Terdzo-NI-012
གཤིན་པོ་འདྲེར་མི་འོང་བའི་ཤོག་དྲིལ་གསལ་བར་བྱས་པ་
by ([[Karmapa, 15th|]])
Volume 42 (ནི) / Pages 95-96 / Folios 1a1 to 1b5
གཤིན་པོ་འདྲེར་མི་འོང་བའི་ཤོག་དྲིལ་གསལ་བར་བྱས་པ་བཞུགས་སོ། །ན་མོ་གུ་རུ། དེང་སང་དུས་དབང་གི་གཤིན་འདྲེ་ཟེར་བ་མང་ཙམ་སྣང་ཡང་དོན་དུ་ཟ་འདྲེ་ཤི་གཤེད་ཀྱིས་གཤིན་པོ་དེའི་བླ་འཕྲོགས་པའི་བླ་དེ་དངོས་སམ། དེས་བརྫུས་པ་ལྟ་བུའི་རིགས་མ་གཏོགས། རྣམ་ཤེས་དངོས་གཤིན་འདྲེར་སྐྱེ་བ་མི་འཐད་སྙམ། གང་ལྟར་གཏེར་མཛོད་ནང་དུ་ཡོད་པའི་ཤོག་དྲིལ་དེ་གསལ་ཁ་ཅན་ཞིག་མི་འདུག །འོལ་ཚོད་ཙམ་བགྱིས་ན། ཐོག་མར་རང་ཉིད་ཡི་དམ་གང་རུང་གི་བདག་བསྐྱེད་སྔོན་དུ་བཏང་། ལིངྒ་ཟེར་བ་གཤིན་པོའི་གཟུགས་ཀྱི་སྙིང་གར་ནྲྀ་ཡིག་གི་མཐར། མིང་རུས་རྣམ་ཤེས་བླ་དང་བཅས་པ་རྟེན་འདིར་ཁུག་ཅིག །ཅེས་བྲིས་པ་དེ་མགོ་མཇུག་ལྡོག་པར་གཡོན་ནས་གཡས་སུ་དྲིལ། དྲི་རྟེན་དང་ལྷན་ཅིག་ཚོན་སྐུད་ལྟ་བུས་དཀྲིས། ལྷོ་སྒོ་ལྟར་གྱི་འགུགས་གཞུག་བློ་མ་ཁེལ་བར་དུ་བསྐྱར། དེ་ནས་བཛྲ་གུ་རུས་བརླབ་པའི་སཱཙྪའི་ནང་དུ་བཅུག་ལ། སཱཙྪ་བརྡབ་ཅིང་གུ་རུར་ཀྲོང་གི་དམིགས་པ་བྱེད། སླར་དེ་ཉིད། མདུན་དུ་ཏྲཱཾ་ལས་རིན་པོ་ཆེའི་མཆོད་སྡོང་བྱང་ཆུབ་ཆེན་པོའི་རྣམ་པ་ཅན། དེའི་བུམ་ནང་དུ་གུ་རུ་པདྨ་ཆུ་དར་སྔོན་པོའི་་་དར་སྔོན་སྤྱི་འགྲེ། མཆན།ན་བཟའ་ཅན། ཤ་བའི་ཡིབ་ཞུ་་་སྐུ་ཚབ་ཕྱག་ཚའི་དབུ་ཞྭ་དེ་འདྲ་ཡིན། མཆན།གསོལ་བ། ཕྱག་གཡས་བྷནྡྷ་ཁ་སྤྲད་པའི་ནང་དུ། དམིགས་ཡུལ་གྱི་རྣམ་ཤེས་བླ་དང་བཅས་པ་བསྲུང་ཞིང་། གཡོན་ཐོད་པ་ཁ་སྤྲད་པའི་བར་དུ། ཟ་འདྲེ་ཤི་གཤེད་རྣམས་ཕྱེ་མར་འཐག་པའི་སྐུར་གསལ་བའི། གནས་གསུམ་འབྲུ་གསུམ་གྱི་འོད་ཀྱིས་ཡེ་ཤེས་པ་སྤྱན་དྲངས། དམ་ཚིག་པར་བསྟིམ། ཉེར་སྤྱོད་དང་གཏོར་མ་སྔགས་ཙམ་གྱིས་འབུལ། ཧྲཱིཿ མ་བཅོས་སྤྲོས་བྲལ་ལྟ་བུའི་བསྟོད་པ་བྱ། གོང་གི་དམིགས་པ་གཙོ་བོར་བཏོན་ལ། བཟླས་པ་བྱ། མཐར་བསམ་པ་ལྷུན་གྲུབ་མའི་མཐའི། གཞན་ཡང་ལས་དང་རྐྱེན་གྱི་དབང་གྱུར་ཏེ༔ འཁྲུལ་སྣང་དངོས་པོར་ཞེན་ཅིང་སྡུག་བསྔལ་ན༔ ཡིད་གཉིས་ཐེ་ཚོམ་མེད་པར་གསོལ་བ་འདེབས༔ གུ་རུ་བདེ་ཆེན་རྒྱལ་པོའི་ངོ་བོ་སྟེ༔ སྡུག་བསྔལ་འཁྲུལ་པ་རྩད་ནས་གཞིག་པར་བྱེད༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ ཞེས་པ་ཅི་མང་སོགས་ཀྱིས་གསོལ་བ་དྲག་ཏུ་བཏབ། མཐར་ཡེ་དྷརྨཱས་རབ་གནས་ཀྱི་དམིགས་པ་མི་བསྡུ་བར་བརྟན་པར་བཞུགས། སྒྲུབ་པ་བཀའ་བརྒྱད་ཟེར་ཡང་། མ་མགོན་སོགས་ཆོས་སྐྱོང་སྤྱིའི་གཏོར་འབུལ་དང་ཕྲིན་ལས་བཅོལ། དགེ་བསྔོ་བཀྲ་ཤིས་བཅས་ཀྱིས་གྲུབ་པར་བྱས་པས་འཐུས་སྙམ། ཞེས་པ་འདིའང་ཤ་བྲག་བླ་མ་ཀརྨ་གཞན་ཕན་གྱིས་བསྐུལ་ངོར། ཀརྨ་པའི་མཚན་འཛིན་མཁའ་ཁྱབ་རྡོ་རྗེས་བྲིས་པ་དགེ་ལེགས་འཕེལ།། །། ༈ དཔེ་ཚན་འདི་སྔོན་ཆད་གཏེར་མཛོད་དཀྱུས་སུ་མེད་ཅིང་། བལ་ཡུལ་ཞེ་དགོན་གྱི་པར་གསར་འདིར་གསར་བཞག་བྱས་པས་ལུང་རྒྱུན་ལ་ཞིབ་རྟོག་དགོས་པ་ཡིན་ནོ།།