Terdzo-NI-043

གཙུག་ལག་གཏོ་བཅོས་རྒྱ་ནག་གི་གཏིང་རྫོགས་འཁོར་ལོའི་ཞལ་ཤེས་

gtsug lag gto bcos rgya nag gi gting rdzogs 'khor lo'i zhal shes

by སྣ་ནམ་འབྲོག་པ་ཐུབ་རྒྱལ་ (Nanam Drokpa Tupgyal)
revealed by སྣ་ནམ་འབྲོག་པ་ཐུབ་རྒྱལ་ (Nanam Drokpa Tupgyal)
in cycle གཙུག་ལག་གཏོ་བཅོས་སྲུང་བ་བརྒྱ་རྩ་ (Gtsug lag gto bcos srung ba brgya rtsa)
Volume 42 (ནི) / Pages 719-721 / Folios 1a1 to 2a4

Citation	sna nam 'brog pa thub rgyal. gtsug lag gto bcos rgya nag gi gting rdzogs 'khor lo'i zhal shes. In Rin chen gter mdzod chen mo pod zhe gnyis pa (The Great Treasury of Rediscovered Teachings Volume 42) by 'jam mgon kong sprul, 719-721. New Delhi: Shechen Publications, 2007-2016.
Author	Sna nam 'brog pa thub rgyal སྣ་ནམ་འབྲོག་པ་ཐུབ་རྒྱལ་
Source Revealer	Sna nam 'brog pa thub rgyal སྣ་ནམ་འབྲོག་པ་ཐུབ་རྒྱལ་
Cycle	Gtsug lag gto bcos srung ba brgya rtsa གཙུག་ལག་གཏོ་བཅོས་སྲུང་བ་བརྒྱ་རྩ་
Terdzö Category	Mahayoga
Notes	Front left-side note: gting rdzogs zhal shes Back left-side note: gter mdzod thung mong las tshoD 'brog rnam thub rgyal
Links	No TBRC link // No THL link

< Previous Text

Next Text >

[edit]

གཙུག་ལག་གཏོ་བཅོས་རྒྱ་ནག་གི་གཏིང་རྫོགས་འཁོར་ལོའི་ཞལ་ཤེས་བཞུགས། །འཕགས་པ་འཇམ་དཔལ་ལ་ཕྱག་འཚལ་ལོ། །འཁོར་ལོའི་སྔགས་དང་ཡི་གེ་ཐམས་ཅད་དབུ་ཆེན་གཟབ་ཆུང་ལེགས་པར་བྲི་ཞིང་མུ་ཁྱུད་མ་ཆད་པ། རྩིབས་ཀྱི་རྩེ་མོ་མུ་ཁྱུད་ལ་མ་ཐུག་ཙམ་བྲི། འཁོར་ལོའི་རེ་མིག་ནང་དུ་བྱི་བ་གླང་སྟག་སོགས་ལོ་སྐོར་བཅུ་གཉིས་ཀྱི་མིང་ཡོད་པར་གཟུགས་འགྲོས་བྲི་དགོས་པ་འཁོར་ལོ་དང་པོ་དང་གཉིས་པ་བཞིན་ནོ། །དྲི་བཟང་གིས་བྱུག །རྟག་སྒྲིལ་བྱས་ལ་ཚོན་སྐུད་སྣ་ལྔས་བཅིངས། ༈ ཕོ་མོ་གཉིས་པོ་སྲོག་མཐུན་ན། །ཚེ་རིང་གཅིག་སྐྲ་གཅིག་གིས་འཐུ། །གཅིག་གི་གཉེར་མ་གཅིག་གིས་འདྲེན། །ཤིན་ཏུ་འགྲོགས་ཡུན་རིང་བ་ཡིན། །ལུས་མཐུན་བུ་ཚ་འཕེལ་བ་སྟེ། །མལ་གང་ཤི་ཆད་མེད་པ་ལ། །དབང་པོ་སྐྱོན་མེད་བཞིན་ལེགས་སྐྱེ། །དབང་མཐུན་ནོར་རྫས་ལོ་ཕྱུགས་འཕེལ། །ལག་པ་མི་ལ་མི་ལྡང་ཞིང་། །ཟས་ནོར་ཕུན་སུམ་ཚོགས་པ་འོ། །ཀླུང་མཐུན་མི་ཁ་བྱམས་པ་སྟེ། །ཕྱི་མི་ནང་མི་ཐམས་ཅད་བྱམས། །ལྷག་པར་ཡ་རབས་གོང་མས་སྐྱོང་། །ནོར་ནི་རྟ་དང་བོང་བུ་འཕྲོད། །སྲོག་ནི་མི་མཐུན་འགྲོགས་ཡུན་ཐུང་། །ཚེ་ཐུང་ནད་མང་བྱར་མི་བཏུབ། །སྲོག་བསྐྱེད་འཁོར་ལོ་སྐྱེས་པར་འདོགས། །སྲོག་སླུ་མཚུན་གསོ་དུར་སྲི་མནན། །འཆི་སླུ་ཚེ་ཆོག་སྲོག་མཁར་འཛུག །ཁྱད་པར་སྐྱེས་པ་གཤེད་བཞི་ལོ། །སྲོག་གུད་དར་དམར་མཚལ་གྱིས་ནི། །སྔགས་བྲིས་མེ་ཤེལ་ལུས་ལ་བཅང་། །བྱ་སྤྲེལ་གུད་ན་དར་སེར་ལ། །གསེར་རམ་ཡུང་བས་སྔགས་བྲིས་ལ། །མ་ཉམས་གསེར་བཅས་རྐེ་ལ་བཏགས། །བྱི་ཕག་གུད་ན་དར་དཀར་ལ། །ར་དཀར་འོ་མ་དུང་བཏབ་པས། །སྔགས་བྲིས་ཁྲོ་ལྕགས་ལུས་ལ་བཅང་། །སྟག་ཡོས་གུད་ན་དར་སྔོན་ལ། །ཆུ་ཤེལ་སྣག་ཚས་སྔགས་བྲིས་ལ། །མཆན་ཁུང་གཡས་སུ་བཅང་བར་བྱ། །རྟ་སྦྲུལ་གུད་པར་གྱུར་པ་ན། །དར་ལྗང་ཤིང་གི་ཐང་ཆུ་ཡིས། །སྔགས་བྲིས་རྒུན་འབྲུམ་སྙིང་གར་བཅང་། །རུས་སྦལ་རང་སྐད་སྔགས་འདི་ཡིན། །ཨོཾ་ཨཱཿཧཱུྃ་ཧྲཱིཿསྲོག་ཐ་ཏྲི་ཡར་སྐྱེད་ལཾ་ལཾ་ཡལ་ཡལ་བྲུཾ་ནྲྀ་སྐྱེད། ལུས་མི་མཐུན་ན་མི་མོ་མང་། །མི་ཐུབ་གཅོང་ཅན་ནད་གཞི་ཅན། །བུ་ཚ་དབང་པོ་སྐྱོན་ཅན་ཡོང་། །ལུས་སྐྱེད་འཁོར་ལོ་མོ་ལ་བཅང་། །ལུས་གསོའི་རྟེན་འབྲེལ་ཆོ་ག་དང་། །སྲིད་བཅོས་སྲིད་མཁར་འཛུག་སོགས་བྱ། །གོས་མདོག་རང་ལུས་མ་དང་བསྟུན། །རྒྱ་ཤོག་གསེར་རམ་མཚལ་གྱིས་ནི། །སྔགས་བྲིས་གོས་ཀྱི་གོང་བར་བཅུག །ཧཱུྃ་བྷྲཱུྃ་ཧྲཱིཿཏྲཾ་ཡལ་སྐྱེད་མེ་རཾ་ཏྲཾ་ཡལ་བྲུཾ་ཡར་སྐྱེད། དྲག་པོ་མདོ་བཞི་སྒྲོག་ན་བཟང་། །དབང་ཐང་མི་མཐུན་ནོར་མི་ཆགས། །ཕྱི་ནས་གསེར་གྱི་སྦྲམ་རྙེད་ཀྱང་། །ནང་དུ་ས་རྡོ་བོང་བར་འགྲོ །དབང་ཐང་སྐྱེད་པའི་གཏོ་ཆོག་བྱ། །གཡང་འགུགས་ནོར་ལྷའི་རྟེན་འཛུགས་ཤིང་། །ཚོགས་གསོག་སྦྱིན་པ་རྒྱ་ཆེན་གཏོང་། །དབང་སྐྱེད་འཁོར་ལོ་ཆུ་གཏོར་གཏོང་། །རྣམ་སྲས་གཏོར་སྒྲུབ་ནོར་རྒྱུན་སྒྲོགས། །དབང་མེ་ཡིན་ན་ཙནྡན་དང་། །ལྕགས་ལ་བྱང་བུ་ཤིང་ཡིན་ན། །རང་སྤར་ཤིང་བྱང་ཆུ་ཆུ་ཤེལ། །ས་རྡོ་དག་ལ་སྔགས་བྲིས་ཏེ། །ལུས་བཅང་རང་སྐད་འདི་བཞིན་ཏེ། ཨོཾ་སྤེལ་སྤེལ་ཡལ་ཡལ་དཾ་དཾ་རཾ་སྤུངས་རཾ་སྤུངས་འདུ་འདུ་ཧེ་ཧེ་འདུས། གཙུག་ཏོར་འབར་བའི་གཟུངས་ཀྱང་འདོན། །ཀླུང་རྟ་མི་མཐུན་མི་ཁ་སྡང་། །སྟོར་བརླག་ཁ་སྨྲས་རྟག་ཏུ་འོང་། །ལེགས་པ་བདག་གིས་བྱས་གྱུར་ཀྱང་། །ངོ་སོ་གཞན་གྱིས་བྱེད་པ་འོང་། །རླུང་བསྐྱེད་འཁོར་ལོ་ཕོ་ལ་བཏགས། །རླུང་རྟ་དགྲ་ཟློག་མི་ཁ་སྒྱུར། །དགྲ་མནན་ལམ་ཟམ་གསོས་ན་ཕན། །རླུང་རྟ་གང་ཡིན་མ་ཡི་དར། །མཚལ་དང་འོ་མ་བསྲེས་པ་ལ། །རིན་ཆེན་སྣ་ལྔའི་ཕྱེ་བཏབ་པས། །སྔགས་བྲིས་སྤྱི་བོར་འཛུག་པར་བྱ། ཨོཾ་ཨཱཿཧཱུྃ་ཧོ་ཧེ་སྟག་སེང་ཁྱུང་འབྲུག་འདི་ཡར་སྐྱེད། ཀུན་འདུས་སརྦ་འདུ་འདུ་ཧོ།

[edit]

Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).