Terdzo-'I-004



Property "author" has been marked for restricted use.








Terdzo-'I-004.pdf
Click the picture above to view the Shechen manuscript.

ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་ལོ་རྒྱུས་

zab lam bde gshegs kun 'dus las:_bka' srung lha chen gyi lo rgyus

by  གཏེར་བདག་གླིང་པ་འགྱུར་མེད་རྡོ་རྗེ་ (Terdak Lingpa Gyurme Dorje)
revealed by  གཏེར་བདག་གླིང་པ་འགྱུར་མེད་རྡོ་རྗེ་ (Terdak Lingpa Gyurme Dorje)
in cycle  ཐུགས་རྗེ་ཆེན་པོ་བདེ་གཤེགས་ཀུན་འདུས་ (Thugs rje chen po bde gshegs kun 'dus)
Volume 53 (འི) / Pages 175-216 / Folios 1a1 to 21b5

Tibetan Text

ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་ལོ་རྒྱུས་བཞུགས་སོ༔ ྈྈྈྈ དབང་གི་བདག་ཉིད་པདྨ་ཧེ་རུ་ཀ་ལ་ཕྱག་འཚལ་ལོ༔ ཐུགས་རྗེ་ཆེན་པོའི་བཀའི་སྲུང་མ་འཇིག་རྟེན་ན་དྲག་རྩལ་དབང་ཕྱུག་གྲུབ་པའི་ལྷ་ཆེན་འདི་ནི་ངོ་བོ་གདོད་ནས་མི་འགྱུར་བ་སྤྱན་རས་གཟིགས་སུ་མངོན་པར་བྱང་ཆུབ་པ་འོ༔ རང་བཞིན་མ་འགགས་པའི་རྩལ་ཞི་བ་དང་ཁྲོ་བོ་ཅིར་ཡང་སྣང་བ་འོ༔ ཐུགས་རྗེ་ཀུན་ཁྱབ་ཀྱི་ཆོ་འཕྲུལ་ལས་ལྷ་ཆེན་དུ་སྲིད་པ་འོ༔ དེ་ཡང་རྒྱ་གར་གྱི་ཡུལ་ཀུན་དུ་བུདྡྷའི་བསྟན་པ་ཆེས་ཆེར་དར་ཞིང་རྒྱས་པར་གྱུར་པ་ན༔ མུ་སྟེགས་རྣམས་ཀྱིས་མ་བཟོད་དེ་ཐ་སྙད་ཀྱི་རྩོད་པ་དང་རིག་སྔགས་ཀྱི་སྦྱོར་བས་དྲེགས་པ་ཅན་འགུགས་པ་དང་གཉེན་པོར་སྤྲོད་པ་སོགས་ཐབས་སྣ་ཚོགས་ཀྱིས་གནོད་པ་བྱེད་དོ༔ དེ་ལས་ལྷོ་ཕྱོགས་སུ་འཇིག་རྟེན་གྱི་ལྷ་དང་ཀླུ་མཐུ་བོ་ཆེ་དུ་མས་ཀྱང་མུ་སྟེགས་ཀྱི་རིགས་ལ་དངོས་གྲུབ་སྟེར་ཞིང་ནང་པ་རྣམས་ལ་འཚེ་བར་བྱེད་དོ༔ དེའི་ཚེ་བདག་གིས་འདུལ་བའི་དུས་ལ་བབས་པར་རིག་ནས་ལྷོ་ཕྱོགས་སུ་སོང་སྟེ་སྟོན་པ་ལྔ་བརྒྱ་པོ་ཐམས་ཅད་རྩོད་པས་ཚར་བཅད་ནས་ཉམས་པར་བྱས་པས་དེ་དག་གི་ཡིད་ཁོང་དུ་ཆུད་ནས་སླར་ཡང་ཙན་དན་གྱི་ནགས་སུ་རིགས་སྔགས་ཀྱི་སྦྱོར་བ་སྒྲུབ་པར་བྱེད་དོ༔ དེར་རྒྱལ་དང་ལྡན་པའི་སྟོང་གི་ནམ་ཕྱེད་ན་བདག་ཉིད་བཞུགས་པའི་གནས་སུ་ས་གཡོ་བ་དང་ལྗོན་ཤིང་རྣམས་འཁྲུགས་ཤིང་སྒྲ་འབྱིན་པ་དང་འོད་དམར་པོ་ཏ་ལ་ཙམ་ཁྱིལ་ཁྱིལ་བྱེད་པ་སོགས༔ ཆོ་འཕྲུལ་སྣ་ཚོགས་སྣང་བར་བྱེད་དོ༔ བདག་གིས་རྡོ་རྗེ་ལྟ་བུའི་ཏིང་ངེ་འཛིན་གྱིས་ཟིལ་གྱིས་མནན་ནས་དབང་དུ་བསྡུས་པས་འོད་དེ་ཉིད་སྐྱེས་བུ་བཞིན་བཟང་དམར་ཞིང་ཆགས་པའི་ཚུལ་ཅན་མེ་ཏོག་གི་རྒྱན་དང་ལྡན་པ་གཅིག་ཏུ་གྱུར་ནས་བཀའ་ཅི་བསྩལ་འབངས་སུ་མཆི་འོ་ཞེས་ཕྱག་བྱེད་ཅིང་ཞབས་ལ་འདུད་པར་གྱུར་ཏོ༔ དེར་བདག་གིས་ཤེས་བཞིན་དུ་མི་མ་ཡིན་གྱི་རིགས་སུ་གཏོགས་པ་འདྲ་བ་ཞིག་མཆིས་ན་སུ་ཞིག་ཆོ་འཕྲུལ་འདི་དག་ནི་གང་གི་མཐུ་ཞེས་དྲིས་པས༔ དེ་ན་རེ་བདག་ནི་འཇིག་རྟེན་ན་ཆེ་བའི་མཐུ་རྩལ་གྲུབ་པ་དབང་ཕྱུག་མ་ཧཱ་དེ་བ་ཞེས་བྱ་བ་སྟེ༔ ཙནྡན་གྱི་ནགས་སུ་མུ་སྟེགས་སྟོན་པ་རྣམས་ཀྱིས་རིག་སྔགས་ཀྱི་སྦྱོར་བས་བསྐུལ་པ་ལས་འདིར་མཆིས་པ་འོ༔ ཆོ་འཕྲུལ་དེ་དག་ནི་བདག་གི་མཐུ་འོ༔ འགྲོ་བ་གཞན་དག་ནི་བདག་གི་ཆོ་འཕྲུལ་ཕྲ་མོ་རེས་ཀྱང་འགུགས་ཤིང་གསོད་པར་བྱེད་པ་འོ༔ སློབ་དཔོན་གྱི་དགོངས་པ་ནི་བཤིགས་པར་མ་ནུས་པས་བདག་ཉིད་མི་བཟད་པའི་ཆོ་འཕྲུལ་གྱིས་སྤ་བཀོང་བར་གྱུར་ན་ཁྱོད་ནི་སངས་རྒྱས་ཐམས་ཅད་ཀྱི་སྤྱི་དཔལ་དུ་ངེས་པས་གུས་ཤིང་འདུད་པ་ལགས༔ བཟོད་པར་མཛོད་ཅིག་འབངས་སུ་མཆི་འོ༔ ཞེས་སྲོག་གི་སྙིང་པོ་རྒྱུད་གཅེས་གནད་དང་བཅས་པ་ཐམས་ཅད་མདོངས་གསོལ་དུ་ཕུལ་ལོ༔ དེར་བདག་གིས་མི་འགྱུར་བའི་བཀའ་གཙིགས་སུ་ཕབ་ནས་དམ་པ་ཆོས་ཀྱི་སྲུང་མར་གཉེར་གཏད་དབང་བསྐུར་ནས་དམ་ཚིག་གི་གསོས་བཏབ༔ དེར་བདག་ཉིད་ཐུགས་ཞི་བ་ཆོས་ཀྱི་དབྱིངས་ལས་རོལ་པ་སྙིང་རྗེ་ཆེན་པོའི་ཐབས་ཀྱིས་མུ་སྟེགས་ཀྱི་སྟོན་པ་རྣམས་ལ་རང་གཤེད་དུ་ཕབ་པས༔ ཙནྡན་གྱི་ནགས་སུ་མི་བཟད་པའི་ཆོ་འཕྲུལ་སྣ་ཚོགས་དང་བཅས་པའི་གནམ་ལྕགས་ཆར་བཞིན་དུ་ཕབ་པས་ནགས་ཚལ་མེ་འབར་སྟེ་མུ་སྟེགས་པ་སྡེ་དང་བཅས་པ་ཚར་བཅད་ནས་མིང་མི་གྲགས་པར་བྱས་ཤིང་སངས་རྒྱས་ཀྱི་བསྟན་པ་ཉི་མ་ཤར་བ་བཞིན་དུ་གྱུར་ཏོ༔ དེ་ནས་བདག་གིས་ལྷ་ཆེན་གྱི་སྲོག་གཏད་རྒྱུད་དང་བཅས་པའི་མན་ངག་མང་དུ་སྤེལ་ཞིང་སྐལ་པ་དང་ལྡན་པ་སོ་སོར་བསྟན་པ་ལས༔ འདི་ནི་མན་ངག་ཐམས་ཅད་ཀྱི་ཟབ་གནད་ལོགས་སུ་ཕྱེ༔ རྒྱུད་ཀྱི་བཅུད་ཐམས་ཅད་གཅེས་གནད་ཀྱི་སྙིང་པོར་བསྡུས་ནས་ཁ་ཚང་དོན་འདྲིལ་དུ་བྱས་ཏེ་ལས་ཅན་གྱི་སློབ་མ་མངའ་བདག་ཡབ་སྲས་དང་ལོ་ཙཱ་བ་བཻ་རོ་ཙ་ན་ལ་ཐུགས་རྩིས་སུ་དགོངས་ནས་བསྟན་པ་འོ༔ སྤྱིར་སྙིགས་མ་ལྔ་བདོ་སུམ་ཅུ་ཁ་རལ་གྱི་དུས་ན་གནམ་གྱི་འོད་ཉམས་པས་ཆར་ཆུ་སྒང་གཤོང་ཆེ༔ སའི་བཅུད་ཉམས་པས་ལོ་ཐོག་དང་རྩི་ཤིང་མི་སྨིན༔ སྐྱེ་འགྲོའི་གཡང་ཉམས་པས་ནད་རིགས་དང་དམག་འཁྲུག་དར༔ དེའི་ཚེ་ནག་ཕྱོགས་ཀྱི་སྟོབས་རྒྱས་པས་འགྲོ་བ་ཐམས་ཅད་ཀྱི་སྙིང་ལ་བདུད་ཞུགས་ནས་གཙུག་ལག་དང་ཆོས་འཁོར་འཇིག༔ ཆོས་བྱེད་ཀྱི་མངའ་ཐང་འཕྲོག་ཅིང་སྲོག་ལ་རྒོལ་བས་མཐའི་དམག་མཚོ་རྡོལ༔ ཁྱད་པར་དུ་བོད་ཕུང་བྱེད་ཀྱི་ཆེ་བཙན་འགོང་པོ་སྙིང་ལ་ཞུགས་པ་དགུས་ཐབས་དུ་མའི་བློ་འདྲིད་དང་གདུབ་རྩུབ་ཀྱིས་བོད་ཁམས་སུ་མི་བདེ་བའི་དུཿཁ་སྣ་ཚོགས་ཟིང་སློང་བའི་དུས་སུ༔ ངའི་རྗེས་སུ་ཞུགས་པ་རྣམས་ཀྱིས་དེ་དག་འདུལ་བའི་ལས་བྱ་འོ༔ དེ་ཡང་དྲག་པོའི་ལས་ཀྱིས་ཐུལ་བ་དཀའ་འོ༔ ཅིའི་ཕྱིར་ན་ལྟ་བ་སྟོང་ཉིད་རྟོགས་པ་གྱབས་ཀྱི་ལྷ་དང་ཏིང་ངེ་འཛིན་གྱི་དྲོད་ཚད་རྙེད་པ་གཉེན་པོ་སྟོབས་ཀྱི་ལྷ་དང་དེ་མངོན་དུ་གྱུར་པ་ལ་རགས་ལུས་ན་དེའི་ཚེ་ལེ་ལོ་དང་སྙོམ་ལས་ཆེ༔ བརྩོན་འགྲུས་ཀྱི་མཐུ་ཆུང་བས་ཕོ་ཉ་ལས་ཀྱི་ལྷ་འཁུལ་བར་མི་ནུས་ཤིང་ཞེ་སྡང་རང་དགའ་མས་འཁོར་བར་ལྟུང་ངོ༔ དེས་ན་འདི་ཉིད་དང་པོ་འཕགས་པ་ཐུགས་རྗེ་ཆེན་པོ་ཡིན་པས་བྱིན་རླབས་ཆེ་ཞིང་དབང་དུ་བསྡུས་ཚད་འཁོར་བར་མི་ལྟུང༔ རྣམ་པ་འཇིག་རྟེན་གྱི་ལྷ་ཆེན་དབང་ཕྱུག་གྲུབ་པ་ཡིན་པས་ཚན་ཆེ༔ དབང་གི་ལྷ་དབང་གི་ཕྲིན་ལས་སུ་བསྒྲུབས་པས་རྣོ་ལ་མྱུར༔ མན་ངག་གབ་འཁྲུགས་སུ་མ་སྦས་པས་ཉམས་སུ་བླང་བདེ༔ དམ་ཚིག་ཟོལ་ཟོག་མེད་པས་བསྒྲུབ་ན་བེམ་པོའི་རྡོ་ཡང་འགུགས་ནུས༔ དེའི་ཕྱིར་འདི་ནི་གཅེས་པ་ཐམས་ཅད་ཀྱི་ཡང་ཐིག་ཐུགས་རྗེ་ཆེན་པོ་བཀའི་སྲུང་མར་གདམས་པ་ཡིན་པས་ནག་ཕྱོགས་ཀྱི་ལོག་འདྲེན་མཐུ་དང་ལྡན་པ་ཐམས་ཅད་དབང་དུ་བསྡུས་ནས་བསྟན་པ་ལ་གཟུད་པར་གྱིས་ཤིག༔ དེས་བོད་འདིར་རེ་ཞིག་བདེ་བར་འགྱུར་རོ༔ ཞེས་གསུངས་ནས་མངའ་བདག་ཡབ་སྲས་དང་བདག་དང་ཕྱི་མའི་འགྲོ་ལ་བརྩེ་བར་དགོངས་ནས་གཏད་པ་འོ༔ གཅེས་པར་ཟུངས་ཤིག་སྐལ་མེད་ཁ་ཟག་ཅན་ལ་མིང་ཙམ་ཡང་མི་བསྒྲག་གོ༔ ཤིན་ཏུ་གསང་བའི་ཐ་ཚིག་གོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་སྲོག་གཏད་ཟབ་མོ་བཞུགས་སོ༔ དབང་གི་བདག་ཉིད་པདྨ་གར་གྱི་དབང་ཕྱུག་ལ་ཕྱག་འཚལ་ལོ༔ དམ་ཚིག་ཅན་ལ་སྲོག་གཏད་སྦྱིན་པར་འདོད་ན་རྒྱལ་གྱི་ཉིན་པར་དབེན་པའི་གནས་སུ་མཎྜལ་སྒྲུབ་ཐབས་བཞིན་བྱས་ལ༔ དེའི་ཁར་གཏོར་མ་རཏྣའི་སྙེ་མ་ལྟ་བུ་དམར་པོ་ལ་སྐུ་བཙུགས་པ་དང༔ སྒྲུབ་ཡིག་དང༔ བླ་རྡོ་རྟེན་རྫས་དང༔ ལྕགས་ཀྱུ་ཞགས་པ་རྣམས་བཞག་མཐའ་མཆོད་པ་ཀུན་གྱིས་བསྐོར༔ སློབ་དཔོན་ཡི་དམ་གྱི་དགོངས་པ་དང་ལྡན་པས་དམིགས་རྟེན་ལྷ་ཆེན་དུ་བསྐྱེད་ནས་མཆོད་བསྟོད་འབུལ་ཞིང་བཟླས་པ་བྱ༔ དེ་ནས་སློབ་མ་དམ་ཚིག་དང་བརྟུལ་ཞུགས་ལྡན་པ་ལྔ་ལས་མི་མང་བས་དར་དམར་པོའི་ཕྱག་རྟེན་དང་རཏྣ་དང་མེ་ཏོག་དམར་པོའི་མཎྜལ་ཕུལ་ལ༔ ཨེ་མ་ཧོ༔ ཐུགས་རྗེ་ཆེན་པོའི་གཏེར་མངའ་བ༔ དམ་ཚིག་བདག་པོ་དགོངས་སུ་གསོལ༔ ཁམས་གསུམ་ཀུན་ལ་དབང་སྒྱུར་བའི༔ མཐུ་ཆེན་གྲུབ་པ་བདག་ལ་སྩོལ༔ ཅེས་ལན་གསུམ་ཞུ༔ དྲེགས་པའི་ལྷ་ཆེན་དབང་ཕྱུག་ཆེ༔ ཁྱོད་ཀྱིས་མཆོད་ཅིང་སྒྲུབ་པ་དང༔ དམ་ཚིག་མཆོག་ལ་གནས་ནུས་སམ༔ དེ་ལྟར་རུང་ན་སྦྱིན་པར་བྱ༔ ཞེས་བརྗོད་ཅིང་སློབ་མས་དེ་ལྟར་ནུས་ཞེས་ཁས་བླང༔ སྐྱབས་འགྲོ་སེམས་བསྐྱེད་བྱ༔ སློབ་དཔོན་དང་སློབ་མ་རྟ་མགྲིན་དུ་བསྒོམ༔ མདུན་གྱི་རྟེན་ལྷ་ཆེན་འཁོར་བཅས་སུ་བསྒོམས་ནས་སྤྱན་འདྲེན་དང་མཆོད་བསྟོད་བྱ༔ སློབ་དཔོན་གྱི་སྙིང་ག་ནས་རྟ་མགྲིན་གཅིག་འཕྲོས་པ་སློབ་མའི་སྤྱི་བོར་བསྟིམས་ལ༔ ཧྲཱི༔ དཔལ་ཆེན་ཧ་ཡ་གྲཱི་ཝའི་སྐུ༔ ཇི་སྙེད་སངས་རྒྱས་ཀུན་གྱི་བདག༔ དྲེགས་པ་སྤྱི་ཡི་གཉེན་པོར་ཆེ༔ དེང་འདིར་ཁྱོད་ལ་དབང་བསྐུར་རོ༔ ཨཱོྃ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཞེས་དྲེགས་པ་སྤྱི་འདུལ་གྱི་དབང་བསྐུར་པས་སློབ་མ་རྟ་མགྲིན་དངོས་སུ་བསམ༔ དེ་འོད་ཕུང་དམར་པོར་ཞུ་བའི་སྙིང་པོ་ཨཾ་དམར་པོ་བསྒོམ༔ དེ་ལས་ལྷ་ཆེན་གྱི་སྐུར་གསལ་བཏབ་ལ་རྟེན་ལས་ལྷ་ཆེན་གཉིས་པ་སྤྲོས་ནས་ཐིམ་པས་ལུས་དང་གྲིབ་མ་བཞིན་དབྱེར་མེད་དུ་གྱུར་པར་བསམ་ལ་གཏོར་མ་གཏད༔ ཧྲཱི༔ ཁམས་གསུམ་དབང་དུ་བྱེད་པའི་ལྷ༔ དབང་ཕྱུག་མ་ཧཱ་དེ་བ་ཡི༔ དངོས་གྲུབ་ཆེན་པོའི་དམ་ཚིག་འདིས༔ ཁྱོད་ལ་དབང་བསྐུར་ཐོབ་གྱུར་ཅིག༔ རྩ་སྔགས་ཀྱི་མཐར་ཀཱ་ཡ་ཝཱ་ཀ་ཙིཏྟ་སིདྡྷི་ས་མ་ཡ་ཛཿཧཱུྃ་བཾ་ཧོ༔ ཞེས་བྱིན༔ སྒྲུབ་ཡིག་གཏད་ནས་བཟླས་ལུང་སྦྱིན༔ སྙིང་གའི་སྔགས་ཕྲེང་མར་མེ་ལྟར་འབར་བའི་འོད་ཀྱིས་ཁམས་གསུམ་སྣོད་བཅུད་ཐམས་ཅད་འོད་དམར་པོར་ལྟེམ་གྱིས་ཞུ་བའི་དྭངས་མ་སྙིང་གར་ཧྲིལ་གྱིས་ཐིམ་པས་ཁམས་གསུམ་དབང་དུ་འདུས་པར་བསམ་ཞིང་ཤུ་ཀྲ་ཟླ་མཚན་གུར་གུམ་གྷི་ཧཾ་ཙནྡན་གྱི་ལྡེ་གུ་རྣམས་སྦྱར་བའི་ཐིག་ལེ་སྙིང་གར་བྱ་སྔགས་རྣམས་བརྗོད་ཅིང་རྟེན་རྫས་སྙིང་གར་བཞག་ནས་བཀའ་བསྒོ་བྱ༔ དེས་ཁམས་གསུམ་གྱི་དབང་ཕྱུག་ཆེན་པོར་གྲུབ་པ་ལ་ལྕགས་ཀྱུ་གཏད་ནས༔ འདི་ནི་དབང་གི་ལྕགས་ཀྱུ་སྟེ༔ འགྲོ་བ་ཀུན་གྱི་སྙིང་ནས་འཛིན༔ ཁམས་གསུམ་མ་ལུས་དབང་དུ་སྡུད༔ དབང་གི་ཕྱག་རྒྱར་ཁྱོད་ལ་སྦྱིན༔ ཨཱོྃ་ཨཾ་ཀུ་ཤ་ཧྲིཾ་ཛ༔ ཞགས་པ་གཏད་ལ༔ འདི་ནི་དབང་གི་ཞགས་པ་སྟེ༔ འགྲོ་བ་ཀུན་གྱི་ལུས་ངག་ཡིད༔ འཆིང་བྱེད་རླུང་གི་ཞགས་པ་ཡང༔ དབང་གི་ཕྱག་རྒྱར་ཁྱོད་ལ་སྦྱིན༔ ཨ་ནྲྀ་ཏྲི་པཱ་ཤཾ་ཧཱུྃ༔ གཏོར་མ་དངོས་གྲུབ་ཏུ་གཏད་ལ༔ བདུད་རྩིའི་རོ་མཆོག་དམ་པ་ཡིས༔ ཟས་ནོར་ལོངས་སྤྱོད་ཆར་ལྟར་འབེབ༔ འཇིག་རྟེན་གསུམ་གྱི་བཅུད་རྣམས་ཀུན༔ དབང་དུ་བྱེད་པར་ཁྱོད་གྱུར་ཅིག༔ ཨཱོྃ་སརྦ་ཨ་མྲྀཏ་སིདྡྷི་ཧཱུྃ༔ གཏོར་མ་དངོས་གྲུབ་ཏུ་ཟར་བཅུག༔ རྫས་རྣམས་གཞན་ལ་མི་སྦྱིན་ནོ༔ དེ་ནས་དམ་ཚིག་བསྟན་ལ་ཁས་ལེན་བྱ༔ ཡོན་གྱི་དངོས་པོ་དག་ཅིང་རྒྱ་ཆེར་འབུལ་བ་གནད་ཟབ་བོ༔ ལྷ་ཆེན་གྱི་སྲོག་གཏད་ཟབ་མོར་དྲིལ་བའི་གནད་གདམས་སྩྱོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་བསྙེན་ཐབས་བཞུགས་སོ༔ དབང་གི་བདག་ཉིད་པདྨ་གར་གྱི་དབང་ཕྱུག་ལ་ཕྱག་འཚལ་ལོ༔ ཐུགས་རྗེ་ཆེན་པོའི་བཀའི་སྲུང་མ་ལྷ་ཆེན་གྱི་བསྙེན་པ་བྱ་བའི་མན་ངག་ནི༔ སྒྲུབ་པའི་གང་ཟག་དམ་ཚིག་དང་བརྟུལ་ཞུགས་ལྡན་པས༔ དཔྱིད་ཟླ་ར་བའི་ཚེས་བརྒྱད་དམ་བཅོ་ལྔ་དང་ཉི་ཤུ་གསུམ་དང་ལྔ་ལ་སོགས་པ་རྒྱལ་དང་ཕུར་བུ་འཛོམ་པའི་དུས་སུ༔ རི་བོ་འཕེན་བཟང་ནགས་ཚལ་རྒྱས་པ་སོགས་དབང་གི་གནས་སུ་འོས་པ་བཙལ་ལ་གཞི་བདག་ལ་གཏོར་མ་བཏང་ནས་བཀའ་བསྒོ༔ བར་ཆད་གཟིར་གནན་དང་ཚོགས་གསག་ཅི་ནུས་བྱས་ལ༔ མཎྜལ་བཅའ་བ་ནི༔ རྒྱལ་པོའི་མཛོད་དང་དགེ་འདུན་གྱི་ཐབ་ས་ཚོང་འདུས་ཚོགས་པའི་ས་རྣམས་ལ་སྟེགས་བུ་ཁྲུ་གང་པ་གཅིག་བརྩིགས༔ ན་ཆུང་གི་རཀྟ་གྷི་ཧཾ་རྒྱ་སྐྱེགས་མྱོས་བྱེད་ཀྱི་ཁུ་བ་རྣམས་ཀྱིས་ཆག་ཆག་གདབ༔ དེ་ལ་ཟླ་གམ་སྒོ་གཅིག་ནུབ་ཏུ་བསྟན་པའི་ནང་དུ་པད་འདབ་བཞིར་ཕྱིར་པདྨའི་ལུ་གུ་རྒྱུད་དང་ལྕགས་ཀྱུ་དང་ཞགས་པ་དང་འོད་ཀྱིས་བསྐོར་བ་བྲི༔ མེ་ཏོག་དམར་པོའི་ཚོམ་བུ་བཀྲམ༔ དེའི་ཁར་ཟངས་གཞོང་དུ་འབྲུ་སྣ་དང་རཏྣ་སྣ་ཚོགས་ཀྱིས་གང་བའི་ཁར་སྐུ་རྟེན་བཙུག་དར་དམར་པོས་གཡོགས༔ མདུན་དུ་འབྲས་སོགས་འབྲུ་སྣ་གཙང་མའི་ཕྱེ་ལ་སྨན་དང་སྤོས་དང་མངར་གསུམ་བསྲེ༔ སྦྲང་རྩིས་སྦྲུས་པའི་གཏོར་མ་རཏྣའི་སྙེ་མ་ལྟ་བུ་ལ་ཤ་དང་ཆན་དང་མེ་ཏོག་དང་ཁུར་བ་དང་ལ་དུ་དང་མྱོས་བྱེད་ཀྱི་འབྲས་བུ་དང་ཞོ་དང་མར་ལ་སོགས་པས་བརྒྱན་པ་དང་བཏུང་བའི་སྣོད༔ མེ་ཏོག་དམར་པོ་དང་ཏིལ་གྱི་སྒྲོན་མེ་དང་ཙན་དན་གྱི་ཆུ་རྣམས་མཆོད་པར་བྱ༔ དེ་ནས་སྲུང་བའི་ཙཀྲ་སྒོམ་པ་དང་གོང་ནོན་གྱི་བསྙེན་པ་དུམ་གཅིག་བྱས་ནས་མདུན་གྱི་རྟེན་ཟླ་གམ་དམར་པོ་སྒོ་གཅིག་པའི་ནང་དུ་པདྨ་དང་ཉི་མའི་དབུས་སུ་ཨཾ་དམར་པོ་འབར་བ་ཞིག་བསམ༔ དེ་ལས་ལྷ་ཆེན་དབང་ཕྱུག་ཆེན་པོ་ཞལ་གཅིག་ཕྱག་གཉིས་སྤྱན་གསུམ་པ་འཛུམ་ཁྲོ་མཆེ་བ་གཙིགས་པ་པདྨ་རཱ་ག་ལྟར་དམར་ཞིང་ཆགས་ཉམས་རྒྱས་པ་རལ་པ་ལ་ཟླ་ཚེས་ཤར་བ་ལིངྒ་སྒྲེང་པ༔ གཡས་པ་ལྕགས་ཀྱུ་དང་གཡོན་རླུང་གི་ཞགས་པ་འཛིན་པ་དར་དང་རཏྣས་བརྒྱན་པ་ཞབས་གཡོན་བརྐྱང་གཡས་བསྐུམ་པ༔ གཡོན་དུ་ལྷ་མོ་ཨུ་མ་དམར་གསལ་ལྕགས་ཀྱུ་དང་ཞགས་པ་འཛིན་པ་དར་དང་མེ་ཏོག་དམར་པོས་བརྒྱན་པ་བཞེངས་པའི་སྟབས་ཅན༔ འདབ་མ་བཞི་ལ་གསང་བའི་དྷཱ་ཀི་འགུགས་བྱེད་མ་འཆིང་བྱེད་མ་རྨོངས་བྱེད་མ་མྱོས་བྱེད་མ་བཞི་བིནྡྷུ་ཀའི་མདོག་ཅན་ལྕགས་ཀྱུ་དང་ཞགས་པ་འཛིན་པ་ཆགས་པའི་ཉམས་གསལ་བ་བཞི་བསྒོམ༔ དེ་རྣམས་ཀྱི་གནས་གསུམ་དུ་ཨཱོྃ་ཨཱཿཧཱུྃ་དང་སྙིང་གར་སོ་སོའི་ས་བོན་བསྐྱེད༔ དེའི་འོད་དང་བདག་གི་ཐུགས་ཀའི་འོད་ཀྱིས་ཚངས་པའི་གནས་དང་ཏི་སེ་དང་རྒྱ་མཚོའི་འགྲམ་སོགས་ནས་སྤྱན་དྲངས་པར་དམིགས་ལ་ཨཱོྃ་མ་ཧཱ་དེ་བ་ཨཱ་ཀརྵཱ་ཡ་ཛཿཛ༔ ཞེས་མང་དུ་བཟླ་ཞིང་ཙན་དན་དང་ག་པུར་དང་སི་ལ་དང་གུར་གུམ་སྤང་སྤོས་དང་ཏང་ཀུན་རྣམས་སྦྱར་པ་བསྲེག༔ དེ་དུས་ལྷ་ཆེན་འཁོར་བཅས་ནམ་མཁའ་ལ་སྤུངས་སེ་བྱོན་པར་བསམ་ཛཿཧཱུྃ་བཾ་ཧོ༔ ས་མ་ཡ་ཏིཥྛ་ལྷན༔ མདུན་གྱི་རྟེན་ལ་ཐིམ་པར་བསམ༔ བཛྲ་ས་མ་ཡ་རཀྵ་ཧཱུྃ་ཏྲི་ཤཱུ་ལའི་ཕྱག་རྒྱ་བསྟན་པས་དམ་ཚིག་གི་བཀའ་བླངས་པར་བསྒོམ༔ མཆོད་པ་སོགས་བྱས་ནས་བཟླས་པ་ལ་འཇུག༔ བདག་གི་ཐུགས་ཀ་ནས་འོད་དམར་པོའི་ཚུལ་གྱི་སྔགས་འཕྲོས་པ་བྲིས་སྐུ་ལྷར་གསལ་བའི་ཐུགས་ཀའི་སྔགས་ལ་ཕོག་པས་སྲོག་རྒྱུད་བསྐུལ་ཏེ་འཇིག་རྟེན་ཐམས་ཅད་དབང་དུ་བསྡུས་ནས་དངོས་གྲུབ་ཏུ་སྟེར་བར་བསམ་ཞིང༔ ཨཱོྃ་མ་ཧཱ་དེ་བ་ས་མ་ཡ་ཧྲིཾ་ཛ༔ ཞེས་འབུམ་ཕྲག་གསུམ་རྫོགས་པར་བཟླ་འོ༔ སྔགས་སྟོང་སྟོང་གི་མཚམས་སུ་མཆོད་པ་བྱ་འོ༔ ཐུན་ནི་བཞིར་གཟུང་ངོ༔ མཚམས་སུ་མེ་ཏོག་དམར་པོ་དང་སྤོས་སྦྱར་བ་དང་ཙན་དན་གྱི་ཆུ་དང་ཏིལ་གྱི་སྒྲོན་མེ་དང་མྱོས་བྱེད་ཀྱི་འབྲས་བུའི་ཟས་དང་ག་ཎའི་མཆོད་པ་རྣམས་སོ༔ རྟགས་ནི་དངོས་དང་ཉམས་དང་རྨི་ལམ་དུ་རིམ་པ་བཞིན་གཞན་གྱིས་རང་ལ་ཟས་ནོར་སྟེར་བ་དང༔ སྔར་མ་མཐོང་བའི་ཡུལ་མཁར་ལོངས་སྤྱོད་བཟང་པོ་མཐོང་བ་དང་ཆས་གོས་དམར་པོ་གྱོན་པ་དང་ཉི་ཟླ་ཤར་བ་དང་མཚོན་ཆ་བཟང་པོ་ཐོགས་པ་དང་ཉམས་དགའ་ཞིང་ཡིད་ཆགས་པ་དང་ཟས་སྨེ་ཞིང་བདའ་བ་དང༔ མི་རྣམས་སྔར་བས་བྱམས་ཤིང་ཟས་ནོར་འབུལ་བ་དང་སྙན་པར་སྒྲོག་པ་སོགས་འབྱུང་ངོ༔ ཡང་གཟུགས་མི་སྡུག་པ་དང་ཐོག་ཚེག་པ་དང་མིང་ནས་འབོད་པ་དང༔ ཐུག་ཆོམ་དང་རྨི་ལམ་འཁྲུགས་པ་སོགས་རྩུབ་པའི་རྟགས་དང༔ དེ་ཚོ་གང་བྱུང་ཡང་ཆགས་ཞེན་བདེན་འཛིན་དང་བྲེད་འཇིགས་དུབ་པ་སྤངས་ཏེ་ཏིང་འཛིན་གསལ་ཞིང་སྔགས་དྲག་ཏུ་བཟླ༔ ཆོས་ཐམས་ཅད་སྒྱུ་མ་ལྟ་བུར་ཐག་བཅད་ནས་སྤྲོས་པ་དང་བྲལ་བའི་ངང་ལ་གློད་དེ་བཞག་གོ༔ དེ་ནས་རྟགས་རྣམས་རྫོགས་པར་མཐོང་ནས་སིདྡྷི་ལེན་པར་བྱའོ༔ སྒྲུབ་རྫས་ནི་གཞན་གྱིས་མ་མཐོང་བར་གསང་ཞིང་སྦ་བར་གཅེས་སོ༔ ཐུགས་རྗེ་ཆེན་པོ་བཀའི་སྲུང་མ་ལྷ་ཆེན་ལྕམ་དྲལ་གྱི་བསྙེན་པའི་གནད་གདམས་སྩྱོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་སྒྲུབ་ཐབས་བཞུགས་སོ༔ དབང་གི་བདག་ཉིད་པདྨ་གར་གྱི་དབང་ཕྱུག་ལ་ཕྱག་འཚལ་ལོ༔ བསྙེན་པ་སྔོན་དུ་ཐེམས་པའི་སྔགས་པས་ལྷ་ཆེན་གྱི་སྒྲུབ་པ་བྱེད་ན༔ གནས་དང་དུས་དང་མཎྜལ་དང་མཆོད་པ་དང་གཏོར་མ་སོགས་སྤྱི་ནི་སྔར་བཞིན་ནོ༔ ཁྱད་པར་དུ་མཎྜལ་གྱི་དབུས་སུ་བྷནྡྷ་དུམ་བུ་གསུམ་པ་ལ་གྷི་ཧཾ་གིས་བྱུག་རྒྱ་སྐྱེགས་ཀྱིས་འཁོར་ལོ་རྩིབས་བཞི་པ་ས་བོན་དང་བཅས་པ་བྲིས་ལ་མེ་ཏོག་དམར་པོ་དང་རཏྣ་སྣ་ཚོགས་ཀྱིས་གང་བའི་ཁར་སྔར་གྱི་སྐུ་དང་མཉམ་དུ་བླ་རྡོའི་རྟེན་རྫས་བཞག་ལ་དར་དམར་པོའི་གུར་ཕུབ༔ དེའི་མདུན་དུ་ཟངས་ཕོར་དུ་མངར་གསུམ་དང་གྷི་ཧཾ་དང་གུར་གུམ་དང་ག་པུར་དང་ཙན་དན་དང་བ་དམར་མོའི་འོ་མ་དང་མེ་ཏོག་དམར་པོ་རྣམས་ཆང་ལ་སྦྱར་བའི་ནང་དུ་རཏྣ་ལྔ་བཅུག་པའི་དམ་རྫས་ཀྱི་ཁར་མེ་ལོང་ལ་ཁུ་ཁྲག་གིས་སྔགས་བྲིས་པས་བཀབ༔ དེའི་ཁར་བཟའ་བ་སྣ་ཚོགས་པའི་གཏོར་མ་རིན་པོ་ཆེའི་སྙེ་མའི་དབྱིབས་ཅན་རྒྱན་དང་ལྡན་པ་ལ་དར་དམར་པོའི་རྒྱལ་མཚན་བཙུག་པ་དང༔ ཕྱོགས་བཞིར་དྷཱ་ཀི་བཞི་ལ་གཏོར་མ་བཞི་དང་བཏུང་བ་བཞི་ཡང་བཤམ༔ རྫས་གཞན་ནི་བསྙེན་པ་དང་མཐུན༔ དེ་ནས་བདག་ཉིད་ཐུགས་རྗེ་ཆེན་པོའི་བསྐྱེད་རིམ་གསལ་ཞིང་བརྟན་པས་ལྷ་ཆེན་དབང་དུ་བསྡུ་བའི་མཐུ་དང་ལྡན་པར་བྱས་ནས་མདུན་གྱི་རྟེན་རྣམས་ལྷ་ཆེན་ལྕམ་དྲལ་འཁོར་དང་བཅས་པའི་སྐུར་སྔར་བཞིན་གསལ་བར་བསྒོམས་ནས་དར་དམར་པོས་གཡབ་ཅིང་སྤྱན་འདྲེན་པ་ནི༔ ཛ༔ ཚུར་བྱོན་ཚུར་བྱོན་ལྷ་ཆེན་པོ༔ འཇིག་རྟེན་སྐྱོང་བ་དབང་ཕྱུག་ཆེ༔ མངོན་ཤེས་རྫུ་འཕྲུལ་ཐབས་ལ་མཁས༔ ཆགས་པའི་ཞལ་ལ་སྒེག་པའི་སྐུ༔ གུ་ལང་ཆེན་པོ་ལྷ་ཡི་ལྷ༔ ཨུ་མཱཿཡུམ་དང་གཉིས་སུ་མེད༔ ཁྱོད་ནི་དབང་ཕྱུག་ཆེན་པོ་སྟེ༔ ཁམས་གསུམ་མ་ལུས་དབང་དུ་བྱེད༔ ཁྱོད་ནི་འཇིགས་བྱེད་ཆེན་པོ་སྟེ༔ སྲིད་གསུམ་མ་ལུས་ཟིལ་གྱིས་གནོན༔ དྲེགས་པའི་ལྷ་ཆེན་ཐམས་ཅད་ཀྱང༔ ཁྱོད་ཀྱི་འཁོར་དང་གཡོག་ལགས་ཀྱི༔ ལས་ལ་མ་གཡེལ་ད་ཚུར་བྱོན༔ དུས་ལ་བབ་བོ་གཤེགས་སུ་གསོལ༔ ཞེས་བརྗོད་ཅིང་འབོད་སྔགས་མང་དུ་བཟླས་ནས་སྤྱན་དྲངས་ཤིང་དམ་བསྒྲག་པ་སོགས་སྔར་བཞིན་བྱ་འོ༔ དེ་ནས་མཆོད་པ་འབུལ་བ་ནི༔ ཚོགས་རྗེ་ཚོགས་བདག་དབང་དང་ལྡན༔ ལྷ་ཆེན་ལྕམ་དྲལ་འཁོར་བཅས་རྣམས༔ དངོས་སུ་བཤམས་དང་ཡིད་སྤྲུལ་གྱི༔ མཆོད་པ་བཟང་པོ་འདི་བཞེས་ཤིག༔ མེ་ཏོག་ཕྲེང་སོགས་རིན་ཆེན་དབྱིག༔ ལ་དུ་མྱོས་བྱེད་ཡིད་བཞིན་ཟས༔ སྤོས་དང་སྨན་སྦྱར་ཏིལ་མར་སྒྲོན༔ བཤོས་གཙང་ཡོན་ཆབ་སྣ་ཚོགས་དང༔ འབྲས་ཆང་རྒུན་ཆང་བཏུང་བའི་མཆོག༔ སྦྲང་རྩི་བུ་རམ་མངར་བའི་རོ༔ རཀྟ་བཅུད་ཆེན་གྷི་ཧཾ་དང༔ བཙོས་དང་རྗེན་ཤ་ཁུ་བ་རྐང༔ བཟའ་དང་བཅའ་དང་བཏུང་བའི་མཆོག༔ གཟུགས་སྒྲ་དྲི་རོ་རེག་བྱ་སོགས༔ སྣ་ཚོགས་མཆོད་པ་འདི་དག་ཀུན༔ བཞེས་ཤིང་མཉེས་པར་མཛད་དུ་གསོལ༔ ཞེས་མཐུན་པའི་མཆོད་པ་སྣ་ཚོགས་ཚིམ་ཞིང་དགྱེས་པར་འབུལ་ཞིང་བསྟོད་པ་བྱས་ནས་བཟླས་པ་བྱ་འོ༔ ལྷ་ཆེན་གྱི་སྙིང་གར་ཉི་མའི་དཀྱིལ་འཁོར་གྱི་དབུས་སུ་ཨཾ་དམར་པོ་མར་མེ་ལྟ་བུ་ཞིག་བསམ་མོ༔ དེ་ནས་སྙིང་ག་ནས་འོད་ཟེར་དམར་པོ་མེ་ལྟར་ཚ་ཞིང་རྣོ་བ་ཞིག་འཕྲོས་ནས་ལྷ་ཆེན་གྱི་སྙིང་གའི་ས་བོན་ལ་ཕོག་པས་བསྲེགས་ཤིང་བསྐུལ་བས་མ་བཟོད་དེ་ཨཾ་དེ་ལས་འོད་དམར་པོ་དཔག་མེད་འཕྲོས་པས༔ གསང་བའི་མཁའ་འགྲོ་མ་དང་ཉེ་དབང་སོགས་འཁོར་གྱི་འཇིག་རྟེན་དྲེགས་པ་ཅན་ཐམས་ཅད་བསྐུལ་ནས་འཇིག་རྟེན་ཁམས་ཀྱི་རྒྱལ་པོ་བློན་པོ་སྐྱེས་པ་བུད་མེད་ཚེ་དཔལ་བཀྲག་མདངས༔ ནོར་གཡང་ཟས་བཅུད་རཏྣའི་དབྱིག་འབྱུང་བཞིའི་བཅུད་སོགས་གང་འདོད་ཐམས་ཅད་དབང་དུ་བསྡུས་ནས་བདག་ལ་ཕུལ་བས་བདག་གིས་དབང་དུ་འདུས་པར་བསམ་ཞིང་བཟླས་པ་བྱ་འོ༔ ཨཱོྃ་མ་ཧཱ་དེ་བ་ཛ༔ ཨུ་མཱཿདེ་བཱིཿཧྲིཾ་ཧ་རི་ནི་ས་པཱ་ཤཾ་ཀུ་རུ་ཧོ༔ ཞེས་འབུམ་ཕྲག་གཅིག་བཟླས་ནས་ཐུན་མཚམས་སུ་མཆོད་པ་འབུལ་བ་ལ་སོགས་པ་རྣམས་བསྙེན་པའི་སྐབས་བཞིན་བྱ་འོ༔ གྲུབ་པའི་རྟགས་ནི་སྔར་གྱི་རྣམས་དང༔ ཁྱད་པར་དུ་བུད་མེད་བཟང་མོ་དང་རྒྱལ་པོ་སོགས་མི་ཆེན་གྱིས་ཕྱག་དང་བཀུར་སྟི་བྱེད་པ་དང༔ གཏེར་རྙེད་པ་དང༔ གདུགས་དང་རྒྱལ་མཚན་དང་དུང་དང་ལྕགས་ཀྱུ་ལ་སོགས་པ་ལག་ཏུ་བྱིན་པ་དང༔ འབྲུ་དང་ཤིང་ཏོག་ལ་སྤྱོད་པ་དང༔ མེ་འབར་བ་དང༔ འོད་འཕྲོ་བ་དང༔ དྲི་ཞིམ་པ་དང༔ བྲོ་གར་བྱེད་པ་དང༔ གོས་དམར་གྱོན་པ་དང༔ ཉི་ཟླ་ཤར་བ་དང༔ དངོས་སུ་གཟུགས་སྟོན་པ་དང་ལུང་སྟོན་པ་སོགས་དངོས་དང་ཉམས་དང་རྨི་ལམ་དུ་བྱུང་བ་ནི་རབ་འབྲིང་ཐ་མའི་རྟགས་སུ་རིམ་པ་བཞིན་ཤེས་པར་བྱ་འོ༔ དེ་རྣམས་ལ་དགའ་བྲོད་མི་བྱ་འོ༔ བརྩོན་འགྲུས་ཆུང་བ་དང་སྔགས་ཆད་ལྷག་དང་ཏིང་འཛིན་མི་གསལ་བ་དང་དམ་ཚིག་གི་སེལ་ཞུགས་པ་སོགས་མི་འགྲུབ་པའི་རྟགས་སུ་སྤྲེའུ་དང་རྟ་བོང་དགོད་པ་དང་རང་གི་ཀ་ཅ་གཞན་གྱིས་ཁྱེར་བ་དང༔ བུད་མེད་དང་བྱིས་པ་རྒྱན་གོས་ངན་པས་ངུ་ཞིང་འབོད་པ་དང་སྙིང་མི་དགའ་ཞིང་ཚིག་པ་དང་རྨུགས་ཤིང་འགྲོ་འདོད་པ་དང་ཏིང་འཛིན་མི་གསལ་བ་སོགས་བྱུང་ན་བར་ཆད་ཀྱི་རྟགས་ཡིན་པས་བློ་རྩེ་གཅིག་ཏུ་བྱས་ནས་དམིགས་པ་བསྒོམ༔ སྔགས་བར་མེད་དུ་བཟླ༔ དམ་ཚིག་ལ་གསང་ཐུབ་པར་བྱ་འོ༔ མཛེ་སྤྲང་ལ་སོགས་པས་རྒོལ་ཞིང་སྨོད་པ་བྱུང་ན་བསྐང་བཤགས་དྲག་པོ་བྱ་འོ༔ རྟགས་འཚུབ་ཅིང་མི་ནོན་པ་འདྲ་ན་ལྷ་ཆེན་གྱི་སྤྱི་བོར་རྟ་མགྲིན་བསྒོམས་ནས་དེའི་སྔགས་ཀྱིས་ཁྲིད་ནས་བཟླས་པ་བྱས་ན་དངོས་གྲུབ་མྱུར་རོ༔ དེ་ནས་རྟགས་རྣམས་གཏན་ལ་ཕེབས་ནས་དངོས་གྲུབ་བླང་ངོ༔ ཐུགས་རྗེ་ཆེན་པོ་བཀའི་སྲུང་མ་ལྷ་ཆེན་ལྕམ་དྲལ་གྱི་སྒྲུབ་པའི་གནད་གདམས་སྩྱོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་བསྟོད་པ་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ ལྷ་ཆེན་སྒྲུབ་པའི་དུས་སུ་ཚེས་བརྒྱད་དང་བཅོ་ལྔ་དང་ཉི་ཤུ་གསུམ་དང་ལྔ་རྣམས་ལ་གཏོར་མ་འབུལ་ཞིང་བསྟོད་པ་འདི་ཉིད་བྱ་འོ༔ ཧྲཱི༔ སྤྱན་རས་གཟིགས་སྤྲུལ་དབང་ཕྱུག་ལྷ་ཆེན་པོ༔ འཇིག་རྟེན་མེས་པོ་ཁམས་གསུམ་ཀུན་གྱི་བདག༔ དངོས་གྲུབ་མཆོག་སྟེར་ཡོན་ཏན་རྫོགས་པའི་ལྷ༔ རྒྱལ་བའི་བཀའ་སྡོད་མཐུ་ཆེན་ཁྱོད་ལ་བསྟོད༔ འོད་ཕུང་བསྐལ་པའི་མེ་ལྟར་འབར་བའི་སྐུ༔ ཉི་ཟླའི་སྤྱན་བགྲད་ཁྲོ་གཉེར་བཞད་པའི་ཞལ༔ མཆེ་གཙིགས་འཛུམ་ཆགས་གཞན་ཡིད་འགུགས་པ་པོ༔ གར་གྱི་དབང་ཕྱུག་དཔལ་ཆེན་བཀའ་བཞིན་དུ༔ དམ་ཚིག་འཁོར་ལོའི་གནས་རྣམས་སྐྱོང་མཛད་ཅིང༔ སྣ་ཚོགས་དར་དང་རཏྣ་ཨུཏྤལ་གྱིས༔ ངེས་པར་ཆེ་བཙན་རྒྱལ་པོའི་རྟགས་སུ་བརྒྱན༔ ཚངས་གནས་ཏི་སེ་རྒྱ་མཚོ་ཆེན་པོའི་ཀློང༔ དུར་ཁྲོད་གནས་ན་མ་མོའི་ཚོགས་ཀྱིས་བསྐོར༔ ཁྱོད་ནི་རྣལ་འབྱོར་གྲུབ་པའི་དབང་ཕྱུག་ཡིན༔ དྲེགས་པའི་ལྷ་ཆེན་ཀུན་གྱིས་ཕྱག་བྱས་ཤིང༔ ལོག་འདྲེན་བགེགས་རྣམས་མ་ལུས་འདུལ་བར་མཛད༔ ལྷ་ཡུལ་གྲོང་ཁྱེར་ནགས་འདབས་ཐམས་ཅད་དུ༔ ལྷ་དམག་དབུགས་འབྱིན་ཆེ་བཙན་གཡུལ་ལས་རྒྱལ༔ ཁམས་གསུམ་ཀུན་གྱི་ཡིད་འགུགས་ལྕགས་ཀྱུ་དང༔ རླུང་གི་ཞགས་པས་སྐྱེ་འགྲོ་འགུགས་ཤིང་འཆིང༔ གནོད་སྦྱིན་གཟི་བརྗིད་མདངས་ཀུན་རྟགས་ཀྱིས་འཕྲོག༔ ཨུ་མཱཿཡུམ་འཁྱུད་རྟག་ཏུ་ཆགས་ཤིང་རོལ༔ གསང་བའི་མ་བཞིས་འགྲོ་ཀུན་དབང་དུ་སྡུད༔ དྲེགས་པའི་ལྷ་ཆེན་ཀུན་ཀྱང་ལས་ལ་འགྱེད༔ ཁྱོད་ནི་མི་བཟད་འཇིགས་བྱེད་ཀུན་གྱི་བདག༔ སྨོན་ལམ་དབང་གིས་རྣམ་འཕྲུལ་ཅིར་ཡང་སྟོན༔ འདོད་པའི་མཆོག་སྩོལ་འཇིག་རྟེན་ཀུན་གྱི་སྐྱབས༔ ཁྱོད་ལ་ཕྱག་འཚལ་རྒྱ་ཆེན་དངོས་གྲུབ་སྩོལ༔ ཅེས་དུས་དུས་སུ་བསྟོད་པ་བྱ་ཞིང་ཕུད་ལ་སོགས་པས་ཀྱང་མཆོད་པ་བྱ་འོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་བསྐུལ་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ ལྷ་ཆེན་སྒྲུབ་པའི་རྣལ་འབྱོར་པས་ཕྲིན་ལས་གང་སྒྲུབ་ཀྱང་ཐུགས་དམ་བསྐུལ་བ་ཤིན་ཏུ་གཅེས་སོ༔ རང་ཉིད་ཡི་དམ་གྱི་བསྐྱེད་རིམ་ཤིན་ཏུ་གསལ་བས་དར་གྱིས་གཡབ་ཅིང་གང་འདོད་པའི་ལས་དེ་ལ་བསམ་པ་རྩེ་གཅིག་པས་འདི་ལྟར་བསྐུལ་ལོ༔ ཧྲཱི༔ བདེ་ཆེན་དབང་གི་དཀྱིལ་འཁོར་ནས༔ དཔལ་ལྡན་ཁྲག་འཐུང་རྟ་མཆོག་དཔལ༔ ཐུགས་རྗེ་ཆེན་པོའི་རོལ་པ་ལས༔ གུ་ལང་ཆེན་པོ་ལྷ་ཡི་ལྷ༔ དབང་ཕྱུག་ཤྲཱི་རལ་པ་ཅན༔ དྲེགས་པའི་སྡེ་དཔོན་མཐུ་ཆེན་ཁྱོད༔ ཚངས་པའི་གནས་དང་རྒྱ་མཚོའི་གླིང༔ གངས་དཀར་རྩེ་དང་ཙན་དན་ནགས༔ གྲུབ་པའི་གནས་ནས་སྐུ་བཞེངས་ཤིག༔ སྐུ་མདོག་དམར་པོ་བསྐལ་པ་ཡི༔ མེ་ལྟར་འབར་བའི་གཟི་བྱིན་གྱིས༔ ཁམས་གསུམ་མ་ལུས་དབང་དུ་སྡུད༔ ཕྱག་མཚན་ལྕགས་ཀྱུ་ཞགས་པ་ཡིས༔ འགྲོ་བའི་ཡིད་འགུགས་འཆིང་བར་མཛད༔ ཟུར་ཕུད་ཟླ་བ་ཚེས་པས་བརྒྱན༔ གསང་བའི་རྟགས་ཀྱིས་སྣོད་བཅུད་ཀྱི༔ གཟི་མདངས་ཡོན་ཏན་མ་ལུས་སྡུད༔ ཡུམ་ཆེན་ལྷ་མོ་དཀའ་ཟློག་མ༔ རྟག་ཏུ་ཆགས་ཤིང་བདེ་ལ་རོལ༔ སྐུ་གསུང་ཐུགས་ཀྱི་དཀྱིལ་འཁོར་ནས༔ གསང་བའི་མ་བཞི་ལས་ལ་འགྱེད༔ ཁམས་གསུམ་ཀུན་གྱི་ཡིད་འགུགས་ཤིང༔ མྱོས་དང་རྨོངས་དང་འཆིང་བར་མཛད༔ དུས་ལ་བབ་པོ་ཕྲིན་ལས་མཛོད༔ ཚངས་དང་འདོད་ལྷ་དབང་པོ་སོགས༔ དྲེགས་པའི་ལྷ་ཆེན་ཐམས་ཅད་ཀྱང༔ ཁྱོད་ཀྱི་འཁོར་དང་གཡོག་ལགས་ཏེ༔ འཇིག་རྟེན་གསུམ་ན་དགྲ་ལས་རྒྱལ༔ དཀའ་ཐུབ་གྲུབ་པ་ཁྱོད་ཀྱི་མཐུས༔ ཟིལ་གྱིས་མི་ནོན་གང་ཡང་མེད༔ སྔོན་ཚེ་ཞལ་བཞེས་དམ་བཅས་པའི༔ ཐུགས་དམ་ད་ལྟ་བསྐུལ་ལགས་སོ༔ དྲེགས་པའི་དཔུང་དང་བཅས་རྣམས་ཀྱིས༔ ཁམས་གསུམ་སྲིད་པ་ཐམས་ཅད་ལ༔ འགུགས་པར་བྱེད་པའི་ལྕགས་ཀྱུས་ཐོབས༔ རླུང་གི་ཞགས་པས་ཡིད་ཆིངས་ལ༔ རང་དབང་བརྟན་པ་དང་ཕྲལ་ནས༔ བདག་གི་དབང་དུ་འདུས་པར་མཛོད༔ གདུག་ཅན་དགྲ་དང་གནོད་པའི་བགེགས༔ ཐམས་ཅད་དྲག་པོའི་དམོད་པས་གཟིར༔ རིག་སྔགས་སྦྱོར་བས་བྱད་དུ་ཆུགས༔ ལུས་ངག་རྡུལ་བཞིན་བརླགས་ནས་ཀྱང༔ ལྷག་མ་ཙམ་ཡང་མེད་པར་མཛོད༔ ཤ་ཁྲག་ཟན་ཆན་ཁུར་བ་དང༔ སྤོས་དང་མེ་ཏོག་ལ་སོགས་པ༔ མཐུན་པའི་དམ་རྫས་ཀུན་བཞེས་ལ༔ རྣལ་འབྱོར་བདག་ཅག་འཁོར་བཅས་ཀྱི༔ བར་ཆད་སོལ་ལ་མཐུན་རྐྱེན་སྒྲུབས༔ བཅོལ་པའི་ལས་རྣམས་མ་ལུས་པ༔ སྐད་ཅིག་ཙམ་ལ་གྲུབ་པར་མཛོད༔ དུས་ལ་བབ་བོ་དབང་ཕྱུག་ཆེ༔ ཕོ་ཉ་བྲན་དང་མངགས་པར་བཅས༔ ཕྲིན་ལས་མ་གཡེལ་ས་མ་ཡ༔ ཞེས་བསྐུལ་ཞིང་ཕྲིན་ལས་གསོལ་ལོ༔ བསྟན་པ་དང་སེམས་ཅན་ལ་ཕན་པའི་བྱང་ཆུབ་སེམས་ཀྱིས་སོ༔ རང་དོན་ཉི་ཚེ་ཙམ་ལ་ནི་མ་ཡིན་ནོ༔ ཤིན་ཏུ་ཟབ་ཅིང་གཉན་པ་འོ༔ ལྷ་ཆེན་གྱི་བསྐུལ་གྱི་གནད་གདམས་ཨོ་རྒྱན་གུ་རུས་གསང་བ་རླུང་གི་ཞགས་པའི་ཏནྟྲ་ལས་དུམ་བུར་བཀོལ་བ་འོ༔ སྐལ་ལྡན་ཤེས་རབ་སྙིང་རྗེ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་རྟེན་རྫས་བཅའ་ཐབས་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ ལྷ་ཆེན་གྱི་སྐུ་རྟེན་བཅའ་བ་ནི༔ ཟླ་བ་ཡར་གྱི་ངོའི་རྒྱལ་གྱི་ཉི་མ་ལ༔ སྨད་འཚོང་མ་གཞོན་ནུ་དཔལ་ཅན་གྱི་འདོམས་དཀྲིས་ཀྱི་རས་སམ་དར་ལ་རང་གི་ས་བོན་དང་ན་ཆུང་གི་རཀྟ་གྷི་ཧཾ་ག་པུར་གུར་གུམ་ཙན་དན་གྱི་ལྡེ་གུ་སོགས་སྨན་སྤོས་དྲི་ཞིམ་པོས་ཆག་ཆག་འཐས་པར་བྱས་ལ་མེ་ཏོག་དམར་པོའི་ཁར་བཞག༔ སྙིང་ཁའི་ཐད་དུ་ཨཾ་དམར་པོ་ཞིག་བྲིས་ལ་དེ་དང་རང་གི་སྙིང་ག་ནས་འོད་ཟེར་འཕྲོས་པས་ལྷ་ཆེན་འཁོར་བཅས་སྔགས་ཀྱི་རྣམ་པར་འོད་ཟེར་དམར་པོ་ཆིལ་ཆིལ་བྱུང་ནས་གཞི་དེ་ལ་ཐིམ་པར་བསམ་ཞིང་སྔགས་བཟླ་མེ་ཏོག་གཏོར༔ དེ་ནས་རང་ངམ་ལྷ་བཟོ་བ་དམ་ཚིག་དང་ལྡན་པས་མངོན་རྟོགས་བཞིན་དུ་ཉིན་དེ་ཉིད་ལ་རྫོགས་པར་བྲིས་ལ་དེའི་མདུན་དུ་མཆོད་པ་དང་གཏོར་མ་བཤམ༔ བགེགས་བསྐྲད་ནས་གཟུགས་ལྷར་བསྐྱེད་ལ་འབོད་སྔགས་ཀྱི་བཟླས་པས་དགུག་བསྟིམ་མཆོད་བསྟོད་དང་སྔགས་བཟླ༔ སྔགས་ཀྱིས་མེ་ཏོག་གཏོར་ནས་བརྟན་བཞུགས་དང་བཀྲ་ཤིས་གསོལ༔ མེ་མཆོད་ཕུལ་ལ་ཞལ་བསྲོ༔ དེ་ནས་གཞན་ལ་མི་སྟོན་པར་དབེན་པར་མཆོད་པ་དང་བཅས་ནས་རྟེན་དུ་གཟུང་ངོ༔ ས་མ་ཡ༔ ལྷ་ཆེན་གྱི་བླ་རྡོའི་རྟེན་རྫས་བཅའ་བ་ནི༔ རྒྱལ་གྱི་ཉི་མ་ལ་སྨད་འཚོང་མ་དཔལ་ཅན་གྱི་ལག་ནས་བྱུང་བའི་དར་རམ་རས་སམ་གྲོ་ཤོག་ལ་རྫས་སྣ་དྲུག་གིས་བྱུག་ཅིང་འཐས་པར་བཅག༔ སྔར་གྱི་རྫས་རྣམས་བསྲེས་པའི་གསེར་རམ་མཚལ་ལམ་རྒྱ་སྣག་སོགས་ཀྱིས་བྲི་འོ༔ རྫས་དེ་རྣམས་མེ་ཏོག་དམར་པོའི་ཁར་བཞག་ནས་བགེགས་བསྐྲད་གཏོར་མ་བཏང་ལ་ཁ་ནུབ་ཏུ་གཏད་ནས་བྱང་ཆུབ་ཀྱི་སེམས་དང་ལྡན་པས༔ བྲི་གཞི་སོར་བརྒྱད་པ་གཉིས་བྱས་པ་ལ་ཡབ་ཡུམ་གཉིས་ཀྱི་སྐུ་མངོན་རྟོགས་བཞིན་སོ་སོར་བྲིས་པའི་ལྟོ་བར་མུ་ཁྱུད་རིམ་པ་ལྔ་བསྐོར༔ རིམ་པ་གསུམ་པ་ལ་རྩིབས་བཞི་བྱ༔ ཡབ་འཁོར་གྱི་ལྟེ་བ་ལ༔ ཨཱོྃ་མ་ཧཱ་དེ་བ་ཛཿས་མ་ཡ་པཱ་ཤཾ་ཀུ་རུ་ཧོ༔ ཞེས་བྲི༔ མུ་ཁྱུད་དང་པོ་ལ༔ ཨཱོྃ་མ་ཧཱ་དེ་བ་ལོ་ཀ་ནན་དྷེ་དྷ་ཤ་ཨཾ་ཀུ་ཤ་ཛ་ཛཿཧྲིཾ་ཧྲིཾ་རཱ་ཙ་སིདྡྷི་ཁུག་ཁུག་སརྦ་པཱ་ཤཾ་ཀུ་རུ་ཧྲིཾ་ཛ༔ ཞེས་བྲི༔ རྩིབས་བཞི་ལ༔ ཨཱོྃ་མ་ཧཱ་དེ་བ་ཧཱུྃ༔ གྷ་ར་ཧོ་ཧཾ་ཛཿཧཱུྃ༔ ཨེ་མན་ཛུ་ཀུབ་ཏ་ཧཱུྃ༔ ཀ་བྷི་ར་ཀོ་བྷི་ར་ཧཱུྃ༔ ཞེས་བྲི༔ རྩིབས་མཆན་ལ༔ ཨཱོྃ་ཧ་བཛྲ་སིད་ཏི་ས་མ་ཡ་པཱ་ཤཾ་ཀུ་རུ་ཧོ༔ དེ་བཞིན་དུ་རི་རཏྣ་ནི་པདྨ་ས་ཀརྨ་ཞེས་བྲི༔ ཕྱིའི་མུ་ཁྱུད་ལ་ཨཱོྃ་མ་ཧཱ་དེ་བ་ཛཿཛཿཛུ་ཛུ་ཧྲིཾ་ཧྲིཾ་ཁུག་ཁུག་དུང་དུང་སློང་སློང་ལོ་ཀ་སརྦ་པཱ་ཤཾ་ཀུ་རུ་ཛ༔ ཨ་ནྲྀ་ཏྲི་ཧྲིཾ་ཧྲིཾ་ཛ༔ ཨཱ་ཀརྵཱ་ཡ་ཧཱུྃ་ཛ༔ བཱ་སུ་སིདྡྷི་ས་མ་ཡ་སྡུས་སྡུས་ཨཾ་ཀུ་ཤ་ཧྲིཾ་པཱ་ཤཾ་ཀུ་རུ་ཧཱུྃ་ཧཱུྃ་ཛཿཛ༔ ཅེས་བྲི༔ དེའི་ཕྱིའི་མུ་ཁྱུད་ལ་ཨཱ་ལི་ཀཱ་ལི་བྲི་འོ༔ ཡུམ་འཁོར་གྱི་ལྟེ་བ་ལ༔ ཨུ་མཱཿདེ་བཱིཿཧྲིཾ་ས་མ་ཡ་པཱ་ཤཾ་ཀུ་རུ་ཧོ༔ ཞེས་བྲི༔ མུ་ཁྱུད་ལ༔ ཨུ་མཱཿདེ་བཱིཿལོ་ཀ་ནན་དྷེ་སོགས་བྲི༔ རྩིབས་ལ༔ ཨུ་མཱཿདེ་བཱིཿས་མ་ཡ་སཏྭཾ་ཛ༔ ཨུ་དྷི་བཾ་མ་ནུ་ཧོ༔ ཨ་པ་ཧི་མུ་ལེ་ཏཾ༔ ལོ་ཀི་ཙིཏྟ་དྷི་ཧྲིཾ་ཛ༔ གཞན་རྣམས་གོང་བཞིན་ནོ༔ སྤེལ་ཚིག་རང་གང་འདོད་བསྒྱུར་རོ༔ མོ་འགུགས་པ་ནི་ཡབ་དང་ཕོ་འགུགས་པ་ནི་ཡུམ་ལ་འོ༔ སྲོག་ཕུར་ནི་ཙན་དན་གྱི་ཕུར་པ་སོར་བཞི་པ་གཅིག་ལ་ཡབ་ཀྱི་སྔགས་བྲི་རང་གི་ཏི་ལ་བྱུག༔ སྟག་མའི་ཕུར་པ་སོར་བཞི་པ་གཅིག་ལ་ཡུམ་གྱི་སྔགས་བྲི་གཞོན་ནུ་མའི་ཟླ་མཚན་བྱུག༔ ཤེལ་རྡོ་ལ་ཨ་ཕ་ཝང་ལོང་བུ་ལ་ཏྲི་གཡུ་ལ་ནྲྀ་བྲི་དེ་རྣམས་ལ་རབ་གནས་བྲིས་སྐུ་བཞིན་བྱ༔ དེ་ནས་ཟངས་སམ་ཙན་དན་དམར་པོའི་དབང་རྟེན་མཛུབ་གང་བ་སྦུབས་ཅན་ཞིག་བཅོས་པའི་ནང་དུ་སྔར་གྱི་ཙཀྲ་ཁ་སྦྱར་གྱི་བར་དུ་སྤེལ་ཚིག་བཅུག་པ་མཐའ་ནས་རིམ་བཞིན་བལྟབ་ལྟེ་བ་མ་ཆག་པར་སྲོག་རྟེན་ལ་དཀྲི་ཞིང་དྲིལ༔ གཞོན་ནུ་མས་བཀལ་བའི་སྐུད་པ་དམར་པོས་བཅིངས་ནས་དབང་རྟེན་གྱི་སྣོད་དུ་བཅུག༔ དེའི་ཞབས་སུ་ལྷ་འདྲེ་མི་གསུམ་གྱི་སྲོག་རྟེན་དང་རཏྣ་ལྔ་དང་མེ་ཏོག་དམར་པོ་དང་སྨན་སྤོས་དྲི་ཞིམ་པོ་དང་དར་ཟབ་སྣ་ཚོགས་དང་ནོར་སྣ་གང་རྙེད་བཅུག་ལ་ཞབས་བསྡམ་རྫས་སྣ་དྲུག་པོས་བྱུགས་ལ་སྤོས་ཀྱིས་བདུག་མེ་ཏོག་དམར་པོའི་ཁར་བཞག་ནས་སྔར་བཞིན་རབ་གནས་བྱ༔ དེ་དར་སྣས་དྲིལ་ཏེ་རྟེན་དུ་གཟུང་ངོ༔ སྒྲུབ་པའི་སྐབས་མཎྜལ་གྱི་དབུས་སུ་བཀོད་ཅིང་རྒྱུན་དུ་རང་གི་ལུས་དང་མི་འབྲལ་བར་བཅང་ངོ༔ མིས་མ་མཐོང་བ་གཅེས་སོ༔ ཚེས་བརྒྱད་དང་བཅོ་ལྔ་དང་རྒྱལ་གྱི་ཉི་མ་ཐམས་ཅད་ལ་གཏོར་མ་དང་པཱུ་ཛ་ལྔས་མཆོད་ཅིང་སྔགས་ཀྱིས་མེ་ཏོག་འབུལ་བར་བྱ་འོ༔ ཤིན་ཏུ་གཅེས་པ་རྟེན་རྫས་ཀྱི་གནད་གདམས་སྩྱོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་ལས་མཐའ་བུང་བ་བཅུད་འཐུང་གི་མན་ངག་བཞུགས་སོ༔ ྈྈྈ དབང་གི་ལྷ་ལ་ཕྱག་འཚལ་ལོ༔ ལྷ་ཆེན་གྱི་ཕྲིན་ལས་རྒྱས་པ་དང་དབང་དང་མངོན་སྤྱོད་ཀྱི་ལས་ཐམས་ཅད་ལ་གཅེས་པ་བུང་བ་བཅུད་འཐུང་གི་ལས་ནི༔ རང་ཉིད་ལྷ་ཆེན་གྱི་སྐུར་མངོན་རྟོགས་བཞིན་གསལ་བཏབ་པའི་སྙིང་ཨུཏྤལ་དམར་པོ་འདབ་མ་བརྒྱད་པ་ཁ་བྱེ་བ་ལྟ་བུ་གེ་སར་ཟི་ཕོལ་དང་བཅས་པའི་དབུས་ན༔ དྭངས་མའི་ཐིག་ལེ་དཀར་ལ་དམར་མདངས་ཆགས་པ་གསལ་ཞིང་འཚེར་བ་སྣུམ་ལ་འདྲིལ་བ་ཨཾ་དང་ཧྲིཾ་སྤུ་ཤད་ཀྱི་རེ་ཁཱ་ལྟ་བུས་མཚན་པ༔ དེའི་ཕྱི་སྐོར་ཟི་ཕོལ་གྱི་སྟེང་ན་གསང་སྔགས་ཀྱི་ཕྲེང་བ་ཤིན་ཏུ་ཕྲ་ཞིང་གསལ་བ་མར་མེ་རླུང་གིས་མ་བསྐྱོད་པ་ལྟ་བུ་གསལ་བཏབ༔ རང་གི་མདུན་དུ་དམིགས་བྱ་གང་ཡིན་དངོས་སུ་གསལ་བའི་སྙིང་ཨུཏྤལ་འདབ་བརྒྱད་ཁ་བྱེ་བ་གེ་སར་ཟི་ཕོལ་དང་བཅས་པའི་དབུས་སུ༔ ལུས་ངག་ཡིད་ཀྱི་དྭངས་མ་ཚེ་དང་བསོད་ནམས་དབང་ཐང་གི་བཅུད་ཀྱི་སྙིང་པོ་ཐིག་ལེ་དམར་པོ་གསལ་ཞིང་འཚེར་བ་དང༔ འདབ་མ་རྣམས་ལ་ཡང་དྭངས་བཅུད་ཏིལ་ལ་མར་གྱིས་ཁྱབ་པའི་ཚུལ་བཞིན་བཀྲག་མདངས་ཟིལ་པ་ཕྲོམ་མེ་བ་བསྒོམ༔ དེ་ནས་རང་གི་སྙིང་གའི་སྔགས་འབྲུ་རྣམས་ལས་འོད་ཟེར་དམར་པོ་ཟེ་རེ་རེ་འཕྲོས་པས་ལུས་ནང་འོད་དམར་པོས་མེར་མེར་གང་བར་བསམ་ཞིང་སྒྲུབ་སྔགས་ཉེར་གཅིག་ཏུ་བཟླ་འོ༔ དེ་ནས་དབུས་ཀྱི་ཐིག་ལེའི་ནང་ནས་གསང་བའི་དྷཱ་ཀི་བཞི་རྣམ་པ་བུང་བ་དམར་སེར་རབ་ཏུ་མྱོས་པ་བཞི་ཛཿཧྲིཾ་གི་སྒྲ་སྒྲོག་བཞིན་པར་ཐོན༔ རང་གི་སྣ་བུག་གཡོན་ནས་ཐོན་དམིགས་བྱའི་སྣ་བུག་གཡས་ནས་ཐོགས་པ་མེད་པར་ཞུགས་ནས་དམིགས་བྱའི་ཚེ་སྲོག་གི་དྭངས་མའི་ཁུ་བཅུད་ཐམས་ཅད་འཇིབས་ཤིང་བརྔུབས་པས༔ ཨུཏྤལ་ཟི་ཕོལ་དང་བཅས་པ་རིད་ཅིང་སྐམ་ནས་མཐར་ལྟེ་བའི་ཐིག་ལེ་ལ་རྔུབ་ཅིང་འཇིབས་པས་དམིགས་མེད་དུ་བྱས་ནས་ཨུཏྤལ་གྱི་སྙིགས་མ་བཅུད་བྲལ་དགུན་གྱི་མེ་ཏོག་བཞིན་བཀྲག་མེད་དུ་གྱུར་ཅིང༔ བུང་བ་རྣམས་རབ་ཏུ་རྒྱགས་ཤིང་གཟི་བརྗིད་དང་ལྡན་པར་བྱས་ནས་དམིགས་བྱའི་སྣ་བུག་གཡོན་ནས་ཐོན་རང་གི་སྣ་བུག་གཡས་སུ་ཞུགས་ནས་སྙིང་གའི་ཨུཏྤལ་གྱི་སྟེང་དུ་བབས་ཏེ༔ དྭངས་མའི་བཅུད་རྣམས་པད་འདབ་ཟི་ཕོལ་ཐིག་ལེ་རྣམས་ལ་སྐྱུགས་ཤིང་བྲན་པས་དེ་དག་རབ་ཏུ་རྒྱས་ཤིང་འོད་འབར་བར་གྱུར་པའི་ཟེར་དང་བུང་བ་རྣམས་དབྱེར་མེད་དུ་འདྲེས་པར་བསམ་ཞིང་སྒྲུབ་སྔགས་ཀྱི་བཟླས་པ་རྩེ་གཅིག་ཏུ་བྱ་འོ༔ ཐུན་གྱི་མཐར་བདག་དང་གཉིས་མེད་སྤྲོས་པ་དང་བྲལ་བའི་ངང་ལ་མཉམ་གཞག་བྱ་འོ༔ འདི་ནི་གཞན་གྱི་ཚེ་སྲོག་བདག་གི་དབང་དུ་བྱེད་པས་དབང་སྡུད་ཀྱི་མཆོག༔ གཞན་གྱི་བཅུད་ཀྱིས་བདག་གི་ཚེ་སྲོག་རྒྱས་པར་བྱེད་པས་ཚེ་སྒྲུབ་ཀྱི་མཆོག༔ ཕ་རོལ་གྱི་ཚེ་སྲོག་སྐད་ཅིག་ལ་འབྲལ་བས་མངོན་སྤྱོད་ཀྱི་མཆོག༔ བདག་གཞན་གཉིས་མེད་འཁོར་འདས་རོ་མཉམ་གྱི་དགོངས་པར་དྲིལ་བས་རྫོགས་རིམ་གྱི་མཆོག༔ དེའི་ཕྱིར་ཤིན་ཏུ་ཟབ་པའི་སྙིང་པོ་འོ༔ གསེར་སྲང་གང་གི་མེ་ཏོག་མེད་པའི་མི་སྐལ་མེད་ལ་མ་སྤེལ་ཅིག༔ གཅེས་པར་ཟུངས་ཤིག༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་དབང་སྡུད་ལས་སྦྱོར་བཞུགས་སོ༔ དབང་གི་བདག་ཉིད་པདྨ་གར་གྱི་དབང་ཕྱུག་ལ་ཕྱག་འཚལ་ལོ༔ བསྙེན་སྒྲུབ་ཐེམས་པའི་རྣལ་འབྱོར་པས་འགྲོ་བ་དབང་དུ་བསྡུ་བར་འདོད་ན་དུས་ཟླ་བ་གང་ཡང་རུང་བའི་ཚེས་བརྒྱད་སོགས་ལ་སྐར་མ་ནི་རྒྱལ་དང་ལྡན་པར་གཅེས་སོ༔ རྟེན་བཅའ་བ་ནི་དར་རམ་གྲོ་ཤོག་ལ་གྷི་ཧཾ་དང་རྒྱ་སྐྱེགས་དང་གུར་གུམ་རྣམས་མྱོས་བྱེད་ཀྱི་ཁུ་བས་བཞུར་བས་དམིགས་བྱ་ཕོ་མོ་གང་ཡིན་དེ་ཉིད་འདྲ་བའི་གཟུགས་མཚན་ཉིད་ཚང་བ་ལ་མིང་དང་རུས་སོགས་བཀོད་དེ་ལྟེ་བར་ལྷ་ཆེན་གྱི་སྔགས་ཀྱིས་སྣ་དྲངས་ནས་ཆེ་གེ་མོ་པཱ་ཤཾ་ཀུ་རུ་ཧོ༔ ཞེས་སོགས་གང་འདོད་པའི་སྤེལ་ཚིག་རྣམས་བྲི༔ ཕྱི་མཐའ་ན་ཕར་དབང་སྡུད་ཀྱི་སྔགས་རིང་དང་ལྕགས་ཀྱུ་དང་ཛཿཧྲིཾ་གི་ལུ་གུ་རྒྱུད་ཀྱིས་བར་མེད་དུ་བསྐོར༔ ཕོ་ལ་གཞོན་ནུའི་བྱང་སེམས་དང་མོ་ལ་གཞོན་ནུ་མའི་ཟླ་མཚན་བྱུག༔ གང་བྱེད་དེའི་དྲི་མ་རྙེད་ན་མཆོག་ཏུ་མྱུར་རོ༔ རཱུ་པ་དེ་གཞོན་ནུ་མས་བཀལ་བའི་སྐུད་པ་དམར་པོས་རྒྱ་གྲམ་དུ་བཅིངས་ནས་སྒྲུབ་པའི་བླ་རྡོའི་འོག་ཏུ་བཅུག་ལ་བཞག༔ དེ་ནས་རང་ཉིད་ཡི་དམ་གྱི་ལྷར་གསལ་བའི་ཐུགས་ཀ་ནས་ལྷ་ཆེན་དམར་པོ་ལྕགས་ཀྱུ་དང་ཞགས་པ་ཐོགས་པ་མང་པོ་སྤྲོས་ཏེ་བསྒྲུབ་བྱའི་སྙིང་ནང་ནས་སེམས་ཀྱི་ངོ་བོ་ཡི་གེ་ནྲྀ་དམར་པོ་ཞིག་གནས་པ་དེ་རང་དབང་མེད་པར་དམར་ཧྲི་ལི་ལི་བཀུག་ནས༔ མདུན་གྱི་གཟུགས་ལ་བསྟིམས་པས་བསྒྲུབ་བྱ་དངོས་སུ་གྱུར་ཏེ་བདག་ལ་གུས་ཤིང་དུང་པའི་ཚུལ་དུ་ཡོད་སྙམས་པའི་དམིགས་པ་རྩེ་གཅིག་ཏུ་བསྒོམ་ཞིང་ཡི་དམ་གྱི་སྔགས་ཀྱིས་དྲངས་ནས་བསྙེན་སྔགས་ཀྱི་མཐར་ཆེ་གེ་པཱ་ཤཾ་ཀུ་རུ་ཧོ༔ ཞེས་བཏགས་པ་བརྒྱ་རྩ་སོགས་བཟླ༔ དེ་ནས་བསྒྲུབ་བྱའི་སྟེང་དུ་ལྷ་ཆེན་གསལ་བཏབ་པའི་ཐུགས་ཀའི་འོད་ཟེར་གྱིས་སྔར་བཞིན་དབང་དུ་བསྡུས་པར་བསམ་ལ་བཟླས་པ་བྱ་འོ༔ དེ་ནས་ཐུན་གྱི་གཤམ་དུ་སྔགས་ཀྱི་འོད་ཟེར་དམར་པོ་དེ་དམིགས་བྱའི་སྙིང་གའི་ནྲྀ་ལ་ཕོག་པས་དེ་ཉིད་ཁ་དོག་ཇེ་དམར་ཇེ་དམར་ལ་སོང་བས་ཐིག་ལེ་དམར་པོའི་རྣམ་པ་ཅན་དུ་ཞུ་ནས་རང་གི་སྙིང་གར་བསྡུས་པར་བསམ་ཞིང་རང་སེམས་དང་དམིགས་བྱ་དབྱེར་མི་ཕྱེད་པའི་ངང་ལ་བཞག་གོ༔ དེ་ནས་ལྷ་ལ་མེ་ཏོག་དམར་པོ་ལ་སོགས་པ་ཕུལ་ནས་དམིགས་བྱ་དབང་དུ་འདུས་པར་གསོལ་བ་བཏབ་བོ༔ སྲོག་མི་འཆུག་པར་དབང་དུ་འདུས་ནས་དངོས་གྲུབ་བླང་ཞིང༔ གཟུགས་དར་དམར་གྱིས་དྲིལ་ཟངས་ཀྱི་གྭ་འུར་བཅུག་རྟེན་རྫས་དང་མཉམ་དུ་ལུས་ལ་བཅང་ངོ༔ ས་མ་ཡ༔ རྒྱ་རྒྱ་རྒྱ༔ ནོར་འགུགས་པར་འདོད་ན༔ གྲོ་ཤོག་ལ་རཏྣ་ལྔ་བརྡར་བའི་ཕྱེ་མས་ཙཀྲ་མུ་ཁྱུད་བཞི་བསྐོར་བའི་ལྟེ་བ་ལ་རྩ་སྔགས་ཀྱི་མཐར་བདག་གི་འབྱོར་པ་པུཥྚིཾ་ཀུ་རུ་ཨཱོྃ༔ ཞེས་སོགས་གང་འདོད་པའི་སྤེལ་ཚིག་བྲི༔ དེའི་ཕྱིའི་མུ་ཁྱུད་ལ་ཨཱོྃ་མ་ཧཱ་དེ་བ་དྷེ་དྷ་ཤ་ཀརྨ་ས་ཡ་བཱ་སུ་སིདྡྷི་ས་མ་ཡ་ཧོ༔ བཱ་སུ་པུཥྚིཾ་ཀུ་རུ་ཨཱོྃ༔ ཞེས་བྲི༔ རྩིབས་བཞི་ལ༔ ཨཱོྃ་ཨཱཿཧ་ས་མ་ཡ་བཱ་སུ་སིདྡྷི་ཧཱུྃ༔ དེ་བཞིན་དུ་རི་ནི་ས་རྣམས་ལ་ཡང་ངོ༔ རྩིབས་མཆན་ལ་མཁའ་འགྲོ་བཞི་ལ་དངོས་གྲུབ་ཞུ་བའི་སྤེལ་ཚིག་བྲི་འོ༔ ཕྱིའི་མུ་ཁྱུད་ལ་དབང་སྡུད་ཀྱི་སྔགས་ལ་ནོར་སྣ་གང་འདོད་དེའི་གསོལ་བྱང་བྲི་འོ༔ དེའི་ཕྱིའི་ཟུར་བཞི་ལ་ལྕགས་ཀྱུ་དང་ངོས་བཞི་ལ་ནོར་བུ་འབར་བ་རེ་བྲི་འོ༔ དེ་ལ་སྨན་དང་སྤོས་དྲི་ཞིམ་པོ་དང་རཏྣ་བརྡར་བའི་ཕྱེ་མས་བྱུགས་ལ་རྒྱལ་རིགས་དབང་ཕྱུག་ཅན་གྱི་ཕྲེང་བའི་སྐུད་པས་བཅིངས་ནས་མཎྜལ་དབུས་ཀྱི་རྟེན་རྫས་ཀྱི་ཞབས་སུ་གཞུག༔ དེའི་མཐར་འབྲུ་དང་རཏྣ་དང་སྨན་དང་དར་ཟབ་ཤིང་ཐོག་སོགས་དཔལ་ཅན་གྱི་ནོར་སྣ་གང་རྙེད་ཐམས་ཅད་ཀྱི་ཕུད་བསྡུས་ནས་སྤུང་ངོ༔ དེ་ནས་བདག་ལྷར་གསལ་བས་མདུན་གྱི་ལྷ་ཆེན་གྱི་རྒྱུད་བསྐུལ་བས་དེའི་ཐུགས་ཀ་ནས་ཕོ་ཉ་མང་པོ་འཕྲོས་ནས་འཇིག་རྟེན་ཁམས་ཀྱི་ཟས་ནོར་ལོངས་སྤྱོད་དཔལ་གཡང་མདངས་བཅུད་ཐམས་ཅད་བསྡུས་ནས་ཙཀྲ་ལ་ཐིམ་པས༔ དེ་ཉིད་ལས་གང་འདོད་པའི་ལོངས་སྤྱོད་རྣམས་ཕྱུ་རུ་རུ་འཕེལ་བས་རང་གི་བང་མཛོད་དང་ཁང་ཁྱིམ་ཐམས་ཅད་གང་བས་འབྱོར་པ་རྒྱས་པར་བསམ་ཞིང་རྩ་སྔགས་ཀྱི་མཐར་བཱ་སུ་སིདྡྷི་པུཥྚིཾ་ཀུ་རུ་ཨཱོྃ༔ ཞེས་བཏགས་ནས་བཟླ་ཞིང་ཐུན་གྱི་མཚམས་སུ་གཏོར་མ་དང་མཆོད་པ་རྣམས་སྔར་བཞིན་ཕུལ༔ ཁྱད་པར་སྦྲང་རྩི་ལ་རཏྣ་ལྔ་བསྲེས་པའི་ཟན་གྱི་རིལ་བུའི་གཏོར་མ་ཕུལ་ནས་འདོད་དོན་གསོལ་བར་བྱའོ༔ རྟགས་གཏན་ལ་ཕེབས་ནས་དངོས་གྲུབ་བླང་ཞིང་འཁོར་ལོ་དེ་ཉིད་ཟ་འོག་གིས་དྲིལ་ལ་ནོར་ཕུད་རྣམས་དང་མཉམ་དུ་རཏྣའི་གྭ་འུར་བཅུག་ནས་བང་མཛོད་ཀྱི་ཕུགས་སུ་སྦ་འོ༔ དེ་ནས་ལོངས་སྤྱོད་གང་བྱུང་ཐམས་ཅད་རང་འདོད་ཀྱི་སེར་སྣ་སྤངས་ལ་བླ་མ་དང་དཀོན་མཆོག་ལ་འབུལ༔ ཕུད་དུམ་རེ་གྭ་འུར་བསྐྱལ༔ ཕོངས་པ་རྣམས་སྐྱོང་བ་ལ་སོགས་བྱས་པས་འབྱོར་པ་མི་ཟད་ཅིང་གོང་ནས་གོང་དུ་འཕེལ་བར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་མེ་མཆོད་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ མེ་མཆོད་བྱེད་པར་འདོད་ན་རང་གོས་དམར་པོ་གྱོན་ཁ་ནུབ་ཏུ་བལྟས་ནས་མདུན་དུ་ཚོང་འདུས་ཀྱི་སའི་ཐབ་ཟླ་གམ་དམར་པོའི་ནང་དུ་ཙན་དན་དང་མཛོ་མོ་ཤིང་དང་འོལ་མོ་སེ་དང་སྐྱུར་བའི་ཤིང་གི་བུད་ཤིང་བརྩིག༔ ཏིལ་གྱི་མར་དང་མེ་ཏོག་དམར་པོ་དང་མངར་གསུམ་དང་ཙན་དན་དང་མྱོས་བྱེད་ཀྱི་འབྲས་བུ་དང་ཤ་ལྔ་དང་བདུད་རྩི་ལྔ་དང་འབྲུ་དང་རིན་པོ་ཆེ་སྣ་ཚོགས་ཁ་ཟས་བཟང་པོ་སྣ་ཚོགས་པ་རྣམས་གསག༔ ཐམས་ཅད་ཁ་དོག་དམར་པོར་བསྒྱུར༔ ཨཱོྃ་ཨགྣེ་ཛྭ་ལ་རཾ༔ སྨད་འཚོང་གི་མེས་སྦར༔ ཨཱོྃ་སརྦ་བྷཱུ་ཏ་རཀྵ་ཧཱུྃ་ཧཱུྃ༔ བགེགས་སྲུང༔ དེ་ནས་རཾ་ལས་འབར་བའི་མེའི་དབུས་སུ་ལྷ་ཆེན་འཁོར་བཅས་གསལ་བར་བསྒོམ༔ སྤྱན་དྲངས་བསྐྱེད་པའི་ལྷ་ལ་བསྟིམ་གཉིས་མེད་དུ་བྱས་པ་ལ་ཏིལ་མར་འབུལ་མཆོད་པ་དང་བསྟོད་པ་བྱ༔ དེ་ནས་རྩ་བའི་སྔགས་ལ་སྤེལ་ཚིག་སྦྲེལ་བས་རྫས་ཐམས་ཅད་བརྒྱ་རྩ་ལ་སོགས་པ་ཕུལ་ནས་གསོལ་བ་བཏབ༔ ཁྱད་པར་དུ་ཙན་དན་གྱི་བྱང་བུ་ལ་དམིགས་བྱའི་རཱུ་པ་མིང་རུས་ཅན་བྲིས་པ་ལ་དགུག་བསྟིམ་བྱས་ནས་དངོས་སུ་བསམ་པ་སྔགས་ཐམས་ཅད་དྲིལ་བའི་མཐར་དབང་སྡུད་ཀྱི་སྔགས་བཏགས་ནས་ཕུལ་བས༔ ལྷ་ཆེན་གྱི་ཐུགས་ཀའི་འོད་ཀྱིས་མཁའ་འགྲོ་དང་འཇིག་རྟེན་གྱི་དྲེགས་པ་ཅན་ཐམས་ཅད་བསྐུལ༔ དེ་རྣམས་ཀྱིས་རླུང་གི་དཀྱིལ་འཁོར་ལ་གནས་པའི་དམིགས་བྱ་གཅེར་བུ་སྐྲ་མ་བཅིངས་པ་དེའི་སྙིང་གར་ལྕགས་ཀྱུས་བཏབ༔ མགྲིན་པར་ཞགས་པས་བཅིངས་ནས་མྱུར་བའི་རླུང་ཤུགས་ཀྱིས་དྲངས་ཏེ་རང་གི་མདུན་དུ་ལྷགས་ཤིང་བརྟན་པ་དང་བྲལ་བས་དབང་དུ་གྱུར་པར་བསམ་མོ༔ དེ་རང་ལ་བསྡུས་ནས་ལྷ་ལ་བཟོད་གསོལ་དང་མཆོད་པ་བྱས་ནས་གཤེགས་སུ་གསོལ༔ ཐལ་བ་མི་ཕྱུགས་མང་པོའི་འཐུང་བའི་ཆུ་ལ་བསྐྱལ་ལོ༔ དེས་ནི་སྒྲུབ་པའི་ལས་ཐམས་ཅད་ཀྱི་འབྲས་བུ་སྐད་ཅིག་ལ་སྟེར་བར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ བཀའ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་ཕྱག་མཚན་ལས་སྦྱོར་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ ཕྱག་མཚན་གྱི་ལས་སྦྱོར་ནི༔ སྨད་འཚོང་མ་དཔལ་ཅན་བདུན་གྱི་ལག་ནས་ཁབ་སྙུང་བུ་གྲི་གུ་རྣམས་བླངས་ལ་མགར་བ་འབྲུག་གི་ལོ་པས་རྒྱལ་གྱི་ཉིན་པར་ལྕགས་ཀྱུ་བྱ་ཁྱུང་གི་སེན་མོ་ལྟར་རྣོ་ཞིང་གུག་པ་ཞིག་བཅོས་ལ་འོལ་མོ་སེའམ་མཛོ་མོ་ཤིང་གི་ཡུ་བ་ཁྲུ་གང་བའི་རྩེ་ལ་བསྐྱོན༔ དར་རམ་རས་སམ་གྲོ་ཤོག་ལ་རྫས་སྣ་དྲུག་གིས་དབང་སྡུད་ཀྱི་སྔགས་སྤེལ་ཚིག་ཅན་བདུན་བྲིས་པ་མགུལ་དུ་དཀྲིས་པའི་ཕྱི་དར་དམར་པོས་དྲིལ༔ སྨད་འཚོང་མས་བཀལ་བའི་སྐུད་པ་དམར་པོ་འདོམ་གང་བ་ཞིག་ལ་མདུད་པ་ཉི་ཤུ་རྩ་གཅིག་བྱས༔ དེ་རེ་རེ་ལ་ཡང་སྔགས་ཉི་ཤུ་རྩ་གཅིག་རེ་གདབ༔ དེའི་སྣེ་གཉིས་སུ་མེ་ལོང་ཆུང་ངུ་རེ་ལ་གྷི་ཧཾ་ག་པུར་དང་རང་གི་ཏི་ལ་རྣམས་ཀྱིས་ཨཱོྃ་ཙན་ཏྲ་སིད་ཏི་ས་མ་ཡ་དུང་དུང་ཛ༔ ཞེས་བྲི༔ གཅིག་ལ་རྒྱ་སྐྱེགས་གུར་གུམ་གཞོན་ནུ་མའི་ཟླ་མཚན་རྣམས་ཀྱིས་ཨཱོྃ་སུརྻ་སིད་ཏི་ས་མ་ཡ་དུང་དུང་ཧྲཱི༔ ཞེས་བྲིས་ཏེ་སྐུད་པའི་རྩེ་ལ་བཏགས༔ སྐུད་པ་དེའི་དཀྱིལ་ནས་བལྟབས་པའི་སྣེ་མོ་ལྕགས་ཀྱུའི་མགུལ་དུ་རི་དྭགས་ཀྱི་རྣ་བ་བཞིན་བྱས་པ་དང་ཉི་ཟླ་གཉིས་འཕྱང་འཕྲུལ་དུ་བྱའོ༔ རཏྣ་ལྔ་དང་མེ་ལོང་དང་འགྲོན་བུ་དང་དུང་ཆུང་དང་དར་སྣ་ལྔ་ལ་སོགས་པ་ཡང་གདག་གོ༔ སྐུད་པའི་རྒྱུ་ནི་རས་བལ་དང་རྐུན་ཆེན་གྱི་སྐྲ་ཤད་དང་རྒྱུས་པ་སྨད་འཚོང་མའི་སྐྲ་ཤད་རྣམས་སོ༔ དེ་ཉིད་སྔགས་ཀྱིས་རྟགས་དང་ལྡན་པར་བསྒྲུབས་ནས་ཐོ་རངས་བྱ་རོག་མི་གྲགས་པའི་དུས་སུ་དྲི་ཆུས་ལུས་བཀྲུས་རྫས་སྣ་དྲུག་གི་ཆུས་བྱུགས་ཤིང་དཔྲལ་བར་རོ་ཐལ་གྱི་ཐིག་ལེ་བྱས་ལ་ལྕགས་ཀྱུ་གཡས་སུ་བཟུང༔ དབང་རྟེན་གཡོན་དུ་ཁྱེར་ལ་ལྷ་ཆེན་གྱི་ང་རྒྱལ་གསལ་ཞིང་བརྟན་པས་སྔགས་བཟླ་ཞིང་ཕྱོགས་བཅུར་གཡབས་པས་བདག་དང་ལྕགས་ཀྱུ་ཉི་ཟླ་རྣམས་ལས་འོད་ཟེར་གསལ་ཞིང་རྣོ་བ་འཕྲོས་པས་སྐྱེ་འགྲོ་རྣམས་ཀྱི་སྙིང་ཁ་ནས་བཟུང་སྟེ་རང་གི་མདུན་དུ་དྲངས་རང་དབང་དང་བྲལ་ཏེ་རང་གི་དབང་དུ་འདུས་པར་བསམ་མོ༔ དེས་ནི་དམིགས་བྱ་སྐད་ཅིག་ལ་དབང་དུ་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་རིལ་བུའི་ལས་སྦྱོར་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ རིལ་བུའི་ལས་སྦྱོར་ནི༔ མེ་ཏོག་གླང་སྣ་ཁུག་ཆོས་ནཱ་ག་གེ་སར་དབང་ལག་རྡོ་ཁབ་ལེན༔ རྩངས་པའི་ཤ་མཆིལ་པ་ཕོའི་ཤ་བྱ་ཕོའི་ཟེ་ཁྲག་བུད་མེད་སྐྱེས་པ་དང་སྦྱོར་བའི་འདོད་ཆུ་འབུད་དུང་བརྡར་ཕྱེ་སུག་སྨེལ་གླ་རྩི་གྷི་ཧཾ་གུར་གུམ་ག་པུར་ཙན་དན༔ རང་གི་ས་བོན་བུད་མེད་གཞོན་ནུའི་ཟླ་མཚན་མྱོས་བྱེད་ཀྱི་འབྲས་བུ་རང་གི་ལྟེ་དྲག་རྣམས་སྦྲང་རྒོད་དང་སྦྱར་བའི་རིལ་བུ་སྲན་མ་ཙམ་དྲིལ་ལ་མཚལ་གྱིས་ཁ་དོག་བསྒྱུར༔ རིན་པོ་ཆེའི་ཟ་མ་ཏོག་ཏུ་བཅུག་དར་གྱིས་དྲིལ་ལ་དབང་སྡུད་ཀྱི་སྔགས་སྤེལ་ཚིག་ཅན་གྱིས་བསྒྲུབས་ལ་བརྒྱ་བརྒྱ་ན་ཧས་འདེབས་མེ་སྟག་ཕྲོམ་ཕྲོམ་པའམ་རླངས་པ་ཕྱུར་ཕྱུར་བྱུང་ན་གྲུབ་པའི་ཚད་ཡིན༔ རྫས་དེ་གཞན་གྱིས་མ་རེག་ཅིང་མ་མཐོང་བ་གཅེས༔ དེ་ནས་དམིགས་བྱ་གང་ཡིན་ལ་རིལ་བུ་དེ་ཟས་དང་སྦྱར་ནས་མ་རིག་པར་བྱིན་ལ་རང་ཉིད་ལྷ་ཆེན་གྱི་ང་རྒྱལ་གྱིས་སྔགས་བཟླ་ཞིང་འབྲུ་སྣ་དང་མེ་ཏོག་དམར་པོ་ལ་སྔགས་པ་དམིགས་བྱའི་ཕྱོགས་སུ་གཏོར༔ དེས་གང་འདོད་དབང་དུ་བྱེད་པར་ཐེ་ཚོམ་མེད་དོ༔ རང་གི་སྲིན་བུ་ཀ་ཀ་རི་རྫས་དྲུག་དང་སྦྱར་བ་སྦྲང་རྒོད་ཀྱིས་བསྡུས་པའི་རིལ་བུ་ལ་སྔགས་བརྒྱ་རྩ་བརྒྱད་བཟླས་ནས་གང་འདོད་པའི་བུ་མོ་ལ་བྱིན་ན་ཁྱི་བཞིན་དུ་འབྲང་ཞིང་དབང་དུ་འགྱུར་རོ༔ དེ་ཕོ་དང་མཆིལ་བའི་ཚིལ་བུ་དང་ར་དཀར་པོ་དང་ཁྱི་དམར་པོའི་གཞང་ཚིལ་རྣམས་སྨད་འཚོང་མའི་འདོམ་རས་ཀྱི་སྡོང་བུ་ལ་སྦར་བའི་དུད་པ་ལ་སྔགས་བརྒྱ་རྩ་བརྒྱད་བཟླས་ལ་རང་གི་སྨིན་དབྲག་ཏུ་བཀུས་ནས་ལྷ་ཆེན་གྱི་ང་རྒྱལ་གྱིས་བལྟས་ན་ཀུན་གྱི་ཡིད་དུ་འོང་ཞིང་དབང་དུ་འགྱུར་རོ༔ རྔ་དང་ཌཱ་མ་རུ་དང་རྐང་གླིང་ལ་སོགས་པ་ལ་དབང་སྡུད་ཀྱི་སྔགས་བྲིས་རྫས་ཀྱིས་བྱུགས་ནས་ལྷ་ཆེན་གྱི་ང་རྒྱལ་གྱིས་བརྡུང་ཞིང་བུས་ན་ཐོས་ཚད་སྣང་བ་འགྱུར་ཞིང་དབང་དུ་འགྱུར་རོ༔ ས་མ་ཡ༔ ཚིལ་སྣ་བཞི་དང་སྨན་སྣ་དྲུག་སྦྲང་སྨྱོན་དང་རྐུན་ཆེན་གྱི་མར་ཁུ་ལ་སྔགས་བརྒྱ་རྩ་བརྒྱད་བཟླས་པ་སྨད་འཚོང་མའི་མེ་ལ་བསྲེགས་ན་གསུར་ཚོར་ཚད་རྒྱུད་འགུལ་ཞིང་དབང་དུ་འགྱུར་རོ༔ དགེ་འདུན་གྱི་འདུས་པ་དང་འབངས་གཡོག་མང་པོའི་གཙོ་བོས་དེ་རྣམས་གུས་ཤིང་མཐུན་པས་དབང་དུ་བྱེད་ན༔ གྷི་ཧཾ་དང་རྒྱ་སྐྱེགས་ཀྱིས་དེ་རྣམས་ཀྱི་གཟུགས་མིང་རུས་དང་བཅས་པ་མང་པོ་བྲིས་ལ་སྔར་བཞིན་འགུགས་གཞུག་བྱས་ནས་དམིགས་བྱ་དངོས་སུ་བསམ༔ དེ་ནས་གཞོན་ནུ་མས་བཀལ་བའི་སྐུད་པ་དམར་པོས་བཅིངས་ལ་ཚོང་འདུས་ཀྱི་ས་དང་སྨད་འཚོང་མའི་ཐབ་སས་གྭའུ་མ་ཁེབས་དང༔ རྒྱལ་པོ་དང་དགེ་བཤེས་བསོད་ནམས་ཅན་གྱི་གདན་ཁྲིའི་ས་ལ་གྭའུ་ཡ་ཁེབས་བྱས་པའི་གྭའུ་ཟླ་གམ་གྱི་ནང་དུ་རང་གི་ས་བོན་མ་ལགས་པའི་རྫས་སྣ་དྲུག་སྦྲང་སྨྱོན་དང་སྦྱར་བས་བྱུག༔ དེའི་ནང་དུ་སྔར་གྱི་ལིང་ག་རྣམས་བཅུག་ལ་མེ་ཏོག་དམར་པོ་དང་རཏྣ་དར་ཟབ་ཀྱིས་བཀང༔ ཡ་ཁེབས་ལ་རྡོ་རྗེ་རྒྱ་གྲམ་བྲིས་པས་བཀབ་མཚམས་སྦྱར༔ རང་གི་མལ་འོག་ཏུ་བཅུག་ནས་རྒྱུན་དུ་ཐུན་མ་ཆད་པར་མནན་པས་ཐམས་ཅད་གུས་ཤིང་མཐུན་པས་དབང་དུ་འགྱུར་རོ༔ ས་མ་ཡ༔ རྒྱལ་པོ་ལ་སོགས་ཏེ་བསོད་ནམས་མངའ་ཐང་ཅན་རྣམས་ལ་ལས་རྣམས་ཐམས་ཅད་ཚང་བར་དྲིལ་ནས་ཕྱག་ལེན་བྱས་ན་ཚན་ཆེ་འོ༔ སྐྱེ་བོ་ཕལ་པ་ལ་སྣ་རེ་རེས་ཀྱང་འགྲུབ་བོ༔ ཐོག་མར་རང་ལས་དམན་པ་གཅིག་ལ་ཚད་དོ༔ གལ་ཏེ་ཕ་རོལ་པོ་བརྟན་པ་བྲལ་ཏེ་སྨྱོས་པ་དང་འཕྱོ་བ་སོགས་བྱུང་ན་འགྲོལ་བར་བྱ་འོ༔ རང་གི་ཆུ་དང་ར་དཀར་མོ་དང་བ་དམར་མོའི་འོ་མ་མེ་ཏོག་པུཎྜ་རཱི་ཀ་དང་མངར་གསུམ་སྦྱར་བའི་ཆུ་ལ་ཨཱོྃ་ཨ་མྲྀཏ་ཧི་ལི་ཧི་ལི་ཤཱན་ཏི་ཀ་སྭཱ་ཧཱ༔ ཞེས་སྟོང་བཟླས་ནས་བྱིན་ན་ཁྲོལ་བར་འགྱུར་རོ༔ དེས་མ་ཁྲོལ་བར་མིང་རུས་ཡོད་ན་སྔར་གྱི་རྫས་ཀྱིས་མིང་རུས་བཀྲུས་པས་གྲོལ་བར་འགྱུར་རོ༔ ས་མ་ཡ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་སྔགས་ཐེམ་གཅེས་གནད་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ ལྷ་ཆེན་ལྕམ་དྲལ་གྱི་སྔགས་ཐེམ་གཅེས་གནད་དུ་བསྟན་པ་ནི༔ ཨཱོྃ་མ་ཧཱ་དེ་བ་ས་མ་ཡ་ཧྲིཾ་ཛ༔ འབྲུ་བཅུ་ནི་བསྙེན་པའི་གསང་སྔགས་ཀྱི་གནད་དོ༔ ཨཱོྃ་མ་ཧཱ་དེ་བ་ཛ༔ ཨུ་མཱཿདེ་བཱིཿཧྲཱིཾ་ཧ་རི་ནི་ས་པཱ་ཤཾ་ཀུ་རུ་ཧོ༔ འབྲུ་ཉི་ཤུ་ནི་སྒྲུབ་པའི་གསང་སྔགས་ཀྱི་གནད་དོ༔ དབང་སྡུད་ཀྱི་གསང་སྔགས་ནི་སུམ་ཅུ་རྩ་གཉིས་སུ་ངེས་པ་འོ༔ དེའི་ལས་ཀྱི་འཕྱོང་ནི་ལྔ་བཅུ་རྩ་བརྒྱད་དུ་བསྟན་པ་འོ༔ སྤེལ་བར་བྱ་བའི་འཕྱོང་གཞན་ནི་མ་གཏོགས་སོ༔ ཁ་སྦྱོར་དབྱེ་བ་ནི་སྐྱབས་ཀྱི་ཡི་གེ་ཟློག་པ་འོ༔ ལྕགས་ཀྱུའི་རྩེ་འཕྲད་པ་ལ་ནི་འདིའི་ཡི་གེ་ཟློག་པ་འོ༔ ངེས་པའི་གནད་ཐིག་གོ༔ ཐུགས་རྗེ་ཆེན་པོ་བཀའི་སྲུང་མ་དབང་གི་ལས་ཐམས་ཅད་ཀྱི་བཅུད་ཐིག་དྲེགས་པའི་ཐུགས་ཀྱི་སྲོག་སྙིང་པོར་དྲིལ་བ་ལྷ་ཆེན་གྱི་སྒྲུབ་ཐབས་ཨོ་རྒྱན་གུ་རུའི་གསུང་བཞིན་བཀོད་པ་འོ༔ ཐུགས་རྗེ་ཆེན་པོའི་བཀའ་སྲུང་ལྷ་ཆེན་གྱི༔ སྒྲུབ་ཐབས་སྙིང་པོ་ཟབ་པའི་མཐར་ཐུག་འདི༔ བཀའ་རྒྱས་བཏབ་ནས་ཡི་གེའི་རིས་སུ་བཀོད༔ ཤ་འུག་སྟག་སྒོ་བདེ་ཆེན་འཁོར་ལོར་སྦས༔ བཀའ་སྲུང་རྣམས་ལ་གཉེར་གཏད་ཐ་ཚིག་བསྒྲགས༔ རྩོད་ལྡན་སྙིགས་མ་སུམ་ཅུའི་དུས་ཀྱི་ཚེ༔ ཨོ་རྒྱན་ཐུགས་སྲས་ཤེས་རབ་སྙིང་རྗེ་ཅན༔ འགྲོ་འདུལ་ལས་ཅན་དེ་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ སྨྲག་ཁ་ཐཾ༔ ྈྈྈྈྈྈྈྈྈྈྈྈྈྈྈྈྈྈྈྈྈྈྈ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་སྒབ་འདྲེ་གནན་ཐབས་བཞུགས་སོ༔ ྈྈྈྈྈྈྈྈྈ དབང་གི་ལྷ་ལ་ཕྱག་འཚལ་ལོ༔ ལྷ་ཆེན་སྒྲུབ་པའི་རྣལ་འབྱོར་པས་སྒབ་འདྲེ་གནན་པ་གཅེས་སོ༔ དུག་ཤོག་ལ་ར་ཁྲག་དང་སྣག་ཚ་བསྲེས་པས་བླ་རྐུ་བྱིས་པའི་གཟུགས༔ བསེ་རག་རི་བོང་གི་མགོ་ཅན༔ གོད་འདྲེ་དོམ་གྱི་མགོ་ཅན༔ སྲིན་མོ་མི་མོའི་གཟུགས་ཅན་རྣམས་ཀྱི་གཟུགས་མགོ་སྤྲད་བཞི་ཚོམ་དུ་བྲིས་པ་ལྕགས་སྒྲོག་གིས་བཅིངས་པའི་ཡན་ལག་བཞིར་ཛཿཧཱུྃ་བཾ་ཧོ༔ མགོ་ལ་ཏྲིག་ནན༔ སྙིང་གར་ཏྲི༔ དེའི་མཐར་རིམ་པ་བཞིན་མི་ལ་ཀུ་རུ་དུ་ཏྲི་ཛ༔ བསེ་རག་ཤན་ཏྲི་དུ་ཛ༔ གོད་འདྲེ་ཙག་ཤ་ཛ༔ བསེན་མོ་དུ་ཏྲི་ཛ༔ ཞེས་དང་ཐམས་ཅད་ཀྱི་མཐར་ཀཱ་ཡ་ཤ་ཏྲི་གནོད་བྱེད་སྒབ་འདྲེ་འབྱུང་པོ་སཏྭམྦྷ་ཡ་ནན༔ ཧུར་ཐུམས་ཛ་མཱ་ར་ཡ་རྦད་ནན༔ ཞེས་བྲི༔ ཀུན་གྱི་ཕྱི་ནས་ཛ་ཁྲམ་གྱིས་བསྐོར་ལ་མདུན་དུ་བཞག༔ རང་ལྷའི་ང་རྒྱལ་གྱིས་དམིགས་བྱ་རྣམས་གཟུགས་ལ་བཀུག་ཅིང་བསྟིམ༔ ཕྱག་རྒྱས་དམ་དུ་བཅིངས་ནས་ཐུན་གྱིས་གཟིར༔ རྟགས་བྱུང་ནས་དུག་ཁྲག་བྱུག་ཤི་སྐྲས་བཅིངས་རི་བོང་གི་ཐོད་པར་བཅུག་ནས་རེ་བས་དྲིལ་ལམ་སྲང་བཞི་མདོའམ་མཆོད་རྟེན་གྱི་ཞབས་སུ་གནན༔ རྡོ་རྗེ་རྒྱ་གྲམ་གྱིས་ཁ་བཅད༔ ཅིས་ཀྱང་མི་ཐར་བར་བསམ་ཞིང་བྲོ་རྡུང་བྱ་འོ༔ སྒབ་འདྲེ་མ་གནན་པར་སྒྲུབ་པ་བྱས་ན་འདྲེས་ལྷར་བརྫུས་ནས་བྲིད་ཅིང་བསླུ་བ་དང༔ ཚེ་སྲོག་འཕྲོག་པ་དང་མི་ནོར་ལ་གོད་ཁ་བྱེད་པ་དང་གཏམ་ངན་དང་མི་ཁས་འགེང་བ་སོགས་བར་ཆད་ཀྱི་དབང་དུ་འགྲོ་བས་འདི་ཉིད་བྱ་བ་ཤིན་ཏུ་གཅེས་སོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་ལས་མཐའ་དྲག་པོའི་ཕྲིན་ལས་བཞུགས་སོ༔ ཟློག་པའི་མན་ངག༔ དབང་གི་ལྷ་ལ་ཕྱག་འཚལ་ལོ༔ མ་ཧཱ་དེ་ཝའི་ལས་མཐའ་དྲག་པོར་བསྒྲུབ་ན་ཟློག་པ་ནི༔ དུར་ཁྲོད་ཀྱི་ས༔ མཆོད་རྟེན་རྙིང་པའི་ས༔ མེ་ཤོར་བའི་ས༔ ཤྭ་རྒོད་རྡོལ་བའི་ས་རྣམས་ལ་ཕོ་མཚན་གྱི་གཟུགས་ཁོང་སྟོང་མཛུབ་གང་བ་སོས་སྨིན་པ་ཞིག་བྱས་ལ་རོ་སོལ་གྱིས་བྱུག༔ དེའི་ནང་དུ་གྲོ་ཤོག་ལ་དུག་ཁྲག་གིས༔ ཨཱོྃ་མ་ཧཱ་དེ་བ་ཨུ་མཱཿདེ་བཱིཿཐུམས་ལཾ་ཐུམས་རིལ་རྦད་སུ་ནྲྀ་ཛཿཆེ་གེའི་ཙིཏྟ་ལ་ཐུམས་རིལ་རྦད་རཀྴ་ཛཿཏྲིག་ཐུམས་མཱ་ར་ཡ་རྦད་བྷྱོ་ཟློག༔ ཅེས་བྲིས་པ་བཅུག༔ དེའི་ཞབས་སུ་ཡུངས་དཀར་ནག་ཀེ་ཚེ་ཤང་ཚེ་དུག་སྣ་ཁྲག་སྣ་སོགས་སྔགས་ཀྱིས་སྔགས་པའི་ཐུན་རྫས་སྣ་ཚོགས་བླུག་རེ་བས་ཁ་བཅད་ལ་མདུན་དུ་བཀོད༔ བདག་ལྷའི་ང་རྒྱལ་གྱིས་རྟེན་དབང་ཕྱུག་ནག་པོ་ཁྲོ་ཞིང་མི་སྡུག་པ་རལ་པ་གཟེངས་པ་གཡས་སྲིད་མེས་དང་གཡོན་རྩེ་གསུམ་ཐོགས་པ་ནད་མཚོན་གྱི་ཚྭ་ཚྭ་འཕྲོ་བ་བསྒོམས་ཤིང་བསྟིམ༔ ཤ་ཁྲག་གི་གཏོར་མ་ཕུལ་ནས་དྲག་སྔགས་ཀྱིས་མཐུ་བསྐྱེད༔ བསྐུལ་བྱ་ཞིང་དགྲ་ཕྱོགས་སུ་ཟོར་དུ་འཕངས་ན་ཕ་རོལ་གྱི་བྱད་ཁ་ཕུར་ཁ་རྦད་འདྲེ་རྦོད་གཏོང་ལྟས་ངན་ཐམས་ཅད་ཟློག་པར་འགྱུར་རོ༔ ཡང་ན་རང་གི་ཁང་པ་ནས་ཁ་དགྲ་ཕྱོགས་སུ་གཏད་དེ་བཙུགས་ཀྱང་འགྲུབ་བོ༔ སེར་བ་དང་ཤྭ་འོད་ལ་སྤེལ་ཚིག་བསྒྱུར་ནས་བརྩམས་པས་འགྲུབ་བོ༔ ས་མ་ཡ༔ ྈ དབྱེ་བའི་མན་ངག་བཞུགས་སོ༔ དགྲ་བོ་མཐུན་གཉིས་འབྱེད་ན་ཉི་ནག་གི་དུས་དུག་ཤོག་ལ་གྲི་ཁྲག་གིས་དམིགས་བྱའི་གཟུགས་མིང་རུས་བླ་རྟགས་དང་བཅས་པ་སོ་སོར་བྲིས་པའི་ལྟོ་བར༔ མ་ཧཱ་དེ་བ་རཀྴ་ཛྭ་ལ་ཤག་ཕྱེ་ཤག་ཕྱེ་མ་མ་ཏྲག་རུ་ཏྲ་མཱ་ར་ཡ་ཕྱེ་ཕྱེ་རྦད༔ ཅེས་དང་དམོད་མོ་གང་དགོས་བྲིས་པ་ཐ་དད་དུ་བྱས་པའི་གཅིག་ལ་ག་པུར་ཆུ་དག་གླ་རྩིས་བྱུགས་ནས་འུག་པའི་སྒྲོ་ལ་སྦྱར༔ གཅིག་ལ་ཚ་བ་གསུམ་བྱུགས་ནས་ཕོ་རོག་གི་དང་རུ་ལ་སྦྱར༔ ཟག་རྫས་གང་རྙེད་སོ་སོར་བྱུགས༔ དེ་ནས་བདག་ཉིད་ལྷ་ཆེན་གྱི་ང་རྒྱལ་དྲག་པོས་དམིགས་བྱ་བཀུག་ཅིང་བསྟིམ༔ ལྷ་དང་ཕྱེས་ནས་ཕྱག་རྒྱས་བཅིངས་ཏེ་དགྲ་བོ་དངོས་སུ་བསྒོམ་ཞིང་དབྱེ་བའི་སྔགས་རྒོད་བཟླ་ཞིང་ཐུན་གྱིས་བྲབས༔ གཟའ་རྒོད་དྲག་པོ་རྒྱུ་བའི་ནམ་གུང་གི་དུས་ནུབ་བྱང་གི་བྲག་ནག་པོ་རླུང་སྒྲ་ཅན་ལྷ་འདྲེ་དྲག་པོ་ཡོད་པའི་སར་ཁྱེར་ལ་དབང་ཕྱུག་དང་ལྷ་འདྲེ་ལ་གཏོར་མ་བཏང༔ མ་ཉེས་པའི་ཤགས་གདབ་ཅིང་དམོད་མོ་དྲག་པོ་བརྗོད༔ སྒྲོ་གཉིས་རྨེ་ཕོའི་སྐྲའམ་རྒྱུས་པས་བྲག་ལོགས་ལ་བཏགས་ཏེ་རྒྱུན་དུ་འཁྲུགས་པར་བྱ་ཞིང་གཞན་གྱིས་མི་མཐོང་བ་གཅེས༔ དེ་ནས་རྟགས་མ་བྱུང་བར་ནུབ་རེ་བཞིན་དབང་ཕྱུག་དང་ལྷ་འདྲེ་ལ་གཏོར་མ་བཏང་བསྐུལ་བྱ༔ དབྱེ་སྔགས་བརྒྱ་རྩ་རེ་བཟླ༔ རྟགས་བྱུང་ནས་བརྔན་ཕུལ་ལ་འུག་སྒྲོའི་ལིང་ག་ལམ་རྒྱ་གྲམ་དུ་སྦ༔ བྱ་རོག་གི་སྒྲོའི་ལིངྒ་ཆུའི་རྦ་དྲག་པོ་མིས་མི་མཐོང་བར་བཏགས་ནས་འཇོག༔ དེས་ནི་ཇི་ལྟར་མཐུན་ཡང་དབྱེ་བར་ནུས་སོ༔ སྲོག་ལ་བྱེད་ན་ཏིལ་གྱི་མར་ཚ་བ་ལ་བསྲེག༔ བབས་ནས་མཐུན་པར་བྱེད་ན་གཟུགས་གཉིས་བཀྲོལ་ལ་འོ་མ་ལ་སྤོས་སྦྱར་བའི་ཆུས་བཀྲུ་འོ༔ ས་མ་ཡ༔ རྒྱ་རྒྱ་རྒྱ༔ ྈ བསྐྲད་པའི་མན་ངག་བཞུགས་སོ༔ དགྲ་བོ་བསྐྲད་པའི་ལས་བྱེད་ན་རྔ་མོའི་ཕྲུ་ཤུན་ལ་དུག་ཁྲག་གིས་དགྲ་གཟུགས་གཅེར་བུ་རླུང་དཀྱིལ་ལ་བཞག་པ་མིང་རུས་བླ་རྟགས་དང་བཅས་པ་ཚང་བར་བྲིས་པའི་ལྟོ་བར༔ མ་ཧཱ་དེ་བ་ཨུ་མཱཿདེ་བཱིཿསརྦ་གིང་ཀ་ར་སྙིང་སྲོག་རྩ་ལ་ཡ་དགྲ་བོ་ཆེ་གེ་མོ་ཨུ་ཙ་ཏ་ཡ་ཕཊ༔ ཡཾ་ཡཾ་མཱ་ར་ཡ་ཕཊ༔ ཅེས་བྲིས་ལ་བཙན་དུག་གུ་གུལ་མུ་ཟི་མཛེ་ཁྲག་ཤུ་དག་ཐང་ཕྲོམ་ཟག་རྫས་གང་རྙེད་རྣམས་ཀྱིས་བྱུགས༔ རང་ཉིད་ལྷ་ཆེན་གྱི་ང་རྒྱལ་གྱིས་དགུག་བསྟིམ་དབྱེ་བ་རྣམས་བྱས་ནས་དགྲ་བོ་དངོས་སུ་བསམ་ཞིང་བསྐྲད་པའི་སྔགས་རྒོད་ཀྱིས་བསྒྲུབས་པའི་ཐུན་གྱིས་གཟིར༔ ལིངྒ་དེ་སྤྲང་པོའི་གོས་དུམ་གྱིས་དྲིལ་ཤི་སྐྲས་བཅིངས༔ ཡུལ་གཞན་གྱི་བྱ་རོག་གཅིག་བཟུང་ལ་དེའི་སྐེ་ལ་བཏགས༔ རང་ལྷ་ཆེན་དུ་བསྒོམས་པའི་མདུན་དུ་ཡཾ་ཡིག་ལས་རླུང་དཀྱིལ་གྱི་སྟེང་ན་དམིགས་བྱ་སྐྲ་བཤིགས་པ་གཅེར་བུ་བྱད་དུ་བཅུག་པ་ཡང་ཞིང་གཡོ་བ་ཞིག་བསམ༔ དབང་ཕྱུག་ལ་གཏོར་མ་ཕུལ་མ་ཉེས་པའི་ཤགས་གདབ་དམོད་མོ་བརྗོད༔ དེ་ནས་རང་གི་སྣ་ནས་རླུང་དྲག་ཏུ་བུས་པས་སྔོ་ཕྱུར་ཏེ་བྱུང་བ་རླུང་དཀྱིལ་ལ་ཕོག་པས་དམིགས་བྱ་ཡེར་གྱིས་བཏེགས་ནས་གཞན་དུ་སོང་བར་བསམ་ལ་བྱ་རོག་དབྱུག་པ་དང་རོལ་མོ་ལ་སོགས་པས་བསྐྲད་པའི་ཕྱི་ནས་ལྷ་ཆེན་མཐིང་ནག་མཚོན་ཆ་ཐོགས་པ་མང་པོས་འདེད་པར་བསམ་མོ༔ བྱ་རོག་ཡུལ་བརྒལ་ནས་སོང་ན་དེས་ཆོག༔ མི་འགྲོ་བར་ལོག་ན་སླར་ཡང་བསྐྱར་ནས་བྱས་པས་དགྲ་བོ་དཔལ་འབྱོར་མངའ་ཐང་ཇི་ལྟར་ཆེ་ཡང་ཡུལ་གཞན་དུ་འབྱེར་བར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ བཀའ་རྒྱ༔ ཁ་ཐཾ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ།། །། ྈ ཟབ་ལམ་བདེ་གཤེགས་ཀུན་འདུས་ལས༔ བཀའ་སྲུང་ལྷ་ཆེན་གྱི་གནད་འབེབ་བཞུགས་སོ༔ དབང་གི་ལྷ་ལ་ཕྱག་འཚལ་ལོ༔ སྒྲུབ་པ་ཐེམས་ཀྱང་རྟགས་མ་བྱུང་ན་སྔར་གྱི་སྒྲུབ་པ་རྣམས་བལྡབ་ཏུ་བསྐྱར་ཞིང་ཉིན་རེ་བཞིན་མེ་མཆོད་ཀྱི་ལས་དང་སྦྱར་ནས་བསྒྲུབ་ན་འགྲུབ་པར་འགྱུར་རོ༔ དེས་ཀྱང་རྟགས་མ་བྱུང་ན་རང་ཉིད་རྟ་མགྲིན་དུ་བསྒོམས་པའི་ཞབས་འོག་ཏུ་ལྷ་ཆེན་མནན་པར་བསམ་ལ༔ གུ་གུལ་དང་མུ་ཟི་ཤ་ཆེན་བཙན་དུག་རྣམས་བསྲེས་པའི་དུད་པས་རྟེན་ལ་བདུག་ཅིང་ཡུངས་དཀར་གྱིས་བྲབ་གོང་གནོན་གྱི་སྔགས་ཀྱི་མཐར༔ ཨཱོྃ་མ་ཧཱ་དེ་བ་ཛ༔ ཨུ་མཱཿདེ་བཱིཿཧྲིཾ༔ ཏྲིག་ནན་ཨེ་ཧུར་ཐུམས་ཛ༔ ཞེས་གཟིར་ཞིང་གཅུན་པས་མ་བཟོད་པར་འཇིག་རྟེན་ཁམས་ཀྱི་མི་ནོར་ལོངས་སྤྱོད་ཐམས་ཅད་དབང་དུ་བསྡུས་ནས་རང་ལ་ཕུལ་བས་བདག་གི་དབང་དུ་གྱུར་པར་བསམ་ཞིང་སྔགས་བཟླ་འོ༔ རྨི་ལམ་དུ་སྐྱེས་བུ་རིད་ཅིང་ཉམ་ངན་པ་དང༔ བཙོན་བཅུག་པ་དང༔ མི་མང་པོས་ཕྱག་དང་ཞུ་གསོལ་བྱེད་པ་བྱུང་ན་ལས་བཤོལ་ལ་རྟེན་ལ་སྤོས་ཀྱིས་བདུག་ཅིང༔ དྲི་བཟང་གི་ཆུས་ཁྲུས་གསོལ་བཟོད་གསོལ་བྱས་ལ་བསྒྲུབས་པས་སྔར་གྱི་རྟགས་ཚོ་འབྱུང༔ དེ་ནས་དངོས་གྲུབ་བླང་བར་བྱ་འོ༔ དེས་ནི་ལས་འབྲས་མྱུར་དུ་འབྱིན་པར་ཐེ་ཚོམ་མེད་དོ༔ ས་མ་ཡ༔ དམིགས་བྱ་ཁོ་རའི་ལྷ་སྲུང་གིས་བསྐྱབས་ནས་ཁུག་ཏུ་མི་སྟེར་བ་དང་དབང་དུ་མ་གྱུར་ན༔ གཏོར་མ་བྱིན་ལ་དམིགས་བྱའི་རཱུ་པ་གུ་གུལ་རྟ་བོན་མུ་ཟི་ཁྱི་ལུད་ཞབས་མ་རྣམས་ཀྱིས་ས་གཞན་དུ་བདུག་ཅིང་སྲུང་མ་དེའི་སྔགས་ཚེག་བར་ཅན་བཟློག་ནས་བཟླས་པས་འགྲུབ་བོ༔ ས་མ་ཡ༔ དབང་སྡུད་མཁན་ནང་འགྲས་ནས་མ་ཁུག་ན་ཡུངས་དཀར་དང་སྦྲང་སྨྱོན་དང་གྲི་ཁྲག་གི་དུད་པས་རཱུ་པ་བདུག་ཅིང་སྔགས་འབྲུ་ལྡོག་ནས་བཟླས་པས་ཐེ་ཚོམ་མེད་དོ༔ ས་མ་ཡ༔ རྒྱ་རྒྱ་རྒྱ༔ རིག་འཛིན་གཏེར་བདག་གླིང་པས་ཤ་འུག་སྟག་སྒོ་བདེ་ཆེན་ཡེ་ཤེས་ཀྱི་འཁོར་ལོ་ནས་སྤྱན་དྲངས་པའོ། །མངྒ་ལཾ།། །།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).