Property:Gyatsabiowylie
From Rinchen Terdzö
This is a property of type Text.
'
da ni de dag thams cad las kyang rtsod ldan tha ma'i dus 'dir ngo mtshar ba'i rnam thar du mas khyad par 'phags pa/_mkhas grub gter ston thams cad kyi 'khor los sgyur ba chen po pad+ma 'od gsal mdo sngags gling pa'i rnam thar zhal gsungs nyid rtsa bar bzung ste mdo tsam bkod na/_rje 'di nyid ngo bo slob dpon 'jam dpal bshes gnyen dang /_paN chen bi ma mi tra dbyer med pa'i thugs rje'i rang gzugs su shar ba yin cing /_gdul bya so so'i blo ngor 'phags pa'i yul du grub chen rdo rje dril bu pa/_paN+Di ta sgo mtha' yas pa'i blo gros/_paN chen nags kyi rin chen la sogs pa dang /_bod yul du chos rgyal khri srong lde'u btsan/_gu ru chos dbang /_ras chung rdor grags/_sa skya rje btsun grags rgyal/_grub chen thang rgyal/_lha btsun nam mkha' 'jigs med sogs gsar rnying gi skyes chen dam pa du ma'i rnam par 'phrul par bstan pa rje nyid nas kyang rjes su dran pa dang /_khyad par rgyal sras mchog grub rgyal po nyid gter 'byin rkyang pa'i skye ba bcu gsum du 'byon par gsungs pa'i thog mar sangs rgyas bla ma nas bcu gnyis pa chos rje gling pa'i bar byon zin nas bcu gsum pa rje 'di nyid yin par rdo rje'i lung las gsal bar mtshon pa dang /_gter ston rgyal po lnga la bran brgyas bskor:_zhes gsungs pa'i lnga pa mdo sngags gling pa ni mchog ldan mgon po yin par grags kyang rten 'brel 'chol bas gter kha gang yang phyag tu ma 'byor cing glo bur du mdzad pa brtul pas yin par nges pa'i rgyal po lnga pa ni rje 'di nyid kho nar tshad mas grub la phyis dus byon pa'i gter ston tshad ma thams cad 'di nyid kyi bran du grub pa'ang mngon sum gyis gsal lo/_/de la da lta'i sprul pa'i sgyu 'phrul bstan pa'i yul ni/_mnga' bdag nyang rin po che'i gter lung las/_rtse sgang zhes pa'i ri bo'i mdun:_pha waM klu dbang 'khyil pa'i steng:_mnga' bdag 'jam pa'i dbyangs zhes 'byung:_bcu gsum zab mo'i gter la spyod:_ces dang /_rin chen gling pa/_rdor gling /_mnga' ris paN chen/_bdud 'dul rdo rje sogs gter kha mang po las lung gis gsal bar bstan pa ltar/_mdo khams sde dge'i mnga' ris gter klung gi bye brag rgyab ri rtse sgang zhes pa'i mdun/_brag ri sbrul 'khyil pa'i gzugs su yod pa'i steng /_dil mgo zhes pa'i grong du yab gnyos kyi rigs chos rgyal sde dge'i drung chen lugs gnyis kyi blo gros dpe zlar 'os pa rin chen dbang rgyal dang /_yum dge rab gnyer chen sog mo bza' bsod nams mtsho gnyis kyi sras su rab yid lcags pho 'brug gi lo/_thub pa'i dbang pos chos 'khor thog mar bskor ba'i dus chen chu stod zla ba'i dkar phyogs kyi rdzogs pa dang po la/_dbyar ru khyung chen brag gi nye 'dabs su yod pa'i skabs/_ras dkar gyi lding gur phub pa'i nang du dbu skra nag po sil bur yod pa'i rnam pas sku bltams shing ngo mtshar ba'i ltas mtshan du ma'ang byung /_'di ni gu ru tshe brtan rgyal mtshan gyi gter lung las/_mon bu spyi ring skra yi l+wa ba can:_ri bo khyung chen lding ba'i zhol du 'byung:_zhes 'byung ba dang yang shin tu 'byor ba yin no/_/thugs kyis dran tsam gyi dus ye shes mgon po phyag drug pa dang sngags srung e ka dzA Tis yang yang brtse zhing skyong ba dang /_sngon rabs kyi skye ba mang po 'al 'ol rjes su dran/_sku chung ngu nas theg pa chen po'i rigs sad cing /_khyad par rab tu byung ba'i phyogs kho na thugs la 'dun/_mkhyen rab dang rnam dpyod 'gran zla bral bas 'bri klog sogs tshegs med par mkhyen cing glegs bam phal cher tshar re gzigs pas tshig don thugs la chub/_dgung lo nyer gcig pa la o rgyan smin grol gling gi mkhan rig 'dzin bzang po las bsnyen par rdzogs/_'jam mgon sa skya pa rdo rje rin chen dang /_smin gling khri chen 'gyur med sangs rgyas kun dga' sogs las shing rta gnyis kyi bka' srol dang 'brel ba'i thugs bskyed bzhes/_thar rtse mkhan rin po che mched las bde dgyes/_smin gling khri chen las yang dag so lugs/_rig 'dzin thugs thig_/zhe chen pa kun gzigs 'gyur med mthu stobs rnam rgyal las sgyu 'phrul gsang ba snying po'i dbang bskur gsan pas sngags kyi sdom pa'i rtsa ba btsugs/_skye sprul gyi go sa dang rigs rus stobs 'byor gyi dregs pa rtsad nas bsnyil te dka' chen dang du bzhes/_'bad pa dang brtson 'grus chen pos dbus gtsang khams gsum gyi bla ma rdo rje 'dzin pa/_dge ba'i bshes gnyen/_rig pa'i gnas la mkhas pa sogs yongs 'dzin brgya dang lnga bcu tsam bsten te bzo gso sgra tshad yan lag rig pa'i gnas bcur grags pa rnams dang /_'dul mdzod dbu phar gyis mtshon mtshan nyid phyogs kyi gzhung bshad gsan sbyang mthar phyin par mdzad/_rnying ma bka' gter/_bka' gdams gsar rnying /_sa ngor tshar gsum/_bka' brgyud kaM tshang/_'bri stag 'brug pa/_jo zhal bo dong sogs sngon gyi lugs srol ma nyams par bzhugs pa thams cad kyi smin grol yongs rdzogs/_sgyu 'phrul gsang ba snying po/_dus kyi 'khor lo/_bde dgyes gsang gsum sogs rgyud dang bstan bcos kyi bshad srol gang yod dang /_rgyal ba'i bka' 'gyur rin po che dang /_rnying ma rgyud 'bum/_bstan 'gyur las rgyun gang bzhugs kyi gtsos bod yul grub mtha' ris med kyi bstan bcos yongs bsdoms glegs bam bdun brgya tsam gyi bklags lung gsan pa sogs mdor na mi lo bcu gsum tsam du thos pa kho na btsal/_bshad rgyud 'degs pa'i ka chen bcur grags pa rnams kyi ring lugs phal mo che gsan/_rje 'dis ni glegs bam gzigs pa tsam gyis don mthil phyin pa mkhyen cing nam yang mi bsnyel ba'i gzungs mnga' yang chos la gal chung mi mdzad pa'i rnam thar ston slad gsan pa tsam du ma bzhag par sbyang goms mthar phyin pas grub mtha' so so'i lta spyod dang khas len gyi gnad/_so so'i srol dang de'i ring lugs 'chugs med yin min sogs zhib la ma 'dres par mkhyen pa'i chos spyan rdul med par mnga' ba 'di tsam yang da lta'i gang zag mchog dman sus kyang bsgrun du mi snang ngo /_/mdo rgyud bstan bcos gang gsan pa rnams kyi smin grol rgyab brten dang bcas pa phal mo che zhig ni lan grangs mang du 'chad pa dang /_gang yang tshar re ma 'chad pa mi mnga' ba zang zing med pa'i chos sbyin kho nas dam pa'i skyes bu mchog rnams nas mu to phal pa yan chad don gnyer so so'i re ba tshul bzhin skong bar mdzad/_sku chung ngu'i dus nas gdul bya 'gro don du ming btags pa'i grong chog ldom bu sogs log 'tsho'i dkor sdud gtan nas ma mdzad kyang 'bar ba gsum dang 'du ba gsum gyi yon tan phyir shar bas zang zing gi dngos po 'bad med byung ba thams cad gnas min du chud zos phra mo tsam yang ma btang par/_sku rten gser zangs kho na las grub pa stong phrag gnyis tsam dang /_gsung rten glegs bam pusti bzhi bcu la nye ba'i spar/_bris ma dang spar ma bsdams pa'i pusti ka stong phrag gnyis tsam/_thugs rten lhun grub steng gi mchod sdong chen mo'i gtsos brgya phrag lhag tsam gser zangs las grub pa/_de dag bzhugs gnas lha khang che chung bcu gsum tsam bkod legs par bzhengs shing dus dang rgyun gyi mchod pa btsugs/_gnas gzhi gsar bzhengs rigs dus dbang gis tshul ldan 'byung dka' bas spros pa ma mdzad kyang phyis tshod dus zing dbang gis stod smad 'khrugs long skabs dgon gnas phal mo che nyams gud cher gyur pa rnams la rje nyid nas kyang dgon pa che chung dang bstun pa'i gnang sbyin dngos ja stong phrag gsum lhag pa dang /_rgya bod kyi mi dpon/_chos rgyal sde dge dpon blon rnams la mthun sbyor mdzad gal gnad bkrol gnang ba'i sgo nas sngar gnas sor chud kyi nyams gsos gsar bzhengs dang /_mchod thebs kyi zhal 'debs/_lugs gnas tshul mthun gyi zhal bsgos rnams kyi sgo nas dar rgyas 'phel ba'i bka' drin rlabs po che bstsal/_phan tshun gyi chos sde che chung rnams la lo re bzhin du gzungs sngags bsngo ba'i rten yon sbyar gnang ba snga rjes dngos ja bzhi stong gi rtsa ba phul/_spyir byang chub kyi sems rin po che rnam pa gnyis la brtan pa thob pa dang /_sgos grub mtha' gang la'ang dag snang dang mos gus kyi rtsal rgyas pa ma gtogs phyogs ris dang log rtog gtan nas mi mnga' ba'i don gyis sa skya bka' brgyud rnying ma dge lugs kyi bstan 'dzin skyes mchog yongs su grags pa rnams dang /_dge ba'i bshes gnyen/_ri khrod sgrub pa po/_chos pa nyams chung /_g.yung drung bon lugs 'dzin pa tshun chad kyi ris su ma chad pa'i slob ma grangs las 'das shing /_rgya bod kyi dpon chen mang po'i gtsos nyin re bzhin yang rgyun mi chad pa'i 'dus pa tshad bzung med pa la mos pa dang 'tshams pa'i chos sbyin/_rkyen sel dbang bka' byin rlabs kyi 'brel ba sogs ni ma thob pa med pa lta bur snang/_chos brgyad kyi 'ching ba las grol bas mchog dman gang la'ang ngo srung dang re dogs kyis mtshon/_mi chos kyi spros pa gting nas chod pas tshe blos thong ba'i bya btang rnams kyi rgyal po'i rnam thar bzung /_snga phyi mi lo bcu gsum tsam du rgyud sde gsar rnying gi lhag pa'i lha du ma'i bsnyen sgrub dang /_rje btsun grol mchog gi gsung rab khrid brgya gtso bor gyur pa'i zab khrid rnams re re bzhin nyams bzhes mdzad pas dam tshig zhal bzhes rjes su bsgrub pa 'di kho na'i rnam thar yang sus kyang 'gran zla bral ba ste spang klog bya ba las kyi 'khor lo gsum las btsams pa'i phyi'i rnam thar mdor bsdus pa'o/_/gangs can gyi ljongs su sgrub brgyud kyi shing rta chen po brgyad du grags pa mkhan slob chos gsum gyi bka' drin las byung ba snga 'gyur rnying ma ba/_jo bo rje dpal ldan a ti sha'i bka' srol lha chos bdun ldan bka' gdams pa/_grub chen bi ru pa'i thugs bcud dpal sa skya pa yab sras las byon pa gdams ngag lam 'bras bu dang bcas pa/_bka' bzhi brgyud pa'i gdams ngag mar mi dwags gsum las brgyud pa bka' brgyud che bzhi chung brgyad/_mkhas grub khyung po'i gser chos dpal ldan shangs pa bka' brgyud/_rgyud thams cad kyi rgyal po dpal dus kyi 'khor lo'i rdzogs rim rdo rje'i rnal 'byor rtsal du bton pa sbyor ba yan lag drug pa/_grub chen dam pa sangs rgyas kyi bka' srol dam chos sdug bsngal zhi byed yan lag gcod yul dang bcas pa/_grub chen o rgyan pa la rdo rje btsun mos dngos su bstsal pa rdo rje gsum gyi bsnyen sgrub rnams brgyud pa'i zam pa ma chad cing sngon gyi lugs srol ma nyams par bzhugs pa rnams la so so nas dad cing mos pa tshad med pas sku ngal khyad du bsad de 'bad brtson drag pos so so'i khungs dang 'brel ba'i yongs 'dzin rnams las smin grol gyi rim pa tshang la ma nor ba rdzogs par gsan cing /_de dag bsam pas sgro 'dogs gcod pa dang /_sgom pas thugs nyams bzhes pa'i skabs rnams su dngos nyams rmi lam ci rigs par/_'phags bod mkhas grub/_yi dam rgyal ba zhi khro/_gnas gsum gyi mkha' 'gro'i tshogs rnams kyis gsang ba gsum gyis byin gyis brlabs pa dang nye brgyud kyi gdams pa bstsal ba sogs skad cig re re la'ang dag pa'i gzigs snang mtha' yas kyang phyogs mtshon tsam las/_zhal gzigs mngon shes sogs mi chos bla ma nam yang sgrog par mi mdzad pas de tsam gyis rtogs par 'gyur ba dang /_gtso bor shing rta brgyad kyi rim pa gnyis kyi tshul thugs su chud pas 'chad rtsod rtsom gsum la chags thogs ma mchis shing 'khrul pa'i dri ma dang bral bas skal ldan rnams rjes su 'dzin par mdzad pa ni nang gi rnam thar sa bon tsam smos pa'o/_khyad par grub chen thang stong rgyal po'i rdo rje'i lung las/_bdag dang gnyis min rnal 'byor pa:_mtshan nyid lnga dang ldan pa zhig:_'di nas bdun brgya'i lo khongs su:_mdo khams bar na 'brug gi lo:_gnyos kyi rig 'dzin sga yi bu:_lcags khams dpa' bo'i mtshan rtags can:_pad+ma rgyal pos byin brlabs pas:_bka' babs bdun ldan mdo sngags gling:_bi ma mi tras byin brlabs pas:_'od gsal sprul pa'i rdo rje ste:_'jam dpal sprul pa mnga' bdag gis:_byin brlabs chos kyi bshes gnyen zhes:_sgyu ma lta bu'i skyes bu 'byung:_zhes dang /_rdzogs chen sde gsum lung byang gong du drangs pa sogs bka' babs bdun la mnga' dbang bsgyur nas bstan 'gro'i don chen mdzad par rdo rje'i lung gis yang yang bsngags pa ltar mngon du gyur pa ste/_dgung lo brgyad bzhes pa'i dus sku khams shin tu bsnyel zhing zug rngu'i tshor bas gdung ba'i skabs gu ru rin po che dang mtsho rgyal yab yum gnyis kyis zhal bstan nas rdo rje phur pa'i dkyil 'khor du dbang bskur cing byin gyis brlabs/_rjes su gdams pa'ang bstsal pas bar chad kyi g.yul las rnam par rgyal bar gyur/_dgung lo bco lnga par dag pa'i snang bar rgya gar rdo rje gdan gyi ke'u tshang rim pa dgu pa'i drung du pheb/_rtsag 'og ma nas rim par steng du phebs pa na/_brgyad pa'i nang slob dpon chen po 'jam dpal bshes gnyen paN+Di ta'i tshul can sku'i g.yas g.yon glegs bam mang po brtsigs pa zhig mjal ba la gus pa chen pos btud cing gsol gdab mdzad pas/_g.yon phyogs nas glegs bam zhig blangs te bstan pa sher phyin sdud pa'i rgya dper 'dug_/de nyid dbur bzhag nas dgongs pa gtad de mtshan nyid kyi chos thams cad kyi bka' lung rdzogs pa yin no gsungs/_g.yas phyogs nas glegs bam zhig blangs nas bstan pa rdzogs pa chen po rdor sems snying gi me long gi rgyud ces bya bar snang/_de nyid dbur bzhag nas dgongs pa gtad de gsang sngags rdo rje theg pa'i tshul spyi dang khyad par rdzogs pa chen po sde gsum gyi tshig don byin rlabs thams cad rdzogs pa yin gsungs/_lung bstan 'ga' zhig kyang mdzad pa'i mthar dgyes pa'i tshul gyis 'od du zhu nas rje nyid la thim pas dar gcig rnam par mi rtog pa'i ting nge 'dzin la 'byams/_de las sad nas phyir phebs pa'i tshe sgo drung du me chen po 'bar zhing 'dug pa'i nang du dbang med du zhugs pas rags pa'i lus phung dngos med bsregs nas bi ma mi tra yin snyam pa'i 'od kyi skur lam mer gyur pa byung /_gzhan yang 'di skabs grub pa'i dbang phyug thang stong rgyal pos mnal lam du zhal bstan zhing byin gyis brlabs/_gdams pa dang rjes su gdams pa bstsal pas bla sgrub tsam yi ger bkod/_phyis bka' rgya grol te rim par gtan la phab pa rdzogs rim drug gi rtsa tshig_/sgrub skor lnga/_khrag 'thung bde gshegs 'dus pa sogs grub thob thugs tig gi skor rnams byon/_'chi med mgon po yab yum gyis zhal bstan zhing byin gyis brlabs pas de dag gi sgrub thabs khyad par can byung ba las tshe yum tsaN+Da lI rtsa ba gtan la phab pa sogs rtsa gsum rab 'byams kyi gzigs snang mtha' yas pa byung yang gsang ba srung ba la thugs shin tu sgam pas gzhan gyis zur tsam yang rtogs par ma gyur/_khyad par lung bstan snga phyi mang du bzhugs par snang na'ang bka' las/_gter ston lung bstan gyis phung /_zhes bya ba yin pas lung bstan zer ba de bris phyin spang blang lag tu lon dgos pa la de ni sus kyang mi lon/_de ma lon pas thog tu mi khel/_smra ba mang po ngag la bdud zhugs pa yin gsungs nas lung bstan mi gnang zhing gzhan la'ang dgyes pa mi mdzad pa 'di la'ang gnad don chen po snang /_dgung grangs bcu drug par sa ga zla ba'i tshes bcu'i tho rangs dag pa'i snang cha la rnga yab pad+ma 'od du pheb/_de'ang brag ri lhun chags pa'i nang du sprin dkar shin tu mdzes pa'i khrod na gu ru mtsho skyes rdo rje mkha' 'gro'i tshogs kyis bskor ba'i bkod pa can mjal/_dgongs pas byin gyis brlabs shing brda'i dbang bskur ba dang bka' babs bdun 'byung ba'i dbugs dbyung rgyas par bstsal pa'i mthar spyan lta stangs dang bcas te/_gzung ba'i yul gyis ma gos shing /_/'dzin pa'i rtog pas ma bslad pa/_/rig stong rjen par bskyang ba ni/_/sangs rgyas kun gyi dgongs ba 'o/_/zhes gsungs te 'khor dang bcas pa rje nyid la thim pas thugs yid dbyer med 'dres pa'i nyams shar te de phyin chad ka dag gi gnas lugs la rang bzhin gyis brtan pa thob par gyur/_de la thugs spro ba brtas te gu ru rin po cher rtse gcig tu gsol btab mdzad pa'i rkyen las mdo rgyud gsar rnying bka' gter smin grol rgyab brten dang bcas pa yongs grags rnams dang rgyun shin tu dkon pa rnams kyang 'bad med du rnyed nas nyams bzhes dang 'chad spel gyis bstan pa'i me ro bslangs pa bka'i bka' babs dang po'o/_/gnyis pa sa gter ni/_dgung lo nyi shu par brag dmar mgrin bzang du phebs skabs ye shes mkha' 'gros gter sgrom dngos su phul ba las thugs rje chen po sems nyid ngal gso'i chos skor dang /_bram ze nyer gcig gi gdung byon pa dang /_'dam shod snying drung nas bla ma sku bzhi'i sgrub thabs kyi skor dang gu ru rin po che'i tshems las sprul pa'i ring bsrel rnams gnyan chen thang lhas spyan drangs te phul ba dang /_si ngu g.yu mtsho nas rtsa gsum sgyu 'phrul drwa ba'i skor/_gter klung pad+ma shel ri nas rtsa gsum spyi 'dus kyi skor mkha' 'gro'i rdzu 'phrul gyis drangs te phul ba sogs mang du bzhugs pa rnams las sngar phan rtsa ba tsam re las gtan la 'bebs par ma gnang zhing thugs sgrub yid bzhin nor bu'i skor dang /_sku tshab dngos grub dpal 'bar bcas rtsi ske nor bu spun gsum du bzhugs pa mchog gyur gling pa la bkas bskul te spyan drangs shing rdzogs par gtan la phab/_spyir bla sgrub skor bzhi ka dang bai ro'i thugs tig rdzogs chen sde gsum sogs kyang rje 'di nyid dang mchog gling lhan rgyas kyi gter kha thun mong bar snang ngo /_/gsum pa de las 'phros pa'i yang gter ni/_don grub sa lug lor gu ru rin po che nyid gter chen sangs rgyas gling pa'i skur snang bas glegs bam bstsal zhing byin gyis brlabs pa'i dag snang khyad par can gyis go phyes te gter ston rnams kyi rnam thar dang gter chos gang bzhugs thugs la gsal zhing de dag bka' babs pa'i bka' lung thob pa ltar/_phal cher sngar gyi gter ston so sos yang gter du sbas pa'i shog ser rnams ye shes mkha' 'gros spyan drangs nas phyag tu phul ba las brda' bsgyur pa dang /_'ga' zhig brda' yig spyan lam du shar ba dang dgongs pa'i klong du rtsol med rang gsal ba nyid gtan la phab cing /_de dag gi skabs su gu ru rin po che dngos dang de nyid gter ston so so'i sku'i rnam par bsgyur nas smin grol chig rdzogs su bstsal ba'i tshul ngo mtshar rmad du byung zhing gnas dus shin tu snyigs kyang zab chos 'di lta bu mjal zhing spyod du yod pa skal pa ches bzang bar shes nas kho bos kyang gzhan gang las kyang gter rnying rgyun chad pa sne re tsam byung na'ang ya mtshan che bas don gnyer chen pos yang nas yang du gsol ba btab pas/_sangs rgyas bla ma'i rtsa gsum dril sgrub/_rgya lo tsA'i bla ma bstan gnyis skor gsum/_nyi ma seng ge'i thugs rje chen po pad+ma zhi khro/_rong zom lo tsA'i mkha' 'gro ma rig byed rtsal/_o rgyan gling pa'i bka' 'dus chos kyi rgya mtsho/_jo mo sman mo'i mkha' 'gro gsang ba kun 'dus/_ra mo shel sman gyi rdo rje bdud rtsi/_dri med kun dga'i bla sgrub dang thugs rje chen po rgyal ba rgya mtsho/_rgya ston pad+ma dbang phyug gi bla ma bde mchog 'khor lo/_lha btsun sngon mo'i zhi byed skor bdun/_bal po a hU~M gi yak+sha dzaM b+ha la rin chen gter spungs/_sngags 'chang las 'phro gling pa'i pad+ma sha ba ri dmar mo/_mnga' bdag mol mi 'khyil gyi rta mgrin gnam lcags 'khor lo/_g.yag phyar sngon mo'i sgrol ljang 'jigs pa kun skyob/_dbu ru ston shAka gi phyag rdor rdo rje me 'bar/_bon po brag tshal gyi tshe gur sbrags ma/_bsam gtan bde chen gling pa'i bka' brgyad dregs 'dul/_mchog ldan mgon po'i gnyen po lha lnga/_mi 'gyur las 'phro gling pa'i pad+ma gtum po/_gar dbang las 'phro gling pa'i phag dkar ye shes gsal byed sogs legs par gtan la phab nas smin grol chig rdzogs su bka' drin bstsal ba thob cing /_gter rnying rgyun mi bzhugs pa nyang gter gu ru mtsho skyes rdo rje/_thugs chen 'gro 'dul dbang rgyas pa/_ra shag ma mo sgang shar gyi dbang /_byang gling dpal rgyal mtshan gyi kun bzang thugs gter/_gru gu yang dbang gi rta mgrin dregs pa kun sgrol/_rdor gling bla rdzogs thugs gsum/_rin chen gling pa'i rdzogs pa chen po chig chod kun grol/_'gro 'dul las 'phro gling pa'i thugs rje chen po don gsal sgron me bka' srung bcas/_dbon gsas khyung thog gi tshe sgrub ye shes srog tig_/rog rje gling pa'i tshe sgrub gsang ba rmad byung sogs kyi smin grol stsol bar gsol ba btab pa ltar dgyes bzhin du gnang ba'i bka' drin thob/_da rung yang gter dang nye brgyud kyi chos skor gtan la 'bebs rgyu'i rigs ni mang po zhig bzhugs yod par snang ngo /_/bzhi pa zab mo dgongs pa'i gter ni/_dgung grangs nyer dgu sa sprel lor dbus pheb lam byang 'brog dge rgyal nas tshes bcu'i tshogs 'khor skabs gu ru rin po che dngos zhal bstan nas byin gyis brlabs/_bsam yas su nyang gter mtsho skyes rdo rje'i sku tshab mdun mchod 'bul skabs sku de mtsho skyes rdo rje dngos su gyur nas byin gyis brlabs shing gdams pa gnang ba la brten/_bla sgrub skor gsum gyi gsang sgrub mtsho skyes snying thig gi chos skor byon pa dang /_dgung lo so lnga pa shing stag rgyal zla bar 'chi med yid bzhin 'khor lo'i bsnyen sgrub mdzad pas 'phags ma yi ge bcu pa'i sgra gdangs can dngos su zhal gzigs nas byin gyis brlabs/_slar 'chi med grub pa'i slob dpon rnam gsum gyis kyang byin gyis brlabs pa la brten nas 'phags ma'i snying thig gi chos skor byon cing /_grub thob thugs tig gi skor sngar smos pa sogs yin la 'di dag ni rgyud dang dbyer med pa'i rdo rje'i tshig rkang so skye'i blo las 'das pa dgongs gter gyi mtshan smos rin chog par snang ngo /_/lnga pa de las 'phros pa'i rjes dran ni/_bod yul du pheb skabs gtsang 'u yug gi mdar phebs pa'i tshe sngon lce btsun chen po 'od lus su gshegs pa'i gnas dus ji lta bar rjes su dran nas gtan la phab pa lce btsun snying thig dang /_lang gro dkon 'byung gi sngon gnas rjes su dran pa'i tshe sgrub bai ro'i thugs tig_/seng gdong dkar mo'i bcud len sogs snang bar mdzad do/_/drug pa dag snang ni/_gong smos 'chi med thugs tig gi tshe yum tsaN+Da lI'i gdams skor dang /_klong chen snying thig gi bla sgrub thig le'i rgya can gyi yig cha/_mchog gling bla sgrub sku gsum rigs 'dus kyis mtshon mang du bzhugs par gdon mi za'ang dngos su spel ba ni de tsam las cher ma mjal/_bdun pa de mthun snyan brgyud ni/_rdzong shod bde gshegs 'dus pa'i gnas chen du bzhugs pa'i skabs dag pa'i snang bar mchod rten bde byed brtsegs pa'i drung du pheb/_de'i phyogs mtshams brgyad dbus dang dgur gu ru mtshan brgyad kun 'dus gu ru rin po che bcas kyi sku'i bkod par bzhugs pa rnams kyis sgrub chen bka' brgyad/_sgyu 'phrul zhi khro sogs kyi smin grol snying po snyan brgyud du bstsal pa las/_gshin rje gshed/_yang dag_/phur pa tsam gtan la phab pa kho bos kyang bka' drin du nos so/_/de ltar na de dag ni gsang ba'i rnam par thar pa zur tsam yin la rgyas par ni gter kha re re la'ang lung bstan/_bskul byang /_kha byang sogs babs tshul/_dngos gter bzhes pa dang/_gter sgrub skabs kyi gzigs snang dag dang smin grol gsan tshul/_yun ring por gsang dam mthar phyin par mdzad nas dus la babs nges pa'i tshe lung dang mthun par skal ldan rnams la spel ba'i tshul sogs rgya cher bzhugs pa rnams gter 'byung chen mo slad char stsol bar gsol ba 'debs pa'i phyir 'dir de tsam mo/_/da dung snyigs dus bstan 'gro'i mgon du bgrang bya brgya phrag las lhag par rtag brtan chen por bzhugs par gsol ba 'debs shing /_bi ma'i bla sgrub mdzad skabs ma 'ongs par sku dngos nyid ri bo rtse lngar bi ma la'i thugs kar thim/_de las sprul pa lnga byon nas bstan pa ris med la phan pa sgrub pa'i lung bstan thob ces zhal nas dngos su thos so
lo chen bai ro'i rnam 'phrul phreng po 'gro 'dul gling pa shes rab 'od zer ni/_byang ngom chen gyi sa'i char khri bsam gnyis kyi cho 'brang las sa pho stag lo chu stod zla ba'i tshes bcur ltas khyad par can dang bcas te sku bltams/_sku chung ngu nas bcos min gyi nges 'byung dang snying rje/_shes rab kyi rtsal che ba sogs theg pa chen po'i rigs sad/_dgung lo brgyad par slob dpon tshul khrims 'od zer ba las dge bsnyen mdzad pa'i mtshan shes rab 'od zer du grags/_gser mdog paN chen slob ma rdor rgyal ba las rab tu byung /_dga' ldan khri chen bstan dar ba bsten nas mtshan nyid kyi gzhung rnams dang 'dus pa sogs lo drug tu sbyangs/_rdor rgyal ba las sa lugs kyi rgyud sde dang dus 'khor la sogs gsan bsam phul du phyin pas mtshan nyid kyi grwa sa rnams su lung rig gi mgrin rnga ldir ba na sus kyang lan ldon par mi nus pas dge bshes chen po'i mtshan du grags/_dgung lo bco brgyad par 'bri gung rin chen phun tshogs mjal bas dad pa dbang med du skyes/_dpon slob gnyis chos kyi 'bel gtam mdzad pas gcig la gcig thugs ches/_'bri gung dang karma bka' brgyud kyi zab chos rnams dang /_gsar rnying gi rgyud 'bum/_mdo sgyu sems gsum bshad pa dang bcas pa/_mkha' 'gro snying tig gtsor gyur rnying ma bka' gter gyi chos phyag len dang bcas pa gsan pa mtha' yas pa mdzad/_bla ma'i bka' bzhin tshogs pa rgya mtsho'i dbus su lnga ldan la rtsa bar byas/_rdo rje'i gsung brgya lnga bcu pa chos tshoms su bcad/_dgongs gcig gi grub mtha'i rkang bzung nas mdo sngags kyi chos 'khor bstan pa yongs rdzogs tshul du bshad pas bla ma'i dgongs pa rdzogs shing 'dus pa rnams snga na med pa'i ngo mtshar gyi gnas su bkod/_sbyangs pa'i yon tan la gnas pas rnam g.yeng 'du 'dzi spangs pa'i dben pa lo brgyad dang khyad par grogs ri rin chen spungs pa'i sgrub phug tu nyams bzhes lo gsum mdzad pas mngon rtags bsam gyis mi khyab pa shar/_ting nge 'dzin gyi sgo mtha' yas pa brnyes/_me mo lug lo chu stod zla ba'i tshes bcur mkha' 'gro mon mo'i chas can zhig gis chang thod phor gang byin pa gsol ba'i rkyen gyis 'od dkar po'i dbus su gu ru pad+ma rgyal po zhal gzigs te bslab bya bstsal pa ltar gter gnas de nyid nas grol tig dgongs pa rang grol gyi chos skor/_sku gsung thugs kyi rten dang bcas pa spyan drangs/_de rjes lha gdan nas kyang de bzhin gshegs pa'i ring bsrel/_myang grol a rgya can sogs rten dang dam rdzas khyad par can gter du bzhes pas mtshon/_snga rjes gter gnas drug nas zab gter ci rigs pa spyan drangs/_'bri gung rin po che dang lhan cig shog ser gtan la phabs/_zing pa stag mgor gter sgrub mdzad pa'i skabs dag pa'i snang bar pad+ma 'od du phebs nas slob dpon yab yum gu ru bde ba chen po'i rnam pas dbang bskur cing zhal gdams bslab bya bstsal/_zla ba gcig tu bzhugs pa'i snang ba byung /_phreng por dgongs 'dus chos bdag nyi ma rgyal mtshan las 'bri gung pa dang lhan cig bla ma dgongs 'dus sogs chos bka' mang du gsan/_phreng po ba rnams kyis gsol ba btab pa ltar de'i gdan sa'ang mdzad/_rdo rje brag tu lo gsum bcad rgyar bzhugs skabs o rgyan rin po ches zhal gzigs te/_deng sang 'di na lta ba ma 'khrul ba'i khyad par 'byed shes pa khyod las mi 'dug pas de'i gnas gsal bar ston cig gsungs pas zhal lung gsal sgron zhes pa don zab la tshig nyung ba'i bstan bcos mdzad/_dus de tsam na mkhas pa dang grub par grags pa thams cad kyis mngon par bsngags shing zab chos kyi bdud rtsi bzhes/_mkha' 'gro snying tig_/dgongs pa yang zab/_grol tig rnams kyi sgrub pa dang dbang khrid mdzad pas grol dbang la mi stong phrag bdun re tshogs pa sha stag dang /_de dag rnams su 'ja' 'od me tog gi char sogs ngo mtshar ba'i ltas mang /_chos kyi spyan mnga' zhing mngon shes la chags thogs med/_hor bsod nams stobs rgyas kyis sbyin bdag zhus nas 'phyong rgyas dpal ri theg chen gling rten dang brten par bcas pa gsar du btab/_dbus gtsang khams gsum du chos kyi phrin las khyab/_dgung lo drug cu rtsa bdun pa chu sprel hor zla drug pa'i tshes bcu'i nyin zhi bar gshegs par bzhed pa la/_sku'i sras karma kun bzang yum sras sogs kyis gsol ba btab pa'i ngor zhag gsum bzhugs nas tshes bcu gsum gyi zhogs par ngo mtshar ba'i ltas dang bcas bde chen shan+ta pu ri'i grong khyer du dpa' bo chen po thod pa'i dum bu rtsal gyi thugs kar sprul pa'i bkod pa bsdus so/_/'di'i rnam thar rgyas pa gter 'byung bcas chos rje kun bzang pas bsgrigs pa'i ngo mtshar ba'i gtam skabs bcu pa zhes pa yod/_grol tig gi smin grol rgyun ma nyams par bzhugs pa kho bos kyang skal bzang du thob bo/
C
mdza' bo nang 'jug tsher mas mtha' mi 'bod:_sa steng g.yo ba'i bdud kyi sprul pa 'byung:_yum bu bla sgang sbas pa'i gter kha 'di:_mi bzhag 'don pa'i rtags de bstan nas 'byung:_o rgyan rog rje gling pa zhes bya 'byung:_zhes pa'i gter ston rog rje gling pa ni/_thang yig 'ga' zhig nas chos rje gling pa dang dbon rje gling pa zhes pa'ang 'byung bar ma zad rje rang nyid kyis kyang zhal gyis bzhes pa'i dwags po chos rje gling pa ni/_rgyal sras lha rje'i gter ston skye ba bcu gnyis pa ste/_rje zla 'od gzhon nu'i gcung lha rje snyi chung nas gdung rabs bar ma chad par byon pa'i rabs bco lnga pa yab rdo rje grags pa'i sras su dwags po klu mkhar gdong du 'khrungs/_mtshan yongs grags chos rje 'dzam gling rdo rje dang bde ba'i rdo rje zhes grags/_rje bzang po rdo rjes zhabs drung rin chen rdo rje'i skye bar bzhed kyang zhwa dmar ye shes snying pos ras chung phug sprul pa'i sku 'chi med dbang po'i skye bar ngos bzung zhing /_zla ba'i dbang po bstan pa'i gsal byed ces mtshan dang dgung lo drug par gdan sar phebs/_gnas brtan 'jam dbyangs grags pa las dge tshul dang dga' ldan khri chen blo bzang dar rgyas las bsnyen par rdzogs/_mtshan ngag gi dbang po blo bzang chos dbyings dpal bzang por gsol/_mdo sngags rgya bod kyi gzhung mang po thugs la btsud cing sbyangs pa sogs dge ba'i bshes gnyen chen por gyur/_rten gong ma rnams dbu ral can du bzhugs pas dge slong gi chas la ral pa yod pas dge slong ral pa can du grags pa ltar sku tshe'i stod la kun spyod gtsang zhing 'dul ba'i phyag len sogs kyang zhib par gnang /_phyis zab gter bzhes nas ring zhig song ba'i sku tshe'i mjug tu sgrub pa mo o rgyan bu khrid kyi skye ba de ma thag pa bde chen phrin las mtsho mo phyag rgyar bzhes pa la 'brug pa rin po che'i yang srid byon pa sogs ngo mtshar can byung yang yun ring ma bzhugs/_gang ltar yang dgung lo nyer lnga'i bar grub thob gtsang smyon chen po'i gdan sa yar lung ras chung phug tu bzhugs shing byang chub gling pa gong ma yon tan rgya mtsho dang /_dge bshes don ldan zhabs sogs las rang lugs kyi dbang lung man ngag phyag bzhes yongs su rdzogs pa dang mdo rgyud kyi chos bka' rig pa'i gnas sogs gsan bsam rgya cher mdzad pas mtshon thos pa'i pha rol tu son/_snga phyir gnas de nyid du thugs sbyong dang sgrub pa mdzad pas rtogs pa klong du gyur pa'i tshul bstan/_rgyal dbang ye shes rdo rje dngos su ma mjal yang byin rlabs 'pho ba'i stobs kyis phyag rgya chen po'i gnas lugs mngon sum du gzigs pa dang /_rig 'dzin stag sham rdo rje las nyid kyi zab gter ci rigs pa'i dbang dang yongs rdzogs kyi bka' gtad gsan nas rdzogs pa chen po'i rtogs pa klong du gyur pas 'di gnyis la rtsa ba'i bla mar mdzad/_bye brag tu zab mo gter gyi bka' babs tshul ni/_stag mo gter ston dbon gsas khyung thog tu grags pas lung bstan dang kha byang phul bar ma zad/_mon phyogs su phebs skabs rtags mtshan gsal bas bla ma sku bzhi'i sgrub thabs/_yum bu bla sgang dang srong btsan bang so sogs kyi kha byang /_'u shang rdo nas kyang gter gyi kha byang phyag tu son pa bzhin yum bu bla sgang dang srong btsan bang so dmar po nas zab gter ci rigs bzhes kyang gtan la 'bebs pa sogs thugs rtsol cher ma gnang zhing phal cher yang gter du rgyas btab/slar yang zab gter gyi 'gro don dus la babs par dgongs nas dgung lo nyer lnga par gdan sa sprul pa'i skur rtsis 'bul gnang /_rang nyid kun spong gi spyod pas dpal tsa ri tra sogs su phebs shing thugs dam nyams bzhes lhur blangs pa na/_yang bskyar kha byang lung bstan je cher gsal ba ltar zag med 'ja' tshon phug pa nas 'chi med rtsa gsum dril sgrub dang tshe chu ngo mtshar can sogs spyan drangs/_rim par kha rag mgo dgu'i dug mtsho nas yang phur gnyis/_spu bo bya rgod gshong nas bla sgrub zab lam thugs kyi nor bu/_rma kung lung gi mtsho nas bla ma rig 'dzin/_'dong chu lha khang nas thugs rje chen po sa snying dang dzaM dmar skor/_gzhan yang /_gro lod/_gtum po seng sgrog_/khros nag sogs gter du bzhes shing phal cher gtan la phab/_dag snang gi skor dang sgrub thabs pad+ma rA ga'i phreng ba sogs bka' 'bum bcas deng sang gi bar phal cher lung rgyun bzhugs pa kho bos kyang nos/_kong yul me tog slas steng du lo gsum gyis mtshon thugs dam bsnyen sgrub dang 'gro don phrin las kyang rgyas/_chos bdag zhal slob kyi gtso bo rgyal dbang byang chub rdo rje/_zhwa dmar dpal chen chos kyi don grub/_tre'o chos kyi dbang po/_'bri gung dkon mchog phrin las bzang po/_dwags po zhabs drung sprul pa'i sku lhun grub nges don dbang po/_'brug thams cad mkhyen pa dpag bsam dbang po sogs bla chen dang /_rtsub ri grub chen/_lho ba grub chen/_nang thugs kyi sras gcig pu rwa ston stobs ldan rdo rje sogs mang du byon cing /_rig 'dzin pad+ma phrin las dang smin gling rgyal sras pad+ma 'gyur med rgya mtsho sogs la'ang chos 'brel tsam byung bar snang /_mthar jun gar byung skabs sbas yul chen po pad+ma bkod par gnas sgo 'byed pa'i thugs bzhed kyis zhabs bskyod nas gnas mthil tsam du phebs/_ring min dgung grangs bzhi bcu rtsa bzhi'i dbo zla bar pad+ma 'od kyi zhing khams su gshegs/_sprul pa'i sku kong po dga' chags sde par 'khrungs pa'i 'jig rten dbang phyug sogs yongs grags dang /_sbas tshul ci rigs da lta'i bar du byung bar mngon no/_/rje 'di'i rnam thar rgyas pa rje nyid kyis 'char gzhi rgyas par bkod pa dang /_lam yig le'u tshan/_sgam po pa bzang po rdo rje'i 'das byung gi rnam thar sogs las zhib par gsal bas 'dir sa bon tsam bkod pa yin no/
D
nyang ban ting 'dzin bzang po'i rnam 'phrul skyes bu ye shes rdo rje'i skye ba dung mtsho ras pa snga ma ni yar lung du 'khrungs/_gzhon dus nas gdan sa mthil du chos sgor zhugs pa'i mtshan shes rab rgya mtsho dang /_sgam po rdor blo ba la bsnyen par rdzogs pa'i mtshan rin chen bzang po gsol/_kha rag g.yu mtshor 'khrul zhig khams pa'i drung du dka' thub kyi sdom pa zhus pa'i skabs/_des lung bstan pa ltar g.yu mtshor byon nas de'u zhig gi khar spyil po 'dug par dka' thub la bsten te sgrub pa mdzad/_spyil po'i gting nas kha byang rnyed pas de'i don sgam por byon/_mtsho 'og ma'i 'khyags pa bskum khru gang gi 'og nas/_dwags po rin po che dang /_skyes bu ye rdor gnyis kyis sbas pa'i chos gter/_rdo sgrom nang du ne'u le'i gzugs/_de'i nang du shog dril dar sna lngas dril ba dang nA ro pa'i dbang bum sogs spyan drangs pa las sems khrid yid bzhin nor bu dang 'pho ba grong 'jug gi skor rnams byon te sems khrid sngar dus dar rgyas che/_deng sang yang rgyun bzhugs pa las zur mang snyan brgyud las lung dang grol mchog khrid brgya las lung khrid bar ma chad par nos/_'dis gnyal du dwags po rin po che 'khrungs sa dung mtsho lha khang sogs rten bzhengs mang po mdzad/_tshal pa drung chen smon lam pa dang kun dga' rdo rje sogs la dngos rdzas mang po phul nas lha sa bskor mi rnams la skyo tshul tshugs pa'ang bshad do +
G
lo chung dkon mchog 'od kyi rnam 'phrul dang /_rgyal sras lha rje'i skye ba bcu pa e spe cog gar dbang las 'phro gling pa ni/_e yul drug gi lung pa'i ljongs gang po nag gi spe cog tu lo tsA ba kher gad 'khor lo grags sogs kyi gdung rus las rig 'dzin rat+na gling pa'i dbon rgyud du 'khrungs/_dgung lo drug par rab tu byung /_spyod pa ya mtshan che ba mang du mdzad/_bcu bdun par yar lung shel brag pad+ma brtsegs pa nas thugs rje chen po 'khor ba las sgro la/_thugs dam zab pa skor bdun/_lus med mkha' 'gro'i chos skor/_yi dam phag mo dkar mo/_bka' brgyad rdzong 'phrang /_tshe dpag med/_mgon po phyag bzhi pa sogs chos dang rten dang dam rdzas dpag tu med pa spyan drangs/_pad+ma brtsegs pa'i brag la dus phyis su'ang mi thar ba la rdzu 'phrul gyis bya 'phur ba ltar byon pas der yod thams cad ngo mtshar gyi sa la bkod/_gzhan yang 'od de gung rgyal mgul nas tshe sgrub gsang ba 'dus pa dang rdo rje rgya mdud/_khros ma nag mo/_ma ning stag zhon zhing skyong sogs/_o rgyan gling pa'i gter zhabs bzo pa tra ka sogs snga phyir gter chos mang du spyan drangs/_gsang sngags bka' gter gyi gdams pa dpag tu med par gsan bsam sgom pa mthar phyin mdzad/_grub pa'i rtags dang mngon shes thogs pa med pas phying dbar stag rtse'i sde pa sogs chen po rnams kyis mchod gnas su bkur/_dbus dang yar 'brog e dwags sogs su 'gro don rgya cher bskyangs/_rig 'dzin zhig po gling pa'i khyung tshang brag gi gter gyi kha byang yang 'dis phul bar grags/_sku tshe'ang mthar phyin par bzhugs shing gdung rgyud dang chos brgyud kyang e gang po spe cog na phyis kyi bar yod par snang /_gter chos gras seng gdong ma'i skor sogs rig 'dzin gter bdag gling pas kyang gsan tshul snang mod/_deng sang rgyun mi 'dug_/'on kyang rje bla mas yang gter gyi tshul du gtan la phab pa'i phag mo dkar mo ye shes 'khor lo'i smin grol rdzogs par bka' drin du thob pas phyogs 'dir yang skal bzang du mtshon no +
gnyal pa nyi ma shes rab ni/_gnyal du sku 'khrungs/_zangs dkar lo tsA ba 'phags pa shes rab kyi slob ma yin/_rnal 'byor gyi rgyud la sbyangs pas yo ga la shin tu mkhas/_gnyal stod smad rnams su chos gzhi btsugs shing /_lha khang mang por rnam snang sku bzhengs pa dang /_yo ga la nyan bshad sogs kyi chos 'khor bskor bas/_'di'i ring la yo ga'i skor rnams dar rgyas shin tu che bar byung ste yo ga'i bstan pa la phan thogs dang sku drin che/_bzhugs sa dngos gtsang po dong du mdzad/_'dis bya rgod gshong gi lha khang gi glo 'bur nas/_sngar blon chen lha bzang klu dpal gyis sbas pa'i sku 'bag dang lhan cig tu rnam sras kyi phyar dar ljongs yul mar grags pa dang rnam sras mdung dmar can gyi sgrub skor rnams spyan drangs pa da lta'i bar bka' ma nub par bzhugs pa yin +
gnyan lo tsA ba dar ma grags ni/_gnyan chen dpal dbyangs kyi gdung rgyud las gtsang shab stod du sku 'khrungs/_rgya gar du byon nas sgra tshad la bslabs pas mkhas par mkhyen/_rdo rje gdan pa dang ri sul gyi rnal 'byor ma sogs las chos dang bstan srung gi skor mang po gsan/_dpal mgon gdong bzhi pa'i skor rnams spyan drangs pas deng sang gnyan gyi mgon po zhes yongs su grags/_khyad par 'di'i sgrub skor o rgyan pad+ma thod phreng gis dpal mo dpal thang gi byang phyogs brag bya skyibs can du sbas pa'ang gdan drangs pas bka' gter chu bo gnyis 'dres su gyur/_de las bka' ma rnams bla ma gnam kha'u ba la gnang /_des rje btsun brtse ba chen po la gdams te dpal ldan sa skya pa'i bstan srung gi gtso bor mdzad/_gter ma rnams sprul sku ra shag chen po la gnang bar grags kyang deng sang de'i rgyun yod med ma 'tshal/_ku ru kul+le'i sgrub skor dpal mo gser gyi snying thig can du grags pa rgya gar rdo rje gdan gyi byang phyogs lha mo ku ru kul+le lder bzo'i 'og_/ral gcig ma'i lder sku so phag las byas pa'i nu ma g.yon pa nas spyan drangs pa deng sang rje sa skya pa'i gser chos bcu gsum las dmar chung skor gsum du grags pa'i ya gyal de yin la/_'di rnying ma'i skor du mi gtogs kyang 'dir snga ma rnams su 'brel mtshungs su bkod 'dug pa ltar mdo tsam bris pa yin no +
'dzim gyi bya ra 'dabs 'dra dkon mchog mtshan:_sde dgon za 'og kha phye 'dra ba 'byung:_gtsang gi ri bo cher sbas gter kha 'di:_mi bzhag 'don pa'i rtags de bstan nas 'byung:_gter ston grub thob dngos grub ces bya 'byung:_zhes pa'i gter ston grub thob dngos grub ni/_lo chen bai ro'i rnam 'phrul gtsang du 'khrungs/_rten sngags 'chang rdo rje 'dzin pa chen por snang /_mi yul du lo sum brgyar bzhugs shing 'chi med tshe'i rig 'dzin chen por grags/_mnga' bdag nyang gis kyang bka' brgyad bka' ma rdzong 'phrang gsan cing de'i rgyun da lta'i bar bzhugs/_gter gyi kha byang 'ga' zhig kyang gnang bar gsungs/_'dis gtsang ri bo che nas kyang gter kha mang du bzhes shing /_khyad par chos rgyal srong btsan sgam pos thugs rje chen po'i mdo rgyud zhal gdams sgrub skor dang bcas pa rnams ra sa 'phrul snang gi gtsang khang byang gi_ rta mgrin _zhabs 'og dang nA ga ku be ra'i brla g.yon par sbas pa o rgyan chen pos gzigs shing khri srong la'ang rjes su bstan/_slar yang gter du sbas pa 'di nyid kyis thog mar bzhes/_de nas mnga' bdag nyang dang lha rje dge ba 'bum gyis kyang cha lag rim par bton pa'i glegs bam yongs su rdzogs par ma Ni bka' 'bum dang rgyal po bka' chems su grags pa gter ston gsum gyi gter chos yin kyang gtso bo'i dbang du byas nas grub thob dngos grub kyi gter chos su 'dren cing phrin las rgya che la rgyun mi 'chad par yongs su grags shing /_kho bos kyang dbang lung khrid dang bcas pa yongs su rdzogs par thob pa'i skal bzang du gyur/_bon po rnams kyis bzhod ston dngos grub zer zhing mkho mthing rnam snang sku rgyab nas bton pa'i bsgrags pa skor gsum dang rdzogs chen yang rtse klong chen sogs da lta'i bar yod par snang +
sna thag sas byas hor dmag bod du 'ong:_ngan song zer yang de 'dra'i sdug bsngal med:_mi la srid bcad srid srung mang du yod:_sems can sa 'og non pa'i dus tsam na:_gnam skas mkhar chur sbas pa'i gter kha 'di:_mi bzhag 'don pa'i rtags de bstan nas 'byung:_gter ston chos kyi dbang phyug ces bya 'byung:_zhes pa'i gter ston rgyal po lnga dang mchog gi sprul sku gsum du grags pa las gnyis pa gu ru rin po che chos kyi dbang phyug ni/_chos rgyal khri srong lde'u btsan nyid mnga' bdag nyang rin po che nas 'bras bu'i mthar son te ma chags pad+ma can du sangs rgyas pa'i gsung gi rnam 'phrul du bstan pa ste/_lho brag tu chos rgyal khri srong gi dus nas nus pa can bar ma chad du byon pa'i gdung rigs yab spang ston grub pa'i snying po dang /_yum mkha' 'gro'i rgyud pa dkar bza' mgon skyid gnyis kyi sras su sprel lo dpyid zla ra ba'i tshes bco lnga'i nyi shar la ngo mtshar ba'i cho 'phrul chen po dang bcas te sku bltams/_skabs der mtshan brjod gser gyi bri zhing yod pa'i tshigs mtshams kyi rten 'brel ltar mtshan chos kyi dbang phyug tu gsol/_'bri gung skyob pa dang zhang rin po che sogs grub chen mang pos sras khyad par can 'byung ba'i lung bstan sngon nas yab la gnang bar 'dug_/dgung lo bzhi pa nas 'bri klog gi dbu brtsam rig pa'i gnas mtha' dag_/bon gyi gzhung chen dang mdos gzhung chen mo yan chad thos pa dpag tu med pa mdzad/_yab dang mnga' bdag 'gro mgon mtshur ston yab sras gtso bor gyur pa'i gsar rnying gi bla ma mang po bsten nas mdo dang gsang sngags gsar rnying /_bka' gter gyi smin grol dang bshad rgyun/_zhi byed gcod yul chos drug phyag rdzogs la sogs pa'i gdams ngag mtha' yas pa gsan/_bar bar du so so'i bsnyen sgrub sogs nyams bzhes brgyud mar gnang /_dgung lo bcu gsum par nyams snang la rje btsun sgrol mas shel mkhar zhig gi rtser khrid pas rdo rje sems dpa' dang mjal/_der mkha' 'gro ma gdong pa bzhi pa zhig 'dug pa'i zhal bzhi nas bstan pa spel zhing gdul dka' 'dul ba'i lung bstan thob/_dgung lo bco brgyad par sa skya paN chen las sems bskyed dang chos 'brel gsan pa'i skabs mnal lam du rgya nag ri bo rtse lngar 'jam dpal dang mjal nas gdams ngag khyad par can gsungs pas chos thams cad thob pa'i nges shes rnyed/_gra pa mngon shes kyi gter ma kha byang zhig rim par brgyud nas phyag tu 'byor pa la brten/_dgung lo nyer gnyis par la yag nyin gyi lung pa gnam skas can nas yang byang blangs/_gter srung klu bdud mgo dgu dang /_ye shes mkha' 'gro yum gyi cha byad can gnyis kyis lde'u mig gtad/_ke'u tshang gi sgo phyes pas gter bcud bya rgod khyung tsam pa zhig byung ba la zhon nas gnam rim pa bcu gsum gyi steng 'ja' 'od 'khyil ba'i gur khang du sangs rgyas rdo rje sems dpa'i zhal mjal te rig pa rtsal gyi dbang thob/_bdud rtsi'i bum pa gnang /_slar gter byang ltar sgo phyes pas khro chu'i klu bdud mgo dgu'i gzugs khru gang pa dang zangs kyi gwa'u gnyis spyan drangs pa'i klu gzugs kyi nang nas gdams ngag skor bzhi/_gwa'u'i nang nas man ngag brgya rtsa brgyad byon/_yab kyang chos gter 'khrul med la thugs ches nas bla rdzogs thugs gsum la nyams len mthar phyin dgos pa dang las tshogs rigs khyab brdal du mi spel ba'i zhal gdams gnang /_mnga' bdag 'gro mgon nas kyang legs so bstsal/_'dis thog drangs pa'i gter kha chen po bco brgyad thugs gter dang bcu dgu bzhes pa'i sdom ni/_gnam skas can dang brag dmar rta mgrin zhabs/_/mon kha steng dang rta mgrin dben rtsa'i sgo/_/mkho yi gshin dmar rta mgrin sgrom tshes la/_/sras mkha' skya bo phug ring phyag mtheb ma/_/bsam yas Ar+Ya lcags phur mon bum thang /_/rtsis kyi lha khang rong brag ha bo gangs/_/rang gab don gyi gter dang bcas pa ste/_/las 'phro'i dbang gis chos dbang bdag dang mjal/_/zhes gsungs pa ltar ro/_/mnal lam rta dkar ma dang zhwa nag ma sogs las gsal ba ltar snga phyir dag pa'i snang bar rnga yab pad+ma 'od du phebs nas o rgyan rig 'dzin 'dus pa'i tshogs dang bcas pa rnams kyis sgrub chen mdzad cing dbang dang gdams ngag lung bstan bslab bya mtha' yas pa bstsal/_sku'i bkod pa drug gcig char du bstan pa dang /_nam mkha' la 'phur ba dang /_rdo la phyag zhabs kyi rjes grangs med pa 'jog pa sogs rdzu 'phrul gyi bkod pa du ma bstan pas rnying ma tsam du ma zad/_kun mkhyen 'phags 'od chos 'od bu ston rin po che sogs kyis kyang /_gu ru chos kyi dbang phyug ni 'gran zla dang bral ba'i grub thob chen po'o zhes bsngags par mdzad/_chos rgyal khri srong gi phyi ma lha'i bu 'od mtha' yas nas mnga' bdag nyang ral bar gyi skye ba bcu gsum tha ler dran/_brgya byin dang lha'i bu rnams kyis kyang mchod bstod phul/_bod kyi lha 'dre thams cad kyis bla mar bkur zhing snyan grags kyis 'jig rten g.yos/_tshong dus 'gur mo dang bsam 'grub bde ba chen po'i lha khang gnyis bzhengs/_lha sa'i jo shAka dang mtshungs pa'i thub pa'i dbang po'i snang brnyan 'phags pa klu sgrub kyis ri btang bzung nas spyan drangs pa/_gu ru rin po ches ha bo'i gangs la sbas pa de gter chen 'di nyid kyis spyan drangs te la yag gu ru lha khang du bzhugs su gsol nas gdan sa'i gtso bor mdzad/_de skabs su byon pa'i bod yul bla chen mi chen ris su ma chad pas zhabs la gtugs/_lang gro'i rnam 'phrul pad+ma dbang chen dang gnyal nyi ma 'od zer sogs khyad par can gyi sras brgyad bar ma chad pa byon cing /_khyad par slob rgyud kyi gtso bo sman lung pa mi bskyod rdo rje zhes snga 'gyur bka' gter kun la mkhas pa chen por gyur pa de dang /_bal po b+ha ro gtsug 'dzin dang /_snod ldan gyi bu dgu/_kaHthog pa ma Ni rin chen zhes sku lus ma spangs par dag pa'i zhing du gshegs pa de nyid sogs grub pa'i go 'phang mthon por gshegs pa'i slob brgyud rnams kyis 'phags bal dang bod khams mtha' dbus kun du thugs rje chen po'i phrin las gtso bor gyur pa'i zab chos rgya cher spel ba'i rgyun da lta'i bar zam ma chad par bzhugs shing de lta bu'i rmad du byung ba'i mdzad pa chen po mthar phyin nas dgung lo nga dgu pa la ltas dang cho 'phrul bsam gyis mi khyab pa bstan te pad+ma 'od kyi pho brang chen por gshegs so/_/dus de tsam na sngags pa gnyis lam du 'dri rmed byed pa na'ang khyed cag gter kha gong 'og gang gi lugs yin zer ba'i zab gter gyi shing rta chen por gyur pa'o/_/de ltar grub thob gter ston thams cad kyi rgyal po 'di nyid kyi sku gsung thugs yon tan phrin las kyi rnam thar rgyas pa rje rang gi gsung lung rgyun bcas bzhugs pa dang /_snying po lta bu rnying rgyud dkar chag dag tu gsal ba las 'dir sa bon tsam zhig smos pa yin cing /_gter kha chen po bco brgyad zhal phyes pa'i nang nas/_bla ma gsang 'dus sogs bla sgrub skor lnga yan lag dang bcas pa/_thugs rje chen po yang snying 'dus pa/_'khor ba dong sprugs/_rdzogs chen sangs rgyas mnyam sbyor/_bka' brgyad gsang rdzogs/_'char kha gnam skas ma/_rta mgrin nag po/_yang dag bde chen snying po/_gtum po seng sgrog_/phur pa spu gri_/sngags rgod lok+t+ri/_dpal mgon ma ning /_gzhan yang gter phran dang gsung 'bum gyi skor ci rigs pa bcas dngos cag lta bus kyang 'bad pa du mas btsal te zhus shing bsnyen sgrub ci rigs pa'ang bgyis pa lags na/_gter kha gong 'og 'di dag gter kha thams cad kyi rtsa ba lta bur gyur pas rnying bstan 'dzin pa chen po rnams kyis kyang gsan bzhes 'chad spel sgom sgrub sogs la thugs gzhol bas bstan pa'i me ro gso bar ci nas gsol ba 'debs pa lags/
L
lha btsun byang chub 'od ni/_mnga' bdag gdung rgyud lha bla ma ye shes 'od kyi dbon por 'khrungs/_rten dge slong du bzhugs/_mdo sngags thams cad la mkhyen pa rgyas shing lo tsA ba yang mkhas par mkhyen/_jo bo rje bod du spyan drangs pas bod khams spyi la bka' drin phul du byung /_bsam yas kyi ka ba'i chol nas pu tra ming sring gi sgrub thabs 'bod rbad bsad gsum gcig tu dril ba'i gdams pa khyad par can spyan drangs pa la sgrub thabs ka bkol mar grags te lo chen rin chen bzang po nas rim par brgyud/_dpal ldan sa skya ba'i mgon pod du dpe lung rgyun ma chad par bzhugs/_spyir lha bla ma khu dbon 'di rnams kyi ring la lha sa dang bsam yas la sogs sngon chos rgyal mes dbon rnams kyis bzhengs pa'i gtsug lag khang rnams nyams pa gso ba dang /_'u shang rdo'i gtsug lag khang mes tshig pa'i shul du lha khang gsar bzhengs dang /_tho ling gser gyi lha khang sogs bzhengs shing /_paN+Di ta mang po spyan drangs nas bstan pa'i nyams gso mdzad pas phyag rjes shin tu che ba yin 'dug go +
P
sangs rgyas gnyis pa pad+ma 'byung gnas te/_slob dpon chen po 'di nyid lam rim bgrod kyi gang zag gam/_sa la gnas pa'i 'phags pa tsam ma yin par mi dang mi ma yin gdul dka' ba rnams thabs sna tshogs pas 'dul ba'i slad du sangs rgyas 'od dpag med dang mnyam med shAkya'i rgyal po sogs sprul pa'i skur bstan pa yin pas de'i rnam par thar pa 'phags chen rnams kyis kyang cha tsam brjod par mi nus mod/_mdo tsam smos na/_chos sku 'od gsal rdo rje snying po'i zhing du ka dag gi grol gzhir gdod nas rang bzhin gyis mngon par byang chub pa thog ma'i mgon po 'od mi 'gyur ba'i mtshan tu grags shing /_rang snang longs sku tshangs pa rnga sgra'i zhing khams su ye shes rigs lnga gangs chen mtsho nges pa lnga ldan gyi bkod pa 'byams su klas pa rang shar ba'i rtsal las/_phyi gsal phyed snang rang bzhin sprul pa sku tshangs chen gyi zhing gis bsdus pa'i rigs lnga'i sangs rgyas kyi zhing sku'i bkod pa tshad med pa sa bcu'i dbang phyug rnams la snang ba de dag gu ru nyid kyi ye shes mi zad pa rgyan gyi 'khor lo'i sprin _bkod pa'i phyir pad+ma kun tu 'chang zhes bya ba dang /_de dag las 'gro 'dul sprul pa sku'i cho 'phrul gyi rnam rol phyogs bcu'i zhing khams tshad med pa rnams dang /_bye brag mi mjed kyi 'jig rten 'di nyid kho nar mtshan nges par bstan pa mdo sngags ston pa brgya rtsas 'jig rten gyi khams lnga bcu'i sgron me mdzad cing /_de re re'i phyogs mtshams kyi 'jig rten rnams su gu ru mtshan mchog brgyad po re re bzhin sprul nas 'gro ba 'dul bar gsungs pa dang /_khyad par gyi bkod pa mkha' 'gro ye shes mtsho rgyal gyis gzigs pa las shar phyogs su gu ru rdo rje gangs can mtsho'i ba spu'i khung bu re rer zhing khams bye ba phrag brgya brgya/_de re rer 'jig rten gyi khams bye ba phrag brgya brgya/_de re rer gu ru bye ba phrag brgya brgya/_de re rer sprul pa bye ba phrag brgya brgya/_de re res kyang gdul bya bye ba phrag brgya brgya 'dul ba'i mdzad pa ston cing /_de bzhin du dbus dang phyogs gzhan rnams su'ang de dang 'dra ba'i rigs bzhi'i bkod pa ston pa sogs tshad med par gsungs pa dang /_bye brag 'dzam bu'i gling 'di kho nar 'gro 'dul sprul pa sku'i phyogs gcig bstan pa la'ang gdul bya'i skal pa dang dbang po'i khyad par gyis mthong tshul tha dad par snang ste/_phur pa bka' ma'i lo rgyus sogs dang 'phags yul phal cher du'ang o rgyan gyi rgyal po'am blon po zhig gi sras su 'khrungs par bshad pa dang /_gter ma'i phyogs phal mo cher rdzus skyes kyi rnam thar sha stag 'byung zhing /_kha cig tu ma la ya gnam lcags yod pa'i ri rtser thog babs su byon pa'ang bshad la/_de re re la'ang ngo mtshar ba'i rnam par thar pa gcig tu ma nges pa mtha' yas pa mchis pa ni/_ji skad du/_rnam thar stong phrag gcig dang brgya phrag dgu:_ma 'ongs dam ldan don du bkod nas sbas:_zhes gsungs pas mtshon/_so skye'i blo'i spyod yul las shin tu 'das pa nyid na'ang gdul bya kha cig la snang ba'i dbang du byas nas gter ma'i phyogs su grags che ba brdzus skyes kyi rnam thar sa bon tsam brjod na/_nub phyogs o rgyan gyi yul la shar dang lho dang byang gsum du rgya mtsho chen po re yod pa las lho dang nub tu nye ba srin yul dang thag nye ba'i rgya mtsho'i gling du/_sangs rgyas kyi byin rlabs las byung ba'i pad+ma'i sdong po kha dog sna tshogs pa'i sbubs su bde ldan zhing gi mgon po'i thugs ka nas gser gyi rdo rje hrIHsa mtshan pa zhig spros pa las khye'u chung lo brgyad pa'i na tshod mtshan dang dpe byad kyis brgyan pa/_rdo rje dang pad+ma 'dzin pa zhig tu sprul te bzhugs shing /_lha dang mtsho gling gi mkha' 'gro ma rnams la zab mo'i chos ston par mdzad/_de'i tshe yul de'i rgyal po in+d+ra bo d+hi la sras med pas dkon mchog mchod cing dkor mdzod sbyin pa btang pas zad de rgya mtsho'i gling nas yid bzhin gyi nor bu blangs/_tshur byon pa'i lam khar chos blon trig na 'dzin gyis thog mar mjal/_de nas rgyal pos mjal te sras kyi skal par byas te pho brang du spyan drangs/_pad+ma 'byung gnas dang mtsho skyes rdo rje zhes mtshan gsol/_nor bu'i mthu las byung ba'i rin po che'i khri steng la bzhugs su gsol/_zas gos rin po che'i char gyis skye bo thams cad tshim par byas/_gzhon nu'i rol rtsed kyis gdul bya mtha' yas pa smin par mdzad/_mkha' 'gro 'od 'chang ma khab tu bzhes te o rgyan rgyal srid chos bzhin du bskyangs pas rgyal po thor cog can du grags/_de'i tshe rgyal srid bzung bas gzhan don rlabs chen mi 'grub par dgongs nas yab la zhus kyang ma gnang bar rtsed mo'i gar mdzad pas rtse gsum shor ba'i brdzu bag gis bdud blon gyi bu dbyings su spar/_bu bsad pa'i khrims kyis dur khrod du spyugs pas bsil ba'i tshal/_dga' ba'i tshal/_so sa gling rnams su brtul zhugs kyi spyod pa mdzad pa na mkha' 'gro bdud 'dul ma dang zhi ba 'tshos dbang bskur byin gyis brlabs/_dur khrod kyi mkha' 'gro rnams dbang du bsdus pa'i tshe shAn+ta rak+Shi ta zhes grags/_d+ha na ko Sha'i mtsho gling du byon te gsang sngags mkha' 'gro'i brda' skad kyis bsgrubs pas mtsho gling gi mkha' 'gro dbang du 'dus/_rtsub 'gyur tshal du spyod pa mdzad pas rdo rje phag mos zhal bstan byin gyis brlabs/_rgya mtsho'i klu dang bar snang gi gza' skar thams cad dam la btags/_gnas gsum gyi dpa' bo mkha' 'gro ma rnams kyis dngos grub bstsal te mtshan rdo rje drag po rtsal du grags so/_/de nas rdo rje gdan du byon nas cho 'phrul sna tshogs bstan pas/_mi rnams kyis khyod su yin dris pa la/_rang byung gi sangs rgyas yin par zhal gyis bzhes pa yid ma ches te skur ba btab pa na/_dgos pa'i dbang mang du gzigs nas za hor gyi yul du byon te slob dpon pra b+ha hasti las rab tu byung bas mtshan shAkya seng ger grags/_yo ga'i rgyud rnams tshar bco brgyad gsan pas de nyid du lha rnams kyi zhal mthong /_ye shes mkha' 'gro gsang ba ye shes dge slong ma'i rnam par snang ba kun dga' mo la dbang zhus pas hU~M yig tu bsgyur te zhal du mid/_khong pa'i nang du phyi nang gsang ba'i dbang rdzogs par mdzad nas pad+mor bton pas sgrib pa gsum sbyangs pa'i tshul mdzad/_rig 'dzin chen po brgyad las sgrub pa sde brgyad/_sangs rgyas gsang ba las sgyu 'phrul/_shrI siM ha las rdzogs chen gtso bor gyur pa'i 'phags yul gyi mkhas grub du ma las mdo rgyud rig pa'i gnas thams cad gsan cing sbyangs pa'i tshul bstan pas chos thams cad tshar re res mkhas par mkhyen/_ma bsgrub par yang lha rnams zhal gzigs/_mtshan blo ldan mchog sred du grags te rnam par smin pa'i rig 'dzin mthar phyin pa'i tshul bstan pa'o/_/de nas za hor gyi rgyal po gtsug lag 'dzin gyi sras mo man+d+ha ra ba zhes mkha' 'gro'i mtshan dang ldan pa de dbang du bsdus nas sgrub rten gyi phyag rgya mor khrid nas brag phug mA ra ti kar tshe'i sgrub pa zla ba gsum mdzad pas mgon po tshe dpag med dngos su byon nas dbang bskur/_nyid dang gnyis su med par byin gyis brlabs/_tshe rgyud bye ba phrag brgya gnang bas tshe la dbang ba'i rig pa 'dzin pa'i dngos grub brnyes/_skye 'chi med pa rdo rje'i skur grub nas za hor gyi rgyal khams 'dul ba'i don du gshegs te bsod snyoms mdzad pas rgyal blon rnams kyis me la bsregs pa na/_til mar mtshor 'khyil ba'i dbus su pad+ma'i sdong po'i rtser yab yum gnyis bzhugs pa'i rdzu 'phrul bstan nas dad pa la bkod/_thams cad chos la btsud nas phyir mi ldog pa'i sa la bzhag_/slar o rgyan rgyal khams 'dul ba'i phyir bsod snyoms la phebs pas yul mi rnams kyis ngo shes te sngon gyi bdud blon la sogs pa rnams kyis tsan+dan gyi me la bsregs pas mtsho dbus pad+ma'i sdong por yab yum gnyis bzhugs te sems can rnams 'khor ba las sgrol bar mtshon phyir thod phreng sku la gsol ba'i rdzu 'phrul bstan pas pad+ma thod phreng rtsal du grags/_rgyal po'i bla mchod lo bcu gsum mdzad/_rgyal khams thams cad chos la bkod/_bka' 'dus chos kyi rgya mtsho'i smin grol bstsal te rgyal po yab yum sogs las can thams cad mchog gi rig 'dzin grub/_mtshan pad+ma rgyal por grags/_spyod yul rnam par 'phrul pa'i mdo las lung bstan pa bzhin/_rgyal po mya ngan med pa 'dul ba'i slad du dge slong dbang po'i sde zhes bya bar sprul te phyir mi ldog pa'i dad pa la sbyar nas dzam bu'i gling du nub gcig la de bzhin gshegs pa'i ring bsrel gyi snying po can gyi mchod rten bye ba bzhengs/_mu stegs kyi rgyal po bstan pa la gnod pa'i stobs ldan 'ga' zhig gnas spar ba dang thabs kyis btul/_rgyal po gcig gis dug drangs pas ma tshugs nas chu bo gang+gA la bskyur bas chu gyen du bskyil zhing /_nam mkha' la gar mdzad pas khye'u chung mkha' lding rtsal du grags/_gzhan yang dgyes rdor gyi rgyud spyan 'dren pa po slob dpon mtsho skyes/_bram ze sa ra ha/_Dom+bi he ru ka_/bi rU pa/_nag po spyod pa chen po la sogs pa'i sku'i bkod pa dang mtshan gyi rnam grangs du ma'ang bstan cing /_sku la rdzogs pa sogs dur khrod chen po rnams su byon te mkha' 'gro rnams la gsang sngags kyi chos bstan/_phyi nang gi dregs pa thams cad kyi srog snying blangs nas bstan srung du bkod pa sogs mdzad pa'i tshe mtshan nyi ma 'od zer du grags/_rdo rje gdan du mu stegs kyi ston pa lnga brgyas bstan pa la rgol ba rtsom pa'i tshe rtsod pa dang nus pa 'gran pas slob dpon nyid rgyal/_khong rnams kyis ngan sngags sgrub pa'i tshe mkha' 'gro bdud 'dul mas phul ba'i drag sngags kyis phyir zlog ste thog chen phab nas ston pa rnams bsgral/_grong khyer mes bsregs/_lhag ma sangs rgyas kyi bstan la btsud nas chos kyi rgyal mtshan dgung du sgreng ba'i tshe seng ge sgra sgrog tu grags te 'di yan chad zag pa gsum zad lam mchog yongs su rdzogs pa'i tshe dbang rig 'dzin gyi tshul du bzhugs pa yin no/_/de nas rgya bal mtshams yang le shod kyi brag phug tu bal po'i rgyal po dge 'dzin gyi sras mo bal mo shAkya de ma la sgrub rten mdzad nas dpal yang dag gi sgo nas mchog sgrub pa'i tshe 'dre srin mthu bo che gsum gyis bar chad byas te/_lo gsum du char ma babs/_nad dang mu ge btang ba la/_rgya gar du bla ma rnams las bar chad 'dul ba'i chos len par btang bas phur pa'i rgyud lung mi khur gnyis brdzangs pa phebs pa tsam gyis bar chad rang bzhin gyis zhi/_char babs shing nad mug rgyun chad yab yum gnyis mchog gi dngos grub brnyes te phyag rgya chen po'i rig 'dzin gyi skur bzhugs so/_/yang dag dngos grub che yang tshong pa dang 'dra bar bar chad mang ba la phur pa skyel ma 'dra bar med du mi rung bar gzigs nas yang phur sbrags ma'i sgrub thabs mang du mdzad/_phur srung bcu drug sogs srid pa pho rgyud mo rgyud thams cad dam la btags te srung mar bzhag_/gzhan yang dus skabs ci rigs par/_o rgyan gyi gling phran hu rmu dzu dang /_si ko dz+har dang /_d+ha ma ko sa dang /_rug+ma sogs dang /_ti ra hu ti sogs tha ru'i rgyal khams dang /_kA ma rU la sogs pa rnams su skal pa dang 'tshams par chos ston pa dang /_thun mong gi dngos grub kyis sems can mang po la phan btags/_chu med pa rnams su chu bton/_chu chen po sa 'og tu bcug_/rgya gar shar lho dbus gsum du mu stegs pa'i lha rten re rang byung du byung ba rnams kyis nang pa'i bstan pa la shin tu gnod pa'i tshe/_de gsum ka rdo rje phur bu'i nus pas tshar bcad/_kany+tsa'i yul du nang pa'i sde shin tu dar ba la du ruSh+ka'i rgyal pos dmag drangs te chu klung nI lar grur zhugs pa'i tshe slob dpon gyis sdigs mdzub mdzad pas gru lnga brgya chur bying /_phyin chad du ruSh+ka'i gnod pa rgyun chad/_'gro lding ba'i yul du byon pa'i dus tshod nges pa can mi gsal yang yul de'i mkha' 'gro ma sogs mi ma yin dang mi rnams rim par btul/_gtsug lag khang bzhengs su bcug_/slob dpon 'di'i bka' srol gyi dgyes rdor/_zla gsang thig le/_yang dag_/rta mgrin/_phur pa/_ma mo gtso bor gyur pa'i rgyud sde bzhi'i nyan bshad sgom gsum da lta'i bar du dar zhing rgyas par bzhugs/_de'i lo rgyus rnams su yul de nas lho nub srin yul du bzhud par bshad/_'di dag ni rgya gar gyi gtam khungs ma rnams su 'byung zhing yongs su grags pa yin la/_spyir lo sum stong drug brgya rgya gar na bzhugs shing bstan 'gro'i don mdzad par gsungs mod/_mkhas pa rnams kyis phyed lo'i dbang du byas pa'am mang tshig tsam du bzhed pa'ang snang ngo /_/gzhan yang hor dang rgya rnams 'dul ba la rgyal po mngon shes can dang /_rnal 'byor pa stobs ldan du sprul pa dang/_zhang zhung yul du ta bi hri tsa zhes rang byung gi khye'ur sprul nas rdzogs chen snyan brgyud kyi gdams pas skal ldan mang po 'od lus su bskyal bas mtshon yul dang skad rigs mi gcig pa rnams su gang 'dul gyi phrin las sna tshogs pas skye dgu rnams thar lam du bkod pa'i phrin las ni tshad bzung du med pa'o/_/bod yul 'dir ji ltar byon pa'i tshul ni/_'jam dpal dbyangs kyi rnam 'phrul chos rgyal khri srong lde'u btsan dgung lo nyi shu bzhes pa na dam chos rgya cher spel ba'i thugs 'dun skyes te rgya gar nas mkhan po bo d+hi satwa spyan drangs/_rten 'brel dang dge ba bcu'i chos bshad/_dgung lo nyer gcig pa la gtsug lag khang gi rmang bting ba la bod kyi lha 'dre rnams kyis bar chad byas te brtsig tu ma ster ba la mkhan pos lung bstan pa ltar rgyal pos bang chen mi lnga slob dpon chen po spyan 'dren pho nyar btang /_slob dpon gyis kyang dus mkhyen te bal yul nas bod du rim par pheb pa'i lam zhor du/_mang yul nas bzung mnga' ris/_dbus gtsang /_mdo khams yan gyi bod yul ma lus par rdzu 'phrul gyi bkod pas zhabs kyis bcags nas/_brtan ma bcu gnyis/_mgur lha bcu gsum/_dge bsnyen nyer gcig gtso bor gyur pa'i mi ma yin mthu bo che thams cad dam la btags shing srog snying blangs/_brag dmar 'om bu'i tshal du mnga' bdag dang mjal 'dzom mdzad/_has po rir byon nas lha srin thams cad bka' 'og tu bsdus/_bsam yas kyi rmang bting nas bzhengs pas lha 'dre rnams kyis kyang grogs dan byas te lo lnga la ri rab gling bzhi gling phran nyi zla lcags ri dang bcas pa'i tshul du yod pa dpal bsam yas mi 'gyur lhun gyis grub pa'i gtsug lag khang /_btsun mo gsum gyi gling gsum dang bcas pa grub/_rab gnas mdzad pa'i tshe byin rlabs kyi ltas ngo mtshar ba lnga byung /_de nas mnga' bdag gis chos bsgyur nas sangs rgyas kyi bstan pa btsugs par dgongs te bod phrug shes rab can rnams la lo tsA bslab/_rgya gar nas sde snod 'dzin pa gzhan yang spyan drangs te mkhan po las thog mar sad mi mi bdun rab tu byung zhing rim par rab byung gi sde bkod/_mkhan slob gnyis sogs paN+Di ta rnams dang /_bai ro tsa na/_ska cog zhang gsum sogs lo tsA ba rnams kyis mdo sngags kyi bka' ma lus pa rnams dang /_dgongs 'grel gyi bstan bcos gtso che ba rnams bod skad du bsgyur/_bai ro dang nam mkha'i snying po sogs rgya gar du btang nas bai ros shrI siM ha las rdzogs chen/_nam snying gis hU~M ka ra las yang dag gi chos gsan cing so sos grub pa'ang thob nas bod du spel/_rgyal pos slob dpon nyid la rdo rje theg pa'i smin grol stsol bar gsol ba btab pas bsam yas mchims phur sgrub chen bka' brgyad kyi dkyil 'khor zhal phyes nas rje 'bangs rnam dgu smin par mdzad nas so sor bka' babs kyi gnyer gtad pas dgu pos kyang so so'i rigs dang mthun pa'i dngos grub thob/_gzhan yang lho brag mkhar chu gzho stod ti sgro la sogs pa'i gnas rnams su mnga' bdag yab sras/_'bangs rigs nyer lnga gtso bor gyur pa'i skal ldan rnams la yo ga rnam pa gsum dang 'brel ba'i zab chos thun mong ma yin pa dpag tu med pa gnang /_bod yul du lo brgya dang bcu gcig bzhugs pa ni phyed lo'i dbang du byas na/_khri srong dgung lo nyer gcig la gu ru bod du phebs/_drug cu rtsa dgu pa la rgyal po 'das/_de rjes lo shas bzhugs nas srin yul du phebs par bshad pas lo hril po lnga bcu rtsa lnga dang zla ba drug bzhugs pa yin pas khri srong bzhugs pa'i tshe lo bzhi bcu rtsa brgyad/_gshegs rjes lo bdun dang zla ba drug bzhugs par gsal/_bdud blon rnams nus pa la skrag nas gshegs par zhus pas bsam yas su lo brgyad bzhugs rjes mang yul la kha nas 'phur te bzhud pa ni sprul pa yin la/_mchod yon lkog tu bka' bgros te sku dngos mtsho rgyal sogs las can gyi 'khor dang bcas bod yul gyi sa gzhi rta rmig tsam yang ma lus pa zhabs kyis bcags/_mnga' ris skor du gangs brag nyi shu/_dbus gtsang du sgrub gnas nyer gcig_/mdo khams gnas chen nyer lnga/_stod smad bar gsum gyi sbas yul rgyal po gsum/_lung lnga/_ljongs gsum/_gling gcig_/de re re la'ang rtsa ba dang yan lag me tog 'bras bu'i tshul du yod pa la sogs pa gangs brag ri mtsho thams cad sgrub gnas su byin gyis brlabs/_phyis su dbon sras bdud kyi sprul pas bstan pa bsnub par mkhyen nas rgyal po la ma 'ongs ba'i lung bstan mang po bstsal/_mchod yon bka' bgros te gsang sngags kyi bstan pa mi nub pa dang /_rtog ge bas bslad cing bcos su med pas byin rlabs mi yal ba dang gdul bya rim par 'byung ba sogs la dgongs nas rgyal po'i bla gter brgya dang /_thugs gter chen po lnga/_zab pa'i gter chen nyer lnga gtso bor gyur pa'i ming can ming med kyi gter kha grangs las 'das pa sbas/_'don pa'i dus/_'don pa po'i gang zag_/las can chos bdag sogs lung bstan re re bzhin bstsal/_mon kha ne ring seng ge rdzong sogs stag tshang ming can bcu gsum du khro bo 'chol ba 'jigs su rung ba'i skur bzhengs nas bod kyi lha srin dregs pa can che phra thams cad dam la bzhag cing gter gyi srung mar gnyer du gtad pa'i tshe rdo rje gro bo lod du grags/_phyi rabs yid ches pa'i phyir du bum thang rdo rje brtsegs pa sogs la sku rjes/_gnam mtsho phyug mo sogs la phyag rjes/_spa gro'i brag dkar sogs la zhabs rjes/_gzhan yang sgrub gnas thams cad du gu ru yab yum gyi phyag zhabs kyi rjes sogs ngo mtshar can gyi bkod pa grangs las 'das pa bzhag_/lha sras mu rub btsan po btang nas b+ha ta hor gyi sgom gra bcom/_ka ca rnams khyer ba'i rjes su rgyal po shing bya can 'brangs nas 'ong ba/_gu ru drag po'i skur bstan te dam la btags te gtsug lag khang gi dkor srung la bskos/_khri srong gshegs pa'i rjes su mu tig btsan po rgyal sar bkod/_khra 'brug tu bka' 'dus sgrub chen mdzad nas rgyal sras lha rje la zab chos kyi gnyer gtad/_gter ston rkyang pa'i skye ba bcu gsum 'byon nas 'gro ba 'dul bar lung bstan/_bod du smin par mdzad pa'i slob ma'i rnam grangs ni bsam gyis mi khyab kyang snga thog rje 'bangs nyer gcig_/bar du rje 'bangs nyer lnga/_phyis su rje 'bangs bcu bdun dang nyer gcig rnams gtso bo yin la/_yer pa'i 'od lus grub pa brgyad cu/_chu bo ri'i sgom chen brgya dang brgyad/_yang rdzong gi sngags pa sum cu/_shel brag gi rtogs ldan nga lnga/_mkha' 'gro ma nyi shu rtsa lnga/_rnal 'byor ma bdun la sogs pa rnams dang /_a mes byang chub 'dre bkol/_rgyus byang chub gzhon nu/_rog ban nam mkha' ye shes/_nyang de bzhin gshegs pa/_spang rje btsan khrom/_sha mi go cha/_ngab mi dang ngab 'bre/_lce rgya mtsho grags/'bre shes rab grags la sogs pa dang /_rlangs/_rngog_/mkhon/_rog_/'gos/_spang /_so/_zur/_gnubs/_rgyus/_skyo la sogs pa'i gdung rigs grub pa thob pa bar ma chad pa las phyis gsar ma'i skyes chen mang du byon pa de dag gi mes po rnams slob dpon chen po'i zhabs la thug pa kho na'o/_/de nas lho nub srin po 'dul du gshegs par nye ba na bod kyi rgyal blon 'bangs dang bcas pa rnams kyis bshol btab kyang ma thebs/_re re bzhin du zhal gdams dang thugs brtse'i bslab bya rgyas par bstsal/_gung thang gi la thog nas seng ge'am rta mchog la chibs/_lha rnams kyis mchod pa'i bkod pa dpag tu med pa dang bcas rnga yab gling du pheb/_zangs mdog dpal ri'i rtse mor srin po'i rgyal po rak+Sha thod phreng gnas spar te de'i gsob tu zhugs/_pho brang pad+ma 'od kyi bkod pa bsam las 'das par sprul/_srin po'i gling brgyad du'ang sprul pa re re rgyal po'i tshul du bzhugs nas sgrub chen bka' brgyad la sogs pa'i chos ston/_dzam bu'i gling gi mi rnams srog gi 'jigs pa las bskyabs/_da lta mthar lam lhun gyis grub pa'i rig 'dzin drug pa'i rgyal tshab kyi tshul du 'jig rten 'di ma stong gi bar du g.yo ba mi mnga' bar bzhugs so/_/dus rtag par bod la thugs rjes dgongs te sprul pas don mdzad/_'dul ba'i bstan pa 'jig pa'i tshe na'ang sngags pa rnams kyi nang du sprul pa re re byon/_skal pa dang ldan pa'i gang zag 'od lus 'grub pa'ang mang du 'byung /_ma 'ongs pa rgyal ba byams pa 'jig rten du byon pa'i tshe slob dpon nyid rgyal sras 'gro ba kun 'dul ces bya bar sprul nas skal ldan rnams la gsang sngags kyi chos bstan par gsungs te gdul bya thun mong ba kha cig gi snang ngo dang mthun pa'i lo rgyus phyogs re'i dbang du byas pa'o/_/de lta bu'i sangs rgyas gnyis pa slob dpon chen po gang de'i bka' babs thugs sras kyi gtso bo rje mnga' bdag khri srong /_'bangs nyer lnga/_thugs kyi gzungs ma lnga bcas kyi rnam thar sa bon tsam smos na/_dpal bsam yas mchims phu'i yang dben du bka' brgyad bde gshegs 'dus pa'i dkyil 'khor zhal phyes nas rje 'bangs rnams la dbang bskur ba'i tshe gser srang bcu re la me tog byas te dkyil 'khor la phul bas gang du me tog phog pa'i lha so sor bka' babs pa sogs kyis grub pa thob pa'i rje 'bangs nyer lngar grags pa byung ste/_'di dus lha srin rnams kyis slob dpon la tho 'tshams phyir klad kyi rdza mo snyil ba slob dpon gyis hU~M zhes gsungs pas rdza mo nyil ba yar log ste yi ge hU~M gi gzugs su gnas par deng sang rdza mo hU~M 'dra mar grags so/_
sa nang 'jigs brgyad sha ba'i rwa co 'byung:_bsod nams zad pa dbus su mi rgod sdigs:_dwags po lhang lta brag gi gter kha 'di:_mi bzhag 'don pa'i rtags de bstan nas 'byung:_mnga' bdag sras mo rin chen tshul rdor 'byung:_zhes pa'i gter ston rin chen tshul rdor ram gsang mtshan pad+ma las 'brel rtsal ni/_rgyal po'i sras mo lha lcam pad+ma gsal nyid dag pa'i skye ba lnga brgyud pa'i tha ma ste rdo bod mtshams gnyan rong 'bri thang zhes bya ba'i yul du nyang gi gdung rigs las lcags mo yos kyi lor sku bltams/_nar son nas lo ror rab byung mdzad pa'i mtshan tshul khrims rdo rjer grags/_dgungs lo bcu drug bzhes pa'i dus gu ru'i rnam 'phrul dge slong rgan po zhig gis kha byang shog dril phyag tu gtad pa dang /_nyer gcig par gter ston rin chen gling pas 'bri thang ko ro brag nas gdan drangs pa'i shog ser gyi khrod nas 'di'i kha byang dang lung bstan byung ba'ang phyag tu phul ba ltar dgung lo nyer gsum pa la dwags po ldang lung khra mo brag nas rdzogs pa chen po mkha' 'gro snying thig gi chos skor zab mo khyad par 'phags pa dang /_gzhan yang bla ma spyi 'dus 'khor lo/_phyag rdor dregs pa kun 'dul/_rta mgrin gnyen po lha gsum/_gshin rje king kang dgra kha la rgyas 'debs/_gza' dang zhing skyong gtsos chos dang drag sngags bstan srung gi skor mang po'ang gdan drangs/_tshur byon pa'i lam khar gnyal stod sho'i tsher ma lung du sngags pa zhig gis zhabs tog phul/_de'i bu rjes su 'brangs nas byung ba rgyal sras legs pa rgyal mtshan yin/_de nas rang yul du dad mos chung bas thugs skyo nas dpon slob lnga dbus su byon/_bsam yas mchims phur bzhugs skabs rdo rje phag mos lung bstan pa ltar lha sar pheb pas rgyal dbang karma pa rang byung rdo rje mjal/_chos rje nyid la'ang mkha' 'gros lung bstan byung ba ltar/_snying thig gi dbang lung shog ser thog nas gsan/_rim par gter chos rnams gtan la phab ste rgyal sras legs pa dang /_sprul sku rin chen gling pa gnyis la dbang lung rdzogs par gnang /_dgung lo nyer lnga par byar smad phying dkar zhes pa'i sa yi cha dang nye ba'i gnyal rgya 'gro la rtser gzhan rkyen gyis sku gshegs/_pur sbyangs pa'i tshe bud med sngon mo rus rgyan can dbu gtsug nas thon te nam mkhar 'gro ba kun gyis mthong /_gdung rus la phag mo'i sku dang ring bsrel dpag med byon cing zhag bdun gyi bar lung pa 'ja' 'od kyis gang ba sogs kyis 'gro ba rnams dad pa'i sa la bkod/_sku tshe 'dir 'gro don mi 'byung zhing sbas tshul gyis nyams su len pa'i dus yin pa sogs lung nas bstan pa ltar 'gro don 'phro can tu gyur pas nyid kyi skye ba phyi ma de ma thag pa kun mkhyen dri med 'od zer gyis rgya cher spel bar mdzad/_kun mkhyen rang byung zhabs kyis rgyal sras legs pa las snying thig gi tshig brgyud bskyar nas gsan cing 'chad spel rgya cher gnang ba'i slob ma'i gtso bo g.yung ston rdo rje dpal ba sogs bzhi la gnyer gtad de dbus gtsang mdo khams rgya hor yan chad du dar bar mdzad pa'i rgyun deng sang yang bzhugs la/_sgra thal 'gyur rtsa ba'i rgyud las/_sa la gnas pa'i byang sems kyis/_/rgya mtsho'i bar du spel bar byed/_/ces pa'i lung don mngon du gyur/_gter ston chen po 'di nyid kyi zab gter snying po snying thig rnam gnyis kyi ya gyal rdzogs chen mkha' 'gro snying thig gi smin grol yongs su grags pa rgyal ba'i dbang po rang byung rdo rje dang kun mkhyen klong chen pa las tshig don so sor brgyud pa tha dad pa dang/_gnyen po lha gsum/_phyag rdor dregs 'dul gyi dbang lung sogs kho bos kyang legs par nos so/
R
g.yu sgra snying po'i rnam 'phrul gter ston rdo rje thogs med dam bstan 'dzin zla 'od rdo rje ni/_kong po brag gsum gyi nang tshan mtsho chu dar ma brag gi phyogs su dwags rgyud grub chen 'jam dbyangs zhes pa'i sras su 'khrungs/_sku na phra mo nas bsnyen sgrub kho na mdzad cing bzhugs pa la bla ma mkha' 'gros lung bstan pa ltar mtsho phu nor bu bkod pa'i gnas sgo phyes/_zab gter 'ga' zhig phyag tu son kyang rten 'brel dbang gis 'dabs gter du sbas/_phyis su sgam po sprul sku mjal nas rten 'brel sor chud de spu bo 'dong chu'i lha khang nas kha byang phyag tu son pa ltar/_pu lung btsan dmar srog gi spu gri'i brag nas tshe sgrub 'od kyi drwa ba'i skor rnams spyan drangs/_gzhan yang gter kha 'ga' zhig khrom gter du mdzad par grags/_pad+ma bkod kyi byang gling btsan phyugs zhes pa'i sar ri khrod btab nas bzhugs/_thugs dam mthar phyin te sku gshegs/_yum zla 'od dbang mo zhes 'ja' lus 'grub par nye ba'i rnal 'byor dbang mo des rgyun bzung bas deng sang yang tshe sgrub kyi skor bzhugs par 'dug_/kho bos kyang snying po tsam zhig rje bla ma'i bka' drin las nos so/ +
lo chen bai ro dngos byon gangs ri'i ljongs tsam na phul du byung ba'i paN+Di ta chen po rong zom chos kyi bzang pos kyang zab gter 'ga' zhig bzhes par grags kyang bar skabs nas rgyun byung min ma nges/_phyis 'dir rje bla ma mdo sngags gling par mkha' 'gro ma rigs byed rtsal gyi gsang sgrub kyi gzhung ngo mtshar can yang gter du babs pa kho bos kyang skal pa bzang po'i dpyid du nos shing /_rong pa chen po'i rnam par thar pa ni rgya cher yongs su grags pas 'dir smos ma dgos so +
S
thang yig las/_rgyal po'i gdung rabs brgyad dam bcu lhag na:_la stod mtsho bar gyam nag ces bya bar:_mu ge nad yams mi thog bud pa 'byung:_glo bo dge skar sbas pa'i gter kha 'di:_mi bzhag 'don pa'i rtags de bstan nas 'byung:_gter ston sangs rgyas bla ma zhes bya 'byung:_zhes lung bstan pa/_gter ston thams cad kyi thog ma sangs rgyas bla ma ni/_rgyal sras lha rje gter ston rkyang pa'i skye ba bcu gsum bzhes pa'i dang po ste/_lo chen rin chen bzang po'i sku tshe'i stod tsam la/_la stod mtsho bar du 'khrungs/_rten sngags btsun co breg gi rnam par bzhugs/_mnga' ris glo bo dge skar gyi gtsug lag khang gi ka zhu nas bla rdzogs thugs gsum/_de dang nye ba'i brag rta mgrin mgul nas rtsa gsum dril sgrub dngos grub brtan gzigs/_thang bar/_khog 'brang brag sogs nas rta mgrin dregs pa zil gnon/_rgya nag nas 'gyur ba'i mdo lugs kyi cho ga mang po dang/_kha bsgyur sogs bton/_dbus gtsang rnams su'ang byon cing 'gro don mthar phyin/_dgung grangs brgyad cu nang phebs/_'di'i gter phur tsA ri mtsho dkar du bzhugs pa phyis chos rje gling pas kyang mjal bar bshad/_gter ston de nyid kyi gdung rgyud la stod phyogs su phyi mo'i bar du yod la/_gter ston sangs rgyas 'bar ces pa de'ang gdung rgyud 'di las 'khrungs par 'dug_/dus ches sngas pas phyis nas mdo phran re'i lung rgyun tsam ma gtogs dbang lung dang dpe rgyun mi bzhugs na'ang /_dus gsum mkhyen pa o rgyan chen po yab sras kyi ye shes kyi gzigs pa dang thugs rje la 'bri bkol med pas snyigs ma'i mtha' 'dir bod 'bangs la lhag par dgongs pa'i tshul gyis/_bi ma la dang /_mnga' bdag mes dbon rnams kyi thugs rje'i sgyu 'phrul 'gogs pa med par shar ba zab gter rgya mtsho'i shing rta gcig pu pad+ma 'od gsal mdo sngags gling pa la bka' babs bdun gyi bdag por dbugs dbyung zhing gter ston brgya rtsa'i zab gter mtha' dag dngos dang brgyud pa'i sgo nas phyag tu babs par rdo rje'i lung gis yang nas yang du skabs phye ba'i bden don mngon du gyur pa las/_sprul pa'i gter chen 'di nyid kyi zab gter gyi snying po rtsa gsum dril sgrub zhu lan nyer gcig pa'i shog ser phyag tu babs na'ang gter gzhung rtsa ba gtan la 'bebs pa ma byung rung gzhung gi dgongs pa dang mthun par phrin las dang gtor dbang chog sgrig tu mdzad cing spel ba kho bos kyang skal pa bzang po'i dpyid dpal du nos shing rin chen gter gyi mdzod chen por bzhugs su gsol ba dang /_sprul pa'i gter chen mchog gyur gling pa sogs ris med kyi skyes chen rnams la bstsal pas gter 'byin thams cad kyi thog ma'i zab gter gyi cha shas snyigs ma'i mtha' 'dir snang bas ngo mtshar dang rten 'brel gyi dge mtshan phun sum tshogs pa'i bka' drin rmad du byung bar gyur to
ma mA ki bal mo shAkya de bI ni/_ne pA la ste bal po'i rgyal po dge ba 'dzin gyi btsun mo bu nad kyis grongs pa/_bu mo dang bcas dur khrod du bskyal ba spre'us gsos/_cung zad nar son pa na phyag zhabs kyi sor mo ngang pa bzhin du drwa bar 'brel ba sogs ngo mtshar sku'i bkod pa can de nyid slob dpon chen pos mtshan ldan gyi grogs dam par gzigs nas rjes su bzung zhing smin par mdzad/_yang le shod kyi brag phug tu yang dag lha dgu'i sgrub pa'i gzungs mar gnang ste snang ba rnam 'byed kyi ting nge 'dzin la brten nas phyag rgya chen po rdo rje'i rig 'dzin grub pa'i tshul bstan/_yum gyis ma mA ki'i dngos grub thob mthar 'ja' lus rdo rje'i sku mngon du mdzad/_'di la bsten nas o rgyan chen pos 'phrul mtshan nyi shu'i sku'i mtshan dang rnam 'gyur 'dod rgur bsgyur cing khyad par gter rigs bco brgyad kyi bka' yi bgro ba thog mar mdzad pa'i bdag po'i rkyen du gyur pas rjes 'jug rnams la bka' drin bsam gyis mi khyab par gyur to +
sprul sku ba mkhal smug po ni/lha sras dam 'dzin gyi rnam 'phrul mnga' bdag nyang gi dus tsam la lho brag tu 'khrungs/_rten sngags 'chang /_zhal khyim smug por bzhugs pas bla dwags kyi mtshan sprul sku smug po gdong ngam ba mkhal smug por grags/_'dis mang yul kha la rong sgo'i brag nas o rgyan mngal skyes kyi rnam thar/_gsol 'debs bar chad lam sel 'grel pa bcas/_rdo rje phur pa'i chos skor nyung ngu rnams spyan drangs par grags kyang deng sang gsol 'debs ni grub mtha' thams cad la khyab cing o rgyan mngal skyes rnam thar gyi dpe tsam bzhugs par snang ngo /_/phyis sprul pa'i sku mchog gyur bde chen gling pas zla nyin kha la rong sgo nas thugs sgrub bar chad kun sel gyi gzhung man ngag las tshogs dang bcas spyan drangs pa'i smin grol zab rgyas su nos pas byin rlabs chu bo gcig 'dres su byar rung bar mngon no +
T
de nyid kyi thugs sras kyi gtso bo bdag cag gi dpal mgon bla ma dam pa byams mgon tA'i si tu dgu pa rdo rje 'chang pad+ma nyin byed dbang po ste/_yul yid lhung smar khams zhes rigs rus mngon par mtho ba ngag dbang mgon po'i sras su ngo mtshar ba'i ltas dang bcas mtshan dpe'i pad+mo bzhad/_rdo rje gtsug lag dga' bas rje bstan pa'i nyin byed kyi yang srid 'khrul med du lung bstan cing kar 'brug rgyal ba yab sras kyis stangs bcad nas dgung lo lnga par gdan sa chen por mnga' gsol/_bla ma dgongs pa 'dus pa'i lung bstan bka' rgya ma las/_ma 'ongs chos kyi spyan can drug dang pad+ma'i ljags ldan drug 'brel chags su lung bstan pa'i pad+ma'i ljags ldan dang por nges pas rje dpa' bos kyang dag snang du gsal ba ltar pad+ma nyin byed dbang po zhes pa'i mtshan gyi cod pan dpyangs/_gzhan dpal pad+ma dbang chen dang /_rgyal dbang bcu gsum pa las rab byung gsan pa'i skabs/_dpal ldan bstan 'dzin nyin byed phrin las rab rgyas phyogs las rnam par rgyal ba'i sde zhes pa'i mtshan gnang /_rje de nyid dang zhwa dmar mchog gi sprul sku chos grub rgya mtsho/_'bri gung pa don grub chos rgyal/_'brug chen kun gzigs chos kyi snang ba/_gar dbang chos skyong 'gyur med/_'dzi sgar bka' brgyud phrin las rnam rgyal rnams dang /_rje rig 'dzin chen po'i sku'i sras tshe dbang dpal dar las kyang chos 'brel tsam gsan cing /_gtso bor rje bdud 'dul rdo rje rtsa ba'i bla mar 'dzin/_de rnams las bka' brgyud kaM tshang gi smin grol yan lag dang bcas pa'i rgyun gang bzhugs gtsos/_'bri 'brug dang rnying ma'i skor sogs gsan bsam rgya cher mdzad/_sdom pa gsum gyi bcas mtshams las nam yang mi 'da' ba'i sku btsun pa'i mchog tu gyur/_thun mong gi rig gnas ci rigs dang khyad par mdo sngags kyi gzhung la don gyis mkhyen pa rgyas pas mkhas pa'i phul du gyur/_bstan 'gro'i don la gcig tu gzhol ba'i thugs bskyed rlabs po che mnga' bas bzang po'i phrin las mkha' khyab tu brdal/_gtso bor dus dang rgyun du zab mo'i rnal 'byor la gzhol bas grub pa'i go 'phang mthon por gshegs par nges kyang bka' gdams pa'i bshes gnyen chen po'i rnam thar ltar rang gi yon tan bum nang gi mar me ltar sbed cing gsang ba srung ba la thugs sgam pas sus kyang gting mtha' mi dpog mod/_thag ring nas phyag nas zang thal du phebs pa dang /_sra mkhregs kyi rdo la zhabs kyi rjes byon pa dang /_zhabs sa la mi reg pa sogs shugs mi thub pa'i tshul gyis thun mong gi spyod yul du bstan/_gzhan sems mkhyen pa'i mngon shes dang /_sprul pa'i sku ngos 'dzin gnang ba rnams bstan pa la phan pa kho nar byung bas 'khrul pa'i dri ma phra mo tsam yang bral/_dbus phyogs su lan gsum chibs bskyod kyis mtshon/_rang gi gdan sa dang khams kyi 'brog sde stod smad rnams su'ang phebs nas chos kyi 'khor lo rgyun mi chad par bskor ba'i grub 'bras/_thugs sras kyi gtso bo dpal karma pa bcu bzhi pa khyab bdag theg mchog rdo rje/_'brug chen chos kyi snang ba gong 'og_/dpa' bo gtsug lag chos rgyal sogs kar 'brug gi skyes chen rnams kyis gtsos/_nang thugs kyi sras zla sprul rin po che karma nges don bstan pa rab rgyas dang /_rang dgon gyi dbon sprul gong 'og_/dpal yul gdan sa pa karma 'gyur med sogs kar rnying gi bstan 'dzin skyes chen phal cher rjes su bzung zhing mos gus gsol 'debs tsam lhur byed pa'i bdag lta bus mtha' brten pa'i slob tshogs kyi phreng ba brjod pa'i yul las 'das/_bdag cag gi bla ma dam pa kun gzigs mkhyen brtse'i dbang pos kyang phyag chen chos drug sogs smin grol ci rigs pa gsan cing rje nyid nas kyang thugs gtad shin tu che bas don brgyud byin gyis brlabs par zhal gyis bzhes shing gter rnying skor sogs 'chad spel dang phyogs bsdu byung na legs zhes rin chen gter mdzod chen mo'i bka'i gnang ba'ang don gyis bstsal bas 'chad spel gyi thugs sras mchog tu mngon par ma zad/_phyis nas dpal karma pa dang mchog gi sprul pa'i skus kyang zab chos gsan cing bdag cag dpon slob kyis rin chen gter mdzod chen mo'i bka'i bsdu ba mthar phyin pas lung don mngon du gyur pa yin no/_/gsung rtsom chog bsgrig sogs sngar yod las gsar spros rigs la thugs dgyes pa cher med kyang rgyal dbang rin po ches gtsos mchog phal gyi gdul bya rnams kyis nan tan du gsol ba btab pa'i ngor/_sgrub dkyil dbang chog khrid yig zhal gdams sogs glegs bam gsum tsam bzhugs pa kho bos kyang ljags lung rags rim gdams gtad byin rlabs zab mo thob cing gzhan la 'chad cing spel ba rjes su gnang ba'i skal bzang yang thob pa yin/_gzhan yang rje 'di nyid byang chub sems dpa'i spyod pa bsdu ba bzhi dang gtong ba la mchog tu goms pas/_stod mnga' ris nas 'jang yul rgya mtshams yan gyi kar 'brug gi dgon sde che phra mtha' dag la dngul 'gyed lan gsum gnang ba dngul srang khri phrag gsum lhag gis mtshon rten gsum dang mchod rdzas sgrub pa'i rgyun sogs mtha' yas pa 'dzug par mdzad/_dpal spungs kyi gdan sar gser gdung chen mo rten dang brten par bcas pa dpe bral du bzhengs/_chos gos dang yo byad sogs ma 'ongs bstan pa'i mig rgyan du 'gyur ba gnang bas mtshon/_bya ba las kyi 'khor lo bsam brjod kyi yul las 'das shing /_dgung grangs drug cu rtsa gcig nas gzugs sku ma gshegs kyi bar lo ngo bco brgyad la sgrub khang chen mor thems mi 'da' ba'i tshul gyis spong ba bsam gtan gyi 'khor lor rtse gcig tu bzhugs pa yin no/_/de lta bu'i rgyal bstan 'dzin skyong spel ba'i 'khor lo gsum gyi mdzad pa mthar phyin nas dgung grangs brgyad cu bzhes pa'i lcags glang snron zla ba'i tshes bdun gyi nam phyed tsam du bsnyun cher med par mngon par shes bzhin du re zhig zhing khams gzhan du gshegs pa'i tshul bstan pa na dgongs pa mngon du gyur pa'i rtags su nam mkha' la sprin med cing ser bu tsam yang mi ldang ba dang /_thams cad kyis tshor ba'i sa g.yo ba sogs rtags dang cho 'phrul mang po mngon par 'du mdzad/_sku gdung rin po che zhugs la phul bas ngo mtshar can gyi rten mang du byon cing gdung gi cha shas tsam dad ldan 'ga' re'i lag tu son pa las ring bsrel mang du 'phel bar snang /_gshegs rjes kyi bya ba dgongs pa rdzogs pa'i thabs kyang /_sku mchod chen mor/_tshogs chen du mar lugs dgyes rdor lha dgu/_gsang 'dus mi bskyod pa/_ma hA mA ya lha lnga'i sgrub mchod rgyun 'dzug sogs phul du phyin par grub/_mchog gi sprul sku dpal karma pas lung bstan cing mtshan pad+ma kun bzang chos kyi rgyal por gnang ba pad+ma'i ljags ldan gnyis par grub bo/_/de lta bu'i rje bla ma 'di nyid kyis zhal gzigs lung bstan lta ci/_mnal lam tsam gyi 'phros kyang gzhan la mi gnang bas dag snang dgongs gter sogs bzhugs min ma nges kyang /_grub brnyes bla ma kaM tshang nor bus nan tan du gsol ba btab pa'i ngor o rgyan rin po che rje 'bangs nyer lngas bskor ba'i bla sgrub zab mo dgongs gter bstan bcos kyi tshul du bstsal cing yang zab dkon mchog spyi 'dus kyi dbang bzhi dang zung du 'brel ba'i rgyun bdag cag gis kyang 'bad pas zhus shing rin chen gter mdzod chen mo'i snying por bzhugs su gsol ba yin no
