Terdzo-CHI-046
བརྒྱུད་པའི་བླ་མ་རྣམས་ལ་གསོལ་བ་འདེབས་པ་བྱིན་རླབས་སྤྲིན་ཕུང་
by མཆོག་གྱུར་གླིང་པ་ (Chogyur Lingpa)
revealed by མཆོག་གྱུར་གླིང་པ་ (Chogyur Lingpa)
in cycle ཟུར་བཟའི་ཐུགས་དམ་སྐོར་དྲུག་ (Zur bza'i thugs dam skor drug)
Volume 36 (ཆི) / Pages 849 / Folios 1a1 to 1a6
བརྒྱུད་པའི་བླ་མ་རྣམས་ལ་གསོལ་བ་འདེབས་པ་བྱིན་རླབས་སྤྲིན་ཕུང་བཞུགས་སོ། །གདོད་མའི་མགོན་པོ་ཀུན་བཟང་ཡུམ་ཆེན་མོ། །ངེས་པ་ལྔ་ལྡན་དབྱིངས་ཕྱུག་རྒྱལ་མོ་ལྔ། །སྤྲུལ་པའི་སྐུར་སྣང་རྡོ་རྗེ་ཕག་མོ་ལ། །གསོལ་བ་འདེབས་སོ་བདེ་ཆེན་ཡེ་ཤེས་སྩོལ། །གསང་བའི་བདག་པོ་མཁའ་འགྲོ་ལས་དབང་མོ། །པདྨ་འབྱུང་གནས་ཡེ་ཤེས་མཚོ་རྒྱལ་མ། །ཡེ་ཤེས་རོལ་པ་ཟུར་བཟའ་མེ་ཏོག་ལ། །གསོལ་བ་འདེབས་སོ་བདེ་ཆེན་ཡེ་ཤེས་སྩོལ། །རྩ་བའི་བླ་མ་རིག་འཛིན་ཡབ་དང་ཡུམ། །ཡེ་ཤེས་མཁའ་འགྲོ་དཀྱིལ་འཁོར་ལྷ་ཡི་ཚོགས། །དཔའ་བོ་ཌཱ་ཀི་དམ་ཅན་རྒྱ་མཚོ་ལ། །གསོལ་བ་འདེབས་སོ་བདེ་ཆེན་ཡེ་ཤེས་སྩོལ། །ཕྱི་སྒྲུབ་སྒྲོལ་མས་བསྐྱེད་རིམ་མཐའ་རུ་ཕྱིན། །ནང་སྒྲུབ་ཕག་མོས་རྩ་རླུང་ལས་སུ་རུང་། །གསང་སྒྲུབ་གསང་བ་ཡེ་ཤེས་ཕོ་ཉའི་ལམ། །ལྷན་སྐྱེས་བདེ་ཆེན་རྟོགས་པར་བྱིན་གྱིས་རློབས། །ཡང་གསང་མནྡཱ་ར་བའི་མན་ངག་གིས། །བརྟུལ་ཞུགས་ལམ་སློང་འཆི་མེད་ཚེ་དབང་འགྲུབ། །དེ་ཁོ་ན་ཉིད་ཡེ་ཤེས་མཚོ་རྒྱལ་གྱིས། །སྣང་བཞིའི་ཡེ་ཤེས་འགྲུབ་པར་བྱིན་གྱིས་རློབས། །ཞེས་པ་འདིའི་བཀའ་བབས་བདེ་ཆེན་ཆོས་སྒྲོན་དང་། དད་ལྡན་ཐོན་པའི་རྗེ་བཙུན་བློ་བཟང་ཆོས་སྒྲོན་སོགས་དོན་གཉེར་མང་པོས་བསྐུལ་ངོར། མཆོག་གྱུར་བདེ་ཆེན་གླིང་པས་མཁའ་འགྲོ་འདུ་བའི་གླིང་དཔལ་གྱི་ལྷ་སར་སྦྱར་བའི་ཡི་གེ་པ་ནི་པདྨ་རང་གྲོལ་ལོ།། །།