Terdzo-MA-028
རྫོགས་པ་ཆེན་པོ་བཀའ་འདུས་ཀྱི༔ རྩ་སྒྲུབ་སྙིང་པོ་དོན་འདུས་ལས༔ དཀྱིལ་འཁོར་འཇུག་པའི་སྙིང་པོ་
by མཆོག་གྱུར་གླིང་པ་ (Chogyur Lingpa)
revealed by མཆོག་གྱུར་གླིང་པ་ (Chogyur Lingpa)
in cycle རྫོགས་ཆེན་བཀའ་འདུས་རྩ་བ་སྙིང་ཐིག་ (Rdzogs chen bka' 'dus rtsa ba snying thig)
Volume 16 (མ) / Pages 631-633 / Folios 1a1 to 2a6
རྫོགས་པ་ཆེན་པོ་བཀའ་འདུས་ཀྱི༔ རྩ་སྒྲུབ་སྙིང་པོ་དོན་འདུས་ལས༔ དཀྱིལ་འཁོར་འཇུག་པའི་སྙིང་པོ་བཞུགས༔ བཀའ་འདུས་རྩ་བའི་སྙིང་ཏིག་གོ ྈྈྈྈྈྈྈྈྈ བླ་མ་ཧེ་རུ་ཀ་ལ་བདུད༔ རྫོགས་པ་ཆེན་པོ་བཀའ་འདུས་ཀྱི༔ རྩ་སྒྲུབ་སྙིང་པོ་འདུས་པ་ལས༔ དཀྱིལ་འཁོར་འཇུག་པའི་སྙིང་པོ་བསྟན༔ ཡོ་བྱད་ཐམས་ཅད་འདུ་བྱས་ལ༔ སློབ་མ་ཁྲུས་བྱ་བགེགས་བསྐྲད་ནས༔ ཡོན་འབུལ་གསོལ་བ་འདི་སྐད་གདབ༔ ཧོ༔ འཁོར་བའི་རྒྱ་མཚོ་ཆེན་པོ་ལ༔ བྱིང་བ་སྐྱབས་མེད་རྣམས་ལ་སྐྱོབས༔ དངོས་གྲུབ་རྣམ་གཉིས་བདག་འདོད་པས༔ སྟ་གོན་ལ་ནི་གནས་པར་ཞུ༔ དེ་ལ་བླ་མས་བཀའ་བསྩལ་བ༔ ཧོ༔ མ་རིག་སྲིད་པའི་འཁྲུལ་འཁོར་འདིར༔ འཁོར་བའི་སེམས་ཅན་སྙིང་རེ་རྗེ༔ ཐར་པ་མྱུར་དུ་ཐོབ་པའི་ཐབས༔ དངོས་གྲུབ་སྣ་ཚོགས་འཐོབ་འགྱུར་བའི༔ གསང་སྔགས་བླ་མེད་འདི་ལ་ནི༔ སྐལ་པ་མེད་པ་མི་རུང་བས༔ དངོས་གྲུབ་སྐལ་པ་བརྟག་པར་བྱ༔ ངེས་འབྱུང་སྐྱབས་འགྲོ་སེམས་བསྐྱེད་ལྡན༔ སློབ་དཔོན་ཐུགས་ཀའི་འོད་ཟེར་གྱིས༔ སློབ་མའི་ལུས་ངག་ཡིད་གསུམ་སྦྱངས༔ ཧཱུྃ་ལས་རྡོ་རྗེ་སེམས་དཔའི་སྐུ༔ དཀར་གསལ་རྡོ་རྗེ་དྲིལ་བུ་འཛིན༔ རྒྱན་རྫོགས་པད་ཟླའི་གདན་བཞུགས་པའི༔ གནས་གསུམ་ཨོཾ་ཨཱཿཧཱུྃ་གིས་མཚན༔ སོ་ཤིང་ཚད་ལྡན་བཟུང་དུ་གཞུག༔ ཡེ་ཤེས་ལྔ་ལྡན་མཎྜལ་དུ༔ ཧ་ས་ཧཱ་ཡིས་དོར་བར་བྱ༔ རྩ་བ་རང་ལ་བསྟན་པ་ངན༔ སྒྲིབ་སྦྱོང་འབད་ལ་སླར་ཡང་བསྐྱར༔ བི་ཤུདྡྷེ་ཡིས་ཁྱོར་ཆུ་སྦྱིན༔ རྨི་ལམ་གསལ་ཕྱིར་འཐུང་ཞིང་བཀྲུ༔ བསྲུང་ཕྱིར་ཁྲོ་བོའི་ལས་སྔགས་ཀྱིས༔ སྲུང་སྐུད་རྡོ་རྗེའི་མདུད་པ་ཅན༔ ཕོ་གཡས་མོ་ཡི་གཡོན་དུ་གདགས༔ དྷཱི་དང་ཁཾ་ལས་སྐྱེས་པ་ཡི༔ ཀུ་ཤས་སྔས་དང་སྟན་དུ་བྱ༔ རྨི་ལམ་བཟང་ངན་བརྟག་པ་ལ༔ ངན་ན་སྡིག་སྒྲིབ་སྦྱོང་ལ་འབད༔ མི་ལྡོག་ཕྱིར་དུ་ཆོས་བཤད་དོ༔ སྐལ་པ་ལྡན་པའི་སློབ་མ་རྣམས༔ རིན་ཆེན་མཎྜལ་ཡོན་དུ་དབུལ༔ ཧོ༔ ཡེ་ཤེས་འབར་བའི་དཀྱིལ་འཁོར་དུ༔ བདག་ཉིད་བཅུག་པར་མཛད་ནས་ཀྱང༔ ཐུགས་རྗེས་ལྷ་ཞལ་བསྟན་པ་དང༔ ཐར་པའི་གནས་ལ་འགོད་དུ་གསོལ༔ དེ་ལ་བླ་མས་ལན་སྦྱིན་པ༔ ཧཱུྃ༔ གསང་བ་བླ་མེད་དཀྱིལ་འཁོར་དུ༔ སྐལ་པ་ལྡན་པ་ཁྱོད་གཞུག་པས༔ བདེ་བ་བླ་ན་མེད་པ་ཐོབ༔ དམ་ཚིག་ཐམས་ཅད་ཐུབ་པར་གྱིས༔ སློབ་མས་དམ་ཚིག་བཟུང་བ་ནི༔ ཧཱུྃ༔ རྡོ་རྗེ་སློབ་དཔོན་དགོངས་སུ་གསོལ༔ དཀྱིལ་འཁོར་ལྷ་ཚོགས་དཔང་པོར་བཞུགས༔ སྐུ་གསུང་ཐུགས་ཀྱི་དམ་ཚིག་རྣམས༔ སྲོག་གི་ཕྱིར་ཡང་མི་གཏང་ངོ༔ བདུད་རྩི་ཧཱུྃ་དུ་དམིགས་ནས་ཀྱང༔ ཧཱུྃ༔ འདི་ནི་དམ་ཚིག་རྡོ་རྗེའི་ཆུ༔ བུ་ཁྱོད་ལ་ནི་སྦྱིན་པར་བྱ༔ དམ་ཚིག་བསྲུངས་ན་དངོས་གྲུབ་ཐོབ༔ ཉམས་ན་དམྱལ་བ་ཆེན་པོར་ལྟུང༔ རྡོ་རྗེ་བདུད་རྩིའི་ཆུ་འཐུངས་ཤིག༔ དམ་ཚིག་ཐམས་ཅད་ཐུབ་པར་གྱིས༔ དེ་ནས་སློབ་མས་བྲོ་བོར་བ༔ ས་མ་ཡ་ཨི་དན་ན་ར་ཀན༔ དེ་ནས་སློབ་མ་ལྷར་བསྐྱེད་ལ༔ གནས་གསུམ་ཨོཾ་ཨཱཿཧཱུྃ་དུ་གསལ༔ དཀྱིལ་འཁོར་པ་ཡི་ཐུགས་ཀ་ནས༔ སྐུ་གསུང་ཐུགས་ཀྱི་ཕྱག་རྒྱ་རྣམས༔ ཆར་ལྟར་བབས་ནས་ལུས་ནང་ཁེངས༔ གནས་གསུམ་ཡིག་འབྲུར་ཐིམ་པར་བསམ༔ ཨོཾ་ཨཱཿཧཱུྃ་གུ་རུ་དེ་བ་ཌཱ་ཀི་ནཱི་ཛྙཱ་ན་ཨཱ་བེ་ཤ་ཡ་ཨ་ཨཱཿ ཕྱག་མཚན་རྡོ་རྗེ་མེ་ཏོག་བཅས༔ སྤྱི་བོར་བཞག་ནས་བརྟན་པར་བྱ༔ ཏིཥྛ་བཛྲ༔ འབྲེལ་པ་བརྟག་པའི་མེ་ཏོག་འབུལ༔ ཧཱུྃ༔ བསྐལ་པ་གོང་ནས་འབྲེལ་པ་ཡི༔ བདག་གི་ལྷ་མཆོག་གང་ཡིན་ལ༔ མེ་ཏོག་བཟང་པོ་འདི་འབུལ་གྱིས༔ ཐུགས་རྗེའི་བརྩེ་བས་བཞེས་སུ་གསོལ༔ པུཥྤེ་པྲ་ཏིཙྪ་ཧོ༔ གང་ལ་བབ་པའི་གསང་མཚན་གདགས༔ མེ་ཏོག་སླར་ཡང་སྤྱི་བོར་བཀོད༔ པུཥྤེ་གྲྀཧྞ་ཨི་མཾ་སཏྭ་མ་ཧཱ་བ་ལ་ཏིཥྛ༔ ཡེ་ཤེས་ཐུར་མས་མིག་དབྱེ་ལ༔ ཧོ༔ ལྟོས་ཤིག་སྐལ་ལྡན་རིགས་ཀྱི་བུ༔ ད་ནི་དད་པ་རབ་ཏུ་སྐྱེད༔ ཡེ་ཤེས་དཀྱིལ་འཁོར་ལྷ་ཚོགས་མཐོང༔ བསྐལ་པར་བསགས་པའི་སྡིག་སྒྲིབ་འདག༔ དངོས་གྲུབ་བཟང་པོ་ཐོབ་ནས་ཀྱང༔ མྱུར་དུ་རྒྱལ་བའི་སྲས་སུ་འགྱུར༔ ཙཀྵུ་པྲ་ཝེ་ཤ་ཡ་ཕཊ༔ མཐོང་བ་ལེགས་པར་བརྟན་པ་ཡིས༔ དབང་རྣམས་བསྐུར་བའི་སྣོད་དུ་རུང༔ དད་པ་ཅན་གྱི་འཇུག་སྒོ་འོ༔ ས་མ་ཡ་རྒྱ་རྒྱ༔ སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པས་མདོ་ཁམས་ནམ་མཁའ་མཛོད་ཀྱི་ལྷོ་ཕྱོགས་གཡུ་འབར་བྲག་ནས་སྤྱན་དྲངས་པའི་ཤོག་སེར་གླེགས་བམ་གྱི་ངོས་ལས། ཕྲིན་ལས་འགྲོ་འདུལ་དབང་གི་གནས་མཆོག་རི་བོ་དབང་ཞུའི་སྙིིང་པོ་ཟླ་གམ་དབང་ཆེན་ཕུག་པར་གཏན་ལ་ཕབ་པའི་ཡི་གེ་པ་ནི་པདྨ་གར་དབང་བློ་གྲོས་མཐའ་ཡས་ཀྱིས་བགྱིས་པ་དགེ་ལེགས་འཕེལ།། །།