Terdzo-'I-034

Revision as of 21:17, 28 December 2017 by Jeremi (talk | contribs) (Text replacement - "= Tibetan Text = " to "<h1 style="font-size: 24px !important;">Tibetan Text</h1> ")



Property "Author" has a restricted application area and cannot be used as annotation property by a user. 








བོད་ཁམས་བདེ་ཐབས་ཆོས་བཅུ་ཡི༔ བསྟན་པ་སྲུང་བའི་སྐོར་བཞི་ལས༔ གཤིན་རྗེ་འཇིགས་བྱེད་རོལ་པ་

bod khams bde thabs chos bcu yi:_bstan pa srung ba'i skor bzhi las:_gshin rje 'jigs byed rol pa

by  མཆོག་གྱུར་གླིང་པ་ (Chogyur Lingpa)
revealed by  མཆོག་གྱུར་གླིང་པ་ (Chogyur Lingpa)
in cycle  བསྟན་པ་སྲུང་བའི་སྐོར་བཞི་ (Bstan pa srung ba'i skor bzhi)
Volume 53 (འི) / Pages 629-674 / Folios 1a1 to 23b6

[edit]

༁ྃ༔ བོད་ཁམས་བདེ་ཐབས་ཆོས་བཅུ་ཡི༔ བསྟན་པ་སྲུང་བའི་སྐོར་བཞི་ལས༔ གཤིན་རྗེ་འཇིགས་བྱེད་རོལ་པ་བཞུགས༔ ྈྈྈ འགྲོ་བ་སྤྱི་དང་བོད་འབངས་ཀྱི༔ སྐྱབས་གཅིག་ཨོ་རྒྱན་རྗེ་ལ་འདུད༔ ཡང་ཅིག་ལྷ་སྲས་བདག་ཉིད་ཀྱིས༔ གུ་རུ་རྗེ་ལ་གསོལ་བཏབ་པ༔ མ་འོངས་སུམ་ཅུ་ཁ་རལ་ལ༔ བོད་ཁམས་སྡུག་བསྔལ་ལ་སྤྱོད་ཅིང༔ བསྟན་པ་ཉམས་ཤིང་འཇིག་པ་ན༔ བར་ཆད་རྐྱེན་གྱི་སྣ་ཁྲིད་བགེགས༔ བསྟན་པའི་དགྲ་བོ་བསྒྲལ་བའི་ཕྱིར༔ ཐབས་དང་མན་ངག་ཅི་བགྱི་ཞུས༔ གུ་རུ་རྗེ་ཡིས་བཀའ་བསྩལ་པ༔ སངས་རྒྱས་བསྟན་པ་ལ་སྡང་བ༔ ཉམས་པ་བདུན་ལྡན་བསྒྲལ་བ་དང༔ བྱད་མ་རྦོད་གཏོང་ཟློག་པ་དང༔ ཕྱི་པའི་ངན་སྔགས་འཕྲུལ་འཁོར་བཤིག༔ བར་ཆད་བགེགས་རྐྱེན་ཚར་གཅད་ཅིང༔ ཆག་ཆེན་ངན་པ་བཟློག་པའི་ཕྱིར༔ དཔལ་ཆེན་འཇམ་དཔལ་གཤིན་རྗེའི་གཤེད༔ འཇིགས་བྱེད་རོལ་པ་ལ་བསྟེན་ནས༔ བྱང་ཆུབ་སྒྲུབ་ཅིང་སྲུང་ཟློག་གསད༔ སྒྲུབ་དང་ལས་སྦྱོར་འདི་ལྟར་བྱ༔ དཔའ་བོ་འཇམ་དཔལ་སྐྱབས་སུ་གཟུང༔ བྱང་ཆུབ་སྒྲུབ་པའི་བགེགས་གཞོམ་ཞིང༔ འགྲོ་ལ་ཕན་དང་བདེ་བ་བསྒྲུབ༔ བསྟན་པ་བསྲུང་བར་སེམས་བསྐྱེད་དོ༔ སྣོད་བཅུད་ཀུན་ཏུ་གཟིགས་ཀྱི་ཞིང༔ བདག་ཉིད་འཇམ་དཔལ་ཡེ་ཤེས་སེམས༔ དམར་གསལ་རལ་གྲི་པུསྟི་འཛིན༔ དར་དང་རིན་ཆེན་རྒྱན་གྱིས་སྤྲས༔ སྐྱིལ་ཀྲུང་པད་ཟླའི་གདན་ལ་བཞུགས༔ སངས་རྒྱས་བྱང་སེམས་ཀུན་གྱིས་བསྐོར༔ ཨོཾ་ཝཱ་གཱི་ཤྭ་ར་མུཾ༔ དེ་ཉིད་གནས་འགྱུར་གཤིན་རྗེའི་གཤེད༔ མཐིང་ནག་དབྱུག་ཏོ་འཁོར་ལོ་འཛིན༔ ཨོཾ་ཡ་མཱནྟ་ཀ་ཧཱུྃ་ཧཱུྃ་ཕཊ༔ སྣོད་བཅུད་གཤིན་རྗེ་རོལ་པའི་ཞིང༔ སྐུ་ལས་སྤྲུལ་པའི་ཁྲོ་ཚོགས་འཕྲོས༔ འབྱུང་པོ་གདོན་གྱི་ཚོགས་རྣམས་ལ༔ མཆོད་སྦྱིན་གཏོར་མ་འདོད་ཡོན་སྦྱིན༔ ཁྲོ་ཆུང་དབྱུག་ཏོ་ཐོགས་པ་ཡིས༔ བར་ཆད་བགེགས་རྣམས་ཐམས་ཅད་གཞོམ༔ ཕྱག་མཚན་འཁོར་ལོ་རྡུལ་ལྟར་འཚུབས༔ ཀུན་ཀྱང་གནམ་ལྕགས་ཞུན་དུ་འདྲིལ༔ སྣང་སྲིད་འཁོར་ལོ་རྩིབས་བཅུར་འབར༔ མཚོན་ཆའི་བུ་ཡུག་མེ་རླུང་འཚུབས༔ སུས་ཀྱང་གཞོམ་གཞིག་མེད་པའི་ནང༔ དུར་ཁྲོད་རོལ་པའི་ས་གཞི་ལ༔ དྲེགས་པ་བརྩེགས་པའི་ཞལ་ཡས་ཁང༔ ཡི་དྭགས་གླང་རྒོད་བསྣོལ་བའི་ཁྲིར༔ པདྨ་ཉི་མའི་གདན་སྟེང་དུ༔ དཔལ་ཆེན་འཇིགས་བྱེད་གཤིན་རྗེའི་གཤེད༔ མུན་པ་འཁྱིལ་བའི་མདོག་ལྟ་བུ༔ རྩ་ཞལ་མ་ཧེ་ཁྲོས་པ་ཡི༔ རྭ་ལ་ཡེ་ཤེས་མེ་ཆེན་འབར༔ མཐིང་སེར་དམར་ལྗང་དབུ་ལྔ་ལ༔ སྤྱན་ནི་བཅོ་ལྔ་ཉི་ལྟར་འབར༔ སྟོབས་བཅུ་རྫོགས་པའི་ཕྱག་བཅུ་ཡིས༔ གྲི་གུག་འཁོར་ལོ་རྡོ་རྗེ་དང༔ བེ་ཅོན་རལ་གྲི་གཡས་ན་འཛིན༔ ཐོད་ཁྲག་ལྕགས་ཀྱུ་གཏུན་ཤིང་དང༔ དགྲ་སཏྭ་མདུང་ཐུང་གཡོན་ན་བསྣམས༔ ཞབས་བཞི་བརྐྱང་བསྐུམ་བདུད་བཞི་བརྫིས༔ སྦྱོར་བའི་ཡུམ་མཆོག་བཻ་ཏཱ་ལི༔ དགྲ་སཏྭ་ཐོད་ཁྲག་འཛིན་པས་འཁྱུད༔ སྤུ་གྲི་འབར་བའི་གཤོག་པ་གདེངས༔ ཐོད་སྐམ་འབར་བས་དབུ་ལ་བརྒྱན༔ གླང་ཆེན་ཞིང་ལྤགས་སྟོད་དུ་གསོལ༔ སྟག་གི་པགས་པའི་ཤམ་ཐབས་མཛད༔ ཐོད་ཕྲེང་དོ་ཤལ་རུས་རྒྱན་དྲུག༔ སྦྲུལ་རིགས་ལྔ་ཡི་ཆས་གསོལ་ནས༔ ཁྲག་ཞགས་ཐལ་བས་བྱུགས་ནས་སུ༔ གར་དགུ་དཔལ་གྱི་རོལ་པས་འགྱིང༔ སྒྲོལ་ཡུམ་ཨེ་ཀ་ཛཱ་ཊི་མ༔ སྨུག་ནག་སྤུ་གྲི་མི་སྙིང་བསྣམས༔ ཕྱོགས་བཞིར་འཁོར་ལོ་རྩིབས་བཞི་ལ༔ ཡ་མ་རཱ་ཛ་མྱོས་བྱེད་འབར༔ མ་རུ་ཙེ་དང་རལ་པ་དགུ༔ མཐིང་སེར་དམར་ལྗང་ཞལ་གསུམ་ལྡན༔ ཕྱག་དྲུག་འཇིགས་པའི་མཚོན་ཆ་འཛིན༔ སྦྱོར་དང་སྒྲོལ་བའི་ཡུམ་དང་བཅས༔ འབར་བའི་གཞལ་ཡས་བར་ཁྱམས་སུ༔ ནག་འཇོམས་ཕྱ་སང་བྲག་འཇོམས་དང༔ ཨ་བ་གླང་མགོ་ཡ་བ་ཏི༔ མིག་དམར་ཏེལ་པ་རྨིགས་པ་དང༔ ཆོས་རྒྱལ་འབར་བ་ཐོད་དབྱུག་ཅན༔ འཆི་བདག་བཅུ་གཉིས་ཡུམ་དང་བཅས༔ སྒོ་བཞིར་རྒོད་དང་སྟག་གི་མགོ༔ ཀངྐ་ལྕགས་སྤྱང་གདོང་ཅན་རྣམས༔ མུ་རན་གྲི་ཐོགས་གིང་ཆེན་བཞི༔ མདུང་དར་ཐོགས་པའི་བདུད་ཆེན་བཞི༔ ཤྭ་ཐོགས་རྩིས་བཞི་ཤན་པ་བཞི༔ གཞན་ཡང་མ་གཤིན་སྤྲུལ་པའི་འཁོར༔ འཇམ་དཔལ་ཉིད་ཀྱི་རྩལ་ལས་སྣང༔ ཧཱུྃ༔ མགོན་པོ་ཀུན་གཟིགས་ཞིང་ཁམས་ནས༔ འཇམ་དཔལ་དཔའ་བོ་སྤྱན་འདྲེན་ནོ༔ གཤིན་རྗེ་རོལ་པའི་དུར་ཁྲོད་ནས༔ དཔའ་བོ་བདུད་དགྲ་བདུད་འདུལ་བ༔ འཇིགས་བྱེད་རོལ་པ་གཤིན་རྗེའི་གཤེད༔ འཁོར་དང་བཅས་པ་གཤེགས་སུ་གསོལ༔ ཨོཾ་ཡ་མཱནྟ་ཀ་ཧཱུྃ་ཧཱུྃ་ཕཊ༔ ཛཿཧཱུྃ་བཾ་ཧོ༔ ས་མ་ཡ་ཏིཥྛ་ལྷན༔ མཁའ་ལ་སྤྲིན་ལྟར་འཁྲིགས་པའི་ལྷ༔ རང་ལ་གཉིས་སུ་མེད་པར་ཐིམ༔ འཇམ་དཔལ་སྒྱུ་འཕྲུལ་དྲ་བའི་ལྷ༔ ནམ་མཁར་བྱོན་ནས་བྱང་སེམས་ཀྱིས༔ ཡེ་ཤེས་ལྔ་རུ་དབང་བསྐུར་ཞིང༔ སྐུ་གསུང་ཐུགས་དང་དབྱེར་མེད་མཛད༔ ཨོཾ་ཨཱཿཧཱུྃ༔ ཨོཾ་ཨཱཿཧཱུྃ་སྭཱ་ཧཱ༔ ཧཱུྃ༔ དུར་ཁྲོད་རོལ་པའི་མཆོད་པ་སྤྲིན་ལྟར་གཏིབས༔ དབང་པོའི་མེ་ཏོག་གསུར་ཆེན་དུད་པའི་སྤྲིན༔ བསྐལ་པའི་མེ་ཕུང་ཁྲག་ཆེན་རྦ་ཀློང་འཁྲུགས༔ རྐང་གི་དུང་ཆེན་ཐོད་རྔ་འབྲུག་ལྟར་ལྡིར༔ ཤ་ཆེན་གཏོར་མ་རི་ལྟར་སྤུངས་པ་ལ༔ རཀྟའི་རྒྱ་མཚོ་བདུད་རྩིས་བྲན་པ་རྣམས༔ གཤིན་རྗེའི་ལྷ་ཚོགས་དགྱེས་པ་ཆེན་པོས་རོལ༔ མ་ཧཱ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བིདྱཱ་ཤབྡ་བ་ལིཾ་ཏ་རཀྟ་པཱུ་ཛ་ཧོ༔ ཧཱུྃ༔ སྟོབས་བཅུ་ཡོངས་རྫོགས་འཇམ་དཔལ་བདུད་ཀྱི་དགྲ༔ འཇིགས་བྱེད་ཞལ་ལ་རྔམ་པའི་འབྲུག་སྒྲ་སྒྲོག༔ མི་གཡོ་ཐུགས་མངའ་གཏུམ་རྔམས་སྒྲོལ་བའི་ལས༔ ཐོགས་མེད་ཡོན་ཏན་ཕྲིན་ལས་རྫོགས་ལ་བསྟོད༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ ཡབ་ནི་ཀུན་ཏུ་བཟང་པོ་སྟེ༔ ཡུམ་ནི་ཀུན་ཏུ་བཟང་མོ་ཡིན༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ མཁྱེན་རབ་ཀུན་གྱི་བདག་པོ་སྟེ༔ ཐབས་མཁས་ཀུན་གྱི་རྒྱལ་པོ་ཡིན༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ སངས་རྒྱས་ཀུན་གྱི་མཐུ་སྟོབས་འདུས༔ མཐུ་རྩལ་ང་ལས་ཆེ་བ་མེད༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ དུས་གསུམ་སངས་རྒྱས་ཀུན་གྱི་རྗེ༔ ཁམས་གསུམ་ཀུན་ལ་ང་ཉིད་ཆེ༔ ང་ཡི་གཟི་བརྗིད་མཐོང་བས་ན༔ ཁྲོ་རྒྱལ་གཞན་རྣམས་དཔའ་ཞུམ་ནས༔ ལག་ཆ་འཆོར་ནས་གཞན་དུ་འབྲོས༔ དྲེགས་ཅན་ཐམས་ཅད་བརྒྱལ་གྱུར་ནས༔ དགྲ་དང་བགེགས་རྣམས་ཕྱེ་མར་བརླག༔ གསལ་བརྟན་ང་རྒྱལ་བཟུང་བྱས་ནས༔ ཨོཾ་ཧྲཱིཿཥྚིཿབཱི་ཀྲྀ་ཏཱ་ན་ན་ཧཱུྃ་ཕཊ༔ གྱད་དུ་གྱུར་ནས་དྲག་སྔགས་བཟླ༔ སྐད་ཅིག་ཏིང་འཛིན་གསལ་ཡང་རུང༔ ཨོཾ་ཡ་མ་རཱ་ཛ་ས་དོ་མེ་ཡ་ཡ་མེ་དོ་རུ་ཎ་ཡོ་ད་ཡ་ཡ་ད་ཡོ་ནི་ར་ཡ་ཀྵེ་ཡ་ཡཀྵེ་ཡཙྪ་ནི་ར་མ་ཡ་ཧཱུྃ་ཕཊ༔ དྲག་སྔགས་འདི་ཉིད་བཟླས་ཙམ་གྱིས༔ ཆག་ཆེན་ངན་པ་ཀུན་ཟློག་ཅིང༔ ཉི་མ་བཞི་ལ་བཟླས་པ་ཡིས༔ བྱང་ཆུབ་སྒྲུབ་པའི་བགེགས་རྣམས་བསྒྲལ༔ ལོག་པར་འདྲེན་པའི་དགྲ་རྣམས་འཆི༔ ཉམས་པ་བདུན་ལྡན་བསྒྲལ་པ་ཡིས༔ བསོད་ནམས་ཚོགས་ཆེན་རྫོགས་ནས་ཀྱང༔ སྐུ་ནི་གསལ་བར་བསྒོམ་པ་ཡིས༔ འཇམ་དཔལ་སྐུ་དང་གཉིས་སུ་མེད༔ གསལ་བརྟན་གྱད་དུ་གྱུར་པ་ཡིས༔ སྣང་བ་ལྷ་རུ་དག་ནས་ཀྱང༔ འཇམ་དཔལ་སྐུ་ཡི་གྲུབ་མཐའ་སྟེ༔ བྱང་ཆུབ་སྒྲུབ་པའི་རིམ་པ་འོ༔ ས་མ་ཡ༔ དང་པོ་སྲུང་བའི་རིམ་པ་ནི༔ རྒྱས་པར་སྟོབས་ཆེན་མཆོད་རྟེན་བཞེངས༔ བསྡུ་ན་པུ་རི་བཅའ་བ་འམ༔ དར་རམ་ཤོག་བུ་གཙང་མ་ལ༔ འཁོར་ལོ་རྩིབས་བཞི་བཅུ་དྲུག་དང༔ མུ་ཁྱུད་གསུམ་ལྡན་བྲིས་པའི་ནང༔ དབུས་སུ་གང་བསྲུང་མིང་སྤེལ་བ༔་་་བསྒྲུབ་བྱ་ཡུལ་འཁོར་གཙུག་ལག་ཁང་ལྟ་བུའི་གཟུགས་དང་མིང་སྤེལ་བ་གང་འབྱོར༔ དེ་ལ་རྩ་བའི་སྔགས་ཀྱིས་བསྐོར༔ འཁོར་ལོ་རྣམས་ལ་གྲོང་ཁྱེར་བཀོད༔་་་འབྲུ་གཉིས་རེ༔ མུ་ཁྱུད་དབྱངས་གསལ་རྟེན་འབྲེལ་སྙིང༔ བཀོད་ལ་རྡོ་རྭ་མེ་རིས་བསྐོར༔ གང་བསྲུང་རཀྵ་ལ་སོགས་སྤེལ༔ ལྷ་དང་དབྱེར་མེད་རབ་གནས་བྱ༔ སྒྲུབ་ཚེ་བདག་དང་དབྱེར་མེད་དུ༔ བདག་ཉིད་འཇམ་དཔལ་ཧེ་རུ་ཀ༔ སྤྱི་བོར་འཁོར་ལོ་དཀར་པོར་ཨོཾ༔ མགྲིན་པར་པདྨ་དམར་པོར་ཨཱ༔ ཐུགས་ཀར་མཆོད་རྟེན་ནང་དུ་ཧཱུྃ༔ བར་ཁྱམས་འཁོར་ཡུག་ཐམས་ཅད་དུ༔ དམིགས་པའི་ཡུལ་དུ་གྱུར་པ་་་བླ་མ་དང་མཆེད་གྲོགས་དམ་ཚིག་གཙང་མ་ཐུགས་ཀའི་ཧཱུྃ་ནང་ལ༔ཚུད༔ ཀུན་ཀྱང་ལྷ་དང་གཞལ་ཡས་ཁང༔ ཕྱི་རོལ་འཁོར་ལོ་རྩིབས་བཅུ་པ༔ མར་རྩེ་ཕུར་པའི་དབལ་ལྟ་བུ༔ དགྲ་བགེགས་བདུད་བཞིའི་སྙིང་ལ་གཟིར༔ རྡོ་རྗེ་འཁོར་ལོ་རིན་པོ་ཆེ༔ པདྨ་རྒྱ་གྲམ་རལ་གྲི་དང༔ ས་ཆུ་མེ་རླུང་ནམ་མཁའི་གུར༔ སྤྲུལ་པའི་ཁྲོ་ཚོགས་མང་པོ་ཡིས༔ སྲུང་བའི་ལས་རྣམས་མཛད་པར་གྱུར༔་་་ཞལ་ནང་དུ་གཟིགས་པ༔ ལྷ་ཚོགས་རྣམས་ཀྱིས་སྲུང་བའི་སྔགས༔ འབྲུག་སྟོང་ལྡིར་བ་ལྟ་བུར་བསྒྲགས༔ གྲོང་ཁྱེར་རྣམས་ལ་སྲུང་སྔགས་སྤེལ༔ བཙན་པོའི་མཁར་རྫོང་ཚུད་པས་ན༔ དྲང་སྲོང་རྣམས་ཀྱི་ངན་སྔགས་ཀྱིས༔ བཤིག་པར་ནུས་པ་མ་ཡིན་ནོ༔ བྱད་མ་འབུམ་གྱིས་གླགས་མི་རྙེད༔ འདི་ནི་སྲུང་བ་ཀུན་གྱི་མཆོག༔ ས་མ་ཡ༔ གཉིས་པ་ཟློག་པའི་རིམ་པ་ནི༔ འཁོར་ལོ་དབུས་སུ་བྷྱོ་ཟློག་ལ༔ གྲོང་ཁྱེར་བཀོད་པ་སྲུང་བ་ལྟར༔ མུ་ཁྱུད་དམོད་པ་གང་ཤེས་བྲི༔ མཚོན་ཆ་ཕྱིར་བསྟན་མེ་ཕུང་བྲི༔ ཡིག་འབྲུ་ལྷ་ཡི་ངོ་བོར་བསྒོམ༔ འོད་ཟེར་ཚ་ཞིང་རྩུབ་པ་ཡིས༔ ཟློག་པའི་ལས་རྣམས་མཛད་པར་བསམ༔ སྔགས་རྣམས་བཟླ་ཞིང་རབ་གནས་བྱ༔ འབྲུ་ནག་དུག་ཁྲག་སྦྱར་བ་ཡི༔ གཏོར་མ་ཟུར་གསུམ་ཞལ་ལྡན་པའི༔ ནང་དུ་བཅུག་གམ་རྩེ་རུ་བརྒྱང༔ དྲག་རྒྱན་རྔམ་བརྗིད་ལྡན་པར་བྱ༔ ཐ་མར་ཟོར་རྫས་རྣམས་ཀྱིས་བསྐོར༔ སྔགས་པ་དྲག་པོའི་ཆས་སུ་ཞུགས༔ ལྷོ་ཡི་ཕྱོགས་སུ་ཁ་བལྟས་ཏེ༔ འཇམ་དཔལ་ཁྲོས་པའི་ཏིང་འཛིན་བསྒོམ༔ གཏོར་མ་རཾ་ཡཾ་ཁཾ་གིས་སྦྱང༔ གཏོར་སྣོད་གཤིན་རྗེ་རོལ་པའི་ཞིང༔ གཏོར་རྒྱུ་ཤ་དང་རུས་པའི་རི༔ ཁྲག་གི་རྒྱ་མཚོ་ཆེན་པོར་འཁྱིལ༔ གཏོར་མ་གཤིན་རྗེའི་དམག་གི་དཔུང༔ དབུས་སུ་འཇིགས་བྱེད་གཤིན་རྗེ་གཤེད༔ ཕྱོགས་བཞིར་གཤེད་ཆེན་ཡབ་ཡུམ་རྣམས༔ འཆི་བདག་ཕྱོགས་སྐྱོང་བཅུ་གཉིས་དང༔ དྲེགས་པ་ཆེན་པོ་སྒོ་བ་བཞི༔ གྲི་ཐོགས་གིང་ཆེན་སྡེ་བཞི་དང༔ དར་ནག་གཡབ་རྡེབ་བདུད་པོ་བཞི༔ ཤྭ་ཐོགས་རྩིས་བཞི་ཤན་པ་བཞི༔ གཞན་ཡང་མ་གཤིན་སྤྲུལ་པའི་ཚོགས༔ ཀུན་ཀྱང་མཐིང་ནག་འབར་བ་ལ༔ མ་ཧེ་ཁྲོས་པའི་གདོང་པ་ཅན༔ ངུར་མོའི་འབྲུག་སྒྲ་འཇིགས་སུ་རུང༔ འཁོར་ལོ་བསྐོར་ཞིང་ལྕགས་ཀྱུ་འདེབས༔ རལ་གྲིས་གཏུབས་ཤིང་དགྲ་སཏྭས་གཤག༔ ཐོ་བས་བརྡུང་ཞིང་ཁྲམ་ལ་འདེབས༔ དུག་རླངས་ནག་པོ་འཐོར་བ་ཡིས༔ ཀུན་ཀྱང་ཟློག་པའི་ལས་རྣམས་མཛད༔ མ་བྷྱོ༔ གཤིན་རྗེ་རོལ་པའི་དུར་ཁྲོད་ནས༔ དཔལ་ཆེན་འཇམ་དཔལ་དབྱིངས་ནས་བཞེངས༔ གཤིན་རྗེའི་དམག་ཚོགས་འདིར་གཤེགས་ལ༔ དྲག་པོ་ཨེ་ཡི་གདན་ལ་བཞུགས༔ ཤ་ཁྲག་རུས་པའི་མཆོད་པ་བཞེས༔ གཉིས་མེད་གུས་པས་ཕྱག་འཚལ་བསྟོད༔ སྡང་བའི་དགྲ་དང་གནོད་པའི་བགེགས༔ ཟ་བའི་འདྲེ་དང་ཕུང་བའི་སྲི༔ བྱད་མ་རྦོད་གཏོང་ཟློག་ཏུ་གསོལ༔ ཞེས་བསྐུལ་ཟློག་སྔགས་དྲག་ཏུ་བཟླ༔ ཕྱག་མཚན་འཁོར་ལོ་འབར་བ་ལས༔ བུ་ཡུག་འཚུབས་པ་ལྟར་འཕྲོས་ནས༔ བྱད་མ་རྦོད་གཏོང་དགྲ་བགེགས་ཀྱི༔ ལུས་གཏུབས་ཡེ་ཤེས་མེ་ཡིས་བསྲེགས༔ ཕྱག་མཚན་ནམ་མཁའི་མཐར་ཁྱབ་པས༔ བར་ཆད་མིང་ཡང་མེད་པར་བསམ༔ བར་ཆད་ཆག་ཆེན་བྱད་རྦོད་སོགས༔ ལས་འདི་བརྩམས་པས་ཟློག་པ་དང༔ བསྟན་པ་བཤིག་པའི་འཕྲུལ་འཁོར་ནི༔ གང་གིས་རྩོམ་པ་ས་མཁར་ལ༔ སྒྱོགས་ཀྱིས་ཕོག་པ་ལྟ་བུར་འཇིག༔ ས་མ་ཡ༔ གསུམ་པ་གསད་པའི་ལས་སྦྱོར་ནི༔ འཁོར་ལོའི་དབུས་སུ་དགྲ་བགེགས་ཀྱི༔ མིང་རུས་གཟུགས་བྱང་ཟག་རྫས་བྱུགས༔ གྲོང་ཁྱེར་གསད་པའི་དམོད་པ་སྦྱར༔ ཆེ་གེ་མོ་མཱ་ར་ཡ་རྦད༔ ཤ་ཁྲག་ཟན་ལ་ཉ་བོའི་གཟུགས༔ དེ་ཡི་སྙིང་གར་འཁོར་ལོ་བཅུག༔ དཀར་བྱང་དམར་བྱང་གཉིས་ཀ་ལ༔ ལྷ་དབྱེ་འགུགས་པ་ཡང་ཡང་བྱ༔ ཆེ་གེ་མོའི་ལྷ་སྲུང་པྲ་བེ་ཤ་ཡ་ཕཊ༔ ཆེ་གེ་མོ་ཛཿཧཱུྃ་བཾ་ཧོ༔ ཨངྐུ་ཤ་ཛ༔ ཧཱུྃ༔ དུག་རླངས་ཁོལ་འདྲ་གཤིན་རྗེའི་དམག་ཚོགས་རྣམས༔ བསྟན་ལ་སྡང་ཞིང་འགྲོ་ལ་འཚེ་བྱེད་པའི༔ ལོག་པར་འདྲེན་པ་བསྒྲལ་བར་དམ་བཅས་པའི༔ ཐུགས་དམ་དུས་ལ་མ་གཡེལ་ས་མ་ཡ༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ གཤིན་རྗེའི་རྒྱལ་པོ་ཐམས་ཅད་དང༔ ལས་ཀྱི་གཤིན་རྗེ་ཐམས་ཅད་གསོན༔ ལས་ངན་སྡིག་ཅན་དགྲ་བོ་འདིས༔ ཕར་ལ་མ་རྒོལ་ཚུར་ལ་གནོད༔ བསྟན་ལ་སྡང་སེམས་ངན་པ་སྐྱེས༔ ང་ཡི་ཡིད་ལ་བརྣག་པ་འདི༔ མངོན་ཤེས་ལྡན་ཀུན་ལྟོས་དང་ཤེས༔ འཇམ་དཔལ་བདེན་པའི་བཀའ་མ་གཅག༔ འཇམ་དཔལ་གཤིན་རྗེའི་རྣལ་འབྱོར་ལ༔ གནོད་པའི་བདུད་དང་བདུད་ཀྱི་ཕྱོགས༔ ཁྱོད་ཀྱིས་བསྒྲལ་བར་དམ་བཅས་པའི༔ སྔར་སྨྲས་རྗེས་སུ་བཤོལ་མེད་པས༔ གསོད་པའི་འཕྲུལ་འཁོར་ཁྱོད་ཀྱིས་ཆོས༔ ཤན་པའི་དམག་དཔུང་མྱུར་བར་འདུས༔ མཚོན་ཆའི་སོ་བརྡར་དུས་ལ་བབ༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ གཤིན་རྗེའི་རྒྱལ་པོ་བཀའ་ལ་ཉོན༔ གཤིན་རྗེའི་རྒྱལ་པོ་ཐམས་ཅད་ཀྱིས༔ འཁོར་ལ་བཀའ་ནན་མ་ཆུང་ཞིག༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ ལས་མཁན་ཐམས་ཅད་བཀའ་ལ་ཉོན༔ ནག་པོ་འཇོམས་བྱེད་ལ་སོགས་པ༔ ལས་ཀྱི་གཤིན་རྗེ་ཐམས་ཅད་ཀྱིས༔ དགྲ་ལ་ཇག་པར་ཆས་རེ་རན༔ ཡ་མ་རཱ་ཛའི་བཀའ་ཉན་པ༔ ཀོང་རྩེ་བྲག་འཇོམས་ལ་སོགས་པའི༔ ལས་ཀྱི་གཤིན་རྗེ་ཐམས་ཅད་དང༔ དུང་གི་བྱ་རྒོད་མགོ་ཅན་སོགས༔ ལྕགས་ཀྱུ་ཐོགས་པའི་ཕོ་ཉ་རྣམས༔ ལས་ངན་དགྲ་བགེགས་འདིར་ཁུག་ཅིག༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ ཁྱོད་ཀྱི་བཀའ་ཉན་མི་བསྲུན་པ༔ གཤིན་རྗེ་ཨ་བ་གླང་མགོ་སོགས༔ ལྷོ་ཕྱོགས་གསེར་གྱི་སྟག་མགོ་ཅན༔ ཞགས་པ་དབྱུག་ཏོ་ཐོགས་པ་རྣམས༔ སྐེ་ནས་ཁྲིད་ཅིང་དབྱུག་པས་རྡུངས༔ དམིགས་པའི་འབེན་ལ་ཨཱ་བེ་ཤ༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ བཀའ་ཡི་བློན་ཆེན་མ་རུ་ཙེ༔ ཁྱོད་ཀྱི་མངག་གཞུག་ཆེན་པོ་ནི༔ མིག་དམར་ཏེལ་པ་རྨིགས་པ་སོགས༔ བསེ་ཡི་དུར་བྱ་ཀངྐའི་མགོ༔ ལྕགས་སྒྲོག་ཐོགས་པ་ཁྱེད་རྣམས་ཀྱིས༔ དམིགས་པའི་འབེན་ལ་དབྱེར་མེད་སྡོམས༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ སྲས་མཆོག་རལ་པ་ཚར་དགུ་ཆོས༔ དམག་དཔོན་ཆོས་རྒྱལ་དཎྜི་སོགས༔ ལྕགས་ཀྱི་སྤྱང་ཀིའི་གདོང་པ་ཅན༔ དྲིལ་བུ་འཁོར་ལོ་ཐོགས་པ་རྣམས༔ དགྲ་བགེགས་མྱོས་ཤིང་གློ་སྙིང་གདུངས༔ ཞེས་བསྐུལ་ཞེ་སྡང་ཆེར་འཁྲུགས་ནས༔ ལས་གཤིན་དམག་ཚོགས་ཕྱོགས་བཅུར་བྱེར༔ དགྲ་བགེགས་བཀུག་ནས་རྟེན་ལ་བསྟིམ༔ དམིགས་པ་གང་ཡིན་མངོན་སུམ་གྱུར༔ ལས་ཀྱི་གཤིན་རྗེ་ཐམས་ཅད་ཀྱིས༔ ལྕགས་ཀྱུས་སྙིང་གི་ནྲྀ་ཏྲི་ཕུག༔ འཁོར་ལོས་ཀླད་ཁྲག་ཞོ་ལྟར་དཀྲུགས༔ དེ་ནས་གློ་སྙིང་གཏུབས་པར་བསམ༔ ཉི་མ་བཞི་པའི་དྲག་སྔགས་མཐར༔ འཁོར་ལོར་བཀོད་པའི་གསང་སྔགས་བཟླ༔ རྟགས་རྫོགས་ལིངྒ་མཚོན་ཆས་གཏུབས༔ བར་པ་གཏོར་མའི་ནང་དུ་བསྟབ༔ སྨན་ཆ་ཁྲག་དང་ཞུན་ཆེན་སྦྱར༔ དུག་ཤིང་ཧོམ་གྱི་མེ་སྦར་ལ༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ འཇིགས་བྱེད་བསྐལ་པའི་མེ་ཆེན་འབར༔ ཞལ་ནི་གནམ་ས་ཙམ་དུ་གདངས༔ ཟ་སྐལ་བརྣག་པ་འདི་ཟོ་ལ༔ མིང་གི་ལྷག་མ་མེད་པར་གྱིས༔ ཆེ་གེ་མོ་ཛྭ་ལ་རཾ༔ ཐལ་བ་ལིངྒའི་སྟོད་ཆ་བཅས༔ ཀླུ་བདུད་བཙན་ལ་གཏད་པར་བྱ༔ གཤིན་རྗེའི་དམག་ཚོགས་དགྲ་ལ་ཆས༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ ལས་ཀྱི་གཤིན་རྗེ་ཁྱེད་རྣམས་ནི༔ ཕར་བཏང་ཚུར་ལ་མ་ལྡོག་ཅིག༔ དགྲ་བགེགས་རྣམས་ལ་ཐོག་ཟོར་རྒྱོབ༔ རྟེན་གྱི་ཡུལ་མཁར་མེད་པར་གྱིས༔ བྷྱོ་བྷྱོ་དགྲ་བགེགས་སྟེང་དུ་བྷྱོ༔ ཟློག་ཟློག་ཆག་ཆེན་ཉམ་ང་ཟློག༔ དགྲ་བགེགས་བྱད་མ་ཆག་ཆེན་ངན་པ་ཤ་རི་བྷྱོ་ཟློག༔ དྲག་ཏུ་བཟླས་ཤིང་རཀྟ་འཐོར༔ དར་ནག་ཕྱར་ཞིང་དྲག་རོལ་བཅས༔ གཏོར་མ་དགྲ་བོའི་ཕྱོགས་སུ་འཕང༔ ནད་མཚོན་ཐོག་གི་ཆར་ཕབ་སྟེ༔ གནོད་བྱེད་རྨེག་མེད་བརླགས་པར་བསམ༔ ཧཱུྃ༔ ང་ནི་འཇམ་དཔལ་གཤིན་རྗེའི་གཤེད༔ ལས་ཀྱི་གཤིན་རྗེ་ཆུ་སྲིན་གདོང༔ ཡ་མཚན་ཆེན་པོ་རྨད་དུ་བྱུང༔ ཟ་སྐལ་དགྲ་འདི་ཁྱོད་ལ་གཏད༔ ལས་སྐལ་བགེགས་འདི་ཁྱོད་ཀྱིས་ཟོ༔ མནར་མེད་དམྱལ་བར་ཁྱོད་གནས་པས༔ ནམ་ཡང་སྟེང་དུ་མ་གཏང་ཞིག༔ ཆེ་གེ་མོ་སཏྭཾ་བྷ་ཡ་ནན༔ སྟོབས་ཆེན་དཔུང་མང་སུ་ཡིན་ཀྱང༔ ཟླ་གཅིག་ལས་ནི་མི་འགོར་འཆི༔ བདུན་རྒྱུད་རིགས་ཀྱང་བརླག་པར་འགྱུར༔ ས་མ་ཡ༔ དེ་ནས་རྫོགས་པའི་རིམ་པ་ཡང༔ ལྷར་སྣང་ཐམས་ཅད་རིམ་པར་འདུས༔ མཁའ་ལ་སྤྲིན་ཆེན་ཐིམ་པ་ལྟར༔ སྤྲོས་པ་མེད་པའི་ངང་ལ་གནས༔ སླར་ཡང་བདག་ཉིད་དཔལ་གྱི་སྐུ༔ རྡོ་རྗེའི་མཁར་དུ་ཚུད་པར་བསམ༔ དེ་ལྟར་སྐུ་ཡི་སྒྲུབ་པ་མཐར་ཕྱིན་ནས༔ འགྲོ་ཕན་གང་བགྱིས་བྱང་ཆུབ་ཆེན་པོར་བསྔོ༔ མྱུར་དུ་འཇམ་དཔལ་དཔའ་བོའི་ས་ཐོབ་ནས༔ མཁའ་ཁྱབ་འགྲོ་བའི་དཔལ་དུ་འབྱུང་བར་ཤོག༔ བརྒྱུད་གསུམ་བླ་མའི་བྱིན་རླབས་སྤྲིན་ལྟར་གཏིབས༔ ཡི་དམ་ལྷ་ཡིས་དངོས་གྲུབ་ཆར་ལྟར་འབེབས༔ རླུང་ལྟར་མྱུར་བའི་དམ་ཅན་ཕྲིན་ལས་མཛད༔ བྱིན་ཆེན་དངོས་གྲུབ་མཐུ་མྱུར་བཀྲ་ཤིས་བསམ༔ དེ་ལྟར་རིམ་པར་ངེས་རྫོགས་སྒོམ་པའམ༔ ཡང་ན་གསལ་སྣང་རྫོགས་པས་ཐུན་གཅིག་གིས༔ ཉམས་སུ་བླང་ན་བྱང་ཆུབ་འབྲས་བུ་ཐོབ༔ བར་ཆད་བགེགས་བྲལ་ཆག་ཆེན་ངན་པ་བཟློག༔ ལོག་ལྟ་ཚར་གཅོད་ཕྱི་པའི་དམག་དཔུང་འཇོམས༔ ངན་གཡོའི་འཕྲུལ་འཁོར་ཐམས་ཅད་ངང་གིས་འཇིག༔ བཀྲ་ཤིས་མཐུ་མྱུར་དྲག་སྔགས་རྒྱལ་པོ་འདི༔ ད་ལྟ་ཉམས་ལོངས་མ་འོངས་དོན་དུ་སྦོས༔ མ་འོངས་ལས་འཕྲོ་ཅན་དང་འཕྲད་ནས་ཀྱང༔ འགྲོ་བའི་རྐྱེན་ཟློག་བསྟན་པའི་ལྕགས་རི་ཡིན༔ དྲག་སྔགས་ཀུན་གྱི་བཅུད་བསྡུས་འདི་ལྟ་བུ༔ དྲག་ཤུལ་མཐུ་ལྡན་བསྐྱེད་རིམ་མཐར་ཕྱིན་པའི༔ བོད་ཡུལ་བསྟན་པའི་ལྕགས་རི་འབྱུང་བ་ཡི༔ སྔགས་པས་ཉམས་ལོངས་བྱང་ཆུབ་སེམས་བསྐྱེད་ནས༔ བསྟན་དང་འགྲོ་བའི་འགལ་རྐྱེན་བཟློག་པར་གྱིས༔ ས་མ་ཡ༔ རྒྱ་རྒྱ༔ ༁ྃ༔ བོད་ཁམས་བདེ་ཐབས་ཆོས་བཅུ་ཡི༔ བསྟན་པ་སྲུང་བའི་སྐོར་བཞི་ལས༔ རྟ་མགྲིན་བསྐལ་པའི་མེ་དཔུང་བཞུགས༔ ྈྈྈྈ གསང་སྔགས་སྟོན་པ་རྡོ་རྗེ་འཛིན༔ པདྨ་ཐོད་ཕྲེང་རྩལ་ལ་འདུད༔ གུ་རུ་རྗེ་ལ་ཡང་གསོལ་བ༔ ཁྱད་པར་བླ་མེད་གསང་བ་སྔགས༔ དེ་ལ་བར་ཆད་འབྱུང་པོའི་ཚོགས༔ འདུལ་ཐབས་བདག་ལ་བསྩལ་དུ་གསོལ༔ ཞུས་པས་གུ་རུས་འདི་སྐད་གསུངས༔ གསང་སྔགས་རྡོ་རྗེ་ཐེག་པ་ཡི༔ བསྟན་པ་ཚུལ་བཞིན་སྐྱོང་བ་ལ༔ བར་ཆད་འབྱུང་པོ་བྱུང་གྱུར་ན༔ རྟ་མགྲིན་དབང་ཆེན་རོལ་པ་ཡི༔ གསུང་གི་དངོས་གྲུབ་ཐོབ་པ་ཡི༔ ལས་སྦྱོར་བསྐལ་པའི་མེ་ལྟ་བུས༔ གཞོམ་པར་བྱེད་པའི་མན་ངག་བསྒྲུབ༔ བླ་མའི་སྤྱི་དཔལ་དཀྱིལ་འཁོར་གཙོ༔ མཁའ་འགྲོ་ཀུན་གྱི་དབང་ཕྱུག་ཆེ༔ དཔལ་ཆེན་རྟ་མགྲིན་ལྷ་ཚོགས་ལ༔ བྱང་ཆུབ་བར་དུ་སྐྱབས་སུ་གཟུང༔ མ་རུངས་པ་རྣམས་ཚར་གཅད་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ དཔལ་ཆེན་རྟ་མགྲིན་སྐུར་བསྒོམས་ནས༔ སྤྲུལ་པས་བགེགས་རྣམས་ཐལ་བར་བྱ༔ སྣང་སྲིད་མ་ལུས་གསེར་གྱི་རི༔ འབར་བའི་རྩེ་བརྒྱད་ཁྲོ་བོ་བརྒྱད༔ ཕྲ་མེན་དགུ་ཁྲི་དགུ་འབུམ་འཕྲོ༔ བསྐལ་པའི་མེ་དཔུང་མཆེད་ཅིང་འབར༔ ལྷ་དང་རིག་འཛིན་སྲུང་མའི་ཚོགས༔ མཁའ་ལ་སྤྲིན་ལྟར་གཏིབས་ནས་ཀྱང༔ གནས་དང་ལུས་ངག་ཡིད་ལ་བསྟིམ༔ སྣོད་རྣམས་དབང་ཆེན་རོལ་པའི་ཞིང༔ བཅུད་རྣམས་དབང་ཆེན་ཡབ་དང་ཡུམ༔ ཡོ་བྱད་ཕྱི་ནང་གསང་བ་ཡི༔ མཆོད་སྤྲིན་དཔག་མེད་མཁའ་ལ་དཀྲིགས༔ དེ་དབུས་དབང་ཆེན་རོལ་པ་ཡི༔ ཕོ་བྲང་ཆེན་པོ་འོད་དུ་འབར༔ དབུས་སུ་པདྨ་ཉི་ཟླ་ལ༔ ཧྲཱིཿལས་གར་དབང་སྤྱན་རས་གཟིགས༔ དམར་པོ་པད་ཕྲེང་བུམ་པ་འཛིན༔ གཉིས་མེད་གསང་བའི་ཡུམ་དང་འཁྲིལ༔ བྱང་ཆུབ་སེམས་ཀྱིས་རྒྱལ་བ་མཆོད༔ འགྲོ་བའི་སྒྲིབ་སྦྱངས་བདེ་ལ་བཀོད༔ ཨོཾ་མ་ཎི་པདྨེ་ཧཱུྃ་ཧྲཱི༔ གར་དབང་སྙིང་རྗེའི་ཆོ་འཕྲུལ་ལས༔ དུར་ཁྲོད་རོལ་པའི་གཞལ་ཡས་ཁང༔ བདག་ཉིད་དབང་ཆེན་རྟ་སྐད་འཚེར༔ དམར་ནག་གཡས་དཀར་གཡོན་སྔོ་ཞལ༔ རྟ་མགོ་གསུམ་ལྡན་ཕྱག་དྲུག་པ༔ རྡོ་རྗེ་ཁ་ཊྭཱཾ་རལ་གྲི་གཡས༔ དྲིལ་བུ་དུང་དམར་སྦྲུལ་ཞགས་གཡོན༔ གཤོག་བརྒྱངས་དུར་ཁྲོད་ཆས་ཀྱིས་བརྒྱན༔ ཞབས་བཞི་ཀླུ་རྒྱལ་ཕོ་མོ་མནན༔ ཡུམ་ཆེན་པདྨ་གཟི་ལྡན་མ༔ ཁ་ཊྭཱཾ་ཐོད་ཁྲག་འཛིན་པས་འཁྱུད༔ བྱི་ལ་པུ་ཤུད་ཕྲ་མེན་འགྱེད༔ སྐུ་ལས་ཡེ་ཤེས་མེ་ཆེན་འབར༔ ཕྱོགས་བཞིར་འཁོར་ལོ་རྩིབས་བཞི་ལ༔ སྲས་མཆོག་དབང་ཆེན་སྡེ་བཞི་ནི༔ དཀར་སེར་དམར་ལྗང་ཞལ་གསུམ་ལྡན༔ ཕྱག་དྲུག་འཇིགས་པའི་མཚོན་ཆ་འཛིན༔ དབང་གི་གསང་བའི་ཡུམ་བཞི་འཁྲིལ༔ ཁྱམས་ལ་ཟིལ་གནོན་ཁྲོ་བོ་བརྒྱད༔ ཡུམ་བཅས་སྒོ་བཞི་དབང་མོ་དང༔ མུ་རན་སྲུང་བའི་བཀའ་སྲུང་ཚོགས༔ གཅིག་ལས་དུ་མར་སྣང་བའི་སྐུ༔ རྒྱལ་བའི་སྐུ་གསུང་ཐུགས་ཀྱི་དངོས༔ ཡེ་ཤེས་ལྔ་ལ་དབང་བསྒྱུར་བས༔ རྒྱལ་བའི་དཀྱིལ་འཁོར་ལྷུན་གྱིས་གྲུབ༔ དབྱིངས་ལས་སྐུར་བཞེངས་མཐའ་ཡས་པའི༔ ཡེ་ཤེས་ཁྲོ་རྒྱལ་སྐུ་གསུང་ཐུགས༔ སྤྲུལ་པ་སྲས་བཅས་སྤྱན་དྲངས་ནས༔ འགུགས་བསྟིམ་དབྱེར་མེད་དགྱེས་པ་སྐྱེད༔ སྤྲུལ་པའི་ཁྲོ་མོའི་ཚོགས་རྣམས་ཀྱིས༔ ཕྱག་འཚལ་ཕྱི་ནང་གསང་མཆོད་ཕུལ༔ ཨེ་མ་ཧོཿཆེ་བའི་སྐུ༔ ཉིད་ཀྱི་གར་ནི་རྣམ་པར་འགྱུར༔ རྒྱལ་བའི་གསུང་དབྱངས་ཀུན་ལ་ཁྱབ༔ གཡོ་བ་མེད་པའི་ཐུགས་མཆོག་མངའ་ཧོ༔ ཐུགས་ཀར་ཡེ་ཤེས་སེམས་དཔའ་ཡི༔ སྲོག་གོར་ཉི་མ་ལ་གནས་པའི༔ རྡོ་རྗེ་ཧྲཱིཿཡིས་མཚན་པ་ལ༔ སྔགས་ཀྱིས་བསྐོར་བའི་འོད་ཟེར་གྱིས༔ སྣོད་བཅུད་དཀྱིལ་འཁོར་རྣམས་ལ་ཕོག༔ འབྲུག་སྟོང་ལྡིར་བའི་ངུར་སྒྲ་ཡིས༔ འཁོར་འདས་འཇིག་རྟེན་ཞིང་ཀུན་གཡོས༔ རྒྱལ་ཀུན་དངོས་གྲུབ་ཆར་ལྟར་ཕབ༔ མ་མོ་མཁའ་འགྲོ་སྤྲིན་ལྟར་འཐིབས༔ དྲེགས་པ་ལས་ལ་རླུང་ལྟར་འཚུབས༔ དཔལ་གྱི་གཟི་བརྗིད་ཆེན་པོས་མནན༔ དངོས་གྲུབ་ཕྲིན་ལས་འགྲུབ་པར་བསམ༔ ཧྲཱིཿཔདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ༔ ཡང་གསང་ཁྲོས་པའི་སྔགས་བཟླས་པས༔ གྲགས་པ་ཐམས་ཅད་སྔགས་སུ་ཐོས༔ ཕྱོགས་བཅུར་རྒྱལ་བའི་ཆོས་ཉན་ནས༔ འཕགས་པའི་ས་ལ་མངོན་བྱེད་པ༔ དབང་ཆེན་གསུང་གི་གྲུབ་མཐའ་འོ༔ ས་མ་ཡ༔ དྲག་སྔགས་སྒོ་ནས་བསྲུང་བ་ནི༔ རྩིབས་བཞི་རྩིབས་བརྒྱད་ལ་སོགས་པའི༔ ལྷ་གནས་འཁོར་ལོར་སྔགས་བཀོད་པ༔ རྒྱས་པར་བྲི་འམ་ཡང་ན་ནི༔ ལྷ་གནས་ས་བོན་བཀོད་པའི་མཐར༔ དྲག་སྔགས་ཤམ་བུར་སྲུང་སྔགས་སྤེལ༔ ཆོས་སྨན་བྱུགས་ལ་ལྷར་བསྒོམ་མམ༔ ལྷ་ཡི་ངོ་བོ་ཡིག་འབྲུ་ལས༔ འོད་འཕྲོས་བསྒྲུབ་བྱ་སྲུང་བར་བསམ༔ ཐུགས་ཀའི་སྔགས་ཕྲེང་ལས་འཕྲོས་པའི༔ གྲངས་མེད་ལུ་གུ་རྒྱུད་དུ་སྦྲེལ༔ སྔགས་སྒྲ་འབྲུག་སྟོང་སྒྲོག་པ་ཡིས༔ སྟེང་འོག་ཕྱོགས་མཚམས་གང་བར་ཁྱབ༔ ཡི་གེ་འཁོར་ལོའི་ནང་དུ་ཚུད༔ བར་ཆད་གང་གིས་མི་ཚུགས་བསམ༔ དྲག་སྔགས་ཐ་མར་སྔགས་འདི་སྤེལ༔ ཆེ་གེ་མོ་རཀྵ་རཀྵ་ཧྲཱིཿཧཱུྃ་བྷྲཱུྃ༔ བར་ཆད་བདུད་ཀྱི་ཕྱོགས་ལས་རྒྱལ༔ དུར་ཁྲོད་ས་ལ་ཨེ་གྲུ་གསུམ༔ འཁོར་ལོ་རྩིབས་བརྒྱད་བྲིས་པའི་ཁར༔ འབྲུ་ནག་གཏོར་མ་ཟུར་གསུམ་བཤམ༔ སྲུང་བའི་འཁོར་ལོར་ཟློག་ཅེས་བསྒྱུར༔ རྩེ་ལ་བརྒྱངས་ཤིང་དྲག་རྒྱན་བྱ༔ ཟོར་གྱི་ཐུན་དང་མཆོད་རྫས་བཤམ༔ སྐད་ཅིག་དུར་ཁྲོད་རོལ་པའི་ཞིང༔ ཁྲག་ཞག་རྦ་ཀློང་འཁྲུགས་པའི་དབུས༔ དགྲ་བགེགས་བསྒྲལ་པའི་ཤ་ཡི་རི༔ རུས་པའི་གྲམ་བུ་གཅལ་དུ་བཀྲམ༔ དྲག་པོའི་ཕོ་བྲང་ཆེན་པོའི་དབུས༔ དཔལ་ཆེན་རྟ་མགྲིན་རྒྱལ་པོ་ནི༔ སྡེ་བཞི་ཟིལ་གནོན་ཁྲོ་བོ་བརྒྱད༔ ཀུན་ཀྱང་རྟ་གདོང་འབར་བའི་ཞལ༔ ཡུམ་དང་སྒོ་སྲུང་བཀའ་སྡོད་བཅས༔ སྐུ་ལ་དུར་ཁྲོད་ཆས་ཀྱིས་བརྒྱན༔ གསུང་ནི་རྟ་སྐད་འབྲུག་ལྟར་སྒྲོག༔ དམིགས་མེད་ཐུགས་རྗེས་ལས་ལ་རྔམས༔ བསྐལ་པའི་མེ་ཕུང་འཁྲུགས་ལྟར་བསམ༔ ཧཱུྃ༔ དབང་དྲག་འབར་བ་ཡབ་ཡུམ་འཁོར་དང་བཅས༔ བཞེངས་ཤིག་བཞེངས་ཤིག་དབྱིངས་ནས་བཞེངས༔ བསྐུལ་ལོ་བསྐུལ་ལོ་འགྲོ་བའི་དོན་དུ་སྐུལ༔ མཛོད་ཅིག་མཛོད་ཅིག་དྲག་པོའི་ཕྲིན་ལས་མཛོད༔ དུག་གསུམ་ཤ་ཁྲག་རུས་པའི་མཆོད་པ་འབུལ༔ ཚར་གཅོད་དྲག་པོའི་ཕྲིན་ལས་དུས་ལ་བབ༔ སྤྲོ་ན་མ་མོའི་གིང་སྐད་ཀྱིས༔ སྐུལ་ཅིང་རཀྟ་ཡང་ཡང་ཕྱར༔ ཁྲག་ཆེན་ཕྱོགས་བཅུ་ཀུན་ཏུ་གཏོར༔ དཔང་གཟུ་བདེན་པ་ཡང་ཡང་བདར༔ ཕུང་ཤུལ་ས་ལ་བྲུབ་ཁུང་བྱ༔ དགྲའམ་བགེགས་ཆེན་གནས་པའི་རྫས༔ དེ་ཡིས་ལིངྒ་བཟོས་པའི་ནང༔ དུག་ཁྲག་གིས་བྲིས་མིང་བྱང་བཅུག༔ བྱ་འུག་དང་རུ་འདྲེ་འཇིགས་སོགས༔ རྫས་ངན་སྦྱར་བའི་དུད་པས་བདུག༔ པྲ་བེ་ཤ་ཡི་སྔགས་ཤམ་གྱིས༔ ཕྲ་མེན་མང་པོས་རྫས་ངན་ཆར༔ ཕབ་པས་རྒྱབ་རྟེན་བྲོས་པར་བསམ༔ དེ་ནས་འགུགས་པའི་ཕྱག་རྒྱ་བཅས༔ ཨངྐུ་ཤ་ཡའི་སྔགས་ཤམ་སྦྱར༔ ཕྲ་མེན་ལྕགས་ཀྱུ་ཐོགས་པ་ཡིས༔ སྙིང་ནས་བཟུང་ཞིང་བཀུག་པ་དང༔ ཛཿཧཱུྃ་བཾ་ཧོཿཞེས་སྦྱར་བས༔ ཕྲ་མེན་རྣམས་ཀྱིས་ཞགས་པས་བཅིངས༔ ལྕགས་སྒྲོག་གིས་བསྡམས་དྲིལ་བུས་མྱོས༔ གཟུགས་བྱང་རྣམས་དང་དབྱེར་མེད་བསྲེས༔ ཟངས་ལྕགས་ཕྱེ་མ་རྦབ་རྡོ་དང༔ ཡུངས་དཀར་དུག་དང་སྐེ་ཚེའི་ཐུན༔ ཁྲག་སོགས་སྦྱར་བས་བྲབས་ནས་སུ༔ ཕྲ་མེན་རྣམས་ཀྱིས་མཚོན་ཆའི་ཆར༔ ཕབ་པས་ལུས་རྣམས་རྡུལ་དུ་བརླག༔ མཱ་ར་ཡ་ཕཊ་རྦད་སྦྱར་བ༔ རིག་པ་ཧུར་ཕྱུང་ཐོག་ལྟར་བཟླ༔ ཕུར་པའི་སྐུ་སྟོད་ཁྲོ་བོ་ལ༔ སྐུ་སྨད་ཟུར་གསུམ་དབལ་དང་ལྡན༔ གནས་གསུམ་ཡི་གེ་ཨོཾ་ཨཱཿཧཱུྃ༔ ཧཱུྃ༔ རྒྱལ་བའི་སྐུ་གསུང་ཐུགས་དང་ལྡན༔ རྩེ་མོར་ཧྲཱིཿལས་ཕཊ་འཕྲོས་པས༔ དགྲ་བགེགས་ནྲྀ་ཏྲིའི་སྲོག་ལ་བབ༔ དྲག་པོའི་ཡི་གེ་མེར་འབར་བས༔ རྩ་ཡི་ཕུང་པོར་ཐོག་བརྒྱབ་བཞིན༔ བསྲེགས་ཤིང་རྡུལ་དུ་བརླགས་པར་བསམ༔ རྗེས་སུ་བསད་རྟགས་བྱུང་བ་ན༔ རྣམ་ཤེས་ཨ་ཡི་རང་བཞིན་དུ༔ རྟ་མགྲིན་རྒྱལ་པོའི་ཐུགས་ཀར་བསྟིམ༔ གཟུགས་བྱང་མཚོན་ཆས་གཏུབས་བྱས་ལ༔ ཆ་གཅིག་མེ་ཡི་ཧོམ་དུ་བསྲེག༔ ཆ་གཅིག་གཏོར་མ་ལ་བསྟབས་ནས༔ དགྲ་བགེགས་བསྒྲལ་པའི་ཤ་ཁྲག་གིས༔ ལྷ་ཚོགས་ཐམས་ཅད་དགྱེས་པར་བསམ༔ གཏོར་མ་ཕྱིར་དཔག་རཀྟ་ཕྱར༔ དགྲ་དང་བགེགས་ཀྱི་སྟེང་དུ་བྷྱོ༔ ཞེས་པའི་དམོད་པ་སྦྱར་ནས་སུ༔ ལྷ་ཚོགས་དམག་ལྟར་ཆས་ནས་ཀྱང༔ སྡིག་ཅན་འབྱུང་པོའི་དཔུང་རྣམས་ལ༔ གཡུལ་བཀྱེས་རྡུལ་དུ་བརླགས་པར་བསམ༔ ལྷ་ཚོགས་ཐམས་ཅད་མཁའ་ལ་བཏེག༔ གཏོར་མ་མེ་ཕུང་མཚོན་ཆའི་ཆར༔ འབྱུང་པོའི་ཕྱོགས་དང་གནས་པའི་རྟེན༔ རྒྱུ་བའི་ལམ་ལ་གཏོར་མ་བརྡེག༔ ཐལ་མོ་དང་ནི་དུལ་མོ་བརྡབ༔ རྩྭ་ཕུང་མེ་ཡིས་བསྲེགས་པ་ལྟར༔ རྗེས་ཤུལ་ཙམ་ཡང་མེད་པར་བསམ༔ སྤྲོ་ན་ཟློག་པའི་དམོད་པ་སྦྱར༔ ཧཱུྃ༔ དམར་ནག་གྲུ་གསུམ་དཀྱིལ་འཁོར་ནས༔ དཔལ་ཆེན་པདྨ་ཧེ་རུ་ཀ༔ རྟ་སྐད་རྔམས་བཞད་སྣང་སྲིད་འདར༔ ཁམས་གསུམ་ཐམས་ཅད་དབང་དུ་སྡུད༔ སྲིད་གསུམ་མ་ལུས་ཟིལ་གྱིས་གནོན༔ དྲག་ཤུལ་བཀའ་སྡོད་འཁོར་བཅས་ཀྱིས༔ གསང་སྔགས་རྡོ་རྗེ་ཐེག་པ་ཡི༔ བསྟན་ལ་གནོད་པར་བྱེད་པའི་བགེགས༔ བདུད་དང་བདུད་ཀྱི་ཕྱོགས་ཐམས་ཅད༔ ཁྲོ་རྒྱལ་རྣམས་ཀྱི་སྟོབས་ཀྱིས་ཟློག༔ མིང་ཙམ་རྡུལ་ཙམ་མེད་པར་གྱིས༔ ཟློག་གོ་དམར་ཆེན་གཏོར་མས་ཟློག༔ སྒྱུར་རོ་བགེགས་ཆེན་བདུད་ལ་བྷྱོ༔ གཏོར་མ་འཕང་རྗེས་སྲུང་འཁོར་བསྒོམ༔ ཐལ་བ་མནན་པའི་ལས་བྱ་འོ༔ ས་མ་ཡ༔ དགྲ་འམ་འབྱུང་པོའི་གཟུགས་བྱང་ལ༔ རྟགས་རྫོགས་བར་དུ་དགུག་གཞུག་བྱ༔ གསད་པའི་ལས་སྦྱོར་ཚད་རྫོགས་ནས༔ ཕུང་ཤུལ་ས་ལ་ཧོམ་གྲུ་གསུམ༔ དུག་ཤིང་ཚེར་མ་ཅན་བརྩིགས་ལ༔ ཞུན་ཆེན་མར་དང་དུག་ཁྲག་སྦྱར༔ ཤན་པའི་རིགས་ཀྱིས་མེ་སྦར་ལ༔ དྲག་པོའི་ལས་ཀྱི་དཀྱིལ་འཁོར་བསྒོམ༔ སྐུལ་ཞིང་ཛྭ་ལ་རཾ་ཞེས་པས༔ ཡིད་ཆེས་བར་དུ་ལན་གྲངས་འབུལ༔ ལྷ་རྣམས་རང་བཞིན་དབྱིངས་སུ་བསྟིམ༔ ས་མ་ཡ༔ འབྱུང་པོ་བསྒྲལ་པའི་གཟུགས་ཕུང་དང༔ ཐལ་བ་མནན་པའི་སྟེང་དུ་འམ༔ ཡང་ན་འབྱུང་པོ་གནས་པའི་སར༔ ཐམས་ཅད་དྲག་པོའི་ཆས་སུ་ཞུགས༔ སྣང་སྲིད་དབང་དྲག་རོལ་པ་ཡི༔ དཀྱིལ་འཁོར་ཆེན་པོར་བལྟས་ནས་སུ༔ དབང་ཆེན་རོལ་པའི་ང་རྒྱལ་གྱིས༔ ཐམས་ཅད་ལུ་གུ་རྒྱུད་དུ་སྦྲེལ༔ དྲག་པོའི་སྔགས་བྱང་འུར་གྱིས་བསྒྲག༔ ཧཱུྃ༔ རྟ་ཡི་བརྟུལ་ཞུགས་ཆེན་པོ་སོགས༔ དབང་ཆེན་རོལ་པའི་རྟོག་པ་བཞེངས༔ དབྱངས་སུ་གྱེར་ཞིང་ང་རྒྱལ་གཟུང༔ གཡས་སུ་བསྐོར་ཞིང་གཡོན་དུ་བརྡུང༔ ལག་གཉིས་སོར་མོ་བསྣོལ་ནས་སུ༔ མཐེ་བོང་རྣ་བ་ལྟར་བྱས་ནས༔ སྤྱི་བོར་བཞག་པ་རྟ་ཡི་རྒྱ༔ ས་སྟེང་ཀུན་ཏུ་མཆོངས་པའི་གར༔ འབྱུང་པོ་གཟིར་གནན་ཆོ་ག་ཡིས༔ སྟོབས་ཅན་ཀུན་གྱི་རྒྱུ་ལམ་ཆད༔ གཞན་ཡང་གྲོང་རྡལ་གྲོང་གི་དབུས༔ ལུང་གསུམ་འདུས་དང་ལམ་གྱི་སྲང༔ དོགས་པ་ཡོད་པའི་ཕྱོགས་སུ་བརྡུང༔ འབྱུང་པོ་ཀུན་གྱི་རྒྱུ་ལམ་ཆད༔ བཀྲ་ཤིས་བྱིན་ཆགས་གནས་སུ་འགྱུར༔ ས་མ་ཡ༔ འབྱུང་པོ་བསྐྲད་པའི་སྦྱོར་བ་ནི༔ ལིངྒ་རླུང་གིས་བཏེག་པ་ཡི༔ རྐང་པ་ཡཾ་གྱིས་མཚན་པ་བྲི༔ ཨུཙྪ་ཏ་ཡ་ཕཊ་སྦྱར་བའི༔ སྔགས་བཀོད་འགུགས་བསྟིམ་བསྒྲལ་བ་དང༔ ལས་ཀྱི་སྦྱོར་བ་རྫོགས་པར་བྱ༔ རྟགས་མཐོང་ངེས་པ་རྙེད་པ་ན༔ ལིངྒ་རྔ་མོང་ཐོད་པར་བཅུག༔ རང་ཡུལ་མི་ལྡོག་འབབས་ཆུར་འཕང༔ དྲག་པོ་ཟོར་གྱིས་རྗེས་བཅད་ལ༔ སྲུང་འཁོར་བསྒོམ་ཞིང་རྟ་བྲོ་བརྡུང༔ འབྱུང་པོ་གཞན་དུ་བྲོས་པར་འགྱུར༔ ས་མ་ཡ༔ བསྙེན་སྒྲུབ་ལས་སྦྱོར་གང་ལ་ཡང༔ རྗེས་སུ་རྫོགས་རིམ་བསྒོམ་པ་ནི༔ ཐུགས་སྲོག་ལས་ནི་འོད་འཕྲོས་པས༔ རྟེན་དང་བརྟེན་པར་བཅས་པ་རྣམས༔ འོད་ཞུ་ཡི་གེ་འཁོར་ལོར་གྱུར༔ དེ་ཉིད་ཐུགས་སྲོག་ལ་འདུས་པས༔ མི་དམིགས་དབྱིངས་སུ་རྒྱས་གདབ་བོ༔ ཁྱད་པར་ཡང་ཟབ་རྫོགས་རིམ་ནི༔ ཀུན་ཀྱང་ཧཱུྃ་གི་སྒྲ་སྒྲོག་པས༔ ལྷ་རྣམས་ཧྲཱིཿདང་བྷྱོ་རུ་གྱུར༔ དེ་དག་འབྲུག་སྒྲ་ཡལ་བ་ལྟར༔ སྐྱེ་མེད་དབྱིངས་སུ་མཉམ་པར་གཞག༔ སླར་ལྡངས་རྒྱུན་གྱི་སྤྱོད་པ་དང༔ དགེ་བ་བསྔོ་ཞིང་བཀྲ་ཤིས་བརྗོད༔ གསང་སྔགས་བསྟན་དང་བྱང་ཆུབ་ལ༔ བར་ཆད་འབྱུང་པོ་བསྒྲལ་བའི་ཐབས༔ མ་འོངས་གསང་སྔགས་རྣལ་འབྱོར་པ༔ དྲག་ཤུལ་འཆང་བའི་དོན་དུ་བསྟན༔ ཟབ་མོའི་གཏེར་དུ་སྦས་ནས་ཀྱང༔ ལས་ཅན་བུ་དང་འཕྲད་པ་ཡི༔ སྨོན་ལམ་བཟང་པོའི་བཀའ་རྒྱས་ཐོབས༔ ས་མ་ཡ༔ ༁ྃ༔ བོད་ཁམས་བདེ་ཐབས་ཆོས་བཅུ་ཡི༔ བསྟན་པ་སྲུང་བའི་སྐོར་བཞི་ལས༔ ཕུར་པ་ཁྲོ་རྒྱལ་སྟོབས་འདུས་བཞུགས༔ ྈྈྈྈ དངོས་གྲུབ་མྱུར་ཐོབ་སྙིང་པོའི་དོན༔ སྟོན་མཛད་གུ་རུ་རྗེ་ལ་འདུད༔ ཡང་ཅིག་གུ་རུ་པདྨ་ལ༔ ལྷ་སྲས་བདག་གིས་འདི་ལྟར་ཞུས༔ རྫོགས་ཆེན་ཨ་ཏི་ཟབ་དོན་གྱི༔ སྙིང་པོ་ཚུལ་བཞིན་སྒྲུབ་པ་ལ༔ བར་ཆད་བྱེད་པའི་དགྲ་བགེགས་རྣམས༔ སྤྱིར་ནི་བྱམས་དང་སྙིང་རྗེ་དང༔ རེ་དོགས་མེད་པའི་ལྟ་བ་ཡིས༔ བདུད་སྡེ་ཐམས་ཅད་གཞོམ་དགོས་ཀྱང༔ དང་པོའི་ལས་ཅན་ནུས་ཆུང་ཞིང༔ ལྟ་བ་གདིང་དང་མི་ལྡན་པས༔ རྡོ་རྗེ་ཕུར་བུའི་རྣལ་འབྱོར་ལ༔ བརྟེན་ཏེ་དགྲ་བགེགས་སྒྲོལ་བའི་ཐབས༔ གུ་རུ་རྗེ་ཡིས་བསྩལ་དུ་གསོལ༔ གུ་རུ་རྗེ་ཡིས་བཀའ་བསྩལ་པ༔ བྱང་ཆུབ་མཆོག་ཏུ་སེམས་བསྐྱེད་པའི༔ རིག་འཛིན་རྒྱལ་བའི་གདུང་འཚོབ་ཀྱི༔ སེམས་བསྐྱེད་ཉམས་པར་མ་གྱུར་ན༔ བདུད་སྡེ་གང་གིས་གླགས་མི་རྙེད༔ འོན་ཀྱང་བདུད་སྡེ་འདུལ་བ་དང༔ འགྲོ་བ་རྣམས་ལ་ཕན་གདགས་སླད༔ རྡོ་རྗེ་ཕུར་བུའི་ཏིང་འཛིན་གྱིས༔ བདུད་དགྲ་ཐམས་ཅད་བཏུལ་བ་ན༔ བྱང་ཆུབ་བར་ཆད་མེད་པར་ཐོབ༔ གཞན་དོན་རྒྱ་ཆེན་ལྷུན་གྱིས་གྲུབ༔ སངས་རྒྱས་ཀུན་གྱི་རང་བཞིན་སྐུ༔ བླ་མ་མཆོག་ལ་སྐྱབས་གསོལ་ནས༔ བྱང་ཆུབ་མཆོག་ཏུ་སེམས་བསྐྱེད་པའི༔ དུས་གསུམ་རྒྱལ་བའི་གདུང་འཚོབ་པ༔ རིག་འཛིན་རྣལ་འབྱོར་བདག་ཉིད་ཀྱིས༔ བདུད་དང་བདུད་ཀྱི་ཕྱོགས་བསྒྲལ་ནས༔ དཔལ་ཆེན་གོ་འཕང་འཐོབ་པར་བགྱི༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་ཁྲོ་བོ་མི་བཟད་པ༔ མཐིང་ནག་ཡུམ་བཅས་ཕུར་བུ་འདྲིལ༔ སྣང་སྲིད་འཁོར་ལོ་རྩིབས་བཅུ་པ༔ ཁྲོ་རྒྱལ་ཡཀྴ་སྐར་ལྟར་འཁྲུགས༔ ཕྱོགས་བཅུའི་སངས་རྒྱས་ཀཱི་ལ་ཡས༔ ཕྱོགས་བཅུའི་འབྱུང་པོ་ཐམས་ཅད་ནན༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ མ་བཅོས་གསལ་རྫོགས་རྫས་ཀྱི་དཀྱིལ་འཁོར་ནི༔ མགོ་བོ་རྒྱ་མདུད་ཁྲོ་བོའི་ཞལ་དང་ལྡན༔ ཉི་མའི་སྤྱན་གྱིས་བགེགས་དཔུང་ཐལ་བར་སྲེག༔ ཞལ་ནས་ཧཱུྃ་གི་སྒྲ་ནི་འབྲུག་ལྟར་སྒྲོག༔ ཤངས་ནས་འཐོར་རླུང་གནམ་ལྕགས་ཐོག་མདའ་འཕེན༔ རྒྱ་མདུད་གོང་མར་རིག་འཛིན་བླ་མའི་ཚོགས༔ སངས་རྒྱས་བྱང་ཆུབ་སེམས་དཔའ་སྤྲིན་ལྟར་གཏིབས༔ འཆང་གཟུང་པདྨ་ཁ་སྤྲོད་འབར་བའི་དབུས༔ རྡོ་རྗེའི་གུར་ཁང་དུར་ཁྲོད་གཞལ་ཡས་ཁང༔ ཕྱི་ནང་ཀུན་ཏུ་ཁྲོ་བོའི་དམག་དཔུང་འཁྲིགས༔ རྒྱ་མདུད་འོག་མར་དམ་ཅན་སྲུང་མའི་ཚོགས༔ དབལ་ཟུར་གསུམ་པ་སྤུ་གྲི་ལྟར་རྣོ་བ༔ བདུད་བཞི་དགྲ་བགེགས་དམ་སྲིའི་སྙིང་ལ་ཟུག༔ ཆུ་སྲིན་ཁ་ནས་སྦྲུལ་ནག་བསྣོལ་མར་འཁྱུགས༔ ཐོག་སེར་བུ་ཡུག་དུག་གི་ཆར་པ་འབེབ༔ སྟོད་སྨད་ཀུན་ཏུ་མེ་ཆུ་རླུང་འཁྲུགས་པས༔ ཀཱི་ལ་ཡ་ཡི་དྲག་སྔགས་འབྲུག་ལྟར་སྒྲོག༔ ཕུར་པའི་ཚྭ་ཚྭས་དགྲ་བགེགས་ཀླད་པ་འགེམས༔ བདག་ཉིད་ཧཱུྃ་གྱུར་ཕོ་བྲང་དབུས་སུ་ཞུགས༔ རྩ་བའི་ལྷ་མཆོག་རྡོ་རྗེ་གཞོན་ནུ་ནི༔ མཐིང་ནག་ལྕགས་ཀྱི་རལ་པ་གྱེན་དུ་འཁྱིལ༔ ཕྱག་གཉིས་ཕུར་འདྲིལ་ཞབས་གཉིས་འདོར་ཐབས་བགྲད༔ འཁོར་ལོ་རྒྱས་འདེབས་གཉིས་མེད་ཡུམ་དང་འཁྲིལ༔ རྡོ་རྗེའི་གཤོག་བརྒྱངས་དུར་ཁྲོད་ཆས་ཀྱིས་བརྒྱན༔ ཡེ་ཤེས་མེ་འབར་སྤྱི་བོ་དུང་ཁང་དུ༔ བུདྡྷ་སྲས་མཆོག་སྨུག་ནག་ཕུར་བུ་འདྲིལ༔ མགྲིན་པར་པདྨ་ཐུགས་ཀར་བཛྲ་དང༔ ལྟེ་བར་རཏྣ་གསང་བར་ཀརྨ་རྣམས༔ དམར་མཐིང་སེར་ལྗང་ཕུར་བུ་འདྲིལ་བ་ཡི༔ ཡེ་ཤེས་ལྔ་ལྡན་ཐུགས་ཀྱི་དཔལ་བེ་འུར༔ ཡེ་ཤེས་སེམས་དཔས་རབ་བརྒྱན་སྲོག་གི་གོར༔ རྡོ་རྗེ་ཧཱུྃ་ནང་མིང་ཡིག་ཐིག་ལེ་བཅས༔ སྔགས་ཀྱི་ཕྲེང་བ་འོད་ཟེར་མེ་ཕུང་འབར༔ བདུད་དཔུང་གང་གིས་གཞོམ་པ་མེད་པར་བསམ༔ རྩ་བའི་སྔགས་བཟླས་གསལ་སྣང་རྫོགས་པ་ན༔ སྲས་མཆོག་ཕུར་བུ་ཨེ་ཡི་སྟེང་དུ་བཀོད༔ ཧཱུྃ༔ དྲག་པོར་བསྐྱེད་པའི་ཕུར་པ་ནི༔ མཐིང་ནག་ལྕགས་ཀྱི་རལ་པ་ཅན༔ ཨུཏྤལ་རྒྱས་པའི་མདོག་འདྲ་བ༔ སྐུ་སྨད་ཨེ་ཡི་རང་བཞིན་ཅན༔ ཕྱག་གཉིས་སྒྲོལ་བྱེད་ཕུར་པ་འདྲིལ༔ དཀར་དམར་མཐིང་གའི་ཕྲ་བཏབ་པ༔ དུས་གསུམ་རྒྱལ་བའི་གཟི་ཆེན་འབར༔ བཏབ་ན་ལྷ་ཡང་བརླག་པར་འགྱུར༔ ཨོཾ་བཛྲ་ཀཱི་ལི་ཀཱི་ལ་ཡ་དཱིཔྟ་ཙཀྲ་ཧ་ན་ཧ་ན་ཧཱུྃ་ཕཊ༔ བྲག་ཁའི་ཆུ་འབབ་བཞིན་དུ་བཟླ༔ ལྕགས་སམ་བྷནྡྷའི་སྣོད་ནང་དུ༔ འབྲུ་ནག་ཁྲག་གིས་སྦྲུས་པ་ཡི༔ ཟུར་གསུམ་ཤ་ཁྲག་མཚོན་ཆས་བརྒྱན༔ ཨེ་ཡི་སྟེང་དུ་བཀོད་ནས་སུ༔ ཧཱུྃ༔ ཁྲོ་རྒྱལ་ཡཀྴ་སྐར་ལྟར་འཁྲུགས༔ བདུད་དང་དགྲ་བགེགས་ཀུན་བསྡུས་ནས༔ མཚོན་ཆ་འབར་བས་བསྒྲལ་ནས་སུ༔ གཟུགས་ཕུང་དུར་ཁྲོད་ས་གཞི་ལ༔ ཤ་ཡི་རི་བོ་ཁྲག་གི་མཚོ༔ ཀེང་རུས་བརྩེགས་པའི་རི་སུལ་དུ༔ ལྕགས་ཀྱི་ཤྭ་ན་ཆེན་པོ་རྒྱུ༔ སྐུ་ནི་རི་རབ་ཟོམ་དང་མཉམ༔ ཤྭ་ནའི་གདོང་ཅན་སེང་སྐད་སྒྲོག༔ སྐུ་སྨད་ཕུར་པའི་དབལ་དང་ལྡན༔ ཕྱག་གཉིས་སྒྲོལ་བྱེད་ཕུར་བུ་འདྲིལ༔ རང་འདྲའི་ཡབ་ཡུམ་སྤྲུལ་འཁོར་བཅས༔ ཕྱོགས་བཅུའི་ཁྲོ་རྒྱལ་སྟོབས་འདུས་པ༔ བདུད་དཔུང་བརླག་པའི་དམག་དཔུང་འཁྲིགས༔ ཨོཾ་བཛྲ་ཀཱི་ལི་ཀཱི་ལ་ཡ༔ ཛཿཧཱུྃ་བཾ་ཧོ༔ ཀ་ཏཾ་ཀ་ཡེ༔ ཛ་ཡེ་བི་ཛ་ཡེ༔ ཨ་ཛི་ཏེ་ཨ་པ་རཱ་ཛི་ཏེ་མཱ་ར་སེ་ན་པྲ་མརྡྷ་ན་ཡེ་ཧཱུྃ་ཕཊ༔ དྲག་སྔགས་ཐོག་འབྲུག་འུར་ལྟར་བཟླ༔ སྒྲུབ་པའི་ཕུར་བུ་བཞད་པ་དང༔ ལས་ཀྱི་ཕུར་བུ་འཕུར་བ་དང༔ གཏོར་མར་མེ་འབར་དུ་བ་ཕྱུར༔ རྟགས་དེ་བྱུང་ན་གང་བརྩམས་འགྲུབ༔ ས་མ་ཡ༔ དེ་ནས་གདབ་པའི་ལས་ལ་འཇུག༔ དགྲ་བགེགས་ཟག་རྫས་མིང་རུས་བཅས༔ ཕུང་ཤུལ་ས་ཡི་བྲུབ་ཁུང་དུ༔ བཅུག་ནས་ཐུན་ཐག་ཟོར་ལ་བཏགས༔ དང་པོར་དགྲ་བགེགས་རྒྱབ་རྟེན་ལ༔ དབྱེ་བའི་ཕུར་པ་གདབ་པ་ནི༔ མཐིང་ནག་ཛཿཧཱུྃ་བཾ་ཧོཿའཕྲོས༔ ཕུར་སྲུང་དམ་ཅན་ལས་ལ་བསྐུལ༔ བཅུ་གཉིས་འཁོར་ལོའི་ལྟེ་བ་རུ༔ གསད་པའི་ཁང་པ་གྲུ་གསུམ་ནང༔ དགྲ་བགེགས་འགུགས་ཤིང་གཞུག་པར་བྱ༔ དམ་ཅན་ལྕམ་དྲལ་བཅུ་གཉིས་བཅས༔ དམག་ཚོགས་འཁོར་ལོའི་གནས་སུ་ལྷགས༔ སྤྲུལ་པའི་ཤྭ་ན་གྲངས་མེད་པ༔ ཕུར་སྲུང་ཇག་པ་ལས་ལ་ཆས༔ ལྕགས་ཀྱུ་ལ་སོགས་འགུགས་བྱེད་ཐོགས༔ དགྲ་བགེགས་རང་དབང་མེད་པར་བཀུག༔ ཕྲ་མེན་རྫས་ངན་ཆར་ཐོགས་པ༔ སྤྲོས་པས་འགོ་བའི་ལྷ་ལྔ་བསྐྲད༔ རྫས་ངན་ཕུར་བུ་མགོ་ལ་བཏབ༔ གཉིས་པ་གཟུགས་ལ་དབབ་པ་ཡི༔ ཕུར་བུ་ཡུངས་དཀར་ཐུན་གྱི་རྫས༔ བྲབས་པས་དབྱེར་མེད་གཟུགས་ལ་བསྟིམ༔ མཐུ་འཕྲོག་ཕུར་བུ་དུག་གི་ཐུན༔ གདབ་པས་བཀྲག་མདངས་རང་ལ་བསྡུ༔ གསུམ་པ་བྱད་དུ་གཞུག་པའི་ཕྱིར༔ ཕྲ་མེན་འཆིང་བྱེད་ཐོགས་པ་ཡིས༔ བྱད་ཕུར་ཡན་ལག་རྣམས་ལ་གདབ༔ དྲུ་གུ་ཐུལ་དུ་བཅིངས་པར་བསམ༔ བཞི་པ་སྨྱོ་ཕུར་དུག་ཁྲག་ནི༔ ཕྲ་མེན་ཀུན་གྱིས་ཐོགས་ནས་སུ༔ དགྲ་བགེགས་བུ་ག་དགུ་ལ་གདབ༔ དྲན་མེད་བརྒྱལ་ཞིང་མྱོས་པར་བསམ༔ གསད་པའི་ཕུར་པ་སྲས་མཆོག་དེ༔ དཀར་ནག་མཚམས་སུ་གདབ་པ་ཡིས༔ ཁྲག་རྩ་ཚེ་ཡི་དྭངས་མ་བཅོམ༔ ནྲྀ་ཏྲི་རྩྭ་མེས་བཅོམ་བཞིན་བསྲེགས༔ ཁོང་ཁྲག་ལྷུད་ཀྱིས་ལུད་པར་བསམ༔ ཁུག་རྟགས་དགྲ་ཡི་བླ་འཁྱམས་འོང༔ སྒྲ་དང་དྲི་ནི་བྱུང་བའི་ཚེ༔ གདབ་པའི་ལས་བྱས་བསད་རྟགས་རྫོགས༔ དེ་ནས་གཅོད་པའི་ཕུར་པ་ནི༔ ཤྭ་ན་བཤན་གྲི་ཐོད་ཕུར་ཅན༔ དུ་མས་གཟུགས་ཕུང་ཁྲོལ་གྱིས་བཤིག༔ ཕོ་གཡས་མོ་གཡོན་བརྩམས་ཏེ་གདབ༔ ཟངས་ལྕགས་དུག་རྡོ་མཚེ་ཁྲག་ཐུན༔ ནད་རླངས་དུག་དང་མཚོན་ཆའི་ཆར༔ བྲབས་པའི་ཕུར་བུ་ཁྱབ་པར་གདབ༔ འབྱུང་པོ་སེར་པོ་ཐོ་ལུམ་ཐོགས༔ དགྲ་བགེགས་ཕྱེ་མ་བཞིན་དུ་འཐགས༔ ཡབ་ཡུམ་རོལ་པའི་གཏུན་ཁུང་དུ༔ གཏུན་གྱིས་དམིགས་མེད་ངང་དུ་བཏང༔ ཕུར་བུ་ཐོ་བས་བརྡུང་བར་བྱ༔ བསྙེན་ཕུར་ཀླད་ལ་བསྐོར་ནས་སུ༔ ཐུགས་ཀའི་ཨ་ལས་འོད་འཕྲོས་པས༔ སྟོང་ཁམས་ཁྱབ་ཅིང་ཚུར་འདུས་པས༔ དགྲ་བགེགས་ཚེ་སྲོག་ཨ་རུ་འདུས༔ ཕུར་པའི་རྩེ་རུ་ཡེ་རེ་བ༔ བདག་གི་ཐུགས་ཀའི་ཨ་ལ་བསྟིམ༔ བཀྲག་མདངས་གཟི་བརྗིད་ལྡན་པར་བསམ༔ ཚེ་ཕུར་སྙིང་གི་དཀྱིལ་དུ་གདབ༔ སྲས་མཆོག་ཕུར་བུ་ཀླད་ལ་བསྐོར༔ སྙིང་གའི་ཨ་ལས་གྲངས་མེད་སྤྲོས༔ ཚུར་འདུས་ཕུར་པའི་དབལ་ལ་ཨ༔ འོད་ཟེར་དཀར་པོ་འཕྲོས་པ་ཡིས༔ དགྲ་བགེགས་སྡིག་སྒྲིབ་སྦྱོང་བར་བསམ༔ ཁྲུས་ལུང་མིང་བྱང་ནྲྀ་ཏྲིར་གདབ༔ སྲས་མཆོག་སླར་ཡང་ལྷར་གསལ་བའི༔ གནས་གསུམ་ཨོཾ་ཨཱཿཧཱུྃ་གསུམ་འབར༔ བདུད་རྩི་ཕུད་ཀྱི་སྐྱེམས་དྲངས་ལ༔ ཡི་གེ་བརྒྱ་པས་ཉེས་བྱས་བཤགས༔ བདག་ཀྱང་རྩ་བའི་ལྷར་གསལ་བའི༔ ཐུགས་ཀའི་ཨ་ལས་འོད་འཕྲོས་པས༔ ལས་ཀྱི་སྒྲིབ་པ་སྦྱོང་བར་བསམ༔ སྲས་མཆོག་ཕུར་བུ་ཀླད་ལ་བསྐོར༔ ཐུགས་ཀའི་འོད་ཀྱིས་སྟོང་ཁམས་ཁྱབ༔ དམིགས་བྱའི་རྣམ་ཤེས་ཨ་རུ་བསྡུས༔ འོག་མིན་གནས་སུ་སྤར་བར་བྱ༔ དགྲ་བགེགས་མིང་བྱང་གང་ཡིན་བསྲེགས༔ སྲོག་ཕུར་བདག་ཕུར་དགྲ་ལ་གདབ༔ འདེབས་པ་པོ་དང་གདབ་པའི་ཡུལ༔ འདེབས་བྱེད་དབྱེར་མེད་རོ་གཅིག་པ༔ ཁྲེགས་ཆོད་ལྟ་བའི་དོན་ལ་བཞག༔ རིག་པའི་ཕུར་པ་དབྱིངས་ལ་གདབ༔ བྱང་ཆུབ་སེམས་ཕུར་སྔོན་འགྲོ་བའི༔ ཡབ་ཡུམ་གཉིས་མེད་རོལ་པ་ཡི༔ བདེ་ཆེན་ཕུར་པ་ཡུམ་མཁར་གདབ༔ དགྲ་ནི་གསོ་བའི་ལས་ལ་བསྔགས༔ དེ་ཡང་རྣམ་ཤེས་ཞལ་དུ་བཅུག༔ སྐུ་ཡི་དབྱིབས་བརྒྱུད་ཡུམ་མཁར་ཕབ༔ སྲས་མཆོག་རྡོ་རྗེ་སེམས་ཆེན་པོ༔ བརྒྱུད་པ་འཛིན་པའི་སྲས་སུ་བྱ༔ སྔོན་འགྲོ་དངོས་གཞི་རྗེས་གསུམ་ལ༔ ཕུར་པ་བཅུ་གཉིས་གདབ་པའི་ལས༔ བསྡུ་ན་ཕུར་བཞིར་འདུས་པ་འོ༔ ས་མ་ཡ༔ རྫོང་བཅས་གདབ་པའི་ལས་རྫོགས་ནས༔ རྒྱས་པར་ལྷ་གྲངས་ཕུར་པ་ཐོགས༔ ལྷ་རྣམས་སིལ་བུར་བསྐུལ་ནས་སུ༔ དཀྱིལ་འཁོར་གསུམ་གྱི་སྤྲུལ་པ་རྣམས༔ མཁའ་ཁྱབ་ཕུར་བུའི་སྤྲིན་སྤྲོས་པས༔ དགྲ་བགེགས་ཆག་ཆེན་ངན་པ་བཟློག༔ ཚུར་ལ་མི་ཟློག་མཐར་བསྐྲད་ནས༔ རྡུལ་ཕྲན་བཞིན་དུ་བརླགས་པར་བསམ༔ སྲས་མཆོག་ཕུར་བུ་ཀླད་ལ་བསྐོར༔ ཕུར་ཐུན་དྲག་པོ་སེར་ལྟར་འབེབ༔ བར་ཆད་ཆག་ཆེན་རྣམས་ལ་གདབ༔ གནོད་པ་བྱུང་བའི་ཕྱོགས་སུ་བསྒྲལ༔ ཧཱུྃ༔ བསྐལ་པ་མེ་རླུང་འཚུབས་པའི་སྟོང་ཁམས་ནས༔ མཐིང་ནག་འབར་བ་ཨེ་ཁྲོམ་སྒོ་ཕྱེས་ལ༔ ཐོག་ལྟར་རྒྱུག་པའི་ཕུར་བུ་བང་མ་བུལ༔ གློག་ལྟར་འཁྱུགས་པའི་གཡབ་མོ་རྩལ་མ་ཞན༔ འབྲུག་ལྟར་སྒྲོག་པའི་དྲག་སྔགས་མཐུ་མ་ཆུང༔ སེར་ལྟར་འཁྲིགས་པའི་ཕུར་བུ་ལས་ལ་ཆོས༔ རླུང་ལྟར་འཚུབས་པའི་སྤྲུལ་པ་དགྲ་ལ་ཆོས༔ སྤྲིན་ལྟར་འཐིབས་པའི་རིག་འཛིན་རྩལ་འཆང་རྣམས༔ རྡོ་རྗེ་ཕུར་བུ་སྒྲུབ་པའི་གྲོགས་མ་གཡེལ༔ བདག་ཉིད་ལྷ་མཆོག་དཔལ་ཆེན་གཞོན་ནུའི་སྐུ༔ ཨིནྡྲ་ནཱི་ལའི་ལྷུན་པོ་སྲིད་རྩེར་སླེབ༔ ནམ་མཁའི་ཞལ་མདོག་ཟང་ཡག་མཆེ་བ་ཅན༔ སྤྱན་མིག་ཁྱུང་གི་ལྟ་སྟངས་གྱེན་ཐུར་གཟིགས༔ གནམ་ལྕགས་ཞུན་མའི་ཚུལ་ཅན་ཕྱག་གཉིས་ཀྱིས༔ རི་རབ་ཕུར་བུ་བདུད་ཆེན་ཀླད་པ་འགེམས༔ དཔའ་བོའི་གོམ་སྟབས་བསྐལ་པའི་མེ་འདྲར་འཚུབས༔ ཀཱི་ལ་ཡ་ཡི་སྒྲ་སྒྲོག་སྟོང་གསུམ་གཡོ༔ ཕྱོགས་བཅུ་ཁྲོ་རྒྱལ་རྔམས་པའི་དབུས་ན་འགྱིང༔ དཔལ་ཆེན་དཔལ་འབར་ཁྱོད་ཀྱིས་རྒྱབ་རྟེན་མཛོད༔ གསང་སྔགས་བསྟན་ལ་སྡང་བའི་དགྲ་བྱུང་ན༔ དཔལ་གྱི་བཀའ་ཉན་ཁྱོད་ཀྱིས་དགྲ་སྙིང་ལོངས༔ སྙིང་ཁྲག་འཐུང་ཞིང་དོན་སྙིང་དཔའ་ཟས་གྱིས༔ བྱང་ཆུབ་སྒྲུབ་ལ་བདུད་དང་བགེགས་བྱུང་ན༔ དཔལ་ཆེན་ཁྱོད་ཀྱིས་ཡེ་ཤེས་སྤྱན་གྱིས་གཟིགས༔ ཕྲ་མེན་སྤྲུལ་ཚོགས་ཐམས་ཅད་ལས་ལ་ཆོས༔ རྣོ་དབལ་ཕུར་བུས་བདུད་བགེགས་སྙིང་ཕུག་ལ༔ ལུས་ངག་ཡིད་གསུམ་ཐལ་བའི་རྡུལ་དུ་རློགས༔ ལྟས་ངན་ཆོ་འཕྲུལ་ཆག་ཆེན་ཉམ་ང་དང༔ དུས་མིན་འཆི་བ་བྱད་མ་རྦོད་གཏོང་བཅས༔ མཁའ་འགྲོའི་བཀའ་ཆད་ལྷ་སྲུང་ཁྲོས་པ་དང༔ ཁྲོ་རྒྱལ་ཕྲ་མེན་གཤིན་རྗེའི་ཕོ་ཉ་འགྱེད༔ ཕྱི་པའི་འཕྲུལ་འཁོར་ལྷ་མིན་ངན་སྔགས་རྣམས༔ དམ་སྲིའི་གཡོ་འཕྲུལ་དུག་མཚོན་སྦྱོར་ངན་ཀུན༔ ཐམས་ཅད་མ་ལུས་གཅིག་ཏུ་བསྡུས་ནས་ཀྱང༔ བྷྱོ་བྷྱོ་དགྲ་དང་བགེགས་ཀྱི་སྟེང་དུ་བྷྱོ༔ སྒྱུར་རོ་ཕུར་པའི་དབལ་གྱིས་བདུད་ལ་སྒྱུར༔ བདུད་དཔུང་ཐལ་བའི་རྡུལ་ཕྲན་བཞིན་དུ་རློགས༔ དྲག་སྔགས་བཟླ་ཞིང་རིག་པ་ཧུར་ཕྱུང་བས༔ གང་ལ་བརྩམས་པ་ཐམས་ཅད་འཇོམས་པར་འགྱུར༔ ས་མ་ཡ༔ དེ་ནས་ཐུན་གྱི་ཕུར་བུ་འཕེན༔ ཕྱོགས་བཅུ་ཀུན་ཏུ་རཀྟ་གཏོར༔ སྔགས་པ་བདུད་ཀྱི་ཆས་སུ་ཞུགས༔ ལས་བྱེད་ཕུར་བུའི་དམག་ཚོགས་རྣམས༔ གང་དུ་བཏང་བ་དེར་ཆས་ནས༔ གཡུལ་ཆེན་མཚོན་ཆ་ཕུར་བུའི་ཟོར༔ དགྲ་དང་བགེགས་ལ་བརྒྱབས་པ་ཡིས༔ སྒྲོན་མེ་རླུང་གིས་བཅོམ་པ་ལྟར༔ ཚར་བཅད་དྲག་པོའི་ལས་མཛད་བསམ༔ ཧཱུྃ༔ སྲིད་གསུམ་འདི་ན་ཆེ་བའི་འབྱུང་པོ་ཀུན༔ རཀྟ་འོང་ངོ་ཕུར་བུའི་ཟོར་ལམ་ཕྱེས༔ ཐུན་ཟོར་འཕེན་པས་སྐུ་ཟུར་ཟོར་སྒོ་ཕྱེས༔ མ་ཉེས་མ་ལན་དམ་ཉམས་དགྲ་བགེགས་རྣམས༔ མ་ཡོ་མ་བཅོས་གཟུ་དང་དཔང་མཛོད་ཅིག༔ ཧཱུྃ༔ ང་ནི་རྡོ་རྗེ་གཞོན་ནུ་སྟེ༔ ལས་ཀྱི་ཤྭ་ན་དགྲ་ལ་ཆོས༔ ཁྱོད་ཀྱི་བཀའ་ཉན་སྲུང་མ་རྣམས༔ གཡུལ་ངོ་ཆེན་པོ་ད་ཤོམས་ཤིག༔ ཟོར་འདི་བར་ཆད་བདུད་ལ་འཕེན༔ ཟོར་འདི་སྡང་བའི་དགྲ་ལ་འཕེན༔ ཟོར་འདི་གནོད་པའི་བགེགས་ལ་འཕེན༔ བར་ཆད་ཆག་ཆེན་བཟློག་ཕྱིར་འཕེན༔ རིག་འཛིན་བླ་མས་རྒྱབ་རྟེན་མཛོད༔ ཡི་དམ་ལྷ་ཚོགས་མཐུ་མ་ཆུང༔ ཆོས་སྐྱོང་སྲུང་མ་རྩལ་མ་ཞན༔ ལས་ཀྱི་ཕོ་ཉ་ཆེན་པོ་རྣམས༔ མི་མངོན་ནམ་མཁའི་དབྱིངས་ནས་རྒྱུགས༔ སྐུ་ནི་རི་རབ་ཟོམ་དང་མཉམ༔ ཕྱག་ན་རི་རབ་ཕུར་ཟོར་ཐོགས༔ བསྐལ་པའི་མེ་འབར་ཐོག་ལྟར་འཕེན༔ བདུད་དཔུང་ཆག་ཆེན་གཡུལ་ངོ་ཟློག༔ དགྲ་བགེགས་དམ་སྲིའི་སྙིང་ལ་རྒྱོབ༔ མིང་གི་ལྷག་མ་མེད་པར་གྱིས༔ དྲག་སྔགས་བཟླ་ཞིང་ཟོར་རྣམས་འཕང༔ འཇིགས་རུང་ཁྱུང་གིས་རྗེས་སྙོག་གཅད༔ སྲུང་སྔགས་བཟླ་ཞིང་སྲུང་འཁོར་བསྒོམ༔ རྣམ་འཇོམས་གཟུངས་ཀྱིས་འཛུལ་ཆོག་བྱ༔ ཚེ་འགུགས་ཕུར་བུའི་དབང་ཡང་བླང༔ གང་འདོད་ཉམས་པ་ཚར་གཅོད་འགྱུར༔ ས་མ་ཡ༔ བསྒྲུབས་པའི་ཕུར་པ་གནས་གསུམ་དུ༔ གཏུགས་ཤིང་བསྒྲིལ་ལ་ལུས་ལ་འཆང༔ ཧཱུྃ༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བའི༔ སངས་རྒྱས་ཕྲིན་ལས་རྫོགས་མཛད་པའི༔ སྐུ་གསུང་ཐུགས་ཀྱི་དབང་སྐུར་ཅིག༔ ཧཱུྃ༔ སངས་རྒྱས་ཀུན་གྱི་སྐུ་གསུང་ཐུགས༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་ཁྲོ་བོ་མི་བཟད་པ༔ སྐུ་གསུང་ཐུགས་སུ་བདག་གྱུར་ཅིག༔ ཁྱད་པར་བརྒྱད་ཀྱི་དངོས་གྲུབ་ཐོབ༔ རྡོ་རྗེའི་མཁར་དུ་ཞུགས་པ་འདྲ༔ བར་ཆད་ལས་རྒྱལ་དོན་རྣམས་འགྲུབ༔ ལྷ་སྲས་ཁྱོད་ཀྱི་བརྒྱུད་འཛིན་པའི༔ སྐལ་ལྡན་རྣམས་ཀྱི་སྙིང་ནོར་གྱིས༔ ས་མ་ཡ༔ ༁ྃ༔ བོད་ཁམས་བདེ་ཐབས་ཆོས་བཅུ་ཡི༔ བསྟན་པ་སྲུང་བའི་སྐོར་བཞི་ལས༔ མགོན་པོ་གནམ་ལྕགས་ཐོག་མདའ་བཞུགས༔ ྈྈྈྈྈ བསྟན་པ་སྲུང་བའི་མཐུ་རྩལ་ཅན༔ བདུད་འདུལ་དྲག་པོ་རྩལ་ལ་འདུད༔ བདག་འདྲ་ལྷ་སྲས་མུ་ཁྲི་ཡིས༔ པདྨ་ཐོད་ཕྲེང་ལ་གསོལ་བ༔ གསང་སྔགས་རྣལ་འབྱོར་ཐམས་ཅད་ཀྱི༔ སྐུ་ལ་བསྡོ་བའི་དགྲ་འདུལ་ཞིང༔ སངས་རྒྱས་བསྟན་པ་གཉན་པོ་ཡི༔ སོ་ཁ་སྲུང་བའི་སྲུང་མ་ཆེ༔ དྲག་རྩལ་མཐུ་ལྡན་མྱུར་མགྱོགས་ཅན༔ བཀྲ་ཤིས་མྱུར་མགྱོགས་ཆེ་བ་ཡི༔ མགོན་པོའི་སྒྲུབ་པ་བསྩལ་དུ་གསོལ༔ ཞེས་ཞུས་གུ་རུས་བཀའ་བསྩལ་པ༔ དེ་ལྟར་བསྟན་པ་སྲུང་བའི་ཐབས༔ སྙིང་པོར་བསྡུས་ཏེ་འདི་རུ་བསྟན༔ བླ་མ་མགོན་པོ་དབྱེར་མེད་པར༔ བདག་ནི་གུས་པས་སྐྱབས་སུ་མཆི༔ འགྲོ་བ་རྣམས་ལ་ཕན་པའི་ཕྱིར༔ བསྟན་པ་བསྲུང་བར་སེམས་བསྐྱེད་དོ༔ གྲུ་གསུམ་ཨེ་ཡི་ཀློང་དཀྱིལ་དུ༔ འཁོར་ལོ་རྩིབས་བཅུའི་གུར་ཁང་དབུས༔ པད་ཉི་དགྲ་བགེགས་བསྣོལ་བའི་སྟེང༔ ཧཱུྃ་ལས་གྲི་གུག་ཧཱུྃ་གིས་མཚན༔ འོད་འཕྲོས་རྒྱལ་བ་སྲས་བཅས་མཆོད༔ བྱིན་རླབས་མཐུ་སྟོབས་གཅིག་ཏུ་བསྡུས༔ སེམས་ཅན་ཀུན་གྱི་དོན་བྱས་ནས༔ ཡོངས་གྱུར་བདག་ཉིད་དཔལ་ཆེན་པོ༔ བླ་མ་མགོན་པོ་དབྱེར་མེད་པ༔ མཐིང་ནག་གྲི་གུག་ཐོད་ཁྲག་འཛིན༔ བེང་ཆེན་མཆན་བཅུག་ཞབས་གཉིས་བགྲད༔ ཨེ་ཀ་ཛཱ་ཊི་གཉིས་མེད་འཁྲིལ༔ མཐིང་ནག་གཡུ་སྤྱང་སྙིང་ཁྲག་འཛིན༔ རྡོ་རྗེའི་གཤོག་བརྒྱངས་དུར་ཁྲོད་ཆས༔ ཡེ་ཤེས་མེ་ཕུང་ཀློང་དུ་བཞུགས༔ ཐུགས་ཀར་འོད་ཀྱི་གུར་ཁྱིམ་དབུས༔ ཡེ་ཤེས་སེམས་དཔའ་ཧེ་རུ་ཀ༔ མཐིང་ནག་རྡོ་རྗེ་དུང་ཁྲག་འཛིན༔ ཐུགས་ཀར་རྡོ་རྗེ་ཧཱུྃ་སྔགས་ཕྲེང༔ དེ་ལས་སྤྲུལ་པའི་ཁྲོ་ཆུང་གིས༔ འབྱུང་པོ་བཀུག་སྟེ་གདན་དུ་བྱས༔ ཁྲོ་བོའི་སྤྲིན་སྤྲོས་བདུད་དཔུང་བཅོམ༔ ཚུར་འདུས་མ་ཧཱ་ཀཱ་ལ་བཅུ༔ བེང་ཕུར་འཛིན་པས་འབྱུང་པོ་གཟིར༔ ཕྲ་མེན་བྱ་རོག་གདོང་ཅན་གྱིས༔ ཕྱོགས་མཚམས་མ་ལུས་སྲུང་བར་བསམ༔ ཨོཾ་མ་ཧཱ་ཀཱ་ལ་ཧཱུྃ་ཧཱུྃ་ཕཊ༔ དེ་ནི་བསྙེན་པའི་རིམ་པ་འོ༔ ས་མ་ཡ༔ དེ་ནས་ལས་སྒྲུབ་རིམ་པ་ནི༔ སྐུ་འབག་འབུར་དུ་དོད་པ་འམ༔ དར་ནག་ངོས་སུ་གསེར་གྱིས་བྲི༔ གསུང་རྟེན་འཁོར་ལོ་རྩིབས་བརྒྱད་པའི༔ དབུས་སུ་ཧཱུྃ་བྷྱོ་སྲོག་སྔགས་དང༔ རྩིབས་ལ་སྡེ་བརྒྱད་སྙིང་པོ་བཀོད༔ མུ་ཁྱུད་གཅིག་དྲིལ་ཤཱ་ས་ན༔ ཡེ་ཤེས་བརྟན་པའི་སྔགས་རྣམས་འགོད༔ བདག་སྲུང་དངོས་གྲུབ་སྩོལ་བ་དང༔ དགྲ་བགེགས་སྒྲོལ་ཅེས་སྤེལ་ཚིག་སྦྱར༔ ཕ་ཝང་ལོང་བུར་ཧཱུྃ་བྲིས་པ༔ དཔའ་བོ་གཡུལ་དུ་བསད་པའི་སྙིང༔ མ་ཉམས་པ་འམ་དུམ་བུ་བཅས༔ ཐོད་བྱང་འབྲུ་སྨན་རིན་པོ་ཆེས༔ བཀང་བའི་ནང་དུ་ལྷན་ཅིག་བཞག༔ གྲི་ལྕགས་ལས་བྱས་རྩེ་གསུམ་མདུང༔ དར་ནག་སྔགས་ཀྱིས་མཚན་པ་བཅས༔ སྐུ་གསུང་ཐུགས་ཡོན་ཕྲིན་ལས་རྟེན༔ ཕྱི་རྟེན་རུ་མཚོན་སྐུ་འབག་དང༔ བདུད་ཆས་འཆམས་སྟབས་རྟ་ནག་གཡག༔ ར་ལུག་བྱ་ནག་རྟ་དམར་སོགས༔ ཁྱད་པར་ལྕགས་སམ་ཐོད་པའི་སྣོད༔ ཐོད་ཆང་འབྲུ་སྣའི་གཏོར་མས་བཀང༔ རྣོ་དབལ་དབྱིབས་དང་དྲག་རྒྱན་ཅན༔ སྐུ་གཟུགས་ཐུགས་རྟེན་རུ་མཚོན་གཟུག༔ ནང་དུ་གཏོར་སྔགས་ཤོག་དྲིལ་བཅུག༔ ལས་གཏོར་ཤ་དང་ཁྲག་གིས་བརྒྱན༔ དུས་དང་རྒྱུན་དུ་འབུལ་བར་བྱ༔ དུར་ཁྲོད་གནས་སུ་སྟེགས་བུ་ལ༔ རོ་སོལ་གྱིས་བྱུགས་ཁྲག་ཆེན་དང༔ མཚལ་གྱིས་དཀྱིལ་འཁོར་བྲི་བ་ནི༔ འཁོར་ལོ་རྩིབས་བརྒྱད་ཨེ་དང་བཅས༔ དབུས་སུ་རྟེན་རྣམས་བཀོད་པར་བྱ༔ ལས་མགོན་མདུན་དུ་དམིགས་ནས་སུ༔ ཡབ་ཡུམ་ཐུགས་ཀར་ཉི་མ་ལ༔ ཧཱུྃ་བྷྱོའི་མཐའ་མར་སྔགས་ཀྱིས་བསྐོར༔ བདག་གི་ཐུགས་ཀའི་འོད་ཀྱིས་བསྐུལ༔ ཅི་བཅོལ་ལས་རྣམས་སྒྲུབ་པར་བསམ༔ སྤྲུལ་པའི་ཕོ་ཉ་གྲངས་མེད་པ༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཐོགས་པ་རྣམས་ཀྱིས་དགྲ་བོ་བཀུག༔ སྨྱོ་ཁྲག་ཆར་ཕབ་ལྷ་སྲུང་བྲོས༔ གཏོར་ཟོར་ཐུན་གྱིས་གཟུགས་ཕུང་བཤིག༔ རྩེ་གསུམ་འབར་བས་དགྲ་སྲོག་བཅད༔ ཤ་ཁྲག་ཀུན་གྱིས་རོལ་པར་བསམ༔ སེང་སྐད་ང་རོ་བསྒྲགས་པ་ཡིས༔ སྡེ་བརྒྱད་བདུད་དམག་འུར་གྱིས་འདུས༔ དགྲ་བགེགས་ཤ་ཁྲག་རོལ་ནས་ཀྱང༔ ཐམས་ཅད་ཞེ་སྡང་ཆེར་འཁྲུགས་ནས༔ གད་རྒྱངས་སྒྲོག་ཅིང་རུ་མཚོན་ཕྱར༔ དར་ནག་གཡབ་མོ་བརྡབས་ནས་སུ༔ དགྲ་བོའི་ཡུལ་དུ་ཆས་པར་བསམ༔ ཕྱག་གཡས་མདུང་དར་བརྡབས་པ་ཡིས༔ དགྲ་ལ་གཡུལ་ངོ་ཆེར་བཀྱེས་ཏེ༔ བདུད་དམག་རྣམས་ཀྱིས་མཚོན་ཆར་ཕབ༔ མི་བསད་ཡུལ་མཁར་བཤིག་པ་དང༔ ལྷ་སྲུང་བྲན་དུ་བཀོལ་བར་བསམ༔ བསྙེན་སྒྲུབ་ལས་སྦྱོར་དོན་རྣམས་འགྲུབ༔ ས་མ་ཡ༔ གཏོར་མཆོད་རཾ་ཡཾ་ཁཾ་གིས་སྦྱང༔ དྲག་པོ་བནྡྷའི་སྣོད་ཡངས་སུ༔ དམ་ཉམས་དགྲ་བགེགས་བསྒྲལ་པ་ཡི༔ ཤ་ཡི་རི་བོ་ཁྲག་གི་མཚོ༔ ཡེ་ཤེས་བདུད་རྩིའི་ངོ་བོ་ལ༔ ཕྱི་ནང་གསང་བའི་མཆོད་པའི་སྤྲིན༔ རབ་འབྱམས་ནམ་མཁའ་གང་བར་བསམ༔ ཨོཾ་ཨཱཿཧཱུྃ༔ མདུན་དུ་དུར་ཁྲོད་ས་གཞིའི་དབུས༔ འཁོར་ལོ་རྩིབས་བརྒྱད་ལྟེ་བ་ལ༔ ཧཱུྃ་ལས་བདུད་མགོན་སེང་གེའི་གདོང༔ མཐིང་ནག་ཆར་སྤྲིན་འཁྲུགས་པའི་མདོག༔ ཕྱག་གཡས་ཁ་ཊྭཱཾ་དར་ནག་ཕྱར༔ གཡོན་པས་ཤ་ཁྲག་གཏོར་མ་བསྣམས༔ དར་ནག་གོས་གསོལ་བདུད་ཀྱི་ཆས༔ བདུད་རྟ་ནག་པོ་རླུང་གཤོག་འཆིབས༔ བྷྱོ་ལས་བདུད་མོ་སེང་གེའི་གདོང༔ དམར་མོ་རྩེ་གསུམ་གློ་སྙིང་འཛིན༔ བེར་དམར་གསོལ་ནས་བཙན་རྟ་འཆིབས༔ གཡས་གཡོན་བམ་རོ་ཕོ་མོ་གཉིས༔ འཇིགས་གཟུགས་སྤྱི་འུ་ཚུགས་སུ་འགྲོ༔ སྡེ་བརྒྱད་བདུད་དམག་འབུམ་གྱིས་བསྐོར༔ གནས་གསུམ་ཨོཾ་ཨཱཿཧཱུྃ་གིས་མཚན༔ འོད་འཕྲོས་འཁོར་བཅས་སྤྱན་དྲངས་གྱུར༔ ཨོཾ་མ་ཧཱ་ཀཱ་ལ་སིཾ་ཧ་མུ་ཁ་ཧཱུྃ་ཕཊ༔ ཏྲི་ཧྲིཾ་ཛ༔ ཌཱ་ཀི་སི་ན་ར་མ་ཏྲི་ཧྲིཾ་ཛ༔ ཨ་ཡ་མ་དུ་རུ་ཙ་ཤ་ན་ཙིཏྟ་ཧྲིཾ་ཧྲིཾ་ཛ༔ དྲག་ཏུ་བཟླས་ཤིང་ཐོད་རྔ་དང༔ རྐང་གླིང་དུང་ཆེན་ཤུགས་པའི་སྒྲ༔ དྲག་པོའི་རོལ་མོ་མྱུར་བས་འབོད༔ ཧཱུྃ༔ ཡུལ་གྱི་མིང་ནི་དེ་བཱི་ཀོ་ཊིའི་ཞིང༔ གནས་ཀྱི་མིང་ནི་དཔལ་གྱི་ཙ་རི་ཏྲ༔ དུར་ཁྲོད་མིང་ནི་རྔམས་པ་སྒྲ་ཆེན་སྒྲོག༔ གཞན་ཡང་ཉི་ཤུ་རྩ་བཞིའི་གནས་རྣམས་ནས༔ ཡབ་གཅིག་དཔལ་ལྡན་མགོན་པོ་སེང་གེའི་གདོང༔ ཡུམ་གཅིག་ལྷ་མོ་སི་ན་ར་མ་བཅས༔ ཕོ་ཉ་ལས་མཁན་བདུད་དམག་སྟོང་སྡེའི་ཚོགས༔ དམ་ཚིག་དབང་གིས་མྱུར་དུ་སྤྱན་འདྲེན་ན༔ མ་ཐོགས་རིངས་པའི་ཚུལ་གྱིས་གཤེགས་སུ་གསོལ༔ བཛྲ་ས་མཱ་ཛ༔ ཧཱུྃ༔ དྲག་པོར་གཤེགས་པས་ཁྲག་གི་མཆོད་ཡོན་འབུལ༔ དུག་ཆུའི་ཞབས་བསིལ་དགྲ་བགེགས་གདན་ལ་བཞུགས༔ མགོ་ཕྲེང་དབང་པོའི་མེ་ཏོག་སྐུ་ལ་བརྒྱན༔ འདྲེ་འཇིགས་ཚིལ་ཆེན་བསྲེགས་པའི་དུད་སྤྲིན་གཏིབས༔ ཞུན་ཆེན་རོ་རས་བསྐལ་པའི་མེ་ཆེན་སྦར༔ ཁྲག་ཞག་མཁྲིས་པའི་དྲི་ཆབ་རྒྱ་མཚོར་བསྐྱིལ༔ ཤ་དང་རུས་པའི་ལྷུན་པོ་ཆེར་སྤུངས་ཏེ༔ བདུད་རྩི་རྩ་བརྒྱད་སྟོང་སྦྱར་དཔའ་བོའི་ཕུད༔ འབྲུ་སྣ་ཤིང་ཏོག་བཟའ་དང་བཏུང་བའི་ཚོགས༔ ཕྱི་ནང་གསང་མཆོད་འབུལ་ལོ་བཞེས་སུ་གསོལ༔ སྔོན་གྱི་ཁས་བླངས་དམ་ལས་མ་གཡེལ་བར༔ བསྟན་པ་སྲུང་བའི་ཕྲིན་ལས་མཛད་དུ་གསོལ༔ ཧཱུྃ༔ རྒྱལ་བའི་བསྟན་པ་སྲུང་བའི་མཐུ་རྩལ་ཅན༔ ཧེ་རུ་ཀ་དཔལ་ཐུགས་ལས་སྤྲུལ་པའི་སྲས༔ ཞིང་སྐྱོང་ཆེན་པོ་སེང་གེའི་གདོང་པ་ཅན༔ ཡབ་ཡུམ་སྲས་དང་བཅས་ལ་ཕྱག་འཚལ་བསྟོད༔ གཞན་ཡང་བསྟོད་པ་རྒྱ་ཆེར་བྱ༔ མགོན་པོ་མཆོད་ཅིང་བསྟོད་པས་འགྲུབ༔ ས་མ་ཡ༔ གྲུབ་ནས་བསྟན་དགྲ་བསྒྲལ་བའི་ཕྱིར༔ ཕུང་ཤུལ་ས་ལ་གྲུ་གསུམ་ཧོམ༔ དགྲ་བོའི་ལིངྒ་ཟག་རྫས་བཅས༔ འབོད་རྦད་གསད་གསུམ་སྔགས་བཟླས་ལ༔ གསོད་པའི་ལས་སྦྱོར་བརྩམ་པར་བྱ༔ གཞན་ཡང་གཡུལ་ངོ་བཟློག་པའི་ཕྱིར༔ དུར་ཁྲོད་ས་ལ་བང་རིམ་བཞི༔ གཏོར་མ་ལྷ་གྲངས་བཤམས་ནས་སུ༔ རུ་མཚོན་སྐུ་གཟུགས་སྔགས་བྱང་དང༔ ནམ་མཁའ་མདའ་འཕང་རྒྱང་གསུམ་དང༔ ཕོ་གདོང་མོ་གདོང་བུ་གདོང་དང༔ སྐུ་གླུད་སྤྱན་གཟིགས་རྣམས་དང་བཅས༔ རྟ་ནག་གཡག་ལུག་ར་གསུམ་དང༔ བྱ་ནག་ཁྱི་ནག་རྟ་དམར་དང༔ ཁྱུང་འབྲུག་སྟག་དང་སེང་གེ་དང༔ གཅན་གཟན་སྡེར་ཆགས་རྣམས་ཀྱིས་བསྐོར༔ ཐ་མར་རྩང་དམར་བསྣོལ་བ་དང༔ སྟག་གཟིག་ལྤགས་པས་སྒབ་བསྐོར་བྱ༔ སྟེང་དུ་ནམ་མཁའི་གདུགས་ཕུབ་ལ༔ ཆོས་ཉིད་དག་པའི་སྔགས་ཀྱིས་སྦྱང༔ ནམ་མཁའ་མཛོད་ཀྱིས་མང་པོར་སྤེལ༔ སྔགས་པ་ཞྭ་ནག་གོས་ནག་གྱོན༔ ལྟ་བའི་གདེང་དང་ཏིང་འཛིན་གསལ༔ ལྷ་ཡི་ང་རྒྱལ་ལྡན་པ་ཡིས༔ ཧཱུྃ༔ ང་ནི་དཔལ་ཆེན་ཧེ་རུ་ཀ༔ ང་ནི་ཁམས་གསུམ་ཀུན་གྱི་རྒྱལ༔ སྣང་སྲིད་མ་ལུས་དབང་དུ་བསྡུ༔ ཧཱུྃ༔ དུར་ཁྲོད་འཇིགས་པའི་ས་གཞི་ལ༔ གནམ་ལྕགས་ལྷུན་པོ་བརྩེགས་པའི་རྩེར༔ འཇིགས་སུ་རུང་བའི་གཞལ་ཡས་ཁང༔ ཐོད་པའི་རྩིག་པ་ཧ་ཧར་བཞད༔ ཀངྐ་འདབ་ཆགས་ཧཱུྃ་ཧཱུྃ་སྒྲོག༔ ལོགས་ནས་གཅན་གཟན་ངར་སྐད་འདོན༔ སེང་ཆེན་འགྱིང་ཞིང་སྟག་ཆེན་རྔམས༔ ཁྱུང་ཆེན་ལྡིང་ཞིང་བྱ་ནག་འཇུམ༔ འབྲུག་སྒྲ་གནམ་ལྕགས་ཐོག་སེར་འབེབ༔ ཁྲག་ཞག་འཁྲུགས་པའི་ཀློང་དཀྱིལ་དུ༔ དགྲ་བགེགས་མི་རྟ་བསྒྲལ་པའི་ཁྲི༔ ཕྱོགས་མཚམས་ཀུན་ཏུ་མེ་རླུང་འཁྲུགས༔ རོ་ལངས་རྒྱུག་ཅིང་ཀིང་རུས་གར༔ ཁྱི་སྤྱང་ངུ་ཟུག་དི་རི་རི༔ ཤ་ཁྲག་ལོངས་སྤྱོད་བསམ་མི་ཁྱབ༔ སྤྱན་གཟིགས་སྣ་ཚོགས་སྤྲིན་ལྟར་གཏིབས༔ ཧཱུྃ༔ གསོན་ཅིག་དགོངས་ཤིག་ནག་པོ་ཆེ༔ བདག་ནི་རྣལ་འབྱོར་སྒྲུབ་པ་པོ༔ རྡོ་རྗེ་འཆང་དབང་ཧེ་རུ་ཀས༔ དཀྱིལ་འཁོར་གཅིག་ཏུ་བསྡུས་པ་ཡི༔ རྡོ་རྗེའི་སྤུན་གྲོགས་དམ་ཚིག་ཅན༔ མཆོད་ཕྱིར་བསྒྲུབ་ཕྱིར་སྤྱན་འདྲེན་ནོ༔ ཧཱུྃ༔ ཆོས་ཀྱི་དབྱིངས་ནས་སྐུ་བཞེངས་ལ༔ མ་ཧཱ་ཀཱ་ལ་གནས་འདིར་བྱོན༔ དུར་ཁྲོད་ཆེན་པོ་བསིལ་བའི་ཚལ༔ རྔམས་པ་སྒྲ་སྒྲོག་ལ་སོགས་པ༔ དུར་ཁྲོད་ཆེན་པོ་བརྒྱད་རྣམས་ནས༔ སྒྲོལ་གིང་ཆེན་པོ་གཤེགས་སུ་གསོལ༔ ཧེ་རུ་ཀ་ཡི་གནས་བཅུ་ནས༔ ཞིང་སྐྱོང་ཆེན་པོ་གཤེགས་སུ་གསོལ༔ མ་ལ་ཡ་ཡི་ནགས་ཁྲོད་ནས༔ བཀའ་སྡོད་ཆེན་པོ་གཤེགས་སུ་གསོལ༔ གངས་རྒྱལ་ཏི་སེ་ཙ་རི་ཏྲ༔ ལ་ཕྱི་གངས་དང་ཁ་བ་དཀར༔ གངས་རྒྱལ་པདྨ་ཤེལ་རི་སོགས༔ གངས་ར་རྫོང་ཆེན་ལ་སོགས་ནས༔ སྒྲུབ་གནས་སྲུང་མ་གཤེགས་སུ་གསོལ༔ རྡོ་རྗེ་གདན་དང་ན་ལེནྡྲ༔ ལྷ་ས་བསམ་ཡས་ལ་སོགས་ནས༔ ཆོས་འཁོར་སྐྱོང་བ་གཤེགས་སུ་གསོལ༔ ཧཱུྃ༔ རི་རབ་བྱང་ལ་གནས་བཅས་ནས༔ ལྷ་མིན་གཡུལ་ངོ་ཟློག་པར་བྱེད༔ དུར་ཁྲོད་འབར་བའི་ཕོ་བྲང་དུ༔ བཞུགས་པའི་གནས་སུ་དགྱེས་པར་མཛོད༔ ཧཱུྃ༔ རྒྱལ་བའི་སྐུ་གསུང་ཐུགས་ཀྱི་རྟེན༔ ཆོས་འཁོར་གཉན་པོའི་གཙུག་ལག་ཁང༔ མདོ་རྒྱུད་བཤད་དང་སྒྲུབ་པའི་སྡེ༔ རྡོ་རྗེ་འཛིན་པ་སྐུལ་ཞིང་མཉེས༔ ཡི་དམ་ལྷ་སྒོམ་སྔགས་ཀྱི་རྒྱུན༔ འོད་གསལ་རྡོ་རྗེ་སྙིང་པོ་སྒོམ༔ གཉེར་དུ་གཏད་པའི་རྟེན་ཆེན་པོ༔ བདུད་མགོན་ཁྱོད་ཀྱི་ཆས་སུ་ཞུགས༔ གཏུམ་ལ་རྔམས་པའི་ཚུལ་གྱིས་འཕྱོངས༔ རུ་མཚོན་ནག་པོ་ཕྱར་ནས་སུ༔ གཡག་རྒོད་རྟ་ནག་རྒྱན་གྱིས་བརྒྱན༔ དཔའ་བོ་ཁྲབ་ཆེན་ང་རོ་སྒྲོག༔ མཚོན་ཆ་ཕྱར་ཞིང་ཀུས་འདེབས་པ༔ ཞྭ་ནག་གོས་ནག་རུ་འདྲེན་ཚོགས༔ སེང་གེ་སྟག་ཆེན་གཅན་གཟན་འཕྱོ༔ བྱ་ཁྱུང་ཀངྐ་བྱ་ནག་འབུམ༔ མི་ནག་ཁྱི་ནག་འཇིགས་རུང་རྣམས༔ སྤྱན་གཟིགས་ཕྱི་ཡི་རྟེན་དུ་འབུལ༔ ཤ་ཁྲག་འབྲུ་སྣའི་གཏོར་ཆེན་བཤམས༔ དུར་ཁྲོད་མཆོག་གི་མཆོད་སྤྲིན་དང༔ སྨན་རཀ་བདུད་རྩི་དཔའ་བོའི་ཕུད༔ མཆོད་ཕྱིར་ནང་གི་རྟེན་དུ་འབུལ༔ སྐུ་གསུང་ཐུགས་ཡོན་ཕྲིན་ལས་རྟེན༔ མ་ཧཱ་ཀཱ་ལའི་ཚོགས་རྣམས་བསྐྱེད༔ ཛཔ྄་བཟླས་དོན་གྱི་རྫོགས་རིམ་སྒོམ༔ གསང་བའི་རྟེན་གྱིས་ཐུགས་དམ་བསྐང༔ དམ་ཅན་འབོད་ཅིང་དགྲ་ལ་རྦད༔ དམ་ཉམས་གསོད་པའི་འཕྲུལ་འཁོར་བཅའ༔ བདུད་ཀྱི་གཡུལ་ངོ་བཟློག་པའི་ཕྱིར༔ དྲག་པོའི་ལས་སྦྱོར་འདི་བགྱིས་པས༔ མ་ཧཱ་ཀཱ་ལའི་ཐུགས་དམ་བསྐང༔ བཅོལ་བའི་ཕྲིན་ལས་མྱུར་དུ་སྒྲུབས༔ ཧཱུྃ་བྷྱོ༔ སྐྱེ་བ་མེད་པ་ཆོས་ཀྱི་དབྱིངས༔ འགག་མེད་ལྷུན་གྲུབ་འཇིག་རྟེན་དུ༔ སྲིད་གསུམ་རི་རབ་གླིང་བཞིར་སྣང༔ སྣ་ཚོགས་ནམ་མཁའ་གདུགས་སུ་ཕུབ༔ ཉི་མ་ཟླ་བ་གཟའ་སྐར་བཀྲ༔ སྲིད་པའི་རི་རབ་རྩེ་མོ་ན༔ བྱ་རྒྱལ་ཁྱུང་ཆེན་མཁའ་ལ་ལྡིང༔ ལྟས་ངན་ཟློག་པའི་ཕོ་ཉ་ཡིན༔ རྣལ་འབྱོར་བདག་ཅག་འཁོར་བཅས་ཀྱི༔ སྐུ་གླུད་རྒྱན་དང་ལྡན་པ་འབུལ༔ སྡེ་བརྒྱད་འབྱུང་པོ་ཐམས་ཅད་ཀྱིས༔ བཟུངས་པ་ཐོངས་ལ་བཅིངས་པ་ཁྲོལ༔ ཐབས་ཀྱི་མདའ་ལ་ཤེས་རབ་འཕང༔ ཟུང་འཇུག་རྒྱང་བུ་རྒྱན་དང་ལྡན༔ སྤྱི་དང་སྒོས་ཀྱི་གླུད་དུ་འབུལ༔ སྤྱི་ཆག་སྒོས་ཆག་ཐམས་ཅད་ཟློག༔ ཕོ་གདོང་མོ་གདོང་བུ་གདོང་རྣམས༔ ཕོ་མོ་བུ་ཚའི་གླུད་དུ་འབུལ༔ དུས་མིན་འཆི་བ་ཐམས་ཅད་ཟློག༔ དར་ཟབ་རྐང་འགྲོ་འབྲུ་ནོར་རྣམས༔ ནང་བཅུད་མཁོ་དགུའི་གླུད་དུ་འབུལ༔ རྒུད་ཅིང་དབུལ་ཕོངས་ཉམ་ཐག་ཟློག༔ གཅན་གཟན་འདབ་ཆགས་སྣ་ཚོགས་པ༔ ལྟས་ངན་ཆོ་འཕྲུལ་བཟློག་ཕྱིར་འབུལ༔ རྨི་ལམ་མཚན་ལྟས་ངན་པ་ཟློག༔ རི་རབ་སྐུ་མཁར་ནམ་མཁའ་རྣམས༔ ཡུལ་དང་མཁར་གྱི་གླུད་དུ་འབུལ༔ ཡུལ་དང་མཁར་ལ་གནོད་པ་ཟློག༔ མི་རྟའི་དམག་ཚོགས་མང་པོ་འབུལ༔ ཕས་ཀྱི་གཡུལ་ངོ་ཐམས་ཅད་ཟློག༔ ཧཱུྃ༔ བདུད་ཀྱི་མགོན་པོ་ཡབ་དང་ཡུམ༔ དམ་ཉམས་དགྲ་བོའི་སྟེང་དུ་ཆོས༔ འགུགས་པའི་ཕོ་ཉ་ལྕགས་ཀྱུ་ཅན༔ དགྲ་བོའི་བླ་འཁྱམས་འདིར་ཁུག་ཅིག༔ ནད་ཀྱི་རྐྱལ་པ་ཁ་ཕྱེས་ལ༔ སྨྱོ་ཁྲག་ལྷ་སྲུང་རྣམས་ལ་ཐོབས༔ དགྲ་བོ་མགོན་སྐྱབས་བྲལ་བར་གྱིས༔ མཚོན་ཆ་ཐོགས་པའི་ཤན་པ་འབུམ༔ མདུང་དང་དམར་གཏོར་རལ་གྲིའི་ཐུན༔ དགྲ་བོའི་གཟུགས་ཕུང་སྙིང་ལ་ཐོབས༔ སྲོག་རྩ་དམར་པོ་རྦད་ཀྱིས་ཆོད༔ ཧཱུྃ༔ ལས་མགོན་ཡབ་ཡུམ་བཀའ་འཁོར་ཞལ་ཕྱེས་ཤིག༔ དམ་ཉམས་དགྲ་བགེགས་རྣམས་ཀྱི་ལུས་ངག་ཡིད༔ ཁ་རྗེ་དབང་ཐང་ཚེ་བསོད་ལོངས་སྤྱོད་འཁོར༔ ཞལ་དུ་བསྟབ་བོ་ལྷག་མ་མེད་པར་བཞེས༔ ཧཱུྃ་བྷྱོ༔ བདུད་ཀྱི་དམག་དཔོན་སེང་གེའི་གདོང༔ ཡུམ་མཆོག་སི་ན་ར་མ་དང༔ བློན་པོ་བཛྲ་སཱ་དྷུ་རྩལ༔ ལས་བྱེད་སྡེ་བརྒྱད་བདུད་དམག་ཚོགས༔ བསྟན་པ་བཤིག་པའི་དགྲ་ལ་བྷྱོ༔ ཧཱུྃ་བྷྱོ༔ ཕོ་ཉ་བམ་རོ་ཕོ་མོ་གཉིས༔ སྤྲེ་འུའི་གདོང་ཅན་འཇིགས་པའི་གཟུགས༔ རྐང་པས་དམར་གཏོར་དགྲ་ལ་འཕེན༔ ཆོ་འཕྲུལ་མང་པོ་དགྲ་ལ་ཐོངས༔ ཧཱུྃ་བྷྱོ༔ དམར་གྱི་གཏོར་མ་ཐོག་གི་ཟོར༔ ཉི་ཟླ་ཟོར་འཕེན་གནམ་ས་གཡོ༔ ཕོ་གདོང་དཔའ་བོ་ཞུབས་ཅན་རྣམས༔ སྟོབས་དང་ལྡན་ཅིང་མཚོན་ཆ་འཕེན༔ མོ་གདོང་བུད་མེད་འདྲེ་མོའི་གཟུགས༔ དམོད་མོ་བྱེད་ཅིང་དུལ་མོ་རྡེབ༔ བུ་གདོང་བྱིས་པ་འུར་རྡོ་ཐོགས༔ ཀུ་སྒྲ་འདོན་ཅིང་འུར་རྡོ་འཕེན༔ མདའ་བཀྲ་མདའ་ཟོར་ཤ་ར་ར༔ འཕང་བཀྲ་འཕང་ཟོར་ཧྲི་ལི་ལི༔ རྒྱང་བུ་གསལ་ཤིང་རྣོ་དབལ་ཅན༔ ཡས་སྟགས་མཐུན་རྫས་སྣ་ཚོགས་དང༔ བྱ་གཅན་རི་དྭགས་ལྟས་ངན་འཕྱོ༔ ཀེང་རུས་རོ་ལངས་གར་བྱེད་ཅིང༔ ངར་མི་འོ་དོད་སྣ་ཚོགས་འབོད༔ ཁྱི་སྤྱང་མང་པོ་ངུ་ཟུག་བྱེད༔ ཆོ་འཕྲུལ་སྲིད་གསུམ་གཡོ་བ་ཡི༔ ཡས་ཟོར་འདི་ནི་དགྲ་ལ་འཕེན༔ བྷྱོ་བྷྱོ་སྡང་བའི་དགྲ་ལ་བྷྱོ༔ བྷྱོ་བྷྱོ་དམིགས་པའི་ཡུལ་དུ་བྷྱོ༔ དགྲ་ཡུལ་ཐལ་བ་རྡུལ་དུ་རློགས༔ ཕུང་བྱེད་འཕྲུལ་འཁོར་ད་ཕོབ་ཅིག༔ ཅེས་བསྐུལ་རིག་པ་ཧུར་ཕྱུང་ངོ༔ ལས་རྣམས་འགྲུབ་རྗེས་གཏང་རག་གཏང༔ སྟོབས་ཆེན་གཡུལ་ངོ་ཐམས་ཅད་བཟློག༔ གསད་ལས་ཞག་ལས་མི་འགོར་རོ༔ ས་མ་ཡ༔ བརྒྱུད་འཛིན་དམ་ཚིག་ལྡན་པ་ལ༔ མགོན་པོའི་བཀའ་གཏད་བྱ་བ་ནི༔ དཀྱིལ་འཁོར་རྟེན་མཆོད་འདུ་བྱས་ལ༔ སྤྱན་དྲངས་མཆོད་བསྟོད་བཟླས་པ་བྱ༔ སློབ་མས་མཚོན་ཆ་འབྲུ་ནོར་སོགས༔ ཡོན་དུ་ཕུལ་ནས་ཐལ་མོ་སྦྱར༔ ཧཱུྃ༔ སངས་རྒྱས་ཀུན་གྱི་བསྟན་པ་སྲུང༔ སྙིང་ཉེ་བཀྲ་ཤིས་མཐུ་ཆེ་བ༔ མྱུར་མཛད་མགོན་པོ་སེང་གེའི་གདོང༔ བླ་མས་བདག་ལ་བསྩལ་དུ་གསོལ༔ དེ་ནས་སློབ་མ་ལྷར་བསྐྱེད་ལ༔ སྐུ་རྟེན་གཏོར་མ་ལག་ཏུ་གཏད༔ ཧཱུྃ༔ ལས་ཀྱི་མགོན་པོ་སེང་གེའི་གདོང༔ ཡབ་ཡུམ་ཕོ་ཉ་ལས་བྱེད་བཅས༔ སྔོན་གྱི་རྒྱལ་བའི་བཀའ་བཞིན་དུ༔ སྒྲུབ་པ་པོ་ལ་གྲོགས་གྱིས་ཤིག༔ ཀཱ་ཡ་བཛྲ་ས་མ་ཡ་སཏྭཾ༔ སྔགས་བྱང་སློབ་མའི་ལག་ཏུ་གཏད༔ བདུད་རྩི་སློབ་མར་སྦྱིན་པ་དང༔ གཏོར་མར་བྲན་ལ་གཉིས་ཀ་ཡི༔ ལྕེ་ལ་རྡོ་རྗེ་བདུད་རྩི་སྦྱིན༔ སྤྱི་བོར་རྡོ་རྗེ་བཞག་ནས་སུ༔ དམ་ལས་མི་འདའ་བྲོ་བོར་བསམ༔ བཛྲ་ས་མ་ཡ་ཨི་དན་ན་ར་ཀན༔ སློབ་མས་གསང་སྔགས་བཟླ་རུ་གཞུག༔ ཧཱུྃ༔ དམ་ཚིག་འཛིན་པའི་ནག་པོ་ཆེ༔ གསུང་གི་གསང་སྔགས་བཟླས་པ་ཡིས༔ ཕྲིན་ལས་གང་བརྩམ་འགྲུབ་པ་དང༔ བསྟན་སྲུང་དམོད་པའི་དངོས་གྲུབ་སྩོལ༔ ཝཱ་ཀ་སརྦ་ས་མ་ཡ་ཨ་བྷི་ཥིཉྩ་ཧཱུྃ༔ ཕྱག་མཚན་ལག་ཏུ་བཞག་ནས་སུ༔ ཧཱུྃ༔ སངས་རྒྱས་ཀུན་གྱི་ཕྲིན་ལས་པ༔ རྣལ་འབྱོར་ཀུན་གྱི་བཀའ་སྡོད་ཆེ༔ གསང་སྔགས་སྲུང་མ་མཐུ་རྩལ་ཅན༔ ཐུགས་རྗེས་རྟག་ཏུ་འདི་སྐྱོངས་ཤིག༔ སརྦ་ཙིཏྟ་ས་མ་ཡ་ཨཱ་ས་ན་ཏིཥྛནྟུ༔ ཁྱད་པར་རྟེན་རྣམས་ལག་ཏུ་གཏད༔ ཧཱུྃ༔ བདུད་ཀྱི་མགོན་པོ་མཐུ་བོ་ཆེ༔ རྟོགས་ན་རང་དང་གཉིས་སུ་མེད༔ མ་རྟོགས་གཉིས་འཛིན་རུ་དྲའི་རྒྱུ༔ གཉིས་མེད་ཟུང་འཇུག་རྟོགས་པ་ཡིས༔ བསྙེན་སྒྲུབ་བསྟན་སྲུང་ལས་རྣམས་སྒྲུབས༔ ས་མ་ཡ་ཨཱ་བེ་ཤ་ཡ་ཨཱ༔ སློབ་མས་དམ་ཚིག་མ་ཉམས་པར༔ བསྙེན་སྒྲུབ་མཆོད་པའི་ལས་ལ་བརྩོན༔ འདི་ནི་བསྒྲུབ་ན་སྙིང་ཉེ་ཞིང༔ བཀྲ་ཤིས་དངོས་གྲུབ་མྱུར་དུ་སྩོལ༔ རྦད་ན་ཐོགས་པ་མེད་པར་འགྲོ༔ གསད་པ་སྤུ་གྲི་བཞིན་དུ་རྣོ༔ ཨོ་རྒྱན་པདྨ་བདག་འདྲ་དང༔ ལྷ་སྲས་བརྒྱུད་འཛིན་དམ་ལྡན་ལ༔ ལུས་དང་གྲིབ་མ་བཞིན་དུ་འགྲོགས༔ བསྟེན་སྒྲུབ་མཆོད་པའི་དོན་ལ་བརྩོན༔ སྤྱན་གཟིགས་སྤྲོས་པ་ཇི་ལྟར་ཆེ༔ དེ་དང་འཚམ་པའི་དོན་རྣམས་སྒྲུབ༔ སྨོན་ལམ་བཏབ་ཅིང་གཏེར་དུ་སྦས༔ ནམ་ཞིག་ལས་འཕྲོ་ཅན་དང་འཕྲད༔ བསྟན་པ་སྲུང་བའི་གྲོགས་སུ་འགྲོགས༔ མི་འབྲལ་ཡལ་བར་མ་དོར་ཅིག༔ ཅེས་གསུངས་མ་འོངས་དོན་ཆེད་དུ༔ ཡི་གེར་བཀོད་ནས་གཏེར་དུ་སྦས༔ སྨོན་ལམ་བཞིན་དུ་འགྲུབ་པར་ཤོག༔ ས་མ་ཡ་རྒྱ་རྒྱ༔ སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པས་མདོ་ཁམས་ནམ་མཁའ་མཛོད་ཀྱི་ལྷོ་ཕྱོགས་གཤིན་རྗེའི་རྦ་དོང་ནས་སྤྱན་དྲངས་པའི་ཤོག་སེར་ཤོག་དྲིལ་ལས། ཕྲིན་ལས་འགྲོ་འདུལ་དབང་གི་གནས་མཆོག་རི་བོ་དབང་ཞུའི་ལྟེ་བ་ཟླ་གམ་དབང་ཆེན་ཕུག་ཏུ་གཏན་ལ་ཕབ་པའི་ཡི་གེ་པ་ནི་པདྨ་གར་དབང་བློ་གྲོས་མཐའ་ཡས་པའི་སྡེས་བགྱིས་པ་སརྦ་སིདྡྷི་རསྟུ།། །།

RTZ-Tsagli-Dzongsar-'I-07-mgon po gnam lcags thog mda'-01.jpeg
RTZ-Tsagli-Dzongsar-'I-07-mgon po gnam lcags thog mda'-02.jpeg
RTZ-Tsagli-Dzongsar-'I-07-mgon po gnam lcags thog mda'-03.jpeg
RTZ-Tsagli-Dzongsar-'I-07-mgon po gnam lcags thog mda'-04.jpeg
RTZ-Tsagli-Dzongsar-'I-07-mgon po gnam lcags thog mda'-05.jpeg
RTZ-Mandala-290-bstan srung skor bzhi'i mgon po gnam lcags thogs dang.jpeg
RTZ-Mandala-Dzongsar-06-544-mgon po gnam lcags thog mda'.jpeg

Footnotes[edit]

Other Information[edit]

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).