Terdzo-PHI-049








Terdzo-PHI-049.pdf
Click the picture above to view the Shechen manuscript.

ནག་པོ་དགུའི་སྦྱོར་བ་ནད་གདོན་ཀུན་འཇོམས་

nag po dgu'i sbyor ba nad gdon kun 'joms

Volume 44 (ཕི) / Pages 519-522 / Folios 1a1 to 2b1

Tibetan Text

༄༅། །ནག་པོ་དགུའི་སྦྱོར་བ་ནད་གདོན་ཀུན་འཇོམས་ཞེས་བྱ་བ་བཞུགས། ། རྒྱ་གར་སྐད་དུ། ན་བ་ཀཱ་ལ་ཡོ་ག །བོད་སྐད་དུ། ནག་པོ་དགུའི་སྦྱོར་བ་ཞེས་བྱ་བ། གིའུ་ཝང་དང་ནི་ཨ་རུ་ར། །བཙན་དུག་གླ་རྩི་ཤུ་དག་དང་། །གུར་གུམ་མུ་ཟི་ཤིང་ཀུན་རྣམས། །རྒྱ་ཡི་སྣག་ཚྭས་གཞི་བླངས་ལ། །ཕྱེ་མ་རིལ་བུ་གང་ཡང་རུང་། །ལུས་ལ་བྱུག་གམ་གདགས་པར་བྱ། །དགུ་ཡི་སྦྱོར་བ་ཚོགས་པ་ན། །གཅིག་ཏུ་ས་བདག་གཉེན་པོར་འགྱུར། །གཉིས་སུ་ཀླུ་ཡི་དུག་གསུམ་སེལ། །གསུམ་དུ་གཉན་གྱི་དུག་རྣམས་སེལ། །བཞི་རུ་ལྷོག་པ་དཀར་ནག་སེལ། །ལྔ་རུ་འབྲུམ་ནག་ཐུབ་པར་འགྱུར། །དྲུག་ཏུ་རྒྱུ་གཟེར་ཐུབ་པ་ཡིན། །བདུན་དུ་བལ་ནད་ཐུབ་པར་འགྱུར། །བརྒྱད་དུ་མཁྲིས་པ་རྩར་རྒྱུག་ཐུབ། །དགུ་རུ་འགོ་བའི་ནད་རྣམས་ཐུབ། །བྱིས་པའི་གདོན་ཆེན་བཅོ་ལྔ་ཐུབ། །གཞན་ཡང་ཡོན་ཏན་བསམ་མི་ཁྱབ། །སློབ་དཔོན་ཀླུ་སྒྲུབ་སྙིང་པོ་ཡིས། །ནག་པོ་དགུ་ཡི་སྦྱོར་བ་འདི། །རྒྱུད་སྡེ་ཀུན་ནས་བཏུས་པ་འོ། །སྨན་དགུ་ལ་ནི་ལྷ་དགུ་བསྐྱེད། །ལྷ་དགུ་ལ་ནི་སྔགས་དགུ་གདབ། །རབ་གནས་བྱས་ལ་མགུལ་དུ་གདགས། །ནད་གདོན་སྲུང་བར་ཐེ་ཚོམ་མེད། །བརྒྱུད་ལྡན་དོན་དགུའི་སྒོ་ནས་སོ། །དེ་ཡི་ལག་ལེན་མན་ངག་ནི། །གཟའ་སྐར་ཚེས་གྲངས་བཟང་དུས་ལ། །རང་རང་ངོ་བོ་མ་ཉམས་པའི། །སྨན་རྣམས་ལེགས་པར་རབ་བསགས་ནས། །མི་མཐུན་ཉམས་པའི་སྐྱོན་སྤངས་ལ། །ཨ་རུ་གིའུ་ཝང་ཤུ་དག་དང་། །བཙན་དུག་གླ་རྩི་གུ་གུལ་དང་། །ཤིང་ཀུན་མུ་ཟི་རྒྱ་སྣག་རྣམས། །རིམ་བཞིན་སྨན་བླ་ཏདྱ་ཐཱ། ཨོཾ་བྷཻ་ཥ་ཛྱེ་བྷཻ་ཥ་ཛྱེ་མ་ཧཱ་བྷཻ་ཥ་ཛྱེ་རཱ་ཛ་ས་མུངྒ་ཏེ་སྭཱ་ཧཱ།འཇམ་དབྱངས་དང་།་་་ཨོཾ་ཝཱ་གཱི་ཤྭ་རི་མུཾ། སྤྱན་རས་གཟིགས་་་ཨོཾ་མ་ཎི་པདྨེ་ཧཱུྃ།དང་རྡོ་རྗེ་འཛིན།་་་ཨོཾ་བཛྲ་པཱ་ཎི་ཧཱུྃ། རྟ་མགྲིན་་་ཨོཾ་བཛྲ་ཀྲོ་དྷ་ཧ་ཡ་གྷྲཱི་ཝ་ཧུ་ལུ་ཧུ་ལུ་ཧཱུྃ་ཕཊ།ཁྲོ་བོ་བདུད་རྩི་འཁྱིལ།་་་ཨོཾ་བཛྲ་ཨ་མྲྀཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། གང་བཟང་་་ཨོཾ་པུརྞ་བྷ་དྲཱ་ཡ་སྭཱ་ཧཱ།དབང་ཕྱུག་ཆེན་པོ་དང་།་་་ཨོཾ་མ་ཧཱ་དེ་ཝ་ཧཱུྃ་ཕཊ། ཚོགས་ཀྱི་བདག་པོར་་་ཏདྱ་ཐཱ། ན་མཿསྟུ་ཏེ་ག་ཎ་པ་ཏ་ཡེ་སྭཱ་ཧཱ། ཨོཾ་གཿགཿགཿགཿགཿགཿགཿགཿག་ཎ་པ་ཏ་ཡེ་སྭཱ་ཧཱ།བསྐྱེད་བྱས་ནས། རང་རང་སྙིང་པོ་གང་འགྲུབ་བཏབ། །རབ་གནས་ཤིས་བརྗོད་སོགས་ཀྱང་བྱ། །གོང་བཞིན་གང་དགོས་རིགས་པས་དཔྱད། །ཤིན་ཏུ་ཟབ་པའི་མན་ངག་མཆོག །འགྲོ་ལ་ཕན་པའི་དོན་དུ་ནི། །མ་སྦས་གསལ་བར་བསྟན་པ་ཡི། །དགེ་བས་འགྲོ་རྣམས་སངས་རྒྱས་ཤོག། །།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).