Terdzo-DA-030

Download PDF

ཚིག་བདུན་སྒྲུབ་ཐབས་ཟབ་མོ་ལས༔ མཁའ་འགྲོ་འདུས་པའི་དབང་བསྐུར་

tshig bdun sgrub thabs zab mo las:_mkha' 'gro 'dus pa'i dbang bskur

by  འཇམ་མགོན་ཀོང་སྤྲུལ་ (Jamgön Kongtrul Lodrö Taye)
revealed by  འཇམ་མགོན་ཀོང་སྤྲུལ་ (Jamgön Kongtrul Lodrö Taye)
in cycle  བླ་སྒྲུབ་རྩ་བ་ཚིག་བདུན་པ (Bla sgrub rtsa ba tshig bdun pa)
Volume 11 (ད) / Pages 675-682 / Folios 1a1 to 4b4

Rinchen Terdzö Volumes List > Volume 11 > Text #30 (Scroll to Bottom)

Citation	'jam mgon kong sprul. tshig bdun sgrub thabs zab mo las mkha' 'gro 'dus pa'i dbang bskur. In Rin chen gter mdzod chen mo pod bcu gcig pa (The Great Treasury of Rediscovered Teachings Volume 11) by 'jam mgon kong sprul, 675-682. New Delhi: Shechen Publications, 2007-2018.
Author	'jam mgon kong sprul འཇམ་མགོན་ཀོང་སྤྲུལ་
Source Revealer	'jam mgon kong sprul འཇམ་མགོན་ཀོང་སྤྲུལ་
Cycle	Bla sgrub rtsa ba tshig bdun pa བླ་སྒྲུབ་རྩ་བ་ཚིག་བདུན་པ
Terdzö Category	Mahayoga
Tibetan Colophon(s)	Treasure colophon: རྗེས་སུ་དམ་ཚིག་ཁས་བླང་ཞིང༔ ཡོན་ཕུལ་ཚོགས་ཀྱི་དགའ་སྟོན་སྤྱད༔ ཤིས་པ་བརྗོད་ཅིང་གཏོར་བསྐྱང་སོགས༔ ལས་ཀྱི་རིམ་པ་མཐའ་རུ་དབྱུང༔ མཁའ་འགྲོ་འདུས་པའི་དཀྱིལ་འཁོར་དུ༔ སྨིན་བྱེད་གསང་ཆེན་གསང་བའི་བཅུད༔ འབྲེལ་ཚད་མཁའ་སྤྱོད་གནས་སུ་འདྲེན༔ ཉམས་བླངས་བདེ་ཆེན་ཡེ་ཤེས་འགྲུབ༔ ལམ་གྱི་བར་ཆད་ངེས་པར་སེལ༔ ཕྱིས་འབྱུང་སྐལ་ལྡན་གདུལ་བྱའི་དོན༔ ཐུགས་ཀྱི་ཐིགས་པ་བཅུད་དུ་འདྲིལ༔ དགོངས་ཀློང་སྨོན་ལམ་རྒྱ་ཡིས་བཏབ༔ དུས་བབས་ལོ་ཙཱ་ཆེན་པོ་ཡི༔ སྤྲུལ་པས་ཀློང་ལྔའི་རྒྱ་བཀྲོལ་ནས༔ སྣོད་ལྡན་མང་པོའི་དོན་བྱེད་ཤོག༔ ས་མ་ཡ༔ རྒྱ་རྒྱ་རྒྱ༔ Revealer colophon: འཆི་མེད་བསྟན་གཉིས་གཡུང་དྲུང་གླིང་པས་རྫོང་ཤོད་བདེ་གཤེགས་འདུས་པའི་གནས་ཀྱི་སྙིང་པོ་ཐུགས་མཆོག་རྡོ་རྗེའི་རྫོང་ཙིཏྟ་གསང་བའི་ཕུག་པར་གཏན་ལ་ཕབ་པའོ།།
Wylie Colophon(s)	Treasure colophon: rjes su dam tshig khas blang zhing:_yon phul tshogs kyi dga' ston spyad:_shis pa brjod cing gtor bskyang sogs:_las kyi rim pa mtha' ru dbyung:_mkha' 'gro 'dus pa'i dkyil 'khor du:_smin byed gsang chen gsang ba'i bcud:_'brel tshad mkha' spyod gnas su 'dren:_nyams blangs bde chen ye shes 'grub:_lam gyi bar chad nges par sel:_phyis 'byung skal ldan gdul bya'i don:_thugs kyi thigs pa bcud du 'dril:_dgongs klong smon lam rgya yis btab:_dus babs lo tsA chen po yi:_sprul pas klong lnga'i rgya bkrol nas:_snod ldan mang po'i don byed shog:_sa ma ya:_rgya rgya rgya:_ Revealer colophon: 'chi med bstan gnyis g.yung drung gling pas rdzong shod bde gshegs 'dus pa'i gnas kyi snying po thugs mchog rdo rje'i rdzong tsit+ta gsang ba'i phug par gtan la phab pa'o
Notes	Front left-side note: dbang chog Back left-side note: gter mdzod 'jam mgon tshig bdun yum bka'
Links	No TBRC link // No THL link

< Previous Text

Next Text >

Tibetan Text

Tsagli

Tsagli (15)

Mandalas (2)

[edit]

༁ྃ༔ ཚིག་བདུན་སྒྲུབ་ཐབས་ཟབ་མོ་ལས༔ མཁའ་འགྲོ་འདུས་པའི་དབང་བསྐུར་བཞུགས༔ ༔ བདེ་ཆེན་ལྷན་ཅིག་སྐྱེས་མར་འདུད༔ མཆོག་དང་ཐུན་མོང་དངོས་གྲུབ་གང༔ ལྷན་སྐྱེས་ཡེ་ཤེས་དྷཱ་ཀི་མའི༔ བྱིན་རླབས་ལམ་དུ་ཁྱེར་བ་ནི༔ བདེ་མྱུར་གསང་བའི་ལམ་མཆོག་སྟེ༔ དེ་ཕྱིར་དེ་དོན་གཉེར་བའི་བུ༔ མཁའ་འགྲོ་འདུས་པའི་དཀྱིལ་འཁོར་དུ༔ གཞུག་པར་འདོད་པའི་རྣལ་འབྱོར་པས༔ དབེན་པའི་གནས་སུ་དཀྱིལ་འཁོར་བཞེངས༔ དབུས་སུ་བུམ་པ་བཅུད་ལྡན་དང༔ མཚན་ལྡན་བྷཉྫར་ཨ་མྲྀ་ཏ༔ མངར་གསུམ་ཆང་དང་སྦྱར་བས་བཀང༔ མེ་ལོང་ལི་ཁྲི་བརྡལ་བ་ལ༔ ཆོས་འབྱུང་ས་བོན་སྔགས་ཀྱིས་བརྒྱན༔ སུམ་བརྩེགས་དར་དམར་ལྡིང་གུར་དབུབ༔ སྐུ་རྟེན་སྔགས་བྱང་མར་མེ་ཤེལ༔ སྒྲུབ་གཏོར་ཟླ་གམ་རྒྱན་གྱིས་སྤྲས༔ གྲི་ཐོད་ཁ་ཊྭཱཾ་ཌཱ་མ་རུ༔ རུས་རྒྱན་བརྟུལ་ཞུགས་ཆས་རྣམས་བཀོད༔ མཆོད་གཏོར་ཚོགས་ཀྱི་ཡོ་བྱད་གསག༔ སྦྱོར་བ་སྔོན་འགྲོའི་རིམ་པ་འོ༔ ས་མ་ཡ༔ དངོས་གཞི་ཕྲིན་ལས་གཞུང་བསྲངས་ལ༔ བསྐྱེད་དང་བཟླས་པའི་རྣལ་འབྱོར་གྱིས༔ ནུས་དང་ལྡན་པའི་གདིང་རྙེད་ནས༔ དམ་སྲུང་ངེས་པའི་སློབ་མ་བོས༔ དག་པ་ཁྲུས་ནས་བཏོན་བྱས་ལ༔ བགེགས་བསྐྲད་སྲུང་བའི་འཁོར་ལོ་བསྒོམ༔ མཎྜལ་ཡོན་འབུལ་གསོལ་བ་གདབ༔ མཁའ་འགྲོའི་དབང་ཕྱུག་དཀྱིལ་འཁོར་གཙོ༔ རྡོ་རྗེ་སློབ་དཔོན་བདག་ལ་དགོངས༔ ཡེ་ཤེས་མཁའ་འགྲོའི་དཀྱིལ་འཁོར་དུ༔ བདག་རྒྱུད་སྨིན་གྲོལ་མཛད་དུ་གསོལ༔ ལན་གསུམ་ཞུས་ལ་སྤྲོ་བ་དྲི༔ མཁའ་འགྲོ་འདུས་པའི་དཀྱིལ་འཁོར་འདི༔ ཟབ་ཅིང་གཉན་ལ་ཁེ་ཉེན་ཆེ༔ མི་ལྡོག་དམ་ཚིག་སྲུང་ནུས་ན༔ རྗེས་སུ་བཟུང་བྱ་གཞན་དུ་མིན༔ ཞེས་དྲིས་ལན་དུ་འདི་སྐད་གསོལ༔ བླ་མའི་གསུང་ནི་རྡོ་རྗེའི་ཚིག༔ ནམ་ཡང་འདའ་བར་མི་བཟོད་པས༔ དམ་ཚིག་ཚུལ་བཞིན་བསྲུང་ལགས་ན༔ དཀྱིལ་འཁོར་གཉན་པོར་གཞུག་ཏུ་གསོལ༔ ཞེས་ཞུས་སྣོད་དུ་གྱུར་པ་ལ༔ སྐྱབས་སེམས་ཡན་ལག་བདུན་པ་ཡིས༔ རྒྱུད་སྦྱང་དམ་ཚིག་ལེགས་པར་འབོགས༔ ཧོ༔ སྤྱི་དང་ཁྱད་པར་དམ་ཚིག་ལས༔ ནམ་ཡང་འདའ་བར་མ་བྱེད་ཅིག༔ རྡོ་རྗེ་བདུད་རྩི་སྲོག་གི་ཆུ༔ རྟག་ཏུ་དཔང་པོར་དྲན་པར་གྱིས༔ བཛྲ་ས་མ་ཡ་ཨ་མྲིཏ་ཧཱུྃ༔ རྡོ་རྗེ་མགོར་བཞག་དམ་ཆུ་སྦྱིན༔ ཡེ་ཤེས་བྱིན་རླབས་དབབ་པའི་ཕྱིར༔ སློབ་མས་སྒོ་གསུམ་གནད་བཅིངས་ལ༔ ལྷན་ཅིག་སྐྱེས་མའི་སྐུ་རུ་གསལ༔ སློབ་དཔོན་དགོངས་པའི་རྩལ་བསྐྱེད་དེ༔ ཐུགས་སྲོག་འོད་ཀྱི་ལྕགས་ཀྱུ་ཡིས༔ མཁའ་སྤྱོད་གནས་ནས་སྤྱན་དྲངས་བསྟིམ༔ སྔགས་ཚིག་རོལ་མོ་རྫས་ཀྱིས་བསྐུལ༔ ཕེབ་པའི་རྟགས་བྱུང་བརྟན་པར་བྱ༔ དེ་དག་འཇུག་པའི་རིམ་པ་འོ༔ ས་མ་ཡ༔ སློབ་དཔོན་ཐུགས་ཀའི་འོད་ཟེར་གྱིས༔ དབང་ལྷ་ནམ་མཁར་སྤྱན་དྲངས་ཏེ༔ བུམ་པའི་བདུད་རྩིས་དབང་བསྐུར་བསམ༔ ཐོག་མར་བུམ་པ་སྤྱི་བོར་བཞག༔ ཨོཾ༔ སྣང་སྟོང་ཡུམ་གྱི་བུམ་པ་རུ༔ ཐབས་མཆོག་བདེ་ཆེན་བཅུད་དུ་འཁྱིལ༔ ཟུང་འཇུག་ཡེ་ཤེས་ཆུ་རྒྱུན་གྱིས༔ སྒྲིབ་དག་དབང་བཞི་ཡོངས་རྫོགས་ཤོག༔ ཨོཾ་ཛྙཱ་ན་སརྦ་དྷཱ་ཀི་ནཱི་ཀ་ལ་ཤ་ཨ་བྷི་ཥིཉྩ་མི༔ རྒྱུད་དག་སྣང་སྟོང་ལྷ་སྐུར་སྨིན༔ དབང་ལྷ་སློབ་མ་ལ་ཐིམ་བསམ༔ རྗེས་འབྲེལ་སྐུ་གཟུགས་སྤྱི་བོར་བཞག༔ ཡེ་ཤེས་སྐུ་ལས་གཉིས་པ་འཕྲོས༔ ལུས་ཐིམ་ལྷ་དང་དབྱེར་མེད་བསམ༔ ཨོཾ༔ གསལ་སྟོང་སྐུ་ཡི་དཀྱིལ་འཁོར་ནས༔ གཟི་བརྗིད་ཆེན་པོའི་བྱིན་དབབ་པས༔ ཁྱོད་ལུས་ཡེ་ཤེས་ཕྱག་རྒྱར་གྱུར༔ སྐུ་ཡི་དབྱིག་ཏུ་སྨིན་པར་ཤོག༔ ཀཱ་ཡ་བཛྲ་ཨོཾ༔ སློབ་དཔོན་དཀྱིལ་འཁོར་དབང་ཕྱུག་མ༔ རང་འོད་དཔའ་བོར་མཉམ་སྦྱོར་བའི༔ བྱང་སེམས་བདུད་རྩི་སྤྲོས་པར་བསམ༔ ཐོད་པའི་བདུད་རྩི་ལྕེ་ལ་བཞག༔ ཨཱ༔ ཐབས་ཀྱི་བྱང་སེམས་བདེ་བ་རྒྱས༔ ཤེས་རབ་རཀྟ་ཆགས་པ་ཆེ༔ ཟུང་འཇུག་ལྷན་སྐྱེས་བདུད་རྩིའི་བཅུད༔ དམ་ཚིག་ཆེན་པོ་དང་དུ་ལོངས༔ ཨོཾ་བོ་དྷི་ཙིཏྟ་ཨ་ཧོཿམ་ཧཱ་སུ་ཁ་ཨ་བྷི་ཥིཉྩ་མི༔ རྗེས་འབྲེལ་བཟླས་པའི་ལུང་ཡང་སྦྱིན༔ སྔགས་ཀྱི་ཕྲེང་བ་མགྲིན་པར་བཞག༔ ཨཱ༔ གྲགས་སྟོང་གསུང་གི་དཀྱིལ་འཁོར་ནས༔ ནུས་པ་སྔགས་ཀྱི་བཅུད་དབབ་པས༔ ཁྱོད་ངག་གཞོམ་མེད་དབྱངས་སུ་གྱུར༔ གསུང་གི་དབྱིག་ཏུ་སྨིན་པར་ཤོག༔ ཝཱ་ཀ་བཛྲ་ཨཱཿ ངག་རླུང་སྔགས་སུ་སྨིན་པར་བསམ༔ སློབ་མ་པདྨ་དཔའ་བོར་གྱུར༔ སིནྡྷུའི་དལ་ལས་ཕྱག་རྒྱ་མོ༔ ལྷན་སྐྱེས་དྷཱ་ཀིའི་ངོ་བོ་སྤྲོས༔ སྙོམས་ཞུགས་དགའ་བཞི་སྐྱེས་པར་བསམ༔ མེ་ལོང་དཀྱིལ་འཁོར་ལག་ཏུ་གཏད༔ སྨིན་མཚམས་སྙིང་གར་ཐིག་ལེ་བཀོད༔ ཧཱུྃ༔ ཆོས་འབྱུང་ལས་རྒྱའི་ཆུ་སྐྱེས་དབུས༔ ཡིག་འབྲུ་ཆོས་དང་སྙོམས་འཇུག་གི༔ དམར་འོད་དམ་ཚིག་གཏུམ་མོ་འབར༔ གསལ་སྟོང་ཕྱག་ཆེན་མཚོན་པར་བྱོས༔ ཨོཾ་ཀརྨ་མུ་དྲ་སརྦ་ཛྙཱ་ན་མ་ཧཱ་སུ་ཁ་ཨ་བྷི་ཥིཉྩ་མི༔ རྗེས་འབྲེལ་རྡོ་རྗེ་སྙིང་གར་བཞག༔ ཡེ་ཤེས་ཕྱག་མཚན་སྤྲོས་ནས་བསྟིམ༔ ཧཱུྃ༔ རིག་སྟོང་ཐུགས་ཀྱི་དཀྱིལ་འཁོར་ནས༔ ཡེ་ཤེས་དགོངས་པའི་རྩལ་འཕོས་པས༔ ཁྱོད་ཡིད་འོད་གསལ་ཆོས་སྐུར་གྱུར༔ ཐུགས་ཀྱི་དབྱིག་ཏུ་སྨིན་པར་ཤོག༔ ཙིཏྟ་བཛྲ་ཧཱུྃ༔ རྟོག་ཚོགས་དབྱིངས་སུ་གྲོལ་བར་བསམ༔ རྡོ་རྗེ་སེམས་དཔའི་མེ་ལོང་བསྟན༔ དཔེ་ཉིད་ཚིག་གིས་མཚོན་བྱ་སྟེ༔ ཧྲཱི༔ ངོ་བོ་སྟོང་པ་ལྷན་སྐྱེས་ཡུམ༔ རང་བཞིན་གསལ་བ་ཐབས་མཆོག་ཡབ༔ ཟུང་འཇུག་མདངས་རྩལ་འཁོར་འདས་སུ༔ སྣང་ཡང་རང་བཞིན་མེད་པར་ལྟོས༔ ཨོཾ་དྷརྨ་དྷཱ་ཏུ་ཛྙཱ་ན་བཛྲ་ཨ་ཨ་ཨ༔ རྗེས་འབྲེལ་མར་མེ་ལྟེ་བར་བཞག༔ གཙོ་མོའི་ལྟེ་བའི་རཾ་དམར་ལས༔ ཡེ་ཤེས་མེ་ལྕེ་ཚོན་གང་སྤྲོས༔ ལྟེ་བར་ཐིམ་པས་བྱིན་བརླབས་བསམ༔ ཧྲཱི༔ བདེ་སྟོང་ཡེ་ཤེས་དཀྱིལ་འཁོར་ནས༔ ལྷན་སྐྱེས་དགའ་བའི་རླབས་གཡོས་པས༔ སྒོ་གསུམ་མི་འགྱུར་བདེ་བ་ཆེ༔ རྡོ་རྗེའི་དབྱིག་ཏུ་སྨིན་པར་ཤོག༔ ཛྙཱ་ན་བཛྲ་ཧྲཱི༔ ལྷན་སྐྱེས་བདེ་སྟོང་མངོན་གྱུར་བསམ༔ བརྟུལ་ཞུགས་སྤྱོད་པའི་ཆས་རྣམས་གཏད༔ ཧོ༔ གཟུང་འཛིན་རྩད་གཅོད་གྲི་གུག་འབར༔ བདེ་སྐྱོང་བྷནྡྷ་དམ་ཚིག་སྣོད༔ ཐབས་ཤེས་ཅང་ཏེའུ་དྲིལ་བུ་དང༔ ཟུངས་འཇུག་རྡོ་རྗེའི་ཁ་ཊྭཱཾ་ག༔ ཕར་ཕྱིན་རུས་པའི་ཕྱག་རྒྱ་བཅས༔ ཟུང་ལ་བརྟུལ་ཞུགས་ཅི་བདེར་སྤྱོད༔ ས་མ་ཡ་ཙརྻ་ཨ་བྷི་ཥིཉྩ་མི༔ མཐའ་རྟེན་ཡོངས་རྫོགས་བྱིན་རླབས་ནི༔ གཏོར་མ་མཁའ་འགྲོའི་དཀྱིལ་འཁོར་གསལ༔ རྡོ་རྗེ་བཞི་ཡི་ཡེ་ཤེས་ཀྱིས༔ སྨིན་ཅིང་གྲོལ་བར་བྱིན་བརླབས་བསམ༔ ཧྲཱི༔ གཏོར་སྣོད་བདེ་ཆེན་འཁྱིལ་པའི་གཞལ་མེད་ཁང༔ གཏོར་མ་སྐུ་གསུམ་ཡུམ་མཆོག་གཙོ་དང་འཁོར༔ ཡེ་ཤེས་གཟི་བྱིན་འོད་ཟེར་ལམས་སེ་ལམ༔ བདེ་སྟོང་རོལ་པའི་བྱིན་རླབས་ཐིབས་སེ་ཐིབ༔ དངོས་གྲུབ་བདུད་རྩིའི་ཆར་རྒྱུན་ཤ་ར་ར༔ མ་གཡེལ་ཐུགས་རྗེ་ཆེན་པོའི་རྩལ་སྐྱེད་ལ༔ སྐལ་ལྡན་ལུས་ངག་ཡིད་གསུམ་སྨིན་པར་མཛོད༔ སྒོ་གསུམ་སྒྲིབ་པའི་རྩ་བ་དྲུངས་ནས་ཕྱུངས༔ མི་ཕྱེད་རྡོ་རྗེ་བཞི་ཡི་དབང་མཆོག་སྐུར༔ ཚེ་དང་ཡེ་ཤེས་མཆོག་གི་དངོས་གྲུབ་སྩོལ༔ ཐབས་ཤེས་དགའ་བ་བཅུ་དྲུག་གསང་ལམ་བགྲོད༔ འགྱུར་མེད་ལྷན་སྐྱེས་ཡེ་ཤེས་མངོན་གྱུར་མཛོད༔ སྙིང་པོའི་སྔགས་ཀྱི་ཤམ་བུ་རུ༔ བ་ལིཾ་ཏ་ཨེ་ཝཾ་མུ་དྲ་ཀཱ་ཡ་ཝཱ་ཀ་ཙིཏྟ་ཛྙཱ་ན་བཛྲ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱི༔ གནས་བཞིར་བཞག་ལ་ལྷ་ཡང་བསྟིམ༔ གཏོར་ཟན་དངོས་གྲུབ་ཞལ་བསྲོར་སྦྱིན༔ གལ་ཏེ་བརྒྱུད་འཛིན་དམ་ལྡན་ལ༔ གསང་བའི་སྲུང་མ་མཆེད་གསུམ་གྱི༔ བཀའ་གཏད་བྱེད་ན་གཏོར་མ་གསུམ༔ ལྷར་གསལ་སློབ་མའི་ལག་ཏུ་གཏད༔ ཧྲཱི༔ ལྷན་སྐྱེས་ཡེ་ཤེས་མཁའ་འགྲོ་མ༔ སོགས་ནས། བཅས་པ་རྣམས༔ སྐུ་གསུམ་བླ་མའི་སྤྱན་སྔ་རུ༔ ཞལ་བཞེས་གཡར་དམ་མ་བསྙེལ་བར༔ དམ་ཚིག་ལྡན་པའི་བུ་འདི་ལ༔ མི་འབྲལ་མ་བུ་ལྟ་བུར་འགྲོགས༔ ཕྲིན་ལས་རྣམ་བཞི་ཐོགས་མེད་སྒྲུབས༔ བདེ་ཆེན་མཆོག་གི་ཡེ་ཤེས་སྤེལ༔ དངོས་གྲུབ་འགྲུབ་པའི་སྡོང་གྲོགས་མཛོད༔ སོ་སོའི་སྔགས་ཀྱི་ཤམ་བུ་རུ༔ ལས་སྔགས་སྦྲེལ་ཏེ་བཀའ་བསྒོས་པས༔ དགྱེས་བཞིན་ཞལ་གྱིས་བཞེས་པར་བསམ༔ དེ་རྣམས་དབང་གི་དངོས་གཞི་འོ༔ ས་མ་ཡ༔ རྗེས་སུ་དམ་ཚིག་ཁས་བླང་ཞིང༔ ཡོན་ཕུལ་ཚོགས་ཀྱི་དགའ་སྟོན་སྤྱད༔ ཤིས་པ་བརྗོད་ཅིང་གཏོར་བསྐྱང་སོགས༔ ལས་ཀྱི་རིམ་པ་མཐའ་རུ་དབྱུང༔ མཁའ་འགྲོ་འདུས་པའི་དཀྱིལ་འཁོར་དུ༔ སྨིན་བྱེད་གསང་ཆེན་གསང་བའི་བཅུད༔ འབྲེལ་ཚད་མཁའ་སྤྱོད་གནས་སུ་འདྲེན༔ ཉམས་བླངས་བདེ་ཆེན་ཡེ་ཤེས་འགྲུབ༔ ལམ་གྱི་བར་ཆད་ངེས་པར་སེལ༔ ཕྱིས་འབྱུང་སྐལ་ལྡན་གདུལ་བྱའི་དོན༔ ཐུགས་ཀྱི་ཐིགས་པ་བཅུད་དུ་འདྲིལ༔ དགོངས་ཀློང་སྨོན་ལམ་རྒྱ་ཡིས་བཏབ༔ དུས་བབས་ལོ་ཙཱ་ཆེན་པོ་ཡི༔ སྤྲུལ་པས་ཀློང་ལྔའི་རྒྱ་བཀྲོལ་ནས༔ སྣོད་ལྡན་མང་པོའི་དོན་བྱེད་ཤོག༔ ས་མ་ཡ༔ རྒྱ་རྒྱ་རྒྱ༔ འཆི་མེད་བསྟན་གཉིས་གཡུང་དྲུང་གླིང་པས་རྫོང་ཤོད་བདེ་གཤེགས་འདུས་པའི་གནས་ཀྱི་སྙིང་པོ་ཐུགས་མཆོག་རྡོ་རྗེའི་རྫོང་ཙིཏྟ་གསང་བའི་ཕུག་པར་གཏན་ལ་ཕབ་པའོ།། །།

[edit]

[edit]

[edit]

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).