Terdzo-DZI-076








Terdzo-DZI-076.pdf
Click the picture above to view the Shechen manuscript.

འཇམ་དཔལ་སྨྲ་བའི་སེང་གེའི་སྒྲུབ་ཐབས་

'jam dpal smra ba'i seng ge'i sgrub thabs

by  འཇམ་དབྱངས་མཁྱེན་བརྩེའི་དབང་པོ་ (Jamyang Khyentse Wangpo)
in cycle  ཕ་དམ་པའི་ལུགས (Pha dam pa'i lugs)
Volume 49 (ཛི) / Pages 903-958 / Folios 1a1 to 28b4

Tibetan Text

༄༅། །འཇམ་དཔལ་སྨྲ་བའི་སེང་གེའི་སྒྲུབ་ཐབས་བཞུགས་སོ། ། རྒྱ་གར་སྐད་དུ། ཨཱརྻ་མཉྫུ་ཤྲཱི་སཱ་དྷ་ནི། བོད་སྐད་དུ། འཕགས་པ་འཇམ་དཔལ་སྒྲུབ་པའི་ཐབས། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཤེས་རབ་འཕེལ་བའི་ཆོ་ག་ནི། །སྤང་རྒྱན་གླ་བ་མཚལ་དཀར་གསུམ། །ཡུང་བ་ཙནྡན་ཨ་ཀ་རུ། །སྤང་སྤོས་དབང་ལག་ཤུ་དག་གསུམ། །གསེར་མདོག་ཤིང་མངར་རྒྱ་སྐྱེགས་གསུམ། །དཔའ་བོ་བཅུ་གཉིས་བསྡུས་ནས་ནི། །ཞིབ་པར་བཏགས་ལ་སྦྲང་རྩི་དང་། །བ་དམར་འོ་མས་རིལ་བུ་ནི། །བརྒྱ་དང་རྩ་བརྒྱད་བྱས་ནས་ནི། །རིན་ཆེན་སྣོད་དུ་བླུག་པར་བྱ། །པདྨ་སེར་པོ་འདབ་བརྒྱད་དབུས། །གོང་གི་རིལ་བུ་བཞག་ནས་ནི། །ཤར་དུ་ཁ་བལྟས་སྟོང་ཉིད་བསྒོམ། །སྟོང་པའི་ངང་ལས་སེང་གེའི་ཁྲི། །དེ་སྟེང་པདྨ་ཟླ་བའི་དབུས། །ཡི་གེ་དྷཱིཿདམར་ཚེག་དྲག་ཅན། །འོད་ཟེར་དམར་པོ་འཕྲོ་བར་བསྒོམ། །དེ་ལས་བདག་ཉིད་འཇམ་དཔལ་ནི། །སྐུ་མདོག་དམར་པོ་རྒྱན་དང་ལྡན། །རལ་པའི་ཐོར་ཚུགས་གྱེན་དུ་སྒྲེང་། །རྩེ་མོ་ཡིད་བཞིན་ནོར་བུས་བརྒྱན། །རལ་གྲི་པུསྟི་འཛིན་མཛད་ཅིང་། །འོད་ཟེར་དམར་པོ་འཕྲོ་བར་བསམ། །ཐུགས་ཀར་བྷྲཱུྃ་ལས་འཁོར་ལོ་ནི། ཁ་དོག་དམར་པོ་རྩིབས་བཞི་པ། །ལྟེ་བར་རལ་གྲི་སོར་བཞིས་མཚན། །རྩ་བའི་སྔགས་ཀྱིས་བསྐོར་བ་འོ། །དེ་ལས་འོད་ཟེར་འཕྲོས་པ་ཡིས། །ཡེ་ཤེས་སེམས་དཔའ་སྤྱན་དྲངས་གཞུག །མདུན་གྱི་ལྷུང་བཟེད་དབུས་སུ་ནི། །ཡི་གེ་ཧྲཱིཿལས་དབྱངས་ཅན་མ། །སྐུ་མདོག་སྔོན་མོ་བརྗིད་པའི་ཞལ། །རིན་ཆེན་རྒྱན་དང་དོ་ཤལ་མཛེས། །དབུ་སྐྲ་མཐོན་མཐིང་ཐོར་ཚུགས་ཅན། །ཕྱག་གཡས་རལ་གྲི་གཡོན་པ་ན། །པོ་ཏི་བསྣམས་ཤིང་འགྱིང་བག་ཅན། །ཐུགས་ཀར་པདྨ་ཟླ་བའི་སྟེང་། །རལ་གྲི་སོར་བཞི་སྙིང་པོས་བསྐོར། །འོད་ཀྱིས་ཡེ་ཤེས་སྤྱན་དྲངས་གཞུག །སངས་རྒྱས་བྱང་ཆུབ་སེམས་དཔའ་རྣམས། །དེ་ཡི་འཁོར་དུ་བསྐོར་བར་བསམ། །བདག་དང་སེམས་ཅན་ཐམས་ཅད་ཀྱི། །བློ་ཡི་མུན་པ་བསལ་བར་བསམ། །མདུན་གྱི་རིལ་བུ་ལ་དམིགས་ཤིང་། །སྔགས་འདི་རྒྱུན་དུ་བཟླས་པར་བྱ། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མུཾ་ཧྲཱིཿཔྲ་ཛྙཱ་བརྡྷ་ནི་ཧྲཱིཿདྷཱིཿསྭཱ་ཧཱ། དངོས་གྲུབ་ཕྲེང་བ་ཉི་ཤུ་གཅིག །བརྒྱ་ཡིས་མི་བརྗེད་གཟུངས་ཐོབ་འགྱུར། །སྟོང་གིས་སྒྲ་སྐད་ཀུན་ལ་མཁས། ཁྲི་ཕྲག་གཅིག་ནི་བཟླས་གྱུར་ན། །ཉི་མ་རེ་ལ་ཤྭ་ལོ་ཀ །ལྔ་སྟོང་རེ་རེ་འཛིན་འགྱུར་ཞིང་། །མངོན་པར་ཤེས་པ་འཆར་བ་དང་། །གཞན་གྱི་སེམས་ནི་ཤེས་པ་དང་། །ཡི་གེའི་རིགས་རྣམས་ཐམས་ཅད་ཀྱང་། །ཐོགས་པ་མེད་པར་ཤེས་པར་འགྱུར། །སྒྲ་དང་བསྟན་བཅོས་ཐམས་ཅད་ཀྱང་། །བཀའ་བཞིན་རྩོམ་པར་ནུས་པ་ཡིན། །ཕྱིས་ནི་ས་ཡི་དབང་ཕྱུག་འཐོབ། །རིལ་བུ་རྒྱལ་ཆེན་བཞིར་མཐོང་ན། །ཤེས་རབ་འཇམ་པའི་རྡོ་རྗེ་དང་། །སངས་རྒྱས་ཀུན་དང་མཉམ་པར་འགྱུར། །རིལ་བུ་དབྱངས་ཅན་མར་མཐོང་ན། །སངས་རྒྱས་ཞིང་དུ་འགྲོ་བར་འགྱུར། །རིལ་བུ་ཉི་མ་ཟླ་བར་མཐོང་། །སྔོན་གྱི་སྐྱེ་བ་དྲན་པར་འགྱུར། །རིལ་བུ་འོད་དུ་མཐོང་གྱུར་ན། །སྒྲ་བཞི་དག་ལ་མཁས་པར་འགྱུར། །འོད་དང་དུ་བ་རྔ་སྒྲ་དང་། །དུང་གདུགས་ཉི་ཟླ་ཤར་བ་དང་། །མེ་ཏོག་འཛུག་དང་ཞིང་རྨོ་དང་། །སྣག་ཚ་འཐུང་དང་ཉམས་དགའ་དང་། །ཡི་གེ་འབྲི་ཀློག་མཐོང་བ་ན། །མངོན་པར་ཤེས་པ་འཆར་བ་དང་། །ཤེས་རབ་འཕེལ་བའི་རྟགས་སུ་འདོད། །དེ་ནས་མདུན་གྱི་སངས་རྒྱས་དང་། །དབྱངས་ཅན་མ་དང་བཅས་པ་རྣམས། །འོད་དུ་ཞུ་ནས་རིལ་བུར་ཐིམ། །ནངས་མ་ཉི་ཤུ་རྩ་གཅིག་ལ། །རིལ་བུ་རེ་རེ་ཟོས་གྱུར་ན། །ཤེས་རབ་འཕེལ་བར་ཐེ་ཚོམ་མེད། ༈ །དང་པོ་རྗེས་གནང་ཐོབ་ནས་ནི། །སྐར་མ་རྒྱལ་ལ་བསྒྲུབ་པར་བྱ། །གཅིག་དང་བརྒྱད་དང་བཅོ་ལྔ་ལ། །བསྒྲུབ་ན་མྱུར་དུ་འགྲུབ་པར་འགྱུར། །རྫུན་དང་ཤ་ཆང་སྒོག་ཙོང་དང་། །སྔོ་ངད་ལ་སོགས་སྤང་བར་བྱ། །མཁོན་དང་ཞེ་སྡང་དྲག་པོ་དང་། །གྲོགས་ངན་མྱ་ངན་སྨྲེ་སྔགས་དང་། །སེམས་ལ་གནོད་པའི་ལས་རྣམས་སྤང་། །རང་ལ་བདོག་པ་ཐམས་ཅད་ཀྱིས། །འཇམ་པའི་རྡོ་རྗེ་མཆོད་བྱ་ཞིང་། །རྟག་ཏུ་ལྷ་ལ་གསོལ་བ་གདབ། །སེམས་ཅན་རྣམས་ལ་སྙིང་རྗེ་བསྒོམ། །སྲིད་པར་འཆིང་བའི་ལས་རྣམས་སྤངས། །གལ་ཏེ་ལས་འཕྲོ་ཡོད་པས་ནི། །ཉི་མ་གཅིག་གིས་འགྲུབ་པར་འགྱུར། །འབྲིང་ན་གཉིས་ཀྱིས་འགྲུབ་པར་འགྱུར། །ཉི་མ་གསུམ་ནི་བསྒྲུབས་གྱུར་ན། །ལས་འཕྲོ་མེད་ཀྱང་འགྲུབ་པར་འགྱུར། །གཞན་གྱི་རྩོད་པ་ཟློག་པ་ནི། །རང་ཉིད་འཇམ་དཔལ་བསྒོམས་པ་ཡི། །དཔྲལ་བར་དྷཱིཿདམར་ཚེག་དྲག་ཅན། །འོད་ཟེར་དམར་པོ་འཕྲོ་བར་བསྒོམ། །དེ་ལས་འཕྲོས་པའི་འོད་ཟེར་གྱིས། །བསྒྲུབ་བྱའི་དཔྲལ་བར་ཐིག་ལེ་མཆོག །རྣམ་ཤེས་འོད་ཀྱི་རྣམ་པར་རེག །རང་གི་དཔྲལ་བའི་དྷཱིཿལ་བསྟིམ། །ཨོཾ་ཧྲཱིཿདྷཱིཿམ་མེ་དཱི་པཾ་ཆེ་གེ་མོའི་རྣམ་པར་ཤེས་པ་མོ་ཧ་ཡ་ཧཱུྃ་ཛཿ བརྒྱ་དང་རྩ་བརྒྱད་བཟླས་ནས་ནི། །རིག་པ་སེང་གེ་ལྟ་བུར་བསྒོམ། །རྩོད་པ་ཀུན་ལས་རྒྱལ་བར་འགྱུར། །འཇམ་དཔལ་དམར་པོ་གསུང་གི་སྒྲུབ་ཐབས། རྗེ་བཙུན་དམ་པ་རྒྱ་གར་གྱིས་མཛད་པ་རྫོགས་སོ།། །། ༄༅། །འཇམ་དཔལ་སྨྲ་བའི་སེང་གེའི་སྒྲུབ་ཐབས་ཉུང་གསལ་སྙིང་པོར་དྲིལ་བ་གྲུབ་པ་མཆོག་གི་ཞལ་ལུང་ཞེས་བྱ་བ་བཞུགས་སོ། །ན་མོ་གུ་རུ་ཝཱ་དཱི་སིཾ་ཧཱ་ཡ། བློ་ལྡན་གང་ཞིག་ངེས་པར་འབྱུང་བ་དང་བྱང་ཆུབ་སེམས་གཉིས་ཀྱི་གཞན་དབང་དུ་གྱུར་པས་མྱུར་དུ་ཐམས་ཅད་གཟིགས་པའི་ཡེ་ཤེས་ལ་བསྙེན་པར་བྱ་བའི་སླད་དུ་འཇམ་དཔལ་སྨྲ་བའི་སེང་གེའི་ཏིང་ངེ་འཛིན་དང་གཟུངས་ཀྱི་སྒོ་བསྒྲུབ་པར་འདོད་པས། འདི་ཉིད་ཀྱི་རྗེས་སུ་གནང་བ་དང་གདམས་ངག་ལེགས་པར་ནོས་ཏེ་དམ་ཚིག་དང་སྡོམ་པར་ལྡན་པས་དབེན་ཞིང་ཉམས་དགའ་བའི་བསམ་གཏན་གྱི་ཁང་བུར་རྣལ་འབྱོར་ལ་འཇུག་པར་བྱའོ། །དེ་ལའང་སྦྱོར་དངོས་རྗེས་གསུམ་ལས། དང་པོ་སྦྱོར་བ་ནི། མདུན་གྱི་ནམ་མཁར་བླ་མ་འཇམ་པའི་དབྱངས་གཙོ་བོར་གྱུར་པའི་སྐྱབས་ཡུལ་རྣམས་མངོན་སུམ་ལྟ་བུར་གསལ་བའི་སྤྱན་སྔར་སྐྱབས་སེམས་ཚད་མེད་བཞི་བསྒོམ་པ་རྣམས་སྤྱི་ལྟར་བྱའོ། །གཉིས་པ་དངོས་གཞི་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷ་ཝ་ཤུདྡྷོ྅་ཧཾ། སྟོང་པའི་ངང་ལས་སེང་གེ་སྔོན་པོ་བསྣོལ་བའི་གདན་གྱི་སྟེང་དུ་པདྨ་དང་ཟླ་བའི་དཀྱིལ་འཁོར་གྱི་དབུས་སུ་རང་གི་སེམས་ཉིད་ཀྱི་ངོ་བོ་ཡི་གེ་དྷཱིཿདམར་པོ་དང་། མདུན་གྱི་ས་གཞིར་པད་ཟླའི་སྟེང་དུ་ཧྲཱིཿཡིག་མཐིང་ཞུན་གྱི་མདོག་ལྟ་བུ། དེ་གཉིས་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ། ཚུར་འདུས་ཡི་གེ་གཉིས་ལ་ཐིམ་པས་དྷཱིཿཡོངས་སུ་གྱུར་པ་ལས། རང་ཉིད་སྐད་ཅིག་གིས་འཕགས་པ་འཇམ་དཔལ་སྐུ་མདོག་དམར་པོ་ཞལ་གཅིག་ཕྱག་གཉིས་པ། ཕྱག་གཡས་ཤེས་རབ་ཀྱི་རལ་གྲི་མེ་འབར་བ་ནམ་མཁའ་ལ་འཕྱར་ཞིང་།་་་ཡིག་ཆ་ཕྱི་མ་རྣམས་སུ་ཕྱག་གཉིས་ཆོས་འཆད་ཀྱི་ཕྱག་རྒྱར་གསུངས་ཀྱང་རྩ་བའི་ཡིག་རྙིང་རྣམས་ཀྱི་དགོངས་པ་ནི་འདི་ཁོ་ན་ཡིན་ཏེ། དེས་མཚོན་གོང་འོག་རྣམས་སུ་ཡིག་ཆ་ཕྱི་མ་དང་མི་མཐུན་པ་རྣམས་ཡིག་རྙིང་སོར་བཞག་པའོ། །གཡོན་ཨུཏྤ་ལའི་ཡུ་བ་མཐེབ་སྲིན་གྱིས་ཐུགས་ཀར་བཟུང་བའི་འདབ་མ་སྙན་གྱི་ཐད་སོར་ཁ་བྱེ་བའི་སྟེང་ན་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་གླེགས་བམ་བསྣམས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཞི་འཛུམ་སྒེག་པའི་ཆ་ལུགས་ཅན། རལ་པའི་ཐོར་ཚུགས་གྱེན་དུ་བསྒྲེང་བའི་རྩེར་ཡིད་བཞིན་གྱི་ནོར་བུ་འབར་བས་མཚན་པའི་ལྷག་མ་ཟུར་ཕུད་ལྔ་གཡོན་དུ་འཕྱང་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་ཐུགས་ཀར་བྷྲཱུྃ་ལས་འཁོར་ལོ་སེར་པོ་རྩིབས་བཞི་པའི་ལྟེ་བར་རལ་གྲི་སོར་བཞི་པ་གྱེན་འགྲེང་དུ་འཁོད་པའི་འཆང་གཟུང་ལ་དྷཱིཿདམར་པོའི་མཐར་རྩ་བའི་སྔགས་ཀྱིས་བསྐོར་བ། མདུན་གྱི་ཧྲཱིཿཡིག་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྐུ་མདོག་སྔོན་མོ་ཅུང་ཟད་ཁྲོ་ཞིང་འཛུམ་ལ་སྒེག་པའི་ཉམས་དང་ལྡན་པ། རལ་གྲི་དང་པུསྟི་འཛིན་ཅིང་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དབུ་སྐྲ་མཐོན་མཐིང་སྤྱི་བོར་བཅིངས་པའི་རྩེ་མོར་ནོར་བུས་མཚན་ཅིང་ལྷག་མ་ལྕང་ལོའི་ཚུལ་དུ་འཕྱང་བ། ཞབས་གཉིས་བཞེངས་པའི་སྟབས་ཀྱིས་སྐུ་འགྱིང་བག་དང་བཅས་ཏེ་བཞུགས་པའི་ཐུགས་ཀར་ཟླ་བའི་སྟེང་དུ་རལ་གྲི་སོར་བཞི་པའི་འཆང་གཟུང་ལ་ཧྲཱིཿཡིག་སྔོན་པོའི་མཐར་སྔགས་ཀྱི་ཕྲེང་བས་བསྐོར་བ། ཡབ་ཡུམ་གཉིས་ཀའི་ཐུགས་ཀའི་ས་བོན་ལས་འོད་ཟེར་འཕྲོས་པས་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་ཨོཾ་བཛྲ་ས་མཱ་ཛཿ ཛཿཧཱུྃ་བཾ་ཧོཿ གཉིས་སུ་མེད་པར་བསམ་ལ། ལྷར་སྣང་སྒྱུ་མ་ལྟ་བུའི་ཏིང་ངེ་འཛིན་ལ་ཡུན་རིང་དུ་སེམས་འཛིན། དེས་སྐྱོ་ན་བཟླས་པ་བྱ་བ་ནི། རང་གི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་འོད་ཟེར་འཕྲོས་པས་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དུ་གྱུར། ནང་བཅུད་ཀྱི་སེམས་ཅན་ཐམས་ཅད་འཇམ་དཔལ་ཡབ་ཡུམ་གྱི་གོ་འཕང་ལ་བཀོད། སླར་ཡང་ཐུགས་ཀའི་དྷཱིཿལས་དྷཱིཿཡིག་གི་ཕྲེང་བ་དཔག་ཏུ་མེད་པ་བྱུང་། རང་གི་སྣ་བུག་གཡས་ནས་ཐོན། ཡུམ་གྱི་སྣ་བུག་གཡོན་ནས་ཞུགས་ཏེ་ཐུགས་ཀའི་ཧྲཱིཿལ་ཐིམ། དེ་ལས་གྲོལ་བའི་ཚུལ་གྱིས་ཧྲཱིཿཡིག་གི་ཕྲེང་བ་སྣ་བུག་གཡས་ནས་བྱུང་། རང་གི་སྣ་བུག་གཡོན་ནས་ཞུགས་པས་ཨཱ་ལི་ཀཱི་ལིའི་སྔགས་སུ་གྱུར་ཏེ་ལུས་ཀྱི་ནང་ཐམས་ཅད་གང་། བ་སྤུའི་བུ་ག་ཚུན་ཆད་ཀྱང་སྔགས་ཀྱི་ཡི་གེས་གཏམས་པས་བློ་ཡི་མུན་པ་ཐམས་ཅད་བསལ་ནས། ཤེས་རབ་ཀྱི་སྣང་བ་རྒྱས། དེ་ལྟར་སྔགས་ཕྲེང་རྒྱུན་མི་འཆད་པར་འཁོར་བའི་བར་ནས་ཤེས་རབ་ཀྱི་བུང་བའི་ཚོགས་འོད་ཟེར་དང་བཅས་པ་དཔག་ཏུ་མེད་པ་ཕྱོགས་བཅུར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་བླ་མ་དམ་པ་རྣམས་ཀྱི་བྱིན་རླབས། ཉན་རང་གི་ཤེས་རབ། སོ་སོ་སྐྱེ་བོའི་ནུས་མཐུ་རྣམས་བསྡུས་ནས་རང་གི་སྤྱི་བོར་ཐིམ་པས་ལུས་ཡེ་ཤེས་དང་ལྡན་པར་བྱས། ཡང་འོད་ཟེར་འཕྲོས་པས་བཀའ་སྡེ་སྣོད་གསུམ་གྱི་བཅུད། གནས་ལྔ་རིག་པའི་པཎྜི་ཏའི་ཤེས་རབ། དགེ་བའི་བཤེས་གཉེན་གྱི་ནུས་པ། སྨན་གྱི་ནུས་པ་རྣམས་བསྡུས་ནས་རང་གི་ལྕེ་ལ་ཐིམ་པས་ངག་ནུས་པ་དང་ལྡན་པར་བྱིན་གྱིས་བརླབས། སླར་ཡང་འོད་ཟེར་འཕྲོས་པས་རྩི་ཤིང་ནགས་ཚལ་གྱི་བཅུད། ཉི་ཟླའི་འོད་ཟེར། རྒྱ་མཚོའི་ནང་གི་ནོར་བུ་རིན་པོ་ཆེའི་འོད། ལྷ་ཀླུ་གཟའ་སྐར་རྣམས་ཀྱི་ཤེས་རབ་དང་ནུས་པ། རྒྱལ་པོ་དང་བཙུན་མོའི་སེམས་རྣམས་བསྡུས་ཏེ་རང་གི་ཐུགས་ཀར་ཐིམ་པས་ཐུགས་བདེ་སྟོང་གཉིས་སུ་མེད་པའི་ཡེ་ཤེས་དང་ལྡན་པར་གྱུར། དེ་ལྟ་བུའི་དམིགས་པ་དང་མ་བྲལ་བའི་ངང། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མུཾ་ཧྲཱིཿཔྲ་ཛྙཱ་བརྡྷ་ནི་ཧྲཱིཿདྷཱིཿསྭཱ་ཧཱ། ཞེས་ཇི་ཙམ་ནུས་པ་བཟླས་པའི་མཐར་དབྱངས་གསལ་དང་རྟེན་འབྲེལ་སྙིང་པོའི་སྔགས་ཀྱིས་ནུས་པ་བརྟན་པར་བྱའོ། །གསུམ་པ་རྗེས་ནི། རྗེ་བཙུན་འཇམ་པའི་དབྱངས་ཀྱིས་བདག་དང་སེམས་ཅན་ཐམས་ཅད་ཀྱི་མི་ཤེས་པའི་མུན་པ་ཐམས་ཅད་བསལ་ནས་བདག་མེད་རྟོགས་པའི་ཤེས་རབ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ནས། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ཐུགས་ཀའི་འཁོར་ལོ་ལ་ཐིམ། དེ་རལ་གྲི་ལ་ཐིམ། དེ་དྷཱིཿལ་ཐིམ། དེ་ཐིག་ལེ་དམར་པོར་གྱུར་པ་འོད་དུ་ཞུ་ནས་སྣང་བ་ཐམས་ཅད་དམར་ལམ་གྱིས་སོང་བས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་དབང་དུ་བྱས་པར་བསམ་ལ། འོད་གསལ་སྟོང་ཉིད་ཀྱི་ངང་དུ་བློ་བཞག །དེ་ལས་ལྡང་བ་ན། སླར་ཡང་རང་སྐད་ཅིག་གིས་རྗེ་བཙུན་འཇམ་པའི་དབྱངས་ཀྱི་སྐུར་གྱུར། དགེ་བ་འདི་ཡིས་མྱུར་དུ་བདག །འཇམ་དཔལ་ཡབ་ཡུམ་འགྲུབ་གྱུར་ནས། །སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་སུ་ཅི་འབྱོར་པའི་གཏོར་མ་བྱིན་གྱིས་བརླབས་ཏེ། ཡེ་ཤེས་པ་སྤྱན་དྲངས་ལ། རྩ་སྔགས་ཀྱི་མཐར་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི་བཏགས་པས་འབུལ་ཞིང་མཆོད་བསྟོད་གསོལ་བ་གདབ། ཉལ་བའི་ཚེ་འོད་གསལ་སྟོང་ཉིད་ཀྱི་ངང་དུ་ཉལ། ལྡང་བ་ན་ནམ་མཁའ་སྟོང་པ་ལས་དབྱངས་ཅན་མའི་ཚོགས་དཔག་ཏུ་མེད་པས་དྷཱིཿཧྲཱིཿའི་སྔགས་ཀྱིས་བསྐུལ་བར་བསམ་ལ་སྒྱུ་མ་ལྟ་བུའི་ལྷའི་སྐུར་ལྡང་། བསྙེན་པ་བྱེད་ན་གཙང་སྦྲ་དང་བཅས་ཐུན་གསུམ་མམ་བཞིའི་རིམ་པས་སྔགས་འབུམ་ཕྲག་བཞི་ཁ་སྐོང་དང་བཅས་པའམ། གཞུང་ནས་བཤད་པའི་རྟགས་རྣམས་དངོས་སམ་རྨི་ལམ་དུ་མཐོང་བའི་བར་བཟླ། དེ་ནས་ཁ་སྐོང་གི་སྦྱིན་སྲེག་དང་། བོགས་འབྱིན་པའི་སླད་དུ་རིལ་བུ་བསྒྲུབ་པ་དང་། ལས་ཀྱི་ཚོགས་རབ་འབྱམས་ཀྱིས་རང་གཞན་ལ་ཕན་གདགས་པ་རྣམས་ནི་རྩ་བའི་ཡིག་རྙིང་གསལ་བྱེད་དང་བཅས་པ་རྣམས་ལས་རྟོགས་པར་བྱ་བ་ཁོ་ནའོ། །ཚུལ་དེ་ལྟར་འབད་པས་གནས་སྐབས་སུ་ཤེས་རབ་ཕྱོགས་མེད་དུ་སྐྱེ་ཞིང་། མངོན་པར་ཤེས་པ་དང་། ཏིང་ངེ་འཛིན་དང་། གཟུངས་ཀྱི་སྒོ་བསམ་གྱིས་མི་ཁྱབ་པ་འཐོབ་པར་འགྱུར་ལ། མཐར་ཐུག་འཕགས་པ་འཇམ་དཔལ་ཡེ་ཤེས་སེམས་དཔའི་སྐུར་མངོན་པར་བྱང་ཆུབ་པར་འགྱུར་བ་ནི་ངེས་པའོ། །དེ་ལྟར་འཇམ་དཔལ་སྨྲ་བའི་སེང་གེའི་སྒྲུབ་ཐབས་མདོར་བསྡུས་སྙིང་པོར་དྲིལ་བ་འདི་ནི་ཀུན་གཟིགས་སྤྲུལ་པའི་སྐུ་རིན་པོ་ཆེ་ཀརྨ་ངེས་དོན་དབང་པོའི་བཀའ་བསྩལ་ནོར་བུའི་ཅོད་པན་སྤྱི་བོར་མཆོད་དེ། མང་དུ་ཐོས་པའི་བཙུན་པ་འཇམ་དབྱངས་མཁྱེན་བརྩེའི་དབང་པོས་གྲུབ་པ་མཆོག་གི་དེད་དཔོན་དམ་པ་སངས་རྒྱས་ཀྱི་ཞལ་ལུང་རྩ་བའི་ཡིག་རྙིང་དག་གི་དགོངས་པ་ཇི་ལྟ་བ་བཞིན་སྦྱར་བའི་དགེ་བས། འགྲོ་ཀུན་འཇམ་དཔལ་དཔའ་བོའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༄༅། །ངག་གི་དབང་ཕྱུག་སྨྲ་བའི་སེང་གེའི་སྒྲུབ་ཐབས་སྙན་པའི་རོལ་མོ་འཁྲོལ་བ་གཞོན་ནུ་རྣམ་པར་རོལ་པ་ཞེས་བྱ་བ་བཞུགས་སོ། །ངག་གི་དབང་ཕྱུག་སྨྲ་བའི་སེང་གེའི་སྒྲུབ་ཐབས་སྙན་པའི་རོལ་མོ་འཁྲོལ་བ་གཞོན་ནུ་རྣམ་པར་རོལ་པ་ཞེས་བྱ་བ། བླ་མ་དང་གསུང་གི་དབང་ཕྱུག་ལ་ཕྱག་འཚལ་ལོ། །ཀུན་གསལ་སྤྲིན་གྱི་རྡུལ་དང་རི་ཡི་ཕྲེང་བས་གོ་འགེབས་ལོ། །བསོད་ནམས་དྲི་མེད་སྣང་བ་ཕྱོགས་ཀྱི་མཐར་འགྲོ་ཀུན་མཁྱེན་མཁའ། །མི་ཤེས་རྡུལ་གྱིས་རབ་གཙང་འཇིག་ལྟ་རི་ཡི་རྩེ་མོ་བསྙིལ། །དེ་ལྟ་ན་ཡང་རྩུབ་རེག་སྤངས་པས་རྟག་ཏུ་འཇམ་པའི་དཔལ། །ཀུན་རྨོངས་ཤུགས་ཀྱིས་འཁོར་བའི་རྒྱ་མཚོ་རུ། །འཕངས་པ་སྒྲོལ་བའི་སྙིང་རྗེའི་གྲུ་ཞོན་པ། །རྒྱལ་བའི་ཡབ་སྟེ་སྲས་ཀྱི་ཐུ་བོ་ནི། །ལྟ་བའི་རིམས་ནད་འཇོམས་པའི་སྨན་ཆེན་པོ། །གང་གིས་ཅུང་ཟད་བསྟེན་པ་ཡང་། །མུན་པ་འཇོམས་པའི་སྣང་བ་ཅན། །སྲིད་པའི་ཉི་མ་འཆར་བྱེད་པ། །དེ་སྒྲུབ་སྙན་པའི་གླིང་བུ་བསྒྱུར། །གང་འདོད་པ་དང་། སྲེད་པ་དང་། མ་རིག་པ་དང་། ལྟ་བའི་ཆུ་བོ་བཞི་སྒྲོལ་ནས་རྣམ་མཁྱེན་ནོར་བུའི་གླིང་ལ་རིང་པོར་མི་ཐོགས་པར་རང་དབང་དུ་སྤྱོད་པར་འཚལ་བ་དེ་དག་ལ་འཕྲུལ་གྱི་ཐབས་ཆེན་པོ་འདི་ནི། གངས་རིའི་ཁྲོད་དུ། གསུང་རྡོ་རྗེ་པདྨ་སཾ་བྷ་བ་དང་། གྲུབ་པའི་དེད་དཔོན་དམ་པ་སངས་རྒྱས་ཀྱི་ཞལ་སྒོ་ནས་བྱིན་པ་སྟེ། ཕྱི་མའི་རྗེས་སུ་འབྲངས་པའི་ཡི་གེའི་ཕྲེང་བ་ལུ་གུ་རྒྱུད་དུ་བསྟར་པ་ལས། ཡུལ་བྱང་ཕྱོགས་ཀྱི་སྨྲ་བའི་སེང་གེ་རྡོ་རྗེ་གཟི་བརྗིད་ཀྱིས། ལོ་རྒྱུས་རྗེས་གནང་སྒྲུབ་པ་དང་། །སྤོགས་དང་ཁ་སྒྱུར་སྦྱིན་སྲེག་དང་། །ལས་ཚོགས་དང་ནི་རྣམ་བདུན་གྱིས། །འཇམ་དཔལ་སྒྲུབ་པའི་རིམ་པ་བཤད། །ཅེས་པའི་ལས་ཚོགས་ལ་ནང་གསེས་བརྒྱད་དང་བཅས་པས་འཆད་ཅིང་། འཇིགས་བྲལ་གསུང་རབ་གཏེར་མཛོད་མང་ཐོས་སྦས་པའི་སྡེ་སོགས་ཀྱིས་རྗེས་གནང་སྒྲུབ་ཐབས་ལས་ཚོགས་གསུམ་དུ་བསྡུས་པ་རྣམས་ནི་རྩ་བའི་གཞུང་རང་སོར་བཞག །སོ་སོའི་བརྒྱུད་པ་ལས་འོངས་པའི་མན་ངག་གིས་བརྒྱན་པའི་ལུགས་སུ་འདུག །དཔལ་ལྡན་ཨེ་ཝཾ་པ་ཡབ་སྲས་ཀྱི་རྗེས་འབྲང་ཐར་རྩེ་སྒྲུབ་ཁང་པ་ཆེན་པོ་དང་། རྩོད་དུས་ཀྱི་རྡོ་རྗེ་འཆང་སྒྲོལ་བའི་མགོན་པོ་ལ་སོགས་པའི་ཡི་གེར་ལོ་རྒྱུས་རྗེས་གནང་སྔོན་དུ་འགྲོ་བའི་བསྙེན་སྒྲུབ་ལས་གསུམ་དང་། ལྷ་སྐུ་ཡན་ལག་བཞི་རྫོགས་སུ་བསྐྱེད་པ་སོགས་རྡོ་རྗེ་ཐེག་པ་སྤྱིའི་ཚུལ་དུ་རྣམ་པར་གཞག་པ་དེ་དག་གི་དོན་རྒྱས་པ་སོ་སོའི་ཡིག་ཆ་བསྟེན་པས་ཁོང་དུ་ཆུད་པར་བྱ་འཚལ་ཞིང་། ལྷག་པར་ཀུན་གཟིགས་འཇམ་པའི་རྡོ་རྗེས་བཀའ་བསྡུ་གནང་བ་སྔགས་ཀྱི་ཐེག་པ་ཡོངས་སུ་རྫོགས་པའི་གླེགས་བམ་སྒྲུབ་ཐབས་ཀུན་བཏུས་གསེར་པོད་ཀྱི་ཁྲོད་དུ་བཞུགས་པའི་ཡིག་རྙིང་རྣམས་ལས་རྟོགས་པར་བྱ་བ་ཁོ་ན་ཡིན་ལ། འདིར་མང་དུ་མ་ཐོས་པ་དག་ལ་རྣ་བའི་བདུད་རྩིར་སྦྱིན་པ་ནི། ལོ་རྒྱུས་རྗེས་གནང་བར་ཆད་སྲུང་། །ཉེ་བར་བསྙེན་ཅིང་དངོས་གྲུབ་སྒྲུབ། །སྤོགས་ཆོག་ཁ་བསྒྱུར་བོགས་འདོན་ཏེ། །དམ་ཚིག་དང་ནི་རྟགས་དང་ཚད། །གཏོར་མ་སྦྱིན་སྲེག་ལས་སྦྱོར་ཏེ། །ཕྱོགས་ལ་རྩེ་མོས་ལྷག་པས་སྡོམ། །ཞེས་སོ། །དང་པོ་ཡིད་ཆེས་སྐྱེད་པའི་གཏམ། །སྔོན་བྱུང་བདེན་མཐོང་འཕགས་པ་ཡིས། །བློ་གྲོས་འཕེལ་བའི་སྒྲུབ་ཐབས་བྱས། །ལུགས་སྲོལ་ཆུ་བོ་འབབ་པའི་ཁུངས། །འོན་ཀྱང་འདི་ལྟར་རྗེས་སུ་ཐོས། །རྒྱལ་བ་འཇིག་རྟེན་ལས་འདས་ཏེ། །ཉིས་སྟོང་ལྔ་བརྒྱ་བརྒལ་བ་ན། །དབུས་འགྱུར་འཆང་དང་མི་རིང་བའི། །གཙུག་ལག་ཁང་གི་འདབས་སྐྱོང་བ། །བགྲང་བྱ་དགུ་བཅུས་དུབ་པ་ཡི། །མགོ་སྐྱེས་ཀུནྡའི་ཕུང་པོ་ཅན། །འཇིག་རྟེན་ཕ་རོལ་ཡོད་ཤེས་པས། །བློ་བཟང་ཞེས་བྱའི་སློབ་དཔོན་ལས། །ཡི་གེ་སློབ་པ་རྒྱལ་པོས་མཐོང་། །ཀྱེ་མ་བྱིས་པའི་བློ་ཅན་མཚར། །ནམ་གཞུག་རྩ་བ་བཙུགས་པ་དང་། །རྒས་ནས་རིག་པ་སློབ་པའི་འབྲས། །འབྱིན་པ་ཤེས་ལྡན་སུ་ཡིས་མཐོང་། །བསྟིང་ཚིག་མདའ་ཡིས་ཟིན་པའི་སྙིང་། །ཡུལ་ལ་སྤྲོ་བ་མེད་གྱུར་ནས། །སློབ་དཔོན་ལས་ནི་རིག་པ་བླངས། །བརྩེ་ལྡན་དེས་ཀྱང་དེ་བྱིན་ནས། །སྐལ་ལྡན་ཉིན་ཞག་གཅིག་གིས་ཏེ། །ཐོགས་ཀྱང་གསུམ་གྱིས་ངེས་པ་འཆད། །ཇི་སྐད་སྨྲས་པ་དེ་བཞིན་དུ། །བྱེད་པའི་ཉིན་ཞག་ཕྱི་མ་ལ། །འཇམ་དཔལ་དོ་ནུབ་བདག་ལ་ཞལ། །མི་སྟོན་མགོ་བོའི་ཡལ་ག་ནི། །ཏཱ་ལ་བཞིན་དུ་གཅོད་དོ་ཞེས། །སྤུ་གྲི་དྲངས་པའི་དམ་བཅས་བསྡིགས། །སྐྱ་རེངས་གསུམ་པའི་དམར་འོད་དང་། །ལྷན་ཅིག་ཉིན་བྱེད་ལྟ་བུའི་ཞལ། །མིག་གི་ཆུ་སྐྱེས་ལ་འཕོས་གྱུར། །ལོ་བརྒྱད་ལང་ཚོའི་མེ་ཏོག་ནི། །བློ་གྲོས་ཟེའུ་འབྲུས་མཛེས་བྱིན་བརླབས། །རིག་བྱེད་གཞོན་ནུ་མཉྫུ་ཤྲཱི། །གྲགས་པ་རི་བོའི་ཁོངས་སུ་རྒྱུ། །དངོས་པོའི་གནས་ལུགས་འཕགས་པའི་མཐུ། །རྫས་སྔགས་རྟེན་འབྲེལ་བསམ་མི་ཁྱབ། །ཆོས་ཀྱི་མཛོད་དེའི་དབྱིག་གི་ཤས། །རྒྱ་གར་ནག་པོའི་ཞལ་སྔ་ནས། །གྲུབ་པའི་སྐྱེ་བོ་རིམ་བརྒྱུད་དེ། །ད་ལྟའང་ཅུང་ཟད་སྤྱོད་པ་དག །བློ་ཡི་དབུལ་བ་སེལ་བྱེད་པའོ། །ལོ་རྒྱུས་ཀྱི་ལེའུ་སྟེ་དང་པོ་འོ། ༈ །གཉིས་པ་སྣོད་རུང་སྒྲུབ་པའི་ཐབས། །མཎྜལ་འདབ་བརྒྱད་དབུས་རིལ་བུ། །མཆོད་གཏོར་ལ་སོགས་སྒྲུབ་དུས་ལྟར། །བདག་བསྐྱེད་འཇམ་དཔལ་མདུན་རིལ་བུ། །དབྱངས་ཅན་པདྨ་འཇམ་དཔལ་བསྒོམ། །བཟླས་རིམ་གཏོར་འབུལ་བདག་ཉིད་འཇུག ཁྲུས་དང་མཎྜལ་དགའ་ཆེན་གྱིས། །གསོལ་གདབ་རྒྱུན་བཤགས་རྗེས་གནང་ལྔར། །སོ་སོར་རྡོ་རྗེ་འཛིན་གསོལ་གདབ། །སློབ་དཔོན་འཇམ་དཔལ་གནས་གསུམ་ནས། །སྐུ་དང་སྔགས་ཕྲེང་རལ་གྲི་སྟེ། །གླེགས་བམ་ནས་ནི་དེ་ཉིད་སྤྲོ། །གནས་ལྔ་དབྱངས་ཅན་ཁ་དོག་ལྔ། །སློབ་མ་འཇམ་དཔལ་གནས་ལྔར་བསྟིམ། །ཚིག་བཅད་བརྗོད་ལ་མེ་ཏོག་བཞག །སྐུ་སོགས་དབང་ཕྱུག་ཐོབ་བསམ་མཐར། །རིལ་བུ་ཟར་གཞུག་བཟླས་ལུང་སྦྱིན། །རྫོགས་རིམ་བསྒོམ་གཞུག་རྗེས་རིམ་གྱིས། །བསྡུས་འདི་རྩ་བའི་ཡི་གེའི་དོན། །རོང་སྟོན་ཀརྨ་ཕྲིན་ལས་སོགས། །བརྒྱུད་པའི་བཀའ་སྲོལ་དང་པོ་འོ། །རྟེན་མཆོད་བཤམས་ལ་སློབ་དཔོན་ཉིད། །འཇམ་དབྱངས་ཕྲག་པར་ཚངས་སྲས་མ། །ནམ་མཁར་རྒྱལ་བ་སྲས་བཅས་གསལ། །ཡན་ལག་བདུན་དང་གཏོར་མ་འབུལ། །སློབ་མས་ཡན་ལག་བདུན་པ་དང་། ཁྱད་པར་ལུས་འབུལ་འཇམ་དབྱངས་ཀྱི། །ཐུགས་ཀར་ཙཀྲ་སྔགས་བཅས་གསལ། །ཡེ་ཤེས་པ་བཅུག་སློབ་དཔོན་གྱི། །ཕྲག་པའི་དབྱངས་ཅན་ཐུགས་ཀ་ཡི། །སྔགས་འཁོར་དག་ལས་འོད་ཟེར་བྱུང་། །སློབ་མའི་ཕྲག་པར་དབྱངས་ཅན་དང་། །སྙིང་གའི་འཁོར་ལོ་སོ་སོར་ཐིམ། །འོད་ཀྱིས་ནམ་མཁའི་རྒྱལ་བ་བསྐུལ། །དེ་ལས་འོད་འཕྲོས་ཐིམ་བསམ་ཞིང་། །ཕྲེང་བར་བཟུང་སྟེ་སྔགས་རྗེས་ཟློས། །གསུམ་བྱས་སློབ་མ་འཇམ་དཔལ་དངོས། །འོད་ཀྱིས་འགྲོ་བའི་བློ་མུན་བསལ། །ཚུར་འདུས་ཤེས་རབ་བདུད་རྩིས་གང་། །འཁོར་ལོར་སེམས་འཛིན་དགེ་བསྔོ་དང་། །ཤིས་པས་བརྒྱན་འདི་ཐམས་ཅད་མཁྱེན། །ཀློང་ཆེན་རབ་འབྱམས་བཞེད་གཉིས་པ། །མཎྜལ་དབུས་སུ་བུམ་པ་སྟེ། །ཕྱོགས་བཞིར་སྐུ་བརྙན་རིལ་བུ་དང་། །གླེགས་བམ་རལ་གྲི་མཐའ་མཆོད་གཏོར། །བདག་བསྐྱེད་བུམ་སྐུ་སྨྲ་བའི་སེང་། །རིལ་བུ་དབྱངས་ཅན་ཕྱག་མཚན་གཉིས། །བསྐྱེད་བཟླས་གཏོར་འབུལ་བུམ་པ་དང་། །རིལ་བུའི་ལྷ་བཞུ་སློབ་མར་ཁྲུས། །མཎྜལ་གསོལ་གདབ་རྒྱུན་བཤགས་དང་། ཁྱད་པར་གསོལ་གདབ་དཔོན་སློབ་གཉིས། །འཇམ་དཔལ་གསལ་ལ་ཡེ་ཤེས་གཞུག །ཚིགས་སུ་བཅད་དེ་བུམ་པ་སོགས། །རྫས་ལྔས་དབང་བསྐུར་གླེགས་བམ་མཐར། །བཟླས་ལུང་རིགས་ལྔའི་དབྱངས་ཅན་མ། །ཀུན་མཐར་གནས་ལྔ་ནས་སྤྲོ་བསྟིམ། །ས་བཟང་འཕགས་པ་ངོར་ཆེན་བརྒྱུད། །ཡོངས་གྲགས་བཀའ་སྲོལ་གསུམ་པ་འོ། །ཀར་འབྲུག་སྤྱི་འགྲོའི་རྗེས་གནང་སོགས། །བོད་ཀྱི་སློབ་དཔོན་ཐ་དད་པས། །བཞེད་པའི་སྲོལ་ལམ་མང་མོད་ཀྱི། །རྩ་བའི་ལུགས་མིན་རང་དགར་ཟད། །རྗེས་གནང་གི་ལེའུ་སྟེ་གཉིས་པའོ། ༈ །གསུམ་པ་གེགས་སེལ་སཱཙྪའི་བཅས། །དཀྱིལ་འཁོར་འོག་ཏུ་དོང་གྲུ་གསུམ། །ནང་དུ་ཕུང་སའི་ཧོམ་ཁུང་བཅའ། །ཟུར་ནི་རྒྱབ་ཏུ་ཕྱོགས་པའི་ནང་། །དུག་ཤོག་ངོས་སུ་གནོད་བྱེད་གཟུགས། །ལྕེ་ནི་བྲང་དུ་སླེབ་པའི་སྟེང་། །རྒྱ་གྲམ་ལྟེ་བར་ཧཱུྃ་ནན་དང་། །གཟུགས་མཐར་སྔགས་འདི་གཡོན་དུ་བསྐོར། །ཨོཾ་མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊ། སྒྲུབ་པ་ལ་བར་དུ་གཅོད་པའི་གནོད་བྱེད་གང་ཡིན་པའི་ལུས་ངག་ཡིད་གསུམ་སཏྭམྦྷ་ཡ་ནན། ཧཱུྃ་ནན། སུཾ་ནན། ཅེས་བྲིས་གྲུ་གསུམ་ནང་དུ་བཅུག །བགེགས་ལ་སྙིང་རྗེའི་སེམས་བསྐྱེད་དེ། །དཔག་ཚད་བདུན་གྱི་ས་འོག་ན། །གཤིན་རྗེའི་ཁང་སྒྲོམ་ནད་མཚོན་གྱི། །སྤྲིན་འཐིབས་མུན་ཁང་དགུ་རིམ་ནང་། །ཏྲི་ལས་སྒྲུབ་ལ་བར་གཅོད་བགེགས། །གན་རྐྱལ་ལྕེ་སྟེང་རྡོ་རྗེ་རིས། །མནན་བསམ་ཐུན་རྫས་སྣ་ཚོགས་བརྡལ། །རོ་གཡམ་ངོས་གཅིག་རྒྱ་གྲམ་ལྟེར། །ཧཱུྃ་ནན་ངོས་གཅིག་རི་རབ་དཀྱིལ། །ལཾ་སུཾ་ནན་ཞེས་བྲིས་པས་བཀབ། །གུང་ལ་རྒྱུ་བླངས་སཱཙྪ་བྱ། །ཨོཾ་མཉྫུ་ཤྲཱི་ཡ་མཱནྟ་ཀ་ཧཱུྃ་ཕཊ། གྲོ་ཤོག་ལ་བྲིས་དར་སྐུད་ཀྱིས། །དཀྲིས་པ་སྙིང་པོར་བཅུག་དེ་དང་། །ཧོམ་བཅས་རོ་སོལ་ནག་པོས་བྱུག །སེམས་བསྐྱེད་སྔགས་ཀྱིས་སྟོང་པར་སྦྱངས། །རང་གི་ཐུགས་ལས་འོད་འཕྲོས་པ། །སཱཙྪ་ལ་ཕོག་དུར་ཁྲོད་ཀྱི། །གཞལ་ཡས་བུམ་དབུས་པད་ཉིའི་སྟེང་། །ཧཱུྃ་ཡིག་མཐིང་ནག་ཡོངས་སུ་གྱུར། །གཤིན་རྗེ་གཤེད་པོ་ཆར་སྤྲིན་མདོག །ཕྱག་གཡས་རལ་གྲི་གཡོན་སྡིགས་མཛུབ། ཁྲོ་བོའི་ཆ་བྱད་ཡོངས་སུ་རྫོགས། །ཐུགས་ཀའི་ཧཱུྃ་ལས་འོད་འཕྲོས་པས། །ཡེ་ཤེས་སེམས་དཔའ་སྤྱན་དྲངས་ཐིམ། ཛཿཧཱུྃ་བཾ་ཧོཿ གནས་གསུམ་ཨོཾ་ཨཱཿཧཱུྃ་གིས་མཚན། །རྟེན་འབྲེལ་སྙིང་པོས་མེ་ཏོག་འཐོར། །ཡན་ལག་བདུན་འབུལ་བགེགས་ཐམས་ཅད། །མནན་བསམ་ཧོམ་ཁུང་སྟེང་དུ་བཞག །དེ་ནི་མནན་པའི་སྦྱོར་བ་འོ། །ཉི་ཤར་བཀྲ་ཤིས་ས་བླངས་ཏེ། །སཱཙྪ་དཀར་པོའི་སྙིང་པོ་རུ། །དངོས་གྲུབ་ཕྲེང་བ་ཉི་ཤུ་གཅིག །གཞུག་ལ་སེམས་བསྐྱེད་སྔགས་ཀྱིས་སྦྱང་། །རང་ཉིད་འཇམ་དཔལ་ཐུགས་ཀའི་འོད། །སཙྪ་ལ་ཕོག་གཞལ་ཡས་ཁང་། །བུམ་ནང་པདྨ་ཟླ་བའི་སྟེང་། །འཇམ་དཔལ་དམར་པོ་གཞུང་བཞིན་བསྐྱེད། །ཡེ་ཤེས་པ་གཞུག་སྐུ་གསུང་ཐུགས། །བྱིན་རླབས་རྟེན་འབྲེལ་སྙིང་པོ་ཡིས། །མེ་ཏོག་འཐོར་ལ་ཡན་ལག་བདུན། །འབུལ་ཏེ་སྒྲུབ་ཁང་ཕྱོགས་མཚམས་བཞག །སླར་ཡང་སེམས་བསྐྱེད་སྟོང་པའི་ངང་། །བུམ་ནང་ལྷ་བསྐྱེད་ཡེ་ཤེས་བཅུག །གནས་གསུམ་བྱིན་བརླབ་ཚོགས་གསག་བྱ། །སྔགས་མཐར་རཀྵ་བཏགས་པ་ནི། །བརྒྱ་རྩ་བརྒྱད་བཟླ་རང་ཐུགས་ལས། །འོད་དམར་འཕྲོས་པས་ཕྱོགས་མཚམས་ལྷར། །ཕོག་པས་རྒྱུད་བསྐུལ་དེ་དག་གིས། །སྔགས་བཟླས་འོད་འཕྲོས་སྟེང་འོག་ཀུན། །འཇམ་དཔལ་གུར་ཁང་མི་ཤིགས་པས། །བར་ཆད་མཐའ་དག་སྲུང་བར་མོས། །དེ་ནི་སྲུང་བའི་རིམ་པ་འོ། །བར་ཆད་སྲུང་བའི་ལེའུ་སྟེ་གསུམ་པའོ། ༈ །བཞི་པར་སྒྲུབ་པོ་གནས་དང་དུས། །ཀུན་སློང་མངོན་པར་རྟོགས་པ་ལྔ། །དང་པོ་རིམ་པས་རྒྱུད་སྨིན་ཅིང་། །བློ་ལྡན་དམ་ཚིག་ལ་གནས་པ། །གཉིས་པ་བསྙེན་སྒྲུབ་བརྩམ་པའི་གནས། །ཡིད་འོང་དབེན་ཞིང་ཉམས་དགའ་བ། །སྨན་ལྗོངས་ནགས་ཚལ་འབྲས་བུས་དུད། །དམེ་ཡུག་ཁྱི་དང་འཚེ་དོགས་བྲལ། །གོང་མས་བྱིན་གྱིས་བརླབས་པ་འོ། །གསུམ་པ་བྱང་བགྲོད་དཀར་པོའི་ཕྱོགས། །ཚེས་གཅིག་བརྒྱད་དང་བཅོ་ལྔ་སྟེ། །ཟླ་བ་ལྷག་ཕུར་པ་ཝ་སངས། ཁྲུམས་སྟོད་ཁྲུམས་སྨད་ནམ་གྲུ་འམ། །ལྷག་པར་ཡར་ངོའི་རྒྱལ་ཉིད་ལ། །འཇུག་དང་མཐའ་རྒྱས་ལས་སོགས་ཤིས། །བཞི་པ་མཁའ་མཉམ་ཕ་མ་ཀུན། །རབ་ཏུ་མི་གནས་ཡེ་ཤེས་ལ། །འགོད་འདོད་བཅོས་མིན་བློས་དྲངས་ཏེ། །ལྔ་པར་བསྐྱེད་དང་རྫོགས་པ་གཉིས། །བསྐྱེད་ལ་ཐུན་དང་ཐུན་མཚམས་ཏེ། །ཐུན་ལའང་སྦྱོར་དངོས་རྗེས་གསུམ་ལས། །སྦྱོར་བ་སྐྱབས་སེམས་ཚོགས་གསོག་གསུམ། །ཐོག་མར་སྐྱབས་སུ་འགྲོ་བ་ནི། །དཀོན་མཆོག་ཀུན་འབྱུང་འཇམ་དཔལ་ཡེ་ཤེས་སེམས། །དྲན་པས་སྲིད་པའི་འཇིགས་འཕྲོག་སྐྱབས་ཀྱི་མཆོག །ཞབས་ཀྱི་ཆུ་སྐྱེས་སྙིང་པོར་བགྲོད་ཀྱི་བར། །མི་འབྲལ་འགྲོ་ཀུན་གཙུག་གི་རྒྱན་དུ་བསྟི། །པདྨ་ཡངས་པའི་སྤྱན་གྱིས་དུས་དྲུག་ཏུ། །གཟིགས་ཀྱང་བདག་གིས་མ་འཚལ་མགོན་པོ་ཀྱེ། །ཉམ་ང་བདུད་བཞིའི་ཕྲུ་མས་གཡེངས་པ་རྣམས། །བདུད་དགྲ་བདུད་འདུལ་དཔའ་བོ་ཆེན་པོས་སྐྱོབས། །གཉིས་པ་སེམས་བསྐྱེད་པ་ནི། སྲིད་ན་གཉིས་སུ་མེད་པའི་ཡེ་ཤེས་སྐུ །གཞན་གྱི་དོན་དུ་བདག་གིས་མི་སྐྱོ་བསྒྲུབ། །ཡེ་ཤེས་རྒྱ་མཚོར་མཁའ་ཁྱབ་འགྲོ་ཞུགས་ནས། །བདག་ཉིད་འཇམ་དཔལ་མཚན་གྱི་ཅོད་པན་དཔྱངས། །ལྷག་བསམ་ཟླ་བའི་འཛུམ་གྱིས་ཡིད་ཅན་ཀུན། །མུན་པའི་རྒྱ་བཀྲོལ་ཡེ་ཤེས་དམིགས་བུ་སྦྱིན། །བྱམས་པའི་གོ་བགོ་སྙིང་རྗེའི་ཡ་ལད་ཐོགས། །སྲིད་པའི་འཇིགས་ལས་སྐྱེ་དགུ་བསྲུང་བགྱི་འོ། །གསུམ་པ་ཚོགས་གསག་པ་ནི། བདག་ཉིད་འཇམ་དཔལ་གཞོན་ནུའི་ཐུགས་ཀྱི་མཛོད། །པད་ཟླ་ལ་ཆགས་དྷཱིཿཡིག་འཆར་ཁའི་མདངས། །མར་མེ་དང་མཚུངས་འོད་ཟེར་ལྕགས་ཀྱུ་འབར། །རྡོ་རྗེ་རྣོན་པོ་བཙུན་མོ་སྲས་དང་བཅས། །ནམ་མཁའི་ངོས་སུ་བརྒྱ་བྱིན་ཚོན་རིས་བཞིན། །བསོད་ནམས་ཞིང་གི་མགྲོན་དུ་ཁུག་པར་གྱུར། །ན་མོ་གུ་རུ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་ཡེ། དབྱངས་ཅན་གཞོན་ནུའི་ཟུར་མིག་ལ་ཆགས་པས། །སྙིང་ལ་བདུད་རྩིར་བྱེད་པའི་མཚན་དཔེ་ནི། །ལྷ་བརྒྱའི་གཙུག་གི་ནོར་བུས་རབ་ཕྱིས་པ། །ཡེ་ཤེས་མེ་ལོང་ཁྱོད་ལ་ཕྱག་འཚལ་ལོ། །གང་ཞིག་དྲན་པས་སྒྲིབ་པའི་གོས་དང་བཅས། །ལུས་ཅན་ཀུན་གྱི་སྙིང་ལ་ཉལ་བ་དེ། །བསླངས་ནས་མཁྱེན་རབ་ལང་ཚོ་རྫོགས་མཛད་པ། །སྨྲ་བའི་སེང་གེ་ཁྱོད་ལ་ཕྱག་འཚལ་ལོ། །ཟུང་འཇུག་ནམ་མཁའི་ངོས་སུ་རྣམ་པར་རོལ། །སྣ་ཚོགས་གཟུགས་སུ་འབྲི་བས་འཁོར་འདས་ཀྱི། ཁྱབ་བདག་སྒྱུ་མའི་གར་མཁན་ཉིད་གྱུར་པ། །སྒྱུ་འཕྲུལ་དྲྭ་བ་ཁྱོད་ལ་ཕྱག་འཚལ་ལོ། ཁུར་ཆེན་ཀུན་གྱིས་མི་གདུང་ཀུན་བཟོད་ཆོས། །རྣམ་འགྱུར་མེད་པར་བྱམས་པས་འཛིན་པ་དེ། །ཕྱོགས་བཅུ་དུས་གསུམ་དག་ཏུ་འབྱུང་མིན་པ། །ཨུ་དུམྦ་ར་ཁྱོད་ལ་ཕྱག་འཚལ་ལོ། །བདག་ཉིད་ཞི་བའི་ཁྱིམ་དུ་མ་སོང་བར། །འཁོར་བ་སྡུག་བསྔལ་མཐའ་དག་གཉེན་དུ་སྐྱེས། །ནོར་བུ་ཟླ་བ་དཔག་བསམ་ལྗོན་པའི་ཤིང་། །སེམས་ཅན་དོན་བྱེད་ཁྱོད་ལ་ཕྱག་འཚལ་ལོ། །འཇམ་དཔལ་ཞེས་གྲགས་རྒྱལ་སྲས་དཔའ་བོའི་མཚན། །ཞིང་མང་རྒྱལ་བས་རབ་བསྐུལ་ལྷ་ཡི་རྔ། །ཐོས་པའི་གོམ་སྟབས་ཕྱིར་མི་ལྡོག་པར་འཆེལ། །འགྲོ་བའི་བླ་མ་ཁྱོད་ལ་ཕྱག་འཚལ་ལོ། །དཔལ་ལྡན་རྡོ་རྗེ་འཛིན་པའི་ཡེ་ཤེས་སྐུ །ཡང་དག་བརྗོད་པའི་མཚན་གྱི་དྲྭ་བས་འཁྱུད། །འཇིག་རྟེན་འཇིག་རྟེན་འདས་པའི་སྣང་བྱེད་པ། །ཐམས་ཅད་ཐམས་ཅད་ཁྱོད་ལ་ཕྱག་འཚལ་ལོ། །ལྷག་བསམ་དྲི་མེད་གསེར་གྱི་ས་གཞི་བསྟར། །བྱང་ཆུབ་ཕྱོགས་ཆོས་ལྷུན་པོའི་མཆོད་སྡོང་བརྩེགས། །ཕར་ཕྱིན་གླིང་གི་ཚོམ་བུ་ཚར་དུ་དངར། །ཟུང་འཇུག་ཉི་ཟླའི་སྒྲོན་མེ་སྦར་བས་མཆོད། །ཐོས་པ་རྒྱ་མཚོར་ཉེར་སྤྱོད་རླབས་ཕྲེང་འཕྱུར། །བསམ་བྱུང་འདོད་ཡོན་ཟག་མེད་དབང་པོ་ཚིམས། །སྒོམ་པའི་འོད་གསལ་གསང་བ་དགྱེས་པའི་མཛོད། །འཆད་རྩོད་རྩོམ་པའི་དཔལ་འབྱོར་དར་བས་མཆོད། །རྡུལ་སྙེད་ཞིང་དང་སྐུ་ཡང་ཁྱབ་བདག་གཅིག །དེ་སྙེད་འདུན་དང་སྨོན་ལམ་མཐུས་ཁེབས་པའི། །རིག་པ་མཐོ་རིས་མཛེས་མའི་སྙིམ་པ་ནས། །ཀུན་བཟང་མཆོད་པའི་མེ་ཏོག་ཆར་དུ་བསྙིལ། །རྟག་ཏུ་འདྲིས་ཀྱང་ལྷན་སྐྱེས་དགྲར་གྱུར་པས། །འཁོར་བའི་བཙོན་རར་འཆིང་བྱེད་རྒྱུ་དང་བཅས། །རང་བཞིན་མ་མཐོང་ནོངས་པའི་བཞིན་དུད་དེ། །གདུང་བས་ཐུགས་རྗེ་ཅན་ལ་བཤགས་ཤིང་བསྡམ། །ཡི་རངས་གཅིག་གིས་སྲིད་ཞིའི་ལེགས་སྤྱད་ཀུན། །ཐུན་མོང་བྱེད་འགྱུར་ཉི་དང་རྒྱུ་སྐར་བཞིན། །རྨི་ལམ་གཏེར་ཆེན་ལེན་པ་མེད་པའི་བློས། །རྒྱལ་བའི་མྱུ་གུའི་རྗེས་སུ་རྐང་པ་བཀོད། །ཆོས་རྔ་དབྱངས་ཆེན་རྒྱུན་མི་ཆད་པར་ཡང་། །ཚངས་ཆེན་མགྲིན་པས་བསྣུན་འདྲ་ཞིང་ཀུན་ན། །སྐུལ་དབྱངས་སྙན་གྱི་པདྨོར་དེངས་པའི་མོད། །གསུང་གི་བདུད་རྩི་ཅི་ཡང་སྐྱུགས་པར་མཛོད། །དཔའ་བོས་གྲངས་མེད་འགྲོ་བ་བསྒྲལ་ལགས་གྲང་། །ད་དུང་རྡུལ་སྙེད་ཆུ་བོར་བྱིང་བས་ན། །དེ་སྲིད་སྲིད་པར་གཡོ་མེད་གཟུགས་ཀྱི་སྐུ །རྡོ་རྗེའི་ཏིང་ངེ་འཛིན་ལ་སྙོམས་ཞུགས་གསོལ། །དམིགས་པའི་དུག་བཅས་རང་གཞན་དགེ་བའི་ཀླུང་། །མི་དམིགས་ཤེས་རབ་སྟོབས་ཀྱིས་གཙང་བྱས་པས། །བྱང་ཆུབ་རྒྱ་མཚོར་འགྲོ་ཀུན་གསོ་བའི་བཅུད། །ཡོངས་བསྔོ་འཕགས་པའི་སྤྱོད་ཡུལ་དང་མཚུངས་ཤོག །ཨོཾ་ཨཱཿཧཱུྃ་མུཿ ཚོགས་ཞིང་མི་དམིགས་པར་བཞག །བདེ་བས་ཀུན་ཁྱབ་དེ་རྒྱུ་དགེ་ལ་སྤྱོད། །སྡུག་བསྔལ་འཆིངས་གྲོལ་དེ་རྒྱུ་སྡིག་ལས་ལྡོག །ལུས་སེམས་བདེས་གང་ཉེ་རིང་མེད་པའི་སེམས། །ནམ་མཁའ་ལྟ་བུས་འགྲོ་ཀུན་འཚོ་གྱུར་ཅིག །ཚོགས་གསག་ཡིག་རྙིང་ལས་མ་བཤད་པས་སྐྱབས་སེམས་ནས་མངོན་རྟོགས་ལ་འཇུག་པས་ཆོག་ལ། སྤྲོ་ན་དཀྱུས་ལྟར་སྦྱར་ཡང་འགལ་བ་མེད་དོ། །གཉིས་པ་དངོས་གཞི་ལྷ་བསྒོམ་ཞིང་། །སྔགས་བཟླས་གཉིས་ལས་དང་པོ་ནི། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ། མཚན་རྟོག་མཁའ་ལྟར་དག་པའི་འོད་གསལ་མདངས། །བྷྲཱུྃ་གྱི་རང་སྒྲས་བྱང་སེམས་ཡོངས་སྦྱོང་གི །རྣམ་འཕྲུལ་མཐུས་བཀོད་དག་པའི་ཞིང་གི་དབུས། །སིཾ་ལས་ཤ་ཚུགས་རབ་བརླིངས་ཁ་ལྔ་པ། །ཨིནྡྲ་རྙིལ་གྱི་ཁུ་བས་བྱུགས་འདྲ་ཟུང་། །གྱེན་མིག་མཚམས་སྤྲིན་རལ་པས་བཏེགས་པའི་སྟེང་། །པཾ་ལས་འདབ་མ་སྟོང་ལྡན་ཆུ་སྐྱེས་སྟན། །ཨ་ལས་ཉ་རྒྱས་ག་པུར་འཛིན་པས་བཀབ། །དེ་དབུས་ལི་ཁྲིའི་མདངས་ལྡན་དྷཱིཿཡིག་གི །སྣང་བ་རྣོན་པོས་འཕགས་ཚོགས་དགྱེས་པ་བསྐུལ། །ཀུན་རྨོངས་མུན་ཁང་བརྟོལ་ནས་ཡོངས་གྱུར་པ། །བདག་ཉིད་སྨྲ་བའི་སེང་གེ་རྒྱལ་ཀུན་ཡབ། །གུར་གུམ་ཉིང་ཁུས་ཛཱམྦུ་ན་དའི་རིར། །བྱེད་པོས་ལན་སྟོང་བྱུགས་འདྲ་ཡེ་ཤེས་ཀྱི། །ཉི་འོད་བྱེ་བ་ཕྲག་བརྒྱའི་དྲྭ་བས་གཡོགས། །གཞོན་ནུའི་ལང་ཚོ་འཛུམ་པའི་ཞལ་གྱིས་སྒེག །ནོར་བུའི་ཅོད་པན་རབ་འབར་ཐོར་ཚུགས་ནི། །དབང་སྔོན་ཟུར་ཕུད་བཞི་ལས་འཕགས་པ་བཞིན། །སྙན་གོང་དྲི་ཞིམ་ཨུཏྤལ་སྔོན་པོའི་ཁ། །སྙན་ཤལ་ནོར་བུའི་འོད་ཀྱིས་ཕྱེ་བ་བཞིན། །སྡུག་བསྔལ་རྩད་གཅོད་ཤེས་རབ་མཚོན་ཆེན་པོ། །རལ་གྲིའི་ཟོལ་གྱིས་ཕྱག་གཡས་སྣ་ཞགས་བརྒྱན། །དོན་ཆེན་ཡི་གེ་མཆོག་སྟེ་རྡོ་རྗེ་ཆོས། །གཡོན་པའི་འཁྲི་ཤིང་ཨུཏྤལ་ཟེའུ་འབྲུར་ཆགས། །འཇམ་ཞིང་ཡང་བ་དབང་པོའི་གཞུ་ཡི་གོས། །ལྷ་ཡི་ཉེར་སྤྱད་རྩེ་དགས་འཁྱུད་པ་འདྲ། །གསར་དུ་ཁ་བྱེ་བུང་བ་འབོད་པའི་ཕྲེང་། །མེ་ཏོག་ནོར་བུའི་ཆུན་པོ་སྤེལ་མ་ངོམས། །ཡིད་ལ་འདོད་པ་ཅི་ཡང་འཇོ་བ་ཡི། །དོ་ཤལ་རིན་ཆེན་མཆོག་ལ་གཟུགས་བརྙན་འཛིན། །མཐོང་ན་མི་མཐུན་མེད་པའི་གཟུགས་ཀྱི་སྐུ །མཚན་གྱི་མེ་ཏོག་དཔེ་བྱད་འབྲས་བུས་གཏམས། །ཞབས་ཟུང་རྡོ་རྗེའི་མདུད་པ་གཅིག་ཏུ་བསྣོལ། །མིག་ལ་ཟླ་བ་ཡིད་ལ་བདུད་རྩིའི་རྒྱུན། །བློ་ལྡན་མོས་པའི་བཞིན་གྱི་སྣོད་གྱུར་པ། །ཀུན་དབྱིབས་ཀུན་གྱི་རང་བཞིན་རྣམ་པར་སྣང་། །ཐུགས་ཀར་བྷྲཱུྃ་ལས་རྣོ་ལྡན་རྩིབས་བཞིའི་ཕྲེང་། །པདྨ་རཱ་གའི་ཙཀྲ་ལས་སྐྱེས་ལྟེར། །རབ་འབར་རལ་གྲི་སོར་བཞིའི་རྩེ་མོར་ཧྲཱིཿ སྦལ་ལ་མུཾ་དང་འཆང་གཟུང་དྷཱིཿཡིག་འབར། །མཐའ་སྐོར་དངོས་གྲུབ་ཕྲེང་བའི་མུ་ཁྱུད་བཅས། །དམར་སེར་མར་མེའི་ཕྲེང་ལྟར་འོད་གསལ་བས། །སྙིང་གི་མུན་པ་མ་ལུས་དག་པར་བྱེད། །འདིར་ཀུན་མཁྱེན་ཆེན་པོའི་གསུང་རབ་ཏུ། ཞབས་སེམས་སྐྱིལ་ལམ་སྐྱིལ་ཀྲུང་གང་བདེ། ཟླ་བའི་རྒྱབ་ཡོལ། གདན་པད་ཟླ་ཉི་མ་སུམ་བརྩེགས། ཕྱག་གཉིས་ཐུགས་ཀར་ཆོས་འཆད་ཀྱིས་ཨུཏྤལ་འཛིན་པའི་གཡས་གཡོན་སྟེང་དུ་རལ་པོད་འཛིན་པ། ཐུགས་ཀར་པད་ཟླ་ལ་འཁོར་ལོ་སོགས་འབྱུང་ཡང་དམ་པའི་ཡིག་རྙིང་དང་མཐུན་པར་བྲིས་ཤིང་། གཞན་ཡང་། འདིར་བླ་མ་ཁ་ཅིག །རལ་གྲིའི་འཆང་གཟུང་གི་དྷཱིཿདང་རྩེ་མོའི་ཧྲཱིཿའི་བར་གྱི་སྦལ་ལ་རྩ་སྔགས། རྩིབས་ཀྱི་རྩེ་མོར་ཧྲཱིཿ རྩ་བར་དྷཱིཿ བར་དུ་རྩ་སྔགས་འགོད་པའང་བཞེད་ལ། ཁ་ཅིག་རལ་གྲི་ལ་ས་བོན་གཉིས་བཀོད་ནས། རྩིབས་ལ་དྷཱིཿརེ་རེ་སྒོམ་པ་ཡང་ཕྱག་བཞེས་སུ་མཛད་དོ། །གང་ལྟར་སྒོམ་ཡང་དམིགས་པ་གསལ་བ་རབ་ཏུ་གཅེས་སོ། །ཞེས་འབྱུང་ཞིང་ལུགས་འདིར་སྔགས་ཕྲེང་འཁོར་ལོའི་རྩིབས་ལ་འགོད་པར་བཞེད་དོ། །མདུན་དུ་མཚོ་སྐྱེས་བསིལ་བྱེད་དཀྱིལ་འཁོར་དབུས། །མཐིང་ཞུན་མདངས་ཅན་ཧྲཱིཿཡིག་འོད་ཟེར་འཕྲོ། །དོན་བྱས་ཡོངས་གྱུར་ཚངས་སྲས་རྒྱལ་བའི་ཡུམ། །དྲི་མེད་ཤིན་ཏུ་དྭངས་པའི་བཻ་ཌཱུརྻ། །གནམ་སྔོན་བཞུས་པའི་ཞུན་མ་ལས་ཕྱུང་བཞིན། །ལྟ་བས་མི་ངོམས་ལང་ཚོའི་མེ་ཏོག་ནི། །བརྗིད་ཅིང་འགྱིང་ཡང་མཉེན་ལྕུག་ཆུ་བ་ལྡེམ། །འཛུམ་མཛེས་སྟོན་ཀའི་ཟླ་འོད་འཐུང་འདོད་པས། །ནགས་ཀྱི་ཙ་ཀོ་ར་ཡི་འདྲེན་བྱེད་འཕྲུལ། །སྒྲ་དབྱངས་རྒྱ་མཚོ་བུང་བའི་གླུས་འཁྱུད་པ། །པདྨོའི་མཆུ་སྒྲོས་གེ་སར་ཚེམས་ཕྲེང་གསལ། །རྒྱལ་ཀུན་སྤྱན་རས་ལྷུང་བའི་ཞལ་གྱི་ཁྱིམ། །རྨོངས་ལ་ཁྲོ་ཞིང་མཁས་ལ་འཛུམ་པ་བཞིན། །ཡིད་འོང་ཟུར་ཕུད་ནོར་བུའི་རྒྱལ་པོ་དང་། །ལན་བུའི་སྙེ་མ་གསེར་གྱི་པདྨོས་ལྕི། །ཕྱག་གི་ལྕུག་ཕྲན་ལས་སྐྱེས་རལ་གྲི་དང་། །གླེགས་བམ་ཀུན་དཀྲིས་གཅོད་ཅིང་སྨྲ་བ་འབྱེད། །སྐེད་སྐབས་ཕྲ་ཡང་ནུ་མའི་མྱོས་བུམ་མཐོ། །རེག་བྱ་བསིལ་ཡང་ཤེས་རབ་མེ་ལྕེ་འབར། །མི་ཟད་བདེ་སྐྱེད་གཞོན་ནུའི་འབྱོར་པའི་དཔྱིད། །རིན་ཆེན་ཨུཏྤལ་འདྲེས་པའི་ཁུར་གྱིས་བསྒྲིབས། །ལྷ་ཡི་གོས་བགོས་ནོར་བུའི་འོག་པག་དང་། །རྐང་གདུབ་དྲིལ་ཆུང་ངང་པའི་མགྲིན་རྔ་འཐབས། །ཟག་མེད་བདེ་བས་མྱོས་སམ་གོམ་ཚུགས་གཉིས། །ཕན་ཚུན་འགྲན་པ་བཞིན་དུ་ཅུང་ཟད་འཁྱོགས། །སྣང་བའི་གཟི་བརྗིད་ཅིས་ཀྱང་མི་འབྱེད་པའི། །དབང་སྔོན་འོད་ཀྱི་ཁྱིམ་ན་མཛེས་པར་རོལ། །ཐུགས་ཀར་ཟླ་བས་བརྒྱན་པའི་ཆུ་སྐྱེས་ནི། །འདབ་བཞིའི་མཛོད་ཁྱིམ་རལ་གྲིའི་ཟེའུ་འབྲུ་མཛེས། །རྩེ་སྦལ་འཆང་གཟུང་དྷཱི་མུཾ་ཧྲཱིཿཡིས་མཚན། །སྔགས་ཕྲེང་གཡོན་སྐོར་སྣང་བས་སྒྲིབ་ཀུན་སྲེག །འདིར་ཡང་ཕྱག་རྒྱ་བཞུགས་ཚུལ་ཡབ་དང་མཐུན་པར་གསུངས་ཤིང་། ཁ་ཅིག་ཙོག་པུའི་སྟབས་སུ་བཤད་པ་ནི་དཀར་མོའི་འགྲེས་སུ་དོགས། ཐུགས་ཀའི་འཁོར་ལོ་ཡབ་ལས་སོར་བཅུ་ཆས་དམའ་བ་ཁ་སྦྱར་གྱི་ཚོད་དུ་ཡོང་བ་དང་སྔགས་ཕྲེང་ཡབ་ཀྱིས་འགྲེ་བར་བཞེད། ཐབས་ཤེས་སྲོག་གི་ས་བོན་ལས་བྱུང་བའི། །གློག་འོད་ལྕགས་ཀྱུའི་ཕོ་ཉས་རང་བཞིན་གནས། །ཤར་ཕྱོགས་རྩེ་ལྔའི་རི་ནས་རྒྱལ་བ་དང་། །རྒྱལ་བའི་མྱུ་གུའི་སྤྲིན་རུམ་ཡེ་ཤེས་པ། །རྒྱུ་སྐར་དབུས་སོན་ཉི་ཟླའི་ཤིང་རྟ་དག །མོས་པའི་མཁའ་ངོས་ལྷམ་མེར་དྲངས་པར་གྱུར། །ཐུགས་ཀའི་མཛོད་ལས་གྲོལ་བའི་རྣམ་སད་ཀྱི། །ན་ཆུང་ལག་མཐིལ་མཆོད་སྤྲིན་སྤྲོ་བས་མཆོད། །ཨོཾ་བཛྲ་ཨརྒྷཾ་སྭཱ་ཧཱ། པཱ་དྱཾ། ཨོཾ་བཛྲ་པུཥྤེ་ཨཱཿཧཱུྃ། ནས། ཤབྡ་ཨཱཿཧཱུྃ་བར། ཛཿཧཱུྃ་བཾ་ཧོཿ བློས་བརྟགས་རང་བཞིན་གྲུབ་པའི་ཕྱག་རྒྱའི་རྒྱ། །ཆུ་དང་ཆུ་བཞིན་གཉིས་སུ་མེད་པར་བསྡམ། །ཏིལ་གོང་སྨིན་པ་ཡོངས་སུ་བརྟོལ་འདྲ་བའི། །སངས་རྒྱས་སྲས་བཅས་དབུས་ན་མཛེས་པར་གྱུར། །ཅེས་མོས་ལ་ལུས་དྲང་པོར་བསྲང་། མིག་སྣ་རྩེར་གཏོད་ཅིང་མ་འགུལ་བས་སྟེང་འོག་གི་རླུང་དལ་བུས་ནང་དུ་ཐུབ་ཐང་དུ་གཟུང་། ཕྱིར་འཕངས། བར་དུ་གནས་པར་བྱས། ཐུགས་ཀའི་འཁོར་ལོ་ལས་འོད་བྱུང་། སྒོ་གསུམ་གྱི་ནད་གདོན་སྡིག་སྒྲིབ་མི་ཤེས་པའི་མུན་པ་ཐམས་ཅད་བསལ། ཡེ་ཤེས་ཀྱི་སྣང་བ་རྒྱས་པ་ལ་ཡིད་རྩེ་གཅིག་ཏུ་གཏད་དེ་ཡིག་འབྲུ་དང་རལ་གྲི་འབར་བའི་སྣང་བ་ལ་མཉམ་པར་གཞག་པ་ནི་མན་ངག་དམ་པ་འོ། །གཉིས་པ་བཟླས་དང་སྤྲོ་བསྡུ་ཡི། །རྣལ་འབྱོར་ལ་ནི་སེམས་འཛིན་པ། །བསྒོམས་པས་སྐྱོ་ན་བྱ་བ་སྟེ། །འཇམ་དཔལ་ཐུགས་ཀའི་སྔགས་ཀྱི་དཀྱིལ་འཁོར་འོད། །སྔགས་ཀྱི་རང་བཞིན་སྣ་བུག་གཡས་ནས་ཐོན། །ཡུམ་གྱི་གཡོན་ཞུགས་ཐུགས་ཀའི་ཧྲཱིཿལ་ཐིམ། །དེ་ལས་སྔགས་ཕྲེང་གྲོལ་བ་དྲི་འཛིན་གྱི། །བུ་ག་གཡས་ནས་ཡབ་ཀྱི་གཡོན་དུ་ཞུགས། །འཆར་ཁའི་མདངས་ཅན་ལྕགས་ཐག་བསྒྲིལ་འདྲ་བ། །ཐུགས་སྲོག་པདྨའི་མཛོད་དུ་ཞུགས་པ་ལས། །ཕྱོགས་བཅུའི་འཇིག་རྟེན་འོད་ཟེར་ཕྲེང་བས་བརྒྱན། །ཤེས་རབ་བུང་བའི་འཕུར་ལྡིང་ཁྱབ་པ་ལས། །བླ་མ་སངས་རྒྱས་སྲས་བཅས་བྱིན་རླབས་དང་། །ཉན་རང་ཤེས་རབ་སྐྱེ་འཕགས་ནུས་པའི་མཐུ། །སྤྱི་བོར་བསྡུས་པས་ཡེ་ཤེས་ལུས་སུ་གྱུར། །སླར་ཡང་བཀའ་དང་བསྟན་བཅོས་ལུང་རྟོགས་བཅུད། །མཁས་པའི་ཤེས་རབ་གྲུབ་པའི་ཉམས་རྟོགས་དང་། །དགེ་བའི་བཤེས་གཉེན་འབྲུ་སྨན་ནུས་བཅུད་སོགས། །ལྗགས་ལ་བསྡུས་པས་རང་ངག་ནུས་ལྡན་བྱས། །ཡང་འཕྲོས་རྩི་ཤིང་ནགས་ཚལ་འབྱུང་བའི་བཅུད། །ནོར་བུ་ཉི་ཟླའི་དཀྱིལ་འཁོར་གཟའ་སྐར་འོད། །ལྷ་ཀླུའི་བཅུད་ནུས་རྒྱལ་བློན་ཡིད་དབང་སོགས། །ཤེས་རབ་བུང་བས་ཐུགས་ཀའི་དཔལ་བེ་འུར་ཁྱེར། །བ་སྤུའི་མཐར་ཐུག་བདེ་སྟོང་སྦྲང་རྩིས་གཏམས། །ཆགས་ཐོགས་བྲལ་བའི་མཁྱེན་རབ་ལང་ཚོས་སྒེག །གཞན་ཡང་དམར་གསལ་འོད་ཀྱིས་སྣོད་བཅུད་སྦྱངས། །གཞལ་ཡས་ཁང་དང་ལྷ་ཡི་སྣང་བར་བསྒྱུར། །སྒྲ་སྐད་གཞོམ་མེད་སྔགས་ཀྱི་རྒྱལ་པོ་རུ། །ངེས་པའི་ཤེས་པས་སྐྱོན་བྲལ་བཟླས་པ་བྱ། །གསུམ་པ་ཐུན་ལས་ལྡང་འདོད་མཇུག་གི་ཆོས། །ཐུགས་ཀའི་འོད་ཀྱིས་སྣོད་བཅུད་ལྷ་སྣང་ཀུན། །རང་ལ་ཐིམ་ཞིང་གདན་ཡང་བདག་ལ་བསྡུ། །ལེགས་སྤྱད་ཆུ་ཐིགས་དུས་གསུམ་གང་བསགས་པ། །ཡེ་ཤེས་རྒྱ་མཚོར་རྣམ་དབྱེར་མེད་གྱུར་ཏེ། །ནམ་མཁའ་མ་ཟད་བར་དུ་གཞན་ཕན་གྱི། །འབྲས་བུ་ནམ་མཁའ་མཛོད་ཀྱི་ཆར་འབབ་ཤོག །ཡེ་ཤེས་རྡོ་རྗེས་སྒྲིབ་པའི་བུམ་པ་བཅོམ། །སྙིང་གི་མུན་པ་སངས་ནས་འཇམ་པའི་དབྱངས། །ཆོས་དང་གཟུགས་སྐུ་སེམས་དང་མིག་ལམ་དུ། །འབྲལ་མེད་གསུང་གི་བདུད་རྩིས་འཚོ་བར་ཤོག །ཁྱོད་ཚུལ་དཔྱོད་པའི་ཆགས་བྲལ་བློ་ཆེན་ཡང་། །བ་སྤུའི་འཁྲི་ཤིང་དུས་མིན་གཡོ་དེ་དང་། །བཟང་པོར་མཚུངས་སྤྱོད་ཆུ་རྒྱུན་མི་ལྡོག་པས། །འགྲོ་ཀུན་རྣམ་ཐར་རྒྱ་མཚོ་གང་གྱུར་ཅིག །ཅེས་སོགས་ཚིག་གིས་མཚམས་སྦྱོར་ཞིང་། །རྣམ་པར་མི་རྟོག་པ་ཡི་རྒྱས། །འཁོར་གསུམ་ཡོངས་སུ་དག་པར་བཏབ། །གཉིས་པ་ཐུན་མཚམས་བྱ་བ་ནི། །འཆད་འགྱུར་གཏོར་མས་ཚིམ་པར་བྱ། ཁྱད་པར་དཀོན་མཆོག་འཁོར་ལྡན་པའི། །འཇམ་པའི་རྡོ་རྗེ་མཚོ་བྱུང་མ། །མཎྜལ་ཁང་པར་སྤྱན་དྲངས་ཏེ། །བདོག་པ་ཀུན་ལས་ཁྱད་པར་དུ། །དད་དང་སྙིང་རྗེ་ཆེན་པོ་དང་། །བསྟོད་དབྱངས་སྙན་པའི་གླིང་བུས་མཆོད། །འདོད་དོན་གསོལ་བ་དྲག་ཏུ་གདབ། ༧ །གཉིས་པ་རྫོགས་པའི་རིམ་ལ་ཡང་། །མཚན་བཅས་མཚན་མ་མེད་པ་གཉིས། །དང་པོ་ལྟེ་དབུས་ཟླ་བ་ལ། །ཐིག་ལེ་དམར་པོ་འོད་འབར་བས། །སྤྱི་བོར་ཧཾ་གི་ཡི་གེ་བསྐུལ། །བདུད་རྩིའི་བ་ཐག་མེ་ལ་ཕོག །འཆི་ཁའི་མར་མེར་སྣུམ་ཟག་བཞིན། །རབ་གསལ་སྒོ་གསུམ་མུན་པ་བཅོམ། །ལུས་ནང་ཡེ་ཤེས་བདུད་རྩིས་ཁེངས། །དེ་ནས་སྙིང་གི་ཁོང་གསེང་དུ། །འཁོར་ལོ་འོད་ཞུ་འབར་བ་ཡི། །མར་མེས་སྙིང་གི་ཕྱོགས་མཚམས་བརྒྱད། །རྩེ་མོ་དགུ་རུ་བུག་པ་རེ། །བརྟོལ་ལས་འོད་སོང་ཧཾ་ཡིག་བཞུས། །བདུད་རྩིས་སྙིང་གི་བུམ་པ་གང་། །དཔྱིད་དཔལ་རབ་རྒྱས་མཁྱེན་གཉིས་ཀྱི། །ཤེས་རབ་དྲི་མེད་འབར་བར་བསམ། །བདེ་གསལ་མི་རྟོག་ངང་ལ་བཞག །གཉིས་པ་བདག་སྲོག་འོད་ཟེར་གྱིས། །ཕྱི་སྣོད་ནང་བཅུད་འཁོར་ལྷ་མོ། །རིམ་པར་ཞུ་ཐིམ་བདག་ཉིད་ཀྱི། །ཐུགས་ལ་ཞུགས་ཏེ་བདག་ཀྱང་ཞུ། །དྷཱིཿལ་ཐིམ་པས་ཐིག་ལེ་ནི། །དམར་སེར་འོད་འཕྲོར་མཉམ་པར་གཞག །དེ་ལས་ཐིག་ལེ་སྔོན་པོར་མཆེད། །གཉིས་ལ་སེམས་གཏད་སླར་ཡང་སྔགས། །བརྗོད་པས་ཅུང་ཟད་འགུལ་བར་བསམ། །དེ་ནས་དེ་གཉིས་ཡས་མར་དང་། །ཕན་ཚུན་འབར་ཏེ་སེམས་ཅན་གྱི། །གར་ཁྱབ་ཐལ་བྱུང་བརྟོལ་བསམ་ཞིང་། །རྩ་སྔགས་བརྗོད་མཐར་གཅིག་ཏུ་འདྲེས། །འོད་ཞུ་ནམ་མཁའི་ཀློང་དུ་ཐིམ། །སྣང་བ་དམར་ལམ་གྱུར་པར་བསམ། །མི་རྟོག་ངང་ལ་ཅི་གནས་བཞག །ལྡང་ཚེ་སྔགས་སྒྲས་འཇམ་དཔལ་གྱི། །ང་རྒྱལ་ལྡན་པས་སྤྱོད་ལམ་བྱ། །བསྡུ་ན་ཡབ་ཡུམ་གང་རུང་གི །སྲོག་ལ་སེམས་སྦ་སྔགས་ཀྱང་བརྗོད། །བརྗོད་མེད་ངང་ལ་ཕྱམ་གྱིས་བཞག །ཐུན་བཞིའི་སྔ་གུང་ཕྱི་གསུམ་མཐར། །མཚན་བཅས་བསྒོམས་ལ་སྲོད་ཐུན་མཐར། །ཡུན་རིང་མཚན་མེད་རྫོགས་རིམ་བསྒོམ། །བསྙེན་པའི་ལེའུ་སྟེ་བཞི་པ་འོ། ༈ །ལྔ་པ་དངོས་གྲུབ་སྒྲུབ་པའི་ཐབས། །སྦྱོར་བ་དངོས་གཞི་རྗེས་ཀྱིས་བསྡུས། །དང་པོ་སྒྲུབ་རྫས་རིལ་བུ་ནི། །སྤང་རྒྱན་གླ་རྩི་མཚལ་དཀར་དང་། །ཡུང་བ་སྤང་སྤོས་ཤུ་དག་དཀར། །ཤིང་མངར་རྒྱ་སྐྱེགས་ཨ་རུ་རྣམས། །རེ་རེ་བཞིན་དུ་ཞོ་ཕྱེད་ཕྱེད། །ཙནྡན་ཨར་ནག་ཞོ་རེ་སྟེ། །དབང་ལག་ཞོ་གསུམ་ཐམས་ཅད་ཀྱང་། །མ་འཁྲུལ་གཙང་ལ་དུས་བཏུས་བཏགས། །བ་དམར་འོ་མ་འཇམ་པའི་མགོན། །ར་དཀར་འོ་མ་དབྱངས་ཅན་མ། །ཞུ་བའི་བདུད་རྩིས་སྦྲུས་པ་ཡི། །རིལ་བུ་ཉིས་བརྒྱ་བཅུ་དྲུག་ནི། །ཞི་ལ་ཟླུམ་པོ་རྒྱས་གྲུ་བཞི། །དཀར་སེར་ལས་མཐུན་དབྱིབས་མདོག་བསྒྱུར། །འོན་ཀྱང་བློ་འཕེལ་རྒྱས་པའི་ལས། །གཙོ་ཕྱིར་དེ་མཐུན་ལག་ཏུ་བསྟར། །ངོས་གཉིས་གི་ཝཾ་གུར་གུམ་དང་། །རྒྱ་སྐྱེགས་ཁུ་བས་དྷཱིཿཧྲཱིཿབྲི། །རིལ་བུ་མང་དུ་བསྒྲུབས་ན་ཚད། །གོང་གི་རིགས་པས་གོང་དུ་དཔག །དར་དམར་ངོས་སུ་གསེར་སྦྱངས་ཀྱིས། །གདན་གྱི་འཁོར་ལོ་རྩིབས་བཞི་ལ། །རྒྱལ་ཆེན་བསྐྱེད་ན་གཡས་སྐོར་དྷྲྀ། །བི་བི་བཻ་བཀོད་སྒྲོལ་དཀར་སོགས། །འཁོར་དུ་བྱེད་ཚེ་ཏཱཾཿཧྲཱིཿདྷཱིཿ བྷེ་བཀོད་དེ་རྒྱབ་མུ་ཁྱུད་གསུམ། །དབྱངས་གསལ་རྟེན་སྙིང་གཡས་སུ་འཁྱིལ། །དེ་རྒྱབ་རྡོ་རྗེ་མེ་ཕྲེང་ངོ་། །བསྡུ་ན་མུ་ཁྱུད་སྤངས་པ་ཡི། །རྩིབས་བཞི་ས་བོན་ཁོ་ན་འབྲི། །སྟེགས་བུ་ཁྲུ་གང་གྲུ་བཞི་གཙང་། །འདབ་བརྒྱད་གསེར་མདོག་ལྟེ་བ་དམར། །གོང་རས་ལྗང་གུ་མུ་ཁྱུད་དཀར། །ལེགས་པར་བྲིས་དབུས་ལྷུང་བཟེད་ནང་། །གདན་འཁོར་ཤར་དུ་ཕྱོགས་པའི་ལྟེར། །ཙནྡན་ཤུག་པའི་སྙིང་པོ་ལས། །རལ་གྲི་སོར་བཞི་སྔགས་འཁོར་ནི། །གསང་མཚན་སྤེལ་ཚིག་ལྡན་པ་བསྒྲེང་། །མ་འཛོམ་གདན་ལྟེར་འབྲི་བའང་རུང་། །དེ་མཐར་དངོས་གྲུབ་རིལ་བུའི་མགོ །ཕྱིར་བསྟན་ཤར་ནས་ཕྱོགས་བཞི་དང་། །མཚམས་སུ་རྩ་སྔགས་བཟླ་བཞིན་བརྩེགས། །དར་དམར་ལོགས་སུ་རྒྱ་སྐྱེགས་མཚལ། །གུར་གུམ་གི་ཝཾ་སྣག་ཚ་ཡིས། །སྟེང་འཁོར་རྩིབས་བརྒྱད་མུ་ཁྱུད་གསུམ། །ལྟེ་བར་རལ་གྲིའི་འཆང་གཟུང་ལ། །དྷཱིཿདང་རྩེ་མོར་ཧྲཱིཿཡིས་མཚན། །རྩིབས་བརྒྱད་རྩ་སྔགས་ཆ་བགོས་ལ། །རྩིབས་རྩེར་དྷཱིཿཡིག་མུ་ཁྱུད་གསུམ། །དབྱངས་གསལ་རྟེན་འབྲེལ་སྙིང་པོའི་མཐར། །ཤེས་རབ་འཕེལ་བར་གྱུར་ཅིག་སོགས། །གང་འདོད་སྤེལ་ཚིག་སྦྱར་བས་བཀང་། །འོག་འཁོར་འདབ་བརྒྱད་ལྟེར་རལ་གྲི །འཆང་གཟུང་ཧྲཱིཿལ་རྩེ་མོར་དྷཱིཿ འདབ་བརྒྱད་དངོས་གྲུབ་ཕྲེང་བ་བགོ །འདབ་རྩེར་ཧྲཱིཿའོ་གཞན་གོང་མཚུངས། །སྟེང་མ་གཡས་སྐོར་འོག་གཡོན་དུ། །བསྐོར་བའི་དབུ་ནི་གཅིག་གྱུར་བྱ། །ཕོ་མོ་ཁ་སྦྱར་རིལ་བུ་དགབ། །དར་དམར་གུར་ཕུབ་རྒྱབ་ཀྱི་ཆར། །རྟེན་དང་མདུན་དུ་མཆོད་གཏོར་བཤམ། །སྦྱོང་བ་གསུམ་དང་བསྒྲུབས་པའི་ཆུས། ཁྲུས་གསོལ་དྲི་མ་དག་པར་བྱ། །སྟེང་འོག་འཁོར་ལོར་བཞེད་མང་ཡང་། །དྲི་མེད་འོད་ཟེར་ཕྲིན་ལས་པའི། །བཞེད་སྲོལ་དྲི་མེད་གུང་སྤྲོས་སོ། །གཉིས་པ་སྒྲུབ་པའི་དངོས་གཞི་ཡི། །ཐོག་མར་མཆོད་པ་བྱིན་གྱིས་བརླབ། །བདུད་རྩི་ཐབས་སྦྱོར་རིག་པས་བསང་། །ཆོས་ཉིད་རྣམ་དག་སྔགས་ཀྱིས་སྦྱང་། །སྟོང་པའི་ངང་ལས་དྲི་མེད་རིན་ཆེན་སྣོད། །ཡངས་ཤིང་རྒྱ་ཆེ་རྣམས་སུ་ཨོཾ་ཡིག་ཞུ། །མཆོད་ཡོན་ཞབས་བསིལ་མེ་ཏོག་བདུག་པའི་སྤོས། །སྣང་གསལ་དྲི་ཆབ་བཤོས་གཙང་རོལ་མོ་སོགས། །དྭངས་ཤིང་ཐོགས་མེད་དགྱེས་སྐྱེད་མཆོད་པའི་སྤྲིན། །ཀུན་བཟང་རྣམ་འཕྲུལ་མཁའ་དབྱིངས་ཀུན་ཁྱབ་གྱུར། །ཨོཾ་བཛྲ་ཨརྒྷཾ་ཨཱཿཧཱུྃ། ཞེས་པས་རིགས་བསྒྲེ་ཤབྡའི་བར། །སྔགས་རྒྱས་བྱིན་བརླབས་སྐྱབས་སེམས་ནས། །བརྩམ་སྟེ་བདག་ཉིད་བསྐྱེད་པའི་མཐར།་་་སྙིང་གི་མུན་པ་མ་ལུས་དག་པར་བྱེད།བར། ཐུགས་ཀའི་རལ་གྲིའི་འོད་ཀྱིས་མདུན་རྟེན་སྦྱངས། །རིལ་བུ་འོད་ཞུ་ཆུ་སྐྱེས་ཟླ་གདན་ལ། །མཐིང་ཤུན་མདངས་ཅན་ཧྲཱིཿསོགས་སྦྲེལ། །མདུན་བསྐྱེད་གཙོ་མོ་གསལ་ཐེབས་ནས།་་་སྔགས་ཕྲེང་གཡོན་སྐོར་སྣང་བས་སྒྲིབ་ཀུན་སྲེག།བར། དཔྱོད་ལྡན་ཞལ་གྱི་ལུང་བཟང་པོ། །འཁོར་དུ་རྒྱལ་ཆེན་བསྐྱེད་འདོད་ན། །དེ་ཡི་ཕྱོགས་བཞིར་དྷྲྀ་སོགས་་་བི་བི་བཻ།ས་བོན་ལས། །ཤར་དུ་ཡུལ་སྲུང་དུང་མདོག་རྒྱུད་མངས་སྦྲེངས། །གཡས་སུ་འཕགས་སྐྱེས་གྲི་ཐོགས་ནཱི་ལའི་མདངས། །ནུབ་ཏུ་སྤྱན་མི་བཟང་དམར་སྦྲུལ་ཞགས་བསྡོགས། །གཡོན་དུ་གནས་སྲུང་གསེར་མདོག་རྒྱལ་མཚན་བསྣམས། །ཀུན་ཀྱང་ཞི་ཞིང་བརྗིད་ལ་དཔའ་བའི་ཉམས། །ལྷ་ཡི་གོ་དང་ཡ་ལད་འཛིན་པ་འོ། །ཞེས་སམ་འཁོར་ལྷ་གཞན་འདོད་ན། །རྩིབས་བཞིའི་གདན་སྟེང་ཤར་དུ་ཚེ་སྦྱིན་མ། །ཟླ་བའི་མདངས་ཅན་སྐྱབས་སྦྱིན་ཨུཏྤལ་འཆང་། །ལྷོ་རུ་སྙིང་རྗེའི་དབང་ཕྱུག་ཆུ་ཤེལ་མདོག །བདུད་རྩིའི་བུམ་པ་ཆུ་སྐྱེས་སྡོང་བུ་འཁྲིལ། །ནུབ་ཏུ་སིནྡྷུ་བ་རའི་ལུས་འཆང་བའི། །ཚངས་པའི་སྲས་མོ་འཁོར་ལོ་པདྨས་སྒེག །བྱང་དུ་ལྷ་ཡི་བླ་མ་ཛྭ་ལའི་མདངས། །ཕྱག་གཉིས་རིན་ཆེན་ལྗོན་པའི་འབྲས་བུས་ལྕི། །བཞི་ཀ་ལྷ་ཡི་གོས་དང་རཏྣས་བརྒྱན། །ཕྱེད་སྐྱིལ་སྟངས་སྟབས་འགྱིང་བག་ཆགས་པར་བཞུགས། །འགྲོ་ལ་མ་ལྟར་བརྩེ་བས་རྨོངས་པ་སེལ། །འཁོར་འདས་བཅུད་བསྡུས་སྒྲུབ་ལ་སྟེར་བ་ཡི། །སྲོག་ཁྱིམ་ཏཱཾ་ཧྲཱིཿདྷཱིཿདང་བཻ་ཡིག་མཐར། །ན་མོ་དྷཱིཿདྷཱ་རི་ཀཱ་སྭཱ་ཧཱ། ན་མ་ཨཱརྻ་པཱ་ལོ་དྷཱ་ར་ཎི་པྲ་ཛྙཱ་བརྡྷ་ནི་སྭཱ་ཧཱ། ཨོཾ་ཨཱཿཔྲ་ཛྙཱ་བརྡྷ་ནི་སྭཱ་ཧཱ། ན་མོ་བཻ་ཡཱ་ཀ་ར་ཎ་པྲ་ཛྙཱ་བརྡྷ་ནི་སྭཱ་ཧཱ། སྔགས་བཞིས་གོ་རིམ་དང་མཚུངས་གཡས་སུ་བསྐོར། །ཐབས་ཤེས་སྲོག་གི་སོགས་སྦྲེལ་ཏེ། །དབུས་ན་མཛེས་པར་གྱུར་པའི་མཚམས། །མྱུར་མཛད་དཔའ་མོ་དཀར་སེར་དམར་སྔོ་བཞིས། །གེགས་སེལ་ཤེས་རབ་སྤེལ་ཞིང་དངོས་གྲུབ་སྟེར། །ཅེས་མོས་མཆོད་ཅིང་བསྟོད་སྤྲོ་ན། །བསྡུས་པ་སྔགས་དང་ཕྱག་རྒྱས་སྟོབ། །རྒྱས་འདོད་དབྱངས་ཀྱི་རྒྱུད་མངས་བཅས། །མུ་ཏིག་ཟེགས་ཕྲེང་ཕྱོགས་ཀྱི་མགུལ་པར་སྦྱིན། །གཙང་བྱེད་ཡན་ལག་བརྒྱད་ལྡན་གདྒཱའི་ཀླུང་། །གསེར་གྱི་བྱ་མ་བུམ་པའི་ལྟོར་འཁྱིལ་བ། །མི་མཉེས་དག་བྱེད་གུས་པའི་ཆོ་གས་དབབ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། ཞབས་ཀྱི་པདྨོ་རྙོགས་ལྡན་འདམ་སྐྱེས་མིན། །བྱིས་བློའི་དྲི་མ་འཁྲུད་པའི་ཆོ་ག་རུ། །གཟུགས་མང་འཇའ་རིས་འཛིན་པའི་སྟོན་གྱི་མཁའ། །ལེགས་པར་བཞུས་འདྲས་ཆོལ་ཟངས་བཀང་སྟེ་འབུལ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་པཱ་དྱཾ་པྲ་ཏཱིཙྪ་སྭཱ་ཧཱ། སྲིད་གསུམ་མཛེས་པའི་སྙིང་པོ་ཕྱོགས་གཅིག་ཏུ། །བྱེད་པོས་བསྡུས་ནས་ཆུན་པོར་བསྟར་འདྲ་བ། །ལྟ་བས་ངོམས་པ་མེད་པའི་མེ་ཏོག་གི །ཆར་པ་འབེབ་ཅིང་ལྡིང་ཁང་དབུབ་པར་བྱ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་པུཥྤཾ་པྲ་ཏཱིཙྪ་སྭཱ་ཧཱ། ཡོངས་འདུའི་འཁྲི་ཤིང་ངད་ཀྱིས་མི་མཚོན་ཅིང་། །རྣམ་དག་ཚུལ་ཁྲིམས་བསུང་ཞིམ་དང་འདྲེས་པ། །དབང་པོ་ཚིམ་བྱེད་སྤོས་སྤྲིན་བླ་རེ་ཡང་། །རྒྱལ་བའི་ཞིང་ཁམས་ཀུན་ཏུ་བྲེ་བར་བྱ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་དྷཱུ་པཾ་པྲ་ཏཱིཙྪ་སྭཱ་ཧཱ། ནོར་བུའི་སྒྲོན་མེ་སྟོང་གི་འོད་འབར་བས། །ཉི་ཟླའི་དཀྱིལ་འཁོར་བྱེ་བ་མོག་པོར་བྱེད། །ཞིང་ཀུན་འོད་གསལ་གཅིག་ཏུ་འདྲེས་པ་བཞིན། །ཡེ་ཤེས་སྣང་བ་སྦར་བའི་གཉེན་དུ་འབུལ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་ཨཱ་ལོ་ཀེ་པྲ་ཏཱིཙྪ་སྭཱ་ཧཱ། ག་པུར་ཙནྡན་གུར་གུམ་ལྡེ་གུ་ཡིས། །མ་བསྒོས་ཚུལ་ཁྲིམས་དྲི་དང་བསིལ་བས་ཁྱབ། །རྣམ་གྲོལ་བྲལ་བས་ཉེན་ལ་དབུགས་དབྱུང་བརྡ། །ཅི་ཡང་སྟོན་སླད་དྲི་ཡི་བྱུགས་པ་འབུལ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་གནྡྷེ་པྲ་ཏཱིཙྪ་སྭཱ་ཧཱ། བསམ་གཏན་ཟས་ཀྱིས་རིང་ནས་བཀྲེས་པའི་ནད། །མཐའ་དག་འཚོ་བའི་ཆོ་གར་མཁས་གྱུར་ཀྱང་། ཁམས་ཀྱི་བཟའ་བར་སྤྱོད་རྣམས་བསམ་རྫོགས་སླད། ཁ་ཟས་རོ་བརྒྱ་ལྡན་པས་བསྙེན་བཀུར་བགྱི། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་ནཻ་བིདྱཱ་པྲ་ཏཱིཙྪ་སྭཱ་ཧཱ། དྲི་ཟའི་རྒྱུད་མངས་བྱེ་བ་སྒྲེང་བ་འམ། །མི་འམ་ཅི་མོ་སྟོང་གི་ཟློས་གར་ཡང་། ཁེངས་པ་འགོག་བྱེད་ནམ་མཁའི་རྒྱ་རལ་ཞིང་། །ཆགས་བྲལ་བརྟན་པ་འཕྲོག་པའི་སྒྲ་སྙན་འཁྲོལ། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་བཛྲ་ཤབྡ་པྲ་ཏཱིཙྪ་སྭཱ་ཧཱ། ཞེས་པ་ཙམ་མམ། སྤྲོ་ན་མཆོད་པའི་བྱེ་བྲག་སྣ་ཚོགས་པ་ཚིགས་སུ་བཅད་པའི་དབྱངས་ཀྱིས་འབུལ་བར་བྱའོ། །བསྟོད་པ་ནི། རྨད་དུ་བྱུང་བའི་སློབ་དཔོན་སྙན་དངགས་མཁན་དགེ་བསྙེན་ཟླ་བས་མཛད་པ་སོགས་བྱིན་རླབས་ཆེ་ཞིང་ཚིག་གི་མེ་ཏོག་དོན་གྱི་འབྲས་བུས་ལྕི་བ་རྣམས་ཇི་ཙམ་ནུས་པར་དད་པས་བླངས་ཏེ་ཡོན་ཏན་རྒྱ་མཚོར་འབུལ་བས་སྨྲ་བ་ལ་ཐོགས་པ་མེད་པའི་མཐུ་སྩོལ་བ་སོགས་འདོད་པའི་དོན་ཐོབ་པ་ཡིན་ལ། དཀྱུས་ཙམ་དུ། ན་མོ་གུ་རུ་མཉྫུ་ཤྲཱི་སྭ་ར་སྭ་ཏྱཱཻ། ཡེ་ཤེས་མཁའ་ལ་ཉིན་བྱེད་སྣང་བས་འཁྱུད། །སྙིང་རྗེའི་ཆུར་རྒྱས་པདྨ་ཡངས་པའི་སྤྱན། །མི་ཟུམ་རྡོ་རྗེ་སེང་གེའི་ཁྲིར་བཞུགས་པ། ཁྱབ་བདག་ངག་གི་དབང་ཕྱུག་ཁྱོད་ལ་འདུད། །ཞིང་སྐུ་མཚན་གྱི་སྤྲིང་ཡིག་རྣམ་པར་འཕྲུལ། །གུར་གུམ་གསར་པའི་ཆུ་ཡིས་མ་བྲིས་པ། །གངས་ཆེན་མཚོ་ཡི་མཁའ་ངོས་སྤྱན་ལྔ་ཡིས། །བཙལ་བས་མ་རྙེད་ཐུབ་རྣམས་ངལ་ལ་འདུད། །དེ་བཞིན་གཤེགས་པ་ཀུན་གྱིས་ཁྱོད་ཁོ་ན། །བསྐྲུན་ཅིང་ཁྱོད་ཉིད་གཅིག་པུས་དུས་གསུམ་གྱི། །འགྲོ་བའི་སྒྲོན་མེ་ཀུན་སྐྱེད་ཡབ་གྱུར་ཀྱང་། །གཞོན་ནུའི་ལང་ཚོ་རྒུད་པ་མེད་ལ་འདུད། །ནམ་མཁའི་ཚལ་དུ་རྒྱུ་སྐར་གར་མཁན་མ། །ཟིལ་གནོན་ཉི་ཟླའི་ཁྱེ་འུ་མིག་གི་རྒྱན། །ཞིང་མང་མཛེས་བྱེད་སྲས་བཅས་རྣམ་འདྲེན་དབུས། ཁྱོད་མཚན་ཡིད་ཀྱི་དཔལ་དུ་འབར་ལ་འདུད། །ཉི་འོད་མུན་པ་ལ་བཞིན་སྙིང་སྟོབས་གསལ། །སྐྱེ་ཚོགས་སྐྱེ་བའི་ཉོན་མོངས་ཞིག་པའི་རྒྱུ། །འཇིགས་རུང་འཁོར་བའི་རྒྱ་མཚོའི་ཟམ་སྟེགས་ནི། །སྨོན་ལམ་ཕ་རོལ་ཕྱིན་པས་བཙུགས་ལ་འདུད། ཁྱོད་སྐུ་མཁའ་དང་མཉམ་ཡང་གཞོན་ནུའི་ཟོལ། །དམར་སེར་འོད་ཀྱི་པ་ཏྲ་རབ་ཏུ་འཛིངས། །རྒྱལ་ཀུན་གསུང་ལམ་འབྱེད་ཀྱང་འགྲོ་མང་གི །སྐད་ཀྱི་རྗེས་སུ་བརྗོད་པ་ཞུགས་ལ་འདུད། །རྣམ་པར་མི་རྟོག་ཡེ་ཤེས་དངོས་མེད་མཛོད། །དངོས་པོའི་ཕྲིན་ལས་ཀུན་ཏུ་དབྱེ་བར་བཟོད། །སྤངས་རྟོགས་གཞལ་དུ་མེད་ཀྱང་འཁོར་བ་སྲིད། །རྒྱལ་བའི་མྱུ་གུའི་བརྫུ་བག་མཛད་ལ་འདུད། །ཡེ་ཤེས་ཕུང་པོ་གཅིག་གི་གཟུགས་བྱས་ན། །ནམ་མཁའི་སྣོད་དོག་མཐའ་དག་སྨྲོས་ཅི་འཚལ། །མཁྱེན་བཟང་རལ་པའི་ཟུར་ཕུད་གང་གཡོ་བར། །ཞབས་སེན་ནོར་བུའི་ཅོད་པན་བཀོད་ལ་འདུད། །ཀུན་རྨོངས་རྩ་བ་གཅོད་ཅེས་དཔུང་པའི་ཚལ། །གླེགས་བམ་རལ་གྲིའི་མྱུ་གུས་གཏམས་ནས་ཅི། །སྐྱེ་དང་ལྷན་ཅིག་བསགས་བྱས་མུན་པའི་མཛོད། །ཡེ་ཤེས་སྣང་བའི་ཟེར་གྱིས་བཅོམ་ལ་འདུད། །སྨྲ་བའི་གླང་ཆེན་མྱོས་པའི་བག་མེད་སྒོ། །བསྲུང་ཕྱིར་སེང་གེའི་ཁྲི་ལ་སེང་གེའི་སྒྲ། །བསྒྲགས་ཀྱང་འགྲོ་བ་རི་དྭགས་ཡིད་ཆགས་པ། །སངས་རྒྱས་རོལ་མོའི་གར་མཛད་དེ་ལ་འདུད། །བ་སྤུའི་ཁུང་བུ་གཅིག་ན་མཐའ་ཡས་པའི། །སྒྱུ་མ་ཀུན་ཤོང་མཁའ་འདིས་ཁྱོད་ཐུགས་འགྲན། །སྙིང་རྗེ་རབ་ཏུ་སྲ་བ་རྡོ་རྗེའི་ལྕིད། །འདེགས་ནུས་ས་འདིས་དཔའ་བའི་རྗེས་སུ་བྱེད། །སྟོན་དང་ཀུན་མཁྱེན་གྲགས་པའི་དཀྱིལ་འཁོར་ན། །རྡོ་རྗེ་ཉི་མ་འབའ་ཞིག་སྣང་བ་ཆེ། །དེས་བྱིན་བློ་གྲོས་མིག་བུས་འཁོར་བ་པའི། །མ་མཐོང་གཡང་ལས་སྲུང་བའང་ཕྱག་གི་གནས། །རྒྱལ་བའི་རྒྱུད་སྐུལ་ཡིད་འོང་འཛུམ་ཞལ་ཅན། །སྟོང་ཉིད་ཞུན་མར་འཁྱིལ་འདྲ་དབང་སྔོན་མདངས། །དབྱངས་ཀྱི་རྒྱུད་མངས་སེམས་ཅན་སད་པར་མཛད། །རྒྱ་མཚོའི་ལྷ་མོ་སྒྲ་ལྡན་དེ་ལ་འདུད། །མི་འཚེ་དགའ་དང་དམ་བཅས་བདེན་རྣམས་ཀྱི། །སེམས་ཡིད་ཁ་ཡི་སྒོར་འཇུག་དེ་ཀུན་ཀྱང་། །ངག་གི་བརྟུལ་ཞུགས་གྲུབ་པ་སོས་ཀའི་གླུ། །སྐྱེ་དགུའི་རྣ་བའི་བཅུད་དུ་ལེན་ལ་འདུད། །དཔྱིད་ཀྱི་ཨུཏྤལ་གཞོན་ནུའི་ཕོན་པོ་ལ། །བུང་བའི་ཕྲེང་བ་མགྲོན་དུ་འདུ་བ་བཞིན། །མི་ཤིགས་རྗེས་ཆགས་རོལ་པའི་འཛུམ་དཀར་མདའ། །ཟུར་མིག་འཁྱོགས་པོའི་འབེན་དུ་སྡུད་ལ་འདུད། །མཐའ་ཡས་དབྱངས་ཀྱི་ཡན་ལག་རྒྱ་མཚོའི་རྒྱུད། །རང་རང་སྐད་ཀྱི་རྗེས་སུ་རྡུང་བརྩོན་པས། །སྨྲ་བའི་ཁ་འབྱེད་འཕྲུལ་ཆེན་ཡི་གེའི་ལྗགས། །སྨྲ་བ་ཀུན་གྱིས་རྐྱོང་བར་མཛད་ལ་འདུད། །ཟབ་མོ་འཕགས་བཞི་འཁྲུངས་པའི་ཡུམ་གྱུར་ཅིང་། །དེ་ཀུན་འབྲལ་བ་མེད་འཁྱུད་རྩེ་དགའི་གཉེན། །སྣ་ཚོགས་གཟུགས་ཅན་ལྷ་མོ་ཡིད་འཕྲོག་མ། །བདག་གི་སྙིང་གི་ཐིག་ལེ་མཛད་དུ་གསོལ། །བྱིས་པའི་སྐྱེ་བོ་བློ་དང་ཁྲིམས་ལྡན་པ། །འཇིག་རྟེན་ལྷ་དང་བཅས་པས་བསྔགས་འོས་ན། །རྣམ་དག་ཕུང་པོ་ལྔ་ཡི་མངལ་ལྕི་བ། །འགྲོ་བ་ཉེར་འཚོའི་མ་དེ་སུས་མི་བསྔགས། །རབ་ཏུ་གུས་པས་སྦྱར་བའི་སྙིམ་པའི་ལྟོ། །སྙན་ངག་མེ་ཏོག་གསར་པས་ལེགས་བཀང་སྟེ། །ཡོན་ཏན་རྒྱ་མཚོ་མཛེས་པའི་རྒྱན་ཕྲེང་དུ། །ཉིན་རེ་བཞིན་ཡང་མོས་པའི་བློ་ཡིས་འབུལ། །གདེངས་པ་ཙམ་གྱིས་ཉེས་བརྒྱའི་ཚང་ཚིང་ཀུན། །ཟ་བའི་ལྕེ་ལྡན་མཁྱེན་རབ་རལ་གྲི་ཡིས། །གཟུང་འཛིན་པདྨའི་སྣལ་མ་ཡུད་ཙམ་ལ། །མི་གཅོད་ཐུགས་ལས་ཆུང་ངུར་གཞོལ་ལམ་ཅི། །བདག་ཅག་འཇམ་མགོན་ཡབ་ཡུམ་ཞབས་མཐིལ་ལ། །སྤྱི་བོས་གཏུགས་ཏེ་དད་པས་ཆོས་ཉན་པར། །གདུང་བས་གཙེས་སོ་སྐྱེ་བར་ངལ་བ་བརྒྱས། །བསྒྲུབ་པོ་ཐུགས་རྗེའི་ཞོ་ཤས་འཚོ་བར་མཛོད། །བསོད་ནམས་བརྒྱ་ལས་གྲུབ་པའི་མཚན་དཔེའི་འོད། །དམར་སེར་གསེར་རིའི་ངོགས་སུ་ཆགས་པའི་མདངས། །སྒྲིབ་པའི་བརྟན་པ་འཕྲོག་པའི་དཔེ་བྲལ་དེ། །ད་ལྟ་མིག་གི་བདུད་རྩིར་སྩོལ་བར་འཚལ། །འཁོར་བ་པ་ནི་བུང་པ་ལྟ་བུར་འཁོར། །ཆགས་བྲལ་རྣམས་ཀྱང་མི་གསལ་སྲེད་པའི་ཆུ། ཁ་མེད་ལྗོན་པ་བཞིན་འཐུང་རང་གི་གཡས། །རིན་ཆེན་རྒྱལ་བའི་སྙིང་པོར་གོས་འདི་སོལ། །ལྷན་སྐྱེས་མུན་པས་ལྡོངས་པའི་ཡེ་ཤེས་མིག །རྩོལ་བས་དུབ་མིན་ཉེ་རིང་མེད་པར་དབྱེ། །སྐྱེ་དགུའི་འདྲེན་བྱེད་བྱ་བ་མཛད་ལགས་ན། །རྒྱ་ཆེན་ལྟ་བའི་མཐོང་བ་དྲི་མེད་སྩོལ། །བློ་གྲོས་སྣོད་དུ་མ་བཟུང་ཤེས་བྱའི་དབྱིག །ཀུན་མཁྱེན་མཛོད་དུ་ཡོད་མེད་སོམ་ཉིའི་རྒྱར། །རྒྱལ་སྲས་དཔའ་རྣམས་ཆུད་པ་དེ་ཙམ་དུ། །ཟབ་ཅིང་རྒྱ་ཆེའི་བློ་ཡི་འདོད་འཇོ་མཛོད། །གཟུངས་དང་ཏིང་འཛིན་ཆང་གིས་རྒྱུད་མྱོས་ཀྱང་། །སྤོབས་པ་ཟླ་བ་ནོར་བུའི་རྡོ་ལེབ་ལ། །ངལ་གསོས་ཆོས་རབ་རྣམ་པར་འབྱེད་པའི་བློས། །ཕྱོགས་ལས་རྣམ་པར་རྒྱལ་བའི་དངོས་གྲུབ་སྩོལ། །ཉི་ལྟར་འབར་ཡང་ཐུགས་རྗེ་ཟླ་བའི་ཞལ། །བདུད་རྩིའི་དོ་ཤལ་དཀར་པོས་བཞད་པའི་དཔལ། །ངེས་ལེགས་སྦྲང་རྩིའི་རྡུལ་སྐྱུགས་མཐོ་རིས་ཀྱི། །ཡོན་ཏན་ཀུ་མུད་དགའ་ཚལ་དར་བར་མཛོད། ཁྱོད་དང་དད་པའི་སེམས་འདི་ཡང་སྲིད་ཀུན། །མི་འབྲལ་བདག་ཉིད་གཞན་ཕན་དབང་སོང་སྟེ། །རྣམ་ཐར་ཚད་གཟུང་མེད་ཅིང་བརྟག་དཀའ་བ། །བདེ་བླག་སྒྲུབ་ལ་ཕྱིར་མི་ལྡོག་གྱུར་ཅིག །བསྟོད་པའི་སིལ་སྙན་ལེགས་འཁྲོལ་ནས། །སྔགས་བཟླས་དམིགས་པ་བསྙེན་དུས་ལྟར། །བཅུད་རྣམས་གཙོ་བོར་སྒྲུབ་རྫས་ལ། །བསྟིམ་ཞིང་འཁོར་གྱི་ཐུགས་རྒྱུད་བསྐུལ། །རྒྱལ་བ་ཀུན་གྱི་མཁྱེན་དང་བརྩེ། །ཡོན་ཏན་དངོས་གྲུབ་རིལ་བུ་དང་། ཁ་སྦྱོར་ཙཀྲ་ལ་ཐིམ་བསམ། །འཁོར་སྔགས་རྣམས་ཀྱང་ཅུང་ཟད་བཟླ། །ཐུན་མཐར་མཆོད་ཅིང་བསྟོད་ནས་སུ། །གཏོར་མ་བདག་མདུན་ལྷན་ཅིག་འབུལ། །གཉིས་པ་ཡོད་ན་ཆོས་སྐྱོང་དང་། །གཞི་བདག་ལ་སྦྱིན་ཕྲིན་ལས་གཞོལ། །མཆོད་བསྟོད་མདོར་བསྡུས་འདོད་དོན་གྱི། །གསོལ་གདབ་ཤེས་བྱའི་མཁའ་དབྱིངས་སམ། །གང་ཚེ་བལྟ་དང་བརྩེ་ལྡན་མས། །མཚོན་ཏེ་རྒྱ་གཞུང་གང་རུང་བྱ། །མདུན་བསྐྱེད་འཁོར་རྣམས་འོད་དུ་འདུས། །གཙོ་མོ་ལ་ཐིམ་དེ་ཉིད་ཀྱང་། །འོད་ཞུ་རིལ་བུའི་རྣམ་པར་གྱུར། །བདག་བསྐྱེད་གདན་བསྡུ་གནས་གསུམ་བསྲུང་། །བསྔོ་སྨོན་ཤིས་པའི་ཚིག་གིས་བརྒྱན། །བདུན་ཕྲག་གསུམ་མམ་ཟླ་གཅིག་སོགས། །རྩེ་གཅིག་ཐུན་བཞིའི་རིམ་པས་འབད། །གསུམ་པ་་་རྗེས་ནི།གྲུབ་པའི་རྟགས་མཐོང་ནས། །ཙཀྲར་འཇམ་དཔལ་དབྱངས་ཅན་མ། །རིགས་ལྔ་ཁ་དོག་ལྔར་བསྐྱེད་ཅིང་། །ཡན་ལག་བཞི་རྫོགས་མཆོད་བསྟོད་དང་། །སྤྱན་དབྱེ་བརྟན་བཞུགས་ལྷ་ཞུ་བས། །བྲིས་པའི་འཁོར་ལོའི་རྣམ་པར་བསྒྱུར། །རྩ་སྔགས་དབྱངས་གསལ་རྟེན་འབྲེལ་སྙིང་། །བརྒྱ་རྩ་བརྒྱད་བཟླས་མེ་ཏོག་འཐོར། །སླར་ཡང་མཆོད་བསྟོད་ཤིས་བརྗོད་བྱ། །དངོས་གྲུབ་སྒྲུབ་པའི་ལེའུ་སྟེ་ལྔ་པ་འོ། ༈ །གལ་ཏེ་འབད་ནས་བསྒྲུབས་ཀྱང་རྟགས། །མ་མཐོང་སྤོགས་པའི་ཆོ་ག་བྱ། །ཙཀྲ་གཉིས་པོ་སྟེང་འོག་བཟློག །རིལ་བུ་གུ་གུལ་དུད་པས་བདུག །རང་ཉིད་དབྱངས་ཅན་མ་རུ་བསྒོམ། །མདུན་བསྐྱེད་འཇམ་དཔལ་སྔགས་འོད་ཀྱི། །འཁོར་ལོ་རང་གི་སྣ་གཡོན་ནས། །ཐོན་ཏེ་མདུན་བསྐྱེད་གཡས་སུ་ཞུགས། །སྤྲོ་བསྡུ་གོང་དང་མཚུངས་པ་ཉིད། ཁྱད་པར་འོད་ཕྲེང་དམར་པོ་ཡིས། །བརྟན་པའི་འཁོར་ལོའི་དམ་བཅའ་བསྐུལ། །ཞལ་སྟོན་རྗེས་འཛིན་སྔགས་ཀྱི་ཕྲེང་། །གཡོན་ནས་གཡས་སུ་འཁོར་བསམ་ཞིང་། །བཟླས་པ་ཐོག་མཐའི་དྷཱིཿཧྲཱིཿབཟློག །དེས་ཀྱང་མ་འགྲུབ་རལ་གྲི་དང་། །འཁོར་ལོའི་ཡིག་འབྲུ་ཐུར་དུ་འཕྱངས། །སེམས་བཟུང་བཟླས་པས་གཞུང་མཐུན་རྟགས། །མི་འབྱུང་མི་སྲིད་དེ་བྱུང་ནས། །དམིགས་བཟླས་དཀྱུས་ལ་འཇུག་པར་གཅེས། །སྤོགས་ཆོག་གི་ལེའུ་སྟེ་དྲུག་པ་འོ། ༈ །སྒྲུབ་དུས་ཇི་ལྟར་འདོད་པ་ཡིས། །དངོས་གྲུབ་སྒྲུབ་པའི་ཁ་བསྒྱུར་ནི། །སངས་རྒྱས་བྱང་སེམས་ཉན་རང་དང་། །མཁས་གྲུབ་འཇིག་རྟེན་ཆེ་སོགས་ཀྱི། །ཚེ་འམ་བསོད་ནམས་ཤེས་རབ་བམ། །འཆད་རྩོད་རྩོམ་པ་མི་བརྗེད་གཟུངས། །ངོ་བོ་འདོད་པའི་དངོས་གྲུབ་ཉིད། །རྣམ་པ་གཤམ་དུ་སྨྲོས་པའི་གཟུགས། །འོད་ཟེར་བུང་བའི་ལྕགས་ཀྱུས་བསྡུས། །བདག་དང་སྒྲུབ་པའི་རྫས་ལ་བསྟིམ། །ལུས་ཁེངས་གང་འདོད་མཆོག་ཐོབ་བསམ། །དེ་བཞིན་དབང་དུ་བྱ་འདོད་ན། །ཕ་རོལ་སེམས་ཏེ་ངག་རྐུ་དང་། །འཕྲོག་སོགས་དེ་དང་དེ་བཞིན་བསྒྲུབ། ཁ་བསྒྱུར་གྱི་ལེའུ་སྟེ་བདུན་པ་འོ། ༈ །རྟགས་ཀྱི་འབྲས་བུའི་བོགས་འདོན་ན། །བདག་ཉིད་འཇམ་དབྱངས་ཐུགས་ཀར་དྷཱིཿ ཐུན་མཚམས་ཆུ་འཛིན་གསར་པའི་འོད། །ལྕགས་ཀྱུའི་རྡུལ་གྱིས་སངས་རྒྱས་དང་། །བྱང་སེམས་ཉན་རང་བྱིན་རླབས་དང་། །དབྱངས་གསལ་ཡི་གེའི་ནུས་པའི་མཐུ། །རིག་འཛིན་བློ་ལྡན་སྔགས་འཆང་བའི། །བློ་གྲོས་ཉི་ཟླ་ནོར་བུའི་འོད། །རྩི་དང་བཅུད་བསྡུས་དྷཱིཿལ་ཐིམ། །དེ་ལས་འོད་བྱུང་སྡིག་ཀུན་སྦྱངས། །ཡིག་འབྲུ་ཆེར་འཕེལ་མགྲིན་པར་ཞུགས། །དྷཱིཿཡིག་དམར་པོས་ལུས་ནང་གང་། །འོད་ཟེར་མེ་ལྕེས་རང་གཞན་གྱི། །སྡིག་སྒྲིབ་བསྲེགས་བསམ་དྷཱིཿཁོ་ན། །འབུམ་ཕྲག་བཞི་ལ་སོགས་པ་བཟླ། །བསྙེན་སྒྲུབ་གཉིས་ཀའི་བོགས་འབྱིན་ནོ། །བོགས་འདོན་གྱི་ལེའུ་སྟེ་བརྒྱད་པ་འོ། ༈ །སྔགས་པ་དམ་ཚིག་མི་གཡོ་བས། །བསྒྲུབས་པའི་འབྲས་བུ་མྱུར་དུ་མཐོང་། །ཞིང་ས་གཤིན་པོར་སོ་ནམ་གྱི། །ཆོ་གས་ལོ་ཏོག་ལེགས་པར་འཁྲུངས། །འདི་ལ་གཉིས་ཏེ་དམ་ཚིག་དངོས། །ཡན་ལག་སྤྱོད་ལམ་བསྟན་པ་འོ། །དང་པོ་སྡིག་པའི་གྲོགས་མི་བསྟེན། །སྡིག་ལས་ཀུན་ཟློག་ཁྱད་པར་དུ། །རྫུན་སོགས་ངག་གི་མི་དགེ་དང་། །འཁོན་དང་ཞེ་སྡང་དྲག་པོ་དང་། །ཤ་ཆང་སྒོག་ཙོང་སྔོ་ངད་སྤང་། །ཆགས་ལས་འཁྲིག་དང་སྨྲེ་སྔགས་དང་། །མྱ་ངན་བྱེད་སར་འགྲོ་མི་བྱ། །ཉམས་གྲིབ་འབག་བཙོག་ཀུན་ལ་འཛེམ། །བྱང་སེམས་ཉམས་ན་ཤེས་རབ་འགྲིབ། །རྟོག་པ་མང་ན་ཤེས་རབ་འཆལ། །མཎྜལ་འབྲི་བ་ནས་བརྩམ་སྟེ། །རིལ་བུ་བཟའ་བའི་བར་དག་ཏུ། །བཅའ་གཞི་མི་ཡིས་མ་མཐོང་ཞིང་། ཁྱད་པར་དུད་འགྲོས་མ་མཐོང་གཅེས། །གལ་ཏེ་མཐོང་ཞིང་རྟགས་ལོག་ན། །བཅའ་གཞི་བསྐྱར་ལ་བསྒྲུབ་པར་བྱ། །གཉིས་པ་སྤྱོད་ལམ་སྒོ་གསུམ་པོ། །བག་ཡོད་གཙང་སྦྲ་ལྡན་པར་སྤྱད། །ཡིག་བརྒྱ་བཟླ་ཞིང་ཁྲུས་ལ་བརྩོན། །དད་དང་སྙིང་རྗེ་ཆེན་པོ་དང་། །སྲུང་བའི་འཁོར་ལོ་རྟག་ཏུ་བསྒོམ། །ཐུན་མཚམས་རྟག་ཏུ་ལྷག་པའི་ལྷ། །མཆོད་དང་བསྟོད་པས་མཉེས་པར་བྱ། །སྲོད་ལ་མཚན་མེད་རྫོགས་རིམ་བསྒོམ། །དམར་སྣང་རྟོག་མེད་ངང་དུ་ཉལ། །ཐོ་རངས་མཁའ་ལ་མཚོ་ལྡན་མ། །བཀྲ་ཤིས་ལྷ་མོས་བསྐོར་རྣམས་ཀྱིས། །ཚིགས་སུ་བཅད་དང་རྡོ་རྗེའི་གླུ། །ཧྲཱིཿདྷཱིཿའི་རིག་པའི་སྒྲས་བསྐུལ་བས། །འཇམ་པའི་རྡོ་རྗེར་བཞེངས་བསམ་ལྡང་། ཁྲུས་བྱས་རྣལ་འབྱོར་རིམ་ལ་འཇུག །ཁ་ཟས་ཡི་གེ་འབྲུ་གསུམ་གྱིས། །དྭངས་མའི་བདུད་རྩིར་སྤར་ནས་ལྷ། །མཆོད་པས་བློ་ཡི་དཔྱིད་རྒྱས་བསམ། །སྤང་དང་བླང་བའི་འཇུག་ངོགས་ཏེ། །ཉེས་པ་བཀྲུ་བའི་རྒྱུན་འདི་བརྟེན། །དམ་ཚིག་དང་སྤྱོད་ལམ་གྱི་ལེའུ་སྟེ་དགུ་པ་འོ། ༈ །བསྒྲུབས་པས་དངོས་གྲུབ་འགྲུབ་པ་ཡི། །མཚན་མ་རབ་འབྲིང་ཐ་མའི་བློ། །དངོས་ཉམས་རྨི་ལམ་གཟུགས་སུ་སྣང་། །བསྙེན་དུས་འོད་དང་དུ་བ་གདུགས། །རོལ་མོའི་སྒྲ་དང་ཉི་ཟླ་ཤར། །མེ་ཏོག་འཐུ་འཛུག་ཞིང་ཆེན་རྨོ། །སྣག་ཚ་འཐུང་དང་གླུ་གར་བྱེད། །ཡི་གེ་འབྲི་དང་ཀློག་པ་སོགས། །ཤེས་རབ་འཕེལ་བའི་རྟགས་སུ་བཤད། །སྒྲུབ་དུས་དེ་ལས་ཁྱད་པར་དུ། །རིལ་བུ་རྒྱལ་ཆེན་བཞིར་མཐོང་ན། །མཁྱེན་རབ་འཇམ་པའི་རྡོ་རྗེར་མཚུངས། །གལ་ཏེ་དབྱངས་ཅན་མ་རུ་མཐོང་། །སངས་རྒྱས་བཞུགས་པའི་ཞིང་དུ་འགྲོ། །ཉི་ཟླར་མཐོང་ན་སྐྱེ་བ་དྲན། །འོད་དུ་མཐོང་ན་སྒྲ་བཞིར་མཁས། །སྐལ་ལྡན་ཉིན་ཞག་གཅིག་གིས་ཏེ། །ལས་འཕྲོ་མེད་ཀྱང་ཞག་གསུམ་གྱིས། །འགྲུབ་ཅེས་མྱུར་བའི་ཚད་དུ་གསུངས། །འོན་ཀྱང་སྙོག་པ་ལྔས་བསྙོགས་པའི། །བློ་དམན་རིག་པ་འགྲུབ་དཀའ་བས། །དྲོད་ཚད་གཏན་ལ་ཕེབས་ཀྱི་བར། །རྟག་གུས་སྦྱོར་བས་སྒྲུབ་པ་བརྩམ། །གལ་ཏེ་སྒྲུབ་ལ་འཇུག་འདོད་ཚེ། །རྟགས་མཐོང་ལས་ཀྱི་འཕྲོ་དང་ལྡན། །ཞུགས་ནས་མི་རིང་བྱུང་བ་ན། །རྗེས་བཟུང་རྟགས་ཏེ་དྲོད་ཚད་མིན། །བདུན་ཕྲག་གཅིག་སོང་ཕན་ཆད་རྟགས། །གང་མཐོང་ཚད་ཀྱི་ངེས་པར་གཟུང་། །འདི་ཡང་ངག་གི་དབང་པོས་བཞེད། །ཅིས་ཀྱང་ལས་ཀྱི་འཕྲོ་དམན་པས། །སྤོགས་ཆོག་སོགས་ཀྱིས་ངལ་བྱས་ཀྱང་། །རྟགས་མེད་སྒྱིད་ལུག་མི་བྱ་སྟེ། །ཅུང་ཟད་བཟླས་པའི་ཡོན་ཏན་ཡང་། །བརྒྱ་ཡིས་མི་བརྗེད་གཟུངས་ཐོབ་ཅིང་། །སྟོང་གིས་སྒྲ་སྐད་ཀུན་ལ་མཁས། ཁྲི་ཡིས་མངོན་ཤེས་འཆར་བ་སོགས། །བསླུ་མེད་གསུངས་ལ་ཡིད་ཆེས་བྱ། །ཚེ་འདིར་མངོན་དུ་མ་གྱུར་ཀྱང་། །ལས་ནི་སྐྱེ་བར་རྗེས་སུ་འབྲང་། །རྟགས་ཚད་ཕན་ཡོན་བཤད་པའི་ལེའུ་སྟེ་བཅུ་པ་འོ། ༈ །བསྙེན་ཅིང་སྒྲུབ་པའི་ཐུན་མཚམས་དང་། །ཉིན་རེ་བཞིན་ཡང་བྱ་དགོས་པའི། །གཏོར་མའི་ཆོ་ག་སྣོད་གཙང་མར། ཁ་ཟས་དཀར་མངར་དྲི་བཟང་པོ། །སྨན་དང་འབྲུས་བཀང་བསང་སྦྱང་ལ། །བྷྲཱུྃ་ལས་རིན་ཆེན་གཞོང་པ་རབ་ཡངས་པར། །ཨོཾ་ཨཱཿཧཱུྃ་ལས་གཏོར་མ་བདུད་རྩིའི་མཚོ། །མཁའ་དང་མཉམ་འཕྱུར་ལྷ་དང་མིའི་ཡོ་བྱད། །གང་འདོད་གཏེར་དང་ཡོངས་འདུའི་ཤིང་བཞིན་གྱུར། །ཨོཾ་ཨཱཿཧཱུྃ། ལན་གསུམ། མདུན་མཁར་པདྨའི་སྡོང་པོ་རིམ་པ་གསུམ། །ཡངས་པའི་དབུས་སུ་འཇམ་དཔལ་ཡབ་དང་ཡུམ། །ནམ་མཁར་བླ་མ་མཐའ་སྐོར་རྒྱལ་བའི་སྤྲིན། །བར་པར་བྱང་སེམས་འོག་མར་ཆོས་སྐྱོང་བ། །སྐྱེ་བ་བཞིས་བསྡུས་འགྲོ་བ་རྣམས་ཀྱང་འཁོད། །རང་སྲོག་འོད་ཀྱིས་ཡེ་ཤེས་འཁོར་ལོ་བཀུག །ཆུ་ལ་ཆུ་བཞག་བཞིན་དུ་འདྲེས་པར་གྱུར། །སྒྲུབ་དུས་བསྐྱེད་དང་བསྟིམ་མི་དགོས། །བདག་མདུན་ལྷ་ལ་འབུལ་བར་དམིགས། །རྡོ་རྗེའི་སྦུ་གུ་ཅན་གྱི་ལྗགས་བརྐྱངས་ནས། །གཏོར་མའི་བཅུད་བཞེས་མཁོ་བའི་ཡོ་བྱད་བསྣམས། །ཟག་མེད་བདེ་བས་རབ་ཏུ་ཚིམས་པར་བསམ། །སྙིང་པོའི་གཤམ་དུ་སྔགས་འདི་བཏགས། །ཨི་དཾ་གྲྀཧྞ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བདུན་ནམ་ལྔ་ཡིས་ཕུལ་པའི་མཐར། །ཀུན་བཟང་རྣམ་ཐར་ནམ་མཁའི་ཁང་བཟང་དུ། །ནམ་མཁའ་མཛོད་ཀྱི་ཏིང་འཛིན་སྤྲིན་གྱི་རྒྱན། །བཀོད་པའི་འོད་ཟེར་ཆོས་དབྱིངས་རྒྱས་པར་བཀྱེ། །ཉིན་རེ་བཞིན་ཡང་མོས་པས་སྤེལ་ཏེ་མཆོད། །ཨོཾ་ཨཱརྻ་མཉྫུ་ཤྲཱི་སྭ་ར་སྭ་ཏཱི་ས་པ་རི་བཱ་ར་ཨརྒྷཾ་ནས། ཤབྡ་པྲ་ཏཱིཙྪ་སྭཱ་ཧཱ། ཨེ་ཡིག་དབྱངས་ཅན་དཔྱིད་ཀྱི་དཔལ་མོ་དང་། །མཉམ་སྦྱོར་ཝཾ་ཡིག་ཐིག་ལེ་བཅུ་དྲུག་ཆ། །འཇམ་དཔལ་དཔའ་བོ་ལས་བྱུང་རིགས་ཀུན་གྱི། །རྒྱལ་བ་སྲས་དང་བཅས་ལ་ཕྱག་འཚལ་བསྟོད། །དཀྱུས་རིང་ཐུགས་རྗེའི་སྤྱན་གྱིས་བྱང་ཆུབ་བར། །མི་འདོར་གཟིགས་ནས་སྙིང་ག་དྭངས་མའི་ཁྱིམ། །མགྲིན་པའི་པད་མཚོར་མི་འབྲལ་དགྱེས་རོལ་ཞིང་། །ཚད་མེད་དངོས་གྲུབ་གཉིས་ཀྱི་འདོད་འཇོར་མཛོད། །འཆད་ལ་སྨྲ་བ་འབུམ་གྱི་ལྗགས་གཡོ་ཞིང་། །རྩོད་པས་ཕྱོགས་ལས་རྣམ་རྒྱལ་སྤོབས་པ་མཐོ། །རྩོམ་པ་ཐོགས་མེད་ལེགས་བཤད་བྱེ་བའི་གཏེར། །མི་བརྗེད་གཟུངས་ཀྱི་བློ་གྲོས་མཐའ་ཡས་སྩོལ། ཁྱད་པར་གསུང་རབ་རྒྱ་མཚོས་མགྲིན་པ་བརྒྱན། །ཆོས་དོན་རྣམ་པར་འབྱེད་པའི་ཤེས་རབ་ཀྱིས། །ཟབ་མོ་སྟོང་དང་རྟེན་འབྱུང་མ་ནོར་བར། །རྟོགས་ནས་ཀུན་མཁྱེན་ཀུན་གྱི་མགོན་གྱུར་མཛོད། །མཆོད་བསྟོད་གསོལ་བ་གདབ་བྱས་ནས། །བཟོད་གསོལ་ཡེ་ཤེས་རྟེན་ལ་གཞུག །ཡང་ན་འཇིག་རྟེན་པ་ཡི་འཁོར། །བཅས་ཏེ་རང་བཞིན་གནས་སུ་གཤེགས། །དམ་ཚིག་པ་རྣམས་བདག་ལ་བསྡུ། །འཁོར་གསུམ་ཡོངས་དག་ཀློང་དུ་སྦ། །གང་ཞིག་གཏོར་མའི་ལས་ལ་བརྩོན། །དངོས་གྲུབ་ཉེ་ཞིང་བར་ཆད་ཀྱིས། །མི་ཚུགས་འདོད་པ་ཀུན་འཇོ་བའི། །སྔགས་ཤེས་གཏེར་གྱི་མཛོད་འདི་འོ། །གཏོར་མའི་ལེའུ་སྟེ་བཅུ་གཅིག་པ་འོ། ༈ །སྒྲུབ་རྟགས་མེ་ཏོག་འཁྲི་ཤིང་ནི། །སྲེག་བླུག་སྦྱོར་བས་འབྲས་བུ་འབྱིན། །མྱུར་ཞིང་བརྟན་པའི་བྱེད་པ་ཅན། །འདི་ལས་གཞན་དུ་མ་མཐོང་ངོ་། །རྒྱས་པ་གཞན་དུ་ཤེས་པར་བྱ། །ཤིན་ཏུ་བསྡུས་ལ་དགའ་བ་རྣམས། །ཚུལ་འདིར་འབད་པའང་འབྲས་བུར་བཅས། །གནས་དེ་ཉིད་དུ་མཎྜལ་ནི། །འདབ་བརྒྱད་སྟེང་དུ་བུད་ཤིང་བརྩེགས། །རྒྱུ་ནི་ཞི་སོགས་ལས་དང་བསྟུན། །དག་བྱེད་བཀྲ་ཤིས་རྩྭ་ཡིས་གཡོགས། །མེ་ཏོག་ཨ་རུ་ར་དང་སྤོས། །མར་མེ་དྲི་ལྔ་བཤོས་གཙང་དང་། །མར་ཁུ་ཀུ་ཤ་དཀར་མངར་གསུམ། །རྫས་བཅུ་བརྒྱ་རྩ་བརྒྱད་སོགས་བཤམ། །སྤྲོ་ན་ཀུ་ཤ་ཏིལ་ལ་སོགས། །སྤྱི་མཐུན་སོ་སོར་བཞག་པ་འམ། །བསྡུ་ན་ཕྱོགས་གཅིག་བསྲེས་པའང་རུང་། །བསང་སྦྱང་ཐབ་ཏུ་མེ་སྦར་ལ། །ཡབ་ཡུམ་ཡན་ལག་བཞི་རྫོགས་ཀྱི། །དབུ་རྒྱན་རིན་ཆེན་འབྱུང་དང་ལྡན། །ཕྱག་དང་མཆོད་པས་བཀུར་བྱས་ཏེ། །འབྲུ་གསུམ་སྔགས་ཀྱིས་བདུད་རྩི་རུ། །བྱི་བརླབས་རྫས་བཅུ་རྩ་སྔགས་སམ། ཨོཾ་ཧྲཱིཿདྷཱིཿམུཾ་ཡིག་འབྲུ་བཞིའི། །སྔགས་མཐར་ཕྲིན་ལས་སོ་སོའི་ཤམ། །གདགས་ཏེ་ཤེས་རབ་སྤེལ་མཚོན་ན། །མ་མ་པྲ་ཛྙཱ་པུཥྚིཾ་ཀུ་རུ་སྭཱ་ཧཱ། ཞེས་པས་རྫས་བཅུ་རེ་རེ་བཞིན། །བརྒྱ་རྩ་བརྒྱད་སོགས་རྫོགས་པ་དང་། །གཏོར་མ་འབུལ་ལ་འདོད་དོན་གསོལ། །ནོངས་བཤགས་ཡེ་ཤེས་རྟེན་ལ་གཤེགས། །དམ་ཚིག་བདག་བསྡུ་མེ་རང་ཞིའི། །ཐལ་བ་རི་རྩེ་ཆུ་ཀླུང་དུ། །དོར་བས་ཤེས་རབ་ཆེན་པོར་འགྱུར། །སྟོང་ཕྲག་བདུན་ནི་ཚད་དུ་བཤད། །གལ་ཏེ་བསྙེན་པའི་ཁ་སྐོང་ན། །རྫས་བཅུ་ལེགས་པར་ཕུལ་ནས་ནི། །མེ་ཏོག་སེར་པོས་གྲངས་སུ་གཟུང་། །ཞི་རྒྱས་དབང་གི་སྲེག་རྫས་རྒྱུ། །མདོག་དབྱིབས་ཆོ་གའི་སྤང་བླང་སོགས། །མ་བརྗོད་སྤྱི་དང་མཐུན་པར་སྤྱད། །སྦྱིན་སྲེག་ལེའུ་སྟེ་བཅུ་གཉིས་པ་འོ། ༈ །བཅུ་གསུམ་ལས་ལ་སྦྱོར་བའི་ཐབས། །དབྱེ་བ་མང་ཡང་བརྒྱད་དུ་སྡོམ། །རིལ་བུ་བཟའ་དང་ཚེ་དཔལ་སྤེལ། །འཆད་སོགས་ལས་དང་དབང་དུ་སྡུད། །ངག་བསྡུ་མངོན་ཤེས་རིག་པ་འཛིན། །ཞལ་ལ་བལྟ་བའི་ཐབས་རྣམས་སོ། །དང་པོ་རྟགས་རྫོགས་སྲེག་བླུག་གིས། །མཉེས་བྱས་ལྷ་རྣམས་ཞུ་བ་ཡི། །རིལ་བུ་རྣམས་ལས་ཕྱོགས་བཅུར་འོད། །རབ་འཕྲོས་ཚེ་དཔལ་ཤེས་རབ་དང་། ཁྱད་པར་གང་འདོད་དངོས་གྲུབ་བསྡུས། །ཚེ་བཀྲག་གཟི་བརྗིད་རྒྱས་འདོད་ན། །རིལ་བུ་ཡེ་ཤེས་བདུད་རྩི་ནི། ཁ་དོག་ལྔ་ལྡན་གྱུར་བསམ་ལ། །འཁོར་ལོས་དྲིལ་ནས་མགུལ་དུ་བཏགས། །ཉིན་ཞག་ཉི་ཤུ་རྩ་གཅིག་གི །ཐོ་རངས་ཁ་ཟས་མ་ཟོས་དུས། །བདག་ཉིད་སྨྲ་བའི་སེང་གེ་བསྒོམ། །རིལ་བུ་ལྔ་འམ་རེ་རེ་ནི། །དར་དམར་ལྕིབས་ཀྱིས་བླངས་ནས་ནི། །དབྱངས་ཅན་མར་བསྒོམ་བསྟོད་པ་བརྗོད། །འོད་ཞུ་འཆི་མེད་བདུད་རྩིར་མོས། །རིག་པ་བརྒྱ་རྩ་བརྒྱད་བཟླས་མིད། །ལྷག་མ་དྲོད་དང་མི་འབྲལ་བཅང་། །བརྒྱ་རྩ་བརྒྱད་ལས་གྲངས་མང་ན། ཁ་སྦྱར་ཙཀྲ་མ་བྲལ་བར། །དར་དམར་སྣོད་བླུགས་རིན་པོ་ཆེའི། །པར་བུར་བཅུག་ལ་མཆོད་གྲལ་བཞག །རིང་དུ་འཚོ་ཞིང་བཅུད་ལེན་འགྱུར། །དེས་མཚོན་ལས་ཀྱི་ཁ་བསྒྱུར་ཏེ། །འཆད་ལ་དཔལ་བེ་འུ་རྩོད་རལ་གྲི། །རྩོམ་ལ་པད་དཀར་སྙན་གྲགས་དུང་། །གཟུངས་ལ་གླེགས་བམ་འབྱོར་ནོར་བུ། །དབང་སྡུད་ལི་ཁྲི་བསམ་པ་ཀུན། །འགྲུབ་འདོད་བུམ་པ་བཟང་པོར་བསྒྱུར། །བཟའ་དུས་དམ་ཚིག་ལེགས་པར་བསྲུང་། །ཚུལ་བཞིན་སྤྱད་ན་བསམ་པ་ཀུན། །རྫོགས་བྱེད་ཡིད་བཞིན་ནོར་བུར་མཚུངས། ཁྱད་པར་ཤེས་རབ་འཕེལ་བར་འགྱུར། །ལྷག་མ་སླར་ཡང་སྒྲུབ་རྫས་ལ། །བསྲེས་པས་ཉིས་འགྱུར་འགྲུབ་ཐག་ཉེ། །གཉིས་པ་ཚེ་བསོད་སྤེལ་བ་ན། །རིལ་བུ་སེར་པོ་གྲུ་བཞིའི་དབྱིབས། །སྒྲུབ་དུས་ཚེ་བསོད་གཙོ་བོར་བསྡུ། །ཡབ་ཡུམ་གསེར་གྱི་མདོག་ཏུ་བསྒྱུར། །གྲུབ་ནས་གོང་སྨྲོས་ལྟར་སྤྱད་པས། །ཉི་ཟླ་དང་མཉམ་ཚེ་ཐོབ་ཅིང་། །འབྱོར་པ་རྒྱལ་པོ་འདྲ་བར་འགྱུར། །གསུམ་པ་འཆད་རྩོད་རྩོམ་སོགས་དང་། །འཛིན་ལ་འཇུག་ཚེ་ཡབ་ཡུམ་ལ། །བསྟོད་ཅིང་གསོལ་གདབ་འདོད་དོན་ཞུ། །ལྷ་ཡི་ང་རྒྱལ་ལྡན་པའི་ལྗགས། །དཔལ་གྱི་བེ་འུ་སོགས་སུ་བསྒྱུར། ཁྱད་པར་རྩོམ་པའི་ཐོག་མ་རུ། །ཡབ་ཡུམ་གཉིས་ལ་མཆོད་པར་བརྗོད། །འཇམ་དཔལ་རྡོ་རྗེ་དབྱངས་ཅན་མར། །ཕྱག་འཚལ་བསྟོད་ཅིང་གསོལ་བ་འདེབས། །རྩོམ་པའི་བློ་གྲོས་སྣང་བ་ནི། །རབ་ཏུ་འཕེལ་བར་མཛད་དུ་གསོལ། །རྩོམ་པ་མཐར་ཕྱིན་གཞན་ཕན་ནི། །ནམ་མཁའ་མཉམ་པར་བྱིན་གྱིས་རློབས། །ཞེས་གསོལ་ལས་ལ་གང་འཇུག་པ། །སྤོབས་པ་འཇམ་པའི་དབྱངས་མཚུངས་གྱུར། །རྩོད་ཚེ་བདག་ཉིད་འཇམ་དཔལ་གྱི། །དཔྲལ་བའི་དྷཱིཿལས་འོད་དམར་འཕྲོས། ཁོ་ཡི་ཤེས་རབ་བཀུག་བསམ་ལ། །སྲིན་ལག་རྩེས་བླངས་དྷཱིཿལ་བསྟིམ། ཨོཾ་ཧྲཱིཿདྷཱིཿཆེ་གེ་མོ་ཧ་ལ་ཧཱུྃ་ཕཊ། བརྒྱ་བཟླས་སེང་གེ་ལྟ་བུར་བསྒྲིམ། །རྩོད་པའི་ཕྱོགས་ལས་རྣམ་པར་རྒྱལ། །བཞི་པ་དབང་དུ་བྱེད་པ་ལ། །ཕལ་པ་མཆོག་གི་དབྱེ་བས་གཉིས། །ཕལ་ལ་སྤྱི་དང་ཁྱད་པར་རོ། །སྤྱི་ལ་དཔའ་བོ་བཅུ་གཉིས་སྟེང་། །ལི་ཁྲི་སེང་ལྡེང་སིནྡྷུ་ར། །སྦྱར་ལ་རྒྱ་སྐྱེགས་ཁུ་བས་བསྐུ །འཁོར་ལོར་དབང་སྡུད་སྤེལ་ཚིག་བྲི། །ལྷ་རྣམས་རཱ་གའི་མདོག་ཏུ་བསྒྱུར། །སྣོད་བཅུད་འོད་ཞུ་རིལ་བུར་བསྡུ། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མུཾ་ཧྲཱིཿཤྲཱི་སིཾ་ཧོ་ཥ་མུ་པ་ཏ་མཉྫུ་ཤྲཱི་ལོ་ཀ་སརྦ་བཱ་ཤཾ་ཀུ་རུ་སྭཱ་ཧཱ། ཁྲི་བཟླས་འོད་རླངས་མེ་ཏོག་ཆར། །དངོས་རབ་རྨི་ལམ་བྱུང་ན་འབྲིང་། །ཐ་མ་གཞན་ལ་ཡིད་ཆགས་ཚེ། །རིལ་བུ་བཟའ་དང་བཅང་བར་བྱ། ཁ་ཅིག་བཞི་མདོ་ཕོ་བྲང་གླིང་། །ཚོང་འདུས་སོགས་སུ་དམར་སེར་བའི། །ལྕི་བ་དང་བསྲེས་དུད་པ་གཏང་། །ཚོར་ཚད་འགྲོ་བ་དབང་དུ་འགྱུར། །བྱེ་བྲག་ཕོ་མོ་དབང་སྡུད་ན། །སྐྱེས་པར་པདྨ་རཀྟ་སྟེ། །བུད་མེད་ཟླ་བའི་ཁུ་བ་དང་། །གཉིས་ཀར་གུར་གུམ་གི་ཝཾ་བསྲེ། །བཅའ་གཞི་གཞན་པ་སྤྱི་དང་མཐུན། །ཕོ་ལ་རང་ཉིད་དབྱངས་ཅན་མ། །རིལ་བུ་འཇམ་དབྱངས་མོ་ལ་བཟློག །བསྒྲུབ་བྱའི་རྣམ་ཤེས་བཀུག་ནས་བསྟིམ། །རྩ་སྔགས་ཤམ་དུ་ཆེ་གེ་མོ། །བཱ་ཤཾ་ཀུ་རུ་ཧོཿཞེས་སྦྱར། །རྟགས་བྱུང་བཟའ་དང་བཅང་བ་དང་། །གཞན་ལ་བྱུགས་སམ་ཁོང་དུ་གཏང་། །དེ་བཞིན་འབངས་ལ་ཚ་བ་གསུམ། །ཕལ་པར་སེང་ལྡེང་སྦྱར་ལ་བསྒྲུབ། །མཆོག་ལ་རྒྱལ་པོ་དབང་སྡུད་ན། །དཔའ་བོ་བཅུ་གཉིས་ལྕགས་ཕྱེ་སྦྱར། །དེ་བཞིན་བཙུན་མོར་གི་ཝཾ་སྟེ། །བློན་ལ་འགྲོན་བུ་དགེ་བའི་བཤེས། །རིན་ཆེན་སྨན་པར་མཆུ་སྨྱུང་སྦྱར། །མིང་སྤེལ་སྒྲུབ་ཚུལ་གོང་དང་མཚུངས། །དཔྲལ་བར་ཐིག་ལེ་སོགས་ཀྱིས་སྡུད། །དབང་བྱེད་རིལ་བུ་ཐམས་ཅད་ཀྱང་། །སྦྲང་རྩིས་དྲིལ་ལ་ཙཀྲ་སོགས། །ཞིབ་པར་ཡིག་རྙིང་རྣམས་སུ་བལྟ། །ལྔ་པ་དབང་གི་ལས་བྱེ་བྲག །ངག་བསྡུ་བ་ལ་རྐུ་འཕྲོག་གཉིས། །རྐུ་བ་མཆོག་ལ་བྱ་བ་སྟེ། །བསྒྲུབ་བྱའི་ལྕེ་སྙིང་པདྨ་ནི། །དམར་པོ་འདབ་བརྒྱད་ཁ་སྦྱོར་བར། །རྣམ་ཤེས་ཤེས་རབ་ངོ་བོ་ནི། །དབྱངས་གསལ་དམར་དང་དཀར་པོས་ཁེངས། །བདག་སྲོག་འོད་ཀྱིས་འཕགས་རྣམས་ཀྱི། །ཤེས་རབ་བསྡུས་ནས་བསྟིམས་པ་དེ། །མཁྱེན་པའི་གཟི་ལྡན་ཁོང་བ་རུ། །ཤེས་རབ་བུང་བ་ཞུགས་ནས་ཁྱེར། །རང་གི་སྙིང་དང་ལྕེ་ལ་བསགས། །སྔགས་མཐར་བསྒྲུབ་བྱ་ཆེ་གེ་མོའི། །ཝཱ་ཀ་བཱ་ཤཾ་ཀུ་རུ་ཧོཿ བཟླས་མཐར་པདྨའང་རང་ལ་བསྟིམ། །སྙིང་ལ་འཇམ་དཔལ་ལྕེར་ལྷ་མོའི། །འཁོར་ལོ་གསལ་ནས་སྔགས་བཟླས་པས། །དེ་ཡི་བློ་གྲོས་དཔལ་ཐོབ་འགྱུར། །འཕྲོག་པ་དགྲ་ཟླར་རྩོད་ལ་སོགས། །དམན་པ་ལ་སྦྱར་ལུས་ཀྱི་ནང་། །དྷཱུ་ཏི་སྨིན་མཚམས་གསང་བར་ཟུག །དེ་ནང་ཤེས་རབ་ཨ་དཀར་གང་། །བདག་སྲོག་འོད་དམར་ལྕགས་ཀྱུ་ནི། །སྨིན་མཚམས་གྲུ་གསུམ་བུག་པར་ཞུགས། །ཨ་རྣམས་དྲངས་ཏེ་བདག་གི་རྒྱུད། །ཤེས་རབ་ཀྱིས་གང་ཕ་རོལ་སྟོང་། །སྔགས་བཟླས་དམིགས་དང་མཚུངས་པར་འགྱུར། །སླར་ཡང་གྲུབ་པའི་མན་ངག་ནི། །བློ་ལྡན་སྙིང་གི་པདྨོ་རྒྱས། །རྣམ་ཤེས་ཨཱ་ལི་ཀཱ་ལི་འཁྲིགས། །ཤེས་རབ་བུང་བས་བདག་ལ་བསྡུས། །སླར་ཞུགས་པདྨའི་བཀྲག་མདངས་འཇིབ། །འཕུར་ནས་དྷཱིཿལ་ཞུགས་པ་ཡིས། །ཤེས་རབ་གཟི་མདངས་རྒྱས་བསམ་མཐར། །པད་སྡོང་རྙིང་ཞིང་ཤེས་རབ་ཀྱི། །འཁོར་ལོ་ནུས་བཀྲག་མདངས་ལྡན་མོས། །གཉིས་ཀའི་ཆར་གཏོགས་ཟབ་མོ་འོ། །དྲུག་པ་མངོན་ཤེས་བསྒྲུབ་འདོད་ན། །མུ་ཏིག་དམར་པོ་ཀ་ར་སྦྱར། །ཝཱ་གི་ཤྭ་རི་མུཾ་སྭཱ་ཧཱ། །སྔགས་ཀྱི་ཤམ་གདགས་རྟགས་མཐོང་ནས། །ཉི་ཟླ་གཟའ་ཡིས་ཟིན་པའི་དུས། །བསྒྲུབ་ཟོས་མངོན་ཤེས་དྲུག་ཁྲི་ཐོབ། ཁ་ཅིག་ཀ་ར་མུ་ཏིག་དམར། །ཨར་ནག་སྤང་སྤོས་སྦྱར་བར་བཞེད། །བདུན་པ་རིག་པ་བསྒྲུབ་འདོད་ན། །རྩ་བའི་སྔགས་སྒྲུབ་སྔོན་སོང་ནས། །འཕྲོ་འདུ་སྤྱི་མཚུངས་རིག་པ་ནི། །ན་མོ་མཉྫུ་ཤྲཱི། ཀུ་མཱ་ར་བྷུ་ཏཱ་ཡ། ཏདྱ་ཐཱ། ཨོཾ་ཨ་ར་ཛེ། བི་ར་ཛེ། ཤུདྡྷེ་ཤུདྡྷེ། བི་ཤུདྡྷེ་བི་ཤུདྡྷེ། ཤོ་དྷ་ནི་ཤོ་དྷ་ནི། བི་ཤོ་དྷ་ནི་བི་ཤོ་དྷ་ནི། ཨ་མ་ལེ། བི་མ་ལེ། ཛ་ཡ་བ་ཏི། རུ་རུ་ཙ་ལེ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་སྭཱ་ཧཱ། འབུམ་ཕྲག་གཅིག་བཟླས་ན་མཁས་པར་འགྱུར་རོ། །གཉིས་བཟླས་ན་རིག་པ་འཛིན་པར་འགྱུར་རོ། །གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །གལ་ཏེ་མཚམས་མེད་པ་ལ་སྤྱོད་པ་ཡིན་ཡང་དེ་ལྟར་སྦྱོར་བ་ཉིད་གུས་པས་བསྒྲུབས་ན། དེ་དག་གི་རེ་བ་མཐའ་དག་བདག་གིས་རྫོགས་པར་བགྱིའོ། །གལ་ཏེ་དེ་ལྟར་མ་བགྱིས་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་རོ། །ཞེས་པ་རྡོ་རྗེའི་བདེན་ཚིག་གིས། །ཞལ་འཆེས་ཐུགས་དམ་བཞེས་པ་ཉིད། ཁ་ཅིག་བཀླགས་པས་འགྲུབ་བཤད་ཀྱང་། །ལུགས་འདིར་སྒྲུབ་པ་འདིར་འབྲེལ་གསུངས། །གཞན་ཡང་རྟ་ཡི་མགྲིན་པ་བསྡེབ། །རྐང་མགྱོགས་འགྲུབ་ལ་འུག་པ་དང་། །མཐིང་རིལ་མིག་བསྲེས་མིག་རྣོ་ཞིང་། །ས་འོག་གཏེར་མཐོང་ཕུག་རོན་དང་། །བྱ་རྒོད་མཁྲིས་པས་མངོན་ཤེས་འགྲུབ། །སྔགས་ཤམ་སྤྲོ་བསྡུ་འདོད་བཞིན་བསྒྱུར། །བརྒྱད་པ་རྗེ་བཙུན་ཞལ་བལྟ་བ། །རིལ་བུར་ག་པུར་གི་ཝང་བསྡེབ། །དངོས་གྲུབ་ཕྲེང་བ་ཉེར་གཅིག་དང་། །ན་མོ་མཉྫུ་ཤྲཱི་སིཾ་ཧ་ནི་ཡ་མཱནྟ་ཀ་ནི་ཧཱུྃ་ཕཊ། སྦྲེལ་ནས་ཁྲི་བཟླས་ཆུ་གཙང་མར། །བསྲེས་ལ་ལག་མཐིལ་གཡོན་དུ་བླུགས། །བརྒྱ་རྩའི་སྔགས་བཟླས་མིག་ལ་བྱུག །མཐོང་བ་དོན་ཡོད་གཞོན་ནུའི་ལུས། །སྐལ་ལྡན་མིག་ལ་སྣང་བར་འགྱུར། ཁ་ཅིག་རྫས་གཉིས་ཁོ་ནར་སྔགས། །བཏབ་ནས་མིག་ལ་བྱུགས་བཞེད་ཀྱང་། །ལུགས་འདིར་གོང་སྨྲོས་ཆོ་ག་ཡིས། །ཞལ་རས་བརྒྱུད་མར་མཇལ་བར་སྣང་། །དེ་ལྟར་བསྒྲུབས་དང་བསྒྲུབ་ལ་བསྐུལ་བའི་བསོད་ནམས་ཅུང་ཟད་ཐོབ་པ་དེས། །སྐྱེ་བ་བྱེ་བར་རྣ་བའི་སྣོད་དུ་རིན་ཐང་མེད་པའི་མཚན་གྱི་བཅུད། །ལེགས་བྱས་བརྒྱ་ཡིས་རིན་དུ་མི་ཁུག་འཇམ་དཔལ་རྡོ་རྗེ་བཙུན་མོར་བཅས། །དགྱེས་པར་རོལ་པའི་སྙིང་གི་དཔལ་བེའུ་མཁྱེན་གཉིས་དཔྱིད་ཀྱིས་གང་བར་ཤོག །འཇམ་དཔལ་དཔའ་བོའི་སྤྱོད་ལས་མི་ལྡོག་པའི། །བློ་ལྡན་མཚན་གྱི་གདུགས་གཅིག་ཞིང་ཀུན་ཏུ། ཁེབས་པས་རྒྱལ་རྣམས་བསྔགས་པའི་ལྗགས་རྐྱོང་བ། །བདག་སོགས་སྐྱེ་བའི་ཕྲེང་བར་ཐོབ་གྱུར་ཅིག །དོན་ཆེན་བསྒྲུབ་ལ་མི་བརྩོན་ན། །དེ་ཡི་དལ་བའི་རྟེན་གྱིས་ཅི། །འདི་བསྒྲུབས་དེ་ལས་ཐམས་ཅད་མཁྱེན། །འཇིག་རྟེན་གསུམ་གྱི་བླ་མར་ཤོག །སྨྲ་བའི་སེང་གེ་སྒྲུབ་པའི་ཐབས། །དམ་པའི་རྗེས་འབྲང་སྲོལ་མང་ཡང་། །རྡོ་རྗེའི་གཟི་བརྗིད་རབ་འབར་བ། །ངག་གི་དབང་ཕྱུག་བསམ་ཡས་པའི། །བཞེད་གཞུང་ཡི་གེ་རྙིང་པས་བརྒྱན། །དྲི་མེད་ཤེས་རབ་སྤྱན་སྒྲུབ་ན། །མིག་སྨན་ཐུར་མས་མི་མཚོན་པ། །གང་འདི་སྨྲ་བ་མགྲིན་པའི་རྔ། །འཇ༵མ་པའི་དབྱ༵ངས་འཛིན་ཐམས་ཅད་མཁྱེ༵ན་། །བརྩེ༵་ཆེན་དབང་ཕྱུག་བཀས་བསྐུལ་ཚེ། །འཇམ་དཔལ་ཐུགས་རྗེའི་གྲིབ་བསིལ་ལ། །སྐྱེ་བར་ངལ་འཚོ་ཐོབ་གྲགས་ཀྱང་། །མི་བཟད་རྨོངས་སོགས་དུག་གསུམ་པོས། །རང་ཚུལ་ཀུན་ནས་དཀྲིས་གྱུར་པ། །བློ༵་གྲོ༵ས་མཐ༵འ་ཡ༵ས་འདི་བསྙེན་ལ། །ཞུགས་ཚེ་རྟེན་འབྱུང་ཙམ་དུ་བྲིས། །དགེའོ། །དགེའོ། །དགེའོ།། །།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).