Terdzo-KHA-004: Difference between revisions
From Rinchen Terdzö
m (Text replace - "= Tsagli = TSAGLI image gallery goes here <headertabs/> == Footnotes == <references/> </onlyinclude> " to "</onlyinclude> = Tsagli = TSAGLI image gallery goes here <headertabs/> == Footnotes == <references/> ") |
m (Text replacement - "= Tsagli = {{TsagliCall}} " to "{{TsagliCall}} ") |
||
| (10 intermediate revisions by 2 users not shown) | |||
| Line 1: | Line 1: | ||
{{ | {{Header | ||
}} | |||
<h1 style="font-size: 24px !important;">Tibetan Text</h1> | |||
<onlyinclude> | <onlyinclude> | ||
<div id='tibetan' class='tib-text'> | <div id='tibetan' class='tib-text'> | ||
༄༅། །རིན་ཆེན་གཏེར་མཛོད་ཆེན་པོའི་སྨིན་གྲོལ་དཀྱུས་གཅིག་ཏུ་འབོག་པའི་སྐབས་ཀྱི་ལག་ལེན་ཕྱོགས་མཚོན་དང་། བཅས་བཤམ་བྱ་བའི་ཚུལ་མཐོང་བས་གོ་འབྱེད་ཅེས་བྱ་བ་བཞུགས་སོ།། | ༄༅། །རིན་ཆེན་གཏེར་མཛོད་ཆེན་པོའི་སྨིན་གྲོལ་དཀྱུས་གཅིག་ཏུ་འབོག་པའི་སྐབས་ཀྱི་ལག་ལེན་ཕྱོགས་མཚོན་དང་། བཅས་བཤམ་བྱ་བའི་ཚུལ་མཐོང་བས་གོ་འབྱེད་ཅེས་བྱ་བ་བཞུགས་སོ།། | ||
ན་མོ་གུ་རུ་དེ་བ་ཌཱ་ཀི་ནཱི་ཡེ། བྱིན་རླབས་རྫོགས་ལྡན་ནོར་བུའི་སྤྲིན་ཆེན་འཁྲིགས། །དངོས་གྲུབ་བདུད་རྩིའི་ཆར་རྒྱུན་འཛད་མེད་འཇོ། །ཕྲིན་ལས་རིན་ཆེན་སྙེ་མ་འདོད་རྒུར་སྦྱིན། །རྩ་གསུམ་ཆོས་སྐྱོང་བཅས་པས་དགེ་ལེགས་སྩོལ། །རཏྣ་གྲམ་བུར་སྤུངས་པའི་གཏེར་མཛོད་ཆེའི། །སྨིན་གྲོལ་སྒོ་འཕར་གཏན་པ་མེད་དབྱེའི་ཚེ། །ལྡེའུ་མིག་འཕྲུལ་དང་སྒྲོན་མེའི་སྣང་བྱེད་བཞིན། །ལག་ལེན་ཁྲིགས་ཆགས་ཕྱོགས་མཚོན་དགོད་པར་སྤྲོ། །དུས་གསུམ་རྒྱལ་བའི་སྤྱི་གཟུགས་ཨོ་རྒྱན་གྱི་སློབ་དཔོན་ཆེན་པོ་མཚོ་སྐྱེས་རྡོ་རྗེས་སངས་རྒྱས་ཀྱི་ཆོ་འཕྲུལ་ཆེན་པོས་དཔལ་གྱི་མགུར་ནས་ཆོས་ཀྱི་རྔ་བོ་ཆེ་གདུལ་བྱའི་ཁམས་དབང་སྐལ་པ་དང་མཐུན་པར་བསམ་ཡས་བརྗོད་ལས་འདས་པར་བསྒྲགས་པར་མཛད་པའི། ཟབ་དོན་གྱི་སྙིང་པོ་འགའ་ཞིག་ཕྱིས་འབྱུང་བོད་འབངས་ལ་ཐུགས་བརྩེས་དགོངས་ཏེ་མཁའ་འགྲོ་གཏད་རྒྱས་བཏབ་པ་རྣམས་སྨོན་ལམ་གྱི་མཐུ་སད་པའི་གཏེར་སྟོན་སྤྲུལ་་་་་་པའི་སྐྱེས་མཆོག་རྣམས་ཀྱིས་གནས་དུས་དང་འཚམས་པར་བསྟན་འགྲོའི་དགེ་ལེགས་སྤེལ་བའི་བཙས་སུ་སྣང་བར་མཛད་པ་ཇི་སྙེད་ཅིག་མཆིས་པ་ལས། རང་ཉིད་ཀྱི་སྐལ་པ་བཟང་པོའི་དཔྱིད་དུ་འོངས་པ་རྣམས་ཀྱི་སྨིན་གྲོལ་རྩ་བའི་སྐོར་བསྟན་པའི་སྲི་ཞུ་དང་མོས་ལྡན་རེ་རེ་ཙམ་ལའང་ཕན་ཐོགས་པར་རེ་བའི་ལྷག་བསམ་བཟང་པོས་ཕྱོགས་གཅིག་ཏུ་བསྡུས་པ་རིན་ཆེན་གཏེར་གྱི་མཛོད་ཆེན་པོའི་སྨིན་གྲོལ་དཀྱུས་གཅིག་ཏུ་འབོགས་པའི་སྐབས་ཀྱི་ཕྱག་ལེན་མདོར་བསྡུས་འགོད་པ་ལ་གསུམ། སྤྱིར་ཇི་ལྟར་བྱ་བའི་ལག་ལེན། ཉེར་མཁོའི་ཡོ་བྱད་སྟ་གོན། བྱེ་བྲག་དབང་རྣམས་ཀྱི་གཤོམ་བཀོད་བསྟན་པའོ། །དང་པོ་ནི། འདི་ཉིད་ཀྱི་སྨིན་གྲོལ་བགྱིད་པར་བརྩམ་པ་ན། སློབ་དཔོན་གྱིས་རང་གི་རྩ་བའི་ཡི་དམ་མམ་དཀྱིལ་འཁོར་སྤྱིའི་ཁྱབ་བདག་རྡོ་རྗེ་སེམས་དཔའ་ལྟ་བུའི་བསྙེན་པ་ཁ་གསོ་ཞག་བདུན་གྱིས་ཉུང་མཐར་བྱས་ཏེ་གནང་བ་སྩོལ་བའི་གསོལ་བ་གདབ། ཞུ་བ་པོའི་སློབ་མ་དད་པ་དམ་ཚིག་ཐུབ་ངེས་ཉམས་ལེན་དང་འཆད་སྤེལ་ནུས་པ་བདུན་ནམ་བཅུ་གསུམ་ལས་མི་མང་བ་ཁྲིགས་བཅད་དགོས་ཏེ། ཞི་ཁྲོ་རྩ་གསུམ་གུ་རུ་ཞི་བ་ཐུགས་རྗེ་ཆེན་པོ་སོགས་ཁྱབ་གདལ་དུ་བསྐུར་ཆོག་ཀྱང་ཞུ་མཁན་ཧ་ཅང་མང་ན་ལྕོགས་ཐབས་མེད་པ་དང་། ཟབ་གཉན་ཆེ་བའི་རིགས་ཕལ་མོ་ཆེ་མང་པོ་ལ་བསྐུར་མི་རུང་བ་འགའ་ཞིག་བརྒྱུད་འཛིན་གཅིག་གམ་གསུམ་ལས་མི་སྤེལ་བར་གསུངས་པས་དབྱེ་བསལ་ཐོག་མ་ནས་ཕྱེད་པ་གལ་ཆེའོ། །དེ་ནས་དབང་ཁྲིད་མ་ཚུགས་པའི་སྔ་རོལ་དུ། རྩ་བ་གསུམ་ལ་ཚོགས་སྐོང་དང་མཎྜལ། ཆོས་སྲུང་ལ་སྐོང་གསོལ། སྡེ་བརྒྱད་ལ་མདོས་གླུད། ཡུལ་ལྷར་བསང་བརྔན། མགྲོན་བཞིར་ཕུད་མཆོད་སྤྱི་གསོལ། ཆུ་གཏོར། གསུང་རབ་ཀློག་འདོན། སྡིག་སྒྲིབ་ཉམས་ཆག་སྦྱོང་བ་ཡིག་བརྒྱའི་བསྒོམ་བཟླས། དོང་སྤྲུགས་ཆོ་ག །ཕྱག་བསྐོར། སཱཙྪ་གྲངས་མང་སོགས་གནང་བ་ཞུ་ཞིང་བར་ཆད་མི་འབྱུང་བར། དོན་གཉིས་འགྲུབ་པའི་རྟེན་འབྲེལ་གྱི་དགེ་བའི་དཔུང་བསྐྱེད་དཔོན་སློབ་ཐུན་མོང་ནས་ཅི་འགྲུབ་ཏུ་བྱས་པས་གནས་སྐབས་བར་ཆད་མི་འབྱུང་བ་དང་ཕྱིན་ཆད་བཀྲ་ཤིས་པའི་རྟེན་འབྲེལ་དུ་འགྱུར་རོ། །ལག་ལེན་དངོས་ལ་རྒྱས་པ་སྒྲུབ་ཆེན་གྱི་ཁོང་དུ་བཏང་བ་དང་། བསྡུས་པ་སྒྲུབ་ཆེན་མི་སྤེལ་བའི་ལུགས་གཉིས་བླ་སློབ་འཁོས་དང་ལོངས་སྐབས་ཀྱིས་གང་ལྕོགས་བྱ་ཆོག་ཅིང་། གཉིས་ཀའང་གཟའ་སྐར་དུས་ཚེས་བཟང་པོ་ཞིག་ལ་དབུ་བཙུགས་ཏེ་རྩ་བའི་རྒྱུ་དབང་བཀའ་བརྒྱད་བདེ་གཤེགས་འདུས་པའི་དབང་ཆེན་ཞིག་ངེས་པར་སྔོན་དུ་འགྲོ་དགོས་པས། དང་པོ་ལྟར་ན། འབྲེལ་དང་དགོས་པའི་གནད་ཤིན་ཏུ་ཆེ་བའི་དབང་གིས་རིགས་ཀུན་ཁྱབ་བདག་དཔལ་རྡོ་རྗེ་སེམས་དཔའི་སྒྲུབ་ཐབས་བཀའ་གཏེར་ཟུང་འཇུག་སྨིན་ལུགས་ཉིད་ཀྱིས་ཁོག་དབུབ་དགོས་པས། དེའི་སྒྲུབ་ཁོག་རྣམ་གྲོལ་སྙེ་མ་ནས་ཇི་ལྟར་འབྱུང་བ་བཞིན། ཉིན་དང་པོའི་སྔ་དྲོ་ས་ཆོག་ནས་མཚམས་གཅོད་རྗེས་འབྲེལ་བཅས། ཕྱི་དྲོ་ལྷ་སྟ་གོན་དང་རྒྱན་བཀོད་འཕྲོས་སུ་སྒྲུབ་ཐབས་འདོད་འཇོ་བུམ་བཟང་གི་དབུ་ནས་འབྱུང་བའི་བླ་མ་གསང་འདུས་ཟླུམ་པོ་བཞི་དབང་དང་གཏོར་དབང་བཅས་བཤམ་སྒྲུབ་བསྐུར་བ་བཅས་གྲུབ་པར་བྱ། བྱིན་རླབས་འདི་ལྟ་བུ་དང་རྗེས་གནང་སྲོག་གཏད་སོགས་དཀྱིལ་འཁོར་ཆེན་པོའི་དབང་བཞི་ཡོངས་རྫོགས་སྔོན་དུ་མ་སོང་བ་ལ་སྦྱིན་བྱར་མིན་ཀྱང་འདི་ནི་ཆོས་སྒོ་འབྱེད་པ་བྱིན་རླབས་བླ་མའི་གཏོར་དབང་ཞེས་ཆེད་དུ་བསྔགས་པ་སོགས་དམིགས་སུ་བསལ་བའི་དགོས་པ་དང་ལྡན་པས་སོ། །ཉིན་གཉིས་པར་རྡོར་སེམས་སྒྲུབ་མཆོད་རྒྱས་པ་ཛབ་བཟླས་ཉུ་ལེ་སྐྲོད་ཅིང་བྱིན་དབབ་པས་མཚོན་སྒྲུབ་ཆེན་གྱི་ཆིངས་ཇི་ལྟ་བར་བྱ། དགོང་མོར་ཉང་གཏེར་བཀའ་བརྒྱད་བདག་བསྐྱེད་ཕྱག་རྒྱ་རྐྱང་སྒྲུབ་ཙམ་བྱས་ལ་སྟ་གོན་ཆས་བསྒྲིག །སློབ་མ་རྣམས་འཚོགས། ཁྲུས་བགེགས་གཏོར་སྲུང་འཁོར། ལོ་རྒྱུས་མཚམས་སྦྱར་ལོ་ཆེན་དབང་བཤད་འཁྱོགས་མཚམས་ཅན་ནས་བཀའ་བརྒྱད་ཀྱི་བཤད་པ་བརྗོད་ལ་མཎྜལ་འབུལ། མདོ་བྱང་ཆེན་མོ་ལྟར་བཀའ་བརྒྱད་ཀྱི་སྟ་གོན་ཡོངས་རྫོགས་གྲུབ་པར་བྱ། འདི་ཕྱིན་ཆད་ཡུན་རིང་བས་བསྙེན་རྒྱུན་འཁྱོལ་དཀའ་ཡང་རྡོར་སེམས་སྒྲུབ་མཆོད་མ་ཆག་པ་དགོས་མོད། བླ་མས་ལོངས་ཁྱབ་མེད་ཅིང་མི་ལྕོགས་ན་གཞན་པའི་བླ་གྲྭ་ཁ་ཤས་ལ་ཉིན་རེ་བཞིན་གོང་ལྟར་བསྒྲུབ་བཅོལ། འདི་ནས་བརྩམ་མཇུག་མ་གྲུབ་ཀྱི་བར་དངོས་རོལ་རྗེས་འབྲང་གཏེར་སྲུང་རྣམས་ཀྱི་གཏོར་འབུལ་ཉིན་རེ་ཚར་རེ་འདོན་མཁན་ཟུར་དུ་ཡོད་ན་ལེགས། དངོས་རོལ་ཚང་མ་མ་གྲུབ་ན་དམ་ཅན་སྤྱི་གཏོར་ཁོངས་སུ་མངོན་རྟོགས་གང་ལྕོགས་རེ་མོས་བཙུད། སྒྲུབ་གཞི་ཡོད་པའི་གནས་དེར་གོ་ཡུལ་དོགས་ན་ཁང་པ་གཞན་དུ་མཆོད་གཏོར་རྒྱས་བསྡུས་གང་ལྕོགས་ལ་བརྟེན་ནས་འདོན་ཆོག་གོ །དགོང་མོ་ནས་བཀའ་བརྒྱད་དབང་ཆས་བཤམ་ལ། ཉིན་གསུམ་པར་ལས་བྱང་བདེ་རོལ་གྱིས་བསྒྲུབས་ལ་མདོ་བྱང་ཆེན་མོའི་དབང་རྫོགས་པར་བསྐུར། རྗེས་ཆོག་གྲུབ་ནས་དེའི་ཆས་བསྡུས་ལ་ཀར་གླིང་ཞི་ཁྲོའི་དབང་ཆས་བཤམ། ཉིན་བཞི་པར་དེའི་དབང་བསྐུར་བ་ནས་བརྩམ་གྲངས་གང་ཐོན་བྱ་བ་ལས་སྤར་བཀབ་མེད། རཏྣའི་ཚེ་སྒྲུབ་གསང་བ་འདུས་པའི་དབང་རྗེས་སུ་བཞག །དབང་ཁྲིད་ཡོངས་རྫོགས་གྲུབ་པའི་ཉིན་རྡོར་སེམས་ཆོ་ག་རྒྱས་པར་བཏང་ཞིང་སྒྲུབ་པའི་དངོས་གྲུབ་བླང་བའི་ཚེ་སློབ་དཔོན་གཞན་གྱིས་མཆོག་གི་སྦྱིན་སྲེག་བྱ་ཞིང་། དེ་ནས་དབང་དང་ཁྲིད་བཅས་རྫོགས་པར་བྱ། གཏོར་མ་བཏང་བ་སོགས་རྗེས་རིམ་རྣམས་བྱ། ཕྱིར་ཉིན་སྔ་བར་ཚེ་གསང་དབང་ཆས་བཤམ་ནས་ལས་བྱང་གིས་བསྒྲུབས་ལ་ཚེ་དབང་རྒྱས་བསྡུས་རྣམས་ཀྱིས་མཐར་དགེ་བྱས་ཏེ་དེའི་རྗེས་ཆོག་དང་། སྒྲུབ་པའི་ཐོ་འགྲོལ་སོགས་སྒྲུབ་ཁོག་ལས་འབྱུང་བ་ལྟར་མཐའ་རྒྱས་སུ་བྱ་བ་ཡིན་ནོ། །གཉིས་པ་སྤྲོས་འབྱོར་ལོངས་ཁོམས་མེད་པ་དག་གིས་སྒྲུབ་ཆེན་དང་མི་སྦྲེལ་བར་ཅི་བདེར་བསྐུར་ན། ཐོག་མར་བཀའ་བརྒྱད་བདེ་འདུས་ཀྱི་དབང་ཆེན་དངོས་སྟ་ཕྱེས་ཏེ་ཉིན་གཉིས་ལ་རྫོགས་པ་བསྐུར། འདིའང་སྒྲུབ་ཆེན་གྱི་ཁོག་དབུབ་སྦྱར་ནས་ཞག་བདུན་ལྔ་གསུམ་གྱིས་མཐའ་རྟེན་པ་སྔོན་ཏུ་གྲུབ་ན་མཆོག་ཏུ་འགྱུར། དེ་ནས་སྨིན་ལུགས་རྡོར་སེམས་ཀྱིས་དབུ་བཟུང་། མཇུག་དགོངས་འདུས་པུསྟི་ལུང་དབང་གྲུབ་ཀྱི་བར་ཉིན་རེ་བཞིན་དབང་རྒྱས་བསྡུས་དང་བསྟུན་པའི་གང་འགྲོ་རིམ་སྒྲུབ་རིམ་བསྐུར་བྱ། དེའང་ཞི་ཁྲོ་སྒྱུ་འཕྲུལ། རྩ་གསུམ། བླ་མ་ཕྱི་སྒྲུབ་སྐོར་པོད་གཞུང་ཐར་ཆགས་ལས་བསྣོན་འཕྲི་མེད་ཅིང་། བླ་མ་ནང་སྒྲུབ་ཆོས་དབང་གསང་འདུས་དབང་ཆེན་རྗེས་སུ་འདོད་བུམ་ལས་འབྱུང་བའི་ཟླུམ་པོ་བཞི་དང་གཏོར་དབང་བསྐུར་བས་མཚོན་དཀར་ཆགས་ལྟར་མ་བུ་ཕན་ཚུན་མཉམ་སྦྲགས་ཀྱིས་རྫོགས་པར་བྱ་དགོས་ཏེ་འདི་ཉིད་འདོད་བུམ་གྱི་རྒྱབ་ཆོས་ལྟ་བུ་ཡིན་པས་སོ། །ཚེ་སྒྲུབ་གསང་འདུས་དབང་རྗེས་སུ་བཞག་ནས་གོང་སྨོས་ལྟར་མཐར་དགེ་བྱེད་པ་ལེགས་སོ། །དེ་ལྟར་ལག་ལེན་རྒྱས་བསྡུས་གང་བྱེད་ཀྱང་། ཞི་ཁྲོ །བླ་མ་ཞི་བ། དྲག་པོ། འཇམ་དཔལ་སོགས་སྡེ་ཚན་རེ་རེའི་མགོར་དངོས་སྟ་ཕྲལ་ནས་ཞག་གིས་བར་བཅད་མ་བཅད་གང་ཡང་རུང་བ་ལ་དཔུང་སྐུད་ཀུ་ཤ་དངོས་སུ་སྦྱིན་པ་སོགས་ཕྱག་ལེན་རྒྱས་པའི་ཕྱོགས་གྲུབ་ན་ལེགས་ཤིང་། མི་འགྲུབ་ན་དཔུང་སྐུད་ཀུ་ཤ་རྣམས་དངོས་སུ་མི་སྦྱིན་ནས་འགྲིམས་པ་སྨིན་གླིང་སོགས་ཀྱི་ཕྱག་ལེན་ཡིན་ཞིང་དངོས་སྟ་ཞག་གིས་བར་མ་བཅད་ན་དེ་དག་དངོས་སུ་སྦྱིན་པ་ལ་དགོས་པ་ཆེར་མེད་པས་དབང་རྒྱུན་ཙམ་ལ་ཁྱད་པར་མེད་པར་གོ །སྡེ་ཚན་སོ་སོའི་དབུར་འབྱུང་བའི་གཙོ་ཆེ་བ་རེའི་སྒྲུབ་མཆོད་ཚོགས་སྐོང་ཡང་རྒྱས་པར་གྲུབ་ན་གལ་ཆེ་ཞིང་སྒྲུབ་བསྐུར་རེ་རེ་བཞིན་ལས་ཐབས་མེད་པ་སྨོས་མ་དགོས། དབང་སྒྲུབ་ཐམས་ཅད་ལའང་བསྙེན་བཟླས་བརྒྱ་རྩ་ལས་མི་ཉུང་བ་དང་། བུམ་བཟླས་ཟུར་དུ་དགོས་རིགས་ལའང་དེ་ལྟར་བྱ། གཏེར་སྲུང་སྒོས་མཆོད་ཡོད་རིགས་སོ་སོའི་ཐད་ཀར་སྦྱར། དམིགས་བསལ་མེད་པ་ལ་དགོང་མོར་ལས་བྱང་རྗེས་མ་དང་འབྲེལ་བར་དམ་ཅན་སྤྱི་གཏོར་གཏེར་གཞི་བཅས་ཚར་རེ་མ་བཏང་ཐབས་མེད་པས་དེ་ཀས་འཐུས་པར་བྱེད། བདག་འཇུག་རེ་རེ་བཞིན་མི་ལྕོགས་པས་ཏིང་འཛིན་དབང་ལེན་སོགས་དམིགས་བསལ་བཤད་པ་རྣམས་དེ་ཀས་འཐུས་ཤིང་། སྤྱི་ལ་རིག་པའི་མེ་ཏོག་དོར། གང་ལའང་སློང་མ་གཞུག་པར་གནང་བ་ཞུ་བ་མ་ཆད་པ་གལ་ཆེ། དབང་ཕྲན། རྗེས་གནང་། སྲོག་གཏད་སོགས་ཟོར་ཡངས་པའི་རིགས་རྣམས་གསུམ་བདུན་ལྔ་སོགས་དུས་གཅིག་ལ་བསྒྲུབ་བསྐུར་མཉམ་དུ་བྱེད་པ་རྙིང་མ་སྤྱིའི་ལུགས་ཡིན་ལ་དོན་དང་མི་འགལ་ཞིང་སླ་བས་དེ་ལྟར་བཤམ་སྒྲུབ་སོགས་བྱ། ཆོས་སྐྱོང་སྲོག་གཏད་རྣམས་ཤིན་ཏུ་གཉན་པས་དམ་ལྡན་གཏོར་འབུལ་སོགས་མ་ཆག་པ་བྱེད་མཁན་མ་གཏོགས་ཁྱབ་བརྡལ་དུ་སྤེལ་མི་རུང་། སྤྱིར་དྲག་སྔགས་མངོན་སྤྱོད་སྐོར་རྣམས་དང་། རྒྱུད་བཅུ་བདུན་གྱི་དབང་། ཁྲོས་མའི་གསང་རྒྱུད་སོགས་ནི་རིག་འཛིན་བརྒྱུད་པ་བར་མ་ཆད་པ་རྣམས་ཀྱིས་བརྒྱུད་འཛིན་དམ་ལྡན་གཅིག་གམ་གསུམ་ལས་མི་སྤེལ་བ་ཕྱག་ལེན་གྱི་མཐའ་ཅན་ཡིན་པས་དབང་ལུང་ཕལ་ཆེར་གྲུབ་པའི་སྐབས་སམ་ཡོངས་རྫོགས་གྲུབ་པའི་རྗེས་སུ་དེ་ལྟར་སྤེལ་མཁས་སུ་བྱའོ། ཁྲིད་ཐམས་ཅད་སོ་སོའི་དབང་བསྐུར་གྲུབ་པའི་རྗེས་སུ་བཤད་དགོས་པས་རྡོར་སེམས་དང་ཀར་གླིང་ཞི་ཁྲོ་ལྟ་བུའི་དབང་གྲུབ་རྗེས་མཚམས་སྦྱོར་བཅས་མཎྜལ་ཕུལ་ལ་ཁྲིད་ཡིག་ཉིད་དལ་བུས་གོ་བརྡ་འཕྲོད་པར་བཀླག་ནས་དགེ་བསྔོ་སོགས་བྱ། འདི་ཕྱིན་ཆད་ཀྱི་ཁྲིད་རྒྱུན་ཡོད་ཚད་ལ་དེས་འགྲེ །འདི་ལ་བཤད་ཁྲིད་དམ་ཁྲིད་ལུང་སྒྲགས་མ་ཟེར། བཤད་མི་ཤེས་མཁན་ནས་ཉབ་ཉོབ་མང་པོ་བཤད་ན་དོན་འབྲས་མེད་ཅིང་ཉི་མ་འཕུལ། བཤད་ཤེས་མཁན་ཡིན་ཡང་དོན་རྩ་ཁྲིད་ཡིག་ནང་མ་འདུས་པ་མེད་ཅིང་རྣམ་གྲངས་མང་པོ་རྫོགས་ཐབས་མེད་པས་འདི་ཡིས་གོ་ཆོད་པར་བྱེད། སྤྱིར་ཁ་བཤད་དཔེ་ཀློག་གང་བྱེད་ཀྱང་སྒོམ་དོན་ཡིད་ལ་ངེས་ཤིང་གོ་བརྡ་འཕྲོད་པ་ཁྲིད་ཀྱི་མཚན་ཉིད། ཚིག་དོན་རེ་རེ་བཞིན་ཡིད་ལ་ཟིན་མི་དགོས་པར་སྒྲ་ཐོས་ཀྱི་ཤེས་འཇུག་བར་མ་ཆད་པ་ཙམ་ལུང་གི་མཚན་ཉིད་ཡིན་པ་ཆོས་སྤྱན་ལྡན་པའི་བླ་མ་དག་བཞེད་པས་དེ་དག་གི་གནད་ཀྱང་ཤེས་པར་བྱ་དགོས་སོ། །ལས་བྱང་བསྒྲིགས་མ་མེད་རིགས་ལ་སྐྱབས་སེམས་བགེགས་གཏོར་གྱིས་མཚོན་པའི་སྔོན་རྗེས་ཡན་ལག་སྦྱོར་འོས་རྣམས་ལས་བྱང་བདེ་རོལ་ལྟ་བུ་སྤྱིར་སྨིན་ལུགས་ཤིག་དང་བསྟུན་ན་ཟོར་ཡངསབས་ལེགས་ཤིང་། བྱེ་བྲག་གཏེར་ཁ་ལྷོ་བྱང་དབུས་གསུམ། ཁམས་ལུགས་ཐ་དད་པ་རྣམས་སོ་སོའི་རང་ལུགས་དང་བསྟུན་ཤེས་ན་མཆོག་ཏུ་འགྱུར་ཏེ། དཔེར་ན་མཆོག་གླིང་ཟབ་བདུན་གྱི་རིགས་ལ་ས་བཅད་སྡེ་ཚན་གསང་སྔགས་སྤྱི་ཆིངས་ཀྱི་སྐོར་ལ་ཡོད་པའི་སྔོན་འགྲོ་དང་མཇུག་གི་སྤྱི་ཆིངས་སྦྱོར་དགོས་པས་མཚོན་ནོ། །བཀླག་ལུང་ནི་དབང་གི་བར་བར་དུ་གྲུབ་ནའང་ལེགས་ཤིང་མི་ལྕོགས་ན་དབང་རྣམས་གྲུབ་ཟིན་པའི་རྗེས་སུ་དཀྱུས་གཅིག་ཏུ་བཀླག་པས་ཆོག་གོ ༈ །གཉིས་པ་འདིའི་སྐབས་སུ་ཉེ་བར་མཁོ་བའི་ཡོ་བྱད་སྔ་ཚགས་སུ་བྱ་དགོས་པ་ནི། དཀྱིལ་འཁོར་སྒོ་རྫོགས་ཡོད་པ་རྣམས་དང་པདྨ་ཆོས་འབྱུང་སོགས་མཎྜལ་རིགས་ཀྱི་རས་བྲིས། ཙཀ་ལི་ཚང་བ་བཅས་མེད་ཐབས་མེད་པས་དེ་དག་ཚོགས་པ་གཞིར་བྱས། རྒྱུད་དང་གཞུང་པོད་ཀྱི་གླེགས་བམ་སོ་སོ་ལ་མཁོ་བ་འཛོམ་ན་རབ། མ་འཛོམ་ན་རྒྱུད་གསང་སྙིང་ཙམ་དང་སོ་སོའི་སྒྲུབ་ཐབས་ཀྱི་ཡི་གེ་དར་གྱིས་དྲིལ་བ། བཏགས་གྲོལ་འཁོར་ལོ་དང་གླེགས་བམ། མཐོང་གྲོལ་ཀློང་སྙིང་རིག་འཛིན་སྲོག་འཁོར། ཚེ་འཁོར་དང་སྲུང་འཁོར་སྤྱི་འགྲོ །གདུགས་དཀར་འཁོར་ལོ། ཆོས་སྐྱོང་རྣམས་དང་རྣམ་སྲས་ཛམ་དམར་སོགས་ཀྱི་སྲོག་འཁོར་བླ་རྡོ། སྡེ་བརྒྱད་བླ་རྡོ་སོ་སོ་ཡོད་དགོས་ཀྱང་མ་འཛོམ་ན། མགོན་པོ་སྤྱི་ལ་གྲི་སྙིང་བསྲེས་པའི་སྙིང་གཟུགས་ཚོན་བཏང་བའི་ནང་དུ་སྒྲུབ་ཁང་བྱང་ངོས་ནས་རྡོ་ནག་གྲུ་གསུམ་ལག་པ་མ་རེག་པ་གྲི་ལྕགས་གྲི་གུག་གམ་གྲི་རྩེས་བླངས་པ་ལ་ཧཱུྃ་བྲིས་པ་དང་། བཀའ་རྒྱ་མར་བཀོད་པའི་མགོན་པོ་སྤྱིའི་སྲོག་འཁོར་བཅས་དར་མཐིང་ནག་གིས་དྲིལ་ནས་གྲི་ལྕགས་གའུ་ཟུར་གསུམ་དུ་བཙུད་པ། ལྷ་མོ་སྤྱི་ལ་མཚོ་རྡེལ་སྔོན་པོ་ལག་པས་མ་རེག་ཅིང་གནམ་གྱིས་མ་མཐོང་བར་བླངས་པ་ལ་བྷྱོ་བྲིས་པ་དང་མ་མོ་སྤྱིའི་སྲོག་འཁོར་དར་གྱིས་བཏུམས་པ། ཆོས་སྐྱོང་སྡེ་བརྒྱད་སྤྱི་ལ་ཕ་ཝཾ་ལོང་བུར་མཚལ་གྱིས་ཏྲི་བྲིས་པ་རྣམས་དང་། རྫས་ཆའི་རིགས། བྱང་གཏེར་ཐུགས་སྒྲུབ་ཀྱི་གཏུམ་མོའི་མེ་དབང་དང་སྐུ་གསུམ་རིགས་འདུས་ཀྱི་ཚ་རྫས་གྲང་རྫས། ཐུགས་ཆེན་རྒྱལ་པོ་ལུགས་ཀྱི་བདུད་རྩི་རིལ་བུ། དྲག་ཁྲོས་དང་ཁྱུང་གསང་བ་ཡང་ཁོལ་རྫས་རྒོད། བདུད་རྩི་བུམ་པའི་རྫས་ཐུམ་དང་རྡོ་རྗེ་ཁྲབ་རིང་འཁོར་ལོ། གཟའ་ཡུམ་བུམ་རྫས། ཁྱུང་ལྔ་ཚད་སྦྱར། འཇམ་དབྱངས་དང་ཕག་དཀར་ཤེས་རབ་རིལ་བུ། དབྱངས་ཅན་མའི་བཞི་མཉམ་སོགས་སོ་སོའི་གཞུང་མཐུན་བསྡུ། དམིགས་བསལ་སྐུ་བརྙན་དགོས་པ་འགའ་རེ་དང་ཛམ་དམར་སྐུ། སངས་གླིང་ཐུགས་ཆེན་རྒྱལ་པོ་ལུགས་ཀྱི་རྟ་ཞལ་ནང་གཞུག་ཅན། མྱང་གྲོལ་རིལ་བུས་བཀང་བའི་བུམ་པ་དབུ་རྒྱན་བཅིངས་པ། ཡང་དག་ཐོད་སྐུ། སྨན་གྱི་ཕོ་བྲང་ཚུལ་བཞིན་བཅས་པ། ཕུར་ཁྲོམ་རྒྱས་བསྡུས་གང་འཛོམ། གཡུ་ཐོག་སྙིང་ཐིག་གི་སྨན་ཁྲོལ་བུ། རྒྱུད་བཞི། གཏར་སྲེག་ཆས། ལྷ་སྨན་དང་དྲང་སྲོང་བཀའ་གཏད་ཆས། ལྕགས་ཕུར་ཁྲོ་ཞལ་ཅན། སེང་ལྡེང་ཕུར་པ་རེ་ཟུང་། སྦ་ལྕགས་ཚིགས་གསུམ། ལྕགས་རྡོར། དུག་ཁྲག །རྭ་སྲུང་། ཚེ་བདག་རྭ་ཟོར། འུར་རྡོ། ཁྲོ་ཆུའི་སྲོག་འཁོར་དང་སྐྱེས་ཕུར། བཙན་དུག །མཆོད་རྟེན་ནམ་སཱཙྪ་དཀར་ནག་རྣམས་དང་། བུམ་རྫས་དྲི་བཟང་དང་ཉེར་ལྔ་སོ་ལྔ་ཕྱོགས་བསྡུས་བྱས་པ་སྣེ་གཉིས། ཞི་ཁྲོ་སོགས་ལ་མཁོ་བའི་སྙིང་པོ་ལྔ། སྨན་ལྔ། རིན་ཆེན་ལྔ། དྲི་ལྔ། འབྲུ་ལྔ་སོ་སོར་བྱས་པ། བྱང་སེམས་དཀར་དམར། ཤ་ལྔ། བདུད་རྩི་ལྔ་སོ་སོའི་རིལ་བུ། སིནྡྷུར། ལི་ཁྲི། ཆོས་སྨན། རྩ་བརྒྱད་སྟོང་སྦྱར་དང། རཀྟ་སོ་ལྔ། གཏོར་མའི་སྤོད་སྨན། བཟང་དྲུག་སོགས་སྨན་སྣ། ཚེ་རྫས་ཕུར་མ། བྱིན་འབེབས་སྦྱར་སྤོས། མ་མགོན་སོགས་སྤོས་སྦྱོར། བ་བྱུང་ལྔ་སོགས་གཙོ་བོར་སློབ་དཔོན་ཉིད་ཀྱིས་སྔ་ནས་ཚགས་སུ་ཚུད་པར་བྱ་དགོས་ཤིང་། སྟ་གོན་རྫས་སོ་ཤིང་དེ་དོར་བའི་གདན་རས་བྲིས་པདྨ་འདབ་བརྒྱད་དང་། ཀུ་ཤ །དཔུང་སྐུད་ཁ་དོག་སོ་སོ་ལས་འབྱུང་བ་ལྟར་རམ། ཐོག་མར་བཀའ་བརྒྱད་བདེ་འདུས་སྟ་གོན་ལ་ཀུ་ཤ་དང་དཔུང་སྐུད་ལུས་ཚད་སུམ་བསྒྲིལ་ཁ་དོག་སྔོན་པོ་སློབ་མའི་གྲངས་མཉམ། གཞན་རྣམས་ཀྱི་སྐབས་སུ་འགྲིམ་རྒྱུའི་ཀུ་ཤའི་ཆུན་ཆེན་པོ་རྒྱ་གྲམ་དུ་བཅིངས་པ་དང་། དཔུང་སྐུད་ཁ་དོག་ལྔ་པ་གོང་གསལ་ཚད་ལྡན་རྡོ་རྗེའི་མདུད་པ་གསུམ་བཏབ་པ་རེ་རེ། མིག་དར་དང་ཅོད་པན་ཁ་དོག་ལྔ་པ་སློབ་མའི་གྲངས་མཉམ། དེ་དོར་བའི་གཞི་རས་ལ་ཕྱོགས་བཞི་དབུས་ལྔར་ཕྱག་རྒྱ་ལྔ་བྲིས་པ། མིག་ཐུར། ཕྱག་ཤིང་། བུམ་པ་ཁ་རྒྱན་མགུལ་ཆིངས་ལྡན་པ་བཅུ་ལས་མི་ཉུང་བ། གཟུངས་རྡོར། དུང་ཆོས་གཉིས་གསུམ། དབུ་རྒྱན། རྡོ་རྗེ། དྲིལ་བུ། རྡོར་དྲིལ་ལྷན་ཅིག་བཅིངས་པ། མེ་ལོང་ཁ་ཤས། ཤེལ་རྡོ་སྟེགས་ཅན་ཆེ་ཆུང་གཉིས་གསུམ། བནྡྷ་མཚན་ལྡན་ཁ་ཤས་དང་མོ་ཐོད་གཅིག་ཙམ། དར་ཁ་དོག་སྣ་ཚོགས་གང་འཛོམ། དབང་ཕྲེང་དུང་ངམ་ཤེལ། པད་རཱག །རཀྴའམ་ཐོད་ཕྲེང་། གདབ་ཕུར་ཆེ་ཆུང་། གྲི་གུག །ལྕགས་ཧོམ། བྱ་འུག་སྒྲོ་ཐོ་བ་སྒྲོལ་གྲི་གཏུན་ཁུང་སོགས་བསྒྲལ་ཆས་ཚང་བ། ཐོད་ངན་དུ་ཐུན་རྫས་སྣ་ཚོགས། ཟློག་འཁོར་སྤྱི་འགྲོ །འཚེ་ཡུངས་རྩང་སོགས་ཟོར་ཆས། དུར་རྡོ་རྒྱ་གྲམ་ཕུང་རེ་བྱད་ཐག་ཐོད་ངན་མནན་ཆས། རྗེས་གནང་ལ་མཁོ་བའི་གདུགས་དང་ཕྱག་ཤིང་འཁོར་ལོ། མེ་དབང་ལ་རས་གོས་སྒོམ་ཐག་ཨང་རག་རྣམས་ཀྱང་གལ་ཆེ་སྐབས་དངོས་འཛོམ་ན་ལེགས། བྱང་གཏེར་དུག་སྲུང་རྡོ་རྗེ་ཕ་ལམ། མངའ་དབང་རིན་ཆེན་འབར་བ། འཇོམས་བྱེད་རྩལ་ཆེན་སོགས་ཁྱད་པར་བ་རྣམས་ཀྱི་དགོས་བྱའང་སོ་སོའི་སྐབས་སུ་བཤད་པ་ལྟར་སྔ་ཚགས་སུ་ཚུད་པ་བྱ། གཡབ་དར་དམར་ནག་གཉིས། དགང་གཟར་བླུགས་དང་སྦྱིན་སྲེག་ཆས་རྫས་ཆེན་བཅུ་གཅིག་སོགས། རྡུལ་ཚོན་སྣ་ལྔ། གུལ་གུལ། ཡུངས་ཀར། ཏིལ་ནག །སྒྲུབ་ཆེན་དང་སྦྲེལ་ན་དེའི་ཆས་སྒབ་སྐོར་རལ་གྲི་བཞི་མདའ་བཞི་ཕུར་བུ་བཅུ་བཞི་སྟེགས་བཅས་རྒྱལ་ཐོ་སོགས་དང་། མི་སྦྲེལ་ཡང་དཀྱིལ་འཁོར་གྱི་རྒྱན་རྒྱལ་མཚན་བཞི་དར་འཕན་བཞི་སོགས་བཀོད་ན་ལེགས་པས་གང་འཛོམ། སྨན་རཀ་དང་ཞི་མཆོད་དྲག་མཆོད་སྣོད་སྒྲོན་ཐུར་བཅས། ཆང་ཕུད། ཡོལ་བ། ཚེ་མདའ། དབང་སྐབས་ཉེར་མཁོའི་སྨན་རག་གཏོར་གསུམ་ཆུང་ངུ་སྣོད་གཅིག་ཏུ་བཞག་པ། ཕྱི་མཆོད་རྣམ་བདུན་གཅིག་ཏུ་བསྒྲིགས་པ། སྟེགས་ཁེབས་ཆེ་ཆུང་། ཌཱ་དྲིལ་རྐང་གླིང་། རོལ་ཆས་སོགས་མདོར་ན་འོག་ཏུ་དགོས་པ་རྣམས་ཐད་ཀར་སླེབ་དུས་མ་ཤོལ་བར་ཞིབ་པར་བསྒྲིག །དགོས་ཆས་འདང་ངེས་ཀྱི་མཆོད་ཕྱེ་གཙང་མ། མར། མཆོད་འབྲུ་བུང་མང་། མར་མེ་སྟོང་མཆོད་ལས་མི་ཉུང་བ། སྤོས་རེང་ངམ་སྤོས་ཕྱེ་དྲི་ལྡན། དཀར་གསུམ། མངར་གསུམ། ཟས་སྣ། གོས་སྣ། ཆང་ཕུད། གཏོར་ཤ་གཙང་མ་རྣམས་ཀྱང་ཚོགས་པར་བྱའོ། ༈ །གསུམ་པ་བྱེ་བྲག་སོ་སོའི་གཤོམ་བཀོད་བཤད་པ་ལའང་། ཐོག་མར་དབང་བསྐུར་ཚུགས་ཉེ་བའི་ཉིན་སྔ་མ་རྣམས་སུ་བཀའ་བརྒྱད་རྡོར་སེམས་ཀྱིས་མཚོན་པའི་གཏོར་མ་འོག་ཏུ་དགོས་པ་རྣམས་ལས་ཐོག་མར་མཁོ་བ་རྣམས་དང་། སྤྱི་འགྲེ་ཆོག་པ། བླ་གཏོར་རམ་ཞི་གཏོར། དཔལ་གཏོར་རིགས་གཉིས། ཟུར་གསུམ་དམར་པོ་རྒྱན་ལྡན་སོགས་ལྔ་བདུན་རེ་ཙམ། ཚེ་འབྲང་ཤིང་ལོ་དང་ཉི་ཟླའི་ཁ་རྒྱན་ཅན་ཁ་ཤས་རྣམས་མར་ཟན་གྱིས་བཅོས་ཏེ་ཚོན་དང་རྒྱན་སྤྲོས་སྤུས་ལེགས་བྱ། རྩ་གསུམ་སྤྱི་དང་ཁྱད་པར་ཆོས་སྲུང་གཏེར་སྲུང་རྣམས་རེ་རེ་བཞིན་འཕྲལ་འཕྲལ་གཤོམ་པ་མ་ལྕོགས་ན། བླ་མ་ཡི་དམ་མཁའ་འགྲོ །ཆོས་སྐྱོང་དངོས་གྲུབ་རོལ་མཚོ་རྗེས་འབྲང་དང་བཅས་པའི་གཏོར་མ་ལེགས་པར་བཞེངས། ལས་བྱང་ལ་དགོས་པའི་མཆོད་གཏོར་རིགས་ཚང་བར་བཅའོ། །དངོས་གཞི་ཚུགས་པའི་ཐོག་མར་གནས་ཁང་ཕྱགས་དར་བྱ། རྩ་བ་གསུམ་གྱི་སྐུ་གསུང་ཐུགས་ཀྱི་རྟེན་བྱིན་རླབས་ཅན་རྣམས་དང་། ཆོས་སྐྱོང་གི་རྟེན་སོགས་བཀྲམ། བླ་བྲེ་དར་འཕན་སོགས་རྒྱན་གྱི་བཀོད་པས་མཛེས་པར་བྱ། སྒྲུབ་ཆེན་དང་སྦྲེལ་ན་སྔོན་འགྲོ་ས་ཆོག་ཕྱི་ནང་མཚམས་གཅོད་ནས་བཟུང་། རྗེས་ཀྱི་བྱ་བ་རྣམས་གྲུབ་ཀྱི་བར་ལག་ལེན་དེའི་ལུགས་བྱ་དགོས་ཀྱང་འདིར་ཡི་གེས་འཇིགས་པས་མ་སྤྲོས་ལ། སྐབས་དེར་ནི་དཀྱིལ་འཁོར་ལྡིང་ཁྲི་བརྩེགས་མར་བྱས་པའི་འོག་ཏུ་རྡོར་སེམས་དཀྱིལ་འཁོར་རྒྱུན་བཞག་གི་མཐའ་སྐོར་དུ་ཕྱི་ནང་མཆོད་པ་བརྒྱ་རྩ་སོགས་བསྒྲིག །སྟེང་མར་སྐབས་སོ་སོའི་དཀྱིལ་འཁོར་དབང་རྫས་རྣམས་རེས་མོས་སུ་བཤམ། སྒབ་བསྐོར་སོགས་ཀྱི་ཆས་རྣམས་སྤྱི་ལྟར་བྱ་བ་ཡིན་ནོ། །སྒྲུབ་ཆེན་དང་མ་འབྲེལ་ན་སྟེགས་བུ་རྒྱ་ཆེ་བ་ཁེབས་བཟང་པོས་བཀབ་ཅིང་། དབང་མང་པོ་སྦྲེལ་སྐབས་དཀྱིལ་འཁོར་དང་དབང་རྫས་རྣམས་ཤོང་ངེས་པའི་ཟུར་བཞིར་རྒྱལ་མཚན། ལོགས་བཞིར་འཕན་གཟུག །སྟེང་དུ་བླ་བྲེ་དར་དཔྱངས་ཀྱིས་མཛེས་པར་བརྒྱན། དེ་སྟེང་དཀྱིལ་འཁོར་གང་ཡིན་བཀྲམ་པའི་དབུས་སུ་བུམ་གཏོར་བརྩེགས་མར་འགོད་དགོས་པའི་རིགས་ལ་འཕྲུལ་སྟེགས་རིམ་པ་གཉིས་པ་བླང་བཞག་བདེ་བ་དང་། བུམ་གཏོར་གང་རུང་འཇོག་དགོས་པ་སྤྱི་དང་སྐུ་ཚབ་བཞུགས་གདན་སོགས་རྐང་གསུམ་འཇོག་དགོས་པས་དེའང་གྲངས་ཀ་མང་དུ་བསྡོགས། གལ་ཏེ་དཀྱིལ་འཁོར་རས་བྲིས་མི་འཛོམས་པའི་དབང་བྱིན་རླབས་ཆུང་ངུའི་རིགས་ལ་མཎྜལ་སྟེང་ཚོམ་བུ་ལྷ་གྲངས་བཀོད་ཀྱང་ཆོག་མོད། ཚོམ་བུའང་ཚོན་གྱིས་ཁ་བསྒྱུར་བའི་འབྲས་ལ་མར་གྱི་སྙིང་པོ་བྱས་ཏེ་ལྷ་མདོག་དང་མཚུངས་པའི་ཆེ་ཆུང་མང་པོ་གྲུབ་ན་ལེགས། བུམ་པ་ལ་གསར་མའི་ལུགས་སུ་གོས་བཟང་པོ་དང་སྲད་བུ་སོགས་ཀྱིས་དཀྲི་བ་ལས་དམིགས་སུ་མ་གསུངས་ཀྱང་། རྙིང་མ་གཏེར་མའི་ཕྱོགས་ཕལ་མོ་ཆེར་མགུལ་ཆིངས་དམིགས་བསལ་དུ་བཤད་ཅིང་ད་ལྟ་ཕྱག་ལེན་དུའང་མཛད་པས། དམིགས་སུ་མ་བཤད་པ་རྣམས་ལའང་མགུལ་ཆིངས་ལྷ་གཙོ་བོའི་སྐུ་མདོག་དང་མཐུན་པར་བཅིངས། བུམ་རྫས་ཀྱང་སྤྱི་ཁྱབ་ཐམས་ཅད་བླ་མེད་ཁོ་ན་ཡིན་པས་སོ་ལྔ་འབའ་ཞིག་དང་དྲི་བཟང་གི་ཆུ་སྦྱར། ཚེ་དབང་ཕལ་ཆེར་དང་། འཇམ་དབྱངས་ལྟ་བུ་དམིགས་བསལ་ཅན་ལ་ཉེར་ལྔ་འདེབས། བྱིན་རླབས་ཀྱི་རིགས་སོགས་ཀྱི་ཐོད་པའི་བདུད་རྩི་ཆང་དང་བདུད་རྩི་ཆོས་སྨན་སྦྱར། རིག་ཙཀ་ཡོད་པའི་དབང་བཞིའི་རིགས་རྣམས་ལ་དེ་སྟེང་མངར་གསུམ་རོ་བྲོ་ངེས་པར་བྱ། ཚེ་དབང་གི་རིགས་ལ་ཚེ་རིལ་ཚེ་ཆང་མངར་གསུམ་དང་སྦྱར་ཞིང་། ཡོད་ན་ཚེ་རྫས་ཕུར་མའང་འདེབས། དབང་གི་བགེགས་བསྐྲད་ལ་གུ་གུལ། བྱིན་འབེབས་ལ་འཛོམ་ན་འབེབས་རྫས། མེད་ན་སྦྱར་སྤོས་དྲི་ཞིམ་པ་བདུག་པ་སོགས་མ་ཆད་པར་བྱའོ། །མིག་དར་མེ་ཏོག་སོགས་ཀྱང་བླང་བཞག་བདེ་བར་བྱས་ཏེ་ནམ་དགོས་ཀྱི་སྐབས་མཎྜལ་མེ་ཏོག་བཀྲམ་སྡུད་དང་ལྷན་ཅིག་གཏད་ཆོག་པར་བྱ། བཀའ་བརྒྱད་ལྟ་བུའི་དབང་ཆེན་མཚམས་སྦྱར་ཡོད་རིགས་ལ་དེ་དག་བླ་མས་བརྡ་སྤྲད་པ་དང་མཉམ་དུ་འགྱེད་དགོས། སྤྱིར་འདི་དག་གི་སྐབས་སུ་ལས་རྡོར་བསླབ་ཤེས་གོ་བ་ཕྱག་ལེན་ཞིབ་པ་ཞིག་གིས་བཤམ་བཀོད་རྣམས་སྔ་མ་གྲུབ་བསྟུན་དེའི་ཆས་རྣམས་བསྡུ་ཞིང་། ཕྱི་མ་རྣམས་འཕྲལ་འཕྲལ་མི་ཤོལ་བ་བསྒྲིག་ཐུབ་པ་དགོས། མཆོད་གཡོག་ལག་བདེ་ཞིག་གིས་ཉིན་རེའི་མཆོད་གཏོར་དཀར་བགེགས། ཆོས་སྲུང་རྒྱུན་འབུལ་གཏེར་གཞི། ལས་བྱང་རེ་རེ་བཞིན་གཏོར་གསོས་ཐེབས་ཀྱུ། ཞལ་ཟས། ཚོགས། ཆད་བརྟན་སོགས་སྤྱི་དང་། བྱེ་བྲག་གང་དགོས་རྣམས་བཅའ་འོ། །ལག་ལེན་རྒྱས་བསྡུས་གཉིས་ཀ་ལའང་གནས་ཁང་གོ་ཡུལ་ཡངས་ན་སྒྲུབ་དཀྱིལ་དང་བར་མཚམས་བྱེ་བའི་རྒྱབ་ཕྱོགས་སུ་སྟེགས་བུ་རིམ་པ་གསུམ་པའི་བསྟར་དང་པོ་ལ། བླ་མ་ཡི་དམ་མཁའ་འགྲོ་ཆོས་སྐྱོང་ཕོ་མོ་ནོར་ལྷ་ཕྱི་རྒྱུད་བཅས་ཀྱི་གཏོར་མ་བདུན་ཚར། གཡས་གཡོན་དུ་སྨན་རཀ་ཕབ་ལྡན། གཉིས་པར་དངོས་རོལ་རྗེས་འབྲང་ཆད་བརྟན་རྒྱུན་བཞག་བཅས། གསུམ་པར་ཞི་མཆོད་དྲག་མཆོད་མཇུག་སྤྲོད་དུ་བཤམས་པའི་བར་དུ་མཉྫི་ལ་ཆོས་སྐྱོང་གཏོར་སྤུངས་རྒྱུན་འབུལ་བཀོད། འདི་དག་ནི་མཆོད་གཏོར་སྤྱི་ཁྱབ་པ་ཡིན་པས་གཏོར་འབུལ་ནམ་བྱེད་ལ་ཐེབས་ཀྱུ་སོགས་ཀྱིས་གསོ་བ་དང། མཆོད་པ་ཉིན་རེ་བཞིན་བརྗེ། ལས་བྱང་སྔ་ཕྱིའི་བར་མཚམས་ལྟ་བུ་ལ་ཁ་གསོ། གོ་ཡུལ་གྱིས་འདི་ལྟར་མ་ཤོང་ནའང་དཀྱིལ་འཁོར་སྒེ་མཆོད་དང་གཏོར་མ་བཤམ་དགོས་པས་དེ་ཀས་འཐུས་སོ། ༈ །དེ་ནས་དབང་བསྐུར་སོ་སོ་དང་འབྲེལ་བའི་གཤོམ་བཀོད་ལག་ལེན་དངོས་ཀྱི་དང་པོ། བཀའ་བརྒྱད་བདེ་འདུས་ཀྱི་དབང་ཆེན་ལའང་སྒྲུབ་དབང་ལུགས་སུ་བྱེད་ན་ལག་ལེན་སྤྱི་ལྟར་བྱ། མགྱོགས་དབང་བྱེད་ན། སྟ་གོན་རྫས་བཞི་སོ་ཤིང་གི་ར་བ་བཅས་ཅོག་སྟེགས་ལྟ་བུར་བཀོད། སྟེགས་བུར་རས་བྲིས་ཀྱི་དཀྱིལ་འཁོར་བཀྲམ་པའི་དབུས་སུ་མཉྫིའི་སྟེང་རྣམ་རྒྱལ་བུམ་པ་མགུལ་ཆིངས་དམར་སྨུག་ཅན། དྲི་བཟང་ཆུ་དང་སོ་ལྔས་བཀང་བ་ཁ་རྒྱན་གཟུངས་རྡོར་བཅས་པ། ཤར་དུ་རྡོར་དྲིལ་ལྷན་ཅིག་བཅིངས་པ་དང་འཁོར་ལོ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ་རྣམས་དར་ཆིངས་ཕྱོགས་མདོག །ཙཀ་ལི་ཚང་བ་ཚན་དུ་བཅད་པ། བུམ་དབང་། ཕྱི་ནང་རྫས་དབང་རྣམས་མདུན། ཞི་ལྷ་ཁ་རྒྱན་གསེབ་བམ་དབུས། དཔལ་དགུ་སོ་སོའི་རང་གནས། བཀའ་སྡོད་བྱང་ཤར་དུ་དགོད། གསང་དབང་ཐོད་ཆང་། ནུས་དབང་ཆས། རིག་ཙཀ །ཤེལ་རྡོ་རྣམས་དང་། ཞི་དྲག་མཆོད་པ། ཟླ་གམ། ཛ་གད། ཚེ་བུམ་རྣམས་ཀྱང་ཕྱག་ལེན་ལྟར་དགོད་ཅིང་། རྒྱབ་ཕྱོགས་སྟེགས་བུ་ཟུར་པར་མཆོད་བཤམ་མེད་ན་དཀྱིལ་འཁོར་ཉིད་ཀྱི་མདུན་རྒྱབ་གང་བདེར་སྨན་རཀ་གཏོར་གསུམ་བཤམ་དགོས་པས། འདིར་དཔལ་གཏོར་གཙོ་འཁོར་དགུ་པ་བཤམ། སྤྱིར་འདི་ཕྱིན་ཆད་ཀྱི་དཀྱིལ་འཁོར་ཐམས་ཅད་ལ་སོ་སོའི་མཆོད་གཏོར་དང་། བྱང་ཤར་མཚམས་འཛིན་མེ་ཏོག །ཤར་དུ་མཆོད་ཡོན་ནས་བརྩམས་ཏེ་མཆོད་པ་རྣམས་བདུན་བསྐོར་བཤམ་དང་། དམིགས་བསལ་མ་བཤད་པ་ལའང་ཕྲེང་ཚར་གྱི་སྒོས་མཆོད་རེ་ཆད་དུ་མི་རུང་བ་ནི་ཐམས་ཅད་ལ་ཤེས་པར་བྱ། སློབ་དཔོན་མདུན་དུ་ལས་བུམ། གཡབ་དར། ཌཱ་དྲིལ། ནང་མཆོད། གདབ་ཕུར། མེ་ཏོག་གི་སྣོད། ཐུན་ཟེ་རྣམས་འཇོག་གོ ༈ །།དེ་ནས་དཀྱིལ་འཁོར་ཐམས་ཅད་ཀྱི་ཁྱབ་བདག་དཔལ་རྡོར་སེམས་ཐུགས་ཀྱི་སྒྲུབ་པ་ལ། རས་བྲིས་སམ་མཎྜལ་ལ་ཚོམ་བུ་གཅིག་པའི་སྟེང་ཁྲིའུར་བུམ་པ། ཐོད་པའི་བདུད་རྩི། སིནྡྷུ་རའི་མེ་ལོང་ལ་ཆོས་འབྱུང་ལྟེ་བར་མཱུཾ་ཡིག་བྲིས་པ་དང་ཤེལ་རྡོ་སྟེགས་ལྡན་རྣམས་བརྩེགས་མར་འཇོག ༈ །ཀར་གླིང་ཞི་ཁྲོ་ལ། གླུད་ཟན་སློབ་མའི་གྲངས་མཉམ། སྟ་གོན་རྫས་བཞི། དཀྱིལ་ཐང་སྟེང་གཙོ་བུམ་སྨན་ལྔ་མཐིང་། ཤར་བུམ་འབྲུ་ལྔ་དཀར། ལྷོ་བུམ་རིན་ཆེན་ལྔ་སེར། ནུབ་བུམ་དྲི་ལྔ་དམར། བྱང་བུམ་སྙིང་པོ་ལྔ་བཏབ་ཅིང་མགུལ་ཆིངས་ལྗང་གུ་ཅན། དབུ་རྒྱན་སོགས་རིག་དབང་། རྣམ་སྣང་སྐུ། ཕྱག་མཚན་ལྔ་སོ་སོར་ཕྲལ་བ་དང་གཅིག་བསྡུས། ཐུབ་དྲུག་ཕྱག་མཚན། ལྷ་ཙཀ་ཚང་བ། གསང་ཐོད། རིག་ཙཀ མེ་ལོང་ཤེལ་རྡོ། རྒྱལ་སྲིད་རྟགས་བརྒྱད་སོ་སོར་ཕྲལ་བ། དབུས་སུ་རྐང་གསུམ་མཐོ་བའི་ཁར་གཏོར་མ་ཟླུམ་པོ་པད་འདབ་བརྒྱད་ཀྱིས་བསྐོར་བའི་རྩེར་རྡོ་རྗེ་ཕྱེད་པ། གཡས་གཡོན་ཉི་ཟླས་བརྒྱན་པ་ལ་གཙོ་བོའི་ཙཀ་ལི་བཙུགས་ཤིང་དར་གདུགས་ཕུབ་པ་བཀོད། འདི་རིགས་གཏོར་དབང་མཐར་དངོས་གྲུབ་ཏུ་སྦྱིན་དགོས་པའི་རིགས་ལ་གཏོར་སྣོད་ཆེ་ན་ཤ་དང་ཟན་དུམ་སོགས་ཟས་སྣས་བསྐོར་ཅིང་། མ་ཤོང་ན་ཟས་སྣ་སྣོད་གཞན་དུ་བླུགས་པ་དང་ལྷན་ཅིག་ཐོད་པའི་བདུད་རྩི་རེའང་བཞག་གོ ༈ །གྲོལ་ཏིག་ཞི་ཁྲོ་ལ། དཀྱིལ་འཁོར་སྟེང་བུམ་པ་གསང་ཐོད་མེ་ལོང་སིནྡྷུ་རའི་ཐིག་ལེ་ཅན་ཤེལ་རྡོ་རྣམས་བརྩེགས་ནས་བཀོད། ཞི་ཁྲོའི་ལྷ་ཙཀ་སྔ་མ་ལྟར་བཀོད། ༈ གནམ་ཆོས་ཞི་ཁྲོ་ལ་མཎྜལ་ཚོམ་བུ་གཅིག་སྟེང་རྣམ་བུམ། མདུན་རྒྱབ་གང་བདེར་ལུགས་འདིའི་ལྷ་བརྒྱ་གཏོར་གཅིག་གམ་དཔལ་གཏོར་སྤྱི་འགྲེ། སྐུ་ཙཀ་ཕྱོགས་སྦམ། འབྲས་སྙེ། དུང་། ཞིང་དབྱུག་ཐོད་ཕྲེང་རྣམས་ཀྱི་ཙཀ་ལི་དགོད། སྤྲོ་ན་རྫས་རྟགས་བཅས། ཕྱིན་ཆད་གཟུངས་དབང་ཐམས་ཅད་འདིས་འགྲེ ༈ །བདེ་གླིང་བཀའ་འདུས་ཞི་ཁྲོ་ལ། སྟ་གོན་རྫས་བཞི། དཀྱིལ་འཁོར་སྟེང་བུམ་པ་ལྔ་དང་རིག་དབང་ཆས། གཏོར་མ་སོགས་ཀར་གླིང་ཞི་ཁྲོ་ལྟར་ལ། ཙཀ་ལི་ཚང་བ། ལྷོར་གསང་ཐོད། ནུབ་རིག་ཙཀ་ཕག་མོའི་གཟུགས། བྱང་དུ་ཤེལ་རྡོ་མེ་ལོང་རྨ་བྱའི་མདོངས་རྣམས་བཀོད། ༈ གྲུབ་ཐོབ་ཐུགས་ཐིག་གི་སྒྲུབ་ཐབས་སྐོར་ལྔ་ལ། དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པ་འོག་མ་རྣམས་ལའང་འགྲེ །བླ་མ་ཞི་བ་ལ་དཀྱིལ་འཁོར་དབུས་རྐང་གསུམ་སྟེང་རྣམ་བུམ་བཅུད་ལྡན་མགུལ་ཆིངས་དཀར་པོ་ཁ་རྒྱན་བཅས། ཁ་རྒྱན་གསེབ་བམ་མདུན་དུ་གུ་རུ་ཟ་ཧོར་མའི་སྐུ་ཙཀ །གཡས་གཡོན་མདུན་རྒྱབ་རྣམས་སུ་དབུ་རྒྱན། རྡོ་རྗེ། དྲིལ་བུ། རྒྱུད་ཀྱི་གླེགས་བམ། མེ་ལོང་། ཆོས་གོས་རྣམ་གསུམ། རིན་ཆེན་རུས་རྒྱན་ཕྱོགས་བསྡུས་ཀྱི་ཙཀ་ལི། གསང་ཐོད་བདུད་རྩི། རིག་ཙཀ །རྒྱབ་ཕྱོགས་སུ་བླ་མའི་གཏོར་ཆེན། སློབ་མར་བཀྱེ་རྒྱུའི་དངོས་གྲུབ་རྫས། མདུན་དུ་ཚེ་འབྲང་། ཚེ་རིལ། ཚེ་ཆང་། རྫས་རྟགས་དང་རྒྱལ་སྲིད་ཙཀ་ལི། སྟེགས་ཟུར་པ་ལྟ་བུ་གང་བདེར་སྒོ་འབྱེད་ཁྲུས་བུམ། མར་མེ། ཆུ་བུམ། རྡོ་རྗེ། ལྷུང་བཟེད་ཆོས་གོས་གླེགས་བམ་ཕྱོགས་བསྡུས། རྟེན་འབྲེལ་བཅུ་གཉིས་གཟུགས་རིས་རྣམས་བཀོད། ཏིལ་སྦྱོང་སོགས་ཉེར་མཁོ་རྣམས་ཀྱང་བསྡོགས། ༈ གུར་དྲག་ལ། དཀྱིལ་འཁོར་དབུས་སུ་བུམ་པ་ཆིངས་དམར། གུར་དྲག་གཙོ་བོའི་སྐུ །སྔགས་བྱང་། ཕྱག་མཚན་རྡོ་རྗེའམ་མེ་ལོང་། རྒྱབ་ངོས་སུ་དཔལ་གཏོར་དར་གདུགས་ཅན། ལས་ཕུར་རྣམས་བཀོད། ལྕགས་ཧོམ། ལིང་ག །བསྒྲལ་ཆས་རྣམས་འདུ་བྱ། ༈ ཐུགས་རྗེ་ཆེན་པོ་ལ། དཀྱིལ་འཁོར་དབུས་བུམ་པ་ཆིངས་དཀར། འགྲོ་འདུལ་ཕྱག་བཞི་པ་ཡུམ་ཅན་སྐུ་ཙཀ །ཤེལ་ཕྲེང་སྔགས་བྱང་། ཕྱག་མཚན་ཕྲེང་བ་པད་དཀར། མདུན་ངོས་མྱོང་གྲོལ་རིལ་བུམ། རྒྱབ་ཏུ་ཞི་གཏོར་དར་གདུགས་ཀྱིས་སྤྲས་པ་བཀོད། ༈ རྟ་མགྲིན་ལ། དཀྱིལ་འཁོར་དབུས་རྣམ་བུམ་བཅུད་ལྡན་ཆིངས་དམར་ཅན། རྟ་མགྲིན་གཙོ་བོའི་སྐུ །སྔགས་བྱང་དང་རཀྴའི་ཕྲེང་བ། ཕྱག་མཚན་རྡོ་རྗེ་ཁ་ཊྭཱཾ་རལ་གྲི་སྡིགས་མཛུབ་མདུང་ཐུང་རྒྱུ་ཞགས་ཕྱོགས་གཅིག་བྲིས་པ། རྒྱབ་ཏུ་དཔལ་གཏོར་རྟ་ཞལ་ཅན། གདབ་ཕུར། ལྕགས་ཧོམ་ལིང་ག །བསྒྲལ་ཆས། མེ་ཧོམ། གཏོར་ཟོར་སོགས་འདུ་བྱ། ༈ ཕག་མོ་ལ། དཀྱིལ་འཁོར་དབུས་ཁྲིའུ་ལ་ཐོད་པ་མཚན་ལྡན་བདུད་རྩིས་བཀང་བའི་ཁ་སིནྡྷུ་རའི་མེ་ལོང་ལ་ཆོས་འབྱུང་བཾ་ཡིག་སྔགས་བྱང་གིས་བསྐོར་བས་བཅད་ལ། དར་དམར་གྱིས་བཀབ་པའི་སྟེང་ཤེལ་རྡོ་བཞག །གཙོ་མོའི་སྐུ །སྔགས་བྱང་ཐོད་ཕུར། མེ་ལོང་། གཡས་སུ་བནྡྷ་ཁ་སྦྱོར་བདུད་རྩི་རིལ་བུས་བཀང་བ་ཆས་ལྡན། གཡོན་དུ་སྨན་གཏོར་རཀྟ་མར་མེ་རྣམས་སྣོད་གཅིག་ཏུ་བཞག་པ་རྣམས་བཀོད། ༈ གཏེར་གསར་སྒྱུ་འཕྲུལ་ཞི་བ་ལ། སྟ་གོན་རྫས་བཞི། དཀྱིལ་འཁོར་སྟེང་བུམ་པ། དབུ་རྒྱན། དར་དམར་མཐིང་སྦྲེལ་བའི་ཅོད་པན། ཙཀ་ལི་ཚང་བ། རྒྱུད་ཀྱི་གླེགས་བམ་དར་གྱིས་དྲིལ་བ། གསང་ཐོད། རིག་ཙཀ་བཅས། ༈ སྒྱུ་འཕྲུལ་ཁྲོ་བོ་ལ། དཀྱིལ་འཁོར་སྟེང་བུམ་པ། ཙཀ་ལི། གླེགས་བམ། གསང་ཐོད། རིག་ཙཀ་བཅས། ༈ དོང་སྤྲུགས་ལ། དཀྱིལ་འཁོར་སྟེང་གཙོ་བུམ། དབུས་སུ་བཏགས་གྲོལ་གླེགས་བམ་དང་ཙཀ་ལི་ཚང་བ། སློབ་མའི་གྲངས་མཉམ་དཔལ་གཏོར་སྣོད་བཅས། བྱང་ཤར་དུ་ཁྲུས་བུམ་མགུལ་ཆིངས་དཀར་པོ་ཅན་བཤམ། ༈ སྒྱུ་འཕྲུལ་ཚེ་དཀྱིལ་རྒྱས་པ་ལ། དཀྱིལ་འཁོར་སྟེང་བུམ་པ་ཕྱོགས་བཞི་དབུས་ལྔར་དཀར་མཐིང་སེར་དམར་ལྗང་གུའི་མགུལ་ཆིངས་དང་བཅུད་སྨན་ལྔ་སོགས་ཀར་གླིང་ལྟར། དབུས་མདུན་ལྷ་ཙཀ་ཚང་བ། རྒྱབ་ངོས་ཁྲིའུར་ཚེ་འབྲང་། གཡས་སུ་ཐོད་པའི་ནང་མར་གྱི་རིལ་བུ་ལྷ་གྲངས་དང་བདུད་རྩིས་བཀང་བ། གཡོན་དུ་མར་མེ་གསལ་བ། མདུན་དུ་ཚེ་ཆང་མངར་གསུམ་སྦྱར་བ། དབུས་སུ་ཚེ་མདའ་རྒྱན་ལྡན། མཚམས་བཞིར་མདའ་དར་དཀར་སྔོ་དམར་ལྗང་བཞི། ཚེ་ནས་བཅས་བཀོད། ༈ སངས་རྒྱས་མཉམ་སྦྱོར་ལ། དཀྱིལ་འཁོར་རམ་དུམཎྜལ་ཚོམ་བུ་དབུས་སུ་གཅིག །དེ་རྒྱབ་ཕྱོགས་བཞིར་བཞི་རིམ་གཉིས་བཀོད་པའི་སྟེང་རྣམ་བུམ། མདུན་སོགས་སུ་རིགས་དྲུག་གི་སྐུ་ཙཀ་གསང་ཐོད། རིག་ཙཀ །ཕུར་བུ་གྲི་སྣ་ཚོགས་རྡོ་རྗེ་རྣམས་བཀོད། ཕྱོགས་བཞིར་བཞི་བསྣོལ་ཆ་བཞི། ཤར་དུ་ལྷག་པོ་ཆ་གཉིས་བཤམ་མོ།། ༈ །།དེ་ནས་རྩ་གསུམ་སྤྱིའི་སྐོར་ལ། ཡང་གཏེར་རྩ་གསུམ་དྲིལ་སྒྲུབ་ལ་སྟེགས་བུར་མེ་ཏོག་སིལ་མ་བཀྲམ་པའི་དབུས་སུ་བླ་གཏོར་དམར་ཟླུམ་རྒྱན་ལྡན་དར་གདུགས་བཅས་པ། མདུན་དུ་ཚེ་འབྲང་། གཡས་གཡོན་ཚེ་རིལ་ཆང་བཅས། ༈ ཀར་ལུགས་རྩ་གསུམ་དྲིལ་སྒྲུབ་ལ། གཞི་སྟེང་འབྲས་གྱི་གཡུང་དྲུང་གཡས་བསྐོར་བྲིས་པའི་དབུས་སུ་ཆང་དང་དཀར་མངར་བསྲེས་པའི་ཟན་གྱིས་པདྨ་འདབ་བརྒྱད་སྟེང་ཟླ་གམ་བཅད་ཁ་མདུན་བསྟན་ཐོག་ཚེ་བུམ་ཉི་ཟླ་ནོར་བུས་བརྒྱན་ཅིང་ཚེ་རིལ་གྱིས་བསྐོར་བ་ལ་སྐུ་ཙཀ་བཙུགས། དེའི་གཡས་སུ་ཚེ་རིལ། གཡོན་དུ་ཐོད་པའི་ནང་ཚེ་ཆང་། མདུན་རྒྱབ་གང་བདེར་བུམ་པ་ཆིངས་དམར། འཁོར་ལོ། པདྨ། རྡོ་རྗེའི་ཙཀ་ལི་སོ་སོ་བ། རི་རབ་ལ་ཕུར་ཆུང་བཏབ་པ། སིནྡྷུར། ཚེ་མདའ་བཅས་བཤམ་འདི་སྐབས་སློབ་མ་རྣམས་ཀྱི་གདན་རེ་རེ་བཞིན་ནས་འབྲས་ཀྱི་གཡུ་དྲུང་བྲི་པའམ། མ་ལྕོགས་ན་ཚོམ་བུ་རེ་དགོད། ༈ རད་གླིང་རྩ་གསུམ་འབྲས་བུའི་དོན་ཁྲིད་ལ། གཞི་སྟེང་དབུས་གཡས་གཡོན་མདུན་དང་བཞིར་མཎྜལ་རེ་ལ་ཚོམ་བུ་རེ་བཀོད་པའི་དབུས་སུ་བུམ་པ་མགུལ་ཆིངས་དམར་པོ་ཁ་རྒྱན་གཟུངས་རྡོར་བཅས་པའི་སྟེང་དུ་ཁྲིའུ་ལ་གཏོར་མ་རིན་ཆེན་འབར་བ་སྐུ་ཙཀ་དར་གདུགས་ཀྱིས་བརྒྱན་པ། གཞན་གསུམ་ལ་རྐང་གསུམ་བཞག་པའི་གཡས་ཀྱི་སྟེང་དུ་བུམ་པ་མགུལ་ཆིངས་དཀར་པོ། གཡོན་དུ་སིནྡྷུ་རའི་མེ་ལོང་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར་མདུན་ནས་གཡས་བསྐོར་གྱིས། ར་ཧ། ཙ་རི། ཧྲི་ནི། ཡ་ས་བྲིས་པ། མདུན་དུ་ཐོད་ཆང་ཆོས་སྨན་མངར་གསུམ་ཅན་བཀོད། ༈ འཇམ་དབྱངས་བླ་མའི་རྩ་གསུམ་དྲིལ་སྒྲུབ་ལ་མཎྜལ་པདྨ་འདབ་བརྒྱད་དབུས་ཚོམ་བུ་གཅིག་པའི་སྟེང་། བླ་མའི་གཏོར་མ་རྒྱན་ལྡན། གཡས་སུ་ཐོད་ཆང་། གཡོན་དུ་མེ་ལོང་། ཤེལ་རྡོ། མདུན་དུ་མདའ་གཞུ་བཅས་བཀོད། ༈ དགོངས་པ་ཡང་ཟབ་ཀྱི་རྩ་གསུམ་གཏོར་དབང་ལ། མཎྜལ་ཚོམ་བུ་དགུ་པའི་ཁར་མཉྫི་ལ་གཏོར་མ་རིན་ཆེན་འབར་བ་རྒྱན་ལྡན་བཀོད། ༈ ཞིག་གླིང་ཐུགས་དམ་ཟབ་པ་སྐོར་བདུན་ལ། དཀྱིལ་འཁོར་དབུས་སུ་རྐང་གསུམ་སྟེང་བུམ་པ་ཆིངས་དཀར་ཁ་རྒྱན་གསེབ་སྐུ་རྟེན་ཙཀ་ལིས་བརྒྱན་པ། མདུན་རྒྱབ་གང་བདེར་ཐོད་ཆང་ཁར་མེ་ལོང་ལ་ལི་ཁྲིའི་ཆོས་འབྱུང་པདྨ་འདབ་དྲུག་དབུས་སུ་ཧྲཱིཿ ཤར་ནས་གཡས་བསྐོར་དུ། ཧཱུྃ། ཧྲཱིཿ ཧྲཱིཿ ཧཱུྃ། ཛཾ། ཧཱུྃ། རྣམས་དང་མཐའ་སྐོར་དབྱངས་གསལ་བྲིས་པ་བཞག་པ་དར་དམར་གྱིས་ཁ་བཀབ་པ་དང་ལྷན་ཅིག་རིག་ཙཀ་དང་མེ་ལོང་དྭངས་པའང་བཀོད། རྒྱབ་ཏུ་དཔལ་གཏོར་དར་གདུགས་ཅན་བཅས། སྒེར་དབང་བདུན་པོ་ཆབ་ཅིག་བསྐུར་ན། མཎྜལ་ལ་ལྷ་མདོག་དང་མཚུངས་པའི་ཚོམ་བུ་བཀོད་པ་བདུན་དབུས་དང་མཐའ་སྐོར་དུ་བཞག་པའི་སྟེང་རྐང་གསུམ་ཁར་དབུས་བླ་གཏོར། མདུན་གཡོན་དཀར་ཟླུམ། མདུན་གཡས་ཚེ་བུམ། གཡས་སུ་དཀར་ཟླུམ། རྒྱབ་གཡས་དཔལ་བཤོས་དམར་པོ། རྒྱབ་གཡོན་ཛཾ་བཤོས། མདུན་དུ་དམར་གཏོར། ཐེབ་ནས་བདུན་དང་སོ་སོའི་སྐུ་ཙཀ་དབང་ཕྲེང་རིགས་བདུན་རྣམས་བཤམ། ༈ བྱང་པའི་མ་རྒྱུད་སྙིང་པོ་དོན་གསུམ་ལ། རས་བྲིས་སམ་མཎྜལ་ལ་དབུས་སུ་འབྲུ་ཚོམ་གཅིག །དེ་རྒྱབ་བཞི་རིམ་གཉིས་བཀོད་པའི་སྟེང་ཨེ་ཁྲོམ་ལ་ལྕགས་ཕུར་དར་ནག་ཅོད་པན་ཅན་གྱི་མདུན་ཕྱོགས་སུ་མཁའ་འགྲོའི་ཐོད་སྐུ་དང་ཕྲེང་དམར། དེ་སྟེང་ཁྲིའུར་བླ་མའི་གཏོར་མ་སྐུ་ཙཀ་དང་བཅས་པ་གཡས་གཡོན་དུ་ཐོད་ཆང་ཧཱུྃ་ཡིག །མེ་ལོང་། གདབ་ཕུར། གུ་གུལ། ཡུངས་ཀར། རཀྟ་ལྕགས་ཧོམ་ལིང་ག་བཅས་བཞག ༈ །ཆོས་གླིང་རྩ་གསུམ་དྲིལ་སྒྲུབ་ལ། དཀྱིལ་འཁོར་དབུས་སྟེགས་ལ་བུམ་པ་ཆིངས་དམར། ལྷ་ཙཀ་ཆ་ཚང་། མདུན་ངོས་ཚེ་འབྲང་རྟ་མགོས་མཚན་པ། སྔགས་བྱང་། དབང་ཕྲེང་དམར་པོ། ཤེལ་རྡོའམ་ཤེལ་གྱི་མེ་ལོང་གཟུགས་བརྙན་འཆར་བ། ཚེ་རིལ་ཚེ་ཆང་གོང་མཚུངས། ཚེ་མདའ། འདི་ཉིད་སྒེར་དུ་བྱེད་སྐབས་ཚེ་གལ་སོགས་དབང་ཆོག་ཏུ་གསལ་བ་ལྟར་བཤམ་བཀོད་བྱ་དགོས་ཀྱང་དཀྱུས་གཅིག་ཏུ་བསྐུར་ཚེ་སྤྱིར་བཤམས་པ་རྣམས་ཀྱིས་འཐུས་པ་འདི་རིགས་གཞན་ལའང་ཤེས་དགོས་སོ། ༈ །རྩ་གསུམ་ཟབ་མོ་ཀུན་འདུས་ལ། མེ་ཏོག་སིལ་མ་བཀྲམ། ཁྲིའུ་ལ་དཔལ་གཏོར་རྒྱན་ལྡན། བཟའ་བཏུང་བཅས་དགོད། ༈ རྩ་གསུམ་སྤྱི་འདུས་ལ། རས་བྲིས་སམ་འབྲུ་ཚོམ་གཙོ་བོ་གསུམ། དེ་རྒྱབ་སྒོ་བ་བཞི་བཅས་བཀོད་པའི་སྟེང་དུ་ཁྲིའུར་རྣམ་བུམ། མདུན་དུ་ལྷ་ཙཀ་བཞི། གཡས་སུ་གསང་ཐོད། གཡོན་དུ་ཤེལ་རྡོ་མེ་ལོང་དབང་ཕྲེང་། རྒྱབ་ཏུ་ཚེ་འབྲང་། ཚེ་རིལ་ཆང་མདའ་དར་བཅས་བཀོད། ༈ ཟབ་བདུན་རྩ་གསུམ་ལ། དཀྱིལ་འཁོར་སྟེང་མཉྫི་ལ་བུམ་པ་ཆིངས་དམར་ལྡན་པའི་ཁར་ཐོད་པའི་བདུད་རྩི་སིནྡྷུ་རའི་མེ་ལོང་ལ་ཆོས་འབྱུང་ལ་ཨོཾ་གསུམ་མའི་སྔགས་བྲིས་པ་དར་དམར་གྱིས་བཀབ་པའི་སྟེང་གུ་རུའི་སྐུ་ཚབ་རྣམས་བརྩེགས་མར་བཀོད། རྒྱབ་ཕྱོགས་སུ་བླ་གཏོར། མདུན་དུ་ཚེ་བུམ། གཡས་གཡོན་དུ་ཚེ་རིལ་ཚེ་ཆང་། ཤེལ་རྡོ་མདའ་དར་རྣམས་བཀོད་དོ།། ༈ །།དེ་ནས་བླ་མ་ཞི་བའི་སྐོར་ལ་ཐོག་མར། ཆོས་དབང་གསང་འདུས་ལ། སྟ་གོན་རྫས་བཞི། དཀྱིལ་འཁོར་སྟེང་བུམ་པ་ཆིངས་སྔོན་པོ། མདུན་དུ་ལྷ་ཙཀ་ཚང་བ་དང་པདྨ་འདབ་བཞིའི་སྟེང་གཏོར་མ་རིན་ཆེན་ཟུར་བརྒྱད་སྐུ་རྟེན་གྱིས་བརྒྱན་ཅིང་ཟས་སྣ་ཐོད་པའི་བདུད་རྩི་བཅས་ཀྱིས་གཏོར་དབང་ཞར་བྱུང་ཚང་། གཡས་གཡོན་དུ་གསང་ཐོད་རིག་ཙཀ །རྒྱབ་ཏུ་སྒྲུབ་ཐབས་གླེགས་བམ་བཅས་བཀོད། ༈ རྒྱ་ལོ་ཙཱའི་བླ་མ་བསྟན་གཉིས་སྐོར་གསུམ་རྩ་དབང་ལ། དཀྱིལ་འཁོར་རས་བྲིས་དབུས་རྣམ་བུམ། དེའི་དོན་དབང་ལ། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ། གཡས་གཡོན་དུ་གསང་ཐོད། རིག་ཙཀ །ཤེལ་རྡོ། མདུན་རྒྱབ་གང་བདེར་ཚེ་འབྲང་། ཚེ་རིལ་ཆང་། མདའ་དར། དབང་ཕྲེང་བཀོད། ༈ དྲི་མེད་ཐུགས་སྒྲུབ་ཡིད་བཞིན་ནོར་བུ་ལ། དཀྱིལ་འཁོར་དབུས་སུ་བུམ་པ་ཆིངས་སྔོན་ཅན། མདུན་དུ་ལྷ་ཙཀ་བརྒྱད། གཡས་གཡོན་དུ་བླ་མའི་སྐུ་འབག་དང་གཏོར་མ་རིན་ཆེན་ཟུར་བརྒྱད། གསང་ཐོད། རིག་ཙཀ དབང་ཕྲེང་། མེ་ལོང་རྡོ་རྗེ། ཚེ་འབྲང་། རིལ་ཆང་བཅས་བཀོད། ༈ བླ་མ་ལོངས་སྐུ་རྫོགས་ཆེན་ལ། དཀྱིལ་འཁོར་སྟེང་ཁྲིའུར་བུམ་པ་ཉེར་ལྔའི་རྫས་ལྡན་ཆིངས་དམར་བཅིངས་པའི་ཁར་མེ་ལོང་ལ་བསྙེན་སྔགས་མཚལ་བྲིས་ཀྱིས་བཀབ། དེ་སྟེང་ཚེ་འབྲང་བུམ་གཟུགས་པད་འདབ་བཞི་དང་རིལ་བུས་བསྐོར་བ་ཉི་ཟླའི་རྒྱན་ལྡན་བཞག །གཡས་གཡོན་རྒྱབ་ཏུ་ཚེ་རིལ་ཚེ་ཆང་མདའ་དར་རྣམས་སོ། ༈ །རྫོགས་ཆེན་ཚེ་དབང་བུ་སྟོན་གོང་ཁུག་མ་ལ། རས་བྲིས་སམ་མཎྜལ་ཚོམ་བུ་དགུ་པའི་ཁར་རྐང་གསུམ་སྟེང་ཚེ་བུམ་རྡོ་རྗེ་ཉི་ཟླ་ནོར་བུ་ནཱ་དའི་མཚན་མས་བརྒྱན་ཅིང་ཚེ་རིལ་གྱིས་བསྐོར་བ། གཡས་སུ་བུམ་པ་ཆིངས་དམར། གཡོན་དུ་ཚེ་ཆང་། རྒྱབ་ཏུ་ཚེ་མདའ་རྣམས་བཀོད། ༈ བྱང་གཏེར་ལོངས་སྐུ་འཆི་མེད་འོད་སྣང་ལ། དཀྱིལ་འཁོར་རས་བྲིས་སམ། ཚོམ་བུ་གཙོ་འཁོར་དགུ །དེ་རྒྱབ་བཞི་བཀོད་པའི་དབུས་མཉྫི་ལ་བུམ་པ་བཅུད་ལྡན་མགུལ་ཆིངས་དཀར་པོ་ལ། བཅུད་ལེན་རིལ་བུ་སློབ་མའི་གྲངས་མཉམ་དར་དམར་གྱིས་བསྟུམས་ལ་མགུལ་དུ་བཏགས་པའི་ཁར་མེ་ལོང་ལ་ཚེ་བསྙེན་མཚལ་གྱིས་བྲིས་པས་བཀབ། དེ་སྟེང་ཚེ་གཏོར་གཞུང་གསལ་བཞག་ལ་དར་དམར་གྱི་གུར་ཕུབ། གཡས་སུ་ཚེ་རིལ། གཡོན་དུ་ཐོད་པའི་བདུད་རྩི། རྒྱབ་ཏུ་ཚེ་མདའ། མཚམས་སུ་མེ་ལོང་ལི་ཁྲིའི་ཚོམ་བུ་ཅན། སྙིང་པོ་ལྔ། འབྲུ་ལྔ་བྲིས་པའི་ཙཀ་ལི། རྫས་བརྒྱད། རྒྱལ་སྲིད་རྣམས་བཀོད། ༈ རཏྣའི་ཚེ་སྒྲུབ་གསང་འདུས་དབང་ཆེན་ལ། སྟ་གོན་རྫས། དཀྱིལ་འཁོར་དབུས་རྣམ་བུམ་ཁར་གཏོར་མ་གཡང་ཞགས་འཁྱིལ་བ། རིགས་ལྔའི་ཕྱག་རྒྱ་སོ་སོ་བ། གོ་ཁྲབ། གསེར་ཚྭ་ཏིལ་དཀར་མར་སྦྲང་སྟེ་སྙིང་པོ་ལྔ་དངོས་སམ་རི་མོར་བྲིས་པ། རྟགས་བརྒྱད་སོ་སོ་བ། རིལ་ཆང་མདའ། དབང་གོང་མའི་ཆས། དཀྱིལ་འཁོར་མདུན་རྒྱབ་གང་བདེར་ཐོད་ཆང་མངར་གསུམ་ཆོས་སྨན་བཏབ་པའི་ཁར་མེ་ལོང་སིནྡྷུ་ར་བརྡལ་བ་ལ་ཆོས་འབྱུང་བསྣོལ་མའི་དབུས་སུ་ཧྲཱིཿམ། མཐའ་སྐོར་ཧ་རི་ནི་ས་བྲིས་པས་བཀབ་ལ་དར་དམར་གྱིས་གཡོགས་པའི་སྟེང་ཤེལ་རྡོ་བཞག ༈ །དོན་དབང་ལ། དཀྱིལ་འཁོར་བུམ་གཏོར་སྔར་ལྟར། རིལ་ཆང་མདའ་བཅས། ༈ ཟླུམ་པོ་བཞི་དབང་ལ། ཕོ་བྲང་གནམ་བབ་མའི་རས་བྲིས་སྟེང་བུམ་པ་ཐོད་ཆང་མེ་ལོང་སིནྡྷུ་རའི་ཐིག་ལེ་ལྷ་གྲངས་དང་བཅས་རྩ་སྔགས་བྲིས་པ་རྣམས་བརྩེགས་མར་བཞག་ལ་དར་དམར་གྱིས་བཀབ་པའི་སྟེང་གུ་རུའི་སྐུ་ཚབ་བརྟན་པོར་བཞུགས་སུ་གསོལ། ༈ ཉང་གཏེར་བླ་མ་ཡོངས་རྫོགས་གཏོར་དབང་ལ། རས་བྲིས་སམ་འབྲུ་ཚོམ་པདྨ་རིས་ཀྱི་ཁར་མཉྫི་ལ་དཔལ་གཏོར་རིན་ཆེན་འབར་བ་པད་འདབ་བརྒྱད་རིལ་བུ་དང་བཅས་པ་སྐུ་ཙཀ་དར་གདུགས་ཅན། མདུན་དུ་ཐོད་པའི་བདུད་རྩི་དང་དབང་ཕྲེང་བཞག ༈ །སྟག་ལུང་ཐུགས་སྒྲུབ་བདེ་འདུས་ལ། རས་བྲིས་སམ་མཎྜལ་ཚོམ་བུ་དགུ་པའི་སྟེང་རྐང་གསུམ་ལ་རྣམ་བུམ་མགུལ་ཆིངས་དཀར་པོ་ཅན། རྒྱབ་ངོས་སུ་བླ་མའི་གཏོར་ཆེན་མདུན་དུ་ཚེ་གཏོར་བུམ་གཟུགས་གཡས་གཡོན་དུ་ཚེ་རིལ་ཚེ་ཆང་བཅས་བཀོད། ༈ བྱང་གླིང་ཀུན་བཟང་ཐུགས་གཏེར་གྱི་བླ་སྒྲུབ་རྩ་དབང་ལ། སྟ་གོན་རྫས་བཞི། ཏིལ་སྦྱོང་། དཀྱིལ་འཁོར་རས་བྲིས་སམ་ཚོམ་བུ་དབུས་སུ་གཅིག །དེ་རྒྱབ་བརྒྱད་རིམ་བཞི། དེ་རྒྱབ་ཕྱོགས་བཞིར་བཞི་བཀོད་པའི་དབུས་སུ་རྣམ་བུམ་ཆིངས་སྔོན། དབུ་རྒྱན། རྡོ་རྗེ། དྲིལ་བུ། རྡོར་དྲིལ། སློབ་དཔོན་དབང་ཆས་དུང་འཁོར་ལོ་སོགས་མདོར་བསྡུས། གསང་ཐོད། མེ་ལོང་སིནྡྷུ་རའི་ཐིག་ལེ་ཅན། ཁ་ཊྭཱཾ་ཌཱར་དྲིལ་བཅས་བཀོད། ༈ དོན་དབང་ལ། ཚོམ་བུའི་སྟེང་བླ་གཏོར། གཡས་གཡོན་དུ་ཐོད་པའི་བདུད་རྩི། སིནྡྷུ་རའི་མེ་ལོང་བཅས། སྤུ་གྲི་མཆེད་གསུམ་དམར་གཏོར་གསུམ་དར་གདུགས་ཅན། དམ་ཅན་གཏོར་མ་མཁར་ཐབས་ཅན་སྤྱི་འགྲོ་བཀོད། ༈ བྱང་གཏེར་རིག་འཛིན་གདུང་སྒྲུབ་ལ། དཀྱིལ་འཁོར་རས་བྲིས་སམ་དབང་ཆོག་ཏུ་བཤད་པའི་མཎྜལ་ཉིས་བརྩེགས་ཀྱི་ཚོམ་བུའི་སྟེང་འཕྲུལ་སྟེགས་ལ་ཟངས་བུམ་མགུལ་ཆིངས་ཅན་གྱི་ཁར་ཐོད་ཆང་སིནྡྷུ་རའི་མེ་ལོང་ཧྲཱིཿམཐར་བཛྲ་གུ་རུ་བྲིས་པ་རྣམས་བརྩེགས་པའི་ཁར་གུ་རུའི་སྐུ་ཚབ་བཞུགས། རྒྱབ་ངོས་སུ་ནང་སྒྲུབ་ཀྱི་གཏོར་མ་འབྲིང་བསྡུས་གང་རུང་དབང་ཆོག་ཏུ་གསལ་བ་ལྟར་རམ་མ་གྲུབ་ན་རིན་ཆེན་ཟུར་བརྒྱད་སྤྱི་འགྲེ་བཟའ་བཏུང་བཅས་བཀོད། ༈ ཡང་གཏེར་བླ་མ་བདེ་མཆོག་འཁོར་ལོ་ལ་དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་དམར་པོ་གཅིག་བཀོད་པའི་ཁར་མཉྫིའི་སྟེང་བུམ་པ་སོ་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་དང་བཅས་པ་བཀོད། མདུན་དུ་གཙོ་འཁོར་ལྷ་ཙཀ་བདུན། དབང་ཕྲེང་དམར་པོ། མེ་ལོང་། རྒྱབ་ཏུ་གསང་དབང་ཐོད་ཆང་དང་རིག་ཙཀ །གཡས་སུ་སྨན་གྱི་ཕོ་བྲང་ཆས་ལྡན། གཡོན་དུ་ཚེ་འབྲང་དང་ཐོད་སྣོད་དུ་ཚེ་ཆང་། ཚེ་རིལ་རྣམས་བཀོད། ༈ བླ་མ་དགོངས་འདུས་དོན་དབང་ལ། སྟ་གོན་རྫས་བཞི། སློབ་མ་མཆོད་པ། དཀྱིལ་འཁོར་དབུས་ཁྲིའུ་ལ་རྣམ་རྒྱལ་བུམ་པ་ཆིངས་དམར། ལྷ་ཙཀ །རིགས་ལྔའི་སྐུ་རྟེན། རྒྱབ་མདུན་གང་བདེར་ཁྲིའུ་ལ་བཏགས་གྲོལ་དཀར་པོ་གཅིག་ཐུབ་གླེགས་བམ་རབ་གནས་ཅན་དར་གྱིས་བཀླུབས་པ། ཕྱོགས་བཞིར་རིག་དབང་ཆས་བཞི། མཚམས་རྣམས་སུ་ཕྱག་མཚན་དང་ཞི་ཁྲོའི་ཆས་ཙཀ །པུ་སྟི། ཕྲེང་དམར། དུང་། ཕྱག་ཤིང་། ཐོད་ཌཱར། ཆང་དང་ཟས་སྣ། གསང་ཐོད། རིག་ཙཀ །འཇའ་ཤེལ། རྒྱབ་ངོས་སུ་བྱིན་རླབས་གཏོར་མའི་བརྡ་དབང་ནས་བཤད་པའི་གཏོར་ཆེན། བཟའ་བཏུང་བཅས། བྱང་ཤར་དུ་ལྕགས་སྣོད་ནང་དྲེགས་པའི་སྤྱི་གཏོར་རྒྱན་ལྡན་ཐེབས་ཀྱུ་མང་པོས་བསྐོར་བ་དང་གྲི་གུག་ཐོད་ཁྲག །འཛོམ་ན་སྲོག་འཁོར། མ་འཛོམ་ན་དུག་ཤོག་གྲུ་བཞི་ལ་སྡེ་བརྒྱད་ས་བོན་བྲིས་པ་རྣམས་བཞག ༈ །རྡོར་གླིང་བླ་མ་བཀའ་འདུས་ལ། སོ་ཤིང་། སྲུང་སྐུད་སྣ་ལྔ། ཀུ་ཤ་རྣམས་བསྡོགས། དཀྱིལ་འཁོར་སྒོ་རྫོགས་སམ་བླ་མའི་ཕོ་བྲང་གནམ་འབབ་མའི་མཎྜལ་གྱི་དབུས་སུ་རྣམ་རྒྱལ་བུམ་པའི་ཁ་རྒྱན་ལ་ཐོད་ཕྲེང་རྩལ་དང་རྟ་ཕག་ཡབ་ཡུམ་སྐུ་ཙཀ་གིས་བརྒྱན་པ་དང་། དེ་མཉམ་ཐོད་ཕྲེང་སྡེ་ལྔ་དང་མཁའ་འགྲོ་རིགས་ལྔ་ཡབ་ཡུམ་ཕྱོགས་བསྡུས་ཀྱི་ཙཀླི་བཞག །དེ་སྟེང་འཕྲུལ་སྟེགས་ལ་བྷན་དྷ་མཚན་བཟང་དུམ་གཅིག་པ་འབྲུ་སྨན་གྱིས་བཀང་བའི་ནང་དུ་གསང་འདུས་ཡབ་ཡུམ་གྱི་སྐུ་བཞག །དེ་སྟེང་མཉྫི་ལ་གཏོར་མ་རིན་ཆེན་ཟུར་བརྒྱད་དར་གདུགས་ཀྱིས་སྤྲས་པ་བཀོད། ཤར་དུ་དཔལ་གཏོར་གུ་རུ་ཟ་ཧོར་མའི་སྐུ །ལྷོར་ཐོད་པའི་སྣོད་དུ་དཔལ་གཏོར་དང་། བློ་ལྡན་མཆོག་སྲེད། ནུབ་ཏུ་རྨ་བྱའི་སྒྲོ །མར་མེ། ཉི་མ་འོད་ཟེར། བྱང་དུ་ཀ་པཱ་ལ་ཆང་གིས་བཀང་བ། མེ་ལོང་དང་། སེང་གེ་སྒྲ་སྒྲོག །ཤར་ལྷོར་ཐོད་ཆང་དང་པདྨ་སམྦྷ། ལྷོ་ནུབ་ཏུ་མེ་ལོང་དང་པདྨ་རྒྱལ་པོ། ནུབ་བྱང་དུ་རྡོར་དྲིལ་དང་ཤཱཀྱ་སེང་གེ །བྱང་ཤར་དུ་སེང་ལྡེང་ཕུར་པ། ཨོ་རྒྱན་དང་། རྡོ་རྗེ་གྲོ་ལོད་རྣམས་ཀྱི་སྐུ་ཙཀ །མདུན་དུ་མེ་ལོང་། གཏོར་མ་ལ་སྐུ་ཙཀ་དར་གདུགས་ཅན་དང་། ཕུར་པ། རལ་གྲི་རྣམས་བཞག །གཞན་གང་བདེར་གསང་རྫས་ཐོད་ཆང་། རིག་ཙཀ །ཆོས་བཀའ་འདི་ཉིད་ཀྱི་གླེགས་བམ་དང་ཅོད་པན། མར་མེ། བུར་ཆང་། པདྨ་འདབ་དྲུག་སྟེང་མཆོད་རྟེན་བང་རིམ་དགུ་པ། རྒྱལ་སྲིད་དང་རྟགས་བརྒྱད་སོ་སོར་བྲིས་པ་རྣམས་ཀྱང་བཀོད། ཤར་དུ་ཆུ་གཉིས་ཉེར་སྤྱོད། ལྷོར་དྲག་མཆོད། ནུབ་ཏུ་སྨན་གཏོར་རཀྟ། བྱང་དུ་ཚོགས་ཀྱི་ཡོ་བྱད་རྣམས་བཤམ། ༈ དོན་དབང་ལ། དཀྱིལ་འཁོར་དབུས་ཁྲིའུའི་སྟེང་རྣམ་བུམ་མགུལ་ཆིངས་བཅུད་དང་ལྡན་པའི་ཁར་ཐོད་པར་བདུད་རྩི་ཨ་མྲྀཏས་བཀང་བ་བཞག་ལ་མེ་ལོང་སིནྡྷུ་རའི་ཐིག་ལེ་ལྔ་ཚོམ་གྱིས་བརྒྱན་པས་བཀབ། དེ་སྟེང་ཤེལ་རྡོ་དང་གུ་རུའི་སྐུ་ཚབ་བཞུགས་སུ་གསོལ། མདུན་རྒྱབ་གང་བདེར་གཏོར་མ་རིན་ཆེན་ཟུར་བརྒྱད་སྐུ་ཙཀ་དར་གདུགས་ཀྱིས་བརྒྱན་པ་བཀོད། ༈ རཏ་གླིང་ཐུགས་སྒྲུབ་ཡང་སྙིང་འདུས་པ་ལ། སྟ་གོན་རྫས་བཞི། སློབ་མ་མཆོད་པ། དཀྱིལ་འཁོར་སྟེང་རྣམ་བུམ་དང་ལྷ་ཙཀ །དེ་ཁར་ལྡིང་ཁྲི་མཐོ་བ་ལ་བླ་གཏོར་རིན་ཆེན་འབར་བ་སྐུ་ཙཀ་དར་གདུགས་ཀྱིས་བརྒྱན་པ། གཡས་སུ་ཐོད་ཆང་ལ་མེ་ལོང་སིནྡྷུརའི་ཐིག་ལེ་ཅན་གྱིས་བཀབ་པ། གཡོན་དུ་རྩ་གསུམ་སྐུའམ་ཡོད་ན་སྐུ་གསུམ་སྒྲུབ་པའི་སྐུ་འབག་དང་དབང་ཕྲེང་ཤེལ་རྡོ། རྒྱབ་ཏུ་གསང་ཐོད་མེ་ལོང་ཆང་དང་སིནྡྷུརས་བྱུགས་པ་ལ་ཆོས་འབྱུང་བསྣོལ་མའི་ནང་དུ་དཔའ་བོ་ཡབ་ཡུམ་གྱི་ས་བོན་བཅུ། མཐའ་སྐོར་དུ། ཨོཾ་ཨཱཿརྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་གང་ཟག་སྙན་བརྒྱུད་ལས་འཕྲོ་གཏེར་བརྒྱུད་ཀྱི་བླ་མ་རྣམས་ཀྱིས་བྱིན་གྱིས་རློབས་ཤིག་ཧཱུྃ། ཞེས་བྲིས་པ་དང་དར་དམར་གྱིས་བཀབ། མདུན་ནམ་ཕྱོགས་བཞིར་རྡོ་རྗེ། གྲི་གུག་ཁ་ཊྭཱཾ། རྡོར་དྲིལ། དབུ་རྒྱན། རྒྱ་གྲམ་མམ་རལ་གྲི །མཐའ་སྐོར་དུ་རྗེས་གནང་ཆས། འཁོར་ལོ། དུང་། དྲིལ་བུ། པུསྟི། རྡོ་རྗེ། དགངས་བླུག །མཆོད་གཏོར། ཕུར་པ་རྣམས་དང་། མེ་ལོང་། ཤེལ་རྡོ་བཅས་བཀོད། ༈ པད་གླིང་བླ་མ་ནོར་རྒྱམ་རབ་འབྱམས་བཀའ་དབང་ལ། མཎྜལ་དཀྱིལ་འཁོར་པདྨ་འདབ་བཞི་ཕྱོགས་མདོག་ཅན། ལྟེ་བ་མཐིང་གའི་དབུས་སུ་མཉྫིའི་སྟེང་ཐོད་པ་མཚན་ལྡན་ནམ། རིན་པོ་ཆེའི་སྣོད་དུ་བླ་མའི་གཏོར་མ་རིན་ཆེན་འབར་བ་བདུད་རྩི་ལྔ་དང་སྙིང་པོ་ལྔ་སྦྱར་བ་རྒྱན་ལྡན་བཞག ༈ །མངའ་པཎ་རིག་འཛིན་ཡོངས་འདུས་ལས་སྤྲོས་བྲལ་བདེ་ཆེན་ལ། རས་བྲིས་སམ་མཎྜལ་ཚོམ་བུ་དགུ་པའི་སྟེང་རྐང་གསུམ་ལ་བུམ་པ་ཆིངས་དམར་ཐོད་ཆང་སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་དབུས་སུ་ཐིག་ལེ་དགུ །དེ་རྒྱབ་བརྒྱད་ཀྱིས་བསྐོར་བའི་མཐའ་སྐོར་དུ་ཐོད་ཕྲེང་རྩལ་གྱི་སྔགས་བྲིས་པ་རྣམས་བརྩེགས་པའི་སྟེང་བླ་མ་རྡོ་རྗེ་འཆང་གི་སྐུ་བཞག །མདུན་དུ་གཏོར་ཆེན་གཞུང་གསལ་བཀོད། ༈ བསྟན་པ་རྨད་བྱུང་ལ། རས་བྲིས་སམ་ཚོམ་བུ་དགུ་པའི་མཎྜལ་སྟེང་རྣམ་བུམ། ཤར་དུ་ཞི་བ། རིགས་ལྔ། རིགས་བཞི། དཔལ་དགུ་མཁའ་འགྲོ་ཁྱུང་དང་བཅས་པའི་ཙཀ་ལི། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། རྒྱབ་ཏུ་གསང་ཐོད་སྟེང་མེ་ལོང་དང་ཤེལ་རྡོ། རིག་ཙཀ་བཅས། ཞི་ཁྲོའི་ཆས། སྨན་རག་གཏོར་གསུམ་ཕྱོགས་བསྡུས། དབང་ཕྲེང་། ལྕགས་ཕུར་དར་ནག་གི་ཅོད་པན་ཅན། སྟ་གོན་རྫས་བཞི་དང་མཆོད་པ། འབྲུ་ལྔའི་ཙཀ་ལི་བཅས། ༈ ཉི་མ་ལྷོ་ནུབ་མ་ལ། རས་བྲིས་སམ་མཎྜལ་འབྲུ་ཚོམ་བརྒྱད་རིམ་གཉིས་དབུས་སུ་གཅིག་དང་བཅས་པའི་ཁར་བུམ་ཐོད་མེ་ལོང་སྐུ་འབག་བརྩེགས་མ་གོང་ལྟར་དང་། ཐོད་ཆང་། རྡོ་རྗེ་བཅས། ༈ སིནྡྷུ་རྒྱ་མཚོ་ཆེ་བ་ལ། མཎྜལ་ཚོམ་བུ་གཅིག་པའི་སྟེང་རྐང་གསུམ་ལ་རྣམ་བུམ་ཁར་ཐོད་པའི་བདུད་རྩི་དར་དམར་གྱིས་བཀབ་པ། མདུན་རྒྱབ་གང་བདེར་བླ་གཏོར་བཞག ༈ །ནུབ་ཕྱོགས་བདེ་ཆེན་ལ། རས་བྲིས་སམ་ཚོམ་བུ་ལྷ་གྲངས་སྟེང་མཉྫི་ལ་སྒྲུབ་གཏོར་རྒྱན་ལྡན། མདུན་དུ་རྣམ་བུམ་ཁར་སིནྡྷུ་རའི་མེ་ལོང་ཆོས་འབྱུང་བསྣོལ་མའི་ནང་ཐིག་ལེ་ལྔ་ཚོམ་ཧཱུྃ་གིས་མཚན་པའི་མཐར། བཛྲ་གུ་རུ་སོགས་ཀྱིས་བསྐོར་བའི་སྟེང་གུ་རུའི་སྐུ་འབག་བཞུགས། རྒྱབ་ཏུ་སྣོད་གཅིག་ཏུ་ལས་བཞིའི་འབྲང་རྒྱས་དཀར་སེར་དམར་ལྗང་བཞི་དར་གདུགས་ཟས་སྣས་བརྒྱན་པ། སྣོད་གཅིག་ཏུ་རྡོར་དྲིལ་ཐོད་པ་ཌཱ་རུ་རྣམས་བཞག ༈ །བསམ་པ་ལྷུན་གྲུབ་ལ། རས་བྲིས་སམ་ཚོམ་བུ་ལྔ་པའི་སྟེང་དུ་སྟེགས་ལ་རང་གཞུང་བླ་གཏོར་རྒྱན་ལྡན། ལྷ་དབང་བཅུ་གསུམ་གྱི་ཙཀ་ལི་བཀོད། ༈ ཞིག་གླིང་པདྨ་བཛྲ་ལ། དཀྱིལ་འཁོར་དབུས་ཁྲིའུར་རྣམ་བུམ་ཉེར་ལྔའི་བཅུད་དང་མགུལ་ཆིངས་དམར་པོ་ཁ་རྒྱན་གཟུངས་རྡོར་དང་ལྡན་པ་བཀོད། གཡས་སུ་བླ་གཏོར་རིན་ཆེན་འབར་བ། གཡོན་དུ་སིནྡྷུརའི་མེ་ལོང་ལ་འཁོར་ལོ་རྩིབས་བཞི་མུ་ཁྱུད་དང་བཅས་པའི་ལྟེ་བར་མ་ཧཱུྃ་མཱུཾ། ཤར་དུ་ཨོཾ་ལཱཾ། ལྷོར་ཏྲཱཾ་མཱཾ། ནུབ་ཏུ་ཧྲཱིཿཔཱཾ། བྱང་དུ་ཧཱ་ཏཱཾ། ཞེས་བྲིས་པའི་སྟེང་དུ་ཤེལ་རྡོ་བཞག །བུམ་པའི་ཁ་རྒྱན་ནམ་མདུན་དུ་གཙོ་འཁོར་ཉི་ཤུའི་ལྷ་ཙག་ཚང་བ། གཞན་ཡང་ཆས་དབང་ནོར་བུའི་གཙུག་ཏོར། གསེར་གྱི་སྙན་ཆ། རིན་ཆེན་མགུལ་རྒྱན། རྡོ་རྗེ། བདུད་རྩིའི་ཐོད་པ། ཁ་ཊྭཱཾ། སྲོག་ཞུ། པདྨའི་དོ་ཤལ། དཔུང་རྒྱན། ཕྱག་གདུབ། སྟོད་གཡོགས། སྨད་དཀྲིས། ཆོས་གོས། དབྱངས་གསལ་ཡིག་འབྲུ་བཅས་ཀྱི་ཙཀ་ལི། རྡོར་དྲིལ་རྣམས་བཀོད། ༈ ཞིག་གླིང་ཆོས་གླིང་གཉིས་འདུས་བླ་མའི་སྒོས་དབང་ལ། དཀྱིལ་འཁོར་རམ་པདྨ་འདབ་བཞིའི་སྟེང་རྣམ་བུམ། རྒྱབ་ཏུ་བླ་མའི་གཏོར་ཆེན་གཡས་སུ་གུ་རུའི་སྐུ་ཚབ་བྱིན་ཅན་གཡོན་དུ་ཐོད་པའི་བདུད་རྩི་ལ་སིནྡྷུརའི་མེ་ལོང་ཆོས་འབྱུང་བསྣོལ་མའི་ལྟེ་བར་པདྨ་འདབ་བཞི་ལ་གུ་རུའི་རྩ་སྔགས་དང་མཐའ་སྐོར་དབྱངས་གསལ་བྲིས་པས་བཀབ། དར་དམར་གྱི་གུར་ཕུབ། ༈ གྲོལ་ཏིག་ལམ་རྒྱས་པའི་དབང་ཆེན་ལ། སྟ་གོན་རྫས་བཞི་དང་མཆོད་པ་ཏྲཱཾ་ཧྲཱིཿཧཱུྃ་ཧཱ་ཨོཾ་རྣམས་ཀྱི་ཙཀ་ལི། དཀྱིལ་འཁོར་རས་བྲིས་སྟེང་ཁྲི་ལ་རྣམ་བུམ་ཁ་རྒྱན་གཟུངས་རྡོར་དང་བཅས་པ། ལྷ་ཙཀ་ཚང་བ། གཡས་སུ་ལམ་རྒྱས་པའི་དབང་སྒྲུབ་གཏོར་མ་ཀུན་བཟང་རྡོ་རྗེ་ཐོད་ཕྲེང་གི་ཙཀ་ལིས་བརྒྱན་པ་དང་དབུ་རྒྱན། གཡོན་དུ་གསང་ཐོད་དར་དམར་བརྒྱད་ལྟེབས་ཀྱིས་བཀབ་པའི་ཁར་སིནྡྷུརའི་མེ་ལོང་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་བཾ། འདབ་བཞིར་ཧ་རི་ནི་ས་བྲིས་པའི་སྟེང་དྲིལ་བུ་དང་རིག་ཙཀ །རིག་དབང་དྲིལ་བུ། རྒྱབ་ཏུ་མེ་ལོང་ཤེལ་རྡོ་ཨོ་རྒྱན་ཡབ་ཡུམ་སྐུ་འབག་བཅས་ལ་དར་དམར་བརྒྱད་ལྟེབས་ཀྱི་གུར་ཕུབ་པ་དང་རྡོ་རྗེ། མདུན་དུ་རྡོར་དྲིལ་དང་ལྕགས་ཕུར། ཤར་ལྷོར་ཁྲུས་བུམ། བྱང་ཤར་ཁྲུས་བུམ། གཞན་ཡང་དུར་ཁྲོད་ཆས། སྨན་རཀ་གཏོར་མ། བགྲང་ཕྲེང་། ཕྱག་ཤིང་། དུང་དཀར། འཁོར་ལོ། སྒྲུབ་གཞུང་པུསྟི། མཆོད་པ་རྣམ་ལྔ་བཅས་བཀོད། ༈ ལམ་འབྲིང་པོའི་དབང་ལ། རས་བྲིས་སམ་ཚོམ་བུ་གཅིག་གི་ཁར་རྐང་གསུམ་སྟེང་རྣམ་བུམ་གསང་ཐོད་མེ་ལོང་སིནྡྷུ་རའི་ཐིག་ལེ་ཅན་གུ་རུའི་སྐུ་འབག་རྣམས་བརྩེགས། རྒྱབ་མདུན་གང་བདེ་ན་བླ་གཏོར་པདྨ་འདབ་བརྒྱད་ཟེའུ་འབྲུ་དང་བཅས་པའི་སྟེང་དུ་ནོར་བུ་བཞི་སྒྲོམ་མེ་རི་དང་བཅས་པའི་མཐར་པད་ཆུང་བརྒྱད་ཀྱིས་བསྐོར་བ་རྒྱན་སྤྲོས་ཅན་བཞག ༈ །ལམ་བསྡུས་པ་རིགས་བསྡུས་བརྡ་དབང་ལྔ་པ་ལ། ཚོམ་བུ་གཅིག་པའི་མཎྜལ་སྟེང་རྣམ་བུམ། གཡས་སུ་བླ་གཏོར་པད་འདབ་བརྒྱད་པ་རྒྱན་ལྡན། གཡོན་དུ་གསང་ཐོད་མེ་ལོང་གིས་བཀབ་པ། རྒྱབ་ཏུ་ཤེལ་རྡོ་དང་གུ་རུའི་སྐུ་རྣམས་བཀོད། ༈ བྱང་པའི་སྐུ་གསུམ་རིགས་འདུས། དཀྱིལ་འཁོར་དབུས་སྟེགས་ལ་རྣམ་བུམ་གྱི་ཁར། མར་ཟན་ལ་ཀ་ར་སྒ་ཕོོ་ལན་ཚྭ་ཚ་གྲང་གི་རྫས་རྣམས་དང་ཆོས་སྨན་བསྲེས་པས་ཚེ་གཏོར་རྡོ་རྗེ་རྩེ་ལྔ་དམར་པོ་ལྟོ་བ་ཕྱེད་མན་ཆད་རིལ་བུའི་ཕྲེང་བས་བསྐོར་བ་ཉི་ཟླའི་རྒྱན་ཅན་ལྷ་ཙཀ་དང་བཅས་པ་བཞག །དེ་ལ་ཚ་རྫས་ནི་ཛ་སུག་ཀོ་གསུམ་བྲག་ཞུན་པདྨ་རཀྟ། གྲང་རྫས་ཅུ་གུ་ལི་གསུམ་ཅོང་ཞི་བྱང་སེམས་དཀར་པོ་ག་པུར་རྣམས་ཕྱེ་མ་བྱས་པའོ། །གཡས་སུ་མེ་ལོང་ལ་མཚལ་དང་ཆོས་སྨན་སྦྱར་བས། འདི་ལྟར་བྲིས་པ་བཞག །གཡོན་དུ་གོང་སྨོས་ཚེ་འབྲང་གི་རྒྱུ་དང་ཚ་རྫས་བསྲེས་པས་འོག་ཉི་མ། གྲང་རྫས་བསྲེས་པས་སྟེང་ཟླ་བ་སྟེ་ཉི་ཟླ་ཁ་སྦྱོར་དཀར་དམར་མདོག་ལྡན་རྒྱན་སྤྲོས་གང་མཛེས་ཅན། མདུན་དུ་ཐོད་ཆང་ཆོས་སྨན་མངར་གསུམ་བཏབ་པའི་ཁ་དར་དམར་གྱིས་བཀབ་པའི་སྟེང་རྡོ་རྗེ་རྩེ་ལྔ་པ། རྒྱབ་ཏུ་ཚེ་ཆང་། ཚེ་མདའ་རྒོད་སྒྲོ་མ་ཉམས་པ་དར་དམར་བླ་གཡུས་བརྒྱན་པ། གཞན་ཡང་པདྨ་ རྟ་ཞལ་ཅན། མར་ཟན་གྱི་རྟ་མགོ །སློབ་མའི་གྲངས་མཉམ་མར་མེ་གསལ་བ་རེ་བཅས་འདུ་བྱ། ༈ དཀོན་མཆོག་སྤྱི་འདུས་ལ། རས་བྲིས་སམ་ཚོམ་བུ་གཅིག་པའི་སྟེང་ཁྲིའུར་རྣམ་བུམ། གཡས་སུ་གསང་ཐོད། གཡོན་དུ་ཁ་ཊྭཱཾ། རྒྱབ་ཏུ་ཐོད་པའི་ནང་རྡོ་རྗེ་བཅུག་པ་དང་ཤེལ་རྡོ། མདུན་དུ་གཞུང་པོད་དང་གཏེར་སྲུང་མཁའ་འགྲོའི་དམར་གཏོར་རྣམས་བཀོད། ༈ དེའི་ཚེ་དབང་། མཎྜལ་སྟེང་རྣམ་བུམ། མདུན་དུ་ཚེ་འབྲང་། གཡས་གཡོན་ཚེ་རིལ་ཆང་། རྒྱབ་ཏུ་ཚེ་མདའ། ༈ པདྨ་འོད་འབར་ལ། རས་བྲིས་སམ་མཎྜལ་སིནྡྷུ་རས་ཆག་ཆག་བཏབ་པ་ལ་ཚོམ་བུ་གཅིག་བཀོད་པའི་སྟེང་ཁྲིའུར་རྣམ་བུམ་སྐུ་འབག་ཙཀ་ལི་བཅས་གཡས་སུ་གཏོར་ཆེན་ནོར་བུ་འབར་བ། གཡོན་དུ་ཐོད་པའི་བདུད་རྩི། རྒྱབ་ཏུ་སྒྲུབ་སྐོར་གླེགས་བམ། ཁ་ཊྭཱཾ། ཤེལ་རྡོ་ཐོད་པར་བཅུག་པ། སྲུང་མའི་དམར་གཏོར་ཐེབས་ཀྱུས་བསྐོར་བ་རྒྱན་ལྡན་རྣམས་བཀོད། ༈ རིག་འཛིན་སྲོག་སྒྲུབ་ལ། སྟ་གོན་རྫས་བཞི། རས་བྲིས་དཀྱིལ་འཁོར་གྱི་ཕྱོགས་བཞི་དབུས་རྔ་རྐང་གསུམ་རེའི་སྟེང་དུ་བུམ་པ་དབུས་སྔོ། ཤར་དཀར་ལྷོ་སེར་ནུབ་དམར་བྱང་ལྗང་གུའི་མགུལ་ཆིངས་དང་ཁ་རྒྱན་ལ་སོ་སོའི་སྐུ་ཙག་བཙུགས་པ། དབུས་བུམ་སྟེང་དུང་ཆོས་གཟུངས་རྡོར། གཡས་སུ་གསང་ཐོད་སྟེང་སིནྡྷུ་རའི་མེ་ལོང་ཆོས་འབྱུང་ལྟེ་བར་ཧྲཱིཿམ། ཕྱོགས་བཞིར་ཧ་རི་ནི་ས་བྲིས་པ་དར་དམར་གྱིས་བཀབ། གཡོན་དུ་རིག་ཙཀ །མེ་ལོང་། ཤེལ་རྡོ། རྨ་བྱའི་མདོངས། ཧྲཱིཿཡིག །མདུན་དུ་ཚེ་འབྲང་། དེའི་གཡས་གཡོན་དུ་ཚེ་རིལ་ཆང་། རྒྱབ་ཏུ་ཚེ་མདའ། གཞན་ཡང་དཔའ་བོ་སྡེ་བཞི་དང་། རྒྱས་གདབ་ཙཀ་ལི། བཀྲ་ཤིས་རྫས་རྟགས། རྒྱལ་སྲིད་ཕྱོགས་བསྡུས་ཀྱི་ཙཀ་ལི། ལི་ཁྲི་བཅས་བཞག ༈ རྒྱ་ཅན་དྭངས་མ་བཅུད་འདྲེན་ལ། མཎྜལ་པདྨ་འདབ་བརྒྱད་དབུས་སུ་བུམ་པ་ཉེར་ལྔ་ཆོས་སྨན་བཅུད་ལེན་རྫས་དང་ཆུ་གཙང་སྦྱར་བས་བཀང་བའི་ཁ་རྒྱན་གསེབ་ཏུ་གཙོ་བོའི་སྐུ་ཙག་གིས་བརྒྱན་པ་བཀོད། མདུན་དུ་ཐོད་ཕྲེང་རིགས་ལྔའི་ཙཀ་ལི་དང་ཚེ་རིལ། གཡས་སུ་ཐོད་པར་ཚེ་ཆང་། རྒྱབ་ཏུ་དྲིལ་བུའམ་རིག་ཙཀ །གཡོན་དུ་འཇའ་ཤེལ་མེ་ལོང་རྨ་བྱའི་སྒྲོ་མདོངས། སྣ་བདུན་དང་རྫས་བརྒྱད་སོ་སོ་བ། ལས་བཞིའི་འབྲང་རྒྱས་བཅས་བཞག ༈ །གནམ་ཆོས་པད་འབྱུང་ཞི་བ་ལ། མཎྜལ་ཚོམ་བུ་གཅིག་སྟེང་རང་ལུགས་སམ་སྤྱི་འགྲེའི་བླ་གཏོར། གཡས་གཡོན་དུ་རྣམ་བུམ་ཆིངས་སྔོན། པུསྟི། ཐིག་ལེ་སེར་པོ། མཚོ་རྒྱལ་སྐུ་ཙཀ་བཅས་བཀོད། ༈ རིག་འཛིན་ཐུགས་ཐིག་ལ། རས་བྲིས་དབུས་སྟེགས་ཀྱི་ཁར་རྣམ་བུམ། གཡས་སུ་གཏོར་ཆེན་ཟུར་བརྒྱད་འཁོར་ལོའི་གདན་ཅན་བཟའ་བཏུང། གཡོན་དུ་གསང་ཐོད་ཁར་སིནྡྷུ་རའི་མེ་ལོང་ཆོས་འབྱུང་བསྣོལ་མ་མཱུཾ་ཡིག་དགའ་འཁྱིལ་བྲིས་པས་བཀབ། མདུན་གྱི་གཡས་ངོས་སུ་རིགས་ལྔའི་ཕྱག་རྒྱ། ཕུར་པ། བཟའ་བཏུང་། གཡོན་ངོས་སུ་སྐུ་འབག །མེ་ལོང་ཤེལ་རྡོ་རྨ་བྱའི་མདོངས་རྣམས་དང་། དབང་ཕྲེང་བཅས། ༈ བླ་མ་ཡིད་བཞིན་ནོར་བུའི་རྩ་དབང་དང་གཏོར་དབང་ལ། རས་བྲིས་སྟེགས་བཅས་ཁར་རྣམས་བུམ་སྟེང་ཐོད་པའི་བདུད་རྩི་མེ་ལོང་དྲི་མེད་ཀྱིས་བཀབ་པའི་ཐོག་གམ་གང་བདེར་གུ་རུའི་སྐུ་འབག་བཞུགས། རྒྱབ་ངོས་སུ་སྨན་སྤོད་བཏབ་པའི་ཟན་ལ་འོག་གཞི་ཟླུམ་པོ་གཉིས་བརྩེགས་སྟེང་རིན་ཆེན་ཟུར་བརྒྱད་དེ་སྟེང་པདྨ་ཁ་སྤྲོད། དེ་སྟེང་ཟླ་གདན་ལ་བླ་གཏོར་ནོར་གཟུགས་ཕྱོགས་བཞིར་པདྨ་དང་བར་མཚམས་ནོར་བུའི་རྒྱན་ལྡན་བཞག ༈ །ཆོས་གླིང་ཟབ་ལམ་ཐུགས་ནོར་གྱི་རྩ་དབང་ལ། སྟ་གོན་རྫས་བཞི། རས་བྲིས་དབུས་ཁྲིའུར་རྣམ་བུམ། མདུན་དུ་ལྷ་ཙཀ་བཅུ་དྲུག་དང་སྔགས་བྱང་། གཡས་སོགས་ལ་དབུ་རྒྱན་དར་དཔྱངས། རྡོར་དྲིལ། ནུབ་ཏུ་མཎྜལ་སྟེང་ཁྲི་འུར་ཐོད་ཆང་བྱང་སེམས་མངར་གསུམ་སྦྱར་བས་བཀང་བའི་ཁར། སིནྡྷུ་རའི་མེ་ལོང་ཆོས་འབྱུང་བསྣོལ་མ་མུ་ཁྱུད་གཉིས་ལྡན་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར། ར་ཧ། ཙ་རི། ཧྲི་ནི། ཡ་ས། ཞེས་གཡས་བསྐོར་དང་། རྒྱབ་ཀྱི་མུ་ཁྱུད་ལ་དབྱངས་གསལ་བྲིས་པས་བཀབ་པའི་སྟེང་ཤེལ་རྡོ་བཞག །མདུན་དུ་གཏེར་སྲུང་གཏོར་མ་བཀོད། སྦྱོང་ཆས་ཡུངས་ཀར། ཁམ་ཕོ་དཀར་པོ། དཱུར་བའི་སྤིར། བ་ལྕིའི་ཆངས་བུ། སེང་རས་ཚལ་པ་རྣམས་དང་། རྗེས་གནང་ཆས་འཁོར་ལོ། དུང་། པུསྟི་སོགས་ཀྱང་བསྡོགས། ༈ རྒྱལ་བ་ཀུན་འདུས་ལ། རས་བྲིས་སྟེགས་བཅས་ཁར་རྣམ་བུམ། རིག་དབང་བཞི། འཁོར་ལོ། རྒྱ་གྲམ། སྐུ་གསུམ་མམ་གུ་རུའི་སྐུ་ཙཀ །ཤེལ་ཕྲེང་། མེ་ལོང་། གསང་ཐོད། རིག་ཙཀ་མདུན་ངོས་བླ་གཏོར་དྲིལ་གཟུགས་རི་མོ་ཟླུམ་པོ་བརྩེགས་པ་རྒྱན་ལྡན་བཤམ། ༈ གུ་རུ་སྤྲོས་མེད་དོན་སྒྲུབ་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ་སྐུ་ཙཀ་བཙུགས་པ། གཡས་སུ་ཐོད་ཆང་དང་བགྲང་ཕྲེང་། གཡོན་དུ་མེ་ལོང་སིནྡྷུ་རའི་ཐིག་ལེ་ཅན་དང་ཤེལ་རྡོ། མདུན་དུ་རིགས་ལྔའི་ཕྱག་མཚན་རྣམས་སོ། ༈ །དག་སྣང་སྲིན་ཡུལ་མ་ལ། བུམ་ཐོད་རིག་ཙཀ་ཤེལ་རྡོ་བཅས་སོ། ༈ །དགོངས་གཏེར་བསམ་པ་ལྷུན་གྲུབ་ལ། རས་བྲིས་སམ་མཎྜལ་ཚོམ་བུ་བཅུ་གསུམ་མའི་སྟེང་རྣམ་བུམ། དེ་སྟེང་འཕྲུལ་སྟེགས་ལ་བླ་གཏོར་རྒྱན་ལྡན། ཤར་དུ་ལྷ་ཙཀ །ལྷོར་དབུ་རྒྱན་དང་རིན་ཆེན་ཕྲེང་བ། ནུབ་ཏུ་རྡོ་རྗེ་དང་མེ་ཏོག་ཕྲེང་བ། བྱང་དུ་དྲིལ་བུ། མཚམས་བཞིར་ཤེལ་ཕྲེང་། གསང་ཐོད། རིག་ཙཀ །ཤེལ་རྡོ་མེ་ལོང་། དབུས་སུ་འཁོར་ལོ་རྣམས་བཀོད། ༈ ཀློང་སྙིང་རིག་འཛིན་འདུས་པ་ལ། དཀྱིལ་འཁོར་རས་བྲིས་སམ་ཚོམ་བུ་གཙོ་འཁོར་དགུ་པའི་སྟེང་བུམ་པ་གཡས་གཡོན་རྒྱབ་ཏུ་གསང་ཐོད། རིག་ཙཀ །ཤེལ་རྡོ་མེ་ལོང་། གཞུང་པོད་རྣམས་བཀོད། ༈ སྙན་བརྒྱུད་ཡིད་བཞིན་ནོར་བུ་ལ། དཀྱིལ་འཁོར་རས་བྲིས་སམ་མཎྜལ་སྟེང་ཚོམ་བུ་གཅིག་བཀོད་པའི་སྟེང་དཔལ་གཏོར་རིན་ཆེན་འབར་བ་བླ་མའི་སྐུ་ཙཀ་དར་གདུགས་དམར་པོ་དབུབ་པ་བཞག ༈ །ཨོ་རྒྱན་རྗེ་འབངས་ཉེར་ལྔ་ལ། མཎྜལ་ལ་ཚོམ་བུ་གཙོ་བོ་གཅིག་ལ་འཁོར་ཉེར་ལྔས་བསྐོར་བའི་སྟེང་རྣམ་བུམ། མདུན་དུ་སྐུ་ཙཀ་ཚང་བ། གཡས་གཡོན་དུ་ཐོད་ཆང་དང་ཁ་ཊྭཱཾ། རྒྱབ་ཏུ་ཤེལ་རྡོ་མེ་ལོང་རྣམས་བཀོད། ༈ གཏེར་གསར་བླ་མ་དགོངས་འདུས་སྙིང་པོ་ལ། རས་བྲིས་སམ་ཚོམ་བུའི་ཁར་རྣམ་བུམ། གཡས་གསང་ཐོད། གཡོན་རིག་ཙཀ །རྒྱབ་ངོས་གུ་རུའི་སྐུ་འབག་དང་ཤེལ་རྡོ། རྨ་བྱའི་མདོངས། མདུན་དུ་བླ་གཏོར་བཅས། ༈ བདུད་འདུལ་རྒྱལ་པོ་ལ། མཎྜལ་ཚོམ་བུ་གཅིག་པའི་ཁར་སྟེགས་ལ་གུ་རུའི་སྐུ་ཚབ། མདུན་ངོས་བླ་མའི་གཏོར་ཆེན་བཤམ། ༈ བླ་སྒྲུབ་ཐུགས་ཀྱི་ཡང་སྙིང་ལ་རས་བྲིས་སམ་ཚོམ་བུ་ལྷ་གྲངས་སྟེང་སྟེགས་ལ་རྣམ་བུམ། གཡས་སུ་གསང་ཐོད། གཡོན་དུ་མེ་ལོང་ལ་ལི་ཁྲི་བྱུགས་ཤིང་རྡོ་རྗེ་པདྨ་བྲིས་པ། རྒྱབ་ཏུ་གུ་རུའི་སྐུ་འབག་དང་ཤེལ་རྡོ། །མདུན་དུ་བླ་མའི་གཏོར་ཆེན་རྣམས་བཤམ། ༈ ཕྱི་སྒྲུབ་བར་ཆད་ཀུན་སེལ་དབང་རྒྱས་པ་གཞན་དུ་ཤེས། འབྲིང་བསྡུས་ལ། རས་བྲིས་སམ་ཚོམ་བུ་ལྷ་གྲངས་མཉྫིའི་ཁར་རྣམ་བུམ་དང་ཐོད་པའི་བདུད་རྩི་མེ་ལོང་སིནྡྷུ་རའི་ཐིག་ལེ་ཧྲཱིཿཡིིག་བྲིས་པ་བརྩེགས་མར་བཀོད། གཡས་སུ་གཏོར་མ་རིན་ཆེན་ཟུར་བརྒྱད་མ། གཡོན་དུ་གུ་རུའི་སྐུ་ཚབ། དབུས་སོགས་སུ་ལྷ་ཙཀ་ཚང་བ། དབང་ཕྲེང་། མེ་ལོང་། མཐའ་རྟེན་ཚེ་དབང་བསྐུར་ན་ཚེ་བུམ་ཚེ་རིལ་ཆང་མདའ་དར་བཅས། ༈ ནང་སྒྲུབ་ཡིད་བཞིན་ནོར་བུའམ་བསམ་ལྷུན་དབང་རྒྱས་པ་ལ། རས་བྲིས་སྟེགས་ཁར་རྣམ་བུམ། ཐོད་ཆང་མེ་ལོང་སིནྡྷུ་རའི་ཐིག་ལེ་ལྔ་ཚོམ་བཾ་ཧ་རི་ནི་སས་མཚན་པ་གུ་རུའི་སྐུ་འབག་རྣམས་བརྩེགས། ལྷ་ཙཀ །སྔགས་བྱང་ཚང་མ། མེ་ལོང་། ལྷ་གནས་ཐད་ཀར་དངོས་གྲུབ་ཀྱི་རྫས་བཅུ་གསུམ་དངོས་སམ་ཙཀ་ལི། རྒྱབ་ངོས་སུ་བླ་མའི་གཏོར་ཆེན་གོང་མཚུངས་རིག་ཙཀ །མཐའ་རྟེན་ཚེ་དབང་བསྐུར་ན་དེའི་ཆས་གོང་མཚུངས་རྣམས་བཀོད། ༈ རྩ་དབང་འབྲིང་པོ་ལ་དངོས་གྲུབ་རྫས་བཅུ་གསུམ་དང་རིག་ཙཀ་མི་དགོས་གཞན་དབང་ཆེན་དང་འདྲ། གཏོར་ཆེན་མདུན་དུ་བཀོད། ༈ གཏོར་དབང་ལ། མཎྜལ་སྟེང་གཏོར་ཆེན་ཁོ་ན་བཞག ༈ །ཚེ་དབང་ཟུང་འབྲེལ་དུ་བྱེད་ན། མཎྜལ་ལ་དེའི་ཆས་རྣམས་བསྒྲིག ༈ །གསང་སྒྲུབ་མཚོ་སྐྱེས་རྡོ་རྗེ་ལ། རས་བྲིས་སམ་མཎྜལ་ཚོམ་བུ་གཅིག་པའི་སྟེང་རྣམ་བུམ། གཡས་སུ་གསང་ཐོད། གཡོན་དུ་མེ་ལོང་དྭངས་པ་དང་རྟ་ཕག་ཡབ་ཡུམ་གྱི་ཙཀ་ལི། རྒྱབ་ཏུ་བླ་གཏོར་རྣམས་བཀོད། ༈ རྩ་གསུམ་རིག་འཛིན་མཆོག་སྒྲུབ་དོན་དབང་ལ། དཀྱིལ་འཁོར་དབུས་སུ་ཁྲིའུའི་ཁར་གུ་རུའི་སྐུ་ཚབ་དང་ཤེལ་རྡོ། དེ་མདུན་གུ་རུའི་སྐུ་ཆས། བྱང་དུ་བུམ་པ་བཅུད་ལྡན་དང་ཆོས་གོས་སོགས། ཤར་དུ་རྡོར་སེམས་སྐུ་སྔགས་བྱང་ཕྱག་མཚན་རྣམས་དང་དར་དང་རིན་ཆེན་རུས་རྒྱན། ལྷོ་རུ་གླེགས་བམ་དང་དཔལ་ཆས། ནུབ་ཏུ་ཐོད་པའི་བདུད་རྩི་དང་རིག་ཙཀ །ཚེ་དབང་ཆས་མདུན་རྒྱབ་གང་བདེར། ཚེ་འབྲང་དང་གཡས་གཡོན་དུ་ཚེ་རིལ་ཆང་། བཀྲ་ཤིས་རྫས་རྟགས་རྒྱལ་སྲིད་ཙཀ་ལི་བཅས་བཀོད། ༈ གསང་ཐིག་བླ་སྒྲུབ་ལ། དཀྱིལ་འཁོར་རས་བྲིས་སམ་ལྷ་གྲངས་ཚོམ་བུའི་དབུས་སུ་ཁྲིའུ་ལ་བུམ་པ་བཅུད་ལྡན་མགུལ་ཆིངས་དཀར་པོ་ཅན་གྱི་ཁར་ཐོད་པའི་བདུད་རྩི། དེ་སྟེང་མེ་ལོང་ལ་སིནྡྷུ་རའི་ཐིག་ལེ་ལྔ་ཚོམ་ལ་ཧཱུྃ་ཨོཾ་སྭཱཿཨཱཿཧཱ། བྲིས་པས་བཀབ་པའི་སྟེང་དུ་གུ་རུའི་སྐུ་ཚབ་བཞུགས། རྒྱབ་ཏུ་བླ་མའི་གཏོར་ཆེན་རྒྱན་ལྡན། མདུན་དུ་ཚེ་འབྲང་ཚེ་རིལ་ཚེ་ཆང་བཅས། དངོས་གྲུབ་སྦྱིན་རྒྱུའི་བཟའ་བཏུང་ཀྱང་བཀོད། ༈ ࿋་་་་རྟགས་འདི་འདྲའི་བར་དུ་བཅུག་པའི་ལག་ལེན་རྣམས་དཔལ་སྤུངས་པར་མར་མེད་ཅིང་རྗེས་སུ་ཆད་འཛུད་བྱས་པ་དཀྱུས་སུ་བཅུག་པ་དང་། ད་དུང་མ་ཚང་བ་མང་པོ་འདུག་ཀྱང་། དབང་ཆོག་སོ་སོའི་དབུར་བཅས་བཤམ་གང་དགོས་གསལ་བས་དོ་གལ་མ་བྱས་སོ། །མཆན། ࿋ གསང་ཐིག་ཡུམ་བཀའི་བཅས་བཤམ། དཀྱིལ་འཁོར་གཞུང་མཐུན་ཡོད་ན་དང་མེད་ན་མེ་ཏོག་གི་ཚོམ་བུ་ལྷ་གྲངས་བཀོད་པའི་ཁར། ཐོད་བཟང་ནང་ཨ་མྲྀཏས་སྦྱལ་བ། མེ་ལོང་སིནྡྷུ་ར་བརྡལ་པ་ལ་ཆོས་འབྱུང་བསྣོལ་མ་པདྨ་འདབ་བཞི་ཅན་གྱི་ལྟེ་བར་བཾ་ཡིག་ལ་སྒྲུབ་སྔགས་ཀྱིས་བསྐོར། འདབ་བཞིར་ཧ་རི་ནི་ས་གཡས་བསྐོར་དུ་བཀོད་པ་དར་དམར་གྱིས་བཀབ་པའི་སྟེང་ཤེལ་རྡོ་བཞག །མདུན་སོགས་གང་བདེར་གཙོ་མོའི་སྐུ་ཙཀ །དབང་ཕྲེང་། ཕྱག་མཚན་གྲི་ཐོད། དར་གོས་རིན་ཆེན་པད་ཕྲེང་། རུས་པའི་ཕྱག་རྒྱ་ལྔ་རྣམས་ཀྱི་ཙཀླི །རྒྱབ་ངོས་སུ་མཁའ་འགྲོའི་གཏོར་མ་རྒྱན་ལྡན་སྐུ་ཙཀ་དར་གདུགས་ཀྱིས་སྤྲས་པ། མདུན་དུ་ཚེ་འབྲང་དང་ཚེ་རིལ་ཆང་། གཞན་ཡང་ཆོས་དྲུག་གི་བྱིན་རླབས་ཆས། དཔལ་འབར། མེ་ལོང་གསལ་བ་དང་ལྷ་སྐུ །དྭངས་པའི་ཤེལ། གཟུགས་བརྙན་སྣ་ཚོགས་བྲིས་པ། མདའ་གཞུ། མར་མེ་རྣམས་དང་། བྱིན་འབེབས་བརྒྱད་ལ་མཁོ་བའི། སིནྡྷུ་ར། བདུད་རྩི། མར་མེ། གཞུང་གསལ་བདུག་སྤོས། མེ་ཏོག་དཀར་དམར་མཐིང་གསུམ་འབྲུ་ལ་ཚོན་གྱིས་བསྒྱུར་བ། བདུད་རྩི་ལྔ་དང་མངར་གསུམ་ཟན་ལ་བསྲེས་པའི་ཏིང་ལོ་དམར་པོ་སློབ་མའི་གྲངས་མཉམ། བྱང་སེམས་དཀར་དམར་དང་མངར་གསུམ་སྦྱར་བའི་ཆང་། བླ་མའི་གཏོར་མ་སྐུ་འབག་གིས་བརྒྱན་པ། གཏོར་དབང་སྐབས། སིནྡྷུ་རའི་ཐིག་ལེ། ཚེ་དབང་ལ། ཚེ་འབྲང་། ཚེ་རིལ་ཆང། ཚེ་མདའ་བཅས་འདུ་བྱའོ། ࿋ ༈ །ཚིག་བདུན་བླ་སྒྲུབ་སོ་སོར། མཎྜལ་ཚོམ་བུ་ལྷ་གྲངས་བཀོད་པའི་དབུས་ཁྲིའུ་ལ་རྣམ་རྒྱལ་བུམ་པ། མདུན་དུ་སོ་སོའི་སྐུ་ཙཀ །རྒྱབ་ཏུ་བླ་གཏོར་དང་ཁྲོ་བོའི་རིགས་ལ་དཔལ་གཏོར། གཡས་གཡོན་དུ་ཞི་དྲག་ལས་མཐུན་གྱི་ཕྲེང་བ་དང་ཤེལ་རྡོ། མཆོག་དབང་དགོས་རིགས་ལ་ཐོད་པའི་བདུད་རྩི་དང་རིག་ཙཀ །དངོས་གྲུབ་ཀྱི་རྫས་བཅས་བཀོད། ༈ ཡུམ་བཀའ་བདེ་ཆེན་རྒྱལ་མོ་ལ། དཀྱིལ་འཁོར་རམ་ཚོམ་བུའི་དབུས་སུ་རྐང་གསུམ་སྟེང་རྣམ་བུམ་ཁར་ཐོད་པའི་བདུད་རྩི། དེ་སྟེང་སིནྡྷུ་རའི་མེ་ལོང་ལ་ཆོས་འབྱུང་དབུས་སུ་ཧྲཱིཿཡིག་མཐར་སྙིང་པོས་བསྐོར་བ་བཞག་ལ་དར་དམར་གྱིས་བཀབ། སྐུ་ཙཀ །སྔགས་བྱང་། ཤེལ་རྡོ། མར་མེ། གྲི་ཐོད་ཁ་ཊྭཱཾ་རུས་རྒྱན་རྣམས་ཀྱི་ཙཀ་ལི། སྒྲུབ་གཏོར་ཟླ་གམ་རྒྱན་ལྡན་དར་གདུགས་བཅས་གང་འོས་སུ་བཀོད། མདུན་དུ་བཀའ་སྲུང་བདེ་ཆེན་རྒྱལ་མོ་མཆེད་གསུམ་གྱི་གཏོར་མ་སྐུ་ཙཀ་དར་གདུགས་ཀྱིས་སྤྲས་པའང་བཞག་གོ ༈ །སྒམ་པོའི་གསང་ལམ་བླ་སྒྲུབ་ལ། སྟེགས་བུའི་དབུས་སུ་རྐང་གསུམ་སྟེང་སིནྡྷུ་རས་བྱུགས་པའི་མེ་ལོང་ཆེ་ལེགས་ངོས་སུ་ཆོས་འབྱུང་བསྣོལ་བའི་དབུས་སུ་པདྨ་འདབ་བཞིའི་ལྟེ་བར་བཾ། ཆོས་འབྱུང་གི་མཐར་ཨོཾ་གསུམ་མའི་སྔགས་ཀྱིས་བསྐོར་བ་བཞག །གཡས་སུ་བུམ་པ་ཆིངས་དམར་རྒྱན་ལྡན། གཡོན་དུ་ཀ་པཱ་ལ་ཆང་དང་བདུད་རྩི་རིལ་བུས་བཀང་པ་བཞག །རྐང་གླིང་སོགས་འདུ་བྱ། ༈ གནམ་ཆོས་ཌོམྦི་པ། བིརྺ་པ། ཕ་དམ་པ། མི་ཏྲ་ཛོ་ཀི །རད་གླིང་ལྔ་ལ། གཟུངས་དབང་སྤྱི་འགྲེ་བཤམ། རྫས་དབང་ཙཀ་ལི་གཅིག་གིས་ཆོག ༈ །དག་སྣང་པཀྴིའི་བླ་སྒྲུབ་ལ། དཀྱིལ་འཁོར་པདྨ་འདབ་བརྒྱད་སྟེང་རྐང་གསུམ་ཁར་དཔལ་གཏོར་དམར་པོ་བརྗིད་ལྡན་ལ་ཟུར་གསུམ་བདུན་གྱིས་བསྐོར་བ་དར་གདུགས་ཅན། མདུན་རྒྱབ་གང་བདེར་རྣམ་བུམ། ཧཱུྃ་དཀར་དམར་མཐིང་གསུམ། རྡོ་རྗེ་དང་ཕུར་བུ། མེ་ལོང་། རྒྱལ་མཚན། ཐིག་ལེ། གཙོ་འཁོར་སྐུ་གཟུགས། དར་དཔྱངས། མེ་ཏོག །རྒྱ་གྲམ་རྣམས་ཀྱི་ཙཀ་ལི་བཀོད། ༈ བླ་སྒྲུབ་ཐིག་ལེའི་རྒྱ་ཅན་ལ། མཎྜལ་ཚོམ་བུ་ལྔ་པའི་ཁར་ཁྲི་འུར་བྷནྡྷ་དུམ་གསུམ་ཆོས་སྨན་འབྲུ་ཡིས་བཀང་པའི་ནང་རིག་འཛིན་འདུས་པའི་སྲོག་འཁོར་བཅུག་པ་ལ་དར་གུར་ཕུབ། གཡས་སུ་རྣམ་བུམ། མདུན་དུ་བླ་མའི་སྐུ་བརྙན། གཡོན་དུ་གསང་ཐོད་རིག་ཙཀ །ཌཱ་རུ་ཁ་ཊྭཱཾ་རུས་རྒྱན་རྣམས་ཀྱི་ཙཀ་ལི། རྒྱབ་ཏུ་ཤེལ་རྡོ་དང་སྙིང་ཏིག་ཆེན་མོ་མ་བུ་གང་རུང་གི་གླེགས་བམ་རྣམས་བཞག ༈ །གྲུབ་ཐོབ་ཐུགས་ཏིག་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ། མདུན་སོགས་སུ་གྲུབ་ཆེན་ཐང་རྒྱལ་སྐུའམ་ཙཀ་ལི། ཨཱ་ལི་ཀཱ་ལིའི་སྔགས་བྱང་གསང་ཐོད། མཁའ་འགྲོ་སྡེ་ལྔ་དང་རིག་ཙཀ །ཤེལ་རྡོ་འཇའ་རིས། ཁ་ཊྭཱཾ་ཅང་ཏེའུ་ཐོད་པ། རྒྱབ་ཕྱོགས་བླ་གཏོར་རྒྱན་ལྡན་བཀོད། ཚེ་དབང་ལ། བུམ་པ། ཐོད་ཆང་། ཚེ་རིལ། ཤེལ་རྡོ་མེ་ལོང་བཅས་ཕལ་ཆེར་སྔ་མས་འཐུས་པར་བྱས་ཀྱང་ཆོག ༈ །སྐུ་གསུམ་རིགས་འདུས་ཟབ་ཏིག་ལ། མཎྜལ་ཚོམ་བུའི་སྟེང་རྐང་གསུམ་ལ་བླ་གཏོར་རྒྱན་ལྡན་དར་གདུགས་བཅས་དགོད་དོ།། ༈ །།དེ་ནས་བླ་མ་དྲག་པོའི་སྐོར་ལས། ཐོག་མར་དྲག་དམར་འོ་བྲན་ལུགས་ལ། རས་བྲིས་སྟེགས་ཁར་རྣམ་བུམ་ཐོད་ཆང་སིནྡྷུ་རའི་མེ་ལོང་ལ་ཆོས་འབྱུང་ནང་ཨརྩིག་སོགས་བྲིས་པ་དར་དམར་གྱིས་བཀབ་པའི་སྟེང་གུ་རུའི་སྐུ་འབག་བཞུགས། ཤར་དུ་རྡོ་རྗེ། ལྷོར་ཐོད་ཆང་། ནུབ་ཏུ་དྲིལ་བུ། བྱང་དུ་སེང་ཕུར། དབུས་སུ་རྡོ་རྗེ་དང་ལྕགས་སྡིག །མདུན་དུ་དཔལ་གཏོར་རྣམས་བཞག ༈ །ཉང་གི་གུར་དྲག་བདེ་གཤེགས་འདུས་པ་ལ། རས་བྲིས་སྟེང་མཉྫི་ལ་རྣམ་རྒྱལ་བུམ་པའི་ཁར་བྷནྡྷ་བཅུད་ལྡན། དེ་སྟེང་མེ་ལོང་ལ་སིནྡྷུ་རའི་དཀྱིལ་འཁོར་ཆོས་འབྱུང་བསྣོལ་མའི་ནང་པདྨ་འདབ་བཞིའི་དབུས་དང་ཕྱོགས་བཞིར་ཨོཾ་ཧཱུྃ་སྭཱ་ཨཾ་ཧཱ། མཐར་ཐོད་ཕྲེང་སྡེ་ལྔའི་སྔགས་གཡས་བསྐོར་དུ་བཀོད་པ་བཞག་ལ་དར་དམར་གྱི་གུར་ཕུབ། མདུན་ཕྱོགས་སུ་ཐོད་ཕྲེང་སྡེ་ལྔ་དང་གོ་ཆ་ལྷ་ལྔའི་དབང་ཙཀ །རྒྱབ་ཏུ་གཏོར་མ་རིན་ཆེན་འབར་བ། སྡེ་བརྒྱད་སྲོག་གཏད་བྱེད་ན་དེའི་འོག་ཏུ་ཐོད་པ་མཚན་ངན་དུ་སྡེ་བརྒྱད་བླ་རྡོ་རྣམས་བཞག །ཤར་དུ་བུམ་པ་བཅུད་ལྡན། ལྷོར་ཚོགས་རྫས་བཟའ་བཏུང་། ནུབ་ཏུ་དཔལ་གཏོར་ཟླ་གམ་ཉི་ཟླ་ནོར་བུས་བརྒྱན་ཅིང་ཤ་ཆང་ཆོས་སྨན་བཏབ་པ། བྱང་དུ་ལྕགས་ཕུར་ཅོད་པན་ཅན། གཞན་ཡང་ཞི་ཆས། གུ་རུའི་སྐུ་ཆས། རྡོ་རྗེ། ལྕགས་སྡིག །རུས་པའི་རྒྱན་དྲུག །གླང་ཀོ །མི་ལྤགས། སྟག་ཤམ། ཐོད་ཕྲེང་། སྦྲུལ་ཆུན། ཁྲག་ཐིག །ཐལ་ཚོམ་རྣམས་སོ། །ཐོད་རྔ་རྐང་གླིང་ཐོད་སྐུ་ཁ་ཊྭཱཾ་རྣམས་སྣོད་གཅིག་ཏུ་བཞག་པ། ༈ འདོད་བུམ་གྱི་དྲག་པོ་བདེ་འདུས་ལ། རས་བྲིས་སྟེང་སྟེགས་ལ་རྣམ་བུམ། གཡས་གཡོན་དུ་གསང་ཐོད། རྡོར་དྲིལ། གོ་ཆ་ལྷ་བཞིའི་སྐུ་དང་དེ་དག་གི་རྟེན་རྫས་པུསྟི། ཕུར་བུ། རྡོ་རྗེ། ལས་བུམ། ཁྱུང་ལྔ། ཚེ་གཏོར་རམ་སྣང་མཐའི་སྐུ །ཐོད་རྔ་ཐོད་ཁྲག །རྒྱབ་ཏུ་དཔལ་གཏོར་རྒྱན་ལྡན་རྣམས་བཀོད། ༈ པད་གླིང་དྲག་དམར་ལ། དཀྱིལ་འཁོར་བརྗེ་བ་མ་གཏོགས་འདྲ། སྲུང་སྐུད་སློབ་མའི་གྲངས་མཉམ་བསྡོག ༈ །འབྲིང་པོ་མེའི་སྤུ་གྲི་ལ། རས་བྲིས་སྟེང་རྣམ་བུམ་ཐོད་པའི་བདུད་རྩི་མེ་ལོང་དྲི་མེད་གུ་རུའི་སྐུ་འབག་རྣམས་བརྩེགས། དེ་རྒྱབ་ཕྱོགས་བཞིར་རྡོ་རྗེ། བདུད་རྩིའི་ཐོད་པ། དྲིལ་བུ། ཕུར་པ། མདུན་དུ་དཔལ་གཏོར་རྣམས་བཞག ༈ །བསྡུས་པ་ལུ་གུ་རྒྱུད་ལ། རས་བྲིས་སམ་ཚོམ་བུ་ལྷ་གྲངས་ཁར་གཏོར་མ་རིན་ཆེན་འབར་བ་སྐུ་ཙཀ་གིས་བརྒྱན་པ། གཡས་སུ་ཐོད་ཆང་གཡོན་དུ་རྡོ་རྗེ་བཅས་བཀོད། ༈ གུ་རུ་དར་ནག་བེར་ཆེན་ལ། རས་བྲིས་སྟེང་དཔལ་གཏོར་རྒྱན་ལྡན་སྐུ་རྟེན་གྱིས་མཚན་པ་བཞག ༈ །བྱང་གླིང་གུར་དྲག་ལ། མཎྜལ་ཚོམ་བུ་གཅིག་པའི་སྟེང་གནམ་ལྕགས་རྡོ་རྗེ་དང་དྲིལ་བུ། གཡས་སུ་གསང་ཐོད། གཡོན་དུ་ཕག་མོའི་སྐུ་ཙཀ །མདུན་དུ་ཐོད་སྐམ་དབུ་རྒྱན། ཁྲག་ཞག་ཐལ་གསུམ། རུས་རྒྱན། ཟབ་བེར། གླང་ཞིང་སྟག་ལྤགས། མགོ་ཕྲེང་། མེ་ཕུང་། པདྨ་ཉི་ཟླ། དྲེགས་པའི་གདན་བཅས། ༈ བྱང་གཏེར་ཐུགས་སྒྲུབ་དྲག་པོ་རྩལ་གྱི་དབང་རྒྱས་པ་ལ། སྟ་གོན་རྫས་བཞི་མཆོད་པ་བཅས། རས་བྲིས་སྟེང་ཁྲིའུ་ལ་རྣམ་བུམ་དང་བླ་མའི་གཏོར་ཆེན། ལྷ་ཙཀ་རྣམས། དབུས་སུ་གནམ་ལྕགས་རྡོ་རྗེ་རྩེ་དགུ་དང་དྲིལ་བུ། ཤར་དུ་རྡོར་དྲིལ། ཤར་ལྷོ་རྡོ་རྗེ་བེ་ཅོན། ལྷོར་འཁོར་ལོ་བེ་ཅོན། ལྷོ་ནུབ་བདུད་རྩིའི་གའུ། ནུབ་ཏུ་པདྨ་རྔེའུ་ཆུང་། ནུབ་བྱང་དུ་ཐོད་པ་བུམ་རིལ། བྱང་དུ་ལྕགས་ཕུར། བྱང་ཤར་སྙིང་ཕྲེང་རྣམས་བཀོད། མགྱོགས་དབང་སྐབས་སུ་འདིའི་ཙཀ་ལི་ཕྱོགས་སྤོམ་བཞག་ཀྱང་རུང་། རིགས་ལྔའི་དབུ་རྒྱན། རྡོར་དྲིལ། ཐོད་ཕྲེང་། གླང་སྟག་ཞིང་གསུམ། སྦྲུལ་ཆུན། ཁྲག་ཞག་ཐལ་གསུམ། གོ་ཁྲབ། མེ་དཔུང་། རུས་རྒྱན་རྣམས་སོ་སོ། ཤར་དུ་ཐོད་པའི་བདུད་རྩི་དང་མར་མེ། ལྷོར་མེ་ལོང་སིན་དྷུ་རའི་ཐིག་ལེ་བཀོད་པ་དང་རིག་ཙཀ་སྨན་ཐོད། ནུབ་ཏུ་ཚེ་འབྲང་དང་རཀྟ། བྱང་དུ་ཤེལ་རྡོ་མེ་ལོང་མཆོད་ཡོན། རྗེས་གནང་ཆས། རྡོར་དྲིལ། རྒྱལ་མཚན། དུང་དཀར། རྔ་ཆེན། མར་མེ་གསུམ། གཏུམ་མོའི་མེ་དབང་རྫས་བྱང་སེམས་དཀར་དམར། སུག་སྨེལ། ཚ་བ་གསུམ། ཚྭ་སྣ་གསུམ་རྣམས་ཀྱི་རིལ་བུའང་ཐོད་ཆང་དང་ལྷན་ཅིག་བཞག་གོ སློབ་མ་མཆོད་པ་སོགས་འདུ་བྱའོ། ༈ །སྨིན་ལམ་འབྲིང་པོ་ལ། རས་བྲིས་སམ་མཎྜལ་སྟེང་ལྷ་གྲངས་ཀྱི་ཚོམ་བུ་བཀོད་པའི་ཁར་རྣམ་བུམ་ཆིངས་སྔོན་པོ་ཅན་གྱི་ཁ་རྒྱན་གསེབ་ཏུ་གཙོ་དགུའི་ཙཀ་ལི། མདུན་དུ་གསང་ཐོད་མེ་ལོང་སིནྡྷུ་རའི་ཐིག་ལེ་ལྔ་ཚོམ་ཅན་གྱིས་བཀབ་པ་དང་རིག་ཙཀ །རྡོར་དྲིལ། རྒྱལ་མཚན་དུང་དཀར་རྔ་ཆེན་རྣམས་ཕྱོགས་བསྡུས། རྒྱབ་ཏུ་གཏོར་ཆེན་དང་བཟའ་བཏུང་འགྱེད་རྒྱུ་བཞག ༈ །བསྡུས་པ་བྱིན་རླབས་ཐུགས་རྗེའི་དབང་བསྐུར་ལ་རས་བྲིས་སམ་ཚོམ་བུ་གཅིག་པའི་སྟེང་དཔལ་གཏོར་ལས་བཞི་ལྷུན་གྲུབ་ལ་བྲིས་སྐུ་བཙུགས་པ་དང་། ཧཱུྃ་ཡིག་སྔོན་པོ། ཧཱུྃ་ཁ་དོག་ལྔ། མེ་ལོང་ཐིག་ལེ་ལྔ་ཚོམ་ཅན། བཟའ་བཏུང་བཅས་བཀོད། ༈ དག་སྣང་ཚེ་གུར་སྦྲགས་མ་ལ། དཀྱིལ་འཁོར་དབུས་རྣམ་བུམ་བཅུད་ལྡན། དེ་སྟེང་ཁྲིའུར་དཔལ་གཏོར་རྒྱན་ལྡན། ཚེ་དཔག་མེད་དང་ཁྲོས་ནག་སྐུ །གཡས་གཡོན་དུ་ཀ་པཱ་ལ་བདུད་རྩིས་གང་བ། ཚེ་རིལ། ཤར་དུ་རྒྱ་གྲམ། ལྷོར་བུམ་པ། ནུབ་ཏུ་མེ་ཏོག །བྱང་དུ་ཉི་ཟླ། མདུན་དུ་ཚེ་འབྲང་། རྒྱབ་ཏུ་མདའ་དར་རྣམས་བཀོད། ༈ རྡོར་གླིང་གུར་དྲག་དབང་བཞི་སྙན་བརྒྱུད་མ་ལ། རས་བྲིས་སྟེང་ཁྲིའུར་དཔལ་གཏོར་སྐུ་ཙཀ་རྒྱན་ལྡན། གཡས་སུ་རྣམ་བུམ། གཡོན་དུ་གསང་ཐོད་དར་དམར་མེ་ལོང་གིས་བཀབ་པ་དང་ཕག་མོའི་ཙཀ་ལི་དྲིལ་བུ། རྒྱབ་ཏུ་གུ་རུའི་སྐུ །མདུན་དུ་ལྷ་ཙཀ་རྣམས་དང་ཚེ་འབྲང་སྣང་མཐའི་ཙཀ་ལི། དུར་ཁྲོད་ཆས་སྦྲུལ་གླང་ཞིང་སྟག་ཐོད་ཕྲེང་ཐོད་རྒྱན་ཐལ་ཁྲག་ཞག་ཟོ་རིས་ཅན། སྲུང་སྐུད་དམར་པོ་སློབ་མའི་གྲངས་མཉམ་བཅས། ༈ གུར་དྲག་མེ་རླུང་འཁྱིལ་བའི་དབང་རྒྱས་པ་རྡོ་རྗེའི་ཕྲེང་བ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སྟེང་ཁྲིའུར་རྣམ་རྒྱལ་བུམ་པའི་ཁར་ཐོད་ཆང་མེ་ལོང་སིནྡྷུ་ར་བརྡལ་པ་ལ་ཆོས་འབྱུང་བསྣོལ་མའི་དབུས་སུ་ཧྲཱིཿམ། མཐའ་བསྐོར་ཧ་རི་ནི་ས་ར་ཙ་ཧྲི་ཡ་བྲིས་པ་རྣམས་བརྩེགས་ལ་དར་དམར་གྱིས་བཀབ་པའི་སྟེང་ཤེལ་རྡོ་བཞག །རྒྱབ་ཏུ་དཔལ་གཏོར་རྒྱན་ལྡན་གྱི་གཡས་གཡོན་དུ་ཚེ་འབྲང་ཚེ་རིལ་ཆང་། དབུས་སོགས་སུ་གཙོ་བོའི་སྐུ་སོགས་ལྷ་ཙཀ་རྣམས་དང་། རྡོ་རྗེ་གྲི་གུག་རལ་གྲི །བནྡྷ་ཁ་ཊྭཱཾ། ལྕགས་སྡིག །ཐོད་སྐམ་དབུ་རྒྱན། ཁྲག་ཞག་ཐལ་གསུམ། གླང་ཀོ །གོ་ཁྲབ། ཞིང་ལྤགས། སྦྲུལ་ཆུན་ཐོད་ཕྲེང་། རུས་རྒྱན། སྟག་ཤམ་གཟིག་ཤམ། སྒྲུབ་ཡིག །ཕྲེང་དམར། མེ་ལོང་དང་ཨ་དཀར་རྣམས་བཀོད། ༈ དོན་དབང་ནོར་བུ་ལུགས་ལ། རས་བྲིས་སམ་ཚོམ་བུ་ལྷ་གྲངས་སྟེང་ཁྲིའུར་དཔལ་གཏོར་བང་རིམ་སུམ་བརྩེགས་སྟེང་རིན་ཆེན་འབར་བ་རྒྱན་ལྡན་སྐུ་ཙཀ་དར་གདུགས་ཅན་བཀོད། གཙོ་བོའི་ཕྱག་མཚན་དྲུག་འཛོམ་ན་དང་གོང་གསལ་ལྷ་ཙཀ །མ་འཛོམ་ན་གཙོ་བོའི་སྐུ །ཧཱུྃ་ཡིག་བཅུ། བནྡྷའི་བདུད་རྩི། སྒྲུབ་ཡིག །ཕྲེང་དམར། གཏེར་སྲུང་དམར་གཏོར། ༈ གཏོར་དབང་ཁ་རྐྱང་། རས་བྲིས་སམ་ཚོམ་བུ་ལྔ་པའི་ཁར་གཏོར་མ་དོན་དབང་ལྟར་བཤམས། ༈ པད་དཀར་དྲག་པོ་ཀཱི་ལ་ཡར། མཎྜལ་ཚོམ་བུ་གཅིག་པའི་སྟེང་ཁྲིའུར་དཔལ་གཏོར་རྒྱན་ལྡན་སྐུ་ཙཀ་དར་གདུགས་བཙུགས་པ། གཡས་སུ་ཀ་པཱ་ལ་བདུད་རྩིས་བཀང་བ། གཡོན་དུ་གསེར་གྱི་རྡོ་རྗེ་རྩེ་དགུ །རྒྱབ་ཏུ་བུམ་པ་རྒྱན་ལྡན་ལ་ཐོད་ཕྲེང་སྡེ་ལྔའི་ཙཀ་ལི་ཡོད་ན་བཙུགས། མདུན་དུ་ཕུར་པ་ཅོད་པན་ཅན། སྡེ་བརྒྱད་གཏོར་མ་ཧོམ་ཁུང་ལིང་ག་བཅས་བཤམ། ༈ རིག་འཛིན་ལེགས་ལྡན་རྡོ་རྗེའི་དྲག་པོ་དབུ་དགུའི་དོན་དབང་ལ། དཀྱིལ་འཁོར་མཎྜལ་ཚོམ་བུ་གཙོ་འཁོར་དགུ་བཀོད་པའི་སྟེང་དུ་དཔལ་གཏོར་སྐུ་ཙཀ་དར་གདུགས་ཅན། གཡས་གཡོན་དུ་ལྕགས་རྡོར་རྩེ་དགུ་དང་ཐོད་ཆང་། ཕྱག་མཚན་རྡོ་རྗེ་ཐོད་ཁྲག་དང་དུར་ཁྲོད་ཆས་ཙཀ་བཅས་བཀོད། ༈ མི་འགྱུར་ལས་གླིང་པདྨ་གཏུམ་པོ་ལ། ཚོམ་བུ་གཅིག་སྟེང་བུམ་པ་ཆིངས་དམར་ཁ་རྒྱན་སྐུ་ཙཀ་གིས་བརྒྱན་པ། མདུན་དུ་དཔལ་གཏོར། གཡས་སུ་མེ་ལོང་ལ་བསྙེན་སྔགས་མཚལ་བྲིས་ཅན། གཡོན་དུ་རྡོ་རྗེ། རྒྱབ་ཏུ་ལྕགས་ཀྱུ་ཕུར་པ་རྣམས་བཤམ། བསྒྲལ་དབང་བྱེད་ན་ལིང་ག་གདབ་ཕུར་སོགས་ཀྱང་བསྡོགས། ༈ དགོངས་ཟབ་གྲོ་ལོད་ལ། མཎྜལ་ཚོམ་བུ་གཅིག་པར་གཏོར་མ་རྡོ་རྗེའི་དབྱིབས་ཅན་སྐུ་ཙཀ་དར་གདུགས་ཅན། ཧཱུྃ་ཡིག་དང་རྡོ་རྗེ། ཕུར་བུ་བཅས། ༈ ཞིག་གླིང་གནམ་ལྕགས་མེ་འཁོར་ལ། དཀྱིལ་འཁོར་རྒྱས་པའམ་པདྨ་འདབ་བརྒྱད་སྟེང་རྣམ་བུམ། གཡས་སུ་དཔལ་གཏོར། གཡོན་དུ་ཐོད་ཆང་ཁར་སིནྡྷུ་རའི་མེ་ལོང་རིགས་ལྔ་ཡབ་ཡུམ་བཅུའི་ས་བོན་བྲིས་པའི་སྟེང་ཤེལ་རྡོ་བཞག ༈ །ཀརྨ་གུ་རུའི་སྲོག་གཏད་ལ། གཞི་སྟེང་ལྕགས་སྣོད་དུ་ཟན་གྱི་ཆོས་འབྱུང་དཀར་པོའི་སྟེང་བདུད་བཞི་དཀར་སེར་དམར་ནག་གཉིས་རེ་ཁ་སྤྲོད་བྱས་པ་བཞི་བརྩེགས་ལ་སེང་ལྡེང་ཕུར་པ་ཅོད་པན་ཅན་བཙུགས། དེ་སྟེང་ཁྲིར་དབང་གཏོར་གདན་ཟུར་གསུམ་རྩག་མཐོའི་སྟེང་གཏོར་མ་ཟུར་གསུམ་ནག་པོ་སྐུ་རྟེན་དར་གདུགས་ཅན་བཞག །གཡས་སུ་རྒྱ་གྲམ། གཡོན་དུ་སེང་ཕུར། མདུན་དུ་ཟོར་གཏོར་སྲིད་མེས་ཀྱི་གཟུགས་ཅན་མེ་རིས་བརྒྱན་པ་བཀོད། ༈ འཇའ་ཚོན་གུར་དྲག་གཏོར་དབང་ལ། ཚོམ་བུ་གཅིག་སྟེང་དཔལ་གཏོར་བཤམ། ༈ འཇའ་ཚོན་གྲོ་ལོད། ཚོམ་བུ་གཅིག་སྟེང་རྣམ་བུམ། དཔལ་གཏོར། གཡས་གཡོན་རཀྴའི་ཕྲེང་བ། རྒྱ་གྲམ། རྡོ་རྗེ་ཕུར་བུ། སྤྲོ་ན་ཧཱུྃ་ཁ་དོག་ལྔའི་ཙཀ་ལི་བཅས་བཀོད། ༈ བདུད་འདུལ་གྲོ་ལོད་ལ། རས་བྲིས་སམ་ཚོམ་བུ་ལྷ་གྲངས་སྟེང་ཁྲིའུར་དཔལ་གཏོར། གཡས་སུ་རྣམ་བུམ། གཡོན་དུ་བནྡྷ། མདུན་དུ་ལྷ་ཙཀ །ཕྱག་མཚན། རྡོ་རྗེ། ཕུར་པ། ལྕགས་སྡིག་ཧཱུྃ་དམར་དང་། སྣ་ཚོགས་རྡོ་རྗེ་འཇའ་འོད་ཅན། ཧཱུྃ་ཁ་དོག་ལྔ། ཧཱུྃ་དམར་ཉེར་གཅིག་གི་ཙཀླི་རྣམས་བཀོད། ༈ རྒྱ་ཅན་གྲོ་ལོད་གནམ་ལྕགས་མེ་འཁོར་ལ། དཀྱིལ་འཁོར་དབུས་མཉྫིའི་ཁར་སྒྲུབ་གཏོར་དར་གྱི་ཅོད་པན་ཅན། མདུན་དུ་རྣམ་བུམ་དང་མིང་དབང་། གཡས་སུ་དབུ་རྒྱན། རྒྱབ་ཏུ་རྡོ་རྗེ་དང་དྲིལ་བུ། གཡོན་དུ་གསང་ཐོད། རིག་ཙཀ་གམ་དྲིལ་བུ། འཇའ་ཤེལ། ཁྲོ་བོ་གཙོ་འཁོར་ལྔ། སྒོ་མ་བཞི། རྡོ་རྗེ་ཆོས། རིག་འཛིན་བརྒྱད། གུ་རུ་མཚན་བརྒྱད། བཀའ་བབས་དགུ་རྣམས་ཀྱི་སྐུ་ཙཀ །སྔགས་བྱང་གསེར་བྲིས། ཕྱག་མཚན། ཆོས་གོས། དུར་ཁྲོད་ཆས་རྣམས་ཀྱི་ཙཀ་ལི་རྣམས་ཅི་བདེར་བཀོད། སྨད་ལས་དབང་ཆས། དགང་བླུགས། མེ་ཕུང་། ལིང་ག་ཐོད་པ་གླང་རུ་བྱད་ཐག་ཐུན་རྫས་རོ་གཡམ་རྣམས་སྣོད་གཅིག་ཏུ་བཞག་པ་དང་། མདའ་རྡོ་ཀོང་བུ་ཁྲག་ཟོར་རྣམས་ཕྱོགས་བསྡུས་བྱས་པའང་བསྡོག ༈ །རྒྱ་ཅན་ཡང་གསང་ཀརྨ་དྲག་པོ་ལ། བྲུབ་ཁུང་དངོས་སམ། རྡུལ་ཚོན་གྱིས་བྲུབ་ཁུང་མཐིང་ནག་ཁ་ཁྱེར་མེ་རི་དང་བཅས་པ་བྲིས་པའི་ཁར་པད་སྣོད་དུ་ཟན་གྱི་ཆོས་འབྱུང་སྟེང་བདུད་བཞིའི་གཟུགས་ལ་ལྕགས་ཕུར་དར་གྱི་ཅོད་པན་ཅན་བཏབ། དེ་སྟེང་མཉྫིའི་སྟེང་གཏོར་ནག་མེ་རི་སོགས་རྒྱན་སྤྲོས་སྐུ་ཙཀ་དར་ནག་གི་གདུགས་ཕུབ་པ་བཀོད། མདུན་དུ་རྣམ་རྒྱལ་བུམ་པ། གཡས་གཡོན་དུ་རལ་གྲི་དང་ལྕགས་ཕུར། གསང་རྫས་ཐོད་པ། རིག་ཙཀ་དྲིལ་བུ་གང་རུང་བཞག །ཕྲེང་བ། མེ་ལོང་། དེ་ལས་སྟེགས་དམའ་བར་ཟོར་གཏོར་ཟུར་གསུམ་ནག་པོ་རྒྱན་མེད། རྩེར་དབང་ཕྱུག་ལིང་ག་དང་རྐེད་པར་བྷ་གས་བརྒྱན་པ་བཤམ། ༈ གནམ་ཆོས་གུར་དྲག་ཕུར་མཇུག་ལ། ཚོམ་བུའི་སྟེང་བུམ་པ། མདུན་དུ་ལྷ་བརྒྱ་གཏོར་གཅིག་སྐུ་ཙཀ །རྡོ་རྗེ་རལ་གྲི་སྡིག་པ་ཁ་ཊྭཱཾ་འབྲས་སྙེ་དུང་དཀར་ཞིང་དབྱུག་ཐོད་ཕྲེང་། མར་མེ་བཅས་བཞག ༈ །སྨིན་གླིང་དྲག་དམར་ལ། རས་བྲིས་དབུས་རྣམ་བུམ་ཁ་རྒྱན་གུ་རུའི་སྐུ་ཙཀ་ཅན། གཡས་སུ་དཔལ་གཏོར། གཡོན་དུ་གསང་ཐོད། ལྷ་ཙཀ །སྔགས་བྱང་རཀྴའི་ཕྲེང་བ། རྡོ་རྗེ་ཕུར་བུ་ལྕགས་སྡིག །དྲེགས་པའི་སྲོག་དབང་བསྐུར་ན་ཐོད་ངན་དུ་སྡེ་བརྒྱད་ཀྱི་གཟུགས་དང་གདབ་ཕུར་ཀྱང་འདུ་བྱ། ༈ ཀློང་གསལ་ཡེ་འབར་དབང་ཆེན་ལ། སྟ་གོན་རྫས་བཞི། དཀྱིལ་འཁོར་རས་བྲིས་སམ་འབྲུ་ཚོམ་ལྷ་གྲངས་སྟེང་རྐང་གསུམ་ཁར་རྣམ་བུམ་མགུལ་ཆིངས་དམར་པོ་ཅན་གྱི་ཁར་ཐོད་ཆང་། དེ་སྟེང་མེ་ལོང་སིནྡྷུ་ར་བརྡལ་པ་ལ་ཧཱུྃ་མཐར་སྙིང་པོས་བསྐོར་བ་བྲིས་པའི་སྟེང་ཤེལ་རྡོ་བཞག་ལ་དར་དམར་གྱི་གུར་ཕུབ། མདུན་དུ་ལྷ་ཙཀ་ཡོངས་རྫོགས། ཐོད་པ་ཆོས་སྨན་གྱིས་བཀང་པ། རྡོར་དྲིལ། གཡས་སུ་དབུ་རྒྱན། རྒྱབ་ཏུ་རྡོ་རྗེ། གཡོན་དུ་དྲིལ་བུ། མཚམས་རྣམས་སུ་ཕྱག་མཚན་དྲུག་པོ་དང་དུར་ཁྲོད་ཆས་ཙཀ །རྒྱབ་ངོས་སུ་དཔལ་གཏོར་བརྗིད་ལྡན། ཚེ་དབང་སྦྲེལ་ན་ཚེ་རིལ་ཆང་། རྗེས་གནང་སྦྲེལ་ན་ཕྲེང་བ་མེ་ལོང་གླེགས་བམ། དྲེགས་པའི་སྲོག་དབང་བྱེད་ན་གསོལ་ཁའི་གཏོར་མ། བླ་རྡོའམ་སྲོག་ཡིག་བརྒྱད་སོ་སོར་བྲིས་པའི་ཙཀ་ལི་ཐོད་ངན་དུ་བཅུག་པ་གཞི་མདུན་ལྟ་བུར་ཞིང་ལྤགས་ཁར་འཁོར་ལོ་རྩིབས་བརྒྱད་སྟེང་རྐང་གསུམ་ལ་བཞག །རྩིབས་བརྒྱད་ལ་དམར་གཏོར་རེ་རེ་བཀོད། ཕུར་པ་རལ་གྲི་རྣམས་དང་། སྲུང་སྐུད་དམར་པོ་སློབ་མའི་གྲངས་མཉམ་ཡང་བསྡོག་གོ ༈ །ཡེ་ཤེས་རབ་འབར་དོན་དབང་ལ། རས་བྲིས་སམ་ཚོམ་བུ་ལྔ་སྟེང་རྣམ་བུམ། གཡས་སུ་སྒྲུབ་གཏོར་ཟུར་གསུམ་བསྣོལ་མའི་སྟེང་དཔལ་གཏོར་ཟུར་གསུམ་རྒྱན་ལྡན། གཡོན་དུ་ཐོད་ཆང་མེ་ལོང་ཤེལ་རྡོ་རྣམས་བརྩེགས་པ། རྡོ་རྗེ་ཕུར་སྡིག །གཙོ་བོའི་སྐུ། དུར་ཁྲོད་ཆས་རྣམས་བཀོད། ༈ ཡེ་འབར་རྗེས་གནང་ཁོལ་འདོན་སྐབས། མཎྜལ་ལ་ཚོམ་བུ་བཀོད་པའི་ཁར་རྣམ་བུམ། གཡས་གཡོན་དུ་རཀྴའམ་ཐོད་ཕྲེང་། མེ་ལོང་། སྒྲུབ་ཐབས་ཀྱི་གླེགས་བམ་རྣམས་བཞག ༈ །སྟག་ཤམ་རྡོ་རྗེ་དྲག་རྩལ་དབང་ཆེན་ལ། དཀྱིལ་འཁོར་རས་བྲིས་སམ་ཚོམ་བུ་ལྷ་གྲངས་སྟེང་མཉྫི་ལ་བུམ་པ་མགུལ་ཆིངས་སྔོན་པོ་ཁ་རྒྱན་གསེབ་གཙོ་བོའི་སྐུ་ཙཀ་ཅན། མདུན་ཕྱོགས་ཐོད་ཕྲེང་སྡེ་ལྔ་སོགས་ལྷ་ཙཀ་ཚང་བ། གཡས་སུ་ཐོད་ཆང་དང་བླ་མ་ཞི་བའི་ཙཀ་ལི། རྒྱབ་ཏུ་དཔལ་གཏོར་བརྗིད་ལྡན་རྡོ་རྗེ་ཉི་ཟླ་མེ་རིས་མཚན་པ། གཡོན་དུ་ཚེ་འབྲང་ཚེ་རིལ། བར་མཚམས་དུར་ཁྲོད་ཆས་ཙཀ །ཐོད་པའམ་རཀྴའི་ཕྲེང་བ། ཁྱུང་ལྔ་ཆུར་སྦྱར་བ། སྡེ་བརྒྱད་དང་གཟའི་སྲོག་དབང་བསྐུར་ན་དེ་དག་གི་ཆས་རྣམས་ཀྱང་བཀོད། ༈ རྩལ་དབང་ལ། མཎྜལ་ལྷ་གྲངས་ཚོམ་བུ་ཅན་གྱི་སྟེང་དུ་རྣམ་བུམ། ཤར་དུ་ཐོད་པའི་བདུད་རྩི། ལྷོར་ཕྱག་མཚན་དྲུག་གི་ཙཀ་ལི། ནུབ་ཏུ་དཔལ་གཏོར་རྒྱན་ལྡན། བྱང་དུ་གཙོ་བོའི་སྐུ་ཙཀ་བཅས་བཀོད། ༈ གཏེར་ཁ་གཉིས་འདུས་དྲག་པོ་མེའི་འཁོར་ལོ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་བཀོད་པའི་སྟེང་དུ་རྣམ་བུམ། མདུན་དུ་དྲག་པོའི་སྐུ་ཙཀ །གཡས་གཡོན་དུ་ཐོད་པའི་བདུད་རྩི་དང་མེ་ལོང་གསལ་བ། དེ་རྒྱབ་ཤར་དུ་རྡོ་རྗེ། ལྷོར་ཐོད་ཆང་། ནུབ་ཏུ་དྲིལ་བུ། བྱང་དུ་ཕུར་པ་དར་གྱི་ཅོད་པན་ཅན་རྣམས་བཞག་གོ ༈ །ཆོས་གླིང་གྲོ་ལོད་ལ། རས་བྲིས་སམ་ཚོམ་བུ་ལྷ་གྲངས་དབུས་ཁྲིའུ་ལ་བུམ་པ་བཅུད་ལྡན་མགུལ་ཆིངས་དམར་པོ་ཁ་རྒྱན་གསེབ་ཏུ་ཐོད་ཕྲེང་རྩལ་གྱི་སྐུ་རྟེན་བཀོད་པ། རྒྱབ་ཏུ་སིནྡྷུ་རའི་མཎྜལ་ཆོས་འབྱུང་བསྣོལ་མ་ཟུར་དྲུག་དགའ་འཁྱིལ་བྲིས་པའི་ཁར་མཉྫི་ལ་གསང་ཐོད་དར་དམར་གྱིས་བཀབ་པ་དང་རིག་ཙཀ །མདུན་དུ་དཔལ་གཏོར་རྒྱན་ལྡན་དྲག་པོའི་སྐུ་འབག་དར་འཕན་གྱིས་བརྒྱན་པ། ཧཱུྃ་ཁ་དོག་ལྔ་སོ་སོ། རྡོ་རྗེ་ཕུར་པ་ལྕགས་སྡིག་ཁྱུང་དང་། དུར་ཁྲོད་ཆས་བརྒྱད་ཙཀ་ལི་ཕྱོགས་བསྡུས་བཅས་བཀོད། སྡེ་བརྒྱད་སྲོག་དབང་བྱེད་ན་དེའི་ཆས་རྣམས་ཀྱང་འདུ་བྱ། ༈ བདེ་གླིང་གྲོ་ལོད་གཤོམ་གོང་གི་འཇའ་ཚོན་ལུགས་དང་འདྲ། ༈ རོལ་རྡོར་ཁྲོ་རོལ་ཕུར་བུའི་སྒེར་དབང་ལ་ལྔ་ཚོམ་སྟེང་དཔལ་གཏོར་ཟུར་གསུམ་སྐུ་ཙཀ་དར་གདུགས་ཅན། གཡས་སུ་རྣམ་བུམ། གཡོན་དུ་རྡོ་རྗེ་རྩེ་དགུ་ཐོད་ཁྲག །མདུན་དུ་སྣ་ཚོགས་རྡོ་རྗེ་དང་། ཐོ་བ་མེ་ཕུང་ལྕགས་སྡིག་ཕུར་པ་བཞིའི་ཙཀ་ལི་ཕྱོགས་བསྡུས་བགྲང་ཕྲེང་བཅས། ༈ གུ་རུ་དྲག་ཁྲོས་ལ། རས་བྲིས་སམ། ཚོམ་བུ་གཙོ་འཁོར་དགུའི་སྟེང་བུམ་པ་རྫས་རྒོད་ཆུ་དང་སྦྱར་བས་བཀང་པ་རྒྱན་ལྡན་བཞག །གཡས་སུ་རཀྴའི་ཕྲེང་བ། གཡོན་དུ་གནམ་ལྕགས་རྡོ་རྗེ། མདུན་དུ་ལྷ་ཙཀ་ཚང་བ། རྒྱབ་ཏུ་དཔལ་གཏོར། གཞན་ཡང་ཐོད་རྒྱན། སྦྲུལ་ཆུན། ཐོད་ཕྲེང་། རུས་རྒྱན། གླང་ཞིང་སྟག་གསུམ། རྡོ་རྗེ། ཐོད་ཁྲག །ཁ་ཊྭཱཾ། ལྕགས་སྡིག་རྣམས་དང་། ཆོས་སྐྱོང་དམར་གཏོར་གཙོ་འཁོར་དགུ་ལ་མ་ནིང་སྐུ་ཙཀ་དར་གདུགས་ཅན། དཀར་གཏོར་སྨན་ལེབ་བུ་ཁུར་དམར་གཏོར་ཟུར་གསུམ་ཕྱོགས་གཅིག་བཤམས་པ་བཅས། ༈ རྩ་གསུམ་པདྨ་ཁྲག་འཐུང་ལ། མཎྜལ་ཚོམ་བུ་གཅིག་པར་ཐོད་སྣོད་དམ་ཟངས་ལྕགས་སྣོད་དུ་དཔལ་གཏོར་མེ་རི་སྐུ་ཙཀ་དར་གདུགས་ཀྱིས་བརྒྱན་པ་བཀོད། ༈ གཏེར་གསར་བླ་མ་བཀའ་བརྒྱད་ལ། དཀྱིལ་འཁོར་སྟེང་བུམ་པ་དགུ་སྐུ་རྟེན་དང་བཅས་པ། བྱང་ཤར་དུ་བཀའ་སྡོད་བུམ་པ། རིག་དབང་བཞིའི་ཆས། སྔགས་བྱང་། ཐོད་རྒྱན་གཉིས། སྦྲུལ་ཆུན། རུས་པ་རིན་ཆེན་རྒྱན། གཤོག་པ། གླང་ཞིང་སྟག་ལྤགས། གོས་བེར། གོ་ཁྲབ། ཐལ་རཀ་ཞག་གསུམ། མེ་ཕུང་། ཁྲི་རྐང་རྣམས་སོ་སོ་དང་། གླེགས་བམ་དུང་ཕྱག་མཚན་འཁོར་ལོ་གདུགས་རྒྱལ་མཚན་སོགས། སྨན་རག་གཏོར་གསུམ། རྭ་སྲུང་། ཟློག་གཏོར་འཁོར་ལོ་བཅས། བྲུབ་ཁུང་ལིང་ག །ཕུར་པ་རལ་གྲི་ཧོམ་གཟར། མེ་ཧོམ་གྲུ་གསུམ། ཀོང་ཟོར་དམར་གཏོར་སོགས་ཟོར་ཆས། བཀྲ་ཤིས་ཞལ་ཟས་བཟའ་བཏུང་རྣམས་དང་། གསང་ཐོད། རིག་ཙཀ །ཤེལ་རྡོ། ཚེ་འབྲང་ཚེ་རིལ་བཅས་བཀོད། ༈ ཐུགས་སྒྲུབ་བར་ཆད་ཀུན་སེལ་གྱི་གྲོ་ལོད་ལ། མཎྜལ་ཚོམ་བུ་དམར་པོའི་སྟེང་དཔལ་གཏོར་སྐུ་ཙཀ་དར་གདུགས་དམར་པོས་བརྒྱན་པ། སྐུ་ཙཀ་སྔགས་བྱང་ཕྱག་མཚན་རྡོ་རྗེ་ལྕགས་ཕུར་བཅས། ༈ ཆོས་རྡོར་དྲག་མཐིང་ལ། རས་བྲིས་སམ་ཚོམ་བུ་ལྷ་གྲངས་རྣམ་བུམ། རིག་དབང་ཆས་བཞི། ལྷ་ཙཀ་ཚང་མ། དུར་ཁྲོད་ཆས། གཡས་གཡོན་དུ་དབང་གཏོར་དང་། ཁྲོ་བཅུའི་དམར་གཏོར། རྒྱབ་ཏུ་ཐོད་ཆང་མེ་ལོང་ལི་ཁྲིའི་ཐིག་ལེ་ཅན་ཤེལ་རྡོ་རྣམས་བརྩེགས་པ། མདུན་དུ་སྒྲུབ་ཡིག་སྔགས་བྱང་རཀྴའི་ཕྲེང་བ། རྡོ་རྗེ་ཕུར་སྡིག །བསྒྲལ་དབང་ཆས་ཧོམ་ཁུང་ཟན་ལིང་དང་ཤོག་ལིང་། གདབ་ཕུར་རལ་གྲི །མེ་ཧོམ་ཆུང་ངུའང་འདུ་བྱ། ༈ གཏོར་དབང་ལ། ཚོམ་བུ་ལྔ་སྟེང་དཔལ་གཏོར་དང་། གཡས་གཡོན་སྨན་རཀ་བཅས་བཀོད། ༈ །གྲོ་ལོད་གདུགས་པ་ཀུན་འདུལ་ལ། མཎྜལ་དཀྱིལ་འཁོར་དབུས་སུ་ཞུན་ཆེན་གྱི་མར་མེ། གཡས་གཡོན་དུ་རྣམ་བུམ་དང་དཔལ་གཏོར་སྐུ་རྟེན་དར་གདུགས་ཅན། མདུན་དུ་ཞི་དྲག་གི་སྐུ་ཙཀ །དུར་ཁྲོད་ཆས་བརྒྱད། རྡོ་རྗེ་རྩེ་དགུ་ཕུར་པ་ལྕགས་སྡིག་བཅས་པའི་ཙཀ་ལི་བཀོད་དོ།། ༈ །།དེ་ནས་སྒྲུབ་ཆེན་བཀའ་བརྒྱད་སྤྱིའི་སྐོར་ལས། ཉང་ལུགས་པདྨ་ཤེལ་ཕུག་མ་ལ། རས་བྲིས་སམ་ཚོམ་བུ་གཙོ་འཁོར་དགུ །དེ་སྟེང་མཉྫི་ལ་རྣམ་བུམ་མགུལ་ཆིངས་སྨུག་ནག་གམ་མཐིང་ནག་གཟུངས་རྡོར་སོ་ལྔའི་བཅུད་ལྡན་ཁ་རྒྱན་ལ་ཞི་ཁྲོའི་གཙོ་སྐུ་རྣམས་བཀོད། མདུན་དུ་ལྷ་ཙཀ་རྣམས། ཤར་དུ་དཔལ་གཏོར་དང་སྨན་རཀ །ལྷོར་དབུ་རྒྱན། ནུབ་ཏུ་རྡོར་དྲིལ། བྱང་དུ་གསང་དབང་ཐོད་ཆང་མེ་ལོང་གིས་བཀབ་པའི་ཁར་ཤེལ་རྡོ་བཞག་པ་དང་རིག་ཙཀ །རྡོ་རྗེ་རྩེ་དགུ། ཐོད་ཁྲག །ཐལ་རཀ་ཞག་གསུམ། གླང་ཞིང་སྟག་ཤམ། ཐོད་སྦྲུལ་རྣམས་སོ་སོ། ལས་བཞིའི་གཟུགས་སམ་གཏོར་མ། བྲུབ་ཁུང་ཉའོ། ལས་ཕུར་བཅས་བཀོད། འོག་གི་བཀའ་བརྒྱད་རིགས་ལ་སྤྱི་ཁོག་འདིས་འགྲེ་དགོས་པ་ཤེས་པར་བྱའོ། ༈ ࿋ རྣལ་འབྱོར་རྒྱུན་དབང་ལ། སྟེགས་བུར་དཀྱིལ་འཁོར་བཀྲམ་པའི་ཁར་བུམ་པ་ཆས་ལྡན་སོ་ལྔའི་རྫས་སྦྱར་གྱིས་བཀང་པ། མདུན་དུ་འཇམ་དཔལ། སྤྱན་གཟིགས། རྡོར་སེམས། རྡོར་འཆང་བཅས་ཞི་བ་རིགས་བཞི་ཙཀླི་གཅིག་ལ་བྲིས་པ། དཔལ་དགུ། ཁྱུང་དཀར་ནག་བཅས་སོ་སོ་དང་། ཤར་དུ་དཔལ་གཏོར་སྨན་རཀ །ལྷོར་དབུ་རྒྱན་རིགས་ལྔ། ནུབ་ཏུ་རྡོ་རྗེ་དང་དྲིལ་བུ། བྱང་དུ་ཐོད་པར་བུར་ཆང་བདུད་རྩི་སྦྱར་བ་མེ་ལོང་གིས་བཀབ་པའི་ཁར་མན་ཤེལ་བཞག །རིག་ཙཀ་གང་བདེར། གཞན་ཡང་དུར་ཁྲོད་ཆས། བྲུབ་ཁུང་། ལིངྒ་། ཕུར་བུ་བཅས། ࿋ ༈ ࿋ བདེ་འདུས་ཞི་བའི་བཅས་བཤམ། དཀྱིལ་འཁོར་གཞུང་མཐུན་བཀྲམ་པའམ་ཚོམ་བུ་ལྷ་གྲངས་བཀོད། སྟ་གོན་ཆས། རྣམ་བུམ་དང་ལས་བུམ། ཀུ་ཤ །སོ་ཤིང་། དཔུང་སྐུད་བཅས་དང་། དངོས་གཞིའི་སྐབས། དབང་རྫས། རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་སོ་སོ་བ། མེ་ལོང་། རྐང་འོག་འཁོར་ལོ། དུང་། རྒྱ་གྲམ། དབུ་རྒྱན། མེ་ཏོག་ཕྲེང་བ། དར་གྱི་ཅོད་པན། རིགས་ལྔའི་ཕྱག་རྒྱ། སྣ་ཚོགས་རྡོ་རྗེ། གསེར་འཁོར། རྡོ་རྗེ། དྲིལ་བུ་བཅས། ࿋ ༈ གསང་རྫོགས་མགྱོགས་དབང་ལ། དཀྱིལ་འཁོར་སྟེང་རྣམ་བུམ་སོགས་སྔར་དང་འདྲ་བ་ལས་དབུ་རྒྱན་ཟུར་པའམ་དེའི་ཙཀ་ལི། སྨན་རཀ་གཏོར་གསུམ་སྣོད་གཅིག་ཏུ་བཞག་པ། དུར་ཁྲོད་ཆས་ཕྱོགས་འདུས་ཀྱི་ཙཀ་ལི་དང་། སྔགས་བྱང་། ཕྲེང་བ། ཚོགས་རྫས་བཟའ་བཏུང་། ཐིག་ལེ་བྱེད་པའི་བདུད་རྩིའི་ཐོད་པའང་འདུ་བྱ། ༈ བྱང་གཏེར་རང་ཤར་ལ། སྟ་གོན་རྫས་བཞི་མཆོད་པ་བཅས། རས་བྲིས་སྟེང་ལྡིང་ཁྲི་རིམ་པ་གཉིས་པའི་སྟེང་གཙོ་བུམ་ཁར་ལྷ་ཙཀ་རྣམས། འོག་མར་ཐོད་སྐུ། གསང་ཐོད་མེ་ལོང་སིནྡྷུ་རའི་ཐིག་ལེ་ཅན་དར་གྱིས་བཀབ་པའི་སྟེང་ཤེལ་རྡོ། དབུ་རྒྱན། རྡོར་དྲིལ་རིག་ཙཀ །དབུས་སུ་ལྕགས་ཕུར་ཅོད་པན་ཅན། ལོགས་གང་བདེར་སྣོད་གཅིག་ཏུ། རྒྱུད་ཀྱི་གླེགས་བམ་རིན་ཆེན་ཕྲེང་བ། དུང་དང་ཕྱག་ཤིང་། རྒྱ་གྲམ། གདུགས། རྒྱལ་མཚན་རྡོར་དྲིལ་རྣམས་དང་། རིགས་ལྔའི་ཕྱག་མཚན། ཞི་བའི་ཆས། ཕྱག་མཚན་རྣམས་གཡས་གཡོན་ཚོ་གཉིས་སུ་བྱས་པ། ཁ་ཊྭཱཾ་བནྡྷ། ཐོད་ཕྲེང་དང་གོས་གསུམ་ལ་གཅིག །ཁྲག་ཐལ་ཞག་གསུམ་ལ་གཅིག །གོ་ཁྲབ་མེ་ཕུང་རུས་རྒྱན་གཅིག །གཟིག་ཤམ། གཙུག་ཏོར། རུས་རྒྱན། ཐོད་ཕྲེང་། ཨ་དཀར། མར་མེ། བྲུབ་ཁུང་ཉའོ། ཞི་དྲག་སྦྱོང་ཆས་ཏིལ་ནག་སོགས་འདུ་བྱ། ༈ ཨོ་རྒྱན་གླིང་པའི་བཀའ་འདུས་དོན་དབང་ལ། རས་བྲིས་སྟེང་དབུས་འབྲུ་ལྔ། ཤར་སྨན་ལྔ། ལྷོར་རིན་ཆེན་ལྔ། ནུབ་དྲི་ལྔ། བྱང་སྙིང་པོ་ལྔ་རྣམས་ཀྱི་བུམ་པ་སྣོད་གཅིག་ཏུ་བཞག་པ། མདུན་དུ་ཞི་བ་རྡོར་འཆང་དང་། གཙོ་བོ་ཉེར་གཅིག་གི་ཙཀ་ལི། བགྲང་ཕྲེང། གཡས་སུ་ཤ་ལྔ་བདུད་རྩི་ལྔ་སོ་སོར་སྦྱར་བའི་ཐོད་པ་ལྔ་སྣོད་གཅིག་ཏུ་བཞག་པ། གཡོན་དུ་རིག་མའི་གཟུགས་དཀར་སེར་དམར་ལྗང་མཐིང་ལྔ། འཇའ་ཤེལ། རྒྱབ་ཕྱོགས་སུ་དཔལ་གཏོར་རྒྱན་ལྡན་བཞག །བསྡུ་ན་བུམ་ཐོད་རིག་ཙཀ་རྣམས་གཅིག་ལ་བསྡུ་ཞིང་ལྷ་དབང་མ་སྦྱར་ཡང་ཆོག ༈ །བཀའ་བརྒྱད་ཐུགས་ཀྱི་མེ་ལོང་གི་མགྱོགས་དབང་། དཀྱིལ་འཁོར་བུམ་པ་དབུ་རྒྱན་རྡོར་དྲིལ་གསང་ཐོད་མེ་ལོང་ཤེལ་རྡོ་རིག་ཙཀ །སྨན་རཀ་གཏོར་གསུམ། དུར་ཁྲོད་ཆས་ཕྱོགས་བསྡུས། ཞི་བ་རིགས་བཞི། དཔལ་དགུ་ཁྱུང་ཙཀ །གདབ་ཕུར་ལིང་ག་རྣམས་ཏེ་གསང་རྫོགས་དང་ཕྱོགས་འདྲའོ། ༈ །བཀའ་བརྒྱད་དངོས་གྲུབ་སྙིང་པོ་དེ་དང་འདྲ་བ་ལས་རིགས་བཞིའི་ཙཀ་ལི་མི་དགོས། ༈ ཀློང་གསལ་བཀའ་བརྒྱད་བདེ་གཤེགས་ཡོངས་འདུས་ཀྱི་ཁྲུས་དབང་ལ། ཁྲུས་བུམ། རྡོར་སེམས་དབང་ལ་རྣམ་བུམ་ཐོད་ཆང་མེ་ལོང་ཤེལ་རྡོ་བརྩེགས་པ། དོན་དབང་ལ། རས་བྲིས་སམ་དགུ་ཚོམ་སྟེང་ཁྲིའུ་ལ་རྣམ་བུམ། རིག་དབང་བཞིའི་ཆས། བནྡྷའི་བདུད་རྩིའི་ནང་བུམ་པ་སོ་ལྔའི་རྫས་ལྡན། དཔལ་དགུ་ཁྱུང་བཅས་ཀྱི་ཙཀ་ལི། དཔལ་ཆས་ཕྱོགས་བསྡུས། གསང་ཐོད། སིནྡྷུ་རའི་མེ་ལོང་ལ་ཧཱུྃ་དགུ་བྲིས་པ། རྡོ་རྗེའི་ལྟེ་བ་ཧཱུྃ་གིས་མཚན་པ་དགུ་བསྒྲིགས། དགང་གཟར་བླུགས་དང་མེ་ཕུང་། ཕུར་པ། ཤེལ་རྡོ། རྨ་བྱའི་མདོངས། རྗེས་གནང་ཆས་བུམ་པ། རྒྱལ་མཚན། གཎྜི། དུང་དཀར། ཕྱག་ཤིང་། རྡོར་དྲིལ། སྒྲུབ་ཡིག །དགང་གཟར་བླུགས་ཕུར་པ་རྣམས་དང་། ཧོམ་ཁུང་ཉའོ། གདབ་ཕུར། སྣ་བདུན། རྫས་བརྒྱད་ཕྱོགས་བསྡུས་བཅས། ༈ གནམ་ཆོས་དགོངས་གཏེར་བཀའ་བརྒྱད་ལུས་དཀྱིལ་དབང་ལ། མཎྜལ་ཚོམ་བུ་དགུ་པའི་ཁར་དཔལ་གཏོར་གཙོ་འཁོར་དགུ་པའམ་ལྷ་བརྒྱ་གཏོར་གཅིག །གཡས་སུ་རྣམ་བུམ། རྒྱབ་ཏུ་ཐོད་ཆང་། གཡོན་དུ་ཕུར་པ་སྟེགས་བཅས། མདུན་དུ་ཐོད་རྒྱན། གླང་ཀོ་སྦྲུལ་ཆུན། ཞིང་ལྤགས་སྟག་ཤམ། ཁྲག །ཞག །ཐལ། གོ་ཁྲབ། མེ་དཔུང་རུས་རྒྱན་དང་གཟིག་ཤམ་རྣམས་ཀྱི་ཙཀ་ལི་སོ་སོ་བ་བཀོད། ༈ བདེ་གླིང་བཀའ་འདུས་འཇའ་ཚོན་དངོས་གྲུབ་སྙིང་པོ་དང་འདྲ། ༈ གྲུབ་ཐོབ་བཀའ་བརྒྱད་ཀྱི་དབང་ལ། སྟ་གོན་རྫས་བཞི། དཀྱིལ་འཁོར་རས་བྲིས་དབུས་མཉྫིའི་ཁར་རྣམ་བུམ་སོ་ལྔའི་བཅུད་ལྡན་མགུལ་ཆིངས་མཐིང་ག་ཁ་རྒྱན་ལྡན་པ། རྡོར་སེམས་དཔལ་དགུ་བྱ་ཁྱུང་དཔལ་མགོན་མ་ནིང་བཅས་ཀྱི་ཙཀ་ལི་བཅུ་གཉིས་ཁ་རྒྱན་གསེབ་ཏུ་བཀོད་པ་ཡིན་ཀྱང་མི་བདེ་ན་མདུན་དུ་བཞག །དབུ་རྒྱན། རྡོ་རྗེ། དྲིལ་བུ། མིང་དབང་རྡོར་དྲིལ། སྔགས་བྱང་། གནམ་ལྕགས་རྡོ་རྗེ་རྣམས་དང་། གཡས་ཕྱོགས་སུ་སྨན་གྱི་ཕོ་བྲང་གཡོན་ཕྱོགས་སུ་སྒྲུབ་ཕུར་མདུན་ངོས་སུ་ཐོད་པའི་ནང་ཟན་ཀོང་སྡོང་བུ་དགུ་བཙུགས་པའི་མར་མེ། དེའི་གཡས་སུ་ཁྲུས་ཀྱི་བུམ་པ་ཉེར་ལྔའི་བཅུད་ལྡན་ཆིངས་དཀར་ཁ་རྒྱན་དང་བཅས་པ། གཡོན་དུ་བམ་ཕྱག་ལེན་ལྟར་བཅས་པ། གང་བདེར་ནུས་དབང་ཆས་པུསྟི། ཕྲེང་བ། དུང་དཀར། ཕྱག་ཤིང་། ཁྲི་གདུགས་སོགས་ཀྱི་ཙཀ་ལི་སོ་སོ་བ། བཟའ་བཏུང་འགྱེད་བདེ། རྒྱབ་མདུན་གང་བདེར་ཟངས་ལྕགས་སྣོད་དུ་དམར་གཏོར་གཉིས་ལ་འཁོར་གཏོར་ཆུང་ངམ་ཐེབ་ཀྱུ་སུམ་ཅུ་དང་བཅོ་བརྒྱད་ཀྱིས་བསྐོར་བ་ལ་འཛོམ་ན་དྲེགས་པའི་སྡེ་དཔོན་དང་དྲེགས་པ་བཅོ་བརྒྱད་ཀྱི་གཙོ་བོའི་ཙཀ་ལི་ཙམ་བཙུགས་པ་ལ་དར་གདུགས་དང་ཤ་ཁྲག་གིས་བརྒྱན་པ་དང་། སྲུང་བའི་འཁོར་ལོ་ལས་ཕུར་ཐུན་རྫས་རི་རབ་མེ་ཧོམ་ཟོར་གཏོར་རྣམས་ཕྱོགས་བསྡུས། ཚེ་འབྲང། ཚེ་རིལ་ཆང་། གསང་ཐོད་བདུད་རྩི་རིག་ཙཀ །ཤེལ་རྡོ་རྣམས་བཀོད་ལེགས་སུ་བཀྲམ། ལྕགས་ཧོམ། ལིང་ག །རལ་གྲི་སོགས་ཉེར་མཁོ་རྣམས་ཚོགས་པར་བྱ། ༈ གཏེར་གསར་བཀའ་འདུས་རྩ་སྒྲུབ་ལ། རས་བྲིས་སམ་དགུ་ཚོམ་སྟེང་། འོག་ཏུ་གསང་ཐོད། སྟེང་དུ་རྣམ་བུམ་བརྩེགས་མར་བཞག་པའི་མདུན་དབུས་སྨན་གྱི་ཕོ་བྲང་། ཤར་དུ་མར་མེ། ལྷོར་བམ་ཆེན། ནུབ་ཏུ་རྟ་ཞལ། བྱང་དུ་ཕུར་པ། ཤར་ལྷོར་མདོས་རཀ །ལྷོ་ནུབ་ཏུ་བླ་གཏོར་རྒྱན་ལྡན། ནུབ་བྱང་དུ་དམར་གཏོར་གྲུ་གསུམ། བྱང་ཤར་དུ་ཀོང་ཟོར་ཟུར་གསུམ་ཚེ་ཡུངས་ཀྱིས་བརྒྱན་པ་རྣམས་བཀའ་བརྒྱད་སྤྱིའི་རྟེན་དང་ཕྱོགས་མཚུངས་སུ་བཀོད། མདུན་རྒྱབ་གང་བདེར་ཚེ་འབྲང་ཡང་བཞག་གོ ༈ །བཀའ་བརྒྱད་བདེ་གཤེགས་ཀུན་འདུས་བསྐྱེད་རྫོགས་འབྲིང་པོའི་དབང་ལ། རས་བྲིས་སམ་དགུ་ཚོམ་སྟེང་རྣམ་བུམ་སོགས་རིག་པའི་དབང་ལྔའི་ཆས། ཐིག་ལེ་རྒྱབ་སྤྱད་ཆོས་སྨན་བྱང་སེམས་དཀར་དམར་དང་སྦྱར་བའི་བདུད་རྩི། རྒྱབ་ཏུ་གསང་ཐོད། ཤ་ལྔ་བདུད་རྩི་ལྔ་ཡོད་པའི་ཐོད་པ་གཉིས་སམ་ཙཀ་ལི་གཉིས། གཡོན་དུ་པདྨ་དམར་པོའི་ཟེའུ་འབྲུ་ལ་རྡོ་རྗེ་དཀར་པོ་ཕྱེད་ནུབ་བྲིས་པའི་ཙཀ་ལི་དང་། དཔལ་ཆས་བཅུ། དུར་ཁྲོད་ཆས་བརྒྱད་ཕྱོགས་བསྡུས་ཙཀ་ལི་གཉིས། གཡས་སུ་མེ་ལོང་ཤེལ་རྡོ་རྨ་བྱའི་མདོངས། འཇའ་ཚོན་ཐིག་ཕྲན་ཡོད་པ། མེ་ཏོག་ཕྲེང་བ་འཇའ་འོད་གྱེན་འགྲེང་རྩིབས་ཤར་ཐིག་ལེ་ཕྱག་མཚན་ཡིག་འབྲུ་ལྔ་སོགས་ཡོད་པ། འཇའ་ཚོན་གྱིས་བསྐོར་བའི་ཐིག་ལེ་དགུ་ལ་དཔལ་ཆེན་དགུ་མཚོན་བྱེད་ཡོད་པ། ཀུན་བཟང་རྒྱན་མེད་གཅེར་བུ་བཅས་ཙཀ་ལི་བཞི། མདུན་དུ་ཚེ་འབྲང་རིལ་ཆང་བཅས། ༈ ཡི་དམ་བཀའ་འདུས་སྙིང་པོ། རས་བྲིས་སམ་ཚོམ་བུ་ཇི་ལྟར་འོས་པའི་སྟེང་རྣམ་བུམ་དབུ་རྒྱན་རྡོར་དྲིལ། གསང་ཐོད་རིག་ཙཀ །ཚེ་འབྲང་ཚོགས་རྫས་སོགས་ལྷན་ཅིག་བཞག་པ། ༈ །།དེ་ནས་བཀའ་བརྒྱད་བྱེ་བྲག་གི་སྐོར་ལས། འཇམ་དཔལ་ཞི་སྒྲུབ་ཀྱི་ཐོག་མར་འཇམ་དཔལ་རྫོགས་ཆེན་ལ། འཇའ་ཚོན་ཐིག་ལེ་ལྔ་སྦྲགས་ཀྱི་དཀྱིལ་འཁོར་སྟེང་ཁྲིའུར་དཔལ་གཏོར་ཟུར་བཞི་ལོགས་བརྒྱད་དམར་པོ་ལ་ཨ་དཀར་ལྔས་མཚན་ཅིང་པདྨས་བསྐོར་བ་རྒྱན་སྤྲོས་ཅན་རིགས་ལྔ་གཅིག་འདུས་ཀྱི་ཙཀ་ལི་གཟུག །ཤར་དུ་བུམ་པ་གཉིས། ཕྱོགས་གསུམ་ལ་རེ་རེ་བཅས་ཕྱོགས་མདོག་ཚན་ལྔ། དབུ་རྒྱན། རྡོར་དྲིལ། མན་ཤེལ། རིགས་ལྔའི་ཙཀ་ལི་སོ་སོ་བ་རྣམས་ཕྱོགས་སྤྱི་ལྟར་བཀོད། ཨ་ཡིག་དཀར་པོ་བཅས་སོ། ༈ །འཇམ་དཀར་མུན་སེལ་སྒྲོན་མེ་ལ། རས་བྲིས་སམ་ཚོམ་བུ་ལྔ་པའི་དབུས་སུ་ཁྲིའུ་ལ་འཇམ་དཔལ་ཡེ་ཤེས་སེམས་དཔའི་སྐུ་དང་མཚན་བརྗོད་ཀྱི་གླེགས་བམ། ཤར་དུ་རྣམ་བུམ་མགུལ་ཆིངས་དཀར་པོ་ཅན་མཐའ་བསྐོར་དུ། དབུ་རྒྱན་རྡོ་རྗེ་དྲིལ་བུ་འཁོར་ལོ་དང་། ནཱ་མ་ཞེས་བྲིས་པ། ཤེལ་ཕྲེང་། གདུགས། རལ་གྲི་མདའ་གཞུ། དུང་འཁོར་ལོ། སྒྲུབ་དཔེ་རྣམས་བཀོད། ༈ དམར་པོ་ལོངས་སྤྱོད་ཚེ་འཕེལ་ལ། རས་བྲིས་སམ་འབྲུ་ཚོམ་དགུ་པའི་ཁར་ཁྲིའུ་ལ། ཆང་། མར། སྦྲང་། བུ་རམ། སྤྲི་སྟེ་བཅུད་ལྔ་བསྲེས་པའི་ཟན་ལ་ཚེ་གཏོར་རིན་ཆེན་འབར་བའི་དབྱིབས་ཅན་རྒྱན་ལྡན་ཟས་སྣས་བསྐོར་བ་དར་གདུགས་བཅས་བཤམ། ཤར་དུ་གསེར་གྱི་རྡོ་རྗེ། ལྷོར་མདའ་དར་དམར་པོ། ནུབ་ཏུ་བུམ་པ་བཅུད་ལྔ་དང་བཟང་དྲུག་སྦྱར་བའི་ཆུས་བཀང་པ། བྱང་དུ་ཐོད་ཆང་བཅས། ༈ བདུད་འདུལ་ལུགས་ཀྱི་འཇམ་དབྱངས་དཀར་པོ་ལ། ཚོམ་བུ་ལྔའི་ཁར་རྣམ་བུམ་དཀར་པོ། རིག་དབང་ཆས། རིགས་ལྔའི་ཕྱག་མཚན་སོ་སོ་བ། གཡས་སུ་དཔལ་གཏོར། མདུན་དུ་སྐུ །གཡོན་དུ་སྒྲུབ་ཡིག་ཕྲེང་བ། ཕྱག་མཚན་པུསྟི་བཅས། ༈ ནང་སྒྲུབ་དམར་སེར་ལ། དེ་དང་འདྲ་བ་ལས་བུམ་པའི་མགུལ་ཆིངས་དམར་སེར། སྐུ་དང་ཕྱག་མཚན་རལ་པོད། ༈ གསང་སྒྲུབ་ཕྱག་བཞི་པ་ལྷ་དགུ་ལ། རས་བྲིས་སྟེང་ཁྲིའུར་གསང་སྒྲུབ་སྐུ་རྟེན་ཤར་དུ་རྣམ་བུམ་སོགས་རིག་དབང་ཆས་ཀྱིས་བསྐོར་བ། གཡས་སུ་དཔལ་གཏོར། གཡོན་དུ་སྒྲུབ་ཡིག་ཕྲེང་བ། ཕྱག་མཚན་རལ་པོད་མདའ་གཞུ། གཞན་ཡང་མཚན་བརྗོད་གླེགས་བམ། གདུགས། དུང་དཀར། འཁོར་ལོ་བཅས་བཀོད། ༈ ཡང་གསང་ཡབ་ཡུམ་ཞལ་སྦྱོར་ལ། ཚོམ་བུ་གཅིག་གི་སྟེང་སྐུ་རྟེན་བརྗེ་བ་ལས་གཞན་གསང་སྒྲུབ་དང་འདྲ། ཕྱག་མཚན་གཞུང་གསལ་འཛོམ་ན་ལེགས། རྗེས་གནང་ཆས་བསྡུ་ན་མི་དགོས། ༈ ཟབ་གསང་ཟུང་འཇུག་སྒྲུབ་པ་ལ་བཤད་མ་ཐག་པ་ལྟར་ལ། སྐུ་རྟེན་དང་ཕྱག་མཚན་རལ་པོད་ཁོ་ནའོ། ༈ །དབྱངས་ཅན་དམར་མོ་ལ། ཕྱི་སྒྲུབ་དང་འདྲ་བ་ལས་བུམ་པ་དམར། སྐུ་རྟེན་དང་ཕྱག་མཚན། ཨུཏྤལ་ནོར་བུ་མེ་ལོང་ངོ་། ༈ །འཇམ་དཔལ་ཁྲོ་བོའི་སྐོར་ལས། ཚེ་བདག་པད་གནུབས་ཟུང་འབྲེལ་ལ། སྟ་གོན་རྫས་བཞི། དཀྱིལ་འཁོར་ཚད་ལྡན་དབུས་སུ་ཐོད་སྣོད་ལ་ཕྱེ་མར་བུ་རམ་ཤ་ཆེན་བསྲེས་པའི་བམ་ཆེན། དེ་སྟེང་ལྡིང་ཁྲི་ལ་རྣམ་རྒྱལ་བུམ་པའི་མདུན་དུ་སྒྲུབ་གཏོར་ལྕགས་མཁར་ཟུར་དྲུག་མ། ནུབ་ཏུ་ཚེ་བུམ་ཁྱད་པར་བ། ལྷོར་བཀྲ་ཤིས་ཀྱི་བུམ་པ་ཞེས་ཀ་པཱ་ལ་ཆང་འོ་མ་མངར་གསུམ་ཆོས་སྨན་སྦྱར་བས་བཀང་པ། མདུན་དུ་སྨན་རཀ །བུམ་པའི་མཐར་ལྷ་ཙཀ་ཚང་མ། གཞན་ཡང་འཁོར་ལོ་རྡོ་རྗེ་རལ་གྲི་གསུམ། བེ་ཅོན་གཏུན་ཤིང་སྡིགས་མཛུབ་སྟེ་ཕྱག་མཚན་དྲུག་གི་ཙཀ་ལི་གཉིས། དུར་ཁྲོད་ཆས་སོགས་གཅིག་བསྡུས། རཀྴའི་ཕྲེང་བ། རིག་ཙཀ །ཤེལ་རྡོ་མེ་ལོང་གཙོ་སྐུ་འགྱིང་ལོག་ཏུ་བྲིས་པ། དྲིལ་བུ། རལ་གྲི །ལྕགས་སྣོད་ལྟ་བུར་དུག་སྣ་ཁྲག་ཡུངས་ཀར་མདའ་གྲི་གུ་གུལ་ཕུར་པ་རྣམས་བཞག་པ། མཆོད་རྟེན་མཚན་ཉིད་ལྡན་པ། ཟོར་ཀོང་ཟོར་རྫས་ཅན། མདའ་གཞུ། འུར་རྡོ། རྭ་ཟོར། སློབ་དཔོན་དབང་རྫས་རྡོར་དྲིལ་གླེགས་བམ་དུང་གཎྜི་གདུགས་རྒྱལ་མཚན་རྣམས་དང་། སྤྲོ་ན་སྔགས་ཆས་ཞྭ་ཕོད་སོགས་འདུ་བྱ། འདིའི་བཅའ་གཞི་ཞིབ་པར་དབང་བསྒྲིགས་སུ་གསལ་བ་དང་མཐོང་བརྒྱུད་ལས་རྟོགས་དགོས་སོ། ༈ །རྣོན་པོ་ནང་གཅོད་ལ་མཎྜལ། ཚོམ་བུ་གསུམ་པའི་ཁར་གཏོར་མ་བྲ་གཟུགས་ཁྲོམ་རིས་ཅན་འཁོར་བཞི་པ་སྐུ་ཙཀ་དར་གདུགས་ཅན་བཀོད། རཀྴའི་ཕྲེང་བ་བཞག ༈ །དྲེགས་འཇོམས་ལ། རས་བྲིས་སྟེགས་ཁར་རྣམ་བུམ་སྐུ་ཙཀ་གཟུངས་རྡོར་བཅས། གཡས་སུ་སྒྲུབ་གཏོར་ལྕགས་གསར་མ་དར་གུར་ཅན། གཡོན་དུ་གསང་ཐོད་མེ་ལོང་ཐུགས་ཐིག་དང་འདྲ། མདུན་དབུས་ལྷ་ཙཀ་རྣམས། གཞན་ཡང་སྔགས་བྱང་། ཕྲེང་བ། ཤེལ་རྡོ། རལ་གྲི་འཁོར་ལོ་གྲི་གུག་ཐོད་ཁྲག་བེ་ཅོན་སྡིགས་མཛུབ་རྣམས་ཙཀ་ལི་སོ་སོ། གདབ་ཕུར་རལ་གྲི་ཧོམ་དང་ཉའོ་རྣམས་བཀོད། ༈ སྙན་བརྒྱུད་གཤིན་རྗེའི་ཐུགས་ཏིག་ལ། རས་བྲིས་སམ་མཎྜལ་ཚོམ་བུ་མཐིང་ནག་གཅིག་བཀོད་པའི་སྟེང་ཐོད་པའི་སྣོད་དུ་བམ་ལག་ལེན་ལྟར་བཅོས་པ། གཡས་སུ་རྣམ་བུམ་ཆིངས་སྔོན་ཅན། མདུན་དུ་ཞི་ཁྲོ་གཉིས་ཀྱི་སྐུ་ཙཀ །དུར་ཁྲོད་ཆས། ཕྱག་མཚན་དྲུག་པོ་གཡས་གཡོན་སོ་སོར་བྱས་པ། སྔགས་བྱང་བཅས་ཙཀ་ལི་དྲུག །ཐོད་ཕྲེང་། གཡོན་དུ་མཆོད་རྟེན། རྒྱབ་ཏུ་གསང་ཐོད་རིག་ཙཀ་ཤེལ་རྡོ། ཚེ་འབྲང་ཚེ་རིལ་འགྱེད་བདེས་བསྐོར་པ། མདུན་ངོས་དྲེགས་པའི་དམར་གཏོར་ཐེབས་ཀྱུས་བསྐོར་བ་རྣམས་བཀོད། ༈ གཏེར་གསར་ཟབ་བདུན་ཚེ་བདག་ལ། རས་བྲིས་དབུས་རྣམ་བུམ་མགུལ་ཆིངས་སྔོན་པོ་ཅན། རིག་དབང་ཆས། ལྷ་ཙཀ་ཉེར་བཞི་ཚང་བ། སྐྱེར་པའི་ཁྲོམ་ཤིང་བཅུ་གཉིས། སོ་གཉིས། བཞི། བདུན་བརྒྱ་ཉི་ཤུ་མཚོན་བྱེད་བཅས་ཚོ་བཞི། དཔལ་དང་དུར་ཁྲོད་ཆས་ཕྱོགས་བསྡུས། འཁོར་ལོ་རྡོ་རྗེ་རལ་གྲི་བེ་ཅོན་གཏུན་ཤིང་དགྲ་སཏྭ་རྣམས་དང་། སྔགས་བྱང་། གསང་ཐོད། རིག་ཙཀ །ཚེ་འབྲང་། ཟློག་གཏོར་འཁོར་ལོ་ཅན། མཚོན་ཆ། མནན་ཆས། མེ་ཧོམ། ཟོར་ཀོང་། འཁོར་ལོ་རྣམས་ཀྱི་དཔེའུ་རིས་སམ་བྲི་ཡིག་བཅས་བཞག ༈ །འཆར་ཀ་གནམ་སྐས་མའི་ཟོར་དབང་ལ། རས་བྲིས་སྟེང་འཕྲུལ་སྟེགས་ལ་བུམ་པ། ཐོད་ཁྲག །བདུད་རྩི། དཔལ་གཏོར་རྣམས་བརྩེགས་མར་འགོད་དགོས་ཀྱང་། འབྱོར་པས་མ་བདེ་ན་བུམ་གཏོར་བརྩེགས། སྨན་རག་གཡས་གཡོན་དུ་བཞག །གཏོར་མ་རྒྱས་པ་ལྕོགས་དཀའ་བས་དམར་གཏོར་ཟུར་གསུམ་འཁོར་དྲུག་དང་ཐེབས་ཀྱུ་མང་པོས་བསྐོར་བ་དར་གདུགས་དབུབ། མདུན་དུ་ལས་གཏོར་སྲིན་ཞལ་ཅན། ཟོར་རྫས་མདའ་གཞུ་འུར་རྡོ་གླང་རུར་ཁྲག་སྣ་བླུགས་པ་རྣམས་སྣོད་གཅིག །ཀོང་ཟོར་ཚོན་དྲུ་སོགས་རྒྱས་ན་བཀའ་བརྒྱད་ཁྲོ་རོལ་ལྟར་བྱས་པ་གཅིག །ཟོར་ཀོང་དཀྱུས་མ་གཅིག །བསྡུ་ན་ཟོར་ཀོང་གཅིག་ལ་ཁྲོམ་ཤིང་མཚོན་ཆ་དུག་སྣ་སོགས་གང་འཛོམ་དང་དཀྱུས་མ་གཅིག་རྣམས་བཤམ། ༈ འཇམ་ནག་གྲིབ་འཇོམས་རྡོ་རྗེ་ཕ་ལམ་ལ། རས་བྲིས་སམ་འབྲུ་ནག་ཚོམ་བུ་གཙོ་འཁོར་ལྔ་པའི་སྟེང་ཁྲིའུ་ལ་རྣམ་བུམ་ཆིངས་ནག་པོ། ཤར་དུ་སྐུ་རྟེན། ལྷོར་བེ་ཅོན། ནུབ་ཏུ་ཐོད་ཁྲག །བྱང་དུ་ཕུར་པ། མཚམས་བཞིར་སྒྲུབ་དཔེ། ཐུན་ཐོད། རཀྴའི་ཕྲེང་བ། དམར་གཏོར་གྲུ་གསུམ་ཁྲག་གིས་བྱུགས་པ་རྣམས་དང་། སྣ་ཚོགས་རྡོ་རྗེ་དང་དྲིལ་བུ། ཧོམ་ཁུང་ཡང་བཞག ༈ འཇིགས་བྱེད་མེའི་སྤུ་གྲི་ལ། འབྲུ་ནག་ཚོམ་བུ་ལྔའི་ཁར་རྣམ་བུམ། རྒྱབ་ཏུ་གཏོར་མ་གྲུ་གསུམ་ནག་པོ་གཙོ་འཁོར་ལྔ་པ་དར་གདུགས་ཅན། མདུན་དུ་གསང་ཐོད་མེ་ལོང་གིས་བཀབ་པ་དང་སྐུ་ཙཀ །མཆོད་གཏོར་གཡས་གཡོན་དུ་གྲི་གུག་བནྡྷ། རལ་གྲི་དང་བེ་ཅོན། འཁོར་ལོ་སཏྭ་རེ། དུར་ཁྲོད་ཆས་ཕྱོགས་བསྡུས་བཅས། ལས་གཤིན་བཀའ་གཏད་བྱེད་ན། གཏོར་མ་གྲུ་གསུམ་ཁྲོམ་ཅན་མེ་རིའི་རྒྱན་ལྡན་དང་ཐོད་དབྱུག་བཅས་བཀོད། ༈ ཀིང་ནག་ཕ་རོལ་རྒོལ་འཇོམས་ལ། དཀྱིལ་འཁོར་བུམ་པ་སྔ་མ་ལྟར། རྒྱབ་ཏུ་དཔལ་གཏོར་འཁོར་བཞི་ཅན་དང་སྨན་རཀ །མདུན་དུ་ལྷ་ཙཀ །གཡས་སུ་དབུ་རྒྱན་རྡོར་དྲིལ་དཔལ་གྱི་ཆས་ཕྱག་མཚན་བཅུ་དགུ །སྒྲུབ་ཐབས་གླེགས་བམ། རྒྱབ་ཏུ་གསང་ཐོད་རིག་ཙཀ་མེ་ལོང་ཤེལ་རྡོ་མར་མེ། གཡོན་དུ་ཧོམ་ཁུང་ལིང་ག་གདབ་ཕུར་རལ་གྲི་ཕྱག་རྒྱ་བཞི། ཐུན་རྫས། མནན་ཐོད། ཕུང་རེ། ཚོན་སྐུད། སཱཙྪ་རི་རབ་དང་བཅས་པ། དམར་གཏོར་ཉུངས་ཀར་གྱིས་བརྒྱན་པ། གཏོར་ཆུང་ཤ་ཁྲག་གིས་བརྒྱན་པ་སློབ་མའི་གྲངས་མཉམ་རྣམས། དཀྱིལ་འཁོར་གྱི་ཕྱོགས་བཞིར་གཤིན་རྗེ་མ་མོ་བདུད་བཙན་བཞིའི་གཏོར་མ་འཛོམ་ན་སྐུ་ཙཀ་བཙུགས་པ་རྣམས་བཀོད། ༈ གཏོར་དབང་། ཚོམ་བུ་ལྔ་སྟེང་དཔལ་གཏོར་སྔ་མ་ལྟར་དང་ཕྱོགས་བཞི་ལ་ལས་གཏོར་བཞི། མདུན་དུ་དམར་གཏོར་ཐེབས་ཀྱུ་མང་པོས་བསྐོར་བ་བཤམ། ༈ ཁྲོ་ཆུའི་དུག་དབང་ལ། ཆོས་འབྱུང་བསྣོལ་མའམ་འབྲུ་ནག་ཚོམ་བུ་བདུན་སྟེང་ཁྲིའུ་ལ་ཐོད་པའམ་ལྕགས་སྣོད་དུ་གྲུ་གསུམ་བསྣོལ་མའི་གདན་དབུས་གཏོར་མ་ཟུར་གསུམ་ཁྲམ་རིས་ཅན་ཟུར་དྲུག་ལ་དམར་གཏོར་དྲུག །གཙོ་འཁོར་བདུན་ལ་རྩང་བདུན་དང་ཤ་ཁྲག་མེ་རིས་བརྒྱན་པའི་རྒྱབ་ངོས་སྐུ་ཙཀ་དང་། སྲོག་འཁོར་ལྟེ་བར་སྨན་ཆེན་ཡུངས་ཀར་འབྲུ་ཙམ་སློབ་མའི་གྲངས་མཉམ་བཅུག་ཅིང་། དར་ནག་གིས་དྲིལ་བ་གཟུག་པ་བཀོད། ཤར་དུ་རཀྴའི་ཕྲེང་བ། ལྷོར་རྡོ་རྗེ། ནུབ་ཏུ་སྐྱེར་པའི་ཕུར་ཆུང་སློབ་མའི་གྲངས་མཉམ། བྱང་དུ་དུག་ཁྲག་ཐོད་སྣོད་དུ་སྦྱར་བ། མདུན་དུ་སྲུང་སྐུད་ནག་པོ་སློབ་མའི་གྲངས། སྒྲུབ་དཔེ། བྲུབ་ཁུང་ཉའོ། རལ་གྲི །མནན་ཆས། མེ་ཧོམ། ཟོར་གཏོར་རྣམས་བཀོད། ༈ གཏོར་དབང་གི་དཀྱིལ་འཁོར་དང་གཏོར་མ་སྔར་ལྟར་བཀོད་དོ། ༈ །ཐུགས་མཆོག་རྡོ་རྗེའི་ནཱ་ག་རཀྴ་ལ། ཚོམ་བུ་གཅིག་པའི་ཁར་གཏོར་མ་གྲུ་གསུམ་དམར་ནག་ཉ་སྦྲུལ་སྦལ་ཤས་བརྒྱན་པ་ལ་སྐུ་ཙཀ་དར་གདུགས་བརྒྱན། མདུན་དུ་འབུལ་གཏོར་དཀར་གཏོར་ཆ་ལྔ་བཤམ། ༈ ཐུགས་རྡོར་ནཱ་ག་རཀྴ་ལ། དྲག་དཀྱིལ་གཞུང་མཐུན་རས་བྲིས་བཀྲམ་པའམ། འབྲུ་ནག་གི་ཚོམ་བུ་གཙོ་འཁོར་བཅུ་གཅིག་བཀོད། དེ་དབུས་ཁྲིའུའི་ཁར་རིན་པོ་ཆེའི་བུམ་པ་བཅུད་ལྡན་ཁ་རྒྱན་མགུལ་ཆིངས་མཐིང་ནག་གཟུངས་རྡོར་བཅས་པའི་ཁར། རིགས་བདག་གཙོ་བོ། གནས་ལྷ་ལྔ་དང་བཅས་པའི་སྐུ་ཙཀ་བཀོད། མདུན་དུ་ལས་བུམ། གཡས་སུ་རྟེན་གཏོར། རྒྱབ་ཏུ་ཟོར་གཏོར། གཡོན་དུ་ཕྱག་མཚན། གྲི་གུག་སྦྲུལ་ཞགས་དང་འཁོར་ལོ་ནད་རྐྱལ་དབྱུག་པ་རྡོ་རྗེ་ལྕགས་སྡིག་མེ་ཕུང་རྣམས་ཕྱོགས་བསྡུས་ཀྱི་ཙཀ་ལི་གཉིས། བར་མཚམས་སུ་ཧ་ལའི་སྨན་ཆེན་དུམ་ཆུང་ངུ་། སྨན་རག་གཏོར་གསུམ་དངོས་སམ་བྲིས་པ། སྤོས་དཀར་ཁུ་བ། བཙག་བུ་སྤྲ་མེ། དུར་ཁྲོད་དཔལ་ཆས། གཞུང་མཐུན་སྲུང་འཁོར་རྣམས་བཀོད། འོག་ཏུ་སྒྲོལ་ལིང་ལས་ཕུར་བཙུགས་པ། མནན་པའི་རི་རབ། མེ་ཧོམ་རྣམས་ཀྱང་འདུ་བྱའོ།། ༈ །།དེ་ནས་པདྨ་གསུང་གི་ཞི་སྒྲུབ་ཀྱི་དང་པོ་ཚེ་སྒྲུབ་ཀྱི་སྐོར་ལས། ལུང་ལུགས་ཚེ་སྒྲུབ་ལ། རས་བྲིས་སྟེང་རྐང་གསུམ་ལ་བུམ་པ་སྙིང་པོ་ལྔའི་བཅུད་ཀྱིས་བཀང་བའི་ཁར་ཚེ་འབྲང་རྒྱ་གྲམ་ཉི་ཟླས་མཚན་པ། རྒྱབ་ཏུ་ཚེ་མདའ་མེ་ལོང་། གཡས་གཡོན་ཚེ་རིལ་ཚེ་ཆང་། ཞབས་བསིལ་བཞི་བསྣོལ་གྱིས་མཐའ་བསྐོར། ༈ ཉང་གཏེར་མཚོ་སྐྱེས་རྡོ་རྗེ་ལ། རས་བྲིས་ཀྱི་དཀྱིལ་འཁོར་རམ་མ་འཛོམ་ན་མཎྜལ་ལ་འབྲུ་དཀར་གྱི་ཚོམ་བུ་ལྷ་གྲངས་བཀོད་པའི་དབུས་སུ་མཉྫི་ལ་རིན་པོ་ཆེའི་བུམ་པ་ཆས་བཅུད་ལྡན་པའི་ཁར་ཐོད་པ་བདུད་རྩིས་གང་བར་གཞུང་གསལ་ཚེ་རྫས་སུམ་ཅུའི་རིལ་བུ་བཏབ་པའི་ཁར། མེ་ལོང་ལ་སིནྡྷུ་རས་ཆོས་འབྱུང་ཉིས་བརྩེགས་ཀྱི་དབུས་སུ་ཧྲཱིཿལ་རྩ་སྔགས་དང་བཛྲ་གུ་རུས་བསྐོར་བ་དང་ཆོས་འབྱུང་གི་ཟུར་དྲུག་ལ་གཡུང་དྲུང་རེ་བྲིས་པས་བཀབ་པའི་སྟེང་དུ་དར་དམར་པོའི་གུར་ཕུབ་པ་ལ་གཟུངས་ཐག་རྡོ་རྗེ་བཏགས་པ་དང་། དེའི་གཡས་སུ་ཚེ་རྒྱས་རིན་པོ་ཆེ་ཟུར་བརྒྱད་པའི་རྣམ་པ་ཅན་རིལ་བུས་བསྐོར་བ་དང་། གཡོན་དུ་དཔལ་གཏོར་རིན་པོ་ཆེ་འབར་བའི་རྣམ་པ་ཅན་པདྨ་འདབ་བཞིས་བསྐོར་བ་རྣམས་བཀོད། དབང་བསྐུར་བའི་འཁོར་ལོ་གཞུང་གསལ་བྲིས་ནས་བལྟེབ་ཆིངས་གཡོགས་བཅས་བྱས་པ་འཛོམ་ན་སློབ་མའི་གྲངས་དང་མཉམ་པ་དབུས་ཀྱི་བུམ་པ་ལ་བརྟེན་ཏེ་དགོད། གཞན་ཡང་ཚེ་རིལ་ཚེ་ཆང་། ཚེ་མདའ། བཀྲ་ཤིས་རྫས་བརྒྱད་རྣམས་ཀྱང་དགོད། ༈ བྱང་གཏེར་ལྕགས་སྡོང་མ་ལ། པདྨ་འདབ་བརྒྱད་སྔོན་པོའི་ཁར་བུམ་པ་ཉེར་ལྔའི་བཅུད་ལྡན་སྐུ་རྟེན་གྱིས་བརྒྱན་པ་བཞག །འདི་ཕྱིན་གྱི་ཚེ་དབང་ཕལ་མོ་ཆེར་ཚེ་རིལ་ཚེ་ཆང་མདའ་དར་གསུམ་དགོས་པ་འདྲ་ཞིང་བཤམ་ལུགས་སྔ་མས་འགྲེ །སྣོད་གཅིག་ཏུ་ལི་ཁྲིའང་བཞག ༈ །ལྕགས་སྡོང་ལྷ་མང་གི་དབང་ལ། པད་སྔོན་ལྟེ་བར་བུམ་པ་སྔ་མ་ལྟར་ལ་ཚེ་བུམ་ངུམ་གཟུགས་རྒྱན་ལྡན་དེའི་ཁར་བཞག །རིལ་ཆང་མདའ་དར། ཟླུམ་གཏོར་ཆེ་ཆུང་གཉིས་བཤམ། ༈ རང་ཤར་ཚེ་ལྷ་ཡོངས་རྫོགས་ལ། དཀྱིལ་འཁོར་རས་བྲིས་སམ་ཚོམ་བུ་ལྔའི་ཁར་བུམ་པ། མདུན་དུ་ཚེ་འབྲང་རྫས་བཀྱེ་ཆོག་པ། ཚེ་རིལ་དང་། རྒྱལ་སྲིད་རྫས་བརྒྱད་སོ་སོ་བ་བཤམ། ༈ སངས་གླིང་ཉི་ཟླ་ཁ་སྦྱོར་ལ། རས་བྲིས་སམ་འབྲུ་ཚོམ་ལྷ་གྲངས་སྟེང་རྣམ་བུམ་ཁར་ཐོད་པའི་བདུད་རྩི་ལ་སིནྡྷུ་རའི་མེ་ལོང་ཆོས་འབྱུང་བསྣོལ་མ་པདྨ་འདབ་བཞིའི་དབུས་དང་འདབ་མར་ཧྲཱིཿལྔ་བྲིས་པ་དར་དམར་གྱིས་བཀབ་པ། ཚེ་རྒྱས་པདྨ་འདབ་བརྒྱད་སྟེང་རིན་ཆེན་ཟུར་བརྒྱད་རྩེ་རྒྱལ་ཉི་ཟླ་ནོར་བུས་བརྒྱན་ཅིང་རིལ་བུས་བསྐོར་བ། འདི་ཐོད་པའི་སྟེང་དུ་བཀོད་དགོས་ཀྱང་མི་བདེ་ན་གཡོན་དུ་བཞག །ཚེ་གཏོར་པད་སྡོང་སྟེང་ནོར་གཟུགས་རྒྱན་ལྡན་ཟས་སྣས་བསྐོར་བ་གཡས་སུ་བཀོད། མདུན་དུ་སྐུ་ཙཀ །ཚེ་མདའ་རྒྱབ། འབྲུ་སྣ་ལྔའི་ཚེ་ཆང་། ཚེ་ཤ་དཀར་མོ་ལག་གཡས་མ་འཛོམ་ན་ཟན་གྱིས་བཅོས་པ་དང་ཤ་ལྔའི་རིལ་བུ་མདུན་གཡས་གཡོན་དུ་བཀོད། བཀྲ་ཤིས་རྫས་བརྒྱད་ཀྱང་སོ་སོར་བཤམ་མོ། ༈ །རྡོར་གླིང་ཞི་ཁྲོའི་ཚེ་སྒྲུབ་འོད་ཟེར་དྲྭ་བ་ལ། དཀྱིལ་འཁོར་སྟེང་ཚེ་འབྲང་ཕྱག་མཚན་ལྔ་དང་རིགས་ལྔའི་ས་བོན་གྱིས་བརྒྱན་པ་ལྔ་དབུས་དང་མཚམས་བཞིར་བཀོད། དཀར་པོ་ལ་སོགས་པའི་བུམ་པ་ལྔ་ཁ་རྒྱན་ལ་རིགས་ལྔའི་སྐུ་ཙཀ་གིས་བརྒྱན་པ་རྣམས་དབུས་དང་ཕྱོགས་བཞིར་བཞག །རིགས་ལྔའི་ཕྱག་རྒྱ་སོ་སོ་བ། སྒོ་བཞིར་འབྲང་རྒྱས་ཞལ་དཀར་བཞི་དང་མདའ་དར་ཕྱོགས་མདོག །མཚམས་བཞིར་རལ་གྲི་བཞི་གཟུག །བཀྲ་ཤིས་རྟགས་བརྒྱད། རིལ་ཆང་མདའ་དང་བཅས་བཀོད། ༈ རཏྣའི་ཚེ་ཁྲིད་རྡོར་ཕྲེང་ལ། རས་བྲིས་སྟེང་རྣམ་བུམ་ཉེར་ལྔའི་རྫས་ལྡན་ཁར་མེ་ལོང་དབུས་སུ་ཧྲཱིཿམཐའ་སྐོར་དུ་བསྙེན་སྔགས་མཚལ་གྱིས་བྲིས་པས་བཀབ་པའི་སྟེང་གཟུངས་རྡོར་བཞག །དེ་སྟེང་ཁྲིའུར་ཚེ་འབྲང་སྐུ་ཙཀ་རྨ་བྱས་བརྒྱན་པ། ཕྱོགས་རྣམས་སུ་རིག་དབང་ཆས་བཞི། རིལ་ཆང་མདའ་སོགས་བཀོད། སྦྱིན་སྲེག་ཐབ་རྫས་རྣམས་དབང་བསྒྲིགས་སུ་གསལ་བ་ལྟར་འདུ་བྱའོ། ༈ །པད་གླིང་རྡོར་ཕྲེང་དབང་གསུང་རྒྱུན་མ་ལ། རས་བྲིས་སྟེང་བུམ་པ་ཉེར་ལྔའི་རྫས་ལྡན་ཁར་ཐོད་ཆང་མེ་ལོང་གིས་བཀབ་པ། ཤར་དུ་ཚེ་འབྲང་རྡོ་རྗེས་མཚན་པ། རིལ་ཆང་མདའ་བཅས། ༈ འཆི་མེད་དཔལ་སྟེར་ལ། ཚོམ་བུ་གཅིག་སྟེང་ཚེ་བུམ་རྟ་མགོས་མཚན་པ། ཚེ་རིལ་ཚེ་ཆང་། ཟླུམ་གཏོར་གཉིས་བཅས། ༈ བདུད་རྩི་བུམ་ཆུང་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ་ཆས་བཅུད་ལྡན་པ། མདུན་དུ་ཚེ་འབྲང་། གཡས་སུ་ཚེ་རིལ། རྒྱབ་ཏུ་ཚེ་མདའ། གཡོན་དུ་ཚེ་ཆང་བཞག ༈ །ཚེ་དབང་མདའ་འཕེལ་མ་ལ། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ། མདུན་དུ་ཚེ་འབྲང་། རིལ་ཆང་མདའ་དར། རྒྱལ་སྲིད་རྟགས་བརྒྱད་སོ་སོར་བཅས། ༈ ཚེ་སྒྲུབ་ཡེ་ཤེས་འོད་མཆོག་ལ། རས་བྲིས་སམ་ཚོམ་བུ་ལྷ་གྲངས་བཀོད་པའི་སྟེང་ཁྲིའུ་ལ་ཉེར་ལྔའི་བཅུད་ལྡན་ཆིངས་དམར་ཁ་རྒྱན་གསེབ་ཏུ་སྐུ་ཙཀ་གིས་བརྒྱན་པ་བཞག །དེའི་མདུན་དུ་ཚེ་འབྲང་རིན་ཆེན་འབར་བའི་བུམ་དབྱིབས་ཅན། གཡས་སུ་ཟ་མ་ཏོག་ཏུ་བདུད་རྩི་ལྔ་ཅོང་ཞི་བྲག་ཞུན་ཨ་བར་སྐྱུར་གསུམ་བཟང་དྲུག །ཤུག་པ་བ་ལུ་མཚེ་མཁན་འོམ་བུ་དཀར་གསུམ་མངར་གསུམ་བཅས་ཀྱི་རིལ་བུའམ་འབྱོར་ན་དེ་རྣམས་ཀྱི་སྨན་མར་རིལ་བུ། གཡོན་དུ་ཐོད་ཆང་མངར་གསུམ་དང་བདུད་རྩི་བཏབ་པ། མདུན་དུ་ཚེ་མདའ་ཚེ་འཁོར་རམ་མ་འབྱོར་ན་སྔགས་བྱང་གཡུ་བཅས་བཏགས་པ་དང་། ཚེ་རིལ་ཚེ་ཆང་བཅས། རྒྱབ་ཏུ་ཕུར་བུ། ལས་བཞིའི་འབྲང་རྒྱས་དཀར་སེར་དམར་ནག་ནོར་བུའམ་ཞལ་དཀར་དུ་གྲགས་པ་བཞི། བཀྲ་ཤིས་རྫས་རྟགས་རྒྱལ་སྲིད་སྣ་བདུན་བཅས་བཤམ། ༈ འབྲི་གུང་ཡང་ཟབ་ཚེ་སྒྲུབ་ཕྱི་ནང་གསང་གསུམ་ལྷན་ཅིག་ཏུ་བསྐུར་བ་ལ། མཎྜལ་ཚོམ་བུ་གཅིག་པའི་སྟེང་ཚེ་བུམ། རིལ་ཆང་མདའ་དར། ཕྱོགས་བཞི་དབུས་ལྔར་བུམ་པ་ལྔའི་ཁར་ཐོད་པའི་བདུད་རྩི་རྣམས་བཀོད། ༈ ཞིག་གླིང་ཚེ་སྒྲུབ་རྒྱལ་བ་འདུས་པ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ་ཆིངས་དམར། དེའི་སྟེང་ངམ་མདུན་གང་བདེར་ཚེ་འབྲང་དང་ལྷ་ཙཀ་ཚང་བ། རྒྱབ་ཏུ་གསང་ཐོད་སྟེང་སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར། ཧ་རི་ནི་ས། མཐའ་སྐོར་དབྱངས་གསལ་བྲིས་པ་བཞག་པའི་སྟེང་དར་དམར་གྱིས་བཀབ་ལ་ཤེལ་རྡོ་བཀོད། རིག་ཙཀ་བཅས་སོ། ༈ །གྲོལ་ཏིག་སྐུ་གསུམ་འདུས་པ་ལ། རས་བྲིས་སམ་ཚོམ་བུ་གཅིག་པའི་སྟེང་རྣམ་བུམ། མདུན་དུ་ཚེ་བུམ། གཡས་སུ་ཚེ་རིལ། རྒྱབ་ཏུ་ཚེ་མདའ་དང་ཡེ་ཤེས་སེམས་དཔའི་ཙཀ་ལི་ཤེལ་རྡོ་བཅས། གཡོན་དུ་ཐོད་ཆང་དར་དམར་གྱིས་བཀབ་པའི་སྟེང་རིག་ཙཀ་དང་། པད་ཕྲེང་བཅས་བཀོད། ༈ ཚེ་སྒྲུབ་གནམ་ལྕགས་རྡོ་རྗེ་ལ། རས་བྲིས་སྟེང་བུམ་པ་དབུས་དམར། ཤར་སྔོ། ལྷོ་སེར། ནུབ་དཀར། བྱང་ལྗང་ཁ་རྒྱན་ལ་རིགས་ལྔའི་སྐུ་རྟེན་ཅན། མདུན་དུ་ཡུམ་ལྔ་སོགས་ལྷ་ཙཀ་ཚང་བ་དང་ཚེ་འབྲང་། རྒྱབ་ཏུ་ཐོད་ཆང་ཁར་མེ་ལོང་དྲི་མེད། ཚེ་རིལ་ཆང་མདའ་དར། ཟས་སྣ། གོས་སྣ། རྟགས་བརྒྱད་ཕྱོགས་བསྡུས་བཅས། ༈ བདུད་འདུལ་ཚ་བ་དམར་ཐག་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ། དེ་རྒྱབ་བརྒྱད། དེ་རྒྱབ་བཞི་བཀོད་པའི་དབུས་སུ་བུམ་པ་ཆིངས་དཀར། ཕྱོགས་བཞིར་བུམ་པ་མཐིང་སེར་དམར་ལྗང་བཞི། སྐུ་ཙཀ་ཉེར་གཅིག །གཡས་སུ་ཚེ་གཏོར་པད་སྟེང་བུམ་གཟུགས་རྡོ་རྗེ་ཉི་ཟླས་མཚན་པ། གཡོན་དུ་ཐོད་ཆང་སིནྡྷུ་རའི་མེ་ལོང་དབུས་དང་ཕྱོགས་མཚམས་སུ་ཧྲཱིཿདགུ་བྲིས་པས་བཀབ་པ། མདུན་དུ་ཚེ་གཏོར་རྡོ་རྗེའི་དབྱིབས་ཉི་ཟླའི་རྒྱན་ཅན། མདའ་དར། ཚེ་རིལ་ཆང་། རིག་ཙཀ །བཀའ་སྲུང་གཏོར་མ་གྲུ་བཞི་སེར་པོ་བཤོས་ཕྲན་ཐེབས་ཀྱུས་བསྐོར་བ་རྣམས་བཀོད། ༈ འཆི་མེད་ཡང་སྙིང་ལ། རས་བྲིས་འདབ་བརྒྱད་ཚོམ་བུ་ལྷ་གྲངས་གང་རུང་དབུས་སུ་རྣམ་བུམ་ཉེར་ལྔའི་རྫས་ལྡན། མདུན་དུ་ཚེ་འབྲང་། རིལ་ཆང་མདའ་དར་བཅས། ༈ ཚེ་སྒྲུབ་ཡེ་ཤེས་རྒྱ་མདུད་ལ། དཀྱིལ་འཁོར་རམ་ཚོམ་བུ་དམར་པོ་གཅིག་སྟེང་བུམ་པ་ཆིངས་དམར་ཁ་རྒྱན་མེ་ལོང་མན་ཤེལ་བཅས་པ། ཤར་དུ་ཐོད་ཆང་མེ་ལོང་སིནྡྷུ་ར་བྱུགས་པས་བཀབ་པ། ལྷོར་ཚེ་རིལ། ནུབ་ཏུ་ཚེ་མདའ། བྱང་དུ་ཚེ་ཆང་། མཚམས་སུ་སྣང་མཐའི་སྐུ་ཙཀ །ཤེལ་རྡོ། དབུ་རྒྱན། ཞི་ཆས། སློབ་དཔོན་མངའ་གསོལ་གྱི་ཆས་རྣམས་སམ། བསྡུ་ན་རྡོར་དྲིལ་ཙམ་འཇོག ༈ །ཀློང་གསལ་ཡང་གསང་བླ་མེད་ལ། དཀྱིལ་འཁོར་རམ་ཚོམ་བུ་ལྷ་གྲངས་བཀོད་པའི་དབུས་སུ་རྣམ་བུམ་ཆིངས་དམར་ཅན། གཡས་གཡོན་སོགས་སུ་ཐོད་པའི་བདུད་རྩི། དཔལ་གཏོར། ཚེ་རིལ་ཆང་། མདའ་དང་། དུརྦའི་ཕོན་པོ། རྫས་རྟགས་རྒྱལ་སྲིད་བཅས། ༈ ནམ་སྙིང་ཚེ་སྒྲུབ་ལ། རས་བྲིས་སམ་དགུ་ཚོམ་སྟེང་ཁྲིའུར་དཔལ་གཏོར་རྒྱན་ལྡན། མདུན་རྒྱབ་གང་བདེར་རྣམ་བུམ་སྐུ་ཙཀ །སྒྲུབ་ཡིག །ཚེ་རིལ་ཆང་བཅས། ༈ སྟག་ཤམ་གསང་དྲིལ་ཟུང་འཇུག་ལ། དཀྱིལ་འཁོར་རམ་ཚོམ་བུ་གཙོ་འཁོར་དགུའི་སྟེང་དུ་རྣམ་བུམ་ཆིངས་དམར་ཅན། ཤར་བུམ་དཀར། ལྷོ་བུམ་སེར། ནུབ་བུམ་མཐིང་། བྱང་བུམ་ལྗང་གུ་རྣམས་ཁ་རྒྱན་ལ་རིགས་ལྔའི་ལྷ་ཙཀ་བཙུགས་པ། གཡས་སུ་ཚེ་གཏོར་དང་རིལ་བུ། གཡོན་དུ་ཚེ་ཆང་དང་ཚེ་མདའ། མདུན་དུ་ཕྲེང་བ། མེ་ལོང་། རྡོ་རྗེ་རྣམས་བཀོད། ༈ ཚེ་སྒྲུབ་ཡེ་ཤེས་སྲོག་ཏིག་ལ། དཀྱིལ་འཁོར་རམ་མཎྜལ་ཚོམ་བུ་དམར་པོ་གཅིག་བཀོད་པའི་ཁར་མཉྫི་ལ་བུམ་པ་ཉེར་ལྔའི་བཅུད་དང་ཆས་ལྡན། མདུན་དུ་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར་བཅས་བཀོད། ༈ བདེ་གླིང་རྡོ་རྗེ་རྒྱ་མདུད་ལ། ཚོམ་བུ་ལྔ་པའི་ཁར་རྣམ་བུམ་ཉེར་ལྔའི་རྫས་ལྡན། ཤར་དུ་རྡོ་རྗེ་མེ་ལོང་། ལྷོར་ཚེ་རིལ། ནུབ་ཏུ་ཚེ་ཆང་། གསང་ཐོད། སྔགས་བྱང་། ཚེ་ཆང་། བྱང་དུ་མདའ་དར། རྟགས་བརྒྱད་བཅས། ༈ ལྕགས་ཀྱི་བང་མཛོད་ལ། རས་བྲིས་སམ་ཚོམ་བུ་ལྷ་གྲངས་སྟེང་རྐང་གསུམ་ཁར་ཚེ་འབྲང། གཡས་སུ་རྣམ་བུམ། གཡོན་དུ་ཐོད་ཆང་མེ་ལོང་ལྕགས་ཀྱི་རྡོ་རྗེ་རྣམས་བརྩེགས། རིལ་ཆང་མདའ་དར་ཚེ་ནས་བཅས། ༈ ཏའུ་རོག་རྗེ་གླིང་པའི་ཚེ་སྒྲུབ་གསང་བ་རྨད་བྱུང་ལ། ཞི་དཀྱིལ་ལམ་མཎྜལ་པདྨ་འདབ་བརྒྱད་ལྟེ་བར་སྐུའམ་ཚེ་བུམ་བྲིས་པའི་དབུས་སུ་མཉྫིའི་ཁར་བུམ་པ་ཉེར་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་བཅས། མདུན་དུ་དཔལ་གཏོར་རྟ་མགྲིན་གྱི་སྐུ་ཙཀ་བཙུགས་པ། བུམ་པའི་གཡས་གཡོན་དུ་ཚེ་རིལ། ཚེ་ཆང་དང་། གཏོར་མའི་གཡས་གཡོན་དུ་ཕྲེང་བ། རྡོ་རྗེ་བཞག ༈ ཚེ་སྒྲུབ་འཆི་མེད་ཐུགས་ཐིག་ལ། དཀྱིལ་འཁོར་རས་བྲིས་སམ་མཎྜལ་ལ་འབྲུ་དཀར་ཀྱི་ཚོམ་བུ་དབུས་དང་མདུན་དུ་ཆེ་ཆུང་གཉིས། ཕྱོགས་བཞིར་བཞི། དེ་རྒྱབ་བཞི་རིམ་གཉིས་བཅས་བཀོད་པའི་དབུས་སུ་རིན་པོ་ཆེའི་སྣོད་དུ་སྒྲུབ་གཏོར་པད་སྤུངས་རྒྱན་ལྡན། གཡས་གཡོན་ཚེ་རིལ་ཚེ་ཆང་། མདུན་དུ་ཤེལ་རྡོ། རྒྱབ་ཏུ་མདའ་དར་བཀོད། ༈ ཟླ་བའི་འོད་ཟེར་གྱི་ཚེ་སྒྲུབ་རྡོ་རྗེ་སྙིང་པོ་ལ། དཀྱིལ་འཁོར་གཞུང་མཐུན་མཉྫིའི་ཁར་བུམ་པ་སོ་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་བཅས་པ། མདུན་དུ་ཐོད་པ་ལ་ཨ་མྲྀཏས་བཀང་བའི་ཁར་སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་དབུས་སུ་གཡུང་དྲུང་ལྟེ་བར་བཾ། ལོགས་བཞིར་ཧ་རི་ནི་ས། དེ་རྒྱབ་འོད་ལྔས་བསྐོར་བ་བྲིས་པ་དར་དམར་གྱིས་བཀབ་པའི་སྟེང་ཤེལ་རྡོ་བཞག །གཡས་གཡོན་དུ་ཚེ་རིལ། ཚེ་ཆང། མདའ་དར་རྣམས་དང་། འགྲུབ་ན་རྒྱབ་ཏུ་ཚེ་གཏོར་གཞུང་གསལ་ཡང་དགོད། ༈ དཔའ་བོའི་ཚེ་སྒྲུབ་འཆི་མེད་བདུད་རྩི་ལ། འོད་ལྔའི་དཀྱིལ་འཁོར་རམ་ལྔ་ཚོམ་ཁར་དབུས་སུ་བུམ་པ། མདུན་དུ་ཚེ་འབྲང་། ཤར་དུ་རྡོ་རྗེ། ལྷོར་ཚེ་རིལ། ནུབ་ཏུ་ཚེ་ཆང་། བྱང་དུ་ཚེ་མདའ་རྣམས་བཀོད། ༈ གཏེར་གསར་བླ་མ་ཆོས་སྐུ་ལ། རས་བྲིས་སམ་ལྷ་གྲངས་ཚོམ་བུའི་སྟེང་རྣམ་བུམ་དང་། དེ་སྟེང་ཁྲིའུ་ལ་ཚེ་འབྲང་། མདུན་དུ་གཙོ་བོ་དང་རིགས་ལྔ་སོ་སོ། སྒེག་སོགས་བརྒྱད་གཅིག་བསྡུས་བྱས་པ་དང་ཡུམ་ལྔའི་ཕྱག་རྒྱའི་ཙཀ་ལི། གཡས་སུ་ཚེ་རིལ། གཡོན་དུ་ཚེ་ཆང་། མདའ་དར་བཅས། ༈ གཏེར་གསར་ཚེ་དཀར་ལ། རས་བྲིས་འཕྲུལ་སྟེགས་སྟེང་བུམ་པ་དབུས་དཀར་སོགས་ཕྱོགས་མདོག་ལྔ། ཡང་བུམ་པ་ཆིངས་སྔོན་ཅན་སོགས་རིག་པའི་དབང་ལྔའི་ཆས། ལྷ་ཙཀ་ཚང་བ། སྔགས་བྱང་ཕྲེང་དམར། གསང་ཐོད་སིནྡྷུ་རའི་མེ་ལོང་ལ་མུྃ་བྲིས་པས་བཀབ་པ། ཤེལ་རྡོ་མེ་ལོང་། གདུགས་དུང་དཀར་འཁོར་ལོ་ཕྱག་ཤིང་སོགས། རིལ་ཆང་མདའ་དར་བཅས་སོ། ༈ །ཚེ་སྒྲུབ་རྡོར་ཕྲེང་རྩ་དབང་ཕྱི་སྒྲུབ་ལ། དཀྱིལ་འཁོར་རམ་མཎྜལ་ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། མདུན་དུ་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་ཚེ་མདའ་གཟུག ༈ །ནང་སྒྲུབ་ལ། མཎྜལ་ཟླ་གམ་དམར་པོའི་སྟེང་དུ་བུམ་པ་ཐོད་ཆང་སིནྡྷུ་རའི་མེ་ལོང་ཨཱཾཿཡིག་བྲིས་པ་རྣམས་བརྩེགས་ཤིང་དར་དམར་གྱིས་བཀབ་པའི་སྟེང་ཤེལ་རྡོ་བཞག །ཚེ་རིལ་མདའ་དར་བཅས། ༈ གསང་སྒྲུབ་ལ། ཚེ་གཏོར་རྒྱན་ཅན་འཇོག་གོ ༈ །དེ་ནས་འོད་དཔག་མེད་ཀྱི་སྐོར་ལ། ཀཿདམ་པའི་གསུང་རྡོ་རྗེ་ལ། ཚོམ་བུའི་ཁར་རྣམ་བུམ། མཐའ་སྐོར་དུ་སྐུ་ཙཀ །མེ་ལོང་སིནྡྷུ་རས་ཧྲཱིཿབྲིས་པ་ཤེལ་རྡོ། པདྨ་ལྷུང་བཟེད་ཀྱི་ཙཀ་ལི་རྣམས་བཀོད། ༈ གནམ་ཆོས་ཞིང་དབང་ལ། མཎྜལ་ཚོམ་བུ་གཙོ་འཁོར་གསུམ་པའི་ཁར་གཏོར་མ་གཙོ་འཁོར་གསུམ་པའམ། ལྷ་བརྒྱ་གཏོར་གཅིག་དང་སྐུ་ཙཀ །མདུན་རྒྱབ་གང་བདེར་རྣམ་བུམ། རྡོ་རྗེ་ལྷུང་བཟེད་ཀྱི་ཙཀ་ལི། ཚེ་དབང་བྱེད་ན་ཚེ་རིལ་ཆང་མདའ་དར་། རྟགས་བརྒྱད་སྣ་བདུན་གྱི་ཙཀ་ལི་སོ་སོ་བ་བཅས། ༈ ཡི་དམ་དགོངས་འདུས་ཀྱི་འོད་དཔག་མེད་ཡེ་ཤེས་སེམས་དཔའི་རྩ་དབང་ལ། རས་བྲིས་སྟེང་བུམ་ལྔ་དབུས་དཀར་སོགས་ཕྱོགས་མདོག །ཚེ་འབྲང་ལྔ་འཁོར་ལོ་སོགས་རིགས་ལྔའི་རྟགས་ཀྱིས་བརྒྱན་པ། དབུས་སུ་ལྷ་ཙཀ །མདུན་དུ་ཤེལ་རྡོ་མེ་ལོང་། རིལ་ཆང་མདའ་དར། ཕྱོགས་བཞིར་མདའ་དར་དཀར་སེར་དམར་ལྗང་། མཚམས་བཞིར་རལ་གྲི་བཞི། རྟགས་བརྒྱད། སྣ་བདུན་བཅས། ༈ ནང་སྒྲུབ་ཚེ་དབང་ལ། རས་བྲིས་སམ་དགུ་ཚོམ་ཁར་རྣམ་བུམ་དང་ཚེ་འབྲང་བརྩེགས། མདུན་དུ་འོད་ཟེར་དཔག་མེད་ཀྱི་སྐུ་དང་མེ་ལོང་། མོ་ཐོད་རཀྟ་དང་ཕོ་ཐོད་བདུད་རྩིས་བཀང་བ་མེ་ལོང་ཤེལ་རྡོ་རྣམས་བརྩེགས་མར་བཤམ། རྡོ་རྗེའང་བཞག ༈ །ཀླུ་སྒྲུབ་ལུགས་ཀྱི་རྗེས་གནང་ལ། ཚོམ་བུའི་སྟེང་བུམ་པ། མདུན་དུ་དབང་གཏོར། གཙོ་བོའི་སྐུ་ཙཀ་དང་ཕྱག་མཚན། གཡས་སུ་དར་དང་རིན་ཆེན་རྒྱན། གཡོན་དུ་བགྲང་ཕྲེང་དང་ཕྲེང་བཞིའི་ཙཀ་ལི་བཅས་བཞག ༈ གཏེར་གསར་ཐུགས་སྒྲུབ་ཞིང་སྦྱོང་དབང་ལ། ཚོམ་བུ་གཅིག་པའི་ཁར་རྣམ་བུམ། གཡས་སུ་བགྲང་ཕྲེང་། གཡོན་དུ་མེ་ལོང་། བཀྲ་ཤིས་རྫས་རྟགས་སྣ་བདུན་རྣམས་ཙཀ་ལི་ཕྱོགས་བསྡུས་ཅན་བཞག་གོ ༈ དེ་ནས་ཐུགས་རྗེ་ཆེན་པོའི་སྐོར་ལས། ཐོག་མར་རྒྱལ་པོ་ལུགས་ཀྱི་རྩ་དབང་ལ། རས་བྲིས་དབུས་ཁྲིའུར་བུམ་པ་ཆིངས་དཀར་ལྡན་པའི་ཁ་རྒྱན་གསེབ་ཏུ་སེང་ཕུར་རྟ་སྔགས་བྲིས་པ་བཙུགས་པའི་མདུན་ངོས་སུ་དུང་ཆུ་གཟུངས་རྡོར་བཀོད། ཤར་དུ་ཅོད་པན་དམར་པོ། ལྷོར་དབུ་རྒྱན། ནུབ་ཏུ་ཐོད་པའི་བདུད་རྩིའི་ཁར་སིནྡྷུ་རའི་མེ་ལོང་པདྨ་འདབ་དྲུག་གི་ལྟེ་བར་ཨོཾ་ཨཱཿཧཱུྃ་ཧྲཱིཿབརྩེགས་མར་དང་འདབ་དྲུག་ལ་ཡིག་དྲུག་བྲིས་པས་བཀབ་པའི་སྟེང་གཞུང་གསལ་བདུད་རྩི་རིལ་བུ་སློབ་མའི་གྲངས་མཉམ་དར་དཀར་གྱིས་དྲིལ་བ། བྱང་དུ་རྡོར་དྲིལ། ཤར་ལྷོར་སྐུ་རྟེན། ལྷོ་ནུབ་ཤེལ་ཕྲེང་དང་སྔགས་བྱང་། ནུབ་བྱང་སྦ་དཀར་ཚིགས་གསུམ། བྱང་ཤར་མེ་ལོང་། ཤར་སྒོར་ལས་བུམ་སེང་ཕུར་ཧྲཱིཿས་མཚན་པ་རྣམས་དང། རྗེས་གནང་ཆས་གདན་ཁྲི་པདྨ་གདུགས་སྒྲུབ་ཡིག་སྤྱི་བླུགས་དུང་དཀར་རྣམས་བཀོད། ༈ ཉང་གཏེར་ཐུགས་རྗེ་ཆེན་པོ་འགྲོ་འདུལ་ལ། སྟ་གོན་རྫས་བཞི། ཁྲུས་དབང་ལ་མཎྜལ་མེ་ཏོག་གི་ཚོམ་བུ་བཀོད་པའི་ཁར་བུམ་པ་དྲི་ཆབ་ཉེར་ལྔའི་རྫས་དང་ཆུ་ཤེལ་གྱི་བཅུད་ལྡན་མགུལ་ཆིངས་དཀར་པོ་ཁ་རྒྱན་རིགས་ལྔའི་ཕྱག་མཚན་དང་བཅས་པ་བཀོད། བཀྲ་ཤིས་རྟགས་བརྒྱད། རྒྱལ་པོ་སོགས་རིན་ཆེན་བརྒྱད་ཀྱི་ཙཀ་ལིའང་བཞག །དངོས་བཞི་རས་བྲིས་ཀྱི་དཀྱིལ་འཁོར་བཀྲམ་པའི་དབུས་སུ་ཁྲིའུ་ལ་རྣམ་བུམ་ཉེར་ལྔའི་རྫས་དང་ཆིངས་དཀར་ཅན་བཞག །དེའི་ཁར་ཐོད་པ་མཚན་ལྡན་ཆང་དང་ཨ་མྲྀཏས་བཀང་བའི་སྟེང་མེ་ལོང་ལ་མཚལ་ལམ་སིནྡྷུ་རས་ཡིག་དྲུག་བྲིས་པས་བཀབ། ནང་དབང་རྫས། དབུ་རྒྱན། ཅོད་པན། རྡོ་རྗེ། དྲིལ་བུ། ཤེལ་ཕྲེང་། སྦ་ལྕགས་ཚིགས་གསུམ། ཁྱད་པར་རྫས། ལྷ་ཙཀ་ཉེར་གཉིས། དངུལ་གྱིས་བྲིས་པའི་ཡིག་དྲུག །པུསྟི། ཁྲི་གདུགས་ཙཀླི་རྣམས་ཅི་བདེར་བཀོད། ཕྲིན་ལས་བཞིའི་དབང་རྫས་ཤར་དུ་དངུལ་བུམ་ནང་དྲི་སྨན་རིན་པོ་ཆེ་ཆུ་སྣ་འོ་མས་བཀང་བ་ཆུ་ཤེལ་དང་བཅས་པ། མགུལ་ཆིངས་དཀར་པོ་ཁ་རྒྱན་མེ་ལོང་ལྡན་པ། ལྷོར་ཚོགས་གཏོར། དཀར་གསུམ། མངར་གསུམ་ཁུར་བ། ཤ་བཙོས་བསྲེགས་རློན་པ་དང་བཅས་པ། ནུབ་ཏུ་ཟངས་གཞོང་དུ་དབང་གཏོར་ཟླ་གམ་དམར་པོ་རྒྱ་སྐྱེག་དང་སིནྡྷུ་རས་བྱུགས་ཤིང་ཆང་དང་སྨན་སྣ་བཅས་པ། བྱང་དུ་ཟངས་སམ་སེང་ལྡེང་ཕུར་པ་རྟ་ཞལ་ཅན། མདུན་ངོས་སུ་ཚེ་བུམ་མགུལ་ཆིངས་དམར་པོ་དྲི་ཆབ་དང་སོ་ལྔས་བཀང་བའི་ཁར་ཚེའི་འབྲང་རྒྱས་བཞག་པ་དང་ཚེ་རིལ་ཚེ་ཆང། རྒྱབ་ཏུ་སྨན་གྱི་ཕོ་བྲང་རྣམས་ཀྱང་དེ་དག་གི་དབང་བསྐུར་ཆེད་དུ་བཀོད། ལས་བྱང་ནས་བཤད་པའི་ལས་བཞིའི་འབུལ་གཏོར་སོགས་ཚོགས་པར་བྱའོ། ༈ །འདོད་བུམ་ནང་འགྲོ་འདུལ་དབང་ལ། དཀྱིལ་འཁོར་བུམ་པ། དབུ་རྒྱན་ཐོད་ཆང་། མེ་ལོང་། རིལ་བུ། སྐུ་སྔགས་བྱང་། ཆོས་དབྱུག །རྗེས་གནང་ཆས་ཙཀ་ལི་མཚོན་བྱེད་བཅས་སྔ་མ་དང་འདྲ། ༈ ཕྱག་སྟོང་སྤྱན་སྟོང་གི་བཤམ་བཀོད་ཀྱང་དེ་ཁོ་ན་ལྟར་ལ་སྐུ་གཟུགས་བརྗེ། ༈ རྒྱལ་བ་རྒྱ་མཚོ་ལ། སིནྡྷུ་རའི་མཎྜལ་གཞུང་གསལ་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་དབུས་པདྨ་འདབ་བཞིའི་ལྟེ་བར་ཧྲཱིཿལ་སྙིང་པོས་བསྐོར་བ་རྡོ་རྗེ་རྣམས་བརྩེགས་ཏེ་བཞག ༈ རྒྱལ་རྒྱམ་ལྷ་ལྔའི་གཏོར་དབང་ལ། ཐོད་པའམ་རིན་པོ་ཆེའི་སྣོད་དུ་དབུས་དང་རྒྱབ་ཏུ་བླ་མ། གཡས་སུ་ཡི་དམ། གཡོན་དུ་མཁའ་འགྲོ །རྒྱབ་ཏུ་ཆོས་སྐྱོང་ཕོ་རྒྱུད་གཏོར་མ་བཅས་རྒྱན་སྤྲོས་ཅན་ཁྲིའུར་བཀོད། ༈ ཡང་སྙིང་འདུས་པ་ལ། རས་བྲིས་སྟེང་རྣམ་བུམ། གཡས་སུ་གཏོར་ཆེན། གཡོན་དུ་ཐོད་ཆང་། མདུན་དུ་ལྷ་ཙཀ་དང་ཡི་གེ་འབྲུ་བདུན་སྔགས་བྱང་། མར་མེ། མེ་ལོང་། རྒྱབ་ཏུ་རིལ་བུ་བུམ་པ་བཅས་བཤམ། ༈ ཉི་མ་སེང་གེའི་པདྨ་རྒྱལ་པོ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སྟེང་རྣམ་བུམ་ཆིངས་དམར་ཅན་གྱི་ཁར་ཐོད་ཆང་སིནྡྷུ་རའི་མེ་ལོང་ལ་ཡིག་བདུན་བྲིས་པས་བཀབ། དེའི་སྟེང་འཕྲུལ་སྟེགས་ལ་བླ་མའི་གཏོར་ཆེན། མདུན་སོགས་སུ་མྱང་གྲོལ་རིལ་བུམ། དབུ་རྒྱན། རྡོར་དྲིལ། མིང་དབང་། ལྷ་ཙཀ་ཚང་བ། ཕྲེང་དམར། མེ་ལོང་། རྒྱ་གྲམ་བཅས་བཀོད། ༈ དོན་དབང་ལ། དཀྱིལ་འཁོར་དབུས་བུམ་པ། གཡས་གཡོན་དུ་རིལ་བུམ་དང་། བླ་གཏོར། མདུན་དུ་ཐོད་ཆང་དང་མེ་ལོང་བཞག །རྩ་དབང་དང་སྦྲེལ་སྐབས་བཤམ་བཀོད་ཟུར་དུ་མི་དགོས། ༈ དེའི་ཚེ་དབང་ལ། དཀྱིལ་འཁོར་རམ་ཚོམ་བུ་དམར་པོ་ལྷ་གྲངས་ཀྱི་དབུས་སུ་རྣམ་བུམ་ཆིངས་དམར་ཚེ་རྫས་ཀྱི་བཅུད་ལྡན། གཡས་སུ་ཚེ་རིལ། གཡོན་དུ་ཚེ་ཆང་། མདུན་དུ་ཚེ་འབྲང་། རྒྱབ་ཏུ་ཚེ་མདའ་བཀོད་ལ་གཟུངས་ཐག་གིས་སྦྲེལ། ༈ པདྨ་ཀཱི་ལ་ཡའི་བྱིན་རླབས་ལ། གྲུ་གསུམ་མཐིང་ནག་དབུས་སུ་ཕུར་སྟེགས་ལ་ཕུར་པ་ཁྲོ་ཞལ་རྟ་གདོང་ཅན་ཉུངས་ཀར་དང་ཅོད་པན་ནག་པོ་བཏགས་པ་བཙུགས། མདུན་དུ་དཔལ་གཏོར་དང་། རཀྴའི་ཕྲེང་བ་བཅས་བཞག ༈ བྱང་གླིང་ཐུགས་ཆེན་ལྷ་དྲུག་ལ། མཎྜལ་པདྨ་འདབ་བརྒྱད་སྟེང་བུམ་པ་ཆིངས་དཀར། དབུས་སུ་འགྲོ་འདུལ་ཕྱག་བཞི་པའི་སྐུ། ཡིག་དྲུག །མེ་ལོང་། གཡས་སུ་པདྨའི་གྲི་གུག་དང་པད་དབྱུག །གཡོན་དུ་ཌཱ་རུ། ཐོད་ཁྲག །མདུན་དུ་རྡོ་རྗེ་ཁ་ཊྭཱཾ་ཐོད་པ་གླིང་བཞི་པ། རྒྱབ་ཏུ་གཏེར་བུམ་བཅས་བཀོད། ༈ བྱང་གཏེར་ཐུགས་རྗེ་ཆེན་པོ་འགྲོ་འདུལ་ལ། རས་བྲིས་དབུས་རྣམ་བུམ། ཕྱོགས་བཞིར་རིགས་དབང་ཆས། མདུན་རྒྱབ་གང་བདེར་བླ་གཏོར་ཨོ་རྒྱན་སྐུ་ཙཀ་བཙུགས་པ། ལྷ་ཙཀ །སྔགས་བྱང་། རྡོར་དྲིལ་དུང་གླེགས་བམ། སྣ་བདུན་དང་རྫས་བརྒྱད་ཕྱོགས་བསྡུས་བཅས། ༈ དོན་ཟབ་དགོངས་བསྒྲིལ་ལ། རས་བྲིས་སམ་ལྷ་གྲངས་ཚོམ་བུའི་སྟེང་གི་ཁྲིའུར་གཞུང་པོད་དམ་རྒྱུད་ཀྱི་གླེགས་བམ། མཐོང་གྲོལ་འཁོར་ལོས་བཀབ་པ། དེ་སྟེང་འཕྲུལ་སྟེགས་ལ་ཐུགས་རྗེ་ཆེན་པོའི་སྐུ་དང་། རྒྱབ་ཕྱོགས་མཆོད་རྟེན། མདུན་ཕྱོགས་རྣམ་རྒྱལ་བུམ་པ་རྣམས་བཀོད། དེའི་མཐའ་སྐོར་རམ་སྟེགས་ཟུར་པར་ཐེག་དགུའི་དབང་རྫས་སྣོད་སོ་སོར་བསྒྲིག་དགོས་པ། ཆོས་གོས་ལྷུང་བཟེད་གསེག་ཤང་། སྲུང་སྐུད་དམར་པོ་སློབ་མའི་གྲངས་མཉམ། ཤིང་ཏོག་དང་རུས་པའི་ཕྲེང་བ་སོ་ཤིང་། དུང་པུསྟི་རྩྭ་ཀུ་ཤའི་ཆུན་པོ་བསྣོལ་མ། མིག་དར་ཅོད་པན་རྡོར་དྲིལ་རིགས་ལྔའི་ཕྱག་མཚན། རྡོ་རྗེ་དང་ཕྲེང་བ། གསེར་ཐུར་དང་མེ་ལོང་། གསང་ཐོད་དང་མེ་ལོང་རིག་ཙཀ །རིན་ཆེན་སྨན་འབྲུའི་མཎྜལ་འདུ་བྱ། ༈ ཡང་གཏེར་རྒྱལ་བ་རྒྱ་མཚོ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སམ་འབྲུ་ཚོམ་ལྷ་གྲངས་དབུས་སུ་ཁྲིའུའི་ཁར་ཐོད་པ་མཚན་ལྡན་མྱང་གྲོལ་རིལ་བུས་ཕྱུར་བུར་བཀང་བ་དར་དམར་གྱིས་བཀབ་པའི་སྟེང་། སིནྡྷུ་རའི་མེ་ལོང་སྔགས་བྱང་བྲིས་པ་བཞག །མདུན་སོགས་ཕྱོགས་མཚམས་རྣམས་སུ་རྣམ་བུམ། དབུ་རྒྱན། རྡོར་དྲིལ། གཙོ་འཁོར་རྣམས་ཀྱི་ལྷ་ཙཀ་དགུ །སྔགས་བྱང་ཕྲེང་དམར། མེ་ལོང་། དར་དང་རིན་པོ་ཆེའི་རྒྱན། སྣ་ཚོགས་རྡོ་རྗེ། གླེགས་བམ། ཕྲིན་ལས་བཞིའི་འབྲང་རྒྱས་སྣོད་གཅིག་བསྡུས། གསང་ཐོད། རིག་ཙཀ་རྣམས་བཀོད། རིལ་བུ་དང་བྱང་སེམས་དཀར་དམར་སིནྡྷུ་ར་རྣམས་སྦྱར་བའི་ཐིག་ལེ་བཀོད་རྒྱུ་དང་། མགུལ་ལ་བཏགས་རྒྱུ་མྱང་གྲོལ་ཐུམ་བུ་སློབ་མའི་གྲངས་མཉམ་སོགས་བསྡོག་གོ ༈ །སངས་གླིང་ནོར་བུ་སྐོར་གསུམ་ལས་ཕྱི་རྒྱལ་པོ་ལུགས་ལ། མཎྜལ་ཡིག་བདུན་བྲིས་པའི་ཁར་འཕགས་པའི་སྐུ་བརྙན་དང་རྒྱལ་པོ་ལུགས་ཀྱི་གླེགས་བམ་བཀོད། བྱང་ཤར་དུ་རྟ་ནག་ཐོད་པའམ་དེའི་ཐོད་རུས་བསྲེས་པའི་ཟན་ལ་རྟ་མགོ་བཅོས་པའི་ནང་དུ་དར་ཟབ་འབྲུ་སྨན་རིན་པོ་ཆེ་རྣམས་དང། མཐིང་ཤོག་ལ་གསེར་རམ་མཚལ་གྱིས་རྟ་སྔགས་བྲིས་པ་གཞུག་ལ་དར་སྣས་བརྒྱན་ཅིང་དར་ནག་གིས་བཀབ་པ་འབྲུའི་སྣོད་དུ་བཞག །མཆོད་གཏོར་དཀར་དམར་བཤམ། ༈ ནང་ནོར་བུ་ལུགས་ལ། སྟ་གོན་རྫས་བཞི། རས་བྲིས་ཁར་རྣམ་རྒྱལ་བུམ་པ། མདུན་དུ་གཙོ་བོའི་སྐུ །ཡིག་དྲུག །ཕྲེང་བ། པད་དཀར་བཞིའི་ཙཀ་ལི་བཀོད། ༈ གསང་བ་ཡང་གསང་བླ་མེད་ལ། རས་བྲིས་སམ་ཚོམ་བུ་ལྔ་པའི་ཁར་ཁྲིའུར་རྣམ་རྒྱལ་བུམ་པ་ཐོད་ཆང་སིནྡྷུ་རའི་མེ་ལོང་ཆོས་འབྱུང་བསྣོལ་མའི་ནང་པདྨ་འདབ་བཞིའི་ལྟེ་བར་ཧྲཱིཿདང་འདབ་མར་ཧ་རི་ནི་ས་བྲིས་པ་བཞག་ལ་དར་དམར་གྱིས་བཀབ། ཤར་དུ་རྡོ་རྗེ། ལྷོར་དབུ་རྒྱན། ནུབ་ཏུ་གླེགས་བམ། བྱང་དུ་དྲིལ་བུ་རྣམས་བཀོད། ༈ རྡོ་གླིང་བདེ་གཤེགས་ཀུན་འདུས་ལ། དཀྱིལ་འཁོར་དབུས་རྣམ་བུམ་ལ་གཙོ་བོའི་སྐུས་བརྒྱན་པ། རྒྱབ་ཏུ་དབུ་རྒྱན་དང་ཨོ་རྒྱན་སྐུ། གཡས་སུ་སེང་ཕུར་དང་རྟ་མགྲིན། གཡོན་དུ་ཐོད་ཆང་དང་གསང་ཡེ། མདུན་དུ་རལ་གྲི །ཡིག་བཅུའི་སྔགས་བྱང་སོ་སོ་བ། གཙོ་བུམ་རྒྱབ་ངོས་ཁྲིའུ་ལ་གཏོར་ཆེན་གོང་གི་ལྷ་ལྔ་ལྟར། ཐོད་པ་ལྔ་ལ་དབུས་སུ་སྦྲང་། ཤར་སོགས་ལ་འོ་མ། ཆང་། བུར་ཆང་། འོ་མ་ཁྲག་སྦྱར་བླུགས་པ། རྡོར་དྲིལ། མེ་ལོང་རྨ་བྱའི་མདོངས་མར་མེ་ཐོད་ཆང་ཤེལ་རྡོ་བཅས་ལྔ་ཚོམ་དུ་བཀོད། དེའི་ཚེ་དབང་ལ། ཚེ་བུམ། ཚེ་འབྲང་། ཚེ་རིལ་ཆང་རྣམས་བཞག ༈ །ཐུགས་རྗེ་ཆེན་པོ་ངན་སོང་ཀུན་སྐྱོབ་ལ། རས་བྲིས་ཀྱི་དཀྱིལ་འཁོར་དབུས་ཁྲིའུ་ལ་རྣམ་བུམ་ཆས་བཅུད་ལྡན་པ་དང་ལྷན་ཅིག་ཏུ་ཐུགས་རྗེ་ཆེན་པོ་དཀར་དམར་གྱི་སྐུ་ཙཀ །ཡིག་བདུན་སོ་སོར་བྲིས་པའི་ཙཀ་ལིའང་བཀོད། མདུན་དུ་ཞི་གཏོར་སྐུ་ཙཀ་གིས་བརྒྱན་པ་དང་། གཡས་གཡོན་དུ་ཐོད་པའི་བདུད་རྩི། མར་མེ། དབུ་རྒྱན། ཕྲེང་བ། མེ་ལོང་ལ་མཚལ་གྱིས་ཡིག་བདུན་བྲིས་པ། ཤེལ་རྡོ། མེ་ལོང་། རས་དཀར་གྲུ་བཞི་ལ་མེ་ཏོག་གི་ཚོམ་བུ་ལྔ་བཀོད་པ། གདུགས། རྡོར་དྲིལ། རྒྱུད་དམ་སྒྲུབ་ཐབས་ཀྱི་གླེགས་བམ། མེ་ལོང་རྣམས་བཀོད། ༈ རད་གླིང་ཐུགས་རྗེ་གསང་འདུས་དབང་ཆེན་སྟོང་དབང་དང་བཅས་པ་ལ། སྟ་གོན་རྫས་བཞི། དཀྱིལ་འཁོར་རས་བྲིས་དབུས་རྐང་གསུམ་ལ་རྣམ་བུམ་ཉེར་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་གཟུངས་རྡོར་ལྡན་པ་བཞག །དབུ་རྒྱན། ཕྲེང་བ་སོགས་ཞི་ཆས་བདུན། རིགས་ལྔའི་ཕྱག་མཚན། དྲིལ་བུ་དང་མེ་ཏོག་ཕྲེང་བ། རིགས་ལྔ་ཡབ་ཡུམ། སྐུ་བཞི། སེམས་དཔའ་སེམས་མ་བཅུ་དྲུག །ཐུབ་པ་དྲུག །སངས་རྒྱས་སྟོང་བཅས་ལྷ་ཙཀ་ཡོངས་རྫོགས། གཞུང་པོད་ཕྲེང་བས་དྲིལ་བ། ཤེལ་རྡོ་མེ་ལོང་། འབྲུ་གསུམ་མཚན་པའི་ཕྱག་རྒྱ་གསུམ་རྣམས་མདུན་སོགས་སུ་བཞག །བཟའ་བཅའ་སྣ་ཚོགས་པའི་ཚོགས་རྫས་སྣོད་གཅིག་ཏུ་བཞག་པ། རྫས་བརྒྱད། ཚེ་འབྲང་རྣམས་ཀྱང་ཅི་བདེར་བཀོད། མྱང་གྲོལ་བུམ་དབང་སྦྲེལ་ན་མདུན་དུ་སྐྱེ་བདུན་རིལ་བུས་བཀང་བའི་བུམ་པ་རིགས་ལྔས་ཁ་བརྒྱན་པ། གཡས་ཕྱོགས་སུ་གསང་དབང་དཀྱིལ་འཁོར་མཎྜལ་ལ་སིནྡྷུ་ར་བྱུགས་ཤིང་ཆོས་འབྱུང་བྲིས་པའི་དབུས་སུ་ཀ་པཱ་ལ་ཆོས་སྨན་ཆང་སྦྱར་གྱིས་བཀང་བ་དར་དམར་གྱིས་ཁ་བཀབ་པའི་སྟེང་དུ་མེ་ལོང་ལ་སིནྡྷུ་ར་ཆང་སྦྱར་བྱུགས་པ་ལ་ཆོས་འབྱུང་དབུས་སུ་ཧྲཱིཿམ། ཕྱོགས་བཞིར་ཧ་རི་ནི་ས་བཞག །གཡོན་ཕྱོགས་སུ་དབང་བཞི་པའི་དཀྱིལ་འཁོར་འཇའ་རིས་མུ་ཁྱུད་ལྔ་ལྡན་གྱི་དབུས་སུ་བནྡྷ་བདུད་རྩིས་བཀང་བའི་ཁ་མེ་ལོང་གིས་བཀབ་ལ་ཤེལ་རྡོ་དང་རྨ་བྱའི་སྒྲོ་ཐིག་བཞག །གཏོར་དབང་ཆས་དབང་གཏོར་གཞུང་གསལ་རྒྱན་ལྡན་དང་། ཐོད་པའི་བདུད་རྩི་མེ་ལོང་གིས་བཀབ་པའི་སྟེང་མན་ཤེལ་བཀོད། ༈ རྣལ་འབྱོར་རྒྱུན་དབང་ཡང་བསྐུར་ན། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ་ཆིངས་དམར་ཅན་གྱི་ཁར་གཏོར་མ་རི་རབ་བཞི་བརྩེགས་དེ་སྟེང་ཟླུམ་པོ། དེ་སྟེང་པདྨ་འདབ་བརྒྱད་ཁར་བུམ་པ་པད་སྤུངས་ནོར་བུས་བརྒྱན་པ་བཞག །གཡས་གཡོན་དུ་དབུ་རྒྱན། ལྷ་ཙཀ་ཚང་བ། ཞི་ཆས། རིགས་ལྔ་ཡབ་ཡུམ་དང་རྡོ་རྗེ་གསུམ་གྱི་ཕྱག་རྒྱ་གླེགས་བམ། ཕྲེང་བ། ཚེ་གཏོར། ཐོད་པའི་བདུད་རྩི། རིག་ཙཀ །ཤེལ་རྡོ་མེ་ལོང་། ཚོགས་རྫས་བཟའ་བཏུང་། རྫས་བརྒྱད་རྣམས་དང་། རིལ་བུའི་དབང་བསྐུར་ན་དེའི་བུམ་པའང་བཀོད། ༈ པད་གླིང་ཐུགས་ཆེན་མུན་སེལ་སྒྲོན་མེ་ལ། རས་བྲིས་ཀྱི་དཀྱིལ་འཁོར་རམ་ཚོམ་བུ་ལྷ་གྲངས་བཀོད་པའི་དབུས་སུ་མཉྫི་ལ་རྣམ་རྒྱལ་བུམ་པ་དྲི་བཟང་ཆུ་དང་སོ་ལྔ་སྦྱར་བའི་བཅུད་ལྡན་མགུལ་ཆིངས་དམར་པོ་ཁ་རྒྱན་གྱིས་སྤྲས་པ། མདུན་དུ་དབང་རྟེན་མར་མེ། ཡི་གེ་འབྲུ་བདུན་སོ་སོར་ཕྲལ་བའི་ཙཀ་ལི། གཡས་སུ་དཔལ་གཏོར་རྒྱན་ལྡན་དར་གདུགས་ཅན། གཡོན་དུ་ཐོད་ཆང་དང་མེ་ལོང་གསལ་བ་རྣམས་བཀོད། ༈ གསུང་རྒྱུན་ཁྲོམ་ཤོག་མ་ལ། དཀྱིལ་འཁོར་རས་བྲིས་ཚོམ་བུ་གང་འཛོམ་གྱི་དབུས་སུ་རྣམ་རྒྱལ་བུམ་པ་བཅུད་ལྡན་མགུལ་ཆིངས་ཁ་རྒྱན་དང་བཅས་པ། མདུན་དུ་ལྷ་ཙཀ་བཅུ་གཉིས། ཨོཾ་ཨཱཿཧཱུྃ་ཧྲཱིཿདང་ཡི་གེ་འབྲུ་བདུན་སོ་སོར་བྲིས་པའི་ཙཀ་ལི། གཡས་སུ་དབང་གཏོར། གཡོན་དུ་ཐོད་པ་བདུད་རྩིས་བཀང་བ་བཞག ༈ །འགྲོ་འདུལ་ལས་འཕྲོ་གླིང་པའི་ཐུགས་ཆེན་དོན་གསལ་སྒྲོན་མེ་ལ་དབང་གི་རྣམ་གྲངས་བདུན་ལས། དང་པོ་ཁྲུས་དབང་ལ། སྟེགས་བུའི་དབུས་སུ་རྣམ་བུམ་མགུལ་ཆིངས་དཀར་པོ་དང་ལས་བུམ་དམར་པོ་ཅན། ཉེར་ལྔའི་བཅུད་ལྡན་ཁ་རྒྱན་གྱིས་སྤྲས་པ་བཞག །གཉིས་པ་བགེགས་སྦྱོང་སྟ་གོན་དབང་ལ། དཀྱིལ་འཁོར་གཞུང་གསལ་གྱི་དབུས་དང་ཕྱོགས་བཞིར་དཔལ་གཏོར་ལྔ་ལ་བུདྡྷ་སོགས་རྟ་མགྲིན་རིགས་ལྔའི་ཙཀ་ལི་བཙུགས་པ་དང་། ཤར་དུ་དབང་བུམ། བྱང་དུ་ཁྲུས་བུམ་བཀོད། ཕྱི་མཆོད་བསྐོར་བཤམ། དཔུང་སྐུད་ཚོན་སྣ་ལྔ་བསྒྲིམ་མམ་གང་འབྱོར། ཀུ་ཤའི་ཆུན་པོ། ལྕགས་སྣོད་དུ་མེ་ཐབ་གྲུ་གསུམ་མཐིང་ནག་མེ་རིས་བསྐོར་བའི་སྟེང་དུ་སྐྱེར་པ་སོགས་དྲག་ཤིང་གྲུ་གསུམ་དུ་བརྩེགས་པ། མཆོད་རྫས་སྨན་རཀ་གཏོར་མ། མེ་རྫས་དུག་ཁྲག་མུ་ཟི་གུ་གུལ་ནག་པོ་རྟ་སྦང་སྦང་ཕྱེ་རྣམས་མར་ནག་གམ་ཨ་རག་གིས་ངར་བཏགས་པ་དང་། སྤྱི་མཐུན་ཉེར་མཁོའི་ཡོ་བྱད་འདུ་བྱ། གསུམ་པ་བུམ་དབང་ལ། དཀྱིལ་འཁོར་གཞུང་གསལ་དབུས་ཁྲིའུའི་སྟེང་རྣམ་རྒྱལ་བུམ་པ་སོ་ལྔའི་བཅུད་ལྡན་མགུལ་ཆིངས་ཅན་གྱི་ཁར་འོད་དཔག་མེད་དང་སྤྱན་རས་གཟིགས་རིགས་ལྔའི་ཙཀ་ལི་བཀོད། ཤར་དུ་རྡོར་དྲིལ། ལྷོར་དབང་གཏོར། ནུབ་ཏུ་ཐོད་ཁྲག །བྱང་དུ་སྨན་ཐོད། པད་འདབ་བརྒྱད་ལ་ཞལ་ཟས་བརྒྱད་བཀོད་པ་ལ་ཤར་དུ་ལྷ་དབང་སོགས་ཐུབ་དྲུག་ཙཀ་ལི་གཡས་བསྐོར་དུ་བཙུགས། བྱང་དང་བྱང་ཤར་གཉིས་ལ་མི་དགོས། སྒོ་བཞིར་དཔལ་གཏོར་བཞི་ལ་རྣམ་རྒྱལ། གཤིན་རྗེ། རྟ་མགྲིན། འཁྱིལ་བ་བཞིའི་ཙཀ་ལི་བཙུགས། རྒྱལ་སྲིད་དང་རྟགས་བརྒྱད་སོ་སོ་བ། འདིའི་རྒྱལ་སྲིད་ལ་འཁོར་ལོའི་ཚབ་ཏུ་རྒྱལ་པོ་རིན་ཆེན་ཕྱག་ན་གསེར་འཁོར་བསྣམས་པ་དགོས། འདི་མཚུངས་རྡོར་གླིང་སོགས་གཏེར་རྙིང་གཞན་ལའང་སྣང་བས་དཀྱུས་འགྲེས་ཁྱད་གསོད་མི་རུང་བ་འདྲ། བྱང་དུ་དམ་ཆུ། ཤར་དུ་ཁྲུས་བུམ་བཅས་བཤམ། བཞི་པ་གསང་དབང་ལ། དཀྱིལ་འཁོར་དབུས་མཉྫིའི་སྟེང་རྣམ་བུམ་དུ་སོ་ལྔའི་རྫས་ལ་ཡིག་བདུན་བཟླས་པས་བྱིན་གྱིས་བརླབས་པའི་བཅུད་ལྡན་མགུལ་ཆིངས་དཀར་པོ་ཁ་རྒྱན་ལྡན་པ་དང་། ཨོཾ་དཀར་པོ་ལ་ཡིག་དྲུག་གིས་བསྐོར་བའི་གསུང་དཀྱིལ་བཀོད། དེ་རྒྱབ་འདབ་བཞིའི་ཤར་ནས་བརྩམ་ཧཱུྃ་སྔོན་པོ། ཏྲཱཾ་སེར་པོ། ཧྲཱིཿདམར་པོ། ཨཱཿལྗང་གུ་བཞི་ལ་རེ་རེ་བཞིན་ཡིག་དྲུག་གིས་བསྐོར་བའི་གསུང་དཀྱིལ་བཞི་བཀོད། ཡིག་དྲུག་ཀྱང་ཨོཾ་དཀར་པོ་སོགས་ཐུབ་དྲུག་སོ་སོའི་སྐུ་མདོག་ལྟར་བྲི་བར་གསུངས་པ་གྲུབ་ན་ལེགས། དེ་རྒྱབ་འདབ་བརྒྱད་ལ་ཕྱོགས་བཞིར་བུམ་པ་མཐིང་སེར་དམར་ལྗང་གི་དར་ཆིངས་ཅན་བྱང་སེམས་དཀར་པོ་དང་། དཀར་གསུམ་བཅུད་ལྡན། མཚམས་བཞིར་ཐོད་པ་མཚན་ལྡན་བཞི་ཆང་དང་བྱང་སེམས་དམར་པོ་མངར་གསུམ་སྦྱར་བས་བཀང་བ་བཞག །ལྔ་པ་ཤེས་རབ་ཡེ་ཤེས་ཀྱི་དབང་ལ། དཀྱིལ་འཁོར་གཞུང་མཐུན་བྲིས་པའི་ཟླ་གམ་དཀར་པོ་ལ། ཕོ་ཐོད་ནང་འཁོར་ལོ་རྩིབས་བཞིའི་དབུས་དང་རྩིབས་ལ་རིགས་ལྔའི་ས་བོན་བྲིས་པའི་ནང་དུ་བྱང་སེམས་དཀར་པོ་དང་དཀར་གསུམ་བྱུགས་ལ་དར་དཀར་གྱིས་བཀབ་པ་བཞག །ཟླ་གམ་དམར་པོར་མོ་ཐོད་ནང་པདྨ་འདབ་བཞིའི་དབུས་དང་འདབ་ལྔར་ཡུམ་ལྔའི་ས་བོན་བྲིས་པའི་ནང་དུ་བྱང་སེམས་དམར་པོ་དང་མངར་གསུམ་བླུགས་ལ་དར་དམར་གྱིས་བཀབ་པ་བཞག །དེ་རྒྱབ་འདབ་བཞིའི་ཤར་དུ་རྣམ་བུམ། ལྷོར་དབུ་རྒྱན། ནུབ་ཏུ་དབང་གཏོར། བྱང་དུ་རྡོར་དྲིལ་དང་ཁྲུས་བུམ། གཞན་ཡང་དཔའ་བོ་དང་རིག་མའི་ཙཀ་ལི་འདུ་བྱ། དྲུག་པ་ཚིག་དབང་རིན་པོ་ཆེ་ལ། དཀྱིལ་འཁོར་དབུས་དང་ཕྱོགས་བཞིར་མཆོད་རྟེན་དཀར་མཐིང་སེར་དམར་ལྗང་གུ་ལྔ་དང་མེ་ལོང་རེ་རེ་བཞག །བདུན་པ་རིག་པ་རྩལ་དབང་ལ། དཀྱིལ་འཁོར་དབུས་སུ་སྤྱན་རས་གཟིགས་ཀྱི་སྐུ་རིན་པོ་ཆེ་ལས་གྲུབ་པ་བཞག །མཐར་དར་ཁ་དོག་ལྔ་སོ་སོར་བཏིང་བའི་སྟེང་དུ་ཁ་དོག་སྣ་ཚོགས་པའི་སྣོད་རྣམས་སུ་ཆུ་ལ་ཚོན་གྱིས་ཁ་དོག་བསྒྱུར་བ་ལྟ་བུའི་བཅུད་ཀྱང་དེ་མཚུངས་བླུགས་པ་དང་། ཤེལ་རྡོ་མེ་ལོང་བཀོད། ༈ མངའ་རིས་གྲུབ་ཆེན་གྱི་ཡིག་དྲུག་གསོལ་འདེབས་ཀྱི་རིག་གཏད་ལ། མཎྜལ་པདྨ་འདབ་མ་དྲུག་པའི་སྟེང་ཁྲིའུར་འགྲོ་འདུལ་སྐུ་བརྙན། འདབ་དྲུག་ལ་མ་ཎི་འབྲུ་དྲུག་གི་ཙཀ་ལི། གཡས་སུ་བུམ་པ་ཆིངས་དཀར། གཡོན་དུ་ཤེལ་ཕྲེང་དང་པད་དཀར་ཙཀ་ལི་བཀོད། ༈ ལེགས་ལྡན་རྗེའི་འཁོར་བ་དབྱིངས་སྒྲོལ་ལ། སོ་ཤིང་སོགས་རྫས་བཞི། དཀྱིལ་འཁོར་རས་བྲིས་སམ་ལྷ་གྲངས་ཚོམ་བུའི་སྟེང་རྣམ་བུམ་ཆིངས་དམར། དབུས་མདུན་ཅོད་པན་དམར་པོ། གཙོ་འཁོར་བཅོ་ལྔའི་ལྷ་ཙཀ །ཕྱོགས་གཞན་དུ་དབུ་རྒྱན། རྡོར་དྲིལ། གསང་ཐོད། རིག་ཙཀ །ཤེལ་རྡོ་མེ་ལོང་། གདུགས་རྒྱལ་མཚན་གླེགས་བམ་རྣམས་དངོས་སམ་ཙཀ་ལི་སོ་སོ་བཞག །སློབ་མ་མཆོད་པ་ཉེར་སྤྱོད་ལྔའང་བསྡོག ༈ །ཞིག་གླིང་འཁོར་བ་ལས་སྒྲོལ་དབང་ཆེན་ལ། ཞི་བའི་ཐབ་དང་སྲེག་རྫས་ཏིལ་ཡུངས། སྟ་གོན་རྫས་བཞི་བསྡོག །དཀྱིལ་འཁོར་རས་བྲིས་དབུས་ཁྲིའུ་ལ་རྣམ་བུམ་ཉེར་ལྔའི་བཅུད་དང་མགུལ་ཆིངས་དཀར་པོ་ཁ་རྒྱན་གཟུངས་རྡོར་ལྡན་པ་བཞག །རྒྱབ་ངོས་སུ་སྒྲུབ་གཏོར་དོན་དབང་གི་སྐབས་སུ་བཤད་པ་ལྟར་རམ་བླ་གཏོར་དམར་པོ་པད་འདབ་ཅན་རྒྱན་ལྡན་བཞག་ཀྱང་འཐུས། བཏགས་གྲོལ་འཁོར་ལོ་དར་སྣས་བཀླུབས་པ་ཁྲིའུ་ལ་བཀོད། མདུན་དུ་སངས་རྒྱས་སྟོང་རྩ། སྤྱན་རས་གཟིགས་ལྔ། ནོར་འཛིན་གསང་འཛིན། སྒྲོལ་མ་སྔོ་དཀར། སེམས་དཔའ་བརྒྱད། སེམས་མ་བརྒྱད། ཐུབ་པ་དྲུག །ཁྲོ་བོ་བཞི་བཅས་ལྷ་ཙཀ་ཚང་བ། དབུ་རྒྱན། ཞི་ཆས། ཕྱག་མཚན་རྣམས་བཀོད། སྨན་རཀ་གཏོར་གསུམ། གཡས་སུ་གསང་དབང་ཐོད་པ་བདུད་རྩིས་བཀང་བའི་ཁར་སིནྡྷུ་རའི་ཐིག་ལེ་ཅན་གྱི་མེ་ལོང་དང་ཤེལ་རྡོ་བཞག །གཡོན་དུ་རྗེས་གནང་ཆས། རྫས་བརྒྱད། རྒྱལ་སྲིད་སོ་སོ་བ། འཁོར་ལོ། །དུང་། པུསྟི། རྡོ་རྗེ། དགང་བླུགས། མཆོད་གཏོར། གདབ་ཕུར། མེ་ལོང་གསལ་བ། ཕྲེང་བ་རིག་ཙཀ་རྣམས་བཞག །རྒྱབ་ངོས་སམ་སྟེགས་བུ་ཟུར་པར་ཐེག་པ་རིམ་དགུའི་དབང་རྫས། ཆོས་གོས་རྣམ་གསུམ་མཁར་གསིལ་ལྷུང་བཟེད། ཐོད་པ་བུམ་རིལ་གདུགས་པུསྟི་དང་བཅས་གསུམ། བུམ་པ། ཕྲེང་བ། རྡོར་དྲིལ་གསུམ། རུས་རྒྱན་གྲི་ཐོད་ཁ་ཊྭཱཾ་ཀ །བྱང་སེམས་དཀར་དམར། མན་ཤེལ་བཅས་གསུམ་སྟེ། གསུམ་ཚན་གསུམ་ཕྱོགས་བཀོད་ལེན་བདེ་བྱ། བཀའ་སྲུང་དྲེགས་པའི་རྗེས་གནང་གི་ཆས་དཀྱིལ་འཁོར་མཐའ་སྐོར་གྱི་ཤར་དུ་ཆོས་འབྱུང་དཀར་པོ་མེ་རིས་བསྐོར་བའི་སྟེང་དུ་དཔལ་ལྷའི་གཏོར་མ་འབྲང་རྒྱས་དཀར་པོ། ལྷོར་སེར་པོའི་སྟེང་དུ་ཤན་པའི་གཏོར་མ་གྲུ་གསུམ་ར་མགོས་མཚན་པ། ནུབ་ཏུ་དམར་པོའི་སྟེང་དུ་སྲིན་པོའི་གཏོར་མ་གྲུ་གསུམ་ར་ཤས་བརྒྱན་པ། བྱང་དུ་ལྗང་གུའི་སྟེང་དུ་མཱ་ར་སྙིང་ཟན་གྱི་གཏོར་མ་གྲུ་གསུམ་ཙིཏྟས་བརྒྱན་པ། བྱང་ཤར་མཐིང་ནག་གི་སྟེང་དུ་གཟའ་གདོང་གཏོར་མ་གྲུ་གསུམ་མིག་གིས་བརྒྱན་པ། ཤར་ལྷོར་ལྗང་གུའི་སྟེང་དུ་ཀླུ་གཏོར་སྦྲུལ་གྱིས་བརྒྱན་པ། ཆོས་འབྱུང་ཐམས་ཅད་མེ་རིས་བསྐོར་བ་འགྲེ །ནུབ་གཡོན་དུ་པདྨ་དཀར་པོ་འདབ་བཞིའི་སྟེང་དུ་ཐང་ལྷའི་གཏོར་མ་གངས་རིའི་གཟུགས་ཅན། འཛོམ་ན་སོ་སོའི་སྐུ་ཙཀ་བཙུགས་པ་བཀོད། ༈ དོན་དབང་ལ། སྟེགས་བུར་གཏོར་མ་རི་རབ་སྟེང་ཟླུམ་བསྐོར། དེ་སྟེང་པདྨ་འདབ་བརྒྱད། དེ་སྟེང་བུམ་པ་པདྨས་བསྐོར་བའི་ཁར་རིན་པོ་ཆེས་བརྒྱན་པ། རི་རབ་མཐའ་སྐོར་པདྨ་ཕྱི་ནང་སྦྲགས་མ་ཡོད་རྒྱན་སྤྲོས་ཅན་བཤམ། མདུན་དུ་ཐོད་ཆང་ཁར་མེ་ལོང་དང་ཤེལ་རྡོ་བཞག ༈ ཡོངས་རྫོགས་གཏད་རྒྱའི་དབང་ལ། དཀྱིལ་འཁོར་དབུས་སུ་མཉྫིའི་ཁར་རྣམ་བུམ། ཁ་རྒྱན་ལ་རབ་གཙོ་འཁོར་ཡོངས་འཛུགས་དང་། མ་འཛོམ་ན་བླ་མ་དང་འཕགས་པའི་སྐུ་ཙཀ་བཞུགས། གཡས་སུ་བླ་མའི་གཏོར་མ་རིན་ཆེན་ཟུར་དྲུག་དང་། འཕགས་པའི་གཏོར་མ་པད་ཕྲེང་བུམ་དབྱིབས། དཔལ་མགོན་གཏོར་མ་དཔལ་གཏོར་ལ་བཤོས་བུ་བརྒྱད་ཀྱིས་བསྐོར་བ་སྐུ་ཙག་གིས་བརྒྱན་པ། གཡོན་དུ་ཐོད་ཆང་དམ་རྫས་སྦྱར་བའི་ཁར་མེ་ལོང་ལ་སིནྡྷུ་རའི་དཀྱིལ་འཁོར་པདྨ་འདབ་བརྒྱད། དབུས་སུ་ཧྲཱིཿམ། མཐའ་སྐོར་དུ་རྩ་སྔགས་དང་དབྱངས་གསལ་གྱིས་བསྐོར་བས་བཀབ་ལ་དར་དམར་གྱིས་གཡོགས་པའི་སྟེང་ཤེལ་རྡོ་བཞག །མདུན་དུ་སྒྲུབ་དཔེ་ཕྲེང་བ་རྡོར་དྲིལ་རྣམས་རིན་པོ་ཆེའི་སྣོད་འབྲུས་གང་བའི་ནང་དུ་བཞག །རྒྱབ་ཏུ་བཀའ་སྲུང་བྱེ་བྲག་པའི་གཏོར་མ་གོང་སྨྲོས་སྐུ་ཙག་གིས་བརྒྱན་པ་རྣམས་སྣོད་གཅིག་ཏུ་བཞག་གོ ༈ །གྲོལ་ཏིག་པདྨའི་དབང་ཕྱུག་ལ། ཚོམ་བུ་གཅིག་གི་ཁར་བུམ་ཐོད་མེ་ལོང་ཤེལ་རྡོ་རྣམས་བརྩེགས། ༈ འཇའ་ཚོན་ངན་སོང་རང་གྲོལ་བཤམ་བཀོད་གོང་གསལ་རྒྱལ་པོ་ལུགས་ཀྱི་རྩ་དབང་དང་འདྲ་བ་ལས་ལྷ་དབང་རྒྱས་པ་བྱེད་ན་ཙཀ་ལི་ཚང་བ་དགོས། ༈ བདུད་འདུལ་ནམ་མཁའ་རྒྱལ་པོ་ལ། སྟ་གོན་རྫས་བཞི། སྔོན་འགྲོ་ཐེག་དགུའི་དབང་ཆས་ཟུར་དུ་བཤམ། དཀྱིལ་འཁོར་དབུས་ཁྲིའུ་ལ་རྣམ་བུམ་བཅུད་ལྡན་མགུལ་ཆིངས་དཀར་པོ་ཁ་རྒྱན་གསེབ་གཙོ་འཁོར་ཡོངས་རྫོགས་སམ་གཙོ་བོའི་སྐུ་ཙམ་བཞུགས། ཤར་དུ་མེ་ལོང་སྟེང་སིནྡྷུ་རའི་རིལ་བུ། ལྷོར་བནྡྷའི་བདུད་རྩི། ནུབ་ཏུ་དབང་གཏོར་རྒྱན་ལྡན། བྱང་དུ་ལས་བུམ་སེང་ཕུར་ཧྲཱིཿདམར་ཁ་རྒྱན་ཅན། དབུས་སུ་ལྷ་ཙཀ་བཅུ་གཅིག །ཤེལ་རྡོ། སྦ་དཀར་ཚིགས་གསུམ། ཤེལ་ཕྲེང་། ཡིག་བཅུ། བཀྲ་ཤིས་རྫས་རྟགས། རྒྱལ་སྲིད་རྣམས་ཀྱང་གང་བདེར་བཞག་གོ ༈ །རྒྱ་ཅན་འཇིག་རྟེན་དབང་ཕྱུག་ལ། དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་སུ་མཉྫིའི་སྟེང་དུ་རྣམ་བུམ་བཅུད་ལྡན་གཟུངས་རྡོར་ལྷ་ཙཀ་གཙོ་འཁོར་དགུ་དང་བཅས་པ། ཤར་དུ་སྨན་གཏོར་རཀྟ། ལྷོར་རིགས་ལྔ་དར་དཔྱངས་དང་བཅས་པ། ནུབ་ཏུ་རྡོ་རྗེ། བྱང་དུ་དྲིལ་བུ། ཤར་ལྷོར་ཆོས་དབྱུག །ལྷོ་ནུབ་ཏུ་རྐང་འོག་གི་འཁོར་ལོ་དང་དུང་། ནུབ་ཏུ་དབང་སྟེགས་གདུགས་དང་བཅས་པ། བྱང་དུ་པུསྟི་དང་རྡོར་དྲིལ། བྱང་ཤར་དུ་གསང་རྫས་ཀྱི་སྣོད་བདུད་རྩིའི་ཐོད་པ་བཅས་བཤམ་མོ། ༈ །གནམ་ཆོས་རྒྱལ་རྒྱམ་ལྷ་ལྔ་ལ། ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། རྒྱབ་ཏུ་དཔལ་གཏོར། གཡས་གཡོན་དུ་ཤེལ་ཕྲེང་དང་རྡོ་རྗེ། ཙཀ་ལི་ཕྲེང་བ་དང་པད་དམར། ཕྲེང་བ་མེ་ཏོག་ནོར་བུ་པད་དམར་རལ་གྲི་ཕྱོགས་བསྡུས་བཅས་བཀོད། ༈ གར་དབང་ཟླ་རྒྱལ་གྱི་རྩ་གསུམ་སྙིང་ཐིག་ལ། དཀྱིལ་འཁོར་རས་བྲིས་སམ་མཎྜལ་ལ་མེ་ཏོག་གི་ཚོམ་བུ་གཙོ་འཁོར་ལྔ་བཀོད་པའི་དབུས་སུ་མཉྫིའི་ཁར་རྣམ་རྒྱལ་བུམ་པ་སོ་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་གཟུངས་ཐག་དང་བཅས་པ། མདུན་དུ་གུ་རུའི་སྐུ་ཙཀ་དང་དབུ་རྒྱན། གཡས་སུ་རྟ་མགྲིན་སྐུ་དང་ཕུར་པ། གཡོན་དུ་གསང་ཡེའི་སྐུ་དང་ཐོད་ཆང་། རྒྱབ་ཏུ་གཏོར་མ་ཟུར་གསུམ་གྲི་གུག་དང་རལ་གྲི །མཚམས་སོགས་སུ་ཡིག་དྲུག་སོ་སོར་བྲིས་པའི་ཙཀ་ལི། ཤེར་དབང་ཆས་བུམ་པར་ཆང་དང་བུར་སྦྲང་སྦྱར་བ། སྣོད་གཅིག་ཏུ་ཐོད་པར་བུར་ཆང་སྦྱར་བ་དང་འོ་མ་མེ་ལོང་བཅས། སྣོད་གཅིག་ཏུ་མེ་ལོང་དཀར་མངར་སྐྱུར་དང་ཁྲག་རྣམས་སྣོད་ཆུང་སོ་སོར་བླུགས་པ། ཚིག་དབང་ཆས་ཐོད་ཆང་མེ་ལོང་ཤེལ་རྡོ་སྒྲོ་མདོངས་རྣམས་བཀོད། ༈ ཚེ་དབང་ལ། རྣམ་བུམ་སྔ་མས་འཐུས། དེ་སྟེང་ཁྲིའུ་ལ་ཚེ་འབྲང་བླ་མའི་སྐུ་ཙཀ་གིས་བརྒྱན་པ། གཡས་སུ་བྱེ་རུའི་སྡོང་པོ་གསེར་གཡུ་བཅས། མ་འཛོམ་ན་བྲིས་པའི་ཙཀ་ལི། གཡོན་དུ་མདའ་དར། རྒྱབ་ཏུ་དཔལ་གཏོར། མདུན་དུ་ཚེ་ཆང་བཅས་བཤམ། ༈ སྨིན་གླིང་བདེ་གཤེགས་ཀུན་འདུས་ལ། སྟ་གོན་རྫས་བཞི་སློབ་མ་མཆོད་པ་ཉེར་སྤྱོད་བཞི། རས་བྲིས་དབུས་སུ་རྣམ་བུམ། རིག་དབང་ཆས་བཞི། ལྷ་ཙཀ །སྔགས་བྱང་། ཕྲེང་དམར། མདུན་དུ་ཐོད་ཆང་། ལི་ཁྲི་མེ་ལོང་ཆོས་འབྱུང་གཉིས་བརྩེགས་ལྟེ་བར་ཧྲཱིཿམཐར་སྔགས་ཕྲེང་ཟུར་དྲུག་དགའ་འཁྱིལ་དང་བཅས་པའི་ཁར་ཤེལ་རྡོ་བཞག་པ་དར་དམར་གྱིས་བཀབ། རྒྱབ་ཏུ་གཏོར་མ་བང་རིམ་བཞི་སྟེང་དཔལ་གཏོར་པད་འདབ་བཞི་པ་མཚམས་བཞིར་མཐེབ་རིལ་ལྔ་བརྩེག་ཅན་རྒྱན་སྤྲོས་སྐུ་ཙཀ་དར་གདུགས་ཅན། བཀའ་སྲུང་གཏོར་མ་དཀར་དམར་བཅས་བཤམ། ༈ ནང་སྒྲུབ་གར་ཚེ་ལ། རས་བྲིས་དབུས་རྣམ་བུམ་ཁར་ཐོད་ཆང་དར་དམར་གྱིས་བཀབ་པའི་སྟེང་མེ་ལོང་གཟུངས་རྡོར་བཞག །ཚེ་རིལ་ཆང་མདའ་དར་བཅས། ༈ ཀློང་གསལ་ཡང་གསང་བླ་མེད་ལ། སྟ་གོན་རྫས་བཞི། དཀྱིལ་འཁོར་སྟེང་རྣམ་བུམ་ཆིངས་དམར། རྒྱབ་ཏུ་དབང་གཏོར། མདུན་སོགས་སུ་ལྷ་ཙཀ་ཚང་བ། དབུ་རྒྱན། རྡོར་དྲིལ། གསང་ཐོད། རིག་ཙཀ །མེ་ལོང་ཤེལ་རྡོ། མཐའ་རྟེན་བཅས་བཀོད། ༈ སྟག་ཤམ་མི་ཏྲ་སྙིང་ཐིག་ལ། སྟ་གོན་རྫས་སོ་ཤིང་སྲུང་སྐུད་དམར་པོ་ཀུ་ཤ །དཀྱིལ་འཁོར་རས་བྲིས་སམ་ལྷ་གྲངས་ཀྱི་འབྲུ་ཚོམ་བཀོད་པའི་དབུས་སུ་ཁྲིའུར་རྣམ་བུམ་མགུལ་ཆིངས་དཀར་པོ་ཉེར་ལྔའི་རྫས་ལྡན་འབྲས་བུ་ཅན་གྱི་ཤིང་གིས་ཁ་བརྒྱན་པའི་གསེབ། པད་དཀར་གྱིས་མཚན་པ། མདུན་ངོས་སུ་ལྷ་ཙཀ་གཙོ་འཁོར་བཅུ་དྲུག །གཡས་སུ་ཡིག་དྲུག་གསེར་བྲིས་ཀྱི་སྔགས་བྱང་། གཡོན་དུ་ཤེལ་ཕྲེང་དང་པད་དཀར། རྒྱབ་ཏུ་རིགས་ལྔའི་སྐུ་དང་ས་བོན་སོ་སོར་ཕྲལ་བ། རིགས་ལྔའི་ས་བོན་ཕྱོགས་བསྡུས་འཇའ་འོད་ཀྱིས་བསྐོར་བ་དང་ཤེལ་རྡོ་རྨ་བྱའི་སྒྲོ །བར་མཚམས་སོགས་གང་བདེར་གླེགས་བམ། བཟླས་ཕྲེང་། ཕྱི་ནང་གི་མཆོད་པ་རྣམས་སྣོད་གཅིག །མཆོད་རྫས། བུམ་ཙཀ །དགང་བླུགས། རྟགས་བརྒྱད། རྒྱལ་སྲིད། ཁྲི་བེར་དབང་ཞྭ་རྣམས་ཕྱོགས་བསྡུས་ཙཀ་ལི། དུང་། རྡོར་དྲིལ་རྣམས་ལྷན་ཅིག་བཀོད། ༈ ཆོས་གླིང་ཡིད་བཞིན་འོད་མཆོག་སའི་སྙིང་པོ་ལ། སྟ་གོན་རྫས་བཞི་མཆོད་པ་རྣམ་ལྔ། རས་བྲིས་དབུས་རྣམ་བུམ་ཁར་ཐོད་ཆང་དང་སིནྡྷུ་རའི་མེ་ལོང་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར་ར་ཧ། ཙ་རི། ཧྲི་ནི། ཡ་ས་བྲིས་པ་བརྩེགས་ལ་དར་དཀར་དམར་གྱིས་བཀབ། ཤར་དུ་མེ་ཏོག་ཕྲེང་བ་དང་ལྷ་ཙཀ་རྣམས། ལྷོར་དབུ་རྒྱན། ནུབ་ཏུ་རྡོར་དྲིལ་དང་རིག་ཙཀ །བྱང་དུ་གཏོར་མ་ཞིང་བཀོད་མ། མཚམས་སུ་ཡིག་བཅུའི་སྔགས་བྱང་ཕྲེང་བ། དུང་པུསྟི་སོགས་བཞག ༈ །གཏེར་གསར་པདྨ་སྒྱུ་འཕྲུལ་དྲྭ་བའི་དབང་བཞི་རྡོ་རྗེ་སྤྱི་བླུགས་ལ། རས་བྲིས་དབུས་རྣམ་བུམ། གཡས་སུ་དཔལ་གཏོར། གཡོན་དུ་ཐོད་ཆང་རིག་ཙཀ་ཤེལ་རྡོ་རྨ་བྱའི་མདོངས་བཅས། ༈ ཕྱིའི་སྨིན་བྱེད་ལ། པདྨ་འདབ་བརྒྱད་དབུས་བུམ་པ་ཉེར་ལྔའི་རྫས་ལྡན་ཁ་རྒྱན་གསེབ་ཕྱི་སྒྲུབ་ཀྱི་སྐུ་ཙཀ་དང་མཐོང་གྲོལ་འཁོར་ལོས་བརྒྱན། ཕྱོགས་བཞིར་སྤོས། མེ་ཏོག །མར་མེ། དྲི་ཆབ་སྟེ་བཞི་བསྣོལ་བཤམ། ༈ ནང་གི་སྨིན་བྱེད་ལ་ལྔ་ཚོམ་དབུས་བུམ་པ་སོ་ལྔའི་རྫས་ལྡན་ཁ་རྒྱན་ནང་སྒྲུབ་ཀྱི་སྐུ་སོགས་སྔ་མ་དང་འདྲ། ༈ གཙུག་ཏོར་དྲི་མེད་ལ། རས་བྲིས་སམ་ལྔ་ཚོམ་སྟེང་རྣམ་བུམ། ཕྱོགས་བཞིར་རིག་དབང་ཆས་དང་། ཁྲི་གདུགས་པུསྟི། རྫས་བརྒྱད་རྟགས་བརྒྱད་སོགས་ཕྱོགས་བསྡུས་བཅས། ༈ ཡིད་བཞིན་འཁོར་ལོ་ལ། འདབ་བརྒྱད་དམ་ལྔ་ཚོམ་དབུས་རྣམ་བུམ། སྐུ་ཙཀ་ལྔ། སྔགས་བྱང་རྣམས་དང་ཤེལ་ཕྲེང་། ཕྱག་མཚན་ལྔ་མེ་ལོང་བཅས། ༈ དེའི་བུམ་ལྔའི་དབང་ལ། དབུས་དང་ཕྱོགས་བཞིར་མཎྜལ་ཚོམ་བུ་གཅིག་པའམ་པདྨ་འདབ་བཞི་རེ་རེ་བཀོད་པའི་སྟེང་དུ་དབུས་སུ་ཆོས་བུམ། ཤར་དུ་མཐུན་བུམ། ལྷོར་སྨན་བུམ། ནུབ་ཏུ་ཚེ་བུམ། བྱང་དུ་ནོར་བུམ་རྣམས་གཞུང་གསལ་བཅུད་དང་སྦྱར་བའི་ཚད་ལྡན། སྐུ་ཙཀ་སྔགས་བྱང་། མེ་ལོང་། སོ་སོའི་མདུན་འབུལ་གཏོར་བཅས། ༈ དཔལ་མོ་ལུགས་བཅུ་གཅིག་ཞལ་གྱི་རྗེས་གནང་ལ་། མཎྜལ་བ་བྱུང་དང་དྲིས་བྱུགས་པར་ཚོམ་བུ་གཅིག་བཀོད་པའི་ཁར་བུམ་པ་འཇོག་གོ། ༈ །།དྲག་པོ་རྟ་མགྲིན་གྱི་སྐོར་ལས། རྟ་མགྲིན་ཡང་གསང་ཁྲོས་པའི་དབང་ཆེན་ལ། དཀྱིལ་འཁོར་རས་བྲིས་མེད་ན་མཎྜལ་ཁྲག་དང་བདུད་རྩི་བྱུགས་པ་ལ་ཚོམ་བུ་གཙོ་འཁོར་དགུ་བཀོད་པའི་སྟེང་ཁྲིའུར་རྣམ་བུམ་ཆས་ལྡན། མདུན་ཕྱོགས་སུ་གུ་རུ་རིན་པོ་ཆེ་དང་ལྷ་དགུའི་ཙཀ་ལི། ཞུན་ཆེན་མར་མེ་འབྲི་མོག་གིས་ཁ་བསྒྱུར་བ། དཔལ་གཏོར་སྙིང་གཟུགས་གཙོ་འཁོར་དགུ་པ་སྐུ་ཙག་དར་གདུགས་སོགས་ཀྱིས་བརྒྱན་པའི་གཡས་གཡོན་སྨན་རཀ །རྒྱབ་ཏུ་མངར་གསུམ་སྦྱར་བའི་མཆོད་ཡོན། ཐལ་ཞག་རཀྟ། ཞིང་གླང་སྟག་ཤམ་ཐོད་སྦྲུལ་རྣམས་སོ་སོ་བ། གསང་ཐོད་རིག་ཙཀ །མེ་ལོང་རྣམས་དང་། ཚེ་དབང་ལ་རྒྱབ་ངོས་འདབ་བརྒྱད་དབུས་བུམ་པ་སྙིང་པོ་ལྔ་དང་ཆང་གིས་བཀང་བའི་ཁར་ཚེ་འབྲང་སྒོང་གཟུགས་སྟོད་དཀར་སྨད་དམར་རྒྱ་གྲམ་གཡུང་དྲུང་གིས་བཀབ་ཅིང་རྡོ་རྗེ་ཕྱེད་པའི་ཏོག་ཅན་གྱི་མཐར་ཚེ་རིལ་གྱིས་བསྐོར་བ་དང་། ཚེ་མདའ་བཀོད། བཀའ་སྲུང་བཀའ་གཏད་བྱེད་ན་དེའི་གཏོར་མ་དབང་བསྒྲིགས་སུ་གསལ་བ་ལྟར་བཀོད། ལི་ཁྲིའམ་སིནྡྷུ་རའང་བསྡོག ༈ །དེའི་གཏོར་དབང་ལ། མཉྫིའི་སྟེང་དཔལ་གཏོར་པད་འདབ་བཞི་པ་མཚམས་མཐེབ་རིལ་དང་རྟ་མགོས་མཚན་པ་སྐུ་རྟེན་དར་གདུགས་བཅས་བཀོད། ༈ རྟ་མགྲིན་གསང་སྒྲུབ་ལ། རས་བྲིས་སམ་ཚོམ་བུ་དམར་པོ་གཅིག་གི་སྟེང་དཔལ་གཏོར་རྟ་དབུ་ཅན་སྔ་མ་ལྟར་བཀོད། ༈ ཉང་གཏེར་བདེ་གཤེགས་ཆིག་དྲིལ་ལ། རས་བྲིས་སམ་ཚོམ་བུ་དམར་པོ་གཅིག་བཀོད་པའི་སྟེང་སེང་ལྡེང་ཕུར་པ་ཅོད་པན་དམར་པོ་ཅན་ཕུར་སྟེགས་ལ་གཟུག །གཡས་སུ་བུམ་པ་རྩ་སྔགས་བཟླས་པའི་ཉུངས་ཀར་བླུགས་པ། གཡོན་དུ་དཔལ་གཏོར་རྟ་ཞལ་དར་གདུགས་དམར་པོ་ཅན། རྟ་མགོ །དུར་ཁྲོད་ཆས་བརྒྱད། སྔགས་བྱང་། གཞུང་པོད། ཕྲེང་དམར་བཅས། ༈ གྲུ་གུ་ཡང་དབང་རྟ་མགྲིན་དྲེགས་པ་ཀུན་སྒྲོལ་ལ། དཀྱིལ་འཁོར་སྟེང་ཕུར་བུ་རྟ་ཞལ་ཅན་ཡུངས་དཀར་དང་ཅོད་པན་གདགས་པ་ཕུར་སྟེགས་ལ་གཟུག །དེ་སྟེང་འཕྲུལ་སྟེགས་ལ་བུམ་པ་ཆིངས་དམར་ཁ་རྒྱན་ལ་གཙོ་བོ་ཡབ་ཡུམ་དང་ཁྱུང་ཙཀ་བཅས་པ། དེ་སྟེང་ཐོད་པའི་བདུད་རྩི་དར་དམར་གྱི་ཁེབས་ལྡན། མདུན་སོགས་སུ་ལྷ་ཙཀ་ཆ་ཚང་། རིགས་ལྔའི་དབུ་རྒྱན། རིག་ཙཀ །བུདྡྷ་ཧེ་རུ་ཀ །འབྲུ་གསུམ་དཀར་དམར་མཐིང་གསུམ། མེ་ལོང་། ཤེལ་རྡོ་མེ་ཕུང་། དུར་ཁྲོད་ཆས་སོ་སོ་བ། རྫས་རྒོད་དོང་བུ། རྡོར་དྲིལ། ཐོད་རྔ། རྐང་གླིང་། སྨན་རག་གཏོར་གསུམ། གཞུང་པོད་བཅས། ༈ དྲེགས་པ་བཅོ་བརྒྱད་རྗེས་གནང་ལ། དཀྱིལ་འཁོར་དབུས་སུ་སྟེགས་བུར་དཔལ་ཆེན་པོའི་སྐུ་དང་བུམ་པ། ཤར་དུ་དཔལ་གཏོར། ལྷོར་རྭ་སྲུང་། ནུབ་ཏུ་མཐིང་ཤོག་ལ་སྔགས་བྱང་ལི་ཁྲིས་བྲིས་པ། བྱང་དུ་ཕུར་པ་ཁྲོ་ཞལ་ཅན། རིགས་ལྔའི་དབུ་རྒྱན་དང་མེ་ཏོག་ཕྲེང་བ། དྲེགས་པ་བཅོ་བརྒྱད་ཀྱི་སྐུ་ཙཀ །གཏོར་ཆུང་ཟུར་གསུམ་དེ་གྲངས། དྲེགས་པའི་གཏོར་ཆེན་ཀྱང་གཞི་མདུན་བཀོད། ༈ བྱང་གཏེར་དྲེགས་པ་དབང་སྡུད་ལ། རས་བྲིས་སམ་ཚོམ་བུ་དམར་པོ་གཅིག་བཀོད་པའི་ཁར་དཔལ་གཏོར་སྐུ་རྟེན་དར་གདུགས་དམར་པོ་ཅན་བཀོད་པའི་ཤར་དུ་རྣམ་བུམ། ལྷོར་གསང་ཐོད། ནུབ་ཏུ་མེ་ལོང་། བྱང་དུ་ཐང་ལྷའི་གཏོར་འབུལ་བཤམ། ༈ རྟ་མགྲིན་གསང་བ་འདུས་པའི་དབང་ཆེན་ལ། སྟ་གོན་རྫས་བཞི། རས་བྲིས་སུ་རྣམ་བུམ། གཡས་སུ་དཔལ་གཏོར་རྟ་ཞལ་ཅན་དང་དབུ་རྒྱན། མདུན་དུ་ཕུར་པ་རྟ་ཞལ་ཅན་དང་དར་གྱི་ཅོད་པན། རྒྱབ་ཏུ་གསང་ཐོད་སིནྡྷུ་རའི་མེ་ལོང་ཆོས་འབྱུང་མ་ཧ་རི་ནི་ས་ལྔ་ཚོམ་དུ་བཀོད་པ་ལ་དར་དམར་གྱིས་བཀབ་པ་དང་རིག་ཙཀ །གཡོན་དུ་ཚེ་བུམ་ཟས་སྣ་གདབ་ཕུར། མཚམས་སུ་ཐོད་པ་ཚར་གསུམ། ཐལ་རཀ་ཞག་གསུམ། གླང་ཞིང་སྟག་ལྤགས། སྦྲུལ་ཆུན། གྲི་ཐོད། རལ་གྲི་ཁ་ཊྭཱཾ། དྲིལ་བུ་ལྕགས་སྒྲོག་གཟིག་ཤམ། རུས་རྒྱན། ཕྲེང་དམར་རྣམས་དང་། ཧོམ་ཁུང་ཉའོ་རྣམས་འདུ་བྱ། ༈ དེའི་གཏོར་དབང་ལ། ལྷ་གྲངས་ཚོམ་བུར་ཁྲིའུ་ལ་རི་རབ་སྟེང་ཟླུམ་པོ་པད་བསྐོར་ཅན། དེ་སྟེང་དཔལ་གཏོར་ངོས་གསུམ་རིན་པོ་ཆེ་དང་ཟུར་གསུམ་པདྨས་མཚན་ཅིང་། པད་འདབ་བརྒྱད་པ་ལ་སྐུ་ཙཀ་དར་གདུགས་ཀྱིས་བརྒྱན་པའི་གཡས་གཡོན་དུ་སྒྲུབ་ཡིག །ཐོད་ཆང་། ཕྱག་མཚན་གོང་གསལ། སིནྡྷུ་ར་དང་བཅས་པ་བཀོད། ༈ མངའ་བདག་མོལ་མི་འཁྱིལ་གྱི་རྟ་མགྲིན་དཔའ་གཅིག་ལ། མཎྜལ་ཚོམ་བུ་དམར་པོ་གཅིག་གི་སྟེང་སེང་ལྡེང་དབྱུག་ཏོ་ཐོད་སྐམ་རྡོ་རྗེས་མཚན་པ་གཟུངས་ལྡན། གཡས་གཡོན་དུ་མེ་ཞགས་དང་མེ་ལོང་། དཔལ་འབར་དམར་པོ་རྩེ་གསུམ་ཅན་བཅས། ༈ རྟ་མགྲིན་སྙིང་པོ་དོན་སྦྱོར་དབང་ཆེན་ལ། སྟ་གོན་རྫས་བཞི། དཀྱིལ་འཁོར་རས་བྲིས་སྟེང་རྣམ་བུམ། དབུ་རྒྱན། རྡོར་དྲིལ། མིང་དབང་། ལྷ་ཙཀ་ཚང་བ། སྔགས་བྱང་། ཕྲེང་དམར། གསང་ཐོད། རིག་ཙཀ །ཤེལ་རྡོ་མེ་ལོང་རྣམས་སྤྱི་ལྟར་བཀོད། ༈ སྙིང་པོ་དོན་སྦྱོར་གཏོར་དབང་ལ། རས་བྲིས་སམ་ཚོམ་བུ་དམར་པོ་ལྷ་གྲངས་སྟེང་དབང་གཞུང་གསལ་ལྟར་རམ་དཔལ་གཏོར་རྟ་ཞལ་ཅན་སྐུ་ཙཀ་དར་གདུགས་རྒྱན་ཅན་ཟས་སྣས་བསྐོར་བ་བཤམ། ༈ གྲོལ་ཏིག་དྲེགས་པ་ཀུན་འདུལ་བསྙེན་དབང་ལ། ཚོམ་བུ་དམར་པོ་གཅིག་གི་སྟེང་རྣམ་བུམ། རྒྱབ་ཏུ་དཔལ་གཏོར་སྐུ་རྟེན་བཅས། མདུན་དུ་ཕུར་བུ། བགྲང་ཕྲེང་། ཅོད་པན་གདབ་ཕུར་ལིངྒ་བཅས། ༈ གསང་བ་གཅིག་གྲུབ་ལ། ཚོམ་བུའི་སྟེང་བུམ་ཐོད་མེ་ལོང་སུམ་བརྩེགས། དཔལ་གཏོར་གང་བདེར་བཞག ༈ །རྟ་ཕག་ཡིད་བཞིན་ནོར་བུ་ལ། རས་བྲིས་སམ་ཚོམ་བུ་དམར་པོ་ལྔ་ཚོམ་སྟེང་རྣམ་བུམ། མདུན་དུ་གསང་ཐོད་དར་དམར་བཀབ་པ། གཡས་སུ་རྡོར་དྲིལ་བགྲང་ཕྲེང་། རྒྱབ་ཏུ་དཔལ་གཏོར། གཡོན་དུ་ཌཱ་རུ་ཐོད་ཁྲག་བཅས། ༈ གནམ་ཆོས་རྟ་མགྲིན་བར་ཆད་ཀུན་སེལ་ལ། མཎྜལ་ཚོམ་བུ་གཅིག་སྟེང་བུམ་པ་སོགས་གཟུངས་དབང་ཆས་བཤམ། ༈ ཡི་དམ་དགོངས་འདུས་རྩ་བའི་དབང་ཆོག་ལ། སྟ་གོན་རྫས་མཆོད་པ་བཅས། རས་བྲིས་དབུས་སུ་རྣམ་བུམ། རིག་པའི་དབང་ཆས་བཞི། ལྷ་ཙཀ་ཚང་བ། སྔགས་བྱང་། ཕྱག་མཚན་རིགས་རྟགས་ལྔ་ཕྱག་རྒྱ་བཞི་བྷན་ཕུར་ཁ་ཊྭཱཾ་བཾ་དབྱུག་ཁྱུང་ཁྲ་ཅང་ཏེའུ་རྣམས། དུར་ཁྲོད་ཆས་བརྒྱད་དར་དཔྱངས་བཅས་ཕྱོགས་བསྡུས། གླེགས་བམ་དུང་རྡོར་དྲིལ་ཕྲེང་བ་བུམ་པ་གཏོར་མཆོད་སོགས། རྒྱབ་ཏུ་གསང་ཐོད་དར་གྱིས་བཀབ་པ་དང་རིག་ཙཀ །གཡས་སུ་བཏགས་གྲོལ་གླེགས་བམ་དར་གྱིས་དྲིལ་བ། གཡོན་དུ་ཤེལ་རྡོ་མེ་ལོང་། རྨ་བྱའི་མདོངས། མདུན་དུ་སྲུང་མའི་གཏོར་མ་དར་གདུགས་ཅན། ཌཱ་རུ་རྐང་གླིང་རྣམས་བཀོད། ༈ རྩ་གསུམ་སྤྱིའི་རྗེས་གནང་ལ། ཚོམ་བུ་གཅིག་པའམ་ལྷ་གྲངས་སྟེང་རྣམ་བུམ། མདུན་དུ་ཞི་དྲག་གང་བྱེད་ཀྱི་དབང་གཏོར། གཙོ་བོའི་སྐུ་ཙཀ་དང་ཕྱག་མཚན། གཡས་སུ་ཞི་དྲག་གང་ཡིན་རྒྱན་ཆས། རྒྱབ་ཏུ་དབང་ཕྲེང་དང་སྔགས་བྱང་། གཡོན་དུ་ཕྲིན་ལས་བཞིའི་ཙཀ་ལི་རྣམས་བཞག་གོ ༈ །གཏེར་གསར་ཟབ་བདུན་རྟ་མགྲིན་ཡང་ཕྱུང་དམར་པོ་ལ། རས་བྲིས་སྟེང་བུམ་ཐོད་སིནྡྷུ་རའི་དཀྱིལ་འཁོར་ཤེལ་རྡོ་རྣམས་བརྩེགས། ༈ གཏེར་གསར་ཟབ་བདུན་དབང་ཟབ་རྟ་མགྲིན་ལ། རས་བྲིས་དབུས་རྣམ་བུམ། གཡས་གཡོན་དུ་ཅོད་པན་རྡོར་དྲིལ། དར་དཔྱངས་དཀར་དམར་སྦྲེལ་བ། སློབ་དཔོན་མངའ་གསོལ་ཆས། གསང་ཐོད། རིག་ཙཀ །ཤེལ་རྡོ་བཅས་བཀོད། ༈ དེའི་གཏོར་དབང་ལ། དཔལ་གཏོར་རྒྱན་ལྡན། སྐུ་རྟེན་དར་གདུགས་བཅས་བཀོད་དོ།། ༈ །།ཤིན་ཏུ་དྲག་པོར་ཁྲོས་པ་ལས་ཀྱི་ལྷ་རྟ་མགྲིན་ནག་པོའི་སྐོར་ལས། བྱང་སེམས་ཟླ་རྒྱལ་ལུགས་ཀྱི་རྟ་ནག་རྗེས་གནང་ལ། མཎྜལ་ཚོམ་བུ་གཅིག་པའི་སྟེང་དུ་དཔལ་གཏོར་དར་གདུགས་མཐིང་ནག་ཅན། མདུན་སོགས་སུ་སྐུ་ཙཀ །གཞུང་པོད། རྡོ་རྗེ། སེང་ལྡེང་ཕུར་བུ་རྣམས་བཤམ། ༈ ཉང་གཏེར་རྟ་མགྲིན་ཡང་ཕྱུང་ནག་པོ་ལ། མཎྜལ་གྲུ་གསུམ་མེ་རི་ཚོམ་བུ་ནག་པོ་ཅན་གྱི་སྟེང་དུ་བུམ་པ་དང་དཔལ་གཏོར་ནག་པོ་རྟ་ཞལ་ཅན་བརྩེགས་ཏེ་བཞག །དར་ནག་སྐུ་སྔགས་བྱང་དང་རཀྴའི་ཕྲེང་བ། རལ་གྲི་ལྕགས་ཀྱུ། དུར་ཁྲོད་ཆས། ཕུར་བུ་རྣམས་བཀོད། ༈ དེའི་གཏོར་དབང་ལ། མཎྜལ་གོང་སྨོས་སྟེང་གཏོར་མ་གོང་ལྟར་སྐུ་རྟེན་བཙུགས་པ་བཀོད། ༈ ཆོས་དབང་རྟ་ནག་ལ། མཎྜལ་དབང་གཏོར་སྐུ་རྟེན་སྔ་མ་ལྟར་ལ། གཡས་གཡོན་དུ་སྔགས་བྱང་དང་ཕུར་པ་སྒྲུབ་ཡིག་བཅས། ༈ རཏྣའི་རྟ་ནག་ལ། རས་བྲིས་སམ་འབྲུ་ནག་ལྔ་ཚོམ་ཁར་བུམ་གཏོར་སྔ་མ་ལྟར། སྐུ་གཟུགས། སྔགས་བྱང་། རལ་གྲི་ལྕགས་ཀྱུ་ཞགས་པ། གླང་ཞིང་སྟག་ཤམ་ཐོད་སྦྲུལ་སོ་སོ་བ་བཀོད། ༈ ཞིག་གླིང་ཡང་གསང་ཐུགས་སྒྲུབ་ལ། རས་བྲིས་དབུས་རྣམ་བུམ། རྒྱབ་ཏུ་དཔལ་གཏོར་རྟ་ཞལ་ཅན། གཡས་གཡོན་དུ་དཔལ་དང་དུར་ཁྲོད་ཆས་ཕྱོགས་བསྡུས། རཀྴའི་ཕྲེང་བ། རྟ་ཞལ། དབུ་རྒྱན། རལ་གྲི །ལྕགས་ཀྱུ། རྡོར་དྲིལ། དར་ནག་བེར། སྣང་བ་མཐའ་ཡས་སྐུ། ཅོད་པན། ཐོད་ཆང་ཁར་སིནྡྷུ་རའི་མེ་ལོང་ལ་ཆོས་འབྱུང་ཧྲཱིཿས་མཚན་གྱིས་བཀབ་པ་བཅས་སོ།། ༈ །།དེ་ནས་ཡང་དག་ཐུགས་ཀྱི་སྒྲུབ་པའི་ཞི་བ་རྡོར་སེམས་ཀྱི་སྐོར་ལས། རོལ་རྡོར་རིགས་འདུས་རྡོར་སེམས་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ་སྐུ་ཙཀ་གིས་བརྒྱན་པ། གཡས་སུ་ཐོད་ཆང་དང་བགྲང་ཕྲེང་། གཡོན་དུ་མེ་ལོང་ལ་སིནྡྷུ་རའི་ཐིག་ལེ་བྱས་པ་དང་ཤེལ་རྡོ། མདུན་དུ་རིགས་ལྔའི་ཕྱག་མཚན་བཅས། ༈ གཏེར་གསར་རྡོར་སེམས་ཐུགས་ཀྱི་སྙིང་པོ་ལ། རས་བྲིས་སམ་ཚོམ་བུ་ལྔ་པའི་དབུས་སུ་རྣམ་བུམ་དང་སྐུ་ཙཀ །རིག་པའི་དབང་ཆས་བཞི། ཤེལ་ཕྲེང་། རྡོ་རྗེ་གསང་ཐོད། རིག་ཙཀ །ཤེལ་རྡོ་བཅས། ༈ གསང་ཐིག་ཕྱག་རྒྱ་གཅིག་པ་ལ། པདྨ་འདབ་བརྒྱད་སྟེང་བུམ་པ་རྫས་ལྡན་བཞག ༈ །ཁྲོ་བོ་བཛྲ་ཧེ་རུ་ཀ་ལ། ཆོས་དབང་ཡང་དག་སྙིང་པོ་ལ། རས་བྲིས་སམ་དགུ་ཚོམ་ཁར་ཐོད་སྐུ་མར་མེར་སྔ་ལྟར། ཐོད་པར་བདུད་རྩི་བཅས། ༈ བྱང་གླིང་ཞི་ཁྲོ་ཕུར་གསུམ་ལ། སྟ་གོན་རྫས་བཞི། མཆོད་པ་བཞི་བསྣོལ། དཀྱིལ་འཁོར་རམ་ཚོམ་བུ་དབུས་དང་མདུན་དུ་ཆེ་ཆུང་གཉིས་བཀོད་པའི་སྟེང་མཉྫིའི་ཁར་འབྲུ་སྣོད་དུ་ཡང་དག་ཐོད་སྐུ། དེའི་གཡས་གཡོན་དུ་རུ་ལུའི་སྔགས་བྱང་། མར་མེ་རྣམས་བཀོད། དེ་སྟེང་འཕྲུལ་སྟེགས་ལ་རྣམ་བུམ་སོ་ལྔའི་བཅུད་ལྡན་ཆིངས་སྔོན་ཁ་རྒྱན་བཅས། མཐའ་སྐོར་དུ། ཞི་བའི་ཕན་དབང་ཆས་ལ། ཀུན་བཟང་ཡབ་ཡུམ། ཞི་ལྷ་ཚང་བའམ་རིགས་ལྔ་ཡབ་ཡུམ། དཔའ་བོ་འབྲུ་ལྔ། དབུ་རྒྱན། རྣམ་བུམ། རིན་ཆེན་ཕྲེང་བ། དར་དམར་མཐིང་གི་ཅོད་པན། རྡོ་རྗེའི་གོ་ཁྲབ་རྒྱལ་མཚན། གདུགས། བཟའ་བཅའ་བཏུང་བ་རྣམས་དང་། ནུས་དབང་ཆས་གླེགས་བམ། ཕྲེང་བ། རྒྱ་གྲམ། དུང་ཕྱག་ཤིང་། འཁོར་ལོ། རིགས་ལྔའི་ཕྱག་མཚན་ཕྱོགས་བསྡུས། ཁྲོ་དབང་ཆས་ཐོད་སྐམ་དབུ་རྒྱན། རྡོར་དྲིལ། ཁ་ཊྭཱཾ་རྔེའུ་ཆུང་། ཐོད་ཁྲག །རྒྱུ་ཞགས། ཁྱུང་། ཁྲག་ཞག་ཐལ་གསུམ། ཐོད་པ་ཚར་གསུམ། སྦྲུལ་ཆུན། གླང་ཞིང་སྟག་ལྤགས། རྡོ་རྗེའི་གཤོག་པ། རལ་མཐིང་། མེ་ཕུང་། ཁྲག་འཐུང་རིགས་ལྔ། ཐོད་པ་བདུད་རྩི་ལྔས་བཀང་བ། མདུན་དུ་སྲས་མཆོག་ཕུར་བུ། ཉུངས་གུལ་རཀྟ། ཕྲེང་བ་དང་འདོད་ཡོན་ལྔ། ལྕགས་ཀྱུ་ཞགས་པ་རལ་གྲི་མནན་སྲེག་འཕང་གསུམ་ཆས། རིགས་ལྔའི་ཕྱག་མཚན་དྲིལ་བུ་བཅས་ཕྱོགས་བསྡུས། རྒྱབ་སོགས་སུ་གསང་ཐོད། རིག་ཙཀ་མགོན་པོ་དང་ལྷ་མོའི་གཏོར་མ་དར་གདུགས་མཐིང་ནག་ཅན་བཀོད། ༈ དེའི་ཆ་ལག་ཚེ་སྒྲུབ་སྨན་མར་གྱི་དབང་ལ། དཀྱིལ་འཁོར་ཅི་རིགས་དབུས་བུམ་པའི་ཁར་ཐོད་པ་བཅུད་ལེན་སྨན་མར་རིལ་བུས་བཀང་བ་ཁ་རྡོ་རྗེ་རྒྱ་གྲམ་གྱིས་བཅད་པ་བཞག་གོ ༈ །ཆོས་གླིང་ཡང་དག་བདེ་ཆེན་སྙིང་པོ་ལ། རས་བྲིས་སམ་དགུ་ཚོམ་ཁར་རྣམ་བུམ། རིག་པའི་དབང་ཆས་བཞི། གསང་ཐོད་རིག་ཙཀ་ཤེལ་རྡོ་རྣམས་བཀོད། ༈ སྙན་བརྒྱུད་ཡང་དག་ཟབ་ཏིག་ལ། མཎྜལ་ཚོམ་བུ་གཅིག་པ་ཐོད་སྐུ། གཡས་བུམ་པ། གཡོན་ཐོད་ཆང་རིག་ཙཀ །མདུན་དུ་མར་མེ་དང་སྨན་གྱི་ཕོ་བྲང་། ཤེལ་རྡོ། རྒྱབ་ཏུ་ཚེ་འབྲང་རིལ་ཆང་བཅས་བཤམ། ༈ ࿋ མཁྱེན་བརྩེའི་ཡང་ཕུར་སྦྲགས་མར་སྟེགས་བུའི་ཁར་སྒྲུབ་ཕུར། དེ་སྟེང་རྣམ་བུམ་མགུལ་ཆིངས་མཐིང་ག །མདུན་དུ་དཔལ་གཏོར་གཡས་གཡོན་དུ་གསང་ཐོད། རིག་ཙཀ ཚེ་འབྲང་། ཚེ་རིལ་ཆང་། མདའ་དར། བསྒྲལ་དབང་ཆས། ལས་ཕུར། དབྱེ་རྫས། བྱ་འུག་སྒྲོ །ཡུངས་ཀར། བྱད་ཐག །དུག་ཁྲག །སྒྲོལ་གྲི །ཐོ་བ། ཧོམ་གཟར། ལྕགས་ཧོམ་དུ་ལིངྒ་། གསེར་སྐྱེམས་ཆས། གཏོར་ཟོར་མཚེ་ཡུངས་ཀྱིས་བརྒྱན་པ་རྣམས་ཅི་བདེར་བཞག ࿋ ༈ །གཏེར་གསར་ཟབ་བདུན་ཡང་དག་ལ། རས་བྲིས་དབུས་སུ་རྣམ་བུམ་ཆང་དང་སོ་ལྔས་བཀང་བའི་ཁར་ཐོད་ཆང་མེ་ལོང་སིནྡྷུ་ར་བརྡལ་པ་ལ་རྩ་སྔགས་བྲིས་པས་བཀབ་པའི་སྟེང་ཁྲིའུ་ལ་ཐོད་སྐུ་དགུའི་མདུན་ཐོད་པའི་མར་མེ་དགུ་ཟན་ལས་བཅོས་ཤིང་འབྲི་མོག་གིས་ཁ་བསྒྱུར་པ་བཞག །ཐོད་སྐུ་དགུ་མ་འཛོམ་ན་གཙོ་བོ་ཐོད་སྐུ་དང་འཁོར་རྣམས་ཀྱི་ཙཀ་ལི་བཀོད། མདུན་དུ་དཔལ་གཏོར། དཔལ་དང་དུར་ཁྲོད་ཆས་ཕྱོགས་བསྡུས་རྣམས་བཀོད། ༈ དེའི་ཚེ་དབང་ལ། རས་བྲིས་སམ་ཚོམ་བུ་དམར་པོ་གཙོ་འཁོར་དགུ་བཀོད་པའི་མཎྜལ་གྱི་སྟེང་ཁྲིའུར་རྣམ་བུམ་ཆིངས་དམར་ཉེར་ལྔའི་བཅུད་ལྡན། གཡས་སུ་ཚེ་འབྲང་ཚེ་རིལ་འགྱེད་བདེ་ཅན། གཡོན་དུ་ཚེ་ཆང་། མདའ་དར་དམར་པོ་བཅས་བཀོད། ༈ ࿋ ཟངས་བྱང་མ་ཟླ་གམ་ལྔ་བཅུ་རྩ་བརྒྱད་ལ། དཀྱིལ་འཁོར་གཞུང་མཐུན་བཀྲམ་པའི་ཁར་བུམ་པ་ཆས་ལྡན། གསང་ཐོད་མེ་ལོང་སིནྡྷུ་རའི་སྔགས་བྱང་། ཐོད་པར་མར་མེ་ལྷ་གྲངས་སམ་སྡོང་བུ་ལྔ་བཙུགས་པ། ཐོད་སྐུ །འཁོར་རྣམས་ཀྱི་ལྷ་ཙཀ་སུམ་ཅུ་སོ་བདུན། སྔགས་བྱང་ངམ་སྔགས་ཕྲེང་རྡོར་དྲིལ། དབུ་རྒྱན། རྡོ་རྗེ། དྲིལ་བུ། མིང་དབང་། དཔལ་དང་དུར་ཁྲོད་ཆས་སོ་སོ་བ། རིན་ཆེན་ཁྲི །སྨན་རཀ་གཏོར་གསུམ། མིག་དར། མེ་ཏོག་དོར་ར། གསེར་ཐུར། སློབ་མ་མཆོད་པ་བཅས་འདུ་བྱའོ། ࿋ ༈ །གསང་ཐིག་ཡང་དག་ལ། ཁྲིའུར་ཐོད་སྣོད་དུ་དཔལ་གཏོར་ཀྱུ་གུ་བརྒྱད་པ་རྒྱན་ལྡན། ༈ ࿋ ཐུགས་སྒྲུབ་ཡང་དག་ལ། རས་བྲིས་སམ་ཚོམ་བུ་གཅིག་པའི་ཁར་བུམ་པ་བཅུད་ལྡན་དུ་ཐོད་སྐུ་དང་མེ་ལོང་། ལྷོར་གསང་ཐོད། ནུབ་ཏུ་རིག་ཙཀ་དང་སྔགས་བྱང། བྱང་དུ་ཤེལ་རྡོ་དང་བྷནྡྷའི་ནང་མར་མེ་གཅིག་བྱས་པ། ཚེ་རིལ་ཆང་བཅས་སོ། ࿋ ༈ ࿋ འཇམ་མགོན་གསང་ཐིག་ཡང་དག་ལ། དཀྱིལ་འཁོར་གཞུང་མཐུན་ནམ་མ་འབྱོར་ན་ཚོམ་བུ་གཅིག་པའི་ཁར་གཞུང་གསལ་ཐོད་སྐུ །མདུན་དུ་བུམ་པ་སོ་ལྔའི་བཅུད་ལྡན་དར་མཐིང་གའི་མགུལ་ཆིངས། གཡས་སུ་བདུད་རྩི་བཏབ་པའི་གསང་ཐོད། གཡོན་དུ་རིག་ཙཀ །སྨན་གཏོར་རཀྟ། སྲུང་མའི་གཏོར་འབུལ་བཅས།། ࿋ ༈ །།ཐུགས་རིག་ཕྱག་རྡོར་སྐོར་ལ། ཆོས་དབང་གཏུམ་པོ་མེ་ལྕེ་ཕྲེང་བ་ལ། རས་བྲིས་སམ་ཚོམ་བུ་གཅིག་གི་སྟེང་བུམ་པ་མདུན་དུ་སྐུ་རྟེན་དང་དཔལ་གཏོར། གཡས་སུ་ཐོད་ཆང་། གཡོན་དུ་རྡོ་རྗེ། རྒྱབ་ཏུ་དར་གྱི་ཅོད་པན་ཁ་དོག་ལྔ་པ་རྣམས་དང་། སྲུང་སྐུད་སྔོན་པོ་སློབ་མའི་གྲངས་མཉམ་བཀོད། ༈ དབུ་རུ་སྟོན་ཤཱཀ་ཀྱི་རྡོ་རྗེ་མེ་འབར་ལ། མཎྜལ་ཚོམ་བུ་སྔོ་ནག་གཅིག་པའི་སྟེང་རྣམ་བུམ། མདུན་དུ་གཙོ་འཁོར་བཞིའི་ཙཀ་ལི། གཡས་སུ་རཀྴའི་ཕྲེང་བ། གཡོན་དུ་དཔལ་གཏོར་དར་གདུགས་བཅས། ༈ ལས་འབྲེལ་དྲེགས་འདུལ་ལ། སྟ་གོན་རྫས་བཞི་མཆོད་པ་བཅས། རས་བྲིས་དབུས་རྣམ་བུམ་སྐུ་ཙཀ་ཅན། མདུན་དུ་དབང་གཏོར་སྙིང་གཟུགས་དམར་པོ་པད་འདབ་བཞི་པ་རྒྱན་སྤྲོས་དར་ནག་གུར་ཅན། ལྷ་ཙཀ་ཚང་བ། མཐའ་སྐོར་དུ། དབུ་རྒྱན། མེ་ཕུང་། ཐོད་ཕྲེང་།སྦྲུལ། གླང་ཞིང་སྟག་ཤམ། ཐོད་རྒྱན་རྣམས་སོ་སོ། བྱུག་པ་གསུམ་གཅིག་བསྡུས། རྡོར་དྲིལ། གླེགས་བམ། རིག་ཙཀ་བཅས། ༈ དྲེགས་འདུལ་ནང་སྒྲུབ་བྱིན་རླབས་ལ། རས་བྲིས་སམ་མཎྜལ་ཚོམ་བུ་ལྔ་པའི་སྟེང་དུ་བུམ་པ་ཉེར་ལྔའི་བཅུད་དང་ཆས་ལྡན་བཤམ། གླུད་གཏོར་བསྒྲུབ་བྱའི་ཆངས་བུ་བཅས་པའང་བསྡོག ༈ །གཏོར་དབང་ལ། ཚོམ་བུ་ལྔ་སྟེང་དཔལ་གཏོར་སྐུ་རྟེན་དར་མཐིང་གི་གདུགས་ཅན་བཀོད། ༈ བྱང་གླིང་གཏུམ་པོ་དྲག་པོ་ལ། རས་བྲིས་སམ་ཚོམ་བུ་ལྷ་གྲངས་ཁར་དཔལ་གཏོར་སྐུ་ཙཀ་དར་གདུགས་ཅན། སྐུ་རྟེན་དར་སྔོན་དང་དུར་ཁྲོད་ཆས། རྡོར་དྲིལ། སྔགས་བྱང་། ལྕགས་རྡོར་རྩེ་ལྔ་བཅས་བཤམ། ༈ གྲྭ་མངོན་ཁང་བརྩེགས་ལ། རས་བྲིས་སམ་ཚོམ་བུ་གཅིག་པའི་སྟེང་དུ་དཔལ་གཏོར་སྐུ་རྟེན་དར་གདུགས་ཅན། མདུན་དུ་བུམ་པ། རཀྴའི་ཕྲེང་བ་བཅས། ༈ སངས་གླིང་ཕྱག་རྡོར་ཁྱུང་གསང་བ་ཡང་ཁྲོས་ལ། སྟ་གོན་རྫས་བཞི། རས་བྲིས་སམ་ཚོམ་བུ་ལྔ་པའི་ཁར་རྣམ་བུམ་ལྷ་མཚན་གསེར་གྱི་རྡོ་རྗེས་སྤྲས་པའི་ནང་དུ། བཙན་དུག་མུ་ཟི་གུ་གུལ་བདུད་རྩི་གླ་རྩི་ལྡོང་རོས་སྒོག་སྐྱ་བུལ་ཏོག་བརྒྱད་ཆུ་གཙང་འོ་མར་སྦྱར་བས་བཀང་། མདུན་དུ་དམར་གཏོར་གཙོ་འཁོར་ལྔ་པ། སྐུ་ཙཀ །སྣོད་གཅིག་ཏུ་ལྕགས་རྡོར། ཁྱུང་ཙཀ །སྦྲུལ་ཆུན། སྔགས་བྱང་། སྒྲུབ་དཔེ་རྣམས་དང་། བཟའ་བཏུང་སྣ་ཚོགས་བཅས། ༈ རཏྣའི་གཏུམ་པོ་ལ། རས་བྲིས་དབུས་རྣམ་བུམ། གཡས་སུ་ཐོད་ཆང་། རྒྱབ་ཏུ་དཔལ་གཏོར་སྐུ་ཙཀ་དར་གདུགས་ཀྱིས་བརྒྱན་པ། གཡོན་དུ་སྒྲུབ་དཔེ། མདུན་དུ་རྡོར་དྲིལ། རལ་གྲི་མེ་ཕུང་། འཁོར་ལོ་སྦྲུལ་ཞགས། གསང་བདག་ཁྱུང་གི་སྐུ་ཙཀ །ཁྲོ་བཅུའི་སྐུའམ་ཕྱག་མཚན་བཅས་བཀོད། ༈ པད་གླིང་གཏུམ་པོ་དྲེགས་འདུལ་ལ། དཀྱིལ་འཁོར་རམ་ཚོམ་བུ་གཙོ་བོ་གཅིག་ལ་འཁོར་བཅུ་དེ་རྒྱབ་བཞིས་བསྐོར་བའི་སྟེང་དུ་རྣམ་བུམ། མདུན་རྒྱབ་གཉིས་སུ་ཐོད་ཆང་དང་དཔལ་གཏོར། རྡོ་རྗེ་ཅོད་པན། སྲུང་སྐུད་སྔོན་པོ་སློབ་མའི་གྲངས། ཕྲེང་བ་བཅས། ༈ ཕྱག་རྡོར་སྟོབས་པོ་ཆེ་ལ། རས་བྲིས་སམ་ཚོམ་བུ་གཅིག་པའི་དབུས་སུ་རྣམ་བུམ། མདུན་དུ་སེང་ཕུར་ཁྲོ་ཞལ་ཅན། གཡས་སུ་ཐོད་སྐུའམ་སྐུ་རྟེན། གཡོན་དུ་དཔལ་གཏོར། རྒྱབ་ཏུ་ཅོད་པན། རྡོར་དྲིལ། རལ་གྲི་མེ་དཔུང་། འཁོར་ལོ་སྦྲུལ་ཞགས། གཙོ་སྐུ་བྱ་ཁྱུང་རིགས་ལྔ། ཧཱུྃ་བཅུ། ཐུན་རྫས་རྫས་བརྒྱད་ཕྱོགས་བསྡུས་བཅས་སོ། ༈ །གཏུམ་པོ་སེང་སྒྲོག་ལ། མཎྜལ་ལ་ཚོམ་བུ་མཐིང་ནག་གཅིག་བཀོད་པའི་སྟེང་མཉྫི་ལ་རྣམ་བུམ་མགུལ་ཆིངས་མཐིང་ནག་བཅུད་ལྡན་བཀོད། གཡས་གཡོན་ཐོད་པའི་བདུད་རྩི། རྡོ་རྗེ། རྒྱབ་མདུན་གང་བདེར་དབང་གཏོར་རྒྱན་ལྡན་བཀོད། ༈ ཟུར་མཁར་ཕྱག་རྡོར་དྲག་སྔགས་ཀུན་འདུས་ལ། དཀྱིལ་འཁོར་གྱི་དབུས་སུ་མཉྫི་ལ་རྣམ་རྒྱལ་བུམ་པ་བཅུད་ལྡན་ཁ་རྒྱན་སྐུ་ཙཀ་གིས་བརྒྱན་པ་བཀོད། དེ་མདུན་ཧཱུྃ་ཡིག་བཅུའི་ཙཀ་ལི། དུར་ཁྲོད་ཆས། རྒྱབ་ཏུ་དཔལ་གཏོར་དར་གདུགས་བཅས། གཡས་གཡོན་དུ་གསང་ཐོད། རིག་ཙཀ །ཤེལ་རྡོ། མདུན་དུ་བཀའ་སྲུང་སྲོག་དབང་ཆས་རྣམ་སྲས་གཏོར་མ། གནམ་ལྕགས་རྡོ་རྗེ། རྒྱལ་མཚན་དང་ནེའུ་ལེའི་ཙཀ་ལི། སྲོག་སྔགས་འབྲུ་བཞི་གསེར་བྲིས། རྫས་བརྒྱད་དང་རྒྱལ་སྲིད་སོ་སོ་བའི་ཙཀ་ལི་བཀོད་དོ།། ༈ །།དེ་ནས་བདུད་རྩི་ཡོན་ཏན་སྒྲུབ་པའི་སྐོར་ལས། ཐོག་མར་གཡུ་ཐོག་སྙིང་ཐིག་ལ། རས་བྲིས་སམ་པདྨ་འདབ་བཞིའི་དབུས་སུ་རྣམ་བུམ། མདུན་དུ་ཐོད་ཆང་ཁར་མེ་ལོང་བཀོད་པའི་སྟེང་དུ་ག་པུར་ཤིང་ཀུན་ཨ་རུ་ར་བཟང་དྲུག་རྣམས་བཞག་པ་དང་ལྷ་ཙཀ་ཚང་མ། གཡས་སུ་དབུ་རྒྱན་དང་། དྲང་སྲོང་དབང་གཏོར་དཀར་ཟླུམ་འདབ་བཞི་རྒྱན་ལྡན་སྐུ་ཙཀ་བཙུགས་པ། རྒྱབ་ཏུ་རྒྱུད་བཞི་ཆ་ལག་དང་བཅས་པའི་གླེགས་བམ། གསང་ཐོད། རིག་ཙཀ །མེ་ལོང་ཤེལ་རྡོ། བུ་རམ་ཆོས་སྨན་སྦྱར་བའི་ཆང་། པདྨ་འདབ་དྲུག་སྟེང་ཤེལ་གྱི་མཆོད་རྟེན་བང་རིམ་དགུ་པ་དང་རྡོར་དྲིལ་རྣམས། གཡོན་དུ་གཏར་སྲེག་གི་ཆས་རྣམས་དང་བཀའ་སྲུང་གཏོར་མ་དམར་གཏོར་ཟུར་གསུམ་གཙོ་འཁོར་དགུ་པ་སྐུ་ཙཀ་དར་གདུགས་ཅན། མཚམས་རྣམས་སུ་དར་དང་རིན་ཆེན་རྒྱན་ཚང་མ་གཅིག་བསྡུས་སྨན་རཀ་གཏོར་གསུམ་ཌཱ་རུ་གཅིག་བསྡུས། རིགས་ལྔའི་ཕྱག་མཚན་དང་གྲི་ཐོད། འཁོར་ལོ་པདྨ་རྡོ་རྗེ་འབྲུ་གསུམ་གྱིས་མཚན་པ་རྣམས་བཀོད། ༈ དོན་དབང་ལ་འབྲུ་ཚོམ་ལྔའི་སྟེང་དཔལ་གཏོར། གཡས་གཡོན་དུ་དཀར་གཏོར་དམར་གཏོར་བཅས། ༈ ཚེ་དབང་ལ། ཚོམ་བུའི་སྟེང་བུམ་པ་དང་གཏོར་མ་སྙིང་གཟུགས་སམ་ནོར་བུའི་དབྱིབས་ཅན་རྒྱན་ལྡན། ཚེ་རིལ་ཆང་། ཕྱག་མཚན་ལྔ་བཅས། ༈ ལྷ་སྨན་རྗེས་གནང་ལ། པད་དཀར་འདབ་བཞིའི་དབུས་བུམ་པ་འོ་མ་དང་ཉེར་ལྔའི་རྫས་ལྡན་ཤུག་པས་ཁ་བརྒྱན་པ། དེ་སྟེང་ཁྲིའུར་ཟླུམ་གཏོར་འདབ་བཞི་འཁོར་ཟླུམ་གཏོར་བཞིས་བསྐོར་བ་ཉི་ཟླ་ནོར་རྒྱན་སྐུ་ཙཀ་བཙུགས་པའི་གཡས་སུ་མདའ་དར་མེ་ལོང་ཅན། གཡོན་དུ་སྦ་གླིང་སྨྱུག་གླིང་བཞག །ཕྱེ་མར། གསེར་སྐྱེམས། སྤོས་དཀར། བསང་ཤུག་བསྡོག ༈ །དྲང་སྲོང་སེར་སྐྱའི་བཀའ་གཏད་ལ། མཎྜལ་སྔོན་པོའི་སྟེང་བུམ་པ་སྔར་ལྟར། གཡས་སུ་སྣོད་གཙང་མར་བཟང་དྲུག །ཚ་བ་གསུམ། ཨ་རུ་ར། རྡོ་རྗེ་དཀར་དམར་ནག་གསུམ། བཙག་བུ། སྤྲ་བ། གཡོན་དུ་སྐྱེས་པ་གྲིར་ཤི་བ་དང་། རྟ། བ་གླང་རྣམས་ཀྱི་སྲེ་ལོང་། ཕོ་རོག་དང་འུག་པའི་མིག །མེ་ལོང་དྭངས་པ་རྣམས་སྨན་པ་མཁས་པའི་སྐྲས་དྲིལ་ཏེ་བཞག །འདི་རྣམས་དངོས་མ་འཛོམ་ཡང་གཟུགས་བརྙན་འབྲི་དགོས་པར་བཤད། མདུན་དུ་དཀར་གཏོར་འདབ་བཞི་ཉི་ཟླ་ནོར་རྒྱན་སྐུ་ཙཀ་ཅན་དང་སྒྲུབ་ཡིག་བཞག །འདི་རྣམས་ཤིན་ཏུ་གཙང་སྦྲ་དགོས། གཡུ་ཐོག་སྙིང་ཐིག་སྐོར་སྟབས་གཅིག་ཏུ་བྱེད་ན། དབང་ཆེན་བཅས་ཚང་མ། སྟེགས་མདུན་རྒྱབ་གང་བདེར་དཔལ་གཏོར། ཚེ་གཏོར། ཚེ་རིལ། མདུན་གཡས་ལྷ་སྨན། གཡོན་དུ་དྲང་སྲོང་གི་ཆས་རྣམས་བཤམས་པས་འཐུས། ༈ སྨན་བླ་ལོངས་སྐུའི་གཏོར་དབང་གི་བཤམ་བཀོད་གོང་གི་དོན་དབང་དང་འདྲ། ༈ གཏེར་གསར་བི་མ་ལ་ལ། པདྨ་འདབ་བརྒྱད་ཨས་མཚན་རྡོ་ར་མེ་རི་ཅན་གྱི་སྟེང་དུ་རྣམ་བུམ་ཨ་དཀར་གྱིས་བརྒྱན་པ། མདུན་དུ་གསང་ཐོད་མེ་ལོང་འཇའ་རིས་ཤེལ་རྡོ་རྣམས་བརྩེགས་པ་དང་། བླ་མ་ཆེ་མཆོག་གནམ་ཞལ་མ་གསུམ་གྱི་སྐུ་ཙཀ་སོ་སོ་བ། གཡས་སུ་ཕོ་མོའི་ཐོད་པ་ཁ་སྦྱོར་ཆོས་སྨན་གྱིས་བཀང་ཞིང་དར་སྣས་དྲིལ་བ། ཚོན་སྐུད་ཀྱིས་རྒྱ་གྲམ་དུ་བཅིངས་པའི་གཡས་གཡོན་རྡོར་དྲིལ་དང་དབུ་རྒྱན་གྱིས་བརྒྱན་པ། ནུབ་ཏུ་ཚེ་རིལ་ཆང་མདའ་དར། བྷནྡྷ་བཅུད་ལེན་རིལ་བུ་གཞུང་གསལ་ལམ་མེད་ན་ཚེ་རྫས་བསྲེགས་པའི་རིལ་བུས་བཀང་སྟེ་དར་གྱིས་བཀབ་པ། བྱང་དུ་མཁའ་འགྲོའི་གཏོར་མ་སྐུ་ཙཀ་མདའ་དར་མཐིང་ག་མེ་ལོང་གིས་བརྒྱན་པ། སྲུང་ཟློག་བསད་གསུམ་ཞལ་ཤེས་ལྟར་བསྐུར་བའི་ཡུལ་ལ། རྭ་སྲུང་། ཟོར་གཏོར། གྲི་གུག་ལིང་ག་བཅས་པའང་བཞག ༈ །བདུད་རྩི་བུམ་པ་ལ། མཉྫིའི་སྟེང་ཀ་པཱ་ལར་སྨན་སྣ་བསྲེས་པའི་ཕྱེ་མ་ཨ་རུ་ར་ཟུར་བརྒྱད་པའི་དབྱིབས་ལོ་མ་ལས་ཐོན་པའི་རྩེར་གསང་བདག་གི་ཙཀ་ལི་བཙུགས། སྲུང་སྨན་ཆེན་མོའམ་མ་འཛོམ་ན་ཡུང་བ། ཤུ་དག །སྨན་ཆེན་གསུམ་གྱི་ཕྱེ་མ་ཐུམ་པོ་ནག་པོ་སློབ་མའི་གྲངས་མཉམ། རྡོ་རྗེ་ཁྲབ་རིང་གི་སྲུང་འཁོར་ཆིངས་ལྡན། ཚོགས་ཀྱི་ཡོ་བྱད། བཀའ་སྲུང་གཏོར་འབུལ་དཀར་དམར་བཅས། ༈ ར་མོ་ཤེལ་སྨན་གྱི་ཡང་གཏེར་རྡོ་རྗེ་བདུད་རྩིའི་བླ་མའི་གཏོར་དབང་ལ། མཎྜལ་ཚོམ་བུ་དཀར་པོ་གཅིག་བཀོད་པའི་སྟེང་མཉྫིའི་ཁར་བླ་གཏོར་རིན་ཆེན་འབར་བ་སྐུ་ཙཀ་དར་གདུགས་བཅས་བཀོད། ༈ རྡོ་རྗེ་བདུད་རྩིའི་དབང་ལ། སྟ་གོན་རྫས་བཞི། དཀྱིལ་འཁོར་བཀྲམ་པའི་དབུས་སུ་རྣམ་བུམ་ཆིངས་ལྗང་ཅན་གྱི་ཁར་ཐོད་པ་བདུད་རྩིས་བཀང་བ་ལ་སིནྡྷུ་རའི་མེ་ལོང་དགའ་འཁྱིལ་བཾ་ཡིག་གིས་མཚན་པས་བཀབ་ལ་དར་གུར་དབུབ། མདུན་སོགས་སུ་དབུ་རྒྱན། རྡོ་རྗེ་དྲིལ་བུ། རྡོར་དྲིལ། ཐོད་ཆང་རྣམས་དང་། ཤར་དུ་ཁྲུས་བུམ། ལྷོར་བདུག་པ། ནུབ་ཏུ་མ་ད་ན་བཏབ་པའི་ཆང་། བྱང་དུ་ཐོད་པར་བདུད་རྩི་རིལ་བུ་བཅས་སྔར་ནས་སོ་སོའི་སྒྲུབ་ཐེམས་ཅན་བཀོད། སིནྡྷུ་ར་དང་ཞུན་མར་དགང་བླུགས་དུང་དཀར་དྲིལ་བུ་གླེགས་བམ་རྣམས་ཀྱང་བསྡོག ༈ ࿋ །རྡོ་རྗེ་བདུད་རྩི་བདེ་བ་ཆེན་པོའི་སྐབས་ལས་སྦྱོར་གྲོལ་བ་དྲུག་གི་རྗེས་གནང་གི་རྫས། ལྡིང་ཁྲི་བར་པ་ལྟ་བུར་དབུས་བདུད་རྩི་རིལ་བུའི་སྙིང་པོ་ཅན་གྱི་མཐོང་གྲོལ་གཏེར་བུམ། ཐོས་གྲོལ་དུང་ལ་བདུད་རྩི་དང་གི་ཝཾ་དྲི་བཟང་སྦྱར་བས་བྱུགས་པ། ཚོར་གྲོལ་རིལ་བུ་དང་སྤོས་སྦྱོར་དྲི་ཞིམ་སྦྱར་བའི་ཕྱེ་མ། མྱོང་གྲོལ་ཐོད་སྣོད་དུ་རིལ་བུ་བླུགས་པ། རེག་གྲོལ་བདུད་རྩི་དང་ག་པུར་དྲི་བཟང་རྣམས་སྦྱར་བའི་ཕྱེ་མ་དང་ཐུམ་བུ་བཏགས་ཆོག །ཁྱབ་གྲོལ་ཀླུ་སྨན་བདུད་རྩི་འོ་མ་རྣམས་དངུལ་སྣོད་དུ་ལྷན་ཅིག་སྦྱར་བ་བཅས། ࿋ ༈ གཏེར་བདག་སྔགས་སྲུང་མའི་སྲོག་གཏད་ལ། ཆོས་འབྱུང་འཁོར་ལོ་མཐིང་ནག་རྩིབས་བཞི་པ་མེ་རི་ཁྲག་མཚོས་བསྐོར་བའི་ལྟེ་བར་ཐིག་ལེ་མཐིང་ནག་རྩིབས་བཞི་དཀར་སེར་དམར་ལྗང་བཀོད་པའི་ཚོམ་བུ་གཙོ་འཁོར་ལྔ་པའི་སྟེང་དུ་རྟེན་གཏོར་སྐུ་གཟུགས་དར་གདུགས་ཀྱིས་སྤྲས་པ་དང་སྔགས་བྱང་བཀོད། ༈ རཏྣའི་ཐུགས་སྒྲུབ་སྨན་དབང་ལ། མཎྜལ་ཚོམ་བུ་ལྔ་པའི་དབུས་སུ་གོང་བཤད་ལྟ་བུའི་སྨན་གྱི་ཕོ་བྲང། རིགས་ལྔའི་ཙཀ་ལི་སོ་སོ་བ་བཅས། ༈ ལེགས་ལྡན་རྗེའི་ཚེ་སྒྲུབ་བདུད་རྩི་འཁྱིལ་བ་ལ། རས་བྲིས་ཁར་བུམ་པ་ལྔ་དབུས་དཀར་སོགས་ཕྱོགས་མདོག་རིགས་ལྔའི་ཕྱག་མཚན་སོ་སོར་བཞག །གསང་ཐོད་ལྔའམ་གཅིག །རིག་ཙཀ་མེ་ལོང་བཅས། ཤེལ་རྡོ་མར་མེ་མེ་ལོང་སྒྲོ་མདོངས་བཞི། མདུན་རྒྱབ་གང་བདེར་ཚེ་འབྲང་། རིལ་ཆང་མདའ་དར་རྟགས་བརྒྱད་ཙཀ་ལི་གཅིག་བསྡུས་རྣམས་བཤམ། ༈ ࿋ སྙན་བརྒྱུད་བདུད་རྩི་མཆོག་ཏིག་ལ། སྟེགས་བུར་རས་བྲིས་སམ་ཚོམ་བུ་མཐིང་ནག་གཙོ་འཁོར་དགུ་པའི་ཁྲིའུའི་ཁར། ཐོད་པ་མཚན་ལྡན་ཨ་མྲིཏས་བཀང་བ། གཡས་སུ་སྨན་གྱི་ཕོ་བྲང་། གཡོན་དུ་མར་མེ། མདུན་དུ་སྐུ་ཙཀ །སྔགས་བྱང་དང་ཕྲེང་བ། དུར་ཁྲོད་ཆས་བརྒྱད། དཀྱིལ་འཁོར། ཙཀླི། ཤ་ལྔ། བདུད་རྩི་ལྔ། རྩ་བརྒྱད་སྟོང་སྦྱར་སྨན་ཕྱེ་རྣམས་ཐོད་པ་སོ་སོར་བཞག་པ། བཏགས་བཙག་སྦོལ་ཞིང་གཞལ་བའི་ཡོ་བྱད་ཕབ་བཅས། རྒྱབ་ཏུ་སྙིང་པོ་ལྔ་ཆང་གིས་སྦྲུལ་པའི་ཚེ་འབྲང་ནང་དུ་བཟླ་བྱའི་སྔགས་ཀྱི་ཤོག་དྲིལ་བཅུག་པའི་གཡས་གཡོན་དུ་ཚེ་རིལ་ཆང་བཅས་བཀོད། ࿋ ༈ འཇའ་ལུས་འོད་ཕུང་རང་གྲོལ་ལ། རས་བྲིས་དབུས་ཁྲིའུར་རྣམ་བུམ་ཆིངས་དམར་ཁ་རྒྱན་གསེབ་ཕག་མོའི་སྐུ་ཙཀ་མེ་ལོང་ཤེལ་བཅས། གཡོན་དུ་གསང་ཐོད་དར་དམར་གྱིས་བཀབ་པ། གཡས་སུ་དཔལ་གཏོར་གཡུང་དྲུང་རིས་ཀྱིས་བརྒྱན་པ། རྒྱབ་ཏུ་དཔལ་འབར་རིང་པོ་དཀར་སེར་དམར་ལྗང་མཐིང་ལྔ། མདུན་དུ་ཏིང་ལོ་རེ་རེ་ལ་སྡོང་བུ་གསུམ་རེ་ཡོད་པ་གསུམ། རུས་རྒྱན། རས་གོས། སྒོམ་ཐག་ཨང་རག་རྣམས་འབྲུ་གསུམ་དང་རཾ་བྲིས་པ་འཛོམ་ན་སློབ་མའི་གྲངས་མཉམ་བསྡོག །སློབ་མ་རྣམས་ཀྱི་གདན་ལ་གཡུང་དྲུང་རཾ་མཚན་བཏིང་ངོ་།། ༈ །།དེ་ནས་ཕུར་པ་ཕྲིན་ལས་སྒྲུབ་པའི་སྐོར་ལས། ཆོས་དབང་སྤུ་གྲི་ལ། དཀྱིལ་འཁོར་རས་བྲིས་ཁར་འཛོམ་ན་ཕུར་པ་གཙོ་འཁོར་བཞི་བཅུ་རྩ་དྲུག་ལྷ་གནས་སོ་སོར་ཨེ་ཁྲོམ་ལ་བཀོད། མ་འཛོམ་ན་དབུས་སུ་ཨེ་ཁྲོམ་ལ་གཙོ་ཕུར་གཞུང་མཐུན་ཚད་ལྡན་དང་གཙོ་བོའི་སྐུ་ཙཀ་བཀོད། ཁྲོ་བོ་བཅུ། སྲས་ཉེར་གཅིག །དམ་ཅན་བཅུ་དྲུག་རྣམས་ལ་ཕྱོགས་བསྡོམས་ཙཀ་ལི་གསུམ། ལས་བཞི་སོ་སོར་བཅས་ཕུར་ཙཀ་བདུན་ནམ། ཡང་ན་ཁྲོ་བཅུ་སྲས་མཆོག་རྣམས་ལ་ལྷ་ཙཀ་ཡོད་ནའང་འཐུས་ཤིང་། དེ་སྟེང་ལྡིང་ཁྲི་ལ་རྣམ་བུམ། རྒྱབ་ཏུ་དཔལ་གཏོར་གཡས་གཡོན་དུ་རྒྱུད་ཀྱི་གླེགས་བམ། གསང་ཐོད། རྡོར་སེམས་སྐུ་ཙཀ་སྔགས་བྱང་། དཀྱིལ་འཁོར་གྱི་གཡས་སུ་དབུ་རྒྱན་དང་ཐོད་སྐམ་ལྔའི་ཅོད་པན། གཡོན་དུ་ཚེ་འབྲང་དང་དངོས་གྲུབ་ཀྱི་རྫས། གཞན་ཡང་ཐལ་རཀ་ཞག་གསུམ། ཐོད་སྦྲུལ་གཉིས། ཞིང་གླང་སྟག་ལྤགས། མེ་ཕུང་རྣམས་སོ་སོ་བ། གདབ་ཕུར་ཆེ་ཆུང་། ཐོ་བ། བྲུབ་ཁུང་ཉའོ་རྣམས་འདུ་བྱ། ༈ བྱང་གཏེར་ཕུར་པ་སྤུ་གྲི་ལ། སྟ་གོན་རྫས་བཞི། དཀྱིལ་འཁོར་སྟེང་དབུས་སུ་གཙོ་ཕུར་ཞལ་མདུན་བསྟན། རྩིབས་བཅུ་ལ་ཁྲོ་བཅུའི་ཕུར་པ་ནང་བསྟན། སྒོ་བཞིར་སྒོ་ཕུར་བཞི་ཕྱིར་བསྟན་བྱིན་རླབས་བཅས་ཨེ་ཁྲོམ་ལ་བཀོད་པའི་དབུས་འཕྲུལ་སྟེགས་ལ་རྣམ་བུམ་ཆིངས་སྔོན་ཅན་བཀོད། མཐའ་སྐོར་རྣམས་སུ། ཡུངས་ཀར། བདུད་རྩི། དབུ་རྒྱན། དར་དཔྱང་། རྡོར་དྲིལ། གླེགས་བམ། སྟོད་གཡོགས། སྨད་གཡོགས། གླང་ཀོ་སྟག་ཤམ། སྦྲུལ་ཆུན། མི་ལྤགས། ཐོད་ཕྲེང་ཚར་གསུམ། ཁྲག་ཞག་ཐལ་བ་རྣམས་སོ་སོ་བ། འདོད་ཡོན་ལྔ། ཚོགས་སམ་ཚེ་བུམ། གསང་དབང་ཐོད་པ། ཕན་དབང་ཆས་དབུ་རྒྱན། གདུགས། ཧཱུྃ་ཡིག །རྡོར་དྲིལ། ཡེ་ཤེས་སེམས་དཔའི་སྐུ །དར་དམར་ཅོད་པན། མེ་ཏོག་ཕྲེང་བ། གོ་ཆ། བཟའ་བཏུང་རྣམས་དངོས་སམ་ཙཀ་ལི་ཚང་བ། རིག་ཙཀ །ནུབ་ཕྱོགས་སུ་གཏོར་ཆེན་རྣམས་བཀོད། བསྒྲལ་དབང་ཆས། སྲས་མཆོག །མགྱོགས་ཕུར། གདབ་ཕུར་རྣམས་སློབ་དཔོན་མདུན་དང་། ལྕགས་ཧོམ་ལིངྒ་། ཕྱག་རྒྱ་བཞི། བྱ་འུག་སྒྲོ །སྐམ་རློན་ཐུན་སོགས་ཀྱང་གང་བདེར་བཞག་གོ ༈ །སངས་གླིང་ཕུར་པ་ཐུགས་ཀྱི་ཉིང་ཁུའི་རྩ་དབང་ལ། སྟ་གོན་རྫས་བཞི། ཞི་ཐབ། ཏིལ་ཡུངས་སོགས་སྲེག་རྫས་མདོར་བསྡུས། དཀྱིལ་འཁོར་རས་བྲིས་དབུས། གཙོ་བོ་སྲས་མཆོག་ཕུར་བུ། ཕྱོགས་བཞིར། བུདྡྷ། རཏྣ། པདྨ། ཀརྨ་ཀཱི་ལའི་ཕུར་པ་བཞི་ཨེ་ཁྲོམ་ལ་བཀོད། དེ་སྟེང་འཕྲུལ་སྟེགས་ལ་རྣམ་བུམ་སོ་ལྔའི་བཅུད་ལྡན་ཆིངས་སྔོན་ཁ་རྒྱན་དང་བཅས་པ་བཞག །དེ་མདུན་གཙོ་བོ། ཀཱི་ལ་རིགས་བཞི། ཁྲོ་བཅུ་ཡབ་ཡུམ། ཟ་བྱེད་གསོད་བྱེད་བཅས་སྐུ་ཙཀ་སོ་ལྔ། ཁྲོ་བཅུ་ཁྲ་ཐབས་ཕྱོགས་བསྡུས་དང་། སྲས་མཆོག་ཉེར་གཅིག་དམ་ཅན་བཅུ་གཉིས་ཕྱོགས་བསྡུས་ཀྱི་སྡོམ་ཕུར་རམ་ཙཀ་ལི་བཀོད། ཆུ་དབང་བུམ་པ། དབུ་རྒྱན། རྡོ་རྗེ། དྲིལ་བུ། མིང་དབང་རྣམས་ཀྱང་ཕྱོགས་བཞིར་བཞག །སློབ་དཔོན་དབང་ཆས་གདུགས། རཀྟ། ཞག །ཐལ་ཆེན། ཞིང་གཡང་། ཐོད་ཕྲེང་། སྟག་ཤམ། གསུར་དུད་དང་མི་རྐང་གླིང་བུ་རྣམས་ཕྱོགས་གཅིག་ཏུ་བཞག །ལས་བཞིའི་ཕྲེང་བ། རྡོ་རྗེ་རྩེ་ལྔ། རྩེ་དགུ། བང་གླང་ཀོ །སྟག་ཤམ། སྦྲུལ་ཆུན། ཐོད་ཕྲེང་། ཞིང་ལྤགས། ཞག །རཀྟ། ཐལ་ཆེན། མེ་ཕུང་རྣམས་གོ་རིམ་ལྟར་དང་། ཕྱག་མཚན་རྡོ་རྗེ་རྩེ་དགུ། རྩེ་ལྔ། མེ་ཕུང་ཁ་ཊྭཱཾ། ཕུར་པ་རྣམས་སོ་སོའི་ཙཀ་ལི། རཀྴའམ་ཐོད་ཕྲེང་། ཆོས་བཤད་འཁོར་ལོ་དུང་དྲིལ་བུ་པུསྟི། གསང་ཐོད། རིག་ཙཀ་རྣམས་ཅི་བདེར་བཀོད། གཞན་དོན་རྗེས་གནང་ལ། འཁོར་ལོ། རལ་གྲི །དུང་། གླེགས་བམ། རྒྱལ་མཚན། མངོན་སྤྱོད་རྗེས་གནང་རྔ། ལས་ཕུར། མདའ་གཞུ། དུར་ཁྲོད་ཆས་བརྒྱད། ལས་བཞིའི་གཟུགས། ཤ་ལྔ། བདུད་རྩི་ལྔ། ཚོགས་རྫས། མར་མེ་བཅས་སྣོད་གཅིག་ཏུ་ལེན་བདེར་བཞག ༈ །དོན་དབང་ལ། སྟ་གོན་རྫས། རས་བྲིས་སམ་ལྷ་གྲངས་ཚོམ་བུའི་ཁར་རྣམ་བུམ། དེ་སྟེང་ཐོད་པ་འབྲུས་བཀང་བར་གཙོ་ཕུར་དང་གཙོ་བོ་ཡབ་ཡུམ་སྐུ་ཙཀ །ཤར་དུ་རྡོ་རྗེ། ལྷོར་སྐྱེར་ཕུར་ཅོད་པན་ཅན། ནུབ་ཏུ་པུསྟི་དང་ཕྲེང་བ། བྱང་དུ་དྲིལ་བུ། འཛོམ་ན་མཚམས་བཞིར་ཕུར་པ་དར་གྱི་ཅོད་པན་ཅན་རེ་རེ། རིགས་ལྔའི་ཙཀ་ལི། སྣོད་གཅིག་ཏུ་གསང་དབང་རྫས་ཆང་སྨན་མངར་གསུམ་སྦྱར་བ། རིག་ཙཀ །མཚམས་ཕུར་གཅིག །སྦྱོང་ཆས་ཏིལ་ནག་རྩྭ་ཆུན། ལྕི་བའི་ཆངས་བུ། ཁམ་ཕོར། སེང་རས་དཀར་པོ་རྣམས་འདུ་བྱ། ༈ རཏྣའི་ཕུར་པ་ཡང་གསང་བླ་མེད་ཀྱི་རྩ་དབང་མཚོན་ཆ་འཁོར་ལོ་ཞལ་སྤྲོད་དང་བཅས་པ་ལ། སྟ་གོན་རྫས་བཞི། མིག་དར་མེ་ཏོག །འཛོམ་ན་ཕུར་ཆུང་སློབ་མའི་གྲངས་མཉམ། དཀྱིལ་འཁོར་དབུས་སུ་ལྡིང་ཁྲི་ལ་རྣམ་བུམ་སོ་ལྔའི་བཅུད་ལྡན་ཆིངས་སྔོན་ཁ་རྒྱན་རིགས་ལྔའི་སྲོག་ཞུས་བརྒྱན་པ་བཀོད། ཕུར་ཁྲོམ་ཡོད་ན་གཙོ་བོ། སྲས་བཞི། ཁྲོ་བཅུ་ཁྲ་ཐབས། ཕྲིན་ལས་བཞི། སྒོ་མ་བཞི། དམ་ཅན་བཅུ་གཉིས། གིང་བཞི། དགེ་བསྙེན་ཉེར་གཅིག །དབང་ཕྱུག་ཉེར་བརྒྱད་རྩང་ཕུར་རྣམས་ལྷ་གནས་སོ་སོར་ཨེ་ཁྲོམ་དང་ཐོད་གདན་ལ་བཀྲམ། མེད་ན་གཙོ་ཕུར་ཚད་ལྡན་དར་ནག་གི་ཅོད་པན་དང་བཅས་པ་དཀྱིལ་འཁོར་དབུས་སུ་ཨེ་ཁྲོམ་ལ་བཙུགས། གཞན་རྣམས་གྲངས་ཚང་ཙཀ་ལི་ལ་ཚོ་བརྒྱད་དུ་བྱས་ནས་བྲིས་པའམ་ཕུར་པ་བརྒྱད་ཙམ་བཀོད། མདུན་ཕྱོགས་སུ་གཙོ་བོ། ཁྲོ་བཅུ། ཁྲ་ཐབས་ཉི་ཤུ་སོ་སོར་བྲིས་པའི་ཙཀ་ལི། རྡོ་རྗེ། ཕུར་པ། ཁ་ཊྭཱཾ། མེ་ཕུང་། ཐལ་རག་ཞག་གསུམ། དྲིལ་བུ། ཐོད་ཁྲག །ཡེ་ཤེས་སེམས་དཔའ་རྣམས་ཀྱི་ཙཀ་ལི། སྔགས་བྱང་གསེར་བྲིས། རྒྱབ་ཏུ་དཔལ་གཏོར་སྐུ་ཙཀ་དར་གདུགས་དང་བཅས་པ། རྒྱུད་དམ་སྒྲུབ་པོད། གཡས་གཡོན་གང་བདེར་ཐོད་པའི་བདུད་རྩི། བྱང་སེམས་དཀར་དམར་ཙན་དན་ག་པུར་བུ་རམ་རྣམས་སྦྱར་བའི་རིལ་བུ་ཕྱེ་མ་གང་བདེ། རིག་ཙཀ །རྔ་དུང་རོལ་མོ། ཚེ་འབྲང་། བཟའ་བཏུང་ཚོགས་རྫས་རྣམས་བཞག །ལས་བུམ། གདབ་ཕུར། ཐོ་བ། ཐུན་རྫས། ལྕགས་ཧོམ་ལིངྒ་རྣམས་འདུ་བྱ། ༈ དོན་དབང་ལ། སྟ་གོན་རྫས། རས་བྲིས་སམ་ལྔ་ཚོམ་ཁར་རྣམ་བུམ། དེ་སྟེང་ཨེ་ཁྲོམ་ལ་གཙོ་ཕུར། གཡས་སུ་དཔལ་གཏོར། གཡོན་དུ་གསང་ཐོད་མེ་ལོང་ཆོས་འབྱུང་བྲིས་པས་བཀབ། རྡོ་རྗེ་རྩེ་དགུ་རྩེ་ལྔ། མེ་ཕུང་ཁ་ཊྭཱཾ། ཐོད་ཕྲེང་། སྦྲུལ་ཆུན། གླང་ཀོ་སྟག་ཤམ། ཐལ་རཀ་ཞག་གསུམ་གཟིག་ཤམ་རྒྱན་དྲུག་དྲིལ་བུ་བཅས་པའི་ཙཀ་ལི་སོ་སོར་ཕྱོགས་བསྡུས། མདུན་དུ་ཚེ་འབྲང་ཟས་སྣ། སྲས་ཕུར། ལྕགས་ཧོམ་ཉའོ་རྣམས་བཀོད། ༈ ࿋ པད་གླིང་ཕུར་པ་སྲོག་གི་སྤུ་གྲི་ལ། དཀྱིལ་འཁོར་རམ་ཚོམ་བུ་མཐིང་ནག་དབུས་སུ་གཙོ་བོ། དེ་ཕྱིར་རིམ་བཞིན་སྲས་མཆོག་ཉེར་གཅིག །ཁྲོ་བཅུ། དབང་ཕྱུག་ཉེར་བརྒྱད་མ་མོ་བཅུ་གཉིས་སྒོ་བཞི་བཅས་དང་དེ་མཐར་གྲངས་མེད། དེ་སྟེང་འཕྲུལ་སྟེགས་ལ་བུམ་པ་མགུལ་ཆིངས་མཐིང་ནག་གིས་སྤྲས་པ། མདུན་དུ་གཙོ་བོ། ཁྲོ་བཅུ། སྲས་མཆོག་ཉེར་གཅིག །སྒོ་བཞི་མངགས་ཕུར་བཅས་ཀྱི་ཕུར་པ། དབུ་རྒྱན། ཅོད་པན། གཞུང་པོད། གསང་ཐོད། ཡེ་ཤེས་སེམས་དཔའི་སྐུ་དང་སྔགས་བྱང་། དུར་ཁྲོད་ཆས། དཔལ་གཏོར། ཞལ་ཟས་སྣ་ཚོགས། གདབ་ལས་ལ། བྲུབ་ཁུང་། ལིངྒ་། ཐོ་བ། དམ་ཅན་མ་མོ་བཅུ་གཉིས། གདབ་ཕུར་བཅས། ࿋ ༈ ཆོས་གླིང་ཐུགས་ཀྱི་ཐིག་ལེ་ལ། སྟ་གོན་རྫས་བཞི་མཆོད་པ་བཅས། རས་བྲིས་དབུས་དང་མདུན་རྒྱབ་ཏུ་ཨེ་ཁྲོམ་རེ་ལ་ཕུར་པ་གཙོ་འཁོར་གསུམ། དེ་སྟེང་ལྡིང་ཁྲིའི་ཁར་རྣམ་བུམ། ཤར་དུ་གཙོ་བོ་ཁྲོ་བཅུ་དང་བཅས་པའི་སྐུ་ཙཀ་དང་ཕྱག་མཚན་མིང་དབང་རྡོར་དྲིལ་བཅིངས་པ། ལྷོར་མེ་ཏོག་ཕྲེང་བ་དང་དབུ་རྒྱན་དར་དཔྱངས། ནུབ་ཏུ་རྡོ་རྗེ་དང་གསང་ཐོད་བར་མེ་ལོང་ལ་ལི་ཁྲིའི་དཀྱིལ་འཁོར་ཆོས་འབྱུང་བསྣོལ་མ་མཱུཾ་དང་དགའ་འཁྱིལ་དྲུག་གིས་མཚན་པས་བཀབ་པའི་སྟེང་སྔགས་བྱང་ཤེལ་རྡོ། བྱང་དུ་དྲིལ་བུ་དང་དཔལ་གཏོར་འཁོར་ལོའི་གདན་དང་སྐུ་ཙཀ་དར་གདུགས་ཅན། ཉེ་ཕྱོགས་གང་བདེར་དུར་ཁྲོད་དཔལ་ཆས་ཕྱོགས་བསྡུས། བསྒྲལ་དབང་གི་ཆས་ལྕགས་ཧོམ་ཟན་ལིང་དང་ཤོག་ལིང་། བྱ་འུག་སྒྲོ །གུ་གུལ། ཐུན་རྫས། རལ་གྲི། པུ་རི་མཆོད་རྟེན་དཀར་ནག་གམ་སཱཙྪ་གཉིས། དམར་གཏོར་མཚེ་ཡུངས་ཀྱིས་བརྒྱན་པ། དགང་གཟར་བླུགས། དྲག་ཤིང་གི་ཧོམ་གྲུ་གསུམ། དམར་གཏོར། མནན་ཆས་ཕུང་རེ་བྱད་ཐག་ཐོད་ངན་དུར་རྡོ་བཅས་བཀོད། ༈ སྟག་ཚང་ཕུར་པ་སྟོད་ལས་རྩ་དབང་ལ། རས་བྲིས་སམ་ཚོམ་བུའི་ཁར་རྣམ་བུམ་ཁ་རྒྱན་གསེབ་ཀུན་བཟང་ཡབ་ཡུམ་གྱི་ཙཀ་ལི་ཙན། མདུན་དུ་གསང་ཐོད་དར་དམར་གྱིས་བཀབ་པའི་སྟེང་མེ་ལོང་ཤེལ་རྡོ་བརྩེགས་པ་དང་ཁ་ཊྭཱཾ། གཡས་བསྐོར་དུ་དབུ་རྒྱན། རྡོ་རྗེ། དྲིལ་བུ། དབུས་སུ་གཙོ་ཕུར་དང་གཙོ་སྐུ། ཧཱུྃ་ཡིག་བཅུ། སྒོ་བ་བཞིའི་ས་བོན་ནམ་ཕྱག་མཚན་གང་འཛོམ། རྒྱབ་ཏུ་དཔལ་གཏོར། གཞན་ཡང་དུར་ཁྲོད་ཆས་བརྒྱད་ཕྱོགས་བསྡུས། བྲུབ་ཁུང་ཉའོ། གདབ་ཕུར་རྣམས་བཀོད། སྨད་ལས་ཆེ་མཆོག་དང་སྦྲེལ་སྐབས་གཙོ་བོ་དང་ཁྲོ་བཅུའི་སྐུ་ཙཀ་ལྷག་པོར་བཀོད། ༈ བདུད་འདུལ་ཕུར་པ་གནམ་ལྕགས་སྤུ་གྲི་ལ་དབང་རྫས་མང་བས་རྩ་དཀྱིལ་དང་རྫས་དཀྱིལ་སོ་སོར་བྱེད་པའི་ལུགས་ཉིད་སྟབས་བདེ་བས་དེ་ལྟར་ན། དཀྱིལ་འཁོར་རས་བྲིས་དབུས་སུ་མཉྫིའི་ཁར་བུམ་པ་མགུལ་ཆིངས་མཐིང་ག་ཅན། ཤར་དུ་དཀར་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ལྗང་གུ་ཅན། བུམ་པ་ལྔ་ཀ་སོ་ལྔའི་བཅུད་དང་ཁ་རྒྱན་ལྡན་པ། དེ་རེ་རེའི་མདུན་དྲུང་དུ་བྷནྡྷ་ཨ་མྲྀཏས་བཀང་བ་རེ་རེ། དེ་དག་དང་མཉམ་དུ་དབུས་སུ་འཁོར་ལོ། ཤར་དུ་རྡོ་རྗེ། ལྷོར་པདྨ། ནུབ་ཏུ་དཔལ་བེའུ། བྱང་དུ་རྒྱ་གྲམ་གྱི་ཙཀ་ལི་བཀོད། གཙོ་བོ། ཀཱི་ལ་ཡ་བཞི། ཁྲོ་བཅུ། ཟ་གསོད་ཉི་ཤུ་སྟེ་ལྷ་ཙཀ་སོ་ལྔ་ལྷ་གནས་སོ་སོའི་དབུས་སུ་སྤོམ་པ་དང་གཙོ་བོའི་ཕྱག་མཚན་བཞག །ལྷོར་གསང་ཐོད། སྒྲུབ་པོད། རྡོ་རྗེ། ཁ་ཊྭཱཾ། ནུབ་ཏུ་སྔགས་བྱང་། རཀྴའམ་ཐོད་ཕྲེང་། དཔལ་ཆས། རིག་ཙཀ །བྱང་དུ་དཔལ་གཏོར་སྐུ་ཙཀ་དར་གདུགས་ཀྱིས་བརྒྱན་པ། གང་བདེར་དབུ་རྒྱན་སྒྲུབ་པོད་ཚེ་གཏོར་གཡང་རྫས་རྣམས་བཀོད། བྱང་ངོས་སྟེགས་བུར་དཀྱིལ་འཁོར་ཨེ་ཁྲོམ་དབུས་ཀྱི་གྲུ་གསུམ་ལ་གཙོ་ཕུར། དེའི་དྲུང་ལས་ཕུར། ཟླ་གམ་གསུམ་ལ་སྲས་མཆོག་ཉེར་གཅིག་བདུན་རེ། དེ་རྒྱབ་དྲག་འཁོར་རྩིབས་བརྒྱད་ཀྱི་ཕྱོགས་བཞིར་ཀྲོ་དྷ་བཞི། མཚམས་བཞིར་ཀཱི་ལ་ཡ་བཞི། དེ་རྒྱབ་རྩིབས་བཅུའི་དབུས་སུ་ཁྲོ་བཅུ། གཡས་གཡོན་དུ་ཟ་གསོད། དེ་རྒྱབ་ཕྱོགས་བཞིར་སྒོ་མ་བཞི་བཅས་ཀྱི་ཕུར་པ་བཀོད། དེ་རྒྱབ་རིམ་བཞིན་ཕུར་སྲུང་བཅུ་གཉིས། དགེ་བསྙེན་ཉེར་གཅིག །གིང་བཞི། དབང་ཕྱུག་ཉེར་བརྒྱད་རྣམས་ཕུར་པ་དངོས་སམ་རྩང་ཕུར་གྲངས་དེ་མཚུངས་བཀོད། དེའི་མཐར་ཡང་སྨན་རཀ་གཏོར་མ་དང་དྲག་མཆོད་ཀྱིས་བསྐོར། གལ་སྲིད་ཕུར་ཁྲོམ་མ་འཛོམ་ན་རྩ་དཀྱིལ་གྱི་དབུས་སུ་གཙོ་ཕུར་དང་ལས་ཕུར་དངོས་སུ་བཀོད། གཞན་རྣམས་ཚན་བསྡུས་པའི་རེ་རེ་ཙམ་མམ་ཙཀ་ལི་ལ་རི་མོ་གྲངས་ཚང་བྲིས་པ་བཞག །ཀཿཐོག་ཕྱག་བཞེས་ལྟར་བསྒྲལ་དབང་སྦྱོར་ན། རྫས་དཀྱིལ་གྱི་བྱང་དུ། དགྲ་ལིང་། གདབ་ཕུར། བྱ་འུག་སྒྲོ །ལྕགས་ཀྱུ་སོགས་མཚོན་ཆས། ཐུན་ཆས། དབྱེ་རྫས། གུ་གུལ། གསེར་སྐྱེམས། འོ་མཚོ། ཁྲག་མཚོ་རྣམས་ཀྱང་འདུ་བྱའོ། ༈ སྙན་བརྒྱུད་ཕུར་པའི་གནད་ཏིག་ལ། རས་བྲིས་སམ་ཚོམ་བུའི་དབུས་སུ་གཙོ་ཕུར་དང་རྣམ་བུམ་བརྩེགས་པའམ་མདུན་རྒྱབ་ཏུ་བཞག །སྐུ་ཙཀ །སྔགས་བྱང་། དུར་ཁྲོད་དཔལ་ཆས་གཅིག་བསྡུས། གསང་ཐོད་རིག་ཙཀ་གདབ་ཕུར་ཚེ་འབྲང་བྲུབ་ཁུང་ཉའོ་རྣམས་སྤྱི་ལྟར་བཀོད། ༈ གཏེར་གསར་ཟབ་བདུན་ཕུར་པའི་སྟོད་ལས་ལ། རས་བྲིས་སྟེང་ཡོད་ན་ཕུར་ཁྲོམ་དང་། མེད་ན་དབུས་སུ་ཨེ་ཁྲོམ་གཙོ་ཕུར། ཁྲོ་བཅུ་ལ་གཅིག །སྲས་མཆོག་ལ་གཅིག །སྒོ་མ་ལ་གཅིག་བཅས་གསུམ་གཡས་གཡོན་མདུན་དུ་བཀོད་པའི་སྟེང་དུ་ཁྲིའུ་ལ་རྣམ་བུམ། མཐའ་སྐོར་དུ་རིག་དབང་ཆས་བཞི། རཀྴའམ་ཐོད་ཕྲེང་། གསང་ཐོད། རིག་ཙཀ་རྣམས་བཀོད། སྨད་ལས་དཀྱིལ་འཁོར་ཞལ་བསྒྱུར་དགོས་པས། དབང་ཆས་སྔ་མ་རྣམས་བསྡུས། དཀྱིལ་འཁོར་སྔ་མའི་སྟེང་དུ་ཨེ་ཁྲོམ་དཀྱིལ་འཁོར་བཅས་པར་ཕུར་པ་སྔ་མ་རྣམས་སླར་བཀོད་པའི་མཉམ་དུ་གཙོ་བོ་ཁྲོ་བཅུའི་ཙཀ་ལི། རཀ་ཕྲེང་། དབུས་མདུན་སྲས་ཕུར། ཕྱོགས་བཞིར་ཕྲིན་ལས་བཞིའི་ཕུར་པ་སོ་སོ་བ། མདུན་དུ་ཐུན་ཕུར། རྒྱབ་ཏུ་ཚེ་འབྲང་། རིལ་ཆང་བཅས། དཔལ་དང་དུར་ཁྲོད་ཆས་ཕྱོགས་བསྡུས། སྨན་རག་གཏོར་གསུམ་ཕྱོགས་བསྡུས། བྱུག་བདུག་བྲབ་གསུམ། ཧོམ་ཁུང་ལིངྒ། རལ་གྲི་ཐོ་བ་སོགས་བསྒྲལ་ཆས། སྣོད་གཅིག་ཏུ་ཐུན་རྫས། ཟོར་གསུམ། ཕུར་ཆུང་གཉིས། གཏོར་ཟོར་རྣམས་བཞག་པ། མེ་ཧོམ་དགང་བླུགས། མནན་ཆས། ཞལ་ཟས་བཟའ་བཏུང་བཅས་འདུ་བྱ། ༈ གཏེར་གསར་གསང་ཐིག་གཏོར་དབང་ལ། བྷནྡྷའི་ནང་དཔལ་གཏོར་སྐུ་ཙཀ་དར་གདུགས་ཀྱིས་བརྒྱན་པ་བཀོད་དོ།། ༈ །།དེ་ནས་མ་མོ་རྦོད་གཏོང་གི་སྐོར་ལ། སྤྲུལ་སྐུ་ར་ཤག་ཆེན་པོའི་མ་མོ་སྒང་ཤར་ལ། སྟ་གོན་རྫས་བཞི་དང་མཆོད་པ་ལྔ། རས་བྲིས་ཀྱི་དཀྱིལ་འཁོར་སྟེང་ཕྱོགས་བཞི་དབུས་ལྔར་ཐོད་པ་ཆང་གིས་བཀང་བ་ལྔའི་ནང་དུ་བདུད་རྩི་ལྔའི་རིལ་བུ་སོ་སོ་ཡོད་ན་དབང་གཞུང་ལྟར་སོ་སོར་བཏབ། མེད་ན་ཐམས་ཅད་ལ་ཆོས་སྨན་བཏབ་པ་བཀོད། མདུན་དུ་གཙོ་འཁོར་བདུན་ཅུ་རྩ་དྲུག་གི་ལྷ་ཙཀ་ཚང་བ། ཕྱག་མཚན། ཐོད་པའི་བདུད་རྩི། ཤ་ཆེན། ཐོད་རྔ། མདའ་གཞུ། ཕུར་པ། རལ་གྲི་མཚོན་ཆའི་འཁོར་ལོ་རྣམས་དངོས་སམ་ཕྱོགས་བསྡུས་ཀྱི་ཙཀ་ལི། གཡས་སུ་དབུ་རྒྱན་ཅོད་པན། རྒྱབ་ཏུ་རྡོ་རྗེ་རྩེ་དགུ །གཡོན་དུ་དྲིལ་བུ། བར་མཚམས་སུ་གསང་ཐོད་མངར་གསུམ་སྨན་སྦྱར། རིག་ཙཀ །དུར་ཁྲོད་ཆས་ཙཀ །རྗེས་གནང་མེ་ལོང་། རལ་གྲི་ནས་འཁོར་ལོའི་བར་ཕྱག་མཚན་ལྔ། རྐང་གླིང་བཅས་བཞག་གོ ༈ །གཏེར་གསར་ཟབ་བདུན་མངོན་རྫོགས་རྒྱལ་པོ་ལ། རས་བྲིས་ཀྱི་དབུས་སུ་རྣམ་བུམ་སོགས་རིག་པའི་དབང་ལྔའི་ཆས། ཐོད་ཆུ། ལྷ་ཙཀ །དར་དཔྱངས་སྔོ་དམར། རཀྴའི་ཕྲེང་བ། སྔགས་བྱང་། རྡོ་རྗེ་རིན་ཆེན་པདྨ་རྒྱ་གྲམ་བཞི་པོ་སོ་སོ་བ། མདུན་དུ་རི་རབ་བང་རིམ་བཅུ་གསུམ་པའི་སྟེང་དུ་དཔལ་གཏོར་ལ། གཡས་སུ་སྨན། གཡོན་དུ་རཀྟ། མདུན་དུ་ཁྲག་ཀོང་། རྒྱབ་ཏུ་མར་མེ་འདོད་ཡོན་སྤར་བཏབ་གང་འགྲུབ་ཀྱིས་བསྐོར་ཞིང་ནམ་མཁའ་བཙུགས་པ། རྒྱབ་ཏུ་གསང་ཐོད་རིག་ཙཀ་ཤེལ། གཞན་ཡང་བྱོལ་སོང་ཁྲི་གདན་ནས་དཔལ་དང་དུར་ཁྲོད་ཆས་གཞལ་ཡས་རྣམས་བཅས་ཙཀ་ལི་བཅུ་དགུ །ཤ་སོགས་བཟའ་བ། ཁྲག་ཆང་བཏུང་བ། རལ་གྲི་སོགས་མཚོན་ཆ་རྣམས་བཀོད། ༈ བོ་དོང་ལུགས་ཀྱི་སེང་གདོང་སྙན་བརྒྱུད་བཀའ་བཅུའི་ཐོག་མ་རིགས་ལྔའི་རྗེས་གནང་ལ། མཎྜལ་གཞུང་མཐུན་ནམ་ཚོམ་བུ་ཁ་དོག་ལྔ་པའི་སྟེང་ཁྲིའུ་ལ་དམར་གཏོར་ཟུར་གསུམ་གཙོ་འཁོར་ལྔ་པ་དར་གདུགས་ཅན། གཡས་སུ་བུམ་པ། གཡོན་དུ་འབུལ་གཏོར། ༈ འཕྲོས་སྙན་བརྒྱུད་བཀའ་དགུ་རྣམས་ལ། མཎྜལ་གཞུང་མཐུན་ནམ། ཚོམ་བུའམ་ཚོན་ཕུང་ལྷ་མདོག་དང་མཚུངས་པར་བཀོད་པའི་སྟེང་དུ་མཉྫིའི་ཁར་གཏོར་མ་ཟུར་གསུམ་མཐེབ་ཀྱུས་བསྐོར་བ་ལྷའི་མདོག་དང་མཚུངས་པ་དར་གདུགས་ཅན་རེ་བཀོད། ཡོད་ན་སྐུ་ཙཀ་བཙུགས་པའི་མདུན་དུ་བུམ་པ་དང་འབུལ་གཏོར་རེ་བཞག །རྗེས་མ་ཚེ་སྒྲུབ་གཉིས་ལ། གཡས་གཡོན་དུ་ཚེ་རིལ་ཆང་བཤམ། དེ་ལ་ལྷ་མདོག་ནི་རིམ་བཞིན། མཐིང་ནག །དམར་ནག །དམར་པོ། ནག་པོ། མཐིང་ནག་གསུམ། དམར་པོ། སེར་པོ་རྣམས་སོ། ༈ །འཇའ་ཚོན་སེང་གདོང་ལ། ཚོམ་བུ་མཐིང་ག་གཅིག་གི་ཁར་དམར་གཏོར་ཟུར་གསུམ་མཐེབ་ཀྱུ་བཞིས་བསྐོར་བ་དར་གདུགས་ཅན། གཡས་སུ་རྣམ་བུམ། གཡོན་དུ་གསང་ཐོད་ཁ་ཊྭཱཾ་ཤེལ་རྡོ། མདུན་དུ་སེང་གདོང་རིགས་ལྔའི་ཙཀ་ལི་བཅས། ༈ ཀློང་གསལ་སི་ཧཾ་དམར་མོ་ལ། འབྲུ་ཚོམ་དམར་པོ་གཅིག་གི་ཁར་གཏོར་མ་གོང་མཚུངས། སྔགས་བྱང་། རྡོ་རྗེ། གྲི་ཐོད་ཁ་ཊྭཱཾ་བཅས། ༈ གཏོར་དབང་རྨི་ལམ་མ་ལ། ཚོམ་བུ་གཏོར་མ་སྔར་ལྟར་བཀོད་པའོ། ༈ །བདུད་འདུལ་དྲག་མོ་ལ། རས་བྲིས་དབུས་སུ་རྣམ་བུམ་ཁར་མོ་ཐོད་མཚན་ལྡན་ནང་ཆོས་སྨན་ཆང་སྦྱར། དེ་སྟེང་སིནྡྷཱུ་རའི་མེ་ལོང་ལ་ཆོས་འབྱུང་བསྣོལ་མ་དགའ་འཁྱིལ་དྲུག་བཅས་པའི་ལྟེ་བར་པདྨ་འདབ་བཞི་ལ་བཾ་ཧ་རི་ནི་ས་བྲིས་པ་བཞག་ལ་དར་དམར་གྱིས་བཀབ། དེ་སྟེང་ཁྲིའུ་ལ་དབང་གཏོར་འདབ་བརྒྱད་གྱེན་ལངས་དབུས་རྡོ་རྗེ་ཕྱེད་པ་ལྟ་བུ་པདྨའི་ལན་ཚར་ཅན་འཁོར་ནོར་བུ་འདྲ་བའི་བཤོས་ཕྲན་བཞིས་བསྐོར་བ་སྐུ་ཙཀ་དར་གདུགས་ཅན་བཤམ། མདུན་སོགས་སུ་ཕྱག་མཚན་གྲི་ཐོད་ཁ་ཊྭཱཾ། ཐོད་སྐམ་དབུ་རྒྱན། དར་གྱི་ཅོད་པན། གླང་ཞིང་སྟག་ལྤགས་ཐོད་ཕྲེང་། རུས་རྒྱན། རྩེ་གསུམ། རོ་གདན་རྣམས་དང་། ལྷ་ཙཀ་ཡོངས་རྫོགས། སྔགས་བྱང་། གླེགས་བམ། རཀྴའམ་ཐོད་ཕྲེང་། སྲུང་ཟློག་བསད་གསུམ་རྗེས་གནང་སྦྱར་ན། རྡོ་རྗེ། འཁོར་ལོ། ཕུར་པ། གྲི་ཐོད་རྣམས་གཞུང་མཐུན་ཅན་བཞག ༈ །དེའི་དོན་དབང་ལ། རས་བྲིས་སམ་ཚོམ་བུ་ལྷ་གྲངས་སྟེང་བུམ་ཐོད་མེ་ལོང་གཏོར་མ་བཞི་པོ་སྔར་ལྟར་བཤམ། འདི་སྐབས་གཏོར་མ་རྒྱབ་མདུན་གང་བདེར་བཤམས་ཀྱང་རུང་ངོ་། ༈ །རོལ་རྡོར་བྲག་གཏེར་སེང་གདོང་མའི་རྗེས་གནང་ལ། ཚོམ་བུ་ལྷ་གྲངས་དབུས་སུ་བུམ་པ་ཁ་རྒྱན་སྐུ་ཙཀ་དང་བཅས་པ། ཕྲེང་བ། ཤེལ་རྡོ། མཁའ་འགྲོའི་གཏོར་མ་ཕྱག་མཚན་གྲི་ཐོད་ཁ་ཊྭཱཾ་རྣམས་གཡས་གཡོན་དུ་བཀོད་དོ།། ༈ །།དེ་ནས་འཇིག་རྟེན་མཆོད་བསྟོད་ཀྱི་སྐོར་ལས། ཉང་གཏེར་དྲེགས་པའི་སྡེ་དཔོན་སུམ་ཅུའི་སྲོག་དབང་ལ། རས་བྲིས་སྟེང་འཛོམ་ན་ཕུར་པ་ལྷ་གྲངས་དང་ཙཀ་ལི་རྣམས་ལྷ་གནས་སོ་སོར་བཀོད། མ་འཛོམ་ན་དབུས་སུ་ཕུར་པ་གཅིག །དྲེགས་པའི་སྡེ་དཔོན་སུམ་ཅུའི་ལྷ་ཙཀ་སྤོ་སྟེ་བཀོད་པའི་སྟེང་དུ་ཁྲིའུ་ལ་ཕུར་བུ་གཟུག །ཆེ་མཆོག །ཕྱག་རྡོར། རྟ་མགྲིན། རྡོར་སེམས་ཀྱི་སྐུ་རྣམས་བཞུགས། མཐའ་སྐོར་དུ་ཐོད་པ་འཁོར་ལོ་དང་སྲོག་ཡིག་བྲིས་པ་ལ་འབྲུ་དང་རིན་པོ་ཆེས་བཀང་བ། རི་རབ་སྟེང་ལྷ་བཤོས་བཞི་དང་མར་མེ་ལྔ་བཞག་པ། རི་རབ་གླིང་བཞིའི་ཙཀ་ལི། བ་དན། རུ་མཚོན། རྒྱལ་མཚན། མཆོད་རྟེན་ནག་པོ། རྫས་རྒོད། རཀྟ། ཡུངས་ཀར། ཕུར་པ། རལ་གྲི་རྣམས་བཀོད། ༈ རོལ་རྡོར་གཏུམ་པོ་དྲེགས་འདུལ་གྱི་གཏོར་དབང་ལ། ཚོམ་བུ་གཅིག་སྟེང་དཔལ་གཏོར་རྒྱན་ལྡན་དང་། ཐོད་ཆང་། རྡོ་རྗེ་བཅས་བཞག ༈ །གཏེར་གསར་གསང་བདག་དྲེགས་འདུལ་རྩ་དབང་ལ། རས་བྲིས་སམ་ཚོམ་བུ་གཅིག་པའི་སྟེང་རྣམ་བུམ། སྐུ་ཙཀ །སྔགས་བྱང་། རཀྴའི་ཕྲེང་བ། ལྕགས་རྡོར། གསང་ཐོད་རིག་ཙཀ་མེ་ལོང་ཤེལ་རྡོ་བཅས། ༈ དྲེགས་པའི་དབང་ལ། རས་བྲིས་སྟེང་དབང་ཆས་རྣམ་བུམ་སོགས་རིག་དབང་ལྔ། དེ་སྟེང་དྲེགས་པའི་སྡེ་དཔོན་སུམ་ཅུའི་ལྷ་ཙཀ །ཕྲེང་བ། སྔགས་བྱང་། རྡོར་དྲིལ། དཔལ་དང་དུར་ཁྲོད་ཆས། སྨན་རཀ་གཏོར་གསུམ་ཕྱོགས་བསྡུས་ཅན། གདབ་ཕུར། གསང་ཐོད། རིག་ཙཀ་རྣམས་བཀོད་དོ།། ༈ །།དེ་ནས་དམོད་པ་དྲག་སྔགས་ཀྱི་སྐོར་ལས། གཏེར་གསར་སྟོབས་ལྡན་ནག་པོ་ལ། བཤམ་བཀོད་སྔ་མ་དང་འདྲ་བ་ལས་ལྷ་ཙཀ་དམོད་པ་དྲག་སྔགས་དང་། སྔགས་བྱང་ཡང་དེ་ལྟར་བཞག ༈ ངག་གི་རྡོ་རྗེའི་ཕྱག་རྡོར་དྲག་སྔགས་མ་ལ། པདྨ་འདབ་བརྒྱད་ཚོམ་བུ་བཅས་པའི་དབུས་སུ་དཔལ་གཏོར་ཁྱུང་དང་རྡོ་རྗེ་ཉི་ཟླས་བརྒྱན་པ། ཤར་དང་ཤར་ལྷོ་ཞི་གཏོར་གཉིས་ཀྱིས་མཚོན་པའི་ཞི་རྒྱས་དབང་དྲག་གཏོར་མ་རྒྱན་ལྡན་དེ་རྒྱབ་སྡེ་བརྒྱད་གཏོར་མ་བརྒྱད་སོ་སོའི་སྲོག་ཡིག་ཤོག་གུར་བྲིས་པ་བཙུགས་པ་རྣམས་སྣོད་སོ་སོར་བཤམ། དབུས་སུ་ཁྲིའུའི་ཁར་རྣམ་བུམ་སྟེང་ཐོད་ཆང་དར་མཐིང་གིས་བཀབ། མདུན་དུ་གཏེར་སྲུང་ཐ་ར་ནག་པོ་ལ་གཏོར་མ་སྦྲུལ་དཀྲིས་གཙོ་འཁོར་གསུམ་ལིངྒས་བརྒྱན་པ་དང་། ཁྱུང་ལྔ་གཅིག་བསྡུས། རྒྱལ་ཆེན་བཞིའི་ཙཀ་ལི་སོ་སོ་བ། རཀྴའི་ཕྲེང་བ་བཅས། དར་སྣ་ལྔའི་ཅོད་པན། ༈ དེའི་ཚེ་དབང་ལ། ཚོམ་བུ་གཅིག་པའི་སྟེང་ཚེ་འབྲང་། གཡས་སུ་རྣམ་བུམ། གཡོན་དུ་ཐོད་ཆང་། རྒྱབ་ཏུ་ཚེ་གཏོར་ཐབས་ཤེས་ཁ་སྦྱོར་ལྟར། མདུན་དུ་ས་བདག་ཀླུ་གཉན། གཟའ་བརྒྱད། ཀླུ་བརྒྱད་སྒོ་མ་བཞིའི་སྐུ་ཙཀ་དྲེགས་འདུལ་ལྟར། སྣོད་གཅིག་ཏུ་གཏོར་ཆུང་ཉེར་བརྒྱད་དང་། དབང་ཕྲེང་། ཚེ་རིལ་ཆང་བཅས། ༈ དག་སྣང་དྲང་སྲོང་དྲི་མེད་ལ། མཎྜལ་པད་འདབ་བཞི་ཚོམ་བུ་གཅིག་པའི་ཁར་རྣམ་བུམ། སྐུ་ཙཀ །གཡས་སུ་ཚེ་རིལ། གཡོན་དུ་ཚེ་ཆང་། མདུན་དུ་འབུལ་གཏོར་དཀར་ཟླུམ་ཤིང་ཏོག་དཀར་མངར་གྱིས་བརྒྱན་པ། ༈ ལོཀྟྲི་པཱ་ལར། ཚོམ་བུ་གཅིག་པའི་སྟེང་དཀར་གཏོར་མངར་གསུམ་ཤིང་ཏོག་སྐུ་ཙཀ་གིས་བརྒྱན་པའི་གཡས་གཡོན་དུ་རལ་གྲི་ཐོ་བ། མདུན་དུ་འབུལ་གཏོར། ཆངས་བུ་བརྒྱད་གྱེན་བསླངས་གཏོར་མ་རྣམས་བཞག ༈ །གཏེར་གསར་ལོཀྟྲི་ལ། ཚོམ་བུ་གཅིག་པའི་རྣམ་བུམ། མདུན་དུ་དབང་གཏོར་དང་ཕྱག་མཚན་གོང་མཚུངས། སྔགས་བྱང་བཅས་སོ།། ༈ །།དེ་ནས་མཁའ་འགྲོའི་སྐོར་ལས་ཐོག་མར། ༈ ཉང་གཏེར་ཕག་མོ་ཞལ་གཉིས་མ་ལ། རྡུལ་ཚོན་ནམ་རས་བྲིས་སྟེང་ཁྲིའུ་ལ་ཐོད་པ་དུམ་གཅིག་བདུད་རྩིས་བཀང་བའི་ཁར་མེ་ལོང་ལ་སིནྡྷུ་རས་ཆོས་འབྱུང་ལྟེ་བར་བཾ། མཐར་སྔགས་ཕྲེང་གིས་བསྐོར་བའི་ཟུར་གསུམ་དུ་དགའ་འཁྱིལ་རེ་རེ་བྲིས་པས་བཀབ་པའི་སྟེང་དར་དམར་གྱི་གུར་ཕུབ། གཡས་སུ་རྣམ་བུམ། གཡོན་དུ་མེ་ཏོག་དམར་པོ། རྒྱབ་ཏུ་ཏིང་ལོ་དམར་པོ་སློབ་མའི་གྲངས་མཉམ། གཡོན་དུ་མཁའ་འགྲོའི་གཏོར་མ་རྒྱན་ཤ་ཆང་བཅས། འཛོམ་ན་བྱིན་འབེབས་སྦྱར་སྤོས། མ་འཛོམ་ན་སྤོས་དྲི་ཞིམ་པོའང་འདུ་བྱ། ༈ ཕག་མོ་དོན་གྲུབ་མ་ལ། མཎྜལ་གཞུང་མཐུན་སྟེང་མེ་ཏོག་དམར་པོའི་ཚོམ་བུ་བཀོད་པར་དར་གུར་དབུབ། ཏིང་ལོ་དམར་པོ་སློབ་མའི་གྲངས་མཉམ། སྦྱར་སྤོས་དང་། ཁྱད་པར་མཆོད་པ་གང་འཛོམ་གཞུང་གསལ་ལྟར་ལ་མ་འཛོམ་པ་རྣམས་དེར་མོས་པའི་ས་བཅད་ཙམ་རེ་བཞག ༈ །དབུ་བཅད་མ་ལ། རྡུལ་ཚོན་ནམ་རས་བྲིས་སྟེང་ཁྲིའུར་བུམ་པའི་ཁར་ཐོད་ཆང་། དེ་སྟེང་མེ་ལོང་ལ་ཆོས་འབྱུང་དབུས་སུ་ཨོཾ་གཡས་ཧཱུྃ་གཡོན་དུ་ཨཱཿ ཕྱིའི་མུ་ཁྱུད་ལ་སྔགས་གསུམ་བྲིས་པས་བཀབ་ཅིང་དར་གདུགས་ཕུབ། ༈ ཁྲོས་ནག་ལ། རས་བྲིས་སྟེང་བུམ་པའི་ཁར་ཐོད་ཆང་། དེ་སྟེང་མེ་ལོང་ལ་ཆོས་འབྱུང་བསྣོལ་མ་དགའ་འཁྱིལ་དྲུག་དང་བཅས་པའི་ལྟེ་བར་ཨ། ཕྱོགས་བཞིར་ཧ་རི་ནི་སའི་མཐར་རྩ་སྔགས་ཀྱིས་བསྐོར་བ་བཞག་ལ། དར་དམར་བརྒྱད་ལྟེབས་ཀྱིས་གུར་ཕུབ། ཤར་དུ་སྐུ་ཙཀ །ལྷོར་སྔགས་བྱང་། ནུབ་ཏུ་གྲི་ཐོད་ཁ་ཊྭཱཾ་དུར་ཁྲོད་ཆས་རྣམས་ཕྱོགས་བསྡུས། བྱང་དུ་སྒྲུབ་ཡིག་རྣམས་བཀོད། དབང་ཕྲེང་། ཐོད་ཆང་རྣམས་ཀྱང་འདུ་བྱ། ༈ ཁྲོས་ནག་དབང་རྒྱས་པ་ལ། སྔ་མའི་སྟེང་ལྷ་ཙཀ་ཚང་བ། དབུ་རྒྱན་རྡོར་དྲིལ། མིང་དབང་ཆས། མདུན་རྒྱབ་གང་བདེར་གཏོར་ཆེན་སྐུ་རྟེན་དར་གདུགས་ཀྱིས་སྤྲས་པ། གཙུག་རྒྱན་ནོར་བུ། ཁ་ཊྭཱཾ། གྲི་གུག །ཐོད་ཁྲག །རྒྱན་དྲུག །ཐོད་རློན་དོ་ཤལ། སྟག་ཤམ་རྣམས་སོ་སོ་བ། དུར་ཁྲོད་ཆས་ཕྱོགས་བསྡུས་བཅས་བཀོད། ༈ གཏུམ་མོའི་མེ་དབང་ལ། མཎྜལ་ཆོས་འབྱུང་ཉིས་བརྩེགས་སམ། འབྲུ་ཚོམ་ལྔ་བཀོད་པའི་དབུས། ཐོད་སྟེགས་མི་མགོའི་སྒྱེད་བུ་གསུམ་གྱི་ཁར། ཐོད་ཆང་སྨན་ཕབ་དང་དྲོད་སྨན་སྦྱར་བས་བཀང་བའི་ཁར་མེ་ལོང་སིནྡྷུ་རའི་ཆོས་འབྱུང་བསྣོལ་མའི་དབུས་དང་ཕྱོགས་བཞིར་ཨ་ཧ་རི་ནི་ས་ལ་རྩ་སྔགས་ཀྱིས་གཡོན་དུ་བསྐོར་བས་བཀབ། དེ་སྟེང་མཉྫིའི་སྟེང་ཐོད་སྣོད་དུ་འབྲུ་བཟང་པོའི་རྗེན་ལ་བདུད་རྩི་ཆོས་སྨན། རིན་པོ་ཆེ་འབྲུ་སྨན་ཤ་ཁྲག་མེ་ཏོག་ཕྱེ་སྟེ་ཁྱད་པར་གྱི་རྫས་བསྲེས་ལ་དཔལ་གཏོར་ཟུར་གསུམ་རྣམ་པ་འཁོར་རང་འདྲ་བཞིས་བསྐོར་བའི་མཐར་དཀར་མངར་རིགས་དང་དྲོད་སྨན་གང་འཛོམ་སྦྱར་བའི་རིལ་བུ་སློབ་མའི་གྲངས་མཉམ་གཅེར། སྐུ་རྟེན་དང་དར་གདུགས་ཕུབ། དཀྱིལ་འཁོར་གྱི་མཐར་བུར་སྦྲང་དང་དྲོད་སྨན་སྦྱར་བའི་ཟན་ལ་སློབ་མའི་གྲངས་ལས་ལྷག་པའི་ཞུན་མར་གྱི་ཏིང་ལོ། གཞན་ཡང་མཁའ་འགྲོའི་གཏོར་འབུལ་གཉིས་བཅས་བཀོད། ༈ མཁའ་འགྲོ་གསང་བ་ཀུན་འདུས་རྩ་དབང་ལ། དཀྱིལ་འཁོར་རས་བྲིས་དབུས་མཉྫིའི་ཁར་ཐོད་པ་མཚན་ལྡན་ཆང་ལ་བདུད་རྩི་ལྔ་སྦྱར་བས་བཀང་བའི་ཁར། སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་ལྟེ་བར་བཾ། མཐའ་སྐོར་དུ་ཐུགས་གསུང་སྐུའི་སྔགས་རིམ་པ་གསུམ་དུ་བསྐོར་བས་བཀབ་པའི་སྟེང་དུ་ཤེལ་རྡོ། མདུན་དུ་གཙོ་འཁོར་སོ་བདུན་གྱི་ལྷ་ཙཀ །ཕྱོགས་གང་བདེར་གསང་དབང་ཐོད་པའི་བདུད་རྩི། དཔལ་འབར། མེ་ལོང་གསལ་བ། གཙོ་མོའི་སྐུ་ཙཀ །མདའ་གཞུ། མར་མེ། རིག་ཙཀ་རྣམས་དང་རྗེས་གནང་ཆས། ཕྲེང་བ། དུང་། གླེགས་བམ། དུར་ཁྲོད་ཆས་བརྒྱད། ཤ་ལྔ་བདུད་རྩི་ལྔའི་རིལ་བུ་ཐོད་ཆང་དུ་བླུགས་པའམ་མ་འཛོམ་ན་གཟུགས་བརྙན་བྲིས་པ་བཅས་བཀོད། བཀའ་སྲུང་བཀའ་གཏད་ལ་གཏོར་མ་ཟུར་གསུམ་གཙོ་འཁོར་གསུམ་པ་དར་གདུགས་ཅན་ཡང་བཀོད། ༈ གཏོར་དབང་ལ་གཏོར་མ་གཞུང་གསལ་སྐུ་ཙཀ་དར་གདུགས་ཀྱིས་བརྒྱན་པ་དཀྱིལ་འཁོར་ཀྱི་དབུས་སུ་བཀོད། སྔ་མའི་ཞར་བྱུང་བྱེད་ན་དཀྱིལ་འཁོར་རྒྱབ་ཕྱོགས་ལྟ་བུར་བཞག །གཉིས་ཀ་ལའང་སློབ་མ་ལ་སྦྱིན་རྒྱུ་ཟས་སྣ་དང་ཐོད་ཆང་ལྷན་ཅིག་ཏུ་བཀོད་དོ། ༈ །རྡོ་རྗེ་མཁའ་འགྲོའི་ཚེ་སྒྲུབ་སོགས་བཞི་ལ། འཛོམ་ན་རས་བྲིས་དཀྱིལ་འཁོར། མ་འཛོམ་ན་མཁའ་འགྲོ་བཞི་ལ་རིམ་བཞིན་ཚོམ་བུ་ལྷ་མདོག་བཀོད་པའི་སྟེང་སོ་སོའི་དབང་རྫས་བཤམ་དགོས་པས། འདི་ལ་ཚོམ་བུ་དཀར་པོ་གཅིག །དེ་སྟེང་ཚེ་འབྲང་། གཡས་གཡོན་དུ་ཚེ་རིལ་ཆང་དང་མདའ་དར་བཀོད། ༈ རིན་ཆེན་མཁའ་འགྲོའི་ནོར་སྒྲུབ་ལ། གཏོར་མ་རིན་ཆེན་འབར་བའི་དབྱིབས་ཅན་ནོར་བུ་མིག་གསུམ་མང་པོས་མཛེས་པར་བསྐོར་བ་རྒྱན་སྤྲོས་དར་གདུགས་སེར་པོ་ཅན། གཡས་སུ་ཐོད་པའི་བདུད་རྩི། གཡོན་དུ་ཐོད་པ་མཚན་ལྡན་འཁོར་ལོ་གཞུང་གསལ་དང་གཡང་རྫས་སྣ་ཚོགས་པས་བཀང་བ་བཞག ༈ །པདྨ་མཁའ་འགྲོའི་དབང་སྡུད་ལ། སྐུ་རྟེན་བྲིས་སྐུ། གསུང་རྟེན་སྲོག་འཁོར། ཐུགས་རྟེན་བྷནྡྷར་དབང་གི་རིལ་བུས་བཀང་བ་རྣམས་གཞུང་མཐུན་བྱས་ལ་གཡས་གཡོན་མདུན་གསུམ་དུ་བཀོད། དབང་གི་མེ་ཐབ། ཡམ་ཤིང་། མར་ཁུ། མངར་གསུམ་ལ་རྫས་སྦྱར་གྱི་རིལ་བུ། མེ་ཏོག་དམར་པོ་ཆང་གིས་སྦགས་པ། ལན་ཚྭ་བཅས་སྲེག་རྫས་རྣམས་དང་། དགང་བླུགས། གསེར་སྐྱེམས་མཆོད་པ་བཅས་འདུ་བྱ། ༈ ལས་ཀྱི་མཁའ་འགྲོའི་ཟོར་དབང་ལ། ཟངས་ལྕགས་ཀྱི་སྣོད་དུ་ཟོར་གཏོར་ཁྲོ་མོའི་ཞལ་ཅན་གཏོར་ཆུང་ལྷ་གྲངས་ཀྱིས་བསྐོར་བ། དེ་རྒྱབ་ཟོར་ཀོང་། ཟུར་གསུམ་བརྒྱད་ལ། ཤར་དུ་ཡུངས་ཀར། ལྷོར་རྩང་། ནུབ་ཏུ་དུག །བྱང་དུ་རྡོ། ཤར་ལྷོར་མེ། ལྷོ་ནུབ་དུག་ཁྲག །ནུབ་བྱང་མདའ། བྱང་ཤར་ཕུང་སའི་ཟོར་རྣམས་བཀོད། མཚེ་ཉུངས་ཤ་ཁྲག་གིས་བརྒྱན་ཅིང་དར་ནག་གི་གདུགས་ཕུབ་ལ། གཡས་གཡོན་དུ་སྔགས་བྱང་དང་། གནམ་ལྕགས་རྡོ་རྗེ་བཞག །ཕྱག་རྒྱ་བཞིའི་ཆས། ཧོམ་དང་ལིངྒ་། བྱང་ཐག །དུག་ཁྲག །སྒྲོལ་ཕུར། རྩེ་གསུམ། གྲི་གུག །ཐོད་ངན་དུ་ཁྲག་ཐུན་སྦྱར་བ་རྣམས་ཉེ་བར་བསྡོག་གོ ༈ །གཡག་ཆར་སྔོན་མོའི་སྒྲོལ་ལྗང་ལ། མཎྜལ་ཚོམ་བུ་ལྗང་གུ་གཅིག་བཀོད་པའི་སྟེང་མཉྫི་ལ་བུམ་པ་ཉེར་ལྔའི་རྫས་དང་ཆིངས་ལྗང་ཅན། མདུན་དུ་དབང་གཏོར་དཀར་ཟླུམ། སྐུ་ཙཀ །སྔགས་ཕྲེང། ཨུཏྤལ་ལྗང་གུའི་ཙཀ་ལི་བཅས་བཀོད། ༈ བླ་མ་དགོངས་འདུས་མཁའ་འགྲོའི་དབང་། རས་བྲིས་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ་བཾ། འདབ་བཞིར་ཧ་རི་ནི་ས། རྩིབས་དྲུག་དགའ་འཁྱིལ་བྲིས་པ་རྣམས་བརྩེགས་པ་དར་དམར་གྱིས་བཀབ། རིགས་ལྔའི་ཕྱག་མཚན་སོ་སོ་བ། དབུ་རྒྱན། མེ་ལོང་། མཁའ་འགྲོའི་སྐུ་རྟེན། སྒྲུབ་ཡིག་དབང་ཕྲེང་། ཅོད་པན་རྣམས་དང་། རྒྱབ་ཏུ་མཁའ་འགྲོའི་གཏོར་མ་གཙོ་འཁོར་ལྔ་རྒྱན་ཅན་བཀོད། ༈ རཏྣའི་མཚོ་རྒྱལ་སྐོར་གསུམ་གྱི་མཚོ་རྒྱལ་ལ། རས་བྲིས་སྟེང་གཏོར་གདན་ཕོར་པ་ལྟ་བུའི་སྟེང་པདྨ་འདབ་བརྒྱད། དེ་སྟེང་རིན་ཆེན་འབར་བ་འདབ་བརྒྱད་རིལ་བུས་བསྐོར་བ་རྒྱན་སྤྲོས་སྐུ་ཙཀ་དར་གདུགས་ཅན་བཞག ༈ སྒྲོལ་མ་ལ། མཎྜལ་ཚོམ་བུ་གཅིག་བཀོད་པའི་སྟེང་བུམ་པ་ཉེར་ལྔའི་རྫས་དང་རྒྱན་ལྡན། ༈ ཁྲོས་ནག་ལ། རས་བྲིས་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་ལྟེ་བར་མ། མཐའ་སྐོར་སྙིང་པོ་བྲིས་པ་བཞག་ལ་དར་དམར་གྱིས་བཀབ་པའི་སྟེང་དུ་ཁྲོས་ནག་སྐུ་བརྙན་བྲིས་འབུར་གང་རིགས་བཞུགས། འདི་གསུམ་དཀྱུས་གཅིག་ཏུ་བསྐུར་ན། གཡས་གཡོན་དབུས་གསུམ་དུ་བཀོད། ༈ ཕག་མོ་ཟབ་རྒྱ་ལ། རས་བྲིས་དབུས་ཐོད་ཆང་བྱང་སེམས་དཀར་དམར་ཆོས་སྨན་བཏབ་པའི་ཁྲིའུ་ལ་དཔལ་གཏོར་རྟ་ཞལ་དང་ཕག་ཞལ་གྱིས་མཚན་པ་རྒྱན་སྤྲོས་དར་གདུགས་ཅན་བཤམ། ༈ ཕག་དཀར་ཡེ་ཤེས་འཁོར་ལོ་ལ། སྐུ་མཚན་མའི་དཀྱིལ་འཁོར་གཞུང་མཐུན་བྲིས་པའམ། མཎྜལ་ལ་མེ་ཏོག་དཀར་པོའི་ཚོམ་བུ་གཅིག་བཀོད་པའི་སྟེང་ཁྲིའུ་ལ་གསུང་བདུད་རྩིའི་དཀྱིལ་འཁོར་ཀ་པཱ་ལ་ཨ་མྲྀཏའི་བཅུད་ལྡན་གྱི་ཁར། ཐུགས་མེ་ལོང་ལ་སིནྡྷུ་ར་བརྡལ་བར་ཆོས་འབྱུང་བསྣོལ་མའི་དབུས་སུ་ཧྲཱིཿགྲ་བཞིར་དགའ་འཁྱིལ་རེ་རེ་བྲིས་པས་དགབ། མདུན་དུ་སྐུ་ཙཀ །ཤེལ་ཕྲེང་། ཁ་ཊྭཱཾ་ག །སྒྲུབ་ཡིག །སྣ་ཚོགས་རྡོ་རྗེ་དང་བདུད་རྩི། གཡས་སུ་ཐོད་པ་མཚན་ལྡན་གཞུང་མཐུན་ཚེ་རིལ་གྱིས་བཀང་བའི་ཁ་དར་དམར་གྱིས་བཀབ་པ་དང་ཚེ་འབྲང་དཀར་མངར་བཟའ་བཏུང་། གཡོན་དུ་བདུད་རྩི་རིལ་བུས་བཀང་བའི་སྨན་གྱི་ཕོ་བྲང་། སྐོང་ཆོག་དབང་རྟེན་མར་མེ་རྣམས་བཀོད། ༈ ཞིག་གླིང་སྒྲོལ་དཀར་ལ། རྡུལ་ཚོན་སོགས་ཀྱི་དཀྱིལ་འཁོར་སྟེང་རྣམ་བུམ་ཉེར་ལྔའི་བཅུད་ལྡན་ཁ་རྒྱན་ལ་སྐུ་ཙཀ་བཙུགས་པའི་མདུན་དུ་དཀར་ཟླུམ་རྒྱན་ལྡན། ཤེལ་རྡོ། ཨུཏྤལ་དཀར་པོ་རྣམས་དང་། རིལ་ཆང་མདའ་དར་སྤྱི་ལྟར། ཤེལ་ཕྲེང་། རྒྱལ་སྲིད་རྫས་བརྒྱད་ཕྱོགས་བསྡུས་རྣམས་བཞག ༈ །སྤྲུལ་སྐུའི་སྙིང་ཐིག་གི་སྒྲོལ་དཀར་ལ། པདྨ་འདབ་བརྒྱད་སྟེང་རྣམ་བུམ། གཡས་སུ་གཏོར་ཟླུམ་འཁོར་བཞིས་བསྐོར་བ་སྐུ་ཙཀ་དར་གདུགས་ཅན། གཡོན་དུ་ཤེལ་རྡོ་དང་། ཤེལ་ཕྲེང་། རྒྱབ་ཏུ་རིལ་ཆང་སྣ་བདུན་རྫས་བརྒྱད་ཕྱོགས་བསྡུས་བཅས། ༈ སྲོག་སྒྲུབ་ཕག་མོ་ལ། རས་བྲིས་དབུས་རྣམ་བུམ་བཀོད་པའི་འོག་ཏུ་མར་མེ་སྦར། མདུན་སོགས་སུ་གསང་ཐོད་མེ་ལོང་སིནྡྷུ་རའི་ཐིག་ལེ་ཅན་དར་དམར་གྱིས་བཀབ། མེ་ལོང་གཡའ་དག་ཤེལ་རྡོ། རྨ་བྱའི་མདོངས། རིག་ཙཀ །དཔལ་འབར་མཐོ་གང་བ་ལྔ་སྣོད་གཅིག་ཏུ་བཙུགས་པ། བདུད་རྩི། རུས་རྒྱན་རྐང་གླིང་ཌཱ་རུ་སོགས་བཀོད། ༈ སྨིན་གླིང་གསང་ཡེ་ལ། དཀྱིལ་འཁོར་གཞུང་མཐུན་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་ལྟེ་བར་ཧྲཱིཿ ཟུར་གསུམ་དུ་ཨོཾ་ཨཱཿཧཱུྃ། ལོགས་གསུམ་དགའ་འཁྱིལ་བྲིས་པ་རྣམས་བརྩེགས་ལ་དར་དམར་གྱི་གུར་ཕུབ། བགེགས་གཏོར་དཔལ་འབར་བཙུགས་པ་དང་། སློབ་མའི་གདན་དགའ་འཁྱིལ་དམར་སེར་ཡང་འདུ་བྱ། ༈ སྟག་ཤམ་མཚོ་རྒྱལ་ལ། རས་བྲིས་སམ་མཎྜལ་སྟེང་ཚོམ་བུ་གཙོ་འཁོར་དགུ་དེ་རྒྱབ་ཕྱོགས་བཞིར་བཀོད་པའི་སྟེང་། ་གཏོར་མ་རྒྱ་གར་དམ་གཟུགས་མའམ་མ་ཤེས་ན་གཏོར་ཟླུམ་དཀར་པོ་པད་འདབ་བཞི་པའི་ཕྱོགས་བཞིར་དཀར་བཤོས་བཞི། མཚམས་བཞིར་དམར་གཏོར་བཞི། དེ་རྒྱབ་ཐེབས་ཀྱུ་བཞིས་བསྐོར་བ། རྒྱན་སྤྲོས། སྐུ་ཙཀ །དར་གདུགས་བཅས་པ། ཤར་དུ། རྣམ་བུམ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། དབུས་མདུན་རྡོར་དྲིལ་ལྷན་ཅིག་པ་དང་ཅོད་པན། མཚམས་བཞིར་ཤེལ་ཕྲེང་། སྦ་ལྕགས་ཚིགས་གསུམ་དར་སྣ་བཏགས་པ། ཌཱ་དྲིལ། རྐང་གླིང་རྣམས་བཀོད། གཞན་ཡང་གསང་ཐོད་བདུད་རྩི་རིག་ཙཀ །ཤེལ་རྡོ་མེ་ལོང་རྨ་བྱའི་མདོངས། ལས་བུམ། བདུད་རྩི་རིལ་བུའམ་ཆོས་སྨན་རིལ་མོ་སློབ་མའི་གྲངས་མཉམ། སིནྡྷུ་ར། ཐོག་མར་སྦྱིན་རྒྱུའི་ཅོད་པན་དམར་པོ། སོ་ཤིང་། སྲུང་སྐུད་སྔོ་དམར་འདོགས་རྒྱུ། ཀུ་ཤའི་ཆུན་པོ་རྣམས་ཉེ་བར་བསྡོག ༈ །ཆོས་གླིང་ཁྲོས་ནག་ལ། བསྙེན་སྒྲུབ་བཅས་འཛོམ་དཀའ་བས་དབང་བསྐུར་དཀྱུས་མར་སྤྱི་འགྲོ་ཙམ་དུ། རས་བྲིས་སམ་ཚོམ་བུའི་སྟེང་ཐོད་ཆང་ཁར་མེ་ལོང་ལ་ཆོས་འབྱུང་དགའ་འཁྱིལ་ཕྱག་མཚན་ས་བོན་ལྔ་བྲིས་པས་བཀབ་ལ་དར་དམར་གྱི་གུར་ཕུབ། མདུན་དུ་རྣམ་བུམ། རུས་རྒྱན། ཐོད་ཌཱར་ཁ་ཊྭཱཾ་བམ་རོ་ཤ་ལྔའི་བཟང་བཏུང་རྣམས་བཀོད། ༈ རོལ་རྡོར་ཕག་མོ་ལ། རས་བྲིས་སམ་ཚོམ་བུ་དམར་པོའི་ཁར་རྣམ་བུམ་སྐུ་ཙཀ་དང་བཅས་པ། གཡས་སུ་ཐོད་ཆང་དང་བགྲང་ཕྲེང་དམར་པོ། གཡོན་དུ་མེ་ལོང་སིནྡྷུ་རའི་ཐིག་ལེ་བཀོད་པ་དང་ཤེལ་རྡོ། རྒྱབ་ཏུ་དབང་གཏོར་གཞུང་གསལ། མདུན་དུ་རིགས་ལྔའི་ཕྱག་མཚན་རྣམས་བཀོད། ༈ ཐུགས་རྡོར་སྒྲོལ་དཀར་ལ། མཎྜལ་ཚོམ་བུ་གཙོ་བོ་གཅིག་ལ་འཁོར་ཉེར་གཅིག་གིས་བསྐོར་བའི་སྟེང་བུམ་པ་ཆིངས་དཀར་ཉེར་ལྔའི་བཅུད་ལྡན། དེ་སྟེང་ཐོད་པའི་བདུད་རྩི་དང་མེ་ལོང་ཤེལ་རྡོ་བཀོད། ཚེ་རིལ་ཆང་མདའ་དར་བཅས་བཤམ། ༈ ཀློང་སྙིང་ཡུམ་བཀའ་བདེ་ཆེན་རྒྱལ་མོའི་རྩ་དབང་ལ། རས་བྲིས་སམ་ཚོམ་བུ་དམར་པོ་གཅིག་བཀོད་པའི་སྟེང་ཐོད་ཆང་ཉེར་ལྔའི་རྫས་དང་ཆོས་སྨན་གྱིས་བཀང་བའི་ཁར་སིནྡྷུ་རའི་མེ་ལོང་ཆོས་འབྱུང་བསྣོལ་མ་བྲིས་པའི་དབུས་སུ་དགའ་འཁྱིལ་ཏཱཾ་གྱིས་མཚན་པ། ཕྱོགས་བཞིར་དགའ་འཁྱིལ་བཞི་ལ་ཧ་རི་ནི་ས་མགོ་ཕྱིར་བསྟན་བྲིས་པས་བཀབ། དེ་སྟེང་དྲིལ་བུ་བཞག་ལ་དར་གུར་ཕུབ། ༈ འཕགས་མའི་སྙིང་ཐིག་གི་རྩ་དབང་ལ། སྟ་གོན་རྫས་བཞི། སློབ་མ་མཆོད་པ་བསྡོག །རས་བྲིས་ཀྱི་དཀྱིལ་འཁོར་དབུས་ཁྲིའུ་ལ་རྣམ་བུམ་ཉེར་ལྔའི་བཅུད་ལྡན་མགུལ་ཆིངས་དཀར་པོ་ཁ་རྒྱན་གཟུངས་རྡོར་དང་བཅས་པ། ཤར་དུ་དབུ་རྒྱན། ལྷོར་རྡོ་རྗེ། ནུབ་ཏུ་དྲིལ་བུ། བྱང་དུ་རྡོར་དྲིལ་ལྷན་ཅིག་པ། གཙོ་འཁོར་ལྷ་ཙཀ་བཅུ་གཅིག །ཤེལ་ཕྲེང་། མེ་ལོང་། གསང་ཐོད། རིག་ཙཀ །ཤེལ་རྡོ་རྣམས་སྤྱི་ལྟར་བཀོད། རྗེས་གནང་ཆས་དུང་། དྲིལ་བུ། སྒྲུབ་པོད། གླེགས་བམ། གདུགས་རྣམས་ཀྱང་ཟུར་དུ་འཇོག ༈ །ཡང་ཟབ་བྱིན་རླབས་ལ། རས་བྲིས་དབུས་སུ་ཐོད་པར་བཅུད་ལེན་རིལ་བུ། གཡས་སུ་རྣམ་བུམ། གཡོན་དུ་ཚེ་འབྲང་། ༈ ཐུན་མོང་རྗེས་གནང་ལ། དཀྱིལ་འཁོར་དབུས་བུམ་པ། གཡས་སུ་ཐོད་ཆང་། གཡོན་དུ་ཚེ་འབྲང་། མདུན་དུ་ཚེ་རིལ་རྣམས་བཞག ༈ །མཆོག་གླིང་གཏེར་གསར་མཁའ་འགྲོའི་སྐོར་གྱི་མཁའ་འགྲོ་དགོངས་འདུས་སྙིང་པོ་ལ། རས་བྲིས་སམ་དགུ་ཚོམ་སྟེང་རྣམ་བུམ། གཡས་སུ་གསང་ཐོད། གཡོན་དུ་རིག་ཙཀ །མདུན་དུ་ཤེལ་རྡོ་དང་རྨ་བྱའི་མདོངས། རྒྱབ་ཏུ་དཔལ་གཏོར་རྒྱན་ལྡན་བཀོད། ༈ ཐུགས་སྒྲུབ་སྒྲོལ་ལྗང་ལ། རས་བྲིས་སམ་མཎྜལ་ཚོམ་བུ་ཉེར་གཅིག་པའི་དབུས་སུ་རྣམ་བུམ། མདུན་དུ་དབང་གཏོར་ཅོག་ཟླུམ་དཀར་པོ་རྒྱན་ལྡན། སྐུ་བརྙན། ཤེལ་ཕྲེང་། ཕྱག་མཚན་ཨུཏྤལ་ལྗང་གུ་རྣམས་ཇི་ལྟར་བདེ་བར་བཀོད། ༈ དགོངས་གཏེར་སྒྲོལ་མའི་ཟབ་ཏིག་གི་ཕྱི་སྒྲུབ་ལ། མཎྜལ་ལ་འབྲུ་དཀར་གྱི་ཚོམ་བུ་དབུས་སུ་གཅིག །མཐའ་སྐོར་དུ་ཉེར་གཅིག་བཀོད་པའི་མདུན་དུ་གཟུངས་བུམ་ཉེར་ལྔའི་བཅུད་ལྡན་མགུལ་ཆིངས་ཁ་རྒྱན་ཅན་བཀོད། ༈ ནང་སྒྲུབ་ལ། རས་བྲིས་ཀྱི་དཀྱིལ་འཁོར་བཏིང་། ཤར་སྒོར་གཡས་སུ་རྣམ་བུམ་ཉེར་ལྔའི་བཅུད་ལྡན་ཆིངས་ལྗང་གུ་གཟུངས་རྡོར་བཅས། ཅི་ལྟར་བདེ་བར་དབུ་རྒྱན། རྡོ་རྗེ། དྲིལ་བུ། གཙོ་འཁོར་དགུ་པོའི་ལྷ་ཙཀ །སྔགས་ཕྲེང་བཀོད། ༈ གསང་སྒྲུབ་ལ། རས་བྲིས་དཀྱིལ་འཁོར་རམ་མ་འཛོམ་ན་ཚོམ་བུ་གཙོ་འཁོར་དགུ་བཀོད་པའི་དབུས་སུ་མཉྫི་ལ་རྣམ་བུམ་བཅུད་ལྡན་ཆིངས་ལྗང་གུ་ཅན་གྱི་ཁར། ཐོད་པ་མཚན་ལྡན་བདུད་རྩིས་བཀང་བའི་སྟེང་དུ་མེ་ལོང་སིནྡྷུ་རའི་དཀྱིལ་འཁོར་ཆོས་འབྱུང་བསྣོལ་མ་དགའ་འཁྱིལ་དང་བཅས་པའི་ལྟེ་བར་ཏཱཾ། མཐར་གཡོན་བསྐོར་དུ། ཨོཾ་ཏཱ་རེ་ཏུཏྟཱ་རེ་བཛྲ་ཝཱ་ར་ཧཱི་བཾ་སྭཱ་ཧཱ། ཞེས་བྲིས་པ་བཞག་ལ་དར་དམར་གྲུ་གསུམ་གྱིས་བཀབ་པའི་སྟེང་ཤེལ་རྡོ་བཞག ༈ །ཟུར་བཟའི་ཐུགས་དམ་སྐོར་དྲུག་གི་མཁའ་འགྲོའི་སྐོར་ལས་དང་པོ་ཕག་མོ། གཉིས་པ་སྒྲོལ་མ། གསུམ་པ་གསང་ཡེ། བཞི་པ་མནྡཱ་ར་བ། ལྔ་པ་མཚོ་རྒྱལ་བཅས་སོ་སོའི་ལྷ་ཙཀ་བརྗེ་བ་མ་གཏོགས་དབང་གི་སྤྱི་ཁོག་འདྲ་བར། དཀྱིལ་འཁོར་རས་བྲིས་སམ་ཚོམ་བུ་གཙོ་འཁོར་ལྔ། དེ་རྒྱབ་བཞི་སྟེ་དགུ་བཀོད་པའི་ཁར་ཁྲིའུར་རྣམ་བུམ། གཡས་སུ་ཕྱི་ནང་གསང་གསུམ་ལ་དཔལ་གཏོར་དམར་པོ། ཡང་གསང་མཁའ་འགྲོ་གཉིས་ལ་གཏོར་ཟླུམ་དཀར་པོའི་དབང་གཏོར་རྒྱན་ལྡན། མདུན་དུ་ལྷ་སོ་སོའི་སྐུ་ཙཀ །སྔགས་བྱང་། མཆོད་རྟེན་དང་སོ་སོའི་ཕྱག་མཚན། གཡོན་དུ་གསང་ཐོད། ཤེར་དབང་ལ་པདྨ་དམར་པོའི་ཟེའུ་འབྲུར་རྡོ་རྗེ་དཀར་པོ་རྩེ་ལྔ་ཕྱེད་ནུབ་བྲིས་པ་རྣམས་བཀོད། མནྡཱ་ར་བར་ཚེ་འབྲང་དང་རིལ་ཆང་ཡང་བཞག་གོ ༈ །གསང་བ་ཡེ་ཤེས་ལ། ཚོམ་བུ་གཙོ་འཁོར་ལྔའི་སྟེང་བུམ་པ་ཐོད་ཆང་སིནྡྷུ་རའི་མེ་ལོང་ཆོས་འབྱུང་བསྣོལ་མ་ཧྲཱིཿམཐར་སྔགས་བྲིས་པ་རྣམས་བརྩེགས་ལ་དར་དམར་ཟུར་གསུམ་པས་བཀབ་པའི་སྟེང་ཤེལ་རྡོ་བཀོད། ༈ སྨིན་ལུགས་གཅོད་དབང་ལ། མཎྜལ་པདྨ་འདབ་བརྒྱད་སྟེང་རྣམ་བུམ། གཡས་གཡོན་དབུ་རྒྱན་རྡོར་དྲིལ། ཟླུམ་གཏོར། ཌཱ་རུ། རྐང་གླིང་། རུས་རྒྱན་ཙཀ་ལི་རྣམས་བཀོད་དོ།། ༈ །།དེ་ནས་ཆོས་སྐྱོང་རྣམས་ཀྱི་ཐོག་མ། ཡེ་ཤེས་མགོན་པོ་ལེགས་ལྡན་ཚོགས་ཀྱི་བདག་པོ་ལ། སྟ་གོན་རྫས་བཞི། རས་བྲིས་དབུས་རྣམ་བུམ་སོགས་རིག་དབང་ཆས་ལྔ། མདུན་དུ་དབང་གཏོར་སྐུ་ཙཀ་དར་གདུགས་ཀྱིས་བརྒྱན་པ། རྒྱབ་ངོས་སུ་གསང་ཐོད། རིག་ཙཀ །མེ་ལོང་དྭངས་པ་རྣམས་དང་། མཐའ་སྐོར་དུ། ལྕགས་ཁང་ལིངྒ་རལ་གྲི་དང་གྲི་གུག །ཞིང་དབྱུག་དང་བིང་། རྡོ་རྗེ། ཕུར་བུ། ཐོད་ཁྲག །རུ་མཚོན། སྦྲུལ་ཞགས། རྔ། ཡུངས་ཐུན། གུ་གུལ། རི་གླིང་། རྒྱ་གྲམ། མེ་ཕུང་། མདའ་གཞུ་ཟོར་ཀོང་རྣམས་སོ་སོ་བ་བཞག །འདི་ཕྱིན་ཆད་ཆོས་སྐྱོང་རྣམས་ལ་གཏོར་མ་མི་འདྲ་བ་སོ་སོར་ཡོད་པ་སོ་སོའི་དབང་ཆོག་དང་དཔེའུ་རིས་ལས་ཤེས་པར་བྱ་ཞིང་། གཏོར་སྣོད་ཐོད་པ་ཟངས་ལྕགས་སྐབས་བསྟུན། འཛོམ་ན་ཐམས་ཅད་ལ་སོ་སོའི་སྐུ་ཙཀ་དང་དར་གདུགས་རང་མདོག་འཛུགས་དགོས་པ་དང་། དཀྱིལ་ཐང་མེད་པའི་མཎྜལ་རིགས་ལ་དུག་ཁྲག་གིས་བྱུག ༈ །གཏེར་གསར་ཟབ་བདུན་ལེགས་ལྡན་ལ། རས་བྲིས་སྟེང་རྣམ་བུམ་ཁར་ཐོད་ཆང་དེ་སྟེང་མེ་ལོང་ལ་སིནྡྷུ་རས་ཆོས་འབྱུང་ནང་དབུས་སུ་ཐིག་ལེ་ཆེ་ཆུང་གསུམ། དེ་རྒྱབ་བཞི་བྲིས་པས་བཀབ་པའི་སྟེང་ཤེལ་རྡོ་བཞག །སྐུ་ཙཀ་བདུན། ཕྱག་མཚན་སེང་ཕུར། སྦྲུལ་ཞགས་དང་ཐོད་ཁྲག་གྲི་གུག་མཚོན་ཆ་འཁོར་ལོ། རལ་གྲི །སེར་བ་དང་ཆུ་སྲིན་ཞགས་པ། ཁྲམ་ཤིང་དང་ནད་རྐྱལ་རྣམས་དང་། སྲུང་ཟློག་བསད་མནན་སྲེག་འཕང་གི་རྫས་ཕྱོགས་བསྡུས་རྣམས་བཀོད། ༈ དེའི་ལས་མགོན་མ་མགོན་ཞལ་སྦྱོར་ལ། རས་བྲིས་སམ་འབྲུ་ནག་དགུ་ཚོམ་སྟེང་དབང་གཏོར། སྐུ་ཙཀ་དང་སྔགས་བྱང་དཀར་དམར་མཐིང་གསུམ་རེ། གྲི་ཐོད། མེ་ལོང་ཕུར་པ། ༈ ཕྱག་བཞི་པ་ལ། རས་བྲིས་སྟེང་རྣམ་བུམ་ཁར་ཐོད་ཆང་། དེ་སྟེང་མེ་ལོང་ལ་ཆོས་འབྱུང་གཉིས་བརྩེགས་དབུས་མགོན་པོ་ཡབ་ཡུམ་རྩ་སྔགས་བྲིས་པས་བཀབ་དར་ནག་གི་གུར་ཕུབ། གཡས་སུ་དཔལ་བཤོས་དང་། གཡོན་དུ་ལས་མགོན་གཏོར་མ་རྒྱན་ལྡན། མདུན་དུ་སྐུ་ཙཀ་རྣམས། རྒྱབ་ཏུ་གིང་ཕོ་མོའི་གཏོར་མ་རྣམས་བཀོད། ༈ མགོན་དཀར་ཚེ་དབང་ལ། པདྨ་འདབ་བརྒྱད་སྟེང་རྣམ་བུམ་ཉེར་ལྔའི་རྫས་ལྡན། མདུན་དུ་དཔལ་གཏོར་ཉི་ཟླའི་རྒྱན་ལྡན་ཚེ་རིལ་གྱིས་བསྐོར། མར་ཟན་ལ་སྙིང་པོ་ལྔ་དང་སྦྱར་བའི་ཚེ་རིལ། གཡོན་དུ་ཐོད་ཆང་། རྒྱབ་ཏུ་ཚེ་མདའ་དར་དམར་པོ་མེ་ལོང་ཅན་རྣམས་བཞག ༈ །གཏེར་གསར་ཕྱག་བཞི་པ་ལ། རས་བྲིས་སྟེང་བུམ་ཐོད་མེ་ལོང་ཤེལ་རྡོ་སྔར་ལྟར་དང་། ལྷ་ཙཀ་ཚང་མ་བཀོད་པས་འཐུས། མེ་ལོང་ལ་ཆོས་འབྱུང་ནང་ཐིག་ལེ་གཙོ་འཁོར་དགུ་བྱའོ། ༈ །གུར་མགོན་སྲོག་གི་སྤུ་གྲི་ལ། རས་བྲིས་ཀྱི་དབུས་སུ་ཨེ་ཁྲོམ་ལ་ཕུར་པ་ཕྱོགས་བཞིར་བྷནྡྷ་དམ་རྫས་ཀྱིས་བཀང་བ། གྲི་གུག །དཔལ་གཏོར། ཕྲེང་བ་རྣམས་བཀོད། ༈ གཏེར་གསར་ཕྱག་དྲུག་པ་པདྨ་སྒྱུ་འཕྲུལ་དྲྭ་བའི་ལུགས་ལ། རས་བྲིས་སྟེང་དབང་གཏོར་དང་སྐུ་རྟེན། སྔགས་བྱང་། ཕྱག་མཚན་གྲི་ཐོད་པདྨ་ཁ་ཊྭཱཾ་ཐོད་རྔ་སྤྲུལ་ཞགས་ཕྱོགས་བསྡུས་བཞག ༈ །ཟབ་མོ་སྐོར་དགུའི་ཕྱི་སྒྲུབ་གཏོར་དབང་ཐུན་མོང་བ་ལ། མཎྜལ་དཀྱིལ་འཁོར་རམ་མེ་ཏོག་ནག་པོའི་ཚོམ་བུ་ལྔ་བཀོད་པའི་སྟེང་དུ་ཁྲིའུའི་ཁར་ལྕགས་སམ་ཐོད་སྣོད་དུ་དཔལ་གཏོར་དམར་པོ་གཙོ་འཁོར་ལྔ་མཐེབ་ཀྱུས་བསྐོར་བ་ལ་སྐུ་ཙཀ་དང་དར་གདུགས་ཀྱིས་བརྒྱན་པ་བཀོད། འདི་ལ་བསྡུ་ན་སྔགས་བྱང་ཕྱག་མཚན་མི་དགོས། ༈ དཔལ་མགོན་མ་ནིང་ལ། མཎྜལ་གྲུ་གསུམ་མཐིང་ནག་གི་དབུས་འབྲུ་ནག་ཁྲག་གིས་སྦགས་པའི་ཚོམ་བུ་དབུས་སུ་ཆེ་ཆུང་གསུམ། དེ་རྒྱབ་ལྔ་བཀོད་པའི་སྟེང་དུ་དབང་གཏོར། གཡས་སུ་རྣམ་བུམ་དང་གཙོ་སྐུ། མདུན་ནས་གཡས་བསྐོར་དུ་སྟག་ཞོན་སྐུ་དང་བེར་ནག །བིང་སྐུ་དང་སྒྲུབ་པོད་སྲོག་སྙིང་། ཐུགས་མགོན་སྐུ་དང་གྲི་གུག་ཧཱུྃ་མཚན། སེང་ཞོན་སྐུ་དང་མདའ་རྒོད་སྒྲོ་མར་དར་ནག་ལ་ཁྲོ་ཞལ་དང་ཧཱུྃ་བྲིས་པ། ཏྲཀྴད་སྐུ་དང་སེང་ལྡེང་ཕུར་པ་ཁྲོ་ཞལ་ཅན་རྣམས་བཀོད། ལིངྒ་གཞུང་གསལ་མ་འབྱོར་ན་ཟན་ལིང་ཁྲག་གིས་སྦགས་པ་ལྕགས་ཧོམ་དུ་བཞག །ཐུན་རྫས། མཚོན་ཆ། མེ་ཧོམ། རཀྟའི་སྣོད། ཚོམ་བུ་བཀོད་རྒྱུ་ཐལ་ཆེན། ཚིལ་གསུར་སོགས་འདུ་བྱའོ། ༈ །རཏྣ་ལུགས་ཀྱི་མ་ནིང་སྲོག་དབང་ལ། དཀྱིལ་འཁོར་དབུས་ཁྲིའུར་བུམ་པ་ཆིངས་སྔོན་སོ་ལྔའི་བཅུད་ལྡན་ཁ་རྒྱན་གསེབ་ཏུ་དཔལ་མགོན་སྐུ་ཙཀ་བཙུགས་པ། གཡས་གཡོན་དུ་སྒྲུབ་པོད། སྲོག་སྔགས། རྡོ་རྗེ་གྲི་གུག་ཧཱུྃ་མཚན། དར་ནག་ལ་སྐུ་བྲིས་པའམ་མ་འཛོམ་ན་ཨོཾ་ཨཱཿཧཱུྃ་རཾ་བྲིས་པ། ཞགས་པ། བླ་རྡོ་ཁ་ཊྭཱཾ་མདུང་ཐུང་། ལྕགས་ཕུར། མདུན་དུ་རྟག་གཏོར་རྒྱུན་གཏོར་གཉིས་བཀོད། ཐོད་ངན་དུ་ལིངྒ་དང་ཐུན་རྫས། མེ་ཧོམ་སོགས་འདུ་བྱ། ༈ གཏོར་དབང་ཁོ་ན་ལ། དཀྱིལ་འཁོར་དབུས་སུ་རྟེན་གཏོར་སྐུ་གཟུགས་དར་ནག་གི་ལྡིང་གུར་ཅན་བཀོད། བིང་དང་རུ་མཚོན། སྙིང་དང་ཞགས་པ། སྒྲུབ་ཡིག །བླ་རྡོ་རྣམས་ཀྱང་བཞག་གོ ༈ །སྟག་ཞོན་ལ། མཎྜལ་གོང་མཚུངས་ཚོམ་བུ་གཙོ་འཁོར་གསུམ། དེ་རྒྱབ་བརྒྱད་བཀོད་པའི་ཁར་དབང་གཏོར་དང་སྐུ་རྟེན། གཡས་གཡོན་དུ་རཀྴའི་ཕྲེང་བ། ཙནྡན་གྱི་བིང་བཅས། ༈ མགོན་པོ་བིང་ལ་། ས་བྲིས་སྟེང་དུ་དབང་གཏོར་སྐུ་རྟེན་དང་བཅས་པ། གཡས་གཡོན་དུ་རག་ཕྲེང། བིང་། ལྕགས་པར། ཕུར་བུ་རྣམས་བཞག ༈ །ཏྲཀྴད་དྭགས་པོ་ལུགས་ལ། ཆོས་འབྱུང་གྲུ་གསུམ་མཐིང་ནག་མེ་རིས་མཚན་པའི་སྟེང་དམར་གཏོར་ཟུར་གསུམ་རྣོ་དབལ་ཅན་མེ་རི་ཤ་ཁྲག་དར་གདུགས་ཀྱིས་བརྒྱན་པ། ༈ མ་ནིང་མ་ལ། མཎྜལ་སྔར་ལྟར་ལ་གཏོར་མ་གཙོ་བོའི་གཡས་ཕྱོགས་སུ་དེ་ལས་དམའ་བ་གཅིག །མཐེབ་ཀྱུ་བཅུ་གཉིས་ཀྱིས་བསྐོར། ༈ ལས་མཁན་འབྲོང་ཞལ་ཅན་ལ། མ་ནིང་མའི་བཅའ་གཞི་དེ་ལྟར་བཀོད་པའི་མདུན་དུ་མཎྜལ་ཆོས་འབྱུང་སུམ་བརྩེགས་ཟུར་དགུ་པ་མི་རོ་དང་བཅས་པའི་སྟེང་དུ་དམར་གཏོར་ཟུར་གསུམ་རྒྱན་ལྡན་བཀོད། ༈ ཤྭ་ནའི་ཞལ་ཅན་ལ། མཎྜལ་ལ་ཆོས་འབྱུང་བསྣོལ་མ་སྔོན་པོ་ཐོད་པའི་རི་མོ་ཅན་གྱི་ནང་དུ་གྲུ་གསུམ་ནག་པོའི་ལྟེ་བར་ཐིག་ལེ་དམར་པོ་གཅིག །དེ་མདུན་ཆུང་བ་གཅིག །ཟུར་དྲུག་ལ་རེ་རེ་བཀོད་པའི་ཁར་དཔལ་གཏོར་ཟུར་གསུམ་དམར་པོ་དར་གདུགས་ཅན་བཤམ། མདུན་དུ་ཐོད་པའི་བདུད་རྩིའང་བཞག ༈ །དཔལ་མགོན་ཞལ་བཞི་པ་ལ། མཎྜལ་གོང་འདྲའི་སྟེང་ཚོམ་བུ་གཙོ་འཁོར་ལྔ་བཀོད་པ་ལ་དབང་གཏོར་རྒྱན་ལྡན་བཀོད། ལྕགས་ཧོམ་དུ་ཟན་ལིང་དང་གདབ་ཕུར་འདུ་བྱ། ༈ བྱང་གཏེར་བསྟན་སྲུང་ཡོངས་རྫོགས་ལ། རས་བྲིས་དབུས་རྣམ་བུམ་ཐོད་ཆང་བརྩེགས་པ་དར་ནག་གིས་བཀབ་པའི་ཁར་སིནྡྷུ་རའི་མེ་ལོང་ཆོས་འབྱུང་དབུས་སུ། ཨོཾ་ཤྲཱི་མ་ཧཱ་ཀ་ལ་ག་ཎ་གུ་ཏི་ཡོ་གི་ཤྭ་རི་ས་མ་ཡ་ཧཱུྃ་ཛཿཛཿ ཞེས་བྲིས་པས་བཀབ་པ་ལ་དར་མཐིང་ནག་གི་གུར་ཕུབ། རྒྱབ་ཏུ་དབང་གཏོར། མདུན་དུ་མཆོད་གཏོར། གཡས་གཡོན་དུ་གྲི་སྙིང་ཐོད་རློན་སྦྲུལ་ཆུན་བིང་གྲི་གུག་དང་གཎྜི། མདའ་མདུང་རལ་གྲི་ཐུན་རྫས་རྡོར་དྲིལ་ཆ་ལང་རྔ་དུང་ཕྱོགས་བསྡུས་བཞག ༈ །ཚོགས་བདག་གཏེར་མ་ཁམས་བྱོན་མ་ལ། རས་བྲིས་སྟེང་རྣམ་བུམ། ཤར་དུ་གཏོར་མ་སྐུ་ཙཀ་ཅན། ལྷོར་གྲི་སྙིང་སྲོག་འཁོར་ཅན། ནུབ་ཏུ་ཐོད་ཆང་། བྱང་དུ་བྲུབ་ཁུང་ཉའོ་ཕུར་བུ་མཚོན་ཆ་ཐུན་རྫས། དབུས་སུ་ལྷ་ཙཀ་རྒྱབ་ཏུ་སྔགས་བྱང་བྲིས་པ་རྣམས་དང་། སྒྲུབ་ཡིག་བཀོད། ༈ གཏེར་གསར་ཤྭ་ནའི་གཏོར་དབང་ལ། ཚོམ་བུའི་སྟེང་དབང་གཏོར་ཐོད་སྣོད་དུ་དམར་གཏོར་ཐོག་མདེལ་དབྱིབས་ཅན། གཏོར་ཆུང་ཉེར་བཞི་དང་མཐེབ་ཀྱུ་མང་པོས་བསྐོར་བ། མེ་རི་དང་རལ་གྲི་ཐོད་ཁྲག་གིས་བརྒྱན་པ་ལ། མདའ་དར་ནག་པོ་མེ་ལོང་སྐུ་རྟེན་བཅས་བཀོད། སྔགས་བྱང་། རལ་གྲི་ཐོད་ཁྲག །གཡས་གཡོན་སྨན་རཀ་བཀོད། ༈ གཏེར་གསར་ཆོས་སྐྱོང་དགོངས་འདུས་སྙིང་པོ་ལ། རས་བྲིས་སམ་ཚོམ་བུ་ལྷ་གྲངས་དབུས་དབང་གཏོར་དང་སྐུ་ཙཀ །སྔགས་བྱང་། ཕྱག་མཚན་གྲི་ཐོད་བཅས། ༈ ཞིག་གླིང་མ་ཧཱ་ཀཱ་ལ་དཔལ་མགོན་བདུན་ཅུའི་སྲོག་གཏད་ལ། དཀྱིལ་འཁོར་དབུས་ཁྲིའུ་ལ་ཟངས་ལྕགས་ཀྱི་སྣོད་དུ་གཏོར་མ་རི་རབ་བང་རིམ་བཞི་པའི་སྟེང་གྲུ་གསུམ་གདན་ཐབས། དེ་སྟེང་མགོན་པོའི་དཔལ་གཏོར་དང་ལྷ་མོའི་གཏོར་མ་བཞག །བང་རིམ་རྣམས་སུ་ལྷ་བརྒྱད། ཀླུ་བརྒྱད། གཟའ་བརྒྱད། ཕྱོགས་སྐྱོང་བཅུ། རྒྱལ་ཆེན་བཞི། འཇིགས་བྱེད་དགུ །རྒྱུ་སྐར་ཉེར་བརྒྱད་རྣམས་སོ་སོའི་དབྱིབས་མཐུན་གྱི་གཏོར་མ་བཀོད། མི་ཤེས་ན་བཤོས་ཟླུམ་གྲངས་ཚང་བཀོད་པ་ལ་རྒྱན་སྤྲོས་དར་གདུགས་ཅན་དང་། ཐོད་ཕྲེང་བཞག ༈ །ཨེ་ཀ་ཛཱ་ཊི་སྡེ་བདུན་ལ། རས་བྲིས་སམ་མཎྜལ་གྲུ་གསུམ་བསྣོལ་མར་ཚོམ་བུ་བདུན་གྱི་ཁར་མཉྫི་ལ་དབུས་དང་ཕྱོགས་བཞི། བྱང་ཤར་དུ་གཉིས་བཅས་སྡེ་བདུན་སོ་སོའི་གཏོར་མ་སྐུ་རྟེན་མདའ་དར་བཅས་པ་བཀོད་པའི་མདུན་དུ་མཆོད་གཏོར་སྤྱི་སྤུངས་སྨན་རཀ་བཅས། ལྷོར་རི་རབ་བང་རིམ་བཞི་པའི་སྟེང་གི་དབུས་དང་ཕྱོགས་བཞིར་མར་མེ་ལྔ་བཞག་པ། ནུབ་ཏུ་རྟེན་རྫས་དང་བཅས་པའི་མདའ་དར། བྱང་དུ་བྷནྡྷ་དམ་རྫས་ཀྱིས་བཀང་བ་རྣམས་དང་། གཞན་ཡང་རི་རབ། བ་དན། རྒྱལ་མཚན། སྙིང་ཕྲེང་། ཐུན་རྫས། རཀྟ། ཡུངས་ཀར། ཕུར་པ། རལ་གྲི །ཟན་ལིང་བཅས་འདུ་བྱ། ༈ སྔགས་སྲུང་མ་གཙོ་རྐྱང་ལ། རས་བྲིས་སྟེང་དབང་གཏོར་བཀོད། ཐོད་པ་དམ་རྫས་ཁྲག་ཆང་དུག་སོགས་ཀྱིས་སྦགས་པ། གྲི་སྙིང་། ཞིང་དབྱུག །སྒྲུབ་དཔེ། གུ་གུལ་ཚིལ་ཆེན་སོགས་ཀྱི་སྤོས་བཅས། ༈ རཏྣ་ལུགས་ཀྱི་རྗེས་གནང་ལ། རས་བྲིས་སམ་འབྲུ་ནག་ཚོམ་བུ་གཅིག་པའི་སྟེང་དུ་དབང་གཏོར་སྐུ་རྟེན་བཅས་པའི་མདུན་དུ་མཆོད་གཏོར་དང་བདུད་རྩི་བཤམ། ༈ སྨིན་ལུགས་ལ། དེ་དང་འདྲ་བའི་སྟེང་། སྔགས་བྱང་། ཡོད་ན་བླ་རྡོ་སྲོག་འཁོར། མེད་ན་ཕྱག་མཚན་སྙིང་དང་ཞིང་དབྱུག་དམ་རྫས་བཅས། ༈ རེ་ཏི་རང་བྱུང་རྒྱལ་མོ་ལ། རས་བྲིས་སྟེང་དབང་གཏོར་རྒྱན་ལྡན་བཀོད། ཕྲེང་བ་བཞག ༈ །ཉང་གཏེར་རྡོ་རྗེ་གཤོག་རྒོད་མ་ལ། རས་བྲིས་སམ་ཚོམ་བུའི་སྟེང་དབང་གཏོར་རྒྱན་ལྡན་བཀོད། ༈ གྲོལ་ཏིག་གཤོག་རྒོད་མ་དེ་དང་འདྲ་བའི་ཐོག །མདུན་དུ་ཕྱག་མཚན་ལྕགས་ཀྱུ་རྡོ་རྗེ་དགྲ་སཏྭ་ཐོད་པ་རྣམས། གཡས་སུ་ཚོགས་རྫས། རྒྱབ་ཏུ་རྟེན་རྫས། མདའ་མོ་དུང་ཤྭ་ཅན། གཡོན་དུ་སྲོག་ཡིག་བྷྱོ་དང་སྔགས་བྱང་རྣམས་བཀོད། ཡི་དམ་དཔལ་གཏོར་ཞབས་སུ་ལྷ་མོའི་བླ་རྡོ་སྤྱི་མཐུན་ནམ་མ་འཛོམ་ན་མཚོ་རྡེལ་སྔོན་པོ་ལ་བྷྱོ་ཡིག་བྲིས་པ་དར་སྔོན་གྱིས་བཏུམ་པ་བཞག །རེ་བ་ཚོན་སྐུད་དུམ་ཐོད་པ་རྣམས་དང་། ཐོད་རྔ་རྐང་གླིང་སྨན་རཀ་གཏོར་མ་རྣམས་ཕྱོགས་བསྡུས་གཏད་ཆོག་བཞག ༈ །གནམ་ཆོས་ཨ་ཕྱི་ལ། གཟུངས་དབང་ལྟར་བཀོད། ༈ གཡུ་སྒྲོན་མའི་བཀའ་གཏད་ལ། འབྲུ་སིལ་མ་བཀྲམ་པའི་དབུས་སོ་སོའི་གཏོར་མ། སྐུ་ཙཀ །ནས་ཐེབ་གང་། ཕྱག་མཚན་བཅས་བཀོད། དམིགས་བསལ་མེད་པའི་གནམ་ཆོས་བཀའ་གཏད་རིགས་ལ་འདིས་འགྲེ ༈ །རྡོ་རྗེ་རབ་བརྟན་མའི་ཐུན་མོང་རྗེས་གནང་ལ། མཎྜལ་དང་སྒྲུབ་གཏོར་གཞུང་མཐུན། སྐུ་ཙཀ །རལ་གྲི་ནེའུ་ལེའི་གཟུགས་བཀོད། ༈ སྲོག་སྒྲུབ་མ་ལ། རས་བྲིས་སྟེང་དབུས་སུ་གཙོ་མོ། གཡས་གཡོན་མདུན་གསུམ་དུ་འཁོར་གྱི་གཏོར་མ་སོ་སོར་བཀོད། ༈ གཟའ་བདུད་ལ། རས་བྲིས་དབུས་སུ་བུམ་པ་རྒྱན་ལྡན། མདུན་དུ་དབང་གཏོར་སྨན་རཀ་དང་བཅས་པ། ལྷོར་ཆུ་སྲིན་རྒྱལ་མཚན་སྦྲུལ་ཞགས་མདའ་གཞུ་མེ་ཕུང་རྣམས་སོ་སོ་བ། བྱང་དུ་འཁོར་གཟའ་བརྒྱད་ཀྱི་སྐུ་གཟུགས་དང་ཕྱག་མཚན་གྱི་ཙཀ་ལི་ཕྱོགས་བསྡུས་གཉིས་བཅས་བཀོད། འབུལ་གཏོར་ནུབ་ཏུའོ། ༈ །ཤན་པ་དམར་ནག་ལ། རས་བྲིས་སྟེང་དབང་གཏོར་ལ་མདའ་དར་ཁྱད་པར་བ་བཙུགས་པ། ཕྱོགས་བཞིར་རལ་གྲི །གྲི་གུག །སྙིང་ཞགས། ཐོད་ཁྲག་བཞི། མཚམས་བཞིར་སྐམ་རློན་གྱི་ཐུན་སྣོད། ཟོར་གཏོར་གྲུ་གསུམ། མེ་ཧོམ་གྱི་ཏིང་ལོ་གྲུ་གསུམ། མནན་པའི་སཱཙྪ་རྣམས་བཞག །མདུན་མཆོད་གཡས་གཡོན་དུ་ཞིང་ལྤགས་གླང་ཀོ་སྟག་ཤམ་སོ་སོ་བ། གཡོན་དུ་འབྲང་རྒྱས་བཟའ་བཏུང་བཅས་བཀོད། ༈ རཏྣ་ལུགས་ཀྱི་རྗེས་གནང་ལ། མཎྜལ་སྟེང་སྒྲུབ་གཏོར་སྐུ་རྟེན་དར་གདུགས་དམར་པོ་བཅས་གཞུང་མཐུན། གཡས་སུ་རལ་གྲི་གྲི་གུག །གཡོན་དུ་སྙིང་ཞགས་བནྡྷ། མདུན་དུ་མཆོད་གཏོར་རྣམས་བཤམ། ༈ པུ་ཏྲ་མིང་སྲིང་ལ། གོང་དུ་མགོན་པོའི་མཆོད་གཏོར་མཐོ་བར་བཤམ། དེ་མདུན་མིང་སྲིང་ལ་རྟག་གཏོར་ཟུར་བརྒྱད་ཀྱི་མདུན་འབུལ་གཏོར་བཅས་བཤམ། ༈ དཀར་བདུད་ལྕམ་དྲལ་ལ། མཎྜལ་ཆོས་འབྱུང་གྲུ་གསུམ་དཀར་པོའི་དབུས་སུ་འབྲུ་དཀར་པོའི་ཚོམ་བུ་བཀོད་པའི་སྟེང་དུ་འབྲང་རྒྱས་དཀར་པོ་ཕུག་རོན་གྱི་གཟུགས་དང་བཅས་པ་བཀོད། དེའི་གཡས་སུ་ཆོས་འབྱུང་གྲུ་གསུམ་ནག་པོ་ལ་འབྲུ་ནག་གི་ཚོམ་བུའི་ཁར་དམར་གཏོར་གྲུ་གསུམ་བཀོད། ༈ ལས་གཤིན་ལ། མཎྜལ་མཐིང་ནག་གྲུ་གསུམ་ཐོད་ར་མེ་རིས་བསྐོར་བ་ལ་ཚོམ་བུ་ཆེ་ཆུང་གཉིས། དེ་རྒྱབ་བརྒྱད་བཀོད་པའི་སྟེང་དུ་གཏོར་མ་རྒྱན་ལྡན་བཀོད། ༈ དམ་ཅན་མགར་དམར་རྗེས་གནང་ལ། སྟེགས་བུ་དམར་པོ་འབྲུ་ཚོམ་བཀོད་པའི་སྟེང་དུ་མཉྫིའི་ཁར་དབང་གཏོར་སྐུ་རྟེན་དང་བཅས་པ། གཡས་སུ་བླ་རྡོ་དང་སྒྲུབ་ཡིག །གཡོན་དུ་རྡོ་རྗེ་དང་སྙིང་གཟུགས་བཞག་གོ ༈ །དམ་ཅན་མགར་ནག་ལ། སྟེགས་ལ་ཚོམ་བུའི་སྟེང་རྟེན་གཏོར་སྐུ་དང་བཅས་པ་བཀོད། མེ་སྒྲོན་ཀྱང་བཞག ༈ །འགྲོ་འདུལ་ལས་འཕྲོ་གླིང་པའི་དམ་ཅན་ལ། དཀྱིལ་འཁོར་སྟེང་གཏོར་མ་མཁར་ཐབས་མ་ལ་སྐུ་ཙཀ་དང་ཕ་ཝཾ་ལོང་བུས་བརྒྱན་པ། ཟླ་གམ་གསུམ་ལ་དམར་གཏོར། སྨན་རཀ །མདའ་དར་མེ་ལོང་ཅན། མདུན་དུ་ཕ་ཝཾ་ལོང་བུ། ཤར་དུ་རྡོ་རྗེ་ལྕགས་ཀྱུ། ལྷོར་བུམ་པ་ཞགས་པ། ནུབ་ཏུ་རལ་གྲི་ལྕགས་སྒྲོག །བྱང་དུ་མདུང་དམར་ཐོ་བ། དབུས་སུ་བླ་རྡོ་ཕ་ཝཾ་ལོང་བུ་རྣམས་བཀོད། ༈ གཏེར་གསར་དམ་ཅན་ལྕམ་དྲལ་ལ། སྟག་ལྤགས་སྟེང་རྟེན་གཏོར་ཡོད་ན་རྟེན་མདའ་བླ་རྡོ་དང་མེ་ལོང་སྐུ་ཙཀ་བཙུགས། གཡས་གཡོན་དུ་རྡོ་རྗེ་དགྲ་སྙིང་། མེ་ལོང་དང་མདའ་དར་བཞག ༈ །ཞིང་སྐྱོང་སེང་གདོང་ལ། རས་བྲིས་སྟེང་ཚོམ་བུ་ལྷ་གྲངས་དང་བཅས་པའི་སྟེང་དུ་རྟེན་གཏོར་སྐུ་དང་བཅས་པ། མདུན་དུ་སྐུ་ཙཀ །གཡས་སུ་སྒྲུབ་ཡིག་སྔགས་བྱང་། མདུན་དུ་བདུད་རྩིའི་ཐོད་པ་རྣམས་དང་། བེར་ནག་དང་སྟག་ཤམ་མི་ལྤགས་མགོ་ཕྲེང་ཁྲག་ཐལ་བ་རུ་མཚོན་ཁ་ཊྭཱཾ་རྣམས་ཕྱོགས་བསྡུས། ཟན་ལིང་གཉིས་ཤོག་ལིང་གཅིག་ཧོམ་དུ་བཀོད་པ་བཅས། ༈ བདུད་འདུལ་ལུགས་ཀྱི་ཞིང་སྐྱོང་ལ། རས་བྲིས་སམ་ཚོམ་བུའི་ཁར་རྟེན་གཏོར། གཡས་གཡོན་སྨན་དང་རཀྟའི་ཐོད་པ། རྒྱབ་ཏུ་མདའ་དར་བླ་རྡོ་སྲོག་འཁོར་བཏགས་པ་བཞག ༈ །སྲོག་སྒྲུབ་དྲག་པོ་སྡེ་བཞིའི་བཀའ་གཏད་ལ། རས་བྲིས་སྟེང་རྣམ་བུམ་ཆས་ལྡན། ཕྱོགས་བཞི་དྲག་པོ་སྡེ་བཞིའི་གཏོར་མ་དར་གདུགས་སྐུ་ཙཀ་སོགས་རྒྱན་ལྡན། མདུན་དུ་ཤེལ་རྡོ་མེ་ལོང་ཧཱུྃ་ཡིག་སྒྲོ་མདོངས། གཡས་སུ་གཞུང་པོད་བགྲང་ཕྲེང་ཐོད་ཆང་། རྒྱབ་ཏུ་ཐོད་ཁྲག །གཡོན་དུ་བྲུབ་ཁུང་ཉའོ། གདབ་ཕུར་ཕྱག་རྒྱ་བཞི་སྒྲོལ་གྲི་རྣམས་དང་། གཞན་ཡང་ཐལ་རཀ་ཞག་གསུམ། དུར་ཁྲོད་ཆས། ཕྱག་མཚན་གྲི་གུག་སྦྲུལ་ཞགས་ལྕགས་ཀྱུ་བེ་ཅོན་ཞིང་དབྱུག་རྒྱུ་ཞགས་ཐོ་བ་སྦུད་པ་རྣམས་ཀྱི་ཙཀ་ལི་དང་། རཀྴའི་ཕྲེང་བ་བཅས་བཀོད། ༈ ཞིང་སྐྱོང་དུར་ཁྲོད་མ་མོ་ལ། སིནྡྷུ་རའི་དཀྱིལ་འཁོར་གཞུང་གསལ་སྟེང་རྟེན་གཏོར་རྒྱན་ལྡན། མདུན་དུ་མར་ཟན་འབུལ་གཏོར་ར་དཀར་མོའི་འོ་མ་ལ་སོགས་བཀོད། གླ་རྩི་སྤོས་དཀར་དང་སྦྱར་བའི་སྤོས་ཀྱང་བསྡོག ༈ །ཤ་ཟ་ཁ་མོ་ཆེའི་སྲོག་གཏད་ལ། རས་བྲིས་སྟེང་རྟེན་གཏོར་སྐུ་ཙཀ་རྒྱན་ལྡན། གཡས་གཡོན་ལྕགས་ཀྱུ་གྲི་སྙིང་། བགྲང་ཕྲེང་བཅས་བཀོད། ༈ བརྟན་མ་བཅུ་གཉིས་ལ། རས་དཀར་པོའི་གཞི་ལ་པདྨ་འདབ་མ་བཅུ་གཉིས་མུ་ཁྱུད་དང་བཅས་པའམ་ཚོམ་བུ་ལྷ་གྲངས་ཀྱི་དབུས་སུ་གོང་གནོན་བླ་མ་ཡི་དམ་གང་རུང་བཀོད་དགོས་པས་སྐབས་འདིར་བླ་མའི་གཏོར་མ་བཞག །པད་འདབ་བཅུ་གཉིས་ལ་བརྟན་མའི་གཏོར་མ་སྐུ་ཙཀ་དར་འཕན་བཅས། ཤར་སྟོད་ནས་བརྩམས་ཏེ་གཡས་བསྐོར་དུ་འགོད། སྨན་རཀ་གཏོར་གསུམ། དཀར་མངར་ཕུད་སྐྱེམས་ཕྱེ་མར་སོགས་སྒེར་མཆོད་གཞུང་གསལ། བཟང་ཤིང་སྤོས་དཀར་སོགས་འདུ་བྱ། ༈ པེ་ཧར་སྲོག་གཏད་ལ། སྟེགས་བུ་འབྲུ་སྣ་སིལ་མ་བཀྲམ་པའི་སྟེང་དུ་རྟེན་གཏོར་སྐུ་རྟེན་མདའ་དར་རྒྱལ་མཚན་གྱིས་བརྒྱན་པ་ཁ་ཟས་བཟང་དགུ་བཅས་བཀོད། མཆོད་གཏོར་མཐུན་རྫས་གཞུང་གསལ་དངོས་དང་། གཟུགས་བརྙན་ཇི་ལྟར་ཚོགས་པ་དང་། རིགས་ལྔའི་ཕྱག་མཚན། དམ་ཤིང་། སྟག །སྤྲེའུ། བྱ་རྒོད། སྤྱང་ཀི །ཟ་འོག་རྒྱལ་མཚན་ལྔ། སྨན་རཀ་གཏོར་གསུམ་ཕྱོགས་བསྡུས་བཅས། ༈ གནོད་སྦྱིན་ཙིའུ་དམར་པོའི་སྲོག་གཏད་ལ། མེ་ཏོག་དམར་པོའི་ཚོམ་བུ་བདུན་བཀོད་པའི་སྟེང་དུ་རྟེན་གཏོར་སྐུ་ཙཀ་སོགས་ཀྱིས་བརྒྱན་པ་བཀོད། རྒྱབ་ཕྱོགས་སྟེགས་མཐོ་བར་དཔལ་གཏོར། མེ་ཏོག་དམར་པོའི་སྣོད། ཕུར་བུ་དང་དབྱུག་ཏོ། གཡས་སུ་རྟེན་རྫས་མདུང་དམར། མདུན་དུ་བླ་རྡོ་འཁོར་ལོ། གཡོན་དུ་ཞགས་པ་དམར་པོ་རྣམས་བཀོད། ༈ གཉན་ཆེན་ཐང་ལྷའི་སྲོག་གཏད་ལ། སྟེགས་བུར་འབྲུ་སྣ་སིལ་མ་བཀྲམ་པའི་ཁར་རྟེན་གཏོར་ཁང་བཟང་མ་སྐུ་རྟེན་སོགས་ཀྱིས་བརྒྱན་པ། མདུན་དུ་ཁྱད་པར་གྱི་མཆོད་པ་རྣམས་དང་། ཤེལ་ཕྲེང་བཞག ༈ །གནམ་ཆོས་སྤོམ་རའི་བཀའ་གཏད་ལ། འབྲུ་སིལ་མ་བཀྲམ་པའི་ཁར་རྟེན་གཏོར། སྐུ་རྟེན། ནས་དཀར་ཐེབ་གང་། ཕྱག་མཚན་དར་མདུང་དང་བུམ་པ་ནོར་བུའི་བརྒྱན་པ་རྣམས་བཀོད། ༈ གཏེར་གསར་ཚེ་རིང་མའི་སྲོག་གཏད་ཐུན་མོང་བ་ལ། སྟེགས་བུར་འབྲུ་ཚོམ་ལྔའི་སྟེང་དུ་དབང་གཏོར་རྒྱན་ལྡན་བཀོད་དོ། འདི་ཡན་གྱི་ཆོས་སྐྱོང་ཐམས་ཅད་ལ་མདུན་དུ་མཆོད་གཏོར་གཙོ་འཁོར་ལྷ་གྲངས་དང་མཚུངས་པའི་གཡས་གཡོན་སྨན་རཀ་འགོད་དགོས་པ་ནི་ཐམས་ཅད་ལ་ཤེས་པར་བྱའོ།། ༈ །།དེ་ནས་དགོས་དབང་ཁྱད་པར་ཅན་གྱིས་བཞག་པའི་རྡོ་རྗེ་གཡུང་དྲུང་གླིང་པའི་ཡབ་སྲས་བཅུད་དྲིལ་ལ། གཞུང་གསལ་དཀྱིལ་འཁོར་རམ། མ་འཛོམ་ན་མཎྜལ་ཚོམ་བུ་གཅིག་བཀོད་པའི་སྟེང་། མཉྫིའི་ཁར་རྣམ་བུམ་ཆིངས་སྔོན་བཅུད་ཀྱིས་གཏམས་པ། མདུན་དུ་བླ་བརྒྱུད་ཙཀ་ལི། རྒྱབ་ཏུ་བླ་གཏོར་ཟླུམ་པོ་སྐུ་གཟུགས་ཀྱིས་བརྒྱན་པ་རྣམས་བཀོད། ༈ བོན་གཏེར་ཀུན་གྲོལ་ལས་འཕྲོ་གླིང་པའི་མཁའ་འགྲོ་གསང་མཛོད་ཀྱི་དབང་ལ། སྟེགས་དཀར་པོའི་སྟེང་འབྲུ་ཚོམ་དགུ་བཀོད་པའི་དབུས་མཉྫི་ལ་ཐོད་པ་མཚན་ལྡན་བྱང་སེམས་དཀར་དམར་ཆོས་སྨན་སྦྱར་བའི་ཆང་བཟང་པོས་བཀང། རིག་ཙཀ་མེ་ལོང་། རས་གོས་སྒོམ་ཐག་ཨང་རག་དངོས་སམ་བྲིས་པའི་ཙཀ་ལི་བཞག ༈ །རྗེས་དྲན་བཻ་རོའི་ཐུགས་ཏིག་ཚེ་སྒྲུབ་ཟབ་རྒྱ་ཅན་ལ། མཎྜལ་དཀྱིལ་འཁོར་སྟེང་ཚེའི་འབྲང་རྒྱས། གཡས་གཡོན་དུ་ཚེ་ཆང་ཚེ་རིལ། དཀར་མངར་བཟའ་བཏུང་བཅས་བཤམ། ༈ གཏེར་གསར་བོན་གསས་དབང་དྲག་འབར་བ་ལ། མཎྜལ་འབྲུ་ཚོམ་གཅིག་བཀོད་པའི་སྟེང་དཔལ་བཤོས་ཟུར་གསུམ་རྩེ་རྒྱལ་ཕྲག་པ་ཅན་རྒྱན་ལྡན། སྐུ་ཙཀ་དར་གདུགས་ཅན་བཀོད། ༈ སྤོམ་རའི་བཀའ་གཏད་ལ། གཞི་དཀར་འབྲུ་དཀར་གྱིས་གཡུང་དྲུང་གཡོན་བསྐོར་བྲིས་པའི་ཁར་རིན་པོ་ཆེའི་སྣོད་དུ་རི་རབ་བང་རིམ་བཞི་ལྡན་སྟེང་། གཏོར་མ་ཁང་བཟང་མ་ནམ་མཁའ་དར་གདུགས་དཀར་པོ་ཅན་མདའ་དར། གསེར་སྐྱེམས་བཅས་བཀོད་པར་བྱའོ། ༈ དེ་ནས་རྩ་གསུམ་ཆོས་སྐྱོང་དང་བཅས་པའི་ཕྲིན་ལས་ཁ་ཚར་གྱི་རིམ་པ་ལ། ཐོག་མར་བསྙེན་སྒྲུབ་སྤྱིའི་ཡན་ལག་ཏུ་ཉེ་བར་མཁོ་བའི་སྐོར་ལས། ༈ ཀློང་གསལ་བདུད་རྩི་འཁྱིལ་བ་ལ། མཎྜལ་ཚོམ་བུ་གཅིག་པའི་སྟེང་བུམ་པ། སྐུ་ཙཀ །སྔགས་བྱང་ངམ་ཕྲེང་བ། ཤེལ་རྡོ། མེ་ལོང་། གཏོར་མ་རྣམས། ༈ གནམ་ཆོས་བདུད་རྩི་འཁྱིལ་བ། ཀུན་ཐུབ་རྒྱལ་མོ་གཉིས་ཀར་གཟུངས་དབང་ཆས་དང་། ༈ མ་ཧཱ་བ་ལའི་བཀའ་གཏད་ལ། མཎྜལ་ཚོམ་བུ་ནག་པོའི་སྟེང་སྐུ་ཙཀ །ཐེབ་ནས། དམར་གཏོར། ཕུར་བུ་རྣམས་བཀོད། ༈ མེ་ལྷའི་བཀའ་གཏད་དེ་མཚུངས་ལ། ཚོམ་བུ་དམར་པོ། སྐུ་ཙཀ །ནས། གཏོར་ཟླུམ། རིལ་བ་སྤྱི་བླུགས་རྣམས་བཀོད། ཕྱེ་མར་རམ་ཟས་མཆོག་དང་མེ་ཧོམ་འདུ་བྱའོ།། ༈ །།དེ་ནས་མཆོག་གི་ཕྲིན་ལས་བཏགས་གྲོལ་གླེགས་བམ་གྱི་དབང་། བླ་མ་ཡང་ཏིག་གི་ལུགས་ལ། མཎྜལ་ཚོམ་བུ་ལྔ་པའི་ཁར་རིན་པོ་ཆེའི་སྣོད་དུ་འཁོར་ལོ་དར་གྱིས་དྲིལ་བ་བཀོད། ༈ མཁའ་འགྲོ་སྙིང་ཐིག་ལ། རྒྱུད་དྲུག་བཞག་པ་ལས་འདྲ། ༈ བླ་མ་དགོངས་འདུས་ལུགས་ལ། དཀྱིལ་འཁོར་རས་བྲིས་སམ་དགུ་ཚོམ་གྱི་དབུས་སུ་ཁྲིའུར་འབྲུའི་སྣོད་དུ་བཏགས་གྲོལ་དཀར་པོ་གཅིག་ཐུབ་ཀྱི་གླེགས་བམ་དར་བསྣས་བཀླུབས་པ་བཞག །གཡས་གཡོན་དུ་བུམ་པ་བཅུད་ལྡན། རིགས་ལྔའི་ཕྱག་མཚན་རྣམས་བཞག་གོ། ༈ །།ལས་སྣ་ཚོགས་པ་ལས། ཀློང་གསལ་རྒྱལ་མཚན་རྩེ་མོ་ལ། ཚོམ་བུ་གཅིག་སྟེང་བུམ་པ་ཆིངས་སེར་དང་། གཡས་གཡོན་དུ་གཏོར་མ། སྐུ་ཙཀ །ཐོད་པའི་བདུད་རྩི། ཤེལ་རྡོ་མེ་ལོང་རྣམས། ༈ གནམ་ཆོས་མདོས་ཆོག་ཉེར་མཁོའི་བཀའ་གཏད་ལ། རིགས་གསུམ་གཅིག་དྲིལ་ལ། གཟུངས་དབང་ཆས་བཀོད། ༈ ལས་ཧུར་དྲག་མོ་ལ། དཀྱིལ་འཁོར་གཏོར་མ་དཔེའུ་རིས་ལྟར་རམ་མ་འཛོམ་ན་ཚོམ་བུ་དབུས་སུ་གཅིག །དེ་རྒྱབ་ཕྱོགས་བཞིར་གཙོ་འཁོར་ལྔ་རེ། དེ་རྒྱབ་དགུ །དེ་རྒྱབ་བཞི། དེ་རྒྱབ་བརྒྱད་བཀོད་པའི་དབུས་སུ་བུམ་པ། གཏོར་མ་སྐུ་ཙཀ་བཙུགས་པ། བྷནྡྷ་བདུད་རྩི། རྡོ་རྗེ་བཅས། ༈ ཀག་ཟློག་རྣམ་དགུ་ལ། དམར་གཏོར་དགུ་ལ་སོ་སོའི་ཙཀ་ལི་བཙུགས་པ་དང་། དབང་རྫས་བུམ་པ་སོགས་གོང་ལྟར། དཀྱིལ་འཁོར་ཚོམ་བུ་རེ་རེ་བཀོད། ༈ ཧ་ས་གརྦྷའི་བཀའ་གཏད་ལ། མདུན་སྟེགས་ཁར་དམར་གཏོར་ཟུར་གསུམ་མཐེབ་ཀྱུས་བརྒྱན་པ། སྐུ་ཙཀ །ཐོད་ཆང་བཤམ། ༈ མ་མོའི་ཁྲག་མདོས་ཀྱི་བཀའ་གཏད་ལ། དམར་གཏོར་གཅིག་ལ་བྱ་ནག་ལུག་ནག་སྨན་ཏིང་རྣམས་ཀྱིས་བསྐོར་བའི་རྩེ་ལ་གཞུང་གསལ་སྐུ་ཙཀ་བཙུགས། འཛོམ་ན་ནམ་མཁའ་ཤིང་རིས་མདའ་འཕང་ཆུང་ངུ་བཙུགས། མ་འཛོམ་ན་ཙཀ་ལིའི་རྒྱབ་ཏུ་བྲིས་པས་ཆོག་པར་གསུངས། ༈ དབང་ཕྱུག་ཟོར་མདོས་བཀའ་གཏད་ལ། སྣོད་ལྔའི་ནང་དུ། ཀོང་ཟོར་གྲུ་གསུམ་ནང་དམར་གཏོར་ཟུར་གསུམ་བཞག་ཅིང་ཟུར་གསུམ་ལ་རྩང་གསུམ་རྩེ་བསྣོལ་བཙུགས་པ་གཙོ་འཁོར་ལྔ་ཕྱོགས་སོ་སོར་བཤམ། རྒྱས་པ་ཆོས་སྐྱོང་སྤྱིའི་བཀའ་གཏད་ཆས་བཤམ་མོ།། ༈ །།ལས་བྱེ་བྲག་པའི་ཐོག་མ་སྲུང་བའི་སྐོར་ལས། རྒྱ་ཕུར་བུའི་དུག་ཁྲག་རྫས་སྲུང་གི་བྱིན་རླབས་ལ། འཛོམ་ན་དུག་ཁྲག་རྭ་སྲུང་ཚད་ལྡན་བྱས་པ་དགོས་ཀྱང་དཀྱུས་སུ་འཛོམ་དཀའ་བས་རྫས་རྒོད་སོགས་སྦྱར་ནས་བསྒྲུབས་པའི་རྭ་སྲུང་སྟེགས་བུར་བཀོད། ༈ གནམ་ཆོས་འཇིགས་མེད་རྡོ་རྗེ་དང་། རྡོ་རྗེ་མཆུ་ལ་གཟུངས་དབང་གི་ཆས་སོ། ༈ །ཞིག་གླིང་དམག་ཟློག་ཉེར་ལྔའི་རྒྱལ་ཆེན་སྡེ་བཞིའི་བཀའ་གཏད་ལ། རས་བྲིས་དབུས་སུ་རྒྱལ་ཆེན་སྡེ་བཞིའི་གཏོར་མ་རིན་པོ་ཆེའི་སྣོད་བཞི་སོ་སོའི་ནང་རིམ་བཞིན་རི་རབ་བང་རིམ་བཞི་བརྩེགས་རེ་རེ་བཀོད་ལ་དེ་སྟེང་ཤར་དུ་ལྷ་བཤོས་དབྱིབས་པད་འདབ་མང་པོས་བསྐོར་བ། ལྷོར་གྲུ་བཞི་མཁར་ཐབས་རྩེར་རལ་གྲིས་བརྒྱན་པ། ནུབ་ཏུ་ཟླུམ་པོ་འདབ་བཞི་རྩེ་མོར་སྦྲུལ་རིགས་ལྔས་དཀྲིས་པ། བྱང་དུ་ཁང་བཟང་སུམ་བརྩེགས། དེ་བཞིའི་རྩེ་མོར་སོ་སོའི་སྐུ་རྟེན་རང་མདོག་མདའ་དར་དང་བཅས་པ། རི་རབ་རྩེ་མོར་རྒྱལ་མཚན་བཙུགས་པ་བཞག །དེ་སྟེང་ཁྲིའུར་རྣམ་བུམ་ཆིངས་སྔོན་ཅན། ཉེ་ལོགས་སུ་བ་དན། ཟས་སྣ་དང་དྲི་བཟང་གི་ཆུ། མཆོད་རྟེན། གདུགས། རྒྱལ་མཚན། དུང་དཀར། པུསྟི། རྡོ་རྗེ་རྣམས་སོ་སོའི་ཙཀ་ལི། རིན་པོ་ཆེ་འབྲུ་སྨན་དར་ཟབ་ལ་སོགས་པས་བཀང་བའི་བུམ་གཏེར། བྲུབ་ཁུང་ཤོག་ལིང་། ཕུར་པ། རལ་གྲི །ཐུན། མེ་ཧོམ་བཅས་སྟ་གོན་བྱ། ༈ དུག་སྲུང་བྱང་གཏེར་དུག་དབང་རྡོ་རྗེ་ཕ་ལམ་གྱི་དབང་གི་བཅས་བཤམ་སྔགས་འཆང་དབང་པོའི་སྡེའི་གསུང་ལས་འབྱུང་བ་ལྟར་བྱ་དགོས། ࿋ དུག་དབང་རྡོ་རྗེ་ཕ་ལམ་གྱི་བཅས་བཤམ། གནས་དབེན་པར་སློབ་དཔོན་ཁ་ལྷོར་བལྟས་པའི་མདུན་དུ་རས་དཀར་ཁ་ཚར་མ་ཉམས་པ་གྲུ་བཞིར་བལྟབས་པའི་སྟེང་དུ། དཀྱིལ་འཁོར་ཆོས་འབྱུང་གྲུ་གསུམ་པའི་དབྱིབས་ཅན། དེ་ཡང་གསུམ་གཉིས་ནས་དཀར་དང་ཆ་གཅིག་སྲན་མ་ནག་པོ་ལས་བྱས་པའི་ལྷོར་ཁ་བསྟན་པའི་དབུས་མན་ཛིའི་ཁར་བུམ་པ་འོ་མར་བཅས་པའི་དྲི་བཟང་གིས་ཕྱེད་གང་བའི་སྟེང་དུ། རིན་པོ་ཆེའི་སྣོད་དུ། གསེར་ཐིག་པོ་དང་སྨན་ཆེན་རྨ་བྱའི་མདོངས། ཟུར་གསུམ་ལྷོ་རྩེར་གུ་ལང་ནག་པོ་ལྕགས་ཀྱི་རྭ་ཅོ་འཕྱར་བ། ནུབ་བྱང་རྩེ་ལ་ཤྲཱི་རལ་པ་ཅན་མདའ་གཞུ་འགེང་པ་། བྱང་ཤར་རྩེ་མོར་དབང་ཕྱུག་ཆེན་པོ་ཏྲི་ཤཱུ་ལ་འགེང་པ། གསུམ་ཀ་ཡང་གཅེར་བུ་ལིངྒ་གྱེན་དུ་བསྒྲེང་བ་ཉམས་དོད་པར་འབུར་དུ་གྲུབ་པ། བུམ་པར་ཞལ་བསྟན་པའི་ཆོས་འབྱུང་གི་ལེབ་གསུམ་གྱི་ཤར་དུ་ལུག་ནག་འོག་ཅན་གྱི་རྐང་པ་གཡས་པའི་དཔྱི་ལྷུ། བྱང་དུ་བར་ལྷུ། ནུབ་ཏོག་རྩེ་ལྟ་བུ། གསུམ་ཀ་ཡང་ཤ་ནང་གྱེན་བསྟན་གྱི་བཅད་ཁ་ཕྱིར་བསྟན་པ། སློབ་དཔོན་གྱི་མདུན་གཡས་སུ། ནུབ་ངོས་ནས་ཚུར་ཟླུམ་གཏོར་གསུམ་དང་ཤེར་དབང་གི་རྫས་ཆུ་གཙང་ལ་ཅུ་གང་དང་ལི་ཁྲི་བཏབ་པ། བཞི་པའི་རྟེན་ཆོས་འབྱུང་གཏོར་མ་ཞེས་པ་སྟེ། དེ་ཡང་འོག་ནས་རིམ་པར་ཞི་རྒྱས་དབང་དྲག་གི་དབྱིབས་ཁ་དོག་སོ་སོར་བསྒྱུར་བ་ལས། སྟེང་གི་དྲག་པོ་ཐོག་གི་མདེའུ་ལྟ་བུ་སྟེ། གཏོར་མ་བཞི་ཀ་ཡང་དཀར་དམར་གྱིས་བརྒྱན། མཐའ་སྐོར་མཆོད་པ་གཡོན་བསྐོར་བཀོད་པའི་ཤར་དུ་ཤ་སྣ་སོགས་བཟའ་བཅའ་གང་ཡང་རུང་བའི་ཚོགས་གང་འཛོམ་མངོན་པར་འདུ་བྱའོ། ࿋ ༈ །གནམ་ཆོས་དགོངས་གཏེར་འོད་ཟེར་ཅན་མ་ལ། མཎྜལ་ཚོམ་བུ་གཅིག་བཀོད་པའི་དབུས་བུམ་པ་ཉེར་ལྔའི་རྫས་ལྡན་མགུལ་ཆིངས་དཀར་པོ་ཁ་རྒྱན་ལྡན་པ་དང་། མདུན་རྒྱབ་གང་བདེར་དབང་གཏོར་སྐུ་ཙཀ་དར་གདུགས་ཀྱིས་བརྒྱན་པ། རྟགས་བརྒྱད་ཙཀ་ལི་བཅས་བཞག་གོ། ༈ །།དེ་ནས་ཞི་བའི་ལས་ཚོགས་ཀྱི། ཐོག་མར་བགེགས་དང་བར་ཆད་ཞི་བའི་སྐོར་ལ། ཆོས་གླིང་བར་ཆད་སེལ་བའི་རྣམ་འཇོམས་བུམ་ཆོག་ལ། པདྨ་འདབ་བརྒྱད་སྟེང་བུམ་པ་རྫས་གཞུང་གསལ་ལམ་མ་འཛོམ་ན་ཉེར་ལྔའི་བཅུད་ལྡན་བཀོད། ༈ མཆོག་གླིང་ཐུགས་སྒྲུབ་རཀྴ་ཐོད་ཕྲེང་ལ། མཎྜལ་ཚོམ་བུ་དབུས་སུ་གཅིག་འཁོར་བཅུས་བསྐོར་བའི་སྟེང་རྣམ་བུམ། མདུན་དུ་དཔལ་གཏོར། སྐུ་ཙཀ །སྔགས་བྱང་ངམ་ཐོད་ཕྲེང་། ཕྱག་མཚན་རྡོ་རྗེ་ཐོད་པའི་ཙཀ་ལི་བཅས། ༈ ཐུགས་སྒྲུབ་མི་གཡོ་བ་རིགས་བཞི་ཀ་ལ། མཎྜལ་པདྨ་འདབ་བརྒྱད་རྡོ་རྭ་མེ་རིའི་བསྐོར་བའི་ལྟེ་བ་རང་མདོག་ལ་ཚོམ་བུ་དེ་མཚུངས་སམ་ཕྱག་མཚན་བྲིས་པའི་སྟེང་དུ་རྣམ་བུམ། སྐུ་ཙཀ །རལ་གྲི་ཞགས་པ་སོགས་ཕྱག་མཚན་སོ་སོ། མདུན་དུ་དབང་གཏོར་བཅས། ༈ ཞི་བྱེད་སྤྱི་བསྡུས་ལྷ་བཙུན་སྔོན་མོའི་ཞི་བྱེད་སྐོར་བདུན་ལ། མཎྜལ་པདྨ་འདབ་བརྒྱད་ཚོམ་བུ་དཀར་པོ་ཅན་གྱི་སྟེང་དུ་བུམ་པ་ཆིངས་དཀར་ཉེར་ལྔའི་བཅུད་ལྡན། མདུན་རྒྱབ་གང་བདེར་ཟླུམ་གཏོར་དར་གདུགས་དཀར་པོས་སྤྲས་པ། སོ་སོའི་སྐུ་ཙཀ་དང་། ཕྱག་མཚན། ཤེལ་ཕྲེང། དར་དང་རིན་པོ་ཆེའི་རྒྱན། རྫས་བརྒྱད་བཅས། སྐོར་བདུན་དུས་གཅིག་སྒྲུབ་བསྐུར་བྱེད་ན་དེ་འདྲ་ཚར་བདུན་བཤམ། སོ་སོའི་མཐའ་རྟེན་ཆས། དང་པོ་སྤྱན་མ་ལ་རིལ་བུ་ཚད་ལྡན་བསྒྲུབས་པའམ་མེད་ན་ཨ་རུ་ར་སློབ་མའི་གྲངས་མཉམ་དང་ཁྲུས་ཆས། གཉིས་པ་ལོ་མ་ཅན་ལ་དེའི་སྨན་རིལ་ལམ་སྤྲུ་ནག་ཤུ་དག་གུ་གུལ་ལ་སྔགས་བཏབ་པ། གསུམ་པ་འོད་ཟེར་ཅན་མ་ལ་སེང་ལྡེང་དབྱུག་པ་རྡོ་རྗེའི་ཏོག་ཅན། བཞི་པ་གཙུག་ཏོར་ལ་ཕུར་བུ་བྱད་དཀྲོལ་ཆས། ཚོན་སྐུད། གྲི་གསར་པ། ཡུངས་ཀར། མེ་ཧོམ། ཁྲུས་ཆས། གླུད་གཏོར་སོགས་བསྡོག །ལྔ་པ་ཤེར་ཕྱིན་དཀར་མོར་བསྒྲུབས་པའི་སྨན་མར་རམ་ཤུ་དག་དཀར་པོ་སྔགས་བཟླས། དྲུག་པ་སྒྲོལ་དཀར་ལ་ཕྱག་རྒྱ་བཅིངས་པས་ཆོག །བདུན་པ་རྨ་བྱ་ཆེན་མོར་ཚེ་འབྲང་རིལ་ཆང་རྣམས་བཀོད། འཆི་བསླུའི་གླུད་ཆངས་བུ་བཅས་པ་དང་ཁྲུས་ཆས་ཀྱང་ཉེར་བསྡོག་བྱའོ། ༈ །ནད་ཞི་བྱེད་ཀྱི་སྐོར་ལ། ཀློང་གསལ་སྨན་བླ་ལ། ཚོམ་བུའི་སྟེང་བུམ་པ་ཆིངས་སྔོན། གཡས་གཡོན་དུ་ཕྲེང་བ། རྡོ་རྗེ། ལྷུང་བཟེད་ཨ་རུ་ར་ལྡན་པ། སྨན་སྣ་ཚོགས་བཅས། ༈ གནམ་ཆོས་སྨན་བླ། མཎྜལ་ཚོམ་བུ་གཅིག་པའི་སྟེང་དབང་གཏོར་སྐུ་ཙཀ་དར་གདུགས་སྔོན་པོ་ཅན་བཀོད། ནད་པ་རྗེས་འཛིན་བྱེད་ན་སྔོན་གཏོར་དང་ཤོག་ཁྲ་བསྡོག ༈ །བདུད་འདུལ་པའི་ལུགས་ཀྱི་ལོ་གྱོན་མའི་དབང་ལ། རས་བྲིས་སམ་ཚོམ་བུ་གཅིག་པའི་ཁར་བུམ་པ་ཆིངས་དཀར་ཉེར་ལྔའི་རྫས་ལྡན། གཡས་སུ་གཏོར་ཟླུམ་དཀར་པོ་འཁོར་བཞི་དང་ཀྱུ་གུས་བསྐོར་བ། གཡོན་དུ་མེ་ལོང་སྨན་ལྔ་དང་སིནྡྷུ་རས་བྱུགས་པ་དང་ཤེལ་ཕྲེང་བཅས། ༈ གནམ་ཆོས་ལུགས་ཀྱི་གཏོར་དབང་ལ་གཏོར་མ་གཞུང་དང་དཔེ་རིས་ལས་འབྱུང་བ་སོ་སོའི་ཙཀ་ལི་བཙུགས་པ་བཤམ། ༈ སྟག་ཤམ་ལོ་གྱོན་མ་ལ། མཎྜལ་ཚོམ་བུ་གཅིག་སྟེང་བུམ་པ་ཉེར་ལྔའི་བཅུད་དང་ཆིངས་དཀར་འབྲས་བུ་ཅན་གྱི་ཤིང་གི་ཁ་རྒྱན་ལྡན་པ། མདུན་དུ་རིན་པོ་ཆེའི་སྣོད་དུ་སྨན་སྣའི་ཕྱེ་མ་བཞག ༈ །གྲུབ་ཐོབ་རིལ་དཀར་སྒོམ་ལུང་ལ། གཞི་སྟེང་ངམ་སློབ་དཔོན་མདུན། སྟེགས་དཀར་པོའི་ཁར་ཐོད་པ་མཚན་ལྡན་ཆང་ཉིང་ཁུ་བཟང་པོས་བཀང་བ་བཞག ༈ གདོན་ཞི་བྱེད་སྐོར་ལ། ཉང་གཏེར་ནམ་མཁའ་ལྡིང་དམར་པོ་ལ། བུམ་པ་དང་གཏོར་མ་ཁོ་ན། ༈ བྱང་གཏེར་ཁྱུང་ཆེན་ཡོངས་རྫོགས་ལ་མཎྜལ་ཚོམ་བུ་ལྔ་བཀོད་པའི་སྟེང་དུ་བུམ་པ། མདུན་དུ་གཙོ་ཁྱུང་མཐིང་ནག །ཁྱུང་རིགས་བཞི་བསྡུས་པའི་ཙཀ་ལི། གཡས་གཡོན་དུ་དབུ་རྒྱན་དང་རྡོར་དྲིལ་བཀོད། ༈ ལས་ཀྱི་བྱ་ཁྱུང་ནག་པོ་ལ། ཚོམ་བུའི་སྟེང་གཏོར་མ་གཙོ་འཁོར་བརྒྱད་པ་མེ་རིའི་རྒྱན་ལྡན་ལ་སྐུ་ཙཀ་དར་གདུགས་དབུབ། ༈ ལས་འབྲེལ་ལུགས་ཀྱི་གཉེན་པོ་ལྷ་གསུམ་ལ། སྟ་གོན་རྫས་མཆོད་པ་བཅས། རས་བྲིས་སམ་ཚོམ་བུ་གཙོ་འཁོར་ལྔ་པའི་སྟེང་དུ་ཁྲིའུ་གསུམ་ལ་བུམ་པ་མགུལ་ཆིངས་ནག་པོ་ཅན་ཉེར་ལྔའི་རྫས་ལྡན་གསུམ་བཞག །གཙོ་བོ་གསུམ། ཀླུ་བརྒྱད་བཅས་ཀྱི་ཙཀ་ལི། སྔགས་བྱང་། རྒྱབ་ཏུ་དཔལ་གཏོར། གཞན་ཡང་ཡུངས་ཀར། སེང་ཕུར། རལ་གྲི །རྡོ་རྗེ། སྨྱག་ཤད། རྨ་བྱའི་སྒྲོ་མདོངས། གུ་གུལ། དྲག་པོའི་འཁོར་ལོ། གཞུང་གསལ་རྫས་སྣ་ཡོད་ན་དང་། མེད་ན་རྫས་རྒོད་རྣམས་ཀྱང་གང་བདེར་བཞག ༈ །མཆོག་ལྡན་མགོན་པོའི་གཉེན་པོ་ལྷ་ལྔ་ལ། དཀྱིལ་འཁོར་རས་བྲིས་སམ་ཚོམ་བུ་གཅིག་པའི་སྟེང་དུ་བུམ་པ་ཆིངས་ནག་ཅན། མདུན་དུ་ལྷ་ལྔའི་ཙཀ་ལི་དང་རྟ་མགོ་ལྗང་ཞུར་རྔོག་མ་དམར་སེར་མར་ཟན་ལ་བཅོས་པ། གཡས་སུ་ཁྱུང་ལྔའི་རིལ་བུ་དང་ཐོད་ཕྲེང་། རྒྱབ་ཏུ་ཚེ་འབྲང་རིལ་ཆང་བཅས་པ་དང་། གནམ་ལྕགས་རྡོ་རྗེ། གཡོན་དུ་མེ་ལོང་། གདབ་ཕུར་སྟེགས་ལ་གཟུག ༈ །མ་ཏིའི་ཁྱུང་དམར་ལ། ཚོམ་བུ་གཙོ་འཁོར་ལྔ་པའི་སྟེང་བུམ་པ་ཁྱུང་ལྔའི་རྫས་ལྡན་དང་། ཡོད་ན་བྱ་ཁྱུང་རིགས་ལྔའི་སྐུ་ཙཀ་སོ་སོར་བཞག ༈ །ར་ཞི་པད་འཛིན་ཁྱུང་ཁྲ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། གཡས་སུ་ཐོད་ཆང་། གཡོན་དུ་མེ་ལོང་། རྒྱབ་ཏུ་ཁྱུང་ལྔའི་རིལ་བུ་སློབ་མའི་གྲངས་མཉམ་སྦྱིན་རྒྱུ་དང་སྐེ་ལ་འདོགས་རྒྱུའི་ཐུམ་པོ་བཅས། ༈ སྟག་ཤམ་ཁྱུང་ཁྲ་ལ། ཚོམ་བུ་ལྔ་པའི་སྟེང་བུམ་པ་ཁྱུང་ལྔའི་རྫས་དང་ཆབ་ཀྱིས་བཀང་བ། གཡས་གཡོན་དུ་ཐོད་ཆང་རྡོ་རྗེ། ཁྱུང་ལྔ་བཏབ་པའི་དྲི་ཆབ། ཁྱུང་ལྔ། ཕུར་བུ། ཡུངས་ཀར་འབྲུ་དགུ་སློབ་མའི་གྲངས་མཉམ་ཤོག་ཐུམ། ཐུན་རྭ། རི་རབ་སྟེང་དཔལ་གཏོར་སྐུ་རྟེན་དང་བཅས་པ་བཞག ༈ །རོལ་རྡོར་ཁྱུང་ཁྲའི་གཏོར་དབང་ལ། དཔལ་གཏོར་སྐུ་རྟེན་ཅན། ཕྲེང་བ་ཐོད་ཆང་རྡོ་རྗེ་བཅས། ༈ བདེ་གླིང་དྲག་པོ་ལྷ་གསུམ་ལ། རས་བྲིས་སམ་ལྷ་གྲངས་ཚོམ་བུའི་སྟེང་ཟངས་བུམ་ཉེར་ལྔའི་རྫས་དང་འོ་མས་བཀང་བ། ཤར་དུ་ལྷ་ཙཀ་དང་ཧཱུྃ་བཅུ། ལྷོར་དཔལ་གཏོར་སྐུ་གཟུགས་དར་གདུགས་བཅས། ནུབ་ཏུ་ཐོད་ཆང་ཕྲེང་བ་སྒྲུབ་ཡིག །བྱང་དུ་དུར་ཁྲོད་ཆས་བརྒྱད་རལ་གྲི་ལྕགས་ཀྱུ །གཞན་ཡང་ཚེ་རིལ་ཆང་བཟའ་བཏུང་། བཀའ་སྲུང་དམར་གཏོར་བཅས་འདུ་བྱ། ༈ དྲག་པོ་རྟ་ཁྱུང་ལ། ཚོམ་བུའི་སྟེང་དཔལ་གཏོར་སྐུ་རྟེན་དར་གདུགས་ཅན། མདུན་དུ་བུམ་པ་ཆིངས་དམར་བཅས་བཀོད། ༈ གཟའ་སྲུང་གསང་བདག་ཉི་མ་མདུང་གང་མ་ལ། མཎྜལ་པདྨ་འདབ་བརྒྱད་ཚོམ་བུ་སྔོན་པོ་གཅིག་བཀོད་པའི་སྟེང་དུ་མཉྫིའི་ལ་བུམ་པ་ཉེར་ལྔའི་བཅུད་ལྡན། གཡས་གཡོན་སྐུ་ཙཀ །རུས་ཕྲེང་། གནམ་ལྕགས་རྡོ་རྗེ། མདུན་རྒྱབ་གང་བདེར་དཔལ་གཏོར་རྒྱན་ལྡན་བཀོད། ༈ ཁྱུང་དམར་མེའི་གཤོག་པ་ཅན་ལ། མཎྜལ་ཚོམ་བུ་ལྔ་པའི་དབུས་སུ་ཁྲིའུར་རྣམ་བུམ། མདུན་སོགས་སུ་སྐུ་ཙཀ །ཕྲེང་བ། ཤེལ་རྡོ། དབང་གཏོར་རྒྱན་ལྡན་བཀོད། ༈ མཆོག་གླིང་ཕྱག་རྡོར་རྡོ་རྗེ་བེ་ཅོན་ལ། མཎྜལ་ཚོམ་བུ་གཅིག་སྟེང་རྣམ་བུམ་ཆིངས་མཐིང་ག །སྐུ་ཙཀ་གསུམ། སྔགས་བྱང་དང་རཀྴའི་ཕྲེང་བ། མདུན་དུ་དཔལ་གཏོར་བཅས། ༈ གཟའ་ཡུམ་རྗེས་གནང་ལ། སྟེགས་གཙང་མར་པདྨ་འདབ་བརྒྱད་སྟེང་བུམ་པ་བ་དམར་གྱི་འོ་མ་དང་ཆུ་གཙང་གིས་བཀང་བ་ལ། ཙན་དན་དཀར་པོ། དེ་བ་དཱ་རུ། རྒྱ་ཤུག །རུ་རྟ། བཙོད། ཏིལ་དཀར། གི་ཝཾ། གུར་གུམ། ཅུ་གང་། ག་པུར། གུ་གུལ་ནག་པོ། ཧ་ས་དེ་བ། རྨ་བྱའི་མདོངས་ཀྱི་ཕྱེ་མས་བཀང་། མགུལ་ཆིངས་དམར་པོ་བྱ། རྒྱབ་མདུན་དུ་དམར་གཏོར་རྒྱན་ལྡན། ཐོད་ཆང་། རྡོ་རྗེ་རྣམས་བཞག །བྱབ་ཁྲུས་བྱེད་ན་དེའི་ཆས་ཀྱང་བསྡོག ༈ །ཀློང་གསལ་སེང་གེ་སྒྲའི་དབང་ལ། མཎྜལ་པདྨ་འདབ་བརྒྱད་ལྟེ་བར་ཧྲཱིཿདཀར་བྲིས་པའམ་ཚོམ་བུ་གཅིག་པའི་སྟེང་བུམ་པ་ཉེར་ལྔའི་རྫས་དང་ཆིངས་དཀར་ཅན། གཡས་གཡོན་ཤེལ་ཕྲེང་། ཤེལ་རྡོ། རྒྱབ་ཏུ་གཏོར་ཟླུམ་པད་འདབ་རྒྱན་སྤྲོས་ཅན་བཞག ༈ ࿋ ཆོས་གླིང་གཏུམ་པོ་སེང་སྒྲོག་ལ། རས་བྲིས་སམ་ཚོམ་བུ་མཐིང་ནག་གཅིག་བཀོད་པའི་ཁར་བུམ་པ་མགུལ་ཆིངས་མཐིང་ནག་གཡས་གཡོན་མདུན་རྒྱབ་རྣམས་སུ། ཐོད་ཆང་མེ་ཏོག་རྡོ་རྗེ་དཔལ་གཏོར་བཅས་བཤམ། ࿋ ༈ །གྲིབ་དང་མི་གཙང་བ་སོགས་ཞི་བའི་སྐོར་ལས། བི་མའི་ལུགས་ཀྱི་རྣམ་འཇོམས་དཀར་པོའི་རིག་གཏད་ལ། ཚོམ་བུ་ལྷ་གྲངས་ཀྱི་ཁར་བུམ་པ་ཉེར་ལྔའི་རྫས་དང་རྒྱན་ལྡན་འབྲས་བུ་ཅན་གྱི་ཤིང་གིས་ཁ་བརྒྱན་པ་བཞག ༈ །བ་རི་ལུགས་ཀྱི་རྣམས་འཇོམས་ལྗང་སྔོན་ལ། པདྨ་འདབ་བརྒྱད་སྟེང་བུམ་པ་རྫས་དང་ཆས་སོགས་གཞུང་གསལ་ལྟར། ༈ སངས་རྒྱས་གསང་བའི་རྣམ་འཇོམས་མཐིང་ནག །མཎྜལར་བུམ་པ་དེ་མཚུངས། ཕྱག་མཚན་རྡོ་རྗེ། རྫས་བརྒྱད་སོ་སོ་བ་རྣམས་བཞག །བླ་སློབ་མཉམ་དུ་འདོན་རྒྱུ་གི་ཝཾ་གུར་གུམ་གྱིས་བྲིས་པའི་གཟུངས་དཔེ་འཛོམ་ན་རབ། མ་འཛོམ་ན་སྤར་མ་ལ་དེ་དག་བྱུགས་པའི་དཔེ་སྟ་གོན་བྱ། རྣམ་འཇོམས་སྔ་ཕྱིའི་རིགས་དང་སྨེ་བརྩེགས་ལ་མེ་ལོང་། ཁྲུས་དར། ཁྲུས་གཞོང་རྣམས་འདུ་བྱ། འགའ་རེ་ལ་ཞི་དྲག་གི་སྦྱོང་ཆས་གུལ་ཡུངས་རྣམས་ཀྱང་བསྡོག་གོ ༈ །གནམ་ཆོས་རྣམ་འཇོམས་ལྗང་གུ་ལ། ཚོམ་བུ་ལྗང་གུ་གཅིག་སྟེང་བུམ་པ་སོགས་གཟུངས་དབང་ཆས་བཀོད། ༈ བདུད་འདུལ་རྣམ་འཇོམས་ཁྲོ་ནག་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་དེ་རྒྱབ་བཅུ། དེ་རྒྱབ་བཞི་བཀོད་པའི་སྟེང་དུ་རྣམ་བུམ་ཆིངས་སྔོན་སྐུ་ཙཀ་མེ་ལོང་ཤེལ་རྒྱན་ཅན། གཡས་སུ་དཔལ་གཏོར། གཡོན་དུ་ལྷ་ཙཀ །མཆོད་གཏོར་གཞུང་གསལ་བཀོད། ༈ ཀློང་གསལ་རྣམ་འཇོམས་ལ། ཚོམ་བུ་གཅིག་སྟེང་རྣམ་བུམ་ཆིངས་དཀར། ཐོད་ཆང་རྡོ་རྗེ། དབང་གཏོར། དབྱངས་གསལ་བཅས། ༈ ཉང་ལུགས་ཁྲོ་མོ་སྨེ་བརྩེགས་ཀྱི་རྗེས་གནང་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ། གཡས་སུ་མཁའ་འགྲོའི་དཔལ་གཏོར། གཡོན་དུ་འབུལ་གཏོར་བཅས། ༈ ཁྲོ་བོ་སྨེ་བརྩེགས་ལ་ཚོམ་བུ་གཅིག་སྟེང་རྣམ་བུམ་ཆིངས་སྔོན། དབང་ཕྲེང་། རྒྱ་གྲམ། སྐུ་ཙཀ །ཕྱག་མཚན་བཅས། ༈ ཁྲོ་མོ་སྨེ་བརྩེགས་ལ་ཚོམ་བུ་བུམ་པ་གོང་མཚུངས། རྡོ་རྗེ་མེ་འབར། མེ་ཆུའི་ཙཀ་ལི་བཅས། ༈ ངག་དབང་རྡོ་རྗེའི་སྨེ་བརྩེགས་ལ། མཎྜལ་ཚོམ་བུ་ནག་པོ་གཅིག་བཀོད་པའི་སྟེང་བུམ་པ་ཉེར་ལྔའི་བཅུད་ལྡན་མགུལ་ཆིངས་མཐིང་ནག་ཁ་རྒྱན་ལྡན་པ་བཀོད། ༈ གཏེར་གསར་སྨེ་བརྩེགས་ལ། རས་བྲིས་སམ་ཚོམ་བུ་སྟེང་རྣམ་བུམ། མདུན་དུ་དབང་གཏོར། སྐུ་ཙཀ །སྔགས་ཕྲེང་། རྡོ་རྗེ་རྣམས་བཞག ༈ །བྱད་ཕུར་ཞི་བྱེད་སྐོར་ལས། བི་མ་ལའི་ལུགས་ཀྱི་གདུགས་དཀར་ལ། རས་བྲིས་སམ་ཚོམ་བུའི་ལྷ་གྲངས་སྟེང་བུམ་པ་ཉེར་ལྔའི་རྫས་ལྡན་མགུལ་ཆིངས་དཀར་པོ་དང་འཛོམ་ན་སྲུང་འཁོར་དང་། མཐའ་རྟེན་སྤྱི་འགྲོ་སྤྲོ་ན་རྟགས་བརྒྱད་ཙམ་བཞག ༈ །བྱད་འགྲོལ་རྡོ་རྗེ་གཙུག་ཏོར་བྱིན་རླབས་ལ་ཚོམ་བུ་གཅིག་སྟེང་རྣམ་བུམ་ཆིངས་སྔོན་ཁྱད་པར་རྫས་ལྡན། མདུན་དུ་གཟུངས་རིང་གླེགས་བམ་མམ་སྔགས་བྱང་བགྲང་ཕྲེང་། རལ་གྲི་དར་ནག་བཏགས་པ་བཀོད། ༈ ࿋ བྱད་ཁྲོལ་གསེར་ལྡེ་ལ། སྟེགས་བུ་ཁེབས་ལྡན་གྱི་ཁར་མཎྜལ་པདྨ་འདབ་བརྒྱད་དམ་ཚོམ་བུའི་ཁར་མཉྫའི་སྟེང་དུ་རིན་པོ་ཆེའི་བུམ་པ་ཁྱད་པར་གྱི་རྫས་གཞུང་གསལ་ལྟར་ཁ་རྒྱན་མགུལ་ཆིངས་ཀྱིས་སྤྲས་པ། རྒྱུན་འབབས་ཀྱི་ཆུ་ལ་རིན་ཆེན་སྣ་ལྔ་བརྡར་ཕྱེ་དང་། བྱ་འུག་དང་རུ་སྦུབ་སྲེག་བགྱིས་པའི་ཐལ་བ་བཏབ་པར་འཐོར་གཡབ་བཙུགས་པ། མདུན་ངོས་སུ་ཟླུམ་གཏོར། བགེགས་གཏོར་དཀར་ཟླུམ་ཏིང་ལོ་མཐེབ་ཀྱུ་རིལ་བུ་མདུན་དུ་གླུད་གཟུགས་བཅས། གཞི་བདག་གཏོར་མ། ཁྲུས་གཞོང་། མེ་ལོང་ཁྲུས་དར། མེ་ཏོག་དཀར་པོ། མདའ་དར་སྣ་ལྔ་མེ་ལོང་བཅས། གྲི་ལྕགས་ཆུ་གྲིའི་དབྱིབ་ཅན། ས། ཆུ། དཔལ་འབར། རླུང་གཡབ། བ་ལུ། སྤེན་མ། རྨ་བྱའི་མདོངས་གསུམ་གྱི་ཕོན་པོ། འོམ་བུ། ཀུ་ཤ །འཇག་མ་རྣམས་ཀྱི་ཕོན་པོ་བཅས་དང་། གདན་དཀར་ནག །བྱད་ཐག་སྔོ་དམར། སཱཙྪ་ནག་པོ་བཅས་སྒྲུབ་བྱའི་གྲངས་མཉམ། ལྕགས་སླང་དུ་སྐྱེར་ཧོམ་གྲུ་གསུམ། ཁྲུས་གཞོང་ཆེ་བ་བཅས་ཚོགས་པར་བྱའོ། ࿋ ༈ ཀློང་གསལ་གདུགས་དཀར་ལ། མཎྜལ་ཚོམ་བུ་གཅིག་པའི་སྟེང་བུམ་པ་ཆིངས་དཀར་ཉེར་ལྔའི་བཅུད་ལྡན། གཡས་གཡོན་སོགས་སུ་ཤེལ་ཕྲེང་། ཤེལ་རྡོ་མེ་ལོང་། ཟླུམ་གཏོར་དར་གདུགས་ཅན། རྫས་རྟགས་བཅས། ༈ གཏེར་གསར་རྡོ་རྗེ་མཁའ་འགྲོ་ལ་རས་བྲིས་སམ། ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། གཡས་གཡོན་དུ་ཐོད་ཆང་། ཤེར་ཙཀ །ཤེལ་རྡོ་བཅས་སོ། ༈ ࿋ །ཐུགས་སྒྲུབ་རྡོ་རྗེ་གཙུག་ཏོར་བྱད་འགྲོལ་ལ། སྟེགས་བུར་བུམ་པ་མགུལ་ཆིངས་མཐིང་ནག་བུམ་རྫས་ཉེར་ལྔ། བཟང་དྲུག གི་ཝཾ། ཤུ་དག །བྱང་སེམས་དཀར་དམར། ཅུ་གང་སིནྡྷུ་ར། ཤིང་ཀུན། ཡུངས་དཀར། བདུད་རྩི་ཆོས་སྨན་རྣམས་སྦྱར་བའི་ཕྱེ་མ་དང་དྲི་བཟང་ཆུས་བཀང་བ། རེ་བའི་གདན་ནག་པོ་གྲུ་གསུམ། སྐུད་པ་སྔོ་དམར་འདོམ་དོ། སཱཙྪ་ནག་པོ་བཅས་སློབ་མའི་གྲངས། ཆུ་གྲི་རྣོ་ཆོད་ཅན་གཞུང་གསལ། བལ་བུ་སྤེན་མ་ལྕུག་མ་ཀུ་ཤ་སོགས་ཀྱི་ཕོན་པོ། སྐྱེར་པའི་མེ་ཧོམ། བསྲེག་རྫས་ཡུངས་དཀར་ནག་ཐང་ཁྲོམ་འབྲས་བུ་བཅས་ཉེར་བསྡོག་བྱའོ།། ࿋ ༈ །།སྡིག་སྒྲིབ་ཞི་བྱེད་ལ། ཆོས་དབང་སྤྱན་རས་གཟིགས་འཁོར་བ་དོང་སྤྲུགས་ལ། པདྨ་འདབ་དྲུག་ཡིག་བདུན་བྲིས་པའི་དཀྱིལ་འཁོར་གྱི་སྟེང་དུ་རྣམ་བུམ་ཐོད་ཆང་མེ་ལོང་ལ་མཚལ་གྱིས་ཡིག་བདུན་བྲིས་པ་ཤེལ་རྡོ་རྣམས་བརྩེགས་ལ་བཞག །སྐུ་ཙཀ་ཡིག་བདུན་སྔགས་བྱང་ཤེལ་རྡོ་མེ་ལོང་། དབང་གཏོར་སྒྲུབ་ཡིག་རྣམས་ཀྱང་བསྐོར་ནས་བཞག ༈ །འཇའ་ཚོན་ལྟུང་བཤགས་ཆོ་ག་ལ། ཚོམ་བུ་གཙོ་འཁོར་ལྔ། དེ་རྒྱབ་བཅུ་རིམ་གསུམ་བཀོད་པའི་སྟེང་རྣམ་བུམ་ཆིངས་སེར། རིག་དབང་ཆས། འབྲུ་ལྔ། ཕྱག་མཚན་ལྔ། ཐིག་ལེ་ལྔ། འབྱུང་ལྔའི་ཙཀ་ལི། རྫས་བརྒྱད། རྟགས་བརྒྱད། རྒྱལ་སྲིད་རྣམས་བཀོད། ༈ གནམ་ཆོས་དགོངས་གཏེར་ཀུན་རིག་ལ། དཀྱིལ་འཁོར་སྟེང་རྣམ་བུམ་ཆིངས་དཀར་ཅན་དང། ཀུན་རིག་ཙཀ་ལི་གསར་མའི་ལུགས་ལྟར་ཚང་བའམ་གཞུང་གསལ་ཕྱོགས་བསྡུས། རྒྱལ་སྲིད་བཅས། ༈ ཀློང་གསལ་མི་འཁྲུགས་པ་ལ། རས་བྲིས་སམ་ཚོམ་བུའི་ཁར་བུམ་པ་ཆིངས་སྔོན། གཡས་གཡོན་དུ་ཕྲེང་བ། རྡོ་རྗེ་ལྷུང་བཟེད། སྐུ་རྟེན་བཅས་བཞག ༈ །རྡོར་སེམས་སྒྲིབ་སྦྱོང་ཡེ་ཤེས་ཆུ་རྒྱུན་ལ། རས་བྲིས་སམ་ཚོམ་བུ་གཅིག་གི་སྟེང་རྣམ་བུམ། གཡས་གཡོན་མདུན་རྣམས་སུ་བུམ་པ་རྡོར་སེམས་རིལ་བུས་བཀང་བ་ཆིངས་དཀར་དབུ་རྒྱན་གྱིས་སྤྲས་པ། གསང་ཐོད། རིག་ཙཀ །ཤེལ་རྡོ་རྣམས་དང་། བྱེ་མ་ཡུངས་ཀར་ཁྲུས་བུམ་མེ་ལོང་སོགས་འདུ་བྱའོ། ༈ །བླ་མ་ལོངས་སྐུ་འགྲོ་འདུལ་ལ། དཀྱིལ་འཁོར་རམ་དབུས་སུ་ཚོམ་བུ་ཆེ་ཆུང་གཉིས། དེ་རྒྱབ་བརྒྱད། དེ་རྒྱབ་བཞི་བཀོད་པའི་སྟེང་དུ་རྣམ་བུམ་ཆིངས་སྔོན་ཉེར་ལྔའི་བཅུད་ལྡན། དབུ་རྒྱན་སོགས་རིག་དབང་ཆས། ཤར་སྒོར་བུམ་པ་ཆིངས་དཀར་དེ་མཚུངས། ལྷ་ཙཀ་ཚང་བ། དབང་ཕྲེང་། མེ་ལོང་། རྫས་རྟགས་སྣ་བདུན་བཅས་བཀོད། ༈ གཏེར་གསར་འཁོར་བ་དོང་སྤྲུགས་ལ། པདྨ་འདབ་བརྒྱད་ལྟེ་བར་ཧྲཱིཿདམར་བྲིས་པའི་སྟེང་རྣམ་བུམ་ཐོད་ཆང་མེ་ལོང་ཧྲཱིཿདམར་བྲིས་པ་རྣམས་བརྩེགས་ལ་དར་དམར་གྱིས་བཀབ། མདུན་དུ་མྱང་གྲོལ་དབང་རིལ་བུའི་བུམ་པ། རྒྱབ་ཏུ་དཔལ་གཏོར་རྒྱན་ལྡན་བཞག ༈ །རིགས་གསུམ་སྙིང་ཏིག་གི་དོང་སྤྲུགས་ལ། དཀྱིལ་འཁོར་རམ་ཚོམ་བུ་ལྷ་གྲངས་དབུས་བུམ་པ་ཆིངས་དམར་ཅན། སྐུ་ཙཀ །མྱང་གྲོལ་བུམ་དབང་སྦྲེལ་ན་དེའང་བཤམ་སོ།། ༈ །།དེ་ནས་རྒྱས་པའི་ལས་ཀྱི་སྐོར་ལས། ཚེ་རྒྱས་པ། གྲུབ་ཆེན་དཔལ་རྡོར་ཚེ་སྒྲུབ་རྡོ་རྗེའི་སྲོག་ཤིང་ལ། སྟེགས་བུའི་དབུས་སུ་ཚེ་འབྲང་། གཡས་སུ་ཚེ་ཆང་། གཡོན་དུ་ཚེ་རིལ། མདུན་དུ་གཏོར་མཆོད། མདའ་དར། ལི་ཁྲི་བཅས། ༈ གྲུབ་ཐོབ་ཟླ་བ་པའི་ཚེ་སྒྲུབ་ལ། མཎྜལ་ཚོམ་བུ་གཅིག་པའི་ཁར་བུམ་པ་ཆིངས་དཀར་ཅན། མདུན་སོགས་སུ་སྐུ་ཙཀ །སྔགས་ཕྲེང་། ཕྱག་མཚན་བུམ་པ། དར་དང་རིན་ཆེན་རྒྱན། དབང་གཏོར་དཀར་ཟླུམ་རྣམས་བཀོད། ༈ འབྲི་གུང་ཆོས་གྲགས་སྒྲ་མི་སྙན་གྱི་ཚེ་སྒྲུབ་ལ། མཎྜལ་པདྨ་དམར་པོ་འདབ་བརྒྱད་ཀྱི་དབུས་རྐང་གསུམ་ཁར་ཐོད་པ་བདུད་རྩིས་བཀང་བ་ལ་ཚེ་རིལ་སློབ་མའི་གྲངས་མཉམ་བླུགས་པའི་ཁ་མེ་ལོང་དར་དམར་གྱིས་བཀབ། ཤར་དུ་ཚེ་གཏོར་ཟླུམ་པོ་བྲིས་སྐུ་བཙུགས་པ་དང་ཤེལ་རྡོ། ལྷོར་གཙོ་བུམ་དང་མདའ་དར། ནུབ་ཏུ་ཆང་ཕུད་དང་དྲི་ཆབ། བྱང་དུ་ལས་བུམ་རྣམས་བཀོད། ༈ ཀློང་གསལ་རྣམ་རྒྱལ་མ་ལ། ཚོམ་བུའི་སྟེང་བུམ་པ་ཆིངས་དཀར། གཡས་གཡོན་དུ་ཤེལ་ཕྲེང་། སྣ་ཚོགས་རྡོ་རྗེ་དང་མདའ་གཞུའི་ཙཀ་ལི། ཚེ་འབྲང་ཚེ་དཔག་མེད་ཀྱི་སྐུ་རྟེན་ཅན། ཚེ་རིལ་མཆོད་རྟེན་བཅས། ༈ དབང་ཆེན་ཚེ་སྒྲུབ་ཉི་ཟླའི་གྭའུ་ལ། ཚོམ་བུ་དམར་པོ་གཅིག་གི་སྟེང་རྣམ་བུམ། གཡས་གཡོན་ཐོད་ཆང་རིག་ཙཀ་ཤེལ་རྡོ། རྒྱབ་ངོས་དཔལ་གཏོར་བཞག ༈ །སྟག་ཤམ་པདྨ་གསང་ཐིག་ཅེས་གུ་རུ་ཞི་བའི་ཚེ་དབང་ལ། པདྨ་འདབ་བརྒྱད་དམ་ཚོམ་བུ་ལྔ་པའི་ཁར་རྣམ་བུམ། མདུན་དུ་རྡོ་རྗེ་མེ་ལོང་། གཡས་གཡོན་ཚེ་རིལ་ཆང་། རྒྱབ་ཏུ་ཚེ་མདའ་བཅས། ༈ ཆོས་གླིང་ཐང་རྒྱལ་ལ། པདྨ་འདབ་བརྒྱད་སྟེང་ཚེ་འབྲང་རྟ་མགོས་མཚན་པའི་མཐར་རིལ་བུས་བསྐོར་བ་དང་། ཐོད་པར་ཚེ་ཆང་བཅས་བཤམ། ༈ ཚེ་སྒྲུབ་རྡོ་རྗེ་སྙིང་པོ་ལ། སྟེགས་བུའི་དབུས་སུ་ཁྲིའུའི་ཁར་ཐོད་པ་མཚན་ལྡན་བདུད་རྩིས་བཀང་བ་གཡས་གཡོན་དུ་ཚེ་རིལ་ཚེ་མདའ་བཀོད། ༈ དྲི་མེད་གླིང་པའི་རྡོ་རྗེའི་སྲོག་སྒྲུབ་ལ། དཀྱིལ་འཁོར་རམ་ཚོམ་བུ་དབུས་དང་མདུན་དུ་རེ་རེ། དེ་རྒྱབ་བཞི་རིམ་གཉིས་བཀོད་པའི་དབུས་སུ་ཁྲིའུར་བུམ་པ་ཆིངས་དམར། གཡས་གཡོན་དུ་ཚེ་རིལ་ཆང་། མདུན་དུ་ལས་བཞིའི་འབྲང་རྒྱས། རྒྱབ་ཏུ་མཆོད་གཏོར་ཟར་སྒོང་ལྟ་བུ་ཕྱོགས་བཞིར་པད་འདབ་དང་མཚམས་སུ་ཚེ་རིལ་གྱིས་སྤྲས་པ་དང་མདའ་དར། ཚེ་ནས་བཅས། ༈ ཚེ་སྒྲུབ་འོད་ཀྱི་སྙིང་པོ་ལ། མཎྜལ་ཚོམ་བུ་དམར་པོ་གཅིག་པའི་སྟེང་བུམ་པ་ཆིངས་དམར་ཅན། མདུན་སོགས་སུ་ཚེ་འབྲང་། ཚེ་རིལ་ཚེ་ཆང་། དཱུར་བ། མདའ་དར་བཅས། ༈ དག་སྣང་ཙཎྚ་ལཱི་ལ། མཎྜལ་ཚོམ་བུ་དམར་པོ་གཅིག་པའི་སྟེང་རྣམ་བུམ། མདུན་དུ་ཚེ་འབྲང་། ཐོད་ཆང་དང་བཅུད་ལེན་རིལ་བུ་གཡས་གཡོན་དུ་བཀོད། ༈ རྡོ་རྗེ་རྒྱ་མདུད་ལ། མཎྜལ་པདྨ་འདབ་བརྒྱད་སྟེང་བུམ་པ་ཆིངས་དམར་སྐུ་ཙཀ་གིས་བརྒྱན་པ། མདུན་སོགས་སུ་ཚེ་འབྲང་། ཚེ་རིལ་ཆང་། མདའ་དར་བཅས། ༈ ཉི་མའི་སྙིང་པོ་ལ། མཎྜལ་ཚོམ་བུ་ལྔ་བཀོད་པའི་དབུས་སུ་མཉྫི་ལ་བུམ་པ་ཆས་བཅུད་ལྡན་པ། མདུན་དུ་ཚེ་འབྲང་། གཉིས་ཀ་སྐུ་ཙཀ་གིས་བརྒྱན་པ། གཡས་གཡོན་དང་རྒྱབ་ཏུ་ཚེ་རིལ་ཚེ་ཆང་ཚེ་མདའ་བཀོད། ༈ ཚེ་སྒྲུབ་པདྨའི་རྒྱ་ཅན་ལ། མཎྜལ་ཚོམ་བུ་གཅིག་པའི་སྟེང་དུ་ཚེ་འབྲང་། གཡས་གཡོན་རྒྱབ་ཏུ་ཚེ་རིལ་ཚེ་ཆང་མདའ་དར་བཀོད། ༈ ལྷུན་རབ་ཚེ་སྒྲུབ་ལ། དཀྱིལ་འཁོར་རས་བྲིས་སམ་ཚོམ་བུ་ལྷ་གྲངས་བཀོད་པའི་དབུས་སུ་མཉྫིའི་སྟེང་རྣམ་བུམ་ཆས་བཅུད་ལྡན་པ། མདུན་དུ་ཚེ་འབྲང་དང་མེ་ལོང་། གཡས་སུ་ཚེ་རིལ། གཡོན་དུ་ཐོད་པར་ཚེ་ཆང་། རྒྱབ་ཏུ་མདའ་དར་བཀོད། ༈ དགོངས་གཏེར་ཚེ་ཡུམ་ཙཎྚ་ལཱི་ལ། དཀྱིལ་འཁོར་གཞུང་མཐུན་ནམ་མཎྜལ་ཚོམ་བུ་དམར་པོ་གཅིག་བཀོད་པའི་སྟེང་དུ། ཁྲིའུ་ལ་རྣམ་བུམ་བཅུད་ལྡན། མདུན་དུ་ཚེ་འབྲང་། གཡས་གཡོན་དུ་ཚེ་རིལ་ཚེ་ཆང་། རྒྱབ་ཏུ་ཤེལ་རྡོ་བཀོད་དོ།། ༈ །།ཤེས་རབ་རྒྱས་པར་བྱེད་པའི་སྐོར་ལ། མ་ཏིའི་འཇམ་དཀར་པད་འདབ་བརྒྱད་ཀྱི་དཀྱིལ་འཁོར་དབུས་ཁྲིའུར་མཚན་བརྗོད་དང་འཇམ་དཔལ་གྱི་སྐུ་བཞུགས། ཤེལ་ཕྲེང། མདུན་དུ་མཆོད་གཏོར་དཀར་ཟླུམ་བཅས་སོ། ༈ །འཇམ་དཔལ་སྨྲ་སེང་དམ་པའི་ལུགས་ལ། མཎྜལ་པདྨ་འདབ་བརྒྱད་སྟེང་རིན་པོ་ཆེའི་སྣོད་དུ་དཔའ་བོ་བཅུ་གཉིས་ཀྱི་རིལ་བུ་བཞག །དར་དམར་སེར་གྱིས་བཀབ། མཆོད་གཏོར་བཅས། ༈ བླ་མ་དགོངས་འདུས་ཆོས་སྡེ་དམར་སེར་ཤེས་རབ་རལ་གྲི་ལ། མཎྜལ་དྲི་བཟང་དང་བ་བྱུང་གིས་བྱུགས་པ་ལ་རྡུལ་ཚོན་དཀར་པོས་ཟླུམ་སྐོར་ཡངས་པའི་ཕྱི་རུ་པདྨ་འདབ་བརྒྱད། དེའི་མདུན་ཕྱོགས་ནས་བརྩམས་པའི་ནང་རིམ་དུ་ཨཱ་ལི་གཉིས་རེ་ཡིག་མགོ་ནང་བསྟན་གཡོན་བསྐོར་དང་། ཕྱི་སྐོར་ཀཱ་ལི་སྡེ་ཚན་བདུན་པོའི་ནང་། ཤ་ཥ་ས། ཧཀྵ་ཞེས་ཆ་བགོས་ཏེ་མགོ་ཕྱིར་བསྟན་གཡས་བསྐོར་དུ་བྲིས་པའི་ལྟེ་བར་མར་ཟན་གྱི་ཀོང་བུར་རས་བལ་སྡོང་བུ་ཅན་གྱི་མར་མེ་དང་། དཀར་གསུམ་བསྲེས་པའི་ཟན་གྱི་བཤོས་ཟླུམ་མཐེབ་ཆེན་ཙམ་པ་སློབ་མའི་གྲངས་མཉམ་བཞག །ཤེལ་ཕྲེང་དང་འབུལ་གཏོར་དཀར་ཟླུམ་སོགས་བཀོད། ༈ དབྱངས་ཅན་མ་དཀར་མོ་ལ། གུར་གུམ་གླ་རྩི་གི་ཝཾ་ཙན་དན་དཀར་པོ་བཞི་ཆ་མཉམ་དུ་སྦྱར་བ་སྟེགས་བུ་ལ་འཐོར་བའི་མཎྜལ་ལ་བའི་འོ་མར་སྦྲང་རྩི་བཞི་མཉམ་རྣམས་སྦྱར་བས་པདྨ་འདབ་བརྒྱད་དབུས་སུ་ཧྲཱིཾ་དང་འདབ་བརྒྱད་ལ་ཨ་ཨཱ་སོགས་དབྱངས་བཅུ་དྲུག་གཉིས་རེ་བཀོད་པ་བཞག །དེ་སྟེང་དཀར་གསུམ་མངར་གསུམ་བཞི་མཉམ་རྣམས་སྦྱར་བའི་ཟན་གྱིས་ཏིང་ལོ་བ་མར་སྦྲང་རྩིས་བཀང་བའི་མར་མེ་སློབ་མའི་གྲངས་མཉམ་བཀོད། མདུན་དུ་ཟླུམ་གཏོར་ཆེ་ཆུང་གཉིས་ཆང་བུ་བཅས་བཞག་གོ ༈ །བླ་མ་སྨྲ་བའི་སེང་གེ་ལ། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ་ཆིངས་དཀར། མདུན་དུ་ལྷ་ཙཀ །གཡས་གཡོན་དུ་སྔགས་ཕྲེང་དང་ཤེས་རབ་རིལ་བུ། རྒྱབ་ཏུ་དབང་གཏོར་བཅས། ༈ ཀློང་གསལ་ཕག་དཀར་ཤེས་རབ་གསལ་བྱེད་ལ། དཀྱིལ་འཁོར་ཆོས་འབྱུང་གཞུང་གསལ་ལམ། ཚོམ་བུའི་སྟེང་བུམ་པ་ཆིངས་དཀར། མཐའ་སྐོར་དུ་ཤེལ་ཕྲེང་། ཐོད་ཆང་། དྲིལ་བུ། ཤེས་རབ་རིལ་བུ་རང་གཞུང་ནས་བཤད་པ་ལྟར་དང་། ཟླུམ་གཏོར་དཀར་པོ་རྒྱན་བཅས། ༈ ཀུན་མཁྱེན་བླ་མའི་དགོངས་གཏེར་ཕག་དཀར་ཤེས་རབ་གསལ་བྱེད་ལ། རྡུལ་ཚོན་ནམ་རས་བྲིས་ཀྱི་མཎྜལ་སྟེང་མཉྫི་ལ་རྣམ་བུམ་བཀོད་པའི་ཁར་ཐོད་པ་བདུད་རྩིས་བཀང་བ་ལ། སིནྡྷུ་རའི་མེ་ལོང་ཆོས་འབྱུང་བཾ་ཡིག་སྔགས་ཕྲེང་གིས་བརྒྱན་པས་བཀབ་པའོ།། ༈ །།བསོད་ནམས་ལོངས་སྤྱོད་རྒྱས་པར་བྱེད་པ་ལ། རྣམ་སྲས་ཕྱི་སྒྲུབ་སེར་ཆེན་ལ། རས་བྲིས་སམ་སྣ་ཚོགས་པདྨ་འདབ་བརྒྱད་སྟེང་རྟེན་གཏོར་ཁང་བརྩེགས་མ་བཀོད། དེའི་གཡས་སུ་བུམ་གདན་པདྨ་འདབ་བཞི་འམ་ཚོམ་བུའི་ཁར་བུམ་པ་བཅུད་ལྡན། གཡོན་དུ་མཆོད་གཏོར་ཟླུམ་པོ་གཙོ་འཁོར་དགུ་པ། མདུན་དུ་དབུ་རྒྱན། རྒྱལ་མཚན་དང་ནེའུའི་ཙཀ་ལི་བཀོད། ༈ ནང་སྒྲུབ་མདུང་དམར་ཅན་ལ། རས་བྲིས་སམ་པདྨ་འདབ་བརྒྱད་དམར་པོའི་སྟེང་རྟེན་གཏོར་སྐུ་རྟེན་བཅས། ཤར་དུ་སྤོས་དང་དྲི་ཆབ་ཀྱི་དུང་ཞལ། ཤར་ལྷོར་མར་མེ། ལྷོར་དངུལ་སྣོད་དུ་ཆང་ཕུད། ལྷོ་ནུབ་ཏུ་མདའ་དར། ནུབ་ཏུ་འབྲུ་སྣའི་མེ་ཏོག །ནུབ་བྱང་དུ་མདུང་དམར། བྱང་དུ་འབུལ་གཏོར་ཤ་སོགས་ཀྱིས་བརྒྱན་པ། བྱང་ཤར་དུ་དམར་གཏོར་རྣམས་བཤམ། གནམ་ལྕགས་རྡོ་རྗེ་རྒྱབ་ངོས་ལ་བཞག ༈ །གསང་སྒྲུབ་དྲག་པོ་རྟ་སྔོན་ལ། རས་བྲིས་ཁར་རྟེན་གཏོར་སྐུ་རྟེན་ཅན། ལྕགས་ཀྱི་རྡོ་རྗེ་སྔར་ལྟར་དང་། རལ་གྲིའང་བཞག ༈ །ཡང་གསང་ཕྱག་མཚན་བཞི་པའི་རྗེས་གནང་བཤམ་བཀོད་ནང་སྒྲུབ་མདུང་དམར་ཅན་དང་འདྲ། ༈ རཏྣའི་མདུང་དམར་ལ། རས་བྲིས་སམ་ཚོམ་བུ་དམར་པོ་གཙོ་འཁོར་ལྔ་པའི་སྟེང་རྟེན་གཏོར་སྐུ་ཙཀ་བཅས། གཡས་སུ་མདུང་དམར་རྒྱལ་མཚན། གཡོན་དུ་ནེ་ལེ་ལྕགས་ཀྱུ། རྒྱབ་ཏུ་གྲི་སྙིང་བླ་རྡོ་དང་སྒྲུབ་ཡིག །མདུན་དུ་ཚེ་འབྲང་དང་འབྲང་རྒྱས་ཞལ་དཀར་བཟའ་བཏུང་ཟས་སྣ་བཤམ། ༈ པད་གླིང་ལུགས་ཀྱི་མདུང་དམར་ཅན་ལ། རས་བྲིས་སམ་སྟེགས་དམར་པོར་མེ་ཏོག་དམར་པོའི་ཚོམ་བུ་གཙོ་འཁོར་དགུ་བཀོད་པའི་དབུས་སུ་རྟེན་གཏོར་སྐུ་རྟེན་ཅན། གཡས་གཡོན་དུ་མདུང་དམར་རྒྱལ་མཚན་ནེའུ་ལེ་ལྕགས་ཀྱུ། མདུན་དུ་གྲི་སྙིང་བུལ་ཏོག །སྒྲུབ་ཡིག །རྒྱབ་ཏུ་ཚེ་འབྲང་བཟའ་བཏུང་བཅས། ༈ བྱང་གཏེར་ནོར་ལྷ་ཡོངས་རྫོགས་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ། དེ་རྒྱབ་བརྒྱད། མདུན་མཚམས་གཡས་གཡོན་དུ་གཉིས། དེ་རྒྱབ་བཞི་བཀོད་པའི་སྟེང་དུ་བུམ་པ་ཆིངས་ནག་ཅན། གཡས་སུ་ཛཾ་གཏོར་རིན་ཆེན་འབར་བ། གཡོན་དུ་ཐོད་ཆང་མངར་གསུམ་སྦྱར་བ། རྒྱབ་ཕྱོགས་ཟངས་སྣོད་དུ་ཛཾ་ནག་གི་སྐུ་དང་ཆུ་སྦྱིན་ཆས་བཤམ། ༈ ཞང་བློན་ལ། པདྨ་འདབ་བརྒྱད་དམ་ཚོམ་བུའི་ཁར་རྟེན་གཏོར་སྐུ་ཙཀ་ཅན་བཀོད། ༈ གྲྭ་མངོན་ཛཾ་དམར་ལ། པདྨ་འདབ་བརྒྱད་དམར་པོའི་སྟེང་ཁྲིའུར་ཐོད་ཆང་བུ་རམ་བདུད་རྩི་རིལ་བུ་བཏབ་པ། དེ་མདུན་གཏོར་མ་རིན་ཆེན་འབར་བའི་དབྱིབས་ཅན་ཟས་སྣས་བརྒྱན་པ་བཀོད། གཡས་སུ་ཟངས་བུམ་ཉེར་ལྔའི་རྫས་ལྡན། གཡོན་དུ་ཆུ་སྦྱིན་སྣོད་ཟངས་གཞོང་སྐུ་རྟེན་དང་བཅས་པ། ཉེ་ལོགས་སུ་ཆུ་བུམ་ཡང་བཞག ༈ །བལ་པོ་ཨཿཧཱུྃ་ཛཾ་ནག་ལ། དཀྱིལ་འཁོར་རམ་ཚོམ་བུ་གཙོ་འཁོར་དགུ །དེ་རྒྱབ་བཞི་བཀོད་པའི་དབུས་སུ་ཐུགས་རྟེན་ཐོད་པ་དུམ་གསུམ་ཉེར་ལྔ་སོགས་ཀྱི་བཅུད་ལྡན་ནང་གསུང་རྟེན་སྲོག་འཁོར་དར་གྱིས་དྲིལ་བའི་རྒྱབ་ཏུ་སྐུ་རྟེན་བཅས་བཞུགས། སྟེང་དུ་བུམ་པ་ཆིངས་སྔོན་ཅན། གཡས་སུ་རིན་ཆེན་སྣོད་དུ་གཏོར་མ་རིན་ཆེན་འབར་བ་ཟས་སྣ་བཅས། གཡོན་དུ་རིན་ཆེན་དར་གོས། གཡང་རྫས་སྣ་ཚོགས། རྒྱབ་ཏུ་མདའ་དར། ཚེ་འབྲང་། རིལ་ཆང་། རྫས་རྟགས་རྒྱལ་སྲིད་བཅས་བཞག ༈ །ཀློང་གསལ་ཛཾ་སེར་ལ། མཎྜལ་ཚོམ་བུ་སེར་པོ་གཅིག་བཀོད་པའི་དབུས་སུ་བུམ་པ་ཆིངས་སེར། གཡས་གཡོན་སོགས་སུ་དབང་གཏོར་ནོར་གཟུགས། ཐོད་ཆང་དང་ཕྲེང་བ། རྡོ་རྗེ། སྐུ་ཙཀ་རྣམས་བཀོད། ༈ གནམ་ཆོས་ཛཾ་ལ་རིགས་དགུ་ལ། ཚོམ་བུ་དཀར། དམར། མཐིང་། སེར། ལྗང་། ནག །ཁྲ་བོ་གསུམ། རིགས་དགུ་ཕྱོགས་བསྡུས་ལ་དབུས་དང་ཕྱོགས་མཚམས་བརྒྱད་དུ་དགུ་ཚོམ་དགུའམ་མི་འགྲུབ་ན་གཙོ་འཁོར་དགུ །ཛཾ་དམར་གཉིས། ཛཾ་ནག་བཅས་ལ་ཚོམ་བུ་རང་མདོག་རེ་རེ། ༈ ཨ་པ་རཱ་ཛི་ཏ་ལ་ཚོམ་བུ་དམར་པོ་བཀོད། དབང་རྫས་ནི་གཟུངས་དབང་གི་ཆས་ཤ་སྟག་གོ ༈ །ཚོགས་བདག་ལ་ཚོམ་བུ་དམར་པོ། ༈ རེ་མནྟ་ལ་དམར་སེར། ཀུ་བེ་ར་ལ་ནག་པོ་རྣམས་བཀོད། དེ་གསུམ་ཀར་གནམ་ཆོས་ཆོས་སྐྱོང་སྤྱིའི་བཀའ་གཏད་ཀྱི་ཆས་སོ། ༈ །དྲི་མེད་གླིང་པའི་པདྨ་རྒྱལ་པོ་ལ། དཀྱིལ་འཁོར་རས་བྲིས་སམ། མཎྜལ་ཚོམ་བུ་དབུས་སུ་གཙོ་འཁོར་ལྔ་དེ་རྒྱབ་བཞི་བཀོད་པའི་སྟེང་། བུམ་པ་ཉེར་ལྔའི་རྫས་ལྡན་ཆིངས་སེར་ཅན་གཙོ་བོའི་སྐུ་ཙཀ་གཟུག་པ། གཡས་སུ་དབང་གཏོར། གཡོན་དུ་ཐོད་ཆང་དར་དམར་ཁེབས་བཅས། རྫས་རྟགས་སྣ་བདུན་ཙཀ་ལི་བཅས་བཀོད། ༈ དབང་གི་ལྷ་མོ་མཆེད་གསུམ་ལ། མཎྜལ་པདྨ་འདབ་བརྒྱད་མཐིང་ལྗང་དམར་པོ་གསུམ་ལ་ཚོམ་བུ་རང་མདོག་བཀོད་པའི་སྟེང་གཏོར་མ་དཀར་གསུམ་གྱིས་བརྒྱན་ཅིང་སྐུ་ཙཀ་དར་གདུགས་བཅས་པ་གསུམ་བཀོད། སྔགས་བྱང་། བླ་རྡོ། སྲོག་འཁོར། ཕྱག་མཚན་ནོར་བུ་དང་བུམ་པ། རིན་པོ་ཆེའི་གཞོང་པ་ཟས་སྣས་བཀང་བ། དར་ཟབ་སྣ་ཚོགས། ནོར་སྣ་རིན་པོ་ཆེ་གང་འཛོམ་བཤམ། ༈ ཆོས་རྡོར་ཛཾ་དཀར་ལ། འབྲུའི་པདྨ་འདབ་བརྒྱད་སྟེང་གཞུང་གསལ་གཏོར་མ་དང་། གཡས་གཡོན་ཚེ་རིལ་ཆང་བཞག ༈ །མཆོག་གླིང་བླ་མ་ནོར་ལྷ་ལ། དཀྱིལ་འཁོར་རས་བྲིས་སམ་ཚོམ་བུ་དབུས་སུ་གཙོ་འཁོར་དགུ །གྲ་བཞི་དང་སྒོ་བཞིར་བཞི་རེ་བཀོད་པའི་དབུས་སྟེང་ཁྲིའུར་འཛོམ་ན་གཞུང་མཐུན་བཅའ་སྒྲུབ་བྱས་པའི་གཏེར་བུམ་དང་མ་འཛོམ་ན་གཏོར་མ་གཞུང་མཐུན། གཡས་སུ་རིན་པོ་ཆེའི་སྣོད་དུ་མངར་གསུམ་སྦྱར་བའི་ཆང་། གཡོན་དུ་ཟས་སྣ་གོས་སྣ། རྒྱབ་ཏུ་མདའ་དར། སྐུ་གསུང་ཐུགས་དབང་སྦྱོར་ན་ལྷ་ཙཀ་བཅུ་བདུན། སྔགས་བྱང་། མེ་ལོང་། རྫས་རྟགས་སྣ་བདུན་བཅས་བཀོད། ༈ མཆོག་གླིང་རྣམ་སྲས་གཅིག་དྲིལ་ཡིད་བཞིན་ནོར་བུ་ལ། དཀྱིལ་འཁོར་དབུས་སུ་གཏོར་ཆེན་དར་གདུགས་བཅས། དེ་སྟེང་མཉྫི་ལ་བུམ་པ་མགུལ་ཆིངས་མཐིང་ནག་ཅན། མདུན་དུ་སྐུ་ཙཀ་སྔགས་བྱང་ཕྱག་མཚན་གསུམ་གསུམ་གྱི་ཙཀ་ལི། གཡས་སུ་རིན་པོ་ཆེའི་སྣོད་འབྲུས་བཀང་བར་བླ་རྡོ་སྲོག་འཁོར་གསུམ་པོ། གཡོན་དུ་ཟས་སྣ། དར་གོས་དམར་པོ། ནོར་སྣ་བཅས་བཞག །གཏོར་མ་ཆོས་སྡེ་ཆེན་པོ་ལ་སེར་ཆེན། སྤྱི་ལ་མདུང་དམར་ཅན། མི་དཔོན་ལ་རྟ་སྔོན་ཅན་གཙོར་བྱ་བར་གསུངས་པས་དབང་གི་སྐབས་དམར་སེར་གང་རུང་བྱས་པས་འཐུས་སོ། ༈ །ཀུན་འཁྱིལ་མཆེད་གསུམ་ལ། མཎྜལ་གསུམ་ཕྲེང་ཚར་དུ་བསྒྲིགས་པ་ལ་པདྨ་འདབ་བརྒྱད་སེར་སྔོ་དམར་བའི་ལྟེ་བར་ཚོམ་བུ་རེ་རེ་བཀོད་པའི་སྟེང་དུ་མཉྫི་ལ་ཐོད་པ་མཚན་ལྡན་རེ་རེའི་ནང་དུ་འབྲང་རྒྱས་གཏོར་མ་ནོར་གཟུགས་པད་སྡོང་ཅན་རྩེ་རྒྱན་གསེར་གྱི་སཏྭ་་་་རེས་མཚན་པ་ལ་རྩྭ་ཀུ་ཤའི་ཆུན་པོ་རེ་བཙུགས་པ་ལ་སྐུ་ཙཀ་བཏགས་པ་དར་གདུགས་ལྷ་མདོག་དང་མཚུངས་པ་ཅན་བཀོད། དེ་རྣམས་ཀྱི་སྟེང་ངམ་རྒྱབ་ངོས་མཐོ་བར་སོ་སོའི་བུམ་པ་བཅུད་ལྡན་ཡང་འཇོག ༈ །བྱང་གཏེར་མངའ་དབང་རིན་ཆེན་འབར་བ་ལ། གཞི་སྟེང་ཡི་དམ་སོགས་ཀྱི་དབང་བྱེད་ན་དེའི་ཆས་དང་ཁྲུས་བུམ་རྣམས་བཀོད། ཆས་གཞན་ལག་ལེན་གསར་བཀོད་དུ་གསལ་བ་ལྟར། འབྱུང་ལྔའི་གདན། ལྷ་འདྲེ་མི་གསུམ་སྲོག་ཡིག །རྒྱལ་པོའི་རྟགས་དྲུག །བཀྲ་ཤིས་པའི་རྫས་བཞི། ཚངས་པའི་འཁོར་ལོ་བྲི་སྒྲུབ་ཚད་ལྡན་སྔོན་ནས་བྱས་པ་དང་བཀྲ་ཤིས་རྫས་བརྒྱད། རྟགས་བརྒྱད་དང་། རྒྱལ་སྲིད་རྣམས་རེ་རེ་བཞིན་རྒྱས་པར་གྲབས་སུ་ཚུད་པར་བྱ། ༈ གནམ་ཆོས་ས་སྙིང་ལ། གཟུངས་དབང་གི་ཆས་དང་། ༈ ཀླུ་དགའ་བོའི་བཀའ་གཏད་ལ། དངུལ་ལམ་ཟངས་ཐེབ་ཏུ་མར་གྱིས་བཅོས་པའི་སྦྲུལ་འཁྱིལ་བ་བཞག ༈ །ཀླུ་མི་མགོན་དཀར་པོ་ལ། ཆོས་སྐྱོང་སྤྱིའི་བཀའ་གཏད་ལྟར་ཆས་རྣམས་བཤམ། ༈ དགོངས་གཏེར་སེང་གེ་སྒྲ་ལ། མཎྜལ་པད་དཀར་འདབ་བརྒྱད་དབུས་ཚོམ་བུ་དཀར་པོ་གཅིག་བཀོད་པའི་སྟེང་དུ་རྣམ་བུམ་ཉེར་ལྔའི་བཅུད་ལྡན་ཆིངས་དཀར་ཁ་རྒྱན་བཅས། མདུན་སོགས་སུ་སྐུ་ཙཀ །ཤེལ་ཕྲེང་ཤེལ་རྡོ། ཟླུམ་གཏོར་དཀར་པོ་དར་གདུགས་ཅན་བཞག། ༈ །།རིགས་རྒྱུད་རྒྱས་བྱེད་གཏེར་གསར་རིན་ཆེན་མཁའ་འགྲོ་ལ། རས་བྲིས་སམ་ཚོམ་བུ་གཙོ་འཁོར་ལྔའི་སྟེང་རྣམ་བུམ། གཡས་སུ་ཐོད་ཆང་། གཡོན་དུ་ཤེར་ཙཀ །མདུན་དུ་ཤེལ་རྡོ་བཞག། ༈ །།བསྟན་པ་རྒྱས་བྱེད་སངས་གླིང་དང་ཞིག་གླིང་ལུགས་ཀྱི་གནས་བཅུའི་རྗེས་གནང་ལ། སྟེགས་གཙང་མའི་དབུས་ཁྲིའུ་ལ་རིན་པོ་ཆེའི་སྣོད་འབྲུ་དཀར་གྱིས་བཀང་བའི་ནང་དུ་ཐུབ་དབང་གནས་བཅུ་ཡོངས་རྫོགས་ཀྱི་ཙཀ་ལི་ལྟ་བུའི་སྐུ་རྟེན། ཤེར་ཕྱིན་གླེགས་བམ། བྱང་ཆུབ་མཆོད་རྟེན་བཅས་བཞུགས་སུ་གསོལ། དེ་དག་གི་ཕྱག་མཚན་རྣམས་ཀྱང་བཤམས། དར་གྱི་གདུགས་ཕུབ། ༈ ཀློང་གསལ་བྱམས་པའི་དབང་ལ། མཎྜལ་པདྨ་འདབ་བརྒྱད་ཚོམ་བུ་དམར་སེར་བཀོད་པའི་སྟེང་བུམ་པ་ཉེར་ལྔའི་རྫས་ལྡན་ཆིངས་སེར། ཕྲེང་བ། རྡོ་རྗེ། ཀླུ་ཤིང་སྡོང་པོ་མེ་ཏོག་སེར་པོ་ཅན་གྱི་ཙཀ་ལི། རྒྱལ་སྲིད་རྣམས་གཡས་གཡོན་དུ་བཀོད། ༈ གནམ་ཆོས་ལུགས་ལ། དཀྱིལ་འཁོར་དཔེའུ་རིས་ལྟར་བཀྲམ་པའི་དབུས་སུ་རྣམ་བུམ། གཙོ་འཁོར་ཡོངས་རྫོགས་ཧྭ་ཤང་རྒྱལ་ཆེན་དང་བཅས་པའི་ཙཀ་ལི། དེ་དག་གི་ཕྱག་མཚན་རྣམས་དང་། མདུན་དུ་གཏོར་མ་དཔེའུ་རིས་ལྟར་བཞག་གོ། ༈ །།དེ་ནས་དབང་གི་ལས་ཀྱི་སྐོར་ལས། རོང་ཟོམ་ཆོས་བཟང་མཁའ་འགྲོ་མ་རིག་བྱེད་རྩལ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་པའི་སྟེང་བུམ་པ་ཆིངས་དམར་དབང་གི་རིལ་བུའི་རྫས་ལྡན་ཁར་བྷནྡྷ་བདུད་རྩིས་བཀང་པ་ལ། སིནྡྷུ་རའི་མེ་ལོང་ཆོས་འབྱུང་གི་དབུས་ཧྲཱིཿདང་ཕྱོགས་བཞིར་ཧ་རི་ནི་ས་བྲིས་པས་བཀབ། དར་དམར་གྱི་གུར་ཕུབ། ༈ ཞིག་གླིང་བདེ་མཆོག་དམར་པོ་ལ། ཟླ་གམ་དམར་པོ་པདྨ་འདབ་བརྒྱད་བཅས་པའི་དབུས་སུ་ཁྲིའུའི་ཁར་མོ་ཐོད་མཚན་ལྡན་ནང་དུ་ཆང་རྒོད་ཆོས་སྨན་སྦྱར་བས་བཀང་བའི་ཁར། སིནྡྷུ་རའི་མེ་ལོང་ཆོས་འབྱུང་བསྣོལ་མའི་དབུས་ཟླ་གམ་ལ། གུ་རུ་པདྨ་དྷཱ་ཀི་ནཱི་སིདྡྷི་ཧཱུྃ་ཧྲཱིཿམཿ ཞེས་པ་དང་། ཟུར་དྲུག་ལ། ཧ་རི་ནི་ས་ར་ཙ་ཧྲི་ཡ། མུ་ཁྱུད་ལ་སརྦ་ལོ་ཀ་མ་མ་པཱ་ཤཾ་ཀུ་རུ་སྭཱ་ཧཱ། ཞེས་བྲིས་པ་བཞག །དེ་སྟེང་བྱང་སེམས་དཀར་དམར་བུ་རམ་ཅུ་གང་བསྲེས་པ་བཞག་ལ་དར་དམར་གྱི་གུར་ཕུབ། མདུན་དུ་མཁའ་འགྲོའི་གཏོར་མ་རྒྱན་ལྡན་དང་། དཔའ་བོ་མཁའ་འགྲོ་ཡབ་ཡུམ་བཅུའི་ཙཀ་ལི་ཕྱོགས་བསྡུས་དང་མེ་ལོང་དྭངས་པ་བཞག ༈ །དགོངས་གཏེར་སྒྲོལ་མ་དམར་མོ་ལ། མཎྜལ་པདྨ་འདབ་བརྒྱད་དམར་པོའི་དབུས་སུ་མཉྫི་ལ་རྣམ་བུམ་ཆས་བཅུད་ལྡན་པའི་སྟེང་དུ་ཐོད་པ་བདུད་རྩི་མངར་གྱིས་བཀང་བའི་ཁར་མེ་ལོང་སིནྡྷཱུ་ར་བརྡལ་བ་ལ་ཆོས་འབྱུང་། དབུས་སུ་ཏཱཾ་ཡིག །མཐའ་སྐོར་ཡིག་བཅུ་བྲིས་པ་བཞག །སྐུ་ཙཀ་སྔགས་བྱང་། ཕྲེང་དམར། ཤེལ་རྡོ་རྨ་བྱའི་མདོངས་རྣམས་མདུན་སོགས་དང་། རྒྱབ་ཏུ་དབང་གཏོར་དམར་པོ་དར་གདུགས་བཅས་བཞག ༈ །གཏེར་གསར་པདྨ་མཁའ་འགྲོ་ལ། རས་བྲིས་སམ་ལྷ་གྲངས་ཚོམ་བུའི་སྟེང་ཟངས་བུམ་རྒྱན་ལྡན་སྐུ་ཙཀ་དང་བཅས་པ། གཡས་སུ་ཐོད་ཆང་ལ་སིནྡྷུ་རའི་མེ་ལོང་ཧྲཱིཿཡིག་སྔགས་ཕྲེང་གིས་བསྐོར་བས་བཀབ། གཡོན་དུ་ཆང་གིས་སྦྲུས་པའི་མཁའ་འགྲོའི་གཏོར་མ་གཙོ་འཁོར་དགུ་པ་ལྕགས་ཀྱུའི་རྒྱན་དང་དར་གུར་ཅན་བཤམ། ཐུན་མོང་མ་ཡིན་པའི་བྱིན་རླབས་བྱེད་ན། དེའི་མདུན་དུ་ཐོད་པ་མཚན་ལྡན་ཆང་དང་ཁྱད་པར་རྫས་ལྡན་གྱིས་བཀང་བ་བཤམ། ༈ ཆོས་གླིང་ཛཾ་དམར་དབང་ལ། རས་བྲིས་སྟེང་ཁྲིའུར་རིན་པོ་ཆེའི་སྣོད་འབྲུས་བཀང་བའི་ནང་དུ་དམ་ཚིག་གི་བྲིས་སྐུ །སྒྲུབ་ཡིག །སྲོག་འཁོར་ཙིཏྟ་རྣམས་བཞག །གཡས་གཡོན་དུ་ཐོད་པ་རཀྟས་བཀང་བ། རིན་པོ་ཆེའི་གའུ་འབྲུ་སྨན་དར་ཟབ་ཀྱིས་བཀང་བ། སིནྡྷུ་རའི་མེ་ལོང་། དབང་གཏོར་དང་ཟངས་གཞོང་དུ་མི་གཟུགས་ཐལ་སྦྱར་གུས་པའི་ཚུལ་ཅན་རྣམས་བཞག །སྦྱིན་སྲེག་ཆས་ཏིལ་མར། སིནྡྷུ་ར། ཟླ་མཚན། མེ་ཏོག་དམར་པོ་སོགས་དམར་ཞིང་རོ་སྐྱུར་བའི་རིགས་རྣམས་ཟངས་སྣོད་དུ་བཞག །ཤིང་དམར་གྱི་ཐབ་ཁུང་ཟླ་གམ་ཡང་ཉེ་བར་བསྡོག་གོ ༈ །དེའི་ལས་བྱེད་དབང་ཕྱུག་དམར་པོའི་རིག་གཏད་ལ། སྟེགས་བུ་དམར་པོ་རས་བྲིས་སམ་འབྲུ་དམར་པོས་ཟླ་གམ་བྲིས་པའི་དབུས་སུ་ཚོམ་བུ་ཆེ་ཆུང་གཉིས། དེ་རྒྱབ་བཞི་བཀོད་པའི་དབུས་སུ་ཟངས་གཞོང་དུ་ལིངྒ་དར་དམར་གྱིས་བཀབ་པ། གཡས་སུ་ལྕགས་ཀྱུ། གཡོན་དུ་མེ་ལོང་ལ་ལི་ཁྲིས་ཧྲཱིཿབྲིས་པ། ཏིང་ལོ་ཆངས་ཟན། མཆོད་པ་སོགས་ཀྱིས་བསྐོར། ༈ བྱང་གཏེར་ལྷ་ཆེན་བསོད་ནམས་དཔལ་འབར་གྱི་དབང་ལ། དཀྱིལ་འཁོར་རམ་མཎྜལ་ཚོམ་བུ་གཙོ་འཁོར་དགུ་བཀོད་པའི་སྟེང་དུ་ལྷ་ཆེན་གྱི་རྟེན་ཡོད་ན་དང་། མེད་ན་གཏོར་མ་སྐུ་རྟེན་དར་གདུགས་ཅན་བཞག །རྒྱབ་ཕྱོགས་གུ་རུའི་སྐུ་བརྙན་བཀྲམ་པའི་མདུན་དུ་བླ་གཏོར་དང་རྟ་མགྲིན་གཏོར་མ་སྟེགས་མཐོ་བར་བཀོད། མདུན་དུ་གཙོ་འཁོར་དགུའི་ཙཀ་ལི་བཞག ༈ །རྗེས་གནང་ལ། དཀྱིལ་འཁོར་སྟེང་ཟངས་གཞོང་འབྲུ་མར་རིན་ཆེན་སྣ་ལྔ་འབྲུ་ལྔ་དར་སྣ་ལྔས་བཀང་བའི་ནང་དུ་དབང་རྟེན། གཡས་སུ་རྒྱ་སྐྱེགས། གཡོན་དུ་ཙན་དན་དམར་པོ་བཅས་བཞག །རྒྱབ་ངོས་མཐོ་བར་བླ་གཏོར། གཡས་སུ་ཕྱི་གཏོར་ཉི་ཟླའི་གཟུགས། རྒྱབ་ཏུ་ནང་གཏོར་ནོར་བུ་འབར་བ། གཡོན་དུ་གསང་གཏོར་སྲིད་མེས་གཟུགས། མདུན་དུ་སྤྱི་གཏོར་རྟགས་གསུམ་ཚང་བ་རྣམས་མེ་ཏོག་དམར་པོ་དང་ཟས་སྣ་ཚོགས་བཅས་བཤམ་མོ། ༈ །ལས་འབྲེལ་ལུགས་ཀྱི་ལྷ་ཆེན་ལ། རས་བྲིས་དབུས་སུ་ཁྲིའུའི་ཁར་ཁྱད་པར་གྱི་རྫས་སམ། མེད་ན་སྐུ་གཟུགས་བཤམ་ལ་དར་དམར་གྱི་གུར་ཕུབ། ཤར་དུ་མེ་ལོང་དང་རྩེ་གསུམ། ལྷོར་རྒྱུད་ཀྱི་གླེགས་བམ། ནུབ་ཏུ་ཐོད་ཆང་བྱང་སེམས་དཀར་དམར་བསྲེས་པ། བྱང་དུ་ཞགས་པ། མདུན་དུ་རྟེན་གཏོར་སྐུ་གཟུགས་དང་ཟས་སྣས་བརྒྱན་པ་བཞག ༈ །སྨིན་ལུགས་ལྷ་ཆེན་ལ། རས་བྲིས་ཚོམ་བུ་དང་བཅས་པའི་དབུས་སུ་ཁྲིའུར་དབང་གཏོར་དམ་རྫས་ཀྱིས་བསྐོར་བ་སྐུ་གཟུགས་དར་དམར་གྱིས་བརྒྱན་པ་བཀོད། མདུན་དུ་རིན་པོ་ཆེའི་སྣོད་མེ་ཏོག་དམར་པོས་བཀང་བའི་ནང་དུ་བླ་རྡོ་རྟེན་རྫས། གཡས་སུ་ལྕགས་ཀྱུ་དམར་པོ། གཡོན་དུ་ཞགས་པ། རྒྱབ་ཕྱོགས་མཐོ་བར་རྟ་མགྲིན་གྱི་སྐུ་བྲིས་འབུར་གང་རིགས་བཞག །སྒྲུབ་ཡིག་པུསྟི། ཐིག་ལེའི་རྫས་ཆང་དང་སྦྱར་བའང་བསྡོག་གོ ༈ །གཏེར་གསར་ལྷ་ཆེན་ལ། གོང་གི་པདྨ་མཁའ་འགྲོ་དང་འདྲ་བ་ལས། མེ་ལོང་ས་བོན་ཧྲཱིཾཿ གཏོར་མ་དམར་ཟླུམ་ཤིང་ཏོག་དབྱིབས་ཅན་སྐུ་ཙཀ་དར་གུར་བཅས་པ། ༈ པདྨ་སྒྱུ་འཕྲུལ་དྲྭ་བའི་བཀའ་སྲུང་ལྷ་ཆེན་བཀའ་གཏད་ལ། རས་བྲིས་དབུས་ཁྲིའུར་ཐོད་ཆང་སྟེང་སྐུ་ཙཀ་དར་གུར་ཕུབ། གཡས་གཡོན་དུ་སྔགས་བྱང་། ཕྲེང་དམར། ལྕགས་ཀྱུ། ཞགས་པ། མེ་ལོང་བུམ་པ་བཅས། ཐིག་ལེའི་རྒྱུ་ལི་ཁྲིའང་བཞག། ༈ །།དེ་ནས་དྲག་པོ་མངོན་སྤྱོད་ཀྱི་སྐོར་ལས། གཙོ་བོ་འཇོམས་བྱེད་རྩལ་ཆེན་གྱི་བཀའ་གཏད་ལ། ཞིང་ལྤགས་ཀྱི་གདན་ལ་སློབ་དཔོན་ཞལ་བྱང་ཤར་དུ་བསྟན་ཏེ་འཁོད་པའི་གཡས་གཡོན་གཉིས་སུ་མདའ་ཆག་གྲུམ་མེད་པ་སུམ་སྒྲོོམ་གྱི་ཁྲིའུ་རེ་རེའི་སྟེང་འབྲུ་ནག་ཚོགས་ཚད་རྗེན་བཏགས་ཀྱི་ཕྱེ་ལ་གཏོར་མ་ཟུར་གསུམ་དམར་པོའི་དཔུང་ཟུར་ཡན་ལ་མེ་རི་གྱེན་བསྟན་བྱས་པ་ཟངས་སྣོད་དུ་མདའ་ཁྲི་གཡས་པར་བཞག །གཏོར་མ་དེ་འདྲ་ནག་པོ་དཔུང་ཟུར་མན་ལ་མེ་རི་ཐུར་བསྟན་བྱས་པ་ལྕགས་སྣོད་དུ་མདའ་ཁྲི་གཡོན་པར་བཞག །སོ་སོའི་སྐུ་ཙཀ་དང་དར་གདུགས་རང་མདོག་ཕུབ། དེ་གཉིས་ཀྱི་བར། རང་མདུན་ཐོད་པ་ཞིག་གི་ནང་ཕུར་བྱང་གཟུག །ལིངྒ་དུམ་བུར་གཏུབས་ཏེ་སྤུངས་པའི་མཐར་ཤ་བཙོས་པ་དང་མ་བཙོས་པ་དུམ་བུ་ཆུང་ངུ་སློབ་མ་རེ་རེ་ལ་བརྒྱ་ཕྲག་རེ་སྦྱིན་རྒྱུ་འདང་ངེས་བྱ། ཀོང་ཟོར་གྲུ་གསུམ་ནག་པོ་རྩང་ཐུར་སུམ་ཚོམ་བཙུགས་པ། འུར་རྡོ་དང་། རྒྱུ་དབྱིབས་གོང་མཚུངས་ཀྱི་གཏོར་ཟོར་གཉིས་རྩང་དམར་ཤ་ཁྲག་གིས་བརྒྱན་པ་དང་། དྲག་མཆོད་སྨན་རཀ་བཅས་བཤམ། བྱང་བུ་བཀྲུ་བའི་ཆང་བཟང་པོའང་འདུ་བྱའོ། ༈ །ཟབ་བདུན་ལས་ཀྱི་མཁའ་འགྲོ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ། དེ་རྒྱབ་བཞི་བཀོད་པའི་སྟེང་དུ་བུམ་པ་ཆིངས་སྔོན་ཅན་སོགས་རིག་དབང་ལྔའི་ཆས། གསང་ཐོད། རིག་ཙཀ་ཤེལ་རྡོ་རལ་གྲི་ཐོ་བ་ཕུར་པ་ལིང་ག་བཅས་བཀོད། ༈ མགོན་པོ་གནམ་ལྕགས་ཐོག་མདའ་ལ། མཎྜལ་དཀྱིལ་འཁོར་དབུས་སུ་ཐོད་པའམ་ཟངས་ལྕགས་སྣོད་དུ་ཞིང་སྐྱོང་གཏོར་མ་སྤྱི་མཐུན་སྐུ་ཙཀ་དར་གདུགས་ཅན། མདུན་སོགས་སུ་སྔགས་བྱང་། ཕྱག་མཚན། སྲོག་འཁོར་བླ་རྡོ་བཅས་བཀོད། ༈ འཇམ་དཔལ་ཕ་རོལ་རྒོལ་འཇོམས་ལ། མཎྜལ་ཚོམ་བུ་གཅིག་པའི་སྟེང་ལྕགས་སམ་ཐོད་པར་དམར་གཏོར་དར་གདུགས་མཐིང་ནག་ཅན་བཀོད། རཀྴའམ་ཐོད་ཕྲེང་། མེ་ལོང་བཅས། ༈ འཆི་བསླུའི་བཀའ་གཏད་འདིར་སྦྲེལ་ན་གཏོར་མ་དེར་གསལ་དང་། ༈ མགོ་གསུམ་བཀའ་གཏད་ལ། ལྕགས་སྣོད་དུ་དམར་གཏོར་གཙོ་འཁོར་དགུ་མཐེབ་ཀྱུས་བསྐོར་བ་ལ་རང་གཟུགས་ཙཀ་ལི་བཙུགས་པ་དང་། གཏོར་ཆུང་ཤ་དུམ་མཐེབ་ཀྱུ་གྲངས་གང་འོས་ཀྱང་འདུ་བྱ། ༈ གནམ་ཆོས་ཀིང་དམར་ལ། གཟུངས་དབང་ཆས་བཀོད་དོ།། ༈ །།དེ་ནས་ལུང་ཨ་ནུ་ཡོ་གའི་སྐོར་ལས། མཁའ་འགྲོ་ཀུན་དགའ་འབུམ་པའི་མ་རྒྱུད་གསང་བ་ལམ་ཁྱེར་ལ། དཀྱིལ་འཁོར་རས་བྲིས་སམ་མ་འཛོམ་ན་མཎྜལ་སྟེང་འབྲུ་ཚོམ་དབུས་གཅིག །དེ་རྒྱབ་བཞི། དེ་རྒྱབ་བརྒྱད་བཅས་བཀོད་པའི་ཁར་མཉྫིའི་དབུས་སུ་བུམ་པ་ཆིངས་མཐིང་ནག །ཤར་དུ་དཀར་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ལྗང་གུ་ཐམས་ཅད་བཅུད་ལྡན་ཁ་རྒྱན་གྱིས་སྤྲས་པ་ལྔ་པོ་སོ་སོའི་མདུན་དུ་རིགས་ལྔའི་མཁའ་འགྲོའི་སྐུ་ཙཀ །རྒྱབ་ཏུ་མཁའ་འགྲོའི་གཏོར་ཆེན་རྒྱན་སྤྲོས་ཅན། ཐོད་པ་མཚན་ལྡན་ཆང་དང་ཆོས་སྨན་མངར་གསུམ་སྦྱར་བ། ཤོག་དྲིལ་ལྔ་སོ་སོར་དར་ཁ་དོག་ལྔས་དྲིལ་བ། དར་རས་ཅོད་པན་བཅས། ༈ གཏེར་གསར་རྡོ་རྗེ་བཀོད་པ་ལ། སྟ་གོན་རྫས་བཞི། དྲག་ཤིང་སོགས་ཀྱི་ཕུར་ཆུང་སློབ་མའི་གྲངས་མཉམ། དཀྱིལ་འཁོར་རས་བྲིས་སྟེང་ལྡེང་ཁྲི་རིམ་པ་གཉིས་པའི་འོག་མར་ཁྲོ་བོའི་གསང་བུམ་ཕོ་མོའི་ཐོད་པ་ཁ་སྦྱོར་ཆང་དང་སོ་ལྔས་བཀང་ཞིང་དར་མཐིང་དམར་གྱིས་བཅིངས་པ་ལྕང་ལོས་བརྒྱན་པ་དང་། ཐོད་པ་དུམ་གཅིག་ནང་ཡབ་ཡུམ་གྱི་སྙིང་པོ་བྲིས་པའི་གཡས་གཡོན་དུ་རྡོ་རྗེ་དྲིལ་བུས་བརྟེན་པ། དེ་དག་གི་མདུན་དུ་ཚེ་བུམ་མགུལ་ཆིངས་དམར་པོ་ཅན་དང་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར་དམར་པོ་རྣམས་བཀོད། སྟེང་མར་དབུས་སུ་རྣམ་རྒྱལ་བུམ་པ། མདུན་དུ་རིགས་ལྔའི་སྐུ་དང་ཕྱག་མཚན་ཕྱོགས་བསྡུས། རིག་ཙཀ །རྫས་བརྒྱད། ཞི་བའི་ཁྲི་ལྔ། ཞི་རྒྱན། གསེར་འཁོར་བཅས་ཕྱི་དབང་ཆས། གཡས་སུ་རྒྱུད་ཀྱི་གླེགས་བམ། སྣ་ཚོགས་རྡོ་རྗེ། འཁོར་ལོ། རྡོ་རྗེ་རྩེ་དགུ་དང་དྲིལ་བུ། གཅན་གཟན་གྱི་གདན་ཁྲི། རྒྱལ་སྲིད་བདུན་རྣམས་དང་། ཞི་ཁྲོའི་ལྷ་ཙཀ་ཉེར་བརྒྱད། ཐོད་སྐམ་དབུ་རྒྱན། རིགས་ལྔའི་སྐུ་དང་མར་མེ་ལྔ་སྣོད་གཅིག་ཏུ་བཞག་པ། རིགས་ལྔའི་སྐུ་ཙཀ་སོ་སོ་ཅན་ལྔ་བཅས་ནང་དབང་ཆས། གཡོན་དུ་མར་མེ། ཉི་ཟླ། དཔའ་བོ་འབྲུ་ལྔ། ཐོང་གཤོལ། ཐོད་ཁྲག་སྐམ་རློན་རྙིང་གསུམ། མཚོན་ཆ་སྣ་ཚོགས། པདྨ། ཞིང་དབྱུག །སྦྲུལ་ཆུན། རིག་མ། འདོད་ཡོན་ལྔ། ཞི་ཁྲོའི་ལྷ་ཙཀ་ཕྱོགས་བསྡམས་འདིར་ལེན་དགོས། སྒྲུབ་རྫས་ཕྱོགས་བསྡུས་ཙཀ་ལི་ལྔ། ཞི་ཁྲོའི་སྐུའམ་ཙཀ་ལི། གླེགས་བམ། རྡོ་རྗེ། སྨན་ཐོད། ཕུར་བུ་རྣམས་ཕྱོགས་བསྡུས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྟེན་མཚོན་བཅས་སྒྲུབ་དབང་ཆས། རྒྱབ་ཏུ་གསང་དབང་ཐོད་པའི་བདུད་རྩི་དང་ཆོས་འབྱུང་པད་རྡོར་གྱི་ཙཀ་ལི་བཀོད། ༈ མདོ་ལུང་ཕྱག་རྒྱ་གཅིག་པའི་དོན་དབང་ལ། མཎྜལ་ཚོམ་བུ་སྔོན་པོ་གཅིག་གི་སྟེང་རྣམ་བུམ་ཆིངས་སྔོན་གྱི་ཁར་ཐོད་པའི་བདུད་རྩི་ལ་སིནྡྷུ་རའི་མེ་ལོང་ཨཝེཾ་བྲིས་པས་བཀབ་པའི་སྟེང་ཤེལ་རྡོ་བཞག་ལ་དར་དམར་ཕུབ། ༈ རྟ་མགྲིན་སྙིང་པོ་དོན་འདུས་ལ། རས་བྲིས་སྟེང་དཔལ་གཏོར་སྐུ་ཙཀ་དང་དར་གདུགས་དམར་པོས་བརྒྱན་པ་རྒྱན་ལྡན་བཤམ། ༈ མི་གཡོ་རྡོ་རྗེ་ཟམ་པའི་ནང་སྒྲུབ་ལྷ་བཅོ་ལྔ་པ་ལ། རས་བྲིས་སམ་ཚོམ་བུ་དབུས་གཙོ་འཁོར་གསུམ། དེ་རྒྱབ་བཞི། གྲ་བཞིར་བཞི། དེ་རྒྱབ་བཞི་བཀོད་པའི་སྟེང་མཉྫི་ལ་བུམ་པ་ཆིངས་སྔོན་ཅན། གཡས་གཡོན་དུ་དབུ་རྒྱན། རིགས་ལྔའི་ཕྱག་མཚན། དྲིལ་བུ། ལྷ་ཙཀ་ཚང་བ་བཀོད། ༈ གསང་སྒྲུབ་ལྷ་བཅུ་གསུམ་པ་ལ། དཀྱིལ་འཁོར་རམ་ཚོམ་བུ་དབུས་སུ་གཅིག་ལས་གཞན་འདྲ་བ་ལ། དབང་རྫས་འཁོར་ལོ། ཉི་ཟླ། རྒྱལ་སྲིད། རྫས་བརྒྱད། རྡོ་རྗེ། གདུགས། དུར་ཁྲོད་དང་དཔལ་ཆས། ཚེ་འབྲང་། སྨན་ཐོད། ཐོད་ཆང་། རིག་ཙཀ་བཅས། ༈ ལུང་ལུགས་ཐུགས་ཀྱི་ཕུར་གཅིག་ལ། རས་བྲིས་དབུས་རྣམ་བུམ་དང་གཙོ་ཕུར། གཡས་གསང་ཐོད། གཡོན་ཤེར་ཙཀ །མདུན་དུ་ཤེལ་རྡོ་བཞག་གོ། ༈ །།དེ་ནས་རྫོགས་ཆེན་མན་ངག་སྡེའི་ཐོག་མར་བི་མ་མི་ཏྲའི་བཀའ་སྲོལ་རྫོགས་ཆེན་རྒྱུད་བཅུ་བདུན་གྱི་དབང་ལས། རྫོགས་པ་རང་བྱུང་གི་རྒྱུད་དབང་ལ། རས་བྲིས་སྟེང་དབུས་དང་ཕྱོགས་བཞིར་བུམ་པ་རིགས་ལྔའི་ཁ་དོག་ཅན། ཨོཾ་ཨཱཿཧཱུྃ་སྭཱ་ཧཱས་མཚན་པ། བུམ་རྫས་དབུས་ནས་རིམ་བཞིན་རིན་པོ་ཆེ་ལྔ། འབྲུ་ལྔ། སྨན་ལྔ། སྤོས་ལྔ། སྙིང་པོ་ལྔ་རྣམས་དང་ཆུ་གཙང་འོ་མ་དཀར་མངར་གྱིས་བཀང་། ཁ་རྒྱན་གསེབ་ཏུ་ཤེལ་དང་མེ་ལོང་དར་སྣ་རྨ་བྱའི་མདོངས་ལྔ། རིགས་ལྔའི་ཙཀ་ལི་བཅས་བཀོད། གསང་ཐོད་ཁར་མེ་ལོང་སིནྡྷུ་རས་བྱུགས་པ་བཞག །སྒོ་བཞིར་ཕུར་པ་བཞི་དང་མདའ་དར་བཞི། མཚམས་བཞིར་རལ་གྲི་བཞི་བཀོད། བྱང་ཤར་དུ་མཎྜལ་པདྨ་འདབ་བཞི་དབུས་ལྗང་གུའི་སྟེང་ལས་བུམ་དང་། དེའི་མདུན་དུ་དབང་གཏོར་དཀར་ཟླུམ་རྒྱན་ལྡན་བཞག །དཀྱིལ་འཁོར་མདུན་དུ་དཔལ་གཏོར། ཚོན་སྐུད་སྣ་ལྔ་སློབ་མའི་གྲངས་མཉམ་ཡང་འདུ་བྱ། ༈ ཁྲོ་བོའི་དབང་ལ། རས་བྲིས་དབུས་ཀྱི་ཁྲིའུར་ཕོ་ཐོད་ལ་བྷྲཱུྃ། མོ་ཐོད་ལ་མ་བྲིས་པ་ཁ་སྦྱོར་དུ་བཞག་པའི་མདུན་དུ་བྱང་སེམས་དཀར་དམར་སོ་སོ་བ། ཐོད་པ་གཅིག་གི་ནང་དུ་ཤ་ཁྲག་གཏོར་མ་བཤམ། ཟླ་གམ་གསུམ་གྱི་སྟེང་བུམ་པ་དར་དམར་གྱི་ཆིངས་དང་བཅུད་ལྡན་གསུམ། འཁོར་ལོའི་སྟེང་དུ་བཀའ་བརྒྱད་ལྟ་བུའི་ཁྲོ་སྐུ་བརྒྱད། གྲུ་ཆད་བཞི་ལ་མེ་ལོང་རེ། རྨ་བྱའི་སྒྲོ་རེ། ཟླ་གམ་སྟེང་ཐོད་པ་མཚན་ལྡན་དུ་གཏོར་མ་བདུད་རྩིས་བྲན་པ་དར་མཐིང་གས་ཁ་བཅད། ལྷོ་ཕྱོགས་སུ་ཚིལ་ཆེན་གྱི་མར་མེ། ནུབ་ཏུ་སེང་ལྡེང་ཕུར་པ་དར་གྱི་ཅོད་པན་ཅན། བྱང་དུ་ཤེལ་རྡོ། མདུན་དུ་མཆོད་རྟེན། གཞན་ཡང་མེ་དཔུང་། རིན་ཆེན། པདྨ། རལ་གྲི །འཛོམ་ན་ཁྱེའུ་མ་སྐྱེས་པའི་བུ་མོའི་ཚིལ་དང་མ་འཛོམ་ནའང་དུད་འགྲོ་ལྟ་བུའི་ལྟོ་ཚིལ། མཆོད་པའི་ལྷ་མོ་ལྔ། རྡོ་རྗེ། རྡུལ་ཚོན་སྣ་ལྔ། ཐིག་ལེའི་རྒྱུ་དྲི་བཟང་ཆབ། ཅོད་པན་རྣམས་དང་། ཐལ་ཞག་རཀྟ་དབུ་རྒྱན་རྣམས་ཀྱང་འདུ་བྱ། ༈ ཚེ་དབང་རིན་པོ་ཆེ་ལ། དཀྱིལ་འཁོར་དབུས་སུ་བུམ་པ་དམར་པོ་དཀར་མངར་ཆབ་ཀྱིས་བཀང་བའི་ཁར་ཚེ་འབྲང་བཀོད། མཐར་ཟས་སྣས་བསྐོར། ཚེ་མདའ་ཡང་འདུ་བྱ། ༈ རིག་པ་རང་ཤར་གྱི་དབང་ལ། དཀྱིལ་འཁོར་དབུས་སུ་རྨ་བྱའི་སྒྲོ་མདོངས། མེ་ལོང་། བྱང་སེམས་དཀར་དམར་སོ་སོ་བ། དཔལ་ཆེན་ཁྲོ་སྐུ་བཤམ། ༈ བཀའ་རྟགས་ཕྱག་རྒྱའི་དབང་ལ། དཀྱིལ་འཁོར་དབུས་རྣམ་བུམ་དང་། ཤེལ་རྡོ། ཐིག་ལེ་རྣམ་ལྔ་བཞག ༈ །གསང་དབང་ལ། དཀྱིལ་འཁོར་དབུས་སུ་རྣམ་སྣང་། དེ་སྟེང་སྣང་བ་མཐའ་ཡས། དེ་སྟེང་པདྨ་དབང་ཆེན་གྱི་སྐུ་ལ་རྨ་བྱ་དར་གདུགས་ཕུབ་པའི་མདུན་དུ་མེ་ལོང་། ཤར་ལྷོར་བཀྲ་ཤིས་བུམ་པ། ཤར་དུ་ཐོད་པའི་ནང་དུ་བྱང་སེམས་དམར་པོ། བྱང་དུ་མེ་ལོང་ཡུ་བ་ཅན་གྱི་བྱང་སེམས་དཀར་པོ། ལྷོར་གོང་སྨོས་ཚིལ་དང་ཤ་ཆེན་མར་མེ་རྣམས་དང་། རིག་ཙཀ་བཅས་བཀོད། ༈ རྫོགས་ཆེན་རང་སྣང་གི་དབང་ལ། དཀྱིལ་འཁོར་དབུས་སུ་རྣམ་བུམ་ཁར་རིགས་ལྔའི་སྐུ་རྟེན། ཤར་བུམ་སྟེང་རིགས་གསུམ་དང་གོས་དཀར་མོའི་སྐུ །ལྷོ་བུམ་སྟེང་རིག་གསེར་ཕྲེང་། ཚེ་དཔག་མེད། ཤེར་ཕྱིན། སྨན་བླ་བཞིའི་སྐུ །ནུབ་བུམ་སྟེང་ཁྲོ་ཆེན་རིགས་ལྔ་ཡབ་ལྔའི་སྐུ །བྱང་བུམ་སྟེང་སྒོ་བ་བཞིའི་སྐུ །བྱང་ཤར་བུམ་པའི་སྟེང་རིགས་གསུམ་ཁྲོ་བོ་དང་རྣམ་འཇོམས་ཀྱི་སྐུ །ཤར་ལྷོའི་བུམ་པའི་སྟེང་རྣམ་འཛིན་དང་སྟོན་དྲུག་ཀུན་བཟང་གསུམ་གྱི་སྐུ །ལྷོ་ནུབ་བུམ་སྟེང་རིགས་ལྔ་ཡུམ་ལྔའི་སྐུ །ནུབ་བྱང་བུམ་སྟེང་ཁྲོ་མོ་ཡུམ་ལྔའི་སྐུ །ཕྱོགས་མཚམས་བརྒྱད་དུ་བཀྲ་ཤིས་རྫས་བརྒྱད། བུམ་པ་རེ་རེའི་རྩར་ཕུད་དང་བཅས་པའི་གཏོར་མ་རེ་བཞག ༈ །བཀའ་སྲུང་ཁྲོས་མའི་དབང་ལ། གྲུ་གསུམ་མཐིང་ནག་མེ་རི་དང་བྷྱོས་མཚན་པའི་སྟེང་དུ་ཁྲིའུར་ལྕགས་སམ་ཐོད་པའི་ནང་དུ་འབྲུ་ནག་གི་ཕྱེ་ལ་དཔལ་གཏོར་བརྗིད་ལྡན་སྐུ་རྟེན་དར་ནག་གིས་བརྒྱན་པ་བཤམ། ༈ ཞིག་གླིང་གསང་བ་སྙིང་ཐིག་ལ། སྟ་གོན་རྫས་བཞི། རས་བྲིས་དབུས་སུ་རྣམ་བུམ། མདུན་དུ་ལྷ་ཙཀ་ཚང་བ་དང་སྔགས་བྱང་། གཡས་གཡོན་སོགས་སུ་དབུ་རྒྱན་དང་རྡོར་དྲིལ། གསང་ཐོད་མེ་ལོང་དར་དམར་གྱིས་བཀབ་པའི་ཁར་ཤེལ་རྡོ་བཞག་པ། སྨན་རག་གཏོར་གསུམ། རིག་ཙཀ་བཅས་བཀོད། ༈ ལྕེ་བཙུན་སྙིང་ཐིག་ལ། འོད་ལྔའི་དཀྱིལ་འཁོར་སྟེང་རྣམ་བུམ་ཨ་དཀར་གྱིས་མཚན་པའི་ཁར་ཐོད་ཆང་། དེ་སྟེང་ཤེལ་རྡོ་བཞག ༈ །པདྨའི་བཀའ་སྲོལ་གྱི་ཐོག་མར་མཁའ་འགྲོ་སྙིང་ཐིག་ལ། སྟ་གོན་རྫས་བཞི། རས་བྲིས་སྟེང་བུམ་པ་རིགས་ལྔའི་མདོག་མཚུངས་ལྔ། ཤེལ་དང་མེ་ལོང་རྨ་བྱས་བརྒྱན་པ་ཕྱོགས་བཞི་དབུས་ལྔར་བཀོད་པ་དང་ལྷན་ཅིག་རིགས་ལྔའི་སྐུ་རྟེན་དང་རིག་དབང་ཆས་བཞི་བཞག །གསང་ཐོད་རིག་ཙཀ །ཤེལ་རྡོ་བཅས། ࿋ མཁའ་འགྲོ་ཡང་ཏིག་སྟ་གོན་སྐབས་དཀྱིལ་འཁོར་ཤར་ཕྱོགས་སུ་སྟེགས་བུ་མདའ་གང་བའི་སྟེང་དུ་ཟླུམ་བསྐོར་བཞིའི་ནང་མ་ལ་པད་འདབ་བཞི། གཉིས་པ་ལ་སེམས་དཔའ་ཡབ་ཡུམ་བརྒྱད་ཀྱི་མཚན་མ་དང་ཐུབ་པ་དྲུག །གསུམ་པ་ལ་སྒོ་མ་བཞིའི་ཕྱག་མཚན། བཞི་པ་ལ་བླ་མ་དང་དཔའ་བོ་ཆོས་སྐྱོང་དང་བཅས་པའི་མཚན་མ་བཀོད་ལ་དཀར་པོར་བྱས་ཏེ་ཞི་བའི་ཤིང་ཟླུམ་པོར་བརྩེགས། སྲེག་རྫས་ཡམ་ཤིང་། མར་ཁུ། འབྲས། སོ་བ། ཏིལ། ནས། གྲོ །སྲན་མ། ཞོ་ཟན། དྲི། བདུག་པ། དུརྦ་རྣམས་སོ་སོའམ་རྫས་སྤུངས། ཆུ་གཉིས་ཉེར་སྤྱོད་དགང་གཟར་བླུགས་བཅས། ཚིག་དབང་སྐབས་ཐོད་པ་བདུད་རྩིས་བཀང་བའི་སྟེང་དུ་མེ་ལོང་ལ་ཆོས་འབྱུང་བསྣོལ་མའི་དབུས་སུ་ཧྲཱིཿམ་ཧ་རི་ནི་ས་ར་ཧྲི་ཡ་ཙིཏྟ་ཧྲིཾ་ཧྲིཾ་ཛཿ ཞེས་མཁའ་འགྲོ་ཡབ་ཡུམ་གྱི་རྩ་སྔགས་དང་མཐའ་སྐོར་ལ་ཨོཾ་གུ་རུ་ཀུན་བཟང་ཡབ་ཡུམ། རིགས་ལྔ་ཡབ་ཡུམ། རྡོ་རྗེ་འཆང་། རྡོ་རྗེ་སེམས་དཔའ། དགའ་རབ་རྡོ་རྗེ། ཤྲཱི་སིངྷ་། པདྨ་མཚན་བརྒྱད། ཡེ་ཤེས་མཚོ་རྒྱལ། པདྨ་ལས་འབྲེལ་རྩལ། ས་མ་ཡ་ཛཿ ཞེས་རིག་འཛིན་གྱི་མཚན་བྲིས་ལ་ཁ་དགབ། ཕྱི་ནང་གི་མཆོད་ཚོགས་རྒྱ་ཆེར་བཤམས་ལ་བཞག །རྗེས་འབྲེལ་ཡུལ་ལྔའི་ངོ་སྤྲོད་ཆས་རིགས་ལྔའི་སྐུ་དང་མི་སྡུག་པའི་གཟུགས། དབྱུག་པ་རིང་པོ་ལ་དྲིལ་བུ་བརྒྱུས་པ། དྲི་བཟང་ངན། རོ་མངར་སྐྱུར། རེག་བྱ་འཇམ་རྩུབ་བཅས། ཀ་དག་ཁྲེགས་ཆོད་གཉིས་ལ། པད་འདབ་བརྒྱད་འོད་ར། རྡོར་ར། མེ་རི་བཅས་བྲིས་ལ་དེའི་སྟེང་དུ་ཐོད་པ་བདུད་རྩིས་བཀང་བ་བཞག་ལ་མཆོད་པས་བསྐོར། མཁའ་འགྲོའི་དོན་དབང་ལ། ཤོམ་སྔར་བཞིན་ལ་པདྨ་རཀྟ་སིནྡྷུ་རའི་ཐིག་ལེ་བཅས། གཞན་དོན་བཀའ་རྒྱའི་དབང་ལ། ཤོམ་སྔར་བཞིན་ལ་ཁྱད་པར་སྐུ་རྟེན་ཞི་ཁྲོའི་ཙཀླི །གསུང་རྟེན་སྙིང་ཐིག་གི་གླེགས་བམ། ཐུགས་རྟེན་ཤེལ་རྡོ། རིག་འཛིན་གཏོར་མ། བཀའ་སྲུང་གཏོར་མ་བཅས་བཞག་གོ ࿋ ༈ །བྱང་གཏེར་ཀ་དག་རང་ཤར་ལ། དཀྱིལ་འཁོར་མཎྜལ་ཆེ་ངེས་སྟེང་རྡུལ་ཚོན་གྱིས་དབུས་སུ་ཟླུམ་བསྐོར་མཐིང་ནག་འོད་ལྔའི་ར་བས་བསྐོར་བ། དེ་རྒྱབ་མུ་ཁྱུད་རིམ་པ་བཅུ་གཅིག་བསྐོར་བའི་དང་པོ་ལ་མཐིང་དམར་ཉིས་རིམ། གཉིས་པ་ལ། དཀར་སེར་དམར་ལྗང་མཐིང་ག་ལྔ་རིམ། གསུམ་པར་དཀར་དམར་ཉིས་རིམ། བཞི་པར་དཀར་དམར་མཐིང་ག་སུམ་རིམ། ལྔ་པར་དཀར་སེར་མཐིང་ག་སུམ་རིམ། དྲུག་པར་དཀར་པོ་ཉིས་རིམ། བདུན་པར་སེར་པོ་ཉིས་རིམ། བརྒྱད་པ་ལེའུ་ཚེ་བཅུ་གཉིས་ཆ་བགོས་ལ་ཚོན་ལྔ་བཏང་བ། དགུ་པར་སེར་པོ་ཉིས་རིམ། བཅུ་པར་དཀར་ནག་ཉིས་རིམ། བཅུ་གཅིག་པར་ནང་ནས་རིམ་བཞིན་དཀར། སེར། ལྗང་གུ །དམར་ནག །སེར་ནག་ནག་པོ་དྲུག་རིམ་ཅན་སློབ་དཔོན་མདུན་སྟེགས་ཧ་ཅང་མི་མཐོ་བ་ལ་བཞག་པའི་སྟེང་ཁྲིའུར་བུམ་པ་བཀོད། མཆོད་གཞིར་སྨན་རཀ་དཔལ་གཏོར། དེའི་མདུན་ཅུང་ཟད་དམའ་བར་སྣོད་གཅིག་ཏུ་གཏོར་མ་ཟུར་གསུམ་དམར་པོ་པདྨས་བསྐོར་བ་གསུམ། སྣོད་གཅིག་ཏུ་ཟླུམ་གཏོར་པདྨ་སྤུངས་པ་འགྲུབ་ན་བཅུ་གཉིས་བཤམ། དབང་སྐབས་རྡུལ་ཚོན་རིམ་པར་ཕྱགས་བདེ་བའི་རྡུལ་ཕྱགས་ཆུང་ངུའང་ཉེ་བར་བསྡོག ༈ །རྡོར་གླིང་ལྟ་བ་ཀློངས་ཡངས་ཞི་ཁྲོའི་གཏོར་དབང་ལ། མཎྜལ་སྟེང་ཚོམ་བུ་ལྷ་གྲངས་སམ་གཙོ་འཁོར་ལྔ་བཀོད་པའི་སྟེང་། གཏོར་མ་བང་རིམ་བཞི་བརྩེགས་སྟེང་རིན་ཆེན་འབར་བ་སྤྱི་འགྲེ་དར་གདུགས་བཅས་བཀོད། ༈ རྡོར་གླིང་ཧཱུྃ་སྐོར་སྙིང་ཐིག་གི་ཕོ་སྒྲུབ་དང་འབྲེལ་བ་བུམ་པའི་དབང་ལ། མཎྜལ་པདྨ་འདབ་བཞི་འཇའ་རིས་མུ་ཁྱུད་ལྔ་ལྡན་གྱིས་བསྐོར་བའི་དབུས་སུ་བུམ་པ་སོ་ལྔའི་རྫས་དང་བཅུད་ལྡན་མགུལ་ཆིངས་དཀར་པོ་ཁ་རྒྱན་གྱིས་སྤྲས་པ། པད་འདབ་ཤར་དུ་ཏིང་ཕོར་ཆུས་བཀང་བ། ལྷོར་ས་གྲུ་བཞི། ནུབ་ཏུ་མར་མེ། བྱང་དུ་རླུང་གཡབ་རྣམས་བཞག །དེའི་རྒྱབ་ཕྱོགས་བླ་མའི་གཏོར་ཆེན་བཤམ། སྔོན་འགྲོ་སྦྱིན་སྲེག་ལ་ཞི་བའི་མེ་ཐབ་སྤྱི་འགྲེ་བྲིས་པའམ་ཐབ་སྟེགས་དཀར་ཟླུམ་འབྲུ་ཚོམ་དཀར་པོ་གཙོ་འཁོར་ལྔ་བཀོད་པའི་ཁར་བུད་ཤིང་ཟླུམ་པོར་བརྩིགས། སློབ་དཔོན་གྱི་གཡོན་ཕྱོགས་སུ་འབུལ་གཏོར་དཀར་ཟླུམ་དང་སྨན་རཀ་ཆུ་གཉིས་ཉེར་སྤྱོད། གཡས་ཕྱོགས་སུ་བ་ལུ་སོགས་ཀྱི་ཡམ་ཤིང་བདུན་ནམ་ཉེར་གཅིག །མར་ཁུ། ཏིལ་དང་ཡུངས་ཀར་རྣམས་བཀོད། ༈ གཉིས་པ་ཟུང་འཇུག་དང་འབྲེལ་བའི་གསང་དབང་ལ། དཀྱིལ་འཁོར་སྒོ་རྫོགས་སམ་ཕྱོགས་མདོག་གི་ཐིག་ལེ་ལྔ་ཚོམ་རེ་རེ་བཞིན་འཇའ་རིས་ཀྱི་མུ་ཁྱུད་ལྔ་དང་མཐའ་སྐོར་མུ་ཁྱུད་འཇའ་རིས་སྣ་ལྔས་བསྐོར་བའི་དབུས་སུ། བུམ་པ་སོ་ལྔ་དང་སྦྲང་ཆང་གི་བཅུད་ལྡན་ཁ་རྒྱན་མགུལ་ཆིངས་དཀར་པོས་སྤྲས་པ། ཤར་དུ་རྡོ་རྗེ། ལྷོར་རིན་ཆེན་འབར་བ། ནུབ་ཏུ་པདྨ། བྱང་དུ་རལ་གྲི་རྣམས་དང་། རིགས་ལྔ་ཡབ་ཡུམ་གྱི་ཙཀ་ལི། བགྲང་ཕྲེང་། དབྱངས་གསལ་དང་། འཁོར་བ་དོང་སྤྲུགས་ཀྱི་སྔགས་བྱང་རྣམས་བཞག །རྒྱབ་ཕྱོགས་སུ་ཡི་དམ་གྱི་གཏོར་ཆེན་བཤམ། ༈ གསུམ་པ་མོ་སྒྲུབ་དང་འབྲེལ་བ་ཤེར་དབང་ལ། མཎྜལ་པདྨ་འདབ་བཞིའི་སྟེང་དུ་ཐོད་པའི་བདུད་རྩི་ཆོས་སྨན་མངར་གསུམ་སྦྱར་བ་དང་རྡོར་དྲིལ། རྟ་མགྲིན་ཧེ་རུ་ཀའི་སྐུ་ཙཀ་དང་། རྒྱབ་ངོས་མཁའ་འགྲོའི་གཏོར་མ་བཤམ། ༈ བཞི་པ་ཚིག་དབང་ལ། དཀྱིལ་འཁོར་འཇའ་རིས་ཀྱི་ཐིག་ལེ་ཉི་ཤུ་རྩ་ལྔའི་མཐར་མུ་ཁྱུད་འཇའ་ཚོན་གྱིས་བསྐོར་བའི་དབུས་སུ་ཤེལ་རྡོ་དང་རྨ་བྱའི་མདོངས་བཞག ༈ །ལྔ་པ་གདམས་གཏད་དབང་ལ་བཤམ་བཀོད་ཟུར་དུ་མི་དགོས། བུམ་པ་སོགས་དབང་ཆས་རྣམས་སྣོད་གཅིག་ཏུ་བསྡུ་དགོས་པ་དང་གཞུང་པོད་གླེགས་བམ་གཏོད་རྒྱུར་འཇོག ༈ །རིན་ཆེན་གླིང་པའི་རྫོགས་ཆེན་ཆིག་ཆོད་ཀུན་གྲོལ་ནི། མཚན་མའི་དབང་རྫས་ལ་མི་ལྟོས་ཀྱང་མཚོན་བྱེད་ཙམ་དུ་མཎྜལ་པདྨ་འདབ་བརྒྱད་མཛེས་ཚོན་འཇའ་རིས་སྣ་ལྔས་བསྐོར་བའི་དབུས་སུ་ཁྲིའུའི་སྟེང་། རིན་པོ་ཆེའི་བུམ་པ་ལྔ་ཚན་ལྔའི་བཅུད་དང་མགུལ་ཆིངས་མཐིང་ག་ཁ་རྒྱན་ཤིང་ལོ་མེ་ཏོག་འབྲས་བུ་དང་བཅས་པ་གཟུག །མདུན་དུ་མེ་ལོང་གཡའ་མེད་པའི་སྟེང་ཤེལ་སྒོང་ཟུར་བརྒྱད་དང་རྨ་བྱའི་སྒྲོ་མདོངས་བཞག ༈ །རཏྣའི་ཀློང་གསལ་སྙིང་ཐིག་གི་ཆོས་སྒོ་འབྱེད་པ་གཏོར་དབང་ལ། མཎྜལ་ཚོམ་བུ་ལྔ་པའི་ཁར་ཁྲིའུ་ལ་དབང་གཏོར་གཞུང་གསལ་རྒྱན་ལྡན་བཀོད། ༈ བསྐྱེད་རིམ་དང་འབྲེལ་བའི་དབང་བསྐུར་རྣམ་གསུམ་ལ། སྟ་གོན་རྫས་བཞི། བླ་མ། རྟ་མགྲིན། ཚེ་དཔག་མེད་གསུམ་གྱི་སྐུ་རྟེན་བྱིན་ལྡན་བཀྲམ་པའི་མདུན་དུ། བླ་མ་ལ། རས་བྲིས་སམ་ལྷ་གྲངས་ཀྱི་ཚོམ་བུའི་ཁར་བླ་མའི་གཏོར་ཆེན་རིན་ཆེན་འབར་བ་བཟའ་བཏུང་བཅས་བཀོད། ཡི་དམ་ལ། རས་བྲིས་སམ་ཚོམ་བུ་ལྷ་གྲངས་གྱི་ལྟེ་བར་བནྡྷ་མཚན་ལྡན་ཆང་དང་ཆོས་སྨན་མངར་གསུམ་སྦྱར་བས་བཀང་བའི་སྟེང་ཁྲིའུ་ལ་ཁྲག་ཆང་གིས་སྦྲུས་པའི་དཔལ་གཏོར་རྟ་མགོས་མཚན་པ་དར་དམར་གྱི་གུར་ཕུབ། རིག་ཙཀ་དང་མེ་ལོང་སྐུ་ཕྱིས་གོས་ཟུང་སོགས་ཁྲུས་ཆས་ཀྱང་བཞག །ཀུན་བཟང་རྡོར་སེམས་ལྟ་བུའི་སྐུའང་བསྡོག །ཚེ་དབང་ལ། རས་བྲིས་སམ་ཚོམ་བུ་ལྔ་པའི་ཁར་འབྱོར་ན་བུམ་པ་ལྔ། མ་འབྱོར་ན་གཅིག་ལ་ཉེར་ལྔའི་རྫས་དང་དཀར་མངར་གྱིས་བཀང་བ་བཞག །གཡས་སུ་ཚེ་ཆང་། གཡོན་དུ་ཚེ་ནས་དཀར་མོ་ལ་མདའ་དར་དམར་པོ་གཟུག ༈ །རྫོགས་རིམ་གྱི་དབང་གི་སྟ་གོན་ལ། མཎྜལ་ཚོམ་བུ་ལྔ་པའི་ཕྱོགས་བཞི་དབུས་ལྔར་ཁྲིའུ་དང་ཀུ་ཤའི་གདན་ལ་བུམ་པ་རིགས་ལྔའི་ཕྱག་མཚན་དང་ལྡན་པ་ཕྱོགས་མདོག་གི་ནང་དུ་འབྲུ་ལྔ། བདུད་རྩི་ལྔ། རིན་པོ་ཆེ་ལྔ། སྨན་ལྔ། དྲི་ལྔ་ཆུ་གཙང་འོ་མ་བཅས་ཀྱིས་བཀང། ཁ་རྒྱན་རྨ་བྱ་ཤེལ་དཀར་མེ་ལོང་ལྡན་པ་བཞག །མཎྜལ་གྱི་ཤར་ཕྱོགས་སུ་མེ་ཐབ་དཀར་པོ་པདྨ་འདབ་བཞི་ཚོམ་བུ་ལྔ་བཀོད་པ་ལ་ཞི་བའི་བུད་ཤིང་ཟླུམ་པོར་བརྩིགས། མར་ཁུ་ཡམ་ཤིང་ཏིལ་ཡུངས་ཀར་གཙོར་བྱས་བསྲེག་རྫས་གང་འཛོམ་དང་དགང་བླུགས་ཀྱང་འདུ་བྱ། དངོས་གཞི་ལ། རས་བྲིས་སམ་ཚོམ་བུ་ལྔ་པའི་ཁར་སྔར་གྱི་བུམ་པ་ལྔ་དང་མཉམ་དུ་རྡོ་རྗེ་ཉི་ཟླའི་ཡུ་བ་ཅན་ལྔ། དྲིལ་བུ་རིགས་ལྔའི་ཕྱག་མཚན་གྱི་ཡུ་བ་བྱས་པ་ལྔ། རིགས་ལྔའི་སྐུ་ཙཀ་སོ་སོ། དབུ་རྒྱན། རྒྱབ་ཏུ་མཎྜལ་ཆོས་འབྱུང་བསྣོལ་མ་ཚོམ་བུ་ལྔ་པའི་སྟེང་ཁྲིའུ་ལ་ཐོད་ཆང་ཁར་སིནྡྷུ་རའི་མེ་ལོང་ཆོས་འབྱུང་ཟུར་ལྔ་པའི་ལྟེ་བར་ཧྲཱིཿམ། ཟུར་ལྔའི་མདུན་དང་གཡས་ནས་བརྩམས་ཏེ། ར་ཧ། ཙ་རི། ཧྲི་ནི། ཡ་ས། ཧཱུྃ་མ་རྣམས་བྲིས་པ་བཞག་ལ་དར་དམར་གྱིས་བཀབ། དེ་སྟེང་ཁྲིའུར་གུ་རུའི་སྐུ་ཚབ་བཞུགས་སུ་གསོལ། ༈ པད་གླིང་ཀུན་བཟང་དགོངས་འདུས་དོན་དབང་ལ། དཀྱིལ་འཁོར་རས་བྲིས་སྟེང་དབུས་དང་ཕྱོགས་བཞིར་མཉྫི་ལ་བུམ་པ་ལྔ། དབུས་སྨན་ལྔ་མགུལ་ཆིངས་དཀར་ཁ་རྒྱན་ལ་རྣམ་སྣང་གི་སྐུ་དང་ཨོཾ་གྱིས་བརྒྱན་པ། དེས་འགྲེས་ཏེ་ཤར་སོགས་འབྲུ་ལྔ་རིན་པོ་ཆེ་ལྔ་དྲི་ལྔ་སྙིང་པོ་ལྔ་དང་མཐིང་སེར་དམར་ལྗང་རིགས་བཞིའི་སྐུ་དང་ཧཱུྃ་ཏྲཱཾ་ཧྲཱིཿཨཱཿ ཐམས་ཅད་ལ་ཤེལ་དང་མེ་ལོང་རྨ་བྱས་བརྒྱན་པ། དབུས་བུམ་མདུན་ཐོད་པ་ཆང་དང་བུ་རམ་སྦྱར་བ། ཤར་ལྷོར་འོ་མ། ལྷོ་ནུབ་ལན་ཚྭ། ནུབ་བྱང་སྦྲང་རྩི། བྱང་ཤར་ཟས་སྣས་བཀང་བའི་ཐོད་པ་བཞི་བཞག །རིག་ཙཀ །སློབ་མའི་གྲངས་མཉམ་གྱི་མར་མེ་གསལ་བའང་བཀོད། སྲུང་སྐུད་ཁ་དོག་ལྔ་པ་དེ་གྲངས་འདུ་བྱའོ། ༈ །ཐུགས་སྒྲུབ་པད་འབྱུང་ལ། མཎྜལ་ཚོམ་བུ་གཅིག་པའི་སྟེང་བུམ་པ་ཆིངས་དཀར་ཐོད་ཆང་སིནྡྷུ་རའི་མེ་ལོང་སྐུ་ཚབ་རྣམས་བརྩེགས་མ་དང་། མདུན་རྒྱབ་གང་བདེར་བླ་གཏོར། ཤེལ་རྡོ། རྨ་བྱའི་མདོངས་རྣམས་བཞག །རྗེས་འབྲེལ་ངོ་མཚར་ཆོས་དྲུག་གི་ཆས། མཐོང་གྲོལ། ཐོས་གྲོལ། བཏགས་གྲོལ། ཚོར་གྲོལ་གཞུང་གསལ་ཚད་ལྡན། མྱང་གྲོལ་རིལ་བུམ། རེག་གྲོལ་འཕོ་རྫས་ཆང་སྦྱར། རྒྱུད་ཀྱི་གླེགས་བམ་བཅས་བཀོད། ༈ ཀུན་སྐྱོང་གླིང་པའི་རྡོར་སེམས་སྙིང་ཐིག་ལ། པདྨ་འདབ་བརྒྱད་མུ་ཁྱུད་འཇའ་ཚོན་རིས་སུ་བསྐོར་བའི་སྟེང་དུ་རྣམ་བུམ། གཡས་སུ་ཐོད་ཆང་། གཡོན་དུ་དཔལ་གཏོར། མདུན་དུ་རྨ་བྱའི་ཕོད་གཙུག ༈ །སྡེ་གསུམ་གསང་སྐོར་བཀའ་བརྒྱད་རྫོང་འཕྲང་ལ། དཀྱིལ་འཁོར་རམ་མཎྜལ་ཚོམ་བུ་གཙོ་འཁོར་དགུ་པའི་སྟེང་དུ་ཁྲིའུ་ལ་བུམ་པ་ཆིངས་སྔོན་སྐུ་ཙཀ་ལྡན་པ། གཡས་སུ་དབུ་རྒྱན། རྒྱབ་ཏུ་རྡོ་རྗེ་དང་གསང་ཐོད་རིག་ཙཀ །གཡོན་དུ་དྲིལ་བུ་དང་ཤེལ་རྡོ་མེ་ལོང་། མདུན་དུ་ཀུན་བཟང་རྡོར་སེམས་རིགས་གསུམ་མགོན་པོ་བཅས་ཞི་བ་ལྔ་དང་དཔལ་དགུ་བྱ་ཁྱུང་བཅས་པའི་ཙཀ་ལི། བར་མཚམས་སུ་སྔགས་ཕྲེང་། ཕྱག་མཚན་རྩེ་དགུ །དུར་ཁྲོད་དང་དཔལ་ཆས། ཁྲི་གདུགས་སོགས་མངའ་གསོལ་ཆས་རྣམས་བཀོད། སྟེགས་གཞན་དུ་བྲུབ་ཁུང་ལིངྒ་ལྕགས་ཕུར། དགང་གཟར་བླུགས། ཟོར་གཏོར་མཚེ་ཡུངས་བཙུགས་པ། མནན་པའི་ཆས། ཞྭ་ནག་བེར་ཕོད་ཐུན་རྭ་མེ་ལོང་རྣམས་དངོས་སམ་བྲིས་པ་དང་། བཀྲ་ཤིས་ཚེ་གལ་གྱི་བཟའ་བཏུང་རྣམས་ཀྱང་ཉེ་བར་བསྡོག ༈ །ཨ་ཏི་ཟབ་དོན་ལ། འོད་ལྔའི་ཐིག་ལེའི་དཀྱིལ་འཁོར་དབུས་སུ་རྣམ་བུམ། གཡས་སུ་མན་ཤེལ་དར་སྣས་དྲིལ་བ། གཡོན་དུ་ཐོད་ཆང་། རྒྱབ་ཏུ་རིགས་ལྔའི་ཙཀ་ལི་ཕྱོགས་བསྡུས་དང་མེ་ལོང་གསལ་བ། མདུན་དུ་སངས་རྒྱས་སྲས་གཅིག་གི་རྒྱུད་དར་སྣས་དྲིལ་བ་བཞག་གོ ༈ །མཆོག་གླིང་རྫོགས་ཆེན་སྡེ་གསུམ་གྱི་དགའ་རབ་སྙིང་ཐིག་ཞི་དབང་ལ། དཀྱིལ་འཁོར་རམ་ཚོམ་བུ་དཀར་པོ་གཅིག་གི་སྟེང་བུམ་པ་ཆིངས་དཀར་ཅན་གྱི་ཁར་ཐོད་པའི་བདུད་རྩི་མེ་ལོང་ཤེལ་རྡོ་རྣམས་བརྩེགས། མདུན་དུ་རྡོར་སེམས་ཡབ་ཡུམ་གྱི་སྐུ་ཙཀ །ཤེལ་ཕྲེང་། རྡོ་རྗེ་མེ་ལོང་། རིག་ཙཀ །གཞུང་ནས་བཤད་པའི་རིལ་བུ་ཐོད་སྣོད་དུ་བླུགས་པ་དར་ཁེབ་ཅན་བཅས་བཞག ༈ ཁྲོ་དབང་ལ། ཟླ་གམ་དཀྱིལ་འཁོར་རམ་ཚོམ་བུ་གཙོ་འཁོར་དགུའི་དབུས་སུ་ཁྲིའུར་འབྲུ་སྣོད་དུ་ཐོད་སྐུ་དར་གྱིས་བཀླུབས་པ། མདུན་དུ་ཐོད་སྣོད་དུ་མར་མེ་དགུ་བཅོས་པ། གཡས་གཡོན་རྣམས་སུ་སྔགས་བྱང་། རྡོར་དྲིལ། གསང་ཐོད་ཁར་སིནྡྷུའི་མེ་ལོང་ལ་ཆོས་འབྱུང་བསྣོལ་མ་དགའ་འཁྱིལ་མཱུཾ་ཡིག་གིས་མཚན་པ། རིག་ཙཀ །ཚེ་འབྲང་བཅས་བཀོད་དོ།། ༈ །།སྤྱི་ཏི་ལ། རས་བྲིས་སྟེང་དཔལ་གཏོར། གཡས་སུ་རྣམ་བུམ། གཡོན་དུ་ཐོད་ཆང་ཁར་མེ་ལོང་དྭངས་པ་བཞག་གོ། ༈ །།ཡང་ཏི་སངས་རྒྱས་མཉམ་སྦྱོར་གྱི་རིག་པའི་རྩལ་དབང་ལ། རས་བྲིས་སྟེང་འདབ་བརྒྱད་ཀྱི་ཤར་དུ་ཉི་ཟླ་སོགས་གཟུགས་སོ་སོར་བཀོད་པའི་ལྟེ་བར་བུམ་པ་སྔོན་པོ་ཁ་རྒྱན་རྡོ་རྗེ་དང་བཅས་པ། འདབ་བརྒྱད་ཤར་གྱི་སྟེང་དུ་མེ་ལོང་། ལྷོར་མི་རོ། ནུབ་ཏུ་སྣོད་གང་རུང་ལ་ཆུ་ཚྭ་འོ་མ། བྱང་དུ་འཇའ་ཚོན། ཤར་ལྷོར་སྤོས་དང་མར་མེ། ལྷོ་ནུབ་ཏུ་དར་སྣ་དང་དངུལ་དཀར་མེ་ལོང་། ནུབ་བྱང་དུ་གྷི་ཝཾ་དང་ཐོད་ཆང་། བྱང་ཤར་དུ་མངར་གསུམ་གྱི་ལྡེ་གུ་དང་ཆོས་འབྱུང་མཐིང་ག །ཤར་སྒོར་ཉི་མ། ལྷོ་སྒོར་ཤེལ་སྒོང་། ནུབ་སྒོར་རླུང་གི་འཁོར་ལོ། བྱང་སྒོར་ཆུ་གཙང་རྣམས་དངོས་དང་རི་མོར་བྲིས་པ་བཞག །མདུན་ཕྱོགས་སུ་དཔལ་གཏོར་ལ་རི་རབ་གླིང་བཞི་འདོད་ཡོན་བཀོད་པ་སྣ་ཚོགས་ཀྱི་ཙཀ་ལི་བཙུགས་པའི་གཡས་གཡོན་དུ་སྨན་རཀ་བཤམ། གཞན་ཡང་དབང་རྫས་དབུ་རྒྱན། རྡོ་རྗེ། དྲིལ་བུ་རྣམས་དང་། དར་ལམ་དཀར་པོའང་འདུ་བྱ། ༈ ཡང་ཏི་གསེར་གྱི་འབྲུ་གཅིག་ལ། སྟ་གོན་རྫས་བཞི། རས་བྲིས་དབུས་སུ་རྣམ་བུམ་རིག་དབང་ཆས་ལས་མིང་དབང་སྣ་ཚོགས་རྡོ་རྗེ། ལྷ་ཙཀ་ཚང་བ། ཐོད་ཆང་ཁར་མེ་ལོང་དྭངས་པ་བཀབ་པ། དྲིལ་བུ། མར་མེ། རླུང་གཡབ་མེ་ལོང་ཤེལ་རྡོ་ལྷན་ཅིག་པ་རྣམས་བཞག་གོ ༈ །མཆོག་གླིང་རིགས་གསུམ་སྙིང་ཐིག་ལས། དང་པོ་ལྷ་མིའི་ཐེག་པ་སྐྱབ་སྡོམ་འབོགས་པ་ལ། གནས་ཁང་བྱི་དོར་བྱ། དྲི་བཟང་ཆུས་ཆག་ཆག་གདབ། སྟེགས་གཙང་མར་མེ་ཏོག་སིལ་མ་བཀྲམ་པའི་དབུས་སུ་ཐུབ་པའི་དབང་པོའི་སྐུ་བརྙན། གཡས་སུ་གསུང་རབ་ཀྱི་གླེགས་བམ། གཡོན་དུ་མཆོད་རྟེན་རྣམས་སྣོད་གཅིག་ཏུ་བཞུགས། མདུན་དུ་ཕྱི་མཆོད་ཕྲེང་ཚར་དུ་བཤམ། ཉན་རང་བྱང་སེམས་ཡན་བསྐུར་སྒྲུབ་དུས་གཅིག་བྱེད་ན་འོག་ནས་འབྱུང་བའི་གཤོམ་རྣམས་ཀྱང་སྟེགས་བུ་གཅིག་གི་སྟེང་གྲལ་ཐབས་སམ། ཕྱོགས་བཞི་ལྟ་བུར་བཀོད། ༈ གཉིས་པ་ཉན་ཐོས་ཐེག་པ་ལ། གཞུང་ནས་གསལ་བ་ལྟར་འཇམ་དཔལ་སོགས་ཉན་ཐོས་ཚུལ་བཟུང་བའི་འབུར་སྐུའམ་ཙཀ་ལི་གསུམ། སོ་ཐར་མདོ་ལྟ་བུའི་གླེགས་བམ། མཆོད་རྟེན་རྣམས་སོ་སོར་བཞུགས། ཆུ་གཉིས་ཉེར་སྤྱོད་ཕྲེང་ཚར་དུ་བཤམ། ༈ གསུམ་པ་རང་རྒྱལ་ཐེག་པ་ལ། ཙན་དན་དཀར་པོས་བྱུགས་པའི་མཎྜལ་གྱི་སྟེང་དུ་གཞུང་ནས་བཤད་པ་ལྟར་རིགས་གསུམ་རང་རྒྱལ་གྱི་སྐུ་བྲིས་འབུར་གང་རུང་དང་། ཕྱི་མཆོད་བཤམ། ༈ བཞི་པ་བྱང་སེམས་ཐེག་པ་ལ། དཀྱིལ་འཁོར་རྟ་བབས་མེད་པའི་སྒོ་རྐྱང་ཁྲུས་རྫིང་སྐྱེད་ཚལ་རིན་པོ་ཆེའི་ལྕགས་རིས་བསྐོར་བའི་དབུས་སུ་པདྨའི་གདན་སུམ་བསྒྲིགས་ལ་རིགས་གསུམ་བྱང་སེམས་གཞུང་ནས་བཤད་པ་ལྟ་བུའི་སྐུ་བརྙན་ནམ་ཙཀ་ལི་དང་། ཕྱི་མཆོད་བཤམ། ༈ ལྔ་པ་ཀྲྀ་ཡ་སྟེ་བྱ་བའི་རྒྱུད་ལ། དཀྱིལ་འཁོར་ཙན་དན་དཀར་པོ་ལ་སོགས་པའི་དྲི་ལྡན་ཤིང་ལེབ་ཀྱི་གཞི་ལ་པདྨ་འདབ་བརྒྱད་སུམ་བསྒྲིགས་ཀྱི་སྟེང་དུ་ཡོད་ན་དབུས་སུ་འཇམ་དབྱངས། གཡས་སུ་སྤྱན་རས་གཟིགས། གཡོན་དུ་ཕྱག་རྡོར་རྣམས་ཙན་དཀར་ལས་བྱས་པའི་སྐུ་བརྙན་ནམ། མ་འཛོམ་ན་ཙཀ་ལི་བཞག །གཡས་གཡོན་དུ་རྣམ་བུམ་ཉེར་ལྔའི་བཅུད་ལྡན་ཁ་རྒྱན་གཟུངས་རྡོར་བཅས་པ། ནོར་བུའི་ཅོད་པན། སྟོད་གཡོགས་དར་དཔྱངས་བཅས་དངོས་སམ་རི་མོར་བྲིས་པ། རྫས་རྟགས། རྒྱལ་སྲིད་རྣམས་ཀྱི་ཙཀ་ལི། ཉེར་སྤྱོད་རྣམས་མདུན་ནས་གཡས་བསྐོར་དུ་བཤམ། ༈ དྲུག་པ་ཡོ་ག་ལ་རིགས་གསུམ་གྱི། དང་པོ་འཇམ་དཔལ་ཡེ་ཤེས་སེམས་དཔའ་ལ། དཀྱིལ་འཁོར་དབུས་སུ་འཇམ་དཔལ་ཡེ་ཤེས་སེམས་དཔའི་སྐུ་བརྙན་བྲིས་འབུར་གང་རུང་བཞུགས། སྔགས་བྱང་ངམ་ཕྲེང་བ་དང་། ཕྱག་མཚན་བཞག །འདིའི་དབང་བསྐུར་སྒེར་དུ་བྱེད་ན་རྣམ་བུམ་བཀོད། ཕྱི་མཆོད་བཤམ། ༈ གཉིས་པ་སྤྱན་རས་གཟིགས་འཁོར་བ་དོང་སྤྲུགས་ལ། དཀྱིལ་འཁོར་དབུས་སུ་བུམ་པ་ཉེར་ལྔའི་བཅུད་ལྡན་དང་སྐུ་གཟུགས་བྲིས་འབུར་གང་རུང་བཞུགས། སྔགས་བྱང་ངམ་ཕྲེང་བ། ཕྱག་མཚན་བཞག །ཕྱི་མཆོད་བཤམ། ༈ གསུམ་པ་གསང་བདག་ངན་སོང་ཀུན་འདྲེན་ལ། དཀྱིལ་འཁོར་དབུས་སུ་བུམ་པ་ཉེར་ལྔའི་བཅུད་ལྡན་དང་། སྐུ་བརྙན་བྲིས་འབུར་གང་རུང་བཞུགས། སྔགས་བྱང་ངམ་ཕྲེང་བ་མེ་ལོང་བཞག །ཕྱི་མཆོད་བཤམ། ༈ བདུན་པ་མ་ཧཱ་ཡོ་ག་འཇམ་དཔལ་རྡོ་རྗེ་ལ། ཞི་དཀྱིལ་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་སུ་རྣམ་བུམ་སོ་ལྔའི་བཅུད་ལྡན་མགུལ་ཆིངས་སེར་པོ་ཁ་རྒྱན་དང་བཅས་པ། གཡས་སུ་གསང་དབང་ཐོད་པ་མཚན་ལྡན་དང་། གཡོན་དུ་ཁྲོ་བོའི་གསང་ཐོད་ཁྱེའུ་དང་བུ་མོ་ལོ་བཅུ་དྲུག་ལོན་པའི་ཐོད་པ་ཁ་སྦྱོར་གསུངས་ཀྱང་མ་རྙེད་ན་ཕོ་མོའི་ཐོད་པ་ཁ་སྦྱོར། གཉིས་ཀའི་ནང་ཆང་དང་ཆོས་སྨན་མངར་གསུམ་སྦྱར་བས་བཀང་བ། རྒྱབ་ཏུ་ཁྲོ་བོའི་དཔལ་གཏོར་སྐུ་ཙཀ་དར་གདུགས་མཐིང་གས་སྤྲས་པ། རིག་མ་དང་སྒྲོལ་གིང་ལས་གཤིན་གྱི་ཙཀ་ལི། འཇའ་ཤེལ། མདུན་དུ་སྨན་རཀ་གཏོར་གསུམ། ཉེར་སྤྱོད་བསྐོར་བཤམ་བྱ། ༈ བརྒྱད་པ་ལུང་ཨ་ནུ་ཡོ་ག་པདྨ་གར་དབང་ལ། དཀྱིལ་འཁོར་གཞུང་མཐུན་དབུས། གཏོར་ཙཀ་པདྨ་ཧེ་རུ་ཀ་དང་དར་གདུགས་དམར་པོ། སྒྲོལ་གིང་དམར་པོ་རལ་གྲི་དང་ཕུར་པ་ཐོགས་པ་བརྗེ་བ་ལས་བཤམ་བཀོད་གཞན་རྣམས་འཇམ་དཔལ་རྡོ་རྗེ་ཇི་ལྟ་བ་བྱའོ། ༈ །དགུ་པ་མན་ངག་རྫོགས་པ་ཆེན་པོ་གསང་བདག་སྙིང་ཐིག་ལ། བཤམ་བཀོད་སྔར་ལྟར་ལ་དཀྱིལ་འཁོར་གཞུང་མཐུན་དབུས། གཏོར་ཙཀ་བཛྲ་ཧེ་རུ་ཀ་དང་དར་གདུགས་མཐིང་ནག །སྒྲོལ་གིང་མཐིང་ནག་རལ་གྲི་དང་ཕུར་པ་ཐོགས་པ་བཀོད། ༈ མན་ངག་ལ། ཐིག་ལེ་ལྔ་ཚོམ་དབུས་མཐིང་ཤར་དཀར་སོགས་ཕྱོགས་མདོག་ཅན་གྱི་ལྟེ་བར་ཧཱུྃ་སྔོན་པོ། ཤར་དུ་ཨོཾ་དཀར་པོ། ལྷོར་ཏྲཱཾ་སེར་པོ། ནུབ་ཏུ་ཧྲཱིཿདམར་པོ། བྱང་དུ་ཨཱཿལྗང་གུ །མཐར་འོད་ལྔའི་མུ་ཁྱུད་ཀྱིས་བསྐོར་བའི་དཀྱིལ་འཁོར་སྟེང་རྣམ་བུམ་མགུལ་ཆིངས་སྔོན་པོ། ཁ་རྒྱན་གསེབ་ཏུ་མདའ་དར་ཤེལ་ཕྲེང་མེ་ལོང་བཏགས་པ་དང་། རིག་མའི་མཚོན་བྱེད་པདྨ་དམར་པོ་རྡོ་རྗེ་དཀར་པོས་མཚན་པ་རྣམས་བཀོད། ༈ བཅུ་པ་རིགས་གསུམ་འདུས་པ་ལ། དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་རྣམ་རྒྱལ་བུམ་པ། གཡས་གཡོན་དུ་གསང་ཐོད། རིག་ཙཀ་བརྡ། རང་བྱུང་འཇའ་ཤེལ་རྣམས་དང་། འགྲོ་འདུལ་ཕྲིན་ལས་ཀྱི་དབང་ཆས། རིགས་གསུམ་མཆོད་རྟེན་ལྔ་པ་བྲིས་འབུར་གང་རུང་འཛོམ་ན་དང་། མེད་ན་མཆོད་རྟེན་རབ་གནས་ལྡན་པ། སངས་རྒྱས་ཀྱི་རིང་བསྲེལ་དངོས་དང་དེ་ཉིད་ཕབ་གཏར་སྦྱར་ནས་དྲིལ་བའི་རིལ་བུ། ཤེས་རབ་རིལ་བུ་གཞུང་གསལ་བསྡུ་བསྒྲུབས་བྱས་པ་བཅས་སོ་སོར་རིན་པོ་ཆེའི་ཟ་མ་ཏོག་ལ་སོགས་པའི་སྣོད་དུ་བཞག་པ། ༈ ཚེ་དཀྱིལ་རིན་པོ་ཆེ་ཟུར་བཞི་པའི་དབུས་སུ་བུམ་པ་ཉེར་ལྔའི་བཅུད་ལྡན་མགུལ་ཆིངས་དམར་པོ། ཚེ་རིལ་ཚེ་ཆང་བཅས་ཕྱོགས་གང་བདེར་བཀོད། བཀའ་སྲུང་དུད་སོལ་མའི་རྗེས་གནང་འདིར་སྦྲེལ་ན་བདེ་བས་འོག་ནས་བཤད་པའི་ཆས་རྣམས་མདུན་ཕྱོགས་ལྟ་བུར་བསྒྲིག །སྨན་རཀ་གཏོར་གསུམ། ཉེར་སྤྱོད་ཀྱིས་མཚོན་བཤམ་བཀོད་དང་ཉེར་མཁོ་སྔ་མ་རྣམས་ལྟར་བྱའོ། ༈ །བཅུ་གཅིག་པ་བཀའ་སྲུང་དུད་སོལ་མའི་སྲོག་གཏད་ལ། འབྲུ་ནག་གི་ཚོམ་བུའི་སྟེང་དུ། ཐོད་པའམ་ཟངས་ལྕགས་ཀྱི་སྣོད་དུ་ཤ་ཁྲག་གིས་སྦགས་པའི་གཏོར་མ་ཟུར་གསུམ་མེ་རི་དར་གདུགས་ཀྱིས་སྤྲས་པ་བཀོད། གཡས་གཡོན་དུ། སྐུ་ཙཀ །སྔགས་བྱང་། དྲི་བཟང་གི་ཆུ། ཕྱག་མཚན་བཞི་དངོས་སམ་བྲིས་པ་རྣམས་དང་། སྨན་རཀ་ཉེར་སྤྱོད་སྤྱི་ལྟར་བཤམ། ཁྲག་ཆང་གི་སྐྱེམས། འབུལ་གཏོར་སོགས་ཀྱང་བསྡོག ༈ །དགོངས་འདུས་པུསྟི་ལུང་དབང་ལ། སྟེགས་གཙང་མར་མེ་ཏོག་སིལ་མ་བཀྲམ་པའི་དབུས་སུ། ཁྲི་སྟེགས་ལ་ཐུབ་དབང་སྐུ་བརྙན་བྱིན་ལྡན་བཞུགས། གཡས་ཕྱོགས་སུ་ཐེག་དགུའི་གླེགས་བམ་རིམ་པར་གཏད་དུ་རུང་བར་བཞག་དགོས་པས། འདུལ་བ་སོ་ཐར་མདོ་དང་བརྒྱད་སྟོང་པ། མངོན་པ་མཛོད་ཙམ། བྱ་སྤྱོད་རྣལ་འབྱོར་གསུམ་ལ་བཀའ་འགྱུར་རྒྱུད་འབུམ་ནས་པོད་རེ་ཙམ་མམ་དེ་དག་གི་སྒྲུབ་ཐབས་རེ་ཙམ་དར་གྱིས་དྲིལ་ལ་བཞག །མ་ཧཱ་ཡོ་ག་ལ་གཏེར་མཛོད་པོད་དང་པོ་ནས་མངོན་སྤྱོད་ལས་རྫོགས་ཀྱི་བར་ཚང་མ། ཨ་ནུ་ལ་མ་རྒྱུད་གསང་བ་ལམ་ཁྱེར་སོགས། ཨ་ཏི་སེམས་སྡེ་མན་ཆད་ཚང་བ་བཞུགས། གཡོན་དུ་གནས་བརྟན་གྱི་སྐུ་གཟུགས། མདུན་དུ་ཕྱི་མཆོད་རྣམ་བདུན་ཕྲེང་ཚར་དང་མཎྜལ་རྒྱས་པར་བཤམ་པས་གྲུབ་བོ། །ནམ་མཁའི་རྣལ་འབྱོར་རྟོགས་པའི་གདིང་རྙེད་པས། །སྦྱངས་པ་སྔོན་སོང་སྐལ་ལྡན་རྗེས་བཟུང་བ། །ཀུན་རྫོབ་ཙམ་ལ་ལྟོས་པ་མ་ཡིན་ཀྱང་། །སྙིགས་དུས་དེ་འདྲའི་སྣོད་བཅུད་འཛོམ་པ་དཀོན། །བདེན་པ་གཉིས་པོ་གཅིག་ལ་གཅིག་བརྟེན་པ། །ཆོས་ཉིད་གཤིས་ལུགས་རྟེན་ཅིང་འབྲེལ་འབྱུང་ཕྱིར། །དང་པོའི་ལས་ཅན་རྒྱུད་སྨིན་བྱེད་པ་ལ། །མཚན་མའི་དཀྱིལ་འཁོར་དབང་རྫས་ཚང་བ་དགོས། །རིམ་གཉིས་རྣལ་འབྱོར་ཇི་བཞིན་མི་བརྟན་ཀྱང་། །དམ་ཚིག་ཡན་ལག་ཅི་ནུས་ཚོགས་གྱུར་ན། །དེ་དང་མཐུན་པའི་ཕན་ཡོན་འཐོབ་འགྱུར་བས། །ནུས་པས་གང་ལྕོགས་སྙོམ་ལས་དབང་མ་གཏང་། །བཤད་ཚོད་ལག་ལེན་དགོས་པ་དོགས་པའི་མཐའ། །གཞུང་དོན་རས་སུ་བོར་བ་ལྷོད་པའི་སྐྱོན། །སྤངས་ནས་འདི་ཙམ་འགྲུབ་ན་དེང་དུས་ཀྱི། །དབང་བསྐུར་ཡིན་པར་རློམས་ནས་ཆེད་དུ་བཀོད། །འདིས་ཀྱང་རིན་ཆེན་གཏེར་གྱི་མཛོད་ཆེན་པོའི། །སྨིན་བྱེད་སྒོ་འཕར་ཕྱོགས་བརྒྱར་དབྱེ་བ་ལ། །སྣང་བའི་གཟི་ལྡན་སྒྲོན་མེ་ཉིད་གྱུར་ནས། །ཀུན་རྨོངས་སེལ་ཞིང་ལེགས་ལམ་རབ་གསལ་ཤོག །ཚུལ་འདི་ལྟར་མཁྱེན་རབ་རྒྱས་པའི་དམ་པ་རྣམས་ལ་མི་མཁོ་ཡང་རང་འདྲའི་བློ་དམན་འཆད་ཉན་གྱི་ཁུར་འཛིན་པ་ལ་རྒྱུས་ཤེས་ལམ་སྟོན་གྱི་ཚུལ་དུ་ཐུགས་ཕན་ཐོགས་པར་རེ་བའི་ལྷག་བློས་ཀུན་ནས་བསླངས་ཏེ་མཛོད་ཆེན་གྱི་གླེགས་བམ་ཡོངས་སུ་རྫོགས་པར་གྲུབ་པའི་རྗེས་ཐོག་ཏུ་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོའམ། རྒྱལ་བའི་སྲས་པོ་བློ་གྲོས་མཐའ་ཡས་པའི་སྡེས་དེ་བཱི་ཀོ་ཊི་ཙ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ། མངྒ་ལམ།། །། | ན་མོ་གུ་རུ་དེ་བ་ཌཱ་ཀི་ནཱི་ཡེ། བྱིན་རླབས་རྫོགས་ལྡན་ནོར་བུའི་སྤྲིན་ཆེན་འཁྲིགས། །དངོས་གྲུབ་བདུད་རྩིའི་ཆར་རྒྱུན་འཛད་མེད་འཇོ། །ཕྲིན་ལས་རིན་ཆེན་སྙེ་མ་འདོད་རྒུར་སྦྱིན། །རྩ་གསུམ་ཆོས་སྐྱོང་བཅས་པས་དགེ་ལེགས་སྩོལ། །རཏྣ་གྲམ་བུར་སྤུངས་པའི་གཏེར་མཛོད་ཆེའི། །སྨིན་གྲོལ་སྒོ་འཕར་གཏན་པ་མེད་དབྱེའི་ཚེ། །ལྡེའུ་མིག་འཕྲུལ་དང་སྒྲོན་མེའི་སྣང་བྱེད་བཞིན། །ལག་ལེན་ཁྲིགས་ཆགས་ཕྱོགས་མཚོན་དགོད་པར་སྤྲོ། །དུས་གསུམ་རྒྱལ་བའི་སྤྱི་གཟུགས་ཨོ་རྒྱན་གྱི་སློབ་དཔོན་ཆེན་པོ་མཚོ་སྐྱེས་རྡོ་རྗེས་སངས་རྒྱས་ཀྱི་ཆོ་འཕྲུལ་ཆེན་པོས་དཔལ་གྱི་མགུར་ནས་ཆོས་ཀྱི་རྔ་བོ་ཆེ་གདུལ་བྱའི་ཁམས་དབང་སྐལ་པ་དང་མཐུན་པར་བསམ་ཡས་བརྗོད་ལས་འདས་པར་བསྒྲགས་པར་མཛད་པའི། ཟབ་དོན་གྱི་སྙིང་པོ་འགའ་ཞིག་ཕྱིས་འབྱུང་བོད་འབངས་ལ་ཐུགས་བརྩེས་དགོངས་ཏེ་མཁའ་འགྲོ་གཏད་རྒྱས་བཏབ་པ་རྣམས་སྨོན་ལམ་གྱི་མཐུ་སད་པའི་གཏེར་སྟོན་སྤྲུལ་་་་་་པའི་སྐྱེས་མཆོག་རྣམས་ཀྱིས་གནས་དུས་དང་འཚམས་པར་བསྟན་འགྲོའི་དགེ་ལེགས་སྤེལ་བའི་བཙས་སུ་སྣང་བར་མཛད་པ་ཇི་སྙེད་ཅིག་མཆིས་པ་ལས། རང་ཉིད་ཀྱི་སྐལ་པ་བཟང་པོའི་དཔྱིད་དུ་འོངས་པ་རྣམས་ཀྱི་སྨིན་གྲོལ་རྩ་བའི་སྐོར་བསྟན་པའི་སྲི་ཞུ་དང་མོས་ལྡན་རེ་རེ་ཙམ་ལའང་ཕན་ཐོགས་པར་རེ་བའི་ལྷག་བསམ་བཟང་པོས་ཕྱོགས་གཅིག་ཏུ་བསྡུས་པ་རིན་ཆེན་གཏེར་གྱི་མཛོད་ཆེན་པོའི་སྨིན་གྲོལ་དཀྱུས་གཅིག་ཏུ་འབོགས་པའི་སྐབས་ཀྱི་ཕྱག་ལེན་མདོར་བསྡུས་འགོད་པ་ལ་གསུམ། སྤྱིར་ཇི་ལྟར་བྱ་བའི་ལག་ལེན། ཉེར་མཁོའི་ཡོ་བྱད་སྟ་གོན། བྱེ་བྲག་དབང་རྣམས་ཀྱི་གཤོམ་བཀོད་བསྟན་པའོ། །དང་པོ་ནི། འདི་ཉིད་ཀྱི་སྨིན་གྲོལ་བགྱིད་པར་བརྩམ་པ་ན། སློབ་དཔོན་གྱིས་རང་གི་རྩ་བའི་ཡི་དམ་མམ་དཀྱིལ་འཁོར་སྤྱིའི་ཁྱབ་བདག་རྡོ་རྗེ་སེམས་དཔའ་ལྟ་བུའི་བསྙེན་པ་ཁ་གསོ་ཞག་བདུན་གྱིས་ཉུང་མཐར་བྱས་ཏེ་གནང་བ་སྩོལ་བའི་གསོལ་བ་གདབ། ཞུ་བ་པོའི་སློབ་མ་དད་པ་དམ་ཚིག་ཐུབ་ངེས་ཉམས་ལེན་དང་འཆད་སྤེལ་ནུས་པ་བདུན་ནམ་བཅུ་གསུམ་ལས་མི་མང་བ་ཁྲིགས་བཅད་དགོས་ཏེ། ཞི་ཁྲོ་རྩ་གསུམ་གུ་རུ་ཞི་བ་ཐུགས་རྗེ་ཆེན་པོ་སོགས་ཁྱབ་གདལ་དུ་བསྐུར་ཆོག་ཀྱང་ཞུ་མཁན་ཧ་ཅང་མང་ན་ལྕོགས་ཐབས་མེད་པ་དང་། ཟབ་གཉན་ཆེ་བའི་རིགས་ཕལ་མོ་ཆེ་མང་པོ་ལ་བསྐུར་མི་རུང་བ་འགའ་ཞིག་བརྒྱུད་འཛིན་གཅིག་གམ་གསུམ་ལས་མི་སྤེལ་བར་གསུངས་པས་དབྱེ་བསལ་ཐོག་མ་ནས་ཕྱེད་པ་གལ་ཆེའོ། །དེ་ནས་དབང་ཁྲིད་མ་ཚུགས་པའི་སྔ་རོལ་དུ། རྩ་བ་གསུམ་ལ་ཚོགས་སྐོང་དང་མཎྜལ། ཆོས་སྲུང་ལ་སྐོང་གསོལ། སྡེ་བརྒྱད་ལ་མདོས་གླུད། ཡུལ་ལྷར་བསང་བརྔན། མགྲོན་བཞིར་ཕུད་མཆོད་སྤྱི་གསོལ། ཆུ་གཏོར། གསུང་རབ་ཀློག་འདོན། སྡིག་སྒྲིབ་ཉམས་ཆག་སྦྱོང་བ་ཡིག་བརྒྱའི་བསྒོམ་བཟླས། དོང་སྤྲུགས་ཆོ་ག །ཕྱག་བསྐོར། སཱཙྪ་གྲངས་མང་སོགས་གནང་བ་ཞུ་ཞིང་བར་ཆད་མི་འབྱུང་བར། དོན་གཉིས་འགྲུབ་པའི་རྟེན་འབྲེལ་གྱི་དགེ་བའི་དཔུང་བསྐྱེད་དཔོན་སློབ་ཐུན་མོང་ནས་ཅི་འགྲུབ་ཏུ་བྱས་པས་གནས་སྐབས་བར་ཆད་མི་འབྱུང་བ་དང་ཕྱིན་ཆད་བཀྲ་ཤིས་པའི་རྟེན་འབྲེལ་དུ་འགྱུར་རོ། །ལག་ལེན་དངོས་ལ་རྒྱས་པ་སྒྲུབ་ཆེན་གྱི་ཁོང་དུ་བཏང་བ་དང་། བསྡུས་པ་སྒྲུབ་ཆེན་མི་སྤེལ་བའི་ལུགས་གཉིས་བླ་སློབ་འཁོས་དང་ལོངས་སྐབས་ཀྱིས་གང་ལྕོགས་བྱ་ཆོག་ཅིང་། གཉིས་ཀའང་གཟའ་སྐར་དུས་ཚེས་བཟང་པོ་ཞིག་ལ་དབུ་བཙུགས་ཏེ་རྩ་བའི་རྒྱུ་དབང་བཀའ་བརྒྱད་བདེ་གཤེགས་འདུས་པའི་དབང་ཆེན་ཞིག་ངེས་པར་སྔོན་དུ་འགྲོ་དགོས་པས། དང་པོ་ལྟར་ན། འབྲེལ་དང་དགོས་པའི་གནད་ཤིན་ཏུ་ཆེ་བའི་དབང་གིས་རིགས་ཀུན་ཁྱབ་བདག་དཔལ་རྡོ་རྗེ་སེམས་དཔའི་སྒྲུབ་ཐབས་བཀའ་གཏེར་ཟུང་འཇུག་སྨིན་ལུགས་ཉིད་ཀྱིས་ཁོག་དབུབ་དགོས་པས། དེའི་སྒྲུབ་ཁོག་རྣམ་གྲོལ་སྙེ་མ་ནས་ཇི་ལྟར་འབྱུང་བ་བཞིན། ཉིན་དང་པོའི་སྔ་དྲོ་ས་ཆོག་ནས་མཚམས་གཅོད་རྗེས་འབྲེལ་བཅས། ཕྱི་དྲོ་ལྷ་སྟ་གོན་དང་རྒྱན་བཀོད་འཕྲོས་སུ་སྒྲུབ་ཐབས་འདོད་འཇོ་བུམ་བཟང་གི་དབུ་ནས་འབྱུང་བའི་བླ་མ་གསང་འདུས་ཟླུམ་པོ་བཞི་དབང་དང་གཏོར་དབང་བཅས་བཤམ་སྒྲུབ་བསྐུར་བ་བཅས་གྲུབ་པར་བྱ། བྱིན་རླབས་འདི་ལྟ་བུ་དང་རྗེས་གནང་སྲོག་གཏད་སོགས་དཀྱིལ་འཁོར་ཆེན་པོའི་དབང་བཞི་ཡོངས་རྫོགས་སྔོན་དུ་མ་སོང་བ་ལ་སྦྱིན་བྱར་མིན་ཀྱང་འདི་ནི་ཆོས་སྒོ་འབྱེད་པ་བྱིན་རླབས་བླ་མའི་གཏོར་དབང་ཞེས་ཆེད་དུ་བསྔགས་པ་སོགས་དམིགས་སུ་བསལ་བའི་དགོས་པ་དང་ལྡན་པས་སོ། །ཉིན་གཉིས་པར་རྡོར་སེམས་སྒྲུབ་མཆོད་རྒྱས་པ་ཛབ་བཟླས་ཉུ་ལེ་སྐྲོད་ཅིང་བྱིན་དབབ་པས་མཚོན་སྒྲུབ་ཆེན་གྱི་ཆིངས་ཇི་ལྟ་བར་བྱ། དགོང་མོར་ཉང་གཏེར་བཀའ་བརྒྱད་བདག་བསྐྱེད་ཕྱག་རྒྱ་རྐྱང་སྒྲུབ་ཙམ་བྱས་ལ་སྟ་གོན་ཆས་བསྒྲིག །སློབ་མ་རྣམས་འཚོགས། ཁྲུས་བགེགས་གཏོར་སྲུང་འཁོར། ལོ་རྒྱུས་མཚམས་སྦྱར་ལོ་ཆེན་དབང་བཤད་འཁྱོགས་མཚམས་ཅན་ནས་བཀའ་བརྒྱད་ཀྱི་བཤད་པ་བརྗོད་ལ་མཎྜལ་འབུལ། མདོ་བྱང་ཆེན་མོ་ལྟར་བཀའ་བརྒྱད་ཀྱི་སྟ་གོན་ཡོངས་རྫོགས་གྲུབ་པར་བྱ། འདི་ཕྱིན་ཆད་ཡུན་རིང་བས་བསྙེན་རྒྱུན་འཁྱོལ་དཀའ་ཡང་རྡོར་སེམས་སྒྲུབ་མཆོད་མ་ཆག་པ་དགོས་མོད། བླ་མས་ལོངས་ཁྱབ་མེད་ཅིང་མི་ལྕོགས་ན་གཞན་པའི་བླ་གྲྭ་ཁ་ཤས་ལ་ཉིན་རེ་བཞིན་གོང་ལྟར་བསྒྲུབ་བཅོལ། འདི་ནས་བརྩམ་མཇུག་མ་གྲུབ་ཀྱི་བར་དངོས་རོལ་རྗེས་འབྲང་གཏེར་སྲུང་རྣམས་ཀྱི་གཏོར་འབུལ་ཉིན་རེ་ཚར་རེ་འདོན་མཁན་ཟུར་དུ་ཡོད་ན་ལེགས། དངོས་རོལ་ཚང་མ་མ་གྲུབ་ན་དམ་ཅན་སྤྱི་གཏོར་ཁོངས་སུ་མངོན་རྟོགས་གང་ལྕོགས་རེ་མོས་བཙུད། སྒྲུབ་གཞི་ཡོད་པའི་གནས་དེར་གོ་ཡུལ་དོགས་ན་ཁང་པ་གཞན་དུ་མཆོད་གཏོར་རྒྱས་བསྡུས་གང་ལྕོགས་ལ་བརྟེན་ནས་འདོན་ཆོག་གོ །དགོང་མོ་ནས་བཀའ་བརྒྱད་དབང་ཆས་བཤམ་ལ། ཉིན་གསུམ་པར་ལས་བྱང་བདེ་རོལ་གྱིས་བསྒྲུབས་ལ་མདོ་བྱང་ཆེན་མོའི་དབང་རྫོགས་པར་བསྐུར། རྗེས་ཆོག་གྲུབ་ནས་དེའི་ཆས་བསྡུས་ལ་ཀར་གླིང་ཞི་ཁྲོའི་དབང་ཆས་བཤམ། ཉིན་བཞི་པར་དེའི་དབང་བསྐུར་བ་ནས་བརྩམ་གྲངས་གང་ཐོན་བྱ་བ་ལས་སྤར་བཀབ་མེད། རཏྣའི་ཚེ་སྒྲུབ་གསང་བ་འདུས་པའི་དབང་རྗེས་སུ་བཞག །དབང་ཁྲིད་ཡོངས་རྫོགས་གྲུབ་པའི་ཉིན་རྡོར་སེམས་ཆོ་ག་རྒྱས་པར་བཏང་ཞིང་སྒྲུབ་པའི་དངོས་གྲུབ་བླང་བའི་ཚེ་སློབ་དཔོན་གཞན་གྱིས་མཆོག་གི་སྦྱིན་སྲེག་བྱ་ཞིང་། དེ་ནས་དབང་དང་ཁྲིད་བཅས་རྫོགས་པར་བྱ། གཏོར་མ་བཏང་བ་སོགས་རྗེས་རིམ་རྣམས་བྱ། ཕྱིར་ཉིན་སྔ་བར་ཚེ་གསང་དབང་ཆས་བཤམ་ནས་ལས་བྱང་གིས་བསྒྲུབས་ལ་ཚེ་དབང་རྒྱས་བསྡུས་རྣམས་ཀྱིས་མཐར་དགེ་བྱས་ཏེ་དེའི་རྗེས་ཆོག་དང་། སྒྲུབ་པའི་ཐོ་འགྲོལ་སོགས་སྒྲུབ་ཁོག་ལས་འབྱུང་བ་ལྟར་མཐའ་རྒྱས་སུ་བྱ་བ་ཡིན་ནོ། །གཉིས་པ་སྤྲོས་འབྱོར་ལོངས་ཁོམས་མེད་པ་དག་གིས་སྒྲུབ་ཆེན་དང་མི་སྦྲེལ་བར་ཅི་བདེར་བསྐུར་ན། ཐོག་མར་བཀའ་བརྒྱད་བདེ་འདུས་ཀྱི་དབང་ཆེན་དངོས་སྟ་ཕྱེས་ཏེ་ཉིན་གཉིས་ལ་རྫོགས་པ་བསྐུར། འདིའང་སྒྲུབ་ཆེན་གྱི་ཁོག་དབུབ་སྦྱར་ནས་ཞག་བདུན་ལྔ་གསུམ་གྱིས་མཐའ་རྟེན་པ་སྔོན་ཏུ་གྲུབ་ན་མཆོག་ཏུ་འགྱུར། དེ་ནས་སྨིན་ལུགས་རྡོར་སེམས་ཀྱིས་དབུ་བཟུང་། མཇུག་དགོངས་འདུས་པུསྟི་ལུང་དབང་གྲུབ་ཀྱི་བར་ཉིན་རེ་བཞིན་དབང་རྒྱས་བསྡུས་དང་བསྟུན་པའི་གང་འགྲོ་རིམ་སྒྲུབ་རིམ་བསྐུར་བྱ། དེའང་ཞི་ཁྲོ་སྒྱུ་འཕྲུལ། རྩ་གསུམ། བླ་མ་ཕྱི་སྒྲུབ་སྐོར་པོད་གཞུང་ཐར་ཆགས་ལས་བསྣོན་འཕྲི་མེད་ཅིང་། བླ་མ་ནང་སྒྲུབ་ཆོས་དབང་གསང་འདུས་དབང་ཆེན་རྗེས་སུ་འདོད་བུམ་ལས་འབྱུང་བའི་ཟླུམ་པོ་བཞི་དང་གཏོར་དབང་བསྐུར་བས་མཚོན་དཀར་ཆགས་ལྟར་མ་བུ་ཕན་ཚུན་མཉམ་སྦྲགས་ཀྱིས་རྫོགས་པར་བྱ་དགོས་ཏེ་འདི་ཉིད་འདོད་བུམ་གྱི་རྒྱབ་ཆོས་ལྟ་བུ་ཡིན་པས་སོ། །ཚེ་སྒྲུབ་གསང་འདུས་དབང་རྗེས་སུ་བཞག་ནས་གོང་སྨོས་ལྟར་མཐར་དགེ་བྱེད་པ་ལེགས་སོ། །དེ་ལྟར་ལག་ལེན་རྒྱས་བསྡུས་གང་བྱེད་ཀྱང་། ཞི་ཁྲོ །བླ་མ་ཞི་བ། དྲག་པོ། འཇམ་དཔལ་སོགས་སྡེ་ཚན་རེ་རེའི་མགོར་དངོས་སྟ་ཕྲལ་ནས་ཞག་གིས་བར་བཅད་མ་བཅད་གང་ཡང་རུང་བ་ལ་དཔུང་སྐུད་ཀུ་ཤ་དངོས་སུ་སྦྱིན་པ་སོགས་ཕྱག་ལེན་རྒྱས་པའི་ཕྱོགས་གྲུབ་ན་ལེགས་ཤིང་། མི་འགྲུབ་ན་དཔུང་སྐུད་ཀུ་ཤ་རྣམས་དངོས་སུ་མི་སྦྱིན་ནས་འགྲིམས་པ་སྨིན་གླིང་སོགས་ཀྱི་ཕྱག་ལེན་ཡིན་ཞིང་དངོས་སྟ་ཞག་གིས་བར་མ་བཅད་ན་དེ་དག་དངོས་སུ་སྦྱིན་པ་ལ་དགོས་པ་ཆེར་མེད་པས་དབང་རྒྱུན་ཙམ་ལ་ཁྱད་པར་མེད་པར་གོ །སྡེ་ཚན་སོ་སོའི་དབུར་འབྱུང་བའི་གཙོ་ཆེ་བ་རེའི་སྒྲུབ་མཆོད་ཚོགས་སྐོང་ཡང་རྒྱས་པར་གྲུབ་ན་གལ་ཆེ་ཞིང་སྒྲུབ་བསྐུར་རེ་རེ་བཞིན་ལས་ཐབས་མེད་པ་སྨོས་མ་དགོས། དབང་སྒྲུབ་ཐམས་ཅད་ལའང་བསྙེན་བཟླས་བརྒྱ་རྩ་ལས་མི་ཉུང་བ་དང་། བུམ་བཟླས་ཟུར་དུ་དགོས་རིགས་ལའང་དེ་ལྟར་བྱ། གཏེར་སྲུང་སྒོས་མཆོད་ཡོད་རིགས་སོ་སོའི་ཐད་ཀར་སྦྱར། དམིགས་བསལ་མེད་པ་ལ་དགོང་མོར་ལས་བྱང་རྗེས་མ་དང་འབྲེལ་བར་དམ་ཅན་སྤྱི་གཏོར་གཏེར་གཞི་བཅས་ཚར་རེ་མ་བཏང་ཐབས་མེད་པས་དེ་ཀས་འཐུས་པར་བྱེད། བདག་འཇུག་རེ་རེ་བཞིན་མི་ལྕོགས་པས་ཏིང་འཛིན་དབང་ལེན་སོགས་དམིགས་བསལ་བཤད་པ་རྣམས་དེ་ཀས་འཐུས་ཤིང་། སྤྱི་ལ་རིག་པའི་མེ་ཏོག་དོར། གང་ལའང་སློང་མ་གཞུག་པར་གནང་བ་ཞུ་བ་མ་ཆད་པ་གལ་ཆེ། དབང་ཕྲན། རྗེས་གནང་། སྲོག་གཏད་སོགས་ཟོར་ཡངས་པའི་རིགས་རྣམས་གསུམ་བདུན་ལྔ་སོགས་དུས་གཅིག་ལ་བསྒྲུབ་བསྐུར་མཉམ་དུ་བྱེད་པ་རྙིང་མ་སྤྱིའི་ལུགས་ཡིན་ལ་དོན་དང་མི་འགལ་ཞིང་སླ་བས་དེ་ལྟར་བཤམ་སྒྲུབ་སོགས་བྱ། ཆོས་སྐྱོང་སྲོག་གཏད་རྣམས་ཤིན་ཏུ་གཉན་པས་དམ་ལྡན་གཏོར་འབུལ་སོགས་མ་ཆག་པ་བྱེད་མཁན་མ་གཏོགས་ཁྱབ་བརྡལ་དུ་སྤེལ་མི་རུང་། སྤྱིར་དྲག་སྔགས་མངོན་སྤྱོད་སྐོར་རྣམས་དང་། རྒྱུད་བཅུ་བདུན་གྱི་དབང་། ཁྲོས་མའི་གསང་རྒྱུད་སོགས་ནི་རིག་འཛིན་བརྒྱུད་པ་བར་མ་ཆད་པ་རྣམས་ཀྱིས་བརྒྱུད་འཛིན་དམ་ལྡན་གཅིག་གམ་གསུམ་ལས་མི་སྤེལ་བ་ཕྱག་ལེན་གྱི་མཐའ་ཅན་ཡིན་པས་དབང་ལུང་ཕལ་ཆེར་གྲུབ་པའི་སྐབས་སམ་ཡོངས་རྫོགས་གྲུབ་པའི་རྗེས་སུ་དེ་ལྟར་སྤེལ་མཁས་སུ་བྱའོ། ཁྲིད་ཐམས་ཅད་སོ་སོའི་དབང་བསྐུར་གྲུབ་པའི་རྗེས་སུ་བཤད་དགོས་པས་རྡོར་སེམས་དང་ཀར་གླིང་ཞི་ཁྲོ་ལྟ་བུའི་དབང་གྲུབ་རྗེས་མཚམས་སྦྱོར་བཅས་མཎྜལ་ཕུལ་ལ་ཁྲིད་ཡིག་ཉིད་དལ་བུས་གོ་བརྡ་འཕྲོད་པར་བཀླག་ནས་དགེ་བསྔོ་སོགས་བྱ། འདི་ཕྱིན་ཆད་ཀྱི་ཁྲིད་རྒྱུན་ཡོད་ཚད་ལ་དེས་འགྲེ །འདི་ལ་བཤད་ཁྲིད་དམ་ཁྲིད་ལུང་སྒྲགས་མ་ཟེར། བཤད་མི་ཤེས་མཁན་ནས་ཉབ་ཉོབ་མང་པོ་བཤད་ན་དོན་འབྲས་མེད་ཅིང་ཉི་མ་འཕུལ། བཤད་ཤེས་མཁན་ཡིན་ཡང་དོན་རྩ་ཁྲིད་ཡིག་ནང་མ་འདུས་པ་མེད་ཅིང་རྣམ་གྲངས་མང་པོ་རྫོགས་ཐབས་མེད་པས་འདི་ཡིས་གོ་ཆོད་པར་བྱེད། སྤྱིར་ཁ་བཤད་དཔེ་ཀློག་གང་བྱེད་ཀྱང་སྒོམ་དོན་ཡིད་ལ་ངེས་ཤིང་གོ་བརྡ་འཕྲོད་པ་ཁྲིད་ཀྱི་མཚན་ཉིད། ཚིག་དོན་རེ་རེ་བཞིན་ཡིད་ལ་ཟིན་མི་དགོས་པར་སྒྲ་ཐོས་ཀྱི་ཤེས་འཇུག་བར་མ་ཆད་པ་ཙམ་ལུང་གི་མཚན་ཉིད་ཡིན་པ་ཆོས་སྤྱན་ལྡན་པའི་བླ་མ་དག་བཞེད་པས་དེ་དག་གི་གནད་ཀྱང་ཤེས་པར་བྱ་དགོས་སོ། །ལས་བྱང་བསྒྲིགས་མ་མེད་རིགས་ལ་སྐྱབས་སེམས་བགེགས་གཏོར་གྱིས་མཚོན་པའི་སྔོན་རྗེས་ཡན་ལག་སྦྱོར་འོས་རྣམས་ལས་བྱང་བདེ་རོལ་ལྟ་བུ་སྤྱིར་སྨིན་ལུགས་ཤིག་དང་བསྟུན་ན་ཟོར་ཡངསབས་ལེགས་ཤིང་། བྱེ་བྲག་གཏེར་ཁ་ལྷོ་བྱང་དབུས་གསུམ། ཁམས་ལུགས་ཐ་དད་པ་རྣམས་སོ་སོའི་རང་ལུགས་དང་བསྟུན་ཤེས་ན་མཆོག་ཏུ་འགྱུར་ཏེ། དཔེར་ན་མཆོག་གླིང་ཟབ་བདུན་གྱི་རིགས་ལ་ས་བཅད་སྡེ་ཚན་གསང་སྔགས་སྤྱི་ཆིངས་ཀྱི་སྐོར་ལ་ཡོད་པའི་སྔོན་འགྲོ་དང་མཇུག་གི་སྤྱི་ཆིངས་སྦྱོར་དགོས་པས་མཚོན་ནོ། །བཀླག་ལུང་ནི་དབང་གི་བར་བར་དུ་གྲུབ་ནའང་ལེགས་ཤིང་མི་ལྕོགས་ན་དབང་རྣམས་གྲུབ་ཟིན་པའི་རྗེས་སུ་དཀྱུས་གཅིག་ཏུ་བཀླག་པས་ཆོག་གོ ༈ །གཉིས་པ་འདིའི་སྐབས་སུ་ཉེ་བར་མཁོ་བའི་ཡོ་བྱད་སྔ་ཚགས་སུ་བྱ་དགོས་པ་ནི། དཀྱིལ་འཁོར་སྒོ་རྫོགས་ཡོད་པ་རྣམས་དང་པདྨ་ཆོས་འབྱུང་སོགས་མཎྜལ་རིགས་ཀྱི་རས་བྲིས། ཙཀ་ལི་ཚང་བ་བཅས་མེད་ཐབས་མེད་པས་དེ་དག་ཚོགས་པ་གཞིར་བྱས། རྒྱུད་དང་གཞུང་པོད་ཀྱི་གླེགས་བམ་སོ་སོ་ལ་མཁོ་བ་འཛོམ་ན་རབ། མ་འཛོམ་ན་རྒྱུད་གསང་སྙིང་ཙམ་དང་སོ་སོའི་སྒྲུབ་ཐབས་ཀྱི་ཡི་གེ་དར་གྱིས་དྲིལ་བ། བཏགས་གྲོལ་འཁོར་ལོ་དང་གླེགས་བམ། མཐོང་གྲོལ་ཀློང་སྙིང་རིག་འཛིན་སྲོག་འཁོར། ཚེ་འཁོར་དང་སྲུང་འཁོར་སྤྱི་འགྲོ །གདུགས་དཀར་འཁོར་ལོ། ཆོས་སྐྱོང་རྣམས་དང་རྣམ་སྲས་ཛམ་དམར་སོགས་ཀྱི་སྲོག་འཁོར་བླ་རྡོ། སྡེ་བརྒྱད་བླ་རྡོ་སོ་སོ་ཡོད་དགོས་ཀྱང་མ་འཛོམ་ན། མགོན་པོ་སྤྱི་ལ་གྲི་སྙིང་བསྲེས་པའི་སྙིང་གཟུགས་ཚོན་བཏང་བའི་ནང་དུ་སྒྲུབ་ཁང་བྱང་ངོས་ནས་རྡོ་ནག་གྲུ་གསུམ་ལག་པ་མ་རེག་པ་གྲི་ལྕགས་གྲི་གུག་གམ་གྲི་རྩེས་བླངས་པ་ལ་ཧཱུྃ་བྲིས་པ་དང་། བཀའ་རྒྱ་མར་བཀོད་པའི་མགོན་པོ་སྤྱིའི་སྲོག་འཁོར་བཅས་དར་མཐིང་ནག་གིས་དྲིལ་ནས་གྲི་ལྕགས་གའུ་ཟུར་གསུམ་དུ་བཙུད་པ། ལྷ་མོ་སྤྱི་ལ་མཚོ་རྡེལ་སྔོན་པོ་ལག་པས་མ་རེག་ཅིང་གནམ་གྱིས་མ་མཐོང་བར་བླངས་པ་ལ་བྷྱོ་བྲིས་པ་དང་མ་མོ་སྤྱིའི་སྲོག་འཁོར་དར་གྱིས་བཏུམས་པ། ཆོས་སྐྱོང་སྡེ་བརྒྱད་སྤྱི་ལ་ཕ་ཝཾ་ལོང་བུར་མཚལ་གྱིས་ཏྲི་བྲིས་པ་རྣམས་དང་། རྫས་ཆའི་རིགས། བྱང་གཏེར་ཐུགས་སྒྲུབ་ཀྱི་གཏུམ་མོའི་མེ་དབང་དང་སྐུ་གསུམ་རིགས་འདུས་ཀྱི་ཚ་རྫས་གྲང་རྫས། ཐུགས་ཆེན་རྒྱལ་པོ་ལུགས་ཀྱི་བདུད་རྩི་རིལ་བུ། དྲག་ཁྲོས་དང་ཁྱུང་གསང་བ་ཡང་ཁོལ་རྫས་རྒོད། བདུད་རྩི་བུམ་པའི་རྫས་ཐུམ་དང་རྡོ་རྗེ་ཁྲབ་རིང་འཁོར་ལོ། གཟའ་ཡུམ་བུམ་རྫས། ཁྱུང་ལྔ་ཚད་སྦྱར། འཇམ་དབྱངས་དང་ཕག་དཀར་ཤེས་རབ་རིལ་བུ། དབྱངས་ཅན་མའི་བཞི་མཉམ་སོགས་སོ་སོའི་གཞུང་མཐུན་བསྡུ། དམིགས་བསལ་སྐུ་བརྙན་དགོས་པ་འགའ་རེ་དང་ཛམ་དམར་སྐུ། སངས་གླིང་ཐུགས་ཆེན་རྒྱལ་པོ་ལུགས་ཀྱི་རྟ་ཞལ་ནང་གཞུག་ཅན། མྱང་གྲོལ་རིལ་བུས་བཀང་བའི་བུམ་པ་དབུ་རྒྱན་བཅིངས་པ། ཡང་དག་ཐོད་སྐུ། སྨན་གྱི་ཕོ་བྲང་ཚུལ་བཞིན་བཅས་པ། ཕུར་ཁྲོམ་རྒྱས་བསྡུས་གང་འཛོམ། གཡུ་ཐོག་སྙིང་ཐིག་གི་སྨན་ཁྲོལ་བུ། རྒྱུད་བཞི། གཏར་སྲེག་ཆས། ལྷ་སྨན་དང་དྲང་སྲོང་བཀའ་གཏད་ཆས། ལྕགས་ཕུར་ཁྲོ་ཞལ་ཅན། སེང་ལྡེང་ཕུར་པ་རེ་ཟུང་། སྦ་ལྕགས་ཚིགས་གསུམ། ལྕགས་རྡོར། དུག་ཁྲག །རྭ་སྲུང་། ཚེ་བདག་རྭ་ཟོར། འུར་རྡོ། ཁྲོ་ཆུའི་སྲོག་འཁོར་དང་སྐྱེས་ཕུར། བཙན་དུག །མཆོད་རྟེན་ནམ་སཱཙྪ་དཀར་ནག་རྣམས་དང་། བུམ་རྫས་དྲི་བཟང་དང་ཉེར་ལྔ་སོ་ལྔ་ཕྱོགས་བསྡུས་བྱས་པ་སྣེ་གཉིས། ཞི་ཁྲོ་སོགས་ལ་མཁོ་བའི་སྙིང་པོ་ལྔ། སྨན་ལྔ། རིན་ཆེན་ལྔ། དྲི་ལྔ། འབྲུ་ལྔ་སོ་སོར་བྱས་པ། བྱང་སེམས་དཀར་དམར། ཤ་ལྔ། བདུད་རྩི་ལྔ་སོ་སོའི་རིལ་བུ། སིནྡྷུར། ལི་ཁྲི། ཆོས་སྨན། རྩ་བརྒྱད་སྟོང་སྦྱར་དང། རཀྟ་སོ་ལྔ། གཏོར་མའི་སྤོད་སྨན། བཟང་དྲུག་སོགས་སྨན་སྣ། ཚེ་རྫས་ཕུར་མ། བྱིན་འབེབས་སྦྱར་སྤོས། མ་མགོན་སོགས་སྤོས་སྦྱོར། བ་བྱུང་ལྔ་སོགས་གཙོ་བོར་སློབ་དཔོན་ཉིད་ཀྱིས་སྔ་ནས་ཚགས་སུ་ཚུད་པར་བྱ་དགོས་ཤིང་། སྟ་གོན་རྫས་སོ་ཤིང་དེ་དོར་བའི་གདན་རས་བྲིས་པདྨ་འདབ་བརྒྱད་དང་། ཀུ་ཤ །དཔུང་སྐུད་ཁ་དོག་སོ་སོ་ལས་འབྱུང་བ་ལྟར་རམ། ཐོག་མར་བཀའ་བརྒྱད་བདེ་འདུས་སྟ་གོན་ལ་ཀུ་ཤ་དང་དཔུང་སྐུད་ལུས་ཚད་སུམ་བསྒྲིལ་ཁ་དོག་སྔོན་པོ་སློབ་མའི་གྲངས་མཉམ། གཞན་རྣམས་ཀྱི་སྐབས་སུ་འགྲིམ་རྒྱུའི་ཀུ་ཤའི་ཆུན་ཆེན་པོ་རྒྱ་གྲམ་དུ་བཅིངས་པ་དང་། དཔུང་སྐུད་ཁ་དོག་ལྔ་པ་གོང་གསལ་ཚད་ལྡན་རྡོ་རྗེའི་མདུད་པ་གསུམ་བཏབ་པ་རེ་རེ། མིག་དར་དང་ཅོད་པན་ཁ་དོག་ལྔ་པ་སློབ་མའི་གྲངས་མཉམ། དེ་དོར་བའི་གཞི་རས་ལ་ཕྱོགས་བཞི་དབུས་ལྔར་ཕྱག་རྒྱ་ལྔ་བྲིས་པ། མིག་ཐུར། ཕྱག་ཤིང་། བུམ་པ་ཁ་རྒྱན་མགུལ་ཆིངས་ལྡན་པ་བཅུ་ལས་མི་ཉུང་བ། གཟུངས་རྡོར། དུང་ཆོས་གཉིས་གསུམ། དབུ་རྒྱན། རྡོ་རྗེ། དྲིལ་བུ། རྡོར་དྲིལ་ལྷན་ཅིག་བཅིངས་པ། མེ་ལོང་ཁ་ཤས། ཤེལ་རྡོ་སྟེགས་ཅན་ཆེ་ཆུང་གཉིས་གསུམ། བནྡྷ་མཚན་ལྡན་ཁ་ཤས་དང་མོ་ཐོད་གཅིག་ཙམ། དར་ཁ་དོག་སྣ་ཚོགས་གང་འཛོམ། དབང་ཕྲེང་དུང་ངམ་ཤེལ། པད་རཱག །རཀྴའམ་ཐོད་ཕྲེང་། གདབ་ཕུར་ཆེ་ཆུང་། གྲི་གུག །ལྕགས་ཧོམ། བྱ་འུག་སྒྲོ་ཐོ་བ་སྒྲོལ་གྲི་གཏུན་ཁུང་སོགས་བསྒྲལ་ཆས་ཚང་བ། ཐོད་ངན་དུ་ཐུན་རྫས་སྣ་ཚོགས། ཟློག་འཁོར་སྤྱི་འགྲོ །འཚེ་ཡུངས་རྩང་སོགས་ཟོར་ཆས། དུར་རྡོ་རྒྱ་གྲམ་ཕུང་རེ་བྱད་ཐག་ཐོད་ངན་མནན་ཆས། རྗེས་གནང་ལ་མཁོ་བའི་གདུགས་དང་ཕྱག་ཤིང་འཁོར་ལོ། མེ་དབང་ལ་རས་གོས་སྒོམ་ཐག་ཨང་རག་རྣམས་ཀྱང་གལ་ཆེ་སྐབས་དངོས་འཛོམ་ན་ལེགས། བྱང་གཏེར་དུག་སྲུང་རྡོ་རྗེ་ཕ་ལམ། མངའ་དབང་རིན་ཆེན་འབར་བ། འཇོམས་བྱེད་རྩལ་ཆེན་སོགས་ཁྱད་པར་བ་རྣམས་ཀྱི་དགོས་བྱའང་སོ་སོའི་སྐབས་སུ་བཤད་པ་ལྟར་སྔ་ཚགས་སུ་ཚུད་པ་བྱ། གཡབ་དར་དམར་ནག་གཉིས། དགང་གཟར་བླུགས་དང་སྦྱིན་སྲེག་ཆས་རྫས་ཆེན་བཅུ་གཅིག་སོགས། རྡུལ་ཚོན་སྣ་ལྔ། གུལ་གུལ། ཡུངས་ཀར། ཏིལ་ནག །སྒྲུབ་ཆེན་དང་སྦྲེལ་ན་དེའི་ཆས་སྒབ་སྐོར་རལ་གྲི་བཞི་མདའ་བཞི་ཕུར་བུ་བཅུ་བཞི་སྟེགས་བཅས་རྒྱལ་ཐོ་སོགས་དང་། མི་སྦྲེལ་ཡང་དཀྱིལ་འཁོར་གྱི་རྒྱན་རྒྱལ་མཚན་བཞི་དར་འཕན་བཞི་སོགས་བཀོད་ན་ལེགས་པས་གང་འཛོམ། སྨན་རཀ་དང་ཞི་མཆོད་དྲག་མཆོད་སྣོད་སྒྲོན་ཐུར་བཅས། ཆང་ཕུད། ཡོལ་བ། ཚེ་མདའ། དབང་སྐབས་ཉེར་མཁོའི་སྨན་རག་གཏོར་གསུམ་ཆུང་ངུ་སྣོད་གཅིག་ཏུ་བཞག་པ། ཕྱི་མཆོད་རྣམ་བདུན་གཅིག་ཏུ་བསྒྲིགས་པ། སྟེགས་ཁེབས་ཆེ་ཆུང་། ཌཱ་དྲིལ་རྐང་གླིང་། རོལ་ཆས་སོགས་མདོར་ན་འོག་ཏུ་དགོས་པ་རྣམས་ཐད་ཀར་སླེབ་དུས་མ་ཤོལ་བར་ཞིབ་པར་བསྒྲིག །དགོས་ཆས་འདང་ངེས་ཀྱི་མཆོད་ཕྱེ་གཙང་མ། མར། མཆོད་འབྲུ་བུང་མང་། མར་མེ་སྟོང་མཆོད་ལས་མི་ཉུང་བ། སྤོས་རེང་ངམ་སྤོས་ཕྱེ་དྲི་ལྡན། དཀར་གསུམ། མངར་གསུམ། ཟས་སྣ། གོས་སྣ། ཆང་ཕུད། གཏོར་ཤ་གཙང་མ་རྣམས་ཀྱང་ཚོགས་པར་བྱའོ། ༈ །གསུམ་པ་བྱེ་བྲག་སོ་སོའི་གཤོམ་བཀོད་བཤད་པ་ལའང་། ཐོག་མར་དབང་བསྐུར་ཚུགས་ཉེ་བའི་ཉིན་སྔ་མ་རྣམས་སུ་བཀའ་བརྒྱད་རྡོར་སེམས་ཀྱིས་མཚོན་པའི་གཏོར་མ་འོག་ཏུ་དགོས་པ་རྣམས་ལས་ཐོག་མར་མཁོ་བ་རྣམས་དང་། སྤྱི་འགྲེ་ཆོག་པ། བླ་གཏོར་རམ་ཞི་གཏོར། དཔལ་གཏོར་རིགས་གཉིས། ཟུར་གསུམ་དམར་པོ་རྒྱན་ལྡན་སོགས་ལྔ་བདུན་རེ་ཙམ། ཚེ་འབྲང་ཤིང་ལོ་དང་ཉི་ཟླའི་ཁ་རྒྱན་ཅན་ཁ་ཤས་རྣམས་མར་ཟན་གྱིས་བཅོས་ཏེ་ཚོན་དང་རྒྱན་སྤྲོས་སྤུས་ལེགས་བྱ། རྩ་གསུམ་སྤྱི་དང་ཁྱད་པར་ཆོས་སྲུང་གཏེར་སྲུང་རྣམས་རེ་རེ་བཞིན་འཕྲལ་འཕྲལ་གཤོམ་པ་མ་ལྕོགས་ན། བླ་མ་ཡི་དམ་མཁའ་འགྲོ །ཆོས་སྐྱོང་དངོས་གྲུབ་རོལ་མཚོ་རྗེས་འབྲང་དང་བཅས་པའི་གཏོར་མ་ལེགས་པར་བཞེངས། ལས་བྱང་ལ་དགོས་པའི་མཆོད་གཏོར་རིགས་ཚང་བར་བཅའོ། །དངོས་གཞི་ཚུགས་པའི་ཐོག་མར་གནས་ཁང་ཕྱགས་དར་བྱ། རྩ་བ་གསུམ་གྱི་སྐུ་གསུང་ཐུགས་ཀྱི་རྟེན་བྱིན་རླབས་ཅན་རྣམས་དང་། ཆོས་སྐྱོང་གི་རྟེན་སོགས་བཀྲམ། བླ་བྲེ་དར་འཕན་སོགས་རྒྱན་གྱི་བཀོད་པས་མཛེས་པར་བྱ། སྒྲུབ་ཆེན་དང་སྦྲེལ་ན་སྔོན་འགྲོ་ས་ཆོག་ཕྱི་ནང་མཚམས་གཅོད་ནས་བཟུང་། རྗེས་ཀྱི་བྱ་བ་རྣམས་གྲུབ་ཀྱི་བར་ལག་ལེན་དེའི་ལུགས་བྱ་དགོས་ཀྱང་འདིར་ཡི་གེས་འཇིགས་པས་མ་སྤྲོས་ལ། སྐབས་དེར་ནི་དཀྱིལ་འཁོར་ལྡིང་ཁྲི་བརྩེགས་མར་བྱས་པའི་འོག་ཏུ་རྡོར་སེམས་དཀྱིལ་འཁོར་རྒྱུན་བཞག་གི་མཐའ་སྐོར་དུ་ཕྱི་ནང་མཆོད་པ་བརྒྱ་རྩ་སོགས་བསྒྲིག །སྟེང་མར་སྐབས་སོ་སོའི་དཀྱིལ་འཁོར་དབང་རྫས་རྣམས་རེས་མོས་སུ་བཤམ། སྒབ་བསྐོར་སོགས་ཀྱི་ཆས་རྣམས་སྤྱི་ལྟར་བྱ་བ་ཡིན་ནོ། །སྒྲུབ་ཆེན་དང་མ་འབྲེལ་ན་སྟེགས་བུ་རྒྱ་ཆེ་བ་ཁེབས་བཟང་པོས་བཀབ་ཅིང་། དབང་མང་པོ་སྦྲེལ་སྐབས་དཀྱིལ་འཁོར་དང་དབང་རྫས་རྣམས་ཤོང་ངེས་པའི་ཟུར་བཞིར་རྒྱལ་མཚན། ལོགས་བཞིར་འཕན་གཟུག །སྟེང་དུ་བླ་བྲེ་དར་དཔྱངས་ཀྱིས་མཛེས་པར་བརྒྱན། དེ་སྟེང་དཀྱིལ་འཁོར་གང་ཡིན་བཀྲམ་པའི་དབུས་སུ་བུམ་གཏོར་བརྩེགས་མར་འགོད་དགོས་པའི་རིགས་ལ་འཕྲུལ་སྟེགས་རིམ་པ་གཉིས་པ་བླང་བཞག་བདེ་བ་དང་། བུམ་གཏོར་གང་རུང་འཇོག་དགོས་པ་སྤྱི་དང་སྐུ་ཚབ་བཞུགས་གདན་སོགས་རྐང་གསུམ་འཇོག་དགོས་པས་དེའང་གྲངས་ཀ་མང་དུ་བསྡོགས། གལ་ཏེ་དཀྱིལ་འཁོར་རས་བྲིས་མི་འཛོམས་པའི་དབང་བྱིན་རླབས་ཆུང་ངུའི་རིགས་ལ་མཎྜལ་སྟེང་ཚོམ་བུ་ལྷ་གྲངས་བཀོད་ཀྱང་ཆོག་མོད། ཚོམ་བུའང་ཚོན་གྱིས་ཁ་བསྒྱུར་བའི་འབྲས་ལ་མར་གྱི་སྙིང་པོ་བྱས་ཏེ་ལྷ་མདོག་དང་མཚུངས་པའི་ཆེ་ཆུང་མང་པོ་གྲུབ་ན་ལེགས། བུམ་པ་ལ་གསར་མའི་ལུགས་སུ་གོས་བཟང་པོ་དང་སྲད་བུ་སོགས་ཀྱིས་དཀྲི་བ་ལས་དམིགས་སུ་མ་གསུངས་ཀྱང་། རྙིང་མ་གཏེར་མའི་ཕྱོགས་ཕལ་མོ་ཆེར་མགུལ་ཆིངས་དམིགས་བསལ་དུ་བཤད་ཅིང་ད་ལྟ་ཕྱག་ལེན་དུའང་མཛད་པས། དམིགས་སུ་མ་བཤད་པ་རྣམས་ལའང་མགུལ་ཆིངས་ལྷ་གཙོ་བོའི་སྐུ་མདོག་དང་མཐུན་པར་བཅིངས། བུམ་རྫས་ཀྱང་སྤྱི་ཁྱབ་ཐམས་ཅད་བླ་མེད་ཁོ་ན་ཡིན་པས་སོ་ལྔ་འབའ་ཞིག་དང་དྲི་བཟང་གི་ཆུ་སྦྱར། ཚེ་དབང་ཕལ་ཆེར་དང་། འཇམ་དབྱངས་ལྟ་བུ་དམིགས་བསལ་ཅན་ལ་ཉེར་ལྔ་འདེབས། བྱིན་རླབས་ཀྱི་རིགས་སོགས་ཀྱི་ཐོད་པའི་བདུད་རྩི་ཆང་དང་བདུད་རྩི་ཆོས་སྨན་སྦྱར། རིག་ཙཀ་ཡོད་པའི་དབང་བཞིའི་རིགས་རྣམས་ལ་དེ་སྟེང་མངར་གསུམ་རོ་བྲོ་ངེས་པར་བྱ། ཚེ་དབང་གི་རིགས་ལ་ཚེ་རིལ་ཚེ་ཆང་མངར་གསུམ་དང་སྦྱར་ཞིང་། ཡོད་ན་ཚེ་རྫས་ཕུར་མའང་འདེབས། དབང་གི་བགེགས་བསྐྲད་ལ་གུ་གུལ། བྱིན་འབེབས་ལ་འཛོམ་ན་འབེབས་རྫས། མེད་ན་སྦྱར་སྤོས་དྲི་ཞིམ་པ་བདུག་པ་སོགས་མ་ཆད་པར་བྱའོ། །མིག་དར་མེ་ཏོག་སོགས་ཀྱང་བླང་བཞག་བདེ་བར་བྱས་ཏེ་ནམ་དགོས་ཀྱི་སྐབས་མཎྜལ་མེ་ཏོག་བཀྲམ་སྡུད་དང་ལྷན་ཅིག་གཏད་ཆོག་པར་བྱ། བཀའ་བརྒྱད་ལྟ་བུའི་དབང་ཆེན་མཚམས་སྦྱར་ཡོད་རིགས་ལ་དེ་དག་བླ་མས་བརྡ་སྤྲད་པ་དང་མཉམ་དུ་འགྱེད་དགོས། སྤྱིར་འདི་དག་གི་སྐབས་སུ་ལས་རྡོར་བསླབ་ཤེས་གོ་བ་ཕྱག་ལེན་ཞིབ་པ་ཞིག་གིས་བཤམ་བཀོད་རྣམས་སྔ་མ་གྲུབ་བསྟུན་དེའི་ཆས་རྣམས་བསྡུ་ཞིང་། ཕྱི་མ་རྣམས་འཕྲལ་འཕྲལ་མི་ཤོལ་བ་བསྒྲིག་ཐུབ་པ་དགོས། མཆོད་གཡོག་ལག་བདེ་ཞིག་གིས་ཉིན་རེའི་མཆོད་གཏོར་དཀར་བགེགས། ཆོས་སྲུང་རྒྱུན་འབུལ་གཏེར་གཞི། ལས་བྱང་རེ་རེ་བཞིན་གཏོར་གསོས་ཐེབས་ཀྱུ། ཞལ་ཟས། ཚོགས། ཆད་བརྟན་སོགས་སྤྱི་དང་། བྱེ་བྲག་གང་དགོས་རྣམས་བཅའ་འོ། །ལག་ལེན་རྒྱས་བསྡུས་གཉིས་ཀ་ལའང་གནས་ཁང་གོ་ཡུལ་ཡངས་ན་སྒྲུབ་དཀྱིལ་དང་བར་མཚམས་བྱེ་བའི་རྒྱབ་ཕྱོགས་སུ་སྟེགས་བུ་རིམ་པ་གསུམ་པའི་བསྟར་དང་པོ་ལ། བླ་མ་ཡི་དམ་མཁའ་འགྲོ་ཆོས་སྐྱོང་ཕོ་མོ་ནོར་ལྷ་ཕྱི་རྒྱུད་བཅས་ཀྱི་གཏོར་མ་བདུན་ཚར། གཡས་གཡོན་དུ་སྨན་རཀ་ཕབ་ལྡན། གཉིས་པར་དངོས་རོལ་རྗེས་འབྲང་ཆད་བརྟན་རྒྱུན་བཞག་བཅས། གསུམ་པར་ཞི་མཆོད་དྲག་མཆོད་མཇུག་སྤྲོད་དུ་བཤམས་པའི་བར་དུ་མཉྫི་ལ་ཆོས་སྐྱོང་གཏོར་སྤུངས་རྒྱུན་འབུལ་བཀོད། འདི་དག་ནི་མཆོད་གཏོར་སྤྱི་ཁྱབ་པ་ཡིན་པས་གཏོར་འབུལ་ནམ་བྱེད་ལ་ཐེབས་ཀྱུ་སོགས་ཀྱིས་གསོ་བ་དང། མཆོད་པ་ཉིན་རེ་བཞིན་བརྗེ། ལས་བྱང་སྔ་ཕྱིའི་བར་མཚམས་ལྟ་བུ་ལ་ཁ་གསོ། གོ་ཡུལ་གྱིས་འདི་ལྟར་མ་ཤོང་ནའང་དཀྱིལ་འཁོར་སྒེ་མཆོད་དང་གཏོར་མ་བཤམ་དགོས་པས་དེ་ཀས་འཐུས་སོ། ༈ །དེ་ནས་དབང་བསྐུར་སོ་སོ་དང་འབྲེལ་བའི་གཤོམ་བཀོད་ལག་ལེན་དངོས་ཀྱི་དང་པོ། བཀའ་བརྒྱད་བདེ་འདུས་ཀྱི་དབང་ཆེན་ལའང་སྒྲུབ་དབང་ལུགས་སུ་བྱེད་ན་ལག་ལེན་སྤྱི་ལྟར་བྱ། མགྱོགས་དབང་བྱེད་ན། སྟ་གོན་རྫས་བཞི་སོ་ཤིང་གི་ར་བ་བཅས་ཅོག་སྟེགས་ལྟ་བུར་བཀོད། སྟེགས་བུར་རས་བྲིས་ཀྱི་དཀྱིལ་འཁོར་བཀྲམ་པའི་དབུས་སུ་མཉྫིའི་སྟེང་རྣམ་རྒྱལ་བུམ་པ་མགུལ་ཆིངས་དམར་སྨུག་ཅན། དྲི་བཟང་ཆུ་དང་སོ་ལྔས་བཀང་བ་ཁ་རྒྱན་གཟུངས་རྡོར་བཅས་པ། ཤར་དུ་རྡོར་དྲིལ་ལྷན་ཅིག་བཅིངས་པ་དང་འཁོར་ལོ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ་རྣམས་དར་ཆིངས་ཕྱོགས་མདོག །ཙཀ་ལི་ཚང་བ་ཚན་དུ་བཅད་པ། བུམ་དབང་། ཕྱི་ནང་རྫས་དབང་རྣམས་མདུན། ཞི་ལྷ་ཁ་རྒྱན་གསེབ་བམ་དབུས། དཔལ་དགུ་སོ་སོའི་རང་གནས། བཀའ་སྡོད་བྱང་ཤར་དུ་དགོད། གསང་དབང་ཐོད་ཆང་། ནུས་དབང་ཆས། རིག་ཙཀ །ཤེལ་རྡོ་རྣམས་དང་། ཞི་དྲག་མཆོད་པ། ཟླ་གམ། ཛ་གད། ཚེ་བུམ་རྣམས་ཀྱང་ཕྱག་ལེན་ལྟར་དགོད་ཅིང་། རྒྱབ་ཕྱོགས་སྟེགས་བུ་ཟུར་པར་མཆོད་བཤམ་མེད་ན་དཀྱིལ་འཁོར་ཉིད་ཀྱི་མདུན་རྒྱབ་གང་བདེར་སྨན་རཀ་གཏོར་གསུམ་བཤམ་དགོས་པས། འདིར་དཔལ་གཏོར་གཙོ་འཁོར་དགུ་པ་བཤམ། སྤྱིར་འདི་ཕྱིན་ཆད་ཀྱི་དཀྱིལ་འཁོར་ཐམས་ཅད་ལ་སོ་སོའི་མཆོད་གཏོར་དང་། བྱང་ཤར་མཚམས་འཛིན་མེ་ཏོག །ཤར་དུ་མཆོད་ཡོན་ནས་བརྩམས་ཏེ་མཆོད་པ་རྣམས་བདུན་བསྐོར་བཤམ་དང་། དམིགས་བསལ་མ་བཤད་པ་ལའང་ཕྲེང་ཚར་གྱི་སྒོས་མཆོད་རེ་ཆད་དུ་མི་རུང་བ་ནི་ཐམས་ཅད་ལ་ཤེས་པར་བྱ། སློབ་དཔོན་མདུན་དུ་ལས་བུམ། གཡབ་དར། ཌཱ་དྲིལ། ནང་མཆོད། གདབ་ཕུར། མེ་ཏོག་གི་སྣོད། ཐུན་ཟེ་རྣམས་འཇོག་གོ ༈ །།དེ་ནས་དཀྱིལ་འཁོར་ཐམས་ཅད་ཀྱི་ཁྱབ་བདག་དཔལ་རྡོར་སེམས་ཐུགས་ཀྱི་སྒྲུབ་པ་ལ། རས་བྲིས་སམ་མཎྜལ་ལ་ཚོམ་བུ་གཅིག་པའི་སྟེང་ཁྲིའུར་བུམ་པ། ཐོད་པའི་བདུད་རྩི། སིནྡྷུ་རའི་མེ་ལོང་ལ་ཆོས་འབྱུང་ལྟེ་བར་མཱུཾ་ཡིག་བྲིས་པ་དང་ཤེལ་རྡོ་སྟེགས་ལྡན་རྣམས་བརྩེགས་མར་འཇོག ༈ །ཀར་གླིང་ཞི་ཁྲོ་ལ། གླུད་ཟན་སློབ་མའི་གྲངས་མཉམ། སྟ་གོན་རྫས་བཞི། དཀྱིལ་ཐང་སྟེང་གཙོ་བུམ་སྨན་ལྔ་མཐིང་། ཤར་བུམ་འབྲུ་ལྔ་དཀར། ལྷོ་བུམ་རིན་ཆེན་ལྔ་སེར། ནུབ་བུམ་དྲི་ལྔ་དམར། བྱང་བུམ་སྙིང་པོ་ལྔ་བཏབ་ཅིང་མགུལ་ཆིངས་ལྗང་གུ་ཅན། དབུ་རྒྱན་སོགས་རིག་དབང་། རྣམ་སྣང་སྐུ། ཕྱག་མཚན་ལྔ་སོ་སོར་ཕྲལ་བ་དང་གཅིག་བསྡུས། ཐུབ་དྲུག་ཕྱག་མཚན། ལྷ་ཙཀ་ཚང་བ། གསང་ཐོད། རིག་ཙཀ མེ་ལོང་ཤེལ་རྡོ། རྒྱལ་སྲིད་རྟགས་བརྒྱད་སོ་སོར་ཕྲལ་བ། དབུས་སུ་རྐང་གསུམ་མཐོ་བའི་ཁར་གཏོར་མ་ཟླུམ་པོ་པད་འདབ་བརྒྱད་ཀྱིས་བསྐོར་བའི་རྩེར་རྡོ་རྗེ་ཕྱེད་པ། གཡས་གཡོན་ཉི་ཟླས་བརྒྱན་པ་ལ་གཙོ་བོའི་ཙཀ་ལི་བཙུགས་ཤིང་དར་གདུགས་ཕུབ་པ་བཀོད། འདི་རིགས་གཏོར་དབང་མཐར་དངོས་གྲུབ་ཏུ་སྦྱིན་དགོས་པའི་རིགས་ལ་གཏོར་སྣོད་ཆེ་ན་ཤ་དང་ཟན་དུམ་སོགས་ཟས་སྣས་བསྐོར་ཅིང་། མ་ཤོང་ན་ཟས་སྣ་སྣོད་གཞན་དུ་བླུགས་པ་དང་ལྷན་ཅིག་ཐོད་པའི་བདུད་རྩི་རེའང་བཞག་གོ ༈ །གྲོལ་ཏིག་ཞི་ཁྲོ་ལ། དཀྱིལ་འཁོར་སྟེང་བུམ་པ་གསང་ཐོད་མེ་ལོང་སིནྡྷུ་རའི་ཐིག་ལེ་ཅན་ཤེལ་རྡོ་རྣམས་བརྩེགས་ནས་བཀོད། ཞི་ཁྲོའི་ལྷ་ཙཀ་སྔ་མ་ལྟར་བཀོད། ༈ གནམ་ཆོས་ཞི་ཁྲོ་ལ་མཎྜལ་ཚོམ་བུ་གཅིག་སྟེང་རྣམ་བུམ། མདུན་རྒྱབ་གང་བདེར་ལུགས་འདིའི་ལྷ་བརྒྱ་གཏོར་གཅིག་གམ་དཔལ་གཏོར་སྤྱི་འགྲེ། སྐུ་ཙཀ་ཕྱོགས་སྦམ། འབྲས་སྙེ། དུང་། ཞིང་དབྱུག་ཐོད་ཕྲེང་རྣམས་ཀྱི་ཙཀ་ལི་དགོད། སྤྲོ་ན་རྫས་རྟགས་བཅས། ཕྱིན་ཆད་གཟུངས་དབང་ཐམས་ཅད་འདིས་འགྲེ ༈ །བདེ་གླིང་བཀའ་འདུས་ཞི་ཁྲོ་ལ། སྟ་གོན་རྫས་བཞི། དཀྱིལ་འཁོར་སྟེང་བུམ་པ་ལྔ་དང་རིག་དབང་ཆས། གཏོར་མ་སོགས་ཀར་གླིང་ཞི་ཁྲོ་ལྟར་ལ། ཙཀ་ལི་ཚང་བ། ལྷོར་གསང་ཐོད། ནུབ་རིག་ཙཀ་ཕག་མོའི་གཟུགས། བྱང་དུ་ཤེལ་རྡོ་མེ་ལོང་རྨ་བྱའི་མདོངས་རྣམས་བཀོད། ༈ གྲུབ་ཐོབ་ཐུགས་ཐིག་གི་སྒྲུབ་ཐབས་སྐོར་ལྔ་ལ། དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པ་འོག་མ་རྣམས་ལའང་འགྲེ །བླ་མ་ཞི་བ་ལ་དཀྱིལ་འཁོར་དབུས་རྐང་གསུམ་སྟེང་རྣམ་བུམ་བཅུད་ལྡན་མགུལ་ཆིངས་དཀར་པོ་ཁ་རྒྱན་བཅས། ཁ་རྒྱན་གསེབ་བམ་མདུན་དུ་གུ་རུ་ཟ་ཧོར་མའི་སྐུ་ཙཀ །གཡས་གཡོན་མདུན་རྒྱབ་རྣམས་སུ་དབུ་རྒྱན། རྡོ་རྗེ། དྲིལ་བུ། རྒྱུད་ཀྱི་གླེགས་བམ། མེ་ལོང་། ཆོས་གོས་རྣམ་གསུམ། རིན་ཆེན་རུས་རྒྱན་ཕྱོགས་བསྡུས་ཀྱི་ཙཀ་ལི། གསང་ཐོད་བདུད་རྩི། རིག་ཙཀ །རྒྱབ་ཕྱོགས་སུ་བླ་མའི་གཏོར་ཆེན། སློབ་མར་བཀྱེ་རྒྱུའི་དངོས་གྲུབ་རྫས། མདུན་དུ་ཚེ་འབྲང་། ཚེ་རིལ། ཚེ་ཆང་། རྫས་རྟགས་དང་རྒྱལ་སྲིད་ཙཀ་ལི། སྟེགས་ཟུར་པ་ལྟ་བུ་གང་བདེར་སྒོ་འབྱེད་ཁྲུས་བུམ། མར་མེ། ཆུ་བུམ། རྡོ་རྗེ། ལྷུང་བཟེད་ཆོས་གོས་གླེགས་བམ་ཕྱོགས་བསྡུས། རྟེན་འབྲེལ་བཅུ་གཉིས་གཟུགས་རིས་རྣམས་བཀོད། ཏིལ་སྦྱོང་སོགས་ཉེར་མཁོ་རྣམས་ཀྱང་བསྡོགས། ༈ གུར་དྲག་ལ། དཀྱིལ་འཁོར་དབུས་སུ་བུམ་པ་ཆིངས་དམར། གུར་དྲག་གཙོ་བོའི་སྐུ །སྔགས་བྱང་། ཕྱག་མཚན་རྡོ་རྗེའམ་མེ་ལོང་། རྒྱབ་ངོས་སུ་དཔལ་གཏོར་དར་གདུགས་ཅན། ལས་ཕུར་རྣམས་བཀོད། ལྕགས་ཧོམ། ལིང་ག །བསྒྲལ་ཆས་རྣམས་འདུ་བྱ། ༈ ཐུགས་རྗེ་ཆེན་པོ་ལ། དཀྱིལ་འཁོར་དབུས་བུམ་པ་ཆིངས་དཀར། འགྲོ་འདུལ་ཕྱག་བཞི་པ་ཡུམ་ཅན་སྐུ་ཙཀ །ཤེལ་ཕྲེང་སྔགས་བྱང་། ཕྱག་མཚན་ཕྲེང་བ་པད་དཀར། མདུན་ངོས་མྱོང་གྲོལ་རིལ་བུམ། རྒྱབ་ཏུ་ཞི་གཏོར་དར་གདུགས་ཀྱིས་སྤྲས་པ་བཀོད། ༈ རྟ་མགྲིན་ལ། དཀྱིལ་འཁོར་དབུས་རྣམ་བུམ་བཅུད་ལྡན་ཆིངས་དམར་ཅན། རྟ་མགྲིན་གཙོ་བོའི་སྐུ །སྔགས་བྱང་དང་རཀྴའི་ཕྲེང་བ། ཕྱག་མཚན་རྡོ་རྗེ་ཁ་ཊྭཱཾ་རལ་གྲི་སྡིགས་མཛུབ་མདུང་ཐུང་རྒྱུ་ཞགས་ཕྱོགས་གཅིག་བྲིས་པ། རྒྱབ་ཏུ་དཔལ་གཏོར་རྟ་ཞལ་ཅན། གདབ་ཕུར། ལྕགས་ཧོམ་ལིང་ག །བསྒྲལ་ཆས། མེ་ཧོམ། གཏོར་ཟོར་སོགས་འདུ་བྱ། ༈ ཕག་མོ་ལ། དཀྱིལ་འཁོར་དབུས་ཁྲིའུ་ལ་ཐོད་པ་མཚན་ལྡན་བདུད་རྩིས་བཀང་བའི་ཁ་སིནྡྷུ་རའི་མེ་ལོང་ལ་ཆོས་འབྱུང་བཾ་ཡིག་སྔགས་བྱང་གིས་བསྐོར་བས་བཅད་ལ། དར་དམར་གྱིས་བཀབ་པའི་སྟེང་ཤེལ་རྡོ་བཞག །གཙོ་མོའི་སྐུ །སྔགས་བྱང་ཐོད་ཕུར། མེ་ལོང་། གཡས་སུ་བནྡྷ་ཁ་སྦྱོར་བདུད་རྩི་རིལ་བུས་བཀང་བ་ཆས་ལྡན། གཡོན་དུ་སྨན་གཏོར་རཀྟ་མར་མེ་རྣམས་སྣོད་གཅིག་ཏུ་བཞག་པ་རྣམས་བཀོད། ༈ གཏེར་གསར་སྒྱུ་འཕྲུལ་ཞི་བ་ལ། སྟ་གོན་རྫས་བཞི། དཀྱིལ་འཁོར་སྟེང་བུམ་པ། དབུ་རྒྱན། དར་དམར་མཐིང་སྦྲེལ་བའི་ཅོད་པན། ཙཀ་ལི་ཚང་བ། རྒྱུད་ཀྱི་གླེགས་བམ་དར་གྱིས་དྲིལ་བ། གསང་ཐོད། རིག་ཙཀ་བཅས། ༈ སྒྱུ་འཕྲུལ་ཁྲོ་བོ་ལ། དཀྱིལ་འཁོར་སྟེང་བུམ་པ། ཙཀ་ལི། གླེགས་བམ། གསང་ཐོད། རིག་ཙཀ་བཅས། ༈ དོང་སྤྲུགས་ལ། དཀྱིལ་འཁོར་སྟེང་གཙོ་བུམ། དབུས་སུ་བཏགས་གྲོལ་གླེགས་བམ་དང་ཙཀ་ལི་ཚང་བ། སློབ་མའི་གྲངས་མཉམ་དཔལ་གཏོར་སྣོད་བཅས། བྱང་ཤར་དུ་ཁྲུས་བུམ་མགུལ་ཆིངས་དཀར་པོ་ཅན་བཤམ། ༈ སྒྱུ་འཕྲུལ་ཚེ་དཀྱིལ་རྒྱས་པ་ལ། དཀྱིལ་འཁོར་སྟེང་བུམ་པ་ཕྱོགས་བཞི་དབུས་ལྔར་དཀར་མཐིང་སེར་དམར་ལྗང་གུའི་མགུལ་ཆིངས་དང་བཅུད་སྨན་ལྔ་སོགས་ཀར་གླིང་ལྟར། དབུས་མདུན་ལྷ་ཙཀ་ཚང་བ། རྒྱབ་ངོས་ཁྲིའུར་ཚེ་འབྲང་། གཡས་སུ་ཐོད་པའི་ནང་མར་གྱི་རིལ་བུ་ལྷ་གྲངས་དང་བདུད་རྩིས་བཀང་བ། གཡོན་དུ་མར་མེ་གསལ་བ། མདུན་དུ་ཚེ་ཆང་མངར་གསུམ་སྦྱར་བ། དབུས་སུ་ཚེ་མདའ་རྒྱན་ལྡན། མཚམས་བཞིར་མདའ་དར་དཀར་སྔོ་དམར་ལྗང་བཞི། ཚེ་ནས་བཅས་བཀོད། ༈ སངས་རྒྱས་མཉམ་སྦྱོར་ལ། དཀྱིལ་འཁོར་རམ་དུམཎྜལ་ཚོམ་བུ་དབུས་སུ་གཅིག །དེ་རྒྱབ་ཕྱོགས་བཞིར་བཞི་རིམ་གཉིས་བཀོད་པའི་སྟེང་རྣམ་བུམ། མདུན་སོགས་སུ་རིགས་དྲུག་གི་སྐུ་ཙཀ་གསང་ཐོད། རིག་ཙཀ །ཕུར་བུ་གྲི་སྣ་ཚོགས་རྡོ་རྗེ་རྣམས་བཀོད། ཕྱོགས་བཞིར་བཞི་བསྣོལ་ཆ་བཞི། ཤར་དུ་ལྷག་པོ་ཆ་གཉིས་བཤམ་མོ།། ༈ །།དེ་ནས་རྩ་གསུམ་སྤྱིའི་སྐོར་ལ། ཡང་གཏེར་རྩ་གསུམ་དྲིལ་སྒྲུབ་ལ་སྟེགས་བུར་མེ་ཏོག་སིལ་མ་བཀྲམ་པའི་དབུས་སུ་བླ་གཏོར་དམར་ཟླུམ་རྒྱན་ལྡན་དར་གདུགས་བཅས་པ། མདུན་དུ་ཚེ་འབྲང་། གཡས་གཡོན་ཚེ་རིལ་ཆང་བཅས། ༈ ཀར་ལུགས་རྩ་གསུམ་དྲིལ་སྒྲུབ་ལ། གཞི་སྟེང་འབྲས་གྱི་གཡུང་དྲུང་གཡས་བསྐོར་བྲིས་པའི་དབུས་སུ་ཆང་དང་དཀར་མངར་བསྲེས་པའི་ཟན་གྱིས་པདྨ་འདབ་བརྒྱད་སྟེང་ཟླ་གམ་བཅད་ཁ་མདུན་བསྟན་ཐོག་ཚེ་བུམ་ཉི་ཟླ་ནོར་བུས་བརྒྱན་ཅིང་ཚེ་རིལ་གྱིས་བསྐོར་བ་ལ་སྐུ་ཙཀ་བཙུགས། དེའི་གཡས་སུ་ཚེ་རིལ། གཡོན་དུ་ཐོད་པའི་ནང་ཚེ་ཆང་། མདུན་རྒྱབ་གང་བདེར་བུམ་པ་ཆིངས་དམར། འཁོར་ལོ། པདྨ། རྡོ་རྗེའི་ཙཀ་ལི་སོ་སོ་བ། རི་རབ་ལ་ཕུར་ཆུང་བཏབ་པ། སིནྡྷུར། ཚེ་མདའ་བཅས་བཤམ་འདི་སྐབས་སློབ་མ་རྣམས་ཀྱི་གདན་རེ་རེ་བཞིན་ནས་འབྲས་ཀྱི་གཡུ་དྲུང་བྲི་པའམ། མ་ལྕོགས་ན་ཚོམ་བུ་རེ་དགོད། ༈ རད་གླིང་རྩ་གསུམ་འབྲས་བུའི་དོན་ཁྲིད་ལ། གཞི་སྟེང་དབུས་གཡས་གཡོན་མདུན་དང་བཞིར་མཎྜལ་རེ་ལ་ཚོམ་བུ་རེ་བཀོད་པའི་དབུས་སུ་བུམ་པ་མགུལ་ཆིངས་དམར་པོ་ཁ་རྒྱན་གཟུངས་རྡོར་བཅས་པའི་སྟེང་དུ་ཁྲིའུ་ལ་གཏོར་མ་རིན་ཆེན་འབར་བ་སྐུ་ཙཀ་དར་གདུགས་ཀྱིས་བརྒྱན་པ། གཞན་གསུམ་ལ་རྐང་གསུམ་བཞག་པའི་གཡས་ཀྱི་སྟེང་དུ་བུམ་པ་མགུལ་ཆིངས་དཀར་པོ། གཡོན་དུ་སིནྡྷུ་རའི་མེ་ལོང་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར་མདུན་ནས་གཡས་བསྐོར་གྱིས། ར་ཧ། ཙ་རི། ཧྲི་ནི། ཡ་ས་བྲིས་པ། མདུན་དུ་ཐོད་ཆང་ཆོས་སྨན་མངར་གསུམ་ཅན་བཀོད། ༈ འཇམ་དབྱངས་བླ་མའི་རྩ་གསུམ་དྲིལ་སྒྲུབ་ལ་མཎྜལ་པདྨ་འདབ་བརྒྱད་དབུས་ཚོམ་བུ་གཅིག་པའི་སྟེང་། བླ་མའི་གཏོར་མ་རྒྱན་ལྡན། གཡས་སུ་ཐོད་ཆང་། གཡོན་དུ་མེ་ལོང་། ཤེལ་རྡོ། མདུན་དུ་མདའ་གཞུ་བཅས་བཀོད། ༈ དགོངས་པ་ཡང་ཟབ་ཀྱི་རྩ་གསུམ་གཏོར་དབང་ལ། མཎྜལ་ཚོམ་བུ་དགུ་པའི་ཁར་མཉྫི་ལ་གཏོར་མ་རིན་ཆེན་འབར་བ་རྒྱན་ལྡན་བཀོད། ༈ ཞིག་གླིང་ཐུགས་དམ་ཟབ་པ་སྐོར་བདུན་ལ། དཀྱིལ་འཁོར་དབུས་སུ་རྐང་གསུམ་སྟེང་བུམ་པ་ཆིངས་དཀར་ཁ་རྒྱན་གསེབ་སྐུ་རྟེན་ཙཀ་ལིས་བརྒྱན་པ། མདུན་རྒྱབ་གང་བདེར་ཐོད་ཆང་ཁར་མེ་ལོང་ལ་ལི་ཁྲིའི་ཆོས་འབྱུང་པདྨ་འདབ་དྲུག་དབུས་སུ་ཧྲཱིཿ ཤར་ནས་གཡས་བསྐོར་དུ། ཧཱུྃ། ཧྲཱིཿ ཧྲཱིཿ ཧཱུྃ། ཛཾ། ཧཱུྃ། རྣམས་དང་མཐའ་སྐོར་དབྱངས་གསལ་བྲིས་པ་བཞག་པ་དར་དམར་གྱིས་ཁ་བཀབ་པ་དང་ལྷན་ཅིག་རིག་ཙཀ་དང་མེ་ལོང་དྭངས་པའང་བཀོད། རྒྱབ་ཏུ་དཔལ་གཏོར་དར་གདུགས་ཅན་བཅས། སྒེར་དབང་བདུན་པོ་ཆབ་ཅིག་བསྐུར་ན། མཎྜལ་ལ་ལྷ་མདོག་དང་མཚུངས་པའི་ཚོམ་བུ་བཀོད་པ་བདུན་དབུས་དང་མཐའ་སྐོར་དུ་བཞག་པའི་སྟེང་རྐང་གསུམ་ཁར་དབུས་བླ་གཏོར། མདུན་གཡོན་དཀར་ཟླུམ། མདུན་གཡས་ཚེ་བུམ། གཡས་སུ་དཀར་ཟླུམ། རྒྱབ་གཡས་དཔལ་བཤོས་དམར་པོ། རྒྱབ་གཡོན་ཛཾ་བཤོས། མདུན་དུ་དམར་གཏོར། ཐེབ་ནས་བདུན་དང་སོ་སོའི་སྐུ་ཙཀ་དབང་ཕྲེང་རིགས་བདུན་རྣམས་བཤམ། ༈ བྱང་པའི་མ་རྒྱུད་སྙིང་པོ་དོན་གསུམ་ལ། རས་བྲིས་སམ་མཎྜལ་ལ་དབུས་སུ་འབྲུ་ཚོམ་གཅིག །དེ་རྒྱབ་བཞི་རིམ་གཉིས་བཀོད་པའི་སྟེང་ཨེ་ཁྲོམ་ལ་ལྕགས་ཕུར་དར་ནག་ཅོད་པན་ཅན་གྱི་མདུན་ཕྱོགས་སུ་མཁའ་འགྲོའི་ཐོད་སྐུ་དང་ཕྲེང་དམར། དེ་སྟེང་ཁྲིའུར་བླ་མའི་གཏོར་མ་སྐུ་ཙཀ་དང་བཅས་པ་གཡས་གཡོན་དུ་ཐོད་ཆང་ཧཱུྃ་ཡིག །མེ་ལོང་། གདབ་ཕུར། གུ་གུལ། ཡུངས་ཀར། རཀྟ་ལྕགས་ཧོམ་ལིང་ག་བཅས་བཞག ༈ །ཆོས་གླིང་རྩ་གསུམ་དྲིལ་སྒྲུབ་ལ། དཀྱིལ་འཁོར་དབུས་སྟེགས་ལ་བུམ་པ་ཆིངས་དམར། ལྷ་ཙཀ་ཆ་ཚང་། མདུན་ངོས་ཚེ་འབྲང་རྟ་མགོས་མཚན་པ། སྔགས་བྱང་། དབང་ཕྲེང་དམར་པོ། ཤེལ་རྡོའམ་ཤེལ་གྱི་མེ་ལོང་གཟུགས་བརྙན་འཆར་བ། ཚེ་རིལ་ཚེ་ཆང་གོང་མཚུངས། ཚེ་མདའ། འདི་ཉིད་སྒེར་དུ་བྱེད་སྐབས་ཚེ་གལ་སོགས་དབང་ཆོག་ཏུ་གསལ་བ་ལྟར་བཤམ་བཀོད་བྱ་དགོས་ཀྱང་དཀྱུས་གཅིག་ཏུ་བསྐུར་ཚེ་སྤྱིར་བཤམས་པ་རྣམས་ཀྱིས་འཐུས་པ་འདི་རིགས་གཞན་ལའང་ཤེས་དགོས་སོ། ༈ །རྩ་གསུམ་ཟབ་མོ་ཀུན་འདུས་ལ། མེ་ཏོག་སིལ་མ་བཀྲམ། ཁྲིའུ་ལ་དཔལ་གཏོར་རྒྱན་ལྡན། བཟའ་བཏུང་བཅས་དགོད། ༈ རྩ་གསུམ་སྤྱི་འདུས་ལ། རས་བྲིས་སམ་འབྲུ་ཚོམ་གཙོ་བོ་གསུམ། དེ་རྒྱབ་སྒོ་བ་བཞི་བཅས་བཀོད་པའི་སྟེང་དུ་ཁྲིའུར་རྣམ་བུམ། མདུན་དུ་ལྷ་ཙཀ་བཞི། གཡས་སུ་གསང་ཐོད། གཡོན་དུ་ཤེལ་རྡོ་མེ་ལོང་དབང་ཕྲེང་། རྒྱབ་ཏུ་ཚེ་འབྲང་། ཚེ་རིལ་ཆང་མདའ་དར་བཅས་བཀོད། ༈ ཟབ་བདུན་རྩ་གསུམ་ལ། དཀྱིལ་འཁོར་སྟེང་མཉྫི་ལ་བུམ་པ་ཆིངས་དམར་ལྡན་པའི་ཁར་ཐོད་པའི་བདུད་རྩི་སིནྡྷུ་རའི་མེ་ལོང་ལ་ཆོས་འབྱུང་ལ་ཨོཾ་གསུམ་མའི་སྔགས་བྲིས་པ་དར་དམར་གྱིས་བཀབ་པའི་སྟེང་གུ་རུའི་སྐུ་ཚབ་རྣམས་བརྩེགས་མར་བཀོད། རྒྱབ་ཕྱོགས་སུ་བླ་གཏོར། མདུན་དུ་ཚེ་བུམ། གཡས་གཡོན་དུ་ཚེ་རིལ་ཚེ་ཆང་། ཤེལ་རྡོ་མདའ་དར་རྣམས་བཀོད་དོ།། ༈ །།དེ་ནས་བླ་མ་ཞི་བའི་སྐོར་ལ་ཐོག་མར། ཆོས་དབང་གསང་འདུས་ལ། སྟ་གོན་རྫས་བཞི། དཀྱིལ་འཁོར་སྟེང་བུམ་པ་ཆིངས་སྔོན་པོ། མདུན་དུ་ལྷ་ཙཀ་ཚང་བ་དང་པདྨ་འདབ་བཞིའི་སྟེང་གཏོར་མ་རིན་ཆེན་ཟུར་བརྒྱད་སྐུ་རྟེན་གྱིས་བརྒྱན་ཅིང་ཟས་སྣ་ཐོད་པའི་བདུད་རྩི་བཅས་ཀྱིས་གཏོར་དབང་ཞར་བྱུང་ཚང་། གཡས་གཡོན་དུ་གསང་ཐོད་རིག་ཙཀ །རྒྱབ་ཏུ་སྒྲུབ་ཐབས་གླེགས་བམ་བཅས་བཀོད། ༈ རྒྱ་ལོ་ཙཱའི་བླ་མ་བསྟན་གཉིས་སྐོར་གསུམ་རྩ་དབང་ལ། དཀྱིལ་འཁོར་རས་བྲིས་དབུས་རྣམ་བུམ། དེའི་དོན་དབང་ལ། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ། གཡས་གཡོན་དུ་གསང་ཐོད། རིག་ཙཀ །ཤེལ་རྡོ། མདུན་རྒྱབ་གང་བདེར་ཚེ་འབྲང་། ཚེ་རིལ་ཆང་། མདའ་དར། དབང་ཕྲེང་བཀོད། ༈ དྲི་མེད་ཐུགས་སྒྲུབ་ཡིད་བཞིན་ནོར་བུ་ལ། དཀྱིལ་འཁོར་དབུས་སུ་བུམ་པ་ཆིངས་སྔོན་ཅན། མདུན་དུ་ལྷ་ཙཀ་བརྒྱད། གཡས་གཡོན་དུ་བླ་མའི་སྐུ་འབག་དང་གཏོར་མ་རིན་ཆེན་ཟུར་བརྒྱད། གསང་ཐོད། རིག་ཙཀ དབང་ཕྲེང་། མེ་ལོང་རྡོ་རྗེ། ཚེ་འབྲང་། རིལ་ཆང་བཅས་བཀོད། ༈ བླ་མ་ལོངས་སྐུ་རྫོགས་ཆེན་ལ། དཀྱིལ་འཁོར་སྟེང་ཁྲིའུར་བུམ་པ་ཉེར་ལྔའི་རྫས་ལྡན་ཆིངས་དམར་བཅིངས་པའི་ཁར་མེ་ལོང་ལ་བསྙེན་སྔགས་མཚལ་བྲིས་ཀྱིས་བཀབ། དེ་སྟེང་ཚེ་འབྲང་བུམ་གཟུགས་པད་འདབ་བཞི་དང་རིལ་བུས་བསྐོར་བ་ཉི་ཟླའི་རྒྱན་ལྡན་བཞག །གཡས་གཡོན་རྒྱབ་ཏུ་ཚེ་རིལ་ཚེ་ཆང་མདའ་དར་རྣམས་སོ། ༈ །རྫོགས་ཆེན་ཚེ་དབང་བུ་སྟོན་གོང་ཁུག་མ་ལ། རས་བྲིས་སམ་མཎྜལ་ཚོམ་བུ་དགུ་པའི་ཁར་རྐང་གསུམ་སྟེང་ཚེ་བུམ་རྡོ་རྗེ་ཉི་ཟླ་ནོར་བུ་ནཱ་དའི་མཚན་མས་བརྒྱན་ཅིང་ཚེ་རིལ་གྱིས་བསྐོར་བ། གཡས་སུ་བུམ་པ་ཆིངས་དམར། གཡོན་དུ་ཚེ་ཆང་། རྒྱབ་ཏུ་ཚེ་མདའ་རྣམས་བཀོད། ༈ བྱང་གཏེར་ལོངས་སྐུ་འཆི་མེད་འོད་སྣང་ལ། དཀྱིལ་འཁོར་རས་བྲིས་སམ། ཚོམ་བུ་གཙོ་འཁོར་དགུ །དེ་རྒྱབ་བཞི་བཀོད་པའི་དབུས་མཉྫི་ལ་བུམ་པ་བཅུད་ལྡན་མགུལ་ཆིངས་དཀར་པོ་ལ། བཅུད་ལེན་རིལ་བུ་སློབ་མའི་གྲངས་མཉམ་དར་དམར་གྱིས་བསྟུམས་ལ་མགུལ་དུ་བཏགས་པའི་ཁར་མེ་ལོང་ལ་ཚེ་བསྙེན་མཚལ་གྱིས་བྲིས་པས་བཀབ། དེ་སྟེང་ཚེ་གཏོར་གཞུང་གསལ་བཞག་ལ་དར་དམར་གྱི་གུར་ཕུབ། གཡས་སུ་ཚེ་རིལ། གཡོན་དུ་ཐོད་པའི་བདུད་རྩི། རྒྱབ་ཏུ་ཚེ་མདའ། མཚམས་སུ་མེ་ལོང་ལི་ཁྲིའི་ཚོམ་བུ་ཅན། སྙིང་པོ་ལྔ། འབྲུ་ལྔ་བྲིས་པའི་ཙཀ་ལི། རྫས་བརྒྱད། རྒྱལ་སྲིད་རྣམས་བཀོད། ༈ རཏྣའི་ཚེ་སྒྲུབ་གསང་འདུས་དབང་ཆེན་ལ། སྟ་གོན་རྫས། དཀྱིལ་འཁོར་དབུས་རྣམ་བུམ་ཁར་གཏོར་མ་གཡང་ཞགས་འཁྱིལ་བ། རིགས་ལྔའི་ཕྱག་རྒྱ་སོ་སོ་བ། གོ་ཁྲབ། གསེར་ཚྭ་ཏིལ་དཀར་མར་སྦྲང་སྟེ་སྙིང་པོ་ལྔ་དངོས་སམ་རི་མོར་བྲིས་པ། རྟགས་བརྒྱད་སོ་སོ་བ། རིལ་ཆང་མདའ། དབང་གོང་མའི་ཆས། དཀྱིལ་འཁོར་མདུན་རྒྱབ་གང་བདེར་ཐོད་ཆང་མངར་གསུམ་ཆོས་སྨན་བཏབ་པའི་ཁར་མེ་ལོང་སིནྡྷུ་ར་བརྡལ་བ་ལ་ཆོས་འབྱུང་བསྣོལ་མའི་དབུས་སུ་ཧྲཱིཿམ། མཐའ་སྐོར་ཧ་རི་ནི་ས་བྲིས་པས་བཀབ་ལ་དར་དམར་གྱིས་གཡོགས་པའི་སྟེང་ཤེལ་རྡོ་བཞག ༈ །དོན་དབང་ལ། དཀྱིལ་འཁོར་བུམ་གཏོར་སྔར་ལྟར། རིལ་ཆང་མདའ་བཅས། ༈ ཟླུམ་པོ་བཞི་དབང་ལ། ཕོ་བྲང་གནམ་བབ་མའི་རས་བྲིས་སྟེང་བུམ་པ་ཐོད་ཆང་མེ་ལོང་སིནྡྷུ་རའི་ཐིག་ལེ་ལྷ་གྲངས་དང་བཅས་རྩ་སྔགས་བྲིས་པ་རྣམས་བརྩེགས་མར་བཞག་ལ་དར་དམར་གྱིས་བཀབ་པའི་སྟེང་གུ་རུའི་སྐུ་ཚབ་བརྟན་པོར་བཞུགས་སུ་གསོལ། ༈ ཉང་གཏེར་བླ་མ་ཡོངས་རྫོགས་གཏོར་དབང་ལ། རས་བྲིས་སམ་འབྲུ་ཚོམ་པདྨ་རིས་ཀྱི་ཁར་མཉྫི་ལ་དཔལ་གཏོར་རིན་ཆེན་འབར་བ་པད་འདབ་བརྒྱད་རིལ་བུ་དང་བཅས་པ་སྐུ་ཙཀ་དར་གདུགས་ཅན། མདུན་དུ་ཐོད་པའི་བདུད་རྩི་དང་དབང་ཕྲེང་བཞག ༈ །སྟག་ལུང་ཐུགས་སྒྲུབ་བདེ་འདུས་ལ། རས་བྲིས་སམ་མཎྜལ་ཚོམ་བུ་དགུ་པའི་སྟེང་རྐང་གསུམ་ལ་རྣམ་བུམ་མགུལ་ཆིངས་དཀར་པོ་ཅན། རྒྱབ་ངོས་སུ་བླ་མའི་གཏོར་ཆེན་མདུན་དུ་ཚེ་གཏོར་བུམ་གཟུགས་གཡས་གཡོན་དུ་ཚེ་རིལ་ཚེ་ཆང་བཅས་བཀོད། ༈ བྱང་གླིང་ཀུན་བཟང་ཐུགས་གཏེར་གྱི་བླ་སྒྲུབ་རྩ་དབང་ལ། སྟ་གོན་རྫས་བཞི། ཏིལ་སྦྱོང་། དཀྱིལ་འཁོར་རས་བྲིས་སམ་ཚོམ་བུ་དབུས་སུ་གཅིག །དེ་རྒྱབ་བརྒྱད་རིམ་བཞི། དེ་རྒྱབ་ཕྱོགས་བཞིར་བཞི་བཀོད་པའི་དབུས་སུ་རྣམ་བུམ་ཆིངས་སྔོན། དབུ་རྒྱན། རྡོ་རྗེ། དྲིལ་བུ། རྡོར་དྲིལ། སློབ་དཔོན་དབང་ཆས་དུང་འཁོར་ལོ་སོགས་མདོར་བསྡུས། གསང་ཐོད། མེ་ལོང་སིནྡྷུ་རའི་ཐིག་ལེ་ཅན། ཁ་ཊྭཱཾ་ཌཱར་དྲིལ་བཅས་བཀོད། ༈ དོན་དབང་ལ། ཚོམ་བུའི་སྟེང་བླ་གཏོར། གཡས་གཡོན་དུ་ཐོད་པའི་བདུད་རྩི། སིནྡྷུ་རའི་མེ་ལོང་བཅས། སྤུ་གྲི་མཆེད་གསུམ་དམར་གཏོར་གསུམ་དར་གདུགས་ཅན། དམ་ཅན་གཏོར་མ་མཁར་ཐབས་ཅན་སྤྱི་འགྲོ་བཀོད། ༈ བྱང་གཏེར་རིག་འཛིན་གདུང་སྒྲུབ་ལ། དཀྱིལ་འཁོར་རས་བྲིས་སམ་དབང་ཆོག་ཏུ་བཤད་པའི་མཎྜལ་ཉིས་བརྩེགས་ཀྱི་ཚོམ་བུའི་སྟེང་འཕྲུལ་སྟེགས་ལ་ཟངས་བུམ་མགུལ་ཆིངས་ཅན་གྱི་ཁར་ཐོད་ཆང་སིནྡྷུ་རའི་མེ་ལོང་ཧྲཱིཿམཐར་བཛྲ་གུ་རུ་བྲིས་པ་རྣམས་བརྩེགས་པའི་ཁར་གུ་རུའི་སྐུ་ཚབ་བཞུགས། རྒྱབ་ངོས་སུ་ནང་སྒྲུབ་ཀྱི་གཏོར་མ་འབྲིང་བསྡུས་གང་རུང་དབང་ཆོག་ཏུ་གསལ་བ་ལྟར་རམ་མ་གྲུབ་ན་རིན་ཆེན་ཟུར་བརྒྱད་སྤྱི་འགྲེ་བཟའ་བཏུང་བཅས་བཀོད། ༈ ཡང་གཏེར་བླ་མ་བདེ་མཆོག་འཁོར་ལོ་ལ་དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་དམར་པོ་གཅིག་བཀོད་པའི་ཁར་མཉྫིའི་སྟེང་བུམ་པ་སོ་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་དང་བཅས་པ་བཀོད། མདུན་དུ་གཙོ་འཁོར་ལྷ་ཙཀ་བདུན། དབང་ཕྲེང་དམར་པོ། མེ་ལོང་། རྒྱབ་ཏུ་གསང་དབང་ཐོད་ཆང་དང་རིག་ཙཀ །གཡས་སུ་སྨན་གྱི་ཕོ་བྲང་ཆས་ལྡན། གཡོན་དུ་ཚེ་འབྲང་དང་ཐོད་སྣོད་དུ་ཚེ་ཆང་། ཚེ་རིལ་རྣམས་བཀོད། ༈ བླ་མ་དགོངས་འདུས་དོན་དབང་ལ། སྟ་གོན་རྫས་བཞི། སློབ་མ་མཆོད་པ། དཀྱིལ་འཁོར་དབུས་ཁྲིའུ་ལ་རྣམ་རྒྱལ་བུམ་པ་ཆིངས་དམར། ལྷ་ཙཀ །རིགས་ལྔའི་སྐུ་རྟེན། རྒྱབ་མདུན་གང་བདེར་ཁྲིའུ་ལ་བཏགས་གྲོལ་དཀར་པོ་གཅིག་ཐུབ་གླེགས་བམ་རབ་གནས་ཅན་དར་གྱིས་བཀླུབས་པ། ཕྱོགས་བཞིར་རིག་དབང་ཆས་བཞི། མཚམས་རྣམས་སུ་ཕྱག་མཚན་དང་ཞི་ཁྲོའི་ཆས་ཙཀ །པུ་སྟི། ཕྲེང་དམར། དུང་། ཕྱག་ཤིང་། ཐོད་ཌཱར། ཆང་དང་ཟས་སྣ། གསང་ཐོད། རིག་ཙཀ །འཇའ་ཤེལ། རྒྱབ་ངོས་སུ་བྱིན་རླབས་གཏོར་མའི་བརྡ་དབང་ནས་བཤད་པའི་གཏོར་ཆེན། བཟའ་བཏུང་བཅས། བྱང་ཤར་དུ་ལྕགས་སྣོད་ནང་དྲེགས་པའི་སྤྱི་གཏོར་རྒྱན་ལྡན་ཐེབས་ཀྱུ་མང་པོས་བསྐོར་བ་དང་གྲི་གུག་ཐོད་ཁྲག །འཛོམ་ན་སྲོག་འཁོར། མ་འཛོམ་ན་དུག་ཤོག་གྲུ་བཞི་ལ་སྡེ་བརྒྱད་ས་བོན་བྲིས་པ་རྣམས་བཞག ༈ །རྡོར་གླིང་བླ་མ་བཀའ་འདུས་ལ། སོ་ཤིང་། སྲུང་སྐུད་སྣ་ལྔ། ཀུ་ཤ་རྣམས་བསྡོགས། དཀྱིལ་འཁོར་སྒོ་རྫོགས་སམ་བླ་མའི་ཕོ་བྲང་གནམ་འབབ་མའི་མཎྜལ་གྱི་དབུས་སུ་རྣམ་རྒྱལ་བུམ་པའི་ཁ་རྒྱན་ལ་ཐོད་ཕྲེང་རྩལ་དང་རྟ་ཕག་ཡབ་ཡུམ་སྐུ་ཙཀ་གིས་བརྒྱན་པ་དང་། དེ་མཉམ་ཐོད་ཕྲེང་སྡེ་ལྔ་དང་མཁའ་འགྲོ་རིགས་ལྔ་ཡབ་ཡུམ་ཕྱོགས་བསྡུས་ཀྱི་ཙཀླི་བཞག །དེ་སྟེང་འཕྲུལ་སྟེགས་ལ་བྷན་དྷ་མཚན་བཟང་དུམ་གཅིག་པ་འབྲུ་སྨན་གྱིས་བཀང་བའི་ནང་དུ་གསང་འདུས་ཡབ་ཡུམ་གྱི་སྐུ་བཞག །དེ་སྟེང་མཉྫི་ལ་གཏོར་མ་རིན་ཆེན་ཟུར་བརྒྱད་དར་གདུགས་ཀྱིས་སྤྲས་པ་བཀོད། ཤར་དུ་དཔལ་གཏོར་གུ་རུ་ཟ་ཧོར་མའི་སྐུ །ལྷོར་ཐོད་པའི་སྣོད་དུ་དཔལ་གཏོར་དང་། བློ་ལྡན་མཆོག་སྲེད། ནུབ་ཏུ་རྨ་བྱའི་སྒྲོ །མར་མེ། ཉི་མ་འོད་ཟེར། བྱང་དུ་ཀ་པཱ་ལ་ཆང་གིས་བཀང་བ། མེ་ལོང་དང་། སེང་གེ་སྒྲ་སྒྲོག །ཤར་ལྷོར་ཐོད་ཆང་དང་པདྨ་སམྦྷ། ལྷོ་ནུབ་ཏུ་མེ་ལོང་དང་པདྨ་རྒྱལ་པོ། ནུབ་བྱང་དུ་རྡོར་དྲིལ་དང་ཤཱཀྱ་སེང་གེ །བྱང་ཤར་དུ་སེང་ལྡེང་ཕུར་པ། ཨོ་རྒྱན་དང་། རྡོ་རྗེ་གྲོ་ལོད་རྣམས་ཀྱི་སྐུ་ཙཀ །མདུན་དུ་མེ་ལོང་། གཏོར་མ་ལ་སྐུ་ཙཀ་དར་གདུགས་ཅན་དང་། ཕུར་པ། རལ་གྲི་རྣམས་བཞག །གཞན་གང་བདེར་གསང་རྫས་ཐོད་ཆང་། རིག་ཙཀ །ཆོས་བཀའ་འདི་ཉིད་ཀྱི་གླེགས་བམ་དང་ཅོད་པན། མར་མེ། བུར་ཆང་། པདྨ་འདབ་དྲུག་སྟེང་མཆོད་རྟེན་བང་རིམ་དགུ་པ། རྒྱལ་སྲིད་དང་རྟགས་བརྒྱད་སོ་སོར་བྲིས་པ་རྣམས་ཀྱང་བཀོད། ཤར་དུ་ཆུ་གཉིས་ཉེར་སྤྱོད། ལྷོར་དྲག་མཆོད། ནུབ་ཏུ་སྨན་གཏོར་རཀྟ། བྱང་དུ་ཚོགས་ཀྱི་ཡོ་བྱད་རྣམས་བཤམ། ༈ དོན་དབང་ལ། དཀྱིལ་འཁོར་དབུས་ཁྲིའུའི་སྟེང་རྣམ་བུམ་མགུལ་ཆིངས་བཅུད་དང་ལྡན་པའི་ཁར་ཐོད་པར་བདུད་རྩི་ཨ་མྲྀཏས་བཀང་བ་བཞག་ལ་མེ་ལོང་སིནྡྷུ་རའི་ཐིག་ལེ་ལྔ་ཚོམ་གྱིས་བརྒྱན་པས་བཀབ། དེ་སྟེང་ཤེལ་རྡོ་དང་གུ་རུའི་སྐུ་ཚབ་བཞུགས་སུ་གསོལ། མདུན་རྒྱབ་གང་བདེར་གཏོར་མ་རིན་ཆེན་ཟུར་བརྒྱད་སྐུ་ཙཀ་དར་གདུགས་ཀྱིས་བརྒྱན་པ་བཀོད། ༈ རཏ་གླིང་ཐུགས་སྒྲུབ་ཡང་སྙིང་འདུས་པ་ལ། སྟ་གོན་རྫས་བཞི། སློབ་མ་མཆོད་པ། དཀྱིལ་འཁོར་སྟེང་རྣམ་བུམ་དང་ལྷ་ཙཀ །དེ་ཁར་ལྡིང་ཁྲི་མཐོ་བ་ལ་བླ་གཏོར་རིན་ཆེན་འབར་བ་སྐུ་ཙཀ་དར་གདུགས་ཀྱིས་བརྒྱན་པ། གཡས་སུ་ཐོད་ཆང་ལ་མེ་ལོང་སིནྡྷུརའི་ཐིག་ལེ་ཅན་གྱིས་བཀབ་པ། གཡོན་དུ་རྩ་གསུམ་སྐུའམ་ཡོད་ན་སྐུ་གསུམ་སྒྲུབ་པའི་སྐུ་འབག་དང་དབང་ཕྲེང་ཤེལ་རྡོ། རྒྱབ་ཏུ་གསང་ཐོད་མེ་ལོང་ཆང་དང་སིནྡྷུརས་བྱུགས་པ་ལ་ཆོས་འབྱུང་བསྣོལ་མའི་ནང་དུ་དཔའ་བོ་ཡབ་ཡུམ་གྱི་ས་བོན་བཅུ། མཐའ་སྐོར་དུ། ཨོཾ་ཨཱཿརྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་གང་ཟག་སྙན་བརྒྱུད་ལས་འཕྲོ་གཏེར་བརྒྱུད་ཀྱི་བླ་མ་རྣམས་ཀྱིས་བྱིན་གྱིས་རློབས་ཤིག་ཧཱུྃ། ཞེས་བྲིས་པ་དང་དར་དམར་གྱིས་བཀབ། མདུན་ནམ་ཕྱོགས་བཞིར་རྡོ་རྗེ། གྲི་གུག་ཁ་ཊྭཱཾ། རྡོར་དྲིལ། དབུ་རྒྱན། རྒྱ་གྲམ་མམ་རལ་གྲི །མཐའ་སྐོར་དུ་རྗེས་གནང་ཆས། འཁོར་ལོ། དུང་། དྲིལ་བུ། པུསྟི། རྡོ་རྗེ། དགངས་བླུག །མཆོད་གཏོར། ཕུར་པ་རྣམས་དང་། མེ་ལོང་། ཤེལ་རྡོ་བཅས་བཀོད། ༈ པད་གླིང་བླ་མ་ནོར་རྒྱམ་རབ་འབྱམས་བཀའ་དབང་ལ། མཎྜལ་དཀྱིལ་འཁོར་པདྨ་འདབ་བཞི་ཕྱོགས་མདོག་ཅན། ལྟེ་བ་མཐིང་གའི་དབུས་སུ་མཉྫིའི་སྟེང་ཐོད་པ་མཚན་ལྡན་ནམ། རིན་པོ་ཆེའི་སྣོད་དུ་བླ་མའི་གཏོར་མ་རིན་ཆེན་འབར་བ་བདུད་རྩི་ལྔ་དང་སྙིང་པོ་ལྔ་སྦྱར་བ་རྒྱན་ལྡན་བཞག ༈ །མངའ་པཎ་རིག་འཛིན་ཡོངས་འདུས་ལས་སྤྲོས་བྲལ་བདེ་ཆེན་ལ། རས་བྲིས་སམ་མཎྜལ་ཚོམ་བུ་དགུ་པའི་སྟེང་རྐང་གསུམ་ལ་བུམ་པ་ཆིངས་དམར་ཐོད་ཆང་སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་དབུས་སུ་ཐིག་ལེ་དགུ །དེ་རྒྱབ་བརྒྱད་ཀྱིས་བསྐོར་བའི་མཐའ་སྐོར་དུ་ཐོད་ཕྲེང་རྩལ་གྱི་སྔགས་བྲིས་པ་རྣམས་བརྩེགས་པའི་སྟེང་བླ་མ་རྡོ་རྗེ་འཆང་གི་སྐུ་བཞག །མདུན་དུ་གཏོར་ཆེན་གཞུང་གསལ་བཀོད། ༈ བསྟན་པ་རྨད་བྱུང་ལ། རས་བྲིས་སམ་ཚོམ་བུ་དགུ་པའི་མཎྜལ་སྟེང་རྣམ་བུམ། ཤར་དུ་ཞི་བ། རིགས་ལྔ། རིགས་བཞི། དཔལ་དགུ་མཁའ་འགྲོ་ཁྱུང་དང་བཅས་པའི་ཙཀ་ལི། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། རྒྱབ་ཏུ་གསང་ཐོད་སྟེང་མེ་ལོང་དང་ཤེལ་རྡོ། རིག་ཙཀ་བཅས། ཞི་ཁྲོའི་ཆས། སྨན་རག་གཏོར་གསུམ་ཕྱོགས་བསྡུས། དབང་ཕྲེང་། ལྕགས་ཕུར་དར་ནག་གི་ཅོད་པན་ཅན། སྟ་གོན་རྫས་བཞི་དང་མཆོད་པ། འབྲུ་ལྔའི་ཙཀ་ལི་བཅས། ༈ ཉི་མ་ལྷོ་ནུབ་མ་ལ། རས་བྲིས་སམ་མཎྜལ་འབྲུ་ཚོམ་བརྒྱད་རིམ་གཉིས་དབུས་སུ་གཅིག་དང་བཅས་པའི་ཁར་བུམ་ཐོད་མེ་ལོང་སྐུ་འབག་བརྩེགས་མ་གོང་ལྟར་དང་། ཐོད་ཆང་། རྡོ་རྗེ་བཅས། ༈ སིནྡྷུ་རྒྱ་མཚོ་ཆེ་བ་ལ། མཎྜལ་ཚོམ་བུ་གཅིག་པའི་སྟེང་རྐང་གསུམ་ལ་རྣམ་བུམ་ཁར་ཐོད་པའི་བདུད་རྩི་དར་དམར་གྱིས་བཀབ་པ། མདུན་རྒྱབ་གང་བདེར་བླ་གཏོར་བཞག ༈ །ནུབ་ཕྱོགས་བདེ་ཆེན་ལ། རས་བྲིས་སམ་ཚོམ་བུ་ལྷ་གྲངས་སྟེང་མཉྫི་ལ་སྒྲུབ་གཏོར་རྒྱན་ལྡན། མདུན་དུ་རྣམ་བུམ་ཁར་སིནྡྷུ་རའི་མེ་ལོང་ཆོས་འབྱུང་བསྣོལ་མའི་ནང་ཐིག་ལེ་ལྔ་ཚོམ་ཧཱུྃ་གིས་མཚན་པའི་མཐར། བཛྲ་གུ་རུ་སོགས་ཀྱིས་བསྐོར་བའི་སྟེང་གུ་རུའི་སྐུ་འབག་བཞུགས། རྒྱབ་ཏུ་སྣོད་གཅིག་ཏུ་ལས་བཞིའི་འབྲང་རྒྱས་དཀར་སེར་དམར་ལྗང་བཞི་དར་གདུགས་ཟས་སྣས་བརྒྱན་པ། སྣོད་གཅིག་ཏུ་རྡོར་དྲིལ་ཐོད་པ་ཌཱ་རུ་རྣམས་བཞག ༈ །བསམ་པ་ལྷུན་གྲུབ་ལ། རས་བྲིས་སམ་ཚོམ་བུ་ལྔ་པའི་སྟེང་དུ་སྟེགས་ལ་རང་གཞུང་བླ་གཏོར་རྒྱན་ལྡན། ལྷ་དབང་བཅུ་གསུམ་གྱི་ཙཀ་ལི་བཀོད། ༈ ཞིག་གླིང་པདྨ་བཛྲ་ལ། དཀྱིལ་འཁོར་དབུས་ཁྲིའུར་རྣམ་བུམ་ཉེར་ལྔའི་བཅུད་དང་མགུལ་ཆིངས་དམར་པོ་ཁ་རྒྱན་གཟུངས་རྡོར་དང་ལྡན་པ་བཀོད། གཡས་སུ་བླ་གཏོར་རིན་ཆེན་འབར་བ། གཡོན་དུ་སིནྡྷུརའི་མེ་ལོང་ལ་འཁོར་ལོ་རྩིབས་བཞི་མུ་ཁྱུད་དང་བཅས་པའི་ལྟེ་བར་མ་ཧཱུྃ་མཱུཾ། ཤར་དུ་ཨོཾ་ལཱཾ། ལྷོར་ཏྲཱཾ་མཱཾ། ནུབ་ཏུ་ཧྲཱིཿཔཱཾ། བྱང་དུ་ཧཱ་ཏཱཾ། ཞེས་བྲིས་པའི་སྟེང་དུ་ཤེལ་རྡོ་བཞག །བུམ་པའི་ཁ་རྒྱན་ནམ་མདུན་དུ་གཙོ་འཁོར་ཉི་ཤུའི་ལྷ་ཙག་ཚང་བ། གཞན་ཡང་ཆས་དབང་ནོར་བུའི་གཙུག་ཏོར། གསེར་གྱི་སྙན་ཆ། རིན་ཆེན་མགུལ་རྒྱན། རྡོ་རྗེ། བདུད་རྩིའི་ཐོད་པ། ཁ་ཊྭཱཾ། སྲོག་ཞུ། པདྨའི་དོ་ཤལ། དཔུང་རྒྱན། ཕྱག་གདུབ། སྟོད་གཡོགས། སྨད་དཀྲིས། ཆོས་གོས། དབྱངས་གསལ་ཡིག་འབྲུ་བཅས་ཀྱི་ཙཀ་ལི། རྡོར་དྲིལ་རྣམས་བཀོད། ༈ ཞིག་གླིང་ཆོས་གླིང་གཉིས་འདུས་བླ་མའི་སྒོས་དབང་ལ། དཀྱིལ་འཁོར་རམ་པདྨ་འདབ་བཞིའི་སྟེང་རྣམ་བུམ། རྒྱབ་ཏུ་བླ་མའི་གཏོར་ཆེན་གཡས་སུ་གུ་རུའི་སྐུ་ཚབ་བྱིན་ཅན་གཡོན་དུ་ཐོད་པའི་བདུད་རྩི་ལ་སིནྡྷུརའི་མེ་ལོང་ཆོས་འབྱུང་བསྣོལ་མའི་ལྟེ་བར་པདྨ་འདབ་བཞི་ལ་གུ་རུའི་རྩ་སྔགས་དང་མཐའ་སྐོར་དབྱངས་གསལ་བྲིས་པས་བཀབ། དར་དམར་གྱི་གུར་ཕུབ། ༈ གྲོལ་ཏིག་ལམ་རྒྱས་པའི་དབང་ཆེན་ལ། སྟ་གོན་རྫས་བཞི་དང་མཆོད་པ་ཏྲཱཾ་ཧྲཱིཿཧཱུྃ་ཧཱ་ཨོཾ་རྣམས་ཀྱི་ཙཀ་ལི། དཀྱིལ་འཁོར་རས་བྲིས་སྟེང་ཁྲི་ལ་རྣམ་བུམ་ཁ་རྒྱན་གཟུངས་རྡོར་དང་བཅས་པ། ལྷ་ཙཀ་ཚང་བ། གཡས་སུ་ལམ་རྒྱས་པའི་དབང་སྒྲུབ་གཏོར་མ་ཀུན་བཟང་རྡོ་རྗེ་ཐོད་ཕྲེང་གི་ཙཀ་ལིས་བརྒྱན་པ་དང་དབུ་རྒྱན། གཡོན་དུ་གསང་ཐོད་དར་དམར་བརྒྱད་ལྟེབས་ཀྱིས་བཀབ་པའི་ཁར་སིནྡྷུརའི་མེ་ལོང་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་བཾ། འདབ་བཞིར་ཧ་རི་ནི་ས་བྲིས་པའི་སྟེང་དྲིལ་བུ་དང་རིག་ཙཀ །རིག་དབང་དྲིལ་བུ། རྒྱབ་ཏུ་མེ་ལོང་ཤེལ་རྡོ་ཨོ་རྒྱན་ཡབ་ཡུམ་སྐུ་འབག་བཅས་ལ་དར་དམར་བརྒྱད་ལྟེབས་ཀྱི་གུར་ཕུབ་པ་དང་རྡོ་རྗེ། མདུན་དུ་རྡོར་དྲིལ་དང་ལྕགས་ཕུར། ཤར་ལྷོར་ཁྲུས་བུམ། བྱང་ཤར་ཁྲུས་བུམ། གཞན་ཡང་དུར་ཁྲོད་ཆས། སྨན་རཀ་གཏོར་མ། བགྲང་ཕྲེང་། ཕྱག་ཤིང་། དུང་དཀར། འཁོར་ལོ། སྒྲུབ་གཞུང་པུསྟི། མཆོད་པ་རྣམ་ལྔ་བཅས་བཀོད། ༈ ལམ་འབྲིང་པོའི་དབང་ལ། རས་བྲིས་སམ་ཚོམ་བུ་གཅིག་གི་ཁར་རྐང་གསུམ་སྟེང་རྣམ་བུམ་གསང་ཐོད་མེ་ལོང་སིནྡྷུ་རའི་ཐིག་ལེ་ཅན་གུ་རུའི་སྐུ་འབག་རྣམས་བརྩེགས། རྒྱབ་མདུན་གང་བདེ་ན་བླ་གཏོར་པདྨ་འདབ་བརྒྱད་ཟེའུ་འབྲུ་དང་བཅས་པའི་སྟེང་དུ་ནོར་བུ་བཞི་སྒྲོམ་མེ་རི་དང་བཅས་པའི་མཐར་པད་ཆུང་བརྒྱད་ཀྱིས་བསྐོར་བ་རྒྱན་སྤྲོས་ཅན་བཞག ༈ །ལམ་བསྡུས་པ་རིགས་བསྡུས་བརྡ་དབང་ལྔ་པ་ལ། ཚོམ་བུ་གཅིག་པའི་མཎྜལ་སྟེང་རྣམ་བུམ། གཡས་སུ་བླ་གཏོར་པད་འདབ་བརྒྱད་པ་རྒྱན་ལྡན། གཡོན་དུ་གསང་ཐོད་མེ་ལོང་གིས་བཀབ་པ། རྒྱབ་ཏུ་ཤེལ་རྡོ་དང་གུ་རུའི་སྐུ་རྣམས་བཀོད། ༈ བྱང་པའི་སྐུ་གསུམ་རིགས་འདུས། དཀྱིལ་འཁོར་དབུས་སྟེགས་ལ་རྣམ་བུམ་གྱི་ཁར། མར་ཟན་ལ་ཀ་ར་སྒ་ཕོོ་ལན་ཚྭ་ཚ་གྲང་གི་རྫས་རྣམས་དང་ཆོས་སྨན་བསྲེས་པས་ཚེ་གཏོར་རྡོ་རྗེ་རྩེ་ལྔ་དམར་པོ་ལྟོ་བ་ཕྱེད་མན་ཆད་རིལ་བུའི་ཕྲེང་བས་བསྐོར་བ་ཉི་ཟླའི་རྒྱན་ཅན་ལྷ་ཙཀ་དང་བཅས་པ་བཞག །དེ་ལ་ཚ་རྫས་ནི་ཛ་སུག་ཀོ་གསུམ་བྲག་ཞུན་པདྨ་རཀྟ། གྲང་རྫས་ཅུ་གུ་ལི་གསུམ་ཅོང་ཞི་བྱང་སེམས་དཀར་པོ་ག་པུར་རྣམས་ཕྱེ་མ་བྱས་པའོ། །གཡས་སུ་མེ་ལོང་ལ་མཚལ་དང་ཆོས་སྨན་སྦྱར་བས། འདི་ལྟར་བྲིས་པ་བཞག །གཡོན་དུ་གོང་སྨོས་ཚེ་འབྲང་གི་རྒྱུ་དང་ཚ་རྫས་བསྲེས་པས་འོག་ཉི་མ། གྲང་རྫས་བསྲེས་པས་སྟེང་ཟླ་བ་སྟེ་ཉི་ཟླ་ཁ་སྦྱོར་དཀར་དམར་མདོག་ལྡན་རྒྱན་སྤྲོས་གང་མཛེས་ཅན། མདུན་དུ་ཐོད་ཆང་ཆོས་སྨན་མངར་གསུམ་བཏབ་པའི་ཁ་དར་དམར་གྱིས་བཀབ་པའི་སྟེང་རྡོ་རྗེ་རྩེ་ལྔ་པ། རྒྱབ་ཏུ་ཚེ་ཆང་། ཚེ་མདའ་རྒོད་སྒྲོ་མ་ཉམས་པ་དར་དམར་བླ་གཡུས་བརྒྱན་པ། གཞན་ཡང་པདྨ་ རྟ་ཞལ་ཅན། མར་ཟན་གྱི་རྟ་མགོ །སློབ་མའི་གྲངས་མཉམ་མར་མེ་གསལ་བ་རེ་བཅས་འདུ་བྱ། ༈ དཀོན་མཆོག་སྤྱི་འདུས་ལ། རས་བྲིས་སམ་ཚོམ་བུ་གཅིག་པའི་སྟེང་ཁྲིའུར་རྣམ་བུམ། གཡས་སུ་གསང་ཐོད། གཡོན་དུ་ཁ་ཊྭཱཾ། རྒྱབ་ཏུ་ཐོད་པའི་ནང་རྡོ་རྗེ་བཅུག་པ་དང་ཤེལ་རྡོ། མདུན་དུ་གཞུང་པོད་དང་གཏེར་སྲུང་མཁའ་འགྲོའི་དམར་གཏོར་རྣམས་བཀོད། ༈ དེའི་ཚེ་དབང་། མཎྜལ་སྟེང་རྣམ་བུམ། མདུན་དུ་ཚེ་འབྲང་། གཡས་གཡོན་ཚེ་རིལ་ཆང་། རྒྱབ་ཏུ་ཚེ་མདའ། ༈ པདྨ་འོད་འབར་ལ། རས་བྲིས་སམ་མཎྜལ་སིནྡྷུ་རས་ཆག་ཆག་བཏབ་པ་ལ་ཚོམ་བུ་གཅིག་བཀོད་པའི་སྟེང་ཁྲིའུར་རྣམ་བུམ་སྐུ་འབག་ཙཀ་ལི་བཅས་གཡས་སུ་གཏོར་ཆེན་ནོར་བུ་འབར་བ། གཡོན་དུ་ཐོད་པའི་བདུད་རྩི། རྒྱབ་ཏུ་སྒྲུབ་སྐོར་གླེགས་བམ། ཁ་ཊྭཱཾ། ཤེལ་རྡོ་ཐོད་པར་བཅུག་པ། སྲུང་མའི་དམར་གཏོར་ཐེབས་ཀྱུས་བསྐོར་བ་རྒྱན་ལྡན་རྣམས་བཀོད། ༈ རིག་འཛིན་སྲོག་སྒྲུབ་ལ། སྟ་གོན་རྫས་བཞི། རས་བྲིས་དཀྱིལ་འཁོར་གྱི་ཕྱོགས་བཞི་དབུས་རྔ་རྐང་གསུམ་རེའི་སྟེང་དུ་བུམ་པ་དབུས་སྔོ། ཤར་དཀར་ལྷོ་སེར་ནུབ་དམར་བྱང་ལྗང་གུའི་མགུལ་ཆིངས་དང་ཁ་རྒྱན་ལ་སོ་སོའི་སྐུ་ཙག་བཙུགས་པ། དབུས་བུམ་སྟེང་དུང་ཆོས་གཟུངས་རྡོར། གཡས་སུ་གསང་ཐོད་སྟེང་སིནྡྷུ་རའི་མེ་ལོང་ཆོས་འབྱུང་ལྟེ་བར་ཧྲཱིཿམ། ཕྱོགས་བཞིར་ཧ་རི་ནི་ས་བྲིས་པ་དར་དམར་གྱིས་བཀབ། གཡོན་དུ་རིག་ཙཀ །མེ་ལོང་། ཤེལ་རྡོ། རྨ་བྱའི་མདོངས། ཧྲཱིཿཡིག །མདུན་དུ་ཚེ་འབྲང་། དེའི་གཡས་གཡོན་དུ་ཚེ་རིལ་ཆང་། རྒྱབ་ཏུ་ཚེ་མདའ། གཞན་ཡང་དཔའ་བོ་སྡེ་བཞི་དང་། རྒྱས་གདབ་ཙཀ་ལི། བཀྲ་ཤིས་རྫས་རྟགས། རྒྱལ་སྲིད་ཕྱོགས་བསྡུས་ཀྱི་ཙཀ་ལི། ལི་ཁྲི་བཅས་བཞག ༈ རྒྱ་ཅན་དྭངས་མ་བཅུད་འདྲེན་ལ། མཎྜལ་པདྨ་འདབ་བརྒྱད་དབུས་སུ་བུམ་པ་ཉེར་ལྔ་ཆོས་སྨན་བཅུད་ལེན་རྫས་དང་ཆུ་གཙང་སྦྱར་བས་བཀང་བའི་ཁ་རྒྱན་གསེབ་ཏུ་གཙོ་བོའི་སྐུ་ཙག་གིས་བརྒྱན་པ་བཀོད། མདུན་དུ་ཐོད་ཕྲེང་རིགས་ལྔའི་ཙཀ་ལི་དང་ཚེ་རིལ། གཡས་སུ་ཐོད་པར་ཚེ་ཆང་། རྒྱབ་ཏུ་དྲིལ་བུའམ་རིག་ཙཀ །གཡོན་དུ་འཇའ་ཤེལ་མེ་ལོང་རྨ་བྱའི་སྒྲོ་མདོངས། སྣ་བདུན་དང་རྫས་བརྒྱད་སོ་སོ་བ། ལས་བཞིའི་འབྲང་རྒྱས་བཅས་བཞག ༈ །གནམ་ཆོས་པད་འབྱུང་ཞི་བ་ལ། མཎྜལ་ཚོམ་བུ་གཅིག་སྟེང་རང་ལུགས་སམ་སྤྱི་འགྲེའི་བླ་གཏོར། གཡས་གཡོན་དུ་རྣམ་བུམ་ཆིངས་སྔོན། པུསྟི། ཐིག་ལེ་སེར་པོ། མཚོ་རྒྱལ་སྐུ་ཙཀ་བཅས་བཀོད། ༈ རིག་འཛིན་ཐུགས་ཐིག་ལ། རས་བྲིས་དབུས་སྟེགས་ཀྱི་ཁར་རྣམ་བུམ། གཡས་སུ་གཏོར་ཆེན་ཟུར་བརྒྱད་འཁོར་ལོའི་གདན་ཅན་བཟའ་བཏུང། གཡོན་དུ་གསང་ཐོད་ཁར་སིནྡྷུ་རའི་མེ་ལོང་ཆོས་འབྱུང་བསྣོལ་མ་མཱུཾ་ཡིག་དགའ་འཁྱིལ་བྲིས་པས་བཀབ། མདུན་གྱི་གཡས་ངོས་སུ་རིགས་ལྔའི་ཕྱག་རྒྱ། ཕུར་པ། བཟའ་བཏུང་། གཡོན་ངོས་སུ་སྐུ་འབག །མེ་ལོང་ཤེལ་རྡོ་རྨ་བྱའི་མདོངས་རྣམས་དང་། དབང་ཕྲེང་བཅས། ༈ བླ་མ་ཡིད་བཞིན་ནོར་བུའི་རྩ་དབང་དང་གཏོར་དབང་ལ། རས་བྲིས་སྟེགས་བཅས་ཁར་རྣམས་བུམ་སྟེང་ཐོད་པའི་བདུད་རྩི་མེ་ལོང་དྲི་མེད་ཀྱིས་བཀབ་པའི་ཐོག་གམ་གང་བདེར་གུ་རུའི་སྐུ་འབག་བཞུགས། རྒྱབ་ངོས་སུ་སྨན་སྤོད་བཏབ་པའི་ཟན་ལ་འོག་གཞི་ཟླུམ་པོ་གཉིས་བརྩེགས་སྟེང་རིན་ཆེན་ཟུར་བརྒྱད་དེ་སྟེང་པདྨ་ཁ་སྤྲོད། དེ་སྟེང་ཟླ་གདན་ལ་བླ་གཏོར་ནོར་གཟུགས་ཕྱོགས་བཞིར་པདྨ་དང་བར་མཚམས་ནོར་བུའི་རྒྱན་ལྡན་བཞག ༈ །ཆོས་གླིང་ཟབ་ལམ་ཐུགས་ནོར་གྱི་རྩ་དབང་ལ། སྟ་གོན་རྫས་བཞི། རས་བྲིས་དབུས་ཁྲིའུར་རྣམ་བུམ། མདུན་དུ་ལྷ་ཙཀ་བཅུ་དྲུག་དང་སྔགས་བྱང་། གཡས་སོགས་ལ་དབུ་རྒྱན་དར་དཔྱངས། རྡོར་དྲིལ། ནུབ་ཏུ་མཎྜལ་སྟེང་ཁྲི་འུར་ཐོད་ཆང་བྱང་སེམས་མངར་གསུམ་སྦྱར་བས་བཀང་བའི་ཁར། སིནྡྷུ་རའི་མེ་ལོང་ཆོས་འབྱུང་བསྣོལ་མ་མུ་ཁྱུད་གཉིས་ལྡན་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར། ར་ཧ། ཙ་རི། ཧྲི་ནི། ཡ་ས། ཞེས་གཡས་བསྐོར་དང་། རྒྱབ་ཀྱི་མུ་ཁྱུད་ལ་དབྱངས་གསལ་བྲིས་པས་བཀབ་པའི་སྟེང་ཤེལ་རྡོ་བཞག །མདུན་དུ་གཏེར་སྲུང་གཏོར་མ་བཀོད། སྦྱོང་ཆས་ཡུངས་ཀར། ཁམ་ཕོ་དཀར་པོ། དཱུར་བའི་སྤིར། བ་ལྕིའི་ཆངས་བུ། སེང་རས་ཚལ་པ་རྣམས་དང་། རྗེས་གནང་ཆས་འཁོར་ལོ། དུང་། པུསྟི་སོགས་ཀྱང་བསྡོགས། ༈ རྒྱལ་བ་ཀུན་འདུས་ལ། རས་བྲིས་སྟེགས་བཅས་ཁར་རྣམ་བུམ། རིག་དབང་བཞི། འཁོར་ལོ། རྒྱ་གྲམ། སྐུ་གསུམ་མམ་གུ་རུའི་སྐུ་ཙཀ །ཤེལ་ཕྲེང་། མེ་ལོང་། གསང་ཐོད། རིག་ཙཀ་མདུན་ངོས་བླ་གཏོར་དྲིལ་གཟུགས་རི་མོ་ཟླུམ་པོ་བརྩེགས་པ་རྒྱན་ལྡན་བཤམ། ༈ གུ་རུ་སྤྲོས་མེད་དོན་སྒྲུབ་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ་སྐུ་ཙཀ་བཙུགས་པ། གཡས་སུ་ཐོད་ཆང་དང་བགྲང་ཕྲེང་། གཡོན་དུ་མེ་ལོང་སིནྡྷུ་རའི་ཐིག་ལེ་ཅན་དང་ཤེལ་རྡོ། མདུན་དུ་རིགས་ལྔའི་ཕྱག་མཚན་རྣམས་སོ། ༈ །དག་སྣང་སྲིན་ཡུལ་མ་ལ། བུམ་ཐོད་རིག་ཙཀ་ཤེལ་རྡོ་བཅས་སོ། ༈ །དགོངས་གཏེར་བསམ་པ་ལྷུན་གྲུབ་ལ། རས་བྲིས་སམ་མཎྜལ་ཚོམ་བུ་བཅུ་གསུམ་མའི་སྟེང་རྣམ་བུམ། དེ་སྟེང་འཕྲུལ་སྟེགས་ལ་བླ་གཏོར་རྒྱན་ལྡན། ཤར་དུ་ལྷ་ཙཀ །ལྷོར་དབུ་རྒྱན་དང་རིན་ཆེན་ཕྲེང་བ། ནུབ་ཏུ་རྡོ་རྗེ་དང་མེ་ཏོག་ཕྲེང་བ། བྱང་དུ་དྲིལ་བུ། མཚམས་བཞིར་ཤེལ་ཕྲེང་། གསང་ཐོད། རིག་ཙཀ །ཤེལ་རྡོ་མེ་ལོང་། དབུས་སུ་འཁོར་ལོ་རྣམས་བཀོད། ༈ ཀློང་སྙིང་རིག་འཛིན་འདུས་པ་ལ། དཀྱིལ་འཁོར་རས་བྲིས་སམ་ཚོམ་བུ་གཙོ་འཁོར་དགུ་པའི་སྟེང་བུམ་པ་གཡས་གཡོན་རྒྱབ་ཏུ་གསང་ཐོད། རིག་ཙཀ །ཤེལ་རྡོ་མེ་ལོང་། གཞུང་པོད་རྣམས་བཀོད། ༈ སྙན་བརྒྱུད་ཡིད་བཞིན་ནོར་བུ་ལ། དཀྱིལ་འཁོར་རས་བྲིས་སམ་མཎྜལ་སྟེང་ཚོམ་བུ་གཅིག་བཀོད་པའི་སྟེང་དཔལ་གཏོར་རིན་ཆེན་འབར་བ་བླ་མའི་སྐུ་ཙཀ་དར་གདུགས་དམར་པོ་དབུབ་པ་བཞག ༈ །ཨོ་རྒྱན་རྗེ་འབངས་ཉེར་ལྔ་ལ། མཎྜལ་ལ་ཚོམ་བུ་གཙོ་བོ་གཅིག་ལ་འཁོར་ཉེར་ལྔས་བསྐོར་བའི་སྟེང་རྣམ་བུམ། མདུན་དུ་སྐུ་ཙཀ་ཚང་བ། གཡས་གཡོན་དུ་ཐོད་ཆང་དང་ཁ་ཊྭཱཾ། རྒྱབ་ཏུ་ཤེལ་རྡོ་མེ་ལོང་རྣམས་བཀོད། ༈ གཏེར་གསར་བླ་མ་དགོངས་འདུས་སྙིང་པོ་ལ། རས་བྲིས་སམ་ཚོམ་བུའི་ཁར་རྣམ་བུམ། གཡས་གསང་ཐོད། གཡོན་རིག་ཙཀ །རྒྱབ་ངོས་གུ་རུའི་སྐུ་འབག་དང་ཤེལ་རྡོ། རྨ་བྱའི་མདོངས། མདུན་དུ་བླ་གཏོར་བཅས། ༈ བདུད་འདུལ་རྒྱལ་པོ་ལ། མཎྜལ་ཚོམ་བུ་གཅིག་པའི་ཁར་སྟེགས་ལ་གུ་རུའི་སྐུ་ཚབ། མདུན་ངོས་བླ་མའི་གཏོར་ཆེན་བཤམ། ༈ བླ་སྒྲུབ་ཐུགས་ཀྱི་ཡང་སྙིང་ལ་རས་བྲིས་སམ་ཚོམ་བུ་ལྷ་གྲངས་སྟེང་སྟེགས་ལ་རྣམ་བུམ། གཡས་སུ་གསང་ཐོད། གཡོན་དུ་མེ་ལོང་ལ་ལི་ཁྲི་བྱུགས་ཤིང་རྡོ་རྗེ་པདྨ་བྲིས་པ། རྒྱབ་ཏུ་གུ་རུའི་སྐུ་འབག་དང་ཤེལ་རྡོ། །མདུན་དུ་བླ་མའི་གཏོར་ཆེན་རྣམས་བཤམ། ༈ ཕྱི་སྒྲུབ་བར་ཆད་ཀུན་སེལ་དབང་རྒྱས་པ་གཞན་དུ་ཤེས། འབྲིང་བསྡུས་ལ། རས་བྲིས་སམ་ཚོམ་བུ་ལྷ་གྲངས་མཉྫིའི་ཁར་རྣམ་བུམ་དང་ཐོད་པའི་བདུད་རྩི་མེ་ལོང་སིནྡྷུ་རའི་ཐིག་ལེ་ཧྲཱིཿཡིིག་བྲིས་པ་བརྩེགས་མར་བཀོད། གཡས་སུ་གཏོར་མ་རིན་ཆེན་ཟུར་བརྒྱད་མ། གཡོན་དུ་གུ་རུའི་སྐུ་ཚབ། དབུས་སོགས་སུ་ལྷ་ཙཀ་ཚང་བ། དབང་ཕྲེང་། མེ་ལོང་། མཐའ་རྟེན་ཚེ་དབང་བསྐུར་ན་ཚེ་བུམ་ཚེ་རིལ་ཆང་མདའ་དར་བཅས། ༈ ནང་སྒྲུབ་ཡིད་བཞིན་ནོར་བུའམ་བསམ་ལྷུན་དབང་རྒྱས་པ་ལ། རས་བྲིས་སྟེགས་ཁར་རྣམ་བུམ། ཐོད་ཆང་མེ་ལོང་སིནྡྷུ་རའི་ཐིག་ལེ་ལྔ་ཚོམ་བཾ་ཧ་རི་ནི་སས་མཚན་པ་གུ་རུའི་སྐུ་འབག་རྣམས་བརྩེགས། ལྷ་ཙཀ །སྔགས་བྱང་ཚང་མ། མེ་ལོང་། ལྷ་གནས་ཐད་ཀར་དངོས་གྲུབ་ཀྱི་རྫས་བཅུ་གསུམ་དངོས་སམ་ཙཀ་ལི། རྒྱབ་ངོས་སུ་བླ་མའི་གཏོར་ཆེན་གོང་མཚུངས་རིག་ཙཀ །མཐའ་རྟེན་ཚེ་དབང་བསྐུར་ན་དེའི་ཆས་གོང་མཚུངས་རྣམས་བཀོད། ༈ རྩ་དབང་འབྲིང་པོ་ལ་དངོས་གྲུབ་རྫས་བཅུ་གསུམ་དང་རིག་ཙཀ་མི་དགོས་གཞན་དབང་ཆེན་དང་འདྲ། གཏོར་ཆེན་མདུན་དུ་བཀོད། ༈ གཏོར་དབང་ལ། མཎྜལ་སྟེང་གཏོར་ཆེན་ཁོ་ན་བཞག ༈ །ཚེ་དབང་ཟུང་འབྲེལ་དུ་བྱེད་ན། མཎྜལ་ལ་དེའི་ཆས་རྣམས་བསྒྲིག ༈ །གསང་སྒྲུབ་མཚོ་སྐྱེས་རྡོ་རྗེ་ལ། རས་བྲིས་སམ་མཎྜལ་ཚོམ་བུ་གཅིག་པའི་སྟེང་རྣམ་བུམ། གཡས་སུ་གསང་ཐོད། གཡོན་དུ་མེ་ལོང་དྭངས་པ་དང་རྟ་ཕག་ཡབ་ཡུམ་གྱི་ཙཀ་ལི། རྒྱབ་ཏུ་བླ་གཏོར་རྣམས་བཀོད། ༈ རྩ་གསུམ་རིག་འཛིན་མཆོག་སྒྲུབ་དོན་དབང་ལ། དཀྱིལ་འཁོར་དབུས་སུ་ཁྲིའུའི་ཁར་གུ་རུའི་སྐུ་ཚབ་དང་ཤེལ་རྡོ། དེ་མདུན་གུ་རུའི་སྐུ་ཆས། བྱང་དུ་བུམ་པ་བཅུད་ལྡན་དང་ཆོས་གོས་སོགས། ཤར་དུ་རྡོར་སེམས་སྐུ་སྔགས་བྱང་ཕྱག་མཚན་རྣམས་དང་དར་དང་རིན་ཆེན་རུས་རྒྱན། ལྷོ་རུ་གླེགས་བམ་དང་དཔལ་ཆས། ནུབ་ཏུ་ཐོད་པའི་བདུད་རྩི་དང་རིག་ཙཀ །ཚེ་དབང་ཆས་མདུན་རྒྱབ་གང་བདེར། ཚེ་འབྲང་དང་གཡས་གཡོན་དུ་ཚེ་རིལ་ཆང་། བཀྲ་ཤིས་རྫས་རྟགས་རྒྱལ་སྲིད་ཙཀ་ལི་བཅས་བཀོད། ༈ གསང་ཐིག་བླ་སྒྲུབ་ལ། དཀྱིལ་འཁོར་རས་བྲིས་སམ་ལྷ་གྲངས་ཚོམ་བུའི་དབུས་སུ་ཁྲིའུ་ལ་བུམ་པ་བཅུད་ལྡན་མགུལ་ཆིངས་དཀར་པོ་ཅན་གྱི་ཁར་ཐོད་པའི་བདུད་རྩི། དེ་སྟེང་མེ་ལོང་ལ་སིནྡྷུ་རའི་ཐིག་ལེ་ལྔ་ཚོམ་ལ་ཧཱུྃ་ཨོཾ་སྭཱཿཨཱཿཧཱ། བྲིས་པས་བཀབ་པའི་སྟེང་དུ་གུ་རུའི་སྐུ་ཚབ་བཞུགས། རྒྱབ་ཏུ་བླ་མའི་གཏོར་ཆེན་རྒྱན་ལྡན། མདུན་དུ་ཚེ་འབྲང་ཚེ་རིལ་ཚེ་ཆང་བཅས། དངོས་གྲུབ་སྦྱིན་རྒྱུའི་བཟའ་བཏུང་ཀྱང་བཀོད། ༈ ࿋་་་་རྟགས་འདི་འདྲའི་བར་དུ་བཅུག་པའི་ལག་ལེན་རྣམས་དཔལ་སྤུངས་པར་མར་མེད་ཅིང་རྗེས་སུ་ཆད་འཛུད་བྱས་པ་དཀྱུས་སུ་བཅུག་པ་དང་། ད་དུང་མ་ཚང་བ་མང་པོ་འདུག་ཀྱང་། དབང་ཆོག་སོ་སོའི་དབུར་བཅས་བཤམ་གང་དགོས་གསལ་བས་དོ་གལ་མ་བྱས་སོ། །མཆན། ࿋ གསང་ཐིག་ཡུམ་བཀའི་བཅས་བཤམ། དཀྱིལ་འཁོར་གཞུང་མཐུན་ཡོད་ན་དང་མེད་ན་མེ་ཏོག་གི་ཚོམ་བུ་ལྷ་གྲངས་བཀོད་པའི་ཁར། ཐོད་བཟང་ནང་ཨ་མྲྀཏས་སྦྱལ་བ། མེ་ལོང་སིནྡྷུ་ར་བརྡལ་པ་ལ་ཆོས་འབྱུང་བསྣོལ་མ་པདྨ་འདབ་བཞི་ཅན་གྱི་ལྟེ་བར་བཾ་ཡིག་ལ་སྒྲུབ་སྔགས་ཀྱིས་བསྐོར། འདབ་བཞིར་ཧ་རི་ནི་ས་གཡས་བསྐོར་དུ་བཀོད་པ་དར་དམར་གྱིས་བཀབ་པའི་སྟེང་ཤེལ་རྡོ་བཞག །མདུན་སོགས་གང་བདེར་གཙོ་མོའི་སྐུ་ཙཀ །དབང་ཕྲེང་། ཕྱག་མཚན་གྲི་ཐོད། དར་གོས་རིན་ཆེན་པད་ཕྲེང་། རུས་པའི་ཕྱག་རྒྱ་ལྔ་རྣམས་ཀྱི་ཙཀླི །རྒྱབ་ངོས་སུ་མཁའ་འགྲོའི་གཏོར་མ་རྒྱན་ལྡན་སྐུ་ཙཀ་དར་གདུགས་ཀྱིས་སྤྲས་པ། མདུན་དུ་ཚེ་འབྲང་དང་ཚེ་རིལ་ཆང་། གཞན་ཡང་ཆོས་དྲུག་གི་བྱིན་རླབས་ཆས། དཔལ་འབར། མེ་ལོང་གསལ་བ་དང་ལྷ་སྐུ །དྭངས་པའི་ཤེལ། གཟུགས་བརྙན་སྣ་ཚོགས་བྲིས་པ། མདའ་གཞུ། མར་མེ་རྣམས་དང་། བྱིན་འབེབས་བརྒྱད་ལ་མཁོ་བའི། སིནྡྷུ་ར། བདུད་རྩི། མར་མེ། གཞུང་གསལ་བདུག་སྤོས། མེ་ཏོག་དཀར་དམར་མཐིང་གསུམ་འབྲུ་ལ་ཚོན་གྱིས་བསྒྱུར་བ། བདུད་རྩི་ལྔ་དང་མངར་གསུམ་ཟན་ལ་བསྲེས་པའི་ཏིང་ལོ་དམར་པོ་སློབ་མའི་གྲངས་མཉམ། བྱང་སེམས་དཀར་དམར་དང་མངར་གསུམ་སྦྱར་བའི་ཆང་། བླ་མའི་གཏོར་མ་སྐུ་འབག་གིས་བརྒྱན་པ། གཏོར་དབང་སྐབས། སིནྡྷུ་རའི་ཐིག་ལེ། ཚེ་དབང་ལ། ཚེ་འབྲང་། ཚེ་རིལ་ཆང། ཚེ་མདའ་བཅས་འདུ་བྱའོ། ࿋ ༈ །ཚིག་བདུན་བླ་སྒྲུབ་སོ་སོར། མཎྜལ་ཚོམ་བུ་ལྷ་གྲངས་བཀོད་པའི་དབུས་ཁྲིའུ་ལ་རྣམ་རྒྱལ་བུམ་པ། མདུན་དུ་སོ་སོའི་སྐུ་ཙཀ །རྒྱབ་ཏུ་བླ་གཏོར་དང་ཁྲོ་བོའི་རིགས་ལ་དཔལ་གཏོར། གཡས་གཡོན་དུ་ཞི་དྲག་ལས་མཐུན་གྱི་ཕྲེང་བ་དང་ཤེལ་རྡོ། མཆོག་དབང་དགོས་རིགས་ལ་ཐོད་པའི་བདུད་རྩི་དང་རིག་ཙཀ །དངོས་གྲུབ་ཀྱི་རྫས་བཅས་བཀོད། ༈ ཡུམ་བཀའ་བདེ་ཆེན་རྒྱལ་མོ་ལ། དཀྱིལ་འཁོར་རམ་ཚོམ་བུའི་དབུས་སུ་རྐང་གསུམ་སྟེང་རྣམ་བུམ་ཁར་ཐོད་པའི་བདུད་རྩི། དེ་སྟེང་སིནྡྷུ་རའི་མེ་ལོང་ལ་ཆོས་འབྱུང་དབུས་སུ་ཧྲཱིཿཡིག་མཐར་སྙིང་པོས་བསྐོར་བ་བཞག་ལ་དར་དམར་གྱིས་བཀབ། སྐུ་ཙཀ །སྔགས་བྱང་། ཤེལ་རྡོ། མར་མེ། གྲི་ཐོད་ཁ་ཊྭཱཾ་རུས་རྒྱན་རྣམས་ཀྱི་ཙཀ་ལི། སྒྲུབ་གཏོར་ཟླ་གམ་རྒྱན་ལྡན་དར་གདུགས་བཅས་གང་འོས་སུ་བཀོད། མདུན་དུ་བཀའ་སྲུང་བདེ་ཆེན་རྒྱལ་མོ་མཆེད་གསུམ་གྱི་གཏོར་མ་སྐུ་ཙཀ་དར་གདུགས་ཀྱིས་སྤྲས་པའང་བཞག་གོ ༈ །སྒམ་པོའི་གསང་ལམ་བླ་སྒྲུབ་ལ། སྟེགས་བུའི་དབུས་སུ་རྐང་གསུམ་སྟེང་སིནྡྷུ་རས་བྱུགས་པའི་མེ་ལོང་ཆེ་ལེགས་ངོས་སུ་ཆོས་འབྱུང་བསྣོལ་བའི་དབུས་སུ་པདྨ་འདབ་བཞིའི་ལྟེ་བར་བཾ། ཆོས་འབྱུང་གི་མཐར་ཨོཾ་གསུམ་མའི་སྔགས་ཀྱིས་བསྐོར་བ་བཞག །གཡས་སུ་བུམ་པ་ཆིངས་དམར་རྒྱན་ལྡན། གཡོན་དུ་ཀ་པཱ་ལ་ཆང་དང་བདུད་རྩི་རིལ་བུས་བཀང་པ་བཞག །རྐང་གླིང་སོགས་འདུ་བྱ། ༈ གནམ་ཆོས་ཌོམྦི་པ། བིརྺ་པ། ཕ་དམ་པ། མི་ཏྲ་ཛོ་ཀི །རད་གླིང་ལྔ་ལ། གཟུངས་དབང་སྤྱི་འགྲེ་བཤམ། རྫས་དབང་ཙཀ་ལི་གཅིག་གིས་ཆོག ༈ །དག་སྣང་པཀྴིའི་བླ་སྒྲུབ་ལ། དཀྱིལ་འཁོར་པདྨ་འདབ་བརྒྱད་སྟེང་རྐང་གསུམ་ཁར་དཔལ་གཏོར་དམར་པོ་བརྗིད་ལྡན་ལ་ཟུར་གསུམ་བདུན་གྱིས་བསྐོར་བ་དར་གདུགས་ཅན། མདུན་རྒྱབ་གང་བདེར་རྣམ་བུམ། ཧཱུྃ་དཀར་དམར་མཐིང་གསུམ། རྡོ་རྗེ་དང་ཕུར་བུ། མེ་ལོང་། རྒྱལ་མཚན། ཐིག་ལེ། གཙོ་འཁོར་སྐུ་གཟུགས། དར་དཔྱངས། མེ་ཏོག །རྒྱ་གྲམ་རྣམས་ཀྱི་ཙཀ་ལི་བཀོད། ༈ བླ་སྒྲུབ་ཐིག་ལེའི་རྒྱ་ཅན་ལ། མཎྜལ་ཚོམ་བུ་ལྔ་པའི་ཁར་ཁྲི་འུར་བྷནྡྷ་དུམ་གསུམ་ཆོས་སྨན་འབྲུ་ཡིས་བཀང་པའི་ནང་རིག་འཛིན་འདུས་པའི་སྲོག་འཁོར་བཅུག་པ་ལ་དར་གུར་ཕུབ། གཡས་སུ་རྣམ་བུམ། མདུན་དུ་བླ་མའི་སྐུ་བརྙན། གཡོན་དུ་གསང་ཐོད་རིག་ཙཀ །ཌཱ་རུ་ཁ་ཊྭཱཾ་རུས་རྒྱན་རྣམས་ཀྱི་ཙཀ་ལི། རྒྱབ་ཏུ་ཤེལ་རྡོ་དང་སྙིང་ཏིག་ཆེན་མོ་མ་བུ་གང་རུང་གི་གླེགས་བམ་རྣམས་བཞག ༈ །གྲུབ་ཐོབ་ཐུགས་ཏིག་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ། མདུན་སོགས་སུ་གྲུབ་ཆེན་ཐང་རྒྱལ་སྐུའམ་ཙཀ་ལི། ཨཱ་ལི་ཀཱ་ལིའི་སྔགས་བྱང་གསང་ཐོད། མཁའ་འགྲོ་སྡེ་ལྔ་དང་རིག་ཙཀ །ཤེལ་རྡོ་འཇའ་རིས། ཁ་ཊྭཱཾ་ཅང་ཏེའུ་ཐོད་པ། རྒྱབ་ཕྱོགས་བླ་གཏོར་རྒྱན་ལྡན་བཀོད། ཚེ་དབང་ལ། བུམ་པ། ཐོད་ཆང་། ཚེ་རིལ། ཤེལ་རྡོ་མེ་ལོང་བཅས་ཕལ་ཆེར་སྔ་མས་འཐུས་པར་བྱས་ཀྱང་ཆོག ༈ །སྐུ་གསུམ་རིགས་འདུས་ཟབ་ཏིག་ལ། མཎྜལ་ཚོམ་བུའི་སྟེང་རྐང་གསུམ་ལ་བླ་གཏོར་རྒྱན་ལྡན་དར་གདུགས་བཅས་དགོད་དོ།། ༈ །།དེ་ནས་བླ་མ་དྲག་པོའི་སྐོར་ལས། ཐོག་མར་དྲག་དམར་འོ་བྲན་ལུགས་ལ། རས་བྲིས་སྟེགས་ཁར་རྣམ་བུམ་ཐོད་ཆང་སིནྡྷུ་རའི་མེ་ལོང་ལ་ཆོས་འབྱུང་ནང་ཨརྩིག་སོགས་བྲིས་པ་དར་དམར་གྱིས་བཀབ་པའི་སྟེང་གུ་རུའི་སྐུ་འབག་བཞུགས། ཤར་དུ་རྡོ་རྗེ། ལྷོར་ཐོད་ཆང་། ནུབ་ཏུ་དྲིལ་བུ། བྱང་དུ་སེང་ཕུར། དབུས་སུ་རྡོ་རྗེ་དང་ལྕགས་སྡིག །མདུན་དུ་དཔལ་གཏོར་རྣམས་བཞག ༈ །ཉང་གི་གུར་དྲག་བདེ་གཤེགས་འདུས་པ་ལ། རས་བྲིས་སྟེང་མཉྫི་ལ་རྣམ་རྒྱལ་བུམ་པའི་ཁར་བྷནྡྷ་བཅུད་ལྡན། དེ་སྟེང་མེ་ལོང་ལ་སིནྡྷུ་རའི་དཀྱིལ་འཁོར་ཆོས་འབྱུང་བསྣོལ་མའི་ནང་པདྨ་འདབ་བཞིའི་དབུས་དང་ཕྱོགས་བཞིར་ཨོཾ་ཧཱུྃ་སྭཱ་ཨཾ་ཧཱ། མཐར་ཐོད་ཕྲེང་སྡེ་ལྔའི་སྔགས་གཡས་བསྐོར་དུ་བཀོད་པ་བཞག་ལ་དར་དམར་གྱི་གུར་ཕུབ། མདུན་ཕྱོགས་སུ་ཐོད་ཕྲེང་སྡེ་ལྔ་དང་གོ་ཆ་ལྷ་ལྔའི་དབང་ཙཀ །རྒྱབ་ཏུ་གཏོར་མ་རིན་ཆེན་འབར་བ། སྡེ་བརྒྱད་སྲོག་གཏད་བྱེད་ན་དེའི་འོག་ཏུ་ཐོད་པ་མཚན་ངན་དུ་སྡེ་བརྒྱད་བླ་རྡོ་རྣམས་བཞག །ཤར་དུ་བུམ་པ་བཅུད་ལྡན། ལྷོར་ཚོགས་རྫས་བཟའ་བཏུང་། ནུབ་ཏུ་དཔལ་གཏོར་ཟླ་གམ་ཉི་ཟླ་ནོར་བུས་བརྒྱན་ཅིང་ཤ་ཆང་ཆོས་སྨན་བཏབ་པ། བྱང་དུ་ལྕགས་ཕུར་ཅོད་པན་ཅན། གཞན་ཡང་ཞི་ཆས། གུ་རུའི་སྐུ་ཆས། རྡོ་རྗེ། ལྕགས་སྡིག །རུས་པའི་རྒྱན་དྲུག །གླང་ཀོ །མི་ལྤགས། སྟག་ཤམ། ཐོད་ཕྲེང་། སྦྲུལ་ཆུན། ཁྲག་ཐིག །ཐལ་ཚོམ་རྣམས་སོ། །ཐོད་རྔ་རྐང་གླིང་ཐོད་སྐུ་ཁ་ཊྭཱཾ་རྣམས་སྣོད་གཅིག་ཏུ་བཞག་པ། ༈ འདོད་བུམ་གྱི་དྲག་པོ་བདེ་འདུས་ལ། རས་བྲིས་སྟེང་སྟེགས་ལ་རྣམ་བུམ། གཡས་གཡོན་དུ་གསང་ཐོད། རྡོར་དྲིལ། གོ་ཆ་ལྷ་བཞིའི་སྐུ་དང་དེ་དག་གི་རྟེན་རྫས་པུསྟི། ཕུར་བུ། རྡོ་རྗེ། ལས་བུམ། ཁྱུང་ལྔ། ཚེ་གཏོར་རམ་སྣང་མཐའི་སྐུ །ཐོད་རྔ་ཐོད་ཁྲག །རྒྱབ་ཏུ་དཔལ་གཏོར་རྒྱན་ལྡན་རྣམས་བཀོད། ༈ པད་གླིང་དྲག་དམར་ལ། དཀྱིལ་འཁོར་བརྗེ་བ་མ་གཏོགས་འདྲ། སྲུང་སྐུད་སློབ་མའི་གྲངས་མཉམ་བསྡོག ༈ །འབྲིང་པོ་མེའི་སྤུ་གྲི་ལ། རས་བྲིས་སྟེང་རྣམ་བུམ་ཐོད་པའི་བདུད་རྩི་མེ་ལོང་དྲི་མེད་གུ་རུའི་སྐུ་འབག་རྣམས་བརྩེགས། དེ་རྒྱབ་ཕྱོགས་བཞིར་རྡོ་རྗེ། བདུད་རྩིའི་ཐོད་པ། དྲིལ་བུ། ཕུར་པ། མདུན་དུ་དཔལ་གཏོར་རྣམས་བཞག ༈ །བསྡུས་པ་ལུ་གུ་རྒྱུད་ལ། རས་བྲིས་སམ་ཚོམ་བུ་ལྷ་གྲངས་ཁར་གཏོར་མ་རིན་ཆེན་འབར་བ་སྐུ་ཙཀ་གིས་བརྒྱན་པ། གཡས་སུ་ཐོད་ཆང་གཡོན་དུ་རྡོ་རྗེ་བཅས་བཀོད། ༈ གུ་རུ་དར་ནག་བེར་ཆེན་ལ། རས་བྲིས་སྟེང་དཔལ་གཏོར་རྒྱན་ལྡན་སྐུ་རྟེན་གྱིས་མཚན་པ་བཞག ༈ །བྱང་གླིང་གུར་དྲག་ལ། མཎྜལ་ཚོམ་བུ་གཅིག་པའི་སྟེང་གནམ་ལྕགས་རྡོ་རྗེ་དང་དྲིལ་བུ། གཡས་སུ་གསང་ཐོད། གཡོན་དུ་ཕག་མོའི་སྐུ་ཙཀ །མདུན་དུ་ཐོད་སྐམ་དབུ་རྒྱན། ཁྲག་ཞག་ཐལ་གསུམ། རུས་རྒྱན། ཟབ་བེར། གླང་ཞིང་སྟག་ལྤགས། མགོ་ཕྲེང་། མེ་ཕུང་། པདྨ་ཉི་ཟླ། དྲེགས་པའི་གདན་བཅས། ༈ བྱང་གཏེར་ཐུགས་སྒྲུབ་དྲག་པོ་རྩལ་གྱི་དབང་རྒྱས་པ་ལ། སྟ་གོན་རྫས་བཞི་མཆོད་པ་བཅས། རས་བྲིས་སྟེང་ཁྲིའུ་ལ་རྣམ་བུམ་དང་བླ་མའི་གཏོར་ཆེན། ལྷ་ཙཀ་རྣམས། དབུས་སུ་གནམ་ལྕགས་རྡོ་རྗེ་རྩེ་དགུ་དང་དྲིལ་བུ། ཤར་དུ་རྡོར་དྲིལ། ཤར་ལྷོ་རྡོ་རྗེ་བེ་ཅོན། ལྷོར་འཁོར་ལོ་བེ་ཅོན། ལྷོ་ནུབ་བདུད་རྩིའི་གའུ། ནུབ་ཏུ་པདྨ་རྔེའུ་ཆུང་། ནུབ་བྱང་དུ་ཐོད་པ་བུམ་རིལ། བྱང་དུ་ལྕགས་ཕུར། བྱང་ཤར་སྙིང་ཕྲེང་རྣམས་བཀོད། མགྱོགས་དབང་སྐབས་སུ་འདིའི་ཙཀ་ལི་ཕྱོགས་སྤོམ་བཞག་ཀྱང་རུང་། རིགས་ལྔའི་དབུ་རྒྱན། རྡོར་དྲིལ། ཐོད་ཕྲེང་། གླང་སྟག་ཞིང་གསུམ། སྦྲུལ་ཆུན། ཁྲག་ཞག་ཐལ་གསུམ། གོ་ཁྲབ། མེ་དཔུང་། རུས་རྒྱན་རྣམས་སོ་སོ། ཤར་དུ་ཐོད་པའི་བདུད་རྩི་དང་མར་མེ། ལྷོར་མེ་ལོང་སིན་དྷུ་རའི་ཐིག་ལེ་བཀོད་པ་དང་རིག་ཙཀ་སྨན་ཐོད། ནུབ་ཏུ་ཚེ་འབྲང་དང་རཀྟ། བྱང་དུ་ཤེལ་རྡོ་མེ་ལོང་མཆོད་ཡོན། རྗེས་གནང་ཆས། རྡོར་དྲིལ། རྒྱལ་མཚན། དུང་དཀར། རྔ་ཆེན། མར་མེ་གསུམ། གཏུམ་མོའི་མེ་དབང་རྫས་བྱང་སེམས་དཀར་དམར། སུག་སྨེལ། ཚ་བ་གསུམ། ཚྭ་སྣ་གསུམ་རྣམས་ཀྱི་རིལ་བུའང་ཐོད་ཆང་དང་ལྷན་ཅིག་བཞག་གོ སློབ་མ་མཆོད་པ་སོགས་འདུ་བྱའོ། ༈ །སྨིན་ལམ་འབྲིང་པོ་ལ། རས་བྲིས་སམ་མཎྜལ་སྟེང་ལྷ་གྲངས་ཀྱི་ཚོམ་བུ་བཀོད་པའི་ཁར་རྣམ་བུམ་ཆིངས་སྔོན་པོ་ཅན་གྱི་ཁ་རྒྱན་གསེབ་ཏུ་གཙོ་དགུའི་ཙཀ་ལི། མདུན་དུ་གསང་ཐོད་མེ་ལོང་སིནྡྷུ་རའི་ཐིག་ལེ་ལྔ་ཚོམ་ཅན་གྱིས་བཀབ་པ་དང་རིག་ཙཀ །རྡོར་དྲིལ། རྒྱལ་མཚན་དུང་དཀར་རྔ་ཆེན་རྣམས་ཕྱོགས་བསྡུས། རྒྱབ་ཏུ་གཏོར་ཆེན་དང་བཟའ་བཏུང་འགྱེད་རྒྱུ་བཞག ༈ །བསྡུས་པ་བྱིན་རླབས་ཐུགས་རྗེའི་དབང་བསྐུར་ལ་རས་བྲིས་སམ་ཚོམ་བུ་གཅིག་པའི་སྟེང་དཔལ་གཏོར་ལས་བཞི་ལྷུན་གྲུབ་ལ་བྲིས་སྐུ་བཙུགས་པ་དང་། ཧཱུྃ་ཡིག་སྔོན་པོ། ཧཱུྃ་ཁ་དོག་ལྔ། མེ་ལོང་ཐིག་ལེ་ལྔ་ཚོམ་ཅན། བཟའ་བཏུང་བཅས་བཀོད། ༈ དག་སྣང་ཚེ་གུར་སྦྲགས་མ་ལ། དཀྱིལ་འཁོར་དབུས་རྣམ་བུམ་བཅུད་ལྡན། དེ་སྟེང་ཁྲིའུར་དཔལ་གཏོར་རྒྱན་ལྡན། ཚེ་དཔག་མེད་དང་ཁྲོས་ནག་སྐུ །གཡས་གཡོན་དུ་ཀ་པཱ་ལ་བདུད་རྩིས་གང་བ། ཚེ་རིལ། ཤར་དུ་རྒྱ་གྲམ། ལྷོར་བུམ་པ། ནུབ་ཏུ་མེ་ཏོག །བྱང་དུ་ཉི་ཟླ། མདུན་དུ་ཚེ་འབྲང་། རྒྱབ་ཏུ་མདའ་དར་རྣམས་བཀོད། ༈ རྡོར་གླིང་གུར་དྲག་དབང་བཞི་སྙན་བརྒྱུད་མ་ལ། རས་བྲིས་སྟེང་ཁྲིའུར་དཔལ་གཏོར་སྐུ་ཙཀ་རྒྱན་ལྡན། གཡས་སུ་རྣམ་བུམ། གཡོན་དུ་གསང་ཐོད་དར་དམར་མེ་ལོང་གིས་བཀབ་པ་དང་ཕག་མོའི་ཙཀ་ལི་དྲིལ་བུ། རྒྱབ་ཏུ་གུ་རུའི་སྐུ །མདུན་དུ་ལྷ་ཙཀ་རྣམས་དང་ཚེ་འབྲང་སྣང་མཐའི་ཙཀ་ལི། དུར་ཁྲོད་ཆས་སྦྲུལ་གླང་ཞིང་སྟག་ཐོད་ཕྲེང་ཐོད་རྒྱན་ཐལ་ཁྲག་ཞག་ཟོ་རིས་ཅན། སྲུང་སྐུད་དམར་པོ་སློབ་མའི་གྲངས་མཉམ་བཅས། ༈ གུར་དྲག་མེ་རླུང་འཁྱིལ་བའི་དབང་རྒྱས་པ་རྡོ་རྗེའི་ཕྲེང་བ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སྟེང་ཁྲིའུར་རྣམ་རྒྱལ་བུམ་པའི་ཁར་ཐོད་ཆང་མེ་ལོང་སིནྡྷུ་ར་བརྡལ་པ་ལ་ཆོས་འབྱུང་བསྣོལ་མའི་དབུས་སུ་ཧྲཱིཿམ། མཐའ་བསྐོར་ཧ་རི་ནི་ས་ར་ཙ་ཧྲི་ཡ་བྲིས་པ་རྣམས་བརྩེགས་ལ་དར་དམར་གྱིས་བཀབ་པའི་སྟེང་ཤེལ་རྡོ་བཞག །རྒྱབ་ཏུ་དཔལ་གཏོར་རྒྱན་ལྡན་གྱི་གཡས་གཡོན་དུ་ཚེ་འབྲང་ཚེ་རིལ་ཆང་། དབུས་སོགས་སུ་གཙོ་བོའི་སྐུ་སོགས་ལྷ་ཙཀ་རྣམས་དང་། རྡོ་རྗེ་གྲི་གུག་རལ་གྲི །བནྡྷ་ཁ་ཊྭཱཾ། ལྕགས་སྡིག །ཐོད་སྐམ་དབུ་རྒྱན། ཁྲག་ཞག་ཐལ་གསུམ། གླང་ཀོ །གོ་ཁྲབ། ཞིང་ལྤགས། སྦྲུལ་ཆུན་ཐོད་ཕྲེང་། རུས་རྒྱན། སྟག་ཤམ་གཟིག་ཤམ། སྒྲུབ་ཡིག །ཕྲེང་དམར། མེ་ལོང་དང་ཨ་དཀར་རྣམས་བཀོད། ༈ དོན་དབང་ནོར་བུ་ལུགས་ལ། རས་བྲིས་སམ་ཚོམ་བུ་ལྷ་གྲངས་སྟེང་ཁྲིའུར་དཔལ་གཏོར་བང་རིམ་སུམ་བརྩེགས་སྟེང་རིན་ཆེན་འབར་བ་རྒྱན་ལྡན་སྐུ་ཙཀ་དར་གདུགས་ཅན་བཀོད། གཙོ་བོའི་ཕྱག་མཚན་དྲུག་འཛོམ་ན་དང་གོང་གསལ་ལྷ་ཙཀ །མ་འཛོམ་ན་གཙོ་བོའི་སྐུ །ཧཱུྃ་ཡིག་བཅུ། བནྡྷའི་བདུད་རྩི། སྒྲུབ་ཡིག །ཕྲེང་དམར། གཏེར་སྲུང་དམར་གཏོར། ༈ གཏོར་དབང་ཁ་རྐྱང་། རས་བྲིས་སམ་ཚོམ་བུ་ལྔ་པའི་ཁར་གཏོར་མ་དོན་དབང་ལྟར་བཤམས། ༈ པད་དཀར་དྲག་པོ་ཀཱི་ལ་ཡར། མཎྜལ་ཚོམ་བུ་གཅིག་པའི་སྟེང་ཁྲིའུར་དཔལ་གཏོར་རྒྱན་ལྡན་སྐུ་ཙཀ་དར་གདུགས་བཙུགས་པ། གཡས་སུ་ཀ་པཱ་ལ་བདུད་རྩིས་བཀང་བ། གཡོན་དུ་གསེར་གྱི་རྡོ་རྗེ་རྩེ་དགུ །རྒྱབ་ཏུ་བུམ་པ་རྒྱན་ལྡན་ལ་ཐོད་ཕྲེང་སྡེ་ལྔའི་ཙཀ་ལི་ཡོད་ན་བཙུགས། མདུན་དུ་ཕུར་པ་ཅོད་པན་ཅན། སྡེ་བརྒྱད་གཏོར་མ་ཧོམ་ཁུང་ལིང་ག་བཅས་བཤམ། ༈ རིག་འཛིན་ལེགས་ལྡན་རྡོ་རྗེའི་དྲག་པོ་དབུ་དགུའི་དོན་དབང་ལ། དཀྱིལ་འཁོར་མཎྜལ་ཚོམ་བུ་གཙོ་འཁོར་དགུ་བཀོད་པའི་སྟེང་དུ་དཔལ་གཏོར་སྐུ་ཙཀ་དར་གདུགས་ཅན། གཡས་གཡོན་དུ་ལྕགས་རྡོར་རྩེ་དགུ་དང་ཐོད་ཆང་། ཕྱག་མཚན་རྡོ་རྗེ་ཐོད་ཁྲག་དང་དུར་ཁྲོད་ཆས་ཙཀ་བཅས་བཀོད། ༈ མི་འགྱུར་ལས་གླིང་པདྨ་གཏུམ་པོ་ལ། ཚོམ་བུ་གཅིག་སྟེང་བུམ་པ་ཆིངས་དམར་ཁ་རྒྱན་སྐུ་ཙཀ་གིས་བརྒྱན་པ། མདུན་དུ་དཔལ་གཏོར། གཡས་སུ་མེ་ལོང་ལ་བསྙེན་སྔགས་མཚལ་བྲིས་ཅན། གཡོན་དུ་རྡོ་རྗེ། རྒྱབ་ཏུ་ལྕགས་ཀྱུ་ཕུར་པ་རྣམས་བཤམ། བསྒྲལ་དབང་བྱེད་ན་ལིང་ག་གདབ་ཕུར་སོགས་ཀྱང་བསྡོགས། ༈ དགོངས་ཟབ་གྲོ་ལོད་ལ། མཎྜལ་ཚོམ་བུ་གཅིག་པར་གཏོར་མ་རྡོ་རྗེའི་དབྱིབས་ཅན་སྐུ་ཙཀ་དར་གདུགས་ཅན། ཧཱུྃ་ཡིག་དང་རྡོ་རྗེ། ཕུར་བུ་བཅས། ༈ ཞིག་གླིང་གནམ་ལྕགས་མེ་འཁོར་ལ། དཀྱིལ་འཁོར་རྒྱས་པའམ་པདྨ་འདབ་བརྒྱད་སྟེང་རྣམ་བུམ། གཡས་སུ་དཔལ་གཏོར། གཡོན་དུ་ཐོད་ཆང་ཁར་སིནྡྷུ་རའི་མེ་ལོང་རིགས་ལྔ་ཡབ་ཡུམ་བཅུའི་ས་བོན་བྲིས་པའི་སྟེང་ཤེལ་རྡོ་བཞག ༈ །ཀརྨ་གུ་རུའི་སྲོག་གཏད་ལ། གཞི་སྟེང་ལྕགས་སྣོད་དུ་ཟན་གྱི་ཆོས་འབྱུང་དཀར་པོའི་སྟེང་བདུད་བཞི་དཀར་སེར་དམར་ནག་གཉིས་རེ་ཁ་སྤྲོད་བྱས་པ་བཞི་བརྩེགས་ལ་སེང་ལྡེང་ཕུར་པ་ཅོད་པན་ཅན་བཙུགས། དེ་སྟེང་ཁྲིར་དབང་གཏོར་གདན་ཟུར་གསུམ་རྩག་མཐོའི་སྟེང་གཏོར་མ་ཟུར་གསུམ་ནག་པོ་སྐུ་རྟེན་དར་གདུགས་ཅན་བཞག །གཡས་སུ་རྒྱ་གྲམ། གཡོན་དུ་སེང་ཕུར། མདུན་དུ་ཟོར་གཏོར་སྲིད་མེས་ཀྱི་གཟུགས་ཅན་མེ་རིས་བརྒྱན་པ་བཀོད། ༈ འཇའ་ཚོན་གུར་དྲག་གཏོར་དབང་ལ། ཚོམ་བུ་གཅིག་སྟེང་དཔལ་གཏོར་བཤམ། ༈ འཇའ་ཚོན་གྲོ་ལོད། ཚོམ་བུ་གཅིག་སྟེང་རྣམ་བུམ། དཔལ་གཏོར། གཡས་གཡོན་རཀྴའི་ཕྲེང་བ། རྒྱ་གྲམ། རྡོ་རྗེ་ཕུར་བུ། སྤྲོ་ན་ཧཱུྃ་ཁ་དོག་ལྔའི་ཙཀ་ལི་བཅས་བཀོད། ༈ བདུད་འདུལ་གྲོ་ལོད་ལ། རས་བྲིས་སམ་ཚོམ་བུ་ལྷ་གྲངས་སྟེང་ཁྲིའུར་དཔལ་གཏོར། གཡས་སུ་རྣམ་བུམ། གཡོན་དུ་བནྡྷ། མདུན་དུ་ལྷ་ཙཀ །ཕྱག་མཚན། རྡོ་རྗེ། ཕུར་པ། ལྕགས་སྡིག་ཧཱུྃ་དམར་དང་། སྣ་ཚོགས་རྡོ་རྗེ་འཇའ་འོད་ཅན། ཧཱུྃ་ཁ་དོག་ལྔ། ཧཱུྃ་དམར་ཉེར་གཅིག་གི་ཙཀླི་རྣམས་བཀོད། ༈ རྒྱ་ཅན་གྲོ་ལོད་གནམ་ལྕགས་མེ་འཁོར་ལ། དཀྱིལ་འཁོར་དབུས་མཉྫིའི་ཁར་སྒྲུབ་གཏོར་དར་གྱི་ཅོད་པན་ཅན། མདུན་དུ་རྣམ་བུམ་དང་མིང་དབང་། གཡས་སུ་དབུ་རྒྱན། རྒྱབ་ཏུ་རྡོ་རྗེ་དང་དྲིལ་བུ། གཡོན་དུ་གསང་ཐོད། རིག་ཙཀ་གམ་དྲིལ་བུ། འཇའ་ཤེལ། ཁྲོ་བོ་གཙོ་འཁོར་ལྔ། སྒོ་མ་བཞི། རྡོ་རྗེ་ཆོས། རིག་འཛིན་བརྒྱད། གུ་རུ་མཚན་བརྒྱད། བཀའ་བབས་དགུ་རྣམས་ཀྱི་སྐུ་ཙཀ །སྔགས་བྱང་གསེར་བྲིས། ཕྱག་མཚན། ཆོས་གོས། དུར་ཁྲོད་ཆས་རྣམས་ཀྱི་ཙཀ་ལི་རྣམས་ཅི་བདེར་བཀོད། སྨད་ལས་དབང་ཆས། དགང་བླུགས། མེ་ཕུང་། ལིང་ག་ཐོད་པ་གླང་རུ་བྱད་ཐག་ཐུན་རྫས་རོ་གཡམ་རྣམས་སྣོད་གཅིག་ཏུ་བཞག་པ་དང་། མདའ་རྡོ་ཀོང་བུ་ཁྲག་ཟོར་རྣམས་ཕྱོགས་བསྡུས་བྱས་པའང་བསྡོག ༈ །རྒྱ་ཅན་ཡང་གསང་ཀརྨ་དྲག་པོ་ལ། བྲུབ་ཁུང་དངོས་སམ། རྡུལ་ཚོན་གྱིས་བྲུབ་ཁུང་མཐིང་ནག་ཁ་ཁྱེར་མེ་རི་དང་བཅས་པ་བྲིས་པའི་ཁར་པད་སྣོད་དུ་ཟན་གྱི་ཆོས་འབྱུང་སྟེང་བདུད་བཞིའི་གཟུགས་ལ་ལྕགས་ཕུར་དར་གྱི་ཅོད་པན་ཅན་བཏབ། དེ་སྟེང་མཉྫིའི་སྟེང་གཏོར་ནག་མེ་རི་སོགས་རྒྱན་སྤྲོས་སྐུ་ཙཀ་དར་ནག་གི་གདུགས་ཕུབ་པ་བཀོད། མདུན་དུ་རྣམ་རྒྱལ་བུམ་པ། གཡས་གཡོན་དུ་རལ་གྲི་དང་ལྕགས་ཕུར། གསང་རྫས་ཐོད་པ། རིག་ཙཀ་དྲིལ་བུ་གང་རུང་བཞག །ཕྲེང་བ། མེ་ལོང་། དེ་ལས་སྟེགས་དམའ་བར་ཟོར་གཏོར་ཟུར་གསུམ་ནག་པོ་རྒྱན་མེད། རྩེར་དབང་ཕྱུག་ལིང་ག་དང་རྐེད་པར་བྷ་གས་བརྒྱན་པ་བཤམ། ༈ གནམ་ཆོས་གུར་དྲག་ཕུར་མཇུག་ལ། ཚོམ་བུའི་སྟེང་བུམ་པ། མདུན་དུ་ལྷ་བརྒྱ་གཏོར་གཅིག་སྐུ་ཙཀ །རྡོ་རྗེ་རལ་གྲི་སྡིག་པ་ཁ་ཊྭཱཾ་འབྲས་སྙེ་དུང་དཀར་ཞིང་དབྱུག་ཐོད་ཕྲེང་། མར་མེ་བཅས་བཞག ༈ །སྨིན་གླིང་དྲག་དམར་ལ། རས་བྲིས་དབུས་རྣམ་བུམ་ཁ་རྒྱན་གུ་རུའི་སྐུ་ཙཀ་ཅན། གཡས་སུ་དཔལ་གཏོར། གཡོན་དུ་གསང་ཐོད། ལྷ་ཙཀ །སྔགས་བྱང་རཀྴའི་ཕྲེང་བ། རྡོ་རྗེ་ཕུར་བུ་ལྕགས་སྡིག །དྲེགས་པའི་སྲོག་དབང་བསྐུར་ན་ཐོད་ངན་དུ་སྡེ་བརྒྱད་ཀྱི་གཟུགས་དང་གདབ་ཕུར་ཀྱང་འདུ་བྱ། ༈ ཀློང་གསལ་ཡེ་འབར་དབང་ཆེན་ལ། སྟ་གོན་རྫས་བཞི། དཀྱིལ་འཁོར་རས་བྲིས་སམ་འབྲུ་ཚོམ་ལྷ་གྲངས་སྟེང་རྐང་གསུམ་ཁར་རྣམ་བུམ་མགུལ་ཆིངས་དམར་པོ་ཅན་གྱི་ཁར་ཐོད་ཆང་། དེ་སྟེང་མེ་ལོང་སིནྡྷུ་ར་བརྡལ་པ་ལ་ཧཱུྃ་མཐར་སྙིང་པོས་བསྐོར་བ་བྲིས་པའི་སྟེང་ཤེལ་རྡོ་བཞག་ལ་དར་དམར་གྱི་གུར་ཕུབ། མདུན་དུ་ལྷ་ཙཀ་ཡོངས་རྫོགས། ཐོད་པ་ཆོས་སྨན་གྱིས་བཀང་པ། རྡོར་དྲིལ། གཡས་སུ་དབུ་རྒྱན། རྒྱབ་ཏུ་རྡོ་རྗེ། གཡོན་དུ་དྲིལ་བུ། མཚམས་རྣམས་སུ་ཕྱག་མཚན་དྲུག་པོ་དང་དུར་ཁྲོད་ཆས་ཙཀ །རྒྱབ་ངོས་སུ་དཔལ་གཏོར་བརྗིད་ལྡན། ཚེ་དབང་སྦྲེལ་ན་ཚེ་རིལ་ཆང་། རྗེས་གནང་སྦྲེལ་ན་ཕྲེང་བ་མེ་ལོང་གླེགས་བམ། དྲེགས་པའི་སྲོག་དབང་བྱེད་ན་གསོལ་ཁའི་གཏོར་མ། བླ་རྡོའམ་སྲོག་ཡིག་བརྒྱད་སོ་སོར་བྲིས་པའི་ཙཀ་ལི་ཐོད་ངན་དུ་བཅུག་པ་གཞི་མདུན་ལྟ་བུར་ཞིང་ལྤགས་ཁར་འཁོར་ལོ་རྩིབས་བརྒྱད་སྟེང་རྐང་གསུམ་ལ་བཞག །རྩིབས་བརྒྱད་ལ་དམར་གཏོར་རེ་རེ་བཀོད། ཕུར་པ་རལ་གྲི་རྣམས་དང་། སྲུང་སྐུད་དམར་པོ་སློབ་མའི་གྲངས་མཉམ་ཡང་བསྡོག་གོ ༈ །ཡེ་ཤེས་རབ་འབར་དོན་དབང་ལ། རས་བྲིས་སམ་ཚོམ་བུ་ལྔ་སྟེང་རྣམ་བུམ། གཡས་སུ་སྒྲུབ་གཏོར་ཟུར་གསུམ་བསྣོལ་མའི་སྟེང་དཔལ་གཏོར་ཟུར་གསུམ་རྒྱན་ལྡན། གཡོན་དུ་ཐོད་ཆང་མེ་ལོང་ཤེལ་རྡོ་རྣམས་བརྩེགས་པ། རྡོ་རྗེ་ཕུར་སྡིག །གཙོ་བོའི་སྐུ། དུར་ཁྲོད་ཆས་རྣམས་བཀོད། ༈ ཡེ་འབར་རྗེས་གནང་ཁོལ་འདོན་སྐབས། མཎྜལ་ལ་ཚོམ་བུ་བཀོད་པའི་ཁར་རྣམ་བུམ། གཡས་གཡོན་དུ་རཀྴའམ་ཐོད་ཕྲེང་། མེ་ལོང་། སྒྲུབ་ཐབས་ཀྱི་གླེགས་བམ་རྣམས་བཞག ༈ །སྟག་ཤམ་རྡོ་རྗེ་དྲག་རྩལ་དབང་ཆེན་ལ། དཀྱིལ་འཁོར་རས་བྲིས་སམ་ཚོམ་བུ་ལྷ་གྲངས་སྟེང་མཉྫི་ལ་བུམ་པ་མགུལ་ཆིངས་སྔོན་པོ་ཁ་རྒྱན་གསེབ་གཙོ་བོའི་སྐུ་ཙཀ་ཅན། མདུན་ཕྱོགས་ཐོད་ཕྲེང་སྡེ་ལྔ་སོགས་ལྷ་ཙཀ་ཚང་བ། གཡས་སུ་ཐོད་ཆང་དང་བླ་མ་ཞི་བའི་ཙཀ་ལི། རྒྱབ་ཏུ་དཔལ་གཏོར་བརྗིད་ལྡན་རྡོ་རྗེ་ཉི་ཟླ་མེ་རིས་མཚན་པ། གཡོན་དུ་ཚེ་འབྲང་ཚེ་རིལ། བར་མཚམས་དུར་ཁྲོད་ཆས་ཙཀ །ཐོད་པའམ་རཀྴའི་ཕྲེང་བ། ཁྱུང་ལྔ་ཆུར་སྦྱར་བ། སྡེ་བརྒྱད་དང་གཟའི་སྲོག་དབང་བསྐུར་ན་དེ་དག་གི་ཆས་རྣམས་ཀྱང་བཀོད། ༈ རྩལ་དབང་ལ། མཎྜལ་ལྷ་གྲངས་ཚོམ་བུ་ཅན་གྱི་སྟེང་དུ་རྣམ་བུམ། ཤར་དུ་ཐོད་པའི་བདུད་རྩི། ལྷོར་ཕྱག་མཚན་དྲུག་གི་ཙཀ་ལི། ནུབ་ཏུ་དཔལ་གཏོར་རྒྱན་ལྡན། བྱང་དུ་གཙོ་བོའི་སྐུ་ཙཀ་བཅས་བཀོད། ༈ གཏེར་ཁ་གཉིས་འདུས་དྲག་པོ་མེའི་འཁོར་ལོ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་བཀོད་པའི་སྟེང་དུ་རྣམ་བུམ། མདུན་དུ་དྲག་པོའི་སྐུ་ཙཀ །གཡས་གཡོན་དུ་ཐོད་པའི་བདུད་རྩི་དང་མེ་ལོང་གསལ་བ། དེ་རྒྱབ་ཤར་དུ་རྡོ་རྗེ། ལྷོར་ཐོད་ཆང་། ནུབ་ཏུ་དྲིལ་བུ། བྱང་དུ་ཕུར་པ་དར་གྱི་ཅོད་པན་ཅན་རྣམས་བཞག་གོ ༈ །ཆོས་གླིང་གྲོ་ལོད་ལ། རས་བྲིས་སམ་ཚོམ་བུ་ལྷ་གྲངས་དབུས་ཁྲིའུ་ལ་བུམ་པ་བཅུད་ལྡན་མགུལ་ཆིངས་དམར་པོ་ཁ་རྒྱན་གསེབ་ཏུ་ཐོད་ཕྲེང་རྩལ་གྱི་སྐུ་རྟེན་བཀོད་པ། རྒྱབ་ཏུ་སིནྡྷུ་རའི་མཎྜལ་ཆོས་འབྱུང་བསྣོལ་མ་ཟུར་དྲུག་དགའ་འཁྱིལ་བྲིས་པའི་ཁར་མཉྫི་ལ་གསང་ཐོད་དར་དམར་གྱིས་བཀབ་པ་དང་རིག་ཙཀ །མདུན་དུ་དཔལ་གཏོར་རྒྱན་ལྡན་དྲག་པོའི་སྐུ་འབག་དར་འཕན་གྱིས་བརྒྱན་པ། ཧཱུྃ་ཁ་དོག་ལྔ་སོ་སོ། རྡོ་རྗེ་ཕུར་པ་ལྕགས་སྡིག་ཁྱུང་དང་། དུར་ཁྲོད་ཆས་བརྒྱད་ཙཀ་ལི་ཕྱོགས་བསྡུས་བཅས་བཀོད། སྡེ་བརྒྱད་སྲོག་དབང་བྱེད་ན་དེའི་ཆས་རྣམས་ཀྱང་འདུ་བྱ། ༈ བདེ་གླིང་གྲོ་ལོད་གཤོམ་གོང་གི་འཇའ་ཚོན་ལུགས་དང་འདྲ། ༈ རོལ་རྡོར་ཁྲོ་རོལ་ཕུར་བུའི་སྒེར་དབང་ལ་ལྔ་ཚོམ་སྟེང་དཔལ་གཏོར་ཟུར་གསུམ་སྐུ་ཙཀ་དར་གདུགས་ཅན། གཡས་སུ་རྣམ་བུམ། གཡོན་དུ་རྡོ་རྗེ་རྩེ་དགུ་ཐོད་ཁྲག །མདུན་དུ་སྣ་ཚོགས་རྡོ་རྗེ་དང་། ཐོ་བ་མེ་ཕུང་ལྕགས་སྡིག་ཕུར་པ་བཞིའི་ཙཀ་ལི་ཕྱོགས་བསྡུས་བགྲང་ཕྲེང་བཅས། ༈ གུ་རུ་དྲག་ཁྲོས་ལ། རས་བྲིས་སམ། ཚོམ་བུ་གཙོ་འཁོར་དགུའི་སྟེང་བུམ་པ་རྫས་རྒོད་ཆུ་དང་སྦྱར་བས་བཀང་པ་རྒྱན་ལྡན་བཞག །གཡས་སུ་རཀྴའི་ཕྲེང་བ། གཡོན་དུ་གནམ་ལྕགས་རྡོ་རྗེ། མདུན་དུ་ལྷ་ཙཀ་ཚང་བ། རྒྱབ་ཏུ་དཔལ་གཏོར། གཞན་ཡང་ཐོད་རྒྱན། སྦྲུལ་ཆུན། ཐོད་ཕྲེང་། རུས་རྒྱན། གླང་ཞིང་སྟག་གསུམ། རྡོ་རྗེ། ཐོད་ཁྲག །ཁ་ཊྭཱཾ། ལྕགས་སྡིག་རྣམས་དང་། ཆོས་སྐྱོང་དམར་གཏོར་གཙོ་འཁོར་དགུ་ལ་མ་ནིང་སྐུ་ཙཀ་དར་གདུགས་ཅན། དཀར་གཏོར་སྨན་ལེབ་བུ་ཁུར་དམར་གཏོར་ཟུར་གསུམ་ཕྱོགས་གཅིག་བཤམས་པ་བཅས། ༈ རྩ་གསུམ་པདྨ་ཁྲག་འཐུང་ལ། མཎྜལ་ཚོམ་བུ་གཅིག་པར་ཐོད་སྣོད་དམ་ཟངས་ལྕགས་སྣོད་དུ་དཔལ་གཏོར་མེ་རི་སྐུ་ཙཀ་དར་གདུགས་ཀྱིས་བརྒྱན་པ་བཀོད། ༈ གཏེར་གསར་བླ་མ་བཀའ་བརྒྱད་ལ། དཀྱིལ་འཁོར་སྟེང་བུམ་པ་དགུ་སྐུ་རྟེན་དང་བཅས་པ། བྱང་ཤར་དུ་བཀའ་སྡོད་བུམ་པ། རིག་དབང་བཞིའི་ཆས། སྔགས་བྱང་། ཐོད་རྒྱན་གཉིས། སྦྲུལ་ཆུན། རུས་པ་རིན་ཆེན་རྒྱན། གཤོག་པ། གླང་ཞིང་སྟག་ལྤགས། གོས་བེར། གོ་ཁྲབ། ཐལ་རཀ་ཞག་གསུམ། མེ་ཕུང་། ཁྲི་རྐང་རྣམས་སོ་སོ་དང་། གླེགས་བམ་དུང་ཕྱག་མཚན་འཁོར་ལོ་གདུགས་རྒྱལ་མཚན་སོགས། སྨན་རག་གཏོར་གསུམ། རྭ་སྲུང་། ཟློག་གཏོར་འཁོར་ལོ་བཅས། བྲུབ་ཁུང་ལིང་ག །ཕུར་པ་རལ་གྲི་ཧོམ་གཟར། མེ་ཧོམ་གྲུ་གསུམ། ཀོང་ཟོར་དམར་གཏོར་སོགས་ཟོར་ཆས། བཀྲ་ཤིས་ཞལ་ཟས་བཟའ་བཏུང་རྣམས་དང་། གསང་ཐོད། རིག་ཙཀ །ཤེལ་རྡོ། ཚེ་འབྲང་ཚེ་རིལ་བཅས་བཀོད། ༈ ཐུགས་སྒྲུབ་བར་ཆད་ཀུན་སེལ་གྱི་གྲོ་ལོད་ལ། མཎྜལ་ཚོམ་བུ་དམར་པོའི་སྟེང་དཔལ་གཏོར་སྐུ་ཙཀ་དར་གདུགས་དམར་པོས་བརྒྱན་པ། སྐུ་ཙཀ་སྔགས་བྱང་ཕྱག་མཚན་རྡོ་རྗེ་ལྕགས་ཕུར་བཅས། ༈ ཆོས་རྡོར་དྲག་མཐིང་ལ། རས་བྲིས་སམ་ཚོམ་བུ་ལྷ་གྲངས་རྣམ་བུམ། རིག་དབང་ཆས་བཞི། ལྷ་ཙཀ་ཚང་མ། དུར་ཁྲོད་ཆས། གཡས་གཡོན་དུ་དབང་གཏོར་དང་། ཁྲོ་བཅུའི་དམར་གཏོར། རྒྱབ་ཏུ་ཐོད་ཆང་མེ་ལོང་ལི་ཁྲིའི་ཐིག་ལེ་ཅན་ཤེལ་རྡོ་རྣམས་བརྩེགས་པ། མདུན་དུ་སྒྲུབ་ཡིག་སྔགས་བྱང་རཀྴའི་ཕྲེང་བ། རྡོ་རྗེ་ཕུར་སྡིག །བསྒྲལ་དབང་ཆས་ཧོམ་ཁུང་ཟན་ལིང་དང་ཤོག་ལིང་། གདབ་ཕུར་རལ་གྲི །མེ་ཧོམ་ཆུང་ངུའང་འདུ་བྱ། ༈ གཏོར་དབང་ལ། ཚོམ་བུ་ལྔ་སྟེང་དཔལ་གཏོར་དང་། གཡས་གཡོན་སྨན་རཀ་བཅས་བཀོད། ༈ །གྲོ་ལོད་གདུགས་པ་ཀུན་འདུལ་ལ། མཎྜལ་དཀྱིལ་འཁོར་དབུས་སུ་ཞུན་ཆེན་གྱི་མར་མེ། གཡས་གཡོན་དུ་རྣམ་བུམ་དང་དཔལ་གཏོར་སྐུ་རྟེན་དར་གདུགས་ཅན། མདུན་དུ་ཞི་དྲག་གི་སྐུ་ཙཀ །དུར་ཁྲོད་ཆས་བརྒྱད། རྡོ་རྗེ་རྩེ་དགུ་ཕུར་པ་ལྕགས་སྡིག་བཅས་པའི་ཙཀ་ལི་བཀོད་དོ།། ༈ །།དེ་ནས་སྒྲུབ་ཆེན་བཀའ་བརྒྱད་སྤྱིའི་སྐོར་ལས། ཉང་ལུགས་པདྨ་ཤེལ་ཕུག་མ་ལ། རས་བྲིས་སམ་ཚོམ་བུ་གཙོ་འཁོར་དགུ །དེ་སྟེང་མཉྫི་ལ་རྣམ་བུམ་མགུལ་ཆིངས་སྨུག་ནག་གམ་མཐིང་ནག་གཟུངས་རྡོར་སོ་ལྔའི་བཅུད་ལྡན་ཁ་རྒྱན་ལ་ཞི་ཁྲོའི་གཙོ་སྐུ་རྣམས་བཀོད། མདུན་དུ་ལྷ་ཙཀ་རྣམས། ཤར་དུ་དཔལ་གཏོར་དང་སྨན་རཀ །ལྷོར་དབུ་རྒྱན། ནུབ་ཏུ་རྡོར་དྲིལ། བྱང་དུ་གསང་དབང་ཐོད་ཆང་མེ་ལོང་གིས་བཀབ་པའི་ཁར་ཤེལ་རྡོ་བཞག་པ་དང་རིག་ཙཀ །རྡོ་རྗེ་རྩེ་དགུ། ཐོད་ཁྲག །ཐལ་རཀ་ཞག་གསུམ། གླང་ཞིང་སྟག་ཤམ། ཐོད་སྦྲུལ་རྣམས་སོ་སོ། ལས་བཞིའི་གཟུགས་སམ་གཏོར་མ། བྲུབ་ཁུང་ཉའོ། ལས་ཕུར་བཅས་བཀོད། འོག་གི་བཀའ་བརྒྱད་རིགས་ལ་སྤྱི་ཁོག་འདིས་འགྲེ་དགོས་པ་ཤེས་པར་བྱའོ། ༈ ࿋ རྣལ་འབྱོར་རྒྱུན་དབང་ལ། སྟེགས་བུར་དཀྱིལ་འཁོར་བཀྲམ་པའི་ཁར་བུམ་པ་ཆས་ལྡན་སོ་ལྔའི་རྫས་སྦྱར་གྱིས་བཀང་པ། མདུན་དུ་འཇམ་དཔལ། སྤྱན་གཟིགས། རྡོར་སེམས། རྡོར་འཆང་བཅས་ཞི་བ་རིགས་བཞི་ཙཀླི་གཅིག་ལ་བྲིས་པ། དཔལ་དགུ། ཁྱུང་དཀར་ནག་བཅས་སོ་སོ་དང་། ཤར་དུ་དཔལ་གཏོར་སྨན་རཀ །ལྷོར་དབུ་རྒྱན་རིགས་ལྔ། ནུབ་ཏུ་རྡོ་རྗེ་དང་དྲིལ་བུ། བྱང་དུ་ཐོད་པར་བུར་ཆང་བདུད་རྩི་སྦྱར་བ་མེ་ལོང་གིས་བཀབ་པའི་ཁར་མན་ཤེལ་བཞག །རིག་ཙཀ་གང་བདེར། གཞན་ཡང་དུར་ཁྲོད་ཆས། བྲུབ་ཁུང་། ལིངྒ་། ཕུར་བུ་བཅས། ࿋ ༈ ࿋ བདེ་འདུས་ཞི་བའི་བཅས་བཤམ། དཀྱིལ་འཁོར་གཞུང་མཐུན་བཀྲམ་པའམ་ཚོམ་བུ་ལྷ་གྲངས་བཀོད། སྟ་གོན་ཆས། རྣམ་བུམ་དང་ལས་བུམ། ཀུ་ཤ །སོ་ཤིང་། དཔུང་སྐུད་བཅས་དང་། དངོས་གཞིའི་སྐབས། དབང་རྫས། རྒྱལ་སྲིད་སྣ་བདུན་དང་བཀྲ་ཤིས་རྫས་བརྒྱད་སོ་སོ་བ། མེ་ལོང་། རྐང་འོག་འཁོར་ལོ། དུང་། རྒྱ་གྲམ། དབུ་རྒྱན། མེ་ཏོག་ཕྲེང་བ། དར་གྱི་ཅོད་པན། རིགས་ལྔའི་ཕྱག་རྒྱ། སྣ་ཚོགས་རྡོ་རྗེ། གསེར་འཁོར། རྡོ་རྗེ། དྲིལ་བུ་བཅས། ࿋ ༈ གསང་རྫོགས་མགྱོགས་དབང་ལ། དཀྱིལ་འཁོར་སྟེང་རྣམ་བུམ་སོགས་སྔར་དང་འདྲ་བ་ལས་དབུ་རྒྱན་ཟུར་པའམ་དེའི་ཙཀ་ལི། སྨན་རཀ་གཏོར་གསུམ་སྣོད་གཅིག་ཏུ་བཞག་པ། དུར་ཁྲོད་ཆས་ཕྱོགས་འདུས་ཀྱི་ཙཀ་ལི་དང་། སྔགས་བྱང་། ཕྲེང་བ། ཚོགས་རྫས་བཟའ་བཏུང་། ཐིག་ལེ་བྱེད་པའི་བདུད་རྩིའི་ཐོད་པའང་འདུ་བྱ། ༈ བྱང་གཏེར་རང་ཤར་ལ། སྟ་གོན་རྫས་བཞི་མཆོད་པ་བཅས། རས་བྲིས་སྟེང་ལྡིང་ཁྲི་རིམ་པ་གཉིས་པའི་སྟེང་གཙོ་བུམ་ཁར་ལྷ་ཙཀ་རྣམས། འོག་མར་ཐོད་སྐུ། གསང་ཐོད་མེ་ལོང་སིནྡྷུ་རའི་ཐིག་ལེ་ཅན་དར་གྱིས་བཀབ་པའི་སྟེང་ཤེལ་རྡོ། དབུ་རྒྱན། རྡོར་དྲིལ་རིག་ཙཀ །དབུས་སུ་ལྕགས་ཕུར་ཅོད་པན་ཅན། ལོགས་གང་བདེར་སྣོད་གཅིག་ཏུ། རྒྱུད་ཀྱི་གླེགས་བམ་རིན་ཆེན་ཕྲེང་བ། དུང་དང་ཕྱག་ཤིང་། རྒྱ་གྲམ། གདུགས། རྒྱལ་མཚན་རྡོར་དྲིལ་རྣམས་དང་། རིགས་ལྔའི་ཕྱག་མཚན། ཞི་བའི་ཆས། ཕྱག་མཚན་རྣམས་གཡས་གཡོན་ཚོ་གཉིས་སུ་བྱས་པ། ཁ་ཊྭཱཾ་བནྡྷ། ཐོད་ཕྲེང་དང་གོས་གསུམ་ལ་གཅིག །ཁྲག་ཐལ་ཞག་གསུམ་ལ་གཅིག །གོ་ཁྲབ་མེ་ཕུང་རུས་རྒྱན་གཅིག །གཟིག་ཤམ། གཙུག་ཏོར། རུས་རྒྱན། ཐོད་ཕྲེང་། ཨ་དཀར། མར་མེ། བྲུབ་ཁུང་ཉའོ། ཞི་དྲག་སྦྱོང་ཆས་ཏིལ་ནག་སོགས་འདུ་བྱ། ༈ ཨོ་རྒྱན་གླིང་པའི་བཀའ་འདུས་དོན་དབང་ལ། རས་བྲིས་སྟེང་དབུས་འབྲུ་ལྔ། ཤར་སྨན་ལྔ། ལྷོར་རིན་ཆེན་ལྔ། ནུབ་དྲི་ལྔ། བྱང་སྙིང་པོ་ལྔ་རྣམས་ཀྱི་བུམ་པ་སྣོད་གཅིག་ཏུ་བཞག་པ། མདུན་དུ་ཞི་བ་རྡོར་འཆང་དང་། གཙོ་བོ་ཉེར་གཅིག་གི་ཙཀ་ལི། བགྲང་ཕྲེང། གཡས་སུ་ཤ་ལྔ་བདུད་རྩི་ལྔ་སོ་སོར་སྦྱར་བའི་ཐོད་པ་ལྔ་སྣོད་གཅིག་ཏུ་བཞག་པ། གཡོན་དུ་རིག་མའི་གཟུགས་དཀར་སེར་དམར་ལྗང་མཐིང་ལྔ། འཇའ་ཤེལ། རྒྱབ་ཕྱོགས་སུ་དཔལ་གཏོར་རྒྱན་ལྡན་བཞག །བསྡུ་ན་བུམ་ཐོད་རིག་ཙཀ་རྣམས་གཅིག་ལ་བསྡུ་ཞིང་ལྷ་དབང་མ་སྦྱར་ཡང་ཆོག ༈ །བཀའ་བརྒྱད་ཐུགས་ཀྱི་མེ་ལོང་གི་མགྱོགས་དབང་། དཀྱིལ་འཁོར་བུམ་པ་དབུ་རྒྱན་རྡོར་དྲིལ་གསང་ཐོད་མེ་ལོང་ཤེལ་རྡོ་རིག་ཙཀ །སྨན་རཀ་གཏོར་གསུམ། དུར་ཁྲོད་ཆས་ཕྱོགས་བསྡུས། ཞི་བ་རིགས་བཞི། དཔལ་དགུ་ཁྱུང་ཙཀ །གདབ་ཕུར་ལིང་ག་རྣམས་ཏེ་གསང་རྫོགས་དང་ཕྱོགས་འདྲའོ། ༈ །བཀའ་བརྒྱད་དངོས་གྲུབ་སྙིང་པོ་དེ་དང་འདྲ་བ་ལས་རིགས་བཞིའི་ཙཀ་ལི་མི་དགོས། ༈ ཀློང་གསལ་བཀའ་བརྒྱད་བདེ་གཤེགས་ཡོངས་འདུས་ཀྱི་ཁྲུས་དབང་ལ། ཁྲུས་བུམ། རྡོར་སེམས་དབང་ལ་རྣམ་བུམ་ཐོད་ཆང་མེ་ལོང་ཤེལ་རྡོ་བརྩེགས་པ། དོན་དབང་ལ། རས་བྲིས་སམ་དགུ་ཚོམ་སྟེང་ཁྲིའུ་ལ་རྣམ་བུམ། རིག་དབང་བཞིའི་ཆས། བནྡྷའི་བདུད་རྩིའི་ནང་བུམ་པ་སོ་ལྔའི་རྫས་ལྡན། དཔལ་དགུ་ཁྱུང་བཅས་ཀྱི་ཙཀ་ལི། དཔལ་ཆས་ཕྱོགས་བསྡུས། གསང་ཐོད། སིནྡྷུ་རའི་མེ་ལོང་ལ་ཧཱུྃ་དགུ་བྲིས་པ། རྡོ་རྗེའི་ལྟེ་བ་ཧཱུྃ་གིས་མཚན་པ་དགུ་བསྒྲིགས། དགང་གཟར་བླུགས་དང་མེ་ཕུང་། ཕུར་པ། ཤེལ་རྡོ། རྨ་བྱའི་མདོངས། རྗེས་གནང་ཆས་བུམ་པ། རྒྱལ་མཚན། གཎྜི། དུང་དཀར། ཕྱག་ཤིང་། རྡོར་དྲིལ། སྒྲུབ་ཡིག །དགང་གཟར་བླུགས་ཕུར་པ་རྣམས་དང་། ཧོམ་ཁུང་ཉའོ། གདབ་ཕུར། སྣ་བདུན། རྫས་བརྒྱད་ཕྱོགས་བསྡུས་བཅས། ༈ གནམ་ཆོས་དགོངས་གཏེར་བཀའ་བརྒྱད་ལུས་དཀྱིལ་དབང་ལ། མཎྜལ་ཚོམ་བུ་དགུ་པའི་ཁར་དཔལ་གཏོར་གཙོ་འཁོར་དགུ་པའམ་ལྷ་བརྒྱ་གཏོར་གཅིག །གཡས་སུ་རྣམ་བུམ། རྒྱབ་ཏུ་ཐོད་ཆང་། གཡོན་དུ་ཕུར་པ་སྟེགས་བཅས། མདུན་དུ་ཐོད་རྒྱན། གླང་ཀོ་སྦྲུལ་ཆུན། ཞིང་ལྤགས་སྟག་ཤམ། ཁྲག །ཞག །ཐལ། གོ་ཁྲབ། མེ་དཔུང་རུས་རྒྱན་དང་གཟིག་ཤམ་རྣམས་ཀྱི་ཙཀ་ལི་སོ་སོ་བ་བཀོད། ༈ བདེ་གླིང་བཀའ་འདུས་འཇའ་ཚོན་དངོས་གྲུབ་སྙིང་པོ་དང་འདྲ། ༈ གྲུབ་ཐོབ་བཀའ་བརྒྱད་ཀྱི་དབང་ལ། སྟ་གོན་རྫས་བཞི། དཀྱིལ་འཁོར་རས་བྲིས་དབུས་མཉྫིའི་ཁར་རྣམ་བུམ་སོ་ལྔའི་བཅུད་ལྡན་མགུལ་ཆིངས་མཐིང་ག་ཁ་རྒྱན་ལྡན་པ། རྡོར་སེམས་དཔལ་དགུ་བྱ་ཁྱུང་དཔལ་མགོན་མ་ནིང་བཅས་ཀྱི་ཙཀ་ལི་བཅུ་གཉིས་ཁ་རྒྱན་གསེབ་ཏུ་བཀོད་པ་ཡིན་ཀྱང་མི་བདེ་ན་མདུན་དུ་བཞག །དབུ་རྒྱན། རྡོ་རྗེ། དྲིལ་བུ། མིང་དབང་རྡོར་དྲིལ། སྔགས་བྱང་། གནམ་ལྕགས་རྡོ་རྗེ་རྣམས་དང་། གཡས་ཕྱོགས་སུ་སྨན་གྱི་ཕོ་བྲང་གཡོན་ཕྱོགས་སུ་སྒྲུབ་ཕུར་མདུན་ངོས་སུ་ཐོད་པའི་ནང་ཟན་ཀོང་སྡོང་བུ་དགུ་བཙུགས་པའི་མར་མེ། དེའི་གཡས་སུ་ཁྲུས་ཀྱི་བུམ་པ་ཉེར་ལྔའི་བཅུད་ལྡན་ཆིངས་དཀར་ཁ་རྒྱན་དང་བཅས་པ། གཡོན་དུ་བམ་ཕྱག་ལེན་ལྟར་བཅས་པ། གང་བདེར་ནུས་དབང་ཆས་པུསྟི། ཕྲེང་བ། དུང་དཀར། ཕྱག་ཤིང་། ཁྲི་གདུགས་སོགས་ཀྱི་ཙཀ་ལི་སོ་སོ་བ། བཟའ་བཏུང་འགྱེད་བདེ། རྒྱབ་མདུན་གང་བདེར་ཟངས་ལྕགས་སྣོད་དུ་དམར་གཏོར་གཉིས་ལ་འཁོར་གཏོར་ཆུང་ངམ་ཐེབ་ཀྱུ་སུམ་ཅུ་དང་བཅོ་བརྒྱད་ཀྱིས་བསྐོར་བ་ལ་འཛོམ་ན་དྲེགས་པའི་སྡེ་དཔོན་དང་དྲེགས་པ་བཅོ་བརྒྱད་ཀྱི་གཙོ་བོའི་ཙཀ་ལི་ཙམ་བཙུགས་པ་ལ་དར་གདུགས་དང་ཤ་ཁྲག་གིས་བརྒྱན་པ་དང་། སྲུང་བའི་འཁོར་ལོ་ལས་ཕུར་ཐུན་རྫས་རི་རབ་མེ་ཧོམ་ཟོར་གཏོར་རྣམས་ཕྱོགས་བསྡུས། ཚེ་འབྲང། ཚེ་རིལ་ཆང་། གསང་ཐོད་བདུད་རྩི་རིག་ཙཀ །ཤེལ་རྡོ་རྣམས་བཀོད་ལེགས་སུ་བཀྲམ། ལྕགས་ཧོམ། ལིང་ག །རལ་གྲི་སོགས་ཉེར་མཁོ་རྣམས་ཚོགས་པར་བྱ། ༈ གཏེར་གསར་བཀའ་འདུས་རྩ་སྒྲུབ་ལ། རས་བྲིས་སམ་དགུ་ཚོམ་སྟེང་། འོག་ཏུ་གསང་ཐོད། སྟེང་དུ་རྣམ་བུམ་བརྩེགས་མར་བཞག་པའི་མདུན་དབུས་སྨན་གྱི་ཕོ་བྲང་། ཤར་དུ་མར་མེ། ལྷོར་བམ་ཆེན། ནུབ་ཏུ་རྟ་ཞལ། བྱང་དུ་ཕུར་པ། ཤར་ལྷོར་མདོས་རཀ །ལྷོ་ནུབ་ཏུ་བླ་གཏོར་རྒྱན་ལྡན། ནུབ་བྱང་དུ་དམར་གཏོར་གྲུ་གསུམ། བྱང་ཤར་དུ་ཀོང་ཟོར་ཟུར་གསུམ་ཚེ་ཡུངས་ཀྱིས་བརྒྱན་པ་རྣམས་བཀའ་བརྒྱད་སྤྱིའི་རྟེན་དང་ཕྱོགས་མཚུངས་སུ་བཀོད། མདུན་རྒྱབ་གང་བདེར་ཚེ་འབྲང་ཡང་བཞག་གོ ༈ །བཀའ་བརྒྱད་བདེ་གཤེགས་ཀུན་འདུས་བསྐྱེད་རྫོགས་འབྲིང་པོའི་དབང་ལ། རས་བྲིས་སམ་དགུ་ཚོམ་སྟེང་རྣམ་བུམ་སོགས་རིག་པའི་དབང་ལྔའི་ཆས། ཐིག་ལེ་རྒྱབ་སྤྱད་ཆོས་སྨན་བྱང་སེམས་དཀར་དམར་དང་སྦྱར་བའི་བདུད་རྩི། རྒྱབ་ཏུ་གསང་ཐོད། ཤ་ལྔ་བདུད་རྩི་ལྔ་ཡོད་པའི་ཐོད་པ་གཉིས་སམ་ཙཀ་ལི་གཉིས། གཡོན་དུ་པདྨ་དམར་པོའི་ཟེའུ་འབྲུ་ལ་རྡོ་རྗེ་དཀར་པོ་ཕྱེད་ནུབ་བྲིས་པའི་ཙཀ་ལི་དང་། དཔལ་ཆས་བཅུ། དུར་ཁྲོད་ཆས་བརྒྱད་ཕྱོགས་བསྡུས་ཙཀ་ལི་གཉིས། གཡས་སུ་མེ་ལོང་ཤེལ་རྡོ་རྨ་བྱའི་མདོངས། འཇའ་ཚོན་ཐིག་ཕྲན་ཡོད་པ། མེ་ཏོག་ཕྲེང་བ་འཇའ་འོད་གྱེན་འགྲེང་རྩིབས་ཤར་ཐིག་ལེ་ཕྱག་མཚན་ཡིག་འབྲུ་ལྔ་སོགས་ཡོད་པ། འཇའ་ཚོན་གྱིས་བསྐོར་བའི་ཐིག་ལེ་དགུ་ལ་དཔལ་ཆེན་དགུ་མཚོན་བྱེད་ཡོད་པ། ཀུན་བཟང་རྒྱན་མེད་གཅེར་བུ་བཅས་ཙཀ་ལི་བཞི། མདུན་དུ་ཚེ་འབྲང་རིལ་ཆང་བཅས། ༈ ཡི་དམ་བཀའ་འདུས་སྙིང་པོ། རས་བྲིས་སམ་ཚོམ་བུ་ཇི་ལྟར་འོས་པའི་སྟེང་རྣམ་བུམ་དབུ་རྒྱན་རྡོར་དྲིལ། གསང་ཐོད་རིག་ཙཀ །ཚེ་འབྲང་ཚོགས་རྫས་སོགས་ལྷན་ཅིག་བཞག་པ། ༈ །།དེ་ནས་བཀའ་བརྒྱད་བྱེ་བྲག་གི་སྐོར་ལས། འཇམ་དཔལ་ཞི་སྒྲུབ་ཀྱི་ཐོག་མར་འཇམ་དཔལ་རྫོགས་ཆེན་ལ། འཇའ་ཚོན་ཐིག་ལེ་ལྔ་སྦྲགས་ཀྱི་དཀྱིལ་འཁོར་སྟེང་ཁྲིའུར་དཔལ་གཏོར་ཟུར་བཞི་ལོགས་བརྒྱད་དམར་པོ་ལ་ཨ་དཀར་ལྔས་མཚན་ཅིང་པདྨས་བསྐོར་བ་རྒྱན་སྤྲོས་ཅན་རིགས་ལྔ་གཅིག་འདུས་ཀྱི་ཙཀ་ལི་གཟུག །ཤར་དུ་བུམ་པ་གཉིས། ཕྱོགས་གསུམ་ལ་རེ་རེ་བཅས་ཕྱོགས་མདོག་ཚན་ལྔ། དབུ་རྒྱན། རྡོར་དྲིལ། མན་ཤེལ། རིགས་ལྔའི་ཙཀ་ལི་སོ་སོ་བ་རྣམས་ཕྱོགས་སྤྱི་ལྟར་བཀོད། ཨ་ཡིག་དཀར་པོ་བཅས་སོ། ༈ །འཇམ་དཀར་མུན་སེལ་སྒྲོན་མེ་ལ། རས་བྲིས་སམ་ཚོམ་བུ་ལྔ་པའི་དབུས་སུ་ཁྲིའུ་ལ་འཇམ་དཔལ་ཡེ་ཤེས་སེམས་དཔའི་སྐུ་དང་མཚན་བརྗོད་ཀྱི་གླེགས་བམ། ཤར་དུ་རྣམ་བུམ་མགུལ་ཆིངས་དཀར་པོ་ཅན་མཐའ་བསྐོར་དུ། དབུ་རྒྱན་རྡོ་རྗེ་དྲིལ་བུ་འཁོར་ལོ་དང་། ནཱ་མ་ཞེས་བྲིས་པ། ཤེལ་ཕྲེང་། གདུགས། རལ་གྲི་མདའ་གཞུ། དུང་འཁོར་ལོ། སྒྲུབ་དཔེ་རྣམས་བཀོད། ༈ དམར་པོ་ལོངས་སྤྱོད་ཚེ་འཕེལ་ལ། རས་བྲིས་སམ་འབྲུ་ཚོམ་དགུ་པའི་ཁར་ཁྲིའུ་ལ། ཆང་། མར། སྦྲང་། བུ་རམ། སྤྲི་སྟེ་བཅུད་ལྔ་བསྲེས་པའི་ཟན་ལ་ཚེ་གཏོར་རིན་ཆེན་འབར་བའི་དབྱིབས་ཅན་རྒྱན་ལྡན་ཟས་སྣས་བསྐོར་བ་དར་གདུགས་བཅས་བཤམ། ཤར་དུ་གསེར་གྱི་རྡོ་རྗེ། ལྷོར་མདའ་དར་དམར་པོ། ནུབ་ཏུ་བུམ་པ་བཅུད་ལྔ་དང་བཟང་དྲུག་སྦྱར་བའི་ཆུས་བཀང་པ། བྱང་དུ་ཐོད་ཆང་བཅས། ༈ བདུད་འདུལ་ལུགས་ཀྱི་འཇམ་དབྱངས་དཀར་པོ་ལ། ཚོམ་བུ་ལྔའི་ཁར་རྣམ་བུམ་དཀར་པོ། རིག་དབང་ཆས། རིགས་ལྔའི་ཕྱག་མཚན་སོ་སོ་བ། གཡས་སུ་དཔལ་གཏོར། མདུན་དུ་སྐུ །གཡོན་དུ་སྒྲུབ་ཡིག་ཕྲེང་བ། ཕྱག་མཚན་པུསྟི་བཅས། ༈ ནང་སྒྲུབ་དམར་སེར་ལ། དེ་དང་འདྲ་བ་ལས་བུམ་པའི་མགུལ་ཆིངས་དམར་སེར། སྐུ་དང་ཕྱག་མཚན་རལ་པོད། ༈ གསང་སྒྲུབ་ཕྱག་བཞི་པ་ལྷ་དགུ་ལ། རས་བྲིས་སྟེང་ཁྲིའུར་གསང་སྒྲུབ་སྐུ་རྟེན་ཤར་དུ་རྣམ་བུམ་སོགས་རིག་དབང་ཆས་ཀྱིས་བསྐོར་བ། གཡས་སུ་དཔལ་གཏོར། གཡོན་དུ་སྒྲུབ་ཡིག་ཕྲེང་བ། ཕྱག་མཚན་རལ་པོད་མདའ་གཞུ། གཞན་ཡང་མཚན་བརྗོད་གླེགས་བམ། གདུགས། དུང་དཀར། འཁོར་ལོ་བཅས་བཀོད། ༈ ཡང་གསང་ཡབ་ཡུམ་ཞལ་སྦྱོར་ལ། ཚོམ་བུ་གཅིག་གི་སྟེང་སྐུ་རྟེན་བརྗེ་བ་ལས་གཞན་གསང་སྒྲུབ་དང་འདྲ། ཕྱག་མཚན་གཞུང་གསལ་འཛོམ་ན་ལེགས། རྗེས་གནང་ཆས་བསྡུ་ན་མི་དགོས། ༈ ཟབ་གསང་ཟུང་འཇུག་སྒྲུབ་པ་ལ་བཤད་མ་ཐག་པ་ལྟར་ལ། སྐུ་རྟེན་དང་ཕྱག་མཚན་རལ་པོད་ཁོ་ནའོ། ༈ །དབྱངས་ཅན་དམར་མོ་ལ། ཕྱི་སྒྲུབ་དང་འདྲ་བ་ལས་བུམ་པ་དམར། སྐུ་རྟེན་དང་ཕྱག་མཚན། ཨུཏྤལ་ནོར་བུ་མེ་ལོང་ངོ་། ༈ །འཇམ་དཔལ་ཁྲོ་བོའི་སྐོར་ལས། ཚེ་བདག་པད་གནུབས་ཟུང་འབྲེལ་ལ། སྟ་གོན་རྫས་བཞི། དཀྱིལ་འཁོར་ཚད་ལྡན་དབུས་སུ་ཐོད་སྣོད་ལ་ཕྱེ་མར་བུ་རམ་ཤ་ཆེན་བསྲེས་པའི་བམ་ཆེན། དེ་སྟེང་ལྡིང་ཁྲི་ལ་རྣམ་རྒྱལ་བུམ་པའི་མདུན་དུ་སྒྲུབ་གཏོར་ལྕགས་མཁར་ཟུར་དྲུག་མ། ནུབ་ཏུ་ཚེ་བུམ་ཁྱད་པར་བ། ལྷོར་བཀྲ་ཤིས་ཀྱི་བུམ་པ་ཞེས་ཀ་པཱ་ལ་ཆང་འོ་མ་མངར་གསུམ་ཆོས་སྨན་སྦྱར་བས་བཀང་པ། མདུན་དུ་སྨན་རཀ །བུམ་པའི་མཐར་ལྷ་ཙཀ་ཚང་མ། གཞན་ཡང་འཁོར་ལོ་རྡོ་རྗེ་རལ་གྲི་གསུམ། བེ་ཅོན་གཏུན་ཤིང་སྡིགས་མཛུབ་སྟེ་ཕྱག་མཚན་དྲུག་གི་ཙཀ་ལི་གཉིས། དུར་ཁྲོད་ཆས་སོགས་གཅིག་བསྡུས། རཀྴའི་ཕྲེང་བ། རིག་ཙཀ །ཤེལ་རྡོ་མེ་ལོང་གཙོ་སྐུ་འགྱིང་ལོག་ཏུ་བྲིས་པ། དྲིལ་བུ། རལ་གྲི །ལྕགས་སྣོད་ལྟ་བུར་དུག་སྣ་ཁྲག་ཡུངས་ཀར་མདའ་གྲི་གུ་གུལ་ཕུར་པ་རྣམས་བཞག་པ། མཆོད་རྟེན་མཚན་ཉིད་ལྡན་པ། ཟོར་ཀོང་ཟོར་རྫས་ཅན། མདའ་གཞུ། འུར་རྡོ། རྭ་ཟོར། སློབ་དཔོན་དབང་རྫས་རྡོར་དྲིལ་གླེགས་བམ་དུང་གཎྜི་གདུགས་རྒྱལ་མཚན་རྣམས་དང་། སྤྲོ་ན་སྔགས་ཆས་ཞྭ་ཕོད་སོགས་འདུ་བྱ། འདིའི་བཅའ་གཞི་ཞིབ་པར་དབང་བསྒྲིགས་སུ་གསལ་བ་དང་མཐོང་བརྒྱུད་ལས་རྟོགས་དགོས་སོ། ༈ །རྣོན་པོ་ནང་གཅོད་ལ་མཎྜལ། ཚོམ་བུ་གསུམ་པའི་ཁར་གཏོར་མ་བྲ་གཟུགས་ཁྲོམ་རིས་ཅན་འཁོར་བཞི་པ་སྐུ་ཙཀ་དར་གདུགས་ཅན་བཀོད། རཀྴའི་ཕྲེང་བ་བཞག ༈ །དྲེགས་འཇོམས་ལ། རས་བྲིས་སྟེགས་ཁར་རྣམ་བུམ་སྐུ་ཙཀ་གཟུངས་རྡོར་བཅས། གཡས་སུ་སྒྲུབ་གཏོར་ལྕགས་གསར་མ་དར་གུར་ཅན། གཡོན་དུ་གསང་ཐོད་མེ་ལོང་ཐུགས་ཐིག་དང་འདྲ། མདུན་དབུས་ལྷ་ཙཀ་རྣམས། གཞན་ཡང་སྔགས་བྱང་། ཕྲེང་བ། ཤེལ་རྡོ། རལ་གྲི་འཁོར་ལོ་གྲི་གུག་ཐོད་ཁྲག་བེ་ཅོན་སྡིགས་མཛུབ་རྣམས་ཙཀ་ལི་སོ་སོ། གདབ་ཕུར་རལ་གྲི་ཧོམ་དང་ཉའོ་རྣམས་བཀོད། ༈ སྙན་བརྒྱུད་གཤིན་རྗེའི་ཐུགས་ཏིག་ལ། རས་བྲིས་སམ་མཎྜལ་ཚོམ་བུ་མཐིང་ནག་གཅིག་བཀོད་པའི་སྟེང་ཐོད་པའི་སྣོད་དུ་བམ་ལག་ལེན་ལྟར་བཅོས་པ། གཡས་སུ་རྣམ་བུམ་ཆིངས་སྔོན་ཅན། མདུན་དུ་ཞི་ཁྲོ་གཉིས་ཀྱི་སྐུ་ཙཀ །དུར་ཁྲོད་ཆས། ཕྱག་མཚན་དྲུག་པོ་གཡས་གཡོན་སོ་སོར་བྱས་པ། སྔགས་བྱང་བཅས་ཙཀ་ལི་དྲུག །ཐོད་ཕྲེང་། གཡོན་དུ་མཆོད་རྟེན། རྒྱབ་ཏུ་གསང་ཐོད་རིག་ཙཀ་ཤེལ་རྡོ། ཚེ་འབྲང་ཚེ་རིལ་འགྱེད་བདེས་བསྐོར་པ། མདུན་ངོས་དྲེགས་པའི་དམར་གཏོར་ཐེབས་ཀྱུས་བསྐོར་བ་རྣམས་བཀོད། ༈ གཏེར་གསར་ཟབ་བདུན་ཚེ་བདག་ལ། རས་བྲིས་དབུས་རྣམ་བུམ་མགུལ་ཆིངས་སྔོན་པོ་ཅན། རིག་དབང་ཆས། ལྷ་ཙཀ་ཉེར་བཞི་ཚང་བ། སྐྱེར་པའི་ཁྲོམ་ཤིང་བཅུ་གཉིས། སོ་གཉིས། བཞི། བདུན་བརྒྱ་ཉི་ཤུ་མཚོན་བྱེད་བཅས་ཚོ་བཞི། དཔལ་དང་དུར་ཁྲོད་ཆས་ཕྱོགས་བསྡུས། འཁོར་ལོ་རྡོ་རྗེ་རལ་གྲི་བེ་ཅོན་གཏུན་ཤིང་དགྲ་སཏྭ་རྣམས་དང་། སྔགས་བྱང་། གསང་ཐོད། རིག་ཙཀ །ཚེ་འབྲང་། ཟློག་གཏོར་འཁོར་ལོ་ཅན། མཚོན་ཆ། མནན་ཆས། མེ་ཧོམ། ཟོར་ཀོང་། འཁོར་ལོ་རྣམས་ཀྱི་དཔེའུ་རིས་སམ་བྲི་ཡིག་བཅས་བཞག ༈ །འཆར་ཀ་གནམ་སྐས་མའི་ཟོར་དབང་ལ། རས་བྲིས་སྟེང་འཕྲུལ་སྟེགས་ལ་བུམ་པ། ཐོད་ཁྲག །བདུད་རྩི། དཔལ་གཏོར་རྣམས་བརྩེགས་མར་འགོད་དགོས་ཀྱང་། འབྱོར་པས་མ་བདེ་ན་བུམ་གཏོར་བརྩེགས། སྨན་རག་གཡས་གཡོན་དུ་བཞག །གཏོར་མ་རྒྱས་པ་ལྕོགས་དཀའ་བས་དམར་གཏོར་ཟུར་གསུམ་འཁོར་དྲུག་དང་ཐེབས་ཀྱུ་མང་པོས་བསྐོར་བ་དར་གདུགས་དབུབ། མདུན་དུ་ལས་གཏོར་སྲིན་ཞལ་ཅན། ཟོར་རྫས་མདའ་གཞུ་འུར་རྡོ་གླང་རུར་ཁྲག་སྣ་བླུགས་པ་རྣམས་སྣོད་གཅིག །ཀོང་ཟོར་ཚོན་དྲུ་སོགས་རྒྱས་ན་བཀའ་བརྒྱད་ཁྲོ་རོལ་ལྟར་བྱས་པ་གཅིག །ཟོར་ཀོང་དཀྱུས་མ་གཅིག །བསྡུ་ན་ཟོར་ཀོང་གཅིག་ལ་ཁྲོམ་ཤིང་མཚོན་ཆ་དུག་སྣ་སོགས་གང་འཛོམ་དང་དཀྱུས་མ་གཅིག་རྣམས་བཤམ། ༈ འཇམ་ནག་གྲིབ་འཇོམས་རྡོ་རྗེ་ཕ་ལམ་ལ། རས་བྲིས་སམ་འབྲུ་ནག་ཚོམ་བུ་གཙོ་འཁོར་ལྔ་པའི་སྟེང་ཁྲིའུ་ལ་རྣམ་བུམ་ཆིངས་ནག་པོ། ཤར་དུ་སྐུ་རྟེན། ལྷོར་བེ་ཅོན། ནུབ་ཏུ་ཐོད་ཁྲག །བྱང་དུ་ཕུར་པ། མཚམས་བཞིར་སྒྲུབ་དཔེ། ཐུན་ཐོད། རཀྴའི་ཕྲེང་བ། དམར་གཏོར་གྲུ་གསུམ་ཁྲག་གིས་བྱུགས་པ་རྣམས་དང་། སྣ་ཚོགས་རྡོ་རྗེ་དང་དྲིལ་བུ། ཧོམ་ཁུང་ཡང་བཞག ༈ འཇིགས་བྱེད་མེའི་སྤུ་གྲི་ལ། འབྲུ་ནག་ཚོམ་བུ་ལྔའི་ཁར་རྣམ་བུམ། རྒྱབ་ཏུ་གཏོར་མ་གྲུ་གསུམ་ནག་པོ་གཙོ་འཁོར་ལྔ་པ་དར་གདུགས་ཅན། མདུན་དུ་གསང་ཐོད་མེ་ལོང་གིས་བཀབ་པ་དང་སྐུ་ཙཀ །མཆོད་གཏོར་གཡས་གཡོན་དུ་གྲི་གུག་བནྡྷ། རལ་གྲི་དང་བེ་ཅོན། འཁོར་ལོ་སཏྭ་རེ། དུར་ཁྲོད་ཆས་ཕྱོགས་བསྡུས་བཅས། ལས་གཤིན་བཀའ་གཏད་བྱེད་ན། གཏོར་མ་གྲུ་གསུམ་ཁྲོམ་ཅན་མེ་རིའི་རྒྱན་ལྡན་དང་ཐོད་དབྱུག་བཅས་བཀོད། ༈ ཀིང་ནག་ཕ་རོལ་རྒོལ་འཇོམས་ལ། དཀྱིལ་འཁོར་བུམ་པ་སྔ་མ་ལྟར། རྒྱབ་ཏུ་དཔལ་གཏོར་འཁོར་བཞི་ཅན་དང་སྨན་རཀ །མདུན་དུ་ལྷ་ཙཀ །གཡས་སུ་དབུ་རྒྱན་རྡོར་དྲིལ་དཔལ་གྱི་ཆས་ཕྱག་མཚན་བཅུ་དགུ །སྒྲུབ་ཐབས་གླེགས་བམ། རྒྱབ་ཏུ་གསང་ཐོད་རིག་ཙཀ་མེ་ལོང་ཤེལ་རྡོ་མར་མེ། གཡོན་དུ་ཧོམ་ཁུང་ལིང་ག་གདབ་ཕུར་རལ་གྲི་ཕྱག་རྒྱ་བཞི། ཐུན་རྫས། མནན་ཐོད། ཕུང་རེ། ཚོན་སྐུད། སཱཙྪ་རི་རབ་དང་བཅས་པ། དམར་གཏོར་ཉུངས་ཀར་གྱིས་བརྒྱན་པ། གཏོར་ཆུང་ཤ་ཁྲག་གིས་བརྒྱན་པ་སློབ་མའི་གྲངས་མཉམ་རྣམས། དཀྱིལ་འཁོར་གྱི་ཕྱོགས་བཞིར་གཤིན་རྗེ་མ་མོ་བདུད་བཙན་བཞིའི་གཏོར་མ་འཛོམ་ན་སྐུ་ཙཀ་བཙུགས་པ་རྣམས་བཀོད། ༈ གཏོར་དབང་། ཚོམ་བུ་ལྔ་སྟེང་དཔལ་གཏོར་སྔ་མ་ལྟར་དང་ཕྱོགས་བཞི་ལ་ལས་གཏོར་བཞི། མདུན་དུ་དམར་གཏོར་ཐེབས་ཀྱུ་མང་པོས་བསྐོར་བ་བཤམ། ༈ ཁྲོ་ཆུའི་དུག་དབང་ལ། ཆོས་འབྱུང་བསྣོལ་མའམ་འབྲུ་ནག་ཚོམ་བུ་བདུན་སྟེང་ཁྲིའུ་ལ་ཐོད་པའམ་ལྕགས་སྣོད་དུ་གྲུ་གསུམ་བསྣོལ་མའི་གདན་དབུས་གཏོར་མ་ཟུར་གསུམ་ཁྲམ་རིས་ཅན་ཟུར་དྲུག་ལ་དམར་གཏོར་དྲུག །གཙོ་འཁོར་བདུན་ལ་རྩང་བདུན་དང་ཤ་ཁྲག་མེ་རིས་བརྒྱན་པའི་རྒྱབ་ངོས་སྐུ་ཙཀ་དང་། སྲོག་འཁོར་ལྟེ་བར་སྨན་ཆེན་ཡུངས་ཀར་འབྲུ་ཙམ་སློབ་མའི་གྲངས་མཉམ་བཅུག་ཅིང་། དར་ནག་གིས་དྲིལ་བ་གཟུག་པ་བཀོད། ཤར་དུ་རཀྴའི་ཕྲེང་བ། ལྷོར་རྡོ་རྗེ། ནུབ་ཏུ་སྐྱེར་པའི་ཕུར་ཆུང་སློབ་མའི་གྲངས་མཉམ། བྱང་དུ་དུག་ཁྲག་ཐོད་སྣོད་དུ་སྦྱར་བ། མདུན་དུ་སྲུང་སྐུད་ནག་པོ་སློབ་མའི་གྲངས། སྒྲུབ་དཔེ། བྲུབ་ཁུང་ཉའོ། རལ་གྲི །མནན་ཆས། མེ་ཧོམ། ཟོར་གཏོར་རྣམས་བཀོད། ༈ གཏོར་དབང་གི་དཀྱིལ་འཁོར་དང་གཏོར་མ་སྔར་ལྟར་བཀོད་དོ། ༈ །ཐུགས་མཆོག་རྡོ་རྗེའི་ནཱ་ག་རཀྴ་ལ། ཚོམ་བུ་གཅིག་པའི་ཁར་གཏོར་མ་གྲུ་གསུམ་དམར་ནག་ཉ་སྦྲུལ་སྦལ་ཤས་བརྒྱན་པ་ལ་སྐུ་ཙཀ་དར་གདུགས་བརྒྱན། མདུན་དུ་འབུལ་གཏོར་དཀར་གཏོར་ཆ་ལྔ་བཤམ། ༈ ཐུགས་རྡོར་ནཱ་ག་རཀྴ་ལ། དྲག་དཀྱིལ་གཞུང་མཐུན་རས་བྲིས་བཀྲམ་པའམ། འབྲུ་ནག་གི་ཚོམ་བུ་གཙོ་འཁོར་བཅུ་གཅིག་བཀོད། དེ་དབུས་ཁྲིའུའི་ཁར་རིན་པོ་ཆེའི་བུམ་པ་བཅུད་ལྡན་ཁ་རྒྱན་མགུལ་ཆིངས་མཐིང་ནག་གཟུངས་རྡོར་བཅས་པའི་ཁར། རིགས་བདག་གཙོ་བོ། གནས་ལྷ་ལྔ་དང་བཅས་པའི་སྐུ་ཙཀ་བཀོད། མདུན་དུ་ལས་བུམ། གཡས་སུ་རྟེན་གཏོར། རྒྱབ་ཏུ་ཟོར་གཏོར། གཡོན་དུ་ཕྱག་མཚན། གྲི་གུག་སྦྲུལ་ཞགས་དང་འཁོར་ལོ་ནད་རྐྱལ་དབྱུག་པ་རྡོ་རྗེ་ལྕགས་སྡིག་མེ་ཕུང་རྣམས་ཕྱོགས་བསྡུས་ཀྱི་ཙཀ་ལི་གཉིས། བར་མཚམས་སུ་ཧ་ལའི་སྨན་ཆེན་དུམ་ཆུང་ངུ་། སྨན་རག་གཏོར་གསུམ་དངོས་སམ་བྲིས་པ། སྤོས་དཀར་ཁུ་བ། བཙག་བུ་སྤྲ་མེ། དུར་ཁྲོད་དཔལ་ཆས། གཞུང་མཐུན་སྲུང་འཁོར་རྣམས་བཀོད། འོག་ཏུ་སྒྲོལ་ལིང་ལས་ཕུར་བཙུགས་པ། མནན་པའི་རི་རབ། མེ་ཧོམ་རྣམས་ཀྱང་འདུ་བྱའོ།། ༈ །།དེ་ནས་པདྨ་གསུང་གི་ཞི་སྒྲུབ་ཀྱི་དང་པོ་ཚེ་སྒྲུབ་ཀྱི་སྐོར་ལས། ལུང་ལུགས་ཚེ་སྒྲུབ་ལ། རས་བྲིས་སྟེང་རྐང་གསུམ་ལ་བུམ་པ་སྙིང་པོ་ལྔའི་བཅུད་ཀྱིས་བཀང་བའི་ཁར་ཚེ་འབྲང་རྒྱ་གྲམ་ཉི་ཟླས་མཚན་པ། རྒྱབ་ཏུ་ཚེ་མདའ་མེ་ལོང་། གཡས་གཡོན་ཚེ་རིལ་ཚེ་ཆང་། ཞབས་བསིལ་བཞི་བསྣོལ་གྱིས་མཐའ་བསྐོར། ༈ ཉང་གཏེར་མཚོ་སྐྱེས་རྡོ་རྗེ་ལ། རས་བྲིས་ཀྱི་དཀྱིལ་འཁོར་རམ་མ་འཛོམ་ན་མཎྜལ་ལ་འབྲུ་དཀར་གྱི་ཚོམ་བུ་ལྷ་གྲངས་བཀོད་པའི་དབུས་སུ་མཉྫི་ལ་རིན་པོ་ཆེའི་བུམ་པ་ཆས་བཅུད་ལྡན་པའི་ཁར་ཐོད་པ་བདུད་རྩིས་གང་བར་གཞུང་གསལ་ཚེ་རྫས་སུམ་ཅུའི་རིལ་བུ་བཏབ་པའི་ཁར། མེ་ལོང་ལ་སིནྡྷུ་རས་ཆོས་འབྱུང་ཉིས་བརྩེགས་ཀྱི་དབུས་སུ་ཧྲཱིཿལ་རྩ་སྔགས་དང་བཛྲ་གུ་རུས་བསྐོར་བ་དང་ཆོས་འབྱུང་གི་ཟུར་དྲུག་ལ་གཡུང་དྲུང་རེ་བྲིས་པས་བཀབ་པའི་སྟེང་དུ་དར་དམར་པོའི་གུར་ཕུབ་པ་ལ་གཟུངས་ཐག་རྡོ་རྗེ་བཏགས་པ་དང་། དེའི་གཡས་སུ་ཚེ་རྒྱས་རིན་པོ་ཆེ་ཟུར་བརྒྱད་པའི་རྣམ་པ་ཅན་རིལ་བུས་བསྐོར་བ་དང་། གཡོན་དུ་དཔལ་གཏོར་རིན་པོ་ཆེ་འབར་བའི་རྣམ་པ་ཅན་པདྨ་འདབ་བཞིས་བསྐོར་བ་རྣམས་བཀོད། དབང་བསྐུར་བའི་འཁོར་ལོ་གཞུང་གསལ་བྲིས་ནས་བལྟེབ་ཆིངས་གཡོགས་བཅས་བྱས་པ་འཛོམ་ན་སློབ་མའི་གྲངས་དང་མཉམ་པ་དབུས་ཀྱི་བུམ་པ་ལ་བརྟེན་ཏེ་དགོད། གཞན་ཡང་ཚེ་རིལ་ཚེ་ཆང་། ཚེ་མདའ། བཀྲ་ཤིས་རྫས་བརྒྱད་རྣམས་ཀྱང་དགོད། ༈ བྱང་གཏེར་ལྕགས་སྡོང་མ་ལ། པདྨ་འདབ་བརྒྱད་སྔོན་པོའི་ཁར་བུམ་པ་ཉེར་ལྔའི་བཅུད་ལྡན་སྐུ་རྟེན་གྱིས་བརྒྱན་པ་བཞག །འདི་ཕྱིན་གྱི་ཚེ་དབང་ཕལ་མོ་ཆེར་ཚེ་རིལ་ཚེ་ཆང་མདའ་དར་གསུམ་དགོས་པ་འདྲ་ཞིང་བཤམ་ལུགས་སྔ་མས་འགྲེ །སྣོད་གཅིག་ཏུ་ལི་ཁྲིའང་བཞག ༈ །ལྕགས་སྡོང་ལྷ་མང་གི་དབང་ལ། པད་སྔོན་ལྟེ་བར་བུམ་པ་སྔ་མ་ལྟར་ལ་ཚེ་བུམ་ངུམ་གཟུགས་རྒྱན་ལྡན་དེའི་ཁར་བཞག །རིལ་ཆང་མདའ་དར། ཟླུམ་གཏོར་ཆེ་ཆུང་གཉིས་བཤམ། ༈ རང་ཤར་ཚེ་ལྷ་ཡོངས་རྫོགས་ལ། དཀྱིལ་འཁོར་རས་བྲིས་སམ་ཚོམ་བུ་ལྔའི་ཁར་བུམ་པ། མདུན་དུ་ཚེ་འབྲང་རྫས་བཀྱེ་ཆོག་པ། ཚེ་རིལ་དང་། རྒྱལ་སྲིད་རྫས་བརྒྱད་སོ་སོ་བ་བཤམ། ༈ སངས་གླིང་ཉི་ཟླ་ཁ་སྦྱོར་ལ། རས་བྲིས་སམ་འབྲུ་ཚོམ་ལྷ་གྲངས་སྟེང་རྣམ་བུམ་ཁར་ཐོད་པའི་བདུད་རྩི་ལ་སིནྡྷུ་རའི་མེ་ལོང་ཆོས་འབྱུང་བསྣོལ་མ་པདྨ་འདབ་བཞིའི་དབུས་དང་འདབ་མར་ཧྲཱིཿལྔ་བྲིས་པ་དར་དམར་གྱིས་བཀབ་པ། ཚེ་རྒྱས་པདྨ་འདབ་བརྒྱད་སྟེང་རིན་ཆེན་ཟུར་བརྒྱད་རྩེ་རྒྱལ་ཉི་ཟླ་ནོར་བུས་བརྒྱན་ཅིང་རིལ་བུས་བསྐོར་བ། འདི་ཐོད་པའི་སྟེང་དུ་བཀོད་དགོས་ཀྱང་མི་བདེ་ན་གཡོན་དུ་བཞག །ཚེ་གཏོར་པད་སྡོང་སྟེང་ནོར་གཟུགས་རྒྱན་ལྡན་ཟས་སྣས་བསྐོར་བ་གཡས་སུ་བཀོད། མདུན་དུ་སྐུ་ཙཀ །ཚེ་མདའ་རྒྱབ། འབྲུ་སྣ་ལྔའི་ཚེ་ཆང་། ཚེ་ཤ་དཀར་མོ་ལག་གཡས་མ་འཛོམ་ན་ཟན་གྱིས་བཅོས་པ་དང་ཤ་ལྔའི་རིལ་བུ་མདུན་གཡས་གཡོན་དུ་བཀོད། བཀྲ་ཤིས་རྫས་བརྒྱད་ཀྱང་སོ་སོར་བཤམ་མོ། ༈ །རྡོར་གླིང་ཞི་ཁྲོའི་ཚེ་སྒྲུབ་འོད་ཟེར་དྲྭ་བ་ལ། དཀྱིལ་འཁོར་སྟེང་ཚེ་འབྲང་ཕྱག་མཚན་ལྔ་དང་རིགས་ལྔའི་ས་བོན་གྱིས་བརྒྱན་པ་ལྔ་དབུས་དང་མཚམས་བཞིར་བཀོད། དཀར་པོ་ལ་སོགས་པའི་བུམ་པ་ལྔ་ཁ་རྒྱན་ལ་རིགས་ལྔའི་སྐུ་ཙཀ་གིས་བརྒྱན་པ་རྣམས་དབུས་དང་ཕྱོགས་བཞིར་བཞག །རིགས་ལྔའི་ཕྱག་རྒྱ་སོ་སོ་བ། སྒོ་བཞིར་འབྲང་རྒྱས་ཞལ་དཀར་བཞི་དང་མདའ་དར་ཕྱོགས་མདོག །མཚམས་བཞིར་རལ་གྲི་བཞི་གཟུག །བཀྲ་ཤིས་རྟགས་བརྒྱད། རིལ་ཆང་མདའ་དང་བཅས་བཀོད། ༈ རཏྣའི་ཚེ་ཁྲིད་རྡོར་ཕྲེང་ལ། རས་བྲིས་སྟེང་རྣམ་བུམ་ཉེར་ལྔའི་རྫས་ལྡན་ཁར་མེ་ལོང་དབུས་སུ་ཧྲཱིཿམཐའ་སྐོར་དུ་བསྙེན་སྔགས་མཚལ་གྱིས་བྲིས་པས་བཀབ་པའི་སྟེང་གཟུངས་རྡོར་བཞག །དེ་སྟེང་ཁྲིའུར་ཚེ་འབྲང་སྐུ་ཙཀ་རྨ་བྱས་བརྒྱན་པ། ཕྱོགས་རྣམས་སུ་རིག་དབང་ཆས་བཞི། རིལ་ཆང་མདའ་སོགས་བཀོད། སྦྱིན་སྲེག་ཐབ་རྫས་རྣམས་དབང་བསྒྲིགས་སུ་གསལ་བ་ལྟར་འདུ་བྱའོ། ༈ །པད་གླིང་རྡོར་ཕྲེང་དབང་གསུང་རྒྱུན་མ་ལ། རས་བྲིས་སྟེང་བུམ་པ་ཉེར་ལྔའི་རྫས་ལྡན་ཁར་ཐོད་ཆང་མེ་ལོང་གིས་བཀབ་པ། ཤར་དུ་ཚེ་འབྲང་རྡོ་རྗེས་མཚན་པ། རིལ་ཆང་མདའ་བཅས། ༈ འཆི་མེད་དཔལ་སྟེར་ལ། ཚོམ་བུ་གཅིག་སྟེང་ཚེ་བུམ་རྟ་མགོས་མཚན་པ། ཚེ་རིལ་ཚེ་ཆང་། ཟླུམ་གཏོར་གཉིས་བཅས། ༈ བདུད་རྩི་བུམ་ཆུང་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ་ཆས་བཅུད་ལྡན་པ། མདུན་དུ་ཚེ་འབྲང་། གཡས་སུ་ཚེ་རིལ། རྒྱབ་ཏུ་ཚེ་མདའ། གཡོན་དུ་ཚེ་ཆང་བཞག ༈ །ཚེ་དབང་མདའ་འཕེལ་མ་ལ། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ། མདུན་དུ་ཚེ་འབྲང་། རིལ་ཆང་མདའ་དར། རྒྱལ་སྲིད་རྟགས་བརྒྱད་སོ་སོར་བཅས། ༈ ཚེ་སྒྲུབ་ཡེ་ཤེས་འོད་མཆོག་ལ། རས་བྲིས་སམ་ཚོམ་བུ་ལྷ་གྲངས་བཀོད་པའི་སྟེང་ཁྲིའུ་ལ་ཉེར་ལྔའི་བཅུད་ལྡན་ཆིངས་དམར་ཁ་རྒྱན་གསེབ་ཏུ་སྐུ་ཙཀ་གིས་བརྒྱན་པ་བཞག །དེའི་མདུན་དུ་ཚེ་འབྲང་རིན་ཆེན་འབར་བའི་བུམ་དབྱིབས་ཅན། གཡས་སུ་ཟ་མ་ཏོག་ཏུ་བདུད་རྩི་ལྔ་ཅོང་ཞི་བྲག་ཞུན་ཨ་བར་སྐྱུར་གསུམ་བཟང་དྲུག །ཤུག་པ་བ་ལུ་མཚེ་མཁན་འོམ་བུ་དཀར་གསུམ་མངར་གསུམ་བཅས་ཀྱི་རིལ་བུའམ་འབྱོར་ན་དེ་རྣམས་ཀྱི་སྨན་མར་རིལ་བུ། གཡོན་དུ་ཐོད་ཆང་མངར་གསུམ་དང་བདུད་རྩི་བཏབ་པ། མདུན་དུ་ཚེ་མདའ་ཚེ་འཁོར་རམ་མ་འབྱོར་ན་སྔགས་བྱང་གཡུ་བཅས་བཏགས་པ་དང་། ཚེ་རིལ་ཚེ་ཆང་བཅས། རྒྱབ་ཏུ་ཕུར་བུ། ལས་བཞིའི་འབྲང་རྒྱས་དཀར་སེར་དམར་ནག་ནོར་བུའམ་ཞལ་དཀར་དུ་གྲགས་པ་བཞི། བཀྲ་ཤིས་རྫས་རྟགས་རྒྱལ་སྲིད་སྣ་བདུན་བཅས་བཤམ། ༈ འབྲི་གུང་ཡང་ཟབ་ཚེ་སྒྲུབ་ཕྱི་ནང་གསང་གསུམ་ལྷན་ཅིག་ཏུ་བསྐུར་བ་ལ། མཎྜལ་ཚོམ་བུ་གཅིག་པའི་སྟེང་ཚེ་བུམ། རིལ་ཆང་མདའ་དར། ཕྱོགས་བཞི་དབུས་ལྔར་བུམ་པ་ལྔའི་ཁར་ཐོད་པའི་བདུད་རྩི་རྣམས་བཀོད། ༈ ཞིག་གླིང་ཚེ་སྒྲུབ་རྒྱལ་བ་འདུས་པ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ་ཆིངས་དམར། དེའི་སྟེང་ངམ་མདུན་གང་བདེར་ཚེ་འབྲང་དང་ལྷ་ཙཀ་ཚང་བ། རྒྱབ་ཏུ་གསང་ཐོད་སྟེང་སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར། ཧ་རི་ནི་ས། མཐའ་སྐོར་དབྱངས་གསལ་བྲིས་པ་བཞག་པའི་སྟེང་དར་དམར་གྱིས་བཀབ་ལ་ཤེལ་རྡོ་བཀོད། རིག་ཙཀ་བཅས་སོ། ༈ །གྲོལ་ཏིག་སྐུ་གསུམ་འདུས་པ་ལ། རས་བྲིས་སམ་ཚོམ་བུ་གཅིག་པའི་སྟེང་རྣམ་བུམ། མདུན་དུ་ཚེ་བུམ། གཡས་སུ་ཚེ་རིལ། རྒྱབ་ཏུ་ཚེ་མདའ་དང་ཡེ་ཤེས་སེམས་དཔའི་ཙཀ་ལི་ཤེལ་རྡོ་བཅས། གཡོན་དུ་ཐོད་ཆང་དར་དམར་གྱིས་བཀབ་པའི་སྟེང་རིག་ཙཀ་དང་། པད་ཕྲེང་བཅས་བཀོད། ༈ ཚེ་སྒྲུབ་གནམ་ལྕགས་རྡོ་རྗེ་ལ། རས་བྲིས་སྟེང་བུམ་པ་དབུས་དམར། ཤར་སྔོ། ལྷོ་སེར། ནུབ་དཀར། བྱང་ལྗང་ཁ་རྒྱན་ལ་རིགས་ལྔའི་སྐུ་རྟེན་ཅན། མདུན་དུ་ཡུམ་ལྔ་སོགས་ལྷ་ཙཀ་ཚང་བ་དང་ཚེ་འབྲང་། རྒྱབ་ཏུ་ཐོད་ཆང་ཁར་མེ་ལོང་དྲི་མེད། ཚེ་རིལ་ཆང་མདའ་དར། ཟས་སྣ། གོས་སྣ། རྟགས་བརྒྱད་ཕྱོགས་བསྡུས་བཅས། ༈ བདུད་འདུལ་ཚ་བ་དམར་ཐག་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ། དེ་རྒྱབ་བརྒྱད། དེ་རྒྱབ་བཞི་བཀོད་པའི་དབུས་སུ་བུམ་པ་ཆིངས་དཀར། ཕྱོགས་བཞིར་བུམ་པ་མཐིང་སེར་དམར་ལྗང་བཞི། སྐུ་ཙཀ་ཉེར་གཅིག །གཡས་སུ་ཚེ་གཏོར་པད་སྟེང་བུམ་གཟུགས་རྡོ་རྗེ་ཉི་ཟླས་མཚན་པ། གཡོན་དུ་ཐོད་ཆང་སིནྡྷུ་རའི་མེ་ལོང་དབུས་དང་ཕྱོགས་མཚམས་སུ་ཧྲཱིཿདགུ་བྲིས་པས་བཀབ་པ། མདུན་དུ་ཚེ་གཏོར་རྡོ་རྗེའི་དབྱིབས་ཉི་ཟླའི་རྒྱན་ཅན། མདའ་དར། ཚེ་རིལ་ཆང་། རིག་ཙཀ །བཀའ་སྲུང་གཏོར་མ་གྲུ་བཞི་སེར་པོ་བཤོས་ཕྲན་ཐེབས་ཀྱུས་བསྐོར་བ་རྣམས་བཀོད། ༈ འཆི་མེད་ཡང་སྙིང་ལ། རས་བྲིས་འདབ་བརྒྱད་ཚོམ་བུ་ལྷ་གྲངས་གང་རུང་དབུས་སུ་རྣམ་བུམ་ཉེར་ལྔའི་རྫས་ལྡན། མདུན་དུ་ཚེ་འབྲང་། རིལ་ཆང་མདའ་དར་བཅས། ༈ ཚེ་སྒྲུབ་ཡེ་ཤེས་རྒྱ་མདུད་ལ། དཀྱིལ་འཁོར་རམ་ཚོམ་བུ་དམར་པོ་གཅིག་སྟེང་བུམ་པ་ཆིངས་དམར་ཁ་རྒྱན་མེ་ལོང་མན་ཤེལ་བཅས་པ། ཤར་དུ་ཐོད་ཆང་མེ་ལོང་སིནྡྷུ་ར་བྱུགས་པས་བཀབ་པ། ལྷོར་ཚེ་རིལ། ནུབ་ཏུ་ཚེ་མདའ། བྱང་དུ་ཚེ་ཆང་། མཚམས་སུ་སྣང་མཐའི་སྐུ་ཙཀ །ཤེལ་རྡོ། དབུ་རྒྱན། ཞི་ཆས། སློབ་དཔོན་མངའ་གསོལ་གྱི་ཆས་རྣམས་སམ། བསྡུ་ན་རྡོར་དྲིལ་ཙམ་འཇོག ༈ །ཀློང་གསལ་ཡང་གསང་བླ་མེད་ལ། དཀྱིལ་འཁོར་རམ་ཚོམ་བུ་ལྷ་གྲངས་བཀོད་པའི་དབུས་སུ་རྣམ་བུམ་ཆིངས་དམར་ཅན། གཡས་གཡོན་སོགས་སུ་ཐོད་པའི་བདུད་རྩི། དཔལ་གཏོར། ཚེ་རིལ་ཆང་། མདའ་དང་། དུརྦའི་ཕོན་པོ། རྫས་རྟགས་རྒྱལ་སྲིད་བཅས། ༈ ནམ་སྙིང་ཚེ་སྒྲུབ་ལ། རས་བྲིས་སམ་དགུ་ཚོམ་སྟེང་ཁྲིའུར་དཔལ་གཏོར་རྒྱན་ལྡན། མདུན་རྒྱབ་གང་བདེར་རྣམ་བུམ་སྐུ་ཙཀ །སྒྲུབ་ཡིག །ཚེ་རིལ་ཆང་བཅས། ༈ སྟག་ཤམ་གསང་དྲིལ་ཟུང་འཇུག་ལ། དཀྱིལ་འཁོར་རམ་ཚོམ་བུ་གཙོ་འཁོར་དགུའི་སྟེང་དུ་རྣམ་བུམ་ཆིངས་དམར་ཅན། ཤར་བུམ་དཀར། ལྷོ་བུམ་སེར། ནུབ་བུམ་མཐིང་། བྱང་བུམ་ལྗང་གུ་རྣམས་ཁ་རྒྱན་ལ་རིགས་ལྔའི་ལྷ་ཙཀ་བཙུགས་པ། གཡས་སུ་ཚེ་གཏོར་དང་རིལ་བུ། གཡོན་དུ་ཚེ་ཆང་དང་ཚེ་མདའ། མདུན་དུ་ཕྲེང་བ། མེ་ལོང་། རྡོ་རྗེ་རྣམས་བཀོད། ༈ ཚེ་སྒྲུབ་ཡེ་ཤེས་སྲོག་ཏིག་ལ། དཀྱིལ་འཁོར་རམ་མཎྜལ་ཚོམ་བུ་དམར་པོ་གཅིག་བཀོད་པའི་ཁར་མཉྫི་ལ་བུམ་པ་ཉེར་ལྔའི་བཅུད་དང་ཆས་ལྡན། མདུན་དུ་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར་བཅས་བཀོད། ༈ བདེ་གླིང་རྡོ་རྗེ་རྒྱ་མདུད་ལ། ཚོམ་བུ་ལྔ་པའི་ཁར་རྣམ་བུམ་ཉེར་ལྔའི་རྫས་ལྡན། ཤར་དུ་རྡོ་རྗེ་མེ་ལོང་། ལྷོར་ཚེ་རིལ། ནུབ་ཏུ་ཚེ་ཆང་། གསང་ཐོད། སྔགས་བྱང་། ཚེ་ཆང་། བྱང་དུ་མདའ་དར། རྟགས་བརྒྱད་བཅས། ༈ ལྕགས་ཀྱི་བང་མཛོད་ལ། རས་བྲིས་སམ་ཚོམ་བུ་ལྷ་གྲངས་སྟེང་རྐང་གསུམ་ཁར་ཚེ་འབྲང། གཡས་སུ་རྣམ་བུམ། གཡོན་དུ་ཐོད་ཆང་མེ་ལོང་ལྕགས་ཀྱི་རྡོ་རྗེ་རྣམས་བརྩེགས། རིལ་ཆང་མདའ་དར་ཚེ་ནས་བཅས། ༈ ཏའུ་རོག་རྗེ་གླིང་པའི་ཚེ་སྒྲུབ་གསང་བ་རྨད་བྱུང་ལ། ཞི་དཀྱིལ་ལམ་མཎྜལ་པདྨ་འདབ་བརྒྱད་ལྟེ་བར་སྐུའམ་ཚེ་བུམ་བྲིས་པའི་དབུས་སུ་མཉྫིའི་ཁར་བུམ་པ་ཉེར་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་བཅས། མདུན་དུ་དཔལ་གཏོར་རྟ་མགྲིན་གྱི་སྐུ་ཙཀ་བཙུགས་པ། བུམ་པའི་གཡས་གཡོན་དུ་ཚེ་རིལ། ཚེ་ཆང་དང་། གཏོར་མའི་གཡས་གཡོན་དུ་ཕྲེང་བ། རྡོ་རྗེ་བཞག ༈ ཚེ་སྒྲུབ་འཆི་མེད་ཐུགས་ཐིག་ལ། དཀྱིལ་འཁོར་རས་བྲིས་སམ་མཎྜལ་ལ་འབྲུ་དཀར་ཀྱི་ཚོམ་བུ་དབུས་དང་མདུན་དུ་ཆེ་ཆུང་གཉིས། ཕྱོགས་བཞིར་བཞི། དེ་རྒྱབ་བཞི་རིམ་གཉིས་བཅས་བཀོད་པའི་དབུས་སུ་རིན་པོ་ཆེའི་སྣོད་དུ་སྒྲུབ་གཏོར་པད་སྤུངས་རྒྱན་ལྡན། གཡས་གཡོན་ཚེ་རིལ་ཚེ་ཆང་། མདུན་དུ་ཤེལ་རྡོ། རྒྱབ་ཏུ་མདའ་དར་བཀོད། ༈ ཟླ་བའི་འོད་ཟེར་གྱི་ཚེ་སྒྲུབ་རྡོ་རྗེ་སྙིང་པོ་ལ། དཀྱིལ་འཁོར་གཞུང་མཐུན་མཉྫིའི་ཁར་བུམ་པ་སོ་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་བཅས་པ། མདུན་དུ་ཐོད་པ་ལ་ཨ་མྲྀཏས་བཀང་བའི་ཁར་སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་དབུས་སུ་གཡུང་དྲུང་ལྟེ་བར་བཾ། ལོགས་བཞིར་ཧ་རི་ནི་ས། དེ་རྒྱབ་འོད་ལྔས་བསྐོར་བ་བྲིས་པ་དར་དམར་གྱིས་བཀབ་པའི་སྟེང་ཤེལ་རྡོ་བཞག །གཡས་གཡོན་དུ་ཚེ་རིལ། ཚེ་ཆང། མདའ་དར་རྣམས་དང་། འགྲུབ་ན་རྒྱབ་ཏུ་ཚེ་གཏོར་གཞུང་གསལ་ཡང་དགོད། ༈ དཔའ་བོའི་ཚེ་སྒྲུབ་འཆི་མེད་བདུད་རྩི་ལ། འོད་ལྔའི་དཀྱིལ་འཁོར་རམ་ལྔ་ཚོམ་ཁར་དབུས་སུ་བུམ་པ། མདུན་དུ་ཚེ་འབྲང་། ཤར་དུ་རྡོ་རྗེ། ལྷོར་ཚེ་རིལ། ནུབ་ཏུ་ཚེ་ཆང་། བྱང་དུ་ཚེ་མདའ་རྣམས་བཀོད། ༈ གཏེར་གསར་བླ་མ་ཆོས་སྐུ་ལ། རས་བྲིས་སམ་ལྷ་གྲངས་ཚོམ་བུའི་སྟེང་རྣམ་བུམ་དང་། དེ་སྟེང་ཁྲིའུ་ལ་ཚེ་འབྲང་། མདུན་དུ་གཙོ་བོ་དང་རིགས་ལྔ་སོ་སོ། སྒེག་སོགས་བརྒྱད་གཅིག་བསྡུས་བྱས་པ་དང་ཡུམ་ལྔའི་ཕྱག་རྒྱའི་ཙཀ་ལི། གཡས་སུ་ཚེ་རིལ། གཡོན་དུ་ཚེ་ཆང་། མདའ་དར་བཅས། ༈ གཏེར་གསར་ཚེ་དཀར་ལ། རས་བྲིས་འཕྲུལ་སྟེགས་སྟེང་བུམ་པ་དབུས་དཀར་སོགས་ཕྱོགས་མདོག་ལྔ། ཡང་བུམ་པ་ཆིངས་སྔོན་ཅན་སོགས་རིག་པའི་དབང་ལྔའི་ཆས། ལྷ་ཙཀ་ཚང་བ། སྔགས་བྱང་ཕྲེང་དམར། གསང་ཐོད་སིནྡྷུ་རའི་མེ་ལོང་ལ་མུྃ་བྲིས་པས་བཀབ་པ། ཤེལ་རྡོ་མེ་ལོང་། གདུགས་དུང་དཀར་འཁོར་ལོ་ཕྱག་ཤིང་སོགས། རིལ་ཆང་མདའ་དར་བཅས་སོ། ༈ །ཚེ་སྒྲུབ་རྡོར་ཕྲེང་རྩ་དབང་ཕྱི་སྒྲུབ་ལ། དཀྱིལ་འཁོར་རམ་མཎྜལ་ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། མདུན་དུ་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་ཚེ་མདའ་གཟུག ༈ །ནང་སྒྲུབ་ལ། མཎྜལ་ཟླ་གམ་དམར་པོའི་སྟེང་དུ་བུམ་པ་ཐོད་ཆང་སིནྡྷུ་རའི་མེ་ལོང་ཨཱཾཿཡིག་བྲིས་པ་རྣམས་བརྩེགས་ཤིང་དར་དམར་གྱིས་བཀབ་པའི་སྟེང་ཤེལ་རྡོ་བཞག །ཚེ་རིལ་མདའ་དར་བཅས། ༈ གསང་སྒྲུབ་ལ། ཚེ་གཏོར་རྒྱན་ཅན་འཇོག་གོ ༈ །དེ་ནས་འོད་དཔག་མེད་ཀྱི་སྐོར་ལ། ཀཿདམ་པའི་གསུང་རྡོ་རྗེ་ལ། ཚོམ་བུའི་ཁར་རྣམ་བུམ། མཐའ་སྐོར་དུ་སྐུ་ཙཀ །མེ་ལོང་སིནྡྷུ་རས་ཧྲཱིཿབྲིས་པ་ཤེལ་རྡོ། པདྨ་ལྷུང་བཟེད་ཀྱི་ཙཀ་ལི་རྣམས་བཀོད། ༈ གནམ་ཆོས་ཞིང་དབང་ལ། མཎྜལ་ཚོམ་བུ་གཙོ་འཁོར་གསུམ་པའི་ཁར་གཏོར་མ་གཙོ་འཁོར་གསུམ་པའམ། ལྷ་བརྒྱ་གཏོར་གཅིག་དང་སྐུ་ཙཀ །མདུན་རྒྱབ་གང་བདེར་རྣམ་བུམ། རྡོ་རྗེ་ལྷུང་བཟེད་ཀྱི་ཙཀ་ལི། ཚེ་དབང་བྱེད་ན་ཚེ་རིལ་ཆང་མདའ་དར་། རྟགས་བརྒྱད་སྣ་བདུན་གྱི་ཙཀ་ལི་སོ་སོ་བ་བཅས། ༈ ཡི་དམ་དགོངས་འདུས་ཀྱི་འོད་དཔག་མེད་ཡེ་ཤེས་སེམས་དཔའི་རྩ་དབང་ལ། རས་བྲིས་སྟེང་བུམ་ལྔ་དབུས་དཀར་སོགས་ཕྱོགས་མདོག །ཚེ་འབྲང་ལྔ་འཁོར་ལོ་སོགས་རིགས་ལྔའི་རྟགས་ཀྱིས་བརྒྱན་པ། དབུས་སུ་ལྷ་ཙཀ །མདུན་དུ་ཤེལ་རྡོ་མེ་ལོང་། རིལ་ཆང་མདའ་དར། ཕྱོགས་བཞིར་མདའ་དར་དཀར་སེར་དམར་ལྗང་། མཚམས་བཞིར་རལ་གྲི་བཞི། རྟགས་བརྒྱད། སྣ་བདུན་བཅས། ༈ ནང་སྒྲུབ་ཚེ་དབང་ལ། རས་བྲིས་སམ་དགུ་ཚོམ་ཁར་རྣམ་བུམ་དང་ཚེ་འབྲང་བརྩེགས། མདུན་དུ་འོད་ཟེར་དཔག་མེད་ཀྱི་སྐུ་དང་མེ་ལོང་། མོ་ཐོད་རཀྟ་དང་ཕོ་ཐོད་བདུད་རྩིས་བཀང་བ་མེ་ལོང་ཤེལ་རྡོ་རྣམས་བརྩེགས་མར་བཤམ། རྡོ་རྗེའང་བཞག ༈ །ཀླུ་སྒྲུབ་ལུགས་ཀྱི་རྗེས་གནང་ལ། ཚོམ་བུའི་སྟེང་བུམ་པ། མདུན་དུ་དབང་གཏོར། གཙོ་བོའི་སྐུ་ཙཀ་དང་ཕྱག་མཚན། གཡས་སུ་དར་དང་རིན་ཆེན་རྒྱན། གཡོན་དུ་བགྲང་ཕྲེང་དང་ཕྲེང་བཞིའི་ཙཀ་ལི་བཅས་བཞག ༈ གཏེར་གསར་ཐུགས་སྒྲུབ་ཞིང་སྦྱོང་དབང་ལ། ཚོམ་བུ་གཅིག་པའི་ཁར་རྣམ་བུམ། གཡས་སུ་བགྲང་ཕྲེང་། གཡོན་དུ་མེ་ལོང་། བཀྲ་ཤིས་རྫས་རྟགས་སྣ་བདུན་རྣམས་ཙཀ་ལི་ཕྱོགས་བསྡུས་ཅན་བཞག་གོ ༈ དེ་ནས་ཐུགས་རྗེ་ཆེན་པོའི་སྐོར་ལས། ཐོག་མར་རྒྱལ་པོ་ལུགས་ཀྱི་རྩ་དབང་ལ། རས་བྲིས་དབུས་ཁྲིའུར་བུམ་པ་ཆིངས་དཀར་ལྡན་པའི་ཁ་རྒྱན་གསེབ་ཏུ་སེང་ཕུར་རྟ་སྔགས་བྲིས་པ་བཙུགས་པའི་མདུན་ངོས་སུ་དུང་ཆུ་གཟུངས་རྡོར་བཀོད། ཤར་དུ་ཅོད་པན་དམར་པོ། ལྷོར་དབུ་རྒྱན། ནུབ་ཏུ་ཐོད་པའི་བདུད་རྩིའི་ཁར་སིནྡྷུ་རའི་མེ་ལོང་པདྨ་འདབ་དྲུག་གི་ལྟེ་བར་ཨོཾ་ཨཱཿཧཱུྃ་ཧྲཱིཿབརྩེགས་མར་དང་འདབ་དྲུག་ལ་ཡིག་དྲུག་བྲིས་པས་བཀབ་པའི་སྟེང་གཞུང་གསལ་བདུད་རྩི་རིལ་བུ་སློབ་མའི་གྲངས་མཉམ་དར་དཀར་གྱིས་དྲིལ་བ། བྱང་དུ་རྡོར་དྲིལ། ཤར་ལྷོར་སྐུ་རྟེན། ལྷོ་ནུབ་ཤེལ་ཕྲེང་དང་སྔགས་བྱང་། ནུབ་བྱང་སྦ་དཀར་ཚིགས་གསུམ། བྱང་ཤར་མེ་ལོང་། ཤར་སྒོར་ལས་བུམ་སེང་ཕུར་ཧྲཱིཿས་མཚན་པ་རྣམས་དང། རྗེས་གནང་ཆས་གདན་ཁྲི་པདྨ་གདུགས་སྒྲུབ་ཡིག་སྤྱི་བླུགས་དུང་དཀར་རྣམས་བཀོད། ༈ ཉང་གཏེར་ཐུགས་རྗེ་ཆེན་པོ་འགྲོ་འདུལ་ལ། སྟ་གོན་རྫས་བཞི། ཁྲུས་དབང་ལ་མཎྜལ་མེ་ཏོག་གི་ཚོམ་བུ་བཀོད་པའི་ཁར་བུམ་པ་དྲི་ཆབ་ཉེར་ལྔའི་རྫས་དང་ཆུ་ཤེལ་གྱི་བཅུད་ལྡན་མགུལ་ཆིངས་དཀར་པོ་ཁ་རྒྱན་རིགས་ལྔའི་ཕྱག་མཚན་དང་བཅས་པ་བཀོད། བཀྲ་ཤིས་རྟགས་བརྒྱད། རྒྱལ་པོ་སོགས་རིན་ཆེན་བརྒྱད་ཀྱི་ཙཀ་ལིའང་བཞག །དངོས་བཞི་རས་བྲིས་ཀྱི་དཀྱིལ་འཁོར་བཀྲམ་པའི་དབུས་སུ་ཁྲིའུ་ལ་རྣམ་བུམ་ཉེར་ལྔའི་རྫས་དང་ཆིངས་དཀར་ཅན་བཞག །དེའི་ཁར་ཐོད་པ་མཚན་ལྡན་ཆང་དང་ཨ་མྲྀཏས་བཀང་བའི་སྟེང་མེ་ལོང་ལ་མཚལ་ལམ་སིནྡྷུ་རས་ཡིག་དྲུག་བྲིས་པས་བཀབ། ནང་དབང་རྫས། དབུ་རྒྱན། ཅོད་པན། རྡོ་རྗེ། དྲིལ་བུ། ཤེལ་ཕྲེང་། སྦ་ལྕགས་ཚིགས་གསུམ། ཁྱད་པར་རྫས། ལྷ་ཙཀ་ཉེར་གཉིས། དངུལ་གྱིས་བྲིས་པའི་ཡིག་དྲུག །པུསྟི། ཁྲི་གདུགས་ཙཀླི་རྣམས་ཅི་བདེར་བཀོད། ཕྲིན་ལས་བཞིའི་དབང་རྫས་ཤར་དུ་དངུལ་བུམ་ནང་དྲི་སྨན་རིན་པོ་ཆེ་ཆུ་སྣ་འོ་མས་བཀང་བ་ཆུ་ཤེལ་དང་བཅས་པ། མགུལ་ཆིངས་དཀར་པོ་ཁ་རྒྱན་མེ་ལོང་ལྡན་པ། ལྷོར་ཚོགས་གཏོར། དཀར་གསུམ། མངར་གསུམ་ཁུར་བ། ཤ་བཙོས་བསྲེགས་རློན་པ་དང་བཅས་པ། ནུབ་ཏུ་ཟངས་གཞོང་དུ་དབང་གཏོར་ཟླ་གམ་དམར་པོ་རྒྱ་སྐྱེག་དང་སིནྡྷུ་རས་བྱུགས་ཤིང་ཆང་དང་སྨན་སྣ་བཅས་པ། བྱང་དུ་ཟངས་སམ་སེང་ལྡེང་ཕུར་པ་རྟ་ཞལ་ཅན། མདུན་ངོས་སུ་ཚེ་བུམ་མགུལ་ཆིངས་དམར་པོ་དྲི་ཆབ་དང་སོ་ལྔས་བཀང་བའི་ཁར་ཚེའི་འབྲང་རྒྱས་བཞག་པ་དང་ཚེ་རིལ་ཚེ་ཆང། རྒྱབ་ཏུ་སྨན་གྱི་ཕོ་བྲང་རྣམས་ཀྱང་དེ་དག་གི་དབང་བསྐུར་ཆེད་དུ་བཀོད། ལས་བྱང་ནས་བཤད་པའི་ལས་བཞིའི་འབུལ་གཏོར་སོགས་ཚོགས་པར་བྱའོ། ༈ །འདོད་བུམ་ནང་འགྲོ་འདུལ་དབང་ལ། དཀྱིལ་འཁོར་བུམ་པ། དབུ་རྒྱན་ཐོད་ཆང་། མེ་ལོང་། རིལ་བུ། སྐུ་སྔགས་བྱང་། ཆོས་དབྱུག །རྗེས་གནང་ཆས་ཙཀ་ལི་མཚོན་བྱེད་བཅས་སྔ་མ་དང་འདྲ། ༈ ཕྱག་སྟོང་སྤྱན་སྟོང་གི་བཤམ་བཀོད་ཀྱང་དེ་ཁོ་ན་ལྟར་ལ་སྐུ་གཟུགས་བརྗེ། ༈ རྒྱལ་བ་རྒྱ་མཚོ་ལ། སིནྡྷུ་རའི་མཎྜལ་གཞུང་གསལ་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་དབུས་པདྨ་འདབ་བཞིའི་ལྟེ་བར་ཧྲཱིཿལ་སྙིང་པོས་བསྐོར་བ་རྡོ་རྗེ་རྣམས་བརྩེགས་ཏེ་བཞག ༈ རྒྱལ་རྒྱམ་ལྷ་ལྔའི་གཏོར་དབང་ལ། ཐོད་པའམ་རིན་པོ་ཆེའི་སྣོད་དུ་དབུས་དང་རྒྱབ་ཏུ་བླ་མ། གཡས་སུ་ཡི་དམ། གཡོན་དུ་མཁའ་འགྲོ །རྒྱབ་ཏུ་ཆོས་སྐྱོང་ཕོ་རྒྱུད་གཏོར་མ་བཅས་རྒྱན་སྤྲོས་ཅན་ཁྲིའུར་བཀོད། ༈ ཡང་སྙིང་འདུས་པ་ལ། རས་བྲིས་སྟེང་རྣམ་བུམ། གཡས་སུ་གཏོར་ཆེན། གཡོན་དུ་ཐོད་ཆང་། མདུན་དུ་ལྷ་ཙཀ་དང་ཡི་གེ་འབྲུ་བདུན་སྔགས་བྱང་། མར་མེ། མེ་ལོང་། རྒྱབ་ཏུ་རིལ་བུ་བུམ་པ་བཅས་བཤམ། ༈ ཉི་མ་སེང་གེའི་པདྨ་རྒྱལ་པོ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སྟེང་རྣམ་བུམ་ཆིངས་དམར་ཅན་གྱི་ཁར་ཐོད་ཆང་སིནྡྷུ་རའི་མེ་ལོང་ལ་ཡིག་བདུན་བྲིས་པས་བཀབ། དེའི་སྟེང་འཕྲུལ་སྟེགས་ལ་བླ་མའི་གཏོར་ཆེན། མདུན་སོགས་སུ་མྱང་གྲོལ་རིལ་བུམ། དབུ་རྒྱན། རྡོར་དྲིལ། མིང་དབང་། ལྷ་ཙཀ་ཚང་བ། ཕྲེང་དམར། མེ་ལོང་། རྒྱ་གྲམ་བཅས་བཀོད། ༈ དོན་དབང་ལ། དཀྱིལ་འཁོར་དབུས་བུམ་པ། གཡས་གཡོན་དུ་རིལ་བུམ་དང་། བླ་གཏོར། མདུན་དུ་ཐོད་ཆང་དང་མེ་ལོང་བཞག །རྩ་དབང་དང་སྦྲེལ་སྐབས་བཤམ་བཀོད་ཟུར་དུ་མི་དགོས། ༈ དེའི་ཚེ་དབང་ལ། དཀྱིལ་འཁོར་རམ་ཚོམ་བུ་དམར་པོ་ལྷ་གྲངས་ཀྱི་དབུས་སུ་རྣམ་བུམ་ཆིངས་དམར་ཚེ་རྫས་ཀྱི་བཅུད་ལྡན། གཡས་སུ་ཚེ་རིལ། གཡོན་དུ་ཚེ་ཆང་། མདུན་དུ་ཚེ་འབྲང་། རྒྱབ་ཏུ་ཚེ་མདའ་བཀོད་ལ་གཟུངས་ཐག་གིས་སྦྲེལ། ༈ པདྨ་ཀཱི་ལ་ཡའི་བྱིན་རླབས་ལ། གྲུ་གསུམ་མཐིང་ནག་དབུས་སུ་ཕུར་སྟེགས་ལ་ཕུར་པ་ཁྲོ་ཞལ་རྟ་གདོང་ཅན་ཉུངས་ཀར་དང་ཅོད་པན་ནག་པོ་བཏགས་པ་བཙུགས། མདུན་དུ་དཔལ་གཏོར་དང་། རཀྴའི་ཕྲེང་བ་བཅས་བཞག ༈ བྱང་གླིང་ཐུགས་ཆེན་ལྷ་དྲུག་ལ། མཎྜལ་པདྨ་འདབ་བརྒྱད་སྟེང་བུམ་པ་ཆིངས་དཀར། དབུས་སུ་འགྲོ་འདུལ་ཕྱག་བཞི་པའི་སྐུ། ཡིག་དྲུག །མེ་ལོང་། གཡས་སུ་པདྨའི་གྲི་གུག་དང་པད་དབྱུག །གཡོན་དུ་ཌཱ་རུ། ཐོད་ཁྲག །མདུན་དུ་རྡོ་རྗེ་ཁ་ཊྭཱཾ་ཐོད་པ་གླིང་བཞི་པ། རྒྱབ་ཏུ་གཏེར་བུམ་བཅས་བཀོད། ༈ བྱང་གཏེར་ཐུགས་རྗེ་ཆེན་པོ་འགྲོ་འདུལ་ལ། རས་བྲིས་དབུས་རྣམ་བུམ། ཕྱོགས་བཞིར་རིགས་དབང་ཆས། མདུན་རྒྱབ་གང་བདེར་བླ་གཏོར་ཨོ་རྒྱན་སྐུ་ཙཀ་བཙུགས་པ། ལྷ་ཙཀ །སྔགས་བྱང་། རྡོར་དྲིལ་དུང་གླེགས་བམ། སྣ་བདུན་དང་རྫས་བརྒྱད་ཕྱོགས་བསྡུས་བཅས། ༈ དོན་ཟབ་དགོངས་བསྒྲིལ་ལ། རས་བྲིས་སམ་ལྷ་གྲངས་ཚོམ་བུའི་སྟེང་གི་ཁྲིའུར་གཞུང་པོད་དམ་རྒྱུད་ཀྱི་གླེགས་བམ། མཐོང་གྲོལ་འཁོར་ལོས་བཀབ་པ། དེ་སྟེང་འཕྲུལ་སྟེགས་ལ་ཐུགས་རྗེ་ཆེན་པོའི་སྐུ་དང་། རྒྱབ་ཕྱོགས་མཆོད་རྟེན། མདུན་ཕྱོགས་རྣམ་རྒྱལ་བུམ་པ་རྣམས་བཀོད། དེའི་མཐའ་སྐོར་རམ་སྟེགས་ཟུར་པར་ཐེག་དགུའི་དབང་རྫས་སྣོད་སོ་སོར་བསྒྲིག་དགོས་པ། ཆོས་གོས་ལྷུང་བཟེད་གསེག་ཤང་། སྲུང་སྐུད་དམར་པོ་སློབ་མའི་གྲངས་མཉམ། ཤིང་ཏོག་དང་རུས་པའི་ཕྲེང་བ་སོ་ཤིང་། དུང་པུསྟི་རྩྭ་ཀུ་ཤའི་ཆུན་པོ་བསྣོལ་མ། མིག་དར་ཅོད་པན་རྡོར་དྲིལ་རིགས་ལྔའི་ཕྱག་མཚན། རྡོ་རྗེ་དང་ཕྲེང་བ། གསེར་ཐུར་དང་མེ་ལོང་། གསང་ཐོད་དང་མེ་ལོང་རིག་ཙཀ །རིན་ཆེན་སྨན་འབྲུའི་མཎྜལ་འདུ་བྱ། ༈ ཡང་གཏེར་རྒྱལ་བ་རྒྱ་མཚོ་ལ། སྟ་གོན་རྫས་བཞི། དཀྱིལ་འཁོར་རས་བྲིས་སམ་འབྲུ་ཚོམ་ལྷ་གྲངས་དབུས་སུ་ཁྲིའུའི་ཁར་ཐོད་པ་མཚན་ལྡན་མྱང་གྲོལ་རིལ་བུས་ཕྱུར་བུར་བཀང་བ་དར་དམར་གྱིས་བཀབ་པའི་སྟེང་། སིནྡྷུ་རའི་མེ་ལོང་སྔགས་བྱང་བྲིས་པ་བཞག །མདུན་སོགས་ཕྱོགས་མཚམས་རྣམས་སུ་རྣམ་བུམ། དབུ་རྒྱན། རྡོར་དྲིལ། གཙོ་འཁོར་རྣམས་ཀྱི་ལྷ་ཙཀ་དགུ །སྔགས་བྱང་ཕྲེང་དམར། མེ་ལོང་། དར་དང་རིན་པོ་ཆེའི་རྒྱན། སྣ་ཚོགས་རྡོ་རྗེ། གླེགས་བམ། ཕྲིན་ལས་བཞིའི་འབྲང་རྒྱས་སྣོད་གཅིག་བསྡུས། གསང་ཐོད། རིག་ཙཀ་རྣམས་བཀོད། རིལ་བུ་དང་བྱང་སེམས་དཀར་དམར་སིནྡྷུ་ར་རྣམས་སྦྱར་བའི་ཐིག་ལེ་བཀོད་རྒྱུ་དང་། མགུལ་ལ་བཏགས་རྒྱུ་མྱང་གྲོལ་ཐུམ་བུ་སློབ་མའི་གྲངས་མཉམ་སོགས་བསྡོག་གོ ༈ །སངས་གླིང་ནོར་བུ་སྐོར་གསུམ་ལས་ཕྱི་རྒྱལ་པོ་ལུགས་ལ། མཎྜལ་ཡིག་བདུན་བྲིས་པའི་ཁར་འཕགས་པའི་སྐུ་བརྙན་དང་རྒྱལ་པོ་ལུགས་ཀྱི་གླེགས་བམ་བཀོད། བྱང་ཤར་དུ་རྟ་ནག་ཐོད་པའམ་དེའི་ཐོད་རུས་བསྲེས་པའི་ཟན་ལ་རྟ་མགོ་བཅོས་པའི་ནང་དུ་དར་ཟབ་འབྲུ་སྨན་རིན་པོ་ཆེ་རྣམས་དང། མཐིང་ཤོག་ལ་གསེར་རམ་མཚལ་གྱིས་རྟ་སྔགས་བྲིས་པ་གཞུག་ལ་དར་སྣས་བརྒྱན་ཅིང་དར་ནག་གིས་བཀབ་པ་འབྲུའི་སྣོད་དུ་བཞག །མཆོད་གཏོར་དཀར་དམར་བཤམ། ༈ ནང་ནོར་བུ་ལུགས་ལ། སྟ་གོན་རྫས་བཞི། རས་བྲིས་ཁར་རྣམ་རྒྱལ་བུམ་པ། མདུན་དུ་གཙོ་བོའི་སྐུ །ཡིག་དྲུག །ཕྲེང་བ། པད་དཀར་བཞིའི་ཙཀ་ལི་བཀོད། ༈ གསང་བ་ཡང་གསང་བླ་མེད་ལ། རས་བྲིས་སམ་ཚོམ་བུ་ལྔ་པའི་ཁར་ཁྲིའུར་རྣམ་རྒྱལ་བུམ་པ་ཐོད་ཆང་སིནྡྷུ་རའི་མེ་ལོང་ཆོས་འབྱུང་བསྣོལ་མའི་ནང་པདྨ་འདབ་བཞིའི་ལྟེ་བར་ཧྲཱིཿདང་འདབ་མར་ཧ་རི་ནི་ས་བྲིས་པ་བཞག་ལ་དར་དམར་གྱིས་བཀབ། ཤར་དུ་རྡོ་རྗེ། ལྷོར་དབུ་རྒྱན། ནུབ་ཏུ་གླེགས་བམ། བྱང་དུ་དྲིལ་བུ་རྣམས་བཀོད། ༈ རྡོ་གླིང་བདེ་གཤེགས་ཀུན་འདུས་ལ། དཀྱིལ་འཁོར་དབུས་རྣམ་བུམ་ལ་གཙོ་བོའི་སྐུས་བརྒྱན་པ། རྒྱབ་ཏུ་དབུ་རྒྱན་དང་ཨོ་རྒྱན་སྐུ། གཡས་སུ་སེང་ཕུར་དང་རྟ་མགྲིན། གཡོན་དུ་ཐོད་ཆང་དང་གསང་ཡེ། མདུན་དུ་རལ་གྲི །ཡིག་བཅུའི་སྔགས་བྱང་སོ་སོ་བ། གཙོ་བུམ་རྒྱབ་ངོས་ཁྲིའུ་ལ་གཏོར་ཆེན་གོང་གི་ལྷ་ལྔ་ལྟར། ཐོད་པ་ལྔ་ལ་དབུས་སུ་སྦྲང་། ཤར་སོགས་ལ་འོ་མ། ཆང་། བུར་ཆང་། འོ་མ་ཁྲག་སྦྱར་བླུགས་པ། རྡོར་དྲིལ། མེ་ལོང་རྨ་བྱའི་མདོངས་མར་མེ་ཐོད་ཆང་ཤེལ་རྡོ་བཅས་ལྔ་ཚོམ་དུ་བཀོད། དེའི་ཚེ་དབང་ལ། ཚེ་བུམ། ཚེ་འབྲང་། ཚེ་རིལ་ཆང་རྣམས་བཞག ༈ །ཐུགས་རྗེ་ཆེན་པོ་ངན་སོང་ཀུན་སྐྱོབ་ལ། རས་བྲིས་ཀྱི་དཀྱིལ་འཁོར་དབུས་ཁྲིའུ་ལ་རྣམ་བུམ་ཆས་བཅུད་ལྡན་པ་དང་ལྷན་ཅིག་ཏུ་ཐུགས་རྗེ་ཆེན་པོ་དཀར་དམར་གྱི་སྐུ་ཙཀ །ཡིག་བདུན་སོ་སོར་བྲིས་པའི་ཙཀ་ལིའང་བཀོད། མདུན་དུ་ཞི་གཏོར་སྐུ་ཙཀ་གིས་བརྒྱན་པ་དང་། གཡས་གཡོན་དུ་ཐོད་པའི་བདུད་རྩི། མར་མེ། དབུ་རྒྱན། ཕྲེང་བ། མེ་ལོང་ལ་མཚལ་གྱིས་ཡིག་བདུན་བྲིས་པ། ཤེལ་རྡོ། མེ་ལོང་། རས་དཀར་གྲུ་བཞི་ལ་མེ་ཏོག་གི་ཚོམ་བུ་ལྔ་བཀོད་པ། གདུགས། རྡོར་དྲིལ། རྒྱུད་དམ་སྒྲུབ་ཐབས་ཀྱི་གླེགས་བམ། མེ་ལོང་རྣམས་བཀོད། ༈ རད་གླིང་ཐུགས་རྗེ་གསང་འདུས་དབང་ཆེན་སྟོང་དབང་དང་བཅས་པ་ལ། སྟ་གོན་རྫས་བཞི། དཀྱིལ་འཁོར་རས་བྲིས་དབུས་རྐང་གསུམ་ལ་རྣམ་བུམ་ཉེར་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་གཟུངས་རྡོར་ལྡན་པ་བཞག །དབུ་རྒྱན། ཕྲེང་བ་སོགས་ཞི་ཆས་བདུན། རིགས་ལྔའི་ཕྱག་མཚན། དྲིལ་བུ་དང་མེ་ཏོག་ཕྲེང་བ། རིགས་ལྔ་ཡབ་ཡུམ། སྐུ་བཞི། སེམས་དཔའ་སེམས་མ་བཅུ་དྲུག །ཐུབ་པ་དྲུག །སངས་རྒྱས་སྟོང་བཅས་ལྷ་ཙཀ་ཡོངས་རྫོགས། གཞུང་པོད་ཕྲེང་བས་དྲིལ་བ། ཤེལ་རྡོ་མེ་ལོང་། འབྲུ་གསུམ་མཚན་པའི་ཕྱག་རྒྱ་གསུམ་རྣམས་མདུན་སོགས་སུ་བཞག །བཟའ་བཅའ་སྣ་ཚོགས་པའི་ཚོགས་རྫས་སྣོད་གཅིག་ཏུ་བཞག་པ། རྫས་བརྒྱད། ཚེ་འབྲང་རྣམས་ཀྱང་ཅི་བདེར་བཀོད། མྱང་གྲོལ་བུམ་དབང་སྦྲེལ་ན་མདུན་དུ་སྐྱེ་བདུན་རིལ་བུས་བཀང་བའི་བུམ་པ་རིགས་ལྔས་ཁ་བརྒྱན་པ། གཡས་ཕྱོགས་སུ་གསང་དབང་དཀྱིལ་འཁོར་མཎྜལ་ལ་སིནྡྷུ་ར་བྱུགས་ཤིང་ཆོས་འབྱུང་བྲིས་པའི་དབུས་སུ་ཀ་པཱ་ལ་ཆོས་སྨན་ཆང་སྦྱར་གྱིས་བཀང་བ་དར་དམར་གྱིས་ཁ་བཀབ་པའི་སྟེང་དུ་མེ་ལོང་ལ་སིནྡྷུ་ར་ཆང་སྦྱར་བྱུགས་པ་ལ་ཆོས་འབྱུང་དབུས་སུ་ཧྲཱིཿམ། ཕྱོགས་བཞིར་ཧ་རི་ནི་ས་བཞག །གཡོན་ཕྱོགས་སུ་དབང་བཞི་པའི་དཀྱིལ་འཁོར་འཇའ་རིས་མུ་ཁྱུད་ལྔ་ལྡན་གྱི་དབུས་སུ་བནྡྷ་བདུད་རྩིས་བཀང་བའི་ཁ་མེ་ལོང་གིས་བཀབ་ལ་ཤེལ་རྡོ་དང་རྨ་བྱའི་སྒྲོ་ཐིག་བཞག །གཏོར་དབང་ཆས་དབང་གཏོར་གཞུང་གསལ་རྒྱན་ལྡན་དང་། ཐོད་པའི་བདུད་རྩི་མེ་ལོང་གིས་བཀབ་པའི་སྟེང་མན་ཤེལ་བཀོད། ༈ རྣལ་འབྱོར་རྒྱུན་དབང་ཡང་བསྐུར་ན། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ་ཆིངས་དམར་ཅན་གྱི་ཁར་གཏོར་མ་རི་རབ་བཞི་བརྩེགས་དེ་སྟེང་ཟླུམ་པོ། དེ་སྟེང་པདྨ་འདབ་བརྒྱད་ཁར་བུམ་པ་པད་སྤུངས་ནོར་བུས་བརྒྱན་པ་བཞག །གཡས་གཡོན་དུ་དབུ་རྒྱན། ལྷ་ཙཀ་ཚང་བ། ཞི་ཆས། རིགས་ལྔ་ཡབ་ཡུམ་དང་རྡོ་རྗེ་གསུམ་གྱི་ཕྱག་རྒྱ་གླེགས་བམ། ཕྲེང་བ། ཚེ་གཏོར། ཐོད་པའི་བདུད་རྩི། རིག་ཙཀ །ཤེལ་རྡོ་མེ་ལོང་། ཚོགས་རྫས་བཟའ་བཏུང་། རྫས་བརྒྱད་རྣམས་དང་། རིལ་བུའི་དབང་བསྐུར་ན་དེའི་བུམ་པའང་བཀོད། ༈ པད་གླིང་ཐུགས་ཆེན་མུན་སེལ་སྒྲོན་མེ་ལ། རས་བྲིས་ཀྱི་དཀྱིལ་འཁོར་རམ་ཚོམ་བུ་ལྷ་གྲངས་བཀོད་པའི་དབུས་སུ་མཉྫི་ལ་རྣམ་རྒྱལ་བུམ་པ་དྲི་བཟང་ཆུ་དང་སོ་ལྔ་སྦྱར་བའི་བཅུད་ལྡན་མགུལ་ཆིངས་དམར་པོ་ཁ་རྒྱན་གྱིས་སྤྲས་པ། མདུན་དུ་དབང་རྟེན་མར་མེ། ཡི་གེ་འབྲུ་བདུན་སོ་སོར་ཕྲལ་བའི་ཙཀ་ལི། གཡས་སུ་དཔལ་གཏོར་རྒྱན་ལྡན་དར་གདུགས་ཅན། གཡོན་དུ་ཐོད་ཆང་དང་མེ་ལོང་གསལ་བ་རྣམས་བཀོད། ༈ གསུང་རྒྱུན་ཁྲོམ་ཤོག་མ་ལ། དཀྱིལ་འཁོར་རས་བྲིས་ཚོམ་བུ་གང་འཛོམ་གྱི་དབུས་སུ་རྣམ་རྒྱལ་བུམ་པ་བཅུད་ལྡན་མགུལ་ཆིངས་ཁ་རྒྱན་དང་བཅས་པ། མདུན་དུ་ལྷ་ཙཀ་བཅུ་གཉིས། ཨོཾ་ཨཱཿཧཱུྃ་ཧྲཱིཿདང་ཡི་གེ་འབྲུ་བདུན་སོ་སོར་བྲིས་པའི་ཙཀ་ལི། གཡས་སུ་དབང་གཏོར། གཡོན་དུ་ཐོད་པ་བདུད་རྩིས་བཀང་བ་བཞག ༈ །འགྲོ་འདུལ་ལས་འཕྲོ་གླིང་པའི་ཐུགས་ཆེན་དོན་གསལ་སྒྲོན་མེ་ལ་དབང་གི་རྣམ་གྲངས་བདུན་ལས། དང་པོ་ཁྲུས་དབང་ལ། སྟེགས་བུའི་དབུས་སུ་རྣམ་བུམ་མགུལ་ཆིངས་དཀར་པོ་དང་ལས་བུམ་དམར་པོ་ཅན། ཉེར་ལྔའི་བཅུད་ལྡན་ཁ་རྒྱན་གྱིས་སྤྲས་པ་བཞག །གཉིས་པ་བགེགས་སྦྱོང་སྟ་གོན་དབང་ལ། དཀྱིལ་འཁོར་གཞུང་གསལ་གྱི་དབུས་དང་ཕྱོགས་བཞིར་དཔལ་གཏོར་ལྔ་ལ་བུདྡྷ་སོགས་རྟ་མགྲིན་རིགས་ལྔའི་ཙཀ་ལི་བཙུགས་པ་དང་། ཤར་དུ་དབང་བུམ། བྱང་དུ་ཁྲུས་བུམ་བཀོད། ཕྱི་མཆོད་བསྐོར་བཤམ། དཔུང་སྐུད་ཚོན་སྣ་ལྔ་བསྒྲིམ་མམ་གང་འབྱོར། ཀུ་ཤའི་ཆུན་པོ། ལྕགས་སྣོད་དུ་མེ་ཐབ་གྲུ་གསུམ་མཐིང་ནག་མེ་རིས་བསྐོར་བའི་སྟེང་དུ་སྐྱེར་པ་སོགས་དྲག་ཤིང་གྲུ་གསུམ་དུ་བརྩེགས་པ། མཆོད་རྫས་སྨན་རཀ་གཏོར་མ། མེ་རྫས་དུག་ཁྲག་མུ་ཟི་གུ་གུལ་ནག་པོ་རྟ་སྦང་སྦང་ཕྱེ་རྣམས་མར་ནག་གམ་ཨ་རག་གིས་ངར་བཏགས་པ་དང་། སྤྱི་མཐུན་ཉེར་མཁོའི་ཡོ་བྱད་འདུ་བྱ། གསུམ་པ་བུམ་དབང་ལ། དཀྱིལ་འཁོར་གཞུང་གསལ་དབུས་ཁྲིའུའི་སྟེང་རྣམ་རྒྱལ་བུམ་པ་སོ་ལྔའི་བཅུད་ལྡན་མགུལ་ཆིངས་ཅན་གྱི་ཁར་འོད་དཔག་མེད་དང་སྤྱན་རས་གཟིགས་རིགས་ལྔའི་ཙཀ་ལི་བཀོད། ཤར་དུ་རྡོར་དྲིལ། ལྷོར་དབང་གཏོར། ནུབ་ཏུ་ཐོད་ཁྲག །བྱང་དུ་སྨན་ཐོད། པད་འདབ་བརྒྱད་ལ་ཞལ་ཟས་བརྒྱད་བཀོད་པ་ལ་ཤར་དུ་ལྷ་དབང་སོགས་ཐུབ་དྲུག་ཙཀ་ལི་གཡས་བསྐོར་དུ་བཙུགས། བྱང་དང་བྱང་ཤར་གཉིས་ལ་མི་དགོས། སྒོ་བཞིར་དཔལ་གཏོར་བཞི་ལ་རྣམ་རྒྱལ། གཤིན་རྗེ། རྟ་མགྲིན། འཁྱིལ་བ་བཞིའི་ཙཀ་ལི་བཙུགས། རྒྱལ་སྲིད་དང་རྟགས་བརྒྱད་སོ་སོ་བ། འདིའི་རྒྱལ་སྲིད་ལ་འཁོར་ལོའི་ཚབ་ཏུ་རྒྱལ་པོ་རིན་ཆེན་ཕྱག་ན་གསེར་འཁོར་བསྣམས་པ་དགོས། འདི་མཚུངས་རྡོར་གླིང་སོགས་གཏེར་རྙིང་གཞན་ལའང་སྣང་བས་དཀྱུས་འགྲེས་ཁྱད་གསོད་མི་རུང་བ་འདྲ། བྱང་དུ་དམ་ཆུ། ཤར་དུ་ཁྲུས་བུམ་བཅས་བཤམ། བཞི་པ་གསང་དབང་ལ། དཀྱིལ་འཁོར་དབུས་མཉྫིའི་སྟེང་རྣམ་བུམ་དུ་སོ་ལྔའི་རྫས་ལ་ཡིག་བདུན་བཟླས་པས་བྱིན་གྱིས་བརླབས་པའི་བཅུད་ལྡན་མགུལ་ཆིངས་དཀར་པོ་ཁ་རྒྱན་ལྡན་པ་དང་། ཨོཾ་དཀར་པོ་ལ་ཡིག་དྲུག་གིས་བསྐོར་བའི་གསུང་དཀྱིལ་བཀོད། དེ་རྒྱབ་འདབ་བཞིའི་ཤར་ནས་བརྩམ་ཧཱུྃ་སྔོན་པོ། ཏྲཱཾ་སེར་པོ། ཧྲཱིཿདམར་པོ། ཨཱཿལྗང་གུ་བཞི་ལ་རེ་རེ་བཞིན་ཡིག་དྲུག་གིས་བསྐོར་བའི་གསུང་དཀྱིལ་བཞི་བཀོད། ཡིག་དྲུག་ཀྱང་ཨོཾ་དཀར་པོ་སོགས་ཐུབ་དྲུག་སོ་སོའི་སྐུ་མདོག་ལྟར་བྲི་བར་གསུངས་པ་གྲུབ་ན་ལེགས། དེ་རྒྱབ་འདབ་བརྒྱད་ལ་ཕྱོགས་བཞིར་བུམ་པ་མཐིང་སེར་དམར་ལྗང་གི་དར་ཆིངས་ཅན་བྱང་སེམས་དཀར་པོ་དང་། དཀར་གསུམ་བཅུད་ལྡན། མཚམས་བཞིར་ཐོད་པ་མཚན་ལྡན་བཞི་ཆང་དང་བྱང་སེམས་དམར་པོ་མངར་གསུམ་སྦྱར་བས་བཀང་བ་བཞག །ལྔ་པ་ཤེས་རབ་ཡེ་ཤེས་ཀྱི་དབང་ལ། དཀྱིལ་འཁོར་གཞུང་མཐུན་བྲིས་པའི་ཟླ་གམ་དཀར་པོ་ལ། ཕོ་ཐོད་ནང་འཁོར་ལོ་རྩིབས་བཞིའི་དབུས་དང་རྩིབས་ལ་རིགས་ལྔའི་ས་བོན་བྲིས་པའི་ནང་དུ་བྱང་སེམས་དཀར་པོ་དང་དཀར་གསུམ་བྱུགས་ལ་དར་དཀར་གྱིས་བཀབ་པ་བཞག །ཟླ་གམ་དམར་པོར་མོ་ཐོད་ནང་པདྨ་འདབ་བཞིའི་དབུས་དང་འདབ་ལྔར་ཡུམ་ལྔའི་ས་བོན་བྲིས་པའི་ནང་དུ་བྱང་སེམས་དམར་པོ་དང་མངར་གསུམ་བླུགས་ལ་དར་དམར་གྱིས་བཀབ་པ་བཞག །དེ་རྒྱབ་འདབ་བཞིའི་ཤར་དུ་རྣམ་བུམ། ལྷོར་དབུ་རྒྱན། ནུབ་ཏུ་དབང་གཏོར། བྱང་དུ་རྡོར་དྲིལ་དང་ཁྲུས་བུམ། གཞན་ཡང་དཔའ་བོ་དང་རིག་མའི་ཙཀ་ལི་འདུ་བྱ། དྲུག་པ་ཚིག་དབང་རིན་པོ་ཆེ་ལ། དཀྱིལ་འཁོར་དབུས་དང་ཕྱོགས་བཞིར་མཆོད་རྟེན་དཀར་མཐིང་སེར་དམར་ལྗང་གུ་ལྔ་དང་མེ་ལོང་རེ་རེ་བཞག །བདུན་པ་རིག་པ་རྩལ་དབང་ལ། དཀྱིལ་འཁོར་དབུས་སུ་སྤྱན་རས་གཟིགས་ཀྱི་སྐུ་རིན་པོ་ཆེ་ལས་གྲུབ་པ་བཞག །མཐར་དར་ཁ་དོག་ལྔ་སོ་སོར་བཏིང་བའི་སྟེང་དུ་ཁ་དོག་སྣ་ཚོགས་པའི་སྣོད་རྣམས་སུ་ཆུ་ལ་ཚོན་གྱིས་ཁ་དོག་བསྒྱུར་བ་ལྟ་བུའི་བཅུད་ཀྱང་དེ་མཚུངས་བླུགས་པ་དང་། ཤེལ་རྡོ་མེ་ལོང་བཀོད། ༈ མངའ་རིས་གྲུབ་ཆེན་གྱི་ཡིག་དྲུག་གསོལ་འདེབས་ཀྱི་རིག་གཏད་ལ། མཎྜལ་པདྨ་འདབ་མ་དྲུག་པའི་སྟེང་ཁྲིའུར་འགྲོ་འདུལ་སྐུ་བརྙན། འདབ་དྲུག་ལ་མ་ཎི་འབྲུ་དྲུག་གི་ཙཀ་ལི། གཡས་སུ་བུམ་པ་ཆིངས་དཀར། གཡོན་དུ་ཤེལ་ཕྲེང་དང་པད་དཀར་ཙཀ་ལི་བཀོད། ༈ ལེགས་ལྡན་རྗེའི་འཁོར་བ་དབྱིངས་སྒྲོལ་ལ། སོ་ཤིང་སོགས་རྫས་བཞི། དཀྱིལ་འཁོར་རས་བྲིས་སམ་ལྷ་གྲངས་ཚོམ་བུའི་སྟེང་རྣམ་བུམ་ཆིངས་དམར། དབུས་མདུན་ཅོད་པན་དམར་པོ། གཙོ་འཁོར་བཅོ་ལྔའི་ལྷ་ཙཀ །ཕྱོགས་གཞན་དུ་དབུ་རྒྱན། རྡོར་དྲིལ། གསང་ཐོད། རིག་ཙཀ །ཤེལ་རྡོ་མེ་ལོང་། གདུགས་རྒྱལ་མཚན་གླེགས་བམ་རྣམས་དངོས་སམ་ཙཀ་ལི་སོ་སོ་བཞག །སློབ་མ་མཆོད་པ་ཉེར་སྤྱོད་ལྔའང་བསྡོག ༈ །ཞིག་གླིང་འཁོར་བ་ལས་སྒྲོལ་དབང་ཆེན་ལ། ཞི་བའི་ཐབ་དང་སྲེག་རྫས་ཏིལ་ཡུངས། སྟ་གོན་རྫས་བཞི་བསྡོག །དཀྱིལ་འཁོར་རས་བྲིས་དབུས་ཁྲིའུ་ལ་རྣམ་བུམ་ཉེར་ལྔའི་བཅུད་དང་མགུལ་ཆིངས་དཀར་པོ་ཁ་རྒྱན་གཟུངས་རྡོར་ལྡན་པ་བཞག །རྒྱབ་ངོས་སུ་སྒྲུབ་གཏོར་དོན་དབང་གི་སྐབས་སུ་བཤད་པ་ལྟར་རམ་བླ་གཏོར་དམར་པོ་པད་འདབ་ཅན་རྒྱན་ལྡན་བཞག་ཀྱང་འཐུས། བཏགས་གྲོལ་འཁོར་ལོ་དར་སྣས་བཀླུབས་པ་ཁྲིའུ་ལ་བཀོད། མདུན་དུ་སངས་རྒྱས་སྟོང་རྩ། སྤྱན་རས་གཟིགས་ལྔ། ནོར་འཛིན་གསང་འཛིན། སྒྲོལ་མ་སྔོ་དཀར། སེམས་དཔའ་བརྒྱད། སེམས་མ་བརྒྱད། ཐུབ་པ་དྲུག །ཁྲོ་བོ་བཞི་བཅས་ལྷ་ཙཀ་ཚང་བ། དབུ་རྒྱན། ཞི་ཆས། ཕྱག་མཚན་རྣམས་བཀོད། སྨན་རཀ་གཏོར་གསུམ། གཡས་སུ་གསང་དབང་ཐོད་པ་བདུད་རྩིས་བཀང་བའི་ཁར་སིནྡྷུ་རའི་ཐིག་ལེ་ཅན་གྱི་མེ་ལོང་དང་ཤེལ་རྡོ་བཞག །གཡོན་དུ་རྗེས་གནང་ཆས། རྫས་བརྒྱད། རྒྱལ་སྲིད་སོ་སོ་བ། འཁོར་ལོ། །དུང་། པུསྟི། རྡོ་རྗེ། དགང་བླུགས། མཆོད་གཏོར། གདབ་ཕུར། མེ་ལོང་གསལ་བ། ཕྲེང་བ་རིག་ཙཀ་རྣམས་བཞག །རྒྱབ་ངོས་སམ་སྟེགས་བུ་ཟུར་པར་ཐེག་པ་རིམ་དགུའི་དབང་རྫས། ཆོས་གོས་རྣམ་གསུམ་མཁར་གསིལ་ལྷུང་བཟེད། ཐོད་པ་བུམ་རིལ་གདུགས་པུསྟི་དང་བཅས་གསུམ། བུམ་པ། ཕྲེང་བ། རྡོར་དྲིལ་གསུམ། རུས་རྒྱན་གྲི་ཐོད་ཁ་ཊྭཱཾ་ཀ །བྱང་སེམས་དཀར་དམར། མན་ཤེལ་བཅས་གསུམ་སྟེ། གསུམ་ཚན་གསུམ་ཕྱོགས་བཀོད་ལེན་བདེ་བྱ། བཀའ་སྲུང་དྲེགས་པའི་རྗེས་གནང་གི་ཆས་དཀྱིལ་འཁོར་མཐའ་སྐོར་གྱི་ཤར་དུ་ཆོས་འབྱུང་དཀར་པོ་མེ་རིས་བསྐོར་བའི་སྟེང་དུ་དཔལ་ལྷའི་གཏོར་མ་འབྲང་རྒྱས་དཀར་པོ། ལྷོར་སེར་པོའི་སྟེང་དུ་ཤན་པའི་གཏོར་མ་གྲུ་གསུམ་ར་མགོས་མཚན་པ། ནུབ་ཏུ་དམར་པོའི་སྟེང་དུ་སྲིན་པོའི་གཏོར་མ་གྲུ་གསུམ་ར་ཤས་བརྒྱན་པ། བྱང་དུ་ལྗང་གུའི་སྟེང་དུ་མཱ་ར་སྙིང་ཟན་གྱི་གཏོར་མ་གྲུ་གསུམ་ཙིཏྟས་བརྒྱན་པ། བྱང་ཤར་མཐིང་ནག་གི་སྟེང་དུ་གཟའ་གདོང་གཏོར་མ་གྲུ་གསུམ་མིག་གིས་བརྒྱན་པ། ཤར་ལྷོར་ལྗང་གུའི་སྟེང་དུ་ཀླུ་གཏོར་སྦྲུལ་གྱིས་བརྒྱན་པ། ཆོས་འབྱུང་ཐམས་ཅད་མེ་རིས་བསྐོར་བ་འགྲེ །ནུབ་གཡོན་དུ་པདྨ་དཀར་པོ་འདབ་བཞིའི་སྟེང་དུ་ཐང་ལྷའི་གཏོར་མ་གངས་རིའི་གཟུགས་ཅན། འཛོམ་ན་སོ་སོའི་སྐུ་ཙཀ་བཙུགས་པ་བཀོད། ༈ དོན་དབང་ལ། སྟེགས་བུར་གཏོར་མ་རི་རབ་སྟེང་ཟླུམ་བསྐོར། དེ་སྟེང་པདྨ་འདབ་བརྒྱད། དེ་སྟེང་བུམ་པ་པདྨས་བསྐོར་བའི་ཁར་རིན་པོ་ཆེས་བརྒྱན་པ། རི་རབ་མཐའ་སྐོར་པདྨ་ཕྱི་ནང་སྦྲགས་མ་ཡོད་རྒྱན་སྤྲོས་ཅན་བཤམ། མདུན་དུ་ཐོད་ཆང་ཁར་མེ་ལོང་དང་ཤེལ་རྡོ་བཞག ༈ ཡོངས་རྫོགས་གཏད་རྒྱའི་དབང་ལ། དཀྱིལ་འཁོར་དབུས་སུ་མཉྫིའི་ཁར་རྣམ་བུམ། ཁ་རྒྱན་ལ་རབ་གཙོ་འཁོར་ཡོངས་འཛུགས་དང་། མ་འཛོམ་ན་བླ་མ་དང་འཕགས་པའི་སྐུ་ཙཀ་བཞུགས། གཡས་སུ་བླ་མའི་གཏོར་མ་རིན་ཆེན་ཟུར་དྲུག་དང་། འཕགས་པའི་གཏོར་མ་པད་ཕྲེང་བུམ་དབྱིབས། དཔལ་མགོན་གཏོར་མ་དཔལ་གཏོར་ལ་བཤོས་བུ་བརྒྱད་ཀྱིས་བསྐོར་བ་སྐུ་ཙག་གིས་བརྒྱན་པ། གཡོན་དུ་ཐོད་ཆང་དམ་རྫས་སྦྱར་བའི་ཁར་མེ་ལོང་ལ་སིནྡྷུ་རའི་དཀྱིལ་འཁོར་པདྨ་འདབ་བརྒྱད། དབུས་སུ་ཧྲཱིཿམ། མཐའ་སྐོར་དུ་རྩ་སྔགས་དང་དབྱངས་གསལ་གྱིས་བསྐོར་བས་བཀབ་ལ་དར་དམར་གྱིས་གཡོགས་པའི་སྟེང་ཤེལ་རྡོ་བཞག །མདུན་དུ་སྒྲུབ་དཔེ་ཕྲེང་བ་རྡོར་དྲིལ་རྣམས་རིན་པོ་ཆེའི་སྣོད་འབྲུས་གང་བའི་ནང་དུ་བཞག །རྒྱབ་ཏུ་བཀའ་སྲུང་བྱེ་བྲག་པའི་གཏོར་མ་གོང་སྨྲོས་སྐུ་ཙག་གིས་བརྒྱན་པ་རྣམས་སྣོད་གཅིག་ཏུ་བཞག་གོ ༈ །གྲོལ་ཏིག་པདྨའི་དབང་ཕྱུག་ལ། ཚོམ་བུ་གཅིག་གི་ཁར་བུམ་ཐོད་མེ་ལོང་ཤེལ་རྡོ་རྣམས་བརྩེགས། ༈ འཇའ་ཚོན་ངན་སོང་རང་གྲོལ་བཤམ་བཀོད་གོང་གསལ་རྒྱལ་པོ་ལུགས་ཀྱི་རྩ་དབང་དང་འདྲ་བ་ལས་ལྷ་དབང་རྒྱས་པ་བྱེད་ན་ཙཀ་ལི་ཚང་བ་དགོས། ༈ བདུད་འདུལ་ནམ་མཁའ་རྒྱལ་པོ་ལ། སྟ་གོན་རྫས་བཞི། སྔོན་འགྲོ་ཐེག་དགུའི་དབང་ཆས་ཟུར་དུ་བཤམ། དཀྱིལ་འཁོར་དབུས་ཁྲིའུ་ལ་རྣམ་བུམ་བཅུད་ལྡན་མགུལ་ཆིངས་དཀར་པོ་ཁ་རྒྱན་གསེབ་གཙོ་འཁོར་ཡོངས་རྫོགས་སམ་གཙོ་བོའི་སྐུ་ཙམ་བཞུགས། ཤར་དུ་མེ་ལོང་སྟེང་སིནྡྷུ་རའི་རིལ་བུ། ལྷོར་བནྡྷའི་བདུད་རྩི། ནུབ་ཏུ་དབང་གཏོར་རྒྱན་ལྡན། བྱང་དུ་ལས་བུམ་སེང་ཕུར་ཧྲཱིཿདམར་ཁ་རྒྱན་ཅན། དབུས་སུ་ལྷ་ཙཀ་བཅུ་གཅིག །ཤེལ་རྡོ། སྦ་དཀར་ཚིགས་གསུམ། ཤེལ་ཕྲེང་། ཡིག་བཅུ། བཀྲ་ཤིས་རྫས་རྟགས། རྒྱལ་སྲིད་རྣམས་ཀྱང་གང་བདེར་བཞག་གོ ༈ །རྒྱ་ཅན་འཇིག་རྟེན་དབང་ཕྱུག་ལ། དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་སུ་མཉྫིའི་སྟེང་དུ་རྣམ་བུམ་བཅུད་ལྡན་གཟུངས་རྡོར་ལྷ་ཙཀ་གཙོ་འཁོར་དགུ་དང་བཅས་པ། ཤར་དུ་སྨན་གཏོར་རཀྟ། ལྷོར་རིགས་ལྔ་དར་དཔྱངས་དང་བཅས་པ། ནུབ་ཏུ་རྡོ་རྗེ། བྱང་དུ་དྲིལ་བུ། ཤར་ལྷོར་ཆོས་དབྱུག །ལྷོ་ནུབ་ཏུ་རྐང་འོག་གི་འཁོར་ལོ་དང་དུང་། ནུབ་ཏུ་དབང་སྟེགས་གདུགས་དང་བཅས་པ། བྱང་དུ་པུསྟི་དང་རྡོར་དྲིལ། བྱང་ཤར་དུ་གསང་རྫས་ཀྱི་སྣོད་བདུད་རྩིའི་ཐོད་པ་བཅས་བཤམ་མོ། ༈ །གནམ་ཆོས་རྒྱལ་རྒྱམ་ལྷ་ལྔ་ལ། ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། རྒྱབ་ཏུ་དཔལ་གཏོར། གཡས་གཡོན་དུ་ཤེལ་ཕྲེང་དང་རྡོ་རྗེ། ཙཀ་ལི་ཕྲེང་བ་དང་པད་དམར། ཕྲེང་བ་མེ་ཏོག་ནོར་བུ་པད་དམར་རལ་གྲི་ཕྱོགས་བསྡུས་བཅས་བཀོད། ༈ གར་དབང་ཟླ་རྒྱལ་གྱི་རྩ་གསུམ་སྙིང་ཐིག་ལ། དཀྱིལ་འཁོར་རས་བྲིས་སམ་མཎྜལ་ལ་མེ་ཏོག་གི་ཚོམ་བུ་གཙོ་འཁོར་ལྔ་བཀོད་པའི་དབུས་སུ་མཉྫིའི་ཁར་རྣམ་རྒྱལ་བུམ་པ་སོ་ལྔའི་བཅུད་ལྡན་མགུལ་ཆིངས་དམར་པོ་ཁ་རྒྱན་གཟུངས་ཐག་དང་བཅས་པ། མདུན་དུ་གུ་རུའི་སྐུ་ཙཀ་དང་དབུ་རྒྱན། གཡས་སུ་རྟ་མགྲིན་སྐུ་དང་ཕུར་པ། གཡོན་དུ་གསང་ཡེའི་སྐུ་དང་ཐོད་ཆང་། རྒྱབ་ཏུ་གཏོར་མ་ཟུར་གསུམ་གྲི་གུག་དང་རལ་གྲི །མཚམས་སོགས་སུ་ཡིག་དྲུག་སོ་སོར་བྲིས་པའི་ཙཀ་ལི། ཤེར་དབང་ཆས་བུམ་པར་ཆང་དང་བུར་སྦྲང་སྦྱར་བ། སྣོད་གཅིག་ཏུ་ཐོད་པར་བུར་ཆང་སྦྱར་བ་དང་འོ་མ་མེ་ལོང་བཅས། སྣོད་གཅིག་ཏུ་མེ་ལོང་དཀར་མངར་སྐྱུར་དང་ཁྲག་རྣམས་སྣོད་ཆུང་སོ་སོར་བླུགས་པ། ཚིག་དབང་ཆས་ཐོད་ཆང་མེ་ལོང་ཤེལ་རྡོ་སྒྲོ་མདོངས་རྣམས་བཀོད། ༈ ཚེ་དབང་ལ། རྣམ་བུམ་སྔ་མས་འཐུས། དེ་སྟེང་ཁྲིའུ་ལ་ཚེ་འབྲང་བླ་མའི་སྐུ་ཙཀ་གིས་བརྒྱན་པ། གཡས་སུ་བྱེ་རུའི་སྡོང་པོ་གསེར་གཡུ་བཅས། མ་འཛོམ་ན་བྲིས་པའི་ཙཀ་ལི། གཡོན་དུ་མདའ་དར། རྒྱབ་ཏུ་དཔལ་གཏོར། མདུན་དུ་ཚེ་ཆང་བཅས་བཤམ། ༈ སྨིན་གླིང་བདེ་གཤེགས་ཀུན་འདུས་ལ། སྟ་གོན་རྫས་བཞི་སློབ་མ་མཆོད་པ་ཉེར་སྤྱོད་བཞི། རས་བྲིས་དབུས་སུ་རྣམ་བུམ། རིག་དབང་ཆས་བཞི། ལྷ་ཙཀ །སྔགས་བྱང་། ཕྲེང་དམར། མདུན་དུ་ཐོད་ཆང་། ལི་ཁྲི་མེ་ལོང་ཆོས་འབྱུང་གཉིས་བརྩེགས་ལྟེ་བར་ཧྲཱིཿམཐར་སྔགས་ཕྲེང་ཟུར་དྲུག་དགའ་འཁྱིལ་དང་བཅས་པའི་ཁར་ཤེལ་རྡོ་བཞག་པ་དར་དམར་གྱིས་བཀབ། རྒྱབ་ཏུ་གཏོར་མ་བང་རིམ་བཞི་སྟེང་དཔལ་གཏོར་པད་འདབ་བཞི་པ་མཚམས་བཞིར་མཐེབ་རིལ་ལྔ་བརྩེག་ཅན་རྒྱན་སྤྲོས་སྐུ་ཙཀ་དར་གདུགས་ཅན། བཀའ་སྲུང་གཏོར་མ་དཀར་དམར་བཅས་བཤམ། ༈ ནང་སྒྲུབ་གར་ཚེ་ལ། རས་བྲིས་དབུས་རྣམ་བུམ་ཁར་ཐོད་ཆང་དར་དམར་གྱིས་བཀབ་པའི་སྟེང་མེ་ལོང་གཟུངས་རྡོར་བཞག །ཚེ་རིལ་ཆང་མདའ་དར་བཅས། ༈ ཀློང་གསལ་ཡང་གསང་བླ་མེད་ལ། སྟ་གོན་རྫས་བཞི། དཀྱིལ་འཁོར་སྟེང་རྣམ་བུམ་ཆིངས་དམར། རྒྱབ་ཏུ་དབང་གཏོར། མདུན་སོགས་སུ་ལྷ་ཙཀ་ཚང་བ། དབུ་རྒྱན། རྡོར་དྲིལ། གསང་ཐོད། རིག་ཙཀ །མེ་ལོང་ཤེལ་རྡོ། མཐའ་རྟེན་བཅས་བཀོད། ༈ སྟག་ཤམ་མི་ཏྲ་སྙིང་ཐིག་ལ། སྟ་གོན་རྫས་སོ་ཤིང་སྲུང་སྐུད་དམར་པོ་ཀུ་ཤ །དཀྱིལ་འཁོར་རས་བྲིས་སམ་ལྷ་གྲངས་ཀྱི་འབྲུ་ཚོམ་བཀོད་པའི་དབུས་སུ་ཁྲིའུར་རྣམ་བུམ་མགུལ་ཆིངས་དཀར་པོ་ཉེར་ལྔའི་རྫས་ལྡན་འབྲས་བུ་ཅན་གྱི་ཤིང་གིས་ཁ་བརྒྱན་པའི་གསེབ། པད་དཀར་གྱིས་མཚན་པ། མདུན་ངོས་སུ་ལྷ་ཙཀ་གཙོ་འཁོར་བཅུ་དྲུག །གཡས་སུ་ཡིག་དྲུག་གསེར་བྲིས་ཀྱི་སྔགས་བྱང་། གཡོན་དུ་ཤེལ་ཕྲེང་དང་པད་དཀར། རྒྱབ་ཏུ་རིགས་ལྔའི་སྐུ་དང་ས་བོན་སོ་སོར་ཕྲལ་བ། རིགས་ལྔའི་ས་བོན་ཕྱོགས་བསྡུས་འཇའ་འོད་ཀྱིས་བསྐོར་བ་དང་ཤེལ་རྡོ་རྨ་བྱའི་སྒྲོ །བར་མཚམས་སོགས་གང་བདེར་གླེགས་བམ། བཟླས་ཕྲེང་། ཕྱི་ནང་གི་མཆོད་པ་རྣམས་སྣོད་གཅིག །མཆོད་རྫས། བུམ་ཙཀ །དགང་བླུགས། རྟགས་བརྒྱད། རྒྱལ་སྲིད། ཁྲི་བེར་དབང་ཞྭ་རྣམས་ཕྱོགས་བསྡུས་ཙཀ་ལི། དུང་། རྡོར་དྲིལ་རྣམས་ལྷན་ཅིག་བཀོད། ༈ ཆོས་གླིང་ཡིད་བཞིན་འོད་མཆོག་སའི་སྙིང་པོ་ལ། སྟ་གོན་རྫས་བཞི་མཆོད་པ་རྣམ་ལྔ། རས་བྲིས་དབུས་རྣམ་བུམ་ཁར་ཐོད་ཆང་དང་སིནྡྷུ་རའི་མེ་ལོང་པདྨ་འདབ་བཞིའི་ལྟེ་བར་ཧྲཱིཿམ། འདབ་བཞིར་ར་ཧ། ཙ་རི། ཧྲི་ནི། ཡ་ས་བྲིས་པ་བརྩེགས་ལ་དར་དཀར་དམར་གྱིས་བཀབ། ཤར་དུ་མེ་ཏོག་ཕྲེང་བ་དང་ལྷ་ཙཀ་རྣམས། ལྷོར་དབུ་རྒྱན། ནུབ་ཏུ་རྡོར་དྲིལ་དང་རིག་ཙཀ །བྱང་དུ་གཏོར་མ་ཞིང་བཀོད་མ། མཚམས་སུ་ཡིག་བཅུའི་སྔགས་བྱང་ཕྲེང་བ། དུང་པུསྟི་སོགས་བཞག ༈ །གཏེར་གསར་པདྨ་སྒྱུ་འཕྲུལ་དྲྭ་བའི་དབང་བཞི་རྡོ་རྗེ་སྤྱི་བླུགས་ལ། རས་བྲིས་དབུས་རྣམ་བུམ། གཡས་སུ་དཔལ་གཏོར། གཡོན་དུ་ཐོད་ཆང་རིག་ཙཀ་ཤེལ་རྡོ་རྨ་བྱའི་མདོངས་བཅས། ༈ ཕྱིའི་སྨིན་བྱེད་ལ། པདྨ་འདབ་བརྒྱད་དབུས་བུམ་པ་ཉེར་ལྔའི་རྫས་ལྡན་ཁ་རྒྱན་གསེབ་ཕྱི་སྒྲུབ་ཀྱི་སྐུ་ཙཀ་དང་མཐོང་གྲོལ་འཁོར་ལོས་བརྒྱན། ཕྱོགས་བཞིར་སྤོས། མེ་ཏོག །མར་མེ། དྲི་ཆབ་སྟེ་བཞི་བསྣོལ་བཤམ། ༈ ནང་གི་སྨིན་བྱེད་ལ་ལྔ་ཚོམ་དབུས་བུམ་པ་སོ་ལྔའི་རྫས་ལྡན་ཁ་རྒྱན་ནང་སྒྲུབ་ཀྱི་སྐུ་སོགས་སྔ་མ་དང་འདྲ། ༈ གཙུག་ཏོར་དྲི་མེད་ལ། རས་བྲིས་སམ་ལྔ་ཚོམ་སྟེང་རྣམ་བུམ། ཕྱོགས་བཞིར་རིག་དབང་ཆས་དང་། ཁྲི་གདུགས་པུསྟི། རྫས་བརྒྱད་རྟགས་བརྒྱད་སོགས་ཕྱོགས་བསྡུས་བཅས། ༈ ཡིད་བཞིན་འཁོར་ལོ་ལ། འདབ་བརྒྱད་དམ་ལྔ་ཚོམ་དབུས་རྣམ་བུམ། སྐུ་ཙཀ་ལྔ། སྔགས་བྱང་རྣམས་དང་ཤེལ་ཕྲེང་། ཕྱག་མཚན་ལྔ་མེ་ལོང་བཅས། ༈ དེའི་བུམ་ལྔའི་དབང་ལ། དབུས་དང་ཕྱོགས་བཞིར་མཎྜལ་ཚོམ་བུ་གཅིག་པའམ་པདྨ་འདབ་བཞི་རེ་རེ་བཀོད་པའི་སྟེང་དུ་དབུས་སུ་ཆོས་བུམ། ཤར་དུ་མཐུན་བུམ། ལྷོར་སྨན་བུམ། ནུབ་ཏུ་ཚེ་བུམ། བྱང་དུ་ནོར་བུམ་རྣམས་གཞུང་གསལ་བཅུད་དང་སྦྱར་བའི་ཚད་ལྡན། སྐུ་ཙཀ་སྔགས་བྱང་། མེ་ལོང་། སོ་སོའི་མདུན་འབུལ་གཏོར་བཅས། ༈ དཔལ་མོ་ལུགས་བཅུ་གཅིག་ཞལ་གྱི་རྗེས་གནང་ལ་། མཎྜལ་བ་བྱུང་དང་དྲིས་བྱུགས་པར་ཚོམ་བུ་གཅིག་བཀོད་པའི་ཁར་བུམ་པ་འཇོག་གོ། ༈ །།དྲག་པོ་རྟ་མགྲིན་གྱི་སྐོར་ལས། རྟ་མགྲིན་ཡང་གསང་ཁྲོས་པའི་དབང་ཆེན་ལ། དཀྱིལ་འཁོར་རས་བྲིས་མེད་ན་མཎྜལ་ཁྲག་དང་བདུད་རྩི་བྱུགས་པ་ལ་ཚོམ་བུ་གཙོ་འཁོར་དགུ་བཀོད་པའི་སྟེང་ཁྲིའུར་རྣམ་བུམ་ཆས་ལྡན། མདུན་ཕྱོགས་སུ་གུ་རུ་རིན་པོ་ཆེ་དང་ལྷ་དགུའི་ཙཀ་ལི། ཞུན་ཆེན་མར་མེ་འབྲི་མོག་གིས་ཁ་བསྒྱུར་བ། དཔལ་གཏོར་སྙིང་གཟུགས་གཙོ་འཁོར་དགུ་པ་སྐུ་ཙག་དར་གདུགས་སོགས་ཀྱིས་བརྒྱན་པའི་གཡས་གཡོན་སྨན་རཀ །རྒྱབ་ཏུ་མངར་གསུམ་སྦྱར་བའི་མཆོད་ཡོན། ཐལ་ཞག་རཀྟ། ཞིང་གླང་སྟག་ཤམ་ཐོད་སྦྲུལ་རྣམས་སོ་སོ་བ། གསང་ཐོད་རིག་ཙཀ །མེ་ལོང་རྣམས་དང་། ཚེ་དབང་ལ་རྒྱབ་ངོས་འདབ་བརྒྱད་དབུས་བུམ་པ་སྙིང་པོ་ལྔ་དང་ཆང་གིས་བཀང་བའི་ཁར་ཚེ་འབྲང་སྒོང་གཟུགས་སྟོད་དཀར་སྨད་དམར་རྒྱ་གྲམ་གཡུང་དྲུང་གིས་བཀབ་ཅིང་རྡོ་རྗེ་ཕྱེད་པའི་ཏོག་ཅན་གྱི་མཐར་ཚེ་རིལ་གྱིས་བསྐོར་བ་དང་། ཚེ་མདའ་བཀོད། བཀའ་སྲུང་བཀའ་གཏད་བྱེད་ན་དེའི་གཏོར་མ་དབང་བསྒྲིགས་སུ་གསལ་བ་ལྟར་བཀོད། ལི་ཁྲིའམ་སིནྡྷུ་རའང་བསྡོག ༈ །དེའི་གཏོར་དབང་ལ། མཉྫིའི་སྟེང་དཔལ་གཏོར་པད་འདབ་བཞི་པ་མཚམས་མཐེབ་རིལ་དང་རྟ་མགོས་མཚན་པ་སྐུ་རྟེན་དར་གདུགས་བཅས་བཀོད། ༈ རྟ་མགྲིན་གསང་སྒྲུབ་ལ། རས་བྲིས་སམ་ཚོམ་བུ་དམར་པོ་གཅིག་གི་སྟེང་དཔལ་གཏོར་རྟ་དབུ་ཅན་སྔ་མ་ལྟར་བཀོད། ༈ ཉང་གཏེར་བདེ་གཤེགས་ཆིག་དྲིལ་ལ། རས་བྲིས་སམ་ཚོམ་བུ་དམར་པོ་གཅིག་བཀོད་པའི་སྟེང་སེང་ལྡེང་ཕུར་པ་ཅོད་པན་དམར་པོ་ཅན་ཕུར་སྟེགས་ལ་གཟུག །གཡས་སུ་བུམ་པ་རྩ་སྔགས་བཟླས་པའི་ཉུངས་ཀར་བླུགས་པ། གཡོན་དུ་དཔལ་གཏོར་རྟ་ཞལ་དར་གདུགས་དམར་པོ་ཅན། རྟ་མགོ །དུར་ཁྲོད་ཆས་བརྒྱད། སྔགས་བྱང་། གཞུང་པོད། ཕྲེང་དམར་བཅས། ༈ གྲུ་གུ་ཡང་དབང་རྟ་མགྲིན་དྲེགས་པ་ཀུན་སྒྲོལ་ལ། དཀྱིལ་འཁོར་སྟེང་ཕུར་བུ་རྟ་ཞལ་ཅན་ཡུངས་དཀར་དང་ཅོད་པན་གདགས་པ་ཕུར་སྟེགས་ལ་གཟུག །དེ་སྟེང་འཕྲུལ་སྟེགས་ལ་བུམ་པ་ཆིངས་དམར་ཁ་རྒྱན་ལ་གཙོ་བོ་ཡབ་ཡུམ་དང་ཁྱུང་ཙཀ་བཅས་པ། དེ་སྟེང་ཐོད་པའི་བདུད་རྩི་དར་དམར་གྱི་ཁེབས་ལྡན། མདུན་སོགས་སུ་ལྷ་ཙཀ་ཆ་ཚང་། རིགས་ལྔའི་དབུ་རྒྱན། རིག་ཙཀ །བུདྡྷ་ཧེ་རུ་ཀ །འབྲུ་གསུམ་དཀར་དམར་མཐིང་གསུམ། མེ་ལོང་། ཤེལ་རྡོ་མེ་ཕུང་། དུར་ཁྲོད་ཆས་སོ་སོ་བ། རྫས་རྒོད་དོང་བུ། རྡོར་དྲིལ། ཐོད་རྔ། རྐང་གླིང་། སྨན་རག་གཏོར་གསུམ། གཞུང་པོད་བཅས། ༈ དྲེགས་པ་བཅོ་བརྒྱད་རྗེས་གནང་ལ། དཀྱིལ་འཁོར་དབུས་སུ་སྟེགས་བུར་དཔལ་ཆེན་པོའི་སྐུ་དང་བུམ་པ། ཤར་དུ་དཔལ་གཏོར། ལྷོར་རྭ་སྲུང་། ནུབ་ཏུ་མཐིང་ཤོག་ལ་སྔགས་བྱང་ལི་ཁྲིས་བྲིས་པ། བྱང་དུ་ཕུར་པ་ཁྲོ་ཞལ་ཅན། རིགས་ལྔའི་དབུ་རྒྱན་དང་མེ་ཏོག་ཕྲེང་བ། དྲེགས་པ་བཅོ་བརྒྱད་ཀྱི་སྐུ་ཙཀ །གཏོར་ཆུང་ཟུར་གསུམ་དེ་གྲངས། དྲེགས་པའི་གཏོར་ཆེན་ཀྱང་གཞི་མདུན་བཀོད། ༈ བྱང་གཏེར་དྲེགས་པ་དབང་སྡུད་ལ། རས་བྲིས་སམ་ཚོམ་བུ་དམར་པོ་གཅིག་བཀོད་པའི་ཁར་དཔལ་གཏོར་སྐུ་རྟེན་དར་གདུགས་དམར་པོ་ཅན་བཀོད་པའི་ཤར་དུ་རྣམ་བུམ། ལྷོར་གསང་ཐོད། ནུབ་ཏུ་མེ་ལོང་། བྱང་དུ་ཐང་ལྷའི་གཏོར་འབུལ་བཤམ། ༈ རྟ་མགྲིན་གསང་བ་འདུས་པའི་དབང་ཆེན་ལ། སྟ་གོན་རྫས་བཞི། རས་བྲིས་སུ་རྣམ་བུམ། གཡས་སུ་དཔལ་གཏོར་རྟ་ཞལ་ཅན་དང་དབུ་རྒྱན། མདུན་དུ་ཕུར་པ་རྟ་ཞལ་ཅན་དང་དར་གྱི་ཅོད་པན། རྒྱབ་ཏུ་གསང་ཐོད་སིནྡྷུ་རའི་མེ་ལོང་ཆོས་འབྱུང་མ་ཧ་རི་ནི་ས་ལྔ་ཚོམ་དུ་བཀོད་པ་ལ་དར་དམར་གྱིས་བཀབ་པ་དང་རིག་ཙཀ །གཡོན་དུ་ཚེ་བུམ་ཟས་སྣ་གདབ་ཕུར། མཚམས་སུ་ཐོད་པ་ཚར་གསུམ། ཐལ་རཀ་ཞག་གསུམ། གླང་ཞིང་སྟག་ལྤགས། སྦྲུལ་ཆུན། གྲི་ཐོད། རལ་གྲི་ཁ་ཊྭཱཾ། དྲིལ་བུ་ལྕགས་སྒྲོག་གཟིག་ཤམ། རུས་རྒྱན། ཕྲེང་དམར་རྣམས་དང་། ཧོམ་ཁུང་ཉའོ་རྣམས་འདུ་བྱ། ༈ དེའི་གཏོར་དབང་ལ། ལྷ་གྲངས་ཚོམ་བུར་ཁྲིའུ་ལ་རི་རབ་སྟེང་ཟླུམ་པོ་པད་བསྐོར་ཅན། དེ་སྟེང་དཔལ་གཏོར་ངོས་གསུམ་རིན་པོ་ཆེ་དང་ཟུར་གསུམ་པདྨས་མཚན་ཅིང་། པད་འདབ་བརྒྱད་པ་ལ་སྐུ་ཙཀ་དར་གདུགས་ཀྱིས་བརྒྱན་པའི་གཡས་གཡོན་དུ་སྒྲུབ་ཡིག །ཐོད་ཆང་། ཕྱག་མཚན་གོང་གསལ། སིནྡྷུ་ར་དང་བཅས་པ་བཀོད། ༈ མངའ་བདག་མོལ་མི་འཁྱིལ་གྱི་རྟ་མགྲིན་དཔའ་གཅིག་ལ། མཎྜལ་ཚོམ་བུ་དམར་པོ་གཅིག་གི་སྟེང་སེང་ལྡེང་དབྱུག་ཏོ་ཐོད་སྐམ་རྡོ་རྗེས་མཚན་པ་གཟུངས་ལྡན། གཡས་གཡོན་དུ་མེ་ཞགས་དང་མེ་ལོང་། དཔལ་འབར་དམར་པོ་རྩེ་གསུམ་ཅན་བཅས། ༈ རྟ་མགྲིན་སྙིང་པོ་དོན་སྦྱོར་དབང་ཆེན་ལ། སྟ་གོན་རྫས་བཞི། དཀྱིལ་འཁོར་རས་བྲིས་སྟེང་རྣམ་བུམ། དབུ་རྒྱན། རྡོར་དྲིལ། མིང་དབང་། ལྷ་ཙཀ་ཚང་བ། སྔགས་བྱང་། ཕྲེང་དམར། གསང་ཐོད། རིག་ཙཀ །ཤེལ་རྡོ་མེ་ལོང་རྣམས་སྤྱི་ལྟར་བཀོད། ༈ སྙིང་པོ་དོན་སྦྱོར་གཏོར་དབང་ལ། རས་བྲིས་སམ་ཚོམ་བུ་དམར་པོ་ལྷ་གྲངས་སྟེང་དབང་གཞུང་གསལ་ལྟར་རམ་དཔལ་གཏོར་རྟ་ཞལ་ཅན་སྐུ་ཙཀ་དར་གདུགས་རྒྱན་ཅན་ཟས་སྣས་བསྐོར་བ་བཤམ། ༈ གྲོལ་ཏིག་དྲེགས་པ་ཀུན་འདུལ་བསྙེན་དབང་ལ། ཚོམ་བུ་དམར་པོ་གཅིག་གི་སྟེང་རྣམ་བུམ། རྒྱབ་ཏུ་དཔལ་གཏོར་སྐུ་རྟེན་བཅས། མདུན་དུ་ཕུར་བུ། བགྲང་ཕྲེང་། ཅོད་པན་གདབ་ཕུར་ལིངྒ་བཅས། ༈ གསང་བ་གཅིག་གྲུབ་ལ། ཚོམ་བུའི་སྟེང་བུམ་ཐོད་མེ་ལོང་སུམ་བརྩེགས། དཔལ་གཏོར་གང་བདེར་བཞག ༈ །རྟ་ཕག་ཡིད་བཞིན་ནོར་བུ་ལ། རས་བྲིས་སམ་ཚོམ་བུ་དམར་པོ་ལྔ་ཚོམ་སྟེང་རྣམ་བུམ། མདུན་དུ་གསང་ཐོད་དར་དམར་བཀབ་པ། གཡས་སུ་རྡོར་དྲིལ་བགྲང་ཕྲེང་། རྒྱབ་ཏུ་དཔལ་གཏོར། གཡོན་དུ་ཌཱ་རུ་ཐོད་ཁྲག་བཅས། ༈ གནམ་ཆོས་རྟ་མགྲིན་བར་ཆད་ཀུན་སེལ་ལ། མཎྜལ་ཚོམ་བུ་གཅིག་སྟེང་བུམ་པ་སོགས་གཟུངས་དབང་ཆས་བཤམ། ༈ ཡི་དམ་དགོངས་འདུས་རྩ་བའི་དབང་ཆོག་ལ། སྟ་གོན་རྫས་མཆོད་པ་བཅས། རས་བྲིས་དབུས་སུ་རྣམ་བུམ། རིག་པའི་དབང་ཆས་བཞི། ལྷ་ཙཀ་ཚང་བ། སྔགས་བྱང་། ཕྱག་མཚན་རིགས་རྟགས་ལྔ་ཕྱག་རྒྱ་བཞི་བྷན་ཕུར་ཁ་ཊྭཱཾ་བཾ་དབྱུག་ཁྱུང་ཁྲ་ཅང་ཏེའུ་རྣམས། དུར་ཁྲོད་ཆས་བརྒྱད་དར་དཔྱངས་བཅས་ཕྱོགས་བསྡུས། གླེགས་བམ་དུང་རྡོར་དྲིལ་ཕྲེང་བ་བུམ་པ་གཏོར་མཆོད་སོགས། རྒྱབ་ཏུ་གསང་ཐོད་དར་གྱིས་བཀབ་པ་དང་རིག་ཙཀ །གཡས་སུ་བཏགས་གྲོལ་གླེགས་བམ་དར་གྱིས་དྲིལ་བ། གཡོན་དུ་ཤེལ་རྡོ་མེ་ལོང་། རྨ་བྱའི་མདོངས། མདུན་དུ་སྲུང་མའི་གཏོར་མ་དར་གདུགས་ཅན། ཌཱ་རུ་རྐང་གླིང་རྣམས་བཀོད། ༈ རྩ་གསུམ་སྤྱིའི་རྗེས་གནང་ལ། ཚོམ་བུ་གཅིག་པའམ་ལྷ་གྲངས་སྟེང་རྣམ་བུམ། མདུན་དུ་ཞི་དྲག་གང་བྱེད་ཀྱི་དབང་གཏོར། གཙོ་བོའི་སྐུ་ཙཀ་དང་ཕྱག་མཚན། གཡས་སུ་ཞི་དྲག་གང་ཡིན་རྒྱན་ཆས། རྒྱབ་ཏུ་དབང་ཕྲེང་དང་སྔགས་བྱང་། གཡོན་དུ་ཕྲིན་ལས་བཞིའི་ཙཀ་ལི་རྣམས་བཞག་གོ ༈ །གཏེར་གསར་ཟབ་བདུན་རྟ་མགྲིན་ཡང་ཕྱུང་དམར་པོ་ལ། རས་བྲིས་སྟེང་བུམ་ཐོད་སིནྡྷུ་རའི་དཀྱིལ་འཁོར་ཤེལ་རྡོ་རྣམས་བརྩེགས། ༈ གཏེར་གསར་ཟབ་བདུན་དབང་ཟབ་རྟ་མགྲིན་ལ། རས་བྲིས་དབུས་རྣམ་བུམ། གཡས་གཡོན་དུ་ཅོད་པན་རྡོར་དྲིལ། དར་དཔྱངས་དཀར་དམར་སྦྲེལ་བ། སློབ་དཔོན་མངའ་གསོལ་ཆས། གསང་ཐོད། རིག་ཙཀ །ཤེལ་རྡོ་བཅས་བཀོད། ༈ དེའི་གཏོར་དབང་ལ། དཔལ་གཏོར་རྒྱན་ལྡན། སྐུ་རྟེན་དར་གདུགས་བཅས་བཀོད་དོ།། ༈ །།ཤིན་ཏུ་དྲག་པོར་ཁྲོས་པ་ལས་ཀྱི་ལྷ་རྟ་མགྲིན་ནག་པོའི་སྐོར་ལས། བྱང་སེམས་ཟླ་རྒྱལ་ལུགས་ཀྱི་རྟ་ནག་རྗེས་གནང་ལ། མཎྜལ་ཚོམ་བུ་གཅིག་པའི་སྟེང་དུ་དཔལ་གཏོར་དར་གདུགས་མཐིང་ནག་ཅན། མདུན་སོགས་སུ་སྐུ་ཙཀ །གཞུང་པོད། རྡོ་རྗེ། སེང་ལྡེང་ཕུར་བུ་རྣམས་བཤམ། ༈ ཉང་གཏེར་རྟ་མགྲིན་ཡང་ཕྱུང་ནག་པོ་ལ། མཎྜལ་གྲུ་གསུམ་མེ་རི་ཚོམ་བུ་ནག་པོ་ཅན་གྱི་སྟེང་དུ་བུམ་པ་དང་དཔལ་གཏོར་ནག་པོ་རྟ་ཞལ་ཅན་བརྩེགས་ཏེ་བཞག །དར་ནག་སྐུ་སྔགས་བྱང་དང་རཀྴའི་ཕྲེང་བ། རལ་གྲི་ལྕགས་ཀྱུ། དུར་ཁྲོད་ཆས། ཕུར་བུ་རྣམས་བཀོད། ༈ དེའི་གཏོར་དབང་ལ། མཎྜལ་གོང་སྨོས་སྟེང་གཏོར་མ་གོང་ལྟར་སྐུ་རྟེན་བཙུགས་པ་བཀོད། ༈ ཆོས་དབང་རྟ་ནག་ལ། མཎྜལ་དབང་གཏོར་སྐུ་རྟེན་སྔ་མ་ལྟར་ལ། གཡས་གཡོན་དུ་སྔགས་བྱང་དང་ཕུར་པ་སྒྲུབ་ཡིག་བཅས། ༈ རཏྣའི་རྟ་ནག་ལ། རས་བྲིས་སམ་འབྲུ་ནག་ལྔ་ཚོམ་ཁར་བུམ་གཏོར་སྔ་མ་ལྟར། སྐུ་གཟུགས། སྔགས་བྱང་། རལ་གྲི་ལྕགས་ཀྱུ་ཞགས་པ། གླང་ཞིང་སྟག་ཤམ་ཐོད་སྦྲུལ་སོ་སོ་བ་བཀོད། ༈ ཞིག་གླིང་ཡང་གསང་ཐུགས་སྒྲུབ་ལ། རས་བྲིས་དབུས་རྣམ་བུམ། རྒྱབ་ཏུ་དཔལ་གཏོར་རྟ་ཞལ་ཅན། གཡས་གཡོན་དུ་དཔལ་དང་དུར་ཁྲོད་ཆས་ཕྱོགས་བསྡུས། རཀྴའི་ཕྲེང་བ། རྟ་ཞལ། དབུ་རྒྱན། རལ་གྲི །ལྕགས་ཀྱུ། རྡོར་དྲིལ། དར་ནག་བེར། སྣང་བ་མཐའ་ཡས་སྐུ། ཅོད་པན། ཐོད་ཆང་ཁར་སིནྡྷུ་རའི་མེ་ལོང་ལ་ཆོས་འབྱུང་ཧྲཱིཿས་མཚན་གྱིས་བཀབ་པ་བཅས་སོ།། ༈ །།དེ་ནས་ཡང་དག་ཐུགས་ཀྱི་སྒྲུབ་པའི་ཞི་བ་རྡོར་སེམས་ཀྱི་སྐོར་ལས། རོལ་རྡོར་རིགས་འདུས་རྡོར་སེམས་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ་སྐུ་ཙཀ་གིས་བརྒྱན་པ། གཡས་སུ་ཐོད་ཆང་དང་བགྲང་ཕྲེང་། གཡོན་དུ་མེ་ལོང་ལ་སིནྡྷུ་རའི་ཐིག་ལེ་བྱས་པ་དང་ཤེལ་རྡོ། མདུན་དུ་རིགས་ལྔའི་ཕྱག་མཚན་བཅས། ༈ གཏེར་གསར་རྡོར་སེམས་ཐུགས་ཀྱི་སྙིང་པོ་ལ། རས་བྲིས་སམ་ཚོམ་བུ་ལྔ་པའི་དབུས་སུ་རྣམ་བུམ་དང་སྐུ་ཙཀ །རིག་པའི་དབང་ཆས་བཞི། ཤེལ་ཕྲེང་། རྡོ་རྗེ་གསང་ཐོད། རིག་ཙཀ །ཤེལ་རྡོ་བཅས། ༈ གསང་ཐིག་ཕྱག་རྒྱ་གཅིག་པ་ལ། པདྨ་འདབ་བརྒྱད་སྟེང་བུམ་པ་རྫས་ལྡན་བཞག ༈ །ཁྲོ་བོ་བཛྲ་ཧེ་རུ་ཀ་ལ། ཆོས་དབང་ཡང་དག་སྙིང་པོ་ལ། རས་བྲིས་སམ་དགུ་ཚོམ་ཁར་ཐོད་སྐུ་མར་མེར་སྔ་ལྟར། ཐོད་པར་བདུད་རྩི་བཅས། ༈ བྱང་གླིང་ཞི་ཁྲོ་ཕུར་གསུམ་ལ། སྟ་གོན་རྫས་བཞི། མཆོད་པ་བཞི་བསྣོལ། དཀྱིལ་འཁོར་རམ་ཚོམ་བུ་དབུས་དང་མདུན་དུ་ཆེ་ཆུང་གཉིས་བཀོད་པའི་སྟེང་མཉྫིའི་ཁར་འབྲུ་སྣོད་དུ་ཡང་དག་ཐོད་སྐུ། དེའི་གཡས་གཡོན་དུ་རུ་ལུའི་སྔགས་བྱང་། མར་མེ་རྣམས་བཀོད། དེ་སྟེང་འཕྲུལ་སྟེགས་ལ་རྣམ་བུམ་སོ་ལྔའི་བཅུད་ལྡན་ཆིངས་སྔོན་ཁ་རྒྱན་བཅས། མཐའ་སྐོར་དུ། ཞི་བའི་ཕན་དབང་ཆས་ལ། ཀུན་བཟང་ཡབ་ཡུམ། ཞི་ལྷ་ཚང་བའམ་རིགས་ལྔ་ཡབ་ཡུམ། དཔའ་བོ་འབྲུ་ལྔ། དབུ་རྒྱན། རྣམ་བུམ། རིན་ཆེན་ཕྲེང་བ། དར་དམར་མཐིང་གི་ཅོད་པན། རྡོ་རྗེའི་གོ་ཁྲབ་རྒྱལ་མཚན། གདུགས། བཟའ་བཅའ་བཏུང་བ་རྣམས་དང་། ནུས་དབང་ཆས་གླེགས་བམ། ཕྲེང་བ། རྒྱ་གྲམ། དུང་ཕྱག་ཤིང་། འཁོར་ལོ། རིགས་ལྔའི་ཕྱག་མཚན་ཕྱོགས་བསྡུས། ཁྲོ་དབང་ཆས་ཐོད་སྐམ་དབུ་རྒྱན། རྡོར་དྲིལ། ཁ་ཊྭཱཾ་རྔེའུ་ཆུང་། ཐོད་ཁྲག །རྒྱུ་ཞགས། ཁྱུང་། ཁྲག་ཞག་ཐལ་གསུམ། ཐོད་པ་ཚར་གསུམ། སྦྲུལ་ཆུན། གླང་ཞིང་སྟག་ལྤགས། རྡོ་རྗེའི་གཤོག་པ། རལ་མཐིང་། མེ་ཕུང་། ཁྲག་འཐུང་རིགས་ལྔ། ཐོད་པ་བདུད་རྩི་ལྔས་བཀང་བ། མདུན་དུ་སྲས་མཆོག་ཕུར་བུ། ཉུངས་གུལ་རཀྟ། ཕྲེང་བ་དང་འདོད་ཡོན་ལྔ། ལྕགས་ཀྱུ་ཞགས་པ་རལ་གྲི་མནན་སྲེག་འཕང་གསུམ་ཆས། རིགས་ལྔའི་ཕྱག་མཚན་དྲིལ་བུ་བཅས་ཕྱོགས་བསྡུས། རྒྱབ་སོགས་སུ་གསང་ཐོད། རིག་ཙཀ་མགོན་པོ་དང་ལྷ་མོའི་གཏོར་མ་དར་གདུགས་མཐིང་ནག་ཅན་བཀོད། ༈ དེའི་ཆ་ལག་ཚེ་སྒྲུབ་སྨན་མར་གྱི་དབང་ལ། དཀྱིལ་འཁོར་ཅི་རིགས་དབུས་བུམ་པའི་ཁར་ཐོད་པ་བཅུད་ལེན་སྨན་མར་རིལ་བུས་བཀང་བ་ཁ་རྡོ་རྗེ་རྒྱ་གྲམ་གྱིས་བཅད་པ་བཞག་གོ ༈ །ཆོས་གླིང་ཡང་དག་བདེ་ཆེན་སྙིང་པོ་ལ། རས་བྲིས་སམ་དགུ་ཚོམ་ཁར་རྣམ་བུམ། རིག་པའི་དབང་ཆས་བཞི། གསང་ཐོད་རིག་ཙཀ་ཤེལ་རྡོ་རྣམས་བཀོད། ༈ སྙན་བརྒྱུད་ཡང་དག་ཟབ་ཏིག་ལ། མཎྜལ་ཚོམ་བུ་གཅིག་པ་ཐོད་སྐུ། གཡས་བུམ་པ། གཡོན་ཐོད་ཆང་རིག་ཙཀ །མདུན་དུ་མར་མེ་དང་སྨན་གྱི་ཕོ་བྲང་། ཤེལ་རྡོ། རྒྱབ་ཏུ་ཚེ་འབྲང་རིལ་ཆང་བཅས་བཤམ། ༈ ࿋ མཁྱེན་བརྩེའི་ཡང་ཕུར་སྦྲགས་མར་སྟེགས་བུའི་ཁར་སྒྲུབ་ཕུར། དེ་སྟེང་རྣམ་བུམ་མགུལ་ཆིངས་མཐིང་ག །མདུན་དུ་དཔལ་གཏོར་གཡས་གཡོན་དུ་གསང་ཐོད། རིག་ཙཀ ཚེ་འབྲང་། ཚེ་རིལ་ཆང་། མདའ་དར། བསྒྲལ་དབང་ཆས། ལས་ཕུར། དབྱེ་རྫས། བྱ་འུག་སྒྲོ །ཡུངས་ཀར། བྱད་ཐག །དུག་ཁྲག །སྒྲོལ་གྲི །ཐོ་བ། ཧོམ་གཟར། ལྕགས་ཧོམ་དུ་ལིངྒ་། གསེར་སྐྱེམས་ཆས། གཏོར་ཟོར་མཚེ་ཡུངས་ཀྱིས་བརྒྱན་པ་རྣམས་ཅི་བདེར་བཞག ࿋ ༈ །གཏེར་གསར་ཟབ་བདུན་ཡང་དག་ལ། རས་བྲིས་དབུས་སུ་རྣམ་བུམ་ཆང་དང་སོ་ལྔས་བཀང་བའི་ཁར་ཐོད་ཆང་མེ་ལོང་སིནྡྷུ་ར་བརྡལ་པ་ལ་རྩ་སྔགས་བྲིས་པས་བཀབ་པའི་སྟེང་ཁྲིའུ་ལ་ཐོད་སྐུ་དགུའི་མདུན་ཐོད་པའི་མར་མེ་དགུ་ཟན་ལས་བཅོས་ཤིང་འབྲི་མོག་གིས་ཁ་བསྒྱུར་པ་བཞག །ཐོད་སྐུ་དགུ་མ་འཛོམ་ན་གཙོ་བོ་ཐོད་སྐུ་དང་འཁོར་རྣམས་ཀྱི་ཙཀ་ལི་བཀོད། མདུན་དུ་དཔལ་གཏོར། དཔལ་དང་དུར་ཁྲོད་ཆས་ཕྱོགས་བསྡུས་རྣམས་བཀོད། ༈ དེའི་ཚེ་དབང་ལ། རས་བྲིས་སམ་ཚོམ་བུ་དམར་པོ་གཙོ་འཁོར་དགུ་བཀོད་པའི་མཎྜལ་གྱི་སྟེང་ཁྲིའུར་རྣམ་བུམ་ཆིངས་དམར་ཉེར་ལྔའི་བཅུད་ལྡན། གཡས་སུ་ཚེ་འབྲང་ཚེ་རིལ་འགྱེད་བདེ་ཅན། གཡོན་དུ་ཚེ་ཆང་། མདའ་དར་དམར་པོ་བཅས་བཀོད། ༈ ࿋ ཟངས་བྱང་མ་ཟླ་གམ་ལྔ་བཅུ་རྩ་བརྒྱད་ལ། དཀྱིལ་འཁོར་གཞུང་མཐུན་བཀྲམ་པའི་ཁར་བུམ་པ་ཆས་ལྡན། གསང་ཐོད་མེ་ལོང་སིནྡྷུ་རའི་སྔགས་བྱང་། ཐོད་པར་མར་མེ་ལྷ་གྲངས་སམ་སྡོང་བུ་ལྔ་བཙུགས་པ། ཐོད་སྐུ །འཁོར་རྣམས་ཀྱི་ལྷ་ཙཀ་སུམ་ཅུ་སོ་བདུན། སྔགས་བྱང་ངམ་སྔགས་ཕྲེང་རྡོར་དྲིལ། དབུ་རྒྱན། རྡོ་རྗེ། དྲིལ་བུ། མིང་དབང་། དཔལ་དང་དུར་ཁྲོད་ཆས་སོ་སོ་བ། རིན་ཆེན་ཁྲི །སྨན་རཀ་གཏོར་གསུམ། མིག་དར། མེ་ཏོག་དོར་ར། གསེར་ཐུར། སློབ་མ་མཆོད་པ་བཅས་འདུ་བྱའོ། ࿋ ༈ །གསང་ཐིག་ཡང་དག་ལ། ཁྲིའུར་ཐོད་སྣོད་དུ་དཔལ་གཏོར་ཀྱུ་གུ་བརྒྱད་པ་རྒྱན་ལྡན། ༈ ࿋ ཐུགས་སྒྲུབ་ཡང་དག་ལ། རས་བྲིས་སམ་ཚོམ་བུ་གཅིག་པའི་ཁར་བུམ་པ་བཅུད་ལྡན་དུ་ཐོད་སྐུ་དང་མེ་ལོང་། ལྷོར་གསང་ཐོད། ནུབ་ཏུ་རིག་ཙཀ་དང་སྔགས་བྱང། བྱང་དུ་ཤེལ་རྡོ་དང་བྷནྡྷའི་ནང་མར་མེ་གཅིག་བྱས་པ། ཚེ་རིལ་ཆང་བཅས་སོ། ࿋ ༈ ࿋ འཇམ་མགོན་གསང་ཐིག་ཡང་དག་ལ། དཀྱིལ་འཁོར་གཞུང་མཐུན་ནམ་མ་འབྱོར་ན་ཚོམ་བུ་གཅིག་པའི་ཁར་གཞུང་གསལ་ཐོད་སྐུ །མདུན་དུ་བུམ་པ་སོ་ལྔའི་བཅུད་ལྡན་དར་མཐིང་གའི་མགུལ་ཆིངས། གཡས་སུ་བདུད་རྩི་བཏབ་པའི་གསང་ཐོད། གཡོན་དུ་རིག་ཙཀ །སྨན་གཏོར་རཀྟ། སྲུང་མའི་གཏོར་འབུལ་བཅས།། ࿋ ༈ །།ཐུགས་རིག་ཕྱག་རྡོར་སྐོར་ལ། ཆོས་དབང་གཏུམ་པོ་མེ་ལྕེ་ཕྲེང་བ་ལ། རས་བྲིས་སམ་ཚོམ་བུ་གཅིག་གི་སྟེང་བུམ་པ་མདུན་དུ་སྐུ་རྟེན་དང་དཔལ་གཏོར། གཡས་སུ་ཐོད་ཆང་། གཡོན་དུ་རྡོ་རྗེ། རྒྱབ་ཏུ་དར་གྱི་ཅོད་པན་ཁ་དོག་ལྔ་པ་རྣམས་དང་། སྲུང་སྐུད་སྔོན་པོ་སློབ་མའི་གྲངས་མཉམ་བཀོད། ༈ དབུ་རུ་སྟོན་ཤཱཀ་ཀྱི་རྡོ་རྗེ་མེ་འབར་ལ། མཎྜལ་ཚོམ་བུ་སྔོ་ནག་གཅིག་པའི་སྟེང་རྣམ་བུམ། མདུན་དུ་གཙོ་འཁོར་བཞིའི་ཙཀ་ལི། གཡས་སུ་རཀྴའི་ཕྲེང་བ། གཡོན་དུ་དཔལ་གཏོར་དར་གདུགས་བཅས། ༈ ལས་འབྲེལ་དྲེགས་འདུལ་ལ། སྟ་གོན་རྫས་བཞི་མཆོད་པ་བཅས། རས་བྲིས་དབུས་རྣམ་བུམ་སྐུ་ཙཀ་ཅན། མདུན་དུ་དབང་གཏོར་སྙིང་གཟུགས་དམར་པོ་པད་འདབ་བཞི་པ་རྒྱན་སྤྲོས་དར་ནག་གུར་ཅན། ལྷ་ཙཀ་ཚང་བ། མཐའ་སྐོར་དུ། དབུ་རྒྱན། མེ་ཕུང་། ཐོད་ཕྲེང་།སྦྲུལ། གླང་ཞིང་སྟག་ཤམ། ཐོད་རྒྱན་རྣམས་སོ་སོ། བྱུག་པ་གསུམ་གཅིག་བསྡུས། རྡོར་དྲིལ། གླེགས་བམ། རིག་ཙཀ་བཅས། ༈ དྲེགས་འདུལ་ནང་སྒྲུབ་བྱིན་རླབས་ལ། རས་བྲིས་སམ་མཎྜལ་ཚོམ་བུ་ལྔ་པའི་སྟེང་དུ་བུམ་པ་ཉེར་ལྔའི་བཅུད་དང་ཆས་ལྡན་བཤམ། གླུད་གཏོར་བསྒྲུབ་བྱའི་ཆངས་བུ་བཅས་པའང་བསྡོག ༈ །གཏོར་དབང་ལ། ཚོམ་བུ་ལྔ་སྟེང་དཔལ་གཏོར་སྐུ་རྟེན་དར་མཐིང་གི་གདུགས་ཅན་བཀོད། ༈ བྱང་གླིང་གཏུམ་པོ་དྲག་པོ་ལ། རས་བྲིས་སམ་ཚོམ་བུ་ལྷ་གྲངས་ཁར་དཔལ་གཏོར་སྐུ་ཙཀ་དར་གདུགས་ཅན། སྐུ་རྟེན་དར་སྔོན་དང་དུར་ཁྲོད་ཆས། རྡོར་དྲིལ། སྔགས་བྱང་། ལྕགས་རྡོར་རྩེ་ལྔ་བཅས་བཤམ། ༈ གྲྭ་མངོན་ཁང་བརྩེགས་ལ། རས་བྲིས་སམ་ཚོམ་བུ་གཅིག་པའི་སྟེང་དུ་དཔལ་གཏོར་སྐུ་རྟེན་དར་གདུགས་ཅན། མདུན་དུ་བུམ་པ། རཀྴའི་ཕྲེང་བ་བཅས། ༈ སངས་གླིང་ཕྱག་རྡོར་ཁྱུང་གསང་བ་ཡང་ཁྲོས་ལ། སྟ་གོན་རྫས་བཞི། རས་བྲིས་སམ་ཚོམ་བུ་ལྔ་པའི་ཁར་རྣམ་བུམ་ལྷ་མཚན་གསེར་གྱི་རྡོ་རྗེས་སྤྲས་པའི་ནང་དུ། བཙན་དུག་མུ་ཟི་གུ་གུལ་བདུད་རྩི་གླ་རྩི་ལྡོང་རོས་སྒོག་སྐྱ་བུལ་ཏོག་བརྒྱད་ཆུ་གཙང་འོ་མར་སྦྱར་བས་བཀང་། མདུན་དུ་དམར་གཏོར་གཙོ་འཁོར་ལྔ་པ། སྐུ་ཙཀ །སྣོད་གཅིག་ཏུ་ལྕགས་རྡོར། ཁྱུང་ཙཀ །སྦྲུལ་ཆུན། སྔགས་བྱང་། སྒྲུབ་དཔེ་རྣམས་དང་། བཟའ་བཏུང་སྣ་ཚོགས་བཅས། ༈ རཏྣའི་གཏུམ་པོ་ལ། རས་བྲིས་དབུས་རྣམ་བུམ། གཡས་སུ་ཐོད་ཆང་། རྒྱབ་ཏུ་དཔལ་གཏོར་སྐུ་ཙཀ་དར་གདུགས་ཀྱིས་བརྒྱན་པ། གཡོན་དུ་སྒྲུབ་དཔེ། མདུན་དུ་རྡོར་དྲིལ། རལ་གྲི་མེ་ཕུང་། འཁོར་ལོ་སྦྲུལ་ཞགས། གསང་བདག་ཁྱུང་གི་སྐུ་ཙཀ །ཁྲོ་བཅུའི་སྐུའམ་ཕྱག་མཚན་བཅས་བཀོད། ༈ པད་གླིང་གཏུམ་པོ་དྲེགས་འདུལ་ལ། དཀྱིལ་འཁོར་རམ་ཚོམ་བུ་གཙོ་བོ་གཅིག་ལ་འཁོར་བཅུ་དེ་རྒྱབ་བཞིས་བསྐོར་བའི་སྟེང་དུ་རྣམ་བུམ། མདུན་རྒྱབ་གཉིས་སུ་ཐོད་ཆང་དང་དཔལ་གཏོར། རྡོ་རྗེ་ཅོད་པན། སྲུང་སྐུད་སྔོན་པོ་སློབ་མའི་གྲངས། ཕྲེང་བ་བཅས། ༈ ཕྱག་རྡོར་སྟོབས་པོ་ཆེ་ལ། རས་བྲིས་སམ་ཚོམ་བུ་གཅིག་པའི་དབུས་སུ་རྣམ་བུམ། མདུན་དུ་སེང་ཕུར་ཁྲོ་ཞལ་ཅན། གཡས་སུ་ཐོད་སྐུའམ་སྐུ་རྟེན། གཡོན་དུ་དཔལ་གཏོར། རྒྱབ་ཏུ་ཅོད་པན། རྡོར་དྲིལ། རལ་གྲི་མེ་དཔུང་། འཁོར་ལོ་སྦྲུལ་ཞགས། གཙོ་སྐུ་བྱ་ཁྱུང་རིགས་ལྔ། ཧཱུྃ་བཅུ། ཐུན་རྫས་རྫས་བརྒྱད་ཕྱོགས་བསྡུས་བཅས་སོ། ༈ །གཏུམ་པོ་སེང་སྒྲོག་ལ། མཎྜལ་ལ་ཚོམ་བུ་མཐིང་ནག་གཅིག་བཀོད་པའི་སྟེང་མཉྫི་ལ་རྣམ་བུམ་མགུལ་ཆིངས་མཐིང་ནག་བཅུད་ལྡན་བཀོད། གཡས་གཡོན་ཐོད་པའི་བདུད་རྩི། རྡོ་རྗེ། རྒྱབ་མདུན་གང་བདེར་དབང་གཏོར་རྒྱན་ལྡན་བཀོད། ༈ ཟུར་མཁར་ཕྱག་རྡོར་དྲག་སྔགས་ཀུན་འདུས་ལ། དཀྱིལ་འཁོར་གྱི་དབུས་སུ་མཉྫི་ལ་རྣམ་རྒྱལ་བུམ་པ་བཅུད་ལྡན་ཁ་རྒྱན་སྐུ་ཙཀ་གིས་བརྒྱན་པ་བཀོད། དེ་མདུན་ཧཱུྃ་ཡིག་བཅུའི་ཙཀ་ལི། དུར་ཁྲོད་ཆས། རྒྱབ་ཏུ་དཔལ་གཏོར་དར་གདུགས་བཅས། གཡས་གཡོན་དུ་གསང་ཐོད། རིག་ཙཀ །ཤེལ་རྡོ། མདུན་དུ་བཀའ་སྲུང་སྲོག་དབང་ཆས་རྣམ་སྲས་གཏོར་མ། གནམ་ལྕགས་རྡོ་རྗེ། རྒྱལ་མཚན་དང་ནེའུ་ལེའི་ཙཀ་ལི། སྲོག་སྔགས་འབྲུ་བཞི་གསེར་བྲིས། རྫས་བརྒྱད་དང་རྒྱལ་སྲིད་སོ་སོ་བའི་ཙཀ་ལི་བཀོད་དོ།། ༈ །།དེ་ནས་བདུད་རྩི་ཡོན་ཏན་སྒྲུབ་པའི་སྐོར་ལས། ཐོག་མར་གཡུ་ཐོག་སྙིང་ཐིག་ལ། རས་བྲིས་སམ་པདྨ་འདབ་བཞིའི་དབུས་སུ་རྣམ་བུམ། མདུན་དུ་ཐོད་ཆང་ཁར་མེ་ལོང་བཀོད་པའི་སྟེང་དུ་ག་པུར་ཤིང་ཀུན་ཨ་རུ་ར་བཟང་དྲུག་རྣམས་བཞག་པ་དང་ལྷ་ཙཀ་ཚང་མ། གཡས་སུ་དབུ་རྒྱན་དང་། དྲང་སྲོང་དབང་གཏོར་དཀར་ཟླུམ་འདབ་བཞི་རྒྱན་ལྡན་སྐུ་ཙཀ་བཙུགས་པ། རྒྱབ་ཏུ་རྒྱུད་བཞི་ཆ་ལག་དང་བཅས་པའི་གླེགས་བམ། གསང་ཐོད། རིག་ཙཀ །མེ་ལོང་ཤེལ་རྡོ། བུ་རམ་ཆོས་སྨན་སྦྱར་བའི་ཆང་། པདྨ་འདབ་དྲུག་སྟེང་ཤེལ་གྱི་མཆོད་རྟེན་བང་རིམ་དགུ་པ་དང་རྡོར་དྲིལ་རྣམས། གཡོན་དུ་གཏར་སྲེག་གི་ཆས་རྣམས་དང་བཀའ་སྲུང་གཏོར་མ་དམར་གཏོར་ཟུར་གསུམ་གཙོ་འཁོར་དགུ་པ་སྐུ་ཙཀ་དར་གདུགས་ཅན། མཚམས་རྣམས་སུ་དར་དང་རིན་ཆེན་རྒྱན་ཚང་མ་གཅིག་བསྡུས་སྨན་རཀ་གཏོར་གསུམ་ཌཱ་རུ་གཅིག་བསྡུས། རིགས་ལྔའི་ཕྱག་མཚན་དང་གྲི་ཐོད། འཁོར་ལོ་པདྨ་རྡོ་རྗེ་འབྲུ་གསུམ་གྱིས་མཚན་པ་རྣམས་བཀོད། ༈ དོན་དབང་ལ་འབྲུ་ཚོམ་ལྔའི་སྟེང་དཔལ་གཏོར། གཡས་གཡོན་དུ་དཀར་གཏོར་དམར་གཏོར་བཅས། ༈ ཚེ་དབང་ལ། ཚོམ་བུའི་སྟེང་བུམ་པ་དང་གཏོར་མ་སྙིང་གཟུགས་སམ་ནོར་བུའི་དབྱིབས་ཅན་རྒྱན་ལྡན། ཚེ་རིལ་ཆང་། ཕྱག་མཚན་ལྔ་བཅས། ༈ ལྷ་སྨན་རྗེས་གནང་ལ། པད་དཀར་འདབ་བཞིའི་དབུས་བུམ་པ་འོ་མ་དང་ཉེར་ལྔའི་རྫས་ལྡན་ཤུག་པས་ཁ་བརྒྱན་པ། དེ་སྟེང་ཁྲིའུར་ཟླུམ་གཏོར་འདབ་བཞི་འཁོར་ཟླུམ་གཏོར་བཞིས་བསྐོར་བ་ཉི་ཟླ་ནོར་རྒྱན་སྐུ་ཙཀ་བཙུགས་པའི་གཡས་སུ་མདའ་དར་མེ་ལོང་ཅན། གཡོན་དུ་སྦ་གླིང་སྨྱུག་གླིང་བཞག །ཕྱེ་མར། གསེར་སྐྱེམས། སྤོས་དཀར། བསང་ཤུག་བསྡོག ༈ །དྲང་སྲོང་སེར་སྐྱའི་བཀའ་གཏད་ལ། མཎྜལ་སྔོན་པོའི་སྟེང་བུམ་པ་སྔར་ལྟར། གཡས་སུ་སྣོད་གཙང་མར་བཟང་དྲུག །ཚ་བ་གསུམ། ཨ་རུ་ར། རྡོ་རྗེ་དཀར་དམར་ནག་གསུམ། བཙག་བུ། སྤྲ་བ། གཡོན་དུ་སྐྱེས་པ་གྲིར་ཤི་བ་དང་། རྟ། བ་གླང་རྣམས་ཀྱི་སྲེ་ལོང་། ཕོ་རོག་དང་འུག་པའི་མིག །མེ་ལོང་དྭངས་པ་རྣམས་སྨན་པ་མཁས་པའི་སྐྲས་དྲིལ་ཏེ་བཞག །འདི་རྣམས་དངོས་མ་འཛོམ་ཡང་གཟུགས་བརྙན་འབྲི་དགོས་པར་བཤད། མདུན་དུ་དཀར་གཏོར་འདབ་བཞི་ཉི་ཟླ་ནོར་རྒྱན་སྐུ་ཙཀ་ཅན་དང་སྒྲུབ་ཡིག་བཞག །འདི་རྣམས་ཤིན་ཏུ་གཙང་སྦྲ་དགོས། གཡུ་ཐོག་སྙིང་ཐིག་སྐོར་སྟབས་གཅིག་ཏུ་བྱེད་ན། དབང་ཆེན་བཅས་ཚང་མ། སྟེགས་མདུན་རྒྱབ་གང་བདེར་དཔལ་གཏོར། ཚེ་གཏོར། ཚེ་རིལ། མདུན་གཡས་ལྷ་སྨན། གཡོན་དུ་དྲང་སྲོང་གི་ཆས་རྣམས་བཤམས་པས་འཐུས། ༈ སྨན་བླ་ལོངས་སྐུའི་གཏོར་དབང་གི་བཤམ་བཀོད་གོང་གི་དོན་དབང་དང་འདྲ། ༈ གཏེར་གསར་བི་མ་ལ་ལ། པདྨ་འདབ་བརྒྱད་ཨས་མཚན་རྡོ་ར་མེ་རི་ཅན་གྱི་སྟེང་དུ་རྣམ་བུམ་ཨ་དཀར་གྱིས་བརྒྱན་པ། མདུན་དུ་གསང་ཐོད་མེ་ལོང་འཇའ་རིས་ཤེལ་རྡོ་རྣམས་བརྩེགས་པ་དང་། བླ་མ་ཆེ་མཆོག་གནམ་ཞལ་མ་གསུམ་གྱི་སྐུ་ཙཀ་སོ་སོ་བ། གཡས་སུ་ཕོ་མོའི་ཐོད་པ་ཁ་སྦྱོར་ཆོས་སྨན་གྱིས་བཀང་ཞིང་དར་སྣས་དྲིལ་བ། ཚོན་སྐུད་ཀྱིས་རྒྱ་གྲམ་དུ་བཅིངས་པའི་གཡས་གཡོན་རྡོར་དྲིལ་དང་དབུ་རྒྱན་གྱིས་བརྒྱན་པ། ནུབ་ཏུ་ཚེ་རིལ་ཆང་མདའ་དར། བྷནྡྷ་བཅུད་ལེན་རིལ་བུ་གཞུང་གསལ་ལམ་མེད་ན་ཚེ་རྫས་བསྲེགས་པའི་རིལ་བུས་བཀང་སྟེ་དར་གྱིས་བཀབ་པ། བྱང་དུ་མཁའ་འགྲོའི་གཏོར་མ་སྐུ་ཙཀ་མདའ་དར་མཐིང་ག་མེ་ལོང་གིས་བརྒྱན་པ། སྲུང་ཟློག་བསད་གསུམ་ཞལ་ཤེས་ལྟར་བསྐུར་བའི་ཡུལ་ལ། རྭ་སྲུང་། ཟོར་གཏོར། གྲི་གུག་ལིང་ག་བཅས་པའང་བཞག ༈ །བདུད་རྩི་བུམ་པ་ལ། མཉྫིའི་སྟེང་ཀ་པཱ་ལར་སྨན་སྣ་བསྲེས་པའི་ཕྱེ་མ་ཨ་རུ་ར་ཟུར་བརྒྱད་པའི་དབྱིབས་ལོ་མ་ལས་ཐོན་པའི་རྩེར་གསང་བདག་གི་ཙཀ་ལི་བཙུགས། སྲུང་སྨན་ཆེན་མོའམ་མ་འཛོམ་ན་ཡུང་བ། ཤུ་དག །སྨན་ཆེན་གསུམ་གྱི་ཕྱེ་མ་ཐུམ་པོ་ནག་པོ་སློབ་མའི་གྲངས་མཉམ། རྡོ་རྗེ་ཁྲབ་རིང་གི་སྲུང་འཁོར་ཆིངས་ལྡན། ཚོགས་ཀྱི་ཡོ་བྱད། བཀའ་སྲུང་གཏོར་འབུལ་དཀར་དམར་བཅས། ༈ ར་མོ་ཤེལ་སྨན་གྱི་ཡང་གཏེར་རྡོ་རྗེ་བདུད་རྩིའི་བླ་མའི་གཏོར་དབང་ལ། མཎྜལ་ཚོམ་བུ་དཀར་པོ་གཅིག་བཀོད་པའི་སྟེང་མཉྫིའི་ཁར་བླ་གཏོར་རིན་ཆེན་འབར་བ་སྐུ་ཙཀ་དར་གདུགས་བཅས་བཀོད། ༈ རྡོ་རྗེ་བདུད་རྩིའི་དབང་ལ། སྟ་གོན་རྫས་བཞི། དཀྱིལ་འཁོར་བཀྲམ་པའི་དབུས་སུ་རྣམ་བུམ་ཆིངས་ལྗང་ཅན་གྱི་ཁར་ཐོད་པ་བདུད་རྩིས་བཀང་བ་ལ་སིནྡྷུ་རའི་མེ་ལོང་དགའ་འཁྱིལ་བཾ་ཡིག་གིས་མཚན་པས་བཀབ་ལ་དར་གུར་དབུབ། མདུན་སོགས་སུ་དབུ་རྒྱན། རྡོ་རྗེ་དྲིལ་བུ། རྡོར་དྲིལ། ཐོད་ཆང་རྣམས་དང་། ཤར་དུ་ཁྲུས་བུམ། ལྷོར་བདུག་པ། ནུབ་ཏུ་མ་ད་ན་བཏབ་པའི་ཆང་། བྱང་དུ་ཐོད་པར་བདུད་རྩི་རིལ་བུ་བཅས་སྔར་ནས་སོ་སོའི་སྒྲུབ་ཐེམས་ཅན་བཀོད། སིནྡྷུ་ར་དང་ཞུན་མར་དགང་བླུགས་དུང་དཀར་དྲིལ་བུ་གླེགས་བམ་རྣམས་ཀྱང་བསྡོག ༈ ࿋ །རྡོ་རྗེ་བདུད་རྩི་བདེ་བ་ཆེན་པོའི་སྐབས་ལས་སྦྱོར་གྲོལ་བ་དྲུག་གི་རྗེས་གནང་གི་རྫས། ལྡིང་ཁྲི་བར་པ་ལྟ་བུར་དབུས་བདུད་རྩི་རིལ་བུའི་སྙིང་པོ་ཅན་གྱི་མཐོང་གྲོལ་གཏེར་བུམ། ཐོས་གྲོལ་དུང་ལ་བདུད་རྩི་དང་གི་ཝཾ་དྲི་བཟང་སྦྱར་བས་བྱུགས་པ། ཚོར་གྲོལ་རིལ་བུ་དང་སྤོས་སྦྱོར་དྲི་ཞིམ་སྦྱར་བའི་ཕྱེ་མ། མྱོང་གྲོལ་ཐོད་སྣོད་དུ་རིལ་བུ་བླུགས་པ། རེག་གྲོལ་བདུད་རྩི་དང་ག་པུར་དྲི་བཟང་རྣམས་སྦྱར་བའི་ཕྱེ་མ་དང་ཐུམ་བུ་བཏགས་ཆོག །ཁྱབ་གྲོལ་ཀླུ་སྨན་བདུད་རྩི་འོ་མ་རྣམས་དངུལ་སྣོད་དུ་ལྷན་ཅིག་སྦྱར་བ་བཅས། ࿋ ༈ གཏེར་བདག་སྔགས་སྲུང་མའི་སྲོག་གཏད་ལ། ཆོས་འབྱུང་འཁོར་ལོ་མཐིང་ནག་རྩིབས་བཞི་པ་མེ་རི་ཁྲག་མཚོས་བསྐོར་བའི་ལྟེ་བར་ཐིག་ལེ་མཐིང་ནག་རྩིབས་བཞི་དཀར་སེར་དམར་ལྗང་བཀོད་པའི་ཚོམ་བུ་གཙོ་འཁོར་ལྔ་པའི་སྟེང་དུ་རྟེན་གཏོར་སྐུ་གཟུགས་དར་གདུགས་ཀྱིས་སྤྲས་པ་དང་སྔགས་བྱང་བཀོད། ༈ རཏྣའི་ཐུགས་སྒྲུབ་སྨན་དབང་ལ། མཎྜལ་ཚོམ་བུ་ལྔ་པའི་དབུས་སུ་གོང་བཤད་ལྟ་བུའི་སྨན་གྱི་ཕོ་བྲང། རིགས་ལྔའི་ཙཀ་ལི་སོ་སོ་བ་བཅས། ༈ ལེགས་ལྡན་རྗེའི་ཚེ་སྒྲུབ་བདུད་རྩི་འཁྱིལ་བ་ལ། རས་བྲིས་ཁར་བུམ་པ་ལྔ་དབུས་དཀར་སོགས་ཕྱོགས་མདོག་རིགས་ལྔའི་ཕྱག་མཚན་སོ་སོར་བཞག །གསང་ཐོད་ལྔའམ་གཅིག །རིག་ཙཀ་མེ་ལོང་བཅས། ཤེལ་རྡོ་མར་མེ་མེ་ལོང་སྒྲོ་མདོངས་བཞི། མདུན་རྒྱབ་གང་བདེར་ཚེ་འབྲང་། རིལ་ཆང་མདའ་དར་རྟགས་བརྒྱད་ཙཀ་ལི་གཅིག་བསྡུས་རྣམས་བཤམ། ༈ ࿋ སྙན་བརྒྱུད་བདུད་རྩི་མཆོག་ཏིག་ལ། སྟེགས་བུར་རས་བྲིས་སམ་ཚོམ་བུ་མཐིང་ནག་གཙོ་འཁོར་དགུ་པའི་ཁྲིའུའི་ཁར། ཐོད་པ་མཚན་ལྡན་ཨ་མྲིཏས་བཀང་བ། གཡས་སུ་སྨན་གྱི་ཕོ་བྲང་། གཡོན་དུ་མར་མེ། མདུན་དུ་སྐུ་ཙཀ །སྔགས་བྱང་དང་ཕྲེང་བ། དུར་ཁྲོད་ཆས་བརྒྱད། དཀྱིལ་འཁོར། ཙཀླི། ཤ་ལྔ། བདུད་རྩི་ལྔ། རྩ་བརྒྱད་སྟོང་སྦྱར་སྨན་ཕྱེ་རྣམས་ཐོད་པ་སོ་སོར་བཞག་པ། བཏགས་བཙག་སྦོལ་ཞིང་གཞལ་བའི་ཡོ་བྱད་ཕབ་བཅས། རྒྱབ་ཏུ་སྙིང་པོ་ལྔ་ཆང་གིས་སྦྲུལ་པའི་ཚེ་འབྲང་ནང་དུ་བཟླ་བྱའི་སྔགས་ཀྱི་ཤོག་དྲིལ་བཅུག་པའི་གཡས་གཡོན་དུ་ཚེ་རིལ་ཆང་བཅས་བཀོད། ࿋ ༈ འཇའ་ལུས་འོད་ཕུང་རང་གྲོལ་ལ། རས་བྲིས་དབུས་ཁྲིའུར་རྣམ་བུམ་ཆིངས་དམར་ཁ་རྒྱན་གསེབ་ཕག་མོའི་སྐུ་ཙཀ་མེ་ལོང་ཤེལ་བཅས། གཡོན་དུ་གསང་ཐོད་དར་དམར་གྱིས་བཀབ་པ། གཡས་སུ་དཔལ་གཏོར་གཡུང་དྲུང་རིས་ཀྱིས་བརྒྱན་པ། རྒྱབ་ཏུ་དཔལ་འབར་རིང་པོ་དཀར་སེར་དམར་ལྗང་མཐིང་ལྔ། མདུན་དུ་ཏིང་ལོ་རེ་རེ་ལ་སྡོང་བུ་གསུམ་རེ་ཡོད་པ་གསུམ། རུས་རྒྱན། རས་གོས། སྒོམ་ཐག་ཨང་རག་རྣམས་འབྲུ་གསུམ་དང་རཾ་བྲིས་པ་འཛོམ་ན་སློབ་མའི་གྲངས་མཉམ་བསྡོག །སློབ་མ་རྣམས་ཀྱི་གདན་ལ་གཡུང་དྲུང་རཾ་མཚན་བཏིང་ངོ་།། ༈ །།དེ་ནས་ཕུར་པ་ཕྲིན་ལས་སྒྲུབ་པའི་སྐོར་ལས། ཆོས་དབང་སྤུ་གྲི་ལ། དཀྱིལ་འཁོར་རས་བྲིས་ཁར་འཛོམ་ན་ཕུར་པ་གཙོ་འཁོར་བཞི་བཅུ་རྩ་དྲུག་ལྷ་གནས་སོ་སོར་ཨེ་ཁྲོམ་ལ་བཀོད། མ་འཛོམ་ན་དབུས་སུ་ཨེ་ཁྲོམ་ལ་གཙོ་ཕུར་གཞུང་མཐུན་ཚད་ལྡན་དང་གཙོ་བོའི་སྐུ་ཙཀ་བཀོད། ཁྲོ་བོ་བཅུ། སྲས་ཉེར་གཅིག །དམ་ཅན་བཅུ་དྲུག་རྣམས་ལ་ཕྱོགས་བསྡོམས་ཙཀ་ལི་གསུམ། ལས་བཞི་སོ་སོར་བཅས་ཕུར་ཙཀ་བདུན་ནམ། ཡང་ན་ཁྲོ་བཅུ་སྲས་མཆོག་རྣམས་ལ་ལྷ་ཙཀ་ཡོད་ནའང་འཐུས་ཤིང་། དེ་སྟེང་ལྡིང་ཁྲི་ལ་རྣམ་བུམ། རྒྱབ་ཏུ་དཔལ་གཏོར་གཡས་གཡོན་དུ་རྒྱུད་ཀྱི་གླེགས་བམ། གསང་ཐོད། རྡོར་སེམས་སྐུ་ཙཀ་སྔགས་བྱང་། དཀྱིལ་འཁོར་གྱི་གཡས་སུ་དབུ་རྒྱན་དང་ཐོད་སྐམ་ལྔའི་ཅོད་པན། གཡོན་དུ་ཚེ་འབྲང་དང་དངོས་གྲུབ་ཀྱི་རྫས། གཞན་ཡང་ཐལ་རཀ་ཞག་གསུམ། ཐོད་སྦྲུལ་གཉིས། ཞིང་གླང་སྟག་ལྤགས། མེ་ཕུང་རྣམས་སོ་སོ་བ། གདབ་ཕུར་ཆེ་ཆུང་། ཐོ་བ། བྲུབ་ཁུང་ཉའོ་རྣམས་འདུ་བྱ། ༈ བྱང་གཏེར་ཕུར་པ་སྤུ་གྲི་ལ། སྟ་གོན་རྫས་བཞི། དཀྱིལ་འཁོར་སྟེང་དབུས་སུ་གཙོ་ཕུར་ཞལ་མདུན་བསྟན། རྩིབས་བཅུ་ལ་ཁྲོ་བཅུའི་ཕུར་པ་ནང་བསྟན། སྒོ་བཞིར་སྒོ་ཕུར་བཞི་ཕྱིར་བསྟན་བྱིན་རླབས་བཅས་ཨེ་ཁྲོམ་ལ་བཀོད་པའི་དབུས་འཕྲུལ་སྟེགས་ལ་རྣམ་བུམ་ཆིངས་སྔོན་ཅན་བཀོད། མཐའ་སྐོར་རྣམས་སུ། ཡུངས་ཀར། བདུད་རྩི། དབུ་རྒྱན། དར་དཔྱང་། རྡོར་དྲིལ། གླེགས་བམ། སྟོད་གཡོགས། སྨད་གཡོགས། གླང་ཀོ་སྟག་ཤམ། སྦྲུལ་ཆུན། མི་ལྤགས། ཐོད་ཕྲེང་ཚར་གསུམ། ཁྲག་ཞག་ཐལ་བ་རྣམས་སོ་སོ་བ། འདོད་ཡོན་ལྔ། ཚོགས་སམ་ཚེ་བུམ། གསང་དབང་ཐོད་པ། ཕན་དབང་ཆས་དབུ་རྒྱན། གདུགས། ཧཱུྃ་ཡིག །རྡོར་དྲིལ། ཡེ་ཤེས་སེམས་དཔའི་སྐུ །དར་དམར་ཅོད་པན། མེ་ཏོག་ཕྲེང་བ། གོ་ཆ། བཟའ་བཏུང་རྣམས་དངོས་སམ་ཙཀ་ལི་ཚང་བ། རིག་ཙཀ །ནུབ་ཕྱོགས་སུ་གཏོར་ཆེན་རྣམས་བཀོད། བསྒྲལ་དབང་ཆས། སྲས་མཆོག །མགྱོགས་ཕུར། གདབ་ཕུར་རྣམས་སློབ་དཔོན་མདུན་དང་། ལྕགས་ཧོམ་ལིངྒ་། ཕྱག་རྒྱ་བཞི། བྱ་འུག་སྒྲོ །སྐམ་རློན་ཐུན་སོགས་ཀྱང་གང་བདེར་བཞག་གོ ༈ །སངས་གླིང་ཕུར་པ་ཐུགས་ཀྱི་ཉིང་ཁུའི་རྩ་དབང་ལ། སྟ་གོན་རྫས་བཞི། ཞི་ཐབ། ཏིལ་ཡུངས་སོགས་སྲེག་རྫས་མདོར་བསྡུས། དཀྱིལ་འཁོར་རས་བྲིས་དབུས། གཙོ་བོ་སྲས་མཆོག་ཕུར་བུ། ཕྱོགས་བཞིར། བུདྡྷ། རཏྣ། པདྨ། ཀརྨ་ཀཱི་ལའི་ཕུར་པ་བཞི་ཨེ་ཁྲོམ་ལ་བཀོད། དེ་སྟེང་འཕྲུལ་སྟེགས་ལ་རྣམ་བུམ་སོ་ལྔའི་བཅུད་ལྡན་ཆིངས་སྔོན་ཁ་རྒྱན་དང་བཅས་པ་བཞག །དེ་མདུན་གཙོ་བོ། ཀཱི་ལ་རིགས་བཞི། ཁྲོ་བཅུ་ཡབ་ཡུམ། ཟ་བྱེད་གསོད་བྱེད་བཅས་སྐུ་ཙཀ་སོ་ལྔ། ཁྲོ་བཅུ་ཁྲ་ཐབས་ཕྱོགས་བསྡུས་དང་། སྲས་མཆོག་ཉེར་གཅིག་དམ་ཅན་བཅུ་གཉིས་ཕྱོགས་བསྡུས་ཀྱི་སྡོམ་ཕུར་རམ་ཙཀ་ལི་བཀོད། ཆུ་དབང་བུམ་པ། དབུ་རྒྱན། རྡོ་རྗེ། དྲིལ་བུ། མིང་དབང་རྣམས་ཀྱང་ཕྱོགས་བཞིར་བཞག །སློབ་དཔོན་དབང་ཆས་གདུགས། རཀྟ། ཞག །ཐལ་ཆེན། ཞིང་གཡང་། ཐོད་ཕྲེང་། སྟག་ཤམ། གསུར་དུད་དང་མི་རྐང་གླིང་བུ་རྣམས་ཕྱོགས་གཅིག་ཏུ་བཞག །ལས་བཞིའི་ཕྲེང་བ། རྡོ་རྗེ་རྩེ་ལྔ། རྩེ་དགུ། བང་གླང་ཀོ །སྟག་ཤམ། སྦྲུལ་ཆུན། ཐོད་ཕྲེང་། ཞིང་ལྤགས། ཞག །རཀྟ། ཐལ་ཆེན། མེ་ཕུང་རྣམས་གོ་རིམ་ལྟར་དང་། ཕྱག་མཚན་རྡོ་རྗེ་རྩེ་དགུ། རྩེ་ལྔ། མེ་ཕུང་ཁ་ཊྭཱཾ། ཕུར་པ་རྣམས་སོ་སོའི་ཙཀ་ལི། རཀྴའམ་ཐོད་ཕྲེང་། ཆོས་བཤད་འཁོར་ལོ་དུང་དྲིལ་བུ་པུསྟི། གསང་ཐོད། རིག་ཙཀ་རྣམས་ཅི་བདེར་བཀོད། གཞན་དོན་རྗེས་གནང་ལ། འཁོར་ལོ། རལ་གྲི །དུང་། གླེགས་བམ། རྒྱལ་མཚན། མངོན་སྤྱོད་རྗེས་གནང་རྔ། ལས་ཕུར། མདའ་གཞུ། དུར་ཁྲོད་ཆས་བརྒྱད། ལས་བཞིའི་གཟུགས། ཤ་ལྔ། བདུད་རྩི་ལྔ། ཚོགས་རྫས། མར་མེ་བཅས་སྣོད་གཅིག་ཏུ་ལེན་བདེར་བཞག ༈ །དོན་དབང་ལ། སྟ་གོན་རྫས། རས་བྲིས་སམ་ལྷ་གྲངས་ཚོམ་བུའི་ཁར་རྣམ་བུམ། དེ་སྟེང་ཐོད་པ་འབྲུས་བཀང་བར་གཙོ་ཕུར་དང་གཙོ་བོ་ཡབ་ཡུམ་སྐུ་ཙཀ །ཤར་དུ་རྡོ་རྗེ། ལྷོར་སྐྱེར་ཕུར་ཅོད་པན་ཅན། ནུབ་ཏུ་པུསྟི་དང་ཕྲེང་བ། བྱང་དུ་དྲིལ་བུ། འཛོམ་ན་མཚམས་བཞིར་ཕུར་པ་དར་གྱི་ཅོད་པན་ཅན་རེ་རེ། རིགས་ལྔའི་ཙཀ་ལི། སྣོད་གཅིག་ཏུ་གསང་དབང་རྫས་ཆང་སྨན་མངར་གསུམ་སྦྱར་བ། རིག་ཙཀ །མཚམས་ཕུར་གཅིག །སྦྱོང་ཆས་ཏིལ་ནག་རྩྭ་ཆུན། ལྕི་བའི་ཆངས་བུ། ཁམ་ཕོར། སེང་རས་དཀར་པོ་རྣམས་འདུ་བྱ། ༈ རཏྣའི་ཕུར་པ་ཡང་གསང་བླ་མེད་ཀྱི་རྩ་དབང་མཚོན་ཆ་འཁོར་ལོ་ཞལ་སྤྲོད་དང་བཅས་པ་ལ། སྟ་གོན་རྫས་བཞི། མིག་དར་མེ་ཏོག །འཛོམ་ན་ཕུར་ཆུང་སློབ་མའི་གྲངས་མཉམ། དཀྱིལ་འཁོར་དབུས་སུ་ལྡིང་ཁྲི་ལ་རྣམ་བུམ་སོ་ལྔའི་བཅུད་ལྡན་ཆིངས་སྔོན་ཁ་རྒྱན་རིགས་ལྔའི་སྲོག་ཞུས་བརྒྱན་པ་བཀོད། ཕུར་ཁྲོམ་ཡོད་ན་གཙོ་བོ། སྲས་བཞི། ཁྲོ་བཅུ་ཁྲ་ཐབས། ཕྲིན་ལས་བཞི། སྒོ་མ་བཞི། དམ་ཅན་བཅུ་གཉིས། གིང་བཞི། དགེ་བསྙེན་ཉེར་གཅིག །དབང་ཕྱུག་ཉེར་བརྒྱད་རྩང་ཕུར་རྣམས་ལྷ་གནས་སོ་སོར་ཨེ་ཁྲོམ་དང་ཐོད་གདན་ལ་བཀྲམ། མེད་ན་གཙོ་ཕུར་ཚད་ལྡན་དར་ནག་གི་ཅོད་པན་དང་བཅས་པ་དཀྱིལ་འཁོར་དབུས་སུ་ཨེ་ཁྲོམ་ལ་བཙུགས། གཞན་རྣམས་གྲངས་ཚང་ཙཀ་ལི་ལ་ཚོ་བརྒྱད་དུ་བྱས་ནས་བྲིས་པའམ་ཕུར་པ་བརྒྱད་ཙམ་བཀོད། མདུན་ཕྱོགས་སུ་གཙོ་བོ། ཁྲོ་བཅུ། ཁྲ་ཐབས་ཉི་ཤུ་སོ་སོར་བྲིས་པའི་ཙཀ་ལི། རྡོ་རྗེ། ཕུར་པ། ཁ་ཊྭཱཾ། མེ་ཕུང་། ཐལ་རག་ཞག་གསུམ། དྲིལ་བུ། ཐོད་ཁྲག །ཡེ་ཤེས་སེམས་དཔའ་རྣམས་ཀྱི་ཙཀ་ལི། སྔགས་བྱང་གསེར་བྲིས། རྒྱབ་ཏུ་དཔལ་གཏོར་སྐུ་ཙཀ་དར་གདུགས་དང་བཅས་པ། རྒྱུད་དམ་སྒྲུབ་པོད། གཡས་གཡོན་གང་བདེར་ཐོད་པའི་བདུད་རྩི། བྱང་སེམས་དཀར་དམར་ཙན་དན་ག་པུར་བུ་རམ་རྣམས་སྦྱར་བའི་རིལ་བུ་ཕྱེ་མ་གང་བདེ། རིག་ཙཀ །རྔ་དུང་རོལ་མོ། ཚེ་འབྲང་། བཟའ་བཏུང་ཚོགས་རྫས་རྣམས་བཞག །ལས་བུམ། གདབ་ཕུར། ཐོ་བ། ཐུན་རྫས། ལྕགས་ཧོམ་ལིངྒ་རྣམས་འདུ་བྱ། ༈ དོན་དབང་ལ། སྟ་གོན་རྫས། རས་བྲིས་སམ་ལྔ་ཚོམ་ཁར་རྣམ་བུམ། དེ་སྟེང་ཨེ་ཁྲོམ་ལ་གཙོ་ཕུར། གཡས་སུ་དཔལ་གཏོར། གཡོན་དུ་གསང་ཐོད་མེ་ལོང་ཆོས་འབྱུང་བྲིས་པས་བཀབ། རྡོ་རྗེ་རྩེ་དགུ་རྩེ་ལྔ། མེ་ཕུང་ཁ་ཊྭཱཾ། ཐོད་ཕྲེང་། སྦྲུལ་ཆུན། གླང་ཀོ་སྟག་ཤམ། ཐལ་རཀ་ཞག་གསུམ་གཟིག་ཤམ་རྒྱན་དྲུག་དྲིལ་བུ་བཅས་པའི་ཙཀ་ལི་སོ་སོར་ཕྱོགས་བསྡུས། མདུན་དུ་ཚེ་འབྲང་ཟས་སྣ། སྲས་ཕུར། ལྕགས་ཧོམ་ཉའོ་རྣམས་བཀོད། ༈ ࿋ པད་གླིང་ཕུར་པ་སྲོག་གི་སྤུ་གྲི་ལ། དཀྱིལ་འཁོར་རམ་ཚོམ་བུ་མཐིང་ནག་དབུས་སུ་གཙོ་བོ། དེ་ཕྱིར་རིམ་བཞིན་སྲས་མཆོག་ཉེར་གཅིག །ཁྲོ་བཅུ། དབང་ཕྱུག་ཉེར་བརྒྱད་མ་མོ་བཅུ་གཉིས་སྒོ་བཞི་བཅས་དང་དེ་མཐར་གྲངས་མེད། དེ་སྟེང་འཕྲུལ་སྟེགས་ལ་བུམ་པ་མགུལ་ཆིངས་མཐིང་ནག་གིས་སྤྲས་པ། མདུན་དུ་གཙོ་བོ། ཁྲོ་བཅུ། སྲས་མཆོག་ཉེར་གཅིག །སྒོ་བཞི་མངགས་ཕུར་བཅས་ཀྱི་ཕུར་པ། དབུ་རྒྱན། ཅོད་པན། གཞུང་པོད། གསང་ཐོད། ཡེ་ཤེས་སེམས་དཔའི་སྐུ་དང་སྔགས་བྱང་། དུར་ཁྲོད་ཆས། དཔལ་གཏོར། ཞལ་ཟས་སྣ་ཚོགས། གདབ་ལས་ལ། བྲུབ་ཁུང་། ལིངྒ་། ཐོ་བ། དམ་ཅན་མ་མོ་བཅུ་གཉིས། གདབ་ཕུར་བཅས། ࿋ ༈ ཆོས་གླིང་ཐུགས་ཀྱི་ཐིག་ལེ་ལ། སྟ་གོན་རྫས་བཞི་མཆོད་པ་བཅས། རས་བྲིས་དབུས་དང་མདུན་རྒྱབ་ཏུ་ཨེ་ཁྲོམ་རེ་ལ་ཕུར་པ་གཙོ་འཁོར་གསུམ། དེ་སྟེང་ལྡིང་ཁྲིའི་ཁར་རྣམ་བུམ། ཤར་དུ་གཙོ་བོ་ཁྲོ་བཅུ་དང་བཅས་པའི་སྐུ་ཙཀ་དང་ཕྱག་མཚན་མིང་དབང་རྡོར་དྲིལ་བཅིངས་པ། ལྷོར་མེ་ཏོག་ཕྲེང་བ་དང་དབུ་རྒྱན་དར་དཔྱངས། ནུབ་ཏུ་རྡོ་རྗེ་དང་གསང་ཐོད་བར་མེ་ལོང་ལ་ལི་ཁྲིའི་དཀྱིལ་འཁོར་ཆོས་འབྱུང་བསྣོལ་མ་མཱུཾ་དང་དགའ་འཁྱིལ་དྲུག་གིས་མཚན་པས་བཀབ་པའི་སྟེང་སྔགས་བྱང་ཤེལ་རྡོ། བྱང་དུ་དྲིལ་བུ་དང་དཔལ་གཏོར་འཁོར་ལོའི་གདན་དང་སྐུ་ཙཀ་དར་གདུགས་ཅན། ཉེ་ཕྱོགས་གང་བདེར་དུར་ཁྲོད་དཔལ་ཆས་ཕྱོགས་བསྡུས། བསྒྲལ་དབང་གི་ཆས་ལྕགས་ཧོམ་ཟན་ལིང་དང་ཤོག་ལིང་། བྱ་འུག་སྒྲོ །གུ་གུལ། ཐུན་རྫས། རལ་གྲི། པུ་རི་མཆོད་རྟེན་དཀར་ནག་གམ་སཱཙྪ་གཉིས། དམར་གཏོར་མཚེ་ཡུངས་ཀྱིས་བརྒྱན་པ། དགང་གཟར་བླུགས། དྲག་ཤིང་གི་ཧོམ་གྲུ་གསུམ། དམར་གཏོར། མནན་ཆས་ཕུང་རེ་བྱད་ཐག་ཐོད་ངན་དུར་རྡོ་བཅས་བཀོད། ༈ སྟག་ཚང་ཕུར་པ་སྟོད་ལས་རྩ་དབང་ལ། རས་བྲིས་སམ་ཚོམ་བུའི་ཁར་རྣམ་བུམ་ཁ་རྒྱན་གསེབ་ཀུན་བཟང་ཡབ་ཡུམ་གྱི་ཙཀ་ལི་ཙན། མདུན་དུ་གསང་ཐོད་དར་དམར་གྱིས་བཀབ་པའི་སྟེང་མེ་ལོང་ཤེལ་རྡོ་བརྩེགས་པ་དང་ཁ་ཊྭཱཾ། གཡས་བསྐོར་དུ་དབུ་རྒྱན། རྡོ་རྗེ། དྲིལ་བུ། དབུས་སུ་གཙོ་ཕུར་དང་གཙོ་སྐུ། ཧཱུྃ་ཡིག་བཅུ། སྒོ་བ་བཞིའི་ས་བོན་ནམ་ཕྱག་མཚན་གང་འཛོམ། རྒྱབ་ཏུ་དཔལ་གཏོར། གཞན་ཡང་དུར་ཁྲོད་ཆས་བརྒྱད་ཕྱོགས་བསྡུས། བྲུབ་ཁུང་ཉའོ། གདབ་ཕུར་རྣམས་བཀོད། སྨད་ལས་ཆེ་མཆོག་དང་སྦྲེལ་སྐབས་གཙོ་བོ་དང་ཁྲོ་བཅུའི་སྐུ་ཙཀ་ལྷག་པོར་བཀོད། ༈ བདུད་འདུལ་ཕུར་པ་གནམ་ལྕགས་སྤུ་གྲི་ལ་དབང་རྫས་མང་བས་རྩ་དཀྱིལ་དང་རྫས་དཀྱིལ་སོ་སོར་བྱེད་པའི་ལུགས་ཉིད་སྟབས་བདེ་བས་དེ་ལྟར་ན། དཀྱིལ་འཁོར་རས་བྲིས་དབུས་སུ་མཉྫིའི་ཁར་བུམ་པ་མགུལ་ཆིངས་མཐིང་ག་ཅན། ཤར་དུ་དཀར་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ལྗང་གུ་ཅན། བུམ་པ་ལྔ་ཀ་སོ་ལྔའི་བཅུད་དང་ཁ་རྒྱན་ལྡན་པ། དེ་རེ་རེའི་མདུན་དྲུང་དུ་བྷནྡྷ་ཨ་མྲྀཏས་བཀང་བ་རེ་རེ། དེ་དག་དང་མཉམ་དུ་དབུས་སུ་འཁོར་ལོ། ཤར་དུ་རྡོ་རྗེ། ལྷོར་པདྨ། ནུབ་ཏུ་དཔལ་བེའུ། བྱང་དུ་རྒྱ་གྲམ་གྱི་ཙཀ་ལི་བཀོད། གཙོ་བོ། ཀཱི་ལ་ཡ་བཞི། ཁྲོ་བཅུ། ཟ་གསོད་ཉི་ཤུ་སྟེ་ལྷ་ཙཀ་སོ་ལྔ་ལྷ་གནས་སོ་སོའི་དབུས་སུ་སྤོམ་པ་དང་གཙོ་བོའི་ཕྱག་མཚན་བཞག །ལྷོར་གསང་ཐོད། སྒྲུབ་པོད། རྡོ་རྗེ། ཁ་ཊྭཱཾ། ནུབ་ཏུ་སྔགས་བྱང་། རཀྴའམ་ཐོད་ཕྲེང་། དཔལ་ཆས། རིག་ཙཀ །བྱང་དུ་དཔལ་གཏོར་སྐུ་ཙཀ་དར་གདུགས་ཀྱིས་བརྒྱན་པ། གང་བདེར་དབུ་རྒྱན་སྒྲུབ་པོད་ཚེ་གཏོར་གཡང་རྫས་རྣམས་བཀོད། བྱང་ངོས་སྟེགས་བུར་དཀྱིལ་འཁོར་ཨེ་ཁྲོམ་དབུས་ཀྱི་གྲུ་གསུམ་ལ་གཙོ་ཕུར། དེའི་དྲུང་ལས་ཕུར། ཟླ་གམ་གསུམ་ལ་སྲས་མཆོག་ཉེར་གཅིག་བདུན་རེ། དེ་རྒྱབ་དྲག་འཁོར་རྩིབས་བརྒྱད་ཀྱི་ཕྱོགས་བཞིར་ཀྲོ་དྷ་བཞི། མཚམས་བཞིར་ཀཱི་ལ་ཡ་བཞི། དེ་རྒྱབ་རྩིབས་བཅུའི་དབུས་སུ་ཁྲོ་བཅུ། གཡས་གཡོན་དུ་ཟ་གསོད། དེ་རྒྱབ་ཕྱོགས་བཞིར་སྒོ་མ་བཞི་བཅས་ཀྱི་ཕུར་པ་བཀོད། དེ་རྒྱབ་རིམ་བཞིན་ཕུར་སྲུང་བཅུ་གཉིས། དགེ་བསྙེན་ཉེར་གཅིག །གིང་བཞི། དབང་ཕྱུག་ཉེར་བརྒྱད་རྣམས་ཕུར་པ་དངོས་སམ་རྩང་ཕུར་གྲངས་དེ་མཚུངས་བཀོད། དེའི་མཐར་ཡང་སྨན་རཀ་གཏོར་མ་དང་དྲག་མཆོད་ཀྱིས་བསྐོར། གལ་སྲིད་ཕུར་ཁྲོམ་མ་འཛོམ་ན་རྩ་དཀྱིལ་གྱི་དབུས་སུ་གཙོ་ཕུར་དང་ལས་ཕུར་དངོས་སུ་བཀོད། གཞན་རྣམས་ཚན་བསྡུས་པའི་རེ་རེ་ཙམ་མམ་ཙཀ་ལི་ལ་རི་མོ་གྲངས་ཚང་བྲིས་པ་བཞག །ཀཿཐོག་ཕྱག་བཞེས་ལྟར་བསྒྲལ་དབང་སྦྱོར་ན། རྫས་དཀྱིལ་གྱི་བྱང་དུ། དགྲ་ལིང་། གདབ་ཕུར། བྱ་འུག་སྒྲོ །ལྕགས་ཀྱུ་སོགས་མཚོན་ཆས། ཐུན་ཆས། དབྱེ་རྫས། གུ་གུལ། གསེར་སྐྱེམས། འོ་མཚོ། ཁྲག་མཚོ་རྣམས་ཀྱང་འདུ་བྱའོ། ༈ སྙན་བརྒྱུད་ཕུར་པའི་གནད་ཏིག་ལ། རས་བྲིས་སམ་ཚོམ་བུའི་དབུས་སུ་གཙོ་ཕུར་དང་རྣམ་བུམ་བརྩེགས་པའམ་མདུན་རྒྱབ་ཏུ་བཞག །སྐུ་ཙཀ །སྔགས་བྱང་། དུར་ཁྲོད་དཔལ་ཆས་གཅིག་བསྡུས། གསང་ཐོད་རིག་ཙཀ་གདབ་ཕུར་ཚེ་འབྲང་བྲུབ་ཁུང་ཉའོ་རྣམས་སྤྱི་ལྟར་བཀོད། ༈ གཏེར་གསར་ཟབ་བདུན་ཕུར་པའི་སྟོད་ལས་ལ། རས་བྲིས་སྟེང་ཡོད་ན་ཕུར་ཁྲོམ་དང་། མེད་ན་དབུས་སུ་ཨེ་ཁྲོམ་གཙོ་ཕུར། ཁྲོ་བཅུ་ལ་གཅིག །སྲས་མཆོག་ལ་གཅིག །སྒོ་མ་ལ་གཅིག་བཅས་གསུམ་གཡས་གཡོན་མདུན་དུ་བཀོད་པའི་སྟེང་དུ་ཁྲིའུ་ལ་རྣམ་བུམ། མཐའ་སྐོར་དུ་རིག་དབང་ཆས་བཞི། རཀྴའམ་ཐོད་ཕྲེང་། གསང་ཐོད། རིག་ཙཀ་རྣམས་བཀོད། སྨད་ལས་དཀྱིལ་འཁོར་ཞལ་བསྒྱུར་དགོས་པས། དབང་ཆས་སྔ་མ་རྣམས་བསྡུས། དཀྱིལ་འཁོར་སྔ་མའི་སྟེང་དུ་ཨེ་ཁྲོམ་དཀྱིལ་འཁོར་བཅས་པར་ཕུར་པ་སྔ་མ་རྣམས་སླར་བཀོད་པའི་མཉམ་དུ་གཙོ་བོ་ཁྲོ་བཅུའི་ཙཀ་ལི། རཀ་ཕྲེང་། དབུས་མདུན་སྲས་ཕུར། ཕྱོགས་བཞིར་ཕྲིན་ལས་བཞིའི་ཕུར་པ་སོ་སོ་བ། མདུན་དུ་ཐུན་ཕུར། རྒྱབ་ཏུ་ཚེ་འབྲང་། རིལ་ཆང་བཅས། དཔལ་དང་དུར་ཁྲོད་ཆས་ཕྱོགས་བསྡུས། སྨན་རག་གཏོར་གསུམ་ཕྱོགས་བསྡུས། བྱུག་བདུག་བྲབ་གསུམ། ཧོམ་ཁུང་ལིངྒ། རལ་གྲི་ཐོ་བ་སོགས་བསྒྲལ་ཆས། སྣོད་གཅིག་ཏུ་ཐུན་རྫས། ཟོར་གསུམ། ཕུར་ཆུང་གཉིས། གཏོར་ཟོར་རྣམས་བཞག་པ། མེ་ཧོམ་དགང་བླུགས། མནན་ཆས། ཞལ་ཟས་བཟའ་བཏུང་བཅས་འདུ་བྱ། ༈ གཏེར་གསར་གསང་ཐིག་གཏོར་དབང་ལ། བྷནྡྷའི་ནང་དཔལ་གཏོར་སྐུ་ཙཀ་དར་གདུགས་ཀྱིས་བརྒྱན་པ་བཀོད་དོ།། ༈ །།དེ་ནས་མ་མོ་རྦོད་གཏོང་གི་སྐོར་ལ། སྤྲུལ་སྐུ་ར་ཤག་ཆེན་པོའི་མ་མོ་སྒང་ཤར་ལ། སྟ་གོན་རྫས་བཞི་དང་མཆོད་པ་ལྔ། རས་བྲིས་ཀྱི་དཀྱིལ་འཁོར་སྟེང་ཕྱོགས་བཞི་དབུས་ལྔར་ཐོད་པ་ཆང་གིས་བཀང་བ་ལྔའི་ནང་དུ་བདུད་རྩི་ལྔའི་རིལ་བུ་སོ་སོ་ཡོད་ན་དབང་གཞུང་ལྟར་སོ་སོར་བཏབ། མེད་ན་ཐམས་ཅད་ལ་ཆོས་སྨན་བཏབ་པ་བཀོད། མདུན་དུ་གཙོ་འཁོར་བདུན་ཅུ་རྩ་དྲུག་གི་ལྷ་ཙཀ་ཚང་བ། ཕྱག་མཚན། ཐོད་པའི་བདུད་རྩི། ཤ་ཆེན། ཐོད་རྔ། མདའ་གཞུ། ཕུར་པ། རལ་གྲི་མཚོན་ཆའི་འཁོར་ལོ་རྣམས་དངོས་སམ་ཕྱོགས་བསྡུས་ཀྱི་ཙཀ་ལི། གཡས་སུ་དབུ་རྒྱན་ཅོད་པན། རྒྱབ་ཏུ་རྡོ་རྗེ་རྩེ་དགུ །གཡོན་དུ་དྲིལ་བུ། བར་མཚམས་སུ་གསང་ཐོད་མངར་གསུམ་སྨན་སྦྱར། རིག་ཙཀ །དུར་ཁྲོད་ཆས་ཙཀ །རྗེས་གནང་མེ་ལོང་། རལ་གྲི་ནས་འཁོར་ལོའི་བར་ཕྱག་མཚན་ལྔ། རྐང་གླིང་བཅས་བཞག་གོ ༈ །གཏེར་གསར་ཟབ་བདུན་མངོན་རྫོགས་རྒྱལ་པོ་ལ། རས་བྲིས་ཀྱི་དབུས་སུ་རྣམ་བུམ་སོགས་རིག་པའི་དབང་ལྔའི་ཆས། ཐོད་ཆུ། ལྷ་ཙཀ །དར་དཔྱངས་སྔོ་དམར། རཀྴའི་ཕྲེང་བ། སྔགས་བྱང་། རྡོ་རྗེ་རིན་ཆེན་པདྨ་རྒྱ་གྲམ་བཞི་པོ་སོ་སོ་བ། མདུན་དུ་རི་རབ་བང་རིམ་བཅུ་གསུམ་པའི་སྟེང་དུ་དཔལ་གཏོར་ལ། གཡས་སུ་སྨན། གཡོན་དུ་རཀྟ། མདུན་དུ་ཁྲག་ཀོང་། རྒྱབ་ཏུ་མར་མེ་འདོད་ཡོན་སྤར་བཏབ་གང་འགྲུབ་ཀྱིས་བསྐོར་ཞིང་ནམ་མཁའ་བཙུགས་པ། རྒྱབ་ཏུ་གསང་ཐོད་རིག་ཙཀ་ཤེལ། གཞན་ཡང་བྱོལ་སོང་ཁྲི་གདན་ནས་དཔལ་དང་དུར་ཁྲོད་ཆས་གཞལ་ཡས་རྣམས་བཅས་ཙཀ་ལི་བཅུ་དགུ །ཤ་སོགས་བཟའ་བ། ཁྲག་ཆང་བཏུང་བ། རལ་གྲི་སོགས་མཚོན་ཆ་རྣམས་བཀོད། ༈ བོ་དོང་ལུགས་ཀྱི་སེང་གདོང་སྙན་བརྒྱུད་བཀའ་བཅུའི་ཐོག་མ་རིགས་ལྔའི་རྗེས་གནང་ལ། མཎྜལ་གཞུང་མཐུན་ནམ་ཚོམ་བུ་ཁ་དོག་ལྔ་པའི་སྟེང་ཁྲིའུ་ལ་དམར་གཏོར་ཟུར་གསུམ་གཙོ་འཁོར་ལྔ་པ་དར་གདུགས་ཅན། གཡས་སུ་བུམ་པ། གཡོན་དུ་འབུལ་གཏོར། ༈ འཕྲོས་སྙན་བརྒྱུད་བཀའ་དགུ་རྣམས་ལ། མཎྜལ་གཞུང་མཐུན་ནམ། ཚོམ་བུའམ་ཚོན་ཕུང་ལྷ་མདོག་དང་མཚུངས་པར་བཀོད་པའི་སྟེང་དུ་མཉྫིའི་ཁར་གཏོར་མ་ཟུར་གསུམ་མཐེབ་ཀྱུས་བསྐོར་བ་ལྷའི་མདོག་དང་མཚུངས་པ་དར་གདུགས་ཅན་རེ་བཀོད། ཡོད་ན་སྐུ་ཙཀ་བཙུགས་པའི་མདུན་དུ་བུམ་པ་དང་འབུལ་གཏོར་རེ་བཞག །རྗེས་མ་ཚེ་སྒྲུབ་གཉིས་ལ། གཡས་གཡོན་དུ་ཚེ་རིལ་ཆང་བཤམ། དེ་ལ་ལྷ་མདོག་ནི་རིམ་བཞིན། མཐིང་ནག །དམར་ནག །དམར་པོ། ནག་པོ། མཐིང་ནག་གསུམ། དམར་པོ། སེར་པོ་རྣམས་སོ། ༈ །འཇའ་ཚོན་སེང་གདོང་ལ། ཚོམ་བུ་མཐིང་ག་གཅིག་གི་ཁར་དམར་གཏོར་ཟུར་གསུམ་མཐེབ་ཀྱུ་བཞིས་བསྐོར་བ་དར་གདུགས་ཅན། གཡས་སུ་རྣམ་བུམ། གཡོན་དུ་གསང་ཐོད་ཁ་ཊྭཱཾ་ཤེལ་རྡོ། མདུན་དུ་སེང་གདོང་རིགས་ལྔའི་ཙཀ་ལི་བཅས། ༈ ཀློང་གསལ་སི་ཧཾ་དམར་མོ་ལ། འབྲུ་ཚོམ་དམར་པོ་གཅིག་གི་ཁར་གཏོར་མ་གོང་མཚུངས། སྔགས་བྱང་། རྡོ་རྗེ། གྲི་ཐོད་ཁ་ཊྭཱཾ་བཅས། ༈ གཏོར་དབང་རྨི་ལམ་མ་ལ། ཚོམ་བུ་གཏོར་མ་སྔར་ལྟར་བཀོད་པའོ། ༈ །བདུད་འདུལ་དྲག་མོ་ལ། རས་བྲིས་དབུས་སུ་རྣམ་བུམ་ཁར་མོ་ཐོད་མཚན་ལྡན་ནང་ཆོས་སྨན་ཆང་སྦྱར། དེ་སྟེང་སིནྡྷཱུ་རའི་མེ་ལོང་ལ་ཆོས་འབྱུང་བསྣོལ་མ་དགའ་འཁྱིལ་དྲུག་བཅས་པའི་ལྟེ་བར་པདྨ་འདབ་བཞི་ལ་བཾ་ཧ་རི་ནི་ས་བྲིས་པ་བཞག་ལ་དར་དམར་གྱིས་བཀབ། དེ་སྟེང་ཁྲིའུ་ལ་དབང་གཏོར་འདབ་བརྒྱད་གྱེན་ལངས་དབུས་རྡོ་རྗེ་ཕྱེད་པ་ལྟ་བུ་པདྨའི་ལན་ཚར་ཅན་འཁོར་ནོར་བུ་འདྲ་བའི་བཤོས་ཕྲན་བཞིས་བསྐོར་བ་སྐུ་ཙཀ་དར་གདུགས་ཅན་བཤམ། མདུན་སོགས་སུ་ཕྱག་མཚན་གྲི་ཐོད་ཁ་ཊྭཱཾ། ཐོད་སྐམ་དབུ་རྒྱན། དར་གྱི་ཅོད་པན། གླང་ཞིང་སྟག་ལྤགས་ཐོད་ཕྲེང་། རུས་རྒྱན། རྩེ་གསུམ། རོ་གདན་རྣམས་དང་། ལྷ་ཙཀ་ཡོངས་རྫོགས། སྔགས་བྱང་། གླེགས་བམ། རཀྴའམ་ཐོད་ཕྲེང་། སྲུང་ཟློག་བསད་གསུམ་རྗེས་གནང་སྦྱར་ན། རྡོ་རྗེ། འཁོར་ལོ། ཕུར་པ། གྲི་ཐོད་རྣམས་གཞུང་མཐུན་ཅན་བཞག ༈ །དེའི་དོན་དབང་ལ། རས་བྲིས་སམ་ཚོམ་བུ་ལྷ་གྲངས་སྟེང་བུམ་ཐོད་མེ་ལོང་གཏོར་མ་བཞི་པོ་སྔར་ལྟར་བཤམ། འདི་སྐབས་གཏོར་མ་རྒྱབ་མདུན་གང་བདེར་བཤམས་ཀྱང་རུང་ངོ་། ༈ །རོལ་རྡོར་བྲག་གཏེར་སེང་གདོང་མའི་རྗེས་གནང་ལ། ཚོམ་བུ་ལྷ་གྲངས་དབུས་སུ་བུམ་པ་ཁ་རྒྱན་སྐུ་ཙཀ་དང་བཅས་པ། ཕྲེང་བ། ཤེལ་རྡོ། མཁའ་འགྲོའི་གཏོར་མ་ཕྱག་མཚན་གྲི་ཐོད་ཁ་ཊྭཱཾ་རྣམས་གཡས་གཡོན་དུ་བཀོད་དོ།། ༈ །།དེ་ནས་འཇིག་རྟེན་མཆོད་བསྟོད་ཀྱི་སྐོར་ལས། ཉང་གཏེར་དྲེགས་པའི་སྡེ་དཔོན་སུམ་ཅུའི་སྲོག་དབང་ལ། རས་བྲིས་སྟེང་འཛོམ་ན་ཕུར་པ་ལྷ་གྲངས་དང་ཙཀ་ལི་རྣམས་ལྷ་གནས་སོ་སོར་བཀོད། མ་འཛོམ་ན་དབུས་སུ་ཕུར་པ་གཅིག །དྲེགས་པའི་སྡེ་དཔོན་སུམ་ཅུའི་ལྷ་ཙཀ་སྤོ་སྟེ་བཀོད་པའི་སྟེང་དུ་ཁྲིའུ་ལ་ཕུར་བུ་གཟུག །ཆེ་མཆོག །ཕྱག་རྡོར། རྟ་མགྲིན། རྡོར་སེམས་ཀྱི་སྐུ་རྣམས་བཞུགས། མཐའ་སྐོར་དུ་ཐོད་པ་འཁོར་ལོ་དང་སྲོག་ཡིག་བྲིས་པ་ལ་འབྲུ་དང་རིན་པོ་ཆེས་བཀང་བ། རི་རབ་སྟེང་ལྷ་བཤོས་བཞི་དང་མར་མེ་ལྔ་བཞག་པ། རི་རབ་གླིང་བཞིའི་ཙཀ་ལི། བ་དན། རུ་མཚོན། རྒྱལ་མཚན། མཆོད་རྟེན་ནག་པོ། རྫས་རྒོད། རཀྟ། ཡུངས་ཀར། ཕུར་པ། རལ་གྲི་རྣམས་བཀོད། ༈ རོལ་རྡོར་གཏུམ་པོ་དྲེགས་འདུལ་གྱི་གཏོར་དབང་ལ། ཚོམ་བུ་གཅིག་སྟེང་དཔལ་གཏོར་རྒྱན་ལྡན་དང་། ཐོད་ཆང་། རྡོ་རྗེ་བཅས་བཞག ༈ །གཏེར་གསར་གསང་བདག་དྲེགས་འདུལ་རྩ་དབང་ལ། རས་བྲིས་སམ་ཚོམ་བུ་གཅིག་པའི་སྟེང་རྣམ་བུམ། སྐུ་ཙཀ །སྔགས་བྱང་། རཀྴའི་ཕྲེང་བ། ལྕགས་རྡོར། གསང་ཐོད་རིག་ཙཀ་མེ་ལོང་ཤེལ་རྡོ་བཅས། ༈ དྲེགས་པའི་དབང་ལ། རས་བྲིས་སྟེང་དབང་ཆས་རྣམ་བུམ་སོགས་རིག་དབང་ལྔ། དེ་སྟེང་དྲེགས་པའི་སྡེ་དཔོན་སུམ་ཅུའི་ལྷ་ཙཀ །ཕྲེང་བ། སྔགས་བྱང་། རྡོར་དྲིལ། དཔལ་དང་དུར་ཁྲོད་ཆས། སྨན་རཀ་གཏོར་གསུམ་ཕྱོགས་བསྡུས་ཅན། གདབ་ཕུར། གསང་ཐོད། རིག་ཙཀ་རྣམས་བཀོད་དོ།། ༈ །།དེ་ནས་དམོད་པ་དྲག་སྔགས་ཀྱི་སྐོར་ལས། གཏེར་གསར་སྟོབས་ལྡན་ནག་པོ་ལ། བཤམ་བཀོད་སྔ་མ་དང་འདྲ་བ་ལས་ལྷ་ཙཀ་དམོད་པ་དྲག་སྔགས་དང་། སྔགས་བྱང་ཡང་དེ་ལྟར་བཞག ༈ ངག་གི་རྡོ་རྗེའི་ཕྱག་རྡོར་དྲག་སྔགས་མ་ལ། པདྨ་འདབ་བརྒྱད་ཚོམ་བུ་བཅས་པའི་དབུས་སུ་དཔལ་གཏོར་ཁྱུང་དང་རྡོ་རྗེ་ཉི་ཟླས་བརྒྱན་པ། ཤར་དང་ཤར་ལྷོ་ཞི་གཏོར་གཉིས་ཀྱིས་མཚོན་པའི་ཞི་རྒྱས་དབང་དྲག་གཏོར་མ་རྒྱན་ལྡན་དེ་རྒྱབ་སྡེ་བརྒྱད་གཏོར་མ་བརྒྱད་སོ་སོའི་སྲོག་ཡིག་ཤོག་གུར་བྲིས་པ་བཙུགས་པ་རྣམས་སྣོད་སོ་སོར་བཤམ། དབུས་སུ་ཁྲིའུའི་ཁར་རྣམ་བུམ་སྟེང་ཐོད་ཆང་དར་མཐིང་གིས་བཀབ། མདུན་དུ་གཏེར་སྲུང་ཐ་ར་ནག་པོ་ལ་གཏོར་མ་སྦྲུལ་དཀྲིས་གཙོ་འཁོར་གསུམ་ལིངྒས་བརྒྱན་པ་དང་། ཁྱུང་ལྔ་གཅིག་བསྡུས། རྒྱལ་ཆེན་བཞིའི་ཙཀ་ལི་སོ་སོ་བ། རཀྴའི་ཕྲེང་བ་བཅས། དར་སྣ་ལྔའི་ཅོད་པན། ༈ དེའི་ཚེ་དབང་ལ། ཚོམ་བུ་གཅིག་པའི་སྟེང་ཚེ་འབྲང་། གཡས་སུ་རྣམ་བུམ། གཡོན་དུ་ཐོད་ཆང་། རྒྱབ་ཏུ་ཚེ་གཏོར་ཐབས་ཤེས་ཁ་སྦྱོར་ལྟར། མདུན་དུ་ས་བདག་ཀླུ་གཉན། གཟའ་བརྒྱད། ཀླུ་བརྒྱད་སྒོ་མ་བཞིའི་སྐུ་ཙཀ་དྲེགས་འདུལ་ལྟར། སྣོད་གཅིག་ཏུ་གཏོར་ཆུང་ཉེར་བརྒྱད་དང་། དབང་ཕྲེང་། ཚེ་རིལ་ཆང་བཅས། ༈ དག་སྣང་དྲང་སྲོང་དྲི་མེད་ལ། མཎྜལ་པད་འདབ་བཞི་ཚོམ་བུ་གཅིག་པའི་ཁར་རྣམ་བུམ། སྐུ་ཙཀ །གཡས་སུ་ཚེ་རིལ། གཡོན་དུ་ཚེ་ཆང་། མདུན་དུ་འབུལ་གཏོར་དཀར་ཟླུམ་ཤིང་ཏོག་དཀར་མངར་གྱིས་བརྒྱན་པ། ༈ ལོཀྟྲི་པཱ་ལར། ཚོམ་བུ་གཅིག་པའི་སྟེང་དཀར་གཏོར་མངར་གསུམ་ཤིང་ཏོག་སྐུ་ཙཀ་གིས་བརྒྱན་པའི་གཡས་གཡོན་དུ་རལ་གྲི་ཐོ་བ། མདུན་དུ་འབུལ་གཏོར། ཆངས་བུ་བརྒྱད་གྱེན་བསླངས་གཏོར་མ་རྣམས་བཞག ༈ །གཏེར་གསར་ལོཀྟྲི་ལ། ཚོམ་བུ་གཅིག་པའི་རྣམ་བུམ། མདུན་དུ་དབང་གཏོར་དང་ཕྱག་མཚན་གོང་མཚུངས། སྔགས་བྱང་བཅས་སོ།། ༈ །།དེ་ནས་མཁའ་འགྲོའི་སྐོར་ལས་ཐོག་མར། ༈ ཉང་གཏེར་ཕག་མོ་ཞལ་གཉིས་མ་ལ། རྡུལ་ཚོན་ནམ་རས་བྲིས་སྟེང་ཁྲིའུ་ལ་ཐོད་པ་དུམ་གཅིག་བདུད་རྩིས་བཀང་བའི་ཁར་མེ་ལོང་ལ་སིནྡྷུ་རས་ཆོས་འབྱུང་ལྟེ་བར་བཾ། མཐར་སྔགས་ཕྲེང་གིས་བསྐོར་བའི་ཟུར་གསུམ་དུ་དགའ་འཁྱིལ་རེ་རེ་བྲིས་པས་བཀབ་པའི་སྟེང་དར་དམར་གྱི་གུར་ཕུབ། གཡས་སུ་རྣམ་བུམ། གཡོན་དུ་མེ་ཏོག་དམར་པོ། རྒྱབ་ཏུ་ཏིང་ལོ་དམར་པོ་སློབ་མའི་གྲངས་མཉམ། གཡོན་དུ་མཁའ་འགྲོའི་གཏོར་མ་རྒྱན་ཤ་ཆང་བཅས། འཛོམ་ན་བྱིན་འབེབས་སྦྱར་སྤོས། མ་འཛོམ་ན་སྤོས་དྲི་ཞིམ་པོའང་འདུ་བྱ། ༈ ཕག་མོ་དོན་གྲུབ་མ་ལ། མཎྜལ་གཞུང་མཐུན་སྟེང་མེ་ཏོག་དམར་པོའི་ཚོམ་བུ་བཀོད་པར་དར་གུར་དབུབ། ཏིང་ལོ་དམར་པོ་སློབ་མའི་གྲངས་མཉམ། སྦྱར་སྤོས་དང་། ཁྱད་པར་མཆོད་པ་གང་འཛོམ་གཞུང་གསལ་ལྟར་ལ་མ་འཛོམ་པ་རྣམས་དེར་མོས་པའི་ས་བཅད་ཙམ་རེ་བཞག ༈ །དབུ་བཅད་མ་ལ། རྡུལ་ཚོན་ནམ་རས་བྲིས་སྟེང་ཁྲིའུར་བུམ་པའི་ཁར་ཐོད་ཆང་། དེ་སྟེང་མེ་ལོང་ལ་ཆོས་འབྱུང་དབུས་སུ་ཨོཾ་གཡས་ཧཱུྃ་གཡོན་དུ་ཨཱཿ ཕྱིའི་མུ་ཁྱུད་ལ་སྔགས་གསུམ་བྲིས་པས་བཀབ་ཅིང་དར་གདུགས་ཕུབ། ༈ ཁྲོས་ནག་ལ། རས་བྲིས་སྟེང་བུམ་པའི་ཁར་ཐོད་ཆང་། དེ་སྟེང་མེ་ལོང་ལ་ཆོས་འབྱུང་བསྣོལ་མ་དགའ་འཁྱིལ་དྲུག་དང་བཅས་པའི་ལྟེ་བར་ཨ། ཕྱོགས་བཞིར་ཧ་རི་ནི་སའི་མཐར་རྩ་སྔགས་ཀྱིས་བསྐོར་བ་བཞག་ལ། དར་དམར་བརྒྱད་ལྟེབས་ཀྱིས་གུར་ཕུབ། ཤར་དུ་སྐུ་ཙཀ །ལྷོར་སྔགས་བྱང་། ནུབ་ཏུ་གྲི་ཐོད་ཁ་ཊྭཱཾ་དུར་ཁྲོད་ཆས་རྣམས་ཕྱོགས་བསྡུས། བྱང་དུ་སྒྲུབ་ཡིག་རྣམས་བཀོད། དབང་ཕྲེང་། ཐོད་ཆང་རྣམས་ཀྱང་འདུ་བྱ། ༈ ཁྲོས་ནག་དབང་རྒྱས་པ་ལ། སྔ་མའི་སྟེང་ལྷ་ཙཀ་ཚང་བ། དབུ་རྒྱན་རྡོར་དྲིལ། མིང་དབང་ཆས། མདུན་རྒྱབ་གང་བདེར་གཏོར་ཆེན་སྐུ་རྟེན་དར་གདུགས་ཀྱིས་སྤྲས་པ། གཙུག་རྒྱན་ནོར་བུ། ཁ་ཊྭཱཾ། གྲི་གུག །ཐོད་ཁྲག །རྒྱན་དྲུག །ཐོད་རློན་དོ་ཤལ། སྟག་ཤམ་རྣམས་སོ་སོ་བ། དུར་ཁྲོད་ཆས་ཕྱོགས་བསྡུས་བཅས་བཀོད། ༈ གཏུམ་མོའི་མེ་དབང་ལ། མཎྜལ་ཆོས་འབྱུང་ཉིས་བརྩེགས་སམ། འབྲུ་ཚོམ་ལྔ་བཀོད་པའི་དབུས། ཐོད་སྟེགས་མི་མགོའི་སྒྱེད་བུ་གསུམ་གྱི་ཁར། ཐོད་ཆང་སྨན་ཕབ་དང་དྲོད་སྨན་སྦྱར་བས་བཀང་བའི་ཁར་མེ་ལོང་སིནྡྷུ་རའི་ཆོས་འབྱུང་བསྣོལ་མའི་དབུས་དང་ཕྱོགས་བཞིར་ཨ་ཧ་རི་ནི་ས་ལ་རྩ་སྔགས་ཀྱིས་གཡོན་དུ་བསྐོར་བས་བཀབ། དེ་སྟེང་མཉྫིའི་སྟེང་ཐོད་སྣོད་དུ་འབྲུ་བཟང་པོའི་རྗེན་ལ་བདུད་རྩི་ཆོས་སྨན། རིན་པོ་ཆེ་འབྲུ་སྨན་ཤ་ཁྲག་མེ་ཏོག་ཕྱེ་སྟེ་ཁྱད་པར་གྱི་རྫས་བསྲེས་ལ་དཔལ་གཏོར་ཟུར་གསུམ་རྣམ་པ་འཁོར་རང་འདྲ་བཞིས་བསྐོར་བའི་མཐར་དཀར་མངར་རིགས་དང་དྲོད་སྨན་གང་འཛོམ་སྦྱར་བའི་རིལ་བུ་སློབ་མའི་གྲངས་མཉམ་གཅེར། སྐུ་རྟེན་དང་དར་གདུགས་ཕུབ། དཀྱིལ་འཁོར་གྱི་མཐར་བུར་སྦྲང་དང་དྲོད་སྨན་སྦྱར་བའི་ཟན་ལ་སློབ་མའི་གྲངས་ལས་ལྷག་པའི་ཞུན་མར་གྱི་ཏིང་ལོ། གཞན་ཡང་མཁའ་འགྲོའི་གཏོར་འབུལ་གཉིས་བཅས་བཀོད། ༈ མཁའ་འགྲོ་གསང་བ་ཀུན་འདུས་རྩ་དབང་ལ། དཀྱིལ་འཁོར་རས་བྲིས་དབུས་མཉྫིའི་ཁར་ཐོད་པ་མཚན་ལྡན་ཆང་ལ་བདུད་རྩི་ལྔ་སྦྱར་བས་བཀང་བའི་ཁར། སིནྡྷུ་རའི་མེ་ལོང་ལ་ཆོས་འབྱུང་བསྣོལ་མའི་ལྟེ་བར་བཾ། མཐའ་སྐོར་དུ་ཐུགས་གསུང་སྐུའི་སྔགས་རིམ་པ་གསུམ་དུ་བསྐོར་བས་བཀབ་པའི་སྟེང་དུ་ཤེལ་རྡོ། མདུན་དུ་གཙོ་འཁོར་སོ་བདུན་གྱི་ལྷ་ཙཀ །ཕྱོགས་གང་བདེར་གསང་དབང་ཐོད་པའི་བདུད་རྩི། དཔལ་འབར། མེ་ལོང་གསལ་བ། གཙོ་མོའི་སྐུ་ཙཀ །མདའ་གཞུ། མར་མེ། རིག་ཙཀ་རྣམས་དང་རྗེས་གནང་ཆས། ཕྲེང་བ། དུང་། གླེགས་བམ། དུར་ཁྲོད་ཆས་བརྒྱད། ཤ་ལྔ་བདུད་རྩི་ལྔའི་རིལ་བུ་ཐོད་ཆང་དུ་བླུགས་པའམ་མ་འཛོམ་ན་གཟུགས་བརྙན་བྲིས་པ་བཅས་བཀོད། བཀའ་སྲུང་བཀའ་གཏད་ལ་གཏོར་མ་ཟུར་གསུམ་གཙོ་འཁོར་གསུམ་པ་དར་གདུགས་ཅན་ཡང་བཀོད། ༈ གཏོར་དབང་ལ་གཏོར་མ་གཞུང་གསལ་སྐུ་ཙཀ་དར་གདུགས་ཀྱིས་བརྒྱན་པ་དཀྱིལ་འཁོར་ཀྱི་དབུས་སུ་བཀོད། སྔ་མའི་ཞར་བྱུང་བྱེད་ན་དཀྱིལ་འཁོར་རྒྱབ་ཕྱོགས་ལྟ་བུར་བཞག །གཉིས་ཀ་ལའང་སློབ་མ་ལ་སྦྱིན་རྒྱུ་ཟས་སྣ་དང་ཐོད་ཆང་ལྷན་ཅིག་ཏུ་བཀོད་དོ། ༈ །རྡོ་རྗེ་མཁའ་འགྲོའི་ཚེ་སྒྲུབ་སོགས་བཞི་ལ། འཛོམ་ན་རས་བྲིས་དཀྱིལ་འཁོར། མ་འཛོམ་ན་མཁའ་འགྲོ་བཞི་ལ་རིམ་བཞིན་ཚོམ་བུ་ལྷ་མདོག་བཀོད་པའི་སྟེང་སོ་སོའི་དབང་རྫས་བཤམ་དགོས་པས། འདི་ལ་ཚོམ་བུ་དཀར་པོ་གཅིག །དེ་སྟེང་ཚེ་འབྲང་། གཡས་གཡོན་དུ་ཚེ་རིལ་ཆང་དང་མདའ་དར་བཀོད། ༈ རིན་ཆེན་མཁའ་འགྲོའི་ནོར་སྒྲུབ་ལ། གཏོར་མ་རིན་ཆེན་འབར་བའི་དབྱིབས་ཅན་ནོར་བུ་མིག་གསུམ་མང་པོས་མཛེས་པར་བསྐོར་བ་རྒྱན་སྤྲོས་དར་གདུགས་སེར་པོ་ཅན། གཡས་སུ་ཐོད་པའི་བདུད་རྩི། གཡོན་དུ་ཐོད་པ་མཚན་ལྡན་འཁོར་ལོ་གཞུང་གསལ་དང་གཡང་རྫས་སྣ་ཚོགས་པས་བཀང་བ་བཞག ༈ །པདྨ་མཁའ་འགྲོའི་དབང་སྡུད་ལ། སྐུ་རྟེན་བྲིས་སྐུ། གསུང་རྟེན་སྲོག་འཁོར། ཐུགས་རྟེན་བྷནྡྷར་དབང་གི་རིལ་བུས་བཀང་བ་རྣམས་གཞུང་མཐུན་བྱས་ལ་གཡས་གཡོན་མདུན་གསུམ་དུ་བཀོད། དབང་གི་མེ་ཐབ། ཡམ་ཤིང་། མར་ཁུ། མངར་གསུམ་ལ་རྫས་སྦྱར་གྱི་རིལ་བུ། མེ་ཏོག་དམར་པོ་ཆང་གིས་སྦགས་པ། ལན་ཚྭ་བཅས་སྲེག་རྫས་རྣམས་དང་། དགང་བླུགས། གསེར་སྐྱེམས་མཆོད་པ་བཅས་འདུ་བྱ། ༈ ལས་ཀྱི་མཁའ་འགྲོའི་ཟོར་དབང་ལ། ཟངས་ལྕགས་ཀྱི་སྣོད་དུ་ཟོར་གཏོར་ཁྲོ་མོའི་ཞལ་ཅན་གཏོར་ཆུང་ལྷ་གྲངས་ཀྱིས་བསྐོར་བ། དེ་རྒྱབ་ཟོར་ཀོང་། ཟུར་གསུམ་བརྒྱད་ལ། ཤར་དུ་ཡུངས་ཀར། ལྷོར་རྩང་། ནུབ་ཏུ་དུག །བྱང་དུ་རྡོ། ཤར་ལྷོར་མེ། ལྷོ་ནུབ་དུག་ཁྲག །ནུབ་བྱང་མདའ། བྱང་ཤར་ཕུང་སའི་ཟོར་རྣམས་བཀོད། མཚེ་ཉུངས་ཤ་ཁྲག་གིས་བརྒྱན་ཅིང་དར་ནག་གི་གདུགས་ཕུབ་ལ། གཡས་གཡོན་དུ་སྔགས་བྱང་དང་། གནམ་ལྕགས་རྡོ་རྗེ་བཞག །ཕྱག་རྒྱ་བཞིའི་ཆས། ཧོམ་དང་ལིངྒ་། བྱང་ཐག །དུག་ཁྲག །སྒྲོལ་ཕུར། རྩེ་གསུམ། གྲི་གུག །ཐོད་ངན་དུ་ཁྲག་ཐུན་སྦྱར་བ་རྣམས་ཉེ་བར་བསྡོག་གོ ༈ །གཡག་ཆར་སྔོན་མོའི་སྒྲོལ་ལྗང་ལ། མཎྜལ་ཚོམ་བུ་ལྗང་གུ་གཅིག་བཀོད་པའི་སྟེང་མཉྫི་ལ་བུམ་པ་ཉེར་ལྔའི་རྫས་དང་ཆིངས་ལྗང་ཅན། མདུན་དུ་དབང་གཏོར་དཀར་ཟླུམ། སྐུ་ཙཀ །སྔགས་ཕྲེང། ཨུཏྤལ་ལྗང་གུའི་ཙཀ་ལི་བཅས་བཀོད། ༈ བླ་མ་དགོངས་འདུས་མཁའ་འགྲོའི་དབང་། རས་བྲིས་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་བསྣོལ་མའི་དབུས་སུ་པདྨ་འདབ་བཞིའི་ལྟེ་བར་ཧྲཱིཿམ་བཾ། འདབ་བཞིར་ཧ་རི་ནི་ས། རྩིབས་དྲུག་དགའ་འཁྱིལ་བྲིས་པ་རྣམས་བརྩེགས་པ་དར་དམར་གྱིས་བཀབ། རིགས་ལྔའི་ཕྱག་མཚན་སོ་སོ་བ། དབུ་རྒྱན། མེ་ལོང་། མཁའ་འགྲོའི་སྐུ་རྟེན། སྒྲུབ་ཡིག་དབང་ཕྲེང་། ཅོད་པན་རྣམས་དང་། རྒྱབ་ཏུ་མཁའ་འགྲོའི་གཏོར་མ་གཙོ་འཁོར་ལྔ་རྒྱན་ཅན་བཀོད། ༈ རཏྣའི་མཚོ་རྒྱལ་སྐོར་གསུམ་གྱི་མཚོ་རྒྱལ་ལ། རས་བྲིས་སྟེང་གཏོར་གདན་ཕོར་པ་ལྟ་བུའི་སྟེང་པདྨ་འདབ་བརྒྱད། དེ་སྟེང་རིན་ཆེན་འབར་བ་འདབ་བརྒྱད་རིལ་བུས་བསྐོར་བ་རྒྱན་སྤྲོས་སྐུ་ཙཀ་དར་གདུགས་ཅན་བཞག ༈ སྒྲོལ་མ་ལ། མཎྜལ་ཚོམ་བུ་གཅིག་བཀོད་པའི་སྟེང་བུམ་པ་ཉེར་ལྔའི་རྫས་དང་རྒྱན་ལྡན། ༈ ཁྲོས་ནག་ལ། རས་བྲིས་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་ལྟེ་བར་མ། མཐའ་སྐོར་སྙིང་པོ་བྲིས་པ་བཞག་ལ་དར་དམར་གྱིས་བཀབ་པའི་སྟེང་དུ་ཁྲོས་ནག་སྐུ་བརྙན་བྲིས་འབུར་གང་རིགས་བཞུགས། འདི་གསུམ་དཀྱུས་གཅིག་ཏུ་བསྐུར་ན། གཡས་གཡོན་དབུས་གསུམ་དུ་བཀོད། ༈ ཕག་མོ་ཟབ་རྒྱ་ལ། རས་བྲིས་དབུས་ཐོད་ཆང་བྱང་སེམས་དཀར་དམར་ཆོས་སྨན་བཏབ་པའི་ཁྲིའུ་ལ་དཔལ་གཏོར་རྟ་ཞལ་དང་ཕག་ཞལ་གྱིས་མཚན་པ་རྒྱན་སྤྲོས་དར་གདུགས་ཅན་བཤམ། ༈ ཕག་དཀར་ཡེ་ཤེས་འཁོར་ལོ་ལ། སྐུ་མཚན་མའི་དཀྱིལ་འཁོར་གཞུང་མཐུན་བྲིས་པའམ། མཎྜལ་ལ་མེ་ཏོག་དཀར་པོའི་ཚོམ་བུ་གཅིག་བཀོད་པའི་སྟེང་ཁྲིའུ་ལ་གསུང་བདུད་རྩིའི་དཀྱིལ་འཁོར་ཀ་པཱ་ལ་ཨ་མྲྀཏའི་བཅུད་ལྡན་གྱི་ཁར། ཐུགས་མེ་ལོང་ལ་སིནྡྷུ་ར་བརྡལ་བར་ཆོས་འབྱུང་བསྣོལ་མའི་དབུས་སུ་ཧྲཱིཿགྲ་བཞིར་དགའ་འཁྱིལ་རེ་རེ་བྲིས་པས་དགབ། མདུན་དུ་སྐུ་ཙཀ །ཤེལ་ཕྲེང་། ཁ་ཊྭཱཾ་ག །སྒྲུབ་ཡིག །སྣ་ཚོགས་རྡོ་རྗེ་དང་བདུད་རྩི། གཡས་སུ་ཐོད་པ་མཚན་ལྡན་གཞུང་མཐུན་ཚེ་རིལ་གྱིས་བཀང་བའི་ཁ་དར་དམར་གྱིས་བཀབ་པ་དང་ཚེ་འབྲང་དཀར་མངར་བཟའ་བཏུང་། གཡོན་དུ་བདུད་རྩི་རིལ་བུས་བཀང་བའི་སྨན་གྱི་ཕོ་བྲང་། སྐོང་ཆོག་དབང་རྟེན་མར་མེ་རྣམས་བཀོད། ༈ ཞིག་གླིང་སྒྲོལ་དཀར་ལ། རྡུལ་ཚོན་སོགས་ཀྱི་དཀྱིལ་འཁོར་སྟེང་རྣམ་བུམ་ཉེར་ལྔའི་བཅུད་ལྡན་ཁ་རྒྱན་ལ་སྐུ་ཙཀ་བཙུགས་པའི་མདུན་དུ་དཀར་ཟླུམ་རྒྱན་ལྡན། ཤེལ་རྡོ། ཨུཏྤལ་དཀར་པོ་རྣམས་དང་། རིལ་ཆང་མདའ་དར་སྤྱི་ལྟར། ཤེལ་ཕྲེང་། རྒྱལ་སྲིད་རྫས་བརྒྱད་ཕྱོགས་བསྡུས་རྣམས་བཞག ༈ །སྤྲུལ་སྐུའི་སྙིང་ཐིག་གི་སྒྲོལ་དཀར་ལ། པདྨ་འདབ་བརྒྱད་སྟེང་རྣམ་བུམ། གཡས་སུ་གཏོར་ཟླུམ་འཁོར་བཞིས་བསྐོར་བ་སྐུ་ཙཀ་དར་གདུགས་ཅན། གཡོན་དུ་ཤེལ་རྡོ་དང་། ཤེལ་ཕྲེང་། རྒྱབ་ཏུ་རིལ་ཆང་སྣ་བདུན་རྫས་བརྒྱད་ཕྱོགས་བསྡུས་བཅས། ༈ སྲོག་སྒྲུབ་ཕག་མོ་ལ། རས་བྲིས་དབུས་རྣམ་བུམ་བཀོད་པའི་འོག་ཏུ་མར་མེ་སྦར། མདུན་སོགས་སུ་གསང་ཐོད་མེ་ལོང་སིནྡྷུ་རའི་ཐིག་ལེ་ཅན་དར་དམར་གྱིས་བཀབ། མེ་ལོང་གཡའ་དག་ཤེལ་རྡོ། རྨ་བྱའི་མདོངས། རིག་ཙཀ །དཔལ་འབར་མཐོ་གང་བ་ལྔ་སྣོད་གཅིག་ཏུ་བཙུགས་པ། བདུད་རྩི། རུས་རྒྱན་རྐང་གླིང་ཌཱ་རུ་སོགས་བཀོད། ༈ སྨིན་གླིང་གསང་ཡེ་ལ། དཀྱིལ་འཁོར་གཞུང་མཐུན་སྟེང་རྣམ་བུམ་ཐོད་ཆང་མེ་ལོང་ཆོས་འབྱུང་ལྟེ་བར་ཧྲཱིཿ ཟུར་གསུམ་དུ་ཨོཾ་ཨཱཿཧཱུྃ། ལོགས་གསུམ་དགའ་འཁྱིལ་བྲིས་པ་རྣམས་བརྩེགས་ལ་དར་དམར་གྱི་གུར་ཕུབ། བགེགས་གཏོར་དཔལ་འབར་བཙུགས་པ་དང་། སློབ་མའི་གདན་དགའ་འཁྱིལ་དམར་སེར་ཡང་འདུ་བྱ། ༈ སྟག་ཤམ་མཚོ་རྒྱལ་ལ། རས་བྲིས་སམ་མཎྜལ་སྟེང་ཚོམ་བུ་གཙོ་འཁོར་དགུ་དེ་རྒྱབ་ཕྱོགས་བཞིར་བཀོད་པའི་སྟེང་། ་གཏོར་མ་རྒྱ་གར་དམ་གཟུགས་མའམ་མ་ཤེས་ན་གཏོར་ཟླུམ་དཀར་པོ་པད་འདབ་བཞི་པའི་ཕྱོགས་བཞིར་དཀར་བཤོས་བཞི། མཚམས་བཞིར་དམར་གཏོར་བཞི། དེ་རྒྱབ་ཐེབས་ཀྱུ་བཞིས་བསྐོར་བ། རྒྱན་སྤྲོས། སྐུ་ཙཀ །དར་གདུགས་བཅས་པ། ཤར་དུ། རྣམ་བུམ། ལྷོར་དབུ་རྒྱན། ནུབ་ཏུ་རྡོ་རྗེ། བྱང་དུ་དྲིལ་བུ། དབུས་མདུན་རྡོར་དྲིལ་ལྷན་ཅིག་པ་དང་ཅོད་པན། མཚམས་བཞིར་ཤེལ་ཕྲེང་། སྦ་ལྕགས་ཚིགས་གསུམ་དར་སྣ་བཏགས་པ། ཌཱ་དྲིལ། རྐང་གླིང་རྣམས་བཀོད། གཞན་ཡང་གསང་ཐོད་བདུད་རྩི་རིག་ཙཀ །ཤེལ་རྡོ་མེ་ལོང་རྨ་བྱའི་མདོངས། ལས་བུམ། བདུད་རྩི་རིལ་བུའམ་ཆོས་སྨན་རིལ་མོ་སློབ་མའི་གྲངས་མཉམ། སིནྡྷུ་ར། ཐོག་མར་སྦྱིན་རྒྱུའི་ཅོད་པན་དམར་པོ། སོ་ཤིང་། སྲུང་སྐུད་སྔོ་དམར་འདོགས་རྒྱུ། ཀུ་ཤའི་ཆུན་པོ་རྣམས་ཉེ་བར་བསྡོག ༈ །ཆོས་གླིང་ཁྲོས་ནག་ལ། བསྙེན་སྒྲུབ་བཅས་འཛོམ་དཀའ་བས་དབང་བསྐུར་དཀྱུས་མར་སྤྱི་འགྲོ་ཙམ་དུ། རས་བྲིས་སམ་ཚོམ་བུའི་སྟེང་ཐོད་ཆང་ཁར་མེ་ལོང་ལ་ཆོས་འབྱུང་དགའ་འཁྱིལ་ཕྱག་མཚན་ས་བོན་ལྔ་བྲིས་པས་བཀབ་ལ་དར་དམར་གྱི་གུར་ཕུབ། མདུན་དུ་རྣམ་བུམ། རུས་རྒྱན། ཐོད་ཌཱར་ཁ་ཊྭཱཾ་བམ་རོ་ཤ་ལྔའི་བཟང་བཏུང་རྣམས་བཀོད། ༈ རོལ་རྡོར་ཕག་མོ་ལ། རས་བྲིས་སམ་ཚོམ་བུ་དམར་པོའི་ཁར་རྣམ་བུམ་སྐུ་ཙཀ་དང་བཅས་པ། གཡས་སུ་ཐོད་ཆང་དང་བགྲང་ཕྲེང་དམར་པོ། གཡོན་དུ་མེ་ལོང་སིནྡྷུ་རའི་ཐིག་ལེ་བཀོད་པ་དང་ཤེལ་རྡོ། རྒྱབ་ཏུ་དབང་གཏོར་གཞུང་གསལ། མདུན་དུ་རིགས་ལྔའི་ཕྱག་མཚན་རྣམས་བཀོད། ༈ ཐུགས་རྡོར་སྒྲོལ་དཀར་ལ། མཎྜལ་ཚོམ་བུ་གཙོ་བོ་གཅིག་ལ་འཁོར་ཉེར་གཅིག་གིས་བསྐོར་བའི་སྟེང་བུམ་པ་ཆིངས་དཀར་ཉེར་ལྔའི་བཅུད་ལྡན། དེ་སྟེང་ཐོད་པའི་བདུད་རྩི་དང་མེ་ལོང་ཤེལ་རྡོ་བཀོད། ཚེ་རིལ་ཆང་མདའ་དར་བཅས་བཤམ། ༈ ཀློང་སྙིང་ཡུམ་བཀའ་བདེ་ཆེན་རྒྱལ་མོའི་རྩ་དབང་ལ། རས་བྲིས་སམ་ཚོམ་བུ་དམར་པོ་གཅིག་བཀོད་པའི་སྟེང་ཐོད་ཆང་ཉེར་ལྔའི་རྫས་དང་ཆོས་སྨན་གྱིས་བཀང་བའི་ཁར་སིནྡྷུ་རའི་མེ་ལོང་ཆོས་འབྱུང་བསྣོལ་མ་བྲིས་པའི་དབུས་སུ་དགའ་འཁྱིལ་ཏཱཾ་གྱིས་མཚན་པ། ཕྱོགས་བཞིར་དགའ་འཁྱིལ་བཞི་ལ་ཧ་རི་ནི་ས་མགོ་ཕྱིར་བསྟན་བྲིས་པས་བཀབ། དེ་སྟེང་དྲིལ་བུ་བཞག་ལ་དར་གུར་ཕུབ། ༈ འཕགས་མའི་སྙིང་ཐིག་གི་རྩ་དབང་ལ། སྟ་གོན་རྫས་བཞི། སློབ་མ་མཆོད་པ་བསྡོག །རས་བྲིས་ཀྱི་དཀྱིལ་འཁོར་དབུས་ཁྲིའུ་ལ་རྣམ་བུམ་ཉེར་ལྔའི་བཅུད་ལྡན་མགུལ་ཆིངས་དཀར་པོ་ཁ་རྒྱན་གཟུངས་རྡོར་དང་བཅས་པ། ཤར་དུ་དབུ་རྒྱན། ལྷོར་རྡོ་རྗེ། ནུབ་ཏུ་དྲིལ་བུ། བྱང་དུ་རྡོར་དྲིལ་ལྷན་ཅིག་པ། གཙོ་འཁོར་ལྷ་ཙཀ་བཅུ་གཅིག །ཤེལ་ཕྲེང་། མེ་ལོང་། གསང་ཐོད། རིག་ཙཀ །ཤེལ་རྡོ་རྣམས་སྤྱི་ལྟར་བཀོད། རྗེས་གནང་ཆས་དུང་། དྲིལ་བུ། སྒྲུབ་པོད། གླེགས་བམ། གདུགས་རྣམས་ཀྱང་ཟུར་དུ་འཇོག ༈ །ཡང་ཟབ་བྱིན་རླབས་ལ། རས་བྲིས་དབུས་སུ་ཐོད་པར་བཅུད་ལེན་རིལ་བུ། གཡས་སུ་རྣམ་བུམ། གཡོན་དུ་ཚེ་འབྲང་། ༈ ཐུན་མོང་རྗེས་གནང་ལ། དཀྱིལ་འཁོར་དབུས་བུམ་པ། གཡས་སུ་ཐོད་ཆང་། གཡོན་དུ་ཚེ་འབྲང་། མདུན་དུ་ཚེ་རིལ་རྣམས་བཞག ༈ །མཆོག་གླིང་གཏེར་གསར་མཁའ་འགྲོའི་སྐོར་གྱི་མཁའ་འགྲོ་དགོངས་འདུས་སྙིང་པོ་ལ། རས་བྲིས་སམ་དགུ་ཚོམ་སྟེང་རྣམ་བུམ། གཡས་སུ་གསང་ཐོད། གཡོན་དུ་རིག་ཙཀ །མདུན་དུ་ཤེལ་རྡོ་དང་རྨ་བྱའི་མདོངས། རྒྱབ་ཏུ་དཔལ་གཏོར་རྒྱན་ལྡན་བཀོད། ༈ ཐུགས་སྒྲུབ་སྒྲོལ་ལྗང་ལ། རས་བྲིས་སམ་མཎྜལ་ཚོམ་བུ་ཉེར་གཅིག་པའི་དབུས་སུ་རྣམ་བུམ། མདུན་དུ་དབང་གཏོར་ཅོག་ཟླུམ་དཀར་པོ་རྒྱན་ལྡན། སྐུ་བརྙན། ཤེལ་ཕྲེང་། ཕྱག་མཚན་ཨུཏྤལ་ལྗང་གུ་རྣམས་ཇི་ལྟར་བདེ་བར་བཀོད། ༈ དགོངས་གཏེར་སྒྲོལ་མའི་ཟབ་ཏིག་གི་ཕྱི་སྒྲུབ་ལ། མཎྜལ་ལ་འབྲུ་དཀར་གྱི་ཚོམ་བུ་དབུས་སུ་གཅིག །མཐའ་སྐོར་དུ་ཉེར་གཅིག་བཀོད་པའི་མདུན་དུ་གཟུངས་བུམ་ཉེར་ལྔའི་བཅུད་ལྡན་མགུལ་ཆིངས་ཁ་རྒྱན་ཅན་བཀོད། ༈ ནང་སྒྲུབ་ལ། རས་བྲིས་ཀྱི་དཀྱིལ་འཁོར་བཏིང་། ཤར་སྒོར་གཡས་སུ་རྣམ་བུམ་ཉེར་ལྔའི་བཅུད་ལྡན་ཆིངས་ལྗང་གུ་གཟུངས་རྡོར་བཅས། ཅི་ལྟར་བདེ་བར་དབུ་རྒྱན། རྡོ་རྗེ། དྲིལ་བུ། གཙོ་འཁོར་དགུ་པོའི་ལྷ་ཙཀ །སྔགས་ཕྲེང་བཀོད། ༈ གསང་སྒྲུབ་ལ། རས་བྲིས་དཀྱིལ་འཁོར་རམ་མ་འཛོམ་ན་ཚོམ་བུ་གཙོ་འཁོར་དགུ་བཀོད་པའི་དབུས་སུ་མཉྫི་ལ་རྣམ་བུམ་བཅུད་ལྡན་ཆིངས་ལྗང་གུ་ཅན་གྱི་ཁར། ཐོད་པ་མཚན་ལྡན་བདུད་རྩིས་བཀང་བའི་སྟེང་དུ་མེ་ལོང་སིནྡྷུ་རའི་དཀྱིལ་འཁོར་ཆོས་འབྱུང་བསྣོལ་མ་དགའ་འཁྱིལ་དང་བཅས་པའི་ལྟེ་བར་ཏཱཾ། མཐར་གཡོན་བསྐོར་དུ། ཨོཾ་ཏཱ་རེ་ཏུཏྟཱ་རེ་བཛྲ་ཝཱ་ར་ཧཱི་བཾ་སྭཱ་ཧཱ། ཞེས་བྲིས་པ་བཞག་ལ་དར་དམར་གྲུ་གསུམ་གྱིས་བཀབ་པའི་སྟེང་ཤེལ་རྡོ་བཞག ༈ །ཟུར་བཟའི་ཐུགས་དམ་སྐོར་དྲུག་གི་མཁའ་འགྲོའི་སྐོར་ལས་དང་པོ་ཕག་མོ། གཉིས་པ་སྒྲོལ་མ། གསུམ་པ་གསང་ཡེ། བཞི་པ་མནྡཱ་ར་བ། ལྔ་པ་མཚོ་རྒྱལ་བཅས་སོ་སོའི་ལྷ་ཙཀ་བརྗེ་བ་མ་གཏོགས་དབང་གི་སྤྱི་ཁོག་འདྲ་བར། དཀྱིལ་འཁོར་རས་བྲིས་སམ་ཚོམ་བུ་གཙོ་འཁོར་ལྔ། དེ་རྒྱབ་བཞི་སྟེ་དགུ་བཀོད་པའི་ཁར་ཁྲིའུར་རྣམ་བུམ། གཡས་སུ་ཕྱི་ནང་གསང་གསུམ་ལ་དཔལ་གཏོར་དམར་པོ། ཡང་གསང་མཁའ་འགྲོ་གཉིས་ལ་གཏོར་ཟླུམ་དཀར་པོའི་དབང་གཏོར་རྒྱན་ལྡན། མདུན་དུ་ལྷ་སོ་སོའི་སྐུ་ཙཀ །སྔགས་བྱང་། མཆོད་རྟེན་དང་སོ་སོའི་ཕྱག་མཚན། གཡོན་དུ་གསང་ཐོད། ཤེར་དབང་ལ་པདྨ་དམར་པོའི་ཟེའུ་འབྲུར་རྡོ་རྗེ་དཀར་པོ་རྩེ་ལྔ་ཕྱེད་ནུབ་བྲིས་པ་རྣམས་བཀོད། མནྡཱ་ར་བར་ཚེ་འབྲང་དང་རིལ་ཆང་ཡང་བཞག་གོ ༈ །གསང་བ་ཡེ་ཤེས་ལ། ཚོམ་བུ་གཙོ་འཁོར་ལྔའི་སྟེང་བུམ་པ་ཐོད་ཆང་སིནྡྷུ་རའི་མེ་ལོང་ཆོས་འབྱུང་བསྣོལ་མ་ཧྲཱིཿམཐར་སྔགས་བྲིས་པ་རྣམས་བརྩེགས་ལ་དར་དམར་ཟུར་གསུམ་པས་བཀབ་པའི་སྟེང་ཤེལ་རྡོ་བཀོད། ༈ སྨིན་ལུགས་གཅོད་དབང་ལ། མཎྜལ་པདྨ་འདབ་བརྒྱད་སྟེང་རྣམ་བུམ། གཡས་གཡོན་དབུ་རྒྱན་རྡོར་དྲིལ། ཟླུམ་གཏོར། ཌཱ་རུ། རྐང་གླིང་། རུས་རྒྱན་ཙཀ་ལི་རྣམས་བཀོད་དོ།། ༈ །།དེ་ནས་ཆོས་སྐྱོང་རྣམས་ཀྱི་ཐོག་མ། ཡེ་ཤེས་མགོན་པོ་ལེགས་ལྡན་ཚོགས་ཀྱི་བདག་པོ་ལ། སྟ་གོན་རྫས་བཞི། རས་བྲིས་དབུས་རྣམ་བུམ་སོགས་རིག་དབང་ཆས་ལྔ། མདུན་དུ་དབང་གཏོར་སྐུ་ཙཀ་དར་གདུགས་ཀྱིས་བརྒྱན་པ། རྒྱབ་ངོས་སུ་གསང་ཐོད། རིག་ཙཀ །མེ་ལོང་དྭངས་པ་རྣམས་དང་། མཐའ་སྐོར་དུ། ལྕགས་ཁང་ལིངྒ་རལ་གྲི་དང་གྲི་གུག །ཞིང་དབྱུག་དང་བིང་། རྡོ་རྗེ། ཕུར་བུ། ཐོད་ཁྲག །རུ་མཚོན། སྦྲུལ་ཞགས། རྔ། ཡུངས་ཐུན། གུ་གུལ། རི་གླིང་། རྒྱ་གྲམ། མེ་ཕུང་། མདའ་གཞུ་ཟོར་ཀོང་རྣམས་སོ་སོ་བ་བཞག །འདི་ཕྱིན་ཆད་ཆོས་སྐྱོང་རྣམས་ལ་གཏོར་མ་མི་འདྲ་བ་སོ་སོར་ཡོད་པ་སོ་སོའི་དབང་ཆོག་དང་དཔེའུ་རིས་ལས་ཤེས་པར་བྱ་ཞིང་། གཏོར་སྣོད་ཐོད་པ་ཟངས་ལྕགས་སྐབས་བསྟུན། འཛོམ་ན་ཐམས་ཅད་ལ་སོ་སོའི་སྐུ་ཙཀ་དང་དར་གདུགས་རང་མདོག་འཛུགས་དགོས་པ་དང་། དཀྱིལ་ཐང་མེད་པའི་མཎྜལ་རིགས་ལ་དུག་ཁྲག་གིས་བྱུག ༈ །གཏེར་གསར་ཟབ་བདུན་ལེགས་ལྡན་ལ། རས་བྲིས་སྟེང་རྣམ་བུམ་ཁར་ཐོད་ཆང་དེ་སྟེང་མེ་ལོང་ལ་སིནྡྷུ་རས་ཆོས་འབྱུང་ནང་དབུས་སུ་ཐིག་ལེ་ཆེ་ཆུང་གསུམ། དེ་རྒྱབ་བཞི་བྲིས་པས་བཀབ་པའི་སྟེང་ཤེལ་རྡོ་བཞག །སྐུ་ཙཀ་བདུན། ཕྱག་མཚན་སེང་ཕུར། སྦྲུལ་ཞགས་དང་ཐོད་ཁྲག་གྲི་གུག་མཚོན་ཆ་འཁོར་ལོ། རལ་གྲི །སེར་བ་དང་ཆུ་སྲིན་ཞགས་པ། ཁྲམ་ཤིང་དང་ནད་རྐྱལ་རྣམས་དང་། སྲུང་ཟློག་བསད་མནན་སྲེག་འཕང་གི་རྫས་ཕྱོགས་བསྡུས་རྣམས་བཀོད། ༈ དེའི་ལས་མགོན་མ་མགོན་ཞལ་སྦྱོར་ལ། རས་བྲིས་སམ་འབྲུ་ནག་དགུ་ཚོམ་སྟེང་དབང་གཏོར། སྐུ་ཙཀ་དང་སྔགས་བྱང་དཀར་དམར་མཐིང་གསུམ་རེ། གྲི་ཐོད། མེ་ལོང་ཕུར་པ། ༈ ཕྱག་བཞི་པ་ལ། རས་བྲིས་སྟེང་རྣམ་བུམ་ཁར་ཐོད་ཆང་། དེ་སྟེང་མེ་ལོང་ལ་ཆོས་འབྱུང་གཉིས་བརྩེགས་དབུས་མགོན་པོ་ཡབ་ཡུམ་རྩ་སྔགས་བྲིས་པས་བཀབ་དར་ནག་གི་གུར་ཕུབ། གཡས་སུ་དཔལ་བཤོས་དང་། གཡོན་དུ་ལས་མགོན་གཏོར་མ་རྒྱན་ལྡན། མདུན་དུ་སྐུ་ཙཀ་རྣམས། རྒྱབ་ཏུ་གིང་ཕོ་མོའི་གཏོར་མ་རྣམས་བཀོད། ༈ མགོན་དཀར་ཚེ་དབང་ལ། པདྨ་འདབ་བརྒྱད་སྟེང་རྣམ་བུམ་ཉེར་ལྔའི་རྫས་ལྡན། མདུན་དུ་དཔལ་གཏོར་ཉི་ཟླའི་རྒྱན་ལྡན་ཚེ་རིལ་གྱིས་བསྐོར། མར་ཟན་ལ་སྙིང་པོ་ལྔ་དང་སྦྱར་བའི་ཚེ་རིལ། གཡོན་དུ་ཐོད་ཆང་། རྒྱབ་ཏུ་ཚེ་མདའ་དར་དམར་པོ་མེ་ལོང་ཅན་རྣམས་བཞག ༈ །གཏེར་གསར་ཕྱག་བཞི་པ་ལ། རས་བྲིས་སྟེང་བུམ་ཐོད་མེ་ལོང་ཤེལ་རྡོ་སྔར་ལྟར་དང་། ལྷ་ཙཀ་ཚང་མ་བཀོད་པས་འཐུས། མེ་ལོང་ལ་ཆོས་འབྱུང་ནང་ཐིག་ལེ་གཙོ་འཁོར་དགུ་བྱའོ། ༈ །གུར་མགོན་སྲོག་གི་སྤུ་གྲི་ལ། རས་བྲིས་ཀྱི་དབུས་སུ་ཨེ་ཁྲོམ་ལ་ཕུར་པ་ཕྱོགས་བཞིར་བྷནྡྷ་དམ་རྫས་ཀྱིས་བཀང་བ། གྲི་གུག །དཔལ་གཏོར། ཕྲེང་བ་རྣམས་བཀོད། ༈ གཏེར་གསར་ཕྱག་དྲུག་པ་པདྨ་སྒྱུ་འཕྲུལ་དྲྭ་བའི་ལུགས་ལ། རས་བྲིས་སྟེང་དབང་གཏོར་དང་སྐུ་རྟེན། སྔགས་བྱང་། ཕྱག་མཚན་གྲི་ཐོད་པདྨ་ཁ་ཊྭཱཾ་ཐོད་རྔ་སྤྲུལ་ཞགས་ཕྱོགས་བསྡུས་བཞག ༈ །ཟབ་མོ་སྐོར་དགུའི་ཕྱི་སྒྲུབ་གཏོར་དབང་ཐུན་མོང་བ་ལ། མཎྜལ་དཀྱིལ་འཁོར་རམ་མེ་ཏོག་ནག་པོའི་ཚོམ་བུ་ལྔ་བཀོད་པའི་སྟེང་དུ་ཁྲིའུའི་ཁར་ལྕགས་སམ་ཐོད་སྣོད་དུ་དཔལ་གཏོར་དམར་པོ་གཙོ་འཁོར་ལྔ་མཐེབ་ཀྱུས་བསྐོར་བ་ལ་སྐུ་ཙཀ་དང་དར་གདུགས་ཀྱིས་བརྒྱན་པ་བཀོད། འདི་ལ་བསྡུ་ན་སྔགས་བྱང་ཕྱག་མཚན་མི་དགོས། ༈ དཔལ་མགོན་མ་ནིང་ལ། མཎྜལ་གྲུ་གསུམ་མཐིང་ནག་གི་དབུས་འབྲུ་ནག་ཁྲག་གིས་སྦགས་པའི་ཚོམ་བུ་དབུས་སུ་ཆེ་ཆུང་གསུམ། དེ་རྒྱབ་ལྔ་བཀོད་པའི་སྟེང་དུ་དབང་གཏོར། གཡས་སུ་རྣམ་བུམ་དང་གཙོ་སྐུ། མདུན་ནས་གཡས་བསྐོར་དུ་སྟག་ཞོན་སྐུ་དང་བེར་ནག །བིང་སྐུ་དང་སྒྲུབ་པོད་སྲོག་སྙིང་། ཐུགས་མགོན་སྐུ་དང་གྲི་གུག་ཧཱུྃ་མཚན། སེང་ཞོན་སྐུ་དང་མདའ་རྒོད་སྒྲོ་མར་དར་ནག་ལ་ཁྲོ་ཞལ་དང་ཧཱུྃ་བྲིས་པ། ཏྲཀྴད་སྐུ་དང་སེང་ལྡེང་ཕུར་པ་ཁྲོ་ཞལ་ཅན་རྣམས་བཀོད། ལིངྒ་གཞུང་གསལ་མ་འབྱོར་ན་ཟན་ལིང་ཁྲག་གིས་སྦགས་པ་ལྕགས་ཧོམ་དུ་བཞག །ཐུན་རྫས། མཚོན་ཆ། མེ་ཧོམ། རཀྟའི་སྣོད། ཚོམ་བུ་བཀོད་རྒྱུ་ཐལ་ཆེན། ཚིལ་གསུར་སོགས་འདུ་བྱའོ། ༈ །རཏྣ་ལུགས་ཀྱི་མ་ནིང་སྲོག་དབང་ལ། དཀྱིལ་འཁོར་དབུས་ཁྲིའུར་བུམ་པ་ཆིངས་སྔོན་སོ་ལྔའི་བཅུད་ལྡན་ཁ་རྒྱན་གསེབ་ཏུ་དཔལ་མགོན་སྐུ་ཙཀ་བཙུགས་པ། གཡས་གཡོན་དུ་སྒྲུབ་པོད། སྲོག་སྔགས། རྡོ་རྗེ་གྲི་གུག་ཧཱུྃ་མཚན། དར་ནག་ལ་སྐུ་བྲིས་པའམ་མ་འཛོམ་ན་ཨོཾ་ཨཱཿཧཱུྃ་རཾ་བྲིས་པ། ཞགས་པ། བླ་རྡོ་ཁ་ཊྭཱཾ་མདུང་ཐུང་། ལྕགས་ཕུར། མདུན་དུ་རྟག་གཏོར་རྒྱུན་གཏོར་གཉིས་བཀོད། ཐོད་ངན་དུ་ལིངྒ་དང་ཐུན་རྫས། མེ་ཧོམ་སོགས་འདུ་བྱ། ༈ གཏོར་དབང་ཁོ་ན་ལ། དཀྱིལ་འཁོར་དབུས་སུ་རྟེན་གཏོར་སྐུ་གཟུགས་དར་ནག་གི་ལྡིང་གུར་ཅན་བཀོད། བིང་དང་རུ་མཚོན། སྙིང་དང་ཞགས་པ། སྒྲུབ་ཡིག །བླ་རྡོ་རྣམས་ཀྱང་བཞག་གོ ༈ །སྟག་ཞོན་ལ། མཎྜལ་གོང་མཚུངས་ཚོམ་བུ་གཙོ་འཁོར་གསུམ། དེ་རྒྱབ་བརྒྱད་བཀོད་པའི་ཁར་དབང་གཏོར་དང་སྐུ་རྟེན། གཡས་གཡོན་དུ་རཀྴའི་ཕྲེང་བ། ཙནྡན་གྱི་བིང་བཅས། ༈ མགོན་པོ་བིང་ལ་། ས་བྲིས་སྟེང་དུ་དབང་གཏོར་སྐུ་རྟེན་དང་བཅས་པ། གཡས་གཡོན་དུ་རག་ཕྲེང། བིང་། ལྕགས་པར། ཕུར་བུ་རྣམས་བཞག ༈ །ཏྲཀྴད་དྭགས་པོ་ལུགས་ལ། ཆོས་འབྱུང་གྲུ་གསུམ་མཐིང་ནག་མེ་རིས་མཚན་པའི་སྟེང་དམར་གཏོར་ཟུར་གསུམ་རྣོ་དབལ་ཅན་མེ་རི་ཤ་ཁྲག་དར་གདུགས་ཀྱིས་བརྒྱན་པ། ༈ མ་ནིང་མ་ལ། མཎྜལ་སྔར་ལྟར་ལ་གཏོར་མ་གཙོ་བོའི་གཡས་ཕྱོགས་སུ་དེ་ལས་དམའ་བ་གཅིག །མཐེབ་ཀྱུ་བཅུ་གཉིས་ཀྱིས་བསྐོར། ༈ ལས་མཁན་འབྲོང་ཞལ་ཅན་ལ། མ་ནིང་མའི་བཅའ་གཞི་དེ་ལྟར་བཀོད་པའི་མདུན་དུ་མཎྜལ་ཆོས་འབྱུང་སུམ་བརྩེགས་ཟུར་དགུ་པ་མི་རོ་དང་བཅས་པའི་སྟེང་དུ་དམར་གཏོར་ཟུར་གསུམ་རྒྱན་ལྡན་བཀོད། ༈ ཤྭ་ནའི་ཞལ་ཅན་ལ། མཎྜལ་ལ་ཆོས་འབྱུང་བསྣོལ་མ་སྔོན་པོ་ཐོད་པའི་རི་མོ་ཅན་གྱི་ནང་དུ་གྲུ་གསུམ་ནག་པོའི་ལྟེ་བར་ཐིག་ལེ་དམར་པོ་གཅིག །དེ་མདུན་ཆུང་བ་གཅིག །ཟུར་དྲུག་ལ་རེ་རེ་བཀོད་པའི་ཁར་དཔལ་གཏོར་ཟུར་གསུམ་དམར་པོ་དར་གདུགས་ཅན་བཤམ། མདུན་དུ་ཐོད་པའི་བདུད་རྩིའང་བཞག ༈ །དཔལ་མགོན་ཞལ་བཞི་པ་ལ། མཎྜལ་གོང་འདྲའི་སྟེང་ཚོམ་བུ་གཙོ་འཁོར་ལྔ་བཀོད་པ་ལ་དབང་གཏོར་རྒྱན་ལྡན་བཀོད། ལྕགས་ཧོམ་དུ་ཟན་ལིང་དང་གདབ་ཕུར་འདུ་བྱ། ༈ བྱང་གཏེར་བསྟན་སྲུང་ཡོངས་རྫོགས་ལ། རས་བྲིས་དབུས་རྣམ་བུམ་ཐོད་ཆང་བརྩེགས་པ་དར་ནག་གིས་བཀབ་པའི་ཁར་སིནྡྷུ་རའི་མེ་ལོང་ཆོས་འབྱུང་དབུས་སུ། ཨོཾ་ཤྲཱི་མ་ཧཱ་ཀ་ལ་ག་ཎ་གུ་ཏི་ཡོ་གི་ཤྭ་རི་ས་མ་ཡ་ཧཱུྃ་ཛཿཛཿ ཞེས་བྲིས་པས་བཀབ་པ་ལ་དར་མཐིང་ནག་གི་གུར་ཕུབ། རྒྱབ་ཏུ་དབང་གཏོར། མདུན་དུ་མཆོད་གཏོར། གཡས་གཡོན་དུ་གྲི་སྙིང་ཐོད་རློན་སྦྲུལ་ཆུན་བིང་གྲི་གུག་དང་གཎྜི། མདའ་མདུང་རལ་གྲི་ཐུན་རྫས་རྡོར་དྲིལ་ཆ་ལང་རྔ་དུང་ཕྱོགས་བསྡུས་བཞག ༈ །ཚོགས་བདག་གཏེར་མ་ཁམས་བྱོན་མ་ལ། རས་བྲིས་སྟེང་རྣམ་བུམ། ཤར་དུ་གཏོར་མ་སྐུ་ཙཀ་ཅན། ལྷོར་གྲི་སྙིང་སྲོག་འཁོར་ཅན། ནུབ་ཏུ་ཐོད་ཆང་། བྱང་དུ་བྲུབ་ཁུང་ཉའོ་ཕུར་བུ་མཚོན་ཆ་ཐུན་རྫས། དབུས་སུ་ལྷ་ཙཀ་རྒྱབ་ཏུ་སྔགས་བྱང་བྲིས་པ་རྣམས་དང་། སྒྲུབ་ཡིག་བཀོད། ༈ གཏེར་གསར་ཤྭ་ནའི་གཏོར་དབང་ལ། ཚོམ་བུའི་སྟེང་དབང་གཏོར་ཐོད་སྣོད་དུ་དམར་གཏོར་ཐོག་མདེལ་དབྱིབས་ཅན། གཏོར་ཆུང་ཉེར་བཞི་དང་མཐེབ་ཀྱུ་མང་པོས་བསྐོར་བ། མེ་རི་དང་རལ་གྲི་ཐོད་ཁྲག་གིས་བརྒྱན་པ་ལ། མདའ་དར་ནག་པོ་མེ་ལོང་སྐུ་རྟེན་བཅས་བཀོད། སྔགས་བྱང་། རལ་གྲི་ཐོད་ཁྲག །གཡས་གཡོན་སྨན་རཀ་བཀོད། ༈ གཏེར་གསར་ཆོས་སྐྱོང་དགོངས་འདུས་སྙིང་པོ་ལ། རས་བྲིས་སམ་ཚོམ་བུ་ལྷ་གྲངས་དབུས་དབང་གཏོར་དང་སྐུ་ཙཀ །སྔགས་བྱང་། ཕྱག་མཚན་གྲི་ཐོད་བཅས། ༈ ཞིག་གླིང་མ་ཧཱ་ཀཱ་ལ་དཔལ་མགོན་བདུན་ཅུའི་སྲོག་གཏད་ལ། དཀྱིལ་འཁོར་དབུས་ཁྲིའུ་ལ་ཟངས་ལྕགས་ཀྱི་སྣོད་དུ་གཏོར་མ་རི་རབ་བང་རིམ་བཞི་པའི་སྟེང་གྲུ་གསུམ་གདན་ཐབས། དེ་སྟེང་མགོན་པོའི་དཔལ་གཏོར་དང་ལྷ་མོའི་གཏོར་མ་བཞག །བང་རིམ་རྣམས་སུ་ལྷ་བརྒྱད། ཀླུ་བརྒྱད། གཟའ་བརྒྱད། ཕྱོགས་སྐྱོང་བཅུ། རྒྱལ་ཆེན་བཞི། འཇིགས་བྱེད་དགུ །རྒྱུ་སྐར་ཉེར་བརྒྱད་རྣམས་སོ་སོའི་དབྱིབས་མཐུན་གྱི་གཏོར་མ་བཀོད། མི་ཤེས་ན་བཤོས་ཟླུམ་གྲངས་ཚང་བཀོད་པ་ལ་རྒྱན་སྤྲོས་དར་གདུགས་ཅན་དང་། ཐོད་ཕྲེང་བཞག ༈ །ཨེ་ཀ་ཛཱ་ཊི་སྡེ་བདུན་ལ། རས་བྲིས་སམ་མཎྜལ་གྲུ་གསུམ་བསྣོལ་མར་ཚོམ་བུ་བདུན་གྱི་ཁར་མཉྫི་ལ་དབུས་དང་ཕྱོགས་བཞི། བྱང་ཤར་དུ་གཉིས་བཅས་སྡེ་བདུན་སོ་སོའི་གཏོར་མ་སྐུ་རྟེན་མདའ་དར་བཅས་པ་བཀོད་པའི་མདུན་དུ་མཆོད་གཏོར་སྤྱི་སྤུངས་སྨན་རཀ་བཅས། ལྷོར་རི་རབ་བང་རིམ་བཞི་པའི་སྟེང་གི་དབུས་དང་ཕྱོགས་བཞིར་མར་མེ་ལྔ་བཞག་པ། ནུབ་ཏུ་རྟེན་རྫས་དང་བཅས་པའི་མདའ་དར། བྱང་དུ་བྷནྡྷ་དམ་རྫས་ཀྱིས་བཀང་བ་རྣམས་དང་། གཞན་ཡང་རི་རབ། བ་དན། རྒྱལ་མཚན། སྙིང་ཕྲེང་། ཐུན་རྫས། རཀྟ། ཡུངས་ཀར། ཕུར་པ། རལ་གྲི །ཟན་ལིང་བཅས་འདུ་བྱ། ༈ སྔགས་སྲུང་མ་གཙོ་རྐྱང་ལ། རས་བྲིས་སྟེང་དབང་གཏོར་བཀོད། ཐོད་པ་དམ་རྫས་ཁྲག་ཆང་དུག་སོགས་ཀྱིས་སྦགས་པ། གྲི་སྙིང་། ཞིང་དབྱུག །སྒྲུབ་དཔེ། གུ་གུལ་ཚིལ་ཆེན་སོགས་ཀྱི་སྤོས་བཅས། ༈ རཏྣ་ལུགས་ཀྱི་རྗེས་གནང་ལ། རས་བྲིས་སམ་འབྲུ་ནག་ཚོམ་བུ་གཅིག་པའི་སྟེང་དུ་དབང་གཏོར་སྐུ་རྟེན་བཅས་པའི་མདུན་དུ་མཆོད་གཏོར་དང་བདུད་རྩི་བཤམ། ༈ སྨིན་ལུགས་ལ། དེ་དང་འདྲ་བའི་སྟེང་། སྔགས་བྱང་། ཡོད་ན་བླ་རྡོ་སྲོག་འཁོར། མེད་ན་ཕྱག་མཚན་སྙིང་དང་ཞིང་དབྱུག་དམ་རྫས་བཅས། ༈ རེ་ཏི་རང་བྱུང་རྒྱལ་མོ་ལ། རས་བྲིས་སྟེང་དབང་གཏོར་རྒྱན་ལྡན་བཀོད། ཕྲེང་བ་བཞག ༈ །ཉང་གཏེར་རྡོ་རྗེ་གཤོག་རྒོད་མ་ལ། རས་བྲིས་སམ་ཚོམ་བུའི་སྟེང་དབང་གཏོར་རྒྱན་ལྡན་བཀོད། ༈ གྲོལ་ཏིག་གཤོག་རྒོད་མ་དེ་དང་འདྲ་བའི་ཐོག །མདུན་དུ་ཕྱག་མཚན་ལྕགས་ཀྱུ་རྡོ་རྗེ་དགྲ་སཏྭ་ཐོད་པ་རྣམས། གཡས་སུ་ཚོགས་རྫས། རྒྱབ་ཏུ་རྟེན་རྫས། མདའ་མོ་དུང་ཤྭ་ཅན། གཡོན་དུ་སྲོག་ཡིག་བྷྱོ་དང་སྔགས་བྱང་རྣམས་བཀོད། ཡི་དམ་དཔལ་གཏོར་ཞབས་སུ་ལྷ་མོའི་བླ་རྡོ་སྤྱི་མཐུན་ནམ་མ་འཛོམ་ན་མཚོ་རྡེལ་སྔོན་པོ་ལ་བྷྱོ་ཡིག་བྲིས་པ་དར་སྔོན་གྱིས་བཏུམ་པ་བཞག །རེ་བ་ཚོན་སྐུད་དུམ་ཐོད་པ་རྣམས་དང་། ཐོད་རྔ་རྐང་གླིང་སྨན་རཀ་གཏོར་མ་རྣམས་ཕྱོགས་བསྡུས་གཏད་ཆོག་བཞག ༈ །གནམ་ཆོས་ཨ་ཕྱི་ལ། གཟུངས་དབང་ལྟར་བཀོད། ༈ གཡུ་སྒྲོན་མའི་བཀའ་གཏད་ལ། འབྲུ་སིལ་མ་བཀྲམ་པའི་དབུས་སོ་སོའི་གཏོར་མ། སྐུ་ཙཀ །ནས་ཐེབ་གང་། ཕྱག་མཚན་བཅས་བཀོད། དམིགས་བསལ་མེད་པའི་གནམ་ཆོས་བཀའ་གཏད་རིགས་ལ་འདིས་འགྲེ ༈ །རྡོ་རྗེ་རབ་བརྟན་མའི་ཐུན་མོང་རྗེས་གནང་ལ། མཎྜལ་དང་སྒྲུབ་གཏོར་གཞུང་མཐུན། སྐུ་ཙཀ །རལ་གྲི་ནེའུ་ལེའི་གཟུགས་བཀོད། ༈ སྲོག་སྒྲུབ་མ་ལ། རས་བྲིས་སྟེང་དབུས་སུ་གཙོ་མོ། གཡས་གཡོན་མདུན་གསུམ་དུ་འཁོར་གྱི་གཏོར་མ་སོ་སོར་བཀོད། ༈ གཟའ་བདུད་ལ། རས་བྲིས་དབུས་སུ་བུམ་པ་རྒྱན་ལྡན། མདུན་དུ་དབང་གཏོར་སྨན་རཀ་དང་བཅས་པ། ལྷོར་ཆུ་སྲིན་རྒྱལ་མཚན་སྦྲུལ་ཞགས་མདའ་གཞུ་མེ་ཕུང་རྣམས་སོ་སོ་བ། བྱང་དུ་འཁོར་གཟའ་བརྒྱད་ཀྱི་སྐུ་གཟུགས་དང་ཕྱག་མཚན་གྱི་ཙཀ་ལི་ཕྱོགས་བསྡུས་གཉིས་བཅས་བཀོད། འབུལ་གཏོར་ནུབ་ཏུའོ། ༈ །ཤན་པ་དམར་ནག་ལ། རས་བྲིས་སྟེང་དབང་གཏོར་ལ་མདའ་དར་ཁྱད་པར་བ་བཙུགས་པ། ཕྱོགས་བཞིར་རལ་གྲི །གྲི་གུག །སྙིང་ཞགས། ཐོད་ཁྲག་བཞི། མཚམས་བཞིར་སྐམ་རློན་གྱི་ཐུན་སྣོད། ཟོར་གཏོར་གྲུ་གསུམ། མེ་ཧོམ་གྱི་ཏིང་ལོ་གྲུ་གསུམ། མནན་པའི་སཱཙྪ་རྣམས་བཞག །མདུན་མཆོད་གཡས་གཡོན་དུ་ཞིང་ལྤགས་གླང་ཀོ་སྟག་ཤམ་སོ་སོ་བ། གཡོན་དུ་འབྲང་རྒྱས་བཟའ་བཏུང་བཅས་བཀོད། ༈ རཏྣ་ལུགས་ཀྱི་རྗེས་གནང་ལ། མཎྜལ་སྟེང་སྒྲུབ་གཏོར་སྐུ་རྟེན་དར་གདུགས་དམར་པོ་བཅས་གཞུང་མཐུན། གཡས་སུ་རལ་གྲི་གྲི་གུག །གཡོན་དུ་སྙིང་ཞགས་བནྡྷ། མདུན་དུ་མཆོད་གཏོར་རྣམས་བཤམ། ༈ པུ་ཏྲ་མིང་སྲིང་ལ། གོང་དུ་མགོན་པོའི་མཆོད་གཏོར་མཐོ་བར་བཤམ། དེ་མདུན་མིང་སྲིང་ལ་རྟག་གཏོར་ཟུར་བརྒྱད་ཀྱི་མདུན་འབུལ་གཏོར་བཅས་བཤམ། ༈ དཀར་བདུད་ལྕམ་དྲལ་ལ། མཎྜལ་ཆོས་འབྱུང་གྲུ་གསུམ་དཀར་པོའི་དབུས་སུ་འབྲུ་དཀར་པོའི་ཚོམ་བུ་བཀོད་པའི་སྟེང་དུ་འབྲང་རྒྱས་དཀར་པོ་ཕུག་རོན་གྱི་གཟུགས་དང་བཅས་པ་བཀོད། དེའི་གཡས་སུ་ཆོས་འབྱུང་གྲུ་གསུམ་ནག་པོ་ལ་འབྲུ་ནག་གི་ཚོམ་བུའི་ཁར་དམར་གཏོར་གྲུ་གསུམ་བཀོད། ༈ ལས་གཤིན་ལ། མཎྜལ་མཐིང་ནག་གྲུ་གསུམ་ཐོད་ར་མེ་རིས་བསྐོར་བ་ལ་ཚོམ་བུ་ཆེ་ཆུང་གཉིས། དེ་རྒྱབ་བརྒྱད་བཀོད་པའི་སྟེང་དུ་གཏོར་མ་རྒྱན་ལྡན་བཀོད། ༈ དམ་ཅན་མགར་དམར་རྗེས་གནང་ལ། སྟེགས་བུ་དམར་པོ་འབྲུ་ཚོམ་བཀོད་པའི་སྟེང་དུ་མཉྫིའི་ཁར་དབང་གཏོར་སྐུ་རྟེན་དང་བཅས་པ། གཡས་སུ་བླ་རྡོ་དང་སྒྲུབ་ཡིག །གཡོན་དུ་རྡོ་རྗེ་དང་སྙིང་གཟུགས་བཞག་གོ ༈ །དམ་ཅན་མགར་ནག་ལ། སྟེགས་ལ་ཚོམ་བུའི་སྟེང་རྟེན་གཏོར་སྐུ་དང་བཅས་པ་བཀོད། མེ་སྒྲོན་ཀྱང་བཞག ༈ །འགྲོ་འདུལ་ལས་འཕྲོ་གླིང་པའི་དམ་ཅན་ལ། དཀྱིལ་འཁོར་སྟེང་གཏོར་མ་མཁར་ཐབས་མ་ལ་སྐུ་ཙཀ་དང་ཕ་ཝཾ་ལོང་བུས་བརྒྱན་པ། ཟླ་གམ་གསུམ་ལ་དམར་གཏོར། སྨན་རཀ །མདའ་དར་མེ་ལོང་ཅན། མདུན་དུ་ཕ་ཝཾ་ལོང་བུ། ཤར་དུ་རྡོ་རྗེ་ལྕགས་ཀྱུ། ལྷོར་བུམ་པ་ཞགས་པ། ནུབ་ཏུ་རལ་གྲི་ལྕགས་སྒྲོག །བྱང་དུ་མདུང་དམར་ཐོ་བ། དབུས་སུ་བླ་རྡོ་ཕ་ཝཾ་ལོང་བུ་རྣམས་བཀོད། ༈ གཏེར་གསར་དམ་ཅན་ལྕམ་དྲལ་ལ། སྟག་ལྤགས་སྟེང་རྟེན་གཏོར་ཡོད་ན་རྟེན་མདའ་བླ་རྡོ་དང་མེ་ལོང་སྐུ་ཙཀ་བཙུགས། གཡས་གཡོན་དུ་རྡོ་རྗེ་དགྲ་སྙིང་། མེ་ལོང་དང་མདའ་དར་བཞག ༈ །ཞིང་སྐྱོང་སེང་གདོང་ལ། རས་བྲིས་སྟེང་ཚོམ་བུ་ལྷ་གྲངས་དང་བཅས་པའི་སྟེང་དུ་རྟེན་གཏོར་སྐུ་དང་བཅས་པ། མདུན་དུ་སྐུ་ཙཀ །གཡས་སུ་སྒྲུབ་ཡིག་སྔགས་བྱང་། མདུན་དུ་བདུད་རྩིའི་ཐོད་པ་རྣམས་དང་། བེར་ནག་དང་སྟག་ཤམ་མི་ལྤགས་མགོ་ཕྲེང་ཁྲག་ཐལ་བ་རུ་མཚོན་ཁ་ཊྭཱཾ་རྣམས་ཕྱོགས་བསྡུས། ཟན་ལིང་གཉིས་ཤོག་ལིང་གཅིག་ཧོམ་དུ་བཀོད་པ་བཅས། ༈ བདུད་འདུལ་ལུགས་ཀྱི་ཞིང་སྐྱོང་ལ། རས་བྲིས་སམ་ཚོམ་བུའི་ཁར་རྟེན་གཏོར། གཡས་གཡོན་སྨན་དང་རཀྟའི་ཐོད་པ། རྒྱབ་ཏུ་མདའ་དར་བླ་རྡོ་སྲོག་འཁོར་བཏགས་པ་བཞག ༈ །སྲོག་སྒྲུབ་དྲག་པོ་སྡེ་བཞིའི་བཀའ་གཏད་ལ། རས་བྲིས་སྟེང་རྣམ་བུམ་ཆས་ལྡན། ཕྱོགས་བཞི་དྲག་པོ་སྡེ་བཞིའི་གཏོར་མ་དར་གདུགས་སྐུ་ཙཀ་སོགས་རྒྱན་ལྡན། མདུན་དུ་ཤེལ་རྡོ་མེ་ལོང་ཧཱུྃ་ཡིག་སྒྲོ་མདོངས། གཡས་སུ་གཞུང་པོད་བགྲང་ཕྲེང་ཐོད་ཆང་། རྒྱབ་ཏུ་ཐོད་ཁྲག །གཡོན་དུ་བྲུབ་ཁུང་ཉའོ། གདབ་ཕུར་ཕྱག་རྒྱ་བཞི་སྒྲོལ་གྲི་རྣམས་དང་། གཞན་ཡང་ཐལ་རཀ་ཞག་གསུམ། དུར་ཁྲོད་ཆས། ཕྱག་མཚན་གྲི་གུག་སྦྲུལ་ཞགས་ལྕགས་ཀྱུ་བེ་ཅོན་ཞིང་དབྱུག་རྒྱུ་ཞགས་ཐོ་བ་སྦུད་པ་རྣམས་ཀྱི་ཙཀ་ལི་དང་། རཀྴའི་ཕྲེང་བ་བཅས་བཀོད། ༈ ཞིང་སྐྱོང་དུར་ཁྲོད་མ་མོ་ལ། སིནྡྷུ་རའི་དཀྱིལ་འཁོར་གཞུང་གསལ་སྟེང་རྟེན་གཏོར་རྒྱན་ལྡན། མདུན་དུ་མར་ཟན་འབུལ་གཏོར་ར་དཀར་མོའི་འོ་མ་ལ་སོགས་བཀོད། གླ་རྩི་སྤོས་དཀར་དང་སྦྱར་བའི་སྤོས་ཀྱང་བསྡོག ༈ །ཤ་ཟ་ཁ་མོ་ཆེའི་སྲོག་གཏད་ལ། རས་བྲིས་སྟེང་རྟེན་གཏོར་སྐུ་ཙཀ་རྒྱན་ལྡན། གཡས་གཡོན་ལྕགས་ཀྱུ་གྲི་སྙིང་། བགྲང་ཕྲེང་བཅས་བཀོད། ༈ བརྟན་མ་བཅུ་གཉིས་ལ། རས་དཀར་པོའི་གཞི་ལ་པདྨ་འདབ་མ་བཅུ་གཉིས་མུ་ཁྱུད་དང་བཅས་པའམ་ཚོམ་བུ་ལྷ་གྲངས་ཀྱི་དབུས་སུ་གོང་གནོན་བླ་མ་ཡི་དམ་གང་རུང་བཀོད་དགོས་པས་སྐབས་འདིར་བླ་མའི་གཏོར་མ་བཞག །པད་འདབ་བཅུ་གཉིས་ལ་བརྟན་མའི་གཏོར་མ་སྐུ་ཙཀ་དར་འཕན་བཅས། ཤར་སྟོད་ནས་བརྩམས་ཏེ་གཡས་བསྐོར་དུ་འགོད། སྨན་རཀ་གཏོར་གསུམ། དཀར་མངར་ཕུད་སྐྱེམས་ཕྱེ་མར་སོགས་སྒེར་མཆོད་གཞུང་གསལ། བཟང་ཤིང་སྤོས་དཀར་སོགས་འདུ་བྱ། ༈ པེ་ཧར་སྲོག་གཏད་ལ། སྟེགས་བུ་འབྲུ་སྣ་སིལ་མ་བཀྲམ་པའི་སྟེང་དུ་རྟེན་གཏོར་སྐུ་རྟེན་མདའ་དར་རྒྱལ་མཚན་གྱིས་བརྒྱན་པ་ཁ་ཟས་བཟང་དགུ་བཅས་བཀོད། མཆོད་གཏོར་མཐུན་རྫས་གཞུང་གསལ་དངོས་དང་། གཟུགས་བརྙན་ཇི་ལྟར་ཚོགས་པ་དང་། རིགས་ལྔའི་ཕྱག་མཚན། དམ་ཤིང་། སྟག །སྤྲེའུ། བྱ་རྒོད། སྤྱང་ཀི །ཟ་འོག་རྒྱལ་མཚན་ལྔ། སྨན་རཀ་གཏོར་གསུམ་ཕྱོགས་བསྡུས་བཅས། ༈ གནོད་སྦྱིན་ཙིའུ་དམར་པོའི་སྲོག་གཏད་ལ། མེ་ཏོག་དམར་པོའི་ཚོམ་བུ་བདུན་བཀོད་པའི་སྟེང་དུ་རྟེན་གཏོར་སྐུ་ཙཀ་སོགས་ཀྱིས་བརྒྱན་པ་བཀོད། རྒྱབ་ཕྱོགས་སྟེགས་མཐོ་བར་དཔལ་གཏོར། མེ་ཏོག་དམར་པོའི་སྣོད། ཕུར་བུ་དང་དབྱུག་ཏོ། གཡས་སུ་རྟེན་རྫས་མདུང་དམར། མདུན་དུ་བླ་རྡོ་འཁོར་ལོ། གཡོན་དུ་ཞགས་པ་དམར་པོ་རྣམས་བཀོད། ༈ གཉན་ཆེན་ཐང་ལྷའི་སྲོག་གཏད་ལ། སྟེགས་བུར་འབྲུ་སྣ་སིལ་མ་བཀྲམ་པའི་ཁར་རྟེན་གཏོར་ཁང་བཟང་མ་སྐུ་རྟེན་སོགས་ཀྱིས་བརྒྱན་པ། མདུན་དུ་ཁྱད་པར་གྱི་མཆོད་པ་རྣམས་དང་། ཤེལ་ཕྲེང་བཞག ༈ །གནམ་ཆོས་སྤོམ་རའི་བཀའ་གཏད་ལ། འབྲུ་སིལ་མ་བཀྲམ་པའི་ཁར་རྟེན་གཏོར། སྐུ་རྟེན། ནས་དཀར་ཐེབ་གང་། ཕྱག་མཚན་དར་མདུང་དང་བུམ་པ་ནོར་བུའི་བརྒྱན་པ་རྣམས་བཀོད། ༈ གཏེར་གསར་ཚེ་རིང་མའི་སྲོག་གཏད་ཐུན་མོང་བ་ལ། སྟེགས་བུར་འབྲུ་ཚོམ་ལྔའི་སྟེང་དུ་དབང་གཏོར་རྒྱན་ལྡན་བཀོད་དོ། འདི་ཡན་གྱི་ཆོས་སྐྱོང་ཐམས་ཅད་ལ་མདུན་དུ་མཆོད་གཏོར་གཙོ་འཁོར་ལྷ་གྲངས་དང་མཚུངས་པའི་གཡས་གཡོན་སྨན་རཀ་འགོད་དགོས་པ་ནི་ཐམས་ཅད་ལ་ཤེས་པར་བྱའོ།། ༈ །།དེ་ནས་དགོས་དབང་ཁྱད་པར་ཅན་གྱིས་བཞག་པའི་རྡོ་རྗེ་གཡུང་དྲུང་གླིང་པའི་ཡབ་སྲས་བཅུད་དྲིལ་ལ། གཞུང་གསལ་དཀྱིལ་འཁོར་རམ། མ་འཛོམ་ན་མཎྜལ་ཚོམ་བུ་གཅིག་བཀོད་པའི་སྟེང་། མཉྫིའི་ཁར་རྣམ་བུམ་ཆིངས་སྔོན་བཅུད་ཀྱིས་གཏམས་པ། མདུན་དུ་བླ་བརྒྱུད་ཙཀ་ལི། རྒྱབ་ཏུ་བླ་གཏོར་ཟླུམ་པོ་སྐུ་གཟུགས་ཀྱིས་བརྒྱན་པ་རྣམས་བཀོད། ༈ བོན་གཏེར་ཀུན་གྲོལ་ལས་འཕྲོ་གླིང་པའི་མཁའ་འགྲོ་གསང་མཛོད་ཀྱི་དབང་ལ། སྟེགས་དཀར་པོའི་སྟེང་འབྲུ་ཚོམ་དགུ་བཀོད་པའི་དབུས་མཉྫི་ལ་ཐོད་པ་མཚན་ལྡན་བྱང་སེམས་དཀར་དམར་ཆོས་སྨན་སྦྱར་བའི་ཆང་བཟང་པོས་བཀང། རིག་ཙཀ་མེ་ལོང་། རས་གོས་སྒོམ་ཐག་ཨང་རག་དངོས་སམ་བྲིས་པའི་ཙཀ་ལི་བཞག ༈ །རྗེས་དྲན་བཻ་རོའི་ཐུགས་ཏིག་ཚེ་སྒྲུབ་ཟབ་རྒྱ་ཅན་ལ། མཎྜལ་དཀྱིལ་འཁོར་སྟེང་ཚེའི་འབྲང་རྒྱས། གཡས་གཡོན་དུ་ཚེ་ཆང་ཚེ་རིལ། དཀར་མངར་བཟའ་བཏུང་བཅས་བཤམ། ༈ གཏེར་གསར་བོན་གསས་དབང་དྲག་འབར་བ་ལ། མཎྜལ་འབྲུ་ཚོམ་གཅིག་བཀོད་པའི་སྟེང་དཔལ་བཤོས་ཟུར་གསུམ་རྩེ་རྒྱལ་ཕྲག་པ་ཅན་རྒྱན་ལྡན། སྐུ་ཙཀ་དར་གདུགས་ཅན་བཀོད། ༈ སྤོམ་རའི་བཀའ་གཏད་ལ། གཞི་དཀར་འབྲུ་དཀར་གྱིས་གཡུང་དྲུང་གཡོན་བསྐོར་བྲིས་པའི་ཁར་རིན་པོ་ཆེའི་སྣོད་དུ་རི་རབ་བང་རིམ་བཞི་ལྡན་སྟེང་། གཏོར་མ་ཁང་བཟང་མ་ནམ་མཁའ་དར་གདུགས་དཀར་པོ་ཅན་མདའ་དར། གསེར་སྐྱེམས་བཅས་བཀོད་པར་བྱའོ། ༈ དེ་ནས་རྩ་གསུམ་ཆོས་སྐྱོང་དང་བཅས་པའི་ཕྲིན་ལས་ཁ་ཚར་གྱི་རིམ་པ་ལ། ཐོག་མར་བསྙེན་སྒྲུབ་སྤྱིའི་ཡན་ལག་ཏུ་ཉེ་བར་མཁོ་བའི་སྐོར་ལས། ༈ ཀློང་གསལ་བདུད་རྩི་འཁྱིལ་བ་ལ། མཎྜལ་ཚོམ་བུ་གཅིག་པའི་སྟེང་བུམ་པ། སྐུ་ཙཀ །སྔགས་བྱང་ངམ་ཕྲེང་བ། ཤེལ་རྡོ། མེ་ལོང་། གཏོར་མ་རྣམས། ༈ གནམ་ཆོས་བདུད་རྩི་འཁྱིལ་བ། ཀུན་ཐུབ་རྒྱལ་མོ་གཉིས་ཀར་གཟུངས་དབང་ཆས་དང་། ༈ མ་ཧཱ་བ་ལའི་བཀའ་གཏད་ལ། མཎྜལ་ཚོམ་བུ་ནག་པོའི་སྟེང་སྐུ་ཙཀ །ཐེབ་ནས། དམར་གཏོར། ཕུར་བུ་རྣམས་བཀོད། ༈ མེ་ལྷའི་བཀའ་གཏད་དེ་མཚུངས་ལ། ཚོམ་བུ་དམར་པོ། སྐུ་ཙཀ །ནས། གཏོར་ཟླུམ། རིལ་བ་སྤྱི་བླུགས་རྣམས་བཀོད། ཕྱེ་མར་རམ་ཟས་མཆོག་དང་མེ་ཧོམ་འདུ་བྱའོ།། ༈ །།དེ་ནས་མཆོག་གི་ཕྲིན་ལས་བཏགས་གྲོལ་གླེགས་བམ་གྱི་དབང་། བླ་མ་ཡང་ཏིག་གི་ལུགས་ལ། མཎྜལ་ཚོམ་བུ་ལྔ་པའི་ཁར་རིན་པོ་ཆེའི་སྣོད་དུ་འཁོར་ལོ་དར་གྱིས་དྲིལ་བ་བཀོད། ༈ མཁའ་འགྲོ་སྙིང་ཐིག་ལ། རྒྱུད་དྲུག་བཞག་པ་ལས་འདྲ། ༈ བླ་མ་དགོངས་འདུས་ལུགས་ལ། དཀྱིལ་འཁོར་རས་བྲིས་སམ་དགུ་ཚོམ་གྱི་དབུས་སུ་ཁྲིའུར་འབྲུའི་སྣོད་དུ་བཏགས་གྲོལ་དཀར་པོ་གཅིག་ཐུབ་ཀྱི་གླེགས་བམ་དར་བསྣས་བཀླུབས་པ་བཞག །གཡས་གཡོན་དུ་བུམ་པ་བཅུད་ལྡན། རིགས་ལྔའི་ཕྱག་མཚན་རྣམས་བཞག་གོ། ༈ །།ལས་སྣ་ཚོགས་པ་ལས། ཀློང་གསལ་རྒྱལ་མཚན་རྩེ་མོ་ལ། ཚོམ་བུ་གཅིག་སྟེང་བུམ་པ་ཆིངས་སེར་དང་། གཡས་གཡོན་དུ་གཏོར་མ། སྐུ་ཙཀ །ཐོད་པའི་བདུད་རྩི། ཤེལ་རྡོ་མེ་ལོང་རྣམས། ༈ གནམ་ཆོས་མདོས་ཆོག་ཉེར་མཁོའི་བཀའ་གཏད་ལ། རིགས་གསུམ་གཅིག་དྲིལ་ལ། གཟུངས་དབང་ཆས་བཀོད། ༈ ལས་ཧུར་དྲག་མོ་ལ། དཀྱིལ་འཁོར་གཏོར་མ་དཔེའུ་རིས་ལྟར་རམ་མ་འཛོམ་ན་ཚོམ་བུ་དབུས་སུ་གཅིག །དེ་རྒྱབ་ཕྱོགས་བཞིར་གཙོ་འཁོར་ལྔ་རེ། དེ་རྒྱབ་དགུ །དེ་རྒྱབ་བཞི། དེ་རྒྱབ་བརྒྱད་བཀོད་པའི་དབུས་སུ་བུམ་པ། གཏོར་མ་སྐུ་ཙཀ་བཙུགས་པ། བྷནྡྷ་བདུད་རྩི། རྡོ་རྗེ་བཅས། ༈ ཀག་ཟློག་རྣམ་དགུ་ལ། དམར་གཏོར་དགུ་ལ་སོ་སོའི་ཙཀ་ལི་བཙུགས་པ་དང་། དབང་རྫས་བུམ་པ་སོགས་གོང་ལྟར། དཀྱིལ་འཁོར་ཚོམ་བུ་རེ་རེ་བཀོད། ༈ ཧ་ས་གརྦྷའི་བཀའ་གཏད་ལ། མདུན་སྟེགས་ཁར་དམར་གཏོར་ཟུར་གསུམ་མཐེབ་ཀྱུས་བརྒྱན་པ། སྐུ་ཙཀ །ཐོད་ཆང་བཤམ། ༈ མ་མོའི་ཁྲག་མདོས་ཀྱི་བཀའ་གཏད་ལ། དམར་གཏོར་གཅིག་ལ་བྱ་ནག་ལུག་ནག་སྨན་ཏིང་རྣམས་ཀྱིས་བསྐོར་བའི་རྩེ་ལ་གཞུང་གསལ་སྐུ་ཙཀ་བཙུགས། འཛོམ་ན་ནམ་མཁའ་ཤིང་རིས་མདའ་འཕང་ཆུང་ངུ་བཙུགས། མ་འཛོམ་ན་ཙཀ་ལིའི་རྒྱབ་ཏུ་བྲིས་པས་ཆོག་པར་གསུངས། ༈ དབང་ཕྱུག་ཟོར་མདོས་བཀའ་གཏད་ལ། སྣོད་ལྔའི་ནང་དུ། ཀོང་ཟོར་གྲུ་གསུམ་ནང་དམར་གཏོར་ཟུར་གསུམ་བཞག་ཅིང་ཟུར་གསུམ་ལ་རྩང་གསུམ་རྩེ་བསྣོལ་བཙུགས་པ་གཙོ་འཁོར་ལྔ་ཕྱོགས་སོ་སོར་བཤམ། རྒྱས་པ་ཆོས་སྐྱོང་སྤྱིའི་བཀའ་གཏད་ཆས་བཤམ་མོ།། ༈ །།ལས་བྱེ་བྲག་པའི་ཐོག་མ་སྲུང་བའི་སྐོར་ལས། རྒྱ་ཕུར་བུའི་དུག་ཁྲག་རྫས་སྲུང་གི་བྱིན་རླབས་ལ། འཛོམ་ན་དུག་ཁྲག་རྭ་སྲུང་ཚད་ལྡན་བྱས་པ་དགོས་ཀྱང་དཀྱུས་སུ་འཛོམ་དཀའ་བས་རྫས་རྒོད་སོགས་སྦྱར་ནས་བསྒྲུབས་པའི་རྭ་སྲུང་སྟེགས་བུར་བཀོད། ༈ གནམ་ཆོས་འཇིགས་མེད་རྡོ་རྗེ་དང་། རྡོ་རྗེ་མཆུ་ལ་གཟུངས་དབང་གི་ཆས་སོ། ༈ །ཞིག་གླིང་དམག་ཟློག་ཉེར་ལྔའི་རྒྱལ་ཆེན་སྡེ་བཞིའི་བཀའ་གཏད་ལ། རས་བྲིས་དབུས་སུ་རྒྱལ་ཆེན་སྡེ་བཞིའི་གཏོར་མ་རིན་པོ་ཆེའི་སྣོད་བཞི་སོ་སོའི་ནང་རིམ་བཞིན་རི་རབ་བང་རིམ་བཞི་བརྩེགས་རེ་རེ་བཀོད་ལ་དེ་སྟེང་ཤར་དུ་ལྷ་བཤོས་དབྱིབས་པད་འདབ་མང་པོས་བསྐོར་བ། ལྷོར་གྲུ་བཞི་མཁར་ཐབས་རྩེར་རལ་གྲིས་བརྒྱན་པ། ནུབ་ཏུ་ཟླུམ་པོ་འདབ་བཞི་རྩེ་མོར་སྦྲུལ་རིགས་ལྔས་དཀྲིས་པ། བྱང་དུ་ཁང་བཟང་སུམ་བརྩེགས། དེ་བཞིའི་རྩེ་མོར་སོ་སོའི་སྐུ་རྟེན་རང་མདོག་མདའ་དར་དང་བཅས་པ། རི་རབ་རྩེ་མོར་རྒྱལ་མཚན་བཙུགས་པ་བཞག །དེ་སྟེང་ཁྲིའུར་རྣམ་བུམ་ཆིངས་སྔོན་ཅན། ཉེ་ལོགས་སུ་བ་དན། ཟས་སྣ་དང་དྲི་བཟང་གི་ཆུ། མཆོད་རྟེན། གདུགས། རྒྱལ་མཚན། དུང་དཀར། པུསྟི། རྡོ་རྗེ་རྣམས་སོ་སོའི་ཙཀ་ལི། རིན་པོ་ཆེ་འབྲུ་སྨན་དར་ཟབ་ལ་སོགས་པས་བཀང་བའི་བུམ་གཏེར། བྲུབ་ཁུང་ཤོག་ལིང་། ཕུར་པ། རལ་གྲི །ཐུན། མེ་ཧོམ་བཅས་སྟ་གོན་བྱ། ༈ དུག་སྲུང་བྱང་གཏེར་དུག་དབང་རྡོ་རྗེ་ཕ་ལམ་གྱི་དབང་གི་བཅས་བཤམ་སྔགས་འཆང་དབང་པོའི་སྡེའི་གསུང་ལས་འབྱུང་བ་ལྟར་བྱ་དགོས། ࿋ དུག་དབང་རྡོ་རྗེ་ཕ་ལམ་གྱི་བཅས་བཤམ། གནས་དབེན་པར་སློབ་དཔོན་ཁ་ལྷོར་བལྟས་པའི་མདུན་དུ་རས་དཀར་ཁ་ཚར་མ་ཉམས་པ་གྲུ་བཞིར་བལྟབས་པའི་སྟེང་དུ། དཀྱིལ་འཁོར་ཆོས་འབྱུང་གྲུ་གསུམ་པའི་དབྱིབས་ཅན། དེ་ཡང་གསུམ་གཉིས་ནས་དཀར་དང་ཆ་གཅིག་སྲན་མ་ནག་པོ་ལས་བྱས་པའི་ལྷོར་ཁ་བསྟན་པའི་དབུས་མན་ཛིའི་ཁར་བུམ་པ་འོ་མར་བཅས་པའི་དྲི་བཟང་གིས་ཕྱེད་གང་བའི་སྟེང་དུ། རིན་པོ་ཆེའི་སྣོད་དུ། གསེར་ཐིག་པོ་དང་སྨན་ཆེན་རྨ་བྱའི་མདོངས། ཟུར་གསུམ་ལྷོ་རྩེར་གུ་ལང་ནག་པོ་ལྕགས་ཀྱི་རྭ་ཅོ་འཕྱར་བ། ནུབ་བྱང་རྩེ་ལ་ཤྲཱི་རལ་པ་ཅན་མདའ་གཞུ་འགེང་པ་། བྱང་ཤར་རྩེ་མོར་དབང་ཕྱུག་ཆེན་པོ་ཏྲི་ཤཱུ་ལ་འགེང་པ། གསུམ་ཀ་ཡང་གཅེར་བུ་ལིངྒ་གྱེན་དུ་བསྒྲེང་བ་ཉམས་དོད་པར་འབུར་དུ་གྲུབ་པ། བུམ་པར་ཞལ་བསྟན་པའི་ཆོས་འབྱུང་གི་ལེབ་གསུམ་གྱི་ཤར་དུ་ལུག་ནག་འོག་ཅན་གྱི་རྐང་པ་གཡས་པའི་དཔྱི་ལྷུ། བྱང་དུ་བར་ལྷུ། ནུབ་ཏོག་རྩེ་ལྟ་བུ། གསུམ་ཀ་ཡང་ཤ་ནང་གྱེན་བསྟན་གྱི་བཅད་ཁ་ཕྱིར་བསྟན་པ། སློབ་དཔོན་གྱི་མདུན་གཡས་སུ། ནུབ་ངོས་ནས་ཚུར་ཟླུམ་གཏོར་གསུམ་དང་ཤེར་དབང་གི་རྫས་ཆུ་གཙང་ལ་ཅུ་གང་དང་ལི་ཁྲི་བཏབ་པ། བཞི་པའི་རྟེན་ཆོས་འབྱུང་གཏོར་མ་ཞེས་པ་སྟེ། དེ་ཡང་འོག་ནས་རིམ་པར་ཞི་རྒྱས་དབང་དྲག་གི་དབྱིབས་ཁ་དོག་སོ་སོར་བསྒྱུར་བ་ལས། སྟེང་གི་དྲག་པོ་ཐོག་གི་མདེའུ་ལྟ་བུ་སྟེ། གཏོར་མ་བཞི་ཀ་ཡང་དཀར་དམར་གྱིས་བརྒྱན། མཐའ་སྐོར་མཆོད་པ་གཡོན་བསྐོར་བཀོད་པའི་ཤར་དུ་ཤ་སྣ་སོགས་བཟའ་བཅའ་གང་ཡང་རུང་བའི་ཚོགས་གང་འཛོམ་མངོན་པར་འདུ་བྱའོ། ࿋ ༈ །གནམ་ཆོས་དགོངས་གཏེར་འོད་ཟེར་ཅན་མ་ལ། མཎྜལ་ཚོམ་བུ་གཅིག་བཀོད་པའི་དབུས་བུམ་པ་ཉེར་ལྔའི་རྫས་ལྡན་མགུལ་ཆིངས་དཀར་པོ་ཁ་རྒྱན་ལྡན་པ་དང་། མདུན་རྒྱབ་གང་བདེར་དབང་གཏོར་སྐུ་ཙཀ་དར་གདུགས་ཀྱིས་བརྒྱན་པ། རྟགས་བརྒྱད་ཙཀ་ལི་བཅས་བཞག་གོ། ༈ །།དེ་ནས་ཞི་བའི་ལས་ཚོགས་ཀྱི། ཐོག་མར་བགེགས་དང་བར་ཆད་ཞི་བའི་སྐོར་ལ། ཆོས་གླིང་བར་ཆད་སེལ་བའི་རྣམ་འཇོམས་བུམ་ཆོག་ལ། པདྨ་འདབ་བརྒྱད་སྟེང་བུམ་པ་རྫས་གཞུང་གསལ་ལམ་མ་འཛོམ་ན་ཉེར་ལྔའི་བཅུད་ལྡན་བཀོད། ༈ མཆོག་གླིང་ཐུགས་སྒྲུབ་རཀྴ་ཐོད་ཕྲེང་ལ། མཎྜལ་ཚོམ་བུ་དབུས་སུ་གཅིག་འཁོར་བཅུས་བསྐོར་བའི་སྟེང་རྣམ་བུམ། མདུན་དུ་དཔལ་གཏོར། སྐུ་ཙཀ །སྔགས་བྱང་ངམ་ཐོད་ཕྲེང་། ཕྱག་མཚན་རྡོ་རྗེ་ཐོད་པའི་ཙཀ་ལི་བཅས། ༈ ཐུགས་སྒྲུབ་མི་གཡོ་བ་རིགས་བཞི་ཀ་ལ། མཎྜལ་པདྨ་འདབ་བརྒྱད་རྡོ་རྭ་མེ་རིའི་བསྐོར་བའི་ལྟེ་བ་རང་མདོག་ལ་ཚོམ་བུ་དེ་མཚུངས་སམ་ཕྱག་མཚན་བྲིས་པའི་སྟེང་དུ་རྣམ་བུམ། སྐུ་ཙཀ །རལ་གྲི་ཞགས་པ་སོགས་ཕྱག་མཚན་སོ་སོ། མདུན་དུ་དབང་གཏོར་བཅས། ༈ ཞི་བྱེད་སྤྱི་བསྡུས་ལྷ་བཙུན་སྔོན་མོའི་ཞི་བྱེད་སྐོར་བདུན་ལ། མཎྜལ་པདྨ་འདབ་བརྒྱད་ཚོམ་བུ་དཀར་པོ་ཅན་གྱི་སྟེང་དུ་བུམ་པ་ཆིངས་དཀར་ཉེར་ལྔའི་བཅུད་ལྡན། མདུན་རྒྱབ་གང་བདེར་ཟླུམ་གཏོར་དར་གདུགས་དཀར་པོས་སྤྲས་པ། སོ་སོའི་སྐུ་ཙཀ་དང་། ཕྱག་མཚན། ཤེལ་ཕྲེང། དར་དང་རིན་པོ་ཆེའི་རྒྱན། རྫས་བརྒྱད་བཅས། སྐོར་བདུན་དུས་གཅིག་སྒྲུབ་བསྐུར་བྱེད་ན་དེ་འདྲ་ཚར་བདུན་བཤམ། སོ་སོའི་མཐའ་རྟེན་ཆས། དང་པོ་སྤྱན་མ་ལ་རིལ་བུ་ཚད་ལྡན་བསྒྲུབས་པའམ་མེད་ན་ཨ་རུ་ར་སློབ་མའི་གྲངས་མཉམ་དང་ཁྲུས་ཆས། གཉིས་པ་ལོ་མ་ཅན་ལ་དེའི་སྨན་རིལ་ལམ་སྤྲུ་ནག་ཤུ་དག་གུ་གུལ་ལ་སྔགས་བཏབ་པ། གསུམ་པ་འོད་ཟེར་ཅན་མ་ལ་སེང་ལྡེང་དབྱུག་པ་རྡོ་རྗེའི་ཏོག་ཅན། བཞི་པ་གཙུག་ཏོར་ལ་ཕུར་བུ་བྱད་དཀྲོལ་ཆས། ཚོན་སྐུད། གྲི་གསར་པ། ཡུངས་ཀར། མེ་ཧོམ། ཁྲུས་ཆས། གླུད་གཏོར་སོགས་བསྡོག །ལྔ་པ་ཤེར་ཕྱིན་དཀར་མོར་བསྒྲུབས་པའི་སྨན་མར་རམ་ཤུ་དག་དཀར་པོ་སྔགས་བཟླས། དྲུག་པ་སྒྲོལ་དཀར་ལ་ཕྱག་རྒྱ་བཅིངས་པས་ཆོག །བདུན་པ་རྨ་བྱ་ཆེན་མོར་ཚེ་འབྲང་རིལ་ཆང་རྣམས་བཀོད། འཆི་བསླུའི་གླུད་ཆངས་བུ་བཅས་པ་དང་ཁྲུས་ཆས་ཀྱང་ཉེར་བསྡོག་བྱའོ། ༈ །ནད་ཞི་བྱེད་ཀྱི་སྐོར་ལ། ཀློང་གསལ་སྨན་བླ་ལ། ཚོམ་བུའི་སྟེང་བུམ་པ་ཆིངས་སྔོན། གཡས་གཡོན་དུ་ཕྲེང་བ། རྡོ་རྗེ། ལྷུང་བཟེད་ཨ་རུ་ར་ལྡན་པ། སྨན་སྣ་ཚོགས་བཅས། ༈ གནམ་ཆོས་སྨན་བླ། མཎྜལ་ཚོམ་བུ་གཅིག་པའི་སྟེང་དབང་གཏོར་སྐུ་ཙཀ་དར་གདུགས་སྔོན་པོ་ཅན་བཀོད། ནད་པ་རྗེས་འཛིན་བྱེད་ན་སྔོན་གཏོར་དང་ཤོག་ཁྲ་བསྡོག ༈ །བདུད་འདུལ་པའི་ལུགས་ཀྱི་ལོ་གྱོན་མའི་དབང་ལ། རས་བྲིས་སམ་ཚོམ་བུ་གཅིག་པའི་ཁར་བུམ་པ་ཆིངས་དཀར་ཉེར་ལྔའི་རྫས་ལྡན། གཡས་སུ་གཏོར་ཟླུམ་དཀར་པོ་འཁོར་བཞི་དང་ཀྱུ་གུས་བསྐོར་བ། གཡོན་དུ་མེ་ལོང་སྨན་ལྔ་དང་སིནྡྷུ་རས་བྱུགས་པ་དང་ཤེལ་ཕྲེང་བཅས། ༈ གནམ་ཆོས་ལུགས་ཀྱི་གཏོར་དབང་ལ་གཏོར་མ་གཞུང་དང་དཔེ་རིས་ལས་འབྱུང་བ་སོ་སོའི་ཙཀ་ལི་བཙུགས་པ་བཤམ། ༈ སྟག་ཤམ་ལོ་གྱོན་མ་ལ། མཎྜལ་ཚོམ་བུ་གཅིག་སྟེང་བུམ་པ་ཉེར་ལྔའི་བཅུད་དང་ཆིངས་དཀར་འབྲས་བུ་ཅན་གྱི་ཤིང་གི་ཁ་རྒྱན་ལྡན་པ། མདུན་དུ་རིན་པོ་ཆེའི་སྣོད་དུ་སྨན་སྣའི་ཕྱེ་མ་བཞག ༈ །གྲུབ་ཐོབ་རིལ་དཀར་སྒོམ་ལུང་ལ། གཞི་སྟེང་ངམ་སློབ་དཔོན་མདུན། སྟེགས་དཀར་པོའི་ཁར་ཐོད་པ་མཚན་ལྡན་ཆང་ཉིང་ཁུ་བཟང་པོས་བཀང་བ་བཞག ༈ གདོན་ཞི་བྱེད་སྐོར་ལ། ཉང་གཏེར་ནམ་མཁའ་ལྡིང་དམར་པོ་ལ། བུམ་པ་དང་གཏོར་མ་ཁོ་ན། ༈ བྱང་གཏེར་ཁྱུང་ཆེན་ཡོངས་རྫོགས་ལ་མཎྜལ་ཚོམ་བུ་ལྔ་བཀོད་པའི་སྟེང་དུ་བུམ་པ། མདུན་དུ་གཙོ་ཁྱུང་མཐིང་ནག །ཁྱུང་རིགས་བཞི་བསྡུས་པའི་ཙཀ་ལི། གཡས་གཡོན་དུ་དབུ་རྒྱན་དང་རྡོར་དྲིལ་བཀོད། ༈ ལས་ཀྱི་བྱ་ཁྱུང་ནག་པོ་ལ། ཚོམ་བུའི་སྟེང་གཏོར་མ་གཙོ་འཁོར་བརྒྱད་པ་མེ་རིའི་རྒྱན་ལྡན་ལ་སྐུ་ཙཀ་དར་གདུགས་དབུབ། ༈ ལས་འབྲེལ་ལུགས་ཀྱི་གཉེན་པོ་ལྷ་གསུམ་ལ། སྟ་གོན་རྫས་མཆོད་པ་བཅས། རས་བྲིས་སམ་ཚོམ་བུ་གཙོ་འཁོར་ལྔ་པའི་སྟེང་དུ་ཁྲིའུ་གསུམ་ལ་བུམ་པ་མགུལ་ཆིངས་ནག་པོ་ཅན་ཉེར་ལྔའི་རྫས་ལྡན་གསུམ་བཞག །གཙོ་བོ་གསུམ། ཀླུ་བརྒྱད་བཅས་ཀྱི་ཙཀ་ལི། སྔགས་བྱང་། རྒྱབ་ཏུ་དཔལ་གཏོར། གཞན་ཡང་ཡུངས་ཀར། སེང་ཕུར། རལ་གྲི །རྡོ་རྗེ། སྨྱག་ཤད། རྨ་བྱའི་སྒྲོ་མདོངས། གུ་གུལ། དྲག་པོའི་འཁོར་ལོ། གཞུང་གསལ་རྫས་སྣ་ཡོད་ན་དང་། མེད་ན་རྫས་རྒོད་རྣམས་ཀྱང་གང་བདེར་བཞག ༈ །མཆོག་ལྡན་མགོན་པོའི་གཉེན་པོ་ལྷ་ལྔ་ལ། དཀྱིལ་འཁོར་རས་བྲིས་སམ་ཚོམ་བུ་གཅིག་པའི་སྟེང་དུ་བུམ་པ་ཆིངས་ནག་ཅན། མདུན་དུ་ལྷ་ལྔའི་ཙཀ་ལི་དང་རྟ་མགོ་ལྗང་ཞུར་རྔོག་མ་དམར་སེར་མར་ཟན་ལ་བཅོས་པ། གཡས་སུ་ཁྱུང་ལྔའི་རིལ་བུ་དང་ཐོད་ཕྲེང་། རྒྱབ་ཏུ་ཚེ་འབྲང་རིལ་ཆང་བཅས་པ་དང་། གནམ་ལྕགས་རྡོ་རྗེ། གཡོན་དུ་མེ་ལོང་། གདབ་ཕུར་སྟེགས་ལ་གཟུག ༈ །མ་ཏིའི་ཁྱུང་དམར་ལ། ཚོམ་བུ་གཙོ་འཁོར་ལྔ་པའི་སྟེང་བུམ་པ་ཁྱུང་ལྔའི་རྫས་ལྡན་དང་། ཡོད་ན་བྱ་ཁྱུང་རིགས་ལྔའི་སྐུ་ཙཀ་སོ་སོར་བཞག ༈ །ར་ཞི་པད་འཛིན་ཁྱུང་ཁྲ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། གཡས་སུ་ཐོད་ཆང་། གཡོན་དུ་མེ་ལོང་། རྒྱབ་ཏུ་ཁྱུང་ལྔའི་རིལ་བུ་སློབ་མའི་གྲངས་མཉམ་སྦྱིན་རྒྱུ་དང་སྐེ་ལ་འདོགས་རྒྱུའི་ཐུམ་པོ་བཅས། ༈ སྟག་ཤམ་ཁྱུང་ཁྲ་ལ། ཚོམ་བུ་ལྔ་པའི་སྟེང་བུམ་པ་ཁྱུང་ལྔའི་རྫས་དང་ཆབ་ཀྱིས་བཀང་བ། གཡས་གཡོན་དུ་ཐོད་ཆང་རྡོ་རྗེ། ཁྱུང་ལྔ་བཏབ་པའི་དྲི་ཆབ། ཁྱུང་ལྔ། ཕུར་བུ། ཡུངས་ཀར་འབྲུ་དགུ་སློབ་མའི་གྲངས་མཉམ་ཤོག་ཐུམ། ཐུན་རྭ། རི་རབ་སྟེང་དཔལ་གཏོར་སྐུ་རྟེན་དང་བཅས་པ་བཞག ༈ །རོལ་རྡོར་ཁྱུང་ཁྲའི་གཏོར་དབང་ལ། དཔལ་གཏོར་སྐུ་རྟེན་ཅན། ཕྲེང་བ་ཐོད་ཆང་རྡོ་རྗེ་བཅས། ༈ བདེ་གླིང་དྲག་པོ་ལྷ་གསུམ་ལ། རས་བྲིས་སམ་ལྷ་གྲངས་ཚོམ་བུའི་སྟེང་ཟངས་བུམ་ཉེར་ལྔའི་རྫས་དང་འོ་མས་བཀང་བ། ཤར་དུ་ལྷ་ཙཀ་དང་ཧཱུྃ་བཅུ། ལྷོར་དཔལ་གཏོར་སྐུ་གཟུགས་དར་གདུགས་བཅས། ནུབ་ཏུ་ཐོད་ཆང་ཕྲེང་བ་སྒྲུབ་ཡིག །བྱང་དུ་དུར་ཁྲོད་ཆས་བརྒྱད་རལ་གྲི་ལྕགས་ཀྱུ །གཞན་ཡང་ཚེ་རིལ་ཆང་བཟའ་བཏུང་། བཀའ་སྲུང་དམར་གཏོར་བཅས་འདུ་བྱ། ༈ དྲག་པོ་རྟ་ཁྱུང་ལ། ཚོམ་བུའི་སྟེང་དཔལ་གཏོར་སྐུ་རྟེན་དར་གདུགས་ཅན། མདུན་དུ་བུམ་པ་ཆིངས་དམར་བཅས་བཀོད། ༈ གཟའ་སྲུང་གསང་བདག་ཉི་མ་མདུང་གང་མ་ལ། མཎྜལ་པདྨ་འདབ་བརྒྱད་ཚོམ་བུ་སྔོན་པོ་གཅིག་བཀོད་པའི་སྟེང་དུ་མཉྫིའི་ལ་བུམ་པ་ཉེར་ལྔའི་བཅུད་ལྡན། གཡས་གཡོན་སྐུ་ཙཀ །རུས་ཕྲེང་། གནམ་ལྕགས་རྡོ་རྗེ། མདུན་རྒྱབ་གང་བདེར་དཔལ་གཏོར་རྒྱན་ལྡན་བཀོད། ༈ ཁྱུང་དམར་མེའི་གཤོག་པ་ཅན་ལ། མཎྜལ་ཚོམ་བུ་ལྔ་པའི་དབུས་སུ་ཁྲིའུར་རྣམ་བུམ། མདུན་སོགས་སུ་སྐུ་ཙཀ །ཕྲེང་བ། ཤེལ་རྡོ། དབང་གཏོར་རྒྱན་ལྡན་བཀོད། ༈ མཆོག་གླིང་ཕྱག་རྡོར་རྡོ་རྗེ་བེ་ཅོན་ལ། མཎྜལ་ཚོམ་བུ་གཅིག་སྟེང་རྣམ་བུམ་ཆིངས་མཐིང་ག །སྐུ་ཙཀ་གསུམ། སྔགས་བྱང་དང་རཀྴའི་ཕྲེང་བ། མདུན་དུ་དཔལ་གཏོར་བཅས། ༈ གཟའ་ཡུམ་རྗེས་གནང་ལ། སྟེགས་གཙང་མར་པདྨ་འདབ་བརྒྱད་སྟེང་བུམ་པ་བ་དམར་གྱི་འོ་མ་དང་ཆུ་གཙང་གིས་བཀང་བ་ལ། ཙན་དན་དཀར་པོ། དེ་བ་དཱ་རུ། རྒྱ་ཤུག །རུ་རྟ། བཙོད། ཏིལ་དཀར། གི་ཝཾ། གུར་གུམ། ཅུ་གང་། ག་པུར། གུ་གུལ་ནག་པོ། ཧ་ས་དེ་བ། རྨ་བྱའི་མདོངས་ཀྱི་ཕྱེ་མས་བཀང་། མགུལ་ཆིངས་དམར་པོ་བྱ། རྒྱབ་མདུན་དུ་དམར་གཏོར་རྒྱན་ལྡན། ཐོད་ཆང་། རྡོ་རྗེ་རྣམས་བཞག །བྱབ་ཁྲུས་བྱེད་ན་དེའི་ཆས་ཀྱང་བསྡོག ༈ །ཀློང་གསལ་སེང་གེ་སྒྲའི་དབང་ལ། མཎྜལ་པདྨ་འདབ་བརྒྱད་ལྟེ་བར་ཧྲཱིཿདཀར་བྲིས་པའམ་ཚོམ་བུ་གཅིག་པའི་སྟེང་བུམ་པ་ཉེར་ལྔའི་རྫས་དང་ཆིངས་དཀར་ཅན། གཡས་གཡོན་ཤེལ་ཕྲེང་། ཤེལ་རྡོ། རྒྱབ་ཏུ་གཏོར་ཟླུམ་པད་འདབ་རྒྱན་སྤྲོས་ཅན་བཞག ༈ ࿋ ཆོས་གླིང་གཏུམ་པོ་སེང་སྒྲོག་ལ། རས་བྲིས་སམ་ཚོམ་བུ་མཐིང་ནག་གཅིག་བཀོད་པའི་ཁར་བུམ་པ་མགུལ་ཆིངས་མཐིང་ནག་གཡས་གཡོན་མདུན་རྒྱབ་རྣམས་སུ། ཐོད་ཆང་མེ་ཏོག་རྡོ་རྗེ་དཔལ་གཏོར་བཅས་བཤམ། ࿋ ༈ །གྲིབ་དང་མི་གཙང་བ་སོགས་ཞི་བའི་སྐོར་ལས། བི་མའི་ལུགས་ཀྱི་རྣམ་འཇོམས་དཀར་པོའི་རིག་གཏད་ལ། ཚོམ་བུ་ལྷ་གྲངས་ཀྱི་ཁར་བུམ་པ་ཉེར་ལྔའི་རྫས་དང་རྒྱན་ལྡན་འབྲས་བུ་ཅན་གྱི་ཤིང་གིས་ཁ་བརྒྱན་པ་བཞག ༈ །བ་རི་ལུགས་ཀྱི་རྣམས་འཇོམས་ལྗང་སྔོན་ལ། པདྨ་འདབ་བརྒྱད་སྟེང་བུམ་པ་རྫས་དང་ཆས་སོགས་གཞུང་གསལ་ལྟར། ༈ སངས་རྒྱས་གསང་བའི་རྣམ་འཇོམས་མཐིང་ནག །མཎྜལར་བུམ་པ་དེ་མཚུངས། ཕྱག་མཚན་རྡོ་རྗེ། རྫས་བརྒྱད་སོ་སོ་བ་རྣམས་བཞག །བླ་སློབ་མཉམ་དུ་འདོན་རྒྱུ་གི་ཝཾ་གུར་གུམ་གྱིས་བྲིས་པའི་གཟུངས་དཔེ་འཛོམ་ན་རབ། མ་འཛོམ་ན་སྤར་མ་ལ་དེ་དག་བྱུགས་པའི་དཔེ་སྟ་གོན་བྱ། རྣམ་འཇོམས་སྔ་ཕྱིའི་རིགས་དང་སྨེ་བརྩེགས་ལ་མེ་ལོང་། ཁྲུས་དར། ཁྲུས་གཞོང་རྣམས་འདུ་བྱ། འགའ་རེ་ལ་ཞི་དྲག་གི་སྦྱོང་ཆས་གུལ་ཡུངས་རྣམས་ཀྱང་བསྡོག་གོ ༈ །གནམ་ཆོས་རྣམ་འཇོམས་ལྗང་གུ་ལ། ཚོམ་བུ་ལྗང་གུ་གཅིག་སྟེང་བུམ་པ་སོགས་གཟུངས་དབང་ཆས་བཀོད། ༈ བདུད་འདུལ་རྣམ་འཇོམས་ཁྲོ་ནག་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་དེ་རྒྱབ་བཅུ། དེ་རྒྱབ་བཞི་བཀོད་པའི་སྟེང་དུ་རྣམ་བུམ་ཆིངས་སྔོན་སྐུ་ཙཀ་མེ་ལོང་ཤེལ་རྒྱན་ཅན། གཡས་སུ་དཔལ་གཏོར། གཡོན་དུ་ལྷ་ཙཀ །མཆོད་གཏོར་གཞུང་གསལ་བཀོད། ༈ ཀློང་གསལ་རྣམ་འཇོམས་ལ། ཚོམ་བུ་གཅིག་སྟེང་རྣམ་བུམ་ཆིངས་དཀར། ཐོད་ཆང་རྡོ་རྗེ། དབང་གཏོར། དབྱངས་གསལ་བཅས། ༈ ཉང་ལུགས་ཁྲོ་མོ་སྨེ་བརྩེགས་ཀྱི་རྗེས་གནང་ལ། མཎྜལ་ཚོམ་བུ་གཅིག་པའི་སྟེང་རྣམ་བུམ། གཡས་སུ་མཁའ་འགྲོའི་དཔལ་གཏོར། གཡོན་དུ་འབུལ་གཏོར་བཅས། ༈ ཁྲོ་བོ་སྨེ་བརྩེགས་ལ་ཚོམ་བུ་གཅིག་སྟེང་རྣམ་བུམ་ཆིངས་སྔོན། དབང་ཕྲེང་། རྒྱ་གྲམ། སྐུ་ཙཀ །ཕྱག་མཚན་བཅས། ༈ ཁྲོ་མོ་སྨེ་བརྩེགས་ལ་ཚོམ་བུ་བུམ་པ་གོང་མཚུངས། རྡོ་རྗེ་མེ་འབར། མེ་ཆུའི་ཙཀ་ལི་བཅས། ༈ ངག་དབང་རྡོ་རྗེའི་སྨེ་བརྩེགས་ལ། མཎྜལ་ཚོམ་བུ་ནག་པོ་གཅིག་བཀོད་པའི་སྟེང་བུམ་པ་ཉེར་ལྔའི་བཅུད་ལྡན་མགུལ་ཆིངས་མཐིང་ནག་ཁ་རྒྱན་ལྡན་པ་བཀོད། ༈ གཏེར་གསར་སྨེ་བརྩེགས་ལ། རས་བྲིས་སམ་ཚོམ་བུ་སྟེང་རྣམ་བུམ། མདུན་དུ་དབང་གཏོར། སྐུ་ཙཀ །སྔགས་ཕྲེང་། རྡོ་རྗེ་རྣམས་བཞག ༈ །བྱད་ཕུར་ཞི་བྱེད་སྐོར་ལས། བི་མ་ལའི་ལུགས་ཀྱི་གདུགས་དཀར་ལ། རས་བྲིས་སམ་ཚོམ་བུའི་ལྷ་གྲངས་སྟེང་བུམ་པ་ཉེར་ལྔའི་རྫས་ལྡན་མགུལ་ཆིངས་དཀར་པོ་དང་འཛོམ་ན་སྲུང་འཁོར་དང་། མཐའ་རྟེན་སྤྱི་འགྲོ་སྤྲོ་ན་རྟགས་བརྒྱད་ཙམ་བཞག ༈ །བྱད་འགྲོལ་རྡོ་རྗེ་གཙུག་ཏོར་བྱིན་རླབས་ལ་ཚོམ་བུ་གཅིག་སྟེང་རྣམ་བུམ་ཆིངས་སྔོན་ཁྱད་པར་རྫས་ལྡན། མདུན་དུ་གཟུངས་རིང་གླེགས་བམ་མམ་སྔགས་བྱང་བགྲང་ཕྲེང་། རལ་གྲི་དར་ནག་བཏགས་པ་བཀོད། ༈ ࿋ བྱད་ཁྲོལ་གསེར་ལྡེ་ལ། སྟེགས་བུ་ཁེབས་ལྡན་གྱི་ཁར་མཎྜལ་པདྨ་འདབ་བརྒྱད་དམ་ཚོམ་བུའི་ཁར་མཉྫའི་སྟེང་དུ་རིན་པོ་ཆེའི་བུམ་པ་ཁྱད་པར་གྱི་རྫས་གཞུང་གསལ་ལྟར་ཁ་རྒྱན་མགུལ་ཆིངས་ཀྱིས་སྤྲས་པ། རྒྱུན་འབབས་ཀྱི་ཆུ་ལ་རིན་ཆེན་སྣ་ལྔ་བརྡར་ཕྱེ་དང་། བྱ་འུག་དང་རུ་སྦུབ་སྲེག་བགྱིས་པའི་ཐལ་བ་བཏབ་པར་འཐོར་གཡབ་བཙུགས་པ། མདུན་ངོས་སུ་ཟླུམ་གཏོར། བགེགས་གཏོར་དཀར་ཟླུམ་ཏིང་ལོ་མཐེབ་ཀྱུ་རིལ་བུ་མདུན་དུ་གླུད་གཟུགས་བཅས། གཞི་བདག་གཏོར་མ། ཁྲུས་གཞོང་། མེ་ལོང་ཁྲུས་དར། མེ་ཏོག་དཀར་པོ། མདའ་དར་སྣ་ལྔ་མེ་ལོང་བཅས། གྲི་ལྕགས་ཆུ་གྲིའི་དབྱིབ་ཅན། ས། ཆུ། དཔལ་འབར། རླུང་གཡབ། བ་ལུ། སྤེན་མ། རྨ་བྱའི་མདོངས་གསུམ་གྱི་ཕོན་པོ། འོམ་བུ། ཀུ་ཤ །འཇག་མ་རྣམས་ཀྱི་ཕོན་པོ་བཅས་དང་། གདན་དཀར་ནག །བྱད་ཐག་སྔོ་དམར། སཱཙྪ་ནག་པོ་བཅས་སྒྲུབ་བྱའི་གྲངས་མཉམ། ལྕགས་སླང་དུ་སྐྱེར་ཧོམ་གྲུ་གསུམ། ཁྲུས་གཞོང་ཆེ་བ་བཅས་ཚོགས་པར་བྱའོ། ࿋ ༈ ཀློང་གསལ་གདུགས་དཀར་ལ། མཎྜལ་ཚོམ་བུ་གཅིག་པའི་སྟེང་བུམ་པ་ཆིངས་དཀར་ཉེར་ལྔའི་བཅུད་ལྡན། གཡས་གཡོན་སོགས་སུ་ཤེལ་ཕྲེང་། ཤེལ་རྡོ་མེ་ལོང་། ཟླུམ་གཏོར་དར་གདུགས་ཅན། རྫས་རྟགས་བཅས། ༈ གཏེར་གསར་རྡོ་རྗེ་མཁའ་འགྲོ་ལ་རས་བྲིས་སམ། ཚོམ་བུ་གཙོ་འཁོར་ལྔ་པའི་སྟེང་རྣམ་བུམ། གཡས་གཡོན་དུ་ཐོད་ཆང་། ཤེར་ཙཀ །ཤེལ་རྡོ་བཅས་སོ། ༈ ࿋ །ཐུགས་སྒྲུབ་རྡོ་རྗེ་གཙུག་ཏོར་བྱད་འགྲོལ་ལ། སྟེགས་བུར་བུམ་པ་མགུལ་ཆིངས་མཐིང་ནག་བུམ་རྫས་ཉེར་ལྔ། བཟང་དྲུག གི་ཝཾ། ཤུ་དག །བྱང་སེམས་དཀར་དམར། ཅུ་གང་སིནྡྷུ་ར། ཤིང་ཀུན། ཡུངས་དཀར། བདུད་རྩི་ཆོས་སྨན་རྣམས་སྦྱར་བའི་ཕྱེ་མ་དང་དྲི་བཟང་ཆུས་བཀང་བ། རེ་བའི་གདན་ནག་པོ་གྲུ་གསུམ། སྐུད་པ་སྔོ་དམར་འདོམ་དོ། སཱཙྪ་ནག་པོ་བཅས་སློབ་མའི་གྲངས། ཆུ་གྲི་རྣོ་ཆོད་ཅན་གཞུང་གསལ། བལ་བུ་སྤེན་མ་ལྕུག་མ་ཀུ་ཤ་སོགས་ཀྱི་ཕོན་པོ། སྐྱེར་པའི་མེ་ཧོམ། བསྲེག་རྫས་ཡུངས་དཀར་ནག་ཐང་ཁྲོམ་འབྲས་བུ་བཅས་ཉེར་བསྡོག་བྱའོ།། ࿋ ༈ །།སྡིག་སྒྲིབ་ཞི་བྱེད་ལ། ཆོས་དབང་སྤྱན་རས་གཟིགས་འཁོར་བ་དོང་སྤྲུགས་ལ། པདྨ་འདབ་དྲུག་ཡིག་བདུན་བྲིས་པའི་དཀྱིལ་འཁོར་གྱི་སྟེང་དུ་རྣམ་བུམ་ཐོད་ཆང་མེ་ལོང་ལ་མཚལ་གྱིས་ཡིག་བདུན་བྲིས་པ་ཤེལ་རྡོ་རྣམས་བརྩེགས་ལ་བཞག །སྐུ་ཙཀ་ཡིག་བདུན་སྔགས་བྱང་ཤེལ་རྡོ་མེ་ལོང་། དབང་གཏོར་སྒྲུབ་ཡིག་རྣམས་ཀྱང་བསྐོར་ནས་བཞག ༈ །འཇའ་ཚོན་ལྟུང་བཤགས་ཆོ་ག་ལ། ཚོམ་བུ་གཙོ་འཁོར་ལྔ། དེ་རྒྱབ་བཅུ་རིམ་གསུམ་བཀོད་པའི་སྟེང་རྣམ་བུམ་ཆིངས་སེར། རིག་དབང་ཆས། འབྲུ་ལྔ། ཕྱག་མཚན་ལྔ། ཐིག་ལེ་ལྔ། འབྱུང་ལྔའི་ཙཀ་ལི། རྫས་བརྒྱད། རྟགས་བརྒྱད། རྒྱལ་སྲིད་རྣམས་བཀོད། ༈ གནམ་ཆོས་དགོངས་གཏེར་ཀུན་རིག་ལ། དཀྱིལ་འཁོར་སྟེང་རྣམ་བུམ་ཆིངས་དཀར་ཅན་དང། ཀུན་རིག་ཙཀ་ལི་གསར་མའི་ལུགས་ལྟར་ཚང་བའམ་གཞུང་གསལ་ཕྱོགས་བསྡུས། རྒྱལ་སྲིད་བཅས། ༈ ཀློང་གསལ་མི་འཁྲུགས་པ་ལ། རས་བྲིས་སམ་ཚོམ་བུའི་ཁར་བུམ་པ་ཆིངས་སྔོན། གཡས་གཡོན་དུ་ཕྲེང་བ། རྡོ་རྗེ་ལྷུང་བཟེད། སྐུ་རྟེན་བཅས་བཞག ༈ །རྡོར་སེམས་སྒྲིབ་སྦྱོང་ཡེ་ཤེས་ཆུ་རྒྱུན་ལ། རས་བྲིས་སམ་ཚོམ་བུ་གཅིག་གི་སྟེང་རྣམ་བུམ། གཡས་གཡོན་མདུན་རྣམས་སུ་བུམ་པ་རྡོར་སེམས་རིལ་བུས་བཀང་བ་ཆིངས་དཀར་དབུ་རྒྱན་གྱིས་སྤྲས་པ། གསང་ཐོད། རིག་ཙཀ །ཤེལ་རྡོ་རྣམས་དང་། བྱེ་མ་ཡུངས་ཀར་ཁྲུས་བུམ་མེ་ལོང་སོགས་འདུ་བྱའོ། ༈ །བླ་མ་ལོངས་སྐུ་འགྲོ་འདུལ་ལ། དཀྱིལ་འཁོར་རམ་དབུས་སུ་ཚོམ་བུ་ཆེ་ཆུང་གཉིས། དེ་རྒྱབ་བརྒྱད། དེ་རྒྱབ་བཞི་བཀོད་པའི་སྟེང་དུ་རྣམ་བུམ་ཆིངས་སྔོན་ཉེར་ལྔའི་བཅུད་ལྡན། དབུ་རྒྱན་སོགས་རིག་དབང་ཆས། ཤར་སྒོར་བུམ་པ་ཆིངས་དཀར་དེ་མཚུངས། ལྷ་ཙཀ་ཚང་བ། དབང་ཕྲེང་། མེ་ལོང་། རྫས་རྟགས་སྣ་བདུན་བཅས་བཀོད། ༈ གཏེར་གསར་འཁོར་བ་དོང་སྤྲུགས་ལ། པདྨ་འདབ་བརྒྱད་ལྟེ་བར་ཧྲཱིཿདམར་བྲིས་པའི་སྟེང་རྣམ་བུམ་ཐོད་ཆང་མེ་ལོང་ཧྲཱིཿདམར་བྲིས་པ་རྣམས་བརྩེགས་ལ་དར་དམར་གྱིས་བཀབ། མདུན་དུ་མྱང་གྲོལ་དབང་རིལ་བུའི་བུམ་པ། རྒྱབ་ཏུ་དཔལ་གཏོར་རྒྱན་ལྡན་བཞག ༈ །རིགས་གསུམ་སྙིང་ཏིག་གི་དོང་སྤྲུགས་ལ། དཀྱིལ་འཁོར་རམ་ཚོམ་བུ་ལྷ་གྲངས་དབུས་བུམ་པ་ཆིངས་དམར་ཅན། སྐུ་ཙཀ །མྱང་གྲོལ་བུམ་དབང་སྦྲེལ་ན་དེའང་བཤམ་སོ།། ༈ །།དེ་ནས་རྒྱས་པའི་ལས་ཀྱི་སྐོར་ལས། ཚེ་རྒྱས་པ། གྲུབ་ཆེན་དཔལ་རྡོར་ཚེ་སྒྲུབ་རྡོ་རྗེའི་སྲོག་ཤིང་ལ། སྟེགས་བུའི་དབུས་སུ་ཚེ་འབྲང་། གཡས་སུ་ཚེ་ཆང་། གཡོན་དུ་ཚེ་རིལ། མདུན་དུ་གཏོར་མཆོད། མདའ་དར། ལི་ཁྲི་བཅས། ༈ གྲུབ་ཐོབ་ཟླ་བ་པའི་ཚེ་སྒྲུབ་ལ། མཎྜལ་ཚོམ་བུ་གཅིག་པའི་ཁར་བུམ་པ་ཆིངས་དཀར་ཅན། མདུན་སོགས་སུ་སྐུ་ཙཀ །སྔགས་ཕྲེང་། ཕྱག་མཚན་བུམ་པ། དར་དང་རིན་ཆེན་རྒྱན། དབང་གཏོར་དཀར་ཟླུམ་རྣམས་བཀོད། ༈ འབྲི་གུང་ཆོས་གྲགས་སྒྲ་མི་སྙན་གྱི་ཚེ་སྒྲུབ་ལ། མཎྜལ་པདྨ་དམར་པོ་འདབ་བརྒྱད་ཀྱི་དབུས་རྐང་གསུམ་ཁར་ཐོད་པ་བདུད་རྩིས་བཀང་བ་ལ་ཚེ་རིལ་སློབ་མའི་གྲངས་མཉམ་བླུགས་པའི་ཁ་མེ་ལོང་དར་དམར་གྱིས་བཀབ། ཤར་དུ་ཚེ་གཏོར་ཟླུམ་པོ་བྲིས་སྐུ་བཙུགས་པ་དང་ཤེལ་རྡོ། ལྷོར་གཙོ་བུམ་དང་མདའ་དར། ནུབ་ཏུ་ཆང་ཕུད་དང་དྲི་ཆབ། བྱང་དུ་ལས་བུམ་རྣམས་བཀོད། ༈ ཀློང་གསལ་རྣམ་རྒྱལ་མ་ལ། ཚོམ་བུའི་སྟེང་བུམ་པ་ཆིངས་དཀར། གཡས་གཡོན་དུ་ཤེལ་ཕྲེང་། སྣ་ཚོགས་རྡོ་རྗེ་དང་མདའ་གཞུའི་ཙཀ་ལི། ཚེ་འབྲང་ཚེ་དཔག་མེད་ཀྱི་སྐུ་རྟེན་ཅན། ཚེ་རིལ་མཆོད་རྟེན་བཅས། ༈ དབང་ཆེན་ཚེ་སྒྲུབ་ཉི་ཟླའི་གྭའུ་ལ། ཚོམ་བུ་དམར་པོ་གཅིག་གི་སྟེང་རྣམ་བུམ། གཡས་གཡོན་ཐོད་ཆང་རིག་ཙཀ་ཤེལ་རྡོ། རྒྱབ་ངོས་དཔལ་གཏོར་བཞག ༈ །སྟག་ཤམ་པདྨ་གསང་ཐིག་ཅེས་གུ་རུ་ཞི་བའི་ཚེ་དབང་ལ། པདྨ་འདབ་བརྒྱད་དམ་ཚོམ་བུ་ལྔ་པའི་ཁར་རྣམ་བུམ། མདུན་དུ་རྡོ་རྗེ་མེ་ལོང་། གཡས་གཡོན་ཚེ་རིལ་ཆང་། རྒྱབ་ཏུ་ཚེ་མདའ་བཅས། ༈ ཆོས་གླིང་ཐང་རྒྱལ་ལ། པདྨ་འདབ་བརྒྱད་སྟེང་ཚེ་འབྲང་རྟ་མགོས་མཚན་པའི་མཐར་རིལ་བུས་བསྐོར་བ་དང་། ཐོད་པར་ཚེ་ཆང་བཅས་བཤམ། ༈ ཚེ་སྒྲུབ་རྡོ་རྗེ་སྙིང་པོ་ལ། སྟེགས་བུའི་དབུས་སུ་ཁྲིའུའི་ཁར་ཐོད་པ་མཚན་ལྡན་བདུད་རྩིས་བཀང་བ་གཡས་གཡོན་དུ་ཚེ་རིལ་ཚེ་མདའ་བཀོད། ༈ དྲི་མེད་གླིང་པའི་རྡོ་རྗེའི་སྲོག་སྒྲུབ་ལ། དཀྱིལ་འཁོར་རམ་ཚོམ་བུ་དབུས་དང་མདུན་དུ་རེ་རེ། དེ་རྒྱབ་བཞི་རིམ་གཉིས་བཀོད་པའི་དབུས་སུ་ཁྲིའུར་བུམ་པ་ཆིངས་དམར། གཡས་གཡོན་དུ་ཚེ་རིལ་ཆང་། མདུན་དུ་ལས་བཞིའི་འབྲང་རྒྱས། རྒྱབ་ཏུ་མཆོད་གཏོར་ཟར་སྒོང་ལྟ་བུ་ཕྱོགས་བཞིར་པད་འདབ་དང་མཚམས་སུ་ཚེ་རིལ་གྱིས་སྤྲས་པ་དང་མདའ་དར། ཚེ་ནས་བཅས། ༈ ཚེ་སྒྲུབ་འོད་ཀྱི་སྙིང་པོ་ལ། མཎྜལ་ཚོམ་བུ་དམར་པོ་གཅིག་པའི་སྟེང་བུམ་པ་ཆིངས་དམར་ཅན། མདུན་སོགས་སུ་ཚེ་འབྲང་། ཚེ་རིལ་ཚེ་ཆང་། དཱུར་བ། མདའ་དར་བཅས། ༈ དག་སྣང་ཙཎྚ་ལཱི་ལ། མཎྜལ་ཚོམ་བུ་དམར་པོ་གཅིག་པའི་སྟེང་རྣམ་བུམ། མདུན་དུ་ཚེ་འབྲང་། ཐོད་ཆང་དང་བཅུད་ལེན་རིལ་བུ་གཡས་གཡོན་དུ་བཀོད། ༈ རྡོ་རྗེ་རྒྱ་མདུད་ལ། མཎྜལ་པདྨ་འདབ་བརྒྱད་སྟེང་བུམ་པ་ཆིངས་དམར་སྐུ་ཙཀ་གིས་བརྒྱན་པ། མདུན་སོགས་སུ་ཚེ་འབྲང་། ཚེ་རིལ་ཆང་། མདའ་དར་བཅས། ༈ ཉི་མའི་སྙིང་པོ་ལ། མཎྜལ་ཚོམ་བུ་ལྔ་བཀོད་པའི་དབུས་སུ་མཉྫི་ལ་བུམ་པ་ཆས་བཅུད་ལྡན་པ། མདུན་དུ་ཚེ་འབྲང་། གཉིས་ཀ་སྐུ་ཙཀ་གིས་བརྒྱན་པ། གཡས་གཡོན་དང་རྒྱབ་ཏུ་ཚེ་རིལ་ཚེ་ཆང་ཚེ་མདའ་བཀོད། ༈ ཚེ་སྒྲུབ་པདྨའི་རྒྱ་ཅན་ལ། མཎྜལ་ཚོམ་བུ་གཅིག་པའི་སྟེང་དུ་ཚེ་འབྲང་། གཡས་གཡོན་རྒྱབ་ཏུ་ཚེ་རིལ་ཚེ་ཆང་མདའ་དར་བཀོད། ༈ ལྷུན་རབ་ཚེ་སྒྲུབ་ལ། དཀྱིལ་འཁོར་རས་བྲིས་སམ་ཚོམ་བུ་ལྷ་གྲངས་བཀོད་པའི་དབུས་སུ་མཉྫིའི་སྟེང་རྣམ་བུམ་ཆས་བཅུད་ལྡན་པ། མདུན་དུ་ཚེ་འབྲང་དང་མེ་ལོང་། གཡས་སུ་ཚེ་རིལ། གཡོན་དུ་ཐོད་པར་ཚེ་ཆང་། རྒྱབ་ཏུ་མདའ་དར་བཀོད། ༈ དགོངས་གཏེར་ཚེ་ཡུམ་ཙཎྚ་ལཱི་ལ། དཀྱིལ་འཁོར་གཞུང་མཐུན་ནམ་མཎྜལ་ཚོམ་བུ་དམར་པོ་གཅིག་བཀོད་པའི་སྟེང་དུ། ཁྲིའུ་ལ་རྣམ་བུམ་བཅུད་ལྡན། མདུན་དུ་ཚེ་འབྲང་། གཡས་གཡོན་དུ་ཚེ་རིལ་ཚེ་ཆང་། རྒྱབ་ཏུ་ཤེལ་རྡོ་བཀོད་དོ།། ༈ །།ཤེས་རབ་རྒྱས་པར་བྱེད་པའི་སྐོར་ལ། མ་ཏིའི་འཇམ་དཀར་པད་འདབ་བརྒྱད་ཀྱི་དཀྱིལ་འཁོར་དབུས་ཁྲིའུར་མཚན་བརྗོད་དང་འཇམ་དཔལ་གྱི་སྐུ་བཞུགས། ཤེལ་ཕྲེང། མདུན་དུ་མཆོད་གཏོར་དཀར་ཟླུམ་བཅས་སོ། ༈ །འཇམ་དཔལ་སྨྲ་སེང་དམ་པའི་ལུགས་ལ། མཎྜལ་པདྨ་འདབ་བརྒྱད་སྟེང་རིན་པོ་ཆེའི་སྣོད་དུ་དཔའ་བོ་བཅུ་གཉིས་ཀྱི་རིལ་བུ་བཞག །དར་དམར་སེར་གྱིས་བཀབ། མཆོད་གཏོར་བཅས། ༈ བླ་མ་དགོངས་འདུས་ཆོས་སྡེ་དམར་སེར་ཤེས་རབ་རལ་གྲི་ལ། མཎྜལ་དྲི་བཟང་དང་བ་བྱུང་གིས་བྱུགས་པ་ལ་རྡུལ་ཚོན་དཀར་པོས་ཟླུམ་སྐོར་ཡངས་པའི་ཕྱི་རུ་པདྨ་འདབ་བརྒྱད། དེའི་མདུན་ཕྱོགས་ནས་བརྩམས་པའི་ནང་རིམ་དུ་ཨཱ་ལི་གཉིས་རེ་ཡིག་མགོ་ནང་བསྟན་གཡོན་བསྐོར་དང་། ཕྱི་སྐོར་ཀཱ་ལི་སྡེ་ཚན་བདུན་པོའི་ནང་། ཤ་ཥ་ས། ཧཀྵ་ཞེས་ཆ་བགོས་ཏེ་མགོ་ཕྱིར་བསྟན་གཡས་བསྐོར་དུ་བྲིས་པའི་ལྟེ་བར་མར་ཟན་གྱི་ཀོང་བུར་རས་བལ་སྡོང་བུ་ཅན་གྱི་མར་མེ་དང་། དཀར་གསུམ་བསྲེས་པའི་ཟན་གྱི་བཤོས་ཟླུམ་མཐེབ་ཆེན་ཙམ་པ་སློབ་མའི་གྲངས་མཉམ་བཞག །ཤེལ་ཕྲེང་དང་འབུལ་གཏོར་དཀར་ཟླུམ་སོགས་བཀོད། ༈ དབྱངས་ཅན་མ་དཀར་མོ་ལ། གུར་གུམ་གླ་རྩི་གི་ཝཾ་ཙན་དན་དཀར་པོ་བཞི་ཆ་མཉམ་དུ་སྦྱར་བ་སྟེགས་བུ་ལ་འཐོར་བའི་མཎྜལ་ལ་བའི་འོ་མར་སྦྲང་རྩི་བཞི་མཉམ་རྣམས་སྦྱར་བས་པདྨ་འདབ་བརྒྱད་དབུས་སུ་ཧྲཱིཾ་དང་འདབ་བརྒྱད་ལ་ཨ་ཨཱ་སོགས་དབྱངས་བཅུ་དྲུག་གཉིས་རེ་བཀོད་པ་བཞག །དེ་སྟེང་དཀར་གསུམ་མངར་གསུམ་བཞི་མཉམ་རྣམས་སྦྱར་བའི་ཟན་གྱིས་ཏིང་ལོ་བ་མར་སྦྲང་རྩིས་བཀང་བའི་མར་མེ་སློབ་མའི་གྲངས་མཉམ་བཀོད། མདུན་དུ་ཟླུམ་གཏོར་ཆེ་ཆུང་གཉིས་ཆང་བུ་བཅས་བཞག་གོ ༈ །བླ་མ་སྨྲ་བའི་སེང་གེ་ལ། རས་བྲིས་སམ་ཚོམ་བུ་ལྷ་གྲངས་སྟེང་རྣམ་བུམ་ཆིངས་དཀར། མདུན་དུ་ལྷ་ཙཀ །གཡས་གཡོན་དུ་སྔགས་ཕྲེང་དང་ཤེས་རབ་རིལ་བུ། རྒྱབ་ཏུ་དབང་གཏོར་བཅས། ༈ ཀློང་གསལ་ཕག་དཀར་ཤེས་རབ་གསལ་བྱེད་ལ། དཀྱིལ་འཁོར་ཆོས་འབྱུང་གཞུང་གསལ་ལམ། ཚོམ་བུའི་སྟེང་བུམ་པ་ཆིངས་དཀར། མཐའ་སྐོར་དུ་ཤེལ་ཕྲེང་། ཐོད་ཆང་། དྲིལ་བུ། ཤེས་རབ་རིལ་བུ་རང་གཞུང་ནས་བཤད་པ་ལྟར་དང་། ཟླུམ་གཏོར་དཀར་པོ་རྒྱན་བཅས། ༈ ཀུན་མཁྱེན་བླ་མའི་དགོངས་གཏེར་ཕག་དཀར་ཤེས་རབ་གསལ་བྱེད་ལ། རྡུལ་ཚོན་ནམ་རས་བྲིས་ཀྱི་མཎྜལ་སྟེང་མཉྫི་ལ་རྣམ་བུམ་བཀོད་པའི་ཁར་ཐོད་པ་བདུད་རྩིས་བཀང་བ་ལ། སིནྡྷུ་རའི་མེ་ལོང་ཆོས་འབྱུང་བཾ་ཡིག་སྔགས་ཕྲེང་གིས་བརྒྱན་པས་བཀབ་པའོ།། ༈ །།བསོད་ནམས་ལོངས་སྤྱོད་རྒྱས་པར་བྱེད་པ་ལ། རྣམ་སྲས་ཕྱི་སྒྲུབ་སེར་ཆེན་ལ། རས་བྲིས་སམ་སྣ་ཚོགས་པདྨ་འདབ་བརྒྱད་སྟེང་རྟེན་གཏོར་ཁང་བརྩེགས་མ་བཀོད། དེའི་གཡས་སུ་བུམ་གདན་པདྨ་འདབ་བཞི་འམ་ཚོམ་བུའི་ཁར་བུམ་པ་བཅུད་ལྡན། གཡོན་དུ་མཆོད་གཏོར་ཟླུམ་པོ་གཙོ་འཁོར་དགུ་པ། མདུན་དུ་དབུ་རྒྱན། རྒྱལ་མཚན་དང་ནེའུའི་ཙཀ་ལི་བཀོད། ༈ ནང་སྒྲུབ་མདུང་དམར་ཅན་ལ། རས་བྲིས་སམ་པདྨ་འདབ་བརྒྱད་དམར་པོའི་སྟེང་རྟེན་གཏོར་སྐུ་རྟེན་བཅས། ཤར་དུ་སྤོས་དང་དྲི་ཆབ་ཀྱི་དུང་ཞལ། ཤར་ལྷོར་མར་མེ། ལྷོར་དངུལ་སྣོད་དུ་ཆང་ཕུད། ལྷོ་ནུབ་ཏུ་མདའ་དར། ནུབ་ཏུ་འབྲུ་སྣའི་མེ་ཏོག །ནུབ་བྱང་དུ་མདུང་དམར། བྱང་དུ་འབུལ་གཏོར་ཤ་སོགས་ཀྱིས་བརྒྱན་པ། བྱང་ཤར་དུ་དམར་གཏོར་རྣམས་བཤམ། གནམ་ལྕགས་རྡོ་རྗེ་རྒྱབ་ངོས་ལ་བཞག ༈ །གསང་སྒྲུབ་དྲག་པོ་རྟ་སྔོན་ལ། རས་བྲིས་ཁར་རྟེན་གཏོར་སྐུ་རྟེན་ཅན། ལྕགས་ཀྱི་རྡོ་རྗེ་སྔར་ལྟར་དང་། རལ་གྲིའང་བཞག ༈ །ཡང་གསང་ཕྱག་མཚན་བཞི་པའི་རྗེས་གནང་བཤམ་བཀོད་ནང་སྒྲུབ་མདུང་དམར་ཅན་དང་འདྲ། ༈ རཏྣའི་མདུང་དམར་ལ། རས་བྲིས་སམ་ཚོམ་བུ་དམར་པོ་གཙོ་འཁོར་ལྔ་པའི་སྟེང་རྟེན་གཏོར་སྐུ་ཙཀ་བཅས། གཡས་སུ་མདུང་དམར་རྒྱལ་མཚན། གཡོན་དུ་ནེ་ལེ་ལྕགས་ཀྱུ། རྒྱབ་ཏུ་གྲི་སྙིང་བླ་རྡོ་དང་སྒྲུབ་ཡིག །མདུན་དུ་ཚེ་འབྲང་དང་འབྲང་རྒྱས་ཞལ་དཀར་བཟའ་བཏུང་ཟས་སྣ་བཤམ། ༈ པད་གླིང་ལུགས་ཀྱི་མདུང་དམར་ཅན་ལ། རས་བྲིས་སམ་སྟེགས་དམར་པོར་མེ་ཏོག་དམར་པོའི་ཚོམ་བུ་གཙོ་འཁོར་དགུ་བཀོད་པའི་དབུས་སུ་རྟེན་གཏོར་སྐུ་རྟེན་ཅན། གཡས་གཡོན་དུ་མདུང་དམར་རྒྱལ་མཚན་ནེའུ་ལེ་ལྕགས་ཀྱུ། མདུན་དུ་གྲི་སྙིང་བུལ་ཏོག །སྒྲུབ་ཡིག །རྒྱབ་ཏུ་ཚེ་འབྲང་བཟའ་བཏུང་བཅས། ༈ བྱང་གཏེར་ནོར་ལྷ་ཡོངས་རྫོགས་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ། དེ་རྒྱབ་བརྒྱད། མདུན་མཚམས་གཡས་གཡོན་དུ་གཉིས། དེ་རྒྱབ་བཞི་བཀོད་པའི་སྟེང་དུ་བུམ་པ་ཆིངས་ནག་ཅན། གཡས་སུ་ཛཾ་གཏོར་རིན་ཆེན་འབར་བ། གཡོན་དུ་ཐོད་ཆང་མངར་གསུམ་སྦྱར་བ། རྒྱབ་ཕྱོགས་ཟངས་སྣོད་དུ་ཛཾ་ནག་གི་སྐུ་དང་ཆུ་སྦྱིན་ཆས་བཤམ། ༈ ཞང་བློན་ལ། པདྨ་འདབ་བརྒྱད་དམ་ཚོམ་བུའི་ཁར་རྟེན་གཏོར་སྐུ་ཙཀ་ཅན་བཀོད། ༈ གྲྭ་མངོན་ཛཾ་དམར་ལ། པདྨ་འདབ་བརྒྱད་དམར་པོའི་སྟེང་ཁྲིའུར་ཐོད་ཆང་བུ་རམ་བདུད་རྩི་རིལ་བུ་བཏབ་པ། དེ་མདུན་གཏོར་མ་རིན་ཆེན་འབར་བའི་དབྱིབས་ཅན་ཟས་སྣས་བརྒྱན་པ་བཀོད། གཡས་སུ་ཟངས་བུམ་ཉེར་ལྔའི་རྫས་ལྡན། གཡོན་དུ་ཆུ་སྦྱིན་སྣོད་ཟངས་གཞོང་སྐུ་རྟེན་དང་བཅས་པ། ཉེ་ལོགས་སུ་ཆུ་བུམ་ཡང་བཞག ༈ །བལ་པོ་ཨཿཧཱུྃ་ཛཾ་ནག་ལ། དཀྱིལ་འཁོར་རམ་ཚོམ་བུ་གཙོ་འཁོར་དགུ །དེ་རྒྱབ་བཞི་བཀོད་པའི་དབུས་སུ་ཐུགས་རྟེན་ཐོད་པ་དུམ་གསུམ་ཉེར་ལྔ་སོགས་ཀྱི་བཅུད་ལྡན་ནང་གསུང་རྟེན་སྲོག་འཁོར་དར་གྱིས་དྲིལ་བའི་རྒྱབ་ཏུ་སྐུ་རྟེན་བཅས་བཞུགས། སྟེང་དུ་བུམ་པ་ཆིངས་སྔོན་ཅན། གཡས་སུ་རིན་ཆེན་སྣོད་དུ་གཏོར་མ་རིན་ཆེན་འབར་བ་ཟས་སྣ་བཅས། གཡོན་དུ་རིན་ཆེན་དར་གོས། གཡང་རྫས་སྣ་ཚོགས། རྒྱབ་ཏུ་མདའ་དར། ཚེ་འབྲང་། རིལ་ཆང་། རྫས་རྟགས་རྒྱལ་སྲིད་བཅས་བཞག ༈ །ཀློང་གསལ་ཛཾ་སེར་ལ། མཎྜལ་ཚོམ་བུ་སེར་པོ་གཅིག་བཀོད་པའི་དབུས་སུ་བུམ་པ་ཆིངས་སེར། གཡས་གཡོན་སོགས་སུ་དབང་གཏོར་ནོར་གཟུགས། ཐོད་ཆང་དང་ཕྲེང་བ། རྡོ་རྗེ། སྐུ་ཙཀ་རྣམས་བཀོད། ༈ གནམ་ཆོས་ཛཾ་ལ་རིགས་དགུ་ལ། ཚོམ་བུ་དཀར། དམར། མཐིང་། སེར། ལྗང་། ནག །ཁྲ་བོ་གསུམ། རིགས་དགུ་ཕྱོགས་བསྡུས་ལ་དབུས་དང་ཕྱོགས་མཚམས་བརྒྱད་དུ་དགུ་ཚོམ་དགུའམ་མི་འགྲུབ་ན་གཙོ་འཁོར་དགུ །ཛཾ་དམར་གཉིས། ཛཾ་ནག་བཅས་ལ་ཚོམ་བུ་རང་མདོག་རེ་རེ། ༈ ཨ་པ་རཱ་ཛི་ཏ་ལ་ཚོམ་བུ་དམར་པོ་བཀོད། དབང་རྫས་ནི་གཟུངས་དབང་གི་ཆས་ཤ་སྟག་གོ ༈ །ཚོགས་བདག་ལ་ཚོམ་བུ་དམར་པོ། ༈ རེ་མནྟ་ལ་དམར་སེར། ཀུ་བེ་ར་ལ་ནག་པོ་རྣམས་བཀོད། དེ་གསུམ་ཀར་གནམ་ཆོས་ཆོས་སྐྱོང་སྤྱིའི་བཀའ་གཏད་ཀྱི་ཆས་སོ། ༈ །དྲི་མེད་གླིང་པའི་པདྨ་རྒྱལ་པོ་ལ། དཀྱིལ་འཁོར་རས་བྲིས་སམ། མཎྜལ་ཚོམ་བུ་དབུས་སུ་གཙོ་འཁོར་ལྔ་དེ་རྒྱབ་བཞི་བཀོད་པའི་སྟེང་། བུམ་པ་ཉེར་ལྔའི་རྫས་ལྡན་ཆིངས་སེར་ཅན་གཙོ་བོའི་སྐུ་ཙཀ་གཟུག་པ། གཡས་སུ་དབང་གཏོར། གཡོན་དུ་ཐོད་ཆང་དར་དམར་ཁེབས་བཅས། རྫས་རྟགས་སྣ་བདུན་ཙཀ་ལི་བཅས་བཀོད། ༈ དབང་གི་ལྷ་མོ་མཆེད་གསུམ་ལ། མཎྜལ་པདྨ་འདབ་བརྒྱད་མཐིང་ལྗང་དམར་པོ་གསུམ་ལ་ཚོམ་བུ་རང་མདོག་བཀོད་པའི་སྟེང་གཏོར་མ་དཀར་གསུམ་གྱིས་བརྒྱན་ཅིང་སྐུ་ཙཀ་དར་གདུགས་བཅས་པ་གསུམ་བཀོད། སྔགས་བྱང་། བླ་རྡོ། སྲོག་འཁོར། ཕྱག་མཚན་ནོར་བུ་དང་བུམ་པ། རིན་པོ་ཆེའི་གཞོང་པ་ཟས་སྣས་བཀང་བ། དར་ཟབ་སྣ་ཚོགས། ནོར་སྣ་རིན་པོ་ཆེ་གང་འཛོམ་བཤམ། ༈ ཆོས་རྡོར་ཛཾ་དཀར་ལ། འབྲུའི་པདྨ་འདབ་བརྒྱད་སྟེང་གཞུང་གསལ་གཏོར་མ་དང་། གཡས་གཡོན་ཚེ་རིལ་ཆང་བཞག ༈ །མཆོག་གླིང་བླ་མ་ནོར་ལྷ་ལ། དཀྱིལ་འཁོར་རས་བྲིས་སམ་ཚོམ་བུ་དབུས་སུ་གཙོ་འཁོར་དགུ །གྲ་བཞི་དང་སྒོ་བཞིར་བཞི་རེ་བཀོད་པའི་དབུས་སྟེང་ཁྲིའུར་འཛོམ་ན་གཞུང་མཐུན་བཅའ་སྒྲུབ་བྱས་པའི་གཏེར་བུམ་དང་མ་འཛོམ་ན་གཏོར་མ་གཞུང་མཐུན། གཡས་སུ་རིན་པོ་ཆེའི་སྣོད་དུ་མངར་གསུམ་སྦྱར་བའི་ཆང་། གཡོན་དུ་ཟས་སྣ་གོས་སྣ། རྒྱབ་ཏུ་མདའ་དར། སྐུ་གསུང་ཐུགས་དབང་སྦྱོར་ན་ལྷ་ཙཀ་བཅུ་བདུན། སྔགས་བྱང་། མེ་ལོང་། རྫས་རྟགས་སྣ་བདུན་བཅས་བཀོད། ༈ མཆོག་གླིང་རྣམ་སྲས་གཅིག་དྲིལ་ཡིད་བཞིན་ནོར་བུ་ལ། དཀྱིལ་འཁོར་དབུས་སུ་གཏོར་ཆེན་དར་གདུགས་བཅས། དེ་སྟེང་མཉྫི་ལ་བུམ་པ་མགུལ་ཆིངས་མཐིང་ནག་ཅན། མདུན་དུ་སྐུ་ཙཀ་སྔགས་བྱང་ཕྱག་མཚན་གསུམ་གསུམ་གྱི་ཙཀ་ལི། གཡས་སུ་རིན་པོ་ཆེའི་སྣོད་འབྲུས་བཀང་བར་བླ་རྡོ་སྲོག་འཁོར་གསུམ་པོ། གཡོན་དུ་ཟས་སྣ། དར་གོས་དམར་པོ། ནོར་སྣ་བཅས་བཞག །གཏོར་མ་ཆོས་སྡེ་ཆེན་པོ་ལ་སེར་ཆེན། སྤྱི་ལ་མདུང་དམར་ཅན། མི་དཔོན་ལ་རྟ་སྔོན་ཅན་གཙོར་བྱ་བར་གསུངས་པས་དབང་གི་སྐབས་དམར་སེར་གང་རུང་བྱས་པས་འཐུས་སོ། ༈ །ཀུན་འཁྱིལ་མཆེད་གསུམ་ལ། མཎྜལ་གསུམ་ཕྲེང་ཚར་དུ་བསྒྲིགས་པ་ལ་པདྨ་འདབ་བརྒྱད་སེར་སྔོ་དམར་བའི་ལྟེ་བར་ཚོམ་བུ་རེ་རེ་བཀོད་པའི་སྟེང་དུ་མཉྫི་ལ་ཐོད་པ་མཚན་ལྡན་རེ་རེའི་ནང་དུ་འབྲང་རྒྱས་གཏོར་མ་ནོར་གཟུགས་པད་སྡོང་ཅན་རྩེ་རྒྱན་གསེར་གྱི་སཏྭ་་་་རེས་མཚན་པ་ལ་རྩྭ་ཀུ་ཤའི་ཆུན་པོ་རེ་བཙུགས་པ་ལ་སྐུ་ཙཀ་བཏགས་པ་དར་གདུགས་ལྷ་མདོག་དང་མཚུངས་པ་ཅན་བཀོད། དེ་རྣམས་ཀྱི་སྟེང་ངམ་རྒྱབ་ངོས་མཐོ་བར་སོ་སོའི་བུམ་པ་བཅུད་ལྡན་ཡང་འཇོག ༈ །བྱང་གཏེར་མངའ་དབང་རིན་ཆེན་འབར་བ་ལ། གཞི་སྟེང་ཡི་དམ་སོགས་ཀྱི་དབང་བྱེད་ན་དེའི་ཆས་དང་ཁྲུས་བུམ་རྣམས་བཀོད། ཆས་གཞན་ལག་ལེན་གསར་བཀོད་དུ་གསལ་བ་ལྟར། འབྱུང་ལྔའི་གདན། ལྷ་འདྲེ་མི་གསུམ་སྲོག་ཡིག །རྒྱལ་པོའི་རྟགས་དྲུག །བཀྲ་ཤིས་པའི་རྫས་བཞི། ཚངས་པའི་འཁོར་ལོ་བྲི་སྒྲུབ་ཚད་ལྡན་སྔོན་ནས་བྱས་པ་དང་བཀྲ་ཤིས་རྫས་བརྒྱད། རྟགས་བརྒྱད་དང་། རྒྱལ་སྲིད་རྣམས་རེ་རེ་བཞིན་རྒྱས་པར་གྲབས་སུ་ཚུད་པར་བྱ། ༈ གནམ་ཆོས་ས་སྙིང་ལ། གཟུངས་དབང་གི་ཆས་དང་། ༈ ཀླུ་དགའ་བོའི་བཀའ་གཏད་ལ། དངུལ་ལམ་ཟངས་ཐེབ་ཏུ་མར་གྱིས་བཅོས་པའི་སྦྲུལ་འཁྱིལ་བ་བཞག ༈ །ཀླུ་མི་མགོན་དཀར་པོ་ལ། ཆོས་སྐྱོང་སྤྱིའི་བཀའ་གཏད་ལྟར་ཆས་རྣམས་བཤམ། ༈ དགོངས་གཏེར་སེང་གེ་སྒྲ་ལ། མཎྜལ་པད་དཀར་འདབ་བརྒྱད་དབུས་ཚོམ་བུ་དཀར་པོ་གཅིག་བཀོད་པའི་སྟེང་དུ་རྣམ་བུམ་ཉེར་ལྔའི་བཅུད་ལྡན་ཆིངས་དཀར་ཁ་རྒྱན་བཅས། མདུན་སོགས་སུ་སྐུ་ཙཀ །ཤེལ་ཕྲེང་ཤེལ་རྡོ། ཟླུམ་གཏོར་དཀར་པོ་དར་གདུགས་ཅན་བཞག། ༈ །།རིགས་རྒྱུད་རྒྱས་བྱེད་གཏེར་གསར་རིན་ཆེན་མཁའ་འགྲོ་ལ། རས་བྲིས་སམ་ཚོམ་བུ་གཙོ་འཁོར་ལྔའི་སྟེང་རྣམ་བུམ། གཡས་སུ་ཐོད་ཆང་། གཡོན་དུ་ཤེར་ཙཀ །མདུན་དུ་ཤེལ་རྡོ་བཞག། ༈ །།བསྟན་པ་རྒྱས་བྱེད་སངས་གླིང་དང་ཞིག་གླིང་ལུགས་ཀྱི་གནས་བཅུའི་རྗེས་གནང་ལ། སྟེགས་གཙང་མའི་དབུས་ཁྲིའུ་ལ་རིན་པོ་ཆེའི་སྣོད་འབྲུ་དཀར་གྱིས་བཀང་བའི་ནང་དུ་ཐུབ་དབང་གནས་བཅུ་ཡོངས་རྫོགས་ཀྱི་ཙཀ་ལི་ལྟ་བུའི་སྐུ་རྟེན། ཤེར་ཕྱིན་གླེགས་བམ། བྱང་ཆུབ་མཆོད་རྟེན་བཅས་བཞུགས་སུ་གསོལ། དེ་དག་གི་ཕྱག་མཚན་རྣམས་ཀྱང་བཤམས། དར་གྱི་གདུགས་ཕུབ། ༈ ཀློང་གསལ་བྱམས་པའི་དབང་ལ། མཎྜལ་པདྨ་འདབ་བརྒྱད་ཚོམ་བུ་དམར་སེར་བཀོད་པའི་སྟེང་བུམ་པ་ཉེར་ལྔའི་རྫས་ལྡན་ཆིངས་སེར། ཕྲེང་བ། རྡོ་རྗེ། ཀླུ་ཤིང་སྡོང་པོ་མེ་ཏོག་སེར་པོ་ཅན་གྱི་ཙཀ་ལི། རྒྱལ་སྲིད་རྣམས་གཡས་གཡོན་དུ་བཀོད། ༈ གནམ་ཆོས་ལུགས་ལ། དཀྱིལ་འཁོར་དཔེའུ་རིས་ལྟར་བཀྲམ་པའི་དབུས་སུ་རྣམ་བུམ། གཙོ་འཁོར་ཡོངས་རྫོགས་ཧྭ་ཤང་རྒྱལ་ཆེན་དང་བཅས་པའི་ཙཀ་ལི། དེ་དག་གི་ཕྱག་མཚན་རྣམས་དང་། མདུན་དུ་གཏོར་མ་དཔེའུ་རིས་ལྟར་བཞག་གོ། ༈ །།དེ་ནས་དབང་གི་ལས་ཀྱི་སྐོར་ལས། རོང་ཟོམ་ཆོས་བཟང་མཁའ་འགྲོ་མ་རིག་བྱེད་རྩལ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ་པའི་སྟེང་བུམ་པ་ཆིངས་དམར་དབང་གི་རིལ་བུའི་རྫས་ལྡན་ཁར་བྷནྡྷ་བདུད་རྩིས་བཀང་པ་ལ། སིནྡྷུ་རའི་མེ་ལོང་ཆོས་འབྱུང་གི་དབུས་ཧྲཱིཿདང་ཕྱོགས་བཞིར་ཧ་རི་ནི་ས་བྲིས་པས་བཀབ། དར་དམར་གྱི་གུར་ཕུབ། ༈ ཞིག་གླིང་བདེ་མཆོག་དམར་པོ་ལ། ཟླ་གམ་དམར་པོ་པདྨ་འདབ་བརྒྱད་བཅས་པའི་དབུས་སུ་ཁྲིའུའི་ཁར་མོ་ཐོད་མཚན་ལྡན་ནང་དུ་ཆང་རྒོད་ཆོས་སྨན་སྦྱར་བས་བཀང་བའི་ཁར། སིནྡྷུ་རའི་མེ་ལོང་ཆོས་འབྱུང་བསྣོལ་མའི་དབུས་ཟླ་གམ་ལ། གུ་རུ་པདྨ་དྷཱ་ཀི་ནཱི་སིདྡྷི་ཧཱུྃ་ཧྲཱིཿམཿ ཞེས་པ་དང་། ཟུར་དྲུག་ལ། ཧ་རི་ནི་ས་ར་ཙ་ཧྲི་ཡ། མུ་ཁྱུད་ལ་སརྦ་ལོ་ཀ་མ་མ་པཱ་ཤཾ་ཀུ་རུ་སྭཱ་ཧཱ། ཞེས་བྲིས་པ་བཞག །དེ་སྟེང་བྱང་སེམས་དཀར་དམར་བུ་རམ་ཅུ་གང་བསྲེས་པ་བཞག་ལ་དར་དམར་གྱི་གུར་ཕུབ། མདུན་དུ་མཁའ་འགྲོའི་གཏོར་མ་རྒྱན་ལྡན་དང་། དཔའ་བོ་མཁའ་འགྲོ་ཡབ་ཡུམ་བཅུའི་ཙཀ་ལི་ཕྱོགས་བསྡུས་དང་མེ་ལོང་དྭངས་པ་བཞག ༈ །དགོངས་གཏེར་སྒྲོལ་མ་དམར་མོ་ལ། མཎྜལ་པདྨ་འདབ་བརྒྱད་དམར་པོའི་དབུས་སུ་མཉྫི་ལ་རྣམ་བུམ་ཆས་བཅུད་ལྡན་པའི་སྟེང་དུ་ཐོད་པ་བདུད་རྩི་མངར་གྱིས་བཀང་བའི་ཁར་མེ་ལོང་སིནྡྷཱུ་ར་བརྡལ་བ་ལ་ཆོས་འབྱུང་། དབུས་སུ་ཏཱཾ་ཡིག །མཐའ་སྐོར་ཡིག་བཅུ་བྲིས་པ་བཞག །སྐུ་ཙཀ་སྔགས་བྱང་། ཕྲེང་དམར། ཤེལ་རྡོ་རྨ་བྱའི་མདོངས་རྣམས་མདུན་སོགས་དང་། རྒྱབ་ཏུ་དབང་གཏོར་དམར་པོ་དར་གདུགས་བཅས་བཞག ༈ །གཏེར་གསར་པདྨ་མཁའ་འགྲོ་ལ། རས་བྲིས་སམ་ལྷ་གྲངས་ཚོམ་བུའི་སྟེང་ཟངས་བུམ་རྒྱན་ལྡན་སྐུ་ཙཀ་དང་བཅས་པ། གཡས་སུ་ཐོད་ཆང་ལ་སིནྡྷུ་རའི་མེ་ལོང་ཧྲཱིཿཡིག་སྔགས་ཕྲེང་གིས་བསྐོར་བས་བཀབ། གཡོན་དུ་ཆང་གིས་སྦྲུས་པའི་མཁའ་འགྲོའི་གཏོར་མ་གཙོ་འཁོར་དགུ་པ་ལྕགས་ཀྱུའི་རྒྱན་དང་དར་གུར་ཅན་བཤམ། ཐུན་མོང་མ་ཡིན་པའི་བྱིན་རླབས་བྱེད་ན། དེའི་མདུན་དུ་ཐོད་པ་མཚན་ལྡན་ཆང་དང་ཁྱད་པར་རྫས་ལྡན་གྱིས་བཀང་བ་བཤམ། ༈ ཆོས་གླིང་ཛཾ་དམར་དབང་ལ། རས་བྲིས་སྟེང་ཁྲིའུར་རིན་པོ་ཆེའི་སྣོད་འབྲུས་བཀང་བའི་ནང་དུ་དམ་ཚིག་གི་བྲིས་སྐུ །སྒྲུབ་ཡིག །སྲོག་འཁོར་ཙིཏྟ་རྣམས་བཞག །གཡས་གཡོན་དུ་ཐོད་པ་རཀྟས་བཀང་བ། རིན་པོ་ཆེའི་གའུ་འབྲུ་སྨན་དར་ཟབ་ཀྱིས་བཀང་བ། སིནྡྷུ་རའི་མེ་ལོང་། དབང་གཏོར་དང་ཟངས་གཞོང་དུ་མི་གཟུགས་ཐལ་སྦྱར་གུས་པའི་ཚུལ་ཅན་རྣམས་བཞག །སྦྱིན་སྲེག་ཆས་ཏིལ་མར། སིནྡྷུ་ར། ཟླ་མཚན། མེ་ཏོག་དམར་པོ་སོགས་དམར་ཞིང་རོ་སྐྱུར་བའི་རིགས་རྣམས་ཟངས་སྣོད་དུ་བཞག །ཤིང་དམར་གྱི་ཐབ་ཁུང་ཟླ་གམ་ཡང་ཉེ་བར་བསྡོག་གོ ༈ །དེའི་ལས་བྱེད་དབང་ཕྱུག་དམར་པོའི་རིག་གཏད་ལ། སྟེགས་བུ་དམར་པོ་རས་བྲིས་སམ་འབྲུ་དམར་པོས་ཟླ་གམ་བྲིས་པའི་དབུས་སུ་ཚོམ་བུ་ཆེ་ཆུང་གཉིས། དེ་རྒྱབ་བཞི་བཀོད་པའི་དབུས་སུ་ཟངས་གཞོང་དུ་ལིངྒ་དར་དམར་གྱིས་བཀབ་པ། གཡས་སུ་ལྕགས་ཀྱུ། གཡོན་དུ་མེ་ལོང་ལ་ལི་ཁྲིས་ཧྲཱིཿབྲིས་པ། ཏིང་ལོ་ཆངས་ཟན། མཆོད་པ་སོགས་ཀྱིས་བསྐོར། ༈ བྱང་གཏེར་ལྷ་ཆེན་བསོད་ནམས་དཔལ་འབར་གྱི་དབང་ལ། དཀྱིལ་འཁོར་རམ་མཎྜལ་ཚོམ་བུ་གཙོ་འཁོར་དགུ་བཀོད་པའི་སྟེང་དུ་ལྷ་ཆེན་གྱི་རྟེན་ཡོད་ན་དང་། མེད་ན་གཏོར་མ་སྐུ་རྟེན་དར་གདུགས་ཅན་བཞག །རྒྱབ་ཕྱོགས་གུ་རུའི་སྐུ་བརྙན་བཀྲམ་པའི་མདུན་དུ་བླ་གཏོར་དང་རྟ་མགྲིན་གཏོར་མ་སྟེགས་མཐོ་བར་བཀོད། མདུན་དུ་གཙོ་འཁོར་དགུའི་ཙཀ་ལི་བཞག ༈ །རྗེས་གནང་ལ། དཀྱིལ་འཁོར་སྟེང་ཟངས་གཞོང་འབྲུ་མར་རིན་ཆེན་སྣ་ལྔ་འབྲུ་ལྔ་དར་སྣ་ལྔས་བཀང་བའི་ནང་དུ་དབང་རྟེན། གཡས་སུ་རྒྱ་སྐྱེགས། གཡོན་དུ་ཙན་དན་དམར་པོ་བཅས་བཞག །རྒྱབ་ངོས་མཐོ་བར་བླ་གཏོར། གཡས་སུ་ཕྱི་གཏོར་ཉི་ཟླའི་གཟུགས། རྒྱབ་ཏུ་ནང་གཏོར་ནོར་བུ་འབར་བ། གཡོན་དུ་གསང་གཏོར་སྲིད་མེས་གཟུགས། མདུན་དུ་སྤྱི་གཏོར་རྟགས་གསུམ་ཚང་བ་རྣམས་མེ་ཏོག་དམར་པོ་དང་ཟས་སྣ་ཚོགས་བཅས་བཤམ་མོ། ༈ །ལས་འབྲེལ་ལུགས་ཀྱི་ལྷ་ཆེན་ལ། རས་བྲིས་དབུས་སུ་ཁྲིའུའི་ཁར་ཁྱད་པར་གྱི་རྫས་སམ། མེད་ན་སྐུ་གཟུགས་བཤམ་ལ་དར་དམར་གྱི་གུར་ཕུབ། ཤར་དུ་མེ་ལོང་དང་རྩེ་གསུམ། ལྷོར་རྒྱུད་ཀྱི་གླེགས་བམ། ནུབ་ཏུ་ཐོད་ཆང་བྱང་སེམས་དཀར་དམར་བསྲེས་པ། བྱང་དུ་ཞགས་པ། མདུན་དུ་རྟེན་གཏོར་སྐུ་གཟུགས་དང་ཟས་སྣས་བརྒྱན་པ་བཞག ༈ །སྨིན་ལུགས་ལྷ་ཆེན་ལ། རས་བྲིས་ཚོམ་བུ་དང་བཅས་པའི་དབུས་སུ་ཁྲིའུར་དབང་གཏོར་དམ་རྫས་ཀྱིས་བསྐོར་བ་སྐུ་གཟུགས་དར་དམར་གྱིས་བརྒྱན་པ་བཀོད། མདུན་དུ་རིན་པོ་ཆེའི་སྣོད་མེ་ཏོག་དམར་པོས་བཀང་བའི་ནང་དུ་བླ་རྡོ་རྟེན་རྫས། གཡས་སུ་ལྕགས་ཀྱུ་དམར་པོ། གཡོན་དུ་ཞགས་པ། རྒྱབ་ཕྱོགས་མཐོ་བར་རྟ་མགྲིན་གྱི་སྐུ་བྲིས་འབུར་གང་རིགས་བཞག །སྒྲུབ་ཡིག་པུསྟི། ཐིག་ལེའི་རྫས་ཆང་དང་སྦྱར་བའང་བསྡོག་གོ ༈ །གཏེར་གསར་ལྷ་ཆེན་ལ། གོང་གི་པདྨ་མཁའ་འགྲོ་དང་འདྲ་བ་ལས། མེ་ལོང་ས་བོན་ཧྲཱིཾཿ གཏོར་མ་དམར་ཟླུམ་ཤིང་ཏོག་དབྱིབས་ཅན་སྐུ་ཙཀ་དར་གུར་བཅས་པ། ༈ པདྨ་སྒྱུ་འཕྲུལ་དྲྭ་བའི་བཀའ་སྲུང་ལྷ་ཆེན་བཀའ་གཏད་ལ། རས་བྲིས་དབུས་ཁྲིའུར་ཐོད་ཆང་སྟེང་སྐུ་ཙཀ་དར་གུར་ཕུབ། གཡས་གཡོན་དུ་སྔགས་བྱང་། ཕྲེང་དམར། ལྕགས་ཀྱུ། ཞགས་པ། མེ་ལོང་བུམ་པ་བཅས། ཐིག་ལེའི་རྒྱུ་ལི་ཁྲིའང་བཞག། ༈ །།དེ་ནས་དྲག་པོ་མངོན་སྤྱོད་ཀྱི་སྐོར་ལས། གཙོ་བོ་འཇོམས་བྱེད་རྩལ་ཆེན་གྱི་བཀའ་གཏད་ལ། ཞིང་ལྤགས་ཀྱི་གདན་ལ་སློབ་དཔོན་ཞལ་བྱང་ཤར་དུ་བསྟན་ཏེ་འཁོད་པའི་གཡས་གཡོན་གཉིས་སུ་མདའ་ཆག་གྲུམ་མེད་པ་སུམ་སྒྲོོམ་གྱི་ཁྲིའུ་རེ་རེའི་སྟེང་འབྲུ་ནག་ཚོགས་ཚད་རྗེན་བཏགས་ཀྱི་ཕྱེ་ལ་གཏོར་མ་ཟུར་གསུམ་དམར་པོའི་དཔུང་ཟུར་ཡན་ལ་མེ་རི་གྱེན་བསྟན་བྱས་པ་ཟངས་སྣོད་དུ་མདའ་ཁྲི་གཡས་པར་བཞག །གཏོར་མ་དེ་འདྲ་ནག་པོ་དཔུང་ཟུར་མན་ལ་མེ་རི་ཐུར་བསྟན་བྱས་པ་ལྕགས་སྣོད་དུ་མདའ་ཁྲི་གཡོན་པར་བཞག །སོ་སོའི་སྐུ་ཙཀ་དང་དར་གདུགས་རང་མདོག་ཕུབ། དེ་གཉིས་ཀྱི་བར། རང་མདུན་ཐོད་པ་ཞིག་གི་ནང་ཕུར་བྱང་གཟུག །ལིངྒ་དུམ་བུར་གཏུབས་ཏེ་སྤུངས་པའི་མཐར་ཤ་བཙོས་པ་དང་མ་བཙོས་པ་དུམ་བུ་ཆུང་ངུ་སློབ་མ་རེ་རེ་ལ་བརྒྱ་ཕྲག་རེ་སྦྱིན་རྒྱུ་འདང་ངེས་བྱ། ཀོང་ཟོར་གྲུ་གསུམ་ནག་པོ་རྩང་ཐུར་སུམ་ཚོམ་བཙུགས་པ། འུར་རྡོ་དང་། རྒྱུ་དབྱིབས་གོང་མཚུངས་ཀྱི་གཏོར་ཟོར་གཉིས་རྩང་དམར་ཤ་ཁྲག་གིས་བརྒྱན་པ་དང་། དྲག་མཆོད་སྨན་རཀ་བཅས་བཤམ། བྱང་བུ་བཀྲུ་བའི་ཆང་བཟང་པོའང་འདུ་བྱའོ། ༈ །ཟབ་བདུན་ལས་ཀྱི་མཁའ་འགྲོ་ལ། དཀྱིལ་འཁོར་རམ་ཚོམ་བུ་གཙོ་འཁོར་ལྔ། དེ་རྒྱབ་བཞི་བཀོད་པའི་སྟེང་དུ་བུམ་པ་ཆིངས་སྔོན་ཅན་སོགས་རིག་དབང་ལྔའི་ཆས། གསང་ཐོད། རིག་ཙཀ་ཤེལ་རྡོ་རལ་གྲི་ཐོ་བ་ཕུར་པ་ལིང་ག་བཅས་བཀོད། ༈ མགོན་པོ་གནམ་ལྕགས་ཐོག་མདའ་ལ། མཎྜལ་དཀྱིལ་འཁོར་དབུས་སུ་ཐོད་པའམ་ཟངས་ལྕགས་སྣོད་དུ་ཞིང་སྐྱོང་གཏོར་མ་སྤྱི་མཐུན་སྐུ་ཙཀ་དར་གདུགས་ཅན། མདུན་སོགས་སུ་སྔགས་བྱང་། ཕྱག་མཚན། སྲོག་འཁོར་བླ་རྡོ་བཅས་བཀོད། ༈ འཇམ་དཔལ་ཕ་རོལ་རྒོལ་འཇོམས་ལ། མཎྜལ་ཚོམ་བུ་གཅིག་པའི་སྟེང་ལྕགས་སམ་ཐོད་པར་དམར་གཏོར་དར་གདུགས་མཐིང་ནག་ཅན་བཀོད། རཀྴའམ་ཐོད་ཕྲེང་། མེ་ལོང་བཅས། ༈ འཆི་བསླུའི་བཀའ་གཏད་འདིར་སྦྲེལ་ན་གཏོར་མ་དེར་གསལ་དང་། ༈ མགོ་གསུམ་བཀའ་གཏད་ལ། ལྕགས་སྣོད་དུ་དམར་གཏོར་གཙོ་འཁོར་དགུ་མཐེབ་ཀྱུས་བསྐོར་བ་ལ་རང་གཟུགས་ཙཀ་ལི་བཙུགས་པ་དང་། གཏོར་ཆུང་ཤ་དུམ་མཐེབ་ཀྱུ་གྲངས་གང་འོས་ཀྱང་འདུ་བྱ། ༈ གནམ་ཆོས་ཀིང་དམར་ལ། གཟུངས་དབང་ཆས་བཀོད་དོ།། ༈ །།དེ་ནས་ལུང་ཨ་ནུ་ཡོ་གའི་སྐོར་ལས། མཁའ་འགྲོ་ཀུན་དགའ་འབུམ་པའི་མ་རྒྱུད་གསང་བ་ལམ་ཁྱེར་ལ། དཀྱིལ་འཁོར་རས་བྲིས་སམ་མ་འཛོམ་ན་མཎྜལ་སྟེང་འབྲུ་ཚོམ་དབུས་གཅིག །དེ་རྒྱབ་བཞི། དེ་རྒྱབ་བརྒྱད་བཅས་བཀོད་པའི་ཁར་མཉྫིའི་དབུས་སུ་བུམ་པ་ཆིངས་མཐིང་ནག །ཤར་དུ་དཀར་པོ། ལྷོར་སེར་པོ། ནུབ་ཏུ་དམར་པོ། བྱང་དུ་ལྗང་གུ་ཐམས་ཅད་བཅུད་ལྡན་ཁ་རྒྱན་གྱིས་སྤྲས་པ་ལྔ་པོ་སོ་སོའི་མདུན་དུ་རིགས་ལྔའི་མཁའ་འགྲོའི་སྐུ་ཙཀ །རྒྱབ་ཏུ་མཁའ་འགྲོའི་གཏོར་ཆེན་རྒྱན་སྤྲོས་ཅན། ཐོད་པ་མཚན་ལྡན་ཆང་དང་ཆོས་སྨན་མངར་གསུམ་སྦྱར་བ། ཤོག་དྲིལ་ལྔ་སོ་སོར་དར་ཁ་དོག་ལྔས་དྲིལ་བ། དར་རས་ཅོད་པན་བཅས། ༈ གཏེར་གསར་རྡོ་རྗེ་བཀོད་པ་ལ། སྟ་གོན་རྫས་བཞི། དྲག་ཤིང་སོགས་ཀྱི་ཕུར་ཆུང་སློབ་མའི་གྲངས་མཉམ། དཀྱིལ་འཁོར་རས་བྲིས་སྟེང་ལྡེང་ཁྲི་རིམ་པ་གཉིས་པའི་འོག་མར་ཁྲོ་བོའི་གསང་བུམ་ཕོ་མོའི་ཐོད་པ་ཁ་སྦྱོར་ཆང་དང་སོ་ལྔས་བཀང་ཞིང་དར་མཐིང་དམར་གྱིས་བཅིངས་པ་ལྕང་ལོས་བརྒྱན་པ་དང་། ཐོད་པ་དུམ་གཅིག་ནང་ཡབ་ཡུམ་གྱི་སྙིང་པོ་བྲིས་པའི་གཡས་གཡོན་དུ་རྡོ་རྗེ་དྲིལ་བུས་བརྟེན་པ། དེ་དག་གི་མདུན་དུ་ཚེ་བུམ་མགུལ་ཆིངས་དམར་པོ་ཅན་དང་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར་དམར་པོ་རྣམས་བཀོད། སྟེང་མར་དབུས་སུ་རྣམ་རྒྱལ་བུམ་པ། མདུན་དུ་རིགས་ལྔའི་སྐུ་དང་ཕྱག་མཚན་ཕྱོགས་བསྡུས། རིག་ཙཀ །རྫས་བརྒྱད། ཞི་བའི་ཁྲི་ལྔ། ཞི་རྒྱན། གསེར་འཁོར་བཅས་ཕྱི་དབང་ཆས། གཡས་སུ་རྒྱུད་ཀྱི་གླེགས་བམ། སྣ་ཚོགས་རྡོ་རྗེ། འཁོར་ལོ། རྡོ་རྗེ་རྩེ་དགུ་དང་དྲིལ་བུ། གཅན་གཟན་གྱི་གདན་ཁྲི། རྒྱལ་སྲིད་བདུན་རྣམས་དང་། ཞི་ཁྲོའི་ལྷ་ཙཀ་ཉེར་བརྒྱད། ཐོད་སྐམ་དབུ་རྒྱན། རིགས་ལྔའི་སྐུ་དང་མར་མེ་ལྔ་སྣོད་གཅིག་ཏུ་བཞག་པ། རིགས་ལྔའི་སྐུ་ཙཀ་སོ་སོ་ཅན་ལྔ་བཅས་ནང་དབང་ཆས། གཡོན་དུ་མར་མེ། ཉི་ཟླ། དཔའ་བོ་འབྲུ་ལྔ། ཐོང་གཤོལ། ཐོད་ཁྲག་སྐམ་རློན་རྙིང་གསུམ། མཚོན་ཆ་སྣ་ཚོགས། པདྨ། ཞིང་དབྱུག །སྦྲུལ་ཆུན། རིག་མ། འདོད་ཡོན་ལྔ། ཞི་ཁྲོའི་ལྷ་ཙཀ་ཕྱོགས་བསྡམས་འདིར་ལེན་དགོས། སྒྲུབ་རྫས་ཕྱོགས་བསྡུས་ཙཀ་ལི་ལྔ། ཞི་ཁྲོའི་སྐུའམ་ཙཀ་ལི། གླེགས་བམ། རྡོ་རྗེ། སྨན་ཐོད། ཕུར་བུ་རྣམས་ཕྱོགས་བསྡུས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྟེན་མཚོན་བཅས་སྒྲུབ་དབང་ཆས། རྒྱབ་ཏུ་གསང་དབང་ཐོད་པའི་བདུད་རྩི་དང་ཆོས་འབྱུང་པད་རྡོར་གྱི་ཙཀ་ལི་བཀོད། ༈ མདོ་ལུང་ཕྱག་རྒྱ་གཅིག་པའི་དོན་དབང་ལ། མཎྜལ་ཚོམ་བུ་སྔོན་པོ་གཅིག་གི་སྟེང་རྣམ་བུམ་ཆིངས་སྔོན་གྱི་ཁར་ཐོད་པའི་བདུད་རྩི་ལ་སིནྡྷུ་རའི་མེ་ལོང་ཨཝེཾ་བྲིས་པས་བཀབ་པའི་སྟེང་ཤེལ་རྡོ་བཞག་ལ་དར་དམར་ཕུབ། ༈ རྟ་མགྲིན་སྙིང་པོ་དོན་འདུས་ལ། རས་བྲིས་སྟེང་དཔལ་གཏོར་སྐུ་ཙཀ་དང་དར་གདུགས་དམར་པོས་བརྒྱན་པ་རྒྱན་ལྡན་བཤམ། ༈ མི་གཡོ་རྡོ་རྗེ་ཟམ་པའི་ནང་སྒྲུབ་ལྷ་བཅོ་ལྔ་པ་ལ། རས་བྲིས་སམ་ཚོམ་བུ་དབུས་གཙོ་འཁོར་གསུམ། དེ་རྒྱབ་བཞི། གྲ་བཞིར་བཞི། དེ་རྒྱབ་བཞི་བཀོད་པའི་སྟེང་མཉྫི་ལ་བུམ་པ་ཆིངས་སྔོན་ཅན། གཡས་གཡོན་དུ་དབུ་རྒྱན། རིགས་ལྔའི་ཕྱག་མཚན། དྲིལ་བུ། ལྷ་ཙཀ་ཚང་བ་བཀོད། ༈ གསང་སྒྲུབ་ལྷ་བཅུ་གསུམ་པ་ལ། དཀྱིལ་འཁོར་རམ་ཚོམ་བུ་དབུས་སུ་གཅིག་ལས་གཞན་འདྲ་བ་ལ། དབང་རྫས་འཁོར་ལོ། ཉི་ཟླ། རྒྱལ་སྲིད། རྫས་བརྒྱད། རྡོ་རྗེ། གདུགས། དུར་ཁྲོད་དང་དཔལ་ཆས། ཚེ་འབྲང་། སྨན་ཐོད། ཐོད་ཆང་། རིག་ཙཀ་བཅས། ༈ ལུང་ལུགས་ཐུགས་ཀྱི་ཕུར་གཅིག་ལ། རས་བྲིས་དབུས་རྣམ་བུམ་དང་གཙོ་ཕུར། གཡས་གསང་ཐོད། གཡོན་ཤེར་ཙཀ །མདུན་དུ་ཤེལ་རྡོ་བཞག་གོ། ༈ །།དེ་ནས་རྫོགས་ཆེན་མན་ངག་སྡེའི་ཐོག་མར་བི་མ་མི་ཏྲའི་བཀའ་སྲོལ་རྫོགས་ཆེན་རྒྱུད་བཅུ་བདུན་གྱི་དབང་ལས། རྫོགས་པ་རང་བྱུང་གི་རྒྱུད་དབང་ལ། རས་བྲིས་སྟེང་དབུས་དང་ཕྱོགས་བཞིར་བུམ་པ་རིགས་ལྔའི་ཁ་དོག་ཅན། ཨོཾ་ཨཱཿཧཱུྃ་སྭཱ་ཧཱས་མཚན་པ། བུམ་རྫས་དབུས་ནས་རིམ་བཞིན་རིན་པོ་ཆེ་ལྔ། འབྲུ་ལྔ། སྨན་ལྔ། སྤོས་ལྔ། སྙིང་པོ་ལྔ་རྣམས་དང་ཆུ་གཙང་འོ་མ་དཀར་མངར་གྱིས་བཀང་། ཁ་རྒྱན་གསེབ་ཏུ་ཤེལ་དང་མེ་ལོང་དར་སྣ་རྨ་བྱའི་མདོངས་ལྔ། རིགས་ལྔའི་ཙཀ་ལི་བཅས་བཀོད། གསང་ཐོད་ཁར་མེ་ལོང་སིནྡྷུ་རས་བྱུགས་པ་བཞག །སྒོ་བཞིར་ཕུར་པ་བཞི་དང་མདའ་དར་བཞི། མཚམས་བཞིར་རལ་གྲི་བཞི་བཀོད། བྱང་ཤར་དུ་མཎྜལ་པདྨ་འདབ་བཞི་དབུས་ལྗང་གུའི་སྟེང་ལས་བུམ་དང་། དེའི་མདུན་དུ་དབང་གཏོར་དཀར་ཟླུམ་རྒྱན་ལྡན་བཞག །དཀྱིལ་འཁོར་མདུན་དུ་དཔལ་གཏོར། ཚོན་སྐུད་སྣ་ལྔ་སློབ་མའི་གྲངས་མཉམ་ཡང་འདུ་བྱ། ༈ ཁྲོ་བོའི་དབང་ལ། རས་བྲིས་དབུས་ཀྱི་ཁྲིའུར་ཕོ་ཐོད་ལ་བྷྲཱུྃ། མོ་ཐོད་ལ་མ་བྲིས་པ་ཁ་སྦྱོར་དུ་བཞག་པའི་མདུན་དུ་བྱང་སེམས་དཀར་དམར་སོ་སོ་བ། ཐོད་པ་གཅིག་གི་ནང་དུ་ཤ་ཁྲག་གཏོར་མ་བཤམ། ཟླ་གམ་གསུམ་གྱི་སྟེང་བུམ་པ་དར་དམར་གྱི་ཆིངས་དང་བཅུད་ལྡན་གསུམ། འཁོར་ལོའི་སྟེང་དུ་བཀའ་བརྒྱད་ལྟ་བུའི་ཁྲོ་སྐུ་བརྒྱད། གྲུ་ཆད་བཞི་ལ་མེ་ལོང་རེ། རྨ་བྱའི་སྒྲོ་རེ། ཟླ་གམ་སྟེང་ཐོད་པ་མཚན་ལྡན་དུ་གཏོར་མ་བདུད་རྩིས་བྲན་པ་དར་མཐིང་གས་ཁ་བཅད། ལྷོ་ཕྱོགས་སུ་ཚིལ་ཆེན་གྱི་མར་མེ། ནུབ་ཏུ་སེང་ལྡེང་ཕུར་པ་དར་གྱི་ཅོད་པན་ཅན། བྱང་དུ་ཤེལ་རྡོ། མདུན་དུ་མཆོད་རྟེན། གཞན་ཡང་མེ་དཔུང་། རིན་ཆེན། པདྨ། རལ་གྲི །འཛོམ་ན་ཁྱེའུ་མ་སྐྱེས་པའི་བུ་མོའི་ཚིལ་དང་མ་འཛོམ་ནའང་དུད་འགྲོ་ལྟ་བུའི་ལྟོ་ཚིལ། མཆོད་པའི་ལྷ་མོ་ལྔ། རྡོ་རྗེ། རྡུལ་ཚོན་སྣ་ལྔ། ཐིག་ལེའི་རྒྱུ་དྲི་བཟང་ཆབ། ཅོད་པན་རྣམས་དང་། ཐལ་ཞག་རཀྟ་དབུ་རྒྱན་རྣམས་ཀྱང་འདུ་བྱ། ༈ ཚེ་དབང་རིན་པོ་ཆེ་ལ། དཀྱིལ་འཁོར་དབུས་སུ་བུམ་པ་དམར་པོ་དཀར་མངར་ཆབ་ཀྱིས་བཀང་བའི་ཁར་ཚེ་འབྲང་བཀོད། མཐར་ཟས་སྣས་བསྐོར། ཚེ་མདའ་ཡང་འདུ་བྱ། ༈ རིག་པ་རང་ཤར་གྱི་དབང་ལ། དཀྱིལ་འཁོར་དབུས་སུ་རྨ་བྱའི་སྒྲོ་མདོངས། མེ་ལོང་། བྱང་སེམས་དཀར་དམར་སོ་སོ་བ། དཔལ་ཆེན་ཁྲོ་སྐུ་བཤམ། ༈ བཀའ་རྟགས་ཕྱག་རྒྱའི་དབང་ལ། དཀྱིལ་འཁོར་དབུས་རྣམ་བུམ་དང་། ཤེལ་རྡོ། ཐིག་ལེ་རྣམ་ལྔ་བཞག ༈ །གསང་དབང་ལ། དཀྱིལ་འཁོར་དབུས་སུ་རྣམ་སྣང་། དེ་སྟེང་སྣང་བ་མཐའ་ཡས། དེ་སྟེང་པདྨ་དབང་ཆེན་གྱི་སྐུ་ལ་རྨ་བྱ་དར་གདུགས་ཕུབ་པའི་མདུན་དུ་མེ་ལོང་། ཤར་ལྷོར་བཀྲ་ཤིས་བུམ་པ། ཤར་དུ་ཐོད་པའི་ནང་དུ་བྱང་སེམས་དམར་པོ། བྱང་དུ་མེ་ལོང་ཡུ་བ་ཅན་གྱི་བྱང་སེམས་དཀར་པོ། ལྷོར་གོང་སྨོས་ཚིལ་དང་ཤ་ཆེན་མར་མེ་རྣམས་དང་། རིག་ཙཀ་བཅས་བཀོད། ༈ རྫོགས་ཆེན་རང་སྣང་གི་དབང་ལ། དཀྱིལ་འཁོར་དབུས་སུ་རྣམ་བུམ་ཁར་རིགས་ལྔའི་སྐུ་རྟེན། ཤར་བུམ་སྟེང་རིགས་གསུམ་དང་གོས་དཀར་མོའི་སྐུ །ལྷོ་བུམ་སྟེང་རིག་གསེར་ཕྲེང་། ཚེ་དཔག་མེད། ཤེར་ཕྱིན། སྨན་བླ་བཞིའི་སྐུ །ནུབ་བུམ་སྟེང་ཁྲོ་ཆེན་རིགས་ལྔ་ཡབ་ལྔའི་སྐུ །བྱང་བུམ་སྟེང་སྒོ་བ་བཞིའི་སྐུ །བྱང་ཤར་བུམ་པའི་སྟེང་རིགས་གསུམ་ཁྲོ་བོ་དང་རྣམ་འཇོམས་ཀྱི་སྐུ །ཤར་ལྷོའི་བུམ་པའི་སྟེང་རྣམ་འཛིན་དང་སྟོན་དྲུག་ཀུན་བཟང་གསུམ་གྱི་སྐུ །ལྷོ་ནུབ་བུམ་སྟེང་རིགས་ལྔ་ཡུམ་ལྔའི་སྐུ །ནུབ་བྱང་བུམ་སྟེང་ཁྲོ་མོ་ཡུམ་ལྔའི་སྐུ །ཕྱོགས་མཚམས་བརྒྱད་དུ་བཀྲ་ཤིས་རྫས་བརྒྱད། བུམ་པ་རེ་རེའི་རྩར་ཕུད་དང་བཅས་པའི་གཏོར་མ་རེ་བཞག ༈ །བཀའ་སྲུང་ཁྲོས་མའི་དབང་ལ། གྲུ་གསུམ་མཐིང་ནག་མེ་རི་དང་བྷྱོས་མཚན་པའི་སྟེང་དུ་ཁྲིའུར་ལྕགས་སམ་ཐོད་པའི་ནང་དུ་འབྲུ་ནག་གི་ཕྱེ་ལ་དཔལ་གཏོར་བརྗིད་ལྡན་སྐུ་རྟེན་དར་ནག་གིས་བརྒྱན་པ་བཤམ། ༈ ཞིག་གླིང་གསང་བ་སྙིང་ཐིག་ལ། སྟ་གོན་རྫས་བཞི། རས་བྲིས་དབུས་སུ་རྣམ་བུམ། མདུན་དུ་ལྷ་ཙཀ་ཚང་བ་དང་སྔགས་བྱང་། གཡས་གཡོན་སོགས་སུ་དབུ་རྒྱན་དང་རྡོར་དྲིལ། གསང་ཐོད་མེ་ལོང་དར་དམར་གྱིས་བཀབ་པའི་ཁར་ཤེལ་རྡོ་བཞག་པ། སྨན་རག་གཏོར་གསུམ། རིག་ཙཀ་བཅས་བཀོད། ༈ ལྕེ་བཙུན་སྙིང་ཐིག་ལ། འོད་ལྔའི་དཀྱིལ་འཁོར་སྟེང་རྣམ་བུམ་ཨ་དཀར་གྱིས་མཚན་པའི་ཁར་ཐོད་ཆང་། དེ་སྟེང་ཤེལ་རྡོ་བཞག ༈ །པདྨའི་བཀའ་སྲོལ་གྱི་ཐོག་མར་མཁའ་འགྲོ་སྙིང་ཐིག་ལ། སྟ་གོན་རྫས་བཞི། རས་བྲིས་སྟེང་བུམ་པ་རིགས་ལྔའི་མདོག་མཚུངས་ལྔ། ཤེལ་དང་མེ་ལོང་རྨ་བྱས་བརྒྱན་པ་ཕྱོགས་བཞི་དབུས་ལྔར་བཀོད་པ་དང་ལྷན་ཅིག་རིགས་ལྔའི་སྐུ་རྟེན་དང་རིག་དབང་ཆས་བཞི་བཞག །གསང་ཐོད་རིག་ཙཀ །ཤེལ་རྡོ་བཅས། ࿋ མཁའ་འགྲོ་ཡང་ཏིག་སྟ་གོན་སྐབས་དཀྱིལ་འཁོར་ཤར་ཕྱོགས་སུ་སྟེགས་བུ་མདའ་གང་བའི་སྟེང་དུ་ཟླུམ་བསྐོར་བཞིའི་ནང་མ་ལ་པད་འདབ་བཞི། གཉིས་པ་ལ་སེམས་དཔའ་ཡབ་ཡུམ་བརྒྱད་ཀྱི་མཚན་མ་དང་ཐུབ་པ་དྲུག །གསུམ་པ་ལ་སྒོ་མ་བཞིའི་ཕྱག་མཚན། བཞི་པ་ལ་བླ་མ་དང་དཔའ་བོ་ཆོས་སྐྱོང་དང་བཅས་པའི་མཚན་མ་བཀོད་ལ་དཀར་པོར་བྱས་ཏེ་ཞི་བའི་ཤིང་ཟླུམ་པོར་བརྩེགས། སྲེག་རྫས་ཡམ་ཤིང་། མར་ཁུ། འབྲས། སོ་བ། ཏིལ། ནས། གྲོ །སྲན་མ། ཞོ་ཟན། དྲི། བདུག་པ། དུརྦ་རྣམས་སོ་སོའམ་རྫས་སྤུངས། ཆུ་གཉིས་ཉེར་སྤྱོད་དགང་གཟར་བླུགས་བཅས། ཚིག་དབང་སྐབས་ཐོད་པ་བདུད་རྩིས་བཀང་བའི་སྟེང་དུ་མེ་ལོང་ལ་ཆོས་འབྱུང་བསྣོལ་མའི་དབུས་སུ་ཧྲཱིཿམ་ཧ་རི་ནི་ས་ར་ཧྲི་ཡ་ཙིཏྟ་ཧྲིཾ་ཧྲིཾ་ཛཿ ཞེས་མཁའ་འགྲོ་ཡབ་ཡུམ་གྱི་རྩ་སྔགས་དང་མཐའ་སྐོར་ལ་ཨོཾ་གུ་རུ་ཀུན་བཟང་ཡབ་ཡུམ། རིགས་ལྔ་ཡབ་ཡུམ། རྡོ་རྗེ་འཆང་། རྡོ་རྗེ་སེམས་དཔའ། དགའ་རབ་རྡོ་རྗེ། ཤྲཱི་སིངྷ་། པདྨ་མཚན་བརྒྱད། ཡེ་ཤེས་མཚོ་རྒྱལ། པདྨ་ལས་འབྲེལ་རྩལ། ས་མ་ཡ་ཛཿ ཞེས་རིག་འཛིན་གྱི་མཚན་བྲིས་ལ་ཁ་དགབ། ཕྱི་ནང་གི་མཆོད་ཚོགས་རྒྱ་ཆེར་བཤམས་ལ་བཞག །རྗེས་འབྲེལ་ཡུལ་ལྔའི་ངོ་སྤྲོད་ཆས་རིགས་ལྔའི་སྐུ་དང་མི་སྡུག་པའི་གཟུགས། དབྱུག་པ་རིང་པོ་ལ་དྲིལ་བུ་བརྒྱུས་པ། དྲི་བཟང་ངན། རོ་མངར་སྐྱུར། རེག་བྱ་འཇམ་རྩུབ་བཅས། ཀ་དག་ཁྲེགས་ཆོད་གཉིས་ལ། པད་འདབ་བརྒྱད་འོད་ར། རྡོར་ར། མེ་རི་བཅས་བྲིས་ལ་དེའི་སྟེང་དུ་ཐོད་པ་བདུད་རྩིས་བཀང་བ་བཞག་ལ་མཆོད་པས་བསྐོར། མཁའ་འགྲོའི་དོན་དབང་ལ། ཤོམ་སྔར་བཞིན་ལ་པདྨ་རཀྟ་སིནྡྷུ་རའི་ཐིག་ལེ་བཅས། གཞན་དོན་བཀའ་རྒྱའི་དབང་ལ། ཤོམ་སྔར་བཞིན་ལ་ཁྱད་པར་སྐུ་རྟེན་ཞི་ཁྲོའི་ཙཀླི །གསུང་རྟེན་སྙིང་ཐིག་གི་གླེགས་བམ། ཐུགས་རྟེན་ཤེལ་རྡོ། རིག་འཛིན་གཏོར་མ། བཀའ་སྲུང་གཏོར་མ་བཅས་བཞག་གོ ࿋ ༈ །བྱང་གཏེར་ཀ་དག་རང་ཤར་ལ། དཀྱིལ་འཁོར་མཎྜལ་ཆེ་ངེས་སྟེང་རྡུལ་ཚོན་གྱིས་དབུས་སུ་ཟླུམ་བསྐོར་མཐིང་ནག་འོད་ལྔའི་ར་བས་བསྐོར་བ། དེ་རྒྱབ་མུ་ཁྱུད་རིམ་པ་བཅུ་གཅིག་བསྐོར་བའི་དང་པོ་ལ་མཐིང་དམར་ཉིས་རིམ། གཉིས་པ་ལ། དཀར་སེར་དམར་ལྗང་མཐིང་ག་ལྔ་རིམ། གསུམ་པར་དཀར་དམར་ཉིས་རིམ། བཞི་པར་དཀར་དམར་མཐིང་ག་སུམ་རིམ། ལྔ་པར་དཀར་སེར་མཐིང་ག་སུམ་རིམ། དྲུག་པར་དཀར་པོ་ཉིས་རིམ། བདུན་པར་སེར་པོ་ཉིས་རིམ། བརྒྱད་པ་ལེའུ་ཚེ་བཅུ་གཉིས་ཆ་བགོས་ལ་ཚོན་ལྔ་བཏང་བ། དགུ་པར་སེར་པོ་ཉིས་རིམ། བཅུ་པར་དཀར་ནག་ཉིས་རིམ། བཅུ་གཅིག་པར་ནང་ནས་རིམ་བཞིན་དཀར། སེར། ལྗང་གུ །དམར་ནག །སེར་ནག་ནག་པོ་དྲུག་རིམ་ཅན་སློབ་དཔོན་མདུན་སྟེགས་ཧ་ཅང་མི་མཐོ་བ་ལ་བཞག་པའི་སྟེང་ཁྲིའུར་བུམ་པ་བཀོད། མཆོད་གཞིར་སྨན་རཀ་དཔལ་གཏོར། དེའི་མདུན་ཅུང་ཟད་དམའ་བར་སྣོད་གཅིག་ཏུ་གཏོར་མ་ཟུར་གསུམ་དམར་པོ་པདྨས་བསྐོར་བ་གསུམ། སྣོད་གཅིག་ཏུ་ཟླུམ་གཏོར་པདྨ་སྤུངས་པ་འགྲུབ་ན་བཅུ་གཉིས་བཤམ། དབང་སྐབས་རྡུལ་ཚོན་རིམ་པར་ཕྱགས་བདེ་བའི་རྡུལ་ཕྱགས་ཆུང་ངུའང་ཉེ་བར་བསྡོག ༈ །རྡོར་གླིང་ལྟ་བ་ཀློངས་ཡངས་ཞི་ཁྲོའི་གཏོར་དབང་ལ། མཎྜལ་སྟེང་ཚོམ་བུ་ལྷ་གྲངས་སམ་གཙོ་འཁོར་ལྔ་བཀོད་པའི་སྟེང་། གཏོར་མ་བང་རིམ་བཞི་བརྩེགས་སྟེང་རིན་ཆེན་འབར་བ་སྤྱི་འགྲེ་དར་གདུགས་བཅས་བཀོད། ༈ རྡོར་གླིང་ཧཱུྃ་སྐོར་སྙིང་ཐིག་གི་ཕོ་སྒྲུབ་དང་འབྲེལ་བ་བུམ་པའི་དབང་ལ། མཎྜལ་པདྨ་འདབ་བཞི་འཇའ་རིས་མུ་ཁྱུད་ལྔ་ལྡན་གྱིས་བསྐོར་བའི་དབུས་སུ་བུམ་པ་སོ་ལྔའི་རྫས་དང་བཅུད་ལྡན་མགུལ་ཆིངས་དཀར་པོ་ཁ་རྒྱན་གྱིས་སྤྲས་པ། པད་འདབ་ཤར་དུ་ཏིང་ཕོར་ཆུས་བཀང་བ། ལྷོར་ས་གྲུ་བཞི། ནུབ་ཏུ་མར་མེ། བྱང་དུ་རླུང་གཡབ་རྣམས་བཞག །དེའི་རྒྱབ་ཕྱོགས་བླ་མའི་གཏོར་ཆེན་བཤམ། སྔོན་འགྲོ་སྦྱིན་སྲེག་ལ་ཞི་བའི་མེ་ཐབ་སྤྱི་འགྲེ་བྲིས་པའམ་ཐབ་སྟེགས་དཀར་ཟླུམ་འབྲུ་ཚོམ་དཀར་པོ་གཙོ་འཁོར་ལྔ་བཀོད་པའི་ཁར་བུད་ཤིང་ཟླུམ་པོར་བརྩིགས། སློབ་དཔོན་གྱི་གཡོན་ཕྱོགས་སུ་འབུལ་གཏོར་དཀར་ཟླུམ་དང་སྨན་རཀ་ཆུ་གཉིས་ཉེར་སྤྱོད། གཡས་ཕྱོགས་སུ་བ་ལུ་སོགས་ཀྱི་ཡམ་ཤིང་བདུན་ནམ་ཉེར་གཅིག །མར་ཁུ། ཏིལ་དང་ཡུངས་ཀར་རྣམས་བཀོད། ༈ གཉིས་པ་ཟུང་འཇུག་དང་འབྲེལ་བའི་གསང་དབང་ལ། དཀྱིལ་འཁོར་སྒོ་རྫོགས་སམ་ཕྱོགས་མདོག་གི་ཐིག་ལེ་ལྔ་ཚོམ་རེ་རེ་བཞིན་འཇའ་རིས་ཀྱི་མུ་ཁྱུད་ལྔ་དང་མཐའ་སྐོར་མུ་ཁྱུད་འཇའ་རིས་སྣ་ལྔས་བསྐོར་བའི་དབུས་སུ། བུམ་པ་སོ་ལྔ་དང་སྦྲང་ཆང་གི་བཅུད་ལྡན་ཁ་རྒྱན་མགུལ་ཆིངས་དཀར་པོས་སྤྲས་པ། ཤར་དུ་རྡོ་རྗེ། ལྷོར་རིན་ཆེན་འབར་བ། ནུབ་ཏུ་པདྨ། བྱང་དུ་རལ་གྲི་རྣམས་དང་། རིགས་ལྔ་ཡབ་ཡུམ་གྱི་ཙཀ་ལི། བགྲང་ཕྲེང་། དབྱངས་གསལ་དང་། འཁོར་བ་དོང་སྤྲུགས་ཀྱི་སྔགས་བྱང་རྣམས་བཞག །རྒྱབ་ཕྱོགས་སུ་ཡི་དམ་གྱི་གཏོར་ཆེན་བཤམ། ༈ གསུམ་པ་མོ་སྒྲུབ་དང་འབྲེལ་བ་ཤེར་དབང་ལ། མཎྜལ་པདྨ་འདབ་བཞིའི་སྟེང་དུ་ཐོད་པའི་བདུད་རྩི་ཆོས་སྨན་མངར་གསུམ་སྦྱར་བ་དང་རྡོར་དྲིལ། རྟ་མགྲིན་ཧེ་རུ་ཀའི་སྐུ་ཙཀ་དང་། རྒྱབ་ངོས་མཁའ་འགྲོའི་གཏོར་མ་བཤམ། ༈ བཞི་པ་ཚིག་དབང་ལ། དཀྱིལ་འཁོར་འཇའ་རིས་ཀྱི་ཐིག་ལེ་ཉི་ཤུ་རྩ་ལྔའི་མཐར་མུ་ཁྱུད་འཇའ་ཚོན་གྱིས་བསྐོར་བའི་དབུས་སུ་ཤེལ་རྡོ་དང་རྨ་བྱའི་མདོངས་བཞག ༈ །ལྔ་པ་གདམས་གཏད་དབང་ལ་བཤམ་བཀོད་ཟུར་དུ་མི་དགོས། བུམ་པ་སོགས་དབང་ཆས་རྣམས་སྣོད་གཅིག་ཏུ་བསྡུ་དགོས་པ་དང་གཞུང་པོད་གླེགས་བམ་གཏོད་རྒྱུར་འཇོག ༈ །རིན་ཆེན་གླིང་པའི་རྫོགས་ཆེན་ཆིག་ཆོད་ཀུན་གྲོལ་ནི། མཚན་མའི་དབང་རྫས་ལ་མི་ལྟོས་ཀྱང་མཚོན་བྱེད་ཙམ་དུ་མཎྜལ་པདྨ་འདབ་བརྒྱད་མཛེས་ཚོན་འཇའ་རིས་སྣ་ལྔས་བསྐོར་བའི་དབུས་སུ་ཁྲིའུའི་སྟེང་། རིན་པོ་ཆེའི་བུམ་པ་ལྔ་ཚན་ལྔའི་བཅུད་དང་མགུལ་ཆིངས་མཐིང་ག་ཁ་རྒྱན་ཤིང་ལོ་མེ་ཏོག་འབྲས་བུ་དང་བཅས་པ་གཟུག །མདུན་དུ་མེ་ལོང་གཡའ་མེད་པའི་སྟེང་ཤེལ་སྒོང་ཟུར་བརྒྱད་དང་རྨ་བྱའི་སྒྲོ་མདོངས་བཞག ༈ །རཏྣའི་ཀློང་གསལ་སྙིང་ཐིག་གི་ཆོས་སྒོ་འབྱེད་པ་གཏོར་དབང་ལ། མཎྜལ་ཚོམ་བུ་ལྔ་པའི་ཁར་ཁྲིའུ་ལ་དབང་གཏོར་གཞུང་གསལ་རྒྱན་ལྡན་བཀོད། ༈ བསྐྱེད་རིམ་དང་འབྲེལ་བའི་དབང་བསྐུར་རྣམ་གསུམ་ལ། སྟ་གོན་རྫས་བཞི། བླ་མ། རྟ་མགྲིན། ཚེ་དཔག་མེད་གསུམ་གྱི་སྐུ་རྟེན་བྱིན་ལྡན་བཀྲམ་པའི་མདུན་དུ། བླ་མ་ལ། རས་བྲིས་སམ་ལྷ་གྲངས་ཀྱི་ཚོམ་བུའི་ཁར་བླ་མའི་གཏོར་ཆེན་རིན་ཆེན་འབར་བ་བཟའ་བཏུང་བཅས་བཀོད། ཡི་དམ་ལ། རས་བྲིས་སམ་ཚོམ་བུ་ལྷ་གྲངས་གྱི་ལྟེ་བར་བནྡྷ་མཚན་ལྡན་ཆང་དང་ཆོས་སྨན་མངར་གསུམ་སྦྱར་བས་བཀང་བའི་སྟེང་ཁྲིའུ་ལ་ཁྲག་ཆང་གིས་སྦྲུས་པའི་དཔལ་གཏོར་རྟ་མགོས་མཚན་པ་དར་དམར་གྱི་གུར་ཕུབ། རིག་ཙཀ་དང་མེ་ལོང་སྐུ་ཕྱིས་གོས་ཟུང་སོགས་ཁྲུས་ཆས་ཀྱང་བཞག །ཀུན་བཟང་རྡོར་སེམས་ལྟ་བུའི་སྐུའང་བསྡོག །ཚེ་དབང་ལ། རས་བྲིས་སམ་ཚོམ་བུ་ལྔ་པའི་ཁར་འབྱོར་ན་བུམ་པ་ལྔ། མ་འབྱོར་ན་གཅིག་ལ་ཉེར་ལྔའི་རྫས་དང་དཀར་མངར་གྱིས་བཀང་བ་བཞག །གཡས་སུ་ཚེ་ཆང་། གཡོན་དུ་ཚེ་ནས་དཀར་མོ་ལ་མདའ་དར་དམར་པོ་གཟུག ༈ །རྫོགས་རིམ་གྱི་དབང་གི་སྟ་གོན་ལ། མཎྜལ་ཚོམ་བུ་ལྔ་པའི་ཕྱོགས་བཞི་དབུས་ལྔར་ཁྲིའུ་དང་ཀུ་ཤའི་གདན་ལ་བུམ་པ་རིགས་ལྔའི་ཕྱག་མཚན་དང་ལྡན་པ་ཕྱོགས་མདོག་གི་ནང་དུ་འབྲུ་ལྔ། བདུད་རྩི་ལྔ། རིན་པོ་ཆེ་ལྔ། སྨན་ལྔ། དྲི་ལྔ་ཆུ་གཙང་འོ་མ་བཅས་ཀྱིས་བཀང། ཁ་རྒྱན་རྨ་བྱ་ཤེལ་དཀར་མེ་ལོང་ལྡན་པ་བཞག །མཎྜལ་གྱི་ཤར་ཕྱོགས་སུ་མེ་ཐབ་དཀར་པོ་པདྨ་འདབ་བཞི་ཚོམ་བུ་ལྔ་བཀོད་པ་ལ་ཞི་བའི་བུད་ཤིང་ཟླུམ་པོར་བརྩིགས། མར་ཁུ་ཡམ་ཤིང་ཏིལ་ཡུངས་ཀར་གཙོར་བྱས་བསྲེག་རྫས་གང་འཛོམ་དང་དགང་བླུགས་ཀྱང་འདུ་བྱ། དངོས་གཞི་ལ། རས་བྲིས་སམ་ཚོམ་བུ་ལྔ་པའི་ཁར་སྔར་གྱི་བུམ་པ་ལྔ་དང་མཉམ་དུ་རྡོ་རྗེ་ཉི་ཟླའི་ཡུ་བ་ཅན་ལྔ། དྲིལ་བུ་རིགས་ལྔའི་ཕྱག་མཚན་གྱི་ཡུ་བ་བྱས་པ་ལྔ། རིགས་ལྔའི་སྐུ་ཙཀ་སོ་སོ། དབུ་རྒྱན། རྒྱབ་ཏུ་མཎྜལ་ཆོས་འབྱུང་བསྣོལ་མ་ཚོམ་བུ་ལྔ་པའི་སྟེང་ཁྲིའུ་ལ་ཐོད་ཆང་ཁར་སིནྡྷུ་རའི་མེ་ལོང་ཆོས་འབྱུང་ཟུར་ལྔ་པའི་ལྟེ་བར་ཧྲཱིཿམ། ཟུར་ལྔའི་མདུན་དང་གཡས་ནས་བརྩམས་ཏེ། ར་ཧ། ཙ་རི། ཧྲི་ནི། ཡ་ས། ཧཱུྃ་མ་རྣམས་བྲིས་པ་བཞག་ལ་དར་དམར་གྱིས་བཀབ། དེ་སྟེང་ཁྲིའུར་གུ་རུའི་སྐུ་ཚབ་བཞུགས་སུ་གསོལ། ༈ པད་གླིང་ཀུན་བཟང་དགོངས་འདུས་དོན་དབང་ལ། དཀྱིལ་འཁོར་རས་བྲིས་སྟེང་དབུས་དང་ཕྱོགས་བཞིར་མཉྫི་ལ་བུམ་པ་ལྔ། དབུས་སྨན་ལྔ་མགུལ་ཆིངས་དཀར་ཁ་རྒྱན་ལ་རྣམ་སྣང་གི་སྐུ་དང་ཨོཾ་གྱིས་བརྒྱན་པ། དེས་འགྲེས་ཏེ་ཤར་སོགས་འབྲུ་ལྔ་རིན་པོ་ཆེ་ལྔ་དྲི་ལྔ་སྙིང་པོ་ལྔ་དང་མཐིང་སེར་དམར་ལྗང་རིགས་བཞིའི་སྐུ་དང་ཧཱུྃ་ཏྲཱཾ་ཧྲཱིཿཨཱཿ ཐམས་ཅད་ལ་ཤེལ་དང་མེ་ལོང་རྨ་བྱས་བརྒྱན་པ། དབུས་བུམ་མདུན་ཐོད་པ་ཆང་དང་བུ་རམ་སྦྱར་བ། ཤར་ལྷོར་འོ་མ། ལྷོ་ནུབ་ལན་ཚྭ། ནུབ་བྱང་སྦྲང་རྩི། བྱང་ཤར་ཟས་སྣས་བཀང་བའི་ཐོད་པ་བཞི་བཞག །རིག་ཙཀ །སློབ་མའི་གྲངས་མཉམ་གྱི་མར་མེ་གསལ་བའང་བཀོད། སྲུང་སྐུད་ཁ་དོག་ལྔ་པ་དེ་གྲངས་འདུ་བྱའོ། ༈ །ཐུགས་སྒྲུབ་པད་འབྱུང་ལ། མཎྜལ་ཚོམ་བུ་གཅིག་པའི་སྟེང་བུམ་པ་ཆིངས་དཀར་ཐོད་ཆང་སིནྡྷུ་རའི་མེ་ལོང་སྐུ་ཚབ་རྣམས་བརྩེགས་མ་དང་། མདུན་རྒྱབ་གང་བདེར་བླ་གཏོར། ཤེལ་རྡོ། རྨ་བྱའི་མདོངས་རྣམས་བཞག །རྗེས་འབྲེལ་ངོ་མཚར་ཆོས་དྲུག་གི་ཆས། མཐོང་གྲོལ། ཐོས་གྲོལ། བཏགས་གྲོལ། ཚོར་གྲོལ་གཞུང་གསལ་ཚད་ལྡན། མྱང་གྲོལ་རིལ་བུམ། རེག་གྲོལ་འཕོ་རྫས་ཆང་སྦྱར། རྒྱུད་ཀྱི་གླེགས་བམ་བཅས་བཀོད། ༈ ཀུན་སྐྱོང་གླིང་པའི་རྡོར་སེམས་སྙིང་ཐིག་ལ། པདྨ་འདབ་བརྒྱད་མུ་ཁྱུད་འཇའ་ཚོན་རིས་སུ་བསྐོར་བའི་སྟེང་དུ་རྣམ་བུམ། གཡས་སུ་ཐོད་ཆང་། གཡོན་དུ་དཔལ་གཏོར། མདུན་དུ་རྨ་བྱའི་ཕོད་གཙུག ༈ །སྡེ་གསུམ་གསང་སྐོར་བཀའ་བརྒྱད་རྫོང་འཕྲང་ལ། དཀྱིལ་འཁོར་རམ་མཎྜལ་ཚོམ་བུ་གཙོ་འཁོར་དགུ་པའི་སྟེང་དུ་ཁྲིའུ་ལ་བུམ་པ་ཆིངས་སྔོན་སྐུ་ཙཀ་ལྡན་པ། གཡས་སུ་དབུ་རྒྱན། རྒྱབ་ཏུ་རྡོ་རྗེ་དང་གསང་ཐོད་རིག་ཙཀ །གཡོན་དུ་དྲིལ་བུ་དང་ཤེལ་རྡོ་མེ་ལོང་། མདུན་དུ་ཀུན་བཟང་རྡོར་སེམས་རིགས་གསུམ་མགོན་པོ་བཅས་ཞི་བ་ལྔ་དང་དཔལ་དགུ་བྱ་ཁྱུང་བཅས་པའི་ཙཀ་ལི། བར་མཚམས་སུ་སྔགས་ཕྲེང་། ཕྱག་མཚན་རྩེ་དགུ །དུར་ཁྲོད་དང་དཔལ་ཆས། ཁྲི་གདུགས་སོགས་མངའ་གསོལ་ཆས་རྣམས་བཀོད། སྟེགས་གཞན་དུ་བྲུབ་ཁུང་ལིངྒ་ལྕགས་ཕུར། དགང་གཟར་བླུགས། ཟོར་གཏོར་མཚེ་ཡུངས་བཙུགས་པ། མནན་པའི་ཆས། ཞྭ་ནག་བེར་ཕོད་ཐུན་རྭ་མེ་ལོང་རྣམས་དངོས་སམ་བྲིས་པ་དང་། བཀྲ་ཤིས་ཚེ་གལ་གྱི་བཟའ་བཏུང་རྣམས་ཀྱང་ཉེ་བར་བསྡོག ༈ །ཨ་ཏི་ཟབ་དོན་ལ། འོད་ལྔའི་ཐིག་ལེའི་དཀྱིལ་འཁོར་དབུས་སུ་རྣམ་བུམ། གཡས་སུ་མན་ཤེལ་དར་སྣས་དྲིལ་བ། གཡོན་དུ་ཐོད་ཆང་། རྒྱབ་ཏུ་རིགས་ལྔའི་ཙཀ་ལི་ཕྱོགས་བསྡུས་དང་མེ་ལོང་གསལ་བ། མདུན་དུ་སངས་རྒྱས་སྲས་གཅིག་གི་རྒྱུད་དར་སྣས་དྲིལ་བ་བཞག་གོ ༈ །མཆོག་གླིང་རྫོགས་ཆེན་སྡེ་གསུམ་གྱི་དགའ་རབ་སྙིང་ཐིག་ཞི་དབང་ལ། དཀྱིལ་འཁོར་རམ་ཚོམ་བུ་དཀར་པོ་གཅིག་གི་སྟེང་བུམ་པ་ཆིངས་དཀར་ཅན་གྱི་ཁར་ཐོད་པའི་བདུད་རྩི་མེ་ལོང་ཤེལ་རྡོ་རྣམས་བརྩེགས། མདུན་དུ་རྡོར་སེམས་ཡབ་ཡུམ་གྱི་སྐུ་ཙཀ །ཤེལ་ཕྲེང་། རྡོ་རྗེ་མེ་ལོང་། རིག་ཙཀ །གཞུང་ནས་བཤད་པའི་རིལ་བུ་ཐོད་སྣོད་དུ་བླུགས་པ་དར་ཁེབ་ཅན་བཅས་བཞག ༈ ཁྲོ་དབང་ལ། ཟླ་གམ་དཀྱིལ་འཁོར་རམ་ཚོམ་བུ་གཙོ་འཁོར་དགུའི་དབུས་སུ་ཁྲིའུར་འབྲུ་སྣོད་དུ་ཐོད་སྐུ་དར་གྱིས་བཀླུབས་པ། མདུན་དུ་ཐོད་སྣོད་དུ་མར་མེ་དགུ་བཅོས་པ། གཡས་གཡོན་རྣམས་སུ་སྔགས་བྱང་། རྡོར་དྲིལ། གསང་ཐོད་ཁར་སིནྡྷུའི་མེ་ལོང་ལ་ཆོས་འབྱུང་བསྣོལ་མ་དགའ་འཁྱིལ་མཱུཾ་ཡིག་གིས་མཚན་པ། རིག་ཙཀ །ཚེ་འབྲང་བཅས་བཀོད་དོ།། ༈ །།སྤྱི་ཏི་ལ། རས་བྲིས་སྟེང་དཔལ་གཏོར། གཡས་སུ་རྣམ་བུམ། གཡོན་དུ་ཐོད་ཆང་ཁར་མེ་ལོང་དྭངས་པ་བཞག་གོ། ༈ །།ཡང་ཏི་སངས་རྒྱས་མཉམ་སྦྱོར་གྱི་རིག་པའི་རྩལ་དབང་ལ། རས་བྲིས་སྟེང་འདབ་བརྒྱད་ཀྱི་ཤར་དུ་ཉི་ཟླ་སོགས་གཟུགས་སོ་སོར་བཀོད་པའི་ལྟེ་བར་བུམ་པ་སྔོན་པོ་ཁ་རྒྱན་རྡོ་རྗེ་དང་བཅས་པ། འདབ་བརྒྱད་ཤར་གྱི་སྟེང་དུ་མེ་ལོང་། ལྷོར་མི་རོ། ནུབ་ཏུ་སྣོད་གང་རུང་ལ་ཆུ་ཚྭ་འོ་མ། བྱང་དུ་འཇའ་ཚོན། ཤར་ལྷོར་སྤོས་དང་མར་མེ། ལྷོ་ནུབ་ཏུ་དར་སྣ་དང་དངུལ་དཀར་མེ་ལོང་། ནུབ་བྱང་དུ་གྷི་ཝཾ་དང་ཐོད་ཆང་། བྱང་ཤར་དུ་མངར་གསུམ་གྱི་ལྡེ་གུ་དང་ཆོས་འབྱུང་མཐིང་ག །ཤར་སྒོར་ཉི་མ། ལྷོ་སྒོར་ཤེལ་སྒོང་། ནུབ་སྒོར་རླུང་གི་འཁོར་ལོ། བྱང་སྒོར་ཆུ་གཙང་རྣམས་དངོས་དང་རི་མོར་བྲིས་པ་བཞག །མདུན་ཕྱོགས་སུ་དཔལ་གཏོར་ལ་རི་རབ་གླིང་བཞི་འདོད་ཡོན་བཀོད་པ་སྣ་ཚོགས་ཀྱི་ཙཀ་ལི་བཙུགས་པའི་གཡས་གཡོན་དུ་སྨན་རཀ་བཤམ། གཞན་ཡང་དབང་རྫས་དབུ་རྒྱན། རྡོ་རྗེ། དྲིལ་བུ་རྣམས་དང་། དར་ལམ་དཀར་པོའང་འདུ་བྱ། ༈ ཡང་ཏི་གསེར་གྱི་འབྲུ་གཅིག་ལ། སྟ་གོན་རྫས་བཞི། རས་བྲིས་དབུས་སུ་རྣམ་བུམ་རིག་དབང་ཆས་ལས་མིང་དབང་སྣ་ཚོགས་རྡོ་རྗེ། ལྷ་ཙཀ་ཚང་བ། ཐོད་ཆང་ཁར་མེ་ལོང་དྭངས་པ་བཀབ་པ། དྲིལ་བུ། མར་མེ། རླུང་གཡབ་མེ་ལོང་ཤེལ་རྡོ་ལྷན་ཅིག་པ་རྣམས་བཞག་གོ ༈ །མཆོག་གླིང་རིགས་གསུམ་སྙིང་ཐིག་ལས། དང་པོ་ལྷ་མིའི་ཐེག་པ་སྐྱབ་སྡོམ་འབོགས་པ་ལ། གནས་ཁང་བྱི་དོར་བྱ། དྲི་བཟང་ཆུས་ཆག་ཆག་གདབ། སྟེགས་གཙང་མར་མེ་ཏོག་སིལ་མ་བཀྲམ་པའི་དབུས་སུ་ཐུབ་པའི་དབང་པོའི་སྐུ་བརྙན། གཡས་སུ་གསུང་རབ་ཀྱི་གླེགས་བམ། གཡོན་དུ་མཆོད་རྟེན་རྣམས་སྣོད་གཅིག་ཏུ་བཞུགས། མདུན་དུ་ཕྱི་མཆོད་ཕྲེང་ཚར་དུ་བཤམ། ཉན་རང་བྱང་སེམས་ཡན་བསྐུར་སྒྲུབ་དུས་གཅིག་བྱེད་ན་འོག་ནས་འབྱུང་བའི་གཤོམ་རྣམས་ཀྱང་སྟེགས་བུ་གཅིག་གི་སྟེང་གྲལ་ཐབས་སམ། ཕྱོགས་བཞི་ལྟ་བུར་བཀོད། ༈ གཉིས་པ་ཉན་ཐོས་ཐེག་པ་ལ། གཞུང་ནས་གསལ་བ་ལྟར་འཇམ་དཔལ་སོགས་ཉན་ཐོས་ཚུལ་བཟུང་བའི་འབུར་སྐུའམ་ཙཀ་ལི་གསུམ། སོ་ཐར་མདོ་ལྟ་བུའི་གླེགས་བམ། མཆོད་རྟེན་རྣམས་སོ་སོར་བཞུགས། ཆུ་གཉིས་ཉེར་སྤྱོད་ཕྲེང་ཚར་དུ་བཤམ། ༈ གསུམ་པ་རང་རྒྱལ་ཐེག་པ་ལ། ཙན་དན་དཀར་པོས་བྱུགས་པའི་མཎྜལ་གྱི་སྟེང་དུ་གཞུང་ནས་བཤད་པ་ལྟར་རིགས་གསུམ་རང་རྒྱལ་གྱི་སྐུ་བྲིས་འབུར་གང་རུང་དང་། ཕྱི་མཆོད་བཤམ། ༈ བཞི་པ་བྱང་སེམས་ཐེག་པ་ལ། དཀྱིལ་འཁོར་རྟ་བབས་མེད་པའི་སྒོ་རྐྱང་ཁྲུས་རྫིང་སྐྱེད་ཚལ་རིན་པོ་ཆེའི་ལྕགས་རིས་བསྐོར་བའི་དབུས་སུ་པདྨའི་གདན་སུམ་བསྒྲིགས་ལ་རིགས་གསུམ་བྱང་སེམས་གཞུང་ནས་བཤད་པ་ལྟ་བུའི་སྐུ་བརྙན་ནམ་ཙཀ་ལི་དང་། ཕྱི་མཆོད་བཤམ། ༈ ལྔ་པ་ཀྲྀ་ཡ་སྟེ་བྱ་བའི་རྒྱུད་ལ། དཀྱིལ་འཁོར་ཙན་དན་དཀར་པོ་ལ་སོགས་པའི་དྲི་ལྡན་ཤིང་ལེབ་ཀྱི་གཞི་ལ་པདྨ་འདབ་བརྒྱད་སུམ་བསྒྲིགས་ཀྱི་སྟེང་དུ་ཡོད་ན་དབུས་སུ་འཇམ་དབྱངས། གཡས་སུ་སྤྱན་རས་གཟིགས། གཡོན་དུ་ཕྱག་རྡོར་རྣམས་ཙན་དཀར་ལས་བྱས་པའི་སྐུ་བརྙན་ནམ། མ་འཛོམ་ན་ཙཀ་ལི་བཞག །གཡས་གཡོན་དུ་རྣམ་བུམ་ཉེར་ལྔའི་བཅུད་ལྡན་ཁ་རྒྱན་གཟུངས་རྡོར་བཅས་པ། ནོར་བུའི་ཅོད་པན། སྟོད་གཡོགས་དར་དཔྱངས་བཅས་དངོས་སམ་རི་མོར་བྲིས་པ། རྫས་རྟགས། རྒྱལ་སྲིད་རྣམས་ཀྱི་ཙཀ་ལི། ཉེར་སྤྱོད་རྣམས་མདུན་ནས་གཡས་བསྐོར་དུ་བཤམ། ༈ དྲུག་པ་ཡོ་ག་ལ་རིགས་གསུམ་གྱི། དང་པོ་འཇམ་དཔལ་ཡེ་ཤེས་སེམས་དཔའ་ལ། དཀྱིལ་འཁོར་དབུས་སུ་འཇམ་དཔལ་ཡེ་ཤེས་སེམས་དཔའི་སྐུ་བརྙན་བྲིས་འབུར་གང་རུང་བཞུགས། སྔགས་བྱང་ངམ་ཕྲེང་བ་དང་། ཕྱག་མཚན་བཞག །འདིའི་དབང་བསྐུར་སྒེར་དུ་བྱེད་ན་རྣམ་བུམ་བཀོད། ཕྱི་མཆོད་བཤམ། ༈ གཉིས་པ་སྤྱན་རས་གཟིགས་འཁོར་བ་དོང་སྤྲུགས་ལ། དཀྱིལ་འཁོར་དབུས་སུ་བུམ་པ་ཉེར་ལྔའི་བཅུད་ལྡན་དང་སྐུ་གཟུགས་བྲིས་འབུར་གང་རུང་བཞུགས། སྔགས་བྱང་ངམ་ཕྲེང་བ། ཕྱག་མཚན་བཞག །ཕྱི་མཆོད་བཤམ། ༈ གསུམ་པ་གསང་བདག་ངན་སོང་ཀུན་འདྲེན་ལ། དཀྱིལ་འཁོར་དབུས་སུ་བུམ་པ་ཉེར་ལྔའི་བཅུད་ལྡན་དང་། སྐུ་བརྙན་བྲིས་འབུར་གང་རུང་བཞུགས། སྔགས་བྱང་ངམ་ཕྲེང་བ་མེ་ལོང་བཞག །ཕྱི་མཆོད་བཤམ། ༈ བདུན་པ་མ་ཧཱ་ཡོ་ག་འཇམ་དཔལ་རྡོ་རྗེ་ལ། ཞི་དཀྱིལ་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་སུ་རྣམ་བུམ་སོ་ལྔའི་བཅུད་ལྡན་མགུལ་ཆིངས་སེར་པོ་ཁ་རྒྱན་དང་བཅས་པ། གཡས་སུ་གསང་དབང་ཐོད་པ་མཚན་ལྡན་དང་། གཡོན་དུ་ཁྲོ་བོའི་གསང་ཐོད་ཁྱེའུ་དང་བུ་མོ་ལོ་བཅུ་དྲུག་ལོན་པའི་ཐོད་པ་ཁ་སྦྱོར་གསུངས་ཀྱང་མ་རྙེད་ན་ཕོ་མོའི་ཐོད་པ་ཁ་སྦྱོར། གཉིས་ཀའི་ནང་ཆང་དང་ཆོས་སྨན་མངར་གསུམ་སྦྱར་བས་བཀང་བ། རྒྱབ་ཏུ་ཁྲོ་བོའི་དཔལ་གཏོར་སྐུ་ཙཀ་དར་གདུགས་མཐིང་གས་སྤྲས་པ། རིག་མ་དང་སྒྲོལ་གིང་ལས་གཤིན་གྱི་ཙཀ་ལི། འཇའ་ཤེལ། མདུན་དུ་སྨན་རཀ་གཏོར་གསུམ། ཉེར་སྤྱོད་བསྐོར་བཤམ་བྱ། ༈ བརྒྱད་པ་ལུང་ཨ་ནུ་ཡོ་ག་པདྨ་གར་དབང་ལ། དཀྱིལ་འཁོར་གཞུང་མཐུན་དབུས། གཏོར་ཙཀ་པདྨ་ཧེ་རུ་ཀ་དང་དར་གདུགས་དམར་པོ། སྒྲོལ་གིང་དམར་པོ་རལ་གྲི་དང་ཕུར་པ་ཐོགས་པ་བརྗེ་བ་ལས་བཤམ་བཀོད་གཞན་རྣམས་འཇམ་དཔལ་རྡོ་རྗེ་ཇི་ལྟ་བ་བྱའོ། ༈ །དགུ་པ་མན་ངག་རྫོགས་པ་ཆེན་པོ་གསང་བདག་སྙིང་ཐིག་ལ། བཤམ་བཀོད་སྔར་ལྟར་ལ་དཀྱིལ་འཁོར་གཞུང་མཐུན་དབུས། གཏོར་ཙཀ་བཛྲ་ཧེ་རུ་ཀ་དང་དར་གདུགས་མཐིང་ནག །སྒྲོལ་གིང་མཐིང་ནག་རལ་གྲི་དང་ཕུར་པ་ཐོགས་པ་བཀོད། ༈ མན་ངག་ལ། ཐིག་ལེ་ལྔ་ཚོམ་དབུས་མཐིང་ཤར་དཀར་སོགས་ཕྱོགས་མདོག་ཅན་གྱི་ལྟེ་བར་ཧཱུྃ་སྔོན་པོ། ཤར་དུ་ཨོཾ་དཀར་པོ། ལྷོར་ཏྲཱཾ་སེར་པོ། ནུབ་ཏུ་ཧྲཱིཿདམར་པོ། བྱང་དུ་ཨཱཿལྗང་གུ །མཐར་འོད་ལྔའི་མུ་ཁྱུད་ཀྱིས་བསྐོར་བའི་དཀྱིལ་འཁོར་སྟེང་རྣམ་བུམ་མགུལ་ཆིངས་སྔོན་པོ། ཁ་རྒྱན་གསེབ་ཏུ་མདའ་དར་ཤེལ་ཕྲེང་མེ་ལོང་བཏགས་པ་དང་། རིག་མའི་མཚོན་བྱེད་པདྨ་དམར་པོ་རྡོ་རྗེ་དཀར་པོས་མཚན་པ་རྣམས་བཀོད། ༈ བཅུ་པ་རིགས་གསུམ་འདུས་པ་ལ། དཀྱིལ་འཁོར་རས་བྲིས་སམ་མཎྜལ་ལ་ཚོམ་བུ་ལྷ་གྲངས་བཀོད་པའི་དབུས་རྣམ་རྒྱལ་བུམ་པ། གཡས་གཡོན་དུ་གསང་ཐོད། རིག་ཙཀ་བརྡ། རང་བྱུང་འཇའ་ཤེལ་རྣམས་དང་། འགྲོ་འདུལ་ཕྲིན་ལས་ཀྱི་དབང་ཆས། རིགས་གསུམ་མཆོད་རྟེན་ལྔ་པ་བྲིས་འབུར་གང་རུང་འཛོམ་ན་དང་། མེད་ན་མཆོད་རྟེན་རབ་གནས་ལྡན་པ། སངས་རྒྱས་ཀྱི་རིང་བསྲེལ་དངོས་དང་དེ་ཉིད་ཕབ་གཏར་སྦྱར་ནས་དྲིལ་བའི་རིལ་བུ། ཤེས་རབ་རིལ་བུ་གཞུང་གསལ་བསྡུ་བསྒྲུབས་བྱས་པ་བཅས་སོ་སོར་རིན་པོ་ཆེའི་ཟ་མ་ཏོག་ལ་སོགས་པའི་སྣོད་དུ་བཞག་པ། ༈ ཚེ་དཀྱིལ་རིན་པོ་ཆེ་ཟུར་བཞི་པའི་དབུས་སུ་བུམ་པ་ཉེར་ལྔའི་བཅུད་ལྡན་མགུལ་ཆིངས་དམར་པོ། ཚེ་རིལ་ཚེ་ཆང་བཅས་ཕྱོགས་གང་བདེར་བཀོད། བཀའ་སྲུང་དུད་སོལ་མའི་རྗེས་གནང་འདིར་སྦྲེལ་ན་བདེ་བས་འོག་ནས་བཤད་པའི་ཆས་རྣམས་མདུན་ཕྱོགས་ལྟ་བུར་བསྒྲིག །སྨན་རཀ་གཏོར་གསུམ། ཉེར་སྤྱོད་ཀྱིས་མཚོན་བཤམ་བཀོད་དང་ཉེར་མཁོ་སྔ་མ་རྣམས་ལྟར་བྱའོ། ༈ །བཅུ་གཅིག་པ་བཀའ་སྲུང་དུད་སོལ་མའི་སྲོག་གཏད་ལ། འབྲུ་ནག་གི་ཚོམ་བུའི་སྟེང་དུ། ཐོད་པའམ་ཟངས་ལྕགས་ཀྱི་སྣོད་དུ་ཤ་ཁྲག་གིས་སྦགས་པའི་གཏོར་མ་ཟུར་གསུམ་མེ་རི་དར་གདུགས་ཀྱིས་སྤྲས་པ་བཀོད། གཡས་གཡོན་དུ། སྐུ་ཙཀ །སྔགས་བྱང་། དྲི་བཟང་གི་ཆུ། ཕྱག་མཚན་བཞི་དངོས་སམ་བྲིས་པ་རྣམས་དང་། སྨན་རཀ་ཉེར་སྤྱོད་སྤྱི་ལྟར་བཤམ། ཁྲག་ཆང་གི་སྐྱེམས། འབུལ་གཏོར་སོགས་ཀྱང་བསྡོག ༈ །དགོངས་འདུས་པུསྟི་ལུང་དབང་ལ། སྟེགས་གཙང་མར་མེ་ཏོག་སིལ་མ་བཀྲམ་པའི་དབུས་སུ། ཁྲི་སྟེགས་ལ་ཐུབ་དབང་སྐུ་བརྙན་བྱིན་ལྡན་བཞུགས། གཡས་ཕྱོགས་སུ་ཐེག་དགུའི་གླེགས་བམ་རིམ་པར་གཏད་དུ་རུང་བར་བཞག་དགོས་པས། འདུལ་བ་སོ་ཐར་མདོ་དང་བརྒྱད་སྟོང་པ། མངོན་པ་མཛོད་ཙམ། བྱ་སྤྱོད་རྣལ་འབྱོར་གསུམ་ལ་བཀའ་འགྱུར་རྒྱུད་འབུམ་ནས་པོད་རེ་ཙམ་མམ་དེ་དག་གི་སྒྲུབ་ཐབས་རེ་ཙམ་དར་གྱིས་དྲིལ་ལ་བཞག །མ་ཧཱ་ཡོ་ག་ལ་གཏེར་མཛོད་པོད་དང་པོ་ནས་མངོན་སྤྱོད་ལས་རྫོགས་ཀྱི་བར་ཚང་མ། ཨ་ནུ་ལ་མ་རྒྱུད་གསང་བ་ལམ་ཁྱེར་སོགས། ཨ་ཏི་སེམས་སྡེ་མན་ཆད་ཚང་བ་བཞུགས། གཡོན་དུ་གནས་བརྟན་གྱི་སྐུ་གཟུགས། མདུན་དུ་ཕྱི་མཆོད་རྣམ་བདུན་ཕྲེང་ཚར་དང་མཎྜལ་རྒྱས་པར་བཤམ་པས་གྲུབ་བོ། །ནམ་མཁའི་རྣལ་འབྱོར་རྟོགས་པའི་གདིང་རྙེད་པས། །སྦྱངས་པ་སྔོན་སོང་སྐལ་ལྡན་རྗེས་བཟུང་བ། །ཀུན་རྫོབ་ཙམ་ལ་ལྟོས་པ་མ་ཡིན་ཀྱང་། །སྙིགས་དུས་དེ་འདྲའི་སྣོད་བཅུད་འཛོམ་པ་དཀོན། །བདེན་པ་གཉིས་པོ་གཅིག་ལ་གཅིག་བརྟེན་པ། །ཆོས་ཉིད་གཤིས་ལུགས་རྟེན་ཅིང་འབྲེལ་འབྱུང་ཕྱིར། །དང་པོའི་ལས་ཅན་རྒྱུད་སྨིན་བྱེད་པ་ལ། །མཚན་མའི་དཀྱིལ་འཁོར་དབང་རྫས་ཚང་བ་དགོས། །རིམ་གཉིས་རྣལ་འབྱོར་ཇི་བཞིན་མི་བརྟན་ཀྱང་། །དམ་ཚིག་ཡན་ལག་ཅི་ནུས་ཚོགས་གྱུར་ན། །དེ་དང་མཐུན་པའི་ཕན་ཡོན་འཐོབ་འགྱུར་བས། །ནུས་པས་གང་ལྕོགས་སྙོམ་ལས་དབང་མ་གཏང་། །བཤད་ཚོད་ལག་ལེན་དགོས་པ་དོགས་པའི་མཐའ། །གཞུང་དོན་རས་སུ་བོར་བ་ལྷོད་པའི་སྐྱོན། །སྤངས་ནས་འདི་ཙམ་འགྲུབ་ན་དེང་དུས་ཀྱི། །དབང་བསྐུར་ཡིན་པར་རློམས་ནས་ཆེད་དུ་བཀོད། །འདིས་ཀྱང་རིན་ཆེན་གཏེར་གྱི་མཛོད་ཆེན་པོའི། །སྨིན་བྱེད་སྒོ་འཕར་ཕྱོགས་བརྒྱར་དབྱེ་བ་ལ། །སྣང་བའི་གཟི་ལྡན་སྒྲོན་མེ་ཉིད་གྱུར་ནས། །ཀུན་རྨོངས་སེལ་ཞིང་ལེགས་ལམ་རབ་གསལ་ཤོག །ཚུལ་འདི་ལྟར་མཁྱེན་རབ་རྒྱས་པའི་དམ་པ་རྣམས་ལ་མི་མཁོ་ཡང་རང་འདྲའི་བློ་དམན་འཆད་ཉན་གྱི་ཁུར་འཛིན་པ་ལ་རྒྱུས་ཤེས་ལམ་སྟོན་གྱི་ཚུལ་དུ་ཐུགས་ཕན་ཐོགས་པར་རེ་བའི་ལྷག་བློས་ཀུན་ནས་བསླངས་ཏེ་མཛོད་ཆེན་གྱི་གླེགས་བམ་ཡོངས་སུ་རྫོགས་པར་གྲུབ་པའི་རྗེས་ཐོག་ཏུ་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོའམ། རྒྱལ་བའི་སྲས་པོ་བློ་གྲོས་མཐའ་ཡས་པའི་སྡེས་དེ་བཱི་ཀོ་ཊི་ཙ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ། མངྒ་ལམ།། །། | ||
</div> | </div></onlyinclude> | ||
{{TsagliCall}} | |||
</onlyinclude> | |||
<headertabs/> | <headertabs/> | ||
== Footnotes == | == Footnotes == | ||
<references/> | <references/> | ||
==Other Information== | ==Other Information== | ||
{{Footer}} | {{Footer | ||
}} | |||
{{RTZ Metadata | |||
|classification=Tibetan Publications | |||
|subclass=Tibetan Texts | |||
|pagename=Terdzo-KHA-004 | |||
|fulltitletib=རིན་ཆེན་གཏེར་མཛོད་ཆེན་པོའི་སྨིན་གྲོལ་དཀྱུས་གཅིག་ཏུ་འབོག་པའི་སྐབས་ཀྱི་ལག་ལེན་ཕྱོགས་མཚོན་དང་། བཅས་བཤམ་བྱ་བའི་ཚུལ་མཐོང་བས་གོ་འབྱེད | |||
|fulltitle=rin chen gter mdzod chen po'i smin grol dkyus gcig tu 'bog pa'i skabs kyi lag len phyogs mtshon dang /_bcas bsham bya ba'i tshul mthong bas go 'byed | |||
|citation=[['jam mgon kong sprul]]. rin chen gter mdzod chen po'i smin grol dkyus gcig tu 'bog pa'i skabs kyi lag len phyogs mtshon dang /_bcas bsham bya ba'i tshul mthong bas go 'byed. In Rin chen gter mdzod chen mo pod gnyis pa (The Great Treasury of Rediscovered Teachings Volume 2) by 'jam mgon kong sprul, 569-787. New Delhi: Shechen Publications, 2007-2016. | |||
|collectiontitle=Rin chen gter mdzod; Rin chen gter mdzod Shechen Edition | |||
|collectiontitletib=རིན་ཆེན་གཏེར་མཛོད་ | |||
|author='jam mgon kong sprul | |||
|compiler='jam mgon kong sprul | |||
|authortib=འཇམ་མགོན་ཀོང་སྤྲུལ་ | |||
|compilertib=འཇམ་མགོན་ཀོང་སྤྲུལ་ | |||
|tiblittype=Buddhist | |||
|tibgenre=Revelations - gter ma, Ritual and Liturgical Texts - cho ga phyag len | |||
|terma=Yes | |||
|rtzcategory=Instructional Materials | |||
|commentary=No | |||
|language=Tibetan | |||
|index=No index | |||
|keywords=lag len; dbang gi bsham bkod; empowerment procedure; ritual implements | |||
|volumenumber=2 | |||
|volnumtib=༢ | |||
|volyigtib=ཁ | |||
|totalvolumes=70 | |||
|textnuminvol=4 | |||
|pagenumbers=569-787 | |||
|totalpages=219 | |||
|beginfolioline=1a1 | |||
|endfolioline=110a4 | |||
|totalfolios=110 | |||
|multivolumework=Yes | |||
|rectonotes=lag len | |||
|versonotes=gter mdzod dbang gi bsham bkod | |||
|colophontib=ཚུལ་འདི་ལྟར་མཁྱེན་རབ་རྒྱས་པའི་དམ་པ་རྣམས་ལ་མི་མཁོ་ཡང་རང་འདྲའི་བློ་དམན་འཆད་ཉན་གྱི་ཁུར་འཛིན་པ་ལ་རྒྱུས་ཤེས་ལམ་སྟོན་གྱི་ཚུལ་དུ་ཐུགས་ཕན་ཐོགས་པར་རེ་བའི་ལྷག་བློས་ཀུན་ནས་བསླངས་ཏེ་མཛོད་ཆེན་གྱི་གླེགས་བམ་ཡོངས་སུ་རྫོགས་པར་གྲུབ་པའི་རྗེས་ཐོག་ཏུ་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོའམ། རྒྱལ་བའི་སྲས་པོ་བློ་གྲོས་མཐའ་ཡས་པའི་སྡེས་དེ་བཱི་ཀོ་ཊི་ཙ་འདྲ་རིན་ཆེན་བྲག་གི་སྒྲུབ་གནས་སུ་བགྱིས་པ་དགེ་ལེགས་འཕེལ། མངྒ་ལམ།། | |||
|colophonwylie=tshul 'di ltar mkhyen rab rgyas pa'i dam pa rnams la mi mkho yang rang 'dra'i blo dman 'chad nyan gyi khur 'dzin pa la rgyus shes lam ston gyi tshul du thugs phan thogs par re ba'i lhag blos kun nas bslangs te mdzod chen gyi glegs bam yongs su rdzogs par grub pa'i rjes thog tu karma ngag dbang yon tan rgya mtsho phrin las kun khyab dpal bzang po'am/_rgyal ba'i sras po blo gros mtha' yas pa'i sdes de bI ko Ti tsa 'dra rin chen brag gi sgrub gnas su bgyis pa dge legs 'phel/_mang+ga lam// | |||
|pagestatus=Phase I Complete | |||
|pagecreationdate=2015/07/02 | |||
|pdflink=File:Terdzo-KHA-004.pdf | |||
}} | |||
Latest revision as of 00:38, 30 December 2017
རིན་ཆེན་གཏེར་མཛོད་ཆེན་པོའི་སྨིན་གྲོལ་དཀྱུས་གཅིག་ཏུ་འབོག་པའི་སྐབས་ཀྱི་ལག་ལེན་ཕྱོགས་མཚོན་དང་། བཅས་བཤམ་བྱ་བའི་ཚུལ་མཐོང་བས་གོ་འབྱེད
rin chen gter mdzod chen po'i smin grol dkyus gcig tu 'bog pa'i skabs kyi lag len phyogs mtshon dang /_bcas bsham bya ba'i tshul mthong bas go 'byed
by འཇམ་མགོན་ཀོང་སྤྲུལ་ (Jamgön Kongtrul Lodrö Taye)
Volume 2 (ཁ) / Pages 569-787 / Folios 1a1 to 110a4
Footnotes
Other Information
Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).
