Terdzo-NI-066



Property "author" has been marked for restricted use.








Terdzo-NI-066.pdf
Click the picture above to view the Shechen manuscript.

བླ་མ་དགོངས་པ་འདུས་པ་ལས༔ མཁའ་འགྲོའི་ལས་ཚོགས་རྟེན་འབྲེལ་མོ་རྩིས་ཀྱི་སྐོར་མཁའ་འགྲོ་ལྔ་སྐོར་

bla ma dgongs pa 'dus pa las:_mkha' 'gro'i las tshogs rten 'brel mo rtsis kyi skor mkha' 'gro lnga skor

by  སངས་རྒྱས་གླིང་པ་ (Sangye Lingpa)
revealed by  སངས་རྒྱས་གླིང་པ་ (Sangye Lingpa)
in cycle  བླ་མ་དགོངས་པ་འདུས་པ་ (Bla ma dgongs pa 'dus pa)
Volume 42 (ནི) / Pages 991-1043 / Folios 1a1 to 27a6

Tibetan Text

༁ྃ༔ བླ་མ་དགོངས་པ་འདུས་པ་ལས༔ མཁའ་འགྲོའི་ལས་ཚོགས་རྟེན་འབྲེལ་མོ་རྩིས་ཀྱི་སྐོར་མཁའ་འགྲོ་ལྔ་སྐོར་བཞུགས་སོ༔ མཁའ་འགྲོ་མ་ལ་མོས་པ་ལམ་དུ་བྱེད་ཅིང༔ བསྙེན་པ་ཐེམས་ནས༔ ཕྱི་ནང་འབྱུང་བའི་རྟེན་འབྲེལ་ཐམས་ཅད་ལ་དབང་འབྱོར་ལས་སུ་རུང་བའི་རྣལ་འབྱོར་པས༔ རྟེན་འབྲེལ་མོ་རུ་གདབ་པར་འདོད་པས་འདི་ལ་བཞི་སྟེ༔ ཇི་ལྟར་བྱ་བའི་ཚུལ་དང༔ མོ་བདར་གྱི་རིམ་པ་དང༔ གདབ་པ་དངོས་དང༔ རྗེས་ཀྱི་རིམ་པ་དང་བཞི་ལས༔ དང་པོ་ཇི་ལྟར་བྱ་བའི་ཚུལ་ནི༔ མོ་གདབ་མོ་ཡི་སྒྲུབ་པ་སྔོན་དུ་སོང་བས༔ ནམ་མོ་གདབ་པ་དེའི་ཚེ༔ གདན་གཙང་མ་དར་དཀར་པོ་ལ་སོགས་པའི་སྟེང་དུ༔ སྒྲུབ་པ་བྱས་པའི་མཁའ་འགྲོ་ཤུགས་འགྲོའི་ཙཀྲ་རབ་གནས་ཅན་བཏིང་ཞིང༔ གཏོར་ཆུང་ཆང་ཕུད་ཀྱིས་བྲན་པ་གཅིག་ཀྱང་འབྱོར་ན་རབ༔ མ་འབྱོར་ན་ནས་འབྲུ་གཙང་མས་སྣོད་གས་ཆག་མེད་པ་བཀང་བ་ཞིག་དང༔ མོ་རྟེན་སྤྱན་གཟིགས་གང་འཐད་མདའ་དར་ལ་སོགས་པ་རྣམས་བཤམས༔ བདག་ཉིད་དཔལ་རྟ་མགྲིན་དུ་གསལ་བའི་སྤྱི་བོར་པདྨ་འབྱུང་གནས་ཨ་ཙ་རའི་ཆ་བྱད་ཅན་གཟི་མདངས་དང་ལྡན་པ་ཞིག་བསྐྱེད༔ སྙིང་གའི་དབུས་སུ་ཡང་ཕག་མོ་གསལ་གདབ༔ མདུན་གྱི་སྐུ་རྟེན་ལ༔ མཁའ་འགྲོ་ཤུགས་འགྲོ་བཅུ་དམ་ཚིག་པ་བསྐྱེད༔ ཡེ་ཤེས་པ་སྤྱན་དྲངས་ལ་བསྟིམ་ཞིང་མཁའ་འགྲོ་དངོས་སུ་གསལ་བའི་ལེགས་ཉེས་ཀྱི་མངོན་པར་ཤེས་པ་འཆར་བར་བསམ་ཞིང༔ བསྒྲུབ་པའི་དུས་ཀྱི་བསྙེན་པ་ཤམ་བུ་དང་བཅས་པ་བརྒྱ་ཕྲག་གམ་ཉེར་གཅིག་ལ་སོགས་པ་ལོང་ཁྱབ་དང་བསྟུན་ལ་བཟླ༔ གཏོར་མ་འབུལ༔ ཆང་ཕུད་གཏོར༔ དད་པའི་ཤུགས་བསྐྱེད་ཅིང་བླ་མ་ཡི་དམ་མཁའ་འགྲོ་ལ་གསོལ་བ་དྲག་ཏུ་གདབ༔ འོག་ནས་འབྱུང་བའི་བདེན་སྟོབས་དང་བདར་བྱང་བྱ༔ དེ་ནས་རྡེའུ་བསྒྲུབ་པ་བྱས་པའི་དཀར་པོ་ལ་འདོད་པའི་དོན་སྨོད་ཅིང༔ སངས་རྒྱས་མཁའ་འགྲོའི་ཐུགས་ཀ་ནས་བཟུང་སྟེ༔ མཁའ་འགྲོ་ཤུགས་འགྲོ་རྣམས་ཀྱི་ཐུགས་ཀར་བཀྲམ་སྟེ༔ རྡེའུ་དཀར་པོ་གང་ལ་བབས་པ་དེ་ལ་ངོས་བཟུང་བར་བྱའོ༔ ༈ གཉིས་པ་མོ་བདར་བའི་རིམ་པ་ནི༔ ཆང་ཕུད་དང་མེ་ཏོག་གཏོར༔ མདའ་དར་གཡབ་པ་ཙམ་གྱིས༔ སྣང་གསལ་སྟོན་པའི་མཁའ་འགྲོ་ཤུགས་འགྲོ༔ ཡེ་ཤེས་དང་ལས་ལ་གྲུབ་པ་ཐམས་ཅད་སྤུངས་སྤུངས་བྱོན་ནས་སྣང་སྲིད་མོའི་སྟོན་པ་མཛད༔ གཞན་ཡང་འཇིག་རྟེན་གྱི་ལྷ་ཀླུ་གཟའ་སྐར་མོ་པྲ་ལ་དགྱེས་པ་རྣམས་འདུས་ནས་སྣང་སྲིད་མོའི་སྟོན་པ་མཛད༔ རྣོ་མཐོང་མོ་ལྷའི་རྒྱལ་པོ་རྣམས་འདུས་ནས་མོ་བཟང་ངན་གྱི་ཤན་ཕྱེད་ཅིང་སྣང་སྲིད་སྟོན་པར་བསམ་ལ་འདི་སྐད་དོ༔ ཨེ་མ་ཧོ༔ འགྱུར་མེད་རྒྱལ་པོ་ཨུ་རྒྱན་རྗེ༔ རྣོ་ལ་རྣོ་གསལ་ཐམས་ཅད་མཁྱེན༔ མཁའ་འགྲོ་མང་པོའི་དབུས་ན་བཞུགས༔ སྣང་སྲིད་གཏན་ལ་ཕབ་པར་མཛོད༔ ཁྱེད་ལ་ཕྱག་འཚལ་སྐྱབས་སུ་མཆི༔ ན་མོ༔ བླ་མ་རྣམས་དང་ཡི་དམ་ལྷ༔ མཁའ་འགྲོ་ཤུགས་འགྲོར་བཅས་པ་ལ༔ བདག་དང་རྒྱུ་སྦྱོར་བཅས་པ་རྣམས༔ ལུས་ངག་ཡིད་གསུམ་གུས་ཕྱག་འཚལ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ མོ་རྟེན་རྫས་མཆོག་མཆོད་པ་འབུལ༔ སྣང་གསལ་སྒྲོན་མེ་སྦར་བ་ཡི༔ མཐུ་དང་དཔུང་གཉེན་མཛད་དུ་གསོལ༔ ཀྱེ༔ འདི་ལྟར་སྤྲུལ་པའི་མཁའ་འགྲོ་མ༔ མོ་དང་རྩིས་ཀྱི་མངའ་བདག་མོ༔ གནས་འདིར་སྤྱན་འདྲེན་གཤེགས་སུ་གསོལ༔ སྣང་གསལ་མོ་ཡི་གབ་རྩེ་ལ༔ བརྩེ་བར་དགོངས་ནས་བཞུགས་སུ་གསོལ༔ སྨན་རག་བདུད་རྩི་གཏོར་མ་འབུལ༔ ཁྱེད་ཀྱི་ཐུགས་དམ་གཉན་བསྐངས་ནས༔ སྣང་གསལ་མོ་ཡི་སྟོན་པ་མཛོད༔ སྣང་སྲིད་ལྷ་ཀླུ་མཐུ་རྩལ་ཅན༔ གཟའ་སྐར་འབྱུང་བའི་ལྷ་ཚོགས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ ཉེས་པའི་སྐྱོན་བྲལ་ཡོན་ཏན་ལྡན༔ འབྲུ་མཆོག་ནས་ཀྱི་མོ་ཡོན་འབུལ༔ སྣང་གསལ་མོ་ཡི་སྟོན་པ་མཛོད༔ མོ་ལྷའི་རྒྱལ་པོ་མངོན་ཤེས་ལྡན༔ ལྷ་དང་དྲང་སྲོང་ལ་སོགས་ཏེ༔ སྣང་གསལ་མོ་ལ་དགྱེས་པ་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ རྒོད་སྒྲོ་ཅན་གྱི་མདའ་གཙང་ལ༔ སྣ་ཚོགས་དར་གྱི་ཅོད་པན་བཏགས༔ སྤྱན་གཟིགས་འདོད་ཡོན་བསམ་མི་ཁྱབ༔ མོ་དང་ཕྱྭ་ཡི་རྟེན་དུ་བཙུགས༔ མོ་ལྷའི་རྒྱལ་པོ་རྣམས་ལ་འབུལ༔ དགྱེས་པའི་མོ་ཡོན་འདི་བཞེས་ལ༔ སྣང་གསལ་མོ་ཡི་སྟོན་པ་མཛོད༔ ཁྱེད་རྣམས་མོ་ཡི་སྟོན་པ་སྟེ༔ བཟང་ངན་གཉིས་ཀྱི་ཤན་འབྱེད་དང༔ ལེགས་ཉེས་གཉིས་ཀྱི་སྟངས་གཅོད་མཛོད༔ བདག་ལ་དགོས་པའི་དུས་བྱུང་བས༔ སྨོད་པའི་མོ་འདི་བསྟན་དུ་གསོལ༔ ལེགས་ཉེས་བཟང་ངན་ཤན་བྱས་ལ༔ རིན་ཆེན་གསལ་བའི་སྒྲོན་མེ་སྤོར༔ མཁྱེན་ལྡན་མངོན་ཤེས་འཕྲུལ་སྒོ་ཕྱེས༔ ན་མོ༔ མཁའ་འགྲོ་ཤུགས་འགྲོ་འབྱུང་བའི་ལྷ༔ མོ་དང་རྩིས་ཀྱི་མངའ་བདག་མོ༔ སྣང་སྲིད་གསལ་བའི་འཕྲུལ་མོ་ཆེ༔ སྤྱན་གཟིགས་མོ་ཡོན་འདི་བཞེས་ལ༔ སྣང་གསལ་མོ་ཡི་སྟོན་པ་མཛོད༔ ཤར་ཕྱོགས་འབྱུང་བ་ཤིང་གི་ལྷ༔ རྡོ་རྗེ་རིགས་ཀྱི་མཁའ་འགྲོ་དང༔ རྡོ་རྗེ་ཤུགས་འགྲོར་བཅས་པ་རྣམས༔ སྣང་གསལ་མོ་ཡི་སྟོན་པ་མཛོད༔ ལྷོ་ཕྱོགས་འབྱུང་བ་མེ་ཡི་ལྷ༔ རིན་ཆེན་རིགས་ཀྱི་མཁའ་འགྲོ་དང༔ རིན་ཆེན་ཤུགས་འགྲོར་བཅས་པ་རྣམས༔ སྣང་གསལ་མོ་ཡི་སྟོན་པ་མཛོད༔ ནུབ་ཕྱོགས་འབྱུང་བ་ལྕགས་ཀྱི་ལྷ༔ པདྨ་རིགས་ཀྱི་མཁའ་འགྲོ་དང༔ པདྨ་ཤུགས་འགྲོར་བཅས་པ་རྣམས༔ སྣང་གསལ་མོ་ཡི་སྟོན་པ་མཛོད༔ བྱང་ཕྱོགས་འབྱུང་བ་ཆུ་ཡི་ལྷ༔ ལས་ཀྱི་རིགས་ཀྱི་མཁའ་འགྲོ་དང༔ ལས་ཀྱི་ཤུགས་འགྲོར་བཅས་པ་རྣམས༔ སྣང་གསལ་མོ་ཡི་སྟོན་པ་མཛོད༔ མཚམས་བཞི་འབྱུང་བ་ས་ཡི་ལྷ༔ སངས་རྒྱས་རིགས་ཀྱི་མཁའ་འགྲོ་དང༔ སངས་རྒྱས་ཤུགས་འགྲོར་བཅས་པ་རྣམས༔ སྣང་གསལ་མོ་ཡི་སྟོན་པ་མཛོད༔ མཁའ་འགྲོ་ཤུགས་འགྲོ་ལ་སོགས་ཏེ༔ མོ་དང་རྩིས་ཀྱི་ལྷ་ཚོགས་རྣམས༔ གཙུག་ལག་མོ་ཡི་སྟོན་པ་མཛོད༔ ཅེས་པའི་བདར་བྱང་དང༔ གཞན་ཡང་ཡུལ་རིས་གཞི་བདག་ལ་སོགས་པ་རྣམས་ལ་མོ་རྟེན་གྱི་འབྲུ་དང་གསེར་སྐྱེམས་གཏོར་མཆོད་བྱ་ཞིང༔ རྒྱས་བསྡུས་སྐབས་དང་བསྟུན་པའི་མོ་བདར་བྱ༔ གལ་ཆེ་ན་ལན་གསུམ་མམ་ལྔ་ལ་སོགས་པར་བདར༔ དེ་ལྟར་མོ་བདར་བྱ་ཞིང་སྐྱེམས་ཕུད་དང༔ འབྲུ་སྔོན་གཏོར་བ་ཙམ་གྱིས་བག་དྲོ་ཆིལ་གྱིས་འགྲོ༔ དེ་ལྟར་བྱུང་ན་ཇི་ལྟར་འདོད་པའི་དོན་སྨོད་ཅིང་གདབ་པར་བྱའོ༔ ༈ གསུམ་པ་མོ་དངོས་ནི༔ སངས་རྒྱས་མཁའ་འགྲོ་ལ་བབས་ན༔ བསྟན་པའི་ཆུས་ཕྱྭ་ནི༔ གངས་དཀར་གྱི་རྩེ་ལ་སེང་གེ་འགྱིང༔ གཡུ་རལ་གྱི་གསེབ་ནས་སེང་ཕྲུག་འཕྱོ༔ ཤིན་ཏུ་བཟང་ངོ༔ ཁྱིམ་ཕྱྭ་ནི༔ རིའམ་ས་དབྱིབས་ཟླུམ་པོའི་དཀྱིལ་དུ་ཡོད་ན་ཐང༔ ལྷ་སྨན་བཟང་མོ་འགོ༔ ཡར་ཚེས་ལ་ལྷ་མཆོད༔ མར་ངོ་ལ་སྲི་མནན་ན་བཟང༔ ཕྱུགས་ལུག་མི་དང་ཟས་ནོར་ལོངས་སྤྱོད་འཕེལ༔ བདུད་དང་རྒྱལ་པོ་འཁྲི༔ དེ་མཆོད་ན་མགོན་བྱེད༔ མ་མཆོད་ན་སྲིད་ལ་རྐུ་བས་གཟབ་བོ༔ གཞན་བཟང་ངོ༔ སྐྱེས་ཀྱི་ཕོ་ཕྱྭ་ལ༔ གཅིག་བརྒྱུད་དམ༔ གཙོ་བོ་མི་ཆེན་གྱི་རྒྱུད་ཡིན་ན་ཐང༔ ཁ་གང་གི་ཟས་ཟ༔ རྒྱབ་གང་གི་གོས་གྱོན༔ བང་གང་གི་རྟ་རྒྱུག༔ མིག་གང་གི་ལྟད་མོ་ལྟ༔ སྐྱིད་གོ་རེ་བ་ལེགས་པར་འོང༔ སྲོག་ཕྱྭ་ལ༔ ལྷ་བཙུན་བཟང་པོ་འགོ༔ མི་ལ་སྨོན་མི་འཚལ༔ སྲོག་གི་དཀོར་མཛོད་ལ༔ གསེར་གྱི་གཡུང་དྲུང་འཁྱིལ༔ སྔར་གྱི་ལྷ་ལ་མཆོད་གསོལ་གྱིས༔ ལོ་གསུམ་ཟླ་བ་གསུམ༔ ཞག་གསུམ་ཟ་མ་གསུམ་དྲོས་དང་བཞི༔ དེའི་བར་དུ་ལྕགས་ཀྱི་སེར་བ་བབས༔ དུག་ལ་རྗེན་ཟས་བྱས་ཀྱང་མི་འཆི༔ ཚེ་སྲོག་སྲ་སྐད་དོ༔ སྲིད་ཕྱྭ་ནི༔ ལོ་ལེགས༔ སྐྱ་རྒྱལ༔ བུ་མང་ཚང་རྡོལ༔ མིང་སྲིང་བརྒྱད་དང་བཅས༔ ཡང་ཆུང་གིས་མཐའ་རྟེན་ནས༔ གཟའ་མི་སྐྱིད་ལ་བརྟན་ཡུན་རིང༔ ཤིན་ཏུ་བཟང་ངོ༔ བུ་ཆུང་གི་མཐུ་ཕྱྭ་ལ༔ བཀྲ་ཤིས་ལྷ་གྲལ་དུ༔ གསེར་གྱི་ལུ་གུ་དང༔ གཡུའི་རེའུ་ཆུང་གཉིས༔ རྩེ་ཀྱུ་སྲིངས་སེ་སྲིང༔ བཟང་བའི་མཆོག་གོ༔ ནོར་ཕྱྭ་ལ༔ གཡང་ར་ཁྱུད་མོ་རུ༔ གསེར་གྱི་ཐང་མ་བརྡལ༔ གཡང་སྐྱབས་དང་གསེར་འོད་འདོན་ན༔ བཙན་ཕྱུག་དར་བར་འོང་སྐད་དོ༔ བློ་ཕྱྭ་ལ༔ མི་ཁྱོད་ཀྱི་བློ་འདི་ལྷས་བྱས༔ བསམ་པའི་དོན་འགྲུབ༔ བཟང་དྲག་པས་མི་འགྲུབ་པའི་ཉེན་འདུག་པས༔ གྲུབ་ན་ཤིན་ཏུ་བཟང་ངོ༔ གྲོགས་ཕྱྭ་ནི༔ མི་ཁྱོད་ཀྱི་གྲོགས་གཡུ་སྡེར་གསེར་ཞལ་དུ༔ སྐྱེམས་པ་ཆང་གིས་བཀང༔ འཛུམ་མདངས་མུ་ལུ་ལུ༔ བཞད་མདངས་ཡ་ལ་ལ༔ བསམ་པའི་དོན་འགྲུབ༔ ཁ་ངོམས་གྲོད་པ་འགྲངས༔ སྣམ་ཕྲག་མར་ཟན་གྱིས་བཀང༔ བཟང་སྐད་དོ༔ ས་ཆ་ཡུལ་གཟུང་ནི༔ ཧ་ཅང་བཙན་མ་དྲག༔ བཙན་ཚོད་ཕྱུག་ཚོད་ཟིན་པར་གྱིས༔ ཤིན་ཏུ་དར་ལ་ཕྱུག་པར་མཆིས༔ བཟང་ངོ༔ ཁང་པ་བཟང་ངམ་ཞེ་ན༔ ཁང་པ་བཟང་པོའི་རྩེ༔ མི་དར་གོ་ཁ་གང༔ ནོར་དར་ར་བ་གང༔ འབྲུ་དར་བང་བ་གང་སྐད་དོ༔ ཞུ་བ་ཨི་གནང་ན༔ དགྱེས་པའི་མདངས་དང་བཅས་ནས་འདུག༔ གང་ཞུས་མྱུར་དུ་འབྱུང༔ བཟང་ངོ༔ དོན་ཕྱྭ་ལ་དོན་དང་བཅས༔ སྙིང་དགའ་ཡ་ལ་ལ༔ ཅི་བསམ་ཁར་མ་འདོན༔ ཅི་འདོད་འབྱུང་སྐད་དོ༔ མགྲོན་པོ་ཨེ་འོང་ན༔ རྔུལ་ནག་ཙ་ར་ར༔ གོམ་སྟབས་ཤ་ར་ར༔ མྱུར་དུ་འོང་བས་ཆང་གསིངས་གདན་ཐིངས་སྐད་དོ༔ ཚོང་ཨི་རྒྱལ་ཞེ་ན༔ ཚོང་རོགས་གང་བ་བཟང་པོས་བྱེད༔ རྒྱལ་དྲགས་ནས་རྒོད་ཅིག་འཆོར་ཉེན་གདའོ༔ སློབ་དཔོན་ཆེ་གེ་འདི་འཕྲོད་དམ་ཞེ་ན༔ ལེ་ལོ་མ་བྱེད་མྱུར་དུ་བསྟེན༔ ཤིན་ཏུ་ཕན་ལ་བྱིན་རླབས་ཆེའོ༔ ལྷ་རྗེ་ཆེ་གེ་འདིས་ནད་པ་ཆེ་གེ་འདི་ལ་ཨི་ཕན་ཞེ་ན༔ ནད་པ་ཡོ་ནས་བསླང༔ ལྷ་རྗེས་གཏང་རག་ཟ༔ བཞད་འཛུམ་མུ་ལེ་འོང༔ ཤིན་ཏུ་འཕྲོད་པར་མཆིས༔ བུ་ཆུང་ལེའུའི་སློབ་དཔོན་ཆེ་གེ་འདི་ལ་ཞུས་ན་སོས་སམ་ཞེ་ན༔ ལྕོ་ག་བུ་བཞི་མ་དང་ལྔ༔ ཚང་ཐར་རྒུམ་བུ་འཐུ༔ རྒྱ་ཁྲ་ཧོར་པོའི་མཆུ་སྐྱག་འདམ་དུ་ཆུད་སྐད་དོ༔ སྨན་དཔྱད་གཏར་སྲེག་འདི་བྱས་ན་འཕྲོད་དམ་ཞེ་ན༔ ཅི་བྱས་ཅི་ལ་བཟང་སྟེ༔ ད་རེས་ཀྱི་འདི་བཤོལ་ན་ལེགས་སོ༔ ནད་པ་འདི་ཨེ་སོས་ཞེ་ན༔ ནད་པ་འདིའི་སྲོག་ལྷས་སྐྱོབ༔ ཚེ་ཉི་ཟླས་འཛིན༔ ནམ་འཆི་ཡང་ད་རེས་ནད་འདིས་མི་འཆིའོ༔ ནད་པ་འདི་ལ་གདོན་ཅི་འདྲ་ཞིག་འདུག་ཟེར་ན༔ གདོན་དུ་མ་མོ་དང༔ བརྟན་མ་དང༔ གསོན་འདྲེ་མོ་དང༔ འདྲེ་མོ་གདོན་པས༔ མ་མོའི་སྤྱི་མདོས་དང༔ གསོན་འདྲེ་ཁ་ཆིངས་དང༔ འདྲེ་མོའི་ཡས་ཐོངས་ཤིག་དང་འཚོའོ༔ བོར་སྟོར་འདི་རྙེད་དམ་ཞེ་ན༔ གཡང་སྒོ་མ་རལ་བས༔ ཚོལ་གོ་ཆོད་ན༔ མྱུར་དུ་རྙེད་པར་གདའོ༔ དམག་དང་ཇག་པ་འགྲོ་ན་བཟང་ངམ་ཞེ་ན༔ མི་ནོར་དཔུང་གིས་འདེབས༔ བསོ་སྒྲ་དི་རེ་སོང་དང༔ ཁ་སོ་ངོ་སོ་ཆེ་བར་འོང་སྐད་དོ༔ རྟ་ལ་སོགས་པའི་རྨིག་ཟླུམ་འདི་ལ་བཅོས་ཀ་ཆེ་གེ་འདིས་བྱས་ན་འཕྲོད་དམ་ཞེ་ན༔ མེ་ཏོག་རྙིང་པ་ལ་ཆབ་བྲན་པ་དང་འདྲ་བར་མཆི༔ ཤིན་ཏུ་འཕྲོད་པས་མྱུར་དུ་གྱིས་སྐད་དོ༔ རྨིག་པ་ཀ་བྲག་པའི་བཅོས་ཀ་འདི་བཤོལ་ན་ལེགས་སོ༔ མཛའ་བོ་བཙལ་ན་རྙེད་དམ་ཞེ་ན༔ རོགས་སྐྱེམས་ཅི་ཡོད་ཡིན༔ མཛའ་རོགས་རྙེད་པར་གདའི༔ ཧ་ཅང་མཐུན་མ་དྲག་པར་མཛོད་སྐད་དོ༔ གསེབ་བཏང་ན་སྲིད་ཨེ་ཆགས་ཞེ་ན༔ གསེབ་ཕས་གོ་ཆོད་ན༔ མོ་ལ་སྲིད་རྟེན་གདའ་སྐད་དོ༔ ཕ་རོལ་དང་རྩོད་པའི་ལབ་བྱས་ན་འཕྲོད་པས་རང་རྒྱལ་ལམ་ཞེ་ན༔ ཁོའི་མགོ་ལ་དམུ་གབ་ཀྱི་ཞྭ་ནག་གྱོན་ནས་འདུག་པས༔ རང་མི་རྒྱལ་ཁ་མེད་ཡིན་ནོ༔ ཆང་བཅོས་ན་ཞིམ་མམ་ཞེ་ན༔ ཆང་དེ་མགྲོན་ཁང་ངམ༔ ལམ་གསུམ་གྱི་བཞི་མདོར་ཆོས་དང་ཞིམ་པར་མཆིའོ༔ བཟོའི་རིག་བྱེད་འདི་བྱས་ན༔ ཤེས་སམ་ཞེ་ན༔ ཕྱི་དལ་གྱིས་མ་ཁྱེར་ན་འཕྲལ་ཕུགས་གང་ལའང་བཟང་ངོ༔ ལོ་ལེགས་པར་མཆིའམ་ཞེ་ན༔ ལོ་ལེགས་སྐྱ་རྒྱལ་ཡོང༔ སྤྲོ་བ་སྐྱེད་ཅིག༔ ཁ་ཆར་ཨེ་འབབ་ཞེ་ན༔ ཁ་ཆར་མྱུར་དུ་འབབ༔ ཆར་ཟོན་གྱིས༔ ཁ་ཆར་ཆེ་སྐད་དོ༔ རྩེད་མོའི་རིགས་ཆེ་གེ་བྱས་ན་ཉམས་དགའམ་ཞེ་ན༔ རྩེད་མོའི་རིགས་མགོ་ཐོན་གཏམ་སྙན་ཐོས་པར་འགྱུར་རོ༔ སྐོར་ཕྱྭ་གཡོན་ཕྱྭ་ནི༔ ཐེ་ཚོམ་ཟ་མི་འཚལ༔ ཤིན་ཏུ་ལེགས་པའི་མཆོག་གོ༔ དགྲ་ཕྱྭ་ལ༔ དགྲ་བླ་གཉན་པོ་ཕུགས་ན་བཞུགས༔ ཕྱོགས་བཞི་མཚམས་བཞི་རུ༔ འགྲོ་འདུག་ཅི་བྱས་ཀྱང༔ དགྲ་འདྲེ་བྱུར་དང་བྲལ༔ དགྲ་གཅིག་འདུག་པས་དེ་ཡུལ་གཞན་དུ་བྲོས་ནས་ཐལ་སྐད་དོ༔ ས་མ་ཡ༔ ༈ སངས་རྒྱས་ཤུགས་འགྲོ་ལ་བབ་ན༔ བསྟན་པའི་ཆུས་ཕྱྭ་ནི༔ རི་མགོ་མཐོན་པོའི་ན་བུན་དང་འདྲ༔ ཆར་མ་བབས་ན༔ དོན་ཆུང་བས་ཕ་མྱེས་སམ༔ བླ་མ་བརྒྱུད་པའི་ཆོས་སྐྱོང་སྲུང་མ་དང༔ ལྷ་བཙུན་གཉན་པོ་དྲག་ཏུ་གསོལ༔ གསོལ་ཀ་ལ་འབུང་དགོས་སོ༔ འབྲིང་སྟོད་ཙམ༔ ཁྱིམ་ཕྱྭ་ནི༔ ཁྱིམ་བཟུང་ཉེས་པས་མི་རྣམས་རྨོངས༔ ཚོང་ཕོངས་ཤིང་དབུལ་བར་མཆི༔ བུད་མེད་ཞང་ཉེའི་ཕྱོགས་ཀྱི་སྒབ་འདྲེ་རྒྱལ་འགོང་དང༔ ཐེའུ་རང་འཁྲི་བས་སྲིད་ཕྱེད་དེས་ཟ༔ འབྲོག་ཁྱིམ་ཡིན་ན་དཀར་འདྲེ་བྱེད༔ ལར་ཁྱིམ་འདྲེ་ཅན་དུ་འདུག་པས་ངན་སྐད་དོ༔ སྐྱེས་ཀྱི་ཕོ་ཕྱྭ་ནི༔ སྟག་དོང་ནང་དུ་བྱི་བས་ཟོས༔ གཟིག་ཤུབས་ཀྱི་རི་མོ་ཡལ༔ མི་ཁྱོད་ལ་རང་མ་ཉེས་པའི་ཁ་ཡོག་འོང༔ མ་ཤི་ཡང་ཤི་དང་འདྲ་བའི་ནད་འོང་ཉེན་ཡོད༔ མིའི་ནོར་ལ་མ་རྔམས༔ ས་བརྐོ་འཕྲུ་སློག་མཁར་ལེན་མ་བྱེད༔ བྱེས་ཐག་རིང་དུ་མ་འགྲོ༔ སྲོག་ལུས་དབང་ཐང་ཀླུང་རྟ་བསྐྱེད་པའི་གཏོ་གྱིས༔ ལར་གཟོབ་སྐད་དོ༔ སྲིད་ཕྱྭ་ནི༔ བུད་མེད་འདི་སྲིད་ཕུགས་ཆུང༔ གོད་འཆའ༔ ཁོང་མིང་སྲིང་གཡེམ་ལ་དགའ༔ ཐབས་སྣ་ཚོགས་དྲག་ཏུ་བྱས་ན་ཅི་སྲིད་ཡིན༔ གཞན་སྒབ་འདྲེ་རྒྱལ་འགོང་དང་བཅས་ནས༔ ནོར་ཕྱུགས་ཁ་དག་ལ་འགྲོ་ཉེན་འདུག་པས་བཤོལ་ན་ལེགས་སོ༔ སྲོག་ཕྱྭ་ནི༔ ལྷ་མཚུན་དཔལ་ལེགས་པས༔ ལག་དྲུག་ལན་དང་བདུན༔ ཀྲོག་ཀྲོག་ལངས་དང་འདབ༔ དཔྱད་ཀྱིས་ནད་མི་སྨན༔ ཡས་ཀྱིས་ཁ་མི་ཁེགས༔ མི་ཁྱོད་ལ་མ་ཕྱོགས་ཀྱི་འདྲེ་ངན་གདོན༔ ན་ཚ་སྲང་སྲིང་དང༔ མཁུན་པ་ཆེ་ཆུང་འབྱུང་ཉེན་འདུག༔ གླུད་བརྒྱ་རྩ་དང་ཆུ་གཏོར་མང་དུ་ཐོངས་ཤིག༔ ལར་ངན་ནོ༔ བུ་ཆུང་གི་མཐུ་ཕྱྭ་ནི༔ བྱེའུ་ཚང་དུ་སྲེ་མོང་ཞུགས༔ ལུག་ཚང་ནང་དུ་སྤྱང་ཀུས་དཀྱུས༔ ལུ་གུ་ལ་ཁ་ཟིན་བྱས༔ བུ་མོ་ཡིན་ན་ཡས་ཀྱིས་བསླུས༔ བུ་ཡིན་ན་མི་སོས་སྐད་དོ༔ ནོར་ཕྱྭ་ནི༔ སྲིད་ཕྱེད་འདྲེས་ཟ༔ ནོར་ཕྱེད་དགྲས་ཁྱེར༔ ཉེ་བ་བདུད་དུ་བབས༔ གཡང་གི་ར་བ་ལ་བསེ་རག་གི་སྒར་འདེབས་པས་ངན༔ གསེར་འོད་སྟོང་ཚར་དང༔ གཡང་སྐྱབས་ལ་འབུངས་ཤིག༔ བློ་ཕྱྭ་ནི༔ མི་ཁྱོད་ཀྱི་བློ་འདྲེས་བརྐུས༔ འདུན་མའི་རྒྱ་རལ༔ བསམ་པའི་དོན་ལ་བློ་རྒྱག་གི་མདའ་ཕོག་ཉེན་འདུག་གོ༔ གྲོགས་ཕྱྭ་ནི༔ ཚིག་སྙན་ངག་སྙན་འོང༔ ལག་ནས་ཟས་མི་འབྲང༔ རང་ལ་གང་ཡོད་ལ་སྤྱོད༔ གཞན་ལ་རེ་མ་ཆེ༔ སྟབས་ཉེས་ན་རང་ནོར་ཕར་འཆོར་ཉེན་ཡོད༔ ས་ཆ་ཡུལ་གཟུང་གི་མོ་ནི༔ འབྲོག་མཚེར་དུ་སྦྲ་འདེབས་ན་རུང༔ གཞན་ས་མཁར་འདེབས་ན་གནས་མི་བརྟན༔ འཕོ་སྐྱས་མང་དུ་འབྱུང་བས་ངན་སྐད་དོ༔ ཁང་པ་བཟང་ངན་ནི༔ ལྷ་མཚེར་དཔལ་གྱི་མཚེར༔ འབྲོག་མཚེར་གཡུང་དྲུང་འཁྱིལ༔ མཁར་ཁང་གི་མཚེར་སྲ་ལ་བརྟན་པས་བཟང་སྐད་དོ༔ ཞུ་བ་ཨི་གནང་ན༔ ཁ་འགྱོད་དང་སྙིང་སྟོང༔ ཞུ་བ་མི་གནང་ལ༔ གནང་ཡང་མི་དགེ་བས་ངན་ནོ༔ དོན་འགྲུབ་བམ་ཞེ་ན༔ དོན་མེད་སྟོང་ལོག་ལག་སྟོང་ཕྲག་ལ་གཟར་དེ༔ ཡ་མཆུ་ལ་དྲེག་པ་ཆགས༔ མ་མཆུ་ལ་ཁ་ཆུ་ལུད༔ ཤིན་ཏུ་ངན་ནོ༔ མགྲོན་པོ་ཨེ་འོང་ཞེ་ན༔ མགྲོན་ལམ་ཆུས་བཅད༔ ཉེ་བར་མི་འོང་སྐད་དོ༔ ཚོང་ཕྱྭ་ནི༔ ཚོང་རོགས་ཐེའུ་རང་གིས་བྱེད༔ གསེར་ཕར་བཏང་བས་བོང་བ་ཚུར་འོང༔ དེ་ལ་དགྱེས་ན་མཛོད༔ གཞན་ངན་ནོ༔ སློབ་དཔོན་ཆེ་གེ་འདི་འཕྲོད་དམ་ཞེ་ན༔ སློབ་དཔོན་བཟང་ལགས་ཀྱང༔ ད་རེས་སྨོན་ལམ་གྱི་མཚམས་མི་སྦྱར་རོ༔ སློབ་དཔོན་དང་ཡོན་མཆོད་ཀྱི་འབྲེལ་མི་འདུག་གོ༔ སྨན་པ་ཨེ་འཕྲོད་ཞེ་ན༔ སྨན་ཁུག་སྟོང་པར་འདུག༔ སྨན་གཞོང་ཁ་སྦུབ༔ སྨན་པའི་ངོ་སོ་མི་འདུག་པས༔ སྨན་པ་འདི་མི་འཕྲོད་དོ༔ བུ་ཆུང་གི་ལེའུ་སློབ་དཔོན་ཆེ་གེ་འདི་ལ་ཞུས་ན༔ བཟང་ངམ་ཞེ་ན༔ མ་པང་སྟོང་བའི་ངོ༔ ཤིན་ཏུ་ངན་ནོ༔ སྨན་དཔྱད་གཏར་བསྲེག་འདི་བྱས་ན་འཕྲོད་དམ་ཞེ་ན༔ གཏར་བསྲེག་བྱས་ན་འཆི༔ སྨན་དཔྱད་བཤོལ་ན་ལེགས༔ ཅིས་ཀྱང་བྱེད་ན་ནད་པ་ལ་གོས་ནག་ཅིག་གམ་ཐོད་ནག་འཆིངས་ལ་གྱིས༔ ལར་འབྲིང་ངོ༔ ནད་པ་ཨི་སོས་སྐད་ན༔ ཚེ་ཉམས་པས་གསོ་དཀའ༔ འདྲེ་ངན་གྱིས་སྲོག་གཅོད༔ འོན་ཀྱང་དུར་སློས༔ སྤང་དག༔ འཆི་ངེས་པའི་སྲོག་བསླུ༔ བརྒྱ་བཞིའི་ཆོ་ག་རྒྱས་པ་ལ་འུར་འདོན༔ དགེ་འདུན་བཞི་སྡེས༔ མདོ་མཆོད་བྱས་ན་འཚོ་སྐད་དོ༔ ནད་པ་འདི་ལ་ཅི་གདོན་ཞེ་ན༔ ནད་པ་འདི་ལ་ཤར་ཕྱོགས་ཀྱི་རྒྱལ་པོ་གཅིག་དང༔ ཟས་དཀར་མཚན་ཅན་གྱིས་རྐྱེན་བྱས་སམ༔ དེ་འདྲའི་ཕྱི་ནས་འདྲེ་བྱུང་བས་གདོན༔ དཀར་པོ་དྲུག་མདོས་དང༔ ཆོ་ག་དཀར་པོ་བཅུ་གསུམ་དགོས་སྐད་དོ༔ སྟོར་བ་རྙེད་དམ་ཞེ་ན༔ མི་ལག་ཏུ་དམ་པར་ཚུད༔ ཁོ་ཐག་ཆོད་ནས་འབྱུང་སྟེ་ལག་ཏུ་འོང་དཀའོ༔ དམག་ཇག་ལ་འགྲོ་ན་བཟང་ངམ་ཞེ་ན༔ མགོ་ཆག་རྐང་གྲུམ་འོང༔ མི་ནོར་དང་ཅི་རེ༔ ཕོ་བཅས་ཕར་ལ་འཆོར༔ དར་མདུང་རྐེད་པ་ཆག་པའི་ངོ་ཡིན་པས་ངན་ནོ༔ རྨིག་ཟླུམ་གྱི་མོ་ནི༔ སྐྱོང་དཀའ་ལ་ནད་མང༔ འཕྲལ་སྡུག་ལ་ཕུགས་ཕན་མི་ཐོགས༔ བཅོས་ཀ་ཅི་བྱས་ཀྱང་ངོ་སོ་མི་འདུག་གོ༔ རྨིག་པ་ཀ་བྲག་པ་འདི་འཕྲལ་ལ་འཕྲོད་འཕྲོད་འདྲ་ཡང་ཕུགས་མི་ཤིས༔ བཅོས་ཀ་ངོ་སོ་ཡངས་ཏེ་ཕུགས་མི་ཕན་སྐད་དོ༔ མཛའ་བོ་བཙལ་ན་རྙེད་དམ་ཞེ་ན༔ རེ་མ་ཆེ༔ བྱ་བ་མ་མང༔ རྙེད་པར་མི་མཆི༔ གལ་ཏེ་རྙེད་ཀྱང་གྱོད་དང་མི་ཁ་འོང་ངོ༔ གསེབ་བཏང་ན་སྲིད་ཨེ་འཕེལ་ཞེ་ན༔ གསེབ་ཕོ་བརྒྱ་ཡོད་ཀྱང་མོ་ལ་སྲིད་མི་ཆགས༔ སྲིད་ཀྱི་རྒྱ་མཚོ་སྐམ་པའི་ངོ༔ ཕ་རོལ་དང་འདུན་མ་གཏམ་ན་འཕྲོད་དམ༔ རང་རྒྱལ་ལམ་ཞེ་ན༔ རི་མགོ་མདུང་མི་ཚུགས༔ རང་ལ་ཁེ་མི་མཆི༔ རང་སར་ཞོག་མཛོད༔ ཆང་གི་མོ་ནི༔ སྔར་ཡང་འགོང་པོ་སྤུན་དགུ་ཆང་ཚང་དུ་ཞུགས༔ ད་དུང་ཡང་དེས་མཚོན༔ འོན་ཀྱང་རྒྱལ་པོ་ལ་སྡེར་ཆ་བྱིན༔ དཀོར་བདག་གཅིག་འདུག་པ་ལ་མཆོད་པ་གྱིས༔ གསུམ་ཙམ་ཞིམ་པའང་སྲིད་དེ་ལར་ངན་ནོ༔ བཟོའི་རིགས་བྱེད་ཆེ་གེ་འདིས་བྱས་ན་དགེའམ་ཞེ་ན༔ བཟོ་ཉེས་སྙིང་སྟོང་གི་ངོ་ཡིན་བཤོལ་མཛོད༔ ལོ་ལེགས་སམ་ཞེ་ན༔ ལོ་ལེགས་པར་མི་མཆི་སྔ་བུན་རྒྱགས་གྲབ་ཆེར་མཛོད༔ ལོ་ལ་རེ་བ་མ་ཆེ་སྐད་དོ༔ ཁ་ཆར་ཨེ་འབབ་ཞེ་ན༔ རླུང་གི་གཡོ་བ་རབ་ཏུ་འཁྲུག་ཅིང༔ ཁ་ཆར་མྱུར་དུ་མི་འབབ་སྐད་དོ༔ རྩེད་མོ་ཆེ་གེ་འདི་བྱས་ན་ལེགས་པར་མཆིའམ་ཞེ་ན༔ རྩེད་མོ་རྒས་ནས་རྩོད་པའི་རྒྱུའམ་རྐང་ལག་ཆག་གྲུམ་འབྱུང་བའི་ཉེན་ཡོད་པས་བཤོལ་ན་ལེགས་སོ༔ སྐོར་ཕྱྭ་གཡོན་ཕྱྭ་ནི༔ གཡོན་མི་ཁྱག་སྐོར་མི་ཕེར་ཏེ༔ ཅི་ནས་ཀྱང་ངན་ནོ༔ དགྲ་ཕྱྭ་ནི༔ འབྲོག་རྔོན་བང་ཆེན་པ༔ དར་དཀར་སྐྱོབ་དང་བྲལ༔ བྲོས་ཀྱང་རྗེས་མི་ཐར༔ དགྲ་ངོ་སྐྲག་ངོ་ཆེ༔ དགྲ་སྲི་མནན༔ དགྲ་བྲུབ་བྱ༔ དགྲ་ཟློག་དྲག་པོ་མྱུར་བར་བྱའོ༔ ས་མ་ཡ༔ ༈ རྡོ་རྗེ་མཁའ་འགྲོ་ལ་བབ་ན༔ བསྟན་པའི་ཆུས་ཕྱྭ་ནི༔ གནམ་གསེར་གྱི་འཁོར་ལོ་རྩིབས་བརྒྱད་ལ་ཁྲི་གདུགས་ཉི་མའི་འོད་འཕྲོ༔ ས་གཡུའི་རྡོ་རྗེ་རྒྱ་གྲམ་ལ་རིན་ཆེན་འབར་བའི་ཕྲ་ཐེབས་ཏེ་བླ་དཔོན་མི་ཆེན་གང་ལའང་བཟང་ངོ༔ ཁྱིམ་ཕྱྭ་ནི༔ རིན་ཆེན་གསེར་གྱི་ས་གཞི་ལ༔ བཻ་ཌཱུར་སྔོན་མོའི་ལྗང་བུ་འཁྲུངས༔ དེ་ལ་མུ་ཏིག་གི་ཆར་པ་འབབ༔ ཤིན་ཏུ་བཟང་བའི་མཆོག་གོ༔ སྐྱེས་ཀྱི་ཕོ་ཕྱྭ་ནི༔ དུང་གི་བ་དན་དཀར་པོ་ལ༔ རིན་ཆེན་བྱི་རུའི་དར་ལྕེ་བཏགས༔ རྩེ་ལ་གསེར་གྱི་ཐོར་ཅོག་བསྐྱོན༔ ཤིན་ཏུ་ལེགས་སོ༔ སྲོག་ཕྱྭ་ནི༔ གངས་དཀར་ཤེལ་བཟང་ལ༔ གསེར་གྱི་ཤ་བ་གྱ་མ་གྱུ༔ དུང་གི་རྭ་རྒྱས་ལྡམ་མ་ལྡེམ༔ གཡུ་མཚོ་མེར་བ་ན༔ ཉ་མོ་གསེར་མིག་འཕྱོ༔ མི་ཁྱོད་ཀྱང་དེ་དང་འདྲ༔ ཅི་བྱས་ཅི་རུ་རུང༔ ལྷ་བཟང་པོས་མགོན་བྱེད༔ ཚེ་རིང་ནད་མེད་ཤིན་ཏུ་རབ་སྐད་དོ༔ བུད་མེད་ཀྱི་སྲིད་ཕྱྭ་ནི༔ ཁོང་གཡེམ་མི་དང་ཉལ་པོ་བྱེད༔ ལྷ་ལ་མནོལ་ཕོག་པས་ལྷ་མི་དགའ༔ བུ་ཚ་སྐྱེས་ན་གླེན་པའམ་དབང་པོ་མ་ཚང་བ་འོང༔ ངན་སྐད་དོ༔ བུ་ཆུང་གི་མཐུ་ཕྱྭ་ནི༔ ཕོ་ལྷས་ཉིན་གྱི་བྱ་ར་བྱེད༔ མོ་ལྷས་མཚན་གྱི་མེལ་ཚེ་བྱེད༔ འགོ་བའི་ལྷ་ལྔ་རྟག་ཏུ་མཆོད༔ ལོ་ལྔ་ཚུན་ལ་ན་ཚ་ཤི་ཆད་འོང་མི་སྲིད༔ ཤིན་ཏུ་བཟང་ངོ༔ ནོར་ཕྱྭ་ནི༔ གསེར་གཞོང་མར་ཁུས་བཀང༔ ཟས་ནོར་ལོངས་སྤྱོད་འཕེལ༔ བཟང་ངོ༔ བློ་ཕྱྭ་ནི༔ མི་ཁྱོད་ཀྱི་བློ་ཕྱྭ་སྲ་ལ་བརྟན༔ འདུན་མ་རྩེ་མོ་བྱུང་རྒྱལ་དུ་འགྲོ་བ་རབ་ཀྱི་མཆོག་གོ༔ གྲོགས་ཕྱྭ་ནི༔ འཛུམ་གྱིས་སྔོན་ནས་བསུ༔ བྱ་བྱེད་ཞུངས་སེ་ཞུང༔ གྲོགས་དང་ཟས་སུ་བཅས༔ བཤོས་སྐྱེམས་ཕུན་སུམ་ཚོགས༔ བཟང་སྐད་དོ༔ ས་ཆ་ཡུལ་འཛིན་ནི༔ རྨང་གཞི་གསེར་ལ་བྱས༔ འགྱུར་མེད་རིན་ཆེན་ཡིན༔ མི་ནོར་ཟས་གསུམ་འཛོམ༔ ཁ་དྲག་དཔུང་དང་ལྡན༔ ཤིན་ཏུ་བཟང་ངོ༔ ཁང་པ་བཟང་ངམ་ཞེ་ན༔ ལྷ་བཟང་པོ་རྒྱུད་ཅན་ཆགས་པས༔ དེ་དང་བསྟུན་མཛོད༔ ཤིན་ཏུ་ལེགས་སོ༔ ཞུ་བ་གནང་ངམ་ཞེ་ན༔ འཕྲལ་དུ་མི་འབྱུང་སྟེ༔ ཕུགས་སུ་གནང་བར་མཆིས་པས༔ གཉུག་བསྲིང་མཛོད༔ དོན་ཨེ་འགྲུབ་ཞེ་ན༔ ཕྱི་དལ་གྱིས་མ་ཆོད་ན་བཟང་སྟེ༔ ཕྱི་དལ་བག་ཟོན་མཛོད་སྐད་དོ༔ མགྲོན་པོ་ཨེ་འོང་ཞེ་ན༔ མགྲོན་པོས་ཟས་ཁུར་སྐྱེམས་དང་ངོ་སོར་བཅས་ནས་འོང་བས་རྔམས་པ་མ་ཆེ་མཛོད༔ ཚོང་བྱས་ན་འཕྲོད་དམ་རྒྱལ་བར་འགྱུར་རམ་ཞེ་ན༔ འཕྲོད་ཀྱང་མྱུར་དུ་འཕྲོད༔ རྒྱལ་ཡང་རྒྱལ་བར་འགྱུར་རོ༔ ཚོང་ཡ་ཤ་སྔོ་ལ་ཁོང་སྒྲིམ་ལབ་སྐྱེན་པ་ཞིག་འབྱུང་ན་ཐང༔ སློབ་དཔོན་ཆེ་གེ་འདི་འཕྲོད་དམ་ཞེ་ན༔ བྱིན་རླབས་ནུས་པར་ལྡན༔ རྟེན་འབྲེལ་མ་བུ་དུས་འདིར་འཛོམ༔ བཟང་སྐད་དོ༔ ལྷ་རྗེ་ཨེ་འཕྲོད་ན༔ སྨན་པ་དེ་མི་གཞན་ལ་མ་ཤོར་ན་ངོ་སོ་ཆེ་སྐད་དོ༔ ལེའུ་པ་ཆེ་གེ་འདི་འཕྲོད་དམ་ཞེ་ན༔ ཕ་བ་ལེའུ་པའི་པང་དུ༔ གསེར་གྱི་སེང་ཕྲུག་དང༔ དུང་གི་ཟླ་བ་གཉིས༔ གཅིག་འོད་གཅིག་ལ་གསལ༔ ཕ་བས་གཏང་རག་ཟ༔ བུ་ཆུང་རྩེད་མོ་རྩེ༔ བཟང་སྐད་དོ༔ སྨན་སྤྱད་གཏར་སྲེག་ལ་ལྷ་རྗེ་བླ་མ་འདི་ཤིན་ཏུ་འཕྲོད་པར་མཆིའོ༔ ནད་པ་ཨེ་སོས་ན༔ ནད་ཡུན་ཅུང་ཞིག་བྱེད༔ ཀླུ་གདོན་གྱིས་བཟུང་ནས་འདུག་པས་གདོན་བཀྲོལ་བྱས་ན་ཕན་པར་འགྱུར་རོ༔ ནད་པ་ལ་གདོན་ཅི་འདུག་ཅེ་ན༔ བདུད་ཀྱི་རིགས་དང༔ བརྟན་མ་དང༔ མ་མོ་དང༔ རི་འདྲེས་གནོད་པས༔ བདུད་ཀྱི་ཞལ་སྒྱུར༔ བརྟན་མའི་སྤྱི་མདོས༔ མ་མོའི་དཔུང་ཟློག་གམ་ཁྲག་མདོས༔ རི་འདྲེ་བཀར་ན་ལེགས་སྐད་དོ༔ བོར་སྟོར་ཨི་རྙེད་དམ་ཞེ་ན༔ གཡུའི་མཛོ་མོ་ཕ་རིར་སོང་ཡང༔ གསེར་གྱི་སྣ་ཐག་ཀ་བ་ལ་བཏགས༔ ཞེས་པས་རྙེད་པར་འགྱུར་རོ༔ དམག་ཇག་ལ་ཕྱིན་ན་རྒྱལ་ལམ་ཞེ་ན༔ རུ་དར་གནམ་དུ་ཕྱར༔ བསོ་སྒྲ་དི་རི་རི༔ གཞུ་མཆོག་བསྒྲིལ་བས་ཆོག་པར་གདའོ༔ སྨིག་ཟླུམ་འདི་བརྟེན་པར་ཤིས་སམ༔ བཅོས་ན་འཕྲོད་དམ་ཞེ་ན༔ བརྟེན་ན་འཕྲལ་བདེ་ཚོད་ལ༔ ཕུགས་སུ་དར་ཞིང་འཕེལ༔ བཅོས་ཀ་བྱས་ཀྱང་ཕན་པར་མཆིའོ༔ རྨིག་པ་ཀ་བྲག་འདི་ཡུན་དུ་མ་བརྟེན་མཛོད༔ འཕྲལ་དགེ་ཕུགས་མི་ཕན༔ བཅོས་ཀ་མ་བྱས་པར་རང་མལ་དུ་བཞག་ན་ལེགས་སོ༔ མཛའ་བོ་ཨི་རྙེད་ན༔ མྱུར་དུ་མི་རྙེད་ཀྱང་གཉུག་བསྲིང་ན་རྙེད༔ རྙེད་ན་ཕུགས་སུ་ཡང་ཕན་སྐད་དོ༔ གསེབ་བཏང་ན་སྲིད་ཨེ་ཆགས་ཞེ་ན༔ གསེབ་འདི་ཆགས་ཀྱང་ཆགས་ལ༔ སྲིད་ཕོ་རུ་འོང༔ བཟང་སྐད་དོ༔ གཞན་དང་གཏམ་ལབ་བྱས་ན་འཕྲོད་དམ༔ རྒྱལ་བར་འགྱུར་རམ་ཞེ་ན༔ འཕྲོད་ཀྱང་འཕྲོད་ལ༔ རང་ཡང་རྒྱལ་ལ་གཏམ་སྙན་ཐོས་པར་འགྱུར་རོ༔ ཆང་བཙོས་ན་ཞིམ་མམ་ཞེ་ན༔ ཆང་མིས་མ་མཐོང་བར་ཚོས༔ ཆང་གི་ནང་དུ་སྲིབ་ཀྱི་རྡོ་ནག་ལ་ཡི་གེ་རཾ་བྲིས་ལ་ཆུགས༔ ཞིམ་པར་འགྱུར༔ བཟོའི་རིགས་གང་བྱས་ཀྱང་བཟོ་ལེགས་ན་བཀྲ་ཤིས་པར་འགྱུར་རོ༔ ལོ་ལེགས་སམ་ཞེ་ན༔ ལོ་ལེགས་བོངས་དང་ལྡན་པར་འོང༔ ཁྱིས་ཟས་མི་འདོད་པའི་སྐྱ་རྒྱས་འོང་སྐད་དོ༔ ཁ་ཆར་ཨེ་འབབ་ཅེ་ན༔ ནམ་མཁར་སྤྲིན་འཁྲིགས་ཀྱང༔ ཁ་ཆར་ཆེ་བར་མི་འབབ་སྟེ༔ ཕབ་ན་མྱུར་དུ་འབབ་སྐད་དོ༔ རྩེད་མོ་འདི་མགོ་ཐོན་ནམ་ཞེ་ན༔ རྩེད་མོ་རང་དགའ་ཙམ་ལས་བཞད་དང་གཏམ་སྙན་མི་ཐོས་སྐད་དོ༔ སྐོར་ཕྱྭ་གཡོན་ཕྱྭ་ནི༔ ཕྱི་དལ་ཅུང་ཆེ་ཙམ༔ གྲུབ་ན་ཤིན་ཏུ་སྐོར་ཕེར༔ གཡོན་ཁུར་རོ༔ དགྲ་ཕྱྭ་ནི༔ འགྲོ་འདུག་ལ་སོགས་གང་བྱས་ཀྱང༔ དགྲའི་མིང་མི་གྲགས༔ བྱུར་གྱི་མགོ་མི་ལྡང༔ ཤིན་ཏུ་བཟང་ཞིང་བཀྲ་ཤིས་སྐད་དོ༔ ས་མ་ཡ༔ ༈ རྡོ་རྗེ་ཤུགས་འགྲོ་ལ་བབ་ན༔ བསྟན་པའི་ཆུས་ཕྱྭ་ནི༔ དར་གཅིག་རྒུད་གཅིག་ཕྱར་དར་རླུང་བསྐྱོད་འདྲ༔ སྐྱིད་སྡུག་རེས་མོས་བྱེད༔ འགྲངས་ལྟོགས་ཁོད་མི་སྙོམས༔ འཕར་འབུབ་ཤིན་ཏུ་ཆེ་སྐད་དོ༔ ཁྱིམ་ཕྱྭ་ལ༔ ཁྱིམ་དང་སྒྱེད་པུ་སྐར་མ་ངན་པ་ལ་བཙུག་པས༔ ན་ཚ་རྒྱུན་མི་འཆད༔ བསམ་པ་མི་འགྲུབ་བརྡ་བསྣོལ་མང༔ ཁྱིམ་ནང་དུ་ནད་སྒྲ་རྒྱུན་མི་འཆད༔ སྒོ་སྒྱུར༔ ཐབ་ཀ་སྤོ༔ གཏོ་ཁུ་དང་རྒྱ་མ་འཛུགས༔ དེ་རྣམས་གཟའ་སྐར་ཚེས་གྲངས་བཟང་པོ་དང་སྤྲད་ན༔ ལེགས་པར་མཆི༔ ལར་འབྲིང་ཙམ་མོ༔ སྐྱེས་ཀྱི་ཕོ་ཕྱྭ་ནི༔ གཞི་རུ་འདུག་ན་སྲིས་ཟད༔ བྱེས་སུ་འགྲོ་ན་གོས་ཟད༔ གཡས་ནས་རྙེད་ཀྱང་གཡོན་དུ་བོར༔ ལུས་ཀྱི་ཤེད་ཉམས༔ གང་བྱས་སྟབས་མི་བདེ་བའི་དུས་ཡིན་པས༔ གར་བབས་ལ་ཞོག༔ འབྲིང་ངོ༔ སྲོག་ཕྱྭ་ནི༔ བདེ་བ་དང་མི་བདེ་བ་ཕྱེད་མ༔ དགྲ་གཉེན་ཕྱེད་མ༔ གྱེན་ལན་དུ་ཐུར་འོང༔ བྱ་བྱེད་མ་མང༔ འཐབ་འཁོན་དང༔ བཤས་ལང་ལོང༔ སྐྱེས་འུར་འུར་གྱི་སར་མ་འགྲིམ༔ ནད་པ་ཡིན་ན་ནད་འདྲེས་བསླང་བའི་ངོ་ཡིན༔ དཔྱད་དང་རིམ་གྲོ་ལ་འབུངས༔ སྔར་ན་ན་དེས་ཐུབ༔ གཞན་ནད་དྲག་ལ་མྱུར་བ་གཅིག་འབྱུང་ཉེན་འདུག་པས་གཟོབ་སྐད་དོ༔ སྲིད་ཕྱྭ་ནི༔ བུད་མེད་འདིའི་སྲིད་ཕུགས་སུ་འདྲེ་མོ་ཞིག་ཞུགས་ནས་དགག་པར་འདུག་པས་ངན་ནོ༔ འདྲེ་མོ་དེ་སྒོར་ཐོན་ན་ཇི་སྲིད་ཡིན་ཏེ༔ ལར་ངན་ནོ༔ བུ་ཆུང་གི་མཐུ་ཕྱྭ་ལ༔ བུ་ཆུང་གི་བླ་སྲོག་ལ་གསོན་འདྲེ་མ་གཅིག་དང༔ ཐེའུ་རང་ནི་འཇབ་འདུག༔ དེ་གཉིས་དང་བྲལ་ན་འཆི་བ་ལ་མི་ཉེན་ཏེ༔ ན་ཚ་དྲག་པོ་ཞིག་འབྱུང་སྐད་དོ༔ ནོར་ཕྱྭ་ལ༔ ནོར་ལ་ཤི་གོད་བོར་སྟོར་འབྱུང་ཉེན་ཡོད༔ ཁྱད་པར་དུ་རྐང་ཕྲན་ལ་ངན༔ རི་ཁྲོད་ལོ་མ་ཅན་གྱི་གཟུངས་མང་དུ་བཀླགས་ན་རུང་ངོ༔ བློ་ཕྱྭ་ལ༔ བཟང་རྩེ་ལ་ཁར་ཡང་མ་ཐོན༔ ངན་རོང་ཁུང་དུ་ཡང་མ་ལྷུང་སྐད་དོ༔ གྲོགས་ཕྱྭ་ལ༔ གྲོགས་ཁ་ལ་འོང་ཆུའི་ལྦུ་བ་དང་འདྲ༔ ངོ་སོ་དང་ཡེ་རེ་འདུག་སྟེ༔ རྔམས་མི་ཆེ་འོ༔ ས་ཆ་ཡུལ་མཁར་འཛིན་པའི་མོ་འདི་དུ་བ་མ་ཆད་ཙམ༔ སྦྲ་ཀ་མ་འགྱེལ་ཙམ༔ འབྲིང་སྐད་དོ༔ ཁང་ཁྱིམ་གྱི་ས་ལ༔ ས་བདག་དང་བྱུར་གྱི་འགྱུ་སྲང་འདུག་པས་ངན་ནོ༔ ཞུ་བ་ཨེ་གནང་ན༔ རྒྱ་གད་ཀྱི་བྲག་ཆར་རམ༔ མཆིན་པ་ན་བའི་རྒྱུ༔ དེ་བས་གཞན་དུ་བསྒྱུར་ན་ལེགས་སོ༔ དོན་འགྲུབ་བམ་ཞེ་ན༔ ཕྲན་ཚེགས་ཡིན་ན་འགྲུབ༔ རྔམ་ཆེན་ནི་མི་འགྲུབ་སྐད་དོ༔ མགྲོན་པོ་ཨེ་འོང་ཞེ་ན༔ མགྲོན་པོ་སེམས་ཀྱིས་སླེབ༔ ལུས་ཀྱིས་དར་གཅིག་མི་སླེབ་བོ༔ ཚོང་ཕྱྭ་ལ༔ འཕྲོད་པར་ཡོད་ཀྱང་རྒྱལ་བར་མི་མཆི་བས་བཤོལ་ན་ལེགས་སོ༔ སློབ་དཔོན་ཆེ་གེ་འདི་འཕྲོད་དམ་ཞེ་ན༔ རྐང་སོ་ཡངས་བར་འདུག་ཀྱང་ངོ་སོ་མི་འདུག་གོ༔ སྨན་པ་ཨི་འཕྲོད་ན༔ འཕྲལ་འཕྲོད་པར་འདུག་སྟེ༔ ཕུགས་མི་འཕྲོད་པས་གཞན་ལ་ཞུས་ན་ལེགས་སོ༔ ལེའུའི་ལྷ་ཕྱྭ་ནི༔ ལེའུ་ཕའི་བང་སྟོང༔ མའི་ཞོ་སྐམ༔ བུ་མོ་ཡིན་ན་སྐྱེས་རྩ་མིང་དུད་འགྲོ་ལ་གྲས་པ་ཐོགས་དང་སོས་པ་སྲིད་ཙམ་ཡིན༔ གཞན་འབྲིང་ཙམ་མོ༔ སྨན་དཔྱད་གཏར་སྲེག་འདི་ལ་སྐྲག་སྔངས་ཀྱི་ངོ་ཞིག་འདུག༔ ཅིས་ཀྱང་བྱེད་ན་སྣང་བརྒྱད་ཀྱི་མདོ་བཀླག་ན༔ དཔྱད་ཀྱི་ངོ་སོ་ཅུང་ཞིག་འདུག༔ ནད་པ་སོས་སམ་ཞེ་ན༔ ནད་པ་འདིས་ཚེ་ལ་ལྷ་དང་འདྲེ་གཉིས་ཀྱིས་ཐོབ་ཤ་འགྱེད་ཅིང་འདུག་པས༔ རིམ་གྲོ་མདོ་སྡེ་བཀླག༔ ཚྭ་ཚྭ་གདབ༔ འཆི་བསླུ་དང༔ གཏོར་ཆེན་བཏང༔ མིང་སྤོ༔ ལུས་སྒྱུར༔ བཙུན་པ་ལ་སོགས་ཡོན་ཏན་ཅན་ཡིན་ན༔ སྤང་དག་གྱིས་དང་འཚོ་བར་མཆིའོ༔ ནད་པའི་གདོན་ངོས་བཟུང་འཚལ་ཞེ་ན༔ ཕོ་གདོན་གྱི་རིགས་མང་དུ་འདུས༔ ཁྱད་པར་དུ་བདུད་དང་གནོད་སྦྱིན་གདོན་པས༔ དེའི་རིམ་གྲོ་བདུད་ཀྱི་ཞལ་སྒྱུར༔ གནོད་སྦྱིན་ལ་གཏོར་མ་བྱིན་དང༔ འགྲོ་བར་འདུག་གོ༔ བོར་སྟོར་འདི་རྙེད་དམ་ཞེ་ན༔ བློ་རྒྱབ་ཏུ་བོར་ལ་ཞོག༔ རེ་མ་ཆེ་སྐད་དོ༔ དམག་ཇག་ཐེབས་སམ་ཞེ་ན༔ ལུང་པ་ཁྲག་མཚོར་འཁྱིལ༔ མདའ་ཆག་དང་གཞུ་ཆག་ཐ་རེ་བ༔ ཕར་ལ་ཡང་ཐེབས་ཚུར་ལ་ཡང་སྣད་ཡར་དང་ཤི་ཆད་ཀྱི་ངོ་ཆེ་སྐད་དོ༔ རྨིག་ཟླུམ་འདི་བརྟེན་རུང་ངམ༔ བཅོས་ཀ་བྱས་ན་ཕན་ནམ་ཞེ་ན༔ བསྲེལ་དུ་མི་རུང༔ འཕྲལ་ལྗི་ལ་ཕུགས་གྱོང༔ བཅོས་ཀ་འདི་བྱེད་དུས་ཤིང་སྣའི་དུད་པ་ཐོངས་ལ་གྱིས་དང་ཕན་པར་མཆིའོ༔ རྨིག་པ་ཀ་བྲག་པ་འདི་བརྟེན་དུ་རུང་ཙམ་ལས་ངོ་སོ་མི་ཆེ༔ སྤུ་མདོག་ཕྲ་ན་བསྲེལ་དུ་རུང༔ བཅོས་ཀའི་རིགས་ནི་གང་ཡང་མི་འཕྲོད་སྐད་དོ༔ མཛའ་བོ་རྙེད་དམ་ཞེ་ན༔ མཛའ་བར་ཁྱིས་ཆོད༔ མཛའ་ལམ་དུ་དུག་དང་རྩང་གིས་གང༔ རྙེད་ཀྱང་མི་རྙེད་ལ༔ རྙེད་ཀྱང་བྱུར་དང་བསྡོངས༔ ཤིན་ཏུ་ངན་ནོ༔ གསེབ་བཏང་ན་སྲིད་ཆགས་སམ་ཞེ་ན༔ ལན་གསུམ་བསྐྱར་ན་ཆགས་པར་མཆིས་ཏེ༔ མི་སོས་པས་བཤོལ་ན་ལེགས་སོ༔ གཞན་དང་ལབ་པ་ནི༔ ཁ་མཆུའི་རིགས་ཡིན་ན་འཕྲོད༔ གཞན་གང་ཡང་བཤོལ་བར་བྱ༔ ལར་འཕྲོད་ཀྱང་རང་རྒྱལ་བར་མི་འགྱུར་རོ༔ ཆང་གི་མོ་ནི༔ ཆང་སྐྱུར་རོ་དགུ་དང་ལྡན་པ་ཞིག་འབྱུང་ཉེན་འདུག༔ ཅི་སྟེ་བཙོ་ན་ལམ་སུམ་མདོར་སྒྱེད་བུ་བཙུགས་པའི་སྟེང་དུ་སྦང་མའི་ཐབ་ཀ་གོ་ཁ་གསུམ་གྱི་ཐལ་བས་གཡོགས་པ་ཞིག་བོར༔ དེ་ཐེའུ་རང་སྟོང་སྡེའི་ཆང་ཐབ་ཡིན་ནོ་བྱས་ལ༔ ནང་དུ་ལོག་ནས་བཙོས་པས་ཞིམ་པར་འགྱུར་རོ༔ བཟོའི་རིགས་བྱེད་བྱས་ན༔ འཕྲལ་ལེགས་ཕུགས་ཤིས་པར་འགྱུར་རམ་ཞེ་ན༔ བཟོ་འདི་ཕྱི་དལ་ཆེ་བས་མི་འཕྲོད༔ འཕྲོད་ཀྱང་དགེ་བར་མི་འགྱུར་བས་ངན་སྐད་དོ༔ ལོ་ལེགས་པ་འབྱུང་ངམ་ཞེ་ན༔ ལོ་ལེགས་སྐྱ་ཡང་མི་རྒྱལ་ལ༔ ལོ་ཉེས་མུ་གེས་ཀྱང་མི་རྡིབ་སྐད་དོ༔ ཁ་ཆར་ཨི་འབབ་ན༔ ཁ་ཆར་མི་འབབ་རླུང་གིས་གཏོར༔ འབྲུག་གློག་འུར་འུར་ཆེ་ཡང་ཆར་པ་ཆེ་བར་མི་འབབ་སྐད་དོ༔ རྩེད་མོ་ལེགས་སམ་ཞེ་ན༔ བྱས་པས་འགྱོད་པ་སྐྱེ་བའི་རྩེད་མོ་འབྱུང༔ བཤོལ་མཛོད༔ སྐོར་ཕྱྭ་གཡོན་ཕྱྭ་ནི༔ དྲག་ལ་རྩུབ་པའི་བྱ་བ་རྣམས་སྐོར་དང་གཡོན་ཕེར༔ གཞན་གང་ལའང་འབྲིང་ངོ༔ དོ་གལ་ཆེ་བ་རྣམས་རིམ་གྲོས་བསླུས་བཏུབ་པ་ཙམ་ཡིན༔ གལ་ཆུང་ཐམས་ཅད་བཤོལ་ན་བཟང་སྐད་དོ༔ དགྲ་ཕྱྭ་ནི༔ དགྲ་ཞེད་གཉེན་ཞེད་ཀྱི་ངོ༔ འཕྲལ་རྩུབ༔ ཕུགས་ཉེས་པ་ཆུང་བ་ཙམ་ཡིན་ནོ༔ ས་མ་ཡ༔ ༈ རིན་ཆེན་མཁའ་འགྲོ་ལ་བབས་ན༔ བསྟན་པའི་ཆུས་ཕྱྭ་ནི༔ མི་ནུབ་པའི་རྒྱལ་མཚན་བཙུག༔ སྙན་གྲགས་ཀྱིས་སྟོང་གསུམ་ཁེངས༔ གསེར་གྱི་འཁོར་ལོ་ལ༔ རིན་པོ་ཆེ་སྣ་ཚོགས་ཀྱི་ཕྲས་བརྒྱན༔ ཤིན་ཏུ་བཟང་བའི་རབ་མཆོག་གོ༔ ཁྱིམ་ཕྱྭ་ནི༔ ཁྱོད་ཀྱི་ཁྱིམ་བདག་ལྷ་མོ་བརྟན་མས་བྱེད་པས༔ ལོ་ལེགས་སྲིས་སྨེ༔ ལྷ་སྨན་བཟང་མོས་མགོན་བྱེད་པས་ནོར་འཕེལ༔ ཟླ་བ་ཉ་ལ་བབས་པའི་ཚེ༔ ལྷ་མོ་བརྟན་མ་དང༔ ལྷ་སྨན་རྟག་ཏུ་གསོལ་མཆོད་བྱས་ན༔ མི་ཚེ་སྐྱིད་ལ་སྐྱེལ་སྐད་དོ༔ སྐྱེས་ཀྱི་ཕོ་ཕྱྭ་ནི༔ མི་ཁྱོད་ལ་ཕོ་ལྷ་དང་དགྲ་བླ་འགོ༔ ཅི་བྱས་ལམ་དུ་འགྲོ༔ དགའ་བའི་ནམ་ལངས༔ སྐྱིད་པའི་ཉི་མ་རྐང་ཞབས་ནས་ཤར་སྐད་དོ༔ སྲོག་ཕྱྭ་ནི༔ མི་ཁྱོད་ཀྱི་སྲོག་ལྕགས་མཁར་དགུ་རིམ་གྱི་མཛོད་ཕུགས་སུ་ཆུད༔ མགོ་ཐོ་ལུམ་གྱིས་བརྡུངས་ཀྱང་མི་འཆི་སྐད་དོ༔ འོན་ཀྱང་གཟའ་སྐར་ངན་པ་ལ་ཤི་བའི་གཤིན་འདྲེ་ཞིག་གིས་གདོན་ནས་ཟ་ཐང་ཆུང་བའི་ཉེན་འདུག་པས༔ གཤིན་འདྲེ་བསྐྲད༔ དེ་ནས་བཟང་སྐད་དོ༔ སྲིད་ཕྱྭ་ནི༔ བུད་མེད་འཛངས་ལ་ཁ་དྲག༔ བྱད་མི་མཚར་ཏེ་གཉེན་བྱམས༔ བུ་དང་བུ་མོ་སྤེལ་མར་སྐྱེ༔ འཕྲལ་བདེ་ལ་ཕུགས་སྐྱིད༔ བཟང་སྐད་དོ༔ བུ་ཆུང་གི་མཐུ་ཕྱྭ་ནི༔ གཡས་སུ་གསེར་གྱི་རྡོ་རྗེ་རྒྱ་གྲམ་སྟེ་སྲ་ལ་བརྟན༔ གཡོན་དུ་གཡུའི་གཡུང་དྲུང་འཁྱིལ་བ་དེ་མདངས་གསལ༔ འཕྲལ་བཟང་ལ་ཕུགས་སུ་ཡང་ཕྲེང་བ་བརྒྱ་རྩ་བརྒྱད་ཀྱི་མདོ་འཛིན་དང་འདྲ་བ་འབྱུང་སྐད་དོ༔ ནོར་ཕྱྭ་ནི༔ རང་ལ་ནོར་མེད་སྙམ་པའི་དོགས་མི་འཚལ༔ ནོར་གཉེར་ཛཾ་བྷ་ལྷས་བྱེད༔ ནོར་ལ་སྤྱོད་ཤེས་ན་དེས་ཆོག་གོ་ཟེར༔ བློ་ཕྱྭ་ནི༔ མི་ཁྱོད་ཀྱི་བློ་ཕུགས་སུ་ཁ་བཙན་ལ་ནོར་ཕྱུག་པ་ཞིག་ཡོད་ན་ཐང༔ ཡང་རྫས་འོད་ཆེན་གྱི་ངོ་ཡིན༔ བློ་ཁ་མ་ཡངས་དང་བློ་གྲོས་ཀྱི་ཆུས་ལེགས་ནས་འོང༔ གྲོགས་ཕྱྭ་ནི༔ གྲོགས་ཆེན་པོའི་ཕྱི་ན་གྱོད་ཆེན་པོ་འབྲང༔ གྲོགས་བག་ཙམ་ཞིག་ཀྱང་འོང་སྟེ༔ དེ་ལས་ཆེ་བའི་གྱོད་ཅིག་འཁོར་འདུག་པས༔ གྲོགས་གང་བྱུང་ལྷའམ་མཆེད་གྲོགས་སམ་འཐད་པ་ཞིག་ལ་བཤུགས་ན་ལེགས་སྐད་དོ༔ ས་མཁར་ཡུལ་གསར་གྱི་མོ་ལ༔ ས་བཟང་དཔལ་བཟང་ཞིག་འདུག༔ རྒྱབ་རི་རིན་པོ་ཆེའི་ཕུང་པོ་བརྩེགས་པ་འདྲ་བ་ཡོད་ན་ཐང༔ མི་ཁྱོད་ཀྱིས་ཨི་ནོན་མི་ཤེས་པས༔ དང་པོ་སའི་མཆོད་རྟེན་ནམ་ལྷ་ཁང་ལ་སོགས་པ་ཞིག་བརྒྱབ་ན༔ ཤིན་ཏུ་དགེ་ལེགས་ཆེ་སྐད་དོ༔ ཁང་པ་བཟང་ངན་ནི༔ འཕོ་སྐྱས་ཡང་ཡང་བྱེད་པའི་ཁང་པ་འཕྲལ་ལ་བཟང༔ གཞན་མི་བརྟན་པར་འདུག་ཟེར་རོ༔ ཞུ་བ་ཨི་གནང་ན༔ ལྷ་དང་བླ་མ་ལ་ཞུས་ན་དགྱེས་པ་དང་བཅས་ནས་གནང༔ མི་དཔོན་དང་མི་མ་ཡིན་པ་སོགས་པ་ལ་ཞུས་ན༔ རྒྱ་གད་ཕྲག་དོག་དང་བཅས་ནས་མི་གནང་སྐད་དོ༔ དོན་ཕྱྭ་ནི༔ དོན་གྲུབ་སྙིང་ནོར་དང་བཅས༔ ཁྱོད་ཀྱི་དོན་གཉེར་ས་དེར༔ མི་ན་སོ་དར་ལ་བབ་པ༔ སྐྲ་ལི་ལ་ངག་ལྗི་བ་ཞིག་ཡོད་ན་ཐང༔ དོན་གང་བསམ་འགྲུབ་པར་འགྱུར་རོ༔ མགྲོན་ཕྱྭ་ནི༔ མགྲོན་པོ་དེ་ཉེ་བར་འོང་ཞིང༔ མྱུར་དུ་འགྲོ་བར་བྱེད་དོ༔ ཚོང་ཕྱྭ་ནི༔ འཕྲལ་མི་འཕྲོད༔ འཕྲོད་ན་བཟང་བས༔ འཕྲལ་ལྷོད་ལ་ཁོང་གྲིམ་པར་གྱིས་སྐད་དོ༔ སློབ་དཔོན་ཨི་འཕྲོད་ན༔ སློབ་དཔོན་དེ་ལ་ལྷ་སྲུང་བཟང་པོ་འཁྲི༔ དེ་གཏོར་མཆོད་ཀྱིས་ཚིམ་པར་གྱིས་དང་འཕྲོད་པར་མཆིའོ༔ ལྷ་རྗེ་ཨི་འཕྲོད་ཅེ་ན༔ སྨན་པ་མི་ཁུག་པའི་ཉེན་འདུག༔ ཁུག་ན་ངོ་སོ་ཤིན་ཏུ་ཆེ་བར་འོང༔ བརྩོན་འགྲུས་བསྐྱེད་འཚལ་ལོ༔ ལེའུ་ཨི་འཕྲོད་ཅེ་ན༔ སྤྱང་ཀིའི་ཁ་ནས་ལུ་གུ་ཐར༔ སྤང་པོའི་ངོས་ལ་རྒོད་ཕྲུག་རྩེ༔ ཤིན་ཏུ་བཟང་ངོ༔ དཔྱད་དང་གཏར་བསྲེག་ཆེ་གེ་བྱས་ན༔ ནད་པ་འདི་ལ་འཕྲོད་དམ་ཞེ་ན༔ གང་བྱས་ལམ་དུ་འགྲོ༔ ལྷ་རྗེས་གཏང་རག་ཟ༔ བཟང་དྲག་པས་དཔྱད་བྱེད་ཁར་ནད་པའི་གླུད་བཞི༔ ཕྱོགས་ཀྱི་ཁ་དོག་དང་མཐུན་པར་བྱས་ལ་བགེགས་དང་འབྱུང་པོ་ལ་སྦྱིན་ཞིང༔ གང་བྱེད་པར་འདོད་པ་བྱའོ༔ ནད་པ་ཆེ་གེ་འདི་སོས་སམ་ཞེ་ན༔ ནད་པ་འདི་ལ་ནད་གཞི་ཡོད༔ དུས་ལ་བབ་པས་རིམ་གྲོ་ལ་ལེ་ལོ་མ་བྱེད༔ སྤྱད་དར་དྲག་ཅིང་རིམ་གྲོ་ཆེར་བྱས་ན་འཚོ་སྐད་དོ༔ ནད་པ་ལ་ཅི་གདོན་ཞེ་ན༔ སྨན་དང་ལྷ་བཙན་མ་དགའ༔ ལྷ་ཆོག་དང་སྨན་ཆོག་བྱ༔ གྲི་བོ་དང་རྒྱལ་པོ་གདོན༔ གྲི་བོ་བཀར་ཡས་དང༔ རྒྱལ་མདོས་བྱ༔ ཁྱིམ་མཚེས་ཀྱི་གོད་འདྲེ་གདོན་པས༔ སྡེར་ཆ་ནར་མར་གཏང་དགོས་སྐད་དོ༔ བོར་བ་ཆེ་གེ་འདི་རྙེད་དམ་ཞེ་ན༔ མི་ཐང་བའི་མིས་ཁྱེར་བའི་ངོ་ཡིན༔ ཐབས་ཀྱིས་བྱས་ན་ལོན་པར་འགྱུར་རོ༔ དམག་ཇག་ལ་ཕྱིན་ན་རྒྱལ་བར་འགྱུར་རམ་ཞེ་ན༔ དམག་དཔོན་རྐང་པ་ཆག༔ ཇག་ཕྲུག་ནོར་དང་འཕྲད༔ མཐོ་མཐོ་རྭ་རྟུལ༔ དམའ་དམའ་སྣོད་གང་བའི་ངོ་ཡིན་སྐད་དོ༔ རྟ་བོང་དྲེའུ་སོགས་ཀྱི་བཅོས་ཀ་འཕྲོད་དམ་ཞེ་ན༔ བཅོས་ཡང་ནོར་དུ་འོང༔ བཙོང་ཡང་ཁེ་དང་བཅས༔ བཅོས་ཀ་གང་བྱས་ཀྱང་ཕན་པར་འགྱུར་རོ༔ རྨིག་པ་ཀ་བྲག་འདི༔ ཁྱོད་ལ་འཕྲོད་པར་དཀའ༔ བཅོས་ཀ་བྱས་ཀྱང་ཕན་མི་ཐོགས༔ བསྐྱུར་ན་ལེགས་སོ༔ མཛའ་བོ་ཨེ་རྙེད་ན༔ རྙེད་ཀྱང་རྙེད་ལགས་ཏེ༔ རྙེད་ཀྱང་ཕྱི་ཐག་མེད༔ འཕྲལ་དུ་ཉམས་དགའ་ཙམ༔ ཕུགས་སུ་ཡུན་རིང་ན་གྱོད་དང་འཕྲད་ཉེན་ཆེའོ༔ གསེབ་བཏང་ན་སྲིད་ཨེ་ཆགས་ཞེ་ན༔ གསེབ་འདིའི་བར་དུ་འབྱུང་པོ་རྒྱུག༔ ཞག་འགའ་བསྲིང་ན་དགེ༔ སྲིད་ཀྱང་ཕོ་རུ་འབྱུང༔ ཡང་ན་མོའི་གཟུགས་བཟོས་ཏེ་བོར་ནས་བསྐྲད༔ དེས་ཆགས་པར་འགྱུར་རོ༔ གཞན་དང་གཏམ་ལབ་བྱས་ན་དགེའམ་ཞེ་ན༔ ཆེ་བཙུན་ཡ་རབས་དང་གཏམ་ནས་འཕྲོད་ན་དགེ་བས་བྱ༔ མ་རབས་དམན་པ་གཏམ་པར་མི་བྱ༔ བཤོལ་ན་ལེགས་སོ༔ ཆང་བཙོ་བའི་མོ་འདི་བཟང་བས༔ བརྩོན་འགྲུས་བྱས་ལ་བཙོ༔ ད་ལྟ་ཁྱོད་ཀྱི་ཆང་མལ་དུ༔ ཆང་འགོང་པོས་གསོལ་རས་ཤིག་འདུག་པ་དེ༔ ལྷག་མ་མ་བཞག་པར་གོས་སེར་ཅན་ལ་བྱིན་ཅིག༔ དེས་འགོང་པོའི་ཁ་འགྱུར་བས་ཁྱོད་ཀྱི་ཆང་མོ་ཡང་ལེགས་པར་མཆིའོ༔ བཟོའི་རིག་བྱེད་དང་རྩེད་མོའི་རིགས་ཐམས་ཅད་ནི་བརྩམ་པར་མི་བྱ༔ འཕྲལ་ཕུགས་གང་ལའང་མི་ཤིས་སོ༔ ལོ་ཡང་མི་ལེགས་པ་སད་ཀྱིས་ཁྱེར་ཉེན་གདའ༔ ཁ་ཆར་ཆུང་ལ་ཐན་ཡུན་རིང་པོ་བྱེད་སྐད་དོ༔ སྐོར་ཕྱྭ་སྐོར་ཕེར་བས་བཟང༔ གཡོན་ཕྱྭ་གཡོན་ཐེག་པས་རབ་བོ༔ དགྲ་ཕྱྭ་ལ་དགྲ་མེད༔ འཇིགས་པའི་དགྲ་དང་བྲལ༔ བྱམས་པའི་གཉེན་དང་འགྲོགས༔ གཟུགས་བཞི་བགྲད་པས་ཆོག༔ འོན་ཀྱང་བྱིས་པ་ཆུང་ཕྲུག་ཅིག་ལ་སྲོག་ལ་མི་ཉེན་པའི་ཁྲག་ངོ་ཞིག་གཞོག་གཡོན་པ་ལ་འདུག་པས་ཁྲག་ཟོར་ཅིག་རྒྱོབ་སྐད་དོ༔ ས་མ་ཡ༔ ༈ རིན་ཆེན་ཤུགས་འགྲོ་ལ་བབས་ན༔ བསྟན་པའི་ཆུས་ཕྱྭ་ནི༔ འོ་མའི་རྒྱ་མཚོ་ལ་ཁྲག་གི་སེར་བ་འབབ༔ གངས་དཀར་གྱི་རྒྱལ་པོ་ལ་གནམ་ལྕགས་ཀྱི་ཐོག་མདའ་ཕོག༔ ཤིན་ཏུ་ངན་ནོ༔ བརྒྱད་སྟོང་པ་བརྒྱ་ཚར༔ སཱཙྪ་འབུམ་ཐེར༔ འཆི་བསླུ༔ སྤང་དག༔ ཆོས་སྐྱོང་གི་གསོལ་ཀ་ཆེན་མོ་རྣམས་དགོས༔ སྐྱ་སེར་བན་བོན་གང་ལ་ཡང་ངན་པས་གཟབ་འཚལ༔ ཁྱིམ་ཕྱྭ་ལ༔ གསེར་གྱི་ཀ་བ་འགྱེལ༔ གཡུའི་གདུང་མ་ཆག༔ ཡས་ནས་བདུད་བབས༔ མས་ནས་སྲི་ལངས༔ ཁྱིམ་འདི་ལ་སྔོན་ཆད་གྲུམ་ཆག་སྙིང་སྟོང་བྱུང་ན་ཐང༔ ད་སྔོན་མ་བྱུང་ན་འབྱུང་ཉེན་འདུག་པས༔ ལམ་འཕྲང་ཕྱགས༔ སཱཙྪ་གདབ༔ འཆི་ངེས་པའི་སྲོག་བསླུ༔ ལུས་བསྒྱུར་མིང་སྤོ༔ ཚེ་སྒྲུབ་བྱ༔ ཚེ་དབང་ཞུ༔ དག་པ་གསེར་འོད་དང་དཔང་སྐོང་འདོན༔ དེ་ལྟར་བྱས་ན་དགེའོ༔ སྐྱེས་ཀྱི་ཕོ་ཕྱྭ་ལ༔ དཔའ་བོའི་གོ་ཆ་ལ་སྡར་མའི་མཚོན་ཕོག༔ སྐྱེས་དར་མའི་བླ་ཚེ་བྱང་སྟོང་རི་སུལ་འགྲིམ་བྱ་བ་ཡིན་ནོ༔ མི་ཁྱོད་ཀྱི་འོག་རྟས་སྒོ་བྲོས་བྱས༔ ཆུང་མས་མགོ་ལོག་བྱས་ཟེར་བའི་ངོ་ཡིན༔ ཡང་ན་སྐྱེ་བོ་མདའ་གྲལ་ནས་འདོན་ཞེས་བྱུང་བས༔ ཆོས་བྱེད་སྙམ་ཡོད་ན་ཐང༔ དེ་བྱས་ན་ཤིན་ཏུ་བཟང་ངོ༔ མ་འཕྲོད་ན༔ བླ་བསླུ༔ ཚེ་ཆོག༔ དགེ་སློང་བཞི་སྡེ་ཡིས་གཏོར་ཟློག་བྱེད་འཚལ༔ དེ་རྣམས་མ་གྲུབ་ན་ནད་ལོ་འཁོར་མའམ༔ ཡན་ལག་སྐྱོན་འབྱུང་ཉེན་འདུག་གོ༔ མོ་བཙུན་གྱི་སྲིད་ཕྱྭ་ལ༔ སྲིད་ཀྱི་གཡུ་མཚོ་ལ་གངས་དཀར་གྱི་རུད་ཕོག་ཟེར་བ་ཡིན༔ སྲིད་ཕུགས་ཆུང༔ བུད་མེད་འཕྱོན་མ་བྱེད་ན་ཐང༔ ལམ་བཅད་བཤོལ་མཛོད༔ བཅད་ན་འཕགས་པ་སྡོང་པོ་བརྒྱན་པའི་ཆོ་ག་དང༔ མོ་ཤིང་གི་ཐེམས་ལ་ལུས་ཆས་བསྐོན༔ དེ་སྐྱེས་ལ་མིང་རུས་མི་གཅིག་པ་བཅུ་གསུམ་གྱི་བང་སྐོར་བྱས་ཏེ༔ ལམ་རྒྱ་གྲམ་དུ་འདོམས་བསྒྲད་ལ་བཞག་གོ༔ དེ་ལྟར་བྱས་ན་མི་དར་ཞིང་ནོར་འཕེལ་ལོ༔ སྲོག་ཕྱྭ་ནི༔ སྐྱིད་སྡུག་རེས་མོས་བྱེད༔ དར་གུད་ཁོད་མི་སྙོམས༔ ཕ་དང་མེས་པོ་ཡང་མེས་ཀྱི་དུར་སྲིས་གདོན༔ ཕ་མྱེས་ཀྱི་གྲིར་ཤི་བ་ཡོད་ན་ཐང༔ མི་ཁྱོད་ལ་གྲི་འཁོར་བས༔ སྲི་མནན་དང་སྲི་འདུལ་དྲག་ཏུ་བྱའོ༔ བུ་ཆུང་གི་མཐུ་ཕྱྭ་ནི༔ ཤིང་ཁའི་བྱེའུ་ཆུང་ལ་ཁྲའི་སྦར་ཤད་བྱུང༔ མངལ་ནས་མ་ཤོར་ཁ་རྗེ་ཆེ༔ འོན་ཀྱང་གྲེ་བར་མ་ཚུད་ཙམ༔ ཆུང་གླུད་བརྒྱ་རྩ་བརྒྱད་བྱས་ཏེ་སློབ་དཔོན་ཞིག་གིས་བསྔོས་ཏེ་གཏང༔ ཚེ་དཔག་མེད་དང༔ གཙུག་ཏོར་རོལ་པའི་མདོ་གཟུངས་བཏོན་ན་མི་འཆི་ཙམ༔ ཤིན་ཏུ་གཟབ་འཚལ༔ ནོར་ཕྱྭ་ནི༔ འཕེལ་མེད་འགྲིབ་མེད་ཆུ་མིག་ལྐུག་པ་དང་འདྲ་སྐད་དོ༔ བློ་ཕྱྭ་ནི༔ མི་ཁྱོད་ཀྱི་བློ་འདྲེས་བསླུས་པ་ཡིན་འདུག༔ བློ་ནོར༔ གྲོས་ཉེས་འདུན་སྟབས་འཆུགས་པའི་ཉེན་འདུག་པས༔ བློ་དེ་ཐོག་ཏུ་མ་གཏང་སྐད་དོ༔ གྲོགས་ཕྱྭ་ནི༔ མི་ཁྱོད་རེ་དང་ཆེ་སྟེ༔ ཁ་མཁས་ཞེ་དམ༔ ཡོང་ཡོང་འདྲ་ཞིང་ལག་ཏུ་མེད༔ འབོད་དུ་རེ་ལ་སྣ་རྒྱུག་དགོས༔ གྲོགས་ཕྱི་དལ་གྱིས་ཁྱེར་རོ༔ ས་ཆ་ཡུལ་མཁར་སོ་མ་འཛིན་འདོད་པའི་མི་ཁྱོད་བདམས་པའི་ས་ཆ་དེ༔ ས་བདག་གདུག་པ་ཅན་གྱི་ཕོ་བྲང་ཡིན་པས་བཏབ་ན་མི་ལ་མཛེ༔ ནོར་ལ་གྱལ་འགྲམ་སྣ་ཚོགས་འབྱུང་བས་ངན་སྐད༔ ཁང་པ་བཏབ་པར་འདོད་པའི་མི་ཁྱོད༔ ཁྱིམ་ཕུགས་བཀྲ་མི་ཤིས༔ མཐར་གཞུག་མི་ནོར་ཐམས་ཅད་ཁ་དག་རྗེས་མེད་དུ་འགྲོ་བར་འདུག༔ ཤིན་ཏུ་ངན་སྐད་དོ༔ ཞུ་བ་ཨི་གནང་ན༔ མི་ཁྱོད་ལ་དཔོན་བཟང་པོའམ༔ ཕ་ཁུ་གངས་ལ་སེང་གེ་འགྱིང་བ་འདྲ་བ་ཡོད་ན་ཐང༔ གང་ཞུས་གནང་ལ་དགེ་ལེགས་སྐད་དོ༔ དོན་ཕྱྭ་ནི༔ བསམ་པ་ནས་ཀྱི་ཕུང་པོ་ལ༔ ངན་སྐྱུར་སྦང་ཟན་གྱི་ཐོག་ཕོག་པས༔ མི་ཁྱོད་ཀྱི་བསམ་པ་མང་པོ་འདུག་ཀྱང༔ མི་ངན་ལ་ཁ་ཚ་བ་མང་པོས་གནོད་པ་སྐྱེལ་བས༔ གང་བསམ་འགྲུབ་པར་མི་འགྱུར་རོ༔ མགྲོན་ཕྱྭ་ནི༔ ཁྱོད་ཀྱི་མགྲོན་པོ་དེ་ཁ་མང་ལ་ཅོལ་ཆུང་བ་ཅོ་ག་གྲོ་མོ་འདྲ་བ་ཞིག་ཡོད་ངོ་ཤེས༔ ལ་འུར་འོང་ཞིང་ལ་འུར་འགྲོ༔ ཡེམ་ཡེམ་བྱ་སྒྲོ་རླུང་ཁྱེར་དང་འདྲ་སྐད་དོ༔ ཚོང་ཕྱྭ་ནི༔ གཡས་ཆུང་གི་ཚོང་ནི༔ ལ་འུར་གྱིས་འཕྲལ་མེད་ཕུག་མེད་ཡིན་ནོ༔ རྔམ་ཆེན་གྱི་ཚོང་བཤོལ་བར་བྱ༔ ནས་ཁལ་གཅིག་གི་ལན་དུ༔ བྲ་སྐོགས་བྲེ་གང་འབྱུང་ཉེན་གདའ་འོ༔ སློབ་དཔོན་ཨི་འཕྲོད་ན༔ སྔས་སྲུང་གི་སློབ་དཔོན་བོས་པས༔ འཕོ་བ་འདེབས་པ་ལ་མོས་པ་འདྲ་བ་འོང་ཉེན་འདུག་པས་འདི་མི་འཕྲོད༔ གཞན་ལ་གསོལ་བ་ཐོབས་སྐད་དོ༔ ལྷ་རྗེ་ཨེ་འཕྲོད་ཀྱི་མོ་ལ༔ ཁེ་ཉེས་གང་ཡང་མེད༔ ཅི་བདེ་སྟབས་དང་སྦྱོར་སྐད་དོ༔ ལེའུ་ཨི་འཕྲོད་ཀྱི་མོ་ལ༔ འཕྲལ་ངོ་སོ་ཡེ་རེ་འདུག་སྟེ༔ ཕུགས་ངན་ངོ་ཆུང༔ གཏང་རག་ལེན་ཁར་གཟོབ་སྐད་དོ༔ དཔྱད་དང་གཏར་བསྲེག་འདི་ཤིན་ཏུ་ངན༔ སྨན་དཔྱད་རྩ་ལ་འགྲོ་བའི་ཉེན་ཡོད་པས་བཤོལ་བར་བྱའོ༔ ནད་པ་ཆེ་གེ་འདི་ཨེ་སོས་ཞེ་ན༔ ནད་པ་མྱུར་དུ་སོས་པར་འགྱུར་རོ༔ རང་སོར་བཞག་པས་ཆོག་གོ༔ ནད་པ་ཆེ་གེ་འདི་ལ་གདོན་པའི་འདྲེ་ཅི་འདྲ་འདུག་ཅེ་ན༔ ནད་པ་འདི་ལ་སྤྱིར་ཡང་རྒྱལ་པོས་གནོད་པས༔ གྲྭ་ཤེར་བྱ༔ གསེར་མདོས་བྱ༔ ཁྱད་པར་པེ་དཀར་གནོད་པས་པེ་དཀར་གྱི་མདོས་གྱིས་སྐད་དོ༔ བོར་བ་འདི་ཨེ་རྙེད་ཅེ་ན༔ འཕྲལ་ལ་རྩད་ཆོད་ཆོད་འདྲ་འདུག་སྟེ༔ ཕུགས་ཁྱོད་ཀྱི་ལག་ཏུ་འོང་བ་དཀའ་སྐད་དོ༔ དམག་ཇག་ཐེབས་སམ་ཞེ་ན༔ ཇག་ཐེབས་ནོར་ཐོབ༔ ལ་བཙས་ཀྱི་ལྷ་འདྲེ་གཉན་པོ་གསོལ་ན་དཔའ་དར་གནམ་དུ་ཕྱར་བས་ཆོག་གོ༔ རྨིག་ཟླུམ་འདི་འཕྲལ་གྱིས་མི་ཕན་ཏེ༔ ཕུགས་ཀྱིས་ཕྱུགས་རྟེན་བྱེད༔ བཅོས་ཀ་ཡང་གཡང་གི་སྐར་མ་དང་འཕྲོད་པར་བྱས་ན་ངོ་སོ་ཆེ་སྐད་དོ༔ རྨིག་པ་ཀ་བྲག་པ་འདི་བསྟེན་རུང༔ བཅོས་ཀ་ནི་བཤོལ་ན་ལེགས་སོ༔ མཛའ་བོ་རྙེད་དམ་ཞེ་ན༔ འདོད་པའི་མཛའ་རོགས་དང་མི་འཕྲད༔ མི་འདོད་པའི་བྱུར་དང་འཕྲད་ཉེན་མཆིས་པས༔ ད་རེས་ཀྱི་དེ་བཤོལ་ན་ལེགས་སོ༔ གསེབ་བཏང་ན་སྲིད་ཨེ་ཆགས་ཞེ་ན༔ སྲིད་ཀྱི་གཡུ་མཚོ་ལ༔ གསེར་གྱི་ངང་པ་འཕྱོ༔ བཟང་ངོ༔ གཞན་དང་གཏམ་ལབ་བྱས་ན་འཕྲོད་དམ༔ རང་རྒྱལ་ལམ་ཞེ་ན༔ གཏམ་ཡ་ཟངས་ཀྱི་བྲག་དམར་ལ༔ གཏམ་རོགས་གསེར་གྱི་ཏོག་ཙེས་བརྐོས༔ ཞེས་པས༔ མི་གཏམ་ཡ་དེ་ཡང་སྲ་ལ་གྱོང་ཞིང་ངན་དྲག་པ་ཞིག་འདུག་སྟེ༔ ཐབས་ཀྱིས་བྱས་པས༔ འཕྲོད་ཀྱང་འཕྲོད་པར་མཆིས༔ ཕུགས་ཀྱང་བཟང་སྐད་དོ༔ ཆང་གི་མོ་འདི༔ ཆང་ཐབ་བུད་མེད་ཀྱིས་སྦྱར༔ ཐབ་མེ་བྱིས་པས་བུས༔ ཐབ་འོག་ཏུ་རྭ་གཞོབ་བཏང༔ ཆང་འདི་ཅི་འདྲ་ཞིག་བྱུང་ཡང༔ འཐུང་རན་པ་དང༔ བན་སེར་ཆགས་ཡོངས་ལ་འདྲེན་པ་ཡིན་བྱས་ནས་བཙོས་ན་ཞིམ་པར་འགྱུར་ལ༔ ཆང་ཕུད་བཙུན་པ་ལ་དྲང་ན་ཕྱིན་ཆད་ཀྱང་གང་བཙོས་ཞིམ་པར་འགྱུར་རོ༔ བཟོའི་རིགས་འཕྲལ་ཕུགས་དགེའམ་ཞེ་ན༔ སོར་ཀ་སྲ་སེ་འབྱུང༔ སོར་ནས་སྙིང་དགའ་དུ་མ་འདུག༔ ལོ་ལེགས་ཆར་ཆེའམ་ཞེ་ན༔ ལོ་ཡང་ལེགས༔ ཟ་བའི་གྲབས་ཆུག༔ ཁ་ཆར་ཆེ་བར་འབབ༔ འོབས་ལམ་བྲུས་སྐད་དོ༔ རྩེད་མོ་བྱས་ན་དགེའམ་ཞེ་ན༔ དཀྱུས་ཀྱི་རྩེ་ར་རུ༔ བདུད་ཀྱི་རྟ་བང་རྒྱུག༔ རྩེད་མོ་བ་རྐྱ་རྦུད་ལ་འགྲོ་བར་འདུག༔ ཅི་ནས་ཀྱང་བཤོལ་བར་བྱའོ༔ སྐོར་ཕྱ་ནམ་ལངས་ཀྱི་སྐར་མ་དང་འདྲ༔ གཡོན་ཕྱྭ་བྱིས་པའི་རྩེད་མོ་འདྲ༔ དགྲ་ཕྱྭ་ནི༔ ཕྱི་ཆར་བས་ནང་ཐིགས་ཀྱིས་ཐུ༔ མར་གོང་དཀྱིལ་ནས་རུས་པ་འབྱུང༔ ཕ་སྤུན་བདུད་དུ་བབ༔ ཚང་ཟླ་དགྲ་རུ་ལངས༔ མ་ཉེས་པའི་བྱུར་ཁ་ཡོག་དགྲ་མལ་དུ་འབྱུང༔ དགྲ་བྲུབ་དང་གཏོ་ནག་བསྐྱལ༔ མི་ཁ་ཟློག་པའི་ཆོ་ག་གང་འཐད་དང༔ ཁྲོ་བོ་རོལ་པའི་གཏོར་ཟློག་བྱེད་པ་གལ་ཆེ་བར་གདའ་སྐད་དོ༔ ས་མ་ཡ༔ ༈ པདྨ་མཁའ་འགྲོ་ལ་བབ་ན༔ མི་ཁྱོད་ཀྱི་ཆུས་ཕྱྭ་ནི༔ ས་པདྨ་འདབ་བརྒྱད་ཀྱི་སྟེང་དུ༔ གཡུའི་དཔག་བསམ་ལྗོན་ཤིང་སྐྱེས༔ ལྗོན་ཤིང་རྩེ་མོ་ལ་ཚངས་པའི་བྱ་རྒྱལ་ཁུ་བྱུག་དེས་སྐད་སྙན་སྒྲོག༔ སིང་ཁྲོལ་ལེ་སིང་ཁྲོལ་ལེ་ཟེར༔ སང་ཕོད་ད་ཚོད་ཚུན་ལ་གཏམ་སྙན་གྱིས་རྒྱལ་ཁམས་གང༔ བཟང་བའི་ནང་ནས་ཀྱང་རབ་བཟང་སྐད་དོ༔ ཁྱིམ་ཕྱྭ་ནི༔ འདོད་འཇོའི་བ་ལ་བེའུ་ཆུང་སྐྱེ༔ གསེར་གྱི་མེ་ཏོག་ལ་གཡུའི་སྦྲང་བུ་འཁོར༔ ཟས་ནོར་ལོངས་སྤྱོད་འཕེལ༔ མ་པང་དུ་བུ་བསྙལ༔ ཕྱུག་གཡང་ཆིལ་ལེ་བ་བཟང་ངོ༔ སྐྱེས་ཀྱི་ཕོ་ཕྱྭ་ནི༔ སྟག་དོང་ཉག་ཕྲན་མདའ་ཡིས་གང༔ གཟིག་ཤུབས་མཆོག་དཀར་གཞུ་ཡིས་གང༔ སྟག་གུ་ནགས་སུ་འཕྱོ༔ བླ་དར་དགུང་ལ་སྙེགས༔ བན་སྐྱེ་བོན་སོགས་གང་ལ་ཡང་ཕྱོགས་རིས་མེད་པར་བཟང་ངོ༔ མི་ཁྱོད་ཀྱི་སྲོག་ཕྱྭ་ཡང་བཟང་ལ་གྲགས་ཆགས༔ རྨུ་ཐག་ལྷ་དང་འབྲེལ༔ གཉེན་བཤེས་མཚོ་ལ་དར་ཆགས་པ་འདྲ་བའམ༔ བྱས་པ་ལག་རིས་ཅན་གྱི་བརྒྱུད་པ་ཡིན་ཐང༔ ན་ཚ་རྐྱེན་གྱོད་མི་འོང༔ བསམ་པའི་དོན་རྩོལ་མེད་དུ་འགྲུབ་པས་བཟང་སྐད་དོ༔ སྲིད་ཕྱྭ་ནི༔ མོ་བཙུན་འདི་ལ་ཀླུ་སྨན་དཀར་མོ་འགོ༔ ཐབ་གཞོབ་དང་གྲིབ་ལ་འཛེམ༔ སྲིད་བུ་མོ་མཛངས་ལ་འཕྲུལ་ཆགས་པ་སྐྱེ༔ ཕྱྭ་གཡང་མ་ཉམས་པའི་བོན་པོས་སྲིད་འགུགས་བྱས་ན༔ བུ་གཅིག་ཀྱང་སྐྱེ༔ རྟག་ཏུ་ཀླུ་སྨན་མཆོད་ན་ཟས་ནོར་འཕེལ་བར་འོང་སྐད་དོ༔ བུ་ཆུང་གི་མཐུ་ཕྱྭ་ནི༔ རྐང་ཕྲ་སྒྱིད་འཁྱོལ༔ ཕ་མའི་བྱུར་རྡོ་མ་ཤི་ཙམ་ཞིག་འོང༔ འབྲིང་སྐད་དོ༔ མི་ཁྱོད་ཀྱི་ནོར་ཕྱྭ་ནི༔ རྟ་ཕྱུགས་ལ་སོགས་ཆེ་ནོར་ལ་བཟང༔ རྐང་ཕྲན་གོད་ཟག་འབྱུང་ཉེན་འདུག་པས་གཡང་ལེན་བྱ༔ འབྱུང་པོ་ཐེའུ་རང་ཁྱིམ་མཚེས་ཀྱི་ཟ་འདྲེས་གནོད་པ་ལ༔ སྔགས་པ་ནུས་པ་ཅན་གྱིས་སྦྱིན་སྲེག་དང་མནན་པ་བྱས་ན་དགེའོ༔ མི་ཁྱོད་ཀྱི་བློ་ཕྱྭ་ནི༔ ཐང་དཀར་རྒོད་ལ་ཞོན༔ རྒོད་པོ་གནམ་དུ་འཕུར༔ མི་ཆེན་གདོང་དྲག་ཁ་མཁས་པ་ཞིག་གིས་མ་བཤོལ་ན་བཟང་ངོ༔ གྲོགས་ཕྱྭ་ནི༔ བསམ་པའི་དོན་ཡང་འགྲུབ༔ གསོལ་ཟས་ནི་བཤོས་དང་སྐྱེམས༔ མ་གཟིམས་ལ་བཞེངས་མཛོད་དང༔ སྐུ་དོན་གཉིས་ནི་འགྲུབ་པར་མཆིས་སོ༔ ས་ཆ་ཡུལ་གསར་གཟུང་འདོད་པའི་མི་ཁྱོད༔ སྔར་བློ་ལ་ཕྱིས་མ་བསླད༔ དམུ་འཁྱིལ་གཡང་དུ་འཁྱིལ༔ མི་དར་ལྷ་རུ་དར༔ མི་རབས་བཅུ་གསུམ་དུ་བརྟན་ལ་ཤིས་སོ༔ ཁང་པ་བཟང་ངན་ཅི་འདྲ་ན༔ ཁྱོད་ཀྱི་ཁང་པ་དེ་ནེའུ་ཆུང་དཀྱིལ་གྱི་མེ་ཏོག་སྐྱེ་ལེགས་འདྲ༔ མཛེས་དང་ཡེ་རེ་བ༔ འཕྲལ་ལེགས་པ་སྐྱིད་པར་མཆིས༔ ཕུགས་བརྟན་རྒྱུ་མེད༔ འོན་ཀྱང་ཐོག་མ་ནས་མ་རྔམས་ལ༔ ཐབས་ཀྱིས་ཟིལ་ལེ་གྱིས་དང༔ སྟབས་དེ་བདེ་ན་རྒྱ་ཕིབས་ཁྱུང་མགོ་ཅན་ཐེབས་ཀྱང་སྲིད་པར་གདའ་ཡི༔ ཞུ་བ་ཨེ་གནང་ན༔ ཐུགས་དཔལ་གྱི་བེའུའི་སྒོ་ཕྱེ༔ ཞལ་པདྨོའི་འཛུམ་མདངས་གསལ༔ མི་ཁྱོད་ཀྱིས་ཅི་འདོད་མྱུར་དུ་འབྱུང༔ དགྱེས་དྲག་ནས་གན་རྐྱལ་དུ་མ་འགྱེལ་བར་བགད་མཛད་སྐད་དོ༔ དོན་ཨེ་འགྲུབ་ཅེ་ན༔ ཁ་གྲོགས་མདངས་དང་བཅས༔ སྙིང་གྲོགས་ནོར་དང་བཅས༔ བསམ་པའི་དོན་འགྲུབ༔ སྤྲོ་བ་བསྐྱེད་སྐད་དོ༔ མགྲོན་པོ་ཨེ་འོང་ཞེ་ན༔ ཁྱོད་ཀྱི་མགྲོན་པོ་དེ༔ དང་པོ་ཀག་གིས་ལངས༔ བར་དུ་ཙོག་གེ་བསྡད༔ ཐ་མ་ཡུལ་གཞན་ཞིག་ཏུ་སོང་སྐད་དོ༔ ཁྱོད་ཀྱི་ཚོང་ཕྱྭ་དེ༔ ཚོང་རྒྱལ་ནོར་འཕེལ་དང་བཅས༔ འཕྲལ་ཕུགས་ཡོངས་ལ་ཕན༔ མི་ཁ་ལ་མ་ཉན་རང་ཐོག་ཏུ་ཐོངས་སྐད་དོ༔ ཁྱོད་ཀྱི་སློབ་དཔོན་ཆེ་གེ་དེ༔ གདན་ལྗི་བས་ཨེ་ཁུག་བསམ༔ ཁུག་ན་མཆོག་ཏུ་བཟང་ངོ༔ ལྷ་རྗེ་ཆེ་གེ་དེ་ནད་པ་ཆེ་གེ་མོའི་ནད་ལ་ཕན་ནམ་ཞེ་ན༔ ད་རེས་ཀྱི་ལྷ་རྗེ་དེའི་སྨན་རྐྱལ་དུ༔ བདུད་རྩིའི་ཞུན་ཟས་བདོག་པས༔ གཞན་ལ་ཁ་མ་སྤོ་འདི་རང་གཅིག་པུས་ཆོག༔ ལེའུ་པ་ཆེ་གེ་མོ་འཕྲོད་དམ་ཞེ་ན༔ ལེའུ་པ་ཡོངས་ཀྱི་སློབ་དཔོན་བཀའ་དྲིན་ཆེ༔ ཚེ་རབས་གསུམ་བརྒྱུད་ཀྱི་ལྷ་བོན་ཁྱོད་ཀྱིས་བྱས༔ ད་རུང་ཚེ་འདིའི་སློབ་དཔོན་ཡང་ཁྱོད་ཤེས་སོ༔ ཅེས་པས་བཟང་ངོ༔ སྨན་དཔྱད་གཏར་སྲེག་ཆེ་གེ་མོ་ལ་བྱས་ན་ཨེ་འཕྲོད་ཅེ་ན༔ དུས་མ་འགྱང་བར་མྱུར་དུ་གྱིས༔ ནད་སོས་ན་འཁོན་དང་བར་འགྱུར་སྐད་དོ༔ ནད་པ་ཆེ་གེ་མོ་འདི་ཨེ་སོས་ཞེ་ན༔ ནད་པ་ལ་བསྔོ་བའི་ཚེ་ཕུར་དང་སྲོག་ཕུར་གཅིག་ཐོབས་ཤིག༔ ཚེ་འགུགས་ཤིག་གྱིས༔ ནད་པ་མྱུར་དུ་མི་སོས་ཀྱང༔ སྲོག་ལ་ཉེས་འགལ་མེད་སྐད་དོ༔ ནད་པ་ལ་གདོན་དུ་ཀླུ་སྨན་གདོན༔ ཀླུ་སྨན་རྒྱལ་མོའི་དགུ་མདོས་བྱ༔ མཚོའམ་ཆུ་མིག་གི་འགྲམ་དུ་གཉིད་ལོག་ན་ཐང༔ ཀླུ་བཅོས་བྱ༔ བོར་བ་རྙེད་དམ་ཞེ་ན༔ སྙིང་གྲོགས་གཅིག་གིས་བཞད་གད་བྱས་སམ༔ ཁྱོད་རང་གི་ཉེ་འཁོར་དུ་ཡོད༔ གཡང་ར་མ་རལ་ཞིང་གཡང་སྒོ་མ་བྱེ་བས༔ གར་ཡང་མ་སོང་སྐད་དོ༔ མྱུར་དུ་ལོན་པར་གདའི༔ དམག་ཇག་རྐུན་ཁྲམ་བྱས་ན་ཐེབས་སམ་ཞེ་ན༔ མི་ཁྱོད་ལས་དཔའ་ལ་རག་པ་འགའ་ཕ་གིར་ཡོད༔ རང་ཚོད་བཟུང་ན་ལེགས༔ མི་ནོར་ལས་རང་ནོར་འཚོ་ཤེས་པར་གྱིས་སྐད་དོ༔ རྨིག་ཟླུམ་འདི་བསྟེན་དུ་རུང་ངམ་ཞེ་ན༔ འཕྲོད་ཀྱང་འཕྲོད་ལ་གང་བཅོས་དེ་ལམ་དུ་འགྲོ༔ འཚོ་སྐྱོང་དང་བཅོས་ཀ་ལ་འབུངས༔ རྨིག་པ་ཀ་བྲག་དེ་བཏང་སྙོམས་བྱེད་པ་ཡིན་པས་འཕྲལ་སྟབས་དང་བསྟུན་མཛོད་ཅིག༔ མཛའ་རོགས་ཨི་རྙེད་ན༔ འཛུམ་གྱིས་སྔོན་ནས་བསུ༔ ཟས་སྐྱེམས་ཀྱིས་འདེགས་སྲོལ་ལམ༔ ཐག་ཐོགས་མེད་པར་ཐ་ལེ་ཕྱིན་པས་ཆོག་པར་གདའི༔ གསེབ་བཏང་ན་སྲིད་ཆགས་སམ་ཞེ་ན༔ ད་རེས་ཀྱི་སྲིད་རྟེན་མོ་རུ་འོང༔ དེ་ལ་དགྱེས་ན་མྱུར་བར་སྤྲོད༔ གཞན་ལ་གཏམ་ལབ་བྱས་ན་འཕྲོད་ཅིང་དགེའམ་ཞེ་ན༔ ངོ་སྡར་ལ་ཡང་ངོ༔ ལོ་ཡང་རྒྱལ་ཕམ་ཁོད་སྙོམས་ལ་མྱུར་དུ་འཕྲོད་སྐད་དོ༔ ཆང་ཕྱྭ་ནི༔ ཆང་དེ་ལ་སྔོན་ཆད་ཀླུ་མ་དགའ་བའི་ཉེས་པ་བྱུང༔ ད་ཀླུ་ལ་ཆབ་གཏོར་དང༔ ཀླུ་བརྒྱད་ཀྱི་དཀྱིལ་འཁོར་མཆོད་ལ་ཚོས་དང་ཞིམ་པར་འོང་སྐད་དོ༔ བཟོའི་རིགས་བྱེད་ཆེ་གེ་མོ་འདི་བྱས་ན་དགེའམ་ཞེ་ན༔ བཟོ་བོའི་སྙིང་ལ་གདོན་གསོལ་ནས་འདུག་པས༔ བཟོ་མི་ལེགས་སོ༔ བཟོ་བོ་དང་མཁོན་བྱུང་ཉེན་འདུག་པས་ཐོག་མར་སྣང་བརྒྱད་ཀྱི་མདོ་བཏོན་ལ་སྟོན་མོ་གྱིས་སྐད་དོ༔ ལོ་ལེགས་ཆར་ཆེའམ་ཞེ་ན༔ ལོ་ཐན་པས་ཁྱེར་ཏེ་མི་ལེགས༔ ཁ་ཆར་འཕྲལ་དུ་མི་འབབ་དལ་གྱིས་འབབ་སྐད་དོ༔ རྩེད་མོ་འདི་དགེའམ་ཞེ་ན༔ རྐང་མགྱོགས་རླུང་གི་རྟ་ལ་ཞོན༔ འཕྲལ་འཕྲོད་ན་བཟང་ངོ༔ ཞག་གིས་བཅད་ན་ངན་སྐད་དོ༔ སྐོར་ཕྱྭ་དམ་མི་འཚལ་ཏེ་བཟང༔ གཡོན་ཕྱྭ་བཀྲ་ཤིས་འཁྱིལ་བ་ཡིན་ནོ་སྐད་དོ༔ དགྲ་ཕྱྭ་ནི༔ དགྲའི་དཔུང་ཞིག༔ མཚོན་གྱི་རྩེ་གྲུམ༔ དགྲ་དཔའ་བོའི་ངར་ཡལ༔ དགྲ་མགོ་དམུ་གབ་ཀྱིས་གཡོགས༔ དགྲ་མེད་འདྲེ་དང་བྲལ་ལོ་སྐད་དོ༔ ས་མ་ཡ༔ ༈ པདྨ་ཤུགས་འགྲོ་ལ་བབས་ན༔ བསྟན་པའི་ཆུས་ཕྱྭ་ནི༔ ཕྱི་ཆུས་ཟས་ནོར་ལོངས་སྤྱོད་འཕེལ་བར་འོང༔ བར་ཆུས་སྲིད་དང་མི་སྡེ་ལ་སྒང་གཤོང་ཆེ༔ ནང་ཆུས་ཞལ་ངོ་རྣམས་ནང་རྩོད་ཐོ་རེ་བ་འབྱུང་སྐད་དོ༔ ཁྱིམ་ཕྱྭ་ནི༔ ནོར་ཕྱུགས་དང་སྲིད་ཀྱི་བང་མཛོད་འཐོར་ཉེན་འདུག་པས༔ མགོ་བསྡུས་ཀྱི་གཡང་འགུགས་དང་ནོར་ལྷ་མཆོད་ན་ལེགས་པར་འོང༔ གློ་བུར་དུ་བྲེད་སྔངས་ཀྱི་ངོ་ཡོད༔ འཐབ་རྩོད་ཀྱི་སར་མི་འགྲོ༔ རང་ཕུགས་སུ་ཀླུ་སྨན་དཀར་མོ་གཅིག་ཆགས་ནས་འདུག་པ་དེ་རྟག་ཏུ་གསོལ་མཆོད་བྱས་ན་མགོན་སྐྱབས་བྱེད༔ མ་མཆོད་ན་ཤུ་ཐོར་དང་དྲེག་གྲུམ་གཏོང༔ མཛེ་འདྲེ་གཅིག་གིས་ཀྱང་གནོད་པར་འདུག་པས་རྒྱུན་དུ་བཀར་ན་ལེགས་སོ༔ སྐྱེས་ཀྱི་ཕོ་ཕྱྭ་ནི༔ མི་ཁྱེད་ལ་གཉའ་ནོན་དང༔ མགོ་འཇབ་ཀྱི་དགྲ་རྐུན་ཡོད་ན་ཐང༔ ཡང་ན་སྔགས་པ་དང་འགྲས་པ་ཡོད་ན་ཐང༔ དེས་ངན་སྔགས་ཀྱི་ཁྲམ་ལ་འདེབས་པས༔ རྟག་ཏུ་དགྲ་ཟོན་དུག་ཟོན༔ མཐུ་ཟོན་ལ་མ་ཡེངས་པར་འབུང་སྐད་དོ༔ སྲོག་ཕྱྭ་ནི༔ མི་ཁྱོད་ལ་འཆི་ངོ་མེད་དེ་ན་ངོ་ཡོད༔ གླུད་དང་ཆབ་གཏོར་ཐོངས༔ སྐྱེ་བོ་ཡིན་ན་ཡུལ་གྱི་ལྷ་བཙུན་གསོལ༔ སྔགས་པ་དང་བཙུན་པ་ལ་སོགས་པ་ཡིན་ན༔ ཆོས་སྐྱོང་གི་བསྐང་གསོ་གྱིས༔ གཞན་ཡང་རིམ་གྲོ་ལ་འབུངས་སྐད་དོ༔ སྲིད་ཕྱྭ་ནི༔ སྲིད་ཕུགས་ངན་ནོ༔ ཚེ་སྟོད་མཐུན་ཡང་ཚེ་སྨད་བྲལ༔ ཚེ་སྟོད་སྐྱིད་ཀྱང་ཚེ་སྨད་སྡུག༔ བྱིས་པ་གསོ་དཀའ༔ ལན་ཆགས་ཀྱི་བྱིས་པ་ཁ་དམར་མགོ་སྐྱ་ཞིག་ན་རེ༔ ང་ཕ་མ་གཉིས་ཀྱི་བྱུར་རྟོས་ཡིན༔ སྲིས་ཀྱི་རྐུན་མ་བྱེད༔ ནོར་གྱི་གདར་དུ་བསྡོས༔ མཆིག་དང་རང་གཞོང་གཅིག་མིན་པ་མ་ལུས་ཟ་བ་ཡིན་ཟེར་བ་ལ༔ དེ་བཀར་བ་ནི༔ སྣམ་སྒྱེ་ཁྲ་བོའི་ནང་དུ་ཞབས་རམ་རུག་དང་སྦང་མ་ལ་སོགས་མི་ཁའི་རྫས་ཀྱིས་བཀང༔ ཁ་མར་ཟན་གྱིས་བཅད་པ་ཞིག་ཕྱུགས་རྫི་དྭ་ཕྲུག་ཅིག་ལ་བསྐུར་ནས་ལམ་ལ་སྨྲ་བཅད་དེ༔ རྒྱ་སྲང་གི་བཞི་མདོར་བོར་བ་ལན་ལྔ་བྱས་ན་ཁོ་འགྲོ་སྐད་དོ༔ བུ་ཆུང་གི་མཐུ་ཕྱྭ་ནི༔ ཕ་མ་གཉིས་པོ་མ་ཤི་བར་དུ་སྐྱོང་དཀའ༔ ཕ་མ་གཉིས་ཤི་ནས་མི་ལྔའི་དཔོན་བྱེད་པའམ༔ གྲོང་གཉིས་ཀྱི་གཙོ་བོ་བྱེད༔ ཆོས་བྱས་ན་སློབ་དཔོན་ཞིག་འབྱུང་སྐད་དོ༔ ནོར་ཕྱྭ་ནི༔ གང་སྟོང་ཤིན་ཏུ་ཆེ་བར་འབྱུང་ངོ༔ བློ་ཕྱྭ་ནི༔ མི་ཁྱོད་ཀྱི་བློ་སྣ་འཕྲུག་ཤད་ཀྱི་སོ་དང་འདྲ༔ བྱ་བ་མང་ལ་དོན་མགོ་ཐོན་པ་ཉུང་སྐད་དོ༔ གྲོགས་ཕྱྭ་ནི༔ འཕྲལ་དུ་མི་འབྱུང་ཕུགས་སུ་འབྱུང་བར་གདའོ༔ ས་ཆ་ཡུལ་མཁར་ཆེ་གེ་མོ་འདི་གཟུང་ངམ་ཞེ་ན༔ འདི་བཟུང་ན་ཁ་སྨྲས་གླེང་གཞིའི་རྒྱུན་མི་ཆད་པ་འབྱུང་བས་གཞན་དུ་སྤོས་ན་ལེགས་སོ༔ ཁང་པ་བརྟག་པ་ནི༔ ཁང་པ་འདི་ཆུ་བརྒྱ་ཟམ་པ་གཅིག་གི་འོག་ཏུ་ཆུད་པ་དང་འདྲ༔ སའི་ལྟེ་བར་ཕོག་བཟང་ངོ༔ མི་ཁྱོད་ཀྱི་ཞུ་བ་དེ༔ ཕྱི་དལ་ཆེ་བར་འདུག༔ ཕྱི་དལ་གྱི་དབང་དུ་མ་སོང་ན༔ འཕྲལ་ཕུགས་གཉིས་ཀ་ལ་གནང་བས་བཟང་ངོ༔ དོན་ཨེ་འགྲུབ་ཅེ་ན༔ ངམ་ལྗི་སེ་འདུག་སྟེ༔ དལ་གྱིས་འགྲུབ་ཀྱང་ཧ་ཅང་དགའ་བར་མི་སེམས་སོ༔ མགྲོན་ཕྱྭ་ནི༔ མགྲོན་པོ་ཉེ་བར་མི་འོང༔ ལར་འོང་བར་སེམས་ཤིང་འདུག་སྐད་དོ༔ ཚོང་ཕྱྭ་ནི༔ ཐེ་ཚོམ་དང་ཡིད་གཉིས་མ་བྱེད་པར་གྱིས་དང༔ རྔམ་མི་ཆེ་ཡང་གཡང་འཁོར་བ་གདའོ༔ སློབ་དཔོན་འཕྲོད་དམ་ཞེ་ན༔ ཐུགས་རྗེ་བྱིན་རླབས་ཀྱི་མཛོད༔ འདྲེ་སྲིན་ངང་གིས་འབྲོས༔ སྤྱན་དྲོངས་ཤིག༔ སྨན་པ་ཆེ་གེ་མོ་འདི་འཕྲོད་དམ་ཞེ་ན༔ སྨན་པའི་ཁ་ཆུ་གྲང་གིས་བཤལ༔ ནད་པའི་སྨན་ཕོར་དུག་གིས་བཀང༔ ཤིན་ཏུ་ངན་ནོ༔ ལེའུ་པ་འཕྲོད་དམ་ཞེ་ན༔ ལེའུའི་མགོན་ལྷ་ཐོད་དཀར་གྱིས་བྱེད༔ སློབ་དཔོན་པ་ཁོ་རང་ལ་ལྷ་ཞིག་དགོས་པར་མཆིའོ༔ སྨན་དཔྱད་གཏར་བསྲེག་འདི་བྱས་ཀྱང་མི་ཕན༔ མ་བྱས་ཀྱང་མི་ཕན་སྐད་དོ༔ ནད་པ་ཆེ་གེ་མོ་འདི་སོས་སམ་ཞེ་ན༔ ནད་པ་འདི་ལ་བཅས་བཅོས་གང་ཡང་མི་དགོས༔ རང་མལ་དུ་ཞོག༔ ནད་ཕན་པར་མཆིའོ༔ ནད་པ་འདི་ལ་ཅི་གདོན་ཞེ་ན༔ རི་བཙན་དང་ཀླུ་བཙན་གདོན༔ བཙན་ཤ་བའི་རུ་མདོས་དང༔ བཙན་མདོས་མྱུར་དུ་ཐོངས་སྐད་དོ༔ སྟོར་བ་ཨི་རྙེད་ན༔ རྩ་ར་མྱུར་དུ་བྱས་ན་ཕྱེད་ཙམ་བསླུས་མ་དང་བཅས་ཏེ་ཅུང་ཟད་ལོན་པར་འགྱུར་རོ༔ དམག་ཇག་ཐེབས་སམ་ཞེ་ན༔ འཕྲལ་ཐེབས་ཏེ་ཕུགས་མི་ཟོས་རྐང་ཆག་གི་རྒྱུ་ཡིན་ནོ་སྐད་དོ༔ རྨིག་ཟླུམ་འདི་བཅང་ན་འཕྲོད་དམ་བཅོས་ན་ཕན་ནམ་ཞེ་ན༔ བཅངས་ཀྱང་ནོར་དུ་མི་འབྱུང༔ བཅོས་ཀྱང་ངོ་མེད་དོ༔ རྨིག་པ་ཀ་བྲག་འདི་ཁྱེད་ཀྱི་ནོར་ཡིན་བསམ་སྟེ༔ འདི་ཁྱེད་ཀྱི་བྱུར་ཡིན་པས་བཅངས་ཀྱང་བྱུར་ལ་བཅོས་ཀྱང་བྱུར་ཡིན་ནོ༔ མཛའ་བོ་རྙེད་དམ་ཞེ་ན༔ ད་རེས་ཀྱི་མཛའ་བ་རྙེད་ཀྱང་རྙེད༔ བྱུར་གཅིག་དང་ཡང་བསྡོངས༔ བསམ་པ་བསད་ནས་བསྡད་ན་རུང༔ གསེབ་བཏང་ན་སྲིད་ཨེ་ཆགས་ཞེ་ན༔ སྲིད་ཤད་ཆད༔ སྲིད་མཚོ་སྐམ༔ གཞན་དུ་བསྒྱུར་ན་འབྲེལ་པ་ཡོད་དེ༔ སྲིད་ཀྱིས་ཕན་པར་མི་འགྱུར་རོ༔ གཞན་དང་གཏམ་ན་རུང་ངམ་ཞེ་ན༔ རང་གཞན་ཐམས་ཅད་ཕུང་བར་འགྱུར་བས༔ སྣ་སྦྲེལ་བར་མི་བྱའོ༔ ཆང་མོ་ནི༔ ཁྱོད་རང་གིས་ནི་ཐབས་ཀྱི་རྣམ་པ་ཅི་བྱས་ཀྱང་མི་ལྡོག་གོ༔ གཞན་ལ་གཏད་ན་ཆང་རུ་བརྗེས་ཏེ་བཙོས་ན་གསུམ་འཐུང་རུང༔ དེ་ནས་ཁོའི་ཆང་ཡང་འགྱུར་རོ་སྐད་དོ༔ བཟོའི་རིགས་བྱེད་ནི་འཕྲལ་ལེགས་ལ་ཕུགས་དགེ༔ ཤིན་ཏུ་བཀྲ་ཤིས་སོ༔ ལོ་ལེགས་སམ་ཞེ་ན༔ བཟང་མེད་ངན་མེད་རང་མལ་དུ་བཏང་སྙོམས་བྱེད༔ ཆར་པ་དང་ཁ་བ་འབྱུང་ངམ་ཞེ་ན༔ ཁ་ཆར་འོང་ལ་ཁད་བྱེད་ཀྱང་མི་འབྱུང་ངོ༔ རྩེད་མོ་འདི་རྩེ་ན་དགེའམ་ཞེ་ན༔ འཕྲལ་ཉམས་དགའ་ཞིང་ཕུགས་ནོམ་པ་འབྱུང་བས༔ ཡུན་རིང་དུ་གཉུག་བསྲིང་ལ་རྩེས་སྐད་དོ༔ སྐོར་ཕྱྭ་སྐོར་ཕེར༔ གཡོན་ཕྱྭ་ལ་བློ་མ་འགེལ་ཅིག༔ དགྲ་ཕྱྭ་ནི༔ ཞོག་འུར་རྐྱལ་འུར་གྱི་ངོ༔ དགྲ་བཙན་ལ་ཁ་དྲག་པ་ཞིག་གིས་གཡོ་གཏོང་ཉེན་འདུག་པས༔ དགྲ་ཟློག་ལ་འབུངས་དང་འགྱོད་པ་མེད༔ ལར་དགྲ་ཟློག་ལས་མཚོན་ཟློག་འཇིགས༔ འཐབ་པའི་ཆས་ལ་འབུངས་མཛོད༔ ཤིན་ཏུ་ངན་ནོ༔ དགྲ་ངོ་སྐྲག་སྔངས་མྱུར་དུ་འབྱུང་ཉེན་འདུག་གོ༔ ས་མ་ཡ༔ ༈ ལས་ཀྱི་མཁའ་འགྲོ་ལ་བབ་ན༔ མི་ཁྱོད་ཀྱི་བསྟན་པའི་ཆུས་ཕྱྭ་ནི༔ དར་དྲགས་ལ་ཡུན་ཐུང༔ བང་ཐག་ཆོད་དུས་རྟ་ཁ་འཐེན་མཛོད་ཅིག༔ ཁྱིམ་ཕྱྭ་ནི༔ སྔར་ཁྱོད་ཀྱི་བང་ཁྱིམ་ར་བ་ལ་སོགས་མེས་ཚིག་ན་ཐང༔ སྔར་མ་ཚིག་ན་ད་ཚིག་ཉེན་འདུག་པས༔ མེ་ཟོན་ལ་གཟོབ༔ ཕྱི་ནས་བལྟས་ན་ཁྱིམ་བཙུན་བཙུན་འདྲ་སྟེ༔ ནང་དུ་གཟའ་མི་འཐབ་མོ་མོད་པར་འོང༔ བྱིས་པ་གཅིག་ལ་གཅིག་གཟབ་འཚལ༔ ཆུང་སྲི་ཁ་དམར་གཅིག་སྒུག་འདུག་པས༔ དེའི་ཁ་ལ་ཡས་གཅིག་རྒྱོབ༔ དེ་ནས་ལེགས་པར་འོང་སྐད་དོ༔ སྐྱེས་ཀྱི་ཕོ་ཕྱྭ་ནི༔ གཡག་གུ་དར་མ་དེ་རྭ་བདར་ཟངས་སེ་ཟང༔ རྔ་རྒྱལ་ལང་མ་ལིང༔ སང་ཕོད་ད་ཙམ་ཚུན་ལ་ལེགས་པར་འོང་སྟེ༔ ལོ་འཕོས་ཟླ་འཕོས་ཙམ་ནས༔ ཁྱོད་ལ་མྱ་ངན་སྙིང་སྟོང་ཆེན་པོ་འབྱུང་ཉེན་འདུག་གོ༔ མི་ཁྱོད་ཀྱི་སྲོག་ཕྱྭ་ནི༔ སེམས་མེ་ལྟར་འབར་བས་ལུས་ཚུགས་མི་སྲིད༔ བྱ་ལག་སྤྲེའུ་བས་མང༔ ཁ་བདར་ལྷབས་སེ་ལྷབ༔ ནམ་ཡང་དཔལ་གྱིས་སྐྱོབ༔ སྐྱེས་ལེགས་ཀུན་གྱིས་སྨོན༔ སྲོག་ལྕགས་ལས་སྲ༔ བཟང་སྐད་དོ༔ མི་ཁྱོད་ཀྱི་སྲིད་ཕྱྭ་ནི༔ སྲིད་ཕུགས་ཆེ༔ ཁྱིམ་མཚེས་མགུ༔ ཕུ་ན་ཕྱུགས་འཕེལ༔ མདའ་རུ་ལོ་ལེགས༔ བུ་མང་ལ་གཉེན་བཟང་ངོ༔ སྐྱིལ་ཆིལ་ལེ་བར་ཡུན་རིང་གནས་སོ༔ བུ་ཆུང་གི་མཐུ་ཕྱྭ་ནི༔ ཐུ་བ་གཡས་ཕོ་ལྷས་སྐྱོབ༔ གཡོན་པ་མོ་ལྷས་སྐྱོབ༔ ཤིན་ཏུ་བཟང་ངོ༔ ནོར་ཕྱྭ་ནི༔ ནོར་གཡང་ཆགས༔ སྐབས་སྐབས་སུ་ནོར་གླུད་ཐོངས༔ ནོར་ལྷ་གསོལ་དང་ཕྱུགས་འཕེལ་ཆེ་བར་འོང༔ བློ་ཕྱྭ་ནི༔ རྒྱུན་སྲིངས་ཤིག༔ བཟང་པོར་མཆིའོ༔ གྲོགས་ཕྱྭ་ནི༔ གྲོགས་ཀྱི་གསེར་ཞལ་མེར་བ་ལ༔ བཤོས་བུ་ཁྱིའི་ནལ་སྐྱག་བྱུང༔ གྲོགས་ཞིག་འདུག་པ་དེ་ཁྱོད་གདན་དུ་འགོར་བས་གཞན་དུ་སོང་སྐད་དོ༔ ས་མཁར་ཡུལ་གཟུང་གི་མོ་ལ༔ ཞྭ་གཅིག་བཟོས་པས་ཨོག་སྒྲོག་མེད༔ གོས་གཅིག་བཟོས་པས་གོང་བ་མེད༔ ལྷྭམ་གཅིག་བཟོས་པས་ལྷྭམ་སྒྲོག་མེད༔ ཡུལ་དེ་བཟུང་ན་གོང་ན་གྲོས་མགོ་འདོན་པའི་དཔོན་མི་འབྱུང༔ རྒྱབ་རྟེན་གྱི་བླ་མཆོད་མི་རྙེད༔ འོག་གི་འབངས་འཁོར་མི་ཆགས་པས་འབྲིང་སྨད་ཙམ༔ མི་ཁྱོད་ཀྱི་ཁང་པ་དེར་བྱས་ན༔ མེས་ཚིག་ཉེན་ཡོད༔ དུས་རྟག་ཏུ་ཚད་པའི་ནད་ན་བ་རྐྱང་འབྱུང་ལ༔ སྤྱད་ན་ཁང་པའི་མདོག་དམར་པོ་དང༔ སྒོ་ཁྱི་དམར་པོ་བརྟེན་དང་ལེགས་པར་མཆི༔ ཞུ་གསོལ་ཨེ་གནང་ན༔ ངོ་སོ་དང་ཆེ་སྟེ་འདོད་དོན་ཆུང་སྐད་དོ༔ དོན་ཨེ་འགྲུབ་ཅེ་ན༔ ཉིན་གཅིག་གི་དོན་ཡིན་ན་འགྲུབ་སྟེ༔ ཞག་བར་ཆོད་ཕན་ཆད་འགྲུབ་ཀྱང་མི་འགྲུབ་ལ༔ གལ་ཏེ་འགྲུབ་ཀྱང་སྙིང་མི་དགའ་འདུག་གོ༔ མགྲོན་པོ་ཆེ་གེ་མོ་ཨེ་འོང་ཞེ་ན༔ མགྲོན་པོ་ཐང་ཆད༔ ཉོན་མོངས་དགྲས་གཙེས༔ བྲེད་སྔངས་དང་བཅས་རྔུལ་ནག་ཙ་རེ་འོང་བར་འདུག་གོ༔ ཚོང་ཕྱྭ་ལ༔ ཚོང་ལ་རྒྱལ་ལ་རུ་རྒྱལ༔ ཀླུངས་རྒྱལ་ཀླུངས་སུ་རྒྱལ༔ མཛོ་ཁལ་རྭ་ལ་མ་བཏགས་ཙམ༔ གཡག་ཁལ་རྔ་རྩིད་ལ་མ་བཏགས་ཙམ༔ ཤིན་ཏུ་བཟང་བའི་ནང་ནས་ཀྱང་མཆོག་གོ༔ ཚོང་ཀློད་ལ་གྱིས་ཤིག༔ སློབ་དཔོན་ཆེ་གེ་མོ་ཨི་འཕྲོད་ཅན༔ སློབ་དཔོན་དེ་བསྟེན་དུ་རུང༔ བྱིན་རླབས་ཀྱང་ཆེ་སྐད་དོ༔ སྨན་པ་དེ་ཨི་འཕྲོད་དམ་ཞེ་ན༔ ཀླུང་རྟ་རྒུད་པའི་སྨན་པ་འདི༔ ཕན་པ་བས་གནོད་པ་ཆེ༔ ནད་པ་རང་སར་ཞོག༔ སྨན་བཅོས་མ་བྱེད་གཏོ་བཅོས་གྱིས༔ ལེའུ་པ་ཆེ་གེ་མོ་འདི་འཕྲོད་དམ་ཞེ་ན༔ བྱིན་རླབས་ནུས་པ་ལྡན་ལགས་ཀྱང༔ བུ་སྲོག་མ་ཡི་ཁོང་ནས་ཆད༔ ལྷ་གཡག་དཔལ་གཡག་གིས་བསྟོད་ན༔ གལ་ཏེ་སོས་ཀྱང་སྲིད༔ སྨན་དཔྱད་གཏར་བསྲེག་ཆེ་གེ་མོས་བྱས་ན་ནད་པ་ལ་འཕྲོད་དམ་ཞེ་ན༔ དེ་མི་འཕྲོད་གཞན་ལ་སྒྱུར་སྐད་དོ༔ ནད་པ་ཨི་སོས་ཞེ་ན༔ བྲེད་སྔངས་དྲག་པོ་ཞིག་འོང༔ སྨན་དཔྱད་རིམ་གྲོ་ལ་འབུངས་ཤིག༔ ཕུགས་ནད་འདིས་མི་ཉེས་སྐད་དོ༔ ནད་པ་འདི་ལ་གདོན་དུ་གཟའ་དང་རྒྱལ་པོ་ཀླུ་དང་མ་ཡམས་གདོན་འདུག་པས༔ དེ་རྣམས་ཀྱི་ཆོ་ག་མྱུར་དུ་དགོས་པར་འདུག་གོ༔ བོར་བ་རྙེད་དམ་ཞེ་ན༔ ཐབས་མཁས་པར་རྩད་ཆོད་དང་དལ་གྱིས་རང་ལག་ཏུ་འོང་བར་གདའོ༔ དམག་ཇག་ཐེབས་སམ་ཞེ་ན༔ དམག་དཔོན་གཞུ་མཆོག་བསྒྲིལ༔ དམག་ཕྲུག་བསོ་སྒྲ་འདེབས༔ དགྲ་ཁ་ཕུང་དུ་འགྲོ༔ དགྲ་བླ་ལ་གསོལ་མཆོད་དྲག་ཏུ་གྱིས༔ ཁ་ཕོ་བཏོན་ནས་ཆོག་པར་གདའོ༔ རྟ་ལ་སོགས་རྨིག་ཟླུམ་འདི་ཨེ་འཕྲོད་ན༔ ཤིན་ཏུ་འཕྲོད༔ བཅོས་ཀ་ཡང་བྱས་ན་ཕན༔ རྨིག་པ་ཀ་བྲག་རྐང་ཕྲན་ལ་རེ་མ་ཆེ༔ ཆེ་ཕྱུག་ནི་བརྟེན་དུ་རུང་ཙམ༔ བཅོས་ཀ་ནི་བགྱིད་འཚལ་ལོ༔ མཛའ་རོགས་རྙེད་དམ་ཞེ་ན༔ མགོ་ལ་ཐལ་བ་མྱོང༔ རྐང་པ་ལ་གཤེད་བུའི་སྦོ་སྐོར་མྱོང༔ མགོ་ཆག་རྐང་གྲུམ་མི་འདྲེས་ཁྲིད་པ་འདྲ་བ་ཞིག་འོང་བར་འདུག་པས༔ སྤྲོས་པ་ཆོད་ཅིག༔ གསེབ་བཏང་ན་སྲིད་ཨེ་ཆགས་ཞེ་ན༔ གསེབ་ཐེབས་ན་སྲིད་ཆགས་པས་བརྩོན་འགྲུས་བསྐྱེད་མཛོད་ཅིག༔ གཞན་དང་ལབ་བུ་འཕྲོད་ཅིང་རང་རྒྱལ་ལམ་ཞེ་ན༔ ངོ་སོ་ཏ་ལ་ལ༔ སྙན་གྲགས་དི་རི་རི༔ གཞན་ལའང་ཕན༔ རང་ཡང་སྙིང་དགའ་དང་བཅས་ནས་འདུག་པས༔ ཤིན་ཏུ་བཟང་བས་གཉུག་སྲིངས་ཤིག༔ ཆང་གི་མོ་ནི༔ འཕྲལ་མི་ཞིམ་པས༔ ཞག་འགའ་ཀློད་ལ་ཚོས༔ འདྲེ་མི་འདུག་ཕབས་དང་ལག་བྱད་ལ་གཟོབ་སྐད་དོ༔ བཟོའི་རིགས་བྱེད་ནི༔ གང་བྱས་ཀྱང་འཕྲལ་ལེགས་ཕུགས་དགེ་སྟེ༔ བཟོ་ལ་བར་ཆད་འབྱུང་ཉེན་འདུག༔ འོན་ཀྱང་རང་ངམ༔ བཟོའི་ཉེ་དྲུང་ལ་བར་ཆད་འོང་ན་ཐང་བར་མཆིས་སོ༔ ལོ་ལེགས་ལ་ཁ་ཆར་ཡོད་དམ་ཞེ་ན༔ ལོ་ནི་ལེགས་པར་འོང༔ ཆར་མི་འབབ་ཀྱང་ཐན་སྲེག་མི་འོང་སྐད་དོ༔ རྩེད་མོ་བྱས་ན་དགེའམ་ཞེ་ན༔ གལ་བཞག་པའི་རྩེ་མོའི་རིགས་གང་བྱས་ཀྱང་རྒྱལ་བར་མི་འགྱུར་ཏེ༔ གལ་མེད་ཀྱི་རྩེད་མོ་ནི་མགོ་ཐོན་ཉམས་དགའ་སྙན་གྲགས་འབྱུང་སྐད་དོ༔ སྐོར་ཕྱྭ་གཡོན་ཕྱྭ་གང་ལའང་སྐོར་ཕེར༔ གཡོན་ཁྱག་ལྡབ་མི་འཚལ༔ བཟང་བའི་མཆོག་གོ༔ དགྲ་ཕྱྭ་ནི༔ མི་ཁྱོད་ལ་དགྲ་ཞིག་འདུག་པ་དེ་གླིང་གཞན་དུ་སོང་སྐད་དོ༔ ས་མ་ཡ༔ ༈ ལས་ཀྱི་ཤུགས་འགྲོ་ལ་བབས་ན༔ ལས་ཀྱི་ཤུགས་འགྲོའི་ཞལ་ན་རེ༔ མི་ཁྱོད་ཀྱི་བསྟན་པའི་ཆུས་ཕྱྭ་དེ༔ སྡེ་བ་དར་མདུང་ཅན་གྱི་མོ་ལ་བཟང༔ གཞན་ཕལ་པ་ཡིན་ན༔ བཙན་པོའི་གཉའ་ནོན་འབྱུང་ངོ་ཡིན་པས་རྟག་ཏུ་བརྟེན་པའི་ལྷ་དང་ཆོས་སྐྱོང་ལ་གསོལ་མཆོད་རེམ་དུ་གྱིས་སྐད་དོ༔ ཁྱིམ་ཕྱྭ་ནི༔ སྒྱེད་ཚུགས་མ་ཤོར་ཙམ༔ ཚོལ་རྙེད་བུན་འཁོར་ལ་མི་ཚེ་ཟད༔ འགོ་བའི་ལྷ་དང་གནོད་པའི་འདྲེ་གཉིས་ཀ་ཤེད་ཆུང་བར་གདའ་སྐད་དོ༔ སྐྱེས་ཀྱི་ཕོ་ཕྱྭ་ནི༔ མི་ཁྱོད་ལ་ན་ཚ་དང་དཀོན་པར་མཆིས་ཏེ༔ བཟང་བར་བྱས་ཀྱང་བཟང་ལན་ངན་གྱིས་འཇལ༔ ཕར་མར་ཟན་བྱིན་ན༔ ཟས་ལན་སྦང་མ་འཇལ༔ སུ་ལ་བྱམས་པར་བྱས་ཀྱང་བྱམས་ལན་དགྲ་བྱེད༔ ཕར་སྙིང་བསྟན་པས་ཚུར་གློ་བ་བསྟན༔ རྐང་མཐིལ་གྱི་རྡེའུ་འཕར་ནས་སྤྱི་བོའི་ཀླད་པ་འཇོམས༔ དར་ལན་རེ་བས་འཇལ༔ ཁྱོད་ཀྱིས་མི་ལ་བསམ་པ་བཟང་བའི་སེམས་བསྐྱེད་ཀྱང༔ ཚུར་ངན་དགུ་དུག་བཅུ་བྱེད་དུ་འོང་བས༔ ཁྱོད་རང་མགོ་རང་གིས་བཏོན་ན་ལེགས་སྐད་དོ༔ སྲོག་ཕྱྭ་ནི༔ གཞོགས་ཕྱེད་སྐམ༔ ཕྱེད་རུལ༔ སྲིས་ཕྱེད་ལྷ་རྗེ་མོ་བོན་པས་ཟ༔ སྲིས་ཕྱེད་འདྲེས་ཁྱེར༔ གྲོང་པའི་ཁྱི་འགྲངས༔ འདྲེ་ཡས་མདོས་ཀྱིས་ཁ་མ་ཁོག༔ རྐང་པས་ལུས་མི་ཐེག༔ ཉི་མ་དང་ནམ་མི་སྐྱོལ་བའི་ནད་དྲག་ལ་ཡུན་རིང་བ་ཞིག་འོང་བར་འདུག༔ དེའི་སྔ་རྟགས་ལ་ཉི་མ་དགོང་མོ་སྙིང་མི་དགའ༔ སྡོད་མི་བརྟན༔ མལ་མི་བདེ༔ ཁ་སྐམ༔ དང་ག་འགག༔ དེ་འདྲ་བ་བྱུང་ན་ཐང༔ ཉིན་ཞག་བདུན་སྔས་མགོ་མཆི་མ་གཏང་དགོས་པ་ཞིག་འབྱུང་ཉེན་འདུག་པས༔ མྱ་ངན་གྱི་བསྒྱུར་གཏོ་ཆེན་པོའམ༔ སྔགས་པས་མདོས་ཟོར་གྱི་རིགས་དང༔ གཏོར་ཟོར༔ བཙུན་པས་བརྒྱ་བཞིའི་ཆོ་ག་དང་གླུད་བརྒྱ་རྩ༔ བོན་པོས་བླ་བསླུ་དང་ཕྱྭ་འདོགས༔ གཞན་ལུས་བསྒྱུར༔ མིང་སྤོ༔ ནད་པ་མང་པོ་ལ་སྨན་སྦྱིན༔ རང་ལ་ཡོད་དམ་མེད་ན་མི་ལ་ཉོས་ནས་བཏང༔ ལམ་འཕྲང་ཕྱགས༔ ཟམ་པ་འཛུག༔ བཞི་སྡེ་ལ་ཆོས་སྟོན་འདྲེན་པ་ལ་སོགས་རིམ་གྲོ་མང་ལ་མྱུར་བར་གྱིས༔ སྡོད་ས་སྤོ༔ བླ་དགེ་བྱིན་རླབས་ཅན་ལ་སྲུང་བར་ཞུ་བ་བྱས་ན་ལོ་གསུམ་བདེ་སྐད་དོ༔ སྲིད་ཕྱྭ་ནི༔ བུད་མེད་འདི་སྲིད་ཕུགས་ཆེ༔ ཁ་དྲོ༔ བྱད་བཞིན་སྡུག༔ ནོར་ཕྱུག༔ མཛངས་ལ་འཕྲུལ་བཟང་སྐད་དོ༔ བུ་ཆུང་གི་མཐུ་ཕྱྭ་ནི༔ བཟང་མ་དྲགས༔ ངན་མི་དྲགས༔ བཏང་སྙོམས་ཀྱི་བར་དུ་ལྷ་འདྲེ་གཉིས་ཐོབ་ཤ་འགྱེད་ཉེན་འདུག་པས༔ ཆུང་གླུད་དང་གཟུངས་གྲྭ་ལྔ་འདོན༔ ཀློག་བྱས་ན་བཟང་སྐད་དོ༔ ནོར་ཕྱྭ་ནི༔ ཁོད་སྙོམས་པར་མཆི༔ རང་འགྲངས་ཙམ་ལ་ཚོད་ཟིན༔ འོན་ཀྱང་ནོར་སྤུ་རྟགས་ཅན་གྱི་ཕྱི་ན་གཡང་སྒོ་རལ་ཉེན་འདུག༔ དེ་མ་ཤོར་ན་སྐྱིད་པར་འོང༔ དེ་ཤོར་ན་ཐ་མ་སྤྲང་དགོས་པའི་ཉེན་འདུག་གཟོབ་སྐད་དོ༔ བློ་ཕྱྭ་ནི༔ བློ་ཉེས་ཐལ་བའི་ལ་བཙས་སུ་འགྲོ་ཉེན་འདུག༔ ལར་མི་ཁྱོད་བློ་ཤོ་རྒོད་ལ་ཡབ་ཡོབ་ཆེ༔ བསགས་པའི་ནོར་ཟད༔ ཕྱི་ལྟས་ཡེ་རེ་བ༔ མི་སྔུན་དུ་ཕྱར་ན་མཛེས༔ ནང་ལྟས་ཐུ་ལེ་བ༔ བུ་སྨད་སྡུག་ལ་བཀོལ༔ མདོ་མེད་ཞི་བ་དང་བྲལ༔ ཚེ་གཞུག་རླུང་གིས་ཁྱེར་བའི་ཉེན་འདུག་སྐད་དོ༔ གྲོགས་ཕྱྭ་ནི༔ ཚོད་མེད་རྭ་ལ་ཕར་བསྙབས་པས༔ ཟལ་ལེ་འབྲི་རྭ་ཚུར་ལ་ཟུག༔ རང་སྲོག་འཆོར་ཉེན་ཡོད༔ ཟན་སྒོང་བསྒྲིལ་འདོད་པས༔ ཐ་མ་ཐལ་རྒུམ་འཐུ་དགོས་པའི་ཉེན་འདུག་པས་གཟོབ་སྐད་དོ༔ ས་ཆ་ཡུལ་འཛིན་བཟང་ངན་ནི༔ ཕུ་ན་ལྷ་བཟང་པོ་ཆགས་པས་མགོན་སྐྱབས་བྱེད༔ མདའ་ན་ཀླུ་བཟང་པོ་གནས་པས་ཟས་ནོར་ལོངས་སྤྱོད་འཕེལ༔ བར་དུ་གཡང་གི་ཞག་ཆགས་པས་མི་དར་ནོར་དུ་དར༔ བློ་མ་འགྱུར་དང་འཕྲལ་ཕུགས་གང་ལའང་བཟང་ངོ༔ ཁང་པ་བཟང་ངན་ནི༔ ཁང་པ་སྲིད་ཀྱི་དར་གོས་ཡིན༔ མི་འཕེལ་ལ་ནོར་ཕྱུག༔ ངན་རྐུན་ལ་ཟོན་གྱིས༔ གཞན་བཟང་ངོ༔ ཞུ་བ་ཨི་གནང་ན༔ གསོལ་བ་འབུངས་ལ་ཐོབས༔ ཅི་འདོད་གནང་བར་གདའི༔ དོན་འགྲུབ་བམ་ཞེ་ན༔ དོན་ཁ་སོ་ངོ་སོ་དང་བཅས་ནས་མྱུར་དུ་འགྲུབ་པར་འདུག་སྐད་དོ༔ མགྲོན་པོ་ཨེ་འོང་ཞེ་ན༔ མ་སྒྱེད་ཀྱི་སྟེང་དུ་ཁུ་བྱུག་བབ༔ གསུང་སྙན་གྱི་གྲགས་པ་ཕྱོགས་བཅུར་སྒྲོག༔ མི་ཁྱོད་ཀྱི་མགྲོན་པོ་དེ༔ གཏམ་སྙན་གསར་པ་གྲོགས་དང་བཅས་ནས་མྱུར་དུ་འོང༔ གལ་ཏེ་འཕྲལ་དུ་མ་བྱུང་ཡང༔ གཏམ་སར་འོང༔ མགྲོན་པོ་ཡང་ཡུན་མི་འགོར་སྐད་དོ༔ ཚོང་རྒྱལ་ལམ་ཞེ་ན༔ ཚོང་ཕམ་སྙིང་ཁུམ་པར་འགྱུར་ཏེ་ཤིན་ཏུ་ངན་ནོ༔ སློབ་དཔོན་ཆེ་གེ་མོ་འཕྲོད་དམ་ཞེ་ན༔ ཐད་ཀར་ཐུགས་འགྱེལ༔ རྒྱལ་བའི་སྲས་མི་མངའ༔ རང་ལས་ཁོང་མི་དྲག༔ གཞན་ལ་སྤོས་ན་ལེགས་སོ༔ སྨན་པ་ཨི་འཕྲོད་ཅེ་ན༔ ཤིན་ཏུ་འཕྲོད་པས་མྱུར་དུ་ཁུག་ཅིག༔ ལེའུའི་ཕ་བ་ཆེ་གེ་མོ་ལ་ཞུས་ན་འཕྲོད་དམ་ཞེ་ན༔ འདི་ལས་ཁ་མ་སྤོ་བཀྲ་ཤིས་ལ་ཚེ་རིང་ཤིན་ཏུ་བཟང་ངོ༔ སྨན་དཔྱད་འདི་འཕྲོད་དམ་ཞེ་ན༔ དཔྱད་བར་དུ་འདྲེ་ཞུགས༔ སྡེར་ཆ་གཅིག་ཐོངས་ལ་གསང་སྟེ་གྱིས་དང༔ ཟུག་ཆོག་པ་ཙམ་འོང་སྐད་དོ༔ ནད་པ་ཆེ་གེ་མོ་འདི་ལ་མྱུར་དུ་ཕན་ནམ་ཞེ་ན༔ ནད་པ་འདི་ལ་ཁའི་བྱ་སྒྲོ་དང་འདྲ་སྟེ་གར་འགྲོ་ཆ་མེད༔ རིམ་གྲོ་ལ་ལེ་ལོ་མ་བྱེད་བརྩོན་འགྲུས་སྐྱེད་ཅིག༔ འོན་ཀྱང་མགྲོན་པོ་ལམ་ཞུགས་ཀྱི་ནད་པ་ཡིན་ན་མྱུར་དུ་སོས་པར་འགྱུར་རོ༔ ནད་པ་ཆེ་གེ་མོ་འདི་ལ་གདོན་ཅི་གདོན་ཞེ་ན༔ ས་བདག་དང་རྒྱལ་པོས་ཕུགས་བྱས༔ གཟའ་དང་ཀླུས་འཕྲལ་རྐྱེན་བྱེད་འདུག༔ དེ་རྣམས་ཀྱི་འཁོར་སྟོང་སྡེ་མང་པོས་ཟུག་བསླང༔ ནད་བྱིངས་ཆེན་པོ་འབྱུང་བའི་ཉེན་འདུག་པས༔ གཟའ་ཀླུ་འགྲས་བསྡུམས་དྲས་འབྱེད༔ ས་བདག་གོང་ཕུར༔ རྟ་ཐོད་སྐྱས་འདེབས༔ སྡེ་བརྒྱད་ཀྱི་མདོས་རྣམས་བཏང་ནས༔ རྒྱབ་ཆོག་ཏུ་གཟུངས་འདུས་འདོན༔ རྣམ་འཇོམས་གྱི་རྒྱབ་ཆོག་རྣམས་བྱས་ན་ཕན་པ་ཆེ་སྟེ༔ ཕྱི་དལ་ཆེར་འདུག་གོ༔ བོར་བ་རྙེད་དམ་ཞེ་ན༔ འཕྲལ་དུ་རྙེད་སྲ༔ ཡུན་རིང་སོང་ན་རྩད་ཆོད་འབྱུང་སྟེ༔ ལག་ཏུ་འོང་བ་དཀའ་བར་མཆིིས་སོ༔ དམག་ཇག་ལ་འགྲོ་ན་བཟང་ངམ་ཞེ་ན༔ དམག་ཉེས་ཇག་ནུབ༔ གཡུལ་ངོར་མདུང་ཆག༔ དཔའ་བོ་འཁྲུགས་གྲལ་དུ་འཆི༔ རང་ཕམ་མི་རྒྱལ་བར་འགྱུར་བས་ཕྱོགས་སུ་ཡང་བརྩམ་པར་མི་བྱ་སྐད་དོ༔ རྨིག་ཟླུམ་གྱི་དུད་འགྲོ་འདི་བརྟེན་པར་རུང་ངམ༔ བཅོས་ཀ་བྱས་ན་ཕན་ནམ་ཞེ་ན༔ བརྟེན་ཀྱང་བསྐྱེད་འབྲི་མེད༔ བཅོས་ཀ་བྱེད་ན་དེའི་མོད་ལ་ཨི་འཆི༔ རང་སར་བཞག་ན་དགེའོ༔ རྨིག་པ་ཀ་བྲག་ཆེ་གེ་མོ་འདི་བརྟེན་ན་འཕྲལ་ཕུགས་ཕན་པར་འགྱུར་རམ༔ བཅོས་ཀ་ཆེ་གེ་འདི་འཕྲོད་དམ་ཞེ་ན༔ འདི་ནི་འཕྲལ་བདེ་ཆོད་ལ༔ ཕུགས་ཀྱི་ནོར་རྟེན་དུ་ཡང་འགྱུར༔ བཅོས་ཀ་ཡང་མུས་ཀྱིས་འཕྲོད་པས་དྲག་ལས་མྱུར་བ་མི་བྱ་སྐད་དོ༔ མཛའ་རོགས་རྙེད་དམ་ཞེ་ན༔ སྔར་འདྲིས་དང་འཕྲད་པར་མཆི༔ གསར་པ་ནི་རྙེད་པར་དཀའ༔ རྙེད་ཀྱང་ཕུགས་སུ་ཡང་མི་ཕན་ནོ༔ གསེབ་བཏང་ན་སྲིད་ཆགས་སམ་ཞེ་ན༔ སྲིད་རྟེན་མི་འདུག་པས་ཆགས་པར་མི་འགྱུར་རམ༔ ཕ་རོལ་དང་ལབ་མཆུ་བྱས་ན་འཕྲོད་དམ་དགེའམ་ཞེ་ན༔ འཕྲོད་ཀྱང་འཕྲོད་ལ་དགེ་ཡང་དགེའོ༔ ཆང་མོ་ནི༔ ཐབས་ནི་ཅི་བྱས་ཀྱང་ཐོག་གཅིག་ལ་མི་ཞིམ་སྐད་དོ༔ བཟོའི་རིགས་བྱེད་གང་བྱས་ཀྱང་ལེགས་པར་མི་མཆི་ཞིང༔ ཕུགས་སུ་ཕན་ཐོགས་པར་མི་འགྱུར་སྐད་དོ༔ ལོ་ལེགས་སམ་ཞེ་ན༔ ལོ་བོངས་བརྟན་མས་བསྡུས༔ སྙེ་སྟོང་བོང་བ་གང་ཡང་འབྲུ་འཕེལ་མི་འབྱུང་བས་ལོ་ཉེས་སྐད་དོ༔ ཁ་ཆར་ཨེ་འབབ་ན༔ ཁ་ཆར་ཤིན་ཏུ་ཆེ་བ་བབ་སྐད་དོ༔ རྩེད་མོའི་རིགས་ཆེ་གེ་མོ་བྱས་ན་དགེའམ་ཞེ་ན༔ ད་རེས་ཀྱི་རྩེད་མོ་འདི༔ འཕྲལ་ཉམས་དགའ༔ ཁྲོམ་འདུ༔ ཕུགས་སུ་གལ་ཐོབས་ལ་དཔའ་ཐོགས༔ ཤིན་ཏུ་དགེའོ༔ སྐོར་ཕྱྭ་སྐོར་དུ་བཟང༔ གཡོན་ཕྱྭ་ལ་གཡོན་ཆགས༔ དགྲ་ཕྱྭ་ལ་དགྲ་མེད་དེ༔ འཇིག་པའི་དགྲ་ཞིག་འདུག་པ་དེ༔ ད་གཟོད་དུས་ཀྱི་སང་ཕོད་ཙམ་འོང་སྐད་དོ༔ ལོ་འཁོར་གཅིག་དང་ཡང་འཁོར་གཅིག༔ མི་ཁྱོད་ལ་དགྲ་མི་འོང་སྐད་དོ༔ ས་མ་ཡ༔ ༈ སྤྱི་དོན་བཞི་པ་རྗེས་ཀྱི་བྱ་བ་ནི༔ དེ་ལྟར་མོའི་རིམ་པ་གང་ཡིན་ཚར་བའི་རྗེས་ལ་གཏོར་མ་འབུལ༔ ལྷ་ཡེ་ཤེས་པ་དམ་ཚིག་པ་ཐམས་ཅད་ཌཱཀྐིའི་བྲིས་སྐུ་ལ་བསྟིམ༔ གཏང་རག་གཏོང༔ ཤིས་པ་བརྗོད༔ དགེ་རྩ་བསྔོ༔ དམིགས་མེད་ཀྱི་རྒྱས་གདབ༔ དོ་གལ་མ་མཆིས་པ་ལ་མི་འདེབས༔ དོ་གལ་དུ་གྱུར་ན༔ ཚོགས་འཁོར་བཤམས་ལ་གདབ༔ གཙང་ཞིང་གཙང་མའི་ཕྱོགས་སུ་གདབ༔ འདི་ནི་ཐོག་མར་གསལ་པོ་མི་འབྱུང་ཞིང༔ བཏབ་གྲངས་མང་ན་ཇེ་རྣོ་ཇེ་རྣོར་འགྲོ་བས་ཤེས་པར་བྱའོ༔ ས་མ་ཡ༔ རྒྱ་རྒྱ་རྒྱ༔ སྦས་རྒྱ༔ གཏད་རྒྱ༔ གཏེར་རྒྱ༔ དྷ་ཐིམ༔ རྟེན་འབྲེལ་མོ་རྩིས་ཀྱི་སྐོར་རིན་པོ་ཆེའི་སྒྲོམ་བུ་ཞེས་བྱ་བ༔ ད་ལྟ་མངའ་བདག་ཡབ་སྲས་དང༔ མ་འོངས་པའི་རྗེས་འཇུག་སྐལ་ལྡན་རྣམས་ཀྱི་དོན་དུ༔ ཨུ་རྒྱན་པདྨས་མཛད་དོ༔ བློ་དམན་མཚོ་རྒྱལ་བདག་གིས་ཟིན་བྲིས་སུ་བྲིས་ནས་གཏེར་དུ་སྦས་པ་འདི༔ ལས་ཅན་གསུང་གི་སྲས་དང་འཕྲད་པར་ཤོག༔ ས་མ་ཡ༔ དྷ་ཐིམ༔ བདག་འདྲ་དགེ་སྦྱོང་སངས་རྒྱས་རྡོ་རྗེས་ཨུ་རྒྱན་སྒྲུབ་གནས་པུ་རི་ཕུག་མོ་ཆེ་ནས་བཏོན་པའོ།། །།འདི་ནི་འཇམ་མགོན་རིན་པོ་ཆེ་དང་རིགས་བདག་བླ་མ་རྣམས་ཀྱི་དགོངས་རྫོགས་ཀྱི་ཕྱིར་དུ་ཁ་བསྐངས་ཏེ་སྤར་གསར་དུ་བསྒྲུབས་པ་ཡིན་པས་དབང་ལུང་སོགས་ལ་ཞིབ་ཅ་བྱ་དགོས་ཡོད་དོ། །ཞེས་སི་ཏུ་པདྨ་དབང་མཆོག་རྒྱལ་པོ་ཁོ་བོས་ཆེད་དུ་གདམས་པའོ།།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).