Terdzo-NGA-012

This page is under construction. Check back later for updated content.

ཟབ་བདུན་རྒྱུད་ཟབ་སྒྱུ་འཕྲུལ་ལས༔ ཚེ་སྐོར་ཕྲིན་ལས་རྒྱས་པ་

zab bdun rgyud zab sgyu 'phrul las: tshe skor phrin las rgyas pa

by མཆོག་གྱུར་གླིང་པ་ (Chogyur Lingpa)
revealed by མཆོག་གྱུར་གླིང་པ་ (Chogyur Lingpa)
in cycle ཚེ་སྐོར་ཕྲིན་ལས་རྒྱས་པ་ (Tshe skor phrin las rgyas pa)
parent cycle ཟབ་བདུན་རྒྱུད་ཟབ་སྒྱུ་འཕྲུལ་ (Zab bdun rgyud zab sgyu 'phrul)
Volume 4 (ང) / Pages 199-246 / Folios 1a1 to 24b5

Citation	mchog gyur gling pa. zab bdun rgyud zab sgyu 'phrul las tshe skor phrin las rgyas pa. In Rin chen gter mdzod chen mo pod bzhi pa (The Great Treasury of Rediscovered Teachings Volume 4) by 'jam mgon kong sprul, 199-246. New Delhi: Shechen Publications, 2007-2016.
Author	Mchog gyur gling pa མཆོག་གྱུར་གླིང་པ་
Source Revealer	Mchog gyur gling pa མཆོག་གྱུར་གླིང་པ་
Cycle	Tshe skor phrin las rgyas pa ཚེ་སྐོར་ཕྲིན་ལས་རྒྱས་པ་
Parent Cycle	Zab bdun rgyud zab sgyu 'phrul ཟབ་བདུན་རྒྱུད་ཟབ་སྒྱུ་འཕྲུལ་
Terdzö Category	Mahayoga
Tibetan Colophon(s)	ཁོ་བོ་ཨོ་རྒྱན་མཆོག་གྱུར་བདེ་ཆེན་གླིང་པས་ནམ་མཁའ་མཛོད་ནས་སྤྱན་དྲངས། ཕྱིས་སུ་གནས་མཆོག་ཙ་འདྲ་རིན་ཆེན་དཔལ་ཀུན་སྤུངས་པ་པདྨའི་ལྗགས་ལྡན་གྱི་གདན་ས་ཆེན་པོར་གཏན་ལ་ཕབ་རིམ་བཞིན་དུ་ཡི་གེའི་རིས་བྱེད་ཀརྨ་ཚེ་དཔལ་ལོ། །སརྦ་མངྒ་ལཾ།། །།
Wylie Colophon(s)	kho bo o rgyan mchog gyur bde chen gling pas nam mkha' mdzod nas spyan drangs/_phyis su gnas mchog tsa 'dra rin chen dpal kun spungs pa pad+ma'i ljags ldan gyi gdan sa chen por gtan la phab rim bzhin du yi ge'i ris byed karma tshe dpal lo/_/sarba mang+ga laM//
Notes	Front left-side note: gter gzhung Back left-side note: gter mdzod sgyu 'phrul tshe skor
Links	No TBRC link // No THL link

< Previous Text

Next Text >

[edit]

༁ྃ༔ ཟབ་བདུན་རྒྱུད་ཟབ་སྒྱུ་འཕྲུལ་ལས༔ ཚེ་སྐོར་ཕྲིན་ལས་རྒྱས་པ་བཞུགས༔ ཚེ་བདག་རྒྱལ་བ་རིགས་ལྔར་འདུད༔ ཚེ་ཡི་ཕྲིན་ལས་རྒྱས་པ་ནི༔ སྔོན་འགྲོ་རྗེས་ཀྱི་བྱ་བ་རྣམས༔ སྤྱི་ཆིང་ངམ་ནི་ཚེ་ཕྲིན་བཞིན༔ དངོས་གཞི་བསྐྱེད་རིམ་བསྒོམ་པ་ནི༔ ཧཱུྃ༔ ཆོས་རྣམས་དམིགས་མེད་མཁར་ལྟར་དག༔ རང་བཞིན་མ་བཅོས་ཆོས་ཀྱི་དབྱིངས༔ འགག་མེད་ལྷུན་གྲུབ་འོད་གསལ་བ༔ ཐུགས་རྗེ་ཕྱོགས་ལྷུང་མེད་པར་ཁྱབ༔ ཟུང་འཇུག་རྒྱུ་ཡི་ཧཱུྃ་ཡིག་ལས༔ རཾ་ཡཾ་ཁཾ་འཕྲོས་སྣོད་བཅུད་སྦྱངས༔ ཚུར་འདུས་ཨེ་ཡཾ་ར་སུཾ་ཀེཾ༔ ཨེ་ལས་ནམ་མཁའ་གྲུ་གསུམ་པ༔ ཡཾ་ལས་སྟོབས་ཆེན་རྒྱ་གྲམ་རླུང༔ ར་ལས་ཁྲག་ཆེན་ཟླུམ་པོར་འཁྱིལ༔ སུཾ་ལས་ཞིང་ཆེན་ས་གྲུ་བཞི༔ ཀེཾ་ལས་རུས་པའི་རི་རབ་བརྩེགས༔ རཾ་ལས་བསྐལ་པའི་མེ་ཆེན་འབར༔ དུར་ཁྲོད་མཆོག་གི་ས་གཞི་རུ༔ པཾ་ལས་པདྨ་འདབ་སྟོང་ལ༔ ཞིང་ཁམས་བཀོད་པ་ཕུན་སུམ་ཚོགས༔ ཧཱུྃ་ལས་རྡོ་རྗེའི་ས་གཞི་དང༔ ཕྱག་མཚན་ལྔ་ཡི་སྲུང་བའི་གུར༔ བྷྲཱུྃ་ལས་རིན་ཆེན་གཞལ་ཡས་ཁང༔ གྲུ་བཞི་སྒོ་བཞི་འདོད་སྣམ་ལ༔ མཆོད་པའི་ལྷ་མོ་བསམ་ཡས་གནས༔ ཤེལ་གསེར་རཱ་ག་མར་གད་དང༔ ཨིནྡྲ་ནཱི་ལའི་རྩིག་པ་ལྔ༔ འཛམ་བུ་ཆུ་གསེར་ཕ་གུ་ལ༔ རིན་ཆེན་ནོར་བུའི་ཕྲ་ཚོམ་བཏབ༔ ཕྱག་མཚན་ལྔ་ཡི་དྲྭ་ཕྱེད་ལ༔ དྲིལ་བུ་གཡེར་ཁ་སིལ་སིལ་སྒྲོག༔ བཻཌཱུརྻ་ཡི་ཤར་བུ་ལ༔ དུང་གི་མཆོད་རྟེན་མདའ་ཡབ་མཛེས༔ སྒོ་བཞི་ཀ་བ་བུམ་པས་མཚན༔ སྣ་ཚོགས་དར་གྱི་ཅོད་པན་འཕྱང༔ རྟ་བབ་བང་རིམ་བརྒྱད་ཀྱི་སྟེང༔ ཆོས་འཁོར་གདུགས་ཏོག་རི་དྭགས་མཛེས༔ ཐོག་ཕུབ་བུམ་པ་བྲེ་ཡི་དབྱིབས༔ ཆོས་ཀྱི་འཁོར་ལོ་བཅུ་གསུམ་འཁོར༔ རྡོ་རྗེ་ནོར་བུའི་ཏོག་མཆོག་འབར༔ གདུགས་དང་བ་དན་རྒྱལ་མཚན་དང༔ རྔ་ཡབ་དར་འཕྱང་ཀུན་ནས་འཕྱར༔ དཔག་བསམ་ཤིང་དང་བདུད་རྩིའི་མཚོ༔ བཀྲ་ཤིས་བྱ་ཚོགས་སྐད་སྙན་སྒྲོག༔ ནང་དུ་རྡོ་རྗེའི་གདུགས་འཁོར་ལོ༔ རིན་ཆེན་ཀ་བ་རྣམས་ཀྱིས་བཏེགས༔ ཉམས་དགའ་འོད་འབར་ཕོ་བྲང་ནང༔ ཁྱམས་དང་གྲུ་ཆད་རིན་པོ་ཆེ༔ ཤར་དཀར་ལྷོ་སེར་ནུབ་དམར་བ༔ བྱང་ལྗང་དབུས་མཐིང་འོད་ཟེར་འཕྲོ༔ དབུས་སུ་པདྨ་འདབ་བརྒྱད་དང༔ ཕྱོགས་བཞིར་པདྨ་འདབ་བཞི་རེ༔ ལྟེ་བ་རྣམས་སུ་དབུས་སེང་གེ༔ ཤར་དུ་གླང་ཆེན་ལྷོར་རྟ་མཆོག༔ ནུབ་ཏུ་རྨ་བྱ་བྱང་མཁའ་ལྡིང༔ བརྒྱད་རེས་བཏེགས་པའི་རིན་ཆེན་ཁྲི༔ པཉྩ་ལཱི་ཀས་ལེགས་པར་བཀབ༔ དབུས་ཀྱི་ཤར་ནུབ་རིན་ཆེན་ཁྲི༔ ཀུན་ལ་ཉི་ཟླ་པདྨ་གསལ༔ ལྷག་མ་པད་རྐྱང་རེ་རེའི་གདན༔ ཕྱོགས་བཞིའི་འདབ་མར་པདྨ་དང༔ ཉི་ཟླ་བརྩེགས་ཤིང་གྲུ་ཆད་དང༔ བར་ཁྱམས་རྣམས་སུ་པད་རྐྱང་རེ༔ སྒོ་བཞིར་ཉི་མའི་གདན་རེ་རེ༔ བདེ་གཤེགས་རྒྱལ་བའི་བཞུགས་གནས་གྱུར༔ བྷྲཱུྃ་བི་ཤྭ་བི་ཤུདྡྷེ་རཏྣ་བོ་དྷི་སཏྭ་པཉྩ་ལཱི་ཀ་པདྨ་སཱུརྻ་ཙནྡྲ་མཎྜ་ལ་བྷྲཱུྃ༔ ཧཱུྃ་ཡིག་ཡོངས་གྱུར་ཨོཾ་དཀར་པོ༔ དེ་ཉིད་འཁོར་ལོ་ཨོཾ་གྱིས་མཚན༔ ཨ་ཧ་ཉི་ཟླ་བྱང་ཆུབ་སེམས༔ གསུམ་ག་རྗེས་ཆགས་འོད་དུ་ཞུ༔ ས་བོན་ཕྱག་མཚན་འབར་བ་ལས༔ འོད་འཕྲོས་རྒྱལ་བ་ཐམས་ཅད་མཆོད༔ སྐུ་ཡི་རིགས་མཆོག་ཀུན་འདུས་ཐིམ༔ འགྲོ་བའི་གཏི་མུག་སྒྲིབ་པ་སྦྱངས༔ རྣམ་པར་སྣང་མཛད་ས་རུ་བཀོད༔ འོད་ཟེར་ཚུར་འདུས་ཡོངས་གྱུར་ལས༔ རྣམ་པར་སྣང་མཛད་ཚེ་དཔག་མེད༔ དཀར་གསལ་ཞལ་གཅིག་ཕྱག་གཉིས་པ༔ མཚན་བཟང་སུམ་ཅུ་རྩ་གཉིས་དང༔ དཔེ་བྱད་བརྒྱད་ཅུས་མཛེས་པར་སྤྲས༔ དབུ་སྐྲ་ཐོར་ཚུགས་རིན་ཆེན་བརྒྱན༔ དར་གྱི་ཅོད་པན་སྟོད་གཡོགས་གསོལ༔ ཟི་ལྡིར་སྨད་གཡོགས་དར་འཕྱང་དང༔ གར་གྱི་ཕུ་དུང་རྣམ་པར་མཛེས༔ དབུ་རྒྱན་སྙན་ཆ་མགུལ་རྒྱན་དང༔ སེ་མོ་དོ་ཤལ་གདུ་བུས་སྤྲས༔ སྐ་རགས་རིན་ཆེན་འོད་འབར་ཅན༔ རུས་པའི་རྒྱན་དྲུག་གཡེར་ཁ་འཁྲོལ༔ ཞབས་གཉིས་མཉམ་པའི་སྐྱིལ་ཀྲུང་བཞུགས༔ ཕྱག་གཉིས་མཉམ་གཞག་མཛད་པའི་སྟེང༔ ཚེ་ཡི་བུམ་པ་བདུད་རྩིས་བཀང༔ འཁོར་ལོ་འོད་ཟེར་འབར་བས་མཚན༔ དེ་ཡི་པང་དུ་དབྱིངས་ཕྱུག་དཀར༔ བཅུ་དྲུག་ལོན་པའི་ན་ཚོད་ལ༔ མཛེས་ཤིང་ནུ་འབུར་བྷ་ག་རྒྱས༔ དྲིལ་བུ་ཚེ་བུམ་འཛིན་པས་འཁྱུད༔ ཞབས་གཉིས་ཡབ་ཀྱི་སྐེད་ལ་འཁྲིལ༔ ཆ་ལུགས་ཐམས་ཅད་ཡབ་དང་མཚུངས༔ དབུ་ལ་རིགས་ལྔ་ཡབ་ཡུམ་བཞུགས༔ གནས་གསུམ་རིགས་གསུམ་ཡབ་དང་ཡུམ༔ ཡབ་ཀྱི་གསང་གནས་མི་དམིགས་པར༔ ཧཱུྃ་ལས་རྡོ་རྗེའི་ལྟེ་བ་ལ༔ ཟླ་བ་ལ་ནི་ཨོཾ་གྱིས་མཚན༔ ཡུམ་གྱི་མཁའ་གསང་པཾ་པདྨ༔ ཉི་མ་ལ་ནི་མཱུཾ་གྱིས་མཚན༔ ཡབ་ཡུམ་དགྱེས་པ་ཆེན་པོས་བསྐུལ༔ ས་མ་ཡ་ཧཱུྃ༔ ས་མ་ཡ་སཏྭཾ༔ ར་ཧོ་ཧཾ༔ རཱ་ག་ཡ་མི༔ ཨ་ལ་ལ་ཧོ༔ ཛཿཧཱུྃ་བཾ་ཧོ༔ བོ་དྷི་ཙིཏྟ་སྥ་ར་ཎ་ཕཊ༔ ཨོཾ་ཨཱཿཧཱུྃ༔ ཡབ་ཡུམ་མཉམ་སྦྱོར་བྱང་ཆུབ་སེམས༔ རིགས་ལྔ་ཡབ་ཡུམ་རྣམ་པར་འཕྲོས༔ ནམ་མཁའི་མཐའ་ལ་ཁྱབ་པ་ལས༔ རྒྱལ་བ་ཐམས་ཅད་དགྱེས་པར་བྱས༔ ཐམས་ཅད་རིགས་ལྔའི་རྣམ་པར་བྱོན༔ འགྲོ་བ་རྣམས་ཀྱི་དུག་ལྔ་སྦྱངས༔ རིགས་ལྔ་ཡབ་ཡུམ་ས་རུ་བཀོད༔ ཐམས་ཅད་མ་ལུས་ཀུན་འདུས་ནས༔ སྐུ་ཡི་རིགས་མཆོག་བདག་ལ་ཐིམ༔ རིགས་བཞི་ཡུམ་གྱི་མཁའ་རུ་ཞུ༔ བྱང་ཆུབ་སེམས་ནི་ཕྱིར་སྤྲོས་པས༔ ས་བོན་ཕྱག་མཚན་སོ་སོར་གྱུར༔ དབུས་ཀྱི་དཀྱིལ་འཁོར་ཆེན་པོའི་ཤར༔ ཀུན་ཏུ་བཟང་པོ་སྐུ་མདོག་མཐིང༔ མཉམ་གཞག་རྡོ་རྗེའི་སྐྱིལ་ཀྲུང་བཞུགས༔ ནུབ་ཏུ་ཀུན་ཏུ་བཟང་མོ་མཐིང༔ མཉམ་གཞག་པདྨའི་སྐྱིལ་ཀྲུང་བཞུགས༔ ཤར་ལྷོར་ལྷ་ཡི་ཐུབ་པ་དཀར༔ ཕྱག་གཉིས་ཆོས་འཆད་པི་ཝང་འཁྲོལ༔ ལྷོ་རུ་མི་ཡི་ཐུབ་པ་སེར༔ ཕྱག་གཉིས་གསེག་ཤང་པར་བུ་བསྣམས༔ ལྷོ་ནུབ་ཡི་དྭགས་ཐུབ་པ་དམར༔ ཕྱག་གཉིས་ཟས་ཀྱི་སྒྲོམ་བུ་བསྣམས༔ ནུབ་བྱང་བྱོལ་སོང་ཐུབ་པ་སྔོ༔ ཕྱག་གཉིས་ཤེས་རབ་པོ་ཏི་འཛིན༔ བྱང་དུ་ལྷ་མིན་ཐུབ་པ་ལྗང༔ ཕྱག་གཉིས་རྡོ་རྗེའི་གོ་ཆ་བསྣམས༔ བྱང་ཤར་དམྱལ་བའི་ཐུབ་པ་ནག༔ ཕྱག་གཉིས་ཡེ་ཤེས་མེ་ཆུ་འཛིན༔ ཐམས་ཅད་ཆགས་བྲལ་སྤྲུལ་སྐུའི་ཚུལ༔ ཆོས་གོས་གསུམ་གསོལ་ཞབས་གཉིས་བཞེངས༔ ཤར་གྱི་དཀྱིལ་འཁོར་ཆེན་པོའི་དབུས༔ མི་བསྐྱོད་རྡོ་རྗེ་ཚེ་དཔག་མེད༔ མཐིང་གསལ་ཞལ་གཅིག་ཕྱག་གཉིས་པ༔ མཛེས་པའི་ཚུལ་འཆང་རིན་ཆེན་བརྒྱན༔ དར་གྱི་ན་བཟའ་སྣ་ཚོགས་གསོལ༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཕྱག་གཉིས་མཉམ་གཞག་ཕྱག་རྒྱའི་སྟེང༔ ཚེ་ཡི་བུམ་པ་བཅུད་ལྡན་གྱི༔ ཁ་རྒྱན་རྡོ་རྗེ་འོད་ཟེར་འབར༔ དེ་ཡི་པང་དུ་མཱ་མ་ཀི༔ མཐིང་གསལ་བཅུ་དྲུག་ལོན་པའི་ཚུལ༔ དྲིལ་བུ་ཚེ་བུམ་འཛིན་པས་འཁྱུད༔ དེའི་ཕྱིར་པདྨ་འདབ་བཞི་ལ༔ ས་སྙིང་དཀར་པོ་མྱུ་གུ་འཛིན༔ ལཱ་སྱེ་དཀར་མོ་མེ་ལོང་བསྣམས༔ བྱམས་པ་དཀར་པོ་ཀླུ་ཤིང་འཛིན༔ པུཥྤེ་དཀར་མོ་མེ་ཏོག་བསྣམས༔ གཡོན་པ་རྣམས་ཀྱིས་ཚེ་བུམ་འཛིན༔ རིན་ཆེན་དར་བརྒྱན་སེམས་སྐྱིལ་བཞུགས༔ ལྷོ་ཡི་དཀྱིལ་འཁོར་ཆེན་པོའི་དབུས༔ རིན་ཆེན་འབྱུང་ལྡན་ཚེ་དཔག་མེད༔ སེར་གསལ་ཞལ་གཅིག་ཕྱག་གཉིས་པ༔ མཛེས་པའི་ཚུལ་འཆང་རིན་ཆེན་བརྒྱན༔ དར་གྱི་ན་བཟའ་སྣ་ཚོགས་གསོལ༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཕྱག་གཉིས་མཉམ་གཞག་ཕྱག་རྒྱའི་སྟེང༔ ཚེ་ཡི་བུམ་པ་བཅུད་ལྡན་གྱི༔ ཁ་རྒྱན་རིན་ཆེན་འོད་ཟེར་འབར༔ དེ་ཡི་པང་དུ་སངས་རྒྱས་སྤྱན༔ སེར་གསལ་བཅུ་དྲུག་ལོན་པའི་ཚུལ༔ དྲིལ་བུ་ཚེ་བུམ་འཛིན་པས་འཁྱུད༔ དེའི་ཕྱིར་པདྨ་འདབ་བཞི་ལ༔ ནམ་སྙིང་སེར་པོ་པོ་ཏི་འཛིན༔ མཱ་ལེ་སེར་མོ་ཕྲེང་བ་བསྣམས༔ སྒྲིབ་སེལ་སེར་པོ་རལ་གྲི་འཛིན༔ དྷཱུ་པེ་སེར་མོ་སྤོས་ཁང་བསྣམས༔ གཡོན་པ་རྣམས་ཀྱིས་ཚེ་བུམ་འཛིན༔ རིན་ཆེན་རྒྱན་ལྡན་སེམས་སྐྱིལ་བཞུགས༔ ནུབ་ཀྱི་དཀྱིལ་འཁོར་ཆེན་པོའི་དབུས༔ སྣང་བ་མཐའ་ཡས་ཚེ་དཔག་མེད༔ དམར་གསལ་ཞལ་གཅིག་ཕྱག་གཉིས་པ༔ མཛེས་པའི་ཚུལ་འཆང་རིན་ཆེན་བརྒྱན༔ དར་གྱི་ན་བཟའ་སྣ་ཚོགས་གསོལ༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཕྱག་གཉིས་མཉམ་གཞག་ཕྱག་རྒྱའི་སྟེང༔ ཚེ་ཡི་བུམ་པ་བཅུད་ལྡན་གྱི༔ ཁ་རྒྱན་པདྨ་འོད་ཟེར་འབར༔ དེ་ཡི་པང་དུ་གོས་དཀར་མོ༔ དམར་གསལ་བཅུ་དྲུག་ལོན་པའི་ཚུལ༔ དྲིལ་བུ་ཚེ་བུམ་འཛིན་པས་འཁྱུད༔ དེའི་ཕྱིར་པདྨ་འདབ་བཞི་ལ༔ སྤྱན་རས་གཟིགས་དམར་པདྨ་འཛིན༔ གཱིརྟི་དམར་མོ་པི་ཝང་བསྣམས༔ ཀུན་བཟང་དམར་ལྗང་སྙེ་མ་འཛིན༔ ཨཱ་ལོ་དམར་མོ་མར་མེ་བསྣམས༔ གཡོན་པ་རྣམས་ཀྱིས་ཚེ་བུམ་འཛིན༔ རིན་ཆེན་རྒྱན་ལྡན་སེམས་སྐྱིལ་བཞུགས༔ བྱང་གི་དཀྱིལ་འཁོར་ཆེན་པོའི་དབུས༔ དོན་ཡོད་གྲུབ་པ་ཚེ་དཔག་མེད༔ ལྗང་གསལ་ཞལ་གཅིག་ཕྱག་གཉིས་པ༔ མཛེས་པའི་ཚུལ་འཆང་རིན་ཆེན་བརྒྱན༔ དར་གྱི་ན་བཟའ་སྣ་ཚོགས་གསོལ༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཕྱག་གཉིས་མཉམ་གཞག་ཕྱག་རྒྱའི་སྟེང༔ ཚེ་ཡི་བུམ་པ་བཅུད་ལྡན་གྱི༔ ཁ་རྒྱན་རྒྱ་གྲམ་འོད་ཟེར་འབར༔ དེ་ཡི་པང་དུ་སྒྲོལ་མ་ནི༔ ལྗང་གསལ་བཅུ་དྲུག་ལོན་པའི་ཚུལ༔ དྲིལ་བུ་ཚེ་བུམ་འཛིན་པས་འཁྱུད༔ དེའི་ཕྱིར་པདྨ་འདབ་བཞི་ལ༔ ཕྱག་རྡོར་ལྗང་གུ་རྡོ་རྗེ་འཛིན༔ གར་མ་ལྗང་གུ་རྔ་ཡབ་བསྣམས༔ འཇམ་དཔལ་ལྗང་སྐྱ་ཨུཏྤལ་འཛིན༔ དྲི་ཆབ་ལྗང་གུ་དུང་ཆོས་འཛིན༔ གཡོན་པ་རྣམས་ཀྱིས་ཚེ་བུམ་འཛིན༔ རིན་ཆེན་རྒྱན་ལྡན་སེམས་སྐྱིལ་བཞུགས༔ དེའི་ཕྱིར་གྲུ་ཆད་རྣམ་བཞི་ལ༔ ཤར་ལྷོར་དཀར་མོ་མགྱོགས་མ་དཀར༔ ལྷོ་ནུབ་སྔོན་མོ་མགྱོགས་མ་མཐིང༔ ནུབ་བྱང་དམར་མོ་མགྱོགས་མ་དམར༔ བྱང་ཤར་ལྗང་མོ་མགྱོགས་མ་ལྗང༔ གཡས་པས་མདའ་དར་རང་མདོག་དང༔ ཚེ་བུམ་གཡོན་འཛིན་གར་ཐབས་མཛད༔ དེའི་ཕྱིར་བར་ཁྱམས་ཕྱོགས་མཚམས་ལ༔ ཤར་དུ་གདུགས་ཀྱི་ལྷ་མོ་དཀར༔ ཤར་ལྷོར་གསེར་ཉའི་ལྷ་མོ་སེར༔ ལྷོ་རུ་བུམ་པའི་ལྷ་མོ་ལྗང༔ ལྷོ་ནུབ་དཔལ་བེའུའི་ལྷ་མོ་སེར༔ ནུབ་ཏུ་པདྨའི་ལྷ་མོ་དམར༔ ནུབ་བྱང་རྒྱལ་མཚན་ལྷ་མོ་མཐིང༔ བྱང་དུ་སྒྲ་དབྱངས་ལྷ་མོ་དཀར༔ བྱང་ཤར་འཁོར་ལྷོའི་ལྷ་མོ་སེར༔ གཡས་པ་རྣམས་ཀྱིས་རྟགས་བརྒྱད་དང༔ གཡོན་པས་ཚེ་ཡི་བུམ་པ་འཛིན༔ བཞེངས་པའི་སྟབས་ཀྱིས་གར་སྟབས་མཛད༔ དེ་ལྟར་གཙོ་འཁོར་ཐམས་ཅད་ནི༔ ཞི་བའི་ཚུལ་དགུ་ལྡན་པ་དང༔ རྒྱན་ཆས་བཅུ་གསུམ་དག་གིས་བརྒྱན༔ ཤར་སྒོར་པྲ་ཛྙཱནྟ་ཀྲྀཏ་སྨུག༔ རྡོ་རྗེ་དང་ནི་དུང་ཁྲག་འཛིན༔ གནོད་སྦྱིན་དཀར་མོ་ལྕགས་ཀྱུ་འཛིན༔ ལྷོ་སྒོར་ཡ་མཱནྟ་ཀྲྀཏ་སེར༔ ཐོད་རློན་དབྱུག་ཐོགས་དུང་ཁྲག་གསོལ༔ འཇིགས་བྱེད་སེར་མོ་ཞགས་པ་འཛིན༔ ནུབ་སྒོར་པདྨཱནྟ་ཀྲྀཏ་དམར༔ ཐོད་དབྱུག་སྦྲུལ་དཀྲིས་དུང་ཁྲག་འཛིན༔ བདུད་རྩི་དམར་མོ་ལྕགས་སྒྲོག་བསྣམས༔ བྱང་སྒོར་བིགྣཱནྟ་ཀྲྀཏ་ལྗང༔ རྒྱ་གྲམ་དབྱུག་པ་ཐོད་ཁྲག་འཛིན༔ གསོད་བྱེད་ལྗང་མོ་དྲིལ་བུ་འཁྲོལ༔ ཡབ་ཡུམ་ཐམས་ཅད་འཁྲིལ་སྦྱོར་རོལ༔ དུར་ཁྲོད་ཆས་ལྡན་བརྐྱང་བསྐུམ་གྱིས༔ མེ་དཔུང་འབར་བའི་ཀློང་དུ་བཞུགས༔ གཞན་ཡང་དཀྱིལ་འཁོར་སྟེང་ལོགས་སུ༔ ཚེ་དབང་རིག་པ་འཛིན་རྣམས་དང༔ བདེ་གཤེགས་རྒྱལ་བ་སྤྲིན་ལྟར་གཏིབས༔ མཁའ་འགྲོ་ཆོས་སྐྱོང་སྲུང་མའི་ཚོགས༔ མཆོད་པའི་སྤྲིན་ཕུང་བསམ་ཡས་བཅས༔ ནམ་མཁའི་ཁམས་ལ་ཁྱབ་པ་རྣམས༔ ངོ་བོ་སྟོང་པ་ཆོས་ཀྱི་དབྱིངས༔ གཙོ་དང་འཁོར་དུ་ཐ་མི་དད༔ རང་བཞིན་གསལ་བ་ལོངས་སྤྱོད་རྫོགས༔ རྣམ་པ་མ་འདྲེས་སོ་སོར་གསལ༔ ཅི་སྣང་ཡེ་ཤེས་རོལ་པ་ལས༔ དཀྱིལ་འཁོར་བསམ་ཡས་ལྷུན་གྱིས་གྲུབ༔ ཅེས་བསྒོམ་དབང་བསྐུར་བྱིན་རླབས་སོགས༔ ཚེ་ཡི་ཕྲིན་ལས་གཞུང་བཞིན་བྱ༔ ས་མ་ཡ༔ རྒྱ་རྒྱ་རྒྱ ༁ྃ༔ ཟབ་བདུན་རྒྱུད་ཟབ་སྒྱུ་འཕྲུལ་ལས༔ ཚེ་སྒྲུབ་ཟབ་མོའི་སྒྲུབ་ཐབས་བཞུགས་སོ༔ རིགས་ལྔ་ཚེ་དཔག་མེད་ལ་འདུད༔ བདག་འདྲ་པདྨ་འབྱུང་གནས་ཀྱིས༔ འཆི་མེད་སྒྲུབ་ཐབས་མཐའ་ཡས་ཤེས༔ ཀུན་གྱི་ཡང་དྲིལ་རིགས་ལྔ་ཡི༔ ཚེ་སྒྲུབ་ཟབ་མོ་འདི་ན་བཀོད༔ ས་མ་ཡ༔ ཕུན་སུམ་ཚོགས་ལྔས་གཞི་བཟུང་སྟེ༔ ཚོགས་བསགས་སྦྱིན་བཏང་སྲོག་བསླུ་སོགས༔ ཕྱི་བཤགས་དགེ་བ་གང་འགྲུབ་འབད༔ ཕྱི་ནང་མཚམས་བཅད་དཀྱིལ་འཁོར་བཞེངས༔ སྐུ་རྟེན་མཚན་དང་དཔེ་བྱད་ཅན༔ རིན་ཆེན་ས་ལ་སོགས་པར་བཞེངས༔ གསུང་རྟེན་དར་རམ་ཤོག་བུ་ལ༔ མུ་ཁྱུད་རིམ་པ་ལྔ་བསྐོར་བའི༔ ལྟེ་བར་འཁོར་ལོ་ཨོཾ་གྱིས་མཚན༔ རྩིབས་བརྒྱད་སྙིང་པོས་མཚན་པ་དང༔ གཉིས་པར་རྩིབས་བཞི་ཕྱག་མཚན་བཞི༔ ཧཱུྃ་ཏྲཱཾ་ཧྲཱིཿཨཱཿརྣམས་ཀྱིས་མཚན༔ སོ་སོའི་སྔགས་བཀོད་གསུམ་པ་ལ༔ ཚེ་གཟུངས་དང་ནི་སྤེལ་ཚིག་བྲི༔ བཞི་པར་དབྱངས་གསལ་རྟེན་སྙིང་དང༔ ལྔ་པར་རྡོ་རྗེའི་ཕྲེང་བས་བསྐོར༔ ཁྱམས་ལ་མེ་ཡི་ཕྲེང་བ་བྲི༔ ཚེ་ཡི་རྫས་བྱུགས་དར་གྱིས་དྲིལ༔ ཐུགས་རྟེན་རྣམ་རྒྱལ་མཆོད་རྟེན་ལ༔ རིང་བསྲེལ་ཚེ་གཟུངས་གཞུག་པ་དང༔ ཡོན་ཏན་ཐོད་པ་མཚན་ལྡན་ནང༔ ཚེ་ཡི་སྐྲ་དང་ལོ་ལེགས་ནས༔ དཱུརྦ་གི་ཝང་སིནྡྷུ་ར༔ ལུག་མུར་དབང་ལག་ར་མོ་ཤག༔ སྦྲང་དང་སྦྱར་བའི་རིལ་བུས་བཀང༔ ཕྲིན་ལས་ཚེ་ཡི་རྟེན་མདའ་དང༔ གཙོ་ལྔའི་བུམ་པ་མགྱོགས་མའི་མདའ༔ བཅུད་ལྡན་རྒྱན་དང་ལྡན་པ་སོགས༔ རྟེན་རྫས་མཆོད་པའི་རྫས་རྣམས་བཤམ༔ ཕྲིན་ལས་བསྐྱེད་རིམ་ཚུལ་བཞིན་བསྒོམ༔ བཟླས་པའི་དུས་སུ་འདི་ལྟར་བསྐྱེད༔ བྷྲཱུྃ་བི་ཤྭ་བི་ཤུདྡྷེ་ཨོཾ་ཧཱུྃ་ཏྲཱཾ་ཧྲཱིཿཨཱཿཛཿཧཱུྃ་བཾ་ཧོ༔ ཕཊ་ཛ༔ ཡེ་ནས་དམ་ཚིག་ཡེ་ཤེས་དབྱེར་མེད་ཀྱང༔ གློ་བུར་འཁྲུལ་པའི་དྲི་མ་བསལ་བའི་ཕྱིར༔ ཡེ་ཤེས་དཀྱིལ་འཁོར་མདུན་དུ་བཞུགས་ནས་ཀྱང༔ དངོས་གྲུབ་རྣམ་གཉིས་འགྲུབ་པའི་ཕྲིན་ལས་མཛོད༔ དེ་ནས་སོ་སོར་བསྐུལ་བ་ནི༔ ཧཱུྃ་ཧྲཱི༔ དབུས་ཕྱོགས་ཆོས་དབྱིངས་ཡེ་ཤེས་ཀློང་ཡངས་ནས༔ རིན་ཆེན་སེང་ཁྲི་པདྨ་ཉི་ཟླའི་སྟེང༔ སྣང་སྟོང་དབྱེར་མེད་རྣམ་སྣང་ཚེ་དཔག་མེད༔ དབྱིངས་ཕྱུག་ཡུམ་མཆོག་བདེ་གཤེགས་ཡབ་ཡུམ་གཉིས༔ མཛེས་པའི་སྐུ་མཆོག་མཚན་དང་དཔེ་བྱད་འབར༔ སྙན་པའི་གསུང་དབྱངས་ཡན་ལག་དྲུག་ཅུར་ལྡན༔ ཐུགས་མཆོག་ཆོས་དབྱིངས་ཡེ་ཤེས་ཀུན་ལ་ཁྱབ༔ ཡབ་ཡུམ་གཉིས་སུ་མེད་པའི་སྐུར་བསྒོམ་སྟེ༔ རྩ་རླུང་ཐིག་ལེ་སྔགས་ཀྱི་འཕྲོ་འདུ་ཡིས༔ བདེ་ཆེན་ཆོས་དབྱིངས་ཡེ་ཤེས་བསྒོམས་ལགས་ན༔ རིག་འཛིན་ཚེ་ཡི་དངོས་གྲུབ་དེང་འདིར་སྩོལ༔ ཆོས་དབྱིངས་ཡེ་ཤེས་ཚེ་བདག་ཡབ་ཡུམ་གཉིས༔ མ་གསལ་བར་དུ་ཡང་ཡང་བསྐྱེད་ཅིང་བསྒོམ༔ མ་འགྲུབ་བར་དུ་དགོངས་པ་མི་གཏོང་བས༔ ད་ལྟ་ཉིད་དུ་རྡོ་རྗེའི་སྐུ་གསུང་ཐུགས༔ དཀའ་བ་མེད་པར་འགྲུབ་པར་བྱིན་གྱིས་རློབས༔ ཞེས་བསྐུལ་དམིགས་པའི་འཕྲོ་འདུ་ནི༔ ཧཱུྃ་ཧྲཱི༔ རྣམ་སྣང་ཚེ་དཔག་མེད་ཀྱི་ཐུགས་ཀ་རུ༔ འཁོར་ལོ་དཀར་པོའི་གྭའུའི་ནང་ཁོངས་སུ༔ ཨོཾ་ཡིག་དཀར་པོ་ཨ་ནྲྀ་ཧཱུྃ་གིས་མཚན༔ རླུང་སྦྱོར་བདེ་བའི་རྐྱེན་གྱིས་ཨོཾ་ཡིག་བསྐུལ༔ ཨོཾ་ལས་ཨོཾ་འཕྲོས་སྟོང་གསུམ་འཇིག་རྟེན་གང༔ བདེ་གཤེགས་རིགས་ཀྱི་སངས་རྒྱས་ཐམས་ཅད་མཆོད༔ བདག་དང་འགྲོ་བའི་གཏི་མུག་སྒྲིབ་པ་སྦྱངས༔ སྣང་བ་ཐམས་ཅད་རྣམ་པར་སྣང་མཛད་སྐུ༔ གྲགས་པ་ཐམས་ཅད་ཨོཾ་གྱི་རང་སྒྲར་གྲགས༔ རིག་པ་བདེ་ཆེན་ཆོས་དབྱིངས་ཡེ་ཤེས་ངང༔ སླར་ཡང་སྦྱོར་མཚམས་ལས་ནི་འོད་འཕྲོས་པས༔ སྣང་སྲིད་ཐམས་ཅད་ཨོཾ་གྱི་རང་བཞིན་གྱུར༔ བདེ་གཤེགས་རིགས་ཀྱི་ཚེ་ཡི་དངོས་གྲུབ་དང༔ འཇིག་རྟེན་ཁམས་ཀྱི་རྒྱལ་རིགས་ཐམས་ཅད་ཀྱི༔ ཚེ་དང་བསོད་ནམས་དཔལ་དང་སྙན་གྲགས་སྟོབས༔ ནམ་མཁའི་ཁམས་ཀྱི་བཅུད་རྣམས་མ་ལུས་པ༔ ཡི་གེ་ཨོཾ་གྱི་རྣམ་པར་བསྡུས་ནས་སུ༔ སྦྱོར་མཚམས་ནས་ཞུགས་ལུས་ཀྱི་ནང་ཀུན་ཁེངས༔ གྭའུའི་ཁ་བྱེ་སྙིང་པོ་ཨོཾ་ལ་ཐིམ༔ བཀྲག་མདངས་འཕེལ་ཞིང་འོད་ཀྱིས་ལུས་ཀུན་ཁྱབ༔ བ་སྤུའི་བུ་ག་འཁོར་ལོས་རྒྱས་གདབ་ཅིང༔ བདེ་གཤེགས་རིགས་ཀྱི་ཚེ་ཡི་དངོས་གྲུབ་ཐོབ༔ རྣམ་སྣང་ཡབ་ཡུམ་ཉིད་དང་དབྱེར་མེད་གྱུར༔ ཞེས་བསྒོམ་རྩ་རླུང་འཁྲུལ་འཁོར་བྱ༔ ཁྱད་པར་གུད་བྱང་བཞིན་དུ་བསྒོམ༔ སྐབས་སུ་རླུང་གི་རྟ་ལ་དྲང༔ སྐབས་སུ་ངག་གི་བཟླས་པ་ནི༔ ཨོཾ་ན་མོ་བྷ་ག་བ་ཏེ་བཻ་རོ་ཙ་ན་ཨ་པ་རི་མི་ཏ་ཨཱ་ཡུརྫྙཱ་ན་སོགས་ནས་སྭཱ་ཧཱ༔ ཞེས་བཟླས་སྐབས་སུ་མདའ་དར་གཡབ༔ ཧཱུྃ༔ ཆོས་དབྱིངས་ཡེ་ཤེས་ངང་ཉིད་ལས༔ བདེ་སྟོང་དབྱེར་མེད་ལོངས་སྤྱོད་རྫོགས༔ རྣམ་པར་སྣང་མཛད་ཡབ་ཡུམ་གཉིས༔ རང་རིག་རང་གསལ་ཐུགས་དམ་བསྐུལ༔ འཛིན་མེད་བདེ་ཆེན་ཕོ་ཉ་སྤྲོས༔ གཉིས་འཛིན་འཁོར་འདས་ཚེ་བཅུད་རྣམས༔ གཉིས་མེད་ཡེ་ཤེས་ཆེན་པོར་སྡུས༔ རང་རིག་བདེ་ཆེན་ཀློང་དུ་སྟིམས༔ མ་བཅོས་ངང་དུ་རྒྱས་ཐོབ་ཅིག༔ ཞེན་སྣང་འཆི་བདག་བདུད་རྣམས་ཆོམས༔ རྣམ་རྟོག་ནད་གདོན་བར་ཆད་སོལ༔ བདེ་ཆེན་ཀ་དག་ཀློང་ཡངས་སུ༔ ལུས་སྣང་རྡོ་རྗེ་ལྷ་ཡི་སྐུ༔ རྩ་རླུང་ཐིག་ལེ་སྔགས་ཀྱི་གདངས༔ དྲན་རྟོག་བདེ་ཆེན་ཐུགས་ཀྱི་དབྱིངས༔ འཆི་མེད་སྐུ་གསུང་ཐུགས་འགྲུབ་པའི༔ ཕྲིན་ལས་གཉན་པོའི་དུས་ལ་བབས༔ ཞེས་བསྐུལ་དམིགས་པ་ཡང་ཡང་བསྒོམ༔ མི་བསྐྱོད་ཡབ་ཡུམ་བསྐུལ་བ་ནི༔ ཧཱུྃ་ཧྲཱི༔ ཤར་ཕྱོགས་མེ་ལོང་ཡེ་ཤེས་ཀློང་ཡངས་ནས༔ རིན་ཆེན་གླང་པོ་པདྨ་ཉི་ཟླའི་སྟེང༔ གསལ་སྟོང་དབྱེར་མེད་མི་བསྐྱོད་ཚེ་དཔག་མེད༔ མཱ་ཀི་ཡུམ་མཆོག་རྡོ་རྗེ་ཡབ་ཡུམ་གཉིས༔ མཛེས་པའི་སྐུ་མཆོག་མཚན་དང་དཔེ་བྱད་འབར༔ སྙན་པའི་གསུང་དབྱངས་ཡན་ལག་དྲུག་ཅུར་ལྡན༔ ཐུགས་མཆོག་མེ་ལོང་ཡེ་ཤེས་ཀུན་ལ་ཁྱབ༔ ཡབ་ཡུམ་གཉིས་སུ་མེད་པའི་སྐུར་བསྒོམ་སྟེ༔ རྩ་རླུང་ཐིག་ལེ་སྔགས་ཀྱི་འཕྲོ་འདུ་ཡིས༔ བདེ་ཆེན་མེ་ལོང་ཡེ་ཤེས་བསྒོམས་ལགས་ན༔ རིག་འཛིན་ཚེ་ཡི་དངོས་གྲུབ་དེང་འདིར་སྩོལ༔ མེ་ལོང་ཡེ་ཤེས་ཚེ་བདག་ཡབ་ཡུམ་གཉིས༔ མ་གསལ་བར་དུ་ཡང་ཡང་བསྐྱེད་ཅིང་བསྒོམ༔ མ་འགྲུབ་བར་དུ་དགོངས་པ་མི་གཏོང་བས༔ ད་ལྟ་ཉིད་དུ་རྡོ་རྗེའི་སྐུ་གསུང་ཐུགས༔ དཀའ་བ་མེད་པར་འགྲུབ་པར་བྱིན་གྱིས་རློབས༔ ཞེས་བསྐུལ་དམིགས་པའི་འཕྲོ་འདུ་ནི༔ ཧཱུྃ་ཧྲཱི༔ མི་བསྐྱོད་ཚེ་དཔག་མེད་ཀྱི་ཐུགས་ཀ་རུ༔ རྡོ་རྗེ་སྔོན་པོ་རྒྱ་གྲམ་གྭའུའི་ནང༔ ཧཱུྃ་ཡིག་སྔོན་པོ་ཨ་ནྲྀ་ཧཱུྃ་གིས་མཚན༔ རླུང་སྦྱོར་བདེ་བའི་རྐྱེན་གྱིས་ཧཱུྃ་ཡིག་བསྐུལ༔ ཧཱུྃ་ལས་ཧཱུྃ་འཕྲོས་སྟོང་གསུམ་འཇིག་རྟེན་གང༔ རྡོ་རྗེ་རིགས་ཀྱི་སངས་རྒྱས་ཐམས་ཅད་མཆོད༔ བདག་དང་འགྲོ་བའི་ཞེ་སྡང་སྒྲིབ་པ་སྦྱངས༔ སྣང་བ་ཐམས་ཅད་མི་བསྐྱོད་རྡོ་རྗེའི་སྐུ༔ གྲགས་པ་ཐམས་ཅད་ཧཱུྃ་གི་རང་སྒྲར་གྲགས༔ རིག་པ་བདེ་ཆེན་མེ་ལོང་ཡེ་ཤེས་ངང༔ སླར་ཡང་སྦྱོར་མཚམས་ལས་ནི་འོད་འཕྲོས་པས༔ སྣང་སྲིད་ཐམས་ཅད་ཧཱུྃ་གི་རང་བཞིན་གྱུར༔ རྡོ་རྗེ་རིགས་ཀྱི་ཚེ་ཡི་དངོས་གྲུབ་དང༔ འཇིག་རྟེན་ཁམས་ཀྱི་རྗེའུ་རིགས་ཐམས་ཅད་ཀྱི༔ ཚེ་དང་བསོད་ནམས་དཔལ་དང་སྙན་གྲགས་སྟོབས༔ ཆུ་ཡི་ཁམས་ཀྱི་བཅུད་རྣམས་མ་ལུས་པ༔ ཡི་གེ་ཧཱུྃ་གི་རྣམ་པར་བསྡུས་ནས་སུ༔ སྦྱོར་མཚམས་ནས་ཞུགས་ལུས་ཀྱི་ནང་ཀུན་ཁེངས༔ གྭའུའི་ཁ་བྱེ་སྙིང་པོ་ཧཱུྃ་ལ་ཐིམ༔ བཀྲག་མདངས་འཕེལ་ཞིང་འོད་ཀྱིས་ལུས་ཀུན་ཁྱབ༔ བ་སྤུའི་བུ་ག་རྡོ་རྗེས་རྒྱས་བཏབ་ཅིང༔ རྡོ་རྗེ་རིགས་ཀྱི་ཚེ་ཡི་དངོས་གྲུབ་ཐོབ༔ མི་བསྐྱོད་ཡབ་ཡུམ་ཉིད་དང་དབྱེར་མེད་གྱུར༔ ཞེས་བསྒོམ་རྩ་རླུང་འཁྲུལ་འཁོར་བྱ༔ ཁྱད་པར་གུད་བྱང་བཞིན་དུ་བསྒོམ༔ སྐབས་སུ་རླུང་གི་རྟ་ལ་དྲང༔ སྐབས་སུ་ངག་གི་བཟླས་པ་ནི༔ ཨོཾ་ན་མོ་བྷ་ག་བ་ཏེ་ཨཀྵོ་བྷྱ་ཨ་པ་རི་མི་ཏ་སོགས་ནས་སྭཱ་ཧཱ༔ ཞེས་བཟླས་སྐབས་སུ་མདའ་དར་གཡབ༔ ཧཱུྃ༔ མེ་ལོང་ཡེ་ཤེས་ངང་ཉིད་ལས༔ བདེ་སྟོང་དབྱེར་མེད་ལོངས་སྤྱོད་རྫོགས༔ མི་བསྐྱོད་རྡོ་རྗེ་ཡབ་ཡུམ་གཉིས༔ རང་རིག་རང་གསལ་ཐུགས་དམ་བསྐུལ༔ འཛིན་མེད་བདེ་ཆེན་ཕོ་ཉ་སྤྲོས༔ གཉིས་འཛིན་འཁོར་འདས་ཚེ་བཅུད་རྣམས༔ གཉིས་མེད་ཡེ་ཤེས་ཆེན་པོར་བསྡུས༔ རང་རིག་བདེ་ཆེན་ཀློང་དུ་སྟིམས༔ མ་བཅོས་ངང་དུ་རྒྱས་ཐོབ་ཅིག༔ ཞེན་སྣང་འཆི་བདག་བདུད་རྣམས་ཆོམས༔ རྣམ་རྟོག་ནད་གདོན་བར་ཆད་སོལ༔ བདེ་ཆེན་ཀ་དག་ཀློང་ཡངས་སུ༔ ལུས་སྣང་རྡོ་རྗེ་ལྷ་ཡི་སྐུ༔ རྩ་རླུང་ཐིག་ལེ་སྔགས་ཀྱི་གདངས༔ དྲན་རྟོག་བདེ་ཆེན་ཐུགས་ཀྱི་དབྱིངས༔ འཆི་མེད་སྐུ་གསུང་ཐུགས་འགྲུབ་པའི༔ ཕྲིན་ལས་གཉན་པོའི་དུས་ལ་བབས༔ ཞེས་བསྐུལ་དམིགས་པ་ཡང་ཡང་བསྒོམ༔ རིན་འབྱུང་ཡབ་ཡུམ་བསྐུལ་བ་ནི༔ ཧཱུྃ་ཧྲཱི༔ ལྷོ་ཕྱོགས་མཉམ་ཉིད་ཡེ་ཤེས་ཀློང་ཡངས་ནས༔ རིན་ཆེན་རྟ་མཆོག་པདྨ་ཉི་ཟླའི་སྟེང༔ ཚོར་སྟོང་དབྱེར་མེད་རིན་འབྱུང་ཚེ་དཔག་མེད༔ སྤྱན་མ་ཡུམ་མཆོག་རིན་ཆེན་ཡབ་ཡུམ་གཉིས༔ མཛེས་པའི་སྐུ་མཆོག་མཚན་དང་དཔེ་བྱད་འབར༔ སྙན་པའི་གསུང་དབྱངས་ཡན་ལག་དྲུག་ཅུར་ལྡན༔ ཐུགས་མཆོག་མཉམ་ཉིད་ཡེ་ཤེས་ཀུན་ལ་ཁྱབ༔ ཡབ་ཡུམ་གཉིས་སུ་མེད་པའི་སྐུར་བསྒོམ་སྟེ༔ རྩ་རླུང་ཐིག་ལེ་སྔགས་ཀྱི་འཕྲོ་འདུ་ཡིས༔ བདེ་ཆེན་མཉམ་ཉིད་ཡེ་ཤེས་བསྒོམས་ལགས་ན༔ རིག་འཛིན་ཚེ་ཡི་དངོས་གྲུབ་དེང་འདིར་སྩོལ༔ མཉམ་ཉིད་ཡེ་ཤེས་ཚེ་བདག་ཡབ་ཡུམ་གཉིས༔ མ་གསལ་བར་དུ་ཡང་ཡང་བསྐྱེད་ཅིང་བསྒོམ༔ མ་འགྲུབ་བར་དུ་དགོངས་པ་མི་གཏོང་བས༔ ད་ལྟ་ཉིད་དུ་རྡོ་རྗེའི་སྐུ་གསུང་ཐུགས༔ དཀའ་བ་མེད་པར་འགྲུབ་པར་བྱིན་གྱིས་རློབས༔ ཞེས་བསྐུལ་དམིགས་པའི་འཕྲོ་འདུ་ནི༔ ཧཱུྃ་ཧྲཱི༔ རིན་འབྱུང་ཚེ་དཔག་མེད་ཀྱི་ཐུགས་ཀ་རུ༔ རིན་ཆེན་སེར་པོ་ཟུར་བརྒྱད་གྭའུའི་ནང༔ ཏྲཱཾ་ཡིག་སེར་པོ་ཨ་ནྲྀ་ཧཱུྃ་གིས་མཚན༔ རླུང་སྦྱོར་བདེ་བའི་རྐྱེན་གྱིས་ཏྲཱཾ་ཡིག་བསྐུལ༔ ཏྲཱཾ་ལས་ཏྲཱཾ་འཕྲོས་སྟོང་གསུམ་འཇིག་རྟེན་གང༔ རིན་ཆེན་རིགས་ཀྱི་སངས་རྒྱས་ཐམས་ཅད་མཆོད༔ བདག་དང་འགྲོ་བའི་ང་རྒྱལ་སྒྲིབ་པ་སྦྱངས༔ སྣང་བ་ཐམས་ཅད་རིན་ཆེན་འབྱུང་ལྡན་སྐུ༔ གྲགས་པ་ཐམས་ཅད་ཏྲཱཾ་གི་རང་སྒྲར་གྲགས༔ རིག་པ་བདེ་ཆེན་མཉམ་ཉིད་ཡེ་ཤེས་ངང༔ སླར་ཡང་སྦྱོར་མཚམས་ལས་ནི་འོད་འཕྲོས་པས༔ སྣང་སྲིད་ཐམས་ཅད་ཏྲཱཾ་གི་རང་བཞིན་གྱུར༔ རིན་ཆེན་རིགས་ཀྱི་ཚེ་ཡི་དངོས་གྲུབ་དང༔ འཇིག་རྟེན་ཁམས་ཀྱི་བྲམ་ཟེ་ཐམས་ཅད་ཀྱི༔ ཚེ་དང་བསོད་ནམས་དཔལ་དང་སྙན་གྲགས་སྟོབས༔ ས་ཡི་ཁམས་ཀྱི་བཅུད་རྣམས་མ་ལུས་པ༔ ཡི་གེ་ཏྲཱཾ་གི་རྣམ་པར་བསྡུས་ནས་སུ༔ སྦྱོར་མཚམས་ནས་ཞུགས་ལུས་ཀྱི་ནང་ཀུན་ཁེངས༔ གྭའུའི་ཁ་བྱེ་སྙིང་པོ་ཏྲཱཾ་ལ་ཐིམ༔ བཀྲག་མདངས་འཕེལ་ཞིང་འོད་ཀྱིས་ལུས་ཀུན་ཁྱབ༔ བ་སྤུའི་བུ་ག་རིན་ཆེན་རྒྱས་བཏབ་ཅིང༔ རིན་ཆེན་རིགས་ཀྱི་ཚེ་ཡི་དངོས་གྲུབ་ཐོབ༔ རིན་འབྱུང་ཡབ་ཡུམ་ཉིད་དང་དབྱེར་མེད་གྱུར༔ ཞེས་བསྒོམ་རྩ་རླུང་འཁྲུལ་འཁོར་བྱ༔ ཁྱད་པར་གུད་བྱང་བཞིན་དུ་བསྒོམ༔ སྐབས་སུ་རླུང་གི་རྟ་ལ་དྲང༔ སྐབས་སུ་ངག་གི་བཟླས་པ་ནི༔ ཨོཾ་ན་མོ་བྷ་ག་བ་ཏེ་རཏྣ་སཾ་བྷ་ཝ་ཨ་པ་རི་མི་ཏ་སོགས་ནས་སྭཱ་ཧཱ༔ ཞེས་བཟླས་སྐབས་སུ་མདའ་དར་གཡབ༔ ཧཱུྃ༔ མཉམ་ཉིད་ཡེ་ཤེས་ངང་ཉིད་ལས༔ བདེ་སྟོང་དབྱེར་མེད་ལོངས་སྤྱོད་རྫོགས༔ རིན་ཆེན་འབྱུང་ལྡན་ཡབ་ཡུམ་གཉིས༔ རང་རིག་རང་གསལ་ཐུགས་དམ་བསྐུལ༔ འཛིན་མེད་བདེ་ཆེན་ཕོ་ཉ་སྤྲོས༔ གཉིས་འཛིན་འཁོར་འདས་ཚེ་བཅུད་རྣམས༔ གཉིས་མེད་ཡེ་ཤེས་ཆེན་པོར་སྡུས༔ རང་རིག་བདེ་ཆེན་ཀློང་དུ་སྟིམས༔ མ་བཅོས་ངང་དུ་རྒྱས་ཐོབ་ཅིག༔ ཞེན་སྣང་འཆི་བདག་བདུད་རྣམས་ཆོམས༔ རྣམ་རྟོག་ནད་གདོན་བར་ཆད་སོལ༔ བདེ་ཆེན་ཀ་དག་ཀློང་ཡངས་སུ༔ ལུས་སྣང་རྡོ་རྗེ་ལྷ་ཡི་སྐུ༔ རྩ་རླུང་ཐིག་ལེ་སྔགས་ཀྱི་གདངས༔ དྲན་རྟོག་བདེ་ཆེན་ཐུགས་ཀྱི་དབྱིངས༔ འཆི་མེད་སྐུ་གསུང་ཐུགས་འགྲུབ་པའི༔ ཕྲིན་ལས་གཉན་པོའི་དུས་ལ་བབས༔ ཞེས་བསྐུལ་དམིགས་པ་ཡང་ཡང་བསྒོམ༔ མཐའ་ཡས་ཡབ་ཡུམ་བསྐུལ་བ་ནི༔ ཧཱུྃ་ཧྲཱི༔ ནུབ་ཕྱོགས་སོར་རྟོག་ཡེ་ཤེས་ཀློང་ཡངས་ནས༔ རིན་ཆེན་རྨ་བྱ་པདྨ་ཉི་ཟླའི་སྟེང༔ བདེ་སྟོང་དབྱེར་མེད་མཐའ་ཡས་ཚེ་དཔག་མེད༔ གོས་དཀར་ཡུམ་མཆོག་པདྨ་ཡབ་ཡུམ་གཉིས༔ མཛེས་པའི་སྐུ་མཆོག་མཚན་དང་དཔེ་བྱད་འབར༔ སྙན་པའི་གསུང་དབྱངས་ཡན་ལག་དྲུག་ཅུར་ལྡན༔ ཐུགས་མཆོག་སོར་རྟོག་ཡེ་ཤེས་ཀུན་ལ་ཁྱབ༔ ཡབ་ཡུམ་གཉིས་སུ་མེད་པའི་སྐུར་བསྒོམ་སྟེ༔ རྩ་རླུང་ཐིག་ལེ་སྔགས་ཀྱི་འཕྲོ་འདུ་ཡིས༔ བདེ་ཆེན་སོར་རྟོག་ཡེ་ཤེས་བསྒོམས་ལགས་ན༔ རིག་འཛིན་ཚེ་ཡི་དངོས་གྲུབ་དེང་འདིར་སྩོལ༔ སོར་རྟོག་ཡེ་ཤེས་ཚེ་བདག་ཡབ་ཡུམ་གཉིས༔ མ་གསལ་བར་དུ་ཡང་ཡང་བསྐྱེད་ཅིང་བསྒོམ༔ མ་འགྲུབ་བར་དུ་དགོངས་པ་མི་བཏང་བས༔ ད་ལྟ་ཉིད་དུ་རྡོ་རྗེའི་སྐུ་གསུང་ཐུགས༔ དཀའ་བ་མེད་པར་འགྲུབ་པར་བྱིན་གྱིས་རློབས༔ ཞེས་བསྐུལ་དམིགས་པའི་འཕྲོ་འདུ་ནི༔ ཧཱུྃ་ཧྲཱི༔ མཐའ་ཡས་ཚེ་དཔག་མེད་ཀྱི་ཐུགས་ཀ་རུ༔ པདྨ་དཀར་པོ་འདབ་བརྒྱད་གྭའུའི་ནང༔ ཧྲཱིཿཡིག་དམར་པོ་ཨ་ནྲྀ་ཧཱུྃ་གིས་མཚན༔ རླུང་སྦྱོར་བདེ་བའི་རྐྱེན་གྱིས་ཧྲཱིཿཡིག་བསྐུལ༔ ཧྲཱིཿལས་ཧྲཱིཿའཕྲོས་སྟོང་གསུམ་འཇིག་རྟེན་གང༔ པདྨ་རིགས་ཀྱི་སངས་རྒྱས་ཐམས་ཅད་མཆོད༔ བདག་དང་འགྲོ་བའི་འདོད་ཆགས་སྒྲིབ་པ་སྦྱངས༔ སྣང་བ་ཐམས་ཅད་མཐའ་ཡས་ཡབ་ཡུམ་སྐུ༔ གྲགས་པ་ཐམས་ཅད་ཧྲཱིཿཡི་རང་སྒྲར་གྲགས༔ རིག་པ་བདེ་ཆེན་སོར་རྟོག་ཡེ་ཤེས་ངང༔ སླར་ཡང་སྦྱོར་མཚམས་ལས་ནི་འོད་འཕྲོས་པས༔ སྣང་སྲིད་ཐམས་ཅད་ཧྲཱིཿཡི་རང་བཞིན་གྱུར༔ པདྨ་རིགས་ཀྱི་ཚེ་ཡི་དངོས་གྲུབ་དང༔ འཇིག་རྟེན་ཁམས་ཀྱི་དམངས་རིགས་ཐམས་ཅད་ཀྱི༔ ཚེ་དང་བསོད་ནམས་དཔལ་དང་སྙན་གྲགས་སྟོབས༔ མེ་ཡི་ཁམས་ཀྱི་བཅུད་རྣམས་མ་ལུས་པ༔ ཡི་གེ་ཧྲཱིཿཡི་རྣམ་པར་བསྡུས་ནས་སུ༔ སྦྱོར་མཚམས་ནས་ཞུགས་ལུས་ཀྱི་ནང་ཀུན་ཁེངས༔ གྭའུའི་ཁ་བྱེ་སྙིང་པོ་ཧྲཱིཿལ་ཐིམ༔ བཀྲག་མདངས་འཕེལ་ཞིང་འོད་ཀྱིས་ལུས་ཀུན་ཁྱབ༔ བ་སྤུའི་བུ་ག་པདྨས་རྒྱས་བཏབ་ཅིང༔ པདྨ་རིགས་ཀྱི་ཚེ་ཡི་དངོས་གྲུབ་ཐོབ༔ མཐའ་ཡས་ཡབ་ཡུམ་ཉིད་དང་དབྱེར་མེད་གྱུར༔ ཅེས་བསྒོམ་རྩ་རླུང་འཁྲུལ་འཁོར་བྱ༔ ཁྱད་པར་གུད་བྱང་བཞིན་དུ་བསྒོམ༔ སྐབས་སུ་རླུང་གི་རྟ་ལ་དྲང༔ སྐབས་སུ་ངག་གི་བཟླས་པ་ནི༔ ཨོཾ་ན་མོ་བྷ་ག་བ་ཏེ་པདྨ་དྷ་ར་ཨ་པ་རི་མི་ཏ་སོགས་ནས་སྭཱ་ཧཱ༔ ཞེས་བཟླས་སྐབས་སུ་མདའ་དར་གཡབ༔ ཧཱུྃ༔ སོར་རྟོག་ཡེ་ཤེས་ངང་ཉིད་ལས༔ བདེ་སྟོང་དབྱེར་མེད་ལོངས་སྤྱོད་རྫོགས༔ སྣང་བ་མཐའ་ཡས་ཡབ་ཡུམ་གཉིས༔ རང་རིག་རང་གསལ་ཐུགས་དམ་བསྐུལ༔ འཛིན་མེད་བདེ་ཆེན་ཕོ་ཉ་སྤྲོས༔ གཉིས་འཛིན་འཁོར་འདས་ཚེ་བཅུད་རྣམས༔ གཉིས་མེད་ཡེ་ཤེས་ཆེན་པོར་སྡུས༔ རང་རིག་བདེ་ཆེན་ཀློང་དུ་སྟིམས༔ མ་བཅོས་ངང་དུ་རྒྱས་ཐོབ་ཅིག༔ ཞེན་སྣང་འཆི་བདག་བདུད་རྣམས་ཆོམས༔ རྣམ་རྟོག་ནད་གདོན་བར་ཆད་སོལ༔ བདེ་ཆེན་ཀ་དག་ཀློང་ཡངས་སུ༔ ལུས་སྣང་རྡོ་རྗེ་ལྷ་ཡི་སྐུ༔ རྩ་རླུང་ཐིག་ལེ་སྔགས་ཀྱི་གདངས༔ དྲན་རྟོག་བདེ་ཆེན་ཐུགས་ཀྱི་དབྱིངས༔ གཉིས་མེད་སྐུ་གསུང་ཐུགས་འགྲུབ་པའི༔ ཕྲིན་ལས་གཉན་པོའི་དུས་ལ་བབས༔ ཞེས་བསྐུལ་དམིགས་པ་ཡང་ཡང་བསྒོམ༔ དོན་གྲུབ་ཡབ་ཡུམ་བསྐུལ་བ་ནི༔ ཧཱུྃ་ཧྲཱི༔ བྱང་ཕྱོགས་བྱ་གྲུབ་ཡེ་ཤེས་ཀློང་ཡངས་ནས༔ རིན་ཆེན་མཁའ་ལྡིང་པདྨ་ཉི་ཟླའི་སྟེང༔ དབྱིངས་རིག་དབྱེར་མེད་དོན་གྲུབ་ཚེ་དཔག་མེད༔ སྒྲོལ་མ་ཡུམ་མཆོག་ལས་རབ་ཡབ་ཡུམ་གཉིས༔ མཛེས་པའི་སྐུ་མཆོག་མཚན་དང་དཔེ་བྱད་འབར༔ སྙན་པའི་གསུང་དབྱངས་ཡན་ལག་དྲུག་ཅུར་ལྡན༔ ཐུགས་མཆོག་བྱ་གྲུབ་ཡེ་ཤེས་ཀུན་ལ་ཁྱབ༔ ཡབ་ཡུམ་གཉིས་སུ་མེད་པའི་སྐུར་བསྒོམ་སྟེ༔ རྩ་རླུང་ཐིག་ལེ་སྔགས་ཀྱི་འཕྲོ་འདུ་ཡིས༔ བདེ་ཆེན་བྱ་གྲུབ་ཡེ་ཤེས་བསྒོམས་ལགས་ན༔ རིག་འཛིན་ཚེ་ཡི་དངོས་གྲུབ་དེང་འདིར་སྩོལ༔ བྱ་གྲུབ་ཡེ་ཤེས་ཚེ་བདག་ཡབ་ཡུམ་གཉིས༔ མ་གསལ་བར་དུ་ཡང་ཡང་བསྐྱེད་ཅིང་བསྒོམ༔ མ་འགྲུབ་བར་དུ་དགོངས་པ་མི་གཏོང་བས༔ ད་ལྟ་ཉིད་དུ་རྡོ་རྗེའི་སྐུ་གསུང་ཐུགས༔ དཀའ་བ་མེད་པར་འགྲུབ་པར་བྱིན་གྱིས་རློབས༔ ཞེས་བསྐུལ་དམིགས་པའི་འཕྲོ་འདུ་ནི༔ ཧཱུྃ་ཧྲཱི༔ དོན་གྲུབ་ཚེ་དཔག་མེད་ཀྱི་ཐུགས་ཀ་རུ༔ རྡོ་རྗེ་ལྗང་གུ་རྒྱ་གྲམ་གྭའུའི་ནང༔ ཨཱཿཡིག་ལྗང་གུ་ཨ་ནྲྀ་ཧཱུྃ་གིས་མཚན༔ རླུང་སྦྱོར་བདེ་བའི་རྐྱེན་གྱིས་ཨཱཿཡིག་བསྐུལ༔ ཨཱཿལས་ཨཱཿའཕྲོས་སྟོང་གསུམ་འཇིག་རྟེན་གང༔ ལས་རབ་རིགས་ཀྱི་སངས་རྒྱས་ཐམས་ཅད་མཆོད༔ བདག་དང་འགྲོ་བའི་ཕྲག་དོག་སྒྲིབ་པ་སྦྱངས༔ སྣང་བ་ཐམས་ཅད་དོན་ཡོད་གྲུབ་པའི་སྐུ༔ གྲགས་པ་ཐམས་ཅད་ཨཱཿཡི་རང་སྒྲར་གྲགས༔ རིག་པ་བདེ་ཆེན་བྱ་གྲུབ་ཡེ་ཤེས་ངང༔ སླར་ཡང་སྦྱོར་མཚམས་ལས་ནི་འོད་འཕྲོས་པས༔ སྣང་སྲིད་ཐམས་ཅད་ཨཱཿཡི་རང་བཞིན་གྱུར༔ ལས་རབ་རིགས་ཀྱི་ཚེ་ཡི་དངོས་གྲུབ་དང༔ འཇིག་རྟེན་ཁམས་ཀྱི་གདོལ་བའི་རིགས་རྣམས་ཀྱི༔ ཚེ་དང་བསོད་ནམས་དཔལ་འབྱོར་སྙན་གྲགས་སྟོབས༔ རླུང་གི་ཁམས་ཀྱི་བཅུད་རྣམས་མ་ལུས་པ༔ ཡི་གེ་ཨཱཿཡི་རྣམ་པར་བསྡུས་ནས་སུ༔ སྦྱོར་མཚམས་ནས་ཞུགས་ལུས་ཀྱི་ནང་ཀུན་ཁེངས༔ གྭའུའི་ཁ་བྱེ་སྙིང་པོ་ཨཱཿལ་ཐིམ༔ བཀྲགས་མདངས་འཕེལ་ཞིང་འོད་ཀྱིས་ལུས་ཀུན་ཁྱབ༔ བ་སྤུའི་བུ་ག་རྒྱ་གྲམ་རྒྱས་བཏབ་ཅིང༔ ལས་རབ་རིགས་ཀྱི་ཚེ་ཡི་དངོས་གྲུབ་ཐོབ༔ དོན་གྲུབ་ཡབ་ཡུམ་ཉིད་དང་དབྱེར་མེད་གྱུར༔ ཅེས་བསྒོམ་རྩ་རླུང་འཁྲུལ་འཁོར་བྱ༔ ཁྱད་པར་གུད་བྱང་བཞིན་དུ་བསྒོམ༔ སྐབས་སུ་རླུང་གི་རྟ་ལ་དྲང༔ སྐབས་སུ་ངག་གི་བཟླས་པ་ནི༔ ཨོཾ་ན་མོ་བྷ་ག་བ་ཏེ་ཨ་མོ་གྷ་སིདྡྷི་ཨ་པ་རི་སོགས་ནས་སྭཱ་ཧཱ༔ ཞེས་བཟླས་སྐབས་སུ་མདའ་དར་གཡབ༔ ཧཱུྃ༔ བྱ་གྲུབ་ཡེ་ཤེས་ངང་ཉིད་ལས༔ བདེ་སྟོང་དབྱེར་མེད་ལོངས་སྤྱོད་རྫོགས༔ དོན་ཡོད་གྲུབ་པ་ཡབ་ཡུམ་གཉིས༔ རང་རིག་རང་གསལ་ཐུགས་དམ་བསྐུལ༔ འཛིན་མེད་བདེ་ཆེན་ཕོ་ཉ་སྤྲོས༔ གཉིས་འཛིན་འཁོར་འདས་ཚེ་བཅུད་རྣམས༔ གཉིས་མེད་ཡེ་ཤེས་ཆེན་པོར་སྡུས༔ རང་རིག་བདེ་ཆེན་ཀློང་དུ་སྟིམས༔ མ་བཅོས་ངང་དུ་རྒྱས་ཐོབ་ཅིག༔ ཞེན་སྣང་འཆི་བདག་བདུད་རྣམས་ཆོམས༔ རྣམ་རྟོག་ནད་གདོན་བར་ཆད་སོལ༔ བདེ་ཆེན་ཀ་དག་ཀློང་ཡངས་སུ༔ ལུས་སྣང་རྡོ་རྗེ་ལྷ་ཡི་སྐུ༔ རྩ་རླུང་ཐིག་ལེ་སྔགས་ཀྱི་གདངས༔ དྲན་རྟོག་བདེ་ཆེན་ཐུགས་ཀྱི་དབྱིངས༔ འཆི་མེད་སྐུ་གསུང་ཐུགས་འགྲུབ་པའི༔ ཕྲིན་ལས་གཉན་པོའི་དུས་ལ་བབས༔ ཞེས་བསྐུལ་དམིགས་པ་ཡང་ཡང་བསྒོམ༔ ཚེ་ཡི་རྫས་ལ་དམིགས་ནས་སུ༔ ཧཱུྃ་ཧྲཱི༔ བྷྲཱུྃ་ལས་བྷཉྫ་གཞལ་ཡས་ཁང་པའི་ནང༔ རིལ་བུ་ཉི་ཟླའི་གྭ་འུ་རྣམས་ཀྱི་ནང༔ ཚེ་ཡི་བདག་པོ་རིགས་ལྔ་ཡབ་ཡུམ་བཞུགས༔ བདེ་ཆེན་འོད་ཟེར་གཟུངས་ཐག་ལ་འཁྲིལ་ཏེ༔ རིལ་བུའི་ལྷ་ཚོགས་རྣམས་ཀྱི་སྦྱོར་མཚམས་ལ༔ ཕོག་པས་དེས་བསྐུལ་རྗེས་ཆགས་འོད་ཟེར་ཚོགས༔ ནམ་མཁའི་མཐར་སྤྲོས་སྣོད་བཅུད་མ་དག་སྦྱངས༔ ཐམས་ཅད་དག་པ་བདུད་རྩིའི་ངང་དུ་བསྒྱུར༔ འཁོར་འདས་ཐམས་ཅད་བྱང་ཆུབ་སེམས་སུ་ཞུ༔ འུབ་ཀྱིས་རིལ་བུའི་ལྷ་ཚོགས་སྐུ་ལ་འདུས༔ མཉམ་སྦྱོར་དགའ་བས་འོད་ཞུ་བདུད་རྩི་ཡི༔ གོང་བུ་ཨོཾ་ཧཱུྃ་ཏྲཱཾ་ཧྲཱིཿཨཱཿས་མཚན་པ༔ འོད་འབར་རབ་འཕེལ་འཕར་གཡོ་ནུས་པར་ལྡན༔ ཚེ་དཔལ་སྤེལ་བའི་བདུད་རྩི་ཆེན་པོར་གྱུར༔ ཨོཾ་ན་མོ་བྷ་ག་བ་ཏེ་ཨ་པ་རི་མི་ཏ་སོགས་ནས་སྭཱ་ཧཱ༔ མཐར་ཨོཾ་ཧཱུྃ་ཏྲཱཾ་ཧྲཱིཿཨཱ༔ མཱུཾ་ལཱཾ་མཱཾ་པཱཾ་ཏཱཾ་སརྦ་ཏ་ཐཱ་ག་ཏ་ཨཱ་ཡུརྫྙཱ་ན་ཏིཥྛ་ཨོཾ༔ ཞེས་བཟླས་བུམ་པ་སྒྲུབ་པ་ནི༔ ཧཱུྃ་ཧྲཱི༔ རང་བྱུང་ཡེ་ཤེས་བུམ་པ་གཞལ་ཡས་ཁང༔ ཚེ་བདག་རིགས་ལྔ་ཡབ་ཡུམ་བཞུགས་པ་ལ༔ ཐུགས་སྲོག་སྔགས་ཕྲེང་གཟུངས་ཐག་ལ་བརྒྱུད་དེ༔ བུམ་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ༔ སྦྱོར་མཚམས་ལས་ནི་འོད་ཟེར་དཔག་མེད་འཕྲོས༔ འཁོར་འདས་གཉིས་ཀྱི་ཚེ་བཅུད་མ་ལུས་པ༔ ཨོཾ་ཧཱུྃ་ཏྲཱཾ་ཧྲཱིཿཨཱཿཡི་རྣམ་པར་བསྡུས༔ བུམ་པའི་ནང་ཞུགས་ཚེ་ཡི་བདུད་རྩིར་ཞུ༔ ཞེས་བསྒོམ་གཟུངས་ཐག་འཛིན་ནས་སུ༔ ཨོཾ་ན་མོ་བྷ་ག་བ་ཏེ་ཨ་པ་རི་མི་ཏ་སོགས་ནས་སྭཱ་ཧཱ༔ ཀཱ་ཡ་ཝཱ་ཀ་ཙིཏྟ་ཨཱ་ཡུརྫྙཱ་ན་ཨ་བྷི་ཥིཉྩ་ཨཱ་བེ་ཤ་ཡ་ཨ་ཨཱ༔ ཞེས་བཟླས་ཚེ་འགུགས་ཡང་ཡང་བྱ༔ ཐུན་མཚམས་མཆོད་ཅིང་བསྟོད་ནས་སུ༔ རང་ཉིད་ཁྲུས་བྱས་ཁྲོ་བོར་བསྒོམ༔ ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ༔ ཧ་ལ་ཧ་ལ་ཧཱུྃ༔ ཞེས་བཟླས་ཐུན་བྲབ་གུ་གུལ་བདུག༔ ཨོཾ་བཛྲ་རཀྵ་རཀྵ་ཧཱུྃ་ཕཊ༔ ཞེས་བཟླས་སྲུང་འཁོར་ཡང་ཡང་བསྒོམ༔ གསོལ་གདབ་འཁོན་བཤགས་རྒྱུད་སྦྱོང་ནི༔ ཧོ༔ བླ་མ་ཚེ་དཔག་མེད་མགོན་དང༔ རྒྱལ་བ་སྲས་དང་བཅས་རྣམས་ལ༔ ལུས་ངག་ཡིད་གསུམ་གུས་ཕྱག་འཚལ༔ བྱང་ཆུབ་བར་དུ་སྐྱབས་སུ་མཆི༔ ཕྱི་ནང་གསང་བའི་མཆོད་པ་འབུལ༔ དམ་ཚིག་ཉམས་ཆག་མ་ལུས་བཤགས༔ སོ་ཐར་བྱང་སེམས་གསང་སྔགས་ཀྱི༔ སྡོམ་པ་སྲོག་ཕྱིར་མི་གཏོང་བཟུང༔ མཆོག་དམན་དགེ་ལ་རྗེས་ཡི་རང༔ བདག་ཅག་སྨིན་གྲོལ་མཛད་དུ་གསོལ༔ བདག་གི་མགོན་དུ་བཞུགས་ནས་ཀྱང༔ སེམས་ཅན་ཀུན་གྱི་དོན་བགྱིད་ཕྱིར༔ ཚེ་དང་ཡེ་ཤེས་དཔག་མེད་ཀྱི༔ གོ་འཕང་དུས་འདིར་འགྲུབ་པར་མཛོད༔ དབང་དང་དངོས་གྲུབ་བསྡུ་བའི་ཕྱིར༔ བདག་དང་འདེར་འཚོགས་རྣལ་འབྱོར་རྣམས༔ སྐད་ཅིག་པདྨ་ཚེ་དཔག་མེད༔ དམར་གསལ་ཞལ་གཅིག་ལོངས་སྤྱོད་རྫོགས༔ ཕྱག་གཉིས་མཉམ་གཞག་ཚེ་བུམ་འཛིན༔ རྡོ་རྗེ་སྐྱིལ་ཀྲུང་བཞུགས་པའི་པང༔ གསང་བ་ཡེ་ཤེས་བཅུ་དྲུག་མ༔ དམར་གསལ་བདེ་བ་ཆེན་པོས་འཁྲིལ༔ དར་དང་རིན་ཆེན་རྒྱན་གྱིས་བརྒྱན༔ པདྨ་ཟླ་བའི་གདན་ལ་བཞུགས༔ ཐུགས་ཀར་པདྨ་ཁ་སྤྲོད་དབུས༔ ཧྲཱིཿལས་འོད་འཕྲོས་དཀྱིལ་འཁོར་པའི༔ ལྷ་ཚོགས་རྣམས་ཀྱི་ཐུགས་རྒྱུད་བསྐུལ༔ སྐུ་དང་སྔགས་ཕྲེང་ཕྱག་མཚན་སོགས༔ ཆར་ལྟར་བབ་ནས་རང་ལ་ཐིམ༔ བྱིན་རླབས་གཟི་བརྗིད་འབར་བར་བསམ༔ ཨོཾ་ན་མོ་བྷ་ག་བ་ཏེ་ཨ་པ་རི་སོགས་མཐར་ ཛྙཱ་ན་ཨཱ་བེ་ཤ་ཡ་ཨ་ཨཱ༔ རོལ་མོ་བསྒྲགས་ཤིང་སྤོས་ཀྱིས་བདུག༔ བྱིན་ཆེན་ཕེབས་པའི་རྟགས་བྱུང་ཚེ༔ ཏིཥྛ་བཛྲས་བརྟན་པར་བྱ༔ བུམ་པ་སྤྱི་བོར་བླངས་ནས་སུ༔ སོ་སོའི་དམིགས་པ་ཁ་བསྒྱུར་ཞིང༔ ཧཱུྃ༔ ཆོས་དབྱིངས་ཡེ་ཤེས་བུམ་པ་རུ༔ བདེ་གཤེགས་རིགས་ཀྱི་ལྷ་ཚོགས་བཞུགས༔ ཚེ་བཅུད་འདུས་པའི་དབང་བསྐུར་བས༔ བདུད་རྩི་བུམ་པའི་ཁ་ནས་ལྷུད༔ ལུས་ནང་གང་སྟེ་སྙིང་ག་ཡི༔ གྭ་འུའི་ཁ་བྱེ་ཨོཾ་ལ་ཐིམ༔ སྟེང་འོག་འཁོར་ལོ་ཁ་བསྒྲིགས་ཏེ༔ འཁོར་ལོའི་ལུ་གུ་རྒྱུད་ཀྱིས་བཅིངས༔ སྐུ་ཡི་ཚེ་དབང་ཐོབ་པར་གྱུར༔ ཨོཾ་ན་མོ་བྷ་ག་བ་ཏེ་བཻ་རོ་ཙ་ན་ཨ་པ་རི་མི་ཏ་སོགས་མཐར་ ཀཱ་ཡ་ཨཱ་ཡུརྫྙཱ་ན་ཨ་བྷི་ཥིཉྩ་ཨོཾ༔ ཧཱུྃ༔ མེ་ལོང་ཡེ་ཤེས་བུམ་པ་རུ༔ རྡོ་རྗེ་རིགས་ཀྱི་ལྷ་ཚོགས་བཞུགས༔ ཚེ་བཅུད་འདུས་པའི་དབང་བསྐུར་བས༔ བདུད་རྩི་བུམ་པའི་ཁ་ནས་ལྷུད༔ ལུས་ནང་གང་སྟེ་སྙིང་ག་ཡི༔ གྭ་འུའི་ཁ་བྱེ་ཧཱུྃ་ལ་ཐིམ༔ སྟེང་འོག་རྡོ་རྗེ་ཁ་བསྒྲིགས་ཏེ༔ རྡོ་རྗེའི་ལུ་གུ་རྒྱུད་ཀྱིས་བཅིངས༔ ཐུགས་ཀྱི་ཚེ་དབང་ཐོབ་པར་གྱུར༔ ཨོཾ་ན་མོ་བྷ་ག་བ་ཏེ་ཨཀྵོ་བྷྱ་ཨ་པ་རི་མི་ཏ་སོགས་མཐར་ ཙིཏྟ་ཨཱ་ཡུརྫྙཱ་ན་ཨ་བྷི་ཥིཉྩ་ཧཱུྃ༔ ཧཱུྃ༔ མཉམ་ཉིད་ཡེ་ཤེས་བུམ་པ་རུ༔ རིན་ཆེན་རིགས་ཀྱི་ལྷ་ཚོགས་བཞུགས༔ ཚེ་བཅུད་འདུས་པའི་དབང་བསྐུར་བས༔ བདུད་རྩི་བུམ་པའི་ཁ་ནས་ལྷུང༔ ལུས་ནང་གང་སྟེ་སྙིང་ག་ཡི༔ གྭ་འུའི་ཁ་བྱེ་ཏྲཱཾ་ལ་ཐིམ༔ སྟེང་འོག་རིན་ཆེན་ཁ་བསྒྲིགས་ཏེ༔ རིན་ཆེན་ལུ་གུ་རྒྱུད་ཀྱིས་བཅིངས༔ ཡོན་ཏན་ཚེ་དབང་ཐོབ་པར་གྱུར༔ ཨོཾ་ན་མོ་བྷ་ག་བ་ཏེ་རཏྣ་སཾ་བྷ་ཝ་ཨ་པ་རི་སོགས་མཐར་ གུ་ཎ་ཨཱ་ཡུརྫྙཱ་ན་ཨ་བྷི་ཥིཉྩ་ཏྲཱཾ༔ ཧཱུྃ༔ སོར་རྟོག་ཡེ་ཤེས་བུམ་པ་རུ༔ པདྨ་རིགས་ཀྱི་ལྷ་ཚོགས་བཞུགས༔ ཚེ་བཅུད་འདུས་པའི་དབང་བསྐུར་བས༔ བདུད་རྩི་བུམ་པའི་ཁ་ནས་ལྷུད༔ ལུས་ནང་གང་སྟེ་སྙིང་ག་ཡི༔ གྭ་འུའི་ཁ་བྱེ་ཧྲཱིཿལ་ཐིམ༔ སྟེང་འོག་པདྨ་ཁ་བསྒྲིགས་ཏེ༔ པདྨའི་ལུ་གུ་རྒྱུད་ཀྱིས་བཅིངས༔ གསུང་གི་ཚེ་དབང་ཐོབ་པར་གྱུར༔ ཨོཾ་ན་མོ་བྷ་ག་བ་ཏེ་པདྨ་དྷ་ར་ཨ་པ་རི་མི་ཏ་སོགས་མཐར་ ཝཱ་ཀ་ཨཱ་ཡུརྫྙཱ་ན་ཨ་བྷི་ཥིཉྩ་ཧྲཱི༔ ཧཱུྃ༔ བྱ་གྲུབ་ཡེ་ཤེས་བུམ་པ་རུ༔ ལས་རབ་རིགས་ཀྱི་ལྷ་ཚོགས་བཞུགས༔ ཚེ་བཅུད་འདུས་པའི་དབང་བསྐུར་བས༔ བདུད་རྩི་བུམ་པའི་ཁ་ནས་ལྷུད༔ ལུས་ནང་གང་སྟེ་སྙིང་ག་ཡི༔ གྭའུའི་ཁ་བྱེ་ཨཱཿལ་ཐིམ༔ སྟེང་འོག་རྒྱ་གྲམ་ཁ་བསྒྲིགས་ཏེ༔ རྒྱ་གྲམ་ལུ་གུ་རྒྱུད་ཀྱིས་བཅིངས༔ ཕྲིན་ལས་ཚེ་དབང་ཐོབ་པར་གྱུར༔ ཨོཾ་ན་མོ་བྷ་ག་བ་ཏེ་ཨ་མོ་གྷ་ཨ་པ་རི་མི་ཏ་སོགས་མཐར་ ཀརྨ་ཨཱ་ཡུརྫྙཱ་ན་ཨ་བྷི་ཥིཉྩ་ཨཱ༔ དམ་རྫས་ཚེ་ཚང་ལོངས་སྤྱོད་ཅིང༔ ཧཱུྃ་ཧྲཱི༔ མི་འགྱུར་ཚེ་ལ་ལོངས་སྤྱོད་ཕྱིར༔ བྱང་ཆུབ་སེམས་ཀྱི་རང་བཞིན་རྣམས༔ རྡོ་རྗེ་ལྕེ་ཡིས་དྲངས་ནས་སུ༔ སྙིང་གར་སྲོག་གི་ངོ་བོར་གནས༔ བདེ་སྟོང་ཡེ་ཤེས་རབ་འཕེལ་ཏེ༔ བགྲེས་རྒུད་མེད་པའི་ཚེ་ཐོབ་ཤོག༔ ཨོཾ་ན་མོ་བྷ་ག་བ་ཏེ་ཨ་པ་རི་མི་ཏ་སོགས་མཐར་ ན་མོ་ཨཱ་ཡུརྫྙཱ་ན་ཚེ་བྷྲཱུྃ༔ སྐབས་འདིར་ཟབ་པའི་ཚེ་བསྡུ་ལ༔ གལ་ཆེན་གུད་བྱང་བཞིན་དུ་བྱ༔ དེ་ནས་ཚེ་སྦ་རྒྱས་གདབ་ནི༔ ཧཱུྃ་ཧྲཱི༔ སྙིང་གའི་ཉི་ཟླའི་གྭ་འུ་རིགས་ལྔ་པོ༔ ཕྱག་མཚན་ལྔས་མཚན་གཞི་ཡི་ཁམས་ལྔ་དང༔ དབྱེར་མེད་གདོད་ནས་མི་འགྱུར་ངང་དུ་གནས༔ སྐྱེ་འཆི་འཕོ་མེད་ཀ་དག་ཆེན་པོར་བཞུགས༔ རྟེན་འབྲེལ་སྙིང་པོ་བཟླ་བཞིན་པས༔ ཚེ་ནས་འཐོར་ཞིང་བརྟན་པར་བྱ༔ ཚོགས་འཁོར་གཏོར་སྐྱོང་དཀྱིལ་འཁོར་བསྡུ༔ མཚམས་གྲོལ་སྨོན་ལམ་བཀྲ་ཤིས་དང༔ གཏེར་སྦ་གནས་སྲུང་ཅི་རིགས་བྱ༔ དེས་ནི་འཆི་མེད་ཚེ་དབང་ཐོབ༔ བགྲེས་མེད་སྐུ་དང་རྒུད་མེད་གསུང༔ འཕོ་མེད་བདེ་ཆེན་ཐུགས་ལ་སོགས༔ འདོད་པའི་དངོས་གྲུབ་འབད་མེད་འབྱུང༔ དེ་ཕྱིར་འདི་ལ་བརྩོན་པར་གྱིས༔ མི་འཛད་རིན་ཆེན་གཏེར་དུ་སྦོས༔ ས་མ་ཡ༔ རྒྱ་རྒྱ་རྒྱ༔ ༁ྃཿ ཟབ་བདུན་རྒྱུད་ཟབ་སྒྱུ་འཕྲུལ་ལས༔ ཚེ་སྐོར་གསོ་བ་གསུམ་ལྡན་བཞུགས་སོ༔ ཚེ་བདག་རྣམས་ལ་གུས་ཕྱག་འཚལ༔ གསོ་བ་གསུམ་ལྡན་གདམས་པ་ནི༔ དང་པོ་ཚེ་ཉམས་གསོ་བ་ནི༔ ཕྱི་བཤགས་ལ་སོགས་ཚུལ་བཞིན་བྱ༔ ནུས་ལྡན་བྱིན་རླབས་རྩལ་ཆེ་བའི༔ བླ་མ་དག་ལ་མཉེས་པ་བསྒྲུབ༔ ཚེ་ཡི་དབང་བསྐུར་བརྒྱ་རྩ་ཞུ༔ ཆོས་སྐྱོང་བྲན་དུ་ཁོལ་བ་ཡི༔ སྔགས་པས་བླ་ཚེ་ཡང་ཡང་བཀུག༔ རང་ཉིད་ཚེ་ཡི་སྒྲུབ་པ་བཞིན༔ དཀྱིལ་འཁོར་རྟེན་མཆོད་ལེགས་པར་བཤམ༔ ཚེ་ཡི་ཕྲིན་ལས་རྒྱས་བསྡུས་སོགས༔ བསྐྱེད་རིམ་ས་མཱ་དྷི་ལ་གནས༔ ཕྱི་ནང་གསང་གསུམ་རྩ་རླུང་ཐིག༔ འཁྲུལ་འཁོར་རྣམས་ཀྱིས་ཚེ་སྤེལ་ཞིང༔ ཐུན་མཚམས་རྣམས་སུ་རིགས་ལྔ་ཡི༔ རིམ་པར་སོ་སོའི་སྐུ་རུ་བསྒོམ༔ ཤར་གྱི་ཕྱོགས་སུ་ཁ་བལྟས་ཏེ༔ མི་བསྐྱོད་ཚེ་དཔག་མེད་དུ་བསྒོམ༔ ཐུགས་སྲོག་ལས་ནི་འོད་འཕྲོས་པས༔ འདས་པའི་རྡོ་རྗེ་རིགས་ཀྱི་ཚེ༔ འཁོར་བའི་སྐྱེ་འགྲོ་བྲམ་ཟེའི་རིགས༔ དྲི་ཟ་མེ་ལྷ་ལ་སོགས་པའི༔ ཚེ་དང་དབང་ཐང་བསོད་ནམས་དང༔ ཁ་དོག་དཀར་བའི་རིན་ཆེན་སྨན༔ གླང་ཆེན་ལ་སོགས་བྱོལ་སོང་རིགས༔ འབྱུང་བ་ཆུ་ཡི་བཅུད་རྣམས་ནི༔ ཡི་གེ་ཧཱུྃ་གི་རྣམ་པར་བྱས༔ འོད་ཟེར་སྔོན་པོར་ཞུ་ནས་སུ༔ འུབ་ཀྱིས་བསྡུས་ཏེ་རླུང་དང་འགྲོགས༔ ཁ་ཡི་ནང་ནས་ཚུར་བྱུང་སྟེ༔ ལུས་ཀྱི་ནང་ཀུན་གང་བ་དང༔ སྙིང་གའི་ཧཱུྃ་ལ་ཐིམ་པར་བསམ༔ ཁ་ཡིས་ཧུབ་ཧུབ་ལྟོ་བར་བསྐྱིལ༔ བུམ་པ་ཅན་གྱི་སྦྱོར་བ་བརྩམ༔ དབྱིངས་རིག་བསྲེ་ཞིང་དལ་བུས་བཏང༔ སྐབས་སུ་གེགས་སེལ་ཧ་སྤྲུག་བྱ༔ དེ་བཞིན་ལྷོ་རུ་་་་ནུབ་བྱང་དབུས་བཅས་འཕྲུལ་ཞེས་གསུངས། མཆན།་་་་་ཁ་བལྟས་ཏེ༔ རིན་འབྱུང་ཚེ་དཔག་མེད་དུ་བསྒོམ༔ དམིགས་པའི་འཕྲོ་འདུ་སྔར་བཞིན་ནོ༔ དེ་ཚེ་རྟགས་ཀྱི་རིམ་པ་ཡང༔ དངོས་སུ་ཚེ་ལྷའི་ཞལ་མཐོང་ཞིང༔ ལུས་ནི་འཇའ་ལུས་རྡོ་རྗེའི་སྐུ༔ ངག་ནི་ཚངས་པའི་དབྱངས་དང་ལྡན༔ ཡིད་ནི་ལྟ་བའི་གདིང་དང་ལྡན༔ ཡོན་ཏན་ཚེ་ལ་ཟད་པ་མེད༔ ཕྲིན་ལས་འགྲོ་བ་མཐའ་ཡས་སྒྲོལ༔ གཞན་ཡང་རྟེན་ལས་འོད་འཕྲོ་ཞིང༔ བུམ་ཆུ་ཚེ་ཆང་བུམ་རྫས་ཁོལ༔ མར་མེ་འཕེལ་ཞིང་གཏོར་མ་ལ༔ འཇའ་ཟུག་བདུད་རྩི་འབབ་པ་དང༔ ཚེ་མདའ་འཕེལ་ཞིང་སྔགས་སྒྲ་ཐོས༔ རྨི་ལམ་ལ་ཡང་ཉི་ཟླ་ཤར༔ རི་རྩེར་འཛེགས་དང་མཆོད་རྟེན་མཐོང༔ སཱཙྪ་གདབ་དང་འབྲུ་མང་རྙེད༔ གོས་བཟང་རྒྱན་ཐོགས་ཕྲེང་བ་ལེགས༔ དབྱར་གྱི་དུས་སུ་གྱུར་པ་རྨིས༔ ཚེ་ཉམས་སོས་པའི་རྟགས་ཡིན་པས༔ དབང་དང་དངོས་གྲུབ་བླང་བར་བྱ༔ གལ་ཏེ་དེ་ལས་ལྡོག་པ་ན༔ སྤོགས་པའི་ཆོ་ག་ཡང་ཡང་བྱ༔ དེ་ནི་ཚེ་ཉམས་གསོ་བ་འོ༔ གཉིས་པ་བསོད་ནམས་ཉམས་པ་དག༔ གསོ་བའི་ཐབས་ནི་འདི་ལྟ་སྟེ༔ ཕྱི་བཤགས་ལ་སོགས་ཚུལ་བཞིན་བྱ༔ སྟེགས་བུ་བ་བྱུང་ལྔ་ཡིས་བྱུགས༔ གནས་ཁང་རྒྱན་གྱིས་ལེགས་པར་བརྒྱན༔ མཚན་ཉིད་ལྡན་པའི་རིག་མར་བཅས༔ ཐིག་གདབ་དཀྱིལ་འཁོར་བྲི་བ་ནི༔ ཕྲིན་ལས་རྒྱས་པ་བཞིན་དུ་འབྲི༔ ལྡིང་ཁྲི་རིམ་པ་གསུམ་བཤམས་ལ༔ སྤོས་དང་རོལ་མོར་བཅས་པ་ཡིས༔ སྐུ་གསུང་ཐུགས་རྟེན་བརྩེགས་མར་བཞུགས༔ ཕྱོགས་བཞི་དབུས་ལྔར་བུམ་པ་བཤམ༔ རྟེན་མདའ་ལས་བཞིའི་མདའ་དར་དང༔ དམ་རྫས་ཚེ་གལ་ཚེ་རིལ་བཤམ༔ སྨན་རཀ་གཏོར་གསུམ་ཞལ་ཟས་ཚོགས༔ སྣང་གསལ་མར་མེ་ལ་སོགས་པའི༔ མཆོད་པ་བརྒྱ་དང་རྩ་བརྒྱད་བཤམ༔ རལ་གྲི་ཕུར་པ་མེ་ལོང་མདའ༔ དར་སྣ་བ་དན་རྒྱལ་མཚན་དང༔ ཚོན་སྐུད་དྲྭ་བས་དཀྱིལ་འཁོར་བརྒྱན༔ ཚེ་ཡི་ཕྲིན་ལས་རྒྱས་པར་བཏང༔ དེ་ནས་བསོད་ནམས་གསག་པའི་ཕྱིར༔ དང་པོ་ཕྱི་མཆོད་འབུལ་བ་ནི༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་ཚོགས་གཉིས་གསག་པའི་ཕྱིར༔ སྟོང་གསུམ་འདིའམ་སྟོང་གསུམ་གཞན་དག་ན༔ ཡན་ལག་བརྒྱད་ལྡན་ཆུ་བོ་ཐམས་ཅད་ཀུན༔ དག་པ་བདུད་རྩི་ཡིད་འོང་ཁྲུས་ཀྱི་ཆབ༔ རྒྱལ་བའི་སྐུ་ལ་རྙོག་པ་མི་མངའ་ཡང༔ བདག་སོགས་སེམས་ཅན་སྒྲིབ་གཉིས་དག་པའི་ཕྱིར༔ རྒྱལ་བའི་སྐུ་ལ་ཁྲུས་ཆབ་འདི་གསོལ་བས༔ ལུས་ངག་ཡིད་གསུམ་སྡིག་སྒྲིབ་ཀུན་དག་ནས༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་བསོད་ནམས་གསག་པའི་ཕྱིར༔ སྟོང་གསུམ་འདི་འམ་སྟོང་གསུམ་གཞན་དག་ན༔ དག་བྱེད་སྨན་དང་དྲི་ལྡན་སྤོས་ཆུའི་རིགས༔ ཡིད་དུ་འོང་བ་ནམ་མཁའ་ཁྱབ་པར་སྦྲེང༔ རྒྱལ་བའི་སྐུ་ལ་དྲི་མ་མི་མངའ་ཡང༔ བདག་སོགས་སེམས་ཅན་སྒྲིབ་གཉིས་དག་པའི་ཕྱིར༔ རྒྱལ་བའི་ཕྱག་ཞབས་མ་ལུས་ཀུན་བསིལ་བས༔ ཉོན་མོངས་ཤེས་བྱའི་སྒྲིབ་པ་ཀུན་དག་ནས༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་བསོད་ནམས་གསག་པའི་ཕྱིར༔ སྟོང་གསུམ་འདིའམ་སྟོང་གསུམ་གཞན་དག་ན༔ མཛེས་པའི་མེ་ཏོག་ངོ་མཚར་བལྟ་ན་སྡུག༔ རིན་ཆེན་ཕྲེང་བ་རྣམ་པ་སྣ་ཚོགས་པ༔ རྒྱལ་བའི་སྐུ་ལ་ཡེ་ཤེས་རྒྱན་མངའ་ཡང༔ བདག་སོགས་སེམས་ཅན་མཚན་དཔེའི་དཔལ་འབར་ཕྱིར༔ རིན་ཆེན་མེ་ཏོག་ཕྲེང་བས་སྐུར་བརྒྱན་པས༔ མཚན་དང་དཔེ་བྱད་འབར་བའི་ལུས་ཐོབ་སྟེ༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་ཚོགས་གཉིས་གསག་པའི་ཕྱིར༔ སྟོང་གསུམ་འདིའམ་སྟོང་གསུམ་གཞན་དག་ན༔ ལྷན་སྐྱེས་དྲི་དང་སྦྱར་བའི་དྲི་བཟང་དྲི༔ ཚོར་བ་ཙམ་གྱིས་བདེ་བ་སྐྱེད་པའི་སྤྲིན༔ རྒྱལ་བའི་སྐུ་ལ་སྨེ་གཙང་མི་མངའ་ཡང༔ བདག་སོགས་སེམས་ཅན་མི་གཙང་སྒྲིབ་བྲལ་ཕྱིར༔ སྣ་ཚོགས་དྲི་བཟང་བདུག་སྤོས་འདི་ཕུལ་བས༔ ཚུལ་ཁྲིམས་ཉམས་སོགས་ཉམས་པ་ཀུན་སངས་ཏེ༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་ཚོགས་གཉིས་གསག་པའི་ཕྱིར༔ སྟོང་གསུམ་འདི་འམ་སྟོང་གསུམ་གཞན་དག་ན༔ འབྲུ་དང་རྩི་མར་ཤིང་བལ་མེ་དང་སྦྱར༔ ཉི་ཟླ་ལ་སོགས་སྣང་གསལ་ཇི་སྙེད་པ༔ རྒྱལ་བའི་ཐུགས་ལ་རྨོངས་པ་མི་མངའ་ཡང༔ བདག་སོགས་སེམས་ཅན་མ་རིག་བསལ་བའི་ཕྱིར༔ རིན་ཆེན་སྒྲོན་མེ་བཟང་པོ་འདི་ཕུལ་བས༔ ཡེ་ཤེས་སྣང་བ་མ་ལུས་རབ་རྒྱས་ཏེ༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་བསོད་ནམས་གསག་པའི་ཕྱིར༔ སྟོང་གསུམ་འདི་འམ་སྟོང་གསུམ་གཞན་དག་ན༔ སིམ་པ་སྐྱེད་པའི་སྨན་མཆོག་ཇི་སྙེད་པ༔ བདེ་བ་སྐྱེད་པའི་ཆབ་དང་རབ་སྦྱར་ཏེ༔ བདག་སོགས་སེམས་ཅན་ཉོན་མོངས་སྦྱོང་བའི་ཕྱིར༔ རྒྱལ་བའི་ཐུགས་ལ་དྲི་ཆབ་འདི་ཕུལ་བས༔ བྱང་ཆུབ་སེམས་ཀྱི་བསླབ་པས་བློ་སྦྱངས་ཏེ༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་བསོད་ནམས་གསག་པའི་ཕྱིར༔ སྟོང་གསུམ་འདི་འམ་སྟོང་གསུམ་གཞན་དག་ན༔ དཀར་གསུམ་མངར་གསུམ་ཤིང་ཐོག་སྣ་ཚོགས་དང༔ འབྲུ་ཡི་རིགས་སོགས་ཞལ་ཟས་ཡོངས་སྦྱར་རྣམས༔ རྒྱལ་བའི་སྐུ་ལ་བཀྲེས་པ་མི་མངའ་ཡང༔ བདག་སོགས་སེམས་ཅན་སེར་སྣའི་སྒྲིབ་སྦྱོང་ཕྱིར༔ རྒྱལ་བའི་སྐུ་ལ་ཞལ་ཟས་འདི་ཕུལ་བས༔ ཏིང་ངེ་འཛིན་གྱི་ཟས་ལ་ལོངས་སྤྱོད་ཅིང༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཚེ་དབང་རིག་འཛིན་དང༔ དཔའ་བོ་མཁའ་འགྲོ་ཆོས་སྐྱོང་བཅས་པ་ལ༔ བདག་སོགས་སེམས་ཅན་བསོད་ནམས་གསག་པའི་ཕྱིར༔ སྟོང་གསུམ་འདི་འམ་སྟོང་གསུམ་གཞན་དག་ན༔ སྙན་པའི་དབྱངས་དང་འགྱུར་བའི་གླུ་ལ་སོགས༔ རོལ་མོའི་ཟློས་གར་བསམ་གྱིས་མི་ཁྱབ་པ༔ རྒྱལ་རྣམས་གསུང་དབྱངས་དྲུག་ཅུར་རབ་ལྡན་ཀྱང༔ སེམས་ཅན་མོས་པའི་ཆོས་སྒྲ་ཐོས་པའི་ཕྱིར༔ རྒྱལ་བ་རྣམས་ལ་རོལ་མོ་འདི་ཕུལ་བས༔ གསུང་དབྱངས་ཡན་ལག་དྲུག་ཅུ་རབ་ཐོབ་ཅིང༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ མཆོད་པ་ཐོགས་ནས་དཀྱིལ་འཁོར་བསྐོར༔ བསྟོད་དབྱངས་རོལ་མོ་བཅས་པས་འབུལ༔ དེ་ནས་ནང་མཆོད་འབུལ་བ་ནི༔ ཧཱུྃ༔ སྤྱི་གཙུག་བདེ་ཆེན་བྷནྡྷ་རུ༔ གོ་རོ་ཙ་ནའི་བདུད་རྩིས་བཀང༔ འདི་ནི་བདུད་རྩི་སྨན་གྱི་མཆོག༔ ཚེ་ཡི་ལྷ་ཚོགས་ཐུགས་དམ་བསྐང༔ མགྲིན་པ་ལོངས་སྤྱོད་བྷནྡྷ་རུ༔ དམར་གསལ་བྱང་སེམས་བདུད་རྩིས་བཀང༔ འདི་ནི་བདུད་རྩི་སྨན་གྱི་མཆོག༔ ཚེ་ཡི་ལྷ་ཚོགས་ཐུགས་དམ་བསྐང༔ སྙིང་ག་ཆོས་དབྱིངས་བྷནྡྷ་རུ༔ བྱང་ཆུབ་སེམས་ཀྱི་བདུད་རྩིས་བཀང༔ འདི་ནི་བདུད་རྩི་སྨན་གྱི་མཆོག༔ ཚེ་ཡི་ལྷ་ཚོགས་ཐུགས་དམ་བསྐང༔ ལྟེ་བ་སྤྲུལ་པའི་བྷནྡྷ་རུ༔ སེར་གསལ་དྲི་ཆེན་བདུད་རྩིས་བཀང༔ འདི་ནི་བདུད་རྩི་སྨན་གྱི་མཆོག༔ ཚེ་ཡི་ལྷ་ཚོགས་ཐུགས་དམ་བསྐང༔ གསང་བ་བདེ་སྐྱོང་བྷནྡྷ་རུ༔ དག་བྱེད་དྲི་ཆུའི་བདུད་རྩིས་བཀང༔ འདི་ནི་བདུད་རྩི་སྨན་གྱི་མཆོག༔ ཚེ་ཡི་ལྷ་ཚོགས་ཐུགས་དམ་བསྐང༔ དེ་ནས་གསང་མཆོད་འབུལ་བ་ནི༔ ཧཱུྃ༔ གཏི་མུག་བསྒྲལ་བའི་བྷནྡྷ་རུ༔ ཆོས་ཀྱི་དབྱིངས་ཀྱི་རཀྟས་བཀང༔ ཆགས་མེད་རཀྟའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ འདོད་ཆགས་བསྒྲལ་བའི་བྷནྡྷ་རུ༔ སོར་རྟོག་ཡེ་ཤེས་རཀྟས་བཀང༔ ཆགས་མེད་རཀྟའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ ཞེ་སྡང་བསྒྲལ་བའི་བྷནྡྷ་རུ༔ མེ་ལོང་ཡེ་ཤེས་རཀྟས་བཀང༔ ཆགས་མེད་རཀྟའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ ང་རྒྱལ་བསྒྲལ་བའི་བྷནྡྷ་རུ༔ མཉམ་ཉིད་ཡེ་ཤེས་རཀྟས་བཀང༔ ཆགས་མེད་རཀྟའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ ཕྲག་དོག་བསྒྲལ་བའི་བྷནྡྷ་རུ༔ བྱ་གྲུབ་ཡེ་ཤེས་རཀྟས་བཀང༔ ཆགས་མེད་རཀྟའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ དེ་ཁོ་ན་ཉིད་ཀྱི་མཆོད་པ་ནི༔ ཧཱུྃ༔ ཞིང་ཆེན་པགས་པའི་གཏོར་གཞོང་དུ༔ ཤ་དང་རུས་པའི་གཏོར་མ་བཤམས༔ དབང་པོ་རྣམ་པ་ལྔ་ཡིས་བརྒྱན༔ ཚེ་ཡི་ལྷ་ཚོགས་ཐུགས་དམ་བསྐང༔ འཁོར་ལོ་ལྔ་ཡི་གཏོར་གཞོང་དུ༔ བདུད་རྩི་ལྔ་ཡི་གཏོར་མ་བཤམས༔ དོན་སྣོད་ལྔ་ཡིས་བརྒྱན་པ་འདིས༔ ཚེ་ཡི་ལྷ་ཚོགས་ཐུགསྎ དྭངས་གསལ་རྩ་ཡི་གཏོར་གཞོང་དུ༔ ཡེ་ཤེས་ཀློང་ལྔའི་གཏོར་མ་བཤམས༔ དཀར་དམར་ཐིག་ལེས་བརྒྱན་པ་འདིས༔ ཚེ་ཡི་ལྷ་ཚོགས་ཐུགསྎ ཐབས་དང་ཤེས་རབ་གཏོར་གཞོང་དུ༔ རྩ་རླུང་ཐིག་ལེའི་གཏོར་མ་བཤམས༔ བདེ་བ་ཆེན་པོས་བརྒྱན་པ་འདིས༔ ཚེ་ཡི་ལྷ་ཚོགས་ཐུགསྎ ཀུན་ཁྱབ་དབྱིངས་ཀྱི་གཏོར་གཞོང་དུ༔ རང་གསལ་ཡེ་ཤེས་གཏོར་མ་བཤམས༔ སྣ་ཚོགས་སྣང་བས་བརྒྱན་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ ཕྱི་ནང་གསང་གསུམ་ཁོ་ན་ཉིད༔ ཐམས་ཅད་འདུས་པའི་མཆོད་པ་ནི༔ ཧཱུྃ༔ ཐབས་དང་ཤེས་རབ་བྷནྡྷ་རུ༔ དགའ་བའི་རང་བཞིན་ཚོགས་གཏོར་བཤམས༔ རྨད་དུ་བྱུང་བའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ གཉིས་མེད་མཉམ་སྦྱོར་བྷནྡྷ་རུ༔ མཆོག་གི་དགའ་བའི་ཚོགས་གཏོར་བཤམས༔ རྨད་དུ་བྱུང་བའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ དཀར་དམར་འབབ་པའི་བྷནྡྷ་རུ༔ ཁྱད་པར་དགའ་བའི་ཚོགས་གཏོར་བཤམས༔ རྨད་དུ་བྱུང་བའི་མཆོད་པ་འདིས༔ ཚེ་ཡི་ལྷ་ཚོགས་ཐུགསྎ བྱང་སེམས་འདྲེས་པའི་བྷནྡྷ་རུ༔ དགའ་བྲལ་ཡེ་ཤེས་ཚོགས་གཏོར་བཤམས༔ རྨད་དུ་བྱུང་བའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ བདེ་བ་གྱེན་འཁྱིལ་བྷནྡྷ་རུ༔ ལུག་ལྡོག་དགའ་བཞིའི་ཚོགས་གཏོར་བཤམས༔ རྨད་དུ་བྱུང་བའི་མཆོད་པ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ མཉམ་རྫོགས་ཡེ་ཤེས་མཆོད་པ་ནི༔ ཧཱུྃ༔ ཕུང་པོ་ལུས་ཀྱི་ཀོང་བུ་རུ༔ རྩ་གསུམ་འཁོར་ལོའི་སྡོང་བུ་བཙུགས༔ བདུད་རྩི་རྣམ་ལྔའི་མར་ཁུས་གཏམས༔ ཡེ་ནས་དག་པའི་མེ་སྦར་བ༔ རྨད་དུ་བྱུང་བའི་སྣང་གསལ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ ཡབ་ཡུམ་ཐབས་ཤེས་ཀོང་བུ་རུ༔ བྱང་ཆུབ་སེམས་ཀྱི་མར་ཁུས་གཏམས༔ རླུང་གི་འགྲོ་འོང་སྡོང་བུ་བཙུགས༔ བདེ་བ་ཆེན་པོའི་མེ་སྦར་བ༔ རྨད་དུ་བྱུང་བའི་སྣང་གསལ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ སྣང་བ་བདེ་བའི་ཀོང་བུ་རུ༔ མཆེད་པ་གསལ་བའི་མར་ཁུས་གཏམས༔ ཐོབ་པ་མི་རྟོག་སྡོང་བུ་བཙུགས༔ འོད་གསལ་ཡེ་ཤེས་མེ་སྦར་བ༔ རྨད་དུ་བྱུང་བའི་སྣང་གསལ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ ཡུལ་སྣང་སྟོང་པའི་ཀོང་བུ་རུ༔ དབང་པོའི་བྱེད་ལས་མར་ཁུས་གཏམས༔ རྣམ་ཤེས་ཚོགས་བརྒྱད་སྡོང་བུ་བཙུགས༔ གཉིས་མེད་སྤྲོས་བྲལ་མེ་སྦར་བ༔ རྨད་དུ་བྱུང་བའི་སྣང་གསལ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ སྐྱེ་བ་མེད་པའི་ཀོང་བུ་རུ༔ འགག་པ་མེད་པའི་མར་ཁུས་གཏམས༔ འགྲོ་འོང་གནས་མེད་སྡོང་བུ་བཙུགས༔ ཕྱི་ནང་ཟང་ཐལ་མེ་སྦར་བ༔ རྨད་དུ་བྱུང་བའི་སྣང་གསལ་འདིས༔ ཚེ་ཡི་ལྷ་ཚོགས་ཐུགས་དམ་བསྐང༔ རྩེ་གཅིག་སྨོན་ལམ་བཏབ་པ་ནི༔ ཧཱུྃ་ཧྲཱི༔ སྣང་བའི་རྩལ་རྫོགས་ཚེ་ལྷའི་དཀྱིལ་འཁོར་འདིར༔ ཕྱི་ནང་གསང་བ་དེ་ཁོ་ན་ཉིད་ཀྱི༔ རྨད་བྱུང་མཆོད་པ་རྒྱ་མཚོ་འདི་ཕུལ་བས༔ ཚེ་དབང་རིག་པ་འཛིན་རྣམས་མཉེས་གྱུར་ཅིག༔ ཚེ་ལྷ་རྒྱལ་བ་རིགས་ལྔའི་ཐུགས་དམ་བསྐང༔ འཁོར་ཚོགས་སྤྲུལ་པ་སྲས་བཅས་རབ་མཉེས་ཏེ༔ དམ་ཚིག་ཉམས་ཆག་ཐམས་ཅད་བསྐང་གྱུར་ཅིག༔ རྣལ་འབྱོར་བདག་གི་ཉམས་ཆག་སོར་ཆུད་ནས༔ ཚེ་དང་ཡེ་ཤེས་དངོས་གྲུབ་ཐོབ་པར་ཤོག༔ གཉིས་པ་བསྟོད་པ་བྱ་བ་ནི༔ ཧཱུྃ་ཧྲཱི༔ ཆོས་དབྱིངས་ཡེ་ཤེས་བཅོམ་ལྡན་ཚེ་ཡི་བདག༔ དཀར་གསལ་ཞལ་གཅིག་ཕྱག་གཉིས་ལོངས་སྤྱོད་རྫོགས༔ ཚེ་ཡི་བུམ་པ་བཅུད་ལྡན་འཁོར་ལོ་བསྣམས༔ རྣམ་སྣང་ཚེ་དཔག་མེད་ལ་ཕྱག་འཚལ་བསྟོད༔ མཁའ་ཁམས་རྣམ་དག་དཀར་མོ་ལང་ཚོ་ཅན༔ དྲིལ་བུ་ཚེ་བུམ་འཛིན་པས་ཡབ་ལ་འཁྱུད༔ བདེ་ཆེན་ཡེ་ཤེས་ཚེ་དབང་སྩོལ་མཛད་མ༔ ཡུམ་མཆོག་དབྱིངས་ཕྱུག་མ་ལ་ཕྱག་འཚལ་བསྟོད༔ ཧཱུྃ་ཧྲཱི༔ མེ་ལོང་ཡེ་ཤེས་བཅོམ་ལྡན་ཚེ་ཡི་བདག༔ མཐིང་གསལ་ཞལ་གཅིག་ཕྱག་གཉིས་ལོངས་སྤྱོད་རྫོགས༔ ཚེ་ཡི་བུམ་པ་བཅུད་ལྡན་རྡོ་རྗེ་བསྣམས༔ མི་བསྐྱོད་ཚེ་དཔག་མེད་ལ་ཕྱག་འཚལ་བསྟོད༔ ཆུ་ཁམས་རྣམ་དག་མཐིང་གསལ་ལང་ཚོ་ཅན༔ དྲིལ་བུ་ཚེ་བུམ་འཛིན་པས་ཡབ་ལ་འཁྱུད༔ བདེ་ཆེན་ཡེ་ཤེས་ཚེ་དབང་སྩོལ་མཛད་མ༔ ཡུམ་མཆོག་མཱ་མ་ཀི་ལ་ཕྱག་འཚལ་བསྟོད༔ ཧཱུྃ་ཧྲཱི༔ མཉམ་ཉིད་ཡེ་ཤེས་བཅོམ་ལྡན་ཚེ་ཡི་བདག༔ སེར་གསལ་ཞལ་གཅིག་ཕྱག་གཉིས་ལོངས་སྤྱོད་རྫོགས༔ ཚེ་ཡི་བུམ་པ་བཅུད་ལྡན་རིན་ཆེན་བསྣམས༔ རིན་འབྱུང་ཚེ་དཔག་མེད་ལ་ཕྱག་འཚལ་བསྟོད༔ ས་ཁམས་རྣམ་དག་སེར་མོ་ལང་ཚོ་ཅན༔ དྲིལ་བུ་ཚེ་བུམ་འཛིན་པས་ཡབ་ལ་འཁྱུད༔ བདེ་ཆེན་ཡེ་ཤེས་ཚེ་དབང་སྩོལ་མཛད་མ༔ ཡུམ་མཆོག་སངས་རྒྱས་སྤྱན་ལ་ཕྱག་འཚལ་བསྟོད༔ ཧཱུྃ་ཧྲཱི༔ སོར་རྟོག་ཡེ་ཤེས་བཅོམ་ལྡན་ཚེ་ཡི་བདག༔ དམར་གསལ་ཞལ་གཅིག་ཕྱག་གཉིས་ལོངས་སྤྱོད་རྫོགས༔ ཚེ་ཡི་བུམ་པ་བཅུད་ལྡན་པདྨ་བསྣམས༔ མཐའ་ཡས་ཚེ་དཔག་མེད་ལ་ཕྱག་འཚལ་བསྟོད༔ མེ་ཁམས་རྣམ་དག་དམར་མོ་ལང་ཚོ་ཅན༔ དྲིལ་བུ་ཚེ་བུམ་འཛིན་པས་ཡབ་ལ་འཁྱུད༔ བདེ་ཆེན་ཡེ་ཤེས་ཚེ་དབང་སྩོལ་མཛད་མ༔ ཡུམ་མཆོག་གོས་དཀར་མོ་ལ་ཕྱག་འཚལ་བསྟོད༔ ཧཱུྃ་ཧྲཱི༔ བྱ་གྲུབ་ཡེ་ཤེས་བཅོམ་ལྡན་ཚེ་ཡི་བདག༔ ལྗང་གསལ་ཞལ་གཅིག་ཕྱག་གཉིས་ལོངས་སྤྱོད་རྫོགས༔ ཚེ་ཡི་བུམ་པ་བཅུད་ལྡན་རྒྱ་གྲམ་བསྣམས༔ དོན་གྲུབ་ཚེ་དཔག་མེད་ལ་ཕྱག་འཚལ་བསྟོད༔ རླུང་ཁམས་རྣམ་དག་ཡུམ་མཆོག་དམ་ཚིག་སྒྲོལ༔ དྲིལ་བུ་ཚེ་བུམ་འཛིན་པས་ཡབ་ལ་འཁྱུད༔ བདེ་ཆེན་ཡེ་ཤེས་ཚེ་དབང་སྩོལ་མཛད་མ༔ ཡུམ་མཆོག་དམ་ཚིག་སྒྲོལ་མར་ཕྱག་འཚལ་བསྟོད༔ ཧཱུྃ་ཧྲཱི༔ བྱེད་པ་རྣམ་དག་མཐིང་ག་མཉམ་གཞག་ཅན༔ ཚེ་བདག་ཀུན་ཏུ་བཟང་པོར་ཕྱག་འཚལ་བསྟོད༔ བྱ་བ་རྣམ་དག་མཐིང་ག་མཉམ་གཞག་ཅན༔ ཚེ་བདག་ཀུན་ཏུ་བཟང་མོར་ཕྱག་འཚལ་བསྟོད༔ བརྩོན་འགྲུས་ཚེ་ལ་མངའ་བརྙེས་ལྷ་ཡི་འཇིག་རྟེན་འདྲེན་པའི་པི་ཝང་འཛིན༔ བརྒྱ་བྱིན་དཀར་པོའི་སྐུ་ལ་ཕྱག་འཚལ་བསྟོད༔ བཟོད་པའི་ཚེ་ལ་མངའ་བརྙེས་ལྷ་མིན་འཇིག་རྟེན་འདྲེན་པའི་གོ་ཆ་བསྣམས༔ ཐགས་བཟང་མཐིང་གའི་སྐུ་ལ་ཕྱག་འཚལ་བསྟོད༔ ཚུལ་ཁྲིམས་ཚེ་ལ་མངའ་བརྙེས་མི་ཡི་འཇིག་རྟེན་འདྲེན་པའི་གསེག་པར་བསྣམས༔ ཐུབ་ཆེན་གསེར་མདོག་ཅན་ལ་ཕྱག་འཚལ་བསྟོད༔ ཤེས་རབ་ཚེ་ལ་མངའ་བརྙེས་བྱོལ་སོང་འཇིག་རྟེན་འདྲེན་པའི་པོ་ཏི་འཛིན༔ སེང་རབ་སྔོན་པོའི་སྐུ་ལ་ཕྱག་འཚལ་བསྟོད༔ སྦྱིན་པའི་ཚེ་ལ་མངའ་བརྙེས་ཡི་དྭགས་འཇིག་རྟེན་འདྲེན་པའི་སྒྲོམ་བུ་འཛིན༔ ཁ་འབར་དམར་པོའི་སྐུ་ལ་ཕྱག་འཚལ་བསྟོད༔ བསམ་གཏན་ཚེ་ལ་མངའ་བརྙེས་དམྱལ་བའི་འཇིག་རྟེན་འདྲེན་པའི་མེ་ཆུ་བསྣམས༔ ཆོས་རྒྱལ་ནག་པོའི་སྐུ་ལ་ཕྱག་འཚལ་བསྟོད༔ ཧཱུྃ་ཧྲཱི༔ རྣམ་ཤེས་ཚོགས་བརྒྱད་གནས་སུ་དག་པ་ཡི༔ ཚེ་བདག་སེམས་དཔའ་བརྒྱད་ལ་ཕྱག་འཚལ་བསྟོད༔ སྐུ་མདོག་དཀར་པོ་མྱུ་གུ་ཚེ་བུམ་འཛིན༔ ཚེ་ལྷ་ས་ཡི་སྙིང་པོར་ཕྱག་འཚལ་བསྟོད༔ སྐུ་མདོག་དཀར་སེར་ཀླུ་ཤིང་ཚེ་བུམ་འཛིན༔ ཚེ་ལྷ་བྱམས་པའི་སྐུ་ལ་ཕྱག་འཚལ་བསྟོད༔ སྐུ་མདོག་སེར་པོ་པོ་ཏི་ཚེ་བུམ་འཛིན༔ ཚེ་ལྷ་ནམ་མཁའི་སྙིང་པོར་ཕྱག་འཚལ་བསྟོད༔ སྐུ་མདོག་དམར་སེར་རལ་གྲི་ཚེ་བུམ་འཛིན༔ ཚེ་ལྷ་སྒྲིབ་པ་སེལ་ལ་ཕྱག་འཚལ་བསྟོད༔ སྐུ་མདོག་དམར་པོ་པདྨ་ཚེ་བུམ་འཛིན༔ ཚེ་ལྷ་སྤྱན་རས་གཟིགས་ལ་ཕྱག་འཚལ་བསྟོད༔ སྐུ་མདོག་དམར་ལྗང་སྙེ་མ་ཚེ་བུམ་འཛིན༔ ཚེ་ལྷ་ཀུན་ཏུ་བཟང་པོར་ཕྱག་འཚལ་བསྟོད༔ སྐུ་མདོག་ལྗང་གུ་རྡོ་རྗེ་ཚེ་བུམ་འཛིན༔ ཚེ་ལྷ་ཕྱག་ན་རྡོ་རྗེར་ཕྱག་འཚལ་བསྟོད༔ སྐུ་མདོག་ལྗང་དཀར་ཨུཏྤལ་ཚེ་བུམ་འཛིན༔ ཚེ་ལྷ་འཇམ་པའི་དབྱངས་ལ་ཕྱག་འཚལ་བསྟོད༔ ཧཱུྃ་ཧྲཱི༔ ཡུལ་བཞི་དུས་བཞི་གནས་སུ་དག་པ་ཡི༔ ཚེ་ལྷ་སེམས་མ་བརྒྱད་ལ་ཕྱག་འཚལ་བསྟོད༔ སྐུ་མདོག་དཀར་མོ་མེ་ལོང་ཚེ་བུམ་འཛིན༔ ཚེ་ལྷ་ལཱ་སྱེ་མ་ལ་ཚེ་འཛིན་སྒེག་པ་མོ་ཕྱག་འཚལ་བསྟོད༔ སྐུ་མདོག་དཀར་སེར་མེ་ཏོག་ཚེ་བུམ་འཛིན༔ ཚེ་ལྷ་པུཥྤེ་མ་ཚེ་འཛིན་མེ་ཏོག་མ་ལ་ཕྱག་འཚལ་བསྟོད༔ སྐུ་མདོག་སེར་མོ་ཕྲེང་བ་ཚེ་བུམ་འཛིན༔ ཚེ་ལྷ་མཱ་ལྱེ་མ་ཚེ་འཛིན་ཕྲེང་བམ་ལ་ཕྱག་འཚལ་བསྟོད༔ སྐུ་མདོག་དམར་སེར་སྤོས་ཁང་ཚེ་བུམ་འཛིན༔ ཚེ་ལྷ་དྷཱུ་པེ་མ་ཚེ་འཛིན་བདུག་སྤོས་མ་ལ་ཕྱག་འཚལ་བསྟོད༔ སྐུ་མདོག་དམར་མོ་པི་ཝང་ཚེ་བུམ་འཛིན༔ ཚེ་ལྷ་གཱིརྟི་མ་ཚེ་འཛིན་གླུ་ལེན་མ་ལ་ཕྱག་འཚལ་བསྟོད༔ སྐུ་མདོག་དམར་ལྗང་སྣང་གསལ་ཚེ་བུམ་འཛིན༔ ཚེ་ལྷ་ཨཱ་ལོ་མ་ཚེ་འཛིན་མར་མེ་མ་ལ་ཕྱག་འཚལ་བསྟོད༔ སྐུ་མདོག་ལྗང་གུ་རྔ་ཡབ་ཚེ་བུམ་འཛིན༔ ཚེ་ལྷ་ནཱིརྟི་མ་ཚེ་འཛིན་གར་བྱེད་མ་ལ་ཕྱག་འཚལ་བསྟོད༔ སྐུ་མདོག་ལྗང་དཀར་དུང་ཆོས་ཚེ་བུམ་འཛིན༔ ཚེ་ལྷ་གནྡྷེ་མ་ཚེ་འཛིན་དྲི་ཆབ་མ་ལ་ཕྱག་འཚལ་བསྟོད༔ གཞན་ཡང་ཡེ་ཤེས་རང་རྩལ་རོལ་པ་ལས༔ ཚེ་ཡི་སྤྲུལ་འཁོར་བཅས་ལ་ཕྱག་འཚལ་བསྟོད༔ དཀར་མོ་གདུགས་དཀར་དང་ནི་ཚེ་བུམ་འཛིན༔ ཚེ་བདག་གདུགས་ཀྱི་ལྷ་མོར་ཕྱག་འཚལ་བསྟོད༔ སྐུ་མདོག་ལྗང་མོ་གཏེར་དང་ཚེ་བུམ་འཛིན༔ ཚེ་བདག་བུམ་པ་ཅན་ལ་ཕྱག་འཚལ་བསྟོད༔ སྐུ་མདོག་དམར་མོ་པདྨ་ཚེ་བུམ་འཛིན༔ ཚེ་བདག་པདྨ་ཅན་ལ་ཕྱག་འཚལ་བསྟོད༔ སྐུ་མདོག་དཀར་མོ་དུང་དཀར་ཚེ་བུམ་འཛིན༔ ཚེ་བདག་དུང་ཅན་མ་ལ་ཕྱག་འཚལ་བསྟོད༔ སྐུ་མདོག་མཐིང་ག་རྒྱལ་མཚན་ཚེ་བུམ་འཛིན༔ ཚེ་བདག་རྒྱལ་མཚན་ཅན་ལ་ཕྱག་འཚལ་བསྟོད༔ སྐུ་མདོག་སེར་མོ་གསེར་ཉ་ཚེ་བུམ་འཛིན༔ ཚེ་བདག་གསེར་ཉ་ཅན་ལ་ཕྱག་འཚལ་བསྟོད༔ སྐུ་མདོག་སེར་མོ་དཔལ་བེའུ་ཚེ་བུམ་འཛིན༔ ཚེ་བདག་དཔལ་བེའུ་ཅན་ལ་ཕྱག་འཚལ་བསྟོད༔ སྐུ་མདོག་སེར་མོ་འཁོར་ལོ་ཚེ་བུམ་འཛིན༔ ཚེ་བདག་འཁོར་ལོ་ཅན་ལ་ཕྱག་འཚལ་བསྟོད༔ ཧཱུྃ་ཧྲཱི༔ མདའ་དར་དཀར་པོ་ཤེལ་གྱི་བུམ་པ་འཛིན༔ དཀར་མོ་མགྱོགས་མའི་སྐུ་ལ་ཕྱག་འཚལ་བསྟོད༔ མདའ་དར་སྔོན་པོ་བཻཌཱུའི་བུམ་པ་འཛིན༔ སྔོན་མོ་མགྱོགས་མའི་སྐུ་ལ་ཕྱག་འཚལ་བསྟོད༔ མདའ་དར་དམར་པོ་བྱེ་རུའི་བུམ་པ་འཛིན༔ དམར་མོ་མགྱོགས་མའི་སྐུ་ལ་ཕྱག་འཚལ་བསྟོད༔ མདའ་དར་ལྗང་གུ་གཡུ་ཡི་བུམ་པ་འཛིན༔ ལྗང་མོ་མགྱོགས་མའི་སྐུ་ལ་ཕྱག་འཚལ་བསྟོད༔ ཧཱུྃ་ཧྲཱི༔ བསྐལ་པ་མེ་ལྟར་འབར་བའི་ཀློང་དཀྱིལ་ནས༔ མཐའ་བཞིའི་ཉོན་མོངས་འཇོམས་པའི་ཁྲོ་བོ་བཞི༔ སྨུག་ནག་འབར་བ་རྡོ་རྗེ་དུང་ཁྲག་འཛིན༔ ཁྲོ་རྒྱལ་མི་གཡོ་བ་ལ་ཕྱག་འཚལ་བསྟོད༔ མཐིང་ནག་ཞིང་གི་དབྱུག་པ་ཐོད་ཁྲག་འཛིན༔ ཁྲོ་རྒྱལ་གཤིན་རྗེའི་གཤེད་ལ་ཕྱག་འཚལ་བསྟོད༔ སྐུ་མདོག་དམར་པོ་ཐོད་དབྱུག་ཐོད་ཁྲག་འཛིན༔ ཁྲོ་རྒྱལ་རྟ་མཆོག་དཔལ་ལ་ཕྱག་འཚལ་བསྟོད༔ ལྗང་ནག་རྒྱ་གྲམ་དབྱུག་པ་ཐོད་ཁྲག་འཛིན༔ ཁྲོ་རྒྱལ་བདུད་རྩི་འཁྱིལ་ལ་ཕྱག་འཚལ་བསྟོད༔ ཧཱུྃ་ཧྲཱི༔ ཚད་མེད་བཞི་ཡི་དབྱིངས་ལས་སྐུར་བཞེངས་མ༔ ཁྲོ་བོའི་སྐུ་ལ་གཉིས་མེད་དགྱེས་པར་འཁྲིལ༔ སྐུ་མདོག་དཀར་མོ་འགུགས་པའི་ལྕགས་ཀྱུ་འཛིན༔ རྡོ་རྗེ་གནོད་སྦྱིན་མ་ལ་ཕྱག་འཚལ་བསྟོད༔ སྐུ་མདོག་སེར་མོ་འཆིང་བྱེད་ཞགས་པ་འཛིན༔ རྡོ་རྗེ་འཇིགས་བྱེད་མ་ལ་ཕྱག་འཚལ་བསྟོད༔ སྐུ་མདོག་དམར་མོ་སྡོམ་བྱེད་ལྕགས་སྒྲོག་འཛིན༔ རྡོ་རྗེ་བདུད་རྩི་མ་ལ་ཕྱག་འཚལ་བསྟོད༔ སྐུ་མདོག་ལྗང་མོ་མྱོས་བྱེད་དྲིལ་བུ་འཛིན༔ རྡོ་རྗེ་གསོད་བྱེད་མ་ལ་ཕྱག་འཚལ་བསྟོད༔ ཧཱུྃ་ཧྲཱི༔ ཚེ་དང་ཡེ་ཤེས་བྱིན་རླབས་གཏེར་གྱི་མཛོད༔ རིག་འཛིན་བླ་མ་རྣམས་ལ་ཕྱག་འཚལ་བསྟོད༔ ཚེ་དང་ཡེ་ཤེས་དངོས་གྲུབ་ཀུན་གྱི་བདག༔ ཡི་དམ་ལྷ་ཚོགས་རྣམས་ལ་ཕྱག་འཚལ་བསྟོད༔ ཚེ་ཡི་བར་ཆད་ཐམས་ཅད་སེལ་བར་མཛད༔ དཔའ་བོ་མཁའ་འགྲོ་རྣམས་ལ་ཕྱག་འཚལ་བསྟོད༔ ཚེ་ལ་གནོད་པའི་བར་ཆད་བགེགས་རྣམས་འདུལ༔ ཆོས་སྐྱོང་སྲུང་མ་རྣམས་ལ་ཕྱག་འཚལ་བསྟོད༔ ཧཱུྃ་ཧྲཱི༔ དེ་ལྟར་རིག་འཛིན་ཚེ་ཡི་ལྷ་ཚོགས་ལ༔ མཆོད་པ་ཕུལ་ཅིང་ཡོན་ཏན་དྲན་པ་ཡིས༔ བསྟོད་ཅིང་གསོལ་བ་བཏབ་པའི་མཐུ་བྱིན་གྱིས༔ ཚེ་དང་ཡེ་ཤེས་དངོས་གྲུབ་ཐོབ་པར་ཤོག༔ ཅེས་བསྟོད་ཐུགས་དམ་བསྐུལ་བ་ནི༔ ཧཱུྃ་ཧྲཱི༔ སྔོན་ཚེ་གདོད་མའི་དབྱིངས་ཀྱི་ཞིང་ཁམས་སུ༔ ཚེ་ཡི་བདག་པོ་ཀུན་ཏུ་བཟང་པོ་དང༔ ཚེ་ཡི་བདག་མོ་ཀུན་ཏུ་བཟང་མོ་གཉིས༔ སྤྲོས་བྲལ་འགྱུར་མེད་ཆེན་པོའི་སྐུ་རུ་གྲུབ༔ ཆོས་སྐུའི་བདེ་བར་གཤེགས་པ་ཐམས་ཅད་ཀྱིས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ རང་རིག་འཕོ་མེད་རྡོ་རྗེའི་སྐུ་འགྲུབ་ནས༔ རྟག་ཅིང་ཁྱབ་པའི་ཚེ་དང་ཡེ་ཤེས་སྩོལ༔ ཧཱུྃ་ཧྲཱི༔ འོད་གསལ་བདེ་བ་ཆེན་པོའི་ཕོ་བྲང་དུ༔ བཅོམ་ལྡན་མགོན་པོ་ཚེ་བདག་རིགས་ལྔ་དང༔ ཚེ་ཡི་ལྷ་མོ་དབྱིངས་ཕྱུག་ཡུམ་ལྔ་ཡིས༔ བདེ་ཆེན་འགྱུར་མེད་དབྱིངས་སུ་སྐུ་བརྙེས་པའི༔ ལོངས་སྐུའི་བདེ་བར་གཤེགས་པ་ཐམས་ཅད་ཀྱིས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ རང་རིག་འཕོ་མེད་རྡོ་རྗེའི་སྐུ་འགྲུབ་ནས༔ རྟག་ཅིང་ཁྱབ་པའི་ཚེ་དང་ཡེ་ཤེས་སྩོལ༔ ཧཱུྃ་ཧྲཱི༔ སྣང་བ་རྣམ་དག་ཕྱོགས་བཅུའི་ཞིང་ཁམས་སུ༔ ཐབས་ཀྱི་ཆ་འཛིན་སངས་རྒྱས་སྲས་རྣམས་དང༔ ཤེས་རབ་ཆ་འཛིན་སྲས་མོའི་ཚོགས་རྣམས་ཀྱིས༔ ཐུགས་རྗེ་རྒྱུན་ཆད་མེད་པའི་སྐུ་བརྙེས་པའི༔ སྤྲུལ་སྐུའི་བདེ་བར་གཤེགས་པ་ཐམས་ཅད་ཀྱིས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ རང་རིག་འཕོ་མེད་རྡོ་རྗེའི་སྐུ་འགྲུབ་ནས༔ རྟག་ཅིང་ཁྱབ་པའི་ཚེ་དང་ཡེ་ཤེས་སྩོལ༔ ཧཱུྃ་ཧྲཱི༔ ཁྱད་པར་ནུབ་ཕྱོགས་བདེ་ཆེན་ཞིང་ཁམས་སུ༔ ཚེ་དང་ཡེ་ཤེས་དཔག་མེད་བཅོམ་ལྡན་འདས༔ གསང་བ་ཡེ་ཤེས་གོས་དཀར་ཡབ་ཡུམ་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ ཤར་ཕྱོགས་པོ་ཊ་ལ་ཡི་ཞིང་ཁམས་སུ༔ ཚེ་ཡི་བདག་པོ་འཕགས་མཆོག་སྤྱན་རས་གཟིགས༔ གསང་བའི་ཡུམ་མཆོག་པདྨ་དབྱིངས་ཕྱུག་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ མཛེས་ཤིང་ཤེས་རབ་སྣང་བའི་ཞིང་ཁམས་སུ༔ མཁྱེན་རབ་མངའ་བདག་འཕགས་མཆོག་འཇམ་པའི་དབྱངས༔ ཡུམ་མཆོག་སྨྲ་བའི་དབང་ཕྱུག་རྒྱལ་མོ་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ མི་འགྱུར་ལྕང་ལོ་ཅན་གྱི་ཕོ་བྲང་དུ༔ གསང་བའི་བདག་པོ་རིག་འཛིན་རྡོ་རྗེ་ཆོས༔ མཁའ་འགྲོའི་གཙོ་མོ་ལས་ཀྱི་དབང་མོ་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ གནས་མཆོག་ཨ་སུ་ར་ཡི་བྲག་ཕུག་ཏུ༔ ཚེ་དབང་རིག་འཛིན་པདྨ་འབྱུང་གནས་དང༔ ཚེ་ཡི་ཕྱག་རྒྱ་མནྡཱ་ར་བ་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ ཨོ་རྒྱན་སིནྡྷུ་འོ་མའི་རྒྱ་མཚོའི་འགྲམ༔ སྤྲུལ་པའི་སྐུ་མཆོག་དགའ་རབ་རྡོ་རྗེ་དང༔ རྣལ་འབྱོར་དབང་མོ་བདེ་ཆེན་རྒྱལ་མོ་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ རྒྱ་གར་མེ་ཏོག་རི་ཡི་ནགས་ཁྲོད་དུ༔ གྲུབ་པའི་སློབ་དཔོན་ཧཱུྃ་ཆེན་ཀཱ་ར་དང༔ བྲམ་ཟེའི་བུ་མོ་བདེ་ལྡན་སྒྱུ་འཕྲུལ་གཉིས༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ རྒྱ་གར་དྲི་བསུང་ལྡན་པའི་རི་མགུལ་དུ༔ མཁས་པ་པཎ་ཆེན་བི་མ་ལ་མི་ཏྲ༔ བདེ་ཆེན་གཏེར་མངའ་ཡུམ་མཆོག་པདྨ་ཅན༔ སྐྱེ་འཆི་བགྲེས་རྒུད་མེད་པའི་སྐུ་བརྙེས་པའི༔ ཁྱེད་ཀྱི་རྗེས་སུ་བདག་གིས་བསྒྲུབ་ལགས་པས༔ ཚེ་ཡི་རིག་འཛིན་སྒྲུབ་པའི་གྲོགས་མཛོད་ཅིག༔ སྔོན་དུས་རིག་འཛིན་ཚེ་ཡི་ཁུངས་རེ་བཟང༔ ད་ལྟ་རིག་འཛིན་ཚེ་ཡི་དཔལ་རེ་འདུ༔ ཚེ་དང་ཡེ་ཤེས་སྒྲུབ་པའི་དཀྱིལ་འཁོར་འདིར༔ ཚེ་དབང་རིག་འཛིན་མྱུར་དུ་འགྲུབ་པར་མཛོད༔ དེ་ནས་ཚེ་ཡི་དབང་བླང་བ༔ ཚེ་འབྲང་སྤྱི་བོའི་གཙུག་ཏུ་བཀོད༔ ཧཱུྃ་ཧྲཱི༔ མི་འགྱུར་ཚེ་འབྲང་པདྨ་རཱ་གའི་མདོག༔ ཟླ་གམ་འབར་བའི་གཞལ་ཡས་ཁང་པ་རུ༔ ཚེ་བདག་སྐུ་གསུང་ཐུགས་ཡོན་ཕྲིན་ལས་བཞུགས༔ ཡེ་ཤེས་ལྔ་ཡི་རིག་རྩལ་ཆོ་འཕྲུལ་གྱིས༔ འཁོར་འདས་ཁམས་ལྔའི་ཚེ་ཡི་བཅུད་བསྡུས་ཏེ༔ སྙིང་པོར་འཁྱིལ་བ་ཚེ་ཡི་དངོས་གྲུབ་མཆོག༔ ལུས་ངག་ཡིད་གསུམ་ཚེ་རྟེན་སྲོག་རྟེན་ལ༔ གཉིས་མེད་བསྟིམས་པས་ཚེ་ཡི་དངོས་གྲུབ་མཆོག༔ སྐྱེ་འཆི་བགྲེས་རྒུད་མེད་པའི་སྐུ་ཐོབ་ཤོག༔ ཨོཾ་ཨཱ་ཡུརྫྙཱ་ན་ཚེ་བྷྲཱུྃ་ཧཱུྃ༔ ཚེ་ཆང་བདུད་རྩི་ངག་ཏུ་བླུད༔ ཧཱུྃ་ཧྲཱི༔ གངས་རི་ལྷུན་ཆགས་གཡུ་མཚོ་གཏན་འཁྱིལ་དང༔ མཚུངས་པའི་ཚེ་ཆང་མར་གྱི་གཟེད་ཁ་ཅན༔ སྐད་ཅིག་བྷནྡྷ་ཐབས་ཤེས་སྣོད་ནང་དུ༔ ཚེ་ཡི་ལྷ་ཚོགས་མཉམ་པའི་རིལ་བུ་རྣམས༔ ཡབ་ཡུམ་དངོས་སུ་གྱུར་པ་བདེ་ཆེན་སྦྱོར༔ བྱང་ཆུབ་སེམས་ཀྱི་འོད་ཟེར་འཕྲོ་འདུ་ཡིས༔ འཁོར་འདས་ཚེ་ཡི་བཅུད་རྣམས་ཐམས་ཅད་བསྡུས༔ ཐམས་ཅད་འོད་ཞུ་བདུད་རྩིའི་རྒྱ་མཚོར་འཁྱིལ༔ ལྕེ་ཡི་རྡོ་རྗེ་ཧཱུྃ་གིས་དྲངས་ནས་སུ༔ རྩ་ཁམས་ཐམས་ཅད་བདུད་རྩིའི་དྭངས་མས་ཁྱབ༔ བྱང་སེམས་ཐིག་ལེ་རབ་རྒྱས་བདེ་སྟོང་འཕེལ༔ མི་ཤིགས་ཚེ་ཡི་དངོས་གྲུབ་ཐོབ་པར་ཤོག༔ ཨོཾ་ཨཱ་ཡུརྫྙཱ་ན་ཚེ་བྷྲཱུྃ༔ ཚེ་རྟེན་མར་མེ་ཐུགས་ཀར་བཟུང༔ ཧཱུྃ་ཧྲཱི༔ ཐབས་ཤེས་ལུས་མཚོན་ཉི་ཟླའི་གྭ་འུ་རུ༔ རྩ་ཐིག་རླུང་གསུམ་སྔགས་ཀྱི་མར་ཁུས་གཏམས༔ རང་རིག་འགྱུར་མེད་སྐུ་ཡི་སྡོང་བུ་ལ༔ བདེ་ཆེན་ཡེ་ཤེས་སྣང་གསལ་མེ་སྦར་ནས༔ ཡེ་ཤེས་ཆེན་པོའི་སྲོག་ཏུ་བཟུང་བ་ནི༔ དུས་གསུམ་བདེ་བར་གཤེགས་པ་རྣམས་ལ་འབུལ༔ མ་རིག་འཁོར་བའི་ཉོན་མོངས་མུན་པ་བསལ༔ ཐབས་ཤེས་ལུས་ཀྱི་རྩ་རླུང་དྭངས་མ་ཀུན༔ འདུས་པའི་ཙིཏྟ་སྲོག་གི་གཞལ་ཡས་སུ༔ གྭ་འུ་སྔགས་ཕྲེང་སྲོག་ཡིག་བཅས་པ་རྣམས༔ མདུན་གྱི་ལྷ་ཡི་ཐུགས་ཀ་ནས་བྱུང་སྟེ༔ རང་གི་སེམས་དང་གཉིས་སུ་མེད་པར་བཞུགས༔ དབྱིངས་དང་རིག་པ་གཉིས་སུ་མེད་པར་བཞག༔ ཚེ་ཡི་དངོས་གྲུབ་ཀུན་གྱི་མཐར་ཐུག་པ༔ བདེ་ཆེན་སྤྲོས་བྲལ་ལྷུན་གྱིས་གྲུབ་པ་ཡི༔ མི་འགྱུར་རྟག་ཅིང་ཁྱབ་པའི་གདིང་ཐོབ་ཤོག༔ ཨོཾ་ཨཱ་ཡུརྫྙཱ་ན་ཚེ་བྷྲཱུྃ་ཧཱུྃ༔ དེ་ལྟར་དབང་བླངས་ཕྲིན་ལས་མཇུག་གི་ཚོགས༔ རྒྱས་པར་བཏང་བས་བསོད་ནམས་ཉམས་པ་གསོ༔ གསུམ་པ་ལས་ཉམས་གསོ་བ་ནི༔ འཆི་ངེས་སྲོག་ཆགས་བརྒྱ་སྟོང་ངམ༔ ལོ་གྲངས་སྲོག་བསླུ་བྱས་པ་ལ༔ སྲོག་ཆགས་རྣམས་ཀྱི་ཐོད་པ་རུ༔ མར་གྱི་རྡོ་རྗེ་གཡུང་དྲུང་བྲི༔ ཆོས་ཉིད་དག་པའི་སྔགས་ཀྱིས་སྦྱང༔ སྟོང་པའི་ངང་ལས་ཡེ་ཤེས་ལས༔ གྲུབ་པའི་སྲོག་ཆགས་སྣ་ཚོགས་པ༔ ཡོངས་གྱུར་ཧྲཱིཿཡིག་འོད་འབར་བ༔ མཆོད་པའི་ཚོགས་སུ་གྱུར་ནས་ཀྱང༔ ཚེ་ཡི་ལྷ་ཚོགས་རྣམས་ལ་འབུལ༔ ཧཱུྃ་ཧྲཱི༔ ཚེ་ཡི་ལྷ་ཚོགས་ཐམས་ཅད་ལ༔ ཡེ་ཤེས་ལྔ་ཡི་རང་བཞིན་ཅན༔ རྣམ་པ་རིན་ཆེན་སྣ་ལྔ་ལས༔ གྲུབ་པའི་སྲོག་ཆགས་སྣ་ཚོགས་པ༔ རིན་ཆེན་མི་དང་ཅང་ཤེས་རྟ༔ གཡག་ལུག་ར་གསུམ་ཟ་ལེ་འབྲི༔ མཁའ་ལྡིང་གཅན་གཟན་ལ་སོགས་པ༔ ཡེ་ཤེས་ལྔ་ཡི་འོད་ཟེར་འཕྲོ༔ འདོད་ཡོན་ལྔ་ཡིས་རབ་བརྒྱན་ཏེ༔ གུས་པས་འབུལ་ལོ་བཞེས་སུ་གསོལ༔ བཞེས་ནས་ཚེ་དང་ཡེ་ཤེས་ཀྱི༔ དངོས་གྲུབ་མ་ལུས་བསྩལ་དུ་གསོལ༔ དེ་ལྟ་བུ་ཡི་གདམས་པ་ཡིས༔ ཉམས་པ་གསུམ་པོ་ངེས་པར་གསོ༔ ཁྱད་པར་འཕགས་པའི་གདམས་པའོ༔ ས་མ་ཡ༔ རྒྱ་རྒྱ་རྒྱ༔ ཁོ་བོ་ཨོ་རྒྱན་མཆོག་གྱུར་བདེ་ཆེན་གླིང་པས་ནམ་མཁའ་མཛོད་ནས་སྤྱན་དྲངས། ཕྱིས་སུ་གནས་མཆོག་ཙ་འདྲ་རིན་ཆེན་དཔལ་ཀུན་སྤུངས་པ་པདྨའི་ལྗགས་ལྡན་གྱི་གདན་ས་ཆེན་པོར་གཏན་ལ་ཕབ་རིམ་བཞིན་དུ་ཡི་གེའི་རིས་བྱེད་ཀརྨ་ཚེ་དཔལ་ལོ། །སརྦ་མངྒ་ལཾ།། །།

[edit]

TSAGLI image gallery goes here

Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).