Terdzo-NGA-014



Property "author" has been marked for restricted use.








Terdzo-NGA-014.pdf
Click the picture above to view the Shechen manuscript.

བདེ་མཆོག་སངས་རྒྱས་མཉམ་སྦྱོར་ལས༔ སློབ་མ་ལྷག་གནས་རིན་ཆེན་སྙིང་པོ་

bde mchog sangs rgyas mnyam sbyor las:_slob ma lhag gnas rin chen snying po

by  མཆོག་གྱུར་གླིང་པ་ (Chogyur Lingpa)
revealed by  མཆོག་གྱུར་གླིང་པ་ (Chogyur Lingpa)
in cycle  དཔལ་ཧེ་རུ་ཀ་འདུས་པའི་ཐུགས་ཏིག་བདེ་མཆོག་སངས་རྒྱས་མཉམ་སྦྱོར་ (Dpal he ru ka 'dus pa'i thugs tig bde mchog sangs rgyas mnyam sbyor)
Volume 4 (ང) / Pages 263-333 / Folios 1a1 to 35a3

Tibetan Text

༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ སློབ་མ་ལྷག་གནས་རིན་ཆེན་སྙིང་པོ་བཞུགས༔ ཧེ་རུ་ཀ་འདུས་པའི་ཐུགས་ཏིག་གོ༔ ཧེ་རུ་ཀ་ལ་ཕྱག་འཚལ་ལོ༔ གཉིས་འཛིན་མ་རིག་འཁྲུལ་པ་ཡིས༔ དངོས་པོར་ཞེན་ཅིང་སྡུག་བསྔལ་བ༔ འཁོར་བའི་སེམས་ཅན་མ་ལུས་པ༔ དུག་ལྔ་རང་རྒྱུད་སྤྱོད་པ་འདི༔ རྒྱུ་ཡི་ཐེག་པས་མི་འདུལ་ཞིང༔ འབྲས་གཞན་གྱིས་ཀྱང་ཇི་ལྟར་འདུལ༔ འདིར་ནི་བླ་ན་མེད་པ་ཡི༔ ཐབས་མཆོག་ཁྱད་པར་འདིར་འཇུག་ཕྱིར༔ སྐལ་བར་ལྡན་པའི་སློབ་མ་རྣམས༔ ལྷག་པར་གནས་པའི་ཆོ་ག་བསྟན༔ ས་མ་ཡ༔ དབང་ཐོབ་མཚན་ཉིད་ལྡན་པ་ཡི༔ རྡོ་རྗེ་སློབ་དཔོན་དེ་ཉིད་ཀྱིས༔ དབེན་པར་དཀྱིལ་འཁོར་ཚུལ་བཞིན་བཞེངས༔ ལྷ་སྐུ་ཕྱག་རྒྱ་ཚང་བར་དགྲམ༔ བུམ་པ་ཆས་ལྡན་བཅུད་བཀང་བཤམ༔ བསྙེན་སྒྲུབ་རྣམ་བཞི་མཐར་ཕྱིན་ནས༔ དཀྱིལ་འཁོར་ལྷ་ལ་གསོལ་བ་གདབ༔ ཧཱུྃ༔ རྒྱལ་བའི་ཕྲིན་ལས་རྨད་པོ་ཆེ༔ སེམས་ཅན་ཀུན་ལ་འཇུག་པའི་ཕྱིར༔ སྙིང་པོའི་དཀྱིལ་འཁོར་ཆེན་པོ་འདིར༔ བདག་གིས་སློབ་མ་གཞུག་པར་འཚལ༔ དཀྱིལ་འཁོར་ལྷ་ཡིས་གནང་བ་བསྩལ༔ ཧཱུྃ༔ རྡོ་རྗེ་འཛིན་པ་དེང་ཁྱོད་ཀྱིས༔ འགྲོ་བ་རྣམས་ལ་སྨན་སླད་དུ༔ སྐལ་པར་ལྡན་པ་སུ་མཆིས་པར༔ དབང་རྣམས་རིམ་པར་བསྐུར་བར་འཚལ༔ དེ་ལྟར་གནང་བ་ཐོབ་གྱུར་པས༔ སློབ་མ་མདུན་དུ་བོས་བྱས་ཏེ༔ བར་ཆད་མེད་ཕྱིར་བགེགས་དང་ཕྲལ༔ བྱུར་རྣམས་བསལ་ཕྱིར་ཁྲུས་བྱས་ལ༔ བདུད་རྣམས་བསྲུང་ཕྱིར་གོ་བཅིང་ངོ༔ སྤྲོ་བ་བསྐྱེད་ཕྱིར་ཆོས་བཤད་ནས༔ ཚོགས་ཆེན་གསག་ཕྱིར་མཎྜལ་འབུལ༔ དངོས་གྲུབ་བརྟག་ཕྱིར་ཆས་སུ་གཞུག༔ གུས་པ་བསྐྱེད་ཕྱིར་གསོལ་གསུམ་གདབ༔ ཧོ༔ དེ་བཞིན་གཤེགས་པ་ཐམས་ཅད་ཀྱི༔ རྡོ་རྗེའི་གྲོང་ཁྱེར་ཆེན་པོ་འདིར༔ སྐལ་བ་ལྡན་པའི་སློབ་མ་བདག༔ ཐར་པ་བསྒྲུབ་ཕྱིར་གཞུག་ཏུ་གསོལ༔ དེ་ལ་བླ་མས་ལན་བཏབ་པ༔ དུས་གསུམ་བདེ་གཤེགས་ཐམས་ཅད་ཀྱི༔ རྨད་བྱུང་གསང་བའི་གནས་འདི་ལ༔ མོས་པ་བྱེད་པའང་དོན་ཆེ་སྟེ༔ ཁེ་ཉེན་དམ་ཚིག་བསྲུང་བར་གྱིས༔ སློབ་མས་སྡོམ་པ་བཟུང་བ་ནི༔ ཧོ༔ ལྷ་དང་སློབ་དཔོན་དགོངས་སུ་གསོལ༔ རྡོ་རྗེ་སེམས་དཔའ་རིགས་དྲུག་གི༔ སྐུ་གསུང་ཐུགས་ཀྱི་དམ་ཚིག་རྣམས༔ སངས་རྒྱས་བསྒྲུབ་ཕྱིར་བརྟན་པོར་བཟུང༔ གསང་གསུམ་དམ་ཚིག་སྦྱིན་པ་ནི༔ ཧཱུྃ༔ སངས་རྒྱས་ཀུན་གྱི་སྐུ་འཆང་བ༔ བླ་མ་མཆེད་ལྕམ་སྙིང་ལྟར་ཆོངས༔ སངས་རྒྱས་ཀུན་གྱི་གསུང་འཆང་བ༔ ལྷ་དང་སྔགས་རྒྱ་དེ་བཞིན་ནོ༔ སངས་རྒྱས་ཀུན་གྱི་ཐུགས་འཆང་བ༔ གསང་བ་བྱང་ཆུབ་སེམས་ཟུངས་ཤིག༔ ཨོཾ་ཨཱཿཧཱུྃ༔ བདུད་རྩིས་གནས་གསུམ་བརྒྱན་པར་བྱ༔ ཧཱུྃ༔ དེ་བཞིན་གཤེགས་པའི་དམ་ཚིག་ཆུ༔ ཉམས་ན་སྲེག་པར་བྱེད་པའི་མེ༔ དམ་ཚིག་ཐུབ་ན་དངོས་གྲུབ་སྤེལ༔ ལས་རྣམས་ཐམས་ཅད་འདིས་འགྲུབ་བྱེད༔ བདུད་རྩི་ཧཱུྃ་གི་ཚོགས་སུ་སྦྱིན༔ བཛྲ་ས་མ་ཡ་ཨི་དཾ་ན་ར་ཀན༔ དམ་ལས་མི་འདའ་བྲོ་བོར་རོ༔ དེ་ནས་ཡེ་ཤེས་དབང་བསྐུར་བ༔ སློབ་དཔོན་དཔལ་ཆེན་ཧེ་རུ་ཀའི༔ ཐུགས་ཀའི་ཧཱུྃ་ལས་འོད་ཟེར་འབར༔ སློབ་མའི་ལུས་སྦྱངས་རིག་པ་ཨོཾ༔ ཨོཾ་གྱི་གླུ་ཡིས་རླུང་སྒྲོམ་བརྒྱུད༔ སྐུ་ཡི་དབྱིབས་བརྒྱུད་ནོར་བུ་ནས༔ ཡུམ་གྱི་པདྨའི་དཀྱིལ་འཁོར་དུ༔ རྒྱལ་བ་རྟག་པའི་སྐུར་བསྐྱེད་ནས༔ ཡབ་ཡུམ་སྙོམས་པར་ཞུགས་པ་ཡི༔ བདེ་བའི་སྒྲ་དང་འོད་ཟེར་གྱིས༔ ནམ་མཁའི་མཐར་ཐུག་རྒྱལ་བ་རྣམས༔ རྒྱལ་བ་རྟག་པའི་སྐུ་གསུང་ཐུགས༔ ཆར་ལྟར་དབུ་ཡི་གཙུག་ནས་ཞུགས༔ ཡབ་ཡུམ་དབུ་མའི་ནང་བརྒྱུད་དེ༔ སློབ་མ་ལྷར་གསལ་ཉིད་ལ་བསྟིམ༔ བདེ་བ་བཟོད་མེད་འབར་བར་བསམ༔ ཨོཾ་སྒྲ་རིང་པོར་བརྗོད་པར་བྱ༔ ཌཱ་མ་རུ་དང་དྲིལ་བུ་འཁྲོལ༔ བྱང་སེམས་ཤ་ཆེན་ཙནྡན་བདུག༔ ཛཿཧཱུྃ་བཾ་ཧོཿས་བརྟན་པར་བྱ༔ ཡོ་གི་ནཱི་ཡིས་ཉམས་བསྐྱང་ངོ་༔ སློབ་མས་རིག་པའི་མེ་ཏོག་འབུལ༔ ཧཱུྃ༔ གསང་བ་སྐུ་ཡི་དཀྱིལ་འཁོར་དུ༔ རིག་པའི་མེ་ཏོག་འདི་ཕུལ་བས༔ ཡེ་ཤེས་དྲུག་ནི་གང་ཐོབ་པ༔ དེ་དང་དེ་ལ་འབབ་པར་ཤོག༔ པུཥྤེ་པྲ་ཏཱིཙྪ་ཧོ༔ སྐུ་ཡི་གནས་དྲུག་གང་བབས་བརྟག༔ སྤྱི་བོ་སྣང་མཛད་མགྲིན་པ་ཆོས༔ རྡོ་རྗེ་སེམས་དཔའ་སྙིང་ག་སྟེ༔ གསང་བ་ཁྲག་འཐུང་ལྟེ་བ་ཉི༔ ཕྱག་ཞབས་རྟ་མཆོག་འབར་བ་འོ༔ དེ་ལྟར་རིགས་སུ་ངེས་བྱས་ནས༔ མངོན་པར་དབང་བསྐུར་རིམ་པ་ལ༔ དང་པོ་མེ་ཏོག་ཕྲེང་བའི་དབང༔ ཅོད་པན་སྤྱི་བོའི་གཙུག་ཏུ་བཅིངས༔ ཨོཾ༔ སྔོན་ནས་འབྲེལ་བའི་ལྷ་མཆོག་ལ༔ རིན་ཆེན་ཅོད་པན་དོར་བའི་མཐུས༔ དེ་བཞིན་གཤེགས་པ་ཐམས་ཅད་ཀྱི༔ ཅོད་པན་མིང་གིས་དབང་བསྐུར་རོ༔ རིགས་དྲུག་གང་ཡིན་འབྲུ་མཚན་པའི༔ ཅོད་པན་སྤྱི་བོའི་གཙུག་ཏུ་བཅིང༔ བདེ་བའི་རྐྱེན་གྱིས་མིག་དབྱེ་འོ༔ ཧཱུྃ༔ བདེ་བ་མཆོག་ལྡན་དེང་ཁྱོད་ཀྱི༔ མ་རིག་སྒྲིབ་པའི་རབ་རིབ་བསལ༔ བདེ་བ་མཆོག་གི་མིག་དག་གིས༔ གསང་བའི་དཀྱིལ་འཁོར་ལེགས་པར་ལྟོས༔ སྤྲོ་བ་བསྐྱེད་ལ་དཀྱིལ་འཁོར་བསྟན༔ གཉིས་པ་བུམ་པའི་དབང་བསྐུར་བ༔ སློབ་དཔོན་ཧེ་རུ་ཀ་ཡབ་ཡུམ༔ སླར་ཡང་སྙོམས་པར་ཞུགས་པ་ཡིས༔ རྒྱལ་བ་བུམ་པ་ཐོགས་པའི་ཚོགས༔ ནམ་མཁའ་གང་བ་སྤྱན་དྲངས་པ༔ སྐུ་ཡི་དབྱིབས་བརྒྱུད་སློབ་མ་ལ༔ བྱང་སེམས་བདུད་རྩིས་དབང་བསྐུར་རོ༔ ཧཱུྃ༔ ཏིལ་གྱི་གོང་བུ་བཞིན་གང་བའི༔ རྒྱལ་བ་བུམ་པ་ཐོགས་པ་ཡིས༔ སྐུ་ཡི་ལམ་ནས་ལེགས་བརྒྱུད་དེ༔ རྣམ་དག་ལྷ་ཡི་དབང་བསྐུར་རོ༔ ཀ་ལཱ་ཤ་ཨ་བྷི་ཥིཉྩ་ཨོཾ༔ སྒྲིབ་སྦྱངས་སྣང་མཛད་དབུ་བརྒྱན་བསམ༔ རྒྱལ་བ་རིགས་དྲུག་སྐུ་སྤྲོས་ཏེ༔ ཨོཾ༔ འོད་གསལ་ཡེ་ཤེས་རྟག་པའི་སྐུ༔ རྒྱལ་བ་སྣང་མཛད་དབང་བསྐུར་བས༔ གཟུང་འཛིན་དྲི་མ་ཀུན་དག་ནས༔ དབྱིངས་ཡེ་གཉིས་མེད་སྐུ་ཐོབ་ཤོག༔ ཀཱ་ཡ་བཛྲ་ཨ་བྷི་ཥིཉྩ་ཨོཾ༔ ཧཱུྃ༔ ཆོས་དབྱིངས་ཡེ་ཤེས་རྡོ་རྗེ་སེམས༔ མི་བསྐྱོད་རྡོ་རྗེས་དབང་བསྐུར་བས༔ གཏི་མུག་དྲི་མ་ཀུན་དག་ནས༔ ཆོས་དབྱིངས་ཡེ་ཤེས་ཐོབ་པར་ཤོག༔ ཙིཏྟ་བཛྲ་ཨ་བྷི་ཥིཉྩ་ཧཱུྃ༔ སྭཱ༔ མཉམ་ཉིད་ཡེ་ཤེས་ཉི་མ་མཆོག༔ རིན་ཆེན་འབྱུང་ལྡན་དབང་བསྐུར་བས༔ ང་རྒྱལ་དྲི་མ་ཀུན་དག་ནས༔ མཉམ་ཉིད་ཡེ་ཤེས་ཐོབ་པར་ཤོག༔ གུ་ཎ་ཨ་བྷི་ཥིཉྩ་སྭཱ༔ ཨཱ༔ སོ་སོར་རྟོག་པ་རྡོ་རྗེ་ཆོས༔ པདྨ་གར་དབང་དབང་བསྐུར་བས༔ འདོད་ཆགས་དྲི་མ་ཀུན་དག་ནས༔ སོར་རྟོག་ཡེ་ཤེས་ཐོབ་པར་ཤོག༔ ཝཱ་ཀ་བཛྲ་ཨ་བྷི་ཥིཉྩ་ཧྲཱི༔ ཧཱུྃ༔ མ་འགག་ཐོགས་མེད་ཧེ་རུ་ཀ༔ ཁྲག་འཐུང་ཆེན་པོའི་དབང་བསྐུར་བས༔ ཞེ་སྡང་དྲི་མ་ཀུན་དག་ནས༔ མེ་ལོང་ཡེ་ཤེས་ཐོབ་པར་ཤོག༔ བཛྲ་ཧེ་རུ་ཀ་ཨ་བྷི་ཥིཉྩ་ཧཱུྃ༔ ཧཱ༔ ཕྲིན་ལས་རོལ་པ་རྟ་མཆོག་དཔལ༔ ལས་བྱེད་ཕོ་ཉའི་དབང་བསྐུར་བས༔ ཕྲག་དོག་དྲི་མ་ཀུན་དག་ནས༔ བྱ་གྲུབ་ཡེ་ཤེས་ཐོབ་པར་ཤོག༔ ཀརྨ་ཨ་བྷི་ཥིཉྩ་ཧཱ༔ དེ་ལྟར་བུམ་པས་དབང་བསྐུར་ནས༔ སློབ་མ་ཕྱིར་ཕྱུངས་ནམ་མཁའ་ལ༔ དབང་སྟེགས་སེང་གེའི་ཁྲི་ལ་བཀོད༔ འཁོར་ལོས་བསྒྱུར་བའི་ཆས་ཀྱིས་སྤྲས༔ བདེ་ཆེན་བྱང་ཆུབ་སེམས་ཀྱི་བཀྲ་ཤིས་ནི༔ འགྲོ་བ་ཀུན་གྱི་སྙིང་ལ་ཡང་དག་གནས༔ གཞི་ལམ་འབྲས་གསུམ་མཚུངས་པར་ལྡན་པའི་དབང༔ མྱུར་དུ་ཐོབ་པའི་བཀྲ་ཤིས་སྣང་བར་ཤོག༔ བུམ་དབང་བརྡ་དོན་ལེགས་པར་བཤད༔ གསུམ་པ་གསང་བའི་དབང་བསྐུར་བ༔ ཤེས་པ་ཨཱཿརུ་བསྒྱུར་བྱས་ནས༔ སྐུ་ཡི་དབྱིབས་བརྒྱུད་པདྨ་ལ༔ ཆོས་ཀྱི་སྐུ་རུ་བསྐྱེད་བྱས་ནས༔ སྔར་བཞིན་ཡེ་ཤེས་བསྟིམ་པ་དང༔ བརྟན་ཅིང་རིག་པའི་མེ་ཏོག་འབུལ༔ མིག་དབྱེ་གསང་བའི་དཀྱིལ་འཁོར་བསྟན༔ དབང་གི་ལྷ་ཚོགས་སྙོམས་ཞུགས་པས༔ བྱང་ཆུབ་སེམས་ཀྱི་རྒྱུན་བབས་པ༔ སློབ་མའི་ལྕེ་ལ་སྦྱིན་པར་བྱ༔ ཨཱ༔ ཏིལ་གྱི་གོང་བུ་བཞིན་གང་བའི༔ རྒྱལ་བ་བྱང་ཆུབ་སེམས་ཐོགས་པ༔ སྐུ་ཡི་དབྱིབས་བརྒྱུད་སློབ་མ་ལ༔ ཐིག་ལེ་བདེ་ཆེན་དབང་བསྐུར་རོ༔ གུ་ཧྱ་ཨ་བྷི་ཥིཉྩ་ཧཱུྃ༔ དབང་སྟེགས་རྨ་བྱའི་ཁྲིར་བཀོད་ལ༔ མངའ་གསོལ་ཤིས་བརྗོད་མེ་ཏོག་འཐོར༔ དབང་གི་བརྡ་དོན་ལེགས་པར་སྤྲད༔ བཞི་པ་ཕོ་ཉའི་དབང་བསྐུར་བ༔ སློབ་མའི་རིག་པ་ཧཱུྃ་དུ་བསྒྱུར༔ རྡོ་རྗེ་སེམས་དཔའི་སྐུར་བསྐྱེད་ནས༔ ཡེ་ཤེས་བསྟིམ་པ་ལ་སོགས་བྱ༔ རྒྱལ་བའི་ཡུམ་རྣམས་སྤྱན་དྲངས་ནས༔ སྐུ་ཡི་དབྱིབས་བརྒྱུད་སློབ་མར་འཁྱུད༔ ཧཱུྃ༔ ཏིལ་གྱི་གོང་བུ་བཞིན་གང་བའི༔ པདྨ་ཅན་གྱི་སེམས་མའི་ཚོགས༔ བྷ་ག་འཛུམ་པ་དང་བཅས་ཏེ༔ བདེ་ཆེན་ཡེ་ཤེས་དབང་བསྐུར་རོ༔ མ་ཧཱ་སུ་ཁ་ཨ་བྷི་ཥིཉྩ་ཧཱུྃ༔ དབང་སྟེགས་གླང་པོའི་ཁྲིར་བཀོད་ལ༔ མངའ་གསོལ་བརྡ་དོན་ངོ་སྤྲད་དོ༔ ཨོཾ༔ བདེ་བའི་ཡེ་ཤེས་འོད་གསལ་ནི༔ རྟོག་པ་ཀུན་འགག་བདེ་ཆེན་གསལ༔ རྡོ་རྗེ་ནམ་མཁའི་དཀྱིལ་ལྟ་བུ༔ སྨྲ་བསམ་བརྗོད་པའི་ཡུལ་ལས་འདས༔ དོན་གྱི་རྡོ་རྗེ་སེམས་དཔའ་འོ༔ དྷརྨ་དྷཱ་ཏུ་ཛྙཱ་ན་གརྦྷ་ཨ་བྷི་ཥིཉྩ་ཧཱུྃ༔ ལྔ་པ་ལས་ཀྱི་དབང་བསྐུར་བ༔ རིག་པ་སྭཱ་རུ་བསྒྱུར་བྱས་ནས༔ རྡོ་རྗེ་ཉི་མའི་སྐུ་རུ་བསྐྱེད༔ ཡེ་ཤེས་བསྟིམ་པ་ལ་སོགས་བྱ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ གསང་བའི་བསྟན་པ་གཏད་པའི་ཕྱིར༔ རྡོ་རྗེ་དྲིལ་བུ་འཛིན་པ་ཀུན༔ སྐུ་ཡི་དབྱིབས་བརྒྱུད་དབང་བསྐུར་བས༔ གསང་བའི་བསྟན་པ་རྒྱས་བྱེད་ཤོག༔ དྷརྨ་ཙཀྲ་ཨ་བྷི་ཥིཉྩ་ཧཱུྃ༔ རྟ་མཆོག་ཁྲིར་བཀོད་མངའ་གསོལ་བྱ༔ རིག་པ་ཧཱུྃ་ཡིག་ཁྲག་འཐུང་སྐུར༔ བསྐྱེད་ནས་ཡེ་ཤེས་དབབ་པར་བྱ༔ ཧཱུྃ༔ ཞི་བས་མི་འདུལ་གདུག་པ་ཀུན༔ འདུལ་ཕྱིར་ཁྲོ་བོའི་ཚོགས་རྣམས་ཀྱིས༔ སྒྲོལ་བྱེད་རྡོ་རྗེའི་དབང་བསྐུར་བས༔ རུ་དྲ་མ་ལུས་སྒྲོལ་བར་ཤོག༔ མ་ཏྲཾ་རུ་དྲ་མཱ་ར་ཡ་ཨ་བྷི་ཥིཉྩ་ཧཱུྃ༔ རུ་དྲའི་ཁྲིར་བཀོད་མངའ་གསོལ་བྱ༔ རིག་པ་ཧཱ་ཡིག་རྟ་མཆོག་ཏུ༔ བསྐྱེད་ནས་ཡེ་ཤེས་ཚོགས་རྣམས་དབབ༔ ཧཱུྃ༔ དེ་བཞིན་གཤེགས་པ་ཐམས་ཅད་ཀྱི༔ ཕྲིན་ལས་མ་ལུས་སྒྲུབ་པའི་ཕྱིར༔ སྣ་ཚོགས་རྡོ་རྗེའི་དབང་བསྐུར་བས༔ ཕྲིན་ལས་སྣ་ཚོགས་འགྲུབ་པར་ཤོག༔ བི་ཤྭ་ཀརྨ་ཨ་བྷི་ཥིཉྩ་ཧཱུྃ༔ རྒྱ་གྲམ་ཉི་མའི་གདན་ལ་བཀོད༔ མངའ་གསོལ་ཤིས་པ་མང་དུ་བརྗོད༔ དམ་ཚིག་ཁས་བླངས་གཏང་རག་འབུལ༔ ལུས་འབུལ་ཡུན་རིང་འཚོ་གཞེས་གསོལ༔ དཀྱིལ་འཁོར་བསྡུ་ཞིང་དགེ་བ་བསྔོ༔ དཔོན་སློབ་དགའ་སྟོན་རྒྱ་ཆེར་བྱ༔ དབང་གི་ཆོ་གའི་རིམ་པ་འོ༔ ས་མ་ཡ༔ མཚན་མའི་དཀྱིལ་འཁོར་བྲིས་པ་ལ༔ ཕྱི་དབང་བསྐུར་ཞིང་བསྐྱེད་རིམ་བསླབ༔ ཏིང་འཛིན་ལེགས་པར་བྱང་བ་ཡི༔ སློབ་དཔོན་ཡབ་ཡུམ་རིག་མར་བཅས༔ གསུམ་གྱིས་སློབ་མ་སྨིན་པར་བྱ༔ ལུས་ཀྱི་དཀྱིལ་འཁོར་ཁོ་ནར་བརྟེན༔ ཏིང་ངེ་འཛིན་གྱི་དབང་བསྐུར་བས༔ དབང་བསྐུར་གཞན་ལས་ཁྱད་པར་འཕགས༔ རྒྱལ་པོ་ཛཿལ་སོགས་པ་ཡི༔ རྟོགས་གྲོལ་དུས་མཉམ་འདིས་ཐོབ་བོ༔ དབང་གི་གལ་བྱང་བསྟན་པ་འོ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ ཕྲིན་ལས་རིན་ཆེན་སྒྲོན་མེ་བཞུགས༔ ཧེ་རུ་ཀ་རིགས་འདུས་པའི་ཐུགས་ཏིག་གོ༔ ཧེ་རུ་ཀ་ལ་ཕྱག་འཚལ་ལོ༔ སྐྱེ་མེད་སངས་རྒྱས་ཆོས་ཀྱི་སྐུ༔ འགག་མེད་བདེ་ཆེན་མཉམ་པར་སྦྱོར༔ ལོངས་སྐུ་དཔལ་ཆེན་ཧེ་རུ་ཀ༔ རྡོ་རྗེ་སེམས་དཔའ་བདེ་བ་ཆེ༔ འགྱུར་མེད་ཐིག་ལེ་ཉག་གཅིག་ཉིད༔ ཕྱག་རྒྱའི་སྐུར་ཤར་དཔལ་འབར་བ༔ ཁྱབ་བདག་རིགས་དྲུག་བསྒོམ་པ་ཡིས༔ མཆོག་གི་དངོས་གྲུབ་མྱུར་ཐོབ་ཐབས༔ ཤིན་ཏུ་གསང་བའི་ཚུལ་དུ་བསྟན༔ ས་མ་ཡ༔ དང་པོ་ཕྲིན་ལས་རིམ་པ་ནི༔ སྦྱོར་དངོས་རྗེས་ཀྱིས་ཉམས་སུ་བླང༔ གངས་བྲག་ལྗོན་པའི་དབུས་ལ་སོགས༔ ཤིན་ཏུ་ཉམས་དགའ་དབེན་པའི་གནས༔ ཡིད་དང་མཐུན་པར་བསྙེན་པ་བྱ༔ ཕྱག་རྒྱ་མཚན་ལྡན་གྲོགས་སུ་བཙལ༔ དམ་ཚིག་ཐོད་སྐུ་བཀྲ་ཤིས་བུམ༔ དཀྱིལ་འཁོར་མཆོད་པའི་རྫས་རྣམས་བསགས༔ རྣལ་འབྱོར་རུས་པའི་རྒྱན་ཐོགས་ནས༔ བདེ་བའི་སྟན་ལ་ཐབས་གཅིག་འདུག༔ གཉིས་མེད་མཉམ་པའི་ངང་ཉིད་ལས༔ རྡོ་རྗེ་འཛིན་པའི་སྐུར་བཞེངས་ཏེ༔ ཧཱུྃ༔ རྒྱལ་བ་རྟག་པ་རྡོ་རྗེ་འཛིན༔ ཧེ་རུ་ཀ་དང་གར་དབང་ཆེ༔ ཉི་མ་རྟ་མཆོག་སྣང་མཛད་པའི༔ ཁྲོ་བོའི་རྒྱལ་པོ་ང་ཡིན་གྱི༔ ང་ཡི་བཀའ་ལས་འདའ་མ་བྱེད༔ དངོས་གྲུབ་ཆུ་ལ་རྡུལ་འཇུག་པའི༔ ལོག་འདྲེན་བདུད་རྣམས་ཕྱིར་དེངས་ཤིག༔ དྲག་སྔགས་བཟླ་ཞིང་ཐུན་གྱིས་བསྐྲད༔ མཚམས་རོལ་ཚམ་རྔམ་དྲག་ཏུ་བྱ༔ ཧཱུྃ༔ ཡང་དག་གསང་བའི་དཀྱིལ་འཁོར་དུ༔ དཔལ་ཆེན་དཔལ་འབར་ཁྲོ་བོའི་རྒྱལ༔ གཉིས་མེད་ཡུམ་དང་རོལ་པ་ཡི༔ རྡོ་རྗེའི་ཞུགས་ནི་ཕྱོགས་བཅུར་འཕྲོ༔ མཚོན་ཆ་མེ་ཕུང་གུར་དུ་འཁྲིགས༔ ལས་ཀྱི་ཁྲོ་བོའི་དམག་དཔུང་གིས༔ ཕྱོགས་བཅུའི་འབྱུང་པོ་རྡུལ་དུ་རློག༔ ཧཱུྃ་ཧཱུྃ་བཛྲ་ཏཱིཀྵྞ་ཛྭ་ལ་རཾ་རཀྵ་རཀྵ༔ ཧཱུྃ༔ མི་གནས་ཡེ་ཤེས་ཐུགས་ཀྱི་དཀྱིལ་འཁོར་དུ༔ མ་རིག་དབང་གིས་རྨོངས་པའི་ལས་བགྱིས་པ༔ གཉིས་མེད་མཉམ་པའི་ངང་དུ་བཤགས་པར་བགྱི༔ དག་ཅིང་ཚངས་པ་མཆོག་གི་དངོས་གྲུབ་སྩོལ༔ ཧཱུྃ༔ དེང་བཟུང་བྱང་ཆུབ་སྙིང་པོར་མཆིས་ཀྱི་བར༔ བླ་མ་མཆོག་དང་ཧེ་རུ་ཀ་དཔལ་ཡུམ༔ བྱང་ཆུབ་སེམས་མཆོག་སངས་རྒྱས་མཉམ་སྦྱོར་བ༔ རྣམ་པ་ཀུན་ཏུ་མི་འབྲལ་བསྒྲུབ་པར་བགྱི༔ ཧཱུྃ༔ ཕྱོགས་བཅུའི་ཞིང་ན་བཞུགས་པའི་རྒྱལ་བ་སྲས༔ འགྲོ་བའི་མགོན་པོ་གང་ན་སུ་བཞུགས་པ༔ གསང་བའི་དཀྱིལ་འཁོར་ཆེན་པོར་སྤྱན་འདྲེན་ན༔ སྐུ་གསུང་ཐུགས་ཀྱིས་བྱིན་གྱིས་བརླབ་ཏུ་གསོལ༔ གཉིས་མེད་མཉམ་པར་རོལ་པའི་སྐུ་གསུང་ཐུགས༔ ལུས་ངག་ཡིད་ལ་རབ་ཏུ་བརྟན་པར་མཛོད༔ ཛྙཱ་ན་ཨཱ་བེ་ཤ་ཡ་ཨཿ ཧཱུྃ༔ མཁའ་དབྱིངས་རྣམ་དག་ཡུམ་གྱི་ཞིང་ཁམས་སུ༔ ཡེ་ཤེས་རོལ་པའི་མཆོད་སྤྲིན་བསམ་མི་ཁྱབ༔ ཐབས་དང་ཤེས་རབ་མཉམ་སྦྱོར་བྷནྡྷ་རུ༔ བདེ་ཆེན་བྱང་ཆུབ་སེམས་མཆོག་མཁའ་ལ་འཕྲོ༔ སྨན་དང་རཀྟ་གཏོར་མ་འདོད་ཡོན་ཚོགས༔ ཀུན་བཟང་མཆོད་པའི་སྤྲིན་དུ་མཁའ་ཁྱབ་བརྡལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀཏ་ཧཱུྃ་ཧྲཱིཿཋ༔ ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋ༔ ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛོ་བ་ལིཾ་ཏ་བ་ལ་བ་ཏེ་གུ་ཧྱ་ས་མ་ཡ་ཧཱུྃ་ཧྲཱིཿཋ༔ ཨོཾ་སརྦ་པཱུ་ཛ་མེ་གྷ་ཨཱཿཧཱུྃ༔ བགེགས་ཞི་མཐུན་རྐྱེན་ཕུན་སུམ་ཚོགས༔ སྔོན་འགྲོ་སྦྱོར་བའི་རིམ་པ་འོ༔ ས་མ་ཡ༔ གཉིས་པ་དངོས་གཞི་ཏིང་འཛིན་བསྒོམ༔ ཧཱུྃ༔ མ་བཅོས་སྤྲོས་མེད་དེ་བཞིན་ཉིད༔ ཡོངས་ལ་ཁྱབ་པ་ཉི་མའི་འོད༔ བདེ་ཆེན་ཨོཾ་གྱི་ཆོ་འཕྲུལ་འབར༔ སྣོད་བཅུད་ཀུན་སྦྱངས་དྭངས་མ་ལས༔ རྣམ་དག་ནམ་མཁའ་ཡུམ་གྱི་མཁའ༔ སྒྲོལ་བྱེད་སྟོབས་ཆེན་རླུང་གིས་བཏེགས༔ མཱ་མ་ཀི་ནི་ཟླུམ་པོར་འཁྱིལ༔ སྤྱན་མའི་མཁའ་དབྱིངས་རི་རབ་རྩེར༔ པདྨའི་སྡོང་པོ་ཆེན་པོ་བརྡལ༔ ཡེ་ཤེས་མེ་འོད་ཀུན་ཏུ་འཕྲོ༔ དུར་ཁྲོད་ཆེན་པོའི་ས་གཞིའི་དབུས༔ འཁོར་ལོ་རྩིབས་བཞིའི་ལྟེ་བ་རུ༔ བྷ་ག་གསང་བའི་གཞལ་ཡས་ཁང༔ གྲུ་བཞི་སྒོ་བཞི་མཚན་ཉིད་རྫོགས༔ ཕུན་སུམ་ཚོགས་པའི་རྒྱན་གྱིས་སྤྲས༔ གྲུ་ཆད་འཁོར་ལོ་འབར་བའི་དབུས༔ ཕྱོགས་བཞིར་བྱོལ་སོང་བཏེགས་པའི་ཁྲི༔ པདྨ་ཉི་མ་ཟླ་བའི་གདན༔ ཨོཾ་ལས་རྒྱལ་བ་རྟག་པའི་སྐུ༔ དཀར་པོ་འཁོར་ལོ་དྲིལ་བུ་འཛིན༔ དབྱིངས་ཕྱུག་ཡུམ་དང་གཉིས་མེད་སྦྱོར༔ དར་དང་རིན་ཆེན་རུས་རྒྱན་སྤྲས༔ ཡེ་ཤེས་ལྔ་ཡི་དབང་དང་ལྡན༔ གསང་བ་རྡོ་རྗེའི་སྐུ་གསུང་ཐུགས༔ ཨོཾ་ཨཱཿཧཱུྃ༔ ཨོཾ་ཨཱཿཧཱུྃ་སྭཱ་ཧཱ༔ ཡབ་ཡུམ་གཉིས་མེད་རོལ་པ་ལས༔ ཧཱུྃ་སྭཱ་ཨཱཿཧཱུྃ་ཧཱ་ཡིག་འཕྲོས༔ ཤར་དུ་ཧཱུྃ་ཡིག་ཡོངས་གྱུར་ལས༔ རྡོ་རྗེ་སེམས་དཔའ་སྐུ་མདོག་དཀར༔ རང་འོད་ཡུམ་འཁྱུད་རྡོར་དྲིལ་འཛིན༔ བྱང་དུ་སྭཱ་ཡིག་ཡོངས་གྱུར་ལས༔ རྡོ་རྗེ་ཉི་མ་སྐུ་མདོག་སེར༔ རིན་ཆེན་དྲིལ་འཛིན་ཡུམ་དང་འཁྲིལ༔ ནུབ་ཏུ་ཨཱཿཡིག་ཡོངས་གྱུར་ལས༔ པདྨ་གར་དབང་སྐུ་མདོག་དམར༔ པདྨ་དང་ནི་དྲིལ་བུ་འཛིན༔ གསང་བའི་ཡུམ་མཆོག་བདེ་ཆེན་འཁྲིལ༔ ལྷོ་རུ་ཧཱུྃ་ཡིག་ཡོངས་གྱུར་ལས༔ རྡོ་རྗེ་ཁྲག་འཐུང་སྐུ་མདོག་མཐིང༔ རྡོ་རྗེ་དང་ནི་དུང་ཁྲག་འཛིན༔ ཀྲོ་དྷཱི་ཤྭ་རཱི་གཉིས་མེད་འཁྲིལ༔ ཞི་མ་ཁྲོ་ཡི་ཆ་ལུགས་རྫོགས༔ སྒོ་བཞིར་པདྨ་ཉི་གདན་ལ༔ ཧཱ་ལས་ཕྲིན་ལས་རྟ་མཆོག་ལྗང༔ རྟ་གདོང་རབ་བཞད་མེ་དཔུང་འབར༔ རྒྱ་གྲམ་རལ་གྲི་དྲིལ་བུ་འཛིན༔ ལས་བྱེད་གསང་བའི་ཡུམ་དང་འཁྲིལ༔ སྤྲུལ་པ་ཡང་སྤྲུལ་བསམ་མི་ཁྱབ༔ ཞི་བའི་ཚུལ་ལྡན་འབར་བའི་གར༔ བདེ་ཆེན་ཕྱག་རྒྱའི་སྐུ་རུ་གསལ༔ ཨོཾ༔ རྣམ་དག་ཡུམ་གྱི་མཁའ་དབྱིངས་སུ༔ སྙོམས་པར་ཞུགས་པའི་རྒྱལ་བ་རྣམས༔ ཐུགས་རྗེའི་སྨོན་ལམ་དགོངས་མཛད་དེ༔ ཡེ་ཤེས་འཁོར་ལོ་གཤེགས་སུ་གསོལ༔ ཨེ་ཧྱེ་ཧི་མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོ༔ ས་མ་ཡ་ཧོ༔ ས་མ་ཡ་སཏྭཾ༔ ཛཿཧཱུྃ་བཾ་ཧོ༔ ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ༔ ཧཱུྃ༔ རྡོ་རྗེ་པདྨ་མཉམ་སྦྱོར་བའི༔ བྱང་ཆུབ་སེམས་ནི་འཕེལ་བའི་རྒྱ༔ དེ་བཞིན་གཤེགས་པའི་ཐུགས་ལ་གནས༔ འདི་ནི་ཞིང་ཁམས་ཀུན་ཏུ་གྲགས༔ ཨོཾ་ཨཱཿཧཱུྃ་སྭཱ་ཧཱ༔ མ་ཧཱ་མུ་དྲ་པཱུ་ཛ་ཧོཿ བདེ་ཆེན་བདེ་བའི་གར་ལ་རབ་ཏུ་རོལ༔ དེ་བཞིན་གཤེགས་པའི་བཙུན་མོ་རྣམ་པ་བཞི༔ རྡོ་རྗེ་སྒེག་མོ་ཕྲེང་ཐོགས་གླུ་གར་མ༔ རྒྱལ་བ་རིགས་དྲུག་སྐུ་ལ་འབུལ་བར་བགྱི༔ ཨོཾ་མ་ཧཱ་སུ་ཁ་སུ་ར་ཏ་བཛྲ་ལཱ་སྱེ་རཏྣ་མཱ་ལྱེ་པདྨ་གཱིརྟི་ཀརྨ་ནཱིརྟི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧཱུྃ༔ བདེ་མཆོག་བདེ་བའི་གནས་ལ་རོལ༔ རྒྱལ་བ་ཀུན་གྱི་སྲས་མོ་མཆོག༔ མེ་ཏོག་ཆར་འབེབས་བདུག་པ་མ༔ ཆོས་ཀྱི་སྒྲོན་མེ་སེམས་མ་ཆེ༔ རྒྱལ་བ་རིགས་དྲུག་རྡོ་རྗེ་ཡི༔ དབང་པོ་མཆོག་ལ་དགྱེས་རྒུར་རོལ༔ གཉིས་མེད་མཉམ་པའི་ངང་དུ་བཞེས༔ ཨོཾ་མ་ཧཱ་སུ་ཁ་སུ་ར་ཏ་བཛྲ་པུཥྤེ་རཏྣ་དྷཱུ་པེ་པདྨ་ཨཱ་ལོ་ཀེ་ཀརྨ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧཱུྃ༔ དེ་བཞིན་གཤེགས་པའི་སྨན་མཆོག་འདིས༔ འཁོར་བ་དུག་གི་རི་བོ་འཇོམས༔ རྡོ་རྗེའི་ཟིལ་པ་འབར་བའི་སྤྲིན༔ རྒྱལ་བའི་གདུང་འཚོབ་ཆེན་པོ་དང༔ དཀྱིལ་འཁོར་ལྷ་རྣམས་དགྱེས་ཕྱིར་འབུལ༔ བཛྲ་པཉྩ་ཨ་མྲྀཏ་ཁཱ་ཧི༔ སྙིང་རྗེ་འབར་བའི་མཚོན་ཆེན་གྱིས༔ འཁོར་བའི་ཚོགས་རྣམས་རབ་བསྒྲལ་པའི༔ བདེ་ཆེན་རཀྟའི་རྦ་ཀློང་འཁྲུགས༔ དཀྱིལ་འཁོར་ལྷ་རྣམས་བཞེས་སུ་གསོལ༔ མ་ཧཱ་རཀྟ་ཁཱ་ཧི༔ ཧཱུྃ༔ གཟུགས་སྒྲ་དྲི་རོ་རེག་བྱ་ཆོས༔ འདོད་ཡོན་རྣམ་པ་ཐམས་ཅད་པ༔ ཀུན་ཏུ་བཟང་པོའི་རྒྱན་ཡིན་ཏེ༔ དཀྱིལ་འཁོར་ལྷ་རྣམས་བཞེས་སུ་གསོལ༔ མ་ཧཱ་བ་ལིཾ་ཏ་ཁཱ་ཧི༔ ཧཱུྃ༔ འཁོར་འདས་དབྱིངས་ཀྱི་རང་བཞིན་ལ༔ སྙིང་རྗེ་ཡེ་ཤེས་མཉམ་པར་སྦྱོར༔ དབྱིངས་ཡེ་གཉིས་མེད་མ་རིག་སྒྲོལ༔ དུས་གསུམ་རྒྱལ་ཀུན་མཉེས་གྱུར་ཅིག༔ མ་ཧཱ་སྟ་ན་གྷ་ཎ་པཱུ་ཛ་ཧོ༔ ཨོཾ༔ མཚན་དང་དཔེ་བྱད་འབར་བའི་སྐུར་སྣང་བ༔ རྒྱལ་བ་རྟག་པའི་སྐུ་ལ་ཕྱག་འཚལ་ལོ༔ ཚངས་དབྱངས་དྲུག་ཅུར་ལྡན་པའི་གསུང་དང་ལྡན༔ པདྨ་གར་དབང་སྐུ་ལ་ཕྱག་འཚལ་ལོ༔ ཡེ་ཤེས་ལྔ་དང་ལྡན་པའི་ཐུགས་མངའ་བ༔ རྡོ་རྗེ་སེམས་དཔའི་སྐུ་ལ་ཕྱག་འཚལ་ལོ༔ ཀུན་ཏུ་བཟང་པོའི་ཡོན་ཏན་བསམ་མི་ཁྱབ༔ རིན་ཆེན་ཉི་མའི་སྐུ་ལ་ཕྱག་འཚལ་ལོ༔ ཕྲིན་ལས་ཐོགས་མེད་གདུག་པ་ཐབས་ཀྱིས་སྒྲོལ༔ བཛྲ་ཧེ་རུ་ཀ་ལ་ཕྱག་འཚལ་ལོ༔ རྣམ་བཞིའི་ལས་ཀྱིས་འགྲོ་དོན་ལྷུན་གྱིས་གྲུབ༔ རྟ་མཆོག་འབར་བའི་སྐུ་ལ་ཕྱག་འཚལ་ལོ༔ ཧཱུྃ༔ འབྱུང་བ་ལྔ་ནི་ཡུམ་ལྔའི་རང་བཞིན་ལ༔ ཁམས་དྲུག་རང་བཞིན་རྒྱལ་བ་དྲུག་གི་སྐུ༔ གཉིས་མེད་མཉམ་པར་རོལ་པས་སྣང་སྲིད་ཀུན༔ སངས་རྒྱས་མཉམ་པར་སྦྱོར་བའི་ཞིང་དུ་བརྡལ༔ ཧཱུྃ༔ འཁོར་བའི་སེམས་ཅན་མ་ལུས་ཀུན༔ ཐམས་ཅད་རྒྱལ་བའི་ཕྱག་རྒྱ་ཆེ༔ སྒྲ་སྐད་རྒྱལ་བའི་དབྱངས་སུ་གྲུབ༔ སེམས་ཉིད་ཡེ་ཤེས་ལྔ་ལྡན་པ༔ འདི་ནི་སངས་རྒྱས་མཉམ་པར་སྦྱོར༔ ཨོཾ༔ གཞི་ནི་སྐྱེ་བ་མེད་པའི་དབྱིངས༔ ལམ་ནི་སྣང་བ་འགག་པ་མེད༔ འབྲས་བུ་སངས་རྒྱས་མཉམ་པར་སྦྱོར༔ ཀུན་ཀྱང་དེ་བཞིན་གཤེགས་པའི་ངང༔ ཏིང་འཛིན་འདི་དང་ལྡན་པ་ཡིས༔ རྣལ་འབྱོར་དངོས་གྲུབ་ལས་ཀུན་བྱེད༔ ཨོཾ་ཨཱཿཧཱུྃ་སྭཱ་ཧཱ༔ གཉིས་མེད་དགོངས་པའི་གཟེར་ཐེབས་པས༔ ཉི་ཁྲི་ཆིག་སྟོང་ཉིན་མོ་དང༔ དེ་བཞིན་མཚན་མོར་བཟླ་བར་བྱ༔ རྡོ་རྗེའི་བཟླས་པ་འདི་དག་གིས༔ མཆོག་དང་ཐུན་མོང་དངོས་གྲུབ་འགྲུབ༔ འབྲས་བུ་སྒྲུབ་པའི་ཐབས་ཆེན་པོ༔ སྙིང་པོ་དངོས་གཞིའི་རིམ་པ་འོ༔ ས་མ་ཡ༔ གསུམ་པ་རྗེས་ཀྱི་རིམ་པ་ནི༔ དུར་ཁྲོད་གསང་བའི་ཚོགས་ཁང་དུ༔ བརྡ་དང་སྒྱུ་རྩལ་སྣ་ཚོགས་ཀྱིས༔ རྣལ་འབྱོར་ཕོ་མོ་ཀུན་འདུས་ཏེ༔ ཤིན་ཏུ་རྒྱན་གྱིས་བརྒྱན་ནས་སུ༔ དུར་ཁྲོད་ལོངས་སྤྱོད་ཆེན་པོ་སྤུངས༔ ཧོ༔ སྐལ་ལྡན་རྣལ་འབྱོར་ཚོགས་ལ་འདུས༔ སྔོན་གྱིས་རྒྱལ་བའི་དམ་ཚིག་ཡིན༔ འདུ་བར་འོས་མིན་གང་ཡིན་པ༔ རྟ་མཆོག་འབར་བས་བརླག་པར་གྱིས༔ ཧཱུྃ༔ དབྱིངས་ཀྱི་བྷནྡྷ་ཡུམ་གྱི་མཁའ༔ ཡེ་ཤེས་དམ་རྫས་ཐབས་ཀྱི་མཆོག༔ བདེ་བ་ཆེན་པོར་འོད་ཞུ་ནས༔ འདོད་ཡོན་མཁའ་ཁྱབ་ཡིད་བཞིན་འབར༔ ཨོཾ་ཨཱཿཧཱུྃ་ཧ་ཧོ་ཧྲཱི༔ ཧཱུྃ༔ ཆོས་དབྱིངས་རྣམ་དག་རྒྱལ་བའི་དཀྱིལ་འཁོར་ནས༔ ཚོགས་རྗེ་ཚོགས་བདག་རིག་འཛིན་སྲུང་མའི་ཚོགས༔ བདེ་ཆེན་དུར་ཁྲོད་ཚོགས་ཀྱི་ལོངས་སྤྱོད་ལ༔ སྤྲིན་ལྟར་གཏིབས་ཤིང་བུ་ཡུག་བཞིན་དུ་འཚུབས༔ རྣལ་འབྱོར་ལོངས་སྤྱོད་ཆེ་ལ་སྤྱན་འདྲེན་ན༔ འབར་བའི་གདན་མཆོག་རྣམས་ལ་བཞུགས་སུ་གསོལ༔ བཛྲ་ས་མ་ཡ་ཛ༔ ཨཱ་ས་ན་ཏིཥྛནྟུ༔ ཧཱུྃ༔ ཡེ་ཤེས་རིན་ཆེན་འདོད་དགུའི་དབྱིག༔ དཔག་བསམ་ཤིང་ཆེན་རྒྱས་པ་དང༔ མ་རྨོས་ལོ་ཏོག་ཇི་བཞིན་དུ༔ ཚོགས་ཀྱི་ལོངས་སྤྱོད་བསམ་མི་ཁྱབ༔ བཞེས་ཤིག་དཀྱིལ་འཁོར་ལྷ་ཚོགས་རྣམས༔ རོལ་ཅིག་དཔའ་བོ་རྣལ་འབྱོར་མ༔ དགྱེས་པར་མཛོད་ཅིག་སྲུང་མའི་ཚོགས༔ ཕོ་ཉའི་ཚོགས་རྣམས་བཞེས་སུ་གསོལ༔ ག་ཎ་ཙཀྲ་པཱུ་ཛ་ཧོ༔ ཧཱུྃ༔ དང་པོར་མ་རིག་འཁྲུལ་པའི་རྒྱུ་ལས་བྱུང༔ བར་དུ་མི་ཤེས་ཉོན་མོངས་དབང་དུ་གྱུར༔ ཐ་མ་ལས་ངན་དབང་གིས་ནོངས་བགྱིས་པ༔ བཀྲམ་པའི་ལྷ་ཚོགས་རྣམས་ལ་བཤགས་པར་བགྱི༔ ཧཱུྃ༔ རྣལ་འབྱོར་དབང་ཕྱུག་ཆེན་པོ་རྣམས༔ འདུས་ཤིག་མི་མོའི་ཚོགས་ལ་རོལ༔ བདེ་བའི་ལོངས་སྤྱོད་འདི་ན་མཆིས༔ གཉིས་མེད་མཉམ་རོལ་ཕྱག་རྒྱ་འབར༔ པདྨར་ནོར་བུ་ལྡན་བྱས་པ༔ བདེ་ཆེན་ཕྱག་རྒྱ་འདི་བརྟེན་པས༔ རྣལ་འབྱོར་ཞིང་ཁམས་ཀུན་ཏུ་ཉུལ༔ སངས་རྒྱས་རྣམས་དང་ཐབས་ཅིག་འདུག༔ ཨོཾ་མ་ཧཱ་སུ་ཁ་སུ་ར་ཏ་སཏྭཾ་ཨ་ཧཾ༔ ཧཱུྃ༔ དུག་ལྔ་འདུས་པའི་ཕུང་པོ་ལ༔ ཡེ་ཤེས་འབར་བའི་མཚོན་གྱིས་བསྣུན༔ སྒྲོལ་བ་ལས་ཀྱི་མཆོད་པ་ཆེ༔ དུག་གསུམ་སྐུ་གསུང་ཐུགས་སུ་བཞེས༔ མ་ཏྲཾ་རུ་དྲ་ཁ་ཁ་ཁཱ་ཧི་ཁཱ་ཧི༔ རྣལ་འབྱོར་ཕོ་མོ་ལོངས་སྤྱོད་རོལ༔ བདེ་བའི་ཉམས་རྩལ་ཅིར་ཡང་བསྒྱུར༔ ལྷག་མ་ཁ་ཕྲུས་བཏབ་བྱས་ལ༔ ཧཱུྃ༔ ནམ་མཁའི་དབྱིངས་ལ་དབང་སྒྱུར་བའི༔ མཁའ་འགྲོ་མི་བཟད་སྤྲིན་འཕྲོ་མ༔ ས་གཞིའི་ཁམས་ལ་དབང་སྒྱུར་བའི༔ ཕོ་ཉ་ལྷག་སྡུད་མ་མོའི་ཚོགས༔ བར་སྣང་ཁམས་ལ་འཕྱོ་བ་ཡི༔ སྒྲོལ་བྱེད་གིང་ཆེན་གིང་ལྕམ་དང༔ ལས་ཀྱི་མངགས་གཞུག་ཆེན་མོ་རྣམས༔ ཚོགས་རྗེ་ཚོགས་བདག་བཀའ་བྱུང་གིས༔ མ་ལུས་འཁོར་བཅས་འདིར་འདུས་ཤིག༔ ལྷག་མའི་ལོངས་སྤྱོད་འདི་གསོལ་ལ༔ སྔོན་ཚེ་དཔལ་གྱི་བཀའ་བསྒོས་ལྟར༔ བཅོལ་པའི་ཕྲིན་ལས་འགྲུབ་པར་མཛོད༔ མ་ཧཱ་པཉྩ་ཨ་མྲྀཏ་རཀྟ་བ་ལིཾ་ཏ་ཁཱ་ཧི༔ ཧཱུྃ༔ སྔོན་ཚེ་གསང་བའི་གནས་མཆོག་ཏུ༔ བཅོམ་ལྡན་རྒྱལ་བ་སྣང་མཛད་ཀྱིས༔ རིགས་དྲུག་བདག་ཉིད་འཁོར་ལོ་ཡི༔ དམ་ཚིག་ཆེན་པོ་རྣམ་བཀོད་ཚེ༔ རྣལ་འབྱོར་རིག་འཛིན་སྲུང་མ་ཡིས༔ ཇི་ལྟར་ཞལ་གྱིས་འཆེས་པ་བཞིན༔ དམ་རྫས་ཕ་འབབ་འདི་ལོངས་ལ༔ རྣལ་འབྱོར་གསང་བའི་གྲོགས་མཛོད་ཅིག༔ ཧཱུྃ༔ རྡོ་རྗེའི་གནས་ཡུལ་སྐྱོང་མཛད་པའི༔ རྣལ་འབྱོར་མ་མོ་བཅུ་གཉིས་ནི༔ སྔགས་འཆང་རྣམས་ཀྱི་བྲན་དུ་མཛད༔ ཚོགས་དང་བཀའ་ཡི་ཚོགས་སུ་འདུས༔ རྣམ་ལྔའི་མཆོད་པ་འདི་བཞེས་ལ༔ གསང་བའི་བསྟན་པ་རྒྱས་པར་མཛོད༔ མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧཱི༔ ཧཱུྃ༔ འདི་ལྟར་སྣང་ཡོད་ཐམས་ཅད་ནི༔ སྣང་མཛད་རྟག་པ་སྐུ་ཡི་བྲོ༔ སྒྲ་སྐད་རྣམ་པ་སྣ་ཚོགས་ནི༔ གར་དབང་རྡོ་རྗེ་ཆོས་ཀྱི་གླུ༔ རྣམ་པར་ཤེས་པའི་ཚོགས་རྣམས་ནི༔ རྡོར་སེམས་ཡེ་ཤེས་ལྔ་ཡི་བྲོ༔ འདོད་པའི་ཡོན་ཏན་ཅིར་སྣང་བ༔ ཐམས་ཅད་རིན་ཆེན་ཉི་མའི་གླུ༔ བསྒུལ་བསྐྱོད་འགྲོ་ཞིང་རྒྱུ་བ་ཀུན༔ བཛྲ་ཧེ་རུ་ཀ་ཡི་གར༔ ལས་དང་བྱ་བ་མ་ལུས་ཀུན༔ རྡོ་རྗེ་རྟ་མཆོག་ཕྲིན་ལས་ཀྱི༔ རོལ་པ་ཆེན་པོའི་བྲོ་བརྡུངས་པས༔ འཁོར་བའི་གནས་རྣམས་མ་ལུས་པ༔ སངས་རྒྱས་མཉམ་པར་སྦྱོར་བའི་བྲོ༔ ཨོཾ་ཨཱཿཧཱུྃ་སྭཱ་ཧཱ༔ ཨེ་ཝཾ་མཱ་ཡཱ་བྷྲཱུྃ༔ སྐྱེ་མེད་དབྱིངས་ལས་འགག་མེད་ཤར་བའི་ལྷ༔ ཡབ་ཡུམ་མཉམ་སྦྱོར་བདེ་ཆེན་འོད་གསལ་གྱི༔ སྣང་བ་ཐམས་ཅད་དབུ་མའི་དབྱིངས་སུ་ཐིམ༔ བདེ་ཆེན་ཕྱག་རྒྱའི་སྐུ་རུ་ཅིར་ཡང་གསལ༔ ཡེ་ཤེས་རོལ་པས་འཁོར་འདས་ཀུན་ལ་ཁྱབ༔ རྒྱལ་བ་དྲུག་གི་ཕྲིན་ལས་ཡོངས་སུ་རྫོགས༔ ཧཱུྃ༔ དུས་གསུམ་བདེ་གཤེགས་རྒྱལ་བ་ཐམས་ཅད་ཀྱི༔ ཐུགས་ཀྱི་དགོངས་པ་ཡོངས་སུ་རྫོགས་པའི་ཕྱིར༔ བདེ་བ་ཆེན་པོའི་ཡེ་ཤེས་མཁའ་ལ་ཁྱབ༔ འགྲོ་ཀུན་རྒྱལ་བ་དྲུག་གི་སྐུ་ཐོབ་ཤོག༔ ཨོཾ༔ མི་འགྱུར་སྐུ་ལ་འགག་མེད་གསུང༔ ཡེ་ཤེས་ལྔ་ལྡན་འཁྲུལ་མེད་ཐུགས༔ ཡོན་ཏན་ཕྲིན་ལས་བསམ་མི་ཁྱབ༔ བདེ་ཆེན་ཀུན་གྱིས་འགྲུབ་པར་ཤོག༔ བསོད་ནམས་ཚོགས་སྤེལ་མཐའ་རྒྱས་ཀྱི༔ རྗེས་ཀྱི་རིམ་པ་རྫོགས་པ་འོ༔ ས་མ་ཡ༔ དེ་ལྟར་རྒྱལ་བ་རིགས་དྲུག་གི༔ དགོངས་པ་གཅིག་ཏུ་བསྡུས་ནས་ཀྱང༔ པདྨ་བདག་གིས་ལེགས་པར་བཀོད༔ དངོས་གྲུབ་རྣམ་གཉིས་སྒྲུབ་པ་ལ༔ རྨད་དུ་བྱུང་བའི་ཐབས་ཆེན་པོ༔ ཟབ་པའི་སྙིང་པོ་འདི་ཁོ་ན༔ གཞན་དུ་ནམ་ཡང་བསྟན་པ་མེད༔ དེ་ཕྱིར་ཡི་དམ་ཀུན་གྱི་མཆོག༔ རྣལ་འབྱོར་རྣམས་ཀྱིས་འདི་ལ་བྱ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ བསྐྱེད་རྫོགས་རིམ་ལྔ་རིན་ཆེན་ཕྲེང་བ་བཞུགས༔ ཧེ་རུ་ཀ་འདུས་པའི་ཐུགས་ཏིག་གོ༔ ཧེ་རུ་ཀ་ལ་ཕྱག་འཚལ་ལོ༔ ཚེ་གཅིག་སངས་རྒྱས་འདོད་པ་ཡིས༔ རྣལ་འབྱོར་ཟབ་མོ་འདི་བསྒོམ་སྟེ༔ དང་པོ་མཚན་ཉིད་ལྡན་པ་ཡི༔ བླ་མ་རྡོ་རྗེ་འཛིན་པ་བཙལ༔ ཚུལ་བཞིན་ལེགས་པར་བསྟེན་ནས་སུ༔ མཉེས་པ་གསུམ་གྱིས་ཞབས་ཏོག་བསྒྲུབ༔ ཧེ་རུ་ཀ་དཔལ་ཡབ་ཡུམ་གྱིས༔ དམ་ཚིག་ལྡན་པའི་སློབ་མ་ལ༔ སྨིན་བྱེད་དབང་གི་རིམ་པ་བསྐུར༔ གྲོལ་བྱེད་ཁྲིད་ཀྱིས་རྒྱུད་སྦྱངས་ནས༔ དབེན་པར་རྩེ་གཅིག་བསྒོམ་པར་བྱ༔ ས་མ་ཡ༔ བསྐྱེད་རྫོགས་རིམ་པ་རྣམ་ལྔ་ལས༔ དང་པོ་ཆོས་ཀུན་སྟོང་པར་བལྟ༔ སྙིང་རྗེ་སྒྱུ་མའི་ཏིང་འཛིན་གྱིས༔ ཕྲ་རགས་ཕྱག་རྒྱ་བྲིས་པ་ལ༔ ཡིད་མིག་རླུང་གསུམ་རྩེ་གཅིག་གཏད༔ དེ་ལ་ཅུང་ཟད་ཟིན་པ་ན༔ ཡིད་ཀྱི་ཡུལ་དུ་ལེགས་པར་བསྒོམ༔ ཕྲ་བ་ཡིག་འབྲུ་གསལ་བ་ལས༔ འོད་འཕྲོས་སྣོད་བཅུད་སྦྱང་བར་བྱ༔ སྐབས་སུ་མི་རྟོག་པ་ལ་བཞག༔ ཡུན་ཐུང་གྲངས་མང་བསྒོམས་པས་བརྟན༔ རྡོ་རྗེ་སྲུང་བའི་འཁོར་ལོའི་དབུས༔ སེང་ཁྲི་པདྨ་ཉི་ཟླའི་སྟེང༔ ཨོཾ་ལས་འོད་འཕྲོས་རྒྱལ་བ་མཆོད༔ སེམས་ཅན་ཀུན་གྱི་དོན་བྱས་ནས༔ ཚུར་འདུས་ཡོངས་སུ་གྱུར་པ་ལས༔ སྣང་མཛད་རྒྱལ་བ་རྟག་པའི་སྐུ༔ དཀར་དམར་ཞི་མ་ཁྲོ་ཡི་ཉམས༔ སྤྱན་གསུམ་མཆེ་བ་བཞི་གཙིགས་ཤིང༔ ཨ་ཧཾ་གསུང་གི་སྒྲ་དབྱངས་སྒྲོག༔ ཕྱག་གཡས་འཁོར་ལོ་ཐུགས་ཀར་འཛིན༔ གཡོན་པས་དྲིལ་བུ་དཀུ་ལ་བརྟེན༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ཅོད་པན་ཟི་ལྡིར་སྟོད་གཡོགས་དང༔ དར་དཔྱང་ཤམ་ཐབས་མཛེས་པར་གསོལ༔ དབུ་རྒྱན་སྙན་ཆ་མགུལ་རྒྱན་དང༔ ཕྲེང་བ་དོ་ཤལ་རུས་པའི་རྒྱན༔ ཕྱག་གདུབ་ཞབས་གདུབ་འོད་དུ་འབར༔ དབྱིངས་ཕྱུག་དཀར་མོ་བཅུ་དྲུག་ཚུལ༔ རྡོ་རྗེ་བདུད་རྩི་འཛིན་པས་འཁྱུད༔ ཞབས་གཉིས་ཡབ་ཀྱི་རྐེད་ལ་འཁྲིལ༔ གཉིས་ཀ་མཚན་དང་དཔེ་བྱད་རྫོགས༔ འོད་ཟེར་རྣམ་ལྔ་ཕྱོགས་བཅུར་འཕྲོ༔ རྡོ་རྗེ་པདྨ་མཉམ་པར་སྦྱོར༔ སྤྱི་བོའི་གནས་ལྔར་ཡེ་ཤེས་ལྔ༔ ཨོཾ་ཧཱུྃ་སྭཱ་ཨཱཾཿཧཱ་ཡིས་མཚན༔ གནས་གསུམ་སྐུ་གསུང་ཐུགས་རྡོ་རྗེ༔ ཨོཾ་དཀར་ཨཱཿདམར་ཧཱུྃ་མཐིང་ག༔ ཡབ་ཀྱི་གསང་བ་ཨོཾ་གྱིས་མཚན༔ ཡུམ་གྱི་མཁའ་དབྱིངས་མཱུཾ་ལྡན་པ༔ བདེ་བ་ཆེན་པོའི་ཉམས་བརྒྱ་བརྟས༔ སྟོང་པའི་དབྱིངས་ལས་འཇའ་ལྟར་ཤར༔ སྣང་བ་ཉིད་ཀྱང་སྟོང་པ་ཉིད༔ སྒྱུ་འཕྲུལ་རོལ་པ་ཆུ་ཟླའི་གར༔ སྤྱི་དང་བྱེ་བྲག་སོ་སོར་གསལ༔ རེས་གསལ་རེས་མི་གསལ་བ་དང༔ ནམ་ཡང་གསལ་དང་ཡུན་རིང་བརྟན༔ རྐྱེན་གྱིས་མི་འཕྲོག་རྒྱུན་དང་ལྡན༔ རིམ་པ་བཞིན་དུ་གཡོ་ཐོབ་གོམས༔ བརྟན་ཅིང་མཐར་ཕྱིན་ཉམས་ལྔ་རྫོགས༔ དེ་ལྟར་ཡིད་ཀྱི་ཡུལ་གསལ་ནས༔ དེ་ནས་དབང་པོར་མཐོང་རེག་གསལ༔ རང་སྣང་ལྷ་རུ་འགྱུར་བར་བསླབ༔ ལུས་ཀྱི་ཤིན་སྦྱངས་ལེགས་གྲུབ་ནས༔ འདོད་དགུར་བསྒྱུར་བའི་ཆོ་འཕྲུལ་གྱིས༔ གཞན་གྱི་སྣང་བ་བསྒྱུར་ནུས་པའི༔ བསྐྱེད་རིམ་གྲུབ་མཐའ་རྫོགས་པ་འོ༔ ས་མ་ཡ༔ གཉིས་པ་ཐིག་ལེའི་རྣལ་འབྱོར་ནི༔ དང་པོ་ལྷ་ཡི་གསལ་སྣང་བརྟན༔ ཧེ་རུ་ཀ་ཡི་སྐུ་ཡི་དབུས༔ དབུ་མ་མཐིང་ག་མདའ་སྨྱུག་ཙམ༔ ཡར་སྣེ་འཁོར་ལོའི་དབུས་སུ་ཟུག༔་་་་དབུའི་སྟེང་དུ་འཁོར་ལོའི་ཁོངས་ནས་ནོར་བུ་འབུར་བ་ལ་ཟུག་པ། མཆན། མར་སྣེ་རྡོ་རྗེ་ནོར་བུའི་སྦུབས༔ གཡས་པ་ཐབས་ཤེས་འཁྱོགས་མའི་རྩ༔ ཕྱི་དཀར་ནང་དམར་ཤེལ་གྱི་སྦུག༔ གཡོན་པ་ཐབས་ཤེས་ལྡན་པའི་རྩ༔ ཕྱི་དམར་ནང་དཀར་ཤིན་ཏུ་དྭངས༔ ཡར་སྣེ་མཚོག་མའི་ཐད་ཙམ་སྟེ༔ མར་སྣེ་ལྟེ་འོག་སོར་བཞིའི་བར༔ རྩ་ཉིད་དབུས་ཀྱི་སྲོག་དང་འབྲེལ༔ འདུས་མདོར་སྟེང་སྒོ་ཟླ་བའི་གདན༔ ཐབས་ཀྱི་ཐིག་ལེ་དཀར་འཚེར་ཟླུམ༔ འོག་སྒོ་ཉི་མ་འབར་བའི་སྟེང༔ ཤེས་རབ་ཐིག་ལེ་དམར་གསལ་འབར༔ གནས་བཞིར་རྩ་འདབ་བཞི་བཞི་གྱེས༔ ཨེ་ཝཾ་མཱ་ཡཱ་ཐིག་ལེས་མཚན༔ སྙིང་གའི་འཁོར་ལོ་ལས་འོངས་པའི༔ ཉི་ཟླའི་རྩ་གཉིས་མིག་ལ་ཟུག༔ མགྲིན་པའི་རྩ་འཁོར་ལས་འོངས་པའི༔ རླུང་སྒྲོམ་འབར་བ་སྣ་སྒོར་ཟུག༔ དེ་ལྟར་རྩ་འཁོར་སྐུ་ཡི་ངང༔ རླུང་སྒྲོམ་གསུང་དང་ཉི་ཟླ་ཐུགས༔ ཡེ་ཤེས་འཆར་བའི་རྩ་རྣམས་བསྒོམ༔ ཁ་དོག་ལྔ་དང་ལྡན་པའི་རླུང༔ རླུང་སྒྲོམ་འབར་བ་ལས་དྲངས་ཏེ༔ ཐབས་དང་ཤེས་རབ་རྩ་ལ་ཞུགས༔ དབུ་མའི་ནང་དུ་བསྟིམ་པར་བྱ༔ རྔུབ་དགང་གཞིལ་ཞིང་མི་ཐུབ་ཚེ༔ སྐྱེས་བུས་མདའ་འཕང་བཞིན་དུ་གཏོང༔ འབྱུང་འཇུག་གནས་གསུམ་བརྒྱ་རྩ་བརྒྱད༔ མཉམ་པའི་འབྱུང་འཇུག་གཅིག་ཐུབ་ན༔ རླུང་ནི་ལས་སུ་རུང་བ་སྟེ༔ ལག་པ་གཉིས་ཀྱིས་མགོ་བོ་ཕུར༔ མགྲིན་པ་དལ་བུས་གཡས་སུ་བསྐོར༔ རོ་སྟོད་མདུན་རྒྱབ་དགྱེ་རྒུ་བྱ༔ རྐེད་པ་བསྐོར་ཞིང་ཕྱེད་སྐྱིལ་གྱིས༔ ཅུང་ཟད་བཏེགས་ལ་བརྡབ་པར་བྱ༔ གནས་ལྔའི་རྩ་མདུད་ཀུན་གྲོལ་ནས༔ རྐང་ལག་ཐམས་ཅད་སྤྲུགས་པ་ཡིས༔ རྩ་གནས་རྩ་འདབ་གེགས་རྣམས་སེལ༔ ལུས་ཀྱི་འཁྲུལ་འཁོར་ལེགས་བྱང་ནས༔ མར་སྣེའི་ཐིག་ལེ་རླུང་བུས་བསྐུལ༔ མེ་ལྕེ་སྤུ་ཡི་རྩེ་མོ་ཙམ༔ ཐོན་ནས་རིམ་པར་འབར་བ་ཡིས༔ རྩ་འཁོར་ཐམས་ཅད་མེ་ཡིས་གང༔ ཐབས་ཀྱི་ཐིག་ལེ་ནར་གྱིས་ཞུ༔ གྲངས་མེད་ཆར་ལྟར་བབས་པ་ཡིས༔ དཀར་དམར་སྣང་བའི་རྩ་འཁོར་གང༔ བདེ་དྲོད་རབ་ཏུ་འཕེལ་བ་དང༔ ཐིག་ལེ་བརྟན་པར་གྱུར་པ་ན༔ ལུས་ཀུན་བྱང་ཆུབ་སེམས་ཀྱིས་བཀང༔ ལུས་བདེ་རླུང་འཇམ་ཐིག་ལེ་འཕེལ༔ བདེ་བས་སེམས་ཟིན་ཡུན་རིང་གནས༔ བདེ་བ་དང་ནི་གསལ་བ་དང༔ མི་རྟོག་པ་ཡི་ཉམས་རྣམས་འཆར༔ རླུང་ལྔ་དབང་དུ་འདུས་པ་དང༔ རྩ་རྣམས་གནས་སུ་གྲོལ་བ་དང༔ ཐིག་ལེ་བདེ་དྲོད་ཆེར་རྒྱས་པས༔ ལུས་ནི་འདོད་རྒུར་བསྒྱུར་བ་དང༔ འབྱུང་བ་ལྔ་ལ་རང་དབང་ཐོབ༔ ས་མ་ཡ༔ གསུམ་པ་ཕོ་ཉའི་རྣལ་འབྱོར་ནི༔ རིག་མ་རིགས་བཟང་ངང་རྒྱུད་རིང༔ དད་ལྡན་བློ་ཆེ་སྙིང་རྗེར་ལྡན༔ ཤེས་རབ་གསལ་ཞིང་བདེ་བ་ཆེ༔ སེར་སྣ་ཆུང་ཞིང་གཏོང་ཕོད་ལྡན༔ མཚན་ཉིད་རྫོགས་པའི་ཕྱག་རྒྱ་དེ༔ རིག་སྔགས་ནུས་པས་འགུགས་པ་འམ༔ ཡང་ན་ནོར་དང་ཐབས་ཀྱིས་བསླུ༔ ཆོས་བཤད་བློ་རྒྱུད་ལེགས་པར་སྦྱངས༔ དབང་བསྐུར་རིམ་གཉིས་ཟབ་མོ་བསླབ༔ དབེན་པར་བདེ་བའི་སྟན་ལ་འདུག༔ སྒྱུ་རྩལ་དུ་མས་བདེ་བ་བསྐུལ༔ ཧེ་རུ་ཀ་དཔལ་ཡབ་ཡུམ་བསྒོམ༔ གནས་ལྔའི་རྩ་ཡི་འཁོར་ལོ་ལ༔ རིགས་ལྔ་ཡན་ལག་རྣམ་བཞི་ལ༔ རྟ་གདོང་རིགས་བཞི་གསལ་གདབ་ནས༔ རྡོ་རྗེ་པདྨ་ཨོཾ་མཱུཾ་ལྡན༔ སྙོམས་ཞུགས་བསྲུབས་དང་བསྲུབ་པ་ཡིས༔ བདེ་བ་ཆེར་གཡོས་དགའ་བ་ནི༔ བཟོད་མེད་འབར་བ་མཆོག་ཡིན་ཏེ༔ རྟོག་པ་ཀུན་འགགས་ཁྱད་པར་གྱི༔ ལྷན་སྐྱེས་བདེ་བ་ཆེན་པོར་ཞུགས༔ བདེ་བ་ནམ་མཁའ་མཉམ་པ་ཡི༔ ཡབ་ཡུམ་ལུས་ངག་ཡིད་གསུམ་པོ༔ གཉིས་སུ་མི་སྣང་དབྱེར་མེད་པ༔ སྨྲ་བསམ་བརྗོད་མེད་རྟོགས་པ་འཆར༔ བདེ་ལ་མི་ཞེན་འཛིན་པ་བྲལ༔ ཡང་ནས་ཡང་དུ་བདེ་བ་སྤེལ༔ དོན་དམ་བདེ་གསལ་ངོ་འཕྲོད་པས༔ ཚེ་གཅིག་སངས་རྒྱས་འདི་ཡིས་འགྲུབ༔ ས་མ་ཡ༔ བཞི་པ་འོད་གསལ་རྣལ་འབྱོར་ནི༔ དེ་ལྟར་སྙོམས་ཞུགས་བདེ་བ་ནི༔ དངོས་པོ་མ་ཡིན་སྟོང་པ་ཉིད༔ མ་སྐྱེས་མི་འགག་ནམ་མཁའི་ངང༔ སྟོང་ཡང་ཡེ་ཤེས་འོད་གསལ་བ༔ སོ་སོ་རང་གིས་རིག་པར་འགྱུར༔ གང་དུའང་མི་གནས་མི་འགག་པ༔ ཅི་ལྟར་སྣང་ཡང་ངོ་བོ་སྟོང༔ དུག་ལྔའི་རྟོག་པ་རང་སར་གྲོལ༔ རེས་འགའ་རྟོག་མེད་ངང་དུ་གནས༔ གསལ་ལ་འཛིན་མེད་ངང་དུ་བཞག༔ རེས་འགའ་སྟོང་གཟུགས་སྣ་ཚོགས་ཤར༔ ལྷ་ཡི་ཕྱག་རྒྱ་ཝལ་གྱིས་གསལ༔ དེ་ཚེ་སྤང་བླང་རེ་དོགས་བྲལ༔ མེ་ལོང་ནང་དུ་གཟུགས་བརྙན་ལྟར༔ བྱིས་པས་ལྟད་མོ་བལྟ་བ་བཞིན༔ འཛིན་མེད་གདིངས་ཐོབ་རྟོགས་པ་དངོས༔ སྤང་བླང་རེ་དོགས་བློ་ཡོད་ན༔ ལྷ་སྐུ་ཤར་ཡང་ཉམས་ཡིན་པས༔ ད་དུང་ཡེངས་མེད་འཛིན་མེད་དུ༔ མཉམ་པར་གཞག་པའི་དོན་ལ་བརྩོན༔ རེས་འགའ་ཅིར་ཡང་མི་སྣང་བར༔ རྟོག་མེད་ངང་ལ་ཡུན་རིང་གནས༔ རླུང་ནི་དབུ་མར་ཚུད་པ་དང༔ ཐིག་ལེ་བདེ་བ་ཆེན་པོར་དག༔ ཐིག་ལེ་འོད་གསལ་སྐུར་སྨིན་ནས༔ ལྷ་ཡི་ཕྱག་རྒྱ་ཅིར་ཡང་སྣང༔ མ་སྐྱེས་རྟོག་མེད་སྟོང་པའི་ངང༔ སྨོན་ལམ་སྙིང་རྗེ་སྒྱུ་མ་ཡིས༔ ཡེ་ཤེས་འོད་གསལ་ལྷ་སྐུར་ཤར༔ དག་པའི་སྣང་བ་མ་འགགས་པ༔ མ་སྐྱེས་ཡིན་ཕྱིར་མི་རྟོག་པ༔ མ་འགགས་པས་ན་ལྷ་སྐུ་ཤར༔ ཞི་བར་མི་གནས་རང་གིས་རིག༔ མི་རྟོག་པས་ན་ཉོན་མོངས་སངས༔ དག་པའི་སྣང་བ་ཡེ་ཤེས་རྒྱས༔ རེ་དོགས་མེད་པས་འཁོར་འདས་མཉམ༔ མ་ཡེངས་རིག་པས་མི་སློབ་པའི༔ ས་ལ་ཡང་དག་སྦྱོར་བར་བྱེད༔ མི་རྟོག་པ་ནི་ཆོས་ཀྱི་དབྱིངས༔ རྒྱལ་བ་རྟག་པའི་ངོ་བོར་རྫོགས༔ མེ་ལོང་བཞིན་དུ་ཅིར་ཡང་འཆར༔ རྡོ་རྗེ་སེམས་དཔའ་སྒྱུ་འཕྲུལ་འཆང༔ སྐུ་དང་ཡེ་ཤེས་དཔག་མེད་འཆར༔ འཁོར་འདས་མཉམ་ཉིད་ཉི་མ་ཆེ༔ སྐྱེ་བ་མེད་ཀྱང་སོ་སོར་རིག༔ རང་གསལ་པདྨ་གར་གྱི་དབང༔ འོད་གསལ་ཡེ་ཤེས་ཧེ་རུ་ཀ༔ འཛིན་མེད་ཐོགས་མེད་ཆོ་འཕྲུལ་སྟོན༔ རྟ་མཆོག་རོལ་པའི་བྱ་བ་གྲུབ༔ རྒྱལ་བ་དྲུག་གི་ས་ཐོབ་ནས༔ ཡེ་ཤེས་བླ་མའི་ས་ལ་སྦྱོར༔ སངས་རྒྱས་འོད་གསལ་སྙིང་པོ་འོ༔ ས་མ་ཡ༔ ལྔ་པ་རྨི་ལམ་རྣལ་འབྱོར་ནི༔ སྐབས་སུ་འོད་གསལ་རྩལ་སྦྱང་ཕྱིར༔ སྙིང་དབུས་མི་ཤིགས་ཐིག་ལེ་ནི༔ དཀར་གསལ་སྲན་མ་འཕོས་པ་ཙམ༔ དེ་ལ་སེམས་བཟུང་ཟིན་པ་ན༔ ཐིག་ལེ་སྙིང་གའི་དབུས་སུ་ཐིམ༔ རྟོག་མེད་ངང་དུ་གཉིད་ལོག་པས༔ དྭངས་གསལ་རྙོགས་མེད་འོད་གསལ་འཆར༔ དེ་ཡང་དང་པོ་རྨི་ལམ་ནི༔ མེ་ལོང་གཟུགས་བརྙན་བཞིན་དུ་འཆར༔ སྣང་བ་སྨིག་རྒྱུ་ལྟ་བུར་མཆེད༔ དེ་ཉིད་མི་སྣང་རྟོག་མེད་ངང༔ འཛིན་མེད་ནམ་མཁའི་དཀྱིལ་ལྟ་བུ༔ སྨྲ་བསམ་བརྗོད་ལས་འདས་པའི་ཉམས༔ ཉམས་ལེན་བརྟན་ན་ཡུན་རིང་གནས༔ སད་པར་མཉམ་གཞག་འོད་གསལ་དང༔ གཉིད་མཐུག་འོད་གསལ་གཉིས་མེད་འདྲེས༔ འོད་གསལ་ཉི་མའི་འོད་བཞིན་དུ༔ འཛིན་པའི་རབ་རིབ་ལས་གྲོལ་བ༔ རྟོགས་པའི་ཟླ་བ་རྫོགས་པར་འཆར༔ དེ་ཡང་འོད་གསལ་ཡེ་ཤེས་ནི༔ གསལ་སྟོང་ཟུང་འཇུག་བདེ་བ་ཆེ༔ རྟོག་པ་མེད་ཀྱང་ས་ལེར་གསལ༔ གཉིས་མེད་ཟུང་འཇུག་བདེ་བ་ཆེ༔ བདེ་བ་ཤར་ཡང་ངོས་བཟུང་བྲལ༔ མ་སྐྱེས་མི་འགག་སྣང་ན་ཡང༔ བཟུང་བས་མི་ཟིན་ཆུ་ཟླ་འདྲ༔ གཞི་རྩ་བྲལ་བས་བསྒོམ་དུ་མེད༔ བསམ་མི་ཁྱབ་པས་བརྗོད་དུ་མེད༔ ཡེ་ཤེས་ནམ་མཁའ་མཉམ་པས་ན༔ ཐོགས་པ་མེད་པར་ཀུན་ལ་ཁྱབ༔ ཐམས་ཅད་སེམས་སུ་རྫོགས་པས་ན༔ སེམས་ཉིད་དག་པས་ཐམས་ཅད་དག༔ རང་རིག་རྟོགས་པས་ཐམས་ཅད་རྟོགས༔ ཤེས་རབ་ཆེན་པོས་ཀུན་མཁྱེན་འགྲུབ༔ དོན་གྱི་ཡེ་ཤེས་སྙིང་པོ་འདི༔ སེམས་ཅན་ཀུན་གྱི་སྙིང་ལ་གནས༔ སངས་རྒྱས་ཀུན་གྱི་ཐུགས་ལ་གནས༔ ལམ་གྱི་སྙིང་པོ་རིག་པ་འདི༔ ཕྱག་རྒྱའི་པདྨས་རབ་གསལ་ནས༔ སྐད་ཅིག་དང་པོར་སེམས་ཅན་ཏེ༔ སྐད་ཅིག་གཉིས་པར་མཉམ་པ་ཉིད༔ གསུམ་པར་སངས་རྒྱས་ས་ལ་སྦྱོར༔ སྐད་ཅིག་ཉིད་ལ་མཉམ་པ་ཉིད༔ ཡུམ་གྱི་པདྨའི་དཀྱིལ་འཁོར་དུ༔ བདེ་བ་ཐབས་ཀྱིས་བསྒྲུབས་པ་ཡིས༔ སྐད་ཅིག་ཉིད་ལ་མཉམ་པ་ཉིད༔ རྟོགས་ནས་སངས་རྒྱས་དེ་རུ་འགྲུབ༔ ཡུམ་གྱི་བྷ་གའི་མཁའ་ཀློང་དུ༔ བདེ་བ་ཐུགས་ཀྱི་དཀྱིལ་འཁོར་ནི༔ འོད་གསལ་སྐྱ་རེངས་དང་པོ་ཤར༔ ཕྱོགས་མེད་ཡེ་ཤེས་ནམ་ལངས་པ༔ གོམས་པ་བརྟན་པོའི་ཉི་མ་ཤར༔ སྒྲིབ་པའི་སྤྲིན་ཚོགས་ཀུན་བསལ་ནས༔ མཐར་ཕྱིན་ཉི་འོད་དབུས་མཐར་བརྡལ༔ རྟོགས་པའི་ཉམས་ལྔ་འདི་རྫོགས་པས༔ དཀའ་བ་མེད་པར་མྱུར་བ་ཉིད༔ སེམས་ཅན་ཡིན་ཀྱང་སངས་རྒྱས་ལ༔ བདེ་ཆེན་མཉམ་པར་སྦྱོར་བས་འགྲུབ༔ དཀའ་བ་མེད་པའི་ལམ་འདི་ནི༔ དུས་གསུམ་རྒྱལ་བའི་ཐུགས་ཀྱི་བཅུད༔ འདོད་ཡོན་ལྔ་ལ་སྤྱོད་བཞིན་པར༔ སངས་རྒྱས་སྒྲུབ་པའི་ཐབས་ཆེན་ནོ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ རྟེན་གསུམ་ལྷག་གནས་རིན་ཆེན་དྲྭ་བ་བཞུགས༔ ཧེ་རུ་ཀ་ལ་ཕྱག་འཚལ་ལོ༔ ཚེ་གཅིག་སངས་རྒྱས་འདོད་པ་ཡི༔ སྐལ་ལྡན་སྐྱེས་བུ་གང་ཡིན་པ༔ སྔོན་དུ་འགྲོ་བས་བློ་སྦྱངས་ནས༔ དབང་གིས་སྨིན་ཅིང་དམ་ཚིག་དག༔ བསྙེན་སྒྲུབ་རྣམ་བཞི་ལེགས་ཐེམས་པས༔ བསྐྱེད་པའི་རིམ་པས་རང་རྒྱུད་གྲོལ༔ རྫོགས་པའི་རིམ་པས་ཉམས་རྟོགས་ཀུན༔ མ་སྐྱེས་པ་རྣམས་སྐྱེད་པ་དང༔ སྐྱེས་པ་གོང་དུ་སྤེལ་བའི་ཕྱིར༔ ཕྱི་ནང་གསང་བའི་རྟེན་རྣམས་ལ༔ ལྷག་པར་གནས་པའི་ཆོ་ག་ལྡན༔ ཡེ་ཤེས་གོང་དུ་སྤེལ་བ་ཡི༔ མཆོག་གི་བསྲེག་བླུག་རིམ་པར་འཇུག༔ གླུ་དང་གར་གྱིས་བརྟན་པར་བྱ༔ ས་མ་ཡ༔ རྟེན་རྣམས་ལྷག་པར་གནས་པ་ལ༔ སྔོན་དུ་འགྲོ་བའི་རིམ་པ་ལས༔ དང་པོ་མེ་ཡིས་སྦྱོང་བ་ནི༔ རབ་དཀར་ས་ལ་སྟེགས་བུ་ཟླུམ༔ རྡོ་རྗེས་མཚན་པའི་ཕྱི་རོལ་དུ༔ བདུད་རྩི་ཅན་གྱི་ཤིང་བརྩེགས་ལ༔ བྲམ་ཟེའི་ཁྱེ་འུས་མེ་སྦར་ཏེ༔ ཧཱུྃ༔ ཆོས་ཀྱི་དབྱིངས་ནས་འབར་བའི་སྐུ༔ ཧཱུྃ་ལས་སྐྱེས་པའི་དྲང་སྲོང་ཆེ༔ འབྱུང་བ་ཆེན་པོ་མེ་ལ་དབང༔ རྡོ་རྗེ་ཁྲུས་ཀྱི་བུམ་པ་འཛིན༔ སེམས་སྐྱིལ་པད་ཟླའི་གདན་ལ་བཞུགས༔ རྡོ་རྗེ་ལྗགས་ཀྱི་དབང་པོ་ལ༔ ཧཱུྃ་ཡིག་དཀར་པོ་འོད་དུ་འབར༔ རིན་ཆེན་འབར་བའི་སྣོད་མཆོག་ཏུ༔ རོ་བརྒྱ་ལྡན་པའི་བདུད་རྩི་འཁྱིལ༔ ཟག་མེད་བདེ་བའི་རྒྱུན་དྲངས་པས༔ དྲང་སྲོང་འཁོར་བཅས་དགྱེས་ཤིང་ཚིམ༔ ཧཱུྃ༔ སྲིད་གསུམ་འབྱུང་པོ་ཀུན་གྱི་གཙོ༔ རྡོ་རྗེ་འཆང་གི་བཀའ་ཉན་པ༔ བར་ཆད་བགེགས་ཆེན་འཇོམས་པའི་གཙོ༔ དྲང་སྲོང་ཆེན་པོས་ཕྲིན་ལས་མཛོད༔ ཨོཾ་ཨགྣི་རཱ་ཛ་ཤཱིནྟཾ་ཀུ་རུ་སྭཱ་ཧཱ༔ མར་ཁུ་ཡམ་ཤིང་ཡུངས་དཀར་འབུལ༔ འབར་བའི་དབྱིངས་སུ་ཐིམ་པར་བསམ༔ ཧཱུྃ༔ འབར་བ་མེ་ཡི་མཁའ་ཀློང་དུ༔ ཞི་མཛད་རྡོ་རྗེ་དབྱིངས་ཕྱུག་མ༔ སྐུ་མདོག་གངས་ཀྱི་རི་བོ་འདྲ༔ རྡོ་རྗེ་ཕྱར་ཞིང་ཁྲུས་བུམ་འཛིན༔ བརྐྱང་བསྐུམ་རུས་པའི་རྒྱན་དྲུག་ཅན༔ ཞི་བྱེད་མཁའ་འགྲོ་འབུམ་གྱིས་བསྐོར༔ རྡོ་རྗེ་འབར་བའི་ལྗགས་ཀྱི་སྦུབས༔ ཧཱུྃ་གིས་མཚན་པའི་འོད་ཟེར་གྱིས༔ པདྨ་འབར་བའི་སྣོད་ཡངས་སུ༔ བདུད་རྩི་རྣམ་ལྔ་བཅུད་དུ་འཁྱིལ༔ མུ་ཏིག་དཀར་པོ་འོད་དུ་འབར༔ བདེ་བ་བསྐྱེད་པའི་བྱང་ཆུབ་སེམས༔ མཁའ་འགྲོའི་སྐུ་ལ་མཉེས་མཆོད་འབུལ༔ ཧཱུྃ༔ རྡོ་རྗེ་མཁའ་འགྲོ་འཁོར་དང་བཅས༔ དམིགས་མེད་ཞི་བ་ཆེན་པོ་ལ༔ བརྩེ་བའི་ཐུགས་རྗེ་ཀུན་ལ་ཁྱབ༔ ཐུགས་དམ་བསྐུལ་བར་མི་འཚལ་ཡང༔ སྨོན་ལམ་དབང་གིས་གསོལ་བ་འདེབས༔ ཕྱི་ནང་གསང་བའི་རྟེན་རྣམས་ཀྱི༔ བར་ཆད་ཐམས་ཅད་ཞི་བར་མཛོད༔ ཉེས་པ་ཐམས་ཅད་བྱང་བར་མཛོད༔ དྲི་མ་ཐམས་ཅད་བསལ་བར་མཛོད༔ ཨོཾ་བཛྲ་ཌཱ་ཀི་ཁ་ཁ་ཁཱ་ཧི་ཁཱ་ཧི་ཤཱནྟིཾ་ཀུ་རུ་སྭཱ་ཧཱ༔ མར་ཁུ་ཡམ་ཤིང་བདུད་རྩི་འབུལ༔ བདུད་རྩིའི་བུམ་པ་བཟུང་བྱས་ལ༔ ཧཱུྃ༔ རྡོ་རྗེ་མཁའ་འགྲོ་གཤེགས་སུ་གསོལ༔ རིན་ཆེན་བུམ་པའི་ནང་དུ་བཞུགས༔ དཔའ་བོ་ཆེན་པོར་མཉམ་སྦྱོར་བའི༔ བྱང་ཆུབ་སེམས་ཀྱི་ཆུ་འབབས་པས༔ གཉིས་མེད་བདེ་བ་ཆེན་པོར་ཞུ༔ ཕྱི་ནང་གསང་བའི་རྟེན་མཆོག་ལ༔ གསང་བ་ཁྲུས་ཀྱི་ཆོ་ག་བགྱི༔ ཕྱི་ཁྲུས་ཤེལ་ལས་དྭངས་པར་མཛོད༔ ནང་ཁྲུས་ལྷ་རུ་དག་པར་མཛོད༔ གསང་ཁྲུས་བདེ་ཆེན་འོད་གསལ་རྟོགས༔ ཡེ་ཤེས་བསྐྱེད་པའི་རྟེན་དུ་མཛོད༔ རྡོ་རྗེ་ཟིལ་པས་ཁྲུས་བྱ་འོ༔ ཧཱུྃ༔ ང་ནི་དཔལ་ཆེན་ཧེ་རུ་ཀ༔ ཀྲོ་དྷཱི་ཤྭ་རཱི་ཡུམ་དང་འབྲེལ༔ བྱང་ཆུབ་སེམས་ནི་ཁྲོ་བོའི་སྤྲིན༔ མགར་གྱི་ཚྭ་ཚྭ་ལྟ་བུང་འཕྲོས༔ གདུག་པ་ཅན་རྣམས་ཚར་བཅད་དེ༔ ཚུར་འདུས་རྡོ་རྗེ་འབར་བར་གྱུར༔ ཧཱུྃ༔ ཁྲོ་བོ་ཆེན་པོ་ཁྲག་འཐུང་ཆེ༔ འཇིགས་བྱེད་འབར་བའི་སྐུར་སྣང་བ༔ སྤྲུལ་པའི་ཕྲ་མེན་འབུམ་འབུམ་སྤྲོ༔ བར་ཆད་བྱེད་པའི་བགེགས་ཆེན་རྣམས༔ རྡུལ་ཕྲན་ཙམ་ཡང་མེད་པར་མཛོད༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ སརྦ་དུཥྚཱན་མཱ་ར་ཡ་ཕཊ༔ ཧཱུྃ༔ འགྱུར་མེད་སྲ་བརྟན་རྡོ་རྗེ་འབར་བའི་དབྱིངས༔ ཁྲག་འཐུང་ཀུན་གྱི་སྐུ་གསུང་ཐུགས་འདུས་པ༔ གནམ་ལྕགས་ཞུན་ལས་གྲུབ་པའི་རྩེ་དགུ་འབར༔ ཕྱོགས་བཅུའི་གདོན་ཚོགས་ཐམས་ཅད་གཟིར་བར་མཛོད༔ ཨོཾ་བཛྲ་ཀྲོ་དྷ་རཀྵ་རཀྵ་ཧཱུྃ༔ དངོས་གཞི་རབ་ཏུ་གནས་པ་ནི༔ དང་པོར་ཕྱི་ཡི་རྟེན་རྣམས་ལ༔ སྦྱང་དང་བསྐྱེད་དང་བསྟིམ་པ་དང༔ དབང་སྐུར་བརྟན་དང་མངའ་གསོལ་ཕྱིར༔ ཆོ་ག་དྲུག་ནི་ཚང་བར་བྱ༔ ཧཱུྃ༔ བདག་ནི་རྡོ་རྗེ་རྟ་མཆོག་འབར་བའི་སྐུ༔ རྡོ་རྗེ་མཁའ་འགྲོ་ཡུམ་དང་གཉིས་མེད་འཁྲིལ༔ བྱང་ཆུབ་སེམས་མཆོག་འོད་ཟེར་མཁའ་ལ་འཕྲོ༔ མ་དག་སྣང་བ་ཐམས་ཅད་སྦྱང་བར་བྱ༔ ཧཱུྃ༔ རྡོ་རྗེ་རྟ་ཡི་གླུ་མཆོག་འབར་བ་ཡིས༔ རྒྱལ་བའི་ཚོགས་རྣམས་ཐུགས་དམ་དབྱིངས་ནས་བསྐུལ༔ བྱང་ཆུབ་སེམས་ཀྱིས་དགྱེས་པའི་ཕུལ་དུ་བྱས༔ འཁོར་ཡུག་ཀུན་ཏུ་བྱང་ཆུབ་སེམས་འཁྱིལ་བས༔ རིན་ཆེན་འབར་བའི་འཁོར་ཡུག་ཡངས་པ་ལ༔ རིན་ཆེན་རི་བོ་རི་བྲག་ཀུན་གྱིས་གཏམས༔ ཆུ་ཀླུང་མཆོག་ཀྱང་ཕྱོགས་བཞི་ཀུན་ནས་འབབ༔ ལྗོན་པ་མཆོག་ཀྱང་འབྲས་བུ་ལྡན་པ་གཏིབས༔ བདུད་རྩི་ཁྲུས་ཆབ་རྫིང་བུ་གཏན་དུ་འཁྱིལ༔ རིག་འཛིན་བུ་དང་བུ་མོ་ཀུན་ཀྱང་རྒྱུ༔ རྒྱལ་སྲིད་རིན་ཆེན་རྣམ་པ་བདུན་གྱིས་གང༔ ཧཱུྃ༔ བྱང་ཆུབ་སེམས་ཀྱི་ལྕགས་ཀྱུ་རབ་འབར་ཆེས༔ རྒྱལ་བའི་ཞིང་ཁམས་མ་ལུས་སྤྱན་དྲངས་ཏེ༔ དྭངས་པའི་མཚོ་ལ་སྦྲང་ཆར་འབབ་པ་བཞིན༔ གཉིས་མེད་མཉམ་པ་རོ་གཅིག་ངང་དུ་ཐིམ༔ ཧཱུྃ༔ བྱང་ཆུབ་སེམས་ཀྱི་འོད་ཟེར་ཀུན་འཕྲོ་བ༔ རྡོ་རྗེ་རབ་ཏུ་འབར་བའི་ཆར་སྤྲོས་པས༔ ཕྱོགས་བཅུའི་ཞིང་ཁམས་ཇི་སྲིད་གནས་ཀྱི་བར༔ དེ་སྲིད་བདག་གི་ཞིང་ཡང་གནས་གྱུར་ཅིག༔ བྱང་ཆུབ་སེམས་ཀྱི་འདོད་ཡོན་ཀུན་ཏུ་འཕྲོས༔ ཞིང་མཆོག་གཟི་བརྗིད་མཆོག་ཏུ་འབར་བ་ཡི༔ རྒྱལ་བའི་ཞིང་དུ་བདག་གིས་མངའ་གསོལ་ན༔ རྡོ་རྗེའི་གནས་མཆོག་ཆེན་པོར་བཞུགས་སུ་གསོལ༔ ཧཱུྃ༔ རྡོ་རྗེ་རྟ་མཆོག་ཆོ་འཕྲུལ་གྱིས༔ རྡུལ་གྱི་རི་ཀུན་རབ་སྦྱངས་ནས༔ སྟོང་པ་ཉིད་ཀྱི་ངང་ཉིད་ལས༔ ཧཱ་ཡིག་དཀར་པོ་ཟླ་བ་ལྟར༔ བྱང་ཆུབ་སེམས་ཀྱི་སྤྲིན་སྤྲོས་པས༔ རྡོ་རྗེའི་རི་མཆོག་ཐམས་ཅད་དུ༔ འཇིག་རྟེན་གངས་ཀྱི་རི་བོ་ནི༔ ཟླ་འོད་ཀུནྡ་བཞད་པ་བཞིན༔ རྡོ་རྗེ་དཀར་པོའི་འོད་འབར་བ༔ དེ་བཞིན་གཤེགས་པ་ཐམས་ཅད་ཀྱི༔ མི་འགྱུར་ཡེ་ཤེས་རྡོ་རྗེའི་ཚོགས༔ སྤྱན་དྲངས་གཉིས་སུ་མེད་པར་ཐིམ༔ རྡོ་རྗེའི་མཐུ་སྟོབས་མ་ལུས་པ༔ མེ་ཏོག་ཀུནྡའི་རྣམ་པ་རུ༔ ཁ་བ་བུ་ཡུག་འཚུབས་པ་བཞིན༔ རྡོ་རྗེ་འབར་བའི་རི་ལ་ཐིམ༔ གངས་ཀྱི་ལྷུན་པོ་ཆེན་པོར་འབར༔ འཇིག་རྟེན་ཆུ་ཀླུང་གསེར་དུ་འབར་བ་ཀུན༔ རྡོ་རྗེ་མཆོག་གི་ཞབས་བསིལ་ཆེན་པོར་གཏམས༔ གཏན་འཁྱིལ་རྒྱ་མཚོ་ཆེན་པོར་མངའ་གསོལ་ལོ༔ ཨོཾ་བཛྲ་ཧ་ཡ་གྲཱི་བ་བོ་དྷི་ཙིཏྟ་ཏིཥྛ་བཛྲ་བྷྲཱུྃ༔ རིན་ཆེན་རྟ་མཆོག་འབར་བའི་རོལ་པ་ལས༔ མཱ་མ་ཀི་དང་གཉིས་མེད་སྦྱོར་བའི་སྤྲིན༔ བཙོ་མ་གསེར་གྱི་མདོག་ཅན་ཀུན་ཏུ་འཕྲོས༔ ས་དང་ཆུ་ཡི་ཉེས་པ་ཀུན་སྦྱངས་ནས༔ མཱ་མ་ཀི་ཡི་བྱང་ཆུབ་སེམས་སྤྲོས་པས༔ ནོར་བུ་ཆུ་ཤེལ་ཆུ་འབེབས་བཾ་ཡིག་ལྡན༔ གཏན་འཁྱིལ་མཚོ་དང་རྒྱུན་འབབས་ཆུ་བོའི་རྒྱུན༔ མཱ་མ་ཀི་ཡི་རང་བཞིན་ཉིད་དུ་གནས༔ རིན་ཆེན་རྟ་མཆོག་ངོ་བོར་གནས་པ་ཉིད༔ ནོར་བུ་དབང་རྒྱལ་ཧཱ་ཡིག་སེར་པོས་མཚན༔ ཉི་མ་འཆར་ཀའི་མདོག་ལྟར་འོད་འབར་བ༔ ཕྱོགས་བཅུ་ཀུན་ཏུ་དེ་བཞིན་གཤེགས་པའི་ཞིང༔ རིན་ཆེན་ས་དང་ཆུ་ཀླུང་བདུད་རྩིའི་མཚོ༔ མིག་འཕྲུལ་ལྟ་བུར་གནས་སུ་བསྟིམ་པ་ཡིས༔ འདོད་པའི་དངོས་གྲུབ་ས་བཅུད་བདུད་རྩིའི་ཚོགས༔ རིན་ཆེན་མེ་ཏོག་མང་པོ་གཅལ་དུ་བཀྲམ༔ ནོར་བུའི་ཆར་གྱིས་རྒྱ་མཚོ་ཆུ་ཀླུང་བརྒྱན༔ རིན་ཆེན་རྟ་མཆོག་ཡབ་ཡུམ་ལས་སྤྲུལ་པའི༔ ས་བདག་ཆུ་བདག་སྟོབས་ལྡན་རྣམས་ཀྱང་གནས༔ འཇིག་རྟེན་ཀུན་ཏུ་དགེ་བར་བྱེད་པ་ཡི༔ མཐུན་ཕྱོགས་དཔལ་ཀུན་འདུ་བར་མངའ་གསོལ་ལོ༔ ཨོཾ་རཏྣ་ཧ་ཡ་གྲཱི་བ་བོ་དྷི་ཙིཏྟ་པུཥྚིཾ་ཀུ་རུ་ཨོཾ༔ པདྨ་རྟ་མཆོག་ཡབ་ཡུམ་བདེ་ཆེན་གྱིས༔ ལྗོན་པའི་ཚལ་གྱི་དྲི་མ་ཀུན་བསལ་ནས༔ པདྨ་དབྱིངས་ཕྱུག་སྨན་དང་པདྨའི་ཚལ༔ ཡེ་ཤེས་པཱཾ་གྱིས་དབྱངས་ལྡན་བུང་བ་འཕྲོ༔ པདྨ་རྟ་མཆོག་་ལྗོན་ཤིང་འབྲས་བུ་ཅན༔ བདེ་ཆེན་ཧཱ་ཡིག་འབྲས་བུ་ཆར་དུ་བསྙིལ༔ ཕྱོགས་བཅུ་ཀུན་ནས་བདེ་ཆེན་ཕོ་ཉ་ཡིས༔ ལྗོན་པའི་ཤིང་དང་སྨན་དང་འབྲས་བུའི་ཚོགས༔ མེ་ཏོག་ཡིད་འོང་རྣམས་ཀྱང་ལེགས་པར་བརྒྱུས༔ ཡིད་ཀྱི་བཀོད་པའི་ལྗོངས་སུ་བཀོད་པར་མཛད༔ བདུད་རྩིའི་ཆབ་དང་དྲི་བཟང་རླུང་གིས་གཡབ༔ སྒྲོན་མེ་དར་ཟབ་རྣམས་ཀྱིས་མངའ་དབུལ་བས༔ རྒྱལ་བ་དགྱེས་པའི་ཚལ་དུ་མངའ་གསོལ་ལོ༔ ཨོཾ་པདྨ་ཧ་ཡ་གྲཱི་བ་བོ་དྷི་ཙིཏྟ་པཱ་ཤཾ་ཀུ་རུ་ཧོ༔ ཀརྨ་རྟ་མཆོག་ཐུགས་རྗེའི་བྱིན་རླབས་ཀྱིས༔ ཡབ་ཡུམ་གཉིས་མེད་ཁང་ཆེན་ཁང་ཕྲན་དང༔ གཞལ་མེད་ཁང་ཆེན་བཀོད་པས་རབ་མཛེས་པ༔ འཐུག་པོ་བཀོད་པའི་ཡེ་ཤེས་ཕོ་བྲང་རྣམས༔ རྫུ་འཕྲུལ་དབང་གིས་གནས་ཁང་རྣམས་ལ་ཐིམ༔ བྱང་ཆུབ་སེམས་ཀྱི་རྒྱ་གྲམ་སྤྲིན་འཕྲོས་པས༔ གཙུག་ལག་ཁང་ཕྲན་ཐམས་ཅད་བརྟན་པར་བྱས༔ བདེ་ཆེན་བདུད་རྩི་ཁ་དོག་སྣ་ཚོགས་པའི༔ རྩི་ཡིས་ལེགས་བྱུགས་རྒྱན་གྱིས་རྣམ་པར་སྤྲས༔ རྒྱལ་པོའི་ཕོ་བྲང་ཆེན་པོར་མངའ་གསོལ་ལོ༔ ཨོཾ་ཀརྨ་ཧ་ཡ་གྲཱི་བ་བོ་དྷི་ཙིཏྟ་སིདྡྷི་ཕ་ལ་ཧཱུྃ༔ རྒྱལ་བ་རྟག་པའི་བྱང་ཆུབ་སེམས་སྤྲིན་གྱིས༔ སྐུ་ཡི་རྟེན་རྣམས་མི་དམིགས་དབྱིངས་སུ་སྦྱངས༔ ཨོཾ་ལས་འཁོར་ལོ་མཱུཾ་ལས་དྲིལ་བུ་འབར༔ དེ་ལ་བྱང་ཆུབ་སེམས་ཀྱི་གསོས་བཏབ་པས༔ རྒྱལ་བ་རྟག་པ་གངས་རི་ལྟ་བུའི་མདོག༔ འཁོར་ལོ་དྲིལ་འཛིན་གཉིས་མེད་ཡུམ་དང་འཁྲིལ༔ རྒྱལ་བ་དེ་འདྲ་དབྱིངས་ནས་སྤྱན་དྲངས་བསྟིམ༔ ཡབ་ཡུམ་བྱང་ཆུབ་སེམས་བབས་དབང་བསྐུར་བས༔ རྒྱལ་བ་རྟག་པའི་སྐུ་རུ་ལྷུན་གྱིས་གྲུབ༔ འདོད་ཡོན་ལྔ་ཡི་མཆོད་པའི་སྤྲིན་སྤྲོས་ཏེ༔ བསོད་ནམས་གསག་པའི་ཞིང་དུ་མངའ་གསོལ་ལོ༔ ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ༔ ཨོཾ་བྷྲཱུྃ་སྭ་ཧཱ༔ པདྨ་གར་དབང་བྱང་ཆུབ་སེམས་སྤྲིན་གྱིས༔ གསུང་གི་རྟེན་རྣམས་མི་དམིགས་དབྱིངས་སུ་སྦྱངས༔ ཨཱཿལས་པདྨ་པཱཾ་ལས་དྲིལ་བུ་འབར༔ དེ་ལ་བྱང་ཆུབ་སེམས་ཀྱི་གསོས་བཏབ་པས༔ པདྨ་གར་དབང་པདྨ་རཱ་གའི་མདོག༔ པདྨ་དྲིལ་འཛིན་གཉིས་མེད་ཡུམ་དང་འཁྲིལ༔ རྒྱལ་བ་དེ་འདྲ་དབྱིངས་ནས་སྤྱན་དྲངས་བསྟིམ༔ ཡབ་ཡུམ་བྱང་ཆུབ་སེམས་བབས་དབང་བསྐུར་བས༔ པདྨ་གར་དབང་སྐུ་རུ་ལྷུན་གྱིས་གྲུབ༔ འདོད་ཡོན་ལྔ་ཡི་མཆོད་པའི་སྤྲིན་སྤྲོས་ཏེ༔ བསོད་ནམས་གསག་པའི་ཞིང་དུ་མངའ་གསོལ་ལོ༔ ཨོཾ་སུ་པྲ་ཏིཥྛ་བཛྲཱ་ཡེ་སྭཱ་ཧཱ༔ ཨོཾ་པདྨ་ནཱིརྟཱི་ཤྭ་ར་ཧྲཱི༔ རྡོ་རྗེ་སེམས་དཔའ་བྱང་ཆུབ་སེམས་སྤྲིན་གྱིས༔ ཐུགས་ཀྱི་རྟེན་རྣམས་མི་དམིགས་དབྱིངས་སུ་སྦྱངས༔ ཧཱུྃ་ལས་རྡོ་རྗེ་མཱཾ་ལས་དྲིལ་བུ་འབར༔ དེ་ལ་བྱང་ཆུབ་སེམས་ཀྱི་གསོས་བཏབ་པས༔ རྡོ་རྗེ་སེམས་དཔའ་ཨིནྡྲ་ནཱི་ལའི་མདོག༔ རྡོ་རྗེ་དྲིལ་འཛིན་གཉིས་མེད་ཡུམ་དང་འཁྲིལ༔ རྒྱལ་བ་དེ་འདྲ་དབྱིངས་ནས་སྤྱན་དྲངས་བསྟིམ༔ ཡབ་ཡུམ་བྱང་ཆུབ་སེམས་བབས་དབང་བསྐུར་བས༔ རྡོ་རྗེ་སེམས་དཔའི་སྐུ་རུ་ལྷུན་གྱིས་གྲུབ༔ འདོད་ཡོན་ལྔ་ཡི་མཆོད་པའི་སྤྲིན་སྤྲོས་ཏེ༔ བསོད་ནམས་གསག་པའི་ཞིང་དུ་མངའ་གསོལ་ལོ༔ ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ༔ ཨོཾ་བཛྲ་དྷཱ་ར་ཧཱུྃ༔ རིན་ཆེན་ཉི་མ་བྱང་ཆུབ་སེམས་སྤྲིན་གྱིས༔ ཡོན་ཏན་གོས་རྒྱན་སོགསརྟེན་རྣམས་མི་དམིགས་དབྱིངས་སུ་སྦྱངས༔ སྭཱ་ལས་རིན་ཆེན་མཱཾ་ལས་དྲིལ་བུ་འབར༔ དེ་ལ་བྱང་ཆུབ་སེམས་ཀྱི་གསོས་བཏབ་པས༔ རིན་ཆེན་ཉི་མ་གསེར་གྱི་རི་བོའི་མདོག༔ རིན་ཆེན་དྲིལ་འཛིན་གཉིས་མེད་ཡུམ་དང་འཁྲིལ༔ རྒྱལ་བ་དེ་འདྲ་དབྱིངས་ནས་སྤྱན་དྲངས་བསྟིམ༔ ཡབ་ཡུམ་བྱང་ཆུབ་སེམས་བབས་དབང་བསྐུར་བས༔ རིན་ཆེན་ཉི་མའི་སྐུ་རུ་ལྷུན་གྱིས་གྲུབ༔ འདོད་ཡོན་ལྔ་ཡི་མཆོད་པའི་སྤྲིན་སྤྲོས་ཏེ༔ བསོད་ནམས་གསག་པའི་ཞིང་དུ་མངའ་གསོལ་ལོ༔ ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ༔ ཨོཾ་རཏྣ་སཱུརྻ་ཏྲཱཾ༔ ཁྲག་འཐུང་ཡབ་ཡུམ་བྱང་ཆུབ་སེམས་སྤྲིན་གྱིས༔ ཕྲིན་ལས་རྟེན་རྣམས་མི་དམིགས་དབྱིངས་སུ་སྦྱངས༔ ཧཱུྃ་ལས་རྡོ་རྗེ་མཱུཾ་ལས་དྲིལ་བུ་འབར༔ དེ་ལ་བྱང་ཆུབ་སེམས་ཀྱི་གསོས་བཏབ་པས༔ ཧེ་རུ་ཀ་དཔལ་ཆར་སྤྲིན་འཁྲུགས་པའི་མདོག༔ རྡོ་རྗེ་དྲིལ་འཛིན་གཉིས་མེད་ཡུམ་དང་འཁྲིལ༔ རྒྱལ་བ་དེ་འདྲ་དབྱིངས་ནས་སྤྱན་དྲངས་བསྟིམ༔ ཡབ་ཡུམ་བྱང་ཆུབ་སེམས་བབས་དབང་བསྐུར་བས༔ ཧེ་རུ་ཀ་དཔལ་སྐུ་རུ་ལྷུན་གྱིས་གྲུབ༔ འདོད་ཡོན་ལྔ་ཡི་མཆོད་པའི་སྤྲིན་སྤྲོས་ཏེ༔ བསོད་ནམས་གསག་པའི་ཞིང་དུ་མངའ་གསོལ་ལོ༔ ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ༔ ཨོཾ་བཛྲ་ཤྲཱི་ཧེ་རུ་ཀ་ཧཱུྃ༔ སླར་ཡང་ཡུམ་གྱི་བྱང་ཆུབ་སེམས་སྤྲོས་པས༔ བཟའ་བཏུང་མ་དག་དངོས་པོར་འཛིན་པ་སྦྱངས༔ བཟའ་བཅའ་བལྡག་གཞིབ་བཏུང་བ་རིམ་པ་བཞིན༔ མཱུཾ་ལཱཾ་མཱཾ་པཱཾ་ཏཱཾ་ཡིག་འོད་ཟེར་གྱིས༔ ཡུམ་ལྔ་འབྱུང་ལྔའི་དྭངས་བཅུད་ཀུན་བསྡུས་ནས༔ བདེ་ཆེན་བདུད་རྩིའི་བཅུད་དུ་འཁྱིལ་པ་ལས༔ དཀར་སེར་དམར་ལྗང་མཐིང་མདོག་ཡུམ་ལྔ་པོ༔ རིན་ཆེན་གཞོང་པ་བདུད་རྩིའི་བཅུང་ལྡན་ཐོགས༔ བྱང་ཆུབ་ལྷ་མོའི་ཚོགས་རྣམས་སྤྱན་དྲངས་ཏེ༔ གཉིས་མེད་བསྟིམ་ཞིང་བྱང་ཆུབ་སེམས་དབང་བསྐུར༔ འདོད་པའི་ཡོན་ཏན་ལྔ་ཡིས་མངའ་གསོལ་ཏེ༔ བདེ་བ་ཆེན་པོར་འོད་ཞུ་བདུད་རྩིར་གྱུར༔ མཱུཾ་ལཱཾ་མཱཾ་པཱཾ་ཏཱཾ་སརྦ་པཉྩ་ཨ་མྲྀཏ་ཧཱུྃ་ཧྲཱིཿཋ༔ གསང་བའི་རྟེན་ནི་ཉེ་བར་དགུག༔ ཕྱི་ནང་གསང་བས་རྒྱུད་སྦྱངས་ཏེ༔ རྒྱལ་བ་རྟག་པ་ཡབ་དང་ཡུམ༔ འཁོར་ལོ་དྲུག་གི་བདེ་གཤེགས་རྣམས༔ གཉིས་མེད་མཉམ་སྦྱོར་བྱང་ཆུབ་སེམས༔ གསང་བའི་རྟེན་ལ་འཕྲོས་པ་ཡིས༔ ལུས་ངག་ཡིད་གསུམ་འཛིན་པ་སྦྱངས༔ ཡབ་ནི་ཆོས་དང་ཡུམ་གོས་དཀར༔ བདེ་ཆེན་འཁོར་ལོར་དག་པ་དང༔ ལྕེ་ལ་གར་དབང་སྙིང་ག་རུ༔ རྡོ་རྗེ་སེམས་དཔའ་ཡབ་དང་ཡུམ༔ རྒྱལ་བ་ཉི་མ་གསང་བ་རུ༔ དཔལ་ཆེན་ཡུམ་དང་བཅས་པ་བཞུགས༔ ཡན་ལག་བཞི་རུ་རྟ་མཆོག་བཅས༔ གཟུགས་ཀྱི་ཕུང་པོ་རྟག་པའི་སྐུ༔ ཚོར་བ་ཉི་མ་འདུ་ཤེས་ཆོས༔ འདུ་བྱེད་རྟ་མཆོག་ཁྲོ་བོའི་རྒྱལ༔ རྣམ་པར་ཤེས་པ་རྡོ་རྗེ་སེམས༔ རྒྱལ་བ་རིགས་དྲུག་བཙུན་མོར་བཅས༔ དབྱིངས་ནས་སྤྱན་དྲངས་གནས་སུ་བཞུགས༔ བྱང་ཆུབ་སེམས་ཀྱིས་དབང་བསྐུར་བས༔ ཕུང་པོ་ལྔ་ནི་རྣམ་པར་དག༔ ཉོན་མོངས་དྲུག་པོ་གནས་གྱུར་པ༔ རྒྱལ་བ་རིགས་དྲུག་རང་བཞིན་ཏེ༔ ཁམས་དྲུག་དག་པ་དབྱིངས་ཕྱུག་མར༔ ཡེ་ནས་རྣམ་དག་ཐབས་ཤེས་རབ༔ འདོད་ཡོན་དྲུག་གིས་དགྱེས་པ་བསྐྱེད༔ སངས་རྒྱས་བྱང་ཆུབ་སེམས་དཔའི་ཚོགས༔ ཐིག་ལེའི་རྣམ་པར་སྤྱན་དྲངས་ནས༔ གཉིས་མེད་བསྟིམས་པས་བརྟན་པར་བྱས༔ རྒྱལ་བ་རྟག་པ་ཆེན་པོ་འམ༔ ཡང་ན་རིགས་དྲུག་གང་ཡིན་པ༔ དེ་བཞིན་མི་འགྱུར་དབྱིངས་ཕྱུག་མ༔ བཙུན་མོ་དྲུག་ཏུ་མངའ་གསོལ་ཏེ༔ ཡེ་ཤེས་རྒྱས་པར་དགྱེས་པ་བསྐྱེད༔ ཨོཾ་བཛྲ་ཨཱ་ཡུ་ཥེ་སྭཱ་ཧཱ༔ ཨོཾ་བྷྲཱུྃ་སྭཱ་ཧཱ༔ རྗེས་ཀྱི་བྱ་བ་སྦྱིན་སྲེག་དང༔ གླུ་དང་གར་ལ་སོགས་པ་ཡི༔ གསང་བའི་སྤྱོད་པ་བསྐྱང་བར་བྱ༔ རྟེན་རྣམས་ལྷག་པར་གནས་པའི་ཚུལ༔ རྨད་བྱུང་རྒྱལ་བའི་དགོངས་པ་འོ༔ ས་མ་ཡ༔ དེ་ལྟར་མཆོག་གི་སྦྱོར་བ་ཡིས༔ སྣོད་དང་བཅུད་དང་རྟེན་དང་ནི༔ བརྟེན་པ་སྐུ་གསུང་ཐུགས་ཡོན་ཏན༔ ཕྲིན་ལས་མི་ཟད་རྒྱན་གྱི་སྤྲིན༔ རྒྱལ་བ་རིགས་དྲུག་ཧེ་རུ་ཀ༔ ཁ་སྦྱོར་བདེ་ཆེན་རྡོ་རྗེའི་གྲོང༔ འོག་མིན་ཆེན་པོར་བྱིན་བརླབས་པས༔ མཐོང་ཐོས་དྲན་རེག་འགྲོ་བ་ཀུན༔ གྲོལ་བ་བཞི་དང་ལྡན་པའི་དཔལ༔ བཀྲ་ཤིས་དགེ་ཞིང་ལེགས་པའི་ཕུལ༔ འདོད་དགུའི་འབྱོར་པ་སྤྲིན་བཞིན་གཏིབས༔ སངས་རྒྱས་ཉིད་ཀྱི་མཛད་པ་སྟེ༔ རྡོ་རྗེ་ཐེག་པའི་ཐབས་ཆེན་པོ༔ འདི་ལས་གཞན་དུ་གསུངས་པ་མེད༔ དེ་ཕྱིར་ནུས་ཐོབ་སྙིང་རྗེར་ལྡན༔ ཆོ་གའི་སྦྱོར་བ་རབ་མཁས་པས༔ ཐུན་མོང་ཁྱད་པར་གསང་ཆེན་གྱི༔ ལྷག་པར་གནས་པའི་ཕྲིན་ལས་ནི༔ ཡུལ་དང་དུས་དང་གནས་སྐབས་བཞིན༔ ཇི་ལྟར་འཚམས་པར་རབ་བརྩོན་པས༔ དེ་དང་དེ་བཞིན་ཡོན་ཏན་ནི༔ འགྲོ་འདུལ་མཛད་པ་རྟག་ཏུ་གཅེས༔ ས་མ་ཡ༔ རྒྱ་རྒྱ་རྒྱ༔ ༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ བསྲེག་བླུགས་ཀྱི་ཆོ་ག་རིན་ཆེན་སྣང་བ་བཞུགས༔ ཧེ་རུ་ཀ་འདུས་པའི་ཐུགས་ཏིག་གོ༔ ཧེ་རུ་ཀ་ལ་ཕྱག་འཚལ་ལོ༔ ཡེ་ཤེས་རྒྱས་པར་བྱ་བའི་ཕྱིར༔ མཆོག་གི་བསྲེག་བླུགས་བྱ་བ་ནི༔ ཐུན་མོང་མཚན་མའི་དཀྱིལ་འཁོར་ཡང༔ ས་ཡི་ཆོ་ག་ལེགས་བྱས་ནས༔ རིན་ཆེན་ལྡན་པའི་སྟེགས་བུ་བཅའ༔ རྡོ་རྗེ་མེ་ཡི་ཕྲེང་བའི་དབུས༔ ཡུམ་གྱི་རང་བཞིན་པདྨ་བྲི༔ གེ་སར་ཐབ་ཀྱི་མཚན་མ་བྱ༔ མཚམས་ཀྱི་བདག་པོའི་དཀྱིལ་འཁོར་ནི༔ གྲུ་བཞི་རིན་ཆེན་འབར་བས་མཚན༔ འབྲས་བུ་ཅན་གྱི་བུད་ཤིང་དང༔ བཅུད་དང་ལྡན་པའི་མཆོད་རྫས་བཤམ༔ འབྱོར་པ་ལྡན་པའི་མེ་སྦར་ལ༔ ཧཱུྃ༔ དཀྱིལ་འཁོར་ཆེན་པོའི་ས་གཞི་ལ༔ རིན་ཆེན་འབར་བ་ལས་གྲུབ་པའི༔ ལས་ཀྱི་ཁང་པ་གྲུ་བཞི་པ༔ རིན་ཆེན་ཟུར་བརྒྱད་རྩེ་མོ་རུ༔ ཡེ་ཤེས་རྒྱས་པར་མཛད་པ་ཡི༔ ས་བརྒྱད་ནོན་པའི་དྲང་སྲོང་ཆེ༔ ཏྲཱཾ་ལས་སྐྱེས་པ་གསེར་གྱི་མདོག༔ ཤ་རྒྱས་གསུས་ཁྱིམ་མཆོག་ཏུ་ཆེ༔ རིན་ཆེན་ཅོད་པན་འོད་འབར་བ༔ རིན་པོ་ཆེ་དང་བགྲང་ཕྲེང་འཛིན༔ རྒྱལ་པོ་རོལ་པའི་འདུག་སྟངས་ཀྱིས༔ ནོར་བདག་དྲང་སྲོང་ཚོགས་ཀྱིས་བསྐོར༔ རིན་ཆེན་འབར་བའི་ལྗགས་སྟེང་དུ༔ ཏྲཱཾ་ཡིག་འབར་བའི་འོད་ཟེར་འབར༔ དཀོན་པའི་མཆོག་གྱུར་རིན་ཆེན་སྣོད༔ བཅུད་ལྡན་བདུད་རྩི་གསེར་གྱི་མདངས༔ དགྱེས་པར་རོལ་པའི་གཟི་བྱིན་འབར༔ རྣལ་འབྱོར་དབང་ཕྱུག་ཐམས་ཅད་ཀྱི༔ སྟོབས་ནི་རབ་ཏུ་རྒྱས་མཛད་ཅིང༔ བར་ཆད་ཀུན་ཀྱང་ཟིལ་གྱིས་མནན༔ གསང་བའི་ཕྲིན་ལས་འགྲུབ་པར་མཛོད༔ ཨོཾ་ཨགྣ་ཡེ་པུཥྚིཾ་ཀུ་རུ་སྭཱ་ཧཱ༔ བཅུད་ལྡན་མར་ཁུ་ཡམ་ཤིང་འབུལ༔ སྦྱིན་སྲེག་ཆོ་ག་མ་རྫོགས་བར༔ བསྲུང་དང་ཕྲིན་ལས་མཛད་པར་གསོལ༔ ས་མ་ཡ༔ ནུབ་ཕྱོགས་ཁ་བལྟས་སིནྡྷུའི་ཕུག༔ རི་བོ་ཟླ་གམ་ས་དམར་བླངས༔ སྟེགས་བུ་ཟླ་གམ་ནུབ་བསྟན་བཅས༔ ཤིན་ཏུ་མཛའ་བའི་ཉལ་པོའི་སས༔ དབང་གི་ལས་ཁུང་ཟླ་གམ་བཞེངས༔ དམར་ཞིང་སྐྱུར་བའི་ཤིང་བརྩེགས་ལ༔ འགུགས་བྱའི་མིང་དང་གཟུགས་དེ་ཉིད༔ སྨད་འཚོང་མ་ཡི་དོར་རྟས་དྲིལ༔ བྱང་སེམས་དཀར་དམར་ཡང་ན་ནི༔ ལུས་ཀྱི་དྲི་མ་གང་འཛོམ་བྱུགས༔ བཅུ་ཕྲག་གང་འཛོམ་བརྒྱ་དང་སྟོང༔ ཕ་རོལ་སྟོབས་དང་སྦྱར་ཏེ་བྱ༔ མྱོས་བྱེད་སྦྱར་བའི་མར་ཁུ་དང༔ མེ་ཏོག་འབྲས་བུ་དམར་པོ་བསགས༔ ཁྱེ་འུ་མཛེས་པ་སྨད་འཚོང་མའི༔ ཏིལ་མར་བྲན་པའི་མེ་སྦར་ལ༔ ཧྲཱི༔ བདེ་བ་ཆེན་པོའི་རང་བཞིན་ནི༔ ཟླ་གམ་དབང་གི་ཕོ་བྲང་དུ༔ དབང་གི་ལྷ་མོ་ཙཎྜ་ལཱི༔ པདྨའི་ལྕགས་ཀྱུ་ཞགས་པ་འཛིན༔ པདྨ་མཁའ་འགྲོ་གྲངས་མེད་སྤྲོ༔ པདྨའི་ལྗགས་ལ་ཧྲཱིཿཡིས་མཚན༔ ཧྲཱིཿལས་པདྨའི་སྣོད་ཡངས་པར༔ ཨོཾ་ལས་ཆགས་པའི་བདུད་རྩི་འཁྱིལ༔ བདེ་ཆེན་བདུད་རྩིའི་བཅུད་གསོལ་བས༔ འཁོར་བཅས་བདེ་བ་ཆེན་པོས་མྱོས༔ འོད་སྤྲོས་དམིགས་བྱ་དེ་ཉིད་ཀྱི༔ དབྱིངས་ནས་པདྨའི་ལྕགས་ཀྱུས་བཟུང༔ ཞགས་པས་བཅིངས་ནས་གཟུགས་ལ་དབབ༔ མཁའ་འགྲོ་མ་དང་གཉིས་མེད་བསྟིམ༔ ཧྲཱི༔ པདྨ་གར་གྱི་ལྷ་མོ་ནི༔ སྲིད་པ་གསུམ་གྱི་ཡིད་འགུགས་མ༔ དམ་ཚིག་ཅན་ལ་སྟོངས་གྲོགས་མཛོད༔ དབང་གི་ཕྲིན་ལས་མ་ལུས་པ༔ རྣལ་འབྱོར་གསང་བའི་གྲོགས་ཡིན་པས༔ མཁའ་འགྲོ་ཆེན་མོ་དུས་ལ་བབས༔ དམ་ཚིག་ཆེན་པོའི་ཕྲིན་ལས་མཛོད༔ ཨོཾ་པདྨ་ཌཱ་ཀི་ནཱི་ཙཎྜ་ལཱི་ཝཱ་ཤཾ་ཀུ་རུ་ཧོ༔ མཆོད་རྫས་བྱང་བུ་ཐམས་ཅད་བསྲེག༔ མཁའ་འགྲོ་རང་དང་གཉིས་མེད་བསྟིམ༔ དམིགས་བྱ་བདག་གི་དབང་དུ་གྱུར༔ ཕྱིར་མི་ལྡོག་པའི་ང་རྒྱལ་བསྐྱེད༔ ས་མ་ཡ༔ དེ་ནས་གསོ་བའི་ཆོ་ག་ནི༔ རྒྱས་པའི་ཐབ་ཁུང་གྲུ་བཞི་པར༔ བདུད་རྩི་འབྲས་བུ་ལྡན་པའི་ཤིང༔ རྩི་མར་དཱུརྦ་ཞོ་མཆོག་ཟན༔ བསྲེག་ལ་འབྱོར་ལྡན་མེ་སྦར་ནས༔ ཧཱུྃ༔ ཚེ་དང་བསོད་ནམས་ཡེ་ཤེས་དང༔ བདེ་བ་ཆེན་པོ་རྒྱས་མཛད་པའི༔ རྒྱལ་བའི་རིན་ཆེན་ཕོ་བྲང་ནི༔ གྲུ་བཞི་ནོར་བུ་འབར་བའི་དབུས༔ མཱཾ་ལས་རིན་ཆེན་མཁའ་འགྲོ་མ༔ ཞལ་གཅིག་ཕྱག་བཞི་གསེར་གྱི་མདོག༔ རིན་ཆེན་གཏེར་གྱི་བུམ་པ་དང༔ ལྕགས་ཀྱུ་ཞགས་པ་འོད་འབར་འཛིན༔ རིན་ཆེན་རྒྱན་ལྡན་པད་སྐྱིལ་བཞུགས༔ རིན་ཆེན་མཁའ་འགྲོ་འབུམ་དང་བཅས༔ མཱུཾ་ལས་རིན་ཆེན་ལྗགས་ཀྱི་འོད༔ རིན་ཆེན་བྷནྡྷའི་སྣོད་ནང་དུ༔ ཤ་ལྔ་བདུད་རྩི་ཞུ་བའི་བཅུད༔ བཟའ་བཏུང་བཟང་པོའི་ཕྲད་དང་བཅས༔ དགྱེས་ཤིང་ཚིམ་པར་གསོལ་བ་ཡིས༔ རིན་ཆེན་དཔལ་གྱི་བེ་འུ་ནས༔ འོད་ཟེར་ཉི་མ་ཤར་བའི་མདངས༔ བསྒྲུབ་བྱའི་ལུས་ལ་ཁྱབ་པ་ཡིས༔ ཚེ་དང་བསོད་ནམས་ཡེ་ཤེས་དང༔ བདེ་བ་ཆེན་པོ་རྒྱས་པར་མཛོད༔ ཧཱུྃ༔ རིན་ཆེན་མཁའ་འགྲོ་མཐུ་རྩལ་ཅན༔ ཆོས་ཀྱི་དབྱིངས་ཀྱང་རྒྱས་མཛད་ན༔ ཡེ་ཤེས་ལྷ་ཚོགས་སྨོས་ཅི་དགོས༔ ཁྱོད་ཀྱི་ཕྲིན་ལས་དུས་ལ་བབས༔ ཚེ་དང་བསོད་ནམས་ཡེ་ཤེས་དང༔ བདེ་བ་ཆེན་པོ་རྒྱས་པར་མཛོད༔ ཨོཾ་རཏྣ་ཌཱ་ཀི་ནཱི་པུཥྚིཾ་ཀུ་རུ་ཨོཾ༔ བདུད་རྩི་བསྲེག་རྫས་ཀུན་འབུལ་ལ༔ བུར་སྦྲང་འོ་མའི་བཏུང་བ་ལ༔ མཁའ་འགྲོ་འོད་ཞུ་བདུད་རྩིར་བསམ༔ ཐབ་ཀྱི་མེ་ལ་ལེགས་བསྐོལ་ནས༔ མཁའ་འགྲོའི་རང་བཞིན་བདུད་རྩི་ཉིད༔ བཏུང་བས་རྩ་ཁམས་ཐམས་ཅད་གང༔ བདེ་ཆེན་ཡེ་ཤེས་ཐིག་ལེ་འཕེལ༔ དྭངས་མའི་འོད་ཟེར་ཕྱོགས་བཅུར་འཕྲོས༔ ཚེ་དང་བསོད་ནམས་རྒྱས་པར་བསམ༔ ས་མ་ཡ༔ དངོས་གཞི་མཆོག་གི་བསྲེག་བླུགས་ནི༔ ཐུན་མོང་གོང་གི་རྫས་རྣམས་བསྲེག༔ ཐུན་མོང་མ་ཡིན་གནད་ལྡན་པས༔ ཧཱུྃ༔ ཆོས་དབྱིངས་ཡེ་ཤེས་རྒྱས་པའི་ཕྱིར༔ དཔའ་བོ་རྟག་པའི་རྡོ་རྗེའི་སྐུ༔ དཔའ་མོ་རྟག་པའི་དབྱིངས་ཕྱུག་མ༔ ཆོས་དབྱིངས་བདེ་ཆེན་རྒྱས་བྱེད་པའི༔ ཆ་ལུགས་སྤྱོད་པ་སྣ་ཚོགས་པས༔ བདེ་བ་རྒྱས་པ་ལས་བྱུང་བའི༔ ཐབས་དང་ཤེས་རབ་གཟར་བུ་ནི༔ རྡོ་རྗེ་པདྨའི་སྦུབས་ལྡན་པ༔ ནོར་བུ་གེ་སར་རྒྱས་པའི་དབུས༔ ཨོཾ་དང་མཱུཾ་གྱིས་མཚན་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བདེ་བ་ཆེན་པོའི་རྫས་ཀྱིས་གཏམ༔ ཆོས་དབྱིངས་མཛེས་པར་བྱ་བའི་ཕྱིར༔ འཁོར་ལོ་འབར་བའི་འདུག་སྟངས་ཀྱིས༔ བྱང་ཆུབ་མཆོག་གི་ཕྱག་རྒྱས་བསྡམ༔ རྟག་པའི་མཚན་ཉིད་ཀུན་ཚང་བ༔ ཟླུམ་པོ་ཡུམ་གྱི་ཐབ་ཁུང་དུ༔ རིན་ཆེན་འཁོར་ལོའི་དཀྱིལ་འཁོར་གསལ༔ གཟུགས་ཀྱི་ཕུང་པོའི་བུད་ཤིང་ལ༔ ཉོན་མོངས་གཏི་མུག་མར་ཁུས་བྲན༔ ཆོས་དབྱིངས་ཡེ་ཤེས་མེ་སྦར་ནས༔ རྒྱལ་བ་རྟག་པའི་ཞལ་ཧོམ་དུ༔ བདེ་ཆེན་བྱང་ཆུབ་སེམས་ཕུལ་བས༔ སྐུ་ཡི་ཐིག་ལེ་ཀུན་འཕེལ་ནས༔ མཚན་དང་དཔེ་བྱད་ཡོངས་སུ་རྫོགས༔ ཨོཾ་མ་ཧཱ་ཨ་ནུ་རཱ་ག་ཎ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ༔ ཧཱུྃ༔ མེ་ལོང་ཡེ་ཤེས་རྒྱས་པའི་ཕྱིར༔ དཔའ་བོ་བཛྲ་ཧེ་རུ་ཀ༔ དཔའ་མོ་བཛྲ་དབྱིངས་ཕྱུག་མ༔ མེ་ལོང་བདེ་ཆེན་རྒྱས་བྱེད་པའི༔ ཆ་ལུགས་སྤྱོད་པ་སྣ་ཚོགས་པས༔ བདེ་བ་རྒྱས་པ་ལས་བྱུང་བའི༔ ཐབས་དང་ཤེས་རབ་གཟར་བུ་ནི༔ རྡོ་རྗེ་པདྨའི་སྦུབས་ལྡན་པ༔ ནོར་བུ་གེ་སར་རྒྱས་པའི་དབུས༔ ཧཱུྃ་དང་མཱུཾ་གྱིས་མཚན་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བདེ་བ་ཆེན་པོའི་རྫས་ཀྱིས་གཏམ༔ མེ་ལོང་མཛེས་པར་བྱ་བའི་ཕྱིར༔ རྡོ་རྗེ་འབར་བའི་འདུག་སྟངས་ཀྱིས༔ རྡོ་རྗེ་འབར་བའི་ཕྱག་རྒྱས་བསྡམ༔ ཁྲག་འཐུང་མཚན་ཉིད་ཀུན་ཚང་བ༔ གྲུ་གསུམ་ཡུམ་གྱི་ཐབ་ཁུང་དུ༔ རྡོ་རྗེ་ནོར་བུའི་དཀྱིལ་འཁོར་གསལ༔ རྣམ་ཤེས་ཕུང་པོའི་བུད་ཤིང་ལ༔ ཉོན་མོངས་ཞེ་སྡང་མར་ཁུས་བྲན༔ མེ་ལོང་ཡེ་ཤེས་མེ་སྦར་ནས༔ ཧེ་རུ་ཀ་ཡི་ཞལ་ཧོམ་དུ༔ བདེ་ཆེན་བྱང་ཆུབ་སེམས་ཕུལ་བས༔ ཐུགས་ཀྱི་ཐིག་ལེ་ཀུན་འཕེལ་ནས༔ ཡེ་ཤེས་ལྔ་ཡི་ཉམས་དང་ལྡན༔ ཨོཾ་མ་ཧཱ་ཨ་ནུ་རཱ་ག་ཎ་ཨཱ་དརྴ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ༔ ཧཱུྃ༔ མཉམ་ཉིད་ཡེ་ཤེས་རྒྱས་པའི་ཕྱིར༔ དཔའ་བོ་རྡོ་རྗེ་ཉི་མའི་སྐུ༔ དཔའ་མོ་རིན་ཆེན་དབྱིངས་ཕྱུག་མ༔ མཉམ་ཉིད་བདེ་ཆེན་རྒྱས་བྱེད་པའི༔ ཆ་ལུགས་སྤྱོད་པ་སྣ་ཚོགས་པས༔ བདེ་བ་རྒྱས་པ་ལས་བྱུང་བའི༔ ཐབས་དང་ཤེས་རབ་གཟར་བུ་ནི༔ རྡོ་རྗེ་པདྨའི་སྦུབས་ལྡན་པ༔ ནོར་བུ་གེ་སར་རྒྱས་པའི་དབུས༔ སྭཱ་དང་མཱཾ་གྱིས་མཚན་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བདེ་བ་ཆེན་པོའི་རྫས་ཀྱིས་གཏམ༔ མཉམ་ཉིད་མཛེས་པར་བྱ་བའི་ཕྱིར༔ རིན་ཆེན་འབར་བའི་འདུག་སྟངས་ཀྱིས༔ རིན་ཆེན་མཆོག་གི་ཕྱག་རྒྱས་བསྡམ༔ རིན་ཆེན་མཚན་ཉིད་ཀུན་ཚང་བ༔ གྲུ་བཞི་ཡུམ་གྱི་ཐབ་ཁུང་དུ༔ རིན་ཆེན་ནོར་བུའི་དཀྱིལ་འཁོར་གསལ༔ ཚོར་བའི་ཕུང་པོའི་བུད་ཤིང་ལ༔ ཉོན་མོངས་ང་རྒྱལ་མར་ཁུས་བྲན༔ མཉམ་ཉིད་ཡེ་ཤེས་མེ་སྦར་ནས༔ རྒྱལ་བ་ཉི་མའི་ཞལ་ཧོམ་དུ༔ བདེ་ཆེན་བྱང་ཆུབ་སེམས་ཕུལ་བས༔ ཡོན་ཏན་ཐིག་ལེ་ཀུན་འཕེལ་ནས༔ འཁོར་དང་ཞིང་ཁམས་ཡོངས་སུ་འཕེལ༔ ཨོཾ་མ་ཧཱ་ཨ་ནུ་རཱ་ག་ཎ་ས་མཱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ༔ ཧཱུྃ༔ སོར་རྟོག་ཡེ་ཤེས་རྒྱས་པའི་ཕྱིར༔ དཔའ་བོ་པདྨ་གར་དབང་སྐུ༔ དཔའ་མོ་པདྨ་དབྱིངས་ཕྱུག་མ༔ སོར་རྟོག་བདེ་ཆེན་རྒྱས་བྱེད་པའི༔ ཆ་ལུགས་སྤྱོད་པ་སྣ་ཚོགས་པས༔ བདེ་བ་རྒྱས་པ་ལས་བྱུང་བའི༔ ཐབས་དང་ཤེས་རབ་གཟར་བུ་ནི༔ རྡོ་རྗེ་པདྨའི་སྦུབས་ལྡན་པ༔ ནོར་བུ་གེ་སར་རྒྱས་པའི་དབུས༔ ཧྲཱིཿདང་པཱཾ་གྱིས་མཚན་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བདེ་བ་ཆེན་པོའི་རྫས་ཀྱིས་གཏམ༔ སོར་རྟོག་མཛེས་པར་བྱ་བའི་ཕྱིར༔ པདྨ་འབར་བའི་འདུག་སྟངས་ཀྱིས༔ པདྨ་མཆོག་གི་ཕྱག་རྒྱས་བསྡམ༔ པདྨའི་མཚན་ཉིད་ཀུན་ཚང་བ༔ ཟླ་གམ་ཡུམ་གྱི་ཐབ་ཁུང་དུ༔ རིན་ཆེན་པདྨའི་དཀྱིལ་འཁོར་གསལ༔ འདུ་ཤེས་ཕུང་པོའི་བུད་ཤིང་ལ༔ ཉོན་མོངས་འདོད་ཆགས་མར་ཁུས་བྲན༔ སོར་རྟོག་ཡེ་ཤེས་མེ་སྦར་ནས༔ པདྨ་གར་དབང་ཞལ་ཧོམ་དུ༔ བདེ་ཆེན་བྱང་ཆུབ་སེམས་ཕུལ་བས༔ གསུང་གི་ཐིག་ལེ་ཀུན་འཕེལ་ནས༔ གསུང་དབྱངས་དྲུག་ཅུའི་ཆོས་སྒྲ་འཕེལ༔ ཨོཾ་མ་ཧཱ་ཨ་ནུ་རཱ་ག་ཎ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ༔ ཧཱུྃ༔ བྱ་གྲུབ་ཡེ་ཤེས་རྒྱས་པའི་ཕྱིར༔ དཔའ་བོ་རྟ་མཆོག་རོལ་པའི་སྐུ༔ དཔའ་མོ་ལས་ཀྱི་དབྱིངས་ཕྱུག་མ༔ བྱ་གྲུབ་བདེ་ཆེན་རྒྱས་བྱེད་པའི༔ ཆ་ལུགས་སྤྱོད་པ་སྣ་ཚོགས་པས༔ བདེ་བ་རྒྱས་པ་ལས་བྱུང་བའི༔ ཐབས་དང་ཤེས་རབ་གཟར་བུ་ནི༔ རྡོ་རྗེ་པདྨའི་སྦུབས་ལྡན་པ༔ ནོར་བུ་གེ་སར་རྒྱས་པའི་དབུས༔ ཧཱ་དང་ཏཱཾ་གྱིས་མཚན་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བདེ་བ་ཆེན་པོའི་རྫས་ཀྱིས་གཏམས༔ བྱ་གྲུབ་མཛེས་པར་བྱ་བའི་ཕྱིར༔ སྣ་ཚོགས་འབར་བའི་འདུག་སྟངས་ཀྱིས༔ སྣ་ཚོགས་རྡོ་རྗེའི་ཕྱག་རྒྱས་བསྡམ༔ ལས་ཀྱི་མཚན་ཉིད་ཀུན་ཚང་བ༔ སྣ་ཚོགས་ཡུམ་གྱི་ཐབ་ཁུང་དུ༔ རིན་ཆེན་རལ་གྲིའི་དཀྱིལ་འཁོར་གསལ༔ འདུ་བྱེད་ཕུང་པོའི་བུད་ཤིང་ལ༔ ཉོན་མོངས་ཕྲག་དོག་མར་ཁུས་བྲན༔ བྱ་གྲུབ་ཡེ་ཤེས་མེ་སྦར་ནས༔ རྟ་མཆོག་རོལ་པའི་ཞལ་ཧོམ་དུ༔ བདེ་ཆེན་བྱང་ཆུབ་སེམས་ཕུལ་བས༔ ཕྲིན་ལས་ཐིག་ལེ་ཀུན་འཕེལ་ནས༔ ཕྲིན་ལས་རྒྱུན་ཆད་མེད་པར་འཕེལ༔ ཨོཾ་མ་ཧཱ་ཨ་ནུ་རཱ་ག་ཎ་ཀྲྀ་ཏྱཱ་ནུཥྛཱ་ན་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ༔ ཧཱུྃ༔ འོད་གསལ་ཡེ་ཤེས་རྒྱས་པའི་ཕྱིར༔ དཔའ་བོ་རྡོ་རྗེ་སེམས་དཔའི་སྐུ༔ དཔའ་མོ་རྡོ་རྗེ་དབྱིངས་ཕྱུག་མ༔ འོད་གསལ་ཡེ་ཤེས་རྒྱས་བྱེད་པའི༔ ཆ་ལུགས་སྤྱོད་པ་སྣ་ཚོགས་པས༔ བདེ་བ་རྒྱས་པ་ལས་བྱུང་བའི༔ ཐབས་དང་ཤེས་རབ་གཟར་བུ་ནི༔ རྡོ་རྗེ་པདྨའི་སྦུབས་ལྡན་པ༔ ནོར་བུ་གེ་སར་རྒྱས་པའི་དབུས༔ ཧཱུྃ་དང་ལཱཾ་གྱིས་མཚན་པ་ལས༔ བདུད་རྩི་བྱང་ཆུབ་སེམས་ཀྱི་སྤྲིན༔ བདེ་བ་ཆེན་པོའི་རྫས་ཀྱིས་གཏམས༔ འོད་གསལ་ཡེ་ཤེས་མཛེས་བྱའི་ཕྱིར༔ རྡོ་རྗེ་མཆོག་གི་འདུག་སྟངས་ཀྱིས༔ རྡོ་རྗེ་མཆོག་གི་ཕྱག་རྒྱས་བསྡམ༔ རྡོ་རྗེའི་མཚན་ཉིད་ཀུན་ཚང་བ༔ ཟླུམ་པོ་ཡུམ་གྱི་ཐབ་ཁུང་དུ༔ རིན་ཆེན་རྡོ་རྗེའི་དཀྱིལ་འཁོར་གསལ༔ ཕུང་པོ་ལྔ་ཡི་བུད་ཤིང་ལ༔ ཉོན་མོངས་ལྔ་ཡི་མར་ཁུས་དྲན༔ འོད་གསལ་ཡེ་ཤེས་མེ་སྦར་ནས༔ རྡོ་རྗེ་སེམས་དཔའི་ཞལ་ཧོམ་དུ༔ བདེ་ཆེན་བྱང་ཆུབ་སེམས་ཕུལ་བས༔ འོད་གསལ་ཡེ་ཤེས་ཐིག་ལེ་འཕེལ༔ སྐུ་ལྔ་ཡེ་ཤེས་ལྷུན་གྲུབ་ཤོག༔ ཨོཾ་མ་ཧཱ་ཨ་ནུ་རཱ་ག་ཎ་མ་ཧཱ་སུ་ཁ་སུ་ར་སཏྭཾ་སྭ་བྷཱ་བ་ཨཱཏྨ་ཀོ྅་ཧཾ༔ རྗེས་ཀྱི་བྱ་བ་གླུ་གར་གྱིས༔ བདེ་བ་ཆེན་པོའི་ཉམས་བསྐྱང་ངོ༔ འཇིག་རྟེན་མེ་ལྷ་རང་གནས་གཤེགས༔ དེ་ལྟར་མཆོག་གི་སྦྱིན་སྲེག་གིས༔ ཡེ་ཤེས་རབ་རྒྱས་སེམས་ཅན་ཀུན༔ མཆོག་གི་སྦྱིན་སྲེག་གཅིག་པུ་ཡིས༔ སངས་རྒྱས་ས་ལ་མཉམ་པར་སྦྱོར༔ ས་མ་ཡ༔ ཕྱི་ནང་གསང་བའི་རྡོ་རྗེའི་ཐབ༔ སྣང་སྟོང་གསལ་སྟོང་བདེ་སྟོང་ཆེའི༔ ཡེ་ཤེས་དྲུག་གི་མེ་འབར་བ༔ རྒྱལ་བ་དྲུག་གི་ལྷ་ཡི་ཞལ༔ ཐུན་མོང་ཁྱད་པར་བླ་མེད་ཀྱི༔ བདུད་རྩིའི་མཆོད་པས་དགྱེས་ཚིམས་མཐུས༔ ཕྲིན་ལས་བཞི་པོ་རྩོལ་མེད་འགྲུབ༔ ཐ་མལ་སྣང་ཞེན་བག་ཆགས་བསྲེགས༔ བདེ་ཆེན་ཡེ་ཤེས་གཟི་བརྗིད་འབར༔ དྭངས་མ་དྲུག་པོ་ལས་རུང་བས༔ ཉོན་མོངས་དྲུག་གི་དུག་བཅོམ་ནས༔ ཡེ་ཤེས་དྲུག་པོ་མཁའ་ཁྱབ་འཕེལ༔ རྒྱལ་བ་རིགས་དྲུག་མངོན་དུ་བྱེད༔ དེ་ཕྱིར་ནུས་ཐོབ་རྣལ་འབྱོར་པས༔ གནས་དུས་གདུལ་བྱའི་ཁྱད་པར་བཞིན༔ ཐུན་མོང་མཆོག་གི་བསྲེག་བླུགས་ནི༔ ཆོ་ག་བཞིན་དུ་བརྩོན་པར་བྱ༔ མར་ཁུ་བྲལ་བའི་བསྲེག་བླུགས་དང༔ བགྲང་ཕྲེང་མེད་པའི་བཟླས་བརྗོད་དང༔ སྦྱིན་སྲེག་མ་བྱས་ལྷག་གནས་ནི༔ ཤིང་རྟ་འཕང་ལོ་ཞིག་པ་བཞིན༔ དེ་ཕྱིར་ཐུན་མོང་ཁྱད་པར་གྱི༔ བཅུད་ལྡན་བདུད་རྩིའི་རྒྱུན་གྱི་སྲོག༔ ཧེ་རུ་ཀ་དཔལ་ཐིག་ལེར་འདྲེས༔ དངོས་གྲུབ་རྣམ་གཉིས་འདི་ལས་འགྲུབ༔ ཉམས་ཆག་ཞི་ཞིང་རིག་རྩལ་རྒྱས༔ ལན་རེར་འཕེལ་བའི་བདེ་ཆེན་གྱི༔ གཟི་བྱིན་བཟོད་པར་དཀའ་བ་ཡིས༔ ཁྲག་འཐུང་ཆེན་པོ་ཡབ་ཡུམ་དང༔ གནས་ཡུལ་དུར་ཁྲོད་ཐམས་ཅད་པའི༔ དཔའ་བོ་དང་ནི་རྣལ་འབྱོར་མ༔ དབང་མེད་ཐུགས་དམ་རྒྱུད་བསྐུལ་ཏེ༔ རྣལ་འབྱོར་མཆོག་གི་གྲོགས་མཛད་ནས༔ ཇི་ལྟར་འདོད་པའི་དངོས་གྲུབ་ནི༔ རྩོལ་མེད་ངང་གིས་འཕེལ་ཞིང་བརྟན༔ དེ་བས་ཕྱི་རབས་ཛོ་ཀི་རྣམས༔ བརྩོན་པས་འདི་ལ་སྒྲུབ་པར་གྱིས༔ བླ་མེད་ཡེ་ཤེས་རྒྱས་པར་འགྱུར༔ ས་མ་ཡ༔ རྒྱ་རྒྱ་རྒྱ༔ ༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ ཚོར་གྲོལ་གླུའི་སྙིང་པོ་རིན་ཆེན་སྒྲ་དབྱངས་བཞུགས༔ ཧེ་རུ་ཀ་འདུས་པའི་ཐུགས་ཏིག་གོ༔ ཧེ་རུ་ཀ་ལ་ཕྱག་འཚལ་ལོ༔ རྣལ་འབྱོར་ཉམས་རྟོགས་སྤར་བའི་ཕྱིར༔ རྡོ་རྗེ་གླུ་ཡི་སརྒ་ནི༔ ཨོཾ༔་་་་་རྒྱལ་བ་རྟག་པའི་གླུ །ཐབས་དང་ཤེས་རབ་མཛེས་པའི་གཟུགས༔ རྣལ་འབྱོར་རྣམས་ཀྱི་སྤྱན་ལ་དགྱེས༔ ཟིམ་བུར་བལྟ་ཞིང་འཛུམ་པར་བྱེད༔ སྣང་སྟོང་མེ་ལོང་གཟུགས་བརྙན་བཞིན༔ གཟུགས་ཀྱི་ཕུང་པོ་སྣང་ཡོད་ཀུན༔ དག་པ་དེ་ཡི་ངང་དུ་འཆར༔ བདེ་བ་རྩ་བརྒྱད་པདྨ་རུ༔ འཁོར་ལོ་བརྩེགས་པའི་རྩེ་མོ་ན༔ ནོར་བུ་འབར་བ་རྒྱས་པ་ཡིས༔ འཁྲིག་པའི་རྩེ་མོ་འཐབ་པ་ལས༔ བཞིན་ཀྱང་སྡུད་པར་བྱེད་པ་དང༔ གླུ་ཡང་ཅ་ཅོ་འདོན་པར་བྱེད༔ ཨོཾ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ ཨོཾ༔་་་་་པདྨ་གར་དབང་གི་གླུ །ཐབས་དང་ཤེས་རབ་བདེ་བའི་ཚིག༔ རྣལ་འབྱོར་རྣམས་ཀྱི་སྙན་ལ་དགྱེས༔ བདེ་བ་གཡོ་བའི་ཐབས་རྨད་བྱུང༔ བྲག་ཅ་དང་ནི་སྒྲ་བརྙན་བཞིན༔ འདུ་ཤེས་སོ་སོར་རྟོག་པ་ཡི༔ བདེ་བ་དག་ཀྱང་བཟུང་བར་བྱེད༔ མེ་ཡི་པདྨ་འབར་བ་ཡིས༔ རྡོ་རྗེ་ནོར་བུ་སྲུབ་པར་བྱེད༔ བྱང་ཆུབ་སེམས་རྣམས་བཞུ་བར་བྱེད༔ བཀྲག་དང་མདངས་རྣམས་འཕེལ་བར་བྱེད༔ བཞིན་གྱི་པདྨ་ཟིལ་པ་ཕྲུམ༔ ཨོཾ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ ཨོཾ༔་་་་རྡོ་རྗེ་ཉི་མའི་གླུ །ཨུཏྤལ་ཙནྡན་དྲི་འཐུལ་བས༔ རྣལ་འབྱོར་རྣམས་ཀྱི་ཤངས་ལ་དགྱེས༔ ཚོར་བ་བདེ་འམ་སྡུག་བསྔལ་ཀྱང༔ བདེ་བ་ཆེན་པོར་འཆར་བར་བྱེད༔ མཆུ་ཡི་པདྨ་ཟུམ་པ་ཡིས༔ རྡོ་རྗེ་ནོར་བུའི་མགུལ་ནས་འཁྱུད༔ ཐབས་ཤེས་བདེ་ཆེན་ཆུ་ཡང་འབྲུབ༔ ཐབས་ཀྱི་ཁུར་བ་དབུགས་འབྱིན་ཅིང༔ ཤེས་རབ་ཆུ་བྱ་མཐིང་རིལ་སྐད༔ ཞི་བ་ཕྱོགས་གཅིག་ཀྱང་སློང་བྱེད༔ ཨོཾ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ ཨོཾ༔་་་་ཧེ་རུ་ཀའི་གླུ །ཐབས་དང་ཤེས་རབ་ལྗགས་ཀྱིས་རོལ༔ རྣལ་འབྱོར་མྱོང་བས་ལྗགས་ལ་དགྱེས༔ རོ་བརྒྱ་ལྡན་པ་འདི་ཡིན་ཏེ༔ རྣམ་པར་ཤེས་པའི་རྟོག་པ་ཀུན༔ རོ་བརྒྱ་ལྡན་པ་འདི་ཡིས་འགག༔ ཁྲོ་མོ་འབར་བའི་ཆོས་འབྱུང་དུ༔ རྡོ་རྗེའི་གཏུན་གྱིས་དྲག་པོར་བརྡུང༔ ཐབས་དང་ཤེས་རབ་ཐིམ་པར་བྱེད༔ ཨོཾ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ ཨོཾ༔་་་་་རྟ་མཆོག་གི་གླུ །ཐབས་ཤེས་ལུས་ཀྱི་རེག་བྱ་ནི༔ རྣལ་འབྱོར་བསྒུལ་སྤྱོད་བདེ་བ་ཆེས༔ འདུ་བྱེད་རྟོག་པ་ཀུན་འགགས་ཏེ༔ ཁྱད་པར་རྩ་ཡི་རེག་བྱ་ནི༔ རལ་གྲི་འཁོར་ལོ་ལྟ་བུ་ཡིས༔ ཐབས་ཤེས་ཕན་ཚུན་སྨིན་པ་ལས༔ འཛིན་པའི་རྟོག་པ་ཀུན་གཅོད་དོ༔ ཨོཾ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ ཨོཾ༔་་་་རྡོ་རྗེ་སེམས་དཔའི་གླུ །ཐབས་ཤེས་ཆོས་ཀྱི་ཁམས་དག་གིས༔ སྟོང་པའི་གཟུགས་སུ་སྣང་བ་ཀུན༔ རྟོག་མེད་དབྱིངས་སུ་གཉིས་སྣང་ནུབ༔ སྲོག་རྩོལ་དབུ་མར་ཐིམ་གྱུར་ཏེ༔ ཕྱི་དང་ནང་དང་གསང་བ་ཀུན༔ གཡོ་བ་མེད་པར་སྡོད་པར་བྱེད༔ དོན་རྣམས་མ་ལུས་འདི་ཡིས་འགྲུབ༔ ཨོཾ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ རྨད་བྱུང་རྡོ་རྗེའི་གླུ་འདི་ནི༔ དེ་བཞིན་གཤེགས་ཀུན་ཐུགས་ལ་གནས༔ རྣལ་འབྱོར་པ་དང་རྣལ་འབྱོར་མ༔ བདེ་ལྡན་གང་ཞིག་སུས་བླངས་པ༔ སངས་རྒྱས་སེམས་ཅན་མཉམ་པར་སྦྱོར༔ ཚོར་བ་ཙམ་གྱིས་གྲོལ་གྱུར་ན༔ དོན་གྱི་རྗེས་སུ་མཉམ་བཞག་པས༔ བདེ་ཆེན་ཡེ་ཤེས་རབ་སྤེལ་ཏེ༔ རྡོ་རྗེའི་ཀུན་ཏུ་སྤྱོད་ལྡན་ན༔ མི་འགྱུར་སྐུ་དང་འགག་མེད་གསུང༔ ལྷན་ཅིག་སྐྱེས་དགའི་རང་བཞིན་ཐུགས༔ མྱུར་དུ་འགྲུབ་པ་སྨོས་ཅི་དགོས༔ དེ་ཕྱིར་ཕྱི་རབས་རྣལ་འབྱོར་རྣམས༔ འདི་ལ་རྟག་ཏུ་ནན་ཏན་གྱིས༔ བདེ་མཆོག་བདེ་བ་ཆེན་པོའི་དབྱིངས༔ ཡེ་ཤེས་རྒྱས་པར་གདོན་མི་ཟ༔ ས་མ་ཡ༔ རྒྱ་རྒྱ་རྒྱ༔ ༁ྃ༔ བདེ་མཆོག་སངས་རྒྱས་མཉམ་སྦྱོར་ལས༔ མཐོང་གྲོལ་གར་གྱི་ཆོ་ག་རིན་ཆེན་རོལ་པ་བཞུགས༔ ཧེ་རུ་ཀ་འདུས་པའི་ཐུགས་ཏིག་གོ༔ ཧེ་རུ་ཀ་ལ་ཕྱག་འཚལ་ལོ༔ རྡོ་རྗེ་གར་གྱི་ཆོ་ག་ནི༔ རྣལ་འབྱོར་ཐམས་ཅད་ཆས་སུ་ཞུགས༔ བདེ་ཆེན་ཚོགས་ཀྱི་སྤྱོད་པ་བསྐྱང༔ དང་པོ་ཕྱི་ཡི་གར་དྲུག་ནི༔ ཧཱུྃ༔ བྱང་ཆུབ་མཆོག་གི་ཕྱག་རྒྱ་ཡིས༔ རྒྱལ་བ་རྟག་པའི་སྐུ་འབར་ཞིང༔ སྤྱི་བོའི་གཙུག་ཏུ་བཞག་པ་ན༔ རྒྱལ་བའི་སྐུ་རྣམས་འགྲུབ་པར་བྱེད༔ ཨོཾ་བཛྲ་ཨཱ་ཡུ་ཥེ་སྭཱ་ཧཱ༔ ཧཱུྃ༔ པདྨ་འབར་བའི་ཕྱག་རྒྱ་ནི༔ བསྡམས་ཤིང་མགྲིན་པར་བཞག་པ་ཉིད༔ པདྨ་གར་དབང་ཕྱག་རྒྱ་སྟེ༔ རྒྱལ་བའི་གསུང་དབྱངས་འགྲུབ་པར་བྱེད༔ ཨོཾ་པདྨ་དྷཱ་ར་ཧྲཱི༔ ཧཱུྃ༔ རྡོ་རྗེ་འབར་བའི་ཕྱག་རྒྱ་ནི༔ ཐུགས་ཀའི་ཐད་དུ་བཀན་བྱེད་པ༔ རྡོ་རྗེ་སེམས་དཔའི་ཕྱག་རྒྱ་ཡིས༔ ཡེ་ཤེས་ལྔ་ནི་འགྲུབ་པར་བྱེད༔ ཨོཾ་བཛྲ་དྷཱ་ར་ཧཱུྃ༔ ཧཱུྃ༔ རིན་ཆེན་འབར་བའི་ཕྱག་རྒྱ་ནི༔ ལྟེ་བའི་ཐད་དུ་འཁྱུད་པ་སྟེ༔ རིན་ཆེན་ཉི་མའི་ཕྱག་རྒྱ་འདིས༔ རྒྱལ་བའི་ཡོན་ཏན་རྒྱས་པར་མཛད༔ ཨོཾ་རཏྣ་སཱུརྻ་ཏྲཱཾ༔ ཧཱུྃ༔ རྡོ་རྗེ་ཁྲོ་བོའི་ཕྱག་རྒྱ་ནི༔ གསང་བའི་ཐད་དུ་བསྐོར་བྱས་པས༔ སངས་རྒྱས་རྣམས་ཀྱང་སྐྲག་འགྱུར་ན༔ དྲེགས་པའི་ཚོགས་རྣམས་སྨོས་ཅི་དགོས༔ ཨོཾ་བཛྲ་ཀྲོ་དྷ་ཧཱུྃ་ཕཊ༔ ཧཱུྃ༔ སྣ་ཚོགས་རྡོ་རྗེའི་ཕྱག་རྒྱ་ནི༔ ཡན་ལག་ཀུན་ལ་བསྐོར་བྱེད་པ༔ འདི་ནི་རྟ་མཆོག་འབར་བའི་རྒྱ༔ རྒྱལ་བའི་ཕྲིན་ལས་རྫོགས་པར་བྱེད༔ ཨོཾ་ཧ་ཡ་གྲཱི་བ་ཧཱུྃ༔ ༈ གཉིས་པ་ལུས་གནད་ནང་གི་གར༔ ཧཱུྃ༔ ཐལ་མོ་གཉིས་ནི་རབ་ཏུ་བསྣོལ༔ སྤྱི་བོའི་གཙུག་ཏུ་བསྐོར་བ་ཡིས༔ བདེ་ཆེན་འཁོར་ལོ་རབ་རྒྱས་ནས༔ རྟག་པའི་རྡོ་རྗེ་འགྲུབ་པར་བྱེད༔ ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ༔ ཧཱུྃ༔ མགྲིན་པའི་པདྨ་གཡས་སུ་བསྐོར༔ ལྗགས་ཀྱང་ནམ་མཁར་བཏེགས་བྱས་ནས༔ ཉི་ཟླ་བར་སྣང་ཁམས་སུ་མནན༔ འབྱུང་འཇུག་གནས་གསུམ་རྡོ་རྗེའི་གླུ༔ ལོངས་སྤྱོད་འཁོར་ལོ་རབ་བྱེ་ནས༔ པདྨ་གར་དབང་འགྲུབ་པར་བྱེད༔ ཨོཾ་པདྨ་ནཱིརྟཱི་ཤྭ་ར་ཧྲཱི༔ ཧཱུྃ༔ རོ་སྟོད་སེང་གེ་ལྟར་འགྱིང་ཞིང༔ རྡོ་རྗེའི་ཕྲག་པ་གཟེངས་བསྟོད་ནས༔ ཐལ་གོང་བརྡལ་བ་ཆེན་པོ་ཡིས༔ བདེ་ཆེན་འཁོར་ལོ་རབ་འབར་ནས༔ རྡོ་རྗེ་སེམས་དཔའ་འགྲུབ་པར་འགྱུར༔ ཧཱུྃ་བཛྲ་དྷྲྀཀ྄༔ ཧཱུྃ༔ ལྟེ་བ་ཨུཏྤལ་ལྟར་རྒྱས་པ༔ རྡོ་རྗེའི་སྐེད་པ་འཁྲིལ་ལྡན་ཚུལ༔ སྤྲུལ་པའི་འཁོར་ལོ་རབ་རྒྱས་ནས༔ རྡོ་རྗེ་ཉི་མ་འགྲུབ་པར་བྱེད༔ སྭཱ་རཏྣ་དྷྲྀཀ྄༔ ཧཱུྃ༔ ཁྲོ་རྒྱལ་འཛུམ་བག་དང་བཅས་ཏེ༔ རྡོ་རྗེའི་གཞག་ཤ་རབ་བགྲད་པ༔ གསང་བའི་འཁོར་ལོ་བདེ་བ་འབར༔ ཧེ་རུ་ཀ་ཉིད་འགྲུབ་པར་བྱེད༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཧཱུྃ༔ རྡོ་རྗེའི་རྐང་ལག་མཉེན་ལྕུག་ལྡན༔ དཀྲུགས་ཤིང་རབ་ཏུ་བསྐོར་བ་ཡིས༔ རྩ་རྣམས་མ་ལུས་ཀུན་དག་ནས༔ རྡོ་རྗེ་རྟ་མཆོག་འགྲུབ་པར་བྱེད༔ ཀརྨ་ཧ་ཡ་གྲཱི་བ་ཧཱུྃ༔ ༈ གསང་བ་བདེ་ཆེན་སྦྱོར་བའི་གར༔ ཧཱུྃ༔་་་་་རྒྱལ་བ་རྟག་པའི་གར །རྟག་པའི་རང་བཞིན་རྒྱལ་བའི་སྐུ༔ ཤིན་ཏུ་རྣམ་པར་དྭངས་པ་སྟེ༔ མཛེས་པ་རྣམ་པར་འགྱུར་བའི་སྐུ༔ མཚན་གྱི་མེ་ཏོག་དཔེ་བྱད་ལྡན༔ ཨོཾ༔ ལོངས་སྤྱོད་རྫོགས་པའི་སྐུར་གསལ་བ༔ ཤིན་ཏུ་མཛེས་པར་བྱས་པ་ཡི༔ བདེ་བ་རྒྱས་པའི་སྐུ་ལྡན་པ༔ མཆོག་ཏུ་མི་འགྱུར་བདེ་ཆེན་གྱི༔ བྱང་ཆུབ་སེམས་ཀྱི་སྐུ་མངའ་བ༔ རྡོ་རྗེ་ནོར་བུའི་རྩེ་མོ་རུ༔ ཨོཾ་གྱི་ཚོགས་ནི་རབ་བརྟན་པ༔ ཨོཾ༔ ཤིན་ཏུ་སྤྲོས་པ་རབ་ལྡན་པའི༔ གསལ་བ་འབར་བའི་དབྱིངས་ཉིད་དུ༔ རྡོ་རྗེ་འདི་ནི་ལྡན་བྱེད་པ༔ སངས་རྒྱས་སེམས་ཅན་མཉམ་པར་སྦྱོར༔ དུས་གསུམ་བདེ་གཤེགས་མཆོག་བརྙེས་པའི༔ རྡོ་རྗེ་ཤུགས་ཀྱིས་འགྲོ་བར་བྱེད༔ ཨོཾ༔ འདི་ནི་དུས་གསུམ་རྒྱལ་ཀུན་གྱི༔ རྨད་བྱུང་གསང་བའི་སྤྱོད་པ་སྟེ༔ གཟུགས་ཀྱི་ཕུང་པོ་རབ་དག་པ༔ རྒྱལ་བའི་སྐུ་ཡང་འདི་ན་ལྡན༔ གཟུགས་དང་སྐུ་ཡི་མཚན་ཉིད་ཀྱང༔ ཐ་དད་རྣམ་པར་མི་རྟོག་པའི༔ དུས་གསུམ་རྒྱལ་ཀུན་དགྱེས་གྱུར་ཅིག༔ ཨོཾ་ཀཱ་ཡ་བཛྲ་དྷརྨ་མ་ཧཱ་སུ་ཁ་ཤཱུནྱ་ཏཱ་སརྦ་བནྡྷ་མ་ཧཱ་ཀཱ་རུ་ཎི་ཀཱ་མ་ཧཱ་སུ་ཁ་སིདྡྷི་སུ་ར་སཏྭཾ་སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡོ་ཏ་མུ༔ མ་ཧཱ་སུ་ཁ་སིདྡྷི་ཧུ༔ ཨོཾ༔ དེ་བཞིན་གཤེགས་ཀུན་བདག་ལ་དགྱེས་པར་མཛོད༔ དེ་བཞིན་གཤེགས་པའི་བདེ་བ་ཀུན་འགྲུབ་སྟེ༔ དེ་བཞིན་གཤེགས་པའི་སྐུ་ནི་གཟུགས་ལ་གནས༔ སྐུ་ཡི་དབྱིངས་སུ་སངས་རྒྱས་ཨ་ལ་ལ་ཧོཿ ནཱིརྟཱི་ར་ཧོ྅་ཧཾ༔ ཨོཾ༔ དེ་བཞིན་གཤེགས་པའི་གཙུག་ཏོར་དུ༔ ནོར་བུ་འབར་བ་རབ་སྤྲས་པ༔ འཁོར་ལོ་འབར་བའི་དབྱིངས་སུ་བསྟིམ༔ འཁོར་ལོ་མཁའ་དབྱིངས་མཛེས་གྱུར་པ༔ བདེ་བ་བརྒྱད་ནི་གཡོ་བའི་རྩ༔ འཁོར་ལོ་འབར་བའི་རྩིབས་དང་ལྡན༔ སྐུ་ཡི་འཁོར་ལོ་འདི་བསྐོར་བས༔ སངས་རྒྱས་ཀུན་གྱི་སྐུ་འགྲུབ་ཤོག༔ ཨོཾ༔ སྐུ་ཡི་ཕྱག་རྒྱ་འདི་ཀུན་ནི༔ རྣལ་འབྱོར་གང་གིས་འཛིན་བྱེད་པ༔ རིག་པ་འཛིན་པའི་ཞིང་རྣམས་སུ༔ སྐུ་ཡི་སངས་རྒྱས་ཐམས་ཅད་དང༔ དབྱིངས་ཕྱུག་རྣམས་དང་ཐབས་ཅིག་འདུག༔ ༈ ཨོཾ༔་་་་་རྡོ་རྗེ་ཆོས་ཀྱི་གར །རྣམ་པར་བདེ་བའི་ཉམས་བརྒྱ་ལྡན་པ་ཡི༔ ཡུམ་གྱི་པདྨ་འབར་བའི་དབྱིངས་ཉིད་དུ༔ ཙཎྜ་ལཱི་ནི་གཏུམ་ཞིང་ཁྲོས་པའི་སྐུ༔ འབར་བའི་སྤྲིན་གྱིས་འཇིག་རྟེན་ཀུན་གཡོ་བ༔ བདེ་གཤེགས་དཔའ་བོའི་ཚོགས་རྣམས་འདི་ཡིས་བསྐུལ༔ ཐིག་ལེ་འབར་བ་དག་ནི་འདི་ཡིས་གཡོ༔ མཆོག་གི་བདེ་བ་ཐམས་ཅད་འདིས་འབེབ་པས༔ གོས་དཀར་ལྷ་མོ་དམར་བའི་མདངས་ལྡན་པའི༔ པདྨའི་ཟུར་མིག་བལྟ་བ་འདི་ལ་གཏོད༔ པདྨའི་དབུས་སུ་བདེ་བ་ཆེན་པོ་ཡིས༔ སྨིན་ཅིང་སྨིན་མཛད་བདེ་བ་འབར་བྱེད་པ༔ འདི་ཀོ་སུ་ཡི་མཐུ་སྙམ་རྟོག་མེད་པ༔ སོ་སོར་རྟོག་པའི་འཛིན་པའང་ཡོད་མིན་ཏེ༔ ཏིང་འཛིན་བརྒྱ་ཕྲག་མང་པོ་འཕེལ་བྱེད་པ༔ ཕོ་ཉའི་བདེ་བ་འདི་ལ་བསྟོད་པར་བྱེད༔ ཨོཾ༔ པདྨ་རྒྱས་པའི་ཞལ་མངའ་བ༔ རྡོ་རྗེ་ཆོས་ཀྱང་ཡུམ་ལ་གཟིགས༔ པདྨ་གར་དབང་རྒྱས་པའི་ཕྱག༔ དེ་བཞིན་གཤེགས་པ་ཐམས་ཅད་ཀྱི༔ ཆགས་མེད་པདྨ་རབ་འཛིན་པ༔ ཡུམ་གྱི་ཐུགས་ཀར་བསྣུན་མཛད་པ༔ ནམ་མཁའ་གང་བ་ཡུམ་གྱི་ཞིང༔ ཁམས་གསུམ་མ་ལུས་དབང་བསྡུས་ནས༔ བདེ་བ་བདག་ལ་སྟོབ་པར་མཛད༔ རྒྱས་པའི་པདྨ་ནོར་བུས་བརྒྱན༔ པདྨ་ཟུམ་པ་གསོས་སུ་བྱེད༔ འདོད་པའི་ཁམས་བརྒྱ་ཀུན་གཡོ་བ༔ སྲིད་གསུམ་བཅུད་རྣམས་དྲངས་པ་ཡིས༔ དཔེར་ན་བྱེ་རུའི་ལྷུན་པོ་ལ༔ ཏིལ་གྱི་མར་གྱིས་བྱུགས་པ་བཞིན༔ པདྨའི་ཡོན་ཏན་བསྟོད་པར་བགྱི༔ ཨོཾ་པདྨ་སུ་ཁ་པདྨ་བཛྲ་མ་ཧཱ་སུ་ཁ་དྷཱ་རི་པདྨེ་ཤྭ་རཱི་ཀྲོ་དྷ་རཱ་ཛ་ཀིཾ་ཀ་ར་མ་མ་ཨེ་ཀ་ཛཱ་ཊི་རུ་ལུ་རུ་ལུ་དྷརྨ་དྷཱ་ཏུ་སྭ་བྷཱ་བ་མ་ཧཱ་སུ་ཁ་སུ་ར་སཏྭཾ་ཨ་ཧཾ༔ མ་ཧཱ་སུ་ཁ་མཱ་ལེ་ཨཱ་ཧ་ར་བཛྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ནཱིརྟཱི་ཨ་ལ་ལ་ཧོ༔ ཨོཾ༔ དེ་བཞིན་གཤེགས་པ་པདྨའི་རིགས་ཚོགས་ཀུན༔ རྡོ་རྗེ་པདྨའི་དཀྱིལ་འཁོར་འདིར་འདུས་ལ༔ བདེ་བ་ཆེན་པོའི་ཉམས་བརྒྱ་འདི་རོལ་ཅིག༔ གལ་ཏེ་ཉོན་མོངས་དབང་གིས་གོས་གྱུར་ན༔ སོ་སོར་རྟོག་པའི་ཡེ་ཤེས་འདི་ཡིས་སྦྱངས༔ དག་དང་མ་དག་སྣང་བ་ཀུན་བསལ་ནས༔ འདི་ན་མ་དག་པ་ནི་འགའ་ཡང་མེད༔ དུས་གསུམ་རྒྱལ་བའི་གསུང་མཆོག་འགྲུབ་པ་ཡིན༔ ཨ་ལ་ལ་ཧོཿ པདྨ་ནཱིརྟཱི་ཤྭ་རཱ་བཛྲ་ཝཱཀ྄་སིདྡྷི་ཕ་ལ་ཧཱུྃ༔ གསུང་གི་ཕྱག་རྒྱ་འདི་ལྡན་པས༔ རྣལ་འབྱོར་ཚེ་རབས་ཐམས་ཅད་དུ༔ དུས་གསུམ་རྒྱལ་བའི་ཞིང་ཁམས་སུ༔ བདེ་ནས་བདེ་བར་འགྲོ་བར་འགྱུར༔ ཨོཾ་མ་ཧཱ་སུ་ཁ་སིདྡྷི་ཧཱུ༔ ༈ ཨོཾ་་་རྡོ་རྗེ་སེམས་དཔའི་གར༔ ཆོས་ཀྱི་དབྱིངས་ཀྱི་ནམ་མཁའ་ཡངས་པ་རུ༔ རྡོ་རྗེ་བདེ་བ་ཆེན་པོ་དགྱེས་མཛད་པ༔ དུས་གསུམ་སངས་རྒྱས་མི་གནས་ཐུགས་ལ་གནས༔ དུས་གསུམ་རྒྱལ་བའི་ཐུགས་ནི་ནམ་མཁར་གནས༔ མཁའ་དབྱིངས་བཟང་མོའི་ནམ་མཁའ་ཡངས་པ་རུ༔ རྡོ་རྗེ་སེམས་དཔའ་བདེ་བ་ཉིད་དུ་བཞུགས༔ བདེ་ཆེན་འོད་གསལ་ཉི་མ་ཤར་བ་ན༔ ཁམས་གསུམ་ཀུན་གྱི་མུན་པ་མ་ལུས་སེལ༔ དུས་གསུམ་རྒྱལ་བའི་རྡོ་རྗེ་འདི་གསོར་བས༔ སྟོང་ཁམས་ཀུན་གྱི་ཉོན་མོངས་འཇོམས་པར་མཛད༔ རྡོ་རྗེ་ནོར་བུ་ལྡན་པའི་དཀྱིལ་འཁོར་དུ༔ བྱང་ཆུབ་སེམས་ཀྱི་འོད་ཟེར་ཉི་མ་འབར༔ སྐད་ཅིག་ཙམ་གྱིས་གནས་མིན་མུན་པ་འཇོམས༔ ཉན་ཐོས་ཚོགས་ཀྱིས་བསྐལ་པར་བསྒོམས་པ་བས༔ སྐད་ཅིག་ཙམ་གྱིས་ཆགས་ལྡན་རྣམས་ཀྱིས་གྲོལ༔ རྨད་བྱུང་རྒྱལ་བའི་གསུང་རབ་རྨད་པོ་ཆེ༔ དབྱིངས་ཀུན་གཅིག་ཏུ་འདུས་པའི་མན་ངག་ལ༔ རྡོ་རྗེ་ནོར་བུ་ལྡན་པར་གྱུར་པ་ཡི༔ བདེ་ཆེན་ཐབས་མཆོག་འདི་ནི་རྨད་དུ་བྱུང༔ བདེ་ཆེན་ནམ་མཁའི་དབྱིངས་སུ་གང་གྱུར་པས༔ འདིས་ནི་རྒྱལ་བའི་ཚོགས་རྣམས་དགྱེས་གྱུར་ཅིང༔ རྡོ་རྗེ་ནོར་བུ་འབར་བའི་དཀྱིལ་འཁོར་དུ༔ བྱང་ཆུབ་སེམས་ཀྱི་ཟླ་བ་ཤར་བ་ན༔ ལུས་ཀྱི་ནང་ཀུན་ཐིག་ལེའི་འོད་ཀྱིས་གང༔ ཀུནྡའི་ཚལ་བཞིན་གངས་རི་བརྩེགས་པ་འདྲ༔ རྡོ་རྗེ་སེམས་དཔའི་སྐུ་ཡི་རྣམ་འགྱུར་ནི༔ བྱེ་བ་འབུམ་གྱི་ཚོགས་སུ་སྟོན་གྱུར་པས༔ མིག་འཕྲུལ་ལྟ་བུར་ཡུམ་གྱི་རྐྱེན་ལས་ཤར༔ རྡོ་རྗེ་སྙེམས་མའི་ནམ་མཁའ་འོད་ཀྱིས་གང༔ ཟླ་བའི་ཟིལ་པས་ལུས་ཀྱི་ཕྱི་ནང་ཁྱབ༔ ཉི་མའི་འོད་ཀྱིས་ཚ་ཟེར་པདྨ་ལ༔ ཕོག་པས་ནོར་བུ་འོད་ཟེར་རབ་འབར་བས༔ བདེ་ཆེན་འཁོར་ལོ་འདི་ནི་རྟག་ཏུ་བསྐོར༔ རྣལ་འབྱོར་རྡོ་རྗེ་སེམས་དཔའ་ཡབ་ཡུམ་གྱི༔ ཐུགས་ལས་ཕྱོགས་བཅུའི་རྡུལ་སྙེད་ཞིང་རྣམས་ཀྱི༔ མགོན་པོ་ཐམས་ཅད་དུས་གཅིག་ཚོགས་པར་བྱེད༔ རྒྱལ་སྲས་རྣམས་ཀྱང་ཞལ་ལ་བལྟ་བཞིན་དུ༔ རྨད་བྱུང་སྟོན་འཁོར་བདེ་བའི་དབུས་སུ་ཚོགས༔ འོད་གསལ་ཆོས་ཀྱི་འཁོར་ལོས་ཉོན་མོངས་གཅོད༔ དུས་གསུམ་མི་འགྱུར་བ་ཡི་བདེ་བ་ཐོབ༔ ཐབས་ཤེས་ཀུན་འདར་མ་ཡི་གནས་སུ་བཞུགས༔ ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡ་བཛྲ་སཏྭ་ས་མུ་དྲ་མ་ཧཱ་སུ་ཁ་དྷརྨ་དྷཱ་ཏུ་སཱུརྻ་ཙནྡྲ་ཧཱུྃ་ཧཱུྃ་བཛྲ་སཏྭ་ས་མ་ཡ་སཏྭཾ་མ་ཧཱ་སུ་ཁ་ཨཱ་བེ་ཤ་ཡ་ཨཱ་བེ་ཤ་ཡ་མ་ཧཱ་སུ་ཁ་དྲྀ་ཤྱ་ཛཿཧཱུྃ་བཾ་ཧོ༔ ཏ་ཎི་ཏ་ཡོ་གི་ནཱི་ཌཱ་ཀི་མ་ཧཱ་སུ་ཁ་སུ་ར་སཏྭཾ་ཨ་ཧོ་མ་ཧཱ་སུ་ཁ་ཕེཾ་ཕེཾ་མ་ཧཱ་རཱ་ག་བཛྲ་སྭ་བྷཱ་བ་ཨཱཏྨ་ཀོ྅་ཧཾ༔ ཧཱུྃ༔ དེ་བཞིན་གཤེགས་པ་རབ་དགྱེས་རྡོ་རྗེ་སེམས་དཔའི་ཚོགས༔ འགྲོ་བ་རྣམས་ཀྱི་སྙིང་ལ་རྟག་ཏུ་གནས་པ་དང༔ དེ་བཞིན་གཤེགས་པ་རྡོ་རྗེ་སེམས་དཔའ་འགྲུབ་པར་མཛོད༔ བཛྲ་སཏྭ་དྲྀ་ཤྱ་ཧོ༔ ས་མ་ཡ་ཏིཥྛ་བཾ༔ ཧཱུྃ༔ རྒྱལ་བ་སེམས་དཔའ་ཐམས་ཅད་ཀྱི༔ རྡོ་རྗེ་སེམས་དཔའི་ཕྱག་རྒྱ་འདི༔ འཛིན་ནས་སེམས་ཅན་ཐམས་ཅད་ཀྱི༔ སྙིང་གི་དབུས་སུ་གནས་པར་མཛད༔ རྣལ་འབྱོར་ཐབས་ལྡན་རྣམས་ཀྱིས་ནི༔ འདི་ཡི་དོན་ནི་རྟོགས་གྱུར་པ༔ ཐབས་ཤེས་གར་འདི་བྱེད་བཞིན་དུ༔ ཕྱོགས་བཅུའི་ཞིང་ཁམས་ཐམས་ཅད་དུ༔ རྡོ་རྗེ་སེམས་དཔའ་དེ་ལ་འགྲོགས༔ ལྷ་མོ་འབུམ་གྱིས་མཆོད་བྱེད་ཅིང༔ སྟུག་པོ་བཀོད་དུ་འདུག་པར་འགྱུར༔ ༈ ཧཱུྃ༔་་་་རྡོ་རྗེ་ཉི་མ་རིན་ཆེན་རྒྱལ་པོའི་གར །པགས་པའི་མདོག་ནི་གསེར་གྱི་མདངས༔ ལུས་ནི་ལྕུག་ཕྲན་ལྟ་བུ་སྟེ༔ མིག་ཀྱང་ཟིམ་བུར་བལྟ་བ་དང༔ སྐད་ཀྱང་ངང་པ་གཞོན་ནུའི་སྐད༔ རྟག་ཏུ་མགྲིན་གླུ་དག་ལ་དགའ༔ རིན་ཆེན་རིགས་ཀྱི་ཡུམ་ཡིན་ཏེ༔ པདྨ་རྒྱས་པ་ལྟ་བུ་ཡི༔ ལག་པ་དག་ཀྱང་འཇམ་ཞིང་མཉེན༔ པདྨའི་ཚལ་གྱི་རྒྱན་མིན་ཏེ༔ པདྨ་འཇམ་པའི་གོས་བཟང་གིས༔ རྣལ་འབྱོར་ལུས་ནི་གཡོགས་པར་འགྱུར༔ དག་པའི་གླུ་སྒྲ་སྙན་ཚིག་གིས༔ རྣལ་འབྱོར་སྙན་གྱི་ཨུཏྤལ་འབྱེད༔ ཙནྡན་ཨུཏྤལ་དྲི་འཐུལ་བས༔ ཤངས་ཀྱི་རླུང་སྒྲོམ་གང་བར་བྱེད༔ ལྗགས་ཀྱང་པདྨའི་འདབ་བཞིན་དུ༔ རྣལ་འབྱོར་ལྗགས་ཀྱི་རོ་ལ་མངར༔ ཡིད་དུ་འོང་བའི་གཟུགས་བཟང་མ༔ རྣལ་འབྱོར་མིག་གི་བདུད་རྩིར་བྱེད༔ རྣལ་འབྱོར་དེ་ནི་གར་འགྲོ་ཡང༔ ཆོས་ཀྱི་ཁམས་ལ་འཆར་གྱུར་པས༔ ལྷ་མོ་འདོད་ཡོན་དྲུག་ལྡན་པ༔ འཇིག་རྟེན་འབྱོར་པ་དྲུག་མ་ལུས༔ འདི་ལ་བརྟེན་ནས་རྒྱས་པར་བྱེད༔ འཇིག་རྟེན་འདས་པའི་ཡེ་ཤེས་དྲུག༔ འདི་ལ་བརྟེན་ནས་སྐྱེད་པར་བྱེད༔ ཏྲཱཾ༔ རིན་ཆེན་དགོས་འདོད་འབྱུང་བའི་པདྨ་ནི༔ འདབ་མ་བཞི་རུ་ནོར་བུས་རབ་མནན་པས༔ ཟེའུ་འབྲུ་དབང་གི་རྒྱལ་པོ་སྟེང་དུ་འབར༔ འདི་འདྲ་རྨད་བྱུང་རྒྱལ་བ་ཀུན་གྱི་ཡུམ༔ བླ་ན་མེད་པའི་བདེ་ཆེན་མཆོག་དམ་པ༔ འོད་གསལ་སྐད་ཅིག་ཉིད་ལ་འཆར་བྱེད་པ༔ བསོད་ནམས་འབུམ་ཕྲག་ཚོགས་པའི་རྣལ་འབྱོར་གྱིས༔ སྤྲིན་བར་ཁུད་པར་ཉི་མ་དྲོ་བ་བཞིན༔ སྐབས་སུ་སྐབས་སུ་རྣལ་འབྱོར་ལུས་ལ་སྣང༔ བྱེ་བ་དུང་ཕྱུར་བསམ་ཡས་བསོད་ནམས་ཀྱི༔ དཔལ་ལས་བསྐྱེད་པའི་རྣལ་འབྱོར་ལུས་དང་འགྲོགས༔ ཨོཾ༔ ཟླ་བ་རྒྱས་པའི་ཞལ་མངའ་བ༔ འཇིག་རྟེན་གདུང་བ་ཐམས་ཅད་སེལ༔ འགྲོ་ཀུན་འདོད་པའི་རླུང་རྣམས་གཡོ༔ ཁམས་གསུམ་མ་ལུས་དབང་སྡུད་ཡིན༔ ཚངས་པའི་མཆོག་མ་དེ་ལ་ཡང༔ བརྒྱ་བྱིན་བཙུན་མོ་དེ་ལ་ཡང༔ འཁོར་ལོས་སྒྱུར་བའི་ཡུམ་རྣམས་ཀྱང༔ དབང་ཕྱུག་ཨུ་མ་དེ་བཱི་ཡང༔ ཕུན་སུམ་ཚོགས་པ་འདིས་དབུལ་ཞིང༔ འཇིག་རྟེན་གྲགས་ལྡན་དེ་རྣམས་ཀྱང༔ ལྷ་མོ་འདི་ལ་སྨོན་པར་བྱེད༔ གང་ཚེ་རྒྱལ་བ་ཉི་མ་ཡི༔ རིག་སྔགས་གྲུབ་པའི་རྣལ་འབྱོར་ལ༔ འདི་ནི་རྟག་ཏུ་འཁོར་བར་བྱེད༔ པདྨ་བཅུད་དང་ལྡན་པ་ལ༔ དེ་ལ་བུང་བ་ཅིས་མི་འཁོར༔ རྨད་བྱུང་རིན་ཆེན་ཡུམ་འདི་ནི༔ རྒྱལ་བ་ཉི་མའི་བྱིན་རླབས་ལས༔ ཛམ་གླིང་ལས་ཀྱི་ས་པ་རུ༔ ཁམས་དྲུག་ལྡན་པའི་དབུས་སུ་ཚོགས༔ འཇིག་ཁམས་གཞན་དུ་མ་ཡིན་པའི༔ འཇིག་རྟེན་ཀུན་གྱི་ལྷོ་ན་གནས༔ རྒྱལ་བ་ཉི་མས་བྱང་ནས་གཟིགས༔ དེ་ཕྱིར་ཉི་མའི་དཀྱིལ་འཁོར་ཀྱང༔ བྱང་གི་ཕྱོགས་སུ་གནས་པ་སྟེ༔ རིགས་ལྡན་དང་ནི་ལཱ་སྱེ་མ༔ ལྷ་མོ་སྤྱན་མ་འདི་ཡིན་ཀྱང༔ སྲ་བའི་བཅུད་ནི་འདུས་པ་ཡི༔ རིན་ཆེན་མཁའ་དབྱིངས་འདི་དག་ཏུ༔ རྡོ་རྗེ་རྟག་པ་འདི་རུ་གནས༔ རྡོ་རྗེ་སེམས་དཔའ་ཀུན་ཏུ་རྒྱུ༔ རིན་ཆེན་ཉི་མ་རྟག་ཏུ་རོལ༔ ཆོས་ཀྱི་ཕྱག་རྒྱས་འདི་འཛིན་ཞིང༔ རྡོ་རྗེ་ཁྲོ་བོ་རྣམས་ཀྱིས་སྲུང༔ རྟ་མཆོག་རྣམས་ཀྱིས་ཕྲིན་ལས་མཛད༔ འདི་ནི་ཕྱག་རྒྱའི་མཆོག་ཡིན་ཏེ༔ རྨད་བྱུང་འདི་ནི་དགྱེས་པར་རོལ༔ རཏྣ་མཱ་ལྱེ་མ་ཧཱ་སུ་ཁ་སརྦ་ཀརྨ་སུ་ཙ་མེ་སཏྭཾ་ཨེ་ཨཱ་རལླི་མ་ཧཱ་སུ་ཁ་བྷནྡྷ་མོཀྵ༔ ཨོཾ༔ ཤིན་ཏུ་རྣམ་དག་བདེ་ཆེན་འདི་ལ་རོལ་པ་གང༔ དུས་གསུམ་རྒྱལ་བའི་སྤྱན་ལ་རབ་ཏུ་མཛེས་བྱེད་པ༔ ཐུགས་ཀྱང་མཉེས་པའི་ཉི་མ་བདག་ལ་རབ་སྣང་ནས༔ མ་རིག་མུན་པ་སེལ་བའི་ཡེ་ཤེས་རྒྱས་པར་མཛོད༔ རཏྣ་སཾ་བྷ་བ་མུ་ཀུ་ཊ་སརྦ་ལོ་ཀ་བྷནྡྷ་ན་ཀ་རོ་མི༔ ཧཱུྃ༔ འདི་དེ་རྒྱལ་བ་ཐམས་ཅད་ཀྱི༔ གསང་བ་རྨད་བྱུང་འདི་ལ་ནི༔ རྣལ་འབྱོར་གང་ཞིག་འགྲོགས་བྱེད་པ༔ ཕྱོགས་བཅུའི་དེ་བཞིན་གཤེགས་ཀུན་གྱི༔ རྡོ་རྗེ་ནོར་བུའི་དབུས་སུ་གནས༔ དེ་བཞིན་གཤེགས་པ་ཐམས་ཅད་ཀྱི༔ པདྨའི་ཟེའུ་འབྲུས་འདི་འཛིན་ཅིང༔ དུས་གསུམ་རྒྱལ་བའི་ཐུགས་ལ་གནས༔ རྒྱལ་བ་ཀུན་གྱི་དབུས་གནས་པའི༔ དེ་བཞིན་གཤེགས་པའི་རྒྱལ་པོ་འགྲུབ༔ ༈ ཧཱུྃ༔་་་་་ཧེ་རུ་ཀའི་གར། ཆོས་སྐུ་ཞི་བའི་ངང་ལས་མ་གཡོས་ཀྱང༔ གདུག་པ་འདུལ་ཕྱིར་དུས་ལས་མི་གཡེལ་བའི༔ འཇིགས་བྱེད་ཧེ་རུ་ཀ་དཔལ་དཀྱིལ་འཁོར་དུ༔ ཁྲོ་མོ་མི་བཟད་འབར་བའི་སྐུ་མངའ་བ༔ ནག་མོ་ཁྲག་གི་མིག་ཅན་མཆེ་བ་ཅན༔ གྲུ་གསུམ་འབར་བའི་མཁའ་དབྱིངས་འབར་བ་ལ༔ དུག་གསུམ་རུ་དྲ་བྱེ་བ་ཀུན་བསྡུས་ནས༔ ཁྲོ་ཆེན་འབར་བའི་རྡོ་རྗེའི་བརྟུལ་ཞུགས་ཀྱིས༔ དྲག་ཏུ་གཟིར་ཞིང་རབ་ཏུ་བརྡུང་བ་ཡིས༔ ཞེ་སྡང་མེ་ལོང་ལྟ་བུའི་དབྱིངས་སུ་བསད༔ གཏི་མུག་མུན་པ་འོད་གསལ་དབྱིངས་སུ་བསལ༔ འདོད་ཆགས་སོ་སོར་རྟོག་པས་རབ་བཅད་པས༔ གཉིས་སུ་མེད་པའི་ཕྱག་རྒྱའི་ཀིངྐ་ར༔ དུག་གསུམ་རུ་དྲ་གསོད་པའི་ཕོ་ཉ་མོ༔ ཁྱོད་ལ་བསྟོད་དོ་ཕྲིན་ལས་རྣམ་བཞི་མཛོད༔ མཁའ་དབྱིངས་ཡུམ་གྱི་གྲུ་གསུམ་དཀྱིལ་འཁོར་དུ༔ དམར་ནག་རཀྟ་འདྲེན་པའི་པདྨ་གནས༔ པདྨའི་སྣོད་དུ་དམར་ཆེན་གཏམས་པ་འདི༔ དཔལ་ཆེན་རྡོ་རྗེའི་ཕྱག་རྒྱས་རབ་དྲངས་ནས༔ སྐུ་ཡི་ཟ་བྱེད་ཚོགས་ཀྱིས་ཙནྡན་འཐུང༔ འཆི་བདག་བདུད་དང་བདུད་ཚོགས་འདི་ཡིས་གཞོམ༔ བདུད་རྒྱལ་རྣམས་ཀྱི་སྙིང་ཁྲག་འདི་ཡིས་འཐུང༔ དཔལ་གྱི་འཁོར་ཚོགས་བཛྲ་ཨཱ་རལླི༔ མཁའ་འགྲོ་མི་བཟད་འབར་བའི་སྤྲིན་འཕྲོ་མ༔ ལས་ཀྱི་ཕྱག་རྒྱའི་ཐུགས་དེ་འདི་ཡིས་བསྡུས༔ དུས་གསུམ་རྒྱལ་བས་མངགས་པའི་ཕོ་ཉ་མོ༔ མཁའ་དབྱིངས་གྲུ་གསུམ་འབར་བའི་ཨེ་དབྱིངས་སུ༔ དུག་གསུམ་བཙོན་དུ་བཟུང་བའི་སྟོབས་ཆེན་མ༔ རུ་དྲ་རྣམ་གསུམ་སྒྲོལ་བའི་མཐུ་མོ་ཆེ༔ ཁྲོ་ཆེན་རྣམས་ཀྱི་རྡོ་རྗེ་འབར་བ་ཡིས༔ བཟོད་མེད་སྙིང་རྗེས་བསྐུལ་བས་རབ་གཟིར་ནས༔ ཚིམ་པ་མེད་པར་ཁྲོ་མོ་ཁྱོད་རྔམས་པས༔ དུག་གསུམ་ཇི་ལྟར་བསད་ཀྱང་ཚིམ་པ་མེད༔ སྟོང་གསུམ་ཉོན་མོངས་བདུད་རྣམས་ཀུན་བསྡུས་ནས༔ ཁྱོད་ཀྱིས་མཁའ་དབྱིངས་གནས་སུ་བསྒྲལ་བྱས་པས༔ ཅུང་ཟད་ཙམ་ཡང་ཚིམ་པར་མི་འགྱུར་བའི༔ རྣམ་རྟོག་གསོད་པའི་ཧ་ཧའི་གད་རྒྱངས་ཅན༔ རྡོ་རྗེ་ཁྲོ་རྒྱལ་རྣམས་ཀྱང་རྟོག་མེད་གནས༔ དང་པོ་བཟོད་མེད་སྙིང་རྗེ་ཁྱོད་ཀྱིས་བསྐུལ༔ བར་དུ་རྟོག་ཚོགས་བསྒྲལ་ལ་ཚིམ་པ་མེད༔ ཐ་མ་ཁྲོ་རྒྱལ་རྣམས་ཀྱང་ཞི་བྱེད་པའི༔ བདེ་བ་མཆོག་སྟེར་ཁྲོ་མོའི་བདེ་ལ་རོལ༔ ཨོཾ་བཛྲ་ཀྲོ་དྷཱི་ཤྭ་རཱི་ཀཱ་མ་རཱུ་པ་དེ་བ་ཙིཏྟ་མཱ་ར་མཱ་ར་རཀྟ་ཁ་ཁ་ཁཱ་ཧི་ཁཱ་ཧི་ཧ་ཧ་ཧི་ཧི་ཧཱུྃ་ཧཱུྃ་ཕཊ྄་ཕཊ྄༔ ཧཱུྃ༔ ཁྲོ་ལ་རྔམས་པ་འབར་བའི་ཐུགས༔ དུག་གསུམ་དུ་དྲ་མ་ལུས་པ༔ བསྒྲལ་ནས་ཞལ་དུ་གསོལ་མཛད་པའི༔ ཁྲག་འཐུང་མ་ལུས་ཐམས་ཅད་ཀྱི༔ མཐུ་སྟོབས་བདག་ལ་གནས་པར་མཛོད༔ ཨོཾ་བཛྲ་ཀྲོ་དྷ་རཱ་ཛ་མ་ཧཱ་སུ་ཁ་མ་ཧཱ་བ་ལ་སུ་ར་སཏྭཾ་ཨ་ཧཾ༔ ཁྲོ་རྒྱལ་རྣམས་ཀྱི་ཕྱག་རྒྱ་འདིས༔ སངས་རྒྱས་རྣམས་ཀྱང་ཟིལ་གནོན་ན༔ དྲེགས་པའི་ཚོགས་ལ་སྨོས་ཅི་དགོས༔ ཁམས་གསུམ་སྐད་ཅིག་ཉིད་ལ་སྒྲོལ༔ ཨོཾ་བཛྲ་ཀྲོ་དྷ་ཀིངྐ་ར་ཧ་ཧ་རུ་ལུ་རུ་ལུ་ཀཱ་མ་དེ་བ་མཱ་ར་སེ་ན་པྲ་མརྡྷ་ན་ཧཱུྃ་ཕཊ༔ ༈ ཧཱུྃ༔་་་་རྟ་མཆོག་གི་གར །རྒྱལ་བ་ཀུན་གྱི་ཕྲིན་ལས་ནི༔ དབང་ཆེན་རྔམ་པའི་སྒྲ་སྒྲོག་པས༔ དཔལ་གྱི་རྟ་སྐད་ཙེ་རེ་རེ༔ རོལ་པའི་རྟ་བྲོ་ཆེམས་སེ་ཆེམ༔ བསྐལ་པའི་མེ་དཔུང་འུ་རུ་རུ༔ གཅན་གཟན་མུ་ཁ་སྤྲིན་ལྟར་གཏིབས༔ ཀངྐ་འདབ་ཆགས་སྐར་ལྟར་འཁྲུགས༔ འཇིགས་བྱེད་རོལ་པའི་དཀྱིལ་འཁོར་དུ༔ རྟ་ཡི་བརྟུལ་ཞུགས་ཆེན་པོ་ཡིས༔ དབང་ཆེན་འབར་བའི་བྲོ་བརྡུང་པས༔ ཐབས་ཤེས་གཟུགས་ཀྱི་ཕུང་པོ་ལ༔ མེ་ལོང་ལྟ་བུས་གཟིར་བའི་བྲོ༔ ཐབས་དང་ཤེས་རབ་ཚོར་བ་ལས༔ ཐམས་ཅད་མཉམ་པའི་བྲོ་བརྡུང་ངོ༔ ཐབས་དང་ཤེས་རབ་འདུ་ཤེས་ལས༔ སོ་སོར་རྟོག་སྟེ་རོལ་པའི་བྲོ༔ ཐབས་དང་ཤེས་རབ་འདུ་བྱེད་ལས༔ བརྩོན་པས་བྱ་བ་གྲུབ་པའི་བྲོ༔ ཐབས་དང་ཤེས་རབ་རྣམ་ཤེས་ལས༔ རྟོག་མེད་ཆོས་ཀྱི་དབྱིངས་ཀྱི་བྲོ༔ དུས་གསུམ་སངས་རྒྱས་ཐམས་ཅད་ཀྱི༔ བྲོ་ནི་སྐྱེ་བ་མེད་པའི་བྲོ༔ གླུ་ནི་འགག་པ་མེད་པའི་གླུ༔ ཞི་བར་མི་གནས་ཚིག་ཏུ་འབྱུང༔ རྒྱལ་བའི་ཕྲིན་ལས་ཐམས་ཅད་ཀྱི༔ སྣ་ཚོགས་ལས་ཀྱི་གར་འདི་ནི༔ བདེ་བ་ཆེན་པོ་སྐྱེད་པའི་བྲོ༔ ཚད་མེད་ནམ་མཁའི་མཐའ་མཉམ་པ༔ ཕྱོགས་བཞིའི་དཀྱིལ་འཁོར་ཡངས་པ་རུ༔ རྟ་མཆོག་རིགས་བཞིས་ལས་མཛད་པས༔ ཐབས་ཤེས་གཡུལ་ངོ་ཐམས་ཅད་ཟློག༔ སྤྲོས་པ་མེད་པའི་ངང་ལ་གནས༔ ཨོཾ་ཧ་ཡ་གྲཱི་བ་ཧྲཱིཿབྷྲཱུྃ་ཧཱུྃ་ཕཊ༔ ཤཱནྟིཾ་ཀུ་རུ་ཨོཾ༔ པུཥྚིཾ་ཀུ་རུ་བྷྲཱུྃ༔ པཱ་ཤཾ་ཀུ་རུ་ཧོ༔ མཱ་ར་ཡ་ཕཊ༔ དེ་ལྟར་གར་གྱི་ཕྱག་རྒྱ་ཡིས༔ རྣལ་འབྱོར་རྟོགས་པའི་ཉམས་སྤར་བས༔ ལས་རྣམས་མ་ལུས་ཐམས་ཅད་འགྲུབ༔ རྒྱལ་བ་རྣམས་དང་ཐབས་ཅིག་འགྲོགས༔ ཞིང་ཁམས་ཀུན་ཏུ་དེ་ཉུལ་ཞིང༔ རྒྱལ་བའི་ཕྲིན་ལས་མ་ལུས་པས༔ སེམས་ཅན་ཀུན་ལ་སྨིན་པར་མཛད༔ གར་གྱི་གསང་བ་རྨད་བྱུང་ངོ༔ ས་མ་ཡ༔ རྡོ་རྗེའི་དམ་ཚིག་རྨད་པོ་ཆེ༔ ཧེ་རུ་ཀ་དཔལ་རྒྱ་མཚོའི་སྤྲིན༔ སྒྲུབ་པའི་ཐབས་མཆོག་བདེ་ཆེན་གར༔ འདི་ལས་གཞན་དུ་བསྟན་པ་མེད༔ དེ་ཕྱིར་ཕྱི་རབས་སྐལ་ལྡན་ཆེ༔ བློ་ཆེ་བློ་བརྟན་བློ་གྲོས་ཟབ༔ ཚེ་གཅིག་བྱང་ཆུབ་འགྲུབ་འདོད་རྣམས༔ འདིར་ཞུགས་འདི་ལ་ནན་ཏན་གྱིས༔ འདི་ཉིད་མངོན་དུ་འགྱུར་བར་བྱོས༔ རྡོ་རྗེ་གར་གྱི་རོལ་པ་ནི༔ གླུ་ཡི་སྙིང་པོའི་སྲོག་ལྡན་པ༔ བདེ་བ་ཆེ་ལ་རབ་ཞུགས་གང༔ སངས་རྒྱས་ཉིད་ཀྱི་སྤྱོད་པ་ཡིན༔ ལུས་དང་དེ་བཞིན་ངག་དང་ཡིད༔ བདེ་བས་ཡང་ཡང་རབ་བསྐྱོད་གང༔ བདེ་གཤེགས་རྣམས་ལ་ཕུལ་ན་ནི༔ སངས་རྒྱས་སེམས་ཅན་མཉམ་སྦྱོར་འགྲུབ༔ དེ་ཡང་ལྷ་ཡི་ཆས་ཞུགས་ཏེ༔ ཕྱག་རྒྱ་གང་ཞིག་འཆིང་བྱེད་པས༔ རིགས་དྲུག་ཕྱག་རྒྱ་རྗེས་དྲན་པ༔ ཐུན་མོང་ཕྱི་ཡི་གར་དུ་བཤད༔ རྡོ་རྗེ་ལུས་ཀྱི་བྱེད་པ་ནི༔ གར་གྱི་ཚུལ་གྱིས་བར་བཅིངས་པས༔ བདེ་བའི་ཉམས་འགྱུར་རྫོགས་བྱེད་པ༔ དེ་ནི་ཁྱད་པར་ནང་ཡིན་ནོ༔ ཐུན་མོང་མ་ཡིན་སྙེམས་མ་དྲུག༔ རྒྱལ་བ་དྲུག་དང་མཉམ་པར་སྦྱོར༔ བདེ་ཆེན་གཟི་བྱིན་བཟོད་བྱེད་པ༔ བླ་ན་མེད་པ་གསང་བའི་ལམ༔ ཇི་ལྟར་སྣང་ཞིང་གྲགས་པ་དང༔ བསྒུལ་ཞིང་སྤྱོད་དང་མྱང་བ་ཀུན༔ མཁའ་ལྟར་རབ་ཞིར་ཡོངས་ཤེས་པ༔ མཐར་ཐུག་དེ་ཁོ་ན་ཡི་གར༔ གལ་ཏེ་དབང་ཐོབ་དམ་ཚིག་ལྡན༔ རྣལ་འབྱོར་གང་གིས་འདི་སྤངས་པ༔ ཚེ་འདིར་ཉེས་རྒུ་ཀུན་འདུ་ཞིང༔ ལྟོས་པ་དང་བཅས་མནར་མེད་འགྲོ༔ སྐལ་བཟང་རྣམས་ཀྱིས་ཚུལ་བཞིན་དུ༔ གསང་བ་མཆོག་འདི་རབ་སྤྱོད་ན༔ ཧེ་རུ་ཀ་དཔལ་བཙུན་མོར་བཅས༔ རྟག་ཏུ་དེ་ལ་བུ་བཞིན་དགོངས༔ གནས་ཡུལ་དུར་ཁྲོད་དཔའ་བོ་དང༔ རྣལ་འབྱོར་མ་ཡིས་གྲོགས་མཛད་དེ༔ ཐུན་མོང་མཆོག་གི་དངོས་གྲུབ་ནི༔ དཀའ་བ་མེད་པར་མྱུར་དུ་འཐོབ༔ དེ་ཕྱིར་པདྨ་བདག་གི་སྲས༔ ཧེ་རུ་ཀ་ཡི་གདུང་འཚོབ་པ༔ མ་འོངས་རྣལ་འབྱོར་དམ་པ་རྣམས༔ འདི་ལ་སྲོག་བཞིན་བཙའ་བར་བྱོས༔ མཐོང་བ་ཙམ་གྱིས་རྣམ་གྲོལ་གྱི༔ ཡེ་ཤེས་སྙིང་ནས་སྐུལ་བྱེད་ན༔ ཇི་བཞིན་སྤྱོད་པ་དེ་རྣམས་ནི༔ ཁྲག་འཐུང་དཔལ་དང་ངེས་པར་མཚུངས༔ པདྨ་བཛྲ་ཐུགས་ཀྱི་བཅུད༔ མ་འོངས་མཐའ་ནས་མཐའ་རུ་འཕེལ༔ ལས་ལྡན་དག་གི་སྐལ་པ་ལས༔ རིན་ཆེན་སྒྲོན་མེ་བཞིན་དུ་འཆར༔ གང་དག་ཉན་ཐོས་འབའ་ཞིག་དང༔ གང་ཞིག་རྟོག་གེ་ལ་དགའ་བ༔ སངས་རྒྱས་མུ་སྟེགས་བྱེད་རྣམས་ལ༔ རླུང་ཕྱོགས་ཙམ་ཡང་བསྒྲག་མི་བྱ༔ ནམ་མཁའ་དང་ནི་རྡོ་རྗེ་མཆོག༔ དཔལ་དང་ཡེ་ཤེས་ཉི་མའི་འོད༔ ཀུན་ནས་དགའ་བ་དེ་དང་དེས༔ ཚུལ་འདི་འཆང་བས་དོན་ཆེན་འགྲུབ༔ བློ་གྲོས་ཆེན་པོས་རབ་འཛིན་ཅིང༔ རྡོ་རྗེ་རྟ་མཆོག་དཔལ་དུ་འགྱུར༔ གར་གྱི་དབང་ཕྱུག་པདྨའི་དཔལ༔ ཁྱད་པར་ཉིད་དུ་འདི་འཛིན་བྱེད༔ དེ་ཚེ་སྣོད་ནི་རྒྱལ་བའི་མཆོག༔ རིགས་དྲུག་ཞིང་དུ་འགྱུར་བ་སྟེ༔ བཅུད་ཀུན་སྐལ་པར་ལྡན་པ་ཡིས༔ ཡེ་ཤེས་དྲུག་གི་བྱིན་ཆེན་ཕེབས༔ ཨོ་རྒྱན་ཆོས་ཀྱི་མཛོད་ཆེན་པོའི༔ བྱེ་བ་ཕྲག་བརྒྱའི་སྙིང་པོའི་བཅུད༔ ཏནྟྲ་བཅོ་བརྒྱད་ངེས་པའི་ལུང༔ ཧེ་རུ་ཀ་དཔལ་རིགས་འདུས་པ༔ དམ་ཚིག་ཆེ་བའི་རྒྱལ་པོ་མཆོག༔ འོ་མ་ལས་ནི་མར་བཞིན་དུ༔ གྲུབ་པའི་དགོངས་པ་གཅིག་ཏུ་བསྡུས༔ མ་བྱུང་འབྱུང་བར་དཀའ་བའི་ཆོས༔ གླེགས་བམ་མགུལ་དུ་ཐོགས་པས་ཀྱང༔ གདུག་པ་ཅན་རྣམས་སྡིགས་པར་བྱེད༔ ལྷ་མ་ཡིན་རྣམས་སྤ་བཀོང་ཞིང༔ ཀླ་ཀློ་གདུག་པ་ཚར་ཐག་གཅོད༔ དཔའ་བོ་མཁའ་འགྲོའི་སྙིང་རྩ་བསྒུལ༔ འཕྲལ་དང་ཡུན་གྱི་ཕུན་ཚོགས་ཀུན༔ པདྨོའི་མཚོ་ལ་ངང་པ་བཞིན༔ འབད་པ་མེད་པར་འདུ་བར་འགྱུར༔ དེ་ཕྱིར་ཁྲག་འཐུང་ཐམས་ཅད་ཀྱི༔ སྙིང་གི་ཐིག་ལེའི་ཕྱི་མོ་མཆོག༔ འདི་ལ་བརྟེན་ནས་སྙིགས་མའི་དུས༔ ཀུན་ཀྱང་ཡེ་ཤེས་རྒྱས་པར་འགྲུབ༔ ས་མ་ཡ༔ རྒྱ་རྒྱ་རྒྱ༔ ༁ྃཿ བདེ་མཆོག་སངས་རྒྱས་མཉམ་སྦྱོར་ལས༔ ཤིན་ཏུ་གསང་བའི་གབ་ཡིག་བཞུགས༔ ཧེ་རུ་ཀ་འདུས་པའི་ཐུགས་ཏིག་གི་ཐེམ་མེད༔ ཧེ་རུ་ཀ་ལ་ཕྱག་འཚལ་ལོ༔ ཐུན་མོང་མ་ཡིན་ལྷག་གནས་ལ༔ ནུས་ལྡན་ཡབ་ཡུམ་མཉམ་སྦྱོར་བའི༔ བདུད་རྩི་བྱང་ཆུབ་སེམས་སྤྲིན་ནམ༔ ཡང་ན་བསྒྲུབས་པའི་བདུད་རྩི་ཡིས༔ དགུན་དུས་གངས་ཀྱི་རི་བོར་བྲན༔ ཆུ་བོ་གང་དུ་འདོད་པར་སྦས༔ སྟོན་གྱི་དུས་སུ་སྲོག་ཆུ་བླངས༔ དཔྱིད་དུས་རྩ་བའམ་འབྲས་བུ་དང༔ ལྗོན་པའི་ནེ་འུ་གསེང་དུ་སྦས༔ དེ་བཞིན་སྙོམས་འཇུག་བྱང་ཆུབ་སེམས༔ རྟེན་ལ་བྱུགས་ཤིང་བདུད་རྩིས་བྲན༔ ས་མ་ཡ༔ ཐུན་མོང་མ་ཡིན་སྦྱིན་སྲེག་ཀྱང༔ སྟེགས་བུ་ལྷོད་འབོལ་གདན་དུ་བྱ༔ ཤ་རྒྱས་བཞིན་ཟླུམ་སྲ་མཁྲེགས་ལྡན༔ པདྨ་མཁྲང་བར་གྱུར་པ་དང༔ དཀར་ཞིང་མིག་དང་ཚེམས་ཕྲེང་ལེགས༔ དེ་ནི་རྟག་པའི་ཡུམ་དུ་བྱ༔ མདོག་དམར་བོང་མཚམས་ཡིད་དུ་འོང༔ པདྨ་དྲོད་ལྡན་ཆོས་ཀྱི་ཡུམ༔ སྟོད་སྨད་རྒྱས་ཤིང་སྔོ་མདངས་ཆགས༔ སྨིན་མཚམས་སྐྲ་ནི་ལི་བ་དང༔ པདྨ་གཏིང་རིང་རྡོ་རྗེའི་ཡུམ༔ མདོག་ནི་སེར་ལ་ཡིད་དུ་འོང༔ ལུས་བོང་རིང་ལ་འདོམ་ཡངས་པ༔ པདྨ་དམ་ཞིང་ཟིལ་པ་ལྡན༔ འདི་ནི་རིན་ཆེན་ཉི་མའི་ཡུམ༔ མདོག་ནག་བཞིན་རྩ་དམར་བ་དང༔ ཡིད་འོང་པདྨ་ཆོས་འབྱུང་དབྱིབས༔ ཚིམས་པ་མེད་པའི་ཆགས་ལྡན་ནི༔ ཧེ་རུ་ཀ་ཡུམ་པདྨ་ཅན༔ སྣ་ཚོགས་གཟུགས་ཅན་ཡིད་འོང་མ༔ མ་ངེས་བདེ་བ་འཕེལ་བྱེད་པ༔ འདི་ནི་རྟ་མཆོག་རོལ་པའི་ཡུམ༔ བཞིན་ནི་དཀར་ལ་དམར་བའི་མདངས༔ བོང་མཛེས་སྐེད་པ་མཉེན་ལྕུག་ལྡན༔ འཁྲིལ་བག་ཆགས་ཤིང་འདོམ་ཡངས་པ༔ པདྨ་རབ་ཏུ་རྒྱས་པ་ནི༔ ཀུན་གྱི་ཐུན་མོང་ཡུམ་དུ་གྲགས༔ དེ་ལྟར་མཚན་ལྡན་དགུག་བྱས་ལ༔ ཕྱི་ནང་གསང་བའི་རྒྱུད་སྦྱང་ངོ༔ སྟེང་ན་ཁྱབ་པ་འཁོར་ལོ་རོལ༔ གཡས་ན་ཁྲག་འཐུང་གཡོན་ཉི་མ༔ རྒྱབ་ཆོས་མདུན་ནི་རྡོ་རྗེ་སེམས༔ འོག་དང་བཞེངས་པ་སྣ་ཚོགས་ནི༔ རྟ་མཆོག་རོལ་པའི་བརྟུལ་ཞུགས་ཡིན༔ ཁྱད་པར་གསང་བའི་བརྟུལ་ཞུགས་ནི༔ རྟག་པའི་རྡོ་རྗེ་བོང་བུའི་ཞལ༔ དབྱིངས་ཕྱུག་མ་ནི་རྟ་ཡི་ཞལ༔ འཁོར་ལོ་བརྩེགས་པའི་རྡོ་རྗེའི་རྩེ༔ ་ནོར་བུ་རབ་ཏུ་རྒྱས་པ་ན༔ འཁོར་ལོའི་གསང་བ་ལྡན་གྱུར་པ༔ ཆགས་ལྡན་བོང་བུའི་རྩ་བཞིན་དུ༔ བདེ་ཆེན་རྟ་མཆོག་མོ་ལ་ནི༔ འཁོར་ལོ་འབར་བའི་གསང་བ་ལྡན༔ བདེ་བ་ཆེན་པོ་དེ་མངའ་བ༔ ཧེ་རུ་ཀ་ཡི་འཇིག་རྟེན་དུ༔ རྟ་དང་བོང་བུའི་དབྱིབས་ལྟ་བུའི༔ དཔའ་བོ་ཡབ་ཡུམ་བྱུང་བ་ལ༔ ཁམས་གསུམ་ཆགས་པ་ཀུན་འདུས་པའི༔ བདེ་ཆེན་ཉམས་བརྒྱ་འབུམ་ཕྲག་ལྡན༔ དེ་ཡི་བརྟུལ་ཞུགས་འཆང་བའི་ཕྱིར༔ ཧེ་རུ་ཀ་ཡང་དེ་ལྟར་བསྒོམ༔ ས་མ་ཡ༔ རྒྱ་རྒྱ་རྒྱ༔ ཞེས་སྤྲུལ་པའི་གཏེར་ཆེན་མཆོག་གྱུར་བདེ་ཆེན་ཞིག་པོ་གླིང་པས་རབ་བྱུང་བཅོ་ལྔ་པའི་ཐོག་མ་མེ་ཡོས་ས་ག་ཟླ་བའི་ཤེར་ཕྱོགས་ཀྱི་རྒྱལ་བ་གཉིས་པ་ལ། མདོ་ཁམས་ཡོན་ཏན་གྱི་གནས་གཙོ་རུ་དམ་གངས་ཁྲོད་བདེ་བ་ཆེན་པོ་ནས་རྡོ་སྒྲོམ་རིམ་པ་གསུམ་པ་སྤྱན་དྲངས་པའི་ཤོག་སེར་ལས་གཏན་ལ་ཕབ་རིམ་བཞིན། ཤར་ཕྱོགས་རིན་ཆེན་རྣམ་པར་བཀོད་པའི་སྦས་གནས་ཆེན་པོའི་མགོ་བོ། བདེ་ཆེན་གསང་བའི་ཕུག་པ་ཧེ་རུ་ཀ་དཔལ་དགྱེས་པའི་ཕོ་བྲང་དུ་རབ་བྱུང་གྲོ་བཞིན་ཟླ་བའི་དཀར་ཕྱོགས་ཀྱི་བཟང་པོ་གཉིས་པར་ཤཱཀྱའི་དགེ་སློང་རྡོ་རྗེ་འཛིན་པ་འཇིགས་བྲལ་གྱི་སློབ་དཔོན་པདྨ་འོད་གསལ་མདོ་སྔགས་གླིང་པས་བྲིས་པ་འགྲོ་ཀུན་ཁ་སྦྱོར་བདུན་ལྡན་དཔལ་ཧེ་རུ་ཀའི་གོ་འཕང་ཚེ་འདི་ཉིད་ལ་མངོན་དུ་བྱེད་པའི་རྒྱུར་གྱུར་ཅིག། །།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).