Terdzo-CA-004
ཐུགས་དམ་ཟབ་པ་སྐོར་བདུན་གྱི་བཀའ་སྲུང་གཟའི་སྐོང་གསོལ་ལས་བྱང་
by ཞིག་པོ་གླིང་པ་ (Zhikpo Lingpa)
revealed by ཞིག་པོ་གླིང་པ་ (Zhikpo Lingpa)
in cycle མངའ་བདག་ཡབ་སྲས་ཐུགས་དམ་རྒྱུན་གྱི་ཉམས་ལེན་ཟབ་པ་སྐོར་བདུན (Mnga' bdag yab sras thugs dam rgyun gyi nyams len zab pa skor bdun)
Volume 5 (ཅ) / Pages 65-66 / Folios 1a1 to 1b4
ཐུགས་དམ་ཟབ་པ་སྐོར་བདུན་གྱི་བཀའ་སྲུང་གཟའི་སྐོང་གསོལ་ལས་བྱང་ནི། དང་པོ་སྤྱན་འདྲེན་པ་ནི། ཧཱུྃ། གསང་བདག་རྟ་མཆོག་དཔལ་དང་རིག་འཛིན་གཙོ། །པདྨ་ཐོད་ཕྲེང་སྤྱན་སྔར་ཁས་བླངས་པའི། །དྲེགས་པའི་གཙོ་བོ་མཐུ་སྟོབས་ཀུན་གྱི་བདག །ལྷ་ཆེན་རཱ་ཧུ་ལ་ཁྱོད་གཤེགས་སུ་གསོལ། ཁྱེད་ཀྱི་འཁོར་ཚོགས་གཟའ་བརྒྱད་གདོང་མོ་བཞི། །རྒྱུ་སྐར་སྣང་སྲིད་ལྷ་འདྲེ་དྲེགས་པའི་ཚོགས། །ཕྱོགས་བཞི་མཚམས་བརྒྱད་ཕོ་བྲང་སོ་སོ་ནས། །སྐད་ཅིག་ཡུད་ཙམ་ལ་ནི་གཤེགས་སུ་གསོལ། །བཞུགས་སུ་གསོལ་བ་ནི། ཧཱུྃ། དགྲ་བགེགས་ཞིང་ཆེན་པདྨའི་གདན་ཁྲི་ལ། །མི་སྲུན་དྲེགས་པའི་གཙོ་བོ་འཁོར་བཅས་རྣམས། །སངས་རྒྱས་བསྟན་པ་གཉན་པོ་བསྲུང་བའི་ཕྱིར། །མི་གཡོ་དགྱེས་ཤིང་བརྟན་པར་བཞུགས་སུ་གསོལ། །མཆོད་པ་འབུལ་བ་ནི། ཧཱུྃ། ཕྱི་ནང་གསང་གསུམ་བདུད་རྩི་རཀྟའི་ཚོགས། །དམར་ཆེན་གཏོར་མ་དགྲ་བོའི་ཤ་ཁྲག་རུས། །ཟ་བྱེད་བསྟན་སྲུང་འཁོར་བཅས་ཞལ་དུ་ཁཱ་ཧི། །ཕྲིན་ལས་བཅོལ་བ་ནི། ཧཱུྃ། སྔོན་གྱི་དམ་བཅས་ཐུགས་དམ་ཇི་བཞིན་དུ། །སངས་རྒྱས་བསྟན་པ་གཉན་པོ་བསྲུང་བ་དང་། །རྣལ་འབྱོར་སྒྲུབ་པ་པོ་ཡི་གྲོགས་མཛད་ཕྱིར། །དམ་བཅས་བཞིན་དུ་བཅོལ་བའི་ཕྲིན་ལས་མཛོད། །བསྟོད་པ་ནི། ཧྲཱིཿ དུག་ལྔ་ལས་གྲུབ་སྲིད་པ་ཀུན་གྱི་བདག །ཟ་བྱེད་རྔམས་པ་ལུས་དམར་མིག་སྟོང་ལྡན། །ཆུ་སྲིན་རྒྱལ་མཚན་རྭ་ཡི་མདའ་གཞུ་འཛིན། །བསྟན་དགྲ་ཐལ་བར་རླག་མཛད་ཁྱེད་ལ་བསྟོད། ཁྱེད་ཀྱི་འཁོར་ཚོགས་གཟའ་བརྒྱད་གདོང་མོ་བཞི། །རྒྱུ་སྐར་སྣང་སྲིད་འཇིག་རྟེན་དྲེགས་པའི་ཚོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །བཀའ་སྡོད་བྲན་གཡོག་ཚོགས་ལ་བདག་བསྟོད་དོ། །བསྐུལ་བ་ནི། ཧཱུྃ། མཐུ་སྟོབས་དྲེགས་པའི་གཙོ་བོ་རཱ་ཧུ་ལ། སྐྱེ་འགྲོའི་སྲོག་བདག་དྲག་རྩལ་ཆེན་པོ་ཁྱེད། །འཁོར་བཅས་བསྐྱོད་དེ་དགྲ་བོའི་སྲོག་ལ་བྷྱོ། །དམ་ཉམས་དགྲ་བོ་ལས་ངན་འདི་ཉིད་ཀྱི། །ཤ་ཟོ་ཁྲག་ཐུངས་སྲོག་དབུགས་ཞལ་དུ་གསོལ། །མི་རྒྱུད་རྩད་ཆོད་ས་ཞིང་ཐལ་བར་ཐོངས། །མིང་ཙམ་མེད་པར་རྡུལ་དུ་བརླག་པར་མཛོད། །ཅེས་བསྐུལ་བར་བྱའོ། །ཞེས་པ་འདི་ནི་ཟུར་མཁར་རྡོའི་མཆོད་རྟེན་གྱི་ཤར་ཕྱོགས་ནས་དར་ཟུར་ཕུ་བ་ཀུན་དགའ་རྒྱ་མཚོ། ཕུན་ཚོགས་སྦྱིན་པ་གསུམ་གྱིས་བསྐུལ་བའི་ངོར་བདག་འདྲ་རྫོགས་ཆེན་པ་གར་གྱི་དབང་ཕྱུག་རྩལ་གྱིས་སྦྱར་བ་དགེ་ལེགས་སུ་འཕེལ་བར་གྱུར་ཅིག། །།
TSAGLI image gallery goes here