Terdzo-CHA-042

Download PDF

ཟབ་མོ་བླ་མའི་ཐུགས་སྒྲུབ་བདེ་མཆོག་འཁོར་ལོའི་རིམ་པ་གཉིས་ཀྱི་ཁྲིད་ཡིག་དག་ཅིང་གསལ་བ་ཟུང་འཇུག་མྱུར་ལམ

zab mo bla ma'i thugs sgrub bde mchog 'khor lo'i rim pa gnyis kyi khrid yig dag cing gsal ba zung 'jug myur lam

by  འཇམ་མགོན་ཀོང་སྤྲུལ་ (Jamgön Kongtrul Lodrö Taye)
revealed by  རྒྱ་སྟོན་པདྨ་དབང་ཕྱུག་, འཇམ་དབྱངས་མཁྱེན་བརྩེའི་དབང་པོ་ (Gyatön Pema Wangchuk, Jamyang Khyentse Wangpo)
in cycle  བླ་མ་བདེ་མཆོག་འཁོར་ལོ་ (Bla ma bde mchog 'khor lo)
Volume 6 (ཆ) / Pages 969-1025 / Folios 1a1 to 29a4

Rinchen Terdzö Volumes List > Volume 6 > Text #43 (Scroll to Bottom)

Citation	'jam mgon kong sprul. zab mo bla ma'i thugs sgrub bde mchog 'khor lo'i rim pa gnyis kyi khrid yig dag cing gsal ba zung 'jug myur lam. In Rin chen gter mdzod chen mo pod drug pa (The Great Treasury of Rediscovered Teachings Volume 6) by 'jam mgon kong sprul, 969-1025. New Delhi: Shechen Publications, 2007-2018.
Author	'jam mgon kong sprul འཇམ་མགོན་ཀོང་སྤྲུལ་
Source Revealer	'jam dbyangs mkhyen brtse'i dbang po, Rgya ston pad+ma dbang phyug
Cycle	Bla ma bde mchog 'khor lo བླ་མ་བདེ་མཆོག་འཁོར་ལོ་
Terdzö Category	Mahayoga
Tibetan Colophon(s)	ཅེས་བླ་མ་འཁོར་ལོ་བདེ་མཆོག་གི་རིམ་གཉིས་ཟབ་ཁྲིད་ཁྱད་པར་དུ་འཕགས་པ་འདིའང་༧ཁྱབ་བདག་གཏེར་ཆེན་བླ་མ་ཉིད་ནས་སྨིན་གྲོལ་གྱི་གདམས་པ་ཚངས་སྤྲུགས་སུ་བསྩལ་ཅིང་བཀའ་ལུང་གིས་རྗེས་སུ་གནང་བ་ལྟར། དུས་ཞབས་རིག་པ་འཛིན་པའི་གཟུགས་བརྙན་པདྨ་གར་དབང་བློ་གྲོས་མཐའ་ཡས་པའི་སྡེས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བཤད་ཡམས་ཀྱི་སྤྲོས་པ་དོར་ཏེ་རྡོ་རྗེའི་གསུང་གི་འབྲུ་ནོན་ཙམ་དུ་བགྱིས་པ་དགེ་ལེགས་འཕེལ། །སརྦ་ཐཱ་མངྒ་ལམ།།
Wylie Colophon(s)	ces bla ma 'khor lo bde mchog gi rim gnyis zab khrid khyad par du 'phags pa 'di'ang 7khyab bdag gter chen bla ma nyid nas smin grol gyi gdams pa tshangs sprugs su bstsal cing bka' lung gis rjes su gnang ba ltar/_dus zhabs rig pa 'dzin pa'i gzugs brnyan pad+ma gar dbang blo gros mtha' yas pa'i sdes rdzong shod bde gshegs 'dus pa'i pho brang chen por bshad yams kyi spros pa dor te rdo rje'i gsung gi 'bru non tsam du bgyis pa dge legs 'phel/_/sarba thA mang+ga lam//
Notes	Front left-side note: khrid yig Back left-side note: gter mdzod rgya ston bla ma bde mchog
Links	No TBRC link // No THL link

< Previous Text

Last Text in Volume

Tibetan Text

Tsagli (0)

Mandalas (0)

[edit]

༄༅། །ཟབ་མོ་བླ་མའི་ཐུགས་སྒྲུབ་བདེ་མཆོག་འཁོར་ལོའི་རིམ་པ་གཉིས་ཀྱི་ཁྲིད་ཡིག་དག་ཅིང་གསལ་བ་ཟུང་འཇུག་མྱུར་ལམ་ཞེས་བྱ་བ་བཞུགས་སོ། ། ན་མོ་གུ་རུ་ཙཀྲ་ས་མྭ་ནཱ་ཡ། ཆོས་དབྱིངས་མཁའ་ལམ་བདེ་ཆེན་ཉི་མའི་གཟིས། །སྲིད་འཁྲུལ་མུན་པའི་དྲྭ་བ་དབྱིངས་སུ་སྡོམ། །དྲན་པས་ཕྱག་རྒྱའི་དངོས་གྲུབ་སྩོལ་མཛད་པ། །རིགས་ཀུན་ཁྱབ་བདག་མཆོག་དེས་རྗེས་འཛིན་མཛོད། །བླ་མ་ཡི་དམ་དབྱེར་མེད་ཧེ་རུ་ཀ །སྡོམ་པའི་རྒྱུད་ལུང་མན་ངག་རྒྱ་མཚོའི་བཅུད། །གྲུབ་མཆོག་བྱེ་བའི་གཤེགས་ཤུལ་ཟླ་མེད་པ། །ངོ་མཚར་ཉེ་བརྒྱུད་བཀའ་སྲོལ་འདི་དབྱེ་འོ། །འཕགས་བོད་གཉིས་སུ་ཟབ་ལམ་མཐར་ཐུག་པར་ཡོངས་སུ་གྲགས་ཤིང་ངོ་མཚར་ཉེ་བརྒྱུད་ཀྱི་བཀའ་སྲོལ་བླ་མ་ཡི་དམ་དབྱེར་མེད་དུ་སྒྲུབ་ཅིང་བཀའ་གཏེར་གཉིས་ཀའི་བཀའ་བབས་ཀྱིས་ཁྱད་པར་དུ་བྱས་པ། ཟབ་མོ་བླ་མའི་ཐུགས་སྒྲུབ་བདེ་མཆོག་འཁོར་ལོའི་རིམ་པ་གཉིས་ཀྱི་གདམས་ཁྲིད་འཆད་པ་ལ་གཉིས། གང་ལས་བྱུང་བའི་ལོ་རྒྱུས། དེ་ལས་བྱུང་བའི་གདམས་ངག་དངོས་སོ། །དང་པོ་ནི། གཞུང་རྩ་བ་ལས། དེ་ལྟར་བླ་མ་ཡི་དམ་གྱི༔ རྣམ་པར་སྒོམ་པའི་ཐབས་ཆེན་པོ༔ ཐུགས་སྒྲུབ་ཀུན་གྱི་མཐར་ཐུག་པ༔ བསྐྱེད་རྫོགས་དམར་བྱང་སྙིང་པོ་འདི༔ འཕགས་པ་དགྱེས་པའི་རི་ཡི་སུལ༔ མཱ་ར་ཏི་ཀའི་བྲག་ཕུག་ཏུ༔ བདག་ཉིད་པདྨ་བཛྲ་དང༔ ཚེ་ལམ་གྲོགས་མཆོག་མནྡྷཱ་རས༔ འཆི་མེད་རིག་འཛིན་སྒྲུབ་པའི་ཚེ༔ ཆོས་སྐུ་ཀུན་བཟང་རྡོ་རྗེ་འཆང༔ ལོངས་སྐུ་དཔལ་ལྡན་བདེ་བའི་མཆོག༔ སྤྲུལ་སྐུ་ལྷན་སྐྱེས་རྣལ་འབྱོར་མས༔ རང་བྱུང་གསང་བའི་དཀྱིལ་འཁོར་དུ༔ དབང་བསྐུར་བྱིན་བརླབས་གདམས་པ་གཏད༔ ཧེ་རུ་ཀ་དང་དབྱེར་མེད་གྱུར༔ དེ་ནས་གངས་ཅན་ཡུལ་དབུས་སུ༔ མངའ་བདག་རྒྱལ་པོས་གསོལ་བཏབ་ངོར༔ གདམས་ཟབ་རྒྱས་འབྲིང་གསུམ་དུ་དབྱེས༔ རྒྱས་པ་སྲིན་སྦར་བྲག་ཏུ་སྦས༔ ཆོས་རྒྱལ་ཆེན་པོའི་སྤྲུལ་པས་འདོན༔ འབྲིང་པོ་རུ་མཚམས་བྱང་དུ་སྦས༔ ལོ་ཙཱ་ཆེན་པོའི་སྐྱེ་བས་འདོན༔ སྙིང་པོའི་བཅུད་འདྲིལ་རྨད་བྱུང་བ༔ ད་ལྟ་མངའ་བདག་ཡབ་སྲས་དང༔ བཻ་རོ་མཆོག་དབྱངས་བདུད་འཇོམས་རྩལ༔ ཐུགས་ཀྱི་གཟུང་མར་བཅས་ལ་གདམས༔ རང་རང་ཉམས་བླངས་དྲོད་ཚད་ཕྱུང༔ བརྡ་རིས་ཨེ་ཡིས་མཚན་པའི་ཡུལ༔ གངས་བར་རྡོ་རྗེ་ཕུག་མོ་ཆེའི༔ ཕ་བོང་དབང་ཕྱུག་མཚན་རྟགས་ཅན༔ དེར་ནི་བསེ་ཡི་སྤར་བུ་རུ༔ ཆོས་དང་བསྟན་སྲུང་དམ་རྫས་བཅས༔ མི་འཇིག་ཕྱག་རྒྱས་བསྡམས་ལ་སྦོས༔ དྲུག་ཅུ་ཁ་རལ་སྙིགས་མའི་དུས༔ སྟོད་སྨད་ཧོར་གྱི་འཁྲུགས་ལོང་གཡོ༔ བོད་ཁམས་རྣལ་དུ་མི་གནས་ཚེ༔ རྒྱལ་བ་མཆོག་དབྱངས་སྤྲུལ་པ་ནི༔ སྟོན་པ་པདྨའི་མིང་གིས་རྙེད༔ གཞན་དོན་ཅུང་ཟད་འབྱུང་ཡང་སྲིད༔ བརྡ་རིས་ཡང་གཏེར་རྒྱས་བཏབ་ན༔ ཆེར་སྙིགས་སུམ་ཅུ་ཁ་རལ་དུས༔ མངའ་བདག་སྐྱེ་མཐའ་པདྨའི་མིང༔ འགྲོ་འདུལ་སྒྱུ་མའི་སྐྱེས་བུ་ལ༔ ཡེ་ཤེས་མཁའ་འགྲོའི་བརྡས་མཚོན་ཏེ༔ དགོངས་བརྒྱུད་མངོན་སུམ་བྱིན་བརླབས་མཐུས༔ ཚིག་བརྒྱུད་ཡི་གེའི་རིས་སུ་བྲིས༔ དོན་བརྒྱུད་སྣོད་ལྡན་འདུས་པ་ལ༔ སྨིན་གྲོལ་བྱིན་རླབས་ཆིག་རྫོགས་སྟོན༔ ལས་ཅན་འགའ་ཙམ་དོན་དུ་འགྱུར༔ འབྲེལ་ཚད་དོན་ལྡན་ཨེ་མ་ཧོ༔ ཞེས་གསུངས་པ་ལྟར་དཔལ་ཧེ་རུ་ཀ་དང་དབྱེར་མེད་པ་བདེ་བ་ཆེན་པོ་པདྨ་བཛྲ་ལ་ཆོས་རྒྱལ་ཁྲི་སྲོང་ལྡེ་བཙན་གྱིས་གསོལ་བ་བཏབ་པའི་ངོར་བླ་མ་བདེ་མཆོག་འཁོར་ལོའི་སྨིན་གྲོལ་གདམས་ངག་ཡོངས་སུ་རྫོགས་པ་ལས་ཅན་འདུས་པ་རྣམས་ལ་བསྩལ། གདམས་སྐོར་རྣམས་རྒྱས་འབྲིང་བསྡུས་གསུམ་དུ་བྱས་ཏེ་ཕྱི་རབས་གདུལ་བྱ་སོ་སོའི་ངོ་སྐལ་དུ་དགོངས་ནས་གཏེར་གནས་ཐ་དད་པ་རྣམས་སུ་རྒྱས་བཏབ་པ་ལས། རྒྱས་པ་བདེ་མཆོག་དམར་པོ་གསང་བ་ཡོངས་རྫོགས་སྐོར་མངའ་བདག་ཉང་རིན་པོ་ཆེས་ལྷོ་བྲག་སྲིན་མོ་སྦར་རྗེས་ནས་སྤྱན་དྲངས། འབྲིང་པོ་ཟབ་མོ་གསང་འདུས་སྐོར་བཻ་རོའི་སྐྱེ་མཐའ་ཨ་ཡ་བོན་པོ་ལྷ་འབུམ་མམ་གུ་རུ་རྣོན་རྩེས་གཙང་གི་བྱང་རུ་མཚམས་ནས་སྤྱན་དྲངས། བསྡུས་པ་སྙིང་པོའི་བཅུད་འདྲིལ་འདི་ཉིད་ལོ་ཙཱ་བ་རྒྱལ་བ་མཆོག་དབྱངས་ཀྱི་རྣམ་འཕྲུལ་རྒྱ་སྟོན་པདྨ་དབང་ཕྱུག་གིས་ཨེ་ཡུལ་རིག་པའི་འབྱུང་གནས་ཀྱི་ཁ་སྟོད། གངས་བར་རྡོ་རྗེའི་ཕུག་མོ་ཆེ་ཞེས་པའི་བྲག་སྐྱིབས་ཆེན་མོའི་སྒོ་དྲུང་ཕ་ཝོང་དབང་ཕྱུག་གི་མཚན་རྟགས་ཅན་ནས་བླ་རྫོགས་ཐུགས་གསུམ་གྱི་ཆོས་དང་བསྟན་སྲུང་གུར་མགོན་གྱི་རྒྱ་གཞུང་། དམ་རྫས་བདུད་རྩི་སྨན་གྱི་རིལ་བུ་སོགས་དང་ལྷན་ཅིག་སྤྱན་དྲངས། བདེ་མཆོག་གི་སྐོར་འདི་ཉིད་ལུང་བྱང་ལྟར་སླར་ཡང་གནས་དེ་ཉིད་དུ་ཡང་གཏེར་དུ་སྦས་པ། དུས་ཕྱིས་རབ་ཚེས་ས་སྟག་ལོའི་ས་ག་ཟླ་བའི་ཚེས་བཅུར་ཡེ་ཤེས་ཀྱི་མཁའ་འགྲོས་སྤྲུལ་པའི་གཏེར་ཆེན་པདྨ་འོད་གསལ་མདོ་སྔགས་གླིང་པ་ལ་གཏེར་དཔེ་བསྟན་ཅིང་བརྡ་སྤྲོད་མཛད་པའི་རྗེས་ཐོག་ཏུ་རྒྱ་སྟོན་པདྨ་དབང་ཕྱུག་ཉིད་ཀྱི་སྐུ་མངོན་དུ་སྣང་བས་དབང་དང་གདམས་ངག་རྫོགས་པར་གནང་། དེ་འཕྲལ་ཚིག་བརྒྱུད་ཡི་གེ་རིས་སུ་གཏན་ལ་ཕབ། ཆུ་རྟ་མགོ་ཟླའི་ཉེར་ལྔར་དོན་བརྒྱུད་སྨིན་གྲོལ་གྱི་གདམས་པ་ཆིག་རྫོགས་སུ་བསྩལ་པའི་བརྒྱུད་པ་ནི། ཆོས་སྐུ་ཀུན་བཟང་རྡོ་རྗེ་འཆང་། ལོངས་སྐུ་དཔལ་ལྡན་བདེ་མཆོག །སྤྲུལ་སྐུ་ལྷན་སྐྱེས་རྣལ་འབྱོར་མ། འཆི་མེད་པདྨ་བཛྲ་ཡབ་ཡུམ། མཁའ་འགྲོ་ཡེ་ཤེས་མཚོ་རྒྱལ། མངའ་བདག་ཁྲི་སྲོང་ཡབ་སྲས། ལོ་ཆེན་བཻ་རོ་ཙ་ན། ལོ་ཙཱ་བ་རྒྱལ་བ་མཆོག་དབྱངས་སོགས་ལ་རྒྱས་འབྲིང་བསྡུས་པའི་ཚུལ་གྱིས་གནང་། དེ་ནས་གཏེར་སྟོན་པདྨ་དབང་ཕྱུག །བཀའ་བབས་བདུན་གྱི་མངའ་བདག་པདྨ་འོད་གསལ་མདོ་སྔགས་གླིང་པ་སྟེ། བཀའ་དྲིན་མཉམ་པ་མེད་པའི་མགོན་པོ་དེས་བདག་ལ་བསྩལ་པའོ། །དེར་མ་ཟད་གསར་མ་ལ་ཡོངས་སུ་གྲགས་པའི་དྲིལ་བུ་རིམ་ལྔའི་ཁྲིད་ཀྱང་རིང་བརྒྱུད་བཀའ་སྲོལ་འགའ་ཞིག་སྨིན་ཁྲིད་དུ་གསན་ཅིང། ཉེ་བརྒྱུད་དག་པའི་སྣང་བར་གྲུབ་ཆེན་རྡོ་རྗེ་དྲིལ་བུ་པ་ཡུམ་དང་བཅས་པས་བརྡའི་དབང་བཞི་བསྐུར། རིམ་ལྔའི་རྩ་ཚིག་ཤོ་ལོ་ཀ་གཅིག་བཀྲལ་ཏེ་གསུངས་ནས་མཐར་བསམ་མི་ཁྱབ་པའི་སྐབས་སུ་དབྱིངས་དང་ཡེ་ཤེས་དབྱེར་མེད་པར་བྱིན་གྱིས་བརླབས་པས་དེའི་ཆུ་བོ་ཡང་གཅིག་ཏུ་འདུའོ། །གཉིས་པ་དེ་ལས་བྱུང་བའི་གདམས་པ་དངོས་ལ་གསུམ། སྔོན་འགྲོ །དངོས་གཞི། རྗེས་སོ། །དང་པོ་ལའང་གསུམ། སྤྱིའི་སྔོན་འགྲོས་གཞི་བཟུང་བ། ཐུན་གྱི་སྔོན་འགྲོས་སྒོ་གསུམ་རྣལ་དུ་དབབ་པ། ཁྲིད་ཀྱི་སྔོན་འགྲོས་རྒྱུད་སྦྱོང་བའོ། །དང་པོ་ནི། རྩ་བར། དབེན་ཞིང་བྱིན་རླབས་ལྡན་པའི་སར༔ ཕྱི་ནང་མཚམས་བཅད༔ ཅེས་པས་བསྟན་ཏེ། རིམ་པ་གཉིས་ཉམས་སུ་ལེན་པའི་གནས་མིའི་རྒྱུ་འགྲུལ་དང་མི་མ་ཡིན་པའི་གནོད་འཚེ་མེད་པས་འདུ་འཛིས་དབེན་ལ་ཉམས་དགའ་བ། གྲུབ་ཐོབ་རིག་འཛིན་གོང་མས་བྱིན་གྱིས་བརླབས་ཤིང་དམ་ཉམས་སོགས་ཀྱི་དྲི་མས་མ་གོས་པ་བཙལ་ལ་དེར་གནས་བཅས་ཏེ་ཕྱི་ཕལ་པ་ཉི་ཚེ་བ་རྣམས་དང་། ནང་གཉེན་འབྲེལ་གྲོགས་འཁོར་སོགས་ཀྱི་འགྲུལ་བགྲོད་གཏོང་ལེན་ཆགས་སྡང་གི་རྒྱུ་ཐམས་ཅད་སྤངས་ཏེ་ཕྱི་མཚམས་རྒྱལ་ཆེན་བཞི་ལ་བཅོལ། ནང་མཚམས་དྲག་པོའི་ང་རྒྱལ་གྱིས་བགེགས་བསྐྲད་ཅིང་སྲུང་འཁོར་བརྟན་པོར་བསྒོམ་མོ། །གཉིས་པ་ཐུན་གྱི་སྔོན་འགྲོས་སྒོ་གསུམ་རྣལ་དུ་དབབ་པ་ནི། རྣམ་གཡེང་སྤང༔ ཞེས་འབྱུང་བས། བདེ་བའི་སྟན་ལ་ལུས་གནད་དྲང་པོར་བསྲངས་ལ་རླུང་རོ་བསལ། ལུས་ཀྱི་བྱ་བྱེད། ངག་གི་སྨྲ་བརྗོད། སེམས་ཀྱི་རྣམ་པར་རྟོག་པའི་འདུ་འཕྲོའི་རྣམ་གཡེང་དུ་འགྱུར་བ་མཐའ་དག་སྤངས་ནས་སྒོ་གསུམ་རང་བབས་སུ་ཀློད་ལ་རྣལ་དུ་དབབ་པར་བྱའོ། །གསུམ་པ་ཁྲིད་ཀྱི་སྔོན་འགྲོས་རྒྱུད་སྦྱོང་བ་ལ་གཉིས། ཐུན་མོང་དང་ཐུན་མོང་མ་ཡིན་པའི་སྔོན་འགྲོའོ། །དང་པོ་ནི། ངེས་འབྱུང་དྲག་པོས་རྒྱུད་བསྐུལ་ནས༔ ཞེས་པས་བློ་ལྡོག་རྣམ་པ་བཞི་ལ་བརྟེན་ནས་འཁོར་བ་ལ་ངེས་པར་འབྱུང་བའི་ཤུགས་དྲག་པོས་བློ་རྒྱུད་ཆོས་ལ་བསྐུལ་བར་བྱ་སྟེ། ད་རེས་བདག་གིས་རྟེན་ཕུན་སུམ་ཚོགས་པ་ཤིན་ཏུ་རྙེད་དཀའ་ལ་རྙེད་ན་དོན་ཆེན་པོ་དང་ལྡན་པའི་དལ་བ་བརྒྱད་འབྱོར་པ་བཅུས་བརྒྱན་པའི་མི་ལུས་རིན་པོ་ཆེ་ཐོབ། སྐྱབས་ཁྱད་པར་དུ་འཕགས་པ་དཀོན་མཆོག་ཀུན་འདུས་མཚན་ལྡན་གྱི་བླ་མ་དམ་པ་མཇལ། ལམ་ཟབ་མོ་གསང་སྔགས་རྡོ་རྗེ་ཐེག་པ་འབྱུང་བར་དཀོན་པ་ཨུ་དུམ་ཝ་རའི་མེ་ཏོག་ལྟ་བུ་དང་འཕྲད་པའི་སྐབས་འདིར་དམ་པའི་ཆོས་གཤའ་མ་ཞིག་བསྒྲུབས་ནས་ཉམས་ལེན་རྒྱུད་ལ་འབྱོར་ངེས་པ་ཞིག་བྱ་དགོས། དེ་མི་བྱེད་པར་ཚེ་འདིར་སྣང་གི་རྣམ་གཡེང་ལེ་ལོའི་དབང་དུ་ཤོར་ན་རང་གིས་རང་ཕུང་སྟེ་འཁོར་བ་མཐའ་མེད་པར་འཁྱམས་ཤིང་སྡུག་བསྔལ་འཁོར་མོ་ཡུག་ཏུ་མྱོང་དགོས་པས་དེ་ལས་བསླུས་ཚབ་ཆེ་བ་ཅི་ཡོད། ཆོས་སྒྲུབ་པ་དེའང་མྱུར་དུ་འབད་འབུང་མ་བཏོན་ན་འཆི་བ་མི་རྟག་པ་བར་སྣང་ནས་གློག་འཁྱུག་པ་ལྟར་ནམ་འོང་ཆ་མེད། ཕྱི་ནམ་ཟླ་དུས་བཞི། ནང་སྐྱེ་འགྲོ་སེམས་ཅན་གཅིག་ཀྱང་རྟག་པ་མེད་པས་རང་ཡང་དོ་ནུབ་བམ་ནངས་པར་འཆིའམ་ད་ལྟ་འཆི་ནའང་ངེས་པ་མེད་པས་ཅི་དྲག །འཆི་ཁར་གནད་གཅོད་ཀྱི་སྡུག་བསྔལ་དང་། བར་དོར་འཁྲུལ་སྣང་གི་འཇིགས་སྐྲག་ཁོ་ནའང་བཟོད་པར་དཀའ། འཆི་བ་ཁོ་ནས་མི་ཆོག་རྣམ་ཤེས་ལས་ཀྱི་རྗེས་སུ་འབྲང་། དཀར་པོ་དགེ་བས་མཐོ་རིས། སྡིག་པ་མི་དགེ་བས་ངན་སོང་དུ་འཕེན། ལས་བྱས་པ་ཐམས་ཅད་རྣམ་སྨིན་མ་མྱོང་བར་ཆུད་མི་ཟ་ཞིང་མ་བྱས་པ་དང་མི་འཕྲད། ལས་རྣམས་འཕེལ་བ་འགྱུར་དང་བཅས་པ་ཡིན་པས་རྒྱུའི་དུས་སུ་ཆུང་ངུ་ལས་མེད་ཀྱང་འབྲས་བུ་རྒྱ་ཆེན་པོར་སྨིན་པས་རང་ལ་ལྟོས་དུས་དགེ་བའི་སྟོབས་ནི་ཆུང་། སྡིག་པའི་སྟོབས་ནི་ཆེ་བས་འཁོར་བར་མི་འཁྱམས་པའི་ཐབས་མི་འདུག །རིགས་དྲུག་གནས་རིས་མཐོ་དམན་གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན་མེའི་འོབས་དང་སྤུ་གྲིའི་ཚལ་དུ་འཇུག་པ་ལྟར་བདེ་བའི་གོ་སྐབས་ཅུང་ཟད་ཀྱང་མེད་པས་ད་རེས་སྡུག་བསྔལ་ཅན་གྱི་འཁོར་བ་ལས་ཅི་ནས་ཀྱང་ཐར་པ་ཞིག་བྱ་སྙམ་དུ་བསམས་ལ་བློ་སྣ་ཐུང་རྦུད་ཀྱིས་བཏང་ལ་ཚེ་འདིའི་ལྟོས་ཐག་རྦད་ཀྱིས་ཆོད་པར་བྱའོ། །གཉིས་པ་ཐུན་མོང་མ་ཡིན་པའི་སྔོན་འགྲོ་ནི། སྐྱབས་སེམས་སྒྲིབ་སྦྱོང་ནན་ཏན་བྱ༔ ཁྱད་པར་བླ་མའི་རྣལ་འབྱོར་ནི༔ མོས་གུས་དྲག་པོས་གནད་དུ་བསྣུན༔ ཞེས་གསུངས་པས་འདི་ལ་བཞི། སྐྱབས་འགྲོ །སེམས་བསྐྱེད། སྒྲིབ་སྦྱོང་། བླ་མའི་རྣལ་འབྱོར་མཎྜལ་དང་བཅས་པའོ། །དང་པོ་ནི། འཁོར་བའི་སྡུག་བསྔལ་འཇིགས་སུ་རུང་བ་དེ་ལས་སྐྱོབ་ནུས་པ་བླ་མ་དཀོན་མཆོག་མ་གཏོགས་གཞན་སུའང་མེད་པར་ཡིད་ཆེས་པའི་དད་པ་བརྟན་པོས་ཀུན་ནས་བསླངས་ཏེ། ས་ཕྱོགས་དག་པའི་ཞིང་ཁམས། གནས་ཁང་ཡེ་ཤེས་ཀྱི་ཕོ་བྲང་། ཅིར་སྣང་མཆོད་པའི་སྤྲིན་ཕུང་དུ་འཁྲིགས་པའི་མདུན་གྱི་ནམ་མཁར་པད་ཟླའི་གདན་ལ་བླ་མ་བདེ་མཆོག་རྡོ་རྗེ་འཆང་སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པས་རང་སྣང་གི་ཡུམ་ལ་འཁྱུད་པ། དར་དང་རིན་ཆེན་རུས་པའི་རྒྱན་གྱིས་བརྒྱན་པ། ཕྱོགས་བཅུ་དུས་བཞིའི་དཀོན་མཆོག་ཀུན་འདུས་སུ་གསལ་བའི་སྤྱན་སྔར། རང་དང་ཕ་མས་གཙོར་བྱས་སེམས་ཅན་ཐམས་ཅད་སྒོ་གསུམ་གུས་པ་ཆེན་པོས་དེང་ནས་བྱང་ཆུབ་མ་ཐོབ་ཀྱི་བར་དུ་ཅི་མཛད་ཁྱེད་མཁྱེན་ནོ་སྙམ་དུ་བློ་གཏད་ལིང་བསྐྱུར་གྱིས་སྐྱབས་སུ་འགྲོ་བར་བསམས་ལ། ན་མོ༔ བླ་མ་འཁོར་ལོ་བདེ་བའི་མཆོག༔ དཀོན་མཆོག་གསུམ་གྱི་ངོ་བོ་ཉིད༔ རྩ་གསུམ་རྒྱ་མཚོའི་བདག་ཉིད་ལ༔ བྱང་ཆུབ་བར་དུ་སྐྱབས་སུ་མཆི༔ ཞེས་བརྗོད་ལ་གྲངས་གསོག །དེས་ནི་ཐར་པའི་ས་བོན་ཐེབས་ཤིང་བསམ་དོན་ཆོས་བཞིན་དུ་འགྲུབ་པར་འགྱུར་རོ། །གཉིས་པ་སེམས་བསྐྱེད་ནི། སྐྱབས་ཡུལ་རྣམས་དཔང་པོར་བཀོད་ལ། མཁའ་ཁྱབ་ཀྱི་སེམས་ཅན་ཐམས་ཅད་རང་གི་ཕ་མ་དྲིན་ཅན་ཤ་སྟག་ཡིན་ཞིང་། འཁོར་བ་ཐོག་མཐའ་མེད་པར་སྡུག་བསྔལ་གྱི་རྒྱུ་འབྲས་ཁོ་ན་ལ་ལོངས་སྤྱོད་པ་སྙིང་རེ་རྗེ། འདི་དག་ཐམས་ཅད་བླ་མ་བདེ་བ་མཆོག་གི་སྐུ་དང་ཡེ་ཤེས་ལ་བདག་ཉིད་ཁོ་ནས་འགོད་པར་བྱ་སྙམ་དུ་སྨོན་པ་དང་། དེའི་ཆེད་དུ་རྡོ་རྗེ་ཐེག་པའི་ལམ་ཟབ་ཀྱི་སྙིང་པོ་བདེ་ཆེན་པདྨ་བཛྲ་ལ་བསྟེན་ཏེ་རིམ་པ་གཉིས་ཀྱི་རྣལ་འབྱོར་རྩེ་གཅིག་ཏུ་བསྒོམ་པར་བགྱིའོ་སྙམ་དུ་འཇུག་པའི་སེམས་བསྐྱེད་གསལ་བཏབ་ལ། ཧོ༔ སེམས་བསྐྱེད་མཁའ་ཁྱབ་འགྲོ་བ་ཀུན༔ སྐུ་དང་ཡེ་ཤེས་མཆོག་ཐོབ་ཕྱིར༔ བདེ་ཆེན་པདྨ་བཛྲ་གྱི༔ རྣལ་འབྱོར་ཟབ་མོ་བསྒོམ་པར་བགྱི༔ ཞེས་བརྗོད། མཐར་བླ་མའི་སྐུ་ལས་འོད་ཟེར་འཕྲོས། རང་གཞན་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་བག་ཆགས་དང་བཅས་པ་སྦྱངས། བྱིན་རླབས་རྒྱུད་ལ་ཞུགས། བླ་མའང་འོད་དུ་ཞུ་ནས་རང་ལ་ཐིམ་པར་བསམ། དེས་ཅི་བྱས་ཐམས་ཅད་བྱང་ཆུབ་ཀྱི་ལམ་དུ་འགྲོ་ཞིང་མཐར་ཐུག་སངས་རྒྱས་ཀྱི་གོ་འཕང་འཐོབ་པར་འགྱུར་རོ། །གསུམ་པ་སྒྲིབ་སྦྱོང་ནི། སྤྱིར་རང་རྒྱུད་ཀྱི་སྡིག་ལྟུང་མ་སྦྱངས་ན་ལམ་གྱི་ཡོན་ཏན་མི་སྐྱེ། སྡིག་སྒྲིབ་ཉེས་ལྟུང་བཤགས་ཤིང་སྦྱོང་བ་ལ་སྟོབས་བཞི་ཚང་དགོས་པས། སྐྱབས་སེམས་སྔོན་དུ་འགྲོ་བས། རང་ཐ་མལ་དུ་གནས་པའི་སྤྱི་བོར་པད་ཟླ་ལ་བླ་མ་དང་དབྱེར་མེད་པའི་རྡོ་རྗེ་སེམས་དཔའ་ཧེ་རུ་ཀ་དཀར་པོ་རྡོ་རྗེ་དང་དྲིལ་བུ་འཛིན་ཅིང་དར་དང་རིན་ཆེན་རུས་པའི་ཕྱག་རྒྱས་སྤྲས་པ། རང་འདྲ་བའི་ཡུམ་རྡོ་རྗེ་སྙེམས་མས་འཁྱུད་ཅིང་རྡོ་རྗེ་དང་པདྨའི་སྐྱིལ་མོ་ཀྲུང་གིས་ཡེ་ཤེས་ཀྱི་འོད་ཟེར་འབར་བའི་ཀློང་ན་བཞུགས་པ། ཐུགས་ཀར་པད་ཟླ་ལ་ཧཱུྃ་གི་མཐར་ཡི་གེ་བརྒྱ་པའི་སྔགས་ཕྲེང་གཡས་སྐོར་ཁ་དོག་དཀར་པོ་འོད་ཟེར་འཕྲོ་བ་གསལ་གདབ་པ་ནི་རྟེན་གྱི་སྟོབས། སྔར་བྱས་ཀྱི་སྡིག་པ་ལ་འཇིགས་སྐྲག་ཤས་མི་བཟོད་པའི་གནོང་འགྱོད་དྲག་པོས། བླ་མ་རྡོ་རྗེ་སེམས་དཔའ། བདག་དང་སེམས་ཅན་ཐམས་ཅད་ཀྱིས་ཚེ་རབས་འཁོར་བ་ཐོག་མ་མེད་པ་ནས་བསགས་པའི་སྡིག་ལྟུང་བག་ཆགས་དང་བཅས་པ་བྱང་ཞིང་དག་པར་བྱིན་གྱིས་བརླབ་ཏུ་གསོལ་སྙམ་པ་རྣམ་པར་སུན་འབྱིན་པའི་སྟོབས། དམིགས་འདུན་དེ་ལས་མ་ཡེངས་པའི་ངང་ཡིག་བརྒྱ་གསོལ་འདེབས་ཀྱི་ཚུལ་དུ་བཟླས་པས། ཐུགས་སྲོག་སྔགས་ཕྲེང་དང་བཅས་པ་ལས་བདུད་རྩིའི་རྒྱུན་དཀར་ཁྲ་ལ་ལ་བབས། སྦྱོར་མཚམས་ནས་ཐོན་ཏེ་རང་གི་སྤྱི་བོར་ཞུགས་པས་སྡིག་སྒྲིབ་ཉེས་ལྟུང་ནད་གདོན་བར་ཆད་ཐམས་ཅད་དུད་ཁུ་སོལ་ཁུ་རྣག་ཁྲག་འབུ་སྲིན་གྱི་རྣམ་པར་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་ཕྱིར་བདས། ལུས་ཤེལ་བུམ་དྲི་མ་མེད་པ་ལྟར་གྱུར་པའི་ནང་ཐམས་ཅད་བདུད་རྩིས་ཁེངས་པར་བསམ་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། དེ་དག་གསལ་གདབ་པ་ནི། རང་གི་སྤྱི་བོར་པད་ཟླའི་སྟེང༔ བླ་མ་རྡོར་སེམས་ཧེ་རུ་ཀ༔ ཡབ་ཡུམ་མཉམ་སྦྱོར་ཐུགས་སྲོག་མཐར༔ སྔགས་ཕྲེང་འཁོར་ལས་བདུད་རྩིའི་རྒྱུན༔ ཆར་ལྟར་བབས་ཏེ་བདག་ལ་ཐིམ༔ སྡིག་སྒྲིབ་ཉེས་ལྟུང་ཀུན་བྱང་གྱུར༔ ཅེས་དང་ཧེ་རུ་ཀའི་ཡིག་བརྒྱ་ཅི་ནུས་བཟླས་པའི་མཐར། ཕྱིན་ཆད་སྲོག་ལ་བབས་ཀྱང་སྡིག་ལྟུང་གི་ལས་མི་བགྱིད་དོ་སྙམ་པ་སོར་ཆུད་པའི་སྟོབས་དང་ལྡན་པས། མགོན་པོ་བདག་ནི་སོགས་བརྗོད་ཅིང་བཤགས་སྡོམ་བྱས་པས། བླ་མ་རྡོ་རྗེ་སེམས་དཔའི་ཞལ་ནས་སྡིག་སྒྲིབ་དག་པའི་གནང་བ་བསྩལ་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ་པས་གསང་བ་གསུམ་དང་སྒོ་གསུམ་དབྱེར་མི་ཕྱེད་པར་བྱིན་གྱིས་བརླབས་པར་མོས་ལ་མཉམ་པར་གཞག །དེས་རང་རྒྱུད་སྡིག་ལྟུང་གི་དྲི་མ་དང་བྲལ་བས་ལམ་གྱི་གེགས་དང་གོལ་ས་མི་འབྱུང་ཞིང་ཡོན་ཏན་ཚུལ་བཞིན་དུ་སྐྱེ་བར་འགྱུར་རོ། །བཞི་པ་བླ་མའི་རྣལ་འབྱོར་མཎྜལ་བཅས་ནི། རྡོ་རྗེ་ཐེག་པའི་ལམ་གྱི་རྩ་བ་ཡིན་པས་ཐོག་མར་རྟེན་བསྐྱེད་པ་ནི། རང་མདུན་ནམ་མཁར་པད་ཟླའི་སྟེང༔ རྩ་བའི་བླ་མ་རྡོ་རྗེ་འཆང༔ པདྨ་ཐོད་ཕྲེང་རཱ་གའི་མདངས༔ རྡོ་རྗེ་དྲིལ་འཛིན་ཡུམ་དང་འཁྱུད༔ དར་དང་རིན་ཆེན་རུས་པས་བརྒྱན༔ སྐྱབས་ཀུན་འདུས་པའི་ངོ་བོར་བཞུགས༔ ཞེས་པའི་ཚིག་གིས་གསལ་བཏབ་ལ་མདུན་གྱི་ནམ་མཁར་རྩ་བའི་བླ་མ་རྡོ་རྗེ་འཆང་པདྨ་ཐོད་ཕྲེང་རྩལ་སྔར་སྐྱབས་ཡུལ་གྱི་སྐབས་སུ་སྨོས་པ་ཇི་ལྟ་བ་བསྐྱེད། དེའི་སྤྱན་སྔར་ཚོགས་གསག་པ་ནི། མཎྜལ་དངོས་སུ་ཡོད་ན་ལག་ལེན་ཚུལ་བཞིན་བྱས་ལ་འབུལ། མེད་ན་ཡིད་ཀྱིས་དམིགས་ཏེ། ཕྱི་ལྟར་སྟོང་གསུམ་རི་རབ་གླིང་བཞི་བྱེ་བ་ཕྲག་བརྒྱ་ལྷ་མིའི་ཡོ་བྱད་ཀྱིས་བཀང་བའི་སྣོད་བཅུད་དཔལ་འབྱོར་ངོ་མཚར་བསམ་གྱིས་མི་ཁྱབ་པ། ནང་རང་གི་ཚེ་རབས་ཐོག་མ་མེད་པ་ནས་ད་ལྟ་ཡན་ཆད་ཀྱི་ལུས་དང་ལོངས་སྤྱོད་དགེ་བའི་རྩ་བ་ཅི་མཆིས་པ། གསང་བ་མཆོད་བྱ་མཆོད་བྱེད་མཆོད་པའི་ཡུལ་ཐམས་ཅད་ཀྱང་གདོད་ནས་རང་བཞིན་གྱིས་སྤྲོས་པ་དང་བྲལ་བར་ཤེས་པའི་དོན་དམ་སྟོང་ཉིད་ཀྱི་ངང་ལས་རྣམ་པ་སྒྱུ་མའི་རོལ་པ་ལྟ་བུར་ཕུལ་བས་རང་གཞན་སེམས་ཅན་ཐམས་ཅད་ཀྱི་རྒྱུད་ལ་ཚོགས་གཉིས་ཡོངས་སུ་རྫོགས་པར་མོས་ལ། ཨོཾ་ཨཱཿཧཱུྃ༔ སྟོང་གསུམ་སྣོད་བཅུད་དཔལ་འབྱོར་དང༔ བདག་ལུས་ལོངས་སྤྱོད་དང་བཅས་པ༔ འཁོར་གསུམ་སྤྲོས་པ་བྲལ་བའི་ངང༔ བླ་མ་མཆོག་ལ་འབུལ་བར་བགྱི༔ གུ་རུ་རཏྣ་མཎྜ་ལ་པཱུ་ཛ་ཧོ༔ ཞེས་བརྒྱ་སྟོང་ལ་སོགས་པ་ཚོགས་རྫོགས་པའི་རྟགས་མ་བྱུང་གི་བར་དུ་ཕུལ་བས་ཉམས་རྟོགས་ཡར་ཟླ་ལྟར་རྒྱས་པར་འགྱུར་རོ། །དངོས་གཞི་གསོལ་བ་གདབ་པ་ནི། རང་ཉིད་ལ་ཐར་པའི་ལམ་ཕྱིན་ཅི་མ་ལོག་པ་སྟོན་པའི་བླ་མ་དེ་ཉིད་སངས་རྒྱས་ཀུན་ལས་ལྷག་པའི་ཡོན་ཏན་དང་བཀའ་དྲིན་ཅན་དུ་བལྟས་ལ་ཚད་བཟུང་མེད་པའི་མོས་གུས་སྙིང་ཁུང་རུས་པའི་གཏིང་ནས་བསྐྱེད་དེ། ཀྱེ་ཀྱེ་བླ་མ་རིན་པོ་ཆེ༔ བདག་ལ་རེ་ལྟོས་ཁྱེད་ལས་མེད༔ སྙིང་ནས་གུས་པས་གསོལ་འདེབས་ན༔ དབང་དང་བྱིན་རླབས་བསྩལ་དུ་གསོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་གསོལ་འདེབས་ཀྱི་བསྙེན་པ་བརྒྱ་སྟོང་གྲངས་མེད་པ་བྱ། ཐུན་མཐར་དབང་བླང་བ་ནི། རྩེ་གཅིག་བསྙེན་པས་གསོལ་བཏབ་མཐུས༔ བླ་མ་འོད་ཞུ་རང་ལ་ཐིམ༔ གསང་གསུམ་དབྱེར་མེད་བྱིན་གྱིས་བརླབས༔ དབང་བཞིའི་ཡེ་ཤེས་སྨིན་པར་བསམ༔ ཞེས་པས། མོ་གུས་གདུང་ཤུགས་ཀྱིས་བླ་མ་འོད་དུ་ཞུ་སྟེ་རང་ལ་ཐིམ། བླ་མའི་སྐུ་དང་རང་གི་ལུས་དབྱེར་མེད་དུ་བྱིན་གྱིས་བརླབས། བུམ་དབང་གི་ཡེ་ཤེས་རྒྱུད་ལ་སྨིན། བླ་མའི་གསུང་དང་རང་གི་ངག་དབྱེར་མེད་དུ་བྱིན་གྱིས་བརླབས། གསང་དབང་གི་ཡེ་ཤེས་རྒྱུད་ལ་སྨིན། བླ་མའི་ཐུགས་དང་རང་གི་ཡིད་དབྱེར་མེད་དུ་བྱིན་གྱིས་བརླབས། ཤེར་དབང་གི་ཡེ་ཤེས་རྒྱུད་ལ་སྨིན། བླ་མའི་དབྱིངས་དང་རང་གི་རིག་པ་དབྱེར་མེད་དུ་བྱིན་གྱིས་བརླབས། དབང་བཞི་པའི་ཡེ་ཤེས་རྒྱུད་ལ་སྨིན་པར་བསམས་ལ་མོས་གུས་ཀྱི་སྟོབས་ལས་སྐྱེས་པའི་གཉུག་མའི་ཤེས་པ་རིག་སྟོང་བཟོ་བཅོས་མེད་པའི་རང་ངོ་ལ་ཅི་གནས་སུ་བཞག །ཐུན་ལས་ལྡང་བ་ན་དགེ་བ་བསྔོ་ཞིང་སྣང་གྲགས་རྟོག་ཚོགས་ཐམས་ཅད་བླ་མའི་སྐུ་གསུང་ཐུགས་ཀྱི་རོལ་པར་ལམ་དུ་ཁྱེར། དེས་ནི་ཚེ་འདི་ཉིད་ལ་དགོངས་པའི་བཙན་ས་ཟིན་ཏེ་རྩ་བརྒྱུད་བླ་མའི་གདུང་འཚོབ་ནུས་པར་འགྱུར་རོ། །གཉིས་པ་དངོས་གཞི་ལ་གཉིས། རྟེན་བསྐྱེད་པའི་རིམ་པ་དང་། བརྟེན་པ་རྫོགས་པའི་རིམ་པའོ། །དང་པོ་ལ་གསུམ། སྦྱོར་བ། དངོས་གཞི། རྗེས་ཉམས་མྱོང་ཇི་ལྟར་འཆར་བའི་ཚུལ་ལོ། །དང་པོ་ནི། གནས་ཁང་བྱི་དོར་ཆག་ཆག་གདབ༔ སྐུ་གསུང་ཐུགས་ཀྱི་རྟེན་དང་ནི༔ མཆོད་ཚོགས་ཇི་ལྟར་འབྱོར་པ་བཤམ༔ ཞེས་པས་རྒྱུད་རྣམ་པར་དག་ཅིང་ཡི་དམ་ལྷས་བྱིན་གྱིས་རློབ་པའི་རྟེན་འབྲེལ་དུ། སྒྲུབ་པའི་གནས་ཁང་ཕྱག་དར་གྱིས་གཙང་མར་བྱས་ལ་དྲི་བཟང་སྤོས་ཀྱི་ཆུས་ཆག་ཆག་གདབ། དམིགས་པ་གསལ་བའི་རྟེན་དམ་ཚིག་གི་བྲིས་སྐུ་དང་གཞུང་པོད་གླེགས་བམ་གྱིས་མཚོན་པའི་སྐུ་གསུང་ཐུགས་ཀྱི་རྟེན་བྱིན་རླབས་ཅན་བཀྲམ། ཕྱི་ནང་གི་མཆོད་པ་དང་ཚོགས་ཀྱི་ཡོ་བྱད་དག་ཅིང་གཙང་བ་ཅི་འབྱོར་བཤམས་ལ་མཚམས་དམ་པར་བཅད་དོ། །གཉིས་པ་དངོས་གཞི་ནི། ཐུན་བཞིར་ཕྲིན་ལས་གཞུང་བསྲངས་ལ༔ ཞེས་པས། ཐོ་རངས། སྔ་དྲོ། ཕྱི་དྲོ། མུན་རུབ་སྟེ་ཐུན་བཞི་ལ་ཕྲིན་ལས་སྔོན་དངོས་རྗེས་གསུམ་ཚང་བས་གཞུང་བསྲངས་ལ་བསྙེན་སྒྲུབ་ལས་ཀྱི་སྦྱོར་བ་མཐར་ཕྱིན་པར་བྱ་དགོས་ཏེ། འདི་ལ་གཉིས། དམིགས་པའི་གཙོ་བོ་ལྷ་སྐུའི་གསལ་སྣང་བསྒྲུབ་པ་དང་། ཡན་ལག་བཟླས་པས་དངོས་གྲུབ་བསྐུལ་བའོ། །དང་པོ་ལའང་གསུམ། གསལ་བརྟན་དག་གསུམ་དང་སྦྱར་བའི་གསལ་སྣང་བསྒྲུབ་པ། དགོངས་པ་མི་འགྱུར་བའི་གཟེར་གདབ་པ། དེ་ལས་སྐྱེས་པའི་ཉམས་མྱོང་ངོས་བཟུང་བའོ། །དང་པོ་རྣམ་པ་གསལ་བ་ནི། ལྷ་སྐུའི་གསལ་སྣང་བརྟན་པོར་བསྒྲུབ༔ ཏིང་འཛིན་གཟེར་བཏབ་བྱིང་རྒོད་བསལ༔ ཞེས་པས་གསལ་སྣང་བསྒྲུབ་པའི་གཞི་དཀྱིལ་འཁོར་འཁོར་ལོ་བསྒོམ་ཚུལ་ཅུང་ཟད་སྨོས་ན། ཕྲིན་ལས་སྔོན་འགྲོའི་རིམ་པ་སོང་ནས། དངོས་གཞི་དམ་ཚིག་པའི་རྟེན་བརྟེན་པ་བསྐྱེད་པ་ལ་ཐོག་མར། ཕྱི་ནང་གི་ཆོས་ཐམས་ཅད་གདོད་ནས་སྤྲོས་བྲལ་ནམ་མཁའ་ལྟ་བུའི་འོད་གསལ་སྟོང་པ་ཉིད་དུ་བལྟ་བ་དེ་བཞིན་ཉིད་སྟོང་པ་ཆེན་པོ། དེ་ལྟར་མ་རྟོགས་པའི་སེམས་ཅན་ཐམས་ཅད་ལ་དམིགས་པ་མེད་པའི་སྙིང་རྗེ་ཆེན་པོས་ཁྱབ་པར་གདལ་བ་ཀུན་སྣང་སྙིང་རྗེ་སྒྱུ་མ། སྟོང་ཉིད་སྙིང་རྗེ་ཟུང་དུ་འཇུག་པའི་རང་རྩལ་རིག་པའི་ངོ་བོ་ཧཱུྃ་དམར་པོ་ནམ་མཁའ་ལ་སྐར་ཆེན་ཤར་བ་ལྟར་ལྷག་གིས་གསལ་བ་རྒྱུའི་ས་བོན་ཏེ་རྒྱུ་ཏིང་ངེ་འཛིན་གསུམ་གྱིས་ཁོག་དབུབ། ཧཱུྃ་གི་འོད་ཀྱིས་གཟུང་འཛིན་གྱི་མཚན་རྟོག་སྦྱངས། སྟོང་པའི་ངང་ལས། ནམ་མཁའི་དབྱིངས་སུ་རླུང་མེ་ཆུ་ས་སྟེ་འབྱུང་བ་རིམ་བརྩེགས་རིན་ཆེན་རི་རབ་དང་བཅས་པའི་སྟེང་དུ་རྡོ་རྗེ་སྲུང་བའི་གུར་ཁང་ཡངས་ཤིང་རྒྱ་ཆེ་བའི་ནང་། དུར་ཁྲོད་ཆེན་པོ་བརྒྱད་ཀྱིས་བསྐོར་བའི་དབུས་སྣ་ཚོགས་པདྨ་དང་རྡོ་རྗེའི་ལྟེ་བར་དུར་ཁྲོད་རོལ་པའི་གཞལ་མེད་ཁང་ཆེན་པོ་རྒྱན་དང་བཀོད་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨའི་གདན་གྱི་སྟེང་དུ་ཉི་མའི་དཀྱིལ་འཁོར། དེའི་སྟེང་དྲེགས་པའི་གཙོ་བོ་འཇིགས་བྱེད་ནག་པོ་ཁ་སྦུབས་དང་ཨུ་མ་དམར་པོ་གན་རྐྱལ་དུ་བསྒྱེལ་བའི་གདན་ལ་རྒྱུའི་ཧཱུྃ་དམར་པོ་བབས། དེ་ཡོངས་སུ་གྱུར་པ་ལས་རང་ཉིད་འཁོར་ལོ་བདེ་མཆོག་པདྨ་བཛྲ་རྩལ་སྐུ་མདོག་པདྨ་རཱ་ག་ལྟར་དམར་ལ་འོད་འཚེར་བ། ཁྲོ་སྒེག་རྗེས་སུ་ཆགས་པའི་ཉམས་འགྱུར་ཅན། ཞལ་གཅིག་སྤྱན་གསུམ་གཡོ་བའི་ཚུལ་མཆེ་བ་གཙིགས་ཤིང་ལྗགས་འདྲིལ་བ། སྨ་ར་སྨིན་མ་དབུ་སྐྲ་གནག་སྣུམ་མེ་འོད་འཕྲོ་ཞིང་རལ་པའི་ཐོར་ཚུགས་ཀྱི་རྩེ་མོར་ཡིད་བཞིན་ནོར་བུ་དང་གཡོན་ངོས་སུ་ཟླ་བ་ཚེས་པས་བརྒྱན་པ། ཞིང་ལྤགས་དང་གླང་ཀོས་སྟོད་གཡོགས་ཤིང་སྟག་ལྤགས་ཀྱི་ཤམ་ཐབས་འཕྱང་པ། ཐོད་པ་སྐམ་པོ་ལྔས་དབུར་བརྒྱན་ཅིང་རློན་པ་ལྔ་བཅུ་རྩ་གཅིག་གི་དོ་ཤལ་ཅན། སྦྲུལ་རིགས་ལྔའི་ཆུན་པོ་དང་རིན་པོ་ཆེ་དང་དབུ་ལ་འཁོར་ལོ་སོགས་རུས་པའི་ཕྱག་རྒྱ་དྲུག་གིས་སྤྲས་པ། ཕྱག་གཉིས་རྡོར་དྲིལ་ཐུགས་ཀར་བསྣོལ་བས་ཡུམ་མནྡཱ་ར་བ་དམར་གསལ་གྲི་ཐོད་བསྣམས་ཤིང་ཕྱག་རྒྱ་ལྔས་བརྒྱན་པ་ལ་འཁྱུད་པ། ཞབས་གཉིས་བརྐྱང་བསྐུམ་དོར་སྟབས་ཚུལ་གྱིས་ཡེ་ཤེས་ཀྱི་མེ་འབར་བའི་དབུས་ན་འགྱིང་བའི་དབུ་གཙུག་ཏུ་རིགས་བདག་བླ་མ་རྡོ་རྗེ་ཆོས་སྔར་སྨོས་པ་ལྟ་བུ་ལ་བརྒྱུད་གསུམ་བླ་མ་རིག་འཛིན་ཚོགས་ཀྱིས་བསྐོར་བ་བཅས་གསལ་ལེགས་པར་གདབ། དེ་ནས་ལུས་དཀྱིལ་བསྒོམ་པ་ནི། འཁོར་ལོ་ལྔ་སོགས་གནས་སོ་སོའི་རྩ་རླུང་ཐིག་ལེའི་དྭངས་མ་རྣམས་ལྷ་དེ་དང་དེ་རུ་གསལ་འདེབས་པ་སྟེ། སྐུའི་གནས་ལྔར་པད་ཟླའི་གདན་ལ་སྤྱི་བོར་བུདྡྷ་ཐོད་ཕྲེང་དཀར་པོ། མགྲིན་པར་པདྨ་ཐོད་ཕྲེང་དམར་པོ། སྙིང་གར་རྡོ་རྗེ་ཐོད་ཕྲེང་མཐིང་ག །ལྟེ་བར་རཏྣ་ཐོད་ཕྲེང་སེར་པོ། གསང་བར་ཀརྨ་ཐོད་ཕྲེང་ལྗང་གུ་རྣམས་ལོངས་སྤྱོད་རྫོགས་པའི་ཆས་ཅན། ཕྱག་གཡས་རྣམས་འཁོར་ལོ་སོགས་རང་རྟགས་དང་། གཡོན་དྲིལ་བུ་བསྣམས་པ། རང་འདྲའི་ཡུམ་ལ་འཁྱུད་ཅིང་རང་འོད་ཀྱི་ཀློང་ན་བཞུགས་པ། སྐུའི་གནས་བརྒྱད་དུ་རིག་འཛིན་ཆེན་པོ་བརྒྱད། དེའང་གནས་ལྔར་ཐོད་ཕྲེང་སྡེ་ལྔའི་ཐུགས་ཀར་བསྒོམ་པ་སྟེ། སྤྱི་བོར་བུདྡྷ་ཐོད་ཕྲེང་རྩལ་གྱི་ཐུགས་ཀར་པད་ཟླའི་གདན་ལ་སྐུ་མཆོག་གཤིན་རྗེའི་གཤེད་དང་དབྱེར་མེད་པའི་སློབ་དཔོན་འཇམ་དཔལ་བཤེས་གཉེན། དེ་བཞིན་དུ་མགྲིན་པར་གསུང་མཆོག་རྟ་མགྲིན་ཀླུ་སྒྲུབ་སྙིང་པོ། ཐུགས་ཀར་ཐུགས་མཆོག་ཡང་དག་ཧཱུྃ་ཀཱ་ར། ལྟེ་བར་ཡོན་ཏན་ཆེ་མཆོག་བི་མ་ལ་མི་ཏྲ། གསང་གནས་སུ་ཕྲིན་ལས་ཕུར་པ་པྲ་བྷ་ཧསྟི། ནོར་བུར་བླ་མེད་མངོན་རྫོགས་དྷ་ན་སཾསྐྲྀཏ། བརླ་གཡས་སུ་དྲེགས་པ་ཀུན་འདུས་རོམ་བུ་གུ་ཧྱ་ཙནྡྲ། བརླ་གཡོན་དུ་སྟོབས་ལྡན་ནག་པོ་ཤཱནྟིཾ་གརྦྷ་སྟེ་དེ་ཐམས་ཅད་ཀྱང་མཐིང་ནག་ཌཱ་རུ་དང་དྲིལ་བུ་འཛིན་ཅིང་རང་འོད་ཀྱི་ཡུམ་ལ་འཁྲིལ་བ་དར་དང་རིན་ཆེན་རུས་པས་བརྒྱན་ཅིང་གར་སྟབས་ཀྱིས་འགྱིང་བ། སྙིང་གའི་ནང་སྐོར་གྱི་ཕྱོགས་བཞིའི་རྩ་འདབ་ལ་རྣལ་འབྱོར་མ་བཞི་སྟེ་ཤར་དུ་མཁའ་འགྲོ་མ་སྔོན་མོ། བྱང་དུ་ལཱ་མ་ལྗང་གུ །ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ། གནས་ཉེར་བཞིར་ཡུལ་ཆེན་ཉེར་བཞིའི་དཔའ་བོ་དང་དཔའ་མོ་རྣམས་ཏེ། སྨིན་མཚམས་པུལླི་ར་མ་ལ་ཡར་ཁཎྜ་ཀ་པཱ་ལ་དང་རབ་གཏུམ་མ། སྤྱི་གཙུག་ཛཱ་ལནྡྷ་རར་མ་ཧཱ་ཀཾ་ལ་དང་གཏུམ་པའི་མིག་ཅན་མ། རྣ་བ་གཡས་ཨོ་ཌཱི་ཡ་ནར་ཀཾ་ཀ་ལ་དང་འོད་ལྡན་མ། རྣ་བ་གཡོན་པ་གོ་ད་བ་རིར་སུ་རཱ་བཱི་ར་དང་དཔའ་བོའི་བློ་ཅན་མ། ལྟག་པ་ཨརྦུ་ཏར་མཆེ་བ་རྣམ་གཙིགས་དང་སྣ་ཆེན་མ། སྨིན་མའི་དབུས་རཱ་མེ་ཤྭ་རར་འོད་དཔག་མེད་དང་མིའུ་ཐུང་མ། མིག་གཉིས་དེ་བཱི་ཀོ་ཊིར་རྡོ་རྗེའི་འོད་དང་ལངྐའི་དབང་ཕྱུག་མ། ཕྲག་པ་གཉིས་མལླ་བར་རྡོ་རྗེའི་སྐུ་དང་ཤིང་གྲིབ་མ་སྟེ་ཐུགས་ཀྱི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་ནག་པོ་མཁའ་ལ་སྤྱོད་པ། མཆན་ཁུང་གཉིས་ཀཱ་མ་རཱུ་པར་ཨཾ་ཀུ་རི་དང་ཨེ་ར་བ་ཏཱི། ནུ་མ་གཉིས་ཨོ་ཏྲིར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ལྟེ་བ་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ། ཁ་ཀ་ལིངྒར་རབ་ཏུ་བཟང་པོ་དང་ཤྱ་མ་དེ་བཱི། མགྲིན་པ་ལམྦ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། སྙིང་ག་ཀཉྩི་རར་འཇིགས་བྱེད་ཆེན་པོ་དང་རྟ་རྣ་མ། འདོམ་བར་ཧི་མ་ལ་ཡར་མིག་མི་བཟང་དང་ཁ་གཱ་ན་ན་སྟེ་གསུང་གི་གསང་བ་བསམ་མི་ཁྱབ་པའི་ངོ་བོ་ཁ་དོག་དམར་པོ་ས་ལ་སྤྱོད་པ། མཚན་མ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། གཤང་ལམ་གྲྀ་ཧ་དེ་བར་རིན་ཆེན་རྡོ་རྗེ་དང་ཁཎྜ་རོ་ཧཱི། བརླ་གཉིས་སཽ་རཱཥྚར་རྟ་མགྲིན་དང་ཤཽཎྜི་ནཱི། བྱིན་པ་གཉིས་སུ་བརན་དྭཱི་པར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། རྐང་སོར་བརྒྱད་ན་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། །བོལ་གོང་གཉིས་སིནྡྷུ་རར་པདྨ་གར་གྱི་དབང་ཕྱུག་དང་སྟོབས་ཆེན་མ། རྐང་པའི་མཐེ་བོང་གཉིས་མ་རུར་རྣམ་པར་སྣང་མཛད་དང་འཁོར་ལོས་སྒྱུར་མ། པུས་མོ་གཉིས་ཀུ་ལུནྟར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་སྐུའི་གསང་བ་བསམ་གྱིས་མི་ཁྱབ་པའི་ངོ་བོ་ཁ་དོག་དཀར་པོ་ས་འོག་ཏུ་སྤྱོད་པ། དཔའ་བོ་ཉེར་བཞི་པོ་ཐམས་ཅད་གྲི་གུག་ཐོད་པ་འཛིན་ཅིང་ཆ་ལུགས་ཡབ་ཧེ་རུ་ཀ་དང་མཚུངས་པ། ཡུམ་རྣམས་གཡས་རྡོ་རྗེའི་ཁ་ཊྭཱཾ་ག་དང་གཡོན་དྲིལ་བུ་བསྣམས་ཤིང་ཡུམ་རྣལ་འབྱོར་མ་དང་མཚུངས་པ། ཡན་ལག་བཞི་ལ་སྒོ་མཚམས་མ་བརྒྱད་དེ། ལག་གཡས་སུ་ཁ་གདོང་མ་སྔོན་མོ་དང་གཤིན་རྗེ་བརྟན་མ་གཡས་སྔོ་གཡོན་སེར་བ། ལག་གཡོན་དུ་འུག་གདོང་མ་ལྗང་གུ་དང་གཤིན་རྗེ་འཇོམས་མ་གཡས་ལྗང་གཡོན་སྔོ་བ། རྐང་གཡོན་ཁྱི་གདོང་མ་དམར་མོ་དང་གཤིན་རྗེ་མཆེ་བ་མ་གཡས་དམར་གཡོན་ལྗང་བ། རྐང་པ་གཡས་སུ་ཕག་གདོང་མ་སེར་མོ་དང་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། སྙིང་པོའི་རྣལ་འབྱོར་མ་བཞི་དང་སྒོ་མཚམས་མ་བརྒྱད་ཀ་གྲི་ཐོད་འཛིན་ཅིང་རལ་པ་གྱེན་བརྫེས་སྟག་ཤམ་དང་རུས་པས་བརྒྱན་ཅིང་ཞབས་གར་སྟབས་ཀྱིས་མེ་འོད་ཀློང་ན་འགྱིང་བ། གཞན་ཡང་ཕུང་ཁམས་སྐྱེ་མཆེད་ཐམས་ཅད་རྩ་གསུམ་རྒྱལ་བ་རབ་འབྱམས་ཏིལ་གྱི་གོང་བུ་ཁ་ཕྱེ་བ་ལྟ་བུར་བཞུགས་པར་མོས་པ་བཅས་འབྲས་བུ་རྟེན་དང་བརྟེན་པར་བཅས་པའི་དཀྱིལ་འཁོར་བ་ཡོངས་སུ་རྫོགས་པར་བསྐྱེད། གནས་གསུམ་དུ་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་ཨོཾ་དཀར་ཨཱཿདམར་ཧཱུྃ་མཐིང་གསུམ་གྱི་རྒྱས་གདབ། ཐུགས་ཀའི་འོད་ཟེར་གྱིས་དབང་ལྷ་སྤྱན་དྲངས། ཡེ་ཤེས་ལྔའི་ཆུ་རྒྱུན་གྱིས་དབང་སྐུར་བས་དབང་རྟགས་སུ་སྣང་བ་མཐའ་ཡས་གཙོ་བོར་གྱུར་པའི་བདེ་གཤེགས་རིགས་ལྔས་དབུར་བརྒྱན་པར་བསམས་ལ་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་སྤྱན་དྲངས་ཤིང་བསྟིམ། ཕྱག་དང་མཆོད་པ་འབུལ་ཞིང་བསྟོད་པའི་གླུ་ཡིས་བསྙེན་བཀུར་རོ། །དེ་ནས། ཕྱི་སྣོད་ཐམས་ཅད་གཞལ་ཡས་ཁང༔ ཕུང་ཁམས་སྐྱེ་མཆེད་ཡི་དམ་ལྷ༔ སྣང་སྟོང་ཆུ་ཟླ་འཇའ་ཚོན་ལྟར༔ གསལ་ལ་མ་འདྲེས་རྩེ་གཅིག་བསྒོམ༔ ཨོཾ་པདྨ་བཛྲ་ཧཱུྃ༔ ཞེས་པའི་ཚིག་གིས་གསལ་བཏབ་སྟེ། ཐོག་མར་རང་ཉིད་གཙོ་བོ་ཡབ་ཡུམ་ལ་སེམས་བཟུང་། དེའང་ཐོག་མར་ཆ་ཤས་རེ་རེ་ནས་གསལ་གདབ། གོམས་ནས་ལྷ་སྐུ་ཡོངས་རྫོགས་ལ་བློ་བཞག །མི་གསལ་ན་བྲིས་སྐུ་ལ་ཡིད་མིག་རླུང་གསུམ་མདུང་ཚུགས་སུ་གཏད་ནས་རང་ལ་སྦྱར། གསལ་སྣང་བརྟན་པོ་སྐྱེས་ན་མེ་ལོང་གི་གཟུགས་བརྙན་ཆུ་ཟླ་འཇའ་ཚོན་རྣམས་ཀྱི་དཔེས་ལྷ་སྐུ་སྣང་སྟོང་དུ་སྦྱང་། དེ་ལྟ་བུས་གཙོ་བོ་ཡབ་ཡུམ་ལ་གསལ་སྣང་ཐོབ་ཅིང་སེམས་ཟིན་པ་ན་རིམ་གྱིས་ལུས་དཀྱིལ་གྱི་ལྷ་རྣམས་དང་། ཕྱི་རོལ་གཞལ་ཡས་ཁང་། དུར་ཁྲོད། སྲུང་འཁོར་དང་བཅས་པ་ལ་རེ་རེ་ནས་སེམས་བཟུང་སྟེ་གསལ་སྣང་ཐོབ་པར་བྱའོ། །གཉིས་པ་ང་རྒྱལ་བརྟན་པ་ནི། སྐབས་སུ་ང་རྒྱལ་བརྟན་པར་བཟུང༔ ཞེས་པའི་དོན་ཕྲིན་ལས་ལྟར། ཧཱུྃ༔ ང་ནི་པདྨ་བཛྲ་རྩལ༔ བདེ་བ་མཆོག་གི་རང་བཞིན་ཆེ༔ སྐུ་དང་ཡེ་ཤེས་ཡོན་ཏན་དང༔ རྩ་གསུམ་རྒྱ་མཚོའི་བདག་ཉིད་དོ༔ ཨོཾ་པདྨ་བཛྲ་ཨཱཏྨ་ཀོ྅་ཧཾ༔ ཞེས་པས་གསལ་གདབ་ལ། རང་ཉིད་ཐ་མལ་པ་ནམ་ཡང་མ་ཡིན། གདོད་ནས་རང་བྱུང་གི་བཅོམ་ལྡན་འདས་པདྨ་བཛྲ་དཔལ་འཁོར་ལོ་བདེ་མཆོག་དངོས་ཡིན། དེའི་རྡོ་རྗེའི་སྐུ་ཞིང་ཁམས་ཐམས་ཅད་ལ་ཁྱབ་པ་དང་བསམ་ལས་འདས་པའི་ཡེ་ཤེས། བྲལ་སྨིན་གྱི་ཡོན་ཏན་ཐམས་ཅད་བདག་ཉིད་ལ་ཡོད་ཅིང་རྩ་གསུམ་རབ་འབྱམས་རྒྱ་མཚོའི་ཁྱབ་བདག་སྤྱི་དཔལ་ཆེན་པོ་ཉིད་ཡིན་ནོ་སྙམ་དུ་ང་རྒྱལ་བརྟན་པོ་ཐུན་དང་ཐུན་མཚམས་ཀུན་ཏུ་མ་བྲལ་བར་བྱའོ། །གསུམ་པ་རྣམ་དག་དྲན་པ་ནི། རེས་འགའ་དག་པ་རབ་འབྱམས་དྲན༔ ཞེས་པའི་དོན། གཞུང་ཚིག་འདིས་གསལ་གདབ་སྟེ། རིག་པ་རང་བྱུང་གཉུག་མའི་ལྷ༔ ཤིན་ཏུ་རྣམ་དག་ཆོས་ཀྱི་སྐུ༔ ཐུགས་རྗེས་འགྲོ་བ་འདུལ་བའི་ཕྱིར༔ རྣམ་འགྱུར་ཆ་ལུགས་ཅིར་ཡང་སྣང༔ ཞལ་གཅིག་དབྱིངས་ལས་འགྱུར་བ་མེད༔ ཕྱག་གཉིས་ཐབས་དང་ཤེས་རབ་སྟེ༔ སྤྱན་གསུམ་རྣམ་པར་ཐར་པའི་སྒོ༔ མཆེ་གཙིགས་མི་འཇིགས་བདུད་བཞི་འདུལ༔ ལྗགས་འདྲིལ་ཡེ་ཤེས་ཆེན་པོར་སྦྱོར༔ རྡོ་རྗེ་དྲིལ་བུ་བདེ་སྟོང་རྒྱས༔ སྟོང་ཉིད་ཤེས་རབ་ཡུམ་དང་འཁྲིལ༔ ཡུམ་གྱིས་གཟུང་འཛིན་གཅོད་པ་དང༔ ཉོན་མོངས་རང་དག་གྲི་ཐོད་བསྣམས༔ མཁའ་གསང་ཨེ་ཝཾ་མཉམ་པར་སྦྱོར༔ ཞི་ཉམས་ཆོས་ཉིད་སྤྲོས་བྲལ་ལས༔ ཁྲོ་ཚུལ་ལོངས་སྤྱོད་ཆེན་པོར་རྫོགས༔ རྗེས་ཆགས་གདུལ་བྱར་རྩེ་གཅིག་དགོངས༔ སྐུ་དམར་འགྲོ་འདུལ་ཆགས་པའི་ཚུལ༔ ཆེ་བའི་ཡོན་ཏན་རྫོགས་པ་དང༔ ཉོན་མོངས་མ་སྤང་ཞི་ཁྲོའི་ཆས༔ ཞབས་གཉིས་བརྐྱང་བསྐུམ་དོར་སྟབས་ཀྱིས༔ ཞི་དང་སྲིད་པའི་མཐའ་གཉིས་གནོན༔ ཡེ་ཤེས་མེ་ཡིས་མ་རིག་སྲེག༔ དྲེགས་པ་ཉི་ཟླ་པདྨའི་སྟེང༔ ཁམས་གསུམ་དབང་ཕྱུག་ཆེན་པོར་བཞེངས༔ སྐུ་ལ་རྩ་གསུམ་ཞི་ཁྲོའི་ལྷ༔ ཕུང་ཁམས་སྐྱེ་མཆེད་དག་པར་རྫོགས༔ གཞལ་མེད་ཁང་ཆེན་བྱང་ཆུབ་ཆོས༔ དུར་ཁྲོད་ཚོགས་བརྒྱད་གཟུང་འཛིན་བསྒྲལ༔ རྡོ་རྗེའི་སྲུང་འཁོར་འགྱུར་མེད་དབྱིངས༔ མདོར་ན་གང་དང་ཅིར་སྣང་བ༔ དེ་ཀུན་ལྷ་དང་ཞིང་ཁམས་ཏེ༔ ཡེ་ཤེས་སྒྱུ་འཕྲུལ་དྲྭ་བ་འོ༔ ཨོཾ་པདྨ་བཛྲ་སརྦ་ཛྙཱ་ན་ཀཱ་ཡ་ཨ་ཨ་ཨ༔ ཞེས་པའི་དོན། རང་བྱུང་རིག་པ་ཆོས་ཀྱི་སྐུ་ཤིན་ཏུ་རྣམ་པར་དག་པ་ལ་དབྱིབས་དང་ཁ་དོག་ལ་སོགས་པའི་དངོས་མཚན་དུ་གྲུབ་པ་མེད་ཀྱང་མཚན་མར་འཛིན་པའི་འགྲོ་བ་རྣམས་ཀྱི་ཞེན་རྟོག་སྦྱང་བའི་ཕྱིར་དུ། ཆོས་དབྱིངས་ཉག་གཅིག་གཞན་དུ་མི་འགྱུར་བར་མཚོན་པའི་ཞལ་གཅིག་ཏུ་བསྟན་པ་སོགས་རྡོ་རྗེའི་གསུང་གི་དོན་རེ་རེ་ནས་བསྒོམ་བྱའི་དཀྱིལ་འཁོར་དང་སྦྱར་ཏེ་གྱ་ནོམ་ལྷར་ཞེན་ལས་བློ་ལྡོག །དེ་ལྟར་གསལ་བརྟན་དག་གསུམ་གྱི་ཏིང་ངེ་འཛིན་ལ་བརྟེན་ནས་ཐ་མལ་སྣང་ཞེན་ཀུན་ལ་ལྷ་སྐུ་ཕྱག་རྒྱའི་གཟེར་བཏབ་པས། མཐར་སྣང་སྲིད་དག་པ་རབ་འབྱམས་ཀྱི་དཀྱིལ་འཁོར་གང་སྣང་ལྷ་སྐུར་འཆར་བ་ལ་བསླབ། དེ་དག་གི་སྐབས་སུ་བསྐྱེད་རིམ་མི་གསལ་བའི་བྱིང་རྨུགས་འཐིབས་གསུམ་བྱུང་ན་ལྟ་སྟངས་ཟས་སྤྱོད་ཁྲུས་སོགས་ཀྱིས་གསེང་། བསྒོམ་བྱ་ལ་བློ་མི་གནས་པའི་རྣམ་རྟོག་འཕྲོ་རྒོད་བྱུང་ན་དྲན་ཤེས་ཐག་པས་བཟུང་ལ་གཉེན་པོ་བརྟེན་པ་སོགས་སྤྱི་ལྟར་བཅོས་ཤིང་སྐྱོན་བསལ་ལ་སྐྱོན་མེད་ཀྱི་བསམ་གཏན་བསྒྲུབ་པར་བྱའོ། །གཉིས་པ་དགོངས་པ་མི་འགྱུར་བའི་གཟེར་གདབ་པ་ནི། ཀུན་ཀྱང་དགོངས་པ་མི་འགྱུར་བའི༔ སེམས་དང་ལྷ་སྐུ་རོ་མཉམ་གཞག༔ ཅེས་པས། བསྐྱེད་རིམ་སྒོམ་པའི་ཚུལ་དེ་ཀུན་ཀྱང་དངོས་པོ་རང་མཚན་ཅན་དུ་མི་བལྟ་བར་དགོངས་པ་མི་འགྱུར་བའི་གཟེར་གྱིས་རྣམ་པ་ཀུན་ཏུ་གདབ་དགོས་ཏེ། སྒོམ་མཁན་རང་གི་སེམས། སེམས་ཀྱི་ངོ་བོ་སྟོང་པ་ཉིད། སྟོང་པའི་རང་རྩལ་ལྷ་སྐུར་ཤར་བ་ཡིན་པས་སེམས་སྟོང་པ་དང་ལྷ་སྐུར་སྣང་བ་གཉིས་ཐ་དད་མེད་པར་སྣང་སྟོང་ཟུང་འཇུག་ཆེན་པོར་རོ་མཉམ་པར་གཞག་པ་ནི་ཐམས་ཅད་དུ་རྒྱས་འདེབས་བྱེད་ཀྱི་གནད་གལ་པོ་ཆེ་ཉིད་དོ། །གསུམ་པ་དེ་ལས་སྐྱེས་པའི་ཉམས་མྱོང་ངོས་གཟུང་བ་ནི། དེ་ལྟར་ཡང་ཡང་གོམས་པ་ལས༔ ཐ་མལ་སྣང་ཞེན་འགོག་ནུས་པའི༔ ཡེ་ཤེས་རྒྱུད་ལ་འཆར་བར་འགྱུར༔ ཞེས་པ་སྟེ། ཇི་སྐད་བཤད་པ་གསལ་བརྟན་དག་གསུམ་རྒྱས་འདེབས་དང་བཅས་པའི་ཏིང་ངེ་འཛིན་དེ་ལྟ་བུ་ལ་ཡང་དང་ཡང་དུ་གོམས་པར་བྱས་པ་ལས་གསལ་སྣང་རིམ་པར་ཐོབ་སྟེ། སྣོད་བཅུད་ཐ་མལ་གྱི་དངོས་པོར་སྣང་ཞིང་དེར་འཛིན་གྱི་ཞེན་རྟོག་དང་བཅས་པ། རྟེན་གཞལ་ཡས་ཁང་དང་བརྟེན་པ་ལྷ་སྐུ་ཕྱག་རྒྱའི་རྣམ་པར་འགོག་ནུས་པའི་སྣང་སྟོང་སྒྱུ་མ་ལྟ་བུའི་ཡེ་ཤེས་རྒྱུད་ལ་འཆར་བར་འགྱུར་རོ། །གཉིས་པ་ཡན་ལག་བཟླས་པས་དངོས་གྲུབ་བསྐུལ་བ་ནི། ཡན་ལག་དངོས་གྲུབ་མྱུར་བའི་ཕྱིར༔ བཀོད་པའི་བཟླས་པར་སེམས་བཟུང་ཞིང༔ འཁོར་བའི་བཟླས་པས་བདེ་ཆེན་བརྟན༔ ཕོ་ཉ་ལྟ་བུར་སྤྲོ་བ་དང༔ བུང་བ་ཚང་ཞིག་ལྟ་བུ་ཡིས༔ དངོས་གྲུབ་བསྒྲུབ་ཅིང་ལས་ལ་སྦྱར༔ ཞེས་གསུངས་ཏེ། ཇི་སྐད་དུ། ཏིང་འཛིན་མེ་དང་འདྲ་བ་ལ། །བཟླས་བརྗོད་རླུང་གི་ཤུགས་ཀྱིས་བསྐུལ། །ཅེས་འབྱུང་བ་ལྟར་བསྐྱེད་པའི་ཏིང་ངེ་འཛིན་གྱི་ཡན་ལག་ལས་དང་དངོས་གྲུབ་ཐོགས་པ་མེད་པར་སྒྲུབ་པའི་ཕྱིར་དུ་སྙིང་པོ་སྔགས་ཀྱི་གཟེར་དང་འཕྲོ་འདུ་ཕྲིན་ལས་ཀྱི་གཟེར་ལ་བརྟེན་ནས་བསྙེན་སྒྲུབ་ཡན་ལག་བཞི་ལྡན་གྱི་བཟླས་པའི་རིམ་པ་ལ་འཇུག་པར་བྱ་སྟེ། དེའང་ཐོག་མར་བཀོད་པའི་བཟླས་པ་ནི། རང་གི་ཐུགས་ཀར་རྡོ་རྗེ་ཐོད་ཕྲེང་དང་ཧཱུྃ་ཆེན་ཀཱ་རར་གསལ་བའི་ཐུགས་ཀར་ཉི་ཟླའི་གྭའུ་ཁ་སྦྱོར་གྱི་དབུས་སུ་ཐུགས་སྲོག་ཧཱུྃ་ཡིག་དམར་པོ་བྱེ་རུའི་མདངས་ཅན་མེ་འོད་འཕྲོ་བ། དེའི་མཐའ་སྐོར་དུ་རྡོ་རྗེའི་སྙིང་པོ་འབྲུ་དྲུག་པའི་སྔགས་ཕྲེང་གཡས་སྐོར་དུ་འཁོད་པ་དྭངས་ཤིང་གསལ་ལ་འོད་ཟེར་འབར་བ་དམིགས། དེ་ལ་སེམས་རྩེ་གཅིག་ཏུ་བཟུང་ནས་རྣམ་རྟོག་གཞན་དུ་མི་འཕྲོ་བར་གནས་པ་ནི་བསྙེན་པ་དང་། འཁོར་བའི་བཟླས་པ་ནི། ཐུགས་ཀའི་སྔགས་ཕྲེང་ལས་གཉིས་པ་གཅིག་རྗེས་གཅིག་མཐུད་དུ་འཕྲོས། ནང་ལུས་དཀྱིལ་དང་ཕྱི་སྟོང་རར་བཅས་པའི་ཡབ་ཡུམ་གྱི་ཞལ་དང་གསང་བ་ནས་བརྒྱུད་དེ་ཐུགས་སྲོག་ལ་ཐིམ་པ་སོགས་མགལ་མེ་ལྟར་བར་མ་ཆད་དུ་འཁོར་བའི་འོད་ཟེར་དང་བདེ་བ་ཆེན་པོའི་གཟི་བྱིན་གྱིས་ཟག་པ་མེད་པའི་བདེ་བ་རབ་ཏུ་འབར་ཞིང་དངོས་གྲུབ་ཀྱི་ཡེ་ཤེས་འཕེལ་ཞིང་བརྟན་པར་གྱུར་པར་བསམས་ལ་བཟླ་བ་ནི་ཡེ་ཤེས་ལྷ་དང་ཉེ་བར་བསྙེན་པའོ། །སྤྲོ་བསྡུའི་བཟླས་པ་ནི། ཐུགས་སྲོག་ས་བོན་གྱི་མཐར་སྒྲུབ་པའི་གསང་སྔགས་ཡིག་འབྲུ་ཉེར་གཅིག་པས་བསྐོར་བ་གསལ་གདབ། བཟླས་པ་ཙམ་གྱིས་ཐུགས་རྒྱུད་བསྐུལ། དེ་ལས་བདེ་བ་ཆེན་པོའི་རང་བཞིན་གྱི་འོད་ཟེར་དཔག་ཏུ་མེད་པ་འཕྲོས། ལུས་དཀྱིལ་གྱི་ལྷ་རྣམས་ལ་ཕོག་པས་ཐུགས་རྒྱུད་བསྐུལ། ཐམས་ཅད་སྙོམས་པར་ཞུགས་པའི་བདེ་བའི་སྒྲ་དང་འོད་ཟེར་སྤྲུལ་པ་ཡང་སྤྲུལ་བསམ་གྱིས་མི་ཁྱབ་པ་རྒྱལ་པོས་ཕོ་ཉ་མངག་པ་ལྟ་བུར་སྤྲོས། ནམ་མཁའ་ཁྱབ་པར་བཞུགས་པའི་རྩ་གསུམ་རྒྱལ་བ་སྲས་དང་བཅས་པ་ལ་མཉེས་པའི་མཆོད་པ་ཕུལ། སྐུ་གསུང་ཐུགས་ཀྱི་བྱིན་རླབས། མཁྱེན་བརྩེ་ནུས་པའི་དྭངས་བཅུད་ཐམས་ཅད་ཕྱག་རྒྱ་ཡིག་འབྲུ་ཕྱག་མཚན་འོད་ཟེར་གྱི་རྣམ་པར་བྱོན་ནས་རང་ལ་ཐིམ་པར་བསམས་ལ་བཟླས་པ་ནི་སྒྲུབ་པ་དང་། བུང་བ་ཚང་ཞིག་ལྟ་བུའི་བཟླས་པ་ནི། སླར་ཡང་འོད་ཟེར་འཕྲོས་པས་སྣང་ཡུལ་ཐམས་ཅད་ལྷ་སྐུ་སྣང་སྟོང་འཇའ་ཚོན་ལྟ་བུ། སྒྲ་གྲགས་ཐམས་ཅད་རང་བྱུང་རྡོ་རྗེའི་སྒྲ་དབྱངས། དྲན་རྟོག་ཐམས་ཅད་རང་གྲོལ་ཕྱག་རྒྱ་ཆེན་པོ་སྟེ་དག་རྫོགས་སྨིན་པའི་འཁོར་ལོར་འབྱམས་ཀླས་པར་བསམས་ལ་སྒྲུབ་སྔགས་བཟླ་བ་ནི་དངོས་གྲུབ་སྒྲུབ་པའོ། །དེ་ལྟར་བྱས་ནས་ལས་ལ་སྦྱར་བའི་ཆེད་དུ། གནས་ལྔའི་ཐོད་ཕྲེང་རིགས་ལྔའི་ཐུགས་ཀར་སོ་སོའི་ཐུགས་སྲོག་ཨོཾ་ཧྲཱིཿཧཱུྃ་ཏྲཱཾ་ཧཱ་རང་མདོག་ཅན་གྱི་མཐར་སྔགས་ཀྱི་ཕྲེང་བས་བསྐོར་བ་གསལ་གདབ། བཟླས་པས་ཐུགས་རྒྱུད་བསྐུལ་ཏེ་སྤྱི་བོའི་བུདྡྷ་ཐོད་ཕྲེང་གི་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་དཀར་པོ་ནམ་མཁའ་གང་བར་འཕྲོས། རང་གཞན་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་བ་མོ་ལ་ཉི་ཟེར་ཕོག་པ་བཞིན་སངས་ཀྱིས་དག་སྟེ་ཞི་བའི་ཕྲིན་ལས་མ་ལུས་པ་ལྷུན་གྱིས་གྲུབ་པར་བསམས་ལ་རང་སྔགས་བཟླ། དེས་འགྲེས་ཏེ། ལྟེ་བའི་རཏྣ་ཐོད་ཕྲེང་གི་འོད་ཟེར་སེར་པོས་རྒྱས་པའི་ལས་དང་། མགྲིན་པའི་པདྨ་ཐོད་ཕྲེང་གི་འོད་ཟེར་དམར་པོས་དབང་གི་ལས་དང་། ཐུགས་ཀའི་རྡོ་རྗེ་ཐོད་ཕྲེང་གི་འོད་ཟེར་སྔོན་པོས་དྲག་པོའི་ལས་དང་། གསང་གནས་ཀརྨ་ཐོད་ཕྲེང་གི་འོད་ཟེར་གྱིས་ཕྲིན་ལས་ཐམས་ཅད་ལྷུན་གྱིས་གྲུབ་པར་བསམས་ལ་སོ་སོའི་སྔགས་བཟླའོ། །དེ་ལ་དུས་དང་རྟགས་ཀྱི་ཚད་ནི་གཞན་དང་མཐུན། གྲངས་ཚད་བསྙེན་པ་འབུམ་ཕྲག་བདུན། སྒྲུབ་པ་འབུམ་ཕྲག་བཞི། ལས་སྦྱོར་ཁྲི་ཕྲག་བཞི་རེས་འགྲུབ་པར་གསུངས་སོ། །གསུམ་པ་རྗེས་ཉམས་མྱོང་ཇི་ལྟར་འཆར་བ་ནི། སྣང་གྲགས་རྟོག་པའི་རྙོག་མ་ཀུན༔ རྡོ་རྗེ་གསུམ་དུ་རང་ཤར་ན༔ བུམ་དབང་ལམ་ཁྱེར་བསྐྱེད་པའི་རིམ༔ གོམས་པ་མཐའ་རུ་ཕྱིན་པ་འོ༔ ཞེས་གསུངས་ཏེ། ཐོག་མེད་ནས་གོམས་པའི་གཟུང་འཛིན་གྱི་འཁྲུལ་པས་སྣང་གྲགས་རྟོག་གསུམ་ཐ་མལ་དུ་འཛིན་པའི་ཞེན་རྟོག་གི་རྙོག་མ་ཐམས་ཅད་བསྐྱེད་དང་བཟླས་པའི་རྣལ་འབྱོར་སྟོབས་ཀྱིས་དབྱིངས་སུ་དེངས་ཏེ་སྣང་བ་ལྷའི་འཁོར་ལོ། གྲགས་པ་སྔགས་ཀྱི་རང་སྒྲ །དྲན་རྟོག་ཕྱག་རྒྱ་ཆེན་པོ་སྟེ་སྐུ་གསུང་ཐུགས་རྡོ་རྗེ་གསུམ་གྱི་རང་བཞིན་དུ་འབད་རྩོལ་མེད་པར་ཤར་བ་ན། དང་པོ་བུམ་པའི་དབང་གི་ཡེ་ཤེས་ལམ་དུ་ཁྱེར་ནུས་ཤིང་བསྐྱེད་རིམ་ལ་བརྟན་ཐོབ་རྩལ་རྫོགས་གོམས་པ་མཐར་ཕྱིན་ཏུ་གྱུར་པ་ཡིན་ནོ། །གཉིས་པ་བརྟེན་པ་རྫོགས་པའི་རིམ་པ་ལ་གསུམ། སྔ་ཕྱིའི་མཚམས་སྦྱར་བ། གོ་དོན་གྱི་འབྲེལ་དགོད་པ། བསྒོམ་དོན་དམིགས་པའི་གནད་སོ་སོར་བཤད་པའོ། །དང་པོ་ནི། དེ་ལྟར་བསྐྱེད་རིམ་རྟེན་བྱས་ནས༔ བརྟེན་པ་བདེ་སྟོང་ལྷན་སྐྱེས་ཀྱི༔ ཡེ་ཤེས་རྒྱུད་ལ་འཆར་བའི་ཕྱིར༔ མན་ངག་རྫོགས་པའི་རིམ་པ་ནི༔ ཞེས་གསུངས་ཏེ། ཇི་སྐད་བཤད་པ་དེ་ལྟ་བུའི་བསྐྱེད་རིམ་ཉིད་ཀྱིས་རྟེན་བྱས་ནས། དེ་ལ་བརྟེན་པ་བདེ་སྟོང་ལྷན་ཅིག་སྐྱེས་པའི་ཡེ་ཤེས་རྒྱུད་ལ་འཆར་བའི་ཕྱིར་དུ་ཟབ་མོའི་མན་ངག་རྫོགས་པའི་རིམ་པ་རྣམས་རིམ་བཞིན་བསྟན་པར་བྱའོ། །ཞེས་སོ། གཉིས་པ་གོ་དོན་གྱི་འབྲེལ་དགོད་པ་ནི། བདག་བྱིན་བརླབ་ཀྱི་ཏིང་འཛིན་གྱིས༔ ཡིད་ཀྱི་རྣམ་རྟོག་དག་པར་བྱེད༔ སྣ་ཚོགས་རྡོ་རྗེའི་རྣལ་འབྱོར་གྱིས༔ རླུང་གི་རྒྱུ་བ་དབུ་མར་བཅད༔ ཛཱ་ལནྡྷ་རའི་འབར་འཛག་གིས༔ རྩ་ཁམས་ཤིན་སྦྱངས་བདེ་བས་ཁྱབ༔ ནོར་བུ་འགེངས་པ་ལ་བརྟེན་ནས༔ བདེ་ཆེན་དཔེ་ཡི་ཡེ་ཤེས་དྲངས༔ མཐར་ཐུག་བསམ་མི་ཁྱབ་པ་ཡིས༔ དོན་གྱི་ལྷན་སྐྱེས་མངོན་དུ་འགྱུར༔ ཅེས་པ་སྟེ། རིམ་པ་དང་པོ་བདག་བྱིན་རླབས་ཀྱི་ཏིང་ངེ་འཛིན་ལ་བརྟེན་ནས་ཡིད་ཀྱི་རྣམ་ཤེས་ཡུལ་ལ་འཇུག་པའི་རྣམ་རྟོག་དག་པར་བྱེད། གཉིས་པ་སྣ་ཚོགས་རྡོ་རྗེའི་རྣལ་འབྱོར་ལ་བརྟེན་ནས་སྲོག་རྩོལ་རླུང་གི་རྒྱུ་བ་དབུ་མའི་དབྱིངས་སུ་བཅད། གསུམ་པ་ཛཱ་ལནྡྷ་རའི་འབར་འཛག་ལ་བརྟེན་ནས་རྩ་ཁམས་ཀྱི་མདུད་པ་གྲོལ་ཞིང་ལུས་སེམས་ཤིན་ཏུ་སྦྱངས་པའི་བདེ་བས་ཁྱབ། བཞི་པ་ནོར་བུ་འགེངས་པ་ལ་བརྟེན་ནས་རྒྱུའི་ཐིག་ལེ་ལ་རང་དབང་ཐོབ་ནས་བདེ་ཆེན་དཔེའི་ཡེ་ཤེས་རྒྱུད་ལ་དྲང་། ལྔ་པ་རིམ་པ་ཀུན་གྱི་མཐར་ཐུག་བསམ་མི་ཁྱབ་པའི་རྣལ་འབྱོར་གྱི་དོན་འཕོ་མེད་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་ནས་རྡོ་རྗེ་འཆང་གི་གོ་འཕང་ལ་རེག་པར་བྱའོ། །དེའང་དྲིལ་བུ་རིམ་ལྔའི་གཞུང་ཡོངས་གྲགས་ལས། ནོར་བུ་འགེངས་པ་གསུམ་པ། ཛཱ་ལནྡྷ་ར་བཞི་པར་བཞག་ཀྱང་འདིར་དེ་གཉིས་གོ་ལྡོག་པའི་རྒྱུ་མཚན་མཆོག་དབང་གསུམ་གྱི་ལམ་འབྲེལ་བསྒྲིགས་ནས་རིམ་གྱིས་འཁྲིད་པའི་དབང་དུ་བཏང་། གྲུབ་ཆེན་གྱི་གཞུང་དུ་རིམ་པ་རེ་རེ་བཞིན་གྱིས་མཐར་ཐུག་གི་འབྲས་བུ་འགྲུབ་པར་གསུངས་པས་དབང་པོ་རྣོ་འབྲིང་བརྟུལ་པོའི་ངོ་སྐལ། གཅིག་ཅར། ཐོད་རྒལ། རིམ་གྱིས་པ་གསུམ་དུ་འགྱུར་བ་ཡིན་པས་རིམ་གྱིས་པ་དང་འདི་གཉིས་གཅིག་གོ །གསུམ་པ་སྒོམ་དོན་དམིགས་པའི་གནད་ལ་རིམ་པ་ལྔ། བདག་བྱིན་རླབས། སྣ་ཚོགས་རྡོ་རྗེ། ཛཱ་ལནྡྷ་ར། ནོར་བུ་འགེངས་པ། བསམ་མི་ཁྱབ་པའི་རྣལ་འབྱོར་རོ། །དང་པོ་ལ་གསུམ། མཚན་མེད་ཀྱི་རྣལ་འབྱོར། མཚན་བཅས་ཀྱི་རྣལ་འབྱོར། དེ་ལས་ཉམས་མྱོང་ཇི་ལྟར་འཆར་བའི་ཚུལ་ལོ། །དང་པོ་ནི། དེ་ལ་རིམ་པ་དང་པོ་ནི༔ དབང་པོ་རྣོན་པོའི་རྣལ་འབྱོར་པས༔ བདེ་བའི་སྟན་ལ་ལུས་གནད་བསྲང༔ སྔོན་འགྲོའི་རིམ་པས་རྒྱུད་སྦྱངས་ཏེ༔ བླ་མའི་ཐུགས་དང་རང་གི་སེམས༔ དབྱེར་མེད་མ་བཅོས་གཉུག་མའི་ངང༔ ཚོགས་དྲུག་སྣང་བ་གང་ཤར་ཡང༔ སྤང་བླང་བསལ་བཞག་ལས་འདས་པའི༔ རྣམ་པར་མི་རྟོག་ངང་མདངས་བསྐྱང༔ ཞེས་པ་སྟེ། རྫོགས་པའི་རིམ་པ་ལྔར་བཤད་པ་དེ་ལས་རིམ་པ་དང་པོ་བདག་བྱིན་རླབས་ཀྱི་ཏིང་ངེ་འཛིན་ནི། སྔོན་སྦྱངས་ཅན་གྱི་གང་ཟག་དབང་པོ་རྣོན་པོའི་རྣལ་འབྱོར་པ་རྣམས་ཀྱིས། སྦྱོར་བ་བདེ་བའི་སྟན་ལ་འདུག་ཅིང་ལུས་གནད་སྤྱི་མཐུན་བསྲང་། སྐྱབས་སེམས་བླ་མའི་རྣལ་འབྱོར་སོགས་སྔོན་འགྲོའི་རིམ་པས་རྒྱུད་སྦྱངས་ཏེ། དངོས་གཞི་བླ་མའི་ཐུགས་དང་རང་གི་སེམས་དབྱེར་མེད་དུ་བསྲེས་ལ་བཟོ་བཅོས་ཀྱིས་མ་བསླད་པར་རང་བབ་གཉུག་མ་ཁྱབ་གདལ་ཆེན་པོའི་ངང་དུ་བཞག །དེའི་ཚེ་མིག་གི་ཡུལ་དུ་གཟུགས་སོགས་ཚོགས་དྲུག་གི་སྣང་བ་སྣ་ཚོགས་གང་ཤར་ཡང་དགའ་དང་མི་དགའ་ལྟ་བའི་ཆགས་སྡང་གི་རྟོག་པ་སྐད་ཅིག་ཀྱང་མ་ཞུགས་པས་མཚོན་སྤང་བླང་དང་བསལ་བཞག་གི་དགག་སྒྲུབ་ཐམས་ཅད་ལས་འདས་པའི་རྣམ་པར་མི་རྟོག་པ་ཆོས་ཉིད་ཀྱི་ངང་མདངས་བསྐྱང་བར་བྱའོ། །གཉིས་པ་མཚན་བཅས་ཀྱི་རྣལ་འབྱོར་ནི། དབང་པོ་འབྲིང་དང་རྟུལ་པོ་དག༔ དེ་ཡིས་གནས་སུ་མ་བཏུབ་ན༔ རང་ཉིད་པདྨ་བཛྲ་ཡབ༔ དྭངས་གསལ་རྙོག་མེད་ཐུགས་ཀ་རུ༔ ཟླ་བའི་གདན་ལ་ཨཾ་དམར་སྐྱ༔ མི་ཤིགས་ཐིག་ལེས་མཚན་པར་བསྒོམ༔ སྟོང་གསལ་ཟུང་འཇུག་ཏི་ལ་ཀར༔ རྩེ་གཅིག་སེམས་གཏད་ཡེངས་མེད་འཇོག༔ དབང་ཤེས་ཡུལ་ལ་འཕོ་བ་ན༔ མིག་ཏུ་རྣམ་ཤེས་རྒྱུ་བའི་ཚེ༔ གནས་དེར་ཐིག་ལེ་དཀར་པོར་གསལ༔ དེ་བཞིན་རྣ་བར་ཐིག་ལེ་ནག༔ སྣར་སེར་ལྕེ་ཡི་འདོམས་རྩར་དམར༔ རྡོ་རྗེའི་བུ་གར་ལྗང་གུར་བསྒོམ༔ དེ་ལ་སེམས་བཟུང་རྟོག་མེད་འཇོག༔ མཐར་ནི་ཚོགས་དྲུག་དབང་ཤེས་ཡུལ༔ དབྱེར་མེད་རྩོལ་བྲལ་ངང་དུ་ཀློད༔ བུམ་པ་ཅན་གྱི་སྦྱོར་བ་ཡིས༔ རླུང་སེམས་ཐིག་ལེར་བརྟན་པར་བཅིང༔ ཞེས་པ་སྟེ། གང་ཟག་དབང་པོ་འབྲིང་དུ་གྱུར་པ་དང་བརྟུལ་པོ་རྣམས་མཚན་མེད་ཀྱི་ཏིང་ངེ་འཛིན་དེ་ཡིས་སེམས་ཇི་བཞིན་གནས་སུ་མ་བཏུབ་ན་མཚན་བཅས་ཀྱི་རྣལ་འབྱོར་བསྒོམས་ལ་སེམས་འཛིན་པར་བྱ་སྟེ། སྔོན་འགྲོ་གོང་བཞིན་སོང་ནས། རང་ཉིད་པདྨ་བཛྲ་ཡབ་རྐྱང་གི་སྐུ་དྭངས་གསལ་རྙོག་པ་མེད་པར་གསལ་བའི་ཐུགས་ཀར་ཟླ་བའི་གདན་ལ་ཡི་གེ་ཨཾ་དམར་སྐྱའི་ཁོག་པར་མི་ཤིགས་པའི་ཐིག་ལེ་དམར་སྐྱ་ཡུངས་འབྲུ་ཙམ་གྱིས་མཚན་པར་བསྒོམས་ལ་སྟོང་གསལ་དབྱེར་མེད་ཟུང་དུ་འཇུག་པའི་ཐིག་ལེ་ལ་སེམས་རྩེ་གཅིག་ཏུ་གཏད་དེ་ཡེངས་པ་མེད་པར་ཅི་གནས་སུ་འཇོག །ཐུན་རེ་རེ་བཞིན་གསལ་འདེབས་དང་སེམས་འཛིན་སྤེལ་ནས་གནས་པ་ལ་བརྟན་པ་ཐོབ་པར་བྱའོ། །འདི་སྐབས་དྲིལ་བུ་རིམ་ལྔའི་ཁྲིད་ཕལ་ཆེར་དུ་ཐིག་ལེ་དམར་སྐྱ་སྒོམ་པ་ཙམ་ལས་མ་གསུངས་ཀྱང་འདིར་སྲོག་མི་ཤིགས་པའི་ཐིག་ལེ་མཚོན་བྱེད་ཀྱི་རྟེན་ཨཾ་དམར་སྐྱའི་ཁོག་པར་མཚོན་བྱ་བརྟེན་པ་ཐིག་ལེ་དམར་སྐྱའི་རྣམ་པར་བསྒོམས་པས་རླུང་སེམས་གཉིས་ཀ་འཆིང་བའི་རྟེན་འབྲེལ་ཁྱད་པར་ཅན་ཡོད་གསུངས། དེ་ནས་དབང་པོ་སྒོ་ལྔའི་ཤེས་པ་ཡུལ་སོ་སོ་ལ་འཕོ་ཞིང་རྒྱུ་བ་དང་སྦྱར་ཏེ་བསྒོམ་པ་ནི། ཡུལ་གཟུགས་ལ་བརྟེན་ནས་མིག་ཏུ་རྣམ་པར་ཤེས་པ་རྒྱུ་བའི་ཚེ་མིག་གི་གནས་སུ་རེ་ཞིག་ཐིག་ལེ་དཀར་པོ་ཞིག་གསལ་བཏབ་ལ་སེམས་ཅི་གནས་སུ་བཟུང་ཞིང་མཐར་རྟོག་མེད་ཀྱི་ངང་དུ་འཇོག །དེ་བཞིན་དུ། རྣ་བར་རྣམ་ཤེས་རྒྱུ་བ་ན་རྣ་བ་གཉིས་སུ་ཐིག་ལེ་ནག་པོ། སྣ་གཉིས་སུ་རྣམ་ཤེས་རྒྱུ་བ་ན་སྣ་བུག་གཉིས་སུ་ཐིག་ལེ་སེར་པོ། ལྕེ་ལ་རྣམ་ཤེས་རྒྱུ་བའི་ཚེ་ལྕེའི་འདོམ་རྩར་ཐིག་ལེ་དམར་པོ། གསང་གནས་སུ་རྣམ་ཤེས་རྒྱུ་བའི་ཚེ་རྡོ་རྗེའི་བུ་གར་ཐིག་ལེ་ལྗང་གུ་བསྒོམས་ཏེ་དེ་དག་ལ་སེམས་བཟུང་ཞིང་རྟོག་མེད་དུ་འཇོག་པ་སྔར་ལྟར་བྱ། གང་གི་ཚེ་ནའང་མཐར་ཚོགས་དྲུག་གི་དབང་པོ་རྣམ་ཤེས་ཡུལ་སྣང་གསུམ་ཀའང་རང་བཞིན་སྟོང་པ་ཉིད་ཀྱི་ངང་དུ་གདོད་ནས་དབྱེར་མེད་དུ་ཤེས་པས་རྩོལ་བྲལ་གྱི་ངང་དུ་ཀློད་ལ་བཞག །རླུང་བུམ་པ་ཅན་སྦྱོར་བ་བཞི་ལྡན་དུ་བཟུང་ལ་རླུང་སེམས་ཀྱི་འཕོ་བ་མཐའ་དག་མི་ཤིགས་པའི་ཐིག་ལེའི་དབྱིངས་སུ་བརྟན་ཅིང་འགྱུར་བ་མེད་པར་བཅིང་ངོ་། །གསུམ་པ་དེ་ལས་ཉམས་མྱོང་ཇི་ལྟར་འཆར་ཚུལ་ནི། དེ་ལྟར་རྩེ་གཅིག་གོམས་པ་ལས༔ ཡིད་ཀྱི་གཟུང་འཛིན་རྟོག་ཚོགས་ཞི༔ མངོན་པར་ཤེས་པ་དྲུག་ཐོབ་ཅིང༔ སྣང་རིག་སྟོང་པ་ཟུང་འཇུག་པའི༔ ཡེ་ཤེས་རྒྱུད་ལ་འཆར་བར་འགྱུར༔ ཞེས་པ་སྟེ། དེ་ལྟར་བདག་བྱིན་རླབས་ཀྱི་རིམ་པ་དབང་པོ་དང་མཐུན་པར་རྩེ་གཅིག་ཏུ་བསྒོམས་ཤིང་བརྟན་པར་གྱུར་པ་ལས། ཡིད་ཀྱི་རྣམ་པར་ཤེས་པ་གཟུང་འཛིན་གཉིས་སུ་འཁྲུལ་པའི་རྟོག་ཚོགས་ཐམས་ཅད་འཇམ་ཉལ་གྱིས་ཞི། མིག་གི་མངོན་ཤེས་རྩོལ་མེད་དུ་འཆར་བ་སོགས་དབང་པོའི་མངོན་པར་ཤེས་པ་དྲུག་ཐོབ་ཅིང་། ཕྱིའི་སྣང་བ་དང་ནང་གི་རིག་པ་གཉིས་པོ་སྟོང་པ་ཉིད་ཀྱི་ངང་དུ་རོ་མཉམ་ཟུང་དུ་འཇུག་པའི་ཡེ་ཤེས་ཆེན་པོ་རྒྱུད་ལ་འཆར་བར་འགྱུར་རོ། །གཉིས་པ་སྣ་ཚོགས་རྡོ་རྗེའི་རིམ་པ་ལ་བཞི། རྩ་བའི་དམིགས་པ། ཡན་ལག་གི་དམིགས་པ། དེ་ལས་ཉམས་མྱོང་ཇི་ལྟར་འཆར་བའི་ཚུལ། བོགས་འབྱིན་གྱི་ཏིང་ངེ་འཛིན་འབྲས་བུ་ཇི་ལྟར་འཆར་བ་དང་བཅས་པའོ། །དང་པོ་ལ་གཉིས། སྦྱོར་བ་དང་དངོས་གཞིའོ། །དང་པོ་ནི། རིམ་པ་གཉིས་པའི་རྣལ་འབྱོར་ནི༔ ལུས་གནད་བསྲང་ཞིང་རླུང་རོ་བསལ༔ དྷཱུ་ཏཱི་འོད་ཀྱི་རང་བཞིན་བསྒོམ༔ སྲོག་རྩོལ་ཁ་སྦྱར་དྲག་ཏུ་གཅུན༔ ཞེས་པ་སྟེ། རིམ་པ་གཉིས་པ་སྣ་ཚོགས་རྡོ་རྗེའི་རྣལ་འབྱོར་ནི། རྩ་བའི་དམིགས་པ་སྦྱོར་བ་བདེ་བའི་སྟན་ལ་ལུས་གནད་ལེགས་པར་བསྲང། རླུང་རོ་ལན་གསུམ་བསལ། རང་ཉིད་ལྷར་གསལ་བའི་ལུས་ཀྱི་དབུས་སུ་རྩ་ཨ་བ་དྷཱུ་ཏཱི་ཕྱི་དཀར་ལ་ནང་དམར་བ་འོད་ཀྱི་རང་བཞིན་ཅན་ཁང་སྟོང་དུ་ཀ་བ་བཙུགས་པ་ལྟ་བུ་བསྒོམ། སྦྱོར་བ་བཞི་ལྡན་གྱི་བུམ་ཅན་བཟུང་ལ་སྲོག་རྩོལ་ཁ་སྦྱར་ཏེ་དབུ་མའི་ནང་དུ་སེམས་གཏད་ལ་རླུང་དྲག་ཏུ་གཅུན་ནོ། །གཉིས་པ་དངོས་གཞི། དབུ་མའི་ཡས་སྣ་སྤྱི་བོའི་སྟེང༔ སྣ་ཚོགས་རྡོ་རྗེ་ལྟེ་བ་མཐིང༔ དེ་ནང་ཨ་ལས་ཆོས་འབྱུང་དང༔ ཧཱུྃ་ལས་རྡོ་རྗེ་རྩེ་ལྔ་པའི༔ ལྟེ་བར་ཟླ་སྟེང་ཧཱུྃ་ཡིག་ནི༔ དཀར་དམར་མདངས་ཅན་དེ་ཉིད་དང༔ མཐར་ནི་ཧཱུྃ་གི་ཐིག་ལེ་ལ༔ རྩེ་གཅིག་སེམས་བཟུང་མཉམ་པར་གཞག༔ དེ་ལས་རླུང་སེམས་གཡོ་བ་ན༔ ཧཱུྃ་གི་ཐིག་ལེའི་འོད་ཟེར་དང༔ རླུང་ཉིད་དྷཱུ་ཏཱིའི་ནང་དུ་སོན༔ བདེ་བའི་ཡེ་ཤེས་སྐྱེས་པར་བསྒོམ༔ དེ་བཞིན་གསང་བའི་གནས་སུ་ཡང༔ སྣ་ཚོགས་རྡོ་རྗེ་ཆོས་འབྱུང་སོགས༔ བསྒོམ་དང་སེམས་འཛིན་སྔར་ལྟར་བྱ༔ ཞེས་པས། དངོས་གཞིའི་དམིགས་པ་ནི། ས་བོན་དང་བཅས་པའི་སྣ་ཚོགས་རྡོ་རྗེའི་རིམ་པ་སྟེ། སྟོང་ར་དབུ་མ་དང་བཅས་པའི་ཡས་སྣ་སྤྱི་བོའི་སྟེང་དུ་སྣ་ཚོགས་རྡོ་རྗེ་ཕྱོགས་བཞིའི་རྭ་ཤར་དཀར། བྱང་ལྗང་། ནུབ་དམར། ལྷོ་སེར། དབུས་མཐིང་གའི་ལྟེ་བ་སྦྲུབས་སྟོང་དུ་གནས་པའི་ནང་དུ་ཆོས་འབྱུང་གྲུ་གསུམ་དམར་སྐྱ །དེའི་དབུས་སུ་ཧཱུྃ་ལས་རྡོ་རྗེ་རྩེ་ལྔ་པ་དམར་སྐྱ་ཉལ་ཐབས་སུ་གནས་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་དཀར་ལ་དམར་བའི་མདངས་ཅན་གསལ་བཏབ་པ་དེ་ཉིད་ལ་སེམས་ཅི་གནས་སུ་བཟུང་། མཐར་ཧཱུྃ་གི་ཐིག་ལེ་ཁོ་ནར་རྩེ་གཅིག་ཏུ་སེམས་བཟུང་ལ་མཉམ་པར་གཞག །དེ་ལས་རླུང་སེམས་གཡོ་ཞིང་མི་གནས་པར་གྱུར་པའི་ཚེ་ན་ཧཱུྃ་གི་ཐིག་ལེ་ལས་བྱུང་བའི་འོད་ཟེར་དང་རླུང་གི་རྒྱུ་བ་གཉིས་ཀ་དྷཱུ་ཏཱིའི་ནང་དུ་སོན་ཏེ་བདེ་བའི་ཡེ་ཤེས་ཚད་དུ་སྐྱེས་པར་བསམས་ལ་བུམ་པ་ཅན་དྲག་ཏུ་བཟུང་བ་ནི་འགྲེའོ། །དེ་བཞིན་དུ་དབུ་མའི་མར་སྣ་གསང་བའི་གནས་སུ་ཡང་སྣ་ཚོགས་རྡོ་རྗེ་ཆོས་འབྱུང་ནང་རྡོ་རྗེ་རྩེ་ལྔའི་ལྟེ་བར་ཟླ་སྟེང་ཧཱུྃ་ཡིག་བཅས་གསལ་བ་དང་། མཐར་ཧཱུྃ་གི་ཐིག་ལེ་ལ་སེམས་བཟུང་ཞིང་མཉམ་པར་འཇོག་པ་སྔར་ལྟར་བྱའོ། །གཉིས་པ་ཡན་ལག་གི་དམིགས་པས་བོགས་དབྱུང་བ་ནི། དབང་ཤེས་ཡུལ་ལ་འཇུག་པའི་ཚེ༔ དེ་དང་དེ་རུ་སྤྲོས་ཏེ་བསྒོམ༔ ཞེས་པ་སྟེ་དབང་པོ་ལ་བརྟེན་ཏེ་རྣམ་པར་ཤེས་པ་རང་རང་གི་ཡུལ་ལ་འཇུག་པར་གྱུར་པའི་ཚེ་གང་དུ་འཇུག་པ་དེ་དང་དེ་རུ་སྤྲོས་ཏེ་བསྒོམ་པར་བྱ་དགོས་པས། དཔེར་ན་མིག་ཤེས་གཟུགས་ལ་འཇུག་པ་ན་མིག་འབྲས་གཉིས་ཀྱི་དབུས་སུ་སྣ་ཚོགས་རྡོ་རྗེ་སོགས་སྔར་ལྟར་བསྒོམས་ལ་སེམས་བཟུང་། དེས་འགྲེས་ཏེ་རྣ་བའི་བུ་ག་གཉིས། སྣའི་འདོམ་སོ། ལྕེའི་རྩ་བ། རྟགས་ཀྱི་རྩེ་མོ་རྣམས་སུ་སྤྲོས་ཏེ་བསྒོམས་ལ་རླུང་སེམས་གཅུན་ནོ། གསུམ་པ་དེ་ལས་ཉམས་མྱོང་ཇི་ལྟར་འཆར་ཚུལ་ནི། འབད་པས་ཉམས་སུ་བླངས་པ་ལས༔ རླུང་སེམས་ཟིན་པའི་ཕྱི་རྟགས་སུ༔ དུ་བ་ལ་སོགས་ཉམས་འཆར་ཞིང༔ ནང་དུ་རྟགས་ཅན་འོད་གསལ་གྱི༔ ཡེ་ཤེས་རྒྱུད་ལ་མྱོང་བར་འགྱུར༔ ཞེས་པ་སྟེ། དེ་ལྟར་ཐུན་བཞི་ལ་སོགས་པར་འབད་པས་ཉམས་སུ་བླངས་པར་བྱས་པ་ལས་དབུ་མར་རླུང་སེམས་ཟིན་པའི་ཕྱི་རྟགས་སུ་དུ་བ་དང་མེ་ཁྱེར་ལ་སོགས་པ་དབང་པོའི་ཡུལ་དུ་སྣང་བའི་ཉམས་བརྟན་པོར་འཆར་ཞིང་། ནང་དུ་རྟགས་ཅན་འོད་གསལ་ནམ་མཁའ་ལྟ་བུའི་ཡེ་ཤེས་སེམས་ཀྱི་རྒྱུད་ལ་མྱོང་བར་འགྱུར་རོ། །བཞི་པ་བོགས་འབྱིན་གྱི་ཏིང་འཛིན་འབྲས་བུ་ཇི་ལྟར་འཆར་བ་དང་བཅས་པ་ནི། དེ་ཡི་བོགས་འབྱིན་ཏིང་འཛིན་ནི༔ ས་བོན་མེད་པའི་བསྒོམ་ཚུལ་ཏེ༔ ལུས་བསྲང་རླུང་རོ་གཡས་ནས་བསལ༔ མཛོད་སྤུར་ཉི་མའི་དཀྱིལ་འཁོར་བསམ༔ གཡོན་ནས་བསལ་བས་དེ་ཡི་སྟེང༔ ཟླ་བའི་དཀྱིལ་འཁོར་ལམ་སྟེ་གྱུར༔ གཉིས་ཀ་དུས་མཉམ་བསལ་བ་ཡིས༔ དེ་སྟེང་དབུས་མཐིང་ཕྱོགས་མདོག་གི༔ ཐིག་ལེ་གསལ་བཏབ་རིམ་པ་བཞིན༔ མ་ཡེངས་སེམས་གཏད་མཉམ་པར་འཇོག༔ རླུང་ནི་ཕྱི་རུ་ཐུབ་ཚད་བཟུང༔ མི་ཐུབ་ནང་དུ་དལ་བུས་རྔུབས༔ དེ་བཞིན་གསང་བའི་རྩེ་མོ་དང༔ དབང་པོའི་སྒོར་ཡང་སྤྲོས་ཏེ་བསྒོམ༔ རླུང་སེམས་ལས་སུ་རུང་བ་ལས༔ ལྷ་ཡི་མིག་སོགས་ཡེ་ཤེས་འཆར༔ ཞེས་པ་སྟེ། ས་བོན་དང་བཅས་པའི་སྣ་ཚོགས་རྡོ་རྗེའི་རིམ་པ་བསྒོམ་པ་དེའི་བོགས་འབྱིན་པའི་ཏིང་ངེ་འཛིན་ནི་ས་བོན་མེད་པའི་སྣ་ཚོགས་རྡོ་རྗེའི་སྒོམ་ཚུལ་ཡིན་ཏེ། དེའང་ལུས་གནད་བསྲངས་ལ་རླུང་རོ་སྣ་བུག་གཡས་ནས་བསལ་བའི་རྐྱེན་གྱིས་སྨིན་མཚམས་མཛོད་སྤུར་ཉི་མའི་དཀྱིལ་འཁོར་ཞིག་དམར་ལམ་གྱིས་བྱུང་བར་བསམ། གཡོན་ནས་བསལ་བས་དེའི་སྟེང་དུ་ཟླ་བའི་དཀྱིལ་འཁོར་དཀར་ལམ་སྟེ་གྱུར་པར་བསམ། སྣ་བུག་གཉིས་ཀ་ནས་དུས་མཉམ་དུ་བསལ་བས་ཉི་ཟླའི་སྟེང་དུ། དབུས་མཐིང་། ཤར་དཀར། ལྷོ་སེར། ནུབ་དམར། བྱང་ལྗང་གུའི་མདོག་ཅན་གྱི་ཐིག་ལེ་ལྔ་ཚོམ་འོད་འཚེར་བ་གསལ་བཏབ་ལ་དབུས་སོགས་རིམ་པ་བཞིན་དུ་དམིགས་པའི་རྟེན་བྱས་ཏེ་མ་ཡེངས་པར་སེམས་གཏད་ལ་ཡུན་རིང་དུ་མཉམ་པར་འཇོག །དེའི་སྐབས་སུ་རླུང་ཡང་ཕྱི་རུ་ཐུབ་ཚད་བཟུང་། མི་ཐུབ་པ་ན་ནང་དུ་དལ་བུས་རྔུབས། དེ་བཞིན་དུ་རླུང་གཡས་གཡོན་དུས་མཉམ་གསུམ་དུ་བསལ་བའི་རྐྱེན་གྱིས་གསང་བའི་རྩེ་མོར་ཉི་ཟླའི་དཀྱིལ་འཁོར་དང་ཐིག་ལེ་ལྔ་ཚོམ་གསལ་བཏབ་ལ་སེམས་གཏད་ཅིང་མཉམ་པར་གཞག །དེས་འགྲེས་ཏེ་མིག་སོགས་དབང་པོའི་སྒོ་གཡས་སུ་ཡང་སྔར་ལྟར་སྤྲོས་ཏེ་བསྒོམ་པར་བྱའོ། །དེ་ལྟར་ཡང་བསྒོམས་པས་བརྟན་པའི་རང་འབྲས་སུ། རླུང་སེམས་ལས་སུ་རུང་བའམ་རང་དབང་ཐོབ་པར་གྱུར་ཅིང་། དེ་ལས་ལྷའི་མིག་ལ་སོགས་པ་དབང་ཤེས་རྣམ་པར་དག་པའི་ཡེ་ཤེས་རྩོལ་མེད་དུ་འཆར་བར་འགྱུར་རོ། །གསུམ་པ་ཛཱ་ལནྡྷ་རའི་རིམ་པ་ལ་གསུམ། སྦྱོར་བ། དངོས་གཞི། རྗེས་ཉམས་མྱོང་འཆར་བའི་ཚུལ་ལོ། །དང་པོ་ནི། རིམ་པ་གསུམ་པའི་རྣལ་འབྱོར་ནི༔ རང་གི་ལྟེ་འོག་སོར་བཞིའི་ཐད༔ རྩ་གསུམ་སྦུབས་གཅིག་གྱུར་པའི་སྣེར༔ ཕྱི་དཀར་ནང་དམར་ཆོས་འབྱུང་དབུས༔ དབུས་མཐིང་ཕྱོགས་མདོག་ཐིག་ལེ་གསལ༔ སྲོག་རྩོལ་བུམ་ཅན་སྦྱོར་བས་གཅུན༔ ཞེས་གསུངས་ཏེ། རིམ་པ་གསུམ་པ་ཛཱ་ལནྡྷ་རའི་རྣལ་འབྱོར་བསྒོམ་པའི་ཚུལ་ནི། ཐོག་མར་ལུས་གནད་བསྲང་། རང་ཉིད་ཕྱི་བླ་མ་བདེ་མཆོག་གི་སྐུ་སྟོང་གསལ་ཕྲུ་མ་ཕུས་བཏབ་པ་ལྟ་བུའི་ནང་གི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། ཡར་སྣ་སྤྱི་བོར་ཟུག་པ། དེའི་གཡས་སུ་རོ་མ་དམར་མོ། གཡོན་དུ་རྐྱང་མ་དཀར་མོ་གཉིས་དབུ་མ་ལས་བལྡབ་འགྱུར་གྱིས་ཕྲ་བའི་ཡར་སྣེ་སྣ་བུག་གཉིས་སུ་ཟུག་པ། མར་སྣ་ལྟེ་འོག་སོར་བཞི་ཙམ་གྱི་ཐད་དུ་རྩ་གསུམ་ཀ་སྦུབ་གཅིག་ཏུ་གྱུར་པའི་སྣེར། ཕྱི་དཀར་ལ་ནང་དམར་བའི་ཆོས་འབྱུང་གྲུ་གསུམ་པའི་དབུས་སུ་དབུས་མཐིང་ཤར་དཀར་སོགས་ཕྱོགས་ཀྱི་མདོག་ཅན་གྱི་ཐིག་ལེ་ལྔ་ཚོམ་གསལ་ལེགས་པར་བཏབ་ལ། སྲོག་རྩོལ་རྔུབས་ཏེ་སྦྱོར་བ་བཞི་ལྡན་གྱི་རླུང་བུམ་པ་ཅན་བཟུང་ལ་གཅུན་ནོ། །གཉིས་པ་དངོས་གཞི་ནི། ལྔ་ལྡན་ཕྲ་མོའི་མེ་ལྕེ་སྦར༔ དེ་ལ་སེམས་གཏད་གོམས་པ་ན༔ མེ་རྣམས་ཆེར་འབར་འོད་ཟེར་ལྔ༔ གཅིག་འདྲེས་སྣ་བུག་གཡས་ནས་ཐོན༔ ཕྱོགས་བཅུའི་བདེ་གཤེགས་ཐམས་ཅད་ཀྱི༔ ཤངས་བུག་གཡས་ཞུགས་ལྟེ་བར་སོན༔ ཡེ་ཤེས་མེ་དང་ལྷན་ཅིག་འབར༔ འཁོར་ལོའི་གནས་བཞིར་བཞུ་བཏུལ་གྱིས༔ བྱང་སེམས་དཀར་དམར་རྣམ་པས་དྲངས༔ ཤངས་བུག་གཡོན་ནས་ཕྱིར་ཐོན་ཏེ༔ རང་གི་སྣ་བུག་གཡོན་ནས་ཞུགས༔ སྤྱི་བོའི་དྷཱུ་ཏཱིའི་ནང་བརྒྱུད་དེ༔ ལྟེ་བའི་མེ་ལ་ཐིམ་པ་ཡིས༔ བདེ་སྟོང་དྲོད་ཀྱི་ཡེ་ཤེས་སྐྱེས༔ སླར་ཡང་མེ་ལྔ་ཆེར་འབར་བས༔ ཡེ་ཤེས་བྱང་སེམས་ཞུ་ཞིང་ཁོལ༔ སྤྱི་གཙུག་ནས་བཟུང་རྐང་སོར་བར༔ འབར་འཛག་རྒྱུན་གྱིས་རབ་ཏུ་གང༔ དྲོད་དང་བདེ་བའི་དེ་ཁོ་ནར༔ རྩེ་གཅིག་སེམས་བཟུང་བུམ་ཅན་བརྟན༔ འཇའ་ཚོན་ལྟ་བུའི་སྐུ་ཐོབ་བསམ༔ ཞེས་པ་སྟེ། རླུང་གི་རྐྱེན་གྱིས། ཐིག་ལེ་ལས་ཁ་དོག་ལྔ་ལྡན་གྱི་མེ་ལྕེ་ཕྲ་མོ་སྦར་བ་ལ་ཡུན་རིང་དུ་སེམས་གཏད། དེ་ལ་ལེགས་པར་གོམས་པ་ན། མེ་ལྕེ་རྣམས་ཆེར་འབར་བས་རྩ་གསུམ་པོ་གང་། འོད་ཟེར་ལྔ་པོ་གཅིག་ཏུ་འདྲེས་ཏེ་སྣ་བུག་གཡས་པ་ནས་ཐོན། ཕྱོགས་བཅུའི་སངས་རྒྱས་ཀྱི་ཞིང་ཁམས་ཀུན་ཏུ་ཁྱབ། བདེ་བར་གཤེགས་པ་ཐམས་ཅད་ཀྱི་ཤངས་བུག་གཡས་པ་ནས་ཞུགས་ཏེ་སྐུའི་ལྟེ་བར་སོན་པས་གཏུམ་མོ་ཡེ་ཤེས་ཀྱི་མེ་དང་ལྷན་ཅིག་ཏུ་འབར། སྤྱི་མགྲིན་སྙིང་ལྟེའི་འཁོར་ལོའི་གནས་བཞིར་འབར་འཛག་བཞུ་བཏུལ་གྱིས་བསྐུལ་བའི་བྱང་ཆུབ་སེམས་ཀྱི་ཆུ་རྒྱུན་དཀར་དམར་གྱི་རྣམ་པས་དྲངས་ཏེ་ཤངས་བུག་གཡོན་པ་ནས་ཕྱིར་ཐོན། རང་གི་སྣ་བུག་གཡོན་པ་ནས་ཞུགས་ཏེ་སྤྱི་བོའི་དྷཱུ་ཏཱིའི་ནང་ནས་བརྒྱུད་ལྟེ་བའི་མེ་ལྔ་ལ་ཐིམ་པས་བདེ་སྟོང་ཟུང་དུ་འཇུག་པའི་དྲོད་ཀྱི་ཡེ་ཤེས་ཆེར་སྐྱེས། སླར་ཡང་ལྟེ་བའི་མེ་ལྔ་པོ་ཆེས་ཆེར་འབར་བས་དབུ་མའི་ནང་གང་། ཡེ་ཤེས་ཀྱི་རང་བཞིན་བྱང་ཆུབ་སེམས་ཀྱི་ཐིག་ལེ་བསྐུལ། དེ་ཉིད་ཞུ་ཞིང་ཁོལ་བས་སྤྱི་གཙུག་ནས་བརྒྱུད་མགྲིན་སྙིང་ལྟེ་བ་གསང་བའི་གནས་ཐམས་ཅད་དུ་ཁྱབ་མཐར་ལག་པ་དང་རྐང་སོར་གྱི་རྩེ་མོའི་བར་འབར་བས་ལུས་བདུད་རྩིའི་རྒྱུན་གྱིས་རབ་ཏུ་གང་བར་མོས་ལ་དྲོད་དང་བདེ་བའི་རང་ངོ་དེ་ཁོ་ན་ཉིད་ལ་རྩེ་གཅིག་ཏུ་སེམས་བཟུང་ཞིང་བུམ་ཅན་གྱི་སྦྱོར་བས་བརྟན་པར་བྱས་པས་གདོས་བཅས་ཀྱི་ལུས་རེག་ཐོགས་ཀྱི་སྒྲིབ་པ་ལས་གྲོལ་ཏེ་སྣང་སྟོང་འཇའ་ཚོན་ལྟ་བུའི་སྐུ་ཐོབ་པར་བསམས་ལ་མཉམ་པར་གཞག་གོ །གསུམ་པ་རྗེས་ཉམས་མྱོང་འཆར་ཚུལ་ནི། ཐིག་ལེ་གང་དུ་བརྟན་པ་ལས༔ རྩ་མདུད་གྲོལ་ཞིང་བདེ་ཆེན་སྐྱེ༔ ལམ་གྱི་ཡོན་ཏན་རྒྱུད་ལ་འཆར༔ མི་ཤིགས་འཇའ་ལུས་སྐུ་ཐོབ་ན༔ གསང་དབང་ལམ་ཁྱེར་རིམ་གསུམ་གྱི༔ གོམས་པ་མཐའ་རུ་ཕྱིན་པ་འོ༔ ཞེས་པ་སྟེ། དེ་ལྟར་རླུང་དང་གཏུམ་མོ་འབར་འཛག་གི་སྦྱོར་བ་ལ་གོམས་པས་ཐིག་ལེ་ལུས་ཀྱི་གནས་གང་དང་གང་དུ་བརྟན་པ། དེའི་རྩ་མདུད་གྲོལ་ཅིང་བདེ་བ་ཆེན་པོའི་ཡེ་ཤེས་སྐྱེ། དེ་ལས་ལམ་གྱི་མངོན་པར་རྟོགས་པའི་ཡོན་ཏན་རྣམས་རྒྱུད་ལ་རིམ་པར་འཆར་ཏེ་མཐར་ཐུག་ཅིས་ཀྱང་མི་ཤིགས་པའི་འཇའ་ལུས་རྡོ་རྗེའི་སྐུ་ཐོབ་པར་འགྱུར་བ་སྟེ། དེ་ལྟར་ན་གསང་བའི་དབང་གི་ལམ་ཁྱེར་རིམ་པ་གསུམ་པའི་རྣལ་འབྱོར་གྱི་གོམས་པ་མཐའ་རུ་ཕྱིན་པར་གྱུར་པའོ། །བཞི་པ་ནོར་བུ་འགེངས་པའི་རིམ་པ་ལ་གསུམ། སྦྱོར་བ། དངོས་གཞི། རྗེས་ཉམས་མྱོང་ཇི་ལྟར་འཆར་བའི་ཚུལ་ལོ། །དང་པོ་ནི། ཡིད་རིག་དམ་ཚིག་ཕྱག་རྒྱ་ནི༔ ལུས་བསྲང་འབྱུང་བའི་རླུང་དུག་བསལ༔ རང་དང་ཡིད་དུ་འོང་བ་ཡི༔ རིག་མ་བདེ་ཆེན་ཡབ་ཡུམ་དང༔ རྩ་གསུམ་འཁོར་ལོ་ལྔ་ལྡན་གསལ༔ མཁའ་གསང་རྡོ་རྗེ་པདྨ་ཡི༔ བུ་གར་ཧཱུྃ་ཕཊ་ཡི་གེས་དགག༔ ལྟེ་བར་ཧོཿསེར་སྙིང་གར་ཧཱུྃ༔ མཐིང་གསལ་མགྲིན་པར་ཨཱཿདམར་པོ༔ སྤྱི་བོར་ཨོཾ་དཀར་སོ་སོ་ལས༔ སྔགས་ཀྱི་ཕྲེང་བ་འཕྲོ་ཞིང་འདུ༔ བདེ་སྟོང་དགའ་བཞིའི་ངོ་བོར་བསམ༔ མཐའ་ཡས་སེམས་ཅན་སྒྲོལ་བའི་སླད༔ བདེ་ཆེན་མངོན་དུ་བྱ་བའི་བློས༔ སྙོམས་པར་ཞུགས་པའི་རྗེས་ཆགས་མེས༔ སྤྱི་བོའི་ཧཾ་ལས་བདེ་བའི་རྒྱུན༔ གནས་བཞིའི་འཁོར་ལོར་སོན་པ་ཡིས༔ དགའ་མཆོག་ཁྱད་པར་ལྷན་སྐྱེས་ཀྱི༔ ཡེ་ཤེས་བསམ་མི་ཁྱབ་པ་སྐྱེས༔ རྡོ་རྗེ་ནོར་བུའི་བར་དུ་དགང༔ བདེ་ལ་སེམས་བཟུང་མི་རྟོག་བཞག༔ ཧཱུྃ་གི་གཞུ་ལ་རླུང་གི་མདའ༔ བཙན་ཐབས་དམིགས་པའི་རྒྱུད་སྦྱར་ཏེ༔ འཁྲུལ་འཁོར་རྩོལ་བས་གྱེན་དུ་དྲང༔ མས་བརྟན་དགའ་བཞིར་མཉམ་གཞག་བྱ༔ ཁྱབ་པར་དགྲམ་ཞིང་མི་ཉམས་བརྟན༔ ཞེས་གསུངས་ཏེ། རིམ་པ་བཞི་པ་ནོར་བུ་འགེངས་པའི་རྣལ་འབྱོར་ལ། ཐོག་མར་སྔོན་དུ་འགྲོ་བ་ཡིད་རིག་དམ་ཚིག་གི་ཕྱག་རྒྱ་ལ་བསླབ་པ་ནི། བདེ་བའི་གདན་ལ་ལུས་གནད་ལེགས་པར་བསྲང་། འབྱུང་བའི་རླུང་དུག་རྣམས་བསལ་བར་མོས་ལ་རླུང་རོ་ལན་གསུམ་བསལ། རང་གི་མདུན་དུ་རིག་མ་གཞོན་མཛེས་མཚན་ཉིད་དང་ལྡན་པ་ཞིག་འཁོད་པར་བསམ། རང་ཉིད་བདེ་མཆོག་པདྨ་བཛྲ་དང་རིག་མ་མནྡྷཱ་ར་བ་ཡབ་ཡུམ་གྱི་སྐུར་གསལ་བའི་ལུས་ནང་རྩའི་གཙོ་མོ་གསུམ། སྤྱི་བོ་བདེ་ཆེན་འཁོར་ལོ་རྩ་འདབ་སོ་གཉིས། མགྲིན་པ་ལོངས་སྤྱོད་འཁོར་ལོ་རྩ་འདབ་བཅུ་དྲུག །སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི། གསང་གནས་བདེ་སྤྱོད་འཁོར་ལོ་རྩ་འདབ་སོ་གཉིས་ཏེ་འཁོར་ལོ་ལྔ་པོ་རྣམས་ཀྱང་གསལ་གདབ། ཡབ་ཀྱི་གསང་གནས་རྡོ་རྗེ་དཀར་པོ་རྩེ་ལྔ་པའི་བུ་གར་ཧཱུྃ་དང་ཡུམ་གྱི་མཁའ་པདྨ་དམར་པོ་འདབ་མ་གསུམ་པའི་ཟེའུ་འབྲུར་ཕཊ་ཀྱི་ཡི་གེས་བཀག་པ། ཡབ་ཡུམ་གཉིས་ཀའི་ལྟེ་བར་ཧོཿསེར་པོ། སྙིང་གར་ཧཱུྃ་མཐིང་གསལ། མགྲིན་པར་ཨཱཿདམར་པོ། སྤྱི་བོར་ཨོཾ་དཀར་པོ། གནས་བཞིའི་ཡིག་འབྲུ་སོ་སོ་ལས་སྒྲུབ་པའི་གསང་སྔགས་ཡིག་འབྲུ་ཉེར་གཅིག་པའི་ཕྲེང་བ་འཕྲོ་ཞིང་འདུ་བ། བདེ་སྟོང་དབྱེར་མེད་དགའ་བ་བཞིའི་ངོ་བོར་གནས་པར་བསམ། མུ་མཐའ་ཡས་པའི་མཁའ་ཁྱབ་ཀྱི་སེམས་ཅན་མ་ལུས་པ་རྣམ་གྲོལ་གཏན་གྱི་བྱང་ཆུབ་མཆོག་ལ་སྒྲོལ་བའི་སླད་དུ་བདེ་བ་ཆེན་པོའི་ཡེ་ཤེས་མངོན་དུ་བྱའོ་སྙམ་པ་སྟེ་ལྷ་སྔགས་ཆོས་ཀྱི་འདུ་ཤེས་གསུམ་དང་ལྡན་པའི་བློས་ཡབ་ཡུམ་སྙོམས་པར་ཞུགས་པའི་རྗེས་ཆགས་ཀྱི་མེས་བསྐུལ་ཏེ། སྤྱི་བོའི་ཧཾ་ལས་བྱང་སེམས་བདེ་བའི་རྒྱུན་ཆར་ལྟར་དུ་བབས། སྤྱི་བོ་ལ་སོགས་པའི་གནས་བཞིའི་འཁོར་ལོ་རྣམས་སུ་སོན་པས་རིམ་པ་བཞིན་དགའ་བ། མཆོག་དགའ། ཁྱད་པར་དགའ་བ། ལྷན་ཅིག་སྐྱེས་པའི་བདེ་ཆེན་གྱི་ཡེ་ཤེས་བསམ་གྱིས་མི་ཁྱབ་པ་སྐྱེས། བྱང་སེམས་ཀྱིས་ལུས་ཀྱི་ནང་ཐམས་ཅད་ཁྱབ། རྡོ་རྗེ་ནོར་བུའི་བར་དུ་གང་བར་བསམ། བདེ་བ་ལ་སེམས་བཟུང་ཞིང་རྣམ་པར་མི་རྟོག་པའི་ངང་དུ་བཞག །ཧ་ཅང་བདེ་བ་ཆེས་ནས་ཕྱིར་འཛག་པའི་ཉམས་བྱུང་ན་ཐིག་ལེ་གྱེན་དུ་བཟློག་དགོས་པས། ངག་ཏུ་ཧཱུྃ་རིང་པོ་འདྲེན་པ་ནི་གཞུ་དང་མཚུངས་ལ། གསང་རླུང་གྱེན་དུ་དྲངས་པས་སོག་སྦུབས་ནས་ཆུ་དྲངས་པ་ལྟར་ཐིག་ལེ་དབུ་མ་ནས་གྱེན་དུ་ཟློག་པར་བསམ་པས་བཙན་ཐབས་ཀྱི་དམིགས་པའི་རྒྱུད་སྦྱར་ལ། འཁྲུལ་འཁོར་ཡན་ལག་གླིང་བཞི་སྡུད། ལྟོ་བ་རི་རབ་ལ་སྦྱར། ལྕེ་རྩེ་རྐན་ལ་གཏད། མིག་གྱེན་ཏུ་ལྡོག །རྡོ་རྗེའི་བུ་ག་དམ་དུ་བཅིར་ཅིང་རླུང་ཕྱིར་འཕེན་པའི་རྩོལ་བས་གྱེན་དུ་དྲངས་ལ། འཁོར་ལོ་སོ་སོར་མས་བརྟན་གྱི་དགའ་བཞི་འདྲེན་ཚུལ་དམིགས་པ་སྤྱི་ལྟར་ལ་མཐར་ལྷན་སྐྱེས་ཀྱི་བདེ་བ་ལ་སེམས་བཟུང་སྟེ་མཉམ་པར་གཞག །སེང་གེ་རྣམ་རོལ་གྱི་འཁྲུལ་འཁོར་ལ་བརྟེན་ཏེ་ཡུར་བ་ལ་ཆུ་དྲངས་པ་བཞིན་རྩ་གནས་སོ་སོར་ཁྱབ་པར་དགྲམ། མཐར་མི་ཉམས་ཤིང་བརྟན་པར་བྱ་བའི་སླད་དུ་ཐིག་ལེ་བདེ་བའི་ཉམས་དང་བཅས་པ་སྙིང་གའི་ཧཱུྃ་ལ་བསྟིམས་ནས་བདེ་རླུང་སེམས་གསུམ་ཡི་གེ་བཅས་དབྱེར་མེད་པར་རྣམ་པར་མི་རྟོག་པའི་ངང་དུ་བཞག་ཅིང་སྙིང་གའི་བུམ་ཅན་ནམ་ལྟེ་བའི་བུམ་ཅན་གཟུང་ལ་དམིགས་པ་སྙིང་གར་གཏད་དོ། །གཉིས་པ་དངོས་གཞི་ལ་གཉིས། ལས་རྒྱའི་བདེ་བ་ལ་བསླབ་པ་དངོས་དང་། མཐའ་རྟེན་ཆོས་ཀྱི་ཕྱག་རྒྱས་བདེ་སྟོང་དབྱེར་མེད་དུ་བསྲེ་བའོ། །དང་པོ་ལ་གཉིས། སྦྱོར་བ་དང་། དངོས་གཞིའོ། །དང་པོ་ནི། དེ་ལྟའི་འཛིན་འགྲེམ་དབང་ཐོབ་ནས༔ དངོས་རིག་ལས་ཀྱི་ཕྱག་རྒྱ་ནི༔ པདྨ་ཅན་སོགས་རིགས་བཟང་པོ༔ བཅུ་དྲུག་ཉེར་ལྔ་མན་ཆད་ཀྱི༔ ན་ཚོད་དར་ཞིང་ཡིད་འོང་བ༔ རྫས་སྔགས་དམིགས་པའི་ལྕགས་ཀྱུས་དགུག༔ དྲང་ངེས་ཆོས་བཤད་བློ་ཁ་བསྒྱུར༔ དབང་གིས་སྨིན་བྱས་དམ་ཚིག་དབོག༔ རིམ་གཉིས་ཉམས་མྱོང་རྒྱུད་ལ་བསྐྱེད༔ ཅེས་གསུངས་ཏེ། དེ་ལྟ་བུའི་ཡིད་རིག་ལ་བརྟེན་ནས་ཐིག་ལེ་འཛིན་འདྲེན་ལ་རང་དབང་ཐོབ་ནས་གོམས་པ་བརྟན་པར་གྱུར་པའི་ཚེ། དངོས་རིག་ལས་ཀྱི་ཕྱག་རྒྱ་ལ་བསླབ་པ་ནི། པདྨ་ཅན་ལ་སོགས་པ་རིགས་ཅན་ལྔ་གང་རུང་གི་མཚན་བཟང་པོ་དང་ལྡན་པའི་བུད་མེད་ལོ་བཅུ་དྲུག་ནས་ཉེར་ལྔ་མན་ཆད་ཀྱི་ན་ཚོད་དར་ལ་གཞོན་ཅིང་མཛེས་སྡུག་ཡིད་དུ་འོང་བ་བཙལ་ལ། རྫས་དང་སྔགས་དང་དམིགས་པའི་འཁྲུལ་འཁོར་གྱི་ལྕགས་ཀྱུས་དགུག་ལ་དབང་དུ་གྱུར་པ་ན། ཐོག་མར་དྲང་ངེས་ཀྱི་ཆོས་བཤད་དེ་བློ་ཁ་དགེ་བའི་ཕྱོགས་སུ་བསྒྱུར། སྣོད་དུ་རུང་བ་ན་དཀྱིལ་འཁོར་དུ་བཅུག་ཅིང་དབང་བཞི་རྫོགས་པར་བསྐུར་བས་རྒྱུད་སྨིན་པར་བྱས་ལ་ཐུན་མོང་དང་ཁྱད་པར་གྱི་དམ་ཚིག་འབོགས་ཏེ་བསྲུང་དུ་གཞུག །ཐོག་མར་བསྐྱེད་རིམ་ལ་གོམས་པ་བརྟེན་ནས་རྫོགས་རིམ་ལ་གཞུག་སྟེ་རིམ་པ་གཉིས་ཀྱི་ཉམས་མྱོང་ཅི་རིགས་རྒྱུད་ལ་བསྐྱེད་པར་བྱའོ། །གཉིས་པ་དངོས་གཞི་ནི། དེ་ལྟར་ལེགས་པར་སྦྱངས་བྱས་མཐར༔ བཅུད་ལེན་ཐབས་ཀྱིས་ཀུནྡ་སྤེལ༔ ཁྲུས་བྱས་རྒྱན་གདགས་བཀུ་མཉེ་བྱ༔ ཤིན་ཏུ་དབེན་པའི་གསང་ཁང་དུ༔ བདེ་བའི་གདན་ལ་ཡབ་ཡུམ་འཁོད༔ འཛུམ་པའི་མདངས་ཕྱུང་ཟུར་གྱིས་བལྟ༔ ཆགས་པའི་གཏམ་སྨྲ་དྲི་ལ་བསྣོམ༔ མ་མཆུ་ལྕེ་ཡི་སྦྲང་རྩི་གཞིབ༔ འོ་བྱ་ལུས་སེམས་བདེ་བ་བསྐྱེད༔ རེ་རེ་ལ་ཡང་སེམས་གཟུང་ཞིང༔ ཚོགས་དྲུག་ལྷུག་པའི་ངང་དུ་བཞག༔ དེ་ནས་འདུ་ཤེས་གསལ་བཏབ་ལ༔ རྡོ་རྗེ་པདྨར་རེག་པ་དང༔ དལ་བུས་བསྲུབས་ཤིང་བསྐྱོད་པ་ལས༔ དབབ་དང་བསྐྱིལ་དང་གྱེན་དུ་བཟློག༔ ཁྱབ་པར་དགྲམ་པ་གོང་ལྟར་བྱ༔ བདེ་སྟོང་བསམ་མི་ཁྱབ་པའི་དབྱིངས༔ ཀ་དག་ངང་དུ་ཡུན་རིང་བཞག༔ ཅེས་པ་སྟེ། དེ་ལྟར་རིག་མ་ཉིད་རྒྱུད་ལེགས་པར་སྦྱངས་པར་བྱས་པའི་མཐར་ཉམས་ལེན་དངོས་གཞི་ལ་འཇུག་པའི་ཐོག་མར་སྨན་དང་ཟས་མཆོག་གི་བཅུད་ལེན་སྦྱོར་བའི་ཐབས་བསྟེན་ནས་ཀུནྡ་བྱང་སེམས་སྤེལ། རིག་མ་ལ་ཁྲུས་བྱས་ཤིང་རྒྱན་གདགས། ལུས་ཀྱི་གནས་རྣམས་སུ་བཀུ་མཉེ་བྱ། དེ་ནས་མིས་མཐོང་ཚོར་མེད་པའི་གནས་ཤིན་ཏུ་དབེན་པའི་གསང་ཁང་ཉིད་དུ་བདེ་བའི་གདན་འཇམ་ཞིང་འབོལ་བ་ལ་ཡབ་ཡུམ་གཉིས་འཁོད། ཕན་ཚུན་འཛུམ་པའི་མདངས་ཕྱུང་བ་དང་། དགའ་བའི་ཟུར་མིག་གིས་བལྟ་བ་དང་། ཆགས་པའི་གཏམ་སྣ་ཚོགས་སྨྲ་བ་དང་། ལུས་ཀྱི་དྲི་སྣོམ་ཞིང་མ་མཆུ་དང་ལྕེའི་སྦྲང་རྩི་འཇིབས་པ་དང་འོ་བྱ་བ་རྣམས་ཀྱིས་ལུས་སེམས་ལ་བདེ་བ་བསྐྱེད་ཅིང་དེ་རྣམས་རེ་རེ་ལའང་བདེ་བའི་རང་ངོ་ལ་བལྟས་ཏེ་སེམས་བཟུང་། ཚོགས་དྲུག་གི་འཆར་སྒོ་ཐམས་ཅད་འཛིན་མེད་དུ་ལྷུག་པའི་ངང་དུ་བཞག་གོ །དེ་ནས་ཡིད་རིག་གི་སྐབས་ལྟར་འདུ་ཤེས་གསུམ་གྱི་རྣལ་འབྱོར་གསལ་བཏབ་ལ་རྡོ་རྗེས་པདྨ་ལ་རེག་པ་དང་། མཐར་དལ་བུས་བསྲུབས་ཤིང་ཅུང་ཟད་བསྐྱོད་པས་ཐིག་ལེ་རིམ་པར་དབབ་པ་དང་། ནོར་བུར་སོན་པ་ན་བསྐྱིལ་བ་དང་། དེ་ནས་གྱེན་དུ་ཟློག་པ་རྣམས་ཀྱིས་ཡས་བབས་དང་མས་བརྟན་གྱི་དགའ་བ་བཞི་ངོས་ཟིན་ཅིང་ཉམས་སུ་མྱོང་བར་བྱས་ལ་རྩ་གནས་རྣམས་སུ་ཁྱབ་པར་དགྲམ་པའི་དམིགས་པ་དང་འཁྲུལ་འཁོར་གྱི་སྦྱོར་བ་གོང་ལྟར་བྱས་པའི་མཐར། བདེ་སྟོང་ཟུང་འཇུག་བསམ་གྱིས་མི་ཁྱབ་པའི་དབྱིངས་ཀ་དག་ཆེན་པོའི་ངང་དུ་ཡུན་རིང་དུ་མཉམ་པར་གཞག་པར་བྱའོ། །གཉིས་པ་མཐའ་རྟེན་ཆོས་རྒྱ་དང་བསྲེ་བ་ནི། མཐའ་རྟེན་ཆོས་ཀྱི་ཕྱག་རྒྱ་ནི༔ སྙོམས་འཇུག་བྱ་བ་ཟིན་མ་ཐག༔ རྡོ་རྗེ་ནོར་བུའི་རྩེ་མོ་ནས༔ རིག་པ་ཧཱུྃ་ཡིག་དམར་སྐྱའི་གཟུགས༔ ཐུར་སེལ་རླུང་གིས་གནས་བཞིར་དྲངས༔ སྤྱི་བོའི་ཧཾ་དང་དབྱེར་མེད་བསྟིམ༔ དམིགས་བསམ་བརྗོད་བྲལ་རང་ངོ་བསྐྱང༔ ཚོགས་དྲུག་སྣང་བ་གང་ཤར་ཀུན༔ བདེ་སྟོང་ཉམས་དང་དབྱེར་མེད་པར༔ ཡུལ་དང་ཡུལ་ཅན་རོ་མཉམ་པའི༔ བརྟུལ་ཞུགས་སྤྱོད་པས་རབ་ཏུ་བསྲེ༔ ཞེས་པ་སྟེ། ལས་རྒྱའི་རྣལ་འབྱོར་གྱི་མཐའ་རྟེན་ཆོས་ཀྱི་ཕྱག་རྒྱ་ལ་བསླབ་པ་ནི། སྙོམས་འཇུག་གི་བྱ་བ་ཟིན་མ་ཐག་པར་རྡོ་རྗེ་ནོར་བུའི་རྩེ་མོ་ནས་རིག་པའི་ངོ་བོ་ཧཱུྃ་ཡིག་དམར་སྐྱའི་གཟུགས་སུ་གྱུར་པ་དེ་འོག་རླུང་བསྐུམས་པའི་རྐྱེན་གྱིས་ཐུར་སེལ་གྱི་རླུང་བསྐྱོད་པས་ལྟེ་བ། སྙིང་ག །མགྲིན་པ། སྤྱི་བོའི་གནས་བཞིར་གྱེན་དུ་དྲངས། སྤྱི་བོའི་ཧཾ་ཡིག་ལ་ཐིམ་པས་དབྱེར་མེད་དུ་གྱུར་པར་མོས་ལ། དམིགས་བསམ་བརྗོད་པ་ཀུན་དང་བྲལ་བའི་རང་ངོ་བསྐྱངས་ལ་ཅི་གནས་སུ་མཉམ་པར་བཞག །རྗེས་ཐོབ་གཟུགས་སྒྲ་སོགས་ཚོགས་དྲུག་གི་སྣང་བ་གང་ཤར་ཐམས་ཅད་བདེ་སྟོང་ཟུང་འཇུག་གི་ཉམས་དང་དབྱེར་མེད་པ་ཕྱིའི་ཡུལ་དང་ནང་གི་ཡུལ་ཅན་ཆུ་ལ་ཆུ་བཞག་པ་ལྟར་རོ་མཉམ་ཆེན་པོའི་བརྟུལ་ཞུགས་ཀྱི་སྤྱོད་པས་རབ་ཏུ་བསྲེ་ཞིང་ལམ་དུ་བསླང་བར་བྱའོ། །གསུམ་པ་རྗེས་ཉམས་མྱོང་འཆར་བའི་ཚུལ་ནི། འབྲས་བུ་ཕྱག་རྒྱ་ཆེན་པོ་ནི༔ བདེ་བས་ཐབས་བྱས་སྟོང་པ་ཉིད༔ སོ་སོ་རང་གིས་རིག་པའི་ཚུལ༔ མྱོང་བ་ཡོད་ཀྱང་དམིགས་སུ་མེད༔ ཡིད་ཆེས་ཡོད་ཀྱང་སྨྲ་མི་བཏུབ༔ གཞོན་ནུ་མ་ཡི་བདེ་བ་བཞིན༔ ཤེས་དང་ཤེས་བྱ་རོ་གཅིག་པས༔ ཡེ་ཤེས་མངོན་སུམ་མཚོན་ནུས་པའི༔ ཉམས་མྱོང་རྒྱུད་ལ་སྐྱེས་པ་ན༔ ཤེར་དབང་ལམ་ཁྱེར་བདེ་བ་ཆེའི༔ གོམས་པ་མཐའ་རུ་ཕྱིན་པ་འོ༔ ཞེས་པ་སྟེ། དེ་ལྟར་རང་ལུས་དང་གཞན་ལུས་ལ་བསྟེན་ནས་ལྷན་ཅིག་སྐྱེས་པའི་བདེ་ཆེན་གྱི་ཡེ་ཤེས་བརྟན་པར་གྱུར་པའི་འབྲས་བུ་ཕྱག་རྒྱ་ཆེན་པོ་མངོན་དུ་གྱུར་པ་ན། བདེ་བས་ཐབས་བྱས་པའི་སྟོང་པ་ཉིད་པྲ་ཕབ་པའི་སྣང་བརྙན་ལྟ་བུ་སོ་སོ་རང་གི་རིག་པའི་ཚུལ་ལ་སེམས་ཀྱིས་མྱོང་བ་ཡོད་ཀྱང་ཚུལ་འདི་ལྟ་བུ་ཞེས་དམིགས་སུ་མེད་པ། རང་ལ་ཡིད་ཆེས་ཡོད་ཀྱང་ངག་གིས་སྨྲ་མི་བཏུབ་པ། དཔེར་ན་གཞོན་ནུ་མ་འཁྲིག་པའི་ཆོས་ལས་བྱུང་བའི་བདེ་བ་སྨྲ་མེད་ཉམས་སུ་མྱོང་བ་ཇི་བཞིན་པ་སྟེ། ཡུལ་ཅན་ཤེས་པ་དང་ཡུལ་ཤེས་བྱ་རོ་གཅིག་ཏུ་འདྲེས་པས་མཐར་ཐུག་ལྷན་ཅིག་སྐྱེས་པའི་ཡེ་ཤེས་མངོན་སུམ་དུ་མཚོན་ནུས་པའི་ཉམས་མྱོང་རྣལ་འབྱོར་པའི་རྒྱུད་ལ་སྐྱེས་པ་ན། གསུམ་པ་ཤེས་རབ་ཡེ་ཤེས་ཀྱི་དབང་ལམ་དུ་ཁྱེར་བའི་བདེ་བ་ཆེན་པོའི་གོམས་པ་མཐར་ཕྱིན་དུ་གྱུར་པའོ། །ལྔ་པ་བསམ་མི་ཁྱབ་པའི་རིམ་པ་ལ་བཞི། སྦྱོར་བ་རྗེས་གཞིག་གིས་འོད་གསལ་དུ་བསྡུ་བ། དངོས་གཞི་བསམ་མི་ཁྱབ་པའི་ངང་དུ་མཉམ་པར་གཞག་པ། རྗེས་ཉམས་མྱོང་འཆར་ཚུལ། བོགས་འབྱིན་ཟུང་འཇུག་གི་རྩལ་སྦྱང་བའོ། །དང་པོ་ནི། རིམ་པ་ལྔ་པའི་རྣལ་འབྱོར་ནི༔ རང་ཉིད་ཁྲག་འཐུང་ཡབ་ཡུམ་གསལ༔ སྙིང་གར་ཟླ་སྟེང་ཧཱུྃ་དམར་སྐྱ༔ འབར་བའི་ཕྲེང་བ་འཁྲིགས་པ་ལས༔ བདེ་བ་ཆེན་པོའི་འོད་ཟེར་འཕྲོས༔ ལུས་གང་གཟུང་འཛིན་རྟོག་པ་སྦྱངས༔ སླར་འཕྲོས་ཁམས་གསུམ་ཐམས་ཅད་ཁྱབ༔ བདེ་ཆེན་ངོ་བོར་མེར་མེར་གཡོས༔ ཆུ་ཟླ་འཇའ་ཚོན་ལྟ་བུའི་ངང༔ མེ་ལོང་ཧས་བཏབ་ཡལ་བ་བཞིན༔ ཧཱུྃ་ཡིག་ནཱ་དའི་བར་དུ་ཐིམ༔ ནཱ་ད་ཤིན་ཏུ་ཕྲ་བ་ཡང༔ གློག་ལྟར་སྟོང་པ་ཉིད་དུ་སྦྱང༔ ཞེས་གསུངས་ཏེ། རིམ་པ་ལྔ་པ་བསམ་མི་ཁྱབ་པའི་རྣལ་འབྱོར་ནི། སྦྱོར་བ་རང་ཉིད་པདྨ་ཁྲག་འཐུང་བདེ་མཆོག་ཡབ་ཡུམ་གྱི་སྐུར་གསལ་བའི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་དམར་སྐྱ་འབར་བའི་འོད་ཟེར་གྱི་ཕྲེང་བ་རབ་ཏུ་འཁྲིགས་པར་མོས་ལ་སེམས་བཟུང་། དེ་ལས་བདེ་བ་ཆེན་པོའི་འོད་ཟེར་དཔག་ཏུ་མེད་པ་འཕྲོས་ཏེ་ལུས་ཀྱི་ནང་ཐམས་ཅད་གང་། གཟུང་འཛིན་གྱིས་བསྡུས་པའི་རྟོག་པ་ཐམས་ཅད་སྦྱངས། སླར་འོད་ཟེར་མུ་མེད་པ་འཕྲོས། ཁམས་གསུམ་གྱི་སྣོད་བཅུད་ཐམས་ཅད་ལ་ཁྱབ་པས་དེ་རྣམས་བདེ་བ་ཆེན་པོའི་ངོ་བོར་གྱུར་ཏེ་མེར་མེར་ཤིག་ཤིག་གཡོས། ཆུ་ཟླ་དང་འཇའ་ཚོན་ལྟ་བུ་སྣང་སྟོང་སྒྱུ་མའི་རང་བཞིན་གྱུར། མཐར་མེ་ལོང་ལ་ཧས་བཏབ་པ་མཐའ་ནས་དབུས་སུ་ཡལ་བ་བཞིན་རིམ་གྱིས་འདུས་ཏེ་ཐུགས་ཀའི་ཧཱུྃ་ལ་ཐིམ། དེའང་ཞབས་ཀྱུ་ནས་ནཱ་དའི་བར་དུ་བསྡུས་ཤིང་། ནཱ་ད་ཤིན་ཏུ་ཕྲ་བའང་བར་སྣང་ལ་གློག་གི་རི་མོ་ཡལ་བ་ལྟར་སྟོང་པ་ཉིད་དུ་སྦྱང་ངོ་། །གཉིས་པ་དངོས་གཞི་བསམ་མི་ཁྱབ་པའི་ངང་དུ་མཉམ་པར་གཞག་པ་ནི། གཟུང་འཛིན་ཆོས་ཀུན་མི་དམིགས་པའི༔ སྟོང་ཉིད་ངང་དུ་ཆམས་ཏེ་བཞག༔ ཅེས་པ་སྟེ་དངོས་གཞི་རྗེས་གཞིག་གིས་སྣོད་བཅུད་འོད་གསལ་དབྱིངས་སུ་བསྡུས་ནས་ཕྱི་གཟུང་བ་དང་ནང་འཛིན་པས་བསྡུས་པའི་ཆོས་ཐམས་ཅད་ཅིར་ཡང་མི་དམིགས་པ་ཀ་དག་སྟོང་པ་ཉིད་སྤྲོས་བྲལ་ནམ་མཁའ་ལྟ་བུའི་ངང་དུ་ཆམས་ཀྱིས་བཞག་པ་ཅི་གནས་སུ་བསྐྱང་བར་བྱའོ། །གསུམ་པ་རྗེས་ཉམས་མྱོང་འཆར་ཚུལ་ནི། མཚོན་བྱེད་ཐབས་ལས་སྐྱེས་པ་ཡི༔ སྟོང་ཉམས་ཙམ་དུའང་མི་རྟོག་པར༔ སྟོང་པ་དང་ནི་མི་སྟོང་དང༔ དབུ་མར་འཛིན་པ་ཀུན་སྤངས་ནས༔ མཁའ་མཉམ་རྡུལ་བྲལ་དོན་དམ་པའི༔ ལྷན་ཅིག་སྐྱེས་པ་མངོན་གྱུར་ན༔ བཞི་པའི་ལམ་ཁྱེར་བསམ་མི་ཁྱབ༔ གོམས་པ་མཐའ་རུ་ཕྱིན་པ་འོ༔ ཞེས་པ་སྟེ། ཐབས་ལམ་དང་རྗེས་གཞིག་སོགས་མཚོན་བྱེད་ཀྱི་ཐབས་རྣམས་ལས་སྐྱེས་པའི་གོ་མྱོང་གི་སྟོང་ཉམས་ཙམ་དུའང་མི་རྟོག་པར། སྟོང་པ་དང་མི་སྟོང་པ་དང་དེ་གཉིས་མཉམ་གྱི་དབུ་མར་འཛིན་པ་ཐམས་ཅད་སྤངས་ནས། ནམ་མཁའ་དང་མཉམ་ཞིང་དྲི་མའི་རྡུལ་དང་བྲལ་བའི་དོན་དམ་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་པའི་ན་དབང་བཞི་པ་ལམ་དུ་ཁྱེར་བའི་བསམ་མི་ཁྱབ་ཀྱི་རིམ་པ་ལ་གོམས་པ་མཐའ་རུ་ཕྱིན་པར་གྱུར་པའོ། །བཞི་པ་འབྲས་བུ་ཕྱག་རྒྱ་ཆེན་པོ་ནི། དེ་ལྟར་བསྒོམ་པའི་དུས་ཀུན་ཏུ༔ སྟོང་ཉམས་ཆེ་ན་ནཱ་ད་ལས༔ རླབས་བཞིན་སྣང་སྟང་ལྷ་སྐུར་ལྡང༔ སྣང་བའི་གཟུང་འཛིན་སྐྱེས་པ་ན༔ སྟོང་པར་སྦྱངས་ཏེ་མི་དམིགས་བཞག༔ སྣང་སྟོང་མཐའ་ལས་འདས་པ་ཡི༔ ཟུང་འཇུག་ཡེ་ཤེས་མངོན་གྲུབ་འགྱུར༔ ཅེས་པ་སྟེ། དེ་ལྟར་བསམ་མི་ཁྱབ་པའི་རིམ་པ་བསྒོམ་པའི་སྦྱོར་དངོས་རྗེས་ཀྱི་དུས་ཐམས་ཅད་དུ་སྟོང་ཉམས་ཤིན་ཏུ་ཆེ་ན་ནཱ་ད་ཕྲ་མོ་ལས་སྐད་ཅིག་གིས་ཆུ་ལས་རླབས་གཡོས་པ་བཞིན་སྣང་སྟོང་ཟུང་འཇུག་གི་ལྷ་སྐུར་ལྡངས་ལ་མཉམ་པར་གཞག །ཕྱི་རོལ་སྣང་བའི་དངོས་ཞེན་ཤུགས་ཆེ་བས་གཟུང་འཛིན་གྱི་རྟོག་པ་བར་མ་ཆད་དུ་སྐྱེས་པ་ན་རྗེས་གཞིག་གི་རྣལ་འབྱོར་གྱིས་སྟོང་པར་སྦྱངས་ཏེ་ཅིར་ཡང་མི་དམིགས་པར་བཞག །དེ་དག་ཉམས་ཚོད་དང་སྦྱར་ཏེ་སྤེལ་མར་སྦྱངས་པས་སྣང་སྟོང་གཉིས་ཀའི་མཐའ་ལས་འདས་པའི་ཟུང་འཇུག་གི་ཡེ་ཤེས་མངོན་སུམ་དུ་འགྲུབ་པར་འགྱུར་རོ། །རིམ་པ་ལྔ་པོ་དེ་རྣམས་གཅིག་རྗེས་སུ་གཅིག་མཐུད་ནས་ཉམས་སུ་ལེན་པ་ཡིན་ན་སྔོན་འགྲོ་ཐོག་མར་སོང་བ་དེ་ཀས་འཐུས། རེ་རེ་གཉིས་གཉིས་ལྟ་བུ་ཁོལ་འདོན་དུ་ཉམས་སུ་ལེན་པ་ཡིན་ན་སྔར་བཤད་པའི་སྔོན་འགྲོ་རྣམས་ཐུན་འགོ་ལ་སྦྱར་དགོས་པའང་ཤེས་པར་བྱའོ། །གསུམ་པ་རྗེས་ཀྱི་རིམ་པ་ལ་གཉིས། ཐུན་གྱི་རྗེས་རིམ་དང། ཁྲིད་ཀྱི་རྗེས་རིམ་མོ། །དང་པོ་ནི། ཐུན་འཇོག་པའི་སྐབས་རྣམས་སུ་ཐེག་ཆེན་ཐུན་མོང་མ་ཡིན་པའི་བསྔོ་སྨོན་གྱིས་རྒྱས་འདེབས་ཤིང་ཤིས་པ་བརྗོད། ཐུན་མཚམས་སྐབས་སུ་བབ་པའི་ལམ་ཁྱེར་ལ་འཇུག་པ་སོགས་སྤྱི་དང་མཐུན་ནོ། །གཉིས་པ་ཁྲིད་ཀྱི་རྗེས་རིམ་ལ་བཞི། དབང་པོ་རབ་ཚེ་འདི། འབྲིང་འཆི་ཁ། ཐ་མ་བར་དོའི་སྐྱེ་བ་བརྒྱུད་ནས་ལམ་གྱི་འབྲས་བུ་མངོན་དུ་བྱེད་ཚུལ། གདམས་པའི་ཆེ་བ་བརྗོད་པས་མཐའ་བསྡུ་བའོ། །དང་པོ་ནི། དེ་ལྟའི་རིམ་པ་རྣམ་ལྔ་ཡང༔ རབ་ཀྱིས་གཅིག་གིས་འགྲུབ་པ་སྟེ༔ འབྲིང་པོས་ཐོད་རྒལ་ཚུལ་དུ་འཆར༔ ཐ་མས་རིམ་གྱིས་སྔ་མ་ལ༔ ཉམས་མྱོང་བརྟན་ནས་ཕྱི་མར་འཇུག༔ ཡིད་གཡེང་སྤངས་ཏེ་མཐར་དབྱུང་བས༔ ཚེ་གཅིག་ཟུང་འཇུག་མངོན་དུ་བྱེད༔ ཅེས་གསུངས་ཏེ། དེ་ལྟ་བུའི་རྫོགས་པའི་རིམ་པ་ལྔ་པོ་དེའང་དབང་པོ་རབ་རྣམས་ཀྱིས་ལྔ་ཀ་མཐར་ཆགས་སུ་ཉམས་སུ་ལེན་མི་དགོས་པར་སྣ་ཚོགས་རྡོ་རྗེའམ་བསམ་མི་ཁྱབ་པའི་རིམ་པ་ལྟ་བུ་གཅིག་ཁོ་ནས་མཆོག་གི་དངོས་གྲུབ་འགྲུབ་པ་ཡིན་ལ། དབང་པོ་འབྲིང་པོས་རིམ་པ་གཉིས་སམ་གསུམ་ལ་སོགས་པ་དེའང་གོ་རིམ་མཐའ་གཅིག་ཏུ་ངེས་པ་མེད་པ་ཐོད་རྒལ་ཚུལ་དུ་འཇུག་པས་ཡེ་ཤེས་འཆར་བ་ཡིན་ལ། དབང་པོ་ཐ་མ་རྣམས་ཀྱིས་ནི་སྔ་མ་སྔ་མ་རིམ་གྱིས་ཉམས་མྱོང་བརྟན་པར་བྱས་ནས་ཕྱི་མ་ཕྱི་མ་ལ་འཇུག་དགོས་པ་ཡིན་ཞིང་། དེ་དག་གང་ཡང་ཡིད་ཀྱི་རྣམ་པར་གཡེང་བ་སྤངས་ཏེ་རྩེ་གཅིག་ཏུ་བརྩོན་འགྲུས་དྲག་པོ་རེས་འཇོག་མེད་པས་ཉམས་ལེན་མཐའ་རུ་དབྱུང་བར་བྱས་ན་ཚེ་གཅིག་ལུས་གཅིག་ཁོ་ནར་ཟུང་འཇུག་ཕྱག་རྒྱ་ཆེན་པོའི་ཡེ་ཤེས་ཀྱི་སྐུ་མངོན་དུ་བྱེད་པར་འགྱུར་རོ། །གཉིས་པ་དབང་འབྲིང་འཆི་ཁར་འབྲས་བུ་མངོན་དུ་བྱེད་ཚུལ་ནི། གལ་ཏེ་ཚེ་འདིར་མ་གྲུབ་ན༔ འཆི་ཁར་རང་ཉིད་གང་གོམས་པའི༔ ཏིང་འཛིན་བརྟན་པོ་གསལ་བཏབ་ནས༔ མི་རྟོག་ངང་དུ་མཉམ་གཞག་ན༔ འོད་གསལ་ཆོས་སྐུར་རོ་གཅིག་པའི༔ རྗེས་ཐོབ་ཟུང་འཇུག་རང་ཤར་འབྱུང༔ ཞེས་པ་སྟེ། གལ་ཏེ་དབང་པོ་སྐལ་པ་སྦྱང་བརྩོན་གྱི་སྟོབས་ཞན་པས་ཚེ་འདི་ལ་མཆོག་གི་འབྲས་བུ་གྲུབ་པར་མ་གྱུར་ན། འཆི་ཁའི་དུས་ལ་བབས་པའི་ཚེ་རང་ཉིད་སྔར་རིམ་པ་གང་ལ་གོམས་པའི་ཤུགས་ཆེ་བ་དེ་ཉིད་ཀྱི་ཏིང་ངེ་འཛིན་བརྟན་པར་གསལ་བཏབ་ནས་མཐར་མི་རྟོག་པའི་ངང་དུ་མཉམ་པར་གཞག་ན། ལམ་གྱི་འོད་གསལ་བུ་ལྟ་བུ་དང་གཞིའི་འོད་གསལ་མ་ལྟ་བུ་གཉིས་དབྱེར་མེད་དུ་འདྲེས་ནས་ཀ་དག་འོད་གསལ་ཆོས་ཀྱི་སྐུར་རོ་གཅིག་པའི་དབྱིངས་སུ་བྱང་ཆུབ་པར་འགྱུར་ཞིང་། དེའི་རྗེས་ཐོབ་ཉིད་ལ་མི་སློབ་པའི་ཟུང་འཇུག་ལྷ་སྐུ་ཕྱག་རྒྱ་ཆེན་པོར་རང་ཤར་བ་འབྱུང་ངོ། །གསུམ་པ་ཐ་མ་བར་དོའི་སྐྱེ་བ་བརྒྱུད་ནས་ལམ་འབྲས་མངོན་དུ་བྱེད་ཚུལ་ནི། དེར་ཡང་བརྟན་པ་མ་ཐོབ་ན༔ བར་དོར་བླ་མ་ལྷ་དང་ནི༔ གདམས་ངག་དྲན་པས་མཚམས་སྦྱར་ཏེ༔ ཟབ་མོའི་ཏིང་འཛིན་བརྟན་པ་ཡིས༔ རླུང་སེམས་ལྷ་ཡི་སྐུར་ཤར་ནས༔ མཁའ་སྤྱོད་ལ་སོགས་རིག་འཛིན་འགྲུབ༔ ཡང་ན་རྡོ་རྗེའི་ལུས་བཟུང་ནས༔ ལམ་གྱི་ལྷག་མ་མངོན་དུ་བྱེད༔ ཅེས་པ་སྟེ། དབང་བརྩོན་སོགས་ཤིན་ཏུ་དམན་པས་འཆི་ཁའི་སྐབས་དེར་ཡང་བརྟན་པ་ཐོབ་པར་མ་གྱུར་ན། སྲིད་པ་བར་དོར་རང་ཉིད་འཆི་བར་ངོ་ཤེས་པའི་སྐབས་སུ་སྔོན་གྱི་བླ་མ་དང་ལྷ་དང་གདམས་ངག་རྗེས་སུ་དྲན་པས་མཚམས་སྦྱར་བར་བྱས་ཏེ། སྔོན་གང་ལ་གོམས་པའི་ཟབ་མོའི་ཏིང་ངེ་འཛིན་སྒོམ་པར་བྱས་ན་སྐབས་དེར་ད་ལྟ་ལས་ཤེས་པ་བདུན་འགྱུར་གྱིས་གསལ་བས་ཡུན་ཐུང་ངུས་གོམས་པ་བརྟན་པོར་གྱུར་ནས་རླུང་སེམས་དབྱེར་མེད་ལྷའི་སྐུར་རང་ཤར་ནས་མཁའ་སྤྱོད་ཆེན་པོ་ལ་སོགས་པའི་རིག་པ་འཛིན་པ་འགྲུབ་པར་འགྱུར་ལ། ཡང་ན་འཆི་བ་མེད་པ་རྡོ་རྗེའི་ལུས་བཟུང་ནས་སྔར་མ་བགྲོད་པའི་ལམ་གྱི་ལྷག་མ་མངོན་དུ་བགྲོད་དེ་རྡོ་རྗེ་འཆང་པདྨ་བདེ་བ་མཆོག་གི་གོ་འཕང་མངོན་དུ་བྱེད་པར་འགྱུར་རོ། །བཞི་པ་གདམས་པའི་ཆེ་བ་བརྗོད་པས་མཐའ་བསྡུ་བ་ནི། དེ་ལྟ་བུ་ཡི་ལམ་རིམ་ནི༔ སྐལ་ལྡན་ཚེ་གཅིག་གྲོལ་བྱེད་པ༔ ཧེ་རུ་ཀ་དཔལ་དགྱེས་པའི་ལུང༔ མན་ངག་སྙིང་པོར་གདམས་པ་འོ༔ ས་མ་ཡ༔ ཞེས་གསུངས་ཏེ། རིམ་པ་གཉིས་ཀྱི་རྣལ་འབྱོར་གཞན་ལས་ཟབ་ཅིང་ཁྱད་པར་འཕགས་པ་བཤད་མ་ཐག་པ་དེ་ལྟ་བུའི་ལམ་གྱི་རིམ་པ་འདི་ནི། སྐལ་པ་དང་ལྡན་པའི་གང་ཟག་རྣམས་དུས་གཞན་ལ་ལྟོས་མི་དགོས་པ་ཚེ་གཅིག་གིས་གྲོལ་བར་བྱེད་པའི་མན་ངག་དུས་གསུམ་དུ་འབྱོན་པར་དཀའ་བ། ཀུན་བཟང་ཧེ་རུ་ཀ་བདེ་བ་མཆོག་དང་དཔལ་པདྨ་བཛྲ་དབྱེར་མེད་རབ་ཏུ་དགྱེས་པའི་ཞལ་གྱི་ལུང་བཟང་། རྒྱུད་ཐམས་ཅད་ཀྱི་དོན། ལུང་ཐམས་ཅད་ཀྱི་བཅུད། མན་ངག་ཐམས་ཅད་ཀྱི་སྙིང་པོའི་ཡང་སྙིང་ཕྱི་རབས་གདུལ་བྱ་སྐལ་ལྡན་རྣམས་ཀྱི་དོན་དུ་གདམས་པར་མཛད་ཅིང་། སྣོད་མིན་ལ་འཆོལ་བར་མི་སྤེལ་བའི་དམ་ཚིག་གི་རྒྱས་བཏབ་པའོ། །རྒྱུད་ཀྱི་ཁུངས་བཙུན་བླ་མའི་མན་ངག་ཟབ། །ཉེ་བརྒྱུད་སྨིན་གྲོལ་བྱིན་རླབས་ཁྱད་པར་འཕགས། །བླ་མ་ཡི་དམ་དབྱེར་མེད་གསང་ལམ་འདི། ཁྲིད་ཚུལ་བརྒྱ་སྟོང་དུ་མའི་ཆར་མི་ཉེ། །སྐལ་བཟང་མཐའ་དག་འདིར་ཞུགས་འདི་དོན་སྒོམས། །རིམ་གཉིས་མཐར་ཕྱིན་ཟུང་འཇུག་ཡེ་ཤེས་སྐུས། །འགྲོ་འདྲེན་ཕྲིན་ལས་རྟག་ཅིང་ཁྱབ་པ་ལས། །ཆོས་འདིའི་སྣང་བས་མཁའ་དབྱིངས་ཀུན་བརྡལ་ཤོག །ཅེས་བླ་མ་འཁོར་ལོ་བདེ་མཆོག་གི་རིམ་གཉིས་ཟབ་ཁྲིད་ཁྱད་པར་དུ་འཕགས་པ་འདིའང་༧ཁྱབ་བདག་གཏེར་ཆེན་བླ་མ་ཉིད་ནས་སྨིན་གྲོལ་གྱི་གདམས་པ་ཚངས་སྤྲུགས་སུ་བསྩལ་ཅིང་བཀའ་ལུང་གིས་རྗེས་སུ་གནང་བ་ལྟར། དུས་ཞབས་རིག་པ་འཛིན་པའི་གཟུགས་བརྙན་པདྨ་གར་དབང་བློ་གྲོས་མཐའ་ཡས་པའི་སྡེས་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བཤད་ཡམས་ཀྱི་སྤྲོས་པ་དོར་ཏེ་རྡོ་རྗེའི་གསུང་གི་འབྲུ་ནོན་ཙམ་དུ་བགྱིས་པ་དགེ་ལེགས་འཕེལ། །སརྦ་ཐཱ་མངྒ་ལམ།། །།

[edit]

[edit]

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).