Terdzo-AA-077

Download PDF

དམ་ཆོས་རྫོགས་པ་ཆེན་པོ་སྡེ་གསུམ་ལས༔ གསང་སྐོར་ཁྲིད་ཀྱི་རིམ་པ་

dam chos rdzogs pa chen po sde gsum las:_gsang skor khrid kyi rim pa

by   ([['jam dbyangs mkhyen brtse'i dbang po|]])
revealed by  མཆོག་གྱུར་གླིང་པ་ (Chogyur Lingpa)
in cycle  དམ་ཆོས་རྫོགས་པ་ཆེན་པོ་སྡེ་གསུམ་ (Dam chos rdzogs pa chen po sde gsum)
Volume 62 (ཨཱཿ) / Pages 435-440 / Folios 1a1 to 3b1

Rinchen Terdzö Volumes List > Volume 62 > Text #77 (Scroll to Bottom)

Citation	'jam dbyangs mkhyen brtse'i dbang po. dam chos rdzogs pa chen po sde gsum las gsang skor khrid kyi rim pa. In Rin chen gter mdzod chen mo pod drug bcu re gnyis pa (The Great Treasury of Rediscovered Teachings Volume 62) by 'jam mgon kong sprul, 435-440. New Delhi: Shechen Publications, 2007-2018.
Author	'jam dbyangs mkhyen brtse'i dbang po;
Source Revealer	Mchog gyur gling pa མཆོག་གྱུར་གླིང་པ་
Cycle	Dam chos rdzogs pa chen po sde gsum དམ་ཆོས་རྫོགས་པ་ཆེན་པོ་སྡེ་གསུམ་
Terdzö Category	Atiyoga
Tibetan Colophon(s)	སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་ཛམ་ནང་པདྨ་ཤེལ་ཕུག་ནས་སྤྱན་དྲངས་པའི་ཤོག་སེར་ལས་གཏན་ལ་ཕབ་རིམ་བཞིན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ །མངྒ་ལཾ།། །།
Wylie Colophon(s)	sprul pa'i gter chen mchog gyur bde chen gling pas dzam nang pad+ma shel phug nas spyan drangs pa'i shog ser las gtan la phab rim bzhin mtsho skyes bla ma dgyes pa'i 'bangs mkhyen brtse'i dbang pos bris pa dge_/mang+ga laM
Notes	Front left-side note: gsang skor zab khrid Back left-side note: gter mdzod rdzogs chen sde gsum mchog gling
Links	No TBRC link // No THL link

< Previous Text

Next Text >

Tibetan Text

༁ྃ༔ དམ་ཆོས་རྫོགས་པ་ཆེན་པོ་སྡེ་གསུམ་ལས༔ གསང་སྐོར་ཁྲིད་ཀྱི་རིམ་པ་བཞུགས་སོ༔ སྡེ་གསུམ་གསང་སྐོར་མན་ངག་སྡེ། ྈྈྈ ན་མོ་གུ་རུ༔ གསང་སྐོར་ཁྲིད་ཀྱི་རིམ་པ་ནི༔ གཞི་ལམ་འབྲས་བུ་བསྟན་པ་འོ༔ དང་པོ་ནམ་མཁའ་ལྟ་བུའི་སེམས༔ རིག་དང་མ་རིག་འཁོར་འདས་ཀྱི༔ ས་མཚམས་གྲིབ་སོ་ཙམ་ལས་མེད༔ རྒྱལ་བུ་དམངས་སུ་བབས་པ་ན༔ བློན་པོས་ངོ་ཤེས་དབང་བསྐུར་ཚེ༔ རྒྱལ་པོས་ཁམས་གསུམ་དབང་དུ་སྡུད༔ དེ་བཞིན་རང་རིག་བྱང་ཆུབ་སེམས༔ དེ་ཡི་མཚན་ཉིད་བསྟན་པར་བྱ༔ གསལ་ཞིང་རྙོགས་པ་མེད་པ་ལ༔ རིག་པ་རང་བྱུང་སྟོང་པའི་ངང༔ གསལ་སྟོང་དབྱེར་མེད་རྒྱུན་ཆད་བྲལ༔ འགྱུར་བ་མེད་ཅིང་ཀུན་ཏུ་རྟག༔ འདི་ཡིན་མེད་པའི་ངོས་གཟུང་བྲལ༔ འོན་ཀྱང་མྱོང་བ་ཅན་གྱི་གདངས༔ ངེས་པ་ཅན་དུ་གནས་པ་འོ༔ དེ་ཉིད་མཐོང་བར་བྱེད་པའི་ལམ༔ རྒྱུད་སྦྱང་ཚོགས་གསག་སྡོམ་པ་བླང༔ སྤྲོས་བཅས་སྤྲོས་མེད་ཤིན་ཏུ་དང༔ རབ་ཏུ་སྤྲོས་མེད་དབང་བཞི་ཞུ༔ སྤྲོས་བཅས་བསྐྱེད་རིམ་སྤྲོས་མེད་དུ༔ རྩ་རླུང་བསྒོམ་ཞིང་ལུས་གནད་བསྣུན༔ ཤིན་ཏུ་སྤྲོས་མེད་བདེ་བ་སྦྱང༔ རབ་ཏུ་སྤྲོས་མེད་དེ་ཉིད་བལྟ༔ བསྐྱེད་རིམ་རྒྱལ་བ་རིགས་ལྔ་འམ༔ ཡང་ན་ཞི་ཁྲོ་གསལ་རྫོགས་བསྒོམ༔ ཡུལ་སྣང་ལྷ་རུ་འགྱུར་བར་བསླབ༔ རྩ་རླུང་རང་ཉིད་ཀུན་བཟང་གི༔ སྐུ་ལ་རྩ་གསུམ་འཁོར་ལོ་དྲུག༔ ཐིག་ལེ་གཏུམ་མོ་འབར་འཛག་བསྒོམ༔ ལུས་གནད་བདུན་ལྡན་དྲུག་ཆིངས་དང༔ ཙོག་པུར་གནས་པ་རྣམ་གསུམ་གྱིས༔ བདེ་དྲོད་མི་རྟོག་གསུམ་ལྡན་གཅེས༔ བདེ་བ་མི་མོ་གཞོན་ནུ་མ༔ ཆོས་ཀྱིས་རབ་ཏུ་སྨིན་བྱས་ཏེ༔ ཡབ་ཡུམ་ཀུན་བཟང་ཀུན་བཟང་མོ༔ གནས་རྣམས་བྱིན་རླབས་མཉམ་པར་སྦྱར༔ དགའ་བ་དགའ་བ་ཆེན་པོ་དང༔ མཆོག་དགའ་དགའ་བྲལ་ལྷན་ཅིག་སྐྱེས༔ ཚོར་བ་བདེ་བའི་ངང་དུ་བསླབ༔ རྫོགས་པ་ཆེན་པོའི་དེ་ཉིད་ནི༔ ལུས་གནད་བདུན་ལྡན་ཞི་གནས་བསྒོམ༔ འཕྲུལ་འཁོར་སྣ་ཚོགས་ལྷག་མཐོང་བསྒོམ༔ ཞི་ལྷག་ཟུང་འཇུག་སྤྱོད་ལམ་ལ༔ དབྱེར་མེད་ཉིད་དུ་འདྲེས་པར་བྱ༔ ལུས་ངག་ཡིད་གསུམ་ལྷུག་པར་གནས༔ རང་བཞིན་བྱ་རྩོལ་བྲལ་བར་ལྟ༔ འབྱམས་ན་རིག་པ་ཧུར་ཕྱུང་ཞིང༔ རྩོལ་བ་དང་བཅས་མཉམ་པར་གཞག༔ བྱིངས་ན་རིག་པ་དྭངས་ལ་བསླབ༔ འགྱུ་བྱེད་རང་ངོ་ཤེས་པར་ལྟ༔ ཅི་ཡང་མ་ཡིན་ཅིར་ཡང་འཆར༔ འདི་ཞེས་བརྗོད་ཚིག་བྲལ་བ་ཡི༔ ཉམས་ལ་ངེས་པར་བསླབ་པར་བྱ༔ འབྲས་བུ་བླ་ན་མེད་པའི་ས༔ ཡང་དག་པར་ནི་ཐོབ་པར་འགྱུར༔ སྐུ་ལྔའི་འབྲས་བུ་ཚེ་འདིར་ཐོབ༔ འབྲས་བུ་གཞི་ལ་སྨིན་པར་ངེས༔ གདམས་པའི་མཐར་ཐུག་ཁོ་ན་འོ༔ གསང་སྐོར་ཁྲིད་ཀྱི་དངོས་གཞི་རྫོགས༔ ས་མ་ཡ་རྒྱ་རྒྱ༔ ༁ྃ༔ ན་མོ་གུ་རུ༔ གསང་སྐོར་ཁྲིད་ཀྱི་རྗེས་འབྲེལ་དུ༔ གནས་ཐབས་འབྲས་བུ་རྣམ་གསུམ་ནི༔ གནས་ནི་སྙིང་གའི་སྒྲོན་མ་རུ༔ ཀུན་གཞི་རང་རིག་ཡེ་ཤེས་ཏེ༔ སྐུ་དང་ཡེ་ཤེས་འོད་ལྔར་བཞུགས༔ དཀར་འཇམ་རྩ་ཡི་སྒྲོན་མ་ལས༔ དབང་པོར་གསལ་བའི་སྒྲོན་མེར་སྣང༔ སྟོང་པའི་དབྱིངས་ནི་རྣམ་པར་དག༔ རིག་པ་ཐིག་ལེ་ལུ་གུ་རྒྱུད༔ གནས་ནི་ལུས་ཀྱི་ནང་ན་གནས༔ ཤར་ནི་དབང་པོའི་ཕྱི་རུ་སྣང༔ དོན་དུ་ཕྱི་ནང་དབྱེར་མེད་ཤེས༔ ཐབས་ནི་སྐུ་གསུམ་བཞུགས་སྟངས་ཀྱིས༔ ྈྈ དབྱིངས་རིག་ཐིག་ལེའི་འོད་ལ་སྦྱང༔ ཆོས་སྐུའི་བཞུགས་སྟངས་སེང་གེ་ལྟར༔ ཉི་མ་འཆར་ཀར་དབྱིངས་ལ་བསླབ༔ ལོངས་སྐུའི་བཞུགས་སྟངས་གླང་ཆེན་གྱིས༔ ཤར་མ་ཁད་པར་རིམ་པར་བསླབ༔ སྤྲུལ་སྐུའི་བཞུགས་སྟངས་ཙོག་པུ་ཡིས༔ ཤར་བའི་དུས་ན་འོད་ལ་སྦྱང༔ ཤིན་ཏུ་གོམས་པར་གྱུར་པ་འམ༔ མ་འདྲེས་སོ་སོར་སྣང་བ་ན༔ ལུས་གནད་བདུན་ལྡན་ཅི་བདེ་བས༔ དབྱིངས་རིག་ཐིག་ལེ་ཉེ་རྫོགས་སུ༔ སྣང་བ་རིག་པ་དབྱེར་མེད་བསྒོམ༔ དེ་ལ་ལམ་རྟགས་འཆར་ཚུལ་རྣམས༔ ཆེས་ཆེར་རིམ་པས་འཕེལ་བ་སྟེ༔ ཡུལ་ཁམས་གང་བར་མངོན་སུམ་སྣང༔ ཕྱག་མཚན་ཡིག་འབྲུ་གོང་དུ་འཕེལ༔ སྐུ་ནི་ཡོངས་རྫོགས་ཚད་ལ་ཕེབས༔ རིག་པ་རང་སྣང་ཟད་སར་ཟིན༔ སྤྱི་བོའི་གཙུག་ཏུ་འོད་བདུན་ནི༔ ཐོ་བརྩེགས་ཚུལ་དུ་བྱུང་བ་ན༔ ཞག་བདུན་འོད་ལུས་འགྲུབ་པའི་རྟགས༔ འབྲས་བུ་ཚེ་གཅིག་ལུས་འདིས་ཐོབ༔ གང་དུ་གནས་ཀྱང་ཞིང་ཁམས་སུ༔ འགྱུར་ལས་གཞན་དུ་འཕོ་བ་མེད༔ དེ་ལྟ་བུ་ཡི་རྣལ་འབྱོར་ཅན༔ མན་ངག་ཀུན་གྱི་མཐར་ཐུག་གོ༔ གསང་སྐོར་ཁྲིད་ཀྱི་རྗེས་འབྲེལ་རྫོགས༔ ས་མ་ཡ་རྒྱ་རྒྱ༔ ྈྈ སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་ཛམ་ནང་པདྨ་ཤེལ་ཕུག་ནས་སྤྱན་དྲངས་པའི་ཤོག་སེར་ལས་གཏན་ལ་ཕབ་རིམ་བཞིན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དགེ །མངྒ་ལཾ།། །།

Tsagli (0)

Mandalas (0)

[edit]

[edit]

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).