Difference between revisions of "Terdzo-PI-029"

 
Line 51: Line 51:
 
<div id='tibetan' class='tib-text'>
 
<div id='tibetan' class='tib-text'>
 
༄༅༔ ཐུན་མོང་རྟེན་འབྲེལ་སྒྲིག་བྱེད་པའི༔ ལྷ་རྣམས་མཉེས་བྱེད་བསང་ཡིག་བཞུགས༔
 
༄༅༔ ཐུན་མོང་རྟེན་འབྲེལ་སྒྲིག་བྱེད་པའི༔ ལྷ་རྣམས་མཉེས་བྱེད་བསང་ཡིག་བཞུགས༔
གུ་རུ་པདྨ་སིདྡྷི་ཧཱུྃ། སྐྱབས་ཀུན་འདུས་ཞལ་ཨོ་རྒྱན་དུས་གསུམ་མཁྱེན་པ་ལ་ཕྱག་འཚལ་ལོ། །འདིར་བྱང་གཏེར་རྒྱགས་བརྔན་བསང་ཆོག་ཇི་ལྟར་བྱ་བའི་ཚུལ་ལ། སྦྱོར་བ་དངོས་གཞི་མཇུག་དང་གསུམ། དང་པོ་སྦྱོར་བ་ལ་བཅའ་སྒྲིག་དང་སྔོན་འགྲོའི་ཆོ་གར་འཇུག་ཚུལ་གཉིས་ལས། དང་པོ་ནི། འདི་ཉིད་ཀྱི་གཏེར་གཞུང་ལས། བརྔན་གྱི་ཆོ་གའི་རིམ་པ་ལ༔ ཤིན་ཏུ་གཙང་བའི་ས་ཕྱོགས་སུ༔ དཀར་གསུམ་མངར་གསུམ་བརྒྱན་པ་དང༔ དམར་གཏོར་ཤ་ཆང་བརྒྱན་པ་དང༔ བསང་བཤོས་ཟས་སྣས་བརྒྱན་པ་དང༔ ཕྱེ་མར་ཅི་འབྱོར་སྣོད་ཁེངས་དང༔ དྲི་བཟང་འབྲུ་སྣ་སྨན་སྤོས་དང༔ རིན་ཆེན་མེ་ཏོག་སྣ་ཚོགས་དང༔ ཁྱད་པར་རྟ་གླང་ར་དང་ལུག༔ མཛོ་གཡག་སྦལ་སྦྲུལ་ལ་སོགས་དང༔ གཟུགས་འགྲོས་སྣ་ཚོགས་བྱས་པ་དང༔ སྦ་སྙུག་ཤུག་པ་ལྕང་མ་དང༔ མཁན་པ་མཚེ་དང་འོམ་བུ་དང༔ བ་ལུ་གླང་མ་ལ་སོགས་པའི༔ རྩི་ཤིང་སྣ་ཚོགས་མཆོད་པ་བཤམས༔ སྟག་གཟིག་དར་ཟབ་ལ་སོགས་པ༔ མདའ་མདུང་དར་ཆེན་འཕྱར་བ་དང༔ རྔ་དུང་ལ་སོགས་རོལ་མོའི་སྒྲ༔ སྤྱན་གཟིགས་མཆོད་པ་སྣ་ཚོགས་བཤམས༔ ཞེས་གསུངས་པ་བཞིན། ཐོག་མའི་བཅའ་གཞི་སྒྲིག་ཚུལ་ལ་དམ་པའི་ཕྱག་བཞེས་འདྲ་མིན་སྣ་ཚོགས་ཞིག་མཆིས་རུང་། འདིར་ནི་རིག་འཛིན་གསང་སྔགས་དགའ་ཚལ་གྱི་མཐོང་བརྒྱུད་ཕྱག་ལེན་ཇི་ལྟར་བསྟར་བའི་ཚུལ་དགོད་པར་བྱ་སྟེ། དེ་ཡང་གང་དུ་བྱ་བའི་གནས་ནི་རི་རྩེ་འམ། ཁང་ཐོག་སོགས་ཤིན་ཏུ་གཙང་བའི་ཡིད་མཐུན་གྱི་གནས་སུ། རས་དཀར་སོགས་དྲི་མ་མེད་པའི་མཆོད་གདན་བཏིང་བའི་སྟེགས་བུའི་ཁར། ཨན་སྟར་སོགས་ཀྱི་གཏོར་སྣོད་གཙང་མའི་དབུས་སུ་བཟང་དྲུག་རིན་ཆེན་སྣ་ལྔའི་ཕྱེ་མ་དཀར་གསུམ་མངར་གསུམ། བདུད་རྩི་རིལ་བུའམ་ཆོས་སྨན་སོགས་རྣལ་འབྱོར་བླ་མེད་ནས་བཤད་པའི་གཏོར་རྫས་ཅི་འབྱོར་བསྲེས་པའི་རྩམ་ཕྱེ་ཆང་ཕུད་ཆུ་གཙང་གིས་སྦྲུས་པའི་ཟན་ལེབ་གྲུ་བཞི་རྩི་དཀར་ཅན་བཞི་བང་རིམ་གྱི་ཚུལ་དུ་བརྩེགས་པའི་འོག་མ་གསུམ་དཔངས་མཉམ་དང་། དེ་གསུམ་བསྡོམས་པའི་དཔངས་དང་མཉམ་པའི་བང་རིམ་བཞི་པའི་སྟེང་དུ་རྩ་གསུམ་སྤྱིའི་དཔལ་གཏོར་ཟླུམ་པོ་པད་འདབ་བཞི་པ་རྩི་དཀར་ཅན། པད་འདབ་རྣམས་ཀྱི་བར་བར་དུ་མཐེབ་ཀྱུ་རྩི་དཀར་ཅན་སྒོར་མོའི་སྟེང་དུ་ཟན་རིལ་བཞག་པས་བསྐོར། བང་རིམ་འོག་མ་གསུམ་གྱི་ཟུར་བཞིར་བཤོས་བུ་སྐེད་རིས་ཅན་རྩི་དཀར་གྱིས་བྱུགས་པ་ལ་ཤིང་རྩེར་སྙིང་དངོས་སམ་ཟན་གྱི་སྙིང་གཟུགས་དམར་པོ་རེ་བཙུགས་པ་སྡོམ་བཅུ་གཉིས་དང་། ངོས་བཞིར་དམར་གཏོར་ཟུར་གསུམ་རེ་རེ་བཅས་སྡོམ་བཅུ་གཉིས། བང་རིམ་འོག་མའི་མདུན་ངོས་དབུས་སུ་གཡག་མགོས་མཚན་པའི་ཐང་ལྷའི་གཏོར་མ་ཟུར་གསུམ་རྩི་དཀར་ཅན། གཡས་སུ་ལུག་མགོས་མཚན་པའི་བསྟན་མའི་གཏོར་མ་དབྱིབས་རྩི་གོང་འདྲ། གཡོན་དུ་ར་མགོས་མཚན་པའི་དམ་ཅན་གྱི་གཏོར་མ་དབྱིབས་རྩི་གོང་འདྲ། ཨན་སྟར་གྱི་གཡས་གཡོན་རྣམས་སུ་བཀྲ་ཤིས་རྫས་རྟགས་འདོད་ཡོན་རིན་ཆེན་སྣ་བདུན་གསེར་དངུལ་དོང་རྩེ་སོགས་མཆོད་པའི་བྱེ་བྲག་སྣ་ཚོགས་དང་། སྐུ་གླུད་ཕོ་གཟུགས་མོ་གཟུགས་རྟ་དྲེལ་མཛོ་གཡག་ར་ལུག་སོགས་མདོར་ན་འཕུར་དགུ་འཛུལ་དགུའི་གཟུགས་འགྲོས་ཟན་པར་གྱི་ནར་མོས་ཟླུམ་གཏོར་བར་སྟོང་རྣམས་སུ་བཀང་། གོང་གི་གཟུགས་འགྲོས་རྣམས་ཀྱི་བར་དུ་ཟན་ཆད་དང་ཆངས་བུ་མཐེབ་ཀྱུ་སོགས་ཀྱིས་ཀྱང་བཀང་། དེའི་གཡས་གཡོན་གང་འོས་སུ་དགྲ་བླ་དང་རང་ལུགས་སྒེར་གསོལ་གྱི་མཆོད་པ་ཇི་དགོས་མཐོང་བརྒྱུད་བཞིན་དང་། ཕྱི་ནང་གི་མཆོད་པ། ཤིང་སྣ་སྨན་སྤོས་ཤིང་འབྲས་ཟས་སྣ་དཀར་གསུམ་མངར་གསུམ་སོགས་སྦྱར་བའི་བསང་བཤོས། ཕྱེ་མར་ཆང་ཕུད་འོ་སྐྱེམས་རྒྱ་ཇའི་བཏུང་བ། འོ་མ་དྲི་བཟང་རིན་ཆེན་ཕྱེ་མ་སྨན་སོགས་སྦྱར་བའི་བསང་ཆུ། དགྲ་བླའི་སྤྱན་གཟིགས་གོ་མཚོན་སོགས་དང་། དར་ཚོན་སྣ་ལྔ་མེ་ལོང་སོགས་ཀྱིས་བརྒྱན་པའི་མདའ་དར། གཡང་རྟེན། ཕྱོགས་བཞིའམ་གང་འོས་སུ་འཕྱར་དར། རང་གི་མདུན་དུ་རྔ་རོལ་སོགས་སྐབས་ཀྱི་ཉེར་མཁོ་རྣམས་འཚོག་པར་བྱ་ཞིང་། བསང་གཡོག་དང་བཅས་པ་སྟ་གོན་བྱ། སྦྱོར་ཆོག་གཉིས་པ་སྔོན་འགྲོའི་རིམ་པ་ནི། གཏེར་གཞུང་ལས། རང་ཉིད་པདྨའི་ང་རྒྱལ་གྱིས༔ མཆོད་རྫས་ཀུན་ལ་སྤོས་ཆུ་གཏོར༔ ཐམས་ཅད་ཅི་འདོད་འབྱུང་བ་ཡི༔ མཆོད་སྦྱིན་ཡིད་བཞིན་གཏེར་གྱུར་པ༔ ས་གཞི་བར་སྣང་གང་བར་བསམ༔ ཤིང་སྣ་མེ་སྦར་བསང་དུད་སྦྱར༔ རོལ་མོའི་སྒྲ་ཡིས་བྱིན་དབབ་བོ༔ ཞེས་གསུངས་པ་ལྟར་གྱི་ཆོ་གར་འཇུག་པའི་རིམ་པ་ལ། ཐོག་མར་སྐྱབས་འགྲོ་ནི། རོལ་མོ་དབྱངས་དང་བཅས་ཏེ་འདི་སྐད་དོ། །ཧཱུྃ༔ རང་བྱུང་ལྷུན་གྱིས་གྲུབ་པའི་སྐུ༔ འོད་གསལ་ཆེན་པོའི་དགོངས་པ་ཅན༔ ཐུགས་རྗེའི་དབང་གིས་འགྲོ་དོན་མཛད༔ བླ་མ་རྣམས་ལ་སྐྱབས་སུ་མཆི༔ རང་ལ་ཡེ་ཤེས་ཤར་བའི་སྐུ༔ མི་འབྲལ་རྩེ་གཅིག་དགོངས་པ་ཅན༔ བྱིན་གྱིས་བརླབ་ཅིང་བར་ཆད་སེལ༔ ཡི་དམ་ལྷ་ལ་སྐྱབས་སུ་མཆི༔ དམ་ཚིག་རྣམ་པར་དག་པའི་སྐུ༔ བརྩེ་གདུང་བྱམས་པའི་དགོངས་པ་ཅན༔ ལེགས་ཉེས་སྟངས་འཛིན་དངོས་གྲུབ་སྟེར༔ མཁའ་འགྲོའི་ཚོགས་ལ་སྐྱབས་སུ་མཆི༔ ཞེས་ལན་གསུམ་གྱིས་སྐྱབས་འགྲོ་དང་། སྔོན་ནས་བསགས་པའི་སྡིག་སྒྲིབ་བཤགས༔ འགྲོ་དོན་སངས་རྒྱས་འཐོབ་བྱའི་ཕྱིར༔ སྨོན་པ་བྱང་ཆུབ་སེམས་བསྐྱེད་དོ༔ སེམས་ཅན་ཡོངས་སུ་སྨིན་བྱའི་ཕྱིར༔ གསང་སྔགས་སྤྱོད་པ་རླབས་ཆེན་སྤྱད༔ དོན་དམ་སྤྲོས་བྲལ་བྱང་ཆུབ་སེམས༔ རང་བྱུང་མཐའ་བྲལ་སྟོང་གསལ་བསྒོམ༔ ཞེས་ལན་གསུམ་གྱིས་སེམས་བསྐྱེད་བྱ། བླ་མ་བདེ་གཤེགས་མཁའ་འགྲོ་གནས་འདིར་གཤེགས༔ ཉི་ཟླ་པད་གདན་མཛེས་ལ་དགྱེས་པར་བཞུགས༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཕྱི་ནང་གསང་གསུམ་མཆོད་སྤྲིན་ཀུན་གྱིས་མཆོད༔ སྔོན་ནས་ད་བར་མི་དགེ་བཅུ་བསགས་བཤགས༔ དུས་གསུམ་དགེ་བའི་ཚོགས་ལ་རྗེས་ཡི་རང༔ བདག་གཞན་ཡོངས་སྒྲོལ་ཆོས་འཁོར་བསྐོར་དུ་གསོལ༔ འགྲོ་མགོན་མྱ་ངན་མི་འདའ་བཞུགས་གསོལ་འདེབས༔ སྒོ་གསུམ་དགེ་སྤྱད་མ་ལུས་བྱང་ཆུབ་བསྔོ༔ མཁའ་མཉམ་འགྲོ་རྣམས་སྐུ་གསུམ་མངོན་འགྱུར་ཤོག༔ ཅེས་པས་ཡན་ལག་བདུན་པ་འབུལ། ཧཱུྃ༔ སྟོང་གསུམ་ཀུན་ཏུ་དྲི་མཆོག་འབྱུང་གྱུར་པའི༔ སྤོས་དང་སྨན་སྦྱར་ཆུ་གཙང་དག་པའི་ཁྲུས༔ ཡིད་བཞིན་སྤྲིན་ཕུང་མཁའ་ལ་ཆར་འབེབ་པས༔ མི་གཙང་དྲི་མའི་ཚོགས་ཀུན་དག་གྱུར་ཅིག༔ ཨོཾ་ཤུདྡྷེ་ཤུདྡྷེ་ཤྭ་དྷ་ན་ཡེ་སྭཱ་ཧཱ༔ ཞེས་ཚར་གསུམ་བརྗོད་ཅིང་གནས་དང་ཡོ་བྱད་ལ་ཆབ་གཏོར་ནས་མ་དག་པ་སྦྱངས་ཏེ་བྱིན་གྱིས་བརླབས་ལ། ཐོག་མར་རང་ཉིད་སྐད་ཅིག་གིས་པདྨ་དཀར་པོ་འདབ་མ་དྲུག་པའི་ལྟེ་བར་རང་རིག་ཧཱུྃ་དཀར་པོའི་འཕྲོ་འདུ་ལས། དཔལ་རྡོ་རྗེ་སེམས་དཔའི་སྐུར་ཐལ་གྱིས་བསྐྱེད་པ་ནི། ཧཱུྃ༔ པད་སྡོང་འདབ་དྲུག་ཁྲི་འཕང་བཞིན༔ ཉི་མ་ཟླ་བའི་གདན་སྟེང་དུ༔ བདག་ཉིད་རྡོ་རྗེ་སེམས་དཔའི་སྐུ༔ དཀར་གསལ་ཞལ་གཅིག་ཕྱག་གཉིས་པ༔ རྡོ་རྗེ་དྲིལ་བུ་ཐུགས་ཀར་འཛིན༔ དར་དང་རིན་ཆེན་དུ་མས་སྤྲས༔ སྤྱི་གཙུག་བླ་མ་ཀུན་བཟང་མཐིང༔ མཚན་དཔེས་སྤྲས་པ་ཡུམ་དང་སྦྱོར༔ སྐུ་ཡི་གནས་སུ་ཞི་ཁྲོའི་ལྷ༔ ཆུ་ནང་ཟླ་བ་ལྟ་བུར་གསལ༔ ཨོཾ་བཛྲ་སཏྭ་ཧཱུྃ༔ ཞེས་ལན་བདུན་ནམ་ཉེར་གཅིག་བཟླ། འདབ་དྲུག་ཤར་གྱི་པད་འདབ་ལ༔ སྦྱོང་བའི་ལྷ་ནི་ཤཱཀ་ཐུབ་སེར༔ ཕྱག་གཉིས་ས་གནོན་ལྷུང་བཟེད་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཁོང་སྟོང་ཕྱག་རྒྱའི་ནང༔ ཨ་དཀར་འོད་འཕྲོས་དངོས་འཛིན་སྦྱང༔ ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅་ཧཾ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་དངོས་འཛིན་དག་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ སྤེལ་བའི་ལྷ་ནི་རྣམ་སྣང་དཀར༔ ཕྱག་གཉིས་འཁོར་ལོ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཚིགས་བཅག་ཕྱག་རྒྱའི་ནང༔ ཁཾ་སྔོན་འོད་འཕྲོས་སྣོད་བཅུད་སྤེལ༔ ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏྞཾྐ་ཨཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་ལེགས་ཚོགས་སྤེལ་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ སྒྱུར་ལྷ་བདུད་རྩི་འཁྱིལ་པ་ལྗང༔ ཕྱག་མཚན་རྒྱ་གྲམ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཁ་གྱེར་ཕྱག་རྒྱའི་ནང༔ ཛ་དམར་འོད་འཕྲོས་བདུད་རྩིར་སྒྱུར༔ ཨོཾ་བཛྲ་ཨ་མྲྀཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་ཟག་མེད་བདུད་རྩིར་བསྒྱུར༔ དེ་ཡི་མཚམས་ཀྱི་པད་འདབ་ལ༔ ཐོབ་ལྷ་རིན་འབྱུང་སྐུ་མདོག་སེར༔ ཕྱག་ན་རིན་ཆེན་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ མཆོག་སྦྱིན་ཕྱག་རྒྱ་ཏྲཾ་སེར་ལས༔ འོད་འཕྲོས་ཀུན་གྱིས་འབད་མེད་ཐོབ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ སྔགས་འདི་ལན་བདུན་བརྗོད་པའི་མཐུས༔ མགྲོན་རྣམས་ཀུན་གྱིས་ཐོབ་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ ཚིམ་ལྷ་དོན་ཡོད་གྲུབ་པ་ལྗང༔ ཕྱག་མཚན་རལ་གྲི་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཁུ་ཚུར་མཆོག་སྦྱིན་ཕྱག་རྒྱའི་ནང༔ ཧ་ལྗང་འོད་འཕྲོས་མགྲོན་མཉེས་གྱུར༔ ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མསྶ་མནྟ་སྥ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་སྭཱ་ཧཱ༔ སྔགས་འདི་ལན་བདུན་བརྗོད་པའི་མཐུས༔ མགྲོན་ཀུན་དགྱེས་ཤིང་ཚིམས་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ དབང་ཆེན་ཕྱག་རྡོར་ལྗང་དམར་ནི༔ ཕྱག་མཚན་རྡོ་རྗེ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ སོར་བསྣོལ་ཕྱག་རྒྱ་ཛ་དམར་ལས༔ འོད་འཕྲོས་མགྲོན་བཞིའི་མཐུ་སྟོབས་བསྡུས༔ ན་མསྶ་མནྟ་བུདྡྷ་ནཾ་གྲ་ཧེ་ཤྭ་རི་པྲ་བྷཉྫྱོ་ཏི་ན་མ་ཧཱ་ས་མ་ཡ་ཧཱུྃ་ཕཊ༔ སྔགས་འདི་ལན་བདུན་བརྗོད་པའི་མཐུས༔ དབང་སྡུད་འཕྲིན་ལས་ཀུན་འགྲུབ་ཤོག༔ ཅེས་བྱིན་གྱིས་བརླབས། གཉིས་པ་དངོས་གཞི་ལ། གཏེར་གཞུང་ལས། དེ་ནས་དངོས་གཞི་བརྔན་པ་ནི༔ རང་ཉིད་པདྨའི་ང་རྒྱལ་གྱིས༔ མགྲོན་རྣམས་སྤྱན་དྲངས་བཞུགས་པ་ལ༔ རིམ་བཞིན་མཆོད་ཅིང་བརྔན་པ་ནི༔ མཆོད་གཏོར་གཟུགས་འགྲོས་བཤམས་པ་ལ༔ བསང་ཆུ་ཕུད་ཆུ་འཐོར་ཕུད་དང༔ ཕྱེ་མར་རིན་ཆེན་འབྲུ་སྣ་ཚོགས༔ མེ་ནང་ཕུལ་ལ་འདི་སྐད་དོ༔ ཞེས་གསུངས་པ་བཞིན་རང་ཉིད་སློབ་དཔོན་ཆེན་པོ་དམ་ཚིག་པར་བསྐྱེད་པ་ནི། པདྨ་ཉི་ཟླའི་གདན་སྟེང་ན། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ལས་སྤྲུལ་པའི་རིག་འཛིན་ནི། །པདྨ་འབྱུང་གནས་རྒྱལ་བའི་སྐུ །སྐུ་མདོག་དཀར་དམར་སྐྱིལ་ཀྲུང་མཛད། །གཞོན་ནུ་ལོ་བརྒྱད་ལོན་པའི་ཚུལ། །སྔགས་པའི་ཆ་ལུགས་མཐིང་ནག་གོས། །རབ་བྱུང་ཆ་ལུགས་ཆོས་གོས་དམར། །རྒྱལ་པོའི་ཆ་བྱད་ཟབ་བེར་གསོལ། །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་པ་མཉམ་གཞག་ཀ་པཱ་ལ། །དབུ་ལ་པདྨའི་མཉེན་ཞུ་གསོལ། །སྣ་ཚོགས་རིན་ཆེན་རྒྱན་གྱིས་མཛེས། །བཀྲག་དང་གཟི་མདངས་ལྡན་པ་ལ། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་གཏེར་བདག་ཚོགས། །མ་ལུས་འཁོར་གྱིས་བསྐོར་བར་གྱུར། །ཡེ་ཤེས་པ་སྤྱན་འདྲེན་པ་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃ། ཞེས་དམ་ཡེ་གཅིག་ཏུ་གྱུར་པར་བསམ་ལ། མཆོད་པ་འབུལ་བ་ནི། ཧཱུྃ། མེ་ཏོག་བདུག་སྤོས་མར་མེ་དང་། །ལྷ་བཤོས་དྲི་ཆབ་མཆོད་པར་བཤམས། །བླ་བྲེ་རྒྱལ་མཚན་ན་བཟའ་དང་། །བ་དན་གདུགས་དང་རོལ་མོའི་ཚོགས། །རིན་པོ་ཆེ་དང་མེ་ཏོག་དང་། །གཟུགས་སྒྲ་དྲི་རོ་རེག་བྱ་དང་། །ཆོས་དང་མདངས་ཆེན་བྱང་ཆུབ་སེམས། །མཆོད་སྤྲིན་བསམ་གྱིས་མི་ཁྱབ་པ། །རྩ་བ་བརྒྱུད་པའི་བླ་མ་དང་། །ཡི་དམ་ཞི་ཁྲོའི་ལྷ་ཚོགས་དང་། །ཆོས་བདག་དཔའ་བོ་མཁའ་འགྲོའི་ཚོགས། །དམ་ཅན་ཆོས་སྐྱོང་རྣམས་ལ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བརྒྱ་རྩ་སོགས་བཟླ། དང་པོ་བརྔན་གྱི་བྱུང་ཁུངས་ནི། འཛམ་བུ་གླིང་གི་བོད་ཡུལ་དབུས༔ བཙན་པོ་ཁྲི་སྲོང་ལྡེའུ་བཙན་གྱིས༔ བསམ་ཡས་གཙུག་ལག་བཞེངས་པའི་དུས༔ ས་བདག་ཀླུ་གཉན་ཁྲོས་གྱུར་ནས༔ ལྷ་ཁང་ཉིན་བརྩིགས་མཚན་མོ་བསྒྱེལ༔ རི་རྡོ་ཐམས་ཅད་ཀླུངས་སུ་ཕབ༔ ཀླུངས་རྡོ་ཐམས་ཅད་རི་ལ་བསྐྱལ༔ རྩི་ཤིང་ཐམས་ཅད་མེ་ལ་བསྲེགས༔ ནད་དང་གནོད་པ་སྣ་ཚོགས་བྱུང༔ རྒྱལ་པོའི་ལྷ་ཁང་བཤོལ་ལ་ཐུག༔ དེ་ཚེ་རྒྱལ་བློན་བཀའ་བགྲོས་མཛད༔ སློབ་དཔོན་པདྨ་སྤྱན་དྲངས་ནས༔ བྲག་དམར་དཔལ་གྱི་བསམ་ཡས་སུ༔ སློབ་དཔོན་པདྨ་འབྱུང་གནས་ཀྱིས༔ རྡོ་རྗེ་ཕུར་པའི་དཀྱིལ་འཁོར་བཞེངས༔ ལྷ་འདྲེ་ཐམས་ཅད་དམ་ལ་བཏགས༔ དཀོན་མཆོག་གསུམ་ལ་མཆོད་པ་ཕུལ༔ ལྷ་དང་སྲུང་མ་ཐམས་ཅད་དང༔ ས་བདག་ཀླུ་གཉན་ཐམས་ཅད་བརྔན༔ དེ་ཡིས་བསམ་ཡས་ཆོས་འཁོར་གྲུབ༔ རྗེ་འབངས་བདེ་ཞིང་བཀྲ་ཤིས་ལ༔ རྒྱལ་བློན་སྐུ་ཚེ་རིང་བ་དང༔ རྩི་ཤིང་མེ་ཏོག་ཐམས་ཅད་སྨིན༔ ལེགས་པའི་ཡོན་ཏན་བསམ་མ་ཁྱབ༔ བརྔན་གྱི་བྱེད་ལས་དགོས་པ་ནི༔ དེ་ཡང་ཕྱི་རབས་རྣལ་འབྱོར་པས༔ གང་འདོད་འཕྲིན་ལས་སྒྲུབ་པ་དང༔ སངས་རྒྱས་བསྟན་པ་སྲུང་བ་དང༔ སྒྲུབ་ལ་བར་ཆད་སེལ་བ་དང༔ འཁོར་སྲུང་རྐྱེན་ཟློག་གྲགས་པ་སྤེལ༔ ལྷ་ཁང་བཞེངས་དང་མཆོད་རྟེན་བརྩིག༔ མི་ནད་ཡམས་ནད་གཅད་པ་དང༔ མཁར་ལས་བྱེད་དང་བཀྲ་ཤིས་འདོད༔ ཐག་རིང་མགྲོན་ལ་འགྲོ་བ་དང༔ ཆུ་ཆེན་གྲུ་ལ་འགྲོ་བ་དང༔ ལམ་འཕྲང་བགྲོད་དང་དམག་ལ་འགྲོ༔ ལྷོ་བལ་སྦས་ཡུལ་འགྲོ་བ་དང༔ ཆེ་ཧྲག་བྱ་བ་ཐམས་ཅད་ཀྱི༔ སྔོན་དུ་བརྔན་འདི་བྱས་པས་འགྲུབ༔ ཅེས་བསང་ཆོག་འདི་ཉིད་གང་དུ་མཛད་པའི་གནས་དང་མཛད་པ་པོ་དང་དགོས་པ་དང་བྱེད་ལས་དང་ཕན་ཡོན་ཏེ་དོན་ལྔའི་སྒོ་ནས་ཕྱི་རབས་རྣལ་འབྱོར་པ་རྣམས་ཀྱིས་འདོད་པའི་དོན་རྣམས་གེགས་མེད་ལྷུན་གྱིས་འགྲུབ་པའི་སླད་དུ་ཆོ་ག་འདིར་འཇུག་པར་སྤྲོ་བ་བསྐྱེད་དེ། དེ་ནས་བསྟོད་པ་བྱ་བ་ནི། ཧཱུྃ༔ བསྟན་པ་འདི་ལ་ངོ་མཚར་རྨད་བྱུང་བའི༔ འཇིག་རྟེན་སྐྱབས་གྱུར་པདྨ་རྒྱལ་པོ་ནི༔ རིགས་ནི་ཟ་ཧོར་རྒྱལ་པོའི་སྲས་སུ་འཁྲུངས༔ ཨོ་རྒྱན་ཡུལ་དུ་སྒྲོ་འདོགས་མ་ལུས་བཅད༔ བསིལ་བ་ཚལ་དུ་དངོས་གྲུབ་ཐམས་ཅད་བརྙེས༔ ཁ་བ་ཅན་དུ་བསྟན་པ་དར་བར་མཛད༔ ལྷོ་ནུབ་མཚམས་སུ་སྲིན་པོའི་ཁ་གནོན་མཛད༔ མྱ་ངན་མི་འདའ་འགྲོ་བའི་གཉེན་གཅིག་པུ༔ སྐུ་གསུམ་ཆེ་མཆོག་བཛྲ་ཧེ་རུ་ཀ༔ དུས་གསུམ་མཉམ་ཉིད་བླ་མ་དུས་འདིར་དྲན༔ བདག་དང་བླ་མ་དབྱེར་མེད་ཧེ་རུ་ཀ༔ རྒྱལ་བའི་ཞིང་ཁམས་དག་པ་ཆེན་པོ་འདིར༔ མི་འགྱུར་ལྷུན་གྲུབ་པདྨ་རྒྱལ་པོ་དང༔ བླ་མ་ཡི་དམ་མཁའ་འགྲོས་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ མགྲོན་སྤྱན་དྲང་བ་ནི། བླ་མ་ཡི་དམ་མཁའ་འགྲོ་དང༔ སངས་རྒྱས་ཆོས་དང་དགེ་འདུན་དང༔ ཞི་རྒྱས་དབང་དང་མངོན་སྤྱོད་ལྷ༔ ཕྱི་ནང་སྲུང་མའི་ཚོགས་རྣམས་དང༔ གསང་སྔགས་རིག་སྔགས་ལྷ་རྣམས་དང༔ འདས་དང་མ་བྱོན་ད་ལྟར་གྱི༔ ལྷ་དང་སྲུང་མ་དམ་ཚིག་ཅན༔ མ་མོ་མཁའ་འགྲོ་ཤུགས་འགྲོ་དང༔ འཇིག་རྟེན་གནས་ཀྱི་མཆོག་གྱུར་པ༔ སྒྲུབ་གནས་བྱིན་ཆེན་ཐམས་ཅད་དང༔ གཞན་ཡང་ས་འོག་ས་སྟེང་གི༔ གནས་བདག་ཆེན་པོ་ཐམས་ཅད་དང༔ འཁོར་དུ་གཏོགས་པའི་སྡེ་བརྒྱད་པོ༔ སྟོང་གསུམ་ཁྱབ་པའི་མཐུ་རྩལ་ཅན༔ ཆེ་དགུ་གཉན་དགུ་ཐམས་ཅད་དང༔ གཙུག་ལག་ཁང་དང་སྒྲུབ་གནས་ཀྱི༔ སྲུང་མ་གཉན་པོ་ཐམས་ཅད་དང༔ གཞན་ཡང་ལྷ་དང་གནོད་སྦྱིན་དང༔ དྲི་ཟ་གྲུལ་བུམ་མཁའ་འགྲོ་སོགས༔ བརྔན་པར་འོས་པའི་མགྲོན་རྣམས་དང༔ ས་བདག་ཀླུ་གཉན་ཐམས་ཅད་ཀུན༔ སངས་རྒྱས་བསྟན་པ་བསྲུང་བ་དང༔ སྒྲུབ་པའི་སྟོངས་གྲོགས་བྱ་བ་དང༔ དགོན་གནས་བར་ཆད་སེལ་བ་དང༔ དགྲ་དང་བགེགས་རྣམས་གཞོམ་པ་དང༔ ནད་གདོན་གནོད་པ་ལ་སོགས་པ༔ ཆག་ཆེ་ཉམ་ང་ཟློག་པ་དང༔ འདོད་པ་ཐམས་ཅད་བསྒྲུབ་པའི་ཕྱིར༔ མགྲོན་རྣམས་སྤྱན་འདྲེན་གཤེགས་སུ་གསོལ༔ འདིར་གཤེགས་བཤམས་པའི་མཆོད་པ་བཞེས༔ བསྟན་པ་དར་ཞིང་རྒྱས་པར་མཛོད༔ བདག་དང་རྒྱུ་སྦྱོར་ཡོན་བདག་གི༔ ཡིད་ལ་རེ་བ་སྐོང་བ་དང༔ ཀུན་ཀྱང་བཤད་པའི་ཆོས་ལ་ཉོན༔ བསང་གྱེར་བ་ནི༔ ཀྱཻ༔ བསང་གི་རྒྱུ་བྱུང་གང་ནས་བྱུང༔ བསང་གི་རྒྱུ་བྱུང་གནམ་ནས་བྱུང༔ ཕ་གནམ་ལ་འབྲུག་ཆེན་ལྡར་མ་ལྡིར༔ མ་ས་ལ་གློག་ཆེན་གྱ་མ་གྱུ༔ བུ་རྟ་རྒོད་གངས་ཀྱི་ཐིགས་པ་ཡིན༔ རྒྱ་མཚོ་ཆུ་ཡི་ལྦུ་བ་ཡིན༔ མ་ཕམ་གཡུ་མཚོའི་ཁ་ཞག་ཡིན༔ བཟང་དྲུག་སྨན་གྱི་ནུས་པ་ཡིན༔ དྲི་ཞིམ་སྤོས་ཀྱི་ངད་པ་ཡིན༔ ཕྱེ་མར་འོ་སྐོལ་གསུར་གྱིས་མཆོད༔ ཤིང་བདུད་རྩི་ཅན་གྱི་དུད་པ་དང༔ གསེར་ལོ་འབར་བའི་སྟག་པ་དང༔ གཡུ་ལོ་འབར་བའི་ཤུག་པ་དང༔ དུང་ལོ་འབར་བའི་བ་ལུ་དང༔ མཁན་པ་སྤོས་དཀར་ཨ་ཀ་རུ༔ ཤིང་བདུད་རྩི་ཅན་གྱི་དུད་པ་དང༔ ཕྱེ་མར་ཟས་ཕུད་གསེར་སྐྱེམས་ཀྱིས༔ ལྷ་འདྲེ་ཐམས་ཅད་བསང་བའི་ཕྱིར༔ ཀྱཻ༔ སྐྱབས་མཆོག་མགོན་གནས་ཡོན་ཏན་ཞིང༔ རྩ་བ་བརྒྱུད་པའི་བླ་མ་བསང༔ ལས་དང་སྐལ་བར་ལྡན་པ་ཡི༔ ཡི་དམ་ལྷ་ཚོགས་ཐམས་ཅད་བསང༔ སྔ་རབས་འདས་དང་ད་ལྟར་བཞུགས༔ སླད་ནས་འབྱོན་དང་དུས་གསུམ་གྱི༔ སངས་རྒྱས་ནམ་མཁའ་གང་བ་བསང༔ རྣམ་པར་སྣང་མཛད་ལ་སོགས་པའི༔ རིགས་ལྔ་བདེ་བར་གཤེགས་པྎ རིགས་གསུམ་མགོན་པོ་ལ་སོགས་པའི༔ བྱང་ཆུབ་སེམས་དཔའ་ཐམས་ཅདྎ སྟོན་པ་བླ་མེད་སངས་རྒྱསྎ སྐྱོབ་པ་བླ་མེད་དམ་ཆོསྎ འདྲེན་པ་བླ་མེད་དགེ་འདུནྎ བླ་མེད་དཀོན་མཆོག་གསུམ་པོྎ བུདྡྷ་བཞི་བཅུ་རྩ་གཉིསྎ ཁྲོ་བོ་རྨད་དུ་བྱུང་བྎ ཁྲག་འཐུང་ལྔ་བཅུ་རྩ་བརྒྱདྎ འཇམ་དཔལ་སྐུ་ཡི་ལྷ་ཚོགསྎ པདྨ་གསུང་གི་ལྷ་ཚོགསྎ ཡང་དག་ཐུགས་ཀྱི་ལྷ་ཚོགསྎ ཆེ་མཆོག་ཡོན་ཏན་ལྷ་ཚོགསྎ ཕུར་པ་འཕྲིན་ལས་ལྷ་ཚོགསྎ བདུད་རྩི་སྨན་གྱི་ལྷ་ཚོགསྎ མ་མོ་རྦོད་གཏོང་ལྷ་ཚོགསྎ བླ་མ་རིག་འཛིན་ལྷ་ཚོགསྎ འཇིག་རྟེན་མཆོད་བསྟོད་ལྷ་ཚོགསྎ དམོད་པ་དྲག་སྔགས་ལྷ་ཚོགསྎ དཔལ་མགོན་བདུན་ཅུ་རྩ་གཉིསྎ ནམ་མཁའ་གང་བའི་ལྷ་ཚོགསྎ བར་སྣང་གང་བའི་གཉན་རྣམསྎ ས་གཞི་གང་བའི་ཀླུ་རྣམསྎ སྡེ་བརྒྱད་དམ་ལ་གནས་པྎ ལྷ་མིན་གཡུལ་ངོ་ཟློག་པྎ ལྷ་དམག་བྱེ་བ་དུང་ཕྱུརྎ དཔལ་ལྡན་ལྷ་མོ་ནག་མོྎ ལྷ་མོ་བྱེ་བ་འཁོར་བཅསྎ འཇིག་རྟེན་བསྟན་མ་བཅུ་གཉིསྎ གསང་སྔགས་ཕྱི་ནང་བསྟན་སྲུངྎ རིག་འཛིན་བརྒྱུད་ཀྱི་སྲུང་མྎ སློབ་དཔོན་བརྒྱུད་ཀྱི་སྲུང་མྎ ཕ་མེས་བརྒྱུད་ཀྱི་སྲུང་མྎ དབེན་གནས་གཉན་གྱི་སྲུང་མྎ ཕྱི་ཨ་དཀར་དཀར་གྱི་སྲུང་མྎ ཚངས་པ་ལ་སོགས་ལྷ་བརྒྱདྎ ཉི་མ་ལ་སོགས་གཟའ་བརྒྱདྎ སྨིན་དྲུག་ལ་སོགས་རྒྱུ་སྐརྎ མཐའ་ཡས་ལ་སོགས་ཀླུ་བརྒྱདྎ ཛམ་ལྷ་ལ་སོགས་ནོར་ལྷྎ དྲི་ཟ་ལ་སོགས་ཕྱོགས་སྐྱོངྎ ཕྱི་ནང་གསང་བའི་ཆོས་སྐྱོངྎ མེད་པ་ཡོད་ཅེས་དགྲ་བླྎ སྟོང་ལ་ཆགས་པའི་དགྲ་བླྎ འབྱུང་བ་ཆགས་པའི་དགྲ་བླྎ སྲིད་པའི་ལྷ་ལུང་དཀར་པོྎ འདོད་རིགས་སྨན་པ་བཅོ་བརྒྱདྎ མ་ཆགས་སྟོང་གི་དགྲ་བླྎ ཡེ་ནས་སྲིད་པའི་དགྲ་བླྎ འདོད་དགུ་ཆགས་པའི་དགྲ་བླྎ མི་ཐུབ་དགྲ་བླ་སྤུན་གསུམྎ ཕ་མེས་བརྒྱུད་ཀྱི་དགྲ་བླྎ མི་རབས་བརྒྱུད་ཀྱི་དགྲ་བླྎ ཕྱི་རབས་བརྒྱུད་ཀྱི་དགྲ་བླྎ དམུ་རབས་བརྒྱུད་ཀྱི་དགྲ་བླྎ གཙུག་རབས་བརྒྱུད་ཀྱི་དགྲ་བླྎ མི་འུ་གདུང་དྲུག་དགྲ་བླྎ སྨོན་པའི་རྫི་ལུང་འཕྱོ་བྎ ཕ་མཚུན་ཡབ་ལྷ་གདལ་དྲུགྎ མ་བཙུན་རྒྱལ་མོ་མཐིང་གེྎ སྨན་བཙུན་དེ་མོ་དབུ་དཀརྎ གྲི་མཚུན་སྟག་ཆས་བལ་བུྎ རྗེ་ཡི་མགུར་ལྷ་བཅུ་གསུམྎ སྲིད་པ་ཆགས་པའི་དགྲ་བླྎ མ་སང་རྡོ་རྗེ་ལེགས་པྎ བཙན་རྒོད་འབར་བ་སྤུན་བདུནྎ ཤར་གྱི་རྨ་ཆེན་སྤོམ་རྎ རྨ་རིགས་སུམ་བརྒྱ་དྲུག་ཅུྎ ལྷོ་ཡི་འཛམ་བུ་གླིང་ཆུངྎ ཀླུ་འཁོར་སུམ་བརྒྱ་དྲུག་ཅུྎ ནུབ་ཀྱི་གཉན་ཆེན་ཐང་ལྷྎ ལྷ་འཁོར་སུམ་བརྒྱ་དྲུག་ཅུྎ བྱང་གི་ལྷ་བཙན་བུ་ལེྎ བཙན་འཁོར་སུམ་བརྒྱ་དྲུག་ཅུྎ ཤར་ལྷོ་ནུབ་བྱང་ཀུན་འགྲོ་བའི། །དགྲ་བླ་གཉན་པོ་ཐམས་ཅདྎ སྨ་རེ་མཆེད་དང་ལྕམ་དྲལྎ ཡར་ལྷ་དེ་ནི་ཤམ་པོྎ འོ་དེ་དེ་ནི་གུང་རྒྱལྎ གཉན་པོ་སྐུ་ལྷ་གེར་འཛོྎ ཕོ་ལྷ་ལྷ་འུ་གཡང་དཀརྎ ལྷ་གཉན་ཚོགས་ལྷ་གུ་རུྎ ཁམས་གསུམ་ཀླུ་དང་ས་བདགྎ ཕོ་ལྷ་དགྲ་བླ་གཉན་པོྎ ཡུལ་གྱི་ས་བདག་གཉན་པོྎ གཞིས་ལ་གནས་པའི་གཞི་བདགྎ མཁར་ལ་གནས་པའི་རྩེ་ལྷྎ ཇག་ཡག་ཅང་སེ་གཉན་པོྎ ཐབ་ལ་གནས་པའི་ཐབ་ལྷྎ ལམ་ལ་གནས་པའི་ལམ་ལྷྎ དུད་པ་གནམ་དུ་སོང་བ་ཡིས༔ ནམ་མཁའ་གང་བའི་ལྷ་ཚོགསྎ མེ་ལྕེ་བར་དུ་འབར་བ་ཡིས༔ བར་སྣང་གང་བའི་ལྷ་ཚོགསྎ མེ་གཞི་ས་གཞིའི་སྟེང་དུ་འབར༔ ས་གཞི་གང་བའི་ལྷ་ཚོགསྎ མེ་སྟག་དྲག་པོའི་ཐོག་རྒོད་འཕྲོ༔ གདུག་པའི་དགྲ་བགེགས་ཁོ་ཐག་ཆོད༔ ཐལ་བ་ཆེན་པོའི་རླུང་ལ་བསྐུར༔ དགྲ་བགེགས་ཐལ་བའི་རྡུལ་དུ་རློག༔ ཀྱཻ༔ ཕྱི་སྣོད་འཇིག་རྟེན་ལྷ་ཚོགས་བསང༔ རྩི་ཤིང་ནགས་ཚལ་ལྷ་ཚོགས་བསང༔ ནང་བཅུད་སེམས་ཅན་ལྷ་ཚོགས་བསང༔ ཕ་རི་གཡས་ལ་གནས་པྎ ཚུར་རི་གཡོན་ལ་གནས་པྎ ཉིན་དང་སྲིབ་ལ་གནས་པྎ ཕྱི་རབས་བརྒྱུད་ཀྱི་སྲུང་མྎ དམུ་རབས་བརྒྱུད་ཀྱི་སྲུང་མྎ གཙུག་རབས་བརྒྱུད་ཀྱི་སྲུང་མྎ སྟོང་གི་སྟོང་ལྷ་མོ་ཆུྎ དབྲ་ཡི་དབྲ་མོ་དབྲ་ཁྲྎ འབྲུ་ཡི་འབྲུ་མོ་ཁྲོམ་ཁྲོམྎ སྒ་ཡི་སྒ་མོ་ལེ་ལེྎ དབའ་ཟླའི་ཚལ་སྟག་དམར་པོྎ སྡ་ཡི་དགུ་རྒྱུད་དགུ་ཁྲམསྎ རང་ལ་ཡོད་པའི་དགྲ་བླྎ གྲོགས་ལ་འགོ་བའི་དགྲ་བླྎ དགྲ་བསད་གྲུབ་པའི་དགྲ་བླྎ དར་མ་ཐོབ་པའི་དགྲ་བླྎ ཆེ་བཙུན་སྨོན་པའི་དགྲ་བླྎ ཐུག་དཀར་སུམ་བརྒྱ་དྲུག་ཅུྎ འབར་བ་ཉིས་བརྒྱ་ལྔ་བཅུྎ ཝེར་མ་བརྒྱ་དང་བརྒྱད་ཅུྎ མེད་པ་ཡོད་སྲིད་དགྲ་བླྎ སྲིད་པའི་ལྷ་ལུང་དཀར་པོྎ གླིང་བཞི་དར་བའི་དགྲ་བླྎ སྐུ་གསུང་ཐུགས་ཀྱི་དགྲ་བླྎ ཕ་མེས་དར་བའི་སྲས་བཙུནྎ མ་ཕྱི་སྔ་མའི་སྨན་བཙུནྎ གཅོད་ཁམས་བཟང་བའི་ཟོ་དོརྎ ཚེ་རབས་བརྒྱུད་ཀྱི་ཟོ་དོརྎ དམུ་རབས་བརྒྱུད་ཀྱི་ཟོ་དོརྎ གཙུག་རབས་བརྒྱུད་ཀྱི་ཟོ་དོརྎ མི་འུ་གདུང་དྲུག་ཟོ་དོརྎ བོད་ཀྱི་མགུར་ལྷ་བཅུ་གསུམྎ དགེ་བསྙེན་སུམ་བརྒྱ་དྲུག་ཅུྎ གནམ་གྱི་བརྒྱ་བྱིན་དཀར་པོྎ ས་ཡི་བརྒྱ་བྱིན་ནག་པོྎ བར་སྣང་བརྒྱ་བྱིན་ཁྲ་བོྎ ཕྱི་བཙན་ནང་བཙན་དབུས་བཙནྎ ལྷ་ཁང་བཙན་རྒོད་འཁོར་བཅསྎ རིགས་ལྡན་ཁྲོ་རྒྱལ་ནུབ་རེྎ མཆེད་འཁོར་སུམ་བརྒྱ་དྲུག་ཅུྎ རི་རབ་ཆེན་པོའི་ས་བདགྎ གསེར་གྱི་རི་ལ་གནས་པྎ རོལ་མཚོ་བདུན་ལ་གནས་པྎ གླིང་བཞི་གླིང་ཕྲན་ས་བདགྎ མངའ་རིས་སྐོར་གསུམ་གཞི་བདགྎ དབུས་གཙང་རུ་བཞིའི་གཞི་བདགྎ མདོ་ཁམས་སྒང་དྲུག་གཞི་བདགྎ ཏི་སེ་གངས་ཀྱི་ས་བདགྎ ཕུ་དྲུག་གནས་པའི་ས་བདགྎ མཐོ་བ་མཁའ་ལ་གནས་པྎ དམའ་བ་ས་ལ་གནས་པྎ ས་བདག་གཙང་བཙན་འཁོར་བཅསྎ ས་ཡི་ལྷ་མོ་བསྟན་མྎ ས་འཛིན་ལག་པ་ཆེན་པོྎ ལོ་འཁོར་བཅུ་གཉིས་ལྷ་རྣམསྎ གབ་རྩེ་དགུ་ཡི་ལྷ་རྣམསྎ ས་བདག་ཀླུ་གཉན་སྟོང་སྐོརྎ ཕོ་ལྷ་དགྲ་བླ་གཉན་པོྎ མ་ལྷ་བུ་རྫི་ཞང་ལྷྎ དགྲ་བླ་རེ་མོ་གཉན་པོྎ རྣོ་མཐོང་སྟོན་པའི་རྣོ་ལྷྎ མདུད་ལྷ་སུམ་བརྒྱ་དྲུག་ཅུྎ ཟ་ཁ་འབྱེད་པའི་ཞལ་ལྕེྎ ཝེར་མ་སུམ་བརྒྱ་དྲུག་ཅུྎ ཁས་དྲགས་སུམ་བརྒྱ་དྲུག་ཅུྎ སྤྱན་རྣོན་སུམ་བརྒྱ་དྲུག་ཅུྎ རྫི་འུ་སུམ་བརྒྱ་དྲུག་ཅུྎ ཉིན་གྱི་གྲོགས་མཁན་ཉི་མྎ མཚན་གྱི་གྲོགས་མཁན་ཟླ་བྎ སྒྲ་གཅན་ལ་སོགས་གཟའ་བརྒྱདྎ ཇག་ལ་འགྲོ་བའི་ཇག་དཔོནྎ དམག་ལ་འགྲོ་བའི་དམག་དཔོནྎ སྐུ་ལྷ་དེ་ནི་འཇིགས་མེདྎ ས་གཞི་འདི་ལ་གནས་པ་བསང༔ བདག་ཅག་འཁོར་དང་བཅས་པ་ཡི༔ མགོན་སྐྱབས་སྟོངས་གྲོགས་རྒྱབ་རྟེན་མཛོད༔ ཆོས་དང་མཐུན་པའི་སྟོངས་གྲོགས་མཛོད༔ མི་མཐུན་དགྲ་བགེགས་མེད་པར་མཛོད༔ འདོད་པའི་རེ་བ་བསྐང་དུ་གསོལ༔ རྒྱལ་ལོ་རྒྱལ་ལོ་ལྷ་རྒྱལ་ལོ༔ ཞེས་སྨོན་ལམ་བཏབ༔ ཕྱག་མཆོད་ནི༔ སེམས་ཅན་ཀུན་གྱི་མགོན་གྱུར་པའི༔ རྒྱལ་བ་ཤཱཀྱ་ཐུབ་པ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ བཅོམ་ལྡན་རྒྱལ་བ་རིགས་ལྔ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཡུམ་ལྔ་རིན་ཆེན་ཕྲེང་བ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཕྱོགས་བཅུའི་སངས་རྒྱས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ དུས་གསུམ་སངས་རྒྱས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཞི་ཁྲོ་དཔལ་ཆེན་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ རིགས་གསུམ་མགོན་པོ་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ གདུང་བ་སེལ་བ་ལ་སོགས་པའི༔ འཕགས་པ་རང་རྒྱལ་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འོད་སྲུངས་ཆེན་པོ་ལ་སོགས་པའི༔ ཉན་ཐོས་ཆེན་པོ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ བྷ་ར་དྷྭ་ཛ་ལ་སོགས་པའི༔ གནས་བརྟན་ཆེན་པོ་བཅུ་དྲུག་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ནམ་མཁའི་སྙིང་པོ་ལ་སོགས་པའི༔ བྱང་ཆུབ་སེམས་དཔའ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཆོས་སྐུ་ཀུན་བཟང་ལ་སོགས་པའི༔ རྩ་བརྒྱུད་བླ་མ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཨིནྡྲ་བོ་དྷི་ལ་སོགས་པའི༔ གྲུབ་ཆེན་བརྒྱད་པོ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཀླུ་ཡི་བྱང་ཆུབ་ལ་སོགས་པའི༔ གྲུབ་ཆེན་བརྒྱད་ཅུ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཀླུ་སྒྲུབ་སྙིང་པོ་ལ་སོགས་པའི༔ རྒྱན་དྲུག་མཆོག་གཉིས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འཇམ་དཔལ་སྐུ་དང་པདྨ་གསུང༔ ཕུར་པ་འཕྲིན་ལས་ལ་སོགས་པའི༔ སྒྲུབ་པ་བཀའ་བརྒྱད་ལྷ་རྣམས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ནུབ་ཕྱོགས་ཨོ་རྒྱན་ལ་སོགས་པའི༔ དུར་ཁྲོད་ཆེན་པོ་བརྒྱད་རྣམས་ཀྱི༔ མ་སྲིང་མཁའ་འགྲོ་རྒྱ་མཚོ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ གནས་དང་ཉེ་བའི་གནས་དང་ཡུལ༔ ཉི་ཤུ་རྩ་བཞིའི་མཁའ་འགྲོ་དང༔ སྲུང་མ་ཞིང་སྐྱོང་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཁྱད་པར་འགྲོ་བའི་གཉེན་གཅིག་པུ༔ ཨོ་རྒྱན་པདྨ་འབྱུང་གནས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འདོད་དགུའི་རེ་བ་བསྐང་དུ་གསོལ༔ རྒྱགས་བརྔན་གྱི་གཞུང་དངོས་ནི༔ ཧཱུྃ༔ མཆོད་ཡོན་མེ་ཏོག་བདུག་སྤོས་དྲི༔ ཞལ་ཟས་རོལ་མོ་གཏོར་མ་དང༔ སྐུ་གླུད་བསང་ཕུད་སྣ་ཚོགས་ཀྱིས༔ འཇིག་རྟེན་འདས་དང་མ་འདས་པའི༔ སྲུང་མ་གཉན་པོ་ཐམས་ཅད་དང༔ ལྷ་ཀླུ་གནོད་སྦྱིན་དྲི་ཟ་སོགས༔ ཆེ་དགུ་གཉན་དགུ་ཐམས་ཅད་བརྔན༔ ཤེལ་སྒོང་ནག་པོ་སྤྱི་དཀར་དང༔ ཤ་ཁྲག་དམར་གྱི་གཏོར་མ་ཡིས༔ མ་ཧཱ་ཀ་ལ་ལྕམ་དྲལ་དང༔ ལེགས་ལྡན་ནག་པོ་འཁོར་བཅས་བརྔན༔ རྒྱ་ཆེའི་མཆོད་པ་སྣ་ཚོགས་དང༔ བདུད་རྩི་ཤ་ཁྲག་གསེར་སྐྱེམས་དང༔ མཁའ་ལྡིང་ནག་པོ་གསེར་མིག་གིས༔ དཔལ་ལྡན་ལྷ་མོ་འཁོར་བཅས་བརྔན༔ ཕྱི་ནང་གསང་བའི་མཆོད་གཏོར་དང༔ བྱ་ནག་ཁྱི་སྤྱང་དོམ་དྲེད་དང༔ བསང་ཕུད་སྤྱན་གཟིགས་སྣ་ཚོགས་ཀྱིས༔ སྔགས་བདག་ཤན་པ་གཟའ་མཆོག་དང༔ དམར་ནག་དམ་ཅན་ལ་སོགས་པ༔ སྲུང་མ་དམ་ཅན་འཁོར་བཅས་བརྔན༔ ལྷ་རྣམས་མེ་ཏོག་ཕྲེང་བས་བརྔན༔ ཀླུ་རྣམས་དཀར་གསུམ་གཏོར་མས་བརྔན༔ གཉན་རྣམས་མངར་གསུམ་དར་ཟབ་བརྔན༔ ས་བདག་གསེར་དངུལ་རིན་ཆེན་བརྔན༔ ལྷ་མོ་བསྟན་མ་བུམ་པསྎ དྲི་ཟ་དྲི་དང་གསུར་གྱིསྎ གཤིན་རྗེ་ཤ་ཡི་གཏོར་མསྎ ལྟོ་ཕྱེ་གྲུལ་བུམ་མི་འམ་ཅི༔ མཁའ་ལྡིང་མཆོད་སྦྱིན་གཏོར་མསྎ གནོད་སྦྱིན་རླུང་ལྷ་དྲང་སྲོང་རྣམས༔ གསེར་གཡུ་སྦ་དང་སྙུག་མསྎ དགེ་བསྙེན་ཤ་དང་ཆང་གིསྎ ལྷ་འདྲེ་ཡིད་ཀྱི་གཟུགས་ཅན་རྣམས༔ ཡིད་དང་མཐུན་པའི་གཏོར་མསྎ བཙན་རྣམས་བྱ་དང་རི་དྭགསྎ ཀླུ་བདུད་སྦྲུལ་དང་སྦལ་པསྎ ལན་ཆགས་མགྲོན་རྣམས་གཏོར་མསྎ སྡེ་བརྒྱད་དམ་སྲི་འབྱུང་པོ་རྣམས༔ སྐུ་གླུད་དར་ཟབ་གཏོར་མསྎ རྒྱ་མཚོའི་ནང་གི་ཀླུ་ཆེན་བརྒྱད༔ ཀླུ་རྟ་རྒྱན་དང་བཅས་པསྎ བར་སྣང་གནས་པའི་གཟའ་ཆེན་བརྒྱད༔ ནས་ནག་ར་ནག་སྙིང་གིསྎ རྒྱུ་སྐར་ཉི་ཤུ་རྩ་བརྒྱད་དང༔ བློན་པོ་སུམ་ཅུ་རྩ་བདུན་རྣམས༔ རིན་ཆེན་གསེར་དངུལ་ཕྱེ་མསྎ འཕྲོག་མ་མ་བུ་ལྔ་བརྒྱའི་ཚོགས༔ ཆངས་བུ་དག་གི་གཏོར་མསྎ རིགས་ཀྱི་སྲུང་མ་ཐམས་ཅད་ལ༔ སོ་སོར་དགྱེས་པའི་གཏོར་མསྎ སྒོ་བཞིའི་སྲུང་མ་འཁོར་བཅས་རྣམས༔ རིན་ཆེན་དར་ཟབ་དོང་ཙེསྎ ལྷ་སྲུང་གཉན་པོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱི༔ བསམ་པ་སྒྲུབས་ལ་རེ་བ་སྐོངས༔ འཁོར་སྲུངས་རྐྱེན་ཟློགས་བར་ཆད་སོལ༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱིས༔ བྱང་ཆུབ་ཐུགས་སུ་ཆུད་པའི་ས༔ རྡོ་རྗེ་གདན་གྱི་ས་བདག་བརྔན༔ རྒྱ་གར་ཤར་ནུབ་རི་བོ་ཆེ༔ མ་མོ་མཁའ་འགྲོ་འདུ་བའི་གནས༔ རི་བོ་ཏ་ལའི་ས་བདག་བརྔན༔ རྡོ་རྗེ་གདན་གྱི་བྱང་ཕྱོགས་ན༔ བྱ་རྒོད་ཕུང་པོའི་རི་དང་ནི༔ སྤོས་ངད་ལྡན་པའི་རི་བོ་ཡི༔ ས་བདག་ཀླུ་གཉན་ཐམས་ཅད་བརྔན༔ ཙ་རི་ཙ་གོང་ལ་སོགས་པའི༔ རྒྱ་གར་ཤར་ཕྱོགས་ཡུལ་རྣམས་ཀྱི༔ ས་བདག་གཉན་པོ་ཐམས་ཅདྎ བསིལ་བ་ཚལ་གྱི་དུར་ཁྲོད་དང༔ རྔམ་པ་སྒྲ་སྒྲོག་ཚང་ཚིང་འཁྲིགས༔ ཧ་ཧ་རྒོད་པ་ལ་སོགས་པའི༔ དུར་ཁྲོད་བརྒྱད་ཀྱི་ས་བདགྎ རྒྱལ་པོའི་ཁབ་དང་ཡངས་པ་ཅན༔ མཉན་ཡོད་གནས་བཅས་ལ་སོགས་པའི༔ གྲོང་ཁྱེར་ཡུལ་འཁོར་ཐམས་ཅད་ཀྱི༔ ས་བདག་གཉན་པོ་ཐམས་ཅདྎ གཞན་ཡང་ཁ་ཆེ་ཨོ་རྒྱན་ཡུལ༔ ལི་ཡུལ་བལ་ཡུལ་ལ་སོགས་པའི༔ ས་བདག་གཉན་པོ་ཐམས་ཅདྎ འཇིག་རྟེན་གསུམ་སྣང་མནྡྷ་ར༔ འབིགས་བྱེད་ལ་སོགས་འཛམ་གླིང་རི༔ ས་བདག་གཉན་པོ་ཐམས་ཅདྎ མ་དྲོས་ལ་སོགས་མཚོ་རྣམས་དང༔ གངྒ་པཀྵུ་སིནྡྷུ་སོགས༔ ཆུ་ཆེན་རྣམས་ཀྱི་ས་བདགྎ ཏི་སེ་གངས་རི་ལ་སོགས་པའི༔ མགུར་ལྷ་གཉན་པོ་ཐམས་ཅདྎ མ་དྲོས་ཀླུ་གཉན་ལ་སོགས་པའི༔ ས་བདག་ཀླུ་གཉན་ཐམས་ཅདྎ རི་བོ་གནྡྷ་ལ་སོགས་པའི༔ ལི་ཡི་ས་བདག་གཉན་རྣམསྎ ལྕང་ར་སྨུག་པོ་ལ་སོགས་པའི༔ སོག་ཡུལ་གཞི་བདག་གཉན་པོྎ གཞན་ཡང་གྲུ་གུ་ཞང་ཞུང་ཡུལ༔ གར་ལོག་ལ་སོགས་མཐའ་ཁོབ་ཡུལ༔ གཞི་བདག་གཉན་པོ་ཐམས་ཅདྎ རྒྱ་གར་རྒྱ་ནག་ཧོར་དང་འཇང༔ བལ་ཡུལ་བོད་ཡུལ་ལི་ཡུལ་སོགས༔ གཞི་བདག་གཉན་པོ་ཐམས་ཅད་བརྔན༔ བདག་ཅག་ཡོན་མཆོད་འཁོར་བཅས་ཀྱི༔ འཁོར་སྲུངས་རྐྱེན་ཟློགས་བར་ཆད་སོལ༔ བསམ་པ་སྒྲུབས་ལ་རེ་བ་སྐོངས༔ བཀྲ་ཤིས་བདེ་ལེགས་ཕུན་ཚོགས་མཛོད༔ སྒེར་གསོལ་མཛད་དགོས་རྣམས་དང་། དགྲ་བླ་དཔངས་བསྟོད། གཡང་འགུགས་བཅས་སྐབས་འདིར་བྱ། ཧཱུྃ༔ ཡུལ་ནི་རྡོ་རྗེ་བྲག་དམར་གྱི༔ སྲིང་གཅིག་གངས་དཀར་ཤ་མེད་མ༔ ཆིབས་སུ་དྲེའུ་རྟ་རྐང་གསུམ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་རྨ་ཆེན་སྤོམ་ར་ཡི༔ སྲིང་གཅིག་ཁ་རག་ཁྱུང་བཙུན་མ༔ ཆིབས་སུ་གྱི་ལིང་ཁ་དཀར་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་དབུ་རུ་ཀ་ཚལ་གྱི༔ སྲིང་གཅིག་རྡོ་རྗེ་གཡུ་སྒྲོན་མ༔ ཆིབས་སུ་ཆུ་རྟ་སྔོན་པོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་མ་ཧཱ་དེ་ཝ་ཡི༔ སྲིང་གཅིག་རྡོ་རྗེ་ཀུན་གྲགས་མ༔ ཆིབས་སུ་ཆུ་གླང་སྔོན་པོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ལྷོ་ཡུལ་དེ་སྙིང་གི༔ སྲིང་གཅིག་སྐྱི་མཐིང་གཡའ་མ་སྐྱོང༔ ཆིབས་སུ་གསེར་ཤ་ཡུ་མོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་སྔ་ཕྱི་དེ་གྲོང་ན༔ སྲིང་གཅིག་ཨུག་ཆོས་གཡའ་མོ་བསིལ༔ ཆིབས་སུ་རུས་སྦལ་མགོ་དགུ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་བལ་ཡུལ་གསེར་ཕུག་ན༔ ཨེ་ཀ་ཛཱ་ཊི་རལ་གཅིག་མ༔ ཆིབས་སུ་གཡུ་འབྲུག་སྔོན་མོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ན་ལེན་ཤིང་ལེན་ན༔ བཙན་ལ་རོལ་པའི་སྨན་གཅིག་མ༔ ཆིབས་སུ་དྲེའུ་རྟ་རྐང་གསུམ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ཀོང་ཡུལ་ཀོང་ཕུག་ན༔ གངས་ཀྱི་ཡུམ་ཆེན་གཡུ་བུན་མ༔ ཆིབས་སུ་སྟག་མོ་རི་བཀྲ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་མང་ཡུལ་མང་ཏིང་ན༔ ཆེ་ཞེ་གཙུག་གི་འོད་འཆང་མ༔ ཆིབས་སུ་འབྲོང་བུ་དར་མ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་དབུ་རུ་སྙིང་པོ་ཡི༔ བྱང་གི་མ་ཏིང་ཏིང་མོ་བཙུན༔ ཆིབས་སུ་འབྲོང་ཆེན་འགྱིང་བ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ན་སྒྲུབ་ཡུལ་ཀ་ཚལ་གྱི༔ མདའ་ལ་བཙན་མོ་གདུག་པ་འདུལ༔ ཆིབས་སུ་དོམ་བུ་སྙིང་དཀར་འཆིབ༔ བཤོས་བུ་སྙིང་དང་གཏོར་མས་བརྔན༔ བསྟན་མ་ཆེན་མོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱི༔ བསམ་པ་སྒྲུབས་ལ་རེ་བ་སྐོངས༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ བོད་ཡུལ་ཀུན་གྱི་གཞི་བདག་ནི༔ ཆེ་དགུ་གཉན་དགུ་ཐམས་ཅད་བརྔན༔ རྡོ་རྗེ་ལེགས་པ་ལ་སོགས་པའི༔ གཙང་གི་གཡས་རུ་ཉིན་སྲིབ་ཀྱི༔ གཞི་བདག་གཉན་པོ་ཐམས་ཅད་བརྔན༔ ཐང་ལྷ་བར་ལྷ་ལ་སོགས་པའི༔ དབུ་རུ་ཉིན་སྲིབ་ས་བདགྎ ཤམྦྷོ་གངས་བཟང་ལ་སོགས་པའི༔ གཡོ་རུ་ཉིན་སྲིབ་གཞི་བདགྎ ཡར་འབྲོག་གཡུ་མཚོ་ཕྱུག་མོ་བརྔན༔ བྱང་གི་གནམ་མཚོ་ཕྱུག་མོྎ སྟོད་ཀྱི་ལྷ་རྒོད་མདུང་རྩེྎ འོ་དེ་གུང་རྒྱལ་ལ་སོགས་པའི༔ ཉང་པོ་འོལ་དགའི་གཞི་བདགྎ སྒམ་པོ་དཔལ་རི་ལ་སོགས་པའི༔ དྭགས་པོའི་གཞི་བདག་ཐམས་ཅདྎ ཀོང་བཙུན་དེ་མོ་ལ་སོགས་པའི༔ ཀོང་པོའི་གཞི་བདག་གཉན་པོྎ རྡོ་རྗེ་བྲག་སྐྱེས་ལ་སོགས་པའི༔ མོན་ཡུལ་རྡོ་དང་གློ་རྣམས་ཀྱི༔ གཞི་བདག་གཉན་པོ་ཐམས་ཅདྎ སྐུ་ལྷ་མཁའ་རི་ལ་སོགས་པའི༔ ལྷོ་བྲག་ཡུལ་གྱི་གཞི་བདགྎ ནགས་སོགས་ཆུ་རྒྱུད་དགེ་བསྙེན་དང༔ ཨ་ལ་རྔོད་ཀྱི་གཞི་བདག་བརྔན༔ རྔུ་ཡི་ཉིན་སྲིབ་ས་བདག་དང༔ གཞི་བདག་གཉན་པོ་ཐམས་ཅདྎ ལྷོ་ཡི་རོང་ལྷ་རྒྱལ་མཚན་དང༔ རོང་བཙན་ཁ་བ་དཀར་པོྎ དབང་ལྷ་མོ་ནམ་མཆེད་བརྒྱད་དང༔ དམག་དཔོན་དགྲ་འདུལ་དབང་ཕྱུག་དང༔ སྨུག་རི་དམུ་བཙན་ལ་སོགས་པའི༔ ཚ་བ་སྒང་གི་གཞི་བདགྎ སྐམ་གྱི་མཐོང་ལ་རྨོག་གཞུ་དང༔ གཟེ་ཡི་རྔ་མོང་གྭ་པ་དང༔ ལྕི་ཡི་བྲག་ལ་མདའ་ཟུག་དང༔ ཟླ་སྙིང་དཀར་ནག་གསུམ་མདོ་དང༔ རྩི་ཡི་སྦ་རྒོད་མཐོན་པོ་དང༔ རྒྱམ་རྡོའི་གངས་དཀར་མཆེད་བརྒྱད་དང༔ ཟླ་བའི་གཞི་བདག་གཉན་པོ་བརྔན༔ ཀླུ་རྒྱལ་མི་མགོན་དཀར་པོ་སོགས༔ སྨར་ཁམས་སྒང་གི་གཞི་བདགྎ ལྷ་ཡི་དགེ་བསྙེན་ཆེན་པོ་སྟེ༔ སྒྱོགས་ཆེན་སྡོང་ར་ལ་སོགས་པའི༔ འབྲི་ཀླུང་ཉིན་སྲིབ་གཞི་བདགྎ ལྡན་གྱི་ཝེར་ཏེ་སྨེ་དགུ་དང༔ གེར་མཚོའི་རི་བོ་དབང་གཞུ་དང༔ མཚམས་ལྔའི་གཞི་བདག་གཉན་རྣམསྎ བཛྲ་བྲམ་ཟེ་ལ་སོགས་པའི༔ སྤོམ་འབོར་སྒང་གི་གཞི་བདགྎ ཤར་གྱི་རྨ་ཆེན་སྤོམ་ར་ནི༔ རྨ་རིགས་སུམ་བརྒྱ་དྲུག་ཅུ་མཆེད༔ སྲིང་ལྕམ་བཞི་བཅུ་རྩ་ལྔར་བཅས༔ རྨ་ཀླུང་ཉིན་སྲིབ་གཞི་བདགྎ བེ་འུ་ཡི་ནི་དུག་མཚོ་དང༔ སྟོང་ར་ཡི་ནི་མཚོ་ནག་དང༔ དབུ་ཡི་ཚྭ་མཚོ་དཀར་པོ་དང༔ ཁྲི་ཤོར་རྒྱལ་མོའི་མཚོ་དང་ནི༔ ཙོང་ཁ་ཡི་ནི་མཚོ་སྔོན་དང༔ མཚོ་སྨན་རྒྱལ་མོ་མཆེད་ལྔྎ དགེ་རི་གཉན་པོ་ལ་སོགས་པའི༔ ཙོང་ཁའི་གཞི་བདག་གཉན་པོྎ བྷ་དང་བྱ་རོག་ཧ་ལ་ཤན༔ གྷ་དང་བྱང་ངོས་གཞི་བདགྎ བྷ་དའི་བཙན་རྒོད་ལ་སོགས་པའི༔ གནས་རི་གནས་མར་ས་བདགྎ རྨ་ལུང་དན་ཏིག་ལ་སོགས་པའི༔ རྨ་ཡི་ཡུལ་གྱི་ས་བདགྎ གཞོན་ནུ་ཀརྟི་ལ་སོགས་པའི༔ ཧལ་ཧའི་ཡུལ་གྱི་གཞི་བདགྎ གཞོང་ལག་ལ་འོ་ཆེ་ལ་སོགས༔ གཡར་མོ་ཐང་གི་གཞི་བདགྎ སྤྱི་ཡི་མདུང་རི་མཐོན་པོ་དང༔ སྤོ་རི་བྲག་དམར་སྒང་རྒྱུདྎ སྤོ་ནའི་ཤེལ་ལུང་ཕྱུག་མོ་དང༔ གྲོལ་གྱི་མ་ལུང་གྲལ་གསུམ་དང༔ རྨང་གྲོལ་རལ་གསུམ་གཞི་བདགྎ དགུ་མིག་བཞི་གསུམ་གཞི་བདགྎ སྙེ་གོང་སྙེ་དམར་ལ་སོགས་པའི༔ སྙེ་གོང་ཉིན་སྲིབ་གཞི་བདགྎ བྲག་དམར་བྱ་རྒོད་ལ་སོགས་པའི༔ ཏེ་ཆུའི་ས་བདག་གཉན་པོྎ ལྷ་སྲིན་གདུག་པ་མང་བྱེད་པའི༔ འོ་དེ་རལ་གསུམ་ས་བདགྎ ཤིན་ཏུ་ཁྲོ་གཏུམ་ཆེ་བ་ཡི༔ རྒྱལ་མོ་རོང་གི་གཞི་བདགྎ འཇང་རི་སྨུག་པོ་ལ་སོགས་པའི༔ འཇང་ཡུལ་གཞི་བདག་གཉན་པོྎ རི་བོ་རྩེ་ལྔ་ལ་སོགས་པའི༔ རྒྱ་ནག་ཡུལ་གྱི་གཞི་བདགྎ ཤར་ཕྱོགས་བ་རེག་འོ་དེ་ཡི༔ ལྷ་ཀླུ་གནོད་སྦྱིན་དྲི་ཟ་སོགས༔ ཆེ་དགུ་གཉན་དགུ་ཐམས་ཅད་བརྔན༔ བདག་ཅག་ཡོན་མཆོད་འཁོར་བཅས་ཀྱི༔ རེ་བ་ཐམས་ཅད་སྐོང་བ་དང༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ གཞན་ཡང་སྟོང་གསུམ་འཛམ་གླིང་ཡུལ༔ ས་འོག་ས་སྟེང་ས་བླ་ཡི༔ གཞི་བདག་གཉན་པོ་ཐམས་ཅད་བརྔན༔ ས་ལ་གནས་པའི་ས་བདགྎ ཆུ་ལ་གནས་པའི་ཀླུ་རྣམསྎ བྲག་ལ་གནས་པའི་བཙན་རྣམསྎ བར་སྣང་གནས་པའི་གཉན་རྣམསྎ ཡུལ་ལྷ་གཞི་བདག་གཉན་པོྎ ལ་ལ་གནས་པའི་གཞི་བདགྎ ཕྲང་ལ་གནས་པའི་གཞི་བདགྎ གྲུ་ཟམ་གནས་པའི་གཞི་བདགྎ ལམ་ལ་གནས་པའི་གཞི་བདགྎ གཞི་བདག་གཉན་པོ་ཁྱེད་རྣམས་ཀྱང༔ མཐུ་སྟོབས་རྫུ་འཕྲུལ་སོ་སོར་ཆེ༔ དཔལ་དང་འབྱོར་པ་སོ་སོར་ཆེ༔ མངའ་རིས་མངའ་ཐང་སོ་སོར་ཆེ༔ མཛད་པ་འཕྲིན་ལས་སོ་སོར་ཆེ༔ མཆོད་པའི་འོས་སུ་སོ་སོར་ཆེ༔ དེ་བས་གཞི་བདག་གཉན་རྣམས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འདོད་པའི་དོན་ལ་གསོལ་འདེབས་ཀྱིས༔ སྔོན་གྱི་ཐུགས་དམ་བརྩེར་དགོངས་ལ༔ དགྱེས་པའི་མཆོད་པ་བཞེས་ནས་ཀྱང༔ བདག་གི་རེ་བ་བསྐང་དུ་གསོལ༔ བརྔན་འོས་ཁྱེད་རྣམས་བརྔན་པ་ཡིས༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ གཞན་ཡང་བརྔན་པར་འོས་པའི་མགྲོན༔ མིང་དང་མཚན་ནས་མ་ཐོན་པའི༔ བླ་མ་ཡི་དམ་མཁའ་འགྲོ་དང༔ སྲུང་མ་དམ་ཅན་རྒྱ་མཚོ་དང༔ ལྷ་དང་དྲང་སྲོང་ཐམས་ཅད་དང༔ ཡུལ་ལྷ་ནོར་ལྷ་ནང་ལྷ་དང༔ ལམ་ལྷ་གཉན་པོ་ཐམས་ཅད་དང༔ གཞན་ཡང་དུས་གསུམ་ཕ་མ་དང༔ ཁམས་གསུམ་རིགས་དྲུག་ཐམས་ཅད་དང༔ ཡི་དྭགས་རྣམས་དང་བགེགས་རྣམས་དང༔ ལན་ཆགས་སྙིང་རྗེའི་མགྲོན་རྣམས་དང༔ གློ་བུར་ལྷགས་པའི་མགྲོན་རྣམས་དང༔ ལྷག་མའི་མགྲོན་རིགས་ཐམས་ཅད་ལ༔ རྒྱལ་ཕམ་མེད་པར་ཐོབ་ནས་ཀྱང༔ ཡིད་ལ་རེ་བ་རྫོགས་པར་ཤོག༔ ཧཱུྃ༔ དེ་ལྟར་མགྲོན་རིགས་ཐམས་ཅད་ཀྱི༔ མངའ་རིས་སྤྱན་ལམ་སོ་སོ་རུ༔ མཆོད་སྦྱིན་དམ་པ་འདི་བསྔོས་པས༔ ལོངས་སྤྱོད་ནམ་མཁའ་མཛོད་གྱུར་ཏེ༔ གང་ལ་ཅི་དགོས་ཐོབ་པར་ཤོག༔ མགྲོན་རྣམས་བརྔན་པའི་བྱིན་རླབས་ཀྱིས༔ བདག་གི་དོན་རྣམས་འགྲུབ་པར་ཤོག༔ སྔོན་ཚེ་སློབ་དཔོན་པདྨ་ཡིས༔ རྒྱགས་བརྔན་ཆེན་པོ་འདི་མཛད་པས༔ གཙུག་ལག་གྲུབ་ཅིང་མཐའ་དམག་ཐུལ༔ རྗེ་ཡི་དགོངས་པ་གྲུབ་པ་ལྟར༔ བདག་གི་དོན་རྣམས་མངག་པ་ནི༔ བདག་ཅག་ཡོན་མཆོད་འཁོར་བཅས་ཀྱི༔ འཁོར་སྲུངས་རྐྱེན་ཟློགས་བར་ཆད་སོལ༔ ཚེ་སྲིངས་དཔལ་དང་འབྱོར་པ་སྤེལ༔ སྙན་པ་སྒྲུབས་ལ་གྲགས་པ་སྒྲོགས༔ རྟག་ཏུ་འགོ་ཞིང་གྲོགས་མཛོད་ལ༔ འགྲོ་ལམ་བདེ་ཞིང་འཇིགས་པ་མེད༔ ལམ་འཕྲང་བདེ་བར་བགྲོད་པ་དང༔ རྙེད་པ་ཆེན་པོ་འགྲུབ་པ་དང༔ གཞིས་བྱེས་ཀུན་ཏུ་བཀྲ་ཤིས་ཤོག༔ ལྷ་དང་སྲུང་མ་ཐམས་ཅད་ཀྱང༔ དགེ་དང་ཞི་བའི་ལས་མཛད་པ༔ དམ་ཆོས་རིན་ཆེན་སྤྱོད་པར་ཤོག༔ ཀུན་ཀྱང་རྒྱལ་བའི་བཀའ་ལ་ཉོན༔ སྡིག་པ་ཅི་ཡང་མི་སྤྱད་ཅིང༔ དགེ་བ་ཕུན་སུམ་ཚོགས་པར་སྤྱད༔ རང་གི་སེམས་ནི་ཡོངས་སུ་འདུལ༔ འདི་ནི་སངས་རྒྱས་བསྟན་པ་ཡིན༔ ཆོས་རྣམས་གཟུགས་བརྙན་ལྟ་བུ་སྟེ༔ དག་ཅིང་གསལ་ལ་རྙོག་པ་མེད༔ གཟུང་དུ་མེད་ཅིང་བརྗོད་དུ་མེད༔ རྒྱུ་དང་ལས་ལས་ཀུན་ཏུ་འབྱུང༔ དེ་ལྟར་ཆོས་རྣམས་ཤེས་གྱིས་ལ༔ སེམས་ཅན་དོན་ནི་མཉམ་མེད་བྱོས༔ འོན་ཀྱང་སྐྱོབ་པའི་སྲས་སུ་སྐྱེ༔ དེ་ལྟར་ཆོས་དང་ཟང་ཟིང་གི༔ སྦྱིན་པས་ཚོགས་ཆེན་ཀུན་རྫོགས་ཏེ༔ ཐམས་ཅད་མངོན་པར་སངས་རྒྱས་ཤོག༔ འཕྲིན་ལས་རྣམ་བཞི་ལྷུན་གྱིས་གྲུབ༔ གཞན་དོན་ནུས་པ་མཐར་ཕྱིན་ནས༔ བྱིན་རླབས་དངོས་གྲུབ་ཡིད་བཞིན་གཏེར༔ ཀུན་བཟང་ཡེ་ཤེས་ཐོབ་པར་ཤོག༔ གནས་སྐབས་གནས་དང་ལམ་བགྲོད་དང༔ རྩོད་དང་དམག་དང་དགྲ་འཐབ་ལས༔ བདག་ཅག་ཡོན་མཆོད་རྒྱལ་གྱུར་ཅིག༔ གང་འདོད་དོན་ཀུན་འགྲུབ་པར་ཤོག༔ མགྲོན་པོ་དག་ནི་དོན་གཉེར་བར༔ ཕྱོགས་རྣམས་སུ་ནི་འགྲོ་བ་ན༔ བདག་གི་དོན་ཀུན་འགྲུབ་པ་དང༔ རྙེད་པ་ཆེན་པོ་ཐོབ་པར་ཤོག༔ ཕྱོགས་རྣམས་ཀུན་གྱི་ལྷ་རྣམས་དང༔ འཇིག་རྟེན་སྐྱོང་བ་གྲགས་དང་ལྡན༔ བཀྲ་ཤིས་བདེ་ལེགས་བྱེད་པོ་རྣམས༔ སྐྱེ་དགུ་ཀུན་གྱི་བསྲུང་བར་ཤོག༔ གསུམ་པ་མཇུག་གི་ཆོ་ག་ནི། ཡིག་བརྒྱས་ལྷག་ཆད་ཁ་བསྐངས་ལ། ཧཱུྃ༔ མགྲོན་རྣམས་ཀུན་གྱི་སྤྱན་ལམ་དུ༔ བདག་གིས་མཆོད་སྦྱིན་བཤམས་པ་ལ༔ འགལ་འཁྲུལ་ནོངས་པ་ཅི་མཆིས་པ༔ ཐམས་ཅད་མ་ལུས་བཟོད་པར་གསོལ༔ གཙོ་བོས་ནུས་པ་མ་མཆིས་པ༔ མ་འབྱོར་མ་རྙེད་མ་ཚང་བ༔ འདིར་ནི་བྱ་མིན་གང་བྱས་པ༔ དེ་དག་ཐམས་ཅད་བཟོད་པར་གསོལ༔ ཨོཾ༔ ཁྱེད་ཀྱིས་སེམས་ཅན་དོན་ཀུན་མཛད༔ རྗེས་སུ་མཐུན་པའི་དངོས་གྲུབ་སྩོལ༔ སངས་རྒྱས་ཡུལ་དུ་གཤེགས་ནས་ཀྱང༔ སླར་ཡང་འབྱོན་པར་མཛད་དུ་གསོལ༔ འཇིག་རྟེན་འདས་དང་མ་འདས་ཀྱི༔ མགྲོན་རྣམས་མ་ལུས་ཐམས་ཅད་ཀུན༔ རང་རང་བདེ་བར་གཤེགས་ནས་ཀྱང༔ སླར་ཡང་འབྱོན་པར་མཛད་དུ་གསོལ༔ ཨོཾ་བཛྲ་མུ༔ སརྦ་ལོ་ཀ་གཙྪ༔ རྒྱགས་བརྔན་ཆེན་མོ་སློབ་དཔོན་པདྨས་མཛད་པ་རྫོགས་སོ༔ བྲག་རི་དུག་སྦྲུལ་སྤུངས་འདྲའི་སྐེད་ནས་རིག་འཛིན་རྒོད་ཀྱི་ལྡེམ་འཕྲུ་ཅན་གྱིས་གཏེར་ནས་གདན་དྲངས་པའོ།། །། ༄༅། །བྱང་གཏེར་གྱི་དགྲ་བླ་དཔངས་བསྟོད་གཞན་ཕན་རོལ་པ་ཞེས་བྱ་བ་བཞུགས་སོ། །དགྲ་བླ་དཔངས་བསྟོད་འདི་ལ་བསང་མཆོད་གཞུང་བཞིན་བྱས་ལ༔ གོ་མཚོན་མདའ་གཞུ་ཁྲབ་རྨོག་འཁོར་གསུམ་དང༔ འོག་རྟ་མདའ་དར་དཀར་པོ་དང༔ ཤ་ཁྲག་དམར་གཏོར་མདུད་དར་དང༔ དཀར་གསུམ་མངར་གསུམ་ཕྱེ་མར་འོ་སྐོལ་དང༔ གསེར་སྐྱེམས་གཡུ་སྔོན་དང་བཅས་བཤམས་ལ༔ ལས་ཀྱི་རྡོ་རྗེས་དམག་མི་ཚོ་ཁ་ལག་བཀྲུར་བཅུག་སྤོས་བསྲེག་ནས་གཡུག་ཆབ་བྲན༔ དེ་ནས་སྙན་ངར་འབོལ་གསུམ་འཛོམ་པའི་གསུང་སྐད་དང༔ སྔགས་པའི་དབྱངས་ཀྱིས་ཐོག་མར་འདི་སྐད་དོ༔ དཔག་བསམ་ནམ་མཁའི་ཀློང་རུམ་དུ༔ དུང་སྐྱོང་དཀར་པོ་ཡེ་ནས་སྲིད༔ ཞལ་གྱི་རླངས་པ་རླུང་ལྟར་འཕྱོ༔ ནམ་མཁའི་མཐོངས་ནས་སྤྲིན་ལྟར་འཕྱོ༔ དེ་ལས་ཆུ་ཡི་ཟིལ་འཕྲོས་པས༔ བདུད་རྩི་རྒྱ་མཚོར་མེར་ཏེ་འཁྱིལ༔ སྟེང་དུ་འཕྱོ་བའི་ལྦུ་བ་ལ༔ སྒོ་ང་བརྒྱ་དང་སྟོང་དུ་སྲིད༔ ནག་པོ་ལྕགས་ཀྱི་སྒོ་ང་བརྒྱ༔ རྡོལ་བའི་ནང་ནས་བྱུང་བ་ནི༔ ལྕགས་ཀྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ནག་པོ་བདུད་ཀྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ གསེར་སྒོང་བརྒྱ་པོ་རྡོལ་པ་ལས༔ གསེར་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ བཙུན་པ་དམུ་ཡི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ གཡུ་སྒོང་བརྒྱ་པོ་རྡོལ་པ་ལས༔ གཡུ་ཡི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཡེ་མཁྱེན་སྐོལ་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ དངུལ་སྒོང་བརྒྱ་པོ་རྡོལ་པ་ལས༔ དངུལ་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཡེ་མཁྱེན་སྨན་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ འཁར་སྒོང་བརྒྱ་པོ་རྡོལ་པ་ལས༔ འཁར་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ བདུད་འདུལ་འཁར་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ དུང་སྒོང་བརྒྱ་པོ་རྡོལ་པ་ལས༔ དུང་གི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཆུ་ཁམས་རླུང་གི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ བསེ་སྒོང་བརྒྱ་པོ་རྡོལ་པ་ལས༔ བསེ་ཡི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ མགོ་ནག་མི་ཡི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ ཅེས་སྤྱན་འདྲེན་ནོ༔ དགྲ་བླ་དཔངས་བསྟོད་ཀྱི་བསང་ནི༔ ཕྱེ་མར་ཇ་ཕུད་ཆང་ཕུད་རྣམས་བསང་ཁང་དུ་འབུལ་ཞིང་གསོལ་བ་བཏབ༔ ལྷ་གསོལ་ནས་བསང་གི་རིམ་པ་ནི་འདི་སྐད་དོ༔ ཀྱཻ༔ གསེར་ལོ་འབར་བའི་སྟག་པ་དང༔ གཡུ་ལོ་འབར་བའི་ཤུག་པ་དང༔ དུང་ལོ་འབར་བའི་སུར་དཀར་དང༔ མཁན་པ་སྤོས་དང་ཨ་ཀ་རུ༔ བདུད་རྩི་ཅན་གྱི་དུད་པ་ཡིས༔ སྐུ་གསུང་ཐུགས་ཀྱི་དགྲ་བླ་བསང༔ ཡེ་ནས་སྲིད་པའི་དགྲ་བླ་བསང༔ མཐོན་པོ་དགུང་གི་དགྲ་བླ་བསང༔ དམའ་བ་ས་ཡི་དགྲ་བླ་བསང༔ ཤར་ཕྱོགས་གླིང་གི་དགྲ་བླ་ནི༔ དུང་སེང་གཡུ་ཡི་རལ་ཅན་བསང༔ ལྷོ་ཕྱོགས་གླིང་གི་དགྲ་བླ་ནི༔ གཡུ་འབྲུག་མེ་ཡི་ཟེ་ཅན་བསང༔ ནུབ་ཕྱོགས་གླིང་གི་དགྲ་བླ་ནི༔ གླང་ཆེན་གསེར་གྱི་རྣ་ཅན་བསང༔ བྱང་ཕྱོགས་གླིང་གི་དགྲ་བླ་ནི༔ མཚལ་སྟག་གཡུ་ཡི་རལ་ཅན་བསང༔ དགྲ་བླ་ཁྱུང་འབྲུག་སེང་གསུམ་བསང༔ སྨོན་པ་འགྲུབ་པའི་དགྲ་བླ་བསང༔ འདོད་དགུ་འབྱུང་བའི་དགྲ་བླ་བསང༔ མྱུར་མགྱོགས་ཆེ་བའི་དགྲ་བླ་བསང༔ དཔའ་སྙིང་ཆེ་བའི་དགྲ་བླ་བསང༔ དགྲ་དཔུང་འཇོམས་པའི་དགྲ་བླ་བསང༔ བགེགས་དཔུང་ཞི་བའི་དགྲ་བླ་བསང༔ ཅི་བསམ་འགྲུབ་པའི་དགྲ་བླ་བསང༔ བསྡུས་པ་བྱེད་ན་ལ་རྫས་ཀྱི་གཏོར་མ་འདིར་འབུལ༔ ཀྱཻ༔ དགྲ་བླ་མཐུ་ཆེན་ཁྱེད་རྣམས་ལ༔ ཤ་ཁྲག་དམར་གྱི་གཏོར་མ་དང༔ དཀར་གསུམ་མངར་གསུམ་མཆོད་རྫས་དང༔ ཕྱེ་མར་འོ་སྐོལ་སྐྱེམས་ཕུད་དང༔ མཐུན་པའི་དམ་རྫས་སྣ་ཚོགས་ཀྱིས༔ མགོན་སྐྱབས་བྱེད་པའི་དགྲ་བླ་མཆོད༔ བོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་རྟུལ༔ རྦད་པའི་ཚེ་ན་མཐུ་མ་ཆུང༔ དགྲ་དཔུང་འཇོམས་པའི་དགྲ་བླ་ཡིས༔ སྐུ་ཡི་སྤྲུལ་པ་མེ་ལྟར་འབར༔ གསུང་གི་སྤྲུལ་པ་འབྲུག་ལྟར་ལྡིར༔ ཐུགས་ཀྱི་སྤྲུལ་པ་གློག་ལྟར་འཁྱུག༔ ཡང་སྤྲུལ་ལྕགས་ཀྱི་བྱ་ཁྲ་དང༔ དུང་གི་བྱ་ཁྱུང་ཀ་རུ་དང༔ བསེ་ཡི་བྱ་གླག་རྨུག་པོ་རྣམས༔ འཕུར་ཞིང་ལྡིང་ལ་གཞུར་པ་དང༔ དགྲ་བོའི་དཔུང་རྣམས་རྡུལ་དུ་རློགས༔ ཞེས་མཆོད་དེ༔ རྟེན་འཛུགས་ཀྱི་རིམ་པ་ནི༔ འཁོར་གསུམ་མཚོན་ཆ་ལ༔ ཆབ་དང་བདུད་རྩི་བྲན༔ དེ་ནས་གྲི་འདོན༔ སྔགས་རྒན་དག་གིས་གྱེར་བ་ནི་འདི་སྐད་དོ༔ ཀྱཻ༔ དགྲ་བླ་གཉན་པོ་འཁོར་བཅས་ལ༔ ཁྲབ་རྨོག་ཕུབ་ཞོལ་འཁོར་གསུམ་དང༔ སྤྱན་གཟིགས་གོ་མཚོན་སྣ་ཚོགས་པ༔ ཆགས་ཤིང་འགོ་བའི་རྟེན་དུ་འཛུགས༔ ཁྲབ་སྟོད་སེང་གེ་འགྱིང་པ་འདྲ༔ ཁྲབ་སྐེད་དངུལ་གྱི་རྡོ་རྗེ་འདྲ༔ ཁྲབ་གཤམ་ཁྱུང་གཤོག་བརྒྱངས་པ་འདྲ༔ སྲོག་རི་སྲོག་མཁར་སྲོག་རྩེ་གསུམ༔ ལྷ་ལྕམ་བག་མར་ཆས་པ་འདྲ༔ འདྲ་བཞིས་སྤྲས་པའི་སྲོག་མཁར་འདི༔ དགྲ་བླ་གཉན་པོའི་རྟེན་དུ་འཛུགས༔ ཀྱཻ༔ རྨོག་ལ་གླིང་བཞི་ཟུར་བཞི་ལྡན༔ རྨོག་གི་ཤར་གྱི་གླིང་ཁམས་ན༔ དགྲ་བླ་གོས་སྔོན་གཤོག་རིང་བཀོད༔ རྨོག་གི་ལྷོ་ཡི་གླིང་ཁམས་ན༔ མགོན་བྱེད་དཀར་པོའི་དགྲ་བླ་བཀོད༔ རྨོག་གི་ནུབ་ཀྱི་གླིང་ཁམས་ན༔ འགྲོ་བ་བདུད་འདུལ་དགྲ་བླ་བཀོད༔ རྨོག་གི་བྱང་གི་གླིང་ཁམས་ན༔ སྣང་གསལ་སྒྲོན་མེའི་དགྲ་བླ་བཀོད༔ རྩེ་ལ་བྱ་རྒྱལ་རྒོད་སྒྲོས་མཚན༔ ཡ་མཚན་ཅན་གྱི་ལྕགས་ཞྭ་འདི༔ དགྲ་བླ་གཉན་པོའི་རྟེན་དུ་འཛུགས༔ མི་འཇིག་སྲ་བརྟན་མཛེས་པའི་ཕུབ༔ གཟི་བརྗིད་རྔ་མས་མཛེས་པར་བརྒྱན༔ གནམ་ལྕགས་འབར་བའི་ཞོལ་གྱིས་མཚན༔ ཕུབ་མོའི་ཤར་གྱི་གླིང་ཁམས་ན༔ བསྙབ་པ་ལག་རིང་དགྲ་བླ་བཀོད༔ ཕུབ་མོའི་ལྷོ་ཡི་གླིང་ཁམས་ན༔ འགྲོ་བ་བང་མགྱོགས་དགྲ་བླ་བཀོད༔ ཕུབ་མོའི་ནུབ་ཀྱི་གླིང་ཁམས་ན༔ ཁུར་བ་སྟོབས་ཆེན་དགྲ་བླ་བཀོད༔ ཕུབ་མོའི་བྱང་གི་གླིང་ཁམས་ན༔ སྣང་གསལ་འོད་ལྡན་དགྲ་བླ་བཀོད༔ འོད་ཟེར་སྣ་ཚོགས་དྲྭ་བས་ཁྱབ༔ གཡས་གཡོན་དར་གྱི་འཕྲུ་དང་བཅས༔ ཡ་མཚན་ཅན་གྱི་ཕུབ་ཆེན་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བགེགས་འབྱུང་པོ་འགུག་བྱེད་པའི༔ མདུང་རྩེ་གནམ་དུ་བསྟན་པ་འདི༔ རྣོ་ངར་ལྡན་པའི་དགྲ་བླའི་རྟེན༔ བ་དན་བར་སྣང་འཕྱོ་བ་འདི༔ དགྲ་བོའི་བླ་འགུགས་དགྲ་བླའི་རྟེན༔ མདུང་རྟིང་ས་ལ་བཙུགས་པ་འདི༔ འཕོ་འགྱུར་མེད་པའི་དགྲ་བླའི་རྟེན༔ མདུང་སྐེད་ལག་པས་བཟུང་བ་འདི༔ དགྲ་བགེགས་སྲོག་གཅོད་དགྲ་བླའི་རྟེན༔ ཡང་ལ་རིང་བ་རྣོ་བའི་མཚོན༔ སྣ་ཚོགས་དར་གྱི་འཕན་བཅས་འདི༔ དགྲ་བླ་གཉན་པོའི་རྟེན་དུ་འཛུགས༔ མཆོག་དཀར་གཞུ་མོ་བདུངས་པ་འདི༔ གཞུ་རྒྱུད་དྲང་བའི་གདང་རིང་ལ༔ དགྲ་བླ་ཆེ་བ་ཀུན་བཞིན་བཀོད༔ མཆོག་དཀར་གཞུ་ཡི་མཆོག་མ་ལ༔ མྱུར་མགྱོགས་སྟོབས་ཆེན་དགྲ་བླ་བཀོད༔ མདའ་མོ་ཤུགས་རྒོད་ཐོག་འབེབ་ལ༔ དགྲ་བླ་ངར་མ་ཀླད་གཞུར་བཀོད༔ ཁྱུང་ཆེན་གཡུ་ཡི་སྒྲོ་གསུམ་ལ༔ དགྲ་བླ་རྣོ་ཆོད་ངར་མ་བཀོད༔ མདེ་འུ་རྡོ་རྗེ་ཕ་ལམ་ལ༔ དགྲ་བླ་རྩེ་མོས་རྣོ་གཅོད་བཀོད༔ ཡ་མཚན་ཅན་གྱི་མདའ་གཞུ་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བོའི་སྐྱེ་རྒྱུད་གཅོད་པ་ཡི༔ གནམ་ལྕགས་འབར་བའི་རལ་གྲི་འདི༔ རྩེ་མོ་མེ་ཡི་ཕུང་པོ་ལ༔ དགྲ་བགེགས་སྲོག་གཅོད་དགྲ་བླ་བཀོད༔ ཡུ་བ་རྔམ་བརྗིད་འཕྲོ་བ་ལ༔ སྲུང་མ་ཐོགས་མེད་དགྲ་བླ་བཀོད༔ གཞུང་རིང་ཚངས་པ་འདྲ་བ་ལ༔ འགྱུར་བ་མེད་པའི་དགྲ་བླ་བཀོད༔ ཐུག་གཅོད་རལ་གྲི་འཇའ་དང་ལྡན༔ རབ་འཇིགས་དཔའ་བོའི་ཕྱག་མཚན་འདི༔ དགྲ་བླ་གཉན་པོའི་རྟེན་དུ་འཛུགས༔ ཅང་ཤེས་ཤུགས་ལྡན་གྱི་ལིང་རྟ༔ དེ་ཡི་ཟེ་རྔོག་གཡས་གཡོན་ལ༔ དགྲ་བླ་དུང་སྐྱོང་དཀར་པོ་བཀོད༔ གྱི་ལིང་རྟ་ཕོའི་རྣ་མཆོག་ལ༔ གསལ་བྱེད་གསལ་བའི་དགྲ་བླ་བཀོད༔ དཔུང་པ་རླུང་གི་འཁོར་ལོ་ལ༔ མཚོ་ལ་ངར་བྱེད་དགྲ་བླ་བཀོད༔ ཚང་ར་སྨད་ཀྱི་འགྲོ་བ་ལ༔ ཕ་གཅིག་བཙན་ལ་རོལ་པ་བཀོད༔ མདོ་བ་བདེ་བའི་རྨིག་བཞི་ལ༔ མགྱོགས་བྱེད་སྟོབས་ཀྱི་དགྲ་བླ་བཀོད༔ གང་འདོད་ས་ལ་ཐོགས་མེད་སྦྱོར༔ མྱུར་མགྱོགས་རླུང་གི་རྟ་ཕོ་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བླ་རི་རྒྱལ་ལྷུན་པོ་ལ༔ དམག་མི་རྩི་ཤིང་རྒྱས་པ་འདྲ༔ དགྲ་བླ་ཉི་ཟླ་ཤར་བ་ལ༔ དམག་མི་རྒྱུ་སྐར་བཀྲམ་པ་འདྲ༔ དགྲ་བླ་གངས་ཀྱི་སེང་གེ་ལ༔ དམག་མི་གཡུ་རལ་རྒྱས་པ་འདྲ༔ དགྲ་བླ་རྒྱ་སྟག་ཁྲ་བོ་ལ༔ དམག་མི་འཛུམ་དྲུག་རྒྱས་པ་འདྲ༔ དགྲ་བླ་བྱ་ཁྱུང་ག་རུ་ལ༔ དམག་མི་སྒྲོ་གཤོག་རྒྱས་པ་འདྲ༔ དགྲ་བླ་གཡུ་འབྲུག་སྔོན་མོ་ལ༔ དམག་མི་གློག་འོད་འཁྱུག་པ་འདྲ༔ དགྲ་བླ་རྒྱ་མཚོ་འཁྱིལ་བ་ལ༔ དམག་མི་ཡིད་བཞིན་ནོར་བུ་འདྲ༔ ཀྱཻ༔ དེ་རིང་སྲིད་པའི་དགྲ་བླ་མཆོད༔ བྲོས་ན་ཐར་བའི་དགྲ་བླ་མཆོད༔ དེད་ན་ཟིན་པའི་དགྲ་བླ་མཆོད༔ གོ་ཁྲབ་སྲ་བའི་དགྲ་བླ་མཆོད༔ འོག་རྟ་མགྱོགས་པའི་དགྲ་བླ་མཆོད༔ ཤགས་ཁ་ཐུབ་པའི་དགྲ་བླ་མཆོད༔ ཅི་བསམ་འགྲུབ་པའི་དགྲ་བླ་མཆོད༔ ཅེས་བསྟོད་དོ༔ དཔངས་བསྟོད་ཀྱི་རིམ་པ་ནི་འདི་སྐད་དོ༔ ཀྱཻ༔ དགྲ་བླ་འཁོར་བཅས་དཔངས་བསྟོད་དོ༔ གངས་ལ་ཉི་མ་ཤར་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ སེང་གེ་གཡུ་རལ་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ སྟག་ལ་འཛུམ་དྲུག་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ ཁྱུང་ཆེན་མཁའ་ལ་འཕྱོ་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ གཡུ་འབྲུག་མཁའ་ལ་སྒྲ་སྒྲོག་བཞིན༔ དགྲ་བླ་གཉན་པོ་དཔངས་བསྟོད་དོ༔ ཤ་བ་རྭ་བཅུ་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མདུང་ལ་བ་དན་བཏགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ རྨོག་ལ་རྒོད་འཕྲུ་བཙུགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ ཁྲབ་ལ་འཛབ་ཞོལ་བཏགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ གྲི་ལ་རྣོ་ངར་འཛོམ་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ གཞུ་མོ་རྒྱུད་ཀྱིས་བདུངས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མདའ་ལ་སྒྲོ་གསུམ་བསྐྱོན་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཁའ་ལ་དར་ཆེན་འཕྱར་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཚོ་ལ་ཉ་མོ་འཕྱོ་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཁར་ལ་བ་གམ་བསྐྱོན་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ དགུང་ལ་ཉི་མ་ཤར་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ དེ་ལྟར་མངའ་གསོལ་དཔངས་བསྟོད་པས༔ བདག་ཅག་ཡོན་མཆོད་འཁོར་བཅས་རྣམས༔ ཕྱོགས་བཞི་མཚམས་བརྒྱད་གར་འགྲོ་ཡང༔ མི་མཐུན་ཕྱོགས་ལས་རབ་རྒྱལ་ཞིང༔ བར་དུ་གཅོད་པའི་དགྲ་བགེགས་འཐུལ༔ བསམ་སྒྲུབ་རེ་སྐོང་འཕྲིན་ལས་མཛོད༔ ཅེས་དཔངས་བསྟོད་དོ༔ ལམ་ལྷའི་རིམ་པ་ནི༔ དཀར་གསུམ་མངར་གསུམ་ཕྱེ་མར་དང༔ འོ་སྐོལ་ནམ་མཁའ་ལ་འབུལ་ལོ༔ ཀྱཻ༔ ནམ་མཁའ་དཀར་པོའི་ཡར་སྟེང་ན༔ གཡུ་འབྲུག་སྔོན་པོའི་ལམ་ལྷ་མཆོད༔ དུང་སྐྱོང་དཀར་པོའི་ལམ་ལྷ་མཆོད༔ ཡོལ་གྱི་ཐོ་གྲུབ་ལམ་ལྷ་མཆོད༔ རྒྱ་སྟག་ཁྲ་བོའི་ལམ་ལྷ་མཆོད༔ སྤྱང་གདོང་སྔོན་པོའི་ལམ་ལྷ་མཆོད༔ གཉེན་བྱེད་དོན་གྲུབ་ལམ་ལྷ་མཆོད༔ རེ་འབྱམས་སྨུག་པོའི་ལམ་ལྷ་མཆོད༔ དུག་སྦྲུལ་དཀར་པོའི་ལམ་ལྷ་མཆོད༔ ལྷ་དམག་བྱེ་བ་དུང་ཕྱུར་མཆོད༔ སྐྱེས་བུ་དཔའ་བའི་ལམ་ལྷ་མཆོད༔ འོག་རྟ་མགྱོགས་པའི་ལམ་ལྷ་མཆོད༔ གོ་ཆ་སྲ་བའི་ལམ་ལྷ་མཆོད༔ མཐུ་རྩལ་ཆེ་བའི་ལམ་ལྷ་མཆོད༔ ཁ་དྲགས་ལམ་ལྷ་ཤུགས་མགོན་མཆོད༔ ཅང་སེ་ལམ་ལྷ་ཁ་དྲོ་མཆོད༔ ཁྱོད་ལ་མཆོད་པ་ཕུལ་པ་ཡིས༔ ལམ་གྱི་བར་ཆད་ཞི་བ་དང༔ དམག་མི་རྣམས་ཀྱི་རྫི་བོ་མཛོད༔ བར་དུ་གཅོད་པའི་དགྲ་བགེགས་ཐུལ༔ མི་མཐུན་ཕྱོགས་རྣམས་ཞི་བར་མཛོད༔ ཅེས་པས་འཕྲིན་ལས་བཅོལ༔ ལ་རྫས་མཆོད་པའི་རིམ་པ་ནི༔ ཤར་ལྷོ་ནུབ་བྱང་གི་ཕྱོགས་བཞི་ལ་གཏོར་མ་འབུལ༔ དེ་ནས་དབུས་ཀྱི་གཏོར་མ་ཡུལ་ལྷ་ལ་གསོལ༔ ཀྱཻ༔ ལ་རྫས་ཁྱོད་ཀྱི་ཤར་ཕྱོགས་སུ༔ སེང་གེ་དཀར་མོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་གཉན་པོའི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱོད་ཀྱི་ལྷོ་ཕྱོགས་སུ༔ གཡུ་འབྲུག་སྔོན་པོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱེད་ཀྱི་ནུབ་ཕྱོགས་སུ༔ རྒྱ་སྟག་ཁྲ་བོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱེད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱོད་ཀྱི་བྱང་ཕྱོགས་སུ༔ འབྲོང་བུ་དར་མའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱོད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ཀྱཻ༔ མཛེས་པའི་མཁན་བྱ་དཀར་པོ་འདི༔ ལ་རྫས་ཁྱེད་ཀྱི་རྩེ་འཛིན་མཛོད༔ མདའ་མདུང་དར་དཀར་བརྒྱན་པ་འདི༔ ཡུལ་ལྷ་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ རང་རྟ་བཙན་ལ་མ་སྐུར་ཅིག༔ ཁྱུང་དང་འབྲུག་དང་གྱི་ལིང་གསུམ༔ ལ་རྫས་རྩེ་ལ་རོལ་ལོ་ལོ༔ ཁྲ་དང་གླག་དང་རྒོད་པོ་གསུམ༔ ལ་རྫས་རྩེ་ལ་ལྡིང་ཞིང་འཁོར༔ ལ་རྫས་དབུས་ཀྱི་དྲང་ཤིང་ན༔ དུང་སྐྱོང་དཀར་པོའི་ཚང་ཞིག་བཅའ༔ ཤར་དུ་སེང་གེའི་ཚང་ཞིག་བཅའ༔ ལྷོ་རུ་གཡུ་འབྲུག་ཚང་ཞིག་བཅའ༔ ནུབ་ཏུ་སྟག་གི་ཚང་ཞིག་བཅའ༔ བྱང་དུ་འབྲོང་གི་ཚང་ཞིག་བཅའ༔ དེ་ལྟར་བཞི་པོ་ལ་རྫས་ཀྱི༔ སྒོ་བཞི་སྲུང་བའི་ཕོ་ཉ་ཡིན༔ ཝེར་མ་ཀུན་ཐུབ་འཇིགས་མེད་དེ༔ དམག་མི་མང་པོའི་ལམ་ལྷ་ཡིན༔ ཝེར་མ་དཔའ་བརྟན་ཐོགས་མེད་དེ༔ གཡུལ་ངོ་ཟློག་པའི་ལམ་ལྷ་ཡིན༔ ཝེར་མ་ཁྲོ་གཏུམ་འཇིགས་མེད་དེ༔ མདའ་དང་མདུང་གི་དགྲ་བླ་ཡིན༔ གསེར་གྱི་འུག་པ་མིག་རྣོ་དེ༔ དམག་སྣ་འདྲེན་པའི་ལམ་ལྷ་ཡིན༔ སྲིད་པ་བརྒྱུད་ཀྱི་ལ་རྫས་ཁྱོད༔ བདག་གིས་བསཽ་སྒྲ་གདབ་ཙ་ན༔ གཉེན་གྱི་སྤྱང་སྤུན་དགུ་པོ་ཡང༔ བདག་ལ་འགོ་བའི་སྲུང་མ་མཛོད༔ བསམ་པ་སྒྲུབས་ལ་རེ་བ་སྐོངས༔ བར་དུ་གཅོད་པའི་དགྲ་བགེགས་ཐུལ༔ མི་མཐུན་རྐྱེན་དང་བར་ཆད་སོལ༔ བཅོལ་པའི་འཕྲིན་ལས་སྒྲུབ་པར་མཛོད༔ སྨོན་ལམ་བཏབ་པ་ནི༔ གངས་དང་སེང་གེ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ནགས་དང་རྒྱ་སྟག་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ བྲག་དང་རྒོད་པོ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ སྤང་དང་ཤ་བ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ཆབ་དང་ཉ་མོ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ མདུང་ལ་བ་དན་བཏགས་པ་བཞིན༔ མི་དང་དགྲ་བླ་མ་བྲལ་ཅིག༔ གཞུ་མོ་རྒྱུད་ཀྱིས་བདུངས་པ་བཞིན༔ མི་དང་དགྲ་བླ་མ་བྲལ་ཅིག༔ རྨོག་དང་རྒོད་འཕྲུ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ མདའ་དང་སྟག་དོང་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ རལ་གྲི་ཤུབས་དང་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ལུས་དང་གྲིབ་མ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ དགྲ་བླ་གཉན་པོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱིས༔ ཕྱོགས་བཞི་མཚམས་བརྒྱད་གར་འགྲོ་ཡང༔ རྟག་ཏུ་མི་འབྲལ་སྡོངས་གྲོགས་མཛོད༔ དགྲ་བླ་དཔངས་བསྟོད་འདི་ཨོ་རྒྱན་རིན་པོ་ཆེས་མཛད་པའོ༔ གཏེར་སྟོན་རིགས་འཛིན་རྒོད་ཀྱི་ལྡེམ་འཕྲུ་ཅན་གྱིས་གཏེར་ནས་བཏོན་པའོ།། །། ༄༅། །ཕྱྭ་གཡང་འགུགས་པ་ནི། ཀྱཻ། ཕུན་ཚོགས་བཀྲ་ཤིས་འཁྱིལ་པའི་གནས་མཆོག་འདིར། །འདོད་པའི་མཆོག་སྟེར་ཕྱྭ་དང་གཡང་གི་ཚོགས། ཁབ་ལེན་རྡོ་དང་ལྕགས་ཀྱི་སྣང་ཚུལ་བཞིན། །དགའ་བའི་གར་དང་བཅས་ཏེ་ཐོགས་མེད་ཁུག །གསེར་མངལ་མགྲིན་སྔོན་འཁོར་ལོའི་ལག་པ་ཅན། །གྲགས་པའི་མུ་ཁྱུད་འཁོར་ལོས་སྒྱུར་བ་སོགས། །སྲིད་འདིར་མངོན་པར་མཐོ་བའི་ཚོགས་རྣམས་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ལེགས་བྲིས་ཚོགས་ཀྱི་འཆི་མེད་བཏུང་བ་དང་། །ཀླུ་དབང་གཙུག་གི་ཡིད་བཞིན་ནོར་བུ་མཆོག །མི་དབང་སྔོན་འགྲོའི་རྒྱལ་སྲིད་སྣ་བདུན་གྱི༔ ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །རིན་ཆེན་གདུགས་དཀར་གསེར་ཉ་བུམ་པ་བཟང་། །པདྨ་དུང་དཀར་གཡས་འཁྱིལ་དཔལ་བེ་འུ། །རྒྱལ་མཚན་འཁོར་ལོ་བཀྲ་ཤིས་རྟགས་བརྒྱད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །རྣམ་འདྲེན་ཟས་གཙང་སྲས་པོས་བཀྲ་ཤིས་པའི། །དངོས་པོར་བྱིན་བརླབས་དགེ་ལེགས་འབྱུང་བའི་སྒོ །རྟེན་འབྲེལ་ལྷུན་གྱིས་གྲུབ་པའི་རྫས་བརྒྱད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ཚེ་རིང་ནད་མེད་འདོད་པའི་དོན་ཀུན་གྲུབ། །སྟོབས་དང་མངའ་ཐང་འབྱོར་པ་ཕུན་སུམ་ཚོགས། །བདེ་ཞིང་སྐྱིད་པའི་དགའ་སྟོན་ཐམས་ཅད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ཅེས་ཕྱྭ་གཡང་འགུགས་པ་འདི་ནི་ཐམས་ཅད་མཁྱེན་ཅིང་གཟིགས་པ་ཆེན་པོ་༧ངག་དབང་བློ་བཟང་རྒྱ་མཚོས་མཛད་པའི་བསང་མཆོད་བཀྲ་ཤིས་འཁྱིལ་པ་ནས་འཁོལ་དུ་ཕྱུང་བའོ། །མངྒ་ལཾ།། །།ལྷ་ལྡན་དེ་མོ་བསྟན་རྒྱས་གླིང་གི་ཤིང་པར་ལྟར་ཡིན་ནོ། ༈ །དཔེ་ཚན་འདི་སྔོན་ཆད་གཏེར་མཛོད་དཀྱུས་སུ་མེད་ཅིང་། བལ་ཡུལ་ཞེ་དགོན་གྱི་པར་གསར་འདིར་གསར་བཞག་བྱས་པས་ལུང་རྒྱུན་ལ་ཞིབ་རྟོག་དགོས་པ་ཡིན་ནོ།།
+
གུ་རུ་པདྨ་སིདྡྷི་ཧཱུྃ། སྐྱབས་ཀུན་འདུས་ཞལ་ཨོ་རྒྱན་དུས་གསུམ་མཁྱེན་པ་ལ་ཕྱག་འཚལ་ལོ། །འདིར་བྱང་གཏེར་རྒྱགས་བརྔན་བསང་ཆོག་ཇི་ལྟར་བྱ་བའི་ཚུལ་ལ། སྦྱོར་བ་དངོས་གཞི་མཇུག་དང་གསུམ། དང་པོ་སྦྱོར་བ་ལ་བཅའ་སྒྲིག་དང་སྔོན་འགྲོའི་ཆོ་གར་འཇུག་ཚུལ་གཉིས་ལས། དང་པོ་ནི། འདི་ཉིད་ཀྱི་གཏེར་གཞུང་ལས། བརྔན་གྱི་ཆོ་གའི་རིམ་པ་ལ༔ ཤིན་ཏུ་གཙང་བའི་ས་ཕྱོགས་སུ༔ དཀར་གསུམ་མངར་གསུམ་བརྒྱན་པ་དང༔ དམར་གཏོར་ཤ་ཆང་བརྒྱན་པ་དང༔ བསང་བཤོས་ཟས་སྣས་བརྒྱན་པ་དང༔ ཕྱེ་མར་ཅི་འབྱོར་སྣོད་ཁེངས་དང༔ དྲི་བཟང་འབྲུ་སྣ་སྨན་སྤོས་དང༔ རིན་ཆེན་མེ་ཏོག་སྣ་ཚོགས་དང༔ ཁྱད་པར་རྟ་གླང་ར་དང་ལུག༔ མཛོ་གཡག་སྦལ་སྦྲུལ་ལ་སོགས་དང༔ གཟུགས་འགྲོས་སྣ་ཚོགས་བྱས་པ་དང༔ སྦ་སྙུག་ཤུག་པ་ལྕང་མ་དང༔ མཁན་པ་མཚེ་དང་འོམ་བུ་དང༔ བ་ལུ་གླང་མ་ལ་སོགས་པའི༔ རྩི་ཤིང་སྣ་ཚོགས་མཆོད་པ་བཤམས༔ སྟག་གཟིག་དར་ཟབ་ལ་སོགས་པ༔ མདའ་མདུང་དར་ཆེན་འཕྱར་བ་དང༔ རྔ་དུང་ལ་སོགས་རོལ་མོའི་སྒྲ༔ སྤྱན་གཟིགས་མཆོད་པ་སྣ་ཚོགས་བཤམས༔ ཞེས་གསུངས་པ་བཞིན། ཐོག་མའི་བཅའ་གཞི་སྒྲིག་ཚུལ་ལ་དམ་པའི་ཕྱག་བཞེས་འདྲ་མིན་སྣ་ཚོགས་ཞིག་མཆིས་རུང་། འདིར་ནི་རིག་འཛིན་གསང་སྔགས་དགའ་ཚལ་གྱི་མཐོང་བརྒྱུད་ཕྱག་ལེན་ཇི་ལྟར་བསྟར་བའི་ཚུལ་དགོད་པར་བྱ་སྟེ། དེ་ཡང་གང་དུ་བྱ་བའི་གནས་ནི་རི་རྩེ་འམ། ཁང་ཐོག་སོགས་ཤིན་ཏུ་གཙང་བའི་ཡིད་མཐུན་གྱི་གནས་སུ། རས་དཀར་སོགས་དྲི་མ་མེད་པའི་མཆོད་གདན་བཏིང་བའི་སྟེགས་བུའི་ཁར། ཨན་སྟར་སོགས་ཀྱི་གཏོར་སྣོད་གཙང་མའི་དབུས་སུ་བཟང་དྲུག་རིན་ཆེན་སྣ་ལྔའི་ཕྱེ་མ་དཀར་གསུམ་མངར་གསུམ། བདུད་རྩི་རིལ་བུའམ་ཆོས་སྨན་སོགས་རྣལ་འབྱོར་བླ་མེད་ནས་བཤད་པའི་གཏོར་རྫས་ཅི་འབྱོར་བསྲེས་པའི་རྩམ་ཕྱེ་ཆང་ཕུད་ཆུ་གཙང་གིས་སྦྲུས་པའི་ཟན་ལེབ་གྲུ་བཞི་རྩི་དཀར་ཅན་བཞི་བང་རིམ་གྱི་ཚུལ་དུ་བརྩེགས་པའི་འོག་མ་གསུམ་དཔངས་མཉམ་དང་། དེ་གསུམ་བསྡོམས་པའི་དཔངས་དང་མཉམ་པའི་བང་རིམ་བཞི་པའི་སྟེང་དུ་རྩ་གསུམ་སྤྱིའི་དཔལ་གཏོར་ཟླུམ་པོ་པད་འདབ་བཞི་པ་རྩི་དཀར་ཅན། པད་འདབ་རྣམས་ཀྱི་བར་བར་དུ་མཐེབ་ཀྱུ་རྩི་དཀར་ཅན་སྒོར་མོའི་སྟེང་དུ་ཟན་རིལ་བཞག་པས་བསྐོར། བང་རིམ་འོག་མ་གསུམ་གྱི་ཟུར་བཞིར་བཤོས་བུ་སྐེད་རིས་ཅན་རྩི་དཀར་གྱིས་བྱུགས་པ་ལ་ཤིང་རྩེར་སྙིང་དངོས་སམ་ཟན་གྱི་སྙིང་གཟུགས་དམར་པོ་རེ་བཙུགས་པ་སྡོམ་བཅུ་གཉིས་དང་། ངོས་བཞིར་དམར་གཏོར་ཟུར་གསུམ་རེ་རེ་བཅས་སྡོམ་བཅུ་གཉིས། བང་རིམ་འོག་མའི་མདུན་ངོས་དབུས་སུ་གཡག་མགོས་མཚན་པའི་ཐང་ལྷའི་གཏོར་མ་ཟུར་གསུམ་རྩི་དཀར་ཅན། གཡས་སུ་ལུག་མགོས་མཚན་པའི་བསྟན་མའི་གཏོར་མ་དབྱིབས་རྩི་གོང་འདྲ། གཡོན་དུ་ར་མགོས་མཚན་པའི་དམ་ཅན་གྱི་གཏོར་མ་དབྱིབས་རྩི་གོང་འདྲ། ཨན་སྟར་གྱི་གཡས་གཡོན་རྣམས་སུ་བཀྲ་ཤིས་རྫས་རྟགས་འདོད་ཡོན་རིན་ཆེན་སྣ་བདུན་གསེར་དངུལ་དོང་རྩེ་སོགས་མཆོད་པའི་བྱེ་བྲག་སྣ་ཚོགས་དང་། སྐུ་གླུད་ཕོ་གཟུགས་མོ་གཟུགས་རྟ་དྲེལ་མཛོ་གཡག་ར་ལུག་སོགས་མདོར་ན་འཕུར་དགུ་འཛུལ་དགུའི་གཟུགས་འགྲོས་ཟན་པར་གྱི་ནར་མོས་ཟླུམ་གཏོར་བར་སྟོང་རྣམས་སུ་བཀང་། གོང་གི་གཟུགས་འགྲོས་རྣམས་ཀྱི་བར་དུ་ཟན་ཆད་དང་ཆངས་བུ་མཐེབ་ཀྱུ་སོགས་ཀྱིས་ཀྱང་བཀང་། དེའི་གཡས་གཡོན་གང་འོས་སུ་དགྲ་བླ་དང་རང་ལུགས་སྒེར་གསོལ་གྱི་མཆོད་པ་ཇི་དགོས་མཐོང་བརྒྱུད་བཞིན་དང་། ཕྱི་ནང་གི་མཆོད་པ། ཤིང་སྣ་སྨན་སྤོས་ཤིང་འབྲས་ཟས་སྣ་དཀར་གསུམ་མངར་གསུམ་སོགས་སྦྱར་བའི་བསང་བཤོས། ཕྱེ་མར་ཆང་ཕུད་འོ་སྐྱེམས་རྒྱ་ཇའི་བཏུང་བ། འོ་མ་དྲི་བཟང་རིན་ཆེན་ཕྱེ་མ་སྨན་སོགས་སྦྱར་བའི་བསང་ཆུ། དགྲ་བླའི་སྤྱན་གཟིགས་གོ་མཚོན་སོགས་དང་། དར་ཚོན་སྣ་ལྔ་མེ་ལོང་སོགས་ཀྱིས་བརྒྱན་པའི་མདའ་དར། གཡང་རྟེན། ཕྱོགས་བཞིའམ་གང་འོས་སུ་འཕྱར་དར། རང་གི་མདུན་དུ་རྔ་རོལ་སོགས་སྐབས་ཀྱི་ཉེར་མཁོ་རྣམས་འཚོག་པར་བྱ་ཞིང་། བསང་གཡོག་དང་བཅས་པ་སྟ་གོན་བྱ། སྦྱོར་ཆོག་གཉིས་པ་སྔོན་འགྲོའི་རིམ་པ་ནི། གཏེར་གཞུང་ལས། རང་ཉིད་པདྨའི་ང་རྒྱལ་གྱིས༔ མཆོད་རྫས་ཀུན་ལ་སྤོས་ཆུ་གཏོར༔ ཐམས་ཅད་ཅི་འདོད་འབྱུང་བ་ཡི༔ མཆོད་སྦྱིན་ཡིད་བཞིན་གཏེར་གྱུར་པ༔ ས་གཞི་བར་སྣང་གང་བར་བསམ༔ ཤིང་སྣ་མེ་སྦར་བསང་དུད་སྦྱར༔ རོལ་མོའི་སྒྲ་ཡིས་བྱིན་དབབ་བོ༔ ཞེས་གསུངས་པ་ལྟར་གྱི་ཆོ་གར་འཇུག་པའི་རིམ་པ་ལ། ཐོག་མར་སྐྱབས་འགྲོ་ནི། རོལ་མོ་དབྱངས་དང་བཅས་ཏེ་འདི་སྐད་དོ། །ཧཱུྃ༔ རང་བྱུང་ལྷུན་གྱིས་གྲུབ་པའི་སྐུ༔ འོད་གསལ་ཆེན་པོའི་དགོངས་པ་ཅན༔ ཐུགས་རྗེའི་དབང་གིས་འགྲོ་དོན་མཛད༔ བླ་མ་རྣམས་ལ་སྐྱབས་སུ་མཆི༔ རང་ལ་ཡེ་ཤེས་ཤར་བའི་སྐུ༔ མི་འབྲལ་རྩེ་གཅིག་དགོངས་པ་ཅན༔ བྱིན་གྱིས་བརླབ་ཅིང་བར་ཆད་སེལ༔ ཡི་དམ་ལྷ་ལ་སྐྱབས་སུ་མཆི༔ དམ་ཚིག་རྣམ་པར་དག་པའི་སྐུ༔ བརྩེ་གདུང་བྱམས་པའི་དགོངས་པ་ཅན༔ ལེགས་ཉེས་སྟངས་འཛིན་དངོས་གྲུབ་སྟེར༔ མཁའ་འགྲོའི་ཚོགས་ལ་སྐྱབས་སུ་མཆི༔ ཞེས་ལན་གསུམ་གྱིས་སྐྱབས་འགྲོ་དང་། སྔོན་ནས་བསགས་པའི་སྡིག་སྒྲིབ་བཤགས༔ འགྲོ་དོན་སངས་རྒྱས་འཐོབ་བྱའི་ཕྱིར༔ སྨོན་པ་བྱང་ཆུབ་སེམས་བསྐྱེད་དོ༔ སེམས་ཅན་ཡོངས་སུ་སྨིན་བྱའི་ཕྱིར༔ གསང་སྔགས་སྤྱོད་པ་རླབས་ཆེན་སྤྱད༔ དོན་དམ་སྤྲོས་བྲལ་བྱང་ཆུབ་སེམས༔ རང་བྱུང་མཐའ་བྲལ་སྟོང་གསལ་བསྒོམ༔ ཞེས་ལན་གསུམ་གྱིས་སེམས་བསྐྱེད་བྱ། བླ་མ་བདེ་གཤེགས་མཁའ་འགྲོ་གནས་འདིར་གཤེགས༔ ཉི་ཟླ་པད་གདན་མཛེས་ལ་དགྱེས་པར་བཞུགས༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཕྱི་ནང་གསང་གསུམ་མཆོད་སྤྲིན་ཀུན་གྱིས་མཆོད༔ སྔོན་ནས་ད་བར་མི་དགེ་བཅུ་བསགས་བཤགས༔ དུས་གསུམ་དགེ་བའི་ཚོགས་ལ་རྗེས་ཡི་རང༔ བདག་གཞན་ཡོངས་སྒྲོལ་ཆོས་འཁོར་བསྐོར་དུ་གསོལ༔ འགྲོ་མགོན་མྱ་ངན་མི་འདའ་བཞུགས་གསོལ་འདེབས༔ སྒོ་གསུམ་དགེ་སྤྱད་མ་ལུས་བྱང་ཆུབ་བསྔོ༔ མཁའ་མཉམ་འགྲོ་རྣམས་སྐུ་གསུམ་མངོན་འགྱུར་ཤོག༔ ཅེས་པས་ཡན་ལག་བདུན་པ་འབུལ། ཧཱུྃ༔ སྟོང་གསུམ་ཀུན་ཏུ་དྲི་མཆོག་འབྱུང་གྱུར་པའི༔ སྤོས་དང་སྨན་སྦྱར་ཆུ་གཙང་དག་པའི་ཁྲུས༔ ཡིད་བཞིན་སྤྲིན་ཕུང་མཁའ་ལ་ཆར་འབེབ་པས༔ མི་གཙང་དྲི་མའི་ཚོགས་ཀུན་དག་གྱུར་ཅིག༔ ཨོཾ་ཤུདྡྷེ་ཤུདྡྷེ་ཤྭ་དྷ་ན་ཡེ་སྭཱ་ཧཱ༔ ཞེས་ཚར་གསུམ་བརྗོད་ཅིང་གནས་དང་ཡོ་བྱད་ལ་ཆབ་གཏོར་ནས་མ་དག་པ་སྦྱངས་ཏེ་བྱིན་གྱིས་བརླབས་ལ། ཐོག་མར་རང་ཉིད་སྐད་ཅིག་གིས་པདྨ་དཀར་པོ་འདབ་མ་དྲུག་པའི་ལྟེ་བར་རང་རིག་ཧཱུྃ་དཀར་པོའི་འཕྲོ་འདུ་ལས། དཔལ་རྡོ་རྗེ་སེམས་དཔའི་སྐུར་ཐལ་གྱིས་བསྐྱེད་པ་ནི། ཧཱུྃ༔ པད་སྡོང་འདབ་དྲུག་ཁྲི་འཕང་བཞིན༔ ཉི་མ་ཟླ་བའི་གདན་སྟེང་དུ༔ བདག་ཉིད་རྡོ་རྗེ་སེམས་དཔའི་སྐུ༔ དཀར་གསལ་ཞལ་གཅིག་ཕྱག་གཉིས་པ༔ རྡོ་རྗེ་དྲིལ་བུ་ཐུགས་ཀར་འཛིན༔ དར་དང་རིན་ཆེན་དུ་མས་སྤྲས༔ སྤྱི་གཙུག་བླ་མ་ཀུན་བཟང་མཐིང༔ མཚན་དཔེས་སྤྲས་པ་ཡུམ་དང་སྦྱོར༔ སྐུ་ཡི་གནས་སུ་ཞི་ཁྲོའི་ལྷ༔ ཆུ་ནང་ཟླ་བ་ལྟ་བུར་གསལ༔ ཨོཾ་བཛྲ་སཏྭ་ཧཱུྃ༔ ཞེས་ལན་བདུན་ནམ་ཉེར་གཅིག་བཟླ། འདབ་དྲུག་ཤར་གྱི་པད་འདབ་ལ༔ སྦྱོང་བའི་ལྷ་ནི་ཤཱཀ་ཐུབ་སེར༔ ཕྱག་གཉིས་ས་གནོན་ལྷུང་བཟེད་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཁོང་སྟོང་ཕྱག་རྒྱའི་ནང༔ ཨ་དཀར་འོད་འཕྲོས་དངོས་འཛིན་སྦྱང༔ ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅་ཧཾ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་དངོས་འཛིན་དག་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ སྤེལ་བའི་ལྷ་ནི་རྣམ་སྣང་དཀར༔ ཕྱག་གཉིས་འཁོར་ལོ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཚིགས་བཅག་ཕྱག་རྒྱའི་ནང༔ ཁཾ་སྔོན་འོད་འཕྲོས་སྣོད་བཅུད་སྤེལ༔ ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏྞཾྐ་ཨཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་ལེགས་ཚོགས་སྤེལ་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ སྒྱུར་ལྷ་བདུད་རྩི་འཁྱིལ་པ་ལྗང༔ ཕྱག་མཚན་རྒྱ་གྲམ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཁ་གྱེར་ཕྱག་རྒྱའི་ནང༔ ཛ་དམར་འོད་འཕྲོས་བདུད་རྩིར་སྒྱུར༔ ཨོཾ་བཛྲ་ཨ་མྲྀཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་ཟག་མེད་བདུད་རྩིར་བསྒྱུར༔ དེ་ཡི་མཚམས་ཀྱི་པད་འདབ་ལ༔ ཐོབ་ལྷ་རིན་འབྱུང་སྐུ་མདོག་སེར༔ ཕྱག་ན་རིན་ཆེན་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ མཆོག་སྦྱིན་ཕྱག་རྒྱ་ཏྲཾ་སེར་ལས༔ འོད་འཕྲོས་ཀུན་གྱིས་འབད་མེད་ཐོབ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ སྔགས་འདི་ལན་བདུན་བརྗོད་པའི་མཐུས༔ མགྲོན་རྣམས་ཀུན་གྱིས་ཐོབ་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ ཚིམ་ལྷ་དོན་ཡོད་གྲུབ་པ་ལྗང༔ ཕྱག་མཚན་རལ་གྲི་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཁུ་ཚུར་མཆོག་སྦྱིན་ཕྱག་རྒྱའི་ནང༔ ཧ་ལྗང་འོད་འཕྲོས་མགྲོན་མཉེས་གྱུར༔ ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མསྶ་མནྟ་སྥ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་སྭཱ་ཧཱ༔ སྔགས་འདི་ལན་བདུན་བརྗོད་པའི་མཐུས༔ མགྲོན་ཀུན་དགྱེས་ཤིང་ཚིམས་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ དབང་ཆེན་ཕྱག་རྡོར་ལྗང་དམར་ནི༔ ཕྱག་མཚན་རྡོ་རྗེ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ སོར་བསྣོལ་ཕྱག་རྒྱ་ཛ་དམར་ལས༔ འོད་འཕྲོས་མགྲོན་བཞིའི་མཐུ་སྟོབས་བསྡུས༔ ན་མསྶ་མནྟ་བུདྡྷ་ནཾ་གྲ་ཧེ་ཤྭ་རི་པྲ་བྷཉྫྱོ་ཏི་ན་མ་ཧཱ་ས་མ་ཡ་ཧཱུྃ་ཕཊ༔ སྔགས་འདི་ལན་བདུན་བརྗོད་པའི་མཐུས༔ དབང་སྡུད་འཕྲིན་ལས་ཀུན་འགྲུབ་ཤོག༔ ཅེས་བྱིན་གྱིས་བརླབས། གཉིས་པ་དངོས་གཞི་ལ། གཏེར་གཞུང་ལས། དེ་ནས་དངོས་གཞི་བརྔན་པ་ནི༔ རང་ཉིད་པདྨའི་ང་རྒྱལ་གྱིས༔ མགྲོན་རྣམས་སྤྱན་དྲངས་བཞུགས་པ་ལ༔ རིམ་བཞིན་མཆོད་ཅིང་བརྔན་པ་ནི༔ མཆོད་གཏོར་གཟུགས་འགྲོས་བཤམས་པ་ལ༔ བསང་ཆུ་ཕུད་ཆུ་འཐོར་ཕུད་དང༔ ཕྱེ་མར་རིན་ཆེན་འབྲུ་སྣ་ཚོགས༔ མེ་ནང་ཕུལ་ལ་འདི་སྐད་དོ༔ ཞེས་གསུངས་པ་བཞིན་རང་ཉིད་སློབ་དཔོན་ཆེན་པོ་དམ་ཚིག་པར་བསྐྱེད་པ་ནི། པདྨ་ཉི་ཟླའི་གདན་སྟེང་ན། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ལས་སྤྲུལ་པའི་རིག་འཛིན་ནི། །པདྨ་འབྱུང་གནས་རྒྱལ་བའི་སྐུ །སྐུ་མདོག་དཀར་དམར་སྐྱིལ་ཀྲུང་མཛད། །གཞོན་ནུ་ལོ་བརྒྱད་ལོན་པའི་ཚུལ། །སྔགས་པའི་ཆ་ལུགས་མཐིང་ནག་གོས། །རབ་བྱུང་ཆ་ལུགས་ཆོས་གོས་དམར། །རྒྱལ་པོའི་ཆ་བྱད་ཟབ་བེར་གསོལ། །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་པ་མཉམ་གཞག་ཀ་པཱ་ལ། །དབུ་ལ་པདྨའི་མཉེན་ཞུ་གསོལ། །སྣ་ཚོགས་རིན་ཆེན་རྒྱན་གྱིས་མཛེས། །བཀྲག་དང་གཟི་མདངས་ལྡན་པ་ལ། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་གཏེར་བདག་ཚོགས། །མ་ལུས་འཁོར་གྱིས་བསྐོར་བར་གྱུར། །ཡེ་ཤེས་པ་སྤྱན་འདྲེན་པ་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃ། ཞེས་དམ་ཡེ་གཅིག་ཏུ་གྱུར་པར་བསམ་ལ། མཆོད་པ་འབུལ་བ་ནི། ཧཱུྃ། མེ་ཏོག་བདུག་སྤོས་མར་མེ་དང་། །ལྷ་བཤོས་དྲི་ཆབ་མཆོད་པར་བཤམས། །བླ་བྲེ་རྒྱལ་མཚན་ན་བཟའ་དང་། །བ་དན་གདུགས་དང་རོལ་མོའི་ཚོགས། །རིན་པོ་ཆེ་དང་མེ་ཏོག་དང་། །གཟུགས་སྒྲ་དྲི་རོ་རེག་བྱ་དང་། །ཆོས་དང་མདངས་ཆེན་བྱང་ཆུབ་སེམས། །མཆོད་སྤྲིན་བསམ་གྱིས་མི་ཁྱབ་པ། །རྩ་བ་བརྒྱུད་པའི་བླ་མ་དང་། །ཡི་དམ་ཞི་ཁྲོའི་ལྷ་ཚོགས་དང་། །ཆོས་བདག་དཔའ་བོ་མཁའ་འགྲོའི་ཚོགས། །དམ་ཅན་ཆོས་སྐྱོང་རྣམས་ལ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བརྒྱ་རྩ་སོགས་བཟླ། དང་པོ་བརྔན་གྱི་བྱུང་ཁུངས་ནི། འཛམ་བུ་གླིང་གི་བོད་ཡུལ་དབུས༔ བཙན་པོ་ཁྲི་སྲོང་ལྡེའུ་བཙན་གྱིས༔ བསམ་ཡས་གཙུག་ལག་བཞེངས་པའི་དུས༔ ས་བདག་ཀླུ་གཉན་ཁྲོས་གྱུར་ནས༔ ལྷ་ཁང་ཉིན་བརྩིགས་མཚན་མོ་བསྒྱེལ༔ རི་རྡོ་ཐམས་ཅད་ཀླུངས་སུ་ཕབ༔ ཀླུངས་རྡོ་ཐམས་ཅད་རི་ལ་བསྐྱལ༔ རྩི་ཤིང་ཐམས་ཅད་མེ་ལ་བསྲེགས༔ ནད་དང་གནོད་པ་སྣ་ཚོགས་བྱུང༔ རྒྱལ་པོའི་ལྷ་ཁང་བཤོལ་ལ་ཐུག༔ དེ་ཚེ་རྒྱལ་བློན་བཀའ་བགྲོས་མཛད༔ སློབ་དཔོན་པདྨ་སྤྱན་དྲངས་ནས༔ བྲག་དམར་དཔལ་གྱི་བསམ་ཡས་སུ༔ སློབ་དཔོན་པདྨ་འབྱུང་གནས་ཀྱིས༔ རྡོ་རྗེ་ཕུར་པའི་དཀྱིལ་འཁོར་བཞེངས༔ ལྷ་འདྲེ་ཐམས་ཅད་དམ་ལ་བཏགས༔ དཀོན་མཆོག་གསུམ་ལ་མཆོད་པ་ཕུལ༔ ལྷ་དང་སྲུང་མ་ཐམས་ཅད་དང༔ ས་བདག་ཀླུ་གཉན་ཐམས་ཅད་བརྔན༔ དེ་ཡིས་བསམ་ཡས་ཆོས་འཁོར་གྲུབ༔ རྗེ་འབངས་བདེ་ཞིང་བཀྲ་ཤིས་ལ༔ རྒྱལ་བློན་སྐུ་ཚེ་རིང་བ་དང༔ རྩི་ཤིང་མེ་ཏོག་ཐམས་ཅད་སྨིན༔ ལེགས་པའི་ཡོན་ཏན་བསམ་མ་ཁྱབ༔ བརྔན་གྱི་བྱེད་ལས་དགོས་པ་ནི༔ དེ་ཡང་ཕྱི་རབས་རྣལ་འབྱོར་པས༔ གང་འདོད་འཕྲིན་ལས་སྒྲུབ་པ་དང༔ སངས་རྒྱས་བསྟན་པ་སྲུང་བ་དང༔ སྒྲུབ་ལ་བར་ཆད་སེལ་བ་དང༔ འཁོར་སྲུང་རྐྱེན་ཟློག་གྲགས་པ་སྤེལ༔ ལྷ་ཁང་བཞེངས་དང་མཆོད་རྟེན་བརྩིག༔ མི་ནད་ཡམས་ནད་གཅད་པ་དང༔ མཁར་ལས་བྱེད་དང་བཀྲ་ཤིས་འདོད༔ ཐག་རིང་མགྲོན་ལ་འགྲོ་བ་དང༔ ཆུ་ཆེན་གྲུ་ལ་འགྲོ་བ་དང༔ ལམ་འཕྲང་བགྲོད་དང་དམག་ལ་འགྲོ༔ ལྷོ་བལ་སྦས་ཡུལ་འགྲོ་བ་དང༔ ཆེ་ཧྲག་བྱ་བ་ཐམས་ཅད་ཀྱི༔ སྔོན་དུ་བརྔན་འདི་བྱས་པས་འགྲུབ༔ ཅེས་བསང་ཆོག་འདི་ཉིད་གང་དུ་མཛད་པའི་གནས་དང་མཛད་པ་པོ་དང་དགོས་པ་དང་བྱེད་ལས་དང་ཕན་ཡོན་ཏེ་དོན་ལྔའི་སྒོ་ནས་ཕྱི་རབས་རྣལ་འབྱོར་པ་རྣམས་ཀྱིས་འདོད་པའི་དོན་རྣམས་གེགས་མེད་ལྷུན་གྱིས་འགྲུབ་པའི་སླད་དུ་ཆོ་ག་འདིར་འཇུག་པར་སྤྲོ་བ་བསྐྱེད་དེ། དེ་ནས་བསྟོད་པ་བྱ་བ་ནི། ཧཱུྃ༔ བསྟན་པ་འདི་ལ་ངོ་མཚར་རྨད་བྱུང་བའི༔ འཇིག་རྟེན་སྐྱབས་གྱུར་པདྨ་རྒྱལ་པོ་ནི༔ རིགས་ནི་ཟ་ཧོར་རྒྱལ་པོའི་སྲས་སུ་འཁྲུངས༔ ཨོ་རྒྱན་ཡུལ་དུ་སྒྲོ་འདོགས་མ་ལུས་བཅད༔ བསིལ་བ་ཚལ་དུ་དངོས་གྲུབ་ཐམས་ཅད་བརྙེས༔ ཁ་བ་ཅན་དུ་བསྟན་པ་དར་བར་མཛད༔ ལྷོ་ནུབ་མཚམས་སུ་སྲིན་པོའི་ཁ་གནོན་མཛད༔ མྱ་ངན་མི་འདའ་འགྲོ་བའི་གཉེན་གཅིག་པུ༔ སྐུ་གསུམ་ཆེ་མཆོག་བཛྲ་ཧེ་རུ་ཀ༔ དུས་གསུམ་མཉམ་ཉིད་བླ་མ་དུས་འདིར་དྲན༔ བདག་དང་བླ་མ་དབྱེར་མེད་ཧེ་རུ་ཀ༔ རྒྱལ་བའི་ཞིང་ཁམས་དག་པ་ཆེན་པོ་འདིར༔ མི་འགྱུར་ལྷུན་གྲུབ་པདྨ་རྒྱལ་པོ་དང༔ བླ་མ་ཡི་དམ་མཁའ་འགྲོས་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ མགྲོན་སྤྱན་དྲང་བ་ནི། བླ་མ་ཡི་དམ་མཁའ་འགྲོ་དང༔ སངས་རྒྱས་ཆོས་དང་དགེ་འདུན་དང༔ ཞི་རྒྱས་དབང་དང་མངོན་སྤྱོད་ལྷ༔ ཕྱི་ནང་སྲུང་མའི་ཚོགས་རྣམས་དང༔ གསང་སྔགས་རིག་སྔགས་ལྷ་རྣམས་དང༔ འདས་དང་མ་བྱོན་ད་ལྟར་གྱི༔ ལྷ་དང་སྲུང་མ་དམ་ཚིག་ཅན༔ མ་མོ་མཁའ་འགྲོ་ཤུགས་འགྲོ་དང༔ འཇིག་རྟེན་གནས་ཀྱི་མཆོག་གྱུར་པ༔ སྒྲུབ་གནས་བྱིན་ཆེན་ཐམས་ཅད་དང༔ གཞན་ཡང་ས་འོག་ས་སྟེང་གི༔ གནས་བདག་ཆེན་པོ་ཐམས་ཅད་དང༔ འཁོར་དུ་གཏོགས་པའི་སྡེ་བརྒྱད་པོ༔ སྟོང་གསུམ་ཁྱབ་པའི་མཐུ་རྩལ་ཅན༔ ཆེ་དགུ་གཉན་དགུ་ཐམས་ཅད་དང༔ གཙུག་ལག་ཁང་དང་སྒྲུབ་གནས་ཀྱི༔ སྲུང་མ་གཉན་པོ་ཐམས་ཅད་དང༔ གཞན་ཡང་ལྷ་དང་གནོད་སྦྱིན་དང༔ དྲི་ཟ་གྲུལ་བུམ་མཁའ་འགྲོ་སོགས༔ བརྔན་པར་འོས་པའི་མགྲོན་རྣམས་དང༔ ས་བདག་ཀླུ་གཉན་ཐམས་ཅད་ཀུན༔ སངས་རྒྱས་བསྟན་པ་བསྲུང་བ་དང༔ སྒྲུབ་པའི་སྟོངས་གྲོགས་བྱ་བ་དང༔ དགོན་གནས་བར་ཆད་སེལ་བ་དང༔ དགྲ་དང་བགེགས་རྣམས་གཞོམ་པ་དང༔ ནད་གདོན་གནོད་པ་ལ་སོགས་པ༔ ཆག་ཆེ་ཉམ་ང་ཟློག་པ་དང༔ འདོད་པ་ཐམས་ཅད་བསྒྲུབ་པའི་ཕྱིར༔ མགྲོན་རྣམས་སྤྱན་འདྲེན་གཤེགས་སུ་གསོལ༔ འདིར་གཤེགས་བཤམས་པའི་མཆོད་པ་བཞེས༔ བསྟན་པ་དར་ཞིང་རྒྱས་པར་མཛོད༔ བདག་དང་རྒྱུ་སྦྱོར་ཡོན་བདག་གི༔ ཡིད་ལ་རེ་བ་སྐོང་བ་དང༔ ཀུན་ཀྱང་བཤད་པའི་ཆོས་ལ་ཉོན༔ བསང་གྱེར་བ་ནི༔ ཀྱཻ༔ བསང་གི་རྒྱུ་བྱུང་གང་ནས་བྱུང༔ བསང་གི་རྒྱུ་བྱུང་གནམ་ནས་བྱུང༔ ཕ་གནམ་ལ་འབྲུག་ཆེན་ལྡར་མ་ལྡིར༔ མ་ས་ལ་གློག་ཆེན་གྱ་མ་གྱུ༔ བུ་རྟ་རྒོད་གངས་ཀྱི་ཐིགས་པ་ཡིན༔ རྒྱ་མཚོ་ཆུ་ཡི་ལྦུ་བ་ཡིན༔ མ་ཕམ་གཡུ་མཚོའི་ཁ་ཞག་ཡིན༔ བཟང་དྲུག་སྨན་གྱི་ནུས་པ་ཡིན༔ དྲི་ཞིམ་སྤོས་ཀྱི་ངད་པ་ཡིན༔ ཕྱེ་མར་འོ་སྐོལ་གསུར་གྱིས་མཆོད༔ ཤིང་བདུད་རྩི་ཅན་གྱི་དུད་པ་དང༔ གསེར་ལོ་འབར་བའི་སྟག་པ་དང༔ གཡུ་ལོ་འབར་བའི་ཤུག་པ་དང༔ དུང་ལོ་འབར་བའི་བ་ལུ་དང༔ མཁན་པ་སྤོས་དཀར་ཨ་ཀ་རུ༔ ཤིང་བདུད་རྩི་ཅན་གྱི་དུད་པ་དང༔ ཕྱེ་མར་ཟས་ཕུད་གསེར་སྐྱེམས་ཀྱིས༔ ལྷ་འདྲེ་ཐམས་ཅད་བསང་བའི་ཕྱིར༔ ཀྱཻ༔ སྐྱབས་མཆོག་མགོན་གནས་ཡོན་ཏན་ཞིང༔ རྩ་བ་བརྒྱུད་པའི་བླ་མ་བསང༔ ལས་དང་སྐལ་བར་ལྡན་པ་ཡི༔ ཡི་དམ་ལྷ་ཚོགས་ཐམས་ཅད་བསང༔ སྔ་རབས་འདས་དང་ད་ལྟར་བཞུགས༔ སླད་ནས་འབྱོན་དང་དུས་གསུམ་གྱི༔ སངས་རྒྱས་ནམ་མཁའ་གང་བ་བསང༔ རྣམ་པར་སྣང་མཛད་ལ་སོགས་པའི༔ རིགས་ལྔ་བདེ་བར་གཤེགས་པ༴ རིགས་གསུམ་མགོན་པོ་ལ་སོགས་པའི༔ བྱང་ཆུབ་སེམས་དཔའ་ཐམས་ཅད༴ སྟོན་པ་བླ་མེད་སངས་རྒྱས༴ སྐྱོབ་པ་བླ་མེད་དམ་ཆོས༴ འདྲེན་པ་བླ་མེད་དགེ་འདུན༴ བླ་མེད་དཀོན་མཆོག་གསུམ་པོ༴ བུདྡྷ་བཞི་བཅུ་རྩ་གཉིས༴ ཁྲོ་བོ་རྨད་དུ་བྱུང་བ༴ ཁྲག་འཐུང་ལྔ་བཅུ་རྩ་བརྒྱད༴ འཇམ་དཔལ་སྐུ་ཡི་ལྷ་ཚོགས༴ པདྨ་གསུང་གི་ལྷ་ཚོགས༴ ཡང་དག་ཐུགས་ཀྱི་ལྷ་ཚོགས༴ ཆེ་མཆོག་ཡོན་ཏན་ལྷ་ཚོགས༴ ཕུར་པ་འཕྲིན་ལས་ལྷ་ཚོགས༴ བདུད་རྩི་སྨན་གྱི་ལྷ་ཚོགས༴ མ་མོ་རྦོད་གཏོང་ལྷ་ཚོགས༴ བླ་མ་རིག་འཛིན་ལྷ་ཚོགས༴ འཇིག་རྟེན་མཆོད་བསྟོད་ལྷ་ཚོགས༴ དམོད་པ་དྲག་སྔགས་ལྷ་ཚོགས༴ དཔལ་མགོན་བདུན་ཅུ་རྩ་གཉིས༴ ནམ་མཁའ་གང་བའི་ལྷ་ཚོགས༴ བར་སྣང་གང་བའི་གཉན་རྣམས༴ ས་གཞི་གང་བའི་ཀླུ་རྣམས༴ སྡེ་བརྒྱད་དམ་ལ་གནས་པ༴ ལྷ་མིན་གཡུལ་ངོ་ཟློག་པ༴ ལྷ་དམག་བྱེ་བ་དུང་ཕྱུར༴ དཔལ་ལྡན་ལྷ་མོ་ནག་མོ༴ ལྷ་མོ་བྱེ་བ་འཁོར་བཅས༴ འཇིག་རྟེན་བསྟན་མ་བཅུ་གཉིས༴ གསང་སྔགས་ཕྱི་ནང་བསྟན་སྲུང༴ རིག་འཛིན་བརྒྱུད་ཀྱི་སྲུང་མ༴ སློབ་དཔོན་བརྒྱུད་ཀྱི་སྲུང་མ༴ ཕ་མེས་བརྒྱུད་ཀྱི་སྲུང་མ༴ དབེན་གནས་གཉན་གྱི་སྲུང་མ༴ ཕྱི་ཨ་དཀར་དཀར་གྱི་སྲུང་མ༴ ཚངས་པ་ལ་སོགས་ལྷ་བརྒྱད༴ ཉི་མ་ལ་སོགས་གཟའ་བརྒྱད༴ སྨིན་དྲུག་ལ་སོགས་རྒྱུ་སྐར༴ མཐའ་ཡས་ལ་སོགས་ཀླུ་བརྒྱད༴ ཛམ་ལྷ་ལ་སོགས་ནོར་ལྷ༴ དྲི་ཟ་ལ་སོགས་ཕྱོགས་སྐྱོང༴ ཕྱི་ནང་གསང་བའི་ཆོས་སྐྱོང༴ མེད་པ་ཡོད་ཅེས་དགྲ་བླ༴ སྟོང་ལ་ཆགས་པའི་དགྲ་བླ༴ འབྱུང་བ་ཆགས་པའི་དགྲ་བླ༴ སྲིད་པའི་ལྷ་ལུང་དཀར་པོ༴ འདོད་རིགས་སྨན་པ་བཅོ་བརྒྱད༴ མ་ཆགས་སྟོང་གི་དགྲ་བླ༴ ཡེ་ནས་སྲིད་པའི་དགྲ་བླ༴ འདོད་དགུ་ཆགས་པའི་དགྲ་བླ༴ མི་ཐུབ་དགྲ་བླ་སྤུན་གསུམ༴ ཕ་མེས་བརྒྱུད་ཀྱི་དགྲ་བླ༴ མི་རབས་བརྒྱུད་ཀྱི་དགྲ་བླ༴ ཕྱི་རབས་བརྒྱུད་ཀྱི་དགྲ་བླ༴ དམུ་རབས་བརྒྱུད་ཀྱི་དགྲ་བླ༴ གཙུག་རབས་བརྒྱུད་ཀྱི་དགྲ་བླ༴ མི་འུ་གདུང་དྲུག་དགྲ་བླ༴ སྨོན་པའི་རྫི་ལུང་འཕྱོ་བ༴ ཕ་མཚུན་ཡབ་ལྷ་གདལ་དྲུག༴ མ་བཙུན་རྒྱལ་མོ་མཐིང་གེ༴ སྨན་བཙུན་དེ་མོ་དབུ་དཀར༴ གྲི་མཚུན་སྟག་ཆས་བལ་བུ༴ རྗེ་ཡི་མགུར་ལྷ་བཅུ་གསུམ༴ སྲིད་པ་ཆགས་པའི་དགྲ་བླ༴ མ་སང་རྡོ་རྗེ་ལེགས་པ༴ བཙན་རྒོད་འབར་བ་སྤུན་བདུན༴ ཤར་གྱི་རྨ་ཆེན་སྤོམ་ར༴ རྨ་རིགས་སུམ་བརྒྱ་དྲུག་ཅུ༴ ལྷོ་ཡི་འཛམ་བུ་གླིང་ཆུང༴ ཀླུ་འཁོར་སུམ་བརྒྱ་དྲུག་ཅུ༴ ནུབ་ཀྱི་གཉན་ཆེན་ཐང་ལྷ༴ ལྷ་འཁོར་སུམ་བརྒྱ་དྲུག་ཅུ༴ བྱང་གི་ལྷ་བཙན་བུ་ལེ༴ བཙན་འཁོར་སུམ་བརྒྱ་དྲུག་ཅུ༴ ཤར་ལྷོ་ནུབ་བྱང་ཀུན་འགྲོ་བའི། །དགྲ་བླ་གཉན་པོ་ཐམས་ཅད༴ སྨ་རེ་མཆེད་དང་ལྕམ་དྲལ༴ ཡར་ལྷ་དེ་ནི་ཤམ་པོ༴ འོ་དེ་དེ་ནི་གུང་རྒྱལ༴ གཉན་པོ་སྐུ་ལྷ་གེར་འཛོ༴ ཕོ་ལྷ་ལྷ་འུ་གཡང་དཀར༴ ལྷ་གཉན་ཚོགས་ལྷ་གུ་རུ༴ ཁམས་གསུམ་ཀླུ་དང་ས་བདག༴ ཕོ་ལྷ་དགྲ་བླ་གཉན་པོ༴ ཡུལ་གྱི་ས་བདག་གཉན་པོ༴ གཞིས་ལ་གནས་པའི་གཞི་བདག༴ མཁར་ལ་གནས་པའི་རྩེ་ལྷ༴ ཇག་ཡག་ཅང་སེ་གཉན་པོ༴ ཐབ་ལ་གནས་པའི་ཐབ་ལྷ༴ ལམ་ལ་གནས་པའི་ལམ་ལྷ༴ དུད་པ་གནམ་དུ་སོང་བ་ཡིས༔ ནམ་མཁའ་གང་བའི་ལྷ་ཚོགས༴ མེ་ལྕེ་བར་དུ་འབར་བ་ཡིས༔ བར་སྣང་གང་བའི་ལྷ་ཚོགས༴ མེ་གཞི་ས་གཞིའི་སྟེང་དུ་འབར༔ ས་གཞི་གང་བའི་ལྷ་ཚོགས༴ མེ་སྟག་དྲག་པོའི་ཐོག་རྒོད་འཕྲོ༔ གདུག་པའི་དགྲ་བགེགས་ཁོ་ཐག་ཆོད༔ ཐལ་བ་ཆེན་པོའི་རླུང་ལ་བསྐུར༔ དགྲ་བགེགས་ཐལ་བའི་རྡུལ་དུ་རློག༔ ཀྱཻ༔ ཕྱི་སྣོད་འཇིག་རྟེན་ལྷ་ཚོགས་བསང༔ རྩི་ཤིང་ནགས་ཚལ་ལྷ་ཚོགས་བསང༔ ནང་བཅུད་སེམས་ཅན་ལྷ་ཚོགས་བསང༔ ཕ་རི་གཡས་ལ་གནས་པ༴ ཚུར་རི་གཡོན་ལ་གནས་པ༴ ཉིན་དང་སྲིབ་ལ་གནས་པ༴ ཕྱི་རབས་བརྒྱུད་ཀྱི་སྲུང་མ༴ དམུ་རབས་བརྒྱུད་ཀྱི་སྲུང་མ༴ གཙུག་རབས་བརྒྱུད་ཀྱི་སྲུང་མ༴ སྟོང་གི་སྟོང་ལྷ་མོ་ཆུ༴ དབྲ་ཡི་དབྲ་མོ་དབྲ་ཁྲ༴ འབྲུ་ཡི་འབྲུ་མོ་ཁྲོམ་ཁྲོམ༴ སྒ་ཡི་སྒ་མོ་ལེ་ལེ༴ དབའ་ཟླའི་ཚལ་སྟག་དམར་པོ༴ སྡ་ཡི་དགུ་རྒྱུད་དགུ་ཁྲམས༴ རང་ལ་ཡོད་པའི་དགྲ་བླ༴ གྲོགས་ལ་འགོ་བའི་དགྲ་བླ༴ དགྲ་བསད་གྲུབ་པའི་དགྲ་བླ༴ དར་མ་ཐོབ་པའི་དགྲ་བླ༴ ཆེ་བཙུན་སྨོན་པའི་དགྲ་བླ༴ ཐུག་དཀར་སུམ་བརྒྱ་དྲུག་ཅུ༴ འབར་བ་ཉིས་བརྒྱ་ལྔ་བཅུ༴ ཝེར་མ་བརྒྱ་དང་བརྒྱད་ཅུ༴ མེད་པ་ཡོད་སྲིད་དགྲ་བླ༴ སྲིད་པའི་ལྷ་ལུང་དཀར་པོ༴ གླིང་བཞི་དར་བའི་དགྲ་བླ༴ སྐུ་གསུང་ཐུགས་ཀྱི་དགྲ་བླ༴ ཕ་མེས་དར་བའི་སྲས་བཙུན༴ མ་ཕྱི་སྔ་མའི་སྨན་བཙུན༴ གཅོད་ཁམས་བཟང་བའི་ཟོ་དོར༴ ཚེ་རབས་བརྒྱུད་ཀྱི་ཟོ་དོར༴ དམུ་རབས་བརྒྱུད་ཀྱི་ཟོ་དོར༴ གཙུག་རབས་བརྒྱུད་ཀྱི་ཟོ་དོར༴ མི་འུ་གདུང་དྲུག་ཟོ་དོར༴ བོད་ཀྱི་མགུར་ལྷ་བཅུ་གསུམ༴ དགེ་བསྙེན་སུམ་བརྒྱ་དྲུག་ཅུ༴ གནམ་གྱི་བརྒྱ་བྱིན་དཀར་པོ༴ ས་ཡི་བརྒྱ་བྱིན་ནག་པོ༴ བར་སྣང་བརྒྱ་བྱིན་ཁྲ་བོ༴ ཕྱི་བཙན་ནང་བཙན་དབུས་བཙན༴ ལྷ་ཁང་བཙན་རྒོད་འཁོར་བཅས༴ རིགས་ལྡན་ཁྲོ་རྒྱལ་ནུབ་རེ༴ མཆེད་འཁོར་སུམ་བརྒྱ་དྲུག་ཅུ༴ རི་རབ་ཆེན་པོའི་ས་བདག༴ གསེར་གྱི་རི་ལ་གནས་པ༴ རོལ་མཚོ་བདུན་ལ་གནས་པ༴ གླིང་བཞི་གླིང་ཕྲན་ས་བདག༴ མངའ་རིས་སྐོར་གསུམ་གཞི་བདག༴ དབུས་གཙང་རུ་བཞིའི་གཞི་བདག༴ མདོ་ཁམས་སྒང་དྲུག་གཞི་བདག༴ ཏི་སེ་གངས་ཀྱི་ས་བདག༴ ཕུ་དྲུག་གནས་པའི་ས་བདག༴ མཐོ་བ་མཁའ་ལ་གནས་པ༴ དམའ་བ་ས་ལ་གནས་པ༴ ས་བདག་གཙང་བཙན་འཁོར་བཅས༴ ས་ཡི་ལྷ་མོ་བསྟན་མ༴ ས་འཛིན་ལག་པ་ཆེན་པོ༴ ལོ་འཁོར་བཅུ་གཉིས་ལྷ་རྣམས༴ གབ་རྩེ་དགུ་ཡི་ལྷ་རྣམས༴ ས་བདག་ཀླུ་གཉན་སྟོང་སྐོར༴ ཕོ་ལྷ་དགྲ་བླ་གཉན་པོ༴ མ་ལྷ་བུ་རྫི་ཞང་ལྷ༴ དགྲ་བླ་རེ་མོ་གཉན་པོ༴ རྣོ་མཐོང་སྟོན་པའི་རྣོ་ལྷ༴ མདུད་ལྷ་སུམ་བརྒྱ་དྲུག་ཅུ༴ ཟ་ཁ་འབྱེད་པའི་ཞལ་ལྕེ༴ ཝེར་མ་སུམ་བརྒྱ་དྲུག་ཅུ༴ ཁས་དྲགས་སུམ་བརྒྱ་དྲུག་ཅུ༴ སྤྱན་རྣོན་སུམ་བརྒྱ་དྲུག་ཅུ༴ རྫི་འུ་སུམ་བརྒྱ་དྲུག་ཅུ༴ ཉིན་གྱི་གྲོགས་མཁན་ཉི་མ༴ མཚན་གྱི་གྲོགས་མཁན་ཟླ་བ༴ སྒྲ་གཅན་ལ་སོགས་གཟའ་བརྒྱད༴ ཇག་ལ་འགྲོ་བའི་ཇག་དཔོན༴ དམག་ལ་འགྲོ་བའི་དམག་དཔོན༴ སྐུ་ལྷ་དེ་ནི་འཇིགས་མེད༴ ས་གཞི་འདི་ལ་གནས་པ་བསང༔ བདག་ཅག་འཁོར་དང་བཅས་པ་ཡི༔ མགོན་སྐྱབས་སྟོངས་གྲོགས་རྒྱབ་རྟེན་མཛོད༔ ཆོས་དང་མཐུན་པའི་སྟོངས་གྲོགས་མཛོད༔ མི་མཐུན་དགྲ་བགེགས་མེད་པར་མཛོད༔ འདོད་པའི་རེ་བ་བསྐང་དུ་གསོལ༔ རྒྱལ་ལོ་རྒྱལ་ལོ་ལྷ་རྒྱལ་ལོ༔ ཞེས་སྨོན་ལམ་བཏབ༔ ཕྱག་མཆོད་ནི༔ སེམས་ཅན་ཀུན་གྱི་མགོན་གྱུར་པའི༔ རྒྱལ་བ་ཤཱཀྱ་ཐུབ་པ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ བཅོམ་ལྡན་རྒྱལ་བ་རིགས་ལྔ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཡུམ་ལྔ་རིན་ཆེན་ཕྲེང་བ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཕྱོགས་བཅུའི་སངས་རྒྱས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ དུས་གསུམ་སངས་རྒྱས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཞི་ཁྲོ་དཔལ་ཆེན་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ རིགས་གསུམ་མགོན་པོ་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ གདུང་བ་སེལ་བ་ལ་སོགས་པའི༔ འཕགས་པ་རང་རྒྱལ་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འོད་སྲུངས་ཆེན་པོ་ལ་སོགས་པའི༔ ཉན་ཐོས་ཆེན་པོ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ བྷ་ར་དྷྭ་ཛ་ལ་སོགས་པའི༔ གནས་བརྟན་ཆེན་པོ་བཅུ་དྲུག་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ནམ་མཁའི་སྙིང་པོ་ལ་སོགས་པའི༔ བྱང་ཆུབ་སེམས་དཔའ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཆོས་སྐུ་ཀུན་བཟང་ལ་སོགས་པའི༔ རྩ་བརྒྱུད་བླ་མ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཨིནྡྲ་བོ་དྷི་ལ་སོགས་པའི༔ གྲུབ་ཆེན་བརྒྱད་པོ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཀླུ་ཡི་བྱང་ཆུབ་ལ་སོགས་པའི༔ གྲུབ་ཆེན་བརྒྱད་ཅུ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཀླུ་སྒྲུབ་སྙིང་པོ་ལ་སོགས་པའི༔ རྒྱན་དྲུག་མཆོག་གཉིས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འཇམ་དཔལ་སྐུ་དང་པདྨ་གསུང༔ ཕུར་པ་འཕྲིན་ལས་ལ་སོགས་པའི༔ སྒྲུབ་པ་བཀའ་བརྒྱད་ལྷ་རྣམས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ནུབ་ཕྱོགས་ཨོ་རྒྱན་ལ་སོགས་པའི༔ དུར་ཁྲོད་ཆེན་པོ་བརྒྱད་རྣམས་ཀྱི༔ མ་སྲིང་མཁའ་འགྲོ་རྒྱ་མཚོ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ གནས་དང་ཉེ་བའི་གནས་དང་ཡུལ༔ ཉི་ཤུ་རྩ་བཞིའི་མཁའ་འགྲོ་དང༔ སྲུང་མ་ཞིང་སྐྱོང་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཁྱད་པར་འགྲོ་བའི་གཉེན་གཅིག་པུ༔ ཨོ་རྒྱན་པདྨ་འབྱུང་གནས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འདོད་དགུའི་རེ་བ་བསྐང་དུ་གསོལ༔ རྒྱགས་བརྔན་གྱི་གཞུང་དངོས་ནི༔ ཧཱུྃ༔ མཆོད་ཡོན་མེ་ཏོག་བདུག་སྤོས་དྲི༔ ཞལ་ཟས་རོལ་མོ་གཏོར་མ་དང༔ སྐུ་གླུད་བསང་ཕུད་སྣ་ཚོགས་ཀྱིས༔ འཇིག་རྟེན་འདས་དང་མ་འདས་པའི༔ སྲུང་མ་གཉན་པོ་ཐམས་ཅད་དང༔ ལྷ་ཀླུ་གནོད་སྦྱིན་དྲི་ཟ་སོགས༔ ཆེ་དགུ་གཉན་དགུ་ཐམས་ཅད་བརྔན༔ ཤེལ་སྒོང་ནག་པོ་སྤྱི་དཀར་དང༔ ཤ་ཁྲག་དམར་གྱི་གཏོར་མ་ཡིས༔ མ་ཧཱ་ཀ་ལ་ལྕམ་དྲལ་དང༔ ལེགས་ལྡན་ནག་པོ་འཁོར་བཅས་བརྔན༔ རྒྱ་ཆེའི་མཆོད་པ་སྣ་ཚོགས་དང༔ བདུད་རྩི་ཤ་ཁྲག་གསེར་སྐྱེམས་དང༔ མཁའ་ལྡིང་ནག་པོ་གསེར་མིག་གིས༔ དཔལ་ལྡན་ལྷ་མོ་འཁོར་བཅས་བརྔན༔ ཕྱི་ནང་གསང་བའི་མཆོད་གཏོར་དང༔ བྱ་ནག་ཁྱི་སྤྱང་དོམ་དྲེད་དང༔ བསང་ཕུད་སྤྱན་གཟིགས་སྣ་ཚོགས་ཀྱིས༔ སྔགས་བདག་ཤན་པ་གཟའ་མཆོག་དང༔ དམར་ནག་དམ་ཅན་ལ་སོགས་པ༔ སྲུང་མ་དམ་ཅན་འཁོར་བཅས་བརྔན༔ ལྷ་རྣམས་མེ་ཏོག་ཕྲེང་བས་བརྔན༔ ཀླུ་རྣམས་དཀར་གསུམ་གཏོར་མས་བརྔན༔ གཉན་རྣམས་མངར་གསུམ་དར་ཟབ་བརྔན༔ ས་བདག་གསེར་དངུལ་རིན་ཆེན་བརྔན༔ ལྷ་མོ་བསྟན་མ་བུམ་པས༴ དྲི་ཟ་དྲི་དང་གསུར་གྱིས༴ གཤིན་རྗེ་ཤ་ཡི་གཏོར་མས༴ ལྟོ་ཕྱེ་གྲུལ་བུམ་མི་འམ་ཅི༔ མཁའ་ལྡིང་མཆོད་སྦྱིན་གཏོར་མས༴ གནོད་སྦྱིན་རླུང་ལྷ་དྲང་སྲོང་རྣམས༔ གསེར་གཡུ་སྦ་དང་སྙུག་མས༴ དགེ་བསྙེན་ཤ་དང་ཆང་གིས༴ ལྷ་འདྲེ་ཡིད་ཀྱི་གཟུགས་ཅན་རྣམས༔ ཡིད་དང་མཐུན་པའི་གཏོར་མས༴ བཙན་རྣམས་བྱ་དང་རི་དྭགས༴ ཀླུ་བདུད་སྦྲུལ་དང་སྦལ་པས༴ ལན་ཆགས་མགྲོན་རྣམས་གཏོར་མས༴ སྡེ་བརྒྱད་དམ་སྲི་འབྱུང་པོ་རྣམས༔ སྐུ་གླུད་དར་ཟབ་གཏོར་མས༴ རྒྱ་མཚོའི་ནང་གི་ཀླུ་ཆེན་བརྒྱད༔ ཀླུ་རྟ་རྒྱན་དང་བཅས་པས༴ བར་སྣང་གནས་པའི་གཟའ་ཆེན་བརྒྱད༔ ནས་ནག་ར་ནག་སྙིང་གིས༴ རྒྱུ་སྐར་ཉི་ཤུ་རྩ་བརྒྱད་དང༔ བློན་པོ་སུམ་ཅུ་རྩ་བདུན་རྣམས༔ རིན་ཆེན་གསེར་དངུལ་ཕྱེ་མས༴ འཕྲོག་མ་མ་བུ་ལྔ་བརྒྱའི་ཚོགས༔ ཆངས་བུ་དག་གི་གཏོར་མས༴ རིགས་ཀྱི་སྲུང་མ་ཐམས་ཅད་ལ༔ སོ་སོར་དགྱེས་པའི་གཏོར་མས༴ སྒོ་བཞིའི་སྲུང་མ་འཁོར་བཅས་རྣམས༔ རིན་ཆེན་དར་ཟབ་དོང་ཙེས༴ ལྷ་སྲུང་གཉན་པོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱི༔ བསམ་པ་སྒྲུབས་ལ་རེ་བ་སྐོངས༔ འཁོར་སྲུངས་རྐྱེན་ཟློགས་བར་ཆད་སོལ༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱིས༔ བྱང་ཆུབ་ཐུགས་སུ་ཆུད་པའི་ས༔ རྡོ་རྗེ་གདན་གྱི་ས་བདག་བརྔན༔ རྒྱ་གར་ཤར་ནུབ་རི་བོ་ཆེ༔ མ་མོ་མཁའ་འགྲོ་འདུ་བའི་གནས༔ རི་བོ་ཏ་ལའི་ས་བདག་བརྔན༔ རྡོ་རྗེ་གདན་གྱི་བྱང་ཕྱོགས་ན༔ བྱ་རྒོད་ཕུང་པོའི་རི་དང་ནི༔ སྤོས་ངད་ལྡན་པའི་རི་བོ་ཡི༔ ས་བདག་ཀླུ་གཉན་ཐམས་ཅད་བརྔན༔ ཙ་རི་ཙ་གོང་ལ་སོགས་པའི༔ རྒྱ་གར་ཤར་ཕྱོགས་ཡུལ་རྣམས་ཀྱི༔ ས་བདག་གཉན་པོ་ཐམས་ཅད༴ བསིལ་བ་ཚལ་གྱི་དུར་ཁྲོད་དང༔ རྔམ་པ་སྒྲ་སྒྲོག་ཚང་ཚིང་འཁྲིགས༔ ཧ་ཧ་རྒོད་པ་ལ་སོགས་པའི༔ དུར་ཁྲོད་བརྒྱད་ཀྱི་ས་བདག༴ རྒྱལ་པོའི་ཁབ་དང་ཡངས་པ་ཅན༔ མཉན་ཡོད་གནས་བཅས་ལ་སོགས་པའི༔ གྲོང་ཁྱེར་ཡུལ་འཁོར་ཐམས་ཅད་ཀྱི༔ ས་བདག་གཉན་པོ་ཐམས་ཅད༴ གཞན་ཡང་ཁ་ཆེ་ཨོ་རྒྱན་ཡུལ༔ ལི་ཡུལ་བལ་ཡུལ་ལ་སོགས་པའི༔ ས་བདག་གཉན་པོ་ཐམས་ཅད༴ འཇིག་རྟེན་གསུམ་སྣང་མནྡྷ་ར༔ འབིགས་བྱེད་ལ་སོགས་འཛམ་གླིང་རི༔ ས་བདག་གཉན་པོ་ཐམས་ཅད༴ མ་དྲོས་ལ་སོགས་མཚོ་རྣམས་དང༔ གངྒ་པཀྵུ་སིནྡྷུ་སོགས༔ ཆུ་ཆེན་རྣམས་ཀྱི་ས་བདག༴ ཏི་སེ་གངས་རི་ལ་སོགས་པའི༔ མགུར་ལྷ་གཉན་པོ་ཐམས་ཅད༴ མ་དྲོས་ཀླུ་གཉན་ལ་སོགས་པའི༔ ས་བདག་ཀླུ་གཉན་ཐམས་ཅད༴ རི་བོ་གནྡྷ་ལ་སོགས་པའི༔ ལི་ཡི་ས་བདག་གཉན་རྣམས༴ ལྕང་ར་སྨུག་པོ་ལ་སོགས་པའི༔ སོག་ཡུལ་གཞི་བདག་གཉན་པོ༴ གཞན་ཡང་གྲུ་གུ་ཞང་ཞུང་ཡུལ༔ གར་ལོག་ལ་སོགས་མཐའ་ཁོབ་ཡུལ༔ གཞི་བདག་གཉན་པོ་ཐམས་ཅད༴ རྒྱ་གར་རྒྱ་ནག་ཧོར་དང་འཇང༔ བལ་ཡུལ་བོད་ཡུལ་ལི་ཡུལ་སོགས༔ གཞི་བདག་གཉན་པོ་ཐམས་ཅད་བརྔན༔ བདག་ཅག་ཡོན་མཆོད་འཁོར་བཅས་ཀྱི༔ འཁོར་སྲུངས་རྐྱེན་ཟློགས་བར་ཆད་སོལ༔ བསམ་པ་སྒྲུབས་ལ་རེ་བ་སྐོངས༔ བཀྲ་ཤིས་བདེ་ལེགས་ཕུན་ཚོགས་མཛོད༔ སྒེར་གསོལ་མཛད་དགོས་རྣམས་དང་། དགྲ་བླ་དཔངས་བསྟོད། གཡང་འགུགས་བཅས་སྐབས་འདིར་བྱ། ཧཱུྃ༔ ཡུལ་ནི་རྡོ་རྗེ་བྲག་དམར་གྱི༔ སྲིང་གཅིག་གངས་དཀར་ཤ་མེད་མ༔ ཆིབས་སུ་དྲེའུ་རྟ་རྐང་གསུམ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་རྨ་ཆེན་སྤོམ་ར་ཡི༔ སྲིང་གཅིག་ཁ་རག་ཁྱུང་བཙུན་མ༔ ཆིབས་སུ་གྱི་ལིང་ཁ་དཀར་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་དབུ་རུ་ཀ་ཚལ་གྱི༔ སྲིང་གཅིག་རྡོ་རྗེ་གཡུ་སྒྲོན་མ༔ ཆིབས་སུ་ཆུ་རྟ་སྔོན་པོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་མ་ཧཱ་དེ་ཝ་ཡི༔ སྲིང་གཅིག་རྡོ་རྗེ་ཀུན་གྲགས་མ༔ ཆིབས་སུ་ཆུ་གླང་སྔོན་པོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ལྷོ་ཡུལ་དེ་སྙིང་གི༔ སྲིང་གཅིག་སྐྱི་མཐིང་གཡའ་མ་སྐྱོང༔ ཆིབས་སུ་གསེར་ཤ་ཡུ་མོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་སྔ་ཕྱི་དེ་གྲོང་ན༔ སྲིང་གཅིག་ཨུག་ཆོས་གཡའ་མོ་བསིལ༔ ཆིབས་སུ་རུས་སྦལ་མགོ་དགུ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་བལ་ཡུལ་གསེར་ཕུག་ན༔ ཨེ་ཀ་ཛཱ་ཊི་རལ་གཅིག་མ༔ ཆིབས་སུ་གཡུ་འབྲུག་སྔོན་མོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ན་ལེན་ཤིང་ལེན་ན༔ བཙན་ལ་རོལ་པའི་སྨན་གཅིག་མ༔ ཆིབས་སུ་དྲེའུ་རྟ་རྐང་གསུམ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ཀོང་ཡུལ་ཀོང་ཕུག་ན༔ གངས་ཀྱི་ཡུམ་ཆེན་གཡུ་བུན་མ༔ ཆིབས་སུ་སྟག་མོ་རི་བཀྲ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་མང་ཡུལ་མང་ཏིང་ན༔ ཆེ་ཞེ་གཙུག་གི་འོད་འཆང་མ༔ ཆིབས་སུ་འབྲོང་བུ་དར་མ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་དབུ་རུ་སྙིང་པོ་ཡི༔ བྱང་གི་མ་ཏིང་ཏིང་མོ་བཙུན༔ ཆིབས་སུ་འབྲོང་ཆེན་འགྱིང་བ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ན་སྒྲུབ་ཡུལ་ཀ་ཚལ་གྱི༔ མདའ་ལ་བཙན་མོ་གདུག་པ་འདུལ༔ ཆིབས་སུ་དོམ་བུ་སྙིང་དཀར་འཆིབ༔ བཤོས་བུ་སྙིང་དང་གཏོར་མས་བརྔན༔ བསྟན་མ་ཆེན་མོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱི༔ བསམ་པ་སྒྲུབས་ལ་རེ་བ་སྐོངས༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ བོད་ཡུལ་ཀུན་གྱི་གཞི་བདག་ནི༔ ཆེ་དགུ་གཉན་དགུ་ཐམས་ཅད་བརྔན༔ རྡོ་རྗེ་ལེགས་པ་ལ་སོགས་པའི༔ གཙང་གི་གཡས་རུ་ཉིན་སྲིབ་ཀྱི༔ གཞི་བདག་གཉན་པོ་ཐམས་ཅད་བརྔན༔ ཐང་ལྷ་བར་ལྷ་ལ་སོགས་པའི༔ དབུ་རུ་ཉིན་སྲིབ་ས་བདག༴ ཤམྦྷོ་གངས་བཟང་ལ་སོགས་པའི༔ གཡོ་རུ་ཉིན་སྲིབ་གཞི་བདག༴ ཡར་འབྲོག་གཡུ་མཚོ་ཕྱུག་མོ་བརྔན༔ བྱང་གི་གནམ་མཚོ་ཕྱུག་མོ༴ སྟོད་ཀྱི་ལྷ་རྒོད་མདུང་རྩེ༴ འོ་དེ་གུང་རྒྱལ་ལ་སོགས་པའི༔ ཉང་པོ་འོལ་དགའི་གཞི་བདག༴ སྒམ་པོ་དཔལ་རི་ལ་སོགས་པའི༔ དྭགས་པོའི་གཞི་བདག་ཐམས་ཅད༴ ཀོང་བཙུན་དེ་མོ་ལ་སོགས་པའི༔ ཀོང་པོའི་གཞི་བདག་གཉན་པོ༴ རྡོ་རྗེ་བྲག་སྐྱེས་ལ་སོགས་པའི༔ མོན་ཡུལ་རྡོ་དང་གློ་རྣམས་ཀྱི༔ གཞི་བདག་གཉན་པོ་ཐམས་ཅད༴ སྐུ་ལྷ་མཁའ་རི་ལ་སོགས་པའི༔ ལྷོ་བྲག་ཡུལ་གྱི་གཞི་བདག༴ ནགས་སོགས་ཆུ་རྒྱུད་དགེ་བསྙེན་དང༔ ཨ་ལ་རྔོད་ཀྱི་གཞི་བདག་བརྔན༔ རྔུ་ཡི་ཉིན་སྲིབ་ས་བདག་དང༔ གཞི་བདག་གཉན་པོ་ཐམས་ཅད༴ ལྷོ་ཡི་རོང་ལྷ་རྒྱལ་མཚན་དང༔ རོང་བཙན་ཁ་བ་དཀར་པོ༴ དབང་ལྷ་མོ་ནམ་མཆེད་བརྒྱད་དང༔ དམག་དཔོན་དགྲ་འདུལ་དབང་ཕྱུག་དང༔ སྨུག་རི་དམུ་བཙན་ལ་སོགས་པའི༔ ཚ་བ་སྒང་གི་གཞི་བདག༴ སྐམ་གྱི་མཐོང་ལ་རྨོག་གཞུ་དང༔ གཟེ་ཡི་རྔ་མོང་གྭ་པ་དང༔ ལྕི་ཡི་བྲག་ལ་མདའ་ཟུག་དང༔ ཟླ་སྙིང་དཀར་ནག་གསུམ་མདོ་དང༔ རྩི་ཡི་སྦ་རྒོད་མཐོན་པོ་དང༔ རྒྱམ་རྡོའི་གངས་དཀར་མཆེད་བརྒྱད་དང༔ ཟླ་བའི་གཞི་བདག་གཉན་པོ་བརྔན༔ ཀླུ་རྒྱལ་མི་མགོན་དཀར་པོ་སོགས༔ སྨར་ཁམས་སྒང་གི་གཞི་བདག༴ ལྷ་ཡི་དགེ་བསྙེན་ཆེན་པོ་སྟེ༔ སྒྱོགས་ཆེན་སྡོང་ར་ལ་སོགས་པའི༔ འབྲི་ཀླུང་ཉིན་སྲིབ་གཞི་བདག༴ ལྡན་གྱི་ཝེར་ཏེ་སྨེ་དགུ་དང༔ གེར་མཚོའི་རི་བོ་དབང་གཞུ་དང༔ མཚམས་ལྔའི་གཞི་བདག་གཉན་རྣམས༴ བཛྲ་བྲམ་ཟེ་ལ་སོགས་པའི༔ སྤོམ་འབོར་སྒང་གི་གཞི་བདག༴ ཤར་གྱི་རྨ་ཆེན་སྤོམ་ར་ནི༔ རྨ་རིགས་སུམ་བརྒྱ་དྲུག་ཅུ་མཆེད༔ སྲིང་ལྕམ་བཞི་བཅུ་རྩ་ལྔར་བཅས༔ རྨ་ཀླུང་ཉིན་སྲིབ་གཞི་བདག༴ བེ་འུ་ཡི་ནི་དུག་མཚོ་དང༔ སྟོང་ར་ཡི་ནི་མཚོ་ནག་དང༔ དབུ་ཡི་ཚྭ་མཚོ་དཀར་པོ་དང༔ ཁྲི་ཤོར་རྒྱལ་མོའི་མཚོ་དང་ནི༔ ཙོང་ཁ་ཡི་ནི་མཚོ་སྔོན་དང༔ མཚོ་སྨན་རྒྱལ་མོ་མཆེད་ལྔ༴ དགེ་རི་གཉན་པོ་ལ་སོགས་པའི༔ ཙོང་ཁའི་གཞི་བདག་གཉན་པོ༴ བྷ་དང་བྱ་རོག་ཧ་ལ་ཤན༔ གྷ་དང་བྱང་ངོས་གཞི་བདག༴ བྷ་དའི་བཙན་རྒོད་ལ་སོགས་པའི༔ གནས་རི་གནས་མར་ས་བདག༴ རྨ་ལུང་དན་ཏིག་ལ་སོགས་པའི༔ རྨ་ཡི་ཡུལ་གྱི་ས་བདག༴ གཞོན་ནུ་ཀརྟི་ལ་སོགས་པའི༔ ཧལ་ཧའི་ཡུལ་གྱི་གཞི་བདག༴ གཞོང་ལག་ལ་འོ་ཆེ་ལ་སོགས༔ གཡར་མོ་ཐང་གི་གཞི་བདག༴ སྤྱི་ཡི་མདུང་རི་མཐོན་པོ་དང༔ སྤོ་རི་བྲག་དམར་སྒང་རྒྱུད༴ སྤོ་ནའི་ཤེལ་ལུང་ཕྱུག་མོ་དང༔ གྲོལ་གྱི་མ་ལུང་གྲལ་གསུམ་དང༔ རྨང་གྲོལ་རལ་གསུམ་གཞི་བདག༴ དགུ་མིག་བཞི་གསུམ་གཞི་བདག༴ སྙེ་གོང་སྙེ་དམར་ལ་སོགས་པའི༔ སྙེ་གོང་ཉིན་སྲིབ་གཞི་བདག༴ བྲག་དམར་བྱ་རྒོད་ལ་སོགས་པའི༔ ཏེ་ཆུའི་ས་བདག་གཉན་པོ༴ ལྷ་སྲིན་གདུག་པ་མང་བྱེད་པའི༔ འོ་དེ་རལ་གསུམ་ས་བདག༴ ཤིན་ཏུ་ཁྲོ་གཏུམ་ཆེ་བ་ཡི༔ རྒྱལ་མོ་རོང་གི་གཞི་བདག༴ འཇང་རི་སྨུག་པོ་ལ་སོགས་པའི༔ འཇང་ཡུལ་གཞི་བདག་གཉན་པོ༴ རི་བོ་རྩེ་ལྔ་ལ་སོགས་པའི༔ རྒྱ་ནག་ཡུལ་གྱི་གཞི་བདག༴ ཤར་ཕྱོགས་བ་རེག་འོ་དེ་ཡི༔ ལྷ་ཀླུ་གནོད་སྦྱིན་དྲི་ཟ་སོགས༔ ཆེ་དགུ་གཉན་དགུ་ཐམས་ཅད་བརྔན༔ བདག་ཅག་ཡོན་མཆོད་འཁོར་བཅས་ཀྱི༔ རེ་བ་ཐམས་ཅད་སྐོང་བ་དང༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ གཞན་ཡང་སྟོང་གསུམ་འཛམ་གླིང་ཡུལ༔ ས་འོག་ས་སྟེང་ས་བླ་ཡི༔ གཞི་བདག་གཉན་པོ་ཐམས་ཅད་བརྔན༔ ས་ལ་གནས་པའི་ས་བདག༴ ཆུ་ལ་གནས་པའི་ཀླུ་རྣམས༴ བྲག་ལ་གནས་པའི་བཙན་རྣམས༴ བར་སྣང་གནས་པའི་གཉན་རྣམས༴ ཡུལ་ལྷ་གཞི་བདག་གཉན་པོ༴ ལ་ལ་གནས་པའི་གཞི་བདག༴ ཕྲང་ལ་གནས་པའི་གཞི་བདག༴ གྲུ་ཟམ་གནས་པའི་གཞི་བདག༴ ལམ་ལ་གནས་པའི་གཞི་བདག༴ གཞི་བདག་གཉན་པོ་ཁྱེད་རྣམས་ཀྱང༔ མཐུ་སྟོབས་རྫུ་འཕྲུལ་སོ་སོར་ཆེ༔ དཔལ་དང་འབྱོར་པ་སོ་སོར་ཆེ༔ མངའ་རིས་མངའ་ཐང་སོ་སོར་ཆེ༔ མཛད་པ་འཕྲིན་ལས་སོ་སོར་ཆེ༔ མཆོད་པའི་འོས་སུ་སོ་སོར་ཆེ༔ དེ་བས་གཞི་བདག་གཉན་རྣམས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འདོད་པའི་དོན་ལ་གསོལ་འདེབས་ཀྱིས༔ སྔོན་གྱི་ཐུགས་དམ་བརྩེར་དགོངས་ལ༔ དགྱེས་པའི་མཆོད་པ་བཞེས་ནས་ཀྱང༔ བདག་གི་རེ་བ་བསྐང་དུ་གསོལ༔ བརྔན་འོས་ཁྱེད་རྣམས་བརྔན་པ་ཡིས༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ གཞན་ཡང་བརྔན་པར་འོས་པའི་མགྲོན༔ མིང་དང་མཚན་ནས་མ་ཐོན་པའི༔ བླ་མ་ཡི་དམ་མཁའ་འགྲོ་དང༔ སྲུང་མ་དམ་ཅན་རྒྱ་མཚོ་དང༔ ལྷ་དང་དྲང་སྲོང་ཐམས་ཅད་དང༔ ཡུལ་ལྷ་ནོར་ལྷ་ནང་ལྷ་དང༔ ལམ་ལྷ་གཉན་པོ་ཐམས་ཅད་དང༔ གཞན་ཡང་དུས་གསུམ་ཕ་མ་དང༔ ཁམས་གསུམ་རིགས་དྲུག་ཐམས་ཅད་དང༔ ཡི་དྭགས་རྣམས་དང་བགེགས་རྣམས་དང༔ ལན་ཆགས་སྙིང་རྗེའི་མགྲོན་རྣམས་དང༔ གློ་བུར་ལྷགས་པའི་མགྲོན་རྣམས་དང༔ ལྷག་མའི་མགྲོན་རིགས་ཐམས་ཅད་ལ༔ རྒྱལ་ཕམ་མེད་པར་ཐོབ་ནས་ཀྱང༔ ཡིད་ལ་རེ་བ་རྫོགས་པར་ཤོག༔ ཧཱུྃ༔ དེ་ལྟར་མགྲོན་རིགས་ཐམས་ཅད་ཀྱི༔ མངའ་རིས་སྤྱན་ལམ་སོ་སོ་རུ༔ མཆོད་སྦྱིན་དམ་པ་འདི་བསྔོས་པས༔ ལོངས་སྤྱོད་ནམ་མཁའ་མཛོད་གྱུར་ཏེ༔ གང་ལ་ཅི་དགོས་ཐོབ་པར་ཤོག༔ མགྲོན་རྣམས་བརྔན་པའི་བྱིན་རླབས་ཀྱིས༔ བདག་གི་དོན་རྣམས་འགྲུབ་པར་ཤོག༔ སྔོན་ཚེ་སློབ་དཔོན་པདྨ་ཡིས༔ རྒྱགས་བརྔན་ཆེན་པོ་འདི་མཛད་པས༔ གཙུག་ལག་གྲུབ་ཅིང་མཐའ་དམག་ཐུལ༔ རྗེ་ཡི་དགོངས་པ་གྲུབ་པ་ལྟར༔ བདག་གི་དོན་རྣམས་མངག་པ་ནི༔ བདག་ཅག་ཡོན་མཆོད་འཁོར་བཅས་ཀྱི༔ འཁོར་སྲུངས་རྐྱེན་ཟློགས་བར་ཆད་སོལ༔ ཚེ་སྲིངས་དཔལ་དང་འབྱོར་པ་སྤེལ༔ སྙན་པ་སྒྲུབས་ལ་གྲགས་པ་སྒྲོགས༔ རྟག་ཏུ་འགོ་ཞིང་གྲོགས་མཛོད་ལ༔ འགྲོ་ལམ་བདེ་ཞིང་འཇིགས་པ་མེད༔ ལམ་འཕྲང་བདེ་བར་བགྲོད་པ་དང༔ རྙེད་པ་ཆེན་པོ་འགྲུབ་པ་དང༔ གཞིས་བྱེས་ཀུན་ཏུ་བཀྲ་ཤིས་ཤོག༔ ལྷ་དང་སྲུང་མ་ཐམས་ཅད་ཀྱང༔ དགེ་དང་ཞི་བའི་ལས་མཛད་པ༔ དམ་ཆོས་རིན་ཆེན་སྤྱོད་པར་ཤོག༔ ཀུན་ཀྱང་རྒྱལ་བའི་བཀའ་ལ་ཉོན༔ སྡིག་པ་ཅི་ཡང་མི་སྤྱད་ཅིང༔ དགེ་བ་ཕུན་སུམ་ཚོགས་པར་སྤྱད༔ རང་གི་སེམས་ནི་ཡོངས་སུ་འདུལ༔ འདི་ནི་སངས་རྒྱས་བསྟན་པ་ཡིན༔ ཆོས་རྣམས་གཟུགས་བརྙན་ལྟ་བུ་སྟེ༔ དག་ཅིང་གསལ་ལ་རྙོག་པ་མེད༔ གཟུང་དུ་མེད་ཅིང་བརྗོད་དུ་མེད༔ རྒྱུ་དང་ལས་ལས་ཀུན་ཏུ་འབྱུང༔ དེ་ལྟར་ཆོས་རྣམས་ཤེས་གྱིས་ལ༔ སེམས་ཅན་དོན་ནི་མཉམ་མེད་བྱོས༔ འོན་ཀྱང་སྐྱོབ་པའི་སྲས་སུ་སྐྱེ༔ དེ་ལྟར་ཆོས་དང་ཟང་ཟིང་གི༔ སྦྱིན་པས་ཚོགས་ཆེན་ཀུན་རྫོགས་ཏེ༔ ཐམས་ཅད་མངོན་པར་སངས་རྒྱས་ཤོག༔ འཕྲིན་ལས་རྣམ་བཞི་ལྷུན་གྱིས་གྲུབ༔ གཞན་དོན་ནུས་པ་མཐར་ཕྱིན་ནས༔ བྱིན་རླབས་དངོས་གྲུབ་ཡིད་བཞིན་གཏེར༔ ཀུན་བཟང་ཡེ་ཤེས་ཐོབ་པར་ཤོག༔ གནས་སྐབས་གནས་དང་ལམ་བགྲོད་དང༔ རྩོད་དང་དམག་དང་དགྲ་འཐབ་ལས༔ བདག་ཅག་ཡོན་མཆོད་རྒྱལ་གྱུར་ཅིག༔ གང་འདོད་དོན་ཀུན་འགྲུབ་པར་ཤོག༔ མགྲོན་པོ་དག་ནི་དོན་གཉེར་བར༔ ཕྱོགས་རྣམས་སུ་ནི་འགྲོ་བ་ན༔ བདག་གི་དོན་ཀུན་འགྲུབ་པ་དང༔ རྙེད་པ་ཆེན་པོ་ཐོབ་པར་ཤོག༔ ཕྱོགས་རྣམས་ཀུན་གྱི་ལྷ་རྣམས་དང༔ འཇིག་རྟེན་སྐྱོང་བ་གྲགས་དང་ལྡན༔ བཀྲ་ཤིས་བདེ་ལེགས་བྱེད་པོ་རྣམས༔ སྐྱེ་དགུ་ཀུན་གྱི་བསྲུང་བར་ཤོག༔ གསུམ་པ་མཇུག་གི་ཆོ་ག་ནི། ཡིག་བརྒྱས་ལྷག་ཆད་ཁ་བསྐངས་ལ། ཧཱུྃ༔ མགྲོན་རྣམས་ཀུན་གྱི་སྤྱན་ལམ་དུ༔ བདག་གིས་མཆོད་སྦྱིན་བཤམས་པ་ལ༔ འགལ་འཁྲུལ་ནོངས་པ་ཅི་མཆིས་པ༔ ཐམས་ཅད་མ་ལུས་བཟོད་པར་གསོལ༔ གཙོ་བོས་ནུས་པ་མ་མཆིས་པ༔ མ་འབྱོར་མ་རྙེད་མ་ཚང་བ༔ འདིར་ནི་བྱ་མིན་གང་བྱས་པ༔ དེ་དག་ཐམས་ཅད་བཟོད་པར་གསོལ༔ ཨོཾ༔ ཁྱེད་ཀྱིས་སེམས་ཅན་དོན་ཀུན་མཛད༔ རྗེས་སུ་མཐུན་པའི་དངོས་གྲུབ་སྩོལ༔ སངས་རྒྱས་ཡུལ་དུ་གཤེགས་ནས་ཀྱང༔ སླར་ཡང་འབྱོན་པར་མཛད་དུ་གསོལ༔ འཇིག་རྟེན་འདས་དང་མ་འདས་ཀྱི༔ མགྲོན་རྣམས་མ་ལུས་ཐམས་ཅད་ཀུན༔ རང་རང་བདེ་བར་གཤེགས་ནས་ཀྱང༔ སླར་ཡང་འབྱོན་པར་མཛད་དུ་གསོལ༔ ཨོཾ་བཛྲ་མུ༔ སརྦ་ལོ་ཀ་གཙྪ༔ རྒྱགས་བརྔན་ཆེན་མོ་སློབ་དཔོན་པདྨས་མཛད་པ་རྫོགས་སོ༔ བྲག་རི་དུག་སྦྲུལ་སྤུངས་འདྲའི་སྐེད་ནས་རིག་འཛིན་རྒོད་ཀྱི་ལྡེམ་འཕྲུ་ཅན་གྱིས་གཏེར་ནས་གདན་དྲངས་པའོ།། །། ༄༅། །བྱང་གཏེར་གྱི་དགྲ་བླ་དཔངས་བསྟོད་གཞན་ཕན་རོལ་པ་ཞེས་བྱ་བ་བཞུགས་སོ། །དགྲ་བླ་དཔངས་བསྟོད་འདི་ལ་བསང་མཆོད་གཞུང་བཞིན་བྱས་ལ༔ གོ་མཚོན་མདའ་གཞུ་ཁྲབ་རྨོག་འཁོར་གསུམ་དང༔ འོག་རྟ་མདའ་དར་དཀར་པོ་དང༔ ཤ་ཁྲག་དམར་གཏོར་མདུད་དར་དང༔ དཀར་གསུམ་མངར་གསུམ་ཕྱེ་མར་འོ་སྐོལ་དང༔ གསེར་སྐྱེམས་གཡུ་སྔོན་དང་བཅས་བཤམས་ལ༔ ལས་ཀྱི་རྡོ་རྗེས་དམག་མི་ཚོ་ཁ་ལག་བཀྲུར་བཅུག་སྤོས་བསྲེག་ནས་གཡུག་ཆབ་བྲན༔ དེ་ནས་སྙན་ངར་འབོལ་གསུམ་འཛོམ་པའི་གསུང་སྐད་དང༔ སྔགས་པའི་དབྱངས་ཀྱིས་ཐོག་མར་འདི་སྐད་དོ༔ དཔག་བསམ་ནམ་མཁའི་ཀློང་རུམ་དུ༔ དུང་སྐྱོང་དཀར་པོ་ཡེ་ནས་སྲིད༔ ཞལ་གྱི་རླངས་པ་རླུང་ལྟར་འཕྱོ༔ ནམ་མཁའི་མཐོངས་ནས་སྤྲིན་ལྟར་འཕྱོ༔ དེ་ལས་ཆུ་ཡི་ཟིལ་འཕྲོས་པས༔ བདུད་རྩི་རྒྱ་མཚོར་མེར་ཏེ་འཁྱིལ༔ སྟེང་དུ་འཕྱོ་བའི་ལྦུ་བ་ལ༔ སྒོ་ང་བརྒྱ་དང་སྟོང་དུ་སྲིད༔ ནག་པོ་ལྕགས་ཀྱི་སྒོ་ང་བརྒྱ༔ རྡོལ་བའི་ནང་ནས་བྱུང་བ་ནི༔ ལྕགས་ཀྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ནག་པོ་བདུད་ཀྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ གསེར་སྒོང་བརྒྱ་པོ་རྡོལ་པ་ལས༔ གསེར་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ བཙུན་པ་དམུ་ཡི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ གཡུ་སྒོང་བརྒྱ་པོ་རྡོལ་པ་ལས༔ གཡུ་ཡི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཡེ་མཁྱེན་སྐོལ་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ དངུལ་སྒོང་བརྒྱ་པོ་རྡོལ་པ་ལས༔ དངུལ་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཡེ་མཁྱེན་སྨན་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ འཁར་སྒོང་བརྒྱ་པོ་རྡོལ་པ་ལས༔ འཁར་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ བདུད་འདུལ་འཁར་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ དུང་སྒོང་བརྒྱ་པོ་རྡོལ་པ་ལས༔ དུང་གི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཆུ་ཁམས་རླུང་གི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ བསེ་སྒོང་བརྒྱ་པོ་རྡོལ་པ་ལས༔ བསེ་ཡི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ མགོ་ནག་མི་ཡི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ ཅེས་སྤྱན་འདྲེན་ནོ༔ དགྲ་བླ་དཔངས་བསྟོད་ཀྱི་བསང་ནི༔ ཕྱེ་མར་ཇ་ཕུད་ཆང་ཕུད་རྣམས་བསང་ཁང་དུ་འབུལ་ཞིང་གསོལ་བ་བཏབ༔ ལྷ་གསོལ་ནས་བསང་གི་རིམ་པ་ནི་འདི་སྐད་དོ༔ ཀྱཻ༔ གསེར་ལོ་འབར་བའི་སྟག་པ་དང༔ གཡུ་ལོ་འབར་བའི་ཤུག་པ་དང༔ དུང་ལོ་འབར་བའི་སུར་དཀར་དང༔ མཁན་པ་སྤོས་དང་ཨ་ཀ་རུ༔ བདུད་རྩི་ཅན་གྱི་དུད་པ་ཡིས༔ སྐུ་གསུང་ཐུགས་ཀྱི་དགྲ་བླ་བསང༔ ཡེ་ནས་སྲིད་པའི་དགྲ་བླ་བསང༔ མཐོན་པོ་དགུང་གི་དགྲ་བླ་བསང༔ དམའ་བ་ས་ཡི་དགྲ་བླ་བསང༔ ཤར་ཕྱོགས་གླིང་གི་དགྲ་བླ་ནི༔ དུང་སེང་གཡུ་ཡི་རལ་ཅན་བསང༔ ལྷོ་ཕྱོགས་གླིང་གི་དགྲ་བླ་ནི༔ གཡུ་འབྲུག་མེ་ཡི་ཟེ་ཅན་བསང༔ ནུབ་ཕྱོགས་གླིང་གི་དགྲ་བླ་ནི༔ གླང་ཆེན་གསེར་གྱི་རྣ་ཅན་བསང༔ བྱང་ཕྱོགས་གླིང་གི་དགྲ་བླ་ནི༔ མཚལ་སྟག་གཡུ་ཡི་རལ་ཅན་བསང༔ དགྲ་བླ་ཁྱུང་འབྲུག་སེང་གསུམ་བསང༔ སྨོན་པ་འགྲུབ་པའི་དགྲ་བླ་བསང༔ འདོད་དགུ་འབྱུང་བའི་དགྲ་བླ་བསང༔ མྱུར་མགྱོགས་ཆེ་བའི་དགྲ་བླ་བསང༔ དཔའ་སྙིང་ཆེ་བའི་དགྲ་བླ་བསང༔ དགྲ་དཔུང་འཇོམས་པའི་དགྲ་བླ་བསང༔ བགེགས་དཔུང་ཞི་བའི་དགྲ་བླ་བསང༔ ཅི་བསམ་འགྲུབ་པའི་དགྲ་བླ་བསང༔ བསྡུས་པ་བྱེད་ན་ལ་རྫས་ཀྱི་གཏོར་མ་འདིར་འབུལ༔ ཀྱཻ༔ དགྲ་བླ་མཐུ་ཆེན་ཁྱེད་རྣམས་ལ༔ ཤ་ཁྲག་དམར་གྱི་གཏོར་མ་དང༔ དཀར་གསུམ་མངར་གསུམ་མཆོད་རྫས་དང༔ ཕྱེ་མར་འོ་སྐོལ་སྐྱེམས་ཕུད་དང༔ མཐུན་པའི་དམ་རྫས་སྣ་ཚོགས་ཀྱིས༔ མགོན་སྐྱབས་བྱེད་པའི་དགྲ་བླ་མཆོད༔ བོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་རྟུལ༔ རྦད་པའི་ཚེ་ན་མཐུ་མ་ཆུང༔ དགྲ་དཔུང་འཇོམས་པའི་དགྲ་བླ་ཡིས༔ སྐུ་ཡི་སྤྲུལ་པ་མེ་ལྟར་འབར༔ གསུང་གི་སྤྲུལ་པ་འབྲུག་ལྟར་ལྡིར༔ ཐུགས་ཀྱི་སྤྲུལ་པ་གློག་ལྟར་འཁྱུག༔ ཡང་སྤྲུལ་ལྕགས་ཀྱི་བྱ་ཁྲ་དང༔ དུང་གི་བྱ་ཁྱུང་ཀ་རུ་དང༔ བསེ་ཡི་བྱ་གླག་རྨུག་པོ་རྣམས༔ འཕུར་ཞིང་ལྡིང་ལ་གཞུར་པ་དང༔ དགྲ་བོའི་དཔུང་རྣམས་རྡུལ་དུ་རློགས༔ ཞེས་མཆོད་དེ༔ རྟེན་འཛུགས་ཀྱི་རིམ་པ་ནི༔ འཁོར་གསུམ་མཚོན་ཆ་ལ༔ ཆབ་དང་བདུད་རྩི་བྲན༔ དེ་ནས་གྲི་འདོན༔ སྔགས་རྒན་དག་གིས་གྱེར་བ་ནི་འདི་སྐད་དོ༔ ཀྱཻ༔ དགྲ་བླ་གཉན་པོ་འཁོར་བཅས་ལ༔ ཁྲབ་རྨོག་ཕུབ་ཞོལ་འཁོར་གསུམ་དང༔ སྤྱན་གཟིགས་གོ་མཚོན་སྣ་ཚོགས་པ༔ ཆགས་ཤིང་འགོ་བའི་རྟེན་དུ་འཛུགས༔ ཁྲབ་སྟོད་སེང་གེ་འགྱིང་པ་འདྲ༔ ཁྲབ་སྐེད་དངུལ་གྱི་རྡོ་རྗེ་འདྲ༔ ཁྲབ་གཤམ་ཁྱུང་གཤོག་བརྒྱངས་པ་འདྲ༔ སྲོག་རི་སྲོག་མཁར་སྲོག་རྩེ་གསུམ༔ ལྷ་ལྕམ་བག་མར་ཆས་པ་འདྲ༔ འདྲ་བཞིས་སྤྲས་པའི་སྲོག་མཁར་འདི༔ དགྲ་བླ་གཉན་པོའི་རྟེན་དུ་འཛུགས༔ ཀྱཻ༔ རྨོག་ལ་གླིང་བཞི་ཟུར་བཞི་ལྡན༔ རྨོག་གི་ཤར་གྱི་གླིང་ཁམས་ན༔ དགྲ་བླ་གོས་སྔོན་གཤོག་རིང་བཀོད༔ རྨོག་གི་ལྷོ་ཡི་གླིང་ཁམས་ན༔ མགོན་བྱེད་དཀར་པོའི་དགྲ་བླ་བཀོད༔ རྨོག་གི་ནུབ་ཀྱི་གླིང་ཁམས་ན༔ འགྲོ་བ་བདུད་འདུལ་དགྲ་བླ་བཀོད༔ རྨོག་གི་བྱང་གི་གླིང་ཁམས་ན༔ སྣང་གསལ་སྒྲོན་མེའི་དགྲ་བླ་བཀོད༔ རྩེ་ལ་བྱ་རྒྱལ་རྒོད་སྒྲོས་མཚན༔ ཡ་མཚན་ཅན་གྱི་ལྕགས་ཞྭ་འདི༔ དགྲ་བླ་གཉན་པོའི་རྟེན་དུ་འཛུགས༔ མི་འཇིག་སྲ་བརྟན་མཛེས་པའི་ཕུབ༔ གཟི་བརྗིད་རྔ་མས་མཛེས་པར་བརྒྱན༔ གནམ་ལྕགས་འབར་བའི་ཞོལ་གྱིས་མཚན༔ ཕུབ་མོའི་ཤར་གྱི་གླིང་ཁམས་ན༔ བསྙབ་པ་ལག་རིང་དགྲ་བླ་བཀོད༔ ཕུབ་མོའི་ལྷོ་ཡི་གླིང་ཁམས་ན༔ འགྲོ་བ་བང་མགྱོགས་དགྲ་བླ་བཀོད༔ ཕུབ་མོའི་ནུབ་ཀྱི་གླིང་ཁམས་ན༔ ཁུར་བ་སྟོབས་ཆེན་དགྲ་བླ་བཀོད༔ ཕུབ་མོའི་བྱང་གི་གླིང་ཁམས་ན༔ སྣང་གསལ་འོད་ལྡན་དགྲ་བླ་བཀོད༔ འོད་ཟེར་སྣ་ཚོགས་དྲྭ་བས་ཁྱབ༔ གཡས་གཡོན་དར་གྱི་འཕྲུ་དང་བཅས༔ ཡ་མཚན་ཅན་གྱི་ཕུབ་ཆེན་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བགེགས་འབྱུང་པོ་འགུག་བྱེད་པའི༔ མདུང་རྩེ་གནམ་དུ་བསྟན་པ་འདི༔ རྣོ་ངར་ལྡན་པའི་དགྲ་བླའི་རྟེན༔ བ་དན་བར་སྣང་འཕྱོ་བ་འདི༔ དགྲ་བོའི་བླ་འགུགས་དགྲ་བླའི་རྟེན༔ མདུང་རྟིང་ས་ལ་བཙུགས་པ་འདི༔ འཕོ་འགྱུར་མེད་པའི་དགྲ་བླའི་རྟེན༔ མདུང་སྐེད་ལག་པས་བཟུང་བ་འདི༔ དགྲ་བགེགས་སྲོག་གཅོད་དགྲ་བླའི་རྟེན༔ ཡང་ལ་རིང་བ་རྣོ་བའི་མཚོན༔ སྣ་ཚོགས་དར་གྱི་འཕན་བཅས་འདི༔ དགྲ་བླ་གཉན་པོའི་རྟེན་དུ་འཛུགས༔ མཆོག་དཀར་གཞུ་མོ་བདུངས་པ་འདི༔ གཞུ་རྒྱུད་དྲང་བའི་གདང་རིང་ལ༔ དགྲ་བླ་ཆེ་བ་ཀུན་བཞིན་བཀོད༔ མཆོག་དཀར་གཞུ་ཡི་མཆོག་མ་ལ༔ མྱུར་མགྱོགས་སྟོབས་ཆེན་དགྲ་བླ་བཀོད༔ མདའ་མོ་ཤུགས་རྒོད་ཐོག་འབེབ་ལ༔ དགྲ་བླ་ངར་མ་ཀླད་གཞུར་བཀོད༔ ཁྱུང་ཆེན་གཡུ་ཡི་སྒྲོ་གསུམ་ལ༔ དགྲ་བླ་རྣོ་ཆོད་ངར་མ་བཀོད༔ མདེ་འུ་རྡོ་རྗེ་ཕ་ལམ་ལ༔ དགྲ་བླ་རྩེ་མོས་རྣོ་གཅོད་བཀོད༔ ཡ་མཚན་ཅན་གྱི་མདའ་གཞུ་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བོའི་སྐྱེ་རྒྱུད་གཅོད་པ་ཡི༔ གནམ་ལྕགས་འབར་བའི་རལ་གྲི་འདི༔ རྩེ་མོ་མེ་ཡི་ཕུང་པོ་ལ༔ དགྲ་བགེགས་སྲོག་གཅོད་དགྲ་བླ་བཀོད༔ ཡུ་བ་རྔམ་བརྗིད་འཕྲོ་བ་ལ༔ སྲུང་མ་ཐོགས་མེད་དགྲ་བླ་བཀོད༔ གཞུང་རིང་ཚངས་པ་འདྲ་བ་ལ༔ འགྱུར་བ་མེད་པའི་དགྲ་བླ་བཀོད༔ ཐུག་གཅོད་རལ་གྲི་འཇའ་དང་ལྡན༔ རབ་འཇིགས་དཔའ་བོའི་ཕྱག་མཚན་འདི༔ དགྲ་བླ་གཉན་པོའི་རྟེན་དུ་འཛུགས༔ ཅང་ཤེས་ཤུགས་ལྡན་གྱི་ལིང་རྟ༔ དེ་ཡི་ཟེ་རྔོག་གཡས་གཡོན་ལ༔ དགྲ་བླ་དུང་སྐྱོང་དཀར་པོ་བཀོད༔ གྱི་ལིང་རྟ་ཕོའི་རྣ་མཆོག་ལ༔ གསལ་བྱེད་གསལ་བའི་དགྲ་བླ་བཀོད༔ དཔུང་པ་རླུང་གི་འཁོར་ལོ་ལ༔ མཚོ་ལ་ངར་བྱེད་དགྲ་བླ་བཀོད༔ ཚང་ར་སྨད་ཀྱི་འགྲོ་བ་ལ༔ ཕ་གཅིག་བཙན་ལ་རོལ་པ་བཀོད༔ མདོ་བ་བདེ་བའི་རྨིག་བཞི་ལ༔ མགྱོགས་བྱེད་སྟོབས་ཀྱི་དགྲ་བླ་བཀོད༔ གང་འདོད་ས་ལ་ཐོགས་མེད་སྦྱོར༔ མྱུར་མགྱོགས་རླུང་གི་རྟ་ཕོ་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བླ་རི་རྒྱལ་ལྷུན་པོ་ལ༔ དམག་མི་རྩི་ཤིང་རྒྱས་པ་འདྲ༔ དགྲ་བླ་ཉི་ཟླ་ཤར་བ་ལ༔ དམག་མི་རྒྱུ་སྐར་བཀྲམ་པ་འདྲ༔ དགྲ་བླ་གངས་ཀྱི་སེང་གེ་ལ༔ དམག་མི་གཡུ་རལ་རྒྱས་པ་འདྲ༔ དགྲ་བླ་རྒྱ་སྟག་ཁྲ་བོ་ལ༔ དམག་མི་འཛུམ་དྲུག་རྒྱས་པ་འདྲ༔ དགྲ་བླ་བྱ་ཁྱུང་ག་རུ་ལ༔ དམག་མི་སྒྲོ་གཤོག་རྒྱས་པ་འདྲ༔ དགྲ་བླ་གཡུ་འབྲུག་སྔོན་མོ་ལ༔ དམག་མི་གློག་འོད་འཁྱུག་པ་འདྲ༔ དགྲ་བླ་རྒྱ་མཚོ་འཁྱིལ་བ་ལ༔ དམག་མི་ཡིད་བཞིན་ནོར་བུ་འདྲ༔ ཀྱཻ༔ དེ་རིང་སྲིད་པའི་དགྲ་བླ་མཆོད༔ བྲོས་ན་ཐར་བའི་དགྲ་བླ་མཆོད༔ དེད་ན་ཟིན་པའི་དགྲ་བླ་མཆོད༔ གོ་ཁྲབ་སྲ་བའི་དགྲ་བླ་མཆོད༔ འོག་རྟ་མགྱོགས་པའི་དགྲ་བླ་མཆོད༔ ཤགས་ཁ་ཐུབ་པའི་དགྲ་བླ་མཆོད༔ ཅི་བསམ་འགྲུབ་པའི་དགྲ་བླ་མཆོད༔ ཅེས་བསྟོད་དོ༔ དཔངས་བསྟོད་ཀྱི་རིམ་པ་ནི་འདི་སྐད་དོ༔ ཀྱཻ༔ དགྲ་བླ་འཁོར་བཅས་དཔངས་བསྟོད་དོ༔ གངས་ལ་ཉི་མ་ཤར་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ སེང་གེ་གཡུ་རལ་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ སྟག་ལ་འཛུམ་དྲུག་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ ཁྱུང་ཆེན་མཁའ་ལ་འཕྱོ་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ གཡུ་འབྲུག་མཁའ་ལ་སྒྲ་སྒྲོག་བཞིན༔ དགྲ་བླ་གཉན་པོ་དཔངས་བསྟོད་དོ༔ ཤ་བ་རྭ་བཅུ་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མདུང་ལ་བ་དན་བཏགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ རྨོག་ལ་རྒོད་འཕྲུ་བཙུགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ ཁྲབ་ལ་འཛབ་ཞོལ་བཏགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ གྲི་ལ་རྣོ་ངར་འཛོམ་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ གཞུ་མོ་རྒྱུད་ཀྱིས་བདུངས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མདའ་ལ་སྒྲོ་གསུམ་བསྐྱོན་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཁའ་ལ་དར་ཆེན་འཕྱར་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཚོ་ལ་ཉ་མོ་འཕྱོ་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཁར་ལ་བ་གམ་བསྐྱོན་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ དགུང་ལ་ཉི་མ་ཤར་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ དེ་ལྟར་མངའ་གསོལ་དཔངས་བསྟོད་པས༔ བདག་ཅག་ཡོན་མཆོད་འཁོར་བཅས་རྣམས༔ ཕྱོགས་བཞི་མཚམས་བརྒྱད་གར་འགྲོ་ཡང༔ མི་མཐུན་ཕྱོགས་ལས་རབ་རྒྱལ་ཞིང༔ བར་དུ་གཅོད་པའི་དགྲ་བགེགས་འཐུལ༔ བསམ་སྒྲུབ་རེ་སྐོང་འཕྲིན་ལས་མཛོད༔ ཅེས་དཔངས་བསྟོད་དོ༔ ལམ་ལྷའི་རིམ་པ་ནི༔ དཀར་གསུམ་མངར་གསུམ་ཕྱེ་མར་དང༔ འོ་སྐོལ་ནམ་མཁའ་ལ་འབུལ་ལོ༔ ཀྱཻ༔ ནམ་མཁའ་དཀར་པོའི་ཡར་སྟེང་ན༔ གཡུ་འབྲུག་སྔོན་པོའི་ལམ་ལྷ་མཆོད༔ དུང་སྐྱོང་དཀར་པོའི་ལམ་ལྷ་མཆོད༔ ཡོལ་གྱི་ཐོ་གྲུབ་ལམ་ལྷ་མཆོད༔ རྒྱ་སྟག་ཁྲ་བོའི་ལམ་ལྷ་མཆོད༔ སྤྱང་གདོང་སྔོན་པོའི་ལམ་ལྷ་མཆོད༔ གཉེན་བྱེད་དོན་གྲུབ་ལམ་ལྷ་མཆོད༔ རེ་འབྱམས་སྨུག་པོའི་ལམ་ལྷ་མཆོད༔ དུག་སྦྲུལ་དཀར་པོའི་ལམ་ལྷ་མཆོད༔ ལྷ་དམག་བྱེ་བ་དུང་ཕྱུར་མཆོད༔ སྐྱེས་བུ་དཔའ་བའི་ལམ་ལྷ་མཆོད༔ འོག་རྟ་མགྱོགས་པའི་ལམ་ལྷ་མཆོད༔ གོ་ཆ་སྲ་བའི་ལམ་ལྷ་མཆོད༔ མཐུ་རྩལ་ཆེ་བའི་ལམ་ལྷ་མཆོད༔ ཁ་དྲགས་ལམ་ལྷ་ཤུགས་མགོན་མཆོད༔ ཅང་སེ་ལམ་ལྷ་ཁ་དྲོ་མཆོད༔ ཁྱོད་ལ་མཆོད་པ་ཕུལ་པ་ཡིས༔ ལམ་གྱི་བར་ཆད་ཞི་བ་དང༔ དམག་མི་རྣམས་ཀྱི་རྫི་བོ་མཛོད༔ བར་དུ་གཅོད་པའི་དགྲ་བགེགས་ཐུལ༔ མི་མཐུན་ཕྱོགས་རྣམས་ཞི་བར་མཛོད༔ ཅེས་པས་འཕྲིན་ལས་བཅོལ༔ ལ་རྫས་མཆོད་པའི་རིམ་པ་ནི༔ ཤར་ལྷོ་ནུབ་བྱང་གི་ཕྱོགས་བཞི་ལ་གཏོར་མ་འབུལ༔ དེ་ནས་དབུས་ཀྱི་གཏོར་མ་ཡུལ་ལྷ་ལ་གསོལ༔ ཀྱཻ༔ ལ་རྫས་ཁྱོད་ཀྱི་ཤར་ཕྱོགས་སུ༔ སེང་གེ་དཀར་མོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་གཉན་པོའི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱོད་ཀྱི་ལྷོ་ཕྱོགས་སུ༔ གཡུ་འབྲུག་སྔོན་པོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱེད་ཀྱི་ནུབ་ཕྱོགས་སུ༔ རྒྱ་སྟག་ཁྲ་བོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱེད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱོད་ཀྱི་བྱང་ཕྱོགས་སུ༔ འབྲོང་བུ་དར་མའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱོད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ཀྱཻ༔ མཛེས་པའི་མཁན་བྱ་དཀར་པོ་འདི༔ ལ་རྫས་ཁྱེད་ཀྱི་རྩེ་འཛིན་མཛོད༔ མདའ་མདུང་དར་དཀར་བརྒྱན་པ་འདི༔ ཡུལ་ལྷ་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ རང་རྟ་བཙན་ལ་མ་སྐུར་ཅིག༔ ཁྱུང་དང་འབྲུག་དང་གྱི་ལིང་གསུམ༔ ལ་རྫས་རྩེ་ལ་རོལ་ལོ་ལོ༔ ཁྲ་དང་གླག་དང་རྒོད་པོ་གསུམ༔ ལ་རྫས་རྩེ་ལ་ལྡིང་ཞིང་འཁོར༔ ལ་རྫས་དབུས་ཀྱི་དྲང་ཤིང་ན༔ དུང་སྐྱོང་དཀར་པོའི་ཚང་ཞིག་བཅའ༔ ཤར་དུ་སེང་གེའི་ཚང་ཞིག་བཅའ༔ ལྷོ་རུ་གཡུ་འབྲུག་ཚང་ཞིག་བཅའ༔ ནུབ་ཏུ་སྟག་གི་ཚང་ཞིག་བཅའ༔ བྱང་དུ་འབྲོང་གི་ཚང་ཞིག་བཅའ༔ དེ་ལྟར་བཞི་པོ་ལ་རྫས་ཀྱི༔ སྒོ་བཞི་སྲུང་བའི་ཕོ་ཉ་ཡིན༔ ཝེར་མ་ཀུན་ཐུབ་འཇིགས་མེད་དེ༔ དམག་མི་མང་པོའི་ལམ་ལྷ་ཡིན༔ ཝེར་མ་དཔའ་བརྟན་ཐོགས་མེད་དེ༔ གཡུལ་ངོ་ཟློག་པའི་ལམ་ལྷ་ཡིན༔ ཝེར་མ་ཁྲོ་གཏུམ་འཇིགས་མེད་དེ༔ མདའ་དང་མདུང་གི་དགྲ་བླ་ཡིན༔ གསེར་གྱི་འུག་པ་མིག་རྣོ་དེ༔ དམག་སྣ་འདྲེན་པའི་ལམ་ལྷ་ཡིན༔ སྲིད་པ་བརྒྱུད་ཀྱི་ལ་རྫས་ཁྱོད༔ བདག་གིས་བསཽ་སྒྲ་གདབ་ཙ་ན༔ གཉེན་གྱི་སྤྱང་སྤུན་དགུ་པོ་ཡང༔ བདག་ལ་འགོ་བའི་སྲུང་མ་མཛོད༔ བསམ་པ་སྒྲུབས་ལ་རེ་བ་སྐོངས༔ བར་དུ་གཅོད་པའི་དགྲ་བགེགས་ཐུལ༔ མི་མཐུན་རྐྱེན་དང་བར་ཆད་སོལ༔ བཅོལ་པའི་འཕྲིན་ལས་སྒྲུབ་པར་མཛོད༔ སྨོན་ལམ་བཏབ་པ་ནི༔ གངས་དང་སེང་གེ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ནགས་དང་རྒྱ་སྟག་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ བྲག་དང་རྒོད་པོ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ སྤང་དང་ཤ་བ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ཆབ་དང་ཉ་མོ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ མདུང་ལ་བ་དན་བཏགས་པ་བཞིན༔ མི་དང་དགྲ་བླ་མ་བྲལ་ཅིག༔ གཞུ་མོ་རྒྱུད་ཀྱིས་བདུངས་པ་བཞིན༔ མི་དང་དགྲ་བླ་མ་བྲལ་ཅིག༔ རྨོག་དང་རྒོད་འཕྲུ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ མདའ་དང་སྟག་དོང་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ རལ་གྲི་ཤུབས་དང་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ལུས་དང་གྲིབ་མ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ དགྲ་བླ་གཉན་པོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱིས༔ ཕྱོགས་བཞི་མཚམས་བརྒྱད་གར་འགྲོ་ཡང༔ རྟག་ཏུ་མི་འབྲལ་སྡོངས་གྲོགས་མཛོད༔ དགྲ་བླ་དཔངས་བསྟོད་འདི་ཨོ་རྒྱན་རིན་པོ་ཆེས་མཛད་པའོ༔ གཏེར་སྟོན་རིགས་འཛིན་རྒོད་ཀྱི་ལྡེམ་འཕྲུ་ཅན་གྱིས་གཏེར་ནས་བཏོན་པའོ།། །། ༄༅། །ཕྱྭ་གཡང་འགུགས་པ་ནི། ཀྱཻ། ཕུན་ཚོགས་བཀྲ་ཤིས་འཁྱིལ་པའི་གནས་མཆོག་འདིར། །འདོད་པའི་མཆོག་སྟེར་ཕྱྭ་དང་གཡང་གི་ཚོགས། ཁབ་ལེན་རྡོ་དང་ལྕགས་ཀྱི་སྣང་ཚུལ་བཞིན། །དགའ་བའི་གར་དང་བཅས་ཏེ་ཐོགས་མེད་ཁུག །གསེར་མངལ་མགྲིན་སྔོན་འཁོར་ལོའི་ལག་པ་ཅན། །གྲགས་པའི་མུ་ཁྱུད་འཁོར་ལོས་སྒྱུར་བ་སོགས། །སྲིད་འདིར་མངོན་པར་མཐོ་བའི་ཚོགས་རྣམས་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ལེགས་བྲིས་ཚོགས་ཀྱི་འཆི་མེད་བཏུང་བ་དང་། །ཀླུ་དབང་གཙུག་གི་ཡིད་བཞིན་ནོར་བུ་མཆོག །མི་དབང་སྔོན་འགྲོའི་རྒྱལ་སྲིད་སྣ་བདུན་གྱི༔ ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །རིན་ཆེན་གདུགས་དཀར་གསེར་ཉ་བུམ་པ་བཟང་། །པདྨ་དུང་དཀར་གཡས་འཁྱིལ་དཔལ་བེ་འུ། །རྒྱལ་མཚན་འཁོར་ལོ་བཀྲ་ཤིས་རྟགས་བརྒྱད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །རྣམ་འདྲེན་ཟས་གཙང་སྲས་པོས་བཀྲ་ཤིས་པའི། །དངོས་པོར་བྱིན་བརླབས་དགེ་ལེགས་འབྱུང་བའི་སྒོ །རྟེན་འབྲེལ་ལྷུན་གྱིས་གྲུབ་པའི་རྫས་བརྒྱད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ཚེ་རིང་ནད་མེད་འདོད་པའི་དོན་ཀུན་གྲུབ། །སྟོབས་དང་མངའ་ཐང་འབྱོར་པ་ཕུན་སུམ་ཚོགས། །བདེ་ཞིང་སྐྱིད་པའི་དགའ་སྟོན་ཐམས་ཅད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ཅེས་ཕྱྭ་གཡང་འགུགས་པ་འདི་ནི་ཐམས་ཅད་མཁྱེན་ཅིང་གཟིགས་པ་ཆེན་པོ་༧ངག་དབང་བློ་བཟང་རྒྱ་མཚོས་མཛད་པའི་བསང་མཆོད་བཀྲ་ཤིས་འཁྱིལ་པ་ནས་འཁོལ་དུ་ཕྱུང་བའོ། །མངྒ་ལཾ།། །།ལྷ་ལྡན་དེ་མོ་བསྟན་རྒྱས་གླིང་གི་ཤིང་པར་ལྟར་ཡིན་ནོ། ༈ །དཔེ་ཚན་འདི་སྔོན་ཆད་གཏེར་མཛོད་དཀྱུས་སུ་མེད་ཅིང་། བལ་ཡུལ་ཞེ་དགོན་གྱི་པར་གསར་འདིར་གསར་བཞག་བྱས་པས་ལུང་རྒྱུན་ལ་ཞིབ་རྟོག་དགོས་པ་ཡིན་ནོ།།
 
</div></onlyinclude>
 
</div></onlyinclude>
 
{{TsagliCall}}
 
{{TsagliCall}}

Latest revision as of 17:38, 7 February 2019



Property "Author" has a restricted application area and cannot be used as annotation property by a user. 

Property "Contributors" has a restricted application area and cannot be used as annotation property by a user. 








ཐུན་མོང་རྟེན་འབྲེལ་སྒྲིག་བྱེད་པའི༔ ལྷ་རྣམས་མཉེས་བྱེད་བསང་ཡིག་

thun mong rten 'brel sgrig byed pa'i:_lha rnams mnyes byed bsang yig

by   ([[Rig 'dzin rgod kyi ldem 'phru can|]])
revealed by   ([[Rig 'dzin rgod kyi ldem 'phru can|]])
in cycle  བྱང་གཏེར་ (Byang gter)
Volume 43 (པི) / Pages 537-580 / Folios 1a1 to 22b2

[edit]

༄༅༔ ཐུན་མོང་རྟེན་འབྲེལ་སྒྲིག་བྱེད་པའི༔ ལྷ་རྣམས་མཉེས་བྱེད་བསང་ཡིག་བཞུགས༔ གུ་རུ་པདྨ་སིདྡྷི་ཧཱུྃ། སྐྱབས་ཀུན་འདུས་ཞལ་ཨོ་རྒྱན་དུས་གསུམ་མཁྱེན་པ་ལ་ཕྱག་འཚལ་ལོ། །འདིར་བྱང་གཏེར་རྒྱགས་བརྔན་བསང་ཆོག་ཇི་ལྟར་བྱ་བའི་ཚུལ་ལ། སྦྱོར་བ་དངོས་གཞི་མཇུག་དང་གསུམ། དང་པོ་སྦྱོར་བ་ལ་བཅའ་སྒྲིག་དང་སྔོན་འགྲོའི་ཆོ་གར་འཇུག་ཚུལ་གཉིས་ལས། དང་པོ་ནི། འདི་ཉིད་ཀྱི་གཏེར་གཞུང་ལས། བརྔན་གྱི་ཆོ་གའི་རིམ་པ་ལ༔ ཤིན་ཏུ་གཙང་བའི་ས་ཕྱོགས་སུ༔ དཀར་གསུམ་མངར་གསུམ་བརྒྱན་པ་དང༔ དམར་གཏོར་ཤ་ཆང་བརྒྱན་པ་དང༔ བསང་བཤོས་ཟས་སྣས་བརྒྱན་པ་དང༔ ཕྱེ་མར་ཅི་འབྱོར་སྣོད་ཁེངས་དང༔ དྲི་བཟང་འབྲུ་སྣ་སྨན་སྤོས་དང༔ རིན་ཆེན་མེ་ཏོག་སྣ་ཚོགས་དང༔ ཁྱད་པར་རྟ་གླང་ར་དང་ལུག༔ མཛོ་གཡག་སྦལ་སྦྲུལ་ལ་སོགས་དང༔ གཟུགས་འགྲོས་སྣ་ཚོགས་བྱས་པ་དང༔ སྦ་སྙུག་ཤུག་པ་ལྕང་མ་དང༔ མཁན་པ་མཚེ་དང་འོམ་བུ་དང༔ བ་ལུ་གླང་མ་ལ་སོགས་པའི༔ རྩི་ཤིང་སྣ་ཚོགས་མཆོད་པ་བཤམས༔ སྟག་གཟིག་དར་ཟབ་ལ་སོགས་པ༔ མདའ་མདུང་དར་ཆེན་འཕྱར་བ་དང༔ རྔ་དུང་ལ་སོགས་རོལ་མོའི་སྒྲ༔ སྤྱན་གཟིགས་མཆོད་པ་སྣ་ཚོགས་བཤམས༔ ཞེས་གསུངས་པ་བཞིན། ཐོག་མའི་བཅའ་གཞི་སྒྲིག་ཚུལ་ལ་དམ་པའི་ཕྱག་བཞེས་འདྲ་མིན་སྣ་ཚོགས་ཞིག་མཆིས་རུང་། འདིར་ནི་རིག་འཛིན་གསང་སྔགས་དགའ་ཚལ་གྱི་མཐོང་བརྒྱུད་ཕྱག་ལེན་ཇི་ལྟར་བསྟར་བའི་ཚུལ་དགོད་པར་བྱ་སྟེ། དེ་ཡང་གང་དུ་བྱ་བའི་གནས་ནི་རི་རྩེ་འམ། ཁང་ཐོག་སོགས་ཤིན་ཏུ་གཙང་བའི་ཡིད་མཐུན་གྱི་གནས་སུ། རས་དཀར་སོགས་དྲི་མ་མེད་པའི་མཆོད་གདན་བཏིང་བའི་སྟེགས་བུའི་ཁར། ཨན་སྟར་སོགས་ཀྱི་གཏོར་སྣོད་གཙང་མའི་དབུས་སུ་བཟང་དྲུག་རིན་ཆེན་སྣ་ལྔའི་ཕྱེ་མ་དཀར་གསུམ་མངར་གསུམ། བདུད་རྩི་རིལ་བུའམ་ཆོས་སྨན་སོགས་རྣལ་འབྱོར་བླ་མེད་ནས་བཤད་པའི་གཏོར་རྫས་ཅི་འབྱོར་བསྲེས་པའི་རྩམ་ཕྱེ་ཆང་ཕུད་ཆུ་གཙང་གིས་སྦྲུས་པའི་ཟན་ལེབ་གྲུ་བཞི་རྩི་དཀར་ཅན་བཞི་བང་རིམ་གྱི་ཚུལ་དུ་བརྩེགས་པའི་འོག་མ་གསུམ་དཔངས་མཉམ་དང་། དེ་གསུམ་བསྡོམས་པའི་དཔངས་དང་མཉམ་པའི་བང་རིམ་བཞི་པའི་སྟེང་དུ་རྩ་གསུམ་སྤྱིའི་དཔལ་གཏོར་ཟླུམ་པོ་པད་འདབ་བཞི་པ་རྩི་དཀར་ཅན། པད་འདབ་རྣམས་ཀྱི་བར་བར་དུ་མཐེབ་ཀྱུ་རྩི་དཀར་ཅན་སྒོར་མོའི་སྟེང་དུ་ཟན་རིལ་བཞག་པས་བསྐོར། བང་རིམ་འོག་མ་གསུམ་གྱི་ཟུར་བཞིར་བཤོས་བུ་སྐེད་རིས་ཅན་རྩི་དཀར་གྱིས་བྱུགས་པ་ལ་ཤིང་རྩེར་སྙིང་དངོས་སམ་ཟན་གྱི་སྙིང་གཟུགས་དམར་པོ་རེ་བཙུགས་པ་སྡོམ་བཅུ་གཉིས་དང་། ངོས་བཞིར་དམར་གཏོར་ཟུར་གསུམ་རེ་རེ་བཅས་སྡོམ་བཅུ་གཉིས། བང་རིམ་འོག་མའི་མདུན་ངོས་དབུས་སུ་གཡག་མགོས་མཚན་པའི་ཐང་ལྷའི་གཏོར་མ་ཟུར་གསུམ་རྩི་དཀར་ཅན། གཡས་སུ་ལུག་མགོས་མཚན་པའི་བསྟན་མའི་གཏོར་མ་དབྱིབས་རྩི་གོང་འདྲ། གཡོན་དུ་ར་མགོས་མཚན་པའི་དམ་ཅན་གྱི་གཏོར་མ་དབྱིབས་རྩི་གོང་འདྲ། ཨན་སྟར་གྱི་གཡས་གཡོན་རྣམས་སུ་བཀྲ་ཤིས་རྫས་རྟགས་འདོད་ཡོན་རིན་ཆེན་སྣ་བདུན་གསེར་དངུལ་དོང་རྩེ་སོགས་མཆོད་པའི་བྱེ་བྲག་སྣ་ཚོགས་དང་། སྐུ་གླུད་ཕོ་གཟུགས་མོ་གཟུགས་རྟ་དྲེལ་མཛོ་གཡག་ར་ལུག་སོགས་མདོར་ན་འཕུར་དགུ་འཛུལ་དགུའི་གཟུགས་འགྲོས་ཟན་པར་གྱི་ནར་མོས་ཟླུམ་གཏོར་བར་སྟོང་རྣམས་སུ་བཀང་། གོང་གི་གཟུགས་འགྲོས་རྣམས་ཀྱི་བར་དུ་ཟན་ཆད་དང་ཆངས་བུ་མཐེབ་ཀྱུ་སོགས་ཀྱིས་ཀྱང་བཀང་། དེའི་གཡས་གཡོན་གང་འོས་སུ་དགྲ་བླ་དང་རང་ལུགས་སྒེར་གསོལ་གྱི་མཆོད་པ་ཇི་དགོས་མཐོང་བརྒྱུད་བཞིན་དང་། ཕྱི་ནང་གི་མཆོད་པ། ཤིང་སྣ་སྨན་སྤོས་ཤིང་འབྲས་ཟས་སྣ་དཀར་གསུམ་མངར་གསུམ་སོགས་སྦྱར་བའི་བསང་བཤོས། ཕྱེ་མར་ཆང་ཕུད་འོ་སྐྱེམས་རྒྱ་ཇའི་བཏུང་བ། འོ་མ་དྲི་བཟང་རིན་ཆེན་ཕྱེ་མ་སྨན་སོགས་སྦྱར་བའི་བསང་ཆུ། དགྲ་བླའི་སྤྱན་གཟིགས་གོ་མཚོན་སོགས་དང་། དར་ཚོན་སྣ་ལྔ་མེ་ལོང་སོགས་ཀྱིས་བརྒྱན་པའི་མདའ་དར། གཡང་རྟེན། ཕྱོགས་བཞིའམ་གང་འོས་སུ་འཕྱར་དར། རང་གི་མདུན་དུ་རྔ་རོལ་སོགས་སྐབས་ཀྱི་ཉེར་མཁོ་རྣམས་འཚོག་པར་བྱ་ཞིང་། བསང་གཡོག་དང་བཅས་པ་སྟ་གོན་བྱ། སྦྱོར་ཆོག་གཉིས་པ་སྔོན་འགྲོའི་རིམ་པ་ནི། གཏེར་གཞུང་ལས། རང་ཉིད་པདྨའི་ང་རྒྱལ་གྱིས༔ མཆོད་རྫས་ཀུན་ལ་སྤོས་ཆུ་གཏོར༔ ཐམས་ཅད་ཅི་འདོད་འབྱུང་བ་ཡི༔ མཆོད་སྦྱིན་ཡིད་བཞིན་གཏེར་གྱུར་པ༔ ས་གཞི་བར་སྣང་གང་བར་བསམ༔ ཤིང་སྣ་མེ་སྦར་བསང་དུད་སྦྱར༔ རོལ་མོའི་སྒྲ་ཡིས་བྱིན་དབབ་བོ༔ ཞེས་གསུངས་པ་ལྟར་གྱི་ཆོ་གར་འཇུག་པའི་རིམ་པ་ལ། ཐོག་མར་སྐྱབས་འགྲོ་ནི། རོལ་མོ་དབྱངས་དང་བཅས་ཏེ་འདི་སྐད་དོ། །ཧཱུྃ༔ རང་བྱུང་ལྷུན་གྱིས་གྲུབ་པའི་སྐུ༔ འོད་གསལ་ཆེན་པོའི་དགོངས་པ་ཅན༔ ཐུགས་རྗེའི་དབང་གིས་འགྲོ་དོན་མཛད༔ བླ་མ་རྣམས་ལ་སྐྱབས་སུ་མཆི༔ རང་ལ་ཡེ་ཤེས་ཤར་བའི་སྐུ༔ མི་འབྲལ་རྩེ་གཅིག་དགོངས་པ་ཅན༔ བྱིན་གྱིས་བརླབ་ཅིང་བར་ཆད་སེལ༔ ཡི་དམ་ལྷ་ལ་སྐྱབས་སུ་མཆི༔ དམ་ཚིག་རྣམ་པར་དག་པའི་སྐུ༔ བརྩེ་གདུང་བྱམས་པའི་དགོངས་པ་ཅན༔ ལེགས་ཉེས་སྟངས་འཛིན་དངོས་གྲུབ་སྟེར༔ མཁའ་འགྲོའི་ཚོགས་ལ་སྐྱབས་སུ་མཆི༔ ཞེས་ལན་གསུམ་གྱིས་སྐྱབས་འགྲོ་དང་། སྔོན་ནས་བསགས་པའི་སྡིག་སྒྲིབ་བཤགས༔ འགྲོ་དོན་སངས་རྒྱས་འཐོབ་བྱའི་ཕྱིར༔ སྨོན་པ་བྱང་ཆུབ་སེམས་བསྐྱེད་དོ༔ སེམས་ཅན་ཡོངས་སུ་སྨིན་བྱའི་ཕྱིར༔ གསང་སྔགས་སྤྱོད་པ་རླབས་ཆེན་སྤྱད༔ དོན་དམ་སྤྲོས་བྲལ་བྱང་ཆུབ་སེམས༔ རང་བྱུང་མཐའ་བྲལ་སྟོང་གསལ་བསྒོམ༔ ཞེས་ལན་གསུམ་གྱིས་སེམས་བསྐྱེད་བྱ། བླ་མ་བདེ་གཤེགས་མཁའ་འགྲོ་གནས་འདིར་གཤེགས༔ ཉི་ཟླ་པད་གདན་མཛེས་ལ་དགྱེས་པར་བཞུགས༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ ཕྱི་ནང་གསང་གསུམ་མཆོད་སྤྲིན་ཀུན་གྱིས་མཆོད༔ སྔོན་ནས་ད་བར་མི་དགེ་བཅུ་བསགས་བཤགས༔ དུས་གསུམ་དགེ་བའི་ཚོགས་ལ་རྗེས་ཡི་རང༔ བདག་གཞན་ཡོངས་སྒྲོལ་ཆོས་འཁོར་བསྐོར་དུ་གསོལ༔ འགྲོ་མགོན་མྱ་ངན་མི་འདའ་བཞུགས་གསོལ་འདེབས༔ སྒོ་གསུམ་དགེ་སྤྱད་མ་ལུས་བྱང་ཆུབ་བསྔོ༔ མཁའ་མཉམ་འགྲོ་རྣམས་སྐུ་གསུམ་མངོན་འགྱུར་ཤོག༔ ཅེས་པས་ཡན་ལག་བདུན་པ་འབུལ། ཧཱུྃ༔ སྟོང་གསུམ་ཀུན་ཏུ་དྲི་མཆོག་འབྱུང་གྱུར་པའི༔ སྤོས་དང་སྨན་སྦྱར་ཆུ་གཙང་དག་པའི་ཁྲུས༔ ཡིད་བཞིན་སྤྲིན་ཕུང་མཁའ་ལ་ཆར་འབེབ་པས༔ མི་གཙང་དྲི་མའི་ཚོགས་ཀུན་དག་གྱུར་ཅིག༔ ཨོཾ་ཤུདྡྷེ་ཤུདྡྷེ་ཤྭ་དྷ་ན་ཡེ་སྭཱ་ཧཱ༔ ཞེས་ཚར་གསུམ་བརྗོད་ཅིང་གནས་དང་ཡོ་བྱད་ལ་ཆབ་གཏོར་ནས་མ་དག་པ་སྦྱངས་ཏེ་བྱིན་གྱིས་བརླབས་ལ། ཐོག་མར་རང་ཉིད་སྐད་ཅིག་གིས་པདྨ་དཀར་པོ་འདབ་མ་དྲུག་པའི་ལྟེ་བར་རང་རིག་ཧཱུྃ་དཀར་པོའི་འཕྲོ་འདུ་ལས། དཔལ་རྡོ་རྗེ་སེམས་དཔའི་སྐུར་ཐལ་གྱིས་བསྐྱེད་པ་ནི། ཧཱུྃ༔ པད་སྡོང་འདབ་དྲུག་ཁྲི་འཕང་བཞིན༔ ཉི་མ་ཟླ་བའི་གདན་སྟེང་དུ༔ བདག་ཉིད་རྡོ་རྗེ་སེམས་དཔའི་སྐུ༔ དཀར་གསལ་ཞལ་གཅིག་ཕྱག་གཉིས་པ༔ རྡོ་རྗེ་དྲིལ་བུ་ཐུགས་ཀར་འཛིན༔ དར་དང་རིན་ཆེན་དུ་མས་སྤྲས༔ སྤྱི་གཙུག་བླ་མ་ཀུན་བཟང་མཐིང༔ མཚན་དཔེས་སྤྲས་པ་ཡུམ་དང་སྦྱོར༔ སྐུ་ཡི་གནས་སུ་ཞི་ཁྲོའི་ལྷ༔ ཆུ་ནང་ཟླ་བ་ལྟ་བུར་གསལ༔ ཨོཾ་བཛྲ་སཏྭ་ཧཱུྃ༔ ཞེས་ལན་བདུན་ནམ་ཉེར་གཅིག་བཟླ། འདབ་དྲུག་ཤར་གྱི་པད་འདབ་ལ༔ སྦྱོང་བའི་ལྷ་ནི་ཤཱཀ་ཐུབ་སེར༔ ཕྱག་གཉིས་ས་གནོན་ལྷུང་བཟེད་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཁོང་སྟོང་ཕྱག་རྒྱའི་ནང༔ ཨ་དཀར་འོད་འཕྲོས་དངོས་འཛིན་སྦྱང༔ ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅་ཧཾ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་དངོས་འཛིན་དག་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ སྤེལ་བའི་ལྷ་ནི་རྣམ་སྣང་དཀར༔ ཕྱག་གཉིས་འཁོར་ལོ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཚིགས་བཅག་ཕྱག་རྒྱའི་ནང༔ ཁཾ་སྔོན་འོད་འཕྲོས་སྣོད་བཅུད་སྤེལ༔ ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏྞཾྐ་ཨཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་ལེགས་ཚོགས་སྤེལ་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ སྒྱུར་ལྷ་བདུད་རྩི་འཁྱིལ་པ་ལྗང༔ ཕྱག་མཚན་རྒྱ་གྲམ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཐལ་མོ་ཁ་གྱེར་ཕྱག་རྒྱའི་ནང༔ ཛ་དམར་འོད་འཕྲོས་བདུད་རྩིར་སྒྱུར༔ ཨོཾ་བཛྲ་ཨ་མྲྀཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ སྔགས་འདི་ལན་བདུན་བརྗོད་པའི་མཐུས༔ སྣོད་བཅུད་ཟག་མེད་བདུད་རྩིར་བསྒྱུར༔ དེ་ཡི་མཚམས་ཀྱི་པད་འདབ་ལ༔ ཐོབ་ལྷ་རིན་འབྱུང་སྐུ་མདོག་སེར༔ ཕྱག་ན་རིན་ཆེན་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ མཆོག་སྦྱིན་ཕྱག་རྒྱ་ཏྲཾ་སེར་ལས༔ འོད་འཕྲོས་ཀུན་གྱིས་འབད་མེད་ཐོབ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ སྔགས་འདི་ལན་བདུན་བརྗོད་པའི་མཐུས༔ མགྲོན་རྣམས་ཀུན་གྱིས་ཐོབ་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ ཚིམ་ལྷ་དོན་ཡོད་གྲུབ་པ་ལྗང༔ ཕྱག་མཚན་རལ་གྲི་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ ཁུ་ཚུར་མཆོག་སྦྱིན་ཕྱག་རྒྱའི་ནང༔ ཧ་ལྗང་འོད་འཕྲོས་མགྲོན་མཉེས་གྱུར༔ ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མསྶ་མནྟ་སྥ་ར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་སྭཱ་ཧཱ༔ སྔགས་འདི་ལན་བདུན་བརྗོད་པའི་མཐུས༔ མགྲོན་ཀུན་དགྱེས་ཤིང་ཚིམས་གྱུར་ཅིག༔ དེ་ཡི་མཚམས་ཀྱི་པད་འདབ་ལ༔ དབང་ཆེན་ཕྱག་རྡོར་ལྗང་དམར་ནི༔ ཕྱག་མཚན་རྡོ་རྗེ་དྲིལ་བུ་བསྣམས༔ མཚན་དང་དཔེ་བྱད་ལྡན་པར་བཞུགས༔ སོར་བསྣོལ་ཕྱག་རྒྱ་ཛ་དམར་ལས༔ འོད་འཕྲོས་མགྲོན་བཞིའི་མཐུ་སྟོབས་བསྡུས༔ ན་མསྶ་མནྟ་བུདྡྷ་ནཾ་གྲ་ཧེ་ཤྭ་རི་པྲ་བྷཉྫྱོ་ཏི་ན་མ་ཧཱ་ས་མ་ཡ་ཧཱུྃ་ཕཊ༔ སྔགས་འདི་ལན་བདུན་བརྗོད་པའི་མཐུས༔ དབང་སྡུད་འཕྲིན་ལས་ཀུན་འགྲུབ་ཤོག༔ ཅེས་བྱིན་གྱིས་བརླབས། གཉིས་པ་དངོས་གཞི་ལ། གཏེར་གཞུང་ལས། དེ་ནས་དངོས་གཞི་བརྔན་པ་ནི༔ རང་ཉིད་པདྨའི་ང་རྒྱལ་གྱིས༔ མགྲོན་རྣམས་སྤྱན་དྲངས་བཞུགས་པ་ལ༔ རིམ་བཞིན་མཆོད་ཅིང་བརྔན་པ་ནི༔ མཆོད་གཏོར་གཟུགས་འགྲོས་བཤམས་པ་ལ༔ བསང་ཆུ་ཕུད་ཆུ་འཐོར་ཕུད་དང༔ ཕྱེ་མར་རིན་ཆེན་འབྲུ་སྣ་ཚོགས༔ མེ་ནང་ཕུལ་ལ་འདི་སྐད་དོ༔ ཞེས་གསུངས་པ་བཞིན་རང་ཉིད་སློབ་དཔོན་ཆེན་པོ་དམ་ཚིག་པར་བསྐྱེད་པ་ནི། པདྨ་ཉི་ཟླའི་གདན་སྟེང་ན། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ལས་སྤྲུལ་པའི་རིག་འཛིན་ནི། །པདྨ་འབྱུང་གནས་རྒྱལ་བའི་སྐུ །སྐུ་མདོག་དཀར་དམར་སྐྱིལ་ཀྲུང་མཛད། །གཞོན་ནུ་ལོ་བརྒྱད་ལོན་པའི་ཚུལ། །སྔགས་པའི་ཆ་ལུགས་མཐིང་ནག་གོས། །རབ་བྱུང་ཆ་ལུགས་ཆོས་གོས་དམར། །རྒྱལ་པོའི་ཆ་བྱད་ཟབ་བེར་གསོལ། །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་པ་མཉམ་གཞག་ཀ་པཱ་ལ། །དབུ་ལ་པདྨའི་མཉེན་ཞུ་གསོལ། །སྣ་ཚོགས་རིན་ཆེན་རྒྱན་གྱིས་མཛེས། །བཀྲག་དང་གཟི་མདངས་ལྡན་པ་ལ། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་གཏེར་བདག་ཚོགས། །མ་ལུས་འཁོར་གྱིས་བསྐོར་བར་གྱུར། །ཡེ་ཤེས་པ་སྤྱན་འདྲེན་པ་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གུ་རུ་པདྨ་སིདྡྷི་ཧཱུྃ། ཞེས་དམ་ཡེ་གཅིག་ཏུ་གྱུར་པར་བསམ་ལ། མཆོད་པ་འབུལ་བ་ནི། ཧཱུྃ། མེ་ཏོག་བདུག་སྤོས་མར་མེ་དང་། །ལྷ་བཤོས་དྲི་ཆབ་མཆོད་པར་བཤམས། །བླ་བྲེ་རྒྱལ་མཚན་ན་བཟའ་དང་། །བ་དན་གདུགས་དང་རོལ་མོའི་ཚོགས། །རིན་པོ་ཆེ་དང་མེ་ཏོག་དང་། །གཟུགས་སྒྲ་དྲི་རོ་རེག་བྱ་དང་། །ཆོས་དང་མདངས་ཆེན་བྱང་ཆུབ་སེམས། །མཆོད་སྤྲིན་བསམ་གྱིས་མི་ཁྱབ་པ། །རྩ་བ་བརྒྱུད་པའི་བླ་མ་དང་། །ཡི་དམ་ཞི་ཁྲོའི་ལྷ་ཚོགས་དང་། །ཆོས་བདག་དཔའ་བོ་མཁའ་འགྲོའི་ཚོགས། །དམ་ཅན་ཆོས་སྐྱོང་རྣམས་ལ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་བརྒྱ་རྩ་སོགས་བཟླ། དང་པོ་བརྔན་གྱི་བྱུང་ཁུངས་ནི། འཛམ་བུ་གླིང་གི་བོད་ཡུལ་དབུས༔ བཙན་པོ་ཁྲི་སྲོང་ལྡེའུ་བཙན་གྱིས༔ བསམ་ཡས་གཙུག་ལག་བཞེངས་པའི་དུས༔ ས་བདག་ཀླུ་གཉན་ཁྲོས་གྱུར་ནས༔ ལྷ་ཁང་ཉིན་བརྩིགས་མཚན་མོ་བསྒྱེལ༔ རི་རྡོ་ཐམས་ཅད་ཀླུངས་སུ་ཕབ༔ ཀླུངས་རྡོ་ཐམས་ཅད་རི་ལ་བསྐྱལ༔ རྩི་ཤིང་ཐམས་ཅད་མེ་ལ་བསྲེགས༔ ནད་དང་གནོད་པ་སྣ་ཚོགས་བྱུང༔ རྒྱལ་པོའི་ལྷ་ཁང་བཤོལ་ལ་ཐུག༔ དེ་ཚེ་རྒྱལ་བློན་བཀའ་བགྲོས་མཛད༔ སློབ་དཔོན་པདྨ་སྤྱན་དྲངས་ནས༔ བྲག་དམར་དཔལ་གྱི་བསམ་ཡས་སུ༔ སློབ་དཔོན་པདྨ་འབྱུང་གནས་ཀྱིས༔ རྡོ་རྗེ་ཕུར་པའི་དཀྱིལ་འཁོར་བཞེངས༔ ལྷ་འདྲེ་ཐམས་ཅད་དམ་ལ་བཏགས༔ དཀོན་མཆོག་གསུམ་ལ་མཆོད་པ་ཕུལ༔ ལྷ་དང་སྲུང་མ་ཐམས་ཅད་དང༔ ས་བདག་ཀླུ་གཉན་ཐམས་ཅད་བརྔན༔ དེ་ཡིས་བསམ་ཡས་ཆོས་འཁོར་གྲུབ༔ རྗེ་འབངས་བདེ་ཞིང་བཀྲ་ཤིས་ལ༔ རྒྱལ་བློན་སྐུ་ཚེ་རིང་བ་དང༔ རྩི་ཤིང་མེ་ཏོག་ཐམས་ཅད་སྨིན༔ ལེགས་པའི་ཡོན་ཏན་བསམ་མ་ཁྱབ༔ བརྔན་གྱི་བྱེད་ལས་དགོས་པ་ནི༔ དེ་ཡང་ཕྱི་རབས་རྣལ་འབྱོར་པས༔ གང་འདོད་འཕྲིན་ལས་སྒྲུབ་པ་དང༔ སངས་རྒྱས་བསྟན་པ་སྲུང་བ་དང༔ སྒྲུབ་ལ་བར་ཆད་སེལ་བ་དང༔ འཁོར་སྲུང་རྐྱེན་ཟློག་གྲགས་པ་སྤེལ༔ ལྷ་ཁང་བཞེངས་དང་མཆོད་རྟེན་བརྩིག༔ མི་ནད་ཡམས་ནད་གཅད་པ་དང༔ མཁར་ལས་བྱེད་དང་བཀྲ་ཤིས་འདོད༔ ཐག་རིང་མགྲོན་ལ་འགྲོ་བ་དང༔ ཆུ་ཆེན་གྲུ་ལ་འགྲོ་བ་དང༔ ལམ་འཕྲང་བགྲོད་དང་དམག་ལ་འགྲོ༔ ལྷོ་བལ་སྦས་ཡུལ་འགྲོ་བ་དང༔ ཆེ་ཧྲག་བྱ་བ་ཐམས་ཅད་ཀྱི༔ སྔོན་དུ་བརྔན་འདི་བྱས་པས་འགྲུབ༔ ཅེས་བསང་ཆོག་འདི་ཉིད་གང་དུ་མཛད་པའི་གནས་དང་མཛད་པ་པོ་དང་དགོས་པ་དང་བྱེད་ལས་དང་ཕན་ཡོན་ཏེ་དོན་ལྔའི་སྒོ་ནས་ཕྱི་རབས་རྣལ་འབྱོར་པ་རྣམས་ཀྱིས་འདོད་པའི་དོན་རྣམས་གེགས་མེད་ལྷུན་གྱིས་འགྲུབ་པའི་སླད་དུ་ཆོ་ག་འདིར་འཇུག་པར་སྤྲོ་བ་བསྐྱེད་དེ། དེ་ནས་བསྟོད་པ་བྱ་བ་ནི། ཧཱུྃ༔ བསྟན་པ་འདི་ལ་ངོ་མཚར་རྨད་བྱུང་བའི༔ འཇིག་རྟེན་སྐྱབས་གྱུར་པདྨ་རྒྱལ་པོ་ནི༔ རིགས་ནི་ཟ་ཧོར་རྒྱལ་པོའི་སྲས་སུ་འཁྲུངས༔ ཨོ་རྒྱན་ཡུལ་དུ་སྒྲོ་འདོགས་མ་ལུས་བཅད༔ བསིལ་བ་ཚལ་དུ་དངོས་གྲུབ་ཐམས་ཅད་བརྙེས༔ ཁ་བ་ཅན་དུ་བསྟན་པ་དར་བར་མཛད༔ ལྷོ་ནུབ་མཚམས་སུ་སྲིན་པོའི་ཁ་གནོན་མཛད༔ མྱ་ངན་མི་འདའ་འགྲོ་བའི་གཉེན་གཅིག་པུ༔ སྐུ་གསུམ་ཆེ་མཆོག་བཛྲ་ཧེ་རུ་ཀ༔ དུས་གསུམ་མཉམ་ཉིད་བླ་མ་དུས་འདིར་དྲན༔ བདག་དང་བླ་མ་དབྱེར་མེད་ཧེ་རུ་ཀ༔ རྒྱལ་བའི་ཞིང་ཁམས་དག་པ་ཆེན་པོ་འདིར༔ མི་འགྱུར་ལྷུན་གྲུབ་པདྨ་རྒྱལ་པོ་དང༔ བླ་མ་ཡི་དམ་མཁའ་འགྲོས་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ མགྲོན་སྤྱན་དྲང་བ་ནི། བླ་མ་ཡི་དམ་མཁའ་འགྲོ་དང༔ སངས་རྒྱས་ཆོས་དང་དགེ་འདུན་དང༔ ཞི་རྒྱས་དབང་དང་མངོན་སྤྱོད་ལྷ༔ ཕྱི་ནང་སྲུང་མའི་ཚོགས་རྣམས་དང༔ གསང་སྔགས་རིག་སྔགས་ལྷ་རྣམས་དང༔ འདས་དང་མ་བྱོན་ད་ལྟར་གྱི༔ ལྷ་དང་སྲུང་མ་དམ་ཚིག་ཅན༔ མ་མོ་མཁའ་འགྲོ་ཤུགས་འགྲོ་དང༔ འཇིག་རྟེན་གནས་ཀྱི་མཆོག་གྱུར་པ༔ སྒྲུབ་གནས་བྱིན་ཆེན་ཐམས་ཅད་དང༔ གཞན་ཡང་ས་འོག་ས་སྟེང་གི༔ གནས་བདག་ཆེན་པོ་ཐམས་ཅད་དང༔ འཁོར་དུ་གཏོགས་པའི་སྡེ་བརྒྱད་པོ༔ སྟོང་གསུམ་ཁྱབ་པའི་མཐུ་རྩལ་ཅན༔ ཆེ་དགུ་གཉན་དགུ་ཐམས་ཅད་དང༔ གཙུག་ལག་ཁང་དང་སྒྲུབ་གནས་ཀྱི༔ སྲུང་མ་གཉན་པོ་ཐམས་ཅད་དང༔ གཞན་ཡང་ལྷ་དང་གནོད་སྦྱིན་དང༔ དྲི་ཟ་གྲུལ་བུམ་མཁའ་འགྲོ་སོགས༔ བརྔན་པར་འོས་པའི་མགྲོན་རྣམས་དང༔ ས་བདག་ཀླུ་གཉན་ཐམས་ཅད་ཀུན༔ སངས་རྒྱས་བསྟན་པ་བསྲུང་བ་དང༔ སྒྲུབ་པའི་སྟོངས་གྲོགས་བྱ་བ་དང༔ དགོན་གནས་བར་ཆད་སེལ་བ་དང༔ དགྲ་དང་བགེགས་རྣམས་གཞོམ་པ་དང༔ ནད་གདོན་གནོད་པ་ལ་སོགས་པ༔ ཆག་ཆེ་ཉམ་ང་ཟློག་པ་དང༔ འདོད་པ་ཐམས་ཅད་བསྒྲུབ་པའི་ཕྱིར༔ མགྲོན་རྣམས་སྤྱན་འདྲེན་གཤེགས་སུ་གསོལ༔ འདིར་གཤེགས་བཤམས་པའི་མཆོད་པ་བཞེས༔ བསྟན་པ་དར་ཞིང་རྒྱས་པར་མཛོད༔ བདག་དང་རྒྱུ་སྦྱོར་ཡོན་བདག་གི༔ ཡིད་ལ་རེ་བ་སྐོང་བ་དང༔ ཀུན་ཀྱང་བཤད་པའི་ཆོས་ལ་ཉོན༔ བསང་གྱེར་བ་ནི༔ ཀྱཻ༔ བསང་གི་རྒྱུ་བྱུང་གང་ནས་བྱུང༔ བསང་གི་རྒྱུ་བྱུང་གནམ་ནས་བྱུང༔ ཕ་གནམ་ལ་འབྲུག་ཆེན་ལྡར་མ་ལྡིར༔ མ་ས་ལ་གློག་ཆེན་གྱ་མ་གྱུ༔ བུ་རྟ་རྒོད་གངས་ཀྱི་ཐིགས་པ་ཡིན༔ རྒྱ་མཚོ་ཆུ་ཡི་ལྦུ་བ་ཡིན༔ མ་ཕམ་གཡུ་མཚོའི་ཁ་ཞག་ཡིན༔ བཟང་དྲུག་སྨན་གྱི་ནུས་པ་ཡིན༔ དྲི་ཞིམ་སྤོས་ཀྱི་ངད་པ་ཡིན༔ ཕྱེ་མར་འོ་སྐོལ་གསུར་གྱིས་མཆོད༔ ཤིང་བདུད་རྩི་ཅན་གྱི་དུད་པ་དང༔ གསེར་ལོ་འབར་བའི་སྟག་པ་དང༔ གཡུ་ལོ་འབར་བའི་ཤུག་པ་དང༔ དུང་ལོ་འབར་བའི་བ་ལུ་དང༔ མཁན་པ་སྤོས་དཀར་ཨ་ཀ་རུ༔ ཤིང་བདུད་རྩི་ཅན་གྱི་དུད་པ་དང༔ ཕྱེ་མར་ཟས་ཕུད་གསེར་སྐྱེམས་ཀྱིས༔ ལྷ་འདྲེ་ཐམས་ཅད་བསང་བའི་ཕྱིར༔ ཀྱཻ༔ སྐྱབས་མཆོག་མགོན་གནས་ཡོན་ཏན་ཞིང༔ རྩ་བ་བརྒྱུད་པའི་བླ་མ་བསང༔ ལས་དང་སྐལ་བར་ལྡན་པ་ཡི༔ ཡི་དམ་ལྷ་ཚོགས་ཐམས་ཅད་བསང༔ སྔ་རབས་འདས་དང་ད་ལྟར་བཞུགས༔ སླད་ནས་འབྱོན་དང་དུས་གསུམ་གྱི༔ སངས་རྒྱས་ནམ་མཁའ་གང་བ་བསང༔ རྣམ་པར་སྣང་མཛད་ལ་སོགས་པའི༔ རིགས་ལྔ་བདེ་བར་གཤེགས་པ༴ རིགས་གསུམ་མགོན་པོ་ལ་སོགས་པའི༔ བྱང་ཆུབ་སེམས་དཔའ་ཐམས་ཅད༴ སྟོན་པ་བླ་མེད་སངས་རྒྱས༴ སྐྱོབ་པ་བླ་མེད་དམ་ཆོས༴ འདྲེན་པ་བླ་མེད་དགེ་འདུན༴ བླ་མེད་དཀོན་མཆོག་གསུམ་པོ༴ བུདྡྷ་བཞི་བཅུ་རྩ་གཉིས༴ ཁྲོ་བོ་རྨད་དུ་བྱུང་བ༴ ཁྲག་འཐུང་ལྔ་བཅུ་རྩ་བརྒྱད༴ འཇམ་དཔལ་སྐུ་ཡི་ལྷ་ཚོགས༴ པདྨ་གསུང་གི་ལྷ་ཚོགས༴ ཡང་དག་ཐུགས་ཀྱི་ལྷ་ཚོགས༴ ཆེ་མཆོག་ཡོན་ཏན་ལྷ་ཚོགས༴ ཕུར་པ་འཕྲིན་ལས་ལྷ་ཚོགས༴ བདུད་རྩི་སྨན་གྱི་ལྷ་ཚོགས༴ མ་མོ་རྦོད་གཏོང་ལྷ་ཚོགས༴ བླ་མ་རིག་འཛིན་ལྷ་ཚོགས༴ འཇིག་རྟེན་མཆོད་བསྟོད་ལྷ་ཚོགས༴ དམོད་པ་དྲག་སྔགས་ལྷ་ཚོགས༴ དཔལ་མགོན་བདུན་ཅུ་རྩ་གཉིས༴ ནམ་མཁའ་གང་བའི་ལྷ་ཚོགས༴ བར་སྣང་གང་བའི་གཉན་རྣམས༴ ས་གཞི་གང་བའི་ཀླུ་རྣམས༴ སྡེ་བརྒྱད་དམ་ལ་གནས་པ༴ ལྷ་མིན་གཡུལ་ངོ་ཟློག་པ༴ ལྷ་དམག་བྱེ་བ་དུང་ཕྱུར༴ དཔལ་ལྡན་ལྷ་མོ་ནག་མོ༴ ལྷ་མོ་བྱེ་བ་འཁོར་བཅས༴ འཇིག་རྟེན་བསྟན་མ་བཅུ་གཉིས༴ གསང་སྔགས་ཕྱི་ནང་བསྟན་སྲུང༴ རིག་འཛིན་བརྒྱུད་ཀྱི་སྲུང་མ༴ སློབ་དཔོན་བརྒྱུད་ཀྱི་སྲུང་མ༴ ཕ་མེས་བརྒྱུད་ཀྱི་སྲུང་མ༴ དབེན་གནས་གཉན་གྱི་སྲུང་མ༴ ཕྱི་ཨ་དཀར་དཀར་གྱི་སྲུང་མ༴ ཚངས་པ་ལ་སོགས་ལྷ་བརྒྱད༴ ཉི་མ་ལ་སོགས་གཟའ་བརྒྱད༴ སྨིན་དྲུག་ལ་སོགས་རྒྱུ་སྐར༴ མཐའ་ཡས་ལ་སོགས་ཀླུ་བརྒྱད༴ ཛམ་ལྷ་ལ་སོགས་ནོར་ལྷ༴ དྲི་ཟ་ལ་སོགས་ཕྱོགས་སྐྱོང༴ ཕྱི་ནང་གསང་བའི་ཆོས་སྐྱོང༴ མེད་པ་ཡོད་ཅེས་དགྲ་བླ༴ སྟོང་ལ་ཆགས་པའི་དགྲ་བླ༴ འབྱུང་བ་ཆགས་པའི་དགྲ་བླ༴ སྲིད་པའི་ལྷ་ལུང་དཀར་པོ༴ འདོད་རིགས་སྨན་པ་བཅོ་བརྒྱད༴ མ་ཆགས་སྟོང་གི་དགྲ་བླ༴ ཡེ་ནས་སྲིད་པའི་དགྲ་བླ༴ འདོད་དགུ་ཆགས་པའི་དགྲ་བླ༴ མི་ཐུབ་དགྲ་བླ་སྤུན་གསུམ༴ ཕ་མེས་བརྒྱུད་ཀྱི་དགྲ་བླ༴ མི་རབས་བརྒྱུད་ཀྱི་དགྲ་བླ༴ ཕྱི་རབས་བརྒྱུད་ཀྱི་དགྲ་བླ༴ དམུ་རབས་བརྒྱུད་ཀྱི་དགྲ་བླ༴ གཙུག་རབས་བརྒྱུད་ཀྱི་དགྲ་བླ༴ མི་འུ་གདུང་དྲུག་དགྲ་བླ༴ སྨོན་པའི་རྫི་ལུང་འཕྱོ་བ༴ ཕ་མཚུན་ཡབ་ལྷ་གདལ་དྲུག༴ མ་བཙུན་རྒྱལ་མོ་མཐིང་གེ༴ སྨན་བཙུན་དེ་མོ་དབུ་དཀར༴ གྲི་མཚུན་སྟག་ཆས་བལ་བུ༴ རྗེ་ཡི་མགུར་ལྷ་བཅུ་གསུམ༴ སྲིད་པ་ཆགས་པའི་དགྲ་བླ༴ མ་སང་རྡོ་རྗེ་ལེགས་པ༴ བཙན་རྒོད་འབར་བ་སྤུན་བདུན༴ ཤར་གྱི་རྨ་ཆེན་སྤོམ་ར༴ རྨ་རིགས་སུམ་བརྒྱ་དྲུག་ཅུ༴ ལྷོ་ཡི་འཛམ་བུ་གླིང་ཆུང༴ ཀླུ་འཁོར་སུམ་བརྒྱ་དྲུག་ཅུ༴ ནུབ་ཀྱི་གཉན་ཆེན་ཐང་ལྷ༴ ལྷ་འཁོར་སུམ་བརྒྱ་དྲུག་ཅུ༴ བྱང་གི་ལྷ་བཙན་བུ་ལེ༴ བཙན་འཁོར་སུམ་བརྒྱ་དྲུག་ཅུ༴ ཤར་ལྷོ་ནུབ་བྱང་ཀུན་འགྲོ་བའི། །དགྲ་བླ་གཉན་པོ་ཐམས་ཅད༴ སྨ་རེ་མཆེད་དང་ལྕམ་དྲལ༴ ཡར་ལྷ་དེ་ནི་ཤམ་པོ༴ འོ་དེ་དེ་ནི་གུང་རྒྱལ༴ གཉན་པོ་སྐུ་ལྷ་གེར་འཛོ༴ ཕོ་ལྷ་ལྷ་འུ་གཡང་དཀར༴ ལྷ་གཉན་ཚོགས་ལྷ་གུ་རུ༴ ཁམས་གསུམ་ཀླུ་དང་ས་བདག༴ ཕོ་ལྷ་དགྲ་བླ་གཉན་པོ༴ ཡུལ་གྱི་ས་བདག་གཉན་པོ༴ གཞིས་ལ་གནས་པའི་གཞི་བདག༴ མཁར་ལ་གནས་པའི་རྩེ་ལྷ༴ ཇག་ཡག་ཅང་སེ་གཉན་པོ༴ ཐབ་ལ་གནས་པའི་ཐབ་ལྷ༴ ལམ་ལ་གནས་པའི་ལམ་ལྷ༴ དུད་པ་གནམ་དུ་སོང་བ་ཡིས༔ ནམ་མཁའ་གང་བའི་ལྷ་ཚོགས༴ མེ་ལྕེ་བར་དུ་འབར་བ་ཡིས༔ བར་སྣང་གང་བའི་ལྷ་ཚོགས༴ མེ་གཞི་ས་གཞིའི་སྟེང་དུ་འབར༔ ས་གཞི་གང་བའི་ལྷ་ཚོགས༴ མེ་སྟག་དྲག་པོའི་ཐོག་རྒོད་འཕྲོ༔ གདུག་པའི་དགྲ་བགེགས་ཁོ་ཐག་ཆོད༔ ཐལ་བ་ཆེན་པོའི་རླུང་ལ་བསྐུར༔ དགྲ་བགེགས་ཐལ་བའི་རྡུལ་དུ་རློག༔ ཀྱཻ༔ ཕྱི་སྣོད་འཇིག་རྟེན་ལྷ་ཚོགས་བསང༔ རྩི་ཤིང་ནགས་ཚལ་ལྷ་ཚོགས་བསང༔ ནང་བཅུད་སེམས་ཅན་ལྷ་ཚོགས་བསང༔ ཕ་རི་གཡས་ལ་གནས་པ༴ ཚུར་རི་གཡོན་ལ་གནས་པ༴ ཉིན་དང་སྲིབ་ལ་གནས་པ༴ ཕྱི་རབས་བརྒྱུད་ཀྱི་སྲུང་མ༴ དམུ་རབས་བརྒྱུད་ཀྱི་སྲུང་མ༴ གཙུག་རབས་བརྒྱུད་ཀྱི་སྲུང་མ༴ སྟོང་གི་སྟོང་ལྷ་མོ་ཆུ༴ དབྲ་ཡི་དབྲ་མོ་དབྲ་ཁྲ༴ འབྲུ་ཡི་འབྲུ་མོ་ཁྲོམ་ཁྲོམ༴ སྒ་ཡི་སྒ་མོ་ལེ་ལེ༴ དབའ་ཟླའི་ཚལ་སྟག་དམར་པོ༴ སྡ་ཡི་དགུ་རྒྱུད་དགུ་ཁྲམས༴ རང་ལ་ཡོད་པའི་དགྲ་བླ༴ གྲོགས་ལ་འགོ་བའི་དགྲ་བླ༴ དགྲ་བསད་གྲུབ་པའི་དགྲ་བླ༴ དར་མ་ཐོབ་པའི་དགྲ་བླ༴ ཆེ་བཙུན་སྨོན་པའི་དགྲ་བླ༴ ཐུག་དཀར་སུམ་བརྒྱ་དྲུག་ཅུ༴ འབར་བ་ཉིས་བརྒྱ་ལྔ་བཅུ༴ ཝེར་མ་བརྒྱ་དང་བརྒྱད་ཅུ༴ མེད་པ་ཡོད་སྲིད་དགྲ་བླ༴ སྲིད་པའི་ལྷ་ལུང་དཀར་པོ༴ གླིང་བཞི་དར་བའི་དགྲ་བླ༴ སྐུ་གསུང་ཐུགས་ཀྱི་དགྲ་བླ༴ ཕ་མེས་དར་བའི་སྲས་བཙུན༴ མ་ཕྱི་སྔ་མའི་སྨན་བཙུན༴ གཅོད་ཁམས་བཟང་བའི་ཟོ་དོར༴ ཚེ་རབས་བརྒྱུད་ཀྱི་ཟོ་དོར༴ དམུ་རབས་བརྒྱུད་ཀྱི་ཟོ་དོར༴ གཙུག་རབས་བརྒྱུད་ཀྱི་ཟོ་དོར༴ མི་འུ་གདུང་དྲུག་ཟོ་དོར༴ བོད་ཀྱི་མགུར་ལྷ་བཅུ་གསུམ༴ དགེ་བསྙེན་སུམ་བརྒྱ་དྲུག་ཅུ༴ གནམ་གྱི་བརྒྱ་བྱིན་དཀར་པོ༴ ས་ཡི་བརྒྱ་བྱིན་ནག་པོ༴ བར་སྣང་བརྒྱ་བྱིན་ཁྲ་བོ༴ ཕྱི་བཙན་ནང་བཙན་དབུས་བཙན༴ ལྷ་ཁང་བཙན་རྒོད་འཁོར་བཅས༴ རིགས་ལྡན་ཁྲོ་རྒྱལ་ནུབ་རེ༴ མཆེད་འཁོར་སུམ་བརྒྱ་དྲུག་ཅུ༴ རི་རབ་ཆེན་པོའི་ས་བདག༴ གསེར་གྱི་རི་ལ་གནས་པ༴ རོལ་མཚོ་བདུན་ལ་གནས་པ༴ གླིང་བཞི་གླིང་ཕྲན་ས་བདག༴ མངའ་རིས་སྐོར་གསུམ་གཞི་བདག༴ དབུས་གཙང་རུ་བཞིའི་གཞི་བདག༴ མདོ་ཁམས་སྒང་དྲུག་གཞི་བདག༴ ཏི་སེ་གངས་ཀྱི་ས་བདག༴ ཕུ་དྲུག་གནས་པའི་ས་བདག༴ མཐོ་བ་མཁའ་ལ་གནས་པ༴ དམའ་བ་ས་ལ་གནས་པ༴ ས་བདག་གཙང་བཙན་འཁོར་བཅས༴ ས་ཡི་ལྷ་མོ་བསྟན་མ༴ ས་འཛིན་ལག་པ་ཆེན་པོ༴ ལོ་འཁོར་བཅུ་གཉིས་ལྷ་རྣམས༴ གབ་རྩེ་དགུ་ཡི་ལྷ་རྣམས༴ ས་བདག་ཀླུ་གཉན་སྟོང་སྐོར༴ ཕོ་ལྷ་དགྲ་བླ་གཉན་པོ༴ མ་ལྷ་བུ་རྫི་ཞང་ལྷ༴ དགྲ་བླ་རེ་མོ་གཉན་པོ༴ རྣོ་མཐོང་སྟོན་པའི་རྣོ་ལྷ༴ མདུད་ལྷ་སུམ་བརྒྱ་དྲུག་ཅུ༴ ཟ་ཁ་འབྱེད་པའི་ཞལ་ལྕེ༴ ཝེར་མ་སུམ་བརྒྱ་དྲུག་ཅུ༴ ཁས་དྲགས་སུམ་བརྒྱ་དྲུག་ཅུ༴ སྤྱན་རྣོན་སུམ་བརྒྱ་དྲུག་ཅུ༴ རྫི་འུ་སུམ་བརྒྱ་དྲུག་ཅུ༴ ཉིན་གྱི་གྲོགས་མཁན་ཉི་མ༴ མཚན་གྱི་གྲོགས་མཁན་ཟླ་བ༴ སྒྲ་གཅན་ལ་སོགས་གཟའ་བརྒྱད༴ ཇག་ལ་འགྲོ་བའི་ཇག་དཔོན༴ དམག་ལ་འགྲོ་བའི་དམག་དཔོན༴ སྐུ་ལྷ་དེ་ནི་འཇིགས་མེད༴ ས་གཞི་འདི་ལ་གནས་པ་བསང༔ བདག་ཅག་འཁོར་དང་བཅས་པ་ཡི༔ མགོན་སྐྱབས་སྟོངས་གྲོགས་རྒྱབ་རྟེན་མཛོད༔ ཆོས་དང་མཐུན་པའི་སྟོངས་གྲོགས་མཛོད༔ མི་མཐུན་དགྲ་བགེགས་མེད་པར་མཛོད༔ འདོད་པའི་རེ་བ་བསྐང་དུ་གསོལ༔ རྒྱལ་ལོ་རྒྱལ་ལོ་ལྷ་རྒྱལ་ལོ༔ ཞེས་སྨོན་ལམ་བཏབ༔ ཕྱག་མཆོད་ནི༔ སེམས་ཅན་ཀུན་གྱི་མགོན་གྱུར་པའི༔ རྒྱལ་བ་ཤཱཀྱ་ཐུབ་པ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ བཅོམ་ལྡན་རྒྱལ་བ་རིགས་ལྔ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཡུམ་ལྔ་རིན་ཆེན་ཕྲེང་བ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཕྱོགས་བཅུའི་སངས་རྒྱས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ དུས་གསུམ་སངས་རྒྱས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཞི་ཁྲོ་དཔལ་ཆེན་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ རིགས་གསུམ་མགོན་པོ་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ གདུང་བ་སེལ་བ་ལ་སོགས་པའི༔ འཕགས་པ་རང་རྒྱལ་འཁོར་བཅས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འོད་སྲུངས་ཆེན་པོ་ལ་སོགས་པའི༔ ཉན་ཐོས་ཆེན་པོ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ བྷ་ར་དྷྭ་ཛ་ལ་སོགས་པའི༔ གནས་བརྟན་ཆེན་པོ་བཅུ་དྲུག་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ནམ་མཁའི་སྙིང་པོ་ལ་སོགས་པའི༔ བྱང་ཆུབ་སེམས་དཔའ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཆོས་སྐུ་ཀུན་བཟང་ལ་སོགས་པའི༔ རྩ་བརྒྱུད་བླ་མ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཨིནྡྲ་བོ་དྷི་ལ་སོགས་པའི༔ གྲུབ་ཆེན་བརྒྱད་པོ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཀླུ་ཡི་བྱང་ཆུབ་ལ་སོགས་པའི༔ གྲུབ་ཆེན་བརྒྱད་ཅུ་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཀླུ་སྒྲུབ་སྙིང་པོ་ལ་སོགས་པའི༔ རྒྱན་དྲུག་མཆོག་གཉིས་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འཇམ་དཔལ་སྐུ་དང་པདྨ་གསུང༔ ཕུར་པ་འཕྲིན་ལས་ལ་སོགས་པའི༔ སྒྲུབ་པ་བཀའ་བརྒྱད་ལྷ་རྣམས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ནུབ་ཕྱོགས་ཨོ་རྒྱན་ལ་སོགས་པའི༔ དུར་ཁྲོད་ཆེན་པོ་བརྒྱད་རྣམས་ཀྱི༔ མ་སྲིང་མཁའ་འགྲོ་རྒྱ་མཚོ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ གནས་དང་ཉེ་བའི་གནས་དང་ཡུལ༔ ཉི་ཤུ་རྩ་བཞིའི་མཁའ་འགྲོ་དང༔ སྲུང་མ་ཞིང་སྐྱོང་ཐམས་ཅད་ལ༔ ཕྱག་འཚལ་མཆོད་པ་སྣ་ཚོགས་འབུལ༔ ཁྱད་པར་འགྲོ་བའི་གཉེན་གཅིག་པུ༔ ཨོ་རྒྱན་པདྨ་འབྱུང་གནས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འདོད་དགུའི་རེ་བ་བསྐང་དུ་གསོལ༔ རྒྱགས་བརྔན་གྱི་གཞུང་དངོས་ནི༔ ཧཱུྃ༔ མཆོད་ཡོན་མེ་ཏོག་བདུག་སྤོས་དྲི༔ ཞལ་ཟས་རོལ་མོ་གཏོར་མ་དང༔ སྐུ་གླུད་བསང་ཕུད་སྣ་ཚོགས་ཀྱིས༔ འཇིག་རྟེན་འདས་དང་མ་འདས་པའི༔ སྲུང་མ་གཉན་པོ་ཐམས་ཅད་དང༔ ལྷ་ཀླུ་གནོད་སྦྱིན་དྲི་ཟ་སོགས༔ ཆེ་དགུ་གཉན་དགུ་ཐམས་ཅད་བརྔན༔ ཤེལ་སྒོང་ནག་པོ་སྤྱི་དཀར་དང༔ ཤ་ཁྲག་དམར་གྱི་གཏོར་མ་ཡིས༔ མ་ཧཱ་ཀ་ལ་ལྕམ་དྲལ་དང༔ ལེགས་ལྡན་ནག་པོ་འཁོར་བཅས་བརྔན༔ རྒྱ་ཆེའི་མཆོད་པ་སྣ་ཚོགས་དང༔ བདུད་རྩི་ཤ་ཁྲག་གསེར་སྐྱེམས་དང༔ མཁའ་ལྡིང་ནག་པོ་གསེར་མིག་གིས༔ དཔལ་ལྡན་ལྷ་མོ་འཁོར་བཅས་བརྔན༔ ཕྱི་ནང་གསང་བའི་མཆོད་གཏོར་དང༔ བྱ་ནག་ཁྱི་སྤྱང་དོམ་དྲེད་དང༔ བསང་ཕུད་སྤྱན་གཟིགས་སྣ་ཚོགས་ཀྱིས༔ སྔགས་བདག་ཤན་པ་གཟའ་མཆོག་དང༔ དམར་ནག་དམ་ཅན་ལ་སོགས་པ༔ སྲུང་མ་དམ་ཅན་འཁོར་བཅས་བརྔན༔ ལྷ་རྣམས་མེ་ཏོག་ཕྲེང་བས་བརྔན༔ ཀླུ་རྣམས་དཀར་གསུམ་གཏོར་མས་བརྔན༔ གཉན་རྣམས་མངར་གསུམ་དར་ཟབ་བརྔན༔ ས་བདག་གསེར་དངུལ་རིན་ཆེན་བརྔན༔ ལྷ་མོ་བསྟན་མ་བུམ་པས༴ དྲི་ཟ་དྲི་དང་གསུར་གྱིས༴ གཤིན་རྗེ་ཤ་ཡི་གཏོར་མས༴ ལྟོ་ཕྱེ་གྲུལ་བུམ་མི་འམ་ཅི༔ མཁའ་ལྡིང་མཆོད་སྦྱིན་གཏོར་མས༴ གནོད་སྦྱིན་རླུང་ལྷ་དྲང་སྲོང་རྣམས༔ གསེར་གཡུ་སྦ་དང་སྙུག་མས༴ དགེ་བསྙེན་ཤ་དང་ཆང་གིས༴ ལྷ་འདྲེ་ཡིད་ཀྱི་གཟུགས་ཅན་རྣམས༔ ཡིད་དང་མཐུན་པའི་གཏོར་མས༴ བཙན་རྣམས་བྱ་དང་རི་དྭགས༴ ཀླུ་བདུད་སྦྲུལ་དང་སྦལ་པས༴ ལན་ཆགས་མགྲོན་རྣམས་གཏོར་མས༴ སྡེ་བརྒྱད་དམ་སྲི་འབྱུང་པོ་རྣམས༔ སྐུ་གླུད་དར་ཟབ་གཏོར་མས༴ རྒྱ་མཚོའི་ནང་གི་ཀླུ་ཆེན་བརྒྱད༔ ཀླུ་རྟ་རྒྱན་དང་བཅས་པས༴ བར་སྣང་གནས་པའི་གཟའ་ཆེན་བརྒྱད༔ ནས་ནག་ར་ནག་སྙིང་གིས༴ རྒྱུ་སྐར་ཉི་ཤུ་རྩ་བརྒྱད་དང༔ བློན་པོ་སུམ་ཅུ་རྩ་བདུན་རྣམས༔ རིན་ཆེན་གསེར་དངུལ་ཕྱེ་མས༴ འཕྲོག་མ་མ་བུ་ལྔ་བརྒྱའི་ཚོགས༔ ཆངས་བུ་དག་གི་གཏོར་མས༴ རིགས་ཀྱི་སྲུང་མ་ཐམས་ཅད་ལ༔ སོ་སོར་དགྱེས་པའི་གཏོར་མས༴ སྒོ་བཞིའི་སྲུང་མ་འཁོར་བཅས་རྣམས༔ རིན་ཆེན་དར་ཟབ་དོང་ཙེས༴ ལྷ་སྲུང་གཉན་པོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱི༔ བསམ་པ་སྒྲུབས་ལ་རེ་བ་སྐོངས༔ འཁོར་སྲུངས་རྐྱེན་ཟློགས་བར་ཆད་སོལ༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱིས༔ བྱང་ཆུབ་ཐུགས་སུ་ཆུད་པའི་ས༔ རྡོ་རྗེ་གདན་གྱི་ས་བདག་བརྔན༔ རྒྱ་གར་ཤར་ནུབ་རི་བོ་ཆེ༔ མ་མོ་མཁའ་འགྲོ་འདུ་བའི་གནས༔ རི་བོ་ཏ་ལའི་ས་བདག་བརྔན༔ རྡོ་རྗེ་གདན་གྱི་བྱང་ཕྱོགས་ན༔ བྱ་རྒོད་ཕུང་པོའི་རི་དང་ནི༔ སྤོས་ངད་ལྡན་པའི་རི་བོ་ཡི༔ ས་བདག་ཀླུ་གཉན་ཐམས་ཅད་བརྔན༔ ཙ་རི་ཙ་གོང་ལ་སོགས་པའི༔ རྒྱ་གར་ཤར་ཕྱོགས་ཡུལ་རྣམས་ཀྱི༔ ས་བདག་གཉན་པོ་ཐམས་ཅད༴ བསིལ་བ་ཚལ་གྱི་དུར་ཁྲོད་དང༔ རྔམ་པ་སྒྲ་སྒྲོག་ཚང་ཚིང་འཁྲིགས༔ ཧ་ཧ་རྒོད་པ་ལ་སོགས་པའི༔ དུར་ཁྲོད་བརྒྱད་ཀྱི་ས་བདག༴ རྒྱལ་པོའི་ཁབ་དང་ཡངས་པ་ཅན༔ མཉན་ཡོད་གནས་བཅས་ལ་སོགས་པའི༔ གྲོང་ཁྱེར་ཡུལ་འཁོར་ཐམས་ཅད་ཀྱི༔ ས་བདག་གཉན་པོ་ཐམས་ཅད༴ གཞན་ཡང་ཁ་ཆེ་ཨོ་རྒྱན་ཡུལ༔ ལི་ཡུལ་བལ་ཡུལ་ལ་སོགས་པའི༔ ས་བདག་གཉན་པོ་ཐམས་ཅད༴ འཇིག་རྟེན་གསུམ་སྣང་མནྡྷ་ར༔ འབིགས་བྱེད་ལ་སོགས་འཛམ་གླིང་རི༔ ས་བདག་གཉན་པོ་ཐམས་ཅད༴ མ་དྲོས་ལ་སོགས་མཚོ་རྣམས་དང༔ གངྒ་པཀྵུ་སིནྡྷུ་སོགས༔ ཆུ་ཆེན་རྣམས་ཀྱི་ས་བདག༴ ཏི་སེ་གངས་རི་ལ་སོགས་པའི༔ མགུར་ལྷ་གཉན་པོ་ཐམས་ཅད༴ མ་དྲོས་ཀླུ་གཉན་ལ་སོགས་པའི༔ ས་བདག་ཀླུ་གཉན་ཐམས་ཅད༴ རི་བོ་གནྡྷ་ལ་སོགས་པའི༔ ལི་ཡི་ས་བདག་གཉན་རྣམས༴ ལྕང་ར་སྨུག་པོ་ལ་སོགས་པའི༔ སོག་ཡུལ་གཞི་བདག་གཉན་པོ༴ གཞན་ཡང་གྲུ་གུ་ཞང་ཞུང་ཡུལ༔ གར་ལོག་ལ་སོགས་མཐའ་ཁོབ་ཡུལ༔ གཞི་བདག་གཉན་པོ་ཐམས་ཅད༴ རྒྱ་གར་རྒྱ་ནག་ཧོར་དང་འཇང༔ བལ་ཡུལ་བོད་ཡུལ་ལི་ཡུལ་སོགས༔ གཞི་བདག་གཉན་པོ་ཐམས་ཅད་བརྔན༔ བདག་ཅག་ཡོན་མཆོད་འཁོར་བཅས་ཀྱི༔ འཁོར་སྲུངས་རྐྱེན་ཟློགས་བར་ཆད་སོལ༔ བསམ་པ་སྒྲུབས་ལ་རེ་བ་སྐོངས༔ བཀྲ་ཤིས་བདེ་ལེགས་ཕུན་ཚོགས་མཛོད༔ སྒེར་གསོལ་མཛད་དགོས་རྣམས་དང་། དགྲ་བླ་དཔངས་བསྟོད། གཡང་འགུགས་བཅས་སྐབས་འདིར་བྱ། ཧཱུྃ༔ ཡུལ་ནི་རྡོ་རྗེ་བྲག་དམར་གྱི༔ སྲིང་གཅིག་གངས་དཀར་ཤ་མེད་མ༔ ཆིབས་སུ་དྲེའུ་རྟ་རྐང་གསུམ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་རྨ་ཆེན་སྤོམ་ར་ཡི༔ སྲིང་གཅིག་ཁ་རག་ཁྱུང་བཙུན་མ༔ ཆིབས་སུ་གྱི་ལིང་ཁ་དཀར་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་དབུ་རུ་ཀ་ཚལ་གྱི༔ སྲིང་གཅིག་རྡོ་རྗེ་གཡུ་སྒྲོན་མ༔ ཆིབས་སུ་ཆུ་རྟ་སྔོན་པོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་མ་ཧཱ་དེ་ཝ་ཡི༔ སྲིང་གཅིག་རྡོ་རྗེ་ཀུན་གྲགས་མ༔ ཆིབས་སུ་ཆུ་གླང་སྔོན་པོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ལྷོ་ཡུལ་དེ་སྙིང་གི༔ སྲིང་གཅིག་སྐྱི་མཐིང་གཡའ་མ་སྐྱོང༔ ཆིབས་སུ་གསེར་ཤ་ཡུ་མོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་སྔ་ཕྱི་དེ་གྲོང་ན༔ སྲིང་གཅིག་ཨུག་ཆོས་གཡའ་མོ་བསིལ༔ ཆིབས་སུ་རུས་སྦལ་མགོ་དགུ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་བལ་ཡུལ་གསེར་ཕུག་ན༔ ཨེ་ཀ་ཛཱ་ཊི་རལ་གཅིག་མ༔ ཆིབས་སུ་གཡུ་འབྲུག་སྔོན་མོ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ན་ལེན་ཤིང་ལེན་ན༔ བཙན་ལ་རོལ་པའི་སྨན་གཅིག་མ༔ ཆིབས་སུ་དྲེའུ་རྟ་རྐང་གསུམ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་ཀོང་ཡུལ་ཀོང་ཕུག་ན༔ གངས་ཀྱི་ཡུམ་ཆེན་གཡུ་བུན་མ༔ ཆིབས་སུ་སྟག་མོ་རི་བཀྲ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་མང་ཡུལ་མང་ཏིང་ན༔ ཆེ་ཞེ་གཙུག་གི་འོད་འཆང་མ༔ ཆིབས་སུ་འབྲོང་བུ་དར་མ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ནི་དབུ་རུ་སྙིང་པོ་ཡི༔ བྱང་གི་མ་ཏིང་ཏིང་མོ་བཙུན༔ ཆིབས་སུ་འབྲོང་ཆེན་འགྱིང་བ་འཆིབ༔ བཤོས་བུ་སྙིང་དང་གཏོར་མས་བརྔན༔ ཡུལ་ན་སྒྲུབ་ཡུལ་ཀ་ཚལ་གྱི༔ མདའ་ལ་བཙན་མོ་གདུག་པ་འདུལ༔ ཆིབས་སུ་དོམ་བུ་སྙིང་དཀར་འཆིབ༔ བཤོས་བུ་སྙིང་དང་གཏོར་མས་བརྔན༔ བསྟན་མ་ཆེན་མོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱི༔ བསམ་པ་སྒྲུབས་ལ་རེ་བ་སྐོངས༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ བོད་ཡུལ་ཀུན་གྱི་གཞི་བདག་ནི༔ ཆེ་དགུ་གཉན་དགུ་ཐམས་ཅད་བརྔན༔ རྡོ་རྗེ་ལེགས་པ་ལ་སོགས་པའི༔ གཙང་གི་གཡས་རུ་ཉིན་སྲིབ་ཀྱི༔ གཞི་བདག་གཉན་པོ་ཐམས་ཅད་བརྔན༔ ཐང་ལྷ་བར་ལྷ་ལ་སོགས་པའི༔ དབུ་རུ་ཉིན་སྲིབ་ས་བདག༴ ཤམྦྷོ་གངས་བཟང་ལ་སོགས་པའི༔ གཡོ་རུ་ཉིན་སྲིབ་གཞི་བདག༴ ཡར་འབྲོག་གཡུ་མཚོ་ཕྱུག་མོ་བརྔན༔ བྱང་གི་གནམ་མཚོ་ཕྱུག་མོ༴ སྟོད་ཀྱི་ལྷ་རྒོད་མདུང་རྩེ༴ འོ་དེ་གུང་རྒྱལ་ལ་སོགས་པའི༔ ཉང་པོ་འོལ་དགའི་གཞི་བདག༴ སྒམ་པོ་དཔལ་རི་ལ་སོགས་པའི༔ དྭགས་པོའི་གཞི་བདག་ཐམས་ཅད༴ ཀོང་བཙུན་དེ་མོ་ལ་སོགས་པའི༔ ཀོང་པོའི་གཞི་བདག་གཉན་པོ༴ རྡོ་རྗེ་བྲག་སྐྱེས་ལ་སོགས་པའི༔ མོན་ཡུལ་རྡོ་དང་གློ་རྣམས་ཀྱི༔ གཞི་བདག་གཉན་པོ་ཐམས་ཅད༴ སྐུ་ལྷ་མཁའ་རི་ལ་སོགས་པའི༔ ལྷོ་བྲག་ཡུལ་གྱི་གཞི་བདག༴ ནགས་སོགས་ཆུ་རྒྱུད་དགེ་བསྙེན་དང༔ ཨ་ལ་རྔོད་ཀྱི་གཞི་བདག་བརྔན༔ རྔུ་ཡི་ཉིན་སྲིབ་ས་བདག་དང༔ གཞི་བདག་གཉན་པོ་ཐམས་ཅད༴ ལྷོ་ཡི་རོང་ལྷ་རྒྱལ་མཚན་དང༔ རོང་བཙན་ཁ་བ་དཀར་པོ༴ དབང་ལྷ་མོ་ནམ་མཆེད་བརྒྱད་དང༔ དམག་དཔོན་དགྲ་འདུལ་དབང་ཕྱུག་དང༔ སྨུག་རི་དམུ་བཙན་ལ་སོགས་པའི༔ ཚ་བ་སྒང་གི་གཞི་བདག༴ སྐམ་གྱི་མཐོང་ལ་རྨོག་གཞུ་དང༔ གཟེ་ཡི་རྔ་མོང་གྭ་པ་དང༔ ལྕི་ཡི་བྲག་ལ་མདའ་ཟུག་དང༔ ཟླ་སྙིང་དཀར་ནག་གསུམ་མདོ་དང༔ རྩི་ཡི་སྦ་རྒོད་མཐོན་པོ་དང༔ རྒྱམ་རྡོའི་གངས་དཀར་མཆེད་བརྒྱད་དང༔ ཟླ་བའི་གཞི་བདག་གཉན་པོ་བརྔན༔ ཀླུ་རྒྱལ་མི་མགོན་དཀར་པོ་སོགས༔ སྨར་ཁམས་སྒང་གི་གཞི་བདག༴ ལྷ་ཡི་དགེ་བསྙེན་ཆེན་པོ་སྟེ༔ སྒྱོགས་ཆེན་སྡོང་ར་ལ་སོགས་པའི༔ འབྲི་ཀླུང་ཉིན་སྲིབ་གཞི་བདག༴ ལྡན་གྱི་ཝེར་ཏེ་སྨེ་དགུ་དང༔ གེར་མཚོའི་རི་བོ་དབང་གཞུ་དང༔ མཚམས་ལྔའི་གཞི་བདག་གཉན་རྣམས༴ བཛྲ་བྲམ་ཟེ་ལ་སོགས་པའི༔ སྤོམ་འབོར་སྒང་གི་གཞི་བདག༴ ཤར་གྱི་རྨ་ཆེན་སྤོམ་ར་ནི༔ རྨ་རིགས་སུམ་བརྒྱ་དྲུག་ཅུ་མཆེད༔ སྲིང་ལྕམ་བཞི་བཅུ་རྩ་ལྔར་བཅས༔ རྨ་ཀླུང་ཉིན་སྲིབ་གཞི་བདག༴ བེ་འུ་ཡི་ནི་དུག་མཚོ་དང༔ སྟོང་ར་ཡི་ནི་མཚོ་ནག་དང༔ དབུ་ཡི་ཚྭ་མཚོ་དཀར་པོ་དང༔ ཁྲི་ཤོར་རྒྱལ་མོའི་མཚོ་དང་ནི༔ ཙོང་ཁ་ཡི་ནི་མཚོ་སྔོན་དང༔ མཚོ་སྨན་རྒྱལ་མོ་མཆེད་ལྔ༴ དགེ་རི་གཉན་པོ་ལ་སོགས་པའི༔ ཙོང་ཁའི་གཞི་བདག་གཉན་པོ༴ བྷ་དང་བྱ་རོག་ཧ་ལ་ཤན༔ གྷ་དང་བྱང་ངོས་གཞི་བདག༴ བྷ་དའི་བཙན་རྒོད་ལ་སོགས་པའི༔ གནས་རི་གནས་མར་ས་བདག༴ རྨ་ལུང་དན་ཏིག་ལ་སོགས་པའི༔ རྨ་ཡི་ཡུལ་གྱི་ས་བདག༴ གཞོན་ནུ་ཀརྟི་ལ་སོགས་པའི༔ ཧལ་ཧའི་ཡུལ་གྱི་གཞི་བདག༴ གཞོང་ལག་ལ་འོ་ཆེ་ལ་སོགས༔ གཡར་མོ་ཐང་གི་གཞི་བདག༴ སྤྱི་ཡི་མདུང་རི་མཐོན་པོ་དང༔ སྤོ་རི་བྲག་དམར་སྒང་རྒྱུད༴ སྤོ་ནའི་ཤེལ་ལུང་ཕྱུག་མོ་དང༔ གྲོལ་གྱི་མ་ལུང་གྲལ་གསུམ་དང༔ རྨང་གྲོལ་རལ་གསུམ་གཞི་བདག༴ དགུ་མིག་བཞི་གསུམ་གཞི་བདག༴ སྙེ་གོང་སྙེ་དམར་ལ་སོགས་པའི༔ སྙེ་གོང་ཉིན་སྲིབ་གཞི་བདག༴ བྲག་དམར་བྱ་རྒོད་ལ་སོགས་པའི༔ ཏེ་ཆུའི་ས་བདག་གཉན་པོ༴ ལྷ་སྲིན་གདུག་པ་མང་བྱེད་པའི༔ འོ་དེ་རལ་གསུམ་ས་བདག༴ ཤིན་ཏུ་ཁྲོ་གཏུམ་ཆེ་བ་ཡི༔ རྒྱལ་མོ་རོང་གི་གཞི་བདག༴ འཇང་རི་སྨུག་པོ་ལ་སོགས་པའི༔ འཇང་ཡུལ་གཞི་བདག་གཉན་པོ༴ རི་བོ་རྩེ་ལྔ་ལ་སོགས་པའི༔ རྒྱ་ནག་ཡུལ་གྱི་གཞི་བདག༴ ཤར་ཕྱོགས་བ་རེག་འོ་དེ་ཡི༔ ལྷ་ཀླུ་གནོད་སྦྱིན་དྲི་ཟ་སོགས༔ ཆེ་དགུ་གཉན་དགུ་ཐམས་ཅད་བརྔན༔ བདག་ཅག་ཡོན་མཆོད་འཁོར་བཅས་ཀྱི༔ རེ་བ་ཐམས་ཅད་སྐོང་བ་དང༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ གཞན་ཡང་སྟོང་གསུམ་འཛམ་གླིང་ཡུལ༔ ས་འོག་ས་སྟེང་ས་བླ་ཡི༔ གཞི་བདག་གཉན་པོ་ཐམས་ཅད་བརྔན༔ ས་ལ་གནས་པའི་ས་བདག༴ ཆུ་ལ་གནས་པའི་ཀླུ་རྣམས༴ བྲག་ལ་གནས་པའི་བཙན་རྣམས༴ བར་སྣང་གནས་པའི་གཉན་རྣམས༴ ཡུལ་ལྷ་གཞི་བདག་གཉན་པོ༴ ལ་ལ་གནས་པའི་གཞི་བདག༴ ཕྲང་ལ་གནས་པའི་གཞི་བདག༴ གྲུ་ཟམ་གནས་པའི་གཞི་བདག༴ ལམ་ལ་གནས་པའི་གཞི་བདག༴ གཞི་བདག་གཉན་པོ་ཁྱེད་རྣམས་ཀྱང༔ མཐུ་སྟོབས་རྫུ་འཕྲུལ་སོ་སོར་ཆེ༔ དཔལ་དང་འབྱོར་པ་སོ་སོར་ཆེ༔ མངའ་རིས་མངའ་ཐང་སོ་སོར་ཆེ༔ མཛད་པ་འཕྲིན་ལས་སོ་སོར་ཆེ༔ མཆོད་པའི་འོས་སུ་སོ་སོར་ཆེ༔ དེ་བས་གཞི་བདག་གཉན་རྣམས་ལ༔ ཕྱག་འཚལ་མཆོད་པ་སྣ་ཚོགས་འབུལ༔ འདོད་པའི་དོན་ལ་གསོལ་འདེབས་ཀྱིས༔ སྔོན་གྱི་ཐུགས་དམ་བརྩེར་དགོངས་ལ༔ དགྱེས་པའི་མཆོད་པ་བཞེས་ནས་ཀྱང༔ བདག་གི་རེ་བ་བསྐང་དུ་གསོལ༔ བརྔན་འོས་ཁྱེད་རྣམས་བརྔན་པ་ཡིས༔ བཀྲ་ཤིས་བདེ་ལེགས་ཕུན་ཚོགས་མཛོད༔ ཧཱུྃ༔ གཞན་ཡང་བརྔན་པར་འོས་པའི་མགྲོན༔ མིང་དང་མཚན་ནས་མ་ཐོན་པའི༔ བླ་མ་ཡི་དམ་མཁའ་འགྲོ་དང༔ སྲུང་མ་དམ་ཅན་རྒྱ་མཚོ་དང༔ ལྷ་དང་དྲང་སྲོང་ཐམས་ཅད་དང༔ ཡུལ་ལྷ་ནོར་ལྷ་ནང་ལྷ་དང༔ ལམ་ལྷ་གཉན་པོ་ཐམས་ཅད་དང༔ གཞན་ཡང་དུས་གསུམ་ཕ་མ་དང༔ ཁམས་གསུམ་རིགས་དྲུག་ཐམས་ཅད་དང༔ ཡི་དྭགས་རྣམས་དང་བགེགས་རྣམས་དང༔ ལན་ཆགས་སྙིང་རྗེའི་མགྲོན་རྣམས་དང༔ གློ་བུར་ལྷགས་པའི་མགྲོན་རྣམས་དང༔ ལྷག་མའི་མགྲོན་རིགས་ཐམས་ཅད་ལ༔ རྒྱལ་ཕམ་མེད་པར་ཐོབ་ནས་ཀྱང༔ ཡིད་ལ་རེ་བ་རྫོགས་པར་ཤོག༔ ཧཱུྃ༔ དེ་ལྟར་མགྲོན་རིགས་ཐམས་ཅད་ཀྱི༔ མངའ་རིས་སྤྱན་ལམ་སོ་སོ་རུ༔ མཆོད་སྦྱིན་དམ་པ་འདི་བསྔོས་པས༔ ལོངས་སྤྱོད་ནམ་མཁའ་མཛོད་གྱུར་ཏེ༔ གང་ལ་ཅི་དགོས་ཐོབ་པར་ཤོག༔ མགྲོན་རྣམས་བརྔན་པའི་བྱིན་རླབས་ཀྱིས༔ བདག་གི་དོན་རྣམས་འགྲུབ་པར་ཤོག༔ སྔོན་ཚེ་སློབ་དཔོན་པདྨ་ཡིས༔ རྒྱགས་བརྔན་ཆེན་པོ་འདི་མཛད་པས༔ གཙུག་ལག་གྲུབ་ཅིང་མཐའ་དམག་ཐུལ༔ རྗེ་ཡི་དགོངས་པ་གྲུབ་པ་ལྟར༔ བདག་གི་དོན་རྣམས་མངག་པ་ནི༔ བདག་ཅག་ཡོན་མཆོད་འཁོར་བཅས་ཀྱི༔ འཁོར་སྲུངས་རྐྱེན་ཟློགས་བར་ཆད་སོལ༔ ཚེ་སྲིངས་དཔལ་དང་འབྱོར་པ་སྤེལ༔ སྙན་པ་སྒྲུབས་ལ་གྲགས་པ་སྒྲོགས༔ རྟག་ཏུ་འགོ་ཞིང་གྲོགས་མཛོད་ལ༔ འགྲོ་ལམ་བདེ་ཞིང་འཇིགས་པ་མེད༔ ལམ་འཕྲང་བདེ་བར་བགྲོད་པ་དང༔ རྙེད་པ་ཆེན་པོ་འགྲུབ་པ་དང༔ གཞིས་བྱེས་ཀུན་ཏུ་བཀྲ་ཤིས་ཤོག༔ ལྷ་དང་སྲུང་མ་ཐམས་ཅད་ཀྱང༔ དགེ་དང་ཞི་བའི་ལས་མཛད་པ༔ དམ་ཆོས་རིན་ཆེན་སྤྱོད་པར་ཤོག༔ ཀུན་ཀྱང་རྒྱལ་བའི་བཀའ་ལ་ཉོན༔ སྡིག་པ་ཅི་ཡང་མི་སྤྱད་ཅིང༔ དགེ་བ་ཕུན་སུམ་ཚོགས་པར་སྤྱད༔ རང་གི་སེམས་ནི་ཡོངས་སུ་འདུལ༔ འདི་ནི་སངས་རྒྱས་བསྟན་པ་ཡིན༔ ཆོས་རྣམས་གཟུགས་བརྙན་ལྟ་བུ་སྟེ༔ དག་ཅིང་གསལ་ལ་རྙོག་པ་མེད༔ གཟུང་དུ་མེད་ཅིང་བརྗོད་དུ་མེད༔ རྒྱུ་དང་ལས་ལས་ཀུན་ཏུ་འབྱུང༔ དེ་ལྟར་ཆོས་རྣམས་ཤེས་གྱིས་ལ༔ སེམས་ཅན་དོན་ནི་མཉམ་མེད་བྱོས༔ འོན་ཀྱང་སྐྱོབ་པའི་སྲས་སུ་སྐྱེ༔ དེ་ལྟར་ཆོས་དང་ཟང་ཟིང་གི༔ སྦྱིན་པས་ཚོགས་ཆེན་ཀུན་རྫོགས་ཏེ༔ ཐམས་ཅད་མངོན་པར་སངས་རྒྱས་ཤོག༔ འཕྲིན་ལས་རྣམ་བཞི་ལྷུན་གྱིས་གྲུབ༔ གཞན་དོན་ནུས་པ་མཐར་ཕྱིན་ནས༔ བྱིན་རླབས་དངོས་གྲུབ་ཡིད་བཞིན་གཏེར༔ ཀུན་བཟང་ཡེ་ཤེས་ཐོབ་པར་ཤོག༔ གནས་སྐབས་གནས་དང་ལམ་བགྲོད་དང༔ རྩོད་དང་དམག་དང་དགྲ་འཐབ་ལས༔ བདག་ཅག་ཡོན་མཆོད་རྒྱལ་གྱུར་ཅིག༔ གང་འདོད་དོན་ཀུན་འགྲུབ་པར་ཤོག༔ མགྲོན་པོ་དག་ནི་དོན་གཉེར་བར༔ ཕྱོགས་རྣམས་སུ་ནི་འགྲོ་བ་ན༔ བདག་གི་དོན་ཀུན་འགྲུབ་པ་དང༔ རྙེད་པ་ཆེན་པོ་ཐོབ་པར་ཤོག༔ ཕྱོགས་རྣམས་ཀུན་གྱི་ལྷ་རྣམས་དང༔ འཇིག་རྟེན་སྐྱོང་བ་གྲགས་དང་ལྡན༔ བཀྲ་ཤིས་བདེ་ལེགས་བྱེད་པོ་རྣམས༔ སྐྱེ་དགུ་ཀུན་གྱི་བསྲུང་བར་ཤོག༔ གསུམ་པ་མཇུག་གི་ཆོ་ག་ནི། ཡིག་བརྒྱས་ལྷག་ཆད་ཁ་བསྐངས་ལ། ཧཱུྃ༔ མགྲོན་རྣམས་ཀུན་གྱི་སྤྱན་ལམ་དུ༔ བདག་གིས་མཆོད་སྦྱིན་བཤམས་པ་ལ༔ འགལ་འཁྲུལ་ནོངས་པ་ཅི་མཆིས་པ༔ ཐམས་ཅད་མ་ལུས་བཟོད་པར་གསོལ༔ གཙོ་བོས་ནུས་པ་མ་མཆིས་པ༔ མ་འབྱོར་མ་རྙེད་མ་ཚང་བ༔ འདིར་ནི་བྱ་མིན་གང་བྱས་པ༔ དེ་དག་ཐམས་ཅད་བཟོད་པར་གསོལ༔ ཨོཾ༔ ཁྱེད་ཀྱིས་སེམས་ཅན་དོན་ཀུན་མཛད༔ རྗེས་སུ་མཐུན་པའི་དངོས་གྲུབ་སྩོལ༔ སངས་རྒྱས་ཡུལ་དུ་གཤེགས་ནས་ཀྱང༔ སླར་ཡང་འབྱོན་པར་མཛད་དུ་གསོལ༔ འཇིག་རྟེན་འདས་དང་མ་འདས་ཀྱི༔ མགྲོན་རྣམས་མ་ལུས་ཐམས་ཅད་ཀུན༔ རང་རང་བདེ་བར་གཤེགས་ནས་ཀྱང༔ སླར་ཡང་འབྱོན་པར་མཛད་དུ་གསོལ༔ ཨོཾ་བཛྲ་མུ༔ སརྦ་ལོ་ཀ་གཙྪ༔ རྒྱགས་བརྔན་ཆེན་མོ་སློབ་དཔོན་པདྨས་མཛད་པ་རྫོགས་སོ༔ བྲག་རི་དུག་སྦྲུལ་སྤུངས་འདྲའི་སྐེད་ནས་རིག་འཛིན་རྒོད་ཀྱི་ལྡེམ་འཕྲུ་ཅན་གྱིས་གཏེར་ནས་གདན་དྲངས་པའོ།། །། ༄༅། །བྱང་གཏེར་གྱི་དགྲ་བླ་དཔངས་བསྟོད་གཞན་ཕན་རོལ་པ་ཞེས་བྱ་བ་བཞུགས་སོ། །དགྲ་བླ་དཔངས་བསྟོད་འདི་ལ་བསང་མཆོད་གཞུང་བཞིན་བྱས་ལ༔ གོ་མཚོན་མདའ་གཞུ་ཁྲབ་རྨོག་འཁོར་གསུམ་དང༔ འོག་རྟ་མདའ་དར་དཀར་པོ་དང༔ ཤ་ཁྲག་དམར་གཏོར་མདུད་དར་དང༔ དཀར་གསུམ་མངར་གསུམ་ཕྱེ་མར་འོ་སྐོལ་དང༔ གསེར་སྐྱེམས་གཡུ་སྔོན་དང་བཅས་བཤམས་ལ༔ ལས་ཀྱི་རྡོ་རྗེས་དམག་མི་ཚོ་ཁ་ལག་བཀྲུར་བཅུག་སྤོས་བསྲེག་ནས་གཡུག་ཆབ་བྲན༔ དེ་ནས་སྙན་ངར་འབོལ་གསུམ་འཛོམ་པའི་གསུང་སྐད་དང༔ སྔགས་པའི་དབྱངས་ཀྱིས་ཐོག་མར་འདི་སྐད་དོ༔ དཔག་བསམ་ནམ་མཁའི་ཀློང་རུམ་དུ༔ དུང་སྐྱོང་དཀར་པོ་ཡེ་ནས་སྲིད༔ ཞལ་གྱི་རླངས་པ་རླུང་ལྟར་འཕྱོ༔ ནམ་མཁའི་མཐོངས་ནས་སྤྲིན་ལྟར་འཕྱོ༔ དེ་ལས་ཆུ་ཡི་ཟིལ་འཕྲོས་པས༔ བདུད་རྩི་རྒྱ་མཚོར་མེར་ཏེ་འཁྱིལ༔ སྟེང་དུ་འཕྱོ་བའི་ལྦུ་བ་ལ༔ སྒོ་ང་བརྒྱ་དང་སྟོང་དུ་སྲིད༔ ནག་པོ་ལྕགས་ཀྱི་སྒོ་ང་བརྒྱ༔ རྡོལ་བའི་ནང་ནས་བྱུང་བ་ནི༔ ལྕགས་ཀྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ནག་པོ་བདུད་ཀྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ གསེར་སྒོང་བརྒྱ་པོ་རྡོལ་པ་ལས༔ གསེར་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ བཙུན་པ་དམུ་ཡི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ གཡུ་སྒོང་བརྒྱ་པོ་རྡོལ་པ་ལས༔ གཡུ་ཡི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཡེ་མཁྱེན་སྐོལ་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ དངུལ་སྒོང་བརྒྱ་པོ་རྡོལ་པ་ལས༔ དངུལ་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཡེ་མཁྱེན་སྨན་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ འཁར་སྒོང་བརྒྱ་པོ་རྡོལ་པ་ལས༔ འཁར་གྱི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ བདུད་འདུལ་འཁར་གྱི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ དུང་སྒོང་བརྒྱ་པོ་རྡོལ་པ་ལས༔ དུང་གི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ ཆུ་ཁམས་རླུང་གི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ བསེ་སྒོང་བརྒྱ་པོ་རྡོལ་པ་ལས༔ བསེ་ཡི་མི་བརྒྱ་རྟ་བརྒྱ་བྱུང༔ རྣོ་བའི་མཚོན་ཆ་ལག་ན་ཐོག༔ མགོ་ནག་མི་ཡི་དགྲ་བླ་ཡིན༔ དེ་རིང་དགྲ་བླའི་རྟེན་ལ་བྱོན༔ ཅེས་སྤྱན་འདྲེན་ནོ༔ དགྲ་བླ་དཔངས་བསྟོད་ཀྱི་བསང་ནི༔ ཕྱེ་མར་ཇ་ཕུད་ཆང་ཕུད་རྣམས་བསང་ཁང་དུ་འབུལ་ཞིང་གསོལ་བ་བཏབ༔ ལྷ་གསོལ་ནས་བསང་གི་རིམ་པ་ནི་འདི་སྐད་དོ༔ ཀྱཻ༔ གསེར་ལོ་འབར་བའི་སྟག་པ་དང༔ གཡུ་ལོ་འབར་བའི་ཤུག་པ་དང༔ དུང་ལོ་འབར་བའི་སུར་དཀར་དང༔ མཁན་པ་སྤོས་དང་ཨ་ཀ་རུ༔ བདུད་རྩི་ཅན་གྱི་དུད་པ་ཡིས༔ སྐུ་གསུང་ཐུགས་ཀྱི་དགྲ་བླ་བསང༔ ཡེ་ནས་སྲིད་པའི་དགྲ་བླ་བསང༔ མཐོན་པོ་དགུང་གི་དགྲ་བླ་བསང༔ དམའ་བ་ས་ཡི་དགྲ་བླ་བསང༔ ཤར་ཕྱོགས་གླིང་གི་དགྲ་བླ་ནི༔ དུང་སེང་གཡུ་ཡི་རལ་ཅན་བསང༔ ལྷོ་ཕྱོགས་གླིང་གི་དགྲ་བླ་ནི༔ གཡུ་འབྲུག་མེ་ཡི་ཟེ་ཅན་བསང༔ ནུབ་ཕྱོགས་གླིང་གི་དགྲ་བླ་ནི༔ གླང་ཆེན་གསེར་གྱི་རྣ་ཅན་བསང༔ བྱང་ཕྱོགས་གླིང་གི་དགྲ་བླ་ནི༔ མཚལ་སྟག་གཡུ་ཡི་རལ་ཅན་བསང༔ དགྲ་བླ་ཁྱུང་འབྲུག་སེང་གསུམ་བསང༔ སྨོན་པ་འགྲུབ་པའི་དགྲ་བླ་བསང༔ འདོད་དགུ་འབྱུང་བའི་དགྲ་བླ་བསང༔ མྱུར་མགྱོགས་ཆེ་བའི་དགྲ་བླ་བསང༔ དཔའ་སྙིང་ཆེ་བའི་དགྲ་བླ་བསང༔ དགྲ་དཔུང་འཇོམས་པའི་དགྲ་བླ་བསང༔ བགེགས་དཔུང་ཞི་བའི་དགྲ་བླ་བསང༔ ཅི་བསམ་འགྲུབ་པའི་དགྲ་བླ་བསང༔ བསྡུས་པ་བྱེད་ན་ལ་རྫས་ཀྱི་གཏོར་མ་འདིར་འབུལ༔ ཀྱཻ༔ དགྲ་བླ་མཐུ་ཆེན་ཁྱེད་རྣམས་ལ༔ ཤ་ཁྲག་དམར་གྱི་གཏོར་མ་དང༔ དཀར་གསུམ་མངར་གསུམ་མཆོད་རྫས་དང༔ ཕྱེ་མར་འོ་སྐོལ་སྐྱེམས་ཕུད་དང༔ མཐུན་པའི་དམ་རྫས་སྣ་ཚོགས་ཀྱིས༔ མགོན་སྐྱབས་བྱེད་པའི་དགྲ་བླ་མཆོད༔ བོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་རྟུལ༔ རྦད་པའི་ཚེ་ན་མཐུ་མ་ཆུང༔ དགྲ་དཔུང་འཇོམས་པའི་དགྲ་བླ་ཡིས༔ སྐུ་ཡི་སྤྲུལ་པ་མེ་ལྟར་འབར༔ གསུང་གི་སྤྲུལ་པ་འབྲུག་ལྟར་ལྡིར༔ ཐུགས་ཀྱི་སྤྲུལ་པ་གློག་ལྟར་འཁྱུག༔ ཡང་སྤྲུལ་ལྕགས་ཀྱི་བྱ་ཁྲ་དང༔ དུང་གི་བྱ་ཁྱུང་ཀ་རུ་དང༔ བསེ་ཡི་བྱ་གླག་རྨུག་པོ་རྣམས༔ འཕུར་ཞིང་ལྡིང་ལ་གཞུར་པ་དང༔ དགྲ་བོའི་དཔུང་རྣམས་རྡུལ་དུ་རློགས༔ ཞེས་མཆོད་དེ༔ རྟེན་འཛུགས་ཀྱི་རིམ་པ་ནི༔ འཁོར་གསུམ་མཚོན་ཆ་ལ༔ ཆབ་དང་བདུད་རྩི་བྲན༔ དེ་ནས་གྲི་འདོན༔ སྔགས་རྒན་དག་གིས་གྱེར་བ་ནི་འདི་སྐད་དོ༔ ཀྱཻ༔ དགྲ་བླ་གཉན་པོ་འཁོར་བཅས་ལ༔ ཁྲབ་རྨོག་ཕུབ་ཞོལ་འཁོར་གསུམ་དང༔ སྤྱན་གཟིགས་གོ་མཚོན་སྣ་ཚོགས་པ༔ ཆགས་ཤིང་འགོ་བའི་རྟེན་དུ་འཛུགས༔ ཁྲབ་སྟོད་སེང་གེ་འགྱིང་པ་འདྲ༔ ཁྲབ་སྐེད་དངུལ་གྱི་རྡོ་རྗེ་འདྲ༔ ཁྲབ་གཤམ་ཁྱུང་གཤོག་བརྒྱངས་པ་འདྲ༔ སྲོག་རི་སྲོག་མཁར་སྲོག་རྩེ་གསུམ༔ ལྷ་ལྕམ་བག་མར་ཆས་པ་འདྲ༔ འདྲ་བཞིས་སྤྲས་པའི་སྲོག་མཁར་འདི༔ དགྲ་བླ་གཉན་པོའི་རྟེན་དུ་འཛུགས༔ ཀྱཻ༔ རྨོག་ལ་གླིང་བཞི་ཟུར་བཞི་ལྡན༔ རྨོག་གི་ཤར་གྱི་གླིང་ཁམས་ན༔ དགྲ་བླ་གོས་སྔོན་གཤོག་རིང་བཀོད༔ རྨོག་གི་ལྷོ་ཡི་གླིང་ཁམས་ན༔ མགོན་བྱེད་དཀར་པོའི་དགྲ་བླ་བཀོད༔ རྨོག་གི་ནུབ་ཀྱི་གླིང་ཁམས་ན༔ འགྲོ་བ་བདུད་འདུལ་དགྲ་བླ་བཀོད༔ རྨོག་གི་བྱང་གི་གླིང་ཁམས་ན༔ སྣང་གསལ་སྒྲོན་མེའི་དགྲ་བླ་བཀོད༔ རྩེ་ལ་བྱ་རྒྱལ་རྒོད་སྒྲོས་མཚན༔ ཡ་མཚན་ཅན་གྱི་ལྕགས་ཞྭ་འདི༔ དགྲ་བླ་གཉན་པོའི་རྟེན་དུ་འཛུགས༔ མི་འཇིག་སྲ་བརྟན་མཛེས་པའི་ཕུབ༔ གཟི་བརྗིད་རྔ་མས་མཛེས་པར་བརྒྱན༔ གནམ་ལྕགས་འབར་བའི་ཞོལ་གྱིས་མཚན༔ ཕུབ་མོའི་ཤར་གྱི་གླིང་ཁམས་ན༔ བསྙབ་པ་ལག་རིང་དགྲ་བླ་བཀོད༔ ཕུབ་མོའི་ལྷོ་ཡི་གླིང་ཁམས་ན༔ འགྲོ་བ་བང་མགྱོགས་དགྲ་བླ་བཀོད༔ ཕུབ་མོའི་ནུབ་ཀྱི་གླིང་ཁམས་ན༔ ཁུར་བ་སྟོབས་ཆེན་དགྲ་བླ་བཀོད༔ ཕུབ་མོའི་བྱང་གི་གླིང་ཁམས་ན༔ སྣང་གསལ་འོད་ལྡན་དགྲ་བླ་བཀོད༔ འོད་ཟེར་སྣ་ཚོགས་དྲྭ་བས་ཁྱབ༔ གཡས་གཡོན་དར་གྱི་འཕྲུ་དང་བཅས༔ ཡ་མཚན་ཅན་གྱི་ཕུབ་ཆེན་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བགེགས་འབྱུང་པོ་འགུག་བྱེད་པའི༔ མདུང་རྩེ་གནམ་དུ་བསྟན་པ་འདི༔ རྣོ་ངར་ལྡན་པའི་དགྲ་བླའི་རྟེན༔ བ་དན་བར་སྣང་འཕྱོ་བ་འདི༔ དགྲ་བོའི་བླ་འགུགས་དགྲ་བླའི་རྟེན༔ མདུང་རྟིང་ས་ལ་བཙུགས་པ་འདི༔ འཕོ་འགྱུར་མེད་པའི་དགྲ་བླའི་རྟེན༔ མདུང་སྐེད་ལག་པས་བཟུང་བ་འདི༔ དགྲ་བགེགས་སྲོག་གཅོད་དགྲ་བླའི་རྟེན༔ ཡང་ལ་རིང་བ་རྣོ་བའི་མཚོན༔ སྣ་ཚོགས་དར་གྱི་འཕན་བཅས་འདི༔ དགྲ་བླ་གཉན་པོའི་རྟེན་དུ་འཛུགས༔ མཆོག་དཀར་གཞུ་མོ་བདུངས་པ་འདི༔ གཞུ་རྒྱུད་དྲང་བའི་གདང་རིང་ལ༔ དགྲ་བླ་ཆེ་བ་ཀུན་བཞིན་བཀོད༔ མཆོག་དཀར་གཞུ་ཡི་མཆོག་མ་ལ༔ མྱུར་མགྱོགས་སྟོབས་ཆེན་དགྲ་བླ་བཀོད༔ མདའ་མོ་ཤུགས་རྒོད་ཐོག་འབེབ་ལ༔ དགྲ་བླ་ངར་མ་ཀླད་གཞུར་བཀོད༔ ཁྱུང་ཆེན་གཡུ་ཡི་སྒྲོ་གསུམ་ལ༔ དགྲ་བླ་རྣོ་ཆོད་ངར་མ་བཀོད༔ མདེ་འུ་རྡོ་རྗེ་ཕ་ལམ་ལ༔ དགྲ་བླ་རྩེ་མོས་རྣོ་གཅོད་བཀོད༔ ཡ་མཚན་ཅན་གྱི་མདའ་གཞུ་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བོའི་སྐྱེ་རྒྱུད་གཅོད་པ་ཡི༔ གནམ་ལྕགས་འབར་བའི་རལ་གྲི་འདི༔ རྩེ་མོ་མེ་ཡི་ཕུང་པོ་ལ༔ དགྲ་བགེགས་སྲོག་གཅོད་དགྲ་བླ་བཀོད༔ ཡུ་བ་རྔམ་བརྗིད་འཕྲོ་བ་ལ༔ སྲུང་མ་ཐོགས་མེད་དགྲ་བླ་བཀོད༔ གཞུང་རིང་ཚངས་པ་འདྲ་བ་ལ༔ འགྱུར་བ་མེད་པའི་དགྲ་བླ་བཀོད༔ ཐུག་གཅོད་རལ་གྲི་འཇའ་དང་ལྡན༔ རབ་འཇིགས་དཔའ་བོའི་ཕྱག་མཚན་འདི༔ དགྲ་བླ་གཉན་པོའི་རྟེན་དུ་འཛུགས༔ ཅང་ཤེས་ཤུགས་ལྡན་གྱི་ལིང་རྟ༔ དེ་ཡི་ཟེ་རྔོག་གཡས་གཡོན་ལ༔ དགྲ་བླ་དུང་སྐྱོང་དཀར་པོ་བཀོད༔ གྱི་ལིང་རྟ་ཕོའི་རྣ་མཆོག་ལ༔ གསལ་བྱེད་གསལ་བའི་དགྲ་བླ་བཀོད༔ དཔུང་པ་རླུང་གི་འཁོར་ལོ་ལ༔ མཚོ་ལ་ངར་བྱེད་དགྲ་བླ་བཀོད༔ ཚང་ར་སྨད་ཀྱི་འགྲོ་བ་ལ༔ ཕ་གཅིག་བཙན་ལ་རོལ་པ་བཀོད༔ མདོ་བ་བདེ་བའི་རྨིག་བཞི་ལ༔ མགྱོགས་བྱེད་སྟོབས་ཀྱི་དགྲ་བླ་བཀོད༔ གང་འདོད་ས་ལ་ཐོགས་མེད་སྦྱོར༔ མྱུར་མགྱོགས་རླུང་གི་རྟ་ཕོ་འདི༔ དགྲ་བླ་གཉན་པོའི་རྟེན་དུ་འཛུགས༔ དགྲ་བླ་རི་རྒྱལ་ལྷུན་པོ་ལ༔ དམག་མི་རྩི་ཤིང་རྒྱས་པ་འདྲ༔ དགྲ་བླ་ཉི་ཟླ་ཤར་བ་ལ༔ དམག་མི་རྒྱུ་སྐར་བཀྲམ་པ་འདྲ༔ དགྲ་བླ་གངས་ཀྱི་སེང་གེ་ལ༔ དམག་མི་གཡུ་རལ་རྒྱས་པ་འདྲ༔ དགྲ་བླ་རྒྱ་སྟག་ཁྲ་བོ་ལ༔ དམག་མི་འཛུམ་དྲུག་རྒྱས་པ་འདྲ༔ དགྲ་བླ་བྱ་ཁྱུང་ག་རུ་ལ༔ དམག་མི་སྒྲོ་གཤོག་རྒྱས་པ་འདྲ༔ དགྲ་བླ་གཡུ་འབྲུག་སྔོན་མོ་ལ༔ དམག་མི་གློག་འོད་འཁྱུག་པ་འདྲ༔ དགྲ་བླ་རྒྱ་མཚོ་འཁྱིལ་བ་ལ༔ དམག་མི་ཡིད་བཞིན་ནོར་བུ་འདྲ༔ ཀྱཻ༔ དེ་རིང་སྲིད་པའི་དགྲ་བླ་མཆོད༔ བྲོས་ན་ཐར་བའི་དགྲ་བླ་མཆོད༔ དེད་ན་ཟིན་པའི་དགྲ་བླ་མཆོད༔ གོ་ཁྲབ་སྲ་བའི་དགྲ་བླ་མཆོད༔ འོག་རྟ་མགྱོགས་པའི་དགྲ་བླ་མཆོད༔ ཤགས་ཁ་ཐུབ་པའི་དགྲ་བླ་མཆོད༔ ཅི་བསམ་འགྲུབ་པའི་དགྲ་བླ་མཆོད༔ ཅེས་བསྟོད་དོ༔ དཔངས་བསྟོད་ཀྱི་རིམ་པ་ནི་འདི་སྐད་དོ༔ ཀྱཻ༔ དགྲ་བླ་འཁོར་བཅས་དཔངས་བསྟོད་དོ༔ གངས་ལ་ཉི་མ་ཤར་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ སེང་གེ་གཡུ་རལ་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ སྟག་ལ་འཛུམ་དྲུག་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ ཁྱུང་ཆེན་མཁའ་ལ་འཕྱོ་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ གཡུ་འབྲུག་མཁའ་ལ་སྒྲ་སྒྲོག་བཞིན༔ དགྲ་བླ་གཉན་པོ་དཔངས་བསྟོད་དོ༔ ཤ་བ་རྭ་བཅུ་རྒྱས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མདུང་ལ་བ་དན་བཏགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ རྨོག་ལ་རྒོད་འཕྲུ་བཙུགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ ཁྲབ་ལ་འཛབ་ཞོལ་བཏགས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ གྲི་ལ་རྣོ་ངར་འཛོམ་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ གཞུ་མོ་རྒྱུད་ཀྱིས་བདུངས་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མདའ་ལ་སྒྲོ་གསུམ་བསྐྱོན་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཁའ་ལ་དར་ཆེན་འཕྱར་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཚོ་ལ་ཉ་མོ་འཕྱོ་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ མཁར་ལ་བ་གམ་བསྐྱོན་པ་བཞིན༔ དགྲ་བླ་གཉན་པོ་དཔངས་བསྟོད་དོ༔ དགུང་ལ་ཉི་མ་ཤར་བ་བཞིན༔ དགྲ་བླ་གཉན་པོ་དཔངས་བསྟོད་དོ༔ དེ་ལྟར་མངའ་གསོལ་དཔངས་བསྟོད་པས༔ བདག་ཅག་ཡོན་མཆོད་འཁོར་བཅས་རྣམས༔ ཕྱོགས་བཞི་མཚམས་བརྒྱད་གར་འགྲོ་ཡང༔ མི་མཐུན་ཕྱོགས་ལས་རབ་རྒྱལ་ཞིང༔ བར་དུ་གཅོད་པའི་དགྲ་བགེགས་འཐུལ༔ བསམ་སྒྲུབ་རེ་སྐོང་འཕྲིན་ལས་མཛོད༔ ཅེས་དཔངས་བསྟོད་དོ༔ ལམ་ལྷའི་རིམ་པ་ནི༔ དཀར་གསུམ་མངར་གསུམ་ཕྱེ་མར་དང༔ འོ་སྐོལ་ནམ་མཁའ་ལ་འབུལ་ལོ༔ ཀྱཻ༔ ནམ་མཁའ་དཀར་པོའི་ཡར་སྟེང་ན༔ གཡུ་འབྲུག་སྔོན་པོའི་ལམ་ལྷ་མཆོད༔ དུང་སྐྱོང་དཀར་པོའི་ལམ་ལྷ་མཆོད༔ ཡོལ་གྱི་ཐོ་གྲུབ་ལམ་ལྷ་མཆོད༔ རྒྱ་སྟག་ཁྲ་བོའི་ལམ་ལྷ་མཆོད༔ སྤྱང་གདོང་སྔོན་པོའི་ལམ་ལྷ་མཆོད༔ གཉེན་བྱེད་དོན་གྲུབ་ལམ་ལྷ་མཆོད༔ རེ་འབྱམས་སྨུག་པོའི་ལམ་ལྷ་མཆོད༔ དུག་སྦྲུལ་དཀར་པོའི་ལམ་ལྷ་མཆོད༔ ལྷ་དམག་བྱེ་བ་དུང་ཕྱུར་མཆོད༔ སྐྱེས་བུ་དཔའ་བའི་ལམ་ལྷ་མཆོད༔ འོག་རྟ་མགྱོགས་པའི་ལམ་ལྷ་མཆོད༔ གོ་ཆ་སྲ་བའི་ལམ་ལྷ་མཆོད༔ མཐུ་རྩལ་ཆེ་བའི་ལམ་ལྷ་མཆོད༔ ཁ་དྲགས་ལམ་ལྷ་ཤུགས་མགོན་མཆོད༔ ཅང་སེ་ལམ་ལྷ་ཁ་དྲོ་མཆོད༔ ཁྱོད་ལ་མཆོད་པ་ཕུལ་པ་ཡིས༔ ལམ་གྱི་བར་ཆད་ཞི་བ་དང༔ དམག་མི་རྣམས་ཀྱི་རྫི་བོ་མཛོད༔ བར་དུ་གཅོད་པའི་དགྲ་བགེགས་ཐུལ༔ མི་མཐུན་ཕྱོགས་རྣམས་ཞི་བར་མཛོད༔ ཅེས་པས་འཕྲིན་ལས་བཅོལ༔ ལ་རྫས་མཆོད་པའི་རིམ་པ་ནི༔ ཤར་ལྷོ་ནུབ་བྱང་གི་ཕྱོགས་བཞི་ལ་གཏོར་མ་འབུལ༔ དེ་ནས་དབུས་ཀྱི་གཏོར་མ་ཡུལ་ལྷ་ལ་གསོལ༔ ཀྱཻ༔ ལ་རྫས་ཁྱོད་ཀྱི་ཤར་ཕྱོགས་སུ༔ སེང་གེ་དཀར་མོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་གཉན་པོའི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱོད་ཀྱི་ལྷོ་ཕྱོགས་སུ༔ གཡུ་འབྲུག་སྔོན་པོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱེད་ཀྱི་ནུབ་ཕྱོགས་སུ༔ རྒྱ་སྟག་ཁྲ་བོའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱེད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ལ་རྫས་ཁྱོད་ཀྱི་བྱང་ཕྱོགས་སུ༔ འབྲོང་བུ་དར་མའི་ཚང་ཞིག་བཅའ༔ མདའ་མདུང་དར་དཀར་བརྒྱན་པ་འདི༔ ལ་རྫས་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱོད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ ཀྱཻ༔ མཛེས་པའི་མཁན་བྱ་དཀར་པོ་འདི༔ ལ་རྫས་ཁྱེད་ཀྱི་རྩེ་འཛིན་མཛོད༔ མདའ་མདུང་དར་དཀར་བརྒྱན་པ་འདི༔ ཡུལ་ལྷ་ཁྱོད་ཀྱི་རྟེན་དུ་འབུལ༔ བདག་དང་རྒྱུ་སྦྱོར་འཁོར་བཅས་ཀྱི༔ མགོན་དང་སྐྱབས་སུ་གྱུར་པར་མཛོད༔ སྲིད་པ་ཆགས་པའི་ལ་རྫས་ཁྱེད༔ གསེར་སྐྱེམས་གཙང་མ་འདི་བཞེས་ལ༔ མགོན་དང་དཔུང་གཉེན་མཛད་དུ་གསོལ༔ རང་རྟ་བཙན་ལ་མ་སྐུར་ཅིག༔ ཁྱུང་དང་འབྲུག་དང་གྱི་ལིང་གསུམ༔ ལ་རྫས་རྩེ་ལ་རོལ་ལོ་ལོ༔ ཁྲ་དང་གླག་དང་རྒོད་པོ་གསུམ༔ ལ་རྫས་རྩེ་ལ་ལྡིང་ཞིང་འཁོར༔ ལ་རྫས་དབུས་ཀྱི་དྲང་ཤིང་ན༔ དུང་སྐྱོང་དཀར་པོའི་ཚང་ཞིག་བཅའ༔ ཤར་དུ་སེང་གེའི་ཚང་ཞིག་བཅའ༔ ལྷོ་རུ་གཡུ་འབྲུག་ཚང་ཞིག་བཅའ༔ ནུབ་ཏུ་སྟག་གི་ཚང་ཞིག་བཅའ༔ བྱང་དུ་འབྲོང་གི་ཚང་ཞིག་བཅའ༔ དེ་ལྟར་བཞི་པོ་ལ་རྫས་ཀྱི༔ སྒོ་བཞི་སྲུང་བའི་ཕོ་ཉ་ཡིན༔ ཝེར་མ་ཀུན་ཐུབ་འཇིགས་མེད་དེ༔ དམག་མི་མང་པོའི་ལམ་ལྷ་ཡིན༔ ཝེར་མ་དཔའ་བརྟན་ཐོགས་མེད་དེ༔ གཡུལ་ངོ་ཟློག་པའི་ལམ་ལྷ་ཡིན༔ ཝེར་མ་ཁྲོ་གཏུམ་འཇིགས་མེད་དེ༔ མདའ་དང་མདུང་གི་དགྲ་བླ་ཡིན༔ གསེར་གྱི་འུག་པ་མིག་རྣོ་དེ༔ དམག་སྣ་འདྲེན་པའི་ལམ་ལྷ་ཡིན༔ སྲིད་པ་བརྒྱུད་ཀྱི་ལ་རྫས་ཁྱོད༔ བདག་གིས་བསཽ་སྒྲ་གདབ་ཙ་ན༔ གཉེན་གྱི་སྤྱང་སྤུན་དགུ་པོ་ཡང༔ བདག་ལ་འགོ་བའི་སྲུང་མ་མཛོད༔ བསམ་པ་སྒྲུབས་ལ་རེ་བ་སྐོངས༔ བར་དུ་གཅོད་པའི་དགྲ་བགེགས་ཐུལ༔ མི་མཐུན་རྐྱེན་དང་བར་ཆད་སོལ༔ བཅོལ་པའི་འཕྲིན་ལས་སྒྲུབ་པར་མཛོད༔ སྨོན་ལམ་བཏབ་པ་ནི༔ གངས་དང་སེང་གེ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ནགས་དང་རྒྱ་སྟག་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ བྲག་དང་རྒོད་པོ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ སྤང་དང་ཤ་བ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ཆབ་དང་ཉ་མོ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ མདུང་ལ་བ་དན་བཏགས་པ་བཞིན༔ མི་དང་དགྲ་བླ་མ་བྲལ་ཅིག༔ གཞུ་མོ་རྒྱུད་ཀྱིས་བདུངས་པ་བཞིན༔ མི་དང་དགྲ་བླ་མ་བྲལ་ཅིག༔ རྨོག་དང་རྒོད་འཕྲུ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ མདའ་དང་སྟག་དོང་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ རལ་གྲི་ཤུབས་དང་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ ལུས་དང་གྲིབ་མ་འགྲོག་པ་བཞིན༔ མི་དང་དགྲ་བླ་མ་བྲལ་ཅིག༔ དགྲ་བླ་གཉན་པོ་ཁྱེད་རྣམས་ཀྱིས༔ བདག་ཅག་ཡོན་མཆོད་འཁོར་བཅས་ཀྱིས༔ ཕྱོགས་བཞི་མཚམས་བརྒྱད་གར་འགྲོ་ཡང༔ རྟག་ཏུ་མི་འབྲལ་སྡོངས་གྲོགས་མཛོད༔ དགྲ་བླ་དཔངས་བསྟོད་འདི་ཨོ་རྒྱན་རིན་པོ་ཆེས་མཛད་པའོ༔ གཏེར་སྟོན་རིགས་འཛིན་རྒོད་ཀྱི་ལྡེམ་འཕྲུ་ཅན་གྱིས་གཏེར་ནས་བཏོན་པའོ།། །། ༄༅། །ཕྱྭ་གཡང་འགུགས་པ་ནི། ཀྱཻ། ཕུན་ཚོགས་བཀྲ་ཤིས་འཁྱིལ་པའི་གནས་མཆོག་འདིར། །འདོད་པའི་མཆོག་སྟེར་ཕྱྭ་དང་གཡང་གི་ཚོགས། ཁབ་ལེན་རྡོ་དང་ལྕགས་ཀྱི་སྣང་ཚུལ་བཞིན། །དགའ་བའི་གར་དང་བཅས་ཏེ་ཐོགས་མེད་ཁུག །གསེར་མངལ་མགྲིན་སྔོན་འཁོར་ལོའི་ལག་པ་ཅན། །གྲགས་པའི་མུ་ཁྱུད་འཁོར་ལོས་སྒྱུར་བ་སོགས། །སྲིད་འདིར་མངོན་པར་མཐོ་བའི་ཚོགས་རྣམས་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ལེགས་བྲིས་ཚོགས་ཀྱི་འཆི་མེད་བཏུང་བ་དང་། །ཀླུ་དབང་གཙུག་གི་ཡིད་བཞིན་ནོར་བུ་མཆོག །མི་དབང་སྔོན་འགྲོའི་རྒྱལ་སྲིད་སྣ་བདུན་གྱི༔ ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །རིན་ཆེན་གདུགས་དཀར་གསེར་ཉ་བུམ་པ་བཟང་། །པདྨ་དུང་དཀར་གཡས་འཁྱིལ་དཔལ་བེ་འུ། །རྒྱལ་མཚན་འཁོར་ལོ་བཀྲ་ཤིས་རྟགས་བརྒྱད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །རྣམ་འདྲེན་ཟས་གཙང་སྲས་པོས་བཀྲ་ཤིས་པའི། །དངོས་པོར་བྱིན་བརླབས་དགེ་ལེགས་འབྱུང་བའི་སྒོ །རྟེན་འབྲེལ་ལྷུན་གྱིས་གྲུབ་པའི་རྫས་བརྒྱད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ཚེ་རིང་ནད་མེད་འདོད་པའི་དོན་ཀུན་གྲུབ། །སྟོབས་དང་མངའ་ཐང་འབྱོར་པ་ཕུན་སུམ་ཚོགས། །བདེ་ཞིང་སྐྱིད་པའི་དགའ་སྟོན་ཐམས་ཅད་ཀྱི། །ཕྱྭ་གཡང་དཔལ་འབྱོར་སྙན་གྲགས་མ་ལུས་སྩོལ། །ཅེས་ཕྱྭ་གཡང་འགུགས་པ་འདི་ནི་ཐམས་ཅད་མཁྱེན་ཅིང་གཟིགས་པ་ཆེན་པོ་༧ངག་དབང་བློ་བཟང་རྒྱ་མཚོས་མཛད་པའི་བསང་མཆོད་བཀྲ་ཤིས་འཁྱིལ་པ་ནས་འཁོལ་དུ་ཕྱུང་བའོ། །མངྒ་ལཾ།། །།ལྷ་ལྡན་དེ་མོ་བསྟན་རྒྱས་གླིང་གི་ཤིང་པར་ལྟར་ཡིན་ནོ། ༈ །དཔེ་ཚན་འདི་སྔོན་ཆད་གཏེར་མཛོད་དཀྱུས་སུ་མེད་ཅིང་། བལ་ཡུལ་ཞེ་དགོན་གྱི་པར་གསར་འདིར་གསར་བཞག་བྱས་པས་ལུང་རྒྱུན་ལ་ཞིབ་རྟོག་དགོས་པ་ཡིན་ནོ།།


Footnotes[edit]

Other Information[edit]

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).