Terdzo-RA-009



Property "author" has been marked for restricted use.








Terdzo-RA-009.pdf
Click the picture above to view the Shechen manuscript.

ཐུགས་རྗེ་ཆེན་པོ་པདྨ་གཙུག་ཏོར་གྱི་མྱོང་གྲོལ་རིལ་བུའི་སྒྲུབ་ཐབས་གཞན་ཕན་བདུད་རྩི་

thugs rje chen po pad+ma gtsug tor gyi myong grol ril bu'i sgrub thabs gzhan phan bdud rtsi

by  འཇམ་དབྱངས་མཁྱེན་བརྩེའི་དབང་པོ་ (Jamyang Khyentse Wangpo)
revealed by  མཆོག་གྱུར་གླིང་པ་ (Chogyur Lingpa)
in cycle  འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་ ('phags pa thugs rje chen po pad+ma gtsug tor)
Volume 25 (ར) / Pages 151-184 / Folios 1a1 to 17b6

Tibetan Text

༄༅། །ཐུགས་རྗེ་ཆེན་པོ་པདྨ་གཙུག་ཏོར་གྱི་མྱོང་གྲོལ་རིལ་བུའི་སྒྲུབ་ཐབས་གཞན་ཕན་བདུད་རྩི་ཞེས་བྱ་བ་བཞུགས་སོ། ། ན་མོ་གུ་རུ་ལོ་ཀེ་ཤྭ་ར་ཡ། དེ་ལ་འཕགས་པ་དོན་ཡོད་ཞགས་པའི་རྟོག་པ་ཆེན་པོའི་པདྨ་གཙུག་ཏོར་གྱི་རྡོ་རྗེ་ཆེན་པོའི་སྙིང་པོ་གསང་བ་ལས། གང་ཞིག་རིལ་བུ་དེ་དག་བསྟེན། །རིལ་བུ་ཐིག་ལེ་རྟག་བྱེད་ལ། །དེ་བཞིན་གཤེགས་ཀུན་དགོངས་པར་མཛད། །འཕགས་པ་སྤྱན་རས་གཟིགས་ཀྱི་དབང་། །དེ་ཉིད་རིག་ལ་རྟག་ཏུ་ནི། །མཆོག་སྦྱིན་དུས་ཀུན་གཟིགས་པར་མཛད། །བསོད་ནམས་ཕུང་པོ་སྟོང་དག་ནི། །ཉི་མ་རེ་རེར་སོག་པར་བྱེད། །འཇིག་རྟེན་པ་ཡི་བདེ་སྤྱད་ཅིང་། །འཇིག་རྟེན་ཕ་རོལ་ཤིན་ཏུ་བདེ། །ཚེ་བརྗེ་བ་ནི་འཕོས་ནས་སུ། །བདེ་བ་ཅན་དུ་མོད་ལ་འགྲོ །ཞེས་སོགས་གྲུབ་པའི་རིལ་བུའི་ཕན་ཡོན་བསྔགས་པ་བརྗོད་པ་མཐའ་ཡས་པ་དང་རྗེས་སུ་མཐུན་པར། ཨོ་རྒྱན་མཚོ་སྐྱེས་རྡོ་རྗེའི་མན་ངག་རྣམས་ལས་ཐུགས་རྗེ་ཆེན་པོའི་མྱོང་གྲོལ་གྱི་རིལ་བུ་སྒྲུབ་ཚུལ་བསམ་གྱིས་མི་ཁྱབ་པ་ཞིག་གསུངས་པ་ལས། སྐབས་འདིར་འཕགས་པ་པདྨ་གཙུག་ཏོར་གྱི་སྒོ་ནས་མྱོང་གྲོལ་སྒྲུབ་ཚུལ་ཁྱེར་བདེ་སྙིང་པོར་དྲིལ་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་གཉིས། ཆོ་གར་མ་གཏོགས་པའི་སྦྱོར་བ་དང་། ཆོ་གར་གཏོགས་པའི་སྦྱོར་བའོ། །དང་པོ་ནི། གཏེར་ཁ་འདི་ཉིད་ཀྱི་ཐུགས་སྒྲུབ་བར་ཆད་ཀུན་སེལ་གྱི་ཆ་ལག་ཐུགས་རྗེ་ཆེན་པོ་ངན་སོང་དོང་སྤྲུགས་ལས། སངས་རྒྱས་བྱང་སེམས་མཆོག་གྲུབ་པའི༔ གདུང་དང་རིང་བསྲེལ་སྐྱེ་བདུན་ཤ༔ འབྲས་གསུམ་རྟག་ངུ་དབང་པོ་ལག༔ ཙནྡན་དཀར་དམར་གུར་གུམ་བཅས༔ འབྲས་དཀར་ཕྱེ་མས་རིལ་བུ་ནི༔ ཡུངས་དཀར་འབྲུ་བདུན་ཚད་དུ་དྲིལ༔ ལེགས་པར་བསྐམས་ལ་བུམ་པར་བླུག༔ ཅེས་གསུངས་པ་ལྟར། ཁུངས་ལྡན་སེལ་མེད་ཀྱི་དམ་རྫས་ཀྱི་རིགས་སྤྱི་དང་། ཁྱད་པར་གཏེར་ཁ་འདི་ཉིད་ཀྱི་ཐུགས་རྗེ་ཆེན་པོའི་མྱོང་གྲོལ་རིལ་བུ། སྐྱེ་བདུན་རིལ་བུ། འཁོར་བ་དོང་སྤྲུགས་ཀྱི་རིལ་བུ། པོ་ཏ་ལའི་མྱོང་གྲོལ་སྡུག་བསྔལ་ཞི་བྱེད་སོགས་ཀྱི་ཕབས་རྒྱུན་ལེགས་པར་སྦྱར་བའི་རིལ་བུ་མཚལ་ལམ། ཙནྡན་གྱིས་མདོག་བསྒྱུར་བ་སོགས་ཕྱག་ལེན་ལྟར་ཚགས་སུ་ཚུད་པར་བྱ། གཉིས་པ་ཆོ་གར་གཏོགས་སྦྱོར་ནི། སྒྲུབ་ཁང་གཙང་ཞིང་ཡིད་དང་མཐུན་པར་གཞི་བགེགས་སོ་སོར་དཀར་དམར་གྱི་གཏོར་མ་རྒྱན་དང་ལྡན་པ་བཤམས་ཏེ། རང་སྐད་ཅིག་གིས་ཁྲོ་བོའི་རྒྱལ་པོ་དཔལ་རྟ་མགྲིན་གྱི་སྐུར་གྱུར་པར་བསམ་ལ། གཏོར་མ་དང་པོ་ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་ས་བདག་ལྷ་ཀླུའི་ཚོགས་རྣམས་སྤྱན་དྲངས་ལ། ཨོཾ་བཛྲ་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱ་ཞེས་ཉེར་སྤྱོད་ཀྱིས་མཆོད། བྷཱུ་མི་པ་ཏི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཞེས་ལན་གསུམ་གྱིས་གཏོར་མ་འབུལ། ཧྲཱི༔ ས་ལ་གནས་པའི་འཇིག་རྟེན་སྐྱོང༔ བརྟན་མ་དབང་ཆེན་ས་འཛིན་ཚོགས༔ འཁོར་བཅས་ས་རིན་འདི་བཞེས་ལ༔ སྒྲུབ་པའི་གནས་མཆོག་འདི་སྩོལ་ཅིག༔ སྔོན་སྐྱོབ་པ་སངས་རྒྱས་ཀྱིས་བདུད་བཏུལ་ཆོས་འཁོར་བསྐོར་བ་ས་གཞི་འདིའི་སྟེང་དུ་མཛད་པ་ལགས་པས༔ དེ་དང་རྗེས་སུ་མཐུན་པར་བདག་ཅག་གིས་ཚོགས་རྫོགས་སྒྲིབ་སྦྱོང་གི་ཆེད་དུ་ཐུགས་རྗེ་ཆེན་པོའི་ལྷ་ཚོགས་སྒྲུབ་པའི་དཀྱིལ་འཁོར་འདེབས་པར་འཚལ་བས་ས་འདི་གནང་བར་ཞུ་ན་བརྟན་ཅིང་བཀྲ་ཤིས་པར་མཛོད་ཅིག༔ ཅེས་ཕྲིན་ལས་གསོལ། བྷཱུ་མི་པ་ཏི་ས་པ་རི་ཝཱ་ར་གཙྪཿས། མགྲོན་རྣམས་ཀྱིས་ས་གཞི་གནང་ཞིང་རང་གནས་སུ་དགྱེས་བཞིན་གཤེགས་པར་བསམ། གཏོར་མ་གཉིས་པ། ཨོཾ་ཨཱཿཧཱུྃ་གིས་བརླབ། ཨོཾ་སརྦ་བྷཱུ་ཏ་ཨཱ་ཀརྵཱ་ཡ་ཛཿས་བགེགས་དགུག །ཨོཾ་སརྦ་བིགྷྣཱན་ན་མ་སརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བ་ལྱཱ་དི་སྭཱ་ཧཱ༔ ཞེས་ལན་གསུམ་གྱིས་གཏོར་མ་སྦྱིན། ཧཱུྃ༔ བདག་ནི་དབང་ཆེན་རྟ་མཆོག་དཔལ༔ བར་དུ་གཅོད་བྱེད་མ་རིག་བདུད༔ འདོད་ཡོན་འདི་ལོངས་ལན་ཆགས་བྱང༔ མུན་གླིང་ལྕགས་རིའི་ཕྱི་ལ་དེངས༔ མི་འགྲོ་འདུག་རྣམས་རྡུལ་དུ་རློག༔ ཨོཾ་ཧ་ཡ་གྲཱི་བ་ཧཱུྃ་ཕཊ༔ ཨོཾ་སུམྦྷ་སོགས་རོལ་མོའི་ཚམ་རྔམ་དང་བཅས་གུ་གུལ་གྱིས་བདུག །ཡུངས་དཀར་གྱིས་བྲབ། གཏོར་མ་རྒྱང་རིང་དུ་དོར་ལ་བགེགས་རྣམས་རྒྱ་མཚོའི་མཐར་བསྐྲད་པར་བསམ། རྒྱས་པར་སྒྲུབ་ཁང་གི་ཕྱོགས་བཞིར་རྒྱལ་ཆེན་བཞིའི་རྟེན་འདུ་བྱས་པའི་མདུན་དུ་མཆོད་གཏོར་བཤམས་ལ་འདི་ཉིད་ཀྱི་གསང་འདུས་སྒྲུབ་ཁོག་ལྟར་ཐོ་གཟུགས། དེ་ཙམ་མི་ནུས་ན་སྒོ་དྲུང་དུ་ཐོ་བརྟན་པོར་བརྩིགས་པ་ལ་དཀར་རྩིས་བྲན། རྒྱལ་ཆེན་བཞིའི་སྐུའམ་སྔགས་བྱང་དར་རས་ཀྱི་ཅོད་པན་དང་བཅས་པའི་མདུན་དུ་མཆོད་གཏོར་བཤམ། རང་གི་སྙིང་ག་ནས་འོད་ཟེར་འཕྲོས་པས་རི་རབ་ཀྱི་ཕྱོགས་བཞི་ནས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས། ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿས་རྟེན་དང་དབྱེར་མེད་དུ་བཞུགས་པར་གྱུར། མཆོད་གཏོར། ཨོཾ་ཧ་ཡ་གྲཱི་ཝ་ཧཱུྃ་ཕཊ་ཀྱིས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་མཆོད་གཏོར་རྣམས་དྭངས་ཤིང་ཐོགས་པ་མེད་པ་ལྷ་རྫས་ཀྱི་མཆོད་པའི་སྤྲིན་ཕུང་ཡེ་ཤེས་ཀྱི་རོལ་པར་འཆར་བར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། ཨོཾ་དྷྲྀཥྚ་རཱཥྚ་ཡ་སྭཱ་ཧཱ། ཨོཾ་བི་རཱུ་ཌྷ་ཀ་ཡ་སྭཱ་ཧཱ། ཨོཾ་བི་རཱུ་པཱཀྵ་ཡ་སྭཱ་ཧཱ། ཨོཾ་བཻ་ཤྲ་བ་ཎཱ་ཡ་སྭཱ་ཧཱ། ན་མ་སརྦ་ཏ་ཐཱ་ག་ཏེ་བྷྱོ་བི་ཤྭ་སོགས་ལན་གསུམ་གྱིས་གཏོར་མ་ཕུལ། ཨོཾ་ཙ་ཏུརྨ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། ཟབ་ཅིང་རྒྱ་ཆེན་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ལ་ཕྱག་འཚལ་ལོ། །རྒྱལ་ཆེན་སྡེ་བཞི་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་ཕྲིན་ལས་གསོལ། རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་རྣམས་རྟེན་འདི་ལ་བརྟན་པར་བཞུགས་ནས། ཇི་སྲིད་སྒྲུབ་པ་མ་ཚར་བར་དེ་སྲིད་དུ་སྲུང་བ་མཚམས་ཀྱི་ཕྲིན་ལས་དམ་པ་མཛད་དུ་གསོལ། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་བརྗོད་ཅིང་མེ་ཏོག་འཐོར་བས་བརྟན་བཞུགས་བྱ། གནས་འདིར་ཉིན་མོ་བདེ་ལེགས་སོགས་བཀྲ་ཤིས་ཀྱི་ཚིགས་སུ་བཅད་པའང་བརྗོད། ནང་དུ་ལོག་ལ་མཚམས་གཅོད་པ་ནི། ཧཱུྃ༔ བདག་ཉིད་ཐུགས་ཀའི་འོད་ཟེར་གྱིས༔ ཕྱོགས་མཚམས་ཡེ་ཤེས་ལྔ་ཡི་མེ༔ རྡོ་རྗེ་མཚོན་ཆ་མང་པོའི་གུར༔ ཁྲོ་བོ་ཁྲོ་མོ་སྤྲིན་ལྟར་གཏིབས༔ ཆོས་སྐུ་ཐིག་ལེ་གཅིག་ཏུ་བལྟ༔ བདུད་ཀྱི་མིང་མེད་གཞོམ་གཞིག་བྲལ༔ ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ༔ ཛྙཱ་ན་ཛྭ་ལ་ཏཱིཀྵྞ་བཛྲ་ཀྲོ་དྷ་ཤཱུནྱ་ཏཱ་ཧཱུྃ་ཧཱུྃ་ཧཱུྃ༔ ཞེས་སྲུང་འཁོར་བརྟན་པར་བསྒོམས་ནས་དེ་ཕྱིན་ཐོ་ནང་དུ་མ་ཚུད་པའི་མི་གསར་པ་ནང་དུ་མི་གཏོང་བ་སོགས་མཚམས་དམ་དུ་གཅད། དཀྱིལ་འཁོར་གྱི་གཞིར། ཨོཾ་ཧ་ཡ་གྲཱི་བ་ཧཱུྃ་ཕཊ་ཅེས་བརྗོད་ཅིང་དྲི་བཟང་དང་བ་བྱུང་གི་ཆུས་ཆག་ཆག་གདབ། ཐིག་ཚོན་བྱིན་གྱིས་བརླབས་ལ་རྡུལ་ཚོན་གྱི་དཀྱིལ་འཁོར་ཚུལ་བཞིན་དུ་འདུ་བྱ་བའམ། མ་གྲུབ་ན་རས་བྲིས་རབ་གནས་དང་ལྡན་པ་དགྲམ། རྣལ་འབྱོར་པ་ཀུ་སཱ་ལིས་ཆིག་སྒྲུབ་ལྟ་བུའི་ཚེ། མཎྜ་ལར་དྲི་བཟང་གི་ཐིག་ལེ་བྱས་པར་མེ་ཏོག་གི་ཚོམ་བུ་ལྔ་བཀོད་ཀྱང་རུང་། གང་ལྟར་ཡང་དེའི་མདུན་དུ་འབུལ་གཏོར་དཀར་ཟླུམ་རྒྱན་ལྡན། མཐའ་སྐོར་དུ་ཆུ་གཉིས་སྔོན་འགྲོའི་ཉེར་སྤྱོད་སོགས་བཀོད་མཛེས་སུ་བཤམ། དཀྱིལ་འཁོར་གྱི་དབུས་སུ་ལྡིང་ཁྲིའམ་མཉྫིའི་ཁར་རིལ་བུའི་བུམ་པ་རིན་པོ་ཆེའི་པྲོག་ཞུ་དང་དར་དཔྱང་གཟུངས་རྡོར་གྱིས་བརྒྱན་པ་སྤོས་རོལ་དང་བཅས་བཀོད་ཅིང་། ལྷ་ཁྲུས་སྤྱི་ལྟར་གསོལ་བའི་རྗེས། ཕུན་སུམ་ཚོགས་པ་མངའ་བ་སོགས་དང་། གནས་འདིར་ཉིན་མོ་བདེ་ལེགས་སོགས་ཤིས་བརྗོད་དང་། རྟེན་འབྲེལ་སྙིང་པོ་དང་བཅས་མེ་ཏོག་གི་ཆར་དབབ། བདག་འཇུག་ལེན་ན་དེའི་ཆས་རྣམས་ཀྱང་འོག་ནས་འབྱུང་བ་ལྟར་བཤམ། འབྱོར་ན་སྟེང་དུ་བླ་རེ་དང་གདུགས་དབུབ། ཕྱོགས་མཚམས་སུ་འཕན་དང་རྒྱལ་མཚན་བ་དན་དར་གྱི་ལྡ་ལྡི་སོགས་མཛེས་པར་བྲེ་ཞིང་བཀྲ་ཤིས་རྫས་རྟགས་ཀྱི་གཟུགས་བརྙན་བྲིས་འབུར་གང་རིགས་ཀྱང་དགོད། དེ་ནས་སྒྲུབ་པ་པོ་རྣམས་ཁྲུས་དང་གཙང་སྦྲ་དང་བཅས་སྟན་བདེ་བ་ལ་འཁོད་པའི་མདུན་དུ་རོལ་མོའི་རིགས་དང་འཐོར་ནས། ཉེ་ལོགས་ཅི་བདེ་བར་གཏོར་མ་ཆ་གསུམ་སོགས་འོག་ཏུ་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ལ། བརྒྱུད་པའི་གསོལ་འདེབས། ཨེ་མ་ཧོ༔ ཆོས་སྐུ་ཀུན་བཟང་སོགས་ཇི་ལྟར་རིགས་པ་སྔོན་དུ་འགྲོ་བས། རང་གི་སྙིང་ག་ནས་འོད་ཟེར་འཕྲོས་པས་བླ་མ་ཐུགས་རྗེ་ཆེན་པོ་ལ་རྒྱལ་བ་སྲས་དང་བཅས་པས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿས་ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། ན་མོ༔ བདག་སོགས་སེམས་ཅན་སྡུག་བསྔལ་གྲོལ་དོན་དུ༔ སོགས་སྐྱབས་སེམས་ཡན་ལག་བདུན་པ་རྣམས་ལན་གསུམ་རེའི་མཐར། ཛཿཧཱུྃ་བཾ་ཧོཿས་ཚོགས་ཞིང་རྣམས་རང་ལ་ཐིམ་པར་གྱུར་པར་བསམ་ལ། མཆོད་གཏོར་རྣམས། ཨོཾ་ཧ་ཡ་གྲཱི་ཝ་ཧཱུྃ་ཕཊ་ཀྱིས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་གནས་ཁང་འོག་མིན་པདྨོ་བཀོད་པའི་ཞིང་ཁམས་ཆེན་པོར་གསལ་བའི་དབུས་སུ་ལྷ་རྫས་དང་ཏིང་ངེ་འཛིན་ལས་གྲུབ་པའི་མཆོད་གཏོར་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་དང་མཉམ་པར་གྱུར། ཨོཾ་བཛྲ་ཨརྒྷཾ་ནས། ཤབྡ་སརྦ་པཱུ་ཛ་ཨཱཿཧཱུྃ་ཞེས་དང་། སྤྲོ་ན་མཆོད་པའི་སྤྲིན་གྱི་གཟུངས་ཀྱང་བཟླ། གཉིས་པ་དངོས་གཞི་ལ་གཉིས། བདག་མདུན་སྐྱེད་སྒྲུབ་དང་། རིལ་བུའི་དམིགས་བཟླས་བྱེ་བྲག་ཏུ་བྱ་བའོ། །དང་པོ་ནི། བདག་དང་བསྒྲུབ་གཞིའི་དཀྱིལ་འཁོར་གྱི་ངོ་བོ་སོ་སོ་མ་ཡིན་ཐ་མི་དད་པར་ཤེས་པས། ཧྲཱི༔ ཕྱི་ནང་ཆོས་རྣམས་དམིགས་མེད་དེ་ཡི་མདངས༔ ཞེས་པ་ནས། ནམ་མཁའ་གང་བར་སྤྱན་དྲངས་གཉིས་མེད་ཐིམ༔ ཞེས་པའི་བར་བདག་མདུན་ཟུང་འཇུག་གི་དགོངས་པས་སྒྲུབ་ཐབས་ལྟར་གསལ་གདབ། སྤྲོ་ན་སྤྱན་འདྲེན་གྱི་མགོར། ཧྲཱི༔ ཤར་ཕྱོགས་པོ་ཏཱ་ལ་ཡི་ཞིང༔ ངོ་མཚར་བཀོད་པ་ཁྱད་པར་འཕགས༔ རང་བྱུང་ལྷུན་གྲུབ་ཕོ་བྲང་ནས༔ སྤྲུལ་སྐུ་སེམས་དཔའ་གཤེགས་སུ་གསོལ༔ ཕུན་ཚོགས་དྲི་བྲལ་བདེ་ལྡན་ཞིང༔ རང་སྣང་རྣམ་དག་དཀྱིལ་འཁོར་ནས༔ ངེས་པ་ལྔ་ལྡན་སངས་རྒྱས་ཆེ༔ ལོངས་སྐུ་ཇོ་བོ་གཤེགས་སུ་གསོལ༔ སྐྱེ་འགག་གནས་བྲལ་ཀ་ནས་དག༔ ཡེ་རྫོགས་འོག་མིན་སྟུག་པོ་བཀོད༔ མི་འགྱུར་རྡོ་རྗེ་སྤྱན་རས་གཟིགས༔ ཆོས་སྐུའི་སངས་རྒྱས་གཤེགས་སུ་གསོལ༔ ཞེས་པའི་མཐར། ཧྲཱི༔ བདག་གི་མགོན་པོ་སོགས་སྒྲུབ་ཐབས་ལྟར་སྦྲེལ་ལ་བསྟོད་པའི་བར་མཐར་ཆགས་སུ་བཏང་རྗེས། བདག་གི་ཐུགས་ཀ་ནས་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ལོགས་སུ་ཕྱེ་སྟེ་མདུན་བསྐྱེད་ཀྱི་རྟེན་དང་དབྱེར་མེད་དུ་བཞུགས་པའི་སོགས་བཟླས་དམིགས་དང་བཅས་བཟླས་པ་ཅི་རིགས་པ་དང་། མདུན་གྱི་ལྷ་ལ་མཆོད་བསྟོད་གསོལ་འདེབས་ནོངས་བཤགས་བར་སྒྲུབ་ཐབས་ནས་འབྱུང་བ་བཞིན་བྱའོ། །གཉིས་པ་རིལ་བུའི་དམིགས་བཟླས་བྱེ་བྲག་ཏུ་བྱ་བ་ནི། བུམ་པ་རིལ་བུ་དང་བཅས་པ། ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་། སྭཱ་བྷཱ་ཝས་སྦྱང་། བུམ་པ་མི་དམིགས་སྟོང་པ་ཉིད་ཀྱི་ངང༔ སྣ་ཚོགས་པད་ཟླའི་ལྟེ་བར་བྷྲཱུྃ་ལྔ་ལྡན༔ ཡོངས་གྱུར་ཕྱི་ནི་རིན་ཆེན་བུམ་པ་ལ༔ ནང་ནི་གཞལ་ཡས་ཁང་ཆེན་སྒོ་བཞི་པ༔ དབུས་ཕྱུར་རྡོ་རྗེ་ནོར་བུའི་ཏོག་གིས་སྤྲས༔ གདུགས་འཕན་དར་དཔྱང་རིན་ཆེན་དུ་མས་བརྒྱན༔ དེ་ནང་པདྨ་འདབ་བཞིའི་གེ་སར་ལ༔ སྲིད་ཞིའི་དྭངས་བཅུད་རིལ་བུ་རེ་རེ་བཞིན༔ པད་ཟླའི་གདན་སྟེང་ས་བོན་ཕྱག་མཚན་ལས༔ འོད་འཕྲོས་དོན་གཉིས་བྱས་འདུས་སྤྱན་རས་གཟིགས༔ དཀར་པོ་ཕྱག་བཞི་ཞབས་གཉིས་སྐྱིལ་ཀྲུང་བཞུགས༔ དར་དང་རིན་ཆེན་རྒྱན་གྱིས་ལེགས་པར་བརྒྱན༔ རྩ་ཕྱག་ཐལ་སྦྱར་ནོར་འཛིན་འོག་མ་གཉིས༔ ཤེལ་ཕྲེང་པདྨ་དཀར་པོའི་ཡུ་བ་འཛིན༔ དེ་ཡི་ཕྱོགས་བཞིར་རིགས་བཞིའི་སྤྱན་རས་གཟིགས༔ དཀར་སེར་དམར་ལྗང་ཞལ་གཅིག་ཕྱག་གཉིས་པ༔ སྐྱབས་སྦྱིན་པདྨ་འཛིན་ཏེ་ལོངས་སྐུའི་ཆས༔ གནས་གསུམ་ཡིག་འབྲུ་གསུམ་གྱིས་མཚན་པ་ཡི༔ ཐུགས་ལས་ལས་ཀྱི་སེམས་དཔའ་སྤྱན་རས་གཟིགས༔ འཁོར་བ་དོང་སྤྲུགས་དམར་གསལ་བཞེངས་པའི་སྟབས༔ གཅེར་བུ་རྒྱན་སྤངས་པད་ཕྲེང་བུམ་པ་བསྣམས༔ གྲངས་མེད་ཉི་ཟེར་རྡུལ་ཕྲན་བཞིན་དུ་འཕྲོ༔ ཁམས་གསུམ་སྣོད་བཅུད་ཐམས་ཅད་ཡོངས་ཁྱབ་པས༔ འགྲོ་འདུལ་འཁོར་བ་དོང་ནས་སྤྲུགས་པར་གསལ༔ སྒོ་བཞིར་འདོད་སྣམ་མཆོད་པའི་ལྷ་མོས་བསྐོར༔ རང་བྱུང་རྡོ་རྗེ་གསུམ་གྱི་ཡི་གེ་ལས༔ འོད་ཟེར་འཕྲོས་པས་ཡེ་ཤེས་སེམས་དཔའི་ཚོགས༔ ནམ་མཁའ་གང་བར་སྤྱན་དྲངས་གཉིས་མེད་ཐིམ༔ ཞེས་གསལ་བཏབ་ལ་སྤྱན་འདྲེན་ནས་བསྟོད་པའི་བར་སྒྲུབ་ཐབས་ལྟར་བྱ། གཟུངས་ཐག་སྙིང་གར་བཟུང་ལ། རང་གི་ཐུགས་ནས་སྔགས་ཀྱི་ཕྲེང༔ གཟུངས་ཐག་རྡོ་རྗེའི་ལམ་ནས་སོང༔ མདུན་བསྐྱེད་དཀྱིལ་འཁོར་ལྷ་ཚོགས་དང༔ ཁྱད་པར་བུམ་ལྷའི་ཐུགས་རྒྱུད་བསྐུལ༔ དེ་དག་ཀུན་ལས་འོད་འཕྲོས་པས༔ ཕྱོགས་བཅུའི་བླ་མ་ཡི་དམ་དང༔ སངས་རྒྱས་བྱང་སེམས་མཁའ་འགྲོའི་ཚོགས༔ མཆོད་ཅིང་ཐུགས་དམ་རྒྱུད་བསྐུལ་ནས༔ མཁྱེན་བརྩེ་ནུས་པའི་བྱིན་རླབས་ཀུན༔ འོད་ཟེར་བདུད་རྩིའི་རྣམ་པར་བསྡུས༔ ཐིམ་པས་གཟི་བྱིན་མཆོག་ཏུ་འབར༔ སླར་འཕྲོས་ཁམས་གསུམ་ལས་ཉོན་སྦྱངས༔ ཕྱི་སྣོད་འཕགས་པའི་ཞིང་ཁམས་ལ༔ ནང་བཅུད་འགྲོ་འདུལ་ཐུགས་རྗེའི་ལྷ༔ སྒྲ་གྲགས་སྔགས་ཀྱི་རང་སྒྲ་དང༔ དྲན་རྟོག་འོད་གསལ་དབྱིངས་ཀྱི་ངང༔ འཁོར་བ་དོང་སྤྲུགས་ཏིང་འཛིན་གྱིས༔ སྣང་སྲིད་བཞིར་བཞེངས་ཕྱག་རྒྱར་སད༔ ཕྱི་ནང་འབྱུང་ལྔའི་དྭངས་མའི་བཅུད༔ དབྱེར་མེད་ཐིག་ལེ་གཅིག་ཏུ་འཁྱིལ༔ ཞེས་དགོངས་པའི་སྲོག་ཏུ་བཟུང་ནས། ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཅེས་གཙོ་བོར་བཟླ་ཞིང་སྐབས་སུ་ཡི་གེ་དྲུག་པ་དང་། ཨོཾ་མ་ཎི་པདྨེ་ཧཱུྃ་ཧྲཱི༔ ཨོཾ་བི་པུ་ལ་གརྦྷེ༔ མ་ཎི་པྲ་བྷེ༔ ཏ་ཐཱ་ག་ཏེ༔ ནིརྡྷེ་ཤ་ནི༔ མ་ཎི་མ་ཎི༔ སུ་པྲ་བྷེ་བི་མ་ལེ་སཱ་ག་ར༔ གམྦྷི་ར་ཧཱུྃ་ཧཱུྃ་ཛྭ་ལ་ཛྭ་ལ་བུདྡྷ་བི་ལོ་ཀི་ཏེ་གུ་ཧྱ་ཨ་དྷིཥྛི་ཏེ་གརྦྷེ་སྭཱ་ཧཱ༔ པདྨ་དྷཱ་ར་ཨ་མོ་གྷ་ཛ་ཡ་ཏེ་ཙུ་རུ་ཙུ་རུ་སྭཱ་ཧཱ༔ ཞེས་འཁོར་བ་དོང་སྤྲུགས་ཀྱི་གཟུངས་སྔགས་སྦྲེལ་བའང་ཇི་ལྟར་རིགས་པ་བཟླ། ཐུན་བསྡུ་བ་ན་དབྱངས་གསལ་རྟེན་འབྲེལ་སྙིང་པོ་རྣམས་ཚར་གསུམ་རེས་སྔགས་ཀྱི་ལྷག་ཆད་ཁ་བསྐང་ཞིང་ནུས་པ་བརྟན་པར་བྱ། མཆོད་པ་རྣམས་ཞལ་གསོ་ཞིང་བསང་སྦྱང་བྱིན་རླབས་སྔར་ལྟར་བྱས་ལ། སྲིད་ཞིའི་མགོན་གྱུར་འཕགས་པའི་ཚོགས་རྣམས་ལ༔ ཞེས་པ་ནས། འཛིན་ཏེ་རིགས་བཞིས་བསྐོར་ལ་ཕྱག་འཚལ་བསྟོད༔ ཅེས་པའི་བར་གྱི་མཆོད་བསྟོད་དང་། ཨོཾ༔ བཅོམ་ལྡན་སྙིང་རྗེ་ཆེན་པོའི་བདག༔ པདྨ་གཙུག་ཏོར་ལྷ་ཚོགས་རྣམས༔ མགོན་མེད་བདག་ལ་ཐུགས་རྗེས་གཟིགས༔ སངས་རྒྱས་ཕྲིན་ལས་མཛད་དུ་གསོལ༔ འཁོར་བ་ངན་སོང་སྡུག་བསྔལ་དང༔ སྡིག་སྒྲིབ་ཐམས་ཅད་ཞི་བར་མཛོད༔ ཡང་དག་ཡེ་ཤེས་སྣང་བ་ཡིས༔ བྱང་ཆུབ་ལམ་ལ་འགོད་མཛད་གསོལ༔ ཞེས་གསོལ་བ་གདབ་བོ། །གསུམ་པ་རྗེས་ལ་གཉིས། སྤྱི་དང་བྲེ་བྲག་གོ །དང་པོ་ལ་གསུམ། ཚོགས་གསག་པའི་སླད་དུ་ཡན་ལག་བདུན་པ་བྱ་བ། བར་ཆད་ཞི་བའི་ཕྱིར་གཏོར་མ་འབུལ་བ། དངོས་གྲུབ་མྱུར་བའི་སླད་དུ་བྱིན་འབེབ་པ་དང་ཆོ་གའི་མཐའ་རྒྱས་གཞན་བསྟན་པའོ། །དང་པོ་ནི། ཇི་སྙེད་སུ་དག་སོགས་བཟང་སྤྱོད་ལས་འབྱུང་བའི་ཡན་ལག་བདུན་པ་ཚར་གསུམ་སོགས་ཇི་ལྟར་རིགས་པ་དང་། སྤྲོ་ཞིང་ནུས་ན་ཕྱག་འཚལ་བའི་སྐབས་ཐམས་ཅད་དུ་ལངས་ཏེ་ཕྱག་བྱ། ཨོཾ་ན་མོ་མཉྫུ་ཤྲཱི་ཡེ་སྭཱ་ཧཱ། ན་མཿསུ་ཤྲཱི་ཡེ་སྭཱ་ཧཱ། ན་མ་ཨུཏྟ་མ་ཤྲཱི་ཡེ་སྭཱ་ཧཱ། ཞེས་ཕྱག་བྱ་བའི་སྔགས་ཀྱང་བརྗོད། མཆོད་པའི་ཡན་ལག་མཐར། ན་མོ་རཏྣ་ཏྲ་ཡཱ་ཡ། ཨོཾ་ན་མོ་བྷ་ག་ཝ་ཏེ། བཛྲ་སཱ་ར་པྲ་མརྡྷ་ནེ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛྭ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎེ་བཛྲེ། སརྦ་ཀརྨ་ཨཱ་ཝ་ར་ཎ་བི་ཤྭ་དྷ་ན་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་བཟླ་ཞིང་རོལ་མོ་ཇི་སྙེད་པ་འབུད་དཀྲོལ་བྱ། མཎྜལ་བརྒྱ་རྩ་སོགས་ཕུལ་རྗེས། ཨོཾ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས། །ཞེས་སོགས་སྨྲེ་བཤགས་ཀྱང་ཕྱག་དང་བཅས་ཏེ་བྱས་མཐར། འདོད་ཆགས་ཞེ་སྡང་སོགས་ཡན་ལག་ལྷག་མ་རྣམས་སྦྲེལ། གཞན་ཡང་གྲུབ་པའི་སློབ་དཔོན་པདྨ་སཾ་བྷ་བའི་གཞུང་ལོ་ཙཱ་བ་རྒྱལ་བ་མཆོག་དབྱངས་ཀྱིས་བསྒྱུར་བའི་རིལ་བུའི་སྒྲུབ་ཐབས་ལས། ཐུན་མཚམས་བསྐོར་བ་བརྒྱ་ཕྲག་བྱ། །ཞེས་འབྱུང་བ་ལྟར། གོ་ཡུལ་གྱིས་བདེ་ན་དཀྱིལ་འཁོར་ལ་དངོས་སུ་བསྐོར་བ་ཇི་ལྟར་ནུས་པ་བྱ་ཞིང་། མ་གྲུབ་ན་ཡིད་ཀྱིས་དམིགས་ཏེ། གང་ལྟར་ཡང་དེའི་ཚེ་ཨུཥྞཱི་ཥ་དང་། དོང་སྤྲུགས་ཀྱི་གཟུགས་ཀྱི་མཐར། དེ་བཞིན་གཤེགས་པ་རིན་ཆེན་རྒྱལ་མཚན་ལ་ཕྱག་འཚལ་ལོ། །ཨོཾ་ན་མོ་བྷ་ག་བ་ཏེ། རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣེ། རཏྣ་བི་ཛ་ཡ་སྭཱ་ཧཱ། ཞེས་རོལ་མོ་དང་བཅས་སྐོར་བའི་སྔགས་བཟླའོ། །གཉིས་པ་གཏོར་འབུལ་ལ་གཉིས། འཇིག་རྟེན་ལས་འདས་པའི་གཏོར་མ་དང་། འཇིག་རྟེན་པའི་གཏོར་མ་གཏོང་བའོ། །དང་པོ་ནི། དཀྱིལ་འཁོར་གྱི་མདུན་དུ་བཤམས་པའི་གཏོར་མ། ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་། སྭཱ་བྷཱ་བས་སྦྱང་། སྟོང་པའི་ངང་ལས་གཏོར་མ་འདོད་རྒུ་འབྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། མདུན་གྱི་ལྷའི་ལྗགས་འོད་ཟེར་གྱི་སྦུ་གུས་དྲངས་ཏེ་གསོལ་བས་དགྱེས་ཤིང་ཚིམས་པར་བསམ་ལ། ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་དབུལ། སྲིད་ཞིའི་མགོན་གྱུར་སོགས་ཀྱིས་མཆོད། ཧྲཱི༔ ཚད་མེད་ཐུགས་རྗེ་སོགས་ཀྱིས་བསྟོད། སྤྱན་རས་གཟིགས་དབང་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་སོགས་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་སྤྱི་ལྟར་བརྗོད་པས་ཕྲིན་ལས་གསོལ། གཉིས་པ་འཇིག་རྟེན་པའི་གཏོར་མ་ནི། སྟབས་བདེ་ན་དཀྱིལ་འཁོར་གྱི་ཁང་པའི་སྒོ་དྲུང་ངམ། མི་བདེ་ན་དཀྱིལ་འཁོར་ལ་ཡོལ་བས་བཅད་པའི་ཕྱི་རོལ་དུ་སྟེགས་ཀྱི་ཁར་གཏོར་མ་ཆ་གསུམ་མཆོད་པ་དང་བཅས་པ་བཤམས་ལ་ཆུ་གཙང་གིས་བྲན། བཀའ་གཏེར་སྤྱི་ཁྱབ་ཀྱི་ཆ་གསུམ་ཆོ་ག་རྒྱས་པའམ། བསྡུ་ན་གཏེར་ཁ་འདི་ཉིད་ལས་འབྱུང་བའི་ཆོ་ག་ནི། གཏོར་མ་དང་པོ་ཕྱོགས་སྐྱོང་ལ་འབུལ་བའི་ཕྱིར། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ། ཞེས་ཆོས་ཉིད་རྣམ་དག་གི་སྔགས་དང་ཕྱག་རྒྱ་ལན་གསུམ་གྱིས་སྟོང་པར་སྦྱང་། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་བརླབས་ཏེ་རྒྱས་པར་སྤེལ། རང་གི་སྙིང་གའི་ས་བོན་ལས་བྱུང་བའི་འོད་ཟེར་གྱིས་ཕྱོགས་སྐྱོང་འཁོར་དང་བཅས་པ་སྤྱན་དྲངས་པར་གྱུར་པར་བསམ་ལ། ཨོཾ་ཨིནྡྲ་ཡེ༔ ཨགྣ་ཡེ༔ ཡ་མ་ཡེ༔ ནཻརརྀ་ཏ་ཡེ༔ བ་རུ་ཎ་ཡེ༔ ཝཱ་ཡ་ཝཱེ༔ ཀུ་བེ་ར་ཡེ༔ ཨཻ་ཤཱ་ནཱ་ཡེ་ཨཱ་དྷི་པ་ཏ་ཡེ༔ སཱུརྱ་ཙནྡྲ་ས་པ་རི་ཝཱ་ར་བཛྲ་ས་མཱ་ཛ༔ ཞེས་པས་སྤྱན་དྲང་། པདྨ་ཀ་མ་ལཱ་ཡ་སཏྭཾ་གྱིས་གདན་འབུལ། ཨོཾ་ཨིནྡྲཱ་ཡེ་སོགས་ནས། ས་པ་རི་ཝཱ་ར་ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་གཏོར་མ་འབུལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱས་མཆོད། ཧྲཱི༔ དབང་པོ་དྲང་སྲོང་གཤིན་རྗེ་སྲིན་པོ་སྟེ༔ ཆུ་ལྷ་རླུང་བདག་གནོད་སྦྱིན་དབང་ལྡན་དང༔ ཉི་ཟླ་དབང་ཆེན་བདག་པོ་འཁོར་བཅས་ལ༔ རང་རང་མཐུན་རྫས་གཏོར་མ་འདི་འབུལ་གྱིས༔ ཐུགས་རྗེ་ཆེན་པོ་འགྲུབ་པའི་ཕྲིན་ལས་མཛོད༔ ཅེས་ཕྲིན་ལས་གསོལ་ལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་གཙྪཿས་གཤེགས་སུ་གསོལ། ཆ་གཉིས་པ་གཞི་བདག་དང་འབྱུང་པོ་ལ་སྦྱིན་ཏེ། སྭཱ་བྷཱ་ཝས་སྦྱང་། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་སོགས་ལན་གསུམ་གྱིས་བྱིན་གྱིས་བརླབས་ཏེ་རྒྱས་པར་སྤེལ། རང་གི་སྙིང་གའི་ས་བོན་ལས་བྱུང་བའི་འོད་ཟེར་གྱིས་གཞི་བདག་གནས་བདག་འབྱུང་པོའི་ཚོགས་རྣམས་སྤྱན་དྲངས་པར་གྱུར། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲང་། པདྨ་ཀ་མ་ལཱ་ཡ་སཏྭཾ་གྱིས་གདན་དབུལ། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་གཏོར་མ་དབུལ། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱས་མཆོད། ཧྲཱི༔ གཞི་བདག་གནས་བདག་འབྱུང་པོའི་ཚོགས༔ མཆོད་གཏོར་དམ་པ་འདི་བཞེས་ལ༔ མི་དགེ་ཕྲག་དོག་མེད་པར་མཛོད༔ ཞི་བདེའི་མཐུན་རྐྱེན་སྒྲུབ་ཏུ་གསོལ༔ ཞེས་ཕྲིན་ལས་གསོལ། ཨོཾ་ལོ་ཀ་པཱ་ལ་བྷཱུ་མི་པ་ཏི་ས་པ་རི་ཝཱ་ར་གཙྪ༔ས་གཤེགས། ཆ་གསུམ་པ་བགེགས་ལ་བསྔོ་སྟེ། ཨོཾ་ཧ་ཡ་གྲཱི་བ་ཧཱུྃ་ཕཊ། རང་ཉིད་སྐད་ཅིག་གིས་ཁྲོ་བོ་རྟ་མགྲིན་འཇིགས་སུ་རུང་བའི་སྐུར་གྱུར། སྭཱ་བྷཱ་བས་སྦྱང་། ན་མསྶརྦ་ཏ་ཐཱ་ག་ཏེ་བྷྱོ་སོགས་ཀྱིས་སྤེལ། རང་གི་སྙིང་ག་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་བགེགས་ཀྱི་རིགས་རྣམས་མདུན་དུ་བཀུག་སྟེ་ཞི་ཞིང་དུལ་བའི་ཚུལ་གྱིས་འཁོད་པར་གྱུར། ལྕགས་ཀྱུའི་ཕྱག་རྒྱ་དང་བཅས། ཨོཾ་བི་ནཱ་ཡ་ཀེ་ཤྭ་ར་སརྦ་བིགྷྣཱན་ཨངྐུ་ཤ་ཛ༔ས་མགྲོན་དགུག །དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ། །དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ། །དེ་བཞིན་གཤེགས་པ་འཇིགས་པ་ཐམས་ཅད་དང་ཡོངས་སུ་བྲལ་བ་ལ་ཕྱག་འཚལ་ལོ། །ཞེས་བདེ་གཤེགས་བཞིའི་མཚན་བརྗོད་པ་སྔོན་དུ་འགྲོ་བས། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷཱ་ར་སཾ་བྷཱ་ར་ཧཱུྃ༔ ཞེས་ལན་གསུམ་གྱིས་གཏོར་མ་བསྔོ། ཧྲཱི༔ གང་དག་སྒྲུབ་ལ་མི་དགའ་བ༔ བི་ནཱ་ཡ་ཀ་དགའ་རབ་དབང༔ བདུད་ཀྱི་ཚོགས་རྣམས་གཏོར་མ་ལོངས༔ ཞི་དང་ཕན་སེམས་ལྡན་པར་མཛོད༔ ཨོཾ་བི་ནཱ་ཡ་ཀེ་ཤྭ་ར་སརྦ་བིགྷྣཱན་གཙྪ༔ས་མགྲོན་རྣམས་རང་གནས་གཤེགས་པར་བསམ་ལ། གང་དག་གདུག་པའི་སེམས་འཆང་བ་དེ་དག་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཞེས་དང་། ཨོཾ་ཧ་ཡ་གྲཱི་བ་ཧཱུྃ་ཕཊ། དང་། སུམྦྷ་སོགས་བརྗོད་པས་བསྐྲད། འབྱུང་པོ་གང་དག་འདིར་ནི་ལྷགས་གྱུར་ཏམ། །ཞེས་སོགས་ཀྱིས་སྨོན་ལམ་གདབ། བདག་འཇུག་ལེན་པར་སྤྲོ་ན་འོག་ནས་འབྱུང་བ་ལྟར་སྐབས་འདིར་བླང་ངོ་། །གསུམ་པ་དངོས་གྲུབ་མྱུར་ཕྱིར་བྱིན་དབབ་པ་སོགས་ལ་གསུམ། བགེགས་བསལ་བ། བྱིན་དབབ་པ། གཏང་རག་གི་མཆོད་བསྟོད་སོགས་བྱ་བའོ། །དང་པོ་ནི། རང་གི་ཐུགས་ཀ་ནས་ཁྲོ་བོ་རྟ་མགྲིན་གྱི་ཚོགས་དཔག་ཏུ་མེད་པ་སྤྲོས་ཏེ་དངོས་གྲུབ་སྒྲུབ་པ་ལ་བར་དུ་གཅོད་པའི་བགེགས་ཀྱི་ཚོགས་ཐམས་ཅད་རྒྱང་རིང་དུ་བསྐྲད་པར་གྱུར། ཅེས་དང་། ཨོཾ་ཧ་ཡ་གྲཱི་བ་ཧཱུྃ་ཕཊ། ཨོཾ་སུམྦྷ་སོགས་བརྗོད་ཅིང་རོལ་མོའི་ཚམ་རྔམ་དང་། གུ་གུལ་གྱིས་བདུག །ཡུངས་དཀར་གྱིས་བྲབས་པས་བགེགས་བསལ། གཉིས་པ་བྱིན་འབེབ་ནི། སྒྲུབ་པ་པོ་རྣམས་དཀྱིལ་འཁོར་གྱི་དྲུང་དུ་བཞེངས་ཏེ། བདག་མདུན་ལྷ་ཚོགས་རྣམས་ཀྱི་ཐུགས་ཀ་ནས་ཡེ་ཤེས་ཀྱི་འོད་ཟེར་བསམ་གྱིས་མི་ཁྱབ་པ་འཕྲོས་པས། བླ་མ་ཐུགས་རྗེ་ཆེན་པོ་རྒྱལ་བ་སྲས་དང་བཅས་པ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ལྷ་སྔགས་ཕྱག་མཚན་གྱི་རྣམ་པས་བདག་གནས་ཡོ་བྱད་རྣམས་ལ་སིབ་སིབ་ཐིམ་པར་གྱུར། ཅེས་བརྗོད་ཅིང་བསམ་ལ། སྤོས་དྲི་ཞིམ་པོ་འཐུལ་ཞིང་། རོལ་མོའི་སྒྲ་དང་དབྱངས་ཀྱི་འགྱུར་བ་སྙན་པོས། ཧཱུྃ༔ འཕགས་མཆོག་ཐུགས་རྗེའི་དུས་ལ་བབ། ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་བརླབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་སྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ། ལོ་ཀེ་ཤྭ་ར་ས་པ་རི་ཝཱ་ར་ཛྙཱ་ན་ཨཱ་བེ་ཤ་ཡ་ཨ་ཨཱཿ ཞེས་ཡང་ཡང་བརྗོད་ཅིང་དཀྱིལ་འཁོར་ལ་བསྐོར་བ་དང་བཅས་བྱིན་དབབ། ཧཱུྃ་ཧཱུྃ་ཧཱུྃ། ཞེས་ཕབ་པའི་ཡེ་ཤེས་པ་མདུན་གྱི་ནམ་མཁར་བསྡུས་ལ། ཛཿཧཱུྃ་བཾ་ཧོཿས་བདག་གནས་སྒྲུབ་རྫས་ལ་དབྱེར་མེད་དུ་བསྟིམ་མོ། །སྒྲུབ་པ་པོ་རྣམས་རང་གནས་སུ་འཁོད་དོ། །གསུམ་པ་གཏང་རག་ནི། གཏང་རག་གི་མཆོད་པ་བསང་སྦྱང་བྱིན་གྱིས་བརླབས་ལ། སྲིད་ཞིའི་མགོན་གྱུར་སོགས་ཀྱིས་མཆོད། ཧྲཱི༔ ཚད་མེད་ཐུགས་རྗེ་སོགས་ཀྱིས་བསྟོད། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པ། །འདིར་ནི་བགྱི་བ་གང་ནོངས་པ། །དེ་ཀུན་ཁྱེད་ཀྱིས་བཟོད་མཛད་རིགས། །ཞེས་དང་། ཡི་གེ་བརྒྱ་པ་ལན་གསུམ་གྱིས་ནོངས་པ་བཤགས། ཨོཾ། འདིར་ནི་རྟེན་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་བསྩལ་དུ་གསོལ། །ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ། ཞེས་མེ་ཏོག་འཐོར་ཞིང་བརྟན་བཞུགས་བྱ། རང་དམ་ཚིག་ཐུགས་རྗེ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོས་པས་གཞལ་ཡས་ཁང་འཁོར་དང་བཅས་པ་འོད་དུ་ཞུ་ནས་རང་ལ་ཐིམ་པའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་གྱུར། འདི་ལྟ་བུ་ཡི་དགེ་བ་ཡིས༔ འཁོར་བ་དོང་ནས་སྤྲུགས་པ་དང༔ འབྲེལ་ཐོགས་འགྲོ་བ་ཐམས་ཅད་ཀུན༔ བདེ་བ་ཅན་དུ་སྐྱེ་བར་ཤོག༔ ཅེས་བསྔོ་སྨོན་བྱ། སྟོན་མཆོག་དམ་པ་སོགས་ཤིས་བརྗོད་རྒྱས་པར་སྤེལ། ན་མོ༔ ཕྱོགས་བཅུ་དུས་བཞིའི་སོགས་གཏེར་ཁ་འདི་ཉིད་ལས་འབྱུང་བའི་སྨོན་ལམ་གྱིས་མཚོན་བསྔོ་སྨོན་རྒྱ་ཆེར་བྱའོ། །དེ་ལྟ་བུའི་རིམ་པས་ཐོར་ཐུན། སྔ་ཐུན། ཕྱི་ཐུན། སྲོད་ཐུན། ནམ་གྱི་ཆ་སྟོད་དང་། ཆ་སྨད་དེ་དུས་དྲུག་ཏུ་ལས་གཞུང་བསྲང་། ཆ་གསུམ་ཐུན་ཐམས་ཅད་ཀྱི་མཐར་མ་གྲུབ་ཀྱང་སྔ་ཐུན་ལྟ་བུ་གང་བདེར་ཚར་གཅིག་བསྔོས་པས་རུང་། སྒྲུབ་པ་པོ་རྣམས་ཚོ་གཉིས་སུ་བཅད་དེ། གཅིག་གིས་ལས་གཞུང་བསྲངས་ཏེ་བུམ་བཟླས་འཇོག་རན་པ་ན། གཅིག་ཤོས་ཀྱིས་བུམ་བཟླས་དབུ་ཚུགས་པར་བྱས་ཏེ། དེ་ལ་གཟུངས་ཐག་གཏད་དེ་བཟའ་བཏུང་དང་གུང་སེང་སོགས་ཀྱང་རེས་མོས་སུ་བྱས་ཏེ་ཁོར་ཡུག་ཏུ་སྔགས་རྒྱུན་མི་འཆད་པར་བཟླ། བཟླ་བྱའི་སྔགས་ཀྱང་ཉིན་བདུན་ལ་མཚོན་ན། ཉིན་དང་པོ་གསུམ་ལ་གོང་དུ་སྨོས་པ་ལྟར་དང་། དེ་ནས་ཉིན་གསུམ་ལ་གཙོ་བོར་འགྲོ་བ་འདུལ་བའི་དམིགས་པ་དང་སྦྱར་ཏེ། ཨུཥྞཱི་ཥ་དང་། ཡིག་དྲུག །སྡིག་སྒྲིབ་ཀུན་འཇོམས་ཀྱི་གཟུངས་རྣམས་ཀྱི་མཐར། ཨ་ར་པ་ཙ་མི་ཏ་ཧྲྀ་ད་ཡ་སྭཱ་ཧཱ༔ ཞེས་བཏགས་པ་བཟླ། མཇུག་གི་ཉིན་གཅིག་ལ། གཙོ་བོར་འབྱུང་ལྔའི་དྭངས་བཅུད་བསྡུ་བའི་དམིགས་པ་དང་སྦྱར་ཏེ། སྔགས་དེ་རྣམས་ཀྱི་མཐར། ཨོཾ་ཨཱཿཧཱུྃ་སྭཱ་ཧཱ༔ མཱུཾ་ལཱཾ་མཱཾ་པཱཾ་ཏཱཾ༔ སརྦ་ཏ་ཐཱ་ག་ཏ་མ་ཧཱ་པཉྩ་ཨོཾ༔ ཨཱ་ཡུརྫྙཱ་ན་མ་ཧཱ་པུཎྱེ་ཏིཥྛ་ཨོཾ༔ ཞེས་བཏགས་པ་བཟླ། གལ་ཏེ་རྣལ་འབྱོར་པ་ཀུ་སཱ་ལི་ལྟ་བུས་སྒྲུབ་གྲོགས་གཞན་མ་རྙེད་ན་རང་གཅིག་པུས་ངག་ཁོར་ཡུག་བཅད་དེ་ཐུན་དྲུག་གི་རིམ་པས་ཇི་སྐད་བཤད་པ་བཞིན་བསྒྲུབས་ཀྱང་རུང་ངོ་། །གཉིས་པ་རྗེས་ཀྱི་ཆོ་ག་བྱེ་བྲག་པ་ལ་གསུམ། བདག་ཉིད་འཇུག་པ། དངོས་གྲུབ་བླང་བ། གཞན་རྗེས་སུ་གཟུང་བའོ། །དང་པོ་ནི། སྤྱིར་གཞུང་རྩ་བར་དམིགས་ཀྱིས་མ་བསལ་བས་བདག་འཇུག་མ་བླང་ཡང་རུང་མོད། གྲུབ་ན་ཕུན་སུམ་ཚོགས་པའི་ཡན་ལག་ཏུ་འགྱུར་བས། དེ་ལྟར་ན་སྦྱོར་བ་བཅས་བཤམ་གྱི་སྐབས་སུ། རིལ་བུའི་བུམ་པའི་མདུན་དུ་མཉྫིའི་ཁར་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པའི་སྟེང་དུ་དུང་ཆོས་དྲི་བཟང་གི་ཆུས་གང་བ་བཞག་པ་ལ། གཞན་ཡང་ཤར་དུ་དབུ་རྒྱན། ལྷོར་རྡོ་རྗེ། ནུབ་ཏུ་དྲིལ་བུ། བྱང་དུ་ཁྲི་གདུགས་པུསྟི། མཐའ་སྐོར་དུ་མཆོད་གཏོར། ཉེ་ལོགས་ཅི་བདེ་བར་ལས་བུམ་དང་། མཎྜལ་མེ་ཏོག་སོགས་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱ། དངོས་གཞིར་ཕྱི་ཐུན་གྱི་སྐབས་བདག་མདུན་གྱི་བཟླས་པ་གྲུབ་ནས། བུམ་པ་དུང་ཞལ་བཅས་བསང་སྦྱང་། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་ལས། །རྣམ་རྒྱལ་བུམ་པ་མཚན་ཉིད་ཡོངས་རྫོགས་སྟེང་། །དུང་ཞལ་བདུད་རྩིའི་བཅུད་ཀྱིས་གང་བའི་དབུས། །སྣ་ཚོགས་པདྨ་འདབ་བཞིའི་གེ་སར་ལ༔ སོགས་ནས། མཚན་པར་གསལ༔ ཞེས་པའི་མཐར། རང་བྱུང་རྡོ་རྗེ་གསུམ་སོགས་སྦྲེལ། སྤྱན་འདྲེན་ནས་བསྟོད་པ་ཡན་སྒྲུབ་ཐབས་ལྟར་བྱས་ལ། གཟུངས་ཐག་ནས་བཟུང་སྟེ། རང་གི་ཐུགས་ཀ་ནས་སྔགས་ཀྱི་ཕྲེང་བ་བྱུང་། གཟུངས་ཐག་ལ་འཁྲིལ་ཏེ་དུང་ཞལ་གྱི་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། དེ་རྣམས་ཀྱི་སྐུ་ལས་བདུད་རྩིའི་རྒྱུན་དཔག་ཏུ་མེད་པ་བབས་པས་དུང་ཞལ་གང་བར་བསམ་ལ་བཟླས་པ་ཅི་ནུས་བྱ། མཐར་དུང་ཞལ་གྱི་ལྷ་འོད་དུ་ཞུ་བའི་བདུད་རྩི་བུམ་པའི་ཆུ་དང་རོ་གཅིག་པར་བསམ་ལ་དུང་ཆུ་བུམ་པར་བླུག །ལས་བུམ་དུ་སྐད་ཅིག་གིས་རྟ་མགྲིན་དམར་པོ་གཡས་དབྱུག་ཏོ་དང་གཡོན་ཞགས་པ་བསྣམས་པར་གསལ་བའི་སྐུ་ལས་བདུད་རྩིའི་རྒྱུན་བབས་པས་བུམ་པར་གང་བར་བསམ་ལ། ཨོཾ་ཧ་ཡ་གྲཱི་བ་ཧཱུྃ་ཕཊ༔ ཅེས་ཅི་ནུས་བཟླ་ཞིང་མཐར་ལྷ་འོད་དུ་ཞུ་བའི་ཆུ་ནུས་པ་དང་ལྡན་པར་བསམ། དེ་ནས་རིལ་བུའི་བུམ་པ་སྒྲུབ་པ་ནས་བཟུང་གཏོར་མ་འབུལ་བ་ཡན་གོང་ལྟར་མཐར་ཆགས་སུ་བཏང་རྗེས། ལས་བུམ་གྱི་ཆུས་ཁྲུས་བྱ་ཞིང་། ཇི་ལྟར་བལྟམས་པ་སོགས་ནས། ཤྲཱི་ཡེ་ཧཱུྃ། ཞེས་བརྗོད། རང་གི་ཐུགས་ཀ་ནས་ཁྲོ་བོ་རྟ་མགྲིན་གྱི་ཚོགས་དཔག་ཏུ་མེད་པ་སྤྲོས་ཏེ་དབང་ལེན་པ་ལ་བར་དུ་གཅོད་པའི་བགེགས་རྣམས་རྒྱང་རིང་དུ་བསྐྲད་པར་གྱུར། ཧ་ཡ་གྲཱི་བ་དང་། སུམྦྷའི་སྔགས་བཟླ་ཞིང་གུ་གུལ་གྱིས་བདུག །ཡུངས་དཀར་གྱིས་བྲབ། རོལ་མོའི་ཚམ་རྔམ་བྱ། ཨོཾ་བཛྲ་རཀྵ་རཀྵ་བྷྲཱུྃ༔ ཞེས་པས་སྲུང་འཁོར་གསལ་གདབ། དཀྱིལ་འཁོར་དུ་འཇུག་པའི་སླད་དུ། ས་གཞི་སྤོས་ཆུས་བྱུགས་ཤིང་སོགས་མཎྜལ་འབུལ། ཐལ་མོ་སྦྱར་ཏེ། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ཅེས་གསོལ་བ་གདབ། མིག་དར་བཅིངས་པའི་ཚུལ་དང་བཅས། ཨོཾ་ཙཀྵུ་བྷནྡྷ་ཝ་ར་མ་ན་ཡ་སྭཱ་ཧཱ། མེ་ཏོག་བཟུང་ལ། ཨཱ་ཁཾ་ཝཱི་ར་ཧཱུྃ། ཚོགས་ཞིང་ནམ་མཁའ་གང་བར་སད་པའི་སྤྱན་སྔར། བདག་སོགས་སེམས་ཅན་སྡུག་བསྔལ་གྲོལ་དོན་དུ༔ སོགས་སྐྱབས་སེམས་ཡན་ལག་བདུན་པ་ལན་གསུམ། ཁྱད་པར་ཅན་གྱི་དོན་ཞུ་བའི་སླད། ན་མོ༔ རྡོ་རྗེའི་བླ་མ་དགོངས་སུ་གསོལ༔ བདག་ལ་ཐུགས་རྗེ་ཆེན་པོ་ཡི༔ དབང་བསྐུར་མཆོག་ནི་བསྩལ་དུ་གསོལ༔ ལན་གསུམ། ཞེས་གསོལ་བ་བཏབ་པ་ལ། བླ་མ་དང་མདུན་བསྐྱེད་ཀྱི་གཙོ་བོ་ཐ་མི་དད་པས། ཨེ་མ་འདི་ནི་སྤྱོད་པའི་རྒྱུད༔ ཚུལ་བཞིན་དམ་ཚིག་ཐུབ་བྱ་འམ༔ ཞེས་དྲིས་པའི་ལན་བཏབ་པར་མོས་ཏེ། ཀྱེ་ཧོ༔ སློབ་དཔོན་ཐབས་མཁས་དགོངས་སུ་གསོལ༔ གསང་སྔགས་དམ་ཚིག་ཚུལ་བཞིན་བསྲུང༔ མཁན་པོ་ཕ་མ་རྗེ་ལྟར་མཆོད༔ བྱང་ཆུབ་སེམས་ནི་མི་སྤང་ངོ༔ མུ་སྟེགས་ཅན་ལའང་སྨད་མི་བྱ༔ རྡོ་རྗེ་དྲིལ་བུ་ཕྱག་རྒྱ་གཟུང༔ ལྷ་སྔགས་ཏིང་འཛིན་གསུམ་མི་གཏང༔ ཁོ་ན་ཉིད་བཞི་འབད་པས་བསྒོམ༔ མནའ་ཆུ་བཏུང་ལ། ཨེ་མ་ཧོ༔ དེ་ལྟར་ཡིན་ན་སྐལ་བར་ལྡན༔ དེ་ཕྱིར་སྙིང་ནས་བྲོ་བོར་ཅིག༔ ཅེས་གདམས་པ་ལ་རྡོ་རྗེའི་བྲོ་བོར་བར་མོས་ཏེ། ཨི་དན་ན་ར་ཀན༔ ཞེས་བརྗོད། ཡེ་ཤེས་པ་དབབ་པའི་སླད་དུ། རང་ཉིད་འཕགས་པ་ཐུགས་རྗེ་ཆེན་པོ་འགྲོ་འདུལ་པདྨ་གཙུག་ཏོར་དུ་གསལ་བཞིན་པའི་གནས་གསུམ་ཡིག་འབྲུ་གསུམ་གྱིས་མཚན་པ་ལས་འོད་ཟེར་འཕྲོས་པས། བསྒོམས་པ་དང་འདྲ་བའི་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་སིབ་སིབ་ཐིམ་པས་རྒྱུད་བྱིན་གྱིས་བརླབས་པར་གྱུར། ཅེས་བརྗོད་ཅིང་བསམ་ལ། ཧཱུྃ༔ འཕགས་མཆོག་ཐུགས་རྗེའི་སོགས་ནས། ཛཿཧཱུྃ་བཾ་ཧོཿ ཞེས་པའི་བར་སྤོས་རོལ་དང་བཅས་ཡང་ཡང་བརྗོད་པས་བྱིན་དབབ། རྡོ་རྗེ་སྤྱི་བོར་རྒྱ་གྲམ་དུ་བཞག་ལ། ཏིཥྛ་བཛྲས་བརྟན་པར་བྱ། པུཥྤེ་པྲ་ཏཱིཙྪ་ཧོ༔ཞེས་མེ་ཏོག་འཐོར། པུཥྤེ་གྲྀཧྞ་ཨི་མཾ་སཏྭཱ་མ་ཧཱ་བཱ་ལ་ཞེས་ལྷག་པའི་ལྷས་མེ་ཏོག་རང་གི་སྤྱི་བོར་བཅིངས་པར་བསམ། བཛྲ་ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ཅེས་པས་མ་རིག་པའི་སྒྲིབ་གཡོགས་དང་མིག་རས་དུས་མཉམ་དུ་བསལ་བར་མོས་ལ། བྷྲཱུྃ་པྲ་བེ་ཤ་ཡ་ཕཊ༔ ཕོ་བྲང་གི་སྒོ་བཞི་ཤག་གིས་ཕྱེ་ནས་ཤར་སྒོ་ནས་བྱམས་པ་ཚད་མེད་པའི་འཇུག་པས་ཞུགས་ཏེ་ཐར་པ་ཆེན་པོའི་གྲོང་ཁྱེར་རྟེན་དང་བརྟེན་པར་བཅས་པ་མངོན་སུམ་བཞིན་དུ་མཐོང་བར་གྱུར་པར་བསམ། དངོས་གཞིའི་དབང་གི་སླད་དུ། ས་གཞི་སྤོས་ཆུས་སོགས་མཎྜལ་འབུལ། ཨེ་མ་འདྲེན་པ་བླ་ན་མེད༔ དབང་བསྐུར་བ་ནི་བསྩལ་དུ་གསོལ༔ ཞེས་གསོལ་བ་བཏབ་པས། སློབ་དཔོན་དང་མདུན་བསྐྱེད་ཀྱི་གཙོ་བོ་ཐ་མི་དད་པའི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ནམ་མཁའ་གང་བར་སྤྱན་དྲངས་པ་དང་ལྷན་ཅིག་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བ་ལ་བརྟེན་ནས། སྒྲིབ་གཉིས་བག་ཆགས་དང་བཅས་པ་ཐམས་ཅད་བྱང་ཞིང་དག་སྟེ་སངས་རྒྱས་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པར་གྱུར། བུམ་པ་སྤྱི་བོར་བཟུང་ཞིང་། སྤྲོས་མེད་དོན་དམ་ཟླུམ་པོའི་བུམ་པ་ན༔ རང་བྱུང་ཐུགས་རྗེ་ཆེན་པོ་ཞུ་བའི་ཆུ༔ འཛིན་སེམས་ཞེ་སྡང་ལ་སོགས་རྣམ་པར་དག༔ མེ་ལོང་ཡེ་ཤེས་བུམ་པས་དབང་བསྐུར་རོ༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ༔ བདུད་རྩིའི་རྒྱུན་གྱིས་ལུས་གང་བའི་ལྷག་མ་སྤྱི་བོར་འཁྱིལ་བ་ལས་རིགས་ཀྱི་བདག་པོ་འོད་དཔག་མེད་ཀྱིས་དབུར་བརྒྱན་པ་ལ། རིན་པོ་ཆེའི་ཅོད་པན་གྱིས་དབང་བསྐུར་བས་སྐུ་དང་ཡེ་ཤེས་ཕྲིན་ལས་དང་བཅས་པའི་ཡོན་ཏན་ཐམས་ཅད་ཡོངས་སུ་རྫོགས་ཤིང་སངས་རྒྱས་ཀྱི་གཟུགས་སྐུ་མཚན་དཔེས་བརྒྱན་པ་འགྲུབ་པའི་སྐལ་བ་ཅན་དུ་བྱས་པར་གྱུར། དབུ་རྒྱན་སྤྱི་བོར་འཆིང་ལ། ཧྲཱི༔ སྐྱེ་མེད་དོན་དམ་སྙིང་པོ་འགག་མེད་ལས༔ ཕྱག་མཚན་ལྔས་བརྒྱན་རིགས་ལྔའི་ཅོད་པན་འདི༔ ཞེན་སེམས་ང་རྒྱལ་མ་ལུས་ཡེ་ནས་དག༔ མཉམ་ཉིད་ཡེ་ཤེས་རིགས་ལྔས་དབང་བསྐུར་རོ༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ རཏྣ་སཾ་བྷ་བ་མུ་ཀུཊ་ཨ་བྷི་ཥིཉྩ་ཧཱུྃ༔ རྡོ་རྗེ་དང་དྲིལ་བུ་ལག་ཏུ་གཏད་པས་སངས་རྒྱས་ཀྱི་ཐུགས་རྣམ་པར་མི་རྟོག་པའི་ཡེ་ཤེས་དང་། གསུང་དབྱངས་ཡན་ལག་དྲུག་ཅུ་འགྲུབ་པའི་སྐལ་བ་ཅན་དུ་བྱས་པར་གྱུར། རྡོར་དྲིལ་སྙིང་གར་སྟེང་འོག་ཏུ་བཟུང་ཞིང་། ཧོ༔ ཁྱོད་ཀྱིས་རྡོ་རྗེ་དྲིལ་བུ་ཆོངས༔ ཐུགས་ཀྱི་དབྱིངས་སུ་འཚང་རྒྱ་འོ༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ བཛྲ་གཎྜེ་ཨ་བྷི་ཥིཉྩ་མི༔ རང་ཉིད་སེང་གེས་བཏེགས་པའི་རིན་པོ་ཆེའི་ཁྲིར་འཁོད་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་ནམ་མཁའ་དང་མཉམ་པའི་བླ་བྲེ་ཕུབ་ཅིང་། ལག་ཏུ་གླེགས་བམ་གཏད་ནས་འཁོར་ལོས་སྒྱུར་བའི་རྒྱལ་པོ་རྒྱལ་སར་དབང་བསྐུར་བ་ལྟར་ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ཏུ་མངོན་པར་དབང་བསྐུར་བར་གྱུར། གླེགས་བམ་འཛིན་པའི་ཚུལ་དང་བཅས། ཧོ༔ དེང་ཕྱིན་རྡོ་རྗེ་སློབ་དཔོན་ཏེ༔ ཕྱག་རྒྱ་གསུམ་དང་མ་བྲལ་ཅིག༔ རང་གཞན་དོན་ལ་བརྩོན་པར་གྱིས༔ ཞེས་དང་། ཡེ་དྷརྨཱཿབརྗོད་ཅིང་མེ་ཏོག་འཐོར་ལ་དབང་ལྷ་རང་ལ་ཐིམ་པར་བསམ། སློབ་དཔོན་དང་མདུན་བསྐྱེད་ཐ་མི་དད་པའི་ཞལ་ནས་སྔགས་ཀྱི་ཕྲེང་བ་བྱུང་། རང་ཉིད་ཀྱི་རྣ་བ་གཡས་པ་ནས་ཞུགས། སྙིང་གའི་ས་བོན་ལ་ཐིམ་པས་སྔགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པར་གྱུར། ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ལན་གསུམ། མདུན་བསྐྱེད་ཀྱི་ཞལ་ནས། དེ་ལྟར་ལྷ་སྔགས་ཀྱིས་མཚོན་པའི་དུས་གསུམ་གྱི་རྣམ་པར་རྟོག་པའི་རྗེས་སུ་མ་འབྲང་བར་སེམས་ཉིད་གཉུག་མའི་དབྱིངས་སུ་མཉམ་པར་ཞོག་ཅིག །ཅེས་གདམས་པར་མོས་ལ་ཅུང་ཟད་མཉམ་པར་འཇོག །བཀྲ་ཤིས་རྫས་རྟགས་ཀྱི་ཙཀླི་བཟུང་ལ། ཧྲཱི༔ མ་རིག་རྣམ་དག་ཡེ་ཤེས་མེ་ལོང་མཆོག དུག་ལྔའི་གདུང་སེལ་སྙིང་པོ་ཞོ་ཡི་ཟས༔ ཉོན་མོངས་གཅོང་གཞིལ་གི་ཝཾ་སྨན་གྱི་ཕུལ༔ ཕྱི་ནང་ཆོས་རྣམས་དབང་སྡུད་ལི་ཁྲི་མཆོག༔ རྒྱུད་དག་གསང་སྔགས་འབྲས་སྤྱོད་བིལྦའི་འབྲས༔ རྡོ་རྗེའི་ཚེ་མཆོག་འཕེལ་བའི་དཱུརྦ་དང༔ ལོག་སྨྲ་ཀུན་བཅོམ་གཡས་འཁྱིལ་ཆོས་ཀྱི་སྒྲ༔ བདུད་སྡེ་ཕམ་མཛད་ཁྲོ་བོ་ཡུངས་དཀར་ཚོགས༔ འདི་དག་དབང་བསྐུར་བཀྲ་ཤིས་ལྡན་པར་ཤོག༔ ཨོཾ་མངྒ་ལཾ་ཀུ་རུ་ཨ་བྷི་ཥིཉྩ་མི༔ ཧྲཱི༔ དཔལ་བེའུ་ཡེ་ཤེས་དྲྭ་བ་ཆེ༔ འཁོར་ལོ་ཕྱོགས་ལྷུང་ཀུན་དང་བྲལ༔ པདྨ་ཆགས་མེད་ཡེ་ཤེས་ཏེ༔ རྒྱལ་མཚན་རྟོག་མེད་བདུད་ལས་རྒྱལ༔ གདུགས་མཆོག་ཁོར་ཡུག་འོད་གསལ་བ༔ བུམ་པ་ཅིར་སྣང་ཆོས་ཀྱི་གཏེར༔ ཆོས་དུང་གྲགས་སྟོང་གདངས་རྩལ་ཅན༔ གསེར་ཉ་ཡེ་ཤེས་བྱང་ཆུབ་སེམས༔ སྐལ་ལྡན་རྣམས་ལ་དབང་བསྐུར་བས༔ བཀྲ་ཤིས་ཕུན་སུམ་ཚོགས་པར་ཤོག༔ ཨོཾ་ཨཥྚ་མངྒ་ལཾ་ཨ་བྷི་ཥིཉྩ་མི། རྗེས་འབྲེལ་དུ་ཤིས་པ་བརྗོད་པ་ཇི་ལྟར་རིགས་པ་དང་བཅས་མེ་ཏོག་གི་ཆར་དབབ་ཅིང་རོལ་མོའི་སྒྲ་སྦྱར། གཙོ་བོས་ཇི་ལྟར་སོགས་ཀྱིས་དམ་ཚིག་ཁས་བླང་། ས་གཞི་སྤོས་ཆུས་བྱུགས་སོགས་གཏང་རག་གི་མཎྜལ། དེང་ནས་བརྩམ་སྟེ་སོགས་ལུས་ལོངས་སྤྱོད་འབུལ་བ་རྣམས་བྱའོ། །དེ་ནས་བྱིན་འབེབ་སོགས་ཆོ་གའི་འཕྲོས་རྣམས་གོང་སྨོས་ལྟར་གཏང་ངོ་། །གཉིས་པ་དངོས་གྲུབ་བླང་བ་ནི། ངན་སོང་དོང་སྤྲུགས་ཀྱི་གཞུང་ལས། ཉམས་དགའ་བྱིན་ཕེབས་རིག་པ་དྭངས༔ འོད་དང་དུ་བ་སྒྲ་སྙན་དང༔ མང་དུ་འཕེལ་ན་གྲུབ་པའི་རྟགས༔ ཞེས་གསུངས་པའི་མཚན་མ་བཟང་པོ་དངོས་སུ་མཐོང་བའམ། སྒྲུབ་པ་སང་གྲོལ་རྒྱུའི་དོ་ནུབ་མཆོད་གཏོར་གསར་པ་རྒྱ་ཆེར་བཤམ། སང་སྔ་བར་ལངས་ལ་ལས་གཞུང་བསྲང་། ནམ་ལངས་པའི་དུས་སུ་བདག་འཇུག་དང་འབྲེལ་ན་དབང་གི་དངོས་གཞི་རྫོགས་པའི་མཚམས་དང་། མ་འབྲེལ་ན་གཏོར་མ་འབུལ་བ་ཡན་གྲུབ་རྗེས། ཐལ་མོ་སྦྱར་བས་བཏུད་དེ། འགྲོ་འདུལ་པདྨ་གཙུག་ཏོར་གྱི༔ དཀྱིལ་འཁོར་ལྷ་ཚོགས་བདག་ལ་དགོངས༔ མྱོང་གྲོལ་རྫས་ཀྱི་དངོས་གྲུབ་མཆོག༔ ཐུགས་རྗེས་དགོངས་ཏེ་བསྩལ་དུ་གསོལ༔ ཞེས་གསོལ་བ་བཏབ་པས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ཀའི་འོད་ཀྱིས་དབང་གི་ལྷ་ནམ་མཁའ་གང་བར་སྤྱན་དྲངས་པ་དང་ལྷན་ཅིག་པས། རིལ་བུ་ལྷར་གསལ་བས་ཡོངས་སུ་གང་བའི་རིན་པོ་ཆེའི་བུམ་པ་སྤྱི་བོར་བཞག་ཅིང་དབང་བསྐུར་བས་སྐུ་ལས་བདུད་རྩིའི་རྒྱུན་བབས། སྤྱི་བོ་ནས་ཞུགས། ལུས་ཀྱི་ནང་ཐམས་ཅད་གང་བར་གྱུར་པར་བསམ་ལ། རིལ་བུའི་བུམ་པ་སྤྱི་བོར་བཟུང་ཞིང་། ཨོཾ༔ ཏིལ་གྱི་གང་བུ་བཞིན་གང་བའི༔ རྒྱལ་བས་བུམ་པ་བཟུང་ནས་ནི༔ མྱོང་གྲོལ་བདུད་རྩིའི་དབང་བསྐུར་བས༔ ཉོན་མོངས་དྲི་མ་དག་པར་ཤོག༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ཀ་ལ་ཤ་ཨ་བྷི་ཥིཉྩ་ཨོཾ༔ དེས་ལུས་ཀྱི་སྒོ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག །འཕགས་པ་ཐུགས་རྗེ་ཆེན་པོའི་སྐུའི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པ་ཡིན་ནོ། །བུམ་པ་མགྲིན་པར་བཟུང་ལ། བུམ་པའི་ལྷ་ལས་རིལ་བུ་ལས་ཀྱི་སེམས་དཔའ་འཕགས་མཆོག་འཁོར་བ་དངོ་སྤྲུགས་ཀྱི་རྣམ་པས་རང་གི་ལྕེ་པདྨ་དམར་པོ་འདབ་མ་བརྒྱད་པའི་རྣམ་པར་གསལ་བའི་དབུས་སུ་བྱོན། དེ་ལས་འོད་ཟེར་འཕྲོས། མགྲིན་པའི་ནང་ཐམས་ཅད་གང་བར་གྱུར། རིལ་བུ་ལྕེ་སྟེང་དུ་བཞག་ལ། ཨཱ༔ བུམ་བཅུད་པདྨ་གཙུག་ཏོར་ལྷ༔ ལས་ཀྱི་སེམས་དཔའི་རྣམ་པར་བྱོན༔ རྡོ་རྗེ་ལྕེ་ཡི་དལ་དུ་བཞུགས༔ ནུས་པ་སྔགས་ཀྱི་དབང་བསྐུར་རོ༔ སྔགས་མཐར། ཝཱ་ཀ་ཨ་བྷི་ཥིཉྩ་ཨཱ༔ དེས་ངག་གི་སྒོ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག །འཕགས་པ་ཐུགས་རྗེ་ཆེན་པོའི་གསུང་གི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པ་ཡིན་ནོ། །མཐར་རིལ་བུ་ལྷར་གསལ་བ་མགྲིན་པའི་ལམ་ནས་བྱོན། སྙིང་པདྨ་འདབ་བརྒྱད་ཀྱི་དབུས་སུ་རླུང་སེམས་དང་དབྱེར་མེད་པའི་ཡེ་ཤེས་སེམས་དཔའ་འགྲོ་འདུལ་འཁོར་བ་དོང་སྤྲུགས་ཀྱི་རྣམ་པས་བྱང་ཆུབ་མ་ཐོབ་བར་དུ་མི་འབྲལ་བར་ཡུན་གྱི་ལྷར་བཞུགས་ཤིང་། ཐུགས་རྗེའི་གཟི་བྱིན་རབ་ཏུ་འབར་བས་རྒྱུད་བྱིན་གྱིས་བརླབས་པར་གྱུར། རིལ་བུ་བུམ་ཆུ་དང་སྦྱར་བ་ཁོང་དུ་མིད་ལ། ཧཱུྃ༔ སྙིང་དབུས་པདྨའི་ཟེའུ་འབྲུ་རུ༔ ཐུགས་རྗེའི་གཟི་འབར་ཡེ་ཤེས་སེམས༔ བྱང་ཆུབ་བར་དུ་རོ་གཅིག་པས༔ མཆོག་གི་དངོས་གྲུབ་ཐོབ་པར་ཤོག༔ སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ༔ ཞེས་བརྗོད་ཅིང་སྙིང་གར་རྡོ་རྗེས་རྒྱས་གདབ་ཚུལ་བྱ། དེས་ཡིད་ཀྱི་སྒོ་ནས་བསགས་པའི་སྡིག་སྒྲིབ་བག་ཆགས་དང་བཅས་པ་བྱང་ཞིང་དག །འཕགས་པ་ཐུགས་རྗེ་ཆེན་པོའི་ཐུགས་ཀྱི་དབང་དང་བྱིན་རླབས་དངོས་གྲུབ་མ་ལུས་པ་ཐོབ་པ་ལ། བླ་མ་དང་དབྱེར་མེད་པའི་མདུན་བསྐྱེད་འཕགས་པའི་ལྷ་ཚོགས་རྣམས་ཀྱིས་ཀྱང་མེ་ཏོག་གི་ཆར་འབེབས་ཤིང་བདེན་ཚིག་གིས་མངའ་གསོལ་བར་གྱུར། འགྲོ་འདུལ་འཕགས་པའི་ཕྲིན་ལས་ཀྱིས༔ ཁམས་གསུམ་སེམས་ཅན་མ་ལུས་ཀུན༔ ལས་ཉོན་སྒྲིབ་པ་ཀུན་བྱང་ནས༔ སྤྱན་རས་གཟིགས་དབང་མྱུར་ཐོབ་ཤོག༔ ཅེས་དང་། རྟེན་འབྲེལ་སྙིང་པོ་བརྗོད་ཅིང་མེ་ཏོག་གི་ཆར་དབབ། རོལ་མོའི་སྒྲ་སྦྱར། དེ་ནས་བདག་འཇུག་དང་འབྲེལ་ན་བཟླས་ལུང་མན་སྔར་ལྟར་བླངས་ཤིང་། གང་ལྟར་ཡང་མཇུག་གཏང་རག་གི་མཆོད་བསྟོད་རྒྱས་པར་བྱ། ནོངས་པ་བཤགས། རྡུལ་ཚོན་ཡིན་ན་གཤེགས་གསོལ་དང་། རས་བྲིས་དང་། རིལ་བུ་ལ་བརྟན་བཞུགས་རྒྱས་པར་བྱ་ཞིང་མེ་ཏོག་གི་ཆར་དབབ། བསྔོ་སྨོན་ཤིས་བརྗོད་བར་གོང་བཞིན་གྲུབ་རྗེས། སྒྲུབ་ཁང་གི་སྒོ་དྲུང་རྒྱལ་ཐོའི་མདུན་གཏང་རག་གི་མཆོད་གཏོར་བཤམས་ལ་གཏོར་མ་བསང་སྦྱང་བྱིན་རླབས་འབུལ་བ་དང་། མཆོད་བསྟོད་གོང་ལྟར་བྱས་ལ། མ་རྙེད་ཡོངས་སུ་མ་ཚང་དང་། །སོགས་ཀྱི་མཐར་ཡི་གེ་བརྒྱ་པས་ནོངས་པ་བཤགས། བཛྲ་མུཿས་རྒྱལ་པོ་ཆེན་པོ་འཁོར་དང་བཅས་པ་རང་རང་གི་གནས་སུ་དགྱེས་བཞིན་གཤེགས་པར་གྱུར། ཅེས་དང་། གནས་འདིར་ཉིན་མོ་བདེ་ལེགས་སོགས་བཀྲ་ཤིས་ཀྱི་ཚིགས་སུ་བཅད་པ་བརྗོད་ལ་ཐོ་བླང་། ནང་དུ་ལོག་སྟེ། ན་མོ༔ ཕྱོགས་བཅུ་དུས་བཞིའི་སོགས་སྨོན་ལམ་རྒྱས་པར་བཏབ་སྟེ་ཤིས་པ་བརྗོད་པའི་ཚིག་གིས་མཐའ་བརྒྱན། ལས་ཀྱི་རྗེས་མི་མངོན་པར་བསྡུས་ཏེ་སྒྲུབ་པ་གྲོལ་ལོ། །གསུམ་པ་གཞན་རྗེས་འཛིན་ནི། གཞན་ལ་དབང་བསྐུར་ན། གོང་གི་བདག་འཇུག་གྲུབ་འཕྲལ། ཨོཾ༔ དེ་བཞིན་གཤེགས་པ་ཐམས་ཅད་ཀྱི༔ རྡོ་རྗེའི་ཡེ་ཤེས་ཐོབ་བྱེད་པའི༔ སྙིང་པོའི་དཀྱིལ་འཁོར་འདི་རུ་ནི༔ བདག་གི་སློབ་མ་འཇུག་པར་འཚལ༔ ཅེས་གནང་བ་ནོད། ཐོ་ནང་དུ་འདུ་བར་འོས་པའི་སློབ་མ་རྣམས་ཕྱི་རོལ་དུ་ཁྲུས་བྱ། ནང་དུ་འོངས་པ་ན་བགེགས་བསྐྲད། སྲུང་འཁོར་བསྒོམ། མཚམས་སྦྱོར་ནས་བརྩམ་སྟེ་དབང་གི་དངོས་གཞི་ཡན་དབང་ཆོག་གཞན་ཕན་ཀུན་ཁྱབ་ལྟར་བསྐུར་རྗེས། དེས་དབང་གི་དངོས་གཞི་གྲུབ་ནས། དེ་དང་རྗེས་སུ་འབྲེལ་བར་མྱོང་གྲོལ་རྫས་ཀྱི་དབང་བསྐུར་བ་ཞུ་བའི་ཡོན་དུ་མཎྜལ་ཕུལ་ཅེས་བརྡ་སྦྱར་ལ་མཎྜལ་འབུལ་དུ་གཞུག །གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། འགྲོ་འདུལ་པདྨ་གཙུག་ཏོར་གྱི༔ ཞེས་སོགས་ཀྱིས་གསོལ་བ་བཏབ་ལ། དབང་བསྐུར་བ་དངོས་ལ་སྐུ་བུམ་པའི་དབང་བསྐུར་བ། གསུང་རིལ་བུའི་དབང་བསྐུར་བ། ཐུགས་རྒྱས་འདེབས་ཀྱི་དབང་བསྐུར་བ་རྣམས་སུ་ཡོད་པ་ལས། ཐོག་མར་སྐུ་བུམ་པའི་དབང་བསྐུར་བའི་སླད་དུ། བླ་མ་དང་དཀྱིལ་འཁོར་གྱི་གཙོ་བོ་སོགས་ནས། གང་བར་གྱུར་པའི་མོས་པ་མཛོད། ཅེས་པས་མཚོན་ཚིག་གི་མཐའ་བསྒྱུར་ཚུལ་ཅུང་ཟད་མ་གཏོགས་གོང་ལྟར་བདེན་བརྗོད་ཀྱི་བར་བགྱིས་མཐར། དེ་ལྟ་བུའི་མྱོང་གྲོལ་བདུད་རྩིའི་དབང་བསྐུར་པས་མཚོན་མཐོང་ཐོས་དྲན་རེག་གི་འགྲོ་བ་ཐམས་ཅད་གྲོལ་བ་བཞི་ལྡན་གྱི་ཕན་ཡོན་རླབས་པོ་ཆེ་འཐོབ་པའི་ཚུལ། ངན་སོང་དོང་སྤྲུགས་འགྲོ་བ་འདུལ་བའི་རྒྱུད་ཆེན་པོ་ལས། བཅོམ་ལྡན་འདས་པདྨའི་སྤྱན་གྱིས་མཁའ་འགྲོ་མ་གར་གྱི་དབང་མོ་ལ་བཀའ་བསྩལ་པ༔ དོན་གྱི་བདུད་རྩི་མྱོང་གྲོལ་ནི་སྐྱེ་བ་མེད་པའོ༔ རྟགས་ཀྱི་བདུད་རྩི་མྱོང་གྲོལ་ནི་སྐྱེ་བ་བདུན་པའི་བཅུད་དོ༔ མཚན་མའི་བདུད་རྩི་མྱོང་གྲོལ་ནི་ཚུལ་བཞིན་དུ་བསྒྲུབས་པའི་རིལ་བུའོ༔ འདི་ནི་ངན་སོང་དང་འཁོར་བ་ཐམས་ཅད་དོང་ནས་སྤྲུགས་པའི་ཐབས་ཆེན་པོ་འཕགས་པའི་ཐུགས་རྗེ་ལས་རང་བྱུང་བའོ༔ འགྲོ་བའི་རེ་འདོད་ཚུལ་བཞིན་དུ་སྐོང་བའི་ཡིད་བཞིན་གྱི་ནོར་བུའོ༔ འདི་ཉིད་སེམས་ཅན་གང་དང་གང་གིས་མཐོང་ངམ༔ ཐོས་སམ༔ རེག་གམ༔ མགུལ་དུ་འཆང་བའམ༔ དྲི་ཚོར་བའམ༔ ཁར་མྱོང་བ་སོགས་འབྲེལ་ཚད་ཐམས་ཅད་ཀྱི་ཚེ་རབས་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་དུང་དཀར་གྱི་རྡུལ་ཕྱིས་པ་བཞིན་དག་པར་འགྱུར་རོ༔ འཁོར་བ་དང་ངན་སོང་དུ་སྐྱེ་བའི་ལས་ཀྱི་སྒོ་ཆོད་པར་འགྱུར་རོ༔ མཐོ་རིས་དང་ཐར་པའི་ས་བོན་ཐེབས་པར་འགྱུར་རོ༔ གཞན་ཡང་ནད་དང༔ གདོན་དང༔ ཡིད་མི་བདེ་བ་ཐམས་ཅད་ཞི་ཞིང༔ ཚེ་དང་བསོད་ནམས་ཡེ་ཤེས་ཐམས་ཅད་རྒྱས་པར་འགྱུར་རོ༔ བགེགས་དང་བར་དུ་གཅོད་པས་མི་ཚུགས་པའི་སྲུང་བ་ཆེན་པོར་འགྱུར་རོ༔ མདོར་ན་གཞན་མང་དུ་སྨོས་ཅི་དགོས་ཏེ༔ རིལ་བུ་གང་གི་ལྟོར་སོང་བའི་སེམས་ཅན་དེ་འཕགས་པའི་གདུང་འཛིན་པས་སྤྱན་རས་གཟིགས་དབང་ཕྱུག་དང་སྐལ་པ་མཉམ་པར་ཤེས་པར་བྱའོ༔ ཞེས་གསུངས་པ་ལ་དད་པ་དང་ངེས་ཤེས་མཆོག་ཏུ་བསྐྱེད་ནས་འཕགས་མཆོག་ཐུགས་རྗེའི་དབང་ཕྱུག་གི་གསོལ་འདེབས་བཟླས་བསྒོམ་ལ་རྩེ་གཅིག་ཏུ་བརྩོན་པ་དང་། བྱེ་བྲག་ཏུ་གཏེར་ཁ་འདི་ཉིད་ཀྱི་ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་ལོ་རྒྱུས་ལས། ཡིག་དྲུག་ཁྲི་ཕྲག་རེ་བཟླས་ནས༔ རིལ་བུ་སུ་དང་སུས་མྱོང་བ༔ ངན་སོང་མེད་པར་ཐེ་ཚོམ་མེད༔ ཅེས་གསུངས་པས། དེང་འདིར་ཡང་རིལ་བུའི་བྱིན་རླབས་ཀྱི་ནུས་པ་སྐྱེད་པའི་ཕྱིར་ཡི་གེ་དྲུག་པ་ཁྲི་ཕྲག་རེ་ལ་ཉུང་མཐའ་བྱས་པ་བཟླ་བ་ལ་བརྩོན་པར་མཛད་འཚལ། དེས་སྤྱི་དང་བྱེ་བྲག་གི་དབང་བསྐུར་བ་དངོས་གཞི་གྲུབ་ནས། མཐའ་རྟེན་དུ་རིག་སྔགས་གྲུབ་པར་བྱེད་པ་བཟླས་ལུང་ཞེས་སོགས་དབང་ཆོག་ལྟར་མཐར་ཆགས་སུ་དགེ་བ་བསྔོ་བའི་བར་བྱས་ལ་སློབ་མ་རྣམས་གྱེས། སྒྲུབ་པ་པོ་རྣམས་ཀྱིས་མཆོད་བསྟོད་སོགས་རྗེས་ཆོག་གོང་བཞིན་བྱའོ། །ཡང་རིལ་བུའི་དབང་རྐྱང་པ་བསྐུར་ནའང་རུང་བས། དེ་ལྟར་ན་ཁྲུས་བྱ། བགེགས་ཕྲལ། སྲུང་འཁོར་བསྒོམ། སེམས་བསྐྱེད་གསལ་བཏབ་ནས། དེ་ལ་འདིར་ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པའི་མཁྱེན་བརྩེ་ནུས་གསུམ་གཅིག་ཏུ་བསྡུས་པའི་ངོ་བོ་ཨོ་རྒྱན་མཚོ་སྐྱེས་རྡོ་རྗེ་འཆང་ཆེན་པོས་ལེགས་པར་གསུངས་པའི། འཕགས་མཆོག་སྙིང་རྗེའི་གཏེར་ཆེན་འགྲོ་འདུལ་སྤྱན་རས་གཟིགས་པདྨ་གཙུག་ཏོར་ལྷ་ལྔའི་དཀྱིལ་འཁོར་དུ་མཐོང་ཐོས་དྲན་རེག་གི་འགྲོ་བ་ཐམས་ཅད། ཐར་པ་དང་ཐམས་ཅད་མཁྱེན་པའི་གོ་འཕང་ལ་དཀའ་བ་མེད་པར་སྦྱོར་བའི་མྱོང་གྲོལ་རྫས་ཀྱི་རིལ་བུའི་དབང་བསྐུར་བ་ལ་སློབ་དཔོན་གྱི་བགྱི་བ་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་ཐོག་མར་མཎྜལ་ཕུལ། ཅེས་མཎྜལ་འབུལ་དུ་གཞུག །དེ་ལྟར་མཎྜལ་ཕུལ་ནས། མི་ཕྱེད་དད་པའི་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀུན་མཁྱེན་ཡེ་ཤེས་སོགས། སྐྱབས་སེམས་ཡན་ལག་བདུན་པ་རྣམས་ཀྱི་མཐར་ཡེ་ཤེས་པ་དབབ་ཅིང་བསྟིམས་ལ། དེ་ལྟར་ཡེ་ཤེས་དབབ་ཅིང་བསྟིམ་པར་བྱ་བ་སྔོན་དུ་སོང་ནས། དངོས་གཞིའི་དབང་བསྐུར་བའི་སླད་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། འགྲོ་འདུལ་པདྨ་སོགས་གསོལ་འདེབས་ནས་བརྩམ་ཕན་ཡོན་བརྗོད་པ་ཡན་གོང་ལྟར་ལ། དེས་དབང་གི་དངོས་གཞི་གྲུབ་ནས། དམ་ཚིག་དང་སྡོམ་པ་ལ་སྲུང་སྡོམ་གྱི་འདུན་པ་དྲག་པོས་འདིའི་རྗེས་ཟློས་མཛོད། གཙོ་བོས་སོགས་ཀྱིས་དམ་ཚིག་ཁས་བླང་། མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་སྤྱི་ལྟར་བྱའོ། །ཐོ་ནང་དུ་འདུ་བར་མི་འོས་རིགས་ལ་དབང་བསྐུར་ན། ཐོ་བླངས་ནས་བསྔོ་སྨོན་སོགས་གྲུབ་རྗེས། གནས་དེ་ཉིད་དམ་ཕྱི་རོལ་དུ་དཀྱིལ་འཁོར་གསར་དུ་བཤམས་ལ་སྒྲུབ་མཆོད་སྔོན་དུ་འགྲོ་བས་གོང་ལྟར་དབང་བསྐུར་བར་བྱའོ། །དེ་ལྟར་ལེགས་པར་བསྒྲུབས་པའི་རིལ་བུའི་ཕན་ཡོན་ནི་གོང་དུ་ཇི་སྐད་སྨོས་པས་མཚོན་ཐུགས་རྗེ་ཆེན་པོའི་རྒྱུད་དང་མན་ངག་རྣམས་ལས་རྒྱ་ཆེར་འབྱུང་བའི་ཕྱིར། སྟོན་པ་རྡོ་རྗེ་འཆང་གི་བཀའ་ནམ་ཡང་མི་བསླུ་བས་ཆོས་སྤོང་བའི་ལས་ངན་གྱི་མཚོ་རྡོལ་བའི་དམ་འོག་ཏུ་མ་ཆུད་པའི་དད་པ་དང་། སྙིང་རྗེ་དང་། གཞན་ལ་སྨན་པར་འདོད་པའི་རྒྱལ་བའི་མྱུ་གུའི་རིགས་སུ་སོན་པ་རྣམས་ཀྱིས་ཚུལ་འདི་ལྟ་བུའི་སྒོ་ནས་ཀྱང་རང་གཞན་གྱི་རྒྱུད་ལ་ཐར་པ་དང་ཐམས་ཅད་མཁྱེན་པའི་ས་བོན་རྒྱ་ཆེར་བསྐྲུན་པའི་ཐབས་ལ་མཁས་པར་བྱའོ། །ཞེས་པའང་གཞན་ཕན་གྱི་བསམ་པ་བཟང་པོ་དང་ལྡན་ཡང་། སྒྲུབ་པ་ཆེན་པོའི་ཚུལ་ཇི་ལྟ་བ་ལག་ཏུ་མི་ལོན་པའི་རིགས་ལ་འདི་ཙམ་གྱིས་ཀྱང་སྐབས་ཀྱི་དོན་གྲུབ་པར་མཐོང་ནས། ཨོ་རྒྱན་རྡོ་རྗེ་འཆང་ཆེན་པོས་ལེགས་པར་གསུངས་པའི་འཇིག་རྟེན་དབང་ཕྱུག་པདྨ་གཙུག་ཏོར་གྱི་གཞུང་རྩ་བ་དང་། ཐུགས་སྒྲུབ་བར་ཆད་ཀུན་སེལ་གྱི་ཆ་ལག་ཐུགས་རྗེ་ཆེན་པོ་ངན་སོང་དོང་སྤྲུགས་ཀྱི་མྱོང་གྲོལ་རིལ་བུའི་ལས་ཚོགས་ཕན་ཚུན་ཁྲིགས་སུ་བསྡེབས་པ་པོ་ནི། སྤྲུལ་པའི་གཏེར་སྟོན་ཆེན་པོ་འགྲོ་འདུལ་མཆོག་གྱུར་བདེ་ཆེན་གླིང་པའི་བཀའ་དྲིན་ལས་ཟབ་མོའི་ལམ་སྲོལ་འདི་དག་དང་པོ་ཁོ་ནར་ཐོས་པའི་སྐལ་པ་བཟང་པོ་དང་ལྡན་ཅིང་། སྤོབས་པ་ཅུང་ཟད་དགེ་བ་མཚོ་སྐྱེས་ཀུན་ཏུ་འཆང་བ་དགྱེས་པའི་འབངས་མཁྱེན་བརྩེའི་དབང་པོ་རྡོ་རྗེ་གཟི་བརྗིད་རྩལ་གྱིས་དགེ་མཚན་གྱི་སྣང་བ་དང་བཅས་ལེགས་པར་སྦྱར་བའི་བསོད་ནམས་ཀྱིས་མཁའ་ཁྱབ་ཀྱི་འགྲོ་བ་ཀུན་ལ་འཕགས་པ་ཐུགས་རྗེའི་གཏེར་གྱི་ཕྲིན་ལས་མཐའ་དག་ཡོངས་སུ་རྫོགས་པའི་རྒྱུར་གྱུར་ཅིག། །།སྤྲུལ་པའི་གཏེར་འབྱིན་རྒྱ་མཚོའི་འཁོར་ལོས་སྒྱུར། །འགྲོ་འདུལ་མཆོག་གྱུར་བདེ་ཆེན་གླིང་པ་ཡི། །རིང་ལུགས་ཕྱོགས་དུས་ཀུན་ཏུ་ཁྱབ་པ་དང་། །ཕན་བདེའི་དགེ་མཚན་རྒྱས་པའི་བཀྲ་ཤིས་ཤོག །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།དཔེ་ཚན་འདི་སྔོན་ཆད་གཏེར་མཛོད་དཀྱུས་སུ་མེད་ཅིང། བལ་ཡུལ་ཞེ་དགོན་གྱི་པར་གསར་འདིར་གསར་བཞག་བྱས་པས་དབང་ལུང་གི་རྒྱུན་ལ་ཞིབ་རྟོག་དགོས་པ་ཡིན་ནོ།།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).