Terdzo-BI-058



Property "author" has been marked for restricted use.








Terdzo-BI-058.pdf
Click the picture above to view the Shechen manuscript.

བླ་མའི་ཐུགས་སྒྲུབ་བར་ཆད་ཀུན་སེལ་ལས༔ མི་གཡོ་བའི་སྒྲུབ་ཐབས་བདུད་བཞི་ཟིལ་གནོན་

bla ma'i thugs sgrub bar chad kun sel las:_mi g.yo ba'i sgrub thabs bdud bzhi zil gnon

by  འཇམ་དབྱངས་མཁྱེན་བརྩེའི་དབང་པོ་ (Jamyang Khyentse Wangpo)
revealed by  མཆོག་གྱུར་གླིང་པ་ (Chogyur Lingpa)
in cycle  མི་གཡོ་བ་བདུད་བཞི་ཟིལ་གནོན་ (Mi g.yo ba bdud bzhi zil gnon)
parent cycle  བླ་མའི་ཐུགས་སྒྲུབ་བར་ཆད་ཀུན་སེལ་ (Bla ma'i thugs sgrub bar chad kun sel)
Volume 45 (བི) / Pages 639-664 / Folios 1a1 to 13b1

Tibetan Text

ྈ བླ་མའི་ཐུགས་སྒྲུབ་བར་ཆད་ཀུན་སེལ་ལས༔ མི་གཡོ་བའི་སྒྲུབ་ཐབས་བདུད་བཞི་ཟིལ་གནོན་བཞུགས་སོ༔ ནང་བདུད་བཞིའི་བར་ཆད་སེལ་བ། ྈྈྈ མི་གཡོ་ཁྲོ་རྒྱལ་ཆེན་པོ་ནི༔ འཇིགས་པའི་བདུད་བཞིའི་གཉེན་པོ་སྟེ༔ དཀྱིལ་འཁོར་གཙོ་མཆོག་བདག་ཉིད་ཀྱི༔ ཕྱག་གཡོན་བྷནྡྷའི་ཆོ་འཕྲུལ་ལས༔ གཏུམ་ཆེན་དུས་མཐའི་མེ་ལྟར་ཤར༔ གང་འདུལ་སྒྱུ་མའི་རྣམ་རོལ་གྱིས༔ གདུལ་དཀའི་ཚོགས་རྣམས་འདུལ་བར་མཛད༔ ཕྱི་ལྟར་འཆི་མེད་ཁྲོ་རྒྱལ་དཀར༔ ནང་ལྟར་སྣང་སྟོང་གཏུམ་པོ་སེར༔ གསང་བ་བདེ་ཆེན་ཁྲག་འཐུང་དམར༔ ཡང་གསང་ཙཎྜ་མཐིང་ནག་འབར༔ ནམ་མཁའི་དབྱིངས་ལས་འཇའ་ཚོན་བཞིན༔ ཕྱག་རྒྱ་སྔགས་དང་ཡེ་ཤེས་ཀྱི༔ རྣམ་རོལ་བསམ་གྱིས་མི་ཁྱབ་པས༔ འཆི་བདག་ཕུང་པོ་ཉོན་མོངས་དང༔ ལྷ་བུའི་བདུད་ཀྱི་སྡེ་བཅོམ་ནས༔ རྣལ་འབྱོར་ཟབ་མོའི་དངོས་གྲུབ་ཐོབ༔ ས་མ་ཡ༔ དེ་ལ་དང་པོར་རྩ་བའི་ལྷ༔ གཏུམ་པོ་དཀར་པོའི་རྣལ་འབྱོར་གྱིས༔ འཆི་བདག་བདུད་ཚོགས་གཞོམ་པ་ནི༔ སྐྱབས་སེམས་ཚོགས་གསག་སྔོན་འགྲོ་བས༔ ཨ༔ འོད་གསལ་སྟོང་ཉིད་དབྱིངས་ཀྱི་ངང༔ རིག་པའི་ཡེ་ཤེས་ཧཱུྃ་དཀར་པོ༔ མཁའ་ལ་འཇའ་ཚོན་བཞིན་དུ་ཤར༔ འོད་འཕྲོས་རྒྱལ་བ་སྲས་བཅས་མཆོད༔ ཁམས་གསུམ་འགྲོ་བའི་སྒྲིབ་གཉིས་སྦྱངས༔ ཚུར་འདུས་ཡོངས་གྱུར་སྐད་ཅིག་གིས༔ པད་ཉི་འཆི་བདག་བདུད་ཀྱི་སྟེང༔ རང་ཉིད་ཟུང་འཇུག་སྒྱུ་མའི་ལྷ༔ གཏུམ་པོ་ཁྲོ་རྒྱལ་ཆེན་པོར་བཞེངས༔ དཀར་གསལ་ཁྲོ་ཞིང་བརྗིད་པའི་ཉམས༔ དབུ་སྐྲ་དམར་སེར་གྱེན་དུ་བརྫེས༔ ཕྱག་གཡས་ཡེ་ཤེས་རལ་གྲི་འཕྱར༔ གཡོན་པས་རྡོ་རྗེའི་ཞགས་པ་བསྣམས༔ ཞབས་གཉིས་གཡས་བརྐྱང་དོར་སྟབས་ཀྱིས༔ ཡེ་ཤེས་མེ་ཕུང་དབུས་ན་རོལ༔ སྟག་ཤམ་རིན་ཆེན་སྦྲུལ་གྱིས་བརྒྱན༔ གནས་གསུམ་ཨོཾ་ཨཱཿཧཱུྃ་གིས་མཚན༔ དེ་བཞིན་གཤེགས་པ་ཐམས་ཅད་ཀྱི༔ རྡོ་རྗེ་གསུམ་དང་དབྱེར་མེད་བསམ༔ ཧཱུྃ༔ ཡེ་ཤེས་དབྱིངས་ལས་རིག་པའི་སྐུ༔ གཏུམ་པོ་ཁྲོ་རྒྱལ་འཁོར་བཅས་ཀུན༔ འཆི་བདག་བདུད་ཚོགས་ཟིལ་གནོན་ཕྱིར༔ དྲག་པོའི་སྟབས་ཀྱིས་གཤེགས་སུ་གསོལ༔ ཨོཾ་ཙནྜ་མ་ཧཱ་རོ་ཥ་ཎ་ཨེ་ཧྱེ་ཧི༔ ཛཿཧཱུྃ་བཾ་ཧོ༔ སླར་ཡང་དབང་ལྷ་སྤྱན་དྲངས་ནས༔ དབང་བསྐུར་རིགས་བདག་དབུ་བརྒྱན་བསམ༔ ཨོཾ༔ དངོས་འབྱོར་ཡིད་ལས་བྱུང་བ་ཡི༔ ཀུན་ཏུ་བཟང་པོའི་མཆོད་སྤྲིན་གྱིས༔ ཆོས་དབྱིངས་རྒྱས་པར་བཀང་བྱས་ཏེ༔ གཏུམ་པོ་ཁྲོ་རྒྱལ་འཁོར་བཅས་མཆོད༔ ཨོཾ་བཛྲ་ཨརྒྷཾ་སོགས༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱིས༔ བདུད་ཚོགས་འདུལ་བར་དབང་བསྐུར་བའི༔ གཏུམ་པོ་ཁྲོ་རྒྱལ་འཁོར་བཅས་ལ༔ གུས་པས་བསྟོད་དོ་དངོས་གྲུབ་སྩོལ༔ ཅེས་བསྟོད་བསྙེན་པའི་དགོངས་པ་ནི༔ ཐུགས་ཀར་ཉི་སྟེང་ཧཱུྃ་གི་མཐར༔ སྔགས་ཕྲེང་གཡས་སུ་འཁོར་བ་ལས༔ འོད་འཕྲོས་ལུས་ཀྱི་ནང་ཀུན་གང༔ སྒྲིབ་དག་བྱིན་གྱིས་བརླབ་པར་བསམ༔ ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ སྒྲུབ་པའི་སྐབས་སུ་འོད་ཟེར་གྱིས༔ འཕགས་མཆོད་འགྲོ་བའི་སྒྲིབ་གཉིས་སྦྱངས༔ སྣོད་བཅུད་གཏུམ་པོའི་ཞིང་དང་སྐུ༔ སྔགས་ཀྱི་རང་སྒྲར་སད་པར་བསམ༔ ཚུར་འདུས་བདག་ལ་ཐིམ་པ་ཡིས༔ དངོས་གྲུབ་རྣམ་གཉིས་ཐོབ་པར་དམིགས༔ ལས་སྦྱོར་རང་གི་ཐུགས་ཀ་རུ༔ ཉི་ཟླའི་གྭའུ་ཁ་སྦྱོར་དབུས༔ རྡོ་རྗེ་རྩེ་ལྔ་ཧཱུྃ་གིས་མཚན༔ དེ་ཡི་ཁོག་པར་ནྲྀ་ཨས་མཚན༔ ཧཱུྃ་གི་འོད་ཀྱིས་ལུས་ཁྱབ་སྟེ༔ ནད་གདོན་སྡིག་སྒྲིབ་འཆི་རྐྱེན་སྦྱངས༔ སླར་ཡང་ཕྱིར་འཕྲོས་འཁོར་འདས་ཀྱི༔ ཚེ་བཅུད་བསྡུས་ནས་ནྲི་ཨར་ཐིམ༔ འཆི་མེད་རྡོ་རྗེའི་སྲོག་འགྲུབ་བསམ༔ ཨོཾ་ཨཱཿཧཱུྃ་ཙཎྜ་མ་ཧཱ་རོ་ཥ་ཎ་ཨཱ་ཡུ་ཥེ་སརྦ་སིདྡྷི་ཧཱུྃ་ནྲྀཿཛ་ཏིཥྛ་ཧཱུྃ༔ དེ་ལྟར་བསྙེན་སྒྲུབ་ལས་གསུམ་ལ༔ བདུན་ཕྲག་གསུམ་དུ་བརྩོན་པ་ན༔ དུས་མིན་འཆི་བའི་འཇིགས་པ་ཞི༔ ཟླ་དྲུག་རྩེ་གཅིག་ཡིད་ཀྱིས་བསྒོམ༔ དུས་ཀྱི་འཆི་བ་དག་ཀྱང་བཟློག༔ ཐུན་མཐར་མཆོད་བསྟོད་རིག་པའི་ལྷ༔ དབྱིངས་སུ་བསྟིམ་ནས་ཟུང་འཇུག་སྐུ༔ ཆུ་ཟླ་འཇའ་ཚོན་ལྟ་བུར་ལྡང༔ ཐུན་མཚམས་ཅི་འབྱོར་གཏོར་མ་ནི༔ འབྲུ་གསུམ་བྱིན་རླབས་རྩ་སྔགས་མཐར༔ ཨི་དཾ་བ་ལིཾ་ཏ་བྷུཉྫ་ཁ་ཁ་ཁཱ་ཧི་ཁཱ་ཧི༔ སརྦ་མཱ་ར་སེ་ན་པྲ་མརྡྷ་ན་ཧཱུྃ་ཕཊ༔ སརྦ་སིདྡྷི་མྨེ་པྲ་ཡཙྪ༔ སརྦ་ཀརྨ་ཀུ་རུ་ཀུ་རུ་སྭཱ་ཧཱ༔ ཞེས་བཏགས་ལན་བདུན་ལ་སོགས་ཕུལ༔ ཧཱུྃ༔ རྡོ་རྗེ་སྙིང་པོ་མཁའ་འདྲ་བ༔ མི་གཡོ་རལ་པ་གཅིག་གིས་བསྒྱིངས༔ དྲག་ཤུལ་ཆེན་པོའི་བྱིན་འཆང་བ༔ ཁྲོ་རྒྱལ་གཏུམ་པོ་འཁོར་དང་བཅས༔ འདོད་ཡོན་གཏོར་མ་འདི་བཞེས་ལ༔ བདུད་སྡེའི་དཔུང་ཚོགས་ཇི་སྙེད་ཀུན༔ སྲུང་དང་ཞི་དང་ཟློག་པ་དང༔ ཚར་གཅོད་ཕྲིན་ལས་བརྟུལ་ཞུགས་ཀྱིས༔ དམ་ཆོས་སྒྲུབ་པའི་བར་ཆད་རྣམས༔ མིང་གི་ལྷག་མ་མེད་པར་མཛོད༔ འཆི་མེད་ཚེ་དང་ཡེ་ཤེས་སོགས༔ དབང་བཅུའི་ཡོན་ཏན་གྲུབ་པ་དང༔ མདོར་ན་རྣམ་བཞིའི་ཕྲིན་ལས་ཀྱི༔ དངོས་གྲུབ་མ་ལུས་བསྩལ་དུ་གསོལ༔ ཞེས་གསོལ་བས་གཏོར་མ་བཞེས་ཤིང་དགྱེས་ཏེ་ཧ་ཧ་ཧི་ཧི་ཧེ་ཧེ་ཧཾ་ཧཾ་ཕཊ་ཅེས་དགྱེས་པའི་གད་མོ་དང་བཅས་ཏེ་ལས་ཐམས་ཅད་མཛད་པར་བསམ་མོ༔ ས་མ་ཡ༔ ཕུང་པོའི་བདུད་རྣམས་འཇོམས་པའི་ཕྱིར༔ གཏུམ་པོ་སེར་པོའི་ཏིང་འཛིན་ནི༔ རང་ཉིད་སྣང་སྟོང་མི་གཡོ་བ༔ གསེར་མདོག་ཁྲོ་གཏུམ་བརྗིད་པའི་ཉམས༔ རྡོ་རྗེ་དྲིལ་བུ་ཐུགས་ཀར་བསྣོལ༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ འོད་ཟེར་རབ་འབར་སྤྱན་གསུམ་པ༔ དར་དང་རིན་ཆེན་སྦྲུལ་གྱིས་བརྒྱན༔ སྣང་བཞིན་སྟོང་ལ་སྟོང་བཞིན་སྣང༔ མེ་ལོང་དྭངས་པར་གཟུགས་བརྙན་བཞིན༔ ཆུ་ཟླ་དང་ནི་འཇའ་ཚོན་ལྟར༔ རང་བཞིན་མ་གྲུབ་ཅིར་ཡང་གསལ༔ སྒྱུ་འཕྲུལ་དྲྭ་བ་ཆེན་པོའི་ཚུལ༔ ཡེ་ཤེས་མེ་དཔུང་འབར་བའི་ཀློང༔ གསལ་འགྲིབ་བྲལ་བའི་ཕྱག་རྒྱར་ཤར༔ ཧཱུྃ་ཧཱུྃ་ཧཱུྃ༔ དམ་ཚིག་ཡེ་ཤེས་གདོད་མ་ནས༔ རྣམ་དབྱེར་མེད་པའི་ཐུགས་ཀ་རུ༔ ཉི་སྟེང་ཧཱུྃ་མཐར་སྔགས་ཀྱིས་བསྐོར༔ འོད་འཕྲོས་རྒྱལ་བ་སྲས་བཅས་མཆོད༔ ཁམས་གསུམ་སྒྲིབ་གཉིས་ཡོངས་སུ་སྦྱངས༔ ཚུར་འདུས་སྣང་སྟོང་དབྱེར་མེད་པའི༔ ཏིང་འཛིན་མཆོག་ཏུ་བརྟན་པར་བསམ༔ ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཧཱུྃ་ཧཱུྃ༔ རང་དང་སྣང་བ་ཐམས་ཅད་ཀུན༔ ལྷར་སྣང་སྒྱུ་མ་ཆུ་ཟླ་དང༔ འཇའ་ཚོན་སྨིག་རྒྱུ་ལྟ་བུར་བལྟ༔ ཁྱད་པར་རང་གི་ཕུང་པོ་ལ༔ བདེན་འཛིན་ཞེན་པ་གཞིག་པའི་སླད༔ རེས་འགའ་སྣང་བཅས་སྟོང་པར་བསྒོམ༔ རེས་འགའ་སྣང་མེད་སྟོང་པར་བཞག༔ རེས་འགའ་བདག་དང་ལྷ་དང་ནི༔ ཕུང་པོ་གཅིག་དང་ཐ་དད་བརྟག༔ དེ་བཞིན་སྐྱེ་འགག་གནས་གསུམ་དཔྱད༔ བདེན་མེད་སྒྱུ་མ་དངོས་སྣང་བའི༔ རྟེན་འབྲེལ་ཙམ་དུ་ཐག་ཆོད་ན༔ ངལ་གསོ་ཤེས་པ་རྣལ་དུ་དབབ༔ དེ་བཞིན་ཆོས་རྣམས་ཀུན་ལ་སྦྱང༔ ཁྱད་པར་ན་ཚ་སྡུག་བསྔལ་སོགས༔ རྐྱེན་སྣང་ཐམས་ཅད་ཐོག་བརྫིས་བྱ༔ གེགས་སེལ་བོགས་འདོན་ཤུགས་ཀྱིས་འབྱུང༔ སློང་ཚར་རྟེན་འབྲེལ་ཐམས་ཅད་འགྲིགས༔ སྣང་བ་ཟིལ་གནོན་སྣང་སེམས་འདྲེས༔ དངོས་སུ་འབྱུང་བཞིའི་འཇིགས་པ་བྲལ༔ ཏིང་འཛིན་རྫུ་འཕྲུལ་མངོན་ཤེས་འཆར༔ ཡན་ལག་མཚན་མོའི་རྣལ་འབྱོར་ནི༔ ཉལ་དུས་སྒྱུ་མའི་ལྷ་སྐུར་གསལ༔ སྙིང་ཉིད་མཆོང་གུར་སྨུག་པོའི་དབུས༔ ཨ་ཡིག་འོད་ལྔ་འབར་བ་ལ༔ ཡིད་གཏད་སྒྱུ་མའི་ངང་དུ་མནལ༔ འོད་གསལ་ཟིན་ཞིང་རྨི་ལམ་འབྱོངས༔ སྒྱུ་མའི་ཕུང་པོ་འདོར་བའི་ཚེ༔ ཨ་ལ་སེམས་གཏད་ཟིན་པ་ན༔ ཕཊ་ཀྱི་སྒྲ་ཡིས་དབྱིངས་སུ་འཕོ༔ སྣང་གྲགས་རྟོག་པའི་ཆོས་རྣམས་ཀུན༔ འཇའ་ཚོན་བྲག་ཆ་སྒྱུ་མ་ལྟར༔ ངོ་ཤེས་ཐག་ཆོད་གདིང་ཐོབ་ན༔ བར་དོ་སྒྱུ་མའི་ལྷ་སྐུར་ཤར༔ ཁྱད་པར་ཡང་ཟབ་དམིགས་པ་ནི༔ སྒྱུ་མ་ལྟ་བུར་འབྱོངས་པའི་རྗེས༔ རང་ལུས་ཕྱི་དབྱིབས་གཏུམ་པོའི་ལྷ༔ སྣང་སྟོང་གཞའ་ཚོན་ཕྱག་རྒྱའི་དབུས༔ རྩ་གསུམ་འཁོར་ལོ་ལྔ་དང་བཅས༔ རྙོག་མེད་དྭངས་ཤིང་ཆེས་གསལ་བསྒོམ༔ ལུས་གནད་བཅས་ཏེ་རླུང་རོ་བསལ༔ ངལ་གསོ་རླུང་རིག་དལ་བ་དང༔ དལ་བུས་རྔུབ་ནས་འཇམ་རླུང་གཟུང༔ འཁོར་ལོ་ལྔ་རུ་ཐིག་ལེ་ནི༔ དཀར་དམར་མཐིང་སེར་ལྗང་གུ་བསྒོམ༔ རླུང་གནས་ཚེ་ན་ཐིག་ལེ་ལས༔ རང་རང་འོད་བྱུང་རྩ་འཁོར་གང༔ ལྡང་ཚེ་ཕྱིར་འཕྲོས་ལུས་རྣམས་ཀུན༔ ལྔ་ལྡན་འཇའ་ཚོན་ལྟ་བུར་བལྟ༔ སླར་ཡང་རླུང་ནི་ཁ་དོག་ལྔ༔ སོར་བཞིའི་ཚོད་རེ་རྔུབ་དགང་གཞིལ༔ རླུང་སེམས་དབྱེར་མེད་ཐུབ་ཚོད་གཟུང༔ མི་ཐུབ་དལ་བུས་བཏང་བྱས་པས༔ ལུས་ནི་མཁའ་ལ་སྤྲིན་དེངས་ལྟར༔ འོད་གསལ་དབྱིངས་སུ་ཡལ་བར་བསམ༔ གེགས་སེལ་ལུས་སྦྱང་ཧ་སྤྲུག་དང༔ བོགས་འདོན་བར་རླུང་རྒྱུན་དུ་བརྟེན༔ འདི་ལྟ་བུ་ཡི་ཐབས་མཁས་ཀྱིས༔ རླུང་སེམས་སྒྱུ་མའི་ལྷ་སྐུ་འགྲུབ༔ རྣམ་སྨིན་རིག་འཛིན་མྱུར་ཐོབ་འགྱུར༔ ཉམས་ལེན་ཀུན་གྱི་སྤྱི་ཆིངས་སུ༔ བླ་མར་བཟོད་མེད་མོས་གུས་བསྐྱེད༔ སྣང་ཡུལ་སྒྱུ་མ་ལྟ་བུར་བལྟ༔ སེམས་ཉིད་སྤྲོས་བྲལ་དབྱིངས་སུ་ཀློད༔ སྐབས་སུ་སྟོང་པར་ཕྱམ་ཕྱམ་གཞག༔ རེས་འགའ་གསལ་བའི་ངར་བསྐྱེད་ཅིང༔ སེམས་ཅན་རྣམས་ལ་སྙིང་རྗེ་བྱ༔ ཀུན་ཀྱང་བདེན་ཞེན་རྣམ་དག་པས༔ ཕུང་པོ་བདག་ཏུ་འཛིན་པའི་བདུད༔ རང་གྲོལ་དོན་གྱི་གཏུམ་པོ་ཆེའི༔ ཡེ་ཤེས་ཕྱག་རྒྱ་མངོན་དུ་ཐོབ༔ ས་མ་ཡ༔ ཉོན་མོངས་བདུད་རྣམས་འཇོམས་པའི་ཕྱིར༔ གཏུམ་པོ་དམར་པོའི་ཏིང་འཛིན་ནི༔ རང་ཉིད་བདེ་ཆེན་མི་གཡོ་བ༔ སྐུ་མདོག་དམར་གསལ་ཆགས་པའི་ཉམས༔ ཕྱག་གཡས་དབང་སྡུད་ཕྱག་རྒྱ་ཡིས༔ རྡོ་རྗེའི་གྲི་གུག་ནམ་མཁར་གདེངས༔ གཡོན་པས་སྡིགས་མཛུབ་ཞགས་པ་བསྣམས༔ ཞབས་ཟུང་པུས་གཡོན་གདན་ལ་བཙུགས༔ གཡས་པ་བཞེངས་ཚུལ་སྟབས་ཀྱིས་བཞུགས༔ དར་དང་རིན་ཆེན་སྦྲུལ་རྒྱན་བཅས༔ ཡེ་ཤེས་མེ་ཕུང་དབུས་ན་རོལ༔ སྣང་སྟོང་སྒྱུ་མའི་སྐུར་གསལ་ཞིང༔ འབྱུང་འཇུག་གནས་གསུམ་སྔགས་དང་སྦྱར༔ ཨོཾ་ཙཎྜ་མ་ཧཱ་རོ་ཥ་ཎ་མ་ཧཱ་སུ་ཁ་སིདྡྷི་ཧཱུྃ་ཧཱུྃ༔ ཞེས་བཟླས་རླུང་ལམ་འབྱོངས་པ་ན༔ ལུས་གནད་དང་བཅས་ལུས་ཀྱི་དབུས༔ རྩ་གསུམ་འཁོར་ལོ་བཞི་ལྡན་པའི༔ གསུམ་ཀ་འདུས་མདོར་ཨ་ཤད་བསྒོམ༔ རླུང་རོ་བསལ་ཞིང་འོག་རླུང་བསྐུམ༔ སྟེང་རླུང་མནན་པས་ཨ་ཤད་ལས༔ མེ་ལྕེ་ཤིན་ཏུ་ཕྲ་བ་བྱུང༔ དབུ་མའི་ནང་ནས་ཐལ་གྱིས་སོང༔ སྤྱི་བོའི་ཧཾ་ལ་རེག་པའི་མོད༔ ཧཱུྃ་ཡིག་མཐའ་སྐོར་ཐིག་ལེ་ནི༔ བཅུ་དྲུག་ཉུངས་དཀར་འབྲུ་ཚད་ཙམ༔ དེ་ལ་ཕོག་པས་འོད་དུ་ཞུ༔ དབུ་མའི་ནང་བརྒྱུད་ཨ་ཤད་ལ༔ ཐིམ་པས་མེ་ལ་ཏིལ་མར་གྱིས༔ གསོས་བཏབ་བཞིན་དུ་ཆེར་འབར་ནས༔ འབར་འཛག་དཀར་དམར་སྣང་བས་གང༔ བདེ་བ་ལྷང་གིས་ཤར་བའི་ཚེ༔ དེ་ལ་མ་ཡེངས་ཅེར་གྱིས་བལྟ༔ རང་གྲོལ་སྐྱེ་མེད་ངང་དུ་བཞག༔ སྟོང་ཉིད་ངང་དུ་ལྷན་གནས་ཚེ༔ སྔར་ལྟར་བདེ་བའི་ཡེ་ཤེས་སྤེལ༔ བདེ་བ་ཆེ་ནས་མི་བཟོད་ན༔ ཐིག་ལེ་སྤྱི་བོའི་ཧཾ་ལ་བསྟིམ༔ བསམ་བརྗོད་བྲལ་བའི་དབྱིངས་སུ་ཀློད༔ དེ་ལ་ཅི་རིགས་གོམས་པ་ན༔ ཡེ་ཤེས་ཕྱག་རྒྱར་སྙོམས་ཞུགས་པས༔ བདེ་ཆེན་སྤེལ་ཞིང་བརྟན་པ་དང༔ གཉིས་མེད་ཀ་དག་ཕྱག་རྒྱས་གདབ༔ ཐིག་ལེ་འཛིན་འདྲེན་དབང་ཐོབ་ནས༔ པདྨ་ཅན་སོགས་མཚན་ལྡན་པའི༔ ལས་ཀྱི་ཕྱག་རྒྱ་དགུག་བྱས་ལ༔ དྲང་ངེས་ཆོས་བཤད་བློ་སྦྱངས་ཏེ༔ དབང་བསྐུར་རྡོ་རྗེའི་དམ་ཚིག་འབོགས༔ རྩ་རླུང་འཕྲུལ་འཁོར་ལེགས་པར་བསྟན༔ དེ་ནས་ཤིན་ཏུ་དབེན་པའི་གནས༔ བདེ་བའི་འབོལ་ལ་རང་ཉིད་དང༔ མདུན་དུ་ཕྱག་རྒྱ་ཆས་ལྡན་འདུག༔ རང་ལུས་གཏུམ་པོ་དམར་པོ་ལ༔ ཡུམ་ནི་གཏུམ་མོ་རང་འདྲ་བ༔ མཚར་སྡུག་ཡིད་འོང་དྲན་པའི་མོད༔ བདེ་ཆེན་ཡེ་ཤེས་སྐྱེ་བར་བསྒོམ༔ ཟུར་གྱིས་བལྟ་ཞིང་ཆགས་གཏམ་བརྗོད༔ འོ་བྱ་ལུས་སེམས་བདེ་བ་བསྐྱེད༔ བདེ་བ་ཁྲིལ་གྱིས་སྐྱེས་པའི་ཚེ༔ དེ་ཡི་ངང་ལ་ལྷོད་ཀྱིས་ཀློད༔ དེ་ནས་གཉིས་ཀའི་གནས་གསུམ་དུ༔ རྡོ་རྗེ་གསུམ་དངོས་ཨོཾ་ཨཱཿཧཱུྃ༔ གསང་བ་རྡོ་རྗེ་པདྨ་ལ༔ བུ་ག་ཧཱུྃ་དང་ཕཊ་ཀྱིས་དགག༔ འདོད་པའི་སྒྱུ་རྩལ་དང་བཅས་ཏེ༔ དམ་འཁྱུད་མཁའ་གསང་དལ་བུས་བསྐྱོད༔ དེ་ཚེ་ཐིག་ལེ་སྤྱི་བོ་ནས༔ མགྲིན་པའི་བར་སོན་དགའ་བ་སྟེ༔ སྙིང་གར་བབས་པས་མཆོག་དགའ་དང༔ ལྟེ་བར་སོན་པ་ཁྱད་པར་དགའ༔ གསང་བ་ནོར་བུའི་རྩེར་བབས་པ༔ ལྷན་ཅིག་སྐྱེས་པའི་དགའ་བ་ཉིད༔ དང་པོར་རྡོ་རྗེའི་དབུས་གནས་ཚེ༔ བདེ་ལ་སེམས་བཟུང་ངང་དུ་བཞག༔ བདེ་བ་ཆེ་ནས་འཆོར་འདྲ་ན༔ མིག་ནི་ནམ་མཁའི་ཁམས་སུ་བགྲད༔ ལྕེ་རྩ་རྐན་ལ་སྦྱར་ནས་ཀྱང༔ རྒྱུ་ཞབས་བརྒལ་བར་བཅང་བ་དང༔ ལྷན་ཅིག་ཧཱུྃ་ཞེས་རླུང་གདངས་བཅས༔ བུམ་ཅན་སྟོད་དུ་འཆིང་བས་དྲང༔ ཐིག་ལེ་མས་བརྟན་དགའ་བཞི་འཆར༔ ཅུང་ཟད་གོམས་པར་གྱུར་པ་ན༔ ནོར་བུའི་རྩེར་ཕབ་སྔར་བཞིན་དྲང༔ ཤིན་ཏུ་གོམས་པ་བརྟན་པའི་ཚེ༔ ཡུམ་གྱི་མཁར་ཕབ་བྱང་སེམས་བསྲེ༔ བདེ་བ་ངོས་གཟུང་སྟོང་ཉིད་བཞག༔ ཡུམ་ནི་བདེ་བས་མ་བཟོད་དེ༔ བརྟན་གཡོའི་དྭངས་བཅུད་ཐམས་ཅད་དང༔ དབྱེར་མེད་ཐིག་ལེ་དམར་པོར་ཞུ༔ རང་གི་ཁམས་དང་ལྷན་ཅིག་ཏུ༔ རྡོ་རྗེའི་ལམ་ནས་རང་དྲངས་ཏེ༔ སྔར་བཞིན་མས་བརྟན་དགའ་བཞི་སྤེལ༔ སྟོང་པ་གཞི་ཡི་འོད་གསལ་དང༔ རོ་མཉམ་ཟུང་འཇུག་ཆེན་པོར་བཞག༔ སྐབས་སུ་མཚན་ལྡན་ཕྱག་རྒྱའི་གཟུགས༔ མེ་ལོང་ནང་དུ་འཆར་གཞུག་ལ༔ དེ་དང་ཡིད་ཀྱིས་སྙོམས་འཇུག་བྱ༔ བདེ་བ་སྐྱེས་ཚེ་སྒྱུ་མར་བལྟ༔ གེགས་སེལ་དང་ནི་དབང་བསྐུར་ལ༔ ཡུམ་གྱི་མཁའ་རུ་དཀྱིལ་འཁོར་བསྒོམ༔ དེ་ལ་མཆོད་ཕྱིར་བདུད་རྩི་སྤྲོ༔ བྱང་སེམས་འདྲེས་པ་ལྕེས་བླངས་ཏེ༔ ལུས་སྤྲུགས་རླུང་གཟུང་འཕྲུལ་འཁོར་བྱ༔ ཁྱད་པར་ཐིག་ལེ་འདྲེན་པའི་ཚེ༔ རླུང་གི་སྦྱོར་བས་དགྲམ་པ་དང༔ སྲིན་ལག་ལ་བཀལ་ལུས་སྤྲུག་བྱ༔ རྩ་གནས་བདེ་བས་ཁྱབ་པའི་ཉམས༔ ཤར་ཚེ་སྟོང་ཉིད་ངང་དུ་ཀློད༔ དེ་ལྟ་བུ་ཡི་རྣལ་འབྱོར་གྱིས༔ ཉོན་མོངས་འདོད་ལ་ཆགས་པའི་བདུད༔ བདེ་བ་ཆེན་པོར་ལམ་ལོངས་པས༔ ལྷན་སྐྱེས་ཡེ་ཤེས་མྱུར་དུ་འདྲེན༔ ལྷན་སྐྱེས་དེ་ཉིད་མཚོན་ཙམ་གྱིས༔ ཞེ་སྡང་གསལ་སྟོང་ཆེན་པོར་དག༔ གཏི་མུག་མི་རྟོག་ཡེ་ཤེས་འགྱུར༔ ང་རྒྱལ་བདེན་མེད་སྒྱུ་མར་གྲོལ༔ ཕྲག་དོག་སྦྲུལ་གྱི་མདུད་པ་ཞིག༔ ཉོན་མོངས་བདུད་ཚོགས་རྩད་ནས་འཇོམས༔ དེ་ལྟར་གྲུབ་པའི་སྐལ་མེད་ན༔ རང་ལུས་ལྷ་སྐུ་སྒྱུ་མ་དང༔ སེམས་ཉིད་རིག་སྟོང་གཉུག་མའི་ངང༔ སྤྲོ་བསྡུ་མེད་པར་བཞག་པ་ཡིས༔ དུག་ལྔ་སྐྱེས་གྲོལ་དུས་མཉམ་པས༔ ལས་མེད་འཁོར་བར་འཆིང་མི་ནུས༔ རྩལ་རྫོགས་ཡེ་ཤེས་རོལ་པར་འཆར༔ མཐར་ཕྱིན་ཀུན་ཏུ་བཟང་པོ་ཡི༔ དགོངས་པ་མཚོན་པར་ནུས་པ་འོ༔ ས་མ་ཡ་རྒྱ་རྒྱ༔ ཟབ་རྒྱ༔ གུ་ཧྱ༔ ལྷ་བུའི་བདུད་ཚོགས་འཇོམས་པའི་ཕྱིར༔ གཏུམ་པོ་མཐིང་གའི་ཏིང་འཛིན་བསྒོམ༔ རང་ཉིད་འོད་གསལ་མི་གཡོ་བ༔ ཨིནྡྲ་ནཱི་ལ་དྭངས་པའི་མདོག༔ ཞབས་གཡས་པུས་བཙུགས་གདན་ལ་རོལ༔ གཡོན་པ་བཞེངས་མ་སྟབས་སུ་བཞུགས༔ ཕྱག་གཉིས་རལ་གྲི་སྡིགས་མཛུབ་ལས༔ ཡེ་ཤེས་མེ་ལྕེ་དུམ་བུར་འཕྲོ༔ ཁྲོ་གཏུམ་བཟོད་དཀའི་གཟི་བྱིན་ཅན༔ དར་དང་རིན་ཆེན་སྦྲུལ་གྱིས་བརྒྱན༔ ཆུ་ཟླ་འཇའ་ཚོན་ལྟ་བུར་བསྒོམ༔ བྲག་ཅ་དང་ནི་སྒྲ་བརྙན་བཞིན༔ གྲགས་སྟོང་རྡོ་རྗེའི་སྔགས་འདི་བཟླ༔ ཨོཾ་ཙཎྜ་མ་ཧཱ་རོ་ཥ་ཎ་ཀཱ་མ་དེ་བ་མཱ་ར་སེ་ན་པྲ་མརྡྷ་ན་ཧཱུྃ་ཕཊ༔ བདེན་མེད་སྒྱུ་མ་རྨི་ལམ་བཞིན༔ རིག་སྟོང་དགོངས་པའི་གཟེར་ཆེན་གདབ༔ འདི་ཙམ་ཁོ་ནར་བརྩོན་པས་ཀྱང༔ རྣམ་གཡེང་སླུ་བྲིད་ལྷ་བུའི་བདུད༔ བྱེ་བས་ཀྱང་ནི་ཚུགས་མི་འགྱུར༔ ཁྱད་པར་གོས་ཀྱི་ཞེན་གཅོད་ཕྱིར༔ ཙཎྜ་ལཱི་ཡི་རྣལ་འབྱོར་ནི༔ ལུས་གནད་དང་བཅས་སྟོང་ར་བསྒོམ༔ རྩ་གསུམ་འདུས་མདོར་ཨ་ཤད་ནི༔ མེ་ལྕེ་འབར་ལ་ཁད་པ་གསལ༔ འཇམ་རླུང་དལ་བུས་བསྐུལ་བ་ཡིས༔ མེ་ལྕེ་སོར་བཞི་ཙམ་དུ་འབར༔ སྙིང་གར་བླ་མའི་ངོ་བོ་ཧཱུྃ༔ མེ་ཡི་རང་བཞིན་བསྲོས་བྱས་པས༔ དབུ་མའི་ནང་ཀུན་ཚ་བའི་དྲོད༔ ཤུགས་དྲག་རིམ་གྱིས་སྐྱེས་པར་བསམ༔ ཐུན་རེར་བརྒྱ་ལས་མི་ཉུང་བའི༔ རླུང་ཁུག་གཟུང་ཞིང་འཕྲུལ་འཁོར་བྱ༔ དེ་ཡིས་ལྟེ་འོག་དྲོས་པ་ན༔ རིམ་བཞིན་ལྟེ་བ་སྙིང་ག་དང༔ མགྲིན་པའི་བར་དུ་བསྲིངས་ལ་སྦར༔ དེ་ནས་རོ་རྐྱང་ལམ་དུ་གཞུག༔ ལུས་ཀྱི་གཡས་གཡོན་དྲོས་པ་ན༔ རྩ་འདབ་ཐམས་ཅད་མེ་ལྕེས་བཀང༔ དེ་བཞིན་རྐང་ལག་བཞི་པོ་དང༔ མགོ་བོའི་ནང་ཀུན་གང་བར་དམིགས༔ ལུས་ནི་མཐིང་ལ་དམར་འོད་ཅན༔ ལྕགས་བསྲེགས་ལྟ་བུར་ཚ་བར་བསམ༔ དེ་ནས་སྒོ་དགུ་བ་སྤུ་ཡི༔ ཁུང་བུ་ཀུན་ནས་མེ་འབར་བས༔ མེ་ཡི་གོང་བུར་ཚུད་པར་དམིགས༔ མཐར་ནི་དཔག་ཚད་ཙམ་དུ་སྦར༔ དེ་ཡང་སྔ་མར་དྲོད་སྐྱེས་ན༔ ཕྱི་མར་རིམ་བཞིན་འཇུག་པ་ཡིས༔ དབང་པོ་ཇི་ལྟར་རྒུད་གྱུར་ཀྱང༔ རྩེ་གཅིག་ཟླ་བ་གསུམ་བསྒོམས་ན༔ གོས་མེད་ཏི་སེའི་རྩེ་ཡང་ཟིན༔ རབ་ཀྱིས་ཞག་གསུམ་བདུན་ན་འགྲུབ༔ ཐུན་མོང་རྫས་ཀྱི་གཏུམ་མོ་ནི༔ གཡག་རྒོད་མཁྲིས་པ་དྲོན་མོའི་ནང༔ ཚ་བ་གསུམ་དང་ཚྭ་སྣ་གསུམ༔ ཟི་ར་ནག་པོ་ཤིང་ཀུན་དང༔ འགྲོན་བུའི་ཐལ་བ་བཏབ་ལ་བསྐམ༔ ཞིབ་བཏགས་གར་ཆང་ཉིང་ཁུ་ཡིས༔ རིལ་བུ་སྲན་མ་ཙམ་དུ་དྲིལ༔ ལྔ་བདུན་དགུ་སོགས་ཉམ་དཔགས་ནས༔ ཆང་བཟང་གིས་ཕུལ་ཕྱི་རུ་བྱུགས༔ གློ་བུར་གཏུམ་མོ་འབར་བར་འགྱུར༔ ཟས་ཀྱི་ཞེན་པ་གཅོད་པའི་ཕྱིར༔ ནམ་མཁའི་བཅུད་ཀྱིས་འཚོ་བ་ནི༔ ནམ་མཁའ་རྒྱ་ཆེར་མཐོང་བའི་སར༔ བླ་མར་གསོལ་གདབ་མོས་གུས་བསྐྱེད༔ ལུས་གནད་དྲང་པོར་བསྲང་བྱས་ཏེ༔ རླུང་རོ་བསལ་ཞིང་ཧ་སྤྲུག་བྱ༔ ངལ་གསོ་ལུས་གནད་ཅི་བདེར་འདུག༔ ཁམས་གསུམ་ནམ་མཁའི་བཅུད་ཐམས་ཅད༔ བསྡུས་ནས་བདུད་རྩི་སྔོན་པོར་ཞུ༔ ཁ་ནས་ཧུབ་ཅེས་ཁོང་པར་མིད༔ ལུས་ཁེངས་མཐིང་ཞུན་ལྟ་བུར་བསམ༔ ཐུབ་ཚད་བཟུང་ལ་རྔུབ་ཆུང་བྱ༔ མ་ཐུབ་ཕྱིར་འཕང་སླར་ཡང་བསྐྱར༔ ཤེས་པ་ནམ་མཁའི་ཁམས་སུ་གཏད༔ དབྱིངས་རིག་བསྲེས་ཏེ་མཉམ་པར་གཞག༔ སྐོམ་ན་ནམ་མཁར་བཾ་དཀར་པོ༔ དངུལ་ཆུ་དྭངས་པ་ལྟ་བུ་ལས༔ འོད་འཕྲོས་འཁོར་འདས་བདུད་རྩི་བསྡུ༔ དེ་ལ་བདུད་རྩིའི་རྒྱུན་བྱུང་བ༔ སོ་བར་ནས་དྲངས་མཆིལ་མ་བཅས༔ ཁོང་དུ་མིད་ཅིང་རླུང་མནན་པས༔ ལུས་ཀུན་བདུད་རྩིས་ལྟེམ་གང་བསམ༔ དེ་ལྟར་རགས་པའི་ཟས་སྤངས་ཏེ༔ བདུན་ཕྲག་བདུན་དུ་སྤེལ་ཏེ་སྦྱང༔ གོམས་པ་སྟོབས་སུ་གྱུར་པ་ན༔ ཟས་མེད་རི་ལ་ལོར་སྒྲུབ་ཀྱང༔ ལུས་སྟོབས་རྒྱས་ཤིང་འཆི་བ་མེད༔ ཐུན་མོང་རྫས་ཀྱི་བཅུད་ལེན་ནི༔ ཅོང་ཞི་ནས་ཙམ་ཁྲུཾ་ཁྲུཾ་བརྡུང༔ གངས་ཆུས་ཡང་ཡང་བཤལ་བྱས་ཏེ༔ ཞིབ་པར་བཏགས་ལ་ཚགས་སུ་བཙག༔ འབྲི་ཡི་འོ་མས་འདམ་བྱས་པར༔ དབང་ལག་པི་ལིང་ཤིང་ཚ་བཅས༔ ཅུང་ཟད་བཏབ་ལ་རིལ་བུར་དྲིལ༔ ཨོཾ་ཐུད་དེ་ཐུད་དེ་མ་ཧཱ་ཐུད་དེ་ཕཊ༔ སྟོང་ཕྲག་བཟླས་པས་རྡོ་དུག་བསལ༔ ཨཱཿཧྲཱིཿཁ་ཊཱྀ་བྷྲཱུྃ༔ མང་དུ་བཟླས་པས་བྱིན་བརླབས་ལ༔ ཐོར་རངས་དང་ནི་སྲོད་ཀྱི་དུས༔ ཆུ་བསྐོལ་ཚ་མོས་ཕུལ་ལ་བཏང༔ རླུང་སྐྱོར་འཕྲུལ་འཁོར་རྒྱུན་མི་གཅད༔ རགས་པའི་ཟས་ཀྱི་ཞེན་པ་བྲལ༔ ཚེ་དང་ལུས་ཀྱི་བཅུད་ལེན་འགྲུབ༔ དེ་ལྟར་ཟས་གོས་གདམས་པ་འདིས༔ འཇིག་རྟེན་ཟས་གོས་ཡེ་མི་དགོས༔ ལོ་དགུར་རི་ཁྲོད་འགྲིམ་གྱུར་ཀྱང༔ ཉམ་ང་བག་ཚ་མི་འཚལ་བས༔ ངོ་སྲུང་མཐུན་འཇུག་སླུ་བྲིད་བྲལ༔ གཏམ་གྱི་ཞེན་པ་གཅོད་པ་ནི༔ གེགས་སེལ་ཀུན་གྱི་རྒྱལ་པོ་སྟེ༔ འཇིག་རྟེན་ཆོས་བརྒྱད་གང་ལ་ཡང༔ བཟློག་བསྒོམ་ཁོ་ནའི་སྦྱོར་བ་ཡིས༔ རོ་སྙོམས་བྱ་ཞིང་ཐོག་བརྫིས་གཏང༔ མི་དང་མི་བསྟུན་རང་ཚུགས་གཟུང༔ ཡུལ་རྐྱེན་སྤང་དཀའ་ཐམས་ཅད་ལ༔ སྒྱུ་མ་ལྟ་བུའི་ངང་ནས་སྤྱད༔ རྣལ་འབྱོར་དབང་ཕྱུག་བླ་ན་མེད༔ གནས་དང་གྲོགས་ཀྱི་ཞེན་སྤོང་ཞིང༔ ཉམས་རྟོགས་བོགས་ཆེན་འབྱིན་པའི་ཕྱིར༔ ཐ་མལ་སྐྱེ་བོས་བགྲོད་དཀའ་བའི༔ གངས་ཁྲོད་རི་རྩེ་དུར་ཁྲོད་སོགས༔ འཇིགས་ཤིང་ཉམ་ངའི་ཕྱོགས་སུ་རྒྱུ༔ ས་གཅིག་མི་སྡོད་ཀུན་ལ་སྤོ༔ སུ་དང་འགྲས་འདྲིས་མེད་པར་བྱ༔ དུས་ཀུན་རིག་པ་རང་ལུགས་བཞག༔ སྐབས་སུ་ཐོགས་བཅས་ཐོགས་མེད་དང༔ དགའ་བྲོད་སྙེམས་བྱེད་བདུད་ལ་གཅོད༔ རྣམ་ཤེས་སྤར་ནས་ཕུང་པོ་ནི༔ ཞེན་མེད་ཚོགས་ཀྱི་མཆོད་པར་གཏང༔ རྣམ་རྟོག་རགས་པ་གང་ཤར་ཡང༔ ཕཊ་ཅེས་བརྗོད་ལ་དབྱིངས་སུ་བསྐྱལ༔ བཟའ་གཏད་མེད་པ་སྨྱོན་པའི་ཚུལ༔ རྟོག་དཔྱོད་མེད་པ་བུ་ཆུང་ཚུལ༔ རྩིས་གདབ་མེད་པ་གར་ཆང་གིས༔ མྱོས་པ་བཞིན་དུ་སྤྱོད་པ་སྤྱད༔ དེ་ལྟར་ཆོས་བརྒྱད་རླུང་བསྐུར་བའི༔ བརྟུལ་ཞུགས་ལམ་དུ་ལོངས་པ་ན༔ ཧེ་རུ་ཀ་ཡི་གདུང་འཛིན་ཕྱིར༔ ལྷ་བུའི་བདུད་ཀྱི་གཡུལ་ལས་རྒྱལ༔ ས་མ་ཡ༔ དེ་ལྟ་བུ་ཡི་རྣལ་འབྱོར་གྱིས༔ ཤིན་ཏུ་འཇིགས་པའི་བདུད་བཞི་ལས༔ རྣམ་པར་རྒྱལ་བའི་རིག་འཛིན་མཆོག༔ གང་གིས་འཇིགས་པར་བྱར་མེད་ཀྱང༔ བདུད་བཞིའི་རྐྱེན་བྱས་དུས་འཁྲུགས་མང༔ དེ་དུས་རྣལ་འབྱོར་འཁོར་སྲུང་ན༔ ཙཀྲ་རྩིབས་བཞིའི་དབུས་སུ་ནི༔ རྡོ་རྗེ་རྩེ་ལྔའི་ལྟེ་བ་རུ༔ མི་གཡོ་མགོན་པོའི་སྐུ་གཟུགས་འབྲི༔ ཐུགས་ཀར་སྙིང་པོའི་ཐ་མ་རུ༔ བསྒྲུབ་བྱའི་མིང་སྤེལ་རཀྵ་སྦྱར༔ རྩིབས་བཞིར་སྙིང་པོའི་ཤམ་བུ་རུ༔ རླུང་ཁམས་མདའ་ཡི་གནོད་པ་ཟློག༔ མཚོན་ཆ་མདའ་ཟློག༔ ས་ཁམས་རྡོ་ཡི་གནོད་པ་ཟློག༔ རྡོ་དབལ་ཟློག༔ ཆུ་ཁམས་གྲི་ཡི་གནོད་པ་ཟློག༔ སྔོན་མོ་གྲི་ཟློག༔ མེ་ཁམས་མདུང་གི་གནོད་པ་ཟློག༔ དམར་མོ་མདུང་ཟློག༔ རྩིབས་མཆན་རྡོ་རྗེ་རིན་པོ་ཆེ༔ པདྨ་རྒྱ་གྲམ་བྷྲཱུྃ་མཚན་བྲི༔ མུ་ཁྱུད་དང་པོར་མགོ་ཕྱིར་བསྟན༔ ཨོཾ་ཨཱཿཧཱུྃ༔ ན་མོ་རཏྣ་ཏྲ་ཡཱ་ཡ༔ ན་མཤྩཎྜ་བཛྲ་པཱ་ཎ་ཡེ༔ མ་ཧཱ་ཡཀྵ་སེ་ན་པ་ཏ་ཡེ༔ ཏདྱ་ཐཱ༔ ཨོཾ་བཛྲ་མ་ཧཱ་ཀྲོ་དྷ་ཨཱརྻ་ཨ་ཙ་ལེ་ཙཎྜ་མ་ཧཱ་རོ་ཥ་ཎ་ཧུ་ལུ་ཧུ་ལུ་ཏིཥྛ་ཏིཥྛ་བྷནྡྷ་བྷནྡྷ་ཧ་ན་ཧ་ན་ཧཱུྃ་ཕཊ༔ འཆང་བ་པོ་ལ་འབྱུང་ལྔ་འདུས་པའི་མཚོན་ཆའི་གནོད་པ་ཐམས་ཅད་ཕྱིར་ཟློག༔ མེ་ལྕགས་སྦྱོར་བ་ངན་པའི་མཚོན་ཆ་གཡས་སུ་བྷྱོ༔ མེ་ལྕགས་སྦྱོར་བ་ངན་པའི་མཚོན་ཆ་གཡོན་དུ་བྷྱོ༔ ཞེས་བྲི་དེ་རྒྱབ་མུ་ཁྱུད་ལ༔ རིམ་བཞིན་དབྱངས་གསལ་རྟེན་སྙིང་དང༔ རྡོར་ར་མེ་རི་མཛེས་པས་བསྐོར༔ སངས་རྒྱས་བྱང་སེམས་མཆོག་གྲུབ་པའི༔ གདུང་དང་བདུད་རྩི་ཨ་མྲྀཏ༔ རྨ་བྱའི་མདོངས་དང་ཡུངས་དཀར་ནག༔ པདྨ་རཀྟ་དང་བཅས་ཏེ༔ རབ་གནས་ལྟེ་བ་མ་ཉམས་བལྟབ༔ ཚོན་སྐུད་སྣ་ལྔས་ལེགས་པར་དཀྲི༔ ལུས་ལ་དྲོད་དང་མ་བྲལ་འཆང༔ དམ་ཚིག་ཁྱི་དང་བུད་མེད་ཀྱིས༔ མི་རེག་མཚོན་རྩེ་གཏོད་པ་སྤང༔ སྲུང་བ་འདི་དང་མ་བྲལ་ན༔ མཚོན་ཆ་སྣ་ཚོགས་ཆར་བབ་ཀྱང༔ རིན་ཆེན་སྲོག་དང་བྲལ་མི་སྲིད༔ ཁྱད་པར་གསང་བའི་དམ་ཚིག་ནི༔ སློབ་དཔོན་ཡོན་གྱིས་མཉེས་པ་དང༔ སྲུང་བར་ཐེ་ཚོམ་སྤང་བ་གཅེས༔ ས་མ་ཡ༔ བདུད་བཞིའི་སྒྱུ་ཐབས་ལ་བརྟེན་ནས༔ དམ་སྲི་འགོང་པོས་རྒྱུད་བསྐུལ་ཏེ༔ སྒྲུབ་མཆོག་རྣམས་ལ་འགབ་འདྲེར་ལྡང༔ དེ་ཕྱིར་དེ་ཉིད་གནོན་པ་ནི༔ དུག་ཤོག་ངོས་ལ་དུག་ཁྲག་གིས༔ རྩིབས་བཞིར་བདུད་བཞི་དབུས་དམ་སྲི༔ རྩིབས་མཆན་བཞི་ལ་སྒབ་འདྲེ་བཞིའི༔ ལིངྒའི་མིང་མཐར་ཏྲི་ཛཿརྦད༔ སཏྭཾ་བྷ་ཡ་ལཾ་ནན་དང༔ ཐ་མར་སརྦ་ཛཿཏྲི་བྲི༔ དེ་མཐར་མཚོན་ཆ་སྣ་ཚོགས་བསྐོར༔ བཀུག་བསྟིམ་བྱས་ཏེ་ཐོད་པར་བཅུག༔ ཨོཾ་ཙཎྜ་མ་ཧཱ་རོ་ཥ་ཎ་བདུད་བཞི་སྒབ་འདྲེ་དམ་སྲི་ཐམས་ཅད་བྷནྡྷ་བྷནྡྷ་ཧཱུྃ་ཕཊ༔ སྟོང་བཟླས་གནམ་ལྕགས་ཁང་སྒྲོམ་ཆེ༔ མཚོན་ཆ་འབྱུང་རིམ་དགུས་གཡོགས་བསམ༔ མཆོད་རྟེན་གཙུག་ལག་སྒྲུབ་ཁང་འོག༔ གཏིང་རིང་དོང་དུ་བཅུག་བྱས་ལ༔ སྐྱེར་པའི་ཕུར་པ་སོར་བཞིའི་མགུལ༔ གོང་གི་སྔགས་བྲིས་དར་ནག་བཏགས༔ ཧཱུྃ༔ བཅོམ་ལྡན་ཁྲོ་རྒྱལ་མི་གཡོ་མགོན༔ མཐིང་ནག་ལྕགས་ཀྱི་རལ་པ་ཅན༔ སྐུ་སྟོད་ཁྲོ་ཆེན་འབར་བའི་གཟུགས༔ རལ་གྲི་དང་ནི་ཞགས་པ་བསྣམས༔ དམ་སྲི་འབྱུང་པོའི་ཚོགས་རྣམས་ཀུན༔ དུམ་བུར་གཅོད་ཅིང་ཐར་མེད་འཆིངས༔ སྐུ་སྨད་གནམ་ལྕགས་ཕུར་པའི་དབལ༔ ཡེ་ཤེས་མེ་ཡི་ཚྭ་ཚྭ་འཕྲོ༔ གང་ལ་གཟིར་ཞིང་བཏབ་པའི་མོད༔ ལྷ་ཡང་རུང་སྟེ་བརླག་པར་བྱེད༔ ཞལ་ནས་སྔགས་ཀྱི་རང་སྒྲ་སྒྲོག༔ གདོན་བགེགས་འབྱུང་པོ་རྡུལ་དུ་རློག༔ ཐུགས་ནི་བདེ་ཆེན་ཡེ་ཤེས་འབར༔ སྒྲུབ་པ་པོ་ལ་དངོས་གྲུབ་སྩོལ༔ བདེ་གཤེགས་སྐུ་གསུང་ཐུགས་ཀྱི་དངོས༔ ཁྲོ་བོའི་རྒྱལ་པོ་ཧཱུྃ་ཀཱ་ར༔ དཔལ་ཆེན་ཨཱརྻ་ཨ་ཙ་ལ༔ གང་གིས་བསྐྱོད་པར་མི་ནུས་པའི༔ ཐུགས་རྗེ་ཐུགས་དམ་དེང་བསྐུལ་ན༔ བདུད་བཞི་དམ་སྲི་སྒབ་འདྲེའི་ཚོགས༔ ཐམས་ཅད་འདུལ་བའི་དུས་ལ་བབ༔ དྲག་ཤུལ་ཁྲོས་པའི་ཤུགས་སྐྱེད་ལ༔ ཀཱི་ལ་ཡ་ཡི་ཕྲིན་ལས་མཛོད༔ དམིགས་པའི་བདུད་དང་དམ་སྲིའི་ཚོགས༔ ནམ་ཡང་སྟེང་དུ་མ་གཏང་ཞིག༔ ཅེས་བརྗོད་བསམ་ཞིང་ཕུར་པས་བཏབ༔ དེ་སྟེང་རྡོ་རྗེ་རྒྱ་གྲམ་མནན༔ ས་ཆུ་མེ་ཡིས་ཁ་བཅད་ལ༔ ཕྱོགས་མཚམས་བསྐོར་ནས་རྟ་བྲོ་བརྡུང༔ གལ་ཆེན་དེ་སྟེང་མཆོད་རྟེན་བཞེངས༔ སྒབ་འདྲེ་དམ་སྲི་མནན་པའི་ཐབས༔ ཀུན་གྱི་ནང་ནས་ཡང་ཟབ་བོ༔ ས་མ་ཡ༔ བདུད་བཞི་སྙིང་ལ་ཞུགས་པ་ལས༔ རྒྱལ་བློན་ལ་སོགས་དབང་པོ་ཆེས༔ དམ་ཆོས་སྒྲུབ་ལ་བར་གཅོད་པའི༔ ཚིག་གི་མཚོན་ཆ་གཅོག་པ་ལ༔ དམིགས་བྱ་དེ་ཡི་ལིངྒ་ནི༔ རི་རུད་དང་ནི་ཕུང་ཤུལ་ས༔ ཆུ་མིག་ལྐུགས་པའི་ཆུས་སྦྲུས་ཏེ༔ སོར་བརྒྱད་སྐྱེ་མཆེད་དོད་པའི་ཁོང༔ དུག་ཤོག་ཆུང་ངུར་དུག་ཁྲག་གིས༔ ནྲྀ་ཡིག་ཐ་མར་སྔགས་བཞིས་བསྐོར༔ ཨོཾ་ཙཎྜ་མ་ཧཱ་རོ་ཥ་ཎ་དམ་ཆོས་སྒྲུབ་པ་ལ་བར་དུ་གཅོད་པའི་སྨྲ་བ་ངན་པ་ཐམས་ཅད་ཧཱུྃ་ཕཊ༔ སརྦ་ཤ་ཏྲཱུན་ཝཱ་ཀ་བྷིནྡྷ་བྷིནྡྷ་ཙྪིནྡྷ་ཙྪིནྡྷ་ཧ་ན་ཧ་ན་ཧཱུྃ༔ ཙིཏྟ་མོ་ཧ་ཡ་བཾ༔ ཧ་ཧ་ཧེ་ཧེ་ཧོ་ཧོ་ཧཾ་ཧཾ་ཕཊ་ཕཊ་སྭཱ་ཧཱ༔ ཞེས་བྲིས་གཞུག་ཅིང་དགུག་གཞུག་བྱ༔ སྐྱེར་པའི་ཕུར་པ་སོར་བརྒྱད་པ༔ མི་གཡོ་ཕུར་པའི་དབལ་ཅན་བསྐྱེད༔ ཨོཾ་ཙཎྜ་མ་ཧཱ་རོ་ཥ་ཎ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཅེས་དང་ལས་སྔགས་སྟོང་གིས་གདབ༔ ལིངྒའི་ཡས་མས་མཆུ་ལ་བཙུག༔ བར་ཆད་གྲོལ་བའི་གནས་སྐབས་སུ༔ ཕུར་པ་བླངས་ནས་འོ་མ་ལ༔ སྔགས་མཐར་ཤཱནྟིཾ་གདགས་པས་བཀྲུ༔ ཅིས་ཀྱང་གལ་ཆེན་གནད་ཐུག་ན༔ མཆོད་རྟེན་ནག་པོའི་འོག་ཏུ་མནན༔ ཚངས་པ་ལྟ་བུའི་བཙན་ཚིག་ཀྱང༔ བྲག་ཅ་བཞིན་དུ་རང་ཡལ་འགྱུར༔ ས་མ་ཡ༔ བདུད་བཞི་འཇོམས་མཛད་གཏུམ་པོ་ཆེའི༔ རྡོ་རྗེའི་གཏོར་བླུག་ཆོ་ག་ནི༔ སྒྲུབ་པའི་དཀྱིལ་འཁོར་དབང་རྫས་བཤམ༔ བསྙེན་སྒྲུབ་བདག་ཉིད་ནུས་ལྡན་བྱ༔ དམ་ཚིག་ངེས་པར་བསྲུང་ནུས་པའི༔ སློབ་མ་ཁྲུས་བྱས་བགེགས་ཕྲལ་ལ༔ སྲུང་འཁོར་གསལ་བཏབ་མཎྜལ་ཕུལ༔ མེ་ཏོག་དང་བཅས་གསོལ་འདེབས་གཞུག༔ རྒྱུད་སྦྱང་བུམ་པའི་ཆུ་ཡིས་བཀྲུ༔ ཧཱུྃ༔ དབྱིངས་ཀྱི་བུམ་པར་རིག་པའི་ལྷ༔ གཏུམ་པོ་ཁྲོ་ཆེན་ཞུ་བའི་ཆུ༔ རྒྱལ་བས་བཟུང་ནས་དབང་བསྐུར་བས༔ བདུད་བཞིའི་དཔུང་ལས་རྣམ་རྒྱལ་ཤོག༔ རྩ་སྔགས་མཐར༔ ཛ་ཡ་ཛ་ཡ་སུ་ཛ་ཡ་མཱ་ར་སེ་ན་པྲ་མརྡྷ་ན་སྭཱ་ཧཱ༔ ཞེས་པས་མི་མཐུན་བདུད་བཞི་ལས༔ རྣམ་རྒྱལ་བདུད་རྩིས་ལུས་གང་བས༔ ཁྲོ་བོའི་རྒྱལ་པོར་ལམ་གྱིས་གྱུར༔ དེ་ལ་མཐུན་རྐྱེན་སྐུ་གསུང་ཐུགས༔ ཡོངས་སུ་རྫོགས་པའི་དབང་བསྐུར་སྦྱིན༔ ཨོཾ༔ སངས་རྒྱས་ཀུན་གྱི་སྐུ་འཆང་བ༔ རྡོ་རྗེ་མི་ཕྱེད་སྐུ་དང་ལྡན༔ རྡོ་རྗེའི་སྐུ་ཡི་དབང་བསྐུར་བས༔ སངས་རྒྱས་ཀུན་གྱི་སྐུ་འགྲུབ་ཤོག༔ རྩ་སྔགས་དང་ཀཱ་ཡ་ཨ་བྷི་ཥིཉྩ་ཨོཾ༔ བཟླས་པའི་ལུང་ནི་ལན་གསུམ་བྱ༔ ཨཱ༔ སངས་རྒྱས་ཀུན་གྱི་གསུང་འཆང་བ༔ རྡོ་རྗེ་མི་ཕྱེད་གསུང་དང་ལྡན༔ རྡོ་རྗེའི་གསུང་གི་དབང་བསྐུར་བས༔ སངས་རྒྱས་ཀུན་གྱི་གསུང་འགྲུབ་ཤོག༔ རྩ་སྔགས་དང་ཝཱ་ཀ་ཨ་བྷི་ཥིཉྩ་ཨཱ༔ ཧཱུྃ༔ ཕྱག་མཚན་རལ་གྲི་སྙིང་གར་བཞག།་་་སངས་རྒྱས་ཀུན་གྱི་ཐུགས་འཆང་བ༔ རྡོ་རྗེ་མི་ཕྱེད་ཐུགས་དང་ལྡན༔ རྡོ་རྗེའི་ཐུགས་ཀྱི་དབང་བསྐུར་བས༔ སངས་རྒྱས་ཀུན་གྱི་ཐུགས་འགྲུབ་ཤོག༔ རྩ་སྔགས་དང་ཙིཏྟ་ཨ་བྷི་ཥིཉྩ་ཧཱུྃ༔ ཧཱུྃ་ཧཱུྃ༔ གཏོར་མ་སྤྱི་བོར་བཞག།་་་སངས་རྒྱས་ཀུན་གྱི་སྐུ་གསུང་ཐུགས༔ རྡོ་རྗེ་མི་ཕྱེད་གསུམ་དང་ལྡན༔ མི་གཡོ་མགོན་པོའི་དབང་བསྐུར་བས༔ རྡོ་རྗེའི་ཡེ་ཤེས་མངོན་གྱུར་ཤོག༔ རྩ་སྔགས་དང་སརྦ་ཨ་བྷི་ཥིཉྩ་ཨ་ཨཱ༔ གཏོར་མའི་ལྷ་བསྟིམ་ཤིས་པ་བརྗོད༔ རྗེས་ཀྱི་བྱ་བ་སྤྱི་ལྟར་སྤྱད༔ ས་མ་ཡ༔ འདི་ཡི་སྲུང་མ་ཁྱད་པར་ཅན༔ མགོན་པོ་དཀར་པོ་མཆོད་པ་ནི༔ གཏོར་མ་རྒྱན་ལྡན་མཛེས་པ་ལ༔ གཙང་མའི་ཟས་སྣ་ཕུད་ཀྱིས་བྲན༔ ཐུགས་ཀའི་འོད་ཀྱིས་དུར་ཁྲོད་བདག༔ ཡབ་ཡུམ་འཁོར་བཅས་སྤྱན་དྲངས་ཏེ༔ གཏོར་མ་བྱིན་བརླབས་སྔགས་འདིས་ཕུལ༔ ཨོཾ་ཀུ་མ་ཀུ་མ་ཁུས་ཐིས་སྭཱ་ཧཱ༔ མ་ཧཱ་ཤྨ་ཤཱ་ན་ཨ་དྷི་པ་ཏི་ཨི་དཾ་བ་ལིཾ་བྷཱུཉྫ་ཁ་ཁ་ཁཱ་ཧི་ཁཱ་ཧི༔ སརྦ་ཀརྨ་ཀུ་རུ་ཀུ་རུ་ཧོ༔ མཆོད་ཅིང་རྔ་བརྡུང་དབྱངས་སྙན་པོས༔ ཧཱུྃ༔ ཧ་ཧར་དགོད་པའི་དུར་ཁྲོད་ནས༔ དཔལ་ཆེན་སྤྲུལ་པ་ཀིངྐ་ར༔ དངོས་གྲུབ་རྣམ་གཉིས་གཏེར་གྱི་བདག༔ ཟླ་བའི་མདོག་ཅན་ཀེང་རུས་གཟུགས༔ རིན་ཆེན་ཐོད་པའི་རྒྱན་ཆ་ཅན༔ གཡས་པས་རྡོ་རྗེའི་དབྱུག་པ་འཕྱར༔ གཡོན་པས་བྷནྡྷ་ཁྲག་བཀང་བསྣམས༔ དར་གྱི་སྟོད་གཡོགས་སྟགས་ཤམ་ཅན༔ རོ་ཡི་སྟེང་ན་གར་བྱེད་པ༔ ཤིན་ཏུ་བརྗིད་ཅིང་འཇིགས་པའི་ཚུལ༔ སྤྲུལ་པས་ས་གཞི་བར་སྣང་གང༔ མེ་ཕུང་འབར་ཞིང་རླུང་ནག་འཚུབས༔ གསོལ་བ་བཏབ་ན་དངོས་གྲུབ་སྩོལ༔ ཕྲིན་ལས་བཅོལ་ན་ཡིད་བཞིན་སྒྲུབ༔ རྦད་ན་དགྲ་དང་ཆོམ་རྐུན་བརླག༔ རྣལ་འབྱོར་བདག་གིས་རྩེ་གཅིག་ཏུ༔ མཆོད་ཅིང་བསྟོད་དོ་ལས་ལ་བཞེངས༔ རི་ལྟར་སྤུངས་པའི་དམར་གཏོར་དང༔ སྤྲིན་ལྟར་གཏིབས་པའི་འདོད་ཡོན་ཚོགས༔ མཚོ་ལྟར་འཁྱིལ་པའི་རཀྟར་བཅས༔ ཧེ་རུ་ཀ་དཔལ་དམ་ཚིག་འདི༔ དུར་ཁྲོད་བདག་པོས་དགྱེས་པར་བཞེས༔ དཀོར་ཆ་སྲུངས་ལ་ཇག་རྐུན་སྒྲོལ༔ ཚེ་སྲིངས་དཔལ་སྐྱེད་འབྱོར་པ་སྤེལ༔ བསམ་པ་སྒྲུབས་ལ་རེ་བ་སྐོངས༔ བཅོལ་པའི་ཕྲིན་ལས་འགྲུབ་པར་མཛོད༔ དེ་ཡི་ཡུམ་མཆོག་མ་མོ་ནི༔ ཀེང་རུས་ལུས་ལ་ཁྲག་གི་མིག༔ རིན་ཆེན་ཐོད་པའི་རྒྱན་གྱིས་བརྒྱན༔ གཡས་པས་རྡོ་རྗེའི་དབྱུག་པ་འཕྱར༔ གཡོན་པས་ཁྲག་སྐྱོགས་ཡབ་ལ་སྟོབས༔ དར་གྱི་སྟོད་གཡོགས་གཟིག་ཤམ་ཅན༔ རོ་ཡི་སྟེང་ན་གར་བྱེད་ཅིང༔ སྤྲུལ་པས་ས་གཞི་སོགས༔ ཡབ་ཡུམ་ཐུགས་ཀར་ཀྵིཾ་ཡིག་བསྒོམ༔ བདག་གི་ཐུགས་ནས་འབར་བའི་འོད༔ འཕྲོས་ཏེ་སྲོག་གི་སྙིང་པོར་རེག༔ ཇི་ལྟར་བཀའ་བསྒོས་བསྒྲུབ་པར་བསམ༔ ཀྵཱིཾ་ཞེས་དྲག་ཏུ་བཟླས་ལ་བསྙེན༔ སྒྲུབ་པའི་སྙིང་པོ་འདི་ཡང་བཟླ༔ ཨོཾ་ཀུ་མ་ཀུ་མ་ཁུས་ཐིས་སྭཱ་ཧཱ༔ ཨོཾ་མ་མ་ར་ལི་པྲ་མ་ཡེ་ཛ་ཛ༔ ལས་སྦྱོར་ཇག་རྐུན་འཆིང་འདོད་ན༔ སརྦ་ཤཱ་ཏྲཱུན་ཙཽ་ར་ཙཀྵུཿམུ་ཁཾ་བྷནྡྷ་བྷནྡྷ་ཕཊ༔ ནོར་དང་ལོངས་སྤྱོད་འཕེལ་འདོད་ན༔ སརྦ་བཱ་སུ་སིདྡྷི་སྡུས་སྡུས་པུཥྚིཾ་ཀུ་རུ་ཧོ༔ དྲག་ཏུ་བསྐུལ་ན་དམིགས་བྱ་ནི༔ ལིངྒར་དགུག་གཞུག་བསྒྲལ་ཅིང་བསྔོ༔ ཐུན་གཏོར་འཕང་ལ་བསྟོད་བསྐུལ་མཐར༔ བྷྱོ༔ དྲག་ཏུ་བསྐུལ་ཚེ་ཀེང་རུས་ལུས༔ ནམ་མཁའ་ཁྱབ་པར་གར་བྱེད་ཅིང༔ ཁྲོ་གཏུམ་འབར་འཁྲུགས་གསོད་ལ་དགའ༔ ནད་རིགས་བཞི་བརྒྱ་རྩ་བཞི་འགྱེད༔ དོ་ནུབ་དགྲ་བོའི་སྟེང་དུ་ཆོས༔ དགྲ་དཔུང་ཁ་ཕུང་རྗེས་མེད་ཐོངས༔ བགེགས་དཔུང་རྡུལ་ཕྲན་བཞིན་དུ་རློགས༔ དུས་ལ་བབ་པོ་ས་མ་ཡ༔ སྔགས་མཐར༔ ཨེ་ཧུར་ཐུམས་བྲེང་ཤག་བྲེང་ཤག་རྒྱུག་རྒྱུག་ཡཱ་ཡཱ༔ ཅེས་བསྐུལ་མེ་ཐུན་དང་བཅས་འཕང༔ དགྲ་ཇག་རྐུན་གསུམ་འཆིང་བྱེད་ཀྱི༔ རིག་པ་ཆུང་ངུའི་ཙཀྲ་ནི༔ འཁོར་ལོ་རྩིབས་བཞིའི་ལྟེ་བར་མིང༔ རྩིབས་ལ་ཀྵཱིཾ་བཞི་མུ་ཁྱུད་ལ༔ སྔགས་མཐར་སྤེལ་ཚིག་དེ་ཡི་ཕྱིར༔ མདའ་གཞུ་བྲི་ཞིང་རཀྟས་བྱུགས༔ རི་བོང་གསོན་པོའི་སྙིང་སྤུ་བཅས༔ དུར་ཁྲོད་བདག་པོར་བསྐྱེད་བསྟིམ་བྱ༔ དར་རམ་རས་ནག་ཁུད་དུ་དྲིལ༔ དྲོད་དང་མ་བྲལ་བཏགས་པ་ཡིས༔ དགྲ་ཇག་རྐུན་གསུམ་རིང་དུ་འཆིང༔ དེ་ལྟར་བསྙེན་སྒྲུབ་ལས་ཀྱི་ཚེ༔ མི་འབྲལ་འགྲོགས་པའི་བླ་རྡོ་ནི༔ དུང་དང་འགྲོན་བུར་ཀྵཱིཾ་ཡིག་ཁོང༔ ཧཱུྃ་དང་ཨ་བྲི་ཞིང་ལྤགས་དྲིལ༔ ཟངས་ཀྱི་སྒྲོམ་བུ་ཟླ་གམ་ནང༔ ནོར་སྣའི་ཕུད་དང་བཅས་ཏེ་བཅུག༔ མགོན་པོ་ཡབ་ཡུམ་དངོས་སུ་གསལ༔ དར་དམར་གྱིས་དྲིལ་ལུས་ལ་བཅང༔ མ་སྒྲུབ་པར་ཡང་ངང་གིས་འཁོར༔ སྲོག་གཏད་བྱ་ན་གཏོར་མ་ནི༔ ལྷར་གསལ་སློབ་མའི་ལག་ཏུ་གཏད༔ བསྟོད་བསྐུལ་ཐ་མར་ཚིག་འདི་གསོལ༔ ཁྱད་པར་རྡོ་རྗེའི་སློབ་མ་འདིའི༔ ལུས་དང་གྲིབ་མ་བཞིན་དུ་འགྲོགས༔ རིག་འཛིན་བརྒྱུད་པས་བཀའ་བསྒོས་ལྟར༔ ཅི་བཅོལ་ལས་ཀུན་མྱུར་དུ་སྒྲུབས༔ ས་མ་ཡ་སྨ་ར་རཀྵནྟུ༔ སྔགས་ཀྱི་ལུང་སྦྱིན་གཉིས་མེད་བསྟིམ༔ ཤིས་པ་བརྗོད་ཅིང་མེ་ཏོག་འཐོར༔ དེས་ནི་བཀྲ་ཤིས་སྙིང་ཉེ་ཞིང༔ དངོས་གྲུབ་ཕྲིན་ལས་ཡིད་བཞིན་འགྲུབ༔ ས་མ་ཡ༔ དེ་ལྟར་མི་གཡོ་མགོན་པོ་ཡི༔ སྒྲུབ་པའི་ཐབས་དང་ཕྲིན་ལས་བཅས༔ སྔོན་ཆད་ས་སྟེང་མ་གྲགས་པ༔ བདུད་བཞིའི་དཔུང་ཚོགས་ཟིལ་གནོན་འདི༔ རང་བྱུང་པདྨའི་ཐུགས་ལས་ཤར༔ མངའ་བདག་རྗེ་འབངས་འཁོར་བཅས་ཀྱི༔ མི་མཐུན་འགལ་རྐྱེན་ཞི་བ་དང༔ མ་འོངས་ཆོས་བདག་སྐྱེས་བུ་ཡི༔ རྣམ་གཡེང་བདུད་ཚོགས་འདུལ་བ་དང༔ ལས་ཅན་རྗེས་འཇུག་ཐམས་ཅད་ཀྱི༔ དངོས་གྲུབ་རྣམ་གཉིས་མཐར་ཕྱིན་ཕྱིར༔ གསང་བ་ཆེན་པོའི་ཚིག་ཏུ་བསྟན༔ མི་བརྗེད་གཟུངས་ཐོབ་དྷཱ་ཀི་ནཱིས༔ ངོ་མཚར་མཁའ་འགྲོའི་ཡི་གེར་ཐོབས༔ རིན་ཆེན་ས་ཡི་གཏེར་དུ་སྦོས༔ གཞན་དོན་ཕྲིན་ལས་ཀུན་ཁྱབ་འགྱུར༔ ས་མ་ཡ༔ རྒྱ་རྒྱ་རྒྱ༔ ྈྈྈ ཁ་ཐཾ༔ མནྟྲ་གུ་ཧྱ༔ སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་མདོ་ཁམས་ཤར་ཕྱོགས་ཀྱི་སྦས་གནས་རི་བོ་དབང་ཞུའི་བྲག་ནས་སྤྱན་དྲངས་པའི་ཤོག་སེར་གྱི་བུ་དཔེ་ཕྱག་བྲིས་དངོས་ལས་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཞལ་བཤུས་པ་ཛ་ཡནྟུ།། །།


Footnotes

Other Information

Disclaimer: This text comes from the Shechen Edition of the Rinchen Terdzö. Thanks go to Phil Battos for automation of uploading all the unicode Tibetan texts. The text was converted from TibetDoc and may have some small mistakes introduced as a result. If you notice any mistakes or inconsistencies in the text or anywhere on this website, please don't hesitate to contact the Tsadra Research Department (research at tsadra).