Terdzo-THI-047

From Rinchen Terdzod
Jump to: navigation, search









This page is under construction. Check back later for updated content.


Terdzo-THI-047.pdf
Click the picture above to view the Shechen manuscript.
Tibetan: དཀྱིལ་འཁོར་སྤྱིའི་ཐིག་ཚོན་གྱི་བྱ་བ་རབ་གསལ་ཀུན་དགའ་
Wylie: dkyil 'khor spyi'i thig tshon gyi bya ba rab gsal kun dga'
Volume: Volume 40 (ཐི) / Pages 923-968 / Folios 1a1 to 23b4
[edit]

༄༅། །དཀྱིལ་འཁོར་སྤྱིའི་ཐིག་ཚོན་གྱི་བྱ་བ་རབ་གསལ་ཀུན་དགའ་བཞུགས་སོ། ། ན་མཿཤྲཱི་བཛྲ་སཏྭཱ་ཡ། བདེ་གཤེགས་དཀྱིལ་འཁོར་ཀུན་གྱི་འབྱུང་གནས་ཆེ། །རྗེ་བཙུན་བླ་མའི་ཞབས་ལ་ཕྱག་འཚལ་ནས། །བློ་དམན་དོན་དུ་དཀྱིལ་འཁོར་ཐིག་ཚོན་གྱི། །ཆོ་གའི་བྱ་བ་རབ་གསལ་ཀུན་དགའ་བཤད། །རེ་ཞིག་ཐིག་ལ་རྣམ་པ་གཉིས། །ཡེ་ཐིག་དང་ནི་ལས་ཐིག་གོ །ཡེ་ཐིག་སྐུད་རྒྱུ་པདྨ་ཡི། །རྒྱུས་པའམ་རས་བལ་ལ་འང་རུང་། །རྒྱུ་དེ་དཔའ་བོས་རིན་གྱིས་ཉོས། །བཅུ་དྲུག་ལོ་ལོན་མཚན་ལྡན་མས། །བཀལ་བའི་སྲད་བུ་ཁ་དོག་ནི། །ལྔ་འམ་ཡང་ན་ཉི་ཤུ་ལྔ། །རིང་ཐུང་དཀྱིལ་འཁོར་ཉིས་བལྡབ་ལ། །སྦོམ་ཕྲ་སྒོ་ཡི་ཉི་ཤུ་ཆ། །ཡེ་ཤེས་ལྔ་རུ་བྱིན་བརླབས་ཏེ། །གདབ་ཚུལ་སློབ་དཔོན་ནུབ་ཏུ་འདུག །སློབ་བུ་ཤར་དུ་གནས་པ་ཡིས།་་་རྒྱབ་འགྲོས་བཅས། ཚངས་ཐིག་དང་པོ་མཁའ་ལ་གདབ། །དེ་བཞིན་སློབ་དཔོན་ལྷོ་དང་ནི། །སློབ་མ་བྱང་དུ་་་རྒྱབ་འགྲོས་བཅས།གཉིས་པ་གདབ། །སློབ་དཔོན་མེ་ཡི་མཚམས་སུ་འདུག །སློབ་མ་བྱང་ཤར་གནས་པ་ཡིས།་་་རྒྱབ་འགྲོས་བཅས། ཤར་གྱི་ལོགས་ཐིག་གདབ་པར་བྱ། །སློབ་དཔོན་རླུང་དང་སློབ་མ་ནི། །སྲིན་པོར་འདུག་པས་་་རྒྱབ་འགྲོས་བཅས།ནུབ་ཕྱོགས་གདབ། །སློབ་དཔོན་དེ་ཉིད་སློབ་མ་ནི། །བྱང་ཤར་འདུག་པས་་་རྒྱབ་འགྲོས་བཅས།བྱང་ཕྱོགས་གདབ། །སློབ་དཔོན་མེ་དང་སློབ་མ་ནི། །སྲིན་པོར་འདུག་པས་་་རྒྱབ་འགྲོས་བཅས།ལྷོ་ཕྱོགས་གདབ། །སློབ་དཔོན་དེ་ཉིད་སློབ་མ་ནི། །རླུང་གནས་ཟུར་ཐིག་དང་པོ་གདབ། །སློབ་དཔོན་སྲིན་པོ་སློབ་མ་ནི། །བྱང་ཤར་འདུག་པས་གཉིས་པ་སྟེ། །ཀུན་ལ་གཡས་སྐོར་ཁྱད་པར་དུ། །ཚངས་ལོག་རྒྱབ་འགྲོས་ཚུལ་གྱིས་གདབ། །གནམ་ཐིག་གདབ་པའི་རིམ་པ་འོ། ༈ །དེ་ནས་ལས་ཐིག་རིམ་པ་བཤད། །རས་བལ་ལས་གྲུབ་སྲད་བུ་ནི། ཁ་དོག་གསུམ་མམ་དགུ་སྒྲིལ་ཏེ། །རིང་ཐུང་སྦོམ་ཕྲ་འཁེལ་མཁན་རིན། །སྔར་བཞིན་བྱས་པའི་ཐིག་སྐུད་དེ། །སྐུ་གསུང་ཐུགས་སུ་བྱིན་བརླབས་ནས། །ཐིག་བརྒྱད་གོ་རིམ་སྔ་མ་ལྟར། །འདེབས་སམ་ཡང་ན་ལོགས་ཐིག་བཞིའི། །སྔོན་དུ་ཟུར་ཐིག་གཉིས་བཏབ་ཀྱང། །གནས་སྐབས་བྱ་སླ་འགལ་བའང་མེད། །འདེབས་དུས་སློབ་དཔོན་སློབ་མ་ཡི། །འདུག་ཕྱོགས་ཡེ་ཐིག་བཞིན་དུ་གཅེས། །དེ་ཡང་ཅུང་ཟད་ཕྱེ་སྟེ་བཤད། ཁྲུ་གང་ཚད་ལས་མི་ཆུང་བའི། །ཇི་ལྟར་རིགས་པའི་གཞིའི་ངོས་སུ། །དང་པོ་ཤར་ནུབ་ཚངས་ཐིག་གདབ། །དེ་ཡི་དབུས་སུ་མཚན་མ་བྱ། །དེ་ནི་དཀྱིལ་འཁོར་དབུས་ཡིན་ནོ། །དབུས་ནས་ཤར་ནུབ་ཚད་མཉམ་པའི། །མཚན་མ་བྱས་པ་བརྐྱངས་པ་ཡིས། །ལྷོ་བྱང་གཉིས་སུ་བྱ་རྗེས་བྱ། །དེ་སྟེང་ཚངས་ཐིག་གཉིས་པ་གདབ། །དེ་བཞིན་ལྷོ་བྱང་ཚངས་ཐིག་ལའང་། །ཤར་ནུབ་ལྟ་བུའི་མཚན་མ་བྱ། །དེ་ཡི་བར་བརྐྱངས་སྲད་བུ་ནི། །ཕྱོགས་བཞི་མཚན་མའི་སྟེང་བཟུང་ནས། །ཟུར་བཞིར་བྱ་རྗེས་མཚན་མ་བྱ། །དེ་སྟེང་ཟུར་ཐིག་གཉིས་པོ་གདབ། །ངོས་རེར་ཇི་ལྟར་འཚམ་པ་ཡི། །ལོགས་ཐིག་བཞི་བཏབ་མདའ་ཡབ་ཐིག །མདའ་ཐིག་ནས་ནི་ལྟེ་བའི་བར། །ཟུར་ཐིག་བཞི་པོ་ཆ་གསུམ་བགོ །སུམ་ཆ་ཕྱི་མའི་སྟེང་བཟུང་ནས། །ལོགས་ཐིག་བཞི་བཏབ་རྩ་བའི་ཐིག །མདའ་ཐིག་དང་ནི་རྩ་ཐིག་བར། །ཕྱེད་བགོས་ཆ་ཆེན་གཉིས་འབྱུང་ངོ་། །ནང་མ་དབུས་དོར་མཐའ་གཉིས་གདབ། །རྩིག་པ་འདོད་སྣམ་ཕ་གུ་འབྱུང་། །ཆ་ཆེན་ཕྱི་མ་ཕྱེད་བགོས་ལ། །ཕྱི་མ་དེ་འང་ཕྱེད་དུ་གཅད། །དྲྭ་ཕྱེད་ཤར་བུ་མདའ་ཡབ་འབྱུང་། །དེ་རྗེས་ནང་གི་རྩ་ཐིག་ནས། །རྟ་བབས་ཕྱི་ཐིག་བར་དུ་ནི། །ཚངས་པའི་ཐིག་གི་གཡས་གཡོན་དུ། །ཆ་ཆེན་གཉིས་གཉིས་གདབ་པར་བྱ། །ནང་མ་ཕྱེད་གདབ་ཕྱི་མ་ཕྱེད། །ཕྱི་མ་ཆ་བཞིར་བགོ་བར་བྱ། །སྒོ་ཁྱུད་སྒོ་འགྲམ་སྒོ་ལོགས་དང་། །མུན་པ་ཀ་བ་ཀ་རྒྱན་འབྱུང། །རྟ་བབས་བརྒྱད་མ་ལ་སོགས་པ། །ཀ་རྒྱན་མཐའ་རུ་ཆ་ཕྲན་བསྣན། །མདའ་ཡབ་ཕྱི་རོལ་རྟ་བབས་བྱ། །དེ་ལ་སྣམ་ཕྲན་གཅད་ལུགས་གསུམ། །བརྒྱད་མ་བཞི་མ་བཅུ་གཅིག་མ། །ཕྱི་མའི་ཕྱག་ལེན་སྔ་འགྱུར་གྱི། །ཕྱོགས་འདིར་ཉུང་བས་འདིར་མི་བརྗོད། །དང་པོ་སྣམ་བུ་བརྒྱད་མ་ནི། །མདའ་ཕྱིར་ཆ་ཆེན་གསུམ་བཅད་པའི། །ནང་མ་གཉིས་པོ་བཞི་བཞིར་བགོ །རྟ་བབས་སྣམ་བུ་བརྒྱད་ཡིན་ནོ། །ཕྱི་མ་དབུས་དོར་མཐའ་གཉིས་གདབ། །པདྨ་འཁོར་ལོ་གདུགས་ཀྱི་ས། །དེ་དག་ཕྱི་མཐའི་རིམ་པ་ནི། །རྟ་རྐང་ཀ་རྒྱན་མཐའ་དང་མཉམ། །ཆུ་སྐྱེས་དང་ནི་སྒྲོམ་བུ་གཉིས། །དེ་ལས་ཆ་ཕྲན་གཅིག་གིས་རིང་། །ཟར་ཚག་དེ་ལས་གཉིས་ཀྱི་ཐུང་། །སྣ་འཕྱོང་དེ་ལས་གཅིག་གིས་རིང་། །ཆུན་འཕྱང་དེ་ལས་གཉིས་ཀྱིས་ཐུང་། །ཤར་བུ་དེ་ལས་གཅིག་གིས་རིང་། །དེ་ལས་ཁྱུང་མགོ་གཅིག་འཕྱར་རོ། །པདྨ་འཁོར་ལོ་གདུགས་གསུམ་པོའི། །རྒྱ་ཚད་ཆ་ཕྲན་གཉིས་རེ་སྟེ། །པདྨའི་གཡས་གཡོན་ཆ་ཕྲན་ཕྱེད། །དོར་སར་རི་དྭགས་རེ་རེ་བྲི། །གླང་རྒྱབ་མིག་གསུམ་བསྐོར་ཚུལ་ནི། །རྟ་བབས་ཀྱི།་་་སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་འཛོམ་པ་ནས་བཟུང་སྟེ། །ཆ་ཕྲན་གཉིས་ཀྱིས་དབུས་མ་བསྐོར། །མུན་པ་པ་ཏིའི་ཕྱི་ཐིག་དང་། །ཚངས་ཐིག་འཛོམ་པའི་གཡས་གཡོན་དུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཉིས་ཀྱིས་གཡས་གཡོན་བསྐོར། །དེ་རྣམས་ཕྱི་རུ་ཆ་རེ་བསྐོར། །འདི་ལ་འཁྱོག་དགུ་བྱ་དགོས་ན། །སྣམ་བུ་དང་པོ་ཕྱེད་དང་བཞི། །གཉིས་པ་གསུམ་པ་དྲུག་དྲུག་གོ །བཞི་པ་ལ་ནི་བཞི་བཞི་སྟེ། །སྣམ་བུ་ལྔ་པ་ཆ་ཕྲན་གསུམ། །དྲུག་པ་དེ་ནས་ཚངས་རྩེར་སླེབས། །དེ་རྣམས་ཕྱི་རུ་ཕྱེད་རེ་གཅད། །འོག་གཞི་འཁོར་ལོའི་བསྐོར་ཚུལ་ནི། །མདའ་ཐིག་ཟུར་ནས་ཆ་ཆེན་ཕྱེད། །དོར་བའི་ཟླུམ་སྐོར་ནང་དུ་ཡང་། །ཆ་ཕྲན་བསྐོར་བ་རྩིབས་རྟེན་ཡིན། །རྩ་ཐིག་དང་ནི་སྒོ་ཁྱུད་ཐིག །འཛོམ་པ་ནས་བཟུང་རྩིབས་རྟེན་ལ། །རྩེ་རེག་གཡས་ནས་གཡོན་པ་དང་། །གཡོན་ནས་གཡས་པར་བསྐོར་བར་བྱ། །འདི་ནི་རྡོར་སེམས་སྒྱུ་དྲའི་ལུགས། །གཞན་དུ་སྣ་ཚོགས་རྡོ་རྗེར་བཞེད། །དེ་ཡི་གཡས་གཡོན་རྭ་སྐོར་ཚུལ། །རྟ་བབས་ཀྱི།་་་སྣམ་བུ་གསུམ་པའི་ཕྱི་ཐིག་དང་། །ཚངས་་་ཐིག་འཛོམ་པའི།ཕྱིར་ཆ་ཕྲན།་་་གཉིས་ཕྱིན་་་ཏེ།འཛོམ་པ་ནས། །གཟུང་སྟེ་ཀ་རྒྱན་རྩེ་ནས་བསྐོར། །དེ་ནས་འཕྲེད་་་དུ་ཆ་ཕྲན།གཉིས་ཕྱི་རུ་གཅིག །ཕྱིན་ཏེ་སྔ་མའི་ཚད་དེས་བསྐོར། །དབུས་རྭ་རྩ་བའི་རྒྱ་ཚད་དུ། །ཆ་ཆེན་གཅིག་ཡིན་མི་མཐོང་ཡང་། །རིམ་ཕྲ་རྩེ་མོ་ཆ་ཕྲན་གཉིས། །པད་འཁོར་གདུགས་ཀྱི་འོག་ཏུ་བྲི། །སྒྱུ་འཕྲུལ་ཞི་བའི་འཁོར་ཡུག་ནི། །རྩིབས་རྟེན་ཕྱི་རུ་ཆ་ཆེན་གཉིས། །བསྐོར་བའི་ནང་མ་ཕྱེད་གཏུབ་བསྐོར། །ནང་ནས་པད་རྡོར་མེ་རིའི་ས། །ལྟེ་བའི་ལྷ་གནས་སྐོར་ཚུལ་ནི། །རྩ་ཐིག་ནང་དུ་ཆ་ཆེན་རེ། །དོར་བ་གྲུ་ཆད་ཐིག་ཏུ་འགྱུར། །དེ་ཡི་ཕྱི་རོལ་ཆ་ཕྲན་གཅིག །བཏབ་པ་གློ་འབུར་བཞི་ཡི་ཐིག །རྒྱར་ནི་ཆ་ཆེན་རེ་རེ་འོ། །དཀྱིལ་འཁོར་དབུས་ནས་གྲུ་ཐིག་བར། །ཚད་མཉམ་ཟླུམ་སྐོར་གཉིས་བསྐོར་བའི། །གཉིས་ཀའི་ནང་དུ་ཆ་ཕྲན་རེ། །བསྐོར་བས་ནང་ནས་རིམ་པ་བཞིན། །ལྟེ་བ་མུ་ཁྱུད་རྩིབས་བཞི་དང་། །ཕྱི་ཡི་མུ་ཁྱུད་ས་ཡིན་ཏེ། །དེ་རྣམས་ཞི་བ་འབྲིང་པོའི་ཐིག ༈ །སྒྱུ་འཕྲུལ་ཁྲོ་དཀྱིལ་ལྟ་བུ་ཡི། །སྒོ་སྦྲགས་ནང་མའི་གདབ་ཚུལ་བཤད། །སྔར་གྱི་གྲུ་ཆད་ཐིག་དེ་ནི། །དཀྱིལ་འཁོར་ནང་མའི་མདའ་ཐིག་ཡིན། །མདའ་ཐིག་དེ་ནས་ལྟེ་བའི་བར། །ལོགས་ཐིག་བཞི་ཡིས་ཕྱེད་མར་གཅད། །ཕྱི་མ་ཆ་གསུམ་བགོས་པ་ཡི། །ནང་མའི་ནང་དུ་བཞི་ཆ་གདབ། །གློ་འབུར་ལྷག་མ་ཡུལ་མའི་ཁྱམ། །བར་མ་དབུས་དོར་མཐའ་གཉིས་གདབ། །རྩིག་པ་འདོད་སྣམ་ཕ་གུ་འབྱུང་། །ཕྱི་མ་ཕྱེད་གདབ་ཕྱི་ཕྱེད་བགོ །དྲྭ་ཕྱེད་ཤར་བུ་མདའ་ཡབ་བོ། །སྒོ་ནི་རྩིག་པའི་ནང་ཐིག་ནས། །མདའ་ཡབ་ཕྱི་ཐིག་བར་དུ་ནི། །ཚངས་པའི་ཐིག་གི་གཡས་གཡོན་དུ། །ཆ་ཆེན་རེ་བཏབ་ཕྱི་ཕྱེད་བགོ །དེ་མཐར་ཆ་ཕྲན་རེ་རེ་བགོ །ནང་སྒོའི་སྒོ་ཁྱུད་འགྲམ་ལོགས་འབྱུང་། །ལོགས་ཐིག་བཞིས་བཅད་ཕྱེད་ནང་མར། །དབུས་ཀྱི་ཟླུམ་སྐོར་ཞི་བ་ལྟར། །བསྐོར་ཞིང་ཕྱི་རོལ་འཁོར་ཡུག་གི །པད་ར་དང་ནི་རྡོར་རའི་བར། །ཆ་ཆེན་གཅིག་བསྣན་དུར་ཁྲོད་ས། །སྒྱུ་འཕྲུལ་ཁྲོ་བོའི་ཐིག་རིམ་ཏེ། །སྒོ་སྦྲགས་གཉིས་མ་གསུམ་མ་སོགས། །ཀུན་ལ་དེ་བཞིན་སྦྱར་ཏེ་དཔྱད། །འོན་ཀྱང་ཚོགས་ཆེན་འདུས་པ་ལྟར། །སྒོ་སྦྲགས་ཤིན་ཏུ་མང་པོ་ལ། །ཕྱི་དཀྱིལ་ཆ་ཆེན་ནང་དཀྱིལ་གྱི། །ཚད་དུ་བྱས་ནས་ནང་མ་རྣམས། །ཤིན་ཏུ་ཕྲ་བས་བྱ་དཀར་འགྱུར། ༈ །དེ་ནས་ཚོགས་ཆེན་འདུས་པ་ཡི། །ཐིག་གི་གདབ་ཚུལ་མདོ་ཙམ་བཤད། །འདི་ལ་སྟེང་ཁང་ཞི་བ་དང་། །འོག་ཁང་ཁྲོ་བོའི་དཀྱིལ་འཁོར་ཏེ། །ཉིས་ཐོགས་ཚུལ་དུ་གནས་པ་སྟེ། །སྟེང་ཁང་ཞི་དཀྱིལ་སྔར་བཤད་པའི། །སྒྱུ་འཕྲུལ་ཞི་བ་ཉིད་དང་འདྲ། །འོག་ཁང་ཁྲོ་བོའི་དཀྱིལ་འཁོར་ནི། །ཚངས་ཟུར་སྤྱི་ལྟར་བཏབ་པའི་རྗེས། །ཇི་ལྟར་རིགས་པའི་མདའ་ཐིག་གདབ། །མདའ་ཐིག་དེ་ནས་ལྟེ་བའི་བར། །དུམ་བུ་ཆ་མཉམ་གསུམ་དུ་བགོ །སུམ་ཆ་ནང་མའི་སྟེང་བཟུང་ནས། །ལོགས་བཞི་བཅད་པ་གྲུ་ཆད་ཐིག །གྲུ་ཆད་ཐིག་ནས་མདའ་ཐིག་བར། །ཆ་མཉམ་ལྔར་བགོས་ནང་མ་བཞིན། །ཕྱེད་ཕྱེད་གཏུབས་པས་དུམ་བུ་དགུ །དེ་ལྟར་དུམ་བུ་དགུ་པོ་ཡང་། །རང་རང་སོ་སོའི་ཆགས་ཚད་ཀྱིས། །དུམ་བུ་གསུམ་གསུམ་དག་ཏུ་བགོ །དང་པོ་ཐམས་ཅད་བར་ཁྱམས་ལ། །གཉིས་ཀུན་དབུས་དོར་མཐའ་གཉིས་གདབ། །རྩིག་པ་འདོད་སྣམ་ཕ་གུ་འབྱུང་། །གསུམ་ཀུན་ཕྱེད་གདབ་ཕྱི་མ་ཕྱེད། །དྲྭ་ཕྱེད་ཤར་བུ་མདའ་ཡབ་བོ། །ནང་སྒོ་བརྒྱད་པོའི་ཐིག་རིམ་ནི། །ཚངས་ངོས་གཡས་གཡོན་ཁྱམས་ཚད་དེ། །བཏབ་པ་ཚད་བགོ་དེ་ཕྱེད་ཕྱིར། །སླར་ཡང་ཁྱམས་ཀྱི་བཞི་ཆ་བསྣན། །ཕྱི་སྒོ་དགུ་པ་ཚངས་ངོས་སུ། །རང་གི་ཆ་ཆེན་གཉིས་གཉིས་གདབ། །ནང་མ་ཕྱེད་གདབ་ཕྱི་མ་ཕྱེད། །ཕྱི་མ་ཆ་བཞིར་བགོ་བར་བྱ། །སྒོ་ཁྱུད་འགྲམ་ལོགས་མུན་པ་དང་། །ཀ་བ་ཀ་རྒྱན་རྣམས་སུ་འགྱུར། །དེ་ནས་མདའ་ཐིག་ཕྱི་རོལ་དུ། །ཕྱི་མའི་སྒོ་ཚད་གསུམ་བཅད་ལ། །རྟ་བབས་སྣམ་བུ་བརྒྱད་མའི་ཚད། །སྒྱུ་འཕྲུལ་བཞིན་ལས་ཁྱད་པར་ནི། །འོག་གཞི་སྣ་ཚོགས་རྡོ་རྗེར་མཛད། །མདའ་རྩེ་ཟླུམ་སྐོར་ཉི་གདན་ཏེ། །དེ་ཕྱིར་་་ཆ་ཕྲན་གཉིས་པའི་རིག་འཛིན་གྱི་སྣམ་བུ་དགོས་སོ། ཁ་དོག་སེར་པོ་ལ་ཐིག་ལེ་གྲངས་མང་བཀོད། མཆན།ཆ་ཆེན་ཕྱེད་དང་གཅིག །ཕྱེད་དང་གཅིག་བསྐོར་པདྨ་དང་། །དུར་ཁྲོད་རྡོར་ར་མེ་རི་འགྱུར། །རྩ་ཐིག་ནང་དུ་ཆ་ཆེན་ཁྱམས།་་་དཔེ་ལ་ལར་རྐང་པ་འདི་མི་འདུག །མཆན། གྲུ་ཆད་ནང་དུ་ཟླུམ་པོར་བསྐོར། །དེ་ནང་མུ་ཁྱུད་ཆ་ཕྲན་བསྐོར། །དེ་ནས་ལྟེ་བའི་བར་ཕྱེད་བགོ །ཕྱི་མ་རྩིབས་བརྒྱད་ནང་མ་ནི། །ཆ་གསུམ་བགོས་ནས་རིམ་བཞིན་བསྐོར། །གྲུ་ཆད་ཕྱི་རོལ་གློ་འབུར་ནི། །ཆ་ཕྲན་དཀྱུས་སུ་ཆ་ཆེན་གཅིག །དེ་རྣམས་འདུས་པའི་ཐིག་རིམ་སྟེ། །ལ་ལ་ཞི་དཀྱིལ་དབུས་བཅུག་ཅིང་། །ཕྱི་རོལ་རིག་འཛིན་ཁྱམས་སྤར་ནས། །སྒོ་སྦྲགས་བཅུ་གཅིག་མཛད་པ་དང་། ཁ་ཅིག་ལྟེ་བ་ཆ་གསུམ་དུ། །བགོས་པའི་ནང་མ་ལིང་ཚེ་དགུ །དེའི་ཕྱིར་འཁོར་ལོ་རྩིབས་བཞི་དང་། །རྩིབས་བརྒྱད་རྣམས་སུ་འདོད་པའང་ཡོད། །འདི་ནི་རྒྱུད་དང་རྒྱ་འགྲེལ་དང་། །ལེགས་མཐུན་རང་གི་བླ་མའི་ལུང་། ༈ །དོང་སྤྲུགས་བརྒྱ་ལྡན་དཀྱིལ་འཁོར་ནི། །རྟ་བབས་ནས་བཟུང་རྩ་ཐིག་བར། །སྔར་གྱི་སྒྱུ་འཕྲུལ་ཞི་བ་དང་། །འཁོར་ཡུག་ཁྲོ་བོ་ལྟ་བུ་ལས། །དབུས་ཀྱི་ལྷ་གནས་ལྟེ་བ་ནས། །རྩ་ཐིག་ལ་རེག་བསྐོར་བའི་ནང་། །ཆ་ཕྲན་གཅིག་བསྐོར་གདུང་ཟླུམ་ཐིག །གདུང་ཐིག་ནས་ནི་ལྟེ་བའི་བར། །ཆ་མཉམ་དྲུག་བགོས་ཟླུམ་སྐོར་ལྔ། །དབུས་ཀྱི་ནང་མཐར་ཆ་ཕྲན་བསྐོར། །རིམ་བཞིན་ལྟེ་བ་མུ་ཁྱུད་དང་། །པདྨ་འདབ་བཞི་འདབ་མ་བརྒྱད། །འདབ་མ་བཅུ་དྲུག་སོ་གཉིས་དང་། །འདབ་མ་བཞི་བཅུ་རྣམས་སུ་འགྱུར། །ལ་ལ་སྒོ་རྐྱང་འགྲམ་ལོགས་དང་། །བྲལ་ཞིང་རྟ་བབས་བརྒྱད་པོ་ཡང་། །ཆ་ཕྲན་གཅིག་དང་ཕྱེད་ཕྱེད་དང་། །གཉིས་དང་ཕྱེད་དང་ཕྱེད་གཉིས་དང་། །གཅིག་གཅིག་དེ་བཞིན་འོག་གཞི་ཡང་། །སྣ་ཚོགས་རྡོ་རྗེར་བཞེད་པ་ཡོད། །རྟ་བབས་བརྒྱད་མའི་གདབ་ཚུལ་ལས། །འཕྲོས་ཏེ་སྒྱུ་འཕྲུལ་ཞི་ཁྲོ་དང་། །ཚོགས་ཆེན་འདུས་པ་དོང་སྤྲུགས་ཀྱི། །ཐིག་གི་རིམ་པ་བཤད་ཟིན་ཏོ། ༈ །གཉིས་པ་རྟ་བབས་བཞི་མ་ནི། །མདའ་ཐིག་ཕྱི་རུ་ཆ་ཆེན་གཉིས། །ནང་མ་ཆ་བཞིར་བགོ་བར་བྱ། །རྟ་བབས་སྣམ་བུ་བཞི་ཡིན་ནོ། །ཕྱི་མ་དབུས་དོར་མཐའ་གཉིས་གདབ། །པད་འཁོར་གདུགས་ཀྱི་གནས་སུ་འགྱུར། །རྟ་བབས་ཕྱི་མཐའི་རིམ་པ་ཡང་། །དང་པོ་ཀ་རྒྱན་མཐའ་དང་མཉམ། །དེ་རྗེས་གསུམ་པོ་རེ་རེ་ཐུང་། །མིག་གསུམ་བསྐོར་ཚུལ་རྟ་བབས་ཀྱི། །སྣམ་བུ་གཉིས་པའི་ཕྱི་ཐིག་དང་། །ཚངས་ཐིག་འཛོམ་པ་ནས་བཟུང་སྟེ། །ཆ་ཕྲན་གཉིས་་་གཅིག།ཀྱི་དབུས་མ་བསྐོར། །སྣམ་བུ་དང་པོའི་ཕྱི་ཐིག་དང་། །ཚངས་ཐིག་འཛོམ་པའི་གཡས་གཡོན་དུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཅིག་རེ་གཡས་གཡོན་བསྐོར། །ཡང་ན་གཡས་གཡོན་མིག་གཉིས་པོ། །བརྒྱད་མ་ལྟ་བུ་བསྐོར་བའང་ཡོད། །སྣ་ཚོགས་རྡོ་རྗེའི་ར་བསྐོར་ཚུལ། །ཚངས་ཕྱིར་གསུམ་ཕྱིན་མདའ་ཕྱིར་གཅིག །ཕྱིན་ཏེ་ཀ་རྒྱན་རྩེ་ནས་བསྐོར། །དེ་ནས་ཕྲེད་གཉིས་ཕྱི་རུ་གཅིག །ཕྱིན་ཏེ་སྔ་མའི་ཚད་དེས་བསྐོར། །མདའ་ཐིག་རྩེ་ནས་ཕྱི་རོལ་དུ། །ཆ་ཆེན་ཕྱེད་དང་གཅིག་དང་ཕྱེད། །གཅིག་བསྐོར་པདྨ་དུར་ཁྲོད་དང་། །རྡོར་ར་མེ་རི་རྣམས་སུ་འགྱུར། ༈ །ལྟེ་བའི་ལྷ་གནས་འགྱུར་ཚུལ་ནི། །གུ་རུ་ཞི་དྲག་ཚེ་དཔག་མེད། །རྡོར་སེམས་བཞི་ལ་ཁྱམས་མི་དགོས། །དེ་ཕྱིར་རྩ་ཐིག་ནང་དུ་ནི། །ཟླུམ་བསྐོར་སོ་སོའི་དབྱེ་བ་བཤད། ༈ །བླ་མ་ཞི་བར་ལྟེ་བ་ནས། །རྩ་ཐིག་ལ་རེག་ཟླུམ་པོར་བསྐོར། །དེ་ནང་ཆ་ཕྲན་ཕྱིའི་མུ་ཁྱུད། །མུ་ཁྱུད་དེ་ནས་ལྟེ་བའི་བར། །ཆ་མཉམ་བཞི་བསྐོར་ནང་མའི་ནང་། །ཆ་ཕྲན་གཅིག་གི་མུ་ཁྱུད་བསྐོར། །ནང་ནས་རིམ་བཞིན་ལྟེ་བ་དང་། །མུ་ཁྱུད་འདབ་བཞི་རིན་ཆེན་བརྒྱད། །པད་མ་འདབ་བརྒྱད་རྩིབས་བརྒྱད་དང་། །རྩིབས་རྟེན་མུ་ཁྱུད་རྣམས་སུ་འགྱུར། ༈ །བླ་མ་དྲག་པོར་ལྟེ་བ་ནས། །རྩ་ཐིག་ནང་གི་མུ་ཁྱུད་བར། །ཆ་མཉམ་གསུམ་བགོས་བསྐོར་བའི་ནང་། །ཆ་ཕྲན་གཅིག་བགོས་རིམ་པ་བཞིན། །ལྟེ་བ་མུ་ཁྱུད་འདབ་མ་བཞི། །རྩིབས་བཞི་རྩིབས་རྟེན་རྣམས་སུ་འགྱུར། །ལྟེ་བའི་མུ་ཁྱུད་ནང་ཐིག་དང་། །ཤར་གྱི་ཚངས་ཐིག་ཕྲད་པ་ནས། །ལྟེ་བར་ཚད་པའི་སྲད་བུ་ཡིས། །གཡས་དང་གཡོན་དུ་མཚན་མ་བྱ། །དེ་ཉིད་ནུབ་ཀྱི་ཚངས་ཐིག་དང་། །སྦྲེལ་བའི་ལྟེ་བ་ཆོས་འབྱུང་འོང་། ༈ །ཚེ་དཔག་མེད་ནི་རྩ་ཐིག་གི །ནང་གི་ཆ་ཕྲན་མུ་ཁྱུད་ནས། །ལྟེ་བའི་བར་དུ་ཕྱེད་མཉམ་བསྐོར། །ནང་མའི་ནང་མཐར་ཆ་ཕྲན་གཅིག །བསྐོར་བས་ལྟེ་བ་མུ་ཁྱུད་དང་། །པད་འདབ་བརྒྱད་དང་མུ་ཁྱུད་དོ། ༈ །རྡོར་སེམས་ཐུགས་ཀྱི་སྒྲུབ་པ་ཡང་། །ལྟེ་བ་འདི་དང་འདྲ་བ་ལས། །རྟ་བབས་སྣམ་བུ་བརྒྱད་མ་ནི། །སྒྱུ་འཕྲུལ་ཞི་བ་ལྟ་བུར་མཛད། ༈ །གཤིན་རྗེ་འཇོམས་བྱེད་གྲུ་ཆད་ནང་། །ཆ་ཕྲན་གཅིག་བསྐོར་རྩིབས་རྟེན་ས། །དེ་ནས་ལྟེ་བའི་བར་ཕྱེད་བགོ །ནང་མའི་ནང་མཐར་ཆ་ཕྲན་བསྐོར། །ལྟེ་བར་ཆོས་འབྱུང་སྔར་བཞིན་བསྐོར། །རིམ་པར་ཆོས་འབྱུང་ཟླ་གམ་དང་། །ཐོད་ཕྲེང་རྩིབས་བཞི་རྩིབས་རྟེན་ནོ། ༈ །བདེ་འདུས་ཕོ་བྲང་དགུ་ཐིག་ནི། །ལྟེ་བའི་ལྷ་གནས་བསྐོར་ཚུལ་ལ། །རྩ་ཐིག་ནང་དུ་ཆ་ཆེན་རེ། །དོར་བ་གྲུ་ཆད་ཐིག་ཏུ་འགྱུར།་་་དཔེ་ལ་ལར་ཚིག་རྐང་འདི་དག་མེད། ཚངས་ཐིག་དང་ནི་གྲུ་ཆད་ཐིག །འཛོམ་པའི་གཡས་གཡོན་ཐིག་རྒྱུད་དུ། །ཆ་མཉམ་གསུམ་བགོས་མཚན་མ་བྱ། །མཚན་མ་ནང་མའི་སྟེང་བཟུང་ནས། །ཐིག་བཞི་བསྣོལ་བཏབ་ལིང་ཚེ་དགུ །ཐིག་བཞིའི་ཕྱི་དང་གྲུ་ཐིག་ཕྱིར། །ཆ་ཕྲན་ཕྱེད་རེ་གདབ་པར་བྱ། །མིག་མང་རིས་བྲིས་རྡོ་རྗེའི་གདུང་། །རྩ་བའི་ཚངས་ཟུར་ཐིག་རྣམས་ནི། །སོ་སོའི་ཚངས་ཐིག་དང་པོ་སྟེ། །ཕྱོགས་བཞིའི་དཀྱིལ་འཁོར་ཟུར་ནས་ཟུར། །གདུང་བཞིའི་བསྣོལ་མཚམས་སྟེང་དྲང་གདབ། །ཕྱོགས་བཞིའི་དཀྱིལ་འཁོར་ཟུར་ཐིག་གྲུབ། །ཟུར་གྱི་ལིང་ཚེ་བཞི་པོ་ཡི། །ཟུར་ནས་ཟུར་དུ་ལོགས་བཞིན་གཏུབས། །མཚམས་དཀྱིལ་ཚངས་ཐིག་གཉིས་པ་འབྱུང་། །དེ་དག་དབུས་ཀྱི་བྱ་རྗེས་སྟེང་། །བསྣོལ་ཏེ་བརྐྱངས་ནས་ཕྱོགས་བཞིར་གདབ། །ཕྱོགས་དཀྱིལ་ཚངས་ཐིག་གཉིས་པ་དང་། །མཚམས་དཀྱིལ་སོ་སོའི་ཟུར་ཐིག་འགྱུར། །དེ་རྣམས་ཞི་ཁྲོ་ཐུན་མོང་ཐིག ༈ །དེ་ནས་ཞི་བའི་ཐིག་རིམ་ནི། །དབུས་དང་ཕྱོགས་བཞིའི་དཀྱིལ་འཁོར་གྱི། །གདུང་ཐིག་བཞི་པོ་རང་རང་གི །མདའ་ཡབ་ཕྱི་ཐིག་ཉིད་དུ་འགྱུར། །མཚམས་བཞིའི་རང་རང་ཟུར་ཐིག་དང་། །གདུང་ཐིག་ཕྲད་པ་ནས་བཟུང་སྟེ། །ལོགས་ཐིག་བཞི་གདབ་མདའ་ཐིག་འབྱུང་། །དེ་ནས་དཀྱིལ་འཁོར་དགུ་ཀ་ཡི། །མདའ་ཐིག་ནས་ནི་ལྟེ་བའི་བར། །སུམ་ཆའི་་་དུམ་བུ་གསུམ་བགོས།ཕྱེད་གདབ་རྩ་ཐིག་གོ །དེ་ནས་མདའ་ཐིག་བར་ཕྱེད་བགོ །ཆ་ཆེན་གཉིས་འབྱུང་ནང་མ་དེ། །དབུས་དོར་མཐའ་གཉིས་གདབ་པར་བྱ། །ཕྱི་མ་ཕྱེད་གདབ་ཕྱི་མ་ཕྱེད། །སྒོ་ནི་ཚངས་ཐིག་གཡས་གཡོན་དུ། །ཆ་ཆེན་རེ་གདབ་དེ་ཕྱེད་བགོ །དཔེ་གཅིག་ལ།་་་དེ་མཐར་ཆ་ཕྲན་གཅིག་རེ་གདབ།་་་ཟེར་བའང་འདུག །མཆན། ཆ་ཆེན་གཉིས་འབྱུང་ནང་མ་དེ། །རྩ་ཐིག་ནང་ནས་ལྟེ་བའི་བར། །ཚད་མཉམ་ཟླུམ་ཐིག་གཉིས་བསྐོར་བའི། །རེ་རེའི་ནང་དུ་ཆ་ཆུང་བསྐོར། །ལྟེ་བ་མུ་ཁྱུད་རྩིབས་བཞི་དང་། །རྩིབས་རྟེན་མུ་ཁྱུད་རྣམས་སུ་འགྱུར། །ཕྱི་རོལ་སྒོ་རྒྱན་རྟ་བབས་ནི། །སྣམ་བུ་བཞི་མ་སྤྱི་ལྟར་དང་། །འཁོར་ཡུག་སྒྱུ་འཕྲུལ་ཞི་བ་བཞིན། ༈ །བདེ་འདུས་ཁྲོ་བོའི་དཀྱིལ་འཁོར་ནི། །ལེ་ཚེ་དགུ་ཀར་རང་རང་གི །གདུང་ཐིག་ལ་རེག་ཟླུམ་པོར་བསྐོར། །དེ་ནང་ཆ་ཕྲན་རེ་བསྐོར་བས། །སོ་སོའི་དམ་ཅན་འཁོར་ཡུག་འབྱུང་། །འཁོར་ཡུག་ཕྱེད་དང་རང་རང་གི །ཟུར་ཐིག་ཕྲད་པའི་སྟེང་བཟུང་ནས། །ངོས་བཞིར་ཐིག་གདབ་མདའ་ཐིག་ཡིན། །དེ་ནང་ཞི་བ་ལྟ་བུ་ལས། ཁྱད་པར་རྩ་ཐིག་ནང་དུ་ནི། །ཆ་ཆེན་གཅིག་བཅད་གྲུ་ཆད་ཐིག །གྲུ་ཆད་ལ་རེག་ལྟེ་བ་ཡི། །ཟླུམ་སྐོར་ཞི་བ་ལྟ་བུ་ལ། །ལྟེ་བའི་མུ་ཁྱུད་ནང་ཐིག་དང་། །ནུབ་ཀྱི་ཚངས་ཐིག་ཕྲད་པ་ནས། །དབུས་ཚད་གཡས་གཡོན་མཚན་མ་བྱ། །དེ་གཉིས་ཤར་གྱི་ཚངས་ཐིག་དང་། །སྦྲེལ་བས་ཆོས་འབྱུང་རྩེ་ཤར་བསྟན། །སོ་སོའི་ལྟེ་བའི་ཆོས་འབྱུང་དང་། །མུ་ཁྱུད་རྩིབས་བཞི་རྩིབས་རྟེན་ནོ། །དེ་ལྟར་ནང་དཀྱིལ་དགུ་པོ་ནི། །རྟ་བབས་སྤངས་པའི་སྒོ་རྫོགས་ཡིན། །གྲུ་ཆད་ཕྱི་རོལ་ཁྱམས་དང་སྒོ །རྒྱན་ལྡན་རྟ་བབས་སྣམ་བུ་ནི། །བརྒྱད་མ་སྒྱུ་འཕྲུལ་ལྟ་བུར་མཛད། །ལ་ལ་རྟ་བབས་སྣམ་བཞིའི་སྟེང་། །བུམ་པ་ཆོས་འཁོར་གདུགས་དང་བཅས། །མཆོད་རྟེན་དབྱིབས་སུ་བཞེད་པའང་ཡོད། །འོན་ཀྱང་སྒོ་ཚད་གཅིག་མ་ལ། །སྣམ་ཕྲན་བཞིར་བཅད་བང་རིམ་བཞི། །རྒྱུད་ཀྱི་དགོངས་པར་འབྱོར་རམ་སྙམ། །འཁོར་ཡུག་གདུགས་ཀྱི་རྩེ་མོ་ནས། །ཆ་ཆེན་ཕྱེད་པ་ལན་གཉིས་དང་། །ཆ་ཆེན་གཅིག་དང་དེ་ཕྱེད་དང་། །ཆ་ཆེན་ཕྱེད་དང་ཆ་ཆེན་གཅིག །བསྐོར་བས་ནང་ནས་རིམ་པ་བཞིན། །བཀའ་སྡོད་ས་དང་པདྨ་དང་། །དུར་ཁྲོད་འཁོར་ལོ་རྩིབས་སྟོང་པ། །རྡོར་ར་མེ་རི་རྣམས་སུ་འགྱུར། ༈ །ཕུར་པ་སྤུ་གྲིའི་ཁྱད་པར་ནི། །གྲུ་ཆད་ཐིག་ནས་ཟླུམ་པོར་བསྐོར། །དེ་ནང་ཕྱི་ནས་རིམ་པ་བཞིན། །ཆ་ཕྲན་གཅིག་དང་ཆ་ཕྲན་ཕྱེད། །ཆ་ཕྲན་ཕྱེད་དྲུག་ཆ་ཕྲན་གཅིག །དེ་ནང་ཆོས་འབྱུང་གཤིན་རྗེ་ལྟར། །བསྐོར་བས་ནང་ནས་རིམ་པ་བཞིན། །ཆོས་འབྱུང་ཟླ་གམ་ཐོད་ཕྲེང་དང་། །རིན་ཆེན་ཆ་བརྒྱད་མུ་ཁྱུད་དང་། །མེ་ཡི་ཕྲེང་བ་རྣམས་སུ་འགྱུར། །གྲུ་ཐིག་ཕྱི་རུ་ཆ་ཕྲན་རེ། །བཏབ་པས་ནང་རྩིག་ཐོད་རིམ་གསུམ། །དེ་སྒོ་རྒྱན་མེད་ཟང་ཐལ་ཡིན། ཁྱམས་དང་ཕྱི་སྒོ་ལ་སོགས་པ། །རྟ་བབས་བཞི་མ་སྤྱི་ལྟར་ལས། །པུ་ཤུའི་ཟུར་ནས་བསྐོར་བ་ཡི། །ཕྱི་རོལ་ཆ་ཆེན་ཕྱེད་དང་གཅིག །ཆ་ཕྲན་གཅིག་དང་ཆ་ཆེན་གཅིག །བསྐོར་བས་་་སྒྲུབ་ཁོག་དངོས་ལས་པད་ར་དུར་ཁྲོད་དམ་ཅན་རྡོར་ར་མེ་རི་རྣམས་གསུངས་སོ། །མཆན།ནང་ནས་དམ་ཅན་དང་། །དུར་ཁྲོད་རྡོར་ར་མེ་རིར་འགྱུར། །དེ་ལྟར་རྟ་བབས་བརྒྱད་མ་དང་། །བཞི་མ་གཉིས་ཀྱིས་ཁོག་ཕུབ་ནས། །ཉེ་བར་མཁོ་བའི་ལྷ་གནས་སོགས། །སྒྱུར་ཚུལ་འགའ་ཞིག་བརྗོད་པ་སྟེ། །རབ་འབྱམས་དཀྱིལ་འཁོར་མཐའ་ཡས་ཕྱིར། །ཐམས་ཅད་བསྙད་པར་མི་ནུས་པས། །འདིས་མཚོན་རང་རང་དཀྱིལ་ཆོག་ལྟར། །ཞིབ་མོའི་བློ་ཡིས་བསྒྱུར་ཏེ་དཔྱད། ༈ །གཉིས་པ་ཚོན་གྱི་ཆོ་ག་བཤད། །ཡོན་བདག་འཁོར་ལོས་སྒྱུར་རྒྱལ་དང་། །རྒྱལ་ཕྲན་འབངས་ཀྱི་གོ་རིམ་བཞིན། །རིན་པོ་ཆེ་དང་འབྲུ་སྨན་དང་། །ས་ལས་བྱས་པའི་ཁ་དོག་ནི། །ལྔ་འམ་ཉི་ཤུ་རྩ་ལྔ་སྟེ། །གཙང་མའི་སྣོད་བླུགས་རང་རིག་གི །ཡིག་འབྲུ་བྲིས་ལ་རང་ཕྱོགས་དགོད། །རིགས་ལྔའི་ལྷ་སྒོམ་བྱིན་བརླབས་ཏེ། །སློབ་དཔོན་ཤར་དུ་ཞལ་ཕྱོགས་པས། །དབུས་ཀྱི་འགྱིང་ཕུར་བཏོན་པའི་ཤུལ། །ལག་གཡོན་མཐེབ་སྲིན་གྱིས་བཟུང་བའི། །རྡུལ་ཚོན་འབྱུང་བ་རིམ་བརྩེགས་ཀྱི། ཁ་དོག་གོ་རིམ་ངེས་པས་དགང་། །དེ་རྗེས་སོར་མོ་འབྲུ་ལྔ་བཀོད། ཁུ་ཚུར་གཡོན་པས་དབང་ལྡན་ནས། །བརྩམ་སྟེ་གཡས་བསྐོར་རྩིག་པའི་སར། །པན་རེག་མཛུབ་གང་ཚད་དུ་བྲི། །དེ་ལ་མཚན་ལྡན་ཐོད་པས་འགེབས། །ཕྱིས་ནས་རྩིག་པ་འདྲེན་པའི་དུས། །ཚོན་པྲ་བརྟག་པའི་དོན་བཞག་ལ། །དེ་ནས་ཞལ་དབང་ཐོབ་པ་ཡི། །སློབ་མ་རྣམས་ཀྱིས་རིམ་པ་ལྟར། །མ་མཐོང་རྨོངས་ལ་བསྟན་པའི་ཕྱིར། །ཚོན་རྣམས་རིམ་པ་བཞིན་དུ་དགྱེ། །ཇི་ལྟར་དགྱེ་བའི་རིམ་པ་ནི། ༈ །ཐོག་མར་སྒྱུ་འཕྲུལ་ཞི་བ་ལ། །དབུས་མཐིང་མུ་ཁྱུད་འོད་ཟེར་ཏེ། །རྩིབས་བཞི་མཆན་དང་གྲུ་ཆད་དང་། །གློ་འབུར་བར་ཁྱམས་སྒོ་དང་བཅས། །ཤར་དཀར་བ་སོགས་ཕྱོགས་ཀྱིས་དབྱེ། །འཁོར་ལོའི་ཕྱི་ཡི་མུ་ཁྱུད་ནག །རྩིག་པ་ནང་ནས་རིམ་པ་བཞིན། །མཐིང་དཀར་སེར་དམར་ལྗང་གུ་འོ། །འདོད་སྣམ་དམར་ལ་ཕ་གུ་སེར། །དྲྭ་བའི་གཞི་ནག་དྲྭ་བ་དཀར། །ཤར་བུའི་གཞི་སྔོ་ཤར་བུ་དཀར། །མདའ་ཡབ་དཀར་པོ་མཆོད་རྟེན་རིས། །མུན་པ་པ་ཏི་གླང་རྒྱབ་ནག །ཀ་བ་ཕྱོགས་མདོག་རྒྱན་མཛེས་ཚོན། །རྟ་བབས་བརྒྱད་རྣམས་གོ་རིམ་བཞིན། །རྟ་རྐང་བཞི་སྔོ་རྡོ་རྗེ་སེར། །ཆུ་སྐྱེས་དམར་ལ་སྒྲོམ་མཛེས་ཚོན། །ཟར་ཚག་དཀར་ལ་གཞི་མ་ནག །སྣ་འཕྱང་སེར་པོ་ཕ་གུ་འདྲ། །སྒྲིལ་འཕྱང་དཀར་ལ་གཞི་མ་ནག །ཤར་བུ་དཀར་ལ་གཞི་མ་སྔོ། །རྒྱ་ཕུབས་ཁྱུང་མགོ་མཐིང་ཁ་འོ། །པདྨ་དམར་ལ་འཁོར་ལོ་དང་། །རི་དྭགས་གསེར་མདོག་གདུགས་དཀར་པོ། །འོག་གཞིའི་རྩིབས་དང་མུ་ཁྱུད་བཅས། །ཕྱོགས་མདོག་ཕྱི་ཁྱམས་ལྗང་གུ་སྟེ། །པདྨ་སྣ་ཚོགས་རྡོར་ར་མཐིང་། །མེ་རི་སྣ་ཚོགས་ཆོས་འཁོར་རོ། ༈ །དེ་ནས་སྒྱུ་འཕྲུལ་ཁྲོ་བོ་ཡི། །ཚོན་གྱི་ཁྱད་པར་ཅུང་ཟད་བཤད། །ལྟེ་བ་མཐིང་ག་མུ་ཁྱུད་ལྗང་། །རྩིབས་བཞི་སེར་པོ་གོང་རས་དམར། །མུ་ཁྱུད་མཐིང་ག་གྲུ་ཆད་ལྗང་། །ཡུལ་མའི་ཁྱམས་སེར་སྒོ་ཕྱོགས་མདོག །ནང་རྩིབས་ནང་ནས་སྔོ་དམར་དཀར། །དབང་མོའི་ཁྱམས་དམར་སྒོ་ཕྱོགས་མདོག །ཕྱི་རོལ་དུར་ཁྲོད་གཞི་མ་ནག །གཞན་རྣམས་ཞི་བ་ཇི་བཞིན་ནོ། ༈ །ཚོགས་ཆེན་འདུས་པའི་ཚོན་ཐོབ་ནི། །ཞི་བའི་ཚོན་ནི་དྲྭ་བ་བཞིན། ཁྲོ་བོའི་ལྟེ་བའི་ཟླུམ་སྐོར་ནི། །གསུམ་ག་མཐིང་ལ་རྩིབས་བརྒྱད་སེར། །གོང་རས་དམར་ལ་མུ་ཁྱུད་སྔོ། །གྲུ་ལྗང་གློ་འབུར་ཕྱོགས་ཀྱི་མདོག །བར་ཁྱམས་དང་པོ་སེར་པོ་ལ། །གཉིས་པ་དཀར་ལ་གསུམ་པ་དམར། །བཞི་པ་སེར་ལ་ལྔ་པ་དམར། །དྲུག་པ་དཀར་ལ་བདུན་པ་ནག །བརྒྱད་པ་ཕྱོགས་མདོག་དགུ་པ་ལྗང་། །རྩིག་པ་ནང་བརྒྱད་ལྗང་གུ་ལ། །ཕྱི་རྩིག་དང་ནི་སྒོ་ཀུན་གྱི། །འདོད་སྣམ་ཕ་གུ་ལ་སོགས་པ། །སྒྱུ་འཕྲུལ་ལྟར་ལ་ཉི་གདན་ལྗང་། །སྣ་ཚོགས་རྡོ་རྗེ་ཕྱོགས་ཀྱི་མདོག །དུར་ཁྲོད་གཞི་སོགས་ཀུན་དང་མཐུན། ༈ །དོང་སྤྲུགས་དབུས་མཐིང་མུ་ཁྱུད་སེར། །འདབ་བཞི་ཕྱོགས་ཚོན་བརྒྱད་ཕན་ཆད། །ལྷ་མདོག་མཛེས་ཚོན་གང་བདེ་བྱ། །མུ་ཁྱུད་ཕྱི་མ་མཐིང་ག་སྟེ། །ལྷག་རྣམས་ཞི་བ་དང་མཐུན་ནོ། ༈ །བླ་མ་ཞི་བའི་ཚོན་ཐོབ་ནི། །ལྟེ་བ་མཐིང་ལ་མུ་ཁྱུད་ལྗང་། །འདབ་བཞི་ཕྱོགས་མདོག་བརྒྱད་སྣ་ཚོགས། །རིན་ཆེན་ཆ་བརྒྱད་རྩིབས་བརྒྱད་དང་། །མུ་ཁྱུད་རྣམས་ནི་མཐིང་ག་འོ། ༈ །རྟ་བབས་སྣམ་བུ་བཞི་མ་ལ། །ནང་ནས་དམར་སྔོ་ལྗང་སེར་རམ། །ཡང་ན་སེར་མཐིང་དམར་ལྗང་བྱ། ༈ །བླ་མ་དྲག་པོའི་ཆོས་འབྱུང་དམར། །མུ་རན་སྔོན་པོ་ཟླ་གམ་དམར། །མུ་ཁྱུད་ཐོད་པའི་ཕྲེང་བ་ལ། །པད་འདབ་ཕྱོགས་ཚོན་འཁོར་ལོ་སྔོ། །གོང་རས་ཕྱོགས་མདོག་མུ་ཁྱུད་མཐིང་། ༈ །ཚེ་དཔག་མེད་ཀྱི་ལྟེ་བ་ནི། །དམར་པོ་རྡོར་སེམས་དཀར་པོ་སྟེ། །གཉིས་ཀའི་འདབ་མ་མཛེས་ཚོན་ནོ། ༈ །གཤིན་རྗེ་འཇོམས་བྱེད་ཆོས་འབྱུང་མཐིང་། །ཟླ་གམ་དམར་པོ་ཐོད་རས་དཀར། །རྩིབས་བཞི་མཐིང་ལ་མཆན་ཕྱོགས་མདོག །མུ་ཁྱུད་སྔོན་པོ་གཞན་རྣམས་འདྲ། ༈ །བདེ་འདུས་ཞི་བའི་ཚོན་རིམ་བཤད། །དཀྱིལ་འཁོར་དགུ་པོའི་ལྟེ་བ་ནི། །དབུས་དཀར་ཤར་དང་ཤར་ལྷོ་སྔོ། །ལྷོ་དང་ལྷོ་ནུབ་སེར་པོ་སྟེ། །ནུབ་དང་ནུབ་བྱང་དམར་པོ་འོ། །བྱང་དང་བྱང་ཤར་ལྗང་གུ་བྱ། །ཀུན་གྱི་མུ་ཁྱུད་འོད་ཟེར་ལ། །རྩིབས་བཞི་སྒོ་རྣམས་ཕྱོགས་མདོག་ལ། །རྩིག་པ་རང་རང་རིགས་དང་སྦྱར། །རྡོ་རྗེའི་གདུང་ནི་མཐིང་ག་འོ། །ཕྱི་ཁྱམས་ཕྱོགས་མདོག་རྩིག་པ་ནི། །ནང་ནས་དཀར་མཐིང་སེར་དམར་ལྗང་། །འདོད་སྣམ་ལ་སོགས་འདྲ་བ་ལ། །ད་རུ་ཀད་ལྗང་པུ་ཤུ་དཀར། །རྟ་བབས་བཞི་ནི་མཛེས་ཚོན་ལ། །པད་རའི་ནང་དུ་ཕྱོགས་སྐྱོང་གི །སྣམ་བུ་དཀར་པོ་བྱས་ཀྱང་རུང་། །པད་ར་སྣ་ཚོགས་རྡོར་ར་ནག །མེ་རི་དམར་སེར་འབར་བ་འོ། ༈ ཁྲོ་བོའི་ཕོ་བྲང་དགུ་པོ་ཡི། །ཚོན་ནི་ལྟེ་བའི་ཆོས་འབྱུང་རྣམས། །དབུས་མཐིང་ཤར་ནས་གཡས་སྐོར་དུ། །མཐིང་ག་སྔོན་པོ་སེར་པོ་དཀར། །དམར་མཐིང་ལྗང་གུ་ནག་པོ་འོ། །ཀུན་ཀྱང་རྩིབས་བཞི་མུ་ཁྱུད་བཅས། །མཐིང་ག་གྲུ་ཆད་ཁྱམས་སྒོ་སོགས། །ཕྱོགས་མདོག་རྩིག་པ་ཐོད་རིམ་གསུམ། །འདོད་སྣམ་ལ་སོགས་འདྲ་བ་ལས། །དམ་ཅན་འཁོར་ཡུག་ནག་པོ་དང་། །རྡོ་རྗེའི་གདུང་མཐིང་འོག་གཞི་སྔོ། །འབར་བའི་རྒྱན་གྱིས་ཐམས་ཅད་སྤྲས། །དབང་མོའི་ལྷ་ཁྱམས་ཕྱོགས་མདོག་ལ། །རྩིག་པ་འདོད་སྣམ་ལ་སོགས་པ། །སྒྱུ་འཕྲུལ་ལྟ་བུར་བྱས་པ་ལས། །འཁོར་ཡུག་བཀའ་སྡོད་ཁྲག་མཚོ་དང་། །རྩིབས་སྟོང་འཁོར་ལོ་སེར་པོ་འོ། ༈ །ཕུར་པ་སྤུ་གྲིའི་ཚོན་ཡིག་ནི། །གྲུ་གསུམ་མཐིང་ནག་ཟླ་གམ་དམར། །ཐོད་ར་དཀར་ལ་རྒྱ་ཆད་མཐིང་། །མུ་སྐོར་སེར་པོ་མུན་མཆན་དམར། ཁྱུད་སྐོར་མེ་རི་ལྔ་ལྡན་ཏེ། ཁྱམས་སྨུག་ནང་རྩིག་དཀར་དམར་སྔོ། །སྒོ་ཁྱམས་ཕྱི་རྩིག་ལ་སོགས་པ། །སྤྱི་འགྲེ་ལྟར་ལས་འཁོར་ཡུག་གི །དམ་ཅན་གནས་ནི་ཁྲག་མཚོ་འོ། ༈ །དེ་ལྟར་དཀྱིལ་འཁོར་སོ་སོ་ཡི། །ལྷ་གནས་རྣམས་སུ་མཚན་མ་ནི། །འགྲུབ་ན་རང་རང་སྐུ་གཟུགས་དང་། །ཡིག་འབྲུ་ཕྱག་མཚན་གང་རུང་འགོད། །གལ་ཏེ་དེ་ཙམ་མི་འགྲུབ་ན། །སྐུ་མདོག་དང་མཚུངས་ཚོན་སྤུང་བྱ། །མདོར་ན་སོ་སོའི་དཀྱིལ་ཆོག་ལྟར། །ཚོན་རྩི་མི་མཐུག་མི་སྲབ་ཅིང་། །མ་འདྲེས་ཆད་དང་ཡོ་བ་སོགས། །སྤངས་ཏེ་སྒྲིན་པོའི་བློ་ཡིས་བྲི། །གང་ཞིག་བློ་གྲོས་དམན་རྣམས་ཀྱིས། །ཐིག་ཚོན་བྱ་བ་གང་ལ་ཡང་། །རྩིང་པོའི་སྤྱོད་པས་སྐྱོན་བྱུང་ན། །དེ་བསལ་ཆོ་ག་བརྩམ་པར་བྱ། །རྒྱལ་བའི་དཀྱིལ་འཁོར་བསམ་མི་ཁྱབ། །ཡིན་ཕྱིར་རྟོག་གེའི་ཡུལ་མིན་པས། །རྒྱུད་འགྲེལ་བླ་མའི་མན་ངག་བཞིན། །རང་བཟོ་སྤངས་ནས་བྲིས་པ་འདི། །གཏེར་ཆེན་ཆོས་རྗེའི་བཀའ་འབངས་སུ། །གཏོགས་པ་དྷརྨཱ་ཤྲཱིས་སོ། །དགེ་བས་མཐའ་ཡས་འགྲོ་བ་ཀུན། །བདེ་བ་ཆེན་པོའི་སྐུ་ཐོབ་ཤོག །སརྦ་དཱ་མངྒ་ལཾ།། །། ༈ འགྲེལ་པ་བཞུགས་སོ། །ཨོཾ་སྭསྟི། ད་ནི་ཐིག་ཚོན་གྱི་ཆོ་ག་དེ་དག་དོན་ཅུང་ཟད་བཀྲོལ་ཏེ་བཤད་པར་བྱའོ། །འདི་ལ་ཐིག་དང་ཚོན་གྱི་བྱ་བ་གཉིས། ཐིག་ལའང་གཉིས་ཏེ་གནམ་ཐིག་དང་། ས་ཐིག་གོ །དང་པོ་ལའང་བཞི་སྟེ། རྒྱུ། ཚད། བྱིན་གྱིས་བརླབ་པ། གདབ་པའི་ཐབས་སོ། །དང་པོ་སྐུད་རྒྱུ་ཞི་བ་ལ་མེ་ཏོག་པདྨའི་རྒྱུས་པ་དང་། ཁྲོ་བོ་ལ་ཞིང་གི་རྒྱུས་ཆེན་ལ་བྱ་བར་གསུངས་ཀྱང་། ཐུན་མོང་དུ་རས་བལ་གཙང་མ་དཔའ་བོའི་རིན་ཞེས་པ་རིན་ལ་མ་རྩོད་པར་ཉོས་ལ་བུ་མོ་མཚན་ལྡན་ལོ་བཅུ་དྲུག་མས་བཀལ་བའི་སྣལ་མ་ཁ་དོག་ལྔའམ་ཉི་ཤུ་རྩ་ལྔ་སྟེ། སྒྱུ་འཕྲུལ་ཞི་བ་རྡོ་རྗེ་ལས་རིམ་ལས། པདྨའི་རྒྱུད་ལ་ཁ་དོག་བསྒྱུར། །བཅུ་དྲུག་ཕྱག་རྒྱས་ལེགས་བཀལ་ཏེ། །སྣལ་མ་གཅིག་ལ་ལྔ་ལྔར་ལྡན། །ཡེ་ཤེས་རང་བཞིན་ཤེས་པར་བྱ། །ཞེས་དང་། ཁྲོ་བོ་ལས་རིམ་ལས། བ་སུ་ཏ་ཡི་རྒྱུས་ཆེན་ལ། །དམ་ཚིག་ཡེ་ཤེས་སྐུ་གསུམ་ལྔ། །ཞེས་བ་སུ་ཏ་དམ་ཚིག་དང་། རྒྱུས་ཆེན་ཡེ་ཤེས་ཀྱི་རྒྱུར་གསུངས་སོ། །ཞི་ཁྲོ་ཐུན་མོང་དུ་རས་བལ་ལ་བྱ་བར་རུང་བ་ནི། ཕུར་པའི་པདྨ་ལས་རིམ་ལས། །དེ་རྗེས་དཀྱིལ་འཁོར་ཐིག་གདབ་བརྩམ། །ཤེས་རབ་མཚན་དང་ལྡན་པ་དེས། །སྐྱོན་མེད་རས་བལ་བསྒྱུར་བ་ཡི། ཁ་དོག་ལྔ་ནི་བཀལ་བྱས་ཏེ། །ཞེས་དང་། ཧཱུྃ་ཀཱ་རའི་ཡང་དག་གི་དཀྱིལ་ཆོག་ལས་ཀྱང་། ཐིག་སྐུད་རས་གསར་པའི་རྒྱུ་ལས་བྱུང་བ་སྔགས་ཀྱིས་བྱིན་གྱིས་བརླབས་ནས་བཀལ་བར་བྱ་སྟེ། ཞེས་སོ། །གཉིས་པ་ཚད་ནི། རིང་ཐུང་དཀྱིལ་འཁོར་གྱི་ཉིས་འགྱུར་ཏེ། དཀྱིལ་འཁོར་ཁྲུ་གང་བ་ལ་གདབ་པའི་ཐིག་སྐུད་ནི་ཁྲུ་དོ་པ་ཡིན་ནོ། །འདིར་ཉིས་འགྱུར་བྱ་རྒྱུའི་དཀྱིལ་འཁོར་གྱི་དོན་ཤྲདྡྷཱས་རྩ་ཐིག་ལ་ངོས་བཟུང་ནས། དེ་ཉིས་འགྱུར་སྣ་ཚོགས་རྡོ་རྗེའི་རྩེ་ཚུན་ཆད་ཀྱི་ཚད་དུ་བྱས་ཏེ་རྟ་བབས་སྒོ་ཚད་གཅིག་མར་འདོད་པ་དང་། ཕྲེང་བ་མཁན་པོའི་དཀྱིལ་འཁོར་མདའ་ཐིག་ལ་བྱས་ནས། དེ་ཉིས་འགྱུར་དུར་ཁྲོད་སྤངས་པའི་འོད་ཕྲེང་ཚུན་གྱི་ཚད་དུ་བྱས་ཏེ་རྟ་བབས་སྒོ་ཚད་གསུམ་མར་འདོད་ལ། འདིར་རྟ་བབས་སྒོ་ཚད་གཉིས་མར་བྱས་པའི་ཚེ་ཕྱི་མ་ལྟར་ཁས་བླངས་པས་དུར་ཁྲོད་ཡོད་པའི་ཕྱོགས་ལ་འགྲིགས་ཤིང་། དུར་ཁྲོད་མེད་པའི་ཕྱོགས་ལ་སྔ་མ་ལྟར་བྱས་ན་དེ་ཉིས་འགྱུར་གྱིས་རྭ་རྩེའམ་འོག་གཞིའི་འཁོར་ལོའི་རྩེ་མ་སྙོག་ཅིང་། ཕྱི་མ་ལྟར་ན་སྒོ་ཚད་གཉིས་ཀྱིས་མ་ལངས་མོད་ཀྱི། འོན་ཀྱང་ཉིས་འགྱུར་དུ་བྱ་བར་གསུངས་པ་ནི་དཀྱིལ་འཁོར་དང་འཚམ་པར་བྱ་ཞེས་པའི་དོན་ཡིན་པའི་གནད་ཀྱིས། འོད་ཕྲེང་དག་གི་ཕྱི་རོལ་དུ་ཐིག་རོ་མ་ལུས་པར་གདབ་དགོས་པའི་ཕྱིར་ན། སློབ་དཔོན་དང་ཐིག་གཡོག་གིས་ལག་པས་བཟུང་བའི་ཆ་མ་གཏོགས་པ་མཐའི་འཁོར་ཡུག་གི་ཚད་ལས་རིང་བ་མི་རུང་ཞིང་། གཞན་དུ་ཟླུམ་ཐིག་ནི་རྐྱང་ཐིག་ལ་ལྟོས་མི་དགོས་པའི་ཕྱིར། རྟ་བབས་སྒོ་ཚད་གསུམ་མ་དང་། གཉིས་མ་དང་། གཅིག་མ་གསུམ་གང་བྱེད་ཀྱང་རུང་སྟེ། འོག་གཞིའི་རྭ་རྩེ་ཚུན་གྱི་ཚད་དང་མཉམ་ཙམ་གྱིས་ཀྱང་དགོས་པ་འགྲུབ་ཅིང་དེ་ལས་ཐུང་དུ་མི་རུང་ངོ། །སྦོམ་ཕྲ་ནི་སྒོའི་ཉི་ཤུའི་ཆ་སྟེ་རྩིག་པའི་རེ་ཁཱ་དང་མཉམ་པས་ཆ་ཕྲན་གཅིག་གི་ལྔའོ། །དེ་སྐད་དུའང་། གལ་པོ་དང་མཉམ་སྦྱོར་གྱི་དཀྱིལ་ཆོག་ལས། རིང་ཐུང་དཀྱིལ་འཁོར་ཉིས་འགྱུར་ལ། །སྦོམ་ཕྲ་སྒོ་ཡི་ཉི་ཤུ་ཆ། །ཞེས་སོ། །གསུམ་པ་བྱིན་རླབས་ནི། སྐུད་པ་རྣམས་དཔའ་བོ་འབྲུ་ལྔར་མོས་ལ། མདུན་གྱི་ནམ་མཁར་སྤྱན་དྲངས་པའི་རྒྱལ་བ་རྣམས་འབར་བའི་ལྟ་སྟངས་ཀྱིས་བསྐུལ་བས། སྦྱོར་བ་མཛད་པའི་བྱང་སེམས་ཡེ་ཤེས་ལྔའི་རང་བཞིན་འོད་ལྔའི་རྣམ་པར་བྱུང་བ་ཐིག་སྐུད་ལ་ཕོག་པས་ཡེ་ཤེས་ལྔའི་རང་བཞིན་ཅན་དུ་གྱུར་པར་བསམ་ལ། དང་པོ་སྲད་བུ་ལྔ་སོ་སོ་དང་། དེ་ནས་གཅིག་ཏུ་སྒྲིལ་བ་སོགས་སོ་སོའི་དཀྱིལ་ཆོག་ལྟར་བྱ་བ་གཅེས་སོ། །དེ་དག་ཀྱང་མཉམ་སྦྱོར་དཀྱིལ་ཆོག་ལས། རིན་ཆེན་ཐོད་པའི་སྣོད་བཞག་ལ། །རིགས་ཀྱི་ཡི་གེའི་སྔགས་ཀྱིས་བསྐྱེད། །མ་ཏི་ཀྲ་མ་ཧཱུྃ། ཨོཾ་ཨཱཿཧཱུྃ། མིག་གི་ལྟ་བས་བཀུག་བྱས་པའི། །སངས་རྒྱས་རིགས་རྣམས་གཞུག་པར་བྱ། །ཉི་ཟླ་འབར་བའི་ལྕགས་ཀྱུ་ཡིས། །དེ་གཉིས་གཅིག་ཏུ་གནས་པར་བསྒོམ། །མཆོད་འབུལ་བསྟོད་པས་མཉེས་བྱས་ནས། །གཙོ་བོའི་སྔགས་བརྗོད་བསྒྲིལ་བར་བྱ། །ཞེས་དང་། ཞི་བ་རྡོ་རྗེ་ལས་རིམ་ལས། གཙང་མའི་སྣོད་དུ་ལེགས་བཀོད་དེ། །ཉི་ཟླ་འབར་བའི་གདན་དག་ལ། །ཐུགས་ལས་ཡི་གེ་འབྲུ་གྲངས་བཞིན། །ཕྱོགས་བཅུ་དུས་བཞི་མདུན་དྲངས་ཏེ། །མཆོད་སྦྱར་གསོལ་བ་གདབ་པར་བྱ། །སྦྱོར་བའི་ཡེ་ཤེས་གྲངས་མཉམ་དང་། །རྡོ་རྗེ་གསུམ་བྱིན་ངེས་པར་བསྟིམ། །དང་པོ་རང་བཞིན་མཉམ་བྱས་ཏེ། །ཅུང་ཟད་མཆོད་ལ་བརྟག་པར་བྱ། །ཞེས་ཡི་དམ་ཐུན་མོང་གི་བྱིན་རླབས་གསུངས་པ་བཞིན་ནོ། །བཞི་པ་གདབ་ཚུལ་ནི། རྡོ་རྗེ་རྒྱལ་པོ་ལྷར་གསལ་བས་གཟུངས་མའམ། སློབ་མ་ཡུམ་དུ་མོས་པ་ལ་ཛཿཛཿཞེས་བླངས་ཏེ། ཐིག་བྱང་ཆུབ་སེམས་ཀྱི་རང་བཞིན་དཀར་བྲེང་གིས་བྱུང་བར་བསམ་ལ། རང་གི་མཐེ་བོང་དང་གུང་མོ་འོག་ཏུ་ཕྱོགས་པས་ཐིག་སྐུད་བཟུང་ཞིང་བཅུས་ཏེ་ནམ་མཁའ་ལ་གྱེན་དུ་སེ་གོལ་གྱིས་གདབ། སྟེང་ཕྱོགས་སུ་ཡེ་ཤེས་ཀྱི་གཞལ་ཡས་ཁང་དུ་གྱུར་པར་བསམ། ཡང་འོག་ཏུ་ཕྱོགས་ཏེ་བར་སྣང་ལ་གདབ་པས་འོག་གི་འཇིག་རྟེན་གཞལ་ཡས་ཁང་དུ་གྱུར་པར་བསམ་པ་སྟེ། གལ་པོ་ལས། ཡེ་ཤེས་ལྔ་ལྡན་གནམ་ཐིག་གིས། །སྟེང་གི་འཇིག་རྟེན་དཀྱིལ་འཁོར་འགྱུར། །ས་ཐིག་འོག་གི་འཇིག་རྟེན་ཡང་། །དཀྱིལ་འཁོར་ཆེན་པོར་འགྱུར་བ་འོ། །ཞེས་དང་། བསྐོར་ཕྱོགས་ནི། །གདབ་ཚུལ་སློབ་དཔོན་ནུབ་ཏུ་འདུག །ཞེས་སོགས་ཏེ། བདེ་འདུས་ཞི་བའི་ཐིག་ཆོག་སློབ་དཔོན་གྱིས་མཛད་པ་ལས། སློབ་དཔོན་ཆུ་བདག་ཕྱོགས་གནས་ལ༔ སློབ་མ་བརྒྱ་བྱིན་ཕྱོགས་གནས་ཏེ༔ ཚངས་ཐིག་དང་པོ་གདབ་པར་བྱ༔ གཤིན་རྗེ་གནོད་སྦྱིན་ཕྱོགས་གནས་ཏེ༔ ཚངས་ཐིག་གཉིས་པ་གདབ་པར་བྱ༔ མེ་དང་འབྱུང་པོར་གནས་ནས་ནི༔ ཤར་གྱི་ཐིག་ནི་གདབ་པར་བྱ༔ རླུང་དང་བདེན་བྲལ་ཕྱོགས་གནས་ཏེ༔ ནུབ་ཀྱི་ཕྱོགས་ནི་དེ་བཞིན་གདབ༔ སློབ་དཔོན་རླུང་གནས་བྱང་གི་ཐིག༔ མེ་དང་བདེན་བྲལ་གནས་ནས་ལྷོ༔ མཚམས་ཀྱི་ཐིག་གཉིས་དེ་བཞིན་གདབ༔ ཅེས་དང་། པདྨ་ལས་རིམ་ལས་ཀྱང་། དེ་ནས་སློབ་དཔོན་ཆུ་བདག་འདུག །ཤི་ཤ་བརྒྱ་བྱིན་ཕྱོགས་སུ་འདུག །གནམ་ཐིག་ཚངས་ཐིག་དང་པོ་གདབ། །ཅེས་པ་ནས། ཟུར་ཐིག་གཉིས་ཀྱང་ཤེས་པར་བྱ། །ཞེས་གསུངས་པའི་བར་རོ། །དེའི་འཕྲོས་ལས། རྡོ་རྗེ་དྲིལ་བུ་ཐོགས་ལ་གདབ༔ སྒྲ་རྣམས་ཀྱང་ནི་དཀྲོལ་བར་བྱ༔ ཡེ་ཤེས་ཐིག་གདབ་རིམ་པ་འོ༔ ཞེས་གསུངས་པས་རྡོར་དྲིལ་དང་བཅས་པས་ཕྱོགས་མ་འཁྲུལ་བར་གདབ་ཅིང་། འགྲོ་ཚུལ་ཡང་། ནག་པོ་པས། བློ་ལྡན་རྒྱབ་ཀྱིས་འགྲོ་བར་བྱ། །ཞེས་པ་ལྟར། ཚངས་ཐིག་དང་ལོགས་ཐིག་ལ་གཡས་སྐོར་རྒྱབ་འགྲོས་ཀྱིས་འགྲོ་ཞིང་། ཟུར་ཐིག་གཉིས་ལ་སྐོར་ཕྱོགས་སུ་འགྲོ་བ་ལས་རྒྱབ་འགྲོས་མི་དགོས་སོ། །གཉིས་པ་ལས་ཐིག་ལའང་། རྒྱུ། ཚད། བྱིན་རླབས། གདབ་ཚུལ་དང་བཞི། དང་པོ་ནི། སྒྱུ་འཕྲུལ་ལས། ཞི་བ་ལ་རས་བལ་ལམ། ཁྲོ་བོ་ལ་ཞིང་ཆེན་གྱི་རྒྱུ་མའམ། གཞན་ལས་རོ་སྐྲ་ལའང་བྱ་བར་བཤད་དོ། །ཧེ་རུ་ཀ་གལ་པོ་ལས། ཤི་བའི་སྐྲ་ཡི་སྐུད་པ་འམ། །བ་སུ་ཏ་ཡིས་ཐིག་སྐུད་བྱ། །ཞེས་དང་། ཞི་བ་ལས་རིམ་ལས། ཁ་དོག་གསུམ་ལྡན་སྣལ་མ་དགུ །རས་བལ་ལས་བཀལ་སྐུ་གསུང་ཐུགས། །ཞེས་སོགས་སོ། །འོན་ཀྱང་ཞི་ཁྲོ་ཐུན་མོང་དུ་རས་བལ་གཙང་མ་ཚད་ལྡན་མས་བཀལ་བའི་སྐུད་པ་ཁ་དོག་སུམ་སྒྲིལ་ལམ་དགུ་སྒྲིལ་དུ་བྱས་པ། གཉིས་པ་ཚད་ཀྱང་སྔར་དང་འདྲ་བ་སྟེ། པདྨ་ལས་རིམ་ལས། དེ་རྗེས་ལས་ཐིག་བརྩམ་པར་བྱ། །ཉེས་པའི་སྐྱོན་མེད་རས་བལ་དཀར། །མཚན་ལྡན་གཟུངས་མ་གོང་མས་བཀལ། །ཤིན་ཏུ་སྙོམ་ལ་འཇུར་མདུད་མེད། །རིང་ཐུང་དཀྱིལ་འཁོར་ཉིས་འགྱུར་ལ། །སྦོམ་ཕྲ་སྒོ་ཡི་ཉི་ཤུ་ཆ། །ཞེས་སོ། །གསུམ་པ་བྱིན་རླབས་ནི། སྐུད་པ་རྣམས་འབྲུ་གསུམ་དུ་མོས་ལ། དེ་བཞིན་གཤེགས་པ་རྣམས་ཀྱི་གནས་གསུམ་ལས་འོད་ཟེར་དཀར་དམར་མཐིང་གསུམ་བྱུང་བ་ཐིགས་སྐུད་ལ་ཐིམ་པས་དེ་ཉིད་ཀྱི་སྐུ་གསུང་ཐུགས་གསུམ་མམ་དགུ་ཕྲུགས་ཀྱི་རང་བཞིན་དུ་གྱུར་པར་བསམ་སྟེ། གལ་པོ་ལས། ས་ཐིག་གསུམ་སྒྲིལ་སྐུ་གསུང་ཐུགས། །ཞེས་སོ། །བཞི་པ་གདབ་ཚུལ་ནི། དྲི་བཟང་པོ་བདུད་རྩི་ལྔ་དང་བཅས་པའི་དཀར་ཆལ་གྱིས་སྦགས་པའི་ཐིག་སྐུད་བརྐྱངས་ཏེ་སློབ་དཔོན་སློབ་མ་ལྷ་ཡབ་ཡུམ་དུ་གསལ་བའི་སྦྱོར་མཚམས་ནས་དམ་ཚིག་གི་ཐིག་སྐུ་གསུང་ཐུགས་ཀྱི་རང་བཞིན་ཅན་བཏབ་པར་བསམ་ལ། རྡོར་དྲིལ་བཞག་སྟེ་ཐིག་ཆེན་བརྒྱད་པོ་སྐོར་ཕྱོགས་དང་གོ་རིམ་ཡེ་ཐིག་བཞིན་དུ་བྱས་ནས་གདབ་སྟེ། པདྨ་ལས་རིམ་ལས། རྡོ་རྗེ་དྲིལ་བུ་བོར་ནས་ནི། །གདབ་པའི་རིམ་པ་གོང་ལྟར་བྱ། །ཞེས་སོ། །ཡང་གནས་སྐབས་བྱ་སླ་བའི་ཆེད་དུ་ལོགས་བཞིའི་སྔོན་དུ་ཟུར་ཐིག་གཉིས་བཏབ་ཀྱང་མི་འགལ་ཏེ། རྡོ་རྗེ་གུར་གྱི་ལེའུ་བརྒྱད་པར། དང་པོ་ཚངས་པའི་ཐིག་དང་ནི། །གཉིས་པར་མཚམས་ཀྱི་ཐིག་དང་ནི། །གསུམ་པར་ངོས་ནི་བཞི་པའི་ཐིག །ཐིག་ནི་རབ་ཏུ་གདབ་པར་བྱ། །ཞེས་གསུངས་པའི་ཕྱིར་རོ། །དེ་ཡང་གནམ་སའི་ཐིག་གདབ་པའི་ཚེ། སྐུད་པ་ཆད་པ་དང་། ཤོར་བ་དང་། ཕྱོགས་འཁྲུལ་བའི་སྐྱོན་རྣམས་སྒྲིམ་པོའི་བློས་སྤངས་ནས་གདབ་སྟེ། སྙིང་པོ་ལས། མཁས་ལྡན་ཆེན་པོས་སྒྲིམ་ཏེ་བྱ། །ཞེས་དང་། རྡོ་རྗེ་ལས་རིམ་ལས། ཐིག་སྐུད་ཆད་ན་སློབ་དཔོན་འཆི། །ཕྱོགས་འཁྲུལ་བས་ནི་གཉིས་ཀ་ཉམས། །རྒྱུན་ཆད་ལམ་ལ་གནས་པར་འགྱུར། །དེ་ཕྱིར་མཁས་པས་སྒྲིམ་སྟེ་བྱ། །ཞེས་དང་། བདེ་འདུས་ཀྱི་དཀྱིལ་འཁོར་བྱ་བའི་ལས་རིམ་ལས་ཀྱང་། ཐིག་སྐུད་ཆད་ན་སློབ་དཔོན་ལ་ངན༔ ཟུར་ཐིག་ཉམས་ན་སློབ་མ་འཆི༔ རིང་ཐུང་འཆོར་ན་ན་བར་འགྱུར༔ ཕྱོགས་མཚམས་འཁྲུགས་ན་ཉེས་པར་འགྱུར༔ ཞེས་གསུངས་སོ། །ཡང་ལས་རིམ་ལས། ཀུན་ཏུ་བྱ་བར་བྱས་པ་དང༔ ཏིང་འཛིན་ལྡན་པས་ཡེ་ཤེས་ལས༔ ཡེ་ཤེས་ཐིམ་པ་ངེས་མཆོད་དེ༔ དམ་ཚིག་ཕྱག་རྒྱ་མུཿཡིས་གཤེགས༔ དེ་ནས་ཉེས་པ་གང་ཡང་མེད༔ ཞེས་པས་ཐིག་སྐུད་གཉིས་ལ་གཏང་རག་གི་ཚུལ་དུ་ཡེ་ཤེས་ལ་ཡེ་ཤེས་ཐིམ་པར་བསམ་ལ་མཆོད་དེ་དམ་ཚིག་གི་ཕྱག་རྒྱ་བཅས་ལ་བཛྲ་མུཿཞེས་པས་གཤེགས་སུ་གསོལ། དེ་ལྟར་བྱས་པས་ཐིག་སྐུད་ལ་འགོམ་པ་སོགས་ཐལ་ཀྱང་ཉེས་པ་མི་འབྱུང་ངོ་། །དེ་བཞིན་དུ་དཀྱིལ་འཁོར་ལ་བཏབ་པའི་ཐིག་རབ་གནས་དང་ལྡན་པ་དེ་ལའང་འགོམ་པའི་ཉེས་པ་སེལ་བའི་ཕྱིར་ཧྲཱིཿཞེས་སྒྲ་རིང་པོར་བརྗོད་པས་དཀྱིལ་འཁོར་གྱི་ཐིག་ལྷ་བློས་ནམ་མཁའ་ལ་བཏེགས་ནས་ཐིག་ཕྲན་གྱི་ཆ་དབྱེ་བ་དང་། ཚོན་བཀྱེ་བ་སོགས་ཐིག་གི་འོག་ཏུ་འཛུལ་བར་མོས་ནས་བྱ་བར་གསུངས་ཏེ། སྔ་མ་ལས། རབ་གནས་ལྡན་པའི་ཐིག་འགོམ་ན༔ བདེ་གཤེགས་སྐུར་པ་བཏབ་དང་མཚུངས༔ སངས་རྒྱས་ཆོས་ལས་རིང་འགྱུར་བས༔ ཧྲཱིཿསྒྲའི་ཕྱག་རྒྱས་འཛུལ་བར་བྱ༔ ཞེས་སོ། །གནམ་སའི་ཐིག་གདབ་པའི་གོ་རིམ་ཡང་། སྒྱུ་འཕྲུལ་མཁན་པོ་ཕལ་ཆེར། ཐོག་མར་ལས་ཐིག་བཏབ་ནས། དེ་རྗེས་སྐུ་གསུང་ཐུགས་རེ་རེ་ཡེ་ཤེས་ལྔ་ལྔའི་རོ་དང་ལྡན་པར་བསམ་ལ་ཡེ་ཐིག་འདེབས་པའི་ཕྱག་ལེན་མཛད་མོད། འདིར་ཡེ་ཐིག་ཐོག་མར་འཆད་པ་བརྗོད་པ་ཉུང་བས་འཆད་བདེ་བ་དང་། དེར་མ་ཟད་སྒྱུ་འཕྲུལ་ལས་ཀྱང་མཐའ་གཅིག་ཏུ་མ་ངེས་ཏེ། བི་མ་ལས་ཐིག་གི་པིཎྜ་ཐ་ལས། རང་བཞིན་དཀྱིལ་འཁོར་གནམ་ཐིག་གདབ། །དེ་ནས་ས་ཐིག་འཆད་པ་བཞིན། །ཉེས་པ་བྲལ་བར་གདབ་པར་བྱ། །ཡང་ན་ཡེ་ཤེས་དམ་ཚིག་པའི། །རྗེས་ལ་རབ་གནས་ལྡན་ཕྱིར་གདབ། །ཅེས་སྔ་ཕྱི་འདམ་ཁར་གསུངས་པ་དང་། ཚད་ལྡན་གྱི་གཞུང་མང་པོར་ཡེ་ཐིག་སྔོན་ལ་འདེབས་པའི་ཁུངས་ཀྱང་མཐོང་བའི་ཕྱིར་རོ། །དེའང་རྔམ་གློག་ལས། ཐིག་གཡོགས་ལས་ཀྱི་སེམས་མ་སྟེ། །མཚན་ལྡན་བྱིན་གྱིས་བརླབས་ནས་ནི། །ཕྱག་རྒྱ་གར་དང་བཅས་པ་ཡིས། །རང་བཞིན་དཀྱིལ་འཁོར་གནམ་ཐིག་གདབ། །དེ་ནས་ས་ཐིག་གདབ་པ་ཡང་། །འདུལ་བའི་དབང་གི་བྱེ་བྲག་ལས། །མཎྜལ་ཚད་ནི་ངེས་པ་མེད། །སོར་བཞི་པ་ལས་བརྩམས་ནས་ནི། །ཇི་སྲིད་དཔག་ཚད་ཐུག་བར་རོ། །ཞེས་དང་། བདེ་འདུས་ཞི་བ་འདུས་པའི་རྩ་རྒྱུད་ལས། དང་པོར་ནམ་མཁར་དགོངས་ཐིག་གདབ༔ དེ་ནས་ས་ཐིག་རིམ་པ་བཞིན༔ ཞེས་དང་། པདྨ་ལས་རིམ་ལས་ཀྱང་། ཡེ་ཤེས་ཐིག་གདབ་རིམ་པ་འོ། །དེ་རྗེས་ལས་ཐིག་བརྩམ་པར་བྱ། །ཞེས་སོགས་མང་ངོ་། །འོན་ཀྱང་འདིར་སྤྱིར་བཏང་ཙམ་དུ་བཀོད་པ་སྟེ། བྱེ་བྲག་དཀྱིལ་ཆོག་སོ་སོའི་ལུགས་བཞིན་མ་འདྲེས་པར་ལག་ཏུ་ལེན་པ་གཅེས་སོ། །དེ་ལྟར་ཐིག་གདབ་སྤྱིར་བཤད་པས་ཁོག་ཕུབ་ནས། ད་ནི་ལས་ཐིག་གི་ཆ་དབྱེ་བ་སོགས་འཆད་པར་འདོད་པས། དེ་ཡང་ཅུང་ཟད་ཕྱེ་སྟེ་བཤད། །ཅེས་སྨྲས་སོ། །དེ་ལ་ཐོག་མར་ཐིག་གཞི་སྟེགས་བུའི་ཚད་ནི་ཕྱི་དཀྱིལ་འཁོར་གྱི་ཚད་སྔར་དྲངས་མ་ཐག་པའི་རྔམ་གློག་གི་ལུང་དེ་ལས། སོར་བཞི་ནས་དཔག་ཚད་ཀྱི་བར་མ་ངེས་པར་གསུངས་པ་ནི་ལྷག་པ་གཟུགས་བརྙན་དང་། ཏིང་ངེ་འཛིན་མ་ཕྱེ་བའི་སྐབས་ཏེ། སྙིང་པོ་ལས། ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པ། །སངས་རྒྱས་དཀྱིལ་འཁོར་སྣ་ཚོགས་བསྒོམ། །ཞེས་དང་། ཐར་ལོའི་འགྱུར་ལས། རྒྱང་གྲགས་ཙམ་ནི་དཔག་ཚད་སྦྱོར། །མཁའ་དབྱིངས་བསམ་མི་ཁྱབ་པ་རུ། །སངས་རྒྱས་དཀྱིལ་འཁོར་བསམ་པར་བྱ། །ཞེས་ལྷག་པ་ཏིང་འཛིན་གྱི་དཀྱིལ་འཁོར་དུ་གསུངས་ཤིང་། ལྷག་པ་གཟུགས་བརྙན་གྱི་དཀྱིལ་འཁོར་ལ་ཆུང་འབྲིང་ཆེ་གསུམ་ལས། ཆུང་ཚད་གཉིས་ནི། དཀྱིལ་འཁོར་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་སྟེ། །ཞེས་སོ། །འབྲིང་ཚད་གཉིས་ནི། ཡང་ན་ལུས་ནི་གསུམ་གྱི་ཚད། །ཡང་ན་ཁྲུ་ནི་བཅུ་དྲུག་གོ །ཞེས་སོ། །ཆེ་ཚད་གཉིས་ནི། ཉི་ཤུའམ་ཉི་ཤུ་རྩ་ལྔ་བྱ། །ཞེས་གསུངས་པའི་ཕྱིར། འདིར་ཁྲུ་གང་ཚད་ལས་མི་ཆུང་བའི་ཞེས་སྨྲས་པ་ནི། དེ་ཆུང་ཚད་ཡིན་པས་དེ་ལས་ཆུང་དུ་མི་གཏུབ་པའི་ཐ་ཚིག་གོ །སྟེགས་བུ་དེའི་རྣམ་པ་ནི། དབུས་མཐོ་ཞིང་། མཐའ་ཀུན་ནས་སྙོམ་པ་སྟེ། འོན་ཀྱང་ཤར་མཐོ་ན་ཚེ་ཐུང་། བྱང་མཐོ་ན་ནོར་རྫས་འཛད། ཅེས་གསུངས་པས་ཤར་དང་བྱང་ཅུང་ཟད་དམའ་བར་བྱའོ། །ཇི་ལྟར་རིགས་པའི་སོགས་ནི་ཚངས་ཐིག་ཟུར་ལ་སོགས་པའི་ཐིག་གདབ་ཚུལ་ཐམས་ཅད་ཞིབ་མོར་སྟོན་པ་སྟེ་ཀློག་པས་གྲུབ་པའོ། །གདབ་ཚུལ་རྣམ་པ་གཞན་དུ་ན་འདི་ལྟར་ཤེས་པར་བྱ་སྟེ། ཐོག་མར་ཚངས་ཐིག་དང་པོ་གདབ། །དེ་དབུས་ཚད་བཏབ་དཀྱིལ་འཁོར་དཀྱིལ། །དེ་སྟེང་བཟུང་ནས་ཟླུམ་སྐོར་གཅིག །དེ་དང་ཚངས་ཐིག་ཕྲད་ས་རུ། །བཟུང་སྟེ་སྔ་མའི་སྲད་བུ་ལས། །ཅུང་ཟད་རིང་ངམ་ཐུང་དུ་བཅུག །དེ་ཡིས་གར་སླེབ་ཟླུམ་བསྐོར་དེའི། །ཕྱི་དང་ནང་དུ་ཕྱོགས་ཟུར་གྱི། །བྱ་རྗེས་དེ་སྟེང་ཚངས་ཐིག་དང་། །ཟུར་ཐིག་གཉིས་པ་གདབ་པར་བྱ། །དབུས་ནས་ཕྱོགས་རེར་ཟུར་ཐིག་སྟེང་། །ཆ་མཉམ་དགུ་ཡི་མཚན་མ་བྱ། །དེ་སྟེང་ལོགས་རེར་ཆ་ཆེན་ནི། །དགུ་དགུ་བཅོ་བརྒྱད་གདབ་པར་བྱ། །དང་པོ་ཕྱེད་གདབ་ཕྱི་མ་གདབ། །གཉིས་པ་ཆ་བཞིར་བགོ་བར་བྱ། །གསུམ་པ་བཞི་པ་མི་གདབ་བཞག །ལྔ་པ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་བརྒྱད་པ་བཞི་བཞིར་བགོ །དགུ་པ་དབུས་དོར་མཐའ་གཉིས་གདབ། །ཅེས་རྟ་བབས་བརྒྱད་མ་དང་། བཞི་མའི་ཚེ་ཆ་མཉམ་བརྒྱད་ཀྱི་མཚན་མ་བྱ། །ཞེས་དང་། བརྒྱད་བརྒྱད་བཅུ་དྲུག་གདབ་པར་བྱ། །ཞེས་དང་། བདུན་པ་བཞིར་བགོ་བརྒྱད་དབུས་དོར། །ཞེས་བརྗོད་དོ། །ཡང་སྒོ་སྦྲགས་ཀྱི་ཚེ། དགུ་དགུ་བཅོ་བརྒྱད་གདབ་པར་བྱ། །དེ་ལ་ཆ་ཆེན་ནང་མ་གསུམ། །ཕྱེད་དུ་གཏུབས་ཏེ་དྲུག་ཏུ་བྱ། །དང་པོ་ཕྱེད་གདབ་ཕྱི་མ་ཕྱེད། །གཉིས་པའི་ནང་དུ་ཆ་ཕྲན་གཅིག །གསུམ་བཞི་མི་གདབ་ལྔ་དབུས་དོར། །དྲུག་པ་ཕྱེད་གདབ་ཕྱི་མ་གདབ། །དེ་ནི་ནང་གི་སྒོ་ཡིན་ནོ། །ཆ་ཆེན་བཞི་པ་ཕྱི་ཡི་ཁྱམས། །ལྔ་པ་དབུས་དོར་མཐའ་གཉིས་གདབ། །ཅེས་སོགས་སྔར་བཞིན་ཏེ། གཞན་དུ་བྲིས་པ་ལས་འདི་བྱ་སླའོ། །འོན་ཀྱང་གཞུང་དུ་ཐོག་མར་མདའ་ཐིག་ནས་འདེབས་པ་ནི། རྩ་ཐིག་སོགས་ངོས་བཟུང་སྟེ་གོ་བ་ལ་ཕན་པའི་ཆེད་དང་། མཉམ་སྦྱོར་གྱི་དཀྱིལ་ཆོག་ལས་ཀྱང་། ཐིག་ནི་ཕྱི་ནས་བཏབ་པ་ལ། །ཚོན་རྩི་ནང་ནས་བཀྱེ་བར་བྱ། །ཞེས་གསུངས་པའི་དགོངས་པའང་ཡིན་ནོ། །ཡང་ཆ་ཆེན་བཅོ་བརྒྱད་དང་བཅུ་དྲུག་ཏུ་དབྱེ་བ་འདི་ནི། རྡོ་རྗེ་ལས་རིམ་ལས། ཕྱོགས་རེར་དགུ་དགུ་སྟེ་སོ་དྲུག་གི་སྟེང་ཚངས་ཟུར་རྩིས་ཏེ། མཆོག་གི་ཐིག་ཕྲན་བཞི་བཅུ་བཞི། །ལེགས་པར་ཁ་དོག་ཕྱེ་ཡང་རུང་། །ཞེས་དང། བདེ་འདུས་རྩ་རྒྱུད་ལས། ཐིག་ནི་བཅུ་དྲུག་དག་ཏུ་གདབ༔ ཅེས་དང་། ཤྲདྡྷཱས་ཀྱང་། ངོས་བཞིའི་ཆ་ནི་དབྱེ་བྱས་ཏེ། །རེ་རེའང་ཆ་ཆེན་བཅུ་དྲུག་ཏུ། །སོ་སོར་རྣམ་པར་དབྱེ་བར་བྱ། །ཞེས་གསུངས་པའི་དོན་ཏེ་སྤྱིར་བཤད་པའོ། །བྱེ་བྲག་རྟ་བབས་བརྒྱད་མ་དང་། བཞི་མ་ལས་འཕྲོས་ཏེ་དཀྱིལ་འཁོར་སོ་སོའི་ཐིག་བཤད་པ་ལས། ཐོག་མར་སྒྱུ་འཕྲུལ་ཞི་བའི་ཐིག་གདབ་ཚུལ་འདི་ནི་དཀྱིལ་འཁོར་འབྲིང་པོའི་འདེབས་ཚུལ་ཏེ། བསྡུས་པ་ལ་བར་ཁྱམས་མེད་པའི་གྲུ་ཆད་ལ་སྒོ་གཏོད་པ་དང་། རྒྱས་པར་ཕོ་བྲང་འཁོར་ལོ་རྩིབས་བཞི་ལྟེ་བ་དང་བཅས་པ་རེ་རེ་ལའང་རྩིབས་བཞི་ལྟེ་བ་དང་བཅས་པས་མཚན་པའོ། །འདིའི་རྟ་བབས་བརྒྱད་མའི་འགོད་རིམ་དང་། འགོད་གཞི་འཁོར་ལོ་བྱེད་པ་ཞི་བ་ལ་འཁོར་ཡུག་གསུམ་ལས་མི་བྱེད་པ་སོགས་ཀྱི་དོན་ནི་འབྱམས་ཀླས་པར། ཞི་བ་འབྲིང་པོའི་བློས་བསླང་རྣམ་གཞག་ཏུ་བྲིས་ཡོད་པས་སྤྲོ་ན་དེར་བལྟ་བར་བྱ་སྟེ། ཁྲོ་བོ་ཡང་དེས་ཁོག་ཕུབ་པ་ཡོད་དོ། །ཚོགས་ཆེན་འདུས་པའི་དཀྱིལ་འཁོར་ལ། ཞི་བ་རྡོ་རྗེ་དབྱིངས་སྟེང་དང་། ཚོགས་ཆེན་འདུས་པ་འོག་ཁང་དུ་བྱས་པའི་ཁྲོ་བོ་ལ་སྒོ་དགུ་བརྩེགས་སུ་བྱེད་པ་ནི་ཧཱུྃ་ཀཱ་རའི་རྒྱ་མདུད་འགྲེལ་པ་ལས། གཞལ་ཡས་ཁང་མཐའ་ཐུག་པ་མེད་པའི་ཁྱམས་དགུ་ལས་མེ་དཔུང་འབར་བ་ནི། ཐེག་པ་དགུའི་རྟོགས་པའི་ཡེ་ཤེས་དགུ་ཡོངས་སུ་རྫོགས་པའི་ཕྱིར་སྒོ་དགུ་བརྩེགས་སུ་མཐོང་སྟེ། ཁྱམས་མཐོ་དམན་གྱི་ཆས་བརྩེགས་པའོ། །ཞེས་དང་། སྤྱིར་སྒོ་དགུར་གྱུར་པ་ནི་ཕྱོགས་དང་པོའི་དབང་གིས་ཤར་ནས་སྨྲོས་པའོ། །བརྩེགས་པ་ནི་སྒོ་རིམ་པ་དགུ་པར་འོག་གཞིའི་ཆས་ཕྱེ་བའོ། །དེ་དག་ལ་ཐིག་ཉི་ཤུ་རྩ་བདུན་ནོ། །ཞེས་གསུངས་པའི་རྗེས་སུ་འབྲངས་ནས་བྲིས་པ་སྟེ་རང་གི་རྗེ་བླ་མའི་དགོངས་པའོ། །དེའང་འདིའི་དབུས་ཀྱི་ཟླུམ་སྐོར་གསུམ་ནི། ཆེ་མཆོག་དང་དབང་མཆོག་བཛྲ་ཧེ་རུ་ཀ་གསུམ་གྱི་སའོ། །དེ་ནས་རིམ་པར་རྩིབས་བརྒྱད་ལ་རྒྱུད་ལུང་གི་ཁྲོ་བོ་བརྒྱད། གློ་འབུར་དང་། གྲུ་ཆད་ལ་གཽ་རཱི་མ་བརྒྱད། བར་ཁྱམས་དང་པོར་སིཾ་ཧ་མ་བརྒྱད་དང་། དེའི་སྒོར་ནང་གི་སྒོ་མ་བཞི། གཉིས་པར་སྤོར་མ་བརྒྱད་དང་། བར་གྱི་སྒོ་མ། གསུམ་པར་དབང་མོ་ཉེར་བརྒྱད། བཞི་པར་མཁའ་འགྲོ་སོ་གཉིས། ལྔ་པར་མ་བདུན་སྲིང་བཞི། དྲུག་པར་གིང་བཅོ་བརྒྱད། བདུན་པར་ཁྲོ་བོ་དྲུག་ཅུ། བརྒྱད་པར་ཕོ་ཉ་སུམ་བརྒྱ་དྲུག་ཅུ། དགུ་པར་མ་མོ་དྲུག་ཅུ། ཕྱོགས་བཞིའི་རྟ་བབས་ལ་རིག་འཛིན་རྣམས་བཞུགས་པར་བཤད་དོ། །ལ་ལ་ནི་ཞི་དཀྱིལ་དབུས་སུ་བཅུག་པའི་སྒོ་སྦྲགས་བཅུ་གཅིག་ཏུ་མཛད་པ་སོགས་ལ་ཁུངས་གསལ་པོ་མ་མཐོང་། ཁྲོ་དཀྱིལ་གྱི་གཙོ་བོ་འགོད་ས་མི་རྙེད་པའི་སྐྱོན་གནས་སོ། །ཡང་སློབ་དཔོན་ཤཱནྟ་རཀྵི་ཏས་མཛད་པའི་ཀུན་འདུས་ཀྱི་བེར་ཀ་ཡིག་ཆུང་ལས། གཞལ་ཡས་སྒོ་དགུ་བརྩེགས་གྲུ་ཆད་གཉིས་སྒོ་སྣམ་ཁྱམས་ལྔ་ལ་ཡོད་པ་བརྒྱད། གཅིག་མུ་ཁྱུད་ལ་ཡོད་ན་མུ་ཁྱུད་ཟླུམ་པོ་ལ་སྒོ་གདོང་དུ་འཚལ་ལ་བསམ། ཞེས་རག་པ་བཀོད་པ་དང་། རྩ་རྒྱུད་དུ། འཁོར་ལོ་དྲུག་བརྩེགས་རྡོ་རྗེ་མུ་ཁྱུད་བདུན་དུ་འདོད་པའང་ཡོད་གསུངས་ཏེ། དེ་དག་སྔོན་གྱི་མཁས་པ་རྣམས་ཀྱིས་མ་བཀྲལ་བས་གྱ་ཚོམས་སུ་བྱ་བར་རིག་པ་མ་ཡིན་ནོ། །འདིར་ཐིག་གི་ཆ་གསུམ་ནང་མ་འཁོར་ལོ་དང་། ཕྱི་མ་གཉིས་ཀ་བསྡམས་ཏེ་ཆ་ལྔར་བགོས་པའི་ནང་མ་བཞིས་སྒོ་བརྒྱད་དང་། ཕྱི་མས་ཕྱི་སྒོར་འགྱུར་བའི་ཕྱག་ལེན་འདི་ནི་དཀྱིལ་འཁོར་ཆེ་ཆུང་གང་ལྟར་ཡང་སྦྱར་ཆོག་པས་བྱ་སླ་བའི་ཆེད་དེ། གཞན་དུ་གནས་ཁང་ཡངས་པ་དང་། སྦྱིན་བདག་འབྱོར་པ་ཅན་གྱིས་དཀྱིལ་འཁོར་ཆེན་པོ་བཞེངས་པའི་ཆ་གསུམ་ནང་མ་དང་། ཕོ་བྲང་བར་མས་སྒོ་བརྒྱད། ཕྱི་མ་ཆ་གསུམ་གྱི་ནང་མ་ཁྱམས་དང་། ཕྱི་མ་གཉིས་ལ་སྒོ་བཏོན་ཏེ། ཕྱི་རོལ་དུ་དེའི་སྒོ་ཚད་དང་མཉམ་པའི་རྟ་བབས་སོགས་བྱས་ན་རྭ་རྩེ་ནས་ཕྱི་རོལ་གྱི་འཁོར་ཡུག་བསྐོར་ཆོག་པ་སོགས་ལག་ལེན་དུ་བྱ་སླ་ཞིང་མཛེས་པ་ཞིག་འབྱུང་ངོ་། །འོན་ཀྱང་དཀྱིལ་འཁོར་ཆུང་ངུའི་ཚེ་ཆ་གསུམ་བར་མ་ལ་སྒོ་བརྒྱད་བརྩེགས་བྱ་དཀའ་བའི་གནས་སུ་གྱུར་པས་འདིར་མ་བྲིས་སོ། །དོང་སྤྲུགས་ཀྱི་པདྨ་བརྒྱའི་འགོད་ལུགས་ནི། བརྒྱ་ལྡན་ལས་རིམ་ལས། མུ་ཁྱུད་དྲུག་སྐོར་རིམ་པ་ལྔ། །བཞི་བརྒྱད་བཅུ་དྲུག་སུམ་ཅུ་གཉིས། །ཐ་མ་བཞི་བཅུར་འགྱུར་བ་ཡིན། །ཞེས་པ་ལྟར་རོ། །འདིར་སྒོ་རྐྱང་འགྲམ་ལོགས་དང་བྲལ་བ་དང་། རྟ་བབས་ཆ་མི་མཉམ་པར་མཛད་པ་སོགས་ནི་བརྟག་པའི་གནས་ཏེ། རྒྱུ་མཚན་བློས་བསླང་རྣམ་གཞག་ཏུ་བཤད་གྲུབ་བོ། །ད་ནི་རྟ་བབས་བཞི་མ་ལས་འཕྲོས་པའི་དཀྱིལ་འཁོར་སོ་སོའི་གདབ་ཚུལ་ནི། གཏེར་མ་ཕལ་ཆེ་བར་ལྷ་སྣམ་མི་དགོས་པའི་ཁྱམས་སྤངས་ཏེ་ཞི་བ་བསྡུས་པ་དང་འདྲ་བར་བྱས་མོད། འོན་ཀྱང་འཇོམས་བྱེད་ཀྱི་དཀྱིལ་ཆོག་ཏུ་ཁྱམས་བཤད་པས་གཞན་མ་རྣམས་ལའང་ཡོད་མེད་འདམ་ཁར་བྱས་ན་རུང་ངམ་སྙམ་མོ། །བདེར་འདུས་ཞི་བ་ལས། འདིར་རྟ་བབས་བཞི་མར་བཤད་པ་ནི༔ སློབ་དཔོན་གྱི་ཐིག་ཆོག་ལས༔ ཆ་གཅིག་ཆ་བཞིར་རྟ་བབས་ཏེ༔ ཞེས་དང་། བདུན་པའི་ཆ་ཕྲན་བཞི་རུ་གདབ༔ ཅེས་གསུངས་པའི་ཕྱིར་རོ། །འོན་ཀྱང་ཞི་བ་འདུས་པ་རྩ་བའི་རྒྱུད་ལས། དེ་ནས་ས་ཐིག་རིམ་པ་བཞིན༔ དགུ་དགུའི་བདག་ཉིད་བཅོ་བརྒྱད་དུ༔ ཆ་ཡི་རྣམ་པ་ལ་སོགས་བགོ༔ ཞེས་དང་། ཞི་བ་ཞེ་གཉིས་ཀྱི་སྒྲུབ་ཐབས་ལས་ཀྱང། རྣམ་ཐར་བཞི་ཡི་སྒོ་ཁྱུད་ལ༔ རྣམ་ཐར་བརྒྱད་ཀྱི་རྟ་བབས་ལྡན༔ ཞེས་བརྒྱད་མར་གསུངས་པའང་ཡོད་པས་མཐའ་གཅིག་ཏུ་མ་ངེས་སོ། །ཕྱི་རོལ་གྱི་འཁོར་ཡུག་ཀྱང་། ཐིག་ཆོག་ལས། དང་པོ་འཇིག་རྟེན་ཕྱོགས་སྐྱོང་ལ༔ གཉིས་པ་རྡོ་རྗེའི་རྭ་བ་སྟེ༔ གསུམ་པ་མེ་རི་རབ་ཏུ་བྲི༔ ཞེས་དང་། དཀྱིལ་འཁོར་བྱ་བའི་རིམ་པ་ལས། ཕྱོགས་སྐྱོང་སྣམ་བུ་དཀར་པོའི་སྣ་ཚོགས་པདྨ་ཞེས་འབྱུང་བས། འདིར་སྒྱུ་འཕྲུལ་ཞི་བ་ལྟར་པདྨ་བྱས་མོད། འདམ་གར་གསུངས་པའི་ཕྱིར། པད་རའི་ཚབ་ཏུ་ཕྱོགས་སྐྱོང་སྣམ་བུ་བྱ་བའམ། རྣམ་པ་གཅིག་ཏུ་ན་པདྨའི་ལྟེ་བའི་ཁ་ཁྱེར་ལ་ཕྱོགས་སྐྱོང་བཀོད་ཀྱང་མི་འགལ་ལམ་སྙམ་མོ། །འདི་ནང་གི་ཕོ་བྲང་དགུ་ལ་རྟ་བབས་བྱེད་པ་ནི་མི་རིགས་ཏེ། ཐིག་ཆོག་ལས། དབུས་ཀྱི་ཕོ་བྲང་དགུ་པོ་ལ༔ སྒོ་རྒྱན་རྟ་བབས་མེད་པ་འོ༔ ཞེས་གསུངས་པའི་ཕྱིར་རོ། ཁྲོ་བོའི་སྐབས་འདིར་ནང་སྒོ་རྣམས་ལ་རྟ་བབས་མི་བྱེད་པ་དང། བྱེད་པའི་ལུགས་གཉིས་ལས། དང་པོ་ནི་རྩ་རྒྱུད་ཀྱི་ལེའུ་བརྒྱད་པར། དེ་ལས་དཀྱིལ་འཁོར་ཆེན་པོ་དགུ༔ ཀུན་ཀྱང་འཁོར་ལོ་རྩིབས་བཞི་པ༔ གྲུ་ཆད་བར་ཁྱམས་སྒོ་བཞིར་ལྡན༔ དེ་དག་ཕྱི་ཁྱམས་སྒོ་རྣམས་དང༔ སྒོ་རྒྱན་ལྕགས་རི་ལྡན་པ་ནི༔ ཚོན་སྣ་ལྔ་ཡིས་ལེགས་པར་བྲིས༔ ཞེས་ནང་སྒོ་ལ་སྒོ་རྒྱན་ལས་མ་གསུངས་པའི་ཕྱིར། གཉིས་པ་ནི། བསྐྱེད་རྫོགས་འབྲིང་པོའི་མངོན་རྟོགས་ལས། ཀུན་ཀྱང་སྒོ་བཞི་པ༔ ཕྲིན་ལས་རྣམ་པ་བཞིའི་བརྡར་རྟ་བབས་བཞི་པ༔ ཞེས་གསུངས་སོ། །དེས་ན་འདིར་བླ་མའི་ཕྱག་ལེན་དུ་རྟ་བབས་མེད་པའི་ཕྱོགས་མཛད་དོ། །རྟ་བབས་ཀྱི་སྣམ་བུ་ནི་བརྒྱད་མ་དང་། བཞི་པ་མཆོད་རྟེན་གྱི་དབྱིབས། བཞི་མ་སྤྱི་འགྲེ་ལྟར་གསུམ་ལས། དང་པོ་ནི། སྒྲུབ་ཐབས་རིན་ཆེན་ཕྲེང་བ་ཞེས་བྱ་བ་སྒོམ་ཁོག་ཆེན་མོར་གྲགས་པ་ལས། རྣམ་པར་ཐར་པ་བརྒྱད་དང་ལྡན་པས་རྟ་བབས་བརྒྱད་དང་ལྡན་པའོ། །ཞེས་གསུངས་པ་ལྟར་དེང་སང་ཕྱག་ལེན་འདི་མཛད་དོ། །གཉིས་པ་ནི། ཞི་བའི་ཐིག་ཆོག་ཏུ། རྟ་བབས་མཛེས་པའི་མཆོད་རྟེན་འདྲ༔ ཞེས་པ་ལ་འཁྲིས་པ་འདྲ་སྟེ། པུ་ཤུ་བང་རིམ་བརྩེགས་ལ་མཆོད་རྟེན་འདྲ་བར་གསུངས་པ་ལྟར་འདྲ་བ་ཡིན་པས་དགོས་པའི་ངེས་པ་མེད་དོ། །ཡང་རྣམ་པ་གཅིག་ཏུ་ན། གསང་རྫོགས་ལས་རྟ་བབས་མཆོད་རྟེན་གཟུགས་སུ་བཤད་པའི་ལྷན་པ་ཤོར་བ་སྙམ་མོ། །གསུམ་པ་ནི་རྩ་རྒྱུད་ལས། བ་སུ་ཏའམ་རྒྱུས་པ་ཡིས༔ ཐིག་ནི་བཅུ་དྲུག་གདབ་པར་བྱ༔ ཞེས་ཆ་ཆེན་བཅུ་དྲུག་ཏུ་གསུངས་པས་སྣམ་ཕྲན་བཞིར་འགྱུར་བའི་ཕྱིར་འདིར་ཡང་ཞི་བ་ལྟར་བཞི་མ་དང་བརྒྱད་མ་འདམ་ཁ་གསུངས་པ་འདྲའོ། །ཕུར་པ་སྤུ་གྲིའི་གྲུ་ཆད་ལ་ཐོད་རྩིག་བྱེད་པ་ནི་བློས་བསླངས་ཀྱི་དུས་སུ་གཞལ་ཡས་ཁང་ཕྱི་མ་ལས་མཐོ་བར་བཞེད་པས་མུ་ཁྱུད་ཀྱི་ཐོད་ཕྲེང་ལྟ་བུ་མ་ཡིན་ཞིང་། འདིའི་སྒོ་ལ་མུ་ཁྱུད་སོགས་མེད་པས་བྲི་བའི་དུས་སུ་སྒོའི་ཐད་དུ་རྩིག་པ་གཅོད་མི་དགོས་ཏེ། སྒོ་གོང་གི་རྩིག་པ་ཡོད་པའི་ཕྱིར་རོ། །བཀའ་བརྒྱད་གསང་རྫོགས་ལའང་ཕོ་བྲང་ནང་མའི་ཐིག་འདི་དང་འདྲ་བ་ལས། དེའི་སྟེང་གདུང་བཞི་བསྣོལ་བའི་ལེ་ཚེ་དགུར་འཁོར་ལོ་རྩིབས་བཞིའི་ལྟེ་བར་ཟླ་གམ་ལོགས་སྒོ་ཅན་རེ་མཛད་དོ། །ཟླ་གམ་འདི་ལ་ལྟེ་བ་ཟླུམ་པོ་ཉིད་གཤགས་ཆོག་པས་ཐིག་མི་དགོས་ཀྱང་། གཞན་དུ་དབང་གི་ཐབ་ཁུང་ལྟ་བུ་ཟླ་གམ་དགོས་པའི་རིགས་ལ། དེའི་ཐིག་ནི། ཚངས་ཟུར་སྤྱི་ལྟར་བཏབ་པའི་རྗེས། །དབུས་ནས་ཤར་དུ་བསྐོར་ཐིག་གི །བཞི་ཆ་འཕགས་པར་སྲད་བུ་བཟུང་། །ཤར་གྱི་གཡས་གཡོན་ཟུར་ཐིག་བར། །བསྐོར་བའི་མདུན་ལོག་བཅད་པས་འབྱུང་། །པད་འདབ་བརྒྱད་ནི་ཚངས་ཟུར་རྣམས། །ཐམས་ཅད་ཕྱེད་མར་བཅད་པས་གྲུབ། །རྩིབས་བཞིར་ཚངས་རྩེ་བཞི་པོ་སྦྲེལ། །རྩིབས་བརྒྱད་དེ་སྟེང་ཟུར་རྩེའང་སྦྲེལ། །རྩིབས་བཅུ་ཚངས་ནས་ཚངས་གཅིག་བར། །དུམ་བུ་ཕྱེད་གསུམ་གཞལ་བ་ཡི། །ཕྱེད་གཉིས་དོར་བའི་ཆ་གཅིག་པོས། །ལྷོ་དང་བྱང་གི་ཚངས་ཐིག་ནས། །ཤར་ནུབ་གཉིས་ཀྱི་ཚངས་ཐིག་བར། །གཉིས་རེ་གཞལ་བས་སྒང་པོ་བརྒྱད། །ཕྱེད་བཅད་མཚན་མ་བརྒྱད་བཏབ་བོ། །དེ་སྟེང་ཤར་ནུབ་ཚངས་ཐིག་བཅད། །མཚན་མ་བཅུ་པོ་གསལ་བར་བཏབ། །མཚན་མ་གཉིས་གཉིས་བར་བཞག་ནས། །སྲད་བུ་བརྐྱངས་ཏེ་རིམ་པར་གདབ། །དེ་ཡིས་འཁོར་ལོ་རྩིབས་བཅུ་འབྱུང་། །ཞེས་པ་རྣམས་ཀྱང་ཞར་ལ་འཕྲོས་པ་སྟེ། ཐིག་གི་ཆོ་ག་ཅུང་ཟད་བཀྲལ་བའོ། ༈ །གཉིས་པ་ཚོན་གྱི་བྱ་བ་ལའང་བཞི་སྟེ། རྒྱུ། ཚད། བྱིན་རླབས། བཀྱེ་བའི་ཐབས་སོ། །དང་པོ་ལའང་འབྱོར་པ་རབ་འབྲིང་ཐ་གསུམ་ལས། འབྱོར་པ་རབ་བྲི་བའི་ཡོན་བདག་འཁོར་ལོས་སྒྱུར་བའི་རྒྱལ་པོའི་དབང་དུ་བྱས་ན། སྔོན་པོ་ཨིནྡྲ་ནཱི་ལ། དཀར་པོ་དངུལ་ལམ་ཤེལ། སེར་པོ་པུ་ཤ་རཱ་གའམ་གསེར། དམར་པོ་པདྨ་རཱ་གའམ་བྱེ་རུ། ལྗང་གུ་མརྒད་དམ་གཡུ་ལས་བྱ་སྟེ། ཧེ་རུ་ཀ་གལ་པོ་ལས། འཁོར་ལོས་སྒྱུར་བའི་རྒྱལ་པོའི་རྫས། །པུ་ཤ་རཱ་ག་གསེར་དང་ནི། །པདྨ་རཱ་ག་མརྒད་དང་། །ཨིནྡྲ་ནཱི་ལ་ཚོན་དུ་སྦྱར། །ཞེས་དང་། རྡོ་རྗེ་ལས་རིམ་ལས། ཨིནྡྲ་ནཱི་ལ་ཟླ་འོད་དང་། །པུ་ཤ་རཱ་ག་བྱེ་རུ་ཟངས། །མརྒད་ཏ་ལས་བྱ་སྟེ་དགྱེ། །ཞེས་སོ། །འབྱོར་པ་འབྲིང་རྒྱལ་ཕྲན་རྣམས་ཀྱིས་འབྲུ་ལྔ་དང་སྨན་ལྔ་གང་རུང་རང་མདོག་གམ། ཚོན་རྩིས་ཁ་དོག་བསྒྱུར་བ་ལས་བྱ་སྟེ། གལ་པོ་ལས། མི་ཡི་དབང་པོས་སོ་ནམ་འབྲས། །བྲ་བོ་རམ་བུ་དེས་དམར་དང་། །ལྗང་གུ་སྲན་མ་ལ་སོགས་པ། །ཞེས་དང་། རྡོ་རྗེ་མེ་ལོང་ལས། འབྲས་དང་སཱ་ལུ་ལ་སོགས་པ། ཁ་དོག་བསྒྱུར་བ་དེ་བཞིན་ནོ། །སྨན་དང་། ཞེས་སོ། །འབྱོར་པ་ཆུང་བ་འབངས་ཕལ་པས་ནི། བཀྲ་ཤིས་པའི་ས་ཕྱོགས་ནས་བྱུང་བའི་ས་ཚོན་རང་མདོག་གམ་ཁ་དོག་བསྒྱུར་བ་ལ་བྱ་སྟེ། སྔ་མའི་འཕྲོས་ལས། འབྱོར་པ་ཆུང་བ་ཡིས། །འབྱུང་ཁུང་ལྔ་ཡིས་བྲི་བར་བྱ། །ཞེས་དང་། གལ་པོ་ལས། རྡོ་ཐལ་བ་བླ་ལྡོང་རོས་དང་། །རྒྱ་སྐྱེགས་དམར་པོ་བྱ་བ་དང་། །རམ་ལས་བྱས་དང་འབྲུ་བསྲེགས་པ། །ཐལ་བའི་རྡུལ་ཚོན་དག་ཏུ་བཤད། །ཅེས་པ་སྟེ། དེ་དག་ནི་ཕྱིའི་ཚོན་ནོ། །ནང་དུ་དྲག་པོའི་ཚོན་ནི། གལ་པོ་ལས། དུར་ཁྲོད་ཐལ་ཆེན་ལྡོང་རོས་དང་། །དེ་ཡི་སོ་ཕག་དུར་ས་དང་། །སོལ་བས་བྲི་བ་ཁྲོ་བོ་འོ། །ཞེས་གསུངས་ཀྱང་། ཁྲོ་དཀྱིལ་བཞེངས་པའི་ཚོན་ལྔ་ལ་ཐལ་ཆེན་ཅུང་ཟད་རེ་བསྲེ་བ་ཕྱག་ལེན་ནོ། །གསང་བའི་ཚོན་ནི། ཞི་ཁྲོ་ཐུན་མོང་ལ་འབྲས་བུ་ཆེན་པོ་ལྔ། བསྒྲལ་བའི་རཀྟའམ། ཡུམ་མཚན་ལྡན་གྱི་པདྨ་རཀྟས་བྲི་བར་བཤད་དེ། གལ་པོ་ལས། རི་མོ་གཅིག་པ་ཞེས་བྱ་བ། །དེ་དག་ཐམས་ཅད་རི་མོ་གཅིག །ཆགས་པའི་རཀྟ་བྱང་ཆུབ་སེམས། །དཀྱིལ་འཁོར་ཀུན་གྱི་ཚོན་རྩིར་བཤད། །ཅེས་སོ། །ད་ནི་ཐུན་མོང་དུ་ཉེ་བར་མཁོ་བ་རྡུལ་ཚོན་བསྒྱུར་བའི་ལག་ལེན་ཅུང་ཟད་བྲི་བར་བྱ་སྟེ། ཀུན་གྱི་གཞི་མ་དཀར་པོ་ནི། །རཱ་ག་རབ་ལ་ཅོང་ཞི་ཐ། །གཏུན་བརྡུང་ཆུ་བསིལ་ཀྱིས་བཏུལ་ཏེ། །དར་གྱི་ཚགས་མས་འཚག་པ་གཅེས། །དམར་རྩི་ཞོས་བྱུག་ཉི་འོད་ལ། །བསྲེགས་ནས་མ་སྐམ་ཙམ་གྱི་དུས། །ས་བསྲེས་རང་མདོག་མ་ཐོན་བར། །ལེགས་པར་མཉེས་པས་དམར་ལེགས་འབྱུང་། །དེ་བརླན་མ་བྲལ་རྡོ་ཞོ་ནི། །བཏུལ་པོ་དང་སྦྱར་ལེགས་འཕུར་ན། །མཐིང་གི་མདངས་འོད་ཟིལ་གྱིས་གནོན། །རམ་བཏུལ་དེ་དང་ས་སྦྱར་ནས། །མཉེ་ན་ལྕགས་ཁ་འབྱུང་བར་འགྱུར། །བ་མོས་མ་རེག་སྟོན་དུས་ཀྱི། །སྤང་རྒྱན་སྐེད་གཏུབ་བྱས་པ་ཡི། །རྩེ་མོའི་ཆ་རྣམས་ཞིབ་མོར་བརྡུང་། །དེ་དང་ས་བསྲེག་སླར་བརྡུངས་ནས། །ཉི་མའི་འོད་དུ་མཉེ་ཞིང་བསྲེག །ལན་གཉིས་ལན་གསུམ་སྒྱུར་བ་ན། ཁ་དོག་སྔོན་པོ་ཕྱི་བཞིན་ལེགས། །དེ་ལ་རྡོ་ཞོ་བཏུལ་པོ་ནི། །ཞིབ་བཏགས་ཅུང་ཟད་བཏབ་བྱས་ནས། །བརྡུང་ཞིང་མཉེ་ནས་ཉི་འོད་ལ། །བསྲེགས་པས་ཁ་དོག་ལྗང་གུ་འབྱུང་། །གྲོ་ལྗང་གཞོན་ནུ་ཧ་ལོའི་འདབ། །སྲན་མ་གཞོན་ནུ་སོགས་བརྡུངས་ནས། །ས་བསྲེགས་མཉེ་ཞིང་ཉི་མར་སྐམ། །འདིས་ཀྱང་ཁ་དོག་ལྗང་ལེགས་འོང་། །ཡུང་བ་ཞིབ་བཏགས་ཞོར་སྦྱར་ནས། །ས་དཀར་བསྲེས་ལ་གྲིབ་སྐམ་བྱ། །བཙོ་མ་གསེར་གྱི་ཁ་དོག་འཛིན། །ཡང་ན་ཞོ་དང་མ་སྦྱར་ཀྱང་། །སྔར་བཞིན་བྱས་པས་སེར་པོ་འོང་། །དེ་ཉིད་རྡོ་ཞོའི་བུལ་ཏོག་དང་། །སྦྱར་བས་ངུར་སྨྲིག་བཟང་པོར་འབྱུང་། །སྦང་མའི་ཕྱེ་དང་སྣུམ་སྦྱར་ནས། །མེར་བསྲེགས་མིག་སྨན་མདོག་དང་མཚུངས། །ཞེས་མདོ་ཙམ་སྨྲས་པ་སྟེ། ཞིབ་པར་མཁས་པའི་ལག་ལེན་ལ་ལྟ་བ་གཅེས་སོ། །གཉིས་པ་ཚད་ནི། གཞིའི་ཚོན་གྱི་ཚད་འཕང་ལ་རེ་ཁཱའི་ཕྱེད་ཕྱེད་དེ་རེ་ཁཱའི་འཕང་དུ་ནི་ཆ་ཕྲན་གྱི་ལྔ་ཆའོ། །ཞེས་གསུངས་ཀྱང་། སྲབ་མཐུག་སྙོམས་ཤིང་། ཁྲིའུ་རིས་མེད་པར་བཀྱེ་བའོ། །གསུམ་པ་བྱིན་རླབས་ནི། ཚོན་རྣམས་སྣོད་གཙང་མར་བླུགས་པ་ལ་རིགས་ལྔའི་ས་བོན་བྲིས་པ་ཕྱོགས་མ་འཁྲུལ་པར་བཀོད་ལ། རིགས་ལྔ་ཡབ་ཡུམ་ལྔའམ། རྒྱས་པར་་་རྒྱལ་བ་ཟེར་བའང་འདུག།རིགས་ཆུང་དང་བཅས་པ་ལྔ་ཚན་ལྔར་གསལ་བ་རྗེས་ཆགས་ཀྱིས་ཞུ་བ་ལས་དོན་ཡེ་ཤེས་ལྔ་མཚོན་པའི་རྟགས་རཏྣ་ལྔར་གྱུར་པར་བསམ་པ་སྟེ། ལས་རིམ་ལས། སྣོད་བླུག་རིམ་འདྲེས་དག་བྱས་ལ། །ཧཱུྃ་སོགས་ཡིག་འབྲུ་གཅིག་ཀྱང་ལྔར། ཁ་དོག་རྗེས་སུ་མཐུན་བྱས་ལ། །ཡོངས་གྱུར་ཉི་ཤུ་རྩ་ལྔའི་ལྷ། །ཐབས་དང་ཤེས་རབ་ལྡན་པར་བསྒོམ། །ཞེས་སོགས་དང་། པདྨ་ལས་རིམ་ལས། དེ་ལ་རིགས་ཀྱི་ཡི་གེ་བཀོད། །ཅེས་དང་། ལྷ་རྣམས་འོད་ཞུ་ཚོན་ལ་ཐིམ། །རཏྣ་ལྔ་རུ་གྱུར་པར་བསམ། །ཞེས་དང་། གལ་པོར། ཡི་གེ་འབྲུ་ལྔས་བྱིན་བརླབས་པ། །ཕྱག་མཚན་རིགས་ལྔ་ཡབ་ཡུམ་གྱུར། །ཅེས་སོགས་གསུངས་པ་ལྟར་རོ། །བཞི་པ་དགྱེ་ཚུལ་ནི། ཐོག་མར་སློབ་དཔོན་ཤར་དུ་ཞལ་ཕྱོགས་པས་ཚོན་ལ་བཀོད་པའི་ཡིག་འབྲུ་རྣམས་མཐེབ་སྲིན་གྱིས་བླངས་ཏེ། ཁུང་བུ་དགང་བ་ནི། རྣམ་སྣང་མངོན་བྱང་ལས། ཚོན་ནི་ནང་ནས་དགྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །ཞེས་སོ། །དེ་ལ་ལག་པ་ལ་དཔའ་བོ་འབྲུ་ལྔ་བཀོད་དེ། ཚོན་པྲ་བརྟག་པའི་དོན་དུ་གཡོན་པའི་ཁུ་ཚུར་གྱིས་དབང་ལྡན་ནས་བརྩམ་ལ་མཛུབ་གང་བའི་པཉྩ་རེ་ཁཱ་འདྲེན་ཏེ། ཀློང་གསལ་གྱི་རྒྱུད་ལས། ཚོན་རེ་སྒོ་ཡི་ཉི་ཤུ་ཆ། །དཔངས་ནི་མདའ་ཙམ་བྲི་བར་བྱ། །ཞེས་དང་། པདྨ་ལས་རིམ་ལས། བྱང་ཤར་མཚམས་ཀྱི་རེ་ཁཱ་ལ། །ས་བོན་པྲ་ནི་བརྟག་པར་བྱ། །ནག་པོ་དཀར་པོ་སེར་པོ་དམར། །ལྗང་གུ་རྣམ་ལྔ་མཉམ་པར་སྦྱར། །མཛུབ་གང་དུ་ནི་བྲི་བར་བྱ། །ཞེས་སོ། །དེ་རྗེས་སློབ་མ་རྣམས་ཀྱིས་ཀྱང་། སོར་མོའི་འཕྲུལ་ལྔ་བཀོད་དེ་ཅི་བདེར་བྲིའོ། །དེ་ཡང་རྡུལ་ཚོན་ཁ་དོག་ལྔ་སོ་སོར་ཕྱེ་བའི་དགོས་པ་ནི། སྒྱུ་འཕྲུལ་རྒྱས་པ་ལས། སེམས་ཅན་མ་ལུས་ཐམས་ཅད་ལ། །ཡེ་ཤེས་ལྔ་ཡིས་ཀུན་ཁྱབ་ཀྱང་། །རང་གི་རྣམ་རྟོག་བསྒྲིབས་བྱས་ནས། །ཡེ་ཤེས་ལྔ་ཡི་དོན་མ་མཐོང་། །དེ་ལྟར་རྨོངས་པ་ཐམས་ཅད་ལ། །ཡེ་ཤེས་མཚན་ཉིད་བསྟན་པའི་ཕྱིར། །དཀར་དང་དམར་དང་སེར་བ་དང་། །ལྗང་གུ་ལ་སོགས་ནག་པོ་བསྟན། །ཞེས་སོ། །དེ་ལྟར་སྤྱིར་བསྟན་ནས། བྱེ་བྲག་ཏུ། ཇི་ལྟར་དགྱེ་བའི་རིམ་པ་ནི། །ཞེས་སོགས་ནི། ཚོན་དགྱེ་བའི་ཁྱད་པར་གྱི་ཆོ་ག་རྣམས་ཞིབ་མོར་སྟོན་པ་སྟེ་གཞུང་བཀླགས་པས་འགྲུབ་པའི་ཕྱིར་མ་བཀྲོལ་ལོ། །ཚོན་དགྱེ་བ་གྲུབ་ནས་མཚན་མ་དགོད་པ་ནི། དེ་ལྟར་དཀྱིལ་འཁོར་སོ་སོ་ཡི། །ཞེས་སོགས་ཏེ། རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་དང་། ལས་རིམ་ལས། དཀྱིལ་འཁོར་རྣམ་པ་གསུམ་དག་ཏུ། །གཞུང་ཉིད་ཀྱིས་ནི་གསལ་བར་གསུངས། །ཡན་ལག་གཟུགས་སུ་སྙིང་པོ་འདི། །ཉི་ཟླ་པདྨའི་རིམ་བཞུགས་པ། །དཀྱིལ་འཁོར་སྐུ་ཡི་མཚན་ཉིད་ཡིན། །ཕྱག་རྒྱ་གསལ་བཀོད་ཐུགས་དཀྱིལ་འཁོར། །སྐུ་འམ་ཡང་ན་ཧཱུྃ་མཱུཾ་བྲི། །མཆོག་དང་འབྲིང་པོས་ཕྱེ་བ་ནི། །དཀྱིལ་འཁོར་གསུམ་དུ་ཕྱེ་བར་བྱ། །ཞེས་སོ། །མདོར་ན་སོ་སོའི་སོགས་ཏེ། ཚོན་རྩི་སྲབ་ན་དབུལ་པོར་འགྱུར། མཐུག་ན་མཛེ་འབྱུང་། ཚོན་ཐལ་ཤོར་ན་ནད་འབྱུང་བ་སོགས་གསུངས་ཤིང་། ཁྱད་པར་དུ་ཚོན་པྲ་བརྟག་པའི་ཚེ། སློབ་དཔོན་ཀུ་ཀུ་རཱ་ཛས། རེ་ཁཱ་དམའ་བས་མི་འགྲུབ་ཅིང་། །ཡོན་པོས་གདུང་བ་སྐྱེད་པར་བྱེད། །ཆད་པས་སློབ་དཔོན་སློབ་མ་ལ། །འཆི་འམ་ན་བར་འགྱུར་བ་ཡིན། །ལྷག་ཆད་ལས་ནི་ནད་འབྱུང་ཞིང་། །ཕྱོགས་འཁྲུལ་རྨོངས་པའི་ལས་སུ་འགྱུར། །ཞེས་གསུངས་པས་བག་ཡོད་པས་བྲིའོ། །གང་ཞིག་བློ་གྲོས་སོགས་ཏེ། ཐིག་ཚོན་གྱི་བྱ་བ་རྣམས་ཇི་བཞིན་མ་གྲུབ་པས་སྐྱོན་དུ་གྱུར་ན། དྲག་པོའི་སྦྱིན་སྲེག་དང་སྔགས་བཟླ་བ་སོགས་སོ་སོའི་སྙིང་པོའི་ཆོ་ག་དང་། གཙོ་བོར་དེ་ཁོ་ན་ཉིད་ཀྱི་ཏིང་འཛིན་གྱིས་སྐྱོན་ཐམས་ཅད་སེལ་བ་ཡིན་པས་འབད་དེ་ཉམས་སུ་བླང་ངོ་། །དེ་དག་ཀྱང་ཞིབ་པར་དཀྱིལ་ཆོག་སོ་སོ་དང་། བླ་མའི་ཕྱག་ལེན་མཐོང་བ་གོམས་པ་ལ་རག་ལས་པས་བླ་མའི་མན་ངག་ཐོབ་པ་ལ་བརྩོན་པར་བྱ་ཡི། འདིར་བརྗོད་པ་ནི་མདོ་ཙམ་མོ། །དེ་ལྟར་གཏེར་ཆེན་བླ་མ་ཆོས་ཀྱི་རྗེའི། །ཞབས་རྡུལ་སྤྱི་བོའི་པདྨོར་རྟག་བཞུགས་ཤིང་། །སྙིང་དབུས་དོ་རར་མཚན་དཔེའི་གར་རྩེན་པའི། །སྐལ་བཟང་སྔགས་བཙུན་དྷརྨཱ་ཤྲཱིས་སྦྱར། །འདིས་ཀྱང་ཚེ་འདི་ཉིད་ལ་རྡོ་རྗེ་འཆང་གི་གོ་འཕང་མཐོན་པོར་ཕྱིན་པའི་རྒྱུར་གྱུར་ཅིག། །།

Footnotes

Other Information

Template:TranslatorInfoFooter

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).