Terdzo-CHA-032



Property "author" has been marked for restricted use.








Terdzo-CHA-032.pdf
Click the picture above to view the Shechen manuscript.

གུ་རུ་ཞི་དྲག་ཐུན་མོང་གི་ཐུགས་སྒྲུབ་བདེ་གཤེགས་འདུས་པ་ལས་སྨིན་བྱེད་དབང་གི་ཆོ་ག་དངོས་གྲུབ་དཔལ་སྟེར་

gu ru zhi drag thun mong gi thugs sgrub bde gshegs 'dus pa las smin byed dbang gi cho ga dngos grub dpal ster

by  འཇམ་མགོན་ཀོང་སྤྲུལ་ (Jamgön Kongtrul)
revealed by  སྟག་ལུང་པ་སངས་རྒྱས་དབོན་པོ་ (Taklungpa Sangye Önpo)
in cycle  ཐུགས་སྒྲུབ་བདེ་གཤེགས་འདུས་པ་ (Thugs sgrub bde gshegs 'dus pa)
Volume 6 (ཆ) / Pages 695-718 / Folios 1a1 to 12b3

[edit]

༄༅། །གུ་རུ་ཞི་དྲག་ཐུན་མོང་གི་ཐུགས་སྒྲུབ་བདེ་གཤེགས་འདུས་པ་ལས་སྨིན་བྱེད་དབང་གི་ཆོ་ག་དངོས་གྲུབ་དཔལ་སྟེར་ཞེས་བྱ་བ་བཞུགས་སོ། ། ན་མོ་གུ་རུ་པདྨ་ཀཱིརྟི་ཤྲཱི་ཡེ། གྲུབ་པས་འདུལ་ལ་བཀའ་བརྒྱུད་གྲུབ་པའི་གཟུགས། །དུས་གསུམ་བརྒྱུད་མར་སྟོན་མཛད་ཐོད་ཕྲེང་རྩལ། །སྟོན་འཁོར་དབྱེར་མེད་ཞབས་ལ་ཕྱག་བགྱིས་ནས། །གྲུབ་པའི་རྡོ་རྗེའི་གསུང་གི་སྨིན་བྱེད་འཆད། །ངོ་མཚར་རྨད་དུ་བྱུང་བའི་ཐུགས་ཀྱི་སྒྲུབ་པའི་དཀྱིལ་འཁོར་དུ་གཞུག་པ་ལ་གསུམ། དབང་རྟེན་འདུ་བྱ་བ། དབང་དོན་དཀྱིལ་འཁོར་སྒྲུབ་པ། དབང་བསྐུར་དངོས་ཀྱི་ལས་རིམ་མོ། །དང་པོ་ནི། དུས་བཟང་ཡར་ངོའི་ཚེས་བཅུ་ལ་སོགས་པར་གུ་རུའི་ཞབས་ཀྱིས་བཅགས་པ་སོགས་བྱིན་རླབས་ཅན་གྱི་གནས་གཙང་མ་བྱི་དོར་བྱས་ཤིང་རྒྱན་གྱིས་སྤྲས་པའི་གུང་དུ་གུ་རུའི་རྟེན་བཀྲམ་པའི་མདུན་དུ། སྟེགས་བུ་ཁེབས་ལྡན་གྱི་དབུས་སུ་དཀྱིལ་འཁོར་རྟ་བབས་སྣམ་བུ་བཞི་ལ་དུར་ཁྲོད་སོགས་ཞི་ཁྲོ་སྦྲགས་མ་སྤྱི་ལྟར་ལ། ནང་དུ་པདྨ་འདབ་བརྒྱད་ཀྱི་ལྟེ་བར་པད་འབྱུང་ཡབ་ཡུམ། འདབ་མ་རྣམས་ལ་གཽ་རཱི་མ་བརྒྱད་ཀྱི་སྐུ་དང་ཕྱག་མཚན་གང་རུང་བྲིས་པ་བཀོད། མ་འབྱོར་ན་མཎྜལ་འབྲུ་ཚོམ་གཙོ་འཁོར་དགུ་པ་བཀོད་པའི་སྟེང་དུ་འཕྲུལ་སྟེགས་ལ་བུམ་པ་བཅུད་ལྡན་ཁ་རྒྱན་མགུལ་ཆིངས་དཀར་པོས་སྤྲས་པ་གཟུངས་རྡོར་དུང་ཆོས་བཅས་བཞག །མདུན་རྒྱབ་གང་བདེར་བླ་མའི་གཏོར་ཆེན་རིན་ཆེན་འབར་བ་སྤྱི་འགྲོ་སྨན་རཀ་བཅས། ཚེ་འབྲང་། ཚེ་རིལ། ཚེ་ཆང་། ལས་བུམ། མདུན་དུ་ཉེར་སྤྱོད་བཤམ། སྔོན་གཏོར། ཚོགས་ཀྱི་ཡོ་བྱད། སྲུང་མའི་གཏོར་འབུལ། མིག་དར། མེ་ཏོག་གིས་མཚོན་ཉེར་མཁོའི་ཡོ་བྱད་རྣམས་ཚོགས་པར་བྱའོ། །གཉིས་པ་ནི། ཚིག་བདུན་དང་བརྒྱུད་པའི་གསོལ་འདེབས་འཕྲོས་སུ་ལས་བྱང་ལྟར་བདུད་རྩི་བྱིན་བརླབ་ནས་བརྩམ། བདག་བསྐྱེད། མདུན་བསྐྱེད་བཟླས་པ་མཆོད་བསྟོད་བཅས་གྲུབ་པ་དང་། བུམ་བསྐྱེད་ནི། བསང་སྦྱང་། སྟོང་པའི་ངང་ལས་པད་ཟླའི་སྟེང་། །བྷྲཱུྃ་ལས་རིན་ཆེན་བུམ་པ་ཟུང་། །མཚན་ཉིད་ཐམས་ཅད་ཡོངས་རྫོགས་པ། །ལྷ་ཡི་བདུད་རྩིས་གང་བའི་དབུས། །སྣ་ཚོགས་པདྨ་འདབ་བརྒྱད་པ། །སོགས་ལས་བྱང་གི་མདུན་བསྐྱེད་ལྟར་ལ། གཡས་བསྐུམ་གཡོན་བརྐྱང་པད་ཟླར་བཞེངས། །ལས་བུམ་དབུས་སུ་པད་ཉིར་ཧཱུྃ། །ལས་བྱུང་ཁྲོ་ཆེན་བདུད་རྩི་འཁྱིལ། །ལྗང་སྔོན་སྣ་ཚོགས་རྡོ་རྗེ་འཕྱར། །དྲིལ་བུ་དཀུར་བརྟེན་འདོར་ཐབས་ཚུལ། །དུར་ཁྲོད་ཆས་དང་རཏྣས་བརྒྱན། །སྐུ་གསུང་ཐུགས་སུ་བྱིན་བརླབས་ཤིང་། །ཡེ་ཤེས་རྣམ་ལྔས་དབང་བསྐུར་རོ། །ཨོཾ་ཨཱཿཧཱུྃ། ཨོཾ་ཧཱུྃ་སྭཱ་ཨཱཾ་ཧཱ། ཞེས་བསྐྱེད་བརླབ་དབང་བསྐུར་བྱ། གཟུངས་ཐག་འཇུས་ཏེ། བདག་གི་ཐུགས་ཀའི་འོད་ཟེར་གཟུངས་ཐག་བརྒྱུད། །བུམ་ལྷའི་ཐུགས་ཀར་ཕོག་པས་རྒྱུད་བསྐུལ་ཏེ། །ཡབ་ཡུམ་མཉམ་སྦྱོར་བྱང་སེམས་བདུད་རྩིའི་རྒྱུན། །བབས་པས་བུམ་པ་ཡོངས་སུ་གང་བར་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཀཱ་ཡ་ཝཱ་ཀ་ཙིཏྟ་ཛྙཱ་ན་པཉྩ་ཨ་བྷི་ཥིཉྩ་ཧཱུྃ། ཞེས་བརྒྱ་རྩ་སོགས་ཅི་འགྲུབ་དང་། ལས་བུམ་ལ་ཨ་མྲྀཏ་བཟླ། ཧཱུྃ་ཧྲཱིཿ བླ་མ་ཡི་དམ་མཁའ་འགྲོ་ལ། །སོགས་མཆོད་པའང་མདུན་བསྐྱེད་ལྟར་བྱ། ཧཱུྃ་ཧྲཱིཿ མ་བཅོས་སྤྲོས་བྲལ་བླ་མ་ཆོས་ཀྱི་སྐུ །བདེ་ཆེན་ལོངས་སྤྱོད་བླ་མ་ཆོས་ཀྱི་རྗེ། །པད་སྡོང་ལས་འཁྲུངས་བླ་མ་སྤྲུལ་པའི་སྐུ །སྐུ་གསུམ་རྡོ་རྗེ་འཆང་ལ་ཕྱག་འཚལ་བསྟོད། །སྐུ་ནི་མི་འགྱུར་ཀུན་ཏུ་བཟང་པོའི་སྐུ །གསུང་ནི་མི་འགག་མཉམ་ཉིད་རིག་པའི་གསུང་། །ཐུགས་ནི་མི་གཡོ་སྨྲ་བསམ་བརྗོད་ལས་འདས། །སྐུ་གསུང་ཐུགས་ལྡན་པདྨ་རྒྱལ་ལ་བསྟོད། །འགྲོ་བའི་དོན་དུ་རང་བྱུང་འོད་དཔག་མེད། །བཀྲ་ཤིས་ཡོན་ཏན་དུ་མས་བརྒྱན་པའི་སྐུ །ཁམས་གསུམ་དབང་སྡུད་པདྨ་རྒྱལ་པོའི་སྲས། །རྡོ་རྗེ་ཐོད་ཕྲེང་རྩལ་ལ་ཕྱག་འཚལ་བསྟོད། །ཅེས་སམ་ཡང་ན་སྐྱེས་མཆོག་སངས་རྒྱས་དབོན་པོས་མཛད་པའི་རྣམ་དག་གི་བསྟོད་པས་བསྟོད། ཨོཾ་ཨཱཿཧཱུྃ། ཞེས་དུང་ཆུ་ཕུལ་ལ། རྣམ་རྒྱལ་བུམ་པའི་ལྷ་ཚོགས་རྣམས། །བདེ་ཆེན་བདུད་རྩིའི་ངོ་བོར་གྱུར། ཁྲོ་ཆེན་བདུད་རྩི་འཁྱིལ་པ་ཡིས། །བགེགས་ཀུན་བསྲུང་བའི་ཕྲིན་ལས་མཛོད། །ཅེས་སོ། །དེ་ནས་སློབ་མ་ལ་དབང་བསྐུར་བ་ལྟར་ཏིང་ངེ་འཛིན་གྱིས་བདག་འཇུག་རྒྱས་པར་ལེན་པ་ནི་ལུགས་འདིའི་བརྒྱུད་པའི་བླ་མ་རྣམས་ཀྱི་ཕྱག་སྲོལ་དུ་སྣང་བས་གྲུབ་ན་དགོས་ནུས་ཕན་ཡོན་དེ་བས་ཆེ་བ་མེད་ལ། མི་འགྲུབ་ན་བྱིན་རླབས་ཆུ་རྒྱུན་གཅིག་མ་ཙམ་མམ། རིག་པའི་མེ་ཏོག་དོར་བར་བྱས་པས་ཀྱང་གནད་ཀྱི་དོན་ནི་ཚང་ངོ་། །གསུམ་པ་ལ་གཉིས། འཇུག་པ་དང་། དངོས་གཞིའོ། །དང་པོ་ནི། སློབ་མ་རྣམས་ལས་བུམ་གྱིས་ཁྲུས་བྱ། ནང་དུ་འཁོད་པ་ལ། བགེགས་གཏོར་སྤྱི་ལྟར་བཏང་། ལས་བྱང་ལྟར་བཀའ་བསྒོ་མཚམས་བཅད། མེ་ཏོག་བཀྱེ་བསྡུ། སེམས་བསྐྱེད་གསལ་བཏབ་ནས། ད་ལམ་སྐབས་སུ་བབས་པའི་འཆད་བྱ་འདི་ཉིད་ཀྱི་དབང་དུ་བྱས་ན། བདེ་གཤེགས་འཁོར་བ་འཇིག་དང་མཉམ་མེད་ཤཱཀྱའི་རྒྱལ་པོ་དབྱེར་མེད་པ་དགེ་བའི་བཤེས་གཉེན་གྱི་རྣམ་པར་སྣང་བ་དཔལ་ལྡན་ཕག་མོ་གྲུ་པ་ཉིད་ཀྱིས་སྔོན་གྱི་ཚེ་འཕགས་པའི་ཡུལ་དུ་སྐུའི་བཀོད་པ་བརྒྱད་དུ་བསྟན་པའི་ཡ་གྱལ་གཅིག་ནི། པདྨ་རྒྱལ་པོས་དྲེགས་པ་ཅན་ཐམས་ཅད་འདུལ་བར་མཛད་པ་ཉིད་ཡིན་པར་ཞལ་གྱིས་བཞེས་ཤིང་དེ་ཉིད་ཀྱི་སློབ་མ་མཆོག་གི་གྲུབ་ཐོབ་གདུགས་ཐོགས་ལྔ་བརྒྱའི་གཙོ་བོར་གྱུར་པ་ཟུང་བཞི་ཡ་བརྒྱད་དུ་གྲགས་པའི་སྐྱེས་མཆོག་མིའི་སེང་གེ་རྣམས་ནི་མགོན་པོ་ཉིད་ཀྱི་གསང་བ་གསུམ་གྱི་རང་མདངས་སུ་ཤར་བས་སྟོན་འཁོར་ཐ་མི་དད་པར་གསུངས་པའི་ནང་ཚན། འཕགས་པ་ཤཱ་རིའི་བུའི་རྣམ་འཕྲུལ་མོས་གུས་མཐར་ཕྱིན་སྟག་ལུང་ཐང་པ་ཆེན་པོ་བཀྲ་ཤིས་དཔལ་གྱི་གདན་སར་བརྒྱུད་འཛིན་སེང་གེའི་ཁྲི་སྐྱོང་མཁས་གྲུབ་གསེར་གྱི་ཕྲེང་བ་བར་མ་ཆད་དུ་བྱོན་པའི་ནང་ནས། སྟག་ལུང་སངས་རྒྱས་རྣམ་གསུམ་ཞེས་ཉི་ཟླ་ལྟར་གྲགས་པའི་ཡ་གྱལ་མཉམ་མེད་དྭགས་པོ་ལྷ་རྗེའི་རྣམ་རོལ་གྲུབ་ཆེན་སངས་རྒྱས་དབོན་པོ་གྲགས་པ་དཔལ་གྱིས་སྤྲུལ་པའི་གནས་ཆེན་རྒྱའོ་གདོང་པདྨ་ཧེ་རུ་ཀ་རང་བྱུང་གི་ཐུགས་ཀ་ནས་སྤྱན་དྲངས་པའི་གུ་རུ་ཞི་དྲག་སྦྲགས་མའི་ཐུགས་སྒྲུབ་བདེ་གཤེགས་འདུས་པའམ། ཨོ་རྒྱན་ཀཻ་རཱི་བརྒྱད་བསྐོར་གྱི་དཀྱིལ་འཁོར་དུ་སྨིན་བྱེད་བྱིན་རླབས་ཀྱི་རིམ་པ་ཐུན་མོང་མ་ཡིན་པ་བསྒྲུབ་པར་བགྱི་བ་ལ་སློབ་དཔོན་གྱི་བྱ་བ་རྣམས་གྲུབ། ཁྱེད་རང་རྣམས་ཀྱི་ངོ་སྐལ་དབང་གི་བྱ་བ་ལ། འཇུག་པ་དང་དངོས་གཞི་གཉིས་སུ་ཡོད་པ་ལས། ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་སོགས་ཀྱིས་མཚམས་སྦྱར་ནས་མཎྜལ་འབུལ་དུ་གཞུག །ཐོག་མར་ཐེག་པ་ཆེ་ཆུང་ཐམས་ཅད་ཀྱི་ལམ་གྱི་གཞི་རྟེན་དུ་གྱུར་པ་སྐྱབས་སུ་འགྲོ་བའི་སྡོམ་པ་བླང་དགོས་པས། བླ་མ་དང་མདུན་བསྐྱེད་དབྱེར་མེད་པ་སངས་རྒྱས་ཀུན་དངོས་མ་ཧཱ་གུ་རུ་དཀོན་མཆོག་ཀུན་འདུས་ཀྱི་རང་བཞིན་ཅན་ལ། བདག་སོགས་མཁའ་ཁྱབ་ཀྱི་སེམས་ཅན་ཐམས་ཅད་དེང་ནས་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་བའི་འདུན་པས་འདིའི་རྗེས་ཟློས་ལན་གསུམ་མཛད་པར་ཞུ། ན་མོ། བླ་མ་བདེ་གཤེགས་འདུས་པའི་སྐུ །སོགས་ལས་བྱང་ལྟར་ལན་གསུམ། ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པ་ལ། མཁའ་ཁྱབ་ཀྱི་ཕ་མ་སེམས་ཅན་གཅིག་ཀྱང་མ་ལུས་པ་སངས་རྒྱས་ཀུན་འདུས་མ་ཧཱ་གུ་རུའི་གོ་འཕང་ལ་འགོད་པར་བྱ་བའི་སླད་དུ་ཟབ་མོ་བླ་མའི་རིམ་པ་ལ་འཇུག་ཅིང་བསྒྲུབ་པའི་འདུན་པས་འདིའི་རྗེས་ཟློས། སེམས་བསྐྱེད་འགྲོ་བ་སོགས་ལན་གསུམ། སྔོན་ཆད་དཀྱིལ་འཁོར་གཉན་པོ་འདིར་མ་ཞུགས་པས་དོན་དམ་ཡེ་ཤེས་ཀྱི་དཀྱིལ་འཁོར་ལ་མ་རིག་པས་མཐོང་བ་བསྒྲིབས་པའི་བརྡར་གདོང་གཡོགས་རེ་འཆིང་བར་ཞུ། ཨོཾ་ཙཀྵུ་རྦནྡྷ་བཱ་ར་མ་ཎཱ་ཡ་ཧཱུྃ། ལྷ་དང་མཇལ་བའི་ཕྱག་རྟེན་རིན་པོ་ཆེའི་ཅོད་པན་གསར་པ་ཕྱག་ཏུ་ཐོགས་པར་མོས་ཤིག །ཨཱ་ཁཾ་བཱི་ར་ཧཱུྃ། ཞེས་མིག་དར་མེ་ཏོག་སྦྱིན། ཐལ་མོ་མེ་ཏོག་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས། སངས་རྒྱས་ཀུན་གྱི་རང་བཞིན་སྐུ །སློབ་དཔོན་ལ་ནི་སྐྱབས་སུ་མཆི། །གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་འཚལ། །ལན་གསུམ། རྒྱུད་ལས་ཉོན་གྱི་སྒྲིབ་པ་སྦྱོང་ཞིང་ཚོགས་གཉིས་ཀྱི་གསག་པ་གོང་དུ་སྤེལ་བའི་སླད་དུ། བླ་མ་དཀྱིལ་འཁོར་གྱི་ལྷ་ཚོགས་རྩ་གསུམ་རྒྱལ་བ་རབ་འབྱམས་ནམ་མཁའ་གང་བར་སད་པ་དང་བཅས་པའི་སྤྱན་སྔར་ཡན་ལག་བཅུ་པོ་དོན་རེ་རེ་ནས་གསལ་འདེབས་བཞིན་པས་འདིའི་རྗེས་ཟློས། སྐུ་གསུམ་བླ་མ་གཤེགས་སུ་གསོལ། །སོགས་ལས་བྱང་ལྟར་གསུམ་མམ་གཅིག་བྱ། བྱིན་རླབས་དབང་བསྐུར་ཟབ་མོའི་གཞི་བཏིང་བའི་སླད་དུ་ཁྱེད་རང་རྣམས་ལུས་གནད་དྲང་པོར་བསྲང་ཞིང་། ངག་གནད་སྲོག་རྩོལ་ཁ་སྦྱོར། སེམས་གནད་གཞན་དུ་མ་ཡེངས་པར་ཡེ་ཤེས་པ་དབབ་པའི་དམིགས་པ་ལ་རྩེ་གཅིག་ཏུ་བསྒྲིམ་པར་ཞུ། ཁྱེད་རང་པདྨ་ཐོད་ཕྲེང་རྩལ། ཁྲོ་ཆེན་དཔལ་གྱི་ཆས་བརྒྱན་པ། །གར་དགུའི་ཉམས་ལྡན་དམ་ཚིག་སེམས། །སྤྱི་བོར་རྩ་བའི་བླ་མ་དང་། །མ་ཧཱ་གུ་རུ་དབྱེར་མེད་པ། །སྐུ་མདོག་དཀར་ལ་དམར་བའི་མདངས། །ཞི་ཞིང་འཛུམ་ལ་སྒེག་པའི་ཉམས། །དབུ་སྐྲ་རལ་པའི་ཐོར་ཚུགས་ཅན། །གཅེར་བུ་རུས་པའི་རྒྱན་གྱིས་མཛེས། །ཕྱག་གཡས་གསེར་གྱི་ཌཱ་མ་རུ། །ནམ་མཁར་འཕྱར་ཞིང་དཀྲོལ་བར་མཛད། །གཡོན་པས་དངུལ་དཀར་དྲིལ་བུ་ནི། །ཐུགས་ཀའི་ཐད་དུ་འཛིན་ཅིང་འཁྲོལ། །བདག་ཉིད་བྱིན་གྱིས་རློབ་པའི་ཆེད། །པདྨ་ཟླ་བའི་གདན་སྟེང་དུ། །གར་སྟབས་སྣ་ཚོགས་སྒྱུར་མཛད་ལ། །མོས་གུས་དྲག་པོས་གསོལ་བཏབ་པས། །བདེ་ཆེན་བདུད་རྩིར་ལྟེམ་གྱིས་ཞུ། །ལུས་གང་སྡིག་སྒྲིབ་ཐམས་ཅད་དག །བདེ་སྟོང་ངང་དུ་གནས་པར་གྱུར། །ཨོཾ་ཨཱཿགུ་རུ་པདྨ་སིདྡྷི་ཨཱ་བེ་ཤ་ཡ་ཨ་ཨཱཿཧཱུྃ། ཞེས་འབེབ་པའི་སྔགས་དང་རྫས་དང་རོལ་མོའི་སྒྲ་མྱུར་དལ་སྤེལ་མ་ཡུན་རིང་དུ་སྦྱར་ལ་ནན་ཏན་དུ་དབབ། ཡེ་ཤེས་པ་དེ་ཉིད་བྱང་ཆུབ་མ་ཐོབ་ཀྱི་བར་དུ་སྒོ་གསུམ་ལ་བརྟན་པར་བྱས་པའི་མོས་པ་མཛོད། རྒྱ་གྲམ་མགོར་བཞག་ལ། ཏིཥྛ་བཛྲ་བརྗོད། སྔར་བྱིན་པའི་རིན་པོ་ཆེའི་ཅོད་པན་དེ་ཉིད་ཁྱེད་རང་གི་ཚེ་རབས་ནས་འབྲེལ་བའི་རིགས་ཀྱི་ལྷ་ལ་འབུལ་བའི་མོས་པས་སྔགས་འདིའི་རྗེས་ཟློས་དང་བཅས་ཏེ་ལྟོས་པ་མེད་པར་འདོར་བར་ཞུ། ཨོཾ་བཛྲ་པུཥྤེ་པྲ་ཏཱིཙྪ་ཧོཿ ཞེས་མཎྜལ་ཚོམ་བུ་ལ་འདོར་དུ་གཞུག །དེ་ཉིད་སླར་སྤྱི་བོར་བཅིངས་ལ། གཙོ་དང་འཁོར་དུ་སྣང་བ་ཐམས་ཅད་ཀྱང་ཉི་མ་དང་འོད་ཟེར་བཞིན་དུ་རིགས་བརྒྱའི་ཁྱབ་བདག་གུ་རུ་པདྨ་སཾ་བྷ་བའི་ཡེ་ཤེས་ཀྱི་རོལ་པ་ལས་མ་གཡོས་པས་ཕྱོགས་གང་དུ་ཕོག་ཀྱང་གཙོ་བོ་ལ་ཕོག་ཅིང་། དེ་ཉིད་སླར་ཡང་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངས་པར་མོས་ཤིག །ཨོཾ་པྲ་ཏི་གྲྀཧྞ་ཧཱུྃ། མིག་དར་གྱི་འོག་ནས་དཀྱིལ་འཁོར་གྱི་བར་སྣང་ལ་གཟིགས་པས་ཁ་དོག་ཇི་ལྟར་མཐོང་བ་ཉིད་སྨྲོས་ཤིག །ཅེས་ལས་སོ་སོར་ལུང་བསྟན་པ་སྤྱི་དང་འདྲ། བདག་འཇུག་ཁོ་ནར་རམ་བསྡུ་ན། དཀྱིལ་འཁོར་ཁ་དོག་ཅིར་མཐོང་བ། །དེ་དང་རྗེས་མཐུན་དངོས་གྲུབ་ཐོབ། །ཐོག་མེད་ནས་སྒྲིབ་པ་འཐུག་པོས་གཡོགས་པའི་མ་རིག་པའི་མིག་རིག་པ་ཡེ་ཤེས་ཀྱི་ཐུར་མས་མིག་རས་དང་ལྷན་ཅིག་གསལ་བར་མོས་ཤིག །ཨོཾ་ཙཀྵུཿཔྲ་བེ་ཤ་ཡ་ཕཊ། ཡེ་ཤེས་ཀྱི་མིག་གསར་དུ་ཐོབ་པ་ལ་མཐོང་བ་བསྟན་པ་ཡིན་པས་དད་སྤྲོ་མོས་གུས་རྒྱ་ཆེན་པོ་སྐྱེད་འཚལ། དཀྱིལ་འཁོར་དུར་ཁྲོད་སྲུང་འཁོར་གྱིས། །བསྐོར་དབུས་མ་ཧཱ་གུ་རུ་ནི། །ཡབ་ཡུམ་མཁའ་འགྲོ་བརྒྱད་དང་བཅས། །སྒྲུབ་པ་བཀའ་བརྒྱད་ལྷ་ཚོགས་བཞུགས། །དེ་ལས་མེ་ཏོག་ཕོག་པའི་ལྷ། །གུ་རུ་ཉིད་ཡིན་རྟེན་བརྟེན་པ། །མངོན་སུམ་བཞིན་དུ་མཐོང་བར་གྱུར། །དེ་དག་གིས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་ནས་དབང་བསྐུར་དངོས་གཞི་རྣམས་ཞུ་བའི་ཡོན་དུ་དམིགས་ཏེ་མཎྜལ་ཕུལ། གཉིས་པ་དངོས་གཞིའི་དབང་ལ་བཞི། སྤྲོས་བཅས་ཀྱི་ཚུལ་དུ་བྱིན་རླབས་ཆུ་རྒྱུན་གཅིག་མ་ལ་བརྟེན་ནས་དབང་བཞི་བསྐུར་ཞིང་གསོལ་འདེབས་ཀྱིས་ཐུགས་དམ་བསྐུལ་བ། སྤྲོས་མེད་ཀྱི་ཚུལ་དུ་སྤྱི་བོའི་གུ་རུའི་འོད་ཟེར་ལ་བརྟེན་ནས་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དབང་བསྐུར་བ། ཤིན་ཏུ་སྤྲོས་མེད་ཀྱི་ཚུལ་དུ་རང་གི་གནས་གསུམ་འོད་ཟེར་སྤྲོ་བསྡུ་ལ་བརྟེན་ནས་རྡོ་རྗེ་གསུམ་གྱི་བྱིན་རླབས་བསྡུ་ཞིང་དྲེགས་པའི་སྲོག་ལ་དབང་བྱེད་པ། རབ་ཏུ་སྤྲོས་མེད་ཀྱི་ཚུལ་དུ་མཐར་ཐུག་དེ་ཁོ་ན་ཉིད་ཟུང་འཇུག་ཡེ་ཤེས་ཆེན་པོའི་དབང་བསྐུར་བ་རྣམས་སུ་ཡོད་པ་ལས། དང་པོ་སྤྲོས་བཅས་ཀྱི་ཚུལ་དུ་བྱིན་རླབས་ཆུ་རྒྱུན་གཅིག་མ་ལ་བརྟེན་ནས་དབང་བཞི་བསྐུར་ཞིང་གསོལ་འདེབས་ཀྱིས་ཐུགས་དམ་བསྐུལ་བའི་སླད་དུ་གསོལ་བ་འདེབས་པ་འདིའི་རྗེས་ཟློས། ཧཱུྃ། གནས་མཆོག་འོག་མིན་ཕོ་བྲང་ནས། །ཆོས་སྐུ་ལོངས་སྐུ་སྤྲུལ་པའི་སྐུ །སྐུ་གསུམ་དབྱེར་མེད་རྡོ་རྗེ་འཆང་། །བདག་ལ་དབང་སྐུར་བྱིན་གྱིས་རློབས། །ཨོཾ། སྐུ་ཡི་བྱིན་གྱིས་བརླབ་ཏུ་གསོལ། །ལུས་ཀྱི་སྒྲིབ་པ་སྦྱང་དུ་གསོལ། །ལུས་ཀྱི་གཟི་བརྗིད་བསྐྱེད་དུ་གསོལ། །སྐུ་མི་འགྱུར་ཚེ་ཡི་དངོས་གྲུབ་སྩོལ། །ཨཱཿ གསུང་གི་བྱིན་གྱིས་བརླབ་ཏུ་གསོལ། །ངག་གི་སྒྲིབ་པ་སྦྱང་དུ་གསོལ། །ངག་ལ་ནུས་པ་བསྐྱེད་དུ་གསོལ། །གསུང་སྙིང་པོ་ལུང་གི་དངོས་གྲུབ་སྩོལ། །ཧཱུྃ། ཐུགས་ཀྱི་བྱིན་གྱིས་བརླབ་ཏུ་གསོལ། །སེམས་ཀྱི་སྒྲིབ་པ་སྦྱང་དུ་གསོལ། །སེམས་ལ་རྟོགས་ཚད་བསྐྱེད་དུ་གསོལ། །ཐུགས་སྐྱེ་མེད་རྡོ་རྗེའི་དངོས་གྲུབ་སྩོལ། །ཡེ་ཤེས་ལྔ་ཡི་དབང་ཞིག་སྐུར། །མཆོག་དང་ཐུན་མོང་དངོས་གྲུབ་སྩོལ། །ལྷ་སྲིན་སྡེ་བརྒྱད་དམ་ལ་ཐོགས། །འབྱུང་པོའི་བར་ཆད་བཟློག་ཏུ་གསོལ། །བགེགས་དང་ལོག་འདྲེན་ཞི་བར་མཛོད། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ལན་གསུམ་བྱ། དེ་ལྟར་གསོལ་བཏབ་ཀྱིས་ཐུགས་རྒྱུད་བསྐུལ་བ་སྔོན་དུ་སོང་ནས། དབང་བླང་བའི་ཡུལ་གསལ་གདབ་པ་ལ་དམིགས་པ་འདི་བཞིན་མཛོད། སྤྱི་བོར་སྣ་ཚོགས་པདྨ་ནི། །འདབ་བརྒྱད་ཉི་ཟླའི་དཀྱིལ་འཁོར་དབུས། །མ་ཧཱ་གུ་རུ་སྐུ་མདོག་མཐིང་། །ཞི་ཞིང་འཛུམ་ལ་སྒེག་པའི་ཉམས། །དབུ་སྐྲ་རལ་པའི་ཐོར་ཚུགས་ཅན། །རྡོར་དྲིལ་འཛིན་པའི་ཕྱག་གཉིས་ཀྱིས། །ཡུམ་མཆོག་སངས་རྒྱས་མཁའ་འགྲོ་མ། །དཀར་མོ་གྲི་ཐོད་ཅན་ལ་འཁྱུད། །རིན་ཆེན་རུས་པའི་རྒྱན་གྱིས་མཛེས། །ལྷ་རྫས་དར་གྱི་ན་བཟའ་ཅན། །འགྱིངས་ཚུལ་གཡས་བརྐྱང་རོལ་པས་བཞུགས། །གཟུང་མ་སྐྲ་གྲོལ་རུས་རྒྱན་ཅན། །པདྨའི་སྐྱིལ་མོ་ཀྲུང་གིས་འཁྲིལ། །མཚན་དཔེའི་དཔལ་འབར་འོད་ལྔ་འཕྲོ། །ཕྱོགས་མཚམས་པདྨའི་འདབ་མ་ལ། །ཀོའུ་རཱི་ཙེའུ་རཱི་ལ་སོགས་པ། །མཁའ་འགྲོ་མ་བརྒྱད་བཞུགས་པར་གསལ། ཁྱེད་རང་རྣམས་ཀྱིས་མོས་གུས་མཛད་པའི་རྐྱེན་གྱིས་ཐུགས་རྒྱུད་བསྐུལ་ཏེ་བྱིན་རླབས་དབང་བཞིའི་ཆུ་རྒྱུན་རིམ་པར་ཕབ་པའི་ཐོག་མར་བུམ་པའི་དབང་ལ་དམིགས་པ་འདི་ལྟར་དུ་མཛོད། ཡབ་ཡུམ་སྙོམས་ཞུགས་སྦྱོར་མཚམས་ནས། །བྱང་སེམས་དཀར་དམར་འདྲེས་པའི་རྒྱུན། །ཞབས་གཡས་ཕྱི་རོལ་རྒྱུད་འཁྲིལ་ཏེ། །མཐེ་བོང་ནས་འཛག་རང་ཉིད་ཀྱི། །ཚངས་བུག་ཏུ་ཞུགས་བདེ་ཆེན་གྱི། །ཨོཾ་ཡིག་ལ་ཕོག་སྨིན་མཚམས་མན། །གང་བས་ལུས་ཀྱི་སྡིག་སྒྲིབ་སྦྱངས། །གུ་རུའི་སྐུ་ཡི་བྱིན་རླབས་ཀྱིས། །བདག་གི་ལུས་ལ་བདེ་བ་རྒྱས། །བུམ་པའི་དབང་མཆོག་ལེགས་པར་ཐོབ། །སྐུ་མི་འགྱུར་ཚེ་ཡི་དངོས་གྲུབ་བརྙེས། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་འཛབ་བསྙེན་མན་ཅི་ནུས་བཟླས་ལ་རོལ་མོའི་སྒྲ་བྱ་ཞིང་རྣམ་རྒྱལ་བུམ་པ་དཔྲལ་བར་བཞག་པ་སོགས་འོག་མ་རྣམས་ལ་རིགས་འགྲེ །གཉིས་པ་གསང་བའི་དབང་ལ་དམིགས་པ་འདི་ལྟར་དུ་མཛོད། བྱང་ཆུབ་སེམས་རྒྱུན་ལོངས་སྤྱོད་ཀྱི། །ཨཱཿཡིག་ལ་ཕོག་མགྲིན་པ་ཡན། །གང་བས་ངག་གི་སྡིག་སྒྲིབ་སྦྱངས། །གུ་རུའི་གསུང་གི་བྱིན་རླབས་ཀྱིས། །བདག་གི་ངག་ལ་ནུས་པ་བསྐྱེད། །གསང་བའི་དབང་མཆོག་ལེགས་པར་ཐོབ། །གསུང་སྙིང་པོ་ལུང་གི་དངོས་གྲུབ་བརྙེས། སྔགས་རོལ་དང་བུམ་པ་མགྲིན་པར་བཞག །གསུམ་པ་ཤེས་རབ་ཡེ་ཤེས་ཀྱི་དབང་ལ་དམིགས་པ་འདི་ལྟར་དུ་མཛོད། བྱང་ཆུབ་སེམས་རྒྱུན་ཆོས་འཁོར་གྱི། །ཧཱུྃ་ཡིག་ལ་ཕོག་སྙིང་ག་ཡན། །གང་བས་ཡིད་ཀྱི་སྡིག་སྒྲིབ་དག །གུ་རུའི་ཐུགས་ཀྱི་བྱིན་རླབས་ཀྱིས། །བདག་གི་སེམས་ལ་རྟོགས་པ་ཤར། །ཤེས་རབ་ཡེ་ཤེས་དབང་མཆོག་ཐོབ། །ཐུགས་སྐྱེ་མེད་རྡོ་རྗེའི་དངོས་གྲུབ་བརྙེས། །སྔགས་རོལ་དང་བུམ་པ་སྙིང་གར་རེག །དབང་བཞི་པ་ལ་དམིགས་པ་འདི་ལྟར་དུ་མཛོད། བྱང་ཆུབ་སེམས་ཀྱི་སྤྲུལ་འཁོར་སོགས། །རྐང་མཐིལ་ཡན་ཆད་ཁྱབ་ཅིང་གང་། །ལུས་ངག་ཡིད་ཀྱི་སྡིག་སྒྲིབ་དག །སྐུ་གསུང་ཐུགས་ཀྱི་བྱིན་རླབས་ཀྱིས། །ལུས་ངག་ཡིད་ལ་ནུས་པ་འབར། །བཞི་པའི་དབང་ཐོབ་སྐུ་གསུང་ཐུགས། །མི་ཕྱེད་རྡོ་རྗེའི་དངོས་གྲུབ་བརྙེས། །སྔགས་རོལ་དང་བུམ་པ་ལྟེ་བར་བཞག་ལ་བུམ་ཆུ་སྦྱིན། བདེ་དང་གསལ་དང་སྟོང་པའི་ཉམས། །དེ་ཚེ་སློབ་དཔོན་ཡབ་ཡུམ་གཉིས། །བདུད་རྩིར་ཞུ་ནས་རང་ལུས་གང་། །རང་སེམས་མདུད་པ་ཁོང་ཀློད་དེ། །མ་བཅོས་སོ་མའི་ངང་དུ་བཞག །བྱང་ཆུབ་སེམས་ཀྱི་ཆུ་རྒྱུན་ནི། །གྱེན་དུ་ལུད་པས་རིགས་ཀྱི་བདག །ད་ལྟའི་རྩ་བའི་བླ་མ་ཡིས། །སྤྱི་བོའི་གཙུག་ཏུ་རྒྱས་བཏབ་གྱུར། །བུམ་ཆུ་འཐོར། དེ་ཚེ་གུ་རུ་པདྨ་ཉིད། །ཐུགས་དམ་དབང་གིས་བླ་མ་ཡི། །རྣམ་པར་འབྱོན་པར་གདོན་མི་ཟ། །དེ་སླད་མོས་པས་གསོལ་བ་གདབ། །ཅེས་གསུངས་པའི་དོན་ལ་ཐེ་ཚོམ་མེད་པའི་མོས་གུས་རྩེ་གཅིག་ཏུ་སྐྱེད་ལ་གསོལ་འདེབས་ལྷན་ཅིག་ཏུ་གསུང་བར་ཞུ། དབྱངས་རོལ་སྤོས་དུད་བཅས། ཧཱུྃ། ཨོ་རྒྱན་གནས་འདི་ཉམས་རེ་དགའ། །སློབ་དཔོན་པདྨ་འབྱུང་གནས་བཞུགས། །འཁོར་དུ་མཁའ་འགྲོ་བརྒྱད་ཀྱིས་བསྐོར། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །ཟ་ཧོར་སློབ་དཔོན་ལེགས་མཆོག་ལ། །རབ་བྱུང་མཚན་ཉིད་ཆོས་རྣམས་གསན། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །ཟ་ཧོར་བྲག་དམར་བྱ་ཁྱུང་དུ། །སློབ་དཔོན་པྲ་ཆེན་ཧསྟི་ལ། །ཡོ་ག་རྣམ་ལྔའི་རྒྱུད་རྣམས་གསན། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །ཨོ་རྒྱན་གོ་མ་དེ་བཱི་ལ། །གསང་སྔགས་དབང་བསྐུར་མ་ལུས་ཐོབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །རྒྱ་གར་དགའ་རབ་རྡོ་རྗེ་ལ། །རྡོ་རྗེ་གདན་དུ་སྡེ་སྣོད་གསན། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །སློབ་དཔོན་ཤྲཱི་སིཾ་ཧ་ལ། །ཨོ་རྒྱན་ཡུལ་དུ་རྫོགས་ཆེན་གསན། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །འཇམ་དཔལ་བཤེས་གཉེན་བྱིན་རླབས་ཀྱིས། །བྱང་ཆུབ་ཤིང་དུ་འཇམ་དཔལ་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །ནཱ་གཱརྫུ་ནའི་བྱིན་རླབས་ཀྱིས། །སིང་ག་ལ་རུ་པདྨ་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །ཧཱུྃ་ཀཱ་ར་ཡི་བྱིན་རླབས་ཀྱིས། །ལི་ཡི་ཡུལ་དུ་ཡང་དག་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། ཁྲག་འཐུང་ནག་པོའི་བྱིན་རླབས་ཀྱིས། ཁ་ཆེའི་ཡུལ་དུ་བདུད་རྩི་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །ཤཱཀྱ་དེ་བའི་བྱིན་རླབས་ཀྱིས། །བལ་པོའི་ཡུལ་དུ་ཕུར་པ་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །དྷ་ན་སཾསྐྲྀའི་བྱིན་རླབས་ཀྱིས། །རྡོ་རྗེ་གདན་དུ་མ་མོ་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །རོམ་བུ་གུ་ཧྱའི་བྱིན་རླབས་ཀྱིས། །བསིལ་བའི་ཚལ་དུ་བསྟན་སྲུང་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །གཟུང་མ་མེ་ཏོག་མནྡཱ་ར། །མཱ་ར་ཏཱི་ཀར་རིག་འཛིན་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱིས་བརླབ་ཏུ་གསོལ། །རྒྱ་གར་བླ་མའི་བྱིན་རླབས་ཀྱིས། །དུར་ཁྲོད་བརྒྱད་དུ་དྲག་སྔགས་གྲུབ། །རྣམ་འཕྲུལ་རྩ་བའི་བླ་མ་བྱོན། །བདག་ལ་བྱིན་གྱི་བརླབ་ཏུ་གསོལ། །རྩ་བའི་དབང་བསྐུར་གཉིས་པ་སྤྲོས་མེད་ཀྱི་ཚུལ་དུ་སྤྱི་བོའི་གུ་རུའི་འོད་ཟེར་ལ་བརྟེན་ནས་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དབང་བསྐུར་བའི་སླད་དུ་དམིགས་པ་འདི་བཞིན་དུ་མཛོད། ཁྱེད་རྣམས་པདྨ་ཐོད་ཕྲེང་རྩལ། ཁྲོ་ཆེན་དཔལ་གྱི་ཆས་བརྒྱན་པའི། །སྤྱི་བོར་སྣ་ཚོགས་པདྨ་ནི། །སོགས་གོང་ལྟར་ལ། མཚན་དཔེའི་དཔལ་འབར་འོད་ལྔ་འཕྲོ། །རྩ་བའི་བླ་མའི་ངོ་བོ་ཉིད། །དེ་ཡི་སྤྱི་མགྲིན་ཐུགས་ལྟེ་གསང་། །གནས་ལྔ་རིམ་པ་ཇི་ལྟ་བར། །ཨོཾ་དཀར་ཨཱཿདམར་ཧཱུྃ་མཐིང་ག །ཏྲཱཾ་སེར་ཧཱ་ཡིག་ལྗང་གུས་མཚན། །དེ་དག་སོ་སོའི་འོད་ཟེར་གྱིས། །བདེ་གཤེགས་རིག་འཛིན་ཐམས་ཅད་དང་། །དཔའ་བོ་མཁའ་འགྲོ་མ་ལུས་པའི། །གསང་བ་བསམ་གྱིས་མི་ཁྱབ་པ། །རྒྱན་འཁོར་ལྔ་ཡི་བྱིན་རླབས་དང་། །དངོས་གྲུབ་འོད་ལྔའི་རྣམ་པར་བསྡུས། །བླ་མའི་གནས་ལྔར་ཐིམ་པ་ལས། །དེ་ཉིད་དུས་གསུམ་བདེ་གཤེགས་དང་། །རིག་པ་འཛིན་པ་ཐམས་ཅད་ཀྱི། །སྐུ་གསུང་ཐུགས་ཡོན་ཕྲིན་ལས་ཀུན། །གཅིག་ཏུ་བསྡུས་པའི་ངོ་བོར་གྱུར། །དེ་ལྟར་གུ་རུ་པདྨ་སཾ་བྷ་ཝ་བླ་མ་དང་གཉིས་སུ་མེད་པ་དཀོན་མཆོག་ཀུན་འདུས་སུ་གསལ་བ་ལ་མོས་གུས་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་མཛོད། ཨོཾ་ཨཱཿཆོས་སྐུ་སྣང་བ་མཐའ་ཡས་ལ་ན་མོ་ཧཱུྃ་སྭཱ་ཧཱ། དེས་འགྲེས་ཏེ་རྩ་བའི་བླ་མའི་བར་གྱི་བརྒྱུད་པ་ཀུན་ལ་སྦྱར། བླ་མའི་གཏོར་མ་ཐོགས་ལ་གནས་ལྔར་རིམ་པར་བཞག་པ་དང་བཅས། བླ་མ་དགྱེས་པ་ཆེན་པོས་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་རིམ་པར་བསྩལ་བའི་མོས་པ་མཛོད། ཁྱེད་རང་སྤྱི་གཙུག་སྟེང་བཞུགས་པའི། །མ་ཧཱ་གུ་རུའི་དཔྲལ་བ་ཡི། །ཨོཾ་ལས་འོད་ཟེར་དཀར་པོ་འཕྲོས། །རང་གི་བདེ་ཆེན་རྩ་འཁོར་དུ། །ཐིམ་པས་ཉོན་མོངས་གཏི་མུག་དང་། །ལུས་ཀྱི་སྒྲིབ་པ་མ་ལུས་དག །སྐུ་ཡི་དངོས་གྲུབ་ཐོབ་པར་གྱུར། །ཨོཾ་ཨཱཿབཛྲ་གུ་རུ་པདྨ་སིདྡྷི་ཧཱུྃ། ཞེས་ལན་བདུན་སོགས་བརྗོད་པ་འོག་མ་རྣམས་ལ་འགྲེ། ཁྱེད་རང་སྤྱི་གཙུག་སྟེང་བཞུགས་པའི། །མ་ཧཱ་གུ་རུའི་མགྲིན་པ་ཡི། །ཨཱཿལས་འོད་ཟེར་དམར་པོ་འཕྲོས། །རང་གི་ལོངས་སྤྱོད་རྩ་འཁོར་དུ། །ཐིམ་པས་ཉོན་མོངས་འདོད་ཆགས་དང་། །ངག་གི་སྒྲིབ་པ་མ་ལུས་དག །གསུང་གི་དངོས་གྲུབ་ཐོབ་པར་གྱུར། །ཨོཾ་ཨཱཿབཛྲ་གུ་རུ་པདྨ་སིདྡྷི་ཧཱུྃ། ཁྱེད་རང་སྤྱི་གཙུག་སྟེང་བཞུགས་པའི། །མ་ཧཱ་གུ་རུའི་ཐུགས་ཀ་ཡི། །ཧཱུྃ་ལས་འོད་ཟེར་སྔོན་པོ་འཕྲོས། །རང་གི་ཆོས་ཉིད་རྩ་འཁོར་དུ། །ཐིམ་པས་ཉོན་མོངས་ཞེ་སྡང་དང་། །ཡིད་ཀྱི་སྒྲིབ་པ་མ་ལུས་དག །ཐུགས་ཀྱི་དངོས་གྲུབ་ཐོབ་པར་གྱུར། །ཨོཾ་ཨཱཿབཛྲ་གུ་རུ་པདྨ་སིདྡྷི་ཧཱུྃ། ཁྱེད་རང་སྤྱི་གཙུག་སྟེང་བཞུགས་པའི། །མ་ཧཱ་གུ་རུའི་ལྟེ་བ་ཡི། །ཏྲཱཾ་ལས་འོད་ཟེར་སེར་པོ་འཕྲོས། །རང་གི་སྤྲུལ་པའི་རྩ་འཁོར་དུ། །ཐིམ་པས་ཉོན་མོངས་ང་རྒྱལ་དག །ཡོན་ཏན་དངོས་གྲུབ་ཐོབ་པར་གྱུར། །ཨོཾ་ཨཱཿབཛྲགུ་རུ་པདྨ་སིདྡྷི་ཧཱུྃ། ཁྱེད་རང་སྤྱི་གཙུག་སྟེང་བཞུགས་པའི། །མ་ཧཱ་གུ་རུའི་གསང་བ་ཡི། །ཧཱ་ལས་འོད་ཟེར་ལྗང་གུ་འཕྲོས། །རང་གི་བདེ་སྐྱོང་རྩ་འཁོར་དུ། །ཐིམ་པས་ཉོན་མོངས་ཕྲག་དོག་དག །ཕྲིན་ལས་དངོས་གྲུབ་ཐོབ་པར་གྱུར། །ཨོཾ་ཨཱཿབཛྲ་གུ་རུ་པདྨ་སིདྡྷི་ཧཱུྃ། ཞེས་བརྗོད། རྩ་བའི་དབང་བསྐུར་གསུམ་པ་ཤིན་ཏུ་སྤྲོས་མེད་ཀྱི་ཚུལ་དུ་རང་གི་གནས་གསུམ་འོད་ཟེར་སྤྲོ་བསྡུ་ལ་བརྟེན་ནས་རྡོ་རྗེ་གསུམ་གྱི་བྱིན་རླབས་བསྡུ་ཞིང་དྲེགས་པའི་སྲོག་ལ་དབང་བྱེད་པའི་སླད་དུ་དམིགས་པ་འདི་ལྟར་མཛོད། ཁྱེད་རང་དུས་གསུམ་བདེ་གཤེགས་དང་། །རིག་པ་འཛིན་པ་ཐམས་ཅད་ཀྱི། །སྐུ་གསུང་ཐུགས་ཡོན་ཕྲིན་ལས་ཀུན། །གཅིག་ཏུ་བསྡུས་པའི་ངོ་བོ་ནི། །གུ་རུ་པདྨ་ཐོད་ཕྲེང་རྩལ། །དམར་ནག་ཞལ་གཅིག་ཕྱག་གཉིས་པ། །སྤྱན་གསུམ་དམར་ཟླུམ་ཁྲོ་གཉེར་བསྡུས། །ཞལ་གདངས་མཆེ་གཙིགས་ཧཱུྃ་སྒྲ་སྒྲོག །དབུ་སྐྲ་སྨ་ར་སྨིན་མའི་ཚོགས། །དམར་སེར་མེ་ལྟར་གྱེན་དུ་གཡེང་། །ཡན་ལག་ཉིང་ལག་རགས་ཤིང་གཏུམ། །གསུས་ཁྱིམ་རྒྱ་མཚོ་ལྟ་བུར་རྒྱས། །ཐོད་སྐམ་ལྔ་ཡི་དབུ་རྒྱན་དང་། །མགོ་རློན་ལྔ་བཅུའི་དོ་ཤལ་འཆང་། །ཀླུ་ཆེན་བརྒྱད་ཀྱིས་ལེགས་བརྒྱན་ཅིང་། །ཕྱག་རྒྱ་དྲུག་གི་རྒྱས་བཏབ་པ། །ཞིང་ལྤགས་གླང་ལྤགས་ན་བཟར་མཛད། །སྟག་གི་པགས་པའི་ཤམ་ཐབས་བགོས། ཁྲག་ཞག་ཐལ་བའི་ཚོམ་བུས་སྤྲས། །ཕྱག་གཡས་གནམ་ལྕགས་རྡོ་རྗེ་གདེང་། །ལྷ་སྲིན་སྡེ་བརྒྱད་ཐལ་བར་རློག །ཕྱག་གཡོན་རི་རབ་ཕུར་བུ་འདྲིལ། །བསྟན་པའི་རུ་དྲ་ཀུན་ལ་འདེབས། །བ་སྤུའི་བུ་ག་ཐམས་ཅད་ནས། ཁྲོ་ཆུང་གྲངས་མེད་འཕྲོ་ཞིང་འདུ། །མ་མོ་འབུམ་གྱི་ཚོགས་དབུས་སུ། །གར་དགུའི་ཉམས་ཀྱིས་མངོན་པར་བརྗིད། །གཡས་བསྐུམ་གཡོན་བརྐྱང་རུ་དྲ་ཟུང་། །གྱད་ཀྱི་དོར་སྟབས་ཆེན་པོས་བརྫིས། །དེ་ཡི་ཐུགས་ཀར་ཡེ་ཤེས་སེམས། །མ་ཧཱ་གུ་རུ་འཛུམ་ཞིང་ཞི། །དཀར་ལ་དམར་བའི་མདངས་ཆགས་པ། །ལེ་བརྒན་དར་གྱི་ཆོས་གོས་ཅན། །ཕྱག་གཡས་གསེར་གྱི་རྡོ་རྗེ་དང་། །ཕྱག་གཡོན་ཚེ་བུམ་བཅུད་ལྡན་བསྣམས། །པད་ཞྭ་པྲོག་ལྔ་རྒྱན་ལྡན་གསོལ། །འགྱིང་ཚུལ་རྡོ་རྗེའི་སྐྱིལ་ཀྲུང་གིས། །ཟླ་བའི་གདན་ལ་བཞུགས་པ་དེའི། །ཐུགས་ཀར་ཉི་མའི་དཀྱིལ་འཁོར་དབུས། །ཏིང་འཛིན་སེམས་དཔའ་ཡི་གེ་ཧཱུྃ། །མཐིང་གསལ་བླ་མའི་ངོ་བོ་ཉིད། །དེ་ལྟར་གསལ་བས་ཁྱེད་རང་དྲག་པོ་ཐོད་ཕྲེང་རྩལ་གྱི་གནས་གསུམ་འབྲུ་གསུམ་གྱི་འོད་ཟེར་སྤྲོ་བསྡུ་འདི་ལྟར་དུ་སྒོམས་ཤིག །སྤྱི་བོར་པད་ཟླའི་དཀྱིལ་འཁོར་ལ། །ཨོཾ་ཡིག་ཀུནྡ་ལྟར་དཀར་གསལ། །དེ་ཡི་འོད་ཀྱིས་དེ་བཞིན་གཤེགས། །ཀུན་གྱི་སྐུ་ཡི་བྱིན་རླབས་བསྡུས། །ཨོཾ། ཡིག་ལ་ཐིམ་དབྱེར་མེད་གྱུར། །ཨོཾ་སྐུ་ནི་ནམ་མཁའི་འཇའ་ཚོན་ལ། །མཚོན་བྲལ་སྣང་སྟོང་ཁྱད་པར་འཕགས། །རང་ལུས་ལྷ་སྐུ་སྣང་སྟོང་སྒྱུ་མ་ལྟ་བུའི་ཏིང་ངེ་འཛིན་ལ་མཉམ་པར་འཇོག་པར་ཞུ། ཞེས་དར་ཅིག་བསྐྱང་འཇུག་པ་ཕྱི་མ་གཉིས་ལའང་འགྲེ །མགྲིན་པར་པདྨའི་གདན་སྟེང་དུ། །ཨཱཿཡིག་ཅོག་ལའི་མཚལ་ལྟར་དམར། །དེ་ཡི་འོད་ཀྱིས་དེ་བཞིན་གཤེགས། །ཀུན་གྱི་གསུང་གི་བྱིན་རླབས་བསྡུས། །ཨཱཿཡིག་ལ་ཐིམ་དབྱེར་མེད་གྱུར། །ཨཱཿ གསུང་ནི་བྲག་ཆའི་བརྡས་མཚོན་ལ། །མཚོན་བྲལ་གྲགས་སྟོང་ཁྱད་པར་འཕགས། །སྒྲ་བརྗོད་སྔགས་ཚིག་གྲགས་སྟོང་བྲག་ཆ་ལྟ་བུའི་ཏིང་ངེ་འཛིན་ལ་མཉམ་པར་འཇོག་པར་ཞུ། ཐུགས་ཀའི་ཏིང་འཛིན་སེམས་དཔའ་ཧཱུྃ། །ནམ་མཁའི་མདོག་ཅན་འོད་འབར་བ། །དེ་ཡི་འོད་ཀྱིས་དེ་བཞིན་གཤེགས། །ཀུན་གྱི་ཐུགས་ཀྱི་བྱིན་རླབས་བསྡུས། །ཧཱུྃ་ཡིག་ལ་ཐིམ་དབྱེར་མེད་གྱུར། ཧཱུྃ། ཐུགས་ནི་ནམ་མཁའི་འཇའ་ཚོན་ལ། །མཚོན་བྲལ་རིག་སྟོང་ཁྱད་པར་འཕགས། །དྲན་རྟོག་འོད་གསལ་རིག་སྟོང་རང་གྲོལ་ཡེ་ཤེས་ཆེན་པོའི་ཏིང་ངེ་འཛིན་ལ་མཉམ་པར་འཇོག་པར་ཞུ། སྣང་སྲིད་ཀྱི་ལྷ་སྲིན་དྲེགས་པའི་སྟོང་སྲོག་ལ་དབང་ཐོབ་པའི་སླད་དུ་དམིགས་པ་འདི་བཞིན་དུ་མཛོད། ཁྱེད་རང་རྒྱལ་བ་སྲས་བཅས་ཀྱི། །རྡོ་རྗེའི་གསང་བ་གཅིག་འདུས་པ། ཁྲག་འཐུང་པདྨ་དྲག་པོ་རྩལ། །འཁོར་འདས་ཀུན་གྱི་ཆེ་བཙན་གྱུར། །དེ་ཡི་མདུན་དུ་སྣང་སྲིད་ཀྱི། །ལྷ་སྲིན་སྡེ་བརྒྱད་དྲེགས་བྱེད་རྣམས། །འདར་ཞིང་འདུས་པས་སྲོག་སྙིང་འབུལ། །རང་ཉིད་བག་ཚ་མེད་པར་ནི། །དཔའ་བརྗིད་ལྡན་པས་རིམ་པ་གཉིས། །ཟུང་དུ་ཆུད་པའི་ཏིང་འཛིན་བརྟན། །རྩ་བའི་དབང་བསྐུར་བཞི་པ་རབ་ཏུ་སྤྲོས་མེད་ཀྱི་ཚུལ་དུ་མཐར་ཐུག་དེ་ཁོ་ན་ཉིད་ཟུང་འཇུག་ཡེ་ཤེས་ཆེན་པོའི་དབང་གི་སླད་དུ། སྤྱི་བོར་རྩ་བའི་བླ་མ་དང་། །གུ་རུ་དབྱེར་མེད་ཆེས་ཆེར་གསལ། །ཅི་མཛད་ཁྱེད་ཤེས་མོས་གུས་ཀྱིས། །གསོལ་བ་སྙིང་ནས་འདེབས་པར་འཚལ། །སླར་གསོལ་འདེབས་མཚན་སྤེལ་གོང་སྨོས་སམ། ཚིག་བདུན་གསོལ་འདེབས། མ་ནམ་བཞི་སྐོར་ལྟ་བུའི་སྤྱི་འགྲོ་གནད་དུ་བསྣུན། གསོལ་འདེབས་ཀྱི་སྙིང་པོ་བཛྲ་གུ་རུ་འཛབ་དབྱངས་བཅས་ཅི་འགྲུབ་བྱས་ལ་མཐར། བླ་མ་རྗེ་བཙུན་ཐུགས་རྗེའི་མཐུས། །རབ་དམར་བདུད་རྩིའི་ངོ་བོར་ཞུ། །རང་གི་ཚངས་བུག་ནས་ཞུགས་ཏེ། །སྙིང་གར་དབྱེར་མེད་འདྲེས་པ་ལས། །དཀོན་མཆོག་ཀུན་འདུས་བླ་མ་ཡི། །ཟབ་གསལ་ཟུང་འཇུག་ཡེ་ཤེས་དང་། །རང་གི་སེམས་ཉིད་གཉུག་མའི་གཤིས། །གཉིས་མེད་ཐིག་ལེ་ཆེན་པོར་རྫོགས། །ཞེས་པའི་དགོངས་པ་བསྐྱང་བར་ཞུ། ཞེས་མཉམ་པར་འཇོག་ཏུ་བཅུག་མཐར་ཚེ་གཏོར་རམ་བླ་གཏོར་སྤྱི་བོར་བཞག་ལ། གཏོར་མ་འདི་ཉིད་ཡེ་ཤེས་རིན་པོ་ཆེའི་གཞལ་ཡས་ཁང་མཚན་ཉིད་ཡོངས་སུ་རྫོགས་པའི་ནང་དུ། སངས་རྒྱས་ཀུན་འདུས་མ་ཧཱ་གུ་རུ་པདྨ་ཐོད་ཕྲེང་རྩལ་ཡབ་ཡུམ་ལ། ཀེའུ་རཱི་མ་མོ་བརྒྱད་དང་། གཞན་ཡང་རྩ་གསུམ་དམ་ཅན་རྒྱ་མཚོས་བསྐོར་ཏེ་སྤྲིན་གྱི་ཕུང་པོ་གཏིབས་པ་ལྟར་བཞུགས་པའི་གནས་གསུམ་ནས་འོད་ཟེར་བདུད་རྩིའི་རྒྱུན་བྱུང། ཁྱེད་རང་རྣམས་ཀྱི་སྒོ་གསུམ་ལ་ཐིམ་པས་བྱིན་རླབས་དངོས་གྲུབ་མ་ལུས་པ་ཐོབ་པའི་འདུན་པ་མཛོད། སྤྲོ་ན་ལས་བྱང་གི་དངོས་གྲུབ་བསྐུལ་ཚིག་གི་མཐར། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། གྲུབ་ཆེན་སངས་རྒྱས་དཔོན་པོ་ནས། པདྨ་འོད་གསལ་མདོ་སྔགས་གླིང་པའི་བར་དུ་བྱོན་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང། རིགས་འདུས་རྒྱལ་བ་པད་འབྱུང་ཡབ་ཡུམ། ཆེ་མཆོག་རྡོ་རྗེ་ཐོད་ཕྲེང་རྩལ། ཀེའུ་རཱི་མ་མོ་ཆེན་མོ་བརྒྱད། གནས་གསུམ་གྱི་དཔའ་བོ་མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས་རྡོ་རྗེའི་སློབ་མ་འདི་རྣམས་ལ་སྐུ་གསུང་ཐུགས་རྡོ་རྗེ་ཡེ་ཤེས་ཆེན་པོའི་བྱིན་ཆེན་དབབ་ཅིང་དབང་ཆེན་བསྐུར་བར་མཛད་དུ་གསོལ། ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ཉེ་བར་ཞི་ཞིང་། ཚེ་བསོད་དཔལ་འབྱོར་སྤང་རྟོགས་ཀྱི་ཡེ་ཤེས་ལ་སོགས་པ་མཐུན་པའི་རྐྱེན་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་མཛད་དུ་གསོལ། གྲུབ་པ་ཆེན་པོ་བརྒྱད་དང་ཕྲིན་ལས་རྣམ་པ་བཞི་ཐོགས་པ་མེད་པ་འགྲུབ་པར་དང་། ལམ་གྱུར་གྱི་འབྲས་བུ་རིག་འཛིན་རྣམ་བཞི་མཐར་ཕྱིན་ནས་མཐར་ཐུག་མི་སློབ་པའི་ཟུང་འཇུག་སྐུ་ལྔ་ཡེ་ཤེས་ལྔའི་བདག་ཉིད་གདོད་མའི་མགོན་པོ་པདྨཱ་ཀ་རའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཅེས་དང། སྙིང་པོ་བརྗོད་ལ་གཏོར་མ་གནས་གསུམ་དུ་བཞག །མཐར་གུ་རུ་འཁོར་དང་བཅས་པ་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་དབྱེར་མེད་པར་གྱུར་པའི་མོས་པ་མཛོད། ཅེས་བརྗོད། དེ་ནས་སྤྲོ་ན། བཀྲ་ཤིས་ཚེ་བརྟན་དཔལ་གྱི་ཟས། །སྙིང་པོ་བསྡུས་པའི་བཅུད་འདི་ནི། །དེ་རིང་བུ་ཡིས་ཟ་བར་གྱིས། །འདི་ཟོས་སངས་རྒྱས་ཚེ་དཔག་མེད། །ཞལ་མཐོང་བསྟེན་པས་ནད་ཀུན་ལས། །གྲོལ་འགྱུར་ཐེ་ཚོམ་བྱ་མི་དགོས། །ཞེས་སམ། བསྡུ་ན་ཞི་བའི་སྙིང་པོ་དང་ཚེ་གཟུངས་བརྗོད་ལ་ཚེ་རིལ་ཚེ་ཆང་སྦྱིན། མེ་ཏོག་འཐོར་ཞིང་ཤིས་བརྗོད་རྒྱས་པར་བྱའོ། །དེ་ལྟར་ན་དེ་དག་རྣམས་ཀྱིས་གྲུབ་པའི་འཁོར་ལོས་སྒྱུར་བ་ཆེན་པོ་འབྲེལ་ཚད་དོན་ལྡན་སྤྲུལ་པའི་སྐྱེས་མཆོག་སངས་རྒྱས་དབོན་པོའི་ཟབ་གཏེར་ལས་བྱོན་པ་ཐུགས་སྒྲུབ་བདེ་གཤེགས་འདུས་པའི་བྱིན་རླབས་དབང་བསྐུར་ཟབ་མོ་ལེགས་པར་གྲུབ་པ་ཡིན་པས་སོགས་ཀྱིས་མཚམས་སྦྱར་ལ་དམ་ཚིག་བསྒྲག་བཟུང་སོགས་སྤྱི་དང་མཐུན་པར་བྱ། དེ་ནས་ལས་བྱང་གི་ཚོགས་མཆོད་ནས་ཤིས་བརྗོད་ཀྱི་བར་ཡང་དཀྱུས་སུ་བཤད་པ་ལྟར་བསྒྲུབ་བོ། །དབང་བསྐུར་འདི་ཉིད་ཏིང་ངེ་འཛིན་ཁོ་ན་ལ་བརྟེན་པ་ཡིན་པས་བུམ་གཏོར་སོགས་བསྐུར་ཐོབ་ཀྱི་སྤྲོས་པ་མ་དགོས་ཀྱང་ཚུར་མཐོང་གི་བསམ་པ་རྫོགས་པའི་ཕྱིར། དབང་བསྐུར་དངོས་གཞིའི་མཇུག་ཏུ་གཏོར་མའི་བཀའ་བསྒོ་ཙམ་སྦྱར་བ་ལ་གཏོར་དབང་ཞེས་གྲགས་པའི་ཕྱག་ལེན་ཕྱིས་སུ་བྱུང་བར་སྣང་ཞིང་། བུམ་པའི་བྱ་བ་མེད་ན་བུམ་པ་སྒྲུབ་པ་ལ་དགོས་ནུས་ལྷག་པོ་མེད་པ་དང་། ཏིང་ངེ་འཛིན་རྣམས་བརྡས་མཚོན་པའི་ཕྱིར་དེ་དག་གནས་སོ་སོར་བཞག་ཀྱང་འགལ་བ་ནི་མེད་ཅིང་བློ་དམན་ལ་རྣམ་པ་གསལ་བའི་དགོས་པའང་མཆིས་སོ། །སྒྲུབ་ཐབས་སྨིན་བྱེད་བྱེ་བའི་བཅུད། །སྙིང་པོའི་བྱིན་རླབས་འདིར་བརྟེན་ནས། །སྲིད་མཚོར་བྱིང་བའི་ལུས་ཅན་ཀུན། །གདོད་མའི་ས་ལ་སྒྲོལ་ནུས་ཤོག །དེ་ལྟར་ངོ་མཚར་བླ་ན་མེད་པའི་སྨིན་བྱེད་ཟབ་མོའི་ཡི་གེ་འདིའང་ཕྱོགས་འདིར་དཔེ་ལུང་གི་རྒྱུན་ཆེས་དཀོན་པས། རང་འདྲའི་སྐལ་མཉམ་གྱིས་གོ་སླ་ཁྱེར་བདེར་དམིགས་ནས། འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་ཤྲཱི་དེ་བཱི་ཀོ་ཊི་ཙ་འདྲ་རིན་ཆེན་བྲག་གི་སྒྲུབ་གནས་སུ་བྲིས་པ་དགེ་ལེགས་འཕེལ།། །།

RTZ-Tsagli-Dzongsar-CHA-07-stag lung bde gshegs kun 'dus-01.jpeg
RTZ-Tsagli-Dzongsar-CHA-07-stag lung bde gshegs kun 'dus-02.jpeg
RTZ-Tsagli-Dzongsar-CHA-07-stag lung bde gshegs kun 'dus-03.jpeg
RTZ-Tsagli-Dzongsar-CHA-07-stag lung bde gshegs kun 'dus-04.jpeg
RTZ-Mandala-024-stag lung thugs sgrub be 'dus.jpeg
RTZ-Mandala-Dzongsar-01-032-stag lung bde gshegs kun 'dus.jpeg
RTZ-Mandala-Dzongsar-11-690-sangs rgyas dbon gyi thugs bde bshegs 'dus pa.jpeg

Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).