Terdzo-SIDDHAM-013
གཤིན་བསྔོ་
by སངས་རྒྱས་གླིང་པ་ (Sangye Lingpa)
revealed by སངས་རྒྱས་གླིང་པ་ (Sangye Lingpa)
in cycle བླ་མ་དགོངས་པ་འདུས་པ་ (Bla ma dgongs pa 'dus pa)
Volume 67 (སིདྡྷཾ) / Pages 247-248 / Folios 1a1 to 1b6
གཤིན་བསྔོ་ནི། ཉེ་དྲུང་མཆེད་གྲོགས་ལ་སོགས་གང་འཐད་པ་ཞིག་གིས་རྗེས་ཟློས་བྱེད་དུ་བཅུག་ལ༔ བླ་མ་ཡི་དམ་མཁའ་འགྲོ་ལ་སོགས་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཚེ་འདས་ཆེ་གེ་མོ་ལ་དགོངས་སུ་གསོལ༔ ཚེ་འདས་ཆེ་གེ་མོ་ཞེས་བྱ་བ་སྐྱེ་བ་འདི་དང་སྐྱེ་བ་གཞན་དག་ཏུ༔ དགེ་བའི་རྩ་བ་སྦྱིན་པ་ལས་བྱུང་བ་དང༔ ཚུལ་ཁྲིམས་ལས་བྱུང་བ་དང༔ སྒོམ་པ་ལས་བྱུང་བ་ལ་སོགས་བསོད་ནམས་དང་ཡེ་ཤེས་ཀྱི་ཚོགས་སུ་གྱུར་པ་བགྱིས་པ་དང༔ བགྱིད་དུ་བསྩལ་བ་དང༔ གཞན་གྱིས་བགྱིས་པ་ལ་རྗེས་སུ་ཡི་རང་བ་ལ་སོགས་པ་རྣམས་དང༔ གཞན་ཡང་ཉེ་དུ་འབྲེལ་པ་མཆེད་གྲོགས་ཤུལ་ན་མཆིས་པ་རྣམས་ཀྱིས༔ ཚེ་འདས་ཆེ་གེ་མོའི་དོན་དུ༔ བླ་མ་ལ་བསྙེན་བཀུར་བགྱིས་པ་དང༔ དཀོན་མཆོག་གསུམ་ལ་མཆོད་པ་ཕུལ་པ་དང༔ ཡི་དམ་གྱི་སྒོམ་བཟླས་བྱས་པ་དང༔ མགྲོན་རྣམ་བཞི་ལ་གཏོར་མ་བཏང་བ་དང༔ སཱཙྪ་བཏབ་པ་དང༔ ཡུལ་གོང་མ་ལ་མཆོད་པ་ཕུལ་པ་དང༔ འོག་མ་ལ་སྦྱིན་གཏང་བགྱིས་པ་དང༔ བདེ་བར་གཤེགས་པའི་གསུང་རབ་བཀླགས་པ་དང༔ སྒྲིབ་སྦྱོང་གི་ཆོ་ག་བགྱིས་པ་དང༔ མ་འོངས་པའི་དུས་སུ་ཡང་བགྱིད་པར་འགྱུར་བ་ལ་སོགས་པའི་དགེ་བའི་རྩ་བ་འདི་དག་རྣམས་ལ་བརྟེན་ནས༔ ཚེ་འདས་ཆེ་གེ་མོ་ཞེས་བགྱི་བ༔ མྱུར་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག༔ དེ་ལྟར་མ་གྱུར་གྱི་བར་དུ་ཡང༔ ཚེ་རབས་ནས་ཚེ་རབས་ཐམས་ཅད་དུ་མཐོ་རིས་ལྷ་དང་མིའི་གོ་འཕང་ཐོབ་པར་གྱུར་ཅིག༔ དེར་ཡང་རིགས་མཆོག་ཏུ་གྱུར་པ་ལ་སོགས་པ་མཐོ་རིས་ཀྱི་ཡོན་ཏན་བདུན་དང་ལྡན་པར་གྱུར་ཅིག༔ བླ་མ་དམ་པ་ཡོངས་སུ་འཛིན་པ་དགེ་བའི་བཤེས་གཉེན་རྣམས་ཀྱིས་རྗེས་སུ་འཛིན་པར་གྱུར་ཅིག༔ ཐེག་མཆོག་བླ་ན་མེད་པའི་ཆོས་ལ་ལོངས་སྤྱོད་པར་གྱུར་ཅིག༔ རང་གཞན་ཐམས་ཅད་ལ་ཕན་ཐོགས་པར་གྱུར་ཅིག༔ ལེ་ལོ་དང་གཡེང་བ་ཐམས་ཅད་རབ་ཏུ་སྤངས་ཏེ་བསྒྲུབ་པ་ཚུལ་བཞིན་དུ་བྱེད་པར་གྱུར་ཅིག༔ ཏིང་ངེ་འཛིན་གསལ་ཞིང་རྟོགས་པ་ཁྱད་པར་ཅན་རྒྱུད་ལ་སྐྱེ་བར་གྱུར་ཅིག༔ ལམ་གྱི་བར་ཆད་དང་འགལ་རྐྱེན་མེད་ཅིང་མཐུན་རྐྱེན་ཕུན་སུམ་ཚོགས་པར་གྱུར་ཅིག༔ མཐར་ཐུག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་མྱུར་དུ་ཐོབ་པར་གྱུར་ཅིག༔ དེ་ལྟར་གྱུར་ནས་ཀྱང་ལྷུན་གྱིས་གྲུབ་པའི་ཕྲིན་ལས་རྒྱ་མཚོ་ལྟ་བུ་ལ་མངའ་བརྙེས་ཏེ་འགྲོ་བ་ཐ་དག་གི་དོན་ཕུན་སུམ་ཚོགས་པ་འབྱུང་བར་གྱུར་ཅིག༔ ཅེས་ལན་གསུམ་གྱི་མཐར༔ སངས་རྒྱས་སྐུ་གསུམ་བརྙེས་པའི་བྱིན་རླབས་དང༔ ཆོས་ཉིད་མི་འགྱུར་བདེན་པའི་བྱིན་རླབས་དང༔ དགེ་འདུན་མི་ཕྱེད་འདུན་པའི་བྱིན་རླབས་དང༔ བླ་མ་ཡི་དམ་མཁའ་འགྲོའི་ཐུགས་རྗེ་ཡིས༔ ཇི་ལྟར་བསྔོས་པ་ཐམས་ཅད་འགྲུབ་གྱུར་ཅིག༔ སྨོན་ལམ་བཏབ་པ་རྣམས་ཀྱང་བཙན་གྱུར་ཅིག༔ ཅེས་པའང་བརྗོད༔ རྗེས་འཁོར་གསུམ་ཡོངས་སུ་དག་པ་མི་དམིགས་པས་རྒྱས་གདབ་པར་བྱའོ༔