RTZ Volume 40 Full Text Tibetan

Rinchen Terdzö, Volume 40, Full Text
རིན་ཆེན་གཏེར་མཛོད་ཆེན་མོ་པོད་བཞི་བཅུ་པ།

Contents

རྩ་རླུང་མཁའ་འགྲོའི་གསང་མཛོད་ལས༔ སྔོན་འགྲོ་རྗེས་ཀྱི་ཚིག་བཤད་ (Volume 40, Text 1)

ྈ རྩ་རླུང་མཁའ་འགྲོའི་གསང་མཛོད་ལས༔ སྔོན་འགྲོ་རྗེས་ཀྱི་ཚིག་བཤད་བཞུགས༔ བདེ་ཆེན་རྡོ་རྗེ་ཕག་མོ་ལ་ཕྱག་འཚལ་ལོ༔ རྩ་རླུང་མཁའ་འགྲོའི་གསང་མཛོད་ལམ་ལ་ཞུགས་པའི་རྣལ་འབྱོར་གྱི་སྔོན་འགྲོ་དང་རྗེས་ཀྱི་ཚིག་བཤད༔ དང་པོ་བགེགས་བསྐྲད་པ་ནི༔ ཧཱུྃ༔ སྣང་སྲིད་རྒྱལ་བའི་ཞིང་ཁམས་ལ༔ མ་རྟོགས་བགེགས་སུ་ལྟ་བའི་རིགས༔ ཐམས་ཅད་གདོད་མའི་ཀློང་ཡངས་སུ༔ སྨྲ་བསམ་བརྗོད་དང་བྲལ་བར་དེངས༔ ཨ་ཏི་ཀྲ་མ་ཨུ་ཙ་ཏྱ་ཕཊ༔ ཅེས་སྟོང་ཞིང་བདག་མེད་ངང་དུ་བགེགས་བསྐྲད་པར་བྱའོ༔ གནས་ལུགས་ཀྱི་ངང་ནས་སྐྱབས་སུ་འགྲོ་བ་ནི༔ སྐྱེ་མེད་སྟོང་པ་ཆོས་ཀྱི་སྐུ༔ འགག་མེད་གསལ་བ་རྫོགས་པའི་སྐུ༔ གཉིས་མེད་གཅིག་པ་སྤྲུལ་པའི་སྐུ༔ འཛིན་མེད་ཀློང་དེར་སྐྱབས་སུ་མཆི༔ ཞེས་སྐྱབས་སུ་འགྲོ་བར་བྱའོ༔ ཐེག་པ་ཆེན་པོ་བྱང་ཆུབ་མཆོག་ཏུ་སེམས་བསྐྱེད་པ་ནི༔ མཐའ་ཡས་འགྲོ་བ་མ་ལུས་པ༔ རྫོགས་པའི་སངས་རྒྱས་ཐོབ་ཕྱིར་དུ༔ བདག་གིས་བྱང་ཆུབ་སེམས་མཆོག་ནི༔ སྲོག་ལ་བབ་ཀྱང་བསྐྱེད་པར་བྱ༔ ཞེས་སེམས་བསྐྱེད་པར་བྱའོ༔ རྩ་རླུང་དོན་གྱི་མཎྜལ་འབུལ་བ་ནི༔ ཕྱི་སྣོད་རྩ་ཡི་མཎྜལ་ལ༔ ནང་བཅུད་རླུང་སེམས་ཚོམ་བུ་བཀོད༔ བདེ་སྟོང་ཐིག་ལེའི་རྒྱན་དང་བཅས༔ རང་རིག་དོན་གྱི་ལྷ་ལ་འབུལ༔ ཞེས་མཎྜལ་འབུལ་བར་བྱའོ༔ བྱིན་རླབས་ཉེ་བརྒྱུད་ཀྱི་བླ་མ་ལ་གསོལ་བ་གདབ་པ་ནི༔ ཧྲཱི༔ མ་བཅོས་གཉུག་མ་ཁྱབ་གདལ་ཆེན་པོའི་དབྱིངས༔ ཡེ་ཉིད་སྟོན་པ་ཀུན་ཏུ་བཟང་པོ་སོགས༔ དགོངས་བརྒྱུད་བླ་མ་རྣམས་ལ་གསོལ་བ་འདེབས༔ འཇའ་ལུས་འོད་སྐུར་གྲུབ་པར་བྱིན་གྱིས་རློབས༔ ཡེ་ཤེས་རང་གསལ་འོད་ཟེར་འཁྱིལ་བའི་ཀློང༔ རིག་སྟོང་སྤྲོས་བྲལ་དབང་ཆེན་ཡབ་ཡུམ་སོགས༔ ཡི་དམ་ལྷ་ཚོགས་རྣམས་ལ་གསོལ་བ་འདེབས༔ ལྷུན་གྲུབ་བདེ་བ་ཆེན་པོར་བྱིན་གྱིས་རློབས༔ རང་སྣང་རྣམ་དག་མཁའ་སྤྱོད་གཞལ་ཡས་ན༔ དབྱིངས་ཀྱི་ཡུམ་ཆེན་རྡོ་རྗེ་ཕག་མོ་སོགས༔ མ་སྲིང་མཁའ་འགྲོ་རྣམས་ལ་གསོལ་བ་འདེབས༔ དྭངས་མ་ཡེ་ཤེས་རྒྱས་པར་བྱིན་གྱིས་རློབས༔ བདེ་ཆེན་རང་གསལ་དག་པའི་དཀྱིལ་འཁོར་ན༔ སློབ་དཔོན་པདྨ་འབྱུང་གནས་ཡབ་ཡུམ་སོགས༔ གུ་རུ་ཌཱ་ཀི་རྣམས་ལ་གསོལ་བ་འདེབས༔ མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས༔ མཐའ་འཁོབ་འགྲོ་བ་འདུལ་བའི་ཕོ་བྲང་ན༔ ཟབ་ཆོས་མཛོད་འཛིན་བཻ་རོ་ཙ་ན་སོགས༔ རླུང་ཁྲིད་བརྒྱུད་པ་རྣམས་ལ་གསོལ་བ་འདེབས༔ རིས་བྲལ་དག་སྣང་འཆར་བར་བྱིན་གྱིས་རློབས༔ གཏེར་གནས་འཇའ་འོད་མེ་དཔུང་འཁྲིགས་པའི་དབུས༔ མ་རྒྱུད་གཙོ་མོ་རྡོ་རྗེ་ཕག་མོ་སོགས༔ བཀའ་གཏེར་སྲུང་མ་རྣམས་ལ་གསོལ་བ་འདེབས༔ ཐར་ལམ་བར་ཆད་ཞི་བར་བྱིན་གྱིས་རློབས༔ རྒྱལ་ཁམས་ཕྱོགས་མེད་གནས་ཀྱི་ཞིང་ཁམས་ན༔ ཟབ་གཏེར་མངའ་བདག་འཇའ་ཚོན་སྙིང་པོ་སོགས༔ གྲུབ་ཆེན་དམ་པ་རྣམས་ལ་གསོལ་བ་འདེབས༔ དོན་གཉིས་ལྷུན་གྱིས་གྲུབ་པར་བྱིན་གྱིས་རློབས༔ སྤྱི་གཙུག་ཉི་ཟླ་པདྨའི་གདན་སྟེང་ན༔ བཀའ་དྲིན་འཁོར་མེད་རྩ་བའི་བླ་མ་སོགས༔ རླུང་སེམས་ཟུང་འཇུག་རྣམས་ལ་གསོལ་བ་འདེབས༔ ཉམས་རྟོགས་མངོན་དུ་གྱུར་པར་བྱིན་གྱིས་རློབས༔ གདུང་ཤུགས་སྙིང་ནས་སྐྱེ་བའི་རྣལ་འབྱོར་ལ༔ མཁྱེན་བརྩེ་ཡེ་ཤེས་སྤྱན་གྱིས་ད་གཟིགས་འཚལ༔ བསྐྱེད་རིམ་ལྷ་ཡི་རྣལ་འབྱོར་མངོན་སུམ་རྟོགས༔ བདེ་དྲོད་རང་དབང་འབྱོངས་པར་བྱིན་གྱིས་རློབས༔ འབྱིན་འཇུག་རླུང་གི་ནུས་པ་རབ་ཏུ་འབར༔ ཞུ་བདེ་ཐིག་ལེ་རྒྱས་པར་བྱིན་གྱིས་རློབས༔ ཐབས་ཤེས་དབྱེར་མེད་སྣང་སྟོང་མཐའ་དང་བྲལ༔ ཟག་མེད་བདེ་བ་ཆེན་པོར་བྱིན་གྱིས་རློབས༔ འཁོར་འདས་སེམས་ཀྱི་ཆོ་འཕྲུལ་རང་སར་དག༔ བདག་མེད་ཆོས་སྐུ་ཐོབ་པར་བྱིན་གྱིས་རློབས༔ གསོལ་བ་བཏབ་པས་བླ་མ་རྣམས་འོད་དུ་ཞུ་ནས༔ རང་ཉིད་ལ་ཐིམ་པས༔ ཐུགས་རྗེའི་བྱིན་རླབས་ཡོན་ཏན་ཅི་མངའ་བ་ཐམས་ཅད་བདག་གི་རྒྱུད་ལ་འཆར་བར་བསམ༔ ཞེས་གདུང་ཤུགས་དྲགས་པོའི་སྒོ་ནས་གསོལ་བ་གདབ་པར་བྱའོ༔ དེ་ནས་རླུང་རོ་ཕྱུང་ཞིང་རླུང་སྦྱོར་ལ་ཞུགས་པ་སོགས་ཚར་ནས་བསྔོ་བ་སྨོན་ལམ་གྱི་རྒྱས་གདབ་པ་ནི༔ བདེ་ཆེན་ལྷུན་གྱིས་གྲུབ་པའི་ཉམས་ལེན་དངོས༔ བདེ་སྟོང་ཟུང་འཇུག་དགེ་བ་འགྲོ་ལ་བསྔོ༔ རྡོ་རྗེ་ཐེག་པའི་བསྟན་པ་རབ་དར་ནས༔ རྡོ་རྗེ་ཕག་མོའི་གོ་འཕང་མྱུར་ཐོབ་ཤོག༔ ཅེས་མི་དམིགས་པའི་རྒྱས་གདབ་པར་བྱའོ༔ སྙིགས་མའི་དུས་འདིར་དགེ་བསམ་བློ་གྲོས་ཅན༔ ཡོད་ན་ཚེ་འདིའི་བྱ་བ་མངོན་དོར་ནས༔ དབེན་པའི་ཁྲོད་དུ་རླུང་སེམས་ཟུང་འཇུག་གི༔ ཉམས་ལེན་བརྩོན་རྣམས་རྨད་བྱུང་སྐལ་པ་བཟང༔ གུ་ཧྱ་རྒྱ༔ འཇའ་ཚོན་པ་རང་གིས་སོ།། །།

རྩ་རླུང་མཁའ་འགྲོའི་གསང་མཛོད་ལས། ས་གཅད་གསལ་བའི་མེ་ལོང་ (Volume 40, Text 2)

༄༅། །རྩ་རླུང་མཁའ་འགྲོའི་གསང་མཛོད་ལས། ས་གཅད་གསལ་བའི་མེ་ལོང་བཞུགས། ། རྩ་རླུང་མཁའ་འགྲོའི་གསང་མཛོད་འདི་ལ་དོན་གྱི་ས་གཅད་གཉིས་ཏེ། བླ་མ་བརྒྱུད་པའི་ལོ་རྒྱུས་དང་། དེ་ལས་བྱུང་བའི་གདམས་པའོ། །དང་པོ་བླ་མ་བརྒྱུད་པའི་ལོ་རྒྱུས་ནི། གཏེར་འབྱུང་སྣང་བའི་དགའ་སྟོན་དང་། ཡིད་ཆེས་ལུང་གི་ཆེ་བ་ལྟར་རོ། །གཉིས་པ་བརྒྱུད་པ་དེ་ལས་བྱུང་བའི་གདམས་པ་དངོས་ལའང་གཉིས། སྨིན་བྱེད་ཀྱི་དབང་དང་གྲོལ་བྱེད་གདམས་པའོ། །དང་པོ་ནི་དབང་མཆོག་ཡེ་ཤེས་རང་ཤར་ལྟར་རོ། །གཉིས་པ་གྲོལ་བྱེད་ཀྱི་གདམས་པ་ལ་བཞི། ཕྱི་བསྐྱེད་རིམ་ལྷ་ཡི་རྣལ་འབྱོར་ལ་བརྟེན་ནས་རང་ལུས་ལྷ་སྐུར་བསྒྲུབ་པ་དང་། ནང་འབྱིན་འཇུག་རླུང་གི་ཉམས་ལ་བརྟེན་ནས་རྩ་ཁམས་དྭངས་མ་རུ་བསྒྲུབ་པ། གསང་བ་ཀུན་རྫོབ་རྒྱུའི་ཐིག་ལེ་ལ་བརྟེན་ནས་དྭངས་མ་ཡེ་ཤེས་སུ་སྒྲུབ་པ་དང་། ཡང་གསང་གང་ལ་གང་འཚམ་གྱི་ལས་མཐར་དབྱུང་བའོ། །དང་པོ་བསྐྱེད་རིམ་ལྷ་ཡི་རྣལ་འབྱོར་ལ་གསུམ། བསྐྱེད་རིམ་སྦྱང་བ། སྙིང་པོ་བགྲང་བ། བདེ་བ་བསྐུལ་བའོ། །གཉིས་པ་འབྱིན་འཇུག་རླུང་གི་ཉམས་ལེན་ལ་གཉིས། རྩ་བ་གཏུམ་མོའི་ཉམས་ལེན་དང་། ཡན་ལག་གནད་ཀྱི་ཉམས་ལེན་ནོ། །དང་པོ་ལ་བཞི། ཕྱི་གནས་ཀྱི་མཚན་ཉིད། ནང་ཟས་ཀྱི་མཚན་ཉིད། གསང་བ་གྲོགས་ཀྱི་མཚན་ཉིད། ཁོ་ན་ཉིད་ཀྱི་ཉམས་ལེན་ནོ། །དང་པོ་ནི་དབེན་ལ་མཐུན་རྐྱེན་འཛོམ་པའོ། །གཉིས་པ་ནི་ཁ་ཟས་བཅུད་ཅན་བསགས་པའོ། །གསུམ་པ་ནི་ཆོས་མཐུན་གྱི་གྲོགས་དང་འགྲོགས་པའོ། །བཞི་པ་ལ་གཉིས། སྟོང་ར་བསྒོམ་པ་དང་། རླུང་གི་རྣལ་འབྱོར་རོ། །དང་པོ་སྟོང་ར་སྒོམ་པ་ལ། ཕྱི་ལུས་དང་། ནང་རྩ་ཡི་སྟོང་ར་དང་། གསང་བ་གཏུམ་མོའི་མེ་ཚང་བཅའ་བའོ། །གཉིས་པ་རླུང་རྣལ་ལ་བཞི། འཇམ་རླུང་ལ་བསླབ་པ་དང་། བར་རླུང་ལ་བསླབ་པ་དང་། བུམ་པ་ཅན་ལ་བསླབ་པ་དང། དྲག་རླུང་ལ་བསླབ་པའོ། །གཉིས་པ་ཡན་ལག་གནད་ཀྱི་ཉམས་ལེན་ལ་དྲུག །དང་པོ་ཐུན་མོང་གཏུམ་མོའི་འཕྲུལ་འཁོར། གཉིས་པ་རྨི་ལམ་འོད་གསལ་ཁོར་ཡུག །གསུམ་པ་འོད་གསལ་འཁྲུལ་པ་རང་དག བཞི་པ་སྒྱུ་ལུས་བདེན་མེད་རང་གྲོལ། ལྔ་པ་བར་དོ་སྣང་བ་རང་གྲོལ། དྲུག་པ་འཕོ་བ་ཟབ་ལམ་རྣལ་འབྱོར་རོ། །གསུམ་པ་ཀུན་རྫོབ་རྒྱུའི་ཐིག་ལེ་ལ་གཉིས། སྤྱིར་བཤད་པ་དང་། སོ་སོར་བཤད་པའོ། །དང་པོ་ལ་ལྔ། རྒྱབ་ཐུར་གྱི་རྒྱུ་དང་། ཚད་དང་། རབ་གནས་དང་། སྦྱོང་ཐབས་ལྔ་དང་བཅུད་ལེན་ནོ། །གཉིས་པ་སོ་སོར་བཤད་པ་ལ་གཉིས། ཡབ་ཀྱི་ཉམས་ལེན་དང་། ཡུམ་གྱི་ཉམས་ལེན་ནོ། །དང་པོ་ལ་གསུམ། ཕྱག་རྒྱའི་བརྟགས་ཐབས། ཇི་ལྟར་བསྟེན་ཚུལ། བསྟེན་པ་ལ་ཕན་ཡོན་འབྱུང་ཚུལ་ལོ། །དང་པོ་ལ་གསུམ། ཕྱི་ལུས་ཀྱི་བརྟག་ཐབས། ནང་གི་བརྟག་ཐབས། གསང་བ་སེམས་ཀྱི་བརྟགས་ཐབས་སོ། །གཉིས་པ་བསྟེན་ཚུལ་ལ་གསུམ། སྔོན་འགྲོ་རྡོ་རྗེ་ཆུ་འཐུང་། དངོས་གཞི་ལག་པའི་འདུ་བྱེད། རྗེས་བྱ་སྙོམས་པར་འཇུག་པའོ། །གསུམ་པ་ཕན་ཡོན་ལ་གཉིས། གནས་སྐབས་ཀྱི་ཡོན་ཏན་བསྐྱེད་ཚུལ། མཐར་ཐུག་འབྲས་བུ་ཐོབ་ལུགས་སོ། །གཉིས་པ་ཡུམ་གྱི་ཉམས་ལེན་ལ་གསུམ། དཔའ་བོའི་མཚན་ཉིད། ཇི་ལྟར་སྦྱོར་བ། དེའི་ཕན་ཡོན་ནོ། །དང་པོ་ལ་གསུམ། མཚན་རྟགས་ཐམས་ཅད་རྫོགས་པ་རབ། ཕྱེད་ཙམ་འབྲིང་། སུམ་ཆ་ཙམ་ཐ་མའོ། །གཉིས་པ་ཇི་ལྟར་སྦྱོར་བ་ལ་གསུམ། སྔོན་འགྲོ་པདྨ་རླུང་འབྱིན། དངོས་གཞི་ཕྱིང་དྲིལ་གདམས་པ། རྗེས་བྱ་ལས་ལ་སྦྱར་བའོ། །གསུམ་པ་ཕན་ཡོན་ལ་གཉིས། ཐུན་མོང་དང་། མཆོག་གི་དངོས་གྲུབ་ཐོབ་ལུགས་སོ། །བཞི་པ་གང་ལ་གང་འཚམ་གྱི་ལས་མཐར་བྱུང་བ་ལ་བདུན། ཐུན་མོང་མིན་པའི་འཕྲུལ་འཁོར། མཚན་ལྡན་འགུག་པའི་ལྕགས་ཀྱུ། གྲོང་འཇུག་འགྲོ་དོན་རྒྱུན་སྐྱོང་། གེགས་སེལ་ཐར་པའི་སྲོག་གཟུང་། ལས་ཚོགས་གཏེར་གྱི་ཕྲེང་བ། བདུད་རྩི་ཆུ་མིག་སྒྲུབ་ཐབས། རྡོ་རྗེ་རྣལ་འབྱོར་མ་སྒྲུབ་ཐབས་སོ། །རྩ་རླུང་མཁའ་འགྲོའི་གསང་མཛོད་ཀྱི་ས་གཅད་གསལ་བའི་མེ་ལོང་ཞེས་བྱ་བ་འདི་ཡང་། དྲེའོ་ཤོད་པདྨ་རྒྱས་པའི་ཡུལ་དུ་སྙིགས་མའི་རྣལ་འབྱོར་འཇའ་ཚོན་སྙིང་པོ་ཅན་གྱིས་སྦྱར་བ་དགེ་ལེགས་སུ་གྱུར་ཅིག། །། ༄། རྩ་རླུང་མཁའ་འགྲོའི་གསང་མཛོད་ལས། གཏེར་འབྱུང་སྣང་བའི་དགའ་སྟོན་བཞུགས། དགེ་ལེགས་ཟླ་ཤར་འོ་མཚོའི་དབུས། །འཁོར་བའི་སྐྱོན་བྲལ་པདྨའི་སྟེང་། །རང་བྱུང་བྱོན་པའི་རྣམ་རོལ་སྟོན། །བླ་མ་མཚོ་སྐྱེས་རྡོ་རྗེས་སྐྱོངས། །རབ་འབར་ཡེ་ཤེས་མེ་ཡི་ཀློང་། །གར་གྱི་ཉམས་དགུ་འབར་བའི་གཟི། །རྒོལ་ངན་ལོག་རྟོག་རྣམ་པར་གཞོམ། །ཡི་དམ་རྟ་མགྲིན་ཅན་དེ་རྒྱལ། །ཉི་མ་ཟླ་བའི་རྒྱུ་བ་གང་། །སྒྲ་གཅན་ལམ་དུ་མངོན་བཟུང་ནས། །དགའ་བཞིའི་ཡེ་ཤེས་རྒྱས་མཛད་མ། །མཁའ་འགྲོ་རྡོ་རྗེ་ཕག་མོར་འདུད། །མཆོག་དང་ཐུན་མོང་དངོས་གྲུབ་དཔལ། །སྟེར་བའི་བདག་ཉིད་རྗེ་བཙུན་མར། །དད་པའི་མེ་ཏོག་འདི་འཐོར་ན། །དགེ་བསམ་མཐར་ཕྱིན་ཤིས་པ་སྩོལ། །མཁྱེན་བརྩེའི་ཤིང་རྟ་ཉེར་བསྒྱུར་ནས། །རྒྱུད་དོན་ཉིན་བྱེད་དབང་པོ་གང་། །གཡའ་བྲལ་ཀུན་གསལ་ལྟོར་དྲངས་ཤིང་། །གཏེར་འབྱུང་སྣང་བའི་དགའ་སྟོན་སྤེལ། །དེ་ཡང་སྙིགས་མ་ལྔ་བདོ་དུས། །བསྟན་འགྲོ་སྐྱོབ་པའི་ཁུར་ལྕི་བ། །ཨོ་རྒྱན་ལས་འཕྲོ་གླིང་པ་དེའི། །རྟོགས་བརྗོད་རྒྱས་པ་གཞན་དུ་གསལ། ཁྱད་པར་རྒྱུད་རྒྱལ་གསང་ཆེན་སྙིང་། །ཡང་ཟབ་མཁའ་འགྲོའི་གསང་མཛོད་ཀྱི། །གཏེར་གྱི་འབྱུང་ཚུལ་ཀ་རི་སྒྲ། །སྒྲོག་འདིར་སྐལ་ལྡན་རྣ་བ་བློགས། །ལྕགས་སྤྲེལ་འབྲས་ལྡན་ཟླ་བ་ལ། །མཁའ་འགྲོ་སྤུ་ལང་དབུ་བརྙན་ཅན། །རིན་ཆེན་རུས་པས་བརྒྱན་པ་ཞིག །བྱུང་ནས་གསང་བའི་ལུང་འདི་སྐྱུག །ཐེ་ཚོམ་དྲི་མ་ཡོངས་སེལ་ལ། །རྟེན་འབྲེལ་གང་ཡང་ལེགས་པའི་གཞི། །བདེ་ཆེན་རྣམ་དག་བཀོད་པ་ཞིང་གི་ནི། །སྲིད་གསུམ་དབང་བསྒྱུར་འཁོར་ལོ་འཆང་། །ཆུ་སྐྱེས་གཞོན་ནུའི་དཔལ་དེ་ལ། །དགེ་ལེགས་སྦྲང་རྩི་འབུམ་དུ་འཛག །ཞིམ་པའི་བསུང་དང་ལྡན་པ་དེ། །ཡིད་ཀྱི་བུང་བ་དགྱེས་པར་རོལ། །དཔལ་གྱི་ས་འཛིན་མཐོན་པོའི་རྩེར། །དགའ་ལྡན་དགའ་བའི་གླུས་བསྐུལ་ཚེ། །སྣ་ཚོགས་དར་གྱི་རྒྱལ་མཚན་དེ། །མཚོ་དབུས་ཚུགས་ལ་ནོར་བུ་མཆོད། །ལང་ཚོས་སྒེག་པའི་ཟླ་བའི་བཞིན། །ཤར་རིའི་ཕྲག་པ་མཐོན་པོ་ལ། །འགོག་མེད་ངོམ་པའི་དཀྱིལ་འཁོར་གང་། །ཆུ་སྣོད་འབུམ་དུ་ངེས་པར་སྣང་། །དེས་ན་རྟེན་འབྲེལ་སྒོ་འཕར་བརྒྱ། །འབྱེད་པའི་ལྡེ་མིག་སུག་པར་སོན། །བདེ་ཆེན་ཕག་མོའི་བྷ་གའི་སྦུབ། །དགོས་འདོད་ནོར་བུའི་མཛོད་ལ་དབང་། །དེ་ལྟས་ལུང་གི་སྐྱོན་བཞིན་པར། །རྡོ་རྗེའི་དཔལ་གྱི་གདན་ས་རུ། །སོང་ནས་དགེ་འདུན་རྒྱ་མཚོའི་དབུས། །ལུང་རིག་སྐད་གསང་མཐོན་པོར་སྒྲོགས། །ལྷ་དང་མི་ཡི་ནོར་བུ་བཟང་། །གྲུབ་པའི་དབང་ཕྱུག་གཙུག་ཏུ་མཆོད། །དགོས་དགུ་རེ་བ་མ་ལུས་པ། །འདོད་པའི་དོན་གྲུབ་ཨེ་མ་མཚར། །རྟེན་འབྲེལ་སྒོ་འབྱེད་ལྡེ་མིག་མ། །པདྨོས་སྦྲང་རྩི་མངར་པོ་གང་། །འཛད་མེད་དགྱེས་པའི་གསུང་དང་བཅས། །ལྷུན་གྱིས་གྲུབ་པའི་དགའ་བས་མྱོས། །རླུང་ཁམས་རླུང་གི་བསྐྱེད་པ་ཅན། །ཡང་དབེན་དཔལ་གྱི་དགོན་པ་རུ། །འབྱོར་ཚེ་ཙི་འུ་དམར་པོ་ཡི། །ཕྲིན་ལས་གར་གྱི་སྣ་དག་འབྱུང་། །དེ་བཞིན་རི་ལོ་དབང་ལྡན་གྱིས། །ཐུགས་ཀྱི་བཞེད་པ་སྒྲུབ་པའི་ཕྱིར། །སོང་ནས་གང་ལ་གང་འཚམ་པ། །འབད་པའི་སྐྱིད་ཀྱི་སྐྱ་རེངས་ཀྱང་། །དེ་ཚེ་དཔལ་གྱི་ལྷ་མོ་ཡི། །གནས་ཆེན་འབྲེལ་བཞག་བྱོན་མཛོད་དང་། །རྟེན་འབྲེལ་ལེགས་པའི་པདྨོ་རྒྱས། །རང་གཞན་སྣང་བ་མགུ་བར་འབྱུང་། །ཞེས་པའི་ལུང་དང་མཐུན་པ་རུ། །སོང་ནས་རྒྱ་མདར་ཟམ་པའི་ཁར། །སྡོད་པའི་ནུབ་མོ་རྗེ་བཙུན་མ། །མངོན་སུམ་བྱོན་ནས་འདི་སྐད་གསུངས། །རིག་སྔགས་འཆང་བ་བྱེད་པའི་དཔལ། །མེ་ཤེལ་ཉི་མ་འཕྲད་པའི་ངོས། །རྟ་ཕག་སྦྱོར་བའི་ཨེ་དབྱིངས་སུ། །ཡིད་བཞིན་ནོར་བུ་ཡིབ་དེ་ཕྱུངས། །མི་ཤེས་མེད་དང་རྒྱུས་མེད་ཀྱི། །ཐབས་དང་ལྡན་པའི་མི་སྣང་སྒྲིབ། །རྡོ་རྗེ་གསང་མཛོད་གསང་ཞིང་སྤྱོད། །ཡང་ཟབ་ཟབ་པའི་དངོས་གྲུབ་འབྱུང་། །ཞེས་ཀྱི་ལུང་ལྟར་རིགས་མཐུན་གྲོགས། །པདྨ་མཁའ་འགྲོས་སྣ་དྲངས་ནས། །ལྕགས་བྱིའི་ཟླ་༣ཚེས་༡༠གནས་སུ་བསྐྱོད། །སྐལ་ལྡན་ཚོགས་ཀྱི་དག་སྣང་རྒྱས། ཁྱད་པར་ཕག་མོ་ཡུམ་གྱི་གནས། །མཁའ་འགྲོ་གསང་བའི་ཕུག་པའི་ནང་། །རྡོ་རྗེ་ཕག་མོའི་བྷ་ག་ནས། །ཟབ་མོ་དོན་གྱི་དངོས་གྲུབ་རྙེད། །བསྟན་འགྲོར་ཕན་རྒྱ་བསྐྱེད་པའི་ངོས། །གཏེར་ཚབ་བཟང་པོ་བཞག་བྱས་ཏེ། །བདེན་པའི་ཚིག་གི་ཕྲེང་བ་རིངས། །སྨོན་ལམ་སྲད་བུར་བརྒྱུས་ཏེ་སྤེལ། །དེ་ཚེ་དག་པའི་སྣང་ངོ་རུ། །མཚོ་སྐྱེས་རྡོ་རྗེའི་སྐུར་བཞེངས་པ། །འཇའ་འོད་འཁྲིགས་པའི་གུར་ཁང་ནས། །རྡོ་རྗེ་བཞད་པའི་གསུང་འདི་སྐད། །ང་ནི་སངས་རྒྱས་ཀུན་གྱི་ཐུགས། །འཆི་མེད་པདྨ་འབྱུང་གནས་ཏེ། །རྡོ་རྗེ་བཞད་པའི་གླུ་དབྱངས་འདི། །སྐལ་ལྡན་བུ་ཡི་རྣ་བར་སྤྲིང་། །ད་ལྟ་སྙིགས་མ་ལྔ་བདོ་དུས། །སངས་རྒྱས་བསྟན་པ་རྟགས་ཙམ་འཛིན། །གསང་སྔགས་ཨ་ཏི་བསྒོམ་པ་ཉུང་། །ཟབ་ལམ་རྩ་རླུང་ལོག་པར་བལྟ། །མཐའ་བཞི་བདུད་ཀྱི་མགོ་བོ་མཐོ། །ནད་མུག་མཚོན་གྱི་བསྐལ་ངན་ཤར། །འགྲོ་ལ་མི་འདོད་སྣ་ཚོགས་འབྱུང་། །དེ་ཚེ་སྨན་བཞེད་ཁྱོད་རང་བསྔགས། ཁྱད་པར་མི་ཤིས་རྒུད་པའི་ཚོགས། །ཡོངས་སུ་རྣམ་པར་བཅིལ་བྱེད་དུ། །མཁའ་འགྲོ་འབུམ་གྱི་སྙིང་གི་ཐིག །རྡོ་རྗེ་གསང་བའི་མཛོད་འདི་འོ། །དེ་སྐད་ཞལ་གྱི་ལུང་གནང་ཚེ། །གུ་རུའི་སྐུ་ལས་མཆེད་འདྲ་བའི། །མཁའ་འགྲོ་མཚོ་རྒྱལ་བོད་མོའི་ཆས། །ཞལ་གྱི་བདུད་རྩིའི་རྒྱུན་བབ་པ། །རིག་སྔགས་འཆང་བར་བྱེད་པའི་བུ། །ལོ་གསུམ་བཅད་རྒྱ་མངོན་བསྡམས་ནས། །སྲུང་བའི་གུར་ཁང་མ་སྦུབ་སྐྱོན། །ཚེ་ཡི་རྒྱུན་ཐག་ཐུང་ལ་རེ། །འོན་ཀྱང་ཚེ་འཛིན་རིགས་ཀྱི་མར། །ཚེ་ཡི་དམུ་ཐག་གཟུང་བཅུག་ན། །རྟེན་འབྲེལ་དམ་གསོ་ཉམས་བསྐང་དང་། །དགོས་སོ་རེ་བ་འགའ་ཙམ་འབྱུང་། །རིག་འཛིན་རྣམ་རོལ་རྡོ་རྗེ་འཆང་། །འཇིག་རྟེན་གསུམ་གྱི་མགོན་གྱུར་ནས། །བསྟན་འགྲོར་སྐྱིད་གྱི་ཉི་མ་འཆར། །བར་ཆད་བདུད་རིགས་རླུང་འཚུབས་གནོན། །ཟབ་དོན་དངོས་གྲུབ་རྙེད་པ་ཡི། །སྒྲོམ་བུ་དམ་ཅན་མགར་བས་མགར། །ཤོག་བུ་འཕགས་པའི་ཡུལ་ནས་བྱུང་། །སྣག་ཚ་ཁོ་མོའི་ཟླ་བའི་མཚན། །བཀའ་ཡི་རྒྱ་མདུད་གྲོལ་བའི་ཚེ། །མ་མོ་རྦོད་གཏོང་བསྟན་པའི་དལ། །དགུང་དུ་རླབས་བྱེད་གསང་མཛོད་འདིས། །རང་གཞན་གྲུབ་རིགས་བརྙེས་པ་འོ། །དེ་ལྟས་བོད་ཡུམ་ཆེན་མོ་ཡི། །ཞལ་གྱི་དྲོད་རླངས་མ་ཡལ་བའི། །བཀའ་ཆབ་སྤྱི་བོའི་གཙུག་ཏུ་བབས། །སྐོམ་པའི་གདུང་བ་གཅིག་ཅར་སེལ། །ཕྱི་ནང་གནས་ཀྱི་ཆགས་ཚུལ་གང་། །ཞིབ་པར་ཁོ་བོས་བགྱིས་པ་ཡི། །དཀར་ཆག་ཡི་གེར་བཏབ་པ་ལ། །གཟིགས་དང་དད་པའི་ངེས་ཤེས་འདྲོང་། ཁམས་གཟུགས་ཚོགས་པ་མ་གྱེས་པའི། །ཕྱོགས་ཀུན་ཉུལ་བའི་ལྡོམ་བུ་པ། །ཌཱ་ཀིའི་ལུང་གིས་སྐྱོང་བཞིན་པར། །དཔལ་རིའི་མདུན་དུ་བཅད་རྒྱ་བསྡམ། །འགྱོད་མེད་བློ་ལ་བདེ་བ་ཙམ། །མ་ཁོམ་རང་རྗེའི་དགེ་རྫོངས་སུ། །ཤར་དུ་བསྐྱོད་ཅིང་སླར་ལ་འཁོད། །རང་དགོས་བྲེལ་བ་རིམ་སེལ་བྱས། །དེ་རྗེས་ཆུ་མོ་ཕག་གི་ལོར། །ཧོར་ཟླ་དགུ་བའི་དཀར་ཕྱོགས་སུ། །དྲེ་ཤོད་དབང་གི་གནས་ཆེན་དུ། །རིལ་བུ་བུམ་སྒྲུབ་ཐུན་མཚམས་སུ། །རྗེ་བཙུན་རྡོ་རྗེ་རྣལ་འབྱོར་མ། །སྣང་རིག་དབྱེར་མེད་ངང་དུ་བྱོན། །ཟབ་དོན་ཕབ་པའི་དུས་ཚིག་འཕྲོད། །ཐུགས་གསང་ཡེ་ཤེས་འཁོར་ལོ་ཕྱེད། །ཤོག་སེར་མཁའ་འགྲོའི་བརྡ་ཡིག་ཅན། །དཀྱུས་སུ་མཐོ་གང་ཞེང་སོར་བཞིས། །ཡིག་ཕྲེང་ཉི་ཤུ་གཅིག་གི་གྲངས། །ཕྱི་ལ་རྩ་གསུམ་འཁོར་ལོའི་ཚུལ། །བརྡ་ཡི་ཡིག་འབྲུ་རེ་རེ་ལ། །ངེས་པའི་ཐིག་ལེ་འབུམ་འབུམ་ཤར། །ཆོས་ཚན་ཉེར་ལྔའི་གྲངས་ལྡན་པ། །བོད་ཀྱི་ཡི་གེར་འབེབ་པར་བྱས། །དྲེ་འོ་ཤོད་ནས་ཕབ་དབུར་གཟུང་། །ཤ་རྫ་རྡོ་རྗེ་ལྷུན་པོའི་མདུན། །ཡང་དབེན་བདེ་ཆེན་རི་ཁྲོད་དུ། །ཤིང་བྱིར་ཕབ་པའི་མཐར་སོན་བྱས། ༈ །མཁའ་འགྲོའི་གསང་མཛོད་རིན་ཆེན་གདུགས། །ཕྲག་པར་འདེགས་པའི་སྙིང་སྟོབས་ཅན། །རླུང་སེམས་བསྟན་པའི་རྒྱལ་མཚན་རྩེར། །སྒྲེང་བར་བྱེད་པའི་འཇའ་ཚོན་པའོ། །བརྩམས་པའི་དགེ་བ་ཉིན་བྱེད་ཀྱིས། །རྒྱལ་བསྟན་པད་ཚལ་ཀུན་རྒྱས་ཏེ། །འགྲོ་བའི་རྨོངས་མུན་ཉེར་སེལ་ནས། །ཡང་དག་སྣང་བ་རྒྱས་གྱུར་ཅིག །ཅེས་གཏེར་འབྱུང་སྣང་བའི་དགའ་སྟོན་འདི་ཡང་མིག་དམར་ཞེས་པ་ཤིང་ཕོ་བྱི་བའི་ལོ། ཧོར་ཟླ་ལྔ་པའི་འོད་ལྡན་གྱི་ཟླ་བར་འཇའ་ཚོན་སྙིང་པོ་ཅན་གྱིས་བརྩམས་པ་འདི་ཡང་གསང་མཛོད་སེམས་ཀྱི་བསྟན་པ་རིན་པོ་ཆེའི་རྒྱན་དུ་གྱུར་ཅིག །སརྦ་མངྒ་ལཾ།། །། ༄། རྩ་རླུང་མཁའ་འགྲོའི་གསང་མཛོད་ལས། ལག་ལེན་ནོར་བུའི་ཕྲེང་བ་བཞུགས། འཁོར་འདས་ཆོས་ཀུན་ཁྱབ་བདག་ཆེན་པོའི་ངོར། །གཉིས་མེད་མཉམ་པར་གྲུབ་ཀྱང་གཟུགས་ཀྱི་སྐུ །མངོན་པར་ཞེན་མཛད་པད་སྡོང་རྩེར་བྱོན་ལྷར། །རླུང་གཡོ་འཁྲི་ཤིང་བཞིན་དུ་བདག་ཕྱག་འཚལ། །མང་མང་གསང་ཆེན་རྒྱུད་དོན་ལྕི་བའི་མངལ། །ཡང་ཡང་ཉམས་ལྟར་འཁུན་བུ་སྟོང་ལྡིར་བ། །གསལ་གསལ་ཡི་གེའི་ལམ་ལ་དུས་གཅིག་ཏུ། །ངེས་ངེས་ལག་ལེན་ནོར་བུའི་ཕྲེང་འདིར་སྤེལ། །དེ་ཡང་རྩ་རླུང་མཁའ་འགྲོའི་གསང་མཛོད་ཉམས་སུ་ལེན་པའི་རྣལ་འབྱོར་གྱིས་སྲིད་པའི་ཕུན་ཚོགས་མཐའ་དག་ཆུ་ཤིང་གི་སྙིང་པོ་ལྟར་མཐོང་ནས། དབེན་པའི་རི་ཁྲོད་དུ་ཐར་པ་དང་ཐམས་ཅད་མཁྱེན་པ་སྒྲུབ་པ་ལ་རྩེ་གཅིག་ཏུ་བརྩོན་པའི་བློ་དང་བཅས་ཏེ། ཐོག་མར་ལེགས་བཤད་ལམ་གྱི་རིམ་པ་ཞིག་ལ་ཞུགས་ནས། བྱང་ཆུབ་སྒྲུབ་ཐབས་ཀྱི་རྩ་བ་དགེ་བའི་བཤེས་གཉེན་བསྟེན་པ་དང་། བཤེས་གཉེན་བསྟེན་ནས་ལུས་ལས་སུ་རུང་བ་དལ་འབྱོར་རྙེད་དཀའ་བ་བསམ་པ་དང་། ལུས་ལས་སུ་རུང་ནས་སེམས་ལས་སུ་རུང་བ་འཆི་བ་མི་རྟག་པ་བསྒོམ་པ་དང་། མི་རྟག་པ་བྱུང་བའི་འོག་ཏུ་གར་སྐྱེ་ངེས་པ་མེད་པའི་འཁོར་བའི་ཉེས་དམིགས་བསམ་པ་དང་། ཉེས་དམིགས་མཐོང་ནས་ལས་རྒྱུ་འབྲས་ཀྱི་སྤང་བླང་བྱེད་པ་དང་། རྒྱུ་འབྲས་ཤེས་ནས་ཡུལ་ཁྱད་པར་ཅན་ལ་དད་པ་བཙལ་བ་དང་། དད་པ་སྐྱེས་ནས་དཀོན་མཆོག་གསུམ་ལ་སྐྱབས་སུ་འགྲོ་བ་དང་། རང་སྐྱབས་འོག་ཏུ་ཚུད་ནས་གཞན་དོན་དུ་སེམས་བསྐྱེད་པ་དང་། བསམ་པ་བྱང་ཆུབ་མཆོག་ཏུ་སེམས་བསྐྱེད་ནས་སྦྱོར་བ་ཞི་གནས་བསྒོམ་པ་དང་། ཞི་གནས་རྒྱུད་ལ་སྐྱེས་ནས་བདག་མེད་ཀྱི་ཤེས་རབ་བསྟན་པ་སོགས། རིམ་པ་བཞིན་དུ་འཇུག་ལ་མྱོང་བ་ཐོན་པར་བྱ། དེ་ནས་ཐབས་ཉེ་ལམ་ཟབ་མོ་རླུང་སེམས་ཟུང་འཇུག་པའི་ཉམས་ལེན་ལ་བརྩོན་ཏེ། ཐོག་མར་སྨིན་བྱེད་ཀྱི་དབང་བསྐུར་བ་ལ། གཏེར་འབྱུང་དང་ལོ་རྒྱུས་ཀྱིས་ངེས་ཤེས་བསྐྱེད་ཅིང་། ཡེ་ཤེས་རང་ཤར་ལྟར་དབང་བསྐུར། རྡོ་རྗེ་རྣལ་འབྱོར་གྱི་གཏོར་མ་འབུལ། སློབ་མས་ལོ་བཅུ་གཉིས་ཀྱི་བཅད་རྒྱར་གནས་པའི་ཁས་ལེན་བྱ། དེ་ནས་ཕྱི་བསྐྱེད་རིམ་ལྷ་ཡི་རྣལ་འབྱོར། ནང་འབྱིན་འཇུག་རླུང་གི་རྣལ་འབྱོར། གསང་བ་ཀུན་རྫོབ་རྒྱུ་ཡི་ཐིག་ལེ། ཡང་གསང་གང་ལ་གང་འཚམ་གྱི་ལས་མཐའ་རྣམས། ས་གཅད་ལྟར་ཉམས་སུ་ལོན་ངེས་བྱ་སྟེ། གདམས་པ་ཡིག་ཐོག་ཏུ་ལུས། ཉམས་ལེན་ལེ་ལོས་ཁྱེར། འབྲས་བུ་ཕྱི་དུས་སུ་འཇོག །ལྟ་བ་གོ་ཡུལ་དུ་འབྱམས། སྒོམ་པ་རེས་འཇོག་ཏུ་ཤོར། སྤྱོད་པ་ཡ་མ་ཟུང་དུ་སྐྱོང་ཞིང་། ཁ་ཆོས་དོན་དང་འཛོལ་བའི་རིགས་ལ་མ་ཤོར་བ་བྱའོ། །དེ་ཡང་དད་བརྩོན་དང་ལྡན་པའི་རྣལ་འབྱོར་གྱིས། ལོ་བཅུ་གཉིས་ཀྱི་བཅད་རྒྱ་དང་བསྟུན་པའི་གདམས་པ་ཉམས་སུ་ལེན་ཚུལ་ལ་གསུམ། དང་པོ་སྐྱེས་བུ་གསུམ་གྱི་ལམ་གྱི་རིམ་པ་ལྟར། བཤེས་གཉེན་བསྟེན་ཚུལ། དལ་འབྱོར་རྙེད་དཀའ། འཆི་བ་མི་རྟག་པ། འཁོར་བའི་ཉེས་དམིགས། ལས་རྒྱུ་འབྲས། དད་པ་དང་སྐྱབས་འགྲོ །སེམས་བསྐྱེད་པ་རྣམས་ལ་ཟླ་བ་རེ་རེ་བྱས་པའི་ཟླ་བ་བདུན། ཞི་གནས་ཏིང་ངེ་འཛིན་ལ་ཟླ་བ་གཉིས། བདག་མེད་བསྒོམ་པ་ལ་ཟླ་བ་གསུམ་དང་བཅུ་གཉིས་ཏེ་ལོ་གཅིག་གོ །བསྐྱེད་རིམ་ལྷའི་རྣལ་འབྱོར་དང་རྡོ་རྗེ་རྣལ་འབྱོར་མའི་སྒྲུབ་པ་ལ་ཟླ་བ་གཅིག །སྟོང་ར་བསྒོམ་པ་ལ་ཟླ་བ་གཅིག །རྡོ་རྗེ་མཆུ་སྦྱོར་ལ་ཟླ་བ་གཅིག །རྡོ་རྗེ་ཤུབ་བུ་ལ་ཟླ་བ་གཅིག །འཇམ་རླུང་ལ་ཟླ་བ་གཅིག །བར་རླུང་ལ་ཟླ་བ་གཉིས། བུམ་པ་ཅན་ལ་ཟླ་བ་གསུམ་དང་བཅུ་གཉིས་ཏེ་ལོ་གཉིས། ཐུན་མོང་གཏུམ་མོའི་འཕྲུལ་འཁོར་ནི་འཇམ་རླུང་ནས་དྲག་རླུང་བར་དུ་སྤྱིར་རྒྱུག་པ་ཡིན་ནོ། །དེ་ནས་རྨི་ལམ། འོད་གསལ། སྒྱུ་ལུས། བར་དོ། འཕོ་བ་དང་ལྔ་ལའང་། གཞི་གཏུམ་མོ་ཉམས་ལེན། ལམ་གདམས་པ་རང་རང་གིས་བསྒྱུར། གྲོགས་འཕྲུལ་འཁོར་གྱི་སྦྱོར་ལུགས་ལ་བརྩོན་པའི་སྒོ་ནས་ལོ་རེ་རེ་ཉམས་སུ་བླངས་ཏེ་ལོ་བདུན། ཐིག་ལེའི་སྐོར་ནི་རྒྱབ་ཐུར་ལ་ཟླ་བ་བཞི། རྡོ་རྗེ་ཆུ་འཐུང་ངམ་པདྨ་རླུང་འབྱིན་ཟླ་བ་བཞི། ལག་པའི་འདུ་བྱེད་ཕྱི་ནང་རིལ་གྱི་གདམས་པ་ལ་ཟླ་བ་བཞི་དང་བཅུ་གཉིས་ཏེ་ལོ་བརྒྱད། ཕོ་ཁྲིད་མོ་ཁྲིད་གང་རུང་དང་ཐུན་མོང་མིན་པའི་འཕྲུལ་འཁོར་ལ་ལོ་གཉིས་ཏེ་ལོ་བཅུ། གྲོང་འཇུག་སྦྱོང་བ་ལོ་གཅིག །རླུང་གི་ལས་ཚོགས་ལ་ལོ་གཅིག་སྟེ་བཅུ་གཉིས་སོ། །དེས་ནི་རྣལ་འབྱོར་པ་ཇི་ལྟར་ཤེས་རབ་ཞན་ཡང་གཞུང་དུ་བཤད་པའི་ཡོན་ཏན་རྣམས་རྒྱུད་ལ་སྐྱེ་ངེས་སོ། །ཡང་ཤེས་རབ་འབྲིང་གི་རྣལ་འབྱོར་གྱིས་གོང་དུ་བཤད་པའི་ལོ་གཅིག་དེ་ལོ་ཕྱེད། ཟླ་གཅིག་དེ་ཟླ་ཕྱེད་དུ་བྱས་པའི་ལོ་དྲུག་དང་ཕྱེད། ཕྱེད་ལ་ཕྱེད་ཀྱིས་བསྲིངས་པའི་ལོ་བདུན་གྱིས་རྫོགས་སོ། །ཤེས་རབ་ཆེ་བའི་རྣལ་འབྱོར་ལ་ནི་གྲངས་ཚད་ཀྱི་ངེས་པ་མེད་དེ། གཞན་གྱི་ལོར་བསྒོམས་པ་ཟླ་བ། ཟླར་བསྒོམས་པ་ཞག །ཞག་བསྒོམས་པ་སྐད་ཅིག་གིས་རྟོགས་པའང་ཡོད་དོ། །ཇི་ལྟར་ཐ་མས་ཀྱང་གཏུམ་མོའི་དྲག་རླུང་གནད་ཉམས་སུ་གང་ལོན་བྱེད་ལ། ལོ་གསུམ་གྱི་བཅད་རྒྱ་ལ་གནས་པའི་དམ་བཅའ་བྱེད་དགོས་སོ། ༈ །ཉིན་ཞག་ཕྲུགས་གཅིག་གིས་ཉམས་ལེན་བྱེད་ལུགས་ནི། ཐོ་རེངས་སྔ་མོ་ལངས་ནས་དབྱངས་གསལ་ཉེར་གཅིག་དང་ཡི་གེ་བརྒྱ་པ་ཚར་གསུམ་བརྗོད། རླུང་གི་སྔོན་འགྲོའི་ཚིག་བཤད་བཏང་ལ་འབྱིན་འཇུག་རླུང་གི་ཉམས་ལེན་ལྟར་རླུང་ཁུག་དང་འཕུར་སུབ་ལུས་སྦྱང་འབེབ་ཆེན་བྱ་ལ་མཉམ་གཞག་སྐྱོང་། དེ་ནས་ནང་ཟས་བྱེད་ལ་བསང་དང་ཆུ་གཏོར་ཙམ་བྱས་ཀྱང་རུང་ལ། ཚར་མཐར་གཏུམ་མོ་ལྟར་རླུང་ཁུག་བརྒྱ་དང་ཐུན་མོང་གི་འཕྲུལ་འཁོར་ཚར་གསུམ་མམ་གཅིག་ལས་མི་ཉུང་བ་བྱས་ཤིང་ཉམས་སྐྱོང་ངོ། །དེ་ནས་ཉིན་ཕྱེད་ཀྱིས་ཚར་ནས་བསྐྱེད་རིམ་ལྷ་ཡི་རྣལ་འབྱོར་ལྟར་འཇུག་ཅིང་དཔའ་བོ་མཁའ་འགྲོའི་སྲོག་སྙིང་ལྔ་བརྒྱ་རེ་བགྲངས་མཐར། རླུང་ཁུག་བརྒྱ་རྩར་སྦྱོང་ཞིང་དམིགས་མེད་དུ་བཞག །སྲུང་མ་སྤྱི་དང་རྣལ་འབྱོར་མ་ལ་གང་ཟ་ཕུད་ཀྱི་གཏོར་མ་འབུལ། དེ་ནས་ནུབ་ཟས་བྱེད་ནས་མཚན་ལྡན་འགུགས་པའི་ལྕགས་ཀྱུ་ལྟར་སུམ་བརྒྱ་བགྲངས་ལ་རླུང་ཁུག་བརྒྱ་དང་། ལུས་སྦྱིན་བསྔོ་སྨོན་སོགས་བྱ་ཞིང་དམིགས་མེད་ངང་དུ་ཉལ། དེ་ནས་ཐོ་རེངས་ལངས་ཏེ་ཉིན་བཞིན་ནན་འཁོར་རོ། །གཏང་བཞག་གི་ཚོད་ནི། ཁྲིད་གཞུང་གཞན་རྣམས་རླུང་སེམས་ཀྱི་བསྟན་པ་ལ་གནས་ཤིང་དད་པའི་ངེས་ཤེས་རྙེད་པའི་སློབ་མ་འགའ་ལ་སྤེལ་དུ་རུང་ཞིང་། རྒྱབ་ཐུར་གྱི་ལག་ལེན། མཚན་ལྡན་འགུགས་པའི་ལྕགས་ཀྱུ། བདུད་རྩི་ཆུ་མིག་སྒྲུབ་ཐབས། ཟབ་ཡིག་སྙིང་གི་རྒྱ་ཅན་རྣམས་ནི། དད་བརྩོན་ཤེས་རབ་ལྡན་ཞིང་རླུང་གི་ཉམས་ལེན་ཁོ་ན་ལ་བརྩོན་པའི་རིགས་བདུན་ཙམ་ལ་སྤེལ། རྡོ་རྗེ་ཆུ་འཐུང་། པདྨ་རླུང་འབྱིན། ཞལ་གདམས་གསུམ་ནི་སྲོག་དང་འདྲ་བའི་སློབ་མ་བསྟན་པ་ལ་ཕན་ངེས་པ་གསུམ་ལས་མང་དུ་སྤེལ་ན་གཏེར་སྲུང་མཁའ་འགྲོའི་བཀའ་ཆད་འབྱུང་ངོ་། ༈ །དེ་ལྟས་རྩ་རླུང་གཞུང་དོན་པདྨོའི་རྫིང་། །རྟོག་བཟོའི་ལང་ཚོ་ངོམས་པའི་ཆུ་འཐུང་གིས། །རྙོག་མིན་ཌཱ་ཀིའི་ལུང་གི་རྒྱུན་བཟང་པོ། །ཕབ་འདིས་ཤེས་ལྡན་སྐོམ་པའི་ནད་སེལ་ཤོག །རྣམ་དཀར་དགེ་བ་གཡས་འཁྱིལ་དུང་། །འགག་མེད་གྲགས་པའི་དབྱངས་རིང་པོ། །ཕན་བདེ་ལྡིང་ཁང་གསར་པའི་རྩེར། །སྒྲོག་པའི་དཔལ་ལ་སྤྱོད་གྱུར་ཅིག །ཅེས་རྩ་རླུང་མཁའ་འགྲོའི་གསང་མཛོད་ཀྱི་ལག་ལེན་ནོར་བུའི་ཕྲེང་བ་འདི་ཡང་། རྗེས་འཇུག་དོན་གཉེར་ཅན་ལ་ཕན་པའི་བློས་བསྐུལ་ནས། ཁོ་བོ་འཇའ་ཚོན་སྙིང་པོར་འབོད་པས་དྲེ་ཤོད་པདྨ་བརྩེགས་པའི་བྱང་ཕྱོགས་རྡོ་རྗེ་གླིང་གི་གདན་སར་བརྩམས་པ། རླུང་སེམས་ཟུང་དུ་འཇུག་པའི་རྣལ་འབྱོར་རྣམས་ཀྱི་སྙིང་གི་དཔྱིད་དུ་གྱུར་ནས་བསྟན་པ་རིན་པོ་ཆེའི་རྒྱན་དུ་གྱུར་ཅིག། །། ྈ རྩ་རླུང་མཁའ་འགྲོའི་གསང་མཛོད་ལས༔ ཡིད་ཆེས་ལུང་གི་ཆེ་བ་བཞུགས༔ ྈྈྈྈ མ་བཅོས་སྤྲོས་བྲལ་བདེ་ཆེན་ཀུན་ཏུ་བཟང༔ རང་བྱུང་ཡེ་ཤེས་སྣང་བ་འོད་པོ་ཆེ༔ རིག་རྩལ་འགག་མེད་གང་འདུལ་རྣམ་པར་རོལ༔

རྩ་རླུང་མཁའ་འགྲོའི་གསང་མཛོད་ལས། ས་གཅད་གསལ་བའི་མེ་ལོང་ (Volume 40, Text 3)

དགེ་ལེགས་གཏེར་འཆང་མཁའ་འགྲོའི་གཙོ་ལ་འདུད༔ འཕགས་ཡུལ་རིག་འཛིན་མཁའ་འགྲོ་རྒྱ་མཚོའི་བཅུད༔ རྩ་རླུང་མཁའ་འགྲོ་གསང་བའི་མཛོད་ཆེན་འདི༔ མ་ཧཱ་གུ་རུའི་བཀའ་བཞིན་མཚོ་རྒྱལ་མས༔ མ་འོངས་འགྲོ་ལ་བརྩེ་བས་ཡི་གེར་སྤེལ༔ ས་མ་ཡ༔ རྒྱ་རྒྱ་རྒྱ༔ དེ་ཡང་བསམ་ཡས་མཆིམས་ཕུའི་ཀེའུ་ཚང་དུ༔ ཨོ་རྒྱན་ཆེན་པོ་པདྨ་འབྱུང་གནས་དེས༔ གསང་བ་ཡེ་ཤེས་མཁའ་འགྲོ་སྒྲུབ་པའི་ཚེ༔ པད་ཅན་མཁའ་འགྲོ་མཚོ་རྒྱལ་བདག་གིས་ནི༔ བདེ་བའི་ལུས་མཆོད་ཕུལ་ནས་འདི་སྐད་ཞུས༔ ཨ་ཧོ་རང་བྱུང་པདྨའི་སྡོང་པོའི་རྩེར༔ སྣང་བ་མཐའ་ཡས་ཐུགས་རྗེ་ཟེར་འཁྲིགས་པས༔ སྐྱེ་འཆི་གཉིས་སྤང་ཚེ་ཡི་རིག་འཛིན་རྗེ༔ འགྲོ་བའི་བླ་མ་པདྨ་འབྱུང་གནས་ལགས༔ རྗེས་བཟུང་འགྲོ་ལ་བརྩེ་བའི་ཐུགས་བསྐྱེད་ཀྱིས༔ བདེ་ཆེན་མཁའ་འགྲོ་འབུམ་གྱི་ཐུགས་བཅུད་ཟབ༔ མ་ལུས་གཅིག་བསྡུས་གོ་སླ་ཁྱེར་བདེ་ཞིང༔ ཚེ་གཅིག་སངས་རྒྱས་འཐོབ་པའི་གདམས་པ་ཞིག༔ ཐུགས་ཀྱི་དཀྱིལ་ནས་བདེན་པའི་བཅུད་ཕྱུངས་ལ༔ བདག་གི་སྤྱི་བོའི་རྒྱན་དུ་སྩོལ་བར་མཁྱེན༔ ཞེས་ཞུས་གུ་རུ་པདྨས་བཀའ་བསྩལ་པ༔ ཉོན་ཅིག་མཚོ་རྒྱལ་ཤེལ་དཀར་མགོན་སྐྱིད་མ༔ ཞུས་པའི་དོན་དེ་སྐབས་ལ་རན་གྱིས་ཐོག༔ བདག་ནི་གདུལ་བྱ་འདུལ་བའི་ཐབས་ལ་མཁས༔ མངལ་དང་བརྫུས་སོགས་མ་འགགས་སྤྱོད་པ་མཛད༔ རྒྱལ་བའི་བསྟན་དང་འགྲོ་བར་ཕན་པའི་ཕྱིར༔ རྒྱ་གར་མཁས་པ་ཤྲཱི་སིཾ་ཧཱུྃ་ཀཱ་ར༔ ཡེ་ཤེས་མཁའ་འགྲོ་བདུད་འདུལ་ཀུན་དགའ་མར༔ ཟབ་མོ་གནད་ཀྱི་གདམས་པ་མང་དུ་ཞུས༔ ཁྱད་པར་ཨོ་རྒྱན་དུར་ཁྲོད་རྩུབ་འགྱུར་ཚལ༔ དབྱིངས་ཀྱི་ཡུམ་ཆེན་རྡོ་རྗེ་ཕག་མོ་ཡི༔ ཞལ་གཟིགས་དབང་བསྐུར་དངོས་གྲུབ་བཀའ་ཡང་བབ༔ རྩ་རླུང་མཁའ་འགྲོའི་གདམས་པ་མང་དུ་ནོད༔ དེ་དག་ནང་ནས་ཟབ་པའི་ཡང་ཟབ་མཆོག༔ དྲི་མེད་གསུང་གི་བཅུད་ལ་གཞིར་བླངས་ནས༔ རྒྱ་ཞང་མཁས་པའི་གདམས་ངག་ཟུར་ཡང་བརྒྱན༔ ཨོ་རྒྱན་བདག་གི་ཉམས་བསྟར་ལག་ལེན་གྱིས༔ བདེ་བླག་རྟོགས་པའི་དོན་གྱི་ཁ་སྐོང་སྟེ༔ རྩ་རླུང་མཁའ་འགྲོའི་གསང་མཛོད་བྱ་བ་འདི༔ མཁའ་འགྲོ་འབུམ་གྱི་སྙིང་གི་ཁྲག་རླངས་ཡིན༔ བཅའ་གཞི་རོལ་མོ་བསྙེན་སྒྲུབ་མི་དགོས་པར༔ ཚེ་བསྲིང་སྲོག་སྐྱོང་འཁོར་སྲུང་རྐྱེན་ཟློག་དང༔ དགྲ་བསད་བགེགས་བཏུལ་ལས་བཞི་ལྷུན་གྱིས་གྲུབ༔ བདག་དང་གཞན་གྱི་སྒྲིབ་སྦྱོང་ཚོགས་ཆེན་རྫོགས༔ འགྲོ་བ་ཐར་པའི་ལམ་ལ་དཀྲི་བ་སོགས༔ འབྱིན་འཇུག་རླུང་གི་ནུས་པ་གྲུབ་བྱེད་པ༔ འདི་འདྲའི་གདམས་པ་འཕགས་པའི་ཡུལ་ནའང་མེད༔ དཔེར་ན་རྟ་རྨིག་ལྕགས་ཀྱིས་ལེགས་གཏུམས་ནས༔ འཛམ་བུ་གླིང་འདི་ལན་དགུ་བསྐོར་གྱུར་ཀྱང༔ གདམས་པ་འདི་འདྲ་རྙེད་པར་གྱུར་ཏ་རེ༔ ཞེས་གསུངས་རྩ་རླུང་མཁའ་འགྲོའི་གསང་མཛོད་ཀྱི༔ རྒྱུད་ལུང་མན་ངག་མ་ལུས་གཏན་ལ་ཕབ༔ ཁོ་མོ་མཚོ་རྒྱལ་སྙིང་གི་བདུད་རྩིར་གནང༔ བདག་གིས་དེ་སྔ་གྲགས་པའི་ཆོས་ཀྱི་སྐོར༔ རྒྱ་ཆེ་ཟབ་བརླིང་ནམ་མཁའི་མཐའ་བཞིན་ཀྱང༔ ལ་ལ་རྒྱ་ཆེ་བློ་ཡིས་དཔོག་པར་དཀའ༔ ལ་ལ་བསྡུས་དྲགས་གནད་འགགས་ཁྲོལ་མི་ནུས༔ འདི་ནི་གོ་སླ་ཁྱེར་བདེ་དམར་ལ་ཟབ༔ ཚིག་ཉུང་དོན་འདུས་གདམས་པ་འདི་འདྲ་བ༔ དེ་སྔོན་གངས་རིའི་ཁྲོད་དུ་གྲགས་པ་མེད༔ ད་དུང་འདི་འདྲ་འབྱུང་བར་མི་འགྱུར་རོ༔ སྙམས་ནས་རྒྱ་གར་དུར་ཁྲོད་བསིལ་ཚལ་དུ༔ སྐྱེས་པའི་ཤིང་མཆོག་བྷོ་དྷི་བྲྀཀྵའི་ཤུན༔ དེ་ལ་ཁོ་མོ་རང་གི་ཟླ་མཚན་གྱིས༔ མཁའ་འགྲོ་བརྡ་ཡི་ཡི་གེར་བྲིས་ནས་སུ༔ རིན་ཆེན་ཕྲ་མེན་གཏེར་གྱི་སྒྲོམ་བུ་རུ༔ བཅུག་ནས་ཨོ་རྒྱན་ཕྱག་གི་རྒྱ་ཡིས་གདབ༔ ལོ་ཙཱ་བཻ་རོ་ཙ་ན་ཉིད་ལ་གནང༔ བཻ་རོའི་སྤྱི་གཙུག་ཅོད་པན་བཅིངས་བྱས་ནས༔ གངས་ཅན་ཤར་ཕྱོགས་རྒྱལ་མོ་རྒྱ་ཡི་རོང༔ དེ་ལ་ཉེ་བའི་ཉག་ཤོད་ཨ་འཛི་ལུང༔ དེ་ཡི་བྱང་ཕྱོགས་གཟི་ཤོད་རུ་ལག་གི༔ རྟ་ཕག་ཡབ་ཡུམ་མངོན་ཞལ་སྦྱོར་བའི་དབྱིབས༔ སེང་གེ་གནམ་རྫོང་རྡོ་རྗེ་ཡོངས་རྫོང་གི༔ དེ་ཡི་ཡུམ་གནས་སེང་གེ་ཡོངས་རྫོང་གི༔ མཁའ་འགྲོ་གསང་ཕུག་ཕག་མོའི་བྷ་གའི་ནང༔ རྡོ་རྗེ་རྣལ་འབྱོར་མ་ལ་གཉེར་བཅོལ་ནས༔ བདེན་པའི་སྨོན་ལམ་སྙིགས་མ་ལྔ་བདོ་དུས༔ ཨོ་རྒྱན་ཡབ་ཡུམ་བྱིན་གྱིས་བརླབས་པའི་བུ༔ གཤེད་བཞི་ལོ་པ་ཁ་གསལ་ཁོང་བརླིང་ཞིང༔ སྐྱེ་མེད་ཆོས་སྐུ་རིས་སུ་མ་ཆད་པ༔ འཇའ་ཚོན་སྙིང་པོ་ཨོ་རྒྱན་ལས་འཕྲོ་གླིང༔ ཞི་དལ་ངང་རིང་རྣལ་འབྱོར་དེ་དང་སྤྲོད༔ དེས་ཀྱང་བསྟན་པ་རྒྱས་པའི་རྒྱུར་གྱུར་ཏེ༔ ཆོས་བདག་སློབ་མ་ལས་བཞི་ཕྲིན་ལས་བརྡ༔ ངོ་མཚར་རིགས་རྟགས་འབར་བའི་མཆོག་གསུམ་ཅན༔ དེ་དང་མ་འཛོལ་སྒྲུབ་བརྒྱུད་རྒྱས་པར་ཤོག༔ ྈྈྈ ས་མ་ཡ༔ གཏེར་རྒྱ༔ སྦས་རྒྱ༔ གསང་རྒྱ༔ ཟབ་རྒྱ༔ གཏད་རྒྱ༔ རྒྱ་རྒྱ་རྒྱ༔ བདག་འདྲ་ཨོ་རྒྱན་ལས་འཕྲོ་གླིང་པའམ། འཇའ་ཚོན་སྙིང་པོར་འབོད་པས་རིགས་མཐུན་གཏེར་གྲོགས་པདྨ་མཁའ་འགྲོ་དང་བཅས་ཏེ། གཟི་ཤོད་གཡུ་མོ་ལུང་གི་རུ་ལག་གནས་ཆེན་རྡོ་རྗེ་ཡོངས་རྫོང་མཁའ་འགྲོ་གསང་ཕུག་གི་ནང་ནས། རྡོ་རྗེ་ཕག་མོའི་བྷ་ག་བྱ་རོག་གདོང་གི་སྦུབས་ནས་ལྕགས་བྱ་ཟླ་བ་གསུམ་པའི་ཚེས་བཅུའི་ཉིན་པར་གཏེར་གྱི་དངོས་གྲུབ་ཏུ་རྙེད་པ། སླར་ཆུ་མོ་ཕག་གི་ཧོར་ཟླ་དགུ་པའི་ཚེས་ལ་དྲེ་ཤོད་པདྨ་བརྩེགས་པའི་བྱང་ཕྱོགས་རྡོ་རྗེ་གླིང་གི་གདན་སར་ཤོག་སེར་ལས་ཞལ་བཤུས་གྲུབ་པར་དགེའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ དབང་མཆོག་ཡེ་ཤེས་རང་ཤར་བཞུགས་སོ༔ ྈྈྈྈ རྡོ་རྗེ་ཕག་མོར་ཕྱག་འཚལ་ནས༔ དབང་མཆོག་ཡེ་ཤེས་རང་ཤར་བསྟན༔ དེ་ལ་སྦྱོར་དངོས་རྗེས་གསུམ་སྟེ༔ སྐལ་ལྡན་བདུན་ལས་མང་མི་སྤེལ༔ ས་མ་ཡ༔ རྒྱ་རྒྱ་རྒྱ༔ དེ་ཡང་དང་པོ་སྐལ་ལྡན་སློབ་མ་ངེས་འབྱུང་སྐྱེ་བའི་ཕྱིར་དུ༔ དྲང་ངེས་ཀྱི་ཆོས་གོ་བདེ་བར་བཤད༔ ཁྱད་པར་དུ་གསང་སྔགས་རྡོ་རྗེ་ཐེག་པའི་ཆེ་བ་བརྗོད་ལ༔ སློབ་བུས་གསོལ་བ་གདབ་པ་ནི༔ བླ་མ་སངས་རྒྱས་ཀུན་གྱི་གཙོ༔ རྩ་རླུང་མཁའ་འགྲོ་གསང་མཛོད་ཀྱི༔ བྱིན་རླབས་དབང་བསྐུར་ཞུ་ལགས་པས༔ བརྩེ་བ་ཆེན་པོས་གནང་དུ་གསོལ༔ ཞེས་ཞུ༔ ལན་དུ༔ སྐལ་བ་ལྡན་པའི་སློབ་མ་ཁྱོད༔ ཁྱབ་གདལ་བདེ་བའི་དཀྱིལ་འཁོར་དུ༔ དབང་ཆེན་ནོད་པ་ངོ་མཚར་ཆེ༔ སྤྲོ་དགའ་སྐྱེད་ལ་གྲལ་དུ་སྡོད༔ ཅེས་གསུངས༔ དེ་ནས་མདུན་དུ་སྟེགས་བུ་གཙང་མའི་སྟེང་དུ་དར་དཀར་པོས་བཀབ༔ ཕྱོགས་མཚམས་དབུས་དང་དགུ་རུ་འབྲུ་ཡི་ཚོམ་བུ་བཀོད༔ དབུས་སུ་མཉྫིའི་ཁར་ཐོད་པ་མཚན་ལྡན་ཆང་དང་བྱང་སེམས་དཀར་དམར་གྱིས་བཀང་བ་བཀོད་ལ༔ ཌཱ་མ་རུ་དང་དྲིལ་བུའི་སྒྲ་གཏང་ཞིང༔ ཧཱུྃ༔ སྣང་སྲིད་རྒྱལ་བའི་ཞིང་ཁམས་ལ༔ མ་རྟོགས་བགེགས་སུ་ལྟ་བའི་རིགས༔ ཐམས་ཅད་གདོད་མའི་ཀློང་ཡངས་སུ༔ སྨྲ་བསམ་བརྗོད་དང་བྲལ་བར་དེངས༔ ཨ་ཏི་ཀྲ་མ་ཨུ་ཙ་ཏ་ཡ་ཕཊ༔ ཅེས་བརྗོད་ལ་བགེགས་བསྐྲད༔ ཁྲུས་ནས་ཕྱུང་སྟེ༔ ཀུན་རྫོབ་དྲི་མ་དག་བྱེད་ཅིང༔ དོན་དམ་བདེན་པ་རྟོགས་པའི་ཆུ༔ ཡེ་ཤེས་བདུད་རྩིས་ཁྲུས་གསོལ་བས༔ ཉོན་ཤེས་སྒྲིབ་པ་དག་གྱུར་ཅིག༔ ཅེས་བརྗོད༔ དེ་ནས་དཔོན་སློབ་གཉིས་ཀས་གནས་ལུགས་གསལ་བཏབ་ལ་སྐྱབས་སུ་འགྲོ་བ་ནི༔ སྐྱེ་མེད་སྟོང་པ་ཆོས་ཀྱི་སྐུ༔ འགག་མེད་གསལ་བ་རྫོགས་པའི་སྐུ༔ གཉིས་མེད་གཅིག་པ་སྤྲུལ་པའི་སྐུ༔ འཛིན་མེད་ཀློང་དེར་སྐྱབས་སུ་མཆི༔ སེམས་བསྐྱེད་པ་ནི༔ མཐའ་ཡས་འགྲོ་བ་མ་ལུས་པ༔ རྫོགས་པའི་སངས་རྒྱས་ཐོབ་ཕྱིར་དུ༔ བདག་གིས་བྱང་ཆུབ་སེམས་མཆོག་ནི༔ སྲོག་ལ་བབ་ཀྱང་བསྐྱེད་པར་བྱ༔ སྡོམ་པ་གཟུང་བ་ནི༔ ཡང་དག་དོན་གྱི་དཀྱིལ་འཁོར་དུ༔ ཞུགས་ནས་གསང་སེམས་སྡོམ་པ་གང༔ བྱང་ཆུབ་བར་དུ་ཉམས་མེད་པར༔ ཚུལ་བཞིན་གཟུང་བར་དམ་བཅའ་འོ༔ མཎྜལ་འབུལ་བ་ནི༔ ཕྱི་སྣོད་རྩ་ཡི་མཎྜལ་ལ༔ ནང་བཅུད་རླུང་སེམས་ཚོམ་བུར་བཀོད༔ བདེ་སྟོང་ཐིག་ལེའི་རྒྱན་དང་བཅས༔ རང་རིག་དོན་གྱི་ལྷ་ལ་འབུལ༔ དེ་ནས་བླ་མས་རྡོ་རྗེ་དུང་ཆོས་ཐོགས༔ དམ་ཚིག་གི་བདུད་རྩི་ལྕེ་ལ་བཞག༔ ཕྱག་མཚན་རྡོ་རྗེ་སློབ་བུའི་སྙིང་གར་གཏད་ལ༔ བདག་ནི་ཁྱོད་ཀྱི་རིགས་བདག་ཆེ༔ ཁྱད་པར་བླ་མེད་དབང་བསྐུར་གྱིས༔ དམ་ཚིག་རྡོ་རྗེའི་ཆུ་འདི་ཐུངས༔ དམ་ཚིག་མ་ལུས་སྲོག་བཞིན་སྲུངས༔ ས་མ་ཡ་ཨི་དནྟེ་ན་ར་ཀན༔ ཞེས་བརྗོད་ལ་གསང་སྔགས་བླ་མེད་ཀྱི་དམ་ཚིག་རྣམས་བཤད༔ ཁྱད་པར་དུ་རྩ་རླུང་མཁའ་འགྲོ་གསང་མཛོད་ཀྱི་དབང་འདི་ཐོབ་ཕྱིར༔ རླུང་སེམས་ཟུང་དུ་འཇུག་པའི་ཉམས་ལེན་གྱི་སྒོ་ནས་ལོ་བཅུ་གཉིས་ཀྱི་བཅད་རྒྱ་བྱེད་པའི་དམ་བཅའ་འབུལ་ལོ༔ དེ་ནས་དཔོན་སློབ་ཀུན་གྱིས་དགོངས་པ་གསལ་གདབ་ཅིང་རླུང་རོ་དབྱུང་ཞིང་བུམ་ཆེན་གྱི་རླུང་བཟུང་ལ་མངོན་རྟོགས་ལྟར་བསྒོམ་པ་ནི༔ ཀ་དག་སྤྲོས་དང་བྲལ་བའི་ཀློང༔ རང་བྱུང་གདོད་མའི་མགོན་པོ་སོགས༔ རིག་རྩལ་འགག་པ་མེད་པའི་ལྷ༔ སྨྲ་བསམ་བརྗོད་དང་བྲལ་བར་བསྒོམ༔ ཞེས་གསལ་གདབ༔ དེ་ནས་ཡེ་ཤེས་བྱིན་ཆེན་དབབ་པ་ནི༔ སྤོས་བསྲེག་རོལ་མོ་དཀྲོལ་ལ༔ རང་ཉིད་རྟ་ཕག་ཡབ་ཡུམ་དུ་གསལ་བའི་ངང་ནས༔ ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧྲཱིང་ཧྲཱིང་ཕེམ་ཕེམ༔ ཞེས་བརྗོད་པས་ལྷ་དང་སྔགས་ལས་འོད་ཟེར་དཔག་ཏུ་མེད་པ་འཕྲོས་ནས༔ མཁའ་སྤྱོད་རིག་འཛིན་གྱི་གནས་ནས་དཔའ་བོ་མཁའ་འགྲོ་སྲུང་མ་ཐམས་ཅད༔ ནམ་མཁའི་ཆར་བཞིན་བྱོན་ནས་བདག་དང་གཉིས་སུ་མེད་པར་བསམ་ལ༔ ཧཱུྃ༔ མ་བཅོས་གཉུག་མ་ཁྱབ་གདལ་ཆེན་པོའི་དབྱིངས༔ ཡེ་ཉིད་སྟོང་པ་ཀུན་ཏུ་བཟང་པོ་སོགས༔ དགོངས་བརྒྱུད་བླ་མ་གནས་འདིར་དབང་ལ་གཤེགས༔ འཇའ་ལུས་འོད་སྐུར་འགྲུབ་པར་བྱིན་གྱིས་རློབས༔ ཡེ་ཤེས་རང་གསལ་འོད་ཟེར་འཁྱིལ་བའི་ཀློང༔ རིག་སྟོང་སྤྲོས་བྲལ་དབང་ཆེན་ཡབ་ཡུམ་སོགས༔ ཡི་དམ་ལྷ་ཚོགས་གནས་འདིར་དབང་ལ་གཤེགས༔ ལྷུན་གྲུབ་བདེ་བ་ཆེན་པོར་བྱིན་གྱིས་རློབས༔ རང་སྣང་རྣམ་དག་མཁའ་སྤྱོད་གཞལ་ཡས་ནས༔ དབྱིངས་ཀྱི་ཡུམ་ཆེན་རྡོ་རྗེ་ཕག་མོ་སོགས༔ མ་སྲིང་མཁའ་འགྲོ་གནས་འདིར་དབང་ལ་གཤེགས༔ དྭངས་མ་ཡེ་ཤེས་རྒྱས་པར་བྱིན་གྱིས་རློབས༔ གཏེར་གནས་འཇའ་འོད་མེ་དཔུང་འཁྲིགས་པའི་དབུས༔ མ་རྒྱུད་གཙོ་མོ་རྡོ་རྗེ་རྣལ་འབྱོར་སོགས༔ བཀའ་གཏེར་སྲུང་མ་གནས་འདིར་དབང་ལ་གཤེགས༔ ཐར་ལམ་བར་ཆད་ཞི་བར་བྱིན་གྱིས་རློབས༔ ཨོཾ་ཨཱཿཧཱུྃ་ཧྲཱི༔ བཛྲ་གུ་རུ་དཱེ་བ་ཌཱ་ཀི་ནཱི༔ སརྦ་སིདྡྷི་ཕ་ལ་ཧཱུྃ་ཛ༔ ཞེས་དྲག་དང་ལྡན་པར་འབད་དོ༔ དེ་ནས་དངོས་གཞི་དབང་བསྐུར་བ་ལ་གསོལ་བ་གདབ་པ་ནི༔ སྔོན་གྱི་གྲུབ་ཆེན་ཕོ་མོ་ལ༔ བཞི་རྫོགས་དབང་བསྐུར་ཇི་བཞིན་དུ༔ བདག་ཅག་སྐལ་ལྡན་སློབ་མ་ལ༔ དབང་བསྐུར་བྱིན་གྱིས་བརླབ་ཏུ་གསོལ༔ ཞེས་ཞུ༔ དང་པོ་ཕྱི་བུམ་པའི་དབང་བསྐུར་བ་ལ༔ མཚན་ལྡན་བཀྲ་ཤིས་ཐོད་མཆོག་བུམ་པ་འདི༔ ལྷ་དང་གཞལ་ཡས་ངོ་མཚར་དཔག་ཏུ་མེད༔ སྐལ་ལྡན་སློབ་མ་ཁྱོད་ལ་དབང་བསྐུར་བས༔ བསྐྱེད་རིམ་ལྷ་ཡི་གསལ་ཆ་ཐོན་པར་ཤོག༔ ཨོཾ་རཏྣ་གཱ་ཌ་ཨ་བྷི་ཥིཉྩ་ཧཱུྃ༔ ཞེས་བསྐུར་རོ༔ དེས་ནི་ཕྱི་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བུམ་པའི་དབང་ཐོབ༔ ལུས་ལྷར་བསྒོམ་པ་ལ་དབང་བར་བྱས༔ འབྲས་བུ་སྤྲུལ་པའི་སྐུ་ཐོབ་པའི་རྟེན་འབྲེལ་བསྒྲིགས་པ་ཡིན་ནོ༔ དེ་ནས་ནང་རྫས་དབང་བསྐུར་བ་ལ༔ དབང་ཆེན་ཡབ་ཡུམ་བདེ་སྟོང་སྦྱོར་བ་ལ༔ བྱང་ཆུབ་སེམས་ཀྱི་ཐིག་ལེ་དཀར་དམར་འབབ༔ སྐལ་ལྡན་སློབ་མ་རྣམས་ལ་དབང་བསྐུར་བས༔ བཟླས་བརྗོད་སྔགས་ཀྱི་ནུས་པ་ཐོབ་པར་ཤོག༔ ཨོཾ་མ་ཧཱ་སུ་ཁཿསིདྡྷི་ཨ་བྷི་ཥིཉྩ་ཧཱུྃ༔ ཞེས་བདུད་རྩི་བླུད་དོ༔ དེས་ནི་ནང་ཏིང་ངེ་འཛིན་གྱི་དཀྱིལ་འཁོར་ལ་བརྟེན་ནས་རྫས་ཀྱི་དབང་ཐོབ༔ ངག་སྔགས་ཀྱི་བཟླས་པ་ལ་དབང་བར་བྱས༔ འབྲས་བུ་ལོངས་སྤྱོད་རྫོགས་པའི་སྐུ་ཐོབ་པའི་རྟེན་འབྲེལ་བསྒྲིགས་པ་ཡིན་ནོ༔ དེ་ནས་གསང་བ་ཤེར་དབང་བསྐུར་བ་ལ༔ ཡེ་ཤེས་མཁའ་འགྲོ་བདེ་བའི་རང་གཟུགས་ཅན༔ རྣམ་པ་ཀུན་ཏུ་བདེ་བའི་སྐད་འབྱིན་མ༔ དཔའ་བོ་ཁྱོད་ཀྱི་བདེ་བའི་ཡུམ་དུ་གཏད༔ དབབ་འཛིན་འདྲེན་འགྲེམ་རང་དབང་ཐོབ་པར་ཤོག༔ ཨོཾ་སརྦ་མ་ཧཱ་ར་ཧཾ་ཨ་བྷི་ཥིཉྩ་ཧཱུྃ༔ ཞེས་རིག་མ་གཏད་དོ༔ དེས་ནི་གསང་བ་བྷ་གའི་དཀྱིལ་འཁོར་ལ་བརྟེན་ནས་ཤེས་རབ་ཡེ་ཤེས་ཀྱི་དབང་ཐོབ༔ ཡིད་ཏིང་ངེ་འཛིན་ལ་དབང་བར་བྱས༔ འབྲས་བུ་ཆོས་ཀྱི་སྐུ་ཐོབ་པའི་རྟེན་འབྲེལ་བསྒྲིགས་པ་ཡིན་ནོ༔ དེ་ནས་ཡང་གསང་ཚིག་དབང་བསྐུར་བ་ལ༔ བུམ་དབང་ལ་སོགས་ཚིག་གིས་བརྗོད་བྱ་སྟེ༔ རིག་པ་སྣང་བ་རྗེས་སུ་མི་འབྲང་ཞིང༔ སྣང་བ་རིག་པའི་དབང་དུ་ཚུར་འདུས་ན༔ དོན་གྱི་དབང་མཆོག་ཡིན་གྱིས་ཉམས་སུ་ལོངས༔ ཞེས་མེ་ལོང་བསྟན་ནོ༔ དེས་ནི་ཡང་གསང་གནས་ལུགས་ཀྱི་དཀྱིལ་འཁོར་ལ་བརྟེན་ནས་ཚིག་དབང་རིན་པོ་ཆེ་ཐོབ༔ འཁོར་འདས་ཀྱི་ཆོས་ལ་དབང་བར་བྱས༔ འབྲས་བུ་ངོ་བོ་ཉིད་ཀྱི་སྐུ་ཐོབ་པའི་རྟེན་འབྲེལ་བསྒྲིགས་པ་ཡིན་ནོ༔ དེ་ནས་རྩ་རླུང་གི་ཆས་དབང་བསྐུར་བ་ནི༔ རྩ་རླུང་ཐིག་ལེ་གསང་བའི་ཆས༔ རྣལ་འབྱོར་རོལ་པའི་དགའ་སྟོན་དུ༔ འཆང་ནས་བསྲུང་མེད་དམ་ཚིག་ལ༔ ཁྱོད་ནི་རྟག་ཏུ་གནས་པར་གྱིས༔ ཞེས་གཏད་དོ༔ དེ་ནས་གཏང་རག་གི་མཎྜལ་འབུལ་ལ༔ བླ་མ་རྡོ་རྗེ་འཛིན་པ་ཡིས༔ རྩ་རླུང་རྡོ་རྗེ་གསང་མཛོད་ཀྱི༔ དབང་རྫོགས་བསྐུར་བ་བཀའ་དྲིན་ཆེ༔ འབྱོར་ཚད་འབུལ་ལོ་བཞེས་སུ་གསོལ༔ ཞེས་འབུལ༔ དེ་ནས་གླུ་བྲོ་བྱ༔ བཀྲ་ཤིས་བརྗོད་པ་ནི༔ ཀ་དག་གདོད་མའི་གཤིས་ལུགས་ལ༔ འཛིན་མེད་རང་གྲོལ་བདེ་བ་ཆེ༔ དབྱིངས་རིག་ཡེ་ཤེས་འོད་དུ་གསལ༔ དང་པོའི་སངས་རྒྱས་བཀྲ་ཤིས་ཤོག༔ ལྷུན་གྲུབ་ལྔ་ལྡན་ཡོངས་སུ་རྫོགས༔ སྣང་སྟོང་མཚན་དཔེའི་རྫུ་འཕྲུལ་གར༔ གསལ་ལ་འཛིན་མེད་ཡེ་ཤེས་ལྷ༔ འཇའ་ལུས་དྭངས་མའི་བཀྲ་ཤིས་ཤོག༔ གང་འདུལ་སྤྲུལ་པའི་ཞིང་མཆོག་བདག༔ སེམས་ཅན་མགོན་གྱུར་རྒྱལ་བའི་སྲས༔ མཁྱེན་བརྩེ་ནུས་པའི་གཏེར་འཆང་བ༔ དོན་མཛད་མཆོག་གི་བཀྲ་ཤིས་ཤོག༔ ཅེས་བརྗོད༔ བསྡུ་ཚིག་ནི༔ དང་པོ་དབྱིངས་ཉིད་བདེ་བ་ཆེ༔ བར་དུ་ལྷུན་གྲུབ་རང་བཞིན་གསལ༔ མཐའ་མ་འགྲོ་དོན་མཐའ་རུ་ཕྱིན༔ སླར་ཡང་གཟོད་མའི་མགོན་པོར་ངེས༔ ཨ༔ ཞེས་བསྡུ་ལ་མི་དམིགས་པའི་རྒྱས་གདབ་བོ༔ རྩ་རླུང་མཁའ་འགྲོའི་གསང་བའི་མཛོད༔ དེ་ཡི་དབང་མཆོག་བསྐུར་བའི་ཐབས༔ མ་ཧཱ་གུ་རུའི་བཀའ་བཞིན་དུ༔ ཁོ་མོས་ཡི་གེར་བྲིས་འདི་དགེ༔ ས་མ་ཡ༔ རྒྱ་རྒྱ་རྒྱ༔ བདག་འདྲ་ཨོ་རྒྱན་ལས་འཕྲོ་གླིང་པ་འཇའ་ཚོན་སྙིང་པོ་ཅན་གྱིས་མདོ་ཁམས་ཤར་ཕྱོགས་ཉག་ཤོད་ཨ་འཛི་ལུང་གི་བྱང་ཕྱོགས། གཟི་ཤོད་གཡུ་མོ་ལུང་གི་རུ་ལག །སྙི་སྟོད་གནས་ཆེན་རྡོ་རྗེ་ཡོངས་རྫོང་མཁའ་འགྲོའི་གསང་ཕུག་ནང་གི་རྡོ་རྗེ་ཕག་མོའི་བྷ་ག་ནས་སྤྱན་དྲངས་པ་བཀྲ་ཤིས་སོ། །མངྒ་ལཾ།། །། ྈ རྩ་རླུང་མཁའ་འགྲོའི་གསང་མཛོད་ལས༔ ཕྱི་བསྐྱེད་རིམ་ལྷ་ཡི་རྣལ་འབྱོར་བཞུགས༔ ྈྈྈྈྈྈ མ་བཅོས་སྤྲོས་བྲལ་བདེ་ཆེན་འདུས་མ་བྱས༔ ཐུགས་རྗེས་འགྲོ་ལ་བརྩེ་བའི་རྣམ་རོལ་གྱིས༔ རྒྱལ་བའི་ལམ་བཟང་བདེ་བླག་རྟོགས་མཛད་པ༔ མཁའ་འགྲོ་འབུམ་གཙོ་རྡོ་རྗེ་ཕག་མོར་འདུད༔ རིག་འཛིན་མཁའ་འགྲོའི་ཐུགས་བཅུད་མཐར་ཐུག་པ༔ གནད་ཀྱི་གདམས་པ་མཁའ་འགྲོ་གསང་མཛོད་ལས༔ བསྐྱེད་རིམ་ལྷ་ཡི་སྐུ་རུ་འགྲུབ་པའི་ཐབས༔ སྣོད་མེད་དག་ལ་སྤིར་གྱི་ཁ་བཞིན་བསྡམ༔ ས་མ་ཡ༔ རྒྱ་རྒྱ་རྒྱ༔ དེ་ཡང་གསང་བ་ཡང་གསང་རྩ་རླུང་གནད་ཀྱི་གདམས་པ་མཁའ་འགྲོའི་གསང་མཛོད་ལས༔ ཕྱི་བསྐྱེད་རིམ་ལྷ་ཡི་རྣམ་གཞག་ལ་བརྟེན་ནས་རང་ལུས་ལྷ་སྐུར་སྒྲུབ་པ་ནི༔ སྟོང་པའི་ངང་ལས་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར༔ དེ་ཡི་སྟེང་དུ་སྲོག་བྲལ་རོ་ཡི་གདན་ལ༔ རིག་པའི་ངོ་བོ་ཧྲཱིཿདྭངས་མ་ལས་འོད་ཟེར་འཕྲོས༔ འཕགས་པ་ཐམས་ཅད་མཆོད༔ སེམས་ཅན་ཐམས་ཅད་དཔའ་བོ་མཁའ་འགྲོའི་གོ་འཕང་ལ་བཀོད༔ སླར་འདུས་ཧྲཱིཿདྭངས་མ་ལ་ཐིམ་པས༔ ཡེ་ཤེས་མེ་རབ་ཏུ་འབར་བའི་དབུས་སུ༔ བདག་ཉིད་དཔལ་རྟ་མགྲིན་དམར་པོ་ཞལ་གཅིག་ཕྱག་གཉིས༔ ཞབས་གཉིས་གཡས་བསྐུམ་གཡོན་བརྐྱང་གིས་བཞེངས་ཤིང༔ རལ་གྲི་ཐོད་ཁྲག་བསྣམས་པ༔ སྤྱན་བགྲད་ཞལ་གདངས་མཆེ་བ་གཙིགས་པ༔ དབུ་སྐྲ་དང་སྨིན་མ་སྨ་ར་རྣམས་དམར་སེར་གྱེན་དུ་འཁྱིལ་བ༔ མི་མགོ་སྐམ་པོ་ལྔ་ཡི་དབུ་རྒྱན༔ རློན་པ་ཁྲག་འཛག་པ་ལྔ་བཅུའི་དོ་ཤལ་བྱས་པ༔ སྐུ་ལ་རུས་པའི་རྒྱན་དྲུག་དང༔ སྟག་གི་ཤམ་ཐབས༔ སྦྲུལ་གྱི་སྐ་རགས༔ གླང་ཆེན་ཀོ་རློན༔ མི་ལྤགས་ཀྱི་གཡང་གཞིས་བརྒྱན་པ༔ སྤྱི་གཙུག་རྟ་མགོ་ལྗང་ཞུར་འཚེར་བ༔ དེའི་ཡུམ་རྡོ་རྗེ་ཕག་མོ་སྐུ་མདོག་དམར་མོ༔ གཡས་གྲི་གུག་དང་གཡོན་ཐོད་ཞལ༔ རྒྱན་དང་ཆ་ལུགས་ཡབ་དང་མཐུན་ཞིང༔ སྤྱི་བོར་ཕག་ཞལ་ནག་པོ་ངུར་བ༔ གཉིས་མེད་བདེ་བ་ཆེན་པོར་འཁྲིལ་བ༔ སྣང་ལ་རང་བཞིན་མེད་པ༔ གསལ་ལ་དངོས་པོ་མེད་པ༔ དར་དམར་པོའི་གུར་ཕུབ་པ་ལྟ་བུར་དམར་ཝང་ངེ་བ༔ ཡབ་ཡུམ་དེ་ལྟར་གསལ་བའི་ལུས་ཀྱི་ནང་དུ༔ རྩ་དབུ་མ་ཕྲ་སྦོམ་སྦ་སྨྱུག་ཙམ་སྤྱི་གཙུག་ནས་གསང་བའི་བར་དུ་ཟང་ཐལ་དུ་ཟུག་པ༔ མཚན་ཉིད་བཞི་དང་ལྡན་པ༔ སྤྱི་བོ་བདེ་ཆེན་གྱི་འཁོར་ལོ་ལ་རྩ་འདབ་སུམ་ཅུ་རྩ་གཉིས༔ མགྲིན་པ་ལོངས་སྤྱོད་ཀྱི་འཁོར་ལོར་བཅུ་དྲུག༔ སྙིང་ཁ་ཆོས་ཉིད་ཀྱི་འཁོར་ལོ་ལ་བརྒྱད༔ ལྟེ་བ་སྤྲུལ་པའི་འཁོར་ལོ་ལ་དྲུག་ཅུ་རྩ་བཞི༔ གསང་བ་བདེ་སྐྱོང་གི་འཁོར་ལོ་ལ་ཉེར་བརྒྱད་རྣམས༔ གདུགས་ཀྱི་ཡུ་བ་ལ་རྩིབས་ཤིང་ཟུག་པའི་ཚུལ་དུ་དྲང་ཤད་དེ་བ༔ རྩ་སྦུབ་ཐམས་ཅད་འོད་ཀྱི་རང་བཞིན་དུ་གསལ༔ དེའི་གཡས་སུ་རོ་མ་དམར་པོ༔ གཡོན་དུ་རྐྱང་མ་དཀར་པོ་གཉིས༔ ཡར་སྣེ་སྤྱི་བོ་ནས་ཐུར་དུ་གུག་སྟེ་སྣ་བུག་གཡས་གཡོན་དུ་ཟུག་པ༔ མར་སྣེ་གསང་གནས་སུ་དབུ་མ་ལ་ཟུག་ཅིང་ཡི་གེ་ཆ་ཡི་དབྱིབས་ལྟ་བུར་བསམ༔ དེའི་སྤྱི་བོར་འབྱུང་བ་ཆུའི་དྭངས་མའི་རྩ་འཁོར་ལ༔ ར་དང་ཧ་ལས་རྡོ་རྗེ་རིགས་ཀྱི་དཔའ་བོ་མཁའ་འགྲོ༔ མགྲིན་པར་འབྱུང་བ་ས་ཡི་དྭངས་མའི་རྩ་འཁོར་ལ༔ ཙ་དང་རི་ལས་རིན་ཆེན་རིགས་ཀྱི་དཔའ་བོ་མཁའ་འགྲོ༔ སྙིང་གར་འབྱུང་བ་ནམ་མཁའི་དྭངས་མའི་རྩ་འཁོར་ལ༔ ཧྲཱིཿདང་མ་ལས་སངས་རྒྱས་རིགས་ཀྱི་དཔའ་བོ་མཁའ་འགྲོ༔ ལྟེ་བར་འབྱུང་བ་མེ་ཡི་འཁོར་ལོ་ལ༔ ཧྲི་དང་ནི་ལས་པདྨ་རིགས་ཀྱི་དཔའ་བོ་མཁའ་འགྲོ༔ གསང་གནས་སུ་འབྱུང་བ་རླུང་གི་དྭངས་མའི་རྩ་འཁོར་ལ༔ ཡ་དང་ས་ལས་ལས་ཀྱི་རིགས་ཀྱི་དཔའ་བོ་མཁའ་འགྲོ༔ གཞན་ཡང་རྡོ་རྗེ་ལུས་ཀྱི་རྩ་ཁམས་རྣམས་སུ༔ དཔའ་བོ་མཁའ་འགྲོའི་ཚོགས་ཏིལ་གྱི་སྒང་བུ་ཁ་ཕྱེས་པ་ལྟར་ཁྲིག་གིས་གང་བ༔ ཡབ་ཡུམ་སྤྱི་བོར་ཚེ་དཔག་མེད་ཡབ་ཡུམ་འཁྲིལ་སྦྱོར་དུ་བཞུགས་པར་བསམ༔ དེ་ཡང་དང་པོ་ཡབ་རྐྱང་ཡུམ་རྐྱང་དུ་བསྐྱེད༔ དེ་ནས་ཡབ་ཡུམ་ཟུང་འཇུག་ཏུ་བསྒོམ་པ་དང་ཆེ་ཆུང་གི་སྤྲོ་བསྡུ་གོམས་པར་བྱས་ལ༔ དཔའ་བོ་མཁའ་འགྲོའི་སྲོག་སྙིང་བགྲང་བ་ནི༔ ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཙིཏྟ་ཧཱུྃ་ཧྲིཾ་ཧྲིཾ༔ ཞེས་བགྲངས་ནས༔ དཔའ་བོ་མཁའ་འགྲོའི་ཚོགས་རྣམས་རང་དབང་མེད་པར་འགྲུབ་སྟེ༔ ལུང་བསྟན་ཆོས་བཤད་ཏིང་འཛིན་སྦར་བ་སོགས་ཀྱི་རྟགས་འབྱུང༔ ཕྲིན་ལས་བཞི་སོགས་གང་བརྩམས་ཐམས་ཅད་ལྷུན་གྱིས་གྲུབ་བོ༔ སྐབས་སུ་དཔའ་བོ་མཁའ་འགྲོ་བདེ་བ་ལ་བསྐུལ་བར་བྱ་སྟེ༔ ཧཱུྃ༔ སྤྱི་བོ་བདེ་ཆེན་འཁོར་ལོ་ཡི༔ ཆུ་ཡི་རྩ་འདབ་སོ་གཉིས་ལ༔ རྡོ་རྗེ་རིགས་ཀྱི་ཡབ་ཡུམ་རྣམས༔ བདེ་ཆེན་ལས་ལ་ད་སྦྱོར་འཚལ༔ མགྲིན་པ་ལོངས་སྤྱོད་འཁོར་ལོ་ཡི༔ ས་ཡི་རྩ་འདབ་བཅུ་དྲུག་ལ༔ རིན་ཆེན་རིགས་ཀྱི་ཡབ་ཡུམ་རྣམས༔ བདེ་ཆེན་ལས་ལ་ད་སྦྱོར་འཚལ༔ སྙིང་ག་ཆོས་ཀྱི་འཁོར་ལོ་ཡི༔ ནམ་མཁའི་རྩ་འདབ་བརྒྱད་རྣམས་ལ༔ སངས་རྒྱས་རིགས་ཀྱི་ཡབ་ཡུམ་རྣམས༔ བདེ་ཆེན་ལས་ལ་ད་སྦྱོར་འཚལ༔ ལྟེ་བ་སྤྲུལ་པའི་འཁོར་ལོ་ཡི༔ མེ་ཡི་རྩ་འདབ་རེ་བཞི་ལ༔ པདྨ་རིགས་ཀྱི་ཡབ་ཡུམ་རྣམས༔ བདེ་ཆེན་ལས་ལ་ད་སྦྱོར་འཚལ༔ གསང་གནས་བདེ་སྐྱོང་འཁོར་ལོ་ཡི༔ རླུང་གི་རྩ་འདབ་ཉེར་བརྒྱད་ལ༔ ལས་ཀྱི་རིགས་ཀྱི་ཡབ་ཡུམ་རྣམས༔ བདེ་ཆེན་ལས་ལ་ད་སྦྱོར་འཚལ༔ ཞེས་བསྐུལ་བ་ཙམ་གྱིས༔ སྤྱི་བོར་རྡོ་རྗེ་རིགས་ཀྱི་དཔའ་བོ་མཁའ་འགྲོ་རྣམས་སྦྱོར་བ་མཛད༔ སྦྱོར་མཚམས་ནས་བྱང་སེམས་དཀར་དམར་རྒྱུན་བབ༔ སྤྱི་བོའི་རྩ་འཁོར་ཐམས་ཅད་གང་ནས་དབུ་མའི་ལམ་ལ་ཞུགས༔ མགྲིན་པར་རིན་ཆེན་རིགས་ཀྱི་དཔའ་བོ་མཁའ་འགྲོ་རྣམས་སྦྱོར་བ་མཛད༔ སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་བབ༔ མགྲིན་པའི་རྩ་འདབ་ཐམས་ཅད་གང༔ སྙིང་གར་སངས་རྒྱས་རིགས་ཀྱི་དཔའ་བོ་མཁའ་འགྲོ་རྣམས་སྦྱོར་བ་མཛད༔ སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་བབ༔ སྙིང་གའི་རྩ་འདབ་ཐམས་ཅད་གང་ནས་དབུ་མའི་ལམ་ནས་ཞུགས༔ ལྟེ་བར་པདྨ་རིགས་ཀྱི་དཔའ་བོ་མཁའ་འགྲོ་རྣམས་སྦྱོར་བ་མཛད༔ སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་བབ༔ ལྟེ་བའི་རྩ་འཁོར་ཐམས་ཅད་གང་ནས་དབུ་མའི་ལམ་ནས་ཞུགས༔ གསང་གནས་ལས་ཀྱི་རིགས་ཀྱི་དཔའ་བོ་མཁའ་འགྲོ་རྣམས་སྦྱོར་བ་མཛད༔ སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་བབ༔ ལུས་ཀྱི་རྩ་ཁམས་ཐམས་ཅད་གང༔ སླར་ཡང་གསང་གནས་ཀྱི་བདེ་བས་ལྟེ་བའི་དཔའ་བོ་མཁའ་འགྲོའི་ཚོགས་ཐམས་ཅད་མཆོད༔ དེ་བཞིན་དུ་ལྟེ་བས་སྙིང་ག༔ སྙིང་གས་མགྲིན་པ༔ མགྲིན་པས་སྤྱི་བོའི་ལྷ་ཚོགས་རྣམས་མཆོད༔ བདེ་བའི་རྒྱུན་ཚངས་བུག་ཏུ་བྱོན༔ སྤྱི་བོའི་ཚེ་དཔག་མེད་ཡབ་ཡུམ་མཆོད༔ བདེ་བས་དགྱེས་ཏེ་སྦྱོར་བ་མཛད༔ སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་བབ༔ སེམས་ཅན་ཐམས་ཅད་ལ་ཕོག་པས་ཚེ་དཔག་ཏུ་མེད་པའི་གོ་འཕང་ལ་བཀོད༔ སླར་འོད་དུ་ཞུ་ནས་ཚེ་དཔག་མེད་ཡབ་ཡུམ་ཀྱང་འོད་ཟེར་དུ་ལྷགས་ནས་རང་ལ་ཐིམ་སྟེ༔ གཞོམ་གཞིག་མེད་པ་རྡོ་རྗེ་ལྟ་བུའི་སྐུ་རུ་གྱུར༔ དེ་ཡང་འོད་ཟེར་གྱི་རྣམ་པར་ཞུ་ནས་ལྷུན་གྲུབ་འོད་གསལ་ཆེན་པོའི་ཀློང་དུ་ཐིམ་པར་དམིགས་ཏེ་མཉམ་པར་བཞག་གོ༔ རྗེས་བསྔོ་བ་སྨོན་ལམ་གདབ༔ སྐབས་སུ་ལུས་ཀྱི་དྲི་མ་བཀྲུ་ཞིང་བཀུ་མཉེ་བྱ༔ འདིས་ནི་རྩ་ཁམས་ཀྱི་སྟོབས་རྒྱས༔ བདེ་བ་མི་བཟོད་པར་འཕེལ༔ ཏིང་འཛིན་ཤུགས་ཀྱིས་སྐྱེ༔ མངོན་ཤེས་དང་རྫུ་འཕྲུལ་འབྱུང༔ ཚེ་རིང་ཞིང་རྒས་རྒུད་མེད༔ མཐར་འཇའ་ལུས་སུ་འགྲོའོ༔ མཁའ་འགྲོའི་ཐུགས་ཀྱི་གསང་མཛོད་ཟབ་མོ་ལས༔ རང་ལུས་ལྷ་སྐུར་བསྐྱེད་པའི་རིམ་པ་འདི༔ རིག་འཛིན་མཁའ་འགྲོ་རྒྱ་མཚོའི་ཐུགས་བཅུད་དེ༔ མཚོ་རྒྱལ་བདག་གིས་བརྩེ་བས་ཡི་གེར་བཀོད༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་གནས་ཆེན་རྡོ་རྗེ་ཡོངས་རྫོང་ནས་རྙེད་པ་དགེའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ ནང་འབྱིན་འཇུག་རླུང་གི་ཉམས་ལེན་བཞུགས༔ ྈྈྈྈྈ བདེ་ཆེན་ཡེ་ཤེས་མེ་དཔུང་གིས༔ ཉོན་མོངས་བུད་ཤིང་མངོན་བསྲེགས་ཏེ༔ གསལ་སྟོང་འཛིན་མེད་མཆོག་སྐྱེལ་བ༔ རྡོ་རྗེ་ཕག་མོར་ཕྱག་འཚལ་ནས༔ འབྱིན་འཇུག་རླུང་གི་ནུས་པ་ཡིས༔ རང་ཁམས་དྭངས་མར་སྒྲུབ་པའི་ཐབས༔ རྗེས་འཇུག་འགྲོ་བ་སྨིན་ཕྱིར་དུ༔ ཡི་གེར་སྤེལ་འདི་གཞན་ལ་གསང༔ ས་མ་ཡ༔ རྒྱ་རྒྱ་རྒྱ༔ འདིར་གསང་སྔགས་རྡོ་རྗེ་ཐེག་པའི་ཡང་སྙིང་རྩ་རླུང་མཁའ་འགྲོའི་གསང་མཛོད་ལས༔ ནང་འབྱིན་འཇུག་རླུང་གི་ཉམས་ལེན་ལ་བརྟེན་ནས་རང་ཁམས་དྭངས་མར་སྒྲུབ་པ་ལ་བཞི༔ ཕྱི་གནས་ཀྱི་མཚན་ཉིད༔ ནང་ཟས་ཀྱི་མཚན་ཉིད༔ གསང་བ་གྲོགས་ཀྱི་མཚན་ཉིད༔ ཁོ་ན་ཉིད་ཀྱི་ཉམས་ལེན་ནོ༔ དང་པོ་ཕྱི་གནས་ཀྱི་མཚན་ཉིད་ནི༔ དབེན་ལ་ཉམས་དགའ་བ༔ མཐུན་རྐྱེན་འཛོམ་ཞིང༔ ལྷ་འདྲེའི་རྒྱུ་སྲང་མེད་པ༔ གོང་མས་བྱིན་བརླབས་གནས་རི་ལྟ་བུའོ༔ གཉིས་པ་ནང་ཟས་ཀྱི་མཚན་ཉིད་ནི༔ གདམས་པ་འདི་དཀའ་ཐུབ་སྡུག་སྲན་གྱི་ཆོས་མིན་ལ༔ ཆེ་བ་རྒྱལ་པོ་ལྟ་བུའི་ཆོས་ཡིན་པའི་ཕྱིར༔ ཁ་ཟས་བཅུད་ཅན་ཕུན་སུམ་ཚོགས་པར་བསགས༔ གསུམ་པ་གསང་བ་གྲོགས་ཀྱི་མཚན་ཉིད་ནི༔ ལས་དང་པོའི་དུས་སུ་ཆོས་མཐུན་གྱི་གྲོགས་བསྟེན༔ ཁྱད་པར་རྩ་རླུང་ཐིག་གསུམ་ལ་མོས་པ་གལ་ཆེ༔ བཞི་པ་ཁོ་ན་ཉིད་ཀྱི་ཉམས་ལེན་ལ་གཉིས༔ སྟོང་ར་བསྒོམ་པ་དང༔ རླུང་གི་རྣལ་འབྱོར་རོ༔ དང་པོ་ཕྱི་ལུས་ཀྱི་སྟོང་ར་ནི༔ ལུས་གནད་རྣམ་སྣང་ཆོས་བདུན་གྱི་ངང་ནས༔ སྲུང་བའི་འཁོར་ལོ་དང་ཡེ་ཤེས་ཀྱི་མེ་རབ་ཏུ་འབར་བའི་དབུས་སུ༔ རང་ཉིད་རྡོ་རྗེ་ཕག་མོ་དར་དམར་པོའི་གུར་ཕུབ་པ་ལྟ་བུ༔ སོ་སེན་བ་སྤུའི་སྦུབ་ཚུན་ཆད་སྟོང་སང་ངེ་བ་བསྐྱེད༔ ནང་རྩ་ཡི་སྟོང་ར་ནི༔ རྩ་གསུམ་འཁོར་ལོ་ལྔ་དང་བཅས་པ་བསྒོམས་ལ༔ གསང་བ་གཏུམ་མོའི་མེ་ཚང་བཅའ་བ་ནི༔ དབུ་མའི་ཡར་སྣེར༔ ཁམས་བྱང་ཆུབ་སེམས་ཀྱི་དཀྱིལ་འཁོར་མཚན་ཉིད་བཞི་ལྡན་མར་སྣེ་རྩ་གསུམ་འདུས་མདོར༔ ཨ་ཤད་གཏུམ་མོའི་མེ་མཚན་ཉིད་བཞི་ལྡན་དུ་བསྒོམ༔ དམིགས་པ་མ་གསལ་བར་དུ་རླུང་མི་གཟུང་སྟེ༔ བསྐྱེད་ཆ་ཐོན་པར་བྱ༔ གཉིས་པ་རླུང་གི་རྣལ་འབྱོར་ལ༔ འཇམ་རླུང༔ བར་རླུང༔ བུམ་པ་ཅན༔ དྲག་རླུང་ལ་བསླབ་པ་བཞི༔ དང་པོ་འཇམ་རླུང་ལ་བསླབ་པ་ནི༔ ཕྱི་རྡོ་རྗེ་མཆུ་སྦྱོར་གྱི་བཟླས་པ་སྒྲ་དང་བཅས་ཏེ་སྒྲིབ་སྦྱོང་ཡི་གེ་བརྒྱ་པ་བཟླ༔ དེ་ནས་ནང་རྡོ་རྗེ་ཤུབ་བུའི་བཟླས་པ་ཕྱི་ཡི་མ་ཐོས་པར་ནུས་སྐྱེད་ཨཱ་ལི་ཀཱ་ལི་བཟླ༔ དེ་ནས་གསང་བ་སྐྱེ་མེད་རྡོ་རྗེའི་བཟླས་པ་ནི༔ ལུས་གནད་སྐྱིལ་ཀྲུང་ཁུ་ཚུར་བརླ་སྟེང་བསྒྲེངས་ལ༔ རླུང་དུག་དགུའམ་གསུམ་དུ་ཕྱུང་ནས༔ རླུང་འཇུག་པ་ཨོཾ་གྱི་རང་བཞིན་ཅན་དུ་བཟུང་བ༔ རོ་རྐྱང་གཉིས་ནས་རྒྱུ་མ་ཕུས་བཏབ་པ་ལྟར་སོང༔ རྩ་གསུམ་གྱི་འདུས་མདོར་ཨ་ཤད་ཀྱི་མེ་ལ་ཕོག༔ ཧཱུྃ༔ རླུང་གནས་པ་ཨཱཿཡི་རང་བཞིན་དུ་མནན་པས༔ མེ་སྦར་བས་བཅུ་འགྱུར་གྱིས་ཚ་རུ་སོང༔ དེའི་ཚ་ངད་ཀྱིས་སྤྱི་བོའི་བྱང་སེམས་ཞུ་ལ་ཁད་དུ་སོང་ནས་བདེ་བ་ལྷན་ལྷན་སྐྱེས་པར་བསམ༔ རླུང་འབྱིན་པ་ཧཱུྃ་གི་རང་བཞིན་དུ་འཕང་པའི་ཚེ་ཡང༔ དམིགས་པ་ཨ་ཤད་ཀྱི་མེ་ཁོ་ན་ཉིད་ལ་གཟིར་བ་གནད་ཡིན༔ དེ་ལྟར་འཇམ་རླུང་གི་ངང་ནས་རླུང་ཁུག་པ་བདུན་དང་བཅུ་གསུམ་ཉེར་ལྔ་སོགས༔ རིམ་གྱིས་བསླབས་ཏེ་བརྒྱ་ཡི་བར་སྤེལ་ཤེས་པར་བྱ༔ འདི་ཡི་ཡོན་ཏན་ནི༔ རླུང་སེམས་རྩ་གསུམ་འདུས་མདོར་གཏད་པས་རླུང་སེམས་དབུ་མར་ཚུད༔ སུམ་མདོ་དེ་ནི་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་ཡིན་ཏེ༔ དེ་རུ་རླུང་ཟིན་ན་གཟུང་འཛིན་གྱི་རྟོག་པ་ཐམས་ཅད་ཟག་མེད་བདེ་བ་ཆེན་པོར་ཤར་རོ༔ དེ་ཡང་རླུང་སྣ་གཡས་ནས་རྒྱུ་དུས་ཉི་མའི་དུག་རླུང་ཡིན་པས་གཟུང་དུ་མི་རུང༔ གཡོན་ནས་རྒྱུ་དུས་ཟླ་བའི་རྩི་རླུང་ཡིན་པས་གཟུང༔ མཉམ་དུ་རྒྱུ་དུས་ཡེ་ཤེས་ཀྱི་བདེ་རླུང་ཡིན་པས་མཆོག་ཏུ་གྱུར་པར་ཤེས་སོ༔ གཉིས་པ་དེ་ལ་ཅུང་ཟད་གོམས་ནས་བར་རླུང་ལ་བསླབ་པ་ནི༔ ལུས་གནད་མེ་ཐབས་དྲུག་ཆིངས་བྱ༔ སྟོང་ར་རྣམ་གསུམ་གྱི་དམིགས་པ་དང་བཅས་ཏེ༔ ཨ་ཤད་ཀྱི་མེ་བརྒྱ་འགྱུར་གྱིས་ཚ་བར་བསྒོམ༔ འོག་རླུང་ཅུང་ཟད་བསྡམ༔ བར་རླུང་ལྟེ་བའི་ཐད་ཀར་བརྒྱངས་ལ་རྐེད་པ་ཉག་ཉག་བྱ༔ སྟེང་རླུང་ཅུང་ཟད་མནན༔ ཐུན་བཞི་དང་སྤྱོད་ལམ་ཐམས་ཅད་བར་རླུང་འབྲལ་མེད་བྱ༔ འདི་ཡི་ཡོན་ཏན་ནི༔ ཡེ་ཤེས་རང་ཤར་གནས་པའི་རླུང་སྦྱོར་ཡིན་ཏེ༔ བསྐྱེད་རྫོགས་ཐམས་ཅད་ཀྱི་གྲོགས་སུ་འགྱུར༔ ཐིག་ལེ་འཛིན་འདྲེན་འགྲམ་པ་ལ་དབང་ཐོབ༔ རིག་པ་བྱིང་རྒོད་ཀྱི་སྐྱོན་དང་བྲལ༔ ནད་རྙིང་པ་སེལ་ཞིང་གསར་པ་མི་འབྱུང༔ བདེ་གསལ་མི་རྟོག་པའི་ཏིང་འཛིན་སྐྱེ༔ ཚེ་སྒྲུབ་ཀུན་གྱི་མཆོག་ཡིན་པས༔ ཚེ་ནི་ཉི་ཟླ་ལྟར་རིང་ངོ༔ གསུམ་པ་དེ་ལ་གོམས་ནས་བུམ་པ་ཅན་ལ་བསླབ་པ་ནི༔ ལུས་གནད་འཁོར་ལོ་བཞི་སྦྱོར་གྱི་ངོས་ནས་སྟོང་ར་རྣམ་གསུམ་བསྒོམ༔ མེ་ལྕེ་ལྟེ་བའི་བར་དུ་འབར་ཞིང་སྟོང་འགྱུར་གྱིས་ཚ་བས༔ སྤྱི་བོའི་བྱང་སེམས་རང་དབང་མེད་པར་ཞུ༔ མེ་ཡི་སྟེང་དུ་སར་སྒྲ་དང་བཅས་ཏེ་ལྷུང༔ དེ་ལྷུང་བ་ཙམ་གྱིས་མེ་ལྕེ་ཆེ་རུ་སོང༔ མེ་ལྕེ་ཆེ་བ་ཙམ་གྱིས་བྱང་སེམས་མང་དུ་ཟག༔ དེ་ཟག་པ་ཙམ་གྱིས་ལུས་སེམས་བཟོད་དུ་མེད་པའི་བདེ་ཕྲིལ་ཕྲིལ་སྐྱེ་བར་བསྒོམ༔ ཐུན་འཇོག་ཁར་ལུས་སྦྱང་བྱ༔ ཐུན་རེར་རླུང་ཁུག་བརྒྱ་ལས་མི་ཉུང་བར་དུས་བཞིར་འབད༔ དེ་ཡང་རླུང་སྦྱོར་བཞི་ལྡན་དུ་དགོས་ཏེ༔ ཅི་ལྟར་ན༔ དང་པོ་རྔུབ་པའི་སྦྱོར་བ་ནི༔ རོ་སྟོད་གསེང་ཞིང་མགྲིན་པ་ཅུང་ཟད་བཀུག་ལ༔ རླུང་སྒྲ་མེད་པར་ནར་གྱིས་རྔུབ༔ རླུང་སྟོབས་རྫོགས་པ་དང་མཆིལ་མ་ཐིག་གཅིག་དང་སྦྲག་སྟེ་འོག་ཏུ་ཧྲིལ་གྱིས་མནན༔ དེ་ལྟར་མ་བྱས་པའི་སྐྱོན་ནི༔ དཔེར་ན༔ སྦུད་མཆུ་མེ་དང་མ་འཕྲད་ན་འབར་དུ་མི་གཏུབ་པ་ལྟར༔ ལུས་ཀྱི་རྐྱལ་པ་རླུང་གིས་གང་ཡང༔ ཨ་ཤད་ལ་མ་གཏད་ན་བར་དྲོད་མི་སྐྱེ༔ ཡོན་ཏན་ནི༔ རླུང་རིག་ལྟེ་འོག་ཏུ་གཏད་པའི་བདེ་དྲོད་མྱུར་དུ་འབར་རོ༔ དགང་བའི་སྦྱོར་བ་ནི༔ རླུང་སྟོབས་རྫོགས་པར་དྲངས་ནས་སྦུད་པ་མནན་པ་ལྟ་བུར༔ ལྟེ་འོག་ཏུ་ནན་གྱིས་མནན་ཏེ་འོག་རླུང་བསྐུམ༔ དེ་ཡང་སྟོད་སྨད་ཀྱི་རླུང་ཚ་གྲང་དང་མི་མཐུན་པའི་ཕྱིར༔ ཅུང་ཟད་མ་གོམས་བར་དུ་རླུང་འཐེན་ན་གེགས་དང་རླུང་ལྡང་བས༔ སྟེང་རླུང་མནན་ལ་འོག་རླུང་རང་སར་བཞག༔ དྲོད་ཆུ་རས་ཐུབ་ཙམ་སྐྱེ་ན་རླུང་ཁ་སྦྱོར་དུ་འཆིང༔ དེ་ཡི་ཡོན་ཏན་ནི༔ རྩ་དང་ཡན་ལག་གི་རླུང་ཐམས་ཅད་གནད་དུ་ཚུད་ནས༔ བདེ་སྟོང་ཟག་པ་མེད་པའི་དྲོད་འབར་བར་འགྱུར་རོ༔ གཞིལ་བའི་སྦྱོར་བ་ནི༔ རླུང་མི་ཐུབ་པ་དང་རྔུབ་ཆུང་བརྩེགས་ལ༔ གཡས་གཡོན་དབུས་གསུམ་དུ་ནེམ་ནེམ་པ་རེ་རེ་བཅག༔ དེ་ལྟར་མ་བྱས་ན་སྨན་རིགས་དུག་ཏུ་འགྱུར་བ་ལྟ་བུ༔ ལུས་ལ་སྐྱོན་དབྱུང་བའི་ཕྱིར༔ གཞིལ་མ་རན་པར་མི་གཞིལ་ལ༔ རན་ནས་གཞིལ་བ་གནད་ཆེ༔ ཡོན་ཏན་ནི་རྩ་ཁ་བྱེ་ཞིང་རྩ་མདུད་གྲོལ་ནས༔ སྤང་རྟོགས་ཀྱི་ཡོན་ཏན་ཐམས་ཅད་རྒྱུད་ལ་སྐྱེ་བར་འགྱུར་རོ༔ འཕེན་པའི་སྦྱོར་བ་ནི༔ རླུང་ལྷག་མ་མ་ལུས་པ་ཕྱི་རུ་ཅི་ཐུབ་ཏུ་འཕངས་ལ༔ རིག་པ་ལྟེ་འོག་ཏུ་གཏད༔ ཕྱི་རུ་མནན་མི་བཟོད་ཅིང་མགོ་འདར་ཕྲི་ལི་ལི་འགྱུར་ན༔ ནང་དུ་དལ་སི་རི་རི་རྔུབ༔ དེ་ལྟར་མ་ཡིན་ན་རླུང་རིག་ཕྱི་རུ་ཧར་གྱིས་ཐོན་ནས་སྐྱོན་དུ་འགྱུར༔ དེའི་ཡོན་ཏན་ནི༔ ཡེ་ཤེས་ཀྱི་དྭངས་རླུང་གཡོ་མེད་དུ་བཞག་པས་རྣལ་འབྱོར་གྱི་ཚེ་འཕེལ་ཞིང་བརྟན་པར་བྱེད་དོ༔ མདོར་ན་རླུང་འཇུག་པའི་ཚེ༔ གྱད་ཆེན་གྱིས་གཞུ་བཀུག་པ་ལྟར་དལ་བུས་རྔུབ༔ གནས་པའི་ཚེ་རྫིང་མཁན་གྱི་རྫིང་བསྐྱིལ་བ་ལྟར་ལྟེ་འོག་ཏུ་མེར་གྱིས་བསྐྱིལ༔ འབྱིན་པའི་ཚེ་དཔག་ཆེན་གྱི་མདའ་འཕངས་པ་ལྟར་རྒྱངས་ཀྱིས་འཕང་བར་བྱའོ༔ རླུང་བུམ་པ་ཅན་གྱི་ཡོན་ཏན་ནི༔ རྩ་དབུ་མའི་མདུད་པ་དང་པོ་ཞིག་སྟེ་རླུང་འཇུག་ས་དང་པོའི་ཡོན་ཏན་སྐྱེ༔ དེར་རླུང་སེམས་གནས་ས་གཉིས་པའི་ཡོན་ཏན་སྐྱེ༔ གནས་པ་དེ་ལ་རླུང་སེམས་ཐིམ་པས་ས་གསུམ་པའི་ཡོན་ཏན་སྐྱེ༔ གཟུང་འཛིན་གྱི་རྟོག་ཚོགས་མཁའ་ལྟར་དག་ནས་ས་བཞི་པའི་ཡོན་ཏན་སྐྱེ༔ མཁྱེན་པའི་ཡོན་ཏན་མཐའ་དག་རྒྱས་ཤིང་ས་ལྔ་པའི་ཡོན་ཏན་སྐྱེའོ༔ དེ་ལྟར་རྩེ་གཅིག་ཏུ་ཉམས་སུ་བླངས་པས་ས་བཅུ་པའི་བར་གྱི་ཡོན་ཏན་ཐམས་ཅད་ཟླ་བ་ཡར་ངོ་བཞིན་དུ་འཕེལ་བར་འགྱུར་རོ༔ བུམ་ཆེན་འདི་ལ་བཞེད་ལུགས་མང་ཡང་སྐྱིལ་ཀྲུང་བཅས་ཏེ་རླུང་བཟུང་ནས་ལག་པས་པུས་མོ་གཉིས་དང་དཔྲལ་བ་ལ་རེག་ནས་སེ་གོལ་བརྡབ་པ་གཅིག་ཏུ་བརྩི་བའི༔ ཡུན་བརྒྱ་རྩ་བརྒྱད་ཐུབ་པ་བུམ་ཆེན༔ བདུན་ཅུ་དོན་གཉིས་བུམ་འབྲིང༔ སུམ་ཅུ་སོ་དྲུག་བུམ་ཆུང་ངོ༔ བཞི་པ་གོམས་སྟོབས་ཆེ་རུ་སོང་ནས་དྲག་རླུང་ལ་བསླབ་པ་ནི༔ ལུས་གནད་ཙོག་པུར་རྐང་པ་གཉིས་བསྣོལ་བའི་མཐེ་བོང་ལ༔ ལག་གཉིས་བསྣོལ་བས་དྲག་ཏུ་བཟུང་ཞིང་ལུས་སྦྱོར་དྲུག་དང་ལྡན་པར་བྱ༔ ཕྱི་ནང་གི་སྟོང་ར་མེ་དམིགས་དང་བཅས་ཏེ༔ གསང་བ་རྩ་གསུམ་འདུས་མདོར་ཨ་ཤད་ཀྱི་མེ་སོར་བཞི་ཙམ་དེ༔ སོར་མོ་ཕྱེད་ཕྱེད་དུ་སྦར་ལ་རླུང་ཁུག་བརྒྱད༔ དེ་ནས་རླུང་ཁུག་བཅུས་བདེ་སྐྱོང་འཁོར་ལོ༔ བཅུས་སྤྲུལ་པའི་འཁོར་ལོ༔ བཅུས་ཆོས་ཀྱི་འཁོར་ལོ༔ བཅུས་ལོངས་སྤྱོད་འཁོར་ལོ༔ བཅུས་བདེ་ཆེན་འཁོར་ལོ༔ མེ་ཡིས་གང་སྟེ༔ སྤྱི་བོའི་ཧཾ་ལས་རླུང་ཁུག་བཅུས་ཐིག་ལེ་མང་དུ་ཞུ་སྤྱི་བོའི་རྩ་འཁོར་གང༔ དེ་ནས་ཐིག་ལེ་བཅུ་དྲུག་སྤྱི་བོ་ནས་མགྲིན་པར་བབ་པས་ན༔ ཡས་བབ་ཀྱི་དགའ་བ་ལ་སེམས་གཟུང་བ་རླུང་ཁུག་བཅུ༔ མགྲིན་པ་ནས་ཐིག་ལེ་བརྒྱད་སྙིང་གར་བབ་པས་ན༔ དགའ་བའི་མཆོག་དགའ་ལ་སེམས་གཟུང་བ་རླུང་ཁུག་བཅུ༔ སྙིང་ག་ནས་ཐིག་ལེ་བཞི་ལྟེ་བར་བབ་པས་ན༔ དགའ་བའི་ཁྱད་པར་གྱི་དགའ་བ་ལ་སེམས་གཟུང་བ་རླུང་ཁུག་བཅུ༔ ལྟེ་བ་ནས་ཐིག་ལེ་གཉིས་གསང་གནས་སུ་བབ་པས་ན༔ དགའ་བའི་ལྷན་སྐྱེས་ཀྱི་དགའ་བ་ལ་སེམས་གཟུང་བ་རླུང་ཁུག་བཅུ་སྟེ་ཐུན་གཅིག་ལ་རླུང་ཁུག་བརྒྱ་རྩ་བརྒྱད་དོ༔ དེའི་ཚེ་ལུས་ཐམས་ཅད་དུ་བལ་ལ་སྣུམ་ཐིམ་པའམ༔ གྲོད་རྐྱལ་མར་ཁུས་ཁེངས་པ་བཞིན་དུ་བྱང་སེམས་བདུད་རྩིའི་རྒྱུན་གྱིས་གང་སྟེ༔ བདེ་དྲོད་མེར་མེར་ཆིལ་ཆིལ་སྐྱེས་པར་བསམ༔ དེ་ཡང་དྲོད་རྟགས་ཕྱི་མ་མ་སྐྱེས་ཀྱི་བར་དུ་མེ་ལྕེ་ལྟེ་བ་ཡན་ཆད་མི་སྤར༔ བསྐྱེད་རིམ་སྔ་མ་མ་གསལ་གྱི་བར་དུ་ཕྱི་མ་མི་སྤོ༔ མེ་ལྕེ་སྦར་བའི་ཚེ་ཡང་སོར་མོ་བཞི་བཞི་ལས་རིང་དུ་བཏང་ན༔ གེགས་འབྱུང་ཞིང་ཡོན་ཏན་བུལ༔ དེ་ལྟར་ཐུན་མོང་ཐུན་བཞིར་སྦྱོང་ཞིང་ལུས་དྲག་ཏུ་གདབ༔ སྤྲུག་བྱའོ༔ འདིའི་ཡོན་ཏན་ནི༔ ལུས་བདེ་ཞིང་རླུང་ལྟར་མགྱོགས༔ ནད་དཀོན་ལ་ཚེ་རིང་སྟེ༔ དཔེར་ན༔ ནངས་པར་སྔ་མོ་ལ་དྲག་རླུང་བུམ་པ་ཅན་གཅིག་བཟུང་ན༔ སང་ཉིན་དེ་ཚོད་མ་ཕྱིན་བར་དུ་དུས་མ་ཡིན་པའི་འཆི་བས་མི་ཚུགས་ལ༔ རླུང་ཁུག་སྟོང་ཕྲག་རེས་དུས་མིན་འཆི་བ་འཇོམས༔ འབུམ་ཕྲག་གཅིག་གིས་ཚེ་ཟད་པ་ཡང་ལོ་ལྔ་རུ་བཤོལ་བ་ཐེ་ཚོམ་མེད༔ རྒྱུན་དུ་མ་ཆག་ན་ཚེའི་བར་ཆད་ཐམས་ཅད་སེལ་ཏེ་འཆི་མེད་རྡོ་རྗེའི་ལུས་སུ་གྲུབ༔ བདེ་གསལ་མི་རྟོག་པའི་ཉམས་བསམ་དུ་མེད་པར་སྐྱེ༔ གང་སྐྱེས་ཐམས་ཅད་ཆགས་ཞེན་མེད་པ་གནས་ལུགས་ཀྱི་ངང་ནས་སྐྱོང་བས༔ བཅོས་མིན་སེམས་ཀྱི་ངོ་བོ་རྗེན་པར་མཐོང༔ འབྱུང་ལྔའི་རླུང་ལ་རང་དབང་ཐོབ་པས་གཞན་སྣང་ཟིལ་གྱིས་གནོན༔ སེམས་ལ་རང་དབང་བསྒྱུར་བས་མངོན་ཤེས་རྫུ་འཕྲུལ་འབྱུང༔ ནང་དུ་དྭངས་མ་བརྟན་པས་ཟས་སྐོམ་སྲེད་པ་ཆུང༔ རྣམ་རྟོག་རང་དབང་དུ་འདུ་བས་ལྷ་འདྲེ་བྲན་དུ་ཁོལ༔ བཀྲག་མདངས་ཡང་རྩལ་རྒྱས་པས་མཐོང་ཚད་དང་བ་སྤྲོ༔ གདོས་བཅས་རང་སར་དག་པས་འཇའ་ལུས་འོད་སྐུར་གྲོལ༔ དྲོད་ལ་བོགས་ཆུང་ན་དམིགས་པ་དང་རྫས་སྦྱོར་ལ་བརྟེན༔ གཏུམ་མོའི་འཕྲུལ་འཁོར་རྣམས་ཐུན་བཞིར་འབད་པས༔ བདེ་དྲོད་དཔག་ཏུ་མེད་པ་སྐྱེས༔ བར་དུ་བརྟན༔ མཐར་རང་དབང་ཐོབ་པར་འགྱུར་རོ༔ འདི་འདྲའི་གདམས་པ་ཁྱད་པར་རྨད་དུ་བྱུང༔ གུ་རུའི་གསུང་བཞིན་མཚོ་རྒྱལ་བདག་གིས་བཀོད༔ ལོ་ཙཱ་ཁྱོད་ཀྱིས་ཟབ་མོའི་གཏེར་དུ་ཞོག༔ རྡོ་རྗེ་རྣལ་འབྱོར་བྱ་ར་ལྷང་ལྷང་མཛོད༔ ས་མ་ཡ༔ རྒྱ་རྒྱ་རྒྱ༔ ྈྈྈྈ བདག་འདྲ་འཇའ་ཚོན་སྙིང་པོས་རྡོ་རྗེ་ཡོངས་རྫོང་རྡོ་རྗེ་ཕག་མོའི་བྷ་ག་ནས་དངོས་གྲུབ་ཏུ་རྙེད་པའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ ཐུན་མོང་གཏུམ་མོའི་འཕྲུལ་འཁོར་བཞུགས་སོ༔ ྈྈྈྈ བདེ་ཆེན་རྡོ་རྗེ་ཕག་མོ་ལ༔ རླུང་གི་སྦྱོར་བས་ཕྱག་འཚལ་ལོ༔ གཏུམ་མོའི་རླུང་ལ་གོམས་ཤིང་བརྟན༔ དབང་ལ་འབྱོར་ཕྱིར་འཕྲུལ་འཁོར་བྱ༔ དང་པོ་རྩ་ནང་རླུང་རོ་སྦྱང༔ བདེ་རླུང་ཕོ་བ་གང་བ་སྐྱིལ༔ དེ་ནས་མགོ་སོགས་ལུས་རྣམས་ཀུན༔ ཤེད་ཀྱིས་འཕུར་སུབ་གསུམ་གསུམ་བྱ༔ གཉིས་པ་སྐྱིལ་ཀྲུང་ས་གནོན་ཕྱག༔ རླུང་གཟུང་ལུས་ཀུན་གསུམ་གསུམ་སྤྲུག༔ གསུམ་པ་ལག་གཉིས་རེས་མོས་ཀྱིས༔ ཁུ་ཚུར་བཅངས་ལ་བརྐྱང་བསྐུམ་བྱ༔ བཞི་པ་གཡས་གཡོན་མདའ་འཕེན་ཚུལ༔ དལ་བུས་ལན་གསུམ་རེས་མོར་བྱ༔ ལྔ་པ་སེང་གེ་རྣམ་རོལ་ཕྱག༔ ངོ་བཀབ་ཕོ་བ་ལན་གསུམ་བསྐོར༔ དྲུག་པ་སྐྱིལ་ཀྲུང་པུས་གཡས་འཁྱུད༔ ཕོ་སྐོར་ལན་གསུམ་གཡོན་དེ་བཞིན༔ བདུན་པ་མཉམ་གཞག་ས་གནོན་དང༔ ཕོ་བ་གཡས་གཡོན་གསུམ་གསུམ་བསྐོར༔ བརྒྱད་པ་ལག་བསྣོལ་གྲུ་མོ་འཁྱུད༔ ཇེ་དྲག་ཇེ་དྲག་ཕོ་ཁར་བརྡེག༔ དགུ་པ་ལག་གཉིས་པུས་མོ་བཀབ༔ རོ་སྟོད་ཤེད་ཕྱུང་གཡས་གཡོན་གཅུ༔ བཅུ་པ་ལག་གཉིས་སོར་མོ་བསྣོལ༔ མདུན་ཕྱོགས་གང་སླེབ་རྣམས་སུ་འཕུར༔ བཅུ་གཅིག་ལག་གཉིས་ཁུ་ཚུར་བཅང༔ རྒྱབ་གཞུང་གར་སླེབ་བརྡུང་ཞིང་བྱུག༔ བཅུ་གཉིས་རྡོ་རྗེ་ཁུ་ཚུར་བཅང༔ གྲུ་མོ་གཉིས་ཀྱིས་རྩིབ་ལོགས་བརྡུང༔ བཅུ་གསུམ་ལག་གཉིས་ཐལ་མོ་སྦྱར༔ འཛུབ་མོས་སྣ་ལ་འཕུར་ཞིང་བསུབ༔ བཅུ་བཞི་མིག་དང་སྤྱི་བོའི་གཙུག༔ དྲོད་དང་ལྡན་པར་མཉེ་སུབ་བྱ༔ བཅོ་ལྔ་ཙོག་འདུག་ལོང་བུ་གཤིབ༔ སྒྱིད་ཁུག་ལྡེམ་ལྡེམ་འཕང་རྡེག་བྱ༔ བཅུ་དྲུག་པ་ཡང་དེ་ཡི་ངང༔ ཁུ་ཚུར་གཡས་གཡོན་བཞི་མདོར་བརྡེག༔ བཅུ་བདུན་རྡོ་རྗེ་སྐྱིལ་ཀྲུང་ལ༔ ལག་གཉིས་དཔྱི་ཆད་སར་བཙུགས་རྡེབ༔ བཅོ་བརྒྱད་རྐང་གཉིས་བརྐྱང་སྟེ་གཤིབ༔ ལག་གཉིས་རེས་མོས་ཤད་ཀྱིས་འཕུར༔ བཅུ་དགུ་གསང་བ་མཉེ་ཞིང་འཕུར༔ དེ་དུས་སྲིན་ཞལ་དྲག་ཏུ་བསྡམ༔ ཉི་ཤུ་རྐང་པ་མདའ་འགེང་ཚུལ༔ ལག་གཉིས་སོར་བསྣོལ་ལྟག་པར་འཁྱུད༔ ཉེར་གཅིག་ལངས་ཏེ་ལག་པ་གཉིས༔ ཁུ་ཚུར་དྲག་བཅངས་གྱེན་དུ་བསྒྲེང༔ ཉེར་གཉིས་སྔ་མ་དེ་ཡི་ངང༔ དྲག་ཏུ་ལངས་ཤིང་དྲག་ཏུ་འདུག༔ ཉེར་གསུམ་གྱད་ཀྱི་བགྲད་སྟངས་ལ༔ ལག་པ་སར་བཙུགས་ལུས་པོ་བཀྱག༔ ཉེར་བཞི་འབོལ་སྟེང་སེམས་སྐྱིལ་འདུག༔ བར་འབེབ་གསུམ་གསུམ་རྒྱབ་པར་བྱ༔ ཉེར་ལྔ་ལངས་ཏེ་ལག་གཉིས་ཀྱི༔ མཁར་ཕྱར་འཕར་ཏེ་ཐོག་འབེབ་གསུམ༔ དེ་ལྟར་འཕྲུལ་འཁོར་ཉེར་ལྔ་པོ༔ ཚར་གཅིག་མ་རྫོགས་བར་དག་ཏུ༔ འཛིན་རླུང་གསར་རྙིང་བརྗེ་བྱ་ཞིང༔ ངལ་མི་བསོ་བར་མྱུར་དྲག་ཏུ༔ ཚར་གཅིག་རྫོགས་ནས་རླུང་རོ་ཕྱུང༔ དམིགས་མེད་ཀ་དག་ངང་དུ་ཀློད༔ དེ་ལྟའི་ཚུལ་གྱིས་སྦྱོང་ནུས་ན༔ དྲོད་འབར་བདེ་སྟོང་ཉམས་མྱོང་འཆར༔ ས་མ་ཡ༔ རྒྱ་རྒྱ་རྒྱ༔ རིགས་སྔགས་འཆང་བ་འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པ་དགེ །བཀྲ་ཤིས་སོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ རྨི་ལམ་འོད་གསལ་འཁོར་ཡུག་ཡོད༔ ྈྈྈྈ རྡོ་རྗེ་ཕག་མོ་འཁྲུལ་པ་རང་དག་ལ་ཕྱག་འཚལ་ལོ༔ རྨི་ལམ་གྱི་གདམས་པ་ལ་གསུམ༔ ངོས་གཟུང་བ༔ རྩལ་སྦྱོང་བ༔ ཆེར་སྤེལ་བའོ༔ དང་པོ་རྨི་ལམ་བཙན་ཐབས་སུ་གཟུང་བ་ནི༔ འགྲོ་འཆག་ཉལ་འདུག་སྤྱོད་ལམ་ཐམས་ཅད་དུ༔ ང་གཉིད་དུ་སོང་འདུག༔ རྨི་ལམ་ཡིན་སྙམ་པའི་འདུན་པ་དྲགས་པོ་བཏང་ནས༔ ངག་ཏུ་ཡང་འདི་རྨི་ལམ་ཡིན༔ སྒྱུ་མ་ཡིན༔ ཞེས་བཟླ་ལ༔ ཉལ་དུས་རང་གི་མགྲིན་པའི་རྩ་འཁོར་གྱི་དབུས་སུ༔ སྣང་མཐའ་རིག་པའི་ཡེ་ཤེས་ཡབ་ཡུམ༔ སྐུ་མདོག་དམར་པོ་ཚོན་གང་བའི་ཐུགས་ཀར་ཨ་ཡིག་དམར་པོ་བྱེ་རུ་ལྟ་བུ་གཅིག་བསྒོམས་ལ༔ བདག་གིས་རྨི་ལམ་ལ་རྨི་ལམ་དུ་ཤེས་པར་བྱིན་གྱིས་རློབས༔ རྨི་ལམ་གྱི་རང་རྩལ་འབྱོང་བར་བྱིན་གྱིས་རློབས༔ རྨི་ལམ་དུ་སྤྲུལ་བསྒྱུར་ནུས་པར་བྱིན་གྱིས་རློབས༔ རྨི་ལམ་རང་དབང་ཐོབ་པར་བྱིན་གྱིས་རློབས༔ ཞེས་བླ་མ་ཡི་དམ་མཁའ་འགྲོ་ལ་གསོལ་བ་སྙིང་ནས་བཏབ་པས༔ རིག་པའི་ཡེ་ཤེས་སྣང་མཐའ་ཡབ་ཡུམ་ལས་འོད་ཟེར་དམར་པོ་བསམ་དུ་མེད་པ་ཕར་འཕྲོས༔ ཕྱི་སྣོད་ཀྱི་འཇིག་རྟེན་ལྷ་ཡི་གཞལ་ཡས་ཁང༔ ནང་བཅུད་ཀྱི་སེམས་ཅན་ལྷ་དང་ལྷ་མོར་བསྒྱུར༔ འོད་ཟེར་ཚུར་འདུས་རང་རྒྱུད་ཀྱི་བག་ཆགས་སྦྱངས༔ སླར་འདུས་སྣང་མཐའི་ཐུགས་ཀར་ཐིམ༔ ཨ་བཀྲག་མདངས་དང་ལྡན་པ་ལ༔ རྩེ་གཅིག་ཏུ་གཏད་ཅིང༔ རླུང་འབྱིན་འཇུག་གནས་གསུམ་ལ་འབད་པས་ཟིན་པར་འགྱུར་རོ༔ གལ་ཏེ་དེས་ཀྱང་མ་ཟིན་ན༔ བདག་མོས་གུས་ཞན་ཅིང་སྒྲིབ་པ་མཐུག༔ དད་འདུན་བརྩོན་འགྲུས་ཆུང་བས་ལན༔ ད་ཅིས་ཀྱང་ཟིན་པར་བྱ་སྙམ་དུ༔ གསོལ་བ་སྙིང་ནས་བཏབ་ན་ཟིན༔ དེས་ཀྱང་མ་ཟིན་ན༔ སྣང་མཐའ་སྤྱི་མགྲིན་སྙིང་ལྟེ་གསང་གནས་རྣམས་སུ་དམིགས་པ་སྤོ༔ ཟིན་ལ་ཁད་ལ་སད་ན༔ མིག་མི་ཕྱེ་བར་དམིགས་པ་གཏད་པས་སད་འབྱམས་ལ་གྲོལ་ལོ༔ གཉིས་པ་དེ་ལྟར་ཟིན་ནས་རྨི་ལམ་རང་རྩལ་སྦྱོང་བ་ནི༔ རྨི་ལམ་ཟིན་པའི་དུས་སུ༔ རྨི་ལམ་གྱི་སྣང་བ་འདི་གར་བསྒྱུར་དུ་ཡིན་བསམས་ནས༔ མེ་ཆུ་གཡང་སའི་འཇིགས་པ་རྣམས་ལ༔ རྨི་ལམ་གྱི་མེས་མི་ཚིག༔ ཆུས་མི་ཁྱེར༔ གཡང་ལ་མི་ལྷུང་བསམས་ནས་ཐེན་ཐོག་མེད་པར་བསྲེ༔ དེ་བཞིན་དུ་གཅན་གཟན་འདྲེ་སྲིན་འཇིགས་པ་སོགས་ལའང་རྩལ་སྦྱང་བར་བྱའོ༔ གསུམ་པ་རྩལ་འབྱོངས་ནས་རྒྱ་ཆེར་སྤེལ་བ་ནི༔ རྨི་ལམ་གྱི་སྣང་བ་འདི་ཅི་བསྒྱུར་ཡིན་སྙམས་ནས༔ མེ་ལ་ཆུ༔ ཆུ་ལ་མེ༔ བདུད་ལ་ལྷ༔ གཅིག་ལ་བཅུ༔ བཅུ་ལ་བརྒྱ༔ བརྒྱ་ལ་སྟོང་དུ་བསྒྱུར༔ བྱ་གཅན་ལ་ཞོན་ནས་དག་པའི་ཞིང་ཉུལ་བ༔ ཉི་ཟླ་ཞོན་ནས་གླིང་བཞི་བསྐོར་བ༔ སངས་རྒྱས་སེམས་དཔའི་ཞལ་བལྟ་བ༔ རྒོལ་བ་གང་གི་གཉེན་པོར་སྤྲུལ་པ་སོགས་བྱ༔ རྨི་ལམ་ཟིན་ཀྱང་སྤྲུལ་བསྒྱུར་གྱི་ནུས་སྟོབས་ཞན་ན༔ རླུང་རྩོལ་ལ་འབད་པ་གལ་ཆེ༔ རྨི་ལམ་མ་ཆོད་ན་བར་དོ་མི་ཆོད་པའི་ཕྱིར༔ ཤི་རུང་གསོན་རུང་དགེ་སྦྱོར་ལ་བརྩོན་པར་བྱའོ༔ ས་མ་ཡ༔ རྒྱ་རྒྱ་རྒྱ༔ འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པ་བཀྲ་ཤིས།། །། ྈ རྩ་རླུང་མཁའ་འགྲོའི་གསང་མཛོད་ལས༔ འོད་གསལ་འཁྲུལ་པ་རང་དག་གོ༔ རྡོ་རྗེ་ཕག་མོ་འོད་གསལ་སྒྱུ་མར་གྲོལ་ལ་ཕྱག་འཚལ་ལོ༔ འོད་གསལ་གྱི་གདམས་པ་ལ་གསུམ༔ གཉིད་ཀྱི་འོད་གསལ་ཆོས་སྐུ་དང་བསྲེ་བ༔ རྨི་ལམ་འོད་གསལ་ལོངས་སྐུ་དང་བསྲེ་བ༔ སད་པ་འོད་གསལ་སྤྲུལ་སྐུ་དང་བསྲེ་བའོ༔ དང་པོ་ཆོས་སྐུ་དང་བསྲེ་བ་ནི༔ ཉིན་གྱི་སྣང་བ་ཐམས་ཅད་རྨི་ལམ་དུ་ཁྱེར་ལ༔ གཉིད་དུ་འགྲོ་ཁར་འཕེན་པ་གཏང་བ་ནི༔ སྙིང་གའི་རྩ་འཁོར་གྱི་དབུས་སུ༔ གུ་རུ་རྡོར་སེམས་གསལ་བ་རང་བྱུང་ཡབ་ཡུམ་སྙིང་ཁ་ཚོན་གང་བའི་ཐུགས་ཀར༔ ཧཱུྃ་ཡིག་མཐིང་ག་གསལ་གདབ༔ འོད་གསལ་ཟིན་པའི་བྱིན་རླབས་ཞུ༔ རྨི་ལམ་སྐབས་ལྟར་འོད་ཟེར་སྔོན་པོའི་སྤྲོ་བསྡུ་བྱ་ལ༔ ཕྱག་ཆེན་གྱི་ངང་ནས་ཧཱུྃ་ལ་ཤེས་པ་གཏད་དེ་ཉལ་བས༔ གཉིད་སྲབ་མཐུག་གང་ལའང་དགེ་སྦྱོར་གྱི་རྩིས་ཟིན་པར་འབྱུང༔ དགེ་སྦྱོར་གྱི་ངང་དུ་གཉིད་པ་དེ་དག་ཅི་ཙམ་གནས་ཀྱི་བར་དུ་འཇོག་པ་ནི༔ གཉིད་ཀྱི་འོད་གསལ་ཆོས་སྐུ་དང་བསྲེ་བའོ༔ གཉིས་པ་རྨི་ལམ་འོད་གསལ་ལོངས་སྐུ་དང་བསྲེ་བ་ནི༔ གོང་དུ་བཤད་པའི་གཉིད་ཀྱི་འོད་གསལ་དེའི་ངང་ནས༔ རྨི་ལམ་གྱི་སྣང་བ་འཆར་བའི་དུས་སུ་ལོངས་སྐུ་འཇའ་ཚོན་ལྟ་བུའི་སྐུར་གསལ་ཏེ༔ ཇི་ཙམ་གནས་ཀྱི་བར་དུ་སྒྱུ་མ་ལྟ་བུའི་ཏིང་ངེ་འཛིན་ལ་མཉམ་པར་འཇོག་པ་ན༔ རྨི་ལམ་འོད་གསལ་ལོངས་སྐུ་དང་བསྲེ་བའོ༔ གསུམ་པ་སད་ནས་འོད་གསལ་སྤྲུལ་སྐུ་དང་བསྲེ་བ་ནི༔ ཐུགས་ཀར་རྡོར་སེམས་ཡེ་ཤེས་སེམས་དཔའི་ཚུལ་དུ་བསྒོམས་ནས་ལྡང་བ་ནི༔ སད་པ་འོད་གསལ་སྤྲུལ་སྐུ་དང་བསྲེ་བའོ༔ མདོར་ན་མཚན་མོའི་རྨི་ལམ་གྱི་སྣང་བ་དེ་ཉིན་མོའི་དགེ་སྦྱོར་དང་བསྲེ༔ ཉིན་མོའི་དགེ་སྦྱོར་གྱི་སྣང་བ་དེ་དང་མཚན་མོའི་རྨི་ལམ་གཉིས་བསྲེ༔ ཉིན་མཚན་ཅི་འདྲེས་ཞིག་བྱེད་དགོས་ཏེ༔ ཉིན་གྱི་དགེ་སྦྱོར་མཚན་གྱི་རྨི་ལམ་དུ་མི་སླེབ་ན༔ བར་དོ་རུ་དགེ་སྦྱོར་གྱི་རྩིས་ཟིན་པའི་རེ་བ་ཟད་དོ༔ དེ་ལྟར་ཉམས་སུ་བླངས་པས་གཉིད་ཀྱི་འོད་གསལ་ཆོས་སྐུ༔ འཆི་བ་འོད་གསལ་ཆོས་སྐུ་གཉིས་དབྱེར་མི་ཕྱེད་པ་ཆུ་ལ་ཆུ་བཞག་པ་ལྟར་སངས་རྒྱས་སོ༔ གལ་ཏེ་བར་དོའི་སྣང་བ་ཤར་ཀྱང༔ བར་དོ་ལོངས་སྐུ་དང་སྐྱེ་བ་སྤྲུལ་སྐུ་ཐོབ་སྟེ་དོན་གཉིས་ལྷུན་གྱིས་གྲུབ་པར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་རྙེད་པ་བཀྲ་ཤིས།། །། ྈ རྩ་རླུང་མཁའ་འགྲོའི་གསང་མཛོད་ལས༔ སྒྱུ་ལུས་བདེན་མེད་རང་གྲོལ་བཞུགས༔ ྈྈྈ རྡོ་རྗེ་ཕག་མོ་སྒྱུ་ལུས་བདེན་མེད་སྟོན་ལ་ཕྱག་འཚལ་ལོ༔ སྒྱུ་ལུས་ཀྱི་གདམས་པ་ལ་གསུམ༔ དང་པོ་སྦྱང་བ༔ བར་དུ་ཚད་པ༔ ཐ་མར་བོགས་འདོན་པའོ༔ དང་པོ་སྦྱང་བ་ནི༔ དབེན་པའི་གནས་སུ་སེམས་བསྐྱེད༔ སྒྱུ་ལུས་འབྱོང་བའི་གསོལ་བ་གདབ༔ དེ་ནས་མདུན་དུ་མེ་ལོང་ནང་དུ་རང་གཟུགས་འཆར་དུ་བཅུག༔ དེ་ལ་ཆེ་བསྟོད་ངན་སྨད་ཅི་བྱས་པས་དགའ་སྡུག་མེད༔ དེ་བཞིན་དུ་ཚེ་འདིའི་སྣང་བ་ཐམས་ཅད་འཁྲུལ་པའི་རང་གཟུགས་སུ་ངེས་ཏེ༔ རྨི་ལམ་གྱི་སྣང་བའམ༔ སྒྱུ་མའི་སྔགས་རྫས་སམ༔ མེ་ལོང་གཟུགས་བརྙན་ལྟར༔ སྣང་ཙམ་ཉིད་ལས་བདེན་པར་གྲུབ་པ་ནི་མེད་དེ༔ འདུས་བྱས་ཐམས་ཅད་བདེན་མེད་སྒྱུ་མའི་རང་བཞིན་ཡིན་ནོ་བསམས་ལ༔ དེ་རྨི་ལམ་དང་བསྲེ༔ རྨི་ལམ་དེ་བར་དོ་དང་བསྲེ་བར་བྱའོ༔ གཉིས་པ་བར་དུ་ཚད་པ་ནི༔ སྒྱུ་མའི་སྣང་བ་རྨི་ལམ་དང་ཨི་འདྲེས་བརྟག་པའི་ཕྱིར༔ ཕྱོགས་རིས་མེད་པའི་རྒྱལ་ཁམས་སུ་འགྲིམ༔ ངོ་ཤེས་མེད་པའི་མི་ཡུལ་དུ་འཁྱམས་ནས༔ ཚ་གྲང་སྐྱིད་སྡུག་གི་སྣང་བ་ཅི་ཤར་རྣམས་ལ༔ གཟུང་འཛིན་གྲུབ་མ་གྲུབ་བལྟ༔ སྣང་ལ་འཛིན་མེད་དུ་ཕྱལ་ཕྱལ་འགྲོ་ན་རྩལ་སྦྱང་སྟེ༔ གཟུགས་ནས་རྣམ་མཁྱེན་བར་དུ་སྤང་བླང་མེད་པ་སྒྱུ་མ་ལྟ་བུར་ཤར་ན་འབྱོངས་པ་ཡིན་ནོ༔ གསུམ་པ་དེ་ལ་བོགས་འདོན་པ་ནི༔ ཆགས་སྡང་གི་ངོར་འཆོར་ན་དབེན་པའི་གནས་སུ་རྩེ་གཅིག་ཏུ་གནད་དུ་བསྣུན༔ དགེ་སྦྱོར་གྱི་གྲོགས་སུ་འགྲོ་ན་སྤྱོད་ལམ་སྣ་ཚོགས་སྦྱང༔ གྲོགས་སུ་ཁྱེར་མི་ནུས་ན་སྟན་དྲོད་མ་ཡལ་བར་ཉམས་སུ་ལེན༔ སྲོག་རྩོལ་གྱི་རླུང་ལ་ནན་ཏན་དུ་བྱའོ༔ འདི་ནི་སྣང་བའི་རྫུན་ཕུག་རྡིབ་ཅིང་འཁྲུལ་པའི་ཕུ་ཐག་ཆོད་པའི་གདམས་ངག་གོ༔ ས་མ་ཡ༔ རྒྱ་རྒྱ་རྒྱ༔ གསང་བདག་རིག་པ་འཛིན་པ་འཇའ་ཚོན་སྙིང་པོས་རྡོ་རྗེ་ཡོངས་རྫོང་མཁའ་འགྲོ་གསང་ཕུག་ནས་གཏེར་དུ་དྲངས་པའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ བར་དོ་སྣང་བ་རང་གྲོལ་བཞུགས་སོ༔ རྡོ་རྗེ་ཕག་མོ་བདེན་མེད་རྟོགས་ལ་ཕྱག་འཚལ་ལོ༔ བར་དོའི་གདམས་པ་ལ་གསུམ༔ འབྱུང་ཚུལ༔ རྩལ་སྦྱང༔ ཐོབ་ལུགས་སོ༔ དང་པོ་འབྱུང་ཚུལ་ནི༔ འཆི་བའི་དུས་སུ་ཚེ་འདིའི་སྣང་བ་འགགས༔ བར་དོའི་སྣང་བ་མ་ཤར་གྱི་བར་རིག་པ་གཞི་ལ་ཐིམ་པའི་དུས་སུ༔ ཚེ་འདིར་ལས་རྒྱ་ལ་བསྟེན་ཞིང་རླུང་སེམས་ལ་ཟུང་དུ་འཇུག་པའི་རྣལ་འབྱོར་ལ༔ སྤྱི་བོ་ནས་ཁམས་དཀར་པོ་ཐུར་དུ་འབབ་ཚེ༔ རང་སྣང་ཟླ་འོད་ལྟ་བུར་འཆར༔ དེ་ལ་སྣང་བ་ཟེར༔ ཞེ་སྡང་ལས་གྱུར་པའི་རྟོག་པ་ཐམས་ཅད་འགག༔ དེ་ནས་ལྟེ་བའི་བྱང་སེམས་དམར་པོ་གྱེན་དུ་རྒྱུག་པའི་ཚེ༔ རང་སྣང་ཉི་འོད་ལྟ་བུར་འཆར༔ དེ་ལ་མཆེད་པ་ཟེར༔ འདོད་ཆགས་ལས་གྱུར་པའི་རྟོག་པ་ཐམས་ཅད་འགག༔ ཁམས་དཀར་དམར་སྙིང་ནང་དུ་འདྲེས་པའི་ཚེ༔ རང་སྣང་མུན་པ་ལྟ་བུར་འཆར༔ དེ་ལ་ཉེར་ཐོབ་ཟེར༔ གཏི་མུག་ལས་གྱུར་པའི་རྟོག་པ་ཐམས་ཅད་འགག༔ འཆི་བ་འོད་གསལ་གྱི་སྐུ་མངོན་དུ་འཆར་ནས་སངས་རྒྱས་སོ༔ ལས་ཀྱི་ཕྱག་རྒྱ་དང་སྲོག་རྩོལ་གྱི་རླུང་ལ་མ་བརྟེན་ན༔ ཚེ་འདིར་འཆི་དུས་ཀྱི་འོད་གསལ་དང་མཚུངས་པ་མི་འབྱུང་ཞིང༔ འཆི་བའི་ཚེ་ཡང་སྣང་མཆེད་ཐོབ་གསུམ་ཤར་བས་དུག་གསུམ་གྱི་རྟོག་པ་བསླང་ཞིང་བརྒྱལ་ཏེ༔ ཆོས་ཉིད་བར་དོ་དང་སྲིད་པ་བར་དོ་སོགས་ཀྱི་འཇིགས་སྐྲག་རྣམས་རིམ་གྱིས་འཆར་རོ༔ གཉིས་པ་རྩལ་སྦྱོང་བ་ནི༔ ཉིན་གྱི་སྣང་བ་ཐམས་ཅད་བར་དོའི་སྣང་བ་རུ་བསམ་ཞིང་ངག་ཏུ་ཡང་བརྗོད༔ བླ་མ་ཡི་དམ་མཁའ་འགྲོ་གསུམ་ལ་གསོལ་བ་དྲག་ཏུ་གདབ༔ བདག་གིས་འཆི་བ་འོད་གསལ་ཆོས་སྐུ་དང་བསྲེ་ནུས་པར་བྱིན་གྱིས་བརླབ་ཏུ་གསོལ༔ བར་དོ་ལོངས་སྐུ་དང་བསྲེ་ནུས་པར་བྱིན་གྱིས་བརླབ་ཏུ་གསོལ༔ སྐྱེ་བ་སྤྲུལ་སྐུ་དང་བསྲེ་ནུས་པར་བྱིན་གྱིས་བརླབ་ཏུ་གསོལ༔ སྙམ་པའི་ངང་ནས༔ འཆི་ཁ་བར་དོའི་སྡུག་བསྔལ༔ ས་ཆུ་མེ་རླུང་མཁའ་རྣམས་ཀྱི་ནུས་པ་གཅིག་ལ་གཅིག་ཐིམ་པའི་རྟགས་སུ༔ དུ་བ༔ སྨིག་སྒྱུ༔ མེ་ཁྱེར༔ མར་མེ༔ མཁའ་སྣང༔ སྣང་མཆེད་ཐོབ་གསུམ་འོད་གསལ༔ ཆོས་ཉིད་བར་དོ་དང་སྲིད་པ་བར་དོ་སོགས་སེམས་ཅན་ཐ་མལ་ཇི་བཞིན་འཆར་བར་བསམས་ལ༔ ག་རེ༔ ང་འཆི་བ་ཡིན་པར་འདུག༔ འཆི་ནས་བར་དོ་ཤར་བར་འདུག་པས༔ བར་དོ་ལ་བར་དོར་ཤེས་པར་བྱ༔ ཤེས་ནས་སངས་རྒྱས་པར་བྱ་སྙམ་ལ༔ ཉིན་སྣང་གི་དགེ་སྦྱོར་དང༔ མཚན་སྣང་གི་རྨི་ལམ་ཐམས་ཅད་བར་དོའི་ཉམས་ལེན་དུ་རྩལ་སྦྱང༔ རྨི་ལམ་དང་བར་དོ་འདྲེས་ན་སང་བར་དོ་ལ་གྲོལ་ངེས༔ ད་ལྟ་གོམས་འདྲིས་མ་བྱས་པའི་གང་ཟག་ནི༔ བར་དོ་ལས་གྲོལ་བར་མི་སྲིད་པའི་ཕྱིར༔ ཉིན་མཚན་འདྲེས་པའི་དགེ་སྦྱོར་ལ་འབུང་དང༔ བར་དོ་ལ་མ་འདྲེས་ཀྱང་རང་འདྲེས་སུ་འགྱུར་བ་ལ་གདོན་མི་ཟའོ༔ གསུམ་པ་བར་དོ་སྦྱང་བའི་ཐོབ་ལུགས་ནི༔ གང་ཟག་དང་པོ་དེས་འཆི་བ་འོད་གསལ་གྱི་ངོ་བོ་ཤིན་ཏུ་ཕྲ་བའི་རླུང་སེམས་དེ་ལས་ཀུན་ཏུ་བཟང་པོ་ཆོས་ཀྱི་སྐུ་རུ་གྲུབ་སྟེ་སངས་རྒྱས་པ་ཡིན་ནོ༔ གང་ཟག་གཉིས་པ་དེས་འཆི་བ་འོད་གསལ་བདེ་སྟོང་གི་ཏིང་ངེ་འཛིན་གྱིས་ལོངས་སྤྱོད་རྫོགས་པའི་སྐུ་རུ་སངས་རྒྱས་སོ༔ གང་ཟག་གསུམ་པ་དེས་འཆི་བ་འོད་གསལ་བསྐྱེད་རིམ་ལྷ་ཡི་རྣལ་འབྱོར་གྱིས་ཅིར་ཡང་སྤྲུལ་པའི་སྐུ་རུ་གྲུབ་ནས་འགྲོ་དོན་མཐར་ཕྱིན་པར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་སྤྱན་དྲངས་པ་དགེ་ལེགས་འཕེལ་བར་ཤོག །ཤུ་བྷཾ།། །། ྈ རྩ་རླུང་མཁའ་འགྲོའི་གསང་མཛོད་ལས༔ འཕོ་བ་ཟབ་ལམ་རྣལ་འབྱོར་བཞུགས༔ ྈྈྈྈ རྡོ་རྗེ་ཕག་མོ་མཁའ་སྤྱོད་འཕོ་བར་བྱེད་ལ་ཕྱག་འཚལ་ལོ༔ འཕོ་བའི་གདམས་པ་ལ་གསུམ༔ སྦྱོང་བ༔ འཕོ་བ༔ ཕན་ཡོན་ནོ༔ དང་པོ་སྦྱོང་བ་བྱེད་པ་ནི༔ ལུས་གནད་ཆ་ལུགས་ལྔ་ལྡན་དུ་བྱ༔ རང་ལུས་རྡོ་རྗེ་ཕག་མོར་གསལ་བའི་སྤྱི་བོར་ཀུན་ཏུ་བཟང་པོ་མཐིང་སྔོན༔ རང་བྱུང་གི་སྐུ་ལ་རྒྱན་མེད་པ༔ སྐྱིལ་ཀྲུང་མཉམ་གཞག་ཅན་དུ་བསྒོམ༔ ལུས་ཀྱི་སྟོང་རའི་དབུས་སུ་དྷཱུ་ཏི་འོད་ཀྱི་སྦུ་གུ༔ སྤྱི་བོ་ནས་སྙིང་གའི་བར་དུ་ཟང་ཐལ་དུ་ཟུག་པར་བསམ༔ དེའི་ནང་དུ་སྙིང་གའི་ཐད་ཙམ་ལ༔ རིག་པའི་ངོ་བོ་དཀར་གསལ་སྲན་འབྲུ་སྦོས་པ་ཙམ་དུ་གྱུར༔ རླུང་འབྱིན་པའི་ཚེ༔ རིག་པའི་ངོ་བོ་དེ་མདའ་འཕང་བ་ལྟར་རྒྱངས་ཀྱིས་སོང༔ སྤྱི་བོར་ཀུན་བཟང་གི་སྐུ་ལ་ཐིམ༔ འཇུག་པའི་ཚེ༔ སྙིང་གར་ལྷན་གྱིས་བབ༔ གནས་པའི་ཚེ༔ འོད་དང་ལྡན་པ་ལ་སེམས་གཟུང༔ སྟེང་རླུང་དྲག་ཏུ་འབུད༔ འོག་རླུང་ཅི་ཐུབ་འཐེན༔ མིག་གྱེན་དུ་གཏད༔ རྒྱུ་ཞབས་རྒལ་པ་ལ་སྦྱར༔ དེ་ལྟར་ཉམས་སུ་བླངས་པས༔ སྤྱི་བོ་སྐྲངས་པ་དང༔ ཆུ་སེར་འཛག་པ༔ ཟ་ཕྲུག་འབྱུང་བ་སོགས་རྟགས་བྱུང་ནས༔ ཞག་རེར་མ་བརྗེད་ཙམ་གྱིས་ཆོག༔ གཉིས་པ་འཕོ་བ་ནི༔ ཉེ་བའི་འཆི་ལྟས༔ མིག་གི་སྦུབ་བཙིར་བས་འོད་མེད་པ་དང༔ རྣ་བ་བཙིར་བས་འུར་སྒྲ་མེད་པ་དང༔ ལྕེ་རྩེ་མིག་གིས་མི་མཐོང་ན༔ ངེས་པར་འཆི་བའི་རྟགས་ཡིན་པས་འཕོ་ཞིང༔ གློ་བུར་དུ་གསོད་པ་དང༔ གཡང་ལ་ལྷུང་བ་སོགས་བྱུང་ཡང་དྲན་པ་ཙམ་གྱིས་འཕོ་ནུས་སོ༔ འཆི་བའི་ཚེ༔ ནུས་ན་རབ་སྐྱིལ་ཀྲུང༔ འབྲིང་ཙོག་པུར༔ ཐ་མ་སངས་རྒྱས་གཟིམས་ཚུལ་བྱ༔ དམིགས་པ་གཞན་སྔར་དང་འདྲ་ལ༔ འཇུག་པའི་ཚེ་ཐུར་དུ་མི་དབབ་པར༔ སྙིང་གར་སེམས་ཀྱི་ངོ་བོ་གསར་པ་ཞིག་བསྒོམས་ལ་ཡང་ཡང་སྤར༔ མཐར་ཀུན་བཟང་སེམས་དང་དབྱེར་མེད་དུ་གྱུར་ནས༔ ཇེ་མཐོ་ཇེ་མཐོ་ནམ་མཁའ་དང་འདྲེས་པར་བསམ༔ དེས་ཀྱང་མགྱོགས་པར་འཕོ་མ་ནུས་ན༔ ཡང་ཡང་བསྐྱར་བས་ཐེ་ཚོམ་མེད་པར་འཕོའོ༔ སེམས་ཅན་གཞན་ལ་འཕོ་བ་བྱེད་ན༔ རླུང་འབྱིན་འཇུག་རང་གིས་བྱེད༔ དམིགས་པ་དེ་འཕོ་རྒྱུ་དེ་ལ་གཏད་པས་ངེས་པར་ཐེབས་སོ༔ འཕོ་བ་དེའི་ཕན་ཡོན་ནི༔ རབ་ཆོས་ཉིད་ཀྱི་དབྱིངས་སུ་སངས་རྒྱས༔ འབྲིང་དག་པའི་ཞིང་དུ་སྐྱེ༔ ཐ་མ་ཡང་ངན་སོང་གི་སྐྱེ་སྒོ་ཁེགས་ནས་མི་ལུས་འཐོབ་བོ༔ ས་མ་ཡ༔ རྒྱ་རྒྱ་རྒྱ༔ འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་ཐོན་པ་ཤུ་བྷཾ།། །། ྈ རྩ་རླུང་མཁའ་འགྲོའི་གསང་མཛོད་ལས༔ གསང་བའི་ཐུར་མའི་གདམས་པ་བཞུགས་སོ༔ བདེ་ཆེན་ཕག་མོར་ཕྱག་འཚལ་ནས༔ གསང་ཐུར་ལ་རྒྱབ་ཐུར་མདུན་ཐུར་གཉིས་ཡོད་པས༔ འདིར་ནི་རྒྱབ་ཐུར་བསྟན་པར་བྱ་སྟེ༔ ཐུར་མའི་རྒྱུ་དང༔ ཚད་དང༔ རབ་གནས༔ སྦྱོང་ཐབས༔ བཅུད་ལེན་དང་ལྔ༔ རྒྱུ་ནི་བྱ་རྒོད་ཀྱི་རྐང་ངམ༔ སྨྱུག་མ་ལས་བྱས་པ༔ ཚད་ནི་སྦོམ་ཕྲ་མཛུབ་མོ་ཙམ༔ སྦྱོང་ཐུར་ལ་སོར་བཞི༔ ལམ་ཐུར་ལ་མཐོ་གང༔ རབ་གནས་ནི་རྟེན་འབྲེལ་སྙིང་པོས་བྱ༔ སྦྱོང་ཐབས་ལ་ལྔ༔ རླུང་བཤལ༔ ཆུ་བཤལ༔ གྲང་བཤལ༔ ཚ་བཤལ༔ དུག་བཤལ་ལོ༔ དང་པོ་རླུང་བཤལ་ནི༔ སྦྱང་ཐུར་ལ་མར་གྱིས་བྱུགས་ནས་སྲིན་ཞལ་དུ་གཞུག༔ ལུས་གནད་གླིང་བཞི་མཐའ་སྡུད་བྱ༔ དམིགས་པ་རང་ཉིད་ཕག་མོར་གསལ་བའི་ནང་དུ༔ དྷཱུ་ཏི་འོད་ཀྱི་སྦུ་གུ་སྦ་ལྕག་ཙམ༔ སྤྱི་བོ་ནས་གསང་གནས་ཀྱི་བར་དུ་ཤད་དེ་ཟུག་པ༔ ཡར་མར་གྱི་སྣེ་བུ་ག་དྲང་ཤད་དེ་ཧ་རེ་ཡོད་པར་དམིགས༔ དེ་ནས་སྣོད་བཅུད་ཐམས་ཅད་འོད་ལྔར་ལྟེམ་གྱིས་ཞུ་ནས་གསང་བའི་སྦུབས་སུ་ཞུགས༔ སྤྱི་གཙུག་ནས་ཕྱུར་ཕྱུར་ཐོན་པར་བསམས་ལ༔ སྟེང་རླུང་དྲག་ཏུ་ཕུ༔ འོག་རླུང་ཐུབ་ཚད་འཐེན༔ རྒྱུ་ཞབས་རྒལ་པ་ལ་སྦྱར༔ ཉྭ་བཞི་བསྒྲིམ༔ མིག་གྱེན་དུ་བགྲད༔ ལྕེ་ཡ་རྐན་ལ་སྦྱར༔ མི་ཐུབ་པ་ནང་དུ་རྔུབ༔ སྣོད་བཅུད་ཐམས་ཅད་འོད་ལྔར་ཞུ་སྟེ་སྤྱི་བོ་ནས་ཞུགས༔ གསང་གནས་ཀྱི་བུ་ག་ནས་ཕྱུ་རུ་རུ་ཐོན་པར་བསམས་ལ༔ མིག་ཐུར་དུ་བགྲད༔ ལུས་ཤེད་ཐམས་ཅད་ཐུར་དུ་ཕྱུང༔ འདི་དུས་འོག་རླུང་སྒྲ་བཅས་སུ་སོང་ཡང་སྐྱོན་མེད༔ དེ་ལྟར་ཐུན་བཞིར་ནན་ཏན་དུ་སྦྱངས་ནས༔ འོག་རླུང་འཐེན་དུས་སྣ་སྒོར་ཐུར་སེལ་གྱི་དྲི་བྲོ་ཞིང༔ སྟེང་རླུང་མནན་དུས་སྣ་ནས་སྤོས་དྲི་རྔུབ་པ་འོག་སྒོར་བྲོ་ནུས་ན༔ སྟེང་འོག་གི་རླུང་འདྲེས་པ་ཡིན་ནོ༔ ཕན་ཡོན་ནི༔ ཐུར་སེལ་རླུང་ནི་རྟ་རྔ་ཙམ༔ ལན་གཅིག་འདྲོངས་པར་གྱུར་པ་ཡིས༔ ངན་འགྲོ་ཐམས་ཅད་རབ་བཅོམ་ནས༔ བར་དོའི་གྲོང་ཁྱེར་དེས་མི་མཐོང༔ ཞེས་སོ༔ གཉིས་པ་ཆུ་བཤལ་ནི༔ རྡུལ་མེད་པའི་ཆུ་གཙང་མ་ཤ་དྲོད་ཙམ་བསྲོ་ལ༔ སྣུམ་ཐུར་མགོ་གསུམ་ཙམ་ཀབ་ལི་བཀང༔ ལམ་ཐུར་མར་གྱིས་བྱུག་པ་སོར་བཞི་སྲིན་ལམ་དུ་བཅུག༔ མཚམས་སུ་དར་གྱིས་བཅིང༔ ལུས་ཐུར་དུ་རྒུར་ནས་པུས་མོ་དང་གྲུ་མོ་ས་ལ་བཙུགས༔ ལམ་ཐུར་མར་སྣེ་ཀབ་ལིའི་ནང་དུ་འཕྲོད་པར་བྱ༔ དེ་ནས་ཆུ་དེ་ཡེ་ཤེས་ཀྱི་བདུད་རྩི་བསིལ་བའི་རང་བཞིན་དུ་བསམས་ལ་བཏང༔ གོང་ལྟར་འོག་རླུང་དྲག་ཏུ་འཐེན་ལ་རྔུབ༔ ཕོ་སྐོར་ཕོ་རླབས་བྱ་ལ་ཕྱིར་འདོན་པ་ཡང་ཡང་བྱ༔ གསུམ་པ་གྲང་བཤལ་ནི༔ ཆང་སྐྱུར་རྙིང་པ་མ་ཡལ་བ་ལ༔ ཨ་བར་སྐྱུར་གསུམ༔ རྒྱ་ཚྭ༔ གཡེར་མ༔ ལྕིམ་ཚ༔ རྒྱ་ལྕམ་འབྲས་བུ༔ དུར་བྱིད༔ ཐར་ནུ༔ ཆུ་རྩ༔ བྱང་ཁྲ་རྣམས་ཞིབ་པར་བཏུལ་ལ༔ གོང་ལྟར་ཕོ་སྐོར་ཕོ་རླབས་བྱ་ལ་ཕྱིར་བཏོན༔ བཞི་པ་ཚ་བཤལ་ནི༔ གར་ཆང་རྙིང་པར༔ མར་རྙིང་གི་ཁུ་བ༔ རྒྱ་ཚྭ༔ རྒྱམ་ཚྭ༔ ཁ་རུ་ཚྭ༔ ཤིང་ཚྭ༔ ལྒ་སྐྱ༔ པི་པི་ལིང༔ ཕོ་བ་རིལ༔ སེ་འབྲུ༔ སུག་སྨེ༔ ཤིང་ཀུན་རྣམས་སྦྱར་བའི་སྨན་ཐུན་གསུམ་ཙམ་བཏང་ལ༔ དམིགས་པ་ནི་ཡེ་ཤེས་ཀྱི་བདུད་རྩི་ཚ་ཞིང་རྩུབ་པའི་རང་བཞིན་ཅན་དུ་བསམས་ལ་བཏང༔ ཕོ་སྐོར་སོགས་གོང་དང་འདྲ༔ ལྔ་པ་དུག་བཤལ་ནི༔ བཙན་དུག༔ ཐར་ནུ༔ དུར་བྱིད༔ ཤིང་ཀུན་རྣམས་ཞིབ་པར་བཏུལ་ལ༔ དང་པོ་སྨན་ཐུན་ཙམ་ཆུ་ལ་སྦྱར་ལ་བཏང༔ ཕོ་སྐོར་དང་ཕོ་རླབས་བྱ་ཞིང་ལྷག་མ་ལུས་པ་ཕྱིར་འཕོ༔ དེ་ལ་གོམས་ནས་ཐུན་གཉིས་དང་གསུམ་སོགས་དགུའི་བར་དུ་སྤེལ་ཤེས་པར་བྱ༔ ལྔ་པ་བཅུད་ལེན་ནི༔ དུག་རིགས་སྤང་བའི་ཤ་དང་རུས་པ་རྐང་ཚིལ་བཟང་པོ་གང་རྙེད་བསྡུས་པའི་ཁུ་བར༔ དྭངས་མ་ལྔ་སྦྱོར་བཏབ་པ་བྲེ་དོ་ཙམ་མམ༔ རླུང་ནུས་ཀྱིས་གང་དྲངས་ཙམ་བཏང་ལ་ཕྱིར་མི་འཕོ་བ་རང་སར་བཞག་པས༔ འོག་སྒོ་རུབ་ཅིང་ལུས་ཟུངས་རྒྱས་ཏེ་ལོ་ཟླ་ཙམ་ལ་འཚོ་བ་མི་དགོས་པར་འབྱུང་སྟེ༔ རི་ཁྲོད་འགྲིམ་པའི་གདམས་པ་ཁྱད་པར་ཅན་ནོ༔ ས་མ་ཡ༔ རྒྱ་རྒྱ་རྒྱ༔ གསང་བདག་འཇའ་ཚོན་སྙིང་པོས་གནས་ཆེན་རྡོ་རྗེ་ཡོངས་རྫོང་ནས་རྙེད་པ་དགེའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ རྡོ་རྗེ་ཆུ་འཐུང་གི་སྦྱོར་བའོ༔ ྈྈྈྈ མཁའ་འགྲོ་རྡོ་རྗེ་ཕག་མོ་ལ་ཕྱག་འཚལ་སྐྱབས་སུ་མཆིའོ༔ རྡོ་རྗེ་ཆུ་འཐུང་གི་གདམས་པ་ལ་བཞི༔ དང་པོ་སྦྱོང་བ༔ བར་དུ་ཚད་པ༔ ཐ་མ་ལས་ལ་སྦྱར་བ༔ མ་གྲུབ་ན་སྤོགས་པའོ༔ དང་པོ་སྦྱོང་བ་ནི༔ རྒྱབ་ཐུར་གྱི་ལག་ལེན་ལ་དབང་འབྱོར་བ་བྱེད་པའོ༔ བར་དུ་ཚད་པ་ནི༔ ལུས་གནད་རླུང་སྦྱོར་དམིགས་པ་རྣམས་ནི་རྒྱབ་ཐུར་སྦྱང་ལུགས་དང་འདྲ་ལ༔ དང་པོ་རྡོ་རྗེ་ལ་མར་དཀར་གྱིས་བྱུག་ནས་ཉི་མ་ལ་བསྲོ་ཞིང་མཉེ་སྟེ༔ ལས་སུ་རུང་བ་དང་འོག་ཏུ་མི་གཞིལ་སྟེང་དུ་རྒྱ་མཚོའི་འགྲམ་ལ་སྦྱར་ཏེ་བཞག༔ ཡང་གཟིམས་པ་དང་སྔར་ལྟར་མཉེ་བ་མང་ཙམ་བྱ༔ དེ་ནས་ལྕམ་པའི་མྱུ་གུ་མཐོ་གང་ཙམ་ཤུན་པ་རྩུབ་མོ་དེ་བཤུས༔ དེ་རྡོ་རྗེའི་སྦུབས་སུ་སོར་བཞི་ཙམ་བཅུག་སྟེ༔ རླུང་འཐེན་པའི་ཚེ་ནང་དུ་ནུབ་པ་དང༔ མནན་པའི་ཚེ་ཕྱིར་རྒྱང་གིས་ཐོན་ན་འབྱོངས་པ་ཡིན༔ ན་ཚ་ཅུང་ཟད་བྱུང་ཡང་སྐྱོན་མེད་པས་བསྲན༔ སྐབས་སུ་མཉེ་བ་གོང་ལྟར་བྱ༔ ཆུ་འགག་ན་རྒྱ་ཚྭ་བཏང་ཞིང་ཡོས་ཚན་གྱིས་བསྲོ༔ དེ་ནས་མདུན་ཐུར༔ རབ་ཟངས་ལྕགས༔ འབྲིང་སྨྱུག་མ༔ ཐ་མ་ཤིང་སྦུ་གུ་ཅན༔ རིང་ཐུང་རང་མཐོ་གང༔ སྦོམ་ཕྲ་གྲོ་སོག་ཙམ༔ ཤིན་ཏུ་འཇམ་ལ་དྲང་བར་བྱས་ཏེ༔ རྡོ་རྗེ་ལ་མི་གནོད་པའི་ཐབས་ཀྱིས་རྩ་བའི་བར་དུ་རིམ་གྱིས་ཕུལ་ནས་སྟེང་རླུང་མནན་པས༔ གསང་སྒོར་སྤུ་འགུལ་ནུས་ན་འབྱོངས་པ་ཡིན་ནོ༔ ཐ་མ་ལས་ལ་སྦྱར་བ་ནི༔ ངང་པའི་སྒོ་ངའམ༔ སྒང་ཕུག་ལྟ་བུའི་ནང་དུ༔ ཆུ་དང་འོ་མ་བསྲེས་པ་ཤ་དྲོད་ཙམ་དུ་ཀ་ར་ཅུང་ཟད་བཏབ་པ་དྲང༔ དེ་ནས་འོ་མ་གཅིག་པུ་ལ་བཟང་དྲུག་དང་པད་རག་བཏབ་ནས་དྲངས་པས༔ འོ་མ་སྣ་བུག་ཏུ་དཀར་རྒྱང་ངེར་དྲངས་པ་དང༔ མནན་པའི་དུས་གང་དྲངས་པ་དེ་ཕྱིར་འབྱིན་ནུས་ན༔ སྟེང་འོག་གི་རླུང་ལ་རང་དབང་ཐོབ་པའི་རྟགས་ཡིན༔ ཆུ་དང་འོ་མ་གང་དྲངས་པ་དེ་ནང་དུ་མི་བཞག་པར་ཕྱིར་བཏོན༔ འདིའི་དུས་མཚན་ལྡན་གྱི་དམར་ཆ་ལེན་པར་ནུས་ཏེ༔ བརྩོན་འགྲུས་དང་ལྡན་ན་ཡུན་རིང་པོར་མི་ཐོགས་པར༔ རྟགས་མངོན་སུམ་དུ་འཆར་བའི་གདམས་པའོ༔ མ་གྲུབ་ན་སྤོགས་པ་ནི་ཞལ་གདམས་སུ་ཤེས་པར་བྱའོ༔ ས་མ་ཡ༔ རྒྱ་རྒྱ་རྒྱ༔ འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་རྙེད་པ་ཤིན་ཏུ་ཟབ་བོ། །བཀྲ་ཤིས་སོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ ཕོ་ཁྲིད་ཉི་མའི་བཅུད་སྡུད་བཞུགས༔ ྈྈྈྈྈ བདེ་ཆེན་མཆོག་ལ་སྐྱེལ་བའི་མ༔ བདེ་ཆེན་རྡོ་རྗེ་ཕག་མོ་ལ༔ བདེ་ཆེན་དགའ་བཞི་རྒྱས་པའི་ཕྱིར༔ བདེ་ཆེན་ངང་དུ་ཕྱག་འཚལ་ལོ༔ གསང་སྔགས་རྡོ་རྗེ་ཐེག་པ་ཡི༔ ཉམས་ལེན་རྡོ་རྗེ་གསང་མཛོད་འདིས༔ རྡོ་རྗེ་རྒྱས་པའི་རྟེན་འབྲེལ་ཕྱིར༔ རྡོ་རྗེའི་སྐུ་རུ་འགྲུབ་པར་བྱེད༔ ས་མ་ཡ༔ རྒྱ་རྒྱ་རྒྱ༔ འདིར་གསང་བ་ལས་ཀྱང་ཆེས་གསང་བའི་གདམས་པ་ཟབ་མོ་རྩ་རླུང་མཁའ་འགྲོའི་གསང་མཛོད་ལས༔ གསང་བ་ལས་ཀྱི་ཕྱག་རྒྱ་ལ་བསྟེན་ནས་དྭངས་མ་ཡེ་ཤེས་སུ་སྒྲུབ་པ༔ ཕོ་ཁྲིད་ཉི་མའི་བཅུད་སྡུད་བསྟན་པ་ལ་གསུམ༔ ཕྱག་རྒྱའི་བརྟག་ཐབས༔ ཅི་ལྟར་བསྟེན་ཚུལ༔ བསྟེན་པ་ལ་ཕན་ཡོན་འབྱུང་ལུགས་སོ༔ དང་པོ་བརྟག་ཐབས་ལ༔ མཚན་ལྡན་གྱི་གཟུངས་མ་དེ་ཡང་ལོ་བཅུ་གཉིས་ནས་ཉེར་ལྔ་མན་ཆད༔ ཕྱི་ནང་གསང་བའི་མཚན་རྟགས་ཚང་བ་སྟེ༔ ཕྱི་ལུས་ཀྱི་རྟགས་ནི༔ མཛེས་ཤིང་ཡིད་དུ་འོང་བས་བདེ་བ་ཁྱད་ཅན་སྐྱེ་བའི་དགོས་པ་ཡོད༔ དྲི་ཞིམ་པས་བདེ་བས་མི་སུན་པའི་དགོས་པ་ཡོད༔ སྐད་སྙན་པས་བདེ་བ་ལ་ཡིད་འཇུག་པའི་དགོས་པ་ཡོད༔ རྐེད་པ་ཕྲ་བས་བདེ་བ་རྒྱུན་མི་འཆད་པའི་དགོས་པ་ཡོད༔ སྨད་ཞེང་རྒྱས་ཤིང་བྷ་ག་རུབ་པས་བདེ་བ་བཙལ་སླ་བའི་དགོས་པ་ཡོད༔ ཆགས་པ་ཆེ་བས་བདེ་བ་དབང་མེད་དུ་སྐྱེ་བའི་དགོས་པ་ཡོད་དོ༔ ནང་རྟགས་ནི༔ གསང་ཐུབ་པས་གསང་སྤྱོད་གཞན་ལ་མི་སྨྲ་བའི་དགོས་པ་ཡོད༔ བདེ་བའི་སྐད་འབྱིན་པས་བདེ་བ་ཁ་གསོ་བའི་དགོས་པ་ཡོད༔ བྷ་གའི་ནང་ན་རྩ་རིང་བས་བདེ་བས་མི་བཟོད་ཅིང་དྭངས་མ་འདྲོངས་སླ་བའི་དགོས་པ་ཡོད་དོ༔ གསང་བའི་རྟགས་ནི༔ དད་པ་ཆེ་ཞིང་ཆོས་ལ་མོས་པས་འཇིག་རྟེན་དབང་དུ་མི་འགྲོ་བའི་དགོས་པ་ཡོད༔ ཤེས་རབ་ཆེ་བས་རྣལ་འབྱོར་གྱི་བརྡ་དང་གསུང་སྒྲོས་གོ་ཞིང་གལ་ཚིག་ཡིད་ལ་ཟིན་པའི་དགོས་པ་ཡོད་དོ༔ དམ་ཚིག་ཐུབ་པས་དངོས་གྲུབ་མྱུར་བའི་དགོས་པ་ཡོད་དོ༔ བློ་ཁོག་ཡངས་པས་གསང་སྔགས་ལ་མོས་པའི་དགོས་པ་ཡོད་དོ༔ དེ་ལྟ་བུའི་རིག་མ་མཚན་རྟགས་སུམ་ཆ་ཙམ་ཚང་ན༔ ཕྱི་ལྟར་འབངས་མོའི་ཚུལ་དུ་བསྟེན༔ མཚན་རྟགས་ཕྱེད་ཆ་ཙམ་ཚང་ན༔ ནང་ལྟར་ཆུང་མའི་ཚུལ་དུ་བསྟེན༔ མཚན་རྟགས་ཐམས་ཅད་ཚང་ན༔ གསང་བ་ལྟར་རྗེ་མོའི་ཚུལ་དུ་བསྟེན་དགོས་ཏེ༔ མཚན་རྟགས་མ་རྫོགས་པའི་ཕྱག་རྒྱ་མ་ནི༔ དཔེར་ན༔ གཡུ་དང་བྱེ་རུ་མཆོང་རྣམས་ལ་བསྐུར་སྟི་བྱི་དོར་ཅི་བྱས་ཀྱང༔ སོ་སོའི་ཚོད་དང་སྦྱར་བའི་རྒྱན་གྱི་རྣམ་པ་ཙམ་ལས༔ དགོས་འདོད་ཐམས་ཅད་འབྱུང་བར་མི་ནུས་པ་དང་འདྲ་ལ༔ མཚན་རྟགས་ཐམས་ཅད་རྫོགས་པའི་རིག་མ་དེ་ནི༔ དཔེར་ན༔ བསམ་འཕེལ་གྱི་ནོར་བུ་དང་འདྲ་སྟེ༔ བཀུར་སྟི་ཕུ་དུད་ཇི་ལྟར་བྱས་པ་བཞིན་འདོད་དོན་ཐམས་ཅད་ལྷུན་གྲུབ་ཏུ་འབྱུང་བས༔ དེ་ལ་བཀུར་སྟི་མ་བྱས་ན་བསམ་པ་ཐམས་ཅད་མི་འགྲུབ་པའི་སྟེང་དུ་བར་ཆད་ཀྱི་རྒྱུ་རུ་འགྲོ་བའི་ཕྱིར༔ ཡིད་བཞིན་གྱི་ནོར་བུ་ལས་ཀྱང་གཅེས་པར་གཟུང་ངོ༔ གོང་དུ་བཤད་པའི་མཚན་རྟགས་དེ་རྣམས་ལས་བཟློག་པའི་བུད་མེད་ནི༔ དངོས་གྲུབ་ཐོབ་པ་ཅི་སྨོས༔ གྱོད་འཁྲུག་གི་གཞི་མ༔ རྣལ་འབྱོར་གྱི་སྲོག་གཅོད༔ ངན་སོང་གི་གཏིང་ཕུལ་ཡིན་པས་ཉེ་བ་ཙམ་དུ་མི་བྱའོ༔ གཉིས་པ་ཇི་ལྟར་བསྟེན་པའི་ཚུལ་ནི༔ རྡོ་རྗེ་ཆུ་འཐུང་དང་ལག་པའི་འདུ་བྱེད་སྔོན་དུ་སོང་བའི་རྣལ་འབྱོར་གྱིས༔ མཁའ་མཉམ་སེམས་ཅན་ཐམས་ཅད་སངས་རྒྱས་པའི་ཆེད་དུ་ཡིན་སྙམ་པའི་ངང་ནས༔ ཐབས་ཤེས་ཀྱི་ཕུང་ཁམས་རྟ་ཕག་ཡབ་ཡུམ༔ སྤྱི་བོར་ཚེ་དཔག་མེད་ཡབ་ཡུམ་དཀར་དམར་སྙོམས་འཇུག་མཛད་པར་བསྒོམས་ལ༔ ཡུམ་གྱི་དབུས་རྩ་རྙེད་པའི་རྟེན་འབྲེལ་བྱ་སྟེ༔ རུས་སྦས་ཀྱི་ནུར་འགྲོས་ལྟར་དལ་བུས་སྐྱོད༔ བདེ་བ་ཆེ་ན་སྐྱོད་འཕྲོ་བཤོལ་ཏེ་ངོ་ཐོག་ཏུ་འཇོག༔ བདེ་བ་ཅུང་ཟད་ཡལ་བ་དང་སྲུབ་ལ༔ དགའ་བཞིའི་ཡེ་ཤེས་ངོས་གཟུང༔ གོམས་ཤས་ཆུང་བ་རྣམས་ཀྱི་དགའ་བ་གསུམ་པ་ཙམ་ལས་མི་དབབ་པར་འདྲེན་འགྲེམ་གྱི་འཕྲུལ་འཁོར་བྱ༔ དེ་ཡང་དབབ་མ་ཐག་ཏུ་འཛིན༔ གཟུང་མ་ཐག་ཏུ་འདྲེན༔ དྲངས་མ་ཐག་ཏུ་དགྲམ་མོ༔ ཅུང་ཟད་གོམས་ནས་བདེ་བ་རྩལ་རྫོགས་པའི་ཚེ༔ འཛིན་འདྲེན་འགྲེམ་པ་རྣམས་བྱ༔ གོམས་སྟོབས་ཆེར་སོང་ནས་ཐིག་ལེ་པདྨར་དབབ༔ ཡུམ་གྱི་དྭངས་མ་དང་མཉམ་དུ་འདྲེན་ནུས་ཏེ༔ རང་གི་དཀར་ཆ་ནི་བདེ་བ་རྒྱས་པའི་ཚེ༔ ངོ་ཐོག་ཏུ་ལྷོད་ནས་བཞག་པས་འཛིན་འདྲེན་དགྲམ་པར་འགྲུབ་བོ༔ དམར་ཆ་འདྲེན་ན༔ ཟླ་མཚན་ཟླ་དུས་སུ་འབབ་ཚེ༔ དྲི་མི་ཞིམ་པ་མནམ་པ་དང༔ ཁ་དོག་སེར་ནག་དཀར་བ་ནི་འདྲེན་དུ་མི་རུང༔ ཚོས་ཁུའམ་མཚལ་ཁུ་ལྟ་བུར་འབབ་དུས་སུ་དྲང༔ འདྲེན་དུས་རྩ་ཁ་འབྱེད་སྡོམ་གྱི་རྫས་བརྟེན་ནས་རྡོ་རྗེ་ཆུ་འཐུང་གི་སྐབས་ལྟར་ཧཱུྃ་གི་སྒྲ་དང་བཅས་པས་དྲང༔ འདྲོངས་རྟགས་རྡོ་རྗེ་མགོ་འཁྱོག་པ་དང༔ ལུས་ཚ་ཆིལ་གྱིས་འབྱུང་བ༔ ཡུམ་གྱིས་མི་བཟོད་པའི་རྣམ་འགྱུར་སྟོན་ན་འདྲོངས་པ་ཡིན་པས༔ འགྲེམ་པའི་འཕྲུལ་འཁོར་ལ་འབད༔ འདྲེན་དཀའ་ན་གསང་བའི་སྦུ་གུ་གཅུག་ལ་དྲང༔ དེས་ཀྱང་མ་དྲངས་ན་ཞལ་གྱི་གདམས་པ་ལས་ཤེས་དགོས་སོ༔ གསུམ་པ་དེ་ལྟར་བསྟེན་པ་ལ་ཡོན་ཏན་འབྱུང་ལུགས་ནི༔ ཡུམ་གྱི་དྭངས་མ་གྱེན་དུ་བཟློག་པའི་སྦྱོར་བ་བྱས་པས༔ ལྟེ་བར་སླེབ་པ་ན་རྒྱུ་མཐུན་གྱི་ཚུལ་གྱི་དགའ་བ༔ སྙིང་གར་སླེབ་པ་ན་རྣམ་སྨིན་གྱི་ཚུལ་གྱི་མཆོག་དགའ༔ མགྲིན་པར་སླེབ་པ་ན་སྐྱེས་བུ་བྱེད་པའི་ཚུལ་གྱི་ཁྱད་དགའ༔ སྤྱི་བོར་སླེབ་པ་ན་དྲི་མ་དང་བྲལ་བའི་ཚུལ་གྱི་ལྷན་སྐྱེས་ཀྱི་དགའ་བ་སྐྱེས་པའི་ཚེ་གནས་ལུགས་ཀྱི་རྟོགས་པ་ཤར༔ ཡེ་ཤེས་ཀྱི་མཁྱེན་པ་རྒྱས༔ གནས་སྐབས་སུ་ལུས་བཀྲག་མདངས་ཆེ༔ ནོར་དང་ལོངས་སྤྱོད་འདུ༔ གདུལ་བྱ་ཕྲིན་ལས་འགྲུབ༔ ས་འོག་གི་གཏེར་ལ་སྤྱོད༔ སྐྲ་དཀར་དང་གཉེར་མ་མི་འབྱུང༔ ཚེའི་དངོས་གྲུབ་ཐོབ་པ་ཡིན་ནོ༔ མཐར་ཐུག་གི་འབྲས་བུ་ནི༔ ལུས་ཀྱི་རྩ་མདུད་གྲོལ་ཞིང་འཇའ་ལུས་འོད་སྐུར་གྲུབ་ནས་སྤྲུལ་སྐུས་འགྲོ་བ་འདྲེན༔ ངག་གི་ནུས་པ་འབར་ཞིང་གདོས་བཅས་སྣང་བ་དག་ནས་ལོངས་སྤྱོད་རྫོགས་སྐུར་གྲོལ༔ སེམས་ཀྱི་གཟུང་འཛིན་ཞིག་ནས་ལྷན་སྐྱེས་ཡེ་ཤེས་འཆར་ཏེ་གདོད་མའི་མགོན་པོ་ཐོབ༔ དེ་གསུམ་དབྱེར་མི་ཕྱེད་པ་ལྷུན་གྲུབ་བདེ་བ་ཆེན་པོ་ངོ་བོ་ཉིད་ཀྱི་སྐུ་རུ་འཚང་རྒྱ་སྟེ༔ མཁའ་སྤྱོད་ཀྱི་གནས་སུ་ཚེ་འདི་ཉིད་ལ་འགྲོ་བར་གདོན་མི་ཟའོ༔ མདོར་ན་མས་བརྟན་གྱི་དགའ་བ་བཞི་ནི༔ འཇིག་རྟེན་ལས་འདས་པའི་ལམ་ཡིན་ཏེ་བརྩོན་འགྲུས་དང་ལྡན་པར་བྱའོ༔ གཉེན་པོ་དང་བརྩོན་འགྲུས་མེད་པའི་རྣལ་འབྱོར་གྱིས༔ གསང་སྔགས་རྡོ་རྗེ་ཐེག་པའི་མིག་ལྟོས་ལ་འགྲན་ཏེ༔ བུད་མེད་བྱོལ་ཉོག་ཏུ་སྤྱོད་པས་སོ་ཐར་སྡོམ་པ་ཉམས༔ འདོད་ཆགས་རང་རྒྱུད་པར་སྤྱད་པས་བྱང་སེམས་ཀྱི་སྡོམ་པ་ཉམས༔ ལྷ་ཐམས་ཅད་ཀྱི་སྲོག་སྙིང་དྭངས་མ་ཉམས་པས་གསང་སྔགས་ཀྱི་སྡོམ་པ་ཉམས༔ དེའི་ཕྱིར་དྭངས་མ་ཉམས་ན་ཡི་དམ་ལྷ་སྒྲུབ་ཀྱང་ནུས་པ་མི་ཐོན༔ མཁའ་འགྲོ་རྣམས་ཀྱི་སྲོག་རྩ་བཅད་པས་ཕྲིན་ལས་མི་འགྲུབ༔ བཀའ་ཡི་སྲུང་མ་རྣམས་གྲིབ་ཀྱིས་ཕོག་སྟེ་ལས་མི་བྱེད་དོ༔ དེའི་ཕྱིར་གསང་སྔགས་རྡོ་རྗེ་ཐེག་པའི་ལམ་ལ་ཞུགས་པ་རྣམས་ཀྱིས༔ ཀུན་ད་བྱང་ཆུབ་ཀྱི་སེམས་འདི་མིག་གི་འབྲས་བུ་ལྟར་གཅེས་པར་མཛོད་ཅིག༔ ཡས་བབ་མས་བརྟན་དགའ་བཞི་ཡེ་ཤེས་ལམ༔ བྷ་གའི་དབྱིངས་ནས་མངོན་སངས་རྒྱས་བྱེད་འདི༔ གུ་རུའི་གསུང་བཞིན་ཁོ་མོས་ཡི་གེར་བཏབ༔ ལོ་ཙཱ་ཁྱོད་ཀྱིས་ཟབ་མོའི་གཏེར་དུ་ཞོག༔ རྡོ་རྗེ་རྣལ་འབྱོར་བྱ་ར་མ་གཡེལ་བར༔ སྐལ་མེད་བདུད་རིགས་ལག་ཏུ་ཤོར་ར་རེ༔ སྐལ་ལྡན་ལས་འཕྲོ་ཅན་ལ་འཕྲོད་པའི་རྒྱ༔ དེས་ཀྱང་བསྟན་པའི་རྒྱལ་མཚན་ཚུགས་པར་ཤོག༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་རྡོ་རྗེ་ཡོངས་རྫོང་རྡོ་རྗེ་ཕག་མོའི་བྷ་ག་ནས་རྙེད་པ་དགེ་ལེགས་སུ་གྱུར་ཅིག། །། ྈ རྩ་རླུང་མཁའ་འགྲོའི་གསང་མཛོད་ལས༔ པདྨ་རླུང་འབྱིན་གྱི་གདམས་པ་བཞུགས་སོ༔ ྈྈྈ རྡོ་རྗེ་ཕག་མོ་ལ་ཕྱག་འཚལ་ལོ༔ པདྨ་རླུང་འབྱིན་གྱི་གདམས་པ་ལ་བཞི༔ པདྨ་རླུང་འབོད༔ པདྨ་ཁ་སྡོམ༔ པདྨ་ཐེར་འབུད༔ པདྨ་སྐད་འདོན་ནོ༔ དང་པོ་པདྨ་རླུང་འབོད་ལ་གཉིས༔ འབོད་ཆུང་དང་འབོད་ཆེན༔ རྒྱབ་ཐུར་གྱི་རིམ་པ་ཚར་ནས༔ ལུས་ཙོག་པུ་པུས་འཁྱུད་ཀྱིས་མགོ་བོ་སྒུར་ལ༔ སྟེང་རླུང་དྲག་ཏུ་ཕུ་ཞིང་འོག་རླུང་ཅི་ནུས་འཐེན་ལ་བགྲད་འབེབ་བྱ༔ འབོད་ཆེན་ནི༔ རྐང་མཐིལ་སྤྲད་ལ་བྷ་གའི་མདུན་དུ་བཞག༔ ལག་གཉིས་བསྣོལ་ཏེ་རྐང་མགོ་གཉིས་ལ་བསྡམ༔ འོག་རླུང་ཅི་ཐུབ་འཐེན་ལ་ཕོ་སྐོར་ཡང་ཡང་བྱ༔ སྟེང་རླུང་ཅི་ཐུབ་འཐེན་ལ་དྲག་འབེབ་ཅི་ནུས་རྒྱབ༔ དེ་རྗེས་ལུས་སྤྲུགས་ལ་མཉམ་པར་གཞག༔ གཉིས་པ་པདྨ་ཁ་སྡོམ་ནི༔ རྒྱུན་དུ་གསང་བའི་སྐྱིལ་ཀྲུང་བྱ་ལ་ཁུ་ཚུར་བརླ་སྟེང་བསྒྲེང༔ སྟེང་རླུང་མནན་ཞིང་འོག་རླུང་འཐེན་ཏེ༔ རྫས་སྦྱོར་ལ་བརྟེན༔ གསུམ་པ་པདྨ་ཐེར་འབུད་ནི༔ འོག་སྒོ་ཀློད་ལ་སྟེང་འོག་གི་རླུང་ཐུར་དུ་ཕུལ་ནས༔ བ་རུ་ཤའི་གནོད་པ་བྱུང་ཡང་གླག་མི་རྙེད་དེ༔ ནང་དུ་ཆུད་ཀྱང་ཕྱིར་འབུད་ནུས་སོ༔ བཞི་པ་པདྨ་སྐད་འདོན་ནི༔ མདུན་ཐུར་བྱ་རྒོད་རྐང་ངམ༔ མི་ཡི་རྐང་དུང་མཐོ་གང་སོར་བཞི་ཡོད་པ་ལ་མར་གྱིས་བྱུག་ནས་པདྨར་གཞུག༔ པད་སྐྱིལ་ཀློད་ནས་རྐང་མགོ་མཐོ་གང་ཙམ་གྱི་སར་བཞག་སྟེ་ལག་གཉིས་ཀྱིས་གཟུང༔ རླུང་འཐེན་མནན་དྲག་ཏུ་བྱ་ལ་རྒྱ་མཚོ་བསྐོར༔ འདི་དུས་གྲུ་མོ་གཉིས་ཀྱི་མཁལ་རྩ་བསྡམ་པ་གལ་ཆེ༔ དེ་ལྟར་སྦྱོང་བས་འོག་རླུང་འཐེན་ཚེ་འོ་མ་སྣ་བུག་ཏུ་དྲངས་ལ༔ སྟེང་རླུང་མནན་དུས་གང་འཐུང་ཕྱིར་འབྱིན་ནུས་ན༔ རྐང་དུང་འབུད་པ་སོགས་འགྲུབ་པ་སྟེ་ཐེ་ཚོམ་དང་བྲལ་བའི་གདམས་པའོ༔ ནུས་པ་འདི་ཙམ་ཐོབ་ཕྱིན་འོག་སྒོ་བདེ་བ་ཆེན་པོའི་ཉམས་ལེན་ལ་འཇུག་པར་བྱའོ༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པ་ལགས་སོ། །དགེའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ མོ་ཁྲིད་ཟླ་བའི་མདངས་ལེན་བཞུགས༔ ྈྈྈྈ ཡུམ་ཆེན་རྡོ་རྗེ་ཕག་མོ་ལ༔ ཡུམ་གྱི་དབྱིངས་ཉིད་རྟོགས་པའི་ཕྱིར༔ ཡེ་ནས་རང་བཞིན་གཅིག་མོད་ཀྱང༔ ཡེ་ཤེས་མཚོ་རྒྱལ་བདག་ཕྱག་འཚལ༔ མཁའ་འགྲོ་མཚོ་རྒྱལ་ཐུགས་ཀྱི་བཅུད༔ བླ་མའི་ཞལ་གྱི་གདམས་པ་འདི༔ སྔོན་མེད་བརྩེ་བས་ཡི་གེར་བཀོད༔ བློ་གྲོས་ལྡན་རྣམས་སྤྱི་བོས་ལོངས༔ ས་མ་ཡ༔ རྒྱ་རྒྱ་རྒྱ༔ གསང་སྔགས་རྡོ་རྗེ་ཐེག་པ་རྩ་རླུང་མཁའ་འགྲོའི་གསང་མཛོད་ལས༔ གསང་བ་ཐབས་ཤེས་སྙོམས་འཇུག་ལ་བརྟེན་ནས་དྭངས་མ་ཡེ་ཤེས་སུ་སྒྲུབ་པ༔ མོ་ཁྲིད་ཟླ་བའི་མདངས་ལེན་བསྟན་པ་ལ་གསུམ༔ དཔའ་བོའི་མཚན་ཉིད༔ ཇི་ལྟར་སྦྱོར་བ༔ དེའི་ཕན་ཡོན་ནོ༔ དང་པོ་མཚན་ཉིད་ནི༔ རིགས་ལྡན་གྱི་དཔའ་བོ་དེ་ཡང་ལོ་བཅོ་བརྒྱད་ནས་ལྔ་བཅུ་མན་ཆད་མཛེས་ཤིང་ཡིད་དུ་འོང་བ༔ སེར་སྣ་ཆུང་ཞིང་གཏོང་ཕོད་ཆེ་བ༔ ཆོས་ཕྱོགས་ཀྱི་བྱ་བ་ལ་བརྩོན་པ༔ ཤེས་རབ་ཆེ་ཞིང་བློ་ཁོག་ཡངས་པ༔ གསང་ཚིག་ཐུབ་ཅིང་ཅི་ཟེར་བཀའ་བཞིན་བསྒྲུབ་པ༔ སྦྱོར་བ་ལ་མཁས་ཤིང་རྡོ་རྗེ་མཁྲེགས་པ༔ མཐོང་བ་དང་རེག་པ་ཙམ་གྱིས་བདེ་བ་རང་བབས་སུ་སྐྱེ་བ་ནི༔ ནང་དུ་བཅུད་ཡོད་ཅིང་དྭངས་མ་བརྟན་པའི་རྟགས་ཡིན༔ ལུས་ངག་གི་སྤྱོད་ལམ་ཐམས་ཅད་བཟང་ཞིང་དྲི་ཞིམ་པ༔ དྲན་པས་མ་ཟིན་དུས་ཀྱང་ཡིད་ལ་ལྷང་ལྷང་འཆར་བ༔ མཉམ་དུ་འགྲོགས་པ་ཙམ་གྱིས་ལུས་ལ་བདེ་བ་འཕེལ་བ་ནི༔ དང་པོ་རབ་ཀྱི་མཚན་ཉིད་ཡིན་པས་བླ་མའི་ཚུལ་དུ་དད་པ་དང་བཅས་ཏེ་བསྟེན༔ ཡོན་ཏན་ཕྱེད་ཆ་ཙམ་ཚང་བ་ནི༔ མཛའ་བོའི་ཚུལ་དུ་བརྩེ་གདུང་དང་བཅས་ཏེ་བསྟེན༔ ཡོན་ཏན་སུམ་ཆ་དང་ལྡན་པ་ནི༔ བྲན་གྱི་ཚུལ་དུ་བྱང་སེམས་དང་བཅས་ཏེ་བསྟེན་པར་བྱའོ༔ དེ་ལྟར་མ་ཡིན་པའི་སྐྱེས་པ་ཉ་པ་དང་ཤན་པའི་རིགས་དང༔ ལོག་ལྟ་ཅན་གྱི་སྐྱེ་བོ་བསྟེན་ན༔ མཆོག་ཐུན་མོང་གི་དངོས་གྲུབ་ཐོབ་པ་ཅི་སྨོས༔ སྡིག་པའི་ཕུང་པོ༔ ཐར་པའི་ལམ་གེགས༔ དམྱལ་བར་ཁྲིད་པའི་དེད་དཔོན་ཡིན་པའི་ཕྱིར༔ ལུས་གཅིག་པུ་མ་ཟད༔ ངག་འདྲེས་པ་ཙམ་ཡང་མི་བྱའོ༔ གཉིས་པ་ཅི་ལྟར་སྦྱོར་བ་ནི༔ པདྨ་རླུང་འབྱིན་དང་ཕྱིང་རིལ་གྱི་གདམས་པ་སྔོན་དུ་སོང་བའི་རྣལ་འབྱོར་མས༔ སེམས་ཅན་གྱི་དོན་དུ་སེམས་བསྐྱེད་པའི་ངང་ནས༔ རང་ཕག་མོ་དང་དཔའ་བོ་རྟ་མགྲིན་དུ་བསྐྱེད༔ མཁའ་གསང་བྱིན་གྱིས་བརླབ་པར་བྱ༔ བདེ་བ་སྐྱེད་པའི་སྤྱོད་པ་ལ་བསླབ༔ ཆགས་པ་གཡོ་བའི་རྟགས་ཤར་བ་དང་སྙོམས་པར་འཇུག༔ བདེ་ཤིག་ཤིག་བྱུང་བ་དང་སྐྱོད་འཕྲོ་བཤོལ་ལ་ངོ་ཐོག་ཏུ་འཇོག༔ དགའ་བའི་ཡེ་ཤེས་ལ་ངོས་གཟུང༔ དེ་བཞིན་དུ་མཆོག་དགའ༔ ཁྱད་དགའ༔ ལྷན་སྐྱེས་ཀྱི་དགའ་བ་ལ་སེམས་གཟུང༔ ཡབ་བདེ་བ་རྒྱས་པའི་དུས་སུ་ངལ་མི་གསོ་བར་དྲག་ཏུ་སྐྱོད་བཅུག༔ ཐིག་ལེ་ཆིལ་གྱིས་བྱུང་བ་དང༔ འདྲེན་འགྲེམ་དགྲམ་པ་ལ་འབད༔ དེ་རྗེས་དྭངས་སྙིགས་འབྱེད་པ་ནི༔ རྐང་མཐིལ་གཉིས་སྤྲད་དེ་བྷ་གའི་མདུན་དུ་བཞག༔ ལག་པ་གཉིས་བསྣོལ་ཏེ་རྐང་མགོ་གཉིས་ལ་གཟུང༔ འོག་རླུང་ཀློད་ལ་སྟེང་རླུང་དྲག་ཏུ་མནན་ནས༔ དྲག་འབེབ་བྱ་ལ་ཐིག་ལེའི་སྙིགས་མ་སྐྱ་ཉོ་ལེར་བྱུང་བ་དང་གཡང་མོའི་སྤྲུགས་སྟངས་བྱ༔ དེས་ནི་དྭངས་མ་ལུས་ལ་ཁྲེམ་ཞིང་སྙིགས་མ་ཕྱིར་འཕོ་བར་བྱེད་དོ༔ འདི་ལ་གོམས་ཤས་ཆེ་བར་མ་བྱུང་གི་བར་དུ་ཁྱད་དགའ་ཙམ་ལས་མི་དབབ་པར་ཡབ་དང་བྲལ་ཏེ་འཛིན་འདྲེན་དགྲམ་པ་ལ་འབད༔ གོམས་སྟོབས་ཆེར་སོང་ནས་སྐྱེ་བོ་ཆགས་སྲེད་ཀྱིས་གདུང་བ་རྣམས་ལ་བློ་ཆེན་སྟོབས་ལྡན་མའི་སྒོ་ནས་ལུས་སྦྱིན་པར་གཏང་ངོ༔ གསུམ་པ་སྦྱོར་བ་དེའི་ཕན་ཡོན་ནི༔ ཐུན་མོང་གི་དངོས་གྲུབ་ཏུ༔ རྒས་པ་མི་འབྱུང་ཞིང་མདོག་བཟང༔ སྐྲ་དཀར་དང་གཉེར་མ་མི་འབྱུང༔ ཤེས་པ་གསལ་ཞིང་བདེ་ཉམས་དཔག་མེད་དུ་སྐྱེད༔ ནད་ཀྱིས་མི་ཚུགས་ཤིང་ཚེ་ལ་དབང་བའི་རིག་འཛིན་འགྱུར༔ མཆོག་གི་དངོས་གྲུབ་ཏུ་ལུས་ཀྱི་རྩ་མདུད་ཞིག་པས་ས་ལམ་ཡོན་ཏན་སྐྱེ༔ ནང་དུ་དྭངས་མ་བརྟན་པས་གཟུང་འཛིན་གྱི་རྟོག་ཚོགས་འགགས༔ ཡེ་ཤེས་ཀྱི་སྣང་བ་ཆེར་རྒྱས༔ སྐུ་དང་ཐིག་ལེ་སོགས་མཐོང་སྣང་དཔག་མེད་འཆར༔ སངས་རྒྱས་ཀྱི་ཞིང་ཁམས་སྐད་ཅིག་རེ་རེ་ལ་མཇལ་བ་སོགས་ཡོན་ཏན་བསམ་གྱིས་མི་ཁྱབ་བོ༔ གལ་ཏེ་ཉོན་མོངས་པའི་དབང་དུ་ཤོར་ན༔ བླ་མ་ཡི་དམ་གྱིས་དབྱིངས་ནས་ཁྲེལ༔ དཔའ་བོ་མཁའ་འགྲོ་བསྒྲུབས་ཀྱང་མི་འགྲུབ༔ དྲག་སྔགས་ཀྱི་ནུས་པ་མི་ཐོན༔ སྐྲ་དཀར་དང་གཉེར་མ་འབྱུང་ཞིང་མདོག་ངན༔ ཚེ་འདི་དང་ཕྱི་མ་ཀུན་ལ་སྡུག་བསྔལ་བར་འགྱུར་རོ༔ གཉེན་པོའི་རྩི་ཡིས་ཟིན་པ་ཡིས༔ ཉོན་མོངས་བུད་ཤིང་མ་ལུས་པ༔ ཡེ་ཤེས་མེ་ཡི་གྲོགས་གྱུར་འདི༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ འཇའ་ཚོན་སྙིང་པོས་རྡོ་རྗེ་ཡོངས་རྫོང་གི་མཁའ་འགྲོ་གསང་ཕུག་རྡོ་རྗེ་ཕག་མོའི་བྷ་ག་ནས་རྙེད་པའོ། །བཀྲ་ཤིས་སོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ ཐུན་མོང་མིན་པའི་འཕྲུལ་འཁོར་ལགས༔ ྈྈྈྈ བདེ་ཆེན་བདེ་བ་བསྐྱེད་པའི་དཔལ༔ རྡོ་རྗེ་ཕག་མོ་རྡོ་རྗེ་རྒྱལ༔ མྱུར་ལམ་རྩ་རླུང་ཐིག་ལེ་ཟབ༔ ཉམས་སུ་ལེན་པའི་རྣལ་འབྱོར་གྱིས༔ འཕྲུལ་འཁོར་གནད་ཀྱིས་མ་གཅུན་ན༔ དཔེར་ན་མེ་དང་རླུང་མེད་ཚེ༔ འབར་བའི་ཤུགས་དང་མི་ལྡན་ལྟར༔ རླུང་གི་ཡོན་ཏན་འབྱུང་བར་དཀའ༔ དེ་ཕྱིར་འཕྲུལ་འཁོར་བཅའ་བ་ལ༔ སྔོན་འགྲོ་དངོས་གཞི་རྗེས་དང་གསུམ༔ སྔོན་འགྲོ་ལུས་གནད་སྐྱིལ་ཀྲུང་བཅའ༔ རླུང་རོ་དཔག་ཆེན་མདའ་ལྟར་འཕང༔ ཡེ་ཤེས་བསྐྱེད་པའི་བདེ་རླུང་ནི༔ གཞུ་ལྟར་བཀུག་ནས་རྫིང་ལྟར་བསྐྱིལ༔ མགོ་ལུས་ཡོངས་ལ་འཕུར་བསུབ་བྱ༔ སེང་ཆེན་འགྱིང་བའི་འཕྲུལ་འཁོར་གྱིས༔ སྟོད་རླུང་སྟོད་དུ་གསེང་ལ་བོར༔ གླང་ཆེན་ཉལ་བའི་འཕྲུལ་འཁོར་གྱིས༔ བར་རླུང་བར་དུ་གཅུན་པར་བྱ༔ དྲང་སྲོང་ཙོག་པུའི་འཕྲུལ་འཁོར་གྱིས༔ སྨད་རླུང་སྨད་དུ་གཏན་ལ་དབབ༔ དངོས་གཞི་འཕྲུལ་འཁོར་བཅའ་ཚུལ་ནི༔ དང་པོ་ཆུ་བོ་གྱེན་བཟློག་པས༔ སྦྲུལ་ནག་འཁྱིལ་བའི་འཕྲུལ་འཁོར་ནི༔ དཔེར་ན་གདུག་པ་སྦྲུལ་གྱི་ལྕེ༔ སྨན་ལྕེས་གསོ་ཞིང་དུག་ལྕེས་གསོད༔ དེ་བཞིན་བསམ་པ་དཀར་ནག་གིས༔ རྣམ་སྨིན་བདེ་སྡུག་བསྐྱེད་པ་བཞིན༔ ཆུ་བོ་འཁོར་འདས་རྣམ་པ་གཉིས༔ འཁྲུལ་པའི་ཆུ་བོ་ཐུར་དུ་འབབ༔ སྡུག་བསྔལ་འཁོར་བའི་ཡོ་ལངས་བསྐྱེད༔ དེ་དག་གྱེན་དུ་མ་བཟློག་ན༔ མྱང་འདས་བྱང་ཆུབ་ཆུ་རྒྱུན་དང༔ འདྲེས་པའི་དུས་མེད་སྡུག་བསྔལ་རྒྱུད༔ དེ་ཕྱིར་ལས་ཀྱི་ཆུ་བོ་དེ༔ ཟློག་ཐབས་སྦྲུལ་ནག་འཕྲུལ་འཁོར་བསྟན༔ སྒལ་བསྲང་མགྲིན་བཀུག་རྐང་པ་གཡས༔ པུས་མོ་གཡོན་གྱི་སྟེང་དུ་བཀབ༔ གཡོན་གྱི་ཁུ་ཚུར་གཡས་མཆན་བཅུག༔ གཡས་ཀྱི་རྐང་གཡོན་ལོང་རྩར་བསྡམ༔ གཡས་སུ་འགྱིང་ཞིང་འཇམ་རླུང་གཟུང༔ དམིགས་པ་ཁམས་གསུམ་རིགས་དྲུག་གི༔ སྡུག་བསྔལ་མ་ལུས་བདག་ལ་བསྡུ༔ གཞན་རྣམས་བདེ་བ་ལྡན་པར་བསྐྱེད༔ འཕྲུལ་འཁོར་འདི་ལ་བརྩོན་བྱས་ན༔ སྦྲུལ་ནག་སྨྱུགས་དོང་བཅུག་པ་ལྟར༔ ཕྱིར་ལྡོག་མེད་པར་གྱེན་དུ་འགྲོ༔ གཉིས་པ་རྒྱ་མཚོ་ཡུར་འདྲེན་གྱི༔ ངང་མོ་བཞི་འགྲོས་འཕྲུལ་འཁོར་ནི༔ དཔེར་ན་རྒྱ་མཚོ་ཆེན་པོ་ལ༔ ཆུ་བྲན་མང་འདུས་རླུང་འཁྲིག་སྟེ༔ ཟིལ་དང་ཆར་གྱིས་རླན་བསྐྱེད་ནས༔ རྩི་ཤིང་ལོ་འབྲས་བསྐྱེད་པ་ལྟར༔ ཕོ་བ་རྒྱ་མཚོ་ཆེན་པོའི་ནང༔ བཟའ་བཏུང་འདུས་པའི་བཅུད་རླངས་ཀྱིས༔ ལུས་ལ་ཁྱབ་པའི་དྭངས་མ་རྣམས༔ རྩ་ཡི་ལམ་ལ་ཡུར་དྲངས་ནས༔ ལུས་སྟོབས་གཟི་མདངས་བསྐྱེད་པ་ཡི༔ ངང་མོ་འགྲོས་ཀྱི་འཕྲུལ་འཁོར་བྱ༔ རྐང་པ་མཉམ་གཤིབ་ལངས་བྱས་ཏེ༔ ལག་སོར་གཉིས་བསྣོལ་གུང་མོ་བསྒྲེང༔ ལུས་བཀུག་གུང་མོ་རྐང་མཐེབ་ནས༔ གྱེན་དུ་འཐེན་ཚུལ་སྤྱི་གཙུག་བསྐྱལ༔ འབྱིན་འཇུག་གནས་གསུམ་འཇམ་རིང་བྱ༔ དམིགས་པ་ཕོ་བ་རྒྱ་མཚོའི་ནང༔ བཟའ་བཏུང་རྫས་རྣམས་མ་ལུས་པ༔ མེ་རླུང་སྦྱོར་བས་བཞུས་པའི་བཅུད༔ དྭངས་མ་དྲི་རླངས་རྩ་ལམ་དྲང༔ ལུས་ཀུན་མེར་གྱིས་ཁེངས་པར་བསམ༔ སྙིགས་མ་རྣམས་ནི་ཐུར་དུ་སོང༔ ལྷག་མེད་འོག་སྒོར་ཐོན་པར་དམིགས༔ འབྱིན་ཚེ་དྭངས་མ་གྱེན་དུ་དྲང༔ གནས་ཚེ་སྙིགས་མ་ཐུར་དུ་བཙགས༔ དེ་ལྟར་སྤེལ་ཚུལ་ཤེས་པར་བྱ༔ དེས་ནི་ལུས་སྟོབས་གཟི་བྱིན་བསྐྱེད༔ ཡོན་ཏན་བརྗོད་ན་དཔག་ཏུ་མེད༔ གསུམ་པ་གཟའ་སྐར་ཁྱིམ་འཛུད་པས༔ མེ་ཐབས་དྲུག་ཆིངས་འཕྲུལ་འཁོར་ནི༔ ཕྱི་ནང་རྟེན་འབྲེལ་གཅིག་པའི་ཕྱིར༔ སྦྱོར་བ་དྲུག་གིས་མ་བཅིངས་ན༔ ཆུ་ལུད་མ་བྲན་ལོ་ཏོག་ལྟར༔ དགེ་ལེགས་ཡོན་ཏན་སྐྱེད་འཕེལ་ཆུང༔ དེ་ཕྱིར་ཉིན་མཚན་དུས་དྲུག་ཏུ༔ ཡས་བབ་མས་བརྟན་དགའ་བ་བཞི༔ ཉམས་སུ་བླངས་པས་ཉོན་མོངས་འཆིངས༔ ཁྱད་པར་མཆོག་གི་དངོས་གྲུབ་འབྱུང༔ བཞི་པ་བདུད་རྩི་སྣོད་དུ་སྦེད༔ ཐོད་པ་ཁ་སྦྱོར་འཕྲུལ་འཁོར་ནི༔ བཅུད་ཀྱི་དྭངས་མ་མ་སྦས་ན༔ ཉམས་པའི་སྐྱོན་རྣམས་འབྱུང་བའི་ཕྱིར༔ འཛག་མེད་ཐོད་པ་ཁ་སྦྱོར་གྱི༔ འཕྲུལ་འཁོར་འདི་ལ་བརྩོན་པར་བྱ༔ འོག་སྒོར་གྲུ་གུ་ཁུ་ཚུར་ཙམ༔ བཞག་ནས་སྐྱིལ་ཀྲུང་རླུང་ཁ་སྦྱོར༔ ལག་གཉིས་ཁུ་ཚུར་སྙིང་ཁར་བསྣོལ༔ ལུས་ནི་ཅུང་ཟད་བསྒྲིམ་པའི་ནང༔ སྙིང་གར་དབུ་མའི་ནང་དག་ཏུ༔ ཐབས་ཤེས་ཉི་ཟླ་ཐོད་སྦྱར་ནང༔ ཐིག་ལེའི་དྭངས་མས་གང་བར་བསྐྱེད༔ ཕྱི་རོལ་རྩ་རྣམས་གྲུ་གུ་ལྟར༔ སྣ་ཚོགས་མདངས་ཀྱིས་བཅིངས་པར་བསམ༔ འཕང་བརྡབ་དྭངས་མ་སྙིང་གར་བསྡུ༔ དེས་ནི་བདུད་རྩིའི་ཐིག་ལེ་རྣམས༔ ཉམས་པར་མི་འགྱུར་ལུས་སྟོབས་རྒྱས༔ འདི་ཡི་སྦྱོར་བ་ཉིན་གཅིག་གིས༔ ལོ་གཅིག་བར་དུ་དྭངས་མ་བརྟན༔ དེ་ཕྱིར་བདུད་རྩི་སྣོད་སྦེད་པའི༔ ཐོད་པ་ཁ་སྦྱོར་འཕྲུལ་འཁོར་གཅེས༔ ལྔ་པ་མེ་ཏོག་བཅུད་སྡུད་པའི༔ བུང་བ་ལྕགས་མཆུའི་འཕྲུལ་འཁོར་ནི༔ བདག་ཉིད་ལྷ་རུ་གསལ་བ་དངོས༔ དཔེར་ན་བུང་བའི་མེ་ཏོག་ལ༔ བག་ཕེབས་རྩི་ལ་འཇིབ་པ་ལྟར༔ ཡིད་ཀྱི་དམིགས་པས་རིག་མ་དང༔ དགའ་བཞི་བདེ་བ་མཉམ་རྒྱས་ཀྱི༔ འདུན་པ་དང་བཅས་རྡོར་སྐྱིལ་བྱ༔ ལག་གཉིས་མིག་ཐད་ཤད་ཀྱིས་བརྐྱང༔ ཉི་མ་ཟླ་བ་མཁའ་ལ་གཏད༔ དར་པོ་ཆེ་ནི་གྱེན་དུ་བསྐྱོད༔ སྦྲུལ་ཚང་བྲག་ལ་ཅི་ནུས་བཅར༔ སྟེང་རླུང་དྲག་ཕུ་འོག་རླུང་འཐེན༔ སྲིན་ཞལ་བསྡམ་ཞིང་རྐང་སོར་བསྐུམ༔ དམིགས་པ་དྷཱུ་ཏིའི་སྦུ་གུ་ཡིས༔ སྨྱུག་མའི་སྦུ་གུས་ཆུ་དྲངས་ལྟར༔ ཕྱག་རྒྱའི་དྭངས་མ་སྐག་ཁུ་བཞིན༔ དེ་དག་རྔུབ་ནས་ཧཾ་ལ་བསྐྱལ༔ འཁོར་ལོ་རེ་ལ་རིམ་བཞིན་སྦར༔ དམར་ཆ་དྲངས་པའི་ཡོན་ཏན་ནི༔ རྡོ་རྗེའི་ལྗགས་ཀྱང་བརྗོད་མི་ནུས༔ དྲུག་པ་དྭངས་མ་གཏིང་འདྲེན་པས༔ ཉི་ཟླ་མཁར་ལྡོག་འཕྲུལ་འཁོར་ནི༔ དཀར་དམར་དྭངས་མ་འཛིན་ནུས་ཀྱང༔ ཉི་མ་ཟླ་བའི་རྒྱུ་བ་དེ༔ སྒྲ་གཅན་ལམ་དུ་མ་བཟློག་ན༔ ནོར་བུ་རིན་ཆེན་ལག་སོན་པ༔ རྒྱལ་མཚན་རྩེ་མོར་མ་མཆོད་ལྟར༔ འདོད་པའི་ཡོན་ཏན་འབྱུང་བ་དཀའ༔ དེ་ཕྱིར་ཉི་ཟླ་མཁར་ལྡོག་གིས༔ འཕྲུལ་འཁོར་འདི་ནི་ཤིན་ཏུ་གཅེས༔ རྐང་གཉིས་གཤིབ་བརྐྱང་ལག་གཉིས་ཀྱིས༔ དྲག་འཐེན་ཚང་ར་རྒྱབ་ཏུ་ཕུལ༔ མགོ་བཀུག་ལུས་ཀུན་ཐང་ཤ་བཅད༔ གཟའ་ཆེན་མཁར་གཏད་དར་གྱེན་བསྐྱོད༔ འོག་སྒོ་སྟེང་གི་སྒོ་ལ་འཐེན༔ རྒྱ་མཚོ་རི་རབ་ངོས་ལ་བཅར༔ དམིགས་པ་ཉི་ཟླའི་དྭངས་མ་ཀུན༔ སྨིན་མཚམས་ཐིག་ལེ་དྲུག་ལ་བསྟིམ༔ ཕྱི་འཛིན་དྲག་པོ་བདུན་བྱས་པས༔ བཅུད་ཀྱི་དྭངས་མ་ངེས་པར་འདྲོངས༔ ཕན་ཡོན་ནོར་བུ་རིན་ཆེན་ལ༔ སྨོན་ལམ་ཐེབས་ལྟར་དགོས་དགུ་འགྲུབ༔ ཉི་ཟླ་མཁར་ལྡོག་འཕྲུལ་འཁོར་ལགས༔ བདུན་པ་ཉི་ཟླའི་འོད་མདངས་བསྲེ༔ རྒྱ་མཚོ་རྦ་རླབས་འཕྲུལ་འཁོར་ནི༔ ཕ་རོལ་ཉི་ཟླའི་བཅུད་ལོན་ནས༔ རང་གི་བཅུད་དང་མ་བསྲེས་ནས༔ མ་ཁྲེམ་པ་དེར་ནད་ཟུག་འགྱུར༔ དེ་ཕྱིར་སེང་གེ་རྣམ་རོལ་གྱི༔ འཕྲུལ་འཁོར་འདི་ལ་བརྩོན་པར་བྱ༔ སྐྱིལ་ཀྲུང་ལག་གཉིས་བུག་བདུན་བཀག༔ དཔུང་སོག་བསྟོད་ཅིང་ཅུང་ཟད་སྒུར༔ རླུང་གཟུང་རྒྱ་མཚོ་རླབས་བསྐྱོད་བཞིན༔ ཕོ་བ་གྱེན་འཐེན་ཐུར་དུ་འཕང༔ ལན་གྲངས་དགུ་ཡི་བར་དུ་བསྐྱར༔ ཕོ་བ་གཡས་གཡོན་བདུན་བདུན་བསྐོར༔ དེས་ནི་ཉི་ཟླའི་མདངས་འོད་འདྲེས༔ ཡོན་ཏན་བརྗོད་ན་བསམ་མི་ཁྱབ༔ རྒྱ་མཚོའི་རྦ་རླབས་འཕྲུལ་འཁོར་རོ༔ རྗེས་ཀྱི་འཕྲུལ་འཁོར་སེམས་སྐྱིལ་བཅའ༔ རླུང་གཟུང་ཕོ་བསྐོར་རོ་སྟོད་གཅུ༔ མགོ་བསྒྲིལ་གྱེན་འགུག་གསུམ་གསུམ་བྱ༔ ལག་པ་བརྐྱང་བསྐུམ་དྲག་པོ་གསུམ༔ དེ་བཞིན་རྐང་པ་བརྐྱང་བསྐུམ་རྗེས༔ དྲག་འབེབ་གསུམ་རྒྱབ་མཉམ་པར་གཞག༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་རྙེད་པ་དགེ་ལེགས་སུ་གྱུར་ཅིག །བཀྲ་ཤིས་སོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ མཚན་ལྡན་འགུགས་པའི་ལྕགས་ཀྱུ་ཡོད༔ ྈྈྈ ཐམས་ཅད་དབང་བསྒྱུར་རྡོ་རྗེ་ཕག་མོ་ལ་ཕྱག་འཚལ་ལོ༔ མཚན་ལྡན་འགུགས་པའི་ལྕགས་ཀྱུ་འདི་ལ་གསུམ༔ རྫས་དང༔ སྒྲུབ་པ་དང༔ བཀྲོལ་བའོ༔ དང་པོ་ནི༔ གསང་བའི་རྫས་བདུན་ལེགས་པར་བརྟུལ་ནས༔ ཟངས་ཀྱི་སྣོད་དུ་དར་དམར་པོས་ཡིབས་ལ་བཞག༔ གཉིས་པ་སྒྲུབ་པ་ནི༔ རང་ཉིད་རྟ་མགྲིན་དམར་པོ་གཡས་ལྕགས་ཀྱུ་དང་གཡོན་ཞགས་པ་བསྣམས་པར་བསྐྱེད༔ ཐུགས་ཀའི་ཧཱུྃ་ལས་འོད་ཟེར་དམར་པོ་དཔག་ཏུ་མེད་པར་འཕྲོས༔ དམིགས་བྱའི་གསང་བའི་སྦུབས་ནས་ཞུགས༔ སེམས་ཀྱི་འདོད་ཆགས་རབ་ཏུ་སློང་ཏེ་མྱོས༔ འོད་ཟེར་སླར་འདུས་པས་ཤ་རུལ་ལ་སྦྲང་བུ་འདུ་བ་ལྟར༔ བདག་གི་དབང་དུ་འདུ་བར་བསམས་ལ༔ ཧྲཱིཿམ་ཧ་རི་ནི་ས་ར་ཙ་ཧྲི་ཡ་ཧཱུྃ༔ ཨོཾ་ཛབ་ཛབ་ཛུབ་ཛུབ་ཁུག༔ ྈྈཆགས་པ་སློང་སློང༔ རམ་རམ་དེད་དེད་ཁུག་སྡུས༔ ཎི་ཛ་བྲམ་ཤིག་ཁུག་ཁུག༔ ཅེས་ཞག་བདུན་བགྲངས་ནས་རིལ་བུ་ལ་ཧ་གདབ༔ གྲུབ་རྟགས་རྫས་ལ་རླངས་པ་འཕྱུར་བ་ཡོང༔ དེ་མ་བྱུང་ན་བསྐྱར་ལ་བསྒྲུབ༔ རྫས་ཀྱི་རིལ་བུ་དེ་གང་དམིགས་ཀྱི་ཁོང་དུ་ལྟོ་ལ་སྦྱར་ཏེ་བཏང་ན༔ མཚན་ལྡན་ཕོ་མོ་ལ་སོགས་འགྲོ་བ་ཐམས་ཅད་དབང་དུ་འདུ་བར་འགྱུར་རོ༔ གསུམ་པ་བཀྲོལ་བ་ནི༔ བསྟེན་བྱ་ནོར་བའམ༔ གནས་སྐབས་བོགས་འདོན་ཙམ་གྱིས་ཆོག་ན༔ བཀྲོལ་སྔགས་ནི༔ ཧ་རི་ནི་ས་ཁྲོལ་ཁྲོལ༔ ཛབ་ཛུབ་ྈཁྲོལ་ཁྲོལ༔ རམ་དེད་བྲམ་ཤིག་ཁྲོལ་ཁྲོལ༔ བྷི་དྲ་སློང་ཎི་ཛ་ཁྲོལ་ཁྲོལ་སྭཱ་ཧཱ༔ ཅེས་བརྒྱ་རྩ་བརྒྱད་བཟླས་ལ་གདོང་དུ་མཆིལ་མ་གཏོར༔ རྐང་པ་ཆུ་རུ་བཅུག་པས་གྲོལ་ལོ༔ དམིགས་བྱ་དངོས་སུ་མེད་ཀྱང་རི་ཁྲོད་འགྲིམ་པའི་རྣལ་འབྱོར་གྱིས་བསྙེན་ན༔ ལྟོ་ཕྱིར་གྲོང་དུ་རྒྱུག་མི་དགོས་པའི་གནད་དམ་པའོ༔ ས་མ་ཡ༔ རྒྱ་རྒྱ་རྒྱ༔ རིག་སྔགས་འཆང་བ་འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་སྤྱན་དྲངས་པ་ཤུ་བྷཾ། བཀྲ་ཤིས་སོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ གྲོང་འཇུག་འགྲོ་དོན་རྒྱུན་སྐྱོང་བཞུགས༔ ྈྈྈ རྡོ་རྗེ་ཕག་མོ་གྲོང་འཇུག་འཆི་བ་མེད་པ་ལ་ཕྱག་འཚལ་ལོ༔ གྲོང་འཇུག་གི་གདམས་པ་ལ་གསུམ༔ དང་པོ་སྦྱོང་བ༔ བར་དུ་ཚད་པ༔ ཐ་མ་ལས་ལ་སྦྱར་བའོ༔ དང་པོ་སྦྱོང་བ་ནི༔ སྟེང་འོག་གི་རླུང་ལ་རང་དབང་ཐོབ་ནས༔ མདུན་དུ་སྟེགས་བུ་གཙང་མའི་སྟེང་དུ༔ ཐོད་པ་མཚན་ལྡན་གྱི་ནང་དུ་མཐིང་ངམ་སྣག་ཚ་བྱུག༔ དེའི་དཀྱིལ་དུ་དངུལ་ལམ་དུང་གིས་ཧཱུྃ་ཡིག་དཀར་པོ་ཚོན་གང་བ༔ ཤིན་ཏུ་གསལ་བ་ཞིག་བྲི༔ རང་ཕག་མོར་གསལ་བའི་སྙིང་གར་ཧཱུྃ་གཅིག་གསལ་ཡང་ཡང་གདབ༔ རླུང་ཕྱིར་ཕུ་བའི་ཚེ༔ རླུང་དང་རྣམ་ཤེས་ཀྱི་ངོ་བོ་ཧཱུྃ་དེ༔ སྣ་ནས་རྒྱངས་ཀྱིས་ཐོད་པའི་ཧཱུྃ་ལ་ཐིམ་ནས༔ ཧཱུྃ་དེ་བཀྲག་མདངས་དང་ལྡན་པ་ལ་སེམས་གཟུང༔ རླུང་ནང་དུ་རྔུབ་མ་ཐག་ཏུ་ཕྱིར་འབྱིན༔ རིག་པ་ཐོད་པའི་ཧཱུྃ་ལ་རྩེ་གཅིག་ཏུ་གཏད་པས༔ ཐོད་པ་ལ་དྲོད་སྐྱེ་བ་དང༔ ཚག་པ་དང༔ འཕར་བ་སོགས་འབྱུང༔ དེ་ལྟར་བྱུང་ནས་རིག་པ་ཐུགས་ཀའི་ཧཱུྃ་ལ་བསྡུའོ༔ བར་དུ་ཚད་པ་ནི༔ ཕྱག་མཚན་ཁབ་ལ་སོགས་དངོས་པོ་གང་རུང་ཞིག་ལ་རླུང་རིག་དྲག་ཏུ་གཏད་ནས༔ རླུང་ཕྱིར་ཅི་ཆགས་སུ་མནན་པས་འཕར་བ་སོགས་འབྱུང༔ དེ་ནས་བྱ་ར་ལུག་སོགས་ཀྱི་རོ་མ་རུལ་ཞིང་རྨེད་མེད་པ་ཁྲུས་གསོལ་ནས༔ དཀྱིལ་འཁོར་དབུས་སུ་བཞག་ལ་སྔར་ལྟར་སྦྱངས་ནས༔ ལུས་ཀྱི་རྩ་གཡོ་ཞིང་འགུལ་ནུས་པ་ཙམ་བྱུང་ནས་བཞག་ལ་རླུང་རིག་ཚུར་བསྡུ་བར་བྱའོ༔ ཐ་མ་ལས་ལ་སྦྱར་བ་ནི༔ རང་གི་ལུས་དེ་རྒས་སམ་ནད་ངན་པས་ཐེབས་ནས་བརྗེ་དགོས་ཚེ༔ རིགས་རྒྱུད་དང་ལྡན་པའི་རོ་གཙང་མ༔ མཚོན་དང་གཅོང་ནད་ཡམས་རིམས་མཛེ་ཡིས་ཤི་བ་མ་ཡིན་པ༔ གློ་བུར་དང་གླང་འཐབ་ཀྱིས་ཤི་བའི་རོ༔ རབ་དྲོད་མ་ཡལ་བ༔ འབྲིང་ཞག་མ་འདས་པ༔ ཐ་མ་ཡང་རུལ་སུམ་མེད་པ་བཙལ་ཏེ༔ ཁྲུས་བྱས༔ རྒྱན་བཏགས་ནས༔ དཀྱིལ་འཁོར་དབུས་སུ་བཞག་ལ༔ བྱང་སེམས་དཀར་དམར་གྱི་རྫས་བླུགས༔ སྣ་བུག་ཚད་ལྡན་གྱི་རོ་དང་སྤྲད༔ དེ་ནས་རང་གི་སྣ་བུག་གཡས་ནས༔ ཧཱུྃ་དཀར་པོ་སྔར་ལྟར་སོང༔ རོ་ཡི་སྙིང་གའི་ཧཱུྃ་ལ་ཐིམ༔ ཧཱུྃ་གཉིས་དབྱེར་མེད་དུ་གྱུར་ཏེ་འོད་འཕྲོ་བ་ལ་སེམས་གཏད༔ ཕྱི་འཛིན་ཡང་ཡང་བསྐྱལ་བས་རོ་ལ་རྣམ་ཤེས་འཕོ༔ རོ་རྙིང་པ་ལ་དྲིན་ལན་བསབ་ཕྱིར༔ བདུན་ཚིགས་བསྲེག་སྦྱོང་སྐུ་གདུང་བཞེངས་པ་སོགས་བྱ༔ འདི་ལ་གྲོགས་ཐབས་ལྡན་སོགས་ཞལ་གྱི་གདམས་པ་ཟབ་མོ་མང་དུ་ཡོད་པ་རྣམས་ཤེས་དགོས་སོ༔ ལག་ལེན་གྱི་གནད་མི་ཤེས་པར་གདམས་པ་འདི་ལ་འཇུག་འདོད་པ་ནི༔ དམིགས་བུ་མེད་པའི་ལོང་བ་གཡང་ལ་ལྷུང་བ་དང་འདྲ་བས་གཟབ་པར་གལ་ཆེའོ༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་གནས་ཆེན་རྡོ་རྗེ་ཡོངས་རྫོང་མཁའ་འགྲོ་གསང་ཕུག་རྡོ་རྗེ་ཕག་མོའི་བྷ་གའི་ནང་ནས་གཏེར་ནས་སྤྱན་དྲངས་པ་ཤུ་བྷཾ།། །། ྈ རྩ་རླུང་མཁའ་འགྲོའི་གསང་མཛོད་ལས༔ གེགས་སེལ་ཐར་པའི་སྲོག་གཟུང་ཡོད༔ ྈྈྈྈྈྈྈ བདེ་ཆེན་རྡོ་རྗེ་ཕག་མོ་ལ་ཕྱག་འཚལ་ཞིང་སྐྱབས་སུ་མཆིའོ༔ རྩ་རླུང་མཁའ་འགྲོའི་གསང་མཛོད་ལ་ཉེ་བར་མཁོ་བའི་གདམས་པ༔ གེགས་སེལ་ཐར་པའི་སྲོག་གཟུང་ཞེས་བྱ་བསྟན་པ་ལ་གསུམ༔ ལུས་རྩ་ཡི་གེགས་སེལ༔ ངག་རླུང་གི་གེགས་སེལ༔ སེམས་ཐིག་ལེའི་གེགས་སེལ་ལོ༔ དང་པོ་ལུས་རྩ་ཡི་གེགས་སེལ་བསྟན་པར་བྱ་བ་ལ༔ སྤྱིར་ལུས་ངག་ཡིད་གསུམ་ལ་གེགས་འབྱུང་བའི་རྒྱུ་ནི༔ གསང་སྔགས་བླ་མེད་ཀྱི་ཉམས་ལེན་ལ་བརྩོན་འགྲུས་ཕུར་ཚུགས་ཆེ་བ་ལས་བྱུང༔ དེ་ཡང་ཉམས་སུ་ལེན་པ་ལ་གེགས་འབྱུང་བ་ནི་ས་ལམ་གྱི་ཡོན་ཏན་སྐྱེ་བ་ཡིན་པས་སྐྱོན་དུ་མི་བལྟ་ཞིང༔ གེགས་ཀྱི་དབང་དུ་མ་སོང་བ་གེགས་སེལ་གྱི་གདམས་པ་ལ་འབད༔ གེགས་འབྱུང་ཡང་དགོས་པ་བྱུང་ན་སེལ་ཐབས་ཡང་དགོས་ཏེ༔ གེགས་མེད་པ་ལ་ཡོན་ཏན་སྐྱེ་བ་མི་སྲིད་ལ༔ གེགས་སྣ་རེ་སེལ་ན་ཡོན་ཏན་གྱི་རིམ་པ་གོང་འཕེལ་དུ་འགྲོ་བའོ༔ ཉམས་ལེན་མེད་པའི་གང་ཟག་གི་རྒྱུད་ལ་མི་བདེ་བ་དུ་མར་འབྱུང་སྟེ༔ དེ་ནི་སྔོན་གྱི་ལས་དང་འཕྲལ་གྱི་རྐྱེན་ལས་གྱུར་པའི་ནད་གདོན་ཡིན་ལ་གེགས་དང་སློང་ཞེས་མི་ཟེར་རོ༔ སྤྱིར་རྩ་སྐམ་ན་ལུས་སྐམ༔ རྩ་ཞ་ན་ལུས་ཞ་བ་སོགས༔ རྩ་ལ་སྐྱོན་ཇི་ལྟར་བྱུང་བཞིན་ལུས་ལ་སྐྱོན་འབྱུང་བའི་ཕྱིར༔ རྩ་ཡི་སྐྱོན་གེགས་མ་བསལ་ན་རླུང་སེམས་གནད་ལ་མི་ཕེབ༔ དེ་མ་ཕེབས་ན་བདེ་སྟོང་ཟག་པ་མེད་པའི་ཡེ་ཤེས་རྒྱུད་ལ་མི་སྨིན་པས་རྩའི་སྐྱོན་གེགས་སེལ་བ་གལ་ཆེའོ༔ རྩ་ལ་སྐྱོན་འབྱུང་བའི་རྒྱུ་ནི༔ སྤྱོད་ལམ་དྲག་ཤུལ་གྱི་ལས་དང༔ གཡང་ལ་ལྷུང་བའམ༔ རྡེབ་ཀྱིས་གནོན་པ་སོགས་དང༔ རླུང་མ་གཟུང་བར་འཕྲུལ་འཁོར་བྱས་པ༔ བཟའ་བཏུང་སྤྱོད་ཉེས་བྱས་པ་ལས་བྱུང་ངོ༔ སྐྱོན་ཞུགས་པའི་རྟགས་ནི༔ ལུས་སྦྲིད་པ་དང༔ ཁོལ་བ་དང༔ ཟ་བ་དང༔ ཚ་བ་དང༔ གཟེར་བ་དང༔ ལུས་སྤྱི་ཁྱབ་ཏུ་ན་བ་དང༔ ཉམས་རྨི་ལམ་ལ་མི་མིན་གྱི་བར་ཆད་བྱེད་པ་དང༔ ཤ་ལྷག་དང་ཤུ་བ་མཛེར་པ་ཞ་རེངས་སོགས༔ མི་འདོད་པ་དུ་མ་འབྱུང་ངོ༔ དེ་སེལ་བའི་ཐབས་ལ༔ འཕྲུལ་འཁོར་དང་སྨན་ནོ༔ དང་པོ་རྩ་ཆད་ན༔ ལུས་ཀྱི་སྟོད་སྨད་ནས་གང་ཡིན་དེ་རུ་རླུང་སྐྱིལ་བ་སྟོང་རའི་དམིགས་པ་དང་རྣམ་སྣང་ཆོས་བདུན་བྱ༔ གར་མ་བདེ་སར་འཕུར་སུབ་བྱེད༔ རང་གི་མི་སླེབ་པ་ཡིན་ན་གྲོགས་ལ་འཕུར་དུ་གཞུག༔ རྗེས་སུ་མི་བསྐྱོད་པ་ངར་མ་ཡལ་བ་བྱུགས་པས་སེལ་ལོ༔ རྩ་སྐམ་ན་ལུས་ལ་གཡའ་ཟ་ཞིང་ཡན་ལག་སྐམ་པ་འབྱུང་སྟེ༔ ལུས་སེམས་སྐྱིལ་ཀྲུང་མཉམ་གཞག་གི་ངང་ནས་རླུང་བཟུང་ལ༔ དང་པོ་ལག་མཐིལ་གཉིས་དྲོད་དང་ལྡན་པར་འཕུར༔ དེ་ནས་སྤྱི་གཙུག་ནས་རྐང་མཐིལ་གྱི་བར་དུ་དྲོད་ཕེབས་པར་འཕུར༔ ཡང་རྐང་མཐིལ་ནས་སྤྱི་བོའི་བར་དུ་འཕུར་ལ༔ སྤྱི་བོར་སླེབ་པ་དང་རླུང་རོ་ཕྱུང་ཞིང་ལུས་ཀུན་སི་ལི་ལི་སྤྲུག༔ དེས་རྩ་སྐམ་པའི་གེགས་སེལ་ཞིང་ལུས་སྟོབས་རྒྱས༔ རྩ་འཆུས་ན༔ དང་པོ་ཉལ་ནས་རླུང་རོ་འདོན་པ་ཁ་ཡར་བྱ༔ དེ་ནས་འཇམ་རླུང་བཟུང་ལ་ལུས་ཀུན་གཡས་གཅུ་གཡོན་གཅུ་མང་དུ་བྱ་ཞིང༔ མཐར་ལུས་སེམས་གཡོ་མེད་དུ་མཉམ་པར་གཞག༔ སྐབས་སུ་མང་དུ་འཆུས་པར་འཕུར་བ་ལན་འགའ་བྱས་པས་སེལ་ལོ༔ རྩ་འཁྲུགས་ན་ལུས་སམ་ལག་པ་འདར་བ་འབྱུང་སྟེ༔ དང་པོ་ལུས་ཅི་བདེར་བཞག་ལ་ལུས་ཐམས་ཅད་འཕུར་སུབ་ཡམ་ཙམ་བྱ༔ དེ་ནས་གན་རྐྱལ་དུ་ཉལ་ནས་ལག་པ་གཉིས་ཀྱིས་གཞུ་སྲ་ཚན་ཅན་འགེང་ཚུལ་རེས་མོས་གསུམ་གསུམ་བྱ༔ རྐང་པ་ཡང་དེ་བཞིན་ཤེས༔ དེ་ནས་རྐང་ལག་གནམ་དུ་རྐྱོང་ཞིང་སྙིང་ཁར་བསྐུམ་པ༔ དང་པོ་དལ་ཞིང་ཇེ་དྲག་ཇེ་དྲག་ཉེར་གསུམ་བྱ་ལ་ཟོ་ཀློད༔ ཧ་རིང་གིས་རླུང་རོ་ཕྱུངས་ན་སེལ་ལོ༔ རྩ་འདར་བ་ནི་ཕལ་ཆེར་ཉལ་སྟབས་མ་བདེ་བས་རྩ་ཡི་ནང་དུ་ཁྲག་དང་ཆུ་སེར་གྱི་རྒྱུ་འགྲུལ་ཆད་པ་ལས་འབྱུང༔ དེ་སེལ་བ་ནི་སྤྱོད་ལམ་ཐམས་ཅད་ཀློད་ལ་འཇམ་རླུང་གཟུང༔ སྡོད་པའི་དུས་སུ་གདན་འབོལ་བར་རྣམ་སྣང་ཆོས་བདུན་བྱ༔ ཉལ་དུས་སངས་རྒྱས་གཟིམ་ཚུལ་གྱིས་རླུང་རིག་སྨིན་མཚམས་སུ་ཐིག་ལེ་དཀར་པོ་ལ་གཏད༔ གོས་དྲོད་ཅན་གོན་ལ་སད་པའི་དུས་ཀྱང་དྲན་པས་ཟིན་པར་བྱས་ལ་ཚུལ་མིན་གྱི་ཉལ་སྟབས་སྤང་བ་ཞག་བདུན་གྱིས་སོར་ཆུད་དོ༔ རྩ་རེངས་པ་དང་ཞ་འཁུམས་རྣམས་ལ་རླུང་བུམ་པ་ཅན་གཟུང༔ ཕྱིང་པ་སྣུམ་ཚོས་ཅན་མེ་ལ་སྲོས་པ་གང་ན་སར་བླན་པ་ཡང་ཡང་བསྐྱར་ན་ཕན་ནོ༔ རྩ་གེགས་དེ་ཐམས་ཅད་ལ་ཟབ་ཡིག་ལྟར་བཀུ་བྱུག་བྱེད་པ་དང༔ ཐུན་མོང་དང་ཐུན་མོང་མ་ཡིན་པའི་འཕྲུལ་འཁོར་རྣམས་ནི་སྤྱི་འགྲོ་ཡིན༔ སྨན་བཅོས་ནི༔ གོང་གི་རྩ་གེགས་དེ་རྣམས་ཐམས་ཅད་ལ༔ ཨ་རུ་གསེར་མདོག༔ རྒྱ་ཚྭ༔ སྤོས་དཀར༔ ལི་ག་དུར༔ རྒྱ་མཚོ་གསེར་བྱེད༔ ཨ་འབྲས༔ འཇམ་འབྲས༔ སྲ་འབྲས༔ དབང་ལག༔ སྤུ་ཤེལ༔ གཟེ་མ༔ ཤུ་གུ་ཚེར་མ་ཅན་གྱི་འབྲུ་གུ༔ བ་ལུ་དཀར་པོ༔ སེང་ལྡེང་དམར་པོ་རྣམས་ཞིབ་པར་བཏུལ་ལ་ཐོ་རེངས་ལ་བསྟེན༔ སྤྱོད་ལམ་ཐམས་ཅད་ཤིན་ཏུ་དལ་བར་བྱ༔ སྔོ་རིགས་ཤ་རུལ་ཆང་སྐྱུར་སྤོད་སྣ་རྣམས་སྤངས་པས༔ རྩ་ཡི་གེགས་སྔ་མ་སེལ་ཞིང་ཕྱིས་མི་འཇུག་པའི་གདམས་པའོ༔ ༈ གཉིས་པ་ངག་རླུང་གི་གེགས་སེལ་ལ༔ དང་པོ་སྲོག་འཛིན་གྱི་རླུང་ནི་རྩ་དབུ་མའི་ནང་དུ་ཀུན་གཞིའི་རྣམ་པར་ཤེས་པ་དང་མཉམ་དུ་གཡོ་བ་མེད་པར་གནས༔ རླུང་དེ་གཞན་དུ་ལོག་ན་འཆི་བར་བྱེད་ལ༔ མིན་ཡང་སྨྱོ་བརྒྱལ་ལ་སོགས་མ་རུངས་མང་པོ་བྱེད་པར་འབྱུང༔ རླུང་གི་ནང་ནས་སྲོག་འཛིན་གྱི་རླུང་འདིའི་སྟོབས་ཆེ་བ་ཡིན་ཏེ༔ འདི་ལ་སྐྱོན་མ་ཞུགས་ན༔ རླུང་གཞན་གྱི་གེགས་རང་བཞིན་གྱིས་སེལ་ལོ༔ སྤྱིར་སྲོག་རླུང་འདིའི་གེགས་སེལ་བ་ལ་ཧཱུྃ་ཕཊ་འདྲེ་བརྡུང་གི་སྤྱོད་པ་ཙབ་ཙུབ་མི་བྱ་བར༔ སྒོ་གསུམ་གྱི་སྤྱོད་ལམ་ཐམས་ཅད་ཅི་བདེར་སྤྱོད་པའམ་སྤྱོད་དུ་བཅུག་ཅིང་སྣ་མི་བསྐྱིལ༔ དེས་དྲན་པ་ཅུང་ཟད་མི་ཟིན་མི་སྲིད་པས༔ ཟིན་མ་ཐག་ཏུ་སྤྲོས་བྲལ་གྱི་ངང་དུ་བཞག༔ སྐབས་སུ་སྙིང་དཀྱིལ་དུ་བླ་མ་བསྒོམ་ཞིང་རང་དང་དབྱེར་མེད་བསྲེ༔ རླུང་མི་འཛིན་པར་མཉམ་པའི་ངང་དུ་ཡུན་རིང་ཀློད་པས་སྲོག་འཛིན་གྱི་རླུང་ལོག་པ་སེལ་ལོ༔ དང་པོ་སྲོག་འཛིན་གྱི་རླུང་རེངས་ན༔ ལུས་ཤིང་གིས་བཀར་བ་ལྟར་ཡ་ཡོ་དང་དགྱེ་དགུ་མི་ཤེས་པར་འབྱུང༔ བཅོས་ཐབས་ནང་ཚང་ཅན་གྱི་གདན་ལ་བུམ་ཅན་གྱི་རླུང་དང་ཐོག་འབེབ་བྱ༔ རང་གིས་མ་ནུས་ན་གོས་སྟན་གྱི་ཁར་གྲོགས་ཐབས་ལྡན་བཞིས་བཀྱགས་ཕབ་བྱེད་བཅུག༔ བཤང་ལམ་དང་རྡོ་རྗེའི་བར་དུ་ཕྱིང་པ་སྣུམ་ཚོས་ཅན་ཚ་མོས་བསྲོ༔ དེ་དུས་ཞྭ་གོས་དྲོན་པོ་གྱོན་ལ་ལུས་གནད་འཁོར་ལོ་བཞི་སྦྱོར་རམ་གླིང་བཞི་མཐའ་སྡུད་བྱའོ༔ སྨན་བཅོས་པ་ནི༔ ཆང་བཟང་བར་བུ་རམ་དང་ཛཱ་ཏི་བཏབ་པ་བསྐོལ་ནས་བཏང༔ ཤ་ཆེན་བདུག༔ ས་དམའ་ཞིང་ནག་སར་སྡོད༔ ཀུ་ཆོ་དང་ཐུག་ཆོམ་རོལ་མོ་སོགས་མི་བྱ༔ དེས་སྲོག་རླུང་ངེས་པར་སེལ་ལོ༔ སྲོག་འཛིན་གྱི་རླུང་འཁྲུགས་ན༔ སྲོག་རྩ་དང་བྲང་སྔོན་རྒྱབ་ན་ཞིང་སེམས་མི་བདེ༔ སྙིང་འཕར༔ ཧུ་ཤུ་འབྱིན༔ ཕྱི་མིའི་རྡོག་སྒྲ་སོགས་ཀྱང་སེམས་ལ་གནོད་པ་འབྱུང༔ དེ་སེལ་བ་ལ་འབོལ་གྱི་སྟེང་དུ་རྡོ་རྗེ་སྐྱིལ་ཀྲུང་བཅའ༔ ཁུ་ཚུར་གཉིས་དཔྱིའི་ཐད་ཀར་ས་ལ་བཙུག༔ འཇམ་རླུང་བཟུང་ཞིང་སྡབ་ཆུང་ཡང་ཡང་བྱ༔ རང་གིས་མ་ནུས་ན་གྲོགས་ཀྱིས་སྣམ་ཕྱར་དུ་བཞག་ནས་རན་ཙམ་རྡེབ་བཅུག༔ སྨན་ནི་ཨ་བར་སྐྱུར་གསུམ༔ ཛཱ་ཏི༔ ཨ་ཀ་རུ༔ ཕྱུགས་ཆེན་གྱི་སྲེ་ལོང་རྣམས་ཁྲམ་ཁྲུམ་བརྡུང༔ དེ་རས་དཀར་དྲི་མེད་དུ་གཏུམས་ལ༔ ཆང་གར་སླ་རན་པ་ཕུལ་གསུམ་གྱི་ནང་ཕུལ་གང་མ་རེད་བར་དུ་གདུ༔ ངར་ཅུང་ཟད་ཡལ་བ་དང་བཏང་ཞིང་གོས་དྲོ་བར་གོན་ལ་རྔུལ་ཐོན་པར་བྱས་པས་སེལ་ལོ༔ སྲོག་འཛིན་གྱི་རླུང་འཁྱམས་པ་ལ༔ རླུང་དང་རྣམ་ཤེས་ནང་དུ་སྡུད་མི་ཤེས་པར་ཕྱི་རུ་ཧད་དེ་འཕྱོ་བ་དང༔ དྲན་མེད་དུ་བརྒྱལ་བ་སོགས་འབྱུང་སྟེ༔ བཅོས་ཐབས་ནི༔ རྣམ་སྣང་ཆོས་བདུན་དང་ལྡན་པའི་ངང་ནས་སྒོ་གསུམ་ཀློད་ལ་མཉམ་གཞག་བསྐྱང༔ སྐབས་སུ་དྲག་རླུང་མིན་པ་འཇམ་རླུང་ལ་བརྟེན༔ སྨན་ནི་ཨ་རུ་ར་ནག་པོ༔ སྙིང་ཞོ་ཤ༔ ཛཱ་ཏི༔ ཕོ་རིལ༔ པི་པི་ལིང༔ གོ་སྙོད༔ ཤ་ཆེན༔ ཤིང་ཀུན་རྣམས་བུར་ཆང་དུ་སྦྱར་ནས་བཏང༔ རྔུལ་ཐོན་པའི་གོས་ཀྱིས་ཡིབས་ན་སེལ་ལོ༔ སྤྱིར་སྲོག་རླུང་གི་སྐྱོན་འདི་རྣམས་ལ་གསོ་རིག་པ་རྣམས་ཀྱིས་རྒྱལ་པོའི་གནོད་པར་ངོས་བཟུང་སྟེ༔ རྒྱལ་ནད་མ་ཡིན་ལ་ཉམས་ལེན་རྟགས་ཡིན་པས་སྨན་པ་སྤང་དགོས༔ གཉིས་པ་ཐུར་སེལ་གྱི་རླུང་ནི༔ ལྟེ་བ་རྩ་གསུམ་འདུས་མདོ་མན་ཆད་ལ་གནས༔ བྱེད་ལས་ནི་དྲི་ཆེན་དྲི་ཆུ་ཁམས་དཀར་དམར་གྱི་འབྱིན་སྡུད་བྱེད༔ ཁྱད་པར་དུ་སྤྱི་གཙུག་ནས་གསང་བའི་བར་གྱི་བདེ་བ་གཡོ་བར་བྱེད་དོ༔ གེགས་ཞུགས་པའི་རྟགས་སུ༔ དང་པོ་ཐུར་སེལ་གྱི་རླུང་འཚངས་བ་ལ༔ གྱེན་རྒྱུ་དང་བསྡོངས་ནས་སྨད་དུ་འཚངས་ནས་འོག་རླུང་མི་ཐོན་ཞིང་སྦོས་པ་དང༔ རྩ་ཆུ་འགགས་པ་འབྱུང་སྟེ༔ དེ་མྱུར་དུ་མ་བཅོས་ན་སྲོག་ལ་ཉེན་པའི་ཕྱིར༔ གདན་དྲོ་འཇམ་གྱི་ཁར་ལུས་གནད་གླིང་བཞི་མཐའ་སྡུད་བྱ་ལ་སྟེང་རླུང་ཆིལ་གྱིས་མནན༔ ཧཱུྃ་གི་སྒྲ་དང་བཅས་པས་འོག་རླུང་ནར་གྱིས་དྲངས༔ རྒྱུ་ཞབས་སྒལ་པ་ལ་སྦྱར༔ དེ་ལྟར་སྟེང་འོག་གི་རླུང་མནན་འཐེན་རེས་མོས་སུ་བྱ༔ སྐབས་སུ་ཟོ་ཀློད་ལ་ངལ་གསོ་བར་བྱའོ༔ སྨན་བཅོས་ནི་ཚ་བ་གསུམ་དང་ཅོང་ཞི་ལྔ་འགྱུར་ཆང་དུ་བཀོལ་བ་སྐམ་པོའི་ཕྱེ་མ༔ ཨ་རུ་ར་དང་སྒ་སྐྱའི་ཐང་གིས་ཕུལ་ལ་གོས་དྲོན་མོར་བྱས་པས་སེལ་ལོ༔ ཐུར་སེལ་གྱི་རླུང་འཁྲུགས་ན༔ ལུས་བདེ་མི་བདེ་རེས་མོས་དང༔ དྲི་ཆེན་དྲི་ཆུ་བཤལ་སྡོམ་བྱེད༔ ཕོ་བ་ཚ་རླབས་དང་སྐབས་སུ་འཁྱག་སྣང་ཤར༔ དེ་སེལ་བའི་ཐབས་ནི༔ ལྟེ་འོག་ཏུ་ཕྱིང་སྣམ་མེ་ལ་སྲོས་པའི་ཕ་རྡོ་རང་གི་མགོ་ཙམ་བཅུག་པའི་སྟེང་དུ་ཁ་སྦུབ་ཏུ་ཉལ་ཞིང༔ རྐང་པ་རྐྱང་བསྐུམ་རེ་མོས་ཀྱི་རྟིང་པ་འཕོངས་ལ་རན་པར་བརྡུང༔ ལག་པ་གཉིས་ཀྱིས་ཨོག་མ་འདེགས༔ དེས་ཀྱང་མ་ཕན་ན་གྲོགས་ཤེད་ལྡན་གཅིག་གིས་རྐང་པ་གཉིས་ཕྲག་པར་བཀལ་ནས་ཁུར་ཏེ༔ རྒྱབ་གཉིས་སྤྲད་ལ་དྲག་ཏུ་འཕག་བཅུག༔ སླར་ཡང་གོང་ལྟར་ཁ་སྦུབ་ཏུ་ཉལ་ནས་ཨ་འདངས་བརྒྱད་པ་མན་ཆད་ཁུ་ཚུར་གྱིས་རན་པར་བརྡུང་བཅུག༔ སྐབས་སུ་ལུས་ཐམས་ཅད་འཕུར་སུབ་བྱ་ཞིང་རླུང་རོ་སེལ་ལོ༔ སྨན་ནི༔ པི་པི་ལིང༔ ཀ་ཀོ་ལ༔ རྒྱམ་ཚྭ༔ ལྒ་སྐྱ༔ འུ་སུ༔ སེ་འབྲུ༔ ཤིང་ཚ་རྣམས་བཏུལ་བས་བདུན་འགྱུར་གྱི་ཅོང་ཞི་ནས་ཙམ༔ ཨ་རུ་ར་གསེར་མདོག་ཤ་རུས་དང་བཅས་པ་བརྡུངས་ནས༔ ཆུ་ཕུལ་ཕྱེད་དུ་གདུས་ནས་སྐམ་ནས་ཞིབ་པར་བྱས་ཏེ་ཆུ་སྐོལ་གྱིས་ཕུལ༔ རིག་མ་དྲོད་ལྡན་གྱི་ཕོ་བ་དང་སྦྱར་བས་སེལ་ལོ༔ ཐུར་སེལ་གྱི་རླུང་སྟོང་ན༔ འོག་རླུང་མི་ཐུབ༔ ཁོག་སྨད་ལྗི༔ སྨད་ཀྱི་རྩ་རྒྱུས་རྣམས་དང༔ ཕོ་བ་གཡས་གཡོན་མདུན་སོགས་ན་ཞིང་གཟེར་བ་འོང༔ བཅོས་ཐབས་ཙོག་པུར་པུས་འཁྱུད་ཀྱི་འཇམ་རླུང་གཟུང༔ སྲིན་ལམ་དབྱེ་བཙུམ་མང་པོ་བྱས་པས་ཕན༔ སྨན་ལ་ལྒ་སྐྱ༔ ཕོ་བ་རིལ༔ པི་པི་ལིང༔ རྒྱ་ཚ༔ ཤིང་ཚ༔ ཛཱ་ཏི་རྣམས་བཏུལ་ལ་རུས་ཐང་ཞག་མེད་ཀྱིས་ཕུལ༔ བཅུ་དྲུག་མདོ་ལ་རྭ་ཚུག་དང་ཕོ་བར་བསྲོས་བྱས་པས་སེལ་ལོ༔ གསུམ་པ་གྱེན་རྒྱུའི་རླུང་ནི༔ མདུན་ཕྱོགས་ཀྱི་རྩ་ནས་མགྲིན་པར་རྒྱུ་ཞིང༔ བྱེད་ལས་ནི་སྨྲ་བརྗོད་གླུ་དབྱངས་ཅ་ཅོ་རྣམས་བྱེད་དོ༔ གལ་ཏེ་རླུང་དེ་ལོག་ན་ནད་ཕལ་ཆེར་བསྐྱེད་པའི་རྒྱུ་བྱེད་པའོ༔ དང་པོ་ཐུར་སེལ་གྱི་རླུང་དང་བསྡོངས་ནས་སྟོད་དུ་འཚངས་ན༔ རྟགས་ནི་རོ་སྟོད་གཟེར་ཞིང་སྐད་མི་ཐོན༔ དབུགས་ཁ་རྒོད༔ འོག་སྒོ་དབྱེ་བཙུམ་མི་ཤེས་པ་འོང༔ དེ་མ་བཅོས་ན་མྱུར་དུ་འཆི་བར་ནུས་སོ༔ བཅོས་ཐབས་ནི༔ སྟེང་རླུང་མི་གཟུང་བར་འོག་སྒོ་དྲག་ཏུ་བསྡམ༔ སྐབས་སུ་འོག་སྒོ་ཀློད་ལ་འབེབ་བྱ༔ རང་གིས་མ་ནུས་ན་གྲོགས་གཉིས་ཀྱིས་སྣམ་ཕྱར་སྟེང་དུ་བཞག་ནས་རན་པ་བརྡབ༔ སྨན་ནི་ཤ་ཆེན་གྱི་གདུས་ཐང་སྨན་ཚ་བ་གསུམ་བཏབ་ལ་བཏང༔ དེ་རྗེས་ཆང་གར་མ་བཀོལ་བ་ཅུང་ཟད་བཏང༔ གོས་དྲོ་བར་གྱོན་ལ་རྔུལ་ཐོན་པས་སེལ་ལོ༔ གྱེན་རྒྱུའི་རླུང་འཁྲུགས་ན༔ རོ་སྟོད་ལྕགས་ཕུར་བཏབ་པ་ལྟར་གཟེར༔ གོང་མ་དང་ནོར་བ་འདྲ་ཞིག་འབྱུང་སྟེ༔ མི་ནོར་བའི་རྟགས་སུ་འོག་སྒོ་དབྱེ་བཙུམ་ཤེས༔ གཟེར་ཟུག་གོང་མ་བས་ཆུང་བས་སོ༔ སེལ་ཐབས་གང་དུ་ན་བའི་གཟེར་མིག་དེ་རུ༔ གྲུ་གུ་ཁུ་ཚུར་ཙམ་ཞིག་བཅིངས་ཏེ༔ གྲོགས་ཤེད་ལྡན་ཞིག་གིས་པང་གིས་བཏབ་ལ་དྲག་ཏུ་སྤྲུག་ཅིང་ས་ལ་དལ་བུས་བཞག༔ སྐབས་སུ་རོ་སྟོད་ན་སར་ཁུ་ཚུར་གྱིས་རན་པར་བརྡུང༔ བཀུ་མཉེ་བྱས་ལ་འཕུར༔ རླུང་བུམ་པ་ཅན་གཟུང༔ སྨན་བཅོས་ནི༔ མི་ནོར་གྱི་རུས་ཁུར༔ ཛཱ་ཏི༔ ཨ་ག་རུ༔ སྒོག་སྐྱ༔ ཁ་རུ་ཚ་རྣམས་བཏབ་ལ་བཏང༔ དེས་སེལ་བར་འགྱུར་རོ༔ གྱེན་རྒྱུའི་རླུང་སྟོང་པ་ལ༔ མགོ་འཐོམ་པ་དང་སྟོད་མི་བདེ༔ རླུང་ནུས་ཆུང༔ བྱང་ཁོག་སྟོང་ཧད་དེ་བ་འབྱུང༔ བཅོས་ཐབས་གདན་དྲོ་འཇམ་གྱི་སྟེང་དུ་ཙོག་བུ་བསྒོམ་འཁྱུད་ཀྱིས་རླུང་བུམ་པ་ཅན་གཟུང༔ རླུང་འབྱིན་འཇུག་གི་ཚེ་ཤིན་ཏུ་དལ་ལ་རིང་བར་བསླབ༔ སྨན་ནི་ཛཱ་ཏི༔ ཨར་ནག༔ སུག་སྨེ༔ རུ་རྟ༔ ཤིན་ཀུན༔ དེ་རྣམས་ཞིབ་པར་བཏུལ་ལ༔ སིང་པོ་ཚ་མོས་ཕུལ༔ གོས་དྲོན་མོ་གོན༔ ཟས་བཅུད་ཅན་བསྟེན་ན་སེལ་བར་འགྱུར་རོ༔ བཞི་པ་མེ་མཉམ་ཀྱི་རླུང་ནི༔ ཕོ་བ་ལ་གནས་འཆའ་ཞིང་བཟའ་བཏུང་དྭངས་སྙིགས་འབྱེད་པར་བྱེད༔ དེ་ལོག་ན་འཁྲུ་སྐྱུག་དང་མ་ཞུ་ཕོ་ནད་ཐམས་ཅད་སྐྱེད་པར་བྱེད་དོ༔ དེ་ཡང་མེ་མཉམ་གྱི་རླུང་གང་བའི་རྟགས་ནི༔ སྟོང་སྦོས་བྱེད་ཅིང་ཀ་འགག༔ བཀྲེས་པའི་དུས་སུ་ན་བར་བྱེད༔ སྨན་པས་བད་ཀན་མྱག་བྱེད་ཕོ་བར་འཁྱིལ་བར་ངོས་བཟུང་སྟེ༔ འདི་ནི་མེ་མཉམ་གྱི་རླུང་ཕོ་བར་འཁྱིལ་བ་ཡིན༔ དེ་བཅོས་པའི་ཐབས་ནི༔ བདེ་བའི་གདན་ལ་སྐྱིལ་ཀྲུང་ལག་གཉིས་པུས་མོའི་སྟེང་དུ་བཀབ་ལ༔ འཛིན་རླུང་གསར་རྙིང་བརྗེ༔ ཕོ་སྐོར་མང་དུ་བྱ༔ རྗེས་སུ་རླུང་བཟུང་ལ་ལག་གཉིས་ཀྱིས་ཕོ་བ་དྲག་ཏུ་འཕུར༔ སྒྲེགས་པ་འདོན་པར་བྱའོ༔ སྨན་ནི༔ སེ་འབྲུ༔ སུག་སྨེ༔ ཙི་ཏྲ་ཀཿ པི་ལིང༔ ལྒ་སྐྱ༔ ཚྭ་ལ་རྣམས་བཏུལ་ཆུ་བསྐོལ་གྱིས་ཕུལ༔ དེས་ནི་སྟོང་སྒྲེགས་མང་པོའམ་སྐྱུག་པར་འབྱུང་སྟེ་དེས་སེལ་བར་འགྱུར་རོ༔ མེ་མཉམ་གྱི་རླུང་ལྷུང་ན༔ ཚ་ལྷུང་གི་རྟགས་ནི༔ སྒྲ་མེད་དུ་འཁྲུ༔ འཁྲུ་མདོག་ཡང་སེར་པོའམ་དུད་ཁུ་ལྟ་བུའམ༔ ཁྲག་ཏུ་འཁྲུ་བའམ༔ ཆུ་རུ་འཁྲུ་ཞིང་ཅུང་ཟད་གཟེར༔ གྲང་རླུང་ནི་ཕོ་བ་སྒྲོག་ཅིང་སྒྲ་དང་བཅས་ཏེ་འཁྲུ༔ འཁྲུ་མདོག་ཀྱང་ཟས་གང་ཟོས་ཀྱི་མདོག་ཏུ་འབྱུང༔ སྐབས་སུ་བེ་སྣབས་ལྟ་བུར་འབྱུང་བར་འགྱུར་རོ༔ གེགས་དེ་སེལ་ཐབས་ལ་རྣམ་སྣང་ཆོས་བདུན་བཅའ་ལ་རླུང་བུམ་པ་ཅན་གཟུང༔ ཕོ་བ་གཡས་གཡོན་དུ་སྐོར་བ་མང་དུ་བྱ༔ དེ་ནས་ལག་པ་གྲུ་མོར་བཟུང་ཞིང་བསྣོལ་ཏེ༔ སྨིན་མཚམས་སུ་བཏེགས་ལ་ཕོ་ཁར་བརྡེག༔ དེ་ཡང་དང་པོ་དལ་བུའི་བྱ༔ དེ་ནས་ཇེ་དྲག་ཇེ་དྲག་ཏུ་རྡེག་པར་ཤེས༔ དེ་ཚེ་རླུང་དགང་བ་གནད་ཡིན༔ དེ་ནས་ཕོ་བ་དྲག་ཏུ་འཕུར་ལ་འོག་སྒོ་འཐེན་ཕུལ་བྱེད༔ སྨན་ནི་ཚ་ལྷུང་ལ་ཨ་རུ༔ སུར་ནག༔ བཙོད༔ སྙ་ལོ༔ ཁ་རུ་ཚ༔ བྲག་ཞུན་རྒྱམ་ཚ་རྣམས་ཆུ་བསྐོལ་དྲོ་འཇམ་གྱིས་ཕུལ༔ གྲང་ལྷུང་ལ༔ སྨན་ཚ་བ་གསུམ༔ ཁ་རུ་ཚ༔ ལྕ་བའི་འབྲས་བུ༔ ཨ་རག་གམ་ཆང་གིས་ཕུལ་ལོ༔ འདི་ལ་སྨན་པ་རྣམས་ཀྱིས་ཕོ་བའི་མཁྲིས་པར་ངོས་འཛིན་པར་འབྱུང་སྟེ༔ འདི་ནི་མེ་མཉམ་གྱི་རླུང་སྟོབས་ཉམས་པ་ཡིན་ནོ༔ ནད་ཟུག་སེལ་ཡང་འཁྲུ་བ་མ་ཆོད་ན༔ འབྲས་ཚོད་དུ་རམ་ཕྱེ་བཏབ་པའམ༔ མོན་ཆ་ར་དང་དན་དྲིག་གི་ཐང༔ ཚ་ལྷུང་ལ་དྲོ་འཇམ༔ གྲང་ལྷུང་ལ་ཚ་ངར་མ་ཡལ་བས་ཕུལ་ན་སེལ་ལོ༔ ལྔ་པ་ཁྱབ་བྱེད་ཀྱི་རླུང་ནི༔ གཡས་ཕྱོགས་རོ་མ་དང་འབྲེལ་ནས་ལུས་ཀྱི་ཚིགས་པ་ཐམས་ཅད་ལ་གནས༔ བྱེད་ལས་ནི་ལུས་ཀྱི་སྟོབས་བསྐྱེད་ཅིང་འགྲོ་འདུག་ལ་སོགས་པའི་ལས་བྱེད༔ གལ་ཏེ་རླུང་དེ་ལོག་ན༔ ཞ་འཁུམ་རེངས་པ་སོགས་ཀྱི་གེགས་སྐྱེད་པར་བྱེད༔ དང་པོ་ཁྱབ་བྱེད་ཀྱི་རླུང་རེངས་པའི་རྟགས་ནི༔ ཡན་ལག་གློ་བུར་དུ་རེངས་པ་དང༔ འཁུམ་པ་དང༔ སྦྲིད་པ་དང༔ ཀླད་ཡུ་འཁོར་བ་སོགས་འབྱུང༔ དེ་སེལ་བའི་ཐབས་ལ་འབོལ་གྱི་སྟེང་དུ་རྐང་པ་ཤད་ཀྱིས་བརྐྱངས་ལ་འདུག་སྟེ༔ ཧ་རིང་ནི་རླུང་རོ་ཕྱུང་ལ་གསར་པ་དལ་གྱིས་རྔུབ་ཅིང་ལུས་ཐམས་ཅད་འཕུར་སུབ་བྱ༔ རྗེས་བཀུ་མཉེ་བྱ་ཞིང་རླུང་མི་གཟུང་བར་ངལ་གསོ༔ སྨན་ནི་ལྒ་དམར༔ དྲོད་སྨན་རིལ་འཇོང་གཉིས༔ ལྕེ་ཚ་རྣམས་ཆང་གིས་ཕུལ༔ བཟའ་བཏུང་དྲོད་བཅུད་ཅན་བརྟེན་པས་སེལ་ལོ༔ ཁྱབ་བྱེད་ཀྱི་རླུང་སྟོང་ན༔ ལུས་འདར་བ༔ ཁ་སོ་སྦྲིད་པ༔ ལུས་སྤྱིའི་ཤེད་ཆུང༔ དབང་པོ་མི་གསལ་བར་ཟ་ཟི་བྱེད༔ དེ་སེལ་ཐབས་ལ༔ བདེ་རླུང་ཕོ་བར་བསྐྱིལ་ལ་ལུས་ཀྱི་སྤྱི་བོ་ནས་རྐང་མཐིལ་བར་དུ་འཕུར་སུབ་བྱ༔ ས་གྱེན་ཐུར་ཅུང་ཟད་ཡོད་སར་རླུང་སྦྱོར་ངང་ནས་རྒྱུག་མཆོང་མང་དུ་བྱ༔ སྐབས་སུ་རྩལ་ཤུགས་དང་རྩེད་མོའི་རྣམ་འགྱུར་གྱིས་ཁམས་གསེང་ངོ༔ སྨན་ནི་ར་མོ་ཤག༔ ཀ་ནི་ཀ་ཤ་ཀ་དྷ༔ མཚེ༔ ཤུག་འབྲུ༔ སྒོག་པ༔ དབང་ལག་རྣམས་ཀྱི་ཞུན་ཆུ་བཅད་པ༔ བུ་རམ་མར་དཀར་སྦྱར་བ་བརྟེན༔ བད་ཀན་ཆེ་ན་བུ་རམ་ཚབ་ཏུ་སྦྲང་རྩི་དང་སྦྱར༔ དྲོད་བཅུད་དང་ལྡན་པའི་ཟས་གོས་བརྟེན་པར་བྱས་ན་སེལ་ལོ༔ ཁྱབ་བྱེད་ཀྱི་རླུང་འཁྲུགས་ན༔ ལྤགས་པ་རྣམས་བརྩེ་ཞིང་བྲང་བྲུམ་བྱེད༔ ལུས་འདར་ཞིང་བ་སྤུ་ཟིང་བ༔ ཡན་ལག་གི་རྩ་རྒྱུས་རྣམས་ན་ཞིང་རྐང་ལག་བརྐྱང་བསྐུམ་བྱེད་སྙིང་འདོད༔ ལུས་ཐམས་ཅད་ཁབ་ཀྱིས་གཙགས་པ་ལྟར་ཚ་ཙག་ཙག་བྱེད་པ་འབྱུང༔ སེལ་བའི་ཐབས༔ སྟན་བདེ་ལ་ཆེ་བར་བསྡད་ནས༔ ལག་གཉིས་ཀྱི་དང་པོ་པུས་མོ་འཕུར༔ དེ་ནས་བརླ་གཉིས༔ རྩིབ་ལོགས་གཉིས༔ བྲང༔ ལག་པ་གཡས་གཡོན་མཇིང་པ༔ མགོ་རྣམས་འཕུར་བའི་རྗེས་ལ་སེངྒེ་རྣམ་རོལ་བྱ༔ རླུང་རོ་འབྱིན་དང་མཉམ་དུ་ལག་པ་སོར་མོ་དང་བཅས་པ་སྤྲུག༔ མཐར་ལངས་ཏེ་ལག་གཉིས་འཕྲད་ཤིང་ལ་བཟུང་ནས༔ རྐང་པ་རེས་མོས་ཀྱིས་སྤྲུག་པ་བྱས་རྗེས༔ རྐང་མགོ་མིན་པར་བསོད་སྣམ༔ མཐར་རས་ཀྱི་དམ་ལྷོད་རན་པར་དཀྲིས་ཤིང༔ རང་གིས་རླུང་དྲག་ཏུ་བཟུང་ནས༔ གྲོགས་ཤིག་གིས་ཕྱིང་པ་ལྷིང་པ་ལྟར་དལ་བུས་སྒྲིལ་ཏེ༔ ལུས་ཐམས་ཅད་རྔུལ་ཞུམ་གྱིས་འབྱུང་ཞིང་དབང་པོ་དྲན་མེད་བརྒྱལ་བ་དང་བཞག་ལ༔ དཀྲིས་པ་ཀློད་ཅིང་རྔུལ་ཆུ་རྣམས་ཕྱེ་ཞིབ་ཀྱིས་བྱུག་འཕྱི༔ དེ་ནས་རླུང་མི་གཟུང་བར་སྒོ་གསུམ་ཟོ་ཀློད་པར་བྱའོ༔ སྨན་གྱིས་འཆོས་པ་ལ༔ ཕྱུགས་ཆེན་གྱི་སྲེ་ལོང་སྐོལ་བ་དྲོ་འཇམ་ནད་ཚབས་དང་བསྟུན་ལ་བཏང༔ དེ་ནས་ཨ་བར་སྐྱུར་གསུམ༔ བ་ཤ་ཀ༔ ཨ་ཀྲོང༔ འབྲས་བུ་གསུམ༔ ཧང་ལེན་རྣམས་ཚ་ཤས་ཆེ་ན་སྦྲང༔ གྲང་ཤས་ཆེ་ན་བུ་རམ་དང་སྦྱར་ལ་བཏང༔ བཟའ་བཏུང་བསིལ་དྲོད་སྙོམས་པར་བརྟེན༔ ལུས་མི་བསྐྱོད་པས་བཀྲུ་ཞིང་བཀུ་མཉེ་བྱ༔ དེ་ལྟར་རྩ་བའི་རླུང་ལྔའི་གེགས་སེལ་རྣམས་ལ་སྔ་གོང་ནས་གོམས་པར་བྱས་ལ་བཅོས་ཉེས་སུ་མ་སོང་བ་གལ་ཆེ༔ སྐབས་སུ་གཏུམ་མོའི་འཕྲུལ་འཁོར་རྣམས་བྱས་པས་ཀྱང་སེལ་བར་འགྱུར་རོ༔ ༈ གསུམ་པ་སེམས་ཐིག་ལེའི་གེགས་སེལ་ལ༔ དང་པོ་ཐིག་ལེ་ནད་ཀྱིས་སྐམ་པ་ནི༔ ཉམས་ལེན་གྱི་འཕྲོ་ལ་ནད་ཀྱིས་ཡུན་རིང་དུ་སྦྱང་བའམ༔ གློ་བུར་གྱི་ནད་དྲག་པོ་ཐེབས་པའི་རྐྱེན་གྱིས་ཐིག་ལེ་སྐམ་སྟེ༔ ལུས་ཀྱི་མདངས་ཉམས༔ ཤ་སྐམ༔ ཤེད་ཆུང༔ སྐོམ་དད་ཆེ་བར་འབྱུང༔ གེགས་དེ་སེལ་ཐབས་ནི༔ བུམ་པའི་རླུང་གི་སྦྱོར་བའི་བསྐྱེད་རིམ་ལྷ་ཡི་རྣལ་འབྱོར་གྱིས་ཐིག་ལེ་སྤེལ༔ འོ་མ་སྐོལ་བར་གངས་སྦལ་ཤ་བཏབ་ནས་བཏང༔ ཡིད་དུ་འོང་བའི་གཟུངས་མ་དང་ཆགས་པ་གཡོ་བའི་གཏམ་བྱ༔ ཁམས་མི་དབབ་པས་དབང་པོ་སྦྱོར་བས་སེལ་ལོ༔ ཐིག་ལེ་གདོན་གྱིས་སྐམ་ན༔ རྣལ་འབྱོར་པ་ལ་མི་གཙང་བའི་གྲིབ་ཀྱིས་ཕོག་པས་མཁའ་འགྲོ་གཡེལ༔ བསེན་མོའི་རིགས་ཐིག་ལེ་ལ་ཞུགས་ནས་ལུས་སྔ་མ་བས་ཀྱང་ཇེ་ངན་དུ་སོང༔ དབང་པོ་འཐིབ༔ ཤེས་པ་གཡེངས༔ ཁམས་ཉོག༔ ལུས་ལྕི་བར་འབྱུང་སྟེ༔ ཡི་དམ་གྱི་ང་རྒྱལ་བསྐྱེད་ནས་དྲག་སྔགས་བཟླས་ན་སེལ་ལོ༔ ཐིག་ལེ་བཟའ་བཏུང་གིས་སྐམ་པ་ནི༔ ལན་ཚྭ་ཚོད་མེད་དུ་བརྟེན་པ༔ ཟྭ་ཚོད་དང་སྔོ་ངད་ལ་སོགས་ཡུན་རིང་ཟོས་པ༔ མར་ཁུ་འོ་མ་དང་སྣུམ་ཚིག་གི་རིགས༔ རྗེན་ཟས་ཡུན་རིང་དུ་སྤྱད་པས་བྱེད་དེ༔ དེའི་རྟགས་སུ་དབང་པོ་འཐིབ༔ ལུས་ཀྱི་བཀྲག་ཡལ༔ ཤེས་པ་འཕྱོ༔ རྐང་ལག་གི་མཐིལ་སྐམ༔ དང་ག་འགག༔ ཆགས་པ་མི་སྐྱེ༔ གསང་རྡོར་ལས་སུ་མི་རུང༔ དེ་སེལ་བ་ལ་གནོད་རྐྱེན་དེ་རྣམས་སྤངས་ཤིང་ཟས་བཅུད་ཅན་རྣམས་ཁམས་དང་འཕྲོད་པར་བརྟེན་པས་སེལ་ལོ༔ ཐིག་ལེ་སྤྱོད་ལམ་གྱིས་སྐམ་པ་ནི༔ ཉིན་མཚན་དུ་གཉིད་ལོག་པ༔ རྟ་རྒྱུག་དང་དྲག་ཤུལ་གྱི་ལས་བྱས་པ༔ མེ་ཆེན་པོས་ཚིག་པར་བསྲེག་པ་སོགས་ཀྱིས་འབྱུང༔ སེལ་བའི་ཐབས་ལ་གོང་དུ་བཤད་པའི་སྤྱོད་ལམ་རྣམས་སྤངས༔ གཞུང་ལུགས་དང་མཐུན་པའི་སྤྱོད་ལམ་རྣལ་མར་བྱ༔ སྐམ་པའི་རིགས་དེ་དག་ཐམས་ཅད་ལ་ཕན་པའི་སྨན་ནི༔ བ་ལུ་དཀར་པོའི་ལོ་མ༔ ཤུག་གུ་ཚེར་མ་ཅན༔ མཚེ༔ འོམ་བུ༔ མཁན་དཀར༔ སྲོ་ལོ༔ སྤང་སྤོས༔ བུར་སྦྲང་ཆུ་བཅད་པ་རྣམས་འདེ་གུར་སྦྱར་ནས་ཐོ་རེངས་བྱ་སྒོང་ཙམ་རེ་བཟའ༔ རིག་མའི་བཀུ་མཉེ་དང༔ ཐིག་ལེ་འཕེལ་བའི་སྤྱོད་ལམ་དམིགས་པ་རྣམས་བྱ༔ གོང་དུ་བཤད་པའི་གདོན་རྐྱེན་རྣམས་སྤངས་ལ༔ ལུས་མ་འཁྱག་པར་བྱ༔ བརླན་གཤེར་ལ་འཛེམ་ན་ཐིག་ལེ་སྐམ་པ་སོར་ཆུད་ནས་ལུས་སྟོབས་རྒྱས་པར་འགྱུར་རོ༔ ཐིག་ལེ་རུལ་བ་ནི༔ འཕྲུལ་འཁོར་དང་དགེ་སྦྱོར་གྱི་འབད་རྩོལ་ཆུང་ཞིང༔ ཟས་བཅུད་ཅན་དང་ཆང་བག་མེད་བཏུང་ནས༔ ཉིན་པར་གཉིད་ལོག་པ་སོགས་ཀྱིས་བྱེད༔ དེ་མ་བཅོས་ན་མཛེ་དང་དམུ་ཆུར་འགྱུར༔ དེའི་རྟགས་སུ་དང་པོ་ཆགས་པ་སྐྱེ༔ སྦྱོར་བ་ཙམ་པ་དང་རྡོ་རྗེ་ལས་སུ་མི་རུང༔ ལུས་ལ་ཤ་རུལ་མནམ༔ ཁམས་ཀྱི་མདོག་རྣག་ལྟ་བུར་རང་བཞིན་གྱིས་འཛག༔ ཉིན་མཚན་མེད་པར་གཉིད་བྲོ༔ གེགས་དེ་སེལ་བ་ལ༔ ཕྱག་བསྐོར་ལ་སོགས་ཤེད་མི་བསྐྱེད་པའི་ལས་མང་པོ་བྱ༔ སྨན་དཔྱད་ནས་འབྱུང་བ་ལྟར་བད་ཀན་རྩ་བཤལ་བཏང༔ ཕྱི་དྲོའི་ཁ་ཟས་ལོ་ཟླ་ཙམ་རིག་པས་དཔྱད་ལ་བཏང༔ དེའི་ཚེ་ལུས་བདེ་ཞིང་སྣང་བ་དེ་དུས་སུ༔ ཕྱག་རྒྱ་ལ་ཁམས་ཡང་ཡང་དབབ༔ དེ་ནས་ག་པུར༔ གུར་གུམ༔ ཙནྡན་དཀར་དམར༔ ཅུ་གང༔ ཨ་རུ་རྣམས་ལེགས་པར་བཏུལ༔ དེ་དང་ཆ་མཉམ་པའི་ཅོང་ཞི་འོ་མར་བཙོས་པའི་ཕྱེ་མ་དང་བསྲེ་ལ་ཐོ་རེངས་སུ་བཏང༔ མེ་དང་ཉི་མ་ལ་ཡུན་རིང་མི་བསྲོ༔ དེས་སེལ་བར་འགྱུར་རོ༔ ཐིག་ལེ་ཆུ་སེར་དུ་སོང་བའི་གེགས་ནི༔ ཐིག་ལེ་སྐྱིལ་བ་ཙམ་ལ་བརྟེན་ནས་ལུས་ལ་མ་ཁྲེམ་པ་ལས་བྱུང༔ དེའི་རྟགས་སུ་མདོག་སེར༔ ཆགས་སྲེད་རྒྱས༔ ཐིག་ལེ་འཛིན་འདྲེན་མི་ནུས༔ ལུས་ཤིན་ཏུ་ལྗི་ཞིང་ཟ་བ་དང་སྦྲིད་པར་བྱེད༔ རླུང་སེར་མི་ཐུབ༔ སྐྲ་དང་སྨིན་མ་བྱི༔ སྔར་ལྟར་མཛེའམ་དམུ་ཆུར་འགྱུར༔ དེ་སེལ་བའི་ཐབས་ལ་ཐིག་ལེ་འབར་འཛག་གི་དམིགས་པ་དང་འཛིན་འདྲེན་གྱི་རླུང་སྦྱོར་ལ་འབད༔ སེངྒེ་རྣམ་རོལ་གྱིས་ཡང་ཡང་དགྲམ༔ སྐབས་སུ་རིག་མ་ལ་ཁམས་དབབ་པས་སེལ་ལོ༔ སྨན་ནི་སེང་ལྡེང༔ སྲོ་མ་རཱ་ཙ༔ མགྲོན་བུ༔ ཤ་རུ༔ དུར་ཁྲོད་རྣམས་བསྲེགས་པའི་ཐལ་བ༔ ཙི་ཏྲ་ཀ༔ སྤོས་དཀར༔ སྦུར་ལེན་རྣམས་བཏུལ་ཞིང༔ གུ་གུལ་ཆུ་ལ་སྦྱང་བ་བླུགས་ནས་འདམ་འཐག་བྱ༔ དེ་སྲན་མ་ཙམ་དུ་སྒྲིལ་ལ་གྲིབ་སྐམ་བྱ༔ རིལ་བུ་ལྔ་ལྔ་མཚེ་དང་སེང་ལྡེང་ཐང་གིས་ཕུལ་ལ་ལྟོ་སྟོང་ལ་བརྟེན་པས་སེལ་ལོ༔ གལ་ཏེ་དེས་ཀྱང་མ་སེལ་ན༔ རྒྱ་ཚྭ༔ རྒྱམ་ཚྭ༔ ཁ་རུ་ཚྭ༔ སྡིག་སྲིན༔ མཚལ་དཀར༔ དན་རོག༔ སེང་ལྡེང༔ ཉི་དགའ༔ པི་པི་ལིང་རྣམས་ཆང་གིས་ཕུལ༔ ཚ་ཤས་ཆེ་ན་ཁ་རུ་ཚྭ་ཆུ་བསྐོལ་གྱིས་ཕུལ་ལ་ཞག་ཉེར་གཅིག་ཙམ་བརྟེན༔ དེ་ནས་རྒྱ་མཚོ་གསེར་བྱེ༔ ཡུང་བ་སེར་པོ༔ སྐྱེར་པའི་བར་ཤུན༔ རྒྱ་སྐྱེགས༔ ཞུ་མཁན༔ གླ་རྩི༔ གུ་གུལ༔ ཤིང་ཀུན༔ ཨ་རུ་ར༔ བྱང་བ་དུག་གཤོག་ཕུད་པ་དགུ་རྣམས་རྩི་བཞིན་བཏགས་ལ༔ བ་ཆུའི་ཁན་དྷས་རིལ་བུ་དན་རོག་གི་ལྡོག་པོ་ཙམ་སྦྱར་བ༔ ལྕམ་པ༔ གཡེར་མ༔ སྡིག་སྲིན༔ གཟེ་མ༔ བཞིའི་ཐང་གིས་རིལ་བུ་དགུ་རེ་ཕུལ་ལ་ནངས་མ་གསུམ་ཙམ་བཏང༔ སྐབས་སུ་ལུས་དྲི་ཆུས་བཀྲུ་ཞིང་མར་དཀར་གྱིས་བྱུག༔ ཚ་བ་ལ་གཟེ་མའི་ཚབ་ཏུ་རྒྱ་ཁུར་བཏང༔ ལུས་མ་འཁྱག་པར་གོས་ཀྱིས་ཡིབ༔ སྐྱུག་བྲོ་ན་སྣ་ལ་སྦང་ཟན་བྱུག༔ དང་གར་རྡོ་གྲང་གླན་ལ་ཙོག་པུར་སྡོད༔ རྒྱུ་ཞབས་ན་ན་ཚ་བ་ལ་སྦང་སྐམ༔ གྲང་བ་ལ་ཡོས་དུགས་བྱའོ༔ དེས་ནི་ཆུ་སེར་ཐམས་ཅད་བཤལ་ཏེ་འབྱུང༔ བཤལ་ཐེབས་གསུམ་གསུམ་ལ་ཆུ་བསྐོལ་སུན་རེ་བཏང༔ ཧ་ཅང་ཟུག་ཆེ་ཞིང་ཆུ་འགྲིམ་དཀའ་བར་བྱུང་ན༔ རྒྱ་ཚ་དང་ཨ་རུ་རྩེ་སྙུང་གི་ཐང་གཏང་ངོ༔ སྨན་རིལ་དགུ་བས་ཉུང་ཨི་དགོས་ལུས་ཉམས་དང་སྨན་ལྟོ་ཆེ་ཆུང་གི་ཤེས༔ ནད་ཚབས་ཆེ་ན་ལན་གསུམ་གསུམ་བསྐྱར༔ འབྲིང་ན་གཉིས༔ ཆུང་ན་གཅིག་གིས་ཆོག༔ ཚ་བ་ལ་བསིལ་དྲོད་སྙོམས་པའི་བཟའ་བཏུང་དང༔ གྲང་བ་ལ་དྲོད་བཅུད་ཅན་གྱི་ཟས་བརྟེན་པ་སྨན་གཞུང་སྤྱི་དང་མཐུན་པར་བྱས་པས་སེལ་བར་འགྱུར་རོ༔ ཐིག་ལེ་ཉམས་པའི་གེགས་ནི༔ བཟའ་བཏུང་ཞག་གཅིག་དཀའ་ཐུབ་ཆེ་བ་དང༔ སྲེད་པའི་དབང་གིས་ཕྱག་རྒྱ་མ་ལ་ཁམས་ཡང་ཡང་ཕབ་པའི་སྐྱོན་གྱིས༔ མདོག་ཤོར༔ སྐྲ་དང་བ་སྤུ་གཟིང༔ ལུས་ལ་དྲི་ངན་དཀུ༔ སེམས་མི་བདེ༔ དེ་བཅོས་ཐབས་ནི༔ བླ་མ་ཁྱད་པར་ཅན་ལ་གསང་སྔགས་ཀྱི་དབང་བཞི་ཞུ༔ ཚོགས་དང་སྐོང་བཤགས་བྱ༔ ཐིག་ལེ་སྤེལ་བ་དང་དགྲམ་པའི་དམིགས་པ་དང་འཕྲུལ་འཁོར་ལ་འབད༔ སྨན་ནི༔ འོ་མ་བསྐོལ་བའི་ནང་དུ་གངས་སྦལ་གྱི་ཤ་བཏབ་པ་བཏང༔ བཟའ་བཏུང་དྲོད་བཅུད་དང་ལྡན་པ་བརྟེན་པས་གེགས་སེལ་ལོ༔ ཐིག་ལེ་ཟག་པའི་གེགས་ལ༔ དང་པོ་བག་ཆགས་ཀྱིས་འཛག་པ་ནི༔ རྨི་ལམ་དུ་སྔར་འདྲིས་ཀྱི་ཡིད་དུ་འོང་བའི་བུད་མེད་དང་འཕྲད་ནས་ཉལ་པོ་བྱས་པ་རྨི་བས་འཛག༔ དེ་མ་བཅོས་ན་གནས་སྐབས་སུ་ལུས་སྟོབས་ཞན༔ མཐར་ཐུག་ཚེ་ལ་གཟན་པར་འགྱུར་རོ༔ དེ་སེལ་ཐབས་ཆགས་པ་སྐྱེ་བའི་ཡུལ་དེ་ཡང་ཕྱི་ལྤགས་དང་སེན་མོ་བ་སྤུ་ཐམས་ཅད་ཀྱང་ཤིན་ཏུ་སྡུག་པའི་རྣམ་པ༔ ནང་ཁྲག་རྣག་ཆུ་སེར་ལ་སོགས་མི་གཙང་བའི་རྫས་དུ་མས་བཀང་བ༔ བར་རྩ་དང་ཆུ་རྒྱུས་ཀྱི་དྲྭ་བས་འབྲེལ་ཞིང་མྱུར་དུ་འཇིག་པའི་རང་བཞིན་བལྟ་ལ༔ བདག་འདོད་ཆགས་རང་རྒྱུད་པར་སོང་བ་འདི་རེ་མ་ལེགས༔ འདོད་ཆགས་ཀྱི་རྟོག་པ་འདི་དང་མ་བྲལ་ན༔ ཐར་པ་ཐོབ་པའི་དུས་མ་མཆིས༔ བྱང་ཆུབ་ཀྱི་ལམ་དུ་མི་འགྲོ༔ བདེ་ལེགས་ཀྱི་འབྲས་བུ་མི་སྨིན༔ ས་ལམ་གྱི་ཡོན་ཏན་མི་སྐྱེ་བའི་ཕྱིར༔ འདོད་ཆགས་ཀྱི་ལས་ངན་པ་དེ་སྐད་ཅིག་ཙམ་ཡང་དྲན་པ་མི་བྱ་བསམས་པས༔ རླུང་རོ་རྙིང་པ་སངས་ཀྱིས་འབུད༔ གསར་པ་དལ་གྱིས་བཟུང་ལ༔ སྤྱི་བོར་བླ་མ་བསྒོམ་ཞིང་གསོལ་བ་ཕུར་ཚུགས་སུ་གདབ༔ ཡང་མཚན་ལྡན་གྱི་ཕྱག་རྒྱ་ཡིན་ན་ཡིད་དུ་མི་འོང་བ་བསྒོམ་དུ་མི་རུང་བའི་ཕྱིར༔ གཟུངས་མ་དེ་འོད་ཟེར་དུ་ལྷགས་ནས་རྡོ་རྗེའི་སྦུབས་སུ་ཞུགས་ཏེ་སྙིང་ཁར་ཐིམ༔ ཆགས་པ་དེ་རང་སེམས་བདེ་བ་ལས་ཕྱི་ན་མེད་པའི་བདེ་ཆེན་སྒྱུ་མ་ལྟ་བུར་ཡང་ཡང་བསྒོམས་པས་སེལ་ལོ༔ ཐིག་ལེ་གདོན་གྱིས་འཛག་པ་ལ༔ ཤི་སྐྲ་ལ་མདུད་པ་གསུམ་བྱས་ནས་སྔགས་ནི༔ ཨཱོཾ་བཛྲ་ཀྲོ་ཏ་རཀྴ་དམ་སྲི་སྲོག་ལ་ཧུར་ཐུམས་རྦད༔ ཅེས་བཏབ་ནས་རྡོ་རྗེ་དཀྲི་ལ༔ རྡོ་རྗེ་ལྕགས་སྲེག་གི་ཕུར་པ་མེ་ལྕེ་ལྷབ་ལྷབ་འབར་བ་ཞིག་ཏུ་གྱུར་པར་བསྒོམ༔ སྐབས་སུ་གཏུམ་མོའི་མེ་དམིགས་ཀྱི་ངང་ནས་སྤྱི་བོ་མ་གཏོགས་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་འུར་འུར་འབར་བས༔ གནོད་པར་བྱེད་པའི་གདོན་བགེགས་ཐམས་ཅད་ཐུལ་ཐུལ་བསྲེགས་པར་བསྒོམ༔ རླུང་རོ་དབྱུང་བའི་ཚེ༔ གདོན་བགེགས་གང་ཡིན་པ་དེ་མཐའི་ལྕགས་རིའི་རྒྱབ་ཏུ་གཏོར་བར་དམིགས་པས་ཀྱང་སེལ་ལོ༔ ཡང་གསང་རྡོར་བཀྲུས་པའི་དྲི་ཆུས་ཟན་སྦྲུས་ཤིང་དབང་པོའི་རྡོ་རྗེ་གསུམ་བཅོས་ཏེ་ཁྱི་དཀར་ནག་ཁྲ་གསུམ་ལ་བྱིན་པས་ལོ་གསུམ་བསྲུང་ནུས་སོ༔ ཐིག་ལེ་ནད་ཀྱིས་འཛག་པ་ནི༔ རྡོ་རྗེ་ལས་སུ་མི་རུང་ཞིང་རང་བཞིན་ནུ་རུ་རུ་འབྱུང་བ་དང༔ དྲི་ཆུ་དང་བསྡོངས་ནས་འབབ་པ་ལ་སོགས་བཅོས་ཐབས་ནི༔ འཛིན་འདྲེན་དགྲམ་པའི་འཕྲུལ་འཁོར་ལ་ནན་ཏན་བསྐྱེད༔ སྨན་ལ་རྒྱ་ཚྭ༔ ཨ་འབྲས༔ འཇམ་འབྲས༔ སྲ་འབྲས༔ གསེར་གྱི་བྱེ་མ༔ སྡིག་སྲིན༔ སེ་འབྲུ༔ སུག་སྨེ༔ གཱི་ཝཾ༔ སྔོ་བྲེ་ག༔ པི་པི་ལིང༔ དོམ་མཁྲིས་རྣམས་བུ་རམ་སྦྱར་ལ་ལན་མང་དུ་བཏང༔ ཟས་གོས་དྲོད་བཅུད་བརྟེན༔ རླན་ལ་འཛེམ༔ སྐབས་སུ་བཀུ་མཉེ་བྱས་ན་ཕན༔ དེས་ཀྱང་མ་ཐུབ་ན༔ རང་གི་གྲུ་མོས་སླེབ་པའི་མཁལ་ཁུང་གཉིས་དང༔ ཨ་འདངས་བཅུ་དགུ་པའི་གཡས་གཡོན་ཚོན་རེ་གཞལ་བའི་སར༔ མེ་བཙའ་བཞག་པས་སེལ་བར་འགྱུར་རོ༔ ཐིག་ལེ་ཁམས་འཁྲུགས་པས་འཛག་པ་ནི༔ ལྗིད་ཅན་པང་ཁུར་བྱས་པའམ༔ བརྡབ་པའམ༔ དྲག་ལས་སམ༔ བུད་མེད་ལ་སྤྱོད་དྲགས་པའི་དབང་གིས༔ གསང་སྦུབས་གཟེར་ཞིང་ཚ་བ༔ དྲི་ཆུའི་ཁམས་ཀྱི་ནང་དུ་ཁྲག་དང་འདྲེས་མར་འབྱུང༔ དམིགས་པ་དང་འཕྲུལ་འཁོར་གྱིས་ནད་སེལ་བ་དཀའ་བས༔ སྨན་ནི༔ ཨ་བར་སྐྱུར་གསུམ༔ ཙོད༔ འབྲི་མོག༔ སྙ་ལོ༔ ཞུ་མཁན༔ ལྕམ་པ༔ གཟེ་མ༔ ལི་ག་དུར་རྣམས་ཀྱི་ཐང་ནད་ཚབས་དང་བསྟུན་ལ་གསུམ་ལྔ་བདུན་གྱི་གཏང་ལུགས་བྱ༔ དེ་རྗེས་ཕྱུགས་ཆེ་ཆུང་གི་སྲེ་ལོང་དང་རྟའི་ཉ་གཞུག་གི་ཐང་བཏང༔ དེ་ནས་ཨ་རུ་ར་གསེར་མདོག༔ གཡག་རྒོད་མཁྲིས་པ༔ སྙ་ལོ་མེ་ཏོག༔ སྔོ་བྲེ་ག༔ བྲག་ཞུན༔ ཛཱ་ཏི་རྣམས་བུར་སྦྲང་དང་སྦྱར་བའི་སྨན་མར་བཏང༔ ཤ་རུལ་དང་ཆང་སྐྱུར་ལ་སོགས་ཁམས་ལ་གནོད་པའི་ཟས་སྤོང༔ ལུས་ངག་ཡིད་གསུམ་ཟོ་ཀློད་ལ་མཉམ་པར་བཞག་པས་སེལ་ལོ༔ ཐིག་ལེའི་རྩ་སྒོ་ཀློད་པས་འཛག་པ་ནི༔ ཆགས་པ་གཡོ་བའི་རྐྱེན་ཅུང་ཟད་ཙམ་ལ་བརྟེན་ནས༔ གསང་རྡོར་ལས་སུ་མི་རུང་དུས་ཀྱང་བདེ་བ་དང་བཅས་ཏེ་འབབ༔ དེས་ལུས་ལ་ནད་རྐྱེན་མང༔ སྐྲ་དཀར་དང་གཉེར་མ་ལ་སོགས་འབྱུང་སྟེ༔ འདི་ཡང་འཕྲུལ་འཁོར་དང་དམིགས་པས་སེལ་བར་དཀའ་ལ༔ སྨན་གྱིས་བཅོས་ཐབས་ནི༔ ཕོ་མོ་རང་མཐུན་གྱི་ཅོང་ཞི་བསྲེ་པ་བ་འོར་བཏུལ་བ་དང༔ དབང་ལག་འོ་མར་བཙོས་པའི་ཆ་མཉམ་གྱི་འདེ་གུར༔ དོམ༔ ཕྱི་བ༔ བྱ་རྒོད༔ སྤྲེའུ༔ འབྲོང༔ ཉ་རྣམས་ཀྱི་མཁྲིས་པ༔ ཨ་རུ་གསེར་མདོག༔ གི་ཝཾ་རྣམས་ལེགས་པར་བཏུལ་ལ་རིལ་བུ་སྲན་མ་ཙམ་དུ་བསྒྲིལ་ནས་གྲིབ་སྐམ་བྱ༔ ནངས་ནུབ་རིལ་བུ་གསུམ་གསུམ་ཟླ་རེར་བརྟེན་ནས་ལོ་རེ་ཐུབ༔ ལོ་གཅིག་བརྟེན་ན་དེའི་གེགས་སེལ་བར་འགྱུར་རོ༔ གཡེར་མ་ལྕམ་པ་ཟྭ་ལ་སོགས་པའི་རྩ་སྒོ་འབྱེད་པར་འགྱུར་བའི་རིགས་རྣམས་སྤངས་ཤིང༔ ཚངས་པར་སྤྱོད་པའི་སྤྱོད་པ་ལ་གནས་པར་གལ་ཆེའོ༔ གེགས་སེལ་འདི་ནི༔ ཉམས་ལེན་ལ་མཁས་ཤིང་གོམ་པས་ཆུ་བོ་དལ་ལ་འབབ་པ་ལྟ་བུའི་སྐྱེས་བུ་ཡང་རབ་འགའ་ལ་མི་དགོས༔ དེ་མ་ཡིན་གྱི་བློ་རབ་འབྲིང་ཐ་མའི་རིགས་གང་ལའང་ཉེ་བར་མཁོ་བའི་གདམས་པ་ཟབ་མོ་འདི་ནི༔ ཡིད་བཞིན་གྱི་ནོར་བུ་ལས་ཀྱང་གཅེས་པར་ཟུངས་ལ་རྟོག་དཔྱོད་མཛོད་ཅིག༔ ས་མ་ཡ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་གནས་ཆེན་རྡོ་རྗེ་ཡོངས་རྫོང་ནས་དངོས་གྲུབ་རྙེད་པ་ཨི་ཐི། བཀྲ་ཤིས།། །། ྈ རྩ་རླུང་མཁའ་འགྲོའི་གསང་མཛོད་ལས༔ ལས་ཚོགས་གཏེར་གྱི་ཕྲེང་བ་བཞུགས་སོ༔ ྈྈྈ བདེ་སྟོང་ཟག་མེད་དབྱིངས་ཉིད་ཡེ་ཤེས་ཆེན་པོའི་ཀློང༔ ཁྱབ་བདལ་ཟུང་འཇུག་འཁོར་འདས་ཡོངས་ཀྱི་སྤྱི་མེས་དཔལ༔ སྨིན་གྲོལ་རབ་འབྱམས་ངེས་གསང་དོན་གྱི་བདག་ཉིད་མཆོག༔ ཆེ་བའི་ཡོན་ཏན་ཀུན་རྫོགས་དེ་ལ་བདག་འདུད་དོ༔ གསང་སེམས་བླ་མེད་སྙིང་པོའི་བཅུད་བཟང་ངེས་ཕྱུང་བའི༔ ཟབ་ལམ་ཌཱ་ཀིའི་གསང་མཛོད་བསྡུས་པའི་མདོ་འགག་ལས༔ གང་འདོད་ཕུན་ཚོགས་འབྱུང་བ་རླུང་གི་ལས་ཚོགས་འདི༔ མ་འོངས་རླུང་སེམས་ཉམས་ལེན་རྣལ་འབྱོར་སྙིང་ནོར་ཡིན༔ ས་མ་ཡ༔ རྒྱ་རྒྱ་རྒྱ༔ འདིར་ཟབ་ལམ་མཁའ་འགྲོའི་གསང་མཛོད་ཉམས་སུ་ལེན་པའི་རྣལ་འབྱོར་གྱིས༔ གང་དགོས་འགྲུབ་བྱེད་ལས་ཚོགས་གཏེར་གྱི་ཕྲེང་བ་བསྟན་པ་ལ༔ གཏུམ་མོ་ཟས་སུ་བཟའ་བར་འདོད་ན༔ ཁ་ཡི་ནང་དུ་དབུགས་ཧ་སིབ་ཀྱི་སྒྲས་དྲངས་ཏེ་རླུང་དེ་ཡེ་ཤེས་ཀྱི་བདུད་རྩིར་གྱུར་ནས༔ ལུས་ཐམས་ཅད་མེར་གྱིས་ཁེངས་པར་བསམས་ལ་རླུང་ཅི་ཐུབ་བར་བསྐྱིལ༔ བསྐྱིལ་བའི་ཚེ་མི་རྟོག་པའི་ངང་ལ་བཞག༔ དེ་ལྟར་ཡང་ཡང་སྦྱངས་པས་ཟས་ཀྱི་སྲེད་པ་ཆུང་དུ་འགྲོ་ཞིང་མཐར་རླུང་གི་ཏིང་ངེ་འཛིན་གྱིས་འཚོ་བར་འགྱུར་རོ༔ ྀཨཚ༔ གཏུམ་མོ་སྐོམ་དུ་འཐུང་བར་འདོད་ན༔ རླུང་བུམ་པ་ཅན་འཛིན་ཞིང་ཆུ་ལས་གྲུབ་པའི་དཔའ་བོ་མཁའ་འགྲོ་རྣམས་ཀྱི་ཐུགས་བཅུད་ཡེ་ཤེས་ཆུ་བོ་དཔག་ཏུ་མེད་པར་བྱུང་ནས༔ རང་ལུས་རྩ་ཁམས་ཐམས་ཅད་མེར་གྱིས་ཁེངས་པར་བསམས་པས་སྐོམ་པའི་གདུང་བ་སེལ་ལོ༔ གཏུམ་མོ་ཟས་སུ་ཟ་བ་དང་སྐོམ་དུ་འཐུང་བ་འདི་གཉིས་ཀྱི་གནད་ནི༔ མཉམ་གཞག་གི་ངོས་ནས་གཞན་གྱི་འཕྲུལ་འཁོར་གཡོ་འགུལ་རྣམས་སྤངས་ཏེ་རླུང་དང་དམིགས་པ་ལ་ནན་ཏན་བསྐྱེད༔ དེ་ལྟར་འབད་པས་རབ་ཞག་གསུམ་འབྲིང་དྲུག་ཐ་མ་དགུ་ནས༔ བདེ་སྟོང་ཡེ་ཤེས་ཟག་པ་མེད་པའི་ཟས་སྐོམ་གྱིས་ལུས་ཁེངས་པར་འགྱུར་རོ༔ ཕྱིས་སུ་བཀྲེས་སྐོམ་ནམ་བྱུང་བའི་ཚེ་ན་དྲན་པ་ཙམ་གྱིས་ཆོག༔ ྀཨཚ༔ རྐང་མགྱོག་ཐོབ་པར་འདོད་ན༔ སྟེང་འོག་གི་རླུང་ཁ་སྦྱོར་རན་ཙམ་དུ་བཟུང་ལ༔ རྐང་ཞབས་གཉིས་སུ་ཡཾ་ལས་རླུང་གི་དཀྱིལ་འཁོར་འདེགས་ཤིང་འགྲོ་བར་བསམ༔ སྲིན་ལག་གི་འཕར་རྩ་མཐེ་བོང་གཉིས་ཀྱིས་མནན་ནས་གོམ་ཟོ་ཡང་བར་འགྲོ༔ ངལ་གསོ་དུས་མ་གཏོགས་རླུང་རོ་གཏིང་འདོན་མི་བྱ༔ དེས་ནི་གཞན་ལས་དགུ་འགྱུར་གྱིས་མགྱོགས་ཏེ་བྱ་རྒོད་ཀྱི་ཉིན་ལམ་རེ་ཆོད་པ་ཡོད་དོ༔ ྀཨཚ༔ ཆུས་མི་བྱིངས་པར་འདོད་ན༔ རྐང་ལག་གི་མཐིལ་དང་འོག་སྒོ་རྣམས་སུ་ཉ་སྲམ་དང་ངང་པའི་ཚིལ་བྱུག༔ བདག་ཉིད་ངང་པའི་རྒྱལ་པོར་དམིགས་ནས་རླུང་བུམ་པ་ཅན་གཟུང༔ ལག་གཉིས་ལྡིང་གཤོག་གི་ཚུལ་དང་ལྡན་པས་ཐེ་ཚོམ་མེད་པར་ཕྱིན་ན་ཆུ་ལ་བརྒལ་ནུས་སོ༔ ྀཨཚ༔ མཁའ་ལ་འཕུར་འདོད་ན༔ ལུས་ལ་བྱ་རྒོད་ཀྱི་རྐང་ཚིལ་བྱུགས་ནས༔ བདག་ཉིད་རླུང་ལས་གྲུབ་པའི་བྱ་རྒོད་རླུང་གི་གཤོག་པ་ཅན་དུ་དམིགས་ལ༔ ལག་གཉིས་འཕུར་སྟབས་དང་བཅས་པའི་འཇམ་རླུང་བཟུང་ན་འཕུར་ནུས་སོ༔ ྀཨཚ༔ ལུས་མི་སྣང་བར་འདོད་ན་སྐྱེས་པ་དར་མའི་རྡོ་ཐལ་དང་ཐལ་ཆེན་སྨིན་མཚམས་སུ་བྱུག༔ ལུས་གནད་ཆོས་བདུན་གྱི་ངང་ནས༔ སྣོད་བཅུད་རང་ལུས་དང་བཅས་པ་དམིགས་མེད་སྟོང་པ་ཆེན་པོའི་ངང་མཉམ་པར་བཞག་ཅིང༔ རླུང་རིག་སྒྲ་གཅན་གྱི་ནང་དུ་གཏད་ན་ལུས་གཞན་གྱིས་སྣང་བར་མི་འགྱུར་རོ༔ ྀཨཚ༔ གཟུགས་མེད་ཀྱི་ལྷ་འདྲེ་དང་བར་དོའི་སེམས་ཅན་ལ་བལྟ་བར་འདོད་ན༔ རང་གི་དཔྲལ་བར་སྣང་སྲིད་ཐམས་ཅད་མཐོང་བའི་ཡེ་ཤེས་ཀྱི་སྤྱན་གཅིག་ཁྲ་ལམ་གྱིས་ཤར་བར་བསྒོམས་ལ་རླུང་རིག་མདུང་ཚུགས་སུ་གཏད༔ ལག་གཉིས་བསྣོལ་བའི་དཔུང་རྩ་གཉིས་བཅིངས་ཏེ་རླུང་བཟུང་བས༔ རླུང་ཁུག་ཉེར་གཅིག་གི་མཐོང་བར་ནུས་སོ༔ ྀཨཚ༔ ཤེས་རབ་འཕེལ་བར་འདོད་ན༔ རང་ལུས་མེ་ཏོག་ཨུཏྤལ་དཀར་པོ་བཞད་པའི་དབུས་སུ་རླུང་སེམས་ཀྱི་ངོ་བོ་འཇམ་པའི་དབྱངས་སུ་བསྐྱེད༔ ལུས་གནད་ཕྱེད་སྐྱིལ་དུ་བཅའ་ལ་རླུང་བཟུང་བས་ཤེས་རབ་དཔག་ཏུ་མེད་པ་འཕེལ་ལོ༔ ྀཨཚ༔ སྙན་གྲགས་ཐོབ་པར་འདོད་ན༔ བདག་ཉིད་ལྷ་ཡི་གཎྜི་རླུང་སེམས་ཀྱི་སྒྲ་དབྱངས་གྲགས་པ་ཞིག་བསྒོམ་སྟེ༔ དྲང་སྲོང་ཙོག་པུའི་འདུག་སྟངས་ཀྱིས་རླུང་བཟུང་ན་སྙན་གྲགས་འཐོབ་བོ༔ ྀཨཚ༔ གདོས་བཅས་ལ་ཐོགས་མེད་དུ་འགྲོ་བར་འདོད་ན༔ རང་ལུས་གདོས་བཅས་སུ་མི་སྣང་བར་ནམ་མཁའ་ལྟ་བུར་བསྐྱེད་ཅིང་སྣང་བའི་དངོས་པོ་ཐམས་ཅད་སྒྱུ་མའམ་སྨིག་རྒྱུའི་རང་བཞིན་མོས་ལ༔ རླུང་སེམས་མདུང་ཚུགས་སུ་གཏད་ཅིང་ཐེ་ཚོམ་མེད་པར་ཕྱིན་པས་དངོས་པོ་གང་ལའང་ཐོགས་མེད་དུ་འགྲོ་ནུས་སོ༔ ྀཨཚ༔ ཉི་ཟླ་རྟོད་ལ་མནན་པར་འདོད་ན༔ ལུས་གནད་ཕྱེད་སྐྱིལ་བཅས་ཏེ་ལག་གཡོན་གཡས་ཀྱི་མཆན་ཁུང་དུ་བཅུག༔ གཡས་ཀྱི་སྡིགས་མཛུབ་ཉི་མ་ལ་གཏད་དེ༔ རླུང་སེམས་རོ་མའི་ནང་དུ་གཟིར་བས་ནང་གི་ཉི་མ་བཙོན་དུ་ཟིན་ཚེ་ཕྱི་རོལ་གྱི་ཉི་མ་ཡང་རྟོད་ལ་ནོན་པར་འགྱུར༔ ཟླ་བ་ལ་ཡང་གོང་གི་དམིགས་པ་དང་འཕྲུལ་འཁོར་གོ་བཟློག་པར་ཤེས་སོ༔ ྀཨཚ༔ ཆུ་བོ་གྱེན་དུ་བཟློག་པར་འདོད་ན༔ འཇམ་རླུང་དྲག་ཏུ་བཟུང་ནས་རླུང་སེམས་དབུ་མའི་ནང་དུ་གཏད་ཅིང་ཆུ་དེ་ལ་སྡིགས་མཛུབ་བྱས་པས༔ ནང་གི་ཆུ་ཐམས་ཅད་དབུ་མར་འཁྱིལ་ནས་རྒྱུ་བ་ཆད་པའི་ཚེ༔ ཕྱི་རོལ་གྱི་ཆུ་བོ་ཡང་གྱེན་ལ་ཟློག་ནུས་སོ༔ ྀཨཚ༔ འབྱུང་བ་ཟིལ་གྱིས་གནོན་པར་འདོད་ན༔ མེ་གནོན་ན་མེའི་སྟེང་དུ་རང་ཉིད་ཆུ༔ དེ་བཞིན་དུ་ཆུ་གནོན་ན་ས༔ ཤིང་གནོན་ན་ལྕགས༔ ལྕགས་གནོན་ན་མེ༔ རླུང་གནོན་ན་རང་ཉིད་གསེར་གྱི་རི་རབ་འོག་ཏུ་རླུང་དང་རླུང་ལྷ་ཐམས་ཅད་གནོན་པར་དམིགས་ལ༔ རླུང་ཕོ་བར་ཚུར་ཆིལ་གྱིས་མནན༔ ལུས་གཡོ་འགུལ་མེད་པར་སྡོད་པས་ནོན་ནོ༔ ྀཨཚ༔ རླུང་སོར་མོར་དྲང་བར་འདོད་ན༔ ལུས་ཀྱི་རྩ་འཁོར་ཐམས་ཅད་སྦུ་གུ་རོག་གེར་ཡོད་པར་བསམས་ལ༔ ལག་པ་དྲག་ཏུ་བརྐྱང་ཞིར་སོར་མོ་རྣམས་བགྲད་ནས༔ རླུང་རིག་མགྲིན་པའི་རྩ་འཁོར་ནས་ཕྱག་སོར་དུ་གཏད་པས་རླུང་སོར་མོ་རུ་དྲངས་པར་ནུས་སོ༔ ྀཨཚ༔ ཆར་དབབ་པར་འདོད་ན༔ ཆ་ལུགས་ལྔ་ལྡན་གྱི་ངང་ནས་ཆུ་རླུང་བུམ་པ་ཅན་བཟུང་ལ༔ ཀླུ་ཐམས་ཅད་བདག་གི་ལྟོ་བ་རྒྱ་མཚོ་ཆེན་པོར་གྱུར་པའི་ནང་དུ་བཀུག་ནས༔ དམིགས་བྱའི་ཞིང་དུ་ཆར་འབེབ་པ་ལ་དམིགས་པ་དྲག་ཏུ་གཏད་པས་འབེབ་པར་འགྱུར་རོ༔ ྀཨཚ༔ ཁ་ཆར་གཅོད་པར་འདོད་ན༔ རང་ཉིད་མེའི་བྱ་ཁྱུང་དུ་དམིགས་ལ་རླུང་གཟུང་བ་ཙམ་གྱིས་ཁ་ཆར་ཐམས་ཅད་ཁྱུང་གི་ལྟོ་བར་ཚུད་ཅིང༔ སྣང་སྲིད་ཐམས་ཅད་མེའི་རང་བཞིན་དུ་གྱུར་པར་བསམས་ལ་ཁ་ཆར་འབྱུང་ཕྱོགས་སུ་དམིགས་པ་གཟིར༔ སྦལ་སྦྲུལ་གྱི་ཤ་དང་དུག་ཤིང་མེ་ལ་བསྲེགས་ན་ཁ་ཆར་ཆད་དོ༔ ྀཨཚ༔ ཐོག་སེར་བཟློག་པར་འདོད་ན༔ རང་ལུས་གསེར་གྱི་ཐོག་ཆེན་རྩེ་དགུ་པ་གཅིག་ཏུ་གྱུར་ནས༔ ཐོག་སེར་དང་ཐོག་སེར་གྱི་བདག་པོ་ཐམས་ཅད་ཐལ་བ་རྡུལ་དུ་བརླག་པར་བསམས་ལ་རླུང་རིག་ཕུར་ཚུགས་སུ་གཏད་ཅིང་སྡིགས་མཛུབ་གདེངས༔ རྩངས་ཕག་ཤའི་དུད་པ་བཏང་ན་ཐོག་སེར་བཟློག་གོ༔ ྀཨཚ༔ གཞན་སྣང་ཟིལ་གྱིས་གནོན་པར་འདོད་ན༔ རང་ཉིད་འཁོར་ལོས་བསྒྱུར་བའི་རྒྱལ་པོར་དམིགས་ནས༔ སྣང་སྲིད་ཐམས་ཅད་བདག་གིས་ཟིལ་གྱིས་གནོན་པར་བསམ་ཞིང༔ རིག་པ་ངར་ཕྱུང༔ དབང་པོ་ལ་གཟེངས་བསྟོད༔ ཕ་རོལ་དེ་ལ་མིག་ཕུར་ཚུགས་སུ་གཏད་ནས་བཟུང་བས་ཟིལ་གྱིས་གནོན་པར་འགྱུར་རོ༔ ྀཨཚ༔ འགྲོ་བ་དབང་དུ་བསྡུ་བར་འདོད་ན༔ བདག་ཉིད་འགུག་བྱེད་མཁའ་འགྲོ་མ་དམར་མོ་ལྕགས་ཀྱུ་བསྣམས་པ་ཞིག་ཏུ་གྱུར་ནས༔ རླུང་རྔུབ་པའི་ཚེ་དམིགས་བྱ་གང་ཡིན་པ་དེའི་རྣམ་ཤེས་ནྲྀའི་རྣམ་པ་ཅན་དུ་རང་དབང་མེད་པར་བཀུག་ནས༔ དབུ་མའི་ནང་དུ་ཚུད་དེ་བདག་གིས་ཅི་འདོད་དབང་དུ་གྱུར་པར་མོས་ན་དབང་དུ་འགྱུར་རོ༔ ྀཨཚ༔ ཚེ་འདས་རྣམ་ཤེས་བཀུག་པར་འདོད་ན༔ ལུས་གནད་བདུན་དང་ལྡན་པའི་ངང་ནས༔ རང་ཉིད་རྫོགས་པའི་སངས་རྒྱས་བསྒོམས་ལ་སྙིང་རྗེ་ཆེན་པོ་བསྐྱེད་ཅིང༔ རླུང་འབྱིན་པའི་ཚེ་འོད་ཟེར་ལྕགས་ཀྱུ་ལྟ་བུར་འཕྲོས༔ འཇུག་པའི་ཚེ་ཚེ་འདས་ཀྱི་རྣམ་ཤེས་རང་དབང་མེད་པར་བཀུག༔ གནས་པའི་ཚེ་དམིགས་རྟེན་གང་ཡིན་པ་ལ་བསྟིམ་ཞིང༔ རླུང་སེམས་དྲག་ཏུ་གཏད་པས་ཁུག་པར་འགྱུར་རོ༔ ྀཨཚ༔ མི་རྒོད་དང་ཇག་པ་འཆིང་བར་འདོད་ན༔ མཐེ་བོང་གིས་སྲིན་ལག་མནན་ལ་མི་རྒོད་དང་ཇག་པ་ཐམས་ཅད་སྲིན་ལག་ལྕགས་ཀྱི་ཁང་པར་ཚུད་པར་དམིགས་ཤིང༔ ཁུ་ཚུར་མཆན་འོག་ཏུ་བཙིར་ཞིང་རླུང་བཟུང་བས་ཇག་རྐུན་འཆིང་ནུས་སོ༔ ྀཨཚ༔ བྱད་དང་རིག་སྔགས་བཟློག་པར་འདོད་ན༔ རང་ཉིད་ཁྲོ་བོ་ཆེན་པོ་སྲིད་པའི་རྩེ་མོར་སླེབ་པ་ཞིག་བསྒོམས་ལ༔ རླུང་ནང་དུ་འཇུག་པའི་ཚེ་བྱད་མ་ལྷ་སྲུང་དང་བཅས་པ་བཀུག་ནས་རང་གི་ལྟོ་བར་ཚུད༔ གནས་པའི་ཚེ་ཕོ་བ་སྤུ་གྲིའི་འཁོར་ལོ་རུ་གྱུར་པས་དུམ་བུར་གཏུབ༔ འབྱིན་པའི་ཚེ་ལྷག་མ་མ་ལུས་པ་མཐའི་ལྕགས་རིའི་རྒྱབ་ཏུ་གཏོར་བར་དམིགས་ན༔ བྱད་དང་རྦོད་གཏོང་གི་རིགས་ཐམས་ཅད་བཟློག་སྟེ་གནོད་བྱེད་གཞན་ཡང་དེ་ལྟར་བྱས་པས་ཐུལ་ལོ༔ ྀཨཚ༔ དུག་གིས་མི་ཚུགས་པར་འདོད་ན༔ ནངས་པར་ཟས་མ་ཟོས་གོང་དུ་རང་གི་དྲི་ཆུ་ཐིག་གཅིག་ལྕེ་ཐོག་ཏུ་བཞག་ནས་རླུང་ཁུག་གཅིག་གཟུང་སྟེ༔ ལུས་རྨ་བྱའི་འདྲངས་སྤྲུག་ལན་གསུམ་བྱས་ནས་བཟའ་བཏུང་ལ་ལོངས་སྤྱོད་པས་དུག་གིས་མི་ཚུགས་སོ༔ ྀཨཚ༔ འགོས་ནད་བསྲུང་བར་འདོད་ན༔ ཨ་རུ༔ གླ་རྩི༔ ག་པུར༔ ཙནྡན་རྣམས་ཀྱི་ཆུས་བྱུག་སྟེ༔ ཐེ་ཚོམ་དང་འཁུ་འཕྲིག་མེད་པར་རླུང་སྣ་བུག་གཡས་ནས་འཇུག་ཚེ་ནད་དང་ནད་ཀྱི་བདག་པོ་ཐམས་ཅད་འུབ་ཀྱིས་བསྡུས་ནས་རང་སེམས་ལ་བསྟིམ་ཞིང་གནས་པའི་ཚེ་སེམས་ཀྱི་ངོ་བོ་ལ་བལྟ༔ སྣ་བུག་གཡོན་ནས་འབྱིན་པའི་ཚེ་ནད་གདོན་གྱི་ངོ་བོ་ཐམས་ཅད་འཇའ་ཚོན་གྱི་རྣམ་པར་སངས་ཀྱིས་བུས་ལ༔ ལུས་ལན་གསུམ་སྤྲུགས་ན་ནད་རིགས་ཀྱིས་མི་ཚུགས་པར་འགྱུར་རོ༔ ྀཨཚ༔ གདོན་གྱིས་མི་ཐུབ་པར་འདོད་ན༔ རང་ལུས་གསེར་གྱི་རྡོ་རྗེ་རྩེ་ལྔ་པ་མེའི་འོད་ཟེར་འཕྲོ་བ་ཞིག་བསྒོམས་ནས་ངོ་ཐོག་ཏུ་འཇོག་ལ་དྲག་རླུང་བཟུང་ན༔ གདོན་བགེགས་ཀྱི་རིགས་ཇི་ལྟར་སྟོབས་ཆེ་ཡང་རང་ལ་གླག་མི་རྙེད་དོ༔ ྀཨཚ༔ གཅན་གཟན་དང་མཚོན་གྱིས་མི་ཚུགས་པར་འདོད་ན༔ རང་ལུས་རྡོ་རྗེ་ཕ་ལམ་དུ་གྱུར་པར་དམིགས་ལ་གནོད་ཕྱོགས་སུ་སྡིགས་མཛུབ་གཏད་ནས༔ རླུང་དྲག་ཏུ་གཅུན་པས་གཅན་གཟན་དང་མཚོན་གྱིས་མི་ཕིགས་སོ༔ ྀཨཚ༔ ཚེ་བསྲིང་བར་འདོད་ན༔ ལུས་གནད་སྐྱིལ་ཀྲུང་མཉམ་གཞག་གི་ངང་ནས་རང་ལུས་གསེར་གྱི་རྡོ་རྗེ་སྲིད་པའི་རྩེ་ནས་དམྱལ་བའི་གདར་ཐུག་པ་ཞིག་བསྒོམ༔ དེའི་ལྟེ་བར་རླུང་སེམས་ཀྱི་ངོ་བོ་ཡི་གེ་ཧྲཱིཿདམར་པོ་འོད་ཟེར་འཕྲོ་བ་གཅིག་བསྐྱེད་ལ༔ རླུང་འབྱིན་པའི་ཚེ་ཧྲཱིཿལས་འོད་ཟེར་དཔག་ཏུ་མེད་པར་འཕྲོས༔ འཇུག་པའི་ཚེ་ཡེ་ཤེས་དང་འཇིག་རྟེན་པའི་ཚེ་བཀྲག་བཅུད་མདངས་ཐམས་ཅད་བཀུག་ནས་ཧྲཱིཿལ་ཐིམ༔ གནས་པའི་ཚེ་ཧྲཱིཿའོད་ཟེར་དུ་འབར་བར་བསམ་ཞིང་བུམ་པ་ཅན་བཟུང་ན་ཚེ་རིང་བར་འགྱུར་རོ༔ ྀཨཚ༔ དགྲ་བོ་གསོད་པར་འདོད་ན༔ ལུས་གནད་འདོར་སྟབས་སུ་བགྲད་པའི་ངོས་ནས་བདག་ཉིད་ལས་ཀྱི་གཤིན་རྗེར་བསྒོམ༔ རླུང་ལྕགས་ཀྱུ་ཅན་གྱི་འབྱིན་འཇུག་བྱས་ཏེ༔ དམིགས་བྱའི་རྣམ་ཤེས་ཀྱི་ངོ་བོ་ཡི་གེ་ནྲིའི་རྣམ་པ་ཅན་དུ་བཀུག་ནས་ཞལ་དུ་བསྟིམ་སྟེ་ལྟོ་རུ་ཚུད་པར་དམིགས་ན༔ ཕ་རོལ་གྱི་ཚེ་ཕྲོགས་ནས་རང་ཉིད་ཚེ་འཕེལ་བར་ངེས་སོ༔ ྀཨཚ༔ མཐུན་གཉིས་དབྱེ་བར་འདོད་ན༔ རང་ཉིད་ཕྲ་མེན་གྱི་རྒྱལ་པོར་བསྒོམས་པའི་མདུན་དུ་དམིགས་བྱ་གཉིས་རྒྱབ་སྤྲོད་དུ་གནས་པ༔ དེ་གཉིས་གཅིག་གི་སྙིང་ཁར་ཕོ་རོག་གཅིག་གི་སྙིང་གར་འུག་པ་བསྐྱེད་ལ༔ དམིགས་པ་ཟིན་ནས་རླུང་འཇུག་པ་དང་མཉམ་དུ་དམིགས་བྱ་གཉིས་འུབ་ཀྱི་བསྡུས་ནས་དབུ་མར་ཞུགས༔ གནས་པའི་ཚེ་སྙིང་གར་རྒྱབ་སྤྲོད་དུ་ཡོད་པར་བསམ༔ འབྱིན་པའི་ཚེ་སོ་སོར་ཐར་གྱིས་གཏོར་ནས་བསྐལ་པའི་བར་དུ་མི་འཕྲད་པར་དམིགས་ལ༔ རྐང་ལག་བཞི་འཕྲ་བྱ་བ་ལན་ཉེར་གཅིག་གིས་དབྱེ་བར་ནུས་སོ༔ ྀཨཚ༔ ཉེས་བྱེད་ཡུལ་ནས་དབྱུང་བར་འདོད་ན༔ བདག་གི་རླུང་གི་དཀྱིལ་འཁོར་བསྐྱེད་པའི་མདུན་དུ༔ དམིགས་བྱ་རླུང་གི་རྔ་མོ་སྔོན་པོ་ལ་ཞོན་ནས་རླུང་གིས་ཡེང་ཡེང་བཀྱགས་པ་ལ་སེམས་གཏད་ཅིང་རླུང་གཟུང༔ འབྱིན་པའི་ཚེ་རླུང་གིས་རང་དབང་མེད་པར་བསྐྱོད་དེ་མཐའི་མུན་པར་དམིགས༔ དེ་འདྲ་གཅིག་གིས་ཡུལ་གཞན་དུ་སྐྲོད་པར་བྱེད་དོ༔ ྀཨཚ༔ དམིགས་བྱའི་མཁར་ཁང་བསྒྱེལ་བར་འདོད་ན༔ ལུས་གནད་མཉམ་པར་བཞག་ཅིང་རང་ལུས་རི་ཡི་རྒྱལ་པོ་རི་རབ་ཙམ་དམིགས་ནས༔ རླུང་འཇུག་པའི་ཚེ་ལྟོ་བ་ཐམས་ཅད་རླུང་གིས་མེར་གྱིས་ཁེངས༔ འབྱིན་པའི་ཚེ་དུས་མཐའི་རླུང་ལྟར་སོང་ནས་རྡུལ་ཕྲན་ཙམ་ཡང་མ་ལུས་པར་གཏོར་བར་བསམས་ལ༔ རླུང་རིག་དྲག་ཏུ་གཏད་པས་མཁར་ཁང་བསྒྱེལ་བར་འགྱུར་རོ༔ ྀཨཚ༔ ལོག་འདྲེན་འབྱུང་པོ་བཏུལ་བར་འདོད་ན༔ རང་ལུས་ལྷུན་པོ་ཙམ་དུ་གྱུར་པར་བསམས་ལ༔ རླུང་རྔུབ་པའི་ཚེ་ལྟོ་བ་ཐམས་ཅད་ཡེ་ཤེས་ཀྱི་མེ་ཡིས་གང༔ དགང་ཞིང་གཞིལ་བའི་ཚེ་མེ་སྔར་ལས་འབུམ་འགྱུར་གྱི་ཚ་རུ་སོང༔ འཕངས་པའི་ཚེ་བསྐལ་པའི་མེ་དཔུང་ལྟ་བུར་སོང་ནས༔ གནོད་བྱེད་གང་ཡིན་པ་དེ་བྱ་སྒྲོ་བཞིན་དུ་རག་རག་བསྲེག་པར་དམིགས་ཤིང༔ གནོད་ཕྱོགས་སུ་སྡིགས་མཛུབ་གཏད་པས་ལོག་འདྲེན་གང་ཡང་འདུལ་ངེས་སོ༔ ྀཨཚ༔ དགྲ་བོའི་ལོ་ཏོག་སྐམ་པར་འདོད་ན༔ གཏུམ་མོ་མེ་དམིགས་ཀྱི་ངང་ནས་རླུང་འབྱིན་པའི་ཚེ་སྣང་སྲིད་ཐམས་ཅད་མེའི་རང་བཞིན་དུ་གྱུར༔ ཁྱད་པར་དམིགས་བྱའི་ལོ་ཏོག་ཐམས་ཅད་མེའི་རང་བཞིན་དུ་གྱུར༔ དམིགས་བྱའི་ལོ་ཏོག་ཐམས་ཅད་བསྲེགས་ནས་ཐལ་བ་བུང་བུང་དུ་སོང་བར་བསམས་ལ༔ རླུང་རིག་དྲག་ཏུ་གཏད་པས་དམིགས་བྱའི་ལོ་ཏོག་བསྐམ་པར་འགྱུར་རོ༔ ྀཨཚ༔ དགྲ་ལ་ཆོ་འཕྲུལ་འགྱེད་པར་འདོད་ན༔ རང་ཉིད་ཐན་གྱི་རྐྱལ་པ་ཆེན་པོ་གྱུར་པའི་ངང་ནས་རླུང་ཁོང་དུ་སྐྱིལ་བའི་ཚེ༔ གང་གཏོང་བར་འདོད་པའི་ཐན་དེ་རླུང་ལས་གྲུབ་པས་ཕོ་བ་ཁེངས་ཤིང༔ རླུང་ཕྱིར་འབྱུང་བའི་ཚེ་དམིགས་བྱའི་ཁང་ཁྱིམ་དུ་ལྟས་ངན་སྣ་ཚོགས་ཀྱིས་གང་བར་བསམས་ལ༔ རླུང་སེམས་དྲག་ཏུ་གཟིར་བས་ཉེར་གཅིག་གིས་དགྲ་ལ་ལྟས་ངན་འབྱུང་ངོ༔ ྀཨཚ༔ གནོད་བྱེད་ཆམ་ལ་ཕབ་པར་འདོད་ན༔ དམིགས་བྱ་དེ་ལ་སྙིང་རྗེ་དྲག་པོ་དུང་ངེ་བ་ཞིག་བསྐྱེད༔ དེ་ནས་རླུང་སེམས་ཁོའི་སྲོག་རྩར་གཏད་དེ་ལུས་ངག་ཡིད་གསུམ་རྡུལ་ཕྲན་བཞིན་དུ་སོང་བར་དམིགས་ཤིང༔ ཞག་གསུམ་དུ་རླུང་རྩོལ་ལ་འབད་པས་གནོད་བྱེད་ཆམ་ལ་དབབ་པར་ནུས་སོ༔ ྀཨཚ༔ མན་ངག་ཟབ་མོ་འདི་རྣམས་ནི་རླུང་སེམས་ལ་རང་དབང་ཐོབ་པའི་རྣལ་འབྱོར་པ་ཞིག་གིས་འགྲུབ་པར་འགྱུར་ལ་གཞན་གྱིས་ནི་མ་ཡིན་ནོ༔ ཨ་ཧོ་མན་ངག་ཟབ་མོ་ལས་ཚོགས་གཏེར་གྱི་ཕྲེང༔ གང་གིས་ཉམས་སུ་ལེན་པས་བདེ་བླག་འབྲས་བུ་ནི༔ ལྐོག་འགྱུར་མིན་པར་མངོན་སུམ་ཉིད་དུ་འགྲུབ་བྱེད་འདི༔ མ་འོངས་ལས་དང་སྐལ་བར་ལྡན་པའི་སྙིང་ནོར་བཞག༔ ས་མ་ཡ༔ གཏེར་རྒྱ༔ སྦས་རྒྱ༔ གསང་རྒྱ༔ ཟབ་རྒྱ༔ གཏད་རྒྱ༔ རྒྱ་རྒྱ་རྒྱ༔ བདག་འདྲ་འཇའ་ཚོན་སྙིང་པོས་གཟི་ཤོད་རུ་ལག་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པ་དགེའོ། །བཀྲ་ཤིས།། །། ྈ རྩ་རླུང་མཁའ་འགྲོའི་གསང་མཛོད་ལས༔ བདུད་རྩི་ཆུ་མིག་སྒྲུབ་ཐབས་བཞུགས་སོ༔ ྈྈྈྈྈ སྐུ་གསུམ་ངོ་བོ་ཐུགས་རྗེས་འགྲོ་ཀུན་སྒྲོལ༔ ཕྲིན་ལས་གང་ཡང་ཐོགས་མེད་འགྲུབ་པའི་དཔལ༔ མཆོག་དང་ཐུན་མོང་དངོས་གྲུབ་མ་ལུས་པ༔ མྱུར་བར་སྟེར་བྱེད་རྡོ་རྗེ་ཕག་མོར་འདུད༔ རླུང་སེམས་ཟུང་དུ་འཇུག་པའི་གདམས་པ་ལ༔ རྩེ་གཅིག་ཉམས་ལེན་བྱེད་པའི་རྣལ་འབྱོར་གྱིས༔ ཐུན་མོང་དངོས་གྲུབ་ཕྲིན་ལས་ཟབ་པའི་དོན༔ གཞན་ལ་མ་སྤེལ་ཙིཏྟའི་མཛོད་དུ་ཆོངས༔ ས་མ་ཡ༔ རྒྱ་རྒྱ་རྒྱ༔ འདིར་འབྱུང་བ་ཆུ་ལ་དབང་དུ་སྡུད་ཅིང་གྲུབ་རྟགས་སྟོན་པར་བྱེད་པ་ལ་གསུམ༔ སྔོན་འགྲོ་རྫས་གསག་པ༔ དངོས་གཞི་སྔགས་སྒྲུབ་པ༔ རྗེས་ལས་ལ་སྦྱར་བའོ༔ དང་པོ་སྔོན་འགྲོ་རྫས་གསག་པ་ནི༔ རྒྱ་མཚོ་རྫིང་ཟབ་ཀླུ་གནས་ངེས་པ་དང༔ ཆུ་བོ་ཆེན་པོ་ཀླུ་གནས་ངེས་པ་དང༔ ཆུ་མིག་གཉན་པོ་ཀླུ་གནས་ངེས་པ་གསུམ་གྱི་སྟེང་ནས༔ མེ་དང་ཉི་མ་ནམ་མཁའ་མ་མཐོང་བར༔ ཆུ་སྐྱོགས་ཞགས་པ་ཅན་གྱི་སྦྱོར་བས་ཟླ་བ་ཉ་ལ་བབ་པའི་ཚེ༔ རང་གི་ལག་རྗེན་མིན་པར་དར་རས་སྔོན་པོའམ་དཀར་པོ་དྲི་མ་མེད་པས་ལྕིབས་ནས༔ རྡེལ་འབྲུ་གླ་རིལ་ཙམ་བདུན་བདུན་བླངས་པས་ཉེར་གཅིག་དང༔ འབྱུང་བ་ཆུ་ཡི་འཁོར་ལོ་མུ་ཁྱུད་རིམ་པ་ལྔ་རུ་བསྐོར་བའི་ལྟེ་བར་ཁཾ་ལས༔ འབྱུང་བ་ཆུ་ཐམས་ཅད་དབང་དུ་སྡུས་ལ་འབྱུང་བ་ཆུའི་དངོས་གྲུབ་མྱུར་དུ་སྩོལ་ཅིག༔ ཅེས་བྲི༔ དེ་རྒྱབ་མུ་ཁྱུད་ལ༔ ཨོཾ་བཛྲ་བྷ་ར་ཧི་བཛྲ་ཌཱ་ཀི་ནཱི༔ ཧ་རི་ནི་ས༔ པ་ནི་པ་ཏི༔ སརྦ་སིདྡྷི་ཧཱུྃ་སྭཱ་ཧཱ༔ ཞེས་བྲི༔ དེ་རྒྱབ་རྩིབས་བཞི་ལ་ཁཾ་རེ་བྲི༔ དེ་རྒྱབ་མུ་ཁྱུད་ལ་ཆུ་རིས་བྲི༔ དེ་རྒྱབ་མུ་ཁྱུད་ལ་ཡེ་དྷརྨཱའི་ཤམ་དུ༔ ཨཱོྃ་པ་ནི་པ་ཏི༔ དེ་ཝི་ལོ་ཀ་ཏ་ར༔ སརྦ་སིདྡྷི་ཕ་ལ༔ པཱ་ཤཾ་ཀུ་རུ་ཧཱུྃ་སྭཱ་ཧཱ༔ ཞེས་བྲི༔ དེ་རྣམས་སྦལ་ཤུན་གྱིས་དྲིལ་ཏེ༔ ཉ་ཕྱིས་ཀྱི་ཁོག་པའམ་རུས་སྦལ་གྱི་ཁོག་པར་བཅུག༔ དེ་རྣམས་ལ་ཤ་རྗེན་མེ་ཉི་མ་ལ་སོགས་དྲོད་ཀྱིས་མ་གོས་པར་བྱ༔ དེ་ནས་གཟའ་སྐར་ཆུ་ལ་བབ་པའི་ཚེ༔ སྟེགས་བུ་གཙང་མའི་སྟེང་དུ་མཉྫིའི་ཁར་བཤམས་ལ་དར་སྔོ་ལྗང་གི་ཞལ་ཁེབས་བཀབ༔ མཐའ་སྐོར་དུ་དཀར་མངར་གྱི་མཆོད་པ་བཤམ༔ སྒྲུབ་གནས་སུ་ཀླུ་གནས་པར་ཤིས་སོ༔ གཉིས་པ་དངོས་གཞི་སྔགས་ཀྱི་སྒྲུབ་པ་ནི༔ རླུང་སེམས་ལ་དབང་འབྱོར་པའི་རྣལ་འབྱོར་གྱིས༔ རླུང་འབྱིན་འཇུག་གནས་གསུམ་དམིགས་པ་གཟིར་བ་ཙམ་གྱིས་ལས་འདི་འགྲུབ་པར་འགྱུར་ལ་རྣལ་འབྱོར་འབྲིང་མན་གྱིས་ཀླུའི་མཆོད་གཞུང་གང་རུང་ཞིག་གིས་ཁོག་དབུབ༔ དེར་མཐུན་གྱི་དཀྱིལ་འཁོར་སྟེང་དུ་གོང་གི་རྫས་དེ་བཞག༔ རང་དང་སྒྲུབ་རྫས་ཀྱི་བར་དུ་གཟུངས་ཐག་སྔོན་པོས་སྦྲེལ་ལ༔ ཨོཾ་སྭ་བྷཱ་བ་ཤུདྡྷ་སོགས༔ རང་གཞན་ཐམས་ཅད་སྟོང་པ་ཉིད་དུ་གྱུར༔ སྟོང་པའི་ངང་ལས་རང་ཉིད་རྡོ་རྗེ་ཕག་མོ་སྐུ་མདོག་སྔོན་མོ༔ འཁོར་མཁའ་འགྲོ་སྡེ་ལྔ་དང་བཅས་པ་སྔོན་མོར་གསལ་བའི་ཐུགས་ལས༔ འོད་ཟེར་སྔོན་པོ་ཞིག་ཕར་འཕྲོས༔ མདུན་གྱི་རྫས་ཁོ་ལ་ཕོག་སྟེ་ཡོངས་སུ་གྱུར་པ་ལས༔ བཻ་ཌཱུརྻ་སྔོན་པོ་ལས་གྲུབ་པའི་གཞལ་ཡས་ཁང༔ རྒྱ་ཆེ་ལ་དཔངས་མཐོ་བ༔ ཉམས་དགའ་ལ་ཡིད་དུ་འོང་བའི་དབུས་སུ༔ རྫས་དང་འཁོར་ལོ་ཡང་ཆུའི་ལྷ་མོ་སྐུ་མདོག་སྔོན་པོ༔ ཞལ་གཅིག་ཕྱག་གཉིས༔ གཡས་ཨུཏྤལ་སྔོན་པོ་དང༔ གཡོན་བདུད་རྩིའི་བུམ་པ་འཛིན་པཿ དར་དང་རིན་པོ་ཆེའི་རྒྱན་གྱིས་སྤྲས་པ༔ ཞི་ཞིང་འཛུམ་པའི་རྣམ་པ་ཅན༔ ཞབས་གཉིས་ཟླ་བའི་གདན་ལ་སྐྱིལ་ཀྲུང་དུ་བཞུགས་པ༔ འཁོར་ཀླུ་ཆེན་བརྒྱད་དང༔ ཆུའི་ལྷ་དང་ལྷ་མོ་རྣམས་ཀྱིས་བསྐོར་ཞིང༔ འབྱུང་བ་ཆུའི་དངོས་གྲུབ་སྟེར་བར་བསྐྱེད༔ ཨཱོྃ་པ་ནི་པ་ཏི༔ དེ་ཝི་ལོ་ཀ་ཏ་ར༔ ས་པ་རི་ཝཱ་ར༔ ས་མ་ཡ་ཛ་ཛ༔ ཞེས་པས༔ རང་བཞིན་གྱི་གནས་ནས་ཆུའི་ལྷ་དང་ལྷ་མོ་ཐམས་ཅད་སྤྱན་དྲངས༔ མདུན་དུ་བསྐྱེད་པའི་དམ་ཚིག་པ་ལ་ཐིམ་སྟེ་གཉིས་སུ་མེད་པར་བསམས་ལ༔ ནུབ་མོར༔ ཨོཾ་བཛྲ་བྷ་ར་ཧི༔ བཛྲ་ཌཱ་ཀི་ནཱི༔ ཧ་རི་ནི་ས༔ པ་ནི་པ་ཏི༔ སརྦ་སིདྡྷི་ཧཱུྃ་སྭཱ་ཧཱ༔ ཞེས་བཟླས་པས༔ སྔགས་ཀྱི་འོད་ཟེར་དབྱར་གྱི་སྨུག་ཟིམ་འཐིབ་པ་ལྟར་འཕྲོས་ཤིང༔ གཟུངས་ཐག་གི་རྒྱུད་ལས་ཕར་སོང་བས༔ འཁོར་ལོ་རྫས་བཅས་ཆུའི་ལྷ་མོར་གསལ་བའི་ཐུགས་ཀར་ཐིམ་པར་དམིགས༔ ཉིན་མོར༔ ཨཱོྃ་པ་ནི་པ་ཏི༔ དེ་ཝི་ལོ་ཀ་ཏ་ར༔ སརྦ་སིདྡྷི་ཕ་ལ༔ པཱ་ཤཾ་ཀུ་རུ་ཧཱུྃ་སྭཱ་ཧཱ༔ ཞེས་བཟླས་པས༔ ཆུའི་ལྷ་མོ་ཆུ་དང་ཆུ་བདག་ཐམས་ཅད་དབང་དུ་བསྡུས་ཤིང༔ འབྱུང་བ་ཆུ་ལ་དབང་འབྱོར་པའི་དངོས་གྲུབ་བྱིན་པར་བསམ༔ ཁྱད་པར་དུ་ས་ཕྱོགས་གཞན་གང་འོས་ཀྱི་ཀླུ་ཕྱུག་པོ་ཞིག་དམིགས་པས་བཀུག་ལ་གང་འདོད་པའི་ཆགས་པ་བསྐྱེད༔ དེ་ཞག་ཉེར་གཅིག་གམ༔ རྟགས་མ་བྱུང་བར་དུ་བསྒྲུབ༔ རྟགས་ནི༔ རབ་དངོས༔ འབྲིང་ཉམས༔ ཐ་མ་རྨི་ལམ་དུ༔ ཆུ་འཁྱིལ་བ༔ ཁ་ཆར་འབབ་པ༔ བུད་མེད་བཟང་པོས་ཆང་ལ་སོགས་བཏུང་བ་འདྲེན་པ༔ ཀླུའི་རྟགས་མང་པོ་འབྱུང༔ དེ་ནས་ཆུ་ཡི་ལྷ་མོ་ཐམས་ཅད་རྫས་དང་འཁོར་ལོ་ལ་བསྟིམ༔ རྫས་སྣོད་དར་གཙང་མས་དྲིལ་ཞིང༔ མི་ལག་མི་འགྲིམས༔ ལུས་དྲོད་མི་བཅར་བར་རང་གར་སྡོད་དུ་འགྲོགས༔ འདོད་པའི་ཕྲིན་ལས་ཐམས་ཅད་འགྲུབ་པར་བྱེད་དོ༔ གསུམ་པ་རྗེས་ཀྱི་བྱ་བ་ལས་ལ་སྦྱར་བ་ནི༔ ས་ཕྱོགས་གང་འདོད་དེ་རུ་རླན་གྱི་རྣམ་པ་ཅུང་ཟད་ཡོད་ན་རབ༔ མེད་ན་གཏིང་དུ་ཆུ་ཡོད་མེད་བརྟགས་ཐབས་སུ༔ རྒྱལ་གྱི་ཟླ་བར་ས་དོང་གྲུ་གང་བརྐོས་པའི་སྟེང་དུ་རྡོ་ལེབ་ཀྱིས་བཀབ༔ དེའི་སྟེང་དུ་མཁར་གཞོང་ཆུས་བཀང་པའི་ནང་དུ་ཆུ་ཤེལ་བཅུག་ལ༔ བཅོ་ལྔའི་ནུབ་མོར་ཟླ་བར་མཐོང་བར་བྱས་ནས་བཞག༔ སང་ཞོག་རྡོ་འོག་ཏུ་ཟིལ་པ་ཆགས་ན་ཆུ་ཡོད་པའི་རྟགས་ཡིན་པས༔ ས་དེར་ཀླུ་གནས་ངེས་པའི་མཚོ་དང་ཆུ་མིག་རྒྱུན་འབབ་ཀྱི་ཆུ༔ ཁྱེའུ་དང་བུ་མོ་གྲོང་པའི་ཆོས་ཀྱིས་མ་གོས་པས༔ ཤ་ཆང་སྒོག་གསུམ་སྤངས་ཏེ་བླངས་ལ་རྫིང་བུ་བསྐྱིལ༔ ཐ་མ་ཤིང་སྣས་བསྐོར༔ སྟེང་དུ་ཀླུའི་ཕོ་བྲང་བཞེངས་ཤིང་དཀྱིལ་འཁོར་དང་རྫས་སྣོད་བཤམ༔ ཀླུ་མཆོད་བྱ་ཞིང་ཆུའི་ལྷ་མོ་འཁོར་བཅས་སྤྱན་དྲངས་ཤིང་གནས་དེར་བརྟན་པར་བཞུགས་སུ་གསོལ༔ གཏོར་མཆོད་རྒྱས་པར་འབུལ་ལ༔ ས་ཕྱོགས་ཆེ་གེ་མོ་འདིར་ཆུ་ཕོབ༔ ཆུ་ཡི་དངོས་གྲུབ་སྩོལ༔ ཆུ་ཡོད་པར་མཛོད་ཅིག༔ ཆུ་འབེབ་པའི་རྟེན་འབྲེལ་གང་བཟང་གིས་བསྒྲིག༔ དེས་ཆུ་ཕེབ་པར་འགྱུར་ཏེ་དམེ་མཛེ་ཡུགས་ས་ལ་སོགས༔ ཚུལ་མི་ཤེས་པའི་མི་ལ་དང་པོ་སློང་དུ་མི་གཞུག༔ དེ་ནི་ཆུ་འབྱུང་བ་ཆུ་དབང་དུ་འདུས་ཤིང་གྲུབ་རྟགས་ཐོན་པར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ ཨེ་མ་ཟབ་ལམ་མཁའ་འགྲོ་གསང་མཛོད་ལས༔ རི་ཁྲོད་ཆུ་ཡི་དབེན་ལ་འདོད་འབྱུང་ནོར༔ ཉེར་མཁོའི་གནད་འདི་མཁའ་འགྲོའི་ཡི་གེར་བཀོད༔ མ་གསང་སྤེལ་ན་གདམས་པའི་བྱིན་རླབས་ཡལ༔ གསང་ཞིང་སྤྱོད་ན་དངོས་གྲུབ་ལྷག་པར་མྱུར༔ དེ་ཕྱིར་མ་འཆལ་སྙིང་གི་གུར་དུ་ཆོངས༔ སྣོད་ལྡན་ཐུགས་ཀྱི་སྲས་མཆོག་དེ་ལ་བྱིན༔ སྐལ་མེད་ལོག་ལྟ་ཅན་ལ་མ་ཤོར་ཅིག༔ ཁ་ཐཾ༔ གུ་ཧྱ་རྒྱ༔ གཏེར་སྟོན་འཇའ་ཚོན་སྙིང་པོས་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པའོ།། །། ྈ རྩ་རླུང་མཁའ་འགྲོའི་གསང་མཛོད་ལས༔ ཟབ་ཡིག་སྙིང་གི་རྒྱ་ཅན་བཞུགས༔ ྈྈྈྈ གདམས་པའི་མཛོད་འཆང་རྡོ་རྗེ་ཕག་མོ་ལ་ཕྱག་འཚལ་ཞིང་སྐྱབས་སུ་མཆིའོ༔ ཁྲིད་ཚར་གྱི་སློབ་མ་ཤེས་ཆེ་དང་ལྡན་གསང་ཐུབ་གཅིག་གཉིས་ཙམ་ལས༔ སྐྱེ་བོ་ལོག་ལྟ་དང་ཐེག་དམན་བློ་ཆུང་གི་རིགས་ལ་རླུང་ཕྱོགས་ཙམ་ཡང་ཐོས་སུ་མི་རུང་བའི་གདམས་པ༔ ཤིན་ཏུ་གཅེས་པའི་ཟབ་ཡིག་སྙིང་གི་རྒྱ་ཅན་མ་འདི་ནི༔ རྩ་རླུང་མཁའ་འགྲོའི་གསང་མཛོད་ཀྱི་ཁྲིད་གཞུང་དབུ་མཐའ་ཀུན་ལ་ཉེ་བར་མཁོ་བའི་རྒྱབ་སྐྱོར་དུ་བྱའོ༔ དེ་ཡང་དང་པོ་ཕྱི་བསྐྱེད་རིམ་ལྷའི་རྣམ་གཞག་གི་སྐབས་སུ༔ དབུ་མ་མཚན་ཉིད་བཞི་ལྡན་གསུང་པ་ནི༔ ཏིལ་གྱི་མར་མེ་ལྟར་གསལ་བ༔ རྒྱ་སྐྱེགས་ཀྱི་ཁུ་བ་ལྟར་དམར་བ༔ པདྨའི་འདབ་མ་ལྟར་སྲབ་པ༔ ཆུ་ཤིང་སྡོང་པོ་ལྟར་དྲང་བ་དང་བཞིའོ༔ མིང་ནི་དབུ་མ་མཆོག་གི་རྩ་དེ་ལ༔ ཨ་བ་དྷཱུ་ཏི༔ ཀུན་འདར་མ༔ སྒྲ་གཅན༔ མ་ནིང༔ ཡིད་བཟང་མ༔ བྱང་ཆུབ་ཀྱི་རྩ༔ ཁཱ་ཁཱ་མུ་ཁཱ༔ མུན་པ་འབབ་པ་ཞེས་སོ༔ རོ་མ་ལ༔ ཉི་མ༔ བུད་མེད༔ རྡུལ༔ ཤེས་རབ་ཀྱི་རྩ༔ ཁྲག་འབབ་པ་ཞེས་སོ༔ རྐྱང་མ་ལ༔ ཟླ་བ༔ སྐྱེས་པ༔ སྙིང་སྟོབས༔ ཐབས་ཀྱི་རྩ༔ ཁུ་བ་འབབ་པ་ཞེས་སོ༔ བུད་མེད་ལ་གཡས་རྐྱང་མ་གཡོན་རོ་མའོ༔ རོ་རྐྱང་འདི་གཉིས་ལུང་རེ་འགའ་ནས་སྐྱེས་པ་ལ༔ གཡས་དཀར་གཡོན་དམར་གསུངས་ཏེ༔ མི་འཐད་པའི་རྟགས་སུ་ཕོ་ལ་སྣ་ཁྲག་གཡས༔ མོ་ལ་གཡོན་ནས་འབབ་པ་འདིས་གསལ་ལོ༔ རྩ་དབུ་མ་ཡང་ཐེག་པ་འོག་མར་ཞེན་ཆེ་བ་རྣམས་ཀྱིས༔ ལྟེ་འོག་སོར་བཞི་ལས་རིང་བར་མི་གནས་ཞེས་སྨྲ་སྟེ༔ ཕྲ་སྦོམ་དར་སྐུད་ཙམ་པ་སྤྱི་བོ་ནས་གསང་གནས་ཀྱི་བར་དུ་གནས་སོ༔ བསྐྱེད་པའི་སྐབས་སུ་རང་གཞུང་དང་བསྟུན་ནས༔ དཔེར་ན༔ འཕོ་བ་བསྒོམ་པའི་དུས་སུ་སྙིང་གའི་བར༔ གཏུམ་མོའི་དུས་སུ་ལྟེ་འོག༔ ཐིག་ལེའི་དུས་སུ་གསང་གནས་ཀྱི་བར་དུ་བསྐྱེད་པར་བྱའོ༔ རོ་རྐྱང་གཉིས་ཀྱང་བསྐྱེད་པའི་དུས་སུ་དབུ་མའི་མར་སྣེ་ལ༔ ཡི་གེ་ཆ་ཡི་དབྱིབས་སུ་ཟུག་ཅིང༔ ཡར་སྣ་རྣ་ལྟག་གཡས་གཡོན་དུ་ཁྲིས་ཤིང་སྣ་བུག་གཡས་གཡོན་དུ་སྒོ་དོད་གསུང་ཡང༔ མར་སྣ་ནི༔ ལྟེ་འོག་སོར་བཞིའི་མཚམས་སུ་དབུ་མའི་ཁར་ཚུད་ལ་ཁད་དུ་གནས་ཏེ༔ སྲོག་རྩོལ་གྱི་རླུང་དང་མཚན་ལྡན་གྱི་ཕྱག་རྒྱ་ལ་བསྟེན་པའི་རྐྱེན་གྱིས་དབུ་མའི་ཁར་ཚུད་དོ༔ རྩ་འཁོར་ལྔའི་གྲངས་མིང་ནི༔ སྤྱི་བོ་བདེ་ཆེན་གྱི་འཁོར་ལོ་ལ༔ རིམ་པ་ཅན༔ འདོད་པ་ཅན༔ འདོད་ཅན་མ༔ སྲོག་གི་ལུས༔ ཟླ་ཐུང་མ༔ ཟླ་སྟེར་མ༔ མཛེས་པ་མ༔ འདོད་ལྡན༔ མི་སྨྲ་བ༔ ཀུ་ཤ་ལ༔ ཤི་པ་ཡོང༔ དག་པ་ཅན༔ མེ་མ༔ ལི་རོ་མ༔ ནེ་ཙོ་མ༔ གང་བ་མ༔ ཉི་མ༔ རོ་ལྡན་མ༔ གོས་རིང་མ༔ ཆང་སྟེར་མ༔ བདུད་རྩི་མ༔ དུང་ཅན་མ༔ དུང་སྣ་མ༔ དུང་མིག་མ༔ དུང་སྣ་ཅན༔ རྒྱགས་མ༔ དབང་རྒྱག་མ༔ བསྒོམ་པ་མ༔ རྒྱགས་པས་རྒྱལ་མ༔ ངོ་མཚར་རྒྱགས་མ༔ སྙེམས་པ་མ༔ ཚིག་བརྟན་དང་སུམ་ཅུ་སོ་གཉིས་སོ༔ མགྲིན་པ་ལོངས་སྤྱོད་ཀྱི་འཁོར་ལོ༔ ལོངས་སྤྱོད་མ༔ ལོངས་སྤྱོད་སྟེར༔ ལོངས་སྤྱོད་གསང༔ ཉི་མ་འགྲོ༔ ཉི་མ་གསལ༔ སྐལ་བ་ཆེ༔ སྐོམ་པ་མ༔ ཐལ་བའི་གདོང༔ བཟའ་བ་མ༔ བཟའ་བ་ཟ༔ བཀྲེས་པ་མ༔ བཅུད་ལེན་མ༔ རོ་བཀུར་མ༔ རོ་འཇིག་མ༔ རོ་མྱང་མ༔ ཁྲུང་ཁྲུང་མ་དང་བཅུ་དྲུག་གོ༔ སྙིང་ག་ཆོས་ཀྱི་འཁོར་ལོ་ལ༔ རིན་ཆེན་ཅོད་པན༔ པདྨ་ཆེན་པོ༔ རྡོ་རྗེ་ཆེན་པོ༔ སྟོབས་པོ་ཆེ༔ མགོན་པོ་ཆེན་པོ༔ སྒྲ་བོ་ཆེ༔ ཉེར་དགའ་ཆེན་པོ༔ མྱོས་ཆེན་དང་བརྒྱད༔ ལྟེ་བ་སྤྲུལ་པའི་འཁོར་ལོ་ལ༔ ཡང་དག་ཤུགས༔ ཤིན་ཏུ་བཟང༔ བཟང་འགྲོ༔ སྟོབས་ཆེན༔ མི་མཛད༔ མཛེས་ཆེན༔ མདུན་སྐྱེས༔ རྒྱགས་པའི་རྟགས༔ རྒྱགས་པའི་ཆ༔ རྒྱགས་པའི་ཆུ༔ རྒྱགས་པ་ཅན༔ རྒྱགས་མཐུན༔ རྒྱགས་པའི་རླན༔ རྒྱགས་འཆང༔ རྩུབ་པ་མ༔ ཁ་མཆུ་ཅན༔ གླང་སྣ༔ དབུག་འགག༔ གཡའ་ཁ་འགྲོ༔ འདབས་ཆགས་མ༔ ཁྲའི་གདོང༔ ཟ་བྱེད་མ༔ མི་བཟད་མ༔ སྒྲ་སྒྲོག་མཛད༔ དྲི་ལྡན་མ༔ དབྱུག་རྡེག་མ༔ བརྟུལ་ཞུགས་མ༔ དབྱངས་ཅན་མ༔ དབྱངས་སྐྱེས་མ༔ སྤྲིན་གྱི་ཤུགས༔ ཆུ་བ་མཐོ༔ རྒྱ་ལྟར་མ༔ ཡུད་ཙམ་མ༔ ཡུད་ཙམ་ལ༔ ཡུད་ཙམ་སྐྱེས༔ རྒྱབ་ལྟས་མ༔ དབྱུག་པ་མ༔ དབྱུག་སྙེམ་མ༔ རྙིང་པ་མ༔ ཚིགས་མ་སླ༔ ཚིགས་ཀྱི་ཚིགས༔ ཚིགས་ཀྱི་ཚད༔ རྡུལ་འབབ་མ༔ ཚིགས་ཀྱི་གནས༔ ཚིགས་ཀྱི་རྡོ༔ ཚིགས་ཀྱི་འོད༔ ལུ་གུ་རྒྱུད༔ དུལ་བྱེད་མ༔ དུལ་འགྲོ་མ༔ གཟི་བརྗིད་ཅན༔ དྲི་མེད་དུལ༔ སྙེམ་པ་མ༔ ཆུན་ཕྱང་ལྟོ༔ ཆགས་པ་ཅན༔ ཆགས་པ་ཆགས༔ ཆུན་འཕྱང་ཅན༔ སྦྲང་བུ་མ༔ ཕྲུ་གུ་བ༔ ཕྲུ་གུ་མ༔ འགྲོ་བཟང་མ༔ ལོ་མ་ཅན༔ ལོ་མ་མགྲིན༔ རབ་མཆོག་མ༔ རབ་གསལ་མ་དང་དྲུག་ཅུ་རྩ་བཞིའོ༔ གསང་གནས་བདེ་སྐྱོང་གི་འཁོར་ལོ་ལ༔ བདེ་བྱེད་མ༔ སྦས་མ༔ བྱ་མཆུ་མ༔ ཤུགས་ལྡན༔ སྐྱོད་བྱེད༔ རྩ་འཇིགས༔ བགྲང་མ༔ ཡལ་འདབ་མ༔ གླང་སྣ་མ༔ འཁྲས་མ༔ གཡུང་ལོ༔ སྟེར་མ༔ ལས་མ༔ སྟོབས་ཆེན༔ ཚངས་རྒྱུ༔ རྒྱུན་འབབ༔ འཁྱིལ་མ༔ ཞག་སྒོར༔ སྡུད་བྱེད༔ རླུང་འཛིན་དྲོད་མ༔ སྦར་བྱེད༔ ཁྲག་འཛིན༔ སྦྲིད་བྱེད༔ གཡའ་ཟ་མ༔ མྱོང་མ༔ མིའུ་ཐུང་དང་་་གཉིས་མི་ཚང་།མཆན།ཉེར་བརྒྱད་དོ༔ དེ་ལྟར་རྩ་ཡི་མིང་གི་གྲངས་སུ་འཛིན་པ་འདིས་ནི༔ རྩ་འཁོར་ལོ་དང་རྩ་འདབ་མང་ཉུང་གི་ལུང་མི་མཐུན་པ་ཁེགས་ཤིང༔ གཞུང་འདི་ལ་ཡིད་ཆེས་པའི་ཕྱིར་རོ༔ སྐབས་སུ་ལུས་ཀྱི་དྲི་མ་བཀྲུ་ཞིང་བཀུ་མཉེ་བྱ༔ ཞེས་པ་ནི༔ དང་པོ་ཕྱག་བསྐོར་སོགས་ཀྱིས་ལུས་རྔུལ་ཆིལ་ལེར་ཐོན་པ་དང༔ ཆུ་དྲོན་མོ་བུལ་ཏོག་བཏབ་ལ་ལུས་ཐམས་ཅད་དག་པར་བཀྲུ༔ དེ་བསྐམ་ནས་འོ་མ་དྲོན་མོའམ་དྲོན་པོར་བསྲོ་ལ་ལུས་ཐམས་ཅད་ཁྱབ་པར་བྱུགས་ལ་འཕུར༔ དེ་རྗེས་རང་གི་དྲི་ཆུ་དང་ཆང་གི་ཉིང་ཁུ་ཆ་མཉམ་དུ་སྦྱར་ལ་ལུས་ཐམས་ཅད་བྱུག་དྲོས་སྐྱེས་པར་འཕུར༔ དེ་ནས་མར་ཚིལ་རྐང་དང་ཁམ་བུ་སྟར་གྱི་ཕྱེ་འཕུར་བྱ་ལ་རིག་མའམ༔ གྲོགས་ཤེད་ལྡན་ཞིག་གིས་ཁོད་སྙོམས་དུ་འཕུར་བྱུག་དྲག་ཏུ་བྱ༔ དེ་ཚར་ནས་ལུས་བསིལ་དྲོད་སྙོམས་པའི་གོས་གོན༔ མེ་དང་ཉི་མ་ལ་ཚིག་པར་མི་བསྲོ༔ བཟའ་བཏུང་འགྲང་ལྟོགས་སྙོམས༔ རླུང་གི་རྣལ་འབྱོར་བཀུ་མཉེ་འདི་ནི༔ ཞག་བདུན་ནམ་བཅུ་ལས་མ་འདས་པར་གལ་ཆེ་བ་ལགས་སོ༔ ནང་འབྱིན་འཇུག་རླུང་གི་ཉམས་ལེན་གྱི་ནང་དུ༔ ལུས་གནད་རྣམ་སྣང་ཆོས་བདུན་ཟེར་བ་ནི༔ རྐང་པ་སྐྱིལ་ཀྲུང་ལག་པ་མཉམ་གཞག༔ སྒལ་ཚིགས་དྲང་པོ༔ དཔུང་པ་ཕྱིར་དགྱེད༔ མགྲིན་པ་དགུག༔ ལྕེ་མཆུ་རང་བབ་ཏུ་བཞག༔ མིག་སྣ་རྩེར་ཕབ་པའོ༔ སྲུང་བའི་འཁོར་ལོ་དང་ཞེས་པ་ནི༔ སྤྱིར་སྲུང་བའི་གུར་ཁང་དགུ་རིམ་སོགས༔ རིགས་མི་འདྲ་བ་མང་ནའང༔ འདིར་ནི༔ ནང་དུ་རྡོ་རྗེའི་གུར་ཁང་སྲ་ལ་མཁྲེགས་པས་གཏམས་པས༔ དེའི་དྲྭ་མིག་ཐམས་ཅད་སྲུང་བ་ཁྲོ་བོ་གསེར་ཁྲབ་ཅན་གྱི་སྐུ་ཞལ་ནང་དུ་གྱུ་ནས་སྲུང་བའི་སྒྲ་སྒྲོག་པ༔ དེའི་ཕྱི་རིམ་མཚོན་ཆའི་གུར་ཁང་རྣོ་ལ་ངར་བས་གཏམས་པས༔ དྲྭ་མིག་ཐམས་ཅད་ཟློག་པའི་ཁྲོ་བོ་ལྕགས་ཁྲབ་ཅན་གྱིས་ཞལ་ཕྱི་རུ་གྱུ་ནས་ཟློག་པའི་སྔགས་བརྗོད་པ༔ དེའི་ཕྱི་རིམ་འཁོར་ལོའི་གུར་ཁང་དྲག་ལ་རྩུབ་པས་གཏམས་པ༔ རྩིབས་རྩེ་ཐམས་ཅད་གསོད་པའི་ལས་མཁན་མཚོན་ཆ་ཅན་གྱིས་ཞལ་ཕྱི་རུ་ཕྱོགས་ནས་གསད་པའི་དབལ་སྟོན་པ༔ ཕྱི་ནང་ཉོན་མོངས་པ་བསྲེགས་ཡེ་ཤེས་ཀྱི་མེ་རབ་ཏུ་འབར་བ་བསྒོམ་པ་ནི༔ བྱད་སྟེམས་ལ་སོགས་གཟུགས་ཅན་གྱི་གནོད་པ༔ ནད་གདོན་ལ་སོགས་གཟུགས་མེད་ཀྱི་གནོད་པས་མི་ཚུགས་པའི་ཡོན་ཏན་ཡོད་དོ༔ དེའི་འོག་ཏུ་བྱང་སེམས་མཚན་ཉིད་བཞི་ལྡན་ནི༔ དཀར་བའི་མཚན་ཉིད་སྟོན་ཀའི་ཟླ་བ་ལྟ་བུ༔ གསལ་བའི་མཚན་ཉིད་ཏིལ་གྱི་མར་མེ་ལྟ་བུ༔ ཟླུམ་པའི་མཚན་ཉིད་བྱ་ཡི་སྒོ་ང་ལྟ་བུ༔ ཞུ་ལ་ཁད་པའི་མཚན་ཉིད་རྔུལ་ཆུ་ལྟ་བུ་དང་བཞིའོ༔ ཡང་ཨ་ཤད་ཀྱི་མཚན་ཉིད་བཞི་ལྡན་ནི༔ ཁ་དོག་རྒྱ་སྐྱེག་གི་མེ་ཏོག་ལྟར་དམར་བ༔ འོད་ཏིལ་གྱི་མར་མེ་ལྟར་གསལ་བ༔ རེག་བྱ་ལྕགས་སྲེག་དམར་པོ་ལས་ཚ་བ༔ དབྱིབས་ཟངས་ཀྱི་མོ་ཁབ་ལྟར་ཕྲ་བ་དང་བཞི་སྟེ༔ མེ་ཡི་སྒྲ་འུར་འུར་ཕེཾ་ཕེཾ་སྒྲོག་པ༔ སོར་བཞི་ཙམ་དུ་བསྒོམ་པར་བྱའོ༔ ཁམས་དཀར་དམར་གཉིས་རྒྱུད་ལ་ལ་ནས་སྤྱི་བོ་ནས་ལྟེ་འོག་ཏུ་གནས་པར་བཤད་ཀྱང༔ གདམས་པ་འདིའི་ལུགས་ཀྱི་དཀར་པོ་ནི་སྨིན་མཚམས་དང༔ དམར་པོ་ནི་རྡོ་རྗེའི་རྩེ་དང་པདྨའི་ཟེའུ་འབྲུ་ལ་གནས་པར་གསུངས་སོ༔ རླུང་གི་རྣལ་འབྱོར་ལ་སྦྱོང་བའི་གང་ཟག་ཕོ་མོ་གང་ཡིན་ཡང༔ ལོ་བཅུ་དྲུག་ནས་ཉེར་ལྔའི་བར་དུ་ལུས་སྟོབས་རབ་ཏུ་རྒྱས་ཤིང་རླུང་ནང་དུ་འཇུག་པའི་ནུས་པ་ཆེ་ལ༔ ཉེར་ལྔ་ནས་ཞེ་ལྔའི་བར་དུ་ཤེད་རྫོགས་པ་རླུང་ནང་དུ་བརྟེན་པའོ༔ ཞེ་ལྔ་ནས་ལྔ་བཅུའི་བར་དུ་ལུས་སྟོབས་རང་སར་གནས་པས་རླུང་ནང་དུ་གནས་པ་ཡིན་ལ༔ ལྔ་བཅུ་ནས་ལོ་རེ་བཞིན་དུ་རླུང་ནུས་ཇེ་ཞན་དུ་འགྲོ་བས་རླུང་གི་ཡོན་ཏན་སྐྱེ་བར་དཀའ༔ འདི་ནི་སྤྱིར་བཏང་གི་ཡིན་གྱི་ལུས་སྟོབས་དང་ཐིག་ལེ་ཉམས་མ་ཉམས་རང་ཉམས་དང་བསྟུན་པ་གལ་ཆེའོ༔ རླུང་སྣ་གཡས་གཡོན་རེ་རེ་ནས་རྒྱུ་བ་སྙོམས་ཐབས་ལ༔ གང་རྒྱུ་བའི་ཕྱོགས་དེར་མཛུབ་མོས་བཀག་ལ་འོག་ཏུ་བསྟན་ལ་ཉལ་ན་སྙོམས་སོ༔ གཞན་ཡང་རླུང་འཛིན་མི་ཉན་པའི་དུས་དྲུག་མི་ལྔ་ལ་སོགས་ཞལ་གྱི་གདམས་པ་ལས་ཤེས་དགོས་སོ༔ བར་རླུང་ལ་བསླབ་དུས་གནད་མེ་ཐབས་དྲུག་ཆིངས་བྱ༔ ཞེས་པ་ནི༔ འབེབ་གདན་གྱི་ཁར་ཙོག་པུར་རྐང་པ་གཉིས་བསྣོལ་བའི་པུས་མོའི་སྟེང་དུ་གྲུ་མོ་གཉིས་བཞག་ནས༔ ལགས་གཉིས་བསྣོལ་ཏེ་ཕྲག་གོང་གཉིས་སུ་བཞག༔ མེ་ཐབ་ཟུར་གསུམ་དྲུག་ཡོང་བར་བྱས་ལ་སྒོམ་ཐག་གིས་བཅད༔ འོག་སྒོའི་ཐད་དུ་གྲུ་གུ་ཁུ་ཚུར་ཙམ་བཞག་པ་མན་ངག་ཡིན་ནོ༔ བུམ་པ་ཅན་གྱི་སྐབས་སུ་ལུས་གནད་འཁོར་ལོ་བཞི་སྦྱོར་ཞེས་པ༔ ཙོག་པུར་འདུག་སྟེ་རྐང་མཐིལ་མེ་ཡི་འཁོར་ལོ་དང༔ བོལ་གོང་ཆུའི་འཁོར་ལོ་གཉིས་སྦྱོར༔ བྲང་ཀ་མེའི་འཁོར་ལོ་དང༔ པུས་མོ་ཆུའི་འཁོར་ལོ་གཉིས་སྦྱོར༔ ལག་གཉིས་མེའི་འཁོར་ལོ་དང༔ གྲུ་མོ་ཆུའི་འཁོར་ལོ་གཉིས་སྦྱོར༔ མཐོང་ག་མེའི་འཁོར་ལོ་དང༔ མ་ནེ་ཆུ་ཡི་འཁོར་ལོ་གཉིས་སྦྱོར་རོ༔ ཐུན་མཚམས་རྣམས་སུ་བོགས་འདོན་གྱི་འཕྲུལ་འཁོར་ཐུན་མོང་བ་རྣམས་བྱ༔ དེ་ནས་ཕོ་བ་གཡས་གཡོན་དུ་བསྐོར༔ དེས་ལྟེ་བའི་རྩ་མདུད་གྲོལ་བའི་རྟེན་འབྲེལ་ཡོད༔ དེ་ནས་རོ་སྟོད་གཡས་གཡོན་གཅུ༔ དེས་ནི་སྙིང་གའི་རྩ་མདུད་གྲོལ་བའི་རྟེན་འབྲེལ་ཡོད༔ དེ་ནས་མགོ་བོ་གཡས་གཡོན་བསྐོར༔ དེས་མགྲིན་པའི་རྩ་དགྱེ་ན་འགུག་གསུམ་གསུམ་བྱ༔ དེས་སྤྱི་བོའི་རྩ་མདུད་གྲོལ་བའི་རྟེན་འབྲེལ་ཡོད༔ དེ་ནས་རྐང་ལག་བརྐྱང་བསྐུམ་ཚར་རྗེས་དྲག་འབེབ་ཅི་ནུས་བྱ༔ དེས་བདེ་དྲོད་ཀྱིས་ལུས་ཁྱབ་ཅིང༔ རླུང་གེགས་དང་ཁམས་འདུས་སེལ༔ བདེ་གསལ་མི་རྟོག་པའི་ཏིང་འཛིན་སྐྱེའོ༔ དྲག་རླུང་གི་སྐབས་སུ་ལུས་སྦྱོར་དྲུག་ནི༔ ཉི་ཟླ་མཁའ་ལ་གཏད༔ རོ་འཛིན་ཐེམ་ལ་སྦྱར༔ རྐྱལ་པ་མདུད་པས་བསྡམ༔ སྦྲུལ་ཚང་བྲག་ལ་གཅར༔ ཞགས་པ་གྱེན་དུ་འཐོན༔ གླིང་བཞི་མཐའ་ནས་བསྡུ་བ་སོགས་ཞལ་གྱི་གདམས་པའོ༔ ཆུ་རས་བྱེད་ན༔ ཞག་གསུམ་གོང་ནས་ཤུལ་དང་མར་རྙིང་སྤང༔ དྲག་རླུང་ལ་ནན་བྱ༔ དེ་ནས་ནངས་པར་སྔ་མོར་ཐུན་མོང་གཏུམ་མོའི་འཕྲུལ་འཁོར་ཉེར་ལྔ་ཚར་གཅིག་སྦྱང༔ དེ་ནས་རས་གཟན་དྲི་མ་མེད་པ་ཆུ་ནང་དུ་དྲངས་ལ་བཙིར༔ གྲོགས་ཤིག་གིས་རས་གཟན་གང་འདང་གིས་དཀྲིས་ཤིང་མགོ་ཡང་བཏུམ་དུ་བཅུག༔ དྲག་རླུང་གི་སྦྱོར་བ་ལ་འབད༔ ཚ་ཆེ་ན་བུམ་ཅན་དང་བར་རླུང་ཙམ་དུ་ཀློད་ཤེས་པར་བྱ༔ དེ་ལྟར་སྦྱངས་པས་ནངས་རེ་ལ༔ རབ་ཀྱིས་གྲངས་དགུ༔ འབྲིང་གིས་ལྔ༔ ཐ་མས་གསུམ༔ ཡང་ཐས་གཅིག་བསྐམ་ནུས་སོ༔ དེ་ཚར་ནས་ཟས་བཅུད་ཅན་བརྟེན༔ བཀུ་མཉེ་ཡང་ཡང་བྱ༔ དྲོད་ཀྱི་ཡོན་ཏན་བུལ་ན་ཕྱི་ནང་གི་རྫས་སྦྱོར་བརྟེན་པ་ལ་ཞལ་གདམས་སུ་ཤེས༔ སྲོག་རྩོལ་ལ་སྤྱོད་པའི་རྣལ་འབྱོར་དེས༔ ཟས་གོས་གྲིབ་ཅན་གྱི་རིགས་སྤང༔ རྡུལ་དང་དུ་བ་ལ་འཛེམ༔ སྤོད་ཚོད་དང་རུལ་སུམ་གྱི་ཟས་མི་བཟའ༔ ཤ་ཅན་གྱི་གོས་ནི་ཅི་སྨྲོས༔ དུག་པོ་ལ་སོགས་ཕྱི་གོས་གོང་བ་ཅན་གྱི་རིགས་དང༔ ལྤགས་ཤུན་གྱི་སྟན་སོགས་དྲོད་ཅན་གྱི་རིགས་སྤང༔ སྤྱོད་ལམ་ཡང་དྲག་ཤུལ་གྱི་ལས་དང༔ ཉིན་མོར་གཉིད་བཀག་པ༔ ཧ་ཅང་གྲང་བསིལ་ཆེ་བ་སོགས་བསྲུང༔ ལུས་ཤ་རྗེན་ཡང་མི་བྱ༔ ལུས་སྟོབས་བརྩོན་འགྲུས་ལྡན་པ་དག་གིས༔ རབ་རང་ལོ་བདུན་ཅུ༔ འབྲིང་དྲུག་ཅུ༔ ཐ་མ་ལྔ་བཅུའི་བར་དུ༔ རབ་རས་རྐྱང༔ འབྲིང་གཟན་རྐྱང༔ ཐ་མའང་ཤ་ཅན་གྱི་གོས་མི་དགོས་པར་འབྱུང༔ ཅི་ལྟར་ཡང་ཐས་ཀྱང་ལོ་གསུམ་བར་དུ་ཤ་ཅན་གྱི་གོས་མི་གྱོན་པའི་དམ་ཚིག་ལ་གནས་དགོས་སོ༔ ཚ་ཐུབ་ནི༔ ཚད་པ་ཆེ་བའི་ཡུལ་དུ་འགྲོ་དགོས་སམ༔ ཚད་པའི་ནད་ཀྱིས་གཙེས་ན༔ རྐང་ལག་ཅི་བདེར་བརྐྱངས་ལ༔ རླུང་དལ་བུས་བཟུང་ལ་ཨ་ཤད་ཀྱི་མེ་ལན་གསུམ་ཙམ་སྤར་ལ༔ སྤྱི་བོའི་ཧཾ་ཡིག་ཞུ་ནས་ལུས་ཀྱི་རྩ་ཁམས་ཐམས་ཅད་ཁེངས་ཏེ༔ རང་ལུས་གངས་ཀྱི་རི་བོ་དཀར་ཞིང་བསིལ་བར་དམིགས་པས་བསིལ་དྲོད་སྙོམས་སོ༔ རྨི་ལམ་གྱི་དུས་སུ་བསྐྱེད་པ་མི་གསལ་ཞིང་རྨི་ལམ་ཟིན་དཀའ་ན༔ ཉལ་ཁར་གསོལ་བ་དྲག་ཏུ་གདབ་ལ༔ སྨིན་མཚམས་སུ་ཐིག་ལེ་དཀར་པོ་སྲན་འབྲུ་ཙམ་ལ་དམིགས་པ་གཏད༔ དེས་ཀྱང་མ་ཟིན་ན༔ སྙིང་ཁར་ཧཱུྃ་མཐིང་ཁ་ཚོན་གང་ལ་དམིགས་པ་གཟིར༔ དེས་མ་ཟིན་ན༔ མགྲིན་པར་ཐིག་ལེ་དམར་པོ་ལ་གཏད༔ དེས་མ་ཟིན་ན༔ གསང་གནས་སུ་ཧཱུྃ་ནག་པོ་སྣག་ཚ་འདྲ་བ་མགོ་ཐུར་དུ་བསྟན་པ༔ དེ་ལ་མེ་ལྕེ་ལྷབ་ལྷབ་འབར་བ་ལ་སེམས་གཏད་དེ༔ རླུང་འབྱིན་འཇུག་གནས་གསུམ་བྱས་པས་ཟིན་ནོ༔ འོད་གསལ་གྱི་སྐབས་སུ་སྐུ་གསུམ་དང་བསྲེ་བར་དཀའ་ན༔ རླུང་རིག་རྡོར་སེམས་ལ་གཏད༔ ལོངས་སྤྱོད་ཀྱི་འཕར་རྩ་མཐེབ་མཛུབ་ཀྱིས་བསྡམས་ནས་ཟིན༔ བསྡམས་ཡུན་རིང་ན་འཕོ་ཉེན་ཡོད་པས༔ ཁམས་ཟི་ཐམ་གྱིས་བྱུང་བའི་ཚེ་ཀློད་དགོས་སོ༔ སྒྱུ་ལུས་ཀྱི་སྐབས་སུ༔ ལུས་ཆགས་ཞེན་མེ་ལོང་ལ་སྦྱང༔ ངག་གི་རང་བཞིན་བྲག་ཆ་ལ་སྦྱང༔ སེམས་ཀྱི་གཟུང་འཛིན་སྨིག་སྒྱུ་ལ་སྦྱང་བར་བྱའོ༔ བར་དོ་ལའང་འོད་གསལ་གྱི་གདམས་པ་ལྟར་མཐེབ་མཛུབ་ཀྱི་འཕྲུལ་འཁོར་བྱ་བ་གནད་ཆེའོ༔ འཕོ་བའི་གདམས་པ་ལ༔ སྦྱང་དུས་སུ་རླུང་འབྱིན་ཚེ༔ ཧིཀ་མང་པོ་དབུགས་ཀྱིས་འཁྱོལ་ཚད་དུ་བརྗོད༔ རླུང་ནུས་ཟད་ཁར་ཀ་ཞེས་བརྗོད་པས༔ རླུང་འབྱིན་ཅི་ཆགས་སུ་མནན་པ་གདམས་ངག་གོ༔ འཕོ་བའི་ཚེ༔ གྲོགས་དམ་པས་ཁྱོད་ལ་འཆི་བ་མི་རྟག་པ་ཡོང་བ་རེད༔ བླ་མའི་གདམས་ངག་མ་བརྗེད་ཅེས་རྣ་བར་བརྗོད་ལ་ཚངས་སྐྲ་འཐེན་པ་གནད་ཡིན་ནོ༔ གསང་ཐུར་གྱི་སྐབས་སུ༔ རྒྱབ་ཐུར་གྱི་སྦྱང་ཐུར་ལ་བྱི་ཏང་ཀའི་ཕྱེ་མ་དང་མར་གཉིས་སྦྱར་ལ་བྱུག༔ དེ་སྲིན་ཞལ་ནི་བཤང་ལམ་སྟེ༔ དལ་བུའི་སྒོ་ནས་ནུབ་པར་བཅུག༔ ནང་དུ་འགྲོ་བའི་དོགས་པ་མེད་དོ༔ སོང་ཡང་སྟེང་རླུང་མནན་པ་ཙམ་གྱིས་ཕྱིར་དབྱུང་ངོ༔ ལམ་ཐུར་དར་གྱིས་བཅིངས་པ་ནི༔ སོར་བཞི་ལས་འདས་པ་བཤང་ལམ་དུ་འགྲོ་མི་རུང་བས་སོ༔ རྡོ་རྗེ་ཆུ་འཐུང་ལས༔ གསང་ཐུར་རྡོ་རྗེ་མི་གནོད་པའི་ཐབས་དང༔ མ་གྲུབ་ན་སྤོག་པ་རྣམས་ནི་ཞལ་གྱི་གདམས་པ་ལས་ཤེས་སོ༔ ཕོ་ཁྲིད་སྐབས་ཀྱི་རིག་མའི་མཚན་རྟགས་ཕྱི་ནང་གསང་གསུམ་ཚང་ནའང༔ བརྡ་ལ་བརྡའི་ལན་བརྟག་པར་གལ་ཆེ་བས༔ མཐོང་ཐོས་དྲན་རེག་ལ་བདེ་བ་སྐྱེ་ནུས་ཤིང༔ ཡིད་དུ་འོང་བའི་གཟུངས་མ་དེ་དང་རང་གཉིས་ལས་འཕྲོ་ཡོད་མེད་བརྟག་པ་ནི༔ རིགས་ཀྱི་མི་མོ་དེ་ལ་ཆགས་པའི་མདངས་ཀྱིས་བལྟ་ཞིང༔ མཛུབ་མོ་གཡུག་པར་བྱས་ཚེ༔ བསྟེན་དུ་རུང་བའི་གཟུངས་མ་ཡིན་པའི་རྟགས་ལ༔ མོ་རང་གི་མགོ་ལ་རེག་ན༔ ཁྱོད་ནི་བདག་གི་གཙུག་ཏུ་ཁུར་བའི་བླ་མར་འོས་ཞེས་པའི་བརྡའ་དང༔ དེ་བཞིན་དུ་མིག་ལ་རེག་ན༔ ལྟ་བར་བྱེད་པའི་མིག་དང་མཚུངས་ཞེས་པ་དང༔ སྐེ་དང་ནུ་མ་ལ་རེག་ན་ཡབ་དཔའ་བོའི་ཚུལ་ཏུ་བསྟེན་ནོ་ཞེས་པ་དང༔ སྙིང་ག་ལ་རེག་ན་སྙིང་པོའི་མཆོག་ཏུ་གྱུར་ཏོ་ཞེས་པ་དང༔ ཕོ་བ་དང་བརླ་ལ་རེག་ན་བདེ་བ་ལ་སྦྱོར་བའི་གནས་སོ་ཞེས་པ་དང༔ འཇིག་རྟེན་གྱི་ཁ་ཟས་ལ་རེག་ན་འདོད་པའི་ལོངས་སྤྱོད་སྟེར་རོ་ཞེས་པའི་བརྡའ་སྟེ་བླང་བར་བྱའོ༔ དེ་ནས་ཟློག་པ་ངན་པའི་རྟགས་ནི༔ ལྟག་པ་བསྟན་ན་ཁྱོད་ནི་རྒྱབ་ཀྱི་ཕྱོགས་སུ་བོར་རོ་ཞེས་པ་དང༔ སྐྲ་འབལ་ན་སྡུག་བསྔལ་གྱི་རྒྱུའོ་ཞེས་པ་དང༔ མཆུ་ལ་རེག་ན་མི་ཁ་སྣ་ཚོགས་འབྱུང་ངོ་ཞེས་པ་དང༔ སོ་དང་སེན་མོ་ལ་རེག་ན་བཤའ་ཞིང་བཟའ་བར་བྱེད་དོ༔ ཅེས་པ་དང༔ འཕོངས་དང་རྐང་པར་རེག་ན་ལྡང་བ་མེད་པར་མནན་ནོ་ཞེས་པ་དང༔ རྩི་ཤིང་གི་ཐུར་མ་གཅོད་ན་སྲོག་གཅོད་པར་བྱེད་ཅེས་པའི་བརྡ་སྟེ༔ མཚན་བཟང་ཡང་སྤང་བར་བྱའོ༔ རྟགས་བཟང་པོ་ཤར་བའི་རིག་མ་དེ་དག་ཐབས་ལ་མཁས་པའི་སྒོ་ནས་འདྲིད་ན་འགུགས་པར་འགྱུར་ལ༔ ཆེད་དུ་གཉེར་དགོས་པར་བྱུང་ཚེ༔ མཚན་ལྡན་འགུགས་པའི་ལྕགས་ཀྱུ་ལྟར་ཉམས་སུ་ལེན་ནོ༔ ལག་པའི་འདུ་བྱེད་ལ་བསླབ་པ་ནི་ཞལ་གྱི་གདམས་པ་ལ་རག་གོ༔ དེ་ནས་བསྟེན་པའི་ཚུལ་ལ༔ ཐབས་ཤེས་ཀྱི་ཕུང་ཁམས་ལྷར་གསལ་བའི་ངོས་ནས༔ མཁའ་གསང་བྱིན་བརླབ་པ་ནི༔ ཡབ་ཀྱི་གསང་གནས་ཧཱུྃ་ལས་རྡོ་རྗེ་དཀར་པོ་རྩེ་ལྔ་པ༔ ནོར་བུ་དམར་པོ་ཨོཾ་གྱིས་མཚན་པ༔ ཡུམ་གྱི་གསང་གནས་ཧྲཱིཿལས་པདྨ་འདབ་བཞི་པ༔ ཟེའུ་འབྲུ་དཀར་པོ་ཨཱཿཡིས་མཚན་པ༔ གཉིས་ཀའི་བུག་སྒོ་ཕཊ་ཀྱིས་བཀག་པར་བསམས་ལ་འཇུག༔ དེ་ཡང་དང་པོ་ཞལ་གྱི་གདམས་པ་ལྟར་ཐབས་ལ་མཁས་པའི་སྒོ་ནས་རྩ་བཙལ་བར་བྱ་སྟེ༔ སྤྱིར་སྐྱེས་པའི་དྷཱུ་ཏི་ནི་སྦོམ་ཞིང་ཐུང་བར་གནས་པས་ནོར་བུ་ལས་འདས་པར་ཕྱིར་འོང་བ་མི་སྲིད་ལ༔ བུད་མེད་ཀྱི་དྷཱུ་ཏི་ནི་ཕྲ་ལ་རིང་བར་ཡོད་པས་བྱ་རོག་གདོང་གི་འོག་ནས་ཕྱིར་ནར་གྱིས་འོང་བའི་ཚེ༔ ཕྱག་རྒྱ་བཞིའི་རྩ་ལ་བརྟག་པ་ནི༔ དང་པོ་པདྨ་ཅན་གྱི་རྩ་ནི་མེ་ཏོག་པདྨའི་དབྱིབས་ཅན་དུ་ཡོད་ལ༔ དེའི་རྟགས་སུ་སྣ་ལ་ཛ་བའི་མེ་ཏོག་ལྟ་བུ་ཡོད༔ རྩ་དེ་ནི་ཁ་ཤིན་ཏུ་བཙལ་སླ་ཞིང་འབྱེད་པར་སླ་བས་ཕྱག་རྒྱའི་མཆོག་ཡིན་ནོ༔ གླང་ཆེན་མ་ནི་གཡོན་ནས་ཅུང་ཟད་གཡོན་དུ་འཁྱིལ་བའི་རྣམ་པར་ཡོད་ལ༔ དེའི་རྟགས་སུ་སྣ་གཡས་སུ་འཁྱིལ་བའི་རྣམ་པ་ཅན་དུ་ཡོད་དོ༔ དུང་ཅན་མ་ནི་དུང་དཀར་གྱི་ཁ་ལྟ་བུ་འཁྱིལ་ཞིང་རིང་བར་ཡོད་ལ༔ དེའི་རྟགས་སུ་སྐྲ་དང་སྣ་ཡང་གཞན་ལས་རིང་བར་ཡོད་དོ༔ རི་དྭགས་ཅན་ནི་རི་དྭགས་གླ་བའི་ལྟེ་བ་འདྲ་བ་ཁ་བཙུམ་ཞིང་བཅིངས་པ་གུར་བུའི་རྣམ་པ་ཡོད་ལ༔ རྩ་དེ་ནི་ཤིན་ཏུ་འཚོལ་དཀའ་བ་ཡིན་པས་རྣལ་འབྱོར་གྱི་སོར་མོའི་འདུ་བྱེད་མཁས་དགོས༔ དེའི་རྟགས་སུ་སྣ་ལ་གུར་བུའི་རི་མོ་དང་ལུས་གཞན་ལས་སྦོམ་པར་ཡོད་དོ༔ དེ་ནས་དབབ་འཛིན་འདྲེན་འགྲེམ་གྱི་འཕྲུལ་འཁོར་འཆི་བ་སྲོག་ལ་བབ་ཀྱང་ཐིག་ལེ་ཉུངས་དཀར་གྱི་འབྲུམ་ཙམ་ཡང་མི་གཏང་སྙམ་པའི་ཞེ་དམ་ཡང་ཡང་བཅའ་ལ༔ དང་པོ་དབབ་པ་ལ་མཁས་པ་རུས་སྦལ་ནུར་འགྲོས་ལྟ་བུའི་གདམས་པ་ལ༔ རྡོ་རྗེ་པདྨར་བསྣུན་ནས་ཡབ་ཀྱི་དྷཱུ་ཏིའི་ཡར་སྣེར་ཁམས་དཀར་པོ་བདེ་བའི་རང་བཞིན་ཅན་དངུལ་ཆུ་ལྟ་བུ་དཀར་ཆི་ལེ་བ༔ ཡུམ་གྱི་དྷཱུ་ཏིའི་མར་སྣེར་དྲོད་དང་བདེ་བ་དབྱེར་མེད་ཀྱི་ངོ་བོ་རཀྟ་དམར་པོ་བྱུ་རུའི་རྡོག་པོ་ལྟ་བུར་དམར་ཆིལ་ལེ་བ་བསམ༔ དེ་ནས་ཆགས་པའི་མདངས་ཀྱིས་ཁམས་དཀར་པོ་མར་གྱི་ཞུན་མ་ལྟ་བུར་ནུ་རུ་རུ་ཞུ༔ སྤྱི་བོ་ནས་མགྲིན་པར་བབ་པས་ན་དགའ་བ༔ མགྲིན་པ་ནས་སྙིང་གར་བབ་པས་ན་མཆོག་དགའ༔ སྙིང་ག་ནས་ལྟེ་བར་བབ་པས་ན་ཁྱད་དགའ༔ ལྟེ་བ་ནས་གསང་གནས་བབ་པས་ལྷན་ཅིག་སྐྱེས་པའི་དགའ་བ་ལ་ངོས་གཟུང༔ དགའ་བ་རེ་རེར་ཕེབས་པ་དང་ལུས་གཡང་མོ་ལྟར་སྤྲུག་ལ་ངོ་ཐོག་ཏུ་འཇོག༔ བདེ་དང་སྲ་ཕུད་ཀྱི་ངར་ཅུང་ཟད་ཞི་ནས་དལ་བུས་སྲུབ་པ་ནི༔ ཐིག་ལེ་ཐུར་དུ་མི་རྒྱུག་པའི་གདམས་པའོ༔ གཉིས་པ་འཛིན་པ་ལ་མཁས་པ་རྫ་ཡི་ཐེམ་བུ་བཀག་པ་ལྟ་བུའི་གདམས་པ་ནི༔ དགའ་བ་གསུམ་པ་དང་བཞི་པར་དབབ་པ་ནི་རང་ཉམས་དང་བསྟུན་པའི་སྒོ་ནས་བསྐྱོད་འཕྲོ་བཤོལ་ལ༔ ཧཱུྃ་བུང་བའི་སྐད་ཙམ་ཁ་སྣ་ཕྱེད་མ་ནས་བཏོན་ཏེ༔ ངག་གི་ནུས་པ་མ་རྫོགས་ཀྱི་བར་དུ་ཅི་ནུས་བགྲངས་ལ་འོག་རླུང་དྲག་ཏུ་འཐེན་པས་མགོ་འདར་ཞིང་ཁམས་ཟི་ཐམ་བྱུང་བ་དང་རྔུབ་སྟེ༔ ནང་དུ་མི་མནན་པར་ཕྱི་རུ་རྫོགས་པར་ཕུལ་བ་གོང་བཞིན་ལན་བདུན་བདུན་བྱས་པས་བཛྲ་གྱི་ངར་འཆོར༔ དེ་མ་ཐག་ཏུ་རིག་མ་དང་བྲལ་ཏེ༔ གསུམ་པ་འདྲེན་པ་ལ་མཁས་པ་ཁྲོན་ཆུ་གྱེན་དུ་འདྲེན་པ་ལྟ་བུའི་གདམས་པ་ནི༔ ལུས་གནད་རྐང་པ་གཤིབ་ནས་བརྐྱང་པའི་རྐང་མགོ་གཉིས་ལ་ལག་གཉིས་བཟུང་ནས་དྲག་ཏུ་འཐེན༔ ཚང་ར་རྒྱབ་ཏུ་ཕུལ་ཞིང་མགོ་བོ་བཀུག་ནས་ལུས་ཐམས་ཅད་ཐང་ཆོད་པའི་ངང་ནས་རླུང་འབྱིན་འཇུག་ལ་འབད༔ སྦྱོར་བ་དྲུག་པ་གླིང་བཞི་མཐའ་སྡུད་མིན་པར་ཚང་དགོས༔ དེ་འདྲ་ལན་བདུན་བདུན་བྱས་པའི་རྗེས་སུ༔ བཞི་པ་དགྲམ་པ་ལ་མཁས་པ་ཡུར་ཆུ་བཀྱེ་བ་ལྟ་བུའི་གདམས་པ་ནི༔ ལུས་གནད་སྐྱིལ་ཀྲུང་བཅའ་ལ་ཁ་སྦྱོར་དུ་གཟུང༔ སྟེང་རླུང་འོག་གི་ཉྭ་བཞི་བསྒྲིམ་ཞིང་གྲུ་མོ་བརྒྱང༔ ལག་པ་མཐེ་བོང་གཉིས་ཀྱིས་རྣ་བ་བལྟེབས་ལ་མནན༔ དེ་བཞིན་དུ་མཛུབ་མོ་དང་གུང་མོ་གཉིས་ཀྱིས་མིག༔ སྲིན་མཛུབ་གཉིས་ཀྱིས་སྣ༔ མཐེབ་ཆུང་གཉིས་ཀྱིས་ཁ་བཀབ་ལ༔ ཕོ་འཁོར་གཡས་གཡོན་དུ་ལན་གསུམ་བསྐོར་ནས་དྲག་འབེབ་གསུམ་བྱ༔ ཧ་དང་ཕཊ་ཀྱིས་རླུང་རོ་ལྷག་མ་མ་ལུས་པར་བསལ་ནས་ལུས་ཀུན་སི་ལི་ལི་སྤྲུགས་ལ་མཉམ་པར་བཞག༔ བདེ་བ་ཁོལ་བུར་འདྲིལ་བའམ་དགྲམ་པ་དཀའ་ན༔ གན་རྐྱལ་དུ་ཉལ་ནས་རླུང་རོ་ཅི་ཆགས་སུ་འབུད༔ མི་ཐུབ་པ་དང་རྔུབ་སྟེ་རླུང་སྟེང་འོག་ཁ་སྦྱོར་དུ་འཆིང༔ རྐང་ལག་བཞི་བསྐུམ་ཞིང་གནམ་དུ་ཤད་ཀྱིས་འཕྲ་བར་བྱས་ལ༔ རྒྱབ་གདན་ཁ་ནས་ཅི་ནུས་འཕར༔ དེ་འདྲ་ཡང་ཡང་བྱས་པས་རྩ་ཟུག་ཐིག་ལེའི་ཟུག་རྣམས་སེལ་བར་འགྱུར་རོ༔ བྱང་སེམས་དབབ་པའི་དུས་བཞི་ནི༔ སློབ་མ་སྨིན་ཕྱིར་ཤེར་དབང་བསྐུར་བ་དང༔ བདུད་རྩི་སྨན་སྒྲུབ་ཀྱི་རྫས་དང༔ ཐིག་ལེ་རུལ་བའི་གེགས་སེལ་དང༔ སེམས་བསྐྱེད་དཀར་པོའི་རིགས་རྒྱུད་འཇོག་དགོས་པ་དང་བཞི་སྟེ༔ གོང་མ་གསུམ་དང་སྲིད་འཛིན་གྱི་མེ་ཏོག་འབབ་པ་དང་འཛོམ་ན་དགག་པའི་རྫས་སྦྱོར་དང༔ རིགས་རྒྱུད་འཇོག་ཐབས་རྣམས་ཞལ་གདམས་སུ་ཤེས་སོ༔ དམར་ཆ་འདྲེན་དུས་མ་གཏོགས་དཀར་ཆ་བརྟན་པར་བྱེད་པ་ལ་རྩ་འཚོལ་མི་དགོས་ཏེ༔ དམར་ཆ་འདྲེན་དུས་ཕྱག་རྒྱའི་རྩ་སྒོ་འབྱེད་པའི་རྫས༔ ལྕམ་པ་དང་གཡེར་མའི་ཐང་ལ་ལྕགས་ཕྱེ་བཏབ་ནས་ཙནྡན་དམར་པོ་སྦྲང་དང་སྦྱར་བའི་རིལ་བུ་ཕུལ་བ་ཞག་གཉིས་བརྟེན༔ རང་གི་རྩ་ཁམས་སྡོམ་པའི་རྫས༔ རྡོ་ཁབ་ལེན༔ ཨ་རུ་ར་གསེར་མདོག༔ ཙནྡན་དཀར་པོ་གསུམ་དང་བུ་རམ་སྦྱར་བའི་རིལ་བུ་ཆང་ཞིམ་པོས་ཕུལ་ལ་བརྟེན༔ གཉིས་ཀ་ཁ་ཟས་བཟང་པོས་ལུས་ཟུངས་བསྐྱེད་ལ་བདེ་བའི་རོལ་རྩེད་དུ་མ་བྱས༔ རྩ་སྣ་རྙེད་པ་དང་རྡོ་རྗེ་པདྨའི་གཏིང་དུ་ཕུལ༔ གཟུངས་མ་བདེ་བའི་སྐད་འཚེར་བའི་ཚེ་རྡོ་རྗེ་ཆུ་འཐུང་གི་གདམས་པ་ལྟར་རོ༔ འདྲེན་པར་དཀའ་ན་གསང་ཐུར་གྱི་སྦྱོར་བས་དྲང༔ དེས་ཀྱང་མ་འདྲོངས་ན་ཞལ་གྱི་གདམས་པར་ཤེས་སོ༔ ཐིག་ལེའི་དབྱེ་བ་དྭངས་མ་གཟུང་ཐབས༔ རིག་མའི་བྷ་ག་དམ་བྱེད༔ དབང་པོས་རྡོ་རྗེ་འཕེལ་ཐབས༔ བདེ་བ་སྐྱེད་པ༔ དམར་ཆ་གསོ་བ་སོགས་ནི་ཞལ་གྱིས་ཤེས་སོ༔ ཐིག་ལེའི་དྭངས་མ་ཉམས་ཤིང་འདོད་ཆགས་རང་གར་སྤྱོད་ན༔ དཔའ་བོ་མཁའ་འགྲོ་རྣམས་ཀྱི་སྲོག་སྙིང་ཐིག་ལེ་ཡིན་པས་ངུ་ཙི་ཏི་རེར་འགྲོ༔ དམ་ཚིག་གི་རྩ་བ་ཡིན་པས་སྡོམ་པ་གསུམ་ཀ་ཉམས༔ ལུས་ཀྱི་བཅུད་ཡིན་པས་བཀྲག་མདངས་ཇེ་ངན་འགྲོ༔ སྲོག་གི་དྭངས་མ་ཡིན་པས་ཐིག་ལེ་ཉམས་ཐེབ་རེ་རེས་ཞག་བདུན་བདུན་གྱིས་ཚེ་ཐུང་གསུངས་པའི་ཕྱིར་རོ༔ ཐིག་ལེ་མ་ཉམས་པ་ཤིན་ཏུ་གལ་ཆེའོ༔ པདྨ་རླུང་འབྱིན་སྐབས་སུ༔ མདུན་ཐུར་བྱ་རྒོད་ཀྱི་རྐང་ངམ་མིའི་རྐང་དུང་ཟེར་བ་ནི༔ སྤྱིར་ལུས་ཀྱི་ཆགས་ཚུལ་བྷ་ག་ཡངས་དོག་དང༔ ཁྱེའུ་སྐྱེས་མ་སྐྱེས་ཀྱི་ཁྱད་དུ་ཡོད་དོ༔ པདྨར་འཇུག་པའི་ཚད་ནི༔ མཐོ་གང་མཚམས་སུ་དར་གྱིས་བཅིངས་ལ་ནང་དུ་གཞུག༔ སོར་བཞི་དེ་ཕྱིར་ལྷག་པ་ཡིན་ནོ༔ མོ་ཁྲིད་ཀྱི་ནང་དུ་ཡོད་པའི་མཛེས་ལྡན་དཔའ་བོ་དེ་ལ་དང་པོ་མཐོང་མ་ཐག་ཏུ་བདེ་བའི་ངད་ཀྱིས་ཟུར་མིག་གཡོ་བར་བྱས་པ་ལྟས་ཚེ༔ འཛུམ་པ་སོགས་དགའ་བའི་རྣམ་འགྱུར་སྣ་གཅིག་མི་སྟོན་ན་བདེ་སྟོང་གི་གྲོགས་སུ་མི་འོས་ལ༔ རྣམ་འགྱུར་སྣ་གཅིག་སྟོན་ན་གྲོགས་སུ་ངེས་ཤིང་རྫས་སྔགས་ཀྱི་སྦྱོར་བས་འགུགས་པ་ཡང་མི་དགོས་སོ༔ གལ་ཏེ་སྐྱེ་བའི་རིགས་མཐོ་དམན་སོགས་ཡུལ་དུས་ཀྱིས་བསྐལ་ན༔ མཚན་ལྡན་འགུག་པའི་ལྕགས་ཀྱུ་ལྟར་སྒྲུབ་ཅིང་མ་འགྲུབ་ན་བསྐྱར་བར་བྱའོ༔ ཕྱིང་རིལ་གྱི་གདམས་པ་ནི་ཞལ་ལས་ཤེས་སོ༔ སྦྱོར་བའི་སྐབས་སུ་དྭངས་མ་འཛིན་འདྲེན་འགྲེམ་འཕྲུལ་འཁོར་ནི༔ གོང་དུ་ཕོ་ཁྲིད་ཀྱི་སྐབས་དང་འདྲ་ལ༔ དྲག་འབེབ་ཀྱི་མཚམས་སུ་དྭངས་སྙིགས་འབྱེད་པའི་འཕྲུལ་འཁོར་འདི་ཕོ་ཁྲིད་ལས་ལྷག་པར་འབྱུང་ངོ༔ ཡང་རླུང་དང་ཉམས་ལེན་མེད་པའི་སྐྱེ་བོ་ལ་སྤྱོད་དུ་བཅུག་ན་རང་གི་སྲིད་འཛིན་པ་འཛོམ་ན༔ ཐིག་ལེ་བཙན་ཐབས་སུ་ཆགས་པའི་མན་ངག་དང༔ བློ་ཆེན་སྟོབས་ལྡན་མའི་སྒོ་ནས་ལུས་སྦྱིན་པ་བཏང་བའི་སྐབས་སུ་གཏན་གྱི་སྐྱེ་སྒོ་ཁེགས་པ་རྣམས་ནི་ཞལ་ལས་ཤེས་སོ༔ མཚན་ལྡན་འགུགས་པའི་ལྕགས་ཀྱུའི་ནང་དུ་གསང་བའི་རྫས་བདུན་ཟེར་བ་ནི༔ མེ་ཏོག་ཁུག་ཆོས༔ ཁྱི་ཡི་རྡོ་རྗེ༔ ར་ཡི་མཚན་མ༔ འཕྱོན་མའི་ཆུ་ཤུལ༔ གཡེར་མ༔ ད་བྱིད༔ པད་རག་དང་བདུན་གྱིས་རིལ་བུ་བོད་སྲན་ཙམ་བྱ༔ གྲོང་འཇུག་གོམས་པའི་སྐབས་སུ་སྦྱང་ཡུལ་གྱི་ཐོད་པ་དུམ་བུ་གཅིག་པ་ཡིན་ཏེ༔ དཔྲལ་བ་གནམ་དུ་བསྟན༔ ལྟག་པ་ས་ལ་བཞག༔ ཁ་རང་ལ་བསྟན་ནས་འགུལ་འཁྲིག་མེད་པར་བྱ༔ རང་དང་ཐོད་པའི་བར་ལ་རིང་ན་འདོམ་གང་དང་ཐུང་ན་གྲུ་གང་ཡོད་པར་དགོས༔ བླ་མ་ཡི་དམ་མཁའ་འགྲོ་གསུམ་ལ་གསོལ་བ་ཕུར་ཚུགས་སུ་གདབ་ལ་སྦྱང་ངོ༔ ཐ་མ་ལས་ལ་སྦྱར་བའི་སྐབས་སུ༔ བྱང་སེམས་དཀར་དམར་གྱི་རྫས་བླུག་ཅེས་པས༔ རོ་ཡི་སྣ་བུག་གཡས་སུ་བྱང་སེམས་དམར་པོ་གཡོན་དུ་དཀར་པོ་བླུགས་པ་རྟེན་འབྲེལ་ཡིན༔ སྣ་ཡི་སྦུ་གུ་ཟངས་ལྕགས་སམ་སྨྱུག་མ་ལ་བྱས་པ༔ རིང་ཐུང་སོར་དྲུག་ལ་གུག་པའི་བར་སོར་ཕྱེད་གཉིས་ཙམ༔ ཕྲ་སྦོམ་རང་ཕྱོགས་མཛུབ་མོ་ཙམ༔ ཕར་སྣ་མཐེབ་ཆུང་ཙམ་པ་དགོས་ཏེ༔ རང་ཕྱོགས་སྦོམ་པ་ནི་རང་གི་སྣ་བུག་གི་ཚད༔ ཕར་སྣ་ཕྲ་བ་ནི་འཇུག་ཡུལ་གྱི་རོ་དེ༔ ཁྱེའུ་ལོ་བརྒྱད་ནས་ཉི་ཤུ་མན་ཆད་བསྔགས་པའི་ཕྱིར་རོ༔ སྣ་སྤྲད་པ་ནི་རོ་ཡི་སྣ་གཡོན་རྐྱང་མ་ཡེ་ཤེས་ཀྱི་རྩ་ལམ་བཟང་བ་དང༔ རང་གི་སྣ་གཡས་རླུང་སྟོབས་ཆེ་བའི་ཕྱིར་སྤྲད་པར་བྱའོ༔ དེ་ནས་གཞུང་ལྟར་སྤྱད་པའི་ཡོན་ཏན་གྱིས༔ རླུང་ཁུག་ཉེར་གཅིག་གིས་རོ་ཡི་རྩ་ལམ་འབྱངས༔ དེ་བཞིན་དུ་ཉེར་གཅིག་གིས་རྩ་གཡོས༔ ཉེར་གཅིག་གིས་རྩ་རྒྱས༔ ཉེར་གཅིག་གིས་ཕྱི་དབུགས་འབྱུང༔ ཉེར་གཅིག་གིས་ནང་དབུགས་འབྱུང༔ ཉེར་གཅིག་གིས་དྲོད་འབྱུང༔ ཉེར་གཅིག་གིས་དབང་པོ་འབྱུང༔ ཉེར་གཅིག་གིས་འཛུམ་པ་འབྱུང༔ ཉེར་གཅིག་གིས་དགོད་པ་འབྱུང༔ ཉེར་གཅིག་གིས་སྐད་འབྱུང༔ ཉེར་གཅིག་གིས་ལངས་པར་ནུས་ཏེ༔ རླུང་ཁུག་ཉིས་བརྒྱ་དང་སོ་གཅིག་གིས་འགྲུབ་ལ༔ དོན་དུ་ཉིན་གཅིག་གམ་ཉིན་ཞག་ཕྲུགས་གཅིག་གིས་འཇུག་པར་ནུས་སོ༔ རང་གི་སྔར་ཤེས་པའི་ཡོན་ཏན་ཐམས་ཅད་ཀྱང་གསལ་ལོ༔ དེ་ཡང་གོང་དུ་བཤད་པའི་རླུང་ཁུག་ཉིས་བརྒྱ་སོ་གཅིག་དེ་གཞིར་བཞག་ཙམ་ཡིན་གྱི་རླུང་སྟོབས་ཆེ་ཆུང་གིས་མ་ངེས་སོ༔ འདི་ལ་གྲོགས་བརྩེ་ཞིང་ཐབས་མཁས་པ་ཞིག་གཙོ་ཆེ་སྟེ༔ གྲོགས་དེས་ཚུ་རོལ་གྱི་དྲོད་མ་ཡལ་བར་དུ་སྣ་བུག་གཉིས་སྤྲད༔ དོན་སྣོད་དང་བླ་གནས་ཀྱི་རྩ་ཐམས་ཅད་ཨེ་འབྱུང་བལྟ༔ དོན་སྣོད་མ་བྱུང་ན་ཧཱུྃ་ལ་དམིགས་པ་གཏད་ནས་སྔར་རོ་ལྟར་སྣ་སྤྲད་དེ་གྲོགས་དེས་རླུང་ཕྱི་འཛིན་བྱ༔ བླ་གནས་མ་བྱུང་ན་མཁའ་འགྲོ་ལ་ཚོགས་དང་སྐོང་བ་བྱ༔ རླུང་ཉེར་གཅིག་རེ་གཟུང༔ དེས་ཀྱང་མ་ཆོག་ན་རྩ་དང་དབུགས་དང་སྐད་སོགས་ཚད་དུ་མ་ཕྱིན་བར་དུ་གྲོགས་དེས་སྣ་སྤྲད་རླུང་ཁུག་ཅི་མང་བསྣན༔ རོ་རྙིང་པ་དྲོད་ཅི་ཡལ་ཙམ་དུ་གོས་ཇེ་སྲབ་གཏང༔ རོ་གསར་པ་ལ་ཤ་ཡི་དྲོད་སྦྱར༔ གོས་དྲོན་པོ་བཀོན༔ ཚད་དུ་ཕྱིན་པ་དང་ཁ་ཟས་བཅུད་ཅན་བསྟེན༔ གྲོགས་ལ་དགའ་བའི་ཆོས་དང་ཡོན་སྟེར༔ སྙིང་རྗེ་ཆེན་པོས་ཀུན་ནས་བསླངས་པའི་འགྲོ་དོན་རྒྱ་ཆེན་པོར་བྱའོ༔ ས་མ་ཡ༔ རྒྱ་རྒྱ་རྒྱ༔ གཏེར་སྟོན་འཇའ་ཚོན་སྙིང་པོས་གནས་ཆེན་རྡོ་རྗེ་ཡོངས་རྫོང་མཁའ་འགྲོ་གསང་ཕུག་རྡོ་རྗེ་ཕག་མོའི་བྷ་གའི་འདྲ་འབག་ནས་དངོས་གྲུབ་ཏུ་སྤྱན་དྲངས་པ་ཤུ་བྷ་མསྟུ།། །། ཞལ་གདམས་སྙིང་གི་ཐིག་ལེ་འདི་ཡིན།མཆན།་་་ྈ ྈྈྈྈ གདམས་པའི་མཛོད་འཆང་རྡོ་རྗེ་ཕག་མོ་ལ་ཕྱག་འཚལ་ལོ༔ རྩ་རླུང་མཁའ་འགྲོའི་གསང་མཛོད་ཀྱི་ཟབ་པའི་ཡང་ཟབ་ཞལ་གདམས་སྙིང་གི་ཐིག་ལེ་བསྟན་པ་ལ༔ དང་པོ་ཟབ་ཡིག་སྙིང་གི་རྒྱ་ཅན་ལས༔ རླུང་འཛིན་མི་ཉན་པའི་ཉི་ྩྡྷ་་་མི་ལྔ།གུ་ཝ་གྲུད༔་་་དུས་དྲུག །ཅེས་པ་ཉི་ྩྡྷ་ནི་་་མི་ལྔ།ལུས་ལ་རྨ་ཆེན་པོ་ཡོད་པས་རླུང་འཛིན་ན༔ རྨ་སོས་དཀའ་བས་མི་འཛིན༔ བུད་མེད་སྦྲུམ་མའི་སྲིད་སྦོས་ནས་སྐྱེ་དཀའ་བས་མི་འཛིན༔ མི་རྒན་ཤོས་རླུང་གནད་ལ་མི་ཆུན་པས་མི་འཛིན༔ མ་ནིང་ལ་རླུང་གི་སྟོབས་མི་སྐྱེ་བས་མི་འཛིན༔ ནད་སྣ་ཡོད་པས་རླུང་མི་གནོན་པས་མི་འཛིན་པ་སྟེ་མི་ལྔའོ༔ དུས་དྲུག་ནི༔ རླུང་ལ་གོམས་འདྲིས་མ་གྱུར་གྱི་བར་དུ་ལས་དྲག་པོ་ངལ་མ་སོས་ཀྱི་བར་དུ་མི་འཛིན༔ ནད་ཟུག་གཟེར་དྲག་པོས་ཐེབ་དུས་མི་འཛིན༔ གཉིད་སད་མ་ཐག་ཏུ་མི་འཛིན༔ འདྲེན་འགྲེམ་གྱི་སྐབས་མ་གཏོགས་པ་ཆགས་པ་སྤྱོད་རྗེས་སུ་མི་འཛིན༔ མྱ་ངན་དྲག་པོ་དང་བྲེད་སྔངས་ཆེན་པོའི་སྐབས་སུ་མི་འཛིན༔ འགྲང་ཆེ་ཞིང་རྡུལ་དང་དུ་བ་འཚུབས་དུས་མི་འཛིན་པ་དང་དྲུག་གོ༔ དྲག་རླུང་སྐབས་སུ་ལུས་སྦྱོར་དྲུག་ཅེས་པ་ནི༔ མིག་གཉིས་མཁའ་ལ་གཏད༔ ལྕེ་ཡ་རྐན་ལ་སྦྱར༔ འོག་སྒོ་སྡོམ༔ ཕོ་བ་རྒལ་པ་ལ་གཅར༔ འོག་རླུང་གྱེན་ལ་འཐེན༔ རྐང་གཉིས་བསྣོལ་བའི་མཐེ་བོང་ལ་ལག་གཉིས་ཀྱིས་བསྣོལ་མར་གཟུང་བའོ༔ གྲོགས་ཏྱི་ཡོང་ཀར་་་ཀྱི་ཡོན་ཏན།བུལ་ན་ཕྱི་ནང་གི་རྫས་སྦྱོར་བརྟེན་ཞེས་པ༔ རྣལ་འབྱོར་པ་རླུང་ཞན་ཅིང་དོ་ཝ་་་གོས།དཀོན་པ་དག་གིས༔ འབྲོང་ངམ་གཡག་རོག་པོ་ཤི་མ་ཐག་གི་མཁྲིས་པ་དྲོད་མ་ཡལ་བའི་ནང་དུ་ཕོ་རིལ་འཁྱོར་བ་གང་བླུགས་ལ་སྐམ་པ་དང༔ བཅའ་ལྒ་པི་ལིང་གཉིས་འཁྱོར་བ་ཕྱེད་རེ༔ ཤིང་ཚ་ཐུན་གསུམ༔ ལྕེ་ཚའི་མེ་ཏོག་དང་ཛཱ་ཏི་ཐུན་རེ༔ གོ་བོའི་ཕོ་བའམ་ཤ༔ སྤྱང་ཀི་དང་བྱ་རྒོད་ཀྱི་མཁྲིས་པའམ་ཤ་གང་རྙེད༔ དེ་རྣམས་ཞིབ་པར་བཏུལ་བ་བུ་རམ་ཨ་རག་གམ་ཆང་བཟང་པོས་ཕུལ༔ བརྟེན་ན་ཚོ་དཔིང་དི་་་ལོ་གཅིག་གི།གྲོགས་བསྟེན༔ ཚུ་ཝ་་་ལུས།ཉེ་་་མེ།དཔུང་བཞིན་དུ་འགྲོ༔ ཕྱི་ལ་དྷྱུད་ཅུའི་ྨླ་ཝ་་་བྱུག་པའི་རྫས།ནི༔ གློ་བུར་དུ་རས་འབུད་པའམ༔ ཤིན་ཏུ་གྲང་བའི་གནས་སུ་འགྲོ་དགོས་པ་བྱུང་ན་ལྒ་པི་ཕོ་གསུམ་ཁྱོར་བ་གང་རེ༔ གཡེར་མ་ཁྱོར་ཕྱེད༔ རྡོ་སོལ་ངར་ལྡན་ཁྱོར་བ་ཕྱེད་མིན་ཙམ༔ ཤིང་ཚ་དང་བཙན་དུག་གཉིས་མཐེ་བོང་ཙམ་རེ་ཞིབ་པར་བཏུལ༔ སྣོད་གཡའ་མེད་ཀྱི་ནང་དུ་དབྱར་ཡིན་ན་ཞག་གཅིག༔ དགུན་ཡིན་ན་ཞག་གསུམ་གསུམ་དྲོ་བར་བསྙལ༔ དེ་ནས་རང་གི་ལུས་ཐམས་ཅད་དྲི་ཆུས་དག་པར་བཀྲུས་ཏེ༔ སྨན་ཆེན་བཞི་དང་ཕོ་བ་མིན་པ་ཆ་སྙོམས་བྱུག༔ དེ་རྣམས་ས་དང་མར་རྙིང་གིས་བཀུ་མཉེ་བྱས་ན༔ ལུས་གྲོག་་་དྲོད།ཉེ་་་མེ།བཞིན་དུ་འབར་ཏེ༔ ནངས་མ་རེ་ལ་་ཆུ།ཕུ་ཙ་ཝ་་་ཆུ་རས།གདུར་་དགུ།ྫྷྞོ་ཉ་དུ་ཝ་་་སྐམ་ནུས།པ་འབྱུང༔ ཡང་ལུས་ཀྱི་དམེ་ཙ་ཉ་་་གཉེར་མ།ཉེག་་་མེད།པར་འདོད་ན༔ རང་ལུས་དྲི་ཆུས་དག་པར་བཀྲུས་ལ༔ སྟར་ག་དང་ཆང་གི་ཉིང་ཁུས་བྱུག་གོ༔ ཝཏྲ་་་སྐྲ།ག་ཉ་ཙ་་་དཀར།ཉེག་་་མེད།པར་འདོད་ན༔ སྤྱིར་རླུང་གི་རྣལ་འབྱོར་ལ་བརྩོན་ཞིང་ཐིག་ལེ་མ་ཉམས་པའི་སྐྱེས་བུ་ལ་ཝཏྲ་་་སྐྲ།ག་ཏ་ཙ་་་དཀར།མི་འབྱུང་ཡང༔ ཁྱད་དུ་གཉེར་བ་དང་པོ་ཝཏྲ་་སྐྲ།བཞར་ལ་དག་པར་བཀྲུས་ཏེ༔ ཨ་རུ་ར་གསེར་མདོག་བཀོལ་བའི་ཆུ་ཡང་ཡང་བྱུག༔ དེ་སྐམ་པ་དང་མཚུར་ནག་ཆུས་ལན་གསུམ་བྱུག་ན་འགྲུབ་བོ༔ རྡོ་རྗེ་ཆུ་འཐུང་གི་སྐབས་སུ་རྡོ་རྗེ་མི་གནོད་པའི་ཐབས་ནི༔ གསང་ཐུར་ནང་དུ་རྒྱུས་པ་སྦང་བ་དྲང་བ་ལྷག་མ་ཕྱིར་ལྟེ་བ་ནས་དགྲམ་ནང་དུ་བཅུག་ཚར་བ་དང་རྒྱུས་པ་ཕྱིར་འཐེན་ནོ༔ མ་གྲུབ་ན་སྤོག་པ་ནི༔ ཐུར་མ་ནས་ཙིད་་་རིག།ཉ་་་མ།ལྟ་བུས་སྤུར་འཇིབ་པའམ༔ ཡང་ན་རང་གི་སྒྱུ་རིལ་གྱི་འབུད་པའི་སྦྱོར་བ་བྱས་ན་འགྲུབ་བོ༔ ཕོ་ཁྲིད་ཀྱི་སྐབས་སུ་ཚད་་་ལག།ཙའི་་་པའི།འདུ་བྱེད་ལ་བསླབ་པ་ནི༔ ལུས་ཙོག་པུ་པུས་འཁྱུད་དུ་འདུག་པ༔ ཕྱི་རྟ་མགྲིན་ནམ་ནང་སྟོང་པར༔ གསང་བ་དྷཱུ་ཏི་སྤྱི་བོ་ནས་གསང་བའི་བར་དུ་དྲང་ཤད་དེ་ཟུག་པ༔ ཡར་སྣེ་སྤྱི་བོར་ཁམས་བྱང་སེམས་ཀྱི་དཀྱིལ་འཁོར་དཀར་པོ༔ དངུལ་ཆུ་གཡའ་དང་བྲལ་བ་ལྟ་བུ་དཀར་ཆི་ལེ་བ༔ མར་སྣེ་གསང་གནས་སུ་ཁམས་བྱང་ཆུབ་སེམས་ཀྱི་དཀྱིལ་འཁོར་དམར་པོ་མཚལ་ལྕོག་ལ་མ་ལྟ་བུ་ཆིལ་ལེ་བ༔ སྙིང་གར་རླུང་སེམས་ཀྱི་ངོ་བོ་ཧཱུྃ་ལྗང་གུ་གཡུ་དྲུག་དམར་གྱི་མདོག་འདྲ་བ་ཚོན་གང་དུ་བསམས་ལ༔ རླུང་འབྱིན་པའི་ཚེ་ཧཱུྃ་དེ་ཡར་སོང་ནས་སྤྱི་བོའི་དཀར་ཆ་ལ་ཕོག༔ ཧཱུྃ་གི་ཀླད་ཀོར་དེས་དཀར་ཆ་རང་དབང་མེད་པར་དྲང༔ རླུང་ནང་དུ་འཇུག་པའི་ཚེ་དམར་ན་རར་སོང༔ གསང་གནས་ཀྱི་དམར་ཆ་དང་འདྲེས་པར་བསམས་ལ༔ རླུང་ལྟེ་འོག་ཏུ་མནན་པའི་ཚེ་ངོ་ཐོག་ལྷན་གྱིས་འཇོག༔ ཡང་འབྱིན་པའི་ཚེ་ཧཱུྃ་གི་ཞབས་ཀྱུའི་དམར་ཆ་རང་དབང་མེད་པར་དྲངས༔ སྤྱི་བོའི་དཀར་ཆ་དང་འདྲེས་ཏེ་བདེ་བ་དཔག་ཏུ་མེད་པ་སྐྱེས་པ་ལ་སེམས་གཏད་ཅིང་ངོ་ཐོག་ཏུ་འཇོག་གོ༔ དེ་ཡང་དམིགས་པ་སྨད་དུ་གཏད་པའི་ཚེ་བདེ་བས་འཆོར་སྙམ་བྱེད་ཅིང༔ སྟོད་དུ་གཏད་པའི་ཚེ་སྨད་ཀྱི་བདེ་ཉམས་ཡལ་ནས་སྟོད་དུ་བདེ་ཁྲིལ་གྱིས་སོང་ན་འབྱོང་བ་ཡིན༔ དེ་ནས་རང་ཉིད་ལྷར་གསལ་བའི་ངོ་ཐོག་ཏུ་འཇོག་པའི་ངོས་ནས༔ ཚད་ཙའི་་་ལག་པའི།འདུ་བྱེད་ཀྱིས་རྡོ་རྗེ་དལ་བུས་གསོར༔ བདེ་བའི་ཐིག་ལེ་མགྲིན་པ་ཙམ་དུ་བབས་ནས་ཡིད་དགའ་རུམ་གྱིས་འབྱུང་བ་དང་ཀློད༔ བདེ་བ་ཡལ་ནས་ཅུང་ཟད་རེ་གསོར་བ་ལན་ལྔའི་མཚམས་སུ་འདྲེན་འགྲེམ་འཕྲུལ་འཁོར་གསུམ་གསུམ་བྱ་ལ་ཟླ་གཅིག་གམ་ཞག་བཅུ༔ དེ་ནས་སྙིང་ག་ཙམ་དུ་དབབ་ལ་ལན་གསུམ་གསུམ་གྱི་འདྲེན་འགྲེམ་འཕྲུལ་འཁོར་བཞི་བཞི་བྱ་བ་ཟླ་གཅིག་གམ་ཞག་བཅུ༔ དེ་ནས་ལྟེ་བ་ཙམ་དུ་བབ་པ་ལན་གཉིས་གཉིས་ཀྱི་མཚམས་སུ་འདྲེན་འགྲེམ་འཕྲུལ་འཁོར་ལྔ་ལྔ་བྱ་བ་ཟླ་བ་གཅིག་གམ་ཞག་བཅུ༔ དེ་ནས་གསང་གནས་མཚམས་སུ་བབ་པ་ལན་རེ་རེའི་མཚམས་སུ་འདྲེན་འགྲེམ་གྱི་འཕྲུལ་འཁོར་བདུན་བདུན་བྱ་བ་ཟླ་བ་གཅིག་གམ་ཞག་བཅུ༔ དེ་ནས་ནངས་པར་སྣོད་གཙང་མར་དྲི་ཆུ་བཞག་ལ་བལྟས་པས་བྱང་སེམས་ཡུངས་དཀར་གྱི་འབྲུ་མའམ་དར་སྐུད་ཙམ་དངོས་སུ་མ་མཐོང་ཡང་ཐུར་མས་བཏེགས་པས་བ་ཐག་གི་ཚུལ་དུ་བྱུང་ན་ཐིག་ལེ་མ་ཟིན་པ་ཡིན་པས་སྔར་བཞིན་བསྐྱར༔ འདི་ཉིད་ཉམས་ཁྲིད་དུ་སྐྱོང་བའི་རྣལ་འབྱོར་པ་ཇི་ལྟར་འདོད་པ་བཞིན་དུ་འགྲུབ་སྟེ་དཔེར་ན་ཐང་ཆེན་པོ་ཞིག་གི་མཐར་གཡང་ས་ཆེན་པོ་ཞིག་ཡོད་པ་རྟ་རྒྱུག་ན་ཐང་སྟོད་ནས་གཡང་སའི་བར་ས་མཚམས་བཞི་ལྔ་བྱས་ཏེ༔ མཐར་གཡང་སའི་ཁ་ནས་ཀྱང་ཟློག་ནུས་པ་དང་འདྲ་སྟེ་ཤིན་ཏུ་ཟབ་པའི་གདམས་པ་ཡིན་ནོ༔ དམར་ཆ་འདྲེན་པའི་གཡས་སུ་ཡུམ་གྱི་དབུ་རྩ་རྙེད་པ་ཞི་ཐབས་ནི་ཝྣཝ་་་སྔས།འཇོལ་་་འབོལ།མཐོ་དམན་རན་པའི་སྟེང་དུ་མུ་ཏྲ་གན་རྐྱལ་དུ་བསྙལ༔ ཉ་ཐ་ཚ་་་མཁལ།གཉིས་སུ་གྲུ་གུ་ཁུ་ཚུར་ཙམ་པ་གཉིས་བཞག་ནས་དར་ཐག་གིས་བསྡམ༔ སྲིན་ཞལ་དུ་ཕྱིང་དྲིལ་སྣུམ་ཚོས་རྡོ་རྗེ་མྱུག་གུ་ཙམ་ཞིག་གཞུག༔ དེ་ནས་མུ་དྲའི་བྱ་རོག་གདོང་པ་ཐབས་ཀྱི་གོང་མོས་དཀྲུགས་པའི་བྱ་གདོང་འོག་ནས་རྩ་སྣ་རྣོ་ཧྲུད་ཧྲུད་དུ་ལུད་ཡོང༔ དེ་སྲ་ཕུད་ཀྱི་བུ་གར་བཅུག་ནས་ཕྱིར་མ་ཤོར་བར་དལ་བུའི་སྒོ་ནས་རྡོ་རྗེ་པདྨར་འཇུག༔ དེ་ཡང་རྡོ་རྗེ་པདྨར་ཡར་རིམ་གྱིས་ཕུལ་བ་བཞིན་དུ་སྲིན་ལམ་གྱི་ཕྱིང་རིལ་མར་མར་འཐེན་པ་དུས་མཉམ་དུ་ཤེས་དགོས༔ དེ་མ་ཤེས་ན་ཕྱག་རྒྱ་ཚེའི་དུས་བྱེད་པ་ཡང་སྲིད་པས་ཤིན་ཏུ་གཟབ་དགོས་སོ༔ རྩ་རིང་ཐབས་ཝེ་ཙ་ཉོའི་་་སེན་མོའི།འདུ་བྱེད་ནི༔ མཐེབ་མཛུབ་གཉིས་ཀྱི་ཝེ་ཙ་ཉོ་རྩ་བ་ནས་བརྡར་ཞིང་འཇམ་པར་བྱས༔ དར་རམ་ཤ་ཤུན་གྱིས་གཡོགས་ལ་པདྨ་ཐ་་ཁ།ཆྱེཝ་་་ཕྱེས།ཏེ་རྩ་སྣ་ཅུང་ཟད་བྱུང་ཇ་་བ།དེ་ག་་་དལ།ཚ་ཇུའི་་་བུའི།ཇ་ཧོ་་་བཞོ།མཁས་པར་བྱས་ལ་སྔར་བཤད་པ་བཞིན་རྡོ་རྗེའི་ཇུ་་་བུ།གར་བཅུག༔ རྩ་སྣ་འདི་ད་ཚ་་་དལ།ཇུའི་་་བུའི།ཇ་ཧོ་ཐབས་མ་མཁས་ན༔ ད་ཨུན་ཝ་་་གཟུངས།མ་འཆི་ཉེན་ཡོད་པས་དེ་ལུགས་ཤེས་པར་མཛོད༔ ཕྱག་རྒྱ་བཞིའི་ངོ་འཛིན་ནི༔ པདྨ་པད་དི་ཕྱག་རྒྱ་མཆོག་ཡིན༔ ཝཱིག་ཏྱན་འཤིང༔ གྭནཝ་མ་ཡང་འདྲང༔ གླང་ཆེན་མས་ཀྱང་ཝཱིག་འཛིན་དྭངས་མ་འདྲང༔ དུང་པད་ཉ་ཝ་ཝཱིག་འཤིང་ལ་དྭངས་མ་འདྲང་དཀའ༔ རི་གྭ་ད་ཝ་ཉ་ཝ་ཝཱིག་འཤིང་ལ་དྭངས་མ་འདྲོངས་སོ༔ ག་ཉ་ཙ་པ་འདྲེན་དུས་རྩ་ཁ་འབྱེད་སྡོམ་གྱི་ྨླ་ཝ་ཞག་གཉིས་རེ་བརྟེན་ནས་གཞུང་དུ་བཤད་པ་ལྟར་འདྲངས་སོ༔ དེས་ཀྱང་མ་འདྲོང་ན༔ ལམ་ཐུར་སོར་དགུའི་མཚམས་སུ་དར་གྱིས་བཅིངས་ཏེ༔ མུ་དྲཱའི་པདྨ་དར་ལ་མ་ཐུག་བར་བསྣུན༔ གེ་ཙན་ཉིད་དྲི་འཛིན་གཡས་སམ་ཁའི་གྲད་དུ་འབེ་ཇ་ཚ༔ དང་པོ་ནས་ཉ་ཚ་དུ་ཆང་རག་བཟང་དྲུག༔ གཟུངས་མ་དེ་དང་མཉམ་དུ་ཚྭེ་ཝ་འདྲེས་པར་དཀྲུགས་ནས་མིད་དོ༔ དེ་དུས་དམིགས་པ་ནི་ཚེ་དཔག་མེད་ཡབ་ཡུམ་གྱི་སྦྱོར་མཚམས་ནས༔ བྱང་སེམས་དཀར་དམར་གྱི་རྒྱུན་བབ༔ རང་ལུས་ཐམས་ཅད་འཆི་མེད་ཚེའི་རྒྱུན་གྱིས་ཁེངས་པ་ལ་སེམས་གཏད་རྗེས་སུ་འགྲེམ་པའི་འཕྲུལ་འཁོར་ལ་ནན་ཏན་དུ་བྱས་ན་ཕན་ཡོན་གཞུང་དུ་བཤད་པ་དང་མཉམ་མོ༔ ཟབ་ཡིག་ལས༔ ཝཏྱེ་ཝྒྷོ་ཇཏད་པའི་ྨླཝ་སྦྱོར་ཞེས་པ༔ གནས་སྐབས་དགག་ན༔ རྒྱ་ཚྭ༔ ལན་ཚྭ༔ མཛེ་ཚྭ༔ བུལ་ཏོག༔ ཚྭ་ལ༔ སྟར་བུ༔ མཚུར་ནག༔ དེ་བདུན་ཞིབ་པར་བཏགས་ནས་སྦྲང་ད་དང་སྦྱར་ནས་རིལ་བུ་སྲན་མ་ཙམ་བྱ༔ ཁམས་འབབ་ཁར་ནོར་བུ་ཨེ་དབྱིངས་ནས་བཏོན་ལ༔ རིལ་བུ་རེ་རེ་མྱུ་གུའི་རྩེ་མོར་སྐྱོན་ནས་དབབ་ན་དོན་འགྲུབ་ངེས་སོ༔ ཡང་མཐར་ཐུག་གི་ཛཏད་ན༔ ས་སྙིང་བཏུལ་མ་ཞོ་གང༔ སྤྱིན་སྲན་མ་ཙམ་གཉིས་ཆུ་སྒོང་ཀོག་གང་ཙམ་ལ་སྐམ་པ་བསྣུར༔ དེ་ལ་ནས་ཆང་བཟང་པོ་སྒོང་ཀོག་བཞི་ཙམ་བླུག༔ གླ་རྩི་དངུལ་ཆུ་གཉིས་སྲན་མ་ཙམ་དུ་བཏབ་ལ༔ མཆིལ་མས་བཤིག་པ་བཏབ༔ དེ་ཕུད་ཚན་ནང་ལ་ཞག་གཅིག་བསྙལ་ནས་ཚགས་སུ་བྱས་ཏེ༔ རྡུལ་གྱི་མེ་ཏོག་ཆད་ནས་ཞག་བདུན་གྱི་བར་དུ་ནངས་པར་ལ་ལྟོ་སྟོང་ལ༔ བསྟེན་ན་གྲུབ་པར་ཐེ་ཚོམ་མེད༔ ཙིད་ཝ་ཙདྱུག་འབོད་ཅའི་སྐབས་སུ༔ པད་རཱག་མཚལ་མདོག་དྲི་མེད་འབབ་པ༔ ཁིད་ལེ་ཆུ་ཁྱེར་གྱི་རྣམ་པ་ཅུང་ཟད་འབབ་པའི་ཐོ་རེངས༔ ཙིད་ཉའི་ཛཞད་གཞལ་ཡས་ཁང་དུ་བསྐྱེད་པའི་དབུས་སུ༔ པདྨ་ཉི་ཟླའི་སྟེང་དུ་ཧྲཱིཿདཀར་ལ་དམར་བའི་མདངས་ཆགས་པ་གཅིག་བསམ༔ དེ་ལས་འོད་ཟེར་དཔག་ཏུ་མེད་པར་འཕྲོས༔ བར་དོའི་སེམས་ཅན་གྱི་དོན་མཛད་པའི་རིག་འཛིན་སྤྲུལ་སྐུ་ཞིག་ལ་ཕོག༔ དེའི་ཐུགས་ཀྱི་ངོ་བོ་ཐམས་ཅད་ཚུར་བསྡུས་ནས་རྒྱུས་པའི་རྩ་ལ་བརྒྱུད༔ རྡོ་རྗེའི་ལམ་ནས་པདྨའི་ས་བོན་ལ་ཐིབ་ཀྱིས་ཐིམ་པར་བསྒོམས་ལ༔ ཐིག་ལེ་ཆིལ་གྱིས་དབབ་ཏེ་མི་དམིགས་པའི་རྒྱས་གདབ༔ ཡུཀ་ལ་ཁ་ཟས་བཟང་པོ་བརྟེན༔ ཟླ་བ་སྟེང་མ་ཡ་ྷྩ་ཉལང་ཉ་བྱུང་ན་ཆགས་པ་ཡིན༔ བསྐྱར་དགོས་བྱུང་ན་ད་ཨུན་ཉའི་ྩྑེ་འོག་ཏུ་ཙནྡན་དཀར་དམར་ག་པུར་མཚལ་རྣམས་ཀྱིས་ཡི་གེ་ཧྲཱིཿགཅིག་བྲི༔ གསང་རྡོར་བ་བླ་སྦྲང་སྨྱོན་སྦྱར་ལ་བྱུག་སྟེ༔ གོང་གི་རྟེན་འབྲེལ་དམིགས་པ་དང་བཅས་སྙོམས་པར་འཇུག་གོ༔ ཐྱེའུ་ཇར་ཝ་པ་འཕེལ་བྱེད་ཀྱི་རྫས་ནི༔ ནམ་ཇར་ཝ་ཅའི་དུས་སུ་དྲི་བཟང་གིས་བདུག༔ སྨན་ཆབ་དང་བརྒྱུད་བཟང་གི་འོ་མ་དྲོན་མོས་ཁྲུས་བྱ༔ ཙནྡན་དཀར་དམར་ག་པུར་གུར་གུམ་ཛཱ་ཏི་གླ་རྩི་གྷི་ཝཾ་ཨ་རུ་ར་གསེར་མདོག༔ ཡབ་ཡུམ་གྱི་བདུད་རྩི་བྱིན་རླབས་རྟེན་གང་འཛོམ་ཞིབ་པར་བཏུལ་ལ༔ ཙཏད་ཉ་ཙམ་བྱིན་གོང་དུ་ལྕེ་ལ་བཞག༔ སླར་ཙཏད་ཉ་ཙ་དང་བསྲེ་ཞིང་ཞག་བདུན་དང་ཉེར་གཅིག་བར་དུ་བཏང༔ ཕྱི་ལ་ཡང་བྱུག་ཅིང་དཀར་ཕྱོགས་ཀྱི་རིམ་གྲོ་ལ་འབད་ན་ཕན་ཡོན་དཔག་ཏུ་མེད༔ ཐིག་ལེའི་དབྱེ་བ་ལ༔ མ་གཟུང་བཏང་ཡང༔ དཝ་ན་ཇ་ནས་ཡར་ལྡོག་པའི་ཁྲིད་ཚེ་སྲོག་འཛིན་ལུས་ཟུངས་བསྐྱེད་པའི་དྭངས་མ་སྟེ་ཕྱིར་འགྲོ་བ་རང་གནས་སུ་ལྡོག་གོ༔ བཟུང་ཡང་མི་འཛིན་པའི་ཁིཿཿད་ཚེ་ནི་ཕད་ཝ་ཅ་སྐྱེས་པའི་རྟགས་སུ་བ་ཡི་ཁ་ཆུ་འདྲ་བ་ཞིག་འབྱུང་སྟེ༔ ཟིན་པ་ལ་ཕན་ཡོན་དང་ཤོར་བ་ལ་ཉེས་དམིགས་གང་ཡང་མེད་དོ༔ བཟུང་ན་ཟིན་པའི་ཁིད་ཚེ་དྭངས་སྙིགས་གཉིས་ཡོད་དེ༔ སྙིགས་མ་ནི་ཧོ་ལྟར་སྐྱ་ལྷུག་གེ་བ་དེའི་གསེབ་ཏུ༔ གྭན་ཝ་ཉ་དཀར་ལ་འཚེར་བ་ཉུང་འབྲུ་ལྟ་བུ་དྲུག་ཡོད་པ་སྟེ༔ ཝརིག་ཅ་འབྱུང་བའི་ས་བོན་ཡིན་ལ༔ ཉོ་ཡི་དྭངས་ཉ་དང་འཕྲད་པས་ཝརིག་ཆགས་པར་བྱེད༔ སྙིགས་མ་ྫྷཏྱ་ྩྭུད་དེ་བ་དེ་ནི་ཇཞ་དེ་ནས་ཕྱིར་འབོར་ནས་འོང༔ གྭན་ཝ་ཉ་འཆོར་ན་ཉེས་དམིགས་ཆེ་བ་དེ་ཡི་ཕྱིར༔ གྭན་ཝ་ཉ་ཤོར་གྱིས་དོགས་ནས་སྙིགས་མ་ཡང་གཟུང་དགོས་པ་ཡིན་ལ༔ གྭན་ཝ་སྙིགས་དེ་ཡང་སོ་སོར་དབྱེ་ནུས་ན༔ སྙིགས་མ་གཏོང་བ་ལ་ནི་ཚུ་ཝ་ཏྱི་ཛ་ཆུང་བ་ཙམ་ལས་ཉེས་པ་ཆེ་བ་ནི་མེད་དོ༔ གྭན་ཝ་མ་གཟུང་ཐབས་ལ་སྙོམས་པར་འཇུག་པའི་ཚེ༔ རང་གི་སྨིན་མཚམས་སུ་གཡུང་དྲུང་དམར་པོའི་སྟེང་དུ་ཁིད་ཚེ་དཀར་ལ་འཚེར་བ་ཉུངས་དཀར་འབྲུམ་ལྟ་བུ་དྲུག༔ གཅིག་ཏུ་སྤུངས་པའི་ཚུལ་དུ་ངང་ཙེ་རེ་ཡོད་པ་ལ་སེམས་གཏད་པ་ལ༔ སྙིགས་ཉ་ཛོར་ཡང་གྭན་ཝ་ཉ་ཉི་མཉ་ཝ་པའི་གནད་ཡོད༔ ཙིད་ཉའི་ྖཀ་དྭ་གཉ་བྱེད་ཀྱི་ཙླ་ལ༔ ཁུག་ཆོས་སྤང་རྒྱན་ཤང་དྲིལ་དཀར་པོ་གསུམ་ཁ་མ་བྱེ་བ༔ བྱ་ཕོའི་ཨོག་ཞོལ༔ རྨ་བྱའི་མདོངས་སྒྲོ་རྣམས་ཞིབ་པར་བཏགས་ལ་འཐུང༔ མར་གསར་དང་སྦྱར་ནས་ྨཉག་ལའང་བྱུག༔ དབང་པོའི་བཛྲ་འཆེ་ཚ་ཁང་ཝ་དི༔ འབྲས་བུ་གསུམ་གྱི་ཐང་དུ་རྡོ་རྗེ་སྦངས་ནས་ཀ་ཙ་བྱུག་ཅིང་ཉི་མར་བསྲོ་ལ་རན་པར་མཉེ༔ སྒྲེང་བ་དང་འོག་ཏུ་མི་གཞིལ་བར་གཡས་གཡོན་སྟེང་རྣམས་སུ་འཁེངས༔ གཟིམས་པའི་ཚེ་རྒྱ་མཚོ་ལ་སྦྱར་ནས་བཞག༔ དེ་ནས་ཁྱི་དང་བོང་བུའི་རྡོ་རྗེ་སྐམ་པའི་ཕྱེ་མ༔ གཡེར་མ་དང་སྤོས་དཀར་ཐུན་རེ་བྱུག་སྟེ༔ འབྲུ་གསུམ་གྱི་སྙིང་པོ་བདུན་བདུན་མགྲོན་ཐལ་ཐུན་གཅིག་རྣམས་ཞིབ་པར་བཏགས་ལ༔ ཆང་རྒན་གྱི་ཉིང་ཁུར་སྦྱར་ནས་གར་སླ་ཞོ་ཙམ་བྱ་སྟེ༔ དབྱར་ཡིན་ན་ཞག་གསུམ་དགུན་ཡིན་ན་ཞག་ལྔ་དྲོ་སར་བསྙལ༔ དེ་ནས་དབང་ལག་གི་ཕྱེ་མ་བསྲེས་ཏེ་རི་བོང་རིལ་མ་ཙམ་བྱ༔ དེ་མོ་རིགས་ཀྱིས་མ་མཐོང་བར་ལས་སྦྱོར་དུས་སུ་རིལ་བུ་རེ་རེ་རང་གི་ཁར་སྦངས་ལ་རྡོ་རྗེ་མྱུག་གུ་ལ་བྱུག༔ བསྐམས་ཚར་ནས་ཙ་ཚི་ཅའི་བདེ་སྟོང་སྐྱེ་བའི་གྲོགས་སུ་འགྱུར་རོ༔ བདེ་ཤེས་ཆུང་ན་བདེ་བ་སྐྱེད་པའི་ཙྙ་ཝ་དི༔ ལྕམ་པའི་འབྲས་བུ་གཟེ་མ་གཡེར་གསུམ་གྱི་ཕྱེ་མ་རྡོ་རྗེའི་རྩེ་ཏོ་བསྐྱོན་ནས་སྦྱོར་ན་ཇ་གེ་ཇ་ཙཏྱཝ་ཝོ༔ ཙིད་མའི་གཉ་ཙ་ཕ་འདྲེན་ཆེ་ན་ལུས་ཟུངས་ཤོར་བས༔ ད་ཝོ་བའི་ཁར་ཝ་ཏྱི་ཙླ་ཝ་དི༔ ཉའི་ཀླད་པ༔ སྦྲུལ་གྱི་རྒྱུང་པ༔ རྒྱ་བྱིལ་དམར་པོའི་ཤ༔ ར་ཐུག་གི་འབྲས་བུ༔ བྱ་ཕོའི་ངང་སྒོང་རྣམས་ཝཏ་ཉ་ཅའི་ཆྱིཉ་གན༔ ཨ་རུ་ར་ཤ་ཆེན་དེའི་བུང་དང་མཉམ་པའི་ཀ་ར་མཉམ་སྦྱར་ནས༔ རིལ་བུ་ལུག་རིལ་ཙམ་བྱས་ནས་ཐོ་རེངས་བརྟེན་པས་ལུས་སྟོབས་ཙཏྱ་ཝ༔ དམར་ཆ་མ་འདྲོངས་པར་ཙླཝ་སྦྱོར་ལ་བརྟེན་ན་ནུབ་རེར་བསྡུ་ཤ་ཉེར་གཅིག་རེ་སྤྱོད་ཀྱང་བྷོ་དྷེ་ཤ་མི་ཞི་སྟེ༔ ད་ཨུན་ཉ་ཛ་གི་ཤས་ཆུང་བ་དག་ལ་བསྟེན་ན་བཟང་ལ༔ རྣལ་འབྱོར་པའང་ཁིད་ཚེ་འཆི་ཚ་ཇའི་རྫས་བརྟེན་དགོས་པ་བྱུང་ཚེ་ཕན་པའི་གདམས་པ་ཟབ་མོའོ༔ ཕྱིང་རིལ་གྱི་གདམས་པ་ནི༔ དང་པོ་སྙུག་སྦུབ་མཐོ་གང་བ་ཞིག་གི་ནང་དུ་ར་ཐུག་ལུག་ཐུག་གི་འབྲས་བུ༔ སྐྱེས་པ་ཡིད་འོང་གི་ཁུ་བ་རྣམས་བྱུག༔ དེ་ཕྱིང་པས་དྲིལ་ལ་ནོར་བུ་དང་བཅས་པ་དོད་པར་བྱ༔ དར་དང་གོས་ཆེན་གྱིས་འཇམ་པར་དྲིལ་ྖཞ་དྭ་ཙ་མི་གནོད་ཅིང་བདེ་བར་བྱས་ལ་གོང་གི་རྫས་དང་མར་བསྲེ་ལ་བླུག༔ དེ་ནས་ཕོ་ཁྲིད་སྐབས་ཀྱི་ཚད་ཙའི་འདུ་བྱེད་བཞིན་དམིགས་པ་འཕྲུལ་འཁོར་སོགས་འདྲ་ལ༔ ཕྱི་ཕོག་གམ་དང་ནང་སྟོང་ར་རྣམས་རིམ་པར་བསླབ་བོ༔ སྐྱེས་པའི་ཐིག་ལེ་བཙན་ཐབས་སུ་འཛིན་པར་འདོད་ན༔ གཙ་གཉ་ཙ་བོ་ཁ་གང་གི་དཀྱིལ་རྡོ་རྗེའི་མདུད་པ་བྱས་ལ་དྲག་སྔགས་ཀྱིས་བཏབ༔ རྡོ་རྗེ་བསྒྲེངས་པའི་འོག་གཉིས་རྩ་བོ་ཆེ་མདུད་པ་ནོན་པར་བྱས་ལ་དམ་དུ་བཅིང༔ ལས་སྦྱོར་ཚར་བ་དང་རྡོ་རྗེ་གསོར་ལ་ཁིད་ཚེ་ཕྱིར་དབྱུང་ངོ༔ དཀར་ཏྱི་སྐྱེ་སྒོ་ཇ་ཏད་ཅ་ཙ་འདོད་ན༔ གོང་དུ་བཤད་པའི་ས་སྙིང་ལ་སོགས་གསང་བའི་རྫས་བཞི་བྱ་ཐབས་བཅས་པ་ལག་ལེན་མ་འཛོལ་བར་བྱའོ༔ གཞན་ཡང་མན་ངག་ཉམས་ཀྱི་ལག་ལེན་ཐམས་ཅད་གནད་དུ་འགྲོ་ཞིང་ཞལ་ཤེས་ཐིངས་པའི་རྣལ་འབྱོར་མ་གཏོགས་ཐོས་ཆུང་སྒེར་བུ་ཅན་གྱི་གཡང་ས་ཆེན་པོ་ཡོད་པར་ཤེས་སོ༔ འདི་ནི་རླུང་སེམས་གནད་དུ་ཚུད་ཅིང་མན་ངག་གི་གཟུངས་ཐུབ་པ་རེ་རེ་ལས་གཅིག་རྒྱུད་མིན་པར་འབྱམས་སུ་སྤེལ་ན་མཁའ་འགྲོ་གཏེར་སྲུང་གི་བཀའ་ཆད་འོང་བས་ཤིན་ཏུ་གཅེས་པར་དགོས་སོ༔ ཨུ་ཡ༔ ཨག་ཐཾ༔ ས་མ་ཡ༔ རྒྱ་རྒྱ་རྒྱ༔ ཞལ་གདམས་སྙིང་གི་ཐིག་ལེ་འདི་ནི་གཏེར་སྟོན་འཇའ་ཚོན་སྙིང་པོས་གནས་ཆེན་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པ། སླར་ཤིང་མོ་གླང་གི་ཧོར་ཟླ་གསུམ་པའི་ཚེས་བཅུའི་ཉིན་པར་ལུང་ཟིན་གྱི་སློབ་མ་ཁྲོ་ཆུང་ནང་སོ་རྡོ་རྗེ་ནམ་མཁའ་དབང་ལྡན་གྱིས་ནན་ཆེར་བསྐུལ་ངོར། ཁྲོ་ཆེན་རྒྱལ་པོའི་ཕོ་བྲང་དྲུག་ཟུང་འབྲུག་མོ་རྣམ་པར་རྒྱལ་བའི་དབུ་རྩེར་ཤོག་སེར་ལས་ཞལ་བཤུས་གྲུབ་པ་དགེའོ། །བཀྲ་ཤིས་པར་གྱུར་ཅིག། །། ྈ རྩ་རླུང་མཁའ་འགྲོའི་གསང་མཛོད་ལས༔ ལེའུ་མ་འཆོལ་རྩིས་རྒྱ་བཞུགས༔ ྈྈྈྈ བདེ་ཆེན་རྡོ་རྗེ་ཕག་མོ་ལ་ཕྱག་འཚལ་ནས༔ རྩ་རླུང་མཁའ་འགྲོ་རྡོ་རྗེ་གསང་མཛོད་ཀྱི༔ ལེའུ་མི་འཆོལ་ངེས་པའི་རྩིས་རྒྱ་འདི༔ སྐལ་མེད་དག་ལ་པིར་གྱི་ཁ་བཞིན་བསྡམ༔ ས་མ་ཡ༔ རྒྱ་རྒྱ་རྒྱ༔ དེ་ཡང་ཡིད་ཆེས་ལུང་གི་ཆེ་བ་ཡིས༔ ཐེ་ཚོམ་རྟོག་པའི་དྲ་བ་བཀྲལ་བར་བྱེད༔ དབང་མཆོག་ཡེ་ཤེས་རང་ལ་ཤར་བ་ཡིས༔ སྐལ་ལྡན་སློབ་མ་སྨིན་ཅིང་གྲོལ་བར་བྱེད༔ ཕྱི་ལྟར་བསྐྱེད་རིམ་ལྷ་ཡི་རྣལ་འབྱོར་གྱིས༔ རང་ལུས་ལྷ་སྐུ་ཕྱག་རྒྱ་འགྲུབ་པར་བྱེད༔ ནང་ལྟར་འབྱིན་འཇུག་རླུང་གི་ཉམས་ལེན་གྱིས༔ རང་ལུས་རྩ་ཁམས་དྭངས་མ་སྒྲུབ་པར་བྱེད༔ ཐུན་མོང་གཏུམ་མོའི་འཕྲུལ་འཁོར་ཉེར་ལྔ་ཡིས༔ དྲོད་འབར་བདེ་སྟོང་ཉམས་མྱོང་འཆར་བར་བྱེད༔ རྨི་ལམ་གདམས་པ་འོད་གསལ་ཁོར་ཡུག་གིས༔ འཁྲུལ་པའི་ས་བོན་མ་ལུས་བཅོམ་པར་བྱེད༔ འོད་གསལ་གདམས་པ་འཁྲུལ་པ་རང་དག་གིས༔ སྐུ་གསུམ་རྫོགས་པའི་སངས་རྒྱས་མྱུར་བར་བྱེད༔ སྒྱུ་ལུས་གདམས་པ་བདེན་མེད་རང་གྲོལ་གྱིས༔ འཁྲུལ་སྣང་རྫུན་ཕུགས་རྡིབ་ཅིང་ཆོད་པར་བྱེད༔ བར་དོའི་གདམས་པ་སྣང་བ་རང་གྲོལ་གྱིས༔ སྐུ་གསུམ་སངས་རྒྱས་གོ་འཕང་ཐོབ་པར་བྱེད༔ འཕོ་བའི་གདམས་པ་ཟབ་ལམ་རྣལ་འབྱོར་གྱིས༔ སྡིག་ཅན་བཙན་ཐབས་མངོན་སངས་རྒྱས་པར་བྱེད༔ གསང་བའི་ཐུར་མའི་གདམས་པ་ཟབ་མོ་ཡིས༔ ངོ་མཚར་གནད་ཀྱི་ལག་ལེན་ཐོབ་པར་བྱེད༔ དབང་པོ་རྡོ་རྗེ་ཆུ་འཐུང་སྦྱོར་བ་ཡིས༔ འོག་སྒོ་བདེ་བའི་ལམ་ལ་འཇུག་པ་འབྱེད༔ ཕོ་ཁྲིད་གདམས་པ་ཉི་མའི་བཅུད་སྡུད་ཀྱིས༔ དྭངས་མ་ཡེ་ཤེས་དབང་ལ་འབྱོར་པར་བྱེད༔ གསང་བ་པདྨ་རླུང་འབྱིན་གདམས་པ་ཡིས༔ ཚོམ་བྲལ་དགའ་བཞི་རྒྱས་པའི་ལམ་ཡང་བྱེད༔ མོ་ཁྲིད་གདམས་པ་ཟླ་བའི་མདངས་ལེན་གྱིས༔ དྭངས་མ་ཡེ་ཤེས་ལྔ་རུ་སྒྲུབ་པར་བྱེད༔ ཐུན་མོང་མིན་པའི་འཕྲུལ་འཁོར་རྣམ་གསུམ་གྱིས༔ རླུང་གི་ཡོན་ཏན་མ་ལུས་འབྱུང་བར་བྱེད༔ ཐབས་ཤེས་མཚན་ལྡན་འགུགས་པའི་ལྕགས་ཀྱུ་ཡིས༔ རང་དགོས་འདོད་པའི་རེ་བ་སྐོང་བར་བྱེད༔ གྲོང་འཇུག་གདམས་པ་འགྲོ་དོན་རྒྱུན་སྐྱོང་གིས༔ བདག་གཞན་དོན་གཉིས་མཐའ་རུ་ཕྱིན་པར་བྱེད༔ གེགས་སེལ་གདམས་པ་ཐར་པའི་སྲོག་གཟུང་གིས༔ བདེ་ཆེན་བདེ་བའི་ལམ་དུ་འཛུད་པར་བྱེད༔ རླུང་གི་ལས་ཚོགས་གཏེར་གྱི་ཕྲེང་བ་ཡིས༔ རྡོ་རྗེ་ཐེག་པའི་བསྟན་པ་མཛེས་པར་བྱེད༔ ཆུ་མིག་བསྒྲུབ་པའི་གྲུབ་རྟགས་སྟོན་པ་ཡིས༔ དབུ་འཕང་མཐོ་ཞིང་མཐུན་རྐྱེན་འཛོམ་པར་བྱེད༔ ཟབ་ཡིག་ཙིཏྟ་སྙིང་གི་རྒྱ་ཅན་གྱིས༔ གདམས་པ་མཛོད་ཀྱི་ཐ་རམ་བཀྲོལ་བར་བྱེད༔ ཞལ་གྱི་གདམས་པ་སྙིང་གི་ཐིག་ལེ་ཡིས༔ གནད་དོན་ཟབ་མོ་བདེ་བླག་རྟོགས་པར་བྱེད༔ རྡོ་རྗེ་རྣལ་འབྱོར་མ་ཡི་སྒྲུབ་ཐབས་ཀྱིས༔ མཆོག་ཐུན་དངོས་གྲུབ་གང་ཡང་ཐོབ་པར་བྱེད༔ ལེའུ་མི་འཆོལ་ངེས་པའི་རྩིས་རྒྱ་ཡིས༔ ཆོས་ཚན་ཚང་མིན་སྤྲོས་པ་ཆོད་པར་བྱེད༔ ས་མ་ཡ༔ རྒྱ་རྒྱ་རྒྱ༔ མཁའ་འགྲོ་གསང་བའི་ཆོས་ཚན་ཉེར་ལྔ་འདི༔ འདི་བས་མང་ན་ལྷག་ལ་ཉུང་ན་ཆད༔ ཆད་ལྷག་གསལ་ཕྱིར་གསང་ཡེ་མཚོ་རྒྱལ་མས༔ མས་འཛེག་རྣལ་འབྱོར་མངོན་སངས་རྒྱས་ཕྱིར་དགེ༔ གུ་ཧྱ་རྒྱ༔ གསང་བདག་འཇའ་ཚོན་སྙིང་པོ་ཅན་གྱིས་དངོས་གྲུབ་ཏུ་རྙེད་པ་དགེའོ།། །། རྡོ་རྗེ་རྣལ་འབྱོར་མའི་སྒྲུབ་ཐབས་དགའ་དབང་འཁྱིལ་བ་འདི་ཡིན།མཆན།་་་ྈ ྈྈྈྈྈ གསང་བའི་མཁའ་འགྲོ་རྡོ་རྗེ་ཕག་མོ་ཆེ༔ གང་འདུལ་ཐབས་ཀྱི་རྣམ་རོལ་བསྒྱུར་བའི་གར༔ རྡོ་རྗེ་རྣལ་འབྱོར་ངེས་པའི་སྙིང་པོ་ཅན༔ དུས་ཀུན་འབྲལ་མེད་སྤྱི་བོའི་རྒྱན་མཆོད་ནས༔ དེ་ཡི་སྒྲུབ་ཐབས་དགའ་དབང་འཁྱིལ་བའི་གཏེར༔ ཕྱི་ཡི་ དཀྱིལ་འཁོར་ཉིད་ལ་མ་ལྟོས་པར༔ རྡོ་རྗེའི་ལུས་ལ་བརྟེན་ནས་སྒྲུབ་པ་ནི༔ སྙིང་གི་གུར་དུ་རོལ་དང་ཡོན་ཏན་མངོན༔ དང་པོ་རླུང་རོ་དགུ་ཕྲུགས་དག་པར་བསལ༔ བུམ་ཆེན་རླུང་གི་ནུུས་པ་སྐྱེས་པའི་ངོས༔ སྟོང་པའི་ངང་ལས་པདྨ་ཉི་མའི་སྟེང༔ རིག་པ་ཡི་དམ་གཉིས་མེད་ཡི་གེ་བཾ༔ དེ་ཉིད་འོད་ཞུ་ཡོངས་སུ་གྱུར་པ་ལས༔ བདག་ཉིད་རྗེ་བཙུན་རྡོ་རྗེ་རྣལ་འབྱོར་མ༔ དམར་མོ་ཞལ་གཅིག་ཕྱག་གཉིས་སྤྱན་གསུམ་ཅན༔ ཕྱག་གཡས་རྡོ་རྗེ་གྲི་གུག་ཐུར་དུ་འཕྱང༔ གཡོན་པས་ཐོད་ཁྲག་སྟེང་གི་ཕྱོགས་བཟུང་ནས༔ གནམ་ཞལ་གྱེན་དུ་ཕྱོགས་པའི་ཚུལ་གྱིས་གསོལ༔ ཕྱག་གཡོན་རྡོ་རྗེས་མཚན་པའི་ཁ་ཊྭཱཾ་ག༔ ཌཱར་དྲིལ་རྩ་གསུམ་འཕན་བཅས་བཀལ་ཞིང་འཁྱུད༔ ཞབས་གཡས་བརྐྱངས་པས་དུས་མཚན་མ་དམར་མོ༔ གཡོན་པ་བསྐུམས་པས་འཇིགས་བྱེད་དམར་མོ་མནན༔ དབུ་སྐྲ་ནག་པོ་སིལ་བུར་གྱུར་པ་ལ༔ ཐོད་པ་སྐམ་པོ་ལྔ་ཡི་དབུ་རྒྱན་དང༔ རློན་པ་ཁྲག་འཛག་ལྔ་བཅུའི་དོ་ཤལ་བྱས༔ གཅེར་བུ་ཕྱག་རྒྱ་ལྔ་ཡིས་རབ་བརྒྱན་ཏེ༔ ཡེ་ཤེས་མེ་དཔུང་འབར་བའི་དབུས་སུ་བཞེངས༔ ཐུགས་ཀར་ཟླ་སྟེང་བཾ་ལ་སྔགས་ཀྱི་ཕྲེང༔ གཡོན་དུ་ཀྱི་ལེར་འཁོར་བའི་འོད་ཟེར་གྱིས༔ རང་ལུས་སྣང་ཁམས་མ་ལུས་ཉེར་གང་སྟེ༔ བདག་གཞན་ནད་གདོན་སྡིག་སྒྲིབ་ཀུན་བསྲེགས་ནས༔ རང་ལུས་འོད་ཀྱི་གོང་བུར་འདྲིལ་བར་གྱུར༔ དབྱིངས་ཀྱི་སེམས་དཔའ་སྤྱན་དྲངས་ནམ་མཁར་བྱོན༔ ཛཿཧཱུྃ་བཾ་ཧོཿས་རང་དང་གཉིས་མེད་བསྟིམ༔ དེ་ཡི་ངང་ལ་བསྙེན་སྔགས་འདི་ཉིད་བགྲང་ངོ༔ ཨཱོཾ་བཛྲ་ཡོ་གི་ནི་མ་ཧཱ་སུ་ཁ་སིདྡྷི་ཧཱུྃ༔ དམ་བཅའ་ཇི་ཙམ་ཡོད་བཞིན་གོང་འཕེལ་བཟླ༔ ཐུན་མཚམས་སུ་ཡང་ཟླ་གདན་བཾ་ཡིག་བཅས༔ བདེ་བ་སྐྱེད་འདོད་གསང་བའི་གནས་སུ་དབབ༔ མི་རྟོག་པ་བསྐྱེད་ལྟེ་བར་ཕབ་བྱས་ན༔ ཁ་སྦྱོར་རླུང་གཟུང་སྔགས་འཁོར་སེམས་གཏད་ཅིང༔ ཡིད་ཀྱིས་ལན་བདུན་བཟླས་ལ་སྣོད་བཅུད་ཀུན༔ འོད་དུ་ཞུ་ནས་བདག་ལ་ཡོངས་སུ་ཐིམ༔ རང་ཉིད་འོད་ཞུ་སྙིང་གའི་ཟླ་གདན་བསྡུ༔ ཟླ་གདན་སྔགས་ཕྲེང་སྔགས་ཕྲེང་བཾ་ཡིག་ཐིམ༔ བཾ་ཡིག་མགོ་བོ་མགོ་བོ་ཟླ་ཚེས་དང༔ ཟླ་ཚེས་ཐིག་ལེ་ཐིག་ལེ་ནཱ་དར་བསྡུ༔ ནཱ་ད་འོད་གསལ་སྟོང་པའི་ངང་ལ་བཞག༔ སྐབས་སུ་ཐུགས་ཉིད་འགྲོ་བའི་དོན་བསྐུལ་ཏེ༔ ཅང་ཏེའུའི་སྒྲ་དང་གསལ་སྟོང་དགོངས་པ་ནི༔ ཧཱུྃ༔ བཞེངས་ཤིག་བཞེངས་ཤིག་མཁའ་འགྲོ་རྒྱ་མཚོའི་གཙོ༔ སྐྱོད་ཅིག་སྐྱོད་ཅིག་རྡོ་རྗེ་རྣལ་འབྱོར་མ༔ དབྱིངས་ནས་མཁའ་ལ་འོད་ཟེར་འབུམ་སྤྲོས་ཤིང༔ ཀློང་འདིར་བསྟན་དང་འགྲོ་བའི་དོན་ཆེན་དུ༔ དམ་ལྡན་རྣལ་འབྱོར་བདག་གིས་སྤྱན་དྲང་ན༔ དམ་ཉམས་དགྲ་བོ་བསྒྲལ་བའི་མཐུ་ཕྱུངས་ལ༔ དམ་པའི་རྗེས་འབྲང་རི་ཁྲོད་དགོན་པ་སྐྱོངས༔ དམ་ལོག་གྲོང་འགྲིམ་སྲོག་ལ་ཧུར་ཐུམས་གྱིས༔ རླུང་སེམས་ཟུང་འཇུག་བྱེད་པའི་ཉམས་རྟོགས་སྤོར༔ ཕྱི་ནང་གསང་བའི་སློང་དང་གོལ་ས་ཆོད༔ སྒྲུབ་རྒྱུད་བསྟན་པ་རྒྱས་པའི་འཕྲིན་ལས་གང༔ ཐོགས་མེད་སྒྲུབས་ཤིག་རྗེ་བཙུན་རྣལ་འབྱོར་མ༔ ཞེས་བརྗོད་ཐུགས་རྗེ་སྟོབས་བསྐུལ་དུས་ཀུན་ཏུ༔ རང་དང་སྣང་བ་ཐམས་ཅད་རྗེ་བཙུན་མར༔ གྲགས་ཚད་ཐམས་ཅད་བཛྲ་ཡོ་གའི་སྒྲ༔ དྲན་རྟོག་ཐམས་ཅད་རྣལ་འབྱོར་མ་ཡི་ཐུགས༔ ལུས་ངག་ཡིད་གསུམ་སྐུ་གསུང་ཐུགས་རྡོ་རྗེ༔ དགའ་བ་གསུམ་གྱི་རང་བཞིན་འབྲལ་མེད་བྱ༔ སྐབས་སུ་དམ་རྫས་མཆོད་གཏོར་འབུལ་བ་ནི༔ རྣལ་འབྱོར་དགོངས་པས་ངར་བསྐྱེད་འདི་སྐད་དོ༔ ཧོ༔ དགོངས་སུ་གསོལ༔ སངས་རྒྱས་བསྟན་པའི་བྱ་ར༔ རིགས་འཛིན་སྔགས་ཀྱི་སྲུང་མ༔ དཔལ་ལྡན་བླ་མའི་བཀའ་སྐྱོང༔ རྣལ་འབྱོར་ཡོངས་ཀྱི་དགྲ་བླ༔ རི་ཁྲོད་འགྲིམ་པའི་རྒྱབ་རྟེན༔ དམ་ལོག་གྲོང་རྒྱུག་སྲོག་གཅོད༔ ལེགས་ཉེས་ཀྱི་སྟངས་འཛིན༔ དཀར་ནག་གཉིས་ཀྱི་ཤན་འབྱེད༔ ཁྲོ་བོའི་གཟུགས་ཅན༔ ཟ་བྱེད་གདོང་ཅན༔ ཡེ་ཤེས་ཀྱི་སྤྱན་ཅན༔ རྫུ་འཕྲུལ་གྱི་ཞབས་ཅན༔ ཐུགས་རྗེའི་སྟོབས་ཅན༔ སྤྲུལ་པའི་སྐུ་ཅན༔ ཤ་ཟན་གྱི་གཙོ་བོ༔ ཁྲག་འཐུང་གི་རྒྱལ་པོ༔ དམ་ལྡན་གྱི་གྲོགས་མཛད༔ དམ་ཉམས་ཀྱི་ཚེ་ལེན༔ མནའ་ཟན་གྱི་གཤེད་མ༔ ལྟ་ལོག་གི་དབུགས་ཕྲོག༔ བཀའ་སྡོད་དམ་ཅན་རྒྱ་མཚོ་ཁྱེད་རྣམས༔ སངས་རྒྱས་ཀྱི་བསྟན་པ་སྲུངས་ཤིག༔ དཀོན་མཆོག་གི་དབུ་འཕང་བསྟོད་ཅིག༔ དགེ་འདུན་གྱི་གྲྭ་འཁོར་སྐྱོངས་ཤིག༔ རྣལ་འབྱོར་གྱི་ཉམས་རྟོགས་སྤོར་ཅིག༔ ས་ལམ་གྱི་ཡོན་ཏན་སྐྱེད་ཅིག༔ རྐྱེན་ངན་གྱི་བར་ཆོད་སོལ་ཅིག༔ ཁྱད་པར་དུ་སངས་རྒྱས་ཀྱི་བསྟན་པ་བཤིག་པ༔ དཀོན་མཆོག་གི་དབུ་འཕང་སྨད་པ༔ དགེ་འདུན་གྱི་ཆོས་འཁོར་བཤིག་པ༔ བླ་མའི་སྐུ་དགྲར་གྱུར་པ༔ མི་མཐུན་པའི་འགལ་རྐྱེན་ཐམས་ཅད་དྲག་པོའི་ལས་ཀྱིས་ཚར་བཅད་དེ༔ ཐལ་བ་རྡུལ་ཕྲན་བཞིན་དུ་བརླག་པར་མཛོད་ཅིག༔ ཡང་ཁྱད་དུ་རྣལ་འབྱོར་བདག་གི་ཚེ་འདི་བློས་བཏང༔ ཕྱི་མའི་དོན་ལ་གཉེར༔ དཀའ་བ་དང་དུ་བླངས༔ ལྗི་བ་ཕྲག་ཏུ་ཁུར༔ ལུས་སྲོག་འབེན་དུ་བཙུགས༔ དབེན་གནས་རི་ཁྲོད་འགྲིམ༔ བླ་མ་གཙུག་ཏུ་ཁུར༔ བྲག་ཕུག་ཞྭ་ལྟར་གོན༔ རི་ཡི་བུ་བྱེད༔ ན་བུན་གྱི་གོས་གྱོན༔ ཏིང་ངེ་འཛིན་གྱི་ཟས་བཟའ་བ་ལ༔ སྡང་བར་བྱེད་པའི་དགྲ༔ གནོད་པར་བྱེད་པའི་བགེགས༔ བར་དུ་གཅོད་པའི་རྐྱེན་ཐམས་ཅད་བཀའ་ཡི་གཏོར་མ་འདི་དང་མཉམ་པོར་བཞེས་ཤིག༔ དེ་སྐད་དམོད་བོར་དམ་རྫས་གཏོར་མ་འབུལ༔ གསང་བའི་མཁའ་འགྲོ་རྡོ་རྗེ་རྣལ་འབྱོར་མ༔ རླུང་སེམས་ཟུང་འཇུག་བུ་ལྟར་གདུང་བྱེད་ཅིང༔ འཕྲིན་ལས་གང་ཡང་ཐོགས་མེད་སྒྲུབ་པའི་དཔལ༔ དགའ་དབང་འཁྱིལ་བའི་གཏེར་ཆེན་འདི་སྤྱོད་ན༔ བསམ་པའི་དགེ་དོན་གང་ཡང་འབད་མེད་འབྱུང༔ ས་མ་ཡ༔ རྒྱ་རྒྱ་རྒྱ༔ གསང་བདག་འཇའ་ཚོན་སྙིང་པོ་ཅན་གྱིས་གནས་ཆེན་རྡོ་རྗེ་ཡོངས་རྫོང་ནས་དངོས་གྲུབ་ཏུ་རྙེད་པ་བཀྲ་ཤིས།། །།

ཚེ་སྒྲུབ་བཻ་རོའི་ཐུགས་ཏིག་གསང་བའི་རྒྱ་ཅན་ (Volume 40, Text 4)

ྈ ཚེ་སྒྲུབ་བཻ་རོའི་ཐུགས་ཏིག་གསང་བའི་རྒྱ་ཅན་བཞུགས་སོ༔ བླ་མ་ཡི་དམ་མཁའ་འགྲོ་གསུམ་ལ་ཕྱག་འཚལ་ལོ༔ སློབ་དཔོན་རིན་པོ་ཆེ་པདྨ་འབྱུང་གནས་དཔལ་བསམ་ཡས་མཆིམས་ཕུ་བྲེ་གུའི་ཀེའུ་ཚང་ན་བཞུགས་པའི་སྐབས༔ ལོ་ཙཱ་བ་བཻ་རོ་ཙ་ན་འཁོར་ཡུག་འོད་གསལ་གྱི་ངང་དུ་མཉམ་པར་བཞག་པའི་སྤྱན་སྔར་ལང་གྲོ་དཀོན་མཆོག་འབྱུང་གནས་ཀྱིས་མཆིས་ཏེ་གསེར་གྱི་མཎྜལ་ཕུལ་ནས་ཚེ་སྒྲུབ་ཀྱི་གདམས་པ་ཟབ་ལ་འདྲིལ་བ་ཞིག་ཞུས་པས་འདི་གནང་ངོ༔ ཨེ་མ་སྐལ་ལྡན་རིགས་ཀྱི་བུ༔ གཡུང་དྲུང་ཚེ་ཉིད་བསྒྲུབ་འདོད་ན༔ མ་རྡལ་མདའ་གང་གྲུ་བཞི་པ༔ སྨན་དང་སྤོས་ཀྱིས་ཆག་ཆག་གདབ༔ ཚེ་ཡི་ཕོ་བྲང་ཟླ་གམ་དབུས༔ གཏའ་ཆེན་བདུད་རྩི་ཚེ་འབྲང་དང༔ དངོས་གྲུབ་ཚོགས་རྫས་མཆོད་པ་བཤམ༔ ཡུལ་ས་གཞི་བདག་དབང་དུ་བསྡུ༔ གཏོར་མ་བྱིན་ལ་བཀའ་བསྒོ་བཅོལ༔ བགེགས་བསྐྲད་མཚམས་གཅད་ཏིང་འཛིན་གསལ༔ དེ་ནས་རིག་འཛིན་ཚེ་ཡི་ལྷར༔ གུས་པས་ཕྱག་འཚལ་སྐྱབས་འགྲོ་བྱ༔ བསྭོ་ཨཱོྃ༔ དཀོན་མཆོག་གསུམ་གྱི་ངོ་བོ་ཉིད༔ གཡུང་དྲུང་ཚེ་ཡི་ལྷ་ཚོགས་ལ༔ ཕྱག་འཚལ་སྐྱབས་མཆི་གསོལ་བ་འདེབས༔ འགྲོ་བའི་དོན་ཕྱིར་འཆི་མེད་བསྒྲུབ༔ ཨ་ཨ་ཨ༔ ཨ་ནི་བོན་ཉིད་སྐྱེ་བ་མེད༔ ཨ་ལས་ཨཱོྃ་འཕྲོས་ཧཱུྃ་ལ་ཐིམ༔ སངས་རྒྱས་སེམས་དཔའ་རིག་འཛིན་དང༔ སྣོད་བཅུད་དྭངས་མ་ཐམས་ཅད་བསྡུས༔ བདག་མདུན་སྐད་ཅིག་དྲན་རྫོགས་སུ༔ འཆི་མེད་དྲན་པ་ཚེ་དབང་རྩལ༔ ཕྱག་གཡས་གཡུང་དྲུང་ཐུགས་ཀར་གཏོད༔ གཡོན་པས་མཉམ་གཞག་ཚེ་བུམ་འཛིན༔ འོད་ལྡན་ཡེ་ཤེས་ཙན་དྷ་ལཱི༔ པདྨ་ཚེ་བུམ་བསྣམས་པས་འཁྲིལ༔ གཉིས་ཀ་དར་དང་རཏ་ནས་བརྒྱན༔ མེ་ཏོག་དམར་པོའི་དོ་ཤལ་འཕྱང༔ པད་ཟླ་ཉི་མའི་དབུས་ན་བཞུགས༔ སྲོག་རྩ་ལྕགས་ཀྱི་སྦུ་གུའི་དབུས༔ གཡུང་དྲུང་དམར་གསལ་ནྲྀ་ཡིས་མཚན༔ ཁོག་པར་ཨ་དཀར་འོད་ལྔ་འཕྲོས༔ དེ་ལས་འོད་ཟེར་ཡར་འཕྲོས་པས༔ དབྱིངས་ནས་ཡེ་ཤེས་སྤྱན་དྲངས་ཐིམ༔ བསྭོ་ཨཱོྃ་ཁོད་སྤུངས་རཏ་ན་ཚེ་ནྲྀ་ཛཿབྷྲཱུྃ༔ སྔགས་ཀྱི་ཟེར་དང་གཟི་བརྗིད་ཀྱིས༔ བླ་མ་ཡི་དམ་མཁའ་འགྲོ་དང༔ རིག་འཛིན་དྲང་སྲོང་ཚེ་ཡི་བདག༔ འཇིག་རྟེན་འབྱུང་བའི་དྭངས་མ་ཀུན༔ བདུད་རྩིར་བསྡུས་ནས་ཚངས་བུག་བརྒྱུད༔ དབུ་མའི་ནང་ཞུགས་ལུས་ཀུན་གང༔ ལུས་ནི་འཆི་མེད་གཞའ་ཚོན་སྐུ༔ ངག་ནི་གཞོམ་མེད་སྔགས་ཀྱི་གསུང༔ ཡིད་ནི་འཕོ་མེད་ཨ་ཡི་ཐུགས༔ མ་བཅོས་མ་བསླད་སྐྱེ་འཆི་བྲལ༔ གཡུང་དྲུང་སྐུ་གསུང་ཐུགས་སུ་གྱུར༔ བཟླས་བརྗོད་བསྙེན་པ་ཐུན་བཞིར་འབུལ༔ མཆོད་ཅིང་བསྟོད་ལ་གསོལ་བ་གདབ༔ མདུན་གྱི་བླ་མ་རང་ལ་བསྟིམ༔ རང་སེམས་སྐྱེ་མེད་ངང་དུ་བཞག༔ དེ་ཚེ་བོན་རྣམས་ཐམས་ཅད་ཀུན༔ སེམས་སྣང་ཡིན་ཏེ་རྨི་ལམ་འདྲ༔ སེམས་ཉིད་ཅི་ཡང་མ་ཡིན་པར༔ ཅིར་ཡང་འཆར་ཏེ་གཞའ་ཚོན་འདྲ༔ ངོ་བོ་སྟོང་པ་བོན་གྱི་སྐུ༔ རང་བཞིན་གསལ་བ་རྫོགས་པའི་སྐུ༔ ཐུགས་རྗེའི་རྩལ་སྣང་སྤྲུལ་པའི་སྐུ༔ སྐུ་གསུམ་ཡེ་ནས་རང་ལ་གནས༔ མི་འགྱུར་འཕོ་མེད་བརྡལ་བ་ཆེ༔ འདི་ནི་རྒྱུ་རྐྱེན་ལས་འདས་ཕྱིར༔ ས་ཡིས་མི་ནོན་ཆུས་མི་ཞིག༔ མེས་བསྲེག་རླུང་གིས་གཏོར་དུ་མེད༔ སྐྱེ་མེད་གནས་མེད་འགག་པ་མེད༔ འཆི་འཕོ་ཐམས་ཅད་རྣམ་རྟོག་སྟེ༔ རྟོག་མེད་གཉུག་མའི་དོན་མཐོང་ནས༔ གོམས་པ་ཀློང་དུ་གྱུར་པ་ན༔ འཆི་མེད་དྲན་པ་ཚེ་འདིར་འགྲུབ༔ གཞན་ལ་ཚེ་དབང་སྦྱིན་པ་ནི༔ སྣོད་ལྡན་ངེས་པར་ཁྲུས་ནས་དབྱུང༔ མཚམས་བཅད་སྐྱབས་འགྲོ་གསོལ་འདེབས་བྱ༔ ཚེ་འབྲང་ལྷར་གསལ་སྤྱི་བོར་བཞག༔ གདུང་བའི་དབྱངས་ཀྱིས་གསོལ་བ་གདབ༔ བསྭོ་ཨཱོྃ༔ རང་བྱུང་ཁྱུང་ལུང་དངུལ་མཁར་ནས༔ འཆི་མེད་དྲན་པ་ཚེ་དབང་རྩལ༔ སྔོན་གྱི་ཐུགས་དམ་རྗེས་དགོངས་ལ༔ རིག་འཛིན་ཚེ་ཡི་དངོས་གྲུབ་སྩོལ༔ སྔགས་དང་བཅས་པས་རྒྱུད་བསྐུལ་བས༔ ཚེ་བཅུད་ཕྱག་གི་བུམ་པར་བསྡུས༔ དེ་ལས་རྒྱུན་བབས་དབང་བསྐུར་བསམ༔ ཚེ་རྫས་དངོས་གྲུབ་ཞལ་ཟས་སྦྱིན༔ བསྭོ་ཨཱོྃ༔ གཏའ་ཆེན་བདུད་རྩི་སྨན་གྱི་མཚོ༔ ར་སཱ་ཡཱ་ནཾ་ཚེ་ཡི་རྫས༔ སྐལ་ལྡན་བུ་ལ་སྦྱིན་པ་ཡིས༔ རྩ་རླུང་བྱང་སེམས་འཕེལ་བར་ཤོག༔ བསྭོ་ཨཱོྃ༔ དངོས་གྲུབ་ཚོགས་ཀྱི་ལོངས་སྤྱོད་འདི༔ ཚེ་ཡི་བདུད་རྩིར་བྱིན་བརླབས་ནས༔ སྐལ་ལྡན་ཁྱོད་ལ་སྦྱིན་པ་ཡིས༔ འཆི་མེད་རིག་འཛིན་འགྲུབ་པར་ཤོག༔ དེ་ནས་ཚེ་བསྟིམ་རྒྱས་གདབ་ནི༔ ཨ༔ སྤྲོས་པས་སྣང་སྲིད་ཁྱབ་པའི་ཚེ༔ བསྡུས་པས་ཐིག་ལེ་ཉག་གཅིག་དབྱིངས༔ འཆི་མེད་གཡུང་དྲུང་ཕྱག་རྒྱས་གདབ༔ མི་འགྱུར་མི་ཤིགས་སྐྱེ་འཆི་བྲལ༔ ཨ་ཨ་ཨ༔ བཀྲ་ཤིས་བརྗོད་ཅིང་མེ་ཏོག་འཐོར༔ བསྭོ་ཨཱོྃ༔ ན་མོ༔ འཆི་མེད་དྲན་པ་ཡབ་སྲས་སོགས་རྩ་བ་དང་བརྒྱུད་པར་བཅས་པའི་དབོན་སྲས་བླ་མ་རྣམས་ཀྱི་ཐུགས་རྗེའི་བྱིན་རླབས་ཀྱིས༔ རིགས་ཀྱི་བུ་འདི་རྣམས་ཚེ་ཉི་ཟླ་དང་མཉམ་པར་གྱུར་ཅིག༔ སྲོག་གཡུང་དྲུང་ལྟར་བརྟན་པར་གྱུར་ཅིག༔ ནད་མེད་ལང་ཚོའི་མཆོག་དང་ལྡན་པར་གྱུར་ཅིག༔ ལོངས་སྤྱོད་ཆུ་བོའི་རྒྱུན་ལྟར་རིང་བར་གྱུར་ཅིག༔ མཐར་ཐུག་རིག་རྩལ་འཆི་མེད་ཐིག་ལེ་ཆེན་པོའི་ཀློང་དུ་གྲོལ་བར་གྱུར་ཅིག༔ ཅེས་བརྗོད་དགའ་སྟོན་ཚོགས་འཁོར་བྱ༔ བདུད་རྩི་སྨན་གྱི་བཅུད་ལེན་ནི༔ དབང་པོའི་ལག་པ་རམ་མཉེ་བ༔ ཆ་མཉམ་བཅུད་ལྡན་འོ་མར་བསྡུ༔ བུར་སྦྲང་སྦྱར་ལ་རིལ་བུ་ནི༔ ལུག་རིལ་ཙམ་དྲིལ་ཐོད་པར་བླུག༔ ལྷར་གསལ་ཚེ་བཅུད་བསྡུ་ཞིང་བསྟིམ༔ སྔགས་ཀྱི་ཤམ་བུར་འདི་བཏགས་བསྙེན༔ ཨཱོྃ་བྲུཾ་ཨཱཿབྲུཾ་ཧཱུྃ་བྲུཾ་ཧྲཱིཿབྲུཾ་ཏྲཱཾ་བྲུཾ་ར་སཱ་ཡཱ་ནཾ་ཚེ་བྲུཾ༔ འབུམ་ཕྲག་བཟླས་པས་བྱིན་གྱིས་བརླབ༔ ལྷ་ཉིད་འོད་ཞུ་རིལ་བུར་བསམ༔ རགས་པའི་བཟའ་བཏུང་སྤངས་བྱས་ཏེ༔ ཞག་བདུན་བརྟེན་པས་བདེ་དྲོད་འཕེལ༔ གཉིས་ཀྱིས་ངག་ནུས་ཕྱོགས་མེད་འབར༔ བདུན་གསུམ་བརྟེན་པས་ཡེ་ཤེས་འཆར༔ ཟླ་བ་གཅིག་ཏུ་བརྟེན་པ་ཡིས༔ ཚེ་རིང་ནད་མེད་རྒས་པ་བྲལ༔ དེ་ནས་ཡུན་དུ་བརྟེན་པ་ཡིས༔ སྨན་གྱི་ནུས་པ་འཆང་བའི་ལྷ༔ རིག་འཛིན་ཚེ་ཉིད་ངེས་པར་འགྲུབ༔ དེ་ཚེ་གེགས་སེལ་བོགས་འདོན་དུ༔ བླ་མ་བསྒོམ་ཞིང་གསོལ་བ་གདབ༔ ལུས་གནད་རླུང་སྦྱོར་རྒྱུན་མི་གཅད༔ སྐབས་སུ་འབེབ་དང་འཕྲུལ་འཁོར་བྱ༔ ཆགས་མེད་ཞེན་མེད་རི་ཁྲོད་འགྲིམ༔ བློ་བདེའི་མལ་དུ་དངོས་གྲུབ་རྙེད༔ ཅེས་གསུངས་སོ༔ ཡང་ཞུས་པ༔ འདི་ལྟ་བུའི་ཟབ་དོན་འདི་ད་ལྟ་སྤེལ་ལམ་གཏེར་དུ་སྦ༔ ཞེས་གསོལ་པས༔ བཻ་རོ་བདག་གི་ཐུགས་ཐིག་འདི༔ ད་ལྟ་སྤེལ་བའི་དུས་མིན་གྱི༔ རང་ཉམས་མཐར་དབྱུང་སྨོན་ལམ་བཅས༔ བོན་ཉིད་དབྱིངས་སུ་ཕྱག་རྒྱས་ཐོབས༔ ནམ་ཞིག་ཁྱོད་ཀྱི་སྐྱེ་བའི་མཐའ༔ གཡུང་དྲུང་འབྱུང་གནས་རྩལ་དང་འཕྲད༔ རང་གཞན་འགའ་ཡི་དོན་དུ་འགྱུར༔ ཤིན་ཏུ་གསང་བས་དངོས་གྲུབ་ཐོབ༔ ཅེས་གསུངས་སོ༔ ཨུ་ཡ་ཨཀྠཾ་རྒྱ༔ བརྡ་རྒྱ་བརྡ་ཐིམ༔ གཏད་རྒྱ་ཨུ་ཡ༔ མི་ཤིགས་གཡུང་དྲུང་འབྱུང་གནས་རྩལ་གྱི་གསང་གཏེར་ཟབ་མོ་ཤིན་ཏུ་གསང་ངོ༔

ཚེ་སྒྲུབ་བཻ་རོའི་ཐུགས་ཏིག་གི་བརྒྱུད་འདེབས་ (Volume 40, Text 5)

ཨེ་མ་ཧོ། ཁྱབ་བདལ་ཐིག་ལེ་ཉག་གཅིག་ཀློང་ཡངས་སུ། །བོན་སྐུ་ཀུན་ཏུ་བཟང་པོ་ལ་གསོལ་བ་འདེབས། །ཀུན་སྙོམས་ཐུགས་རྗེ་ཆེན་པོའི་གཞལ་ཡས་སུ། །རྫོགས་སྐུ་ཚད་མེད་འོད་ལྡན་ལ་གསོལ་བ་འདེབས། །སྣ་ཚོགས་འགྲོ་བ་འདུལ་བའི་ཞིང་ཁམས་སུ། །སྤྲུལ་སྐུ་འཆི་མེད་གཙུག་ཕུད་ལ་གསོལ་བ་འདེབས། །གཡུང་དྲུང་རིན་ཆེན་གསང་བའི་བྲག་ཕུག་ཏུ། །གྱེར་སྤུངས་དྲན་པ་ནམ་མཁའ་ལ་གསོལ་བ་འདེབས། །གཉིས་འཛིན་རང་གྲོལ་བདེ་ཆེན་ཕོ་བྲང་དུ། །ལོ་ཆེན་གན་ཇག་ཐང་ཏ་ལ་གསོལ་བ་འདེབས། །ཅིར་སྣང་བོན་སྐུར་དག་པའི་གཞལ་ཡས་སུ། །ལང་གྲོ་དཀོན་མཆོག་འབྱུང་གནས་ལ་གསོལ་བ་འདེབས། །མཁྱེན་བརྩེ་ནུས་པའི་གཟི་བརྗིད་འབར་བ་ན། །མི་ཤིགས་གཡུང་དྲུང་འབྱུང་གནས་ལ་གསོལ་བ་འདེབས། །གང་འདུལ་འགྲོ་དོན་མཛད་པའི་ཕོ་བྲང་དུ། །དྲིན་ཆེན་རྩ་བརྒྱུད་བླ་མ་ལ་གསོལ་བ་འདེབས། །ཡི་དམ་ཞི་ཁྲོ་དཔའ་བོ་མཁའ་འགྲོ་དང་། །བཀའ་སྐྱོང་སྲུང་མའི་ལྷ་ཚོགས་ལ་གསོལ་བ་འདེབས། །ཕྱི་ནང་འབྱུང་བའི་དྭངས་མ་དབང་དུ་གྱུར། །བདུད་བཞི་འཆི་བདག་གཡུལ་ལས་རྣམ་པར་རྒྱལ། །སྐྱེ་འཆི་མེད་པ་ཚེ་དབང་རིག་འཛིན་ཐོབ། །མི་འགྱུར་རྟག་པ་གཡུང་དྲུང་སྐུ་མཉེས་ཤོག །བསྙེན་སྒྲུབ་མཐར་ཕྱིན་ལྷག་པའི་ལྷ་ཞལ་འཁུམས། །རིག་སྟོང་རྩལ་རྫོགས་སྒྲིབ་བྲལ་གཞའ་ཚོན་ལུས། །ཐུགས་སྤྲུལ་ཁོད་སྤུངས་གཤེན་དང་དབྱེར་མེད་པར། །མཁའ་མཉམ་ཀློང་བདལ་དོན་གཉིས་མཐར་ཕྱིན་ཤོག །བསྟན་པའི་སྣང་ཆེན་ས་གསུམ་ཡོངས་ལ་ཁྱབ། །བསྟན་འཛིན་སྐྱེས་བུའི་སྐུ་ཚེ་རྟག་ཅིང་བརྟན། །བསྟན་པ་རྗེས་བཞག་མཛད་པ་མཐའ་རུ་ཕྱིན། །བསྟན་འགྲོའི་དགེ་ལེགས་རབ་ཏུ་རྒྱས་གྱུར་ཅིག །ཅེས་ཚེ་སྒྲུབ་བཻ་རོའི་ཐུགས་ཏིག་གི་བརྒྱུད་འདེབས་འདིའང་། མཁས་གྲུབ་རིག་འཛིན་ཡོངས་ཀྱི་འཁོར་ལོས་སྒྱུར་བ་༧འཇམ་དབྱངས་མཁྱེན་བརྩེའི་དབང་པོའི་ཞལ་སྔ་ནས་སྨིན་གྲོལ་བདུད་རྩི་ཐོག་མར་ཐོབ་པའི་སྐལ་བཟང་ཅན་འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་བགྱིས་པ་དགེ་ལེགས་འཕེལ།། །།

བཻ་རོའི་ཐུགས་ཏིག་དྲན་པ་ཚེ་སྒྲུབ་ཀྱི་ཕྲིན་ལས་དབང་བསྐུར་གྱི་ཆོ་ག་བཀླག་ཆོག་ཏུ་བཀོད་པ་ཚེ་དབང་གཡུང་དྲུང་འཁྱིལ་བ་ (Volume 40, Text 6)

༄༅། །བཻ་རོའི་ཐུགས་ཏིག་དྲན་པ་ཚེ་སྒྲུབ་ཀྱི་ཕྲིན་ལས་དབང་བསྐུར་གྱི་ཆོ་ག་བཀླག་ཆོག་ཏུ་བཀོད་པ་ཚེ་དབང་གཡུང་དྲུང་འཁྱིལ་བ་ཞེས་བྱ་བ་བཞུགས་སོ།། ན་མོ་གུ་རུ་དྷེ་བ་དྷཱ་ཀི་ནཱི་ཡཻ། ཡེ་སངས་རྒྱས་ཉིད་མ་འགགས་ཐུགས་རྗེའི་རྩལ། །གང་འདུལ་རོལ་པ་འཆི་མེད་རིག་འཛིན་ཚུལ། །རྣམ་ཐར་བསམ་ཡས་ཞབས་ལ་གུས་བཏུད་དེ། །སྒྲུབ་ཐབས་ཟུར་འདེབས་དགོད་འདིར་གནང་བ་སྩོལ། །རྣམ་སྣང་ལོ་ཙཱ་བ་ཆེན་པོའི་ཐུགས་ཏིག་ཆེས་ཟབ་པའི་ཚེ་སྒྲུབ་འདི་ཉིད་རང་དོན་ནར་མའི་ཉམས་ལེན་ནི་གཏེར་གཞུང་ཉིད་ལས་ཅིའང་མི་དགོས་ཤིང་། གཞན་དོན་ཚེ་སྒྲུབ་དང་དབང་བསྐུར་སོགས་ཀྱི་སྐབས་སྤྱི་མཚུངས་ཅུང་ཟད་སྤྲོ་བ་ལ་གཉིས། ཕྲིན་ལས་དང་། དབང་བསྐུར་རོ། །དང་པོ་ལ་གསུམ། སྔོན་འགྲོ །དངོས་གཞི། རྗེས་སོ། །དང་པོ་ནི། བཀྲ་ཤིས་ཤིང་ཡིད་དུ་འོང་བའི་དབེན་པར་སྟེགས་གཙང་མ་སྨན་སྤོས་ཀྱིས་ཆག་ཆག་བཏབ་པ་ལ། དཀྱིལ་འཁོར་ཟླ་གམ་དམར་པོ་གཡུང་དྲུང་དང་འོད་ལྔའི་རྭ་བས་བསྐོར་བའི་དབུས་སུ་དཀར་མངར་སྤོད་ཟན་སྦྱར་བའི་ཚེ་འབྲང་རྒྱན་ལྡན་བཞག །མདུན་དུ་ཐོད་པ་མཚན་ལྡན་མངར་གསུམ་བཏབ་པའི་ཆང་གིས་བཀང་བ་ཁ་ལ་མར་ཟེ་ཡིས་བརྒྱན་པ་དང་། གཡས་གཡོན་དུ་ཚེ་རིལ། ཟླ་ཕྲོམ་ཟླ་རྒྱས་ཀྱིས་མཚོན་བཀྲ་ཤིས་པའི་ཞལ་ཟས་རྣམས་བཀོད། དབང་རྒྱས་པར་བསྐུར་ན། བླ་མ་བརྒྱུད་པ་དང་གཙོ་བོའི་སྐུ་ཙཀ་ཀྱང་བཞག །སྨན་གཏོར་རཀྟ། ཕྱི་མཆོད་སོགས་སྤྱི་མཚུངས་དང་། མདའ་དར། དཀར་གཏོར། ཚོགས་ཀྱི་ཡོ་བྱད་རྣམས་ཚོགས་པར་བྱ། དེ་ནས་ཆོ་གའི་སྔོན་དུ་འགྲོ་བ་ལ་ལྔ། དང་པོ་བསང་ཁྲུས་བྱ་བ་ནི། སྤོས་དུད་ཀྱིས་ཕྱུངས་ལ། ཨ། ནགས་ཚལ་བཅུད་ཕྱུངས་ཡིད་དུ་འོང་། །དྲི་ཞིམ་ངད་ལྡན་སྤོས་མེ་འདིས། །གནས་དང་ཡོ་བྱད་སྒྲུབ་པ་པོའི། །ཉེས་པའི་སྐྱོན་རྣམས་བསང་བར་བྱ། །ཨཱོྃ་ཤིམ་ཕོད་ཧ་ར་སང་ངེ་ཡེ་སྭཱ་ཧཱ། ཆབ་བྲན་ལ། ཨཱོྃ། གཙང་མའི་ཚན་ཆབ་སྤོས་ཀྱི་ཆུ། །དྲི་ལྡན་བདུད་རྩིའི་ཁྲུས་གསོལ་བས། །གནས་དང་ཡོ་བྱད་སྒྲུབ་པ་པོའི། །སྐྱོན་གྱི་དྲི་མ་དག་གྱུར་ཅིག །ཨཱོྃ་ཤུདྡྷེ་ཤུདྡྷོ་ས་ལེ་སང་ངེ་ཡེ་སྭཱ་ཧཱ། གཉིས་པ་ཕྱི་རྒྱུད་ལ་དཀར་གཏོར་བསྔོ་བ་ནི། རཾ་ཡཾ་ཁཾ། དཀར་གཏོར་རི་རབ་གླིང་བཞི་འདོད་པའི་ཡོན་ཏན་སྣ་ཚོགས་ཀྱིས་གང་བར་གྱུར། ཨ་ཨཱོྃ་ཧཱུྃ། ཨཱོྃ། སྔོན་གྱི་རྒྱལ་བའི་བཀའ་ཉན་ཅིང་། །ད་ལྟ་དགེ་བའི་སྡོངས་མཛད་པ། །ལྷ་ཀླུ་སྡེ་བརྒྱད་འཇིག་རྟེན་སྐྱོང་། །ཡུལ་ས་གཞི་བདག་མཐུ་བོ་ཆེ། །འཁོར་བཅས་འདིར་གཤེགས་གཏོར་མ་བཞེས། །ཀོ་ལོང་རུ་ང་མ་བྱེད་པར། །སྒྲུབ་པའི་མཐུན་རྐྱེན་སྤེལ་བ་དང་། །དཀར་པོ་དགེ་བའི་སྡོངས་གྲོགས་མཛོད། །ཅེས་གཏོར་མ་ཕྱིར་འབུལ། གསུམ་པ་བགེགས་བསྐྲད་པ་ནི། བསྭོ། ང་ནི་རྔམ་ཆེན་ཁྲོ་བོའི་སྐུ། དུག་ལྔ་འཇོམས་མཛད་མེ་ཕུང་འབར། །ཉོན་མོངས་བགེགས་རིགས་ཐལ་བར་རློག །འདུག་པའི་གནས་མེད་ལ་འུར་དེངས། །བསྭོ་ཨཱོྃ་ཁྲོ་ཏ་ཧ་ལ་ནེ་རཾ་ཛ་ལ་རཾ། བཞི་པ་རྒྱན་བཀོད་པ་ནི། ཨ། ཚེ་འབྲང་མཁའ་དབྱིངས་གཉིས་སུ་མེད། །ཚེ་ཆང་གཏའ་ཆེན་བྱང་ཆུབ་རྒྱུན། །ཞལ་ཟས་བཀྲ་ཤིས་དངོས་གྲུབ་རྟེན། །བདག་ཅག་གཡུང་དྲུང་ཚེ་སྒྲུབ་ཕྱིར། །མི་འགྱུར་བརྟན་པར་བཞུགས་སུ་གསོལ། །གཡུང་དྲུང་རཏ་ན་སི་ཏི་བྲུཾ་ལྷན། ལྔ་པ་གསང་མཚམས་གཅད་པ་ནི། བསྭོ། ང་ནི་གཡུང་དྲུང་ཚེ་ཡི་ལྷ། །མ་བཅོས་མ་བསླད་སྙིང་པོ་ཨ། །སྐྱེ་ཤི་མེད་པའི་རང་བཞིན་ཡིན། །བར་གཅོད་འབྱུང་པོ་རང་གི་སེམས། །སེམས་ཉིད་སྟོང་གསལ་འཛིན་པ་བྲལ། །རྣམ་རྟོག་བགེགས་ཀྱི་མིང་ཡང་མེད། །བགེགས་རྣམས་སྟོང་པའི་ངང་དུ་དེངས། །བསྭོ། ཨ་ཕཊ་ཕཊ། ཅེས་ལྟ་བས་བསྲུང་ངོ་། །གཉིས་པ་དངོས་གཞི་ལ་བདུན་ལས། དང་པོ་རྒྱུད་དག་པའི་སྦྱོར་བ་ནི། བསྭོ་ཨཱོྃ༔ དཀོན་མཆོག་གསུམ་གྱི་ངོ་བོ་ཉིད༔ གཡུང་དྲུང་ཚེ་ཡི་ལྷ་ཚོགས་ལ༔ ཕྱག་འཚལ་སྐྱབས་མཆི་གསོལ་བ་འདེབས༔ འགྲོ་བའི་དོན་ཕྱིར་འཆི་མེད་བསྒྲུབ༔ ལན་གསུམ། འདིར་གཏེར་རྙིང་ལྟར་ཅུང་ཟད་སྤྲོ་ན། བདག་དང་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཇི་སྲིད་གཡུང་དྲུང་སྙིང་པོ་ལ་མཆིས་ཀྱི་བར་དུ། རྩ་བའི་བླ་མ་བཀའ་དྲིན་ཅན་ལ་སྐྱབས་སུ་མཆིའོ། །བརྒྱུད་པའི་བླ་མ་བྱིན་རླབས་ཅན་ལ་སྐྱབས་སུ་མཆིའོ། །འདྲེན་པའི་བླ་མ་ཐུགས་རྗེ་ཅན་ལ་སྐྱབས་སུ་མཆིའོ། །སྐྱབས་གནས་ཡུལ་མཆོག་རྣམ་བཞིའི་ཚོགས་ལ་སྐྱབས་སུ་མཆིའོ། །ཕོ་རྒྱུད་རིག་འཛིན་སེམས་དཔའི་ཚོགས་ལ་སྐྱབས་མཆིའོ། །མོ་རྒྱུད་མ་དང་མཁའ་འགྲོའི་ཚོགས་ལ་སྐྱབས་སུ་མཆིའོ། །མི་མངོན་དབྱིངས་ནས་ཐུགས་རྗེའི་འོད་ཕྱུངས་ལ། །བདག་ལ་གཡུང་དྲུང་ཚེ་ཡི་དངོས་གྲུབ་སྩོལ། །ཅེས་དང་། ཨེ་མ་ཧོཿ འོག་མིན་དབྱིངས་ནས་འཆི་མེད་སྐུ་རུ་བསྟན། ཁོད་སྤུངས་དྲན་པའི་སྐུ་ལ་གསོལ་བ་འདེབས། །དུར་ཁྲོད་ཚོགས་བདག་ཚེ་དབང་དངོས་གྲུབ་སྟེར། །འོད་ལྡན་འབར་མའི་སྐུ་ལ་གསོལ་བ་འདེབས། །ཡེ་ཤེས་སྤྱན་ལྡན་ཀུན་མཁྱེན་དགོངས་པ་བརྙེས། །བཻ་རོ་ཙཱ་ནའི་སྐུ་ལ་གསོལ་བ་འདེབས། །སྨོན་ལམ་བཀའ་བབས་གང་འདུལ་འགྲོ་དོན་མཛད། །ལང་གྲོ་ལོ་ཙཱའི་སྐུ་ལ་གསོལ་བ་འདེབས། །སྦྱངས་པའི་འཕྲོ་སད་བཀའ་གཏེར་དངོས་གྲུབ་བསྙེམས། །མི་ཤིགས་གཡུང་དྲུང་འབྱུང་གནས་ལ་གསོལ་བ་འདེབས། །རྒྱལ་བའི་རྣམ་འཕྲུལ་གདུལ་དཀའ་ཐར་པར་འདྲེན། །རྩ་བའི་བླ་མའི་སྐུ་ལ་གསོལ་བ་འདེབས། །དད་གུས་གདུང་བས་གསོལ་བ་བཏབ་པའི་མཐུས། །གདོས་བཅས་ལུས་ལ་ནད་གཅོང་མེད་པ་དང་། །དབང་བཞི་ཡོངས་སུ་རྫོགས་པར་བྱིན་གྱིས་རློབས། །བདག་འཛིན་བློ་ཡི་འཆིང་བ་དབྱིངས་སུ་གྲོལ། །རླུང་སེམས་དབུ་མར་ཐིམ་པར་བྱིན་གྱིས་རློབས། །ངོ་ཤེས་ཐག་ཆོད་སྣང་བ་བླ་མར་འཆར། །ཚེ་དབང་རིག་འཛིན་ཐོབ་པར་བྱིན་གྱིས་རློབས། །ཞེས་གསོལ་བ་གདབ། གཉིས་པ་བདག་ལྷ་རུ་བསྐྱེད་པ་ནི། སྟོང་ཞིང་བདག་མེད་པའི་ངང་ལས། ཀུན་སྣང་སྙིང་རྗེ་ཚད་མེད་པ་བསྒོམ། དེའི་ངང་ལས་ཆུ་ལས་ཆུ་བུར་རྡོལ་བ་བཞིན་དུ་ས་བོན་དང་ལྷར་བསྒོམ་སྟེ། ཨ་ཨ་ཨ༔ ཨ་ནི་བོན་ཉིད་སྐྱེ་བ་མེད༔ ཨ་ལས་ཨཱོྃ་འཕྲོས་ཧཱུྃ་ལ་ཐིམ༔ སངས་རྒྱས་སེམས་དཔའ་རིག་འཛིན་དང༔ སྣོད་བཅུད་དྭངས་མ་ཐམས་ཅད་བསྡུས༔ བདག་ཉིད་སྐད་ཅིག་དྲན་རྫོགས་སུ༔ འཆི་མེད་དྲན་པ་ཚེ་དབང་རྩལ༔ ཕྱག་གཡས་གཡུང་དྲུང་ཐུགས་ཀར་གཏོད༔ གཡོན་པས་མཉམ་གཞག་ཚེ་བུམ་འཛིན༔ འོད་ལྡན་ཡེ་ཤེས་ཙན་དྷ་ལཱི༔ པདྨ་ཚེ་བུམ་བསྣམས་པས་འཁྲིལ༔ གཉིས་ཀ་དར་དང་རཏ་ནས་བརྒྱན༔ མེ་ཏོག་དམར་པོའི་དོ་ཤལ་འཕྱང༔ པད་ཟླ་ཉི་མའི་དབུས་ན་བཞུགས༔ སྲོག་རྩ་ལྕགས་ཀྱི་སྦུ་གུའི་དབུས༔ གཡུང་དྲུང་དམར་གསལ་ནྲྀ་ཡིས་མཚན༔ ཁོག་པར་ཨ་དཀར་འོད་ལྔ་འཕྲོ༔ དེ་ལས་འོད་ཟེར་ཡར་འཕྲོས་པས༔ དབྱིངས་ནས་ཡེ་ཤེས་སྤྱན་དྲངས་ཐིམ༔ བསྭོ་ཨཱོྃ་ཁོད་སྤུངས་རཏ་ན་ཚེ་ནྲྀ་ཛཿབྲུཾ༔ གསུམ་པ་དཀྱིལ་འཁོར་བསྐྱེད་པ་ནི། བདག་ཉིད་ཁོད་སྤུངས་ཡབ་ཡུམ་གྱི་ཐུགས་ཀ་ནས་ཡི་གེ་འབྲུ་གསུམ་འཕྲོས། མདུན་གྱི་དཀྱིལ་འཁོར་ལ་ཕོག་སྟེ་འོད་དུ་ཞུ། དེ་དག་ཡོངས་སུ་གྱུར་པ་ལས་ཕྱི་ཡེ་ཤེས་ཀྱི་གཞལ་ཡས་ཁང་གསལ་ལ་རང་བཞིན་མེད་པ། སྣང་ལ་དངོས་པོ་མེད་པ། རྒྱན་དང་བཀོད་པ་ཕུན་སུམ་ཚོགས་པའི་ནང་དུ་ཉི་ཟླ་པདྨ་བརྩེགས་པའི་གདན་ལ་ཁོད་སྤུངས་དྲན་པ་འཆི་མེད་ཚེའི་ལྷ། ཞལ་གཅིག་ཕྱག་གཉིས། ཕྱག་གཡས་མི་འགྱུར་བའི་གཡུང་དྲུང་ཐུགས་ཀར་གཏོད་དེ་འཛིན་པ། གཡོན་པས་མཉམ་གཞག་ཚེའི་བུམ་པ་བདུད་རྩིའི་བཅུད་ཀྱིས་གང་ཞིང་དཔག་བསམ་ཡལ་གའི་ཁ་རྒྱན་ཅན་བསྣམས་པ། ཞབས་གཉིས་སྐྱིལ་མོ་ཀྲུང་གིས་བཞུགས་པའི་པང་དུ་ཡུམ་ཡེ་ཤེས་ཙནྡྷ་ལཱི་འོད་ལྡན་འབར་མ་པདྨ་དང་ཚེ་བུམ་བསྣམས་པས་འཁྲིལ་བ། ཡབ་ཡུམ་གཉིས་ཀའང་དཀར་ལ་དམར་བའི་མདངས་ཆགས་ཤིང་ཡེ་ཤེས་ཀྱི་འོད་ལྔ་འཕྲོ་བ་ཞི་ཞིང་འཛུམ་ལ་སྒེག་པའི་ཉམས་ཅན། དར་དང་རིན་པོ་ཆེ་སྣ་ཚོགས་པ་དང་པདྨའི་ཕྲེང་བས་མཛེས་པར་བརྒྱན་པ། ཚེ་བདག་རིག་འཛིན་ཕོ་མོ་གྲངས་མེད་པས་བསྐོར་བར་གྱུར། བཞི་པ་དབྱིངས་ནས་སྤྱན་འདྲེན་པ་ནི། བདག་མདུན་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། མི་མངོན་དབྱིངས་དང་ཕྱོགས་བཅུའི་ཞིང་ཁམས་མཁའ་སྤྱོད་གྲུབ་པའི་གནས་མཆོག་རྣམས་ནས་ཡེ་ཤེས་པའི་ལྷ་ཚོགས་སྤྱན་དྲངས་ཏེ་གཉིས་མེད་དུ་ཐིམ་པར་གྱུར། ཨཱོྃ། མི་འགྱུར་སྐུ་གསུམ་དབྱིངས་ཉིད་ལས། །འགྲོ་དོན་ཐུགས་རྗེས་སྤྲུལ་པ་ཡི། ཁོད་སྤུངས་གཡུང་དྲུང་ཚེ་ཡི་ལྷ། །ཡུམ་ནི་རྒོད་ལྕམ་འོད་ལྡན་མ། །ཚེ་བདག་རིག་འཛིན་མཁའ་འགྲོར་བཅས། །ཐུགས་དམ་དབང་གིས་གཤེགས་ནས་ཀྱང་། །དགྱེས་ཤིང་བརྟན་པར་བཞུགས་སུ་གསོལ། །འཆི་མེད་ཚེ་ཡི་དངོས་གྲུབ་སྩོལ། །བསྭོ་ཨཱོྃ་ཁོད་སྤུངས་རཏ་ན་ཌཱ་ཀི་ནཱི་བྲུཾ་ཛ༔ ཏི་ཏ་ལྷན། ལྔ་པ་མཆོད་པ་འབུལ་བའི་ཐོག་མར་ཕྱག་མཆོད་ནི། ན་མོ། བདག་དང་མཐའ་ཡས་སེམས་ཅན་རྣམས། །རྩེ་གཅིག་མོས་པའི་ཏིང་འཛིན་གྱིས། །གཡུང་དྲུང་ཚེ་ཡི་ལྷ་ཚོགས་ལ། །ཕྱག་འཚལ་དང་བས་སྐྱབས་སུ་མཆི། ཁོད་སྤུངས་རཏ་ན་ཌཱ་ཀི་ནཱི་གུ་དུ་ན་ཧྲུན། བཤགས་པ་ནི། ན་མོ། བདག་དང་འགྲོ་བ་མ་ལུས་པས། །ཐོག་མེད་དུས་ནས་ད་ལྟའི་བར། །ལས་ངན་སྡིག་སྒྲིབ་ཅི་བསགས་པ། ཁོད་སྤུངས་རིག་འཛིན་འཁོར་བཅས་ལ། །གནོང་འགྱོད་སེམས་ཀྱིས་མཐོལ་ལོ་བཤགས། །བྱང་དག་ཚངས་པའི་དངོས་གྲུབ་སྩོལ། །ཨ་དཀར་ཨུ་དུག་གཤའ་ཡ་ནི། མཆོད་པ་བྱིན་རླབས་ནི། བདག་གི་ཐུགས་ཀ་ནས་ཨ་ཨཱོྃ་ཧཱུྃ་འཕྲོས་ཏེ་མཆོད་རྫས་ལ་ཕོག་པས། རིན་པོ་ཆེ་དང་པདྨ་ལ་སོགས་པའི་སྣོད་ཡངས་ཤིང་རྒྱ་ཆེ་བ་རྣམས་སུ། མཆོད་རྫས་ཡེ་ཤེས་ཀྱི་རང་བཞིན་བདེ་བའི་ཡོ་བྱད་བསམ་གྱིས་མི་ཁྱབ་པ་དང་། སྨན་གཏོར་རཀྟ་བདུད་རྩིའི་རྒྱ་མཚོ་དྭངས་མ་ལ་མཆོད་རྫས་ཐོགས་པའི་ལྷ་མོ། ཁུ་བ་རོ་བརྒྱ་དང་ལྡན་པའི་བདུད་རྩི་རྩིགས་མ་འདོད་པའི་ཡོན་ཏན་སྣ་ཚོགས་པས་ནམ་མཁའ་གང་བར་གྱུར། ཨ་ཨཱོྃ་ཧཱུྃ། ཕྱི་མཆོད་ནི། ཨེ་མ་ཧོཿ གཡུང་དྲུང་ཚེ་ཡི་ལྷ་ཚོགས་ལ། །དངོས་འབྱོར་ཡིད་ཀྱིས་སྤྲུལ་པ་ཡི། །བླ་མེད་མཆོད་པའི་སྤྲིན་ཕུང་ནི། །འདོད་པའི་ཡོན་ཏན་བསམ་མི་ཁྱབ། །ཡེ་ཤེས་ལྔ་ཡི་འོད་ཟེར་འཕྲོ། །བདག་ཅག་དད་པས་འབུལ་ལགས་ཀྱིས། །ཡེ་ཤེས་དབྱིངས་སུ་བཞེས་ནས་ཀྱང་། །རིག་འཛིན་ཚེ་ཡི་དངོས་གྲུབ་སྩོལ། །ཟུར་ཤམ་དེ་ཤོ་ཧ་ར་ཡེ་སྭཱ་ཧཱ། སྨན་མཆོད་ནི། ཨེ་མ་ཧོཿ ངོ་མཚར་གཡུ་འབྲང་བདུད་རྩིའི་ཕུད། །ར་སཱ་ཡཱ་ནཾ་སྨན་གྱི་བཅུད། །འཆི་མེད་ལྷ་ཚོགས་ཞལ་དུ་འབུལ། །གཡུང་དྲུང་ཚེ་ཡི་དངོས་གྲུབ་སྩོལ། །གཡུ་འབྲང་བདུད་རྩི་ཁཱ་ཧི། རཀྟ་འབུལ་བ་ནི། བསྭོ། མཚན་ལྡན་བཀྲ་ཤིས་ཞལ་བུ་རུ། །དུག་ལྔ་རྩད་བཅད་དམར་གྱིས་བཀང་། །འཆི་མེད་ལྷ་ཚོགས་ཞལ་དུ་འབུལ། །གཡུང་དྲུང་ཚེ་ཡི་དངོས་གྲུབ་སྩོལ། །ཏིང་མུར་རཀྟ་ཁཱ་ཧི། གཏོར་མ་འབུལ་བ་ནི། བསྭོ། མཁའ་དབྱིངས་རྣམ་དག་གཏོར་གཞོང་དུ། །ཟད་མེད་ལོངས་སྤྱོད་གཏོར་མས་བཀང་། །འཆི་མེད་ལྷ་ཚོགས་ཞལ་དུ་འབུལ། །གཡུང་དྲུང་ཚེ་ཡི་དངོས་གྲུབ་སྩོལ། །བྲུཾ་ཟད་མིན་སྤུངས་སོ་བ་ལིང་ཁཱ་ཧི། དྲུག་པ་ཚེ་འཛབ་འདྲེན་པ་ནི། ཐོག་མར་བདག་བསྐྱེད་ལ་དམིགས་ཏེ། སྔགས་ཀྱི་ཟེར་དང་གཟི་བརྗིད་ཀྱིས༔ བླ་མ་ཡི་དམ་མཁའ་འགྲོ་དང༔ རིག་འཛིན་དྲང་སྲོང་ཚེ་ཡི་བདག༔ འཇིག་རྟེན་འབྱུང་བའི་དྭངས་མ་ཀུན༔ བདུད་རྩིར་བསྡུས་ནས་ཚངས་བུག་བརྒྱུད༔ དབུ་མའི་ནང་ཞུགས་ལུས་ཀུན་གང༔ ལུས་ནི་འཆི་མེད་གཞའ་ཚོན་སྐུ༔ ངག་ནི་གཞོམ་མེད་སྔགས་ཀྱི་གསུང༔ ཡིད་ནི་འཕོ་མེད་ཨ་ཡི་ཐུགས༔ མ་བཅོས་མ་བསླད་སྐྱེ་འཆི་བྲལ༔ གཡུང་དྲུང་སྐུ་གསུང་ཐུགས་སུ་གྱུར༔ ཅེས་བསྒོམས་ལ། བསྭོ་ཨཱོྃ་ཁོད་སྤུངས་རཏ་ན་ཚེ་ནྲྀ་ཛཿབྲུཾ༔ ཞེས་བཟླ། མདུན་བསྐྱེད་ཐུགས་ཀར་ཟླ་སྟེང་ཨཱོྃ། །དཀར་གསལ་སྔགས་ཀྱི་ཕྲེང་བས་བསྐོར། །བཟླས་པས་རྒྱུད་བསྐུལ་འོད་ཟེར་འཕྲོས། །བླ་མ་ཡི་དམ་མཁའ་འགྲོ་དང་། །རིག་འཛིན་དྲང་སྲོང་ཚེ་ཡི་བདག །འཇིག་རྟེན་འབྱུང་བའི་དྭངས་མ་བཅུད། །བླ་ཚེ་ཆད་ཉམས་ཡར་པ་ཀུན། །བདུད་རྩི་འོད་ཟེར་རྣམ་པར་བསྡུས། །བདག་མདུན་སྒྲུབ་པའི་རྫས་ལ་ཐིམ། །འཆི་མེད་དངོས་གྲུབ་འགྲུབ་པར་གྱུར། །ཅེས་བསྒོམས་ལ་བཟླས་པ་ཅི་ནུས་བྱའོ། །བདུན་པ་བསྟོད་ཅིང་ཚེ་འགུགས་པ་ནི། མདའ་དར་གཡབ་ལ། བསྭོ་ཨཱོྃ། བདེར་གཤེགས་རིག་འཛིན་ཚེ་ཡི་ལྷ། །སྐུ་ནི་འཆི་མེད་སྐྱེས་ནས་བཙན། །གསུང་ནི་འགག་མེད་ཚངས་པའི་དབྱངས། །ཐུགས་ནི་མི་འགྱུར་གཡུང་དྲུང་དབྱིངས། །མཚན་ནི་དྲན་པ་ཚེ་དབང་རྩལ། །དཀར་གསལ་གཟི་བརྗིད་འོད་དུ་འབར། །ཕྱག་མཚན་གཡུང་དྲུང་ཚེ་བུམ་བསྣམས། །ཡུམ་ནི་མདངས་ལྡན་འོད་འཕྲོ་མ། །པདྨ་ཚེ་བུམ་བསྣམས་པས་འཁྲིལ། །ལོངས་སྤྱོད་རྫོགས་པའི་ཆས་ཀྱིས་བརྒྱན། །ཚེ་དབང་རིག་འཛིན་མཁའ་འགྲོས་བསྐོར། །གཡུང་དྲུང་ཚེ་ཡི་དངོས་གྲུབ་འབེབ། །འཆི་མེད་ལྷ་མཆོག་འཁོར་བཅས་ལ། །ཕྱག་འཚལ་སྐུ་བསྟོད་མཆོད་པ་འབུལ། །བསྭོ་ཨཱོྃ། ཚེ་བདག་ཡབ་ཡུམ་དབྱིངས་ནས་བཞེངས། །ཕོ་ཉ་མགྱོགས་མ་ལས་ལ་སྐུལ། །ཕྱི་སྣོད་འབྱུང་བའི་དྭངས་མ་བཅུད། །ནང་བཅུད་སྐྱེ་འགྲོའི་ཚེ་བསོད་སྟོབས། །གསང་བ་རྒྱལ་བ་སྲས་བཅས་ཀྱི། །ཐུགས་རྗེ་ནུས་སྟོབས་ཡོན་ཏན་དཔལ། །བདག་གི་བླ་ཚེ་ཆད་ཉམས་བཅས། །ཡེ་ཤེས་ཆེན་པོའི་བྱིན་གྱིས་སྡུས། །བདག་དང་སྒྲུབ་པའི་རྫས་ལ་སྟིམས། །ཚེ་བཅུད་ཉམས་པ་གོང་དུ་གསོས། །གནས་པ་སྤེལ་ལ་ཡར་པ་སྡུས། །སྒྲུབ་རྫས་གཡུ་འབྲང་བདུད་རྩིར་སྐྱིལ། །ཕྱི་ནང་གསང་བའི་བར་ཆད་སོལ། །ལུས་ངག་ཡིད་ལ་དབང་མཆོག་སྐུར། །ངོ་མཚར་རྟགས་དང་ཆོ་འཕྲུལ་སྟོན། །གཡུང་དྲུང་ཚེ་ཡི་དངོས་གྲུབ་སྩོལ། །ཅེས་དང་སྔགས་བརྗོད་ལ་བཀུག་ཅིང་བརྟན་པར་བྱའོ། །གསུམ་པ་རྗེས་ཀྱི་བྱ་བ་ལ་ལྔ་ལས། དང་པོ་ཚོགས་འབུལ་བ་ནི། ཚོགས་རྫས་ལ་ཆབ་བྲན་ཏེ། རཾ་ཡཾ་མཾ་ས་ལེ་སང་ངེ་ཡེ་སྭཱ་ཧཱ། འབགས་བཙོག་དྲི་མ་ཐམས་ཅད་སྦྱངས། བདག་གི་ཐུགས་ཀ་ནས་ཨ་ཨཱོྃ་ཧཱུྃ་འཕྲོས་ཏེ་ཚོགས་རྫས་ལ་ཕོག་པས། རིན་པོ་ཆེ་དང་པདྨ་ལ་སོགས་པའི་སྣོད་ཡངས་ཤིང་རྒྱ་ཆེ་བ་རྣམས་སུ། ཚོགས་རྫས་བདུད་རྩིའི་རྒྱ་མཚོ་དྭངས་མ་ལ་མཆོད་རྫས་ཐོགས་པའི་ལྷ་མོ། ཁུ་བ་རོ་བརྒྱ་དང་ལྡན་པའི་བདུད་རྩི་རྩིགས་མ་འདོད་པའི་ཡོན་ཏན་སྣ་ཚོགས་པས་ནམ་མཁའ་གང་བར་གྱུར། ཨ་ཨཱོྃ་ཧཱུྃ། ཞེས་བརྗོད་ལ་བྱིན་བརླབ། ཚོགས་ཞིང་སྤྱན་འདྲེན་ཏེ། ཨཱོྃ། ཁྱབ་བདལ་དབྱིངས་ཀྱི་གཞལ་ཡས་ནས། །སྐུ་གསུམ་ལྷུན་གྲུབ་རོལ་པ་ལས། །འགྲོ་དོན་སྐུ་སྤྲུལ་ཚེ་ཡི་ལྷ། ཁོད་སྤུངས་དྲན་པ་ཡབ་ཡུམ་དང་། །རིག་འཛིན་མཁའ་འགྲོའི་འཁོར་བཅས་རྣམས། །ཚོགས་ལ་སྤྱན་འདྲེན་གཤེགས་སུ་གསོལ། ཨ་ཨཱོྃ་ཧཱུྃ་ཁོད་སྤུངས་དྷཱ་ཀི་ནཱི་ས་མ་ཡ་ཛ་ཛཿ མཆོད་པ་ནི། ཨཱོྃ། དབོན་གསས་རིག་འཛིན་མཁའ་འགྲོ་ལ། །དངོས་འབྱོར་ཡིད་ལས་སྤྲུལ་པ་ཡི། །འདོད་ཡོན་ལོངས་སྤྱོད་ཚོགས་མཆོད་འབུལ། །ཐུགས་རྗེས་བཞེས་ལ་བྱིན་གྱིས་རློབས། །ཟུར་ནམ་དེ་ཤོ་ཧ་ར་ཐིམ་ཐིམ་ཡེ་སྭཱ་ཧཱ། བཤགས་པ་ནི། མ་རིག་དབང་གྱུར་འཁྲུལ་པའི་བློས། །འགལ་འཁྲུལ་ཉེས་སྐྱོན་ཅི་མཆིས་པ། །ལོངས་སྤྱོད་ཚོགས་ཀྱི་མཆོད་པས་བཤགས། །སྐྱོན་བྲལ་ཚངས་པའི་དངོས་གྲུབ་སྩོལ། །ཨུ་དུག་གཤའ་ཡ་ནི་ས་ལེ་སང་ངེ་སྭཱ་ཧཱ། བསྒྲལ་བསྟབ་ནི། གྱི་གྲན་ཤུ་ནི་ག་མཱ་ར་ཡ་ཛ་ཛཿ བསྭོ། དཔལ་ཆེན་ཐུགས་རྗེས་དྲག་པོར་ཁྲོས། །ང་བདག་ལོག་པའི་དགྲ་བགེགས་རྣམས། །གཟུགས་ཕུང་ལོངས་སྤྱོད་ཚོགས་སུ་སྒྲོལ། །རྣམ་ཤེས་མཁའ་ཀློང་དབྱིངས་སུ་སྟིམས། །མུ་མར་གྲན་ལ་ཧྲིལ་ཤག་ཐུམ་རྦད། བསྭོ། མ་རིག་ཉོན་མོངས་བསྒྲལ་པའི་ཚོགས། །དྲན་པ་ཡབ་ཡུམ་ཞལ་དུ་བསྟབ། །ལོག་རྟོག་སྐྱེ་འཆི་བསྒྲལ་པའི་ཚོགས། །རིག་འཛིན་མཁའ་འགྲོའི་ཞལ་དུ་བསྟབ། ཨ་ལ་ལ་ཧོཿ ཐུགས་དམ་བརྒྱུད་བསྐང་ནི། ན་མོ། སྔོན་གྱི་བསྐལ་པ་དང་པོ་ལ། །བླ་ཆེན་དྲན་པ་ཡབ་ཡུམ་གྱིས། །གཡུང་དྲུང་གསང་བའི་གནས་ཁང་དུ། །ལོངས་སྤྱོད་ཚོགས་ཀྱི་ཕུད་བཤམས་ནས། །དབྱིངས་ན་བཞུགས་པའི་ཞི་ལྷ་དང་། །མཁའ་ལ་འབར་བ་ཁྲོ་བོའི་ཚོགས། །ཀློང་དུ་སངས་རྒྱས་བསྟན་སྲུང་རྣམས། །ཐུགས་དམ་དབྱིངས་སུ་བསྐངས་པ་བཞིན། །གསང་བའི་གནས་མཆོག་དམ་པ་འདིར། །ཚོགས་ཀྱི་མཆོད་པས་ཐུགས་དམ་བསྐང་། །མཆོག་ཐུན་ཚེ་ཡི་དངོས་གྲུབ་སྩོལ། །དེ་འོག་བར་གྱི་བསྐལ་པ་ལ། །ལོ་ཆེན་བཻ་རོ་ཡབ་སྲས་ཀྱིས། །མཆིམས་ཕུ་བྲེ་གུའི་ཀེའུ་ཚང་དུ། །ལོངས་སྤྱོད་ཚོགས་ཀྱི་ཕུད་བཤམས་ནས། །དབྱིངས་ན་བཞུགས་པའི་ཞི་ལྷ་དང་། །མཁའ་ལ་འབར་བ་ཁྲོ་བོའི་ཚོགས། །ཀློང་དུ་སངས་རྒྱས་བསྟན་སྲུང་རྣམས། །ཐུགས་དམ་དབྱིངས་སུ་བསྐངས་པ་བཞིན། །གསང་བའི་གནས་མཆོག་དམ་པ་འདིར། །ཚོགས་ཀྱི་མཆོད་པས་ཐུགས་དམ་བསྐང་། །མཆོག་ཐུན་ཚེ་ཡི་དངོས་གྲུབ་སྩོལ། །དེ་འོག་དུས་ཀྱི་བསྐལ་པ་ལ། །མི་ཤིགས་གཡུང་དྲུང་འབྱུང་གནས་སོགས། །ཚེ་དབང་བརྒྱུད་པའི་བླ་མ་ཡིས། །རང་རང་གར་བཞུགས་སྒྲུབ་གནས་སུ། །ལོངས་སྤྱོད་ཚོགས་ཀྱི་ཕུད་བཤམས་ནས། །དབྱིངས་ན་བཞུགས་པའི་ཞི་ལྷ་དང་། །མཁའ་ལ་འབར་བ་ཁྲོ་བོའི་ཚོགས། །ཀློང་དུ་སངས་རྒྱས་བསྟན་སྲུང་རྣམས། །ཐུགས་དམ་དབྱིངས་སུ་བསྐངས་པ་བཞིན། །གསང་བའི་གནས་མཆོག་དམ་པ་འདིར། །ཚོགས་ཀྱི་མཆོད་པས་ཐུགས་དམ་བསྐང་། །མཆོག་ཐུན་ཚེ་ཡི་དངོས་གྲུབ་སྩོལ། ཁྱད་པར་བསྐང་བ་ནི། བསྭོ། རྨད་བྱུང་གསང་བའི་གཞལ་ཡས་འདིར། །དངོས་འབྱོར་ཡིད་ལས་སྤྲུལ་པ་ཡི། །ལོངས་སྤྱོད་ཚོགས་ཀྱི་མཆོད་པ་འདིས། །དམིགས་མེད་ཡོངས་ཁྱབ་བོན་གྱི་སྐུ །འགག་མེད་ལྷུན་གྲུབ་ལོངས་སྤྱོད་རྫོགས། །དབྱེར་མེད་རང་ཤར་སྤྲུལ་པའི་སྐུ། ཁོད་སྤུངས་དྲན་པ་ཡབ་དང་ཡུམ། །ཕྱི་རྒྱུད་བདེ་གཤེགས་ཞི་བའི་ལྷ། །ནང་རྒྱུད་གསང་སྔགས་ཁྲོ་བོའི་ཚོགས། །གསང་རྒྱུད་རིག་འཛིན་མཁའ་འགྲོ་མ། །ཕྱི་ནང་བཀའ་སྐྱོང་སྲུང་མའི་ཚོགས། །ཐུགས་དམ་གཉན་པོ་དབྱིངས་སུ་བསྐང་། །ཞི་རྒྱས་དབང་དྲག་ཕྲིན་ལས་གང་། །འབད་མེད་ལྷུན་གྱིས་གྲུབ་པར་མཛོད། །དེ་ནས་བརྡའི་འབུལ་ལེན་བཅས་ཚོགས་ལ་རོལ། ལྷག་མ་རྣམས། ཨ་ཨཱོྃ་ཧཱུྃ། འདོད་ཡོན་ཟད་མེད་ཀྱི་གཏེར་དུ་དམིགས་ལ། ཨཱོྃ། འདོད་ཡོན་ལྔ་ལྡན་ལྷག་མ་འདི། །ཀུན་བཟང་དགོངས་པས་བྱིན་བརླབས་ནས། །ལན་ཆགས་སྙིང་རྗེའི་མགྲོན་ལ་བསྔོ། །སྡུག་བསྔལ་ཀུན་ཞི་བདེ་ཐོབ་ཤོག །ཐོར་ཐོར་ཐིམ་ཐིམ་ཤཱན་ཏིང་ཀུ་རུ་ཡེ་སྭཱ་ཧཱ། སྨོན་ལམ་ནི། འཆི་མེད་རིག་འཛིན་ཚེ་ཡི་ལྷ་ཚོགས་ལ། །དངོས་འབྱོར་ཡིད་སྤྲུལ་ཚོགས་མཆོད་ཕུལ་པའི་མཐུས། །སྒྲིབ་གཉིས་བྱང་ཞིང་ཚོགས་གཉིས་ཡོངས་སུ་རྫོགས། །སྐུ་གསུམ་ཐོབ་ནས་འགྲོ་བའི་དོན་བྱེད་ཤོག །གཉིས་པ་དངོས་གྲུབ་བླང་བ་ནི། ཨེ་མ་ཧོཿ ཚེ་བདག་ཡབ་ཡུམ་དགོངས་སུ་གསོལ། །བདག་གིས་བསྙེན་སྒྲུབ་ཟབ་མོ་ཐེམས། །རང་བྱུང་རིག་པའི་ལྷ་ཞལ་འཁུམས། །ད་ནི་མི་འབྲལ་བསྙེན་ལགས་ན། །བཀྲ་ཤིས་རྫས་མཆོག་ལ་བརྟེན་ནས། །ཐུན་མོང་ལས་བཞིའི་དངོས་གྲུབ་དང་། ཁྱད་པར་ཡེ་ཤེས་དབང་མཆོག་སྩོལ། །འཆི་མེད་གཡུང་དྲུང་ཚེ་ཐོབ་ནས། །འགྲོ་དོན་མཐར་ཕྱིན་འགྲུབ་པར་མཛོད། །ཨཱོྃ་ཡཾ་རཾ་ཁཾ་སུ་ཨེ་དྲུང་མུ་རཏ་ན་ཡེ་ལྷན་འདུ། ཞེས་རྫས་རྣམས་གཡས་སྐོར་གཡོན་སྐོར་དུ་རོལ། གསུམ་པ་གཏོར་མ་བསྐྱང་བ་ནི། བསྭོ། སྣང་སྲིད་ཡངས་པའི་གཏོར་གཞོང་དུ། །འདོད་ཡོན་རྒྱན་གྱི་གཏོར་མ་བཤམས། །ཟད་མེད་གཏེར་དུ་བྱིན་བརླབས་ཏེ། །སྐྱབས་གནས་སྲི་ཞུའི་མགྲོན་རྣམས་མཆོད། །ཚེ་དབང་འགྲུབ་པའི་བྱིན་རླབས་སྩོལ། །མགོན་པོ་ཡོན་ཏན་མགྲོན་རྣམས་བསྐང་། །བཀའ་ཡི་བསྟན་པ་གཉན་པོ་སྲུངས། །བགེགས་རིགས་ལན་ཆགས་མགྲོན་ལ་སྦྱིན། །གནོད་འཚེའི་གདུག་རྩུབ་ཞི་བར་གྱིས། །རིགས་དྲུག་སྙིང་རྗེའི་མགྲོན་ལ་བསྔོ། །སྡུག་བསྔལ་ཀུན་ཞི་བདེ་ཐོབ་ཤོག །ཨི་དམ་བྷ་ལིང་ཁཱ་ཧི། ཞེས་གཏོར་མ་ཕྱི་རོལ་དུ་འབུལ་ལ་གཏོར་བྲོ་ནི། བསྭོ། མ་རྟོགས་འཁྲུལ་པའི་ཕུང་པོ་ལ། །རིག་པ་ཡེ་ཤེས་བྲོ་ཆེན་བརྡུང་། །ང་བདག་འཛིན་པའི་བདུད་བཅོམ་ནས། །ཀུན་བཟང་ཐུགས་སུ་མཉམ་པར་སྦྱོར། །བསྭོ་ཁོད་དོ་སྤུངས་སོ་ཤ་ཏྲུཾ་མཱ་ར་ཡ་ནན། བཞི་པ་བཀྲ་ཤིས་ནི། ཨེ་མ་ཧོཿ འཇིགས་བྲལ་མི་མངའ་བདེ་ཆེན་དབྱིངས། །གསས་མཁར་གཞལ་ཡས་བཀྲ་ཤིས་ཤོག །སྟོང་ཞིང་བདག་མེད་སྤྲོས་མཐའ་བྲལ། ཁྱབ་བརྡལ་བོན་སྐུའི་བཀྲ་ཤིས་ཤོག །རང་བཞིན་མི་འགྱུར་ལྷུན་ལ་རྫོགས། །བདེ་ཆེན་ལོངས་སྐུའི་བཀྲ་ཤིས་ཤོག །གང་འདུལ་ཐབས་གྱིས་འགྲོ་བ་འདྲེན། །ཅིར་ཡང་སྤྲུལ་སྐུའི་བཀྲ་ཤིས་ཤོག །སྐྱེ་འཆི་གཉིས་སྤངས་འཆི་མེད་བརྙེས། ཁོད་སྤུངས་ཡབ་ཡུམ་བཀྲ་ཤིས་ཤོག །རྒྱུད་ལུང་མན་ངག་གཏེར་མཛོད་འཆང་། །རྩ་བརྒྱུད་བླ་མའི་བཀྲ་ཤིས་ཤོག །མཆོག་ཐུན་དངོས་གྲུབ་ཆར་དུ་འབེབ། །ཡི་དམ་ལྷ་ཚོགས་བཀྲ་ཤིས་ཤོག །བར་ཆོད་སེལ་ཞིང་བསྟན་པ་སྲུང་། །མཁའ་འགྲོ་བཀའ་སྲུང་བཀྲ་ཤིས་ཤོག །ཕྱོགས་དུས་གནས་སྐབས་ཐམས་ཅད་དུ། །བཀྲ་ཤིས་བདེ་ལེགས་འཕེལ་རྒྱས་ཤོག །ལྔ་པ་གཤེགས་བསྡུ་ནི། སྔོན་གྱི་གཏེར་རྙིང་ལས་གཤེགས་བསྡུ་མ་གསུངས་པས་ཕྱག་རྒྱ་སྒོ་བཅད་ཀྱི་སྒྲུབ་པར་དོན་ལའང་གནས་མོད། ཕྱིས་ཀྱི་རྗེས་འབྲངས་འགས་སྤྱིའི་རིགས་ལས་ཡེ་ཤེས་པ་གཤེགས་ཀྱང་། འདིར་ནི་བླ་མེད་སྤྱི་མཐུན་ལྟར་ཡེ་ཤེས་ལ་རྟེན་ཡོད་ན་བརྟན་བཞུགས་བྱ། མེད་ན་དམ་ཡེ་ཆབས་ཅིག་འོད་གསལ་དུ་བསྡུ་སྟེ། ཨ། བདག་དང་སྣང་སྲིད་གཞལ་ཡས་ལྷ། །བསྐྱེད་པ་སྒྱུ་མའི་རྣམ་རོལ་ཀུན། །བདག་ཉིད་རིག་པའི་ཀློང་དུ་ཐིམ། །མ་བཅོས་ཁྱབ་བརྡལ་ཆེན་པོར་བཞག །ཨ་ཨཱོྃ་ཧཱུྃ་འདུས་ལེ་ལྷན། ཞེས་མ་བཅོས་རང་བྱུང་གི་ངོ་བོ་རྗེན་པར་བཞག་ལ། སླར་ལྷའི་ང་རྒྱལ་གྱིས་དགེ་བ་བསྔོ་ཞིང་སྨོན་ལམ་གདབ་བོ། ༈ །འདིའི་བསྙེན་པ་བྱེད་ན། ཐོག་མར་བདག་བསྐྱེད་ཁོ་ན་ལ་བརྟེན་ཏེ་བཟླས་པའི་གྲངས་ཚད་རབ་བྱེ་བ་བཞི། འབྲིང་བྱེ་བ་གཅིག་སྟེ་འབུམ་ཕྲག་བཅུ། ཐ་མ་འབུམ་ཕྲག་བཞི་བཟླ། རྟགས་སྤྱི་དང་མཚུངས། སྒྲུབ་པ་བྱེད་ན་ལས་བྱང་འདི་ལྟར་བདག་མདུན་གཉིས་ཆར་བཏང་ལ། མདུན་བསྐྱེད་ལ་དམིགས་པའི་བཟླས་པ་འབུམ་ཕྲག་གིས་མཐའ་རྟེན་པའམ། ཞག་བདུན་ཡན་ཅི་འགྲུབ་བྱ། བཅུད་ལེན་གྱི་རིལ་བུ་སྒྲུབ་པའི་སྐབས་སུའང་འདི་ལྟར་སྦྲེལ་ན་ལེགས་སོ།། ༈ །།གཉིས་པ་ཚེ་དབང་གི་རིམ་པ་ནི། དཀྱིལ་འཁོར་དབང་རྫས་ཀྱི་གཤོམ་དང་། ཕྲིན་ལས་གཏང་ཚུལ་བཤད་མ་ཐག་པ་ལྟར་བྱས་ལ། བཟླས་པ་ཚེ་འགུགས་ཡན་སོང་བ་དང་། སློབ་མ་ལ་ཁྲུས་བྱ་སྟེ། ལས་བུམ་ཐོགས་ལ། བུམ་པ་རང་བྱུང་གི་གཞལ་ཡས་ཁང་དུ་གྱེར་སྤུངས་དྲན་པ་དུང་གི་མདོག་ཅན་གསལ་བའི་ཐུགས་ཀ་ནས་ཡེ་ཤེས་བདུད་རྩིའི་ཆུ་རྒྱུན་བྱུང་སྟེ། ཁྱེད་རང་རྣམས་ཀྱིས་ཐོག་མེད་ནས་བསགས་པའི་སྡིག་སྒྲིབ་ཐམས་ཅད་སང་གིས་དག་པར་མོས་ཤིག །ཨཱོྃ། ཁོད་སྤུངས་ཐུགས་ལས་འོད་ཤར་བའི། །ཡེ་ཤེས་རྒྱུན་གྱི་ཆུ་བོ་ཡིས། །ཉོན་མོངས་བག་ཆགས་སྡིག་སྒྲིབ་བཀྲུ། །ཤེལ་གོང་བཞིན་དུ་དག་གྱུར་ཅིག །ཅེས་དང་ཡིག་བརྒྱ་བརྗོད་ལ་ཁྲུས་བྱ། བདག་ཉིད་ཁོད་སྤུངས་ཆེན་པོའི་ཐུགས་ལས་འོད་ཟེར་མེ་རི་ཐོག་མཚོན་དཔག་ཏུ་མེད་པ་འཕྲོས། ཕྱི་ནང་གསང་བའི་བར་གཅོད་ཐམས་ཅད་ཚར་བཅད་པར་གྱུར། བསྭོ། ང་ནི་གཡུང་དྲུང་ཚེ་ཡི་ལྷ། །སོགས་ཀྱིས་མཚམས་བཅད་ལ་སྟོང་ཉིད་ཀྱི་ལྟ་བས་བསྲུང་། སེམས་བསྐྱེད་གསལ་གདབ་སོགས་བྱས་ཏེ། དེ་ལ་སྐབས་སུ་བབས་པའི་ལོ་རྒྱུས་ཅུང་ཟད་བསྙད་ན། ཁོད་སྤུངས་དྲན་པ་ནམ་མཁའ་ཞེས་བྱ་བའི་འཆི་མེད་ཀྱི་རིག་འཛིན་ཆེན་པོ་འདི་ཉིད་གདུལ་དཀའི་འགྲོ་བ་མང་པོ་འདུལ་བའི་ཕྱིར་དུ་སངས་རྒྱས་ཀྱི་ཐུགས་ལས་སྤྲུལ་པའི་སྐུར་བྱོན་པ་སྟེ། ནུབ་ཕྱོགས་སྟག་གཟིག་གི་ཡུལ་དུ་བརྫུས་ཏེ་འཁྲུངས་པའི་ཚེ་ཁྱེའུ་དག་པ་དྲི་མེད་ཅེས་གྲགས། ཞང་ཞུང་ཁྱུང་ལུང་དངུལ་མཁར་དུ་སྐུའི་སྐྱེ་བ་མི་རུ་བསྟན་པའི་ཚེ་གྱེར་སྤུངས་དྲན་པ་ནམ་མཁའ་ཞེས་པའི་མཚན་གསོལ་ཅིང་། ཞང་བོད་མཁས་པ་རྣམས་ལས་བློ་སྦྱངས་པའི་ཚེ་མཁས་ཆེན་རྫུ་འཕྲུལ་ཡེ་ཤེས་ཞེས་ཀྱང་གྲགས། ཨོ་རྒྱན་གྱི་དུར་ཁྲོད་གནས་བརྒྱད་དུ་ཁྲག་འཐུང་དཔའ་བོ་བརྒྱད་ཀྱི་སྐུར་བཞེངས་ཏེ་སྡེ་བརྒྱད་གདུག་པ་ཅན་ཐམས་ཅད་དམ་ལ་བཏགས། རྒྱ་གར་ཡུལ་དུ་རོམ་བུ་གུ་ཧྱ་ཙནྡྲ་སོགས་མཁས་པ་དགུ་ལ་གཏུགས་ཤིང་མུ་སྟེགས་ཀྱི་རྩོད་པ་བཟློགས་ནས་སངས་རྒྱས་བསྟན་པ་སྤེལ་བའི་ཚེ་གྲུབ་ཆེན་བིརྺ་པ་ཞེས་སུ་གྲགས། འཆི་མེད་ཚེའི་གྲུབ་པ་བརྙེས་ཏེ་ཚེ་ལ་དབང་བའི་རིག་པ་འཛིན་པའི་གཟུགས་ཀྱིས་འགྲོ་དོན་རྒྱུན་ཆད་མེད་པར་མཛད། མཁའ་འགྲོ་འོད་ལྡན་འབར་མ་དང་ཐབས་ཤེས་ཟུང་དུ་སྦྲེལ་ནས་འགྲོ་བའི་དོན་དུ་འཆི་མེད་རིག་འཛིན་སྤྲུལ་པའི་སྐུ་མཆོག་རྣམ་གཉིས་བསྐྲུན་པའི་ཚུལ་ཡང་བསྟན། བོད་ཡུལ་མངའ་བདག་ཆོས་སྐྱོང་རྒྱལ་པོའི་མཆོད་གནས་སུ་ཕེབ་སྟེ། ཨོ་རྒྱན་ཆེན་པོ་པདྨ་ཐོད་ཕྲེང་ལས་གདམས་པའི་བདུད་རྩི་གསོལ་ཞིང་བཀའ་བབས་གྲུབ་ཆེན་ཉེར་ལྔའི་སྡེར་ཡང་བཞུགས་པའི་ཚུལ་བསྟན་པས་མཚོན། བསམ་གྱིས་མི་ཁྱབ་པའི་རྣམ་ཐར་ནམ་མཁའ་ལྟ་བུའི་བདག་ཉིད་ཅན་ཡིན་ལ། དེ་ཉིད་སྒྲུབ་པའི་ཐབས་ཀྱི་བྱེ་བྲག་བཀའ་གཏེར་གྱི་སྲོལ་ཀ་མང་དུ་བཞུགས་པ་ལས། ཟབ་འདྲིལ་ཁྱད་པར་དུ་འཕགས་པའི་ཚེ་སྒྲུབ་འདི་ནི། སྤྲུལ་པའི་ལོ་ཙཱ་བ་ཆེན་པོ་བཻ་རོ་ཙ་ན་ལ་ལང་གྲོ་ལོ་ཙཱ་བ་དཀོན་མཆོག་འབྱུང་གནས་ཀྱིས་གསེར་གྱི་མཎྜལ་ཕུལ་ཏེ་ཆེད་དུ་གསོལ་བ་བཏབ་པའི་ངོར་གནང་ཞིང་དགོངས་པའི་ཀློང་དུ་གཏེར་རྒྱས་བཏབ་པ། དེང་སང་སྨོན་ལམ་གྱི་དུས་ལ་བབས་པའི་ཚེ་ལང་གྲོ་ལོ་ཙཱའི་ཡེ་ཤེས་ཀྱི་སྒྱུ་འཕྲུལ་སྤྲུལ་པའི་གཏེར་ཆེན་མི་ཤིགས་གཡུང་དྲུང་འབྱུང་གནས་རྩལ་གྱིས་རྗེས་སུ་དྲན་པའི་ཆོ་འཕྲུལ་ངོ་མཚར་རྨད་དུ་བྱུང་བས་གཏན་ལ་ཕབ་སྟེ། སྐལ་ལྡན་འགའ་ཞིག་ལ་ཐུན་མོང་མ་ཡིན་པར་བསྩལ་བའི་གདམས་ངག་ཟབ་མོ་བྱིན་རླབས་ཁྱད་པར་དུ་འཕགས་པའི་ཚེ་སྒྲུབ་བཻ་རོའི་ཐུགས་ཏིག་གསང་བའི་རྒྱ་ཅན་གྱི་དབང་བསྐུར་བ་ཡིན་པས། ཐོག་མར་ཞུ་བའི་ཡོན་དུ་མཎྜལ་ཕུལ་མཛོད། ཅེས་མཎྜལ་འབུལ་དུ་གཞུག །བླ་མ་དང་མདུན་གྱི་ལྷ་དབྱེར་མེད་པ་ཁོད་སྤུངས་ཆེན་པོ་འཆི་མེད་དྲན་པ་ཚེ་དབང་རྩལ་ཡབ་ཡུམ་ལ་སྐྱབས་ཡུལ་རབ་འབྱམས་ཀྱིས་བསྐོར་ནས་བཞུགས་པ་ལ། བདག་སོགས་སེམས་ཅན་ཐམས་ཅད་ཅི་མཛད་ཁྱེད་ཤེས་ཀྱི་དད་གུས་དྲག་པོས་སྒོ་གསུམ་གུས་པས་ཕྱག་འཚལ་ཞིང་སྐྱབས་སུ་འགྲོ་བ་དང་། རྒྱུད་བྱིན་གྱིས་རློབ་ཅིང་དབང་མཆོག་བསྐུར་བའི་གསོལ་བ་འདེབས་པ་དང་། ཕ་མ་འགྲོ་དྲུག་རྣམས་སངས་རྒྱས་ཀྱི་ས་ལ་དགོད་པའི་ཕྱིར་འཆི་མེད་ཚེའི་སྨིན་གྲོལ་ཟབ་མོའི་སྒོར་ཞུགས་པར་སེམས་བསྐྱེད་ལ་ཆོ་གའི་ལད་མོ་མཛོད་ཅིག །བསྭོ་ཨཱོྃ༔ དཀོན་མཆོག་གསུམ་གྱི་སོགས་ལས་བྱང་ལྟར་ལན་གསུམ། དེ་རྣམས་ཀྱིས་སྔོན་འགྲོ་དབང་གིས་ལམ་སྒོ་འབྱེད་པ་སོང་། དངོས་གཞིའི་དབང་རྣམས་རྫོགས་པར་བསྐུར་བ་ལ། སྨིན་བྱེད་ཀྱི་བཅུད་ཆགས་པའི་རྟེན་དུ་ཡེ་ཤེས་ལྷའི་བྱིན་རླབས་རྒྱུད་ལ་དབབ་དགོས་པས་ཡིད་རྩེ་གཅིག་པས་དམིགས་པ་འདི་ལྟར་སྒོམས་ཤིག །སྟོང་པའི་ངང་ལས་པདྨ་ཉི་ཟླ་བརྩེགས་པའི་གདན་ལ། ཁྱེད་རང་རྣམས་ཁོད་སྤུངས་དྲན་པ་འཆི་མེད་ཚེའི་ལྷ་སོགས་མདུན་བསྐྱེད་ལྟར་གསལ་གདབ་པ་ནས། སྤྱན་དྲངས་ཏེ་ཁྱེད་རང་རྣམས་ཀྱི་ལུས་ངག་ཡིད་གསུམ་ལ་གཉིས་མེད་དུ་ཐིམ་པར་གྱུར་པའི་འདུན་པ་གྱིས་ཤིག །སྤོས་རོལ་དབྱངས་ཀྱིས་བསྐུལ་ཏེ། ཨཱོྃ། མི་འགྱུར་སྐུ་གསུམ་སོགས་ནས། གཤེགས་ནས་ཀྱང་། །སྐལ་ལྡན་རྣམས་ལ་བྱིན་གྱིས་རློབས། །འཆི་མེད་ཚེ་ཡི་དངོས་གྲུབ་སྩོལ། །ཅེས་དང་སྔགས་བརྗོད་ལ་བྱིན་དབབ་བོ། །དེ་ནས་དབང་དངོས་གཞི་བསྐུར་བ་ལ་ཐོག་མར་གསོལ་བ་འདེབས་པ་འདིའི་ལད་མོ་གྱིས། ཀྱེ། འགྲོ་བའི་མགོན་པོ་བླ་མ་རྗེ། །ཐུགས་རྗེས་བདག་ལ་དགོངས་སུ་གསོལ། །བདག་ཉིད་ལས་དང་སྐལ་བར་ལྡན། །ཚེ་ཡི་དབང་མཆོག་བསྩལ་དུ་གསོལ། །ལན་གསུམ། བླ་མས། ངོ་མཚར་སྐལ་ལྡན་རིགས་ཀྱི་བུ། ཁྱོད་ནི་ལས་དང་སྐལ་ལྡན་ཕྱིར། །དབང་མཆོག་གང་ཡིན་སྦྱིན་པར་བྱ། །ཞེས་གནང་བ་སྦྱིན། དབང་དངོས་གཞི་ལ་ཕྱི་ནང་གསང་བ་ཁྱད་པར་དོན་གྱི་དབང་དང་བཞི་ཡོད་པ་ལས། དང་པོ་ཕྱི་བརྒྱུད་པའི་བླ་མའི་དབང་བསྐུར་བ་ནི། མི་མངོན་དབྱིངས་ནས་རྩ་བརྒྱུད་བླ་མ་རྣམས་ནམ་མཁའ་ལ་སྤྲིན་གཏིབས་པ་ལྟར་བྱོན་ནས། ཁྱེད་རང་རྣམས་ལ་ཐིམ་པས་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པའི་འདུན་པ་གྱིས་ཤིག །བླ་བརྒྱུད་ཙཀླི་མགོར་བཞག་ལ། ཨེ་མ་ཧོཿ འོག་མིན་དབྱིངས་ནས་འཆི་མེད་སྐུ་རུ་བསྟན། ཁོད་སྤུངས་དྲན་པའི་སྐུ་ལ་གསོལ་བ་འདེབས། །མི་མངོན་དབྱིངས་ནས་ཐུགས་རྗེའི་འོད་ཕྱུངས་ལ། །གཡུང་དྲུང་ཚེ་ཡི་དབང་བསྐུར་བསྩལ་དུ་གསོལ། །ཞེས་བརྒྱུད་འདེབས་ལྟར་གཏང་། གཉིས་པ་ནང་ཡི་དམ་ལྷའི་དབང་བསྐུར་བ་ནི། འཆི་མེད་ཚེ་བདག་དྲན་པ་ཡབ་ཡུམ་འཁོར་དང་བཅས་པ་མཁའ་སྤྱོད་བདེ་ཆེན་གྱི་གནས་ནས་ཆར་བབས་པ་ལྟར་བྱོན་ནས། ཁྱེད་རང་རྣམས་ལ་ཐིམ་པས་ཕུང་ཁམས་སྐྱེ་མཆེད་ཐམས་ཅད་ལྷ་སྐུ་རིག་སྟོབས་ཡེ་ཤེས་སུ་གྲོལ་བའི་འདུན་པ་མཛོད། གཙོ་བོའི་སྐུ་ཙཀ་མགོར་བཞག་ལ། བསྭོ་ཨཱོྃ། བདེར་གཤེགས་རིག་འཛིན་སོགས་བསྟོད་པ་ལྟར་ལ། འཆི་མེད་ལྷ་མཆོག་འཁོར་བཅས་ཀྱིས། །སྐལ་ལྡན་བུ་ལ་དབང་མཆོག་སྐུར། །གཡུང་དྲུང་ཚེ་ཡི་དངོས་གྲུབ་སྩོལ། །ཅེས་དང་སྙིང་པོ་བརྗོད། གསུམ་པ་ཚེ་བུམ་འབྲང་རྒྱས་ཀྱི་དབང་བསྐུར་བ་ནི། ཚེའི་འབྲང་རྒྱས་གཡུང་དྲུང་རིན་པོ་ཆེ་འབར་བའི་གཞལ་ཡས་ཁང་གི་ནང་དུ། ཚེ་བདག་ཁོད་སྤུངས་འཆི་མེད་རིག་འཛིན་ཆེན་པོ་ཡབ་ཡུམ་འཁོར་དང་བཅས་ཏེ་བཞུགས་པ་ལ་དད་གུས་དྲག་པོས་ཐུགས་རྒྱུད་བསྐུལ་བས། ཐུགས་ལས་འོད་ཟེར་དཔག་ཏུ་མེད་པ་འཕྲོས། འཁོར་འདས་ཀྱི་ཚེ་བཅུད་མ་ལུས་པ་བདུད་རྩི་འོད་ཟེར་གྱི་རྣམ་པས་ཕྱག་གི་བུམ་པར་བསྡུས་ཏེ་ཞུ་ཞིང་ཁོལ། བུམ་པའི་ཁ་ནས་བདུད་རྩིའི་རྒྱུན་ངང་ལྷུད་ཀྱིས་བབས། ཁྱེད་རང་རྣམས་ཀྱི་སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བས་དབང་བཞི་གཅིག་ཅར་དུ་རྫོགས། སྐྱེ་ཤི་མེད་པའི་ཚེ་ཐོབ། འགྱུར་བ་མེད་པའི་གཡུང་དྲུང་གི་སྐུར་གྱུར་པའི་འདུན་པ་མཛོད་ཅིག །ཚེ་འབྲང་མགོར་བཞག་ལ། བསྭོ་ཨཱོྃ༔ རང་བྱུང་ཁྱུང་ལུང་དངུལ་མཁར་ནས༔ འཆི་མེད་དྲན་པ་ཚེ་དབང་རྩལ༔ སྔོན་གྱི་ཐུགས་དམ་རྗེས་དགོངས་ལ༔ རིག་འཛིན་ཚེ་ཡི་དངོས་གྲུབ་སྩོལ༔ སྙིང་པོ་བརྗོད། བརྟན་གཡོའི་བཅུད་དང་དྭངས་མ་བསྡུས་པའི་ཚེ་ཆང་བདུད་རྩི་གསོ་བྱེད་སྨན་གྱི་རྒྱུན་དང་། བཀྲ་ཤིས་དངོས་གྲུབ་ཀྱི་རྫས་མཆོག་རྣམས་ཀྱིས་ཞལ་བསྲོས་པས་རྩ་རླུང་བྱང་སེམས་ཀྱི་དྭངས་མ་སྟོབས་སུ་གྱུར། འཆི་བ་མེད་པ་ཚེ་ལ་དབང་བའི་རིག་པ་འཛིན་པའི་དངོས་གྲུབ་བརྙེས་པར་བསམ་ཞིག །ཚེ་ཆང་སྦྱིན་ལ། བསྭོ་ཨཱོྃ༔ གཏའ་ཆེན་བདུད་རྩི་སྨན་གྱི་མཚོ༔ ར་སཱ་ཡཱ་ནཾ་ཚེ་ཡི་རྫས༔ སྐལ་ལྡན་བུ་ལ་སྦྱིན་པ་ཡིས༔ རྩ་རླུང་བྱང་སེམས་འཕེལ་བར་ཤོག༔ སྙིང་པོ་བརྗོད། རིལ་བུ་དང་རྫས་རྣམས་སྦྱིན་ལ། བསྭོ་ཨཱོྃ༔ དངོས་གྲུབ་ཚོགས་ཀྱི་ལོངས་སྤྱོད་འདི༔ ཚེ་ཡི་བདུད་རྩིར་བྱིན་བརླབས་ནས༔ སྐལ་ལྡན་ཁྱོད་ལ་སྦྱིན་པ་ཡིས༔ འཆི་མེད་རིག་འཛིན་འགྲུབ་པར་ཤོག༔ སྔགས་བརྗོད། བཞི་པ་ཁྱད་པར་ངོ་སྤྲོད་དོན་གྱི་དབང་བསྐུར་བ་ནི། རྩ་བའི་གསུང་འདི་ལ་གསན་ཏེ་རང་སེམས་གཉུག་མ་ཁྱབ་བརྡལ་ཆེན་པོའི་ངང་དུ་མ་བཅོས་པར་ཞོག་ཅིག །མདུན་གྱི་བླ་མ་རང་ལ་བསྟིམ༔ རང་སེམས་སྐྱེ་མེད་ངང་དུ་བཞག༔ དེ་ཚེ་བོན་རྣམས་ཐམས་ཅད་ཀུན༔ སེམས་སྣང་ཡིན་ཏེ་རྨི་ལམ་འདྲ༔ སེམས་ཉིད་ཅི་ཡང་མ་ཡིན་པར༔ ཅིར་ཡང་འཆར་ཏེ་འཇའ་ཚོན་འདྲ༔ ངོ་བོ་སྟོང་པ་བོན་གྱི་སྐུ༔ རང་བཞིན་གསལ་བ་རྫོགས་པའི་སྐུ༔ ཐུགས་རྗེའི་རྩལ་སྣང་སྤྲུལ་པའི་སྐུ༔ སྐུ་གསུམ་ཡེ་ནས་རང་ལ་གནས༔ མི་འགྱུར་འཕོ་མེད་བརྡལ་བ་ཆེ༔ འདི་ནི་རྒྱུ་རྐྱེན་ལས་འདས་ཕྱིར༔ ས་ཡིས་མི་ནོན་ཆུས་མི་ཞིག༔ མེས་བསྲེག་རླུང་གིས་གཏོར་དུ་མེད༔ སྐྱེ་མེད་གནས་མེད་འགག་པ་མེད༔ འཆི་འཕོ་ཐམས་ཅད་རྣམ་རྟོག་སྟེ༔ རྟོག་མེད་གཉུག་མའི་དོན་མཐོང་ནས༔ གོམས་པ་ཀློང་དུ་གྱུར་པ་ན༔ འཆི་མེད་དྲན་པ་ཚེ་འདིར་འགྲུབ༔ ཅེས་གསུངས་པའི་དོན་ལ་རྟག་ཏུ་མཉམ་པར་བཞག་པས་གདོད་ནས་སྐྱེ་ཤི་མེད་པའི་དོན་རྟོགས་ཏེ་སྐུ་གསུམ་མངོན་དུ་འགྲུབ་པར་འགྱུར་རོ། །དེས་དངོས་གཞིའི་དབང་བསྐུར་གྲུབ་ནས། མཐར་ཕྱིན་པ་རྗེས་ཀྱི་བྱ་བ་ལ་དེ་ལྟར་འཆི་མེད་ཚེའི་དབང་དང་དངོས་གྲུབ་ཆེན་པོ་ཐོབ་པ་དེ་ཉིད། ནམ་དུའང་ཉམས་པ་མེད་པར་རང་རིག་སྐྱེ་མེད་ཀྱི་དབྱིངས་སུ་འགྱུར་མེད་གཡུང་དྲུང་གི་ཕྱག་རྒྱས་བཏབ་པའི་འདུན་པ་གྱིས་ཤིག །མཚོན་བྱེད་གཡུང་དྲུང་ངམ་རྡོ་རྗེ་སྙིང་གར་བཞག་ལ། ཨ༔ སྤྲོས་པས་སྣང་སྲིད་ཁྱབ་པའི་ཚེ༔ བསྡུས་པས་ཐིག་ལེ་ཉག་གཅིག་དབྱིངས༔ འཆི་མེད་གཡུང་དྲུང་ཕྱག་རྒྱས་གདབ༔ མི་འགྱུར་མི་ཤིགས་སྐྱེ་འཆི་བྲལ༔ ཨ་ཨ་ཨ༔ བླ་མ་རིག་འཛིན་ཚེ་ལྷ་ནམ་མཁའ་གང་བས་བཀྲ་ཤིས་པའི་བདེན་ཚིག་བརྗོད་ཅིང་མེ་ཏོག་ཆར་དུ་བསྙིལ་བས་འཆི་མེད་རྟག་པ་དམ་པའི་དགེ་ལེགས་ཀྱི་སྣང་བ་རབ་ཏུ་འཕེལ་ཞིང་རྒྱས་པར་གྱུར། མེ་ཏོག་འཐོར་ལ་ཤིས་བརྗོད་དང་། བསྭོ་ཨཱོྃ༔ ན་མོ༔ འཆི་མེད་དྲན་པ་ཡབ་སྲས་སོགས་རྩ་བ་དང་བརྒྱུད་པར་བཅས་པའི་དབོན་གསས་བླ་མ་རྣམས་ཀྱི་ཐུགས་རྗེའི་བྱིན་རླབས་ཀྱིས༔ རིགས་ཀྱི་བུ་འདི་རྣམས་ཚེ་ཉི་ཟླ་དང་མཉམ་པར་གྱུར་ཅིག༔ སྲོག་གཡུང་དྲུང་ལྟར་བརྟན་པར་གྱུར་ཅིག༔ ནད་མེད་ལང་ཚོའི་མཆོག་དང་ལྡན་པར་གྱུར་ཅིག༔ ལོངས་སྤྱོད་ཆུ་བོའི་རྒྱུན་ལྟར་རིང་བར་གྱུར་ཅིག༔ མཐར་ཐུག་རིག་རྩལ་འཆི་མེད་ཐིག་ལེ་ཆེན་པོའི་ཀློང་དུ་གྲོལ་བར་གྱུར་ཅིག༔ ཅེས་བརྗོད་པས་དབང་བསྐུར་ལེགས་པར་འགྲུབ། རྩ་གཞུང་དངོས་བསྟན་ལ་ཁ་སྐོང་མི་བྱེད་ན། བརྒྱུད་པའི་བླ་མ་དང་ལྷ་དབང་བཅས་བཞག་པས་འཐུས་ལ། དབང་གྲངས་གསོག་བྱེད་ན། ཞལ་བསྲོའི་བཟའ་བཏུང་སྦྱིན་པ་ཡན་རྒྱས་པ་ཚར་གཅིག་སོང་ནས། ཚེ་འབྲང་དང་ཚེ་རྫས་སྦྱིན་པའི་ཤྭ་ལོ་ཀ་གཉིས་ཀྱི་རྗེས་སུ་སྨོན་ལམ་ཚིག་ལྷུག་ཚར་རེ་བརྗོད་པ་ལ་གྲངས་གཟུང་། རྫོགས་ནས་ངོ་སྤྲོད་ཕྱིན་རྒྱས་པར་བྱ། གོང་ལྟར་མཇུག་གཏང་རག་མཎྜལ་སོགས་རྗེས་སྤྱི་ལྟར་དང་། དགའ་སྟོན་ཚོགས་ཀྱི་འཁོར་ལོ་ཡང་ལས་བྱང་ལྟར་ལ། སྤྲོས་འབྱོར་ཆེ་ན་སློབ་མ་རྣམས་ཆབས་ཅིག་ཚོགས་ནས་ལོངས་སྤྱད། དངོས་གྲུབ་བླང་བ་དབང་གི་སྐབས་དགོས་ངེས་མེད་ཅིང་གཏོར་སྐྱོང་ཕྱིན་གྱི་མཇུག་བསྡུ་རྣམས་ཀྱང་མཐར་ཆགས་སུ་བྱས་པས་འགྲུབ་བོ། །འདི་ལ་གཏེར་གཞུང་ཉིད་ལ་བཟླས་སྒོམ་ཙམ་ལས་འདོན་ཆ་མི་གསལ་ཡང་དངོས་དང་ཤུགས་ལས་བསྟན་ཅིང་། ཁྱབ་བདག་བླ་མ་རིན་པོ་ཆེའི་ཞལ་སྔ་ནས་འདི་ལྟར་འོས་པའི་བཀའ་ལུང་དངོས་སུ་བསྩལ་པ་ལྟར། དྲན་པའི་སྒྲུབ་སྐོར་ཆེན་མོ་དབོན་གསས་ཁྱུང་རྒོད་རྩལ་ལམ་རིག་འཛིན་རྒོད་ལྡེམ་ཅན་གྱིས་ཟང་ཟང་ལྷ་བྲག་གི་སྙིང་མཛོད་སྨུག་པོ་ནས་བཏོན་པའི་ཚེ་སྒྲུབ་ཀྱི་དབང་ལུང་ཡང་ལེགས་པར་ཐོབ་པས་དེ་ཉིད་ཁུངས་སུ་བྱས་ཏེ། ཕྱག་ལེན་རྙིང་པ་དང་མཐུན་རུང་དུ་སྦྱར་བའོ། །འཕྲལ་ཡུན་འཆི་བདག་གཡུལ་ལས་རྣམ་པར་རྒྱལ། །འཆི་མེད་ཁོད་སྤུངས་ཆེན་པོའི་གསང་བ་གསུམ། །བདེ་བླག་ཉིད་འགྲུབ་འགྲོ་ཀུན་དབུགས་འབྱིན་པའི། །ཚེ་དབང་བདུད་རྩིའི་རྒྱུན་ཆེན་འབེབ་བྱེད་ཤོག །ཅེས་རིན་ཆེན་གཏེར་གྱི་མཛོད་ཆེན་པོར་དགོས་འབྱུང་དབྱིག་གི་སྙིང་པོ་རྣམས་ཀྱིས་རིམ་པར་འགེངས་པའི་སྐབས་སུ་ཉེ་བར་མཁོ་བའི་ཆ་རྐྱེན་དུ་གྱུར་ཏེ། འཆི་མེད་བསྟན་གཉིས་གཡུང་དྲུང་གླིང་པས་འབྱོར་དྲུག་རྒྱས་པའི་དུས་ཚེས་བཟང་པོ་ལ་རྫོང་ཤོད་བདེ་གཤེགས་འདུས་པའི་ཕོ་བྲང་ཆེན་པོར་བཀོད་པ་དགེ་ལེགས་འཕེལ།། །།

བོན་རྩིས་ཕྲ་མེན་སྐོར་རྣམས་ལས༔ དབང་དྲག་འབར་བའི་སྒྲུབ་ཐབས་ (Volume 40, Text 7)

<!TCC Tibetan character 4,47 undefined in unicode!>ཾྯ༔ བོན་རྩིས་ཕྲ་མེན་སྐོར་རྣམས་ལས༔ དབང་དྲག་འབར་བའི་སྒྲུབ་ཐབས་བཞུགས༔ བོན་སྲས་དབང་དྲག་འབར་ལ་འདུད༔ དེ་ཉིད་སྒྲུབ་པའི་གང་ཟག་གིས༔ སྦྱོར་དངོས་རྗེས་ཀྱིས་ཉམས་སུ་བླང༔ དང་པོ་སྐྱབས་ཡུལ་མདུན་དུ་བསྒོམ༔ ངེས་འབྱུང་བསམ་པ་བརྟན་པོ་ཡིས༔ ཧོ༔ བླ་ན་མེད་པའི་སྐྱབས་རྣམས་ལ༔ བདག་སོགས་འགྲོ་ཀུན་སྐྱབས་སུ་མཆི༔ མི་འགྱུར་གཡུང་དྲུང་ས་ཐོབ་ནས༔ འགྲོ་ཀུན་སྒྲོལ་བར་སེམས་བསྐྱེད་དོ༔ གཉིས་པ་བསྐྱེད་རྫོགས་དོན་ལ་འཇུག༔ བོན་ཉིད་མཐའ་བྲལ་སྙིང་རྗེའི་ཚུལ༔ ཧཱུྃ་ཡིག་མཐིང་གའི་འཕྲོ་འདུ་ལས༔ སྣང་སྲིད་ཁྲོ་བོ་འབར་བའི་ཞིང༔ གནམ་ལྕགས་འཁོར་ལོ་རྩིབས་བཅུའི་དབུས༔ པདྨ་ཉི་སྟེང་མེ་ཡི་ཀློང༔ བོན་སྲས་དབང་དྲག་འབར་བའི་སྐུ༔ མཐིང་ནག་རབ་འཇིགས་ཁྲོ་གཏུམ་ཚུལ༔ བེར་ཆེན་ཕྱི་ནང་དུར་ཁྲོད་ཆས༔ རྡོ་རྗེ་དང་ནི་ཕུར་པ་འཛིན༔ སྟག་མོ་གྲུས་མའི་སྟེང་ན་འགྱིང༔ ཁྲོ་བོ་ཁྲོ་མོ་འབུམ་གྱིས་བསྐོར༔ རྡོ་རྗེ་གསུམ་གྱི་ཡི་གེ་ལས༔ འོད་འཕྲོས་རྔ་ཡབ་གླིང་མཆོག་ནས༔ རིག་འཛིན་ཚོགས་རྣམས་སྤྱན་དྲངས་བསམ༔ ཧཱུྃ༔ མ་རུངས་གདུག་པ་འདུལ་བའི་ཕྱིར༔ དབྱིངས་ཀྱི་ཁྲོ་རྒྱལ་འཁོར་དང་བཅས༔ གནས་འདིར་སྤྱན་འདྲེན་གཤེགས་སུ་གསོལ༔ བྱིན་རླབས་དབང་དང་དངོས་གྲུབ་སྩོལ༔ ཧྲིཾ་ཧྲིཾ་ཕེཾ་ཕེཾ་ཛ་ཛ༔ ཧྲཱི༔ པདྨ་ཉི་མའི་གདན་སྟེངས་སུ༔ དགྱེས་ཤིང་བརྟན་པར་བཞུགས་སུ་གསོལ༔ བོན་སྲས་དབང་དྲག་འབར་བ་ལ༔ རང་བཞིན་རྣམ་དག་མཇལ་ཕྱག་འཚལ༔ ས་མ་ཡ་ཏིཥྛ་ལྷན༔ ཨ་ཏི་པཱུ་ཧོ༔ པྲ་ཏཱིཙྪ་ཧོ༔ ཧཱུྃ༔ འདོད་པའི་ཡོན་ཏན་ལྔ་ཡི་སྤྲིན༔ སྨན་རག་གཏོར་མའི་མཆོད་པ་དང༔ སྦྱོར་སྒྲོལ་གསང་བའི་མཆོད་པ་རྣམས༔ རིག་འཛིན་བླ་མའི་ཚོགས་ལ་འབུལ༔ ཨོཾ་མ་ཧཱ་པཱུ་ཛ་པྲ་ཏི་ཛ་ཧོ༔ བསྭོ༔ ཡེ་ནས་རྣམ་དག་ངང་ཉིད་ལས༔ བདེ་ཆེན་གཡུང་དྲུང་འདུ་འབྲལ་མེད༔ བོན་སྲས་འབར་བའི་སྐུར་སྟོན་པ༔ ཁྲོ་བོའི་རྒྱལ་ལ་ཕྱག་འཚལ་བསྟོད༔ དེ་ནས་བཟླས་པའི་རིམ་པ་ནི༔ ཐུགས་ཀར་ཉི་མ་འབར་བའི་དབུས༔ འགྱུར་མེད་གཡུང་དྲུང་ཡིག་འབྲུ་ལ༔ མེ་ཡི་ཚྭ་ཚྭ་འཕྲོ་བ་ཡིས༔ ནད་གདོན་སྡིག་སྒྲིབ་དམིགས་མེད་སྦྱངས༔ རིག་འཛིན་བླ་མའི་བྱིན་རླབས་རྣམས༔ ཚུར་འདུས་བདག་ཐིམ་གཟི་བྱིན་འབར༔ སྣང་སྲིད་སྐུ་གསུང་ཐུགས་ཀྱི་ངང༔ གཡུང་དྲུང་ཐིག་ལེའི་ངང་དུ་རྫོགས༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ འབྲུ་གཅིག་ལྔ་སྦྲེལ་རླུང་དང་སྦྱར༔ མཐར་ནི་སྣང་སྲིད་རང་ལ་འདུས༔ དེ་ཉིད་ཐུགས་ཀྱི་གཡུང་དྲུང་ལ༔ ཐིམ་ནས་སྐྱེ་མེད་ངང་ལ་བཞག༔ རྗེས་སུ་སྨོན་ལམ་གདབ་པ་ནི༔ ཧོ༔ བླ་མེད་བོན་འདི་བསྒྲུབས་པའི་མཐུས༔ འགྲོ་བ་ཆོས་སྐུའི་སར་འགོད་ཤོག༔ འགྱུར་མེད་གཡུང་དྲུང་སྐུ་གསུང་ཐུགས༔ མྱུར་དུ་འགྲུབ་པའི་བཀྲ་ཤིས་ཤོག༔ དེ་ལྟར་གུ་རུ་པདྨ་ཡིས༔ བཻ་རོ་ཙ་ན་བདག་ལ་བསྩལ༔ རིན་ཆེན་གཏེར་དུ་སྦས་པ་འདི༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ་རྒྱ༔ འབུར་མོ་བྲག་ནས་མཆོག་གྱུར་གླིང་པས་བཏོན་པའོ།། <!TCC Tibetan character 4,47 undefined in unicode!>ཾྯ༔ བོན་སྲས་དབང་དྲག་འབར་ལ་འདུད༔ དེ་ཉིད་སྒྲུབ་པའི་གང་ཟག་དེས༔ དང་པོ་དབང་གིས་སྨིན་པར་བྱ༔ གཏོར་མ་བྲིས་སྐུ་ལྷ་རུ་བསྒོམ༔ སློབ་མ་སྡིག་དང་སྒྲིབ་སྦྱངས་ནས༔ ལྷ་རུ་བསྒོམས་ནས་བྱིན་ཆེན་འབེབ༔ གཏོར་མའི་ལྷ་ནི་སློབ་མར་བསྟིམ༔ ཧཱུྃ༔ བོན་སྲས་དབང་དྲག་འབར་བའི་ཚོགས༔ བོན་ཉིད་དབྱིངས་ནས་སྐུར་བཞེངས་ལ༔ སྐལ་ལྡན་སློབ་མའི་ཚོགས་རྣམས་ལ༔ བདེ་ཆེན་འགྱུར་མེད་གཡུང་དྲུང་ནས༔ སྐུ་གསུང་ཐུགས་ཀྱི་དབང་མཆོག་སྩོལ༔ སྒོ་གསུམ་སྨིན་ཅིང་གྲོལ་བར་མཛོད༔ ཁྱེད་དང་དབྱེར་མེད་བྱིན་གྱིས་རློབས༔ ཧཱུྃ་གི་གླུ་བླངས་དབྱེར་མེད་བསྲེས༔ རྗེས་ཀྱི་བྱ་བ་སྤྱི་ལྟར་སྤྱད༔ ས་མ་ཡ་རྒྱ༔ འབུར་མོ་བྲག་ནས་མཆོག་གྱུར་གླིང་པས་སྤྱན་དྲངས་པའོ།། །།

བོན་རྩིས་ཕྲ་མེན་སྐོར་རྣམས་ལས༔ རྨ་རྒྱལ་སྤོམ་རའི་སྒྲུབ་ཐབས་ (Volume 40, Text 8)

<!TCC Tibetan character 4,47 undefined in unicode!>ཾྯ༔ བོན་རྩིས་ཕྲ་མེན་སྐོར་རྣམས་ལས༔ རྨ་རྒྱལ་སྤོམ་རའི་སྒྲུབ་ཐབས་བཞུགས་སོ༔ བོན་སྲས་དབང་དྲག་འབར་ལ་འདུད༔ གཉན་ཆེན་སྒྲུབ་པར་འདོད་པས་ནི༔ གཞི་མ་དཀར་ལ་སོགས་པའི་སྟེང༔ ནས་ཀྱི་གཡུང་དྲུང་བྲིས་པ་འམ༔ ཡང་ན་སྐུ་མཁར་བྲིས་པ་སྟེ༔ རིན་ཆེན་སྣོད་དུ་འབྲུ་སྣ་ལྔ༔ ཆང་དང་མར་ཁུས་སྦྲུས་ནས་སུ༔ བང་རིམ་ལྕགས་རི་མཛེས་པའི་ཁར༔ སྐུ་མཁར་ལོངས་སྤྱོད་བཅས་པ་བཀོད༔ ནམ་མཁའ་རྒྱང་བུ་མདའ་འཕང་དང༔ ཤིང་རིས་མཐུན་རྫས་སྣ་ཚོགས་དང༔ མདའ་དར་གཡུ་འོད་འཕྲོ་བ་ཐོགས༔ རྔ་གཤང་རོལ་མོ་གླུ་དབྱངས་བཅས༔ བསྭོ་བསྭོ༔ ཡེ་སྟོང་བོན་སྐུའི་ཕོ་བྲང་ནས༔ ཕྱྭ་དམུ་གཙུག་གསུམ་ལྷ་དང་བཞི༔ སྲིད་པ་ལྷ་སྲས་འོད་འཕྲོ་འབར༔ ཉི་མ་ཤར་ལ་དབང་སྒྱུར་བའི༔ རྨ་རིགས་ཀུན་གྱི་མགོན་པོ་ལ༔ རྨ་སྲས་གསལ་བའི་འོད་ལྡན་གྲགས༔ དཀར་བའི་མཛུམ་མདངས་ཡ་ལ་ལ༔ དེང་འདིར་གཙང་མ་ལྷ་ཡི་གནས༔ བོན་ཉིད་སྒྲ་སྒྲོག་རྔ་བོ་ཆེ༔ གསལ་བའི་གླུ་དབྱངས་གཤང་སྒྲ་འཁྲོལ༔ དར་དཀར་མདའ་ཡི་གཡབ་མོ་དང༔ གཡུ་འོད་འབར་བས་སྤྱན་འདྲེན་ན༔ བོན་གྱི་ལྷ་སྲུང་སྐུ་བསྐྱོད་འཚལ༔ ཀྱེ༔ སྲིད་པ་ལྷ་ཡི་གནས་མཆོག་ཏུ༔ རིན་ཆེན་མཛེས་པའི་ས་གཞི་ལ༔ ནོར་བུ་སྣ་ཚོགས་སྐུ་མཁར་བརྩེགས༔ དར་ཟབ་དུ་མའི་གདན་ཁྲི་ལ༔ གཉན་ཆེན་འཁོར་དང་བཅས་པ་རྣམས༔ དགྱེས་པའི་ཚུལ་དུ་བཞུགས་སུ་གསོལ༔ བསྭོ༔ ཀུན་ཏུ་བཟང་པོ་སྟོན་པ་གཤེན་རབ་དང༔ ཚེ་དབང་རིག་འཛིན་རྣམས་ཀྱི་སྤྱན་སྔ་རུ༔ སྲིད་པའི་ལྷ་རབས་ཁྱོད་ཀྱིས་དཔང་བཙུགས་ནས༔ བོན་སྐྱོང་བྱེད་པར་ཞལ་བཞེས་དེ་བཞིན་དུ༔ བཅོལ་བའི་ཕྲིན་ལས་མ་ལུས་སྒྲུབ་པར་མཛོད༔ ཀྱེ༔ གཙང་མར་སྦྱར་བའི་དུད་སྤྲིན་མཁའ་ཁྱབ་ཀྱིས༔ མནོལ་གྲིབ་ཕོག་པ་ཐམས་ཅད་ཐུར་དུ་བསལ༔ དག་པར་བྱེད་པའི་ཨརྒྷཾ་དཀར་པོ་ཡིས༔ ཉེས་པའི་དྲི་མ་ཐམས་ཅད་ཡོངས་སུ་བཀྲུ༔ རིན་ཆེན་སྣ་ཚོགས་ལས་གྲུབ་རི་རབ་ལ༔ མཛེས་ཤིང་བརྗིད་པའི་ནོར་བུའི་གཞལ་ཡས་ཁང༔ ཟ་འོག་སྣ་ཚོགས་ཐོག་ཕུབ་ལོགས་སུ་གསལ༔ མཐོ་ཞིང་ཡངས་པའི་ངོ་མཚར་ཁྲི་མཆོག་ལ༔ བརྟན་པར་བཞུགས་པ་སྐུ་ཡི་རྒྱན་དུ་འབུལ༔ ཤིང་ཐོག་དཀར་གསུམ་ཤ་ཐུད་འབྲུ་ལ་སོགས༔ བཅུད་ལྡན་ཟས་སྣ་བཟའ་བའི་རིགས་རྣམས་དང༔ འབྲས་ཆང་རྒུན་ཆང་ཀ་ར་བུ་རམ་སྦྱར༔ བཏུང་བའི་ཚོགས་རྣམས་ཞལ་དང་ལྗགས་ལ་འབུལ༔ རིན་ཆེན་དར་ཟབ་གཡག་ལུག་ར་གསུམ་དང༔ གོ་ཆ་སྲ་ལ་མཚོན་ཆ་རྣོན་པོའི་ཚོགས༔ སྟག་གཟིག་གུང་སོགས་གཅན་གཟན་སྡེར་མོ་ཅན༔ འབྲང་རྒྱས་ཤ་བ་རི་དྭགས་རྩེ་བྲོ་འཁྲབ༔ ནམ་མཁའ་འཇའ་རིས་སྣ་ཚོགས་གདུགས་སུ་ཕུབ༔ ཤིང་རིས་འཇའ་ཚོན་སྣ་ཚོགས་བར་སྣང་ཁྱབ༔ མདའ་འཕང་སྐྱེས་པ་ཕོ་མོ་ས་གཞི་གང༔ རྒྱང་བུ་སྐུ་མཁར་བལ་ཏི་ཤུག་ཏི་དང༔ སྨྱུག་མ་རྩེ་རྒྱལ་དར་གྱིས་བརྒྱན་པ་རྣམས༔ ལྗོན་ཤིང་ལྷ་ཡི་དར་ཟབ་འདྲ༔ ཕོ་གཏང་མོ་གཏང་བུ་གཏང་རྣམས༔ ལྷ་མི་སྐྱེད་ཚལ་རྒྱུ་བ་བཞིན༔ ཐུགས་ལ་དགྱེས་པའི་མདོས་འདི་འབུལ༔ བསྭོ༔ ལྷ་སྲས་རྨ་རྒྱལ་སྤོམ་ར་ནི༔ སྐུ་མདོག་དཀར་གསལ་བརྗིད་ཅིང་མཛེས༔ ཟ་འོག་སྣ་ཚོགས་ན་བཟའ་གསོལ༔ རིན་ཆེན་མཛེས་པའི་དབུ་རྒྱན་ཅན༔ ཕྱག་ན་ཡིད་བཞིན་ནོར་བུ་འཛིན༔ མགྱོགས་འགྲོས་གཡུ་རྔོོག་ཆིབས་སུ་འཆིབ༔ རྨ་རིགས་སུམ་བརྒྱ་དྲུག་ཅུ་དང༔ རྨ་སྨན་འཁོར་ཚོགས་བསམ་མི་ཁྱབ༔ བསྟན་པ་སྲུང་བའི་མཐུ་རྩལ་ཅན༔ ཡོན་ཏན་བསམ་མི་ཁྱབ་པར་མངའ༔ ཁྱོད་ལ་བསྟོད་དོ་ཕྲིན་ལས་མཛོད༔ ༈ བསྭོ༔ ཕྱྭ་དང་གཡང་གི་བདག་པོ་ནི༔ རྨ་ཡི་ཡུལ་གྱི་བཙད་པོ་བ༔ སྐུ་ལྷ་དེ་ནི་ཆེན་པོར་གྲགས༔ བོན་དང་སྲིད་ཀྱི་གཡང་གི་བདག༔ ཞང་ཞུང་ཡུལ་གྱི་བོན་གྱི་གཡང༔ དེ་རིང་འདི་རུ་ཕྱྭ་ཁུག་ཅིག༔ ཤར་དང་ལྷོ་ཡི་རྒྱ་དཀར་ནག༔ ནུབ་བྱང་སྟག་གཟིག་གེ་སར་གྱི༔ བཙན་ཕྱུག་ནོར་གྱི་ཕྱྭ་གཡང་ཁུག༔ སྟེང་ཕྱོགས་ལྷ་ཡི་འཆི་མེད་ཚེ༔ འོག་ཕྱོགས་ཀླུ་ཡི་འཛད་མེད་ནོར༔ བར་ཕྱོགས་གཉན་གྱི་རྩལ་གཡང་རྣམས༔ མ་ལུས་ད་ལྟ་འདི་རུ་ཁུག༔ མི་ལ་ཚེ་དང་ནོར་ལ་གཡང༔ ཟས་ལ་བཅུད་ཀྱི་ཕྱྭ་གཡང་སྩོལ༔ སྙན་གྲགས་དཔལ་འབྱོར་རྒྱས་པར་མཛོད༔ ཕྱྭ་ཁུ་ཡེ་གཡང་ཁུ་ཡེ༔༈ བསྭོ༔ ཤར་ཕྱོགས་གངས་ཀྱི་རི་བོ་ན༔ སྤྲིན་དཀར་ན་བུན་འཁྱིལ་བ་ནས༔ ལྷ་ཡི་སྲས་པོ་གཉན་གྱི་རྗེ༔ མི་ཡི་ཟོ་དོར་གཡང་གི་བདག༔ བཙུན་མོ་སྲས་བློན་འཁོར་བཅས་ལ༔ སྤྱན་གཟིགས་མཆོད་པའི་མདོས་འདི་འབུལ༔ བསམ་པ་སྒྲུབས་ལ་རེ་བ་སྐོངས༔ བཅོལ་བའི་ཕྲིན་ལས་འགྲུབ་པར་མཛོད༔ ཀྱེ༔ གཙང་མ་ལྷ་ཡི་གནས་འདི་རུ༔ ཕྱྭ་དང་གཡང་གི་བདག་པོ་བ༔ སྐུ་གཅིག་ལ་ནི་མཚན་གསུམ་གྲགས༔ ཡབ་རྗེ་ལྷ་ཡིས་མཚན་གསོལ་བ༔ རྨ་སྲས་གསལ་བའི་འོད་ལྡན་གྲགས༔ ཡུམ་ནི་ལྷ་སྨན་མཚན་གསོལ་བ༔ རྨ་རྒྱལ་དེ་ནི་སྤོམ་ར་ཞེས༔ སྟོན་པ་བོན་གྱིས་མཚན་གསོལ་བ༔ ཉེ་རྗེ་དེ་ནི་གང་སྔོན་པ༔ དབུ་ནག་བོད་ཀྱིས་མཚན་གསོལ་བ༔ སྐུ་ལྷ་དེ་ནི་བཙད་པོར་གྲགས༔ ངམ་ཤོད་དེ་ཡི་རི་བོ་ན༔ བོན་སྲས་དབང་དྲག་འབར་བ་ཡིས༔ གཡུང་དྲུང་གཟི་འབར་རྩལ་དུ་བཏགས༔ སྐུ་གཟུགས་རིན་ཆེན་ནོར་གྱི་ཚོགས༔ སྲོག་གི་བང་སོ་འདི་འཛུགས་པས༔ ལྷ་སྲུང་རྟེན་དང་མི་འབྲལ་མཛོད༔ དགྲ་གདོན་རྣམས་ཀྱི་མགོ་བོ་ནོན༔ ཕྱྭ་གཡང་ནོར་ལ་འགུགས་པར་མཛོད༔ མཚུན་གཡང་མི་ཡི་རྗེ་བོ་མཛོད༔ བཀྲ་ཤིས་ལྷ་རྒྱལ་གཡང་ཁུ་ཡེ༔ ༈ བསྭོ༔ བོན་སྐྱོང་ཁྱེད་ནི་བོན་ལ་དགའ༔ འབྲེལ་པ་ཐ་ཚིག་བོན་ལ་ཆེ༔ བོན་སྲས་དབང་དྲག་བཀའ་བཞིན་དུ༔ གཡུང་དྲུང་བོན་གྱི་སྲོལ་འཛིན་ལ༔ ཤག་དང་མནའ་རོག་སྤུན་གྱི་ཚུལ༔ དེང་ཕྱིན་ཁ་འཛིན་སྡོངས་གྲོགས་མཛོད༔ ལོངས་སྤྱོད་ཕྱྭ་གཡང་དངོས་གྲུབ་སྩོལ༔ སྨྲང་རྣམས་ལན་གསུམ་དབྱངས་སུ་གྱེར༔ རྟེན་རྫས་མཆོད་གཏོར་གར་འོས་དཔྱད༔ རྗེས་ཀྱི་བྱ་བ་སྤྱི་ལྟར་བྱ༔ ཕྱི་རབས་བོད་ཀྱི་ལྗོངས་འདི་རུ༔ རྨ་གཡང་ལོངས་སྤྱོད་འབྱུང་ཕྱིར་དུ༔ བོན་སྲས་ཚེ་དབང་རིག་འཛིན་ངས༔ མ་འོངས་དོན་དུ་གཏེར་དུ་སྦས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ་རྒྱ༔ འབུར་མོ་བྲག་ནས་མཆོག་གྱུར་གླིང་པས་སྤྱན་དྲངས་པ་བླ་ཁྲི་རྒྱལ་བ་གཡུང་དྲུང་གིས་དོན་གཉེར་ཆེར་མཛད་པའི་རྟེན་འབྱུང་དགེ་བར་བྱུང་བས་རྒྱམ་གངས་མགུལ་གཡུ་མཚོ་རི་ཁྲོད་དུ་ཕབ་པའོ། །ཡི་གེ་པ་ནི་ཧོར་འབྱུང་ཤེས་རབ་ཡོན་ཏན་གྱིས་བྲིས་པའོ། །སརྦ་མངྒ་ལཾ།། །།

བོན་རྩིས་ཕྲ་མེན་སྐོར་རྣམས་ཀྱི་བརྒྱུད་འདེབས་ (Volume 40, Text 9)

བརྒྱུད་འདེབས་ནི། ཧྲཱིཿ ཀ་དག་སྤྲོས་དང་བྲལ་བའི་ཞིང་ཁམས་ནས། །བོན་སྐུ་ཀུན་ཏུ་བཟང་པོ་ལ་གསོལ་བ་འདེབས། །སྣ་ཚོགས་འགག་མེད་རོལ་པའི་ཞིང་ཁམས་ནས། །ལོངས་སྐུ་རྒྱལ་བ་འདུས་པ་ལ་གསོལ་བ་འདེབས། །གང་འདུལ་ཐབས་བསྟན་མ་ངེས་ཞིང་ཁམས་ནས། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །དབྱིངས་ཀློང་ཐབས་ཤེས་ཟུང་འབྲེལ་ཞིང་ཁམས་ནས། །དབྱངས་ཅན་ཡེ་ཤེས་མཚོ་རྒྱལ་ལ་གསོལ་བ་འདེབས། །ཕྱོགས་མེད་དག་སྣང་འཆར་བའི་ཞིང་ཁམས་ནས། །ལོ་ཆེན་བཻ་རོ་ཙ་ན་ལ་གསོལ་བ་འདེབས། །སྙིགས་དུས་འགྲོ་བ་འདུལ་བའི་ཞིང་ཁམས་ནས། །ཨོ་རྒྱན་མཆོག་གྱུར་གླིང་པ་ལ་གསོལ་བ་འདེབས། །སྔོན་བཟང་སྨོན་ལམ་འབྲེལ་བའི་ཞིང་ཁམས་ནས། །ཟབ་དོན་ཆོས་ཀྱི་བདག་པོ་ལ་གསོལ་བ་འདེབས། །སྤྱི་གཙུག་འགྱུར་མེད་བདེ་བའི་ཞིང་ཁམས་ནས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །དབང་བཞི་ལུས་ལ་རྫོགས་པར་བྱིན་གྱིས་རློབས། །མཆོག་ཐུན་དངོས་གྲུབ་ཐོབ་པར་བྱིན་གྱིས་རློབས། །སྐྱབས་ཡུལ་འོད་ཞུ་རང་ལ་ཐིམ་པར་བསམ། ཞེས་དབང་དྲག་འབར་བའི་བླ་བརྒྱུད་གསོལ་འདེབས་འདི་ནི་གཏེར་ཆེན་མཆོག་གི་བཀའ་ཕེབས་ལྟར། དངོས་སློབ་རྒྱལ་བ་གཡུང་དྲུང་བསྟན་འཛིན་པས་བགྱིས་པ་དགེ་ལེགས་འཕེལ་བར་གྱུར་ཅིག །སརྦ་མངྒ་ལཾ།། །།

བོན་རྩིས་ཕྲ་མེན་སྐོར་རྣམས་ཀྱི་དབང་གི་ཟུར་འདེབས་ (Volume 40, Text 10)

ཨོཾ་སྭསྟི། གཏེར་ཆེན་མཆོག་གྱུར་གླིང་པའི་ཟབ་གཏེར་ལས་བྱོན་པ་བོན་གསས་དབང་དྲག་འབར་བའི་གཏོར་དབང་དང་། རྨ་རྒྱལ་སྤོམ་རའི་བཀའ་གཏད་མདོར་བསྡུས་འདི་ཉིད་སོ་སོར་བྱས་ཀྱང་ཆོག་མོད། འདིར་ཟོར་ཡང་སླད་ཆབས་ཅིག་བྱེད་སྐབས། སྟེགས་བུའི་སྟེང་དུ་འབྲུའི་ཚོམ་བུ་གཅིག་བཀོད་པའི་སྟེང་རྐང་གསུམ་ཁར་དཔལ་བཤོས་ཟུར་གསུམ་རྩེ་རྒྱལ་ཕྲག་པ་ཅན་རྒྱན་ལྡན་ལ་སྐུ་ཙཀ་བཙུགས་ཤིང་དར་གདུགས་ཕུབ་པ་བཀོད། དེ་མདུན་འབྲུ་དཀར་གྱི་གཡུང་དྲུང་གཡོན་སྐོར་བྲིས་པའི་སྟེང་རིན་པོ་ཆེའི་སྣོད་དུ་གཏོར་མ་རི་རབ་བང་རིམ་བཞི་ལྡན་སྟེང་མཁར་ཐབས་ཏོག་དང་བཅས་པ་བཀོད་ལ་དར་གདུགས་དཀར་པོ་ཕུབ། སྤྲོ་ན་འདོད་ཡོན་གཟུགས་འགྲོས་ཟས་སྨན་རིན་པོ་ཆེ་དར་སྣས་བསྐོར། ནམ་རྒྱང་མདའ་འཕང་སོགས་ཀྱང་གཟུག །དཀྱུས་ཙམ་ལ་དེ་དག་མེད་ཀྱང་ཆོག །མདའ་དར། སྨན་རག །ཕྱི་མཆོད། གསེར་སྐྱེམས་རྣམས་བཤམ། ཐོག་མར་བོན་ལུགས་དུག་ཕྱུང་ཚན་བསང་སོགས་སྐབས་སུ་བབས་ཀྱང་མི་ཤེས་པའམ་མདོར་བསྡུས་སུ། རཾ་ཡཾ་ཁཾ། ཐམས་ཅད་སྟོང་ཉིད་ནམ་མཁའི་ངང་། །བྷྲཱུྃ་ལས་རིན་ཆེན་སྣོད་ནང་དུ། །ཨོཾ་ལས་ཕྱི་ནང་མཆོད་པའི་ཚོགས། །སོ་སོའི་ལྷ་མོའི་རོལ་པར་བཅས། །རབ་འབྱམས་ནམ་མཁའ་གང་བར་གྱུར། །ཨོཾ་བཛྲ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝིདྱ་ཤབྡ་པཱུ་ཛ་ས་མ་ཡ་ཧཱུྃ། ཞེས་མཆོད་པ་བྱིན་བརླབ། སྐྱབས་སེམས། བསྐྱེད་བསྟིམ་ནས། བསྟོད་པའི་བར་ཚིག་རིས་གཅིག་གིས་བདག་དང་གཏོར་མ་གཉིས་ཀ་ལྷར་གསལ་གདབ། འཕྲོ་འདུའི་ཏིང་འཛིན་ཡང་དེ་ལྟར་བྱས་ཏེ་ཧཱུྃ་ལྔ་སྦྲེལ་བཟླ། དེའང་བདག་བསྐྱེད་གཙོར་བྱེད་སྐབས་ཧཱུྃ་བཟླས་རླུང་དང་སྦྱར་དགོས་ཀྱང་སྐབས་འདིར་ནི་ངག་བཟླས་ཙམ་གྱིས་འཐུས། མཐར་མཆོད་བསྟོད་བྱ། རྒྱས་པར་སྤྲོ་ན་མདུན་རྟེན་གཏོར་མ་སྒྲུབ་པའི་དོན་དུ་སྤོམ་རའི་ལས་བྱང་ཚར་གཅིག་གཏང་། བསྡུ་ན་བཀའ་གཏད་སྐབས་ཚར་གཅིག་འགྲོ་དགོས་པ་དེ་ཙམ་གྱིས་ཀྱང་འཐུས། དེའང་དམ་ཚིག་པ་བསྐྱེད་པ་ནི་མེད་པས་སྤྱན་དྲངས་པ་ཉིད་མདུན་རྟེན་དང་དབྱེར་མེད་དུ་བསྒོམ་པ་ཡིན། སྒྲུབ་ཐབས་འདི་ལ། བསྭོ་བསྭོ༔ ཡེ་སྟོང་བོན་སྐུའི་སོགས་ནས་སྤྱན་འདྲེན། བཞུགས་གསོལ། དམ་བསྒྲག །མཆོད་པ་བསྟོད་པ་ཡན་དུམ་བུ་ལྔ་ཕྲིན་ལས་རྩ་བ་ཡིན་པས་རྒྱུན་དུ་དེ་ཙམ་གྱིས་འཐུས། དེ་ཕྱིན་ཆད། བསྭོ༔ ཕྱྭ་དང་གཡང་གི་སོགས་གཡང་འགུགས། བསྭོ༔ ཤར་ཕྱོགས་གངས་ཀྱི་སོགས་མདོས་འབུལ། ཀྱེ༔ གཙང་མ་ལྷ་ཡི་སོགས་སྐུ་མཁར་རམ་རྟེན་འཛུག །བསྭོ༔ བོན་སྐྱོང་ཁྱེད་ནི་སོགས་བཀའ་གཏད་ཡིན་པས་སོ་སོའི་སྐབས་བསྟུན་གྱི་འདོར་ལེན་བྱ་དགོས་སོ། །དེ་ནས་དབང་གི་ཕྱག་ལེན་ཡང་སྒེར་ཆོས་བཏང་སྙོམས་སུ་བྱས་ནས། སྐབས་འདིར་སྤྱི་ཙམ་དུ། སློབ་མ་ལ་ཁྲུས་བྱ། བགེགས་བསྐྲད་ཅིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་མཚམས་སྦྱོར་སྤྱིར་མཁའ་འགྲོའི་གསང་མཛོད་ལྟར་ལ། ཁྱད་པར་དུ་འདིར་སྐབས་སུ་བབས་པ། མདོ་ཁམས་ཀྱི་ལྗོངས་སུ་གཙོ་བོར་བཞུགས་ཤིང་འགྲོ་འདུལ་གྱི་ཕྲིན་ལས་སྐྱོང་བ་ས་བཅུའི་དབང་ཕྱུག་ལྷ་སྲས་དམ་འཛིན་མུ་རུབ་བཙད་པོའི་ཡེ་ཤེས་སྒྱུ་འཕྲུལ་དྲྭ་བའི་རོལ་གར། སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་གླིང་པས་རོང་མེ་དཀར་མོ་སྟག་ཚང་ནས་ཚེ་གཡང་སྒྲུབ་པའི་སྐོར་དང་། དཔའ་འོག་དཔལ་དེའུ་རིན་ཆེན་སྤུངས་པ་ནས་སྣང་སྲིད་ཞི་བདེར་བྱེད་པའི་སྐོར་སོགས་བོན་སྐོར་འགའ་ཞིག་གཏེར་ནས་བཞེས་ཀྱང་ཕལ་ཆེར་གཏན་ལ་འབེབ་མ་གྲུབ་ལ། འདིར་ལྷ་མདོ་འབུར་མོ་བདེ་ཆེན་པདྨོ་བཀོད་ནས་སྐུ་ཚབ་པདྨ་བདུད་འདུལ་སོགས་དང་ལྷན་ཅིག་སྤྱན་དྲངས་ཏེ་རྩ་བ་ཙམ་རེ་ཕབ་པར་མཛད་པ་བླ་མ་དྲག་པོ་བོན་གསས་དབང་དྲག་འབར་བའི་བྱིན་རླབས་གཏོར་མའི་དབང་བསྐུར་བ་དང་། བསྟན་སྲུང་ཆེན་པོ་རྨ་རྒྱལ་སྤོམ་ར་གཉན་པོའི་བཀའ་གཏད་བཅས་ཆབས་ཅིག་ཏུ་བསྒྲུབ་པ་ལ། བདག་གིས་བགྱི་བར་འོས་པ་རྣམས་སྔོན་དུ་གྲུབ། ཁྱེད་རང་རྣམས་ཀྱི་ངོ་སྐལ་དུ་གྱུར་པ་གསོལ་བ་འདེབས་པའི་ཡོན་དུ་མཎྜལ་ཞིག་འབུལ་བར་འཚལ། ཞེས་མཚམས་སྦྱར་ལ་མཎྜལ་འབུལ་དུ་གཞུག །སློབ་དཔོན་དང་མདུན་བསྐྱེད་དབྱིངས་ཐ་དད་མི་མངའ་བ་སྐྱབས་གནས་ཡུལ་མཆོག་རྣམ་བཞི་ཀུན་འདུས་ཀྱི་ངོ་བོ་བོན་གསས་དབང་དྲག་འབར་བ་དངོས་སུ་གསལ་བ་ལ། ཡིད་ཁྱེད་ཤེས་ཀྱི་དད་པས་སྐྱབས་སུ་འགྲོ་བ་དང་། མ་གྱུར་སེམས་ཅན་ཐམས་ཅད་སངས་རྒྱས་ཀྱི་ས་ལ་དགོད་པའི་ཕྱིར་དུ་བླ་ན་མེད་པའི་གཡུང་དྲུང་སྙིང་པོ་མཆོག་གི་སེམས་བསྐྱེད་པར་བགྱིའོ་སྙམ་པས་འདིའི་ལད་མོ་གྱིས་ཤིག །ཧོ༔ བླ་ན་མེད་པའི་སོགས་ལན་གསུམ། བྱིན་རླབས་ཀྱི་གཞི་དགོད་པའི་ཕྱིར་ཡེ་ཤེས་པ་རྒྱུད་ལ་དབབ་པ་ཡིན་པས་ཁྱེད་རང་དམ་ཚིག་པའི་སྐུར་གསལ་གདབ་ཅིང་ཡེ་ཤེས་པ་བསྟིམ་པའི་དམིགས་རིམ་རྣམས་ལ་འཇུག་འཚལ། བོན་ཉིད་མཐའ་བྲལ་སོགས་ལྷ་བསྐྱེད། སྤྱན་འདྲེན་བརྗོད་ཅིང་དབྱངས་རོལ་སྤོས་ཀྱིས་མཚོན་ཏེ་ཡེ་ཤེས་པ་དབབ་ཅིང་བསྟིམ། གཏོར་མ་ཐོགས་ལ། དེ་ལྟར་ཁྱེད་རང་བླ་མ་དྲག་པོ་དམ་ཡེ་གཉིས་སུ་མེད་པར་གྱུར་པ་ལ། བརྟན་ཅིང་བྱིན་གྱིས་བརླབ་པའི་སླད་དུ། གཏོར་མ་འདི་ཉིད་ཕྱི་ལྟར་སྒྲུབ་པའི་དམ་རྫས་ཆེན་པོ་དངོས་གྲུབ་ཀུན་འབྱུང་། ནང་ལྟར་ཡེ་ཤེས་རོལ་པའི་གཏོར་སྡོང་བྱིན་རླབས་སྤྲིན་འཕྲོ། གསང་བ་དབང་དྲག་རོལ་པའི་གསས་མཁར་རབ་ཏུ་འབར་བའི་ཀློང་དུ་བདུད་འདུལ་བོན་གསས་དབང་དྲག་འབར་བ་འཁོར་ཁྲོ་བོ་ཁྲོ་མོ་འབུམ་གྱིས་བསྐོར་བའི། དཔྲལ་བ་ནས་རང་འདྲའི་སྐུ་དང་འོད་ཟེར་དཀར་པོ། མགྲིན་པ་ནས་ཧཱུྃ་ཡིག་གི་ཕྲེང་བ་དང་འོད་ཟེར་དམར་པོ། ཐུགས་ཀ་ནས་ཕྱག་མཚན་རྡོ་རྗེ་ཕུར་པའི་ཚོགས་དང་འོད་ཟེར་སྔོན་པོ། གནས་ཐམས་ཅད་ནས་འོད་ཟེར་མེ་ཕུང་ཁྲོ་ཆུང་གི་ཚོགས་ཆར་ལྟར་དུ་བབས་ཏེ་ཁྱེད་རང་གི་གནས་གསུམ་དང་ལུས་ཀྱི་ཆ་ཐམས་ཅད་དུ་ཐིམ་པས་སྡིག་སྒྲིབ་ནད་གདོན་བར་དུ་གཅོད་པ་ཐམས་ཅད་ལྷག་མེད་ཏུ་སྦྱངས། སྐུ་གསུང་ཐུགས་གསང་བ་བསམ་གྱིས་མི་ཁྱབ་པའི་དབང་དང་བྱིན་རླབས་དངོས་གྲུབ་མ་ལུས་པ་གཅིག་ཅར་དུ་ཐོབ་པའི་འདུན་པ་མཛོད་ཅིག །ཧཱུྃ༔ བོན་གསས་དབང་དྲག་འབར་བའི་ཚོགས༔ སོགས་དང་ཧཱུྃ་དབྱངས་བརྗོད་ལ་གཏོར་མ་གནས་གསུམ་དུ་བཞག །མཐར་གཏོར་མའི་ལྷ་འོད་དུ་ཞུ་སྟེ་ཁྱེད་རང་ལ་ཐིམ་པས་བོན་གསས་དབང་དྲག་འབར་བའི་སྐུ་གསུང་ཐུགས་དང་དབྱེར་མེད་པར་གྱུར་སྙམ་པའི་ང་རྒྱལ་སྐྱེད་ཅིག །ཅེས་བྱས་ལ་ཤིས་པ་བརྗོད། དེ་ནས་བཀའི་བསྟན་སྐྱོང་ཆེན་པོ་རྨ་རྒྱལ་སྤོམ་རའི་བཀའ་གཏད་བགྱི་བའི་ཐོག་མར་མདུན་རྟེན་སྒྲུབ་པའི་ཕྲིན་ལས་ལ་འཇུག་པ་ཡིན་པས་གྱེར་སྒོམ་སོ་སོའི་སྐབས་དང་མཐུན་པར་དམིགས་པའི་གསལ་འདེབས་ཀྱང་བགྱིད་འཚལ། ཅེས་བྱས་ལ་མདའ་དར་ཐོགས་ཏེ་སྤོམ་རའི་སྒྲུབ་ཐབས་ཀྱི་སྤྱན་འདྲེན་ནས་བསྟོད་པའི་བར་དུ་གཏང་། དེ་ནས་སློབ་དཔོན་ཉིད་དབང་དྲག་འབར་བར་གསལ་བའི་ཐུགས་ཀ་ནས་འོད་ཟེར་འཕྲོས་ཏེ་རྨ་རྒྱལ་གཙོ་འཁོར་ལ་ཕོག་པས་ཐུགས་དམ་གྱི་རྒྱུད་བསྐུལ། འཁོར་འདས་བརྟན་གཡོའི་དྭངས་བཅུད། སྲིད་པ་གསུམ་གྱི་ཕྱྭ་གཡང་དཔལ་འབྱོར་ཐམས་ཅད་འོད་ཟེར་གསེར་བཙོ་མའི་ཁ་དོག་ཅན་གྱི་རྣམ་པར་བསྡུས་ཏེ་ཁྱེད་རང་ལ་ཐིམ་པས་ཚེ་བསོད་དབང་ཐང་དར་ཞིང་རྒྱས་པར་སྒོམས་ཤིག །ཅེས་བྱས་ལ། བསྭོ༔ ཕྱྭ་དང་གཡང་གི་ནས། ཕྱྭ་ཁུ་ཡེ་གཡང་ཁུ་ཡེ༔ ཡན་བརྗོད་ལ་མདའ་དར་གཡབ། ཁྱེད་རང་ཡི་དམ་དབང་དྲག་འབར་བའི་ཏིང་འཛིན་གྱིས་གནས་པ་ལ། སྒྲུབ་པའི་རྟེན་གྱི་གཏོར་མ་རྨ་རྒྱལ་གཉན་པོ་གཡུང་དྲུང་གཟི་འབར་རྩལ་ལྕམ་དྲལ་སྲས་འཁོར་སྤྲུལ་པའི་ཚོགས་དང་བཅས་པ་མངོན་སུམ་ཉིད་དུ་གསལ་བ་གཏད་ཅིང་བཀའ་བསྒོས་པས། དེང་ནས་བརྩམ་སྟེ་ལུས་དང་གྲིབ་མ་ལྟར་མི་འབྲལ་བར་འགྲོགས་ཤིང་བསམ་དོན་མཐའ་དག་ཡིད་བཞིན་དུ་སྒྲུབ་པའི་ཁ་འཛིན་རྒྱབ་རྟེན་སྡོངས་གྲོགས་གཡེལ་མེད་དུ་མཛད་པར་སྒོམས་ཤིག །སྤོམ་རའི་གཏོར་མ་ལག་ཏུ་གཏད་ལ། བསྭོ༔ བོན་སྐྱོང་ཁྱེད་ནི་སོགས་བརྗོད། མཐར་སྤྱི་ལྟར་བཀའ་བསྒོ་བྱེད་ན། སངས་རྒྱས་བསྟན་པའི་སྲུང་མ་རྨ་རྒྱལ་སྤོམ་ར་གཉན་པོ་འཁོར་དང་བཅས་པ་རྣམས་ཀྱིས། རྒྱལ་བ་དགོངས་པའི་བརྒྱུད་པ། སེམས་དཔའ་ཏིང་འཛིན་བརྒྱུད་པ། གྲུབ་ཐོབ་སྙན་ཁུངས་བརྒྱུད་པ། ལས་འཕྲོ་གཏེར་གྱི་བརྒྱུད་པའི་དཔོན་གསས་བླ་མ་རིག་འཛིན་བརྒྱུད་པར་བཅས་པའི་བཀའ་དང་ཐ་ཚིག་གི་རིམ་པ་ལས་མ་འདའ་བར། སྐལ་ལྡན་རིགས་ཀྱི་བུ་འདི་ལ་རྟག་ཏུ་སྲུངས་ཤིང་སྐྱོབས། འགལ་རྐྱེན་བར་གཅོད་སོལ། མཐུན་རྐྱེན་ལེགས་ཚོགས་སྤེལ། ཚེ་བསོད་དཔལ་འབྱོར་ཡར་ངོའི་ཟླ་བ་ལྟར་འཕེལ་ཞིང་རྒྱས་པའི་ཕྲིན་ལས་གཡེལ་བ་མེད་པར་མཛད་དུ་གསོལ། ཅེས་བརྗོད། གཏོར་མ་རང་གནས་སུ་བཞག །བཀྲ་ཤིས་བརྗོད། དེ་རྣམས་ཀྱིས་བོན་གསས་དབང་དྲག་འབར་བའི་གཏོར་དབང་དང་། རྨ་རྒྱལ་སྤོམ་རའི་བཀའ་གཏད་ལེགས་པར་གྲུབ་པ་ཡིན་པས་སོགས་ཀྱིས་མཚམས་སྦྱར་ལ་དམ་ཚིག་བསྒྲག་གཟུང་སོགས་སྤྱི་ལྟར་བྱ། སླར་གཏོར་མ་ཁ་གསོ། འབྲུ་གསུམ་གྱིས་བྱིན་བརླབ། སྤོམ་རའི་མཆོད་བསྟོད་དང་། བསྭོ༔ ཤར་ཕྱོགས་གངས་ཀྱི་སོགས་བརྗོད་ལ་གཏོར་མ་གཙང་སར་གཤེགས། ཡི་དམ་མཆོད་བསྟོད་དང་ནོངས་བཤགས། བདག་བསྐྱེད་བསྡུ་ལྡང། སྨོན་ལམ་བཀྲ་ཤིས་གཞུང་བཞིན་བྱའོ། །ཞེས་པའི་གསལ་བྱེད་མདོར་བསྡུས་འདིའང་བློ་གྲོས་མཐའ་ཡས་ཀྱིས་རྫོང་ཤོད་སྒྲུབ་གནས་སུ་སྤེལ་བ་དགེ་ལེགས་འཕེལ། སརྦ་དཱ་མངྒ་ལཾ།། །།

གསར་རྙིང་སྤྱིར་འགྲོ་བའི་དབང་བཤད་བྱེ་བྲག་སོ་སོ་ལ་འཁྱོག་མཚམས་ཀྱི་དཔེར་བརྗོད་དང་བཅས་པ་ (Volume 40, Text 11)

༄༅། །གསར་རྙིང་སྤྱིར་འགྲོ་བའི་དབང་བཤད་བྱེ་བྲག་སོ་སོ་ལ་འཁྱོག་མཚམས་ཀྱི་དཔེར་བརྗོད་དང་བཅས་པ་བཞུགས་སོ། ། ཨོཾ་སྭསྟི་སིདྡྷི་རསྟུ། རབ་འབྱམས་དཀྱིལ་འཁོར་འཁོར་ལོའི་དབང་ཕྱུག་དང་། །ཐ་དད་མ་དམིགས་རྗེ་བཙུན་གཏེར་བདག་གླིང་། །གང་གི་ཞབས་པད་སྤྱི་བོར་རྟག་མཆོད་ནས། །འཆད་འདོད་གསར་བུའི་དགའ་སྟོན་དེ་རིང་སྤེལ། །འདིར་དབང་བཤད་སྤྱི་འགྲོའི་ཁོག བྱེ་བྲག་ཉེར་མཁོར་ཁ་སྒྱུར་ཚུལ་གྱི་དཔེར་བརྗོད་དང་བཅས་པ་ཅུང་ཟད་ཅིག་གླེང་བར་བྱ་སྟེ། དེ་ཡང་སློབ་མ་ཁྲུས་དང་ཕྱག་སོགས་སྔོན་དུ་འགྲོ་བས། གྲལ་ལ་འཁོད་དེ། གླེང་བ་སྐབས་སུ་བབ་པ་དང་གསལ་དག་སྙན་པའི་ངག་གིས་འདི་སྐད་ཅེས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ། དེའི་ཆེད་དུ་རྗེས་གནང་ངམ། རྡོ་རྗེ་ཐེག་པའི་ལམ་གྱི་རྩ་བ་མངོན་པར་དབང་བསྐུར་བ་ཟབ་མོ་གསན་ནས་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པ་བྱང་ཆུབ་མཆོག་ཏུ་སེམས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པ་ཡང་། སྐྱེས་རབས་ལས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རབ་ཏུ་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་ནི་བདུད་རྩི་འཐུང་བ་བཞིན། །ཞེས་དང་། གཞན་ཡང་། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་དཔའ་སོགས། །བདེ་བར་གཤེགས་པ་རྣམས་ཀྱིས་བྱིན་མི་བརླབ། །ཅེས་གསུངས་པ་ལྟར། དགེ་བའི་བཤེས་གཉེན་ལ་གུས་པ་དང་ལྡན་པས་སྒོ་གསུམ་ལེགས་པར་བསྡམས་ཏེ་གཞན་དུ་མ་ཡེངས་པའི་སྒོ་ནས་གསན་པར་ཞུ་འཚལ། དེ་ཡང་འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་མངའ་བ་དེ་ཉིད་ཀྱིས། སེམས་ཅན་རྣམས་ཀྱི་བསམ་པ་དང་། དབང་པོ་དང་། སྐལ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་བསྟན་པ་ཐམས་ཅད་ཀྱང་བསྡུ་ན། ཐེག་པ་གསུམ་དུ་འདུས་ཏེ། རྡོ་རྗེ་སྙིང་འགྲེལ་ལས། སངས་རྒྱས་པ་ལ་བཞི་པ་དང་། །ལྔ་པ་ཐུབ་པའི་དགོངས་པ་མིན། །ཞེས་གསུངས་པས། ཉན་ཐོས་དང་། རང་རྒྱལ། ཐེག་པ་ཆེན་པོ་སྟེ། ཐེག་པ་གསུམ་དུ་རྣམ་གྲོལ་གྱི་ཐེག་པ་ཐམས་ཅད་འདུས་པས་ཐེག་པ་བཞི་པ་མེད་མོད་ཀྱང་། གསུམ་པོའི་ནང་སེམས་ཀྱི་དབྱེ་བ་ལ་བརྟེན་པའི་ཐེག་པའི་རྣམ་གྲངས་ནི་མང་དུ་འབྱུང་བས་མི་འགལ་ཏེ། ལང་ཀར་གཤེགས་པ་ལས། ཐེག་པ་རྣམ་པ་མང་བཤད་པ། །སེམས་ཅན་རྣམས་ནི་དྲང་བའི་ཕྱིར། །ཐེག་པ་ཐ་དད་ངས་བཤད་དེ། །ཐེག་པ་གཅིག་ཏུ་ངས་བསྟན་ཏོ། །ཇི་སྲིད་སེམས་ནི་འཇུག་པའི་བར། །ཐེག་པ་དག་ལ་ཐུག་པ་མེད། །ཅེས་གསུངས་པའི་ཕྱིར་རོ། །དེས་ན་སྤྱིར་མངོན་མཐོའི་ཐེག་པ་གཉིས། ངེས་པར་ལེགས་པའི་ཐེག་པ་གསུམ་དང་ལྔར་མདོ་དེ་ལས་གསུངས་ཏེ། ཇི་སྐད་དུ། ལྷ་ཡི་ཐེག་དང་ཚངས་པའི་ཐེག །དེ་བཞིན་དུ་ནི་ཉན་ཐོས་དང་། །དེ་བཞིན་གཤེགས་དང་རང་རྒྱལ་གྱི། །ཐེག་པ་མཐའ་དག་པ་བཤད་དོ། །ཞེས་དང་། ཡང་། མངོན་མཐོའི་ཐེག་པ་གཉིས་གཅིག་ཏུ་བསྡུས། ངེས་ལེགས་ཀྱི་དེ་བཞིན་གཤེགས་པའི་ཐེག་པ་ལ་བྱང་སེམས་དང་སྔགས་གཉིས་སུ་ཕྱེས་ནས་ལྔར་བཤད་པའང་ཡོད་དེ། གསང་སྙིང་ལས། ཐེག་པ་བཞི་ཡིས་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས། དེ་ལ་མངོན་མཐོའི་ཐེག་པ་ནི། ལས་འབྲས་ལ་ཡིད་ཆེས་པའི་སྒོ་ནས་དགེ་མི་དགེ་བླང་དོར་མ་ནོར་བར་སྤྱད་པས་མི་དང་འདོད་ལྷའི་གོ་འཕང་ཐོབ་ནུས་པ་དེའི་ཕྱིར། གཙོ་བོའི་སྒྲས་སྨྲོས་ཏེ། ལྷའི་ཐེག་པ་ཞེས་གསུངས་པ་དང་། དེའི་སྟེང་དུ་འཇིག་རྟེན་པའི་བསམ་གཏན་དང་གཟུགས་མེད་ཀྱི་ཏིང་ངེ་འཛིན་བསྒོམ་པ་ནི། འདོད་ཉོན་གྱིས་གཙང་བས་ཚངས་པའི་ཐེག་པ་སྟེ། དེ་གཉིས་འཇིག་རྟེན་པའི་ཐེག་པ་ཡིན་པས་འཁོར་བ་ལས་ཁྱད་པར་དུ་འདྲེན་མི་ནུས་པའི་ཕྱིར། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་བཟླ། །ཞེས་པ་ལས་གཞན་དུ་གྱུར་པས་ན། ཐེག་པ་དངོས་མ་ཡིན་མོད་ཀྱི། དེ་ལྟ་ནའང་ཡང་དག་པའི་ལྟ་བ་དང་ལྡན་པས་དགེ་བཅུའི་ལས་ལམ་ལ་སྤྱོད་པ་ནི། རྣམ་གྲོལ་གྱི་ཐེག་པ་ཐམས་ཅད་ཀྱི་གཞིའམ་སྔོན་དུ་འགྲོ་བ་ཡིན་པས། ལམ་སྟེགས་སུ་འགྱུར་ཏེ། དགྱེས་རྡོར་ལས། དགེ་བ་བཅུ་ལས་བརྩམས་ནས་ནི། །དེ་ཡི་ཆོས་ནི་རབ་ཏུ་དབྱེ། །ཞེས་དང་། སློབ་དཔོན་སངས་རྒྱས་གསང་བས་ལམ་རིམ་དུ། གཞི་ཡི་ཐེག་པ་དང་པོར་ཞོག །ཅེས་གསུངས་ཤིང་། རིན་ཆེན་ཕྲེང་བ་ལས་ཀྱང་། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེག་ན་ཐར་པ་གམ་ན་འདུག །ཅེས་པ་ལྟར་མངོན་མཐོའི་ཐེམ་སྐས་ལ་འཛེགས་ནས་བགྲོད་བྱའི་གནས་ངེས་ལེགས་སམ་རྣམ་པར་གྲོལ་བའི་ཐེག་པ་དེ་ལའང་། སྔ་འགྱུར་རང་སྐད་ཀྱི་དབང་དུ་བྱས་ན། སྤྱི་མདོ་དགོངས་པ་འདུས་པ་ལས། ལངྐའི་བདག་པོ་གཞན་ཡང་གང་། །དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པ་འོ། །ཞེས་གསུམ་དུ་སྣང་བ་ལས། རེ་རེ་ལའང་གསུམ་གསུམ་དུ་ཕྱེ་བས་ཐེག་པ་དགུར་འགྱུར་ཏེ། ཀུན་འབྱུང་འདྲེན་པའི་ཐེག་པ་ནི། ཉན་ཐོས། རང་རྒྱལ། བྱང་སེམས་ཏེ་མཚན་ཉིད་སྡེ་གསུམ་དང་། དཀའ་ཐུབ་རིག་བྱེད་ཀྱི་ཐེག་པ་ནི་ཀྲི་ཡ། ཨུ་པ་ཡ། ཡོ་ག་སྟེ་ཕྱི་རྒྱུད་སྡེ་གསུམ་དང་། དབང་བསྒྱུར་ཐབས་ཀྱི་ཐེག་པ་ནི། བསྐྱེད་པ་མ་ཧཱ་ཡོ་ག །ལུང་ཨ་ནུ་ཡོ་ག །མན་ངག་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་རྣམས་སུ་དབྱེར་ཡོད་ཅིང་། གསུམ་མམ་དགུར་ཕྱེ་བ་དེ་ཡང་བསྡུ་ན། ཀུན་བྱེད་རྒྱལ་པོ་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་སྔགས་ཀྱི་ཐེག་པ་འོ། །ཞེས་པས་རྒྱུ་ཕ་རོལ་ཏུ་ཕྱིན་པའི་ཐེག་པ་དང་། འབྲས་བུ་སྔགས་ཀྱི་ཐེག་པ་གཉིས་སུ་འདུ་ཞིང་། དེ་གཉིས་ཀྱི་ཁྱད་པར་ནི། སྔགས་དང་སྦྱོར་བའི་བྱ་བ་གཙོ་བོར་སྟོན་པ་དང་མི་སྟོན་པའི་ཁྱད་པར་ཏེ། རབ་དབྱེ་ལས་ཀྱང་། མདོ་དང་སྔགས་ཀྱི་ཁྱད་པར་ནི། །ཆོ་གའི་བྱ་བ་ཡོད་མེད་ཡིན། །ཞེས་པའང་དོན་འདི་ལ་དགོངས་པར་སྣང་ངོ་། །འོ་ན་ཕ་རོལ་ཏུ་ཕྱིན་པའི་ཚུལ་ལས་སྔགས་ཀྱི་ཚུལ་གང་གིས་ཁྱད་པར་དུ་འཕགས་སྙམ་ན། དོན་གསུམ་གྱིས་མདོ་ལས་སྔགས་མཆོག་ཏུ་གྱུར་པ་སྟེ། གསུམ་གང་ཞེ་ན། མྱུར་བ་དང་། བདེ་བ་དང་། ཐབས་ལ་མཁས་པའི་ཁྱད་པར་རོ། །དེ་ལ་མྱུར་བ་ནི། ཕར་ཕྱིན་ཐེག་པས་རང་ལམ་གྱི་བྱང་ཆུབ་ཐོབ་པ་ལ་བསྐལ་པ་གྲངས་མེད་ཐོགས་མོད། སྔགས་ལས་ནི། ཀྲི་ཡས་མི་ཚེ་བདུན་ནམ་བསྐལ་པ་བརྒྱད། ཨུ་པ་ཡས་མི་ཚེ་ལྔའམ་བསྐལ་པ་གཅིག་གམ་གསུམ། ཡོ་གས་ཚེ་ལོ་བརྒྱ་པའི་མིའི་སྐྱེ་བ་གསུམ་མམ་བཅུ་དྲུག །བླ་མེད་ཀྱིས་སྐྱེ་བ་འདིའམ་བར་དོར་བྱང་ཆུབ་ཐོབ་པར་གསུངས་ཤིང་། དེ་ལྟར་མྱུར་བའི་རྒྱུ་ཡང་། སྔགས་སུ་ནི། ཆོ་གའི་ཁྱད་པར་གྱིས་ལྷ་རྣམས་དངོས་སུ་མཆོད་པ་ལེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་བླ་མའི་སྐུ་ལ་ཞུགས་ནས་སྒྲུབ་པ་པོའི་མཆོད་པ་ལེན་པ་ལ་སོགས་པས་ཡོངས་སུ་སྤྱད་པ་ལས་བྱུང་བའི་བསོད་ནམས་ཡོད་པ་དང་། སྔགས་དང་ཕྱག་རྒྱའི་མཐུས། ཆུ་ཐིགས་རེ་ཡང་གངྒཱའི་རྡུལ་སྙེད་དུ་འཕེལ་བས། དེ་སྙེད་ཀྱི་བསོད་ནམས་འབྱུང་བ་དང་། མ་དག་པའི་སྣང་བ་འགོག་པའི་ཞིང་སྦྱོང་བའི་ཏིང་ངེ་འཛིན་ལས་དང་པོ་པའི་དུས་ནས་ཀྱང་མངོན་དུ་བྱེད་ནུས་པས། སྔགས་དང་ཕྱག་རྒྱ་ཏིང་ངེ་འཛིན་གྱི་ཁྱད་པར་རེ་རེས་ཀྱང་སེམས་ཅན་མཐའ་ཡས་པ་སྨིན་པའི་རྒྱུ་ཁྱད་པར་ཅན་བྱེད་ནུས་པ་དེ་དག་སྔགས་ཀྱི་ཐེག་པ་ལ་ཞུགས་ཙམ་ཉིད་ནས་ཡོད་པའི་རྒྱུས་མྱུར་བ་ཡིན་ནོ། །གཉིས་པ་བདེ་བ་ནི། ལུས་སེམས་ལ་ཚོར་བ་རྩུབ་པོ་མེད་པ་སྟེ། དེའི་རྒྱུ་ཡང་འདི་ལས་སྐལ་པ་དྲུག་གི་ལུས་ཀྱང་ཚེགས་མེད་པ་གྲུབ་པ་དང་། རྫུ་འཕྲུལ་དང་ཏིང་ངེ་འཛིན་མང་པོ་ཐོབ་པ་དང་། སྔགས་ཀྱི་མཐུས་དེ་བཞིན་གཤེགས་པ་རྣམས་མངོན་དུ་བཞུགས་ཤིང་འགྲོ་བའི་བསམ་པ་ཐམས་ཅད་སྒྲུབ་ནུས་པའི་རྒྱུས་བདེ་བ་ཡིན་ནོ། །གསུམ་པ་ཐབས་ལ་མཁས་པ་ནི། རིག་པ་འཛིན་པ་རྣམས་དང་ཚུལ་ཁྲིམས་མཉམ་པས་ལྷ་དགྱེས་པ་དང་། སྤྱོད་ཡུལ་ཁྱད་པར་ཅན་དང་འབྲེལ་བའི་ཏིང་ངེ་འཛིན་དང་། ཤེས་རབ་རྨད་དུ་བྱུང་བས་སྣོད་བཅུད་དག་མཉམ་ཆེན་པོར་གཏན་ལ་ཕེབ་པ་དང་། སྤྱོད་ཡུལ་ཐམས་ཅད་དུ་ལྷ་དང་སྔགས་ཀྱི་ཐབས་ལ་འཇུག་ནུས་པས་ན་ཐབས་ལ་མཁས་པ་ཡིན་ནོ། །དེར་མ་ཟད་ཕ་རོལ་ཏུ་ཕྱིན་པའི་རང་ལམ་གྱིས་གྲངས་མེད་གསུམ་གྱི་ཚོགས་བསགས་པས་ས་བཅུ་པའི་བྱང་ཆུབ་སེམས་དཔའ་སངས་རྒྱས་ཀྱི་རྒྱལ་ཚབ་ཆེན་པོའི་གོ་འཕང་ལས་ལྷག་པ་ཐོབ་མི་ནུས་ཀྱང་། སྐབས་དེར་སྔགས་ཀྱི་ཐེག་པ་ལ་ཞུགས་ནས་རྫོགས་པའི་སངས་རྒྱས་འཐོབ་དགོས་པས་ན་སྔགས་ཀྱི་ཐེག་པ་ནི་བགྲོད་པ་གཅིག་པའི་ལམ་དུ་འགྱུར་བའི་ཕྱིར། མཐར་ཐུག་གི་ཐེག་པ་གཅིག་ཉིད་དུ་ངེས་པས་ཀྱང་འཕགས་ཏེ། སྤྱི་མདོ་དགོངས་འདུས་ལས། ཐེག་པ་དཔག་མེད་བསྟན་པ་ཡང། །ཇི་ལྟར་མོས་པ་ཐ་དད་པས། ཁྲིད་པར་བྱ་བའི་ཐབས་སུ་ཟད། །རྡོ་རྗེ་ཐེག་པ་ཉིད་ལས་མེད། །ཅེས་དང་། སྒྱུ་འཕྲུལ་རྩ་རྒྱུད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་དང་། སྒྱུ་འཕྲུལ་བརྒྱད་ཅུ་པ་ལས་ཀྱང་། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་གསུངས་པ་ཡིན་ནོ། །འོ་ན་གསང་སྔགས་རྡོ་རྗེ་ཐེག་པ་དེ་སྡེ་སྣོད་གསུམ་གང་དུ་འདུ་ཞེ་ན། འདི་ལ་དགོངས་པ་མི་མཐུན་པ་ཡང་མང་སྟེ། གང་དག་མངོན་པའི་སྡེ་སྣོད་ལས་ཕྱི་ནང་གཉིས་ལས་སྔགས་ནི་ནང་གི་མངོན་པའོ། །ཞེས་བཞེད་པ་དང་། ཟབ་མོའི་དོན་མདོར་བསྡུས་ཏེ་སྟོན་པས་ན་མདོ་སྡེའོ་ཞེས་བཞེད་པའང་ཡོད་མོད། རང་ལུགས་ནི་རིག་པ་འཛིན་པའི་སྡེ་སྣོད་ཅེས། སྡེ་སྣོད་གསུམ་ལས་ལོགས་པར་རྐང་ཐུབ་པ་གཅིག་ཏུ་བྱས་ཏེ། སྡེ་སྣོད་བཞི་པར་བཞག་ན་ལེགས་པར་མངོན་ནོ། །དེ་ལྟར་ཡང་། ཀུན་བྱེད་རྒྱལ་པོའི་རྒྱུད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་དང་། དཔུང་བཟང་གིས་ཞུས་པ་ལས་ཀྱང་། །བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་དུ་ནི་རྒྱལ་བས་གསུངས། །ཞེས་དང་། སློབ་དཔོན་སངས་རྒྱས་གསང་བས་མཛད་པའི་རྣམ་འཇོམས་ཀྱི་གཟུངས་འགྲེལ་ལས། སངས་རྒྱས་མཆོག་གིས་ཆོས་གསུངས་པ། །འདུལ་བ་མདོ་སྡེ་མངོན་པ་དང་། །རིག་པ་འཛིན་པའི་སྡེ་བཞིར་གནས། །ཞེས་གསུངས་པའི་ཕྱིར། རྡོ་རྗེ་ཐེག་པའི་སྡེ་སྣོད་དང་། རིག་པ་འཛིན་པའི་སྡེ་སྣོད་དང་། སྔགས་ཀྱི་སྡེ་སྣོད་དང་། སྡེ་སྣོད་བཞི་པ་དང་། ཆོས་འདི་པ་རྣམས་ཀྱི་རྒྱུད་ཅེས་པ་རྣམས་མིང་གི་རྣམ་གྲངས་སོ། །དེ་ལ་སྔགས་ཀྱི་མཚན་གཞི་ནི། སྦྱང་གཞི་དབྱིངས་རང་བཞིན་གྱིས་རྣམ་པར་དག་པ་དང་། དེ་ལ་བརྟེན་པའི་ཆོས་སྦྱང་བྱ་སྦྱོང་བྱེད་དང་བཅས་པ་ཐམས་ཅད་ཡིན་ཞིང་། དེ་ཡང་སྦྱང་གཞི་ལ་བརྟེན་པའི་སྦྱང་བྱ་གློ་བུར་གྱི་དྲི་མ་རྣམས། དབང་གིས་རྒྱུད་སྨིན་པར་བྱས་ནས། དེ་དང་རྗེས་སུ་འབྲེལ་བའི་སྨོན་ལམ་བསྒོམ་པ་དང་། དེས་བྲལ་ཐོབ་ཀྱི་ཡོན་ཏན་གྱི་ཆར་གཏོགས་པ་རྣམས་སྦྱོང་བྱེད་ཡིན་ནོ། །དེ་ལྟར་སྦྱངས་པས་དབྱིངས་ལ་སྒྲིབ་བྱེད་ཀྱི་དྲི་མ་ཕྲ་རགས་ཐམས་ཅད་དག་ནས། གཞིའི་ཡོན་ཏན་ཇི་ལྟ་བ་བཞིན་མངོན་དུ་གྱུར་པ་ནི་འབྲས་བུ་སྟེ། དེ་སྐད་དུའང་གསང་བ་གྲུབ་པ་ལས། དབྱིངས་ལ་བྲལ་བ་དག་ཐོབ་འབྲས། །གསང་སྔགས་རྣམ་པ་བཞིར་བཤད་དེ། །ཞེས་སོ། །སྔགས་ཀྱི་མཚན་ཉིད་ནི། ཆོས་ཀྱི་དབྱིངས་རང་བཞིན་གྱིས་རྣམ་པར་དག་པ་དང་། རྗོད་བྱེད་ཐུགས་རྡོ་རྗེའི་གསང་བ་འཁོར་དང་བཅས་པ་སྟེ། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པ། །ཆོས་ཀྱི་དབྱིངས་དང་ཡང་དག་ལྡན། །ཞེས་སོ། །སྔགས་ཀྱི་ངེས་ཚིག་ནི། མནྟྲ་ཞེས་པའི་སྒྲ་ལས་དྲངས་ན། ཡིད་ཤེས་བདེ་མྱུར་དུ་སྐྱོབ་པས་ན་སྔགས་ཏེ། གསང་འདུས་ཀྱི་རྒྱུད་ཕྱི་མ་ལས། མན་ནི་ཡིད་ཅེས་བྱ་བ་སྟེ། །ཏྲ་ནི་སྐྱོབ་པར་བྱ་བའི་དོན། །ཞེས་སོ། །གསང་སྔགས་ཀྱི་དབྱེ་བ་ནི། གསར་རྙིང་ཐུན་མོང་གི་བཞེད་པའི་དབང་དུ་བྱས་ན་བཞིར་འགྱུར་ཏེ། རྡོ་རྗེ་སྙིང་པོ་བཀོད་པའི་རྒྱུད་ལས། བདེ་བར་གཤེགས་པས་དགོངས་པའི་རྒྱུད། །རྣམ་པ་བཞི་རུ་ཡང་དག་བཤད། །བྱ་སྤྱོད་རྣལ་འབྱོར་བླ་མེད་དོ། །ཞེས་གསུངས། དེ་ཡང་བཞིར་འབྱེད་པའི་རྒྱུ་མཚན་ནི་ལྔ་ལས། དང་པོ་མི་རིགས་བཞིའི་སྤྱོད་པ་ལ་དགོངས་ནས། དེ་འདུལ་བའི་ཕྱིར་བཞིར་གསུངས་ཏེ། དུར་ཁྲོད་རྒྱན་གྱི་རྒྱུད་ལས། བྲམ་ཟེ་རྒྱལ་རིགས་རྗེའུ་རིགས་དང་། །དམངས་རིགས་གདོལ་པ་འདུལ་དོན་དུ། །རྒྱུད་ནི་རྣམ་པ་བཞིར་གསུངས་ཏེ། །བྱ་སྤྱོད་རྣལ་འབྱོར་བླ་མེད་དོ། །ཞེས་གསུངས། གཉིས་པ་གང་ཟག་གི་བློ་རིགས་བཞི་ལ་དགོངས་ནས་ཀྱང་བཞིར་གསུངས་ཏེ། བསམ་གཏན་ཕྱི་མ་ལས། སེམས་ཅན་དམན་ལ་བྱ་བའི་རྒྱུད། །དེ་ལྟག་རྣམས་ལ་སྤྱོད་པའི་རྒྱུད། །སེམས་ཅན་མཆོག་ལ་རྣལ་འབྱོར་རྒྱུད། །དེ་ལྟག་རྣམས་ལ་བླ་མེད་རྒྱུད། །ཅེས་གསུངས། གསུམ་པ་རྫོགས་ལྡན་ལ་སོགས་པའི་དུས་བཞི་ལ་དགོངས་ནས་བཞིར་གསུངས་ཏེ། དཔལ་ཕྲེང་དམ་པའི་རྒྱུད་ལས། གསང་སྔགས་བྱུང་ཚུལ་རྣམ་བཞི་སྟེ། །བསྐལ་པ་རྫོགས་ལྡན་སུམ་ལྡན་གཉིས། །རྩོད་དུས་རྒྱུད་ཀྱང་དེ་བཞིན་དུ། །གདུལ་བྱའི་ངོ་ལ་སྣང་བ་ཡིན། །ཞེས་གསུངས། བཞི་པ་སྦྱང་གཞི་འདོད་ཆགས་ཀྱི་འཇུག་ཚུལ་བཞི་ལ་དགོངས་ནས་ཀྱང་བཞིར་གསུངས་ཏེ། བརྟག་གཉིས་ལས། བལྟས་དང་དགོད་དང་ལག་བཅང་དང་། །འཁྱུད་དང་གཉིས་སྤྲོད་ལ་སོགས་པའི། །རྒྱུད་ཀྱང་རྣམ་པ་བཞིར་གསུངས་སོ། །ཞེས་གསུངས། ལྔ་པ་ལྷ་བཞིའི་རྗེས་སུ་འཇུག་པའི་ཕྱིན་ཅི་ལོག་བཞི་དྲང་བ་ལ་དགོངས་ནས་ཀྱང་བཞིར་གསུངས་ཏེ། གཏི་མུག་ཅན་ཚངས་པ་གཙང་སྦྲ་ཆོས་སུ་སྨྲ་བ་རྗེས་སུ་འཛིན་པའི་ཕྱིར་བྱ་བའི་རྒྱུད། ཞེ་སྡང་ཅན་ཁྱབ་འཇུག་འཚེ་བ་ཆོས་སུ་སྨྲ་བ་རྗེས་སུ་འཛིན་པའི་ཕྱིར་སྤྱོད་རྒྱུད། ང་རྒྱལ་ཅན་བརྒྱ་བྱིན་འབྱོར་པ་ཆོས་སུ་སྨྲ་བ་རྗེས་སུ་འཛིན་པའི་ཕྱིར་རྣལ་འབྱོར་རྒྱུད། འདོད་ཆགས་ཅན་དབང་ཕྱུག་འདོད་ཆགས་ཆོས་སུ་སྨྲ་བ་རྗེས་སུ་འཛིན་པའི་ཕྱིར་རྣལ་འབྱོར་བླ་ན་མེད་པའི་རྒྱུད་གསུངས་པ་ཡིན་ལ། དེ་རྣམས་བརྗོད་བྱ་རྗོད་བྱེད་སོགས་རེ་རེ་ནས་གཏན་ལ་ཕབ་ན་མཐའ་ཡས་པར་འགྱུར་བའི་ཕྱིར་རེ་ཞིག་དེ་ཙམ་བྱས་ནས། འདིར་སྐབས་སུ་བབ་པ་ནི། ཞེས་འགྲེས་སྦྱར་ནས། ༈ བྱ་རྒྱུད་ཀྱི་དབང་རྗེས་གནང་ལྟ་བུ་ཡིན་ན་འདི་སྐད་ཅེས། ཀྲི་ཡ་ཞེས་པའི་སྒྲ་ལས་དྲངས་ན་བྱ་བའི་རྒྱུད་དེ། བསམ་གཏན་ཕྱི་མའི་འགྲེལ་པ་ལས། རྒྱུད་འདི་ནི་ལུས་ངག་གི་བྱ་བ་གཙོ་བོར་སྟོན་པས་བྱ་བའི་རྒྱུད་དོ། །ཞེས་གསུངས་ཤིང་། ངོ་བོ་ནི། དོན་དམ་པ་མཐའ་བཞི་དང་བྲལ་བའི་རྟོགས་པས། ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པ་སྟེ། སློབ་དཔོན་སངས་རྒྱས་གསང་བས་སྒྱུ་འཕྲུལ་ལམ་རིམ་དུ། གཉིས་མེད་མཉམ་པ་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །རེས་བསྒོམ་བྱ་བ་ལས་ཀྱི་ས། །ཞེས་གསུངས། དེ་ཇི་ལྟར་ཉམས་སུ་ལེན་ཚུལ་ནི། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །ཞེས་པས་ཆུ་དང་ཅོད་པན་གྱི་དབང་ཙམ་བསྐུར་བས་རྒྱུད་སྣོད་རུང་དུ་བསྒྲུབས་ནས། དཀའ་ཐུབ་དང་གཙང་སྦྲའི་སྤྱོད་པ་ལ་གནས་པས། མདུན་བསྐྱེད་ཀྱི་ལྷ་སྤྱན་དྲངས་པ་ལ་མཆོད་ཅིང་། དམ་ཚིག་གི་ཕྱག་རྒྱས་བཏབ། བཟླས་པས་ཐུགས་རྒྱུད་བསྐུལ་བའི་བསྙེན་པ་རྣམས་ལྷ་དང་མི་དག་རྗེ་ཁོལ་གྱི་ཚུལ་དུ་བལྟས་ནས་དངོས་གྲུབ་ལེན་པ་སྟེ། རིག་པ་ཐམས་ཅད་ཀྱི་དངོས་གྲུབ་ལེན་པའི་རྒྱུད་ལས། རྗེ་དཔོན་རྒྱལ་པོའི་སྐུར་བལྟས་ལ། །རང་ཉིད་བྲན་གྱི་འདུ་ཤེས་ཀྱིས། །སྔགས་སྒྲུབ་དངོས་གྲུབ་སྙིང་པོ་ནི། །བླ་ན་མེད་པའི་མཆོག་ཏུ་བླང་། །ཞེས་གསུངས། འདིའི་རང་ལམ་གྱིས་དབང་པོ་རྣོ་བ་ན་མི་ཚེ་བདུན་ནམ། ཇི་ལྟར་འགྱངས་ནའང་བསྐལ་པ་ཆེན་པོ་བརྒྱད་ནས་བྱང་ཆུབ་ཐོབ་པར་བཞེད་པ་ཡིན་ནོ། །དེ་ཡང་བྱ་བའི་རྒྱུད་ལ་དབྱེ་ན་རིགས་དྲུག །དེ་ལ་གཙོ་བོའི་རིགས་གསུམ་ནི། དེ་བཞིན་གཤེགས་པའི་རིགས་དང་། པདྨའི་རིགས། རྡོ་རྗེའི་རིགས་སོ། །ཕལ་པའི་རིགས་གསུམ་ནི། ནོར་ཅན་གྱི་རིགས། ལྔས་རྩེན་ནམ་རྒྱས་པའི་རིགས། འཇིག་རྟེན་པའི་རིགས་རྣམས་ཏེ་དྲུག་ལས། དེ་བཞིན་རིགས་ཀྱི་སྐབས་ཡིན་ན། འདིར་དེ་བཞིན་གཤེགས་པའི་རིགས་ལ་བརྒྱད་དེ། རིགས་ཀྱི་གཙོ་བོ་དང་། རིགས་ཀྱི་བདག་པོའི་རིགས་ཀྱི་འཁོར་ལོས་བསྒྱུར་བ་དང་། རིགས་ཀྱི་ཡུམ་དང་། རིགས་ཀྱི་གཙུག་ཏོར་དང་། རིགས་ཀྱི་ཁྲོ་བོ་ཁྲོ་མོ་དང་། རིགས་ཀྱི་ཕོ་ཉ་མོ་དང་། རིགས་ཀྱི་སེམས་དཔའ་དང་། རིགས་ཀྱི་འཇིག་རྟེན་དང་བརྒྱད་ལས། འདིར་རིགས་ཀྱི་གཙོ་བོའི་རྒྱུད་ཐུབ་པ་དམ་ཚིག་གསུམ་བཀོད་དང་། རིགས་ཀྱི་བདག་པོའི་རྒྱུད་འཇམ་དཔལ་དབྱངས་འདི་ཞེས་བྱའི་རིག་གཏད་དམ། རྗེས་གནང་ངམ། དཀྱིལ་འཁོར་དུ་འཇུག་ཅིང་དབང་བསྐུར་བ་སྒྲུབ་པར་བྱེད་པ་སྐབས་སུ་བབ་པ་ཡིན། དེ་ཡང་རྡོ་རྗེ་སློབ་དཔོན་གྱི་བགྱི་འོས་རྣམས་ཆད་ལྷག་མེད་པ་སྔོན་དུ་སོང་གྲུབ་པས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ། བླ་མ་དང་ལྷག་པའི་ལྷ་དབྱེར་མ་མཆིས་པའི་དྲུང་དུ་རིག་གཏད་དམ། རྗེས་གནང་ངམ། དཀྱིལ་འཁོར་དུ་འཇུག་པའམ། དབང་། ཞུ་བའི་ཡོན་དུ་མཎྜལ་ཕུལ་མཛོད། ཅེས་པའི་སྒྱུར་ཚུལ་རྣམས་འོག་མ་རྣམས་ལའང་འགྲེ་ཤེས་པར་བྱའོ། ༈ །ཡང་བྱ་རྒྱུད་པད་རིགས་ལ་མཚོན་ན། འདིར་པདྨོའི་རིགས་ལ་ལྔ་ཏེ། རིགས་ཀྱི་གཙོ་བོ་དང་། རིགས་ཀྱི་བདག་པོ་དང་། རིགས་ཀྱི་ཡུམ་དང་། རིགས་ཀྱི་ཁྲོ་བོ་དང་ཁྲོ་མོ་དང་། རིགས་ཀྱི་བཀའ་ཉན་ཕོ་མོ་དང་ལྔ་ལས། འདིར་རིགས་ཀྱི་གཙོ་བོའི་རྒྱུད་ཚེ་དང་ཡེ་ཤེས་དཔག་ཏུ་མེད་པའམ། རིགས་ཀྱི་བདག་པོའི་རྒྱུད་འཕགས་པ་སྤྱན་རས་གཟིགས་འདི། ཞེས་བྱ་བའི་རིག་གཏད་དམ། རྗེས་གནང་སོགས་སྔར་བཞིན་ནོ། ༈ །ཡང་རྡོ་རྗེའི་རིགས་ལ་མཚོན་ན། འདིར་རྡོ་རྗེའི་རིགས་ལ་ལྔ་སྟེ། རིགས་ཀྱི་གཙོ་བོ་དང་། རིགས་ཀྱི་བདག་པོ་དང་། རིགས་ཀྱི་ཡུམ་དང་། རིགས་ཀྱི་ཁྲོ་བོ་དང་ཁྲོ་མོ་དང་། རིགས་ཀྱི་ཕོ་ཉ་ཕྱག་བརྙན་དང་ལྔ་ལས། འདིར་རིགས་ཀྱི་གཙོ་བོའི་རྒྱུད་མི་འཁྲུགས་པའམ། རིགས་ཀྱི་བདག་པོའི་རྒྱུད་ཕྱག་ན་རྡོ་རྗེའམ། རྡོ་རྗེ་རྣམ་པར་འཇོམས་པ་འདི། ཞེས་བྱ་བའི་རིག་གཏད་དམ་སོགས་སྔར་ལྟར་རོ། །དེ་ཙམ་གྱིས་མཚོན་པར་བྱས་ནས་བྱ་རྒྱུད་ཀྱི་རིགས་ལྷག་མ་རྣམས་ལའང་སྦྱར་ཤེས་པར་བྱའོ། <!TCC Tibetan character 4,47 undefined in unicode!> །ཡང་གཉིས་ཀའི་རྒྱུད་དམ་སྤྱོད་རྒྱུད་ཀྱི་དབང་རྗེས་གནང་ལྟ་བུ་ཡིན་ན། འདིར་སྐབས་སུ་བབ་པ་ནི་ཞེས་པའི་མཇུག་ཏུ། ཨུ་པ་ཡ་ཞེས་པའི་སྒྲ་ལས་དྲངས་ན་གཉིས་ཀའི་སྤྱོད་པའི་རྒྱུད་དེ། རང་ཤར་ལས། ལྟ་བ་ཡོ་གར་ལྟ་བ་ལ། །སྤྱོད་པ་ཀྲི་ཡར་སྤྱོད་པ་འོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་དང་། རྣམ་སྣང་མངོན་བྱང་གི་དོན་བསྡུས་ལས། རྒྱུད་འདི་ནི་ལུས་ངག་གི་བྱ་བ་དང་། ཏིང་ངེ་འཛིན་གཉིས་ཀ་སྤྱོད་པས་སྤྱོད་པའི་རྒྱུད་དོ། །ཞེས་གསུངས་ཤིང་ངོ་བོ་ནི། ལྟ་སྒོམ་ཡོ་ག་དང་སྤྱོད་པ་བྱ་བ་དང་ཆ་འདྲར་སྤྱོད་པས་དངོས་གྲུབ་སྒྲུབ་པའི་ཐབས་སུ་གྱུར་པ་སྟེ། ལྟ་ཕྲེང་ལས། གཉིས་ཀ་ལ་བརྟེན་པ་ལས་གྲུབ་པའོ། །ཞེས་གསུངས། དེ་ཇི་ལྟར་ཉམས་སུ་ལེན་པའི་ཚུལ་ནི། ཡེ་ཤེས་ཐིག་ལེ་ལས། རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་དུ་རབ་ཏུ་གསལ། །ཞེས་ཆུ་ཅོད་པན་གྱི་སྟེང་དུ། ཕྱག་མཚན་རྡོར་དྲིལ་དང། མིང་དབང་རྣམས་བསྐུར་བས་སྣོད་རུང་དུ་བྱས་ནས་སྤྱོད་པ་ཕལ་ཆེར་བྱ་བ་དང་འདྲ་བ་ལས། ལྟ་སྒོམ་ཡོ་ག་དང་མཐུན་པས་ཉམས་ལེན་གྱི་ཚེ་ཡང་། བདག་དམ་ཚིག་པ་དང་ལྷ་ཡེ་ཤེས་པ་སྤུན་ནམ་གྲོགས་པོའི་ཚུལ་དུ་བཟང་ངན་མེད་པར་བལྟས་ཏེ། མཆོད་བསྟོད་བཟླས་པ་ལ་སོགས་པའི་སྒོ་ནས་དངོས་གྲུབ་ལེན་པ་ཡིན་ནོ། །དེ་ལྟར་ཡང་ལྟ་རིམ་ལས། གཉིས་ཀའི་རྒྱུད་ཀྱི་འདོད་པ་ནི། །ལྟ་སྤྱོད་གོང་འོག་རྗེས་སུ་མཐུན། །ཞེས་གསུངས་ཤིང་། དེ་ཡང་སྒོམ་པ་ཡོ་ག་དང་རྗེས་སུ་མཐུན་རྒྱུ་ནི། ཡོ་ག་དམ་ཡེ་གཉིས་ཕན་ཚུན་གྲོགས་པོར་ལྟ་བ་སྤྱོད་རྒྱུད་དང་ཐུན་མོང་པ་དང་། ཐུན་མིན་དམ་ཡེ་གཉིས་མེད་དུ་བྱེད་པ་གཉིས་ལས། འདིར་དང་པོ་སྟེ། རང་ཤར་ལས། ལྷ་དང་རྣལ་འབྱོར་བདག་ཉིད་ཀྱང་། །སྤུན་དང་གྲོགས་པོའི་ཚུལ་དུ་འདོད། །ཅེས་ཡོ་གའི་འདོད་གཞུང་འཆད་པའི་ཚེ་གསུངས་པ་ལྟར་རོ། །དེ་ལྟར་འབད་པས་དབང་པོ་ཡང་རབ་མི་ཚེ་ལྔའམ། འགྱངས་ནའང་བསྐལ་པ་གཅིག་གམ་གསུམ་གྱིས་རང་འབྲས་ཐོབ་པར་བཞེད་པ་ཡིན། དེ་ཡང་སྤྱོད་པའི་རྒྱུད་ལ་དབྱེ་ན། སྐུ་གསུང་ཐུགས་ཀྱི་རིགས་གསུམ་ལས། འདིར་སྐུའི་རིགས་རྣམ་པར་སྣང་མཛད་མངོན་པར་བྱང་ཆུབ་པ། འཕགས་པ་མི་གཡོ་བ་འདི་ཞེས་བྱ་བའི་རྗེས་གནང་ངམ། ཞེས་སོགས་དང་། ཐུགས་ཀྱི་རིགས་ཕྱག་ན་རྡོ་རྗེ་འདི་ཞེས་བྱ་བའི་སོགས་འགྲེའོ། <!TCC Tibetan character 4,47 undefined in unicode!> །ཡང་རྣལ་འབྱོར་གྱི་རྒྱུད་ཀྱི་དབང་ལྟ་བུ་ཡིན་ན། འདིར་སྐབས་སུ་བབ་པ་ནི། ཞེས་པའི་རྗེས་སུ་ནི། ཡོ་ག་ཞེས་པའི་སྒྲ་ལས་དྲངས་ན། ནང་གི་རྣལ་འབྱོར་གཙོ་བོར་བྱེད་པའི་སྒོ་ནས་སྟོན་པས་ན་རྣལ་འབྱོར་རྒྱུད་ཅེས་བྱ་སྟེ། དེ་ཁོ་ན་ཉིད་སྣང་བའི་དོན་བསྡུས་ལས། རྒྱུད་འདི་ནི་ཏིང་ངེ་འཛིན་གཙོ་བོར་སྟོན་པས་རྣལ་འབྱོར་གྱི་རྒྱུད་དོ། །ཞེས་གསུངས་ཤིང་། ངོ་བོ་ནི། དོན་དམ་མཚན་མ་མེད་པའི་ཆོས་ཉིད་ཀྱི་བྱིན་རླབས་ཀུན་རྫོབ་ལྷར་བརྟགས་ཏེ། རྟོགས་པ་བཟང་ངན་བླང་དོར་གྱི་རྩོལ་བས་འབྲས་བུ་བསྒྲུབ་པ་སྟེ། སངས་རྒྱས་གསང་བའི་ལམ་རིམ་ལས། ལྷུན་གྲུབ་མཉམ་པ་མ་མཐོང་བས། །ཆོས་ཀུན་རྣམ་དག་ཡེ་ཤེས་ཀྱིས། །བྱིན་རླབས་རྡོ་རྗེ་དབྱིངས་སྤྲུལ་པ། །བླང་དོར་བྱེད་པ་རྣལ་འབྱོར་རོ། །ཞེས་གསུངས། དེ་ཇི་ལྟར་ཉམས་སུ་ལེན་ཚུལ་ནི། ཡེ་ཤེས་ཐིག་ལེ་ལས། ཕྱིར་མི་ལྡོག་པ་བུམ་པའི་དབང་། །རྣལ་འབྱོར་རྒྱུད་དུ་གསལ་བར་བྱས། །དེ་ནི་དྲུག་པའི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། ཞེས་ཆུ་ཅོད་པན། རྡོར་དྲིལ། མིང་དབང་། བརྟུལ་ཞུགས། རྡོ་རྗེ་སློབ་དཔོན་གྱི་དབང་། རྗེས་གནང་སོགས་མཐའ་རྟེན་དང་བཅས་པ་བསྐུར་བས་སྣོད་རུང་དུ་བྱས་ནས། བདག་བསྐྱེད་དཀྱིལ་འཁོར་གྱི་འཁོར་ལོ་ཕྱག་རྒྱ་བཞིས་རྒྱས་བཏབ་ནས་བསྒོམ་ཞིང་། ཐུན་མཐར་ཕྱག་རྒྱ་བཀྲོལ་ནས་གཤེགས་སུ་གསོལ། དེ་ཡང་མངོན་བྱང་ལྔ་དང་ཆོ་འཕྲུལ་བཞིའི་སྒོ་ནས་ལྷའི་རྣལ་འབྱོར་ཕྱག་རྒྱ་བཞི་ལྡན་དུ་བསྒོམ་ཞིང་། ཡོ་ག་ཁྱད་པར་བ་ལ་སྤྱོད་རྒྱུད་དང་ཐུན་མོང་མ་ཡིན་པའི་དམ་ཡེ་གཉིས་མེད་དུ་བྱས་ནས་དངོས་གྲུབ་ལེན་པ་སྟེ། རྡོ་རྗེ་འབྱུང་བ་ལས། གཉིས་སུ་མེད་པའི་ཆོས་ཉིད་ངང་། །བླ་མེད་དངོས་གྲུབ་དམ་པ་བླང་། །ཞེས་གསུངས། དེ་ལྟར་འབད་པས་ཚེ་ལོ་བརྒྱ་པའི་མིའི་སྐྱེ་བ་གསུམ་མམ། ཐ་ནའང་བཅུ་དྲུག་གི་ཡུན་ཚོད་ཙམ་ལ་དབང་པོ་རྣོ་ཤོས་ཀྱིས་ཕྱག་རྒྱ་ཆེན་པོའི་དངོས་གྲུབ་འགྲུབ་ཅིང་། དེའི་ཡུན་ཚད་ཉིས་འགྱུར་གྱིས་ས་བཅུ་པ་ལ་སྦྱོར་བ་ཡིན་གསུངས། དེ་ཡང་ཡོ་གའི་རྒྱུད་ལ་དབྱེ་ན། རྩ་རྒྱུད་དེ་ཉིད་འདུས་པ། བཤད་རྒྱུད་རྩེ་མོ་དང་དཔལ་མཆོག །ཆ་མཐུན་གྱི་རྒྱུད་ངན་སོང་སྦྱོང་བ་སོགས་དང་། ཐབས་ཤེས་ཀྱི་སྒོ་ནས་ཕྱེ་ན། ཕ་རྒྱུད་དེ་ཉིད་འདུས་པ་དང་རྩེ་མོ་སོགས། མ་རྒྱུད་དཔལ་མཆོག་དང་པོ་དང་རྡོ་རྗེ་སྙིང་རྒྱན་སོགས་ཡོད་པ་ལས། རྡོ་རྗེ་དབྱིངས་ཀྱི་དཀྱིལ་འཁོར་དུ་འཇུག་ཅིང་དབང་བསྐུར་བ་སོགས། ཞེས་སམ། ཆ་མཐུན་གྱི་རྒྱུད་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཀུན་རིག་རྣམ་པར་སྣང་མཛད་ཀྱི་དཀྱིལ་འཁོར་དུ། ཞེས་སམ། ངན་སོང་སྦྱོང་བ་གཟི་བརྗིད་ཀྱི་རྒྱལ་པོ་བརྟག་པ་ཕྱོགས་གཅིག་པ་ལས་བྱུང་བ་གཙུག་དགུའི་དཀྱིལ་འཁོར་དུ། ཞེས་སོགས་འགྲེའོ། <!TCC Tibetan character 4,47 undefined in unicode!> །ཡང་རྣལ་འབྱོར་བླ་མེད་ཀྱི་སྐབས་ཡིན་ན། འདིར་སྐབས་སུ་བབ་པ་ནི། ཞེས་པའི་རྗེས་སུ། མ་ཧཱ་ཡོ་ག་ཞེས་པའི་སྒྲ་ལས་དྲངས་ན་རྣལ་འབྱོར་ཆེན་པོ་སྟེ། གཉིས་མེད་ཀྱི་དོན་ལ་བློ་འབྱོངས་པས། ཡོ་ག་ཕྱི་པ་ལས་ཆེས་ཁྱད་པར་དུ་འཕགས་པའི་ཕྱིར་རོ། །ངོ་བོ་ནི། བསྐྱེད་རྫོགས་ཟུང་འཇུག་གི་སྒོ་ནས་འཁོར་འདས་མཉམ་ཉིད་ཀྱི་དོན་ལ་རྟོགས་གོམས་ཀྱི་སྦྱོར་བས་གྲོལ་བ་ཐོབ་པའི་རང་བཞིན་ནོ། །འདི་ནི་ཐེག་པ་འོག་མ་རྣམས་ཀུན་རྫོབ་རྫས་ཡོད་དང་བཏགས་ཡོད་དུ་བཟུང་ནས་བཟང་ངན་བླང་དོར་དུ་ལྟ་བ་ལས་འཕགས་ཏེ། འདིར་ཆོས་རྣམས་ལ་མི་གཉིས་ཀྱི་བསམ་སྤྱོད་དང་ལྡན་པས། འབྲས་བུའི་ངོ་བོ་སྣང་སྟོང་ཟུང་འཇུག་གི་ཆོས་སྐུར་རྟོགས་པར་བྱས་ནས། དེ་དང་རྗེས་སུ་མཐུན་པའི་ཏིང་ངེ་འཛིན་གྱིས་གོམས་པར་བྱེད་པའི་ཕྱིར་ཏེ། སློབ་དཔོན་སངས་རྒྱས་གསང་བས། ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས། དེ་ཇི་ལྟར་ཉམས་སུ་ལེན་པའི་ཁྱད་པར་ཡང་། ཡེ་ཤེས་ཐིག་ལེ་ལས། རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་དང་། སྒྱུ་འཕྲུལ་རྩ་རྒྱུད་ཀྱི་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་བུམ་དབང་གི་སྟེང་དུ། ཐུན་མོང་མ་ཡིན་པ་མཆོག་དབང་གོང་མ་གསུམ་བསྣན་ནས་བཞི་བསྐུར་བས་སྣོད་རུང་དུ་བྱས་ནས། ལམ་བསྐྱེད་རིམ་མ་དག་པའི་སྣང་བ་དབྱིངས་སུ་སྦྱོང་བའི་དཀྱིལ་འཁོར་གྱི་འཁོར་ལོ་བསྒོམ་ཞིང་། དབང་དང་བསྐྱེད་རིམ་གཉིས་ཀ་ལ་ཡང་འབྲས་བུའི་བཞུགས་ཚུལ་དང་རྣམ་པ་མཐུན་པའི་ལམ་དུ་བྱེད་ཚུལ་དང་། མར་འཁོར་བ་དང་རྣམ་པ་མཐུན་པའི་དྲི་མ་སྦྱོང་ཚུལ་ཏེ། སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་རྣམས་ཞིབ་མོར་སྦྱོར། ཐུན་མཚམས་སུ་ཡང་སྣང་བ་ཐམས་ཅད་ལྷ་དང་ལྷ་མོར་བསྒོམ། རྫོགས་རིམ་རྡོ་རྗེའི་ལུས་ལ་གནད་དུ་བསྣུན་པའི་ཐབས་ཀྱིས། སེམས་དང་ཡིད་དང་། རླུང་རྣམས་དབུ་མར་ཐིམ་པས་མངོན་དུ་གྱུར་པའི་བདེ་སྟོང་ཟུང་འཇུག་འགྲུབ། སྤྱོད་པ་རྣམ་པ་གསུམ་གྱི་ཉེ་རྒྱུས་འབྲས་བུ་ལ་སྦྱོར་བར་བཞེད། དེ་ཡང་བསམ་པའི་སྟོབས་ཆེ་བ་གཅིག་གིས་འབད་པས་བསྒོམས་ན། ཚེ་ལོ་བརྒྱ་པའི་ཚེ་གང་གཅིག་གི་ཡུན་ལ་ལམ་གཞན་ལ་མ་ལྟོས་པར་འཚང་རྒྱ་ནུས་པར་གསུངས། དེ་ལྟ་བུའི་རྣལ་འབྱོར་བླ་ན་མེད་པ་ལ་དབྱེ་ན། གངས་ཅན་ལྗོངས་འདིར་གསང་སྔགས་གསར་རྙིང་ལུགས་སྲོལ་གཉིས་བྱུང་། དེ་གཉིས་ཀྱི་ཁྱད་པར་ནི། ལོ་ཙཱ་བ་རིན་ཆེན་བཟང་པོ་མ་བྱོན་གོང་དུ་འགྱུར་བའི་མདོ་རྒྱུད་རྣམས་སྔ་འགྱུར་དང་། དེ་ཕྱིན་འགྱུར་བ་རྣམས་གསར་མ་ཡིན་ཞེས་བཞེད་དེ། གཙོ་ཆེའི་དབང་དུ་བྱས་ནས་གསུངས་པ་ཡིན། ཞེས་འགྲེས་བསླངས་ནས། <!TCC Tibetan character 4,47 undefined in unicode!> གསར་མའི་སྐབས་ཡིན་ན། དེ་ལྟར་གསར་རྙིང་གཉིས་ལས། འདིར་གསར་མ། དེའང་རྡོ་རྗེ་གུར་ལས། སྐྱེས་པ་རྣམས་ནི་གདུལ་བྱའི་ཕྱིར། །རྣལ་འབྱོར་ཕ་ཡི་རྒྱུད་བསྟན་ཅིང་། །བཙུན་མོ་རྣམས་ནི་དགའ་བྱའི་ཕྱིར། །ཕྱིས་ནས་རྣལ་འབྱོར་མ་རྒྱུད་གསུངས། །ཞེས་དང་། འཇམ་དཔལ་སྒྱུ་དྲྭ་ལས། གཉིས་མེད་གཉིས་སུ་མེད་པར་སྟོན། །ཞེས་པས་གསུམ་སྟེ། ཐབས་ཕ་ཡི་རྒྱུད། ཤེས་རབ་མའི་རྒྱུད། གཉིས་སུ་མེད་པ་སྙིང་པོ་དོན་གྱི་རྒྱུད་དང་གསུམ། དེ་རྣམས་ཀྱི་ཁྱད་པར་ནི། དཀྱིལ་འཁོར་གང་དུ་ལྷ་ཕོའི་རྣམ་པ་མང་ཞིང་དར་རས་རིན་པོ་ཆེའི་རྒྱན་ཅན་སོགས་ཡབ་ཀྱི་ལྷ་སྔགས་ཆོ་ག་ཉིད་རྩལ་འདོན་དུ་བྱུང་ན་ཕ་རྒྱུད། གང་དུ་ལྷ་མོའི་རྣམ་པ་མང་ཞིང་གཅེར་བུར་རུས་པའི་རྒྱན་ཅན་སོགས་དང་ཡུམ་གྱི་ལྷ་སྔགས་ཆོ་ག་སོགས་རྩལ་འདོན་དུ་བྱུང་ན་མ་རྒྱུད། ཡང་ཐབས་ཀྱི་དེ་ཁོ་ན་ཉིད་རྒྱ་ཆེ་བར་སྟོན་པ་ཕ་རྒྱུད། ཤེས་རབ་ཀྱི་དེ་ཁོ་ན་ཉིད་ཟབ་པར་སྟོན་པ་མ་རྒྱུད། དེ་དག་ཆ་མཉམ་པར་སྟོན་ན་གཉིས་མེད་དོ། །ཞེས་གསུངས་ཀྱང་གཙོ་བོར་ནི་བླ་མེད་ཀྱི་ཐུན་མོང་མ་ཡིན་པ་མཆོག་དབང་གོང་མ་གསུམ་གྱི་ཉམས་ལེན་གང་རྩལ་དུ་བཏོན་ནས་ཉམས་སུ་ལེན་པས་བཞག་པ་ཉིད་ལེགས་པར་སྣང་སྟེ། དེས་ན་གོང་དུ་གསང་དབང་གི་ལམ་སྟེང་སྒོ་རླུང་གི་རྣལ་འབྱོར་གཙོ་བོར་སྟོན་པ་ཕ་རྒྱུད། གང་དུ་ཤེས་རབ་ཡེ་ཤེས་ཀྱི་ལམ་འོག་སྒོ་ལས་རྒྱའི་རྣལ་འབྱོར་གཙོ་བོར་སྟོན་པ་མ་རྒྱུད། གང་དུ་དབང་བཞི་པའི་ལམ་ཕྱག་རྫོགས་ཀྱི་རྣལ་འབྱོར་གཙོ་བོར་སྟོན་པ་གཉིས་མེད་ཀྱི་རྒྱུད་དོ། །དེ་གསུམ་གྱི་མཚན་གཞི་ཡང་། ཕ་རྒྱུད་གསང་འདུས་དང་དམར་ནག་འཇིགས་གསུམ་སོགས། མ་རྒྱུད་མཉམ་སྦྱོར། བདེ་མཆོག །མ་ཧཱ་མཱ་ཡཱ་སོགས། གཉིས་མེད་ཀྱི་རྒྱུད་དུས་ཀྱི་འཁོར་ལོ་ལ་སོགས་པའོ། །བདག་ཉིད་ཆེན་པོ་ས་སྐྱ་པ་ནི་ཀྱཻ་རྡོར་གྱི་རྒྱུད་ཀྱང་གཉིས་མེད་ཀྱི་རྒྱུད་དུ་འཛིན་ཅིང་། བཅོམ་ལྡན་རལ་གྲིས་ནི། གུར་ནས་མ་རྒྱུད་བཅུ་བཞིའི་ནང་དུ་དྲངས་པ་དང་། རྣལ་འབྱོར་མ་རྒྱུད་ཀྱེ་རྡོ་རྗེ། །ཞེས་སོགས་ཀྱིས་གནོད་པས་མ་རྒྱུད་དུ་འཐད་ཅེས་གསུངས་པའང་སྣང་། <!TCC Tibetan character 4,47 undefined in unicode!> ཕ་རྒྱུད་འདུས་པ་ལྟ་བུ་ལ་དཔེར་མཚོན་ན། དེ་ལས་འདིར་སྒྲོན་མ་གསལ་བར། ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་བཞི་སྟོང་གང་གསུངས་པ། །དཔལ་ལྡན་འདུས་འདི་སྣོད་ཡིན་ཏེ། །དེ་བས་འདི་ནི་རྒྱུད་ཀུན་རྩེ། །ཞེས་མདོ་སྡེ་དང་རྒྱུད་ཐམས་ཅད་ཀྱི་སྣོད་དང་རྩ་བར་གསུངས་པ་དཔལ་གསང་བ་འདུས་པའི་དཀྱིལ་འཁོར་དུ་ཞེས་པ་ལྟ་བུའི་སོ་སོའི་ཆེ་བ་རེ་བརྗོད་ནས། འདི་དང་འདི་ཞེས་བྱ་བའི་དཀྱིལ་འཁོར་དུ་ཞེས། ཕ་རྒྱུད། མ་རྒྱུད། གཉིས་མེད་ཀྱི་རྒྱུད་ཐམས་ཅད་ལ་རིགས་འགྲེ་ཤེས་པར་བྱ་ཞིང་། དེ་དག་ལ་ལྷག་གནས་དང་། འཇུག་པ་སོགས་སྐབས་ཐོབ་ཕྱེད་པར་བྱ། ཡང་དབང་བཞིའི་དོན་ཚང་ཡང་དབང་གི་ཆོ་ག་དངོས་མ་ཡིན་ཞིང་། ཆོ་གའི་རིམ་པ་ཤིན་ཏུ་ཟོར་ཡང་བ་རྣམས་བྱིན་རླབས་ཞེས་གྲགས་པ་ལྟར། བྱིན་རླབས་དང་། སྐུ་གསུང་ཐུགས་ཀྱི་རྗེས་སུ་གནང་བ་སོགས་སྐབས་བབ་ཀྱིས་བསྒྱུར་བའི་འཕྲུལ་ཤེས་པར་བྱའོ། <!TCC Tibetan character 4,47 undefined in unicode!> །ཡང་གསང་སྔགས་རྙིང་མའི་སྐབས་ཡིན་ན། གཙོ་ཆེའི་དབང་དུ་བྱས་ནས་གསུངས་པ་ཡིན། ཞེས་པའི་རྗེས་སུ། དེ་ལྟར་གསར་རྙིང་གཉིས་ལས། འདིར་གསར་མ་ལས་ཁྱད་པར་དུ་གྱུར་པ་གསང་སྔགས་རྙིང་མ་ཡིན། དེ་ཡང་གང་གིས་ཁྱད་པར་དུ་གྱུར་ཅེ་ན། ལོ་ཙཱ་བ་ཆེན་པོ་རོང་ཟོམ་ཆོས་ཀྱི་བཟང་པོའི་ཞལ་སྔ་ནས། གསང་སྔགས་རྙིང་མ་པ་རྣམས་ལ་གསར་མ་ལས་ཁྱད་པར་དུ་འཕགས་པའི་ཆེ་བ་དྲུག་ཡོད། ཅེས་གསུངས་པ་ལྟར། དང་པོ་སྤྱན་འདྲེན་ཡོན་བདག་གི་ཆེ་བ་ནི། སྔ་འགྱུར་གྱི་ཡོན་བདག་འཕགས་པ་རིགས་གསུམ་མགོན་པོ་རྣམ་པ་རྒྱལ་པོའི་ཚུལ་བཟུང་ནས་མངའ་བདག་མེས་དབོན་རྣམ་གསུམ་ཡིན་པས་ཕྱི་འགྱུར་བ་རྣམས་ཀྱི་ཡོན་བདག་དང་མི་འདྲ། གཉིས་པ་གང་དུ་བསྒྱུར་ཞིང་གཏན་ལ་ཕབ་པའི་གནས་ནི། སྔོན་སྤྲུལ་པའི་གཙུག་ལག་ཁང་བསམ་ཡས་སོགས་ཆོས་འཁོར་སྟོད་སྨད་དུ་ཡིན་པས། ད་ལྟའི་དགོན་ཕག་ཕུག་ཏུ་བསྒྱུར་བ་དང་མི་འདྲ། གསུམ་པ་སྒྱུར་བྱེད་ལོ་ཙཱའི་ཁྱད་པར་ནི། སྔོན་གྱི་ལོ་ཙཱ་བ་སྒྲ་བསྒྱུར་བཻ་རོ་ཙ་ན་དང་སྐ་ཅོག་ཞང་གསུམ། རྨ་གཉགས་སོགས་སྤྲུལ་པའི་ལོ་ཙཱ་བ་རྣམས་ཀྱིས་བསྒྱུར་བའི་ཆོས་ཡིན། ད་ལྟའི་ལོ་ཙཱ་བ་དབྱར་མང་ཡུལ་དུ་བསྡད། དགུན་རྒྱ་བལ་ཡུལ་དུ་ཡུག་རེ་ཕྱིན་ནས་བསྒྱུར་བ་དང་མི་འདྲ། བཞི་པ་པཎྜི་ཏའི་ཁྱད་པར་ནི། སྔོན་གྱི་པཎྜི་ཏ་མཁན་པོ་ཞི་བ་འཚོ་དང་། སངས་རྒྱས་གསང་བ་དང། སློབ་དཔོན་ཆེན་པོ་པདྨ་འབྱུང་གནས་དང་། པཎ་ཆེན་བི་མ་ལ་མི་ཏྲ་སོགས་སངས་རྒྱས་དང་། ས་ཆེན་པོ་ལ་བཞུགས་པའི་བྱང་འཕགས་རྣམས་ཀྱི་ཆོས་ཡིན། ད་ལྟའི་གསེར་འཚོལ་དུ་འཁྱམས་པའི་པཎྜི་ཏ་དང་མི་འདྲ། ལྔ་པ་ཞུ་རྟེན་མེ་ཏོག་གི་ཁྱད་པར་ནི། སྔོན་གསེར་ཤ་བའི་རླིད་བུ་བཀང་བ་དང་། བྲེ་ལ་གཞལ་ནས་ཕུལ་ཏེ་ཞུས་པའི་ཆོས་ཡིན། ད་ལྟ་མཆན་ནས་གསེར་ཞོ་རེ་རེ་གཉིས་གཉིས་བཏོན་ནས་ཞུས་པ་དང་མི་འདྲ། དྲུག་པ་ཆོས་ཀྱི་ཁྱད་པར་ནི། སྔོན་འཕགས་ཡུལ་དུ་སངས་རྒྱས་ཀྱི་བསྟན་པ་གྲྭ་མ་ཉམས་པའི་དུས་སུ་བསྒྱུར་བ་མ་ཟད། འཕགས་ཡུལ་ན་མེད་པའི་རྒྱུད་དབང་ཐོབ་པའི་བྱང་ཆུབ་སེམས་དཔའ་དང་། གྲུབ་པ་དང་། རིག་པ་འཛིན་པ་དང་། མཁའ་འགྲོ་མ་རྣམས་ཀྱིས་བཟུང་སྟེ་དག་པའི་ཞིང་ན་བཞུགས་པ་དང་། ཛམྦུའི་གླིང་གི་ཆ་ཤས་སིངྒ་ལ་དང་། ནུབ་ཕྱོགས་ཨོ་རྒྱན་གྱི་ཡུལ་སོགས་ནས་སློབ་དཔོན་ཆེན་པོ་པདྨ་དང་བི་མ་ལ་སོགས་ཀྱིས་རྫུ་འཕྲུལ་གྱི་བཀོད་པས་བླངས་ནས་བསྒྱུར་བས་རྒྱ་གར་དུ་པཎ་གྲུབ་ཡོངས་ལ་མ་གྲགས་པ་མང་པོ་ཞིག་ཀྱང་བོད་ཀྱི་བསོད་ནམས་ཀྱི་སྐལ་པར་བྱོན། འགྱུར་ཀྱང་སྔོན་གྱི་ལོ་ཙཱ་རྣམས་སྤྲུལ་པའི་སྐུ་ཡིན་པས་དོན་ཇི་ལྟ་བ་བཞིན་དུ་གཏན་ལ་ཕེབས་པས་གོ་སླ་དབྱིངས་འཇལ་བ་ལ་རླབས་ཆེ། ཕྱིས་ལོ་ཙཱ་བ་རྣམས་ཀྱིས་དོན་བསྒྱུར་མ་ནུས་པ་རྒྱ་དཔེའི་གོ་རིམ་ལྟར་སྒྲ་འགྱུར་བྱས་པས་ཚིག་བསྒྲིམས་པ་ལ་གོ་དཀའ། དབྱིངས་འཇལ་བ་ལ་རླབས་ཆུང་བ་ལྟར་སྣང་བས་མི་འདྲ་བ་ཡིན་ནོ། ཁྱད་པར་དེ་ལྡན་གྱི་གསང་སྔགས་རྙིང་མ་དེའང་། རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་སྟེ། བརྒྱུད་པའི་བཀའ་སྲོལ་གསུམ་དུ་གནས་ཤིང་། དེ་ཐམས་ཅད་ཀྱི་བརྗོད་བྱ་རྗོད་བྱེད་སྤྱིའི་ལུས་ཀྱིས་ཕྱེ་ན། རྒྱུད་སྡེ་དང་། སྒྲུབ་སྡེ་གཉིས་སུ་འདུས་པ་ལས། དེའི་དང་པོ་རྒྱུད་སྡེ་ལའང་གསུམ་སྟེ་རྒྱུད་མ་ཧཱ་ཡོ་ག །ལུང་ཨ་ནུ་ཡོ་ག །མན་ངག་ཨ་ཏི་ཡོ་གའོ། །དེ་གསུམ་གྱི་ཁྱད་པར་ལ། ལྷ་རྗེ་ཟུར་ཆུང་བའི་ཞལ་ནས། རིག་པའི་ཆོ་འཕྲུལ་དུ་སྣང་བ་མ་ཧཱ། རང་རིག་རྩལ་དུ་སྣང་བ་ཨ་ནུ། རིག་པ་རང་སྣང་ཨ་ཏིའོ། །ཞེས་གསུངས་པའི་དགོངས་པ་ནི། ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ཀྱི་ཆོ་འཕྲུལ་དུ་རྟོགས་པས། ཐབས་བསྐྱེད་པའི་རིམ་པ་དང་སྤྱོད་པ་ལ་གཙོ་བོར་བརྟེན་པ་རྒྱུད་མ་ཧཱ་ཡོ་ག །ཆོས་ཐམས་ཅད་སེམས་ཉིད་དབྱིངས་ཡེ་ཤེས་གཉིས་སུ་མེད་པའི་རྩལ་དུ་རྟོགས་པས། ཤེས་རབ་རྫོགས་པའི་རིམ་པ་དང་ཏིང་ངེ་འཛིན་ལ་གཙོ་བོར་བརྟེན་པ་ལུང་ཨ་ནུ་ཡོ་ག །ཆོས་ཐམས་ཅད་ཡེ་ནས་སྐྱེ་འགག་མེད་པའི་རང་བྱུང་གི་ཡེ་ཤེས་རང་སྣང་བར་རྟོགས་པས། ཡེ་ཐོག་ཏུ་གྲོལ་བར་བྱེད་པའི་ཐབས་སྤང་བླང་རེ་དོགས་དང་བྲལ་བ་སྟེ། ལྟ་བ་ལ་གཙོ་བོར་བརྟེན་པ་རྫོགས་པ་ཆེན་པོ་ཨ་ཏི་ཡོ་གའོ།། <!TCC Tibetan character 4,47 undefined in unicode!> སྒྱུ་འཕྲུལ་ཞི་ཁྲོ་ལ་མཚོན་ན། དེ་ལས་འདིར་རྒྱུད་མ་ཧཱ་ཡོ་ག །དེ་ལའང་བསྐྱེད་རིམ་ཐབས་ཀྱི་ཆ་དང་། རྫོགས་རིམ་རླུང་གཙོ་བོར་བྱེད་པའི་གསལ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པ་མ་ཧཱའི་མ་ཧཱ་སྟེ་ཕ་རྒྱུད་གསང་བ་འདུས་པ་ལ་སོགས་པ་དང་། བསྐྱེད་རིམ་གྱི་སྤྲོས་པ་ཤས་ཆུང་ཞིང་ཤེས་རབ་རྫོགས་པའི་རིམ་པ་ཁམས་བྱང་ཆུབ་ཀྱི་སེམས་ཐིག་ལེ་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཚུལ་དུ་ཉམས་སུ་ལེན་པ་མ་ཧཱའི་ཨ་ནུ་སྟེ་མ་རྒྱུད་སངས་རྒྱས་མཉམ་སྦྱོར་དང་དཔལ་ཡང་དག་ལ་སོགས་པ་དང་། བསྐྱེད་རྫོགས་ཟུང་དུ་འཇུག་ཅིང་། དེའང་རྫོགས་རིམ་རྩ་ཐིག་རླུང་གསུམ་ལས་སྐྱེས་པའི་བདེ་གསལ་རྣམ་པར་མི་རྟོག་པའི་ཡེ་ཤེས་དང་། ཁྱད་པར་འོད་གསལ་ཡེ་ཤེས་ཆེན་པོ་ལ་གཙོ་བོར་བྱེད་པའི་ཚུལ་གྱིས་ཉམས་སུ་ལེན་པ་མ་ཧཱའི་ཨ་ཏི་སྟེ་གཉིས་མེད་ཀྱི་རྒྱུད་སྒྱུ་འཕྲུལ་དྲྭ་བ་ལ་སོགས་པ་ལས། འདིར་སྔ་འགྱུར་བཀའ་མའི་སྲོལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞི་བའམ། ཁྲོ་བོའི། དཀྱིལ་འཁོར་དུ་དབང་བསྐུར་བ་སྐབས་སུ་བབ་པ་ཡིན། དེ་ལའང་ཐོག་མར་ངེས་ཤེས་འདྲེན་པ་བླ་མ་བརྒྱུད་པའི་ལོ་རྒྱུས་ཀྱི་དབང་དུ་བྱས་ན། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་གསུངས་པ་ལྟར་གསུམ་ལས། དང་པོ་ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་བདག་ཉིད་སྟོན་པ་རིགས་དྲུག་པ་བཅོམ་ལྡན་འདས་དཔལ་ཀུན་ཏུ་བཟང་པོས་འོག་མིན་ཆེན་པོའི་གནས་སུ། འཆད་པའི་སྐྱེས་བུ་དེ་བཞིན་གཤེགས་པ་ལྔ་ཡང་རྣམ་པར་སྣང་བར་མཛད་ནས། རྡོ་རྗེ་གསང་བ་ལ་སོགས་པ་རིག་པ་ཁྱད་པར་ཅན་གྱི་འཁོར་རྣམས་ལ་རྒྱུད་ཀྱི་རྒྱལ་པོ་ཉིད་དགོངས་བརྡའི་གསུང་གིས། དུས་རྟག་པ་རྒྱུན་གྱི་འཁོར་ལོར་སྟོན་པ་ནི་རྒྱལ་བ་དགོངས་བརྒྱུད་དོ། །རྒྱལ་སྲས་སེམས་དཔའི་འཁོར་གྱི་ནང་ནས་རིགས་གསུམ་མགོན་པོས་ལྷ་ཀླུ་གནོད་སྦྱིན་གྱི་གནས་སུ་བཤད་ནས་དར་བ་དང་། ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན། ལངྐའི་ཡུལ་ཏེ་སིང་ག་ལའི་གླིང་གི་རི་བོ་མ་ལ་ཡའམ་དེང་སང་སུ་མ་ན་ཀུ་ཊའི་རི་ཞེས་གྲགས་པའི་རྩེ་མོར་གསང་བདག་གིས། དམ་པའི་རིགས་ཅན་དྲྭ་མ་ལྔ་ལ་བཤད་པ་རྣམས་ནི་རིག་འཛིན་བརྡ་བརྒྱུད་དོ། །དེ་ནས་གང་ཟག་སྙན་བརྒྱུད་ནི། གསང་བདག་གིས་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་རླབས་ཀྱིས་ཟ་ཧོར་གྱི་རྒྱལ་པོ་ཛཿལ་རྨི་ལྟས་ངོ་མཚར་བ་བདུན་རྨིས་ཤིང་དེའི་རྗེས་ཐོགས་སུ་ཇི་སྐད་དུ། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛཿཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོས་སྣང་བར་འགྱུར། །ཞེས་ལུང་བསྟན་པ་ལྟར་རྒྱལ་པོ་ཉིད་ཀྱི་ཕོ་བྲང་གི་ཁང་ཐོག་ཏུ་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབས་ཤིང་། རྒྱལ་པོ་ཛཿནས་ཀུ་ཀུ་རཱ་ཛཿ ཨིནྡྲ་བྷཱུ་ཏི། སིཾ་ཧ་རཱ་ཛཿ ཨུ་པ་རཱ་ཛཿ སྲས་མོ་གོ་མ་དེ་བཱི་རྣམས་ལས་བརྒྱུད་དེ། ཐམས་ཅད་ཚོགས་ཀྱི་སྤྱོད་པའི་ཉེ་རྒྱུ་ལ་བརྟེན་ནས་རང་རང་གི་ཚོམ་བུ་དང་བཅས་པ་རྡོ་རྗེ་འཆང་ཆེན་པོའི་ས་ལ་མངོན་དུ་གཤེགས་པ་ཤ་སྟག་གོ །སྲས་མོས་སྒེག་པ་རྡོ་རྗེ་དང་སློབ་དཔོན་སངས་རྒྱས་གསང་བ། དེ་གཉིས་ཀས་པཎ་ཆེན་བི་མ་ལ་མི་ཏྲ། དེས་བོད་དུ་ལོ་ཙཱ་བ་རྨ་གཉགས་གཉིས། རྨ་རིན་ཆེན་མཆོག་ནས་མཁས་པ་གཙུག་གྱེར་རྣམ་གཉིས་ལས་ཞང་དང་། གཉགས་ལོ་ཡེ་ཤེས་གཞོན་ནུས་སོག་པོ་དཔལ་ཡེ་ལ་བརྒྱུད་དེ། ཞང་དང་སོག་པོས་གནུབས་ཆེན་སངས་རྒྱས་ཡེ་ཤེས་ལ་བསྐུར། དེ་ནས་གནུབས་ཡོན་ཏན་རྒྱ་མཚོ་ཡབ་སྲས་དང་། ཆོས་ལུང་གི་ཉང་ཁུ་དབོན་ནས་ལྷ་རྗེ་ཟུར་པོ་ཆེ་ཤཱཀྱ་འབྱུང་གནས། དེའི་སློབ་མ་རྩེ་མོ་བཞི་ལས་ལྟ་སྒོམ་གྱི་རྩེ་མོ་ཟུར་ཆུང་ཤེས་རབ་གྲགས། དེའི་སློབ་མ་ཀ་བཞི་དང་གླན་ཤཱཀ་བྱང་ལས་གསང་བདག་ཆེན་པོ་སྒྲོ་ཕུག་པ་ཤཱཀྱ་སེང་གེ་ནས་རིམ་པར་བརྒྱུད་དེ། ཁོ་བོ་ཅག་གི་བླ་མ་དམ་པ་བཀའ་དྲིན་མཉམ་མེད་འདི། ཞེས་བྱ་བས་བདག་རྒྱུད་དབང་གི་ཆུ་བོས་སྨིན་པར་མཛད་པ་ཡིན། བརྒྱུད་པ་དེ་ལས་བྱུང་བའི་ཆོས་དེ་ལའང་ལམ་གྱི་གཞི་སྨིན་བྱེད་དབང་གི་རིམ་པ་དང་། དེའི་ཉམས་ལེན་གྲོལ་བྱེད་བསྐྱེད་རྫོགས་ཀྱི་རིམ་པ་གཉིས་སུ་ཡོད་པས་འདིར་དབང་བསྐུར་བའི་རིམ་པ་དེ་སྐབས་སུ་བབ་པ་ཡིན། དེ་ནས་སྟ་གོན་གྱི་ཚེ། དེ་ལའང་ཇི་སྐད་དུ། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །ཞེས་པས་དབང་བསྐུར་བ་ཡང་དཀྱིལ་འཁོར་སྔོན་དུ་འགྲོ་བ་ཅན་ཡིན་པས། དཀྱིལ་འཁོར་ལ་ཡང་དབྱེ་ན། རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །བྱང་ཆུབ་སེམས་དང་ཚོགས་མཆོག་བསྟན། །ཞེས་བདུན་དུ་གསུངས་ཀྱང་གང་དུ་དབང་བསྐུར་བའི་དཀྱིལ་འཁོར་ནི་གང་ཟག་གི་རྒྱུད་ཚོད་དང་སྦྱར་ནས། རང་བཞིན་ཡེ་ཤེས་ཀྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་གཟུགས་བརྙན་ནས་སྤྲུལ་པའི་དཀྱིལ་འཁོར་དང་། རིག་པ་ཉམས་ཀྱི་དཀྱིལ་འཁོར་གསུམ་བཤད་པ་ནི་འཕགས་པ་རྣམས་ཀྱི་སྤྱོད་ཡུལ་ཡིན། ཏིང་ངེ་འཛིན་ལ་བརྟན་པ་རྗེས་མཐུན་ཙམ་ཐོབ་པ་ལ་སོགས་པའི་སློབ་དཔོན་གྱིས་ནི། གདུལ་བྱའི་དབྱེ་བས་སྐལ་དམན་འཇུག་པ་རྡུལ་ཚོན། འབྲིང་རས་བྲིས། རབ་ཚོམ་བུ། ཡང་རབ་བླ་མའི་ལུས་དཀྱིལ་ལ་བརྟེན་པའི་ཚུལ་བཞི་ལས། འདིར་ད་ལྟར་གྱི་བླ་མ་དམ་པ་རྣམས་ཀྱི་ཕྱག་བཞེས་སུ་རྡུལ་ཚོན་དང་རས་བྲིས་གང་རུང་ལ་བརྟེན་ནས་དབང་བསྐུར་བར་མཛད་པའི་ཚུལ་གཉིས་ལས། རྡུལ་ཚོན་ལྟར་ན། ནུབ་གཉིས་པ་སྟ་གོན། ཞེས་སམ། རས་བྲིས་ཡིན་ན། ནུབ་དང་པོ་སྟ་གོན་གྱི་ཆོ་ག་སྟེ། དེ་ཡང་ལྷ་དང་བུམ་པའི་སྟ་གོན་གྲུབ་ནས། ད་སློབ་མ་སྟ་གོན་གྱི་བྱ་བ་སྒྲུབ་པ་སྐབས་སུ་བབ་པ་ཡིན་པས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་ལྷག་གནས་ཀྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྗོད། དབང་དངོས་གཞིའི་ཚེ། འདིར་དབང་བསྐུར་བའི་རིམ་པ་དེ་སྐབས་སུ་བབ་པ་ཡིན། ཞེས་པའི་རྗེས་སུ། དེ་ལ་དབང་གི་ངོ་བོ་ནི། རྒྱུ་གཉིས་རྐྱེན་བཞི་ཚོགས་པ་ལ་བརྟེན་ནས་གོ་འཕང་གི་ཆོས་རྒྱུད་ལ་འཇོག་པའི་ལས་ཀྱིས། རྒྱུད་ཀྱི་དྲི་མ་བྱང་བའམ་ཉམས་སྨད་པར་བྱས་ཤིང་ཐར་པའི་མྱུ་གུ་མྱུར་དུ་སྐྱེས་པའམ། སྐྱེ་ངེས་ཀྱི་ས་བོན་ཁྱད་པར་ཅན་གསོས་ཐེབས་པས་ལམ་བསྒོམ་རུང་དང་འབྲས་བུ་ཐོབ་རུང་གི་ནུས་པ་མཐུ་ཅན་དུ་སྨིན་པར་བྱས་པ་སྟེ། ས་བོན་གསོས་ཐེབས་པའི་ཆ་སྟེ་སྔགས་ཀྱི་སྡོམ་པའང་ཡིན་ལ། དམ་ཚིག་ཀྱང་ཡིན་ནོ། །ངེས་ཚིག་ནི་ཨ་བྷི་ཥིཉྩའི་སྒྲ་ལས་དྲངས་ན། མངོན་པར་གཏོར་བས་ན་དབང་སྟེ། སྦྱང་བྱ་སྒོ་གསུམ་གྱི་དྲི་མ་གཏོར་ཞིང་འཁྲུད་པར་བྱེད་པའི་ཕྱིར། ཡང་མངོན་པར་བླུགས་པས་ན་དབང་སྟེ། ལམ་བསྒོམ་རུང་དང་འབྲས་བུ་ཐོབ་རུང་གི་ནུས་པ་ཁྱད་པར་ཅན་རྒྱུད་ལ་འཇོག་པའི་ཕྱིར་དེ་ལྟར་ཡང་། བརྟག་གཉིས་ལས། གཏོར་དང་བླུག་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས། དབྱེ་ན་དད་པ་ཅན་རྗེས་སུ་འཛིན་པ་ལ་ཕན་པའི་དབང་བཅུ། བརྩོན་འགྲུས་ཅན་རྗེས་སུ་འཛིན་པ་ལ་ནུས་པའི་དབང་ལྔ། བརྟུལ་ཞུགས་ཅན་རྗེས་སུ་འཛིན་པ་ལ་ཟབ་མོའི་དབང་གསུམ་གསུངས་ཏེ། རྩ་རྒྱུད་ཐར་ལོའི་འགྱུར་ལས། དད་དང་བརྩོན་འགྲུས་བརྟུལ་ཞུགས་ལ། །ཕན་དང་ནུས་པའི་དབང་བསྐུར་བྱ། །ཤེས་རབ་དབང་བསྐུར་རིམ་པ་བཅས། །བརྩེ་བས་ཆུད་མི་ཟ་བར་སྦྱིན། །ཞེས་གསུངས། དེ་ཡང་དབང་བསྐུར་བ་ནི་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དེ་ལའང་རྡོ་རྗེ་རྩེ་མོ་ལས། སེམས་ཅན་ཤིན་ཏུ་གདུལ་དཀའ་གང་། །སྡོམ་པར་འཛིན་པ་མི་མཛད་ཅིང་། །དད་དང་ལྡན་པ་མེད་པ་ཡང་། །འཇུག་པ་ཉིད་ནི་དགག་མི་བྱ། །ཞེས་པས་རེ་ཞིག་དབང་གི་སྣོད་དུ་མ་གྱུར་པའི་གང་ཟག་ཡིན་ནའང། དཀྱིལ་འཁོར་དུ་བཅུག་པ་ཙམ་ལ་འགལ་བ་མེད་པར་གསུངས་མོད། དཀྱིལ་འཁོར་དུ་མ་བཅུག་པ་ལ་དབང་བསྐུར་བ་ནི་ནམ་དུའང་མི་རུང་ཞིང་། ཇི་སྐད་དུ། དཀྱིལ་འཁོར་མ་མཐོང་བ་རྣམས་ཀྱི་མདུན་དུ་མ་སྨྲ་ཞིག་ཅེས་གསུངས་པའི་ཕྱིར། དེས་ན། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་གསུངས་པ་ལྟར་སྟ་གོན་དུ་གནས་པ་ཡན་ཆད་སོང་ནས། དངོས་གཞི་ལ། རྡོ་རྗེ་སློབ་དཔོན་གྱི་བྱ་བ་དང་། རྡོ་རྗེ་སློབ་མའི་བྱ་བ་གཉིས་ལས། སློབ་དཔོན་གྱིས་བགྱི་འོས་དཀྱིལ་འཁོར་བཞེངས་པ་སྒྲུབ་པ་མཆོད་པ། བདག་ཉིད་དཀྱིལ་འཁོར་དུ་རིག་པས་འཇུག་པ་རྣམས་ཆད་ལྷག་མེད་པར་སྔོན་དུ་གྲུབ། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ། ལྷ་དང་སྐལ་པ་མཉམ་པའི་ཆེད་དུ་དཀྱིལ་འཁོར་དུ་འཇུག་པའི་ཆོས་དང་། ཞུགས་ནས་དབང་ནོད་པའི་བྱ་བ་གཉིས་ལས། འདིར་འཇུག་པའི་ཡན་ལག་ཁྲུས་དང་བགེགས་བསལ་བ་སྔོན་དུ་སོང་ནས་ད་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ་བར་མཛོད། ཅེས་བརྗོད། <!TCC Tibetan character 4,47 undefined in unicode!> དེས་མཚོན་ནས་མདོ་དབང་ལྟ་བུ་ལ། ལྟ་བ་ལ་གཙོ་བོར་བསྟན་པ་རྫོགས་པ་ཆེན་པོ་ཨ་ཏི་ཡོ་གའོ། །ཞེས་པའི་བར་སྔར་ལྟར་ལ། དེ་ལས་འདིར་ལུང་ཨ་ནུ་ཡོ་ག །དེ་ལའང་ལུང་གི་མ་ཧཱའི་རྒྱུད་ཡེ་ཤེས་རྔམ་པ་གློག་གི་འཁོར་ལོ་ལྟ་བུ། ལུང་གི་ལུང་རྩ་བའི་རྒྱུད་ཀུན་འདུས་རིག་པ་ལྟ་བུ། ལུང་གི་ཨ་ཏི་སེམས་ལུང་ཆེན་པོའི་མདོ་ལྟ་བུ་སྟེ། ཨ་ནུའི་ནང་གསེས་ཀྱི་བསྐྱེད་རྫོགས་གསུམ་དང་། དེ་ཐམས་ཅད་ཀྱི་སྤྱི་དེམས་དགོངས་པ་འདུས་པའི་མདོ་རྣམས་ལས། འདིར་རྩ་བཤད་ཀྱི་རྒྱུད་དེ་ཐམས་ཅད་དང། ཆ་མཐུན་གྱི་རྒྱུད་རྣམ་པར་སྣང་མཛད་ཐིག་ལེ་དབང་གི་ཏནྟྲ་དང་། དབང་བསྐུར་རྒྱལ་པོ་སོགས་རྒྱུད་དང་། བདེ་བ་གསལ་མཛད་ཀྱི་མན་ངག་གིས་ཇི་ལྟར་བཀྲལ་བའི་དགོངས་དོན་གཅིག་ཏུ་དྲིལ་བ་འདུས་པ་ཆེན་པོ་མདོའི་དཀྱིལ་འཁོར་དུ་དབང་བསྐུར་བ་སྐབས་སུ་བབ་པ་ཡིན། དེ་ཡང་དབང་དོན་བསྡུས་པ་ལས། སེམས་ཅན་རྣམས་ཀྱི་དོན་ཆེད་དུ། །དབང་གི་དོན་རྣམས་བསྡུ་བར་བྱ། །ཆུ་བོ་ཆེན་པོ་བཞི་རྣམས་ལ། །སྔོན་བྱུང་དང་ནི་རྗེས་སུ་འཇུག །ཅེས་པས་སྔོན་བྱུང་རྒྱལ་བའི་མཛད་སྤྱོད་ཀྱི་སྒོ་ནས་གདུལ་བྱ་སྤྲོ་བ་སྐྱེད་པའི་དབང་དང་། རྗེས་འཇུག་གང་ཟག་གི་ཉམས་ལེན་གྱི་སྒོ་ནས་གདུལ་བྱ་ཆུད་མི་ཟ་བར་སྐུར་ཐབས་གཉིས་ལས། འདིར་ཕྱི་མ་རྗེས་འཇུག་གི་དབང་ཡིན། དེ་ལའང་། རྗེས་འཇུག་ལམ་པའི་དང་། རྗེས་འཇུག་ལས་དང་པོ་བའི་དབང་གཉིས་ལས། སྔ་མ་ལམ་པའི་དབང་ནི། དབང་དོན་རྣམ་པར་འབྱེད་པ་ལས། རྗེས་འཇུག་ལམ་པའི་དབང་སྐབས་ན། །སྐུ་ནི་རྣལ་འབྱོར་རྣམ་པ་ལྔ། །ཞེས་གསུངས་པ་ལྟར། ཚོགས་སྦྱོར་གཉིས་གཅིག་ཏུ་བསྡུས་པ་མོས་སྤྱོད་ཀྱི་ལམ་པ་དང་། མཐོང་ལམ་དང་། སྒོམ་ལམ་དང་། མཐར་ལམ་དང་། ལམ་བཞི་ལ་གནས་པའི་སློབ་མ་ལ། རིམ་པར་ཆུ་བོ་བཞིའི་དབང་བསྐུར་བས། ལམ་འོག་མ་གོང་མ་ལ་སྦྱོར་བར་གསུངས་པའི་ཕྱིར། དང་པོ་གསུམ་ལམ་དབང་དང་། ཕྱི་མ་གཅིག་པོ་འབྲས་དུས་ཀྱི་དབང་དུ་འགྱུར་ཞིང་། དེ་ལས་འདི་ནི་སྨིན་བྱེད་གཙོ་ཆེ་བ་རྗེས་འཇུག་ལས་དང་པོའི་དབང་ཞེས་གྲགས་པ་དེ་ཡིན། དེ་ལའང་སྦྱངས་པས་སྣོད་དུ་གྱུར་པའི་སློབ་མ་ལ་མདོ་ཡོངས་རྫོགས་ཀྱི་ལུགས་སུ་བསྐུར་བ་དང་། རང་བཞིན་གྱི་སྣོད་དུ་གྱུར་པའི་སློབ་མ་ལ་མདོ་ཁྱད་པར་བའི་ལུགས་སུ་བསྐུར་བ་གཉིས་ལས། འདིར་གཉིས་གཅིག་ཏུ་དྲིལ་ནས་བསྐུར་བའི་ལུགས་ཡིན། དེ་ལ་དབང་གི་ངོ་བོ་ནི། ཞེས་པ་ནས། གཏོར་དང་བླུག་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས། ཞེས་པའི་བར་སྔར་ལྟར་གྱི་རྗེས་སུ། དབྱེ་ན་དབང་དོན་བསྡུས་པ་ལས། རྗེས་འཇུག་ལས་ཀྱི་དང་པོ་ལ། །ཆུ་བོ་བཞི་ཡི་དབང་བསྐུར་བས། །ཡོ་ག་ལ་སོགས་ཐེག་དྲུག་ལ། །ཕྱི་ནང་རྒྱུད་ཀྱི་ཆུ་བོས་བྱ། །བསྐྱེད་པ་མ་ཧཱ་ཡོ་ག་ནི། །ནང་དབང་འབྱུང་བའི་ཆུ་བོས་བྱ། །ལུང་པ་ཨ་ནུ་ཡོ་ག་ནི། །སྒྲུབ་དབང་གྲགས་པའི་ཆུ་བོས་བྱ། །རྫོགས་པ་ཨ་ཏི་ཡོ་ག་ལ། །གསང་དབང་རྫོགས་པའི་ཆུ་བོས་བྱ། །ཞེས་གསུངས་ཤིང་། དེའང་ལྷ་མིའི་ཐེག་པ་ནས་ཡོ་གའི་བར་བྱ་སྤྱོད་སོ་སོར་བགྲངས་པའི་ཐེག་པ་བདུན་གྱི་དབང་ནོད་པས། ས་དང་པོ་འགྱུར་བ་མ་ངེས་པ་ནས། བདུན་པ་དམིགས་པ་འབྲས་བུ་སྐྱེ་བའི་བར་གྱི་ས་བདུན་ནོན་པས་ཡོ་ག་སྟེ་རྣལ་འབྱོར་དུ་འགྱུར་ལ། ནང་དབང་འབྱུང་བའི་ཆུ་བོ་ནོད་པས་ས་བརྒྱད་པ་གནས་པ་མི་གཡོ་བའི་ས་ནོན་ནས་རྣལ་འབྱོར་ཆེན་པོར་འགྱུར། སྒྲུབ་དབང་གྲགས་པའི་ཆུ་བོ་ནོད་པས་ས་དགུ་པ་བརྡལ་བ་ཆོས་ཉིད་ཀྱི་ས་ནོན་ནས་རྗེས་སུ་རྣལ་འབྱོར་དུ་འགྱུར། གསང་དབང་རྫོགས་པའི་ཆུ་བོ་ནོད་པས་ས་བཅུ་པ་རྫོགས་པ་སྤྱིར་ཆིབ་ཀྱི་ས་ནོན་ནས་ཤིན་ཏུ་རྣལ་འབྱོར་དུ་འགྱུར་བར་གསུངས། ཞེས་འགྲེས་སྦྱར་ནས། དེ་ལ་ཐོག་མར་སྤྱི་དབང་ཆེན་པོའི་གླེང་གཞི་དང་འབྲེལ་བ་སྔོན་འགྲོ་སྒོ་འབྱེད་ཕྱག་ན་རྡོ་རྗེ་ངན་སོང་གནས་འདྲེན་གྱི་དཀྱིལ་འཁོར་དུ་དབང་བསྐུར་བ་ལ། ཞེས་སམ། དེ་ལ་ཕྱི་དབང་རྒྱུད་ཀྱི་ཆུ་བོ་ལས། ཐོག་མར་ལྷ་མིའི་དཀྱིལ་འཁོར་དུ་དབང་བསྐུར་བ་ལ། ཞེས་སོགས་སྐབས་བབ་གང་ཡིན་བརྗོད་ནས། སྟ་གོན་ཡོད་མེད་དང་འཇུག་པའི་ཁྱད་པར་སོགས་སྔར་གྱི་རིགས་འགྲེས་ཁོག་ཕུབ་ནས་མ་འདྲེས་པར་འདོར་ལེན་བྱའོ། <!TCC Tibetan character 4,47 undefined in unicode!> །ཡང་ཨ་ཏིའི་རྩ་དབང་ལྟ་བུ་ལ། རྫོགས་པ་ཆེན་པོ་ཨ་ཏི་ཡོ་གའོ། །ཞེས་པའི་བར་སྔར་ལྟར་ལ། དེ་ལྟར་བསྐྱེད་རྫོགས་རྣམ་པ་གསུམ་ལས་འདིར་མན་ངག་རྫོགས་པ་ཆེན་པོ། དེ་ཡང་སྤྲོས་བྲལ་རང་བྱུང་གི་ཡེ་ཤེས་རྒྱ་ཆད་ཕྱོགས་ལྷུང་མེད་པ་ཐེག་པ་ཀུན་གྱི་དོན་ཐམས་ཅད་ཡོངས་སུ་རྫོགས་པས་རྩེ་མོར་གྱུར་ཏེ། ཀུན་བྱེད་རྒྱལ་པོ་ལས། གཅིག་རྫོགས་གཉིས་རྫོགས་སེམས་སུ་རྫོགས། །གཅིག་རྫོགས་སེམས་ཀྱི་བྱས་པ་རྫོགས། །གཉིས་རྫོགས་ཕུན་སུམ་ཚོགས་པ་རྫོགས། །ཀུན་རྫོགས་བྱང་ཆུབ་སེམས་སུ་རྫོགས། །ཞེས་གསུངས། དེས་ན་མ་ཧཱ་དང་ཨ་ནུ་མན་ཆད་ཐམས་ཅད་རྩོལ་སྒྲུབ་བླང་དོར་བྱས་པས་རེ་དོགས་ཀྱི་དྲི་མས་རང་བྱུང་གི་ཡེ་ཤེས་ལ་སྒྲིབ་པའི་ཕྱིར། རྫོགས་ཆེན་གྱི་གོལ་སར་བཤད་དེ། ནམ་མཁའ་དང་མཉམ་པའི་རྒྱུད་ལས། མ་ཧཱ་རྡོ་རྗེ་འཆང་འདོད་པས། །ཐབས་དང་ཤེས་རབ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་སྒྲུབ་རྣམ་བཞིས་སྒྲུབ་པར་བྱེད། །ཨ་ཏི་ཡོ་གའི་བདེ་ཆེན་ནི། །རྩོལ་སྒྲུབ་འདས་པའི་བྱང་ཆུབ་སེམས། །རྩོལ་སྒྲུབ་འདོད་པས་མ་ཧཱ་སྒྲིབ། །རྫོགས་ཆེན་རྩོལ་སྒྲུབ་བྱེད་པ་ནི། །མ་ཧཱ་ཡོ་ག་གོལ་བར་བཤད། །ཨ་ནུ་དབྱེར་མེད་པ་འདོད་པ། །དབྱིངས་དང་ཡེ་ཤེས་སྒོར་ཞུགས་ནས། །འདི་ལྟར་སྣང་བའི་ཆོས་རྣམས་ལ། །རྒྱུ་ནི་དག་པའི་དབྱིངས་ལྟ་བ། །འབྲས་བུ་ཡེ་ཤེས་དཀྱིལ་འཁོར་ལྟ། །ཨ་ཏི་ཡོ་གའི་བདེ་ཆེན་ནི། །རྒྱུ་འབྲས་འདས་པའི་བྱང་ཆུབ་སེམས། །རྒྱུ་འབྲས་འདས་པ་ཨ་ནུའི་སྒྲིབ། །རྫོགས་ཆེན་རྒྱུ་འབྲས་གཉིས་ལྟ་ན། །ཨ་ནུ་ཡོ་ག་གོལ་བར་བཤད། །ཅེས་གསུངས། རྒྱུ་མཚན་དེའི་ཕྱིར་ཨ་ཏི་ཡོ་ག་ནི་བྱ་རྩོལ་དང་བྲལ་བའི་ཡེ་ཤེས་ལ་དབང་བསྒྱུར་བ་སྟེ། ཀུན་བྱེད་ལས། ཀྱེ་སེམས་དཔའ་ཆེན་པོ། རྫོགས་པ་ཆེན་པོའི་ལྟ་སྤྱོད་ནི། །རྒྱུ་འབྲས་བསྒྲུབ་དང་མི་འདྲ་སྟེ། །ལྟ་སྤྱོད་བྱང་ཆུབ་སེམས་འདི་ནི། །ནམ་མཁའ་ལྟ་བུའི་རང་བཞིན་ཏེ། །ནམ་མཁའ་ལ་ནི་རྟོག་དཔྱོད་འདས། །ཞེས་སོགས་རྒྱ་ཆེར་གསུངས་ཤིང་། ནམ་མཁའ་ཆེ་ལས་ཀྱང་། རང་བྱུང་ཡེ་ཤེས་རྩོལ་མེད་ལས། །གྲོལ་ནས་གྲོལ་བའི་ལམ་ཡང་སྟོན། །ཞེས་གསུངས་པ་ཡིན་ནོ། །རྫོགས་པ་ཆེན་པོ་དེ་ལའང་དབྱེ་ན། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་སྡེ། །ཞེས་པས་སེམས་སྡེ། ཀློང་སྡེ། མན་ངག་སྡེ་དང་གསུམ་ལས། འདིར་སེམས་སྡེ་སྔ་འགྱུར་ལྔ། ཕྱི་འགྱུར་བཅུ་གསུམ་སྟེ་མ་བུ་བཅོ་བརྒྱད་ཀྱི་རྒྱུད་ཀྱི་དགོངས་པ། ལོ་ཙཱ་བ་ཆེན་པོ་བཻ་རོ་ཙ་ནའི་ཐུགས་ཀྱི་ཉིང་ཁུ། སེམས་སྡེ་ཉང་ལུང་ཨ་དོན་བཅོ་བརྒྱད་ཀྱི་རྩལ་དབང་བསྐུར་བ་སྐབས་སུ་བབ་པ་ཡིན། དེ་ལ་འདིར་ཤིན་ཏུ་རྣལ་འབྱོར་གྱི་ལུགས་ཀྱིས། སྐལ་ལྡན་འབད་མེད་དུ་གྲོལ་བར་བྱེད་པ་ལ། ཞེས་སོགས་དབང་ཆོག་གི་དཀྱུས་བཞིན་ཤེས་པར་བྱའོ། <!TCC Tibetan character 4,47 undefined in unicode!> །ཡང་ན་རཀ་དོང་སྤྲུག་ལ། རྫོགས་པ་ཆེན་པོ་ཨ་ཏི་ཡོ་གའོ། །ཞེས་པའི་བར་སྔར་ལྟར་ལ། དེ་ལས་འདིར་བསྐྱེད་རྫོགས་རྣམ་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་བསྐང་ཞིང་རྟོག་སྒྲིབ་སྦྱོང་ལ། སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས་བླ་ན་མེད་པའི་དངོས་གྲུབ་ཀྱི་སྐལ་པ་ཅན་དུ་བྱེད་པའི་ཐབས་མཁས་ཀྱི་སྒོ་རྨད་དུ་བྱུང་བ། རྣལ་འབྱོར་སྤྱི་ཁྲུས་ན་རག་དོང་སྤྲུག་མཚམས་མེད་ལྔ་སྦྱོང་གི་དཀྱིལ་འཁོར་དུ་དབང་བསྐུར་བ་སྐབས་སུ་བབ་པ་ཡིན། དེ་ལའང་རྒྱུད་དང་མན་ངག་སོ་སོའི་དགོངས་པས། གླང་པོ་ཆེ་རབ་འབོགས་ཀྱི་རྟོག་པ་གཅིག་ཁོལ་དུ་ཕྱུང་བ་ཀལྤ་དུམ་བུའི་རྒྱུད་དྲི་མ་མེད་པ་བཤགས་པའི་རྒྱུད་ཀྱི་ལེའུ་གསུམ་པ། སློབ་དཔོན་ཆེན་པོ་པདྨའི་གདམས་ངག་གིས་བཀྲལ་པ་ཞི་ཁྲོ་ཁྲོམ་དཀྲུག་ཏུ་གྲགས་པ་དང་། པདྨས་མཛད་པའི་སྒྲུབ་ཐབས་རྒྱ་ཞང་ཁྲོམ་གྱི་གཏེར་མའི་རྗེས་སུ་འབྲངས་པས་བཤགས་རྒྱུད་ཀྱི་ལེའུའི་གོ་རིམ་ལྟར་ཞི་ཁྲོ་གནས་བསྒྱུར་དང་། ཡི་གེ་བརྒྱ་པ་ཕྲིན་ལས་ཀྱི་རྒྱུད་སོགས་ལ་བརྟེན་པའི་ཞི་ཁྲོ་རིགས་བསྡུས་དང་། ཞི་ཁྲོ་རང་གཞུང་ལ་དོང་སྤྲུག་གིས་ཁ་བསྐངས་པ་ཞི་ཁྲོ་རབ་འབྱམས་སུ་གྲགས་པ་རྣམས་ལས། འདིར་ཞི་ཁྲོ་རིགས་བསྡུས་པདྨ་བརྒྱ་ལྡན་གྱི་དཀྱིལ་འཁོར་རམ། ཞི་ཁྲོ་ཁྲོམ་དཀྲུག་གི་དཀྱིལ་འཁོར་དུ་དབང་བསྐུར་བར་བྱེད་པ་ཡིན། དེ་ཡང་འགྱོད་ཚངས་ཀྱི་རྒྱལ་པོ་འདི་ཇི་ལྟར་བྱུང་བའི་ཁུངས་ཀྱི་གླེང་གཞི་ནི། སྔོན་འདོད་ཁམས་ཀྱི་གནས་འདི་ན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་མཁས་པ་ཞིག་ལ། སློབ་མ་རྒྱལ་པོའི་བུ་ཞིག་ཡོད་པས་དེས་སློབ་སྦྱོང་མཐར་ཕྱིན་པ་ན། ད་ནི་ང་ཡི་གོང་ན་རིག་པར་སྨྲ་བ་སློབ་དཔོན་འདི་ཙམ་དུ་ཟད་པས། འདི་གོང་དུ་མི་གཏོང་ངོ་སྙམ་དུ་བསམས་ནས་སློབ་དཔོན་ལ་ཐོ་འཚམས་ཤིང་། སློབ་དཔོན་གྱིས་ཀྱང་ཞེ་སྡང་གིས་དམོད་བོར་བའི་ལས་ཀྱིས་གཉིས་ཀ་ངན་འགྲོར་ལྟུང་ནས་སྡུག་བསྔལ་གྱིས་ཉམ་ཐག་པར་གྱུར་པ་ལས། ཡུལ་དང་འཕྲད་པའི་ཐུགས་རྗེ་སྐྱེས་ནས། དཔལ་རྡོ་རྗེ་སེམས་དཔའ་མངོན་དུ་བྱོན་ནས་འགྱོད་ཚངས་ཀྱི་བཤགས་པ་དང་ཡིག་བརྒྱའི་གསང་སྔགས་བསྟན་པས་སྔོན་གྱི་གནས་དྲན་ཏེ་འགྱོད་པ་དྲགས་པོ་སྐྱེས་པ་ལ། གསང་བའི་བདག་པོས་ཕྱི་ནང་གསང་བའི་དབང་བསྐུར་བས་དགེ་བའི་གསོས་ཐེབས་ཏེ་བྱང་ཆུབ་ཀྱི་མྱུ་གུ་སྐྱེས་པས། རིམ་གྱིས་རིག་འཛིན་གྱི་ས་ལ་གནས་པར་གྱུར་ཏོ། །ཉམས་ཆག་སྦྱོང་བའི་ཐབས་ཕུལ་དུ་བྱུང་བ་དེ་ཉིད་ཕྱིས་མི་ཡི་ཡུལ་དུ་ཇི་ལྟར་དར་བ་ནི། གསང་བདག་གི་མཐུས་རྒྱལ་པོ་ཛཿལ་ཏནྟྲ་སྡེ་བཅོ་བརྒྱད་ཀྱི་གླེགས་བམ་ཆར་དུ་བབ་པའི་ནང་ཚན། གླང་པོ་ཆེ་རབ་འབོགས་ཀྱི་ལེའུ་གསུམ་པ་ཁོལ་དུ་ཕྱུང་བ་དུམ་བུའི་རྒྱུད་ལ་སོགས་པ་རྒྱལ་པོ་ཛཿནས་ཚོམ་བུའི་རིག་འཛིན་རྣམས་ལ་བརྒྱུད་དེ། སངས་རྒྱས་གསང་བའི་མན་ངག་བི་མ་ལ། སློབ་དཔོན་ཆེན་པོ་པདྨ་ནས་གཉགས་ལོ་ཡེ་ཤེས་གཞོན་ནུ་ལ་བཀའ་བབས་ཤིང་། དེ་ནས་སོག་པོ་ལྷ་དཔལ། གནུབས་ཆེན་སངས་རྒྱས་ཡེ་ཤེས། སྲུ་ལེགས་སྒྲོན། ཞུ་སྟོན་གཞོན་ནུ་སྙིང་པོ། སྲས་བསོད་ནམས་ཤཱཀྱ། ཟུར་ཆེ་ཆུང་ནས་རིམ་པར་བརྒྱུད་དེ། དཔལ་ལྡན་བླ་མ་དམ་པ་འདི། ཞེས་བྱ་བ་ལས། ཁོ་བོས་ལེགས་པར་ཐོབ་པ་ནི་གང་ལས་བྱུང་བ་བརྒྱུད་པའི་ལོ་རྒྱུས་ཡིན་ལ། དེ་ལས་བྱུང་བའི་གདམས་པ་དེ་ལ། ཕྱི་ནང་གསང་བའི་བཤགས་པའི་སྒོ་ནས་ཉམས་ཆག་སྐོང་བའི་ཆོ་ག་དང་། དབང་བསྐུར་བའི་རིམ་པ་གཉིས་ལས། འདིར་དབང་བསྐུར་བའི་སྐབས་ཡིན། དེ་ལའང་རྡོ་རྗེ་སློབ་དཔོན་གྱིས་བགྱི་འོས་དང་། ཞེས་སོགས་སྔར་ལྟར་རོ། <!TCC Tibetan character 4,47 undefined in unicode!> །ཡང་གཏེར་མ་ལ་མཚོན་ན། ཁྱད་པར་དེ་ལྡན་གྱི་གསང་སྔགས་རྙིང་མ་དེ་ལའང་། རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་སྟེ། ཞེས་པའི་བར་སྔར་ལྟར་ལས། དེ་ལྟར་བརྒྱུད་པའི་བཀའ་སྲོལ་གསུམ་དུ་གནས་པ་ལས། འདིར་བཀའ་མ་ལས། བཀའ་བབ་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱ་སྟེ། ཁྱད་པར་གྱི་བརྒྱུད་པ་གསུམ་དང་། གཙོ་བོར་བརྒྱུད་ཐག་ཉེ་བས་བྱིན་རླབས་ཀྱི་ཚན་ཁ་ཆེ་ཞིང་། གཏེར་ཡིག་གི་དཔེ་དཔང་མངའ་བས་ཁུངས་བཙུན་པ་དང་། གང་ལ་གང་འདུལ་གྱི་དུས་དང་འཚམ་པར་མངོན་པར་སྣང་བས་ཟབ་ལམ་ནུབ་པ་མེད་པའི་ཕྱིར། ཁྱད་པར་དུ་འཕགས་པ་གཏེར་གྱི་ཕྱོགས་སུ་གཏོགས་པ་ཡིན། དེང་སང་བཀའ་མ་རྣམས་དུས་དབང་གིས་རིམ་པར་ནུབ་ཅིང་འཆལ་བའི་ཚེ། ལས་འཕྲོ་སད་པའི་སྐལ་ལྡན་རྣམས་གཏེར་ཆོས་ཀྱིས་རང་དང་གཞན་གྱི་དོན་རླབས་པོ་ཆེ་དཀའ་བ་མེད་པར་འགྲུབ་པར་འགྱུར་བ་ལ་དགོངས་ནས། རྒྱུད་ལུང་མན་ངག་གི་བཅུད་ཐམས་ཅད་གངས་རིའི་ཕྲེང་བས་བསྐོར་བའི་ལྗོངས་བོད་ཡུལ་གྱི་རི་བྲག་མཚོ་གསུམ་གཙུག་ལག་ཁང་སོགས་སུ་མི་འཇིག་པའི་ཕྱག་རྒྱས་བཏབ་སྟེ་སྦ་བར་མཛད་པའི་དགོས་པ་ནི། ཇི་སྐད་དུ། ཤིན་ཏུ་ཟབ་པའི་མཐར་ཐུག་སྙིང་པོ་རྣམས། །སྤྱིར་ཡང་བོད་རྣམས་གསར་ངས་ཆེ་བ་དང་། །སྙིགས་མའི་འགྲོ་ལ་ལྷག་པར་སྙིང་རྗེ་བས། །མཐའ་དབུས་ཐམས་ཅད་གཏེར་གྱིས་བཀང་ནས་བཞག །ལས་ཅན་བུ་དང་འཕྲད་པའི་སྨོན་ལམ་བཏབ། །མ་འོངས་དུས་སུ་རྟོག་གེ་ཐ་སྙད་ཅན། །སྒོམ་ཆེན་ལ་སོགས་ཕྱོགས་དང་རིས་དྲེགས་ཅན། །རང་ཆེ་འབྱིན་ཅིང་གཏེར་ལ་རྩོད་ན་ཡང་། །སྙིགས་མའི་ཆོས་བྱེད་ཕལ་ཆེར་གཏེར་གྱིས་འདྲེན། །ཟབ་ལ་ཁ་ཚང་མ་བསྒྲིབས་མཐའ་རྒྱས་ཤིང་། །གདམས་པ་སྣ་རེས་གང་ཟག་གྲོལ་བར་ངེས། །དེ་བས་ལས་སད་སྐལ་ལྡན་སྦྱངས་པ་ཅན། །འཆི་བ་དྲན་ན་གཏེར་ཆོས་ཉམས་སུ་ལོངས། །ཚེ་གཅིག་ཐར་ལམ་ཐོབ་བོ་རྗེས་འཇུག་རྣམས། །ཞེས་གསུངས་པ་ལྟར། བོད་དང་བོད་ཆེན་པོའི་ཡུལ་འདིར་རྒྱུ་བའི་སྐྱེ་དགུ་རྣམས་ཀྱི་ཕན་བདེའི་རྩ་ལག་དུས་བབ་ཀྱི་ཟབ་གཏེར་ལ་རག་ལས་པ་ཡིན་ལ། དེ་ཉིད་སྤྱན་འདྲེན་པ་པོ་ཡང་། སྔོན་གྱི་ལོ་པཎ་དང་རྒྱལ་བློན་ས་ཆེན་པོ་ལ་བཞུགས་པའི་འཕགས་ཆེན་རྣམས། གང་འདུལ་གྱི་སྤྲུལ་པའི་སྣང་བརྙན་གཏེར་སྟོན་དུ་བསྟན་ནས་འབྱོན་པ། ཐང་ཡིག་ཏུ། སངས་རྒྱས་བླ་མ་ནས་བདེ་ཆེན་གླིང་པའི་བར་སོ་སོའི་དུས་རྟགས་དང་བཅས་ལུང་བསྟན་པ་ལས། ཉང་གཏེར་བཀའ་བརྒྱད་ལྟ་བུ་ལ་མཚོན་ན། འདིར་ཇི་སྐད་དུ། སྲིན་མོ་སྦར་རྗེས་སྦས་པའི་གཏེར་ཁ་འདི། །མི་བཞག་འདོན་པའི་རྟགས་དེ་སྟོན་ནས་འབྱུང་། །མངའ་བདག་སྤྲུལ་པ་ཉང་རལ་ཞེས་བྱ་འབྱུང་། །ཞེས་ལུང་བསྟན་པ་ལྟར། འགྲན་ཟླ་དང་བྲལ་བའི་གཏེར་སྟོན་གྱི་རྒྱལ་པོ་མངའ་བདག་ཉང་ཉི་མ་འོད་ཟེར་གྱིས་སྤྱན་འདྲེན་པར་མཛད་པའི་ཆོས་གཏེར་མཐའ་ཡས་པ་ཞིག་བཞུགས་པ་ལས། འདིར་སྒྲུབ་ཆེན་བདེ་གཤེགས་འདུས་པ། དེ་ལ་སྔ་འགྱུར་རྣམས་རྒྱུད་སྡེ་དང་སྒྲུབ་སྡེ་ཞེས་བཀའ་ཡི་བབས་སོ་གཉིས་སུ་འབྱེད་པ་ལས། འདི་ནི་སྒྲུབ་སྡེ་བརྒྱད་གཅིག་ཏུ་དྲིལ་ནས་སྒྲུབ་པ་རྩ་བ་ལྟ་བུར་གྱུར་པ་ཡིན། དེ་ཡང་སྤྱིར་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་བདག་ཉིད་དུ་གནས་པ་ལས། དེ་སྒྲུབ་པའི་ཐབས་ཀྱི་སྒོ་ཡང་རྣམ་པ་ལྔར་འགྱུར་ཏེ། འཇམ་དཔལ་གྱི་སྐུ་འཁོར་ལོ་བཞི་ལ་བརྟེན་ནས་བདེ་གཤེགས་སྐུའི་སྒྲུབ་པ་དང་། རྟ་སྐད་ཐེངས་གསུམ་ལ་བརྟེན་ནས་པདྨ་གསུང་གི་སྒྲུབ་པ་དང་། ཐུགས་རིག་པ་རང་བྱུང་གི་ཡེ་ཤེས་ཡང་དག་གྲུབ་པ་གཅིག་པུ་ལ་བརྟེན་ནས་ཐུགས་རྡོ་རྗེའི་སྒྲུབ་པ་དང་། འཁོར་འདས་ཀྱི་ཆོས་ཐམས་ཅད་ཡོན་ཏན་དུ་རྫོགས་པར་སྟོན་པ་བདུད་རྩི་ཡོན་ཏན་གྱི་སྒྲུབ་པ་དང་། མངོན་སྤྱོད་ཀྱི་ཕྲིན་ལས་ཀྱིས་གདུག་པ་ཚར་གཅོད་པའི་ཐབས་གཅོ་བོར་སྟོན་པ་ཕུར་པ་ཕྲིན་ལས་ཀྱི་སྒྲུབ་པ་སྟེ་ཡེ་ཤེས་ལྷའི་སྒྲུབ་སྡེ་ལྔ་དང་། འདས་མ་འདས་ཀྱི་སྒྲུབ་སྡེ་ཐུན་མོང་བ་མ་མོ་རྦོད་གཏོང་དང་། དམོད་པ་དྲག་སྔགས། འཇིག་རྟེན་མཆོད་བསྟོད་ཀྱི་སྒྲུབ་སྡེ་སྟེ། དེ་གསུམ་ཡང་ཡེ་ཤེས་ལྷའི་སྒྲུབ་པ་རྣམས་ཀྱི་བསྟན་པ་སྲུང་བ་ལ་དགོངས་ནས། ལེའུ་ཀ་བསམ་གྱིས་མི་ཁྱབ་པ་ཞིག་གསུངས་པ་ཡིན་ཅིང་། དེ་ཐམས་ཅད་གཅིག་ཏུ་དྲིལ་ནས་སྒྲུབ་པའི་ཐབས། འདིར་སྒྲུབ་ཆེན་བདེ་གཤེགས་འདུས་པའི་དཀྱིལ་འཁོར་དུ་དབང་བསྐུར་བར་བྱེད་པ་ལས། ཐོག་མར་ངེས་ཤེས་འདྲེན་པ་ལོ་རྒྱུས་ཀྱི་དབང་དུ་བྱས་ན། སྟོན་པ་བཅོམ་ལྡན་འདས་དཔལ་ཀུན་ཏུ་བཟང་པོ་ཉིད་ཆོས་སྐུ་སྐྱེ་བ་མེད་པ་ལས་མ་གཡོས་བཞིན་དུ་གཟུགས་སྐུའི་རོལ་པ་ཞི་བ་དང་ཁྲོ་བོ་དཔལ་ཧེ་རུ་ཀའི་རྣམ་པར་བཞེངས་ནས། འོག་མིན་གསང་བ་མཆོག་གི་གནས་སུ། འཁོར་སངས་རྒྱས་དང་བྱང་ཆུབ་སེམས་དཔའ་ཁྲོ་བོ་དང་ཁྲོ་མོ་སོགས་བསམ་གྱིས་མི་ཁྱབ་པ་ལ། ཆོས་ཉིད་ཀྱི་རང་སྒྲས་སྤྱི་རྒྱུད་ལྔ། སྒོས་རྒྱུད་བཅུ་ལ་སོགས་ཏེ་སྒྲུབ་སྡེའི་རྒྱུད་མཐའ་ཡས་པ་གསུངས། དེ་རྣམས་རིག་འཛིན་གྱི་གཙོ་བོ་གསང་བདག་རྡོ་རྗེ་ཆོས་ཀྱིས་ཐོག་མར་ངག་ཏུ་བསྡུས། དེ་ནས་པུསྟི་གླེགས་བམ་ལ་བཀོད་ཅིང་། དགོངས་འགྲེལ་དུ་ལུང་ལྔ་ཡང་མཛད་དེ། མཁའ་འགྲོ་ལས་ཀྱི་དབང་མོ་ཆེ་ལ་གཏད། དེས་སྤྱི་དང་བྱེ་བྲག་གི་རྒྱུད་སོ་སོར་ཕྱེས་ནས་རིན་པོ་ཆེའི་སྒྲོམ་བུར་བཅུག་ཏེ་བསིལ་བ་ཚལ་གྱི་མཆོད་རྟེན་བདེ་བྱེད་བརྩེགས་པར་གཏེར་དུ་སྦས། ནམ་ཞིག་ན་སློབ་དཔོན་བརྒྱད་ཀྱི་གཟིགས་སྣང་མཐུན་པར་ཆོ་འཕྲུལ་སྣ་ཚོགས་སྣང་བས་གནས་དེར་བྱོན་ནས་སྡེ་བརྒྱད་རྣམས་ལ་བཀའ་བསྒོས་པས། གཏེར་སྲུང་རྣམས་ཀྱིས་བྱེ་བྲག་གི་རྒྱུད་ཀྱི་སྒྲོམ་བུ་བརྒྱད་པོ་བཀའ་བབས་ཀྱི་རིག་འཛིན་བརྒྱད་པོ་སོ་སོ་ལ་གཏད། སྤྱི་རྒྱུད་ཀྱི་སྒྲོམ་རིན་པོ་ཆེ་སྣ་བརྒྱད་ལས་བྱས་པ་སླར་གཏེར་དུ་སྦས་པ་སློབ་དཔོན་ཆེན་པོ་པདྨ་འབྱུང་གནས་ཀྱིས་སྤྱན་དྲངས། དེ་ལ་སློབ་དཔོན་ཆེན་པོ་འདི་ནི་དུས་གསུམ་སངས་རྒྱས་ཐམས་ཅད་ཀྱི་གསུང་རྡོ་རྗེའི་བདག་ཉིད་འོད་དཔག་ཏུ་མེད་པའི་ངོ་བོ་ལས་མ་གཡོས་བཞིན་དུ་ཐུགས་རྗེའི་རང་རྩལ་མ་འགགས་པའི་ཆོ་འཕྲུལ་འཕགས་པ་སྤྱན་རས་གཟིགས་དབང་ཕྱུག་དང་། དབང་ཆེན་རྟ་མགྲིན་སོགས་གང་ལ་གང་འདུལ་གྱི་རྣམ་པར་རོལ་པ་མཐའ་ཡས་པ་སྟོན་པ་ལས། ཁྱད་པར་འཛམ་བུ་གླིང་དུ་ཐུབ་པའི་དབང་པོའི་རྒྱལ་ཚབ་ཏུ་དྷ་ན་ཀོ་ཤའི་མཚོ་གླིང་དུ་པད་སྡོང་ལས་སྐུ་བལྟམས་པའི་ཚུལ་བསྟན་ཏེ། རྒྱ་བོད་ཀུན་ཏུ་སངས་རྒྱས་ཀྱི་བསྟན་པ་ལ་སྟོན་པ་གཉིས་པ་ལྟ་བུར་གྱུར་ཅིང་། ཁྱད་པར་བསམ་ཡས་མཆིམ་ཕུ་བྲག་དམར་ཀེའུ་ཚང་དུ་རྗེ་འབངས་ཉི་ཤུ་རྩ་ལྔ་ལ་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་ཞལ་ཕྱེས་ནས་དབང་བསྐུར་ཏེ། བཀའ་བབས་ཀྱི་གྲུབ་ཆེན་བརྒྱད་ཀྱི་མེ་ཏོག་ཚོམ་བུའི་གཙོ་བོ་སོ་སོས་བཞེས་པ་དང་མཐུན་པར་སྒྲུབ་གནས་བརྒྱད་དུ་བསྒྲུབ་ཏུ་བཏང་ཞིང་། རྗེ་འབངས་དེ་ཐམས་ཅད་ཀྱིས་གྲུབ་པ་བརྙེས། དེའི་ནང་ནས་ཀྱང་མངའ་བདག་ཁྲི་སྲོང་ལྡེའུ་བཙན་ལ་བདེ་གཤེགས་འདུས་པའི་བཀའ་བབས་པས། རྒྱུད་ལུང་མན་ངག་ཐམས་ཅད་ལོ་ཆེན་བཻ་རོ་ཙ་ན་དང་ལྡན་མ་རྩེ་མང་གིས་ལོ་ཙཱ་བྱས་ཏེ་བསྒྱུར་བཤད་ཀྱིས་གཏན་ལ་ཕབ་ནས་གསུངས། རྒྱལ་པོ་ཉིད་རང་སྐལ་བར་ལྡན་ཀྱང་སྲིད་ཀྱིས་ཡེངས་ནས་ཐུགས་ཉམས་སུ་མ་ལོན་པས། གུ་རུའི་གསུངས་བཞིན་སྐྱེ་སྲིད་ཕྱི་མ་ལ་འཕྲད་པའི་སྨོན་ལམ་བཏབ་སྟེ། བླ་དཔེ་རྣམས་བྲག་དམར་མགྲིན་བཟང་དུ་གཏེར་དུ་སྦས། དེ་ཉིད་མཁའ་འགྲོ་རྣམས་ཀྱིས་ཕྱིས་མཁོ་མཐིང་རྣམ་སྣང་གི་རྒྱབ་ཏུ་གཏེར་སྒོ་སྤོས། སླད་ཀྱིས་བསམ་ཡས་དབུ་རྩེའི་ཁོར་ས་བར་མ་ནས་ཁ་བྱང་གྲུབ་ཐོབ་དངོས་གྲུབ་ཀྱིས་བཏོན་ཏེ་ཕུལ་བ་ལྟར། མངའ་བདག་ཉང་ཉི་མ་འོད་ཟེར་གྱིས་མཁོ་མཐིང་ནས་བདེ་གཤེགས་འདུས་པའི་སྐོར་རྣམས་སྤྱན་དྲངས་ཏེ། བཀའ་བབ་ཀྱི་བུ་ལྔ་དང་། ཁྱད་པར་སྲས་ཆུང་འགྲོ་བའི་མགོན་པོ་སོགས་སྐལ་ལྡན་གྱི་སློབ་མ་རྣམས་སྨིན་གྲོལ་ལ་འགོད་པར་མཛད། དེ་ལས་བརྒྱུད་པའི་ཁྱད་པར་དུ་མ་ཞིག་པཎ་ཆེན་པདྨ་དབང་རྒྱལ་ལ་བབས་པ་ནས་རིམ་པར་བརྒྱུད་དེ། བླ་མ་དམ་པ་འདི། ཞེས་བྱ་བའི་དྲུང་དུ་ཁོ་བོས་ལེགས་པར་ཐོབ་པ་ཡིན། བརྒྱུད་པ་དེ་ལས་བྱུང་བའི་ཆོས་དེ་ལའང་། ལམ་གྱི་གཞི་སྨིན་བྱེད་དབང་གི་རིམ་པ་དང་། དེ་དང་རྗེས་སུ་འབྲེལ་བའི་གྲོལ་བྱེད་བསྐྱེད་རྫོགས་ཀྱི་རིམ་པ་གཉིས་སུ་ཡོད་པ་ལས། འདིར་དབང་བསྐུར་བའི་རིམ་པ་དེ་སྒྲུབ་པ་སྐབས་སུ་བབ་པ་ཡིན། དེ་ནས་སྟ་གོན་གྱི་ཚེ། དེ་ལའང་ཇི་སྐད་དུ། ཞེས་སོགས་སྒྱུ་འཕྲུལ་ཞི་ཁྲོ་སོར་བཞག་དང་། དངོས་གཞིའི་སྐབས་ཀྱང་། དབང་གི་ངོ་བོ། ངེས་ཚིག་གི་བཤད་པ་སྒྱུ་འཕྲུལ་ལྟར་བླངས། དེ་རྗེས། དབྱེ་ན། ཕྱི་དབང་རྫས་ལ་བརྟེན་ནས་བསྐུར་བ་དང་། ནང་དབང་ལུས་ལ་བསྟེན་ཏེ་བསྐུར་བ་དང་། གསང་དབང་ཡུམ་ལ་བསྟེན་ཏེ་བསྐུར་བ་དང་། དེ་ཁོ་ན་ཉིད་སེམས་ལ་བསྟེན་ཏེ་བསྐུར་བ་དང་བཞི་ཡོད་ཅིང་། དེ་ཡང་དབང་བསྐུར་བ་ནི། དཀྱིལ་འཁོར་སྔོན་དུ་འགྲོ་བ་ཅན་ཡིན་པས། ཐོག་མར་དཀྱིལ་འཁོར་དུ་འཇུག་དགོས་ཏེ། རྩ་བར། དཀྱིལ་འཁོར་དེར་འཇུག་རྣམ་པ་གཉིས། །སློབ་དཔོན་དང་ནི་སློབ་མ་འོ། །ཞེས་རྡོ་རྗེ་སློབ་དཔོན་གྱིས་བགྱི་འོས་དཀྱིལ་འཁོར་བཞེངས་སྒྲུབ་བདག་ཉིད་འཇུག་པ་དང་བཅས་པ་སོང་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ། ཞེས་སོགས་སྔར་ལྟར་རོ། །དེས་མཚོན་ནས། དང་པོ་ཆོས་དབང་། བར་པ་རྡོར་གླིང་། ཐ་མ་པད་གླིང་སྟེ་གསང་རྫོགས་ལུགས་གསུམ་དང་། བྱང་གཏེར་རང་བྱུང་རང་ཤར་སོགས་བཀའ་བརྒྱད་སྤྱི་བཀའ་རྣམས་སོ་སོའི་དགོས་ཆོས་བསྒྱུར་ཁ་མ་གཏོགས་ཁོག་འདྲ་ཞིང་། སྒོས་བཀའ་ཡང་དག །གཤིན་རྗེའི་གཤེད། རྟ་མགྲིན། ཕུར་པ་སོགས་ལ་སྒྲུབ་སྡེའི་སྤྱི་བབས་ཀྱི་བཤད་པ་འདྲ་བ་ལ། དེའི་ནང་ནས་འདི་དང་འདི་ཞེས་ངོས་གཟུང་ཞིང་། དེ་ཡང་བཀའ་གཏེར་དག་སྣང་གི་སྡེ་གར་གཏོགས་དམིགས་ཕྱེད་པ་དང་། དེར་མ་ཟད་གཏེར་མ་བླ་རྫོགས་ཐུགས་གསུམ་སོགས་གཞན་དང་གཞན་ལ་རིགས་འགྲེས་ཤེས་དགོས་ཏེ། གཏེར་མ་རྒྱ་ཆེས་པས་ཐམས་ཅད་བརྗོད་པར་མི་ནུས་ཤིང་། བཤད་པའི་འཁྱོགས་མཚམས་ཀྱི་བསྒྱུར་ཁ་ཡང་ཧ་ཅང་མང་ན་མགོ་འཁོར་བའི་གནས་སུ་འགྲོ་ཉན་སྣང་བས་རེ་ཞིག་དེ་ཙམ་མོ། །ཞེས་བློ་དམན་རྣམས་ལ་ཕན་པའི་ཕྱིར་ཚུལ་འདི་ལྟ་བུ་ཞིག་བརྩམ་དགོས་ཞེས་ཐངས་ལ་མཁར་སྤྲུལ་སྐུ་རིན་པོ་ཆེ་ངག་དབང་ཀུན་བཟང་རང་གྲོལ་གྱིས་གསུང་གིས་སྐུལ་བར་མཛད་པའི་བཀའ་མ་ཆོག་པས་གཉོས་བཙུན་རྨོངས་པ་དྷརྨ་ཤྲཱིས་ཟིན་བྲིས་སུག་ལས་སུ་བསྟར་བའོ།། །།

གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས། གཟུངས་དབང་འགྲིགས་ཆགས་སུ་བཀོད་པའི་དབུ་ཕྱོགས་ལེགས་པར་ (Volume 40, Text 12)

༄༅། །གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས། གཟུངས་དབང་འགྲིགས་ཆགས་སུ་བཀོད་པའི་དབུ་ཕྱོགས་ལེགས་པར་བཞུགས་སོ།། ན་མོ་ཨ་མི་ཏ་བྷཱ་ཡ། རྩ་བ་གསུམ་ལ་གུས་པས་ཕྱག་འཚལ་ཏེ། །གཟུངས་དབང་ཕྱག་ལེན་འགྲིགས་ཆགས་འདིར་འགོད་བྱ། །ཆོས་བདག་སྲུང་མས་བཀའ་ཡི་གནང་བ་སྩོལ། །མཎྜལ་པདྨ་འདབ་བརྒྱད་ཚོམ་བུ་བཀོད། །བུམ་པ་གཏོར་མ་མར་མེ་བདུད་རྩི་སོགས། །མཆོད་པ་ཅི་འབྱོར་དང་བཅས་སྤྱི་ལྟར་བཤམ། །མངོན་རྟོགས་གཅིག་གིས་བདག་མདུན་བུམ་པ་གསུམ། །དུས་གཅིག་བསྐྱེད་ལ་བཟླས་པ་ཅི་འགྲུབ་བྱ། །སྤྲོ་ན་རྩ་གསུམ་ལས་བྱང་གབ་སྤྲད་དམ། །ཡང་ན་སྤྱི་སྒྲུབ་ལྟར་དུ་མཆོད་བསྟོད་བྱ། །དེ་ཡང་དབང་རྣམས་སྒྲུབ་པའི་ཕྱག་ལེན་ཏེ། །སྐད་ཅིག་བསྐྱེད་རིམ་གྱིས་ནི་དབང་སྒྲུབ་རྫོགས་པར་བྱ༔ ཞེས་གསུངས་པའི་དོན་ནོ། །དེ་ནས་སློབ་མ་རྣམས་མདུན་དུ་འཚོགས་ནས། འོ་ན་ད་ལམ་ཁྱེད་རྣམས་ལ་གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་བྱུང་བའི་དབང་ཟབ་མོ་ཞིག་བསྐུར་བ་ཡིན་ཏེ། དེའི་ལོ་རྒྱུས་ཅུང་ཟད་ཞུ་ན། བཅོམ་ལྡན་འདས་ཆོས་སྐུ་ཀུན་ཏུ་བཟང་པོས་རང་བཞིན་སྟོང་པ་ཉིད་ཀྱི་ཀློང་ནས་གྲགས་སྟོང་རྡོ་རྗེའི་གསུང་གིས། རྒྱུད་ཀྱི་རྒྱལ་པོ་ཞེས་བྱ་བའི་རྒྱུད་བཞི། རྟོགས་བརྗོད་བཞི་དང་བརྒྱད་བཀའ་བསྩལ་ཏེ། དེ་ལ་བརྟེན་ནས་སངས་རྒྱས་སྣང་བ་མཐའ་ཡས་ཀྱིས། རྒྱུད་བདག་ཞི་བའི་རྒྱུད་ལས་ཁོལ་དུ་ཕྱུང་སྟེ། ལྷ་སྤྱི་ཁྱབ་ཀྱི་གཟུངས་དབང་ཚིགས་སུ་བཅད་དེ་འཁྲུགས་བསྡེབས་ནས། སྤྲུལ་སྐུ་མི་འགྱུར་རྡོ་རྗེ་ལ་དངོས་སུ་གནང་ངོ་། །དེའི་རྡོ་རྗེའི་ཚིག་རྐང་ལས། སློབ་མ་གྲལ་འཁོད་ཁྲུས་དང་མཎྜལ་ཕུལ༔ ཞེས་གསུངས་པས། ལས་བུམ་འདིའི་ནང་ན་བཅོམ་ལྡན་འདས་རྡོ་རྗེ་སེམས་དཔའ་བཞུགས་པའི་སྐུ་ལས་བདུད་རྩིའི་རྒྱུན་བབས་ནས། ཁྱེད་རང་རྣམས་ཀྱི་སྡིག་སྒྲིབ་ཉམས་ཆག་གསང་སྔགས་ཀྱི་སྣོད་དུ་མི་རུང་བའི་ཉེས་སྐྱོན་ཐམས་ཅད་སང་སང་དག་ནས་ལུས་ཤེལ་གོང་ལྟར་གྱུར་པར་སྒོམས་ཤིག །ལས་བུམ་ཐོགས་ལ་དབྱངས་དང་བཅས༔ ཧཱུྃ། བུམ་པ་འདི་ནི་རྡོ་རྗེ་སེམས༔ ཁྱོད་ཀྱི་མགོ་ལ་བཞག་པ་ཡིས༔ སྡིག་སྒྲིབ་ཉེས་ལྟུང་དག་གྱུར་ཅིག༔ མ་རིག་དབང་རྣམས་དག་གྱུར་ཅིག༔ ཨོཾ་ཨཱཿཧཱུྃ་སྭཱ་ཧཱ༔ བཛྲ་སཏྭ་ཧཱུྃ༔ ཞེས་ཁྲུས་དང་ཆབ་བཏང་། དེ་ནས་འབྲུ་ལག་ཏུ་བླུགས་ཤིང་། འབྲུ་འདི་རྣམས་རིན་པོ་ཆེ་སྣ་བདུན་གྱིས་ཁྱེད་རང་རྣམས་ཀྱི་སྙིམ་པ་བཀང་ནས། ཡི་དམ་གྱི་ལྷ་ལ་ཕྱག་རྟེན་དུ་འབུལ་སྙམ་པའི་མོས་པ་མཛོད་ཅིག །འདི་ནི་རིན་ཆེན་སྣ་ཚོགས་ཏེ༔ ཁྱོད་ཀྱིས་ལྷ་ལ་ཕུལ་བ་ཡིས༔ བསམ་དོན་ཡིད་བཞིན་འགྲུབ་པར་ཤོག༔ དེ་ནས་མཆོད་གཡོག་པས་གཟུང་ངམ། ཉུང་ན་མདུན་དེར་མཎྜལ་གཅིག་བཞག་ལ། ད་ལིའི་མཎྜལ་འདི་རིན་ཆེན་གསེར་གྱི་ས་གཞི་གླིང་བཞི་གླིང་ཕྲན་བརྒྱད་དང་བཅས་པར་སྒོམས་ལ། དེའི་སྟེང་དུ་ཁྱེད་རང་རྣམས་ཀྱིས་འབྲུ་རིན་པོ་ཆེ་བླུགས་པས། གསེར་དང་གཡུ་ལ་སོགས་རིན་པོ་ཆེ་སྣ་བདུན་གྱིས་གླིང་བཞི་ཕྱུར་བུར་བཀང་སྟེ། གསང་སྔགས་ཀྱི་དབང་ཟབ་མོ་ཞུ་བའི་དོན་དུ་འབུལ་སྙམས་པས་མཎྜལ་སྟེང་དུ་ནས་གཏོར་ཞིང་རྗེས་ཟློས་མཛོད། ལི་ཡི་མཎྜལ་རིན་ཆེན་བསྒྱུར་བྱས་ནས༔ ནས་རྣམས་ཀུན་ཀྱང་གསེར་གཡུར་བསྒྱུར་ནས་ཀྱང༔ བླ་མ་ཐུགས་རྗེ་སྤྲུལ་པའི་སྐུ་གཅིག་ལ༔ དད་པས་འབུལ་ལོ་ཐུགས་རྗེས་བདག་གཞན་གཟིགས༔ དེ་ཡང་གནམ་ཆོས་ཐུགས་ཀྱི་གཏེར་ཁ་འདི་ནི་བཀའ་མ་ཡང་ཡིན་ཏེ་ལྷ་སོ་སོའི་ཞལ་ནས་དངོས་སུ་གསུངས། གཏེར་མ་ཡང་ཡིན་ཏེ་ཐུགས་ཀྱི་གཏེར་ནས་ཕྱུང་། གནམ་ཆོས་ཡིན་ཏེ་ས་ལ་མ་བརྟེན་པར་ནམ་མཁའ་ནས་གསུངས། འདི་ལ་ཡང་བླ་མ་ཡི་དམ་མཁའ་འགྲོ་ཆོས་སྐྱོང་གི་དབང་དང་སྒྲུབ་ཐབས་དཔག་ཏུ་མེད་པ་ཡོད་པའི་ནང་ནས་ད་ལམ་ཆེ་གེའི་དབང་བསྐུར་བ་ལ། རྡོ་རྗེའི་ཚིག་རྐང་ལས། སློབ་མ་དུ་ཡོད་རྣམས་ཀྱི་ཞལ་ནས་འདི་སྐད་ཞུ་རུ་བཅུག༔ ཅེས་གསུངས་པས་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང༔ ཁྱད་པར་ཆེ་གེ་ལ༔ གསོལ་བ་འདེབས་སོ་དབང་བསྐུར་སྩོལ༔ གསུམ་བརྗོད། ཡང་གསོལ་བ་འདེབས་པའི་གཟུངས་འདིའི་རྗེས་ཟློས་མཛོད། ཨཱོཾ་བཀའ་དུ་བཀའ་ཏྲ༔ སྱ་མྱ་ཧྱ༔ ད་གསང་སྔགས་ཀྱི་དབང་ཟབ་མོ་ཞུ་བའི་ཐོག་མར་ཐེག་པ་ཆེན་པོའི་སྐྱབས་སེམས་ཀྱི་སྡོམ་པ་འཛིན་དགོས་པས་བདུན་རྣམ་དག་གསར་རྙིང་གི་རྒྱུད་སྡེ་རྣམས་ནས་གསུངས་པ་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་དགེ་ལ་རྗེས་ཡི་རང༔ སངས་རྒྱས་བྱང་ཆུབ་ཡིད་ཀྱིས་གཟུང༔ སངས་རྒྱས་ཆོས་དང་ཚོགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་ནི་རབ་བསྒྲུབ་ཕྱིར༔ བྱང་སེམས་ནི་བསྐྱེད་པར་བགྱི༔ བྱང་ཆུབ་སེམས་ནི་བསྐྱེད་བགྱིས་ནས༔ སེམས་ཅན་ཐམས་ཅད་མགྲོན་དུ་གཉེར༔ བྱང་ཆུབ་སྤྱོད་མཆོག་མཛད་བཞིན་སྤྱད༔ འགྲོ་ལ་ཕན་ཕྱིར་སངས་རྒྱས་ཤོག༔ སྔར་དབང་མང་དུ་ཐོབ་ན་ཚིག་ཐ་མ་ལན་གསུམ། གསར་དུ་ཡིན་ན་ཚང་མ་ལན་གསུམ་གལ་ཆེ། དེ་ལྟར་སློབ་མ་རྣམས་ཀྱིས་རང་ལ་ཞུས་ནས། སྣོད་ལྡན་དུ་ངོས་འཛིན་པའི་གཟུངས་ནི༔ སངས་རྒྱས་སློབ་དཔོན་རང་གི་ཞལ་ནས་འདི་སྐད་ཅེས་ནི་གསུང་བར་བྱ༔ ཞེས་རྡོ་རྗེའི་ཚིག་རྐང་ལས་བྱུང་བ་ལྟར། བླ་མ་དང་ཡི་དམ་གྱི་ལྷ་ཆེ་གེས་ཁྱེད་ཅག་སྣོད་དང་ལྡན་པས་རྗེས་སུ་གཟུང་ངོ༔ ཞེས་གནང་བ་བྱིན་པའི་མོས་པ་མཛོད། ཏྱེ་ཐྱེ་ྪདྷྱ་ཧ་ཧཱུྃ་ལྱ༔ ཡང་རྡོ་རྗེའི་ཚིག་རྐང་ལས། སློབ་དཔོན་སངས་རྒྱས་དངོས་ཀྱིས་དེ་སྐད་ཅེས་ནི་གསུངས་ཚར་ནས༔ སློབ་མ་ཡིས་ནི་འདི་སྐད་ཅེས་བརྗོད་དད་གུས་བསྐྱེད་པར་བྱ༔ ཞེས་གསུངས་པས། བླ་མ་དང་ཡི་དམ་ཐ་དད་མེད་ཅིང་སངས་རྒྱས་ཀུན་འདུས་ཀྱི་ངོ་བོ་ཡིན་སྙམ་དུ་དད་གུས་རྩེ་གཅིག་པས། དད་པ་བསྐྱེད་པའི་གཟུངས་འདིའི་རྗེས་ཟློས་མཛོད། ཧ་ཧ་ཧ་ཧ་ཧ་ཧ་ཧ༔ ཧཱུྃ་ཧཱུྃ་ཧཱུྃ་ཧཱུྃ༔ དེ་ནས་ཡེ་ཤེས་པ་འབེབ་པ་ནི། ཁྱེད་རྣམས་ཆེ་གེར་གསལ་བར་སྒོམས༔ རྒྱས་པར་འདིར་མངོན་རྟོགས་བཙུད། བདག་དང་ཁྱོད་མདུན་དེ་ལྟར་སྒོམས༔ རང་རང་སོ་སོའི་གནས་མཆོག་ནས༔ སྤྲུལ་པ་ཡང་སྤྲུལ་དཔག་མེད་པ༔ མཚོ་ལ་ཆར་པ་བབས་བཞིན་དུ༔ ཁྱོད་ཉིད་ལ་ནི་ཐིམ་པར་སྒོམས༔ རོལ་མོ་དབྱངས་དང་བཅས་པས། ཧཱུྃ༔ ཆེ་གེའི་ལྷ་ཚོགས་མ་ལུས་རྣམས༔ གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ༔ སྐལ་ལྡན་དད་ལྡན་འདི་ལ་དབང་མཆོག་སྐུར༔ ལོག་འདྲེན་ཚེ་ཡི་བར་ཆད་བསལ་དུ་གསོལ༔ རྩ་སྔགས་དང་། ཨོཾ་བཛྲ་ཨཱ་ཝེ་ཤ་ཡ་ཨ་ཨཱ༔ ཞེས་སྔགས་དང་རོལ་མོ་ཡུན་རིང་བྱའོ། །དེ་ནས་ཁྱོད་ལ་ཐིམ་པ་དེ་ཇི་སྲིད་བར་དུ་བརྟན་པར་སྒོམས། རྡོ་རྗེ་སྤྱི་བོར་བཞག་ནས་ནི། ཏིཥྛ་བཛྲ༔ ཞེས་བརྗོད་དོ། །དེ་ཡང་རྡོ་རྗེའི་ཚིག་རྐང་ལས། དེ་ནས་ལག་ཏུ་བུམ་པ་ཐོགས་ཏེ་འདི་སྐད་ཅེས་ནི་བརྗོད་པ་ཡིས༔ གང་ཡིན་བུམ་པའི་དབང་ནི་སློབ་མ་དེ་ལ་ཡོངས་རྫོགས་འགྱུར་བའོ༔ ཞེས་གསུངས་པས། བུམ་པ་འདི་ནི་ཕྱི་བུམ་པ་ལ་ནང་རིན་པོ་ཆེའི་གཞལ་ཡས་ཁང་དུ་གྱུར་པའི་ནང་དུ་ཆེ་གེའི་ལྷ་ཚོགས་དངོས་སུ་བཞུགས་པའི་སྐུ་ལས་བདུད་རྩིའི་རྒྱུན་བབས། ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་ཞུགས་ཏེ། ལུས་ཀྱི་གནས་བཞི་གང་། སྒྲིབ་པ་བཞི་དག །དབང་བཞི་ཐོབ། སྐུ་བཞི་མངོན་དུ་བྱེད་པའི་སྐལ་པ་ཅན་དུ་གྱུར་པར་སྒོམས་ཤིག །ཧཱུྃ༔ བུམ་པ་འདི་ནི་རིན་ཆེན་ཁང༔ ཆེ་གེ་འཁོར་བཅས་བཞུགས་པ་ཡིས༔ རིགས་ཀྱི་བུ་ལ་དབང་བསྐུར་བས༔ དབང་བཞི་ཡོངས་རྫོགས་ཐོབ་པར་ཤོག༔ བུམ་དབང་བསྐུར་བའི་གཟུངས་ནི་འདི༔ ཀུམ་བྷ་པ་ནི་ཀ་ཡེ༔ འབར་འབུ་ཨ་ཡི་ཀ་ཀི་ཀ་ཀོ༔ འདིའི་སྐབས་སུ་ལྷ་གང་ཡིན་དེའི་སྔགས་བརྗོད་མགོ་ལ་བཞག །དེ་ནས་རྡོ་རྗེའི་ཚིག་རྐང་ལས། སློབ་མས་དད་གུས་བསྐྱེད་ནས་སློབ་དཔོན་གྱིས་ནི་གཏོར་མ་ཐོགས་ལ་འདི་སྐད་དོ༔ ཞེས་གསུངས་པའི་དོན། གཏོར་མ་འདི་ཉིད་འདི་ལྟ་བུ་མ་ཡིན་པར། ཆེ་གེའི་ལྷ་ཚོགས་སྔར་སྨྲོས་མ་ཐག་པའི་མཚན་ཉིད། སྟེང་གི་ཆ་ལ་རིག་འཛིན་གྲུབ་ཐོབ་རྒྱ་མཚོ། བར་གྱི་ཆ་ལ་ཡི་དམ་རྒྱུད་སྡེ་དྲུག་གི་ལྷ་ཚོགས། འོག་གི་ཆ་ལ་ཡེ་ཤེས་ཀྱི་ཆོས་སྐྱོང་སྲུང་མའི་ལྷ་ཚོགས་སྤྲིན་འཁྲིགས་པ་ལྟ་བུ་ཁྱེད་རང་གི་སྤྱི་བོར་བྱོན་ཏེ། དེ་རྣམས་ཀྱི་སྐུ་གསུང་ཐུགས་ལས་འོད་ཟེར་ཁ་དོག་སྣ་ཚོགས་འཕྲོས་ཏེ་ཁྱེད་རང་རྣམས་ལ་ཐིམ་པས། དབང་དང་བྱིན་རླབས་དངོས་གྲུབ་ཐམས་ཅད་ཐོབ་ཅིང་། ངེད་ཀྱིས་ཇི་ལྟར་གསོལ་བ་བཏབ་པ་བཞིན་དུ་བྱིན་རླབས་དངོས་གྲུབ་ཐམས་ཅད་ད་ལྟ་ཉིད་དུ་གནང་ཞིང་ཐོབ་བྱུང་སྙམ་པའི་མོས་པ་རྩེ་གཅིག་ཏུ་མཛོད་ཅིག །ཧཱུྃ༔ གཏོར་མ་འདི་ནི་ཆེ་གེ་ཡིན༔ མ་ལུས་འཁོར་བཅས་ལྷམ་མེར་བཞུགས༔ བུ་ཁྱོད་ལ་ནི་དབང་བསྐུར་བས༔ དབང་བཞི་ཡོངས་སུ་རྫོགས་ཐོབ་ཤོག༔ ཆོས་སྐུ་ཀུན་བཟང་ཡབ་ཡུམ། ལོངས་སྐུ་རིགས་ལྔ་ཡབ་ཡུམ། སྟོན་པ་རྡོ་རྗེ་སེམས་དཔའ། རིག་འཛིན་དགའ་རབ་རྡོ་རྗེ། མཁས་པ་ཤྲཱི་སིཾ་ཧ། རྒྱ་གར་གྱི་རིག་འཛིན་ཆེན་པོ་བརྒྱད། འཆི་མེད་པདྨ་འབྱུང་གནས། རྗེ་འབངས་ཉི་ཤུ་རྩ་ལྔ་ལ་སོགས་པ་རིག་འཛིན་བརྒྱུད་པའི་བླ་མ་དམ་པ་རྣམས་དང་། ཁྱད་པར་དུ་ཆེ་གེའི་ལྷ་ཚོགས་འཁོར་དང་བཅས་པས། རྡོ་རྗེའི་སློབ་མ་འདི་རྣམས་ལ་བྱིན་གྱིས་རློབས་ཤིག །ད་ལྟ་ཉིད་དུ་བྱིན་གྱིས་རློབས་ཤིག །མྱུར་བ་ཉིད་དུ་བྱིན་གྱིས་རློབས་ཤིག །འདི་རྣམས་ཀྱི་ལུས་ངག་ཡིད་གསུམ་ལ་གནོད་ཅིང་འཚེ་བར་བྱེད་པའི། སྟེང་གདོན་གཟའ་རྒྱུ་སྐར། འོག་གདོན་ཀླུ་ས་བདག །བར་གདོན་གཉན་ཐེའུ་རང་ལ་སོགས་པ་གདོན་རིགས་སྟོང་ཕྲག་བརྒྱད་ཅུའི་གནོད་པ་ཐམས་ཅད་ཉེ་བར་ཞི་བར་བྱིན་གྱིས་རློབས་ཤིག །རླུང་ལས་གྱུར་པ། མཁྲིས་པ་ལས་གྱུར་པ། བད་ཀན་ལས་གྱུར་པ། འདུས་པ་ལས་གྱུར་པ་ལ་སོགས་པ་ནད་རིགས་བཞི་བརྒྱ་རྩ་བཞིའི་གནོད་པ་ཐམས་ཅད་ཉེ་བར་ཞི་བར་བྱིན་གྱིས་རློབས་ཤིག །ཚེ་དང་བསོད་ནམས་དཔལ་དང་འབྱོར་པ་ཡོན་ཏན་ཡེ་ཤེས་ཐམས་ཅད་ཟླ་བ་ཡར་གྱི་ངོ་ལྟར་འཕེལ་ཞིང་རྒྱས་པར་བྱིན་གྱིས་རློབས་ཤིག །འཆི་མེད་ཚེའི་དངོས་གྲུབ་རླུང་སེམས་སྣང་བ་ཐམས་ཅད་དབང་དུ་འདུས་པར་བྱིན་གྱིས་རློབས་ཤིག །བྱང་ཆུབ་སྒྲུབ་པའི་བར་ཆད་བདུད་བཞི་ལོག་འདྲེན་ཐམས་ཅད་ཚར་ཆོད་པར་བྱིན་གྱིས་རློབས་ཤིག །སྐྱེ་བ་འདི་ནས་ཚེ་རབས་ཐམས་ཅད་དུ། ཆེ་གེའི་ལྷ་ཚོགས་རྣམས་ཀྱིས་རྡོ་རྗེའི་སློབ་མ་འདི་རྣམས་ཀྱི་ལྷག་པའི་ལྷ་མཛོད། ཉིན་གསུམ་གྱི་བྱ་ར་མཛོད། མཚན་གསུམ་གྱི་མེལ་ཚེ་མཛོད། དུས་མ་ཡིན་པའི་འཆི་བ་དང་། འཁོར་བ་དང་ངན་སོང་གི་སྡུག་བསྔལ་ཐམས་ཅད་ལས་བསྐྱབ་པར་མཛད་དུ་གསོལ། གཏོར་མའི་དབང་བསྐུར་གཟུངས་ནི་འདི༔ མ་ཉི་མ་ཏ་ཡ་ཀ་དི་མ་ཧུ༔ ཧ་སྱ་ལ་སྱ་སེ་ལེ་ཡེ༔ ལྱ་ལྱེ་པྱ་ཏྱ་ཧྱ་ཧཱུྃ་ཧྱ༔ དེ་ནས་རྡོ་རྗེའི་ཚིག་རྐང་ལས། སོ་སོའི་སྐུ་གཟུགས་སློབ་མའི་ལག་ཏུ་གཏད༔ ཅེས་གསུངས་པས། སྐུ་གཟུགས་འདི་ཉིད་ཆེ་གེ་མོ་དངོས་སུ་གསལ་བའི་སྐུའི་གནས་རྣམས་ནས་རང་འདྲ་བའི་སྐུ་དཀར་སེར་དམར་ལྗང་མཐིང་གའི་ཚོགས་འཕྲོས་ནས། ཁྱེད་རང་རྣམས་ཀྱི་གནས་སོ་སོར་ཐིམ་པས། སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་ཡོངས་སུ་རྫོགས་པ་ཐོབ་པར་སྒོམས་ཤིག །ཧཱུྃ༔ ཆེ་གེའི་སྐུ་གཟུགས་ལ༔ ཆེ་གེའི་ལྷ་ཚོགས་རྫོགས༔ སློབ་མ་ཁྱོད་ལ་དབང་བསྐུར་བས༔ ཆེ་གེའི་ལྷ་ཚོགས་ཀྱི༔ དབང་བཞི་ཡོངས་སུ་རྫོགས་ཐོབ་ཤོག༔ སྐུ་དབང་བསྐུར་བའི་གཟུངས་ནི་འདི༔ ལྷབ་ལྷབ་ལྗིམ་པ་ཉྱ་ཧ་སྱ་ཡེ༔ ཧཱ་ཏྲཾ༔ ཀ་ལི་ཀི་ལི་ཀཱ་ཏྲཾ༔ པ་ལེ་པི་ལེ་ཀ་ཏཾ༔ བ་ལེ་བི་ལེ་ཀ་ཏཾ༔ ཧ་ཧཱུྃ་པ་ཏིམ་བ་ཏིམ༔ དེ་ཉིད་མགོར་བཞག །དེ་ནས་རྡོ་རྗེའི་ཚིག་རྐང་ལས། སློབ་མའི་ལག་ཏུ་མར་མེ་གཏད༔ སློབ་མས་ཕྱག་གསུམ་འཚལ་ནས་འདི་སྐད་ཞུ་བར་བྱ༔ ཞེས་གསུངས་པའི་དོན། མར་མེ་འདི་ཁྱོད་ལ་གཏད་པས། མ་རིག་པའི་མུན་པ་སངས་ནས། ཡི་དམ་ཆེ་གེ་དངོས་སུ་མཇལ་བའི་དབང་ཐོབ་པར་སྒོམས་ཤིག །ཧཱུྃ༔ ཡེ་ཤེས་སྣང་བ་ཆེན་པོ་ཡི༔ སྔགས་འཆང་རྒྱལ་པོས་སྒྲོན་མེ་སྦྱིན༔ འདི་ལ་བརྟེན་ནས་བུ་ཁྱོད་ཀྱང༔ ཡི་དམ་ལྷ་དང་འཕྲད་པར་ཤོག༔ ཨོཾ་བཛྲ་དྷཱི་པཾ་ཨ་བྷི་ཥིཉྩ་ཧཱུྃ༔ དེ་ནས་རྡོ་རྗེའི་ཚིག་རྐང་ལས། སློབ་མས་ཕྱག་གསུམ་འཚལ་ནས་འདི་སྐད་ཞུ་བར་བྱ༔ ཞེས་གསུངས་པའི་དོན། བླ་མ་དང་དཀྱིལ་འཁོར་གྱི་ལྷ་ལ་སྣང་གསལ་གྱི་མར་མེ་མདངས་དང་ལྡན་པ་རེ་ཕུལ་བས། མ་རིག་པའི་སྒྲིབ་པ་ཐམས་ཅད་དག་ནས། ཚེ་རབས་ཐམས་ཅད་དུ་བྱང་ཆུབ་ཀྱི་ལམ་གེགས་དང་གོལ་ས་མེད་པ་གསལ་པོར་མཐོང་བའི་མོས་པས། མར་མེ་འདི་ངེད་ལ་ཕུལ་ནས་ཕྱག་གསུམ་འཚལ་བའི་མོས་པས། མགོ་བོས་འདུད་པ་གསུམ་དང་བཅས་ཏེ། མར་མེ་འབུལ་བའི་གཟུངས་འདིའི་རྗེས་ཟློས་མཛོད། མ་ཧཱ་གུ་རུ་ཙིཏྟ༔ མ་མ་ཏ་རི་ཀྵ༔ ཥ་ཧ་ནྱ་ཧྱ༔ དེ་ནས་རྡོ་རྗེའི་ཚིག་རྐང་ལས། འབྲས་སྙེ་ཐོགས་ཏེ་སློབ་མའི་མགྲིན་པར་བཞག་ལ་འདི་སྐད་བརྗོད་པའོ༔ ཞེས་གསུངས་པའི་དོན། འབྲས་སྙེ་འདི་ཡང་བཅོམ་ལྡན་འདས་ལྷ་མོ་ནོར་རྒྱུན་མའི་ཕྱག་ན་གནས་པའི་འབྲས་སྙེ་ལྟར། ཡིད་ལ་བསམ་པའི་འདོད་དོན་ཐམས་ཅད་སྐད་ཅིག་ལ་འགྲུབ་པའི་རིན་པོ་ཆེའི་འབྲས་ཀྱི་སྙེ་མ་འདི་ཁྱེད་རང་རྣམས་ཀྱི་མགྲིན་པ་ལོངས་སྤྱོད་ཀྱི་འཁོར་ལོའི་གནས་སུ་བཞག་པས། ཚེ་དང་བསོད་ནམས་ལོངས་སྤྱོད་ཐམས་ཅད་འཕེལ་ཞིང་གསུང་དབང་ཡོངས་རྫོགས་ཐོབ་པར་སྒོམས་ཤིག །ཧཱུྃ༔ འདི་ནི་རིན་ཆེན་འབྲས་སྙེ་སྟེ༔ ཁྱོད་ཀྱི་མགྲིན་པར་བཞག་པ་ཡིས༔ ཆེ་གེའི་གསུང་དབང་ཀུན༔ མ་ལུས་ཁྱོད་ཀྱིས་ཐོབ་པར་ཤོག༔ འབྲས་དབང་བསྐུར་བའི་གཟུངས་ནི་འདི༔ ཨ་ཥི་ཧ་ཀྵི་པ༔ ཀྵི་ཀྵི་ཀྵི༔ བེ་གེ་ནཱ་ཧ༔ <!TCC Tibetan character 4,200 undefined in unicode!>ེྰ་<!TCC Tibetan character 4,200 undefined in unicode!>ེྰ་ཧེ་ཧེ༔ ཧྱེ་ཧྱ་ཀ་ཏི་ཀ་ཀ་ཏི༔ དེ་ནས་རྡོ་རྗེའི་ཚིག་རྐང་ལས། ཨ་དཀར་རམ་ནི་དུང་དཀར་ཐོགས་ལ་སྔགས་འདི་བརྗོད༔ ཅེས་གསུངས་པའི་དོན། རིན་པོ་ཆེ་དུང་དཀར་པོ་གཡས་སུ་འཁྱིལ་ཞིང་ཨ་ཡིག་དཀར་པོས་མཚན་པ། ནང་གི་རྩ་རྗེས་ལ་རིགས་ལྔའི་ཕྱག་མཚན་དང་དབྱངས་གསལ་གྱི་ཡི་གེ་བཀྲ་ཤིས་པའི་རྟགས་བརྒྱད་ལ་སོགས་པ་རང་གྲུབ་ཡོད་པ་གཅིག་ཁྱེད་རང་རྣམས་ཀྱི་སྙིང་གར་བཞག་པས། ཐུགས་དབང་ཡོངས་རྫོགས་ཐོབ་ནས་སྟོང་གསུམ་ཆོས་སྒྲས་འགེངས་པའི་དབང་དང་ལྡན་པར་སྒོམས་ཤིག །ཧཱུྃ༔ དུས་གསུམ་རྒྱལ་བ་ཀུན་གྱི་སྐུ་གསུང་ཐུགས༔ གཡས་འཁྱིལ་རྩ་རྗེས་ཡོངས་རྫོགས་དོད་པ་འདི༔ བུ་ཁྱོད་སྙིང་གར་གཏུགས་པའི་བྱིན་རླབས་ཀྱིས༔ ཆེ་གེའི་ཐུགས་དབང་ཡོངས་རྫོགས་ཐོབ་པར་ཤོག༔ དུང་དབང་བསྐུར་བའི་གཟུངས་ནི་འདི༔ ཨ་ཨ༔ ཨ་ཨ༔ ཨ༔ དུམ་དུམ༔ དུམ་དུམ༔ དུམ་དུམ༔ ཧ་ཧ་ཧ༔ ཧ་ཧ༔ ཧ་ཧ༔ ཀི་ཏིམ་བླ་ན༔ ཀ་ཀོ་སེང་པ་ཏིམ༔ ཡང་རྡོ་རྗེའི་ཚིག་རྐང་ལས། ཞིང་དབྱུག་གམ་ནི་ཐོད་རློན་ཕྲེང་བ་སློབ་མའི་ལག་བཞག་ལ༔ ཞེས་གསུངས་པས། ཞིང་ཆེན་དབྱུག་པའི་རྒྱལ་མཚན་དང་ཐོད་ཕྲེང་འདི་གཏད་པས། གསང་སྔགས་ཀྱི་བསྟན་པ་མི་ནུབ་པའི་རྒྱལ་མཚན་འཛིན་ཅིང་། ཡོན་ཏན་ཕྲིན་ལས་ཀྱི་དབང་ཐོབ་ནས། མ་མོ་མཁའ་འགྲོ་བྲན་དུ་ཁོལ་བ་དང་། སྔགས་ཀྱི་ནུས་མཐུ་ཐོགས་པ་མེད་པའི་དབང་ཐོབ་པར་སྒོམས་ཤིག །ཧཱུྃ༔ སློབ་མ་རིགས་ཀྱི་བུ་ཁྱོད་ལ༔ ཞིང་དབྱུག་ཐོད་ཕྲེང་དབང་བསྐུར་བས༔ ཆེ་གེའི་ལྷ་ཚོགས་ཀྱི༔ སྐུ་གསུང་ཐུགས་ཡོན་དབང་ཐོབ་ཤོག༔ ཞིང་དབྱུག་གམ་ནི་ཐོད་ཕྲེང་གིས༔ དབང་བསྐུར་གཟུངས་ནི་འདི་ལྟར་རོ༔ གྷི་ཧུ་ར་ཧ་སྱེ༔ ཧེ་ཨ་ཧཱུྃ་ཧཱུྃ༔ དེ་ནས་རྡོ་རྗེའི་ཚིག་རྐང་ལས། བཙན་དུག་སྡོང་པོ་དང་ནི་བདུད་རྩི་ལག་ཐོགས་ལ༔ ཞེས་གསུངས་པའི་དོན། གསང་སྔགས་ཀྱི་དབང་ཟབ་མོ་འདི་ལྟ་བུ་ཐོབ་ནས་དམ་ཚིག་མ་བསྲུང་ན་ནི། བཙན་དུག་གི་སྡོང་པོ་ཟོས་པ་དང་འདྲ་སྟེ། ཚེ་འདིར་བཀའི་ཆད་པས་སྡུག་བསྔལ་སྣ་ཚོགས་བསྐྱེད་ཅིང་ཚེའི་དུས་བྱེད། ཕྱི་མའང་རྡོ་རྗེའི་དམྱལ་བ་ཆེན་པོར་ལྟུང་ནས་ཐར་པའི་སྲོག་ཆད། དམ་ཚིག་བསྲུངས་ན་འཆི་མེད་ཀྱི་བདུད་རྩི་འཐུངས་པ་ལྟར། ཚེ་འདིར་བདེ་ལེགས་ཐམས་ཅད་འབྱུང་ཞིང་། ཕྱི་མའང་དག་པའི་ཞིང་ཁམས་སུ་ངེས་པར་སྐྱེ་བས། དེས་ན་དམ་ཚིག་མང་ཡང་བསྡུ་ན། བླ་མ་ཡི་དམ་གྱི་ལྷ་དབྱེར་མེད་དུ་མོས་གུས་བསྐྱེད་ལ་དུས་ནམ་ཡང་མི་སྤང་སྙམ་པ་གྱིས་ལ་རྗེས་ཟློས་མཛོད། གཙོ་བོ་ཁྱེད་ཀྱིས་ཅི་གསུངས་པ༔ གསུངས་བཞིན་མ་འཆུགས་བདག་གིས་བསྒྲུབ༔ དེང་ནས་གཟུང་སྟེ་ཅི་སྲིད་དུ༔ གཙོ་བོའི་བཀའ་ལས་མི་འདའ་བསྒྲུབ༔ དབང་ཐོབ་དམ་ཚིག་གཟུངས་ནི་འདི༔ ས་མ་ཡ་ཀ་ཧི་ཧ་པ་ཧཱུྃ༔ རྡོ་རྗེའི་ཚིག་རྐང་ལས། བཙན་དུག་སྡོང་པོས་བདུད་རྩི་བསྒྲེས་ཏེ་སློབ་མའི་ལག་བཞག་ལྕེས་བལྡག་སྟེ༔ ཞེས་གསུངས་པའི་དོན། དམ་ཚིག་མ་བསྲུང་ན་དུག་དང་། དམ་ཚིག་བསྲུངས་ན་བདུད་རྩིར་འགྱུར་བའི་བརྡ་དོན་གོ་མཛོད་ལ། དུག་གི་སྡོང་པོས་བླངས་པའི་བདུད་རྩི་འདི་ཐུངས་ཤིག །ཅེས་བདུད་རྩི་བྱིན་ལ། དམ་ཚིག་སྲུང་བའི་གཟུངས་འདིའི་རྗེས་ཟློས་མཛོད། ཀ་ཏི་ཀ་ས་མ་ཡ༔ ཨ་མྲྀཏ་ལའི༔ ཧ་ལ་ཧ་ལ༔ པ་ག་ས་མ་ཡ༔ ཨ་དྷེ་བ༔ ཨ་ས་མ་ཡ༔ ན་ར་ཀ༔ ག་ཛ་སྭཱ་ཧཱ༔ དེ་ནས་རྗེས་ཀྱི་བྱ་བ་རྡོ་རྗེའི་ཚིག་རྐང་ལས། གོང་བཞིན་དམ་ཚིག་ཉམས་ན་དམྱལ་བར་ལྟུང་བས་བསྲུང་བར་གྱིས་ལ་མཎྜལ་ཕུལ༔ ཞེས་འབྱུང་བས། གཏང་རག་གི་མཎྜལ་དུ། སྲིད་པ་གསུམ་གྱི་བསོད་ནམས་དགེ་ཚོགས་གླིང་བཞི་རི་རབ་དང་བཅས་ཏེ་ཆེ་གེའི་ལྷ་ཚོགས་ལ་བློས་བླངས་ཏེ་འབུལ་སྙམ་པས་འདིའི་རྗེས་ཟློས་མཛོད། ཀྱཻ༔ བླ་མ་ཆེ་གེ་ལ༔ གླིང་བཞི་སྲིད་པའི་དགེ་ཚོགས་ནི༔ ཅི་མཆིས་བསྡུས་ཏེ་མཎྜལ་འབུལ༔ དེ་ཡང་གཟུངས་དབང་རྡོ་རྗེའི་ཚིག་རྐང་ལས། འདི་ནི་ཡེ་ཤེས་པ་དང་འཇིག་རྟེན་འདས་དང་མ་འདས་སོ་མཚམས་པ༔ ཀུན་ལ་དབང་བསྐུར་འདི་ཡི་རིགས་འགྲེས་ཀུན་ལ་བྱ༔ འཇིག་རྟེན་པ་ཡི་ལྷ་ལ་དབང་བསྐུར་འདི་ནི་བྱ་བར་མི་རུང་ངོ༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ་གུ་ཧྱ༔ ཞེས་སངས་རྒྱས་སྣང་བ་མཐའ་ཡས་ཉིད་ཀྱིས་བཀའ་བསྩལ་པ་ལྟར། ཆེ་གེའི་གཟུངས་དབང་ཐོབ་པ་ཡིན་པས། བསྙེན་པ་སོགས་རང་གཞན་གྱི་དོན་ལ་བརྩོན་པར་མཛོད་ཅིག །ཅེས་སློབ་མ་གྲོལ། རྗེས་ཆོག་སྤྱི་ལྟར་རོ། །དང་པོ་བདག་མདུན་གསལ་གདབ། བསྙེན་པ་ཅུང་ཟད་བྱ་ཞིང་ཏིང་ངེ་འཛིན་གྱིས་དབང་བླངས་པས་རང་གི་བྱིན་རླབས་མི་ཉམས་པའོ། །རྒྱས་པར་ཚོགས་གཏོར་འབུལ་བྱ། བསྡུ་ན་མཆོད་བསྟོད་བྱ་ཞིང་། ཡེ་ཤེས་པ་དང་དམ་ཚིག་པ་ཐམས་ཅད་བདག་ཉིད་ལ་བསྡུ་སྟེ། རྩ་གསུམ་མཆོད་ཕྲེང་མཇུག་ལྟར་རོ། །ཞེས་པ་སྤྲུལ་སྐུ་ཉིད་ཀྱི་བཀས་བསྐུལ་ཏེ། ཉིད་ཀྱི་གནམ་ཆོས་ནང་ནས་སབ་འོས་སབ་སྟེ། ཀརྨ་ཨ་རཱ་གས་བཀོད་པ་ལ་ཉེས་འགལ་མཆིས་ན་རྩ་གསུམ་བཀའ་སྲུང་རྣམས་ལ་བཤགས། དགེ་བས་བསྟན་པ་འཕེལ་ཞིང་རྒྱས་གྱུར་ཅིག །མངྒ་ལཾ།། །།

གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་ཆོས་སྐྱོང་དང་བཀའ་སྲུང་སྤྱིའི་བཀའ་གཏད་སྲོག་དབང་ཕྱག་ལེན་འགྲིགས་ཆགས་སུ་བསྡེབས་པ་ (Volume 40, Text 13)

༄༅། །གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་ཆོས་སྐྱོང་དང་བཀའ་སྲུང་སྤྱིའི་བཀའ་གཏད་སྲོག་དབང་ཕྱག་ལེན་འགྲིགས་ཆགས་སུ་བསྡེབས་པའོ།། ན་མོ་གུ་རུ་པད་མ་བཛྲཱ་ཡ། དྷེ་རུ་པའི་དབང་གི་མཐར་སྡེ་བརྒྱད་དང་ཆོས་སྐྱོང་སྤྱིའི་བཀའ་གཏད་བྱུང་བའི་གཞུང་ལས། དེ་ནས་དྲེགས་པའི་སྲོག་དབང་ནི༔ དབང་སྒྲུབ་གོང་ལྟར་བྱས་ལ༔ ཞེས་གསུངས་པའི་དོན་ནི། མཎྜལ་ནས་ཀྱི་ཚོམ་བུ་པདྨ་འདབ་བརྒྱད་སྟེང་དུ། རབ་དར་ནག་གི་སྐུའམ་མ་རྙེད་ན་ཐང་སྐུའམ་ཙཀླི་བཤམ། ལྷ་གང་ཡིན་གྱི་གཏོར་མའམ་མ་འབྱོར་ན་སྤྱིའི་དམར་གཏོར་རམ། དཀར་གཏོར་གང་འོས་བཤམ། ཕྱག་མཚན་དངོས་སམ་ཙཀ་ལི། ནས་ཏིང་གང་ཡང་བཤམ། གང་འཛོམ་གྱི་མཆོད་པ་བཤམས་ལ། རང་ཉིད་ཡི་དམ་གང་ཡིན་གྱི་ལས་བྱང་མངོན་རྟོགས་བསྒོམ། ལས་བུམ་དུ་སྐད་ཅིག་གིས་རྟ་མགྲིན་བསྐྱེད། རྒྱས་པར་ནི་ཆོས་སྐྱོང་ངམ་བཀའ་སྲུང་སོ་སོའི་མངོན་རྟོགས་དང་ལས་བྱང་སོ་སོའི་གང་འོས་གབ་སྤྲད་ལ་འདོན། དེ་ནས་སོ་སོའི་སྔགས་གང་ཡིན་བསྙེན་པ་བརྒྱ་རྩ་བརྒྱད་ཙམ་བྱས་ལ། དེ་ནས་སློབ་མ་རྣམས་མདུན་དུ་འཁོད་དོ། །འོ་ན་ད་ལམ་ཁྱེད་རྣམས་ལ་ཆོས་སྐྱོང་ངམ་བཀའ་སྲུང་ཆེ་གེའི་བཀའ་གཏད་བྱེད་པ་ཡིན་ཏེ། དེ་ལ་གནམ་ཆོས་ཐུགས་ཀྱི་གཏེར་ཁ་འདི་ལ་མིང་གི་མངོན་བརྗོད་ཅེས་བྱ་བའི་རྒྱུད་བུ་ཆུང་ཞིག་བྱུང་སྟེ། རྒྱུད་དེའི་དོན་རྒྱས་པར་བཀྲོལ་བ་བླ་མ་ཡི་དམ་མཁའ་འགྲོ་ཆོས་སྐྱོང་གི་སྒྲུབ་ཐབས་རིགས་མི་གཅིག་པ་བརྒྱ་ཡོད་དོ། །དེ་དག་རེ་རེ་ལའང་དབང་རེ་རེ་ཡོད་པས་སྒྲུབ་ཐབས་བརྒྱ་རྩ་གསར་པ་ཞེས་བྱ་བ་ཡང་ཡིན་ལ། དེའི་ནང་ནས་སྔར་མ་གྲགས་པའི་ལྷ་མཆོག་དྷེ་རུ་པ་ཞེས་བྱ་བའི་དབང་རྒྱས་པ་གཅིག་ཡོད། དེའི་གཤམ་ནས་ཆོས་སྐྱོང་དང་བཀའ་སྲུང་གི་རིགས་ཐམས་ཅད་ལ་རྒྱས་འགེབས་པའི་བཀའ་གཏད་དྲེགས་པའི་སྲོག་དབང་བསྡུས་པ་ཞིག་བྱུང་བས། དེ་ཉིད་ཕྱག་ལེན་གྱིས་བརྒྱན་ཏེ་ཆེ་གེའི་སྲོག་དབང་བསྐུར་བའི་ཐོག་མར། སློབ་མ་ཁྲུས་ནས་དབྱུང་བའི་དོན་དུ། ལས་བུམ་ཐོགས་ལ། ཧཱུྃ༔ བུམ་པ་འདི་ཡི་ནང་དུ་ནི༔ ཁྲོ་རྒྱལ་རྟ་མགྲིན་གསལ་བ་ཡི༔ སྐུ་ལས་བདུད་རྩིའི་རྒྱུན་བབས་པས༔ སྡིག་སྒྲིབ་ཐམས་ཅད་བཀྲུས་ནས་ཀྱང༔ ལུས་ཀུན་བདུད་རྩིས་གང་བར་གྱུར༔ ཨོཾ་ཧྱ་གྷྲི་ཝ་ཧཱུྃ་ཕཊ༔ ཅེས་བུམ་ཆུ་སྤྱི་བོར་གཏིག །ཆབ་ལེན་དུ་བཅུག །དེ་ནས་ནས་བཀྱེས་ལ། ད་ཆོས་སྐྱོང་ངམ་བཀའ་སྲུང་ཆེ་གེའི་བཀའ་གཏད་སྲོག་དབང་ཞུ་བའི་ཆེད་དུ་མཎྜལ་འབུལ་བའི་རྗེས་ཟློས་མཛོད། རི་རྒྱལ་རི་བོ་མཆོག་རབ་དང༔ གླིང་བཞི་གླིང་བརྒྱད་ཉི་ཟླས་བརྒྱན༔ བླ་མ་ཆོས་སྐྱོང་རྣམས་ལ་འབུལ༔ རྒྱུན་ཆད་མེད་པར་ཐུགས་རྗེས་ཟུངས༔ ད་བླ་མ་དང་ཆེ་མཆོག་པདྨ་ཐོད་ཕྲེང་རྩལ་དབྱེར་མེད་པའི་དྲུང་དུ་འདིའི་རྗེས་ཟློས་མཛོད། བླ་མ་པདྨ་ཐོད་ཕྲེང་རྩལ༔ བདག་གིས་རྩེ་གཅིག་དད་གསོལ་འདེབས༔ ཆོས་སྐྱོང་ངམ་བཀའ་སྲུང་ཆེ་གེ་ཡི༔ བཀའ་གཏད་བདག་ལ་བསྩལ་དུ་གསོལ༔ ལན་གསུམ། དེ་ནས་སློབ་མ་ཁྱེད་རང་རྣམས་སྣོད་དུ་རུང་བར་བྱ་བའི་དོན་དུ་བདུན་རྣམ་དག་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི༔ སྡིག་པ་མི་དགེ་སོ་སོར་བཤགས༔ འགྲོ་བའི་དགེ་ལ་རྗེས་ཡི་རང༔ སངས་རྒྱས་བྱང་ཆུབ་ཡིད་ཀྱིས་གཟུང༔ སངས་རྒྱས་ཆོས་དང་ཚོགས་མཆོག་ལ༔ བྱང་ཆུབ་བར་དུ་སྐྱབས་སུ་མཆི༔ རང་གཞན་དོན་ནི་རབ་བསྒྲུབ་ཕྱིར༔ བྱང་ཆུབ་སེམས་ནི་བསྐྱེད་པར་བགྱི༔ བྱང་ཆུབ་སེམས་ནི་བསྐྱེད་བགྱིས་ནས༔ སེམས་ཅན་ཐམས་ཅད་མགྲོན་དུ་གཉེར༔ བྱང་ཆུབ་སྤྱོད་པ་མཆོག་སྤྱད་ནས༔ འགྲོ་ཕན་སངས་རྒྱས་མྱུར་ཐོབ་ཤོག༔ ཅེས་ལན་གསུམ། ད་ཆོས་སྐྱོང་དང་བཀའ་སྲུང་དྲག་པོའི་བཀའ་གཏད་ཅིང་སྲོག་དབང་བསྐུར་བ་ལ། སློབ་མ་ཡི་དམ་ལྷའི་བསྐྱེད་རིམ་བརྟན་པོ་བྱ་དགོས། དེ་མེད་ན་བདག་པོ་ངན་པ་ལ་ཁྱི་གཏུམ་པོ་ལྟར་མི་ཆུན་པས། སྐད་ཅིག་གིས་དམ་ཚིག་པ་དང་ཡེ་ཤེས་པ་དབྱེར་མེད་པའི་རང་བཞིན། ཁྱེད་རང་ཕྱག་ན་རྡོ་རྗེ་སྐུ་མདོག་མཐིང་ནག་གཡས་རྡོ་རྗེ་ཕྱར་བ། གཡོན་སྡིགས་མཛུབ་དང་ཞགས་པ་འཛིན་པ། ཁྲོ་བོའི་ཆ་ལུགས་ཡོངས་སུ་རྫོགས་པ་གཅིག་ཏུ་སྒོམས་ལ་སྔགས་འདིའི་རྗེས་ཟློས་མཛོད། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ད་བླ་མ་ཡི་དམ་དབང་དྲག་པདྨ་ཧེ་རུ་ཀ་དངོས་ཡིན་སྙམ་པ་གྱིས་ལ། གསོལ་བ་འདེབས་པ་འདིའི་རྗེས་ཟློས་མཛོད། ཆོས་སྐྱོང་ངམ་མགོན་པོ་ཆེ་གེ་ཡི༔ བཀའ་གཏད་བདག་ལ་བསྩལ་དུ་གསོལ༔ བདུན་བརྗོད། ད་མདུན་དུ་བཤམས་པའི་སྐུ་དང་གཏོར་མ་ལ་སོགས་པའི་དབང་རྫས་རྣམས་དང་ཐ་དད་མེད་པའི་ཞེས་སོ་སོའི་མངོན་རྟོགས་བརྗོད། རྒྱས་པར་སྤྲོ་ན་སྤྱན་འདྲེན་སོགས་ལས་བྱང་གཞུང་ལྟར་ཚར་གཅིག་འདོན། རྔ་རོལ་མོ་དབྱངས་སོགས་བྱས་པ་ལེགས་སོ། །དེ་ནས་ཆེ་གེའི་སྐུ་གཟུགས་ཡིན་ཏེ༔ སྐུ་གཟུགས་འདི་ཁོ་རང་དངོས་ཡིན་པས༔ འདི་ཁྱོད་ལ་གཏད་པས་འབངས་སུ་ཚུད་པར་སྒོམས་ཤིག༔ ཧཱུྃ༔ འདི་ནི་ཆེ་གེའི་སྐུ་གཟུགས་ཏེ༔ ཁྱོད་ཀྱི་ལག་ཏུ་བཞག་པ་ཡིས༔ ཆེ་གེའི་སྐུ་ཡི་དབང་ཐོབ་ཤོག༔ སྙིང་པོ་ལན་བདུན་དང་། ཀཱ་ཡ་ཨ་བྷི་ཥིཉྩ་ཨོཾ༔ བརྗོད། སྐུ་ལག་ཏུ་བཞག །གསུང་ནས་འབྲུ་ཡིན་པས༔ ནས་འབྲུ་འདིའི་ཕྱེད་འདིའི་དབུ་རྒྱན་རིགས་འོད༔ ཕྱེད་མགོན་པོའམ་ཆོས་སྐྱོང་ཆེ་གེ་ཡིན་པར་སྒོམས་ཤིག༔ ཧཱུྃ༔ ནས་ཀྱི་འབྲུ་ནི་རེ་རེ་ཡང༔ ཆེ་གེ་ཁྱོད་ཀྱི་ནི༔ ལག་ཏུ་བཞག་པས་དབང་ཐོབ་ཅིང༔ གསུང་དབང་ཡོངས་སུ་རྫོགས་པར་ཤོག༔ དེ་ནས་འབྲུའི་ཕྱེད་སྤྱི་བོར་བཞག༔ ཕྱེད་ལག་ཏུ་གཏད་ལ། སྙིང་པོ་ལན་བདུན་མཐར། ཝཱ་ཀ་ཨ་བྷི་ཥིཉྩ་ཨཱ༔ དེ་ནས་ཐུགས་གཏོར་མའི་དབང་ཡིན་པས༔ གཏོར་མ་འདི་ཆོས་སྐྱོང་ངམ་མགོན་པོ་ཆེ་གེ་ཡིན་པར་སྒོམས་ལ༔ འདི་གཏད་པས་ཁྱོད་ཀྱི་འབངས་སུ་ཚུད་པར་སྒོམས་ཤིག༔ ཧཱུྃ༔ འདི་ནི་ཆེ་གེ་སྟེ༔ ཁྱོད་ཀྱི་ལག་ཏུ་བཞག་པ་ཡིས༔ ཆེ་གེ་འཁོར་དང་བཅས་པ་ཡི༔ ཐུགས་དབང་ཡོངས་རྫོགས་ཐོབ་པར་ཤོག༔ སྔགས་ལན་བདུན། ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཕྱག་མཚན་ཐོགས་ཏེ། འོ་འདི་ཁྱོད་ལ་གཏད་པས་བཀའ་བསྒོས་པ་བཞིན་དུ་བྱེད་པར་སྒོམས་ཤིག༔ ཧཱུྃ༔ འདི་ནི་ཆེ་གེའི་ཕྱག་མཚན་ཏེ༔ ཁྱོད་ཀྱི་ལག་ཏུ་བཞག་པ་ཡིས༔ ཆེ་གེ་འཁོར་དང་བཅས་པ་ཡི༔ བཀའ་གཏད་ཡོངས་རྫོགས་ཐོབ་པར་ཤོག༔ ཆོས་སྐྱོང་ངམ་མགོན་པོ་ཆེ་གེ་འཁོར་དང་བཅས་པས་སློབ་མ་ཆེ་གེ་ལ་བསྲུང་བ་དང་བསྐྱབ་པ་དང་མགོན་པ་དང་སྡོངས་གྲོགས་མཛད་དུ་གསོལ༔ སྔགས་ལན་བདུན་མཐར། གུ་ཎ་ཨ་བྷི་ཥིཉྩ་སྭཱ་ཧཱ༔ བརྗོད། དེ་ནས་དེས་ཆོས་སྐྱོང་ངམ་མགོན་པོ་ཆེ་གེའི་བཀའ་གཏད་ཡོངས་སུ་རྫོགས་པ་ཐོབ་པ་ཡིན་པས༔ འདི་ནས་ས་མ་ཐོབ་ཀྱི་བར་དུ་ཆོས་སྐྱོང་ངམ་མགོན་པོར་གཟུང་སྙམ་པས་འདིའི་རྗེས་ཟློས་མཛོད༔ གཙོ་བོས་ཇི་ལྟར་བཀའ་བསྩལ་པ༔ དེ་དག་ཐམས་ཅད་བདག་གིས་བགྱི༔ དེང་ནས་གཟུང་སྟེ་བདག་བྲན་དུ༔ ཁྱེད་ལ་བདག་ནི་འབུལ་ལགས་ན༔ ཁྱེད་ཀྱིས་སློབ་མར་གཟུང་བ་དང༔ ཆ་ཤས་ཀྱང་ནི་སྤྱད་དུ་གསོལ༔ ཞེས་དང་། ས་གཞི་སྤོས་སོགས་བརྗོད། སླར་ཡང་མཆོད་བསྟོད་བསྙེན་པ་བྱ། གཤེགས་སམ་རྟེན་ལ་བསྟིམ་པ་སོགས་སྤྱི་ལྟར་བྱ། འདི་ནི་གཏེར་མགོན་ཕྱག་བཞི་པ་མན་ཆད་ནས་ཅུང་ཟད་ལྷ་འདྲེ་དམ་ཚིག་ཅན་ཡན་ཆད་ལ་རིགས་འགྲེས་རུང་ངོ༔ འདི་ནི་ཡེ་ཤེས་འཇིག་རྟེན་ཁྱད་མེད་དོ༔ ཞེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གཉིས་པ་སྤྲེལ་ལོ་སྦྲུལ་ཟླ་བའི་ཉེར་བརྒྱད་ལ་སྤྱན་རས་གཟིགས་དམར་པོ་ཞལ་གཅིག་ཕྱག་གཉིས་པའི་ཕྱག་བརྡབ་པའི་སྒྲ་ལས་བྱུང་བའི་རྩ་ཚིག་དེ་ཉིད་ལ། སྤྲུལ་སྐུའི་གསུང་གིས་བསྐུལ་ནས་ཉིད་ཀྱི་ཐུགས་གཏེར་ནང་ནས་སབ་འོས་སབ་སྟེ་རྒྱས་པར་ཨ་རཱ་གས་བཀོད་པ་ལ་ཉེས་པ་གང་མཆིས་ཆོས་སྐྱོང་རྣམས་ལ་བཤགས་ཤིང་། དགེ་བས་ཟབ་གཏེར་བསྟན་པ་འཕེལ་བར་གྱུར་ཅིག །མངྒ་ལཾ། །ཤུ་བྷ་མསྟུ་སརྦ་ཛ་ག་ཏཾ། །ྀཨཚ།

ལྷག་པའི་ལྷ་སྤྱི་ལ་འཇུག་པའི་སྐུ་གསུང་ཐུགས་ཀྱི་དབང་བསྐུར་བ་རྡོ་རྗེ་གསུམ་གྱི་རྒྱན་ (Volume 40, Text 14)

༄༅། །ལྷག་པའི་ལྷ་སྤྱི་ལ་འཇུག་པའི་སྐུ་གསུང་ཐུགས་ཀྱི་དབང་བསྐུར་བ་རྡོ་རྗེ་གསུམ་གྱི་རྒྱན་ཞེས་བྱ་བ་བཞུགས་སོ། ། རྡོ་རྗེ་སེམས་དཔའི་ཡེ་ཤེས་སྐུ །རྡོ་རྗེ་སློབ་དཔོན་ལ་བཏུད་ནས། །རྡོ་རྗེ་ཐེག་པའི་སྨིན་བྱེད་བཅུད། །རྡོ་རྗེ་གསུམ་གྱི་དབང་བསྐུར་འབྲི། །འདི་ལྟར་ཐེག་པ་ཆེན་པོ་གསང་སྔགས་ཀྱི་ལམ་ལ་མོས་པ་ཅུང་ཟད་བརྟན་ཀྱང་ཟབ་མོའི་དོན་ཇི་བཞིན་དུ་འཛིན་པའི་སྐལ་བ་མི་ལྡན་པ་དང་། དེ་ལས་གཞན་པའང་རུང་སྟེ་ཐུན་མོང་གི་གདུལ་བྱར་གྱུར་པ་རྣམས་ལ་དཀྱིལ་འཁོར་དུ་འཇུག་པའམ་བུམ་དབང་ཙམ་ལས། དབང་གོང་མ་རྣམས་མི་སྦྱིན་པར་འཕགས་ཡུལ་དང་གངས་ཅན་གྱི་ལྗོངས་འདིར་སྔར་བྱོན་པའི་རྡོ་རྗེ་འཛིན་པ་ཆེན་པོ་རྣམས་ཀྱིས་བཞེད་ཅིང་ཕྱག་ལེན་དུའང་མཛད་པ་ལས། འདིར་སྐུ་གསུང་ཐུགས་ཀྱི་དབང་བསྐུར་ཇི་ལྟར་བགྱི་བའི་ཚུལ་སྙིང་པོར་དྲིལ་བ་ནི། བུམ་དབང་དང་ལྷ་དབང་ཡན་སོ་སོའི་གཞུང་ལྟར་གྲུབ་རྗེས། དེས་བཅོམ་ལྡན་འདས་འདི། ཞེས་བྱ་བའི་སྐུའི་དབང་བསྐུར་པ་ཐོབ། ཁྱེད་རང་རྣམས་ཀྱི་ལུས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་སྦྱངས། གནས་སྐབས་སུ་ལུས་ལྷར་བསྒོམ་པ་ལ་དབང་། མཐར་ཐུག་སྣོད་བཅུད་ཀྱི་ཆོས་ཐམས་ཅད་སྣང་སྟོང་སྒྱུ་འཕྲུལ་དྲྭ་བའི་བདག་ཉིད་བཅོམ་ལྡན་འདས་ཀྱི་སྐུ་མི་ཟད་པ་རྒྱན་གྱི་འཁོར་ལོར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། སྤྲོ་ན་ཤིས་པ་བརྗོད། དེ་ནས་གསུང་གི་དབང་བསྐུར་བའི་སླད་དུ། སློབ་དཔོན་གྱི་ཐུགས་ཀ་ནས་སྔགས་ཀྱི་ཕྲེང་བ་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་བ་ཞལ་ནས་ཐོན། ཁྱེད་རང་རྣམས་ལྷག་པའི་ལྷར་གསལ་བའི་ཞལ་དུ་ཞུགས། ཐུགས་ཀའི་ས་བོན་གྱི་མཐར་གཡས་སྐོར་དུ་འཁོད་པས། བརྟན་གཡོའི་སྒྲ་སྐད་ཐམས་ཅད་གྲགས་སྟོང་གཞོམ་མེད་རྡོ་རྗེ་གསུང་གི་ངོ་བོར་དག་པར་གྱུར་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་གསུམ་མཛོད། ཅེས་རྗེས་ཟློས་བྱར་གཞུག །སྤྲོ་ན། དེ་ནས་ཁྱེད་རང་རྣམས་ཀྱིས་སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་འཐོར་བཞིན་པ་དང་བཅས་པས་འདིའི་རྗེས་ཟློས་མཛོད། བཅོམ་ལྡན་བདག་གིས་བཟུང་ལགས་ཀྱིས། །བཅོམ་ལྡན་བདག་ལ་བྱིན་གྱིས་རློབས། །ལན་གསུམ། སློབ་དཔོན་གྱིས་ཁྱེད་རང་རྣམས་ཀྱིས་ཕུལ་བའི་མེ་ཏོག་གི་ཕྲེང་བ་དེ་ཉིད་སྔགས་ཀྱི་ཕྲེང་བར་བྱིན་གྱིས་བརླབས་ཏེ་སྤྱི་བོར་བཞག་པས་སྙིང་གའི་སྔགས་ཕྲེང་བྱང་ཆུབ་མ་ཐོབ་ཀྱི་བར་དུ་བརྟན་ཅིང་ནུས་ལྡན་དུ་བྱས་པའི་མོས་པ་མཛོད། བཅོམ་ལྡན་འདི་ལ་བསྩལ་ལགས་ཀྱིས། །བཅོམ་ལྡན་འདི་ལ་བྱིན་གྱིས་རློབས། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་བསྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྡོ་རྗེ་སློབ་མ་འདི་རྣམས་ཀྱི་རྒྱུད་ལ་བཅོམ་ལྡན་འདས་ཀྱི་གསུང་གསང་སྔགས་ཀྱི་བྱིན་རླབས་མ་ལུས་པ་འཇུག་ཅིང་བརྟན་པར་གྱུར་ཅིག །ཅེས་སམ། ཡང་ན། དེ་བརྟན་པར་བྱ་བའི་སླད་དུ་སྔགས་ཀྱི་ཕྲེང་བས་ཀྱང་དབང་བསྐུར་བའི་མོས་པ་མཛོད། ཨཱ༔ སངས་རྒྱས་ཀུན་གྱི་གསུང་གི་མཛོད༔ རང་བྱུང་གསང་སྔགས་རྡོ་རྗེའི་སྒྲ༔ གསུང་དབྱངས་ཡན་ལག་དྲུག་ཅུའི་དབང༔ བརྒྱད་ཁྲི་བཞི་སྟོང་ཆོས་ཀྱི་སྒོ༔ བསམ་ཡས་གདུལ་བྱའི་བསམ་པ་བཞིན༔ ཡོངས་སུ་སྒྲོག་པའི་དབང་བསྐུར་རོ༔ རྩ་སྔགས་མཐར། ཝཱ་ཀ་ཨ་བྷི་ཥིཉྩ་ཨཱ༔ ཞེས་པ་གཉིས་གང་རུང་བྱ། དེས་བཅོམ་ལྡན་འདས་ཀྱི་གསུང་གི་དབང་བསྐུར་པ་ཐོབ། ཁྱེད་རང་རྣམས་ཀྱི་ངག་གི་སྒོ་ནས་བསགས་པའི་སྡིག་པ་དང་སྒྲིབ་པ་སྦྱངས། གནས་སྐབས་སུ་ངག་སྔགས་ཀྱི་འཁོར་ལོར་བསྒོམ་པ་དང་། མཐར་ཐུག་འཁོར་འདས་ཀྱི་སྒྲ་སྐད་ཐམས་ཅད་གྲགས་སྟོང་གཞོམ་མེད་བཅོམ་ལྡན་འདས་ཀྱི་གསུང་མི་ཟད་པ་རྒྱན་གྱི་འཁོར་ལོའི་ངོ་བོར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། སྤྲོ་ན་ཤིས་པ་བརྗོད། དེ་ནས་ཐུགས་ཀྱི་དབང་བསྐུར་བའི་སླད་དུ། ལྷ་སྔགས་ཀྱི་སྣང་ཆ་ཐམས་ཅད་འཛིན་མེད་ཁྱབ་བརྡལ་སྤྲོས་པ་དང་བྲལ་བའི་ངང་དུ་ཐིམ་པས། འོད་གསལ་སྟོང་ཉིད་ནམ་མཁའི་དབྱིངས་ལྟ་བུ་རྒྱུད་ལ་སྐྱེས་པའི་མོས་པ་དང་བཅས་ཏེ་དེའི་ངང་དུ་ཅུང་ཟད་རེ་མཉམ་པར་འཇོག་མཛོད། དེའི་དོན་མེ་ལོང་གི་གཟུགས་བརྙན་སྣང་ལ་རང་བཞིན་མ་གྲུབ་པ་འདི་ཉིད་ཀྱིས་མཚོན་པ་ཡིན་ཏེ། ཧཱུྃ༔ ཆོས་ཀུན་མེ་ལོང་གཟུགས་བརྙན་བཞིན༔ སྤྲོས་མེད་སྟོང་གསལ་མཐའ་བྲལ་དབྱིངས༔ རང་བྱུང་ཡེ་ཤེས་རོལ་པའི་རྩལ༔ འགག་མེད་སྒྱུ་མའི་ལྟད་མོ་ལ༔ སྒྱུ་མ་མཁན་གྱིས་རོལ་པ་བཞིན༔ སྤྲོས་བྲལ་ཀ་དག་ངང་དུ་ཞོག༔ རྩ་སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ༔ དེས་བཅོམ་ལྡན་འདས་ཀྱི་ཐུགས་ཀྱི་དབང་བསྐུར་པ་ཐོབ། ཁྱེད་རང་རྣམས་ཀྱི་ཡིད་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་སྦྱངས། གནས་སྐབས་སུ་ཡིད་འོད་གསལ་གྱི་ཏིང་ངེ་འཛིན་བསྒོམ་པ་ལ་དབང་། མཐར་ཐུག་འཁོར་འདས་ཀྱི་རྟོག་ཚོགས་ཐམས་ཅད་རིག་སྟོང་སྤྲོས་བྲལ་བདེ་བ་ཆེན་པོའི་བཅོམ་ལྡན་འདས་ཀྱི་ཐུགས་མི་ཟད་པ་རྒྱན་གྱི་འཁོར་ལོར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། ཤིས་པ་བརྗོད། རྗེས་སྤྱི་དང་འདྲའོ། །རྡོ་རྗེ་གསུམ་གྱི་བྱིན་རླབས་ཀྱིས། །རྡོ་རྗེའི་ཡེ་ཤེས་མངོན་བྱེད་པ། །རྡོ་རྗེ་ཐེག་པའི་ལམ་བཟང་གིས། །རྡོ་རྗེའི་རིག་འཛིན་གྲུབ་གྱུར་ཅིག །ཅེས་པའང་ལྷག་པའི་ལྷ་སྤྱི་ལ་འཇུག་པའི་སྐུ་གསུང་ཐུགས་ཀྱི་དབང་བསྐུར་བ་ཇི་ལྟར་བྱ་བའི་ཚུལ་སྙིང་པོར་དྲིལ་བའི་ལེའུ་ཚན་ནོ། །ཞེས་པའང་མཁྱེན་བརྩེའི་དབང་པོས་སོ།། །།

ཐུན་མོང་གི་སྔོན་འགྲོའི་ཆོས་བཤད་རིན་ཆེན་ཐེམ་སྐས་ (Volume 40, Text 15)

༄༅། །ཐུན་མོང་གི་སྔོན་འགྲོའི་ཆོས་བཤད་རིན་ཆེན་ཐེམ་སྐས་ཞེས་བྱ་བ་བཞུགས་སོ། ། ཨོཾ་སྭསྟི། ཐུན་མོང་གི་སྔོན་འགྲོའི་ཆོས་བཤད་རིན་ཆེན་ཐེམ་སྐས་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བདེ་ཆེན་ཞི་བའི་དབྱིངས་ལས་མི་གཡོ་ཡང་། །སྣ་ཚོགས་སྒྱུ་མའི་རོལ་གར་མཐའ་ཡས་པས། །ཕན་བདེའི་དངོས་ཀུན་སྩོལ་བའི་ཕྲིན་ལས་ཅན། །མཆོག་གསུམ་ངོ་བོ་བླ་མར་ཕྱག་བགྱི་འོ། །སྲིད་པའི་གྲོང་ཁྱེར་ཉམ་ངའི་གཡང་ས་ལས། །རྣམ་གྲོལ་ཐར་པ་མཆོག་གི་གྲོང་ཁྱེར་དུ། །སྐལ་བཟང་མྱུར་བདེར་འཇུག་པ་རིན་ཆེན་གྱི། །ཐེམ་སྐས་ལམ་གྱི་རིམ་པ་འདིར་གསལ་བྱ། །དེ་ཡང་སྤྱིར་སེམས་ཅན་ཐམས་ཅད་ཀྱི་སེམས་ཉིད་གདོད་མ་ནས་སངས་རྒྱས་སུ་གནས་པ་དེ་ཉིད་མངོན་དུ་བྱེད་པ་ལ། བློ་དམན་ཐོས་བསམ་རིམ་འཇུག་གི་ལམ་ལ་བརྟེན་པ་དང། བློ་རབ་མོས་གུས་ཐོད་རྒལ་གྱི་ལམ་ནས་འཇུག་པའི་ཚུལ་གཉིས་ནི་མདོ་སྔགས་ཀྱི་བསྟན་པ་གཉིས་ཀའི་ཚུལ་ལ་ཡོད་ཅིང་། དེ་ལས་དང་པོའི་དབང་དུ་བྱས་ན་མ་ཆགས་པ་གསུམ་ལ་བརྟེན་ནས་དོན་གཉེར་གསུམ་གྱི་བློ་སྐྱེ་བ་ལ་བསླབ་པར་བྱ་བ་ཡིན་ནོ། །དང་པོ་ནི། དལ་འབྱོར་རྙེད་དཀའ་བ་དང་། དེ་ཉིད་མི་རྟག་པར་བསམ་པ་ལས་ཚེ་འདིའི་ཆགས་ཞེན་གྲོལ་ནས་ཕྱི་མ་མཐོ་རིས་ཀྱི་བདེ་བ་དོན་གཉེར་གྱི་བློ་བཅོས་མིན་དུ་སྐྱེའོ། །གཉིས་པ་ནི། འཁོར་བའི་སྡུག་བསྔལ་དང་། ལས་རྒྱུ་འབྲས་བསམ་པས་འཁོར་བའི་ཆགས་ཞེན་བྲལ་ནས་རང་ཉིད་ཐར་པའི་ལམ་ངེས་ལེགས་དོན་གཉེར་གྱི་བློ་རྣལ་མ་སྐྱེའོ། །གསུམ་པ་ནི། བྱམས་སྙིང་རྗེ་བྱང་ཆུབ་ཀྱི་སེམས་བསྒོམས་པས་རང་དོན་གྱི་ཆགས་ཞེན་བྲལ་ནས་གཞན་དོན་དུ་བྱང་ཆུབ་ཐོབ་འདོད་ཀྱི་བློ་བཅོས་མིན་དུ་སྐྱེ་བར་འགྱུར་ཞིང་། དེ་ལྟར་སྐྱེས་བུ་གསུམ་གྱི་བློ་རིགས་དེ་ཤེས་པ་འགྱུར་ཐུབ་པ་མ་བྱུང་གི་བར་དུ་བསྒོམ་པ་ནི་ཆོས་ཐམས་ཅད་ཀྱི་རྩ་བ་ཡིན་ལ། འདི་གསུམ་རྒྱུད་ལ་མ་སྐྱེས་ན། ལྷ་སྒོམ་སྔགས་བཟླ་སོགས་ཇི་ལྟར་བྱས་ཀྱང་གར་འགྲོའི་གཏད་སོ་ཡོད་པ་མ་ཡིན་ནོ། །དེ་ལྟར་ན་ཇི་ལྟར་ཉམས་སུ་བླང་བའི་རིམ་པ་ནི་འདི་ལྟར་ཤེས་པར་བྱ་བ་ཡིན་ཏེ། དལ་འབྱོར་རྙེད་དཀའ་བསམ་པ། འཆི་བ་མི་རྟག་པ་བསམ་པ། འཁོར་བའི་ཉེས་དམིགས་བསམ་པ། ལས་རྒྱུ་འབྲས་བསམ་པ་དང་བཞིའོ། །དང་པོ་ལ་དལ་འབྱོར་ངོས་གཟུང་བ། དེ་ཉིད་རྙེད་དཀའ་ཚུལ། དེ་དོན་ཆེ་བ་བསམ་པ་གསུམ་གྱི་དང་པོ་ནི། བཟོད་པར་དཀའ་བའི་སྡུག་བསྔལ་ཅན་གྱི་འཁོར་བ་འདིར་མི་སྐྱེ་བའི་ཐབས་ལ་འབད་དགོས་ཤིང་། དེ་ཉིད་སྒྲུབ་པའི་རྟེན་ཡང་དལ་འབྱོར་གྱི་ལུས་འདི་ཉིད་ཡིན་ཏེ། དེ་ཡང་ད་ལན་ཙམ་མ་གཏོགས་ཤིན་ཏུ་རྙེད་དཀའ་བས། ད་རེས་འདི་ལ་སྙིང་པོ་ལོན་པ་ཞིག་ཅི་ནས་ཀྱང་བྱེད་དགོས་སྙམ་པའི་འདུན་པ་རྩེ་གཅིག་ཏུ་བྱ་ཞིང་། དེ་ཡང་། བརྒྱད་སྟོང་འགྲེལ་ཆེན་དུ། དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོངས་པ། །ལྐུགས་པ་འདི་དག་མི་ཁོམ་བརྒྱད། །ཅེས་པ་ལྟར། ངན་སོང་གསུམ་དུ་སྐྱེས་ན་ནི་སྡུག་བསྔལ་དོས་དྲག་ཅིང་ལུས་རྟེན་ཤིན་ཏུ་ངན་པས་ཆོས་མི་ཁོམ། འདོད་ཁམས་ཀྱི་ལྷ་རྣམས་ནི་འདོད་ཡོན་ལ་ཆགས་པས་གཡེངས་ཤིང་སྐྱོ་ཤས་ཆུང་། གཟུགས་དང་གཟུགས་མེད་ཀྱི་ལྷ་ཕལ་ཆེར་ཡང་ཏིང་ངེ་འཛིན་གྱིས་རྟག་ཏུ་མྱོས་པས་ཆོས་མི་ཁོམ། སངས་རྒྱས་མ་བྱོན་པའི་འཇིག་རྟེན་གྱི་ཁམས་སངས་རྒྱས་ཀྱིས་སྟོངས་པའི་སར་སྐྱེས་པའམ། བྱོན་ཡང་ཆོས་མ་དར་བའི་ས་ཕྱོགས་མཐའ་འཁོབ་ཀླ་ཀློར་སྐྱེས་པ་དང་། ཆོས་དར་བའི་སར་སྐྱེས་ཀྱང་ཚེ་སྔ་ཕྱི་དང་ལས་འབྲས་དང་དཀོན་མཆོག་གསུམ་མེད་པར་འཛིན་པའི་ལོག་ལྟ་ཅན་དང་། ཀླེན་ལྐུགས་སུ་གྱུར་ནས་བླང་དོར་གྱི་གནས་གང་ཡང་མི་གོ་བས་འཇུག་ལྡོག་གི་བསམ་པ་མེད་པར་སྐྱེས་པ་རྣམས་ནི་མི་ཁོམ་པའི་གནས་བརྒྱད་ཡིན་ལ། དེ་ཡང་ངན་སོང་གསུམ་དང་ལྷ་ཚེ་རིང་པོ་ནི་མི་མ་ཡིན་པའི་མི་ཁོམ་པ་དང་། གཞན་བཞི་ནི་མིའི་མི་ཁོམ་པ་ཡིན་ནོ། །མི་ཁོམ་པའི་ལྷ་ནི་འདུ་ཤེས་མེད་པའི་ལྷ་ཉིད་ལ་ངོས་འཛིན་འཐད་པར་ཡང་བཤད་དོ། །དེ་ལྟར་མི་ཁོམ་པའི་གནས་བརྒྱད་དང་བྲལ་བ་ནི་དལ་བ་ཡིན་ཏེ། ནམ་མཁའ་རིན་པོ་ཆེའི་མདོ་ལས། བྱང་ཆུབ་སེམས་དཔའ་ནམ་མཁའི་སྙིང་པོས་གསོལ་བ། བཅོམ་ལྡན་འདས་དལ་འབྱོར་ཇི་ལྟར་བལྟ་བར་བགྱི། བཀའ་བསྩལ་པ། སེམས་རྣམ་པར་རྟོག་པས་དབྱེན་བཅོས་ཏེ་གཡེང་བ་ནི་བྲེལ་བ་ཞེས་བྱའོ། །སེམས་རྣམ་པར་རྟོག་པ་ཞི་ནས་རང་བཞིན་དུ་གནས་པ་ནི་དལ་བ་ཞེས་བྱའོ། །ཞེས་དང་། སྡུད་པར། མི་ཁོམ་བརྒྱད་སྤངས་དེ་ཡིས་དལ་བ་རྟག་ཏུ་རྙེད། །ཅེས་གསུངས་པའོ། །འབྱོར་བའི་ཆོས་བཅུ་ལས་རང་འབྱོར་ལྔ་ནི། །མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །ཅེས་པས། དེ་ལ་བདག་གིས་སྤྱིར་མི་ལུས་ཐོབ། སྒོས་ཡུལ་དབུས་ཆོས་དར་བའི་སར་སྐྱེས། དབང་པོ་སྒོ་ལྔ་སོགས་ཚང་བས་བླང་དོར་ཤེས་སུ་རུང་། མཚམས་མེད་པའི་ལས་བྱས་སམ་བྱེད་དུ་བཅུག་པ་མ་ཡིན་པ། འཇིག་རྟེན་དང་འཇིག་རྟེན་ལས་འདས་པའི་དཀར་ཆོས་ཐམས་ཅད་སྐྱེ་བའི་གནས་འདུལ་བ་ལ་དད་པ་སྟེ་སངས་རྒྱས་ཀྱི་གསུང་རབ་ལ་དད་པ་དང་ལྡན་པ་ཙམ་འདུག་སྟེ། ལྔ་པོ་ནི་རང་རྒྱུད་ཀྱིས་བསྡུས་ཤིང་ཆོས་སྒྲུབ་པའི་ཆ་རྐྱེན་ཡིན་པས་རང་འབྱོར་ཞེས་བྱའོ། །དེ་ཡང་མི་ཁོམ་པ་བརྒྱད་ལས་ལོག་པའི་དལ་བ་དང་རང་འབྱོར་ལྔ་ནི་གནད་གཅིག་གོ །གཞན་འབྱོར་ལྔ་ནི། སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་ནི་བརྩེ་བ་འོ། །ཞེས་པས་སངས་རྒྱས་འཇིག་རྟེན་དུ་བྱོན་པ། དེས་དམ་པའི་ཆོས་གསུངས་པ། དེའི་བསྟན་པ་མ་ནུབ་པར་གནས་པ། བསྟན་པ་ལ་རྗེས་སུ་འཇུག་པ་གཞན་ཡང་མང་དུ་ཡོད་པ། ཆོས་བྱེད་པ་རྣམས་ལ་གཞན་གྱིས་སྙིང་བརྩེ་བའི་སྒོ་ནས་ཟས་གོས་སོགས་མཐུན་རྐྱེན་སྦྱོར་བ་པོ་ཡང་མང་དུ་ཡོད་པའོ། །གཞན་བརྩེ་བ་ནི་དགེ་བའི་བཤེས་གཉེན་གྱིས་ཆོས་ལ་བརྩེ་བས་འདྲེན་པ་ཉིད་ཡིན་པར་བཤད་པ་ཡང་ཡོད་དོ། །དེ་ལྔ་ནི་གཞན་རྒྱུད་ཀྱིས་བསྡུས་ཤིང་ཆོས་སྒྲུབ་པའི་ཆ་རྐྱེན་ཡིན་པས་ན་གཞན་འབྱོར་རོ། །དེ་ཡང་མདོ་ལས། འབྱོར་པ་ནི་སེམས་ཀྱི་རང་བཞིན་ཤེས་པ་བློ་ཡང་དག་པའི་དོན་ལ་འབྱོར་པ་ཞེས་བྱའོ། །ཞེས་གསུངས་པས། དེ་ལ་དལ་བ་ནི་ངོ་བོ་ཡིན་ལ། འབྱོར་པ་ནི་དེའི་ཁྱད་པར་གྱི་ཆོས་ཏེ། དེ་ལྟར་དལ་འབྱོར་བཅོ་བརྒྱད་ཚང་བའི་ལུས་འདི་ལྟ་བུ་ཤིན་ཏུ་རྙེད་པར་དཀའ་བས། ད་རེས་ཆོས་ལ་འབད་དགོས་པ་འདུག་སྙམ་བློ་རྩེ་གཅིག་ཏུ་དྲིལ་བར་བྱ་སྟེ། སྤྱོད་འཇུག་ལས། འདི་འདྲའི་དལ་བ་རྙེད་གྱུར་ནས། །བདག་གིས་དགེ་གོམས་མ་བྱས་ན། །འདི་ལས་བསླུས་པ་གཞན་མེད་དེ། །འདི་ལས་རྨོངས་པ་གཞན་མེད་དོ། །ཞེས་གསུངས་པ་བཞིན་ནོ། །གཉིས་པ་དེ་ཉིད་རྙེད་དཀའ་བའི་ཚུལ་ནི། སེམས་ཅན་གྱི་ནང་ན་ངན་སོང་གསུམ་གྱི་འགྲོ་བ་ནི་ཤིན་ཏུ་མང་སྟེ་ས་ཆེན་པོའི་རྡུལ་བཞིན་མཐའ་མེད། མཐོ་རིས་ཀྱི་འགྲོ་བ་ནི་ཤིན་ཏུ་ཉུང་སྟེ་སེན་མོའི་སྟེང་གི་རྡུལ་ཙམ་དུ་གསུངས་ཤིང་། ངན་སོང་གསུམ་གྱི་ནང་ནས་ཉུང་ཤོས་དུད་འགྲོ་དང་། དེའི་ཡང་བྱིངས་ནི་རྒྱ་མཚོ་ཆེན་པོར་གནས་ཤིང་བསམ་གྱིས་མི་ཁྱབ། ཁ་འཐོར་གྱིས་ཀྱང་ས་གཞི་རི་ཀླུང་བར་སྣང་ཐམས་ཅད་ཁེངས་པ་ཙམ། ལྷ་དང་མིའི་འགྲོ་བ་ནི་དེ་ལ་ལྟོས་ན་སྲིད་མཐའ་ཙམ་དང་། དེ་ལས་ཀྱང་སྤྱིར་མིའི་འགྲོ་བ་ཉུང་། སྒོས་འཛམ་བུའི་གླིང་པའི་མི་ཉུང་། ཡང་སྒོས་ཆོས་ལྡན་གྱི་མི་ལུས་ནི་སྲིད་མཐའ་ཙམ་སྟེ། དེ་ལྟར་ཉུང་བ་ཡང་སེམས་ཅན་གྱི་ནང་ན་སྡིག་པའི་ལས་བྱེད་པ་ནི་ཆེས་མང་སྟེ་མཐའ་མེད། དགེ་བ་བྱེད་པ་ནི་ཅི་ནས་ཀྱང་ཉུང་ཞིང་། དེའི་ནང་ནས་ཀྱང་མི་ལུས་འཕེན་ཐུབ་པའི་ཚུལ་ཁྲིམས་བསྲུང་བ་ཤིན་ཏུ་དཀོན་པས་མི་ལུས་རྙེད་པར་དཀའ་བ་སྟེ། དབུ་མ་འཇུག་པར། མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། ཅེས་མངོན་མཐོའི་རྒྱུ་ཚུལ་ཁྲིམས་ཁོ་ནར་ངེས་པ་དང་། དེ་ཉིད་དཀོན་པའི་དཔེ་ཡང་། མགོན་པོ་ཀླུ་སྒྲུབ་ཀྱིས། རྒྱ་མཚོ་གཅིག་གནས་གཉའ་ཤིང་བུ་ག་དང་། །རུས་སྦལ་ཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་འོ་མི་དབང་གིས། །དམ་ཆོས་སྤྱོད་པས་དེ་འབྲས་མཆིས་པར་མཛོད། །ཅེས་གསུངས་པའི་དཔེས་ཀྱང་མཚོན་པར་བྱས་ནས་སྤྱིར་མི་ལུས་རྙེད་དཀའ་དང་། ཁྱད་པར་ཆོས་ལྡན་གྱི་མི་ལུས་འདི་འདྲ་རྙེད་པ་ནི་བསོད་ནམས་མང་པོ་བསགས་པའི་མཐུ་ལས་བྱུང་བས་ན། ད་རེས་རྙེད་པར་དཀའ་བའི་ལུས་རྟེན་ཕུན་སུམ་ཚོགས་པ་ཐོབ་པའི་དུས་འདིར་གཏན་གྱི་བདེ་བའི་ཕྱིར་དུ་ཆོས་རྣམ་དག་ཅིག་ཅི་ནས་ཀྱང་བསྒྲུབ་པར་བྱའོ་སྙམ་དུ་བསམ་པའོ། །གསུམ་པ་རྙེད་པ་དོན་ཆེ་བར་བསམ་པ་ནི། དེ་ལྟར་ཤིན་ཏུ་རྙེད་དཀའ་བའི་མི་ལུས་དེ་ཐོབ་པ་ལ་དགོས་པ་ཅི་ཡོད་སྙམ་ན་ཕན་ཡོན་ཤིན་ཏུ་ཆེ་སྟེ། གནས་སྐབས་སུ་སྐྱེ་བ་ནས་སྐྱེ་བར་མཐོ་རིས་ཀྱི་བདེ་བ་ལུས་དང་ལོངས་སྤྱོད་སོགས་ཕུན་སུམ་ཚོགས་པའི་དངོས་པོ་མཐའ་དག་ཀྱང་བདེ་བླག་ཏུ་སྒྲུབ་ནུས། དེར་མ་ཟད་ཐེག་པ་འོག་མའི་མྱང་འདས་དང་། བླ་ན་མེད་པའི་བྱང་ཆུབ་ཀྱང་སྒྲུབ་ནུས་ཤིང་། འདི་མ་ཐོབ་ན་ཐར་པ་ལྟ་ཅི་སྨྲོས་འཁོར་བའི་བདེ་བ་ཙམ་ཡང་སྒྲུབ་པའི་ཐབས་མེད་པས། དེས་ན་ད་རེས་དལ་འབྱོར་ལ་སྙིང་པོ་ལོན་པ་ཞིག་མ་བྱས་ན་རིན་པོ་ཆེའི་གླིང་ནས་ལག་སྟོང་དུ་ལྡོག་པ་ལྟར་དོན་མེད་དུ་སོང་ན་འཕུང་ཚབས་ཤིན་ཏུ་ཆེ་སྟེ། སྤྱོད་འཇུག་ལས། མི་ཡི་གྲུ་ལ་བསྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་གསུངས་པ་ལྟར་འདོད་དོན་ཁྱད་པར་ཅན་འགྲུབ་ཏུ་རུང་བའི་རྟེན་ལན་གཅིག་ཐོབ་པ་དེ་ཉིད་སྔར་དོན་མེད་དུ་དེ་ཙམ་ཐལ། ད་ནི་ཅི་ནས་ཀྱང་དམ་པའི་ཆོས་ལ་རྩེ་གཅིག་ཏུ་འབད་པར་བྱའོ་སྙམ་པའི་བསམ་པ་སྙིང་ཐག་པ་ནས་དྲན་པར་བྱས་ནས་དལ་འབྱོར་མདོ་མེད་དུ་མ་སོང་བ་གལ་ཆེའོ། །གཉིས་པ་འཆི་བ་མི་རྟག་པ་བསམ་པ་ནི། མཐར་འཆི་བ་འོང་སྙམ་པ་ཐམས་ཅད་ལ་ཡོད་ཀྱང་། རེ་ཞིག་མི་འཆི་བར་རེ་བའི་བློ་དེ་འཆི་ཁ་ཚུན་ཆད་ལ་འབྱུང་། བློ་ངན་དེས་བསྒྲིབས་ནས་ཚེ་འདིའི་རྣམ་གཡེང་ལ་འབྱམས། ཕྱི་མའི་དོན་བསྒྲུབ་པ་ཕྱི་བཤོལ་ལེ་ལོའི་དབང་དུ་འགྲོ་བས་མི་རྟག་པ་བསྒོམ་དགོས། དེ་ལ་ངེས་པར་འཆི་བ་བསམ་པ། ནམ་འཆི་ཆ་མེད་པ། འཆི་བ་ལ་ཅིས་ཀྱང་མི་སྟོངས་པར་བསམ་པ་གསུམ་གྱི་དང་པོ་ངེས་པར་འཆི་བ་བསམ་པ་ནི། དལ་འབྱོར་གྱི་རྟེན་དེ་ཉིད་ཐོབ་ཟིན་ནས་མི་འཆི་བ་ཞིག་ཡིན་ན་དེ་ཀ་ཡིན་མོད་རྟག་པའི་ངེས་པ་ཅུང་ཟད་ཀྱང་མེད་དེ། ལུས་ཅི་འདྲ་ཞིག་བླངས་པ་དང་། གནས་གྲོགས་གང་ལ་བརྟེན་ཀྱང་འཆི་བ་ལས་མ་འདས། ས་སྟེང་གི་འགྲོ་བ་སྔར་བྱུང་བ། ད་གཟོད་འབྱུང་འགྱུར། ད་ལྟ་དངོས་སུ་ཡོད་པ་འདི་ཐམས་ཅད་ཀྱང་འཆི་བ་ལས་མ་འདས། མདོར་ན་རང་རེ་བཙས་ནས་དེ་རིང་ཡན་ཆད་དུ་དགྲ་གཉེན་བར་མའི་འགྲོ་བ་ཇི་ཙམ་ཞིག་ཤི། དེས་ན་བདག་ལ་མི་འཆི་བའི་གདིང་ཅི་ཞིག་ཡོད་དེ། མདོ་ལས། བྱུང་དང་འབྱུང་བར་འགྱུར་བ་ཇི་སྙེད་པ། །ཀུན་གྱིས་ལུས་འདི་གཏོང་ནས་འགྲོ་བ་དང་། །དེ་ཀུན་འཇིག་པར་མཁས་པས་རྟོགས་བགྱི་སྟེ། །ཆོས་ལ་གནས་བགྱི་ངེས་པར་སྤྱད་པ་སྤྱོད། །ཅེས་དང་། རྟ་དབྱངས་ཀྱིས། ས་འམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་པ། །འགའ་ཞིག་ཁྱོད་ཀྱིས་མཐོང་བ་འམ། །ཐོས་སམ་འོན་ཏེ་ཐེ་ཚོམ་ཟ། །ཞེས་དང་། གང་དུ་ཕྱིན་ཀྱང་འཆི་བས་མི་ཚུགས་པའི། །ས་ཕྱོགས་དེ་ནི་གང་ནའང་ཡོད་མ་ཡིན། །ནམ་མཁའ་ལ་མེད་རྒྱ་མཚོའི་གཏིང་ནའང་མེད། །རི་བོ་ཀུན་གྱི་ཕུག་ཏུ་ཞུགས་ཀྱང་མེད། །ཅེས་གསུངས་པ་ལྟར་སྤྱིར་འཆི་བ་ལས་མ་འདས་ཤིང་། འོན་ཀྱང་ཚེ་རིང་པོར་འཚོ་བ་ཞིག་ཡིན་དུ་སྲིད་ཀྱང་། ལོ་དང་ཟླ་བ་ཞག་དང་ཟ་མ་སྐད་ཅིག་རེ་རེས་ཀྱང་སྡོད་པ་མེད་པར་འཆི་བ་ལ་ཇེ་ཉེར་སོང་བས་སྔར་དེ་ཙམ་ཞིག་འདས། ལྷག་མ་ཡང་བསྣོན་པ་མེད་ཅིང་བར་མ་ཆད་དུ་འགྲིབ་པ་ཡིན་ཏེ། རྒྱ་ཆེ་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །སྐྱེས་བུའི་ཚེ་འགྲོ་རི་གཟར་འབབ་ཆུར་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ །ཞེས་དང་། སྤྱོད་འཇུག་ལས། ཉིན་མཚན་སྡོད་པ་ཡོངས་མེད་པར། །ཚེ་འདི་རྟག་ཏུ་གོད་འགྱུར་ཞིང་། །སྣོན་པ་གུད་ནས་འོང་མེད་ན། །བདག་ལྟ་འཆི་བར་ཅིས་མི་འགྱུར། །ཞེས་གསུངས་པས། དེས་ན་དང་པོར་གཞོན་པའི་དུས་སུ་ནི་བསམ་པ་མ་རྙེད་པས་ཆོས་མ་བྱུང་། མཐར་རྒས་ནས་ནི་ཆོས་བྱེད་ལོ་བྱས་ཀྱང་ལུས་སེམས་ཀྱི་སྟོབས་ཟད་པས་བོགས་སྐྱེད་མི་འབྱུང་། དེའི་བར་གྱི་ཕྱེད་ནི་གཉིད་ཀྱིས་འདས། གཞན་ཡང་རྣམ་གཡེང་འགྲོ་འདུག་སོགས་དོན་མེད་སྣ་ཚོགས་ཀྱི་དབང་དུ་འགྲོ་བས་ཆོས་བྱེད་པའི་གནས་སྐབས་ཅུང་ཟད་ཙམ་དེར་འདུག་པས། ཚེ་འདིའི་ཕུན་ཚོགས་དང་བསླུ་བྲིད་ཐམས་ཅད་རྨི་ལམ་ཐུན་གཅིག་གི་བདེ་བ་ལྟར་ངེས་ཤེས་བསྐྱེད་ནས་དམ་པའི་ཆོས་སྒྲུབ་པ་ལ་ནན་ཏན་དུ་བྱའོ། །གཉིས་པ་ནམ་འཆི་ཆ་མེད་པར་བསམ་པ་ནི། མཐར་འཆི་ཡང་རེ་ཞིག་མི་འཆི་བས་དེ་ཙམ་དུ་རིངས་ཅི་དགོས་སྙམ་ན། སྤྱིར་སྒྲ་མི་སྙན་པ་མ་གཏོགས་པ་འགྲོ་བ་གཞན་གྱི་ཚེ་ལ་ངེས་པ་མེད་ཅིང་། ཁྱད་པར་འཛམ་བུ་གླིང་པའི་ཚེ་ནི་ཤིན་ཏུ་མ་ངེས་པ་ཡིན་ཏེ། དང་པོར་ཚེ་ལོ་དཔག་མེད་ཐུབ་པའང་བྱུང་མོད། མཐར་ལོ་བཅུ་ལ་རིང་མཐའ་བྱེད་དགོས་ཤིང་། ད་ལྟ་ཡང་རྒན་གཞོན་བར་མ་གང་ལ་ཡང་ནམ་འཆིའི་ངེས་གཟུང་མེད་དེ། མཛོད་ལས། འདི་ན་མ་ངེས་ཐ་མར་ནི། །ལོ་བཅུ་དང་པོ་དཔག་ཏུ་མེད། །ཅེས་སོ། །གལ་ཏེ་སྔོན་གྱི་ལེགས་བྱས་ཀྱིས་ཚེ་ལོ་དྲུག་ཅུ་བདུན་ཅུ་ཙམ་འཕངས་སུ་སྲིད་ཀྱང་། དེ་རིང་ནས་བརྩི་རྒྱུ་མིན་ཏེ། སྔར་དེ་ཙམ་འདས། ད་ཇི་ཙམ་ཐུབ་ཚོད་མི་དཔོགས། ཡང་སུམ་ཅུའམ་བཞི་བཅུ་ཙམ་ལས་མ་འཕངས་པའང་སྲིད། གང་ནའང་མཐོང་ཐོས་ཀྱི་འགྲོ་བ་གློ་བུར་དུ་ཤི་བ་རྣམས་ལ་བརྟགས་ན། རང་ཅག་དེ་ལྟ་བུའི་ཆོས་ཅན་ལས་མ་འདས་ཏེ། ཀུན་མཁྱེན་ཆོས་རྗེས། ཚེ་འདི་མི་རྟག་འཇིམ་པའི་བུམ་པ་འདྲ། །སང་དང་འཇིག་རྟེན་ཕྱི་མའི་སྣང་བ་གཉིས། །སྔོན་ལ་གང་འབྱུང་ངེས་པ་མེད་པས་ན། །དེ་རིང་ཉིད་ནས་དམ་པའི་ཆོས་མཛོད་ཅིག །ཅེས་གསུངས་པ་ལྟར། སང་གནངས་དང་འོ་སྐོལ་གྱི་ཚེ་ཕྱི་མ་གང་སྔ་མི་ཤེས་པས་ཚེ་འདིའི་བྱ་བྱེད་ཐམས་ཅད་ཀྱི་འཁྲི་བ་རྦད་ཀྱིས་ཆོད་པར་བྱ་དགོས་ཏེ། ཀླུ་སྒྲུབ་ཀྱིས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པས་ལུས་ཅན་འདི་དག་ཀྱང། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་ལྟ་སྨྲོས་ཅི་འཚལ། །ཞེས་པ་ལྟར་ལུས་ནི་ཆུའི་ལྦུ་བ་ལྟར་ཉམ་ཆུང་། དབུགས་ནི་སྟོན་ཀའི་ན་བུན་བཞིན་ནམ་ཡལ་ཆ་མེད། རང་དབང་མ་ཐོབ་པའི་སེམས་ནི་གར་འགྲོའི་བརྟོལ་མ་མཆིས་ཏེ། ཇི་སྐད་དུ། དེ་རིང་ཁོ་ན་མི་འཆི་ཞེས། །བདེ་བར་འདུག་པ་རིགས་མ་ཡིན། །ཞེས་དང་། ཀླུ་སྒྲུབ་ཀྱིས་ཀྱང་། འཆི་བའི་རྐྱེན་ནི་མང་བ་སྟེ། །གསོན་པ་ཡི་ནི་ཉུང་ཟད་ཅིག །དེ་དག་ཉིད་ཀྱང་འཆི་བའི་རྐྱེན། །དེ་བས་རྟག་ཏུ་ཆོས་མཛོད་ཅིག །ཅེས་གསུངས་པ་ལྟར། ཕྱིའི་རྐྱེན་མི་དང་དུད་འགྲོ་གདོན་བགེགས་ལ་སོགས་པས་འཚེ་བ་དང་། མེ་ཆུ་གཡང་ས་ལ་སོགས་པའི་འབྱུང་བའི་གནོད་པ། ནང་ལུས་ལ་ནད་རིགས་བཞི་བརྒྱ་རྩ་བཞི་ལ་སོགས་པ་མདོར་ན་འཆི་རྐྱེན་འདིས་མི་བྱེད་བྱ་བ་མེད་དེ། འཚོ་བའི་རྐྱེན་དུ་རེ་བའི་ཟས་གོས་དང་སྨན་སོགས་བརྟེན་པ་ཡང་འཆི་རྐྱེན་དུ་མི་འགྲོ་བའི་ཆ་མེད། དེས་ན་འཆི་བའི་རྐྱེན་ངན་བུ་ཡུག་འཚུབས་པ་ལྟ་བུའི་དབུས་ན་བདག་གནས་པ་ཡིན་ན། ནམ་འཆི་ཆ་མེད་སྙམ་དུ་བསྒོམ་པར་བྱ་སྟེ། དམ་པས། ཡེངས་པའི་བར་ལ་འཆི་བདག་བདུད་ཀྱིས་འཛིན། །ད་ལྟ་ཉིད་ནས་སྒྲུབས་ཤིག་དིང་རི་བ། །ཞེས་གསུངས་པ་ལྟར་རོ། །གསུམ་པ་འཆི་བ་ལ་ཆོས་མ་གཏོགས་ཅིས་ཀྱང་མི་ཕན་པར་བསམ་པ་ནི། དེ་ལྟར་འཆི་བའི་གནས་སྐབས་མངོན་དུ་གྱུར་པ་ན། བསགས་པའི་ནོར་རྫས་མང་ཡང་ཁྱེར་དབང་མེད་དེ་ལྷན་ཅིག་སྐྱེས་པའི་ཤ་རུས་ཀྱང་འཇོག་དགོས། འགྲོགས་པའི་གཉེན་བཤེས་དང་འཁོར་གཡོག་བརྩེ་དུངས་ཆེ་བས་མཐའ་བསྐོར་ཡང་འཁྲིད་པའི་དབང་མེད། བརྩིགས་པའི་ཁང་ཁྱིམ་བཙན་ཡང་འཁྲི་ས་དང་སྡོད་དབང་མེད་པར་ཚེ་འདིའི་ཕུན་ཚོགས་ཐམས་ཅད་དང་བྱེ་བྲལ་བྱས་ནས་རྒྱུས་མེད་ཀྱི་ཕྱོགས་སུ་རང་དབང་མེད་པར་འགྲོ་བ་ལ། ཟས་ནོར་ཤེད་སྟོབས་རིག་སྔགས་རྟེན་འབྲེལ་གང་གིས་ཀྱང་མི་བཟློག་སྟེ། མདོ་ལས། རྒྱལ་པོ་ཆེན་པོ། ན་བས་ནི་ནད་མེད་པ་འཇོམས་ཤིང་འོང་། རྒ་བས་ནི་དར་ལ་བབས་པ་འཇོམས་ཤིང་འོང་། རྒུད་པས་ནི་ཕུན་སུམ་ཚོགས་པ་འཇོམས་ཤིང་འོང་། འཆི་བས་ནི་སྲོག་འཇོམས་ཤིང་འོང་། དེ་དག་ལ་མགྱོགས་པར་འབྲོས་པའམ། ནོར་གྱིས་བཟློག་པའམ། རྫས་དང་སྔགས་དང་སྨན་རྣམས་ཀྱིས་ཞི་བར་བྱ་སླ་བ་མ་ཡིན་ནོ། །ཞེས་དང་། ཞི་བ་ལྷས། གཤིན་རྗེའི་སྐྱེས་བུས་ཟིན་པ་ལ། །གཉེན་གྱིས་ཅི་ཕན་བཤེས་ཅི་ཕན། །ཞེས་གསུངས་པ་དང་། འོ་ན་དེ་དག་རྗེས་སུ་མི་འབྲང་ན་ཅི་ཞིག་འབྲང་སྙམ་ན། རང་གིས་བསགས་པའི་ལས་དགེ་སྡིག་གཉིས་པོ་རྗེས་སུ་འབྲང་བ་ཡིན་ཏེ། རྒྱལ་པོ་ལ་གདམས་པའི་མདོ་ལས། དུས་ཀྱིས་བསྙེན་ནས་རྒྱལ་པོ་འགྲོ་གྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དག་ནི་གང་ནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །ཞེས་གསུངས་པ་དང་། དེས་ན་ཕྱི་ནང་སྣོད་བཅུད་ཀྱི་འགྱུར་བ་ཐམས་ཅད་རང་ལ་མི་རྟག་པ་སྟོན་པའི་བརྡར་ངེས་ཤེས་བསྐྱེད་ནས། ཚེ་འདིའི་བྱ་བྱེད་ཐམས་ཅད་ནི་ཟིན་ཚར་མེད་ཅིང་མདོ་དོན་ཆུང་། འཆི་དུས་ཕན་ཆད་རྒྱུན་ཆགས་སུ་ཕན་པ་ནི་དམ་པའི་ཆོས་ཁོ་ན་ཡིན་ལ། ད་ལྟ་ཉིད་དུ་ཆོས་ལ་འབད་པར་བྱའོ་སྙམ་དུ་བསམ་པ་གལ་ཆེའོ། །དེ་ལྟར་ཡང་ཀླུ་སྒྲུབ་ཀྱིས། མགོ་འམ་གོས་ལ་གློ་བུར་མེ་ཤོར་ན། །དེ་དག་ལྡོག་སླད་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱིད་སླད་འབད་འཚལ་ཏེ། །དེ་ལས་ཆེས་མཆོག་དགོས་པ་གཞན་མ་མཆིས། །ཞེས་པ་དང་། དམ་པས། བྲེལ་དོན་ཚར་ནས་ཆོས་ལ་ཕྱིན་པ་མེད། །དྲན་པའི་ཚེ་ན་རྒྱུགས་ཤིག་དིང་རི་བ། །ཞེས་གསུངས་པ་བཞིན་ནོ། །གསུམ་པ་འཁོར་བའི་ཉེས་དམིགས་བསམ་པ་ལ་གསུམ། ངན་སོང་གསུམ་གྱི་སྡུག་བསྔལ་བསམ་པ། མཐོ་རིས་ཀྱི་སྡུག་བསྔལ་བསམ་པ། སྡུག་བསྔལ་གསུམ་གྱི་རང་བཞིན་སྤྱིར་བསམ་པའོ། །དང་པོ་ངན་སོང་གསུམ་གྱི་སྡུག་བསྔལ་བསམ་པ་ནི། དེ་ལྟར་ངེས་པར་འཆི་བས་ཚེ་འདིར་སྡོད་པའི་དབང་མེད། ཤི་བས་མི་ཆོག་སྐྱེ་བ་ལེན་དགོས། དེ་ཡང་བདེ་འགྲོ་དང་ངན་འགྲོ་གཉིས་ལས་མ་འདས། དེ་ཉིད་ལས་དཀར་ནག་གིས་འཕངས་པའི་རྗེས་སུ་འགྲོ་བ་ལས་རང་དབང་ཅན་མ་ཡིན་ན་བདག་གིས་ཀྱང་མི་དགེ་བའི་ལས་ཇི་སྙེད་ཅིག་བསགས་མོད། བདག་ངན་སོང་དུ་སྐྱེས་ན་སྡུག་བསྔལ་ཅི་འདྲ་ཞིག་མྱོང་བར་འགྱུར་སྙམ་དུ་བསམ་དགོས། དེ་ཡང་དཔལ་མགོན་ཀླུ་སྒྲུབ་ཀྱིས། །རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་སྐོམ་དག་གིས་རིད་པ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་ལྟ་ཞིང་དྲན་པར་བྱ། །དེའི་རྒྱུ་རྣམ་སྤང་བདེ་རྒྱུ་སྤྱད། །ཅེས་གསུངས་པ་ལྟར། དང་པོ་དམྱལ་བའི་སྡུག་བསྔལ་བསམ་པ་ལ་བཞི་ལས། དང་པོ་ཚ་དམྱལ་གྱི་སྡུག་བསྔལ་བསམ་པ་ནི། དེ་ལ་གནས་ཀྱི་ཁྱད་པར་ལྕགས་བསྲེགས་ཀྱི་ས་གཞི་རི་རོང་ངམ་གྲོག་ཅན། མེ་ལྕེ་ཁྲུ་གང་ཙམ་རྟག་ཏུ་འབར་ཞིང་ཟངས་ཞུན་དང་འགྱུར་བྱེད་ཀྱི་ཁུ་བ་འབབ་པ། ལྕགས་བསྲེགས་ཀྱི་སྡོང་པོ་མེ་འབར་བས་གཏམས་པ། གདུག་པའི་བྱ་དང་གཅན་གཟན་དང་དམྱལ་སྲུང་གཤེད་མ་མི་བསྲུན་པ་དུ་མས་གང་བ། ལྕགས་བསྲེགས་ཀྱི་རྩིག་པ་དང་མེ་འོབས་ཀྱིས་ཀུན་ནས་བསྐོར་བ། དེ་ཡང་བསྐལ་པ་འཇིག་དུས་ཀྱི་མེ་ལས་ཚ་ཞིང་། དེ་བས་འོག་མ་འོག་མ་བཞི་འགྱུར་གྱིས་ཚ་བར་བཤད་དོ། །དེར་སྐྱེ་བའི་བར་དོ་རྣམས་ཆར་རླུང་གིས་དེད་པས་གྲང་བའི་རྣམ་པར་ཤར་བས་ཚ་དམྱལ་གྱི་གནས་མཐོང་སྟེ། དེ་དྲོ་བར་ཤེས་ནས་སྲེད་པས་བརྒྱུགས་པས་དེར་ཚུད་པའི་སྐད་ཅིག་ལ་གཉིད་སད་པ་ལྟར་སྐྱེ་བ་ལེན་པར་འགྱུར་ཞིང་། དེ་ཡང་རིག་པ་ཚོར་ངེས་སྐྱེན་ཞིང་ལུས་འཇམ་ཞིང་མཉེན་པས་ལུས་སེམས་གཉིས་ཀའི་ཆ་ནས་བཟོད་སྲན་ཆུང་བས་ཀྱང་སྡུག་བསྔལ་ལྷག་པར་ཆེའོ། །སྡུག་བསྔལ་གྱི་ཁྱད་པར་ནི། ཡང་སོས་པ་རྣམས་ལས་དབང་གིས་མཚོན་ཆ་སྣ་ཚོགས་ལག་ཏུ་བྱུང་སྟེ། ཕན་ཚུན་དགྲའི་འདུ་ཤེས་ཀྱི་ཞེ་སྡང་དྲག་པོས་བསྣུན་རེས་བྱས་པས་ཤིན་ཏུ་སྡུག་བསྔལ་བས་བརྒྱལ་ཞིང་འགྱེལ་བ་ན་ནམ་མཁའ་ལས་ཡང་སོས་པར་གྱུར་ཅིག་ཅེས་པའི་སྒྲ་བྱུང་བའམ། རླུང་གྲང་མོ་ལངས་པས་སླར་ཡང་སོས་ཏེ་སྔ་མ་ལྟར་སྡུག་བསྔལ་དྲག་པོ་ལས་མ་ཟད་ཀྱི་བར་དུ་མྱོང་ངོ། །ཐིག་ནག་པ་རྣམས་ཀྱི་ལུས་ལ་དམྱལ་སྲུང་རྣམས་ཀྱིས་ཐིག་བཞིའམ་བརྒྱད་ལ་སོགས་པ་དུ་མ་བཏབ་ནས་དེའི་སྟེང་དུ་སོག་ལེས་འདྲལ་བ་དང་། སཏྭ་གྲི་ལ་སོགས་པས་གཤོག་ཅིང་གཅོད་པའི་སྡུག་བསྔལ་གྲུབ་ཟིན་མེད་པའོ། །བསྡུས་འཇོམས་པ་རྣམས་ཀྱི་ལུས་གཅིག་ཏུ་འདུས་པ་ན། དམྱལ་སྲུང་རྣམས་ཀྱིས་ལྕགས་ཀྱི་རི་ར་ལུག་དང་སྟག་སེང་ལ་སོགས་པའི་གདོང་པ་ལྟ་བུའི་བར་དུ་བཅུག་ནས་བཙིར་བས་བུ་ག་ཀུན་ནས་ཁྲག་གི་རྒྱུན་འབབ་པ་དང་། ཡང་འདུས་པ་ན་ལྕགས་ཀྱི་ཐོ་གཏུན་ཆེན་པོས་ཏིལ་བཞིན་དུ་འཚིར་བ་དང་། ལྕགས་བསྲེགས་ཀྱི་ཕ་བོང་ཆར་དུ་བབས་པས་བརྡུང་ཞིང་འཇོམས་པར་འགྱུར་བའི་སྡུག་བསྔལ་དང་། ངུ་འབོད་པ་རྣམས་འཇིགས་སྐྲག་གིས་གནས་འཚོལ་བ་ན་ལྕགས་ཀྱི་ཁང་པ་མཐོང་སྟེ་དེར་ཞུགས་མ་ཐག་སྒོ་ཟུམ་ཞིང་ཕྱི་ནང་ཀུན་ཏུ་མེ་འབར་བས་བསྲེགས་པས་ངུ་ཞིང་འོ་དོད་འབོད་ཀྱང་སྐྱབས་མི་རྙེད་པའི་སྡུག་བསྔལ་དང་། ངུ་འབོད་ཆེན་པོ་གཞན་སྔ་མ་དང་འདྲ་བ་ལས་ལྕགས་ཁང་ཉིས་རིམ་དུ་སྔར་བཞིན་བསྲེགས་པས་སྡུག་བསྔལ་ཤིན་ཏུ་དྲགས་པར་མྱོང་བ་དང་། ཚ་བ་པ་རྣམས་ཀྱི་ལུས་ལྕགས་ཀྱི་ཕྲུ་བ་དཔག་ཚད་དུ་མ་ཡོད་པ་མེ་འབར་བའི་ནང་དུ་ཉ་བཞིན་སྲེག་པ་དང་། ལྕགས་ཀྱི་གསལ་ཤིང་འབར་བས་བཤང་ལམ་ནས་སྤྱི་བོར་ཐལ་ཕྱུང་དུ་ཕུག་པས་ནང་ཁྲོལ་ཐམས་ཅད་འཚིག །བུ་ག་དང་བ་སྤུའི་ཁུང་བུ་ཐམས་ཅད་ནས་མེ་འབར་བ་དང་། ལྕགས་བསྲེགས་ཀྱི་ས་གཞི་ལ་བསྒྱེལ་ནས་ལྕགས་ཀྱི་ཐོ་བ་འབར་བས་རྡུང་བར་བྱེད་དོ། །རབ་ཏུ་ཚ་བ་པ་རྣམས་ཀྱི་ལུས་ལྕགས་ཀྱི་གསལ་ཤིང་རྩེ་མོ་གསུམ་པ་མེ་འབར་བས་བཤང་ལམ་ནས་སྤྱི་བོ་དང་ཕྲག་པ་གཉིས་སུ་ཕུག་པ་བུ་ག་ཐམས་ཅད་ནས་མེ་འབར་བ་དང་། ལྕགས་ལེབ་མེ་འབར་བས་ལུས་དཀྲི་ཞིང་ལྕགས་ཟངས་འགྱུར་བྱེད་ཁོལ་མའི་ནང་དུ་སྤྱི་ཚུགས་སུ་འབྲས་བཞིན་བཙོས་པས་ཤ་ཁྲག་ཞིག་ནས་ཀེང་རུས་ཙམ་ལུས་པ་དང་། ལྕགས་ཀྱི་གཞི་ལ་བཀྲམ་པས་ཤ་ཁྲག་སྐྱེས་པ་ན་སླར་ཡང་འཚོད་པར་བྱེད་དོ། །མནར་མེད་པ་རྣམས་ཀྱི་ལུས་ལ་ལྕགས་ཀྱི་ས་གཞི་ལས་ཕྱོགས་ཐམས་ཅད་ནས་མེ་རབ་ཏུ་འབར་བ་འོངས་ཏེ། དེའི་པགས་པ་ཤ་རྒྱུས་པ་རུས་པ་རྐང་གི་བར་དུ་སྲེག་ཅིང་མར་མེའི་སྙིང་པོ་བཞིན་དུ་ལུས་དང་མེ་དབྱེར་མི་ཕྱེད་པར་འབར་བས་སྨྲེ་སྔགས་འབྱིན་པ་ལས་སེམས་ཅན་དུ་མངོན་པ་ཙམ་དང་། ལྕགས་ཀྱི་ཞིབ་མར་མདག་མེ་འབར་བ་དང་ལྷན་ཅིག་རྔོད་པ་དང་། ལྕགས་བསྲེགས་ཀྱི་རི་ཆེན་པོ་ལ་འབབ་འཛེག་བྱེད་དུ་འཇུག་པ་དང་། ལྕེ་ཕྱུང་སྟེ་ལྕགས་བསྲེགས་ཀྱི་གཞི་ལ་བརྒྱངས་ནས་ཕུར་པས་འདེབས་པ་དང་། པགས་པ་བཤུས་ནས་ལྕགས་བསྲེགས་ཀྱི་གཞི་ལ་གན་རྐྱལ་དུ་འཇོག་པ་དང་། ཁ་འབྱེད་བྱེད་ཀྱིས་ཕྱེ་ནས་ལྕགས་ཀྱི་ཐོ་ལུམ་དང་ཟངས་ཞུན་བླུད་པས་ཁ་དང་ལྐོག་མ་དང་ནང་ཁྲོལ་ཐམས་ཅད་འཚིག་སྟེ་རོ་སྨད་ནས་ཕྱིར་ཐོན་པ་སོགས་སྡུག་བསྔལ་བཟོད་ཐབས་མེད་པ་ཡིན་ནོ། །ཚེ་ཚད་ཀྱི་ཁྱད་པར་ནི། མངོན་པ་ལས། མི་རྣམས་ཀྱི་ལོ་ལྔ་བཅུ་ལ། །འདོད་པ་དག་གི་ལྷ་རྣམས་ལས། །འོག་མ་དག་གི་ཉིན་ཞག་གཅིག །དེས་ན་ཚེ་ལོ་ལྔ་བརྒྱ་འོ། །གོང་མ་གཉིས་ཀ་གཉིས་འགྱུར་རོ། །ཞེས་སོ། །ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་ཉིན་ཞག་མཉམ། །ཞེས་གསུངས་པས། མི་ལོ་ལྔ་བཅུ་ལ་རྒྱལ་ཆེན་རིགས་བཞི་པའི་ཞག་གཅིག །དེས་རྩིས་པའི་རང་ལོ་ལྔ་བཅུ་ཐུབ། དེ་ཡོངས་རྫོགས་ཡང་སོས་པའི་ཞག་གཅིག་ཏུ་བྱས། དེའི་ལོ་ལྔ་བརྒྱ་ནི་ཡང་སོས་པའི་ཚེ་ཚད་ཡིན་ལ། འོག་མ་རྣམས་ལོ་གྲངས་ཉིས་འགྱུར་ཉིས་འགྱུར་དུ་འཕེལ་ཞིང་ཞག་གྲངས་ཀྱང་ཉིས་འགྱུར་ཉིས་འགྱུར་གྱིས་རིང་བས་གོང་མ་གོང་མའི་བཞི་འགྱུར་འོག་མ་འོག་མ་ལ་ཡོད་པར་ཤེས་པར་བྱའོ། །གཉིས་པ་གྲང་དམྱལ་གྱི་སྡུག་བསྔལ་བསམ་པ་ནི། གནས་ཀྱི་ཁྱད་པར་ཉི་ཟླ་ལ་སོགས་པའི་སྣང་བ་མེད་པའི་མུན་ཁྲོད་གངས་དང་འཁྱག་པའི་གཅོང་རོང་རླུང་དང་བུ་ཡུག་ཤིན་ཏུ་གྲང་བས་ཀུན་ཏུ་ཁྱབ་པ་རྣམས་སུ། ལུས་དང་ངག་གི་སྒྲའི་དོན་དང་མཐུན་པར་གྲང་བའི་སྡུག་བསྔལ་གོང་མ་གོང་མ་ལས་འོག་མ་འོག་མ་བདུན་འགྱུར་གྱིས་གྲང་བར་བཤད། དེར་སྐྱེ་བའི་བར་དོ་རྣམས་མེ་ནང་དུ་འཚིག་པ་ལྟ་བུའི་སྣང་བ་ཤར་བས་གྲང་དམྱལ་གྱི་གནས་མཐོང་སྟེ། དེ་ལ་སྲེད་པས་བརྒྱུགས་པས་དེ་ཉིད་དུ་སྐྱེ་བར་འགྱུར་ཞིང་། སྡུག་བསྔལ་གྱི་ཁྱད་པར་ནི། ཆུ་བུར་ཅན་ནི། རླུང་དང་བུ་ཡུག་གི་གྲང་བས་བཏབ་པས་ལུས་ཆུ་བུར་ཧྲམ་ཧྲམ་པས་གང་བས་འཁུམས་ཏེ་སྡུག་བསྔལ་བའོ། །ཆུ་བུར་རྡོལ་པ་ཅན་ནི། གྲང་དྲགས་པས་ཆུ་བུར་ཡང་བརྡོལ་ཏེ། དེའི་ནང་ནས་སྐྱེས་པའི་ལྕགས་ཀྱི་འབུ་མཆུ་རྣོན་གྱིས་པགས་པ་འདྲལ་ཞིང་། ཞག་དང་ཆུ་སེར་འཛག་པའང་འཁྱག་པར་འགྲོ་བས་སྡུག་བསྔལ་ལོ། །ཨ་ཆུ་ཟེར་བ་ནི། སྐད་ཤིབ་ཤིབ་པོར་འབྲུ་ངག་ཅན་ཅུང་ཟད་ཙམ་ཐོན་པས་སྨྲེ་སྔགས་འདོན་པའོ། །ཀྱི་ཧུད་ཟེར་བ་ནི། དེ་བས་ཀྱང་གྲང་བས་འབྲུ་ངག་མི་ཐོན་པར་ཉེན་སྐད་ཕྲ་མོ་ཤིབ་ཤིབ་པོས་འདོན་པའོ། །སོ་ཐམ་ཐམ་པ་ནི། དེ་བས་ཤིན་ཏུ་གྲང་བས་སྐད་མི་ཐོན་པར་ལུས་འདར་བས་དཀོས་ཐག་ཅིང་སོ་འདར་རྡེབ་པའོ། །ཨུཏྤལ་ལྟར་གས་པ་ནི། དེ་བས་ཀྱང་གྲང་བའི་ལྷགས་པའི་ཤུགས་ཀྱིས་པགས་པ་སྔོན་པོར་གྱུར་ཏེ་ཁ་ལྔའམ་དྲུག་ཏུ་གྱེས་ནས་གས་པ་དང་། པདྨ་ལྟར་གས་པ་ནི། སྔོ་བ་ལས་ཀྱང་ཐལ་བས་དམར་པོར་གྱུར་ཏེ་ཁ་བཅུའམ། དེ་བས་ཀྱང་མང་བར་གས་པའོ། །པདྨ་ལྟར་ཆེར་གས་པ་ནི། གྲང་བའི་མཐར་ཐུག་པས་པགས་པ་བཤུས་ནས་ཤིན་ཏུ་དམར་བ་ཁ་བརྒྱའམ་སྟོང་ལ་སོགས་པར་གས་ནས་སྡུག་བསྔལ་ལ་བཟོད་ཐབས་མེད་པ་ཡིན་ནོ། །ཚེ་ཚད་ཀྱི་ཁྱད་པར་ནི། མཛོད་ལས། ཏིལ་སྦྱངས་ནང་ནས་ལོ་བརྒྱ་ཞིང་། །ཏིལ་གཅིག་ཕྱུང་བས་ཟད་གྱུར་པ། །ཆུ་བུར་ཅན་གྱི་ཚེ་ཚད་ཡིན། །གཞན་གྱི་ཚེ་ནི་ཉི་ཤུའི་འགྱུར། །ཞེས་པས། མ་ག་དྷཱའི་ཁལ་བརྒྱད་ཅུ་འགྲོ་བའི་སྣོད་སྦྱངས་ཞེས་པ་ཏིལ་གྱིས་ཕྱུར་བུར་བཀང་སྟེ། ལོ་བརྒྱ་བརྒྱ་ན་ཏིལ་འབྲུ་རེ་རེ་ཕྱུང་བས་ཏིལ་དེ་ཟད་པ་ཙམ་ཆུ་བུར་ཅན་གྱི་ཚེ་ཚད་དུ་བཤད། འོག་མ་རྣམས་ལ་ཉི་ཤུ་འགྱུར་གྱིས་འགྲོས་རྩི་བ་ཡིན་ནོ། །གསུམ་པ་ཉེ་འཁོར་བའི་སྡུག་བསྔལ་བསམ་པ་ནི། མཛོད་ལས། བརྒྱད་པོ་ཀུན་ལས་ལྷག་བཅུ་དྲུག །དེ་དག་གི་ནི་ངོས་བཞི་ན། །མེ་མ་མུར་དང་རོ་མྱགས་འདམ། །སྤུ་གྲིའི་ལམ་སོགས་ཆུ་བོ་ཡིན། །ཞེས་པ་ལྟར། ཚ་དམྱལ་བརྒྱད་པོ་ཐམས་ཅད་ཀྱི་ཕྱོགས་བཞི་པོ་རེ་རེ་ན་ཡང་། མེ་མ་མུར་ལ་སོགས་པ་བཞི་བཞི་ཡོད་པས་བཅུ་དྲུག་སྟེ། ཚ་དམྱལ་དངོས་གཞི་ལས་ཐོན་པའམ། དེ་ཉིད་དུ་སྐྱེས་ཀྱང་རུང་། ཕྱོགས་གང་དུ་བྲོས་ཀྱང་མེ་མ་མུར་གྱི་འོབས་པུས་ནུབ་ཙམ་དུ་ཚུད་དེ། དེར་རྐང་པ་བཞག་མ་ཐག་ཤ་པགས་ཐམས་ཅད་སྲེག་ཅིང་བཏེག་མ་ཐག་འཚོ་བ་དང་། དེ་ལས་ཐར་ཡང་རོ་མྱགས་ཀྱི་འདམ་རྫབ་ཤིན་ཏུ་དྲི་ང་བར་ལུས་བྱིང་བ་ན་སྲིན་བུ་མཆུ་རྣོན་མོ་ཁབ་འདྲ་བས་ཤ་པགས་རུས་པའི་བར་དུ་ཕུག་སྟེ་ཟ་བ་དང་། དེ་ལས་ཐར་ཡང་སྤུ་གྲི་སོ་རྣོན་གཏམས་པའི་ལམ་ལ་སླེབ་སྟེ་རྐང་པ་བཞག་མ་ཐག་དུམ་བུར་གཅོད་ཅིང་བཏེག་མ་ཐག་སོས་པར་འགྱུར་བ་དང་། སོགས་ཁོངས་ནས་བསྡུས་པ་ནི། དེ་ལས་ཐར་ནས་རལ་གྲི་ལོ་མའི་ནགས་ཚལ་དུ་སོང་། དེར་གྲིབ་མ་ལ་འཁོད་པ་ན་ལས་རླུང་གིས་བསྐྱོད་པས་རལ་གྲི་རྣམས་ཆར་ལྟར་བབས་པས་ལུས་ཐམས་ཅད་གཅོད་ཅིང་འགྱེལ་བ་ན་ཁྱི་རྣམས་ཀྱིས་རུབ་སྟེ་ཟ་བ་དང་། དེ་ལས་ཐར་ཡང་གཅན་གཟན་གདུག་པ་ཅན་མང་པོས་དེད་པས་ལྕགས་ཀྱི་ཤིང་ཤལ་མ་ལིའི་ཚལ་མཐོང་ནས་དེར་བྲོས་ཏེ་འབབ་འཛེག་བྱས་པས། ཚེར་མ་རྣོན་པོ་སོར་བཅུ་དྲུག་པ་ཡས་མན་དུ་བལྟ་བ་ལས་ལུས་ཁྲོལ་ཚགས་བཞིན་ཕུག་ནས་ཁྭ་ཏ་སོགས་བྱ་ལྕགས་མཆུ་ཅན་གྱིས་མིག་འབྲུ་ཞིང་ཤ་འཐོག་པ་སོགས་ཀྱིས་འཇིགས་པར་བྱེད་དོ། །དེ་ལས་ཐར་ཡང་ཚ་བས་གདུངས་པས་ཆུ་ཀླུང་འབབ་པ་མཐོང་སྟེ་བརྒྱུགས་པ་ན་འགྱུར་བྱེད་ཀྱི་ཆུ་བོ་རབ་ཏུ་ཚ་བའི་ནང་དུ་ལྷུངས་ཏེ། གཏིང་དུ་སོང་བ་ན་ཤ་རུས་བྲལ་ནས་རུས་པ་དཀར་སིང་གིས་སོང་། སྟེང་དུ་ཐོན་ཚེ་ཤ་སྐྱེས་ནས་ཡང་ནུབ་པ་དང་། འབྲོས་པར་འདོད་ཀྱང་འགྲམ་གཉིས་ན་དམྱལ་སྲུང་མཚོན་ཆ་ཐོགས་པ་དག་གིས་འབྲོས་སུ་མི་སྟེར་བ་དང་། རེས་འགའ་ལྕགས་ཀྱུས་ཕྱིར་ཕྱུང་ནས་གན་རྐྱལ་དུ་བཞག་སྟེ་ཅི་འདོད་ཅེས་དྲིས་པ་ན། བདག་ཅག་གིས་ཅི་ཡང་མི་ཤེས་མི་མཐོང་མོད། འོན་ཀྱང་བཀྲེས་སྐོམ་མོ། །ཞེས་བརྗོད་པ་ན་ཐོ་ལུམ་འབར་བ་དང་ཟངས་ཞུན་ཁོལ་མ་ཁར་བླུགས་པ་ལ་སོགས་པའི་སྡུག་བསྔལ་ཡོད་དོ། །དེ་དག་ལས་སྤུ་གྲི་དང་། ནགས་ཚལ། ཤལ་མ་ལི་རྣམས་རིགས་གཅིག་ཏུ་བསྡོམས་པས་ཉེ་འཁོར་བ་བཞིའོ། །འདི་དག་ལ། ཚེ་ཚད་ནི་ངེས་གཟུང་མ་བཤད་ཀྱང་སོ་སོར་ལོ་བརྒྱ་སྟོང་དུ་གནས་དགོས་པས་སྡུག་བསྔལ་དོས་ནི་དྲག་ཡུན་ནི་རིང་ངོ་། །བཞི་པ་ཉི་ཚེ་བའི་སྡུག་བསྔལ་བསམ་པ་ནི། གནས་ནི། དམྱལ་བ་དངོས་གཞིའི་ཉེ་འཁོར་དང་། རྒྱ་མཚོའི་འགྲམ། ས་འོག་དང་། ས་སྟེང་གི་ཆུ་སོགས་ངེས་མེད་དུ་གནས། སྡུག་བསྔལ་ནི་མེས་སྲེག་པ་དང་། འཁྱགས་ཤིང་གས་པ་དང་། གཤེད་མས་གསོད་ཅིང་ཟ་བ་སོགས་དང་། ཉིན་མོ་བདེ་ཞིང་མཚན་མོ་སྡུག་བསྔལ་བ་དང་། དེ་ལས་གོ་ལྡོག་པ་སོགས་ཏེ་ཚེ་ཚད་ཀྱང་ངེས་པ་མེད་དེ། གྲོ་བཞིན་སྐྱེས་དང་། དགེ་འདུན་བསྲུངས་ཀྱི་རྟོགས་བརྗོད་ལས་འབྱུང་བ་ལྟ་བུའོ། །དེས་ན་དེ་དག་ཏུ། སྐྱེ་བའི་རྒྱུ་ནི་འཆད་འགྱུར་བཞིན་སྔར་ཡང་མང་དུ་བསགས། ད་དུང་གསོག་པར་འགྱུར་ན་ཚེ་འདི་དང་དམྱལ་བའི་བར་ན་དབུགས་གྱུ་གྱུ་བ་འདི་ལས་མེད་ན་བདེ་བར་སྡོད་མི་རིགས་ཏེ། ཞི་བ་ལྷས། དམྱལ་བ་ཡི་ནི་ལས་བྱས་ནས། །ཅི་ཕྱིར་འདིར་ནི་བདེ་བར་གནས། །ཞེས་དང་། བཤེས་སྤྲིང་ལས་ཀྱང་། སྡིག་ཅན་དབུགས་འབྱུང་འགག་པ་ཙམ་ཞིག་གི །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་སྐྱེ་བར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨྲོས་ཅི་འཚལ། །ཞེས་གསུངས་པ་དང་། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ཡིན་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་ཡང་མི་མཆི་ཆར་ཡང་མི་ཕོད་དོ། །ཞེས་གསུངས་པ་དང་། དེ་ལྟ་བུའི་སྡུག་བསྔལ་གྱི་རྒྱུ་ནི། རང་གི་ཉེས་སྤྱོད་ཁོ་ན་ཡིན་པས་བསྒྲིམས་ཏེ་སྤང་བར་བྱའོ། །གཉིས་པ་ཡི་དྭགས་ཀྱི་སྡུག་བསྔལ་བསམ་པ་ནི། ཕལ་ཆེར་འཛམ་གླིང་འདིའི་འོག་དཔག་ཚད་ལྔ་བརྒྱ་འདས་པ་ན་ཡོད་ཅིང་། ཁ་འཐོར་བ་ནི། ས་གཞི་རི་ཀླུང་ཐམས་ཅད་ལ་ཁྱབ་པ་ལྟ་བུར་ཡོད་དོ། །དེ་ལའང་དྲན་པ་ཉེར་བཞག་ལས་རིགས་སོ་དྲུག་ཏུ་གསུངས་ཀྱང་། བསྡུ་ན་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། ཟས་སྐོམ་གྱི་སྒྲིབ་པ་ཅན་དང་གསུམ་ལས། ཕྱིའི་སྒྲིབ་པ་ཅན་ནི། བཀྲེས་སྐོམ་གྱིས་ཉེན་པས་ཁ་ལུས་ཐམས་ཅད་སྐམ་ཞིང་རིད་པ། མགྲིན་པ་དང་ཡན་ལག་ཕྲ་བ། སྐྲ་འཛིངས་པ། ཟས་སྐོམ་འཚོལ་ཕྱིར་ཀུན་ཏུ་བརྒྱུགས་ཀྱང་མ་རྙེད་ཅིང་། གལ་ཏེ་རྒྱང་རིང་པོ་ནས་ཟས་ཀྱི་ཕུང་པོ་དང་། ཆུ་ཀླུང་དང་ལྗོན་ཤིང་འབྲས་བུ་ཅན་ལ་སོགས་པ་མཐོང་ཡང་། དེར་ཕྱིན་པ་ན་ཟས་རྣམས་ཤུལ་ཙམ་ཡང་མེད་པར་ཡལ། ཆུ་ཀླུང་རྣམས་བསྐམས་པའམ་རྣག་ཁྲག་ཏུ་འགྱུར། ལྗོན་ཤིང་རྣམས་འབྲས་བུ་མེད་པའི་སྡོང་དུམ་སྐམ་པོར་མཐོང་བ་དང་། དེ་ལྟར་མ་སོང་ཡང་སྐྱེས་བུ་མཚོན་ཆ་ཐོགས་པ་མང་པོས་འགོག་ཅིང་བསྲུང་བ་ལ་སོགས་པའི་སྡུག་བསྔལ་ཡོད་དོ། །ནང་གི་སྒྲིབ་པ་ཅན་ནི། ཁ་ཅིག་ཁ་ནི་ཁབ་ཀྱི་མིག་ཙམ་ལ། །ལྟོ་བ་རི་ཡི་གཏོས་ཙམ་བཀྲེས་པས་ཉེན། །མི་གཙང་གྱི་ནར་བོར་བ་ཅུང་ཟད་ཀྱང་། །འཚལ་བའི་མཐུ་དང་ལྡན་པ་མ་ལགས་སོ། །ཞེས་གསུངས་པ་ལྟར་ཟས་སྐོམ་རྙེད་ཅིང་ཁར་མི་ཚུད་ཅིང་། ཚུད་ཀྱང་ཟས་རྣམས་འགྲམ་ཕུགས་སུ་སྟོར། སྐོམ་རྣམས་ཁ་དུག་གིས་བསྐམས། ཅུང་ཟད་མིད་ཀྱང་མགྲིན་པ་ནས་མི་ཐར། ཐར་ཡང་ལྟོ་བ་མི་ཁེངས་པ་སོགས་ཀྱིས་བཟའ་བཏུང་མི་ནུས་པས་སྡུག་བསྔལ་ལོ། །ཟས་སྐོམ་གྱི་སྒྲིབ་པ་ཅན་ནི། བཟའ་བཏུང་ཁོང་དུ་སོང་ཚད་ཀྱང་མེ་འབར་བར་གྱུར་ནས་ནང་ཁྲོལ་སོགས་སྲེག་པ་དང་། ལྗན་ལྗིན་ཟ་བ་ཞེས་བཤང་གཅི་དང་རྣག་ཁྲག་མཆིལ་སྣབས་སོགས་མི་གཙང་ཞིང་དྲི་ང་བ་དང་། དུག་དང་མེ་མདག་སོགས་ངན་པ་དང་དུཿཁ་བསྐྱེད་པ་ཁོ་ན་ཟ་དགོས་པའོ། །དེ་ཐམས་ཅད་ཀྱང་སྤྱིར་དུས་རྟག་ཏུ་བཀྲེས་སྐོམ་གྱི་སྡུག་བསྔལ་བཟོད་གླགས་མེད་ཅིང་། གོས་དང་བྲལ་བས་ཚད་པས་འཚིག་པ་དང་། གྲང་བས་སྦྲེབས་པ་དང་། སོས་ཀ་ཟླ་བས་ཀྱང་འཚིག་ཅིང་། དགུན་ཉི་མས་ཀྱང་གྲང་བར་བྱེད་པ་དང། དབྱར་དུས་སྤྲིན་ཡང་མེ་ཆར་དུ་འབབ་པ་དང་། རྟག་ཏུ་འཚོལ་འགྲོས་ཀྱིས་ངལ་ཞིང་ཆད་པ་དང་། ཉམས་ཞན་པས་རུས་ཚིགས་འཁྲོགས་ཏེ་མེ་འབར་བ་དང་། ཕན་ཚུན་དགྲར་གྱུར་པས་འཆིང་བ་དང་། བརྡེག་པ་དང་། གསོད་པའི་འཇིགས་པ་དང་། གཏད་ས་མེད་པར་འཇིགས་སྐྲག་ཆེན་པོས་འབྲོས་པ་སོགས་སྡུག་བསྔལ་དོས་དྲག་ཅིང་ཡུན་རིང་པོར་མྱང་དགོས་པའོ། །ཚེ་ཚད་ཀྱི་ཁྱད་པར་མཛོད་ལས། ཟླ་བ་ཉིན་ཞག་གིས་ལྔ་བརྒྱ། །ཞེས་པས་མིའི་ཟླ་བ་གཅིག་ལ་ཞག་གཅིག་ཏུ་བྱས་པའི་རང་ལོ་ལྔ་བརྒྱ་དང་། བཤེས་སྤྲིང་ལས། ལྔ་སྟོང་དག་དང་ཁྲིར་ཡང་འཆི་མི་འགྱུར། །ཞེས་གསུངས་པས། ཡི་དྭགས་ལ་ལའི་ཚེ་ཚད་ལོ་ལྔ་སྟོང་དང་ཁ་ཅིག་གི་ལོ་ཁྲི་ཡིན་པར་བཤད་དོ། །དེ་ལྟ་བུའི་སྡུག་བསྔལ་གྱི་རྒྱུ་ནི་སེར་སྣ་འཇུར་གེགས་སོགས་ཡིན་པས་བསྒྲིམས་ཏེ་བག་ཡོད་པར་བྱའོ། །གསུམ་པ་དུད་འགྲོའི་སྡུག་བསྔལ་བསམ་པ་ནི། བྱིངས་དང་ཁ་འཐོར་བ་གཉིས། བྱིངས་ན་གནས་པ་རྒྱ་མཚོ་ཆེན་པོ་ན་ཡོད། སྐྱོབ་པའི་རྟེན་དང་གནས་མེད་པས་རླབས་ཀྱིས་བདས་ཏེ་ངེས་མེད་དུ་འཁྱམས། ཕན་ཚུན་གཅིག་ལ་གཅིག་ཟ་སྟེ། ཆེ་བས་ཆུང་བ་མིད་པ་དང་། ཆུང་བས་ཆེ་བའི་ལུས་ཕུག་སྟེ་ཟ་བ་དང་། ཀླུ་རྣམས་ནི་བྱེ་ཚན་གྱིས་ཉིན་རེ་བཞིན་བསྲེག་ཅིང་མཁའ་ལྡིང་གིས་ཟ་བ་སོགས་རྟག་ཏུ་དགྲ་བྱུང་གིས་དོགས་པའི་འཇིགས་སྐྲག་གི་སྡུག་བསྔལ་བཟོད་ཐབས་མེད། ཁ་འཐོར་ལྷ་དང་མིའི་ཡུལ་ན་ཡོད་པ་འདི་རྣམས་ཡིན། མིས་བདག་ཏུ་མ་བཟུང་བ་རྣམས་ནི་དགྲ་བྱུང་གི་དོགས་པའི་འཇིགས་སྐྲག་གིས་རྟག་ཏུ་མནར་བས་སེམས་ལ་བདེ་བ་མེད་ཅིང་བྱ་དང་གཅན་གཟན་གྱིས་ཟ་བ་དང་། མི་རྣམས་ཀྱིས་དབང་མེད་པར་གསོད་པ་དང་། བདག་ཏུ་བཟུང་བ་རྣམས་ཀྱང་སྤུ་འབྱིད་པ་དང་། སྣ་འབིག་པ་དང་། བརྡེག་ཅིང་བསྐུལ་བ་དང་། ཁུར་ལྕི་བས་མནར་བ་དང་། ཤ་དང་ཁྲག་དང་པགས་པ་དང་རུས་པའི་ཕྱིར་གསོད་པ་དང་། གླེན་ཞིང་གཏི་མུག་པས་བླང་དོར་མི་ཤེས་པས་འཐོམས་ཏེ་སྡུག་བསྔལ་བ་དང་། གཞན་ཡང་བཀྲེས་སྐོམ་ཚ་གྲང་ངལ་དུབ་སོགས་དམྱལ་བ་དང་ཡི་དྭགས་ཀྱི་སྡུག་བསྔལ་འདྲ་རུང་དུ་ཡོད་པའོ། །བཤེས་སྤྲིང་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིང་དང་བརྡེག་སོགས་སྡུག་བསྔལ་སྣ་ཚོགས་མྱོང་། །ཞི་འགྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་འབྱུང་། ཁ་ཅིག་མུ་ཏིག་བལ་དང་རུས་པ་ཁྲག །ཤ་དང་པགས་པའི་ཆེད་དུ་འཆི་བར་འགྱུར། །དབང་མེད་གཞན་དག་རྡོག་པ་ལག་པ་དང་། །ལྕག་དང་ལྕགས་ཀྱུ་རྣམས་ཀྱིས་བཏབ་སྟེ་བཀོལ། །ཞེས་གསུངས་སོ། །ཚེ་ཚད་ནི། དུད་འགྲོ་རྣམས། མཆོག་རིང་བསྐལ་པའོ། །ཞེས་ཚེ་རིང་བས་བསྐལ་པ་ཙམ་ཐུབ་ཅིང་། ཐུང་བ་ངེས་མེད་དུ་བཤད་དོ། །དེ་ལྟར་ངན་འགྲོའི་སྡུག་བསྔལ་བསམ་པ་ནི། ད་ལྟ་མེ་ནང་དུ་མཛུབ་མོ་བཅུག་ནས་ཞག་རེ་སྡོད་པ་དང་། དགུན་གྲང་སྒང་འཁྱགས་སྦུབས་སུ་གཅེར་བུར་སྡོད་པ་དང་། ཉིན་ཞག་ཁ་ཡར་བཟའ་བཏུང་མེད་པ་དང་། ལུས་ལ་སྦྲང་བུ་དང་ལྗི་ཤིག་གིས་སོ་བཏབ་པ་ཙམ་ཡང་བཟོད་པར་དཀའ་ན། དམྱལ་བ་ཡི་དྭགས་དུད་འགྲོ་རྣམས་ཀྱི་སྡུག་བསྔལ་ཇི་ལྟར་བཟོད་སྙམ་དུ་ད་ལྟའི་རང་ཉམས་ལ་དཔགས་ནས་འཇིགས་སྐྲག་གི་སྐྱོ་ཤས་དང་ངེས་འབྱུང་དྲགས་པོས་བསྐུལ་ནས་དལ་འབྱོར་དོན་ཡོད་པར་བྱའོ། །གཉིས་པ་མཐོ་རིས་ཀྱི་ཉེས་དམིགས་བསམ་པ་ནི། བསོད་ནམས་ཆ་མཐུན་གྱི་དགེ་བའི་ལས་ལམ་ཆུང་འབྲིང་ཆེན་པོར་བསགས་པ་ལས་མི་དང་འདོད་ལྷ་དང་། ཁམས་གོང་མའི་ལྷར་རིམ་པ་བཞིན་སྐྱེས་ནས་དེ་དང་དེའི་གནས་སྐབས་ཀྱི་བདེ་བ་ལ་སྤྱོད་དོ། །དེས་ན་ངན་སོང་ན་བདེ་བའི་སྐབས་མེད་པས་བདེ་འགྲོ་ཐོབ་པའི་ཐབས་ལ་འབད་པར་བྱའོ་སྙམ་ན། འཁོར་བ་ཐམས་ཅད་སྡུག་བསྔལ་གྱི་རང་བཞིན་ཡིན་པས་སྙིང་པོ་མེད། ངན་འགྲོར་དེ་ལྟར་སྡུག་བསྔལ་བར་མ་ཟད། མཐོ་རིས་ཀྱང་སྡུག་བསྔལ་གྱི་རང་བཞིན་ཅན་ཡིན་པར་བསམ་དགོས། དེ་ལ་མིའི་སྡུག་བསྔལ་བསམ་པ། ལྷ་མིན་གྱི་སྡུག་བསྔལ་བསམ་པ། ལྷའི་སྡུག་བསྔལ་བསམ་པ་དང་གསུམ་ལས། དང་པོ་མིའི་སྡུག་བསྔལ་བསམ་པ་ནི། དེ་ལ་སྤྱིར་སྐྱེ་བའི་ཚེ་མའི་མངལ་དོག་ཅིང་མུན་ནག་དྲི་ང་བ་ཚ་གྲང་གི་འགྱུར་ལྡོག་བཟོད་དཀའ་བ་དེར་ཟླ་བ་བགྲངས་ནས་སྡོད་དགོས། དེ་ནས་མགོ་མཇུག་ལྡོག་ནས་འཇུར་མིག་ནས་དྲངས་པ་ལྟ་བུ་དང་། རེག་པ་དང་ཚེར་ལྕག་བྲབས་པ་ལྟ་བུ་དང་། ལག་ཏུ་བླངས་ཚེ་བྱིའུ་ཁྲས་ཁྱེར་བ་ལྟ་བུའི་སྡུག་བསྔལ་ཡོད་པར་འདུག །དེ་ནས་རྒས་པའི་ཚེ་ཁ་དོག་ཉམས་པས་ལུས་ཀྱི་མདངས་མི་སྡུག་པས་སྔོ་ནག་ཐལ་ཁ། མགོ་དཀར། དབང་པོའི་བཀྲག་དབྱིབས་ཉམས་པས་སོ་གོག །ལུས་རྒུར་ཞིང་ཡན་ལག་འཁྱོགས། ཤ་སྐམ། པགས་པ་ལྷོད། གདོང་བྱད་གཉེར་མས་གང་། མཐུ་ཉམས་པས་ལྡང་བ་དཀའ། འགྲོ་ན་འཁྱོར། འདུག་ན་བུབ། སྨྲ་ན་ལྡབ་ལྡིབ་ཏུ་འགྱུར། དབང་པོ་ཉམས་པས་མིག་མི་གསལ་ཞིང་རྣ་བ་འོན། ལོངས་སྤྱོད་ཉམས་པས་ཁ་ཟས་ཉུང་ན་བཀྲེས། མང་ན་མི་འཇུ་བ་སོགས་འདོད་ཡོན་ལ་སྤྱད་དུ་མེད་ཅིང་ཀུན་གྱི་ཡིད་དུ་མི་འོང་བའོ། །ཡང་སྔོན་ལས་འཕྲལ་རྐྱེན་གྱིས་འབྱུང་བཞི་འཁྲུགས་པའི་ནད་ཀྱིས་བཏབ་པས་ཟུག་རྔུ་ལྡང་ཞིང་ལུས་རྒུད། འདོད་པའི་བཟའ་བཏུང་དང་གཉིད་སོགས་ལ་སྤྱོད་པའི་དབང་མེད། མི་འདོད་པའི་སྨན་དང་དཔྱད་སོགས་བརྟེན་ཅིང་འཆི་བར་དོགས་པའི་སྡུག་བསྔལ་མཐའ་མེད། འཆི་བའི་ཚེ་སྨན་དཔྱད་རིམ་གྲོ་ཅི་བྱས་ཀྱང་མ་ཕན་པར་སྔར་འབད་པས་བསྒྲུབས་པའི་ལོངས་སྤྱོད་དང་དབང་ཐང་འཁོར་གྲོགས་ཐམས་ཅད་དང་། ཕངས་ཤིང་སྡུག་པའི་ལུས་ཀྱང་བཞག་སྟེ་གནད་གཅོད་ཀྱི་སྡུག་བསྔལ་དྲག་པོ་དང་བཅས་ནས་འཆི་བར་འགྱུར་རོ། །སྡུག་བསྔལ་བཞི་པོ་དེ་མི་སྤྱི་མཐུན་དུ་མྱང་དགོས་པར་མ་ཟད་བྱེ་བྲག་གི་སྡུག་བསྔལ་ཡང་སྡུག་བསྔལ་བཞི་པོ་དེ་ཤས་ཆུང་བའི་བར་སྐབས་སུ་ཡང་། ལོངས་སྤྱོད་མངའ་ཐང་སོགས་ཚེ་འདིའི་བདེ་འབྱོར་ཕྲ་མོ་སྒྲུབ་པའི་དོན་དུ་ལུས་སྲོག་ཐེད་ལ་བོར་ནས་དཀའ་བ་ཇི་སྙེད་ཅིག་བྱས་ཀྱང་འདོད་པའི་དོན་མ་འགྲུབ་པའི་སྡུག་བསྔལ། ཚ་གྲང་བཀྲེས་སྐོམ་ནད་གདོན་དགྲ་ཇག་སོགས་ཡིད་དུ་མི་འོང་བའི་རྐྱེན་དང་ཕྲད་པའི་སྡུག་བསྔལ། གཉེན་གྲོགས་འཁོར་འདབས་ལོངས་སྤྱོད་སོགས་དགའ་བདེ་སྐྱིད་པའི་དཔལ་དང་བྲལ་བའི་སྡུག་བསྔལ། མདོར་ན་འབྱོར་ལྡན་རྣམས་འཁོར་དང་ལོངས་སྤྱོད་ཇི་ཙམ་ཆེ་བ་ལྟར་དེ་དག་བསྲུང་བའི་སྡུག་བསྔལ་ཡང་ཆེ་ལ། དབུལ་པོ་རྣམས་ཟས་གོས་སོགས་འདོད་པའི་ཡོ་བྱད་བཙལ་ཡང་མ་རྙེད་པའི་ཕོངས་པའི་སྡུག་བསྔལ་དང་ལྡན་པ་སྟེ། སྐྱེས་རབས་ལས། གཅིག་ནི་བསྲུང་བས་ཉོན་མོངས་ལ། །གཉིས་པ་འཚོལ་བས་ཤ་ཐང་ངོ་། །ཕྱུག་གམ་ཡང་ན་དབུལ་ཡང་རུང་། །གང་ནའང་དགའ་བ་མེད་པར་འགྱུར། །ཞེས་དང་། བཞི་བརྒྱ་པ་ལས་ཀྱང་། མཆོག་ལ་ཡིད་ཀྱི་སྡུག་བསྔལ་ཏེ། །ཐ་མལ་རྣམས་ལ་ལུས་སྐྱེས་སོ། །སྡུག་བསྔལ་གཉིས་ཀྱིས་འཇིག་རྟེན་འདི། །ཉིན་རེ་བཞིན་ནི་འཇོམས་པར་བྱེད། །ཅེས་གསུངས་པ་ལྟར་རང་ཅག་གི་མངོན་དུ་གྱུར་པ་འདི་ཀས་མཚོན་པའོ། །གཉིས་པ་ལྷ་མིན་གྱི་སྡུག་བསྔལ་བསམ་པ་ནི། དང་པོར་ལྷའི་ཕུན་སུམ་ཚོགས་པའི་དཔལ་རྣམས་མཐོང་བའི་ཚེ། དེ་ལ་ཕྲག་དོག་པས་ཡིད་ལ་མི་བཟོད་པའི་གདུང་བ་དྲག་པོ་རྟག་ཏུ་ཡོད་ཅིང་། དུས་དུས་ན་ལྷ་དང་འཐབས་པ་ལས། ལྷ་མིན་བསོད་ནམས་མཐུ་ཆུང་བས་གསོད་པ་དང་བརྡེག་པ་དང་ཡན་ལག་གཅོད་པ་དང་འདྲལ་བ་ལ་སོགས་པའི་སྡུག་བསྔལ་དྲག་པོ་འབྱུང་ཞིང་། དེའི་ཚེ་ལྷ་རྣམས་ནི་མགོ་བོ་དང་རྐེད་པ་མ་ཆད་ན་གནད་དུ་འཕོག་ཀྱང་སླར་འཚོ་ལ། ལྷ་མིན་རྣམས་ནི་མི་ལྟར་གནད་དུ་ཕོག་པ་ལས་འཆི་སྟེ། ཤི་བའི་གཟུགས་བརྙན་གསེར་གྱི་ས་གཞིའི་སྟེང་དུ་ཀུན་སྣང་ཞེས་པའི་མཚོ་ལ་ཤར་བས་དམག་མ་ལོག་པའི་གོང་ནས་ཉེ་དུ་རྣམས་མྱ་ངན་གྱིས་གདུང་བར་བཤད་ཅིང་། ལྷ་མིན་ཕལ་ཆེར་ནག་ཕྱོགས་ཡིན་པས་ཆོས་ལ་མི་དགའ། འགའ་ཞིག་མོས་སུ་ཆུག་ཀྱང་རྣམ་སྨིན་གྱི་སྒྲིབ་པ་ཅན་ཡིན་པས་ཁྱད་པར་རྟོགས་པའི་སྐལ་པ་མེད་དོ། །གསུམ་པ་ལྷའི་སྡུག་བསྔལ་བསམ་པ་ལ་གཉིས། འདོད་པའི་ལྷ་དང་། ཁམས་གོང་མའི་འོ། །དང་པོ་འདོད་པའི་ལྷ་རྣམས་ནི། སྔར་འདོད་ཡོན་ལ་བག་མེད་པར་སྤྱད་པའི་བདེ་བས་བྲིད་དེ། ཚེ་ཟད་པ་མ་ཚོར་བ་ལ་སོང་སྟེ་འཆི་འཕོ་བ་ན། ལུས་ཀྱི་མདོག་མི་སྡུག་པ་དང་། སྟན་ལ་མི་དགའ་བ་དང་། མེ་ཏོག་གི་ཕྲེང་བ་རྙིང་པ་དང་། གོས་ལ་དྲི་མ་ནག་པོ་ཆགས་པ་དང་། ལུས་ལ་སྔོན་མེད་པའི་རྔུལ་འབྱུང་བ་སྟེ་འཆི་ལྟས་ལྔ་ལྷའི་ཞག་བདུན་གྱི་གོང་དུ་འབྱུང་བས་འཆི་འཕོའི་སྡུག་བསྔལ་དོས་དྲགས་ལ་ཡུན་རིང་བ་དང་། དེའི་ཚེ་རང་གི་ལྷ་མོ་དང་འཁོར་རྣམས་ཀྱིས་ཀྱང་སྤངས་ཏེ་ལྷ་གཞན་གྱི་དྲུང་དུ་སོང་བས་སྡུག་བསྔལ་བ་དང་ཡིད་མི་བདེ་བ་ཆེར་སྐྱེད་ཅིང་། ཁྱད་པར་ལྷའི་དཔལ་དང་འདོད་ཡོན་ལ་ཆགས་ཀྱང་དབང་མེད་དུ་འབྲལ་བར་ཤེས། ཤི་ནས་ཀྱང་ལྷར་སྐྱེ་བ་ནི་སྲིད་པ་ཙམ་སྟེ་མིར་སྐྱེ་བའང་ཉུང་། ཕལ་ཆེར་ངན་སོང་དུ་སྐྱེ་བས། དེའི་སྡུག་བསྔལ་བཟོད་དཀའ་བ་ཡུན་རིང་དུ་མྱང་དགོས་པར་ཤེས་ནས་འོག་ཏུ་ལྟུང་བའི་སྡུག་བསྔལ་བཟོད་གླགས་མེད་པར་འབྱུང་བ་སྟེ། དྲན་ཉེ་ལས། ལྷ་ཡི་གནས་ནས་ལྟུང་བ་ན། །སྡུག་བསྔལ་རབ་ཏུ་སྐྱེ་བ་གང་། །དེ་ལ་སེམས་ཅན་དམྱལ་བ་ཡིས། །བཅུ་དྲུག་ཆར་ཡང་མི་ཕོད་དོ། །ཞེས་དང་། བཤེས་སྤྲིང་ལས། བརྒྱ་བྱིན་འཇིག་རྟེན་མཆོད་འོས་གྱུར་ནས་ཀྱང་། །སླར་ཡང་ལས་ཀྱི་དབང་གིས་ས་སྟེང་ལྷུང་། །འཁོར་ལོས་སྒྱུར་རྒྱལ་ཉིད་དུ་གྱུར་ནས་ཀྱང་། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་པ་ལྟར་རོ། །གཞན་ཡང་ལྷ་བསོད་ནམས་ཆེ་བ་རྣམས་ཀྱི་འདོད་ཡོན་གྱི་དཔལ་མཐོང་བ་ན། བསོད་ནམས་ཆུང་བ་རྣམས་སེམས་ཁོང་དུ་ཆུད་ནས་སྤ་བཀོང་བར་འགྱུར་བ་དང་། མཐུ་ཆེ་བས་ཆུང་བ་རྣམས་གནས་ནས་སྐྲོད་པའི་སྡུག་བསྔལ་དང་། ཁྱད་པར་རྒྱལ་ཆེན་བཞི་པའི་རིགས་དང་། སུམ་ཅུ་རྩ་གསུམ་པ་རྣམས་ལ་ལྷ་མ་ཡིན་དང་འཐབ་ཅིང་རྩོད་པ་དང་། ལུས་མཚོན་གྱིས་གཅོད་པ་དང་འདྲལ་བ་དང་གསོད་པ་ལ་སོགས་པའི་སྡུག་བསྔལ་དྲག་པོ་ཡོད་དོ། །གཉིས་པ་ཁམས་གོང་མའི་སྡུག་བསྔལ་བསམ་པ་ནི། གཟུགས་དང་གཟུགས་མེད་པ་དག་ན། སྡུག་བསྔལ་གྱི་སྡུག་བསྔལ་མངོན་འགྱུར་བ་མེད་ཀྱང་འདུ་བྱེད་ཀྱི་སྡུག་བསྔལ་ཁོ་ནའི་རང་བཞིན་ལས་མ་འདས་པ་དང་། ཏིང་ངེ་འཛིན་གྱིས་མྱོས་པ་ལྟར་གྱུར་པས་སོ་སྐྱེ་རྣམས་ཡོན་ཏན་གོང་འཕེལ་དུ་འགྲོ་བ་མེད་ཅིང་། ཏིང་ངེ་འཛིན་གྱི་རོ་མྱངས་པས་རོ་མྱང་ཅན་གྱི་ཏིང་ངེ་འཛིན་དང་བྲལ་མི་ཕོད་ཅིང་། དེས་རང་རང་གི་ཏིང་ངེ་འཛིན་ཉམས་ནས་འཆི་བའང་ཡོད། སྒོས་སུ་དེར་གནས་པའི་སོ་སྐྱེ་རྣམས་སྔོན་ལས་ཀྱི་འཕེན་པ་ཟད་པ་ན་སླར་ཡང་འདོད་པའི་ཁམས་སུ་སྐྱེ་བ་ལེན་ཏེ། སྔོན་མའི་རྟེན་ལ་འཇིག་རྟེན་པའི་ཏིང་ངེ་འཛིན་བསྒོམས་པའི་སྐབས་དང་། སྐབས་དེར་བསམ་གཏན་གཟུགས་མེད་ཀྱི་ཏིང་ངེ་འཛིན་ལ་ཉམས་བདེ་བདེ་འདྲ་བར་འདུག་ཀྱང་ཡིད་བརྟན་མེད་པར་ནམ་མཁར་འཕངས་པའི་མདའ་བཞིན་དུ་ཟག་བཅས་ཀྱི་བདེ་བའི་འཕེན་ཤུགས་ཟད་པ་ན་སླར་ངན་སོང་དུ་ལྟུང་བར་འགྱུར་ཏེ། བཤེས་སྤྲིང་ལས། ལྷ་ཡུལ་འདོད་བདེ་ཤིན་ཏུ་ཆེན་པོ་དང་། །ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་གྱུར་པ་ཡི། །སྡུག་བསྔལ་རྒྱུན་མི་ཆད་པ་བརྟེན་འཚལ་ལོ། །ཞེས་པ་ལྟར་རོ། །དེས་ན་མེ་ཆེ་ཆུང་ཅི་ཡིན་ཡང་ཚ་བ་ལས་མ་འདས་པ་ལྟར། ཁམས་གསུམ་འཁོར་བ་འདི་མཐོ་དམའ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་ཏེ། གནས་གང་དུ་གནས་ཀྱང་སྡུག་བསྔལ་གྱི་གནས། གྲོགས་སུ་དང་འགྲོགས་ཀྱང་སྡུག་བསྔལ་གྱི་གྲོགས། ལོངས་གང་ལ་སྤྱད་ཀྱང་སྡུག་བསྔལ་གྱི་ལོངས་སྤྱོད་ལས་མ་འདས་ཏེ། རྒྱུད་བླ་ལས། མི་གཙང་བ་ལ་དྲི་ཞིམ་མེད་བཞིན་འགྲོ་ལྔ་དག་ན་བདེ་བ་མེད། །དེ་ཡི་སྡུག་བསྔལ་རྟག་ཏུ་མི་མཚོན་རྒྱ་ཚྭ་ལ་སོགས་རེག་སྐྱེས་བཞིན། །ཞེས་གསུངས་པ་ལྟར་ཤེས་པར་བྱའོ། །གསུམ་པ་སྡུག་བསྔལ་གསུམ་གྱི་རང་བཞིན་བསམ་པ་ནི། སྤྱིར་འཁོར་བ་ལ་སྡུག་བསྔལ་ནི་རྒྱུ་འབྲས་གཉིས་ཏེ། དང་པོ་ནི། ལྷ་དང་མི། འཁོར་དང་ལོངས་སྤྱོད་ཕུན་སུམ་ཚོགས་ཀྱང་བསམ་པ་མི་དགེ་བས་ཟིན་པ་སྦྱོར་བ་སྡིག་པ་ལ་སྤྱོད་པ་རྣམས་སོ། །གཉིས་པ་ནི། ངན་སོང་གསུམ་དང་། མཐོ་རིས་ཀྱི་བཀྲེན་ཕོངས་ཅན་དང་། ལུས་ནད་དང་། སེམས་མྱ་ངན་གྱིས་ཟིན་པ་སོགས་སོ། །སྡུག་བསྔལ་དེ་ཡང་མདོར་བསྡུ་ན་རྣམ་པ་གསུམ་སྟེ། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་དང་གསུམ་མོ། །དང་པོ་ནི། དཔེར་ན་རྨ་ཁར་དུག་བཏབ་པ་བཞིན་ཚ་གྲང་བཀྲེས་སྐོམ་སོགས་ཚོར་བ་སྡུག་བསྔལ་ཐམས་ཅད་ཡིན་ཏེ། གཙོ་བོར་ངན་སོང་གསུམ་ནའོ། །གཉིས་པ་ནི། དཔེར་ན་གྲང་བའི་ཚེ་མེ་ལ་བརྟེན་པ་བཞིན། ཚེ་དང་ལོངས་སྤྱོད་སོགས་མཐའ་ན་བསམ་གཏན་གྱི་བདེ་བ་ཚུན་ཆད་དེ། ཚོར་བ་བདེ་བ་ཐམས་ཅད་ཡིན་ཏེ་གཙོ་བོར་མི་དང་འདོད་པའི་ལྷ་རྣམས་སོ། །གསུམ་པ་ནི། དཔེར་ན་སྐོམ་ནད་ཅན་ལན་ཚྭའི་ཆུ་འཐུང་བ་བཞིན། སྡུག་བསྔལ་དེ་གཉིས་ཀའི་གཞི་འདུ་བྱེད་ཉེ་བར་ལེན་པའི་ཕུང་པོ་ཙམ་འདི་སྡུག་བསྔལ་ཐམས་ཅད་ཀྱི་བསྐྱེད་གཞི་ཡིན་ཏེ། འདི་ལས་སྐྱེ་རྒ་སོགས་སྡུག་བསྔལ་ཐམས་ཅད་རིམ་ཅན་དུ་འབྱུང་ཞིང་། འདི་ཚོར་བ་བཏང་སྙོམས་ཁོ་ན་དང་ལྡན་པའི་ཚེ་འདུ་བྱེད་ཀྱི་སྡུག་བསྔལ་ཁོ་ནའི་མིང་ཐོབ་པ་ཡིན་ཏེ། གཙོ་བོར་བསམ་གཏན་བཞི་ནའོ། །དེ་ལྟར་ཡང་མདོ་ལས། ཚོར་བ་གང་ཅི་ཡང་རུང་བ་དེས་ན་ཐམས་ཅད་སྡུག་བསྔལ་བའོ། །ཞེས་གསུངས་པའང་དེ་ལ་དགོངས་པའོ། །འདི་ལས་མ་ཐར་ན་གཞན་གཉིས་ལས་ཐར་བ་མེད་དེ་ཤིང་སྡོང་གི་རྩ་བ་མ་བཅད་ན་ལོ་འདབ་བཅད་ཀྱིས་མི་ལང་བ་བཞིན་ཤེས་པར་བྱའོ། །བཞི་པ་ལས་རྒྱུ་འབྲས་བསམ་པ་ནི། ལས་འབྲས་སྤྱིར་བསམ་པ། བྱེ་བྲག་ཏུ་བསམ་པ། བདེན་བཞིས་འགག་བསྡུ་བའོ། །དང་པོ་སྤྱིར་བསམ་པ་ནི། མདོ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པས། དགེ་བའི་ལས་ཀྱི་འབྲས་བུ་བདེ་བ་དང་། མི་དགེ་བའི་ལས་ཀྱི་འབྲས་བུ་སྡུག་བསྔལ་ཏེ་དཀར་ནག་གི་ལས་འབྲས་སོ་སོར་སྨིན་ཚུལ་བསམ་གྱིས་མི་ཁྱབ་པར་གསུངས་པས་སྤང་བླང་བྱེད་དགོས། ལས་དགེ་སྡིག་གང་ཡིན་ཡང་རུང་། རྒྱུ་ལས་ཀྱི་དུས་ན་ཆུང་ངུ་ལས་མེད་ཀྱང་འབྲས་བུ་རྣམ་སྨིན་གྱི་དུས་ན་འཕེལ་ཏེ་ཆེ། འགྱུར་ཆེ་ཤོས་བརྒྱ་འགྱུར་སྟོང་འགྱུར་དུ་འཕེལ། འགྱུར་ཆེ་བ་ལ་ཚད་གཟུང་དུ་མེད་དེ། ནས་སོགས་འབྲུའི་ས་བོན་གྱི་འཕེལ་སྐྱེད་བཞིན་ནོ། །དེས་ན་རང་གིས་བསགས་པའི་ལས་གཉེན་པོས་མ་བཅོམ་ན། འབྲས་བུ་མ་སྨིན་གྱི་བར་དུ་ཆུད་འཛའ་བ་མི་སྲིད་པས་བླང་དོར་གྱི་གནས་ལ་གཟབ་པ་གལ་ཆེའོ། །གཉིས་པ་བྱེ་བྲག་ཏུ་བསམ་པ་ལ། མི་དགེ་བ་སྤང་བྱར་བསམ་པ། དགེ་བ་བསྒྲུབ་བྱར་བསམ་པ། ལུང་མ་བསྟན་དགེ་བར་བསྒྱུར་བའོ། །དང་པོ་ནི། དེ་ཡང་ལས་མི་དགེ་བ་ནི། རང་བཞིན་གྱི་ཁ་ན་མ་ཐོ་བ་སུས་སྤྱད་ཀྱང་སྡིག་པར་འགྱུར་བ། དུག་གསུམ་དང་ཕྲག་དོག་སེར་སྣ་ལ་སོགས་པ་རྩ་ཉོན་དང་ཉེ་ཉོན་ཉེས་སྤྱོད་ཀུན་ནས་སློང་ནུས་པ་རྣམས་དང་། དེ་དག་གིས་ཀུན་ནས་བསླངས་པའི་སྒོ་གསུམ་གྱི་ལས་མི་དགེ་བ་ཐམས་ཅད་དང་བཅས་པའི་ཁ་ན་མ་ཐོ་བ་གང་གིས་སྡོམ་པ་བླངས་པ་དེ་ལས་ལོག་པར་སྤྱད་ན་སྡིག་པར་འགྱུར་བ་རྣམས་སོ། །དེས་ན་འཁོར་བའི་སྡུག་བསྔལ་ཐམས་ཅད་རྒྱུ་མི་དགེ་བའི་ལས་ལས་བྱུང་མོད། མི་དགེ་བ་དེ་ལ་རྣམ་གྲངས་མང་ཡང་བླང་དོར་གྱི་གནས་ལ་གལ་ཆེ་བ་ཆེ་ལོང་ཙམ་དུ་བསྡུ་ན་བཅུ་སྟེ། མཛོད་ལས། དེ་ནས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་བཤད་དོ། །ཞེས་གསུངས་པས། དེ་ལ་ལུས་ཀྱི་ལས་གསུམ་ལས། སྲོག་གཅོད་པ་ནི། སྲོག་གཅོད་འདོད་ཀྱིས་གསད་བྱ་མ་ནོར་བར་བསད་པ། མ་ཤི་བར་དུ་གསོད་སེམས་ལས་མ་ལྡོག་པའོ། །མ་བྱིན་པར་ལེན་པ་ནི། གཞན་གྱི་ནོར་རང་ལ་མ་བྱིན་པར་འཕྲོག་པའམ་བརྐུས་པ་སོགས་གང་ཡིན་ཡང་རུང་སྟེ་རང་གིས་ཐོབ་བློ་སྐྱེས་པའོ། །འདོད་པས་ལོག་པར་གཡེམ་པ་ནི། ཡུལ་མ་ཡིན་པ་གཞན་གྱིས་བདག་ཏུ་བཟུང་བའི་བུད་མེད། བདུན་རྒྱུད་ཚུན་ཆད་ཀྱི་ཉེ་དུ་དང་། གཞན་གྱིས་གླ་རྔན་མ་སྦྱངས་པའི་སྨད་འཚོང་མ། ཕ་མ་རྒྱལ་པོ་སོགས་གཞན་གྱིས་བསྲུངས་པ། ཚངས་སྤྱོད་ཀྱི་སྡོམ་པས་བསྲུངས་པ་རྣམས་སོ། །དུས་མ་ཡིན་པ་ནད་བུ་ཅན་དང་། མྱ་ངན་ཅན་དང་། སྦྲུམ་མ་དང་། ཟླ་མཚན་འབབ་པ་དང་། ནམ་ཡང་འདོད་པས་མ་ངོམས་པ་སོགས་སོ། །གནས་མ་ཡིན་པ་མཆོད་རྟེན་དང་གཙུག་ལག་ཁང་དང་། གྱོ་མོ་མང་པོའི་དབུས་དང་བགྲོད་བྱ་ལ་གནོད་པའི་ས་གཞི་འབར་འབུར་སྲ་མཁྲེགས་ཅན་སོགས་སོ། །ལམ་མ་ཡིན་པ་སྐྱེ་གནས་ལས་གཞན་པའི་སྒོར་བརྟེན་པ་རྣམས་སོ། །དེ་དག་ནི་ཁྱིམ་པའི་དབང་དུ་བྱས་ཀྱི། ཚངས་སྤྱོད་རྣམས་ནི་མི་ཚངས་པར་སྤྱོད་པ་ཅི་འདྲ་ཞིག་བརྟེན་ཀྱང་ལོག་གཡེམ་མོ། །ངག་གི་ལས་བཞི་ལ་རྫུན་སྨྲ་ནི། བསླུ་སེམས་ཀྱིས་འདུ་ཤེས་བསྒྱུར་ནས། ཤེས་བཞིན་དུ་མི་བདེན་པར་སྨྲས་ལ། ཕ་རོལ་པོས་དོན་གོ་བའོ། །འདི་ནི་ངག་གི་རིག་བྱེད་ཙམ་དུ་མ་ཟད། ལུས་ཀྱི་བརྡས་ཀྱང་དེར་འགྱུར་བ་ཡོད་དོ། །ཕྲ་མ་ནི། མི་མཐུན་པའི་འགྲོ་བ་གཉིས་དབྱེ་འདོད་ཀྱིས་དཀྲུགས་ཀྱི་ཚིག་སྨྲས་ཤིང་ཕ་རོལ་གྱིས་དོན་གོ་བ་ནའོ། །ཚིག་རྩུབ་ནི། དངོས་སུ་ཐོས་པར་དེའི་སྐྱོན་བརྗོད་པ་སོགས་ཞེ་ལ་འཕོག་པའི་ཚིག་སྨྲས་ཤིང་དེས་གོ་བའོ། །ངག་འཁྱལ་ནི། དེ་གསུམ་མ་ཡིན་པ་གཞན་ཁ་གསག་གླུ་དང་ཟློས་གར་དམག་དང་ཚོང་དང་ཆགས་པའི་གཏམ་ལ་སོགས་པ་དང་། ལྟ་ལོག་གི་ཆོས་ཀྱི་གཏམ་སྨྲ་བ་སོགས་སོ། །ཡིད་ཀྱི་ལས་གསུམ་ལས་བརྣབ་སེམས་ནི། གཞན་གྱི་གནས་ཁང་ལོངས་སྤྱོད་འཁོར་གཡོག་ལ་སོགས་པ་རྣམས་རང་གིར་བྱེད་འདོད་པའི་བསམ་པ་གཏིང་ཚུགས་པར་བྱེད་པའོ། །གནོད་སེམས་ནི། གཞན་ལ་གནོད་པར་བྱེད་འདོད་པས་སྡུག་བསྔལ་འབྱུང་བར་གྱུར་ཅིག་སྙམ་པའི་བསམ་པ་གཏིང་ཚུགས་པའོ། །ལོག་ལྟ་ནི། ལས་འབྲས་མི་བདེན་པ་དང་། ཚེ་སྔ་ཕྱི་དང་། དཀོན་མཆོག་གསུམ་སོགས་མེད་པར་འཛིན་པ་དམ་པོ་འཆང་བ་ཡིན་ནོ། །དེ་ལྟར་བཅུ་པོ་ནི་ལས་ལམ་རྫོགས་པའི་དབང་དུ་བྱས་ཀྱི། བསམ་བཞིན་མ་ཡིན་པར་ནོར་ཏེ་བསད་པ་སོགས་བཅུ་པོའི་ཕྱོགས་མཐུན་ཐམས་ཅད་ཀྱང་སྤོང་བ་ལ་ནན་ཏན་དུ་བསླབ་པར་བྱ་སྟེ། འདོད་ཆགས་ཞེ་སྡང་གཏི་མུག་བཅས། །དེས་བསྐྱེད་ལས་ནི་མི་དགེ་བའོ། །ཞེས་གསུངས་པ་ལྟར་རོ། །ད་ནི་མི་དགེ་བ་དེ་དག་གི་འབྲས་བུ་ནི་གསུམ་སྟེ། རྣམ་སྨིན་དང་། རྒྱུ་མཐུན་དང་། བདག་པོའི་འབྲས་བུའོ། །དང་པོ་ནི། མི་དགེ་བ་དེ་དག་ཀྱང་ཀུན་སློང་དྲག་ཞན་ལ་སོགས་པའི་བྱེ་བྲག་གིས་ཆེན་པོ་དང་འབྲིང་དང་ཆུང་ངུ་གསུམ་དུ་འགྱུར་ལ། དེ་ཡང་ཆེ་བས་དམྱལ་བ། འབྲིང་གིས་ཡི་དྭགས། ཆུང་བས་དུད་འགྲོར་སྐྱེ་བ་ཡིན་ཏེ། སྔར་བཤད་པའི་སྡུག་བསྔལ་རྣམས་མྱོང་བར་འགྱུར་བ་ཡིན་ནོ། །གཉིས་པ་མྱོང་བ་རྒྱུ་མཐུན་ནི། སྲོག་བཅད་པས་ཚེ་ཐུང་། བརྐུས་པས་ལོངས་སྤྱོད་ཆུང་། ལོག་གཡེམ་གྱིས་དགྲ་མང་། རྫུན་གྱིས་སྐུར་བ་མང། ཕྲ་མས་གྲོགས་དང་འཁོན། ཚིག་རྩུབ་ཀྱིས་མི་སྙན་པ་ཐོས། ངག་འཁྱལ་གྱིས་ངག་མི་བཙན། བརྣབ་སེམས་ཀྱིས་རེ་བ་མི་འགྲུབ། གནོད་སེམས་ཀྱིས་འཇིགས་པ་བསྐྱེད། ལོག་ལྟས་གླེན་ཞིང་གཏི་མུག་པར་འགྱུར་རོ། །བྱེད་པ་རྒྱུ་མཐུན་ནི། སྔར་ལས་དེ་དང་དེ་བྱས་པས་ཕྱིས་ཀྱང་དེ་དང་དེ་ལ་དགའ་བའོ། །གསུམ་པ་བདག་པོའི་འབྲས་བུ་ནི། ཕྱི་རོལ་ཡུལ་ལ་སྨིན་པར་འགྱུར་ཏེ། སྲོག་གཅོད་ཀྱིས་འབྲུ་དང་སྨན་སོགས་མཐུ་ཆུང་། བརྐུས་པས་ལོ་ཉེས། ལོག་གཡེམ་གྱིས་ས་ཕྱོགས་རྡུལ་དང་ཁུག་སྣ་ཆར་རྡུལ་གྱིས་འཁྲིགས། རྫུན་སྨྲས་པས་ས་ཕྱོགས་དྲི་ང་ཞིང་ལྗན་ལྗིན་གྱིས་གང་། ཕྲ་མས་ས་གཞི་གཡང་ས་དང་ངམ་གྲོག་རང་རོང་དུ་འགྱུར། ཚིག་རྩུབ་ཀྱིས་ཐང་སྐྱ་བོ་དང་ཚེར་མ་དང་ཚྭ་སྒོ་ཅན་དུ་འགྱུར། ཀྱལ་པས་ནམ་ཟླ་དུས་བཞི་ཚུལ་མིན་དུ་འགྱུར། བརྣབ་སེམས་ཀྱིས་འབྲུ་ཕྲ་བ་དང་ངན་པར་འགྱུར། གནོད་སེམས་ཀྱིས་རོ་བཅུད་བཟང་པོ་རྣམས་ངན་པར་འགྱུར། ལོག་ལྟས་འབྲུ་རྣམས་ཉུང་ངུ་ནས་གཏན་མེད་ཀྱི་བར་དུ་འགྱུར་བ་སོགས་སོ། །དེ་ལྟར་རྒྱུ་མཐུན་དང་བདག་པོའི་འབྲས་བུ་འདི་རྣམས་སྐྱེ་བ་དེ་དང་ཕྱི་མའི་བར་སྐབས་མ་ངེས་པར་འབྱུང་བའོ། །གཉིས་པ་དགེ་བ་བསྒྲུབ་བྱར་བསམ་པ་ནི། སྤྱིར་གཉེན་པོ་བརྒྱད་ཁྲི་བཞི་སྟོང་སོགས་བསམ་གྱིས་མི་ཁྱབ་ཀྱང་། རགས་པ་ཆེ་ལོང་དུ་བསྡུས་ན་སྔར་བསྟན་པའི་མི་དགེ་བ་བཅུ་པོ་ཡིད་ཀྱིས་སྤངས་ནས་ལུས་ངག་གི་སླར་ལོག་པའི་སྤོང་སེམས་སྤྱོད་ལམ་དང་བཅས་པ་དེ་ཡིན་ན། བདག་འདི་ལ་རྟག་ཏུ་གནས་པར་བྱའོ་སྙམ་དུ་བསམ་ཞིང་། དེ་ལ་མི་དགེ་བཅུ་ཡིད་ཀྱིས་སྤངས་པའི་གོ་དོན་ནི། དེ་རྣམས་ཉེས་དམིགས་ཀྱི་སྐྱོན་ཅན་དུ་ཤེས་ནས་ནམ་དུ་ཡང་མི་འདོད་པ་ཡིན། ལུས་ངག་གི་སླར་ལོག་པ་ནི། བཅུ་པོ་དེ་དག་རྒྱུན་དུ་མི་བྱ་བར་མ་ཟད། དེ་དག་བྱས་ན་གནས་སྐབས་སུ་ཁེ་ཆེ་ཞིང་འབད་མེད་དུ་བྱེད་ཐུབ་པའི་སྐབས་བྱུང་ཡང་ཡིད་ཀྱིས་སྤངས་པ་དེ་དྲན་པས་བྱ་བ་དེ་ལ་འཇུག་པར་མི་ནུས་པ་དེ། ལུས་ངག་གི་བདུན་པོ་ལ་ནི་གཉིས་ཀ་ཚང་དགོས་ལ། ཡིད་ཀྱི་གསུམ་ནི་ཡིད་ཀྱིས་སྤངས་པ་ཁོ་ནས་སོ། །མི་དགེ་བ་ལ་མི་རུང་བར་སེམས་པ་ནི་སྤོང་སེམས་ཡིན་ལ། དེ་ལྟར་ཤེས་པ་ནི་ཀུན་རྫོབ་ཤེས་པ་མ་འཁྲུལ་པ་ཡིན་པས་གཉེན་པོར་འགྱུར་ཞིང་ཚུལ་ཁྲིམས་ཀྱི་ངོ་བོའང་ཡིན་ནོ། །སྤོང་སེམས་འཕེན་ཤུགས་ཆེ་བ་ཡོད་ན། གཉིད་རྨུགས་དང་རྣམ་གཡེང་སོགས་ཀྱིས་བར་ཆོད་ཀྱང་། རྐྱེན་དེ་དམིགས་པའི་ཚེ་ཉེས་སྤྱོད་དུ་ཤེས་ནས་སྡོམ་པར་འགྱུར་རོ། །འདི་ནི་སྔར་གྱི་འཕེན་ཤུགས་དེའི་ས་བོན་གྱི་མཐུ་ལས་བྱུང་བ་ཡིན་ཏེ། དེའི་ཕྱིར་མི་དགེ་བཅུ་སྤོང་བའི་སེམས་པ་ས་བོན་དང་བཅས་པ་ནི་དགེ་བ་བཅུའོ། །དེར་མ་ཟད་མདོར་ན་ལུས་ཀྱི་ལས་ཕྱག་བསྐོར་མཆོད་པ་སེམས་ཅན་དང་ཆོས་ཀྱི་དོན་དུ་འགྲོ་འོང་ངག་གི་ལས་བསྟོད་པ་བཟླས་བརྗོད་སེམས་ཅན་དང་ཆོས་ཀྱི་དོན་དུ་སྨྲ་བ་སོགས་དགེ་བས་ཀུན་ནས་བླངས་པའི་ལུས་ངག་གི་བྱ་བྱེད་ཐམས་ཅད་དང་། ཡིད་ཀྱི་ལས་དད་གུས་ངེས་འབྱུང་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པ་སོགས་རང་བཞིན་གྱི་དགེ་སེམས་སུ་གྱུར་ཚད་ནན་ཏན་དུ་བསྒྲུབ་པར་བྱ་སྟེ། ཆགས་སྡང་གཏི་མུག་མེད་ལས་སྐྱེ། །དེས་བསྐྱེད་ལས་ནི་དགེ་བ་སྟེ། །ཞེས་པ་ལྟར་རོ། །ད་ནི་དགེ་བ་དེ་དག་གི་འབྲས་བུ་ཡང་གསུམ་སྟེ། རྣམ་སྨིན་དང་། རྒྱུ་མཐུན་དང་། བདག་པོའི་འབྲས་བུའོ། །དང་པོ་ནི། དགེ་བ་དེ་དག་ཀྱང་སྦྱོར་དངོས་མཇུག་གསུམ་ཐམས་ཅད་དགེ་སེམས་ཀྱིས་ཟིན་པ་དང་མ་ཟིན་པ་ལས་དགེ་བའི་སྟོབས་ཆེ་འབྲིང་ཆུང་གསུམ་དུ་འགྱུར་རོ། །ཆེན་པོས་ཁམས་གོང་མའི་ལྷ་དང་། འབྲིང་གིས་འདོད་པའི་ལྷ་དང་། ཆུང་ངུས་མིར་སྐྱེ་བ་ཡིན་ནོ། །དགེ་བ་ཡིན་ཡང་བསམ་པ་མ་དག་པ་སོགས་ཀྱིས་ནི་ལྷ་མིན་དུ་སྐྱེ་བར་མདོ་ལས་བཤད་དོ། །གཉིས་པ་རྒྱུ་མཐུན་བདག་པོའི་འབྲས་བུ་ནི། སྔར་མི་དགེ་བ་བཅུའི་སྐབས་སུ་བཤད་པ་དེ་ཉིད་འདིར་མཐུན་ཕྱོགས་སུ་གྱུར་པ་སྟེ། རིན་ཆེན་ཕྲེང་བ་ལས། ཚེ་རིང་འབྱོར་པ་དགྲ་སྤངས་དང་། །བསྟོད་དང་གྲགས་མང་སྙན་པའི་གཏམ། །ཚིག་བཙུན་བསམ་པ་འགྲུབ་པ་དང་། །ཡིད་བདེ་བ་དང་བློ་གྲོས་འཕེལ། །འདི་དག་དགེ་བའི་རྒྱུ་མཐུན་བཅུ། །མཐུ་ཆེ་ལོ་ལེགས་ཉམས་དགའ་བ། །མཐོ་དམན་སྙོམས་དང་ཞིང་ས་གཤིན། །རྩ་ཤིང་རྒྱས་དང་དུས་ཚིགས་རན། །འབྲུ་སྦོམ་རོ་ཞིམ་འབྲས་བུ་རྒྱས། །དགེ་བ་བཅུ་ཡི་བདག་འབྲས་ཡིན། །ཞེས་སོ། །དེ་ལྟར་དགེ་བ་བཅུ་ལ་གནས་པ་ནི་འདི་ཕྱི་ཀུན་ཏུ་བདེ་བའི་རྒྱུ་ཡིན་པས་ཅི་ནས་ཀྱང་བསྒྲུབ་པར་བགྱིའོ་སྙམ་དུ་བྱ་བ་གལ་ཆེའོ། །གསུམ་པ་ལུང་མ་བསྟན་པའི་ལས་ནི། ཀུན་སློང་དགེ་མི་དགེའི་བསམ་པ་གང་གིས་ཀྱང་མ་ཟིན་ཅིང་། འབྲས་བུ་བདེ་སྡུག་ལུང་བསྟན་དུ་མེད་པའི་ལས་ཟས་ཟ་བ་དང་འགྲོ་འཆག་ལ་སོགས་པའོ། །དེ་དག་གང་སྤྱད་ཀྱང་མདོ་དོན་མེད་པ་ལ་དུས་འདའ་བའི་ཕྱིར་དགེ་བར་བསྒྱུར་བ་གལ་ཆེ་བས། བདག་གིས་ཟ་བ་དང་འགྲོ་འཆག་ལ་སོགས་པ་འདི་དག་གིས་འབྲས་བུ་མི་བསྐྱེད་ཅིང་འཁོར་བ་ལས་ཐར་པའི་རྒྱུར་མི་འགྲོ་བ་འདུག །དོན་མེད་དུ་དེ་ཙམ་ཟད་དུ་འཕངས། ད་ཅི་ནས་ཀྱང་དགེ་བར་བསྒྱུར་བར་བགྱིའོ་སྙམ་དུ་སྒོ་གསུམ་གྱི་བྱ་བྱེད་ཐམས་ཅད་བྱང་ཆུབ་ཀྱི་སེམས་ཀྱིས་ཟིན་པར་བྱ་སྟེ། བཞི་བརྒྱ་པ་ལས། བསམ་པ་བྱང་ཆུབ་སེམས་དཔའ་ལ། །དགེ་བའམ་གལ་ཏེ་མི་དགེའང་རུང་། །ཐམས་ཅད་དགེ་ལེགས་ཉིད་འགྱུར་ཏེ། །གང་ཕྱིར་ཡིད་དགེའི་དབང་འགྱུར་ཕྱིར། །ཞེས་དང་། སྤྱོད་འཇུག་ལས། དེང་ནས་བརྩམ་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་པ་ལྟར་ཁ་ཕྱིར་བལྟས་སུ་མ་སོང་བར་བློ་རྩེ་ནང་དུ་བཀུག་སྟེ་ཅི་བྱས་དགེ་བའི་ལས་ལམ་དོན་ཡོད་པ་ལ་མཐའ་བསྐྱང་བར་བྱའོ། །གསུམ་པ་བདེན་བཞིས་འགག་བསྡུ་བ་ནི། དེ་ཡང་བདེན་པ་ནི་མི་བསླུ་བའི་དོན་ཡིན་ལ། རྒྱུ་ལས་དང་ཉོན་མོངས་ཀྱི་རྟེན་འབྲེལ་ལས་འབྲས་བུ་ཁམས་གསུམ་དུ་སྣང་བ་ཡང་རྒྱུ་འབྲས་བསླུ་བ་མེད་པའི་མཐུ་ལས་བྱུང་བ་སྟེ་བདེན་པ་དང་པོ་གཉིས་སོ། །རྒྱུ་བྱང་ཆུབ་ཀྱི་ཕྱོགས་ལ་འབད་པས་འབྲས་བུས་རྣམ་པར་གྲོལ་བའི་གནས་ཐོབ་པ་ཡང་མི་བསླུ་བ་ཉིད་ཀྱིས་བདེན་པ་སྟེ་འཕགས་པའི་བདེན་པ་ཞེས་བྱའོ། །དེས་ན་སྤྱིར་འཁོར་འདས་ཀྱི་ཆོས་ཐམས་ཅད་བདེན་པ་བཞིར་འདུས་པས་ཐར་འདོད་རྣམས་ཀྱི་ཉམས་སུ་བླང་བྱ་ཡང་བདེན་པ་བཞིར་མ་འདུས་པ་མེད་དོ། །དེ་ཡང་ཀུན་འབྱུང་དང་། སྡུག་བསྔལ་དང་། ལམ་དང་། འགོག་པ་སྟེ་བཞིའོ། །དང་པོ་ཀུན་འབྱུང་གི་བདེན་པ་ནི། གཞིའི་གནས་ལུགས་སྨྲ་བསམ་བརྗོད་མེད་སྟོང་པ་ཉིད་དུ་གནས་པ་ཉིད་ལྷན་ཅིག་སྐྱེས་པའི་མ་རིག་པས་ངོ་མ་ཤེས། ཀུན་ཏུ་བཏགས་པའི་མ་རིག་པས་རིས་སུ་བཅད་ནས་ཕུང་པོ་ལ་བདག་ཏུ་བཟུང་བས་འཁྲུལ་ལོ། །ཕུང་པོ་ལ་བདག་འཛིན་ཞུགས་པས། ཡུལ་མཐུན་པ་ལ་བརྟེན་ནས་འདོད་ཆགས། མི་མཐུན་པ་ལ་བརྟེན་ནས་ཞེ་སྡང་། བར་མ་ལ་བརྟེན་ནས་གཏི་མུག་སྐྱེ། དུག་གསུམ་ལ་བརྟེན་ནས་དུག་ལྔ་སྐྱེ་སྟེ། དེ་ལ་ཀུན་ནས་ཉོན་མོངས་པའི་རྟེན་ཅན་གྱི་རྟོག་པ་ཞེས་བྱ་སྟེ། དཔེར་ན་དབྱར་གྱི་ས་གཞི་དང་འདྲ་སྟེ་ལས་ཐམས་ཅད་སྐྱེ་ཞིང་འགྲུབ་པར་བྱེད། ལས་ལ་རྣམ་གྲངས་མང་ན་ཡང་འཁོར་བར་འཕེན་བྱེད་ཀྱི་ལས་ནི་གསུམ་དུ་འདུས། བསོད་ནམས་མ་ཡིན་པའི་ལས། བསོད་ནམས་ཀྱི་ལས། མི་གཡོ་བའི་ལས་སོ། །དེ་གསུམ་གྱི་དང་པོས་ངན་འགྲོར་འཕེན། གཉིས་པས་འདོད་པའི་བདེ་འགྲོ་དང་། གསུམ་པས་ཁམས་གོང་མ་གཉིས་འཕེན་པར་བྱེད་དོ། །ལས་ཀྱི་དབྱེ་བ་ནི་གོང་དུ་བཤད་པ་བཞིན་ནོ། །དེས་ན་འཁོར་བའི་རྩ་བ་ཉོན་མོངས་པ་དེ་རང་རྒྱུད་ལ་ནམ་སྐྱེས་པ་ན་གཉེན་པོས་ཟིན་པར་བྱས་ནས་ལྡོག་པ་གལ་ཆེ་སྟེ། དམ་པས། ཉོན་མོངས་སྐྱེས་ཚེ་གཉེན་པོས་མ་སླེབ་ན། །ཆོས་ཀྱི་དགོས་པ་སྟོར་རོ་དིང་རི་བ། །ཞེས་གསུངས་པ་བཞིན་ནོ། །གཉིས་པ་སྡུག་བསྔལ་བདེན་པ་ནི། རྒྱུ་ཀུན་འབྱུང་སྟེ། ཉོན་མོངས་པ་དུག་གསུམ་དང་། དུག་ལྔ་ལས་འབྲས་བུ་ཁམས་གསུམ་འཁོར་བའི་གནས་སུ་འཁྱམས་ཏེ་འགྲོ་བ་རིགས་དྲུག་གི་ལས་དང་སྡུག་བསྔལ་ལ་བར་མེད་དུ་སྤྱོད་པས་རྟག་ཏུ་མནར་ཞིང་ཉམ་ཐག་པ་སྟེ། རྒྱ་ཆེ་རོལ་པ་ལས། སྲེད་སྲིད་མ་རིག་དབང་གིས་འགྲོ་བ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་བསྐོར་བ་བཞིན། །ཞེས་དང་། སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་ཇི་བཞིན་ནོ། །ཞེས་དང་། མདོར་ན་སེམས་ཅན་གྱི་སེམས་ཀྱི་རང་བཞིན་འོད་གསལ་བ་དེ་བཞིན་གཤེགས་པའི་སྙིང་པོ་ཅན་ཡིན་ཡང་། གློ་བུར་གྱི་དྲི་མས་ཚུལ་བཞིན་མ་ཡིན་པ་ཡིད་བྱེད་ཀྱི་རྣམ་པར་རྟོག་པས་ཉོན་མོངས་པར་འགྱུར་ཞིང་། དེས་ཀུན་ནས་བསླངས་པའི་ཟག་པ་དང་བཅས་པའི་ལས་ལ་སྤྱད་པས་འཁོར་བའི་ཕུང་ཁམས་སྐྱེ་མཆེད་རྣམས་གྲུབ་པ་སྟེ། རྒྱུད་བླར། ཚུལ་བཞིན་མ་ཡིན་ཡིད་བྱེད་ཀྱིས། །ལས་དང་ཉོན་མོངས་རབ་ཏུ་སྐྱེ། །ལས་དང་ཉོན་མོངས་རྒྱུ་ལས་ནི། །ཕུང་པོ་ཁམས་དང་སྐྱེ་མཆེད་འབྱུང། །ཞེས་དང་། དེས་ན་ལས་མི་དགེ་བ་དང་དགེ་བའི་ཁྱད་པར་ལས། ངན་འགྲོ་དང་བདེ་འགྲོའི་ཕུང་པོ་སོ་སོར་འགྲུབ་སྟེ། རིན་ཆེན་ཕྲེང་བར། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །རྣམ་པ་ཀུན་ཏུ་བདེ་བ་དག །ཅེས་དང་། དེས་ན་སྔར་བཤད་པའི་འཁོར་བའི་ཉེས་དམིགས་ཀྱིས་བསྐུལ་ནས་དགེ་བའི་ལས་ལ་སྤྲོ་ཤུགས་ཆེན་པོས་ཡིད་དྲངས་ཏེ་ཅི་ནུས་སུ་འབད་པར་བྱ་སྟེ། སྤྱོད་འཇུག་ལས། ཡིད་ལ་བསམ་པའི་དགེ་བྱས་པས། །གང་དང་གང་དུ་འགྲོ་འགྱུར་བ། །དེ་དང་དེར་ནི་དགེ་བ་དེས། །འབྲས་བུའི་ཡོན་གྱིས་མངོན་མཆོད་འགྱུར། །ཞེས་གསུངས་པ་བཞིན་ནོ། །གསུམ་པ་ལམ་གྱི་བདེན་པ་ནི། རྒྱུའི་རྐྱེན་ནི་རིགས་ཡིན་ལ། བདག་པོའི་རྐྱེན་ནི་བླ་མ་དམ་པ་སྟེ། དེས་བསྟན་པའི་དོན་ཉམས་སུ་བླངས་པ་ལས་འབྱུང་བའི་ཕྱིར་དང་། གཞི་ཇི་ལྟ་བ་བཞིན་རྟོགས་པ་བླ་མར་རག་ལས་པའོ། །ལམ་ཉམས་སུ་ལེན་པ་ནི། གང་ཟག་ལ་རག་ལས་ཤིང་། ལེན་བྱའི་ལམ་ནི་ཐབས་ཤེས་ཟུང་དུ་འབྲེལ་བའི་དགེ་བ་གང་ཞིག་རྣམ་པར་གྲོལ་བའི་འཇུག་ངོགས་སུ་གྱུར་པ་སྟེ། མདོ་ལས། ཐབས་དང་བཅས་པའི་ཤེས་རབ་ནི་ལམ་མོ། །ཤེས་རབ་དང་བཅས་པའི་ཐབས་ནི་ལམ་མོ། །ཞེས་གསུངས་པ་དང་། ཆོས་མངོན་པ་ལས་ཀྱང་། ལམ་གང་གིས་སྡུག་བསྔལ་ཡོངས་སུ་ཤེས་པ་དང་། ཀུན་འབྱུང་སྤོང་བ་དང། འགོག་པ་མངོན་དུ་བྱེད་པ་དང་། ལམ་བསྒོམ་སྟེ་འདི་ནི་ལམ་གྱི་མཚན་ཉིད་མདོར་བསྡུས་པའོ། །ཞེས་གསུངས་པ་དང་། དེས་ན་རྒྱལ་བའི་བསྟན་པ་སྤྱི་དང་ཁྱད་པར་དུ་གྱུར་པ་འདི་དག་གི་ལམ་གྱི་རིམ་པ་རྣམས་ལ། སོ་སོའི་དབང་པོ་དང་སྦྱར་ཏེ་ནན་ཏན་རྩེ་གཅིག་ཏུ་བསླབས་པ་ལས་རིམ་བཞིན་ཚོགས་སྦྱོར་མཐོང་སྒོམ་མཐར་ཕྱིན་པའི་ལམ་རྣམས་བསྒྲོད་པར་འགྱུར་ཏེ། འབྲས་བུ་ལག་ཏུ་ལོངས་པ་ཉམས་ལེན་ལ་རག་ལས་པའི་ཕྱིར་རོ། །བཞི་པ་འགོག་པའི་བདེན་པ་ནི། འཁོར་བའི་ཆོས་ཐམས་ཅད་གང་དུ་འགོག་པའི་གཞི་ནི་སྟོང་པ་ཉིད་ཡིན་ལ། དེ་ཡང་ཆོས་ཐམས་ཅད་ཀྱི་གནས་ལུགས་ཆོས་ཉིད་དེ་བཞིན་ཉིད་ཡོད་མེད་སོགས་སྤྲོས་པའི་མཐའ་ཐམས་ཅད་ལས་རྣམ་པར་གྲོལ་བ་ཆོས་ཉིད་སྟོང་པ་ཉིད་ཀྱིས། ཆོས་ཅན་ཐམས་ཅད་ལ་ཁྱབ་པས་ཐ་དད་མ་ཡིན་ཅིང་། ཆོས་ཉིད་འདུས་མ་བྱས་དང་། ཆོས་ཅན་འདུས་བྱས་རྣམས་མཚན་ཉིད་མི་མཐུན་པས་གཅིག་པའང་མ་ཡིན་པ། རྟག་ཆད་སོགས་ཀྱི་མཐའ་ལས་འདས་པའི་དབྱིངས་འགྱུར་བ་མེད་པ་གང་ཡིན་པ་དེ་ནི་སྟོང་པ་ཉིད་དོ། །དེ་ཉིད་རྟོགས་བྱེད་ཀྱི་ལམ་ཉམས་སུ་བླངས་པས་ཀུན་འབྱུང་གི་བདེན་པ་དུག་གསུམ་དང་དུག་ལྔ། དེས་ཀུན་ནས་བླངས་པའི་ལམ་རྣམས་འགོག །འབྲས་བུ་སྡུག་བསྔལ་གྱི་ཕུང་པོ་དང་། དེ་ལ་བརྟེན་པའི་སྡུག་བསྔལ་རྣམས་འགོག་པ་སྟེ། མདོར་ན་རང་གི་རིག་པའི་སྟེང་གི་ཉོན་མོངས་པ་རྣམས་ས་བོན་དང་བཅས་པ་དབྱིངས་ཡལ་དབྱིངས་ནུབ་ཏུ་སྤངས་པ་ནི་འགོག་གཞི་སྟོང་པ་ཉིད་ཀྱི་ཡེ་ཤེས་ཏེ། འགོག་བདེན་ཁྱད་པར་ཅན་ཡིན་པས་ཐར་པ་དང་མྱ་ངན་ལས་འདས་པ་ཐོབ་པ་ཞེས་བྱའོ། །དེས་ན་སྡུག་བསྔལ་བདེན་པའི་རང་བཞིན་འགོག་བདེན་དང་། ཀུན་འབྱུང་བདེན་པའི་རང་བཞིན་ལམ་བདེན། འགོག་ལམ་སྤངས་རྟོགས་ངོ་བོ་དབྱེར་མེད་དོ། །ཞེས་ཀྱང་གསུངས་སོ། །དེ་ཡང་དཔེར་མཚོན་ན། ནད་སྐྱེད་བྱེད་ཀྱི་ཟས་དང་སྤྱོད་ལམ་བརྟེན་པ་ནི་ཀུན་འབྱུང་ངོ་། །དེས་ནད་ཀྱི་ཟུག་རྔུས་མནར་བ་ན་སྡུག་བསྔལ་ལོ། །དེ་ལ་སྨན་དཔྱད་དང་ཟས་སྤྱོད་ཀྱིས་སྐྱོང་བ་ནི་ལམ་བདེན་ནོ། །དེས་ནད་མེད་པར་སོར་ཆུད་པ་ནི་འགོག་བདེན་ནོ། །དཔེ་དེས་མཚོན་པ་ནི། སེར་སྣས་འཇུར་གེགས་བྱེད་པ་ནི་ཀུན་འབྱུང་། དབུལ་ཞིང་ཕོངས་པར་གྱུར་པ་ནི་སྡུག་བསྔལ། སྦྱིན་པ་གཏོང་བ་ནི་ལམ་བདེན། དེས་མ་འོངས་པ་ན་དབུལ་བའི་སྡུག་བསྔལ་སྤངས་པ་ནི་འགོག་པའི་བདེན་པའོ། །ཚུལ་དེས་རྒྱུ་འབྲས་ཀྱི་འགྲོས་ཤེས་པར་བྱའོ། །དེ་ལྟར་ཇི་སྐད་བཤད་པའི་དོན་རྣམས་ལ་ནན་ཏན་དུ་སློབ་པ་སྔོན་དུ་བཏང་ནས། སེམས་ཅན་ཐམས་ཅད་ཀྱི་དོན་དུ་སངས་རྒྱས་བསྒྲུབ་པ་ཙམ་གྱི་བྱ་བ་ཁམ་པོ་ཆེ་རྩོམ་པ་ལ་སྐྱབས་ཁྱད་པར་ཅན་ཞིག་འཚོལ་དགོས་ཏེ། དེ་ཡང་དཀོན་མཆོག་གསུམ་པོ་ནི་སྐྱོན་ཀུན་ཟད། ཡོན་ཏན་ཀུན་རྫོགས། སེམས་ཅན་ཐམས་ཅད་སྐྱོབ་པར་ནུས་པའི་མཐུ་དང་ལྡན་པས་དེ་ཁོ་ན་ལ་བསྟེན་ནས་བློ་གཏད་ལིང་བསྐྱུར་གྱིས་སྐྱབས་འགྲོ་རེ་དོགས་དང་བྲལ་བར་བྱ་ཞིང་། དེ་ནས་ཡུལ་སེམས་ཅན་ཚད་མེད་པ་ལ། སྙིང་རྗེ་ལ་སོགས་པའི་བློའི་རྣམ་པ་ཚད་མེད་པ་བཞི་བསྒོམ་པ་རྟེན་དུ་བྱས་ནས། བརྟེན་པ་གཞན་དོན་དུ་སངས་རྒྱས་ཐོབ་འདོད་ཀྱི་སྨོན་པ་དང་། དེ་ཉིད་མངོན་དུ་བྱེད་པའི་ལམ་འཇུག་པ་སྟེ་བྱང་ཆུབ་ཀྱི་སེམས་རྣམ་པ་གཉིས་བསྐྱེད་པར་བྱ་ཞིང་། དེ་ཡང་སྨོན་འཇུག་གི་བློའི་རྣམ་པ་ལ་བྱང་ཆུབ་ཀྱི་སེམས་དང་། ཆོ་ག་ལ་བསྐྱེད་པའི་ཐ་སྙད་དུ་བྱ་ཞིང་། སེམས་གཉིས་པོ་དེ་བློ་དང་འདྲེ་ངེས་སུ་བསྒོམས་པའི་མཐར་སེམས་རྩ་བྲལ་དུ་འཇོག་པ་ནི་དོན་དམ་བྱང་ཆུབ་ཀྱི་སེམས་ཡིན་ལ། དེ་ཉིད་ཆོ་ག་ལས་བསྐྱེད་པའི་ཚུལ་ནི། རྣམ་སྣང་མངོན་བྱང་གི་རྒྱུད་དང་། འཕགས་མཆོག་ཀླུ་སྒྲུབ་ཀྱི་གཞུང་ལས་ཀྱང་འབྱུང་བ་བཞིན་ནོ། །དེས་ན་བཤད་མ་ཐག་པའི་ལམ་དེ་དག་ཐུན་མོང་དང་ཁྱད་པར་གྱི་ལམ་རིམ་གང་ལ་བརྟེན་ནས་འཁྲིད་པ་དེ་དང་དེའི་གཞུང་བཞིན་དུ་བསྟན་པ་ལས་དགོས་པ་འགྲུབ་པའི་ཕྱིར་འདིར་རེ་ཞིག་དེ་ཙམ་མོ། །དེས་ན་འདི་ལྟ་བུའི་གནད་དང་མ་བྲལ་ན་ཉམས་ལེན་དོན་དུ་འགྲིལ་བ་ཞིག་འོང་ཞིང་། དེ་བས་ན་ཆོས་འདི་ཆགས་སྡང་གི་བསྣོན་མར་མ་སོང་བར་རང་རྒྱུད་ལ་ཅི་འབྱོར་དུ་བསླབ་པའི་ཉམས་ལེན་ལ་འབད་པར་བྱའོ། །རང་གཞན་དོན་ཆེན་བསྒྲུབ་ལ་བསྐུལ་བའི་གཏམ། །དྲི་མེད་ལུང་དོན་བླ་མའི་གསུང་ངག་གིས། །ཇི་ལྟར་འདོམས་བཞིན་ཅུང་ཟད་བཤད་པ་ལས། །རྒྱ་ཆེའི་ཕ་མཐའ་སུ་ཡིས་བརྗོད་པར་ནུས། །འོན་ཀྱང་ཆུ་གཏེར་ཆེ་ལས་ཐིགས་པ་ཙམ། །བླངས་པ་ཡིས་ཀྱང་གདུང་སེལ་བྱེད་པ་བཞིན། །ལམ་གྱི་འཇུག་སྒོ་ཕྱོགས་ཙམ་ཤེས་པས་ཀྱང་། །བླང་དོར་གནས་ལ་བསླུ་མེད་གདིང་ཐོབ་འགྱུར། །དེ་ལས་དགེ་བའི་གྲུ་ཆེན་རྨད་བྱུང་བ། །ལྷག་བསམ་རླུང་གི་བགྲོད་པས་བསྐྱོད་བྱས་ཏེ། །འགྲོ་ཀུན་སྲིད་པའི་རྒྱ་མཚོ་ཆེན་པོ་ལས། །རྣམ་གྲོལ་རིན་ཆེན་གླིང་དུ་བགྲོད་གྱུར་ཅིག །དེ་ལྟར་ཐུན་མོང་གི་སྔོན་འགྲོའི་ལམ་རིམ་གསལ་བར་བྱེད་པ་རིན་ཆེན་ཐེམ་སྐས་ཞེས་བྱ་བ་འདི་ནི་དང་པོའི་ལས་ཅན་རྣམས་འཇུག་པ་བདེ་བའི་ཆེད་དུ་སྙོམ་ལས་པ་འགྱུར་མེད་རྡོ་རྗེས་ཡི་གེར་སྤེལ་བའོ།། །།

གསང་སྔགས་རྙིང་མའི་ཐེག་པ་དགུའི་འཇུག་སྒོ་ལས། དང་པོ་སྐྱབས་སུ་འགྲོ་བ་སྦྱིན་པའི་ཆོ་ག་ཤིན་ཏུ་བསྡུས་པ་ (Volume 40, Text 16)

༄༅། །གསང་སྔགས་རྙིང་མའི་ཐེག་པ་དགུའི་འཇུག་སྒོ་ལས། དང་པོ་སྐྱབས་སུ་འགྲོ་བ་སྦྱིན་པའི་ཆོ་ག་ཤིན་ཏུ་བསྡུས་པ་བཞུགས་སོ། ། ན་མོ་གུ་རུ་ཤཱཀྱ་སིཾ་ཧཱ་ཡ། སྟོན་པ་ཤཱཀྱ་སེང་གེར་ཕྱག་འཚལ་ནས། །ཐེག་པ་ཐུན་མོང་སྐྱབས་སྡོམ་འབོགས་ཐབས་འགོད། །སྟོན་པའི་སྐུའམ་མཚན་བརྒྱད་ཀྱི་ཞལ་ཐང་བཤམ། མཆོད་པ་རྣམ་ལྔ་མཎྜལ་ལ་སོགས་པ་བཤམས་ན་ལེགས། དེ་ནས་མདུན་དུ་གཅིག་གམ་མང་པོ་ཡང་རུང་སྟེ། ཕྱག་འཚལ་ནས་ཐལ་མོ་སྙིང་གར་སྦྱར་ཏེ་ཙོག་པུར་འདུག་ཏུ་བཅུག་ལ། འོ་ན་ད་ལམ་ཁྱེད་རང་རྣམས་དམ་པའི་ཆོས་ཀྱི་སྒོར་འཇུག་འདོད་པ་དེ་ཤིན་ཏུ་ལེགས། དེའི་རྒྱུ་མཚན་ཅི་ཞེ་ན། ཨོ་རྒྱན་རིན་པོ་ཆེའི་ཞལ་ནས། དལ་འབྱོར་འདི་ནི་ཤིན་ཏུ་རྙེད་དཀའ་ཡང་། །འཆི་བདག་ནད་ཀྱིས་ཉེ་བར་བཏབ་པའི་ཚེ། །ཆོས་མེད་མི་རྣམས་སྟོང་ལོག་སྙིང་རེ་རྗེ། །ཞེས་གསུངས་པ་ལྟར། མི་ལུས་འདི་ལྟ་བུ་ཡང་ཡང་མི་ཐོབ། ད་རེས་ཁོ་ན་ཙམ་ཡིན། ད་རེས་ལུས་འདི་ཡང་མི་རྟག་སྟེ་ནམ་འཆི་ཆ་མེད། ཤི་བའི་འོག་ཏུ་སྐྱེ་ས་རིགས་དྲུག་གང་རུང་གཅིག་ལས་འོས་མེད། རིགས་དྲུག་གང་རུང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་ཏེ། ཨོ་རྒྱན་རིན་པོ་ཆེའི་ཞལ་ནས། ཐར་མེད་ལས་ཀྱི་གྲོང་ཁྱེར་དྲུག་པོ་འདིར། །གཅིག་ནས་གཅིག་ཏུ་ཟོ་ཆུའི་འཁྱུད་མོ་བཞིན། །ཐར་མེད་འཁོར་བའི་འགྲོ་རྣམས་སྙིང་རེ་རྗེ། །ཞེས་གསུངས་སོ། །སྡུག་བསྔལ་དེ་ལས་ཐར་བར་བྱེད་པ་ལ་དམ་པའི་ཆོས་ཀྱི་སྒོར་འཇུག་དགོས། ཆོས་དེ་ལའང་ཐེག་པ་རིམ་པ་དགུ་ཡོད་པ་ལས། དེ་ལ་སྐས་འཛེགས་པ་ལྟར་རིམ་པ་བཞིན་དུ་ཐེག་པ་ཐུན་མོང་ནས་འཇུག་དགོས་ཏེ། ཨོ་རྒྱན་རིན་པོ་ཆེས་སྒྲུབ་ཆེན་གྱི་གཞུང་རྣམས་ནས། ཀྱཻ། རིགས་ཀྱི་བུ་རྣམས་ཡོན་ཏན་ཐམས་ཅད་ཀྱི་གཞི་མ། དམ་པའི་ཆོས་ཐེག་པ་ཆེན་པོ་འདི་ཉིད། སྡོམ་པ་གསུམ་ལས་བྱུང་བས། དཀོན་མཆོག་གསུམ་ལ་སྐྱབས་སུ་སོང་། ཞེས་སོགས་དང་། སྔར་མ་ཐོབ་པ་རྣམས་ལ་སྐྱབས་འགྲོ་སོགས་སྡོམ་པ་རྣམས་ཐེབས་པར་འབོགས་དགོས་པར་གསུངས་པས། ད་རེས་ཁྱེད་རྣམས་ལ་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་དེ་འབོགས་པ་ཡིན་པས། མདུན་དུ་བཤམས་པའི་སྐུ་རྟེན་འདི་རྣམས་དང་དབྱེར་མེད་པར་གྱད་དང་སེང་གེས་བཏེགས་པའི་རིན་པོ་ཆེའི་ཁྲི་པདྨ་དང་ཟླ་བའི་གདན་ལ། བསྟན་པའི་བདག་པོ་བཅོམ་ལྡན་འདས་ཤཱཀྱ་སེང་གེ་སྐུ་མདོག་གསེར་བཙོ་མའི་མདོག་ལྟ་བུ་ལ་མཚན་བཟང་པོ་སུམ་ཅུ་རྩ་གཉིས། དཔེ་བྱད་བཟང་པོ་བརྒྱད་ཅུས་སྤྲས་པ། སྐུ་ལ་ཆོས་གོས་རྣམ་གསུམ་གསོལ་ཞིང་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་ས་གནོན་དང་བཅས་པའི་རྡོ་རྗེ་འཛིན་ཅིང་། གཡོན་མཉམ་གཞག་གི་སྟེང་ན་ལྷུང་བཟེད་འཛིན་པ། འོད་དང་འོད་ཟེར་འཕྲོ་ཞིང་འཕགས་པ་གནས་བརྟན་བཅུ་དྲུག་ལ་སོགས་པ། ཐེག་པ་ཆེ་ཆུང་གི་དགེ་འདུན་རྒྱ་མཚོས་བསྐོར་བ་མངོན་སུམ་དུ་བཞུགས་པར་སྒོམས་ཤིག །ཅེས་དམིགས་པ་སྤྲད་ནས། རང་ཉིད་ཐལ་མོ་སྙིང་གར་སྦྱར་ཏེ། ཟ་ཧོར་རྒྱལ་པོའི་ཡུལ་དབུས་སུ༔ བདུད་དཔུང་འདུལ་བའི་དངོས་གྲུབ་བརྙེས༔ ཤཱཀྱ་སེང་གེ་ཞེས་སུ་གྲགས༔ ཁྱེད་ཀྱི་རྗེས་སུ་བདག་སྒྲུབ་ཕྱིར༔ བྱིན་གྱིས་བརླབ་ཕྱིར་གཤེགས་སུ་གསོལ༔ ཨོཾ་གུ་རུ་ཤཱཀྱ་སེང་གེ་བཛྲ་ས་མཱ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན༔ དེ་ལྟར་བཅོམ་ལྡན་འདས་ཤཱཀྱ་སེང་གེ་འཁོར་དང་བཅས་པ་དང་། ངེད་སློབ་དཔོན་དང་བཅས་པའི་དྲུང་དུ། དུས་ད་ནས་གཟུང་སྟེ། ཇི་སྲིད་འཚོའི་བར་དུ་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་ཞུས་ཏེ། བདག་དང་སེམས་ཅན་ཐམས་ཅད་འཁོར་བའི་སྡུག་བསྔལ་ཐམས་ཅད་ལས་སྐྱོབ་པར་བྱ་སྙམ་པའི་འདུན་པ་རྩེ་གཅིག་གིས་སྟོན་པ་སངས་རྒྱས་ལ་དམིགས་ཏེ་ཕྱག་གསུམ། འདིས་གསུངས་པའི་ཆོས་ལ་དམིགས་ཏེ་ཕྱག་གསུམ། ངེད་ལ་སློབ་དཔོན་ཞུ་བའི་ཕྱིར་ཕྱག་གསུམ་དང་དགུ་ཕྲུགས་དེ་འཚོལ་ཅིག །ཅེས་ཕྱག་དགུ་འཚལ་དུ་བཅུག་གོ །དེ་ནས་སྔར་ལྟར་འདུག་བཅུག་གོ །ད་ནས་གཟུང་སྟེ་སངས་རྒྱས་ལ་སྟོན་པ་ཞུ། ཆོས་ལ་སྐྱབས་སུ་ཞུ། དགེ་འདུན་ལ་གྲོགས་ཞུ་སྙམ་པ་གྱིས་ལ་རྗེས་ཟློས་མཛོད། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་གཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །ཆགས་པ་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ། སྐྱབས་གསུམ་འཛིན་པའི་དགེ་བསྙེན་དུ། བཙུན་པས་གཟུང་དུ་གསོལ། དེ་ལྟར་ལན་གཅིག་སོང་ནས། ལན་གཉིས་པའི་རྗེས་ཟློས་མཛོད། ཅེས་ལན་གཉིས་པ་གོང་ལྟར་རོ། །ད་ལན་གསུམ་པའི་མཇུག་ཏུ་ཁྱེད་རང་རྣམས་ཀྱི་རྒྱུད་ལ་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་སྐྱེ། ང་ཡང་ཁྱེད་རང་རྣམས་ཀྱི་སློབ་དཔོན་དུ་འགྱུར་བ་ཡིན་པས། འདིའི་རྗེས་ཟློས་མཛོད། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་གཟུང་སྟེ། ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །ཆགས་པ་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ། སྐྱབས་གསུམ་འཛིན་པའི་དགེ་བསྙེན་དུ། སློབ་དཔོན་གྱིས་གཟུང་དུ་གསོལ། ད་ངེད་ཀྱིས་ཐབས་ཡིན་ནོ། །བརྗོད་པའི་ཚེ། ཁྱོད་རང་ལེགས་སོ། །བརྗོད་ཅིག །རང་གིས། ཐབས་ཡིན་ནོ། །སློབ་མས། ལེགས་སོ། །བརྗོད་དོ། །དེས་ཁྱེད་རྣམས་ལ་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་ལེགས་པར་ཐོབ་པ་ཡིན་པས། དེང་ཕྱིན་ཆད་བསླབ་པ་རྣམས་བསྲུང་དགོས། དེ་ལ་བསྲུང་བྱའི་བསླབ་པ་དགུ་སྟེ། སངས་རྒྱས་ལ་སྐྱབས་སུ་སོང་ན། སངས་རྒྱས་ཀྱི་སྐུ་གཟུགས། ཐ་ན་སཙྪའི་དུམ་བུ་ཡན་ཆད་ལ་མ་གུས་པ་སྤང་ཞིང་གུས་པ་བསྒྲུབ། ཆོས་ལ་སྐྱབས་སུ་སོང་ན། ཆོས་ཡི་གེ་འབྲུ་གཅིག་ཡན་ཆད་ལ་གུས་པ་བྱ། དགེ་འདུན་ལ་སྐྱབས་སུ་སོང་ན། ཐ་ན་ལྷན་པ་སེར་པོ་གྲུ་བཞི་བཏབ་པ་ཡན་ཆད་ལ་མ་གུས་པ་སྤང་ཞིང་གུས་པ་བསྒྲུབ། སངས་རྒྱས་ལ་སྐྱབས་སུ་སོང་ན། ཕྱི་རོལ་པའི་ལྷ་ལ་ཕྱག་མི་འཚལ། ཆོས་ལ་སྐྱབས་སུ་སོང་ན། སེམས་ཅན་ལ་གནོད་པ་མི་བྱ། དགེ་འདུན་ལ་སྐྱབས་སུ་སོང་ན། གྲོགས་མུ་སྟེགས་ཅན་མི་བསྟེན། ནངས་ནུབ་སྐྱབས་འགྲོ་ལ་བརྩོན་པ་དང་། ཅི་ཟ་ཅི་འཐུང་ཕུད་ཀྱིས་དཀོན་མཆོག་གསུམ་མཆོད་པ་དང་། ན་ཚ་སྡུག་བསྔལ་ཅི་བྱུང་ཡང་དཀོན་མཆོག་གསུམ་ལས་གཞན་པའི་སྐྱབས་མི་ཚོལ་བ་རྣམས་ལེགས་པར་སྲུངས་ཤིག །གལ་ཏེ་དེ་རྣམས་མ་བསྲུང་ན་སྐྱབས་སུ་འགྲོ་བའི་སྡོམ་པ་ལས་ཉམས་པས། ཚེ་འདི་ཕྱིའི་སྐྱབས་མེད་ཅིང་ངན་སོང་དང་འཁོར་བ་མཐའ་མེད་དུ་འཁྱམས་པའི་ཉེས་པ་ཆེན་པོ་འོང་། ལེགས་པར་བསྲུངས་ན། སྐྱེ་བོ་ཐ་མལ་པ་དང་། ཕྱི་རོལ་པ་ལས་ཁྱད་པར་དུ་འཕགས་པ་དང་། སྡོམ་པ་དང་དམ་ཚིག་ཐམས་ཅད་ཀྱི་གཞི་རྟེན་དུ་འགྱུར་བ་དང་། སངས་རྒྱས་བཅོམ་ལྡན་འདས་ཀྱི་འཁོར་རྣམ་བཞིའི་གྲར་ཆུད་པ་དང་། ལས་ཀྱི་རྣམ་སྨིན་མ་གཏོགས་པའི། ཚེ་འདིའི་ནད་དང་སྡུག་བསྔལ་ཐམས་ཅད་ལས་སྐྱོབ་པ་དང་། སྡིག་པ་ཐམས་ཅད་སྲབ་པར་འགྱུར་བ་དང་། ངན་སོང་དུ་མི་ལྟུང་བ་སོགས་ཕན་ཡོན་ཆེན་པོ་ཐོབ་སྟེ། ཨོ་རྒྱན་རིན་པོ་ཆེས། རྟེན་སྡོམ་པ་གསུམ་གྱི་རྟེན་དུ་རུང་། ཅི་བྱས་ཚོགས་སུ་འགྲོ །གནས་སྐབས་ཀྱི་བར་ཆད་སེལ་བ་དང་། འཁོར་བའི་དུཿཁ་ལས་སྐྱོབ། མུ་སྟེགས་ལ་སོགས་པ་ལམ་ལོག་པར་མི་འགྲོ །ལམ་དམ་པའི་གཞི་ཐིངས་བས་ཅི་བྱས་ཚོགས་སུ་འགྲོ་བས་མཆོག་ཏུ་གཅེས་པ་ཡིན་ནོ། །ཞེས་གསུངས་སོ། །ད་མིང་འདོགས་པ་དང་སྐྲ་བྲེག་པ་ནི། འདུལ་བའི་གཞུང་ལས་ནི་རབ་བྱུང་དང་དགེ་ཚུལ་སྒྲུབ་པའི་དུས་ཀྱི་བར་བྱེད་དགོས་པར་ཡང་མ་གསུངས་ནའང་། བོད་ཡུལ་འདིར་ཚངས་སྤྱོད་དགེ་བསྙེན་ལ་སྐྲ་བྲེག་པ་དང་། མིང་བརྗེ་བ་སོགས་བྱེད་པར་བོད་ཀྱི་མཁས་གྲུབ་ཀུན་གྱི་ཕྱག་བཞེས་སུ་གྲགས་ཆེ་ཞིང་། ཁྱད་པར་དུའང་གངས་ཅན་ལྗོངས་ཀྱི་གྲྭ་ས་ཆེན་པོ་འཛིན་པའི་གདུང་རྒྱུད་པ་རྣམས་ལ་སྐྱབས་གསུམ་འཛིན་པའི་དགེ་བསྙེན་དུ་བསྒྲུབས་ནས་སྐྲ་ཕུད་ལེན་ཅིང་མཚན་གསོལ། རབ་ཏུ་བྱུང་བའི་ན་བཟའ་ཡང་མནབ་སྲོལ་དང་། མཐའ་འཁོབ་རྒྱལ་པོ་དང་བློན་པོ་ཆེན་པོ་རྣམས་ལ་ཡང་། སྐྱབས་གསུམ་འཛིན་པའི་དགེ་བསྙེན་དུ་བསྒྲུབས་ནས། མཚན་གསོལ་སྐྲ་ཕུད་ལེན་པར་བོད་ཀྱི་བླ་ཆེན་རྣམས་ཀྱིས་མཛད་པའི་ཕྱག་ལེན་ལྟར། སྐྲ་ཕུད་ལེན་པ་ཡིན་པས། གཙུག་ཕུད་བྲེག་གམ་བརྗོད་དུས་སློབ་མས་བྲེགས་སྨྲོས་ཤིག །མཆོད་གཡོག་གཅིག་གིས་གྲི་བཟུང་ནས། སྐྲ་ལ་འཇུ་བཅུག་ལ། སློབ་དཔོན་གྱིས། གཙུག་ཕུད་བྲེག་གམ། བརྗོད་དུས། སློབ་མས། བྲེགས། བརྗོད། སྐྲ་ཕུད་སློབ་དཔོན་གྱི་ཕྱག་ཏུ་བཞག །དེ་ནས་རྟེན་གྱི་མདུན་དེར་བཞག་གོ །འོ་དེ་སྔ་ཁྱོད་རྣམས་སངས་རྒྱས་ཀྱི་བསྟན་པའི་གྲར་མ་ཚུད། དམ་པའི་ཆོས་སྒོར་མ་ཞུགས་པ་ཡིན་པ་ལས། དེ་རིང་ནས་དམ་པའི་ཆོས་སྒོར་ཞུགས་པ་ཡིན་པ་ལས། སྐྲ་བྲེགས་མིང་བརྗེ་བ་འདི་བརྗེད་ཐོ་ཡིན་པས། བསམ་པ་ཐམས་ཅད་དམ་པའི་ཆོས་དང་མཐུན་པར་མཛོད་ཅིག །མིང་ཡང་རྒྱ་གར་ན་ཉན་ཐོས་སྡེ་པ་བཅོ་བརྒྱད་སོ་སོའི་མིང་ནས་དྲངས་ནས་འདོགས། བོད་དུ་སློབ་དཔོན་སོ་སོའི་མཁན་པོའི་མཚན་ལ་དྲངས་ནས་འདོགས་པའི་སྲོལ་སྣང་ནའང་། ཨོ་རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། པདྨ་ལ་དྲངས་ནས་འདོགས་པ་ལེགས་པར་གསུངས་པས། ད་ལམ་ཁྱོད་ཀྱི་མིང་ལའང་ཆེ་གེ་ཐོགས། ཞེས་ཨོ་རྒྱན་ནམ། པདྨའམ། གུ་རུའམ། རྡོ་རྗེ་སོགས་ཀྱི་དབུ་ཅན་ལ། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ། ཐབས་མཁས། སྟོབས་ཆེན། ཡེ་ཤེས། སྙིང་རྗེ། བྱམས་པ། དགའ་བ། ཀུན་ཁྱབ། རབ་དགའ། དྲི་མེད། འོད་འཕྲོ། འོད་ཟེར། རྣམ་དག །བློ་གྲོས། ལེགས་པ། ཆོས་མཆོག །ཆོས་སྐུ །འོད་གསལ། སློབ་ལམ། མཐར་ཕྱིན། མཉམ་ཉིད། དོན་གྲུབ། ཡོན་ཏན། ཚངས་དབྱངས། ནོར་བུ། ཆོས་འཁོར། རྟ་མཆོག གླང་པོ། བརྒྱ་བྱིན་ལ་སོགས། གཞན་གང་འོས་བཏགས་སོ། །འོ་དེས་ཁྱེད་རྣམས་ཀྱིས་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་ལེགས་པར་ཐོབ་པ་ཡིན་པས་བཀའ་དྲིན་ཆེའོ། །ཞེས་བརྗོད་ལ་ཕྱག་གསུམ་འཚོལ། ཞེས་བརྗོད་ལ་གྲོལ་ལོ། །དེ་ནས་སྐྲ་སྐར་ལེགས་པར་བརྩིས་ལ། དེ་ཉིན་རུང་ན་ལེགས་མི་རུང་ན་རྗེས་སོར་སྐར་མ་ལེགས་དུས་སྐྲ་བྲེག་པར་བྱའོ། །རབ་བྱུང་གི་སེར་གོས་རྣམས་འདུལ་བ་ནས་རབ་བྱུང་བསྒྲུབ་དུས་ངེས་པར་སེར་གོས་དགོས་པའི་ངེས་པ་མེད་ཀྱང་། བོད་དུ་དགེ་བསྙེན་ལ་བཙུན་ཆས་བྱེད་སྲོལ་ཡོད་པས། སྐྱབས་གསུམ་འཛིན་པས་ཀྱང་བཙུན་ཆས་འཛོམ་ན་མི་རུང་མེད་པས་གང་རྙེད་གྱོན་ནོ། །ཅེས་སྤྲུལ་སྐུས་གསུང་གིས་བསྐུལ་ནས། རྫོགས་ཆེན་དང་མཐུན་པར་ཨ་རཱ་གས་བྲིས་པར་ཉེས་པ་མཆིས་ན་བཤགས་ཤིང་དགེ་བས་བཅོམ་ལྡན་འདས་ཤཱཀྱ་སེང་གེའི་རྗེས་ཞུགས་ཀྱིས་འཛམ་གླིང་ཁྱབ་པར་གྱུར་ཅིག །སརྦ་མངྒ་ལཾ།། །།

སྔ་འགྱུར་རྡོ་རྗེ་ཐེག་པའི་དབང་བསྐུར་སྤྱི་ལ་འཇུག་པའི་མཚམས་སྦྱོར་ཉུང་ངུར་བསྡུས་པ་བློ་གསལ་ངག་གི་འདོད་འཇོ་ (Volume 40, Text 17)

༄༅། །སྔ་འགྱུར་རྡོ་རྗེ་ཐེག་པའི་དབང་བསྐུར་སྤྱི་ལ་འཇུག་པའི་མཚམས་སྦྱོར་ཉུང་ངུར་བསྡུས་པ་བློ་གསལ་ངག་གི་འདོད་འཇོ་ཞེས་བྱ་བ་བཞུགས་སོ།། སྲིད་ཞིའི་དགེ་མཚན་བདུད་རྩིའི་དོ་ཤལ་ནི། །སྙིང་རྗེའི་ཟླ་བ་གཞོན་ནུ་ལ་ཆགས་པས། །གྲུབ་གཉིས་ངལ་འཚོས་ཡིད་ཅན་གདུང་སེལ་བ། ཁྱབ་བདག་རྡོ་རྗེ་སེམས་དཔས་དགེ་ལེགས་མཛོད། །དེ་ལ་འདིར་དབང་ཐོབ་ཅིང་དམ་ཚིག་ལ་གནས་པའི་སྔགས་པས་བསྙེན་སྒྲུབ་ལས་སུ་རུང་བ་སྔོན་དུ་སོང་ནས། ཟང་ཟིང་མེད་པའི་བྱམས་པ་དང་། འཁོར་བ་ལས་སྒྲོལ་འདོད་ཀྱི་སྙིང་རྗེ་ཆེན་པོ་སོགས་གཞན་ལ་གཅིག་ཏུ་ཕན་པ་དང་བདེ་བའི་ཡིད་ཀྱིས་གནས་སྐབས་དང་མཐར་ཐུག་གི་དངོས་གྲུབ་རླབས་པོ་ཆེའི་གནས་སུ་དབུགས་དབྱུང་བའི་སླད། རྡོ་རྗེའི་སློབ་མ་རྣམས་དཀྱིལ་འཁོར་ཆེན་པོར་འཇུག་ཅིང་སྨིན་པར་འདོད་པས། གནས་དབེན་ཞིང་ཡིད་དང་མཐུན་པར་སྟེགས་བུའི་ཁར་ལྷག་པའི་ལྷ་གང་ལ་བསྟེན་པའི་དཀྱིལ་འཁོར་དང་། དབང་རྫས། མཆོད་པའི་ཡོ་བྱད་སོགས་མ་ཚང་བ་མེད་པ་འདུ་བྱས་ནས་བདག་མདུན་དབྱེར་མེད་ཀྱི་བསྐྱེད་བཟླས་དང་། རྣམ་བུམ་ལ་དམིགས་ཀྱིས་བསལ་བའི་བཟླས་པ། ལས་བུམ་སྒྲུབ་པ་བཅས་ཀྱི་མཐར་རིག་པའི་མེ་ཏོག་དོར་བ་ཙམ་གྱིས་བདག་ཉིད་འཇུག་པ་དང་། སློབ་མ་འཇུག་པར་གསོལ་བ་གདབ་པ་རྣམས་གྲུབ་ནས། བསྒྲུབ་བྱ་རྣམས་གྲལ་ལ་འཁོད་པར། ལས་བུམ་ཐོགས་ཏེ། ཧྲཱིཿ བདེར་གཤེགས་རྒྱལ་བ་རྣམས་ཀྱི་ཐུགས་རྗེའི་ཆུས། །སྐལ་ལྡན་སློབ་མའི་ལུས་ངག་ཡིད་གསུམ་ལ། །གནས་པའི་ཉོན་མོངས་བག་ཆགས་དྲི་མའི་ཚོགས། །བཀྲུ་བར་བགྱི་འོ་བྱང་ཞིང་དག་གྱུར་ཅིག །ལས་སྔགས་དང་ཡི་གེ་བརྒྱ་པ་སོགས་ཀྱི་མཐར། རྡོ་རྗེ་སློབ་མ་རྣམས་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་ལས་དང་ཉོན་མོངས་པ་སྡིག་པ་དང་སྒྲིབ་པ་ཐམས་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བརྗོད་ཅིང་ཁྲུས་བྱ། དེ་ནས་བགེགས་གཏོར་གཏང་བ་ནི། རང་ཉིད་སྐད་ཅིག་གིས་དབང་ཆེན་ཧེ་རུ་ཀར་གསལ་བའི་ཐུགས་ཀ་ནས་འོད་ཟེར་འཕྲོས་པས་ནམ་མཁའ་མེ་རླུང་འཁྲུགས་པའི་དུར་ཁྲོད་དུ་ཁྲོ་བོའི་རྒྱལ་པོ་རྟ་མགྲིན་ཡེ་ཤེས་པ་དཔའ་བརྗིད་ཀྱི་ཉམས་དང་ལྡན་པར་གྱུར་པ་ཨོཾ་བཛྲ་ས་མ་ཡ་ཛ་ཛཿ ཞེས་པས་སྤྱན་དྲངས་ཏེ་བདག་དང་གཉིས་མེད་ཀྱི་ང་རྒྱལ་བསྐྱེད། ཧཱུྃ༔ ཕྱོགས་བཞི་མཚམས་བཞི་སྟེང་འོག་ཐམས་ཅད་དང༔ ས་འོག་ས་སྟེང་ས་བླར་རྒྱུ་བ་ཡི༔ བགེགས་དང་ལོག་འདྲེན་ལན་ཆགས་འབྱུང་པོའི་ཚོགས༔ བགེགས་འདུལ་ཁྲོ་རྒྱལ་འབར་བའི་བཀའ་བྱུང་གིས༔ སྐད་ཅིག་ཡུད་ཙམ་ཞིག་གིས་འདིར་ཁུག་ལ༔ བདག་གིས་བསྒོ་བའི་བཀའ་ལ་ཉན་པར་བྱོས༔ བཛྲཱ་ཊཀྐི་རཱ་ཛ་ཧཱུྃ་ཛ༔ ཛཿཧཱུྃ་བཾ་ཧོ༔ བཛྲ་ཨངྐུ་ཤ་ཛ༔ས་བགེགས་དང་ལོག་འདྲེན་འབྱུང་པོ་ཐམས་ཅད་འདུས་པར་བསམ། གཏོར་མ་ལས་སྔགས་སམ། ཨོཾ་བཛྲ་ཡཀྵ་ཧཱུྃ་གིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཏྲཱཾཿལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ལན་ཆགས་བགེགས་ཀྱི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ། ནམ་མཁའ་ལས་འཕང་མཐོ་བ། རྒྱ་མཚོ་ལས་གཏིང་ཟབ་པ། རྩི་ཤིང་ལས་ལྷུན་སྟུག་པ། ཞིང་རྡུལ་ལས་གྲངས་མང་བ། རང་རང་ལ་གང་མཁོ་བའི་འདོད་འབྱུང་གི་ལོངས་སྤྱོད་ཟད་མི་ཤེས་པའི་གཏེར་ཆེན་པོ་གཅིག་ཏུ་གྱུར་པར་བསམ་ལ། ཨོཾ་ཨཱཿཧཱུྃ་ཧོཿས་རླབས། ཨོཾ་སརྦ་