Terdzo-MA-024
རྫོགས་པ་ཆེན་པོ་བཀའ་འདུས་ཀྱི༔ རྩ་སྒྲུབ་སྙིང་པོ་དོན་འདུས་ལས༔ ཕྲིན་ལས་སྙིང་པོར་བསྡུས་པ་
by མཆོག་གྱུར་གླིང་པ་ (Chogyur Lingpa)
revealed by མཆོག་གྱུར་གླིང་པ་ (Chogyur Lingpa)
in cycle རྫོགས་ཆེན་བཀའ་འདུས་རྩ་བ་སྙིང་ཐིག་ (Rdzogs chen bka' 'dus rtsa ba snying thig)
Volume 16 (མ) / Pages 605-607 / Folios 1a1 to 2a6
རྫོགས་པ་ཆེན་པོ་བཀའ་འདུས་ཀྱི༔ རྩ་སྒྲུབ་སྙིང་པོ་དོན་འདུས་ལས༔ ཕྲིན་ལས་སྙིང་པོར་བསྡུས་པ་བཞུགས༔ བཀའ་འདུས་རྩ་བའི་སྙིང་ཏིག་གོ །ྈྈྈྈྈ བླ་མ་ཧེ་རུ་ཀ་ལ་འདུད༔ རྫོགས་པ་ཆེན་པོ་བཀའ་འདུས་ཀྱི༔ རྩ་སྒྲུབ་སྙིང་པོ་ཀུན་འདུས་ལས༔ ཕྲིན་ལས་སྙིང་པོར་བསྡུས་པ་བསྟན༔ སྦྱོར་དངོས་རྗེས་ཀྱིས་ཉམས་སུ་བླང༔ དང་པོ་སྔོན་དུ་འགྲོ་བ་ནི༔ ཧཱུྃ༔ རང་རིག་གདོད་ནས་དག་པ་ལ༔ བགེགས་དང་ལོག་འདྲེན་མིང་ཡང་མེད༔ སྣང་སྲིད་སྐུ་དང་ཡེ་ཤེས་ངང༔ འཇའ་ཟེར་ཐིག་ལེ་ཀུན་ཏུ་འབར༔ རྡོ་རྗེ་སྲུང་བའི་འཁོར་ལོ་ཡིས༔ གློ་བུར་བགེགས་ཚོགས་མཚམས་བཅད་དོ༔ ཧཱུྃ་ཧཱུྃ་ཧཱུྃ་བཛྲ་རཀྵ་རཀྵ་བྷྲཱུྃ༔ ཨོཾ་ཨཱཿཧཱུྃ༔ ཆོས་རྣམས་ཀུན་བཟང་མཆོད་སྤྲིན་ཆེ༔ ཕྱི་ནང་གསང་མཆོད་ལྷུན་གྱིས་གྲུབ༔ འདི་ལྟར་སྣང་བའི་འདོད་ཡོན་ཀུན༔ བདེ་བ་ཆེན་པོའི་རྒྱན་དུ་ཤར༔ ཨོཾ་སརྦ་པཱུ་ཛ་མེ་གྷ་ཨཱཿཧཱུྃ༔ གཉིས་པ་དངོས་གཞི་ཏིང་འཛིན་ནི༔ ཧཱུྃ༔ ངོ་བོ་ཀ་ནས་དག་པ་ལ༔ རང་བཞིན་ལྷུན་གྱིས་གྲུབ་པའི་རྩལ༔ ཐུགས་རྗེ་མཁའ་ཁྱབ་དཀྱིལ་འཁོར་ཆེ༔ དབུས་སུ་ཀུན་བཟང་ཡབ་དང་ཡུམ༔ འོག་ཏུ་དཔལ་ཆེན་ཆེ་བའི་མཆོག༔ སྟེང་དུ་བཀའ་དྲིན་སུམ་ལྡན་རྗེ༔ ཕྱོགས་བཞིར་རིགས་བཞི་ཞི་དང་ཁྲོ༔ དེ་ཡི་མུ་རན་འཇའ་ཟེར་ཀློང༔ རྒྱལ་བ་སྲས་བཅས་ཁྲོ་བོའི་ཚོགས༔ བར་ཁྱམས་སྒྲུབ་སྡེ་ཆེན་པོ་བརྒྱད༔ མུ་རན་བཀའ་སྡོད་ཕོ་ཉའི་ཚོགས༔ ཕྱི་ཁྱམས་ཐེག་པ་རིམ་དགུའི་ལྷ༔ ཡེ་ཤེས་མགོན་པོ་ལྕམ་དྲལ་སོགས༔ བསྟན་སྲུང་ཕྲིན་ལས་རྣམ་བཞིའི་བདག༔ ཉི་མ་ལས་ནི་འོད་ཟེར་བཞིན༔ སྣང་བ་གཞིར་རྫོགས་དཀྱིལ་འཁོར་གསལ༔ སྐུ་གསུང་ཐུགས་དང་ཡེ་ཤེས་ལྔ༔ ལྷུན་གྱིས་གྲུབ་པའི་བདག་ཉིད་བསྒོམ༔ ཨོཾ་ཨཱཿཧཱུྃ༔ ཨོཾ་ཨཱཿཧཱུྃ་སྭཱ་ཧཱ༔ ཧཱུྃ༔ ཆོས་དབྱིངས་འགྱུར་མེད་ཞིང་ཁམས་ནས༔ འོད་གསལ་ཡེ་ཤེས་ཆེན་པོའི་ལྷ༔ ཀུན་བཟང་ཆེ་མཆོག་ཞི་དང་ཁྲོ༔ གཉིས་མེད་ཚུལ་གྱིས་གཤེགས་སུ་གསོལ༔ བཛྲ་ས་མཱ་ཛ༔ ཛཿཧཱུྃ་བཾ་ཧོ༔ ས་མ་ཡ་ཏིཥྛ་ལྷན༔ ཨ་ཏི་པཱུ་ཧོ༔ པྲ་ཏིཙྪ་ཧོ༔ ཧཱུྃ༔ དབྱིངས་ཀྱི་རྒྱན་རྫོགས་མཆོད་པའི་སྤྲིན༔ ཕྱི་ནང་གསང་བ་བླ་མེད་པ༔ གཉིས་སུ་མེད་པའི་ཚུལ་དུ་འབུལ༔ བདེ་བ་ཆེན་པོའི་ངང་དུ་བཞེས༔ མ་ཧཱ་སརྦ་ག་ཎ་ཙཀྲ་པཱུ་ཛ་ཧོ༔ ཧཱུྃ༔ ངོ་བོ་ཀ་དག་སྤྲོས་དང་བྲལ༔ རང་བཞིན་ལྷུན་གྲུབ་འོད་གསལ་མདངས༔ ཐུགས་རྗེ་རིག་རྩལ་ལུག་རྒྱུད་ལྷ༔ ཡེ་རྫོགས་ཞི་ཁྲོའི་ལྷ་ལ་བསྟོད༔ ཀུན་ཀྱང་འོད་འབར་གཟི་བརྗིད་ཆེ༔ སྐུ་དང་ཡིག་འབྲུ་ཕྱག་མཚན་ཚོགས༔ རབ་འཕེལ་མཁའ་ཁྱབ་རྒྱལ་བ་མཆོད༔ སེམས་ཅན་རྣམས་ལ་ཞུགས་པ་ཡིས༔ གནས་འགྱུར་ཞི་ཁྲོའི་ལྷ་རུ་གྱུར༔ ཨོཾ་ཨཱཿཧཱུྃ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ གསུམ་པ་རྗེས་ཀྱི་རིམ་པ་ནི༔ ཧཱུྃ༔ དབྱིངས་ཀྱི་རང་བཞིན་བྷནྡྷ་རུ༔ རིག་པ་ཡེ་ཤེས་བདུད་རྩིས་བཀང༔ ལྷུན་གྲུབ་མདངས་རྩལ་འདོད་ཡོན་འཕྲོ༔ ཆོས་དབྱིངས་རྒྱན་དུ་སྤྲིན་ལྟར་གཏིབས༔ ཨོཾ་ཨཱཿཧཱུྃ༔ ཧཱུྃ༔ ཡེ་ཤེས་རང་ཤར་ལྷ་ཚོགས་ལ༔ འདོད་ཡོན་རང་གྲོལ་ཚོགས་མཆོད་འབུལ༔ དབྱེར་མེད་ངང་དུ་བསྐང་ཞིང་བཤགས༔ གཉིས་འཛིན་བློ་ཟད་ངང་དུ་བསྒྲལ༔ མ་དག་འཁྲུལ་པའི་ཕུང་པོ་རྣམས༔ རེ་དོགས་མེད་པའི་དབྱིངས་སུ་བསྟབ༔ བྷྱོ༔ རིག་པ་རང་ཤར་བཀའ་སྡོད་རྣམས༔ རྟེན་ཅིང་འབྲེལ་འབྱུང་དམ་ཚིག་རྫས༔ བཀའ་ཡི་ཕ་འབབ་འདི་བཞེས་ལ༔ ཕྲིན་ལས་རྣམ་བཞི་ལྷུན་གྲུབ་མཛོད༔ ཧཱུྃ༔ ལྷུན་གྲུབ་རིག་རྩལ་ཕྱིར་ཤར་བ༔ ནང་དབྱིངས་ཆེན་པོའི་དབྱིངས་སུ་བསྡུ༔ གདོད་ནས་སྐྱེ་བ་མེད་པ་ལས༔ རང་བཞིན་དཀྱིལ་འཁོར་འཇའ་ལྟར་ཤར༔ སྣང་སྲིད་སྐུ་དང་ཡེ་ཤེས་ངང༔ ལྷུན་གྲུབ་ངང་དུ་མངོན་སངས་རྒྱས༔ ཨ་ཨ་ཨ༔ དེ་ལྟར་ཉམས་སུ་བླངས་པ་ཡིས༔ སྣང་བཞི་མཐར་ཕྱིན་རྡོ་རྗེའི་སྐུ༔ འོད་གསལ་འཕོ་བ་ཆེན་པོ་འགྲུབ༔ ས་མ་ཡ་རྒྱ་རྒྱ༔ སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པས་མདོ་ཁམས་ནམ་མཁའ་མཛོད་ཀྱི་ལྷོ་ཕྱོགས་གཡུ་འབར་བྲག་ནས་སྤྱན་དྲངས་པའི་ཤོག་སེར་གླེགས་བམ་གྱི་ངོས་ལས། ཕྲིན་ལས་འགྲོ་འདུལ་དབང་གི་གནས་མཆོག་རི་བོ་དབང་ཞུའི་སྙིང་པོ་ཟླ་གམ་དབང་ཆེན་ཕུག་ཏུ་གཏན་ལ་ཕབ་པའི་ཡི་གེ་པ་ནི་པདྨ་གར་དབང་བློ་གྲོས་མཐའ་ཡས་པའི་སྡེས་བགྱིས་པ་དགེ་ལེགས་འཕེལ།། །།