Terdzo-ZHI-015



Property "author" has been marked for restricted use.








Terdzo-ZHI-015.pdf
Click the picture above to view the Shechen manuscript.

རྟ་ལྷ་གནོད་སྦྱིན་ཆེན་པོ་ཀུ་བེ་ར་ཡི་བསྙེན་སྒྲུབ་མཆོད་བསྟོད་གཅིག་དྲིལ་རྒྱུད་མང་པོའི་བཅུད་བསྡུས་

rta lha gnod sbyin chen po ku be ra yi bsnyen sgrub mchod bstod gcig dril rgyud mang po'i bcud bsdus

by  ཀརྨ་ཆགས་མེད་ (Karma Chakme)
Volume 51 (ཞི) / Pages 215-216 / Folios 1a1 to 1b6

Tibetan Text

རྟ་ལྷ་གནོད་སྦྱིན་ཆེན་པོ་ཀུ་བེ་ར་ཡི་བསྙེན་སྒྲུབ་མཆོད་བསྟོད་གཅིག་དྲིལ་རྒྱུད་མང་པོའི་བཅུད་བསྡུས་ཡོད། བཛྲ་པཱ་ཎི་ལ་ན་མོ། ཀུ་བེ་ར་མཆོད་པར་འདོད་པས། གཏོར་མ་རིན་པོ་ཆེའི་དབྱིབས་ཅན་གཅིག་བྱས་ལ། ཧཱུྃ། མདུན་དུ་གནོད་སྦྱིན་ཀུ་བེ་ར། །མདོག་ནག་གོ་ཁྲབ་རྨོག་ཞུ་ཅན། །སྔོན་པོ་ཆུ་རིས་ཆིབས་སུ་འཆིབ། །གཡས་ན་རལ་གྲི་འབར་བ་བསྣམས། །གཡོན་ན་གཏེར་གྱི་ནེའུ་ལེ་བསྣམས། །ཐུགས་ཀའི་འོད་ཀྱིས་སྤྱན་དྲངས་གྱུར། །བྱང་ཕྱོགས་སྐྱོང་བའི་ཞིང་ཁམས་ནས། །རྣམས་སྲས་ཐུགས་ལས་སྤྲུལ་པའི་སྲས། །ཀུ་བེ་ར་ནི་རྫུ་ཕྲུལ་ཅན། །གནོད་སྦྱིན་འབུམ་གྱི་འཁོར་དང་བཅས། །བདག་གིས་མཆོད་ཕྱིར་སྤྱན་འདྲེན་ན། །དམ་ཚིག་དབང་གིས་གཤེགས་སུ་གསོལ། །རིན་ཆེན་ཁྲི་མཆོག་པད་ཟླ་དང་། །རྟ་མཆོག་བརྗིད་པའི་ཁྲི་སྟེང་དུ། །དགྱེས་པའི་ཚུལ་གྱིས་བཞུགས་ནས་ཀྱང་། །སྔོན་ཚེ་ཐུབ་པའི་དབང་པོ་དང་། །གསང་བདག་དམ་ཚིག་རྗེས་དགོངས་ལ། །བཅོལ་བའི་ཕྲིན་ལས་འགྲུབ་པར་མཛོད། །ཨོཾ་ཀུ་བེ་ར་ཡ་ས་མ་ཡ། ཛཿཧཱུྃ་བཾ་ཧོ་ཏིཥྛ་ལྷན། མེ་ཏོག་བདུག་སྤོས་མར་མེ་དྲི། །སྣ་ཚོགས་ཞལ་ཟས་རོལ་མོའི་ཚོགས། །འདོད་ཡོན་སྣ་ལྔ་རིན་ཆེན་བདུན། །བཀྲ་ཤིས་རྟག་རྫས་འབྲུ་སྨན་དང་། །དཀར་གསུམ་མངར་གསུམ་གཏོར་མ་འབུལ། །འཁོར་བཅས་མཉེས་ཤིང་ཚིམས་གྱུར་ཅིག །ཨ་ཀཱ་རོ་སོགས། ཨོཾ་ཀུ་བེ་ར་ཡ་ས་པ་རི་ཝཱ་ར་ཨི་དམ་བྷ་ལིཾ་ཏ་གྷྲི་ཧཱནྟུ། ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪ། མ་མ་སརྦ་ཀརྨ་སིདྡྷི་ཨ་མོ་ག་སྭཱ་ཧཱ། ཨརྒྷཾ་སོགས། ཀུ་བེ་ར་ནི་སྐུ་མདོག་ནག །རྫུ་ཕྲུལ་རྟ་ཡི་སྟེང་ན་བཞུགས། །གཡོན་པས་ནེའུ་ལེ་གཡས་པ་ན། །རལ་གྲི་བསྣམས་ལ་ཕྱག་འཚལ་བསྟོད། །མཆོད་སྦྱིན་གཏོར་མ་འདི་བཞེས་ལ། །བདག་གི་རྟ་འདི་སྲུང་སྐྱོབ་མཛོད། །བདག་ཏུ་ཟུངས་ལ་འཚོ་བར་གྱིས། །གཞི་བྱེས་ལམ་གསུམ་གར་འགྲོ་ཡང་། །རྟ་ཡི་རྫི་བོ་ཁྱེད་ཀྱིས་མཛོད། །གནོད་ཅིང་འཚེ་བ་མ་གཏང་ལ། །རྟ་འདྲེ་རྟིལ་སྲིའི་ཁ་ཁོག་ཅིག །ཅེས་བརྗོད་ལ་སྲབ་མདའ་བཞེས་པའི་ཚུལ་དུ་བྱ། རྟའི་རྫི་བོ་བྱེད་པར་ཁས་བླངས་པར་བསམ། ཐུགས་ཀར་ཟླ་བའི་གདན་ལ་ཀཾ་ཡིག་གི་མཐར་སྔགས་གཡས་སུ་བསྐོར་བར་བསམ་ལ། ཨོཾ་ཨཱཿཀུ་བེ་ར་ཡ་སྭཱ་ཧཱ། གྷོ་ར་རཀྵ་རཀྵ་བྷྲཱུྃ་བྷྲཱུྃ་སྲུངས་ཤིག །ཅེས་རྟ་ཕོ་ལ་སྲུངས་ཤིག་དང་མོ་ལ་སྤེལ་ཅིག་སྦྱར་བ་བརྒྱ་རྩ་བརྒྱད་བཟླའོ། །འདི་ནི་མགོན་པོ་དངོས་གྲུབ་འབྱུང་རྒྱུད་དང་། རྣམ་སྲས་རྒྱུད་ནོར་བུ་འབྱུང་བ་དང་། རྟའི་གཟུངས་དང་། ཁྲི་སྲོང་ལྡེའུ་བཙན་གྱིས་མཛད་པའི་ཆོ་ག་དང་། ཟངས་དཀར་ལུགས་ཀྱི་རྣམ་སྲས་ཆོ་ག་སོགས་ནས་ཨ་རཱ་གས་བསྡུས་པའོ། །མངྒ་ལཾ། ཤུ་བྷཾ།། །། ༈ དཔེ་ཚན་འདི་སྔོན་ཆད་གཏེར་མཛོད་དཀྱུས་སུ་མེད་ཅིང་། བལ་ཡུལ་ཞེ་དགོན་གྱི་པར་གསར་འདིར་གསར་བཞག་བྱས་པས་ལུང་རྒྱུན་ལ་ཞིབ་རྟོག་དགོས་པ་ཡིན་ནོ།།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).