Terdzo-RI-027



Property "Author" has a restricted application area and cannot be used as annotation property by a user. 








ལུང་ལུགས་ཐུགས་ཀྱི་ཕུར་གཅིག་རྩ་བའི་སྒྲུབ་པ་

lung lugs thugs kyi phur gcig rtsa ba'i sgrub pa

by  མཆོག་གྱུར་གླིང་པ་ (Chogyur Lingpa)
revealed by  མཆོག་གྱུར་གླིང་པ་ (Chogyur Lingpa)
in cycle  ལུང་ལུགས་ཐུགས་ཀྱི་ཕུར་གཅིག་ (Lung lugs thugs kyi phur gcig)
Volume 55 (རི) / Pages 641-660 / Folios 1a1 to 10b6

[edit]

༁ྃ༔ ལུང་ལུགས་ཐུགས་ཀྱི་ཕུར་གཅིག་རྩ་བའི་སྒྲུབ་པ་བཞུགས་སོ༔ བླ་མ་ཧེ་རུ་ཀ་ལ་འདུད༔ བདག་འདྲ་པདྨ་འབྱུང་གནས་ཀྱིས༔ ཕུར་པ་ཀུན་གྱི་དོན་བསྡུས་ནས༔ རྩ་བའི་ཉམས་ལེན་འདི་ན་བཤད༔ དེ་ལ་སྔོན་དངོས་རྗེས་གསུམ་གྱི༔ དང་པོ་རྟེན་མཆོད་བཤམས་བྱས་ནས༔ སྐྱབས་འགྲོ་སེམས་བསྐྱེད་ཚོགས་བསགས་ནས༔ ལོག་རྟོག་གཉིས་འཛིན་བདུད་བསལ་ཕྱིར༔ ཧཱུྃ༔ ཉོན་ཅིག་ལོག་འདྲེན་བགེགས་ཀྱི་ཚོགས༔ ང་ཡི་བཀའ་ལས་འདའ་མ་བྱེད༔ སྡིག་ཅན་གང་ཞིག་འདའ་བྱེད་རྣམས༔ ཀླད་པ་ཚལ་པ་བརྒྱ་རུ་ཁོས༔ ཏིང་འཛིན་ཁྲོ་ཆུང་སྤྲུལ་པས་གཟིར༔ ཧཱུྃ༔ རང་རྩལ་རོལ་པའི་དཀྱིལ་འཁོར་ལས༔ ཕྱོགས་བཅུ་ཁྲོ་བོའི་དཀྱིལ་འཁོར་གྱི༔ ཡེ་ཤེས་སྤྲུལ་པ་བསམ་མི་ཁྱབ༔ རྣམ་རྟོག་བགེགས་ཚོགས་མཚམས་ཆོད་ཅིག༔ ཧཱུྃ་ཧཱུྃ་ཧཱུྃ་བཛྲ་རཀྵ་རཀྵ་བྷྲཱུྃ༔ ཧཱུྃ༔ སྣང་སྲིད་སྐུ་གསུང་ཐུགས་ཀྱི་ངང༔ ཡེ་ནས་སྒྲིབ་གཡོགས་བྲལ་བ་ལ༔ མ་རིག་ཐ་མལ་ཞེན་པས་བཅིངས༔ རང་རིག་རང་གསལ་ངང་དུ་བཤགས༔ ས་མ་ཡ་ཤུདྡྷེ་ཨ༔ ཧཱུྃ༔ མཁའ་དབྱིངས་ཡུམ་གྱི་ཞིང་ཁམས་སུ༔ དཔལ་ཆེན་རྡོ་རྗེ་གཞོན་ནུ་ཡིས༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ གངྒཱ་ལ་ཡི་ཆུ་བོ་རུ༔ པཎ་ཆེན་བི་མ་མི་ཏྲ་ཡིས༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ སློབ་དཔོན་པདྨ་འབྱུང་གནས་ཀྱིས༔ རྒྱ་གར་ཙནྡན་ནགས་ཁྲོད་དུ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ མནྟྲ་ལ་ཡི་མཁར་གོང་དུ༔ བལ་པོ་ཤཱི་ལ་མཉྫུ་ཡིས༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ མཁར་ཆེན་ཡེ་ཤེས་མཚོ་རྒྱལ་གྱིས༔ དགུང་གི་ཕོ་རོག་ནག་པོ་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ སྔོན་གྱི་རིག་འཛིན་ཐམས་ཅད་ཀྱིས༔ ཇི་ལྟར་བསྒྲུབས་བཞིན་དེང་སྒྲུབ་ཀྱིས༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ ཛྙཱ་ན་ཨཱ་བེ་ཤ་ཡ་ཨཱ༔ ཧཱུྃ༔ ཡེ་ནས་དག་པའི་ངང་ཉིད་ལས༔ སྐུ་གསུང་ཐུགས་ཀྱི་འཕྲོ་འདུ་ལས༔ སྨན་རཀ་གཏོར་གསུམ་མཆོད་པའི་སྤྲིན༔ རབ་འབྱམས་ནམ་མཁའ་གང་བར་གྱུར༔ ཨོཾ་ཨཱཿཧཱུྃ༔ མ་ཧཱ་སརྦ་པཱུ་ཛ་ཧོ༔ གཉིས་པ་དངོས་གཞིའི་རིམ་པ་ལ༔ ཧཱུྃ༔ སྣང་སྲིད་ཆོས་རྣམས་སེམས་སུ་རྫོགས༔ ཕུང་པོ་ཁམས་དང་སྐྱེ་མཆེད་ཀུན༔ གཉིས་མེད་བྱང་ཆུབ་སེམས་ཀྱི་དཀྱིལ༔ མ་བཅོས་ཡེ་ནས་ལྷུན་གྱིས་གྲུབ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཁམས་ལྔ་དག་པའི་མཁའ་ཀློང་དུ༔ ཕུང་པོ་དུར་ཁྲོད་གཞལ་ཡས་ཁང༔ རྣམ་ཐར་བརྒྱད་ཀྱི་འཁོར་ལོའི་དབུས༔ ཡུམ་གྱི་མཁའ་དབྱིངས་ཨེ་ཡི་ཀློང༔ བྲག་ཆེན་རུ་དྲ་པད་ཉི་ལ༔ རང་བྱུང་སྔགས་ཀྱི་སྒྲ་གདངས་ཀྱིས༔ བདག་ཉིད་མ་བཅོས་རྫོགས་པའི་སྐུ༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་གཡས་དཀར་གཡོན་དམར་ཞལ༔ རྩ་ཕྱག་སྲིད་པའི་ཕུར་བུ་སྒྲིལ༔ ལྷག་མས་རྡོ་རྗེ་རྩེ་དགུ་དང༔ སྡིགས་མཛུབ་རྩེ་ལ་མེ་ཕུང་འབར༔ རྡོ་རྗེ་རྩེ་ལྔ་རབ་ཏུ་གསོར༔ ཁ་ཊྭཱཾ་རྩེ་གསུམ་གཟིར་ཞིང་གདེངས༔ ཞབས་བཞིས་འདོར་སྟབས་ལྷ་ཆེན་མནན༔ སྤྱན་བསྒྲད་ཞལ་གདངས་མཆེ་བ་གཙིགས༔ ཧཱུྃ་ཧཱུྃ་རྡོ་རྗེའི་གསུང་གདངས་ཅན༔ ཐབས་དང་ཤེས་རབ་གཤོག་པ་གདེངས༔ དཔལ་དང་དུར་ཁྲོད་ཆས་ཀྱིས་བརྒྱན༔ ཉི་ཁྲི་ཆིག་སྟོང་གྱེན་དུ་འཁྱིལ༔ བྱེ་བ་ཐེར་འབུམ་རྡོ་རྗེས་གཏམས༔ ཡུམ་མཆོག་འཁོར་ལོ་རྒྱས་འདེབས་མ༔ མཐིང་སྐྱ་ཨུཏྤལ་དུང་དམར་སྟོབ༔ ཕྱག་རྒྱ་ལྔ་ཡི་རྒྱན་འཆང་ཞིང༔ གཡས་བརྐྱང་གཡོན་བསྐུམ་ཡབ་དང་སྦྱོར༔ རྡོ་རྗེ་པདྨ་མཉམ་པར་རོལ༔ ཡེ་ཤེས་མེ་ཕུང་འབར་བའི་ཀློང༔ སྲས་མཆོག་ཉེར་གཅིག་སྤྲུལ་པར་བཅས༔ རང་རིག་རང་རྩལ་ངང་དུ་བསྐྱེད༔ ཨོཾ་བཛྲ་ཀྲོ་དྷ་ཧཱུྃ་ཀཱ་ར༔ བི་ཛ་ཡ༔ ནཱི་ལ་དཎྜ༔ ཡ་མཱནྟ་ཀ༔ ཨ་ཙ་ལཱ༔ ཧ་ཡ་གྲཱི་བ༔ ཨ་པ་རཱ་ཛི་ཏ༔ ཨ་མྲྀཏ༔ ཏྲཻ་ལོཀྱ༔ མ་ཧཱ་བ་ལ་ཧཱུྃ་ཕཊ༔ རང་བྱུང་སྔགས་ཀྱི་སྒྲ་གདངས་ལས༔ སྟེང་འོག་ཕྱོགས་བཅུའི་གནས་རྣམས་སུ༔ ཧཱུྃ་མཛད་རྣམ་རྒྱལ་དབྱུག་སྔོན་ཅན༔ གཤིན་རྗེ་མི་གཡོ་རྟ་མགྲིན་རྒྱལ༔ འདོད་རྒྱལ་བདུད་རྩི་ཁམས་གསུམ་རྒྱལ༔ སྟོབས་པོ་ཆེ་རྣམས་སྐུ་མདོག་མཐིང༔ རྡོ་རྗེ་དང་ནི་དུང་ཁྲག་འཛིན༔ རང་རང་ཡུམ་དང་གཉིས་མེད་འཁྲིལ༔ དབང་བཅུ་ཕར་ཕྱིན་བཅུ་ཡི་ངང༔ ཕྲ་མེན་སྒོ་སྐྱོང་སྲུང་མའི་ཚོགས༔ ཡེ་ཤེས་རོལ་རྩལ་བསམ་མི་ཁྱབ༔ ཡེ་ནས་དབང་ཆེན་རྣམ་ལྔར་ལྡན༔ སྐུ་གསུང་ཐུགས་སུ་བྱིན་གྱིས་རློབས༔ ཧཱུྃ༔ སྲིད་པའི་ཕུར་བུ་སྒྲུབ་པ་དང༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཡེ་ཤེས་ཁྲོ་བོ་གཤེགས་ནས་ཀྱང༔ རྟགས་དང་མཚན་མ་བསྟན་པ་དང༔ ཀཱི་ལ་ཡ་ཡི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་བཛྲ་ས་མཱ་ཛ༔ ཛཿཧཱུྃ་བཾ་ཧོ༔ ཨ་ཏི་པཱུ་ཧོ༔ པྲ་ཏཱིཙྪ་ཧོ༔ ཧཱུྃ༔ རང་སྣང་རྣམ་དག་ལྷ་ཚོགས་ལ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོ་འདོད་ཡོན་ལྔ༔ བདུད་རྩི་རཀྟ་གཏོར་ཆེན་པོ༔ སྦྱོར་སྒྲོལ་གསང་བའི་མཆོད་པ་འབུལ༔ ཨོཾ་བཛྲ་པུཥྤེ་ནས། ཤབྡ་པཱུ་ཛ་ཧོ༔ ཨ་མྲྀཏ༔ རཀྟ༔ བ་ལིཾ་ཏ་ཁཱ་ཧི༔ ཧཱུྃ༔ ཆོས་སྐུ་ཞི་བའི་ངང་ཉིད་ལས༔ ལོངས་སྤྱོད་རྫོགས་སྐུ་དཔལ་ཆེན་པོ༔ སྤྲུལ་སྐུ་དཀྱིལ་འཁོར་རྣམ་གསུམ་ཤར༔ རྡོ་རྗེ་ཕུར་པའི་ལྷ་ལ་བསྟོད༔ ཐབས་ཀྱི་སྤྱོད་པའི་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་ཕྱིར༔ དབང་དང་དངོས་གྲུབ་བསྩལ་དུ་གསོལ༔ བདག་ཉིད་རྩ་བའི་ཐུགས་ཀ་རུ༔ འོད་ཀྱི་གུར་ཁྱིམ་པད་ཟླའི་སྟེང༔ རྡོ་རྗེ་སེམས་དཔའ་ཡབ་དང་ཡུམ༔ རྒྱན་ཆས་རྫོགས་པའི་ཐུགས་ཀ་རུ༔ རིན་ཆེན་ཆ་བརྒྱད་ཉི་ཟླའི་སྟེང༔ རྡོ་རྗེ་རྩེ་ལྔའི་ལྟེ་བ་རུ༔ ཉི་མའི་སྟེང་དུ་ཧཱུྃ་དང་སྔགས༔ དེ་ལས་འོད་འཕྲོས་བྱང་སེམས་ཀྱི༔ ཡབ་ཡུམ་བདེ་ཆེན་རོལ་པའི་རྒྱུན༔ མཐའ་ཡས་སྤྲིན་ཆེན་འཕྲོ་བ་ཡིས༔ རྒྱལ་མཆོད་བྱིན་རླབས་ཐམས་ཅད་བསྡུས༔ འགྲོ་བའི་སྒྲིབ་སྦྱངས་ལྷ་རུ་གྱུར༔ སྣང་སྲིད་ཕུར་བུའི་སྐུ་གསུང་ཐུགས༔ མ་མོ་མཁའ་འགྲོ་དམ་ལ་བཞག༔ བར་ཆད་བགེགས་དཔུང་ཐལ་བར་བརླག༔ རང་རིག་བདེ་ཆེན་ངང་ནས་བཟླ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ དཀྱིལ་འཁོར་གསུམ་གྱི་ངང་ཉིད་ལས༔ མ་ཡེངས་རྩེ་གཅིག་ཏིང་འཛིན་གྱིས༔ སྐུ་གསུང་ཐུགས་ཀྱི་ངང་དུ་བསྒྲུབ༔ གསུམ་པ་རྗེས་ཀྱི་བྱ་བ་ལ༔ ཚོགས་ཀྱི་འདུ་བ་ཡོ་བྱད་བཅས༔ ཧཱུྃ༔ རང་བྱུང་རིག་པའི་ཡེ་ཤེས་ཀྱི༔ རཾ་ཡཾ་ཁཾ་གིས་དངོས་འཛིན་སྦྱངས༔ བྷྲཱུྃ་ལས་དབྱིངས་ཀྱི་ཀ་པཱ་ལར༔ ཨོཾ་ཧཱུྃ་ཏྲཱཾ་ཧྲཱིཿཨཱཿརྣམས་ཀྱིས༔ བདེ་གཤེགས་རིགས་ལྔའི་དམ་ཚིག་རྫས༔ ཁ་དོག་དྲི་རོ་ནུས་པར་ལྡན༔ ཨོཾ་ག་ཎ་ཙཀྲ་ཀཱ་མ་གུ་ཎ་ཧཱུྃ་ཧྲཱིཿཋ༔ ཧཱུྃ༔ ཡེ་ཤེས་ལྔ་ཡི་ཆོ་འཕྲུལ་ལས༔ འདོད་ཡོན་མཆོད་སྤྲིན་བསམ་མི་ཁྱབ༔ བསོད་ནམས་ཡེ་ཤེས་ཚོགས་རྫོགས་ཕྱིར༔ དཀྱིལ་འཁོར་ལྷ་ཚོགས་རྣམས་ལ་འབུལ༔ གྷ་ཎ་ཙཀྲ་པཱུ་ཛ་ཧོ༔ ཧཱུྃ༔ ཐོག་མེད་དུས་ནས་ད་ལྟའི་བར༔ མ་རིག་ལུས་དང་ངག་སེམས་ཀྱིས༔ བག་མེད་སྤྱོད་པས་དམ་འགལ་པ༔ ཚོགས་ཀྱི་འཁོར་ལོས་བསྐང་ཞིང་བཤགས༔ ས་མ་ཡ་ཤུདྡྷེ་ཨ༔ ཧཱུྃ༔ མ་རིག་གཉིས་འཛིན་དགྲ་དང་བགེགས༔ རྣམ་ཐར་གསུམ་གྱི་ཨེ་དབྱིངས་སུ༔ ཡེ་ཤེས་ཕུར་པའི་མཚོན་གྱིས་བསྒྲལ༔ ལྷ་ཚོགས་རྣམས་ཀྱི་ཞལ་དུ་བསྟབ༔ མ་ཏྲཾ་རུ་ཏྲ་མཱ་ར་ཡ་མཱཾ་ས་རཀྟ་ཀེཾ་ནི་རི་ཏི་ཁ་རཾ་ཁཱ་ཧི༔ ཚོགས་ལ་ལོངས་སྤྱོད་ལྷག་མ་བསྡུས༔ ཨོཾ་ཨཱཿཧཱུྃ༔ དཔལ་གྱི་བཀའ་ཉན་དམ་ཚིག་ཅན༔ ལྷག་མའི་གཏོར་མ་འདི་བཞེས་ལ༔ སྔོན་ཚེ་དཔལ་གྱི་བཀའ་ལུང་བཞིན༔ བཅོལ་བའི་ཕྲིན་ལས་འགྲུབ་པར་མཛོད༔ ཨུཙྪིཥྚ་བ་ལིཾ་ཏ་ཁཱ་ཧི༔ ཧཱུྃ༔ སྔོན་ཚེ་དུར་ཁྲོད་ཆེན་པོ་རུ༔ དཔལ་ཆེན་རྡོ་རྗེ་གཞོན་ནུ་དང༔ བར་དུ་ཡང་ལེ་ཤོད་ཀྱི་གནས༔ རྒྱ་གར་སློབ་དཔོན་རྣམ་གསུམ་དང༔ ཐ་མ་ཡང་རྫོང་དབེན་གནས་སུ༔ པདྨ་ཐོད་ཕྲེང་མཚོ་རྒྱལ་གྱི༔ སྤྱན་སྔར་ཁས་བླངས་དམ་བཅས་པའི༔ ཕུར་པའི་དམ་ཅན་བཀའ་སྲུང་རྣམས༔ དཔལ་གྱི་གཏོར་མ་འདི་བཞེས་ལ༔ སྔོན་གྱི་ཁས་བླངས་དམ་བཅས་བཞིན༔ ཕྲིན་ལས་རྣམ་བཞི་འགྲུབ་པར་མཛོད༔ བྷྱོ༔ ཁྱད་པར་པདྨ་ཐོད་ཕྲེང་གི༔ སྤྱན་སྔར་དབང་བསྐུར་དམ་མནོས་པའི༔ བདུད་མོ་བཞི་དང་གནོད་སྦྱིན་བཞི༔ སྨན་མོ་བཞི་སོགས་བརྟན་མའི་ཚོགས༔ འདིར་གཤེགས་བདུད་རྩི་བཤལ་ཆུ་བཞེས༔ ཕུར་བུ་སྒྲུབ་པའི་རྣལ་འབྱོར་གྱི༔ ཆོས་བཞིན་འགྲུབ་པའི་སྡོངས་གྲོགས་མཛོད༔ མ་མ་ཧྲཱིང་ཧྲཱིང་བ་ལིཾ་ཏ་ཁཱ་ཧི༔ ཧཱུྃ༔ སྲིད་པ་ཕུར་བུའི་དཀྱིལ་འཁོར་འདིར༔ སྐུ་གསུང་ཐུགས་ཀྱི་བྲོ་བརྡུངས་པས༔ དུག་གསུམ་དགྲ་བགེགས་བརླགས་པར་མཛད༔ ཐམས་ཅད་ཆོས་ཀྱི་དབྱིངས་སུ་ཐིམ༔ ཨོཾ་ལཾ་ཧཱུྃ་ལཾ་སཏྭཾ་བྷ་ཡ་ནན༔ ཧཱུྃ༔ དཔལ་ཆེན་རྡོ་རྗེ་གཞོན་ནུ་དང༔ ཡུམ་ཆེན་འཁོར་ལོ་རྒྱས་འདེབས་ཀྱི༔ བདེ་ཆེན་གསང་བའི་མཁའ་ཀློང་ནས༔ མཆོག་དང་ཐུན་མོང་དངོས་གྲུབ་སྩོལ༔ རྩ་སྔགས་མཐར། ཀཱ་ཡ་བཱ་ཀ་ཙིཏྟ་སརྦ་སིདྡྷི་ཧཱུྃ༔ ཧཱུྃ༔ སྣང་སྲིད་ཕུར་བུའི་དཀྱིལ་འཁོར་རྣམས༔ ཐུགས་ཀྱི་ཐིག་ལེ་ཆེན་པོར་ཐིམ༔ དཔལ་ཆེན་པོ་ཡི་དབྱིངས་ཉིད་ལས༔ སྐུ་གསུང་ཐུགས་ཀྱི་དཀྱིལ་འཁོར་གསལ༔ ཧཱུྃ༔ མི་གནས་ཡེ་ཤེས་དཀྱིལ་འཁོར་དུ༔ སྐུ་གསུང་ཐུགས་སུ་ལྷུན་གྲུབ་ནས༔ རྡོ་རྗེ་གཞོན་ནུའི་གོ་འཕང་ཐོབ༔ འགྲོ་བ་ཀུན་གྱི་དཔལ་དུ་ཤོག༔ ཧཱུྃ༔ རིག་འཛིན་རྩལ་འཆང་བྱིན་རླབས་ཀུན་གྱི་བདག༔ སྲིད་པའི་ཕུར་བུ་དངོས་གྲུབ་ཀུན་གྱི་གཏེར༔ མ་མོ་མཁའ་འགྲོ་མྱུར་མགྱོགས་ཕྲིན་ལས་ཅན༔ ཕུར་པའི་དཀྱིལ་འཁོར་ལྷ་ཡི་བཀྲ་ཤིས་ཤོག༔ དེ་ནས་རྒྱུན་གྱི་སྤྱོད་ལམ་བྱ༔ ཨེ་མ་བདག་འདྲ་པདྨ་དང༔ མཁས་པ་བི་མ་མི་ཏྲ་དང༔ བལ་པོ་ཤཱི་ལ་མཉྫུ་དང༔ ཤཱཀྱ་དེ་མ་ལ་སོགས་པས༔ ཡང་ལེ་ཤོད་ཀྱི་བྲག་ཕུག་ཏུ༔ ཕུར་པའི་སྒྲུབ་པ་བྱས་པའི་ཚེ༔ ཏཱ་ལའི་ལོ་མར་ཡི་གེར་བཏབ༔ ས་མ་ཡ༔ རྒྱ་རྒྱ་རྒྱ༔ འདིའི་ཁ་བྱང་ནི། གུ་རུ་པདྨ་འབྱུང་གནས་ཀྱི༔ ཐུགས་ཀྱི་གདམས་པའི་མཐར་ཐུག་རྣམས༔ རྒྱ་དཔེ་བོད་དུ་བསྣམས་ནས་སུ༔ འགྱུར་བའི་སྐབས་ཀྱང་མ་ཕྱེད་དེ༔ གུ་རུ་རང་གིས་སྨོན་ལམ་མཛད༔ ནམ་མཁའ་མཛོད་དུ་གཏེར་དུ་སྦས༔ ནམ་ཞིག་ཟབ་པ་སྐོར་བདུན་གྱི༔ ལས་འཕྲོ་ཅན་ལ་འཕྲོད་ནས་ཀྱང༔ སོ་སོའི་བདག་པོར་འཕྲོད་པར་ཤོག༔ ཅེས་དང་སྙིང་བྱང་ལས། ཕུར་པ་རྒྱུད་ལུང་གཉིས་ཀྱི་སྐོར༔ པྲ་བྷ་ཧསྟིས་བྱིན་བརླབས་པ༔ གཉགས་ལོའི་སྐྱེ་བ་ཙནྡྲའི་མིང༔ དེ་ཡིས་སྒྲུབ་ཅིང་འགྲོ་དོན་སྤྱོད༔ ཅེས་གསུངས་སོ།། །། ༁ྃ༔ ལུང་ལུགས་ཕུར་པའི་ཐལ་འབྱིན་དགོངས་པ་གསལ་བར་བཀོད་པ་བཞུགས༔ བླ་མ་རྡོ་རྗེ་གཞོན་ནུ་ལ་ཕྱག་འཚལ་ལོ༔ ཕུར་པ་ཐལ་འབྱིན་གྱི་དགོངས་པ་འདི་ལ་དོན་རྣམ་པ་བཞི༔ ལྟ་བ༔ བྱང་ཆུབ་སེམས༔ སྙིང་རྗེ༔ རྫས་སོ༔ དང་པོ་ལྟ་བ་ལ༔ འདེབས་བྱེད་ཀྱི་ཕུར་པ་རང་བྱུང་རིག་པའི་ཡེ་ཤེས༔ སྤྲོས་པའི་མཐའ་ཐམས་ཅད་དང་བྲལ་ཅིང༔ རང་རིག་རང་གསལ་མ་བཅོས་པ༔ དེ་ཁོ་ན་ཉིད་གནས་ལུགས་ཀྱི་ངང་དུ་བཞག་པ་འོ༔ འདེབས་པའི་ཡུལ་ཆོས་དབྱིངས་རང་བཞིན་རྣམ་པར་དག་པ༔ དེ་ཁོ་ན་ཉིད༔ ངོ་བོ་ཉིད་དོ༔ འདེབས་པའི་ཐབས་དབྱིངས་སྐྱེ་བ་མེད་པ་ལ༔ མ་འགགས་རང་མདངས་རིག་པའི་ཡེ་ཤེས་སྣ་ཚོགས་སུ་སྣང་བ༔ ངོ་བོ་དབྱིངས་དང་རོ་གཅིག༔ རང་བཞིན་རྣམ་པ་མ་འདྲེས་སོ་སོར་སྣང་བ༔ ཡེ་ནས་མ་གྲུབ་པ་མེ་ལོང་ནང་གི་གཟུགས་བརྙན་ལྟ་བུ༔ རྟག་ཆད་བདག་དང་མཐའ་བཞི་དང་བྲལ་བའི་ངང་དུ་བཞག་པ༔ ཐེབས་པའི་རྟགས་ནི༔ ངོ་བོ་གཡོ་བ་མེད་པ༔ རང་བཞིན་གསལ་བའི་ཐུགས་རྗེ་སྣ་ཚོགས་སུ་སྣང་བ༔ གསུམ་ཀ་ངོ་བོ་རོ་གཅིག་པ༔ ཞེན་འཛིན་འཁྲུལ་པ་གང་གིས་ཀྱང་མ་བཅིངས་པ༔ རང་གྲོལ་ཡེ་ཇི་བཞིན་པ༔ བྱར་མེད་དུ་རྟོགས་པ་འོ༔ མ་ཐེབས་པའི་སྐྱོན་ནི༔ རང་ལས་རང་འཁྲུལ༔ ལམ་གྱི་ཐབས་གང་བརྟེན་ཀྱང་མཐའ་གཅིག་ཏུ་ཞེན་འཛིན་གྱིས་སངས་རྒྱས་ཐོབ་པའི་དུས་མེད་དོ༔ ཐེབས་པའི་ཡོན་ཏན་ནི༔ དབྱིངས་རིག་ཟུང་འཇུག་ཡེ་ཤེས་བླ་མའི་ས་ཐོབ་བོ༔ གཉིས་པ་བྱང་ཆུབ་སེམས་ལ༔ འདེབས་བྱེད་ཀྱི་ཕུར་པ་རྣལ་འབྱོར་པ་བྱ་ཀ་ལནྡ་ལྟ་བུ༔ འདེབས་པའི་ཡུལ་ཡུམ་མཚན་ཉིད་དང་ལྡན་པ་གསང་རྩ་པདྨ་ཅན་ལ་སོགས་པ་ཡོད་པ་འོ༔ འདེབས་པའི་ཐབས༔ གཉིས་ཀ་རྩ་རླུང་གིས་རྒྱུད་སྦྱངས༔ བདག་དཔལ་ཆེན་པོ༔ ཡུམ་འཁོར་ལོ་རྒྱས་འདེབས་མ༔ ལུས་ཀྱི་གནས་བཅུར་ཁྲོ་བཅུ་ཡབ་ཡུམ༔ མཁའ་གསང་རྡོ་རྗེ་དང་པདྨ༔ ཧཱུྃ་དང་ཨས་མཚན་པ་སྔགས་ཀྱི་འདུ་ཤེས༔ ཐབས་དེ་ལ་བརྟེན་ཏེ་སེམས་ཅན་གྱི་དོན་དུ་སངས་རྒྱས་སྒྲུབ་པ་ཀུན་རྫོབ་བྱང་ཆུབ་སེམས་ཆོས་ཀྱི་འདུ་ཤེས༔ ཡབ་ཡུམ་སྦྱོར་བས་ཐིག་ལེ་ཕབ༔ དགའ་བ་བཞི་རིམ་པ་བཞིན་བསྐྱེད་ཅིང་ངོ་བོར་བལྟས༔ ནོར་བུ་གང་བར་བཟུང་བ་ལུགས་འབྱུང་དང༔ དེ་ལས་ལྡོག་ཅིང་ཁྱབ་པར་བཀྲམ་ནས་ངོས་གཟུང་བ་ལུགས་ལྡོག་གི་དགའ་བ་བཞི་འོ༔ ཐེབས་པའི་རྟགས་ནི༔ ཐིག་ལེ་གསང་རྩ་ཕན་ཚུན་དུ་བཞག་པའི་སྐབས༔ ལྷན་ཅིག་སྐྱེས་པའི་ཡེ་ཤེས་ངོ་བོ་རྟོག་མེད༔ རང་བཞིན་རྣམ་པ་མ་འདྲེས་འོད་གསལ་བ༔ བཅོས་བསླད་མེད་པར་འཆར་བ་འོ༔ མ་ཐེབས་པའི་སྐྱོན་ནི༔ དཔེའི་ཡེ་ཤེས་ངོ་མ་འཕྲོད་ན་དོན་གྱི་ཡེ་ཤེས་ངོ་མི་འཕྲོད་ཅིང༔ འཁོར་བར་ལྟུང་བ་འོ༔ ཐེབས་པའི་ཡོན་ཏན་ནི༔ ཡེ་ཇི་བཞིན་པའི་གནས་ལུགས་སྐྱེ་མེད་སྟོང་པ༔ རང་བཞིན་འགག་མེད་འོད་གསལ་བ༔ བདེ་སྟོང་གཉིས་མེད་ཟུང་འཇུག་བྱང་ཆུབ་སེམས་ཐིག་ལེ་བདེ་བ་ཆེན་པོ་རྟོགས་པར་འགྱུར་རོ༔ གསུམ་པ་སྙིང་རྗེ་ལ༔ འདེབས་བྱེད་ཀྱི་ཕུར་པ་རྣལ་འབྱོར་པ་སྙིང་རྗེའི་མཆོག་ཏུ་གྱུར་པ༔ འགྲོ་བ་རྣམས་ལ་མས་བུ་གཅིག་པུ་གཡང་ས་ལས་ལྷུང་བ་ལས་ཟློག་པ་ལ་བརྩོན་པ་ལྟ་བུ་འོ༔ འདེབས་པའི་ཡུལ༔ རང་གིས་རང་མ་རིག༔ འཁྲུལ་པའི་སེམས་ཅན་རིས་མེད་པ༔ རྒྱུད་དྲུག་གིས་བསྡུས་པ་ཐམས་ཅད་དོ༔ འདེབས་པའི་ཐབས༔ བྱང་ཆུབ་ཀྱི་སེམས་ལྔས་གཞི་བཟུང་བའི་ཕུང་ཁམས་སྐྱེ་མཆེད་ཐམས་ཅད་ལྷར་བསྒོམས་ཤིང༔ གྲགས་སྟོང་སྔགས་ཀྱི་བཟླས་པ༔ རིག་པ་ཆོས་ཉིད་དུ་ལ་བཟླ་བས་མ་དག་པའི་སྣང་བ་ནུབ༔ དག་པའི་སྣང་བ་སྐུ་གསུང་ཐུགས་སུ་འབྱམས་ཀླས༔ བསྙེན་སྒྲུབ་རྣམ་པ་བཞི་མཐར་ཕྱིན་པས་འགྲོ་བ་རྣམས་སྨིན་གྲོལ་ལ་བཀོད་པ་འོ༔ ཐེབས་པའི་རྟགས་ནི༔ རྟོགས་པས་བདག་བསྒྲལ༔ འཁྲུལ་པའི་སྦུབས་ལས་གྲོལ་ཞིང་ཆོས་ཐམས་ཅད་མཚན་ཉིད་མེད་པར་རྟོགས་པས་སྙིང་རྗེ་སྒྱུ་མ་ལྟ་བུས་གཞན་དོན་རྩོལ་མེད་དུ་འབྱུང་བ་འོ༔ མ་ཐེབས་པའི་སྐྱོན་ནི༔ གཞན་ལ་ཕན་སེམས་མེད་པས་རང་ཉིད་ལམ་ཐག་རིང་བ་དང༔ ཕ་མར་གྱུར་པའི་སེམས་ཅན་རྣམས་འཁོར་བའི་གཡང་ས་ལ་འཁྱམ་ཞིང༔ རྟེན་མི་ལུས་དང༔ བརྟེན་པ་ལྷ་བསྒོམ་སྔགས་བཟླས་ཏིང་ངེ་འཛིན་དོན་མེད་དུ་འགྱུར་རོ༔ ཐེབས་པའི་ཡོན་ཏན་ནི༔ རྟོགས་པས་བདག་གྲོལ་ནས་ཚེ་འདི་ལ་མངོན་པར་རྫོགས་པ་སངས་རྒྱས༔ གཞན་དོན་སྙིང་རྗེ་སྒྱུ་མ་ལྟ་བུས་རྩོལ་མེད་འགྲོ་དོན་སྨོན་ལམ་མཐའ་བཙན༔ འཁོར་བ་དོང་ནས་སྤྲུགས་པ་འོ༔ བཞི་པ་རྫས་ལ༔ འདེབས་བྱེད་རྣལ་འབྱོར་པ་ལྟ་བའི་རྫོང་དུ་ཞུགས༔ བསྐྱེད་པའི་འཕྲང་ལས་གྲོལ༔ སྙིང་རྗེའི་སྲོག་དང་ལྡན་པ༔ དངུལ༔ གསེར༔ ཟངས༔ ལྕགས་ཀྱི་ཕུར་པ་མགོ་བོ་རྒྱ་མདུད་རྐེད་པ་འཆང་གཟུང་ལྟེ་བ་རྒྱ་མདུད་དང་ཆུ་སྲིན༔ རྩེ་མོའི་དབལ་ཟླུམ་པོ༔ གྲུ་བཞི༔ ཟླ་གམ༔ ཟུར་གསུམ་པ༔ བཀྲ༔ བརྗིད༔ མཛེས༔ རྣོ༔ བདུད་རྩི༔ བཅུད་ལྡན༔ མྱོས་བྱེད༔ དུག་གིས་ངར་བཏབ་པ་འོ༔ འདེབས་པའི་ཡུལ༔ འཇིགས་པ་བརྒྱད༔ འབྱོར་པ་དྲུག༔ དགོས་པ་གསུམ༔ ཉམས་པ་བདུན༔ འདེབས་པའི་ཐབས༔ བདག་ལྷ༔ རྫས་སྲས་མཆོག་རིགས་བཞི༔ གང་ལ་འདེབས་པའི་རྟགས་དེ་མངོན་སུམ་བཞིན་དུ་བསྒོམ་པ་འོ༔ ཐེབས་པའི་རྟགས༔ ཞི་རྒྱས་དབང་དྲག་གི་ཕྲིན་ལས་འགྲུབ་པ་འོ༔ མ་ཐེབས་པའི་སྐྱོན་ནི༔ འགལ་རྐྱེན་མི་བཟློག་ཅིང་མཐུན་རྐྱེན་མི་འཛོམ༔ མི་བསྲུན་པ་རྣམས་མི་ཐུལ་ཞིང༔ སངས་རྒྱས་ཀྱི་བསྟན་པ་མི་འཕེལ་ལོ༔ ཐེབས་པའི་ཡོན་ཏན་ནི༔ རང་གཞན་གང་ལའང་འཇིགས་པ་བརྒྱད་ཀྱིས་མི་ཚུགས༔ འབྱོར་པ་དྲུག་དང་ལྡན༔ དགོས་པ་གསུམ་དབང་དུ་འདུས༔ ཉམས་པ་བདུན་འདུལ་ཞིང༔ རང་གཞན་གྱི་དོན་འགྲུབ༔ སངས་རྒྱས་ཀྱི་བསྟན་པ་འཕེལ་ལོ༔ ཕུར་པ་མཁན་པོ་དགོངས་པ་འདི་བཞི་དང་ལྡན་པར་བྱ་བ་གལ་ཆེ༔ གུ་རུ་པདྨས་ཡང་ལེ་ཤོད་དུ་བཀོད་པ་འོ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ ལུང་ལུགས་ཕུར་གཅིག་གི་མངོན་སྤྱོད་རྫས་ཕུར་གདབ་ཁའི་ཁ་ཚར་བཞུགས་སོ༔ བླ་མ་རྡོ་རྗེ་གཞོན་ནུ་ལ་ཕྱག་འཚལ་ལོ༔ མངོན་སྤྱོད་རྫས་ཀྱི་ཕུར་པ་གདབ་པའི་སྔོན་དུ་ལྷ་རྣམས་ཐུགས་དམ་བསྐུལ་བར་བྱ༔ ཧཱུྃ༔ མཐིང་ནག་གྲུ་གསུམ་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་དང༔ ཡུམ་ཆེན་འཁོར་ལོ་རྒྱས་འདེབས་མ༔ སྲས་མཆོག་ཉི་ཤུ་རྩ་གཅིག་དང༔ ཁྲོ་བོ་བཅུ་དང་ཁྲོ་མོ་བཅུ༔ ཐབས་ཤེས་སྤྲུལ་པའི་ཟ་གསོད་ཚོགས༔ ཕྲ་མེན་སྒོ་མ་ཆེན་མོ་བཞི༔ ཕུར་པ་ཕྲིན་ལས་ལྷ་ཚོགས་རྣམས༔ མི་མངོན་དབྱིངས་ནས་སྐུར་བཞེངས་ལ༔ དམ་ཚིག་དཀྱིལ་འཁོར་འདི་ལ་བཞུགས༔ གཉིས་སུ་མེད་པའི་ཕྱག་བགྱི་བཞེས༔ དམ་རྫས་བདུད་རྩིའི་མཆོད་པ་འབུལ༔ དྲག་ཤུལ་མཐུ་རྩལ་ལྡན་ལ་བསྟོད༔ ཐུགས་དམ་ཐུགས་རྗེས་དགྲ་བགེགས་སྒྲོལ༔ ཧཱུྃ༔ སྔོན་ཚེ་སྒྲུབ་པའི་གནས་མཆོག་ཏུ༔ ཤྭ་ན་ས་བདག་བདག་ཉིད་མ༔ སྐྱེས་བུ་གིང་དང་ཕོ་ཉའི་ཚོགས༔ དམར་གྱི་གཏོར་མ་འདི་བཞེས་ལ༔ ཐུགས་དམ་གཉན་པོའི་དུས་ལ་བབ༔ གང་ལ་བྱ་བ་ཁྱོད་ཀྱིས་ཤེས༔ ཡིད་ལ་བརྣགས་པའི་དགྲ་བོ་རྣམས༔ རིངས་པར་ཁུག་ལ་མྱུར་དུ་སྒྲོལ༔ ཅེས་བསྐུལ་ཞིང་དཔང་གཟུག་པ་ནི༔ ཧཱུྃ༔ བྱང་ཆུབ་མཆོག་ཏུ་སེམས་བསྐྱེད་ནས༔ བླ་མེད་ལམ་དུ་ཞུགས་པ་ལ༔ བར་ཆད་འཚེ་བ་དགྲ་ཡིས་བྱས༔ ཉེས་མེད་རྣལ་འབྱོར་གྲོགས་གཡེལ་ན༔ སྔོན་གྱི་ཐུགས་དམ་ཉམས་པར་འགྱུར༔ དྲག་པོའི་ཕྲིན་ལས་དུས་ལ་བབ༔ ཅེས་དཔང་བཅོལ་ཞིང༔ དགྲ་བགེགས་ཀྱི་མིང་གཟུགས་ལ་བདེན་སྟོབས་བརྗོད་ཅིང་འགུགས་གཞུག་དྲག་ཏུ་བྱ༔ ཕོ་ཉ་སྤྲུལ་པ་ཡང་སྤྲུལ་གྱི་ཚོགས་རྣམས་ཀྱིས་ཕྱག་རྒྱ་བཞིས་བསྡམས་ཏེ་གནས་འདིར་བཀུག༔ རྫས་ངན་གྱི་ཆར་ཕབ་པས་ལྷ་སྲུང་གཞན་དུ་བྲོས༔ སྐུའི་འོད་ཟེར་གྱིས་མཐུ་དང་རྫུ་འཕྲུལ་ཕྲོགས༔ རྣམ་ཤེས་རྟེན་དང་གཉིས་མེད་དུ་བསྟིམས༔ བྱད་ཀྱི་ཞགས་པས་བཅིངས༔ སྨྱོ་ཁྲག་གི་ཆར་ཕབ་ནས་དྲན་མེད་དུ་བཏང་བར་བསམ་ལ་བཅོལ་བསྐུལ་དྲག་ཏུ་བྱ་འོ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ ལུང་ལུགས་ཕུར་པ་ཕྱི་ནང་གསང་བའི་དོན་བསྟན་པ་བཞུགས་སོ༔ བླ་མ་རྡོ་རྗེ་གཞོན་ནུ་ལ་ཕྱག་འཚལ་ལོ༔ ཕྱི་ནང་གསང་གསུམ་གྱི་ཕུར་པའི་དོན་བསྟན་པ་ལ་རྣམ་པ་གསུམ༔ དང་པོ༔ ཕྱིའི་ཕུར་པ་ལ༔ རྒྱ་མདུད་གཟུགས་ཁམས༔ རྒྱ་མདུད་འོག་མ་ཡན་ཆད་གཟུགས་མེད་ཀྱི་ཁམས༔ ཆུ་སྲིན་གྱི་དབལ་རྔམས་མན་ཆད་འདོད་ཁམས༔ སྲིད་གསུམ་ཕུར་པ་ལ་རྫོགས་པ་དེ་ཉིད༔ སྣང་བ་ཐམས་ཅད་སྐུ༔ གྲགས་པ་ཐམས་ཅད་སྔགས་ཀྱི་སྒྲ་གདངས༔ དྲན་རྟོག་ཐམས་ཅད་ཆོས་ཉིད་དུ་བལྟ་བ་ཕུར་པ་ཕྱིའི་དཀྱིལ་འཁོར་རོ༔ གཉིས་པ་ནང་གི་ཕུར་པ་ནི༔ རྒྱ་མདུད་གོང་མ་སྤྱི་བོ་བདེ་ཆེན་གྱི་འཁོར་ལོ༔ འཆང་གཟུང་མགྲིན་པ་ལོངས་སྤྱོད་ཀྱི་འཁོར་ལོ༔ རྒྱ་མདུད་འོག་མ་སྙིང་ག་ཆོས་ཀྱི་འཁོར་ལོ༔ ཆུ་སྲིན་རྔམས་ཞལ་ལྟེ་བ་སྤྲུལ་པའི་འཁོར་ལོ༔ རྩེ་མོ་གསང་བ་ཡུམ་གྱི་མཁའ་དབྱིངས༔ ཐབས་ཤེས་གཉིས་མེད་བདེ་སྟོང་དགའ་བ་བཞིའི་དཀྱིལ་འཁོར་རོ༔ གསུམ་པ་་་གསང་བ་ནི།ངོ་བོ་རང་བཞིན་གྱིས་དག་པ་རྒྱ་མདུད་གོང་མ༔ རང་བཞིན་འོད་གསལ་བ༔ ཐུགས་རྗེ་སྣ་ཚོགས་སུ་སྣང་བ་འཆང་གཟུང༔ རྣམ་ཤེས་ཚོགས་བརྒྱད་གནས་སུ་དག་པ་པདྨ་འདབ་བརྒྱད༔ རྒྱ་མདུད་འོག་མ་གཉིས་སུ་མེད་པའི་བྱང་ཆུབ་སེམས༔ དབལ་ཟུར་གསུམ་པ་རྩོལ་མེད་རང་བྱུང་རིག་པའི་ཡེ་ཤེས༔ གསང་བ་རྫོགས་པའི་དཀྱིལ་འཁོར་རོ༔ ཕུར་པ་མཁན་པོ་འདི་གསུམ་གྱི་དོན་དང་ལྡན་པར་བྱ་བ་གལ་ཆེ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ ལུང་ལུགས་ཐུགས་ཀྱི་ཕུར་གཅིག་གི་དབང་བཞི་རྡོ་རྗེ་སྤྱི་བླུགས་བཞུགས་སོ༔ བླ་མ་དང་རྡོ་རྗེ་གཞོན་ནུ་ལ་ཕྱག་འཚལ་ལོ༔ དབང་བཞི་རྡོ་རྗེ་སྤྱི་བླུགས་སུ་བསྐུར་བ་འདི་ལ་དོན་རྣམ་པ་གསུམ༔ སྔོན་འགྲོ་དང་དངོས་གཞི་རྗེས་སོ༔ དང་པོ་ནི༔ སློབ་དཔོན་མཚན་ཉིད་བརྒྱད་དང་ལྡན་པས་སློབ་མ་མཚན་ཉིད་ལྔ་ཚང་བ་ལ༔ དབང་བསྐུར་བའི་སྐབས་སུ་དབེན་པའི་གནས་བཙལ་ལ་སའི་ཆོ་ག་བྱ་ཞིང་དཀྱིལ་འཁོར་དུར་ཁྲོད་ཀྱི་ཕོ་བྲང་རིན་ཆེན་ཟུར་བརྒྱད༔ ཁོར་ཡུག་དང་བཅས་པ་བྲི༔ དབུས་སུ་བུམ་པ་བདུད་རྩི་ལྔས་བཀང་བ༔ སྒྲུབ་པའི་ཕུར་བུ་བརྗིད་ལྡན༔ གསང་ཐོད༔ རིག་མ༔ ཤེལ་རྡོ༔ ཕྱི་ནང་གསང་བའི་མཆོད་པ་རྣམས་བཤམ༔ དབང་སྒྲུབ་བསྙེན་པ་ཚུལ་བཞིན་དུ་བྱ༔ སྒྲུབ་པ་རྟགས་ཐོན་ནས་སློབ་མ་བྱུར་དང་བགེགས་ཕྲལ་ནས་མཎྜལ་ཕུལ་ལ༔ ཧོ༔ བླ་མ་གསང་སྔགས་ཆེ་བའི་མཆོག༔ ཐེག་པ་ཆེན་པོའི་ཚུལ་ལ་གནས༔ ཐུགས་རྗེས་དཀྱིལ་འཁོར་ལ་གཞུག་ཅིང༔ རྡོ་རྗེ་གཞོན་ནུའི་དབང་མཆོག་སྩོལ༔ ཞེས་གསོལ་བ་བཏབ༔ སྐྱབས་སུ་འགྲོ་ཞིང་སེམས་བསྐྱེད༔ ཡན་ལག་བདུན་པས་ཚོགས་བསགས་ཤིང་རྒྱུད་སྦྱང༔ ཧོ༔ ཧེ་རུ་ཀ་དཔལ་དགོངས་སུ་གསོལ༔ འདི་ནས་བྱང་ཆུབ་སྙིང་པོའི་བར༔ སྤྱི་དང་ཁྱད་པར་ལྷག་པ་ཡི༔ དམ་ཚིག་ཚུལ་བཞིན་བསྲུང་བར་བགྱི༔ སློབ་དཔོན་གྱིས༔ རྡོ་རྗེ་མགོར་བཞག་བདུད་རྩི་སྦྱིན་ཅིང༔ ཧཱུྃ༔ རྡོ་རྗེ་གསང་བའི་བཀའ་ལས་ནི༔ འདས་ན་དམྱལ་བ་ཆེན་པོར་ལྟུང༔ དམ་ཚིག་ཚུལ་བཞིན་སྲུང་བ་ལ༔ གསང་སྔགས་འབྲས་བུ་འབད་མེད་འབྱུང༔ དེ་བས་དམ་ལས་མ་འདའ་ཞིག༔ བཛྲ་ས་མ་ཡ་རཀྵ༔ སློབ་མས་བདུད་རྩི་མྱོང་ཞིང༔ ས་མ་ཡ་ཨི་དན་ན་ར་ཀན༔ དེ་ནས་སློབ་མ་རྡོ་རྗེ་གཞོན་ནུར་བསྐྱེད་ལ༔ སློབ་དཔོན་ལ་མོས་གུས་བྱས་པའི་རྐྱེན་གྱིས་དཀྱིལ་འཁོར་པའི་ལྷ་ཚོགས་རྣམས་ཀྱི་སྐུ་ལས་སྐུ་དང་ས་བོན་ཕྱག་མཚན་གྱི་རྣམ་པར་བྱོན་ནས་སློབ་མའི་ལུས་ཀྱི་ནང་གང་སྙིང་ཁའི་ཧཱུྃ་ལ་ཐིམ་པས་བདེ་སྟོང་ཡེ་ཤེས་རྩོལ་མེད་དུ་ཤར་བའི་དོན་ལ་མཉམ་པར་འཇོག༔ རོལ་མོའི་སྒྲ་དང་སྙིང་པོ་སྤྱི་དྲིལ་གྱི་མཐར༔ ཛྙཱ་ན་ཨཱ་བེ་ཤ་ཡ་ཨ་ཨཱ༔ ར་ར་ར་ར་ཙཱ་ལ་ཡ་ཙཱ་ལ་ཡ་ཧཱུྃ་ཨཱཿཧཾ་ཛྷེཾ༔ ཞེས་བཟླས་ཤིང་བྱིན་ཕེབས་པའི་རྟགས་མ་བྱུང་གི་བར་བསྐྱར༔ ཏིཥྛ་བཛྲས་བརྟན་པར་བྱ༔ གཉིས་པ་དངོས་གཞི་དབང་བསྐུར་བ་ནི༔ བུམ་པ་སྤྱི་བོར་བཀོད་ཅིང༔ ཧཱུྃ༔ མཁའ་དབྱིངས་ཡུམ་གྱི་བུམ་པ་རུ༔ བྱང་ཆུབ་སེམས་ཀྱི་ལྷ་ཚོགས་ཞུ༔ སྐལ་ལྡན་སློབ་མར་དབང་བསྐུར་བས༔ རྡོ་རྗེ་གཞོན་ནུའི་སྐུ་ཐོབ་ཤོག༔ སྔགས་ཀྱི་མཐར༔ ཀ་ལ་ཤཿཨ་བྷི་ཥིཉྩ་ཧཱུྃ༔ ཞེས་བསྐུར་བས་ཆུ་ཡིས་ལུས་གང་ལྷག་མ་སྤྱི་བོར་ལུད་པ་ལས་རིགས་ལྔས་དབུ་བརྒྱན་པར་བསམ༔ སྒྲུབ་ཕུར་དཀྱིལ་འཁོར་གསུམ་གྱི་རང་བཞིན་སློབ་མ་ལ་དབྱེར་མེད་དུ་བསྟིམས་ལ་ཕུར་བསྐོར་བྱ༔ ཧཱུྃ༔ སྣང་སྲིད་ཕུར་བུའི་དཀྱིལ་འཁོར་དུ༔ སྐུ་གསུང་ཐུགས་ཀྱི་རང་བཞིན་རྫོགས༔ རྩ་བའི་དཔལ་ཆེན་སྒོམ་པ་དང༔ ཕྱོགས་བཅུའི་ཁྲོ་བོ་སྤྲུལ་པར་འགྱེད༔ རྫས་ཀྱི་སྲས་མཆོག་ལས་ལ་མངག༔ བསྙེན་སྒྲུབ་ཕྲིན་ལས་དབང་ཐོབ་ཤོག༔ ཅེས་ཛཔ྄་དབྱངས་བྱ་ཞིང་ཕུར་པ་གནས་གསུམ་དུ་བཞག༔ དེ་དག་གིས་ཏིང་ངེ་འཛིན་གྱི་དཀྱིལ་འཁོར་དུ་བུམ་པ་ལྷའི་ཕན་ནུས་ཀྱི་དབང་རྣམས་རྫོགས་པར་ཐོབ༔ ལམ་བསྐྱེད་རིམ་དཀྱིལ་འཁོར་གསུམ༔ སྐུ་གསུང་ཐུགས་སྒོམ་པ་ལ་དབང་ཞིང་འབྲས་བུ་སྤྲུལ་སྐུ་ཐོབ་པའི་སྐལ་པ་ཅན་དུ་བྱས་པ་ཡིན༔ གསང་དབང་བསྐུར་བ་ནི༔ བླ་མ་ཡབ་ཡུམ་རྡོ་རྗེ་གཞོན་ནུ་འཁོར་ལོ་རྒྱས་འདེབས་མཉམ་པར་སྦྱོར་བའི་བྱང་ཆུབ་སེམས་སློབ་མའི་ལྕེ་ལ་བཞག་པས་རྩ་གནས་ཐམས་ཅད་གང༔ དྭངས་མ་འཕེལ་ཞིང་བདེ་དྲོད་རྒྱས་པར་བསམ༔ ཧཱུྃ༔ བླ་མ་ཧེ་རུ་ཀ་ཡབ་ཡུམ༔ དགའ་བཞི་རོལ་པའི་བྱང་ཆུབ་སེམས༔ བུ་ཡི་ལྕེ་ལ་བཞག་པ་ཡིས༔ བདེ་ཆེན་གསང་བའི་དབང་ཐོབ་ཤོག༔ སྔགས་ཀྱི་མཐར༔ གུ་ཧྱ་ཨ་བྷི་ཥིཉྩ་ཨཱ༔ དེས་བླ་མ་ཡབ་ཡུམ་སྐུའི་དཀྱིལ་འཁོར་དུ་བྱང་ཆུབ་སེམས་གསང་བའི་དབང་ཐོབ༔ ལམ་རྩ་རླུང་སྒོམ་པ་ལ་དབང་ཞིང་འབྲས་བུ་ལོངས་སྐུ་མཚན་དང་དཔེ་བྱད་རྫོགས་པའི་སྐུ་ཐོབ་པའི་སྐལ་པ་ཅན་དུ་བྱས་པ་ཡིན་ནོ༔ དེ་ནས་ཤེས་རབ་ཡེ་ཤེས་ཀྱི་དབང་བསྐུར་བ་ནི༔ རིག་མ་སློབ་བུ་ལ་གཏད༔ གཉིས་ཀ་དཔལ་ཆེན་པོ་ཡབ་ཡུམ༔ མཁའ་གསང་རྡོ་རྗེ་པདྨ་ཧཱུྃ་དང་ཨས་མཚན་པ༔ ཐབས་འདིས་ཧེ་རུ་ཀའི་གོ་འཕང་ལ་སྤྲོ་བ་བསྐྱེད་དེ༔ མཁའ་གསང་དུ་རྡོ་རྗེ་སྲུབ་པའི་སྦྱོར་བས་ཐིག་ལེ་གནས་བཞིར་བབས་པས་དགའ་བཞིའི་ངོ་བོར་བལྟ༔ གསང་རྩ་ཕན་ཚུན་དུ་གཏེམ་པས་ལྷན་སྐྱེས་ཡེ་ཤེས་ཉམས་སུ་མྱོང༔ ནོར་བུ་གང་བར་བཟུང་ནས་གནས་བཞིར་བཟློགས་པས་ལུས་ལ་ཁྱབ་པར་བཀྲམ༔ ཞེས་བརྡ་སྤྲད་ལ༔ ཧཱུྃ༔ ཤེས་རབ་ཡུམ་གྱི་པདྨ་ལ༔ ཆགས་མེད་བདེ་སྟོང་ཐིག་ལེར་འཁྱིལ༔ ལྷན་ཅིག་སྐྱེས་པའི་ལྟ་བ་རྟོགས༔ ཤེས་རབ་ཡེ་ཤེས་དབང་ཐོབ་ཤོག༔ སྔགས་ཀྱི་མཐར༔ མ་ཧཱ་མུ་དྲ་ཨ་བྷི་ཥིཉྩ་ཧཱུྃ༔ དེ་དག་གིས་མཁའ་དབྱིངས་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ༔ ཡིད་ཀྱི་དྲི་མ་དག༔ ལམ་ལྷན་ཅིག་སྐྱེས་པའི་ཡེ་ཤེས་སྒོམ་པ་ལ་དབང༔ འབྲས་བུ་ཆོས་སྐུ་འགྲུབ་པའི་སྐལ་པ་ཅན་དུ་བྱས་པ་ཡིན༔ དེ་ནས་རིག་པའི་རྩལ་དབང་བསྐུར་བ་ནི༔ ཤེལ་རྡོ་ཕྱར་ལ༔ ཧཱུྃ༔ ཕྱི་དང་ནང་མེད་ཟང་ཐལ་གསལ༔ ཡེ་ནས་རྣམ་དག་གཉིས་སུ་མེད༔ ཐབས་ཤེས་དྲི་མ་རང་སངས་ནས༔ རང་གྲོལ་འཛིན་མེད་ངང་དུ་ཞོག༔ སྔགས་མཐར༔ དྷརྨ་དྷཱ་ཏུ་ཨ་བྷི་ཥིཉྩ་ཧཱུྃ༔ དེ་དག་གིས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་རིག་པའི་རྩལ་དབང་ཐོབ༔ བག་ཉལ་རྣམ་རྟོག་ཕྲའུ་ཡི་ཤན་དག༔ རང་བྱུང་རྩོལ་མེད་ཀྱི་དོན་སྒོམ་པ་ལ་དབང༔ འབྲས་བུ་ངོ་བོ་ཉིད་སྐུ་ཐོབ་པའི་སྐལ་པ་ཅན་དུ་བྱས་པ་ཡིན་ནོ༔ གསུམ་པ་རྗེས་ཀྱི་བྱ་བ་ལ༔ སློབ་མས་དམ་ཚིག་ཁས་བླང༔ གཏང་རག་འབུལ༔ ཚོགས་ཀྱི་འཁོར་ལོ་བྱ་ཞིང་གཏོར་མ་སྐྱོང༔ དཀྱིལ་འཁོར་བསྡུ་ཞིང་བསྔོ་བ་དང་སྨོན་ལམ་བཀྲ་ཤིས་བྱའོ༔ འདི་ནི་རྩ་བ་ཐུགས་ཀྱི་ཕུར་གཅིག་གི་དབང་བསྐུར་བ་ཡིན་པས་ཤིན་ཏུ་ཟབ་ཅིང་གཉན་ལ་གལ་ཆེ་འོ༔ གུ་རུ་པདྨས་ཡང་ལེ་ཤོད་དུ་བཀོད་པ་འོ༔ ས་མ་ཡ༔ རྒྱ་རྒྱ་རྒྱ༔

RTZ-Tsagli-Dzongsar-RI-08-mchog gling lung lugs thugs kyi phur gcig-01.jpeg
RTZ-Tsagli-Dzongsar-RI-08-mchog gling lung lugs thugs kyi phur gcig-02.jpeg
RTZ-Tsagli-Dzongsar-RI-08-mchog gling lung lugs thugs kyi phur gcig-03.jpeg
RTZ-Tsagli-Dzongsar-RI-08-mchog gling lung lugs thugs kyi phur gcig-04.JPG
RTZ-Tsagli-Dzongsar-RI-08-mchog gling lung lugs thugs kyi phur gcig-05.jpeg
RTZ-Tsagli-Dzongsar-RI-08-mchog gling lung lugs thugs kyi phur gcig-06.jpeg
RTZ-Tsagli-Dzongsar-RI-08-mchog gling lung lugs thugs kyi phur gcig-07.JPG
RTZ-Tsagli-NA-03-mchog gling lung lugs phur pa'i bum tsak-01.jpg
RTZ-Mandala-292-lung lugs thugs kyi phur gcig.jpeg
RTZ-Mandala-Dzongsar-06-552-mchog gling lung lugs thugs kyi phur gcig.jpeg

Footnotes[edit]

Other Information[edit]

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).