Terdzo-AA-079
སྡེ་གསུམ་སྤྱི་སྐོར་རབ་གནས་ཆོ་ག་
by འཇམ་དབྱངས་མཁྱེན་བརྩེའི་དབང་པོ་ (Jamyang Khyentse Wangpo)
revealed by མཆོག་གྱུར་གླིང་པ་ (Chogyur Lingpa)
in cycle དམ་ཆོས་རྫོགས་པ་ཆེན་པོ་སྡེ་གསུམ་ (Dam chos rdzogs pa chen po sde gsum)
Volume 62 (ཨཱཿ) / Pages 447-448 / Folios 1a1 to 1b2
སྡེ་གསུམ་སྤྱི་སྐོར་རབ་གནས་ཆོ་ག་བཞུགས། །དབྱིངས་དང་རིག་པ་དབྱེར་མེད་པའི༔ ཡེ་ཤེས་སྤྱན་དབྱེའི་ཆོ་ག་ནི༔ ཚད་དང་མཚན་ཉིད་རྫོགས་པ་ཡི༔ སྐུ་གཟུགས་ལ་སོགས་མདུན་བདར་ཏེ༔ མཆོད་པའི་ཡོ་བྱད་རྒྱས་པར་བཤམས༔ བདག་མདུན་སྒྲུབ་ཅིང་མཆོད་པ་དང༔ བུམ་པར་བདུད་རྩི་འཁྱིལ་པ་བསྐྱེད༔ རྡོ་རྗེའི་སྔགས་ཀྱིས་ནུས་ལྡན་བྱ༔ དེ་ནས་བགེགས་ཚོགས་གཏོར་མས་སྦྱངས༔ རང་གཞན་སྡིག་པ་ཏིལ་ལ་བསྟིམ༔ ཡེ་ཤེས་མེས་བསྲེག་ཆུ་བོར་དོར༔ ཨཱོྃ་བཛྲ་སཏྭ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ༔ ལས་ཀྱི་བུམ་པས་ཉེས་སྐྱོན་བཀྲུ༔ ཨ༔ རང་བཞིན་དབྱིངས་ཀྱི་བུམ་པ་རུ༔ ཡེ་ཤེས་རིག་པའི་བདུད་རྩིས་བལྟམས༔ རྟེན་མཆོག་རྣམས་ལ་ཁྲུས་གསོལ་བས༔ གློ་བུར་དྲི་མ་དག་གྱུར་ཅིག༔ ཨཱོྃ་ཨཱཿཧཱུྃ་ཛྙཱ་ན་ཨ་མྲྀཏ་སརྦ་ཤུདྡྷེ་སྭཱ་ཧཱ༔ ཁྲུས་རས་གཙང་མས་སྐུ་ཕྱི་ཞིང༔ དྲི་ཡིས་བྱུགས་ཏེ་ཤིས་པ་བརྗོད༔ ཨ༔ ཆོས་ཀུན་གདོད་ནས་སྐྱེ་མེད་ལས༔ སྐྱེ་བའི་རྣམ་འཕྲུལ་ཅིར་ཡང་སྣང༔ གང་འདུལ་འགྲོ་བ་སྒྲོལ་བའི་ཕྱིར༔ རྡོ་རྗེའི་སྐུ་གསུང་ཐུགས་སུ་ཤར༔ ལྷ་སྐུ་ཕྱག་རྒྱའི་གཟུགས་བརྙན་ཀུན༔ ཆོས་དབྱིངས་ཡེ་ཤེས་རྣམ་སྣང་མཛད༔ དཀར་གསལ་འཁོར་ལོ་དྲིལ་བུ་འཛིན༔ སངས་རྒྱས་སྤྱན་དང་མཉམ་པར་སྦྱོར༔ གསུང་རྟེན་རིག་པ་གླེགས་བམ་ཀུན༔ སོར་རྟོག་ཡེ་ཤེས་སྣང་མཐའ་ཡས༔ དམར་གསལ་པདྨ་དྲིལ་བུ་འཛིན༔ གོས་དཀར་མོ་དང་མཉམ་པར་སྦྱོར༔ ཐུགས་རྟེན་ཕྱག་མཚན་མཆོད་རྟེན་ཀུན༔ མེ་ལོང་ཡེ་ཤེས་མི་བསྐྱོད་རྒྱལ༔ མཐིང་གསལ་རྡོ་རྗེ་དྲིལ་བུ་འཛིན༔ དབྱིངས་ཕྱུག་མ་དང་མཉམ་པར་སྦྱོར༔ མཁྱེན་བརྩེའི་ཕྱག་བྲིས་ལས་ཞལ་བཤུས་པའོ།། །།