Terdzo-'I-050



Property "author" has been marked for restricted use.








Terdzo-'I-050.pdf
Click the picture above to view the Shechen manuscript.

བླ་མའི་ཐུགས་སྒྲུབ་བར་ཆད་ཀུན་སེལ་ལས་འཇམ་དཔལ་ཕ་རོལ་རྒོལ་འཇོམས་ཀྱི་བརྒྱུད་པའི་གསོལ་འདེབས་

bla ma'i thugs sgrub bar chad kun sel las 'jam dpal pha rol rgol 'joms kyi brgyud pa'i gsol 'debs

by  འཇམ་མགོན་ཀོང་སྤྲུལ་ (Jamgön Kongtrul)
revealed by  མཆོག་གྱུར་གླིང་པ་ (Chogyur Lingpa)
in cycle  འཇམ་དཔལ་ཕ་རོལ་རྒོལ་འཇོམས་ ('jam dpal pha rol rgol 'joms)
parent cycle  བླ་མའི་ཐུགས་སྒྲུབ་བར་ཆད་ཀུན་སེལ་ (Bla ma'i thugs sgrub bar chad kun sel)
Volume 53 (འི) / Pages 825-826 / Folios 1a1 to 1b2

Tibetan Text

བླ་མའི་ཐུགས་སྒྲུབ་བར་ཆད་ཀུན་སེལ་ལས་འཇམ་དཔལ་ཕ་རོལ་རྒོལ་འཇོམས་ཀྱི་བརྒྱུད་པའི་གསོལ་འདེབས་བཞུགས་སོ། ཁྱབ་བདག་ཀུན་བཟང་འཇམ་དཔལ་གཤིན་རྗེའི་གཤེད། །གསང་བདག་དཔའ་བོ་གནོད་སྦྱིན་སྐར་མདའ་གདོང་། །བསྟན་པའི་དབུ་བརྙེས་རྒྱལ་པོ་ཛཿགསུམ་ལ། །གསོལ་བ་འདེབས་སོ་ཕྱོགས་ལས་རྣམ་རྒྱལ་ཤོག །འཇམ་དཔལ་བཤེས་གཉེན་རོམྦུ་གུ་ཧྱ་རྗེ། །ཤཱནྟིཾ་གརྦྷ་པདྨ་ཐོད་ཕྲེང་རྩལ། ཁ་ཐུན་ནག་པོ་གཙུག་ལག་དཔལ་དགེ་ལ། །གསོལ་བ་འདེབས་སོ་ཕྱོགས་ལས་རྣམ་རྒྱལ་ཤོག །དུ་ཧར་ནག་པོ་སངས་རྒྱས་གསང་བ་དང་། །བཱ་སུ་དྷཱ་ར་སངས་རྒྱས་ཡེ་ཤེས་ཞབས། །བདུད་འདུལ་རྒྱལ་པོ་མངའ་བདག་ཡབ་སྲས་ལ། །གསོལ་བ་འདེབས་སོ་ཕྱོགས་ལས་རྣམ་རྒྱལ་ཤོག །པདྨའི་རྒྱལ་ཚབ་མཆོག་གྱུར་བདེ་ཆེན་གླིང་། །བཀའ་བབས་ཆོས་བདག་རྩ་བརྒྱུད་བླ་མའི་ཚོགས། །འཇམ་དཔལ་ཞི་ཁྲོའི་དཀྱིལ་འཁོར་འཁོར་ལོ་ལ། །གསོལ་བ་འདེབས་སོ་ཕྱོགས་ལས་རྣམ་རྒྱལ་ཤོག །ལྷར་སྣང་བརྟན་པོས་སྲིད་གསུམ་ཟིལ་གྱིས་གནོན། །དྲག་སྔགས་ནུས་པས་བདུད་བགེགས་ཐལ་བར་བརླག །ཏིང་འཛིན་སྟོབས་ཀྱིས་ལས་ཆེན་བཅུ་གཉིས་དང་། །དངོས་གྲུབ་རྣམ་གཉིས་བདེ་བླག་འགྲུབ་པར་ཤོག །མི་ཁ་བྱད་ཕུར་དུས་མིན་འཆི་བ་སོགས། །ཉེས་པའི་ཚང་ཚིང་མཐུ་སྟོབས་དུས་མཐའི་མེས། །ལྷག་མེད་བཅོམ་ནས་འཆི་བདག་བདུད་ཀྱི་དཔུང་། །མཐར་བྱེད་འཇམ་དཔལ་ཁྲོས་པའི་སྐུ་བརྙེས་ཤོག །འཁོར་ལོ་རྣམ་བཞིར་གོམས་པའི་རྩལ་རྫོགས་ནས། །རང་རིག་འཇམ་དཔལ་གཞོན་ནུ་སྙིང་དབུས་སད། །སྒྲིབ་གཉིས་གཡུལ་ལས་རྣམ་པར་རྒྱལ་བ་ཡིས། །གསང་ཆེན་རྡོ་རྗེའི་འཁོར་ལོས་སྒྱུར་བྱེད་ཤོག །ཅེས་པ་འདི་ནི་ལྷ་མཆོག་འདི་ཉིད་ལ་མོས་པའི་བློ་ཅན་ཀརྨ་ཉི་མས་གསུང་བསྐུལ་ངོར། པདྨ་གར་གྱི་དབང་ཕྱུག་རྩལ་གྱིས་བྲིས་པ་དགེ་ལེགས་འཕེལ།། །།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).